19/2 Мученика Варлаама (ок. 304). Преподобных Варлаама и Иоасафа, царевича Индийского, и отца его Авенира царя (IV). Святителя Филарета, митрополита Московского и Коломенского (1867). Преподобного Варлаама, игумена Печерского, в Ближних пещерах почивающего (1065). Обретение мощей преподобномученика Адриана Пошехонского, Ярославского (1625). Иконы Божией Матери, именуемой «В скорбех и печалех Утешение» (1863).

Тропарь мученику Варлааму, глас 4

Му́ченик Твой, Го́споди... (общий мученику).

Кондак, глас тойже

Яви́лся еси́ преудивле́н кре́постию, всесожже́ния/ Лива́н благово́нен себе́ прине́сл еси́, же́ртву Христу́,/ и вене́ц по́чести прии́м, Варлаа́ме,/ при́сно моли́ за ны, страда́льче.

Величание

Велича́ем тя,/ страстоте́рпче святы́й Варлаа́ме,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Варлааму Индийскому, глас 8

Слез твои́х исто́чники пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоно́сил еси́,/ и был еси́ свети́льник вселе́нныя, сия́я чудесы́, Варлаа́ме о́тче наш,/ моли́ Христа́ Бо́га спасти́ся душа́м на́шим.

Тропарь преподобному Иоасафу, царевичу Индийскому, глас 4

От духо́внаго наста́вника научи́вся,/ царю́ Иоаса́фе, Бо́га позна́ти,/ Креще́нием же просвети́вся,/ лю́ди к ве́ре обрати́л еси́,/ и отцу́ твоему́ от купе́ли прие́мник быв,/ ца́рство оста́вив, пусты́ню дости́гл еси́,/ и в ней трудолю́бие подвиза́лся еси́./ Моли́ Христа́ Бо́га со учи́телем твои́м Варлаа́мом/ спасти́ся душа́м на́шим.

Ин тропарь, глас тойже

Из чре́ва ма́терия/ прекра́сное вселе́ние бысть Свята́го Ду́ха,/ пресла́вне Иоаса́фе,/ и от блаже́ннаго Варлаа́ма безце́нный би́сер, Христа́,/ в се́рдце свое́м прия́л еси́,/ и Боже́ственным Креще́нием И́ндию просвети́л еси́,/ оте́ческое же нече́стие испра́вль,/ приведе́ его́ от тьмы ко све́ту Богоразу́мия/ и, оста́вив тле́нное на земли́ ца́рство,/ пусты́ню дости́г и своего́ учи́теля,/ те́мже на Небесе́х от Живонача́льныя Тро́ицы венце́м ца́рским венча́ся,/ моли́ о нас, чту́щих честну́ю твою́ па́мять.

Кондак, глас 8

Ве́дый твое́ из младе́нства благо́е изволе́ние, Иоаса́фе, Еди́н Сердцеве́дец Бог,/ и от ца́рствия земна́го в мона́шеское пребыва́ние приведы́й тя,/ вели́кому Варлаа́му после́довати сподо́би,/ с ни́мже и ны́не, го́рний Иерусали́м всесве́тлый Оте́чество име́я,/ жела́емыя добро́ты кра́сно наслажда́яся Святы́я Тро́ицы./ Мо́лим тя, ца́рская красото́,/ помина́й нас, ве́рою чту́щих тя.

Ин кондак, глас тойже

Ве́дый твое́ от младе́нства Благо́е изволе́ние, Иоаса́фе,/ Един Сердцеве́дец Бог,/ и́бо от ца́рствия земна́го во и́ноческое пребыва́ние приве́дый тя,/ и вели́кому Варлаа́му восле́довати сподо́би тя,/ и со а́нгелы с ним в Неизрече́нном Све́те водвори́ся;/ с ни́миже Святе́й Тро́ице предстоя́,/ мо́лим тя, ца́рское красото́,/ помина́й нас, ве́рою пра́зднующих па́мять твою́!

Величание

Ублажа́ем тя,/ преподо́бне о́тче Иоаса́фе,/ и чтим боле́зни и труды́ твоя́,/ и́миже труди́лся еси́/ во испове́дании Христо́ве.

Тропарь святителю Филарету, митрополиту Московскому и Коломенскому, глас 4

Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным/ лю́дем пропове́дал еси́,/ мир и ми́лость се́рдцем умиле́нным/ стра́ждущим яви́л еси́,/ я́ко учи́тель ве́ры и страж неусы́пный,/ па́ству Росси́йскую жезло́м пра́вости сохрани́л еси́./ Сего́ ра́ди ко Христу́ Бо́гу дерзнове́ние име́я,/ моли́ дарова́ти Це́ркве утвержде́ние,/ лю́дем и душа́м на́шим спасе́ние.

Кондак, глас 2

Я́ко и́стинный подража́тель преподо́бнаго Се́ргия,/ доброде́тель измла́да возлюби́л еси́,/ богоблаже́нне Филаре́те./ я́ко па́стырь пра́ведный и испове́дник непоро́чный,/ по святе́м преставле́нии от безбо́жных поруга́ние и поноше́ние прия́л еси́,/ Бог же зна́меньми и чудесы́ тя просла́ви/ и засту́пника Це́ркве на́шея яви́.

Величание

Велича́ем тя,/ святи́телю о́тче Филаре́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Варлааму, игумену Печерскому, в Ближних пещерах почивающему, глас 1

Ми́ра кра́сная и сла́ву его́ оста́вль,/ прите́кл еси́ в пеще́ру,/ иде́же от си́лы преуспева́я в си́лу,/ был еси́ вождь Христо́ва ста́да, всесла́вне Варлаа́ме,/ е́же я́ко упа́с до́бре, упаси́ и нас, мо́лим тя,/ сохраня́я от всех зол, да тя ублажа́ем.

Кондак, глас 2

Оте́ческаго преще́ния не устраши́лся еси́,/ ласка́ниям того́ не повину́лся еси́,/ ниже́ ле́стию низложи́лся еси́ же́нскою, всече́стне Варлаа́ме,/ но непобеди́м от тех пребы́л еси́,/ наде́яся на Го́спода своего́, Ему́же моли́ся о душа́х на́ших.

Величание

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномученику Адриану Пошехонскому, Ярославскому, глас 4

Христо́ву му́ченику тезоимени́т был еси́, преподо́бне ,/ мно́ги труды́ подъя́л еси́ терпе́нием свои́м,/ и убие́ние от окре́стных и ну́ждную* сме́рть претерпе́л еси́,/ и ны́не, о преподобному́чениче о́тче Адриа́не,/ моли́ душе́вныя и теле́сныя на́ша стра́сти уврачева́ти,/ и́же ве́рою и любо́вию обре́тение честны́х моще́й твои́х почита́ющих/ и всечестну́ю па́мять твою́ пра́зднующих.

Кондак, глас 4

Христа́ ра́ди до́блественне претерпе́л еси́/ и вене́ц нетле́ния от Него́ восприя́л еси́ страда́ния своего́,/ приходя́щим же с ве́рою к тебе́ подае́ши цельбы́,/ о преподобному́чениче Адриа́не, приснопа́мятне,/ моли́твенниче о душа́х на́ших.

Величание

Ублажа́ем тя,/ преподобному́чениче Адриа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.