9/22 Мучеников Онисифора и Порфирия (ок. 284–305). Преподобной Матроны (ок. 492). Святителя Нектария, митрополита Пентапольского (1920). Иконы Божией Матери, именуемой «Скоропослушница» (X).

Тропарь мученикам Онисифору и Порфирию, глас 4

Му́ченицы Твои́, Го́споди... (общий мученикам).

Кондак, глас 2

Му́ченик дво́ица, пострада́вше кре́пко,/ вра́жию горды́ню на зе́млю низложи́сте,/ озари́вшеся благода́тию Несозда́нныя Тро́ицы,/ сла́внии Ониси́форе и Порфи́рие,/ моли́теся непреста́нно о всех нас.

Величание

Велича́ем вас,/ страстоте́рпцы святи́и Ониси́форе и Порфи́рие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобной Матроне, глас 8

Мужескому́дренно утаи́вшися вра́жиих лука́вых путе́й, Матро́но,/ к жи́зни вои́стину ше́ствовавши несумне́нною во́лею/ и неукло́нное тече́ние Богому́дро сконча́вши,/ от Христа́ прия́ла еси́ благода́ть духо́вную,/ тем и во́ду цельба́м источа́еши/ любо́вию притека́ющим в па́мять твою́ сла́вную,/ мни́хом* похвала́,/ моли́ Христа́ Бо́га спасти́ся душа́м на́шим.

Кондак, глас 2

За любо́вь Госпо́дню, преподо́бная Матро́но,/ поко́я жела́ние возненави́дела еси́,/ поще́нием дух твой просвети́вши,/ но твои́ми моли́твами и проти́вных шата́ния разори́,/ кре́пко бо зве́ри побе́дила еси́.

Величание

Ублажа́ем тя,/ преподо́бная ма́ти Матро́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Некта́рию, митрополиту Пентапо́льскому, глас 4

Преподо́бнически пожи́л еси́, я́ко му́дрый иера́рх,/ Некта́рие преподо́бне,/ те́мже Уте́шителя просла́влен си́лою,/ де́моны отго́ниши и боля́щия исцеля́еши,/ ве́рою приходя́щия к Боже́ственным моще́м твои́м.

Кондак, глас 2

Боже́ственный Гром, труба́ духо́вная... (общий святителю).

Величание

Велича́ем тя,/ святи́телю о́тче Некта́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Скоропослушница», глас 4

К Богоро́дице притеце́м су́щии в беда́х,/ и ко святе́й ико́не Ея́ ны́не припаде́м,/ с ве́рою зову́ще из глубины́ души́:/ ско́ро на́ше услы́ши моле́ние, Де́во,/ я́ко Скоропослу́шница наре́кшаяся,/ Тебе́ бо ра́ди раби́ Твои́ в ну́ждах/ гото́вую Помо́щницу и́мамы.

Кондак, глас 8

В мо́ри жите́йстем обурева́емии,/ треволне́нию подпа́даем страсте́й и искуше́ний./ Пода́ждь у́бо нам, Госпоже́, ру́ку по́мощи, я́коже Петро́ви Сын Твой,/ и ускори́ от бед изба́вити ны, да зове́м Ти:/ ра́дуйся, Всеблага́я Скоропослу́шнице.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.