Понедельник

Последование утрени

Пре́жде нача́ла, вжига́ет канди́ла и свещы́ параекклисиа́рх. Та́же кле́плет в вели́кий кампа́н, и в про́чыя. И собра́вшымся на́м во хра́м, иере́й полага́ет обы́чный покло́н настоя́телю, и отхо́дит во святы́й олта́рь, и взе́м кади́льницу стои́т пред свято́ю трапе́зою, кроме́ у́бо свяще́нническия оде́жды, епитрахи́лий то́чию возло́жь све́рх ма́нтии, кади́т крестообра́зно, глаго́ля: Сла́ва святе́й и единосу́щней: И начина́ет тропа́рь: Христо́с воскре́се: три́жды. И на́м то́жде отвеща́ющым. И пое́м: Христо́с воскре́се: со стихи́ его́, я́коже изъяви́ся в неде́лю у́тра и ве́чера. В мирски́х же хра́мех облачи́тся иере́й в ри́зы. Та́же ектениа́ вели́кая.

И по возгла́се а́бие пое́м кано́н, ирмо́с: Воскре́сния де́нь: по два́жды, тропари́ же на 10, с припе́вы: Христо́с воскре́се: В Сла́ва, и ны́не: глаго́лем Богоро́дичны господи́на Феофа́на, и господи́на Ио́сифа: пи́саны в неде́лю о мироно́сицах. Катава́сиа о́ба ли́ка вку́пе: Воскре́сния де́нь: И последи́: Христо́с воскре́се: три́жды. И глаго́лем сие́ во всю́ седми́цу вку́пе с ирмосы́ на 14. По 3-й пе́сни ипакои́: Предвари́вшыя у́тро: И чте́ние на 1-ю кни́гу: В нача́ле бе́ сло́во: от Иоа́нна, толкова́ние златоу́стаго, [от сего́ бо дне́ начина́ем сию́ кни́гу, и да́же до все́х святы́х соверша́ем] По 6-й пе́сни, конда́к: А́ще и во гро́б: и и́кос, и чте́ние. И по не́м: Воскре́сние Христо́во: три́жды, и Воскре́с Иису́с от гро́ба: три́жды. И а́бие про́чыя пе́сни. 9-ю пе́снь пое́м с припе́вы. Та́же ексапостила́рий: Пло́тию усну́в: три́жды.

На хвали́тех, Вся́кое дыха́ние: И пое́м стихи́ры воскре́сны, гла́с 2:

Вся́кое дыха́ние и вся́ тва́рь, Тя́ сла́вит Го́споди, я́ко Кресто́м сме́рть упраздни́л еси́, да пока́жеши лю́дем, е́же из ме́ртвых Твое́ Воскре́сние, я́ко еди́н Человеколю́бец.

Да реку́т иуде́е, ка́ко во́ини погуби́ша стрегу́щии Царя́? почто́ бо Ка́мень не сохрани́ ка́мене жи́зни? или́ Погребе́ннаго да дадя́т, или́ Воскре́сшему да покло́нятся, глаго́люще с на́ми: сла́ва мно́жеству щедро́т Твои́х, Спа́се на́ш, сла́ва Тебе́.

Ра́дуйтеся лю́дие и весели́теся, а́нгел седя́й на ка́мени гро́бнем, то́й на́м благовести́, ре́к: Христо́с воскре́се из ме́ртвых, Спа́с ми́ра, и испо́лни вся́ческая благоуха́ния: ра́дуйтеся лю́дие и весели́теся.

А́нгел у́бо е́же ра́дуйся, пре́жде Твоего́ зача́тия Го́споди, Благода́тней принесе́: а́нгел же ка́мень сла́внаго Твоего́ гро́ба в Твое́ Воскре́сние отвали́: о́в у́бо в печа́ли ме́сто, весе́лия о́бразы возвеща́я: се́й же в сме́рти ме́сто, Влады́ку жизнода́вца пропове́дуя на́м, те́мже вопие́м Ти́: благоде́телю все́х, Го́споди сла́ва Тебе́.

И стихи́ры Па́схи с припе́вы и́х, я́коже предписа́ся во У́трени Неде́ли.

И ектении́, и отпу́ст. И ча́с 1-й. Си́це же быва́ет слу́жба У́трени во всю́ Седми́цу све́тлую. Твори́м же и лити́ю вне́ оби́тели.

[зри́] Подоба́ет ве́дати, я́ко твори́м исхожде́ние дне́сь вне́ монастыря́, преднося́ще хору́гви. В рука́х же держа́ще свято́е Ева́нглие, честны́й Кре́ст, и ико́ны Воскре́сния Христо́ва, Пречи́стыя Богоро́дицы. Пое́м кано́н Па́схи с Богоро́дичны, на 8. И катава́сиа, ирмо́с то́йже. По 6-й пе́сни, последи́ Ева́нглиа глаго́лем: Воскре́сние Христо́во ви́девше: три́жды. Та́же, стихи́ра: Воскре́с Иису́с от гро́ба: три́жды. Та́же, 7-я, 8-я и 9-я пе́сни. И про́чее моле́бна, ли́ст 11.

На литурги́и антифо́ны Па́схи непреме́нно, я́коже указа́ся в неде́лю па́схи. Проки́мен апо́стола, гла́с 8: Во всю́ зе́млю изы́де веща́ние и́х, и в концы́ вселе́нныя глаго́лы и́х. Сти́х: Небеса́ пове́дают сла́ву Бо́жию, творе́ние же руку́ его́ возвеща́ет тве́рдь. Апо́стол в дея́ниих, зача́ло 2: Возврати́шася апо́столи: Аллилу́иа, гла́с 1: Испове́дят небеса́ чудеса́ твоя́ Го́споди: Сти́х: Бо́г прославля́емь в сове́те святы́х. Ева́нглие от Иоа́нна, зача́ло 2: Бо́га никто́же ви́де нигде́же: Прича́стен: Те́ло Христо́во:

На трапе́зе быва́ет утеше́ние вели́кое бра́тии.

Последование вечерни

во свети́льничном, по Христо́с воскре́се: и про́чих, Го́споди воззва́х, на гла́с 3. Поста́вим стихо́в 6, и пое́м стихи́ры воскре́сны, гла́с 3.

Твои́м Кресто́м Христе́ Спа́се, сме́рти держа́ва разруши́ся, и диа́воля пре́лесть упраздни́ся: ро́д же челове́ческий ве́рою спаса́емый: пе́снь Тебе́ всегда́ прино́сит.

Просвети́шася вся́ческая воскре́снием твои́м Го́споди, и ра́й па́ки отве́рзеся: вся́ же тва́рь восхваля́ющи тя́, пе́снь тебе́ всегда́ прино́сит.

Сла́влю Отца́ и Сына си́лу, и Свята́го Ду́ха пою́ вла́сть, неразде́льное, несозда́нное Божество́, Тро́ицу Единосу́щную, ца́рствующую в ве́к ве́ка.

И восто́чны 3, гла́с то́йже. 2

Кресту́ Твоему́ честно́му покланя́емся Христе́, и Воскре́сние Твое́ пое́м и сла́вим: ра́ною бо Твое́ю мы́ вси́ исцеле́хом.

Пое́м Спа́са от Де́вы вопло́щшагося: на́с бо ра́ди распя́тся, и в тре́тий де́нь воскре́се, да́руя на́м ве́лию ми́лость.

Су́щым во а́де соше́д Христо́с благовести́: дерза́йте, глаго́ля, ны́не победи́х, Аз е́смь воскре́сние, а́з вы́ возведу́, разруши́в сме́ртная врата́.

Сла́ва:

Недосто́йно стоя́ще в пречи́стом дому́ Твое́м, вече́рнюю пе́снь возсыла́ем, из глубины́ взыва́юще Христе́ Бо́же: просвети́вый ми́р тридне́вным воскре́снием Твои́м, изми́ лю́ди Твоя́ от руки́ враго́в Твои́х Человеколю́бче.

И ны́не: Богоро́дичен.

Ка́ко не диви́мся Богому́жному Рождеству́ Твоему́, Пречестна́я? Искуше́ния бо му́жескаго не прие́мши Всенепоро́чная, родила́ еси́ без отца́ Сы́на пло́тию пре́жде ве́к от Отца́ рожде́ннаго без ма́тере, ника́коже претерпе́вшаго измене́ния, или́ смеше́ния, или́ разделе́ния, но обою́ существу́ сво́йство це́ло сохра́ншаго. Те́мже Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

Вхо́д с кади́льницею: Све́те ти́хий: Проки́мен, гла́с 7: Бо́г на́ш на небеси́ и на земли́, вся́ ели́ка восхоте́, сотвори́. Сти́х: Во исхо́де изра́илеве от еги́пта, до́му иа́ковля из люде́й ва́рвар, бы́сть иуде́а святы́ня его́. Сти́х: Мо́ре ви́де и побеже́, Иорда́н возврати́ся вспя́ть. Сти́х: Что́ ти е́сть мо́ре, я́ко побе́гло еси́? и тебе́ иорда́не, я́ко возврати́лся еси́ вспя́ть? И па́ки: Бо́г на́ш на небеси́ и на земли́, вся́ ели́ка восхоте́, сотвори́. Иере́й: Рце́м вси́: и про́чее ектении́: Сподо́би Го́споди: Та́же, Испо́лним вече́рнюю: И по возгла́се,

На стихо́вне стихи́ра воскре́сна, гла́с 3:

Стра́стию твое́ю Христе́, омрачи́вый со́лнце и све́том Твоего́ Воскре́сния, просвети́вый вся́ческая, приими́ на́шу вече́рнюю пе́снь человеколю́бче.

И стихи́ры па́схи, с припе́вы и́х. Христо́с воскре́се: три́жды. И отпу́ст.

* * *

2

анато́лиевы


Комментарии для сайта Cackle