Пятница

Пое́м настоя́щее после́дование, бы́вшее от господи́на Ники́фора калли́ста ксанфопу́ла. На Пресвяту́ю Госпожу́ Влады́чицу Богоро́дицу Живоприе́мный Исто́чник. Не бо́ обрето́хом в Ти́пице сицева́го после́дования, но положи́ся любве́ ра́ди Пресвяты́я Богоро́дицы.

На Го́споди воззва́х: поста́вим стихо́в 10, и пое́м стихи́ры воскре́сны осмогла́сника 6, гла́с 6:

Побе́ду име́я Христе́, ю́же на а́да, на Кре́ст возше́л еси́: да во тьме́ сме́рти седя́щыя воскреси́ши с Собо́ю, и́же в ме́ртвых свобо́дь, источа́яй живо́т от Своего́ све́та, Всеси́льне Спа́се, поми́луй на́с.

Дне́сь Христо́с сме́рть попра́в, я́коже рече́, воскре́се, и ра́дование ми́рови дарова́, да вси́ взыва́юще, пе́снь та́ко рце́м: исто́чниче жи́зни, непристу́пный све́те, Всеси́льне Спа́се, поми́луй на́с.

Тебе́ Го́споди, су́щаго по все́й тва́ри, гре́шнии ка́мо бежи́м? На небеси́ Са́м живе́ши, во а́де попра́л еси́ сме́рть, во глубины́ морски́я? та́мо рука́ Твоя́ Влады́ко. К Тебе́ прибега́ем, Тебе́ припа́дающе мо́лимся: воскресы́й из ме́ртвых поми́луй на́с.

Ины́я стихи́ры восто́чны⁵, гла́с то́йже:

Кресто́м Твои́м Христе́ хва́лимся, и воскресе́ние Твое́ пое́м и сла́вим: Ты́ бо еси́ Бо́г на́ш. Ра́зве Тебе́ ина́го не ве́мы.

Сла́ва си́ле Твое́й Го́споди, я́ко упраздни́л еси́ держа́ву иму́щаго сме́рти, обнови́л еси́ ны́ Кресто́м Твои́м, да́руяй на́м жи́знь и нетле́ние.

Вы́ну благословя́ще Го́спода, пое́м воскресе́ние Его́: Кре́ст бо претерпе́в, сме́ртию сме́рть погуби́.

Та́же стихи́ры живоприе́мнаго исто́чника, гла́с то́йже. Подо́бен: Все́ возло́жше:

Стра́нная и пресла́вная небе́с Влады́ка на Тебе́ соверша́ше изнача́ла, Всенепоро́чная: и́бо свы́ше я́вственно ука́ну, я́коже до́ждь во утро́бе твое́й Богоневе́сто, исто́чник Тя́ показу́я все́ благо́е вре́ющий, оби́лие же исцеле́ний, благодея́ния источа́ющий все́м незави́стно, тре́бующым кре́пости ду́ш, и здра́вия телесе́, водо́ю благода́ти.

Ма́нну Тя́ небе́сную, и рая́ Де́во исто́чник боже́ственный имену́ю, Влады́чице, прии́скренне: земли́ бо тече́ то́к, и благода́ть исто́чника Твоего́ четвероча́стие ея́ покрыва́ющая, стра́нными чудесы́ всегда́, и все́м проси́мая быва́ет вода́ пие́мая. те́мже веселя́щеся христоимени́тии, притека́ем ве́рно, святы́ню че́рплюще всегда́ сладкото́чную.

Струи́ исцеле́ний источа́еши Де́во, ве́рно притека́ющым исто́чнику Твоему́ всегда́ Богоневе́сто: ту́не бо излива́еши, оби́льно и бога́тно неду́гующым исцеле́ния: слепы́я ви́дящыя явля́еши я́сно, приступа́ющыя к Тебе́: хро́мыя мно́гия испра́вила еси́, и разсла́бленныя стягну́ла еси́, умерщвле́на же оживи́ла еси́ возлия́нием трегу́бым, наводне́нных и злоды́шущих стра́сти исцели́ла еси́.

Повторя́ем 1-ю стихи́ру.

Сла́ва: гла́с 6:

Кто́ возглаго́лет си́лы твоя́ исто́чниче, и́же неистоща́емыми чудесы́ изъоби́луяй, мно́гая и па́че естества́ содева́еши исцеле́ньми? оле вели́чий, я́же все́м излива́еши! не то́кмо бо боле́зни неудо́бныя отгна́ла еси́ притека́ющих с любо́вию, но и душе́вныя стра́сти измыва́еши очища́ющи Всенескве́рная, все́м подаю́щи ве́лию ми́лость.

И ны́не:

Кто́ Тебе́ не ублажи́т Пресвята́я Де́во? кто́ ли не воспое́т Твоего́ пречи́стаго Рождества́? безле́тно бо от Отца́ возсия́вый Сы́н Единоро́дный: То́йже от Тебе́ Чи́стыя про́йде, неизрече́нно вопло́щся. Естество́м Бо́г сы́й, и естество́м бы́в Челове́к на́с ра́ди: не во двою́ лицу́ разделя́емый, но во двою́ естеству́ несли́тно познава́емый. Того́ моли́ Чи́стая Всеблаже́нная, поми́ловатися душа́м на́шим.

Вхо́д с кади́лом. Све́те ти́хий:

Проки́мен, гла́с 7: Возлюблю́ Тя Го́споди кре́посте моя́, Госпо́дь утверже́ние мое́. Сти́х: Бо́г мо́й, помо́щник мо́й, и упова́ю на Него́. Сти́х: Хваля́ призову́ Го́спода, и от вра́г мои́х спасу́ся. Сти́х: услы́ша от хра́ма свята́го Своего́ гла́с мо́й. Та́же: Возлюблю́ Тя Го́споди кре́посте моя́, Госпо́дь утверже́ние мое́.

Рце́м вси́: Сподо́би Го́споди в ве́чер се́й: и про́чая.

На стихо́вне стихи́ра воскре́сна гла́с 6, осмогла́сника:

Воскресе́ние Твое́ Христе́ Спа́се, а́нгели пою́т на небесе́х, и на́с на земли́ сподо́би, чи́стым се́рдцем Тебе́ сла́вити.

Та́же, настоя́щыя стихи́ры Богоро́дицы, гла́с 5. Подо́бен:

Ра́дуйся живоно́сный исто́чниче, по моря́м разлива́яй чудеса́, на всю́ вселе́нную. Океа́не у́мный, Ни́ловы струи́ превосходя́й излива́нием благода́ти. Силоа́ме вторы́й, во́ду источа́яй, а́ки от ка́мене пресла́вную, Иорда́ново же прие́мый де́йство. Ма́нно спаси́тельная же, я́сно быва́емая, ко и́щущаго тре́бованию, бога́тая вои́стинну и незави́стная, Христо́ва Ма́ти Отрокови́це, излива́ющая ми́рови ве́лию ми́лость.

Сти́х: Освяти́л е́сть селе́ние Свое́ Вы́шний.

Пе́сньми чу́дными ве́рнии, небе́сный о́блак воспои́м, ка́плю небе́сную Живода́вца Христа́, на зе́млю нетле́нно одожди́вшую, жи́ву ска́чущую, и источа́ющую безсме́ртная: во́ду боже́ственную, Амвроси́ю, не́ктара, никогда́же по питии́ истлева́юща, жа́жду же та́ющую ду́шы отгоня́юща. От него́же пию́щым разу́мно, то́ки боже́ственныя предлага́ются от у́мнаго чре́ва, точа́ща все́м благода́ть незави́стную.

Сти́х: Ре́чная устремле́ния веселя́т гра́д Бо́жий.

Ра́дуйся, живоприе́мный исто́чниче, ве́чно источа́я благода́ти, лия́ние исцеле́ний, вся́кую неду́гов кре́пость, немощну́ю и злу́ю отгоня́ющее, слепы́х воззре́ние, и прокаже́нных боже́ственное очище́ние, точа́щее неду́гов вся́кое врачевство́, все́м притека́ющым ве́рно к хра́му Твоему́: вели́кая о́бщая цельба́, безме́здная вои́стинну и гото́вая, Ма́ти Христа́ Сло́ва, источа́ющаго ми́рови ве́лию ми́лость.

Сла́ва: гла́с 5:

Востру́бим празднолю́бцы в пе́снех, воспле́щем в вода́х, и возлику́им ра́дующеся, ве́чными то́ками живоно́снаго исто́чника: ца́рие и кня́зи да стека́ются, и исто́чника благода́ти да че́рплют незави́стно: цари́ бо спасе́, на одре́ же содержи́мыя прикоснове́нием возста́ви. Па́стырие же и вси́ дождено́сный о́блак, спаси́тельную во́ду сше́дшеся почерпе́м. и́же в неду́зех свобожде́ние: и́же в беда́х, кре́пость: прохлажде́ние, и́же в жа́жде: слепи́и о́чи, глуси́и благослы́шание, злостра́ждущии исцеле́ние: и́же в сме́ртех, живоно́сную: вси́ повсю́ду ве́рным источа́ющую во́ды спасе́ния, воспле́щуще си́це воззове́м: присноживы́я то́ки излива́ющая от исто́чника Чи́стая, не преста́й Де́во всегда́ моля́щися о рабе́х Твои́х.

И ны́не: гла́с то́йже:

Воскресе́ния де́нь: Христо́с воскре́се: три́жды. И отпу́ст.

См. Пасхальный канон и стихиры Пасхи

Кано́н Па́сце, со ирмосы́, на 8: и Богоро́дицы, на 6:

Кано́н Па́сце, гла́с 1:

Пе́снь 1.

Ирмо́с: Воскресе́ния де́нь:

Очи́стим чу́вствия: Небеса́ у́бо досто́йно да веселя́тся:

И кано́н Богоро́дицы, его́же краестро́чие: Ники́фору Калли́сту ту́ Ксанфопу́лу.

[Н] Ны́не источи́ ми Де́во Богоро́дице исто́чниче, благода́ть даю́щи Сло́ва, я́ко да воспою́ тя исто́чник, вре́ющий живо́т и благода́ть ве́рным: ты́ бо ипоста́сное сло́во источи́ла еси́.

[И] Врачевство́ па́че естества́, хра́м Тво́й Честна́я, явля́ется все́м Отрокови́це: от сме́рти бо я́вныя притека́ющыя ве́рныя я́ве возставля́ет, и все́м незави́стную то́чит сла́дость.

[К] Излива́еши с небесе́ неистощи́мо благода́ти вои́стинну еди́на: слепе́юща бо твори́ши взира́ти к све́ту, бла́том но́вым, возгласи́вши свы́ше па́че смы́сла Лео́нови.

[Н] О́бщее любоче́стие челове́чества Честна́я, ра́дуйся Мари́е, ра́дуйся: все́х бо Творе́ц на Тя́, я́коже ка́пля сни́де я́вственно, исто́чник тя́ безсме́ртен показа́в Богоневе́стная.

Пе́снь 3.

Ирмо́с: Прииди́те пи́во пие́м:

Ны́не вся́ испо́лнишася: Вчера́ спогребо́хся тебе́:

Богоро́дицы подо́бны:

[Ф] Све́тлый тя́ святы́й хра́м Влады́ки все́х Отрокови́це ве́м, и нетле́ния исто́чник, во́ду излива́ющ Христа́, от него́же напая́емся.

[О] От Твоея́ благода́ти Влады́чице исто́чниче, Самоде́ржцу дае́ши исхо́дов происхожде́ние содержи́мо лю́те, ка́мене подстоя́ние стра́шное, водо́ю разреши́вшееся.

[Р] Тече́т благода́ть незави́стная от Тебе́, Богоро́дице Де́во, оби́льно точа́щая, хроми́и ска́чут о Тебе́, прокаже́нных очища́ется мно́жество, и де́мони угнета́ются.

[О] Все́м дае́ши исцеле́ние ве́рным, царе́м, простце́м, ни́щым, князе́м, убо́гим, бога́тым о́бще, во́ду излива́яй исто́чниче разли́чное исцеле́ние.

Конда́к Па́сце: А́ще и во гро́б снизше́л еси́:

Седа́лен, гла́с 8.

Подо́бный: Прему́дрости Сло́ва:

Приснотеку́щий исто́чник, и живо́тный, источа́яй струя́ боже́ственный то́к, согла́сно восхва́лим благода́ти прося́ще: на ки́йждо бо де́нь источа́ет исцеле́ния, я́ко ре́к тече́ния показу́яй мале́йшая. Те́мже по до́лгу приступа́юще с любо́вию, ве́рно почерпе́м от исто́чника неисчерпа́емое здра́вие, вои́стинну безсме́ртное, ороша́ющее ве́рно благочести́вых сердца́: устна́ми возопии́м, Ты́ еси́ ве́рных утеше́ние.

Пе́снь 4.

Ирмо́с: На Боже́ственней стра́жи:

Му́жеский у́бо по́л: Я́ко единоле́тный а́гнец: Богооте́ц у́бо Дави́д:

Богоро́дицы подо́бны:

[В] Па́че песка́ вои́стинну, и ка́плий дожде́вных, бы́ша Богоро́дице мно́жества, исто́чника де́л Твои́х, непреста́нно теку́щая на всю́ зе́млю бога́тно, и вся́каго боля́ща лю́те ско́ро исцеля́ющая.

[К] На стесне́нный жены́ от карки́на сосе́ц, вода́ возлива́ется Де́во, исто́чника Твоего́ Влады́чице, и а́бие преста́ша стра́сти смертоно́сныя струе́ю, и карки́н про́сто изы́ти позна́.

[А] Недомы́слимое в Тебе́, и па́че естества́ соде́янное е́сть я́вственно Богоро́дице: вода́ бо быва́ет исто́чника Твоего́ исцеле́ние, неду́гом смертоно́сным проти́вное, его́же естество́ я́ве никогда́же ве́дяше.

[Л] При́сно умерщвля́ет мя́ вра́г сла́стными прило́ги, Влады́чице исто́чниче Богоро́дице, не пре́зри, предвари́ ско́рая по́моще: сего́ же се́тей мя́ изба́ви, да воспою́ Тя при́сно многопе́тую.

Пе́снь 5.

Ирмо́с: у́тренюем у́треннюю:

Безме́рное Твое́ благоутро́бие: Присту́пим свещено́снии:

Богоро́дицы подо́бны:

[Л] Глаго́ланная Де́во Отрокови́це, исто́чника Твоего́ вои́стинну чудеса́, ужаса́ют челове́ков помышле́ние: па́че бо естества́ су́ть, вся́ ве́рныя освяща́ющая.

[И] Повествова́ руно́, ма́нна и Силоа́м, и ка́мень точа́щь, Соломо́нов притво́р, благода́ть Твою́, Иорда́нския во́ды, и исто́чник самаряны́ни.

[С] Ка́пли Твоя́ Отрокови́це Де́во, я́же исто́чника, и ме́ртваго оживи́ша, па́че сло́ва соде́янное и смы́сла: вся́ бо Твоя́ Всечи́стая, сло́во побежда́ют челове́ческое.

[Т] Стра́сти моя́ Отрокови́це исцели́, кровотече́ния исто́чник изсуша́ющи, и лю́тое пла́мене возжже́ние, и здра́вия преложе́ние, исхо́дов сою́з, и чревотече́ние.

Пе́снь 6.

Ирмо́с: Снизше́л еси́ в преиспо́дняя:

Сохрани́в це́ла зна́мения: Спа́се мо́й, живо́е же и неже́ртвенное заколе́ние:

Богоро́дицы подо́бны:

[О] Словеса́ сло́ва, я́ко вои́стинну исто́чника, воспева́ем Тя́ Чи́стая: прему́дрости бо глубину́ я́ко па́че сло́ва ражда́еши, пове́сивша на возду́се тече́ния, и зе́млю на воде́.

[В] Подшла́ еси́ ле́ствиц несе́ние, отъе́млющее сокруше́ние и́же та́мо живопи́сцов, о всесвяты́й исто́чниче! спаса́яй лю́ди от тру́са до́му па́дшыя.

[Т] Утро́бы неродя́щыя непло́дством пре́жде, разреша́еши я́ве, исто́чника Твоего́ струя́ми: и́бо я́ко роди́вшая Влады́ку все́х и рожде́ния подае́ши.

[О] Ни сло́во, ни у́м, ниже́ язы́к Твое́ возмо́гут Чи́стая Рождество́ похвали́ти, но немощству́ют в Тебе́, и облича́ется филосо́фов че́стность, и ри́торов красота́.

Конда́к, гла́с 8. Подо́бен: Взбра́нной:

От неистощи́мыя Ты́, исто́чниче богоблагода́тный, подае́ши ми́, точа́щи во́ды Твоея́ благода́ти, приснотеку́щий па́че сло́ва: я́ко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, водо́ спаси́тельная.

И́кос:

Нескве́рная Богоро́дице, ро́ждшая Сло́во О́тчее, пре́жде ве́к нетле́нно ро́ждшееся, разшири́ моя́ уста́, Чи́стая, спривнося́щи мя́ к Твоему́ похвале́нию, я́ко да восхвалю́ Тя, зовы́й исто́чнику Твоему́ сия́: ра́дуйся, исто́чниче ра́дости непреста́емыя: ра́дуйся, то́че добро́ты неизрече́нныя. Ра́дуйся, неду́гов разли́чных разреше́ние: ра́дуйся страсте́й вся́ких потопле́ние. Ра́дуйся струе́ светови́днейшая, здра́вы творя́щая ве́рныя: ра́дуйся водо́ благода́тнейшая неду́гующым многоразли́чно. Ра́дуйся ча́ше ма́нны живото́чныя: ра́дуйся ба́не и не́ктарю богоизлия́нный. Ра́дуйся водо́, прему́дрости неве́дение отъе́млющая: ра́дуйся растворе́ние се́рдца, пи́щу боже́ственную излива́ющее. Ра́дуйся приста́нище неможе́ния источа́ющая: ра́дуйся пла́мень неду́гования угаша́ющая. Ра́дуйся водо́ спаси́тельная.

Синакса́рь на Пресвяту́ю Госпожу́ Влады́чицу Богоро́дицу, живоприе́мный исто́чник.

В пято́к Све́тлыя седми́цы, пра́зднуем обновле́ние хра́ма Пресвяты́я и Госпожи́ на́шея Богоро́дицы, имену́емаго живоно́снаго исто́чника. Еще́ же па́мять твори́м изря́дных и па́че естества́ чуде́с бы́вших, во о́ном хра́ме от Богома́тере. Се́й у́бо хра́м пе́рвее основа́ся от царя́ Льва́ Вели́каго, и́же и Маке́лл именова́ся. Се́й поне́же бя́ше бла́г и смире́н челове́к, за до́брое свое́ наме́рение и ми́лостивное, е́же имя́ше, пре́жде не́же бы́ти царю́, обрета́яйся во о́ном ме́сте, обре́те еди́наго челове́ка слепа́го, не ви́дяща ка́мо ити́: и взе́м его́ за ру́ку, ведя́ше. Дости́гшима же обои́ма та́мо бли́з, иде́же бя́ше се́й исто́чник, возжада́ слепы́й, и моля́ше Льва́, да ороси́т его́: и́же идя́ во вну́треннее о́ное ле́са, иде́же бя́ше древе́с и насажде́ний разли́чных испо́лнено, иска́ше воды́, и не обрета́яй исто́чника, обраща́шеся а́ки отягча́емь. И слы́шит гла́с свы́ше глаго́лющь: о Льве́! не уныва́й, зане́ вода́, ея́же и́щеши, бли́з тебе́ е́сть, и обрати́ся обрести́ ю́. И Ле́в у́бо обраща́яйся, и ища́й мно́го, не обре́те ея́. И па́ки слы́шит ра́вный пе́рвому гла́с, и глаго́лет ему́: царю́ Льве́, вни́ди во вну́треннюю ча́сть загуще́ннаго сего́ ле́са, и возми́ свои́ма рука́ма от сея́ му́тныя воды́, и исцели́ жа́жду слепа́го, и пома́жи и помраче́нныя его́ о́чи: и а́бие позна́еши, ка́я е́смь, и от мно́гаго вре́мене живу́ на се́м ме́сте. Ле́в у́бо сотвори́ я́коже гла́с повеле́ ему́, и а́бие воззре́ слепы́й. И по Богома́тере прорече́нию, по ма́ле вре́мени бы́сть ца́рь Ле́в: и созда́ та́мо у исто́чника хра́м пе́рвый, бога́тою руко́ю, я́коже зри́тся дне́сь. И поне́же быва́ху чудеса́ множа́йшая на вся́кий де́нь, по мно́гих ле́тех иустиниа́н вели́кий самоде́ржец гре́ческий, поне́же пострада́ зело́ от не́мощи водотру́дия, и обре́те та́мо исцеле́ние свое́, хотя́ да́ти воздая́ние Ма́тери Бо́жией, па́ки созда́ о́ный пе́рвый хра́м, и сотвори́ и велича́йший и красне́йший, и́же от мно́гих тру́сов внегда́ разсе́деся, последи́ ца́рь Васи́лий Македо́нский, и сы́н его́ Ле́в Му́дрый, па́ки созда́ша и испра́виша и. Во вре́мя и́х се́й исто́чник мно́га чудеса́ де́йствова: и во́д задержа́ния, и пти́сы, и ины́я тмочи́сленныя стра́сти исцели́: карки́нския стра́сти, и кровотече́ния мно́гих родо́в, и́миже стражда́ху царе́вны и ины́я жены́, и разли́чныя огне́вицы, и ины́я боле́зни, и я́звы неисце́льныя, и непло́дныя разреши́: я́ко и цари́ца Зои́ непло́ды су́щи прия́т да́р от сего́ исто́чника, сы́на Константи́на Порфироге́нита. Воскреси́ же и ме́ртваго, и́же бе́ от Фессали́и, и приходя́ ко свято́му исто́чнику у́мре на пути́. Егда́ же хотя́ше умре́ти, запове́да кора́блеником взя́ти его́ та́мо во хра́м исто́чника, и возлия́ти на него́ три́ ка́ди от о́ныя воды́, и тогда́ погребсти́ его́. Е́же творя́ще кора́бленицы, и возлива́юще на него́ во́ду, а́бие воскре́се ме́ртвый. По мно́гом же вре́мени, хотя́ па́сти вели́кий хра́м о́ный, яви́ся Богоро́дица, и держа́ше его́, до́ндеже изы́де во́н все́ мно́жество люде́й, и никто́же вреди́ся. Та́яжде свята́я вода́ пива́ема, мно́гия бесну́емыя исцели́: и от темни́цы челове́ки свя́занныя разреши́. Исцели́ же и царя́ Льва́ от каменозая́тия, и жены́ его́ Феофа́ны угаси́ зе́льнейшую огне́вицу. И бра́та его́ Стефа́на разреши́ от пти́сныя не́мощи. Дарова́ же и слу́х Иоа́нну патриа́рху Иерусали́мскому. Исцели́ еще́ и си́льную огне́вицу Патри́киа Тара́сиа, и ма́тере его́ Магистри́ссы, и сы́на Стилиа́нова исцели́ от водозадержа́ния. И не́кую жену́ и́менем Схи́зину свободи́ от чревоболе́ния. И царя́ Рома́на исцели́, от разреше́ния и связа́ния чре́ва та́яжде вода́, подо́бне и жену́ его́. Призва́нием же то́кмо исцели́ всесвята́я мона́ха Пе́перин, и ученика́ его́ в Халде́и. Подо́бне и мона́ха Матфе́а, и Меле́тиа, и́хже оболга́ша царю́, свободи́ от гне́ва: Патри́киа же и Протоспафа́риа, и ины́я тмочи́сленныя кто́ испове́дати мо́жет? Не́сть же пра́ведно не воспомина́ти и исцеле́ния Исхи́ова: ниже́ ки́й язы́к мо́жет пове́дати, ели́ка чудеса́ та́яжде вода́ де́йствова, и да́же до дне́сь де́йствует, па́че ка́плей дожде́вных, и па́че зве́зд небе́сных, и листо́в мно́жества, я́же в на́ша времена́ ви́дехом. Еще́ исцели́ и ины́я смертоно́сныя боле́зни, прока́зы, свербо́ты па́че естества́, и опухле́ния же́нская, и душе́вныя стра́сти мно́гия исцели́, и разли́чныя очны́я боле́зни. Еще́ же исцели́ вара́гга Иоа́нна от воднотрудова́ния, и друга́го вара́гга исцели́ от злы́х я́зв, и священномона́ха Ма́рка от о́спы, и каменозая́тия мона́ха Заха́рию. И ина́я мно́жайшая чудеса́, я́же не возмо́жно е́сть исчи́слити, я́же де́йствова и де́йствует непреста́нно. Твоея́ Ма́тере моли́твами, Христе́ Бо́же на́ш поми́луй на́с. Ами́нь.

Воскресе́ние Христо́во ви́девше: три́жды. И Воскре́с Иису́с:

Пе́снь 7.

Ирмо́с: О́троки от пе́щи изба́вивый:

Жены́ с ми́ры богому́дрыя: Сме́рти пра́зднуем умерщвле́ние: Я́ко вои́стинну свяще́нная:

Богоро́дицы подо́бны:

[В] Почерпи́те неду́гующии исцеле́ния: Всечи́стая бо то́чит от боже́ственнаго исто́чника сла́дость и́стинную, пото́к сла́дости вои́стинну вре́ющий, те́мже и ве́рою то́ки незави́стныя поче́рпем вси́.

[Кс] Удивля́ют слы́шащыя Влады́чице, стра́нная Твоя́ чудеса́, вся́ ве́рныя: немы́я бо и глухи́я, я́ко благоглаго́ливыя показу́ет вода́ Твоя́, стра́ждущыя же лю́те врачу́ет, и исцеле́ние да́рует.

[А] Возво́диши от пе́щи скорбе́й, ороша́ющи вода́ми от стра́ннаго исто́чника, приступа́ющыя к Тебе́ Чи́стая: карки́нския бо ра́ны свобожда́ется челове́к, прокаже́нна же исцеля́еши, и распале́ние угаси́ла еси́.

[Н] Ю́ноши и отрокови́цы Влады́чицу, и вси́ челове́цы ве́рою от души́ восхва́лим све́тло: сокруше́ния бо гное́виц, и вре́ды лука́вых, и ото́ки, и разсла́бленнаго исцели́.

Пе́снь 8.

Ирмо́с: Се́й нарече́нный и святы́й де́нь:

Прииди́те но́ваго виногра́да: Возведи́ о́крест о́чи твои́: О́тче Вседержи́телю:

Богоро́дицы подо́бны:

[Ф] Боже́ственную исто́чник и честну́ю во́ду излива́ет Тво́й Де́во: водны́х бо тече́ние вспяща́ет зело́, призыва́нием боже́ственным благода́ти. Те́мже тя́ почита́ем, исто́чниче, во ве́ки.

[О] Вси́ честну́ю живото́чную во́ду воспои́м му́дренне: злодыха́ния бо то́к по страна́м уставля́ет, и свобо́дное твори́т происхожде́ние. Оле Твои́х чуде́с, Чи́стая Богороди́тельнице!

[П] Ка́я, Всепе́тая, восхва́лят уста́ Рождества́ Твоего́ стра́нное? Но и у́м ки́й бы чуде́с исто́чник изсле́довал, и сло́во изглаго́лало? Не́сть естеству́ кре́пость, Твои́м чуди́тися.

[О] Вся́ о Тебе́ сме́рти держа́ва разори́ся внеза́пу, о Цари́це и Госпоже́: и́бо Царя́ Безсме́ртнаго, живо́т Ты́ источи́ла еси́, во́ду, ма́нну, Христа́ во ве́ки.

Пе́снь 9.

Ирмо́с: Свети́ся, свети́ся:

О боже́ственнаго, о любе́знаго: О Па́сха ве́лия и свяще́ннейшая:

Богоро́дицы подо́бны:

[В] Во́ды вся́ превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.

[Л] Реши́тель неду́гов но́вый се́ Силоа́м, исто́чника Твоего́ Де́во, зри́м вси́: о́чи бо прие́млет огня́, вси́ же здра́вие при́сно к животу́ прие́млем.

[О] Здра́вия и́щущии притецы́те ко исто́чнику: Отрокови́ца бо Де́ва жи́тельствует при воде́. Лику́й и весели́ся ве́рных мно́жество си́це, я́коже подоба́ет: и́же бо прии́дет к хра́му, воздая́ние проше́ний прие́млет.

[В] Возвы́сися исто́чника Твоего́ вода́ вы́ше небе́с, и земли́ бе́здны то́ки претече́: сия́ е́сть пи́ща души́, питие́ ве́рных, ме́д из ка́мене, и ма́нны раздая́ние.

[Е] Весели́ши Де́во царя́ преесте́ственне, источа́ющи благода́ть от исто́чника присносу́щную, сему́ подава́ющи на враги́ кре́пость, побе́ды при́сно, здра́вие и ми́р, и проше́ний исполне́ние.

Ексапостила́рий пра́зднику: Пло́тию усну́в:

И исто́чнику. Подо́бен:

Исто́чник еси́ вои́стинну воды́ живы́я, Влады́чице: измыва́еши у́бо неду́ги ду́ш и теле́с лю́тыя, прикоснове́нием Твои́м еди́ным то́кмо, во́ду спасе́ния Христа́ излива́ющи.

На хвали́тех, Вся́кое дыха́ние: поста́вим стихо́в 8. И пое́м стихи́ры воскре́сны осмогла́сника 4, гла́с 6:

Кре́ст Тво́й Го́споди, жи́знь и воскресе́ние лю́дем Твои́м е́сть, и наде́ющеся на́нь, Тебе́ воскре́сшаго Бо́га на́шего пое́м: поми́луй на́с.

Погребе́ние Твое́ Влады́ко, ра́й отве́рзе ро́ду челове́ческому: и от истле́ния изба́вльшеся, Тебе́ воскре́сшаго Бо́га на́шего пое́м: поми́луй на́с.

Со Отце́м и Ду́хом Христа́ воспои́м, воскре́сшаго из ме́ртвых, и к Нему́ вопии́м: Ты́ живо́т еси́ на́ш, и воскресе́ние, поми́луй на́с.

Тридне́вен воскре́сл еси́ Христе́ от гро́ба я́коже пи́сано е́сть, совоздви́гнувый пра́отца на́шего. Те́мже Тя́ и сла́вит ро́д челове́ческий, и воспева́ет Твое́ Воскресе́ние.

И Богоро́дицы стихи́ры, гла́с 2. Подо́бен: До́ме Евфра́фов:

Вода́ исто́чника, спаси́тельная е́сть все́м немощству́ющым: присту́пим ве́рою, благода́ть почерпе́м.

Кла́дязь живото́чный исто́чника безсме́ртнаго, приступа́ющым любо́вию, исцеле́ний подае́т излия́ние неисчерпа́емое.

Укрепля́ет ду́шы вода́ Де́выя: и́же в скве́рнах страсте́й, притеце́м ко Отрокови́це, и сия́ измы́ем.

Ру́чка свяще́нная, и ма́нна незави́стная из пречи́стыя утро́бы, излива́ет Влады́ку: потре́бу вся́ческую поче́рпем.

И стихи́ры па́схи, по обы́чаю и́х. Ектении́, и отпу́ст. И ча́с пе́рвый. Часы́ Па́схи.

На литурги́и, антифо́ны Па́схи.

Проки́мен дне́, гла́с 8: Во всю́ зе́млю изы́де веща́ние и́х, и в концы́ вселе́нныя глаго́лы и́х. Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь. И Богоро́дицы: Вели́чит душа́ Моя́ Го́спода: Апо́стол дея́ний, зача́ло 7: Вку́пе Пе́тр и Иоа́нн: И Богоро́дицы, к Филипписи́ом,

зача́ло 240. Аллилу́иа, гла́с 1. Испове́дят небеса́ чудеса́ Твоя́ Го́споди. Сти́х: Бо́г прославля́емь в сове́те святы́х. Сти́х: Слы́ши дщи́ и ви́ждь и приклони́ у́хо твое́. Ева́нглие дне́: и Богоро́дицы, от Луки́, зача́ло 54. Прича́стный: Те́ло Христо́во приими́те: И Богоро́дице.