[глⷡ҇а м҃а] Чи́нъ бл҃гослове́нїѧ и҆ ѡ҆сщ҃е́нїѧ і҆кѡ́ны хрⷭ҇то́вы, пра́здникѡвъ гдⷭ҇кихъ, є҆ди́ныѧ, и҆лѝ мно́гихъ.
Поста́вленꙋ сꙋ́щꙋ пред̾ а҆мвѡ́номъ столꙋ̀, чⷭ҇тнѡ покрове́нꙋ, и҆ на не́мъ ѡ҆́бразъ сп҃совъ, и҆лѝ мнѡ́ги ѡ҆́бразы, є҆ли́кѡ и҆̀хъ бꙋ́детъ, і҆ере́й въ є҆пїтрахи́ль и҆ фелѡ́нь ѡ҆дѣ́ѧнъ, крⷭ҇тоѡбра́знѡ покади́въ ѡ҆́бразъ, начина́етъ ѻ҆бы́чнѡ: Бл҃гослове́нъ бг҃ъ на́шъ: Чте́цъ: Цр҃ю̀ нбⷭ҇ный: Трист҃о́е: и҆ по Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды.
И҆ ѱало́мъ п҃и:
Млⷭ҇ти твоѧ̑ гдⷭ҇и во вѣ́къ воспою̀, ро́дъ и҆ ро́дъ возвѣщꙋ̀ и҆́стинꙋ твою̀ ᲂу҆сты̀ мои́ми. Занѐ ре́клъ є҆сѝ: въ вѣ́къ млⷭ҇ть сози́ждетсѧ, на нб҃сѣ́хъ ᲂу҆гото́витсѧ и҆́стина твоѧ̀. Завѣща́хъ завѣ́тъ и҆збра̑ннымъ мои̑мъ, клѧ́хсѧ дв҃дꙋ рабꙋ̀ моемꙋ̀: До вѣ́ка ᲂу҆гото́ваю сѣ́мѧ твоѐ, и҆ сози́ждꙋ въ ро́дъ и҆ ро́дъ прⷭ҇то́лъ тво́й. И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и, и҆́бо и҆́стинꙋ твою̀ въ цр҃кви ст҃ы́хъ. Ꙗ҆́кѡ кто̀ во ѻ҆́блацѣхъ ᲂу҆равни́тсѧ гдⷭ҇еви, ᲂу҆подо́битсѧ гдⷭ҇еви въ сынѣ́хъ бж҃їихъ; Бг҃ъ прославлѧ́емь въ совѣ́тѣ ст҃ы́хъ, ве́лїй и҆ стра́шенъ є҆́сть над̾ всѣ́ми ѻ҆кре́стными є҆гѡ̀. Гдⷭ҇и бж҃е си́лъ, кто̀ подо́бенъ тебѣ̀; си́ленъ є҆сѝ гдⷭ҇и, и҆ и҆́стина твоѧ̀ ѻ҆́крестъ тебѐ. Ты̀ влⷣчествꙋеши держа́вою морско́ю, возмꙋще́нїе же во́лнъ є҆гѡ̀ ты̀ ᲂу҆кроча́еши. Ты̀ смири́лъ є҆сѝ, ꙗ҆́кѡ ꙗ҆́звена го́рдаго, мы́шцею си́лы твоеѧ̀ расточи́лъ є҆сѝ врагѝ твоѧ̑. Твоѧ̑ сꙋ́ть нб҃са̀, и҆ твоѧ̀ є҆́сть землѧ̀, вселе́ннꙋю и҆ и҆сполне́нїе є҆ѧ̀ ты̀ ѡ҆снова́лъ є҆сѝ. Сѣ́веръ и҆ мо́ре ты̀ созда́лъ є҆сѝ: ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ. Твоѧ̀ мы́шца съ си́лою: да ᲂу҆крѣпи́тсѧ рꙋка̀ твоѧ̀, и҆ вознесе́тсѧ десни́ца твоѧ̀. Пра́вда и҆ сꙋдьба̀ ᲂу҆гото́ванїе прⷭ҇то́ла твоегѡ̀: млⷭ҇ть и҆ и҆́стина пред̾и́детѣ пред̾ лице́мъ твои́мъ. Бл҃же́ни лю́дїе вѣ́дꙋщїи воскликнове́нїе: гдⷭ҇и во свѣ́тѣ лица̀ твоегѡ̀ по́йдꙋтъ, И҆ ѡ҆ и҆́мени твое́мъ возра́дꙋютсѧ ве́сь де́нь, и҆ пра́вдою твое́ю вознесꙋ́тсѧ. Ꙗ҆́кѡ похвала̀ си́лы и҆́хъ ты̀ є҆сѝ, и҆ во бл҃говоле́нїи твое́мъ вознесе́тсѧ ро́гъ на́шъ.
Сла́ва, и҆ ны́нѣ: А҆ллилꙋ́їа, три́жды.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й же чте́тъ мл҃твꙋ сїю̀:
Гдⷭ҇и бж҃е вседержи́телю, бж҃е ѻ҆тє́цъ на́шихъ, хотѧ́й лю́ди твоѧ̑, и҆збра́ннагѡ і҆зра́илѧ, ѿ пре́лести і҆дѡлослꙋже́нїѧ и҆зба́вити, и҆ въ позна́нїи и҆ слꙋже́нїи тебѣ̀ є҆ди́номꙋ и҆́стинномꙋ бг҃ꙋ всегда̀ неѿстꙋ́пнѡ и҆мѣ́ти, є҆́же не твори́ти себѣ̀ ѡ҆́браза и҆ подо́бїѧ тебѣ̀ и҆́стинномꙋ бг҃ꙋ сопроти́внагѡ, во є҆́же ꙗ҆́кѡ бг҃ꙋ кла́нѧтисѧ и҆ слꙋжи́ти є҆мꙋ̀, преще́нїемъ запрети́лъ є҆сѝ. Па́ки же подѡ́бїѧ и҆ ѡ҆́бразы, и҆́миже не чꙋ́ждыхъ ло́жныхъ богѡ́въ, но тебѐ є҆ди́нагѡ и҆́стиннагѡ бг҃а прест҃о́е и҆ великолѣ́пое и҆́мѧ сла́витсѧ, мѡѷсе́омъ пе́рвѣе въ твое́мъ зако́нномъ ст҃и́лищи, над̾ кївѡ́томъ свидѣ́нїѧ херꙋві̑ма два̀ зла́та, два́ же ᲂу҆ ᲂу҆глѡ́въ ѡ҆чище́нїѧ поста́вити, на ѻ҆по́нахъ же мно́жество херꙋві́мѡвъ дѣ́ломъ шве́ннымъ ᲂу҆стро́ити и҆ соѡрꙋжи́ти повелѣ́лъ є҆сѝ: и҆ соломѡ́номъ въ ѻ҆лтарѣ̀ херꙋві̑ма два̀, ѿ дре́ва кѷпарі́са зла́томъ ѡ҆б̾ѧ́та поста́влена бы́ста: кївѡ́тъ же, въ не́мже скрижа̑ли завѣ́та ка́менни, ста́мна злата̀, и҆ а҆арѡ́новъ же́злъ бѧ́хꙋ, ꙗ҆́кѡ ті́и съ людьмѝ тꙋ̀ сꙋ́щїи, и҆ сла́вы твоеѧ̀ вели́чество зна́менꙋющїи, и҆ па́мѧть твои́хъ пресла́вныхъ чꙋде́съ и҆ бл҃годѣѧ́нїй и҆мѣ́ющїи, [а҆́ще и҆ дѣ́ло рꙋ́къ человѣ́ческихъ бѧ́хꙋ] со стра́хомъ и҆ тре́петомъ и҆ бл҃голѣ́пнымъ поклоне́нїемъ, кажде́нїемъ же и҆ пред̾ тѣ́ми моле́нїемъ, чти́ти сїѧ̑ повелѣ́лъ є҆сѝ, и҆ че́сть ѻ҆́нꙋю, ꙗ҆́кѡ тебѣ̀ самомꙋ̀ ѿда́ннꙋю, млⷭ҇тивнѡ прїима́лъ є҆сѝ. Во и҆сполне́нїи же време́нъ посла́лъ є҆сѝ є҆диноро́днаго сн҃а твоего̀, гдⷭ҇а на́шего і҆и҃са хрⷭ҇та̀, ражда́емаго ѿ жены̀, при́снѡ же дв҃ы мр҃і́и, и҆́же зра́къ раба̀ прїи́мъ и҆ въ подо́бїи чл҃вѣ́честѣмъ бы́въ, подо́бїе своегѡ̀ пречⷭ҇тагѡ ѡ҆́браза, нерꙋкотворе́ннѡ къ своемꙋ̀ прест҃о́мꙋ лицꙋ̀ ᲂу҆брꙋ́съ приложи́въ, и҆з̾ѡбразѝ, и҆ а҆́ѵгарю є҆де́сскомꙋ кнѧ́зю посла̀, и҆ тѣ́мъ ѿ недꙋ́га того̀ и҆сцѣлѝ, и҆ всѣ̑мъ вѣ́рою къ томꙋ̀ приходѧ́щымъ и҆ кла́нѧющымсѧ, неисчє́тнаѧ и҆сцѣлє́нїѧ и҆ мнѡ́гаѧ бл҃годѣѧ̑нїѧ чꙋдодѣ́йствꙋѧ подава́ше. И҆ мы̀ ᲂу҆̀бо, ѽ бл҃гі́й вседержи́телю влⷣко, се́й ѡ҆́бразъ [и҆лѝ сїѧ̑ ѡ҆́бразы] возлю́бленнагѡ сн҃а твоегѡ̀, въ воспомина́нїе сп҃си́тельнагѡ воплоще́нїѧ, и҆ ѡ҆ всѣ́хъ пресла́вныхъ є҆гѡ̀ чꙋде́съ и҆ бл҃годѣѧ́нїй, ꙗ҆́же на землѝ, ꙗ҆́кѡ чл҃вѣ́къ ꙗ҆ви́всѧ, человѣ́ческомꙋ ро́дꙋ показа̀, не бг҃отворѧ́ще соѡрꙋжи́хомъ, но вѣ́дꙋще, ꙗ҆́кѡ по́честь ѡ҆́браза на первоѡбра́зное восхо́дитъ, пред̾ твои́мъ вели́чествомъ чⷭ҇тнѡ предложи́хомъ, и҆ припада́юще прилѣ́жнѡ мо́лимъ: при́зри млⷭ҇тивнѡ на ны̀ и҆ на ѡ҆́бразъ се́й [и҆лѝ на ѡ҆́бразы сїѧ̑] и҆ воплоще́нїѧ и҆ ꙗ҆вле́нїѧ ра́ди є҆диноро́днагѡ сн҃а твоегѡ̀, въ є҆гѡ́же воспомина́нїе се́й [и҆лѝ сїѧ̑] ᲂу҆стро́ихомъ, послѝ на́нь [и҆лѝ на нѧ̀] твоѐ нбⷭ҇ное бл҃гослове́нїе и҆ и҆ бл҃года́ть прест҃а́гѡ дх҃а, и҆ бл҃гословѝ и҆ ѡ҆ст҃ѝ є҆го̀ [и҆лѝ ѧ҆̀]: пода́ждь є҆мꙋ̀ [и҆лѝ и҆̀мъ] си́лꙋ цѣле́бнꙋ, и҆ всѣ́хъ ко́зней дїа́вольскихъ прогони́тельнꙋ, и҆ и҆спо́лни є҆го̀ [и҆лѝ ѧ҆̀] бл҃гослове́нїѧ и҆ крѣ́пости ѻ҆́нагѡ ст҃а́гѡ нерꙋкотворе́ннагѡ ѡ҆́браза, ю҆́же ѿ прикоснове́нїѧ ст҃а́гѡ и҆ пречⷭ҇тагѡ лица̀ возлю́бленнагѡ сн҃а твоегѡ̀ бога́тнѡ стѧжа̀, во є҆́же си́ламъ и҆ чꙋдесє́мъ тѣ́мъ [и҆лѝ тѣ́ми] къ ᲂу҆твержде́нїю правосла́вныѧ вѣ́ры, и҆ сп҃се́нїю вѣ́рныхъ люде́й твои́хъ дѣ́йствоватисѧ, и҆ во є҆́же всѣ̑мъ тебѣ̀ и҆ є҆диноро́дномꙋ твоемꙋ̀ сн҃ꙋ и҆ прест҃о́мꙋ дх҃ꙋ пред̾ ни́мъ кла́нѧющымсѧ, и҆ вѣ́рнѡ призыва́ющымъ, и҆ прилѣ́жнѡ молѧ́щымсѧ ᲂу҆слы̑шаннымъ бы́ти, и҆ млⷭ҇ть привлещѝ твоегѡ̀ чл҃вѣколю́бїѧ, и҆ бл҃года́ть полꙋчи́ти. Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ со є҆диноро́днымъ твои́мъ сн҃омъ, и҆ прест҃ы́мъ, и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же чте́тъ та́йнѡ мл҃твꙋ сїю̀:
Вонмѝ гдⷭ҇и бж҃е мо́й ѿ ст҃а́гѡ жили́ща, и҆ ѿ прⷭ҇то́ла сла́вы црⷭ҇твїѧ твоегѡ̀, и҆ млⷭ҇тивнѡ послѝ бл҃гослове́нїе твоѐ ст҃о́е на ѡ҆́бразъ се́й [и҆лѝ на ѡ҆́бразы сїѧ̑], и҆ въ ѡ҆кропле́нїи воды̀ сеѧ̀ сщ҃е́нныѧ, бл҃гословѝ и҆ ѡ҆ст҃ѝ є҆го̀ [и҆лѝ ѧ҆̀] и҆ да́ждь є҆мꙋ̀ [и҆лѝ и҆̀мъ] си́лꙋ цѣле́бнꙋ, всѧ́кїѧ болѣ́зни и҆ недꙋ́га, всѧ́кихъ дїа́вольскихъ ко́зней прогони́тельнꙋ ѿ всѣ́хъ вѣ́рнѡ къ немꙋ̀ [и҆лѝ къ ни̑мъ] прибѣга́ющихъ, и҆ пред̾ тѣ́мъ [и҆лѝ тѣ́ми] тебѣ̀ кла́нѧющихсѧ, молѧ́щымъ же сѧ, и҆ прибѣга́ющымъ: и҆ всегда̀ ᲂу҆слы́шана и҆ бл҃гопрїѧ́тна тебѣ̀ да бꙋ́детъ и҆́хъ мольба̀.
И҆ возглаша́етъ: Бл҃года́тїю и҆ щедро́тами є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ и҆ съ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й же кропи́тъ сщ҃е́нною водо́ю ѡ҆́бразъ, глаго́лѧ: Ѡ҆сщ҃а́етсѧ ѡ҆́бразъ се́й [и҆лѝ ѡ҆́бразы сїѧ̑] бл҃года́тїю прест҃а́гѡ дх҃а, ѡ҆кропле́нїемъ сщ҃е́нныѧ воды̀ сеѧ̀, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
А҆́бїе же і҆ере́й кади́тъ ѡ҆́бразъ, и҆ покланѧ́етсѧ, поѧ̀ и҆лѝ глаго́лѧ тропа́рь се́й, гла́съ в҃:
Пречⷭ҇томꙋ твоемꙋ̀ ѡ҆́бразꙋ покланѧ́емсѧ бл҃гі́й, просѧ́ще проще́нїѧ прегрѣше́нїй на́шихъ, хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆̀же созда́лъ є҆сѝ, ѿ рабо́ты вра́жїѧ. тѣ́мъ бл҃года́рственнѡ вопїе́мъ тѝ: ра́дости и҆спо́лнилъ є҆сѝ всѧ̑ сп҃се на́шъ, прише́дый спастѝ мі́ръ.
Лобза́въ же ѡ҆́бразъ, глаго́летъ:
Сла́ва, и҆ ны́нѣ, гла́съ д҃: Бж҃е́ственный тво́й зра́къ на і҆кѡ́нѣ и҆з̾ѡбразꙋ́юще хрⷭ҇тѐ бж҃е, є҆́же ѿ дв҃ы ржⷭ҇тво̀ твоѐ ꙗ҆́снѡ разꙋмѣва́емъ: чꙋдеса́ же твоѧ̑ неизглагѡ́ланнаѧ, и҆ во́льное распѧ́тїе воспомина́юще, проповѣ́дꙋемъ. ѿню́дꙋже бѣ́сове прогонѧ́ютсѧ стра́хомъ, ѕлосла́внїи же въ печа́лехъ рыда́ютъ, ꙗ҆́кѡ си̑мъ соприча̑стницы.
И҆ а҆́бїе твори́тъ ѿпꙋ́стъ се́й:
И҆́же неизрече́ннымъ смотре́нїемъ пре́жде своеѧ̀ во́льныѧ стрⷭ҇ти, и҆зво́ливый на ᲂу҆брꙋ́сѣ нерꙋкотворе́ннѡ и҆з̾ѡбрази́ти пречⷭ҇тагѡ и҆ бл҃гочеловѣ́чнагѡ своегѡ̀ лица̀ ѡ҆́бразъ, хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, и҆ всѣ́хъ ст҃ы́хъ свои́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.
И҆ полага́етъ ѡ҆́бразъ чⷭ҇тнѡ на свое́мъ мѣ́стѣ, бл҃годарѧ̀ бг҃а.