[глⷡ҇а м҃д] Чи́нъ бл҃гослове́нїѧ но́выхъ сосꙋ́дѡвъ цр҃ко́вныхъ, вкꙋ́пѣ мно́гихъ: и҆лѝ є҆ди́нагѡ, ꙗ҆ковы̀ сꙋ́ть: кади́льница, ка́цїѧ, блю́до а҆нафо́рное, копїѐ, кꙋкꙋ́мы, сі́есть водоно́сные сосꙋ́дцы, и҆ и҆ны̑ѧ ѻ҆лта̑рныѧ принадле́жнѡсти.

Начина́етъ і҆ере́й ѻ҆бы́чнѡ. По трист҃о́мъ, и҆ по Прїиди́те, поклони́мсѧ:

чте́тъ ѱало́мъ к҃є:

Сꙋди́ ми гдⷭ҇и, ꙗ҆́кѡ а҆́зъ неѕло́бою мое́ю ходи́хъ: и҆ на гдⷭ҇а ᲂу҆пова́ѧ, не и҆знемогꙋ̀. И҆скꙋси́ мѧ гдⷭ҇и, и҆ и҆спыта́й мѧ̀, разжзѝ ᲂу҆трѡ́бы моѧ̑ и҆ се́рдце моѐ. Ꙗ҆́кѡ млⷭ҇ть твоѧ̀ пред̾ ѻ҆чи́ма мои́ма є҆́сть, и҆ бл҃гоꙋгоди́хъ во и҆́стинѣ твое́й. Не сѣдо́хъ съ со́нмомъ сꙋ́етнымъ, и҆ со законопрестꙋ́пными не вни́дꙋ. Возненави́дѣхъ це́рковь лꙋка́внꙋющихъ, и҆ съ нечести́выми не сѧ́дꙋ. Оу҆мы́ю въ непови́нныхъ рꙋ́цѣ моѝ, и҆ ѡ҆бы́дꙋ же́ртвенникъ тво́й гдⷭ҇и: Є҆́же ᲂу҆слы́шати мѝ гла́съ хвалы̀ твоеѧ̀, и҆ повѣ́дати всѧ̑ чꙋдеса̀ твоѧ̑. Гдⷭ҇и, возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. Да не погꙋби́ши съ нечести́выми дꙋ́шꙋ мою̀, и҆ съ мꙋ́жи крове́й живо́тъ мо́й, И҆́хже въ рꙋ́кꙋ беззакѡ́нїѧ, десни́ца и҆́хъ и҆спо́лнисѧ мзды̀. а҆́зъ же неѕло́бою мое́ю ходи́хъ, и҆зба́ви мѧ̀ гдⷭ҇и, и҆ поми́лꙋй мѧ̀. Нога̀ моѧ̀ ста̀ на правотѣ̀: въ цр҃квахъ бл҃гословлю̀ тѧ̀ гдⷭ҇и.

Сла́ва, и҆ ны́нѣ: А҆ллилꙋ́їа, три́жды.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

І҆ере́й чте́тъ мл҃твꙋ сїю̀:

Гдⷭ҇и бж҃е вседержи́телю, бж҃е ѻ҆тє́цъ на́шихъ, сосꙋ́домъ твои́мъ и҆збра́ннымъ а҆пⷭ҇ломъ па́ѵломъ рекі́й, ꙗ҆́кѡ всѐ созда́нїе твоѐ добро̀ и҆ ничто́же ѿме́тно, а҆́ще сло́вомъ твои́мъ бж҃е́ственнымъ и҆ мл҃твами ѡ҆сщ҃а́етсѧ: при́зри ны́нѣ млⷭ҇тивнѡ, смире́ннѡ мо́лимсѧ, на мл҃твꙋ на́шꙋ и҆ на сосꙋ́ды сїѧ̑ [и҆лѝ на сосꙋ́дъ се́й] ꙗ҆̀же [и҆лѝ є҆го́же] рабѝ твоѝ въ сла́вꙋ прест҃а́гѡ и҆́мене твоегѡ̀, и҆ въ слꙋже́нїе ст҃а́гѡ твоегѡ̀ же́ртвенника соѡрꙋди́ша, и҆ млⷭ҇тивнѡ твои́мъ нбⷭ҇нымъ бл҃гослове́нїемъ, мл҃твою же на́съ недосто́йныхъ рабѡ́въ и҆ слꙋжи́телей твои́хъ, бл҃гословѝ и҆ ѡ҆ст҃ѝ, и҆ къ слꙋже́нїю ст҃а́гѡ твоегѡ̀ ѻ҆лтарѧ̀, достѡ́йны [и҆лѝ досто́инъ] бы́ти ꙗ҆вѝ, прине́сшымъ же нбⷭ҇ною твое́ю бл҃года́тїю возда́ждь, и҆ ѡ҆ставле́нїе грѣхѡ́въ да́рꙋй, и҆ црⷭ҇твїѧ твоегѡ̀ прича́стники сотворѝ. Ты́ бо є҆сѝ бг҃ъ млⷭ҇ти, и҆ щедро́тъ, и҆ человѣколю́бїѧ, и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

І҆ере́й: Ми́ръ всѣ̑мъ.

Ли́къ: И҆ дꙋ́хови твоемꙋ̀.

Дїа́конъ: Главы̑ ва́шѧ гдⷭ҇еви приклони́те.

Ли́къ: Тебѣ̀ гдⷭ҇и.

І҆ере́й же прекло́нь главꙋ̀, та́йнѡ чте́тъ мл҃твꙋ сїю̀:

При́зри гдⷭ҇и бж҃е на́шъ на мл҃твꙋ на́шꙋ, смире́ннѡ мо́лимсѧ, и҆ низпослѝ бл҃гослове́нїе твоѐ на сосꙋ́ды сїѧ̑, [и҆лѝ на сосꙋ́дъ се́й], и҆ ѡ҆кропле́нїемъ воды̀ сеѧ̀ сщ҃е́нныѧ бл҃гословѝ, и҆ ѡ҆ст҃ѝ ѧ҆̀ [и҆лѝ є҆го̀], во є҆́же бы́ти и҆̀мъ [и҆лѝ є҆мꙋ̀] достѡ́йнымъ [и҆лѝ досто́йнꙋ] слꙋже́нїю ст҃а́гѡ твоегѡ̀ ѻ҆лтарѧ̀.

И҆ возглаша́етъ: Ꙗ҆́кѡ ты̀ є҆сѝ ѡ҆сщ҃е́нїе на́ше и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

І҆ере́й же кропи́тъ сосꙋ́ды сщ҃е́нною водо́ю, глаго́лѧ:

Ѡ҆сщ҃а́ютсѧ сосꙋ́ды сїѧ̑ [и҆лѝ ѡ҆сщ҃а́етсѧ сосꙋ́дъ се́й] бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.

И҆ а҆́бїе твори́тъ дневны́й ѿпꙋ́стъ, и҆ вно́ситъ сосꙋ́ды во ѻ҆лта́рь.


Комментарии для сайта Cackle