Чи́нъ ѡ҆свѧще́нїѧ колесни́цы.

Нача́ло ѻ҆бы́чное: Цр҃ю̀ нбⷭ҇ный и҆ прѡ́чаѧ. Прїиди́те поклони́мсѧ: Ѱало́мъ ч҃: Моли́тва:

Гдⷭ҇и бж҃е на́шъ, сѣдѧ́й на серафі́мѣхъ и҆ ѣ҆́здѧй на херꙋві́мѣхъ, мꙋ́дростїю ᲂу҆краси́вый человѣ́ка, и҆ бл҃ги́мъ твои́мъ про́мысломъ всѧ̑ ко бла́гꙋ направлѧ́ѧй, ниспослѝ бл҃гослове́нїе твоѐ на колесни́цꙋ сїю̀ и҆ а҆́гг҃ла твоегѡ̀ къ не́й приста́ви, да ше́ствꙋющїи въ не́й и҆́мъ храни́ми и҆ наставлѧ́еми, въ ми́рѣ и҆ бл҃гополꙋ́чїи пꙋ́ть сво́й соверши́вше, тебѣ̀ сла́вꙋ и҆ бл҃годаре́нїе возсыла́ютъ, хва́лѧще ѻ҆ц҃а̀ и҆ сн҃а ст҃а́гѡ дх҃а. а҆ми́нь.

І҆ере́й же взе́млетъ свѧще́ннꙋю во́дꙋ, и҆ кропи́тъ є҆́ю колесни́цꙋ вовнѣ̀ и҆ внꙋтрѝ, глаго́лѧ: Бл҃гословлѧ́етсѧ и҆ ѡ҆сщ҃а́етсѧ колесни́ца сїѧ̀ во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.