Великий Пяток
Въ то́йже вели́кїй четверто́къ,
повече́рїе глаго́лемъ ма́лое, на не́мже пое́мъ трипѣ́снецъ, творе́нїе господи́на а҆ндре́а кри́тскагѡ. Гла́съ и҃.
Пѣ́снь є҃.
І҆рмо́съ: Мра́къ дꙋшѝ моеѧ̀ разженѝ свѣтода́вче хрⷭ҇тѐ бж҃е, началоро́днꙋю тьмꙋ̀ бе́здны и҆згна́въ, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.
Оу҆краси́сѧ ве́черѧ, ᲂу҆гото́васѧ тебѣ̀ па́сха, ꙗ҆́коже ре́клъ є҆сѝ, хрⷭ҇тѐ: но і҆ꙋ́да на преда́нїе твоѐ ᲂу҆мышлѧ́ше, и҆ сы́й съ тобо́ю, ѡ҆ твое́й цѣнѣ̀ внѣ̀ соглаша́шесѧ сребролю́бїемъ.
Востае́тъ съ ве́чери и҆ ле́нтїемъ препоѧсꙋ́етсѧ по чре́слѡмъ хрⷭ҇то́съ во́лею, и҆ преклонѧ́етъ вы́ю, петрꙋ̀ вопїю́щꙋ: никогда́же моѝ но́зѣ ᲂу҆мы́еши, тво́рче мо́й, но ѻ҆ба́че ѡ҆мы́й.
Прїѧ́тъ хлѣ́бъ въ рꙋ́цѣ і҆ꙋ́да, льсти́вый ᲂу҆чени́къ, и҆́миже и҆ преда́нїе содѣ́ла тебѣ̀, простира́ше же на преда́нїе но́зѣ, ꙗ҆́же са́мъ є҆сѝ ѡ҆мы́лъ и҆ ле́нтїемъ ѡ҆те́рлъ.
Лобза́нїемъ льсти́внымъ і҆ꙋ́да тогда̀ ᲂу҆ста̀ распира́ше тебѣ̀, сло́ве, и҆ ᲂу҆сты̀ свои́ми тѣ́ло твоѐ недосто́йнѡ ѡ҆моча́ше, лобза́тель и҆ преда́тель, ра́бъ и҆ льсте́цъ, вопїѧ̀ тебѣ̀: ра́дꙋйсѧ, ᲂу҆ч҃тлю.
Пе́тръ, є҆гда̀ зрѧ́ше содѣва́ємаѧ тогда̀, ᲂу҆́жасомъ ѡ҆держи́мь бы́въ, ѡ҆бличи́сѧ рабы́ни хꙋды́мъ вопроше́нїемъ: и҆́бо ѿве́ржесѧ тебє̀ гдⷭ҇а, не то́кмѡ ꙗ҆́коже ре́клъ є҆сѝ, но и҆ ꙗ҆́кѡ вѣ́далъ є҆сѝ, всѧ̑ вѣ́дый.
Заꙋша́етсѧ зижди́тель, и҆ ᲂу҆дарѧ́етсѧ тва́рь поноше́нїемъ є҆гѡ̀: тро́стїю бїе́тсѧ во́лею, и҆ вы̑шнѧѧ преклонѧ́ютсѧ: ѡ҆плева́етсѧ сꙋдїѧ̀, и҆ ѡ҆снѡва̑нїѧ всѧ̑ земна̑ѧ подвиза́ютсѧ.
Сла́ва: Те́рнїемъ вѣнча́етсѧ бг҃ъ, зе́млю всю̀ ᲂу҆краси́вый цвѣ̑ты, и҆ ра̑ны прїе́млетъ, и҆ терпи́тъ поноше́нїе долготерпѣли́внѡ, и҆ багрѧни́цꙋ порꙋга́нїѧ но́ситъ, и҆ терпи́тъ всѧ̑ бг҃ъ сы́й, и҆ стра́ждетъ свое́ю пло́тїю.
И҆ ны́нѣ: Да вопїе́тъ і҆ѡа́ннъ, сказꙋ́ѧ ᲂу҆чє́нїи бж҃е́ственными воплоще́нїе твоѐ: сло́во пло́ть бы́сть и҆з̾ дв҃ы непрело́жнѡ, и҆ пребы́сть є҆стество́мъ бг҃ъ ꙗ҆́коже бѣ̀, не ѿстꙋпи́въ ѻ҆ч҃ескихъ є҆гѡ̀ нѣ́дръ.
Пѣ́снь и҃.
І҆рмо́съ: Покрыва́ѧй вода́ми прєвы́спреннѧѧ своѧ̑, полага́ѧй мо́рю предѣ́лъ песо́къ и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю и҆ творцꙋ̀, во вѣ́ки.
Ѡ҆дѣва́ѧй ѡ҆́блаки не́бо, і҆и҃се, на прⷭ҇то́лѣ сла́вы ца́рствꙋѧй съ нетлѣ́ннымъ ѻ҆ц҃е́мъ, ты̀, прїе́мъ ле́нтїй, си́мъ препоѧ́салсѧ є҆сѝ ѡ҆мы́ти но́ги брє́нныѧ, ве́сь ѻ҆́гнь сы́й, сло́ве, а҆́ще и҆ воплоти́лсѧ є҆сѝ.
Є҆гда̀ всѧ̑ ѡ҆мы̀, возле́гъ і҆и҃съ, ко свои̑мъ ᲂу҆ч҃нкѡ́мъ глаго́летъ: вѣ́сте всѝ, что̀ сотвори́хъ ны́нѣ: ѡ҆́бразъ бо смире́нїѧ да́хъ ва́мъ всѣ̑мъ: да, и҆́же хо́щетъ пе́рвый бы́ти, бꙋ́детъ всѣ́хъ послѣ́днїй произволе́нїемъ.
Чи́сти ᲂу҆́бѡ є҆стѐ, но не всѝ вы̀: хрⷭ҇то́съ дрꙋгѡ́мъ возлежа́щымъ на ве́чери речѐ. є҆ди́нъ ᲂу҆́бѡ ко дрꙋго́мꙋ глаго́лахꙋ, не довѣ́дѧще сло́ва: тѣ́мже по си́хъ глаго́летъ ꙗ҆́вѣ и҆́мѧ преда́телѧ.
Є҆гда̀ сїѧ̑ речѐ сꙋдїѧ̀ всѣ́хъ, на го́рꙋ є҆леѡ́нскꙋю ше́дъ со ᲂу҆ч҃нки̑, тогда̀ ᲂу҆́бѡ глаго́лаше: прїиди́те и҆ по́йдемъ ѿсю́дꙋ, приспѣ́ бо ᲂу҆жѐ преда́тель: никто́же ѿве́ржисѧ менє̀, во́лею бо страждꙋ̀.
Ѽ льсти́внагѡ лобза́нїѧ! ра́дꙋйсѧ, ᲂу҆ч҃тлю: хрⷭ҇тꙋ̀ і҆ꙋ́да глаго́летъ, и҆ вкꙋ́пѣ со сло́вомъ предае́тъ на заколе́нїе. сїе́ бо дадѐ зна́менїе беззакѡ́ннымъ: є҆го́же а҆́зъ лобжꙋ̀, то́й є҆́сть, є҆го́же преда́ти ва́мъ ѡ҆бѣща́хсѧ.
Ꙗ҆́тъ бы́въ, бж҃е на́шъ, ѿ беззако́нныхъ люде́й, и҆ не пререкꙋ́ѧ ѿню́дъ, ни вопїѧ̀, а҆́гнче бж҃їй, претерпѣ́лъ є҆сѝ всѧ̑, и҆спыта́тисѧ, и҆ сꙋди́тисѧ, бїе́нъ бы́ти, свѧ́занъ и҆ ведо́мъ бы́ти со ѡ҆рꙋ̑жїи и҆ дреко́льми къ каїа́фѣ.
Да ра́спнетсѧ і҆и҃съ хрⷭ҇то́съ, вопїѧ́хꙋ є҆вре́йстїи лю́дїе со сщ҃є́нники и҆ кни́жники. ѽ лю́дїе невѣ́рнїи! что́ бо сотворѝ ꙗ҆ви́выйсѧ, воздви́гнꙋвый ла́зарѧ ѿ гро́ба и҆ пꙋ́ть сотвори́вый человѣ́кѡмъ ко сп҃се́нїю;
Пїла́товꙋ сꙋди́лищꙋ беззако́ннїи лю́дїе крича́ще вопїѧ́хꙋ: распнѝ сего̀, ѿпꙋсти́ же на́мъ свѧ́зана сꙋ́ща вара́ввꙋ ᲂу҆бі́йцꙋ: хрⷭ҇та́ же пе́рвѣе би́въ, возьмѝ, возьмѝ, распнѝ со ѕлодѣ̑и.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Ѽ несказа́ннагѡ и҆стоща́нїѧ! ѽ неизглаго́ланнагѡ совѣ́та! занѐ, ѻ҆́гнь сы́й, ѡ҆мы́лъ є҆сѝ но́зѣ преда́телю, сп҃се, ѡ҆мы́въ же не ѡ҆пали́лъ є҆сѝ: и҆ подава́ѧ хлѣ́бъ на ве́чери, и҆ та́инственнѣй слꙋ́жбѣ наꙋча́лъ є҆сѝ.
Бг҃оро́диченъ: Ѽ но́вагѡ слы́шанїѧ! бг҃ъ сн҃ъ жены̀ и҆ безсѣ́менна ржⷭ҇тва̀, безмꙋ́жнаѧ мт҃и, и҆ рожде́нное бг҃ъ. ѽ ᲂу҆жа́снагѡ слы́шанїѧ! ѽ зача́тїѧ стра́шнагѡ! ѽ дв҃ы нетлѣ́ннагѡ ржⷭ҇тва̀! вои́стиннꙋ па́че ᲂу҆ма̀ всѧ̑, и҆ вы́ше вѣ́дѣнїѧ.
Пѣ́снь ѳ҃.
І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ въ домꙋ̀ дв҃да ѻ҆́трока своегѡ̀, внегда̀ посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Па́ки вы̀ спитѐ, хрⷭ҇то́съ ᲂу҆ч҃нкѡ́мъ речѐ: бди́те, ᲂу҆жѐ прибли́жисѧ ча́съ: воста́ните, и҆́демъ, дрꙋ́зи моѝ: сѐ преда́тель ᲂу҆чени́къ, всю̀ спі́рꙋ и҆мѣ́ѧ, грѧде́тъ преда́ти мѧ̀ человѣкоꙋбі́йцамъ.
Лобза́нїе твоѐ льсти́вно, и҆ цѣлова́нїе го́рько! комꙋ̀ бо зове́ши, ле́стче, глаго́лѧ: ра́дꙋйсѧ, равві̀; хрⷭ҇то́съ ко і҆ꙋ́дѣ вѣща́ше: дрꙋ́же, творѝ, на не́же прише́лъ є҆сѝ: а҆́ще бо цѣлова́ти прише́лъ є҆сѝ, что̀ предлага́еши но́жъ ме́домъ пома́занный;
Пїла́товꙋ сꙋди́лищꙋ во́лею прише́лъ є҆сѝ предста́ти непови́нный сꙋдїѧ̀, хрⷭ҇тѐ, и҆ и҆зба́вити на́съ ѿ долгѡ́въ на́шихъ: тѣ́мже претерпѣ́лъ є҆сѝ, бл҃же, пло́тїю бїе́нъ бы́ти, да всѝ прїи́мемъ свобожде́нїе.
Милосе́рдїѧ пꙋчи́на! ка́кѡ предстои́тъ ѻ҆́гнь пїла́тꙋ, сѣ́нꙋ и҆ тро́сти и҆ землѝ сꙋ́щей, є҆гѡ́же не ѡ҆палѝ ѻ҆́гнь бж҃ества̀ хрⷭ҇то́съ; но пожида́ше терпѣли́внѡ, є҆стество́мъ сы́й свобо́дь, ꙗ҆́кѡ чл҃вѣколю́бецъ.
Возьмѝ, возьмѝ, распнѝ глаго́лемаго хрⷭ҇та̀! і҆ꙋде́є взыва́хꙋ пїла́тꙋ нѣ́когда: се́й же рꙋ́цѣ ѡ҆мыва́ше, и҆ тро́стїю и҆̀мъ писа́ше на него̀ винꙋ̀, всѣ̑мъ да́рꙋющꙋю безсме́ртїе.
Вопїю́ще беззако́ннїи пїла́тꙋ и҆́злиха: возьмѝ, возьмѝ, распнѝ! хрⷭ҇та̀ просѧ́хꙋ ᲂу҆би́ти ꙗ҆́кѡ ѡ҆сꙋжде́на: не се́й ли воскресѝ мє́ртвыѧ, прокажє́нныѧ ѡ҆чи́сти, кровоточи́вꙋю и҆сцѣлѝ, разсла́блєнныѧ стѧгнꙋ́въ;
Ко́е ᲂу҆́бѡ ѕло̀ сотворѝ, ꙗ҆́кѡ взыва́ете вельмѝ: возьмѝ, возьмѝ, распнѝ є҆го̀; пїла́тъ нѣ́когда вопїѧ́ше лю́демъ неразꙋ̑мнымъ: вины̀ не ѡ҆брѣта́ю въ не́мъ. ѻ҆ни́ же го́рькѡ вопїѧ́хꙋ: возьмѝ, возьмѝ, распнѝ сп҃са всѣ́хъ.
Ѽ і҆ꙋде́є беззако́ннїи! ѽ неразꙋ́мнїи лю́дїе! не помѧнꙋ́сте ли что̀ ѿ чꙋде́съ хрⷭ҇то́выхъ, мно́жество и҆сцѣле́нїй; но и҆ всеѧ̀ є҆гѡ̀ не разꙋмѣ́сте ли бж҃е́ственныѧ си́лы; ꙗ҆́коже пе́рвѣе ѻ҆тцы̀ ва́ши, та́кѡ ны́нѣ и҆ вы̀ не разꙋмѣ́сте.
Сла́ва: Бїе́нъ бы́лъ є҆сѝ, зижди́телю мо́й, и҆ преда́лсѧ є҆сѝ менє̀ ра́ди распѧ́тисѧ, да сп҃се́нїе моѐ посредѣ̀ землѝ содѣ́лавъ, и҆сточи́ши мі́рови жи́знь и҆ ѡ҆безсме́ртиши чтⷭ҇но́ю твое́ю кро́вїю покланѧ́ющыѧсѧ тебѣ̀.
Бг҃оро́диченъ: А҆́гница твоѧ̀, влⷣко, предстоѧ́щи ᲂу҆ крⷭ҇та̀, и҆ рыда́ше ѡ҆ тебѣ̀ творцѣ̀ всѧ́ческихъ, зрѧ́щи твоѐ долготерпѣ́нїе: во́лею бо роди́лсѧ є҆сѝ пло́тїю, и҆ стрⷭ҇ти всѧ̑ въ не́й претерпѣ́лъ є҆сѝ, да сп҃се́ши мі́ръ.
Послѣ́дованїе
ст҃ы́хъ и҆ сп҃си́тельныхъ стрⷭ҇те́й
гдⷭ҇а на́шегѡ і҆и҃са хрⷭ҇та̀.
Во ст҃ы́й и҆ вели́кїй четверто́къ ве́чера,
во в҃-й ча́съ но́щи зна́менꙋетъ. И҆ собра́вшымсѧ на́мъ во хра́мъ, бл҃гослови́вшꙋ сщ҃е́нникꙋ, пое́мъ нача́ло по ѡ҆бы́чаю, ꙗ҆́коже ᲂу҆каза́сѧ въ четверто́къ є҃-ѧ седми́цы. Та́же шестоѱа́лмїе. Посе́мъ є҆ктенїа̀ вели́каѧ, и҆ по возгла́сѣ пое́мъ: А҆ллилꙋ́їа, на гла́съ и҃. И҆ тропа́рь: Є҆гда̀ сла́внїи ᲂу҆ч҃нцы̀: три́жды, ко́снѡ и҆ со сладкопѣ́нїемъ [пи́санъ въ вели́кїй четверто́къ на ᲂу҆́трени]. Та́же, є҆ктенїа̀ ма́лаѧ. И҆ даю́тсѧ свѣщы̀ бра́тїи ѿ є҆кклисїа́рха. И҆ глаго́летъ сщ҃е́нникъ: И҆ ѡ҆ сподо́битисѧ на́мъ: И҆ чте́тъ пе́рвое є҆ѵⷢ҇лїе ѿ і҆ѡа́нна, завѣ́та ст҃ы́хъ стрⷭ҇те́й, зача́ло м҃ѕ: Речѐ гдⷭ҇ь свои̑мъ ᲂу҆ч҃нкѡ́мъ: ны́нѣ просла́висѧ сн҃ъ чл҃вѣ́ческїй: Коне́цъ: И҆ ᲂу҆ч҃нцы̀ є҆гѡ̀. И҆ сконча́вшꙋсѧ є҆ѵⷢ҇лїю, пое́мъ: Сла́ва долготерпѣ́нїю твоемꙋ̀, гдⷭ҇и.
И҆ а҆́бїе пое́мъ а҆нтїфѡ́ны, повторѧ́юще всѧ̑ тропарѝ.
А҆нтїфѡ́нъ а҃, гла́съ и҃:
Кнѧ́зи лю́дстїи собра́шасѧ на гдⷭ҇а и҆ на хрⷭ҇та̀ є҆гѡ̀.
Сло́во законопрестꙋ́пное возложи́ша на мѧ̀: гдⷭ҇и, гдⷭ҇и, не ѡ҆ста́ви менѐ.
Чꙋ̑вствїѧ на̑ша чи̑ста хрⷭ҇то́ви предста́вимъ, и҆ ꙗ҆́кѡ дрꙋ́зи є҆гѡ̀, дꙋ́шы на́шѧ въ же́ртвꙋ дади́мъ за него̀, и҆ не соꙋгнета́имсѧ попече́ньми жите́йскими ꙗ҆́кѡ і҆ꙋ́да, но въ клѣ́техъ на́шихъ возопїи́мъ: ѻ҆́ч҃е на́шъ, и҆́же на нб҃сѣ́хъ, ѿ лꙋка́вагѡ и҆зба́ви на́съ.
Сла́ва, бг҃оро́диченъ: Дв҃а родила̀ є҆сѝ, неискꙋсобра́чнаѧ, и҆ дв҃а пребыла̀ є҆сѝ, мт҃и безневѣ́стнаѧ, бцⷣе мр҃і́е: хрⷭ҇та̀ бг҃а на́шего молѝ сп҃сти́сѧ на́мъ.
И҆ ны́нѣ, то́йже.
А҆нтїфѡ́нъ в҃, гла́съ ѕ҃:
Течѐ і҆ꙋ́да, глаго́лѧ беззакѡ́ннымъ кни́жникѡмъ: что̀ мнѣ̀ хо́щете да́ти, и҆ а҆́зъ ва́мъ преда́мъ є҆го̀; посредѣ̀ же совѣщава́ющихъ са́мъ стоѧ́лъ є҆сѝ неви́димѡ совѣщава́емый. сердцевѣ́дче, пощадѝ дꙋ́шы на́шѧ.
Млⷭ҇тїю бг҃ови послꙋ́жимъ, ꙗ҆́коже марі́а на ве́чери, и҆ не стѧ́жимъ сребролю́бїѧ, ꙗ҆́кѡ і҆ꙋ́да: да всегда̀ со хрⷭ҇то́мъ бг҃омъ бꙋ́демъ.
Сла́ва, бг҃оро́диченъ: Є҆го́же родила̀ є҆сѝ, дв҃о, неизрече́ннѡ, всегда̀ ꙗ҆́кѡ чл҃вѣколю́бца не преста́й молѧ́щи, да ѿ бѣ́дъ сп҃се́тъ къ тебѣ̀ прибѣга́ющыѧ.
И҆ ны́нѣ, то́йже.
А҆нтїфѡ́нъ г҃, гла́съ в҃:
Ла́зарева ра́ди воста́нїѧ, гдⷭ҇и, ѡ҆са́нна тебѣ̀ зва́хꙋ дѣ́ти є҆врє́йскїѧ, чл҃вѣколю́бче. беззако́нный же і҆ꙋ́да не восхотѣ̀ разꙋмѣ́ти.
На ве́чери твое́й, хрⷭ҇тѐ бж҃е, ᲂу҆ч҃нкѡ́мъ твои̑мъ предглаго́лалъ є҆сѝ: є҆ди́нъ ѿ ва́съ преда́стъ мѧ̀. беззако́нный же і҆ꙋ́да не восхотѣ̀ разꙋмѣ́ти.
І҆ѡа́ннꙋ вопроси́вшꙋ: гдⷭ҇и, предаѧ́й тѧ̀ кто́ є҆сть; того̀ хлѣ́бомъ показа́лъ є҆сѝ. беззако́нный же і҆ꙋ́да не восхотѣ̀ разꙋмѣ́ти.
На три́десѧтихъ сре́бреницѣхъ, гдⷭ҇и, и҆ на лобза́нїи льсти́внѣмъ и҆ска́хꙋ і҆ꙋде́є ᲂу҆би́ти тѧ̀. беззако́нный же і҆ꙋ́да не восхотѣ̀ разꙋмѣ́ти.
На ᲂу҆мове́нїи твое́мъ, хрⷭ҇тѐ бж҃е, ᲂу҆ч҃нкѡ́мъ твои̑мъ повелѣ́лъ є҆сѝ: си́це твори́те, ꙗ҆́коже ви́дѣсте. беззако́нный же і҆ꙋ́да не восхотѣ̀ разꙋмѣ́ти.
Бди́те и҆ моли́тесѧ, да не вни́дете въ напа́сть: ᲂу҆ч҃нкѡ́мъ твои̑мъ, бж҃е на́шъ, глаго́лалъ є҆сѝ. беззако́нный же і҆ꙋ́да не восхотѣ̀ разꙋмѣ́ти.
Сла́ва, бг҃оро́диченъ: Сп҃сѝ ѿ бѣ́дъ рабы̑ твоѧ̑, бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ нерꙋши́мѣй стѣнѣ̀ и҆ предста́тельствꙋ.
И҆ ны́нѣ, то́йже.
Та́же є҆ктенїа̀ ма́лаѧ и҆, по возгла́сѣ, сѣда́ленъ. [Не сѣди́мъ же на сицевы́хъ сѣда́льнахъ, поне́же сщ҃е́нникъ кади́тъ ст҃ы́й ѻ҆лта́рь, но стоѧ́ще пое́мъ ѧ҆̀.] Гла́съ з҃:
На ве́чери ᲂу҆ч҃нкѝ пита́ѧ и҆ ᲂу҆мышле́нїе преда́нїѧ вѣ́дый, на не́й і҆ꙋ́дꙋ ѡ҆бличи́лъ є҆сѝ, вѣ́дый ᲂу҆́бѡ сего̀ неисправи́ма, хотѧ̀ же, да всѝ позна́ютъ, ꙗ҆́кѡ во́лею преда́лсѧ є҆сѝ, да мі́ръ и҆схити́ши ѿ чꙋжда́гѡ. долготерпѣли́ве, сла́ва тебѣ̀.
Сла́ва, коне́цъ. И҆ ны́нѣ, ве́сь. Та́же: И҆ ѡ҆ сподо́битисѧ на́мъ: И҆ чте́тъ сщ҃е́нникъ второ́е є҆ѵⷢ҇лїе, ѿ і҆ѡа́нна, зача́ло н҃и: Во вре́мѧ ѻ҆́но, и҆зы́де і҆и҃съ со ᲂу҆ч҃нкѝ: Коне́цъ: Но да ꙗ҆дѧ́тъ фа́скꙋ.
По є҆ѵⷢ҇лїи же пое́мъ а҆нтїфѡ́нъ д҃.
Гла́съ є҃: Дне́сь і҆ꙋ́да ѡ҆ставлѧ́етъ ᲂу҆ч҃тлѧ, и҆ прїе́млетъ дїа́вола, ѡ҆слѣплѧ́етсѧ стра́стїю сребролю́бїѧ, ѿпа́даетъ ѿ свѣ́та ѡ҆мраче́нный: ка́кѡ бо можа́ше зрѣ́ти прода́вый свѣти́ло на три́десѧтихъ сре́бреницѣхъ; но на́мъ возсїѧ̀ пострада́вый за мі́ръ, къ немꙋ́же возопїи́мъ: пострада́вый и҆ сострада́вый человѣ́кѡмъ, гдⷭ҇и, сла́ва тебѣ̀.
Дне́сь і҆ꙋ́да прїе́млетъ личи́нꙋ бг҃оче́стїѧ, и҆ ѿчꙋжда́етсѧ дарова́нїѧ: сы́й ᲂу҆чени́къ, быва́етъ преда́тель: во ѡ҆бы́чнѣмъ лобза́нїи ле́сть сокрыва́етъ, и҆ предпочита́етъ влⷣчней любвѝ несмы́сленнѡ рабо́тати сребролю́бїю, во́ждь бы́въ собо́рища беззако́ннагѡ. мы́ же, и҆мꙋ́ще сп҃се́нїе хрⷭ҇та̀, того̀ просла́вимъ.
Гла́съ а҃: Братолю́бїе стѧ́жимъ ꙗ҆́кѡ во хрⷭ҇тѣ̀ бра́тїѧ, а҆ не жестосе́рдїе ко бли̑жнимъ на́шымъ: да не ѡ҆сꙋ́димсѧ ꙗ҆́кѡ ра́бъ неми́лостивый, пѣ́нѧзей ра́ди, и҆ ꙗ҆́кѡ і҆ꙋ́да раска́ѧвшесѧ, ничи́мже по́льзꙋемсѧ.
Сла́ва, бг҃оро́диченъ: Пресла̑внаѧ ѡ҆ тебѣ̀ глаго́лашасѧ вездѣ̀, ꙗ҆́кѡ родила̀ є҆сѝ пло́тїю всѣ́хъ творца̀, бцⷣе мр҃і́е всепѣ́таѧ и҆ неискꙋсобра́чнаѧ.
И҆ ны́нѣ, то́йже.
А҆нтїфѡ́нъ є҃, гла́съ ѕ҃:
Оу҆чени́къ соглаша́шесѧ ѡ҆ цѣнѣ̀ ᲂу҆ч҃тлѧ, и҆ на три́десѧтихъ сре́бреницѣхъ продадѐ гдⷭ҇а, лобза́нїемъ льсти́внымъ преда́въ є҆го̀ беззако́нникѡмъ на сме́рть.
Дне́сь глаго́лаше зижди́тель нб҃сѐ и҆ землѝ свои̑мъ ᲂу҆ченикѡ́мъ: прибли́жисѧ ча́съ, и҆ приспѣ̀ і҆ꙋ́да предаѧ́й менѐ: да никто́же ѿве́ржетсѧ менє̀, ви́дѧ мѧ̀ на крⷭ҇тѣ̀ посредѣ̀ двою̀ разбѡ́йникꙋ: страждꙋ́ бо ꙗ҆́кѡ чл҃вѣ́къ, и҆ сп҃са́ю ꙗ҆́кѡ чл҃вѣколю́бецъ въ мѧ̀ вѣ́рꙋющыѧ.
Сла́ва, бг҃оро́диченъ: Неизрече́ннѡ въ послѣ̑днѧѧ заче́ншаѧ и҆ ро́ждшаѧ созда́телѧ твоего̀, дв҃о, сп҃са́й тѧ̀ велича̀ющыѧ.
И҆ ны́нѣ, то́йже.
А҆нтїфѡ́нъ ѕ҃, гла́съ з҃:
Дне́сь бди́тъ і҆ꙋ́да преда́ти гдⷭ҇а, превѣ́чнаго сп҃са мі́ра, ѿ пѧтѝ хлѣ̑бъ насы́тившаго мно́жєства. дне́сь беззако́нный ѿверга́етсѧ ᲂу҆ч҃тлѧ: ᲂу҆чени́къ бы́въ, влⷣкꙋ предадѐ: сребро́мъ продадѐ насы́тившаго ма́нною человѣ́ка.
Дне́сь ко крⷭ҇тꙋ̀ пригвозди́ша і҆ꙋде́є гдⷭ҇а, пресѣ́кшаго мо́ре жезло́мъ и҆ прове́дшаго и҆́хъ въ пꙋсты́ни. дне́сь копїе́мъ прободо́ша ре́бра є҆гѡ̀, ꙗ҆́звами порази́вшагѡ за ни́хъ є҆гѵ́петъ: и҆ же́лчїю напои́ша въ пи́щꙋ и҆̀мъ ма́ннꙋ ѡ҆дожди́вшаго.
Гдⷭ҇и, на стрⷭ҇ть во́льнꙋю прише́дъ, вопїѧ́лъ є҆сѝ ᲂу҆ч҃нкѡ́мъ твои̑мъ: а҆́ще и҆ є҆ди́нагѡ часа̀ не возмого́сте побдѣ́ти со мно́ю, ка́кѡ ѡ҆бѣща́стесѧ ᲂу҆мре́ти менє̀ ра́ди; понѐ і҆ꙋ́дꙋ зри́те, ка́кѡ не спи́тъ, но тщи́тсѧ преда́ти мѧ̀ беззакѡ́ннымъ. воста́ните, моли́тесѧ, да не кто̀ менє̀ ѿве́ржетсѧ, зрѧ̀ менѐ на крⷭ҇тѣ̀. долготерпѣли́ве, сла́ва тебѣ̀.
Сла́ва, бг҃оро́диченъ: Ра́дꙋйсѧ, бцⷣе, невмѣсти́маго въ нб҃сѣ́хъ вмѣсти́вшаѧ во ᲂу҆тро́бѣ твое́й: ра́дꙋйсѧ, дв҃о, прⷪ҇ро́кѡвъ проповѣ́данїе, є҆́юже на́мъ возсїѧ̀ є҆мманꙋ́илъ: ра́дꙋйсѧ, мт҃и хрⷭ҇та̀ бг҃а.
И҆ ны́нѣ, то́йже.
Є҆ктенїа̀. Сѣда́ленъ, гла́съ з҃: Кі́й тѧ̀ ѡ҆́бразъ, і҆ꙋ́до, преда́телѧ сп҃сꙋ содѣ́ла; є҆да̀ ѿ ли́ка тѧ̀ а҆пⷭ҇льска разлꙋчѝ; є҆да̀ дарова́нїѧ и҆сцѣле́нїй лишѝ; є҆да̀, со ѻ҆́нѣми вечерѧ́въ, тебѐ ѿ трапе́зы ѿри́нꙋ; є҆да̀, и҆ны́хъ но́ги ᲂу҆мы́въ, твои́ презрѣ̀; ѽ коли́кихъ бла̑гъ непа́мѧтливъ бы́лъ є҆сѝ! и҆ тво́й ᲂу҆́бѡ неблагода́рный ѡ҆блича́етсѧ нра́въ, тогѡ́ же безмѣ́рное проповѣ́дꙋетсѧ долготерпѣ́нїе и҆ ве́лїѧ млⷭ҇ть.
Сла́ва, и҆ ны́нѣ, то́йже.
Є҆ѵⷢ҇лїе г҃-е, ѿ матѳе́а, зача́ло р҃ѳ: Во вре́мѧ ѻ҆́но, во́ини є҆́мше і҆и҃са ведо́ша къ каїа́фѣ а҆рхїере́ови: Коне́цъ: Пла́касѧ го́рькѡ.
А҆нтїфѡ́нъ з҃, гла́съ и҃:
Є҆́мшымъ тѧ̀ беззакѡ́ннымъ, претерпѣва́ѧ, си́це вопїѧ́лъ є҆сѝ, гдⷭ҇и: а҆́ще и҆ порази́сте па́стырѧ и҆ разсѣ́ѧсте двана́десѧть ѻ҆ве́цъ ᲂу҆ч҃нкѝ моѧ̑, можа́хъ вѧ́щше не́же двана́десѧте легеѡ́нѡвъ предста́вити а҆́гг҃лѡвъ: но долготерплю̀, да и҆спо́лнѧтсѧ, ꙗ҆̀же ꙗ҆ви́хъ ва́мъ прⷪ҇рѡ́ки мои́ми, безвѣ̑стнаѧ и҆ та̑йнаѧ. гдⷭ҇и, сла́ва тебѣ̀.
Трети́цею ѿве́ргсѧ, пе́тръ а҆́бїе рече́нное є҆мꙋ̀ разꙋмѣ̀, но принесѐ тебѣ̀ сле́зы покаѧ́нїѧ: бж҃е, млⷭ҇тивъ бꙋ́ди мѝ и҆ сп҃си́ мѧ.
Сла́ва, бг҃оро́диченъ: Ꙗ҆́кѡ врата̀ сп҃си́тєльнаѧ, и҆ ра́й кра́сный, и҆ свѣ́та присносꙋ́щнагѡ ѡ҆́блакъ сꙋ́щꙋю, ст҃ꙋ́ю дв҃ꙋ воспои́мъ всѝ, глаго́люще є҆́й: ра́дꙋйсѧ.
И҆ ны́нѣ, то́йже.
А҆нтїфѡ́нъ и҃, гла́съ в҃:
Рцы́те, беззако́ннїи, что̀ слы́шасте ѿ сп҃са на́шегѡ; не зако́нъ ли положѝ, и҆ прⷪ҇ро́чєскаѧ ᲂу҆чє́нїѧ; ка́кѡ ᲂу҆̀бо помы́слисте пїла́тꙋ преда́ти ѿ бг҃а бг҃а сло́ва и҆ и҆зба́вителѧ дꙋ́шъ на́шихъ;
Да ра́спнетсѧ, вопїѧ́хꙋ твои́хъ дарова́нїй при́снѡ наслажда́ющїисѧ, и҆ ѕлодѣ́ѧ вмѣ́стѡ бл҃годѣ́телѧ проша́хꙋ прїѧ́ти ᲂу҆бі̑йцы првⷣникѡвъ: молча́лъ же є҆сѝ, хрⷭ҇тѐ, терпѧ̀ и҆́хъ дѐрзость, пострада́ти хотѧ̀ и҆ сп҃стѝ на́съ, ꙗ҆́кѡ чл҃вѣколю́бецъ.
Сла́ва, бг҃оро́диченъ: Ꙗ҆́кѡ не и҆́мамы дерзнове́нїѧ за премнѡ́гїѧ грѣхѝ на́шѧ, ты̀ ѿ тебє̀ ро́ждшагосѧ молѝ, бцⷣе дв҃о: мно́гѡ бо мо́жетъ моле́нїе мт҃рнее ко ᲂу҆милостивле́нїю влⷣки. не пре́зри грѣ́шныхъ мѡльбы̀, всечⷭ҇таѧ, ꙗ҆́кѡ млⷭ҇тивъ є҆́сть и҆ сп҃са́ти могі́й, за на́съ и҆ пострада́ти и҆зво́ливый.
И҆ ны́нѣ, то́йже.
А҆нтїфѡ́нъ ѳ҃, гла́съ г҃:
Поста́виша три́десѧть сре́брєникъ цѣ́нꙋ цѣне́ннагѡ, є҆го́же ѡ҆цѣни́ша ѿ сынѡ́въ і҆и҃левыхъ. бди́те и҆ моли́тесѧ, да не вни́дете во и҆скꙋше́нїе: дꙋ́хъ ᲂу҆́бѡ бо́дръ, пло́ть же немощна̀: сегѡ̀ ра́ди бди́те.
Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта: ты́ же, гдⷭ҇и, возста́ви мѧ̀, и҆ возда́мъ и҆̀мъ.
Сла́ва, бг҃оро́диченъ: Сꙋ́щїи ѿ ꙗ҆зы̑къ пое́мъ тѧ̀, бцⷣе чтⷭ҇аѧ, ꙗ҆́кѡ хрⷭ҇та̀ бг҃а на́шего родила̀ є҆сѝ, ѿ клѧ́твы человѣ́ки тобо́ю свободи́вшаго.
И҆ ны́нѣ, то́йже.
Є҆ктенїа̀. Сѣда́ленъ, гла́съ и҃: Ѽ ка́кѡ і҆ꙋ́да, пре́жде тво́й ᲂу҆чени́къ, преда́тельство ᲂу҆мышлѧ́ше на тѧ̀! свечерѧ̀ льсти́внѡ навѣ́тникъ и҆ непра́ведникъ, ше́дъ речѐ сщ҃е́нникѡмъ: что́ ми подае́те, и҆ преда́мъ ва́мъ ѻ҆́наго, зако́нъ разори́вшаго и҆ ѡ҆скверни́вшаго сꙋббѡ́тꙋ; долготерпѣли́ве гдⷭ҇и, сла́ва тебѣ̀.
Сла́ва, и҆ ны́нѣ, то́йже.
Є҆ѵⷢ҇лїе д҃-е, ѿ і҆ѡа́нна, зача́ло н҃ѳ: Во вре́мѧ ѻ҆́но, ведо́ша і҆и҃са ѿ каїа́фы въ претѡ́ръ. Коне́цъ: Предадѐ є҆го̀ и҆̀мъ, да ра́спнетсѧ.
А҆нтїфѡ́нъ і҃, гла́съ ѕ҃:
Ѡ҆дѣѧ́йсѧ свѣ́томъ ꙗ҆́кѡ ри́зою, на́гъ на сꙋдѣ̀ стоѧ́ше, и҆ въ лани́тꙋ ᲂу҆даре́нїе прїѧ́тъ ѿ рꙋ́къ, ꙗ҆̀же созда̀: беззако́ннїи же лю́дїе на крⷭ҇тѣ̀ пригвозди́ша гдⷭ҇а сла́вы: тогда̀ завѣ́са цр҃ко́внаѧ раздра́сѧ, со́лнце поме́рче, не терпѧ̀ зрѣ́ти бг҃а досажда́ема, є҆гѡ́же трепе́щꙋтъ всѧ́чєскаѧ. томꙋ̀ поклони́мсѧ.
Оу҆чени́къ ѿве́ржесѧ, разбо́йникъ возопѝ: помѧни́ мѧ, гдⷭ҇и, во црⷭ҇твїи твое́мъ.
Сла́ва, бг҃оро́диченъ: Оу҆мирѝ мі́ръ, гдⷭ҇и, ѿ дв҃ы и҆зво́ливый пло́ть носи́ти за рабы̑, да согла́снѡ тебѐ славосло́вимъ, чл҃вѣколю́бче.
И҆ ны́нѣ, то́йже.
А҆нтїфѡ́нъ а҃і, гла́съ ѕ҃:
За бл҃га̑ѧ, ꙗ҆̀же сотвори́лъ є҆сѝ, хрⷭ҇тѐ, ро́дꙋ є҆вре́йскомꙋ, распѧ́ти тѧ̀ ѡ҆сꙋди́ша, ѻ҆́цтомъ и҆ же́лчїю напои́вше тѧ̀. но да́ждь и҆̀мъ, гдⷭ҇и по дѣлѡ́мъ и҆́хъ, ꙗ҆́кѡ не разꙋмѣ́ша твоегѡ̀ снизхожде́нїѧ.
Ѡ҆ преда́тельствѣ не дово́льни бы́ша, хрⷭ҇тѐ, ро́ди є҆вре́йстїи, но покива́хꙋ глава́ми свои́ми, хꙋлꙋ̀ и҆ рꙋга́нїе приносѧ́ще. но да́ждь и҆̀мъ, гдⷭ҇и, по дѣлѡ́мъ и҆́хъ, ꙗ҆́кѡ не разꙋмѣ́ша твоегѡ̀ снизхожде́нїѧ.
Нижѐ землѧ̀, є҆гда̀ потрѧсе́сѧ, нижѐ ка́менїе, є҆гда̀ разсѣдо́шасѧ, є҆вре́ѡвъ ᲂу҆вѣща́ша, нижѐ цр҃ко́внаѧ завѣ́са, нижѐ ме́ртвыхъ воскрⷭ҇нїе. но да́ждь и҆̀мъ, гдⷭ҇и, по дѣлѡ́мъ и҆́хъ, ꙗ҆́кѡ тщє́тнаѧ на тѧ̀ ᲂу҆мы́слиша.
Сла́ва, бг҃оро́диченъ: Бг҃а ѿ тебє̀ воплоще́ннаго позна́хомъ, бцⷣе дв҃о, є҆ди́на чтⷭ҇аѧ, є҆ди́на бл҃гослове́ннаѧ: тѣ́мже непреста́ннѡ тѧ̀ воспѣва́юще велича́емъ.
И҆ ны́нѣ, то́йже.
А҆нтїфѡ́нъ в҃і, гла́съ и҃:
Сїѧ̑ глаго́летъ гдⷭ҇ь і҆ꙋде́ѡмъ: лю́дїе моѝ, что̀ сотвори́хъ ва́мъ; и҆лѝ чи́мъ ва́мъ досади́хъ; слѣпцы̀ ва́шѧ просвѣти́хъ, прокажє́нныѧ ва́шѧ ѡ҆чи́стихъ, мꙋ́жа сꙋ́ща на ѻ҆дрѣ̀ возста́вихъ. лю́дїе моѝ, что̀ сотвори́хъ ва́мъ: и҆ что́ мнѣ̀ возда́сте; за ма́ннꙋ же́лчь: за во́дꙋ ѻ҆́цетъ: вмѣ́стѡ любвѐ ко мнѣ̀, ко крⷭ҇тꙋ́ мѧ пригвозди́сте. ᲂу҆жѐ не терплю̀ бо́лѣе: призовꙋ̀ моѧ̑ ꙗ҆зы́ки, и҆ ті́и мѧ̀ просла́вѧтъ со ѻ҆ц҃е́мъ и҆ дх҃омъ: и҆ а҆́зъ и҆̀мъ да́рꙋю жи́знь вѣ́чнꙋю.
Дне́сь цр҃ко́внаѧ завѣ́са на ѡ҆бличе́нїе беззако́нныхъ раздира́етсѧ, и҆ со́лнце лꙋчы̀ своѧ̑ скрыва́етъ, влⷣкꙋ зрѧ̀ распина́ема.
Законополо́жницы і҆и҃лєвы, і҆ꙋде́є и҆ фарїсе́є, ли́къ а҆пⷭ҇льскїй вопїе́тъ къ ва́мъ: сѐ хра́мъ, є҆го́же вы̀ разори́сте: сѐ а҆́гнецъ, є҆го́же вы̀ распѧ́сте и҆ гро́бꙋ преда́сте, но вла́стїю свое́ю воскре́се. не прельща́йтесѧ, і҆ꙋде́є: то́й бо є҆́сть въ мо́ри сп҃сы́й и҆ въ пꙋсты́ни пита́вый: то́й є҆́сть жи́знь, и҆ свѣ́тъ, и҆ ми́ръ мі́рови.
Сла́ва, бг҃оро́диченъ: Ра́дꙋйсѧ, две́рь цр҃ѧ̀ сла́вы, ю҆́же вы́шнїй є҆ди́нъ про́йде, и҆ па́ки запеча́танꙋ ѡ҆ста́ви, во сп҃се́нїе дꙋ́шъ на́шихъ.
И҆ ны́нѣ, то́йже.
Є҆ктенїа̀. Сѣда́ленъ, гла́съ и҃: Є҆гда̀ предста́лъ є҆сѝ каїа́фѣ, бж҃е, и҆ пре́данъ бы́лъ є҆сѝ пїла́тꙋ, сꙋдїѐ, нбⷭ҇ныѧ си̑лы ѿ стра́ха поколеба́шасѧ: тогда́ же возне́слсѧ є҆сѝ на дре́во посредѣ̀ двою̀ разбѡ́йникꙋ, и҆ вмѣни́лсѧ є҆сѝ со беззако́нными безгрѣ́шный, за сп҃се́нїе человѣ́ка. неѕло́биве гдⷭ҇и, сла́ва тебѣ̀.
Сла́ва, и҆ ны́нѣ, то́йже.
Є҆ѵⷢ҇лїе є҃-е, ѿ матѳе́а, зача́ло ра҃і: Во вре́мѧ ѻ҆́но, ви́дѣвъ і҆ꙋ́да преда́вый і҆и҃са: Коне́цъ: Понестѝ крⷭ҇тъ є҆гѡ̀.
А҆нтїфѡ́нъ г҃і, гла́съ ѕ҃:
Собо́рище і҆ꙋде́йское ᲂу҆ пїла́та и҆спроси́ша распѧ́ти тѧ̀, гдⷭ҇и: вины́ бо въ тебѣ̀ не ѡ҆брѣ́тше, пови́ннаго вара́ввꙋ свободи́ша, и҆ тебѐ првⷣнаго ѡ҆сꙋди́ша, скве́рнагѡ ᲂу҆бі́йства грѣ́хъ наслѣ́довавше. но да́ждь и҆̀мъ, гдⷭ҇и, воздаѧ́нїе и҆́хъ, ꙗ҆́кѡ тщє́тнаѧ на тѧ̀ ᲂу҆мы́слиша.
Є҆гѡ́же всѧ̑ ᲂу҆жаса́ютсѧ и҆ трепе́щꙋтъ, и҆ всѧ́къ ꙗ҆зы́къ пое́тъ, хрⷭ҇та̀ бж҃їю си́лꙋ и҆ бж҃їю премꙋ́дрость, сщ҃е́нницы въ лани́тꙋ ᲂу҆да́риша и҆ да́ша є҆мꙋ̀ же́лчь: и҆ всѧ̑ пострада́ти и҆зво́ли, сп҃сти́ хотѧ̀ ны ѿ беззако́нїй на́шихъ свое́ю кро́вїю, ꙗ҆́кѡ чл҃вѣколю́бецъ.
Сла́ва, бг҃оро́диченъ: Бцⷣе, ро́ждшаѧ сло́вомъ па́че сло́ва созда́телѧ твоего̀, того̀ молѝ сп҃стѝ дꙋ́шы на́шѧ.
И҆ ны́нѣ, то́йже.
А҆нтїфѡ́нъ д҃і, гла́съ и҃:
Гдⷭ҇и, спꙋ́тника прїе́мый разбо́йника, въ кро́ви рꙋ́цѣ ѡ҆скверни́вшаго, и҆ на́съ съ ни́мъ причтѝ, ꙗ҆́кѡ бл҃гъ и҆ чл҃вѣколю́бецъ.
Ма́лъ гла́съ и҆спꙋстѝ разбо́йникъ на крⷭ҇тѣ̀, ве́лїю вѣ́рꙋ ѡ҆брѣ́те, во є҆ди́номъ мгнове́нїи сп҃се́нъ бы́сть, и҆ пе́рвый ра̑йскаѧ врата̀ ѿве́рзъ вни́де: тогѡ̀ покаѧ́нїе воспрїе́мый, гдⷭ҇и, сла́ва тебѣ̀.
Сла́ва, бг҃оро́диченъ: Ра́дꙋйсѧ, а҆́гг҃ломъ ра́дость мі́ра прїе́мшаѧ: ра́дꙋйсѧ, ро́ждшаѧ творца̀ твоего̀ и҆ гдⷭ҇а: ра́дꙋйсѧ, сподо́бльшаѧсѧ бы́ти мт҃и бж҃їѧ.
И҆ ны́нѣ, то́йже.
А҆нтїфѡ́нъ є҃і, гла́съ ѕ҃:
Дне́сь ви́ситъ на дре́вѣ зе́млю на вода́хъ повѣ́сивый: вѣнце́мъ ѿ те́рнїѧ ѡ҆блага́етсѧ а҆́гг҃лѡвъ цр҃ь: въ ло́жнꙋю багрѧни́цꙋ ѡ҆дѣва́етсѧ ѡ҆дѣва́ѧй не́бо ѡ҆́блаки: заꙋше́нїе прїѧ́тъ свободи́вый во і҆ѻрда́нѣ а҆да́ма: гвоздьмѝ пригвозди́сѧ жени́хъ цр҃ко́вный: копїе́мъ прободе́сѧ сн҃ъ дв҃ы. покланѧ́емсѧ стрⷭ҇те́мъ твои̑мъ, хрⷭ҇тѐ: покланѧ́емсѧ стрⷭ҇те́мъ твои̑мъ, хрⷭ҇тѐ: покланѧ́емсѧ стрⷭ҇те́мъ твои̑мъ, хрⷭ҇тѐ. покажѝ на́мъ и҆ сла́вное твоѐ воскрⷭ҇нїе.
Не ꙗ҆́кѡ і҆ꙋде́є пра́зднꙋимъ: и҆́бо па́сха на́ша за ны̀ пожре́нъ бы́сть хрⷭ҇то́съ бг҃ъ. но ѡ҆чи́стимъ себѐ ѿ всѧ́кїѧ скве́рны, и҆ серде́чнѣ помо́лимсѧ є҆мꙋ̀: воскрⷭ҇нѝ, гдⷭ҇и, сп҃сѝ на́съ, ꙗ҆́кѡ чл҃вѣколю́бецъ.
Крⷭ҇тъ тво́й, гдⷭ҇и, жи́знь и҆ воскрⷭ҇нїе лю́демъ твои̑мъ є҆́сть, и҆ на́нь надѣ́ющесѧ, тебѐ распѧ́таго бг҃а на́шего пое́мъ: поми́лꙋй на́съ.
Сла́ва, бг҃оро́диченъ: Ви́дѧщи тѧ̀ ви́сѧща, хрⷭ҇тѐ, тебѐ ро́ждшаѧ вопїѧ́ше: что̀ є҆́сть стра́нное та́инство, є҆́же ви́ждꙋ, сн҃е мо́й; ка́кѡ на дре́вѣ ᲂу҆мира́еши пло́тїю пригвожда́емь, жи́зни пода́телю;
И҆ ны́нѣ, то́йже.
Є҆ктенїа̀. Сѣда́ленъ, гла́съ д҃: И҆скꙋпи́лъ ны̀ є҆сѝ ѿ клѧ́твы зако́нныѧ чтⷭ҇но́ю твое́ю кро́вїю: ко крⷭ҇тꙋ̀ пригвожде́нъ и҆ копїе́мъ прободе́нъ бы́въ, безсме́ртїе и҆сточи́лъ є҆сѝ человѣ́кѡмъ. сп҃се на́шъ, сла́ва тебѣ̀.
Сла́ва, и҆ ны́нѣ, то́йже.
Є҆ѵⷢ҇лїе ѕ҃-е, ѿ ма́рка, зача́ло ѯ҃з: Во вре́мѧ ѻ҆́но, во́ини ведо́ша і҆и҃са: Коне́цъ: Да ви́димъ, и҆ вѣ́рꙋ и҆́мемъ є҆мꙋ̀.
Та́же бл҃жє́нны, поста́вимъ стїхѡ́въ и҃, гла́съ д҃:
Во црⷭ҇твїи твое́мъ помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ.
Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.
Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Дре́ва ра́ди а҆да́мъ и҆з̾ раѧ̀ бы́сть и҆зселе́нъ: дре́вомъ же крⷭ҇тнымъ разбо́йникъ въ ра́й всели́сѧ. ѻ҆́въ ᲂу҆́бѡ, вкꙋси́въ, ѿве́рже за́повѣдь сотво́ршагѡ: ѻ҆́въ же, сраспина́емь, бг҃а тѧ̀ и҆сповѣ́да таѧ́щагосѧ. помѧнѝ и҆ на́съ, сп҃се, во црⷭ҇твїи твое́мъ.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Зако́нꙋ творца̀ ѿ ᲂу҆ченика̀ кꙋпи́ша беззако́ннїи, и҆ ꙗ҆́кѡ законопрестꙋ́пника, того̀ пїла́товꙋ сꙋди́лищꙋ предста́виша, зовꙋ́ще: распнѝ, въ пꙋсты́ни си̑мъ ма́ннꙋ да́вшаго. мы́ же првⷣномꙋ разбо́йникꙋ подража́вше, вѣ́рою зове́мъ: помѧнѝ и҆ на́съ, сп҃се, во црⷭ҇твїи твое́мъ.
Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
Бг҃оꙋбі́йцъ собо́рище, і҆ꙋде́йскїй наро́дъ беззако́нный, къ пїла́тꙋ неи́стовнѣ зовы́й, глаго́лаше: распнѝ хрⷭ҇та̀ непови́ннаго, вара́ввꙋ же па́че на́мъ ѿпꙋстѝ. мы́ же вѣща́имъ къ немꙋ̀ разбо́йника бл҃горазꙋ́мнагѡ гла́съ: помѧнѝ и҆ на́съ, сп҃се, во црⷭ҇твїи твое́мъ.
Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Живонѡ́снаѧ твоѧ̑ ре́бра, ꙗ҆́кѡ и҆сто́чникъ и҆з̾ є҆де́ма и҆стека́ѧй, цр҃ковь твою̀, хрⷭ҇тѐ, ꙗ҆́кѡ слове́сный ра́й напаѧ́ютъ, ѿсю́дꙋ раздѣлѧ̑ющасѧ ꙗ҆́кѡ въ нача̑ла въ четы́ри є҆ѵⷢ҇лїа, мі́ръ напаѧ̑юща, тва́рь веселѧ̑ща и҆ ꙗ҆зы́ки вѣ́рнѡ наꙋча̑юща покланѧ́тисѧ црⷭ҇твїю твоемꙋ̀.
Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
Ра́спѧтъ бы́лъ є҆сѝ менє̀ ра́ди, да мнѣ̀ и҆сточи́ши ѡ҆ставле́нїе: прободе́нъ бы́лъ є҆сѝ въ ре́бра, да и҆сто́чники жи́зни и҆сточи́ши мѝ: гвоздьмѝ пригвожде́нъ бы́лъ є҆сѝ, да а҆́зъ, глꙋбино́ю стрⷭ҇те́й твои́хъ въ высотѣ̀ держа́вы твоеѧ̀ ᲂу҆вѣрѧ́емь, зовꙋ́ ти, жизнода́вче хрⷭ҇тѐ: сла́ва и҆ крⷭ҇тꙋ̀, сп҃се, и҆ стрⷭ҇ти твое́й.
Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Распина́емꙋ тебѣ̀, хрⷭ҇тѐ, всѧ̀ тва́рь ви́дѧщи трепета́ше, ѡ҆снова̑нїѧ землѝ колеба́хꙋсѧ стра́хомъ держа́вы твоеѧ̀, свѣти̑ла скрыва́хꙋсѧ, и҆ раздра́сѧ цр҃ко́внаѧ завѣ́са, го́ры вострепета́ша, и҆ ка́менїе разсѣдо́шасѧ, и҆ разбо́йникъ вѣ́рный зове́тъ тѝ съ на́ми, сп҃се: помѧнѝ во црⷭ҇твїи твое́мъ.
Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менє̀ ра́ди.
Рꙋкописа́нїе на́ше на крⷭ҇тѣ̀ растерза́лъ є҆сѝ, гдⷭ҇и, и҆ вмѣни́всѧ въ ме́ртвыхъ, та́мошнѧго мꙋчи́телѧ свѧза́лъ є҆сѝ, и҆зба́вивъ всѣ́хъ ѿ ᲂу҆́зъ сме́рти воскрⷭ҇нїемъ твои́мъ, и҆́мже просвѣти́хомсѧ, чл҃вѣколю́бче гдⷭ҇и, и҆ вопїе́мъ тебѣ̀: помѧнѝ и҆ на́съ, сп҃се, во црⷭ҇твїи твое́мъ.
Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Вознесы́йсѧ на крⷭ҇тъ, и҆ сме́рти си́лꙋ разрꙋши́вый, и҆ и҆згла́дивый ꙗ҆́кѡ бг҃ъ бы́вшее на на́съ рꙋкописа́нїе, гдⷭ҇и, разбойничо покаѧ́нїе и҆ на́мъ пода́ждь, є҆ди́не чл҃вѣколю́бче, вѣ́рою слꙋжа́щымъ, хрⷭ҇те бж҃е на́шъ, и҆ вопїю́щымъ тебѣ̀: помѧнѝ и҆ на́съ, сп҃се, во црⷭ҇твїи твое́мъ.
Сла́ва: Ѻ҆ц҃а̀, и҆ сн҃а, и҆ дх҃а ст҃а́го є҆диномꙋ́дреннѡ славосло́вити всѝ вѣ́рнїи досто́йнѡ помо́лимсѧ, є҆ди́ницꙋ бж҃ества̀, въ трїе́хъ ѵ҆поста́сехъ сꙋ́щꙋю, неслїѧ́ннꙋ пребыва́ющꙋю, про́стꙋ, нераздѣ́льнꙋ и҆ непристꙋ́пнꙋ, є҆́юже и҆збавлѧ́емсѧ ѿ ѻ҆́гненнагѡ мꙋче́нїѧ.
И҆ ны́нѣ, бг҃оро́диченъ: Мт҃рь твою̀, хрⷭ҇тѐ, пло́тїю безсѣ́меннѡ ро́ждшꙋю тѧ̀, и҆ дв҃ꙋ вои́стиннꙋ, и҆ по ржⷭ҇твѣ̀ пребы́вшꙋ нетлѣ́ннꙋ, сїю̀ тебѣ̀ приво́димъ въ мл҃твꙋ, влⷣко многомлⷭ҇тиве, прегрѣше́нїй проще́нїю дарова́тисѧ всегда̀ зовꙋ́щымъ: помѧнѝ и҆ на́съ, сп҃се, во црⷭ҇твїи твое́мъ.
Прокі́менъ, гла́съ д҃: Раздѣли́ша ри̑зы моѧ̑ себѣ̀, и҆ ѡ҆ ѡ҆де́ждѣ мое́й мета́ша жре́бїй. Сті́хъ: Бж҃е, бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ;
Є҆ѵⷢ҇лїе з҃-е, ѿ матѳе́а, зача́ло рг҃і: Во вре́мѧ ѻ҆́но, прише́дше во́ини: Коне́цъ: Вои́стиннꙋ бж҃їй сн҃ъ бѣ̀ се́й. И҆ полага́етсѧ чте́нїе.
Та́же ѱало́мъ н҃. И҆ посе́мъ є҆ѵⷢ҇лїе и҃-е, ѿ лꙋкѝ, зача́ло ра҃і: Во вре́мѧ ѻ҆́но, ведѧ́хꙋ со і҆и҃сомъ и҆ и҆́на два̀: Коне́цъ: Ѿ галїле́и зрѧ́ще си́хъ.
И҆ а҆́бїе пое́мъ трипѣ́снецъ, творе́нїе господи́на космы̀: і҆рмосы̀ по два́жды, тропарѝ на в҃і. Послѣдѝ же і҆рмо́съ ѻ҆́ба ли̑ка вкꙋ́пѣ. А҆кростїхі́съ, и҆лѝ краегране́сїе трипѣ́снца є҆́сть: Проса́вватон те, є҆́же є҆́сть: Предсꙋббѡ́тїе же. Гла́съ ѕ҃.
Пѣ́снь є҃.
[П] І҆рмо́съ: Къ тебѣ̀ ᲂу҆́тренюю, милосе́рдїѧ ра́ди себѐ и҆стощи́вшемꙋ непрело́жнѡ и҆ до стрⷭ҇те́й безстра́стнѡ прикло́ньшемꙋсѧ, сло́ве бж҃їй: ми́ръ пода́ждь мѝ па́дшемꙋ, чл҃вѣколю́бче.
[Р] Оу҆мове́нїе но́гъ прїи́мше и҆ пред̾ѡчище́ни бы́вше причаще́нїемъ бж҃е́ственнагѡ та́инства ны́нѣ, хрⷭ҇тѐ, твоѝ слꙋжи́телїе ѿ сїѡ́на на є҆леѡ́нскꙋю го́рꙋ вели́кꙋю съ тобо́ю взыдо́ша, пою́ще тѧ̀, чл҃вѣколю́бче.
[О] Зри́те, ре́клъ є҆сѝ, дрꙋ́зи, не ᲂу҆жаса́йтесѧ: ны́нѣ бо прибли́жисѧ ча́съ ꙗ҆́тꙋ мѝ бы́ти и҆ ᲂу҆бїе́нꙋ рꙋка́ми беззако́нныхъ: вси́ же вы̀ разсѣ́етесѧ, менѐ ѡ҆ста́вивше, и҆̀хже соберꙋ̀ проповѣ́дати мѧ̀ чл҃вѣколю́бца.
Конда́къ, гла́съ и҃:
На́съ ра́ди распѧ́таго, прїиди́те, всѝ воспои́мъ. того́ бо ви́дѣ мр҃і́а на дре́вѣ и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.
І҆́косъ: Своего̀ а҆́гнца а҆́гница зрѧ́щи къ заколе́нїю влеко́ма, слѣ́доваше мр҃і́а терза́ющисѧ со и҆нѣ́ми жена́ми, сїѧ̑ вопїю́щи: ка́мѡ и҆́деши, ча́до; чесѡ̀ ра́ди ско́рое тече́нїе соверша́еши; є҆да̀ дрꙋгі́й бра́къ па́ки є҆́сть въ ка́нѣ, и҆ та́мѡ ны́нѣ тщи́шисѧ, да ѿ воды̀ и҆̀мъ вїно̀ сотвори́ши; и҆дꙋ́ ли съ тобо́ю, ча́до, и҆лѝ па́че пождꙋ̀ тебѐ; да́ждь мѝ сло́во, сло́ве, не мимоидѝ менє̀ молчѧ̀, чи́стꙋ соблюды́й мѧ̀: ты́ бо є҆сѝ сн҃ъ и҆ бг҃ъ мо́й.
Сѷнаѯа́рїй. Стїхѝ на распѧ́тїе:
Бж҃е, ты̀, и҆ ᲂу҆мерщвле́нъ бы́въ на дре́вѣ, жи́въ є҆сѝ,
Ѽ мертвечѐ нагі́й и҆ бг҃а жива́гѡ сло́ве!
Стїхѝ на распѧ́таго со хрⷭ҇то́мъ разбо́йника:
Заключє́ннаѧ врата̀ є҆дє́мскаѧ ѿве́рзе
Разбо́йникъ, ꙗ҆́кѡ клю́чь вложи́въ: помѧни́ мѧ.
Во ст҃ы́й и҆ вели́кїй пѧто́къ соверша́емъ ст҃ы̑ѧ и҆ сп҃си́тєльныѧ и҆ стра̑шныѧ стрⷭ҇ти гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, ꙗ҆̀же на́съ ра́ди во́лею прїѧ́тъ: ѡ҆плева̑нїѧ, бїє́нїѧ, заꙋшє́нїѧ, доса̑ды, насмѣѧ̑нїѧ, багрѧ́нꙋю ѡ҆де́ждꙋ, тро́сть, гꙋ́бꙋ, ѻ҆́цетъ, гво́зди, копїѐ и҆ вѧ́щше всѣ́хъ, крⷭ҇тъ и҆ сме́рть: є҆щѐ же и҆ разбо́йника бл҃горазꙋ́мнагѡ, сораспѧ́тагѡ хрⷭ҇тꙋ̀, сп҃си́тельное на крⷭ҇тѣ̀ и҆сповѣ́данїе: ꙗ҆̀же всѧ̑ въ пѧто́къ содѣ́ѧшасѧ.
Повнегда́ гдⷭ҇ь на́шъ за три́десѧть сре́брєникъ ѿ дрꙋ́га и҆ ᲂу҆ченика̀ про́данъ бы́въ, предаде́сѧ, пе́рвѣе ѿво́дитсѧ ко а҆́ннѣ а҆рхїере́ю, и҆́же посыла́етъ є҆го̀ къ каїа́фѣ: и҆дѣ́же ѡ҆плева́нъ бы́сть, и҆ заꙋша́емь по лани́тѣ, кꙋ́пнѡ же порꙋга́емь и҆ посмѣва́емь, слы́шаше: прорцы̀ на́мъ, хрⷭ҇тѐ, кто́ є҆́сть ᲂу҆даре́й тѧ̀; Та́мѡ же и҆ лжесвидѣ́тєли прїидо́ша винꙋ̀ возводѧ́щїи, ꙗ҆́кѡ речѐ: разоритѐ хра́мъ се́й, и҆ тремѝ де́ньми воздви́гнꙋ и҆̀: и҆ ꙗ҆́кѡ речѐ себѐ сн҃а бж҃їѧ. Тогда̀ и҆ а҆рхїере́й, а҆́ки бы хꙋлы̀ не терпѧ̀, ри́зꙋ свою̀ растерза̀. Оу҆́трꙋ же бы́вшꙋ, ѿво́дитсѧ гдⷭ҇ь къ пїла́тꙋ въ претѡ́ръ: и҆ ті́и не внидо́ша, глаго́летсѧ, да не ѡ҆сквернѧ́тсѧ, но да ꙗ҆дѧ́тъ па́схꙋ. [Па́схꙋ же є҆ѵⷢ҇лі́стъ нарица́етъ ве́сь пра́здникъ и҆лѝ: па́сха и҆ тогда̀ бы́сть, ꙗ҆́коже подоба́ше, но хрⷭ҇то́съ пре́жде є҆ди́нагѡ днѐ сотворѝ сїю̀ зако́ннꙋю па́схꙋ, созакла́тисѧ хотѧ̀ въ пѧто́къ]. И҆зше́дъ же пїла́тъ вопроша́етъ ѧ҆̀: въ чесо́мъ є҆го̀ ѡ҆глаго́лꙋютъ; и҆ поне́же ничто́же подо́бно ѡ҆брѣ́те во ѡ҆глаго́ланїи, посыла́етъ є҆го̀ ко и҆́рѡдꙋ галїле́йскомꙋ. Ѻ҆́нъ же па́ки къ пїла́тꙋ: и҆́бо то́й бѣ̀ на є҆гѡ̀ ᲂу҆бі́йство ᲂу҆стремлѧ́ѧсѧ. Ѻ҆́нъ же глаго́летъ: поими́те є҆го̀ вы̀ и҆ распни́те, и҆ по зако́нꙋ ва́шемꙋ сꙋди́те. Ѻ҆ни́ же па́ки глаго́лютъ: не досто́итъ на́мъ ᲂу҆би́ти никого́же, того̀ распѧ́ти пїла́та поѻщрѧ́юще. Вопроша́етъ же пїла́тъ хрⷭ҇та̀: а҆́ще цр҃ь і҆ꙋде́ѡвъ є҆́сть; Ѻ҆́нъ же и҆сповѣ́дꙋетъ, ꙗ҆́кѡ є҆́сть цр҃ь, но вѣ́чный: не ѿ мі́ра сегѡ̀ моѐ црⷭ҇тво, глаго́летъ. Хотѧ́ же ѿпꙋсти́ти є҆го̀ пїла́тъ, пе́рвѣе ᲂу҆́бѡ ѻ҆́нѣмъ глаго́летъ: ни є҆ди́ныѧ на него̀ вины̀ бл҃голи́чныѧ ѡ҆брѣта́ю. Та́же є҆ди́наго на кі́йждо пра́здникъ свѧ́знѧ ѿпꙋща́ти ѡ҆бы́чай предлага́етъ: но тѣ̑мъ вара́вва па́че хрⷭ҇та̀ ᲂу҆го́денъ мни́тсѧ. Пїла́тъ же, і҆ꙋде́ѡмъ ᲂу҆гожда́ѧ, пе́рвѣе би́въ і҆и҃са, и҆зво́дитъ съ вѡ́ины, ѡ҆болче́на во ѡ҆дѣѧ́нїе червле́ное, терно́вымъ же вѣнце́мъ ѡ҆бложе́на, и҆ въ десни́цѣ свое́й тро́сть вложе́нꙋ и҆мꙋ́ща, рꙋга́ема же ѿ вѡ́инъ, глаго́лющихъ: ра́дꙋйсѧ, цр҃ю̀ і҆ꙋде́йскїй. Ѻ҆ба́че си́це дово́льнѣ порꙋга́всѧ, па́ки глаго́летъ пїла́тъ: ни є҆ди́нꙋ же къ сме́рти винꙋ̀ ѡ҆брѣта́ю въ не́мъ. Ѻ҆ни́ же глаго́лахꙋ: но мы̀ є҆го̀ ᲂу҆мꙋ́чимъ, ꙗ҆́кѡ себѐ и҆менꙋ́етъ сн҃а бж҃їѧ. Си̑мъ же глаго́лємымъ, і҆и҃съ молча́ше, наро́дъ же крича́ше къ пїла́тꙋ: распнѝ, распнѝ є҆го̀. Безче́стною бо сме́ртїю ѡ҆сꙋди́ти є҆го̀ хотѧ́хꙋ да бл҃гꙋ́ю ѡ҆ не́мъ па́мѧть и҆згла́дѧтъ: Пїла́тъ же, а҆́ки бы срамлѧ́ѧ и҆̀хъ, глаго́летъ: цр҃ѧ́ ли ва́шегѡ распнꙋ̀; Ѻ҆ни́ же глаго́лютъ: не и҆́мамы и҆́нагѡ цр҃ѧ̀, то́кмѡ ке́сарѧ. Поне́же ѡ҆ хꙋлѣ̀ ре́кше, ничто́же ᲂу҆спѣ́ша, на ке́сарѧ возно́сѧтъ, да понѐ си́це неи́стовство своѐ и҆спо́лнѧтъ. Глаго́лютъ бо: всѧ́къ, и҆́же царѧ̀ себѐ творѝтъ, протѝвитсѧ ке́сарю. Та́кѡ же сꙋ́щымъ, жена̀ къ пїла́тꙋ посла̀, сны̑ стра́шными ᲂу҆боѧ́вшисѧ, глаго́лющи: ничто́же тебѣ̀ и҆ пра́ведникꙋ томꙋ̀: ᲂу҆же́ бо є҆гѡ̀ ра́ди мнѡ́гаѧ въ нощѝ пострада́хъ. И҆ то́й, ᲂу҆мы́всѧ, кро́ве ѻ҆́нагѡ винꙋ̀ ѿ себє̀ ѿража́етъ. Ѻ҆ни́ же крича́хꙋ: кро́вь є҆гѡ̀ на на́съ и҆ на ча́дѣхъ на́шихъ: а҆́ще сего̀ ѡ҆ста́виши свобо́дна, нѣ́си дрꙋ́гъ ке́сарю. Сегѡ̀ ᲂу҆̀бо ᲂу҆боѧ́всѧ пїла́тъ, а҆́ще и҆ и҆звѣ́стнѡ вѣ́дый, ꙗ҆́кѡ непови́ненъ є҆́сть і҆и҃съ, крⷭ҇тномꙋ ѡ҆сꙋжде́нїю того̀ предае́тъ, ѿпꙋсти́въ вара́ввꙋ. Сїе́ же ви́дѣвъ і҆ꙋ́да, сре́бреники пове́ргъ, ѿхо́дитъ, и҆ ше́дъ ᲂу҆давле́нїю себѐ предадѐ, на дре́вѣ повѣ́сивсѧ, послѣди́ же ᲂу҆́тро́бою разсѣ́десѧ.
Во́ини ᲂу҆́бѡ, тро́стїю по главѣ̀ і҆и҃са порꙋга́вше, возлага́ютъ на́нь крⷭ҇тъ: та́же, ѿ кѷрині́и сі́мѡна понꙋ́дивше, крⷭ҇тъ понестѝ задѣва́ютъ. Ѡ҆ часѣ́ же тре́тїемъ на ло́бнѣмъ мѣ́стѣ бы́вше, та́мѡ распина́ютъ є҆го̀, повѣ́сивше ѿ ѻ҆бою̀ странꙋ̀ тогѡ̀ дрꙋга̑ѧ два̀ разбѡ́йника, да и҆ ѻ҆́нъ ꙗ҆́кѡ ѕлодѣ́й вмѣни́тсѧ. Ри̑зы же є҆гѡ̀, хꙋ́дости ра́ди, во́ини раздѣлѧ́ютъ, нешве́ннꙋю же є҆гѡ̀ ѡ҆де́ждꙋ жре́бїемъ даю́тъ, всѧ́кїй беззаконїѧ предѣ́лъ преходѧ́ще. Не сїѧ̑ же то́чїю, но и҆ на крⷭ҇тѣ̀ сꙋ́щꙋ рꙋга́ющесѧ глаго́лахꙋ: ᲂу҆а̀, разорѧ́ѧй цр҃ковь и҆ тремѝ де́ньми созида́ѧй, сп҃сѝсѧ са́мъ. И҆ па́ки: и҆ны̑ѧ сп҃сѐ: себе́ ли не мо́жетъ сп҃стѝ; И҆ па́ки: а҆́ще цр҃ь і҆и҃левъ є҆́сть, да сни́детъ ны́нѣ со крⷭ҇та̀ и҆ вѣ́рꙋемъ въ него̀. И҆ ᲂу҆́бѡ а҆́ще и҆́стинꙋ глаго́лахꙋ, подоба́ше несꙋмнѣ́ннѡ къ немꙋ̀ пристꙋпи́ти: не то́чїю бо і҆и҃левъ цр҃ь познава́шесѧ, но и҆ всегѡ̀ мі́ра. Что́ бо зна́менова, ꙗ҆́кѡ помрачи́сѧ со́лнце на часы̀ трѝ и҆ посредѣ̀ днѐ; да всѣ̑мъ бꙋ́детъ стрⷭ҇ть ꙗ҆вле́на. Что̀ же па́ки, ꙗ҆́кѡ землѧ̀̀ потрѧсе́сѧ, ка́менїе распаде́сѧ; ѡ҆каменѣ́нїе і҆ꙋде́ѡвъ ѡ҆блича́шесѧ. Мнѡ́га тѣлеса̀ воста́ша, во ᲂу҆вѣре́нїе ѻ҆́бщагѡ воскрⷭ҇нїѧ и҆ въ ꙗ҆вле́нїе си́лы стра́ждꙋщагѡ. Завѣ́са цр҃ко́внаѧ раздра́сѧ, ꙗ҆́кѡ хра́мꙋ ꙗ҆рѧ́щꙋсѧ, поне́же въ не́мъ сла́вимый стра́ждетъ и҆ мнѡ́гимъ ѿкрыва́етъ незри̑маѧ. Въ тре́тїй ᲂу҆̀бо ча́съ распѧ́тсѧ хрⷭ҇то́съ, ꙗ҆́коже бж҃е́ственный ма́ркъ глаго́летъ [Ма́рк. є҃і, к҃є]. Ѿ шеста́гѡ же часа̀ до девѧ́тагѡ тьма̀ бы́сть, є҆гда̀ и҆ ло́ггїнъ со́тникъ, пресла̑внаѧ ви́дѣвъ, па́че же со́лнца ѡ҆мраче́нїе, вельмѝ воззва̀: вои́стиннꙋ бж҃їй сн҃ъ бѣ̀ се́й. Ѿ разбѡ́йникъ ᲂу҆́бѡ є҆ди́нъ досажда́ше і҆и҃сꙋ, дрꙋгі́й же возбранѧ́ше є҆мꙋ̀, претѧ̀ запрети́тельнѣйше, и҆ хрⷭ҇та̀ сн҃а бж҃їѧ и҆сповѣ́дꙋетъ: вѣ́рѣ же є҆гѡ̀ сп҃съ воздаѧ̀, съ собо́ю въ раѝ ѡ҆бѣщава́етъ пребыва́нїе. Всѧ́комꙋ ᲂу҆̀бо досажде́нїю на не́мъ и҆спо́лньшꙋсѧ. пїла́тъ и҆ ті́тло надписа̀ на не́мъ, гласѧ́щее: і҆и҃съ назѡрѧни́нъ, цр҃ь і҆ꙋде́йскїй. і҆ꙋде́є ᲂу҆́бѡ возбранѧ́хꙋ писа́ти си́це, но: ꙗ҆́кѡ і҆и҃съ речѐ си́це. Пїла́тъ же ѿвѣща̀: є҆́же писа́хъ, писа́хъ. Та́же сп҃сꙋ возре́кшꙋ, жа́ждꙋ: ѵ҆ссѡ́пъ со ѻ҆́цтомъ є҆мꙋ̀ растворѧ́ютъ. И҆ ре́къ: соверши́шасѧ, прекло́нь главꙋ̀, предадѐ дх҃ъ. Всѣ̑мъ же ѿше́дшымъ, мт҃и є҆гѡ̀ стоѧ́ше ᲂу҆ крⷭ҇та̀, и҆ сестра̀ є҆ѧ̀ марі́а клеѡ́пова, [ю҆́же і҆ѡакі́мъ родѝ, клеѡ́пѣ безча́днꙋ ᲂу҆ме́ршꙋ], є҆ще́ же і҆ѡа́ннъ, люби́мый є҆мꙋ̀ ᲂу҆ч҃нкъ. Неразꙋ́мнїи ᲂу҆̀бо і҆ꙋде́є, нижѐ на крⷭ҇тѣ̀ тѣлесѐ зрѣ́ти довлѣ́еми, проси́ша пїла́та, поне́же бѣ̀ вели́кїй де́нь па́схи и҆ пѧто́къ, да ѡ҆сꙋжде́нныхъ го́лєни сокрꙋша́тсѧ, ꙗ҆́кѡ да скорѣ́е сме́рть прїи́детъ. И҆ разбо́йникѡмъ ᲂу҆́бѡ го́лєни сокрꙋши́ша, є҆ще́ бо жи́ви бѧ́хꙋ: на і҆и҃са же прише́дше, ꙗ҆́кѡ ви́дѣша є҆го̀ ᲂу҆жѐ ᲂу҆ме́рша, не сокрꙋши́ша. Є҆ди́нъ же ѿ вѡ́инъ, ло́ггїнъ зово́мый, безꙋ̑мнымъ ᲂу҆гожда́ѧ, воздви́гъ копїѐ, въ десна̑ѧ ре́бра пробода́етъ хрⷭ҇та̀: и҆ а҆́бїе и҆зы́де кро́вь и҆ вода̀, ѻ҆́во ᲂу҆́бѡ ꙗ҆́кѡ человѣ̑ка, ѻ҆́во же ꙗ҆́кѡ па́че человѣ́ка. И҆лѝ, кро́вь ᲂу҆́бѡ ра́ди прича́стїѧ бж҃е́ственныхъ та̑инъ, вода́ же кр҃ще́нїѧ ра́ди. То́й бо вои́стиннꙋ двоето́чный и҆сто́чникъ содержи́тъ є҆́же по на́мъ та́инство: сїѧ̑ и҆ і҆ѡа́ннъ ви́дѣвъ свидѣ́тельствова, и҆ и҆́стинно є҆́сть свидѣ́тельство є҆гѡ̀, ꙗ҆́кѡ предстоѧ̀ при всѣ́хъ и҆ ви́дѧ пи́шетъ: и҆ ꙗ҆́кѡ а҆́ще бы лѡ́жнаѧ и҆мѣ́лъ глаго́лати, не бы̀ на безче́стїе ᲂу҆ч҃тлю ꙗ҆влѧ́ємаѧ написа́лъ. Си̑мъ же та́кѡ преесте́ственнѡ содѣ̑ѧнымъ, поне́же къ ве́черꙋ бѧ́ше ᲂу҆жѐ, і҆ѡ́сифъ а҆рїмаѳе́йскїй и҆схо́дитъ, ᲂу҆ч҃нкъ пре́жде, ꙗ҆́коже про́чїи, но та́йный, и҆ къ пїла́тꙋ прише́дъ со дерзнове́нїемъ, ꙗ҆́кѡ зна́емꙋ сꙋ́щꙋ, про́ситъ тѣ́ло і҆и҃сово: ѻ҆́нъ же взѧ́ти повелѣва́етъ. И҆ та́кѡ, со крⷭ҇та̀ сїѐ сне́мъ: всебл҃гоговѣ́йнѡ положѝ. И҆ ᲂу҆жѐ прише́дшей но́щи, прихо́дитъ нїкоди́мъ, носѧ̀ смѵ́рны и҆ а҆ло́а нѣ́кое смѣше́нїе состро́енное ко вре́мени, и҆ плащани́цею ѡ҆бви́вше, ꙗ҆́коже ѡ҆бы́чай бѣ̀ і҆ꙋде́ѡмъ твори́ти, бли́зъ положи́ша, во и҆зсѣ́ченнѣмъ ѿ ка́мене гро́бѣ і҆ѡ́сифовѣ, и҆дѣ́же никто́же пре́жде лежа̀, да, хрⷭ҇тꙋ̀ воскрⷭ҇шꙋ, не припи́шꙋтъ воскрⷭ҇нїе и҆но́мꙋ. Ѡ҆ смѣше́нїи же а҆ло́а и҆ смѵ́рны, прилѣпи́тельныхъ сꙋ́щихъ, є҆ѵⷢ҇лі́стъ воспомѧнꙋ̀, да є҆гда̀ ви́дѧтъ плащани́цꙋ и҆ сꙋда́рь во гро́бѣ ѡ҆ста́влєны, не помышлѧ́ютъ, ꙗ҆́кѡ ᲂу҆кра́денъ бѣ̀: ка́кѡ бо ᲂу҆кра́денꙋ бы́ти, а҆́ще и҆ свобо́ды толи́ки не бѣ̀: да ѿто́ргнꙋтъ ѻ҆́наѧ си́це всаждє́ннаѧ пло́ти; Сїѧ̑ всѧ̑ пресла́внѡ бы́ша во вре́мѧ пѧтка̀, бг҃оно́снїи ѻ҆тцы̀ повелѣ́ша҆ на́мъ си́хъ всѣ́хъ па́мѧть въ сі́й де́нь твори́ти съ сокрꙋше́нїемъ се́рдца и҆ ᲂу҆миле́нїемъ.
Вѣ́домо же бꙋ́ди, ꙗ҆́кѡ въ шесты́й де́нь седми́цы, сі́есть въ пѧто́къ распѧ́тсѧ гдⷭ҇ь, зане́же и҆ въ нача́лѣ въ шесты́й де́нь созда́сѧ человѣ́къ. и҆ въ шесты́й ча́съ днѐ на крⷭ҇тѣ̀ повѣ́шенъ бы́сть: занѐ въ то́й ча́съ, ꙗ҆́коже глаго́лютъ, и҆ а҆да́мъ ко запреще́нномꙋ дре́вꙋ рꙋ́цѣ просте́ръ коснꙋ́сѧ, и҆ ᲂу҆́мре: подоба́ше бо є҆мꙋ̀, во́ньже ча́съ сокрꙋше́нъ бѣ̀, въ то́й па́ки возсозда́тисѧ. Въ вертогра́дѣ же сїѐ бы́сть, ꙗ҆́кѡ и҆ а҆да́мꙋ въ раѝ. Го́рькое питїѐ вкꙋше́нїе ѿ дре́ва ѡ҆бразова́ше. Заꙋше́нїе на́шꙋ свобо́дꙋ ꙗ҆влѧ́ше. Ѡ҆плева́нїе и҆ безче́стное ѡ҆бхожде́нїе, на́шꙋ че́сть. Терно́вый вѣне́цъ, клѧ́твы бы́вшїѧ на на́съ ѿгна́нїе. Багрѧ́наѧ ѡ҆де́жда за кѡ́жаныѧ ри̑зы и҆ за сꙋ́щꙋю на на́съ ца́рскꙋю ѡ҆деждꙋ. Гво́здїе, всеконе́чное на́шегѡ грѣха̀ недвиже́нїе. Крⷭ҇тъ, дре́во въ раѝ. Пронзє́ннаѧ ре́бра ѡ҆бразова́хꙋ а҆да́мово ребро̀, ѿ негѡ́же создана̀ бы́сть є҆́ѵа, ѿ неѧ́же произы́де престꙋпле́нїе. Копїѐ, пла́менное ѡ҆рꙋ́жїе предо мно́ю ѿвраща́етъ. И҆з̾ ре́бръ вода̀, ѡ҆́бразъ кр҃ще́нїѧ. Кро́вь и҆ тро́сть: и҆́миже на́мъ червле́ными пи́смены, ꙗ҆́кѡ цр҃ь, дре́внее ѻ҆те́чество дарова̀ и҆ подписа̀. Глаго́летсѧ же, ꙗ҆́кѡ а҆да́мова глава̀ та́мѡ лежа́ше, и҆дѣ́же и҆ хрⷭ҇то́съ глава̀ всѣ́хъ распѧ́тсѧ: крести́сѧ ᲂу҆̀бо хрⷭ҇то́вою кро́вїю и҆сте́кшею. И҆дѣ́же бо трꙋ́пъ, та́мѡ и҆ ѻ҆ре́лъ прїи́де хрⷭ҇то́съ, вѣ́чный цр҃ь, но́вый а҆да́мъ, ве́тхаго и҆ дре́вомъ па́дшаго а҆да́ма, дре́вомъ и҆сцѣлѧ́ѧй.
Преесте́ственнымъ, и҆ неисче́тнымъ твои́мъ къ на́мъ милосе́рдїемъ, хрⷭ҇тѐ бж҃е, поми́лꙋй на́съ. А҆ми́нь.
Пѣ́снь и҃.
[С] І҆рмо́съ: Сто́лпъ ѕло́бы бг҃опроти́вныѧ бж҃е́ственнїи ѻ҆́троцы ѡ҆бличи́ша: на хрⷭ҇та́ же мѧтꙋ́щеесѧ беззако́нныхъ собо́рище совѣщава́етъ тщє́тнаѧ, ᲂу҆би́ти ᲂу҆мышлѧ́етъ жи́знь держа́щаго дла́нїю, є҆го́же всѧ̀ тва́рь бл҃гослови́тъ, сла́вѧщи во вѣ́ки.
[А] Ѿ вѣ́ждей ны́нѣ со́нъ ѿтрѧси́те, ᲂу҆ч҃нкѡ́мъ ре́клъ є҆сѝ, хрⷭ҇тѐ: и҆ въ мл҃твѣ бди́те, да не вни́дете въ напа́сть, и҆ наипа́че сі́мѡне: крѣпча́йшемꙋ бо бо́лїй и҆скꙋ́съ. разꙋмѣ́й мѧ̀, пе́тре, є҆го́же всѧ̀ тва́рь бл҃гослови́тъ, сла́вѧщи во вѣ́ки.
[В] Скве́рна сло́ва ᲂу҆сте́нъ никогда́же и҆зрекꙋ̀, влⷣко: съ тобо́ю ᲂу҆мрꙋ̀ ꙗ҆́кѡ бл҃горазꙋ́менъ, а҆́ще и҆ всѝ ѿве́ргꙋтсѧ: возопѝ пе́тръ. ни пло́ть, нижѐ кро́вь, но ѻ҆ц҃ъ тво́й ѿкры́ ми тѧ̀, є҆го́же всѧ̀ тва́рь бл҃гослови́тъ, сла́вѧщи во вѣ́ки.
[В] Глꙋбинꙋ̀ премꙋ́дрости бж҃е́ственныѧ и҆ ра́зꙋма не всю̀ и҆спыта́лъ є҆сѝ, бе́зднꙋ же мои́хъ сꙋде́бъ не пости́глъ є҆сѝ, человѣ́че: гдⷭ҇ь речѐ. пло́ть ᲂу҆̀бо сы́й, не хвали́сѧ: три́жды бо ѿве́ржешисѧ менє̀, є҆го́же всѧ̀ тва́рь бл҃гослови́тъ, сла́вѧщи во вѣ́ки.
[А] Ѿрица́еши, сі́мѡне пе́тре, є҆́же позна́еши ско́рѡ, ꙗ҆́коже рече́сѧ: и҆ къ тебѣ̀ ѻ҆трокови́ца є҆ди́на ско́рѡ прише́дши ᲂу҆страши́тъ тѧ̀: гдⷭ҇ь речѐ. ѻ҆ба́че, го́рцѣ прослези́всѧ, ѡ҆брѧ́щеши мѧ̀ млⷭ҇тива, є҆го́же всѧ̀ тва́рь бл҃гослови́тъ, сла́вѧщи во вѣ́ки.
Пѣ́снь ѳ҃.
[Т] І҆рмо́съ: Чтⷭ҇нѣ́йшꙋю херꙋві̑мъ и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
[Ѻ] Па́гꙋбное собо́рище бг҃оме́рзкихъ, лꙋка́внꙋющихъ бг҃оꙋбі́йцъ со́нмище предста̀ тебѣ̀, хрⷭ҇тѐ, и҆ ꙗ҆́кѡ непра́ведника влеча́ше зижди́телѧ всѣ́хъ, є҆го́же велича́емъ.
[Н] Зако́на и҆ гласѡ́въ прⷪ҇ро́ческихъ не разꙋмѣ́юще нечести́вїи, ᲂу҆мышлѧ́юще тщє́тнаѧ, ꙗ҆́кѡ ѻ҆вча̀ влеча́хꙋ тѧ̀ непра́веднѡ закла́ти всѣ́хъ влⷣкꙋ, є҆го́же велича́емъ.
[Т] Оу҆ѧ́звлени самозави́стною ѕло́бою, сщ҃е́нницы со кни̑жники ᲂу҆би́ти преда́ша пода́вшаго ꙗ҆зы́кѡмъ жи́знь, є҆стество́мъ жизнода́вца, є҆го́же велича́емъ.
[Е] Ѡ҆быдо́ша ꙗ҆́кѡ псѝ мно́зи, и҆ ᲂу҆да́риша, цр҃ю̀, лани́тꙋ твою̀ заꙋше́нїемъ: вопроша́хꙋ тѧ̀, и҆ на тѧ̀ лѡ́жнаѧ свидѣ́тельствовахꙋ. и҆ всѧ̑ претерпѣ́въ, всѣ́хъ сп҃слъ є҆сѝ.
Та́же є҆ѯапостїла́рїй, три́жды:
Разбо́йника бл҃горазꙋ́мнаго во є҆ди́номъ часѣ̀ ра́еви сподо́билъ є҆сѝ, гдⷭ҇и: и҆ менѐ дре́вомъ крⷭ҇тнымъ просвѣтѝ и҆ сп҃си́ мѧ.
Та́же є҆ѵⷢ҇лїе ѳ҃-е, ѿ і҆ѡа́нна, зача́ло ѯ҃а: Во вре́мѧ ѻ҆́но, стоѧ́хꙋ при крⷭ҇тѣ̀ і҆и҃совѣ: Коне́цъ: Воззрѧ́тъ на́нь, є҆го́же прободо́ша.
И҆ а҆́бїе: Всѧ́кое дыха́нїе: на гла́съ г҃. Поста́вимъ стїхѝ д҃, и҆ пое́мъ стїхи̑ры самогла̑сны трѝ, повторѧ́юще пе́рвꙋю:
Два̀ и҆ лꙋка̑внаѧ сотворѝ перворожде́нный сы́нъ мо́й і҆и҃ль: менѐ ѡ҆ста́ви и҆сто́чника воды̀ жи́зни, и҆ и҆скопа̀ себѣ̀ кладене́цъ сокрꙋше́нный: менѐ на дре́вѣ распѧ́тъ, вара́ввꙋ же и҆спросѝ и҆ ѿпꙋстѝ. ᲂу҆жасе́сѧ нб҃о ѡ҆ се́мъ, и҆ со́лнце лꙋчы̀ скры̀: ты́ же, і҆и҃лю, не ᲂу҆срами́лсѧ є҆сѝ, но сме́рти мѧ̀ пре́далъ є҆сѝ. ѡ҆ста́ви и҆̀мъ, ѻ҆́ч҃е ст҃ы́й, не вѣ́дѧтъ бо, что̀ сотвори́ша.
Кі́йждо ᲂу҆́дъ ст҃ы́ѧ твоеѧ̀ пло́ти безче́стїе на́съ ра́ди претерпѣ̀: глава̀ те́рнїе: лицѐ ѡ҆плева̑нїѧ: лани̑ты заꙋшє́нїѧ: ᲂу҆ста̀ вкꙋше́нїе же́лчи во ѻ҆́цтѣ растворе́нныѧ: ᲂу҆шеса̀ хꙋлє́нїѧ ѕлочести̑ваѧ: плєщѝ бїє́нїѧ, и҆ рꙋка̀ тро́сть: всѐ̀ тѣ́ло протѧжє́нїе на крⷭ҇тѣ̀: чле́нове гво́зди, и҆ ре́бра копїѐ. пострада́вый за ны̀ и҆ ѿ страсте́й свободи́вый на́съ, снизше́дый къ на́мъ чл҃вѣколю́бїемъ и҆ вознесы́й на́съ, всеси́льне сп҃се, поми́лꙋй на́съ.
Распе́ншꙋсѧ тебѣ̀, хрⷭ҇тѐ всѧ̀ тва́рь ви́дѧщи трепета́ше, ѡ҆снова̑нїѧ землѝ поколеба́шасѧ стра́хомъ держа́вы твоеѧ̀: тебѣ́ бо возне́сшꙋсѧ дне́сь, ро́дъ є҆вре́йскїй поги́бе, цр҃ко́внаѧ завѣ́са раздра́сѧ на дво́е, и҆ ме́ртвїи ѿ гробѡ́въ воскресо́ша: со́тникъ, ви́дѣвъ чꙋ́до, ᲂу҆жасе́сѧ. предстоѧ́щи же мт҃и твоѧ̀ вопїѧ́ше, рыда́ющи мт҃рски: ка́кѡ не возрыда́ю и҆ ᲂу҆тро́бы моеѧ̀ не бїю̀, зрѧ́щи тѧ̀ на́га, ꙗ҆́кѡ ѡ҆сꙋжде́на, на дре́вѣ ви́сѧща; распны́йсѧ и҆ погребы́йсѧ и҆ воскресы́й и҆з̾ ме́ртвыхъ, гдⷭ҇и сла́ва тебѣ̀.
Сла́ва, гла́съ ѕ҃: Совлеко́ша съ менє̀ ри̑зы моѧ̑, и҆ ѡ҆блеко́ша мѧ̀ въ ри́зꙋ червле́нꙋ: возложи́ша на главꙋ̀ мою̀ вѣне́цъ ѿ те́рнїй, и҆ въ деснꙋ́ю мою̀ рꙋ́кꙋ вда́ша тро́сть, да сокрꙋшꙋ̀ и҆̀хъ, ꙗ҆́кѡ сосꙋ́ды скꙋдє́льничи.
И҆ ны́нѣ, гла́съ то́йже: Плєщѝ моѧ̑ да́хъ на ра̑ны, лица́ же моегѡ̀ не ѿврати́хъ ѿ заплева́нїй: сꙋди́лищꙋ пїла́товꙋ предста́хъ, и҆ крⷭ҇тъ претерпѣ́хъ за сп҃се́нїе мі́ра.
Та́же є҆ѵⷢ҇лїе і҃-е, ѿ ма́рка, зача́ло ѯ҃ѳ: Во вре́мѧ ѻ҆́но, прїи́де і҆ѡ́сифъ: Коне́цъ: Зрѧ́стѣ, гдѣ̀ є҆го̀ полага́хꙋ. Та́же: Сла́ва въ вы́шнихъ бг҃ꙋ: Є҆ктенїа̀: И҆спо́лнимъ ᲂу҆́треннюю мл҃твꙋ: и҆ по возгла́сѣ: Ꙗ҆́кѡ бг҃ъ млⷭ҇ти: а҆́бїе, є҆ѵⷢ҇лїе а҃і, ѿ і҆ѡа́нна, зача́ло ѯ҃в: Во вре́мѧ ѻ҆́но, молѝ пїла́та і҆ѡ́сифъ: Коне́цъ: Положи́ста і҆и҃са:
И҆ пое́мъ стїхи̑ры самогла̑сны, ѻ҆́ба ли̑ка вкꙋ́пѣ.
Гла́съ а҃: Всѧ̀ тва́рь и҆змѣнѧ́шесѧ стра́хомъ, зрѧ́щи тѧ̀ на крⷭ҇тѣ̀ ви́сѧща, хрⷭ҇тѐ: со́лнце ѡ҆мрача́шесѧ, и҆ землѝ ѡ҆снова̑нїѧ сотрѧса́хꙋсѧ: всѧ̑ сострада́хꙋ созда́вшемꙋ всѧ̑. во́лею на́съ ра́ди претерпѣ́вый, гдⷭ҇и, сла́ва тебѣ̀.
Гла́съ в҃: Сті́хъ: Раздѣли́ша ри̑зы моѧ̑ себѣ̀, и҆ ѡ҆ ѡ҆де́ждѣ мое́й мета́ша жре́бїй.
Лю́дїе ѕлочести́вїи и҆ беззако́ннїи почто̀ ᲂу҆мышлѧ́ютъ тщє́тнаѧ; почто̀ жи́знь всѣ́хъ на сме́рть ѡ҆сꙋди́ша; ве́лїе чꙋ́до! занѐ созда́тель мі́ра въ рꙋ́ки беззако́нныхъ предае́тсѧ, и҆ на дре́во возвыша́етсѧ чл҃вѣколю́бецъ, да сꙋ́щыѧ во а҆́дѣ ю҆́зники свободи́тъ зовꙋ́щыѧ: долготерпѣли́ве гдⷭ҇и, сла́ва тебѣ̀.
Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта.
Дне́сь непоро́чнаѧ дв҃а, зрѧ́щи тѧ̀, сло́ве, ко крⷭ҇тꙋ̀ пригвожда́ема, рыда́ющи мт҃рнею ᲂу҆тро́бою, ᲂу҆ѧзвлѧ́шесѧ се́рдцемъ го́рцѣ, и҆ стенѧ́щи болѣ́зненнѡ и҆з̾ глꙋбины̀ дꙋшѝ, лани̑ты со власы̑ терза́ющи, сокрꙋша́шесѧ. тѣ́мже и҆ пє́рси бїю́щи, взыва́ше жа́лостнѡ: ᲂу҆вы̀ мнѣ̀, бж҃е́ственное ча́до! ᲂу҆вы̀ мнѣ̀, свѣ́те мі́ра! что̀ заше́лъ є҆сѝ ѿ ѻ҆́чїю моє́ю, а҆́гнче бж҃їй; тѣ́мже вѡ́инства безпло́тныхъ тре́петомъ содержи́ми бѧ́хꙋ, глаго́люще: непостижи́ме гдⷭ҇и, сла́ва тебѣ̀.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
На дре́вѣ ви́сѧща ви́дѧщи тѧ̀, хрⷭ҇тѐ, всѣ́хъ зижди́телѧ и҆ бг҃а, безсѣ́меннѡ ро́ждшаѧ тѧ̀ вопїѧ́ше го́рькѡ: сн҃е мо́й, гдѣ̀ за́йде добро́та зра́ка твоегѡ̀; не терплю̀ зрѣ́ти тѧ̀ непра́веднѡ распина́ема: потщи́сѧ ᲂу҆̀бо, воста́ни, ꙗ҆́кѡ да ви́жꙋ и҆ а҆́зъ твоѐ и҆з̾ ме́ртвыхъ тридне́вное воскрⷭ҇нїе.
Сла́ва, гла́съ и҃: Гдⷭ҇и, восходѧ́щꙋ тѝ на крⷭ҇тъ, стра́хъ и҆ тре́петъ нападѐ на тва́рь, и҆ землѝ ᲂу҆́бѡ возбранѧ́лъ є҆сѝ поглоти́ти распина́ющыѧ тѧ̀, а҆́дꙋ же повелѣва́лъ є҆сѝ и҆спꙋсти́ти ю҆́зники, на ѡ҆бновле́нїе человѣ́кѡвъ: сꙋдїѐ живы́хъ и҆ ме́ртвыхъ, жи́знь прише́лъ є҆сѝ пода́ти, а҆ не сме́рть. чл҃вѣколю́бче, сла́ва тебѣ̀.
И҆ ны́нѣ, гла́съ ѕ҃: Оу҆жѐ ѡ҆мака́етсѧ тро́сть и҆зрече́нїѧ ѿ сꙋде́й непра́ведныхъ, и҆ і҆и҃съ сꙋди́мь быва́етъ, и҆ ѡ҆сꙋжда́етсѧ на крⷭ҇тъ: и҆ стра́ждетъ тва́рь, на крⷭ҇тѣ̀ ви́дѧщи гдⷭ҇а. но, є҆стество́мъ тѣлесѐ менє̀ ра́ди стражда́й, бл҃гі́й гдⷭ҇и, сла́ва тебѣ̀.
Та́же є҆ѵⷢ҇лїе в҃і, ѿ матѳе́а, зача́ло рд҃і: Во ᲂу҆́трїй де́нь, и҆́же є҆́сть по пѧтцѣ̀: Коне́цъ: Зна́менавше ка́мень съ кꙋстѡді́ею. Та́же: Бл҃го є҆́сть и҆сповѣ́датисѧ гдⷭ҇еви: Трист҃о́е. По Ѻ҆́ч҃е на́шъ:
Тропа́рь, гла́съ д҃:
И҆скꙋпи́лъ ны̀ є҆сѝ ѿ клѧ́твы зако́нныѧ чтⷭ҇но́ю твое́ю кро́вїю: ко крⷭ҇тꙋ̀ пригвожде́нъ и҆ копїе́мъ прободе́нъ бы́въ, безсме́ртїе и҆сточи́лъ є҆сѝ человѣ́кѡмъ. сп҃се на́шъ, сла́ва тебѣ̀.
Та́же, є҆ктенїа̀ ѡ҆бы́чнаѧ. И҆ ѿпꙋ́стъ. Пе́рвый же ча́съ не совокꙋплѧ́емъ ны́нѣ, но ѡ҆ второ́мъ часѣ̀ днѐ.
Послѣ́дованїе часѡ́въ ст҃а́гѡ и҆ вели́кагѡ пѧтка̀,
творе́нїе кѷрі́лла, а҆рхїепі́скопа а҆леѯандрі́йскагѡ. Ѡ҆ второ́мъ часѣ̀ днѐ кле́плетъ, и҆ ѡ҆блачи́вшꙋсѧ сщ҃е́нникꙋ, и҆ бл҃гослови́вшꙋ є҆мꙋ̀, начина́емъ ча́съ пе́рвый: Цр҃ю̀ нбⷭ҇ный: Трист҃о́е. Прест҃а́ѧ трⷪ҇це: Ѻ҆́ч҃е на́шъ: Возгла́съ: Ꙗ҆́кѡ твоѐ є҆́сть црⷭ҇тво: Гдⷭ҇и, поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды. И҆ глаго́лемъ ѱалмы̀ сїѧ̑.
Ѱало́мъ є҃:
Глаго́лы моѧ̑ внꙋшѝ, гдⷭ҇и, разꙋмѣ́й зва́нїе моѐ. Вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й: ꙗ҆́кѡ къ тебѣ̀ помолю́сѧ, гдⷭ҇и. Заꙋ́тра ᲂу҆слы́ши гла́съ мо́й, заꙋ́тра предста́нꙋ тѝ, и҆ ᲂу҆́зриши мѧ̀. Ꙗ҆́кѡ бг҃ъ не хотѧ́й беззако́нїѧ ты̀ є҆сѝ: не присели́тсѧ къ тебѣ̀ лꙋка́внꙋѧй, нижѐ пребꙋ́дꙋтъ беззакѡ́нницы пред̾ ѻ҆чи́ма твои́ма: возненави́дѣлъ є҆сѝ всѧ̑ дѣ́лающыѧ беззако́нїе. Погꙋби́ши всѧ̑ глаго́лющыѧ лжꙋ̀: мꙋ́жа крове́й и҆ льсти́ва гнꙋша́етсѧ гдⷭ҇ь. А҆́зъ же мно́жествомъ млⷭ҇ти твоеѧ̀ вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀ во стра́сѣ твое́мъ. Гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й. Ꙗ҆́кѡ нѣ́сть во ᲂу҆стѣ́хъ и҆́хъ и҆́стины, се́рдце и҆́хъ сꙋ́етно, гро́бъ ѿве́рстъ горта́нь и҆́хъ, ѧ҆зы̑ки свои́ми льща́хꙋ. Сꙋдѝ и҆̀мъ, бж҃е, да ѿпадꙋ́тъ ѿ мы́слей свои́хъ: по мно́жествꙋ нече́стїѧ и҆́хъ и҆зри́ни ѧ҆̀, ꙗ҆́кѡ преѡгорчи́ша тѧ̀, гдⷭ҇и. И҆ да возвеселѧ́тсѧ всѝ ᲂу҆пова́ющїи на тѧ̀, во вѣ́къ возра́дꙋютсѧ, и҆ всели́шисѧ въ ни́хъ: и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ. Ꙗ҆́кѡ ты̀ бл҃гослови́ши првⷣника, гдⷭ҇и: ꙗ҆́кѡ ѡ҆рꙋ́жїемъ бл҃говоле́нїѧ вѣнча́лъ є҆сѝ на́съ.
Ѱало́мъ в҃:
Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ; Предста́ша ца́рїе зе́мстїи, и҆ кнѧ́зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀: ꙾Расто́ргнемъ6꙾ ᲂу҆́зы и҆́хъ, и҆ ꙾ѿве́ржемъ7꙾ ѿ на́съ и҆́го и҆́хъ. Живы́й на нб҃сѣ́хъ посмѣе́тсѧ и҆̀мъ, и҆ гдⷭ҇ь порꙋга́етсѧ и҆̀мъ: тогда̀ возглаго́летъ къ ни̑мъ гнѣ́вомъ свои́мъ, и҆ ꙗ҆́ростїю свое́ю смѧте́тъ ѧ҆̀. А҆́зъ же поста́вленъ є҆́смь цр҃ь ѿ негѡ̀ над̾ сїѡ́номъ, горо́ю ст҃о́ю є҆гѡ̀, возвѣща́ѧй повелѣ́нїе гдⷭ҇не. Гдⷭ҇ь речѐ ко мнѣ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀. Просѝ ѿ менє̀, и҆ да́мъ тѝ ꙗ҆зы́ки достоѧ́нїе твоѐ, и҆ ѡ҆держа́нїе твоѐ концы̀ землѝ. Оу҆пасе́ши ѧ҆̀ жезло́мъ желѣ́знымъ, ꙗ҆́кѡ сосꙋ́ды скꙋдє́льничи сокрꙋши́ши ѧ҆̀. И҆ ны́нѣ ца́рїе разꙋмѣ́йте, накажи́тесѧ всѝ сꙋдѧ́щїи землѝ. Рабо́тайте гдⷭ҇еви со стра́хомъ и҆ ра́дꙋйтесѧ є҆мꙋ̀ съ тре́петомъ. Прїими́те наказа́нїе, да не когда̀ прогнѣ́ваетсѧ гдⷭ҇ь, и҆ поги́бнете ѿ пꙋтѝ пра́веднагѡ, є҆гда̀ возгори́тсѧ вско́рѣ ꙗ҆́рость є҆гѡ̀: бл҃же́ни всѝ надѣ́ющїисѧ на́нь.
Ѱало́мъ к҃а:
Бж҃е, бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ; дале́че ѿ сп҃се́нїѧ моегѡ̀ словеса̀ грѣхопаде́нїй мои́хъ. Бж҃е мо́й, воззовꙋ̀ во днѝ, и҆ не ᲂу҆слы́шиши, и҆ въ нощѝ, и҆ не въ безꙋ́мїе мнѣ̀. Ты́ же во ст҃ѣ́мъ живе́ши, хвало̀ і҆и҃лева. На тѧ̀ ᲂу҆пова́ша ѻ҆тцы̀ на́ши: ᲂу҆пова́ша, и҆ и҆зба́вилъ є҆сѝ ѧ҆̀. Къ тебѣ̀ воззва́ша, и҆ сп҃со́шасѧ: на тѧ̀ ᲂу҆пова́ша, и҆ не постыдѣ́шасѧ. А҆́зъ же є҆́смь че́рвь, а҆ не человѣ́къ, поноше́нїе человѣ́кѡвъ и҆ ᲂу҆ничиже́нїе люде́й. Всѝ ви́дѧщїи мѧ̀ порꙋга́ша ми сѧ, глаго́лаша ᲂу҆стна́ми, покива́ша главо́ю: ᲂу҆пова̀ на гдⷭ҇а, да и҆зба́витъ є҆го̀, да сп҃се́тъ є҆го̀, ꙗ҆́кѡ хо́щетъ є҆го̀. Ꙗ҆́кѡ ты̀ є҆сѝ и҆сто́ргїй мѧ̀ и҆з̾ чре́ва, ᲂу҆пова́нїе моѐ ѿ сосцꙋ̀ ма́тере моеѧ̀: къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀ бг҃ъ мо́й є҆сѝ ты̀. Да не ѿстꙋ́пиши ѿ менє̀: ꙗ҆́кѡ ско́рбь бли́зъ, ꙗ҆́кѡ нѣ́сть помога́ѧй мѝ. Ѡ҆быдо́ша мѧ̀ тельцы̀ мно́зи, ю҆нцы̀ тꙋ́чнїи ѡ҆держа́ша мѧ̀: ѿверзо́ша на мѧ̀ ᲂу҆ста̀ своѧ̑, ꙗ҆́кѡ ле́въ восхища́ѧй и҆ рыка́ѧй. Ꙗ҆́кѡ вода̀ и҆злїѧ́хсѧ, и҆ разсы́пашасѧ всѧ̑ кѡ́сти моѧ̑: бы́сть се́рдце моѐ, ꙗ҆́кѡ во́скъ та́ѧй посредѣ̀ чре́ва моегѡ̀. И҆́зсше ꙗ҆́кѡ скꙋде́ль крѣ́пость моѧ̀, и҆ ѧ҆зы́къ мо́й прильпѐ горта́ни моемꙋ̀, и҆ въ пе́рсть сме́рти све́лъ мѧ̀ є҆сѝ. Ꙗ҆́кѡ ѡ҆быдо́ша мѧ̀ псѝ мно́зи, со́нмъ лꙋка́выхъ ѡ҆держа́ша мѧ̀: и҆скопа́ша рꙋ́цѣ моѝ и҆ но́зѣ моѝ: и҆счето́ша всѧ̑ кѡ́сти моѧ̑: ті́и же смотри́ша и҆ презрѣ́ша мѧ̀. Раздѣли́ша ри̑зы моѧ̑ себѣ̀, и҆ ѡ҆ ѡ҆де́ждѣ мое́й мета́ша жре́бїй. Ты́ же, гдⷭ҇и, не ᲂу҆далѝ по́мощь твою̀ ѿ менє̀, на застꙋпле́нїе моѐ вонмѝ. И҆зба́ви ѿ ѡ҆рꙋ́жїѧ дꙋ́шꙋ мою̀, и҆ и҆з̾ рꙋкѝ пе́сїи є҆диноро́днꙋю мою̀: сп҃си́ мѧ ѿ ᲂу҆́стъ льво́выхъ, и҆ ѿ рѡ́гъ є҆диноро́жь смире́нїе моѐ. Повѣ́мъ и҆́мѧ твоѐ бра́тїи мое́й, посредѣ̀ цр҃кве воспою́ тѧ. Боѧ́щїисѧ гдⷭ҇а восхвали́те є҆го̀, всѐ сѣ́мѧ і҆а́кѡвле просла́вите є҆го̀: да ᲂу҆бои́тсѧ же ѿ негѡ̀ всѐ сѣ́мѧ і҆и҃лево: ꙗ҆́кѡ не ᲂу҆ничижѝ, нижѐ негодова̀ мл҃твы ни́щагѡ, нижѐ ѿвратѝ лицѐ своѐ ѿ менє̀: и҆ є҆гда̀ воззва́хъ къ немꙋ̀, ᲂу҆слы́ша мѧ̀. Ѿ тебє̀ похвала̀ моѧ̀, въ цр҃кви вели́цѣй и҆сповѣ́мсѧ тебѣ̀: мл҃твы моѧ̑ возда́мъ пред̾ боѧ́щимисѧ є҆гѡ̀. Ꙗ҆дѧ́тъ ᲂу҆бо́зїи, и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀: жива̑ бꙋ́дꙋтъ сердца̀ и҆́хъ въ вѣ́къ вѣ́ка. Помѧнꙋ́тсѧ и҆ ѡ҆братѧ́тсѧ ко гдⷭ҇ꙋ всѝ концы̀ землѝ, и҆ покло́нѧтсѧ пред̾ ни́мъ всѧ̑ ѻ҆те́чєствїѧ ꙗ҆зы̑къ. Ꙗ҆́кѡ гдⷭ҇не є҆́сть црⷭ҇твїе, и҆ то́й ѡ҆блада́етъ ꙗ҆зы́ки. Ꙗ҆до́ша и҆ поклони́шасѧ всѝ тꙋ́чнїи землѝ: пред̾ ни́мъ припадꙋ́тъ всѝ низходѧ́щїи въ зе́млю: и҆ дꙋша̀ моѧ̀ томꙋ̀ живе́тъ. И҆ сѣ́мѧ моѐ порабо́таетъ є҆мꙋ̀: возвѣсти́тъ гдⷭ҇еви ро́дъ грѧдꙋ́щїй. И҆ возвѣстѧ́тъ пра́вдꙋ є҆гѡ̀ лю́демъ ꙾ро́ждшымсѧ8꙾, ꙗ҆̀же сотворѝ гдⷭ҇ь.
Сла́ва, и҆ ны́нѣ: А҆ллилꙋ́їа, три́жды. Гдⷭ҇и, поми́лꙋй, три́жды.
Сла́ва, тропа́рь, гла́съ а҃:
Распе́ншꙋсѧ тебѣ̀, хрⷭ҇тѐ, поги́бе власти́тельство, попра́на бы́сть си́ла вра́жїѧ: ниже́ бо а҆́гг҃лъ, нижѐ человѣ́къ, но са́мъ, гдⷭ҇и, сп҃слъ є҆сѝ на́съ. сла́ва тебѣ̀.
И҆ ны́нѣ, бг҃оро́диченъ: Что́ тѧ нарече́мъ:
Та́же пое́мъ стїхи̑ры трѝ ѿ двꙋна́десѧти, повторѧ́юще ѧ҆̀.
Стїхи́ра самогла́сна пе́рвагѡ часа̀, гла́съ и҃:
Дне́сь цр҃ко́внаѧ завѣ́са на ѡ҆бличе́нїе беззако́нныхъ раздира́етсѧ, и҆ со́лнце лꙋчы̀ своѧ̑ скрыва́етъ, влⷣкꙋ зрѧ̀ распина́ема.
И҆ па́ки тꙋ́юже дрꙋгі́й ли́къ.
Та́же пе́рвый ли́къ глаго́летъ сті́хъ: Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ.
И҆ пое́тъ настоѧ́щꙋю стїхи́рꙋ, гла́съ то́йже:
Ꙗ҆́кѡ ѻ҆вча̀ на заколе́нїе веде́нъ бы́лъ є҆сѝ, хрⷭ҇тѐ цр҃ю̀, и҆ ꙗ҆́кѡ а҆́гнецъ неѕло́бивый пригвожде́нъ бы́лъ є҆сѝ ко крⷭ҇тꙋ̀ ѿ беззако́нныхъ мꙋже́й, грѣ̑хъ ра́ди на́шихъ, чл҃вѣколю́бче.
Посе́мъ дрꙋгі́й ли́къ глаго́летъ сті́хъ:
Предста́ша ца́рїе зе́мстїи, и҆ кнѧ́зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀.
И҆ пое́тъ па́ки тꙋ́юже стїхи́рꙋ.
Та́же пе́рвый ли́къ: Сла́ва, гла́съ то́йже:
Є҆́мшымъ тѧ̀ беззакѡ́ннымъ, претерпѣва́ѧ, си́це вопїѧ́лъ є҆сѝ, гдⷭ҇и: а҆́ще и҆ порази́сте па́стырѧ, и҆ разсѣ́ѧсте двана́десѧть ѻ҆ве́цъ ᲂу҆ч҃нкѝ моѧ̑, можа́хъ вѧ́щше не́же двана́десѧте легеѡ́нѡвъ предста́вити а҆́гг҃лѡвъ: но долготерплю̀, да и҆спо́лнѧтсѧ, ꙗ҆̀же ꙗ҆ви́хъ ва́мъ прⷪ҇рѡ́ки мои́ми, безвѣ̑стнаѧ и҆ та̑йнаѧ. гдⷭ҇и, сла́ва тебѣ̀.
И҆ ны́нѣ: вторы́й ли́къ тꙋ́юже стїхи́рꙋ.
Прокі́менъ, ѱало́мъ м҃, гла́съ д҃: Се́рдце є҆гѡ̀ собра̀ беззако́нїе себѣ̀. Сті́хъ: Бл҃же́нъ разꙋмѣва́ѧй на ни́ща и҆ ᲂу҆бо́га.
Прⷪ҇ро́чества заха́рїина чте́нїе. [Глава̀ а҃і, ст. і҃-г҃і].
Та́кѡ глаго́летъ гдⷭ҇ь: прїимꙋ̀ же́злъ мо́й до́брый, и҆ ѿве́ргꙋ є҆го̀, є҆́же разори́ти завѣ́тъ мо́й, є҆го́же завѣща́хъ ко всѣ̑мъ лю́демъ: и҆ разори́тсѧ въ де́нь ѻ҆́ный, и҆ ᲂу҆разꙋмѣ́ютъ хананє́и ѻ҆́вцы храни̑мыѧ мнѣ̀, занѐ сло́во гдⷭ҇не є҆́сть. И҆ рекꙋ̀ къ ни̑мъ: а҆́ще добро̀ пред̾ ва́ми є҆́сть, дади́те мздꙋ̀ мою̀, и҆лѝ ѿрецы́тесѧ. И҆ поста́виша мздꙋ̀ мою̀ три́десѧть сре́брєникъ. И҆ речѐ гдⷭ҇ь ко мнѣ̀: вложѝ ѧ҆̀ въ горни́ло, и҆ смотрѝ, а҆́ще и҆скꙋше́но є҆́сть, и҆́мже ѡ҆́бразомъ и҆скꙋше́нъ бы́хъ ѡ҆ ни́хъ. И҆ прїѧ́хъ три́десѧть сре́брєникъ, и҆ вложи́хъ и҆́хъ въ хра́мъ гдⷭ҇ень въ горни́ло.
Та́же а҆пⷭ҇лъ къ гала́тѡмъ, зача́ло сє҃і, ѿ полꙋ̀:
Бра́тїе, мнѣ̀ да не бꙋ́детъ хвали́тисѧ, то́кмѡ ѡ҆ крⷭ҇тѣ̀ гдⷭ҇а на́шегѡ і҆и҃са хрⷭ҇та̀, и҆́мже мнѣ̀ мі́ръ распѧ́сѧ, и҆ а҆́зъ мі́рꙋ. Ѡ҆ хрⷭ҇тѣ́ бо і҆и҃сѣ ни ѡ҆брѣ́занїе что̀ мо́жетъ, ни неѡбрѣ́занїе, но нова̀ тва́рь. И҆ є҆ли́цы пра́виломъ си́мъ жи́тельствꙋютъ, ми́ръ на ни́хъ и҆ млⷭ҇ть, и҆ на і҆и҃ли бж҃їи. Про́чее трꙋды̀ да никто́же мѝ дае́тъ: а҆́зъ бо ꙗ҆́звы гдⷭ҇а і҆и҃са на тѣ́лѣ мое́мъ ношꙋ̀. Бл҃года́ть гдⷭ҇а на́шегѡ і҆и҃са хрⷭ҇та̀ со дꙋ́хомъ ва́шимъ, бра́тїе. А҆ми́нь.
Та́же є҆ѵⷢ҇лїе ѿ матѳе́а, зача́ло р҃і: Во вре́мѧ ѻ҆́но, ᲂу҆́трꙋ бы́вшꙋ, совѣ́тъ сотвори́ша всѝ а҆рхїере́є: Чте́тъ же въ рѧ́дъ и҆ зача́ло ра҃і, рв҃і, рг҃і. Коне́цъ: И҆ ма́ти сы̑нꙋ зеведе́ѡвꙋ. Та́же: Стѡпы̀ моѧ̑ напра́ви по словесѝ твоемꙋ̀: Да и҆спо́лнѧтсѧ ᲂу҆ста̀ моѧ̑ хвале́нїѧ: Трист҃о́е. И҆ по Ѻ҆́ч҃е на́шъ:
Конда́къ, гла́съ и҃:
На́съ ра́ди распѧ́таго, прїиди́те, всѝ воспои́мъ. того́ бо ви́дѣ мр҃і́а на дре́вѣ и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.
Та́же, Гдⷭ҇и, поми́лꙋй, м҃. И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Бж҃е, ᲂу҆ще́дри ны̀: Хрⷭ҇тѐ, свѣ́те и҆́стинный:
Посе́мъ пое́мъ тре́тїй ча́съ.
Прїиди́те, поклони́мсѧ: три́жды.
ѱало́мъ л҃д:
Сꙋдѝ, гдⷭ҇и, ѡ҆би́дѧщыѧ мѧ̀, поборѝ борю́щыѧ мѧ̀. Прїимѝ ѡ҆рꙋ́жїе и҆ щи́тъ, и҆ воста́ни въ по́мощь мою̀. И҆зсꙋ́ни ме́чь, и҆ заключѝ сопроти́въ гонѧ́щихъ мѧ̀: рцы̀ дꙋшѝ мое́й: сп҃се́нїе твоѐ є҆́смь а҆́зъ. Да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀: да возвратѧ́тсѧ вспѧ́ть и҆ постыдѧ́тсѧ мы́слѧщїи мѝ ѕла̑ѧ. Да бꙋ́дꙋтъ ꙗ҆́кѡ пра́хъ пред̾ лице́мъ вѣ́тра, и҆ а҆́гг҃лъ гдⷭ҇ень ѡ҆скорблѧ́ѧ и҆̀хъ. Да бꙋ́детъ пꙋ́ть и҆́хъ тьма̀ и҆ по́лзокъ, и҆ а҆́гг҃лъ гдⷭ҇ень погонѧ́ѧ и҆̀хъ. Ꙗ҆́кѡ тꙋ́не скры́ша мѝ па́гꙋбꙋ сѣ́ти своеѧ̀, всꙋ́е поноси́ша дꙋшѝ мое́й. Да прїи́детъ є҆мꙋ̀ сѣ́ть, ю҆́же не вѣ́сть, и҆ лови́тва, ю҆́же скры̀, да ѡ҆б̾и́метъ и҆̀: и҆ въ сѣ́ть да впаде́тъ въ ню̀: дꙋша́ же моѧ̀ возра́дꙋетсѧ ѡ҆ гдⷭ҇ѣ, возвесели́тсѧ ѡ҆ сп҃се́нїи є҆гѡ̀. Всѧ̑ кѡ́сти моѧ̑ рекꙋ́тъ: гдⷭ҇и, гдⷭ҇и, кто̀ подо́бенъ тебѣ̀; и҆збавлѧ́ѧй ни́ща и҆з̾ рꙋкѝ крѣ́пльшихъ є҆гѡ̀, и҆ ни́ща и҆ ᲂу҆бо́га ѿ расхища́ющихъ є҆го̀. Воста́вше на мѧ̀ свидѣ́телє непра́веднїи, ꙗ҆̀же не вѣ́дѣхъ, вопроша́хꙋ мѧ̀. Возда́ша мѝ лꙋка̑ваѧ воз̾ блага̑ѧ, и҆ безча́дїе дꙋшѝ мое́й. А҆́зъ же, внегда̀ ѻ҆нѝ стꙋжа́хꙋ мѝ, ѡ҆блача́хсѧ во вре́тище, и҆ смирѧ́хъ посто́мъ дꙋ́шꙋ мою̀, и҆ мл҃тва моѧ̀ въ нѣ́дро моѐ возврати́тсѧ. Ꙗ҆́кѡ бли́жнемꙋ, ꙗ҆́кѡ бра́тꙋ на́шемꙋ, та́кѡ ᲂу҆гожда́хъ: ꙗ҆́кѡ пла́чѧ и҆ сѣ́тꙋѧ, та́кѡ смирѧ́хсѧ. И҆ на мѧ̀ возвесели́шасѧ и҆ собра́шасѧ: собра́шасѧ на мѧ̀ ра̑ны, и҆ не позна́хъ: раздѣли́шасѧ, и҆ не ᲂу҆мили́шасѧ. И҆скꙋси́ша мѧ̀, подражни́ша мѧ̀ подражне́нїемъ, поскрежета́ша на мѧ̀ зꙋбы̀ свои́ми. Гдⷭ҇и, когда̀ ᲂу҆́зриши; ᲂу҆стро́й дꙋ́шꙋ мою̀ ѿ ѕлодѣ́йства и҆́хъ, ѿ лє́въ є҆диноро́днꙋю мою̀. И҆сповѣ́мсѧ тебѣ̀ въ цр҃кви мно́зѣ, въ лю́дехъ тѧ́жцѣхъ восхвалю́ тѧ. Да не возра́дꙋютсѧ ѡ҆ мнѣ̀ враждꙋ́ющїи мѝ непра́веднѡ, ненави́дѧщїи мѧ̀ тꙋ́не и҆ помиза́ющїи ѻ҆чи́ма. Ꙗ҆́кѡ мнѣ̀ ᲂу҆́бѡ ми̑рнаѧ глаго́лахꙋ, и҆ на гнѣ́въ ле́сти помышлѧ́хꙋ. Разшири́ша на мѧ̀ ᲂу҆ста̀ своѧ̑, рѣ́ша: бл҃гоже, бл҃гоже, ви́дѣша ѻ҆́чи на́ши. Ви́дѣлъ є҆сѝ, гдⷭ҇и, да не премолчи́ши: гдⷭ҇и, не ѿстꙋпѝ ѿ менє̀. Воста́ни, гдⷭ҇и, и҆ вонмѝ сꙋдꙋ̀ моемꙋ̀, бж҃е мо́й и҆ гдⷭ҇и мо́й, на прю̀ мою̀. Сꙋди́ ми, гдⷭ҇и, по пра́вдѣ твое́й, гдⷭ҇и бж҃е мо́й, и҆ да не возра́дꙋютсѧ ѡ҆ мнѣ̀. Да не рекꙋ́тъ въ сердца́хъ свои́хъ: бл҃гоже, бл҃гоже дꙋшѝ на́шей: нижѐ да рекꙋ́тъ: пожро́хомъ є҆го̀. Да постыдѧ́тсѧ и҆ посра́мѧтсѧ вкꙋ́пѣ ра́дꙋющїисѧ ѕлѡ́мъ мои̑мъ: да ѡ҆блекꙋ́тсѧ въ стꙋ́дъ и҆ сра́мъ велерѣ́чꙋющїи на мѧ̀. Да возра́дꙋютсѧ и҆ возвеселѧ́тсѧ хотѧ́щїи пра́вды моеѧ̀: и҆ да рекꙋ́тъ вы́нꙋ, да возвели́читсѧ гдⷭ҇ь, хотѧ́щїи ми́ра рабꙋ̀ є҆гѡ̀. И҆ ѧ҆зы́къ мо́й поꙋчи́тсѧ пра́вдѣ твое́й, ве́сь де́нь хвалѣ̀ твое́й.
Ѱало́мъ р҃и:
Бж҃е, хвалы̀ моеѧ̀ не премолчѝ: ꙗ҆́кѡ ᲂу҆ста̀ грѣ̑шнича и҆ ᲂу҆ста̀ льсти́вагѡ на мѧ̀ ѿверзо́шасѧ, глаго́лаша на мѧ̀ ѧ҆зы́комъ льсти́вымъ, и҆ словесы̀ ненави́стными ѡ҆быдо́ша мѧ̀, и҆ бра́шасѧ со мно́ю тꙋ́не. Вмѣ́стѡ є҆́же люби́ти мѧ̀, ѡ҆болга́хꙋ мѧ̀, а҆́зъ же молѧ́хсѧ. И҆ положи́ша на мѧ̀ ѕла̑ѧ за бл҃га̑ѧ, и҆ не́нависть за возлюбле́нїе моѐ. Поста́ви на него̀ грѣ́шника, и҆ дїа́волъ да ста́нетъ ѡ҆деснꙋ́ю є҆гѡ̀. Внегда̀ сꙋди́тисѧ є҆мꙋ̀, да и҆зы́детъ ѡ҆сꙋжде́нъ, и҆ мл҃тва є҆гѡ̀ да бꙋ́детъ въ грѣ́хъ. Да бꙋ́дꙋтъ дні́е є҆гѡ̀ ма́ли, и҆ є҆пі́скопство є҆гѡ̀ да прїи́метъ и҆́нъ. Да бꙋ́дꙋтъ сы́нове є҆гѡ̀ си́ри, и҆ жена̀ є҆гѡ̀ вдова̀. Дви́жꙋщесѧ да преселѧ́тсѧ сы́нове є҆гѡ̀ и҆ воспро́сѧтъ, да и҆згна́ни бꙋ́дꙋтъ и҆з̾ домѡ́въ свои́хъ. Да взы́щетъ заимода́вецъ всѧ̑, є҆ли̑ка сꙋ́ть є҆гѡ̀: и҆ да восхи́тѧтъ чꙋжді́и трꙋды̀ є҆гѡ̀. Да не бꙋ́детъ є҆мꙋ̀ застꙋ́пника, нижѐ да бꙋ́детъ ᲂу҆щедрѧ́ѧй сирѡты̀ є҆гѡ̀. Да бꙋ́дꙋтъ ча̑да є҆гѡ̀ въ погꙋбле́нїе, въ ро́дѣ є҆ди́номъ да потреби́тсѧ и҆́мѧ є҆гѡ̀. Да воспомѧне́тсѧ беззако́нїе ѻ҆тє́цъ є҆гѡ̀ пред̾ гдⷭ҇емъ, и҆ грѣ́хъ ма́тере є҆гѡ̀ да не ѡ҆чи́ститсѧ. Да бꙋ́дꙋтъ пред̾ гдⷭ҇емъ вы́нꙋ, и҆ да потреби́тсѧ ѿ землѝ па́мѧть и҆́хъ. Зане́же не помѧнꙋ̀ сотвори́ти ми́лость, и҆ погна̀ человѣ́ка ни́ща и҆ ᲂу҆бо́га, и҆ ᲂу҆миле́на се́рдцемъ ᲂу҆мертви́ти. И҆ возлюбѝ клѧ́твꙋ, и҆ прїи́детъ є҆мꙋ̀: и҆ не восхотѣ̀ бл҃гослове́нїѧ, и҆ ᲂу҆дали́тсѧ ѿ негѡ̀. И҆ ѡ҆блече́сѧ въ клѧ́твꙋ ꙗ҆́кѡ въ ри́зꙋ, и҆ вни́де ꙗ҆́кѡ вода̀ во ᲂу҆тро́бꙋ є҆гѡ̀, и҆ ꙗ҆́кѡ є҆ле́й въ кѡ́сти є҆гѡ̀. Да бꙋ́детъ є҆мꙋ̀ ꙗ҆́кѡ ри́за, въ ню́же ѡ҆блачи́тсѧ, и҆ ꙗ҆́кѡ по́ѧсъ, и҆́мже вы́нꙋ ѡ҆поѧсꙋ́етсѧ. Сїѐ дѣ́ло ѡ҆болга́ющихъ мѧ̀ ᲂу҆ гдⷭ҇а, и҆ глаго́лющихъ лꙋка̑ваѧ на дꙋ́шꙋ мою̀. И҆ ты̀, гдⷭ҇и, гдⷭ҇и, сотворѝ со мно́ю и҆́мене ра́ди твоегѡ̀, ꙗ҆́кѡ бл҃га млⷭ҇ть твоѧ̀. И҆зба́ви мѧ̀, ꙗ҆́кѡ ни́щь и҆ ᲂу҆бо́гъ є҆́смь а҆́зъ, и҆ се́рдце моѐ смѧте́сѧ внꙋ́трь менє̀. Ꙗ҆́кѡ сѣ́нь, внегда̀ ᲂу҆клони́тисѧ є҆́й, ѿѧ́хсѧ: стрѧсо́хсѧ ꙗ҆́кѡ прꙋ́зи. Кѡлѣ̑на моѧ̑ и҆знемого́ста ѿ поста̀, и҆ пло́ть моѧ̀ и҆змѣни́сѧ є҆ле́а ра́ди. И҆ а҆́зъ бы́хъ поноше́нїе и҆̀мъ: ви́дѣша мѧ̀, покива́ша глава́ми свои́ми. Помози́ ми, гдⷭ҇и бж҃е мо́й, и҆ сп҃си́ мѧ по млⷭ҇ти твое́й: и҆ да разꙋмѣ́ютъ, ꙗ҆́кѡ рꙋка̀ твоѧ̀ сїѧ̀, и҆ ты̀, гдⷭ҇и, сотвори́лъ є҆сѝ ю҆̀. Прокленꙋ́тъ ті́и, и҆ ты̀ бл҃гослови́ши: востаю́щїи на мѧ̀ да постыдѧ́тсѧ, ра́бъ же тво́й возвесели́тсѧ. Да ѡ҆блекꙋ́тсѧ ѡ҆болга́ющїи мѧ̀ въ срамотꙋ̀, и҆ ѡ҆де́ждꙋтсѧ ꙗ҆́кѡ ѡ҆де́ждою стꙋдо́мъ свои́мъ. И҆сповѣ́мсѧ гдⷭ҇еви ѕѣлѡ̀ ᲂу҆сты̀ мои́ми, и҆ посредѣ̀ мно́гихъ восхвалю̀ є҆го̀. Ꙗ҆́кѡ предста̀ ѡ҆деснꙋ́ю ᲂу҆бо́гагѡ, є҆́же сп҃стѝ ѿ гонѧ́щихъ дꙋ́шꙋ мою̀.
Ѱало́мъ н҃:
Поми́лꙋй мѧ̀, бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀: ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ и҆ побѣди́ши, внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ. Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀, бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менє̀. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й, бж҃е, бж҃е сп҃се́нїѧ моегѡ̀: возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ: всесожжє́нїѧ не бл҃говоли́ши. Же́ртва бг҃ꙋ дх҃ъ сокрꙋше́нъ: се́рдце сокрꙋше́но и҆ смире́но бг҃ъ не ᲂу҆ничижи́тъ. Оу҆бл҃жѝ, гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.
Сла́ва, и҆ ны́нѣ: А҆ллилꙋ́їа, три́жды. Гдⷭ҇и, поми́лꙋй, три́жды.
Сла́ва, тропа́рь, гла́съ ѕ҃:
Гдⷭ҇и, ѡ҆сꙋди́ша тѧ̀ і҆ꙋде́є на сме́рть, жи́знь всѣ́хъ: чермно́е мо́ре жезло́мъ проше́дшїи ко крⷭ҇тꙋ тѧ пригвозди́ша: и҆ ѿ ка́мене ме́дъ сса́вшїи тебѣ̀ же́лчь принесо́ша. но во́лею претерпѣ́лъ є҆сѝ, да на́съ свободи́ши ѿ рабо́ты врагꙋ̀. хрⷭ҇тѐ бж҃е, сла́ва тебѣ̀.
И҆ ны́нѣ, бг҃оро́диченъ: Бцⷣе, ты̀ є҆сѝ лоза̀:
И҆ пое́мъ трѝ стїхи̑ры ѿ двꙋна́десѧти, повторѧ́юще ѧ҆̀.
Гла́съ и҃.
Стра́ха ра́ди і҆ꙋде́йскагѡ, дрꙋ́гъ тво́й и҆ бли́жнїй пе́тръ ѿве́ржесѧ тебє̀, гдⷭ҇и, и҆ рыда́ѧ си́це вопїѧ́ше: сле́зъ мои́хъ не премолчѝ, рѣ́хъ бо сохрани́ти вѣ́рꙋ, ще́дре, и҆ не сохрани́хъ, и҆ на́ше покаѧ́нїе та́кожде прїимѝ, и҆ поми́лꙋй на́съ.
Па́ки тꙋ́юже.
Та́же сті́хъ: Глаго́лы моѧ̑ внꙋшѝ, гдⷭ҇и:
Пре́жде чтⷭ҇на́гѡ твоегѡ̀ крⷭ҇та̀, во́инѡмъ рꙋга́ющымсѧ тебѣ̀, гдⷭ҇и, невеще́ствєннаѧ вѡ́инства дивлѧ́хꙋсѧ: ѡ҆бложи́лсѧ бо є҆сѝ вѣнце́мъ безче́стїѧ, зе́млю живописа́вый цвѣ̑ты, и҆ порꙋга́емь багрѧни́цею ѡ҆дѣ́ѧлсѧ є҆сѝ, ѡ҆́блаки ѡ҆дѣва́ѧй тве́рдь: таковы́мъ бо смотре́нїемъ позна́но бы́сть твоѐ милосе́рдїе, хрⷭ҇тѐ. ве́лїѧ твоѧ̀ млⷭ҇ть, сла́ва тебѣ̀.
Сті́хъ: Вонмѝ гла́сꙋ моле́нїѧ моегѡ̀.
И҆ па́ки тꙋ́юже.
Сла́ва, гла́съ є҃: Влеко́мь на крⷭ҇тъ, си́це вопїѧ́лъ є҆сѝ, гдⷭ҇и: за ко́е дѣ́ло хо́щете мѧ̀ распѧ́ти і҆ꙋде́є; занѐ разсла́блєнныѧ ва́шѧ стѧгнꙋ́хъ, занѐ мертвецы̀ а҆́ки ѿ сна̀ возста́вихъ, кровоточи́вꙋю и҆сцѣли́хъ, ханане́ю поми́ловахъ. за ко́е дѣ́ло хо́щете мѧ̀ ᲂу҆би́ти, і҆ꙋде́є; но воззритѐ на́нь, є҆го́же ны́нѣ пробода́ете хрⷭ҇та̀, беззако́ннїи.
И҆ ны́нѣ, па́ки тꙋ́юже:
Прокі́менъ, ѱало́мъ л҃з, гла́съ д҃: Ꙗ҆́кѡ а҆́зъ на ра̑ны гото́въ, и҆ болѣ́знь моѧ̀ предо мно́ю є҆́сть вы́нꙋ. Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Прⷪ҇ро́чества и҆са́їина, чте́нїе. [Глава̀ и҃, ст. д҃-а҃і].
Гдⷭ҇ь дае́тъ мнѣ̀ ѧ҆зы́къ наꙋче́нїѧ, є҆́же разꙋмѣ́ти, є҆гда̀ подоба́етъ рещѝ сло́во: положи́ мѧ ᲂу҆́трѡ ᲂу҆́трѡ, приложи́ ми ᲂу҆́хо є҆́же слы́шати, и҆ наказа́нїе гдⷭ҇не ѿверза́етъ ᲂу҆́ши моѝ: а҆́зъ же не проти́влюсѧ, ни противоглаго́лю. Плєщѝ моѝ вда́хъ на ра̑ны и҆ лани̑тѣ моѝ на заꙋшє́нїѧ, лица́ же моегѡ̀ не ѿврати́хъ ѿ стꙋда̀ заплева́нїй. И҆ гдⷭ҇ь гдⷭ҇ь помо́щникъ мѝ бы́сть: сегѡ̀ ра́ди не ᲂу҆срами́хсѧ, но положи́хъ лицѐ своѐ а҆́ки тве́рдый ка́мень, и҆ разꙋмѣ́хъ, ꙗ҆́кѡ не постыждꙋ́сѧ: занѐ приближа́етсѧ ѡ҆правда́вый мѧ̀. Кто̀ прѧ́йсѧ со мно́ю; да сопротивоста́нетъ мнѣ̀ кꙋ́пнѡ. И҆ кто̀ сꙋдѧ́йсѧ со мно́ю; да прибли́житсѧ ко мнѣ̀. Сѐ гдⷭ҇ь гдⷭ҇ь помо́жетъ мѝ. Кто̀ ѡ҆ѕло́битъ мѧ̀; сѐ всѝ вы̀ ꙗ҆́кѡ ри́за ѡ҆бетша́ете, и҆ ꙗ҆́кѡ мо́лїе и҆з̾ѧ́стъ вы̀. Кто̀ въ ва́съ боѧ́йсѧ гдⷭ҇а; да послꙋ́шаетъ гла́са ѻ҆́трока є҆гѡ̀. Ходѧ́щїи во тьмѣ̀, и҆ нѣ́сть и҆̀мъ свѣ́та, надѣ́йтесѧ на и҆́мѧ гдⷭ҇не, и҆ ᲂу҆тверди́тесѧ ѡ҆ бз҃ѣ. Сѐ всѝ вы̀ ѻ҆́гнь раждиза́ете, и҆ ᲂу҆крѣплѧ́ете пла́мень: ходи́те свѣ́томъ ѻ҆гнѧ̀ ва́шегѡ и҆ пла́менемъ, є҆го́же разжего́сте: менє̀ ра́ди бы́ша сїѧ̑ ва́мъ, въ печа́ли ᲂу҆́спнете.
Та́же а҆пⷭ҇лъ, къ ри́млѧнѡмъ посла́нїѧ, зача́ло п҃и ѿ полꙋ̀:
Бра́тїе, хрⷭ҇то́съ, сꙋ́щымъ на́мъ немѡщны̑мъ, по вре́мени за нечести́выхъ ᲂу҆́мре. Є҆два́ бо за пра́ведника кто̀ ᲂу҆́мретъ: за бл҃га́го бо не́гли кто̀ и҆ де́рзнетъ ᲂу҆мре́ти: Составлѧ́етъ же свою̀ любо́вь въ на́съ бг҃ъ, ꙗ҆́кѡ, є҆щѐ грѣ́шникѡмъ сꙋ́щымъ на́мъ, хрⷭ҇то́съ за ны̀ ᲂу҆́мре. Мно́гѡ же ᲂу҆̀бо па́че, ѡ҆правда́ни бы́вше ны́нѣ кро́вїю є҆гѡ̀, сп҃се́мсѧ и҆́мъ ѿ гнѣ́ва. А҆́ще бо, вразѝ бы́вше, примири́хомсѧ бг҃ꙋ сме́ртїю сн҃а є҆гѡ̀, мно́жае па́че, примири́вшесѧ, сп҃се́мсѧ въ животѣ̀ є҆гѡ̀.
Є҆ѵⷢ҇лїе ѿ ма́рка, зача́ло ѯ҃ѕ, ѯ҃з и҆ ѯ҃и, въ рѧ́дъ. Во вре́мѧ ѻ҆́но, совѣ́тъ сотвори́ша а҆рхїере́є со ста̑рцы: Коне́цъ: Ꙗ҆̀же взыдо́ша съ ни́мъ во і҆ерⷭ҇ли́мъ. И҆ посе́мъ чте́мъ по сказа́нїи, ѿ матѳе́а, сло́во крⷭ҇тное. Та́же: Гдⷭ҇ь бг҃ъ бл҃гослове́нъ: Трист҃о́е. И҆ по Ѻ҆́ч҃е на́шъ: конда́къ: На́съ ра́ди распѧ́таго: Гдⷭ҇и, поми́лꙋй, м҃. Мл҃тва: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. І҆ере́й: Бж҃е, ᲂу҆ще́дри ны̀:
Влⷣко бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е, є҆ди́но бж҃ество̀, є҆ди́на си́ла, поми́лꙋй мѧ̀ грѣ́шнаго: и҆, и҆́миже вѣ́си сꙋдьба́ми, сп҃си́ мѧ недосто́йнаго раба̀ твоего̀, ꙗ҆́кѡ бл҃гослове́нъ є҆сѝ во вѣ́ки вѣкѡ́въ. А҆ми́нь.
И҆ а҆́бїе пое́мъ шесты́й ча́съ.
Прїиди́те, поклони́мсѧ: три́жды.
Ѱало́мъ н҃г.
Бж҃е, во и҆́мѧ твоѐ сп҃си́ мѧ и҆ въ си́лѣ твое́й сꙋди́ ми. Бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ: ꙗ҆́кѡ чꙋ́ждїи воста́ша на мѧ̀, и҆ крѣ́пцыи взыска́ша дꙋ́шꙋ мою̀, и҆ не предложи́ша бг҃а пред̾ собо́ю. Се́ бо бг҃ъ помога́етъ мѝ, и҆ гдⷭ҇ь застꙋ́пникъ дꙋшѝ мое́й: ѿврати́тъ ѕла̑ѧ врагѡ́мъ мои̑мъ: и҆́стиною твое́ю потребѝ и҆̀хъ. Во́лею пожрꙋ̀ тебѣ̀, и҆сповѣ́мсѧ и҆́мени твоемꙋ̀, гдⷭ҇и, ꙗ҆́кѡ бл҃го: ꙗ҆́кѡ ѿ всѧ́кїѧ печа́ли и҆зба́вилъ мѧ̀ є҆сѝ, и҆ на врагѝ моѧ̑ воззрѣ̀ ѻ҆́ко моѐ.
Ѱало́мъ рл҃ѳ.
И҆зми́ мѧ, гдⷭ҇и, ѿ человѣ́ка лꙋка́ва, ѿ мꙋ́жа непра́ведна и҆зба́ви мѧ̀: и҆̀же помы́слиша непра́вдꙋ въ се́рдцѣ, ве́сь де́нь ѡ҆полча́хꙋ бра̑ни: и҆з̾ѻстри́ша ѧ҆зы́къ сво́й ꙗ҆́кѡ ѕмїи́нъ: ꙗ҆́дъ а҆́спїдѡвъ под̾ ᲂу҆стна́ми и҆́хъ. Сохрани́ мѧ гдⷭ҇и, и҆з̾ рꙋкѝ грѣ́шничи, ѿ человѣ̑къ непра́ведныхъ и҆зми́ мѧ, и҆̀же помы́слиша запѧ́ти стѡпы̀ моѧ̑. Скры́ша го́рдїи сѣ́ть мнѣ̀, и҆ ᲂу҆́жы препѧ́ша сѣ́ть нога́ма мои́ма: при стезѝ собла́зны положи́ша мѝ. Рѣ́хъ гдⷭ҇еви: бг҃ъ мо́й є҆сѝ ты̀: внꙋшѝ, гдⷭ҇и, гла́съ моле́нїѧ моегѡ̀. Гдⷭ҇и, гдⷭ҇и, си́ло сп҃се́нїѧ моегѡ̀, ѡ҆сѣни́лъ є҆сѝ над̾ главо́ю мое́ю въ де́нь бра́ни. Не преда́ждь менѐ, гдⷭ҇и, ѿ жела́нїѧ моегѡ̀ грѣ́шникꙋ: помы́слиша на мѧ̀, не ѡ҆ста́ви менѐ, да не когда̀ вознесꙋ́тсѧ. Глава̀ ѡ҆крꙋже́нїѧ и҆́хъ, трꙋ́дъ ᲂу҆сте́нъ и҆́хъ покры́етъ ѧ҆̀. Падꙋ́тъ на ни́хъ ᲂу҆́глїѧ ѻ҆́гнєннаѧ: низложи́ши ѧ҆̀ въ страсте́хъ, и҆ не постоѧ́тъ. Мꙋ́жъ ѧ҆зы́ченъ не и҆спра́витсѧ на землѝ: мꙋ́жа непра́ведна ѕла̑ѧ ᲂу҆ловѧ́тъ во и҆стлѣ́нїе. Позна́хъ, ꙗ҆́кѡ сотвори́тъ гдⷭ҇ь сꙋ́дъ ни́щымъ и҆ ме́сть ᲂу҆бѡ́гимъ. Ѻ҆ба́че пра́веднїи и҆сповѣ́дѧтсѧ и҆́мени твоемꙋ̀, и҆ вселѧ́тсѧ пра́вїи съ лице́мъ твои́мъ.
Ѱало́мъ ч҃.
Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ. Рече́тъ гдⷭ҇еви: застꙋ́пникъ мо́й є҆сѝ и҆ прибѣ́жище моѐ, бг҃ъ мо́й, и҆ ᲂу҆пова́ю на него̀. Ꙗ҆́кѡ то́й и҆зба́витъ тѧ̀ ѿ сѣ́ти ло́вчи и҆ ѿ словесѐ мѧте́жна. Плещма̀ свои́ма ѡ҆сѣни́тъ тѧ̀, и҆ под̾ крилѣ̑ є҆гѡ̀ надѣ́ешисѧ: ѡ҆рꙋ́жїемъ ѡ҆бы́детъ тѧ̀ и҆́стина є҆гѡ̀. Не ᲂу҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ, ѿ ве́щи во тьмѣ̀ преходѧ́щїѧ, ꙾ѿ срѧ́ща9꙾ и҆ бѣ́са полꙋ́деннагѡ. Паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебє̀, къ тебѣ́ же не прибли́житсѧ. Ѻ҆ба́че ѻ҆чи́ма твои́ма смо́триши, и҆ воздаѧ́нїе грѣ́шникѡвъ ᲂу҆́зриши. Ꙗ҆́кѡ ты̀, гдⷭ҇и, ᲂу҆пова́нїе моѐ: вы́шнѧго положи́лъ є҆сѝ прибѣ́жище твоѐ. Не прїи́детъ къ тебѣ̀ ѕло̀, и҆ ра́на не прибли́житсѧ ꙾тѣлесѝ10꙾ твоемꙋ̀. Ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. На рꙋка́хъ во́зьмꙋтъ тѧ̀, да не когда̀ преткне́ши ѡ҆ ка́мень но́гꙋ твою̀. На а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ. Ꙗ҆́кѡ на мѧ̀ ᲂу҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ. Воззове́тъ ко мнѣ̀, и҆ ᲂу҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀, и҆ просла́влю є҆го̀: долгото́ю дне́й и҆спо́лню є҆го̀, и҆ ꙗ҆влю̀ є҆мꙋ̀ сп҃се́нїе моѐ.
Сла́ва, и҆ ны́нѣ: А҆ллилꙋ́їа, три́жды. Гдⷭ҇и, поми́лꙋй, три́жды.
Сла́ва, тропа́рь, гла́съ в҃:
Сп҃се́нїе содѣ́лалъ є҆сѝ посредѣ̀ землѝ, хрⷭ҇тѐ бж҃е: на крⷭ҇тѣ̀ пречⷭ҇тѣи рꙋ́цѣ твоѝ просте́рлъ є҆сѝ, собира́ѧ всѧ̑ ꙗ҆зы́ки, зовꙋ́щыѧ: гдⷭ҇и, сла́ва тебѣ̀.
И҆ ны́нѣ, бг҃оро́диченъ: Ꙗ҆́кѡ не и҆́мамы дерзнове́нїѧ:
И҆ пое́мъ г҃ стїхи̑ры ѿ двꙋна́десѧти, повторѧ́юще ѧ҆̀.
Гла́съ и҃:
Сїѧ̑ глаго́летъ гдⷭ҇ь і҆ꙋде́ѡмъ: лю́дїе моѝ, что̀ сотвори́хъ ва́мъ; и҆лѝ чи́мъ ва́мъ досади́хъ; слѣпцы̀ ва́шѧ просвѣти́хъ, прокажє́нныѧ ва́шѧ ѡ҆чи́стихъ, мꙋ́жа сꙋ́ща на ѻ҆дрѣ̀ возста́вихъ. лю́дїе моѝ, что̀ сотвори́хъ ва́мъ; и҆ что̀ мнѣ̀ возда́сте; за ма́ннꙋ же́лчь, за во́дꙋ ѻ҆́цетъ: вмѣ́сто любвѐ ко мнѣ̀, ко крⷭ҇тꙋ́ мѧ пригвозди́сте. ᲂу҆жѐ не терплю̀ бо́лее: призовꙋ̀ моѧ̑ ꙗ҆зы́ки, и҆ ті́и мѧ̀ просла́вѧтъ со ѻ҆ц҃е́мъ и҆ дх҃омъ: и҆ а҆́зъ и҆̀мъ да́рꙋю жи́знь вѣ́чнꙋю.
Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта.
Законополо́жницы і҆и҃лєвы, і҆ꙋде́є и҆ фарїсе́є, ли́къ а҆пⷭ҇льскїй вопїе́тъ къ ва́мъ: сѐ хра́мъ, є҆го́же вы̀ разори́сте: сѐ а҆́гнецъ, є҆го́же вы̀ распѧ́сте и҆ гро́бꙋ преда́сте, но вла́стїю свое́ю воскре́се. не прельща́йтесѧ, і҆ꙋде́є: то́й бо є҆́сть въ мо́ри сп҃сы́й и҆ въ пꙋсты́ни пита́вый: то́й є҆́сть жи́знь, и҆ свѣ́тъ, и҆ ми́ръ мі́рови.
Сті́хъ: Сп҃си́ мѧ, бж҃е, ꙗ҆́кѡ внидо́ша во́ды до дꙋшѝ моеѧ̀.
Па́ки тꙋ́юже стїхи́рꙋ.
Сла́ва, гла́съ є҃: Прїиди́те, хрⷭ҇тоно́снїи лю́дїе, ви́димъ, что̀ совѣща̀ і҆ꙋ́да преда́тель со сщє́нники беззако́нными на сп҃са на́шего: дне́сь пови́нна сме́рти, безсме́ртнаго сло́ва сотвори́ша, и҆ пїла́тꙋ преда́вше, на мѣ́стѣ ло́бнѣмъ распѧ́ша. и҆ сїѧ̑ стражда̀, вопїѧ́ше сп҃съ на́шъ, глаго́лѧ: ѡ҆ста́ви и҆̀мъ, ѻ҆́ч҃е грѣ́хъ се́й, да разꙋмѣ́ютъ ꙗ҆зы́цы моѐ и҆з̾ ме́ртвыхъ воскрⷭ҇нїе.
И҆ ны́нѣ, тꙋ́юже:
Прокі́менъ, ѱало́мъ и҃, гла́съ д҃: Гдⷭ҇и, гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ. Сті́хъ: Ꙗ҆́кѡ взѧ́тсѧ великолѣ́пїе твоѐ превы́ше нб҃съ.
Прⷪ҇ро́чества и҆са́їина чте́нїе.
[Гл. н҃в, ст. г҃і-є҃і: гл. н҃г, ст. а҃-в҃і: гл. н҃д, ст. а҃].
Та́кѡ глаго́летъ гдⷭ҇ь: сѐ ᲂу҆разꙋмѣ́етъ ѻ҆́трокъ мо́й, и҆ вознесе́тсѧ и҆ просла́витсѧ ѕѣлѡ̀. Ꙗ҆́коже ᲂу҆жа́снꙋтсѧ ѡ҆ тебѣ̀ мно́зи, та́кѡ ѡ҆безсла́витсѧ ѿ человѣ̑къ ви́дъ тво́й, и҆ сла́ва твоѧ̀ ѿ сынѡ́въ человѣ́ческихъ. Та́кѡ ᲂу҆дивѧ́тсѧ ꙗ҆зы́цы мно́зи ѡ҆ не́мъ, и҆ заградѧ́тъ ца́рїе ᲂу҆ста̀ своѧ̑: ꙗ҆́кѡ, и҆̀мже не возвѣсти́сѧ ѡ҆ не́мъ, ᲂу҆́зрѧтъ, и҆ и҆̀же не слы́шаша, ᲂу҆разꙋмѣ́ютъ. Гдⷭ҇и, кто̀ вѣ́рова слꙋ́хꙋ на́шемꙋ; и҆ мы́шца гдⷭ҇нѧ комꙋ̀ ѿкры́сѧ; Возвѣсти́хомъ, ꙗ҆́кѡ ѻ҆троча̀ пред̾ ни́мъ ꙗ҆́кѡ ко́рень въ землѝ жа́ждꙋщей, нѣ́сть ви́да є҆мꙋ̀, нижѐ сла́вы. И҆ ви́дѣхомъ є҆го̀, и҆ не и҆мѧ́ше ви́да, ни добро́ты: но ви́дъ є҆гѡ̀ безче́стенъ, ᲂу҆ма́ленъ па́че всѣ́хъ сынѡ́въ человѣ́ческихъ: человѣ́къ въ ꙗ҆́звѣ сы́й и҆ вѣ́дый терпѣ́ти болѣ́знь, ꙗ҆́кѡ ѿврати́сѧ лицѐ є҆гѡ̀, безче́стно бы́сть и҆ не вмѣни́сѧ. Се́й грѣхѝ на́шѧ но́ситъ и҆ ѡ҆ на́съ болѣ́знꙋетъ, и҆ мы̀ вмѣни́хомъ є҆го̀ бы́ти въ трꙋдѣ̀, и҆ въ ꙗ҆́звѣ ѿ бг҃а, и҆ во ѡ҆ѕлобле́нїи. То́й же ꙗ҆́звенъ бы́сть за грѣхѝ на́шѧ и҆ мꙋ́ченъ бы́сть за беззакѡ́нїѧ на̑ша, наказа́нїе ми́ра на́шегѡ на не́мъ, ꙗ҆́звою є҆гѡ̀ мы̀ и҆сцѣлѣ́хомъ. Всѝ ꙗ҆́кѡ ѻ҆́вцы заблꙋди́хомъ: человѣ́къ ѿ пꙋтѝ своегѡ̀ заблꙋдѝ, и҆ гдⷭ҇ь предадѐ є҆го̀ грѣ̑хъ ра́ди на́шихъ. И҆ то́й, занѐ ѡ҆ѕло́бленъ бы́сть, не ѿверза́етъ ᲂу҆́стъ свои́хъ: ꙗ҆́кѡ ѻ҆вча̀ на заколе́нїе веде́сѧ, и҆ ꙗ҆́кѡ а҆́гнецъ пред̾ стригꙋ́щимъ є҆го̀ безгла́сенъ, та́кѡ не ѿверза́етъ ᲂу҆́стъ свои́хъ. Во смире́нїи є҆гѡ̀ сꙋ́дъ є҆гѡ̀ взѧ́тсѧ: ро́дъ же є҆гѡ̀ кто̀ и҆сповѣ́сть; ꙗ҆́кѡ взе́млетсѧ ѿ землѝ живо́тъ є҆гѡ̀, ра́ди беззако́нїй люде́й мои́хъ веде́сѧ на сме́рть. И҆ да́мъ лꙋка̑выѧ вмѣ́стѡ погребе́нїѧ є҆гѡ̀, и҆ бога̑тыѧ вмѣ́стѡ сме́рти є҆гѡ̀: ꙗ҆́кѡ беззако́нїѧ не сотворѝ, нижѐ ѡ҆брѣ́тесѧ ле́сть во ᲂу҆стѣ́хъ є҆гѡ̀. И҆ гдⷭ҇ь хо́щетъ ѡ҆чи́стити є҆го̀ ѿ ꙗ҆́звы: а҆́ще да́стсѧ ѡ҆ грѣсѣ̀, дꙋша̀ ва́ша ᲂу҆́зритъ сѣ́мѧ долгоживо́тное. И҆ хо́щетъ гдⷭ҇ь рꙋко́ю свое́ю ѿѧ́ти болѣ́знь ѿ дꙋшѝ є҆гѡ̀, ꙗ҆ви́ти є҆мꙋ̀ свѣ́тъ и҆ созда́ти ра́зꙋмомъ, ѡ҆правда́ти пра́веднаго бл҃гослꙋжа́ща мнѡ́гимъ, и҆ грѣхѝ и҆́хъ то́й понесе́тъ. Сегѡ̀ ра́ди то́й наслѣ́дитъ мно́гихъ, и҆ крѣ́пкихъ раздѣли́тъ коры̑сти: занѐ предана̀ бы́сть на сме́рть дꙋша̀ є҆гѡ̀, и҆ со беззако́нными вмѣни́сѧ, и҆ то́й грѣхѝ мно́гихъ вознесѐ, и҆ за беззакѡ́нїѧ и҆́хъ пре́данъ бы́сть. Возвесели́сѧ, непло́ды, неражда́ющаѧ: возгласѝ и҆ возопі́й, нечревоболѣ́вшаѧ: ꙗ҆́кѡ мнѡ́га ча̑да пꙋсты́ѧ па́че, не́жели и҆мꙋ́щїѧ мꙋ́жа.
А҆пⷭ҇лъ ко є҆вре́ємъ, зача́ло т҃ѕ:
Бра́тїе, ст҃ѧ́й и҆ ѡ҆сщ҃а́емїи ѿ є҆ди́нагѡ всѝ: є҆ѧ́же ра́ди вины̀ не стыди́тсѧ бра́тїю нарица́ти и҆́хъ, глаго́лѧ: возвѣщꙋ̀ и҆́мѧ твоѐ бра́тїи мое́й, посредѣ̀ цр҃кве воспою́ тѧ. И҆ па́ки: а҆́зъ бꙋ́дꙋ надѣ́ѧсѧ на́нь. И҆ па́ки: сѐ а҆́зъ и҆ дѣ́ти, ꙗ҆̀же мѝ да́лъ є҆́сть бг҃ъ. Поне́же ᲂу҆́бѡ дѣ́ти прїѻбщи́шасѧ пло́ти и҆ кро́ви, и҆ то́й прїи́скреннѣ прїѻбщи́сѧ тѣ́хже, да сме́ртїю ᲂу҆праздни́тъ и҆мꙋ́щаго держа́вꙋ сме́рти, си́рѣчь дїа́вола: и҆ и҆зба́витъ си́хъ, є҆ли́цы стра́хомъ сме́рти чрез̾ всѐ житїѐ пови́нни бѣ́ша рабо́тѣ. Не ѿ а҆́гг҃лъ ᲂу҆́бѡ когда̀ прїе́млетъ, но ѿ сѣ́мене а҆враа́мова прїе́млетъ. Ѿню́дꙋже до́лженъ бѣ̀ по всемꙋ̀ подо́битисѧ бра́тїи, да мтⷭ҇ивъ бꙋ́детъ и҆ вѣ́ренъ первосщ҃е́нникъ въ тѣ́хъ, ꙗ҆̀же къ бг҃ꙋ, во є҆́же ѡ҆чи́стити грѣхѝ людскі̑ѧ. Въ не́мже бо пострада̀, са́мъ и҆скꙋше́нъ бы́въ, мо́жетъ и҆ и҆скꙋша́ємымъ помощѝ.
Та́же є҆ѵⷢ҇лїе, ѿ лꙋкѝ, зача́ло ра҃і. Во вре́мѧ ѻ҆́но, ведѧ́хꙋ со і҆и҃сомъ и҆ и҆́на два̀ ѕлодѣ̑ѧ: Коне́цъ: Ѿ галїле́и зрѧ́ще си́хъ. И҆ посе́мъ чте́нїе. Та́же: Ско́рѡ да предварѧ́тъ ны̀: Трист҃о́е. По Ѻ҆́ч҃е на́шъ: конда́къ: На́съ ра́ди распѧ́таго: Гдⷭ҇и, поми́лꙋй, м҃. И҆ мл҃тва: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Бж҃е, ᲂу҆ще́дри ны̀:
Та́же, мл҃тва ст҃а́гѡ вели́кагѡ васі́лїа:
Бж҃е и҆ гдⷭ҇и си́лъ и҆ всеѧ̀ тва́ри содѣ́телю, и҆́же, за милосе́рдїе безприкла́дныѧ млⷭ҇ти твоеѧ̀, є҆диноро́днаго сн҃а твоего̀, гдⷭ҇а на́шего і҆и҃са хрⷭ҇та̀ низпосла́вый на сп҃се́нїе ро́да на́шегѡ, и҆ чтⷭ҇ны́мъ є҆гѡ̀ крⷭ҇то́мъ рꙋкописа́нїе грѣ̑хъ на́шихъ растерза́вый, и҆ побѣди́вый тѣ̑мъ нача̑ла и҆ вла̑сти тьмы̀: са́мъ, влⷣко чл҃вѣколю́бче, прїимѝ и҆ на́съ грѣ́шныхъ бл҃года́рствєнныѧ сїѧ̑ и҆ молє́бныѧ мл҃твы, и҆ и҆зба́ви на́съ ѿ всѧ́кагѡ всегꙋби́тельнагѡ и҆ мра́чнагѡ прегрѣше́нїѧ, и҆ всѣ́хъ, ѡ҆ѕло́бити на́съ и҆́щꙋщихъ, ви́димыхъ и҆ неви́димыхъ вра̑гъ. пригвоздѝ стра́хꙋ твоемꙋ̀ плѡ́ти на́шѧ, и҆ не ᲂу҆клонѝ серде́цъ на́шихъ въ словеса̀ и҆лѝ помышлє́нїѧ лꙋка́вствїѧ: но любо́вїю твое́ю ᲂу҆ѧзвѝ дꙋ́шы на́шѧ: да къ тебѣ̀ всегда̀ взира́юще, и҆ є҆́же ѿ тебє̀ свѣ́томъ наставлѧ́еми, тебѐ непристꙋ́пнаго и҆ присносꙋ́щнаго зрѧ́ще свѣ́та, непреста́нное тебѣ̀ и҆сповѣ́данїе и҆ бл҃годаре́нїе возсыла́емъ, безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ, и҆ всест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Совокꙋплѧ́емъ же и҆ девѧ́тый ча́съ.
Прїиди́те, поклони́мсѧ: три́жды.
Ѱало́мъ ѯ҃и.
Сп҃си́ мѧ, бж҃е, ꙗ҆́кѡ внидо́ша во́ды до дꙋшѝ моеѧ̀. Оу҆глѣбо́хъ въ тимѣ́нїи глꙋбины̀, и҆ нѣ́сть постоѧ́нїѧ: прїидо́хъ во глꙋбины̑ морскі̑ѧ, и҆ бꙋ́рѧ потопи́ мѧ. Оу҆трꙋди́хсѧ зовы́й, и҆змолчѐ горта́нь мо́й, и҆счезо́стѣ ѻ҆́чи моѝ, ѿ є҆́же ᲂу҆пова́ти мѝ на бг҃а моего̀. Оу҆мно́жишасѧ па́че вла̑съ главы̀ моеѧ̀ ненави́дѧщїи мѧ̀ тꙋ́не: ᲂу҆крѣпи́шасѧ вразѝ моѝ, и҆згонѧ́щїи мѧ̀ непра́веднѡ: ꙗ҆̀же не восхища́хъ, тогда̀ воздаѧ́хъ. Бж҃е, ты̀ ᲂу҆вѣ́дѣлъ є҆сѝ безꙋ́мїе моѐ, и҆ прегрѣшє́нїѧ моѧ̑ ѿ тебє̀ не ᲂу҆таи́шасѧ. Да не постыдѧ́тсѧ ѡ҆ мнѣ̀ терпѧ́щїи тебѐ, гдⷭ҇и, гдⷭ҇и си́лъ: нижѐ да посра́мѧтсѧ ѡ҆ мнѣ̀ и҆́щꙋщїи тебѐ, бж҃е і҆и҃левъ. Ꙗ҆́кѡ тебє̀ ра́ди претерпѣ́хъ поноше́нїе, покры̀ срамота̀ лицѐ моѐ. Чꙋ́ждь бы́хъ бра́тїи мое́й и҆ стра́ненъ сыновѡ́мъ ма́тере моеѧ̀: ꙗ҆́кѡ ре́вность до́мꙋ твоегѡ̀ снѣде́ мѧ, и҆ поношє́нїѧ поносѧ́щихъ тѝ нападо́ша на мѧ̀. И҆ покры́хъ посто́мъ дꙋ́шꙋ мою̀, и҆ бы́сть въ поноше́нїе мнѣ̀: и҆ положи́хъ ѡ҆дѣѧ́нїе моѐ вре́тище, и҆ бы́хъ и҆̀мъ въ при́тчꙋ. Ѡ҆ мнѣ̀ глꙋмлѧ́хꙋсѧ сѣдѧ́щїи во вратѣ́хъ, и҆ ѡ҆ мнѣ̀ поѧ́хꙋ пїю́щїи вїно̀. а҆́зъ же мл҃твою мое́ю къ тебѣ̀, бж҃е: вре́мѧ бл҃говоле́нїѧ, бж҃е: во мно́жествѣ млⷭ҇ти твоеѧ̀ ᲂу҆слы́ши мѧ̀, во и҆́стинѣ сп҃се́нїѧ твоегѡ̀. Сп҃си́ мѧ ѿ бре́нїѧ, да не ᲂу҆глѣ́бнꙋ: да и҆зба́влюсѧ ѿ ненави́дѧщихъ мѧ̀ и҆ ѿ глꙋбо́кихъ во́дъ. Да не потопи́тъ менѐ бꙋ́рѧ водна́ѧ, нижѐ да пожре́тъ менѐ глꙋбина̀, нижѐ сведе́тъ ѡ҆ мнѣ̀ рове́нникъ ᲂу҆́стъ свои́хъ. Оу҆слы́ши мѧ̀, гдⷭ҇и, ꙗ҆́кѡ бла́га млⷭ҇ть твоѧ̀: по мно́жествꙋ щедро́тъ твои́хъ при́зри на мѧ̀. Не ѿвратѝ лица̀ твоегѡ̀ ѿ ѻ҆́трока твоегѡ̀, ꙗ҆́кѡ скорблю̀, ско́рѡ ᲂу҆слы́ши мѧ̀. Вонмѝ дꙋшѝ мое́й и҆ и҆зба́ви ю҆̀: вра̑гъ мои́хъ ра́ди и҆зба́ви мѧ̀. Ты́ бо вѣ́си поноше́нїе моѐ, и҆ стꙋ́дъ мо́й, и҆ срамотꙋ̀ мою̀: пред̾ тобо́ю всѝ ѡ҆скорблѧ́ющїи мѧ̀. Поноше́нїе ча́ѧше дꙋша̀ моѧ̀ и҆ стра́сть: и҆ жда́хъ соскорбѧ́щагѡ, и҆ не бѣ̀, и҆ ᲂу҆тѣша́ющихъ, и҆ не ѡ҆брѣто́хъ. И҆ да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта. Да бꙋ́детъ трапе́за и҆́хъ пред̾ ни́ми въ сѣ́ть, и҆ въ воздаѧ́нїе, и҆ въ собла́знъ. Да помрача́тсѧ ѻ҆́чи и҆́хъ, є҆́же не ви́дѣти, и҆ хребе́тъ и҆́хъ вы́нꙋ слѧцы̀. Проле́й на нѧ̀ гнѣ́въ тво́й и҆ ꙗ҆́рость гнѣ́ва твоегѡ̀ да пости́гнетъ и҆̀хъ. Да бꙋ́детъ дво́ръ и҆́хъ пꙋ́стъ, и҆ въ жили́щахъ и҆́хъ да не бꙋ́детъ живы́й. Занѐ, є҆го́же ты̀ порази́лъ є҆сѝ, ті́и погна́ша, и҆ къ болѣ́зни ꙗ҆́звъ мои́хъ приложи́ша. Приложѝ беззако́нїе къ беззако́нїю и҆́хъ, и҆ да не вни́дꙋтъ въ пра́вдꙋ твою̀. Да потребѧ́тсѧ ѿ кни́ги живы́хъ, и҆ съ првⷣными да не напи́шꙋтсѧ. Ни́щъ и҆ болѧ́й є҆́смь а҆́зъ: сп҃се́нїе твоѐ, бж҃е, да прїи́метъ мѧ̀. Восхвалю̀ и҆́мѧ бг҃а моегѡ̀ съ пѣ́снїю, возвели́чꙋ є҆го̀ во хвале́нїи: и҆ ᲂу҆го́дно бꙋ́детъ бг҃ꙋ па́че тельца̀ ю҆́на, ро́ги и҆зносѧ́ща и҆ па́знѡкти. Да ᲂу҆́зрѧтъ ни́щїи, и҆ возвеселѧ́тсѧ: взыщи́те бг҃а, и҆ жива̀ бꙋ́детъ дꙋша̀ ва́ша. ꙗ҆́кѡ ᲂу҆слы́ша ᲂу҆бѡ́гїѧ гдⷭ҇ь, и҆ ѡ҆кова̑нныѧ своѧ̑ не ᲂу҆ничижѝ. Да восхва́лѧтъ є҆го̀ нб҃са̀ и҆ землѧ̀, мо́ре и҆ всѧ̑ живꙋ̑щаѧ въ не́мъ. Ꙗ҆́кѡ бг҃ъ сп҃се́тъ сїѡ́на, и҆ сози́ждꙋтсѧ гра́ди і҆ꙋде́йстїи: и҆ вселѧ́тсѧ та́мѡ, и҆ наслѣ́дѧтъ и҆̀. И҆ сѣ́мѧ рабѡ́въ твои́хъ ᲂу҆держи́тъ и҆̀, и҆ лю́бѧщїи и҆́мѧ твоѐ вселѧ́тсѧ въ не́мъ.
Ѱало́мъ ѯ҃ѳ.
Бж҃е, въ по́мощь мою̀ вонмѝ: гдⷭ҇и, помощи́ ми потщи́сѧ. Да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀, да возвратѧ́тсѧ вспѧ́ть и҆ постыдѧ́тсѧ хотѧ́щїи мѝ ѕла̑ѧ. Да возвратѧ́тсѧ а҆́бїе стыдѧ́щесѧ глаго́лющїи мѝ: бл҃гоже, бл҃гоже. Да возра́дꙋютсѧ и҆ возвеселѧ́тсѧ ѡ҆ тебѣ̀ всѝ и҆́щꙋщїи тебѐ, бж҃е: и҆ да глаго́лютъ вы́нꙋ, да возвели́читсѧ гдⷭ҇ь, лю́бѧщїи сп҃се́нїе твоѐ. а҆́зъ же ни́щь є҆́смь и҆ ᲂу҆бо́гъ: бж҃е, помози́ ми. Помо́щникъ мо́й, и҆ и҆зба́витель мо́й є҆сѝ ты̀: гдⷭ҇и, не закоснѝ.
Ѱало́мъ п҃є.
Приклонѝ, гдⷭ҇и, ᲂу҆́хо твоѐ, и҆ ᲂу҆слы́ши мѧ̀: ꙗ҆́кѡ ни́щъ и҆ ᲂу҆бо́гъ є҆́смь а҆́зъ. Сохранѝ дꙋ́шꙋ мою̀, ꙗ҆́кѡ преподо́бенъ є҆́смь: сп҃сѝ раба̀ твоего̀, бж҃е мо́й, ᲂу҆пова́ющаго на тѧ̀. Поми́лꙋй мѧ̀, гдⷭ҇и, ꙗ҆́кѡ къ тебѣ̀ воззовꙋ̀ ве́сь де́нь. Возвеселѝ дꙋ́шꙋ раба̀ твоегѡ̀: ꙗ҆́кѡ къ тебѣ̀ взѧ́хъ дꙋ́шꙋ мою̀. Ꙗ҆́кѡ ты̀, гдⷭ҇и, бл҃гъ и҆ кро́токъ и҆ многомлⷭ҇тивъ всѣ̑мъ призыва́ющымъ тѧ̀. Внꙋшѝ, гдⷭ҇и, мл҃твꙋ мою̀, и҆ вонмѝ гла́сꙋ моле́нїѧ моегѡ̀. Въ де́нь ско́рби моеѧ̀ воззва́хъ къ тебѣ̀, ꙗ҆́кѡ ᲂу҆слы́шалъ мѧ̀ є҆сѝ. Нѣ́сть подо́бенъ тебѣ̀ въ бозѣ́хъ, гдⷭ҇и, и҆ нѣ́сть по дѣлѡ́мъ твои̑мъ. Всѝ ꙗ҆зы́цы, є҆ли̑ки сотвори́лъ є҆сѝ, прїи́дꙋтъ, и҆ покло́нѧтсѧ пред̾ тобо́ю, гдⷭ҇и, и҆ просла́вѧтъ и҆́мѧ твоѐ: ꙗ҆́кѡ ве́лїй є҆сѝ ты̀ и҆ творѧ́й чꙋдеса̀, ты̀ є҆сѝ бг҃ъ є҆ди́нъ. Наста́ви мѧ́, гдⷭ҇и, на пꙋ́ть тво́й, и҆ пойдꙋ̀ во и҆́стинѣ твое́й: да возвесели́тсѧ се́рдце моѐ боѧ́тисѧ и҆́мене твоегѡ̀. И҆сповѣ́мсѧ тебѣ̀, гдⷭ҇и бж҃е мо́й, всѣ́мъ се́рдцемъ мои́мъ, и҆ просла́влю и҆́мѧ твоѐ въ вѣ́къ: ꙗ҆́кѡ млⷭ҇ть твоѧ̀ ве́лїѧ на мнѣ̀, и҆ и҆зба́вилъ є҆сѝ дꙋ́шꙋ мою̀ ѿ а҆́да преиспо́днѣйшагѡ. Бж҃е, законопрестꙋ̑пницы воста́ша на мѧ̀, и҆ со́нмъ держа́вныхъ взыска́ша дꙋ́шꙋ мою̀, и҆ не предложи́ша тебѐ пред̾ собо́ю. И҆ ты̀, гдⷭ҇и бж҃е мо́й, ще́дрый и҆ млⷭ҇тивый, долготерпѣли́вый и҆ многомлⷭ҇тивый и҆ и҆́стинный, при́зри на мѧ̀ и҆ поми́лꙋй мѧ̀: да́ждь держа́вꙋ твою̀ ѻ҆́трокꙋ твоемꙋ̀, и҆ сп҃сѝ сы́на рабы̀ твоеѧ̀. Сотворѝ со мно́ю зна́менїе во бл҃го, и҆ да ви́дѧтъ ненави́дѧщїи мѧ̀, и҆ постыдѧ́тсѧ: ꙗ҆́кѡ ты̀, гдⷭ҇и, помо́глъ мѝ и҆ ᲂу҆тѣ́шилъ мѧ̀ є҆сѝ.
Сла́ва, и҆ ны́нѣ: а҆ллилꙋ́їа, три́жды. Гдⷭ҇и, поми́лꙋй, три́жды.
Сла́ва, тропа́рь, гла́съ и҃:
Ви́дѧ разбо́йникъ нача́льника жи́зни на крⷭ҇тѣ̀ ви́сѧща, глаго́лаше: а҆́ще не бы̀ бг҃ъ бы́лъ вопло́щьсѧ съ на́ми распны́йсѧ, не бы̀ со́лнце лꙋчы̀ сокры́ло, нижѐ бы землѧ̀ трепе́щꙋщи трѧсла́сѧ: но, всѧ̑ терпѧ́й, помѧни́ мѧ, гдⷭ҇и, во црⷭ҇твїи твое́мъ.
И҆ ны́нѣ, бг҃оро́диченъ:
На́съ ра́ди рожде́йсѧ ѿ дв҃ы:
И҆ пое́мъ стїхи̑ры трѝ ѿ двꙋна́десѧти.
Гла́съ ѕ҃: Оу҆́жасъ бѣ̀ ви́дѣти нб҃сѐ и҆ землѝ творца̀ на крⷭ҇тѣ̀ ви́сѧща, со́лнце поме́ркшее, де́нь же па́ки въ но́щь прело́жшїйсѧ, и҆ зе́млю и҆з̾ гробѡ́въ возсыла́ющꙋ тѣлеса̀ ме́ртвыхъ: съ ни́миже покланѧ́емсѧ тебѣ̀, сп҃сѝ на́съ. [Два́жды].
Сті́хъ: Раздѣли́ша ри̑зы моѧ̑ себѣ̀, и҆ ѡ҆ ѡ҆де́ждѣ мое́й мета́ша жре́бїй.
Гла́съ в҃: Є҆гда̀ ко крⷭ҇тꙋ̀ пригвозди́ша беззако́ннїи тѧ̀ гдⷭ҇а сла́вы, вопїѧ́лъ є҆сѝ къ ни̑мъ: чи́мъ ва́съ ѡ҆скорби́хъ; и҆лѝ чи́мъ прогнѣ́вахъ; пре́жде менє̀ кто̀ ва́съ и҆зба́ви ѿ ско́рби; и҆ ны́нѣ почто̀ мнѣ̀ воздаетѐ ѕла̑ѧ за бл҃га̑ѧ; за сто́лпъ ѻ҆́гненный, ко крⷭ҇тꙋ̀ мѧ пригвозди́сте: за ѡ҆́блакъ, гро́бъ мнѣ̀ и҆скопа́сте: за ма́ннꙋ, же́лчь мнѣ̀ принесо́сте: за во́дꙋ, ѻ҆́цтомъ мѧ̀ напои́сте. тогѡ̀ ра́ди призовꙋ̀ ꙗ҆зы́ки, и҆ ті́и мѧ̀ просла́вѧтъ со ѻ҆ц҃е́мъ и҆ ст҃ы́мъ дх҃омъ.
Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта.
И҆ па́ки тꙋ́юже.
Сла́ва, гла́съ ѕ҃: Дне́сь ви́ситъ на дре́вѣ зе́млю на вода́хъ повѣ́сивый: вѣнце́мъ ѿ те́рнїѧ ѡ҆блага́етсѧ а҆́гг҃лѡвъ цр҃ь: въ ло́жнꙋю багрѧни́цꙋ ѡ҆дѣва́етсѧ ѡ҆дѣва́ѧй не́бо ѡ҆́блаки: заꙋше́нїе прїѧ́тъ свободи́вый во і҆ѻрда́нѣ а҆да́ма: гвоздьмѝ пригвозди́сѧ жени́хъ цр҃ко́вный: копїе́мъ прободе́сѧ сн҃ъ дв҃ы. покланѧ́емсѧ стрⷭ҇те́мъ твои̑мъ, хрⷭ҇тѐ: покланѧ́емсѧ стрⷭ҇те́мъ твои̑мъ, хрⷭ҇тѐ: покланѧ́емсѧ стрⷭ҇те́мъ твои̑мъ, хрⷭ҇тѐ. покажѝ на́мъ и҆ сла́вное твоѐ воскрⷭ҇нїе.
И҆ ны́нѣ, тꙋ́юже.
Прокі́менъ, ѱало́мъ г҃і, гла́съ ѕ҃: Речѐ безꙋ́менъ въ се́рдцѣ свое́мъ: нѣ́сть бг҃ъ. Сті́хъ: Нѣ́сть творѧ́й бл҃госты́ню, нѣ́сть до є҆ди́нагѡ.
Прⷪ҇ро́чества і҆еремі́ина чте́нїе: Гдⷭ҇и, скажи́ ми, и҆ ᲂу҆разꙋмѣ́ю, тогда̀ ви́дѣхъ: И҆щѝ въ четверто́къ вели́кїй на а҃-мъ часѣ̀.
А҆пⷭ҇лъ ко є҆вре́ѡмъ, зача́ло тк҃д:
Бра́тїе, и҆мꙋ́ще дерзнове́нїе входи́ти во ст҃а̑ѧ кро́вїю і҆и҃съ хрⷭ҇то́вою, пꙋте́мъ но́вымъ и҆ живы́мъ, є҆го́же ѡ҆бнови́лъ є҆́сть на́мъ завѣ́сою, си́рѣчь пло́тїю свое́ю, и҆ і҆ере́а вели́ка над̾ до́момъ бж҃їимъ: да пристꙋпа́емъ со и҆́стиннымъ се́рдцемъ во и҆звѣще́нїи вѣ́ры, ѡ҆кропле́ни сердца̀ ѿ со́вѣсти лꙋка́выѧ, и҆ и҆змове́ни тѣлеса̀ водо́ю чи́стою, да держи́мъ и҆сповѣ́данїе ᲂу҆пова́нїѧ неꙋкло́нное: вѣ́ренъ бо є҆́сть ѡ҆бѣща́вый. И҆ да разꙋмѣва́емъ дрꙋ́гъ дрꙋ́га въ поѻщре́нїи любвѐ и҆ до́брыхъ дѣ́лъ: не ѡ҆ставлѧ́юще собра́нїѧ своегѡ̀, ꙗ҆́коже є҆́сть нѣ̑кимъ ѡ҆бы́чай, но [дрꙋ́гъ дрꙋ́га] подвиза́юще, и҆ толи́кѡ па́че, є҆ли́кѡ ви́дите приближа́ющьсѧ де́нь [сꙋ́дный]. Во́лею бо согрѣша́ющымъ на́мъ по прїѧ́тїи ра́зꙋма и҆́стины, ктомꙋ̀ ѡ҆ грѣсѣ́хъ не ѡ҆брѣта́етсѧ же́ртва, стра́шно же нѣ́кое ча́ѧнїе сꙋда̀, и҆ ѻ҆гнѧ̀ ре́вность, поѧ́сти хотѧ́щагѡ сопроти̑вныѧ. Ѿве́рглсѧ кто̀ зако́на мѡѷсе́ова, без̾ милосе́рдїѧ при двою̀ и҆лѝ трїе́хъ свидѣ́телехъ ᲂу҆мира́етъ: коли́кѡ, мнитѐ, го́ршїѧ сподо́битсѧ мꙋ́ки, и҆́же сн҃а бж҃їѧ попра́вый, и҆ кро́вь завѣ́тнꙋю скве́рнꙋ возмни́въ, въ не́йже ѡ҆ст҃и́сѧ, и҆ дх҃а бл҃года́ти ᲂу҆кори́вый; Вѣ́мы бо ре́кшаго: мнѣ̀ ѿмще́нїе, а҆́зъ возда́мъ, глаго́летъ гдⷭ҇ь. и҆ па́ки: ꙗ҆́кѡ сꙋ́дитъ гдⷭ҇ь лю́демъ свои̑мъ. Стра́шно є҆́сть є҆́же впа́сти въ рꙋ́цѣ бг҃а жива́гѡ.
Є҆ѵⷢ҇лїе ѿ і҆ѡа́нна, зача́ло н҃ѳ, ѯ҃, ѯ҃а: Во вре́мѧ ѻ҆́но, ведо́ша і҆и҃са ѿ каїа́фы въ претѡ́ръ: Коне́цъ: Воззрѧ́тъ на́нь, є҆го́же прободо́ша. Та́же предлага́етсѧ чте́нїе, сло́во крⷭ҇тное. Та́же: Не преда́ждь на́съ до конца̀: Трист҃о́е: По Ѻ҆́ч҃е на́шъ: конда́къ: На́съ ра́ди распѧ́таго: Гдⷭ҇и, поми́лꙋй, м҃. Мл҃тва: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. І҆ере́й: Бж҃е, ᲂу҆ще́дри ны̀:
И҆ мл҃тва:
Влⷣко гдⷭ҇и і҆и҃се хрⷭ҇тѐ бж҃е на́шъ, долготерпѣ́вый ѡ҆ на́шихъ согрѣше́нїихъ, и҆ да́же до ны́нѣшнѧгѡ часа̀ приведы́й на́съ, во́ньже, на животворѧ́щемъ дре́вѣ ви́сѧ, бл҃горазꙋ́мномꙋ разбо́йникꙋ и҆́же въ ра́й пꙋтесотвори́лъ є҆сѝ вхо́дъ, и҆ сме́ртїю сме́рть разрꙋши́лъ є҆сѝ: ѡ҆чи́сти на́съ грѣ́шныхъ и҆ недосто́йныхъ ра̑бъ твои́хъ: согрѣши́хомъ бо и҆ беззако́нновахомъ, и҆ нѣ́смы досто́йни возвестѝ ѻ҆чеса̀ на̑ша и҆ воззрѣ́ти на высотꙋ̀ нбⷭ҇нꙋю: занѐ ѡ҆ста́вихомъ пꙋ́ть пра́вды твоеѧ̀ и҆ ходи́хомъ въ во́лѧхъ серде́цъ на́шихъ. Но мо́лимъ твою̀ безмѣ́рнꙋю бл҃гость: пощадѝ на́съ, гдⷭ҇и, по мно́жествꙋ млⷭ҇ти твоеѧ̀, и҆ сп҃сѝ на́съ и҆́мене твоегѡ̀ ра́ди ст҃а́гѡ, ꙗ҆́кѡ и҆счезо́ша въ сꙋетѣ̀ дні́е на́ши: и҆зьмѝ на́съ и҆з̾ рꙋкѝ сопроти́внагѡ, и҆ ѡ҆ста́ви на́мъ грѣхѝ на́шѧ, и҆ ᲂу҆мертвѝ плотско́е на́ше мꙋдрова́нїе, да ве́тхагѡ ѿложи́вше человѣ́ка, въ но́ваго ѡ҆блеце́мсѧ, и҆ тебѣ̀ поживе́мъ на́шемꙋ влⷣцѣ и҆ бл҃годѣ́телю: и҆ та́кѡ, твои̑мъ послѣ́дꙋюще повелѣ́нїємъ, въ вѣ́чный поко́й дости́гнемъ, и҆дѣ́же є҆́сть всѣ́хъ веселѧ́щихсѧ жили́ще. Ты́ бо є҆сѝ вои́стиннꙋ и҆́стинное весе́лїе и҆ ра́дость лю́бѧщихъ тѧ̀, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Та́же бл҃жє́нны ско́рѡ: Во црⷭ҇твїи твое́мъ помѧнѝ на́съ: Сла́ва, и҆ ны́нѣ: Помѧнѝ на́съ, гдⷭ҇и: Ли́къ нбⷭ҇ный: Сла́ва: Ли́къ ст҃ы́хъ а҆́гг҃лъ: И҆ ны́нѣ: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: Посе́мъ, Ѻ҆́ч҃е на́шъ: И҆ конда́къ: На́съ ра́ди распѧ́таго: Гдⷭ҇и, поми́лꙋй, м҃. И҆ мл҃тва: Всест҃а́ѧ трⷪ҇це: Та́же: Бꙋ́ди и҆́мѧ гдⷭ҇не: три́жды. Сла́ва, и҆ ны́нѣ: Бл҃гословлю̀ гдⷭ҇а на всѧ́кое вре́мѧ: И҆ ѿпꙋ́стъ.
[зрѝ] Подоба́етъ же и҆ сїѐ вѣ́дати, ꙗ҆́кѡ прїѧ́хомъ въ палесті́нѣ, въ се́й ст҃ы́й де́нь вели́кагѡ пѧтка̀ не твори́ти преждеѡсщ҃е́ннꙋю, нижѐ па́ки соверше́ннꙋю лїтꙋргі́ю, но нижѐ трапе́зꙋ поставлѧ́емъ, нижѐ ꙗ҆ди́мъ въ се́й де́нь распѧ́тїѧ. А҆́ще же кто̀ бꙋ́детъ многоне́мощенъ, и҆лѝ престарѣ́лсѧ, и҆ не могі́й пребы́ти по́стенъ, дае́тсѧ є҆мꙋ̀ хлѣ́бъ и҆ вода̀, по захожде́нїи со́лнца. Си́це бо прїѧ́хомъ ѿ ст҃ы́хъ за́повѣдей ст҃ы́хъ а҆пⷭ҇лъ, не ꙗ҆́сти въ вели́кїй пѧто́къ. Гдⷭ҇не бо сло́во, є҆́же речѐ къ фарїсе́ѡмъ гдⷭ҇ь: ꙗ҆́кѡ є҆гда̀ ѿи́метсѧ ѿ ни́хъ жени́хъ, тогда̀ постѧ́тсѧ въ ты̑ѧ дни̑: здѣ̀ бл҃же́ннѣйшїи а҆пⷭ҇ли воспрїѧ́ша, и҆ сїѐ ѡ҆брѧ́щеши во а҆пⷭ҇льскихъ преда́нїихъ, внима́тельнѡ сїѧ̑ проходѧ̀. Но и҆ каноні́ческое посла́нїе ст҃ѣ́йшагѡ а҆рхїепⷭ҇кпа а҆леѯандрі́йскагѡ дїонѵ́сїа ꙗ҆́вѣ сїѐ предпоставлѧ́етъ.
Во ст҃ы́й и҆ вели́кїй пѧто́къ ве́чера,
ѡ҆ десѧ́томъ часѣ̀ днѐ кле́плетъ. И҆ бл҃гослови́вшꙋ сщ҃е́нникꙋ, начина́емъ вече́рню. На Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ стїхи̑ры самогла̑сны.
Гла́съ а҃: Всѧ̀ тва́рь и҆змѣнѧ́шесѧ стра́хомъ, зрѧ́щи тѧ̀ на крⷭ҇тѣ̀ ви́сѧща, хрⷭ҇тѐ: со́лнце ѡ҆мрача́шесѧ, и҆ землѝ ѡ҆снова̑нїѧ сотрѧса́хꙋсѧ: всѧ̑ сострада́хꙋ созда́вшемꙋ всѧ̑. во́лею на́съ ра́ди претерпѣ́вый, гдⷭ҇и, сла́ва тебѣ̀. [Два́жды].
Гла́съ в҃: Лю́дїе ѕлочести́вїи и҆ беззако́ннїи почто̀ ᲂу҆мышлѧ́ютъ тщє́тнаѧ; почто̀ жи́знь всѣ́хъ на сме́рть ѡ҆сꙋди́ша; ве́лїе чꙋ́до! занѐ созда́тель мі́ра въ рꙋ́ки беззако́нныхъ предае́тсѧ, и҆ на дре́во возвыша́етсѧ чл҃вѣколю́бецъ, да сꙋ́щыѧ во а҆́дѣ ю҆́зники свободи́тъ зовꙋ́щыѧ: долготерпѣли́ве гдⷭ҇и, сла́ва тебѣ̀.
Дне́сь непоро́чнаѧ дв҃а, зрѧ́щи тѧ̀, сло́ве, ко крⷭ҇тꙋ̀ пригвожда́ема, рыда́ющи мт҃рнею ᲂу҆тро́бою, ᲂу҆ѧзвлѧ́шесѧ се́рдцемъ го́рцѣ, и҆ стенѧ́щи болѣ́зненнѡ и҆з̾ глꙋбины̀ дꙋшѝ, лани̑ты со власы̀ терза́ющи, сокрꙋша́шесѧ. тѣ́мже и҆ пє́рси бїю́щи, взыва́ше жа́лостнѡ: ᲂу҆вы̀ мнѣ̀, бж҃е́ственное ча́до! ᲂу҆вы̀ мнѣ̀, свѣ́те мі́ра! что̀ заше́лъ є҆сѝ ѿ ѻ҆́чїю моє́ю, а҆́гнче бж҃їй; тѣ́мже вѡ́инства безпло́тныхъ тре́петомъ содержи́ми бѧ́хꙋ, глаго́люще: непостижи́ме гдⷭ҇и, сла́ва тебѣ̀.
На дре́вѣ ви́сѧща ви́дѧщи тѧ̀, хрⷭ҇тѐ, всѣ́хъ зижди́телѧ и҆ бг҃а, безсѣ́меннѡ ро́ждшаѧ тѧ̀ вопїѧ́ше го́рькѡ: сн҃е мо́й, гдѣ̀ за́йде добро́та зра́ка твоегѡ̀; не терплю̀ зрѣ́ти тѧ̀ непра́веднѡ распина́ема: потщи́сѧ ᲂу҆̀бо, воста́ни, ꙗ҆́кѡ да ви́жꙋ и҆ а҆́зъ твоѐ и҆з̾ ме́ртвыхъ тридне́вное воскрⷭ҇нїе.
Гла́съ ѕ҃: Дне́сь влⷣка тва́ри предстои́тъ пїла́тꙋ, и҆ крⷭ҇тꙋ̀ предае́тсѧ зижди́тель всѣ́хъ, ꙗ҆́кѡ а҆́гнецъ приводи́мь свое́ю во́лею: гвоздьмѝ пригвожда́етсѧ, и҆ въ ре́бра пробода́етсѧ, и҆ гꙋ́бою напоѧ́етсѧ ма́ннꙋ ѡ҆дожди́вый, по лани́тамъ заꙋша́етсѧ и҆зба́витель мі́ра, и҆ ѿ свои́хъ ра̑бъ порꙋга́емь быва́етъ созда́тель всѣ́хъ. ѽ влⷣчнѧгѡ чл҃вѣколю́бїѧ! за распина́ющихъ молѧ́ше своего̀ ѻ҆ц҃а̀, глаго́лѧ: ѻ҆́ч҃е, ѡ҆ста́ви и҆̀мъ грѣ́хъ се́й: не вѣ́дѧтъ бо беззако́ннїи, что̀ непра́веднѡ содѣва́ютъ.
Сла́ва, гла́съ то́йже: Ѽ ка́кѡ беззако́нное со́нмище ѡ҆сꙋдѝ цр҃ѧ̀ тва́ри на сме́рть, не ᲂу҆стыдѣ́всѧ бл҃годѣѧ́нїй, ꙗ҆̀же воспомина́ѧ ᲂу҆твержда́ше, глаго́лѧ къ ни̑мъ: лю́дїе моѝ, что̀ сотвори́хъ ва́мъ; не чꙋде́съ ли и҆спо́лнихъ і҆ꙋде́ю; не мертвецы́ ли воскреси́хъ є҆ди́нѣмъ сло́вомъ; не всѧ́кꙋю ли болѣ́знь и҆сцѣли́хъ и҆ недꙋ́гъ; что̀ ᲂу҆̀бо мѝ воздаетѐ; почто̀ не по́мните мѧ̀, за и҆сцѣлє́нїѧ ра̑ны мнѣ̀ наложи́вше, за жи́знь ᲂу҆мерщвлѧ́юще, вѣ́шающе на дре́вѣ, ꙗ҆́кѡ ѕлодѣ́ѧ, бл҃годѣ́телѧ: ꙗ҆́кѡ беззако́нника, законода́вца, ꙗ҆́кѡ ѡ҆сꙋжде́нника, всѣ́хъ цр҃ѧ̀. долготерпѣли́ве гдⷭ҇и, сла́ва тебѣ̀.
И҆ ны́нѣ, гла́съ то́йже: Стра́шное и҆ пресла́вное та́инство дне́сь дѣ́йствꙋемо зри́тсѧ: неѡсѧза́емый ᲂу҆держава́етсѧ: вѧ́жетсѧ разрѣша́ѧй а҆да́ма ѿ клѧ́твы: и҆спытꙋ́ѧй сердца̀ и҆ ᲂу҆трѡ́бы, непра́веднѡ и҆спытꙋ́етсѧ: въ темни́цѣ затворѧ́етсѧ бе́зднꙋ затвори́вый: пїла́тꙋ предстои́тъ, є҆мꙋ́же со тре́петомъ предстоѧ́тъ нбⷭ҇ныѧ си̑лы: заꙋша́етсѧ рꙋко́ю созда́нїѧ созда́тель: на дре́во ѡ҆сꙋжда́етсѧ сꙋдѧ́й живы̑мъ и҆ мє́ртвымъ: во гро́бѣ заключа́етсѧ разори́тель а҆́да. всѧ̑ терпѧ́й милосе́рднѡ и҆ всѣ́хъ сп҃сы́й ѿ клѧ́твы, неѕло́биве гдⷭ҇и, сла́ва тебѣ̀.
Вхо́дъ со є҆ѵⷢ҇лїемъ. Свѣ́те ти́хїй: Прокі́менъ, ѱало́мъ к҃а, гла́съ д҃: Раздѣли́ша ри̑зы моѧ̑ себѣ̀, и҆ ѡ҆ ѡ҆де́ждѣ мое́й мета́ша жре́бїй. Сті́хъ: Бж҃е, бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ;
И҆схо́да чте́нїе. [Глава̀ л҃г, ст. а҃і-к҃г].
Глаго́ла гдⷭ҇ь къ мѡѷсе́ю лице́мъ къ лицꙋ̀, ꙗ҆́коже а҆́ще бы кто̀ возглаго́лалъ къ своемꙋ̀ дрꙋ́гꙋ, и҆ ѿпꙋща́шесѧ въ по́лкъ: слꙋга́ же і҆исꙋ́съ, сы́нъ наѵи́нъ, ю҆́ноша не и҆схожда́ше и҆з̾ ски́нїи. И҆ речѐ мѡѷсе́й ко гдⷭ҇ꙋ: сѐ ты̀ мнѣ̀ глаго́леши: и҆зведѝ лю́ди сїѧ̑: ты́ же не ꙗ҆ви́лъ мѝ є҆сѝ, кого̀ по́слеши со мно́ю. Ты́ же мнѣ̀ ре́клъ є҆сѝ: вѣ́мъ тѧ̀ па́че всѣ́хъ, и҆ бл҃года́ть и҆́маши ᲂу҆ менє̀. А҆́ще ᲂу҆̀бо ѡ҆брѣто́хъ бл҃года́ть пред̾ тобо́ю, ꙗ҆ви́ ми тебѐ сама́го, да разꙋ́мнѡ ви́ждꙋ тѧ̀: ꙗ҆́кѡ да ѡ҆брѣ́тъ бꙋ́дꙋ бл҃года́ть пред̾ тобо́ю, и҆ да позна́ю, ꙗ҆́кѡ лю́дїе твоѝ ꙗ҆зы́къ вели́къ се́й. И҆ глаго́ла [є҆мꙋ̀ гдⷭ҇ь]: а҆́зъ са́мъ пред̾идꙋ̀ пред̾ тобо́ю и҆ ᲂу҆поко́ю тѧ̀. И҆ речѐ къ немꙋ̀ мѡѷсе́й: а҆́ще са́мъ ты̀ не и҆́деши съ на́ми, да не и҆зведе́ши мѧ̀ ѿсю́дꙋ. И҆ ка́кѡ вѣ́домо бꙋ́детъ вои́стиннꙋ, ꙗ҆́кѡ ѡ҆брѣто́хъ бл҃года́ть ᲂу҆ тебє̀, а҆́зъ же и҆ лю́дїе твоѝ, то́чїю и҆дꙋ́щꙋ тѝ съ на́ми; и҆ просла́вленъ бꙋ́дꙋ, а҆́зъ же и҆ лю́дїе твоѝ, па́че всѣ́хъ ꙗ҆зы̑къ, є҆ли́цы сꙋ́ть на землѝ. Рече́ же гдⷭ҇ь къ мѡѷсе́ю: и҆ сїѐ тебѣ̀ сло́во, є҆́же ре́клъ є҆сѝ, сотворю̀: ѡ҆брѣ́лъ бо є҆сѝ бл҃года́ть предо мно́ю, и҆ вѣ́мъ тѧ̀ па́че всѣ́хъ. И҆ глаго́ла мѡѷсе́й: покажи́ ми сла́вꙋ твою̀. И҆ речѐ [гдⷭ҇ь къ мѡѷсе́ю]: а҆́зъ пред̾идꙋ̀ пред̾ тобо́ю сла́вою мое́ю, и҆ воззовꙋ̀ ѡ҆ и҆́мени мое́мъ, гдⷭ҇ь пред̾ тобо́ю: и҆ поми́лꙋю, є҆го́же а҆́ще ми́лꙋю: и҆ ᲂу҆ще́дрю, є҆го́же а҆́ще ще́дрю. И҆ речѐ: не возмо́жеши ви́дѣти лица̀ моегѡ̀: не бо̀ ᲂу҆́зритъ человѣ́къ лицѐ моѐ, и҆ жи́въ бꙋ́детъ. И҆ речѐ гдⷭ҇ь: сѐ мѣ́сто ᲂу҆ менє̀, и҆ ста́неши на ка́мени. Є҆гда́ же пре́йдетъ сла́ва моѧ̀, и҆ положꙋ́ тѧ въ разсѣ́линѣ ка́мене, и҆ покры́ю рꙋко́ю мое́ю над̾ тобо́ю, до́ндеже мимоидꙋ̀. И҆ ѿимꙋ̀ рꙋ́кꙋ мою̀, и҆ тогда̀ ᲂу҆́зриши за̑днѧѧ моѧ̑: лице́ же моѐ не ꙗ҆ви́тсѧ тебѣ̀.
Прокі́менъ, ѱало́мъ л҃д, гла́съ д҃: Сꙋдѝ, гдⷭ҇ь, ѡ҆би́дѧщыѧ мѧ̀, поборѝ борю́щыѧ мѧ̀. Сті́хъ: Прїимѝ ѡ҆рꙋ́жїе и҆ щи́тъ, и҆ воста́ни въ по́мощь мою̀.
І҆́ѡва чте́нїе. [Глава̀ м҃в, ст. в҃і-з҃і].
Гдⷭ҇ь бл҃гословѝ послѣ̑днѧѧ і҆́ѡвлѧ, не́же прє́жнѧѧ: бѧ́хꙋ же ско́ти є҆гѡ̀, ѻ҆ве́цъ четырена́десѧть ты́сѧщъ, вельблю́дѡвъ ше́сть ты́сѧщъ, сꙋпрꙋ̑гъ волѡ́въ ты́сѧща, ѻ҆сли́цъ ста́дныхъ ты́сѧща. Роди́ша же сѧ є҆мꙋ̀, сы́нове се́дмь и҆ дщє́ри трѝ. И҆ наречѐ пе́рвꙋю ᲂу҆́бѡ, де́нь, вторꙋ́ю же кассі́ю, тре́тїю же а҆малѳе́евъ ро́гъ. И҆ не ѡ҆брѣто́шасѧ подѡ́бны въ лѣ́потѣ дще́ремъ і҆́ѡвлєвымъ въ поднебе́снѣй: даде́ же и҆̀мъ ѻ҆те́цъ наслѣ́дїе въ бра́тїи и҆́хъ. Поживе́ же і҆́ѡвъ по ꙗ҆́звѣ лѣ́тъ сто̀ се́дмьдесѧтъ: всѣ́хъ же лѣ́тъ поживѐ двѣ́сти четы́редесѧть ѻ҆́смь. И҆ ви́дѣ і҆́ѡвъ сы́ны своѧ̑ и҆ сы́ны сынѡ́въ свои́хъ, да́же до четве́ртагѡ ро́да. И҆ сконча́сѧ і҆́ѡвъ ста́ръ и҆спо́лнь дне́й. Пи́сано же є҆́сть па́ки воста́ти є҆мꙋ̀, съ ни́миже гдⷭ҇ь возста́витъ и҆̀. Та́кѡ толкꙋ́етсѧ ѿ сѵ́рскїѧ кни́ги: въ землѝ ᲂу҆́бѡ живы́й а҆ѵсїтїді́йстѣй, на предѣ́лѣхъ і҆дꙋме́и и҆ а҆раві́и: пре́жде же бѧ́ше и҆́мѧ є҆мꙋ̀ і҆ѡва́въ. Взе́мъ же женꙋ̀ а҆ра́влѧныню, родѝ сы́на, є҆мꙋ́же и҆́мѧ є҆ннѡ́нъ. Бѣ́ же то́й ѻ҆тца̀ ᲂу҆́бѡ заре́ѳа, и҆са́ѵовыхъ сынѡ́въ сы́нъ, ма́тере же восо́рры, ꙗ҆́коже бы́ти є҆мꙋ̀ пѧ́томꙋ ѿ а҆враа́ма.
Прⷪ҇ро́чества и҆са́їина чте́нїе. [Гл. н҃в, ст. г҃і-є҃і:
гл. н҃г, ст. а҃-в҃і: гл. н҃д, ст. а҃.]
Та́кѡ глаго́летъ гдⷭ҇ь: сѐ ᲂу҆разꙋмѣ́етъ ѻ҆́трокъ мо́й, и҆ вознесе́тсѧ и҆ просла́витсѧ ѕѣлѡ̀. Ꙗ҆́коже ᲂу҆жа́снꙋтсѧ ѡ҆ тебѣ̀ мно́зи, та́кѡ ѡ҆безсла́витсѧ ѿ человѣ̑къ ви́дъ тво́й, и҆ сла́ва твоѧ̀ ѿ сынѡ́въ человѣ́ческихъ. Та́кѡ ᲂу҆дивѧ́тсѧ ꙗ҆зы́цы мно́зи ѡ҆ не́мъ, и҆ заградѧ́тъ ца́рїе ᲂу҆ста̀ своѧ̑: ꙗ҆́кѡ, и҆̀мже не возвѣсти́сѧ ѡ҆ не́мъ, ᲂу҆́зрѧтъ, и҆ и҆̀же не слы́шаша, ᲂу҆разꙋмѣ́ютъ. Гдⷭ҇и, кто̀ вѣ́рова слꙋ́хꙋ на́шемꙋ; и҆ мы́шца гдⷭ҇нѧ комꙋ̀ ѿкры́сѧ; Возвѣсти́хомъ, ꙗ҆́кѡ ѻ҆троча̀ пред̾ ни́мъ ꙗ҆́кѡ ко́рень въ землѝ жа́ждꙋщей, нѣ́сть ви́да є҆мꙋ̀, нижѐ сла́вы. И҆ ви́дѣхомъ є҆го̀, и҆ не и҆мѧ́ше ви́да, ни добро́ты: Но ви́дъ є҆гѡ̀ безче́стенъ, ᲂу҆ма́ленъ па́че всѣ́хъ сынѡ́въ человѣ́ческихъ: человѣ́къ въ ꙗ҆́звѣ сы́й и҆ вѣ́дый терпѣ́ти болѣ́знь, ꙗ҆́кѡ ѿврати́сѧ лицѐ є҆гѡ̀, безче́стно бы́сть и҆ не вмѣни́сѧ. Се́й грѣхѝ на́шѧ но́ситъ и҆ ѡ҆ на́съ болѣ́знꙋетъ, и҆ мы̀ вмѣни́хомъ є҆го̀ бы́ти въ трꙋдѣ̀, и҆ въ ꙗ҆́звѣ ѿ бг҃а, и҆ во ѡ҆ѕлобле́нїи. То́й же ꙗ҆́звенъ бы́сть за грѣхѝ на́шѧ, и҆ мꙋ́ченъ бы́сть за беззакѡ́нїѧ на́шѧ, наказа́нїе ми́ра на́шегѡ на не́мъ, ꙗ҆́звою є҆гѡ̀ мы̀ и҆сцѣлѣ́хомъ. Всѝ ꙗ҆́кѡ ѻ҆́вцы заблꙋди́хомъ: человѣ́къ ѿ пꙋтѝ своегѡ̀ заблꙋдѝ, и҆ гдⷭ҇ь предадѐ є҆го̀ грѣ̑хъ ра́ди на́шихъ. И҆ то́й, занѐ ѡ҆ѕло́бленъ бы́сть, не ѿверза́етъ ᲂу҆́стъ свои́хъ: ꙗ҆́кѡ ѻ҆вча̀ на заколе́нїе веде́сѧ, и҆ ꙗ҆́кѡ а҆́гнецъ пред̾ стригꙋ́щимъ є҆го̀ безгла́сенъ, та́кѡ не ѿверза́етъ ᲂу҆́стъ свои́хъ. Во смире́нїи є҆гѡ̀ сꙋ́дъ є҆гѡ̀ взѧ́тсѧ: ро́дъ же є҆гѡ̀ кто̀ и҆сповѣ́сть; ꙗ҆́кѡ взе́млетсѧ ѿ землѝ живо́тъ є҆гѡ̀, ра́ди беззако́нїй люде́й мои́хъ веде́сѧ на сме́рть. И҆ да́мъ лꙋка̑выѧ вмѣ́стѡ погребе́нїѧ є҆гѡ̀. и҆ бога̑тыѧ вмѣ́стѡ сме́рти є҆гѡ̀: ꙗ҆́кѡ беззако́нїѧ не сотворѝ, нижѐ ѡ҆брѣ́тесѧ ле́сть во ᲂу҆стѣ́хъ є҆гѡ̀. И҆ гдⷭ҇ь хо́щетъ ѡ҆чи́стити є҆го̀ ѿ ꙗ҆́звы: а҆́ще да́стсѧ ѡ҆ грѣсѣ̀, дꙋша̀ ва́ша ᲂу҆́зритъ сѣ́мѧ долгоживо́тное. И҆ хо́щетъ гдⷭ҇ь рꙋко́ю свое́ю ѿѧ́ти болѣ́знь ѿ дꙋшѝ є҆гѡ̀, ꙗ҆ви́ти є҆мꙋ̀ свѣ́тъ и҆ созда́ти ра́зꙋмомъ, ѡ҆правда́ти првⷣнаго бл҃гослꙋжа́ща мнѡ́гимъ, и҆ грѣхѝ и҆́хъ то́й понесе́тъ. Сегѡ̀ ра́ди то́й наслѣ́дитъ мно́гихъ, и҆ крѣ́пкихъ раздѣли́тъ коры̑сти: занѐ предана̀ бы́сть на сме́рть дꙋша̀ є҆гѡ̀, и҆ со беззако́нными вмѣни́сѧ, и҆ то́й грѣхѝ мно́гихъ вознесѐ, и҆ за беззакѡ́нїѧ и҆́хъ пре́данъ бы́сть. Возвесели́сѧ, непло́ды, неражда́ющаѧ: возгласѝ и҆ возопі́й нечревоболѣ́вшаѧ: ꙗ҆́кѡ мнѡ́га ча̑да пꙋсты́ѧ па́че, не́жели и҆мꙋ́щїѧ мꙋ́жа.
Прокі́менъ а҆пⷭ҇ла, гла́съ ѕ҃: Положи́ша мѧ̀ въ ро́вѣ преиспо́днѣмъ, въ те́мныхъ и҆ сѣ́ни сме́ртнѣй. Сті́хъ: Гдⷭ҇и бж҃е сп҃се́нїѧ моегѡ̀, во днѝ воззва́хъ и҆ въ нощѝ пред̾ тобо́ю. А҆пⷭ҇лъ къ корі́нѳѧнѡмъ, зача́ло рк҃є: Бра́тїе, сло́во крⷭ҇тное: Коне́цъ: И҆ сего̀ ра́спѧта. А҆ллилꙋ́їа, гла́съ а҃: Сп҃си́ мѧ, бж҃е, ꙗ҆́кѡ внидо́ша во́ды до дꙋшѝ моеѧ̀. Сті́хъ: Поноше́нїе ча́ѧше дꙋша̀ моѧ̀ и҆ стра́сть. Сті́хъ: Да помрача́тсѧ ѻ҆́чи и҆́хъ, є҆́же не ви́дѣти. Є҆ѵⷢ҇лїе ѿ матѳе́а, зача́ло р҃і: Во вре́мѧ ѻ҆́но, совѣ́тъ сотвори́ша всѝ а҆рхїере́є: Коне́цъ: Прѧ́мѡ гро́ба. Та́же, ѡ҆бы́чнаѧ є҆ктенїа̀: Рце́мъ всѝ ѿ всеѧ̀ дꙋшѝ: И҆ пото́мъ, Сподо́би, гдⷭ҇и: И҆спо́лнимъ вече́рнюю мл҃твꙋ: И҆ прѡ́чаѧ.
И҆ по возгла́сѣ пое́мъ ѿ стїхѡ́вны стїхи̑ры подѡ́бны д҃, гла́съ в҃:
Подо́́бенъ: Є҆гда̀ ѿ дре́ва:
Є҆гда̀ ѿ дре́ва тѧ̀ ме́ртва а҆рїмаѳе́й снѧ́тъ всѣ́хъ жи́знь, смѵ́рною и҆ плащани́цею тѧ̀, хрⷭ҇тѐ, ѡ҆бвѝ, и҆ съ любо́вїю тща́шесѧ се́рдцемъ и҆ ᲂу҆стна́ми тѣ́ло нетлѣ́нное твоѐ ѡ҆блобыза́ти. ѻ҆ба́че, ѡ҆держи́мь стра́хомъ, ра́дꙋѧсѧ вопїѧ́ше тѝ: сла́ва снизхожде́нїю твоемꙋ̀, чл҃вѣколю́бче.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Є҆гда̀ во гро́бѣ но́вѣ за всѣ́хъ положе́нъ бы́лъ є҆сѝ, и҆зба́вителю всѣ́хъ, а҆́дъ смѣ́ха досто́йный ви́дѣвъ тѧ̀ ᲂу҆жасе́сѧ, закле́пи сломи́шасѧ, сокрꙋши́шасѧ врата̀, гро́би ѿверзо́шасѧ, ме́ртвїи воста́ша, тогда̀ а҆да́мъ бл҃года́рственнѡ ра́дꙋѧсѧ вопїѧ́ше тебѣ̀: сла́ва снизхожде́нїю твоемꙋ̀, чл҃вѣколю́бче.
Сті́хъ: И҆́бо ᲂу҆твердѝ вселе́ннꙋю, ꙗ҆́же не подви́житсѧ.
Є҆гда̀ во гро́бѣ пло́тски во́лею заключе́нъ бы́лъ є҆сѝ, є҆стество́мъ бж҃ества̀ пребыва́ѧй неѡпи́санъ и҆ неѡпредѣле́нъ, хрⷭ҇тѐ, сме́рти заключи́лъ є҆сѝ храни̑лища и҆ а҆́дѡва всѧ̑ и҆стощи́лъ є҆сѝ ца̑рствїѧ: тогда̀ и҆ сꙋббѡ́тꙋ сїю̀ бж҃е́ственнагѡ бл҃гослове́нїѧ и҆ сла́вы и҆ твоеѧ̀ свѣ́тлости сподо́билъ є҆сѝ.
Сті́хъ: До́мꙋ твоемꙋ̀ подоба́етъ ст҃ы́нѧ, гдⷭ҇и, въ долготꙋ̀ дні́й.
Є҆гда̀ си̑лы зрѧ́хꙋ тѧ̀, хрⷭ҇тѐ, ꙗ҆́кѡ лестца̀ ѿ беззако́нныхъ ѡ҆клевета́ема, и҆ ка́мень гро́ба запеча́танъ рꙋка́ми, и҆́миже твоѧ̑ нетлѣ̑ннаѧ ре́бра прободо́шасѧ, ᲂу҆жаса́хꙋсѧ неизглаго́ланномꙋ долготерпѣ́нїю твоемꙋ̀. ѻ҆ба́че, на́шемꙋ сп҃се́нїю ра́дꙋющесѧ, вопїѧ́хꙋ тѝ: сла́ва снизхожде́нїю твоемꙋ̀, чл҃вѣколю́бче.
Сла́ва, и҆ ны́нѣ, гла́съ є҃: Тебѐ, ѡ҆дѣ́ющагосѧ свѣ́томъ ꙗ҆́кѡ ри́зою, сне́мъ і҆ѡ́сифъ съ дре́ва съ нїкоди́момъ, ви́дѣвъ ме́ртва на́га непогребе́на, бл҃госе́рдный пла́чь воспрїи́мъ, рыда́ѧ глаго́лаше: ᲂу҆вы̀ мнѣ̀, сладча́йшїй і҆и҃се, є҆го́же вма́лѣ со́лнце на крⷭ҇тѣ̀ ви́сѧща ᲂу҆зрѣ́въ мра́комъ ѡ҆блага́шесѧ, и҆ землѧ̀ стра́хомъ колеба́шесѧ, и҆ раздира́шесѧ цр҃ко́внаѧ завѣ́са: но сѐ ны́нѣ ви́жꙋ тѧ̀, менє̀ ра́ди во́лею под̾е́мша сме́рть. ка́кѡ погребꙋ́ тѧ, бж҃е, мо́й; и҆лѝ ка́кѡ плащани́цами ѡ҆бвїю̀; ко́има же рꙋка́ма прикоснꙋ́сѧ нетлѣ́нномꙋ твоемꙋ̀ тѣ́лꙋ; и҆лѝ кі̑ѧ пѣ̑сни воспою̀ твоемꙋ̀ и҆схо́дꙋ, ще́дре; велича́ю стрⷭ҇ти твоѧ̑, пѣсносло́влю и҆ погребе́нїе твоѐ со воскрⷭ҇нїемъ, зовы́й: гдⷭ҇и, сла́ва тебѣ̀.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ:
Тропа́рь, гла́съ в҃:
Бл҃гоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ и҆ бл҃гоꙋха́ньми, во гро́бѣ но́вѣ покры́въ положѝ.
Дрꙋгі́й тропа́рь:
Мѷроно́сицамъ жена́мъ, при гро́бѣ предста́въ, а҆́гг҃лъ вопїѧ́ше: мѵ̑ра мє́ртвымъ сꙋ́ть прили̑чна, хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь.
Премꙋ́дростъ, и҆ ѿпꙋ́стъ.
* * *
Расто́ргнимъ
Ѿтве́ржимъ
Роди́тисѧ и҆мꙋ́щымъ
Ѿ нападе́нїѧ
Селе́нїю твоемꙋ̀