Е. Кустовский

Источник

Неделя всех святых

В субботу вечера, на малей вечерни

На Го́споди, воззва́х: поставим стихи 4. И поем стихиры воскресны 4, глас 8: Вече́рнюю песнь: Го́споди, Го́споди: Ра́дуйся, Сио́не: Е́же от Бо́га Отца́ Сло́во: Слава, глас 6: Му́чеников боже́ственный лик: [Ищи сих всех на велицей вечерни.]

И ныне: Богородичен догматик, глас 8:

Ка́ко Тя́ ублажи́м, Богоро́дице?/ Ка́ко же воспое́м, Преблагослове́нная,/ непостижи́мое та́инство Рожде́ния Твоего́?/ Веко́в бо Творе́ц и на́шего Соде́тель естества́,/ Сво́й о́браз уще́дрив,/ низведе́ Самого́ Себе́ во истоща́ние неизсле́димое:/ Сы́й в невеще́ственных не́дрех О́тчих,/ во утро́бе Твое́й, Чи́стая, всели́ся/ и Пло́ть непрело́жно бы́сть/ от Тебе́, Неискусобра́чная,/ пребы́в у́бо, е́же бе́, естество́м Бо́г./ Те́мже Ему́ покланя́емся,/ Бо́гу соверше́нну и Челове́ку соверше́нну,/ Тому́ во обое́м зра́це:/ и́бо о́ба естества́ в Не́м су́ть вои́стину./ Сугу́ба же вся́ пропове́дуем есте́ственная Его́ сво́йства/ по сугу́бому существу́, два́ почита́юще де́йства и хоте́ния:/ Единосу́щен бо сы́й Бо́гу и Отцу́,/ самовла́стно хо́щет и де́йствует, я́ко Бо́г;/ Единосу́щен же сы́й и на́м,/ самовла́стно хо́щет и де́йствует, я́ко Челове́к./ Того́ моли́, Чи́стая, Всеблаже́нная,// спасти́ся душа́м на́шим.

На стиховне стихира воскресна: Возше́л еси́ на Крест, Иису́се:

Таже Богородичны подобны 3, глас 8:

Подобен: О, пресла́внаго чудесе́!

Стих: Помяну́ и́мя Твое́/ во вся́ком ро́де и ро́де.

Ра́дуйся, Богоро́дице Всепе́тая./ Ра́дуйся, Исто́чниче, жизнь ве́рным источа́ющий./ Ра́дуйся, всех Влады́чице/ и Госпоже́ тва́ри Благослове́нная./ Ра́дуйся, Всенепоро́чная, Препросла́вленная./ Ра́дуйся, Всепречи́стая. Ра́дуйся, Пала́то./ Ра́дуйся, Боже́ственное Селе́ние./ Ра́дуйся, Чи́стая. Ра́дуйся, Ма́ти Де́во.// Ра́дуйся, Богоневе́сто.

Стих: Слы́ши, Дщи, и виждь,/ и приклони́ у́хо Твое́.

Ра́дуйся, Богома́ти Пречи́стая./ Ра́дуйся, ве́рных Наде́жде./ Ра́дуйся, ми́ра Очище́ние./ Ра́дуйся, вся́кия ско́рби избавля́ющи рабы́ Твоя́./ Ра́дуйся, челове́ков Утеше́ние живоно́сное./ Ра́дуйся, Заступле́ние./ Ра́дуйся, Предсто́лпие призыва́ющим Тя́./ Ра́дуйся, Бо́жие боже́ственное Пребыва́ние// и Горо́ свята́я.

Стих: Лицу́ Твоему́ помо́лятся/ бога́тии лю́дстии.

Ра́дуйся, Богоро́дице, Ма́ти Христо́ва./ Ра́дуйся, еди́на Наде́жде, челове́ков Заступле́ние./ Ра́дуйся, Прибе́жище./ Ра́дуйся, Све́щниче Све́та све́тлый./ Ра́дуйся, Свеще́ освяще́нная./ Ра́дуйся, Пала́то. Ра́дуйся, Раю́./ Ра́дуйся, Боже́ственное Селе́ние./ Ра́дуйся, Исто́чниче,// источа́ющ во́ды притека́ющим к Тебе́.

Слава, и ныне, Богородичен:

Его́же Не́бо не вмести́, Де́во Богоро́дице,/ во чре́ве Твое́м нетесноме́стно вмести́ся,/ и пребыла́ еси́ чи́стая,/ сло́вом неизрече́нным,/ ничи́мже де́вству оскве́рншуся./ Ты́ бо еди́на была́ еси́ в жена́х и Ма́ти, и Де́ва;/ и Ты́ еди́на, Пречи́стая, воздои́ла еси́ Сы́на Живода́вца/ и на объя́тиях Твои́х носи́ла еси́ Недре́млющее О́ко./ Но не оста́ви не́дра О́тча,/ я́коже пре́жде ве́к предбы́сть;/ но Горе́ ве́сь Бо́г со А́нгелы,/ до́ле ве́сь из Тебе́ с челове́ки,/ и везде́ несказа́нно./ Того́ моли́, Всесвята́я Влады́чице,// спасти́ся правосла́вно Богоро́дицу Чи́стую испове́дающим Тя́.

По Ны́не отпуща́еши: тропарь воскресен, глас 8:

С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да на́с свободи́ши страсте́й,// Животе́ и Воскресе́ние на́ше, Го́споди, сла́ва Тебе́.

Слава, и ныне, Богородичен:

И́же на́с ра́ди рожде́йся от Де́вы,/ и распя́тие претерпе́в Благи́й,/ испрове́ргий сме́ртию сме́рть,/ и Воскресе́ние явле́й, я́ко Бо́г,/ не пре́зри я́же созда́л еси́ руко́ю Твое́ю:/ яви́ человеколю́бие Твое́, Ми́лостиве,/ приими́ ро́ждшую Тя́ Богоро́дицу, моля́щуюся за ны́,// и спаси́, Спа́се на́ш, лю́ди отча́янныя.

Ектении и отпуст.

На велицей вечерни

По обычном псалме первую кафисму всю.

На Го́споди, воззва́х: поставим стихов 10. И поем стихиры воскресны 3, и восточны 3, и святых 4.

Глас 8.

Стих: Изведи́ из темни́цы ду́шу мою́/ испове́датися и́мени Твоему́.

Вече́рнюю пе́снь/ и слове́сную слу́жбу/ Тебе́, Христе́, прино́сим,/ я́ко благоволи́л еси́// поми́ловати на́с Воскресе́нием.

Стих: Мене́ ждут пра́ведницы,/ до́ндеже возда́си мне.

Го́споди, Го́споди,/ не отве́ржи нас от Твоего́ лица́,// но благоволи́ поми́ловати нас Воскресе́нием.

Стих: Из глубины́ воззва́х к Тебе́, Го́споди,/ Го́споди, услы́ши глас мой.

Ра́дуйся, Сио́не святы́й,/ ма́ти церкве́й, Бо́жие жили́ще:/ ты бо прия́л еси́ пе́рвый// оставле́ние грехо́в Воскресе́нием.

Стих: Да бу́дут у́ши Твои́/ вне́млюще гла́су моле́ния моего́.

Е́же от Бо́га Отца́ Сло́во,/ пре́жде ве́к ро́ждшееся,/ в после́дняя же времена́/ То́ежде от Неискусобра́чныя вопло́щшееся во́лею,/ распя́тие сме́ртное претерпе́/ и дре́вле умерщвле́ннаго челове́ка// спасе́ Свои́м Воскресе́нием.

Стих: А́ще беззако́ния на́зриши, Го́споди, Го́споди, кто постои́т?/ Я́ко у тебе́ очище́ние есть.

Е́же из ме́ртвых Твое́ Воскресе́ние славосло́вим, Христе́,/ и́мже свободи́л еси́ Ада́мский род от а́дова мучи́тельства/и дарова́л еси́ ми́рови, я́ко Бог, жизнь ве́чную// и ве́лию ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Сла́ва Тебе́, Христе́ Спа́се,/ Сы́не Бо́жий Единоро́дный,/ пригвозди́выйся на Кресте́// и воскресы́й из гро́ба тридне́вен.

Стихиры всех святых, глас 6.

Подобен: Всю отложи́вше:

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Духо́внии вети́и, ученицы́ Спа́совы,/ Ду́ху орга́ни бы́вше ве́рою,/ разсе́яшася в концы́ земли́,/ честно́е пропове́дание правосла́вне се́юще;/ от ни́хже прозябо́ша боже́ственным земледе́лием/ и благода́тию му́ченик во́инства,/ Страсть честну́ю образу́юща/ многообра́зными раздробле́ний ра́нами и огне́м,// и со дерзнове́нием мо́лятся о душа́х на́ших.

Стих: Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Огне́м воспаля́еми Госпо́дни любве́,/ огня́ презре́ша,/ и, я́ко боже́ственное у́глие возжига́еми,/ честни́и му́ченицы во Христе́/ попали́ша хвра́стное ле́сти шата́ние,/ звере́й же загради́ша уста́ честны́м призыва́нием,/ и, во главы́ усека́еми,/ посеко́ша врага́ вся́ ополче́ния,/ и, крове́й пролива́юще пото́ки терпели́вно,// Це́рковь напои́ша, ве́рою просвеща́ему.

Стих: Хвали́те Го́спода, вси́ язы́цы,/ похвали́те Его́ вси́ лю́дие.

Со зверьми́ бра́вшеся, бие́ми мече́м,/ ноготьми́ растерза́еми, рука́ми отъе́млеми,/ и му́чими тве́рдии му́ченицы,/ и огне́м веще́ственным неща́дно пали́ми,/ и пробода́еми, и соста́вы ссеца́еми,/ претерпе́ша тверде́йше:/ упокое́ние предви́деша бу́дущее,/ и нетле́нныя венцы́, и сла́ву Христа́,// Ему́же со дерзнове́нием мо́лятся о душа́х на́ших.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Во всех конце́х страда́вшия ве́рно/ апо́столы, му́ченики,/ свяще́нники богому́дрыя,/ честны́х жен свяще́нное стека́ние/ свяще́нными пе́сньми по до́лгу восхва́лим,/ я́ко соедини́шася Небе́сным земни́и,/ и страстьми́ безстра́стие благода́тию Христо́вою прия́ша,/ и ны́не, я́ко зве́зды све́тлыя озаря́юще нас,// со дерзнове́нием мо́лятся о душа́х на́ших.

Слава, глас тойже:

Му́ченик боже́ственный ли́к,/ Це́ркви основа́ние,/ благове́стию сконча́ние,/ вы́ де́лом Спа́сова глаго́лания испо́лнисте:/ ва́ми бо врата́ а́дова,/ на Це́рковь отве́рзшаяся, заключи́шася,/ кро́ве ва́шея ли́тие и́дольския же́ртвы изсуши́,/ закла́ние ва́ше породи́ церко́вное исполне́ние,/ безпло́тных удиви́сте, Бо́гу венцено́сцы предстоите́,// Его́же непреста́нно моли́те о душа́х на́ших.

И ныне, Богородичен, глас 8:

Ца́рь Небе́сный/ за человеколю́бие на земли́ яви́ся/ и с челове́ки поживе́:/ от Де́вы бо Чи́стыя Пло́ть прие́мый/ и из Нея́ проше́дый с восприя́тием,/ Еди́н е́сть Сы́н, сугу́б естество́м,/ но не Ипоста́сию./ Те́мже соверше́нна Того́ Бо́га/ и соверше́нна Челове́ка вои́стину пропове́дающе,/ испове́дуем Христа́ Бо́га на́шего,/ Его́же моли́, Ма́ти Безневе́стная,// поми́ловатися душа́м на́шим.

Вход. Све́те ти́хий:

Прокимен дне: Госпо́дь воцари́ся:

Таже паремии.

Пророчества Исаиина чтение (глава 43):

Та́ко глаго́лет Госпо́дь: вси́ язы́цы собра́шася вку́пе, и соберу́тся кня́зи от ни́х. Кто́ возвести́т сия́? Или́ я́же от нача́ла, кто́ слы́шана сотвори́т ва́м? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми́ свиде́тели, и А́з Свиде́тель, глаго́лет Госпо́дь Бо́г: и О́трок, Его́же избра́х; да позна́ете, и ве́руете Ми́, и разуме́ете, я́ко А́з е́смь; пре́жде Мене́ не бы́сть и́н бо́г, и по Мне́ не бу́дет. А́з е́смь Бо́г, и не́сть ра́зве Мене́ спаса́яй. А́з возвести́х и спасо́х, уничижи́х, и не бе́ в ва́с чу́ждий. Вы́ Мне́ свиде́тели, и А́з Госпо́дь Бо́г, и еще́ от нача́ла А́з е́смь, и не́сть от ру́к Мои́х избавля́яй: сотворю́, и кто́ отврати́т то́? Си́це глаго́лет Госпо́дь Бо́г, избавля́яй ва́с, Святы́й Изра́илев.

Премудрости Соломони чтение (глава 3):

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие сокруше́ние, они́ же су́ть в ми́ре. И́бо, пред лице́м челове́ческим а́ще и му́ку прии́мут, упова́ние и́х безсме́ртия испо́лнено, и в ма́ле нака́зани бы́вше, вели́кими благоде́тельствовани бу́дут: я́ко Бо́г искуси́ я́, и обре́те и́х досто́йны Себе́. Я́ко зла́то в горни́ле искуси́ и́х и я́ко всепло́дие же́ртвенное прия́т я́. И во вре́мя посеще́ния и́х возсия́ют и я́ко и́скры по сте́блию потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися на́нь разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Премудрости Соломони чтение (глава 5):

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие, рве́ние Свое́, и вооружи́т тва́рь в ме́сть враго́м. Облече́тся в броня́ пра́вды, и возложи́т шле́м, су́д нелицеме́рен. Прии́мет щи́т непобеди́мый, преподо́бие; поостри́т же напра́сный гне́в во ору́жие; спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т; и от каменоме́тныя я́рости, испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м Ду́х си́лы и, я́ко ви́хор разве́ет и́х. И опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те, держа́щии мно́жества и гордя́щиися о наро́дех язы́к: я́ко дана́ е́сть от Го́спода держа́ва ва́м, и си́ла от Вы́шняго.

Посем ектения сугубая: Рцем вси: Сподо́би, Го́споди:

Таже ектения просительная: Испо́лним вече́рнюю моли́тву:

На литии стихира храма.

Таже самогласны святых всех. Глас 1:

Ве́ры согла́сием мирско́е торжество́/ от ве́ка Бо́гу благоугоди́вших,/ патриа́рхов честно́е и проро́ков сосло́вие,/ апо́столов удобре́ние, му́чеников собра́ние, по́стников похвалу́,/ все́х святы́х па́мять духо́вне пра́зднуим:/ мо́лят бо ся́ непреста́нно,/ дарова́тися ми́ру ми́рови// и душа́м на́шим ве́лией ми́лости.

Прииди́те, вси́ ве́рнии,/ святы́х все́х всесла́вную па́мять/ во псалме́х, пе́ниих и пе́снех духо́вных восхва́лим./ Крести́теля Спаси́телева,/ апо́столы, проро́ки и му́ченики,/ священнонача́льники, учи́тели же и преподо́бныя,/ по́стники и пра́ведныя,/ и святы́х же́н боголю́бное состоя́ние/ че́стно ублажа́юще, согла́сно возопии́м:/ Преблаги́й Христе́ Бо́же на́ш,/ те́х моли́твами пода́ждь ми́р це́рквам Твои́м,/ побе́ды на враги́ христолюби́вым лю́дем// и душа́м на́шим ве́лию ми́лость.

Прииди́те, вси́ духо́вне возвесели́мся о па́мяти святы́х:/ се́ бо прии́де, богатотво́рная на́м дарова́ния принося́щи./ Те́мже во гла́се ра́дости/ и чи́стей со́вести возопии́м, глаго́люще:/ ра́дуйтеся, проро́ков сосло́вие,/ и́же прише́ствие Христо́во ми́рови пропове́давше/ и я́же издале́ча,/ я́ко бли́зу, предви́девше./ Ра́дуйтеся, апо́стольский ли́че,/ язы́ков мре́жницы и ловцы́ челове́ков./ Ра́дуйтеся, му́чеников собо́ре,/ от коне́ц земли́ собра́вшиися во еди́ну ве́ру,/ и о то́й му́к томле́ния претерпе́вшии,/ и соверше́нне страда́ния вене́ц прие́мшии./ Ра́дуйтеся, отце́в наслажде́ние,/ своя́ телеса́ поще́нием иста́явше/и умертви́вше стра́сти плотски́я,/ у́м боже́ственным раче́нием впери́сте,/ на Небеса́ возлете́сте/ и, со А́нгелы водворя́ющеся, восприе́млете ве́чная блага́я./ Но, о проро́цы, апо́столи и му́ченицы с по́стники,/ ва́с Венча́вшаго приле́жно моли́те/ изба́витися от вра́г ви́димых и неви́димых/ в ве́ре и любви́ соверша́ющим при́сно// честну́ю па́мять ва́шу.

Слава, глас 5:

Ны́нешнему торжеству́ стеце́мся, ве́рнии:/ предлага́ется и на́м духо́вная трапе́за/ и ча́ша та́инственная от сла́дких бра́шен,/ весе́лия испо́лнена му́ченических доброде́телей./ Си́и бо терпеливоду́шнии от коне́ц земли́,/ теле́сное всеразли́чным преда́вше ра́нам,/ Бо́гу принесо́ша же́ртву слове́сну, вся́кий во́зраст:/ о́ви у́бо во главы́ усека́еми,/ о́вии же по хребту́ стру́жеми,/ друзи́и же ру́к отсече́ние и все́х удо́в;/ вси́ вку́пе святи́и Христо́вым страда́нием о́бщницы бы́ша./ Но, венцы́ те́м возме́здие му́к пода́вый Го́споди,/ во сле́д те́х жи́тельствовати сподо́би на́с,// я́ко Человеколю́бец.

И ныне, Богородичен, глас тойже:

Хра́м и две́рь еси́,/ пала́та и престо́л Царе́в,/ Де́во Всечестна́я:/ Е́юже Изба́витель мо́й, Христо́с Госпо́дь,/ во тьме́ спя́щим яви́ся,/ Со́лнце сы́й пра́вды, просвети́ти хотя́,/ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко Ма́терне дерзнове́ние к Нему́ стяжа́вшая,// непреста́нно моли́ спасти́ся душа́м на́шим.

На стиховне стихира воскресна, глас 8:

Возше́л еси́ на Крест, Иису́се,/ снизше́дый с Небесе́:/ прише́л еси́ на смерть, Животе́ безсме́ртный,/ к су́щим во тьме Свет и́стинный,/ к па́дшим всех Воскресе́ние.// Просвеще́ние и Спа́се наш, сла́ва Тебе́.

И восточны, глас тойже:

Стих: Госпо́дь воцари́ся,/ в ле́поту облече́ся.

Христа́ славосло́вим, воскре́сшаго от ме́ртвых:/ ду́шу бо и Те́ло прие́м,/ стра́сти отобою́ду отсече́,/ пречи́стей у́бо души́ во ад соше́дшей, его́же и плени́;/ во гро́бе же истле́ния не ви́де свято́е Те́ло// Изба́вителя душ на́ших.

Стих: И́бо утверди́ вселе́нную,/ я́же не подви́жится.

Псалмы́ и пе́сньми славосло́вим, Христе́,/ от ме́ртвых Твое́ Воскресе́ние,/ и́мже нас свободи́л еси́ мучи́тельства а́дова/ и, я́ко Бог, дарова́л еси́ жизнь ве́чную// и ве́лию ми́лость.

Стих: До́му Твоему́ подоба́ет святы́ня, Го́споди,/ в долготу́ дни́й.

О Влады́ко все́х, Непостижи́ме,/ Тво́рче Небесе́ и земли́,/ Кресто́м пострада́вый,/ мне безстра́стие источи́л еси́;/ погребе́ние же прие́м и воскре́с во сла́ве,/ совоскреси́л еси́ Ада́ма руко́ю всеси́льною./ Сла́ва Твоему́ тридне́вному воста́нию,/ и́мже дарова́л еси́ нам ве́чную жизнь и очище́ние грехо́в,// я́ко Еди́н Благоутро́бен.

Слава, глас 6:

Прииди́те, ве́рнии,/ дне́сь лик совокупи́вше,/ благоче́стно торжеству́им/ и всех святы́х пресла́вную и честну́ю па́мять/ сла́вно почти́м, глаго́люще:/ ра́дуйтеся, апо́столи сла́внии,/ проро́цы, и му́ченицы, и священнонача́льницы./ Ра́дуйтеся, преподо́бных собо́ре и пра́ведных./ Ра́дуйтеся, честны́х жен ли́че,/ и Христа́ о ми́ре моли́те,/ побе́ды на сопроти́вныя дарова́ти// и душа́м на́шим ве́лию ми́лость.

И ныне, Богородичен, глас тойже:

Творе́ц и Изба́витель мо́й, Пречи́стая,/ Христо́с Госпо́дь из Твои́х ложе́сн проше́д,/ в мя́ оболки́йся,/ пе́рвыя кля́твы Ада́ма свободи́./ Те́мже Ти́, Всечи́стая,/ я́ко Бо́жии Ма́тери же и Де́ве вои́стину,/ вопие́м немо́лчно:/ ра́дуйся а́нгельски, ра́дуйся, Влады́чице,/ Предста́тельство, и Покро́ве,// и Спасе́ние ду́ш на́ших.

Ны́не отпуща́еши: Трисвятое.

По О́тче наш: Богоро́дице Де́во: дважды.

И святых тропарь, глас 4:

И́же во все́м ми́ре му́ченик Твои́х,/ я́ко багряни́цею и ви́ссом,/ кро́вьми Це́рковь Твоя́ украси́вшися,/ те́ми вопие́т Ти, Христе́ Бо́же:/ лю́дем Твои́м щедро́ты Твоя́ низпосли́,/ мир жи́тельству Твоему́ да́руй// и душа́м на́шим ве́лию ми́лость.

И благословение хлебов.

Аще ли убо не творится бдение, на Го́споди, воззва́х: воскресны 3, и восточен (анатолиев) един; и святых на 6, подобен: Всю отложи́вше:

По Трисвятом тропарь воскресен, Слава: святых, И ныне: Богородичен: писаны в начале утрени. И отпуст.

На полунощнице канон Троичный от Октоиха, гласа.

На утрени

На Бог Госпо́дь: тропарь воскресный, глас 8:

С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да на́с свободи́ши страсте́й,// Животе́ и Воскресе́ние на́ше, Го́споди, сла́ва Тебе́. (Дважды.)

Слава, святых тропарь, глас 4:

И́же во всем ми́ре му́ченик Твои́х:

И ныне, Богородичен:

Е́же от ве́ка утае́нное/ и А́нгелом несве́домое та́инство:/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь/ и Крест во́лею нас ра́ди восприи́м,/ и́мже воскреси́в первозда́ннаго,// спасе́ от сме́рти души́ на́ша.

По 1м стихословии седален воскресен, глас 8:

Воскре́сл еси́ из ме́ртвых, Животе́ всех, и А́нгел све́та жена́м вопия́ше: преста́ните от слез, апо́столом благовести́те, возопи́йте пою́ще, я́ко воскре́се Христо́с Госпо́дь, благоволи́вый спасти́, я́ко Бог, род челове́ческий.

Стих: Воскресни́ Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

Челове́цы, Спа́се, гроб Твой запеча́таша, А́нгел ка́мень от две́рей отвали́; жены́ ви́деша Воста́вша из ме́ртвых, и ты́я благовести́ша ученико́м Твои́м в Сио́не, я́ко воскре́сл еси́, Животе́ всех, и разреши́шася у́зы сме́ртныя. Го́споди, сла́ва Тебе́.

Слава, и ныне, Богородичен:

И́же нас ра́ди рожде́йся от Де́вы, и распя́тие претерпе́в, Благи́й, испрове́ргий сме́ртию смерть, и Воскресе́ние явле́й, я́ко Бог, не пре́зри я́же созда́л еси́ руко́ю Твое́ю: яви́ человеколю́бие Твое́, Ми́лостиве, приими́ ро́ждшую Тя Богоро́дицу, моля́щуюся за ны, и спаси́, Спа́се наш, лю́ди отча́янныя.

По 2м стихословии седален, глас 8.

Подобен: Повеле́нное та́йно:

Белонося́й Гаврии́л све́тел предста́, я́ко в ви́де мо́лнии, Христо́ву гро́бу, и ка́мень отвали́ от гро́ба, и стра́х ве́лий содержа́ше Твоя́ стра́жи, и внеза́пу пребы́ша вси́ а́ки ме́ртви. От гро́ба стра́жей, и ка́мене печа́ти устыди́теся, пребеззако́ннии, разуме́йте, я́ко воскре́се Христо́с.

Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Подобен: Прему́дрости сло́ва:

Воскре́с от гро́ба, я́ко вои́стину, преподо́бным повеле́л еси́ жена́м пропове́дати воста́ние апо́столом, я́коже пи́сано е́сть; и ско́рый Пе́тр предста́ гро́бу и, све́т во гро́бе зря́, ужаса́шеся. Те́мже и, ви́дев плащани́цы еди́ны, кроме́ Боже́ственнаго Те́ла, в не́м лежа́щия, со стра́хом возопи́: сла́ва Тебе́, Христе́ Бо́же, я́ко спаса́еши вся́, Спа́се на́ш, О́тчее бо еси́ Сия́ние.

Слава, и ныне, Богородичен (не седяще поем, но стояще и со страхом и благоговением глаголем) настоящий:

О Тебе́ ра́дуется, Благода́тная, вся́кая тварь, а́нгельский собо́р и челове́ческий род, освяще́нный Хра́ме и Раю́ слове́сный, Де́вственная Похвало́, из Нея́же Бог воплоти́ся, и Младе́нец бысть пре́жде век сый Бог наш: ложесна́ бо Твоя́ престо́л сотвори́ и чре́во Твое́ простра́ннее Небе́с соде́ла. О Тебе́ ра́дуется, Благода́тная, вся́кая тварь, сла́ва Тебе́.

Таже непорочны или по обычаю полиелей.

Посем тропари: Ангельский собо́р:

Ектения малая. И ипакои, глас 8:

Мироно́сицы, Жизнода́вца предстоя́щия гро́бу, Влады́ку иска́ху в ме́ртвых Безсме́ртнаго, и ра́дость благове́щения от А́нгела прие́мшия, апо́столом возвеща́ху: я́ко воскре́се Христо́с Бо́г, подая́й ми́рови ве́лию ми́лость.

Степенна, глас 8.

Антифон 1:

От ю́ности моея́/ враг мя искуша́ет,/ сластьми́ пали́т мя,/ аз же, наде́яся на Тя, Го́споди,/ побежда́ю сего́.

Ненави́дящии Сио́на,/ да бу́дут у́бо/ пре́жде исторже́ния я́ко трава́:/ ссече́т бо Христо́с вы́я их/ усече́нием мук.

Слава: Святы́м Ду́хом,/ е́же жи́ти вся́ческим:/ Свет от Све́та, Бог вели́к,/ со Отце́м пое́м Ему́ и Сло́вом.

И ныне, тойже.

Антифон 2:

Се́рдце мое́/ стра́хом Твои́м да покры́ется,/ смиреному́дрствующее,/ да не возне́сшееся отпаде́т/ от Тебе́, Всеще́дре.

На Го́спода име́вый наде́жду/ не устраши́тся тогда́,/ егда́ огне́м/ вся суди́ти и́мать и му́кою.

Слава: Святы́м Ду́хом/ всяк, кто боже́ственный, ви́дит и предглаго́лет,/ чудоде́йствует вы́шняя,/ в Трие́х Еди́наго Бо́га поя́:/ а́ще бо и трисия́ет,/ единонача́льствует Божество́.

И ныне, тойже.

Антифон 3:

Воззва́х Тебе́, Го́споди,/ вонми́, приклони́ ми у́хо Твое́, вопию́щу,/ и очи́сти, пре́жде да́же не во́змеши/ мене́ отсю́ду.

К ма́тери свое́й земли́/ отходя́й всяк/ па́ки разреша́ется/ прия́ти му́ки/ или́ по́чести пожи́вших.

Слава: Святы́м Ду́хом/ богосло́вие, Еди́ница Трисвята́я:/ Оте́ц бо Безнача́лен,/ от Него́же роди́ся Сын безле́тно,/ и Дух Сопресто́лен, Сообра́зен,/ от Отца́ спросия́вший.

И ныне, тойже.

Антифон 4:

Се ны́не что добро́, или́ что красно́?/ Но е́же жи́ти бра́тии вку́пе./ В сем бо Госпо́дь обеща́/ живо́т ве́чный.

О ри́зе свое́й/ И́же кри́ны се́льныя украша́яй повелева́ет,/ я́ко не подоба́ет пещи́ся.

Слава: Святы́м Ду́хом,/ единови́дною Вино́ю,/ вся содержа́тся миропода́тельне:/ Бог бо Сей есть,/ Отцу́ же и Сы́нови/ единосу́щен госпо́дственне.

И ныне, тойже.

Прокимен, глас 8: Воцари́тся Госпо́дь во век,/ Бог твой, Сио́не, в род и род.

Стих: Хвали́, душе́ моя́, Го́спода, восхвалю́ Го́спода в животе́ мое́м.

Таже: Вся́кое дыха́ние/ да хва́лит Го́спода.

Стих: Хвали́те Бо́га во святы́х Его́:

Евангелие утреннее воскресно 1е, от Матфея, зачало 116: Единиина́десять ученицы́: От сего убо дне утренняя Евангелия воскресна начинаем чести по ряду.

Воскресе́ние Христо́во: и псалом 50.

Слава: Моли́твами апо́столов: И ныне: Моли́твами Богоро́дицы: Поми́луй мя, Бо́же: Посем стихира: Воскре́с Иису́с от гро́ба:

Каноны 4: воскресен со ирмосом на 4, Крестовоскресен на два, и Богородицы на два, и всех святых на 6.

Канон воскресен, глас 8.

Песнь 1

Ирмос: Колесницегони́теля фарао́ня погрузи́/ чудотворя́й иногда́/ Моисе́йский же́зл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// пе́снь Бо́гови воспева́юща.

Припев: Сла́ва, Го́споди, свято́му Воскресе́нию Твоему́.

Всеси́льну Христо́ву Божеству́ ка́ко не диви́мся? От страсте́й у́бо всем ве́рным безстра́стие и нетле́ние точа́щу, от ребра́ же свята́го исто́чник безсме́ртия иска́пающу, и живо́т из гро́ба присносу́щный.

Я́ко благоле́пен жена́м А́нгел ны́не яви́ся и, све́тлыя нося́ есте́ственныя о́бразы невеще́ственныя чистоты́, зра́ком же возвеща́я свет Воскресе́ния, зовы́й: воскре́се Госпо́дь.

Богородичен: Пресла́вная возглаго́лашася о Тебе́ в ро́дех родо́в, Бо́га Сло́ва во чре́ве вме́щшая, чиста́ же пребы́вши, Богоро́дице Мари́е. Те́мже Тя вси почита́ем, су́щее по Бо́зе Предста́тельство на́ше.

Ин канон, крестовоскресен.

Ирмос: Во́ду проше́д:

Припев: Сла́ва, Го́споди, Кресту́ Твоему́ честно́му и Воскресе́нию.

Взя́шася врата́ боле́зненная, и ужасо́шася вра́тницы а́довы, зря́ще в преиспо́днейшая Соше́дшаго, И́же на высоте́ все́х превы́ше естества́.

Удиви́шася чи́ни а́нгельстии, зря́ще на престо́ле посажде́но О́тчи па́дшее естество́ челове́ческое, затворе́нное в преиспо́дних земли́.

Ин канон, Пресвятыя Богородицы.

Ирмос: Пои́м Го́сподеви:

Припев: Пресвята́я Богоро́дице, спаси́ нас.

Пречи́стая Богоро́дице, вопло́щшееся Присносу́щное и Пребоже́ственное Сло́во па́че естества́ ро́ждшая, пое́м Тя.

Грозд Тя живоно́сен, всеми́рнаго иска́пающ сла́дость спасе́ния, Де́ва, Христе́, роди́.

Ин канон, всех святых, глас 8.

Егоже краестрочие: Святых всех многоименныя чины пою.

Ирмос: Колесницегони́теля фарао́ня:

Припев: Вси святи́и, моли́те Бо́га о нас.

Твои́х святы́х воспева́я чи́ны, Твои́м све́том души́ мое́й моли́твами сих озари́тися молю́ся: Ты бо еси́ Свет непристу́пный, неве́дения мрак отгоня́ Твои́ми светлостьми́, Сло́ве Бо́жий, Светода́вче Христе́. (Дважды.)

Я́ко возвы́сился еси́ на Дре́ве, привле́кл еси́ к Твоему́ позна́нию язы́ков все насле́дие, Влады́ко, и све́том уясни́л еси́ Святы́я Тро́ицы, апо́столы святы́ми Твои́ми, и́миже мглу пре́лести отгна́л еси́.

Законоположе́нием Твои́м, Христе́, увещава́еми, Твои́ апо́столи я́же на земли́ вся благоче́стно отри́нуша и све́том благода́ти освети́ша всю вселе́нную сла́внии, ева́нгельски Тя пропове́дающе.

Слава: Ра́дующеся му́ченицы, Крест Твой взе́мше, и, честну́ю Страсть неукло́нно подража́юще, мучи́тельскаго не убоя́шася преще́ния до́блии, ни огня́, ни меча́, ни ран, но ниже́ гла́да, ниже́ сме́рти.

И ныне, Богородичен: Наме́рение му́жеское де́вы, Всечи́стая, восприе́мше я́ве: му́ченическая бо страда́ния неукло́нно подража́юще, и псало́мски в след Тебе́ Сы́ну Твоему́, Де́во, боже́ственне сра́дующеся, Всецарю́ приведо́шася.

Катавасия: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́, ра́дуяся, Тоя́ чудеса́.

Песнь 3

Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя́, Христе́, за́поведей Твои́х утверди́,/ я́ко не́сть свя́т, па́че Тебе́,// Еди́не Человеколю́бче.

Осужде́нна бы́вша Ада́ма вкуше́нием греха́, Пло́ти Твоея́ спаси́тельною Стра́стию оправда́л еси́, Христе́: Сам бо непови́нен сме́ртнаго иску́са был еси́, Безгре́шне.

Воскресе́ния свет возсия́ су́щим во тьме и се́ни сме́ртней седя́щим Бог мой Иису́с и, Свои́м Божество́м кре́пкаго связа́в, сего́ сосу́ды расхи́тил есть.

Богородичен: Херуви́м и Серафи́м превы́шши яви́лася еси́, Богоро́дице: Ты бо еди́на прия́ла еси́ Невмести́маго Бо́га в Твое́м чре́ве, Нескве́рная. Те́мже Тя ве́рнии вси пе́сньми, Чи́стая, ублажа́ем.

Ин, крестовоскресен.

Ирмос: Небе́снаго кру́га Верхотво́рче:

Отве́ргшагося пре́жде за́поведи, Го́споди, изринове́нна мя су́ща от Тебе́ сотвори́л еси́, в него́же вообрази́вся, послуша́нию же навы́к, Себе́ па́ки назда́л еси́ распя́тием.

Прему́дростию вся проуве́девый, Го́споди, и ра́зумом Твои́м водрузи́вый преиспо́дняя, не не сподо́бил еси́ снизхожде́нием Твои́м, Сло́ве Бо́жий, воскреси́ти е́же по о́бразу Твоему́.

Ин, Богородицы.

Ирмос: Ты еси́ утвержде́ние:

Даждь нам по́мощь Твои́ми моли́твами, Всечи́стая, прило́ги отража́ющи лю́тых обстоя́ний.

Е́ве прама́тери Ты исправле́ние была́ еси́, Нача́льника жи́зни ми́рови, Христа́, Богоро́дице, ро́ждши.

Ин, всех святых.

Ирмос: Утвержде́й в нача́ле Небеса́:

Свяще́нством свяще́нным свяще́нницы и па́стырие обле́кшеся и то му́дрственно окорми́вше Христу́, досто́йно украси́ша учи́тельства сло́во, свы́ше вои́стину обогати́вшеся. (Дважды.)

Украси́вшеся удобре́ньми пе́рваго добротворе́ния и яви́вшеся я́ко непреле́стная свети́ла, онебеси́сте Це́рковь Христо́ву, святи́и, оты́нуду и́наго ту разли́чно украси́вше. (Дважды.)

Слава: Зако́ну повину́ющеся Твоему́, блаже́нных собо́ри, многообра́зными доброде́тельми просвети́вшеся, насле́доваша оби́тели Небе́сныя, Влады́ко, ра́дующеся: и́ную бо и́ный, вси ты́я досто́йно испо́лниша.

И ныне, Богородичен: От чре́ва де́вственна И́же от Бо́га Бо́га Сло́ва родила́ еси́ нам, Богома́ти, Его́же де́вы чи́стыя боголе́пно возлюби́ша, и в след Тебе́ вся Сему́ я́ве после́доваша.

Катавасия: Твоя́ песносло́вцы, Богоро́дице,/ живы́й и незави́стный Исто́чниче,/ ли́к себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

Седален, глас 8.

Подобен: Прему́дрости сло́ва:

Пра́отец, оте́ц, патриа́рх, апо́стол, му́ченик, проро́к, святи́телей и преподо́бных Твои́х, по́стников и пра́ведных же, и вся́каго и́мене пи́саннаго в кни́зе жи́зни, святу́ю па́мять соверша́юще, Христе́ Бо́же, все́х подвиза́ем на моли́тву, моля́щеся: умири́ ми́р Тво́й те́ми, я́ко Человеколю́бец, да вси́ вопие́м Ти́: Бо́же прославля́емый в сове́те святы́х Твои́х, Ты́ еси́ вои́стину просла́вивый досто́йно па́мять и́х.

Слава, тойже.

И ныне, Богородичен:

Небе́сную Дверь и Киво́т, пресвяту́ю Го́ру, све́тлый О́блак воспои́м, неопали́мую Купину́, слове́сный Рай, Е́вы Воззва́ние, вселе́нныя всея́ вели́кое Сокро́вище, я́ко спасе́ние в Ней соде́лася ми́рови и оставле́ние дре́вних согреше́ний. Сего́ ра́ди вопие́м Ей: моли́ся Сы́ну Твоему́, прегреше́ний оставле́ние дарова́ти благоче́стно покланя́ющимся всесвято́му Рождеству́ Твоему́.

Песнь 4

Ирмос: Ты моя́ Кре́пость, Го́споди,/ Ты моя́ и Си́ла,/ Ты мой Бог, Ты мое́ Ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Ты врага́ су́ща мя зело́ возлюби́л еси́, Ты истоща́нием стра́нным соше́л еси́ на зе́млю, Благоутро́бне Спа́се, после́дняго моего́ досажде́ния не отве́ргся, и, пребы́в на высоте́ пречи́стыя Твоея́ сла́вы, пре́жде безче́ствованнаго просла́вил еси́.

Кто́ зря́, Влады́ко, ны́не не ужаса́ется, Стра́стию сме́рть разруша́ему, Кресто́м бежа́щее тле́ние, и сме́ртию а́д бога́тства истощава́емый, боже́ственною си́лою Тебе́, Распя́таго? Чу́дно де́ло, Человеколю́бче.

Богородичен: Ты ве́рных Похвала́ еси́, Безневе́стная, Ты Предста́тельница, Ты и Прибе́жище христиа́н, Стена́ и Приста́нище: к Сы́ну бо Твоему́ мольбы́ но́сиши, Всенепоро́чная, и спаса́еши от бед ве́рою и любо́вию Богоро́дицу Чи́стую Тебе́ зна́ющия.

Ин, крестовоскресен.

Ирмос: Услы́шах, Го́споди:

На Кресте́ Тя́ пригвозди́ша законопресту́пных де́ти, Христе́ Бо́же: и́мже спа́сл еси́, я́ко Благоутро́бен, сла́вящия Твоя́ страда́ния.

Воскре́с от гро́ба, вся совоскреси́л еси́ су́щия во а́де ме́ртвыя, и просвети́л еси́, я́ко Благоутро́бен, сла́вящия Твое́ Воскресе́ние.

Ин, Богородице.

Ирмос тойже.

Клас возрасти́вшая животво́рный, неора́нная Ни́во, Подаю́щаго ми́рови жизнь, Богоро́дице, спаса́й пою́щия Тя.

Богоро́дицу Тя, Всечи́стая, просве́щшиися вси пропове́дуем, Со́лнце бо пра́вды родила́ еси́, Присноде́во.

Ин, всех святых.

Ирмос: Ты моя́ Кре́пость, Го́споди:

Совоку́плься собо́р святы́х Твои́х любо́вию и Тебе́ наслажда́яйся и́стинно же и чи́сто в ра́дости, лик неразруша́емый А́нгелом слику́ет о Тебе́, Всеви́дче, Бо́зе всех и Го́споде. (Дважды.)

Ю́ношески, сла́внии священному́ченицы, му́ченическим венце́м увязо́стеся, богоде́тельным пома́занием, е́же пе́рвее свяще́нства укра́шени, пребога́тии. Те́мже сугу́бы венцы́ досто́йно прие́мше, со Христо́м ве́чно ра́дуетеся.

Плотско́е мудрова́ние все ду́ху, богоно́снии, вои́стину повину́сте, по́стнически сего́ стремле́ния неудержи́мая посто́м увяди́вше, и ны́не безстра́стия све́том просвети́вшеся, мзды трудо́в прия́сте.

Слава: Я́ко Христа́, му́ченицы, Первому́ченика, му́ки зело́ претерпе́сте, терпели́во же и до́блественне, я́ко в чужди́х страда́льчествующе телесе́х, сла́внии, и ны́не, Ца́рствия насле́дницы показа́вшеся, ве́рным исцеле́ния источа́ете.

И ныне, Богородичен: Неве́ста Бо́жия была́ еси́, Богороди́тельнице, Сего́ бо Сло́во Преве́чное теле́сне родила́ еси́ нам: в Не́мже и жены́ свя́то пожи́вше и страда́льчествы всеразли́чными Тобо́ю украси́вшеся, прама́тернее паде́ние испра́виша.

Катавасия: Седя́й в сла́ве/ на престо́ле Божества́,/ во О́блаце ле́гце/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.

Песнь 5

Ирмос: Вску́ю мя́ отри́нул еси́/ от лица́ Твоего́, Све́те незаходи́мый,/ и покры́ла мя́ е́сть чужда́я тьма́, окая́ннаго,/ но обрати́ мя́, и к све́ту за́поведей Твои́х// пути́ моя́ напра́ви, молю́ся.

Оде́ятися претерпе́л еси́ в багряни́цу, пре́жде Стра́сти Твоея́, Спа́се, поруга́емь, первозда́ннаго покрыва́я безобра́зное обнаже́ние, и наг пригвозди́лся еси́ на Кресте́ Пло́тию, совлача́я, Христе́, ри́зу умерщвле́ния.

От пе́рсти сме́ртныя Ты па́дшее мое́ па́ки назда́л еси́ существо́, воскре́с; и нестаре́ющееся, Христе́, устро́ил еси́, яви́в па́ки я́коже ца́рский о́браз, нетле́ния жизнь блиста́ющ.

Богородичен: Ма́тернее дерзнове́ние, е́же к Сы́ну Твоему́ иму́щи, Всечи́стая, сро́днаго промышле́ния е́же о нас не пре́зри, мо́лимся, я́ко Тебе́ и еди́ну христиа́не ко Влады́це Очище́ние ми́лостивно предлага́ем.

Ин, крестовоскресен.

Ирмос: Просвети́ нас:

Наста́ви нас си́лою Креста́ Твоего́, Христе́: тем бо Тебе́ припа́даем, мир пода́ждь нам, Человеколю́бче.

Окорми́ живо́т наш, я́ко Преблаги́й, пою́щих Твое́ воста́ние, и мир пода́ждь нам, Человеколю́бче.

Ин, Богородицы.

Ирмос: У́тренююще вопие́м Ти:

Утоли́ нестерпи́мую бу́рю страсте́й мои́х, Я́же Бо́га ро́ждшая, Окорми́теля и Го́спода.

Слу́жат Рождеству́ Твоему́, Пречи́стая Богоро́дице, а́нгельстии чи́нове и челове́ков собра́ние.

Ин, всех святых.

Ирмос: Вску́ю мя отри́нул еси́:

Предзре́ти, я́коже проро́цы боже́ственнии, хотя́щая бы́ти сподо́бистеся, и возжеле́сте благоро́дию души́ очи́ститися житие́м чи́стым, о богоно́снии, просвеща́еми си́лою духо́вною. (Дважды.)

Ли́к святы́х ны́не све́тится боже́ственными дарова́ньми, и́же пре́жде зако́на вси́ патриа́рси, проро́цы, апо́столи, и му́ченик собо́ри, и по́стников, и учи́телей, и пра́ведных, со священному́ченики. (Дважды.)

Слава: Светя́щееся зря́ще Твои́х святы́х днесь собра́ние Твое́ю, Спа́се, све́тлостию и свеща́ми неугаса́емыми благода́ти, Твое́ боже́ственное бога́тство благи́х и изоби́лие воспева́ем непреста́нно, Человеколю́бче.

И ныне, Богородичен: Преди́вное Твое́ Рождество́ возлюби́вше, жены́ пречестны́я кра́сная жития́ нивочто́же вмени́ша, Всечи́стая, Его́ еди́ни рачи́тельно жела́юще све́тлости и боже́ственнаго осия́ния.

Катавасия: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Песнь 6

Ирмос: Очи́сти мя́, Спа́се,/ мно́га бо беззако́ния моя́,/ и из глубины́ зо́л возведи́, молю́ся,/ к Тебе́ бо возопи́х, и услы́ши мя́,// Бо́же спасе́ния моего́.

Дре́вом кре́пко низложи́ мя началозло́бный: Ты же, Христе́, возне́сся на Кресте́, крепча́е низложи́л еси́, посрами́в сего́, па́дшаго же воскреси́л еси́.

Ты́ уще́дрил еси́ Сио́на, Возсия́вый от гро́ба, но́ваго вме́сто ве́тхаго соверши́в, я́ко Благоутро́бен, боже́ственною Твое́ю Кро́вию: и ны́не ца́рствуеши в не́м во ве́ки, Христе́.

Богородичен: Да изба́вимся от лю́тых прегреше́ний мольба́ми Твои́ми, Богороди́тельнице Чи́стая, и да улучи́м, Пречи́стая, боже́ственное сия́ние из Тебе́ неизрече́нно воплоще́ннаго Сы́на Бо́жия.

Ин, крестовоскресен.

Ирмос: Моли́тву пролию́ ко Го́споду:

Дла́ни на Кресте́ распросте́рл еси́, Исцеля́яй неудержа́нно просте́ртую во Еде́ме ру́ку первозда́ннаго, и Твое́ю во́лею же́лчи вкуси́л, и спасл еси́, Христе́, я́ко Си́лен, сла́вящия Твоя́ страда́ния.

Сме́рти Изба́витель вкуси́ дре́вняго осужде́ния, я́ко да и тле́ния ца́рство разруши́т; и во а́дская сше́д, воскреси́ и спасе́, я́ко Си́лен, пою́щия Его́ Воскресе́ние.

Ин, Богородицы.

Ирмос: Ри́зу мне пода́ждь све́тлу:

Храм Тя Бо́жий и киво́т, и черто́г одушевле́нный, и дверь Небе́сную, Богоро́дице, ве́рнии возвеща́ем.

Тре́бищем Разруши́тель, я́ко Бог, бы́вшее Рождество́ Твое́, Мари́е Богоневе́сто, покланя́емо есть со Отце́м и Ду́хом.

Ин, всех святых.

Ирмос: Очи́сти мя, Спа́се:

Я́ко честны́й, избра́нный, положе́нный Ка́мень краеуго́льный, святи́и в Сио́не обре́тше Тя, Влады́ко, Основа́ние непоколеби́мое, избра́нное ка́мение себе́ назда́ша. (Дважды.)

Пронзе́нным Твои́м ре́бром, ка́пли Кро́ве иска́паша с водо́ю богоде́тельно, мир обнови́ша и боже́ственный собо́р святы́х всех, Благоде́телю, призда́ша. (Дважды.)

Слава: Пое́м всеблагоче́стно му́ченик о́блак боже́ственный, благода́тию просвеще́нный и возсия́вший светле́е багряни́цею кро́ве и червлени́цею их тве́рдаго страда́ния.

И ныне, Богородичен: Ма́терь всеи́стинную Бо́жию Тя́ вси́ зна́ем, Е́юже естество́ же́нское изба́вльшееся, Всенепоро́чная, о Христе́ предпострада́, доброде́тели же вся́кия благоче́стно бы́сть испо́лнено.

Катавасия: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.

Кондак, глас 8:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики./ Тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

Икос:

И́же по всей земли́ му́чившиися и на Небеса́ пресели́вшиися, и́же Стра́сти Христо́вы подража́вшии и стра́сти на́ша отъе́млющии, зде днесь собира́ются, перворожде́нных показу́юще Це́рковь, я́ко Го́рния о́браз содержа́щу и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.

Песнь 7

Ирмос: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.

Сла́вное истоща́ние, Боже́ственное бога́тство Твоея́ нищеты́, Христе́, удивля́ет А́нгелы, на Кресте́ зря́щия Тя пригвожда́ема, за е́же спасти́ ве́рою зову́щия: благослове́н Бог оте́ц на́ших.

Боже́ственным Твои́м соше́ствием све́та испо́лнил еси́ преиспо́дняя, и тьма прогна́на бысть, пре́жде гоня́щая; отону́дуже воскресо́ша и́же от ве́ка ю́зницы, зову́ще: благослове́н Бог оте́ц на́ших.

Троичен: Всех у́бо Го́спода, Еди́наго же Еди́ному Единоро́дному Сы́ну правосла́вно Отца́ богосло́вяще, Тя возвеща́ем, и Еди́наго ве́дяще от Тебе́ исходя́ща Ду́ха Пра́ваго, соесте́ственна и соприсносу́щна.

Ин, крестовоскресен.

Ирмос: От Иуде́и:

Спасе́ние соде́лал еси́ посреде́ вселе́нныя проро́чески, Бо́же, на Дре́во бо вознесе́н быв, вся призва́л еси́ ве́рою зову́щия: оте́ц на́ших Бо́же, благослове́н еси́.

Воскре́с от гро́ба, я́коже от сна́, Ще́дре, все́х изба́вил еси́ от тли́, тва́рь же уверя́ется апо́столы, пропове́дающими воста́ние: отце́в Бо́же, благослове́н еси́.

Ин, Богородицы.

Ирмос тойже.

От де́вственнаго ложесна́ вопло́щся, яви́лся еси́ на спасе́ние на́ше. Те́мже Твою́ Ма́терь ве́дяще Богоро́дицу, благода́рственно зове́м: отце́в Бо́же, благослове́н еси́.

Жезл прорасти́ла еси́, Де́во, от ко́рене Иессе́ова, Всеблаже́нная, Плод цветонося́щий, спаси́тельный ве́рою Сы́ну Твоему́ зову́щим: отце́в Бо́же, благослове́н еси́.

Ин, всех святых.

Ирмос: Бо́жия снизхожде́ния:

Святы́х чи́нове, во святы́х Почива́ющаго немо́лчно пою́ще, сла́дости боже́ственныя ны́не наслажда́ются и ра́дующеся лику́ют пою́ще: благослове́н Бог оте́ц на́ших.

Боже́ственными сия́ньми трисо́лнечнаго светопроли́тия, че́стне святы́х собо́ри осия́вшеся, Еди́ницу тричи́сленную богосло́вят, Отца́ Безнача́льна и Сы́на благоче́стно и Ду́ха Свята́го.

Неизрече́нною сла́вою Твое́ю егда́ яви́шися, Бо́же, посреде́ бого́в, досто́йная подая́, и да́ры раздая́, и венцы́ дая́, тогда́, Спа́се, сподо́би пе́ти Тебе́: благослове́н Бо́г оте́ц на́ших.

Слава: Ра́дующеся пои́м святы́х всех собо́р, отвсю́ду собра́вшихся, и ро́ды вку́пе, и досто́инства, и жи́тельства, и с ни́ми пое́м: благослове́н Бог оте́ц на́ших.

И ныне, Богородичен: Мари́ю Пречи́стую и Пресвяту́ю Богороди́тельницу, отрокови́цы вся, лик боже́ственный ку́пно соста́вивше, велегла́сно ра́дующеся возопи́йте: ра́дуйся, ра́дости Исто́чник нам источа́ющая.

Катавасия: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся пою́ще:// препе́тый отце́в Госпо́дь и Бо́г, благослове́н еси́.

Песнь 8

Ирмос: Седмери́цею пе́щь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся́ ве́ки.

Иису́сова Божества́ пребоже́ственная си́ла в нас боголе́пно возсия́ла есть: Пло́тию бо вку́шь за все́х сме́рть кре́стную, разруши́ а́дову кре́пость. Его́же непреста́нно, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Распны́йся воста́, великовы́йный паде́, пады́й и сокруше́нный испра́вися, тля отве́ржена бысть, и нетле́ние процвете́: жи́знию бо ме́ртвенное поже́рто бысть. О́троцы, благослови́те, свяще́нницы, воспо́йте, лю́дие, превозноси́те во вся ве́ки.

Троичен: Трисве́тлое Божество́, во Еди́ной сия́ющее зари́ от Еди́наго Триипоста́снаго Естества́, Роди́теля Безнача́льна, Единоесте́ственно же Сло́во Отцу́ и сца́рствующаго Единосу́щнаго Ду́ха, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Ин, крестовоскресен.

Ирмос: Победи́тели мучи́теля:

На Дре́ве ру́це мне просте́рша, обнаже́ннаго мя призыва́юща, Свое́ю благообра́зною согре́яти нагото́ю, благослови́те, вся дела́, Го́спода и превозноси́те Его́ во ве́ки.

Из преиспо́дняго а́да возне́сша мя́ па́дшаго и высокопресто́льною сла́вою Роди́теля поче́тшаго, благослови́те, вся́ дела́, Го́спода и превозноси́те Его́ во ве́ки.

Ин, Богородицы.

Ирмос: Царя́ Небе́снаго:

Сопроти́вных разжже́нныя и пламенови́дныя на на́с угаси́ стре́лы, я́ко да пое́м Тя́, Чи́стая, во вся́ ве́ки.

Преесте́ственне Соде́теля и Спа́са, Бо́га Сло́ва родила́ еси́, Де́во: те́мже Тя пое́м во вся ве́ки.

Ин, всех святых.

Ирмос: Седмери́цею пещь:

Ра́дуйтеся, му́ченицы, проро́цы, апо́столи, священному́ченик честны́й собо́ре, пра́ведных, преподо́бных же и учи́телей боже́ственный ли́че, с мироно́сицами жена́ми сладкопою́ще: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Я́же па́че ума́ све́тлостию насыща́еми, святи́и, боже́ственнаго весе́лия и ра́дости исполня́еми, бо́зи быва́ете к Бо́гу приближе́нием, богоде́тельным све́тлостем обща́ющеся, и, сла́вы неизрече́нныя просвети́вшеся луча́ми, Христа́ превозноси́те во вся ве́ки.

Благослови́м Отца́ и Сы́на и Свята́го Ду́ха, Го́спода.

Яви́вшеся, святи́и, я́ко зве́зды многосве́тлыя, церко́вное не́бо уясня́ете разли́чными дарова́ньми и разли́чными добро́тами, в пра́вде, целому́дрии, му́жестве, ра́зуме: Влады́ку, свяще́нницы, воспо́йте, лю́дие, превозноси́те во вся ве́ки.

И ныне, Богородичен: С весе́лием вся жены́ богому́дрыя, сконча́вшияся, пою́т ду́хом Де́ву Пречи́стую, и́стинную Ма́терь Бо́жию, от кля́твы прама́тере Е́вы нас изба́вившую, благогове́йно предстоя́ще, Тоя́ воспо́йте Плод во ве́ки.

Хва́лим, благослови́м:

Катавасия: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся́ ве́ки.

Таже поем: Честне́йшую:

Песнь 9

Ирмос: Ужасе́ся о се́м Не́бо,/ и земли́ удиви́шася концы́,/ я́ко Бо́г яви́ся челове́ком пло́тски,/ и чре́во Твое́ бы́сть простра́ннейшее Небе́с./ Те́м Тя́ Богоро́дицу// А́нгелов и челове́к чинонача́лия велича́ют.

Боже́ственным и безнача́льным естество́м прост сый, сложи́лся еси́ прия́тием пло́ти, в Тебе́ само́м сию́ соста́вив, Сло́ве Бо́жий, и пострада́в, я́ко Челове́к, пребы́л еси́ кроме́ страсте́й, я́ко Бог. Те́мже Тя во двою́ существу́ неразде́льно и неслия́нно велича́ем.

Отца́ по существу́ Боже́ственному, я́коже естество́м бы́в Челове́к, ре́кл еси́ Бо́га, Вы́шний, рабо́м снизходя́; воскре́с от гро́ба, благода́тию Отца́ земноро́дных поло́жь, И́же по естеству́ Бо́га же и Влады́ку, с Ни́мже Тя́ вси́ велича́ем.

Богородичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Бо́га Сло́ва, Его́же Оте́ц отры́гну от се́рдца Своего́ пре́жде всех век, я́ко Благ, Его́же ны́не и теле́с превы́шша разуме́ем, а́ще и в Те́ло облече́ся.

Ин, крестовоскресен.

Ирмос: Устраши́ся:

Бо́жия Тя́ естество́м у́бо Сы́на, зача́таго во утро́бе све́мы Богома́тере, и бы́вшаго на́с ра́ди Челове́ка, и зря́ще Тя́ на Кресте́, естество́м у́бо стра́ждуща челове́ческим, безстра́стна же я́ко Бо́га пребыва́юща, велича́ем.

Разруши́ся тьма дря́хлая, от а́да бо возсия́ Со́лнце пра́вды, Христо́с, земли́ просвеща́я вся концы́, сия́я Божества́ све́том, Небе́сный Челове́к, Бог земны́й, Его́же во двою́ естеству́ велича́ем.

Ин, Богородицы.

Ирмос: Вои́стину Богоро́дицу:

Ра́дости и весе́лия испо́лнь есть па́мять Твоя́, приступа́ющим исцеле́ния точа́щи, и благоче́стно Богоро́дицу Тя возвеща́ющим.

Псалмы́ Тя воспева́ем, Благода́тная, и немо́лчно, е́же ра́дуйся, прино́сим: Ты бо источи́ла еси́ всем ра́дость.

Ин, всех святых.

Ирмос: Ужасе́ся о сем Не́бо:

Наде́ждею и любо́вию вооруже́нно и ве́рно огражде́нно, счине́ние избра́нных вся мучи́телей преще́ния, му́ки и ра́ны ра́дующеся претерпе́ша, благосла́вно от Христа́ обогати́вшеся, победотворя́щаго в страда́ниих и́стины первому́ченики.

Приста́нище спасе́ния, Крести́теля, апо́столы, проро́ки и му́ченики с по́стники, боже́ственныя учи́тели и свяще́нники, патриа́рхов же собра́ние и священному́ченики благосла́вныя, жены́ боголюби́выя, преподо́бныя и пра́ведныя ны́не досто́йно восхва́лим.

Слава: Огне́м искуси́вшеся искуше́ний и сластьми́ не прельсти́вшеся, ра́дуетеся чи́сте, престо́лу Влады́чню светови́дному предстоя́ще, сла́внии собо́ри святы́х, на Небесе́х, разреши́вшимся зерца́лом, се́ни же мимоше́дшей и́стинными явле́ньми.

И ныне, Богородичен: Яви́лася еси́ разстоя́щимся совокупи́тельная: Тобо́ю бо А́нгелом единосе́льницы на Небесе́х челове́цы бы́ша вои́стину, и свиде́тельствуют чи́нове всех святы́х, ны́не с ни́ми пою́ще Твое́ Рождество́, Де́во Богоро́дице, в ве́чных пе́снех.

Катавасия: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Ектения малая.

Таже: Свят Госпо́дь Бог наш: на глас 8.

Посем ексапостиларий воскресен:

Со ученики́ взы́дем на го́ру Галиле́йскую, ве́рою Христа́ ви́дети, глаго́люща власть прия́ти вы́шних и до́льних: научи́мся, ка́ко учи́т крести́ти во и́мя Отца́ и Сы́на и Свята́го Ду́ха язы́ки вся и спребыва́ти ученико́м, я́коже обеща́ся, до сконча́ния.

Слава, светилен всех святых:

Крести́теля и Предте́чу, апо́столы, проро́ки, му́ченики, священнонача́льники же, по́стники и преподо́бныя, священному́ченики, ку́пно боголюби́выя жены́ и пра́ведныя вся, и А́нгелов чи́ны до́лжно пе́сньми увязе́м, моля́щеся сла́ву сих получи́ти от Христа́ Спа́са.

И ныне, Богородичен:

И́же Горе́ прославля́емый боже́ственне от А́нгелов, от не́др О́тчих, Пречи́стая, не отсту́пль неизрече́нно, с до́льними поживе́: Ты́ же сего́ была́ еси́ спасе́ния Хода́таица, от чи́стых Твои́х крове́й Сему́, Чи́стая, па́че сло́ва Пло́ть заимода́вши. Его́же моли́ рабо́м Твои́м избавле́ние да́ти прегреше́ний.

На хвалитех: Вся́кое дыха́ние: поставим стихов 8, и поем стихиры воскресны.

Глас 8.

Стих: Сотвори́ти в них суд напи́сан,/ сла́ва сия́ бу́дет всем преподо́бным Его́.

Го́споди, а́ще и суди́лищу предста́л еси́, от Пила́та суди́мый,/ но не отступи́л еси́ от престо́ла, со Отце́м седя́й,/ и, воскре́с из ме́ртвых,/ ми́р свободи́л еси́ от рабо́ты чужда́го,// я́ко Ще́др и Человеколю́бец.

Стих: Хвали́те Бо́га во святы́х Его́,/ хвали́те Его́ во утверже́нии си́лы Его́.

Го́споди, а́ще и я́ко ме́ртва во гро́бе иуде́и положи́ша,/ но я́ко Царя́ спя́ща во́ини Тя́ стрежа́ху;/ и я́ко живота́ Сокро́вище печа́тию печа́таша:/ но воскре́сл еси́// и по́дал еси́ нетле́ние душа́м на́шим.

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

Го́споди, ору́жие на диа́вола Кре́ст Тво́й да́л еси́ на́м,/ трепе́щет бо и трясе́тся,/ не терпя́ взира́ти на си́лу его́:/ я́ко ме́ртвыя возставля́ет и сме́рть упраздни́.// Сего́ ра́ди покланя́емся погребе́нию Твоему́ и воста́нию.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

А́нгел Тво́й, Го́споди,/ Воскресе́ние пропове́давый,/ стра́жи у́бо устраши́, жена́м же возгласи́ глаго́ля:/ что́ и́щете Жива́го с ме́ртвыми?/ Воскре́се, Бо́г сы́й,// и вселе́нней жи́знь дарова́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Пострада́л еси́ Кресто́м, Безстра́стный Божество́м,/ погребе́ние прия́л еси́ тридне́вное,/ да нас свободи́ши от рабо́ты вра́жия/ и, обезсме́ртив, оживотвори́ши нас, Христе́ Бо́же,// Воскресе́нием Твои́м, Человеколю́бче.

Ины стихиры, всех святых, глас 4.

Подобен: Я́ко до́бля:

Стих: Хвали́те Его́ в кимва́лех доброгла́сных, хвали́те Его́в кимва́лех восклица́ния./ Вся́кое дыха́ние да хва́лит Го́спода.

Святы́я Госпо́дь, и́же на земли́, удиви́,/ Того́ бо ра́ны и страда́ния в пло́ти восприя́ша,/ в си́х крася́щеся и боже́ственными удобре́ньми явле́нно удобря́еми:/ я́же воспои́м, я́ко неувяда́ющия цве́ты,/ я́ко зве́зды непреле́стныя Це́ркве,// я́ко во́льная заколе́ния.

Стих: Воззва́ша пра́веднии,/ и Госпо́дь услы́ша их.

С проро́ки апо́столи,/ с преподо́бными учи́телие,/ со священному́ченики вси́ пра́веднии,/ и же́н пострада́вшее,/ и любо́вию пости́вшееся святы́х мно́жество,/ и пра́ведных чи́нове/ да восхва́лятся свяще́нными пе́сньми,/ я́ко Го́рняго Ца́рствия насле́дницы,// я́ко рая́ жи́телие.

Стих: Ди́вен Бог во святы́х Свои́х,/ Бог Изра́илев.

И́же зе́млю онебеси́вшии доброде́телей све́тлостию,/ и́же Христо́ву смерть подража́вшии,/ безсме́ртия хода́тайственный путь ше́ствовавшии,/ и́же стра́сти челове́ком рукоде́йствием благода́ти очи́стившии,/ и́же во всем ми́ре единоду́шно страда́льчествовавшии,// до́блественне да восхва́лятся му́ченицы.

Слава, стихира евангельская, глас 1:

На го́ру ученико́м иду́щим/ за земно́е вознесе́ние,/ предста́ Госпо́дь, и, поклони́вшеся Ему́/ и да́нныя вла́сти везде́ научи́вшеся,/ в поднебе́сную посыла́хуся/ пропове́дати е́же из ме́ртвых Воскресе́ние/ и е́же на Небеса́ Вознесе́ние:/ и́мже и во ве́ки спребыва́ти Нело́жный обеща́ся Христо́с Бо́г// и Спа́с ду́ш на́ших.

И ныне: Преблагослове́нна еси́:

Славословие великое. По Трисвятом тропарь: Воскре́с из гро́ба:

Ектении и отпуст. И час 1-й.

На часех тропарь воскресен: С высоты́ снизше́л еси́: и всех святых: И́же во всем ми́ре: Кондак святых: Я́ко нача́тки:

На Божественной Литургии

Блаженна воскресна гласа, на 4.

Глас 8.

Блаже́ни ми́лостивии,/ я́ко ти́и поми́ловани бу́дут.

Помяни́ на́с, Христе́, Спа́се ми́ра,/ я́коже помяну́л еси́ разбо́йника на дре́ве,/ и сподо́би все́х, Еди́не Ще́дре,/ Небе́снаго Ца́рствия Твоего́.

Блаже́ни чи́стии се́рдцем,/ я́ко ти́и Бо́га у́зрят.

На Дре́ве пригво́ждся, Спа́се на́ш, во́лею,/ дре́вом Ада́ма от кля́твы изба́вил еси́,/ воздава́я, я́ко Ще́др,/ е́же по о́бразу и рая́ вселе́ние.

Блаже́ни миротво́рцы,/ я́ко ти́и сы́нове Бо́жии нареку́тся.

Слы́ши, Ада́ме, и ра́дуйся со Е́вою,/ я́ко обнажи́вый дре́вле обои́х/ и пре́лестию взе́мый плене́нны на́с,/ Кресто́м Христо́вым упраздни́ся.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Днесь Христо́с воскре́се от гро́ба,/ всем ве́рным подая́ нетле́ние,/ и ра́дость обновля́ет мироно́сицам/ по Стра́сти и воста́нии.

И от канона всех святых песнь 6, на 4.

Блаже́ни есте́, егда́ поно́сят вам,/ и изжену́т, и реку́т всяк зол глаго́л на вы, лжу́ще, Мене́ ра́ди.

Я́ко честны́й, избра́нный,/ положе́нный Ка́мень краеуго́льный,/ святи́и в Сио́не обре́тше Тя, Влады́ко, Основа́ние непоколеби́мое,/ избра́нное ка́мение себе́ назда́ша.

Ра́дуйтеся и весели́теся,/ я́ко мзда ва́ша мно́га на Небесе́х.

Пронзе́нным Твои́м ре́бром,/ ка́пли Кро́ве иска́паша/ с водо́ю богоде́тельно,/ мир обнови́ша/ и боже́ственный собо́р святы́х всех,/ Благоде́телю, призда́ша.

Слава:

Пое́м всеблагоче́стно му́ченик о́блак боже́ственный,/ благода́тию просвеще́нный/ и возсия́вший светле́е багряни́цею кро́ве/ и червлени́цею их тве́рдаго страда́ния.

И ныне, Богородичен:

Ма́терь всеи́стинную Бо́жию Тя вси зна́ем,/ Е́юже естество́ же́нское изба́вльшееся, Всенепоро́чная,/ о Христе́ предпострада́,/ доброде́тели же вся́кия благоче́стно бы́сть испо́лнено.

По входе тропарь воскресный, глас 8:

С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да на́с свободи́ши страсте́й,// Животе́ и Воскресе́ние на́ше, Го́споди, сла́ва Тебе́.

И святых тропарь, глас 4:

И́же во все́м ми́ре му́ченик Твои́х,/ я́ко багряни́цею и ви́ссом,/ кро́вьми Це́рковь Твоя́ украси́вшися,/ те́ми вопие́т Ти́, Христе́ Бо́же:/ лю́дем Твои́м щедро́ты Твоя́ низпосли́,/ ми́р жи́тельству Твоему́ да́руй// и душа́м на́шим ве́лию ми́лость.

Слава, и ныне, кондак святых, глас 8:

Я́ко нача́тки естества́, Насади́телю тва́ри,/ вселе́нная прино́сит Ти́, Го́споди, богоно́сныя му́ченики./ Те́х моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

Трисвятое.

Прокимен Апостола, глас 8: Помоли́теся/ и воздади́те Го́сподеви Бо́гу на́шему.

Стих: Ве́дом во Иуде́и Бог, во Изра́или ве́лие и́мя Его́.

И святых, глас 4: Ди́вен Бо́г во святы́х Свои́х,/ Бо́г Изра́илев.

Апостол ко евреем, зачало 330: Святи́и вси ве́рою:

Аллилуия, глас 4: Воззва́ша пра́веднии, и Госпо́дь услы́ша их.

Стих: Мно́ги ско́рби пра́ведным, и от всех их изба́вит я Госпо́дь.

Евангелие от Матфея, зачало 38: Всяк, и́же испове́сть Мя пред челове́ки:

Причастен: Хвали́те Го́спода с Небе́с: Другий: Ра́дуйтеся, пра́веднии, о Го́споде:

Зри: Подобает ведати: аще храм всех святых: На малей и велицей вечерни, и на утрени, и на Литургии подобне поем, якоже случится в Неделю великаго святаго, емуже бывает бдение. Точию на утрени поем полиелей.

По полиелеи величание:

Велича́ем ва́с,/ апо́столи, му́ченицы, проро́цы и вси́ святи́и,/ и чти́м святу́ю па́мять ва́шу:/ вы́ бо моли́те о на́с// Христа́, Бо́га на́шего.

Псалом избранный: Блаже́н муж, боя́йся Го́спода:

И седален святых, писан в каноне по 3й песни.

Степенна гласа. Прокимен. Вся́кое дыха́ние: И Евангелие святых. Воскресе́ние Христо́во: По 50 псалме стихира всех святых, кую волиши.

Канон воскресен со ирмосом на 4, и Богородицы на 2, и святых на 8. И прочее, якоже предписася.

Конец, и Богу слава.


Источник: Праздничные службы Цветной Триоди / Е. Кустовский – М.: СофтИздат, 2008. – 280 с.

Комментарии для сайта Cackle