Е. Кустовский

Неделя пятая Святых Постов. Инии типицы предаша пети в сию неделю последование преподобныя матере нашея Марии Египетския

На велицей вечерни,

поставим стихов 10, и поем стихиры Осмогласника:

Воскресны 3, и Анатолиевы 3. И Триоди подобны 3, глас 6.

Подобен: Всю отложи́вше:

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Тебе́ у́бо возбраня́ше честны́х взира́ния, / скве́рн пре́жде привлече́нное скверне́ние; / твое́ же чу́вство, и твоя́ богому́драя соде́янных со́весть, / к лу́чшим тебе́ обраще́ние соде́яша. / На ико́ну бо воззре́вши благослове́нныя Богоотрокови́цы, / всех пока́явшися прегреше́ний свои́х, всехва́льная, преж́них, // в дерзнове́нии Честно́му Дре́ву поклони́лася еси́.

Стих: Яко у Го́спода ми́лость и мно́гое у Него́ избавле́ние / и Той изба́вит Изра́иля от всех беззако́ний его́.

Паки таяжде стихира.

Стих: Хвали́те Го́спода вси язы́цы / похвали́те Его́ вси лю́дие.

Ме́стом поклони́вшися ра́достно святы́м, / доброде́тели напу́тное спаси́тельнейшее, / отту́ду прия́ла еси́, / и зело́ потекла́ еси́ до́брое ше́ствие; / и струю́ преше́дши Иорда́нскую, / в жили́ще Предте́чево усе́рдно всели́лася еси́, / и страсте́й свире́пство жи́тельством омрачи́ла еси́, / истончава́ющи в дерзнове́нии, / приснопа́мятная ма́ти, // плотска́я сво́йства.

Стих: Яко утверди́ся ми́лость Его́ на нас / и и́стина Госпо́дня пребыва́ет во век.

В пустыню вселившися, / Твоих страстей образы от души́ отъяла еси, / боговиднейшее изображение в души́ написавши, / доброде́телей ви́ды; / и толи́ко просия́ла еси́, / я́ко и вода́ми легко́ преходи́ти, блаже́нная, / и от земли́ взима́тися в твои́х к Богу молениих; / и ныне в дерзновении всеславная Марие, / Христу́ предстоя́щи, // моли́ся о душа́х на́ших.

Слава, глас 4:

Очудотвори́, Христе́, Креста́ Твоего́ си́ла, / я́ко и я́же прежде блудни́ца, / по́стническим по́двигом подвиза́ся; / отню́дуже и немощно́е отве́ргши, / до́блественно сопротивоста́ на диа́вола. / Те́мже и по́честь побе́ды нося́щи, // мо́лится о душа́х на́ших.

И ныне, догматик гласа. Вход. Све́те ти́хий:

На стиховне стихиры Осмогласника.

Слава, преподобныя, глас 2:

Душе́вная ловле́ния, и стра́сти плотски́я / мече́м воздержа́ния посе́кла еси́; / по́мысла прегреше́ния молча́нием обуче́ния подави́ла еси́, / и струя́ми слез твои́х пусты́ню всю напои́ла еси́, / и прозябла́ еси́ нам покая́ния плоды́. // Те́мже Твою́ па́мять, преподо́бная, пра́зднуем.

И ныне, Богородичен:

О, чудесе́ но́ваго всех дре́вних чуде́с! / кто бо позна́ Ма́терь без му́жа ро́ждшую, / и на руку́ нося́щую, всю тварь содержа́щаго? / Бо́жие есть изволе́ние, ро́ждшееся. / Его́же я́ко младе́нца, Пречи́стая, / Твои́ма рука́ма носи́вшая, / и Ма́терне дерзнове́ние к нему́ иму́щая, / не преста́й моля́щи о чту́щих Тя, // уще́дрити и спасти́ ду́ши на́ша.

Ны́не отпуща́еши: По Трисвятом тропарь Богоро́дице Де́во: дважды.

И преподобныя, единожды. Глас 8:

В тебе́, ма́ти, изве́стно спасе́ся е́же по о́бразу; / прии́мши бо крест, после́довала еси́ Христу́, / и де́ющи учи́ла еси́ презира́ти у́бо плоть, прехо́дит бо, / прилежа́ти же о души́

вещи безсмертней. // Темже и со ангелы срадуется, преподобная Марие, дух твой.

На утрени,

по шестопсалмии, на Бог Госпо́дь: тропарь воскресен дважды.

Слава, преподобныя, глас 8: В тебе́, ма́ти:

И ныне, Богородичен:

Иже нас ради рождейся от Девы, / и, распятие претерпев, Благий, / испровергий смертию смерть, / и воскресение явлей, яко Бог, / не презри, яже создал еси́ рукою Твоею, / яви́ человеколюбие Твое, Милостиве. / Приими рождшую Тя Богородицу, молящуюся за ны, // и спаси, Спасе наш, люди отчаянныя.

Каноны Октоиха: Воскресный со ирмосом на 4, и Богородицы на 2.

И Триоди 2 канона, на 8. Катавасия: Отве́рзу уста́:

По 6й песни кондак преподобныя, глас 3:

Блуда́ми пе́рвее преиспо́лнена вся́ческими, / Христо́ва неве́ста днесь покая́нием яви́ся, / а́нгельское жи́тельство подража́ющи, / де́моны Креста́ ору́жием погубля́ет. // Сего́ ра́ди Ца́рствия неве́ста яви́лася еси́, Мари́е пресла́вная.

Ексапостиларий утренний воскресный.

Сла́ва: преподобныя, писан в Триоди. И ны́не: тамже.

На хвалитех поставим стихов 8, и поем стихиры Осмогласника.

Таже преподобныя, глас 1:

Стих: Воскресни́, Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Несть Ца́рство Бо́жие пи́ща и питие́, / но пра́вда и воздержа́ние со свя́тостию. / Те́мже не бога́тии вни́дут в не́, / но ели́цы сокро́вища своя́ в ру́ки ни́щих влага́ют. / Сия́ и Дави́д проро́к учи́т, глаго́ля: / пра́веден муж ми́луяй весь день, / наслажда́яйся Го́сподеви, / и во све́те ходя́й не по́ткнется. / Сия́ же вся к наказа́нию на́шему писа́шася, / я́ко да постя́щеся благосты́ню твори́м, // и даст нам Госпо́дь вме́сто земны́х небе́сная.

Слава, паки тойже. И ныне: Преблагослове́нна еси́:

Славословие великое, и тропарь воскресен. Таже ектении, и отпуст.

На Литургии,

блаженна и прокимен рядового гласа.

Апостол дне ко евреям, зачало 321 от полу.

И преподобныя, к галатом, зачало 208. Аллилуия гласа.

Евангелие от Марка, зачало 47. И преподобныя, от Луки, зачало 33.

Причастный: Хвали́те Го́спода с небе́с:



Источник: Е. Кустовский. Воскресные службы постной Триоди. Москва. 2000

Комментарии для сайта Cackle