В туюжде неделю вечера

на Го́споди воззва́х: поставим стихов 10, и поем 4 стихиры Осмогласника умилительны, со стиховны вечерни и утрени; и Триоди 3, подобны господина Иосифа. Глас 3.

Подобен: Ве́лия Креста́:

Стих: Аще беззако́ния на́зриши, Го́споди, Го́споди, кто постои́т? / я́ко у Тебе очище́ние есть.

Великия, вернии, во время покажем воздержания труды, / я́ко да сла́ву вели́кую получи́м, / ми́лостию Вели́каго Бо́га // избавля́еми пла́мене гее́нскаго.

Стих: Имене ра́ди Твоего́ потерпе́х Тя Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Время пощения ныне преполовивше, / начало божественнаго жития́ я́ве пока́жем, / и в коне́ц доброде́тельнаго жи́тельства / дости́гнути те́пле потщи́мся; // я́ко да прии́мем сладость нестаре́емую.

Ина стихира господина Феодора, глас 7:

Подобен: Под кров Твой:

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Преполовивше сей священный пощения путь, / к будущему радостию потецем, / благотворения елеем души помазавше, / я́ко да сподо́бимся Христа́ Бо́га на́шего, / и Боже́ственным страсте́м поклони́тися, // предвари́ти и Стра́шное и Свято́е Воскресе́ние.

И Минеи 3. Аще имать святый, Сла́ва: стихиру самогласну. Аще ли несть, Сла́ва, и ны́не, Богородичен во глас Минеи, от менших.

Вход. Све́те ти́хий:

Прокимен великий, глас 8:

Не отврати́ лица́ Твоего́ от о́трока Твоего́, я́ко скорблю́, ско́ро услы́ши мя. / Вонми́ души́ мое́й, и изба́ви ю.

Стих: Спасе́ние Твое́ Бо́же, да прии́мет мя.

Стих: Да у́зрят ни́щии, и возвеселя́тся.

Стих: Взыщи́те Бо́га, и жива́ бу́дет душа́ ва́ша.

И паки высочайшим гласом: Не отврати́ лица́ Твоего:

На стиховне самогласен дне, глас 7:

Виногра́д насади́вый, / и де́латели призвавый, / близ есть Спас, / приидите, пощения подвижницы, / мзду восприимем, / я́ко бога́т есть Да́вец и ми́лостив; // ма́ло де́лавше, прии́мем душе́вную ми́лость.

Ин самогласен, глас 6:

Стих: К Тебе́ воздвиго́х о́чи мои́, живу́щему на небеси́. Се я́ко о́чи раб в руку́ госпо́дий своих, яко очи рабыни в руку́ госпожи́ своея́; та́ко о́чи на́ши ко Го́споду Бо́гу на́шему, / до́ндеже уще́дрит ны.

В разбойническия помыслы впад Адам, / прельстися умом, и уязви́вся душе́ю, / лежа́ше наг заступле́ния; / ни свяще́нник же пре́жде зако́на внят ему́, / ниже́ леви́т по зако́не воззре́в на́нь; / то́кмо Ты, прише́дый Бо́же, / не от Самари́и, но от Богоро́дицы; // Го́споди, сла́ва Тебе́.

Стих: Поми́луй нас, Го́споди, поми́луй нас, яко по мно́гу испо́лнихомся уничиже́ния; наипа́че напо́лнися душа́ на́ша поноше́ния гобзу́ющих / и уничиже́ния го́рдых.

Мученичен:

Му́ченицы Твои́ Го́споди, / не отверго́шася Тебе́, / ни отступиша от заповедей Твоих; // тех молитвами помилуй нас.

Сла́ва: святаго Минеи, аще есть. И ны́не: Богородичен, по гласу Минеи.

Аще же ни, Сла́ва, и ны́не: Богородичен, глас тойже:

Арха́нгельски воспои́м ве́рнии Небе́сный Черто́г, / и Две́рь Запеча́танну вои́стинну. / Ра́дуйся, Ея́же ра́ди отрасте́ нам / Спас всех Христо́с, Жизнода́вец и Бог; / низложи́, Влады́чице, мучи́тели, / безбо́жныя враги́ на́ша, / руко́ю Твое́ю, Пречи́стая, // упова́ние христиа́н.

Зде чтет предстоятель, аще изволит, по обычаю, акафист Страстем Христовым.

Посем: Ны́не отпуща́еши: И прочее последование, яко в сыропустную неделю указуяся.