Источник

ЛИТУРГИЧЕСКИЕ МОЛИТВЫ

Молитва иерея, приступающего к служению Литургии

БОЖЕ МОЙ И ГОСПОДИ ИИСУСЕ ХРИСТЕ, се аз, недостойный иерей дерзаю паки приступити к страшному Престолу Твоему, да службу мою совершу. Молю Тя, Царю безначальне, Сый прежде всех век: не отврати Лица Твоего от отрока Твоего, и слуха Твоего от нечистых молитв да не заградиши. Ходатайства моего об искупленных Кровию Твоею да не презриши, и дерзновения моего да не вмениши мне во грех.

БОЖЕ МОЙ, в помощь мою вонми; Господи, помощи ми потщися...

Прошения перед Херувимской песнью

Первая пятерица

ОТЧЕ БЛАГИЙ, Сыне Единородный, Душе Святый, Троице светоначальная и животворящая, яже всякую тварь видимую и невидимую от не сущих во еже быти неизреченною премудростию Твоею приведшая и неисчетною силою Твоею содержащая, яже по прочих Твоих о роде нашем благодеяниих, пренебесное сие служение нам даровавшая, сподоби нас благодатию Твоею о величестве Тайны сея веровати и разумети, и сердцем чистым и умом просвещенным службы сея священнодействие якоже достоит совершати; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, основание Сый всему сущему, и вечности и времени, властию Твоею положивый пределы временнаго бытия нашего на земли, и в Сыне Твоем собезначальнем даровавый нам чрез воскресение жизнь вечную и Царство непреложное, приими нас, припадающих к Тебе, и укрепи нас Духом Твоим Святым в сей час предстояния нашего страшному Престолу Твоему к безкровному священнодействию и к неосужденному причащению Божественных Тайн; молим Ти ся, Отче благий, услыши ны и помилуй.

ЦАРЮ СВЯТЫЙ, ИИСУСЕ ХРИСТЕ, едине истинный Архиерею, принесый Себе на олтаре крестнем в мироискупительную жертву, и сим неисповедимым священнодействием давый нам Тело Твое пречистое в снедь и Кровь Твою честную в питие, сотвори ны достойны неизреченных сих Таинств, освящающих и обожающих нас; молим Ти ся, Христе, услыши ны и помилуй.

ДУШЕ СВЯТЫЙ, Боже великий и дивный, Света Источниче и Жизни Подателю, благий Утешителю и вседержавный Заступниче, Истины Откровение и тайносовершительная Сило, в сей страшный час непостижимыя Вечери Христа, не отврати Лица Твоего от нас, присно оскорбляющих Тя, но прииди, и милостивно склонися к немощи нашей, и вся совершив, введи ны в Чертог Его, неповинными и неосужденными; молим Ти ся, услыши и скоро помилуй.

БОЖЕ ОТЧЕ, Вседержителю Благий, сый благословен во веки, призвавый ны в вечную славу о Христе Иисусе, Иже един Праведник сый, за ны неправедныя пострада; Иже не сотворив ни единаго греха, грехи мира всего в Теле Своем на Крест вознесе, и излиянием Крове Своея тяготу клятвы законныя разруши; Иже в немощи плоти явил есть нам образ Твоего совершенства, молим Тя, Отче Святый, исполни ны свыше силою Твоею, да последуем стопам Его; сотвори ны подобницы быти Сыну Твоему возлюбленному в веце сем непостоянней и превратней, да не похулится нас ради истинный путь Твой, ниже поругаем будет от сынов противления.

Ей, Отче благий, во благоволении Твоем приими службу сию от рук наших и яви ны достойны причащения Тела и Крове Христа Твоего и вселения Духа Твоего.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Вторая пятерица

БОЖЕ ВЕЛИКИЙ, Троице Святая, единосущая и нераздельная, Царю и Творче всех веков, почтивый ны образом твоим, и в видимем зраце естества нашего подобие живописавый умнаго существа Твоего, сподоби нас обрести милость и благодать пред Тобою во еже славити Тя в невечернем дни Царствия Твоего со всеми от века святыми: отцы и праотцы, пророки и апостолы, мученики и исповедники, преподобными и святительми; молим Ти ся, услыши и помилуй.

ГОСПОДИ БОЖЕ ВСЕДЕРЖИТЕЛЮ, Отче Господа нашего Иисуса Христа, всесильне и многомилостиве, во дни оны изливый Духа Твоего Святаго на апостолы и всех, иже беху с ними, и даровавый им возвещати величия Твоя языками всея земли, и ныне, молим Тя, излий Того же Духа Твоего на ны, недостойныя рабы и рабыни Твоя, и сотвори ны, призывающих чудное Имя Твое, сыны и дщери нетварнаго Света Твоего, причащением Христовых Тайн; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Слове Божий и Боже, един сый основание незыблемое Церкве Твоея, юже Крестом Твоим и смертию создал еси, воскресением совершил еси, вознесением благословил еси, Духа Святаго ниспосланием освятил и оживотворил еси во веки, сподоби ны неосужденнаго предстояния святей Твоей сей Трапезе и достойнаго причащения пречистаго Твоего Тела и честныя Твоея Крове; молим Ти ся, услыши и помилуй.

ДУШЕ СВЯТЫЙ, всесильне и самовластие, Отцу и Сыну единосущне и единославне, несозданнаго Света Источниче, премудрости и богоразумия Подателю, схождением Твоим всего мира концы к истинному боговедению приведый, сниди и ныне даже до нас, просвещаяй и освящаяй, исцеляяй и утешаяй нетленным Твоим утешением; молим Ти ся, скоро услыши ны и скоро помилуй.

ОТЧЕ БЛАГИЙ, Отче Святый и милостивый, открывый нам тайны безкровнаго священнодействия, и положивый нас грешных во еже приносити Тебе дары же и жертвы о гресех наших и о всем мире Твоем; Сам, невидимый Царю, призри благостынно на ны, в час сей предстоящия святому сему престолу, на немже предложитися имут страшныя Тайны Тела и Крове Единороднаго Сына Твоего и Бога нашего, и свободив ны от всякия скверны плоти и духа, просвети и освяти ны, да чистою совестию и просвещенным сердцем восприимем часть святынь, и соединимся Самому Христу Твоему, истинному Богу нашему, рекшему: ядый Мою плоть и пияй Мою Кровь, во Мне пребывает, и Аз в нем; да всельшуся в нас Слову Твоему, явимся храм Пресвятаго Твоего Духа, обновленнии в естестве нашем по дару сему.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Третья пятерица

ОТЧЕ БЛАГИЙ, Сыне Единородный, Душе Святый, великий и дивный Боже, рекий из тьмы возсияти свету, облистай во омраченных сердцах наших незаходимый свет боговедения Твоего, и в скудельных сосудех естества нашего яви непобедимую силу Твою, неприступны показав нас ни единой тьме, и к правде Твоей, юже открыл еси нам, да не приложится ни единое беззаконие, но да будет во всем непорочна и свята служба наша пред Тобою; молим Ти ся, услыши и помилуй.

ВЛАДЫКО БОЖЕ, Отче Вседержителю, от всея твари поклоняемый и воспеваемый, сподоби нас Тебе, Единаго воистину сущаго Бога и Отца нашего, благодарити и славословити за величество Любве Твоея, еюже нас, недостойных тако возлюбил еси, якоже Сына Твоего Единороднаго дал еси нам, да в Нем и чрез Него сынами Света Твоего явиши ны, Духом Твоим Святым удовли ны в час сей к достойному предстоянию у Престола Твоего и неосужденному совершению сея словесныя и безкровныя Жертвы; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Сыне Единородне, от Отца прежде век нетленно возсиявый, Слово ипостасное, присносущныя славы Царю, в плоть оболкийся и принесый Себе в Жертву на олтаре крестнем нашего ради спасения, приими нас ныне, припадающих Ти, и сподоби ны причастия пречистых Твоих Тела и Крове во исцеление и освящение душ и телес наших; молим Ти ся, услыши ны и помилуй.

ДУШЕ СВЯТЫЙ, от Отца исходящий и в Сыне почивающий, прииди, Свете неописанне, вся исполняяй и животворяй, и просвети ны, омраченныя страстьми, исцели естество наше, падением Адамовым сокрушенное, и причащением пречистых Христовых Тайн запечатлей в нас Образ Его, смиреннаго и кроткаго Агнца Божия, вземлющаго грехи мира; молим Ти ся, услыши ны и скоро помилуй.

ГОСПОДИ ИИСУСЕ ХРИСТЕ, Сыне Бога Живаго, отверзый очи слепорожденному, отверзи умныя очи сердца нашего, и даждь нам узрети Тебе, Творца и Бога нашего. Молим Тя: не отвержи нас от Лица Твоего, и презрев все окаянство и низость нашу, яви нам Свет Твой, о Свете мира, и сынами Света Твоего покажи нас. О сладчайший Христе, от Отца низпославый Святаго Утешителя на святыя Твоя ученики и апостолы, даждь, Всеблагий, и нам недостойным дар Духа Твоего Святаго, Иже да научит ны познанию Твоему и да открыет нам тайны путей спасения Твоего.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Четвертая пятерица

ПРЕБЕЗНАЧАЛЬНАЯ, Всесильнейшая Троице Святая, Отче, Сыне и Душе, Едине истинный Боже, поклоняемый и славимый на небеси и на земли, приемляй словесную службу от созданных Тобою, от всея твари видимыя и невидимыя: во благоволении Твоем приими и наше поклонение и славословие, и сподоби ны неизменне пребыти во свете Твоих неизреченных откровений; молим Ти ся, услыши и помилуй.

ВЛАДЫКО БОЖЕ, Отче Безначальне, низпосланием Духа Твоего Святаго законоположи нас в путех заповедей Твоих, и даже до последняго издыхания нашего сотвори ны неуклонны во истине исповедания Твоего. Исцели всякое неможение естества нашего и благоволением Твоим покрый грядущее время жития нашего, сподобляя нас достойно приносити безкровную Жертву о гресех наших и о всем мире Твоем; молим Ти ся, Отче Всесвятый, услыши ны и помилуй.

ГОСПОДИ ИИСУСЕ ХРИСТЕ, Боже Спасителю наш, един сый воистину Краеугольный Камень, на Немже зиждется всякая жизнь, призри милостивне на ны, недостойныя рабы Твоя, дерзающия в надежде на благоволение Твое принести Тебе сие священнодействие и Кровию Твоею омый нас от всякаго греха; молим Ти ся, Христе, услыши и помилуй.

ДУШЕ СВЯТЫЙ, Свете неименуемый, Свете неизследимый и сокровенный, прииди и вселися в ны: очисти ны от тьмы неведения, напой нас, жаждущия, таинственными струями познания Твоего, и изведи из темницы греховныя души наша, исцеляяй ны от всякия раны, таящияся в нас, причащением Божественныя и нетленныя Пищи – Тела и Крове Христа Бога; молим Ти ся, услыши и скоро помилуй.

ОТЧЕ СВЯТЫЙ, хвалим Тя, благословим Тя, кланяем Ти ся и благодарим Тя, яко избрал еси место сие и освятил еси храм сей к славословию пресвятаго Имене Твоего, и жертвенник к приношению безкровныя жертвы пресвятаго Тела и честныя Крове Христа Твоего. Молим Тя: николиже отступи от нас, но якоже в веках на жертвы отцев наших Духа Твоего Святаго ниспосылал еси в безмерной благости Твоей, сице и ныне, не презри молений и служб наших, но сотвори нас быти служители Новаго Завета, иже в Крови Христа Твоего, да причастницы сущи святых Твоих Таинств, явимся сынами Света Твоего в Сыне Твоем Единороднем.

Ей, Отче благий, отверзи умныя очи сердца нашего, и даждь нам воистину познати Тебе, Творца и Бога нашего: сотвори нас сообразны Слову и Сыну Твоему, да вообразится внутрь нас Его непостижимый образ, по нему же создал еси человека; сподоби нас быти селением Духа Твоего Святаго, и не ктому селением греха, вложи в сердца наша огнь Божественныя любве, прииди и вселися в ны вечным селением со Единородным Сыном Твоим и Духом Святым.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Пятая пятерица

СВЕТ СЫЙ ТРИИПОСТАСНЫЙ, Отче, Сыне и Душе, Творче наш, во свете живый неприступнем, естеством неосязаемый и неизреченный, призвавый нас в причастие наследия святых во Свете, открывый нам путь Святыни Твоея Евангелием Иисуса Христа, исправи служение наше, яко кадило пред Тобою, и милостивно приими жертву сию хваления и плод устен наших, исповедающих Тя; молим Ти ся, услыши и помилуй.

ОТЧЕ ВСЕСВЯТЫЙ, Сый от века и прежде всех веков, безпредельный и неизменный, предвечный Источниче всего сущаго, приими молитву нашу, даруй нам свободу от печали греховныя, вложи в сердца наша огнь любве Твоея, исполни ум наш светом Твоего богоразумия, дух наш возвыси к видению неизследимых судеб Твоих, да сподобимся служити Тебе в духе и истине даже до последняго издыхания нашего; молим Ти ся, услыши и помилуй.

ГОСПОДИ ИИСУСЕ ХРИСТЕ, Начальниче жизни, вся носяй глаголом силы Твоея, давый Себе измену смерти, и из прободеннаго ребра Твоего источивый человеком нетленную жизнь, не отврати Лица Твоего от нас, недостойных раб Твоих, но приими смиренную службу сию нашу, и милость Твою богатно излей на ны в веце сем, и в грядущем Царстве Твоем подавай нам истее причащатися Тебе, Пасха велия и священнейшая; молим Ти ся, Христе, услыши и помилуй.

ЦАРЮ НЕБЕСНЫЙ, ДУШЕ СВЯТЫЙ, благий Утешителю, едине даяй силу утружденным и крепость изнемогающим, без Негоже вси сильнии утомятся и крепции ослабеют, сытии взалчут и младии согнутся, смеющиися восплачут, и веселящийся возскорбят; услыши ны в скорби нашей и обнови ны в силе Твоей, и возведи ны к достойному служению Тебе; молим Ти ся, услыши ны и скоро помилуй.

ВЛАДЫКО ВСЕДЕРЖИТЕЛЮ, Иисусе Христе, безначальнаго Отца собезначальне Сыне и Слове, непостижимым истощанием Твоим все домостроительство спасения мира прекрасне совершивый, и в безмерности снисхождения вручивый немощным людем служение сему великому Таинству. Молим Тя, Владыко Христе, да почиет благоволение Твое на всем деле священныя службы нашея; очисти ны от всякаго греха и неправды; силою Духа Святаго преобрази все существо наше во мраке страстей лежащее, и возсоздай в нас искаженный падением Адама Твой образ предвечный, яко да и мы сподобимся непостыднаго предстояния Престолу Твоему, Иисусе Спасе мира.

Ей, Боже, Боже наш, милостивно приими от рук наших сию страшную Жертву о гресех наших, да причастницы сущи Божественных Твоих Тела и Крове, обрящем мзду верных Твоих служителей.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Шестая пятерица

ОТЧЕ, СЫНЕ И ДУШЕ, в триех Лицех нераздельная Единице, Троическое едино Божество, Существо неприкосновенное, Свете неприступный, Тайно сокровеннейшая, от всея твари покланяемая, спаси ны верою и любовию воспевающия Тя; молим Ти ся, услыши ны и помилуй.

ОТЧЕ БЛАГИЙ, почтивый ны образом Твоим и даровавый нам радость познати истину Твою чрез воплощение Единороднаго Сына Твоего и сошествие Святаго Духа, от Тебе исходящаго; не отврати Лица Твоего от нас, недостойных раб Твоих и ниспосли на всех сынов человеческих дух истиннаго благочестия, да якоже воды наполняют море, тако да исполнится вся земля нетленным светом Твоего богоразумия; молим Ти ся, Отче Святый, услыши ны и помилуй.

ГОСПОДИ ИИСУСЕ ХРИСТЕ, Агнче Божий, Победителю Святый, приявый крестную смерть нашего ради спасения, избавивый нас от работы вражия, да нектому себе живем, но Тебе Единому, за ны умершему и преславно воскресшему. Сподоби нас достойно восприяти святых Твоих Тайн, да все, еже есть мертвенное в плоти нашей, пожерто будет нетленным Твоим животом; молим Ти ся, Христе, услыши ны и помилуй.

ДУШЕ СВЯТЫЙ, вечности Царю и жизни нетленныя Подателю, по множеству скорбей и воздыханий наших, умножи милость Твою в нас и низложи вся борющия ны враги, и буди Сам Ты действуяй в нас вся благоугодная Тебе, и освяти всех нас души и телеса освящением неотъемлемым; молим Ти ся, услыши и скоро помилуй.

ГОСПОДИ ИИСУСЕ ХРИСТЕ, непорочне Агнче Божий, закланный от сложения мира, Иже Кровию Своею искупил еси нас от всякаго колена и языка, сотворивый нас цари и иереи Богу и Отцу Твоему. Ты бо завесою пречистыя Плоти Твоея обновил еси нам путь новый и живый во Святая Святых во еже приносити сердцем сокрушенным и духом смирения словесную сию и безкровную службу нашу о гресех наших и о всем мире Твоем.

Темже припадаем и в умилении вопием Ти, долготерпеливе Господи: Духом страха Твоего осени нас, в час сей дерзающия приступити к подножию сея великия Тайны спасения мира, и сподоби нас сердцем, измовенным слезами, и умом, просвещенным евангельским Твоим словом, прикоснутися, елико по нашей силе, к таинству Твоего Божественнаго истощания.

О Свете мира, егоже трепещут Серафими, лица закрывающе пред неприступною славою Твоею, и нас на земли удовли всеблагоговейно воззрети на Тя, молящагося с воплем крепким и со слезами в Гефсимании и восходяща на Голгофу, да чада Божия расточенная собереши воедино распростертыма на Кресте рукама Твоима.

Ей, Агнче Божий, вземляй грехи мира, запечатлей в нас сей образ Твой непостижимый, и укрепи ны последовати Тебе, аможе аще пойдеши, да Плотию Твоею пречистою питаеми и честною Кровию Твоею напаяеми, явимся люди обновления и царское священие во еже неосужденно ходатайствовати за весь род Адамов от начала даже до скончания века.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Седьмая пятерица

ОТЧЕ БЛАГИЙ, Сыне Единородный, Душе Святый, Троице Единосущная, не отврати Лица Твоего от нас, яко скорбим; приими словесную сию службу нашу, приносимую Тебе сердцем сокрушенным и духом смирения, и сподоби нас воздати Тебе чистую хвалу о благодеяниих Твоих, и в мире глубоцем сохрани нас даже до последняго нашего издыхания; молим Ти ся, услыши и помилуй.

СЫЙ ОТ ВЕКА и прежде всех веков безпредельный и неизменный Господи, обратися и умолен буди на рабы Твоя, ибо в трудех и болезнех оскудевают дни наши и близок час нашего к Тебе отшествия, приими нас, припадающих к Тебе и укрепи ны в сей час пред стояния нашего страшному Престолу Твоему к безкровному священнодействию и к неосужденному причастию Святынь Твоих; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Единородный Сыне Отца безначальнаго и Слове, Имже вся быша, и без Него ничтоже бысть, еже бысть, пришествием Твоим во плоти возсоздавый падший в первороднем Адаме образ Твой, приими поклонение наше и мольбы, из глубины греховныя тьмы возносимыя к Тебе, и силою Твоею возведи ны на высоту истиннаго разумения заповедей Твоих, да светом евангельскаго слова Твоего просвещени, сподобимся неосужденно причаститися Божественных Твоих Тайн, Плоти и Крове Твоея; молим Ти ся, Господи Иисусе, услыши и помилуй.

ДУШЕ СВЯТЫЙ, Свете незаходиме, Свете неприступне, благий Утешителю, ходатайствуяй о нас ко Отцу воздыханьми неизглаголанными, в сей страшный час Тайныя Вечери Христа, осени нас пришествием Твоим, и силою Твоею удовли ны к совершению сего Божественнаго священнодействия, Царствия Христова причастники ны сотворяя; молим Ти ся, скоро услыши и помилуй.

ГОСПОДИ ИИСУСЕ ХРИСТЕ, Боже Спасителю наш, мир Твой подавый человеком и Пресвятаго Духа дар с небес ниспославый в наследие неотъемлемое верным, егоже преестественным действом нетленный свет боговедения роду человеческому даровася, и мы прелести, якоже тьмы, избавихомся и Тебе богословити со Отцем и Святым Духом, во едином Божестве, и силе, и власти озарихомся. Ты убо, Христе, Сый Отчее сияние, Существа и Естества Его неизменное и недвижное начертание, Источниче премудрости и благости неизследимая Пучино, отверзи сердце наше и утверди ум наш во еже знати Тебе, единаго истиннаго Сына Божия, вземлющаго грехи мира. Приими и нас, обуреваемых в мире сем, якоже приял еси Петра в море утопающаго, и укрепи нас силою Твоею на борющаго нас диавола. Се бо со страхом предстоим Тебе, в бездну милости Твоея отчаяние душ наших повергающе. Глаголом Твоим и неизреченною силою премудрости Твоея управляяй всю тварь, исправи живот наш к заповедем Твоим; тихое обуреваемых пристанище, единый истинный Путю, скажи нам путь воньже пойдем, яко Тебе предахом души наша: Дух премудрости Твоея безумию нашему даруй; Духом страха Твоего осени вся дела наша, да на всякий день и час Духом Твоим наставляеми и укрепляеми, сподобимся во всем творити волю Твою святую и всесовершенную. Яви нас носители Новаго Завета Твоего, иже в Крови Твоей, Иисусе Спасе наш, причастники нас сотворив пречистых Твоих Таинств; по множеству милости Твоея, приими нас, да будем достойны приносити Тебе жертву духовную о гресех наших и сподоби нас без порока служити Тебе вся дни живота нашего, яко да и мы унаследуем часть верных Твоих служителей в день страшный воздаяния Твоего праведнаго.

Яко да под державою Твоею всегда хранимы, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Восьмая пятерица

ОТЧЕ БЛАГИЙ, Сыне Единородный, Душе Святый, Троице Святая и всезиждительная, непостижимым повелением Твоим призвавшая нас от небытия в жизнь сию, и Тебе Единаго воистину Сущаго Бога познание нам даровавшая, сподоби нас в сей страшный час священнодействия принести Тебе разумное благодарение и непорочное славословие; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, безначальне, неизменне, непостижиме, даровавый нам в Сыне Твоем Единороднем и возлюбленнем обручение будущаго наследия и славу сыноположения, низпосли на ны Духа Твоего Святаго, Иже да совершит ны во всяком деле блазе, наипаче же в сей страшный час священнодействия Божественных Твоих Тайн; молим Ти ся, услыши ны и помилуй.

ИИСУСЕ ХРИСТЕ, Боже, Спасителю наш, едине истинный Архиерею, Святый и непорочный, очисти ны от всякия злобы и лукавства, и даждь нам участие и наследие со всеми от века святыми в неизследимей Тайне любве Твоея, причастием Божественных Твоих Тела и Крове; молим Ти ся, услыши и помилуй.

ДУШЕ СВЯТЫЙ, Боже Живый и животворяй, вечности сый вечность, яко Сый прежде всех веков, от Него же исходит всякий свет бытия, милостивно призри на немощь естества нашего, помяни болезни наша и скорби, труды и злострадания, и силою Твоею Божественною удовли ны к достойному совершению сего небеснаго священнодействия; молим Ти ся, услыши и скоро помилуй.

ГОСПОДИ ИИСУСЕ ХРИСТЕ, Сый Отчее сияние, существа и естества Его неизменное и всесовершенное начертание, источниче премудрости и благости неизследимая пучино, отверзи сердце наше и утверди ум наш во еже знати Тебе, Единаго истиннаго Сына Божия, вземлющаго грехи мира.

Се бо со страхом и верою предстоим Тебе, в бездну милости Твоея отчаяние душ наших повергающе. Омый и очисти ны от всякаго греха и неправды, и силою Духа Твоего Святаго яви нас быти служители Новаго Завета Твоего, еже в Крови Твоей, Иисусе Боже наш; сотвори ны достойны приносити Тебе сию страшную Жертву о наших гресех и о всем мире Твоем; да причастницы сущи Божественных Твоих Тела и Крове, обрящем мзду верных Твоих служителей и мудрых строителей в день великий воздаяния Твоего праведнаго.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Дополнительные варианты пятеричных прошений

Святой Троице

ОТЧЕ БЛАГИЙ, Сыне Единородный, Душе Святый, Троице Единосущная, Едина безначальная, от небытия в жизнь сию всяческая всезиждительным Твоим повелением приведшая и неисчетною силою Твоею содержащая и совершающая, человеки же нетленным светом Твоего богоразумия просветившая, и причастники безначальныя Твоея Жизни явившая, приими благоволением Твоим исповедание сие наше, и даруй нам обрести милость и благодать пред Тобою; молим Ти ся, услыши и помилуй.

Богу Отцу

ОТЧЕ СВЯТЫЙ, тако возлюбивый мир, яко же дати нам и Сына Твоего Единороднаго, Иже душу Свою положи о нас, да живи будем во веки, молим Тя, воззри милостивне на ны, яко наги изыдохом из чрева матере нашея, и ни единаго дела достойнаго Тебе сотворихом, пребывше даже до сего дне обнажени от всякия доброты; приими благоволением Твоим сию службу нашу, яви нас причастники Тела и Крове Христа Твоего и храмы Духа Святаго Твоего; молим Ти ся, услыши и помилуй.

Иисусу Христу

ГОСПОДИ ИИСУСЕ ХРИСТЕ, собезначальне Отцу Сыне и Слове, страхом Твоим утверди ны в путех истины Твоея, и силою любве Твоея возведи ны в след стопам Твоим, не попускаяй нам отступити от света повелений Твоих. Сподоби же нас неосужденнаго предстояния святей Твоей сей Трапезе и достойнаго причащения пречистаго Тела Твоего и честныя Крове Твоея; молим Ти ся, Христе, услыши ны и помилуй.

Иисусу Христу (иное)

ГОСПОДИ ИИСУСЕ ХРИСТЕ, осудивый грех Плотию Своею, призри на ны, во Адаме умирающия, и оживотворив нас причащением пречистых и безсмертных Твоих Тайн, приведи ны в совершенное познание Отца Твоего, и сотвори нас быти языком святым и царским священием в невечернем дни Царствия Твоего; молим Ти ся, услыши и помилуй.

Духу Святому

ДУШЕ СВЯТЫЙ, Великий Царю и Боже, прииди и вселися в ны, и силою пребывания Твоего в душах и умах наших, возведи ны на гору боговидения, свободив нас от тяжких уз греховных; молим Ти ся, услыши и помилуй.

Духу Святому (иное)

ДУШЕ СВЯТЫЙ, от Отца исходяй и в Сыне почиваяй, Свет сый неприступный и сила, животворящая всякую тварь, прииди, Всеблагий, и вселися в ны вечным вселением; исцели ны умерщвленныя грехом; настави ны, омраченныя, на всякую истину; вселением же Твоим в душах наших преобрази все существо наше во тьме падения лежащее, и искаженный в нас Адамов зрак возсоздай, да и мы явимся истинная чада Отца безначальнаго и сонаследницы Сына, прежде всех век возлюбленнаго, причастницы сущи Его пречистаго Тела и честныя Крове; молим Ти ся, услыши ны и скоро помилуй.

Заключительное прошение

ВЛАДЫКО ВСЕДЕРЖИТЕЛЮ, Иисусе Христе, пребезначальнаго Отца собезначальне Сыне и Слове, неизреченнаго ради милосердия Твоего все домостроительство спасения нашего прекрасно совершивый, и по безмерному благоволению Твоему вручивый немощным людем служение сему великому таинству спасения мира, Сам, Господи, щедрый и милостивый, пощади и помилуй нас, прости нам вся прегрешения наша, вольная и невольная; заступи ны силою Твоею от всякаго неприязненнаго нападения; сотвори ны неприступны всем кознем вражиим и неприкосновенны всякия скверны, от него находящия; сохрани ны неизменно в путех воли Твоея; утверди ны в истине слова Твоего, свобождая нас от всякаго неможения и неведения.

Ей, Господи, благий и кроткий, по дару Духа Святаго Твоего, благоволи нам быти непостыдными слугами святых Твоих Таинств; сподоби нас без порока прейти путь сей служения даже до последняго издыхания нашего, и даждь нам благоугодное Тебе слово во отверзении уст наших, во еже призывати благословение Твое на приносимыя нами дары.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Заключительное прошение (иное)

БОЖЕ ОТЧЕ ВСЕДЕРЖИТЕЛЮ, от Негоже исходит всякий свет бытия, Боже живый и животворяй, не остави нас, заблуждших, яко овцы, от путей Твоих. Оскорбихом любовь Твою, согрешихом, беззаконовахом пред Тобою, ниже соблюдохом, ниже сотворихом, якоже заповедал еси нам. Се ныне предстоим Тебе, осужденнии, и отчаянно взываем Ти: силою Духа Твоего Святаго обнови естество наше, просвети и освяти нас до конца вселением в нас Слова Твоего; яви ны неизменно подобны Сыну Твоему возлюбленному, да сообразуются сердца наша непостижимому Его образу, по нему же создал еси Человека.

Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Молитва Великого входа2

СЫЙ ВЛАДЫКО БОЖЕ, Отче Вседержителю, создавый нас и введый в жизнь сию, показавый нам пути во спасение, даровавый нам небесных тайн откровение: Ты бо еси положивый нас в службу сию силою Духа Твоего Святаго. Благоволи убо, Господи, быти нам служителем Новаго Твоего Завета, слугам святых Твоих Таинств. Приими нас, приближающихся святому Твоему жертвеннику, по множеству милости Твоея: да будем достойны приносити Тебе словесную сию и безкровную Жертву, о гресех наших и о гресех всего мира.

Аминь.

Молитва перед освящением Святых Даров3

ОТЧЕ СВЯТЫЙ, приими нас, припадающих к подножию ног Твоих, и Имене ради Единороднаго Твоего возлюбленнаго Сына, Единаго Господа и Бога нашего Иисуса Христа, прости нам вся грехи и преступления наша за всю нашу окаянную жизнь, ради Крове Его, излиянныя на землю, юже мы осквернихом; ради Плоти Его пречистыя, жезлом пригвожденныя ко Кресту; ради всех страданий и терзаний души Его в мире сем; ради заповеди Его, данныя миру и достигшия даже до нас, чрез отцев наших, иже в истекших веках благоугодивших пред Тобою.

Ей, ОТЧЕ СВЯТЫЙ, Отче Благий, не презри ны, малое стадо Твое, не отвержи нас от Лица Твоего за невежество и окаянство наше; но якоже в веках низпосылал еси Духа Твоего Святаго на жертвы отцев наших, сице и ныне, не презри нашего приношения, и низпосли Духа Твоего Святаго на вся ны, зде сущия, и на предлежащия дары сия...

Заамвонная молитва

ВЕЛИЙ ЕСИ, ГОСПОДИ, и несть подобнаго Тебе. Милость и истина предыдита пред Лицем Твоим, правда и суд исходита от Престола Твоего. Блажени людие, хранящие завет Твой: во свете Лица Твоего пребудут и о Имени Твоем возрадуются и правдою Твоею укрепятся: Ты бо еси сила их, и во благоволении Твоем вознесутся, и во истине Твоей прославятся.

Господи, помощь Твою положи на нас, и стеною милости Твоея огради нас. Рука Твоя да заступит нас, и мышца Твоя да укрепит нас.

Господи, внегда призвати нам Тебе, приклони ухо Твое к нам: Ты бо еси Отец наш, не отрини убо нас в скорби нашей. Ты един еси Заступник спасения нашего, не презри нас и не предаждь нас в поношение врагом нашим.

Господи, Боже наш, благоволивый малому стаду Твоему завещати Царство неколеблемое и сокровище неоскудеваемое на небесех, услыши моление наше и прииди во еже заступити ны от всех гонящих нас. Един еси, сведый тайная сердца всякаго, не скрый от нас воли Твоея и пути спасения Твоего.

Неизследима судеб Твоих бездна, и совети Твои непостижимы; всем человеком хотяй спастися и в разум истины Твоея приити, изведи ны из рова падения нашего, и всякое недоумение от сердец наших отыми.

Ты бо еси Бог спасения нашего, инаго бо разве Тебе не вемы, и Имя Твое именуем, и славу Твою воспоем со всеми святыми во веки веков.

Аминь.

Заамвонная молитва иная

ВОЗСИЯЙ НАМ, Боже, Боже наш, Свет Твой истинный, да во Свете Твоем узрим славу твою, яко Единороднаго от Отца, и да вообразится внутрь нас образ Твой непостижимый, по нему же создал еси человека.

Боже, Спасителю наш, Сило ума и Крепосте души нашея, да вселится в нас доброта Твоя, да пребудем неотступно в Тебе, присно носяще в себе Духа Твоего Святаго, Иже да даст нам познати любовь Твою к человеку, и уподобитися Тебе, Единому Господу и Богу нашему, якоже быша подобнии Тебе вся от века святии Твои.

Ей, Господи Иисусе Христе, по неложному Твоему обетованию, прииди со Отцем и Духом Святым, и обитель Твою в нас сотвори во веки веков.

Аминь.

* * *

2

Молитву «СЫЙ ВЛАДЫКО БОЖЕ» ИЗ Литургии Святого Василия Великого старец Софроний всегда читал на великом входе, при перенесении Святых Даров на Престол. В заключительных ее словах, его собственных, он выразил свое глубокое видение литургического акта: «Как Христос очищение есть о гресех наших, не о наших же точию, но и о всего мира (1Ин. 2, 2), так Божественная Литургия, являясь космическим, всеобъемлющим актом, приносится за грехи всего мира. Через литургическую молитву наше сознание предельно расширяется, и по мере нашего проникновения в эту тайну, мы становимся способными вместить “всех и вся”, и подобно распятому Христу, обнять все концы “сердцем сокрушенным и духом смирения”. Тогда человек перестает быть ограниченным, замкнутым в себе индивидом, но подобно новому Адаму – Христу, он носит в себе всех людей, усопших, живых и грядущих, и становится действительно универсальным. В этом состоянии, когда молитва за всего Адама является подлинным состоянием нашего существа, старец видел последнее совершенство призвания во Христе.»

3

Молитву «ОТЧЕ СВЯТЫЙ» старец Софроний обычно читал на Литургии во время пения «ТЕБЕ ПОЕМ» перед освящением Святых Даров.


Источник: Молитвенное приношение старца Софрония / Преподобный Софроний (Сахаров). - Москва : Паломникъ, 2004. - 84 с.

Комментарии для сайта Cackle