Часть IV. Тексты

Слово похвално преподобному отцу нашему Сергию.

Сътворено бысть учеником его священноиноком Епифанием.

Благослови, отче

Тайну цареву добро есть хранити, а дела Божиа проповедати преславно есть; еже бо не хранити царевы тайны – пагубно есть и блазнено, а еже млъчати дела Божиа преславнаа – беду души наносить. Тем же и аз боюся млъчати дела Божиа, въспоминаа муку раба оного, приимшаго Господень талант, и в земли съкрывшаго, и прикупа имь не сътворшаго. Никто же бо достоин есть, неочищену³²² имеа мысль вънутреняго человека; таков сый страстный аз, пленицами многыми грехов моихь стягнут, таковымь преславнымь вещемь нелепо бе мне коснутися, н разве тъчию безакониа моа възвещевати и пещися о гресехь моихь. Нъ поне же желание привлачит мя и недостоиньство е млъчати запрещает ми, и греси мои яко бремя тяшко отяготеша на мне. И что сътворю? Дръзну ли недостойне к начинанию? Что убо, реку ли или запрещу в себе? Окаю ли свое окаанство? Внимаю ли въсходящим на сердце мое блаженствомь о преподобнемь?

Н ты сам, отче, сьдействуй ми, да не яко недостойну ми помрачится ум мой, н самь, – яже и не пишущу ми в мысли моей, да взыдуть от твоихь похвал, – сиа пищющу ми, ты вразуми и настави. Множицею бо воспомянувь и слезы о семь испустихь моего ради недостоинства, да не како не получу искомаго, о нем же начахь, аще не ты руку простреши. Несмь бо доволен по достоанию хвалы тебе принести, н малаа от великых провещати. Н обаче сподоби мя принести похвалы тебе, приносящаго молбы о моей худости к Христу Богу нашему. Аще бо и вси достойни, н азь недостоин есмь, влекомь и жадая, да поне крупицам трапезы избранных причастникь буду: могут бо и множество крупиць насытити алчющих душа, наипаче же духовных отець учениа и душеполезнаа словеса не токмо телеса, н и самую душю могуть укрепити и окормляти к духовнымь подвигом: поне же светла, и сладка, и просвещенна нам всечестных нашихь отець възсиа память, пресветлою бо зарею и славою просвещающеся, и нас осиявають. Светла убо въистину, и просвещенна, и всякоя почести от Бога и радости достойна, им же вашихь боголюбивых душь, яко възлюбленых чядъ отець, к духовному веселию ныне съзвавши и, яко любителя отець, въ светлей сей церкви радостно приемлющи и любовию веселящи прежде же плотскыя духовную вам предуготовляющи трапезу: исполнь сущи радости и веселиа духовнаго и исполнь сладости божественых е словес, аггельскыя пища.

Пищу убо аггельскую Писание духовнаа словеса нарицают, им же душа наслаждаеть, вънимающи умом, и яко пищею тело, тако и словом укрепляема бываеть душа. Сладость бо словесную Давид вкусивь, удивляяся, к Богу глаголеть: «Коль сладка гортани моему словеса Твоя, паче меда устом моим. От заповедей Твоих разумех, и сего ради възненавидехь всякь путь неправды». Такожде и древнии отцы наши и прочии вси, иже в посте провосиаша.

Сих же стопамь последуя и житию их ревнуя, всякь путь неправды възненавиде и истину възлюби, его же и прежде надписаниемь слова вменихомь и от нас днесь ныне похваляемь есть Сергие, блаженый и преподобный отець нашь. Сему убо въправду подобаеть дивитися, и достойно есть ублажити: зане и он, человекь подобострастен намь бывь, но паче нас Бога възлюби, и вся краснаа мира сего, яко уметы, вмени и презре, и усръдно Христу последова, и Бог възлюби его; и яко угодити Ему искрено потщася, и удиви и прослави Его; «славящаа Мя бо, – рече, – Аз прославлю, уничижающаа же Мя без чести будуть». И его же Бог прослави, кто можеть похвалу его съкрыти? Лепо убо и намь того в правду достойно ублажити и похвалити: похвала бо его яже от нас не оного что ползуеть, н намь паче спасение духовное съдевает. Сего ради в наше научение полезно узаконися, иже от Бога почести святых последнему роду писаниемь предавати, да не глубиною забвениа покрываются святого добродетели, н паче же разумно словесы сказующе, подобно симь открывати, яко не утаити ползу слышащимь.

Весть бо добродетель словомь многым умилити, яко же жалом душу уязвити и к Богу чистымь житиемь подвигнути. Такожде и съй приведе к Богу многых душа е чистымь своимь и непорочным житием, преподобный игумен отець нашь Сергие святый: старець чюдный, добродетелми всякыми украшен, тихый и кроткый нрав имея, и сьмереный добронравый, приветливый и благоуветливый, утешителный, сладкогласный и благоподатливый, милостивый и добросрьдый, смереномудрый и целомудреный, благоговейный и нищелюбный, страннолюбный и миролюбный, и боголюбный; иже есть отцамь отець и учителемь учитель, наказатель вождемь, пастырем пастырь, игуменомь наставникь, мнихомь начялникь, монастырем строитель, постникомь похвала, мльчялником удобрение, иереомь красота, священникомь благолепие, сущий вождь и неложны учитель, добрый пастырь, правый учитель, нелестный наставникь, умный правитель, всеблагый наказатель, истинный кръемникь, богоподатный врачь, изящный предстатель, священный чиститель, начялный общежитель, милостыням податель, трудолюбный подвижникь, молитвеникь крепокь, чистоте хранитель, целомудриа образь, столпь трьпениа; иже поживе на земли аггелскымь житиемь и вьзсиа вь земли Русстей, акы звезда пресветлаа; иже за премногую его добродетель людемь на ползю бысть многымь, многымь на спасение, многымь на успех душевный, многым на потребу, многым на устрои; иже бысть христолюбивым княземь великымь русскым учитель православию; велможам же, и тысущным, и прочим старейшинамь и всему синглиту, и христолюбивому всему воинству еже о благочестии твердый поборникь; архиепископом же, и епископом, и прочимь святителемь, архимандритом благоразумный и душеполезный възгласникь и съвоспросник; честным же игуменом и презвитеромь е прибежище, иночьскому же чину акы лествица, възводящиа на высоту небесную; сиротамь акы отець милосердь, вдовицамь яко заступникь тепль; печалным утешение, скръбящимь и сетующимь радостотворець, ратующимся и гневающимся миротворець, нищим же и маломощнымь сокровище неоскудное, убогымь, не имущимь повседневныя пища великое утешение, болящимь вь мнозех недузех посетитель, и изнемагающимь укрепление, малодушьным утврьжение, безвременнымь печалникь, обидимымь помощникь, насильствующим и хыщником крепокь обличитель, сущимь вь пленени отпущение, в работах сущимь свобождение; вь темницах вь узах дрьжимым избавление, дльжным искупление, всемь просящим подаание, пианицам истрезвение, гръделивымь целомудрие, чюжаа грябящимь въстягновеение, лихоимцемь възбранникь, грешникомь кающимся верный поручитель и всемь притекающимь к нему, акы к источнику благопотребну.

Беше же видети его хождениемь и подобиемь аггелолепными сединами честна, постом украшена, въздержаниемь сиая и братолюбиемь цветый, кротокь взором, тихь хождениемь, умилен видениемь, смирен сердцемь, высокь житиемь добродетелным, почтен Божиею благодатию. Поне же Бога чтяше, и Бог почте его и честь многу положи на нем. Он Бога прослави, и Богъ на земли прослави его, яко же рече Господь в святомь Еуангелии: «Тако да просветится свет вашь пред человекы, яко да видят дела ваша блага и прославят Отца вашего, иже есть на небесехь». И пакы рече: «Не укрыется град, врьху горы стоя. Ни вжигают светилника и поставляють его под спудомь, но на свещнице», и прочаа.

Сего же угодника Своего, преподобнаго е отца нашего и преблаженаго Сергиа, тако Бог почте и, и тако прослави его, яко да молитвами его мнози от болезней здрави бывааху и многи от недугь исцеление приаша, мнози от бесовъ избавишася и от многоразличных искушений очистишася. Толико бо Бог прослави угодника Своего не токмо в той стране, в ней же святый живяше, но и въ иных градех, и в далних странах, и в всех языцехь от моря даже и до моря, не токмо в Царьствующемь граде, но и в Иерусалиме. Не токмо едини православнии почюдишася добродетелному житию преподобнаго, но и невернии мнози удивишася благопребывателней жизни его: бяше бо Бога възлюби всем сердцемь своимь и ближняго своего, яко и сам ся. Равно бо любляше всех и всемь добро творяше, и вси ему благотворяху; и къ всемь любовь имяше, и вси к нему любовь имеаху и добре его почитааху. И мнози е к нему прихождааху, не токмо ближнии, но издалече и от далних градов и стран, хотяще видети и, и слышати слово от него, и велику ползу и душевное спасение приемлюще от поучениа и дел его: учяше бо и творяше, яко же в Деаниихь святых Апостол речеся: «Поне же начатъ Исус творити же и учити»; иже убо словом учяаше, то же и самь деломь творяше.

И не токмо от поучениа его ползеваахуся, н и многажды некымь, зрящимь на нь точию, от зрениа его приимати ползу многымь. Многых научи душеполезными словесы, и на покаание к Богу обрати, и многых спасе, облекь в иночьскый образь, паче же аггельскы, и честныа мощи ихь своима рукама опрятавь, погребению предасть. И многых душа к Богу приведе, и мнози поучениемь его спасошася и доныне спасаются, не точию иноци, н и простии, поминающе душеполезнаа его словеса и учениа; е упасе бо порученое ему от Бога стадо в преподобии и правде, образь во всемь бывь своимь ученикомь. Поживе на земли житие чисто, непорочно и благоугодно Господеви, еже начен от юности зело, то же и съвръши в старости глубоце, не изменивь правила чрьнечьскаго во вся лета житиа своего, никако же разленися, ни уныв, не инако начя, и инако оконча: но елико убо жестоко и свято начя, толико же изрядно и чюдно скончя; с благоизволениемь убо начя, с святынею же съвръши въ страсе Божии. «Зачало бо премудрости страх Господень»; зане же веру, и упование, и любовь преизлише приобрете, тем же благочестиве начя, и благочестно поживе, и свято съвръши. Равно течение сконча, веру съблюде, и венець праведный получи, и мзду верну въсприят трудовь ради и исправлений своихь, ими же подвизася на земли, подвигь многь съевръшив, и труд великь подъят, тяготу вара дневнаго понес, и зной полудневный доблестовне въсприят, и студень зимную велми пострада, и мразы лютыа и нестерпимыя претрьпе имени ради Божиа; и того ради ныне въсприят мзду съвръшену и велию милость.

Что же много глаголю, и глаголя не престаю, умножая речь, распростираа глаголы и продолжаа слово, не могый по достоанию написати житиа добраго господина и святого старца, не могый по подобию нарещи или похвалити достойно? Но обаче прочаа его добродетели инде скажемь, и многаа его исправлениа инде повемь, и похвалу его изложимь, аще Бог вразумить и силу подасть молитвами святого старца; ныне же несть время за оскудение разума и за мелину ума моего.

Сиа же подробну писах не к темь, иже известо сведущим и добре знающимь благочестное житие его: ти бо не требують сего възвещение. е Н понудихся възвестити сиа и въспомянути новорожденым³²³ младенцемь и младоумным отрочатом, и детьскый смысл еще имущимь, да и ти некогда възрастуть, и възмужають, и преуспеють, и достигнут в меру връсты исполънениа мужества, и достигнуть в разумь сверъшен, и другь друга въспросят о семь, и почетше разумеють и инемь възвестять, яко же в Святомь писании речеся: «Въпроси, – рече, – отца твоего, и възвестить тебе, старца твоя, и рекуть тебе. Елико видеша, и слышаша, и разумеша отци наши, поведаша нам, да не утаится от чад ихь в род ин сказати я сыновом своим, да познает род ин, сынове родящеися, да въстануть и поведять я сыномь своимь и не забудуть дел Божиих». Елици бо их бышя великому тому и святому старцу самовидци же и слугы, ученици и таибници, паче же послушници, иже е своима очима видеша его, и уши их слышаша и, и руце ихь осязаста и, ядоша же и пища с ним, иже учениа его насытишася и добродетели его насладишяся, то тии не требують сего нашего писмене. Доволни бо суще и иныхь научити, паче же и мене самого наказати, и известити, и наставити на путь правый; а елици ихь еже быти ныне начинають, яко же преди речеся, иже не видеша, ни разумеша, и всемь сущимь, наипаче же новоначалным зело прилична и угодна суть, да не забвено будеть житие святого тихое, и кроткое, и незлобивое; да не забвено будет житие его чистое, и непорочное, и безмятежное; да не забвено будет житие его добродетелное, и чюдное, и преизящное; да не забвены будуть многыя его добродетели и великаа исправлениа; да не забвены будуть благыа обычаа и добронравныя образы; да не будуть бес памяти сладкаа его слоевеса и любезныя глаголы; да не останет бес памяти таковое удивление, иже на немь удиви Богь милость свою и дарова намь видети такова мужа свята и велика старца, иже бысть вь дни наша.

О, вьзлюблении! Вьсхотех умльчати многыа его добродетели, яко же преди рекох, но обаче внутрь желание нудит мя глаголати, а недостоинство мое запрещает ми мльчати. Помысль болезный предваряеть, веля ми глаголати, скудость же ума заграждает ми уста, веляще ми умлькнути. И поне же обьдрьжимь есмь и побеждаемь обема нуждема, но обаче лучше ми есть глаголати, да прииму поне малу некую³²⁴ ослабу и почию от многых помысль, смущающих мя, вьсхотевь нечто от житиа святого поведати, сиречь от многа малая. И вземь, написах и положихь зде в худемь нашемь гранесьсловии на славу и честь Святей и Живоначялней Троици и Пречистей Его Матери е и на похвалу преподобному отцю нашему Сергию худымь своимь разумомь и растленнымь умомь. Наипаче же усумнехся, дрьзаа, надеяся на молитву блаженаго, поне же житие его добродетелно есть и сьврьшено, и от Бога прославлень бысть. Аз же убояхся, яко немощень есмь, груб же и умовредень сый; нь обаче подробну глаголя, невьзможно бо есть постигнути до конечнаго споведаниа, яко же бы кто могль исповедати доволно о преподобьнем семь отци нашем и великом старци, иже бысть вь дни наша, и времена, и лета, и вь стране и вь языце нашем, поживе на земли аггелскымь житиемь, стяжа трьпение крепко и въздержание твердо, в девьстве, и чистоте, и целомудрии, съвръши святыню в страсе Божии, и сподоблен бысть божественыя благодати: поне же от юности очистися церкви быти Святого Духа и преуготова себе съсуд свят и избран, да вселится Бог в нь, е по апостолу, глаголющю: «Братие, вы есте церкви Бога жива, яко же рече Бог: «Вселюся в ню».

Сий убо преподобный отець нашь Сергие из детьска възраста, и от юны връсты, и от младых ногот предасться Богу, и от самых пелен Богу освятися, и измлада церкви велми пристояше, и чясто в ню входя, поучаася в святых книгахь, навыкь божественаа писаниа, и сладостно их послушая, и в них поучяашеся, яко же пророкь Давидь рече: «Поучится день и нощь и будеть яко древо, сажденно при исходящих вод, иже плод свой дасть в время свое». Измлада бо възлюби мнишскый чин и въ нь облъкся, измлада в всякой добродетели прилежно постився и всяку добродетель иночьскаго житиа исправи, и свет благодатный възсиа въ сердци его, и просветися помысл его благодатию духовною, ея же приспеаше в житии добродетелномь.

И въздржание велие стяжа в себе, смереномудрие, целомудрие и къ всемь любовь нелицеемерну. Слава же и слышание пронесеся о немь повсюде, и вси слышащем издалеча притекааху к нему, и великь успех, и многу ползу, и спасение приимаху от него: дасть бо ему Господь разум о всемь, и слово утешениа даровася ему, могый утешити печалныя. Сице же бе тщание его, да не прилпнет ум его ни кацех же вещех земных и житейскыхь печалехь; и ничто же не стяжа себе притяжаниа на земли, ни имениа от тленнаго богатства, ни злата или сребра, ни скровищь, ни храмов светлых и превысокых, ни домов, ни сел красных, ни ризь многоценных. Но сице стяжа себе паче всех истинное нестяжание и безъименство, и богатство – нищету духовную, смерение безмерное и любовь нелицемерную равну к всемь человеком. И всех вкупе равно любляше и равно чтяше, не избираа, ни судя, ни зря на лица человеком, и ни на кого же возносяся, ни осужаа, ни клевеща, е ни гневом, ни яростию, ни жестостию, ни лютостию, ни же злобы дръжа на кого; н бяше слово его в благодати солию растворено с сладостию и с любовию.

Кто бо, слыша добрый его сладкый ответ, не насладися когда от сладости словесъ его? Или кто, зряй на лице его, не веселяшеся? Или кто, видя святое его житие, и не покаяся? Или кто, видя кротость его и незлобие, и не умилися? Или кто сребролюбець бысть, видя его нищету духовную, и не подивися? Или кто похыщникь и гордостию превъзносяйся, видя его высокое смерение, и не почюдися? Или кто бысть блудникь, видя чистоту его, и не пременися от блуда? Или кто гневлив и напрасен, беседуаи с нимь, на кротость не преложися? Несмь бо азь видел в дни сиа, и в нынешняа времена, и въ наша лета сицева мужа свята, и съвръшена в всяко дело благо, и украшена всякою добродетелию всячьскы. Яко же от проечихь святых иже кто възлюблен есть от Бога, яко же съй преподобный Сергие?

Съй ми есть и первый и последний в нынешняа времена; сего Бог проявил есть в последняа времена на скончание века и последнему роду нашему, сего Бог прославил есть в Руской земли и на скончание седмыя тысяща; съй убо преподобный отець нашь провосиал есть в стране Русстей, и яко светило пресветлое възсиа посреди тмы и мрака, яко цветъ прекрасный посреди тръниа и волцечь, яко звезда незаходимаа, яко луча, тайно сиающи и блистающи, и яко крин в юдолии мирскых, яко кадило благоюханное, яко яблоко добровонное, яко шипокь благоюханный, яко злато посреди бръниа, яко сребро раждежено, и искушено, и очищено седморицею, яко камень честный, и яко биср многоценный, яко измарагд и самфиръ пресветлый, яко финикс процвете, яко кипарис при водахь, яко кедр иже в Ливане, е яко маслина плодовита, яко араматы благоюханиа, яко миро излианное, яко сад благоцветущь, яко виноград плодоносен, яко грозд многоплоден, яко оград заключен, и яко врътоград затворен, яко сладкый запечатленный источникь, яко съсуд избран, яко алавастр мира многоценнаго, яко град нерушим, яко стена неподвижима, яко забрала тверда, яко сын крепокь и верен, яко основание церковное, яко стлъп непоколебим, яко венець пресветлый, яко корабль, исплънь богатства духовнаго, яко земный аггел, яко небесный человекь.

Успе же старець о Господе в старости глубоце, добре пожив, въ преподобии, и правде и целомудрии, в смиреномудрии, в всякой чистоте и святыни, исплънь дний духовных. Преставися от житиа сего лет седмидесять. Чернечествова же лет 50 с всякым прилежаниемь и въздержаниемь, не леностию е когда съдръжимь, н с бодростию и со мноземь трезвениемь, и всех инокь предуспе в роде нашемь труды своими и тръпениемь, и многых превзыде добродетелми и исправлении своими. Что же наше житие или что наше пребывание противу святаго подвигомь и прочимь добродетелем? Ничто же есть наше чрьнечество, и наша молитва яко стень есть. Колико растоание имать востокь от запада, сице намь неудобь есть постигнути житиа блаженаго и предивнаго мужа. Сице ти есть житие его и сицевы труды его, и исправлениа, и подвизи, и потове, и мнози болезни, еже от многа мало нечто понудихомся, аще и не по чину положихом, ни по достоянию написахом.

Егда же приспе время преставлениа его, заповеда учеником своимь и не повеле имь в церкви положити ся, н вне церкви тако просто повеле погребсти ся с прочими братиами. Братиа же, слыешавше сиа от святого, зело скръбни быша и о семь въспросиша пресвятейшаго архиепископа. Тогда же бе в преславнемь и пресловущем в велицемь граде Москве, украшаяй престол Пресвятыя и преславныя Владычица наша и Богородица, преосвященный Киприан митрополит. Порасмотрив и рассудив в себе, како и где погребется блаженный, и благослови и повеле имь положити его в церкви на правей стране; еже и бысть. Положено же бысть тело преподобьнаго въ церкви, ю же самь създа, и въздвиже, и устрои, и съвръши, и украси ю всякою подобною красотою, и нарече сиа быти в имя Святыа, и Живоначялныя, и Неразделимыя, и Единосущныя Троица; в честнемь его монастыри, и пресловущей лавре, и велицей ограде, и в славней обители, ю же самь съгради, и совокупи, и устрои; иде же братию собра, словесное стадо Христово, и спасеную паству упасе ю в незлобии сердца своего, е и в разуме настави; иде же и самь одеян бысть в иночьскый образ, паче же аггелскый; и многы тмами темь труды положи, и неизчетныа подвигы показа; иде же непрестанныя молитвы сътвори; иде же повседневныя и нощныа пениа и благодарениа славословяше и Бога въспеваше; иде же многолетное и многострадалное течение свое препроводи и укрепи, не исходя от места своего во иныя пределы, разве нужда некыя.

Не взыска Царьствующаго града, ни Святыя горы или Иерусалима, яко же азь, окаанный и лишеный разума. Увы³²⁵, люте мне! Ползаа семо и овамо, и преплаваа сюду и овуду, и от места на место преходя; н не хождааше тако преподобный, н в млъчании добре седяше и себе вънимааше: ни по многым местомь, ни по далнимь странамь хождааше, н в единомъ месте живяше и Бога въспевааше. Не искаше бо суетных и стропотных е вещий, иже не требе ему бысть, н паче всего възыска единого истиннаго Бога, иже чимь есть душа спасти, еже и бысть: «Ищете бо, – рече, – и обрящете, и толкущему отвръзается». Кто бо ныне тако възыска Бога всемь сердцемь и от всея душа възлюби, яко же съй преподобный отець нашь, яко же пророкь рече: «Всемь сердцемь моим възысках Тебе»; и пакы: «Възысках Господа, и услыша мя».

В время же преставлениа его събрася множество народа от град и от стран многых, коиждо желаше с многым тщанием приближитися и прикоснутися честнемь телеси его или что взяти от риз его на благословение себе. Поболев убо старець неколико время, и тако преставися ко Господу, к вечным обителем, изсушив тело свое постом и молитвами, истончив плоть и умертвив уды сущаа на земли, страсти телесныя покорив духови, победив вреды душевныя, поправ сласти житейескыя, отвръг земнаа попечениа, одолевь страстнымь стремлением, презрев мирскую красоту, злато, и сребро, и прочая имениа прелестнаа света сего яко худаа вменив и презре. И легьце преплув многомутное житейское море, и без вреда препроводи душевный корабль, исплънь богатства духовнаго, беспакостно доиде в тихое пристанище, и достиже, и крилома духовныма въскрилися на высоту разумную, и венцемь бестрастиа украсися, преставися к Господу и преиде от смерти в живот, от труда в покой, от печали в радость, от подвига въ утешение, от скръби в веселие, от суетнаго житиа в вечную жизнь, от маловременнаго века в векы бесконечныя, от тля в нетление, от силы в силу, и от славы в славу. И вси пришедшеи ту и обретшеися плакахуся его ради.

Князи, и боляре, и прочии велмужи, и честнии игумени, е попы же, и диякони, и инокь множество, и прочии народи с свещами и с кандилы проводиша честно священныя его и страстотерпческыя мощи, певше над нимь обычныя пения, и благодаривше надгробныя песни, и доволно молитвовавше, опрятавше и благочинне положиша и в гробе, яко же прежде речеся. И на многь час плакавше над нимь доволно, едва разыдошася кождо въсвоя[си], многа плачя и печали наполнишяся. Наипаче непрестанных слез еже ему беша приснии ученици и любимии послушници, в пастве его живущеи, зело вси скръбни быша, и хождаху, сетующе, въздыхающе и рыдающе, стенюще, смерени, слезни, дряхли, печални, умилени, поникли, не имуще утешениа, и другь друга сретающе и въпрашающе, и с многыми слезами умилено глаголаху: «Прости, отче, и благослови, възлюбленный о Христе брате. Се добрый е и блаженый нашь старець от нас к Г осподу отиде, и нас сирых оставив. Изыде тамо, иде же есть мзда велиа и въздаание деломь его и многым трудомь его. Изыде с миромь к Господу, Его же измлада възлюби. Успе сномь вечнымь и длъжным и почи о Господе в покой вечный, токмо нас сирых оставль. Темь ныне и мы по немь жадаем и плачемся, яко остахом его и обнищахомь зело, яко осирехомь и умалихомся, яко смерихомся [и уничижихомся, яко оскръбихомся]³²⁶ и убожихомся³²⁷, и изумлени быхом, яко стадо бес пастыря и корабль бес кръмника, яко виноград многоплодный без стража и болящий без врачя; быхомь смущени и отвръжени». Сиа таковаа и подобнаа симь, по немь скоръбяще и плачюще, глаголаху.

Мнози же убо елици к нему веру и любовь имуще не токмо в животе, н и по смерти к гробу его присно приходяще, и с страхомь притекающе, и верою приступающе, и е любовию припадающе, и с умилениемь приничюще, и рукама обьемлюще святолепно и благоговейно, осязающе очима, и главами своими прикасающеся, и любезно целующе раку мощей его, и устнами чистами лобызающе, и верою теплою и горящимь желаниемь и многою любовию беседующе к нему, акы живу, поистине и по успении живому, и съ сльзами глаголюще к нему: «О святче Божий, угодниче Спасовь! О преподобниче и избранниче Христов! О священнаа главо, преблаженный авва Сергие великый! Не забуди нас, нищих своихь, до конца, но поминай нас всегда в святыхь своих и благоприятных молитвах к Господу. Помяни стадо свое, яже сам паствил еси, и не забуди присещати чад своих. Моли за ны, отче священный, за дети своя духовныя, яко имея дръзновение к Небесному Царю, и не премлъчи, въпиа за ны к Господу, не е презри нас, верою и любовию чтущих тя. Помяни нас, недостойных, у престола Вседръжителева. Не престай моляся о нас къ Христу Богу, тебе бо дана бысть благодать за ны молитися. Не мним бо тя мертва суща, аще и телом преставися от нас, но не отступи от нас духомь, пастуше нашь добрый. Се бо мощий твоих гроб пред очима нашима видимь есть всегда, н святаа твоя душа невидимо с аггельскыми воинствы, с бесплотными ликы, с небесными силами у престола Вседръжителева и в лепоту достойно веселится. Нам бо суще сведущим тя, яко живу ти и по смерти сущу, тако бо писано есть пророком, глаголющимь: «Душа праведныхь в руце Божии, и не прикоснется ихь мука; упование ихь исплънь бесмертиа, яко Бог искуси я и обрете ихь достойны Себе; яко злато искуси я, яко всесъзжениа прият я; яко благодать и милость в избраенных Его, и посещение на преподобных Его». «Праведници бо, – рече, – в векы живуть, мзда от Господа и строение их от Вышняго; сего ради приимуть царьствие красоты и венець доброты от рукы Господня. Память праведнаго с похвалами бываеть, и благословение Господне над главою праведнаго; аще и преставится праведный, в покои будеть; старость бо честна не многолетна, ни в числе лет изчетена есть; седины же суть разумь человеку, лета же старости – житие нескверно. Угодень Богу бывь и вьзлюблень бывь, живый посреди грешникь преставлень бысть, да не злоба изменить разум его, и лесть да не помрачит душу его; скончався, в мале испльни лета многа: угодна бо бе Господеви душа его. Того ради любить Господь праведника, сьхранить и живить и, и ублажить его на земли, и не дасть в векы смятениа праведнику, ни же дасть видети истлениа преподобному Своему. е Яко высокь Господь на смереныя призираеть, и приемля кроткыя Господь, и близь есть всемь призывающим Его истиною; волю боящихся Его сьтворить, и молитву ихь услышить, и спасеть я; хранить Господь вся любящаа Его; любить Господь праведных сердца, прияти же ему вси непорочнии в путь; хранить Господь вся кости их, и ни едина от нихь не ськрушится; похваляему убо праведнику вьзвеселятся людие. Се тако благословится человекь, бояйся Господа, и иже живый в помощи Вышняго вь крове Бога небеснаго вьдворится; насаждень в дому Господни, вь дворех дому Бога нашего процвететь, яко кедрь иже в Ливане умножится. Си есть слава церковнаа, слава си есть всемь преподобнымь Его. Радуйтеся, праведнии, о Господе, праведнымь подобаеть похвала!» «В память вечную, – рече, – будет праведникь, и род праведныхь благословится. Мне же зело честни быша друзи Твои, Боже, зело утврьдишася владычьствиа е ихь». Яко же рече Павель апостоль: «Братие, радуйтеся о Господе», и пакы рече: «Радуйтеся». И речеть праведникь: «Поне же убо сьмерихся, и спасе мя Господь. Сего ради обратися душе моя в покой твой, яко добро сьтвори тебе Господь, яко изять душю мою от смерти, очи мои от слезь, и нозе мои от вьспопльзновениа; угодих пред Господомь вь стране живущих. Се покой мой вь векь века, зде вселюся; изволих приметатися в дому Бога моего паче, неже жити ми в селех грешничих. Когда прииду и явлюся лицю Божию вь гласе радованиа и исповеданиа шума празднующаго? Тем же не умру, нь живь буду и исповемь дела Господня; показуя наказа мя Господь, смерти же не предасть мя. Отврьзите мне врата правды, и вшед в ня исповемся Господеви, глаголя: «Господи, Боже силь! Коль вьзлюбленна села Твоя! Желаеть душа моя скончатися вь дворы, яко лучши есть день единь вь дворех Твоих паче е тысящь; яко тысяща лет пред очима Твоима, Господи, яко день вчерашний, иже мимо идеть; яко желаеть елень на источникы водныя, тако вжада душа моя к Тебе, Боже; яко всемь есть веселящимся жилище у тебе и источникь животу. Блажени живущеи в дому Твоем: в векь века въсхвалят Тя. Блажени кротци, яко ти наследят землю и обладають ею».

Яве, яко праведници, и кротци, и смирении сердцемь, ти наследять землю тиху и безмлъвну, веселящу всегда и наслажающу, не токмо телеса, н и самую душу неизреченнаго веселиа непрестанно исплъняюще, и на ней вселятся в векь века.

Тако и съй преподобный отець нашь Сергие того ради вся краснаа мира сего презре и сиа въжделе, и сиа прилежно възыска, землю кротку и безмлъвну, землю тиху и безмятежну, землю красну и всякого исполънь утешениа, яко же е сама истина рече в святомь Еуагелии: «Толцай отвръзе себе, и ищай обрящеть бесценный бисеръ», рекше Господа нашего Исус Христа, и Царство Небесное от Него въсприят, его же буди всем нам получити благодатию Господа нашего, Ему же подобаеть всяка слава, честь, покланяние с Безначалным Его Отцемь и съ Пресвятымь, и благым, и Животворящимь Его Духомь ныне, и присно, и в векы веком. Аминь.³²⁸

Сохранилось в составе Пространной редакции XVI века – в первой ее части (до главы «О изведении источника»). Текст печатается по рукописи МДА, № 88, пропуски восполняются по списку МДА, № 50 (или по смыслу) и заключаются в квадратные скобки.

Слава Богу о въсем и всяческых ради, о них же всегда прославляется великое и Трисвятое Имя, еже и присно прославляемо есть! Слава Богу Вышнему, иже в Троици славимому, еже есть упование наше, свет и живот нашь, в Него же веруемь, вън же крестихомся, о Нем же живемь, и движемся и есмы! Слава показавшему нам житие мужа свята и старца духовна! Весть бо Господь славити славящая Его и благословяти благословящая Его, еже и присно прославляет Своя угодникы, славящаа Его житиемь чистым, и богоугодным, и добродетелным.

Благодаримъ Бога за премногую Его благость, бывшую на нас, яко же рече апостол: «Благодать Богу о неизреченнем Его даре!» Паче же ныне длъжьни есмы благодарити Бога о всемь, ежедарова нам такова старца свята, глаголю же господина преподобнаго Сергиа, в земли нашей Русстей, и в стране нашей полунощней, в дни наша, в последняа времена и лета. Гроб его у нас и пред нами есть, к нему же верою повсегда притекающе, велико утешение душам нашим приемлем и от сего зело пользуемся; да поистине велико то есть нам от Бога дарование даровася.

Дивлю же ся о сем, како толико лет минуло, а житие его не писано. О сем съжалихся зело, како убо таковый святый старец, пречюдный и предобрый, отнеле же преставися 26 лет преиде, никто же не дръзняше писати о нем, ни далнии, ни ближнии, ни большие, ни меншие: болшие убо яко не изволяху, а меншии яко не смеяху. По лете убо единемь или по двою по преставлении старцеве аз, окаанный и вседръзый, дерьзнухь на сие. Въздохнув к Богу и старца призвав на молитву, начяхь подробну мало нечто писати от житиа старцева, и к себе вътайне³²⁹ глаголя: «Аз не хватаю ни пред кым же, но себе пишу, а³³⁰ запаса ради, и памяти ради, и пльзы ради». Имеях же у себе за 20 лет приготованы таковаго списания свитки, в них же беаху написаны некыа главизны еже о житии старцеве памяти ради: ова убо в свитцех, ова же в тетратех, аще и не по ряду, но предняа назади, а задняа напреди.

И сице ожидающу ми в таковая времена и лета, и жадающу ми того, дабы кто паче мене и разумнее мене описал, яко да и аз шед поклонюся ему, да и мене поучит и вразумит. Но распытав, и услышав и уведах известно, яко никто же нигде же, яко же речеся, не писаше о нем, и се убо егда воспомяну или услышю, помышляю и размышляю: како тихое, и чюдное, и добродетелное житие его пребысть бес писаниа по многа времена? Пребых убо неколико лет, акы безделен в разъмышлении, недумением погружаася, и печалиу оскорбляася, и умом удивляася, и желанием побеждаеася. И наиде ми желание несыто еже како и коим образом начати писати, акы от многа мало, еже о житии преподобнаго старца.

И обретох некыа старца премудры в ответех, разсудны и разумны, и въпросих а о сем, яко да препокоат мое желание, и Рех има, аще достоит писатися. Они же отвещавше, рекоша: «Яко же бо нелепо и не подобает житиа нечистивых пытати и писати, сице не подобает житиа святых мужъ³³¹ оставляти, и не писати и млъчанию предати, и в забытие положити. Аще бо мужа свята житие списано будет, то от того плъза велика есть и утешение вкупе списателем, сказателем, послушателем; аще ли же старца свята житие не писано будет, а самовидци и памятухи его аще будут преставилися, то каа потреба толикую и таковую пльзу в забытии положити, и акы глубине млъчанию предати. Аще не писано будет житие его, то по чему ведати не знавшим и не видавшим его, каков был, или откуду бе, како родися, и како възраесте, и како пострижеся, и како въздръжася, и како поживе, и каков име конець житию. Аще ли будет писано, и сие некто слышав, поревнует въслед жития его ходити и от сего приимет плъзу. Пишет же и Великий Василие: «Буди ревнитель право живущим, и сих житие и деание пиши на сердци своем». Виждь, яко велит житиа святых писати не токмо на хартиах, но и на своем сердци пльзы ради, а не скрывати и ни таити: тайна бо царева лепо есть таити, а дела Божиа проповедати добро есть и полезно».

И оттоле нужда ми бысть распытовати и въпрошати древних старцев, прилежно сведущих, въистинну известно о житии его, яко же Святое глаголеть писание: «Въпроси отца твоего, и възвестит тебе, и старца твоа, рекут тебе». Елико слышах и разумех – отци мои поведаша ми, елика от старец слышах, и елика своима очима видех, и елика от самого уст слышах, и елика уведах от иже въслед его ходивъшаго время немало и възлиавшаговоду на руци его, и елика другаа некая слышахом и от его брата старейшаго Стефана, бывшаго по плоти отца Феодору, архиепископу Ростовьскому; ова же от инех старьцевъ древних, достоверных бывших самовидцев рожеству его, и въспитанию, и книговычению, възрасту его и юности, даже и до пострижениа его; друзии же старци самовидци суще и сведетели неложнии постризанию его, и начятку пустынножительству его, и поставлению его еже на игуменьство; и по ряду прочим прочии възвестители же и сказатели бываху.

Ино къ множьству трудов старчих и к великым исправлением его възирая, акы безгласен и безделен в недоумении от ужасти бываа, не обретаа словес потребных, подобных деанию его. Како могу аз, бедный, в нынешнее время Сергиево все по ряду житие исписати и многаа исправлениа его и неизчетныа труды его сказати? Откуду ли начну, яже по достоиньству деяениа того и подвигы послушателем слышаны вся сътворити? Или что подобает пръвие въспомянути? Или котораа довлеет беседа к похвалениемь его? Откуду ли приобрящу хитрость да възможна будеть к таковому сказанию? Како убо таковую, и толикую, и не удобь исповедимую повем повесть, не веде, елма же чрез есть нашу силу творимое? Яко же не мощно есть малей лодии велико и тяшъко бремя налагаемо понести, сице и превосходить нашу немощь и ум подлежащаа беседа.

Аще бо и побежает нашу худость, но обаче молимся всемилостивому и всесилному Богу и Пречистей Его Матери, яко да уразумит и помилует мене грубаго и неразумнаго, яко да подаст ми слово в отвръзение уст моих, не моего ради, глаголюща, недостоиньства, но молитв ради святых старец. И самого того призываю Сергия на помощь и съосеняющую его благодать духовную, яко да поспешник ми будет и слову споесобник, еще же и его стадо богозванное, благо събрание, събор честных старець. К ним же смирением припадаю, и самех тех подножию касаюся, и на моление призываю и принуждаю. Зело бо тех молитв повсегда требую³³², паче же ныне, внегда сие начинающу ми начинание и ко ей же устремихъся сказаниа повести. И да никто же ми зазиратель на сие дръзающу будет: ни бо аз сам възможне имам, или доволен к таковому начинанию, аще не любовь и молитва преподобнаго того старца привлачит и томит мой помысл и принужает глаголати же и писати.

Достоить же яснее рещи, яко аще бо ми мощно было по моему недостоиньству, то подобаше ми отинудь с страхом удобь³³³ млъчяти и на устех своих пръст положити, сведущу свою немощь, а не износити от уст глагол, еже не по подобию, ни же продръзати на сицевое начинание, еже чрез свое достоание. Но обаче печаль приат мя, и жалость поат мя: толикаи такова велика свята старца пресловуща и многословуща житие его всюду обносимо, и по далним странам, и по градом, мужа явлена и именита всем того исповедающим – и за толико лет житие оставлено и не описано бяше. Непъщевах сиа млъчанию предати, яко в глубине забвениа погрузити. Аще бо не писано будет старцево житие, но оставлено купно без въспоминаниа, то се³³⁴ убо никако же повредит святого того старьца, еже не получити ему от нас въспоминаниа же и писаниа: их же бо имена на небесех Богъ³³⁵ написа, сим никаа же потреба еже от человек требовати писаниа же и въспоминаниа. Но мы сами от сего не пльзуемся, оставляюще толикую и таковую пльзу. И того ради сиа вся събравъше, начинаем писати, яко да и прочии мниси, яже не суть видали старца, да и те прочтут и поревнують старцеве добродетели и его житию веруют; «блажени бо, – рече, – не видевше вероваша». Пакы же другойци другаа печаль приемлет мяи обдержит мя: аще бо аз не пишу, а ин никто же не пишет, боюся осужениа притчи оного раба лениваго, скрывшаго талант и обленившагося. Он бо добрый старец, чюдный страстотръпець, без лености повсегда подвигом добрым подвизаашеся и николи же обленися; мы же не токмо сами не подвизаемся, но и того готовых чюжих трудов, еже в житии его, ленимся възвестити писаниемь, послушателем слышаны сиа сътворити.

Ныне же, аще Бог подасть, хотел убо бых писати от самого рожества его, и младеньство, и детьство, и в юности, и в иночьстве, и в игуменьстве, и до самого преставлениа, да не забвена будут толикаа исправлениа его, да не забыто будет³³⁶ житие его чистое, и тихое, и богоугодное. Но боюся усумняся прикоснутися повести, не смею и недоумею, како бы сътворити пръвее, начяток подписанию, яко выше силы моеа дело бысть, яко немощен есмь, и груб, и неразумичен.

Но обаченадеюся на милосердаго Бога и на угодника Его, преподобнаго старца,³³⁷ молитву, и от Бога прошу милости, и благодати, и дара слову, и разума, и памяти. И аще Бог подасть ми, и вразумит мя, и наставит мя, Своего си раба неключимаго, не отчаю бо ся милости Его благыя и благодати Его сладкыа. Творит бо елико хощет и может, могый даровати слепым прозрение, хромымъ хожение, глухым слышание, немым проглаголание. Сице может и мое омрачение просветити, и мое неразумие вразумити, и моему неумению умение подати да убо о имени Господа нашего Исуса Христа, рекшаго: «Без Мене не можете творити ничто же; ищите и обрящете, просите и приимете». Сего Господа Бога, Спаса помощника на помощь призываю: тъй бо есть Бог нашъ великодатель, и благых податель, и богатых даров дародавець, премудрости наставник, и смыслу давець, несмысленым казатель, учяй человека разуму, даа умение неумеющим, даа молитву молящемуся, даай просящему мудрость и разум, даайвсяко даание благо, даай дар на пльзу просящим, даай незлобивым коварьство, и отроку уну чювьство и смысл, иже сказание словес его просвещает и разум дает младенцем.

До зде убо окончавше предъсловие, и тако Бога помянувше и на помощ призвавше Его: добро бо есть о Бозе начяти, и о³³⁸ Бозе кончяти, и к Божиим рабом беседовати, о Божии угоднице повесть чинити. Начнем же уже основу слова, имемся по беседу, еже положити начяло повести; и тако прочее житие старцево о Бозе начинаем писати сице.

Съй преподобный отец наш Сергие родися от родителя доброродну и благоверну: от отца, нарицаемаго Кирила, и от матере именем Мариа, иже бяста Божии угодници, правдиви пред Богом и пред человекы, и всячьскыми добродетелми исплънени же и украшени, яко же Бог любит. Не попусти бо Бог, иже таковому детищу въсиати хотящу, да родится от родиетелю неправедну. Но прежде проуготова Бог и устроил таковаа праведна родителя его и потом от нею своего си произведе угодника. О прехвалнаа връсто! О предобраа супруга, иже таковому детищу родителя быста! Прежде же подобаше почтити и похвалити родителей его, да от сего яко некое приложение похвалы и почьсти ему будеть. Поне же лепо бяше ему от Бога дароватися многым людем на успех, на спасение же и на пльзу, и того ради не бе лепо такому детищу от неправедных родитися родителей, ни же иным, сиречь неправедным родителем таковаго не бе лепо родити детища. Но токмо тем единем от Бога даровася, еже и прилучися: паче и снидеся добро къ добру и лучшее к лучшему.

И бысть же и чюдо некое прежде рожениа его: прилучися нечто сицево, его же не достоит млъчанию предати. Еще бо ему в утробе матерне носиму, въ един от дний, дневи сущу недели, мати его въниде в церковь по обычаю, въ время, егда³³⁹ святую поеют литургию. И стоаще с прочими женами въ притворе, и внегда хотяху начяти чести святое Еуагелие, людем млъчящим, тогда абие вънезаапу младенец начят вопити в утробе матерне, яко же и многым от таковаго проглашениа ужаснутися о преславнем чюдеси, бывающем о младенци сем. Пакы же, егда преже начинания еже пети Херувимьскую песнь, рекше «Иже херувим», тогда внезаапу младенець гласомъ начя велми верещати в утробе вторицею паче пръваго, яко и в всю церковь изыде глас его, яко и самой матери его ужасшися стоати, и сущим женам стоащим ту, и недомыслящимся в себе, глаголющим: «Что убо будет о младенци сем?» Вънегда же иерей възгласи: «Вънмем, святаа святым!», тогда пакы младенець третицею велми възопи.

Мати же его мало не паде на землю от многа страха, и трепетом великым одръжима сущи, и ужасшися, нача в себе плакати. Прочая же верныа оны жены приступльеши к ней, начаша въпрашати ю, глаголюще: «Имаши ли въ пазусе младенца пеленами повита, его же глас младенческый слышахом, въ всей церкви верещающе?» Она же в недоумении от многа плачя не можаше к ним ни провещати, но въмале отвеща им: «Пытайте, – рече, – инде, аз бо не имам». Они же въпрошаша, пытающе промежи собою, и поискавше, и не обретоша. Пакы обратишяся к ней, глаголюще: «Мы в всей церкви поискавше и не обретохом младенца. Да кый тъй есть младенець, иже гласом проверещавый?» Мати же его, не могущи утаити бываемаго и испытаемаго, отвеща к ним: «Аз младенца в пазусе не имам, яко же мните вы, имею же в ютробе, еще до времени не рожена. Сий провъзъгласилъ есть». Жены же реша к ней: «Да како дасться глас преже рожениа младенцу, в утробе сущу?» Она же рече: «Аз³⁴⁰ о сем и сама удивляюся и вся есмь в страсе, трепещу, не ведущи бываемаго».

Жены же, въздохнувше и бьюще в перси своа, възвращахуся каяждо на свое место, токмо к себе глаголющи: «Что убо будет отроча се? И яже о нем воля Господня да будет». Мужие же в церкви сиа вся слышавши и видевши, стоаху з безмолвием ужасни, донде же иерей святую свръши литургию, и съвлечеся риз своих, и распусти люди. И разидошася кийждо въсвоаси; и бысть страх на всех слышащих сиа.

Мариа же, мати его, от дне того, отнеле же бысть знамение таковое и проявление, оттоле убо пребываше до времене рожениа его и младенца в утробе носящи яко некое съкровище многоценное, и яко драгый камень, и яко чюдный бисер, и яко съсуд избран. И егда в себе сего носяше и сим непраздне сущи ей, тогда сама съблюдашеся от всякыя скверны и от всякыя нечистоты, постом огражаася, и всякыя пища тлъстыа ошаявся, и от мяс, и от млека, и рыб не ядяше, хлебом точию, и зелием, и водою питашеся. И от пианьства отинудь въздръжащеся, но вместо питиавсякого воду едину точию, и то по оскуду, испиваше. Начасте же втайне наедине с въздыханиемь и съ сльзами моляшеся к Богу, глаголя: «Господи! Спаси мя, съблюди мя, убогую си рабу Свою, и сего младенца носимаго в утрообе моей спаси и съхрани! Ты бо еси храняй младенца Господь, и воля Твоа да будет, Господи! И буди имя Твое благословено в векы веком. Аминь».

И сице творя, пребываше даже и до самого рождениа его; велми же прилежаше паче всего посту и молитве, яко и самое то зачатие и рожество полно бе поста и молитвы. Бяше бо и та добродетелна сущи и зело боащися Бога, яко³⁴¹ и преже рождениа его уведавши и разумевши яже о нем таковое знамение, и проявление, и удивление. И съвещаша с мужем своим, глаголя, яко: «Аще будеть ражаемое мужеск пол, обещаевеся принести его въ церковь и дати его благодетелю всех Богу»; яко же и бысть. Оле веры добрыа! О теплоты благы! Яко и преже рожества его обещастася привести его и вдати благых подателю Богу, яко же древле Анна пророчица, мати Самоиля пророка.

Егда же исплънишяся дние родити ей, и роди младенца своего. И зело непечално рожество приимши, родители же его призваста к себе ужикы своа, и другы, и суседи, и възвеселишяся, славяще и благодаряще Бога, давшаго има таковый детищь. По рожении же его, внегда и пеленами повито бысть отрочя, нужа всяко бяше еже и к сосцу принести. Да внегда аще случашеся матери его пищу некую вкусити еже от мяс, и тою насыщене быти и полне утробе ея, тогда никако же младенець съсцу касашеся. И сие случашеся не единою бывати, но овогда день, овогда два младенцу не напитатися. Иже отинудь о сем ужас вкупе и скръби обдержаще³⁴² рожешую и сродникы еа. И едва разумеша, яко не хощет младенец еже от мяс питаеме питателницеего быти тем млеком напаатися, но точию от поста еи не раздрешатися. И уже оттоле пища матерня въздръжание и пост бяше, и оттоле младенец повсегда по обычаю питаем бываше.

И исполнишяся дние обещанию матери его: яко бысть по днех шестих седмиц, еже есть четверодесятный день по рожестве его, родители же его принесоста мледенець в церковь Божию, въздающе, яко же и приаста, яко же обещастася въздати его Богу, давшему его; купно же иерееви повелевающа, яко да крещением божественым съвръшити и. Иерей же, огласив его, и много молитвовавъ над ним, и с радостию духовною и с тщанием крести его во имя Отца, и Сына, и Святого Духа – Варфоломея в святом крещении нарек того имя. Възвед же его абие от купелныа воды крещениа благодать приимши богатно Святого Духа, и провидев Духомь божественым, и проразуме, съсуду избранну быти младенцу. Отець же его и матиразум имуща Святого Писаниа не худе, и та поведаста иереови, како, носим сый в утробе матерни, въ церкви трикраты провъгласи: «Что убо будет сие, мы не вемы». Иерей же, именем Михаил, разсуден сый книгам, поведаше има от божественаго Писаниа, от обою закона, Ветхаго и Новаго, сказа, глаголя: «Давиду в Псалтыри рекшу, яко: «Несъделанное мое видеста очи Твои»; и сам Господь святыми Своими усты учеником си рече: «Вы же яко искони с Мною есте». Тамо, в Ветхом законе, Иеремея пророк в чреве матерни освятися; зде же, в Новем, Павел апостол въпиаше: «Бог, отець Господа нашего Исуса Христа, възвавый мя из чрева матере моеа, явити сына своего в мне, да благовестую в странах». И ина множайшаа от святыхъ поведа ема Писаниа. О младенци же рече к родителем: «Не скръбите о сем, но паче радуйтеся и веселитеся, яко будет сосуд избран Богу, обитель³⁴³ и служитель Святыа Троица»; еже и бысть. И тако благословив отрочя и родителяего, отпусти а в дом ею.

Потом же по времени, малым минувъшим днем, о младенци пакы чюдодействовашеся другое некое знамение, странно нечто и незнаемо: в среду бо и в пяток не приимаше ни от съсцу, ни от млека кравьа, но отинудь ошаатися ему и не съсати, и не ядущу пребывати ему в весь день. Кроме же среды и пятка въ прочаа дни по обычаю питашеся; аще ли будяше в среду и³⁴⁴ в пяток, то алчен младенець пребываше. Се же не единою, ни дважды, но и многажды прилучашеся, еже есть по вся среды и пяткы бываше. От сего некым мняшеся, яко болно бе детище; о сем же убо мати его скръбящи сетоваше. И с другыми женами, с прочими кормительницами, расматреюще беаше, мняше, яко от некыа болезни младенцу приключашеся сие бывати. Но обаче обзираху повсюду младенца, яко несть болно, и яко не обреташеся в нем явленыа или не явленныа знамение болезни: ни плакаше, ни стъняще, ни дряхловаше. Но и лице, и сердце, и очи весели, и всячьскыи младенцу радостну сущу, яко и ручицами играше. Тогда вси видящи, и познаша, и разумеша, яко не болезни ради в пяток и в среду младенец млека не приимаше, но проявление некое прознаменашеся, яко благодать Божиа бе на нем. Еже проявляше будущаго въздръжаниа образ, яко некогда в грядущая времена и лета в постъном житии просиати ему; еже и бысть.

Другойци же мати его привожаше к нему жену некую доилицу имущу млеко, дабы его напитала. Младенець же не рачи приати никако же от чюждиа матери питатися, но точию от своеа си родителница. И сие видевше, прихождаху к нему и другиа жены, таци же и доилици, тем подобъно тако же творити, яко же и пръвие. И тако пребысть своею токмо питаем материю, донде же и отдоен бысть. Сеже сматряют неции, яко и се знамение бысть, яко дабы добра корене добраа леторасль нескверным млеком въспитан быв.

Нам же мнится сице быти: яко сий младенець измлада бысть Господеви рачитель, иже в самой утробе и от утробы матерня к богоразумию прилепися, иже от самех пелен Бога познал и въправду уразумел, иже в пеленах сый в самой колыбели пощению навыкаше; иже от матери млеком питаем сый вкупе с плотным млеком въздръжанию учашеся; иже по естеству младенець сый, но выше естества пост начинаше; иже в младенце чистотный бысть въскръмленик; иже благочестием паче, нежели млеком въспитан бысть; иже преже рожениа его избран Богом и пронаречен, егда в утробе матерьне носим, трикраты в церкви провъзъгласи, иже слышащаа удивляет.

Дивити же ся паче сему подобает, како младенець в утробе не провереща кроме церкви, без народа, или инде, втайне, наедине, но токмо при народе, яко да мнози будут слышателие и сведетели сему истиньству. И пакы, како не помалу провъзгласи, но в всю церковь, яко да в всю землю изыдеть слово о нем; и³⁴⁵ егда сущей родителнице его или на пиру, или в нощи спяще, но в церкви, паче же и на молитве-да молитвъник крепок будет к Богу. И како не провереща не в коей хлевине или не в чисте месте некоем и ненарочите, но паче в церкви, стоащи на месте чисте, на месте святе, иде же подобает святыню Господню съвръшити – яко да обрящется съвръшенаа святыня Господня в страсе Божии.

Пакы ему достоить чюдитися, что ради не провъзгласи единицею или дважды, но паче третицею, яко да явится ученик Святыа Троица, поне же убо тричисленое число паче инех прочих числ болши есть зело чтомо. Везде бо троечисленое число всеему добру начало и вина възвещению, яко же се глаголю: трижды Господь Самоила пророка възва; трею камению пращею Давидъ Голиада порази; трижды повеле възливати воду Илиа на полена, рек: «Утройте», – утроиша; трижды тожде Илиа дуну на отрочища и въскреси его; три дни и три нощи Иона пророк в ките тридневнова; трие отроци в Вавилоне пещь огньную угасиша; тричисленое же слышание Исаию пророку серафимовидцу, егда на небеси слышашеся ему пение аггельское, трисвятое въпиющих: «Свят, свят, свят Господь Саваоф!» Трею же лет въведена бысть в церковь Святаа Святых пречистаа дева Мариа; тридесяти же лет Христос крестися от Иоанна в Иердане; три же ученикы Христос постави на Фаворе и преобразися пред ними; тридневно же Христос из мрътвых въскресе; трикраты же Христос по въскресении рече: «Петре, любиши ли Мя?» Что же извещаю по три числа, а что ради не помяну болшагои страшнаго, еже есть тричисленое Божество: треми святынями, треми образы, треми събьствы, въ три лица едино Божество Пресвятыа Троица, Отца, и Сына, и Святого Духа; триупостаснаго Божества, едина сила, едина власть, едино господьство? Лепо же бяше и сему младенцу трижды провъзгласити, в утробе матерне сущу, преже рожениа, прознаменуа от сего, яко будет некогда троичный ученик, еже и бысть, и многы приведет в разум и в уведение Божие, уча словесныа овца веровати в Святую Троицу единосущную, в едино Божество.

Воле, не указание ли се будет яве, яже о том последи будущаа дивна и странна! Воле, не знамение ли се есть истовое, да покажется, яже о нем да збудет ся делесы чюдесными напоследок! Подобает бо видевшим и слышавшим перваа и веровати последним. Яко и преже рожениа его Богъ прознаменал есть его: не просто бо, ни бездобь таковое знамение и удивление бывшеее преднее, но предпутие есть последи будущим. Се же понудихомся рещи, елма же чюдна мужа чюдно и житие поведается.

Лепо же зде помянути и древних святых, иже в Ветхом и Новем законе въсиавших; и многых бо святых зачатье и рожество откровениемъ божественым некако откровено бысть. Мы бо не от себе износим слово, но от святых възимающи писаний словеса и к предлежащей повести повесть приуподобляюще въспоминаниемь сице: и поне же Иеремею пророка Бог въ чреве матерни освяти, и прежде рожениа его проведый, яко провидець Бог, яко быти ему приателищу Святого Духа, наполняет сего абие благодати от юностна възраста. Исаия же пророк рече: «Глаголеть Господь, възвавый мя из утробы, и ис чрева матере моеа избрав, пронарече мя». Святый же великый Иоаннъ пророк Предтечя еще сый в утробе матерни позна Господа, носимаго въ ложеснех Пречистыа приснодевы Мариа; и възыграся младеенець радощами в чреве матери своеа Елисафи, и тоа устнами пророчьствова. И възъпи тогда, глаголя: «Откуду се мне, да прииде мати Господа моего къ мне?». Святый же славный пророк Илия Фезвитянин, егда роди его мати его, тогда родители его видеша видение, яко мужие благокрасни и белообразни нарицахут имя ему, и огнеными пеленами повиваху его, и пламы огненыи дааху ему ясти. Отець же его, шед в Иерусалим, възвести сиа архиереом. Они же реша ему: «Не бойся, человече! Будет бо детища сего житие свет и слово суд, и тъй судит Израилю оружием и огнемъ»; еже и бысть.

Святый Николае чюдотворець, егда родися и начаша омывати его, вънезаапу въста младенець на ногу свою и стоаше прост в ночвах полтора часа. Святый же преподобный отец наш Ефрем Сирин, егда бе родися младенец, родителие его видение видеста: виноград на языце его насажен, и възрасте, и исплъни всю землю, и прихоежаху птица небесныа и ядяху от плода его. Виноград же проявляше хотящий разум податися ему. Преподобный Алимпий Столпник, преже рожества его мати его виде сонъ таковый, яко ношаше на руку своею агнец красен, имущ на рогу своею свеща. И от того разуме, яко хощет родитися отрочя и будет добронравно; яко же и бысть. Иже в святыих отець наш преподобный Симеонъ Стлъпник, иже на Дивней горе чюдотворець, зачят бе от обещания, Предтечи Крестителю матери его възвестившу. И рожься, въегда доену ему быти, небрежаше леваго съсца. Богу проявившу о сем, яко десный путь заповеди Господня възлюбити ему. Святый Феодор Сикеотъ чюдотворець, егда бе в утробе матерне младенец, мати его видение виде: звезда с небес сшед, паде на утробу еа. Се же звезда проявляше всяку добродетель отрочати. Пишет в житии Великаго Еуфимиа, яко преже рожениа его, в едину бо от нощей, молящимасяродителема его в нощи единема, некое Божие явление явися има, глаголя: «Тешитася и утешитася! Се бо дарова вама Бог отрока тешениа тяклоименита, яко в родстве его тешение дарова Богъ своим церквам». И пакы в житии Феодора Едесскаго писано есть, яко родители его Симеон и Мариа молитвою просиста себе детища сына. В един от дний, в пръвую суботу Великаго поста, в церкви молящимася има, сладко некое видение предста има, особь комуждо их явлься: мняста бо ся видети великаго мученика Феодора Тирона купно с Павлом апостолом стоаща и глаголюща: «Въистину дар Божий будеть ражаемый отрок, еже есть Феодоръ»; еже и бысть. Пишет же в житии святого отца нашего Петра митрополита, новаго чюдотворца иже в Руси, яко прилучися нечто сицево знамение. И прежде рожениа его, еще сущу ему в утробе матерне, в едину от нощей, свитающи дневи недели, виде видениетаково мати его: мняше бо ся³⁴⁶ ей агньца дръжати на руку своею; посреди же рогу его древо благолиствено израстъше, и многыми цветы же и плоды обложено, и посреди ветвий его мъногы светяща³⁴⁷ свеща. И възбудившися, недоумеашеся, что се, или что събытие и конец таковому видению. Обаче аще она и не домышъляашеся, но конецъ сбытию последи с удивлением яви, еликыми дарьми угодника Своего Богъ обогати.

И что подобает инаа прочаа глаголати и длъготою слова послушателем слухы ленивы творити? Сытость бо и длъгота слова ратник есть слуху, яко же и преумноженаа пища телесем. И никто же да не зазрит ми грубости моей³⁴⁸, яко о сем продлъжившу ми слово: и еже от прочих святых от житиа ихъ въспоминая, и приводя свидетельства на извещение, и приуподобляа, к подлежащей повести чюднаго сего мужа чюдны и вещи сказаются. Чюдо новослышащеся, еже в утробе зачало провъзглашениа его. Чюдно же въ младенцех в пеленах въспитание его – не худо бо знамение сие мняшеся быти. Тако бо подобаше с чюдесем родитися таковому отроку, яко да от сего познають прочии человеци, яко такова чюдна мужа чюдно и зачатие, и рожество, и въспитение. Таковою благодатию Господь удиви его, паче прочих младенцев новоражающихся, и тацеми знаменми проявляше о немь премудрое Божие промышъление.

Хощу же сказати времена и лета, в ня же преподобный родися: в лета благочестиваго преславнаго дръжавнаго царя Андроника, самодръжьца гречьскаго, иже в Цариграде царствовавшаго, при архиепископе Коньстянтина града Калисте, патриарсе вселеньском, в земли же Русстей въ княжение великое тферьское при великом князе³⁴⁹ Димитрии Михайловиче, при архиепископе пресвященнем Петре, митрополите всеа Руси, егда рать Ахмулова.

Младенець же прежереченный, о нем же слово изначала приходить, бе убо по святомь крещении преиде неколико время месяцей, егда и отдоен бысть законом естества, и от съсцу отъемлеться, и от пелен разрешается, и от колыбели свобожается. И тако абие отроча растяше прочее время, по обычаю телеснаго възраста, преуспеваа душею, и телом, и духом, и исплъняася разума и страха Божия, и милость Божиа³⁵⁰ бе на нем; донде же достиже до седмаго лета възрастом, в егда родителие его въдаша его грамоте учити.

Прежереченный раб Божий Кирил имеаше три сыны: пръваго Стефана, втораго же сего Варфоломеа, третиаго же Петра; их же въспита с всякым наказанием въ благочестии и чистоте. Стефану же и Петру спешно изучившу грамоту, сему же отроку не скоро выкнущу писанию, но медлено некако и не прилежно. Учитель же его с многым прилежанием учяше его, но отрок не внимаше и не умеяше, не точен бысть дружинесвоей, учящимся с ним. О сем убо много браним бываше от родителю своею, боле же от учителя томим, а от дружины³⁵¹ укаряем. Отрок же вътайне чясто с сльзами моляшеся Богу, глаголя: «Господи! Ты дай же ми грамоту сию, Ты научи мя и вразуми мя».

Посем убо не мала печаль бяше родителема его; не малу же тщету вменяше себе учитель его. Вси же си печаляхуся, не ведуще яже о нем вышняго строениа Божиа промысла, яже хощет Бог сотворити на отрочати семь, яко не оставит Господь преподобнаго Своего. Се же бяше по смотрению Божию быти сему, яко да от Бога книжное учение будет ему, а не от человек; еже и бысть. Скажем же и сие, яко от Божиа откровениа умети ему грамоту.

В един убо от дний отець его посла его на възыскание клюсят. Се же все бысть всемудраго Бога судьбами, яко же Пръвыя Царьскиа Книгы извещают о Сауле, иже послан бяше отцом своим Киссом на възыскание ослят; он же шед обрете святого пророка Саемоила, от него же помазан бысть на царство, и выше дела поделие приобрете. Сице и блаженый отрок выше дела поделие обрете; послан бо бысть³⁵² отцомь своим Кирилом на възыскание скота, обрете етера черноризца, старца свята, странна и незнаема, саном прозвитера, святолепна и анъгиловидно, на поле под дубом стоаща и молитву прилежно с сльзами творяща. Отрок же, видев, преже сътвори смирено метание ему, таче приближися и ста близ его, ожидаа коньца молитве.

И яко преста старец и възрев на отрока, и прозре внутренима очима, яко хощет быти съсуд избранъ³⁵³ Святому Духу. И пригласив, призва и к себе, и благослови его, и о Христе целование даст ему, и въпроси его, глаголя: «Да что ищеши, или что хощеши, чядо?» Отрок же рече: «Възълюби душа моа³⁵⁴ въжелети паче всего умети грамоту сию, еже и вдан бых учитися, и ныне зело прискръбна³⁵⁵ есть душа моя³⁵⁶, поне же учюся грамоте и не умею. Ты же, отче святый, помолися за мя къБогу, яко да бых умел грамоту».

Старец же, въздев руце купно же³⁵⁷ и очи на небо и въздохнув к Богу, и сътворь молитву прилежну и по молитве рече: «Аминь».³⁵⁸ И изем от чпага своего акы некое съкровище, и оттуду треми пръсты подаст ему нечто образом акы анафору, видением акы мал кусъ бела хлеба пшенична, еже от святыа просфиры, рек ему: «Зини усты своими, чадо, и развръзи я. Приими сие и снежь, се тебе дается знамение благодати Божиа и разума Святого Писаниа. Аще бо и мало видиться даемое, но велика сладость вкушениа его». Отрок же овръз уста своа и снесть сие; и бысть сладость в устех его, акы мед сладяй. И рече: «Не се ли есть реченное: «Коль сладка гортани моему словеса твоя! Паче меда устом моим»; и душа моя възлюби а зело». И рече ему старец: «Веруеши ли, и болша сих узриши. И о грамоте, чадо, не скръби: ведый буди извест[н]о³⁵⁹, яко от сего дне дарует ти Господь грамоте умети зело добре, паче братиа твоеа и паче свръстникътвоих». И поучи его о плъзе души.

Отрок же сътвори поклонение старцу и акы земля плодовитаа и доброплоднаа, семена приемши в сердци си, стояше, радуася душею и сердцемь, яко сподобися такова свята старца обрести. Старец же тщашеся отъити в путь свой; отрок же пометашеся на земли лицем пред ногама старчима и с сльзами моляше старца, дабы обитал в дому родителей его, глаголя: «Родители мои зело любят таковыа, яко же ты, отче». Старец же удивлься вере его, потщався въниде в дом родителей его.

Они же, узревше его, и изыдоша в сретение ему и поклонистася ему. Старецъ же благослови я; они же готовяху трапезу поставити пред ним. Старець же не преже брашна вкуси, но преже въниде в храм молитвеный, еже есть въ чясовницу, поим с собою освященнаго в утробе отрока. И начат «Чясы» пети, повеле же сему отроку псалом глаголати. Отрок же рече: «Аз не умею того, отче». Старець же рече: «Рех ти, яко от сего дне дарует ти Господь умети грамоту. Ты же глаголи слово Божие без сумнениа». Тогда бысть сицево удивление: отрок приим благословение от старца, начат стихословити зело добре и стройне; и от того часа горазд бысть зело грамоте. И сбысться пророчьство премудраго пророка Иеремиа, глаголюща: «Тако глаголеть Господь: «Се дах словеса Моа въ уста твоя». Родители же его и братиа его се видевше и слышавше, удивишася скорому его разуму и мудрости и прославиша Бога, давшаго ему такову благодать.

И изведше съ старцем, поставиша пред ним брашно. Старець же вкуси брашна, благослови родители его и хотяше отъити. Родители же его моляхуся старцу, въпрашающе его и глаголюще: «Отче господине! Пожди еще, да въпрашаем тя, да разрешиши и утешиши нищету нашу и печаль нашу. Сие смиреное отрочя наше, его же благословяеши и хвалословиши, о нем же многа блага предглаголеши. Но мы о нем в удивлении есмы, и печаль о немъзело жасит ны, поне же вещь о нем сътворися страшна, странна и незнаема – сицево: еще ему сущу в утробе матерьне, за неколико время рождениа его, трижды провереща въ утробе матерне³⁶⁰, в церкви сущи, при народе, в время, егда святую поють литоргию. Иньде же нигде же сицева вещь ни же слышашеся, ни же видешеся и мы о сем страшимся, недомыслящеся, что си будет конец сему, или что напреди сбытися имать».

Старец же святый проразуме и позна духом будущее и рече има: «О блаженаа връсто! О предобраа супруга, иже таковому детищу родители быста! Въскую устрашистеся страхом, иде же не бе страха. Но паче радуйтеся и веселитеся, яко сподобистася таковый детищ родити, его же Бог избра и преже рождениа его, его же Бог прознамена еще суща в утробе матерне. И уже конечную беседу реку и потом препокою слово: се вам буди знамение моих словес сбытие, яко по моем ошествии узрите отрока добре умеющавсю грамоту и вся прочаа разумевающа святыа книгы. Второе же знамение вам и извещение, – яко отроча се будет великъ пред Богом и человекы, житиа ради добродетелнаго». И сиа рекъ старец отъиде, назнаменав темне глагол к ним, яко: «Сын ваю имать быти обитель Святыя Троица и многы приведет въслед себе на разум божественых заповедей». И сиа рек, изиде от них. Они же проважахуть его пред врата домовнаа; он же от них вънезапу невидим бысть.

Они же, недоумевающеся, помышляаху, яко аггел послан бысть даровати отроку умение грамоте. Отец же его и мати, въземше от старца благословение и словеса его положиша на сердци своем, възвратистася в дом свой. По ошествии же старца оного обретеся отрок вънезаапу всю грамоту оттуду добре умеа, пременися странным образом: и куюждо разгнет книгу, ту абие добре чтый, да разумеет. Добрый си отрокъ достоин бысть даровь духовных, иже от самех пелен Бога позна, и Бога възлюби, и Богом спасен бысть. Пребываше в всем повинуася родителема своима: тщаше бо ся повелениа ею съвръшити и ни в чем же преслушатися ею, яко же и Святое глаголеть³⁶¹ Писание: «Чти отца своего и матерь, да будеши длъголетен на земли»³⁶².

Еще же иное дело скажем сего блаженнаго отрока, еже в младе телесе старъ смысл показа. По летех же неколицех жесток постъ показа и от [в]сего въздръжание имеаше, в среду же и в пяток ничто же не едяше, в прочаа же дни хлебом питашеся и водою; в нощи же многажды³⁶³ без сна пребываше на молитве. И тако вселися во нь благодать Святого Духа.

Мати же его матерними си глаголы увещевааше его глаголющи: «Чядо! Не съкруши си плоти от многаго въздержаниа, да не в язю въпаднеши, паче же младу ти еще сущу, плоти растущи и цветущи. Никто же бо тако млад сый, в ту връсту твою³⁶⁴ таковому жестоку посту касается; никтоже от братиа твоеа и от свръстник твоих сицево стяжа въздръжание, яко же ты. Суть бо неции, иже и до седмижды днем ядят, иже от утра зело рано начинающе и длъго нощи окончевающи, пьюще бесчисмени. Ты же, овогда единою днем яси, овогда же ни единою, но чресъ день. Престани, чядо, от таковыа продлъженыа лечбы, неси доспел в сие прясло, не бе бо ти еще время. Все бо добро, но въ свое время». Предобрый же отрокъ³⁶⁵ отвещеваше ей, купно же и моляше ю, глаголя: «Не дей мене, мати моа, да не по нужи преслушаюся тебе, но остави мя тако пребывати. Не вы ли глаголаста ми, яко «егда был еси в пеленах и в колыбели, тогда – рече, – в всякую среду и в пяток млека не ядущу ти». Да то слыша аз, како могу елика сила не въспрянути к Богу, да мя избавит от грех моих?».

К сим же отвеща мати его, глаголющи³⁶⁶. «И двою на десять не имаши лет, грехи поминаеши. Кыа же имаши грехы? Невидим бо на тебе знамений греховных, но видехом на тебе знамение благодати и благочестиа, яко благую чясть избрал еси, яже не отъиметься от тебе». Отрок же рече: «Престани³⁶⁷, мати моа, что глаголеши? Се бо ты сиа глаголеши яко мати сущаа, яко чадолюбица, яко мати о чадех веселящися, естественою любовию одръжима. Но слыши Святое глаголеть Писание: «Никто же да не похвалится в человецех, никто же чист пред Богом, аще и един день живота его будет; никто же есть без греха, токмо един Бог без греха». Неси ли божественаго слышала Давида, мню, яко о нашей худости глаголюща: «Се бо в безаконии зачат есмь, и в гресех роди мя мати моа».

И то рек, пакы по пръвое дръжашеся доброе устроение, Богу помагающу ему на благое произволение. Сий предобрый и вседоблий отрок не по колицехъ временех пребываше в дому родителей своих, възрастаа и преуспеваа в страх Божий: к детем играющим не исхожаше и к ним не приставаше; ижев пустошь текущим и въсуе тружающимся не вънимаше; иже суть сквернословци и смехотворци, с теми отнудь не водворяшеся. Но разве токмо упражняшеся на славословие Божие и в том наслажашеся, к церкви Божии прилежно пристоаше, на заутренюю, и на литургию, и на вечерню всегда исхождааше и святыа книгы часто почитающе.

И в всемъ всегда труждааше тело свое, и иссушаа плоть свою, и чистоту душевную и телесную бе[с] скверны съблюдаше, и часто на месте тайне наедине с сльзами моляшеся к Богу, глаголя: «Господи! Аще тако есть, яко же поведаста ми родителие мои, яко и преже рожениа моего Твоа благодать и Твое избрание и знамение бысть на мне, убозем, воля Твоа да будет, Господи! Буди, Господи, милость Твоа на мне! Но дай же ми, Господи! Измлада всем сердцем и всею душею моею³⁶⁸, яко от утробы матере моеа к Тебе привръжен есмь, из ложесн, от съсцу³⁶⁹ матере моеа – Бог мой еси Ты. Яко егда сущу ми в утробе матерни, тогда благодать Твоа посетила мя есть, и ныне не остави мене, Господи, яко отець мой и мати моа оставляют мя. Ты же, Господи, приими мя, и присвой мя к Себе, и причти мя к избранному Ти стаду: яко Тебе оставлен есмь нищий. И из младеньства избави мя, Господи, от всякыя нечистоты и от всякыа скверны плотекия и душевныа. И творити святыню в страсе Твоем сподоби мя, Господи. Сердце мое да възвыситься к Тебе, Господи, и вся сладкаа мира сего да не усладят мене, и вся краснаа житейскаа да не прикоснутся мне. Но да прилпе душа моа въслед Тебе, мене же да прииметь десница Твоя. И ничто же да не усладит ми мирьскых красот на слабость, и не буди ми нимала же порадоватися радостию мира сего. Но исплъни мя, Господи, радости духовныа, радости неизреченныа, сладости божественыа и дух Твой благый наставит мя на землю праву». Старци же и прочии люди, видевши таковое пребывание уноши, дивляехуся, глаголющи: «Что убо будет уноша съй, иже селику дару добродетели сподобил его Бог от детьства?».

До зде же убо списашася сиа вся, елика съдеашася, иде же бе прежде жил Кирил не в коей веси³⁷⁰ области оноя, иже бе в пределех Ростовьскаго княжениа, не зело близ града Ростова. Хощет же слово сказати акы некое преселение: пресели бо ся Кирил от Ростова в Радонежь. Како же или что ради преселися, аще бо и много имам глаголати, но обаче нужа ми бысть о сем писати.

Сей убо прежереченный раб Божий Кирил преже имеаше житие велико в Ростовьстей области, болярин сый, един от славных и нарочитых боляр, богатством многым изобилуя, но напослед на старость обнища и оскуде. Како же и что ради обнища, да скажем и се: яко частыми хоженьми еже с князем в Орду, частыми ратми татарьскыми еже на Русь, чястыми послы татарьскыми, чястыеми тяшъкыми данми и выходы еже в Орду, чястыми глады хлебными. Надо всеми же сими и паче³⁷¹ егда бысть великаа рать татарьскаа, глаголемаа Федорчюкова Туралыкова, егда по ней за год един наста насилование³⁷², сиречь княжение великое досталося князю великому Ивану Даниловичю, купно же и досталося княжение ростовьское к Москве. Увы, увы, и тогда граду Ростову, паче же и князем их, яко отъася от них власть, и княжение, и имение, и честь, и слава, и вся прочаа потягну к Москве.

Егда изиде по великого князя [велению] и послан бысть от Москвы на Ростов акы некый воевода един от велмож, именем Василий, прозвище Кочева, и с нимъ Мина. И егда вънидоста в град Ростов, тогда възложиста велику нужу на градъ да и на вся живущаа в нем, и гонение много умножися. И не мало их от ростовецъ москвичем имениа своя с нуждею отдаваху, а сами противутого раны на телеси своем с укоризною възимающе и тщима рукама отхождаху. Иже последняго беденьства образ, яко не токмо имениа обнажени быша, но и раны на плоти своей подъяша, и язвы жалостно на себе носиша и претръпеша. И что подобаеть много глаголати? Толико дръзновение над Ростовом съдеяша, яко и самого того епарха градскаго, старейшаго болярина ростовьскаго, именем Аверкиа, стремглав обесиша, и възложиша на ня руце свои, и оставиша поругана. И бысть страх велик на всех слышащих и видящих сия, не токмо в граде Ростове, но и въ всех пределех его.

И таковыя ради нужа раб Божий Кирил въздвижеся из веси оноя предиреченныа Ростовьскыя; и събрася с всем домом своим, и с всем родом своим въздвижеся, и преселися от Ростова в Радонежь. И пришел, приселися близ церкви, нареченныа в имя святого Рожества Христова, еже и доныне стоить церковь та. И ту жиевяше с родом своим. Не един же сий, но с ним и инии мнози преселишася от Ростова в Радонеж. И быша преселници на земли чюждей, от них же есть Георгий, сын протопопов, с родом си, Иоанн, Феодор, Тормосов род, Дюдень, зять его, с родом си, Онисим, дядя его, иже последи бысть диакон. Онисима же глаголют с Протасием тысяцкым пришедша [въ] тую же весь, глаголемую Радонежь, ю же даде князь великы сынови своему мезиному князю Андрею. А наместника постави в ней Терентиа Ртища, и лготу люд ем многу дарова, и ослабу обещася тако же велику дати. Ея же ради льготы събрашяся мнози, яко же и Ростовьскыа ради нужа и злобы разбегошяся мнози.

Отрок же предобрый, предобраго родителя сын, о нем же беседа въспоминается, иже присно въспоминаемый подвижник, иже от родителей доброродных и благоверных произыде, добра бо корене добрая отрасль³⁷³ прорасте, добру кореню пръвообразуемую печять всячьскыи изъобраезуа. Из младых бо ногтей яко же сад благородный показася и яко плод благоплодный процвете, бысть отроча добролепно и благопотребно. По времени же възраста к лучшим паче преуспевающу ему, ему же житийскыа красоты ни в что же въменившу и всяко суетьство мирьское яко исметие поправшу, яко же рещи и то самое естество презрети, и преобидети, и преодолети, еже и Давидова в себе словеса начасте пошептавшу: «Каа полъза в крови моей, вънегда снити ми в истление?» Нощию же и денью не престааше молящи Бога, еже подвижным начатком ходатай есть спасениа. Прочаа же добродетели его како имам поведати: тихость, кротость, слова млъчание, смирение, безгневие, простота без пестроты? Любовь равну имеа ко всем человеком, никогда же к ярости себе, ни на претыкание, ни на обиду, ни на слабость, ни на смех; но аще и усклабитися хотящу ему, – нужа бо исему быти приключается, – но и то с целомудриемь зело и съ въздръжаниемь. Повсегда же сетуа хождаше, акы дряхловати съобразуася; боле же паче плачющи бяше, начасте сльзы от очию по ланитома точящи, плачевное и печалное жительство сим знаменающи. И Псалтырь в устех никогда же оскудеваше, въздръжаниемь присно красующися, дручению телесному выну радовашеся, худость ризную с усердием приемлющи. Пива же и меду никогда же вкушающи, ни к устом приносящи или обнюхающи. Постническое же житие от сего произволяющи, таковаа же вся не доволна еже к естеству въменяющи.

Сынове же Кириловы, Стефан и Петр, оженистася; третий же сын, блаженый уноша Варфоломей, не въсхоте женитися, но и зело желаше въ иночьское житие. О семь многажды моляшеся отцу своему, глаголя: «Ныне отпусти мя, владыко, по глаголу твоему, и по благословению твоему да идув иночьское житие». Родителие же его рекоста ему: «Чядо! Пожди мало и потръпи о наю: се бо в старости, и в скудости, и в болести есмы ныне, и несть кому послужити нама. Се бо братиа твоа Стефан и Петр оженистася и пекутся, како угодити женама; ты же не оженивыйся печешися, како угодити Богови – паче же благую чясть избрал еси, и яже не отъимется от тебе. Токмо послужи нама мало, да егда наю, родителя своа, проводиши до гроба, тогда и свою мысль сътвориши, Егда нас гробу предаси и землею погребеши, тогда и свое хотение исполниши».

Пречюдный же уноша с радостию обещася послужити има до живота ею и от того дни тщашеся по вся дни всячьскыи угодити родителема своима, яко да наследить от них молитву и благословение. И тако пребысть неколико время, служа и угаждаа родителема своима всею душою и чистою съвестию, донде же поестригостася в мнишескый чин, отъидоша кыйждо ею в своа времена въ монастыря своа. И мало поживша лет в черньчестве, преставистася от житиа сего, отъидоста к Богу, а сына своего, блаженаго уношу Варфоломеа, по вся дни многыми благословении благословяху и до последняго издыханиа. Блаженый же уноша проводив до гроба родителя своа, и пев над ними нагробныя песни, и скутав телеса ею, и целовав, с многою честию и предав гробу, и покрыв землею с слезами акы некое съкровище многоценное. И с сльзами почте отца и матерь умръша понахидами же и святыми литургиами, украси память родителю своею и молитвами, и милостынями къ убогым, и нищекръмием. И пребысть до 40 дний сице творя память родителема своима.

И отъиде въ дом свой, радуася душею же и сердцемь, акы некое съкровище многоценное приобрете, полно богатьства духовнаго. Сам же преподобный юноеша зело желаше мнишескаго житиа. Въшед в дом по преставлении родителю своею и начя упражнятися от житейскых печалей мира сего. Дом же и яже суть в дому потребныа вещи ни в что же въменивь си, поминаше же в сердци Писание, глаголющее, яко «многа въздыхания и уныния житие мира сего плъно есть». Пророк рече: «Изыдете от среды их, и отлучитеся, и нечистем мире не прикасайтеся». И другий пророк рече: «Отступите от земля и възыдете на небо». И Давид рече: «Прилпе душа моа въслед Тебе, мене же прият десница Твоа»; и пакы: «Се удалихся, бегаа, и въдворихся в пустыню, чаах Бога спасающаго мя». И Господь в Еуангелии рече: «Иже кто³⁷⁴ хощеть въслед Мене итьти, аще не отречеться всех, яже суть въ мире сем, не можеть быти Мой ученикъ». Сими утвръдив си душу и тело, и призва Петра, по плоти брата своего меншаго, оставляет ему отчее наследие и спроста вся, яже суть в дому его³⁷⁵ житейскым на потреебу. Сам же не възя себе ничто же, по божественому апостолу, рекшему: «Уметы вся въмених си, да Христа приобрящу».

Стефану же, по роду брату его старейшему, не много лет пожившу с женою, и жена его умре, родивши два сына: Климента да Иоанна, иже тот Иоанн последи бысть Феодор Симоновьскый. Стефан же не по мнозе оставль мир и бысть мних в монастыри Святыа Богородица у Покрова, иже на Хотькове. К нему же пришед блаженный уноша Варфоломей, моляше Стефана, дабы шель с ним на възыскание места пустыннаго. Стефан же, принужен быв словесы блаженнаго, и исшедша.

Обходиста по лесом многа места и последи приидоста на едино место пустыни, в чящах леса, имущи и воду. Обышедша же место то и възлюбиста е, паче же Богу наставляющу их. И сътвориша молитву, начаста своима рукама лес сещи, и на раму своею беръвна изнесоша на место. Прежде жесебе сътвориста одрину и хизину и покрыста ю, потом же келию едину създаста, и обложиста церквицу малу, и срубиста ю. И егда бысть съвръшено кончана церковь внеуду изготована, яко же бысть лепо уже время свящати ю, тогда блаженный уноша рече к Стефану: «Поне же брат ми еси старейший по роду и по плоти, паче же и по духу, и лепо ми есть имети тебе³⁷⁶ в отца место. И ныне несть ми кого въпросити о всем развие тебе. Паче же о сем молю тя и въпрашаю тя³⁷⁷: се уже церьковь поставлена и съвръшена всем, и время есть свящати ю; скажи ми, в которое имя будет праздник церкви сиа, и во имя котораго святого свящати ю?».

Отвещав же Стефан, рече ему: «Что мя въпрашаеши и въскую мя искушаеши и истязаеши? И сам веси мене не хужде, поне же отець и мати, наша родителие, коль краты възвестиша тебе пред нами глаголющи: «Блюди, блюди, чадо! И не наше еси чадо: но Божие дание: елма же Бог избра тебе, еще суща в утробе матерне носима, и прознамена о тебе и преже рожениа твоего, егда трикраты провъзгласил еси в всю церковь в время, егда поют святую литургию. Яко же и всем людем, стоащим ту и слышащим, в удивлении быти и ужасным почюдитися, глаголюще: «Что убо будет младенещь съй?». Но священници же и старци, святии мужие, ясно о тебе поразсудиша и протолковаша, глаголюще: «поне же о младенци сем троичное число изообразися, и сим прознаменуа, яко будет некогда ученик Святыа Троицы. И не токмо же сам единъ веровати начнет благочестно, но и ины многы приведет и научит веровати в Святую Троицу». Да лепо есть тебе свящати церковь сию паче всех во имя Святыа Троица. Не наше же се замышление, но Божие изволение, и прознаменание, и избрание, Богу тако изволшу. Буди имя Господне³⁷⁸ благословено в векы!» И сия изглаголавшу Стефану, блаженный же уноша въ^{379 е}здохнувъ от сердца и рече: «Въистину изглагола, господине мой. Се и мне любо есть, и аз того же хотех и смышлях. И желает душа моа еже съвръшити [и] свящати церковь в имя Святыа Троица. Но смирениа ради въпрашах тя; и се Господь Богъ не остави мене, и желание сердца моего дал ми, и хотениа моего не лишил мя».

И то рекша, и вьзяша и благословение, и священие от святителя. И приехаша из града от митрополита Феогноста священници, и привезоша с собою священие, и антимис, и мощи святых мученик, и прочаа, яже на потребу на освящение церкви. И тогда священа бысть церкви в имя Святыа Троица [отъ] преосвященнаго архиепископа Феогноста, митрополита Киевского и³⁸⁰ всеа Руси, при великом князи Симеоне Ивановиче; мню убо, еже рещи въ начало княжениа его. Въправду убо³⁸¹ церковь си наречена бысть в имя Святыа Троица: поне же поставлена бысть благодатию Бога Отца, и милостию Сына Божиа, и поспешением Святого Духа. Стефан же съвръшив церковь и свящав ю, и немного поживе в пустыни с братом си, и видя труд пустынный, житие скръбно, житие жестко, отвсюду теснота, отвсюду недостаткы, ни имущим ниоткуду ни ястьа, ни питиа, ни прочих, яже на потребу. Не бе бо ни прохода, ни приноса ниоткуду же; не бе бо окрест пустыня тоя близ тогда ни сель, ни дворов, ни людей, живущих в них; ни пути людскаго ниоткуду же, и не бе мимоходящаго, ни посещающаго, но округ места того с все страны все лес, все пустыня. Онь же видя сиа и стужив си, оставляет пустыню, купно же и брата своего приснаго, преподобнаго пустынолюбца и пустыножителя, и оттуду изиде на Москву.

И пришед въ град вселися в манастырь святого Богоявлениа, и обрете себе келию, и живяше в ней, зело подвизаася на добродетель: бяше бо и тот любяше жити трудолюбно, живый в келии своей житие жестьеко, постом и политвою, и от всего въздержаася, и пива не пиаше, и ризы не щапливы ношааше. Бяше же в та времена в том манастыри Алексий митрополит живяше, еще не поставлен в митрополиты, но чрьнеческое житие честно проходя пребываше. С ним же Стефан духовным житием оба купно живяста, но и въ церкви на клиросе оба, по ряду стоаще, пояху; тако же и Геронтий некто, нарочит и славен старец, в том же манастыри живяше. Уведав же князь великый Симеон яже о Стефане и добрем житии его, и повеле Феогносту митрополиту поставити его в прозвитеры, въ священничьскый сан, таче потом игуменьство ему приказати в том манастыри, и прия его в отечьство себе в духовничьство; тако же и Василий тысущник, и Феодор, брат его, и прочии боляре старейши купно вси по ряду.

Вседоблий же блаженный юноша верный, ижебе присны брат и единоматерен тому Стефану, аще бо и от единого отца родистася, аще и едино чрево изнесе ею, но не едино произволение ею. Не брата ли приснаа оба быста себе? Не единомыслием ли съгласистася, седоста на месте том? Не оба ли равно купно съвещастася сести в пустынице той? Како абие распрягостася другь от друга? Ов сице произволи, другый же инако; ов убо въ градстем монастыре подвизатися проразсуди, ов же и пустыню яко град сътвори.

Не зазрите же ми грубости моей, поне же и до зде писах и продлъжих слово о младеньстве его, и о детьстве его, и прочее о всем белецком житии его: и елико бо аще в миру пребываше, но душею и желаниемъ к Богу распалашеся. Показати же хощу почитающим и послушающим житиа его, каков был из млада и из детьства верою и чистым житиемь, и всеми добрыми делы украшен – сице деание и хожеение его еже в миру. Доброму сему и преудобреному отроку аще и в мирьстем устроении живущу ему тогда, но обаче Бог свыше призираше на него, посещаа его Своею благодатью, съблюдаа его и огражаа святыми аггелы Своими, и в всяком месте съхраняа его и всяком пути его, амо же колиждо хождааше. Бог бо есть сердцевидець, един съведый сердечнаа, единь сведый тайнаа, прозря будущаа яже о нем, яко имеаше в сердци многы добродетели и любви рачение, проведый, яко будет в нем съсуд избран по Его благому доброизволению, яко будет игуменъ множайшии братии и отець многым манастырем. Но тогда убо велми хотяше облещися в образ чрьнечьскый: зело желаше иноческаго житиа и постнаго и млъчаннаго пребываниа.

Сам же преподобный отець нашь тогда еще не бе приал аггельскаго образа, донеле же извыче вся монастырьскаадела: и чрънечьскыи устрои, и прочаа ключимаа, яже на потребу мнихом. И повсегда, по вся времена, с великым прилежаниемь, и с желанием, и с сльзами моляшеся Богу, дабы сподобитися аггельскому тому образу и причестися в иночьскый лик. И призвав к себе в прежереченную пустынку некоего старца духовна, чином священничьскым украшена, прозвитерьскою благодатию почтена, саном игумена суща, именем Митрофана. Ему же повелевает купно же и молит с смиренометанием, и к нему радостне прекланяет главу свою, в иноческая хотя от него облещися. И присно глаголя ему: «Отчь! Сътвори любовь, постризи мя в мнишескый чинь, зело бо хощу его от юности моеа от многа времени, но нужа родительскаа одръжаше мя. Ныне же от всех сих свободихся, и сице жадаю, ацем же образомь желает елень на источникы водныя; сице желает душа моа иночьскаго и пуестыннаго жительства»³⁸².

Игумен же незамедлено вниде в церковь и постриже и в аггельскый образ, месяца октовриа в 7 день, на память святых мученикь Сергиа и Вакха. И наречено бысть имя его в мнишеском чину Сергий: тако бо тогда нарицаху сплоха имена, не съ имени; но вън же день, аще котораго святого память прилучашеся, в то имя прорицаху постригающемуся имя. Бе же святый тогда възрастом 23 лета, егда прият иноческый образ³⁸³. Церковь же, ю же поминаю, ю же сам тъй Сергий създа и нарече ю в имя Святыя Троица, в той церкви прежереченный он игумен с пострижениемь купно тогда сверши и божественую литургию. Блаженный же Сергий, новопостриженый чрънець, яко съвершен бысть, тогда спричастник комканий святых таинь, пречистому телу и крови Господа нашего Исуса Христа, яко достоинь, сподобися таковыа святыня. И тако по святом причащении и, и в самом томь причащении въниде в нь и вселися благодать и дар СвятогоДуха. Откуду же се бысть ведомо? Прилучиша бо ся неции ту в то время, яко въистину яко неложнии свидетелие, яко егда Сергий причащься святых таин, тогда абие внезаапу исплънися вся церкви она благоуханиа: не токмо в церкви, но и окрест церкви обоняша воню благовонну. И вси видевше и очютивше и прославиша Бога, иже сице прославляющаго Своа угодникы.

Се бысть пръвый чрьнець в той церкви и в той пустыни пострижен. Пръвый начинаниемь, последний мудрованиемь, прьвыи чисменем, и последний же труды. А реку и пръвый, и последний: мнози бо в той церькви постригошася, но ни единь же доспе³⁸⁴ достигнути в прясло его; мнози тако же начаша, но не вси абие сице окончаша; мнози потом в том месте и при нем, и по нем иночьствоваша, поистине вси добри суть, но не вси сравнаются в меру его. Се бысть того места акы пръвый инок, началообразный трудоположник, всем прочимь мнихом образ бываа живущим ту. Егда бо постризашеся, не токмо постризает власы главы своеа, но въкупе с отъятиемь нечювьственых власовь и плотскаа съотрезует желаниа; а еже егда ризъ³⁸⁵ мирьскых съвлачашеся, въкупе отлагаше я. Се есть тъй, иже ветхаго человека съвлачашеся и отлагааше, а в новаго облечеся. И препоасаше крепко чресла своа, уготоваася в подвигы духовныа мужескы вънити, оставль мир и отречеся его и всех, яже суть в мире, имениа же и всех прочих житийскых вещей. И единою просто рещи и вся узы мирьскаго житиа растръзавь, – акы некы орел, легкыма крилома опрятавъся, акы къ въздуху на высоту възлетев, – тако и съй преподобный оставль миръ и яже суть в мире, отбеже всех прочих житейскых вещей, оставль род свой и вся ближникы и ужикы, дом же и отечество, по древнему патриарху Аврааему.

Пребысть же блаженный в церкьви седмь дний, ничто же въкушаа разве точию просфиру, оную же от рукы игумена взят, от всего упражняася, разве точию посту и молитве прилежаше. Давидьскую песнь всегда присно в устехъ имеяше, псаломскаа словеса, ими же самь тешашеся, ими же хваляше Бога. Молча поаше и благодаряше Бога, глаголя: «Господи! Възлюбих красоту дому Твоего и место вселениа славы Твоеа; дому Твоему подобает святыни Господ[н]и в длъготу дний. Коль възлюблена села Твоа, Господи сил! Желает и скончевается душа моа в дворы Господня; сердце мое и плоть моа възрадовастеся о Бозе живе. Ибо птица обрете себе храмину, и грълица гнездо себе, иде же положи птънца своа. Блажении живущии в дому Твоем; в векы веком въсхвалят Тя. Яко лучше есть день един в дворех Твоих паче тисущь; изволих привьметатися в дому Бога моего паче, нежели жити ми в селех грешничих».

е Егда же отпущаше игумена оного, иже постригшаго и, с мнозем смиреномудриемъ Сергий рече ему: «Се убо, отче, отходиши ты днесь еже от зде, а мене смиренаго, яко же и произволих, единого оставляеши. Но аз убо от многа времени и всею мыслью моею и желаниемь вжелах сего, еже³⁸⁶ жити ми единому в пустыни, без всякого человека. Издавна бо сего просих у Бога моляся, повсегда слыша и поминаа пророка, въпиюща и глаголюща: «Се удалихся, бегаа, и удворихъся в пустыни, чаах Бога, спасающаго мя от малодушиа и от буря. И сего ради услыша мя Бог и внят глас молитвы моеа. Благословен Бог, иже не оставит молитвы моеа и милости Своеа от Мене». И ныне о сем благодарю Бога сподобившаго мя по моему желанию, еже единому в пустыни сей жительствовати и единьствовати и безмольствовати. Ты же, отче, обаче ныне отходя еже отсюду, благослови мя убо смиреннаго и помолися о моем уединении, купно же и поучи мене, како жити ми единому в пустыни, како молитися Богу, како без вреда пребыти, како противитися врагу и гръдым его мыслем. Аз бо есмь новоукый, и новопосьтриженый и новоначалный инок, яко длъжен есмь съвъспрашатися с тобою».

Игумен же, акы в ужасе, удивляася отвеща: «Или мя, рече, въпрашаеши, его же ты не невеси нас не хуже, о честнаа главо! Обыкл бо еси нам присно сим образ смирениа показовати. Обаче ныне и аз реку, яко же лепо ми есть словесы молитвеными отвещати ти, сице глаголя: Господь Бог, иже преже избравый тя, сице да ущедрит тя, да вразумит тя, да научить тя и радости духовныа да исплънит тя». И мало нечто от духовных побеседова с ним, и уже отъити хотяше. Преподобный же Сергий поклонися ему до земля, рек: «Отче! Помолися о мъне к Богу, да ми поможет тръпети плотскыа брани, и бесовьскыа находы, и звериная устрьмлениа, и пустынныа труды». Игумен же отвещав, рече: «Глаголеть Павел апостол: «Благословен Господь³⁸⁷, иже не дасть нас³⁸⁸ чрес силу искушеным быти!» И пакы рече: «Все могу укрепляющему мя Богу». И абие отходя, предает его Богу и оставляет его в пустыни единого³⁸⁹ безмлъствовати и единьствовати.

Сергий же, отпущаа игумена, еще пакы прошаше от него благословениа и молитвы. Игумен же преподобному Сергию рече: «Се аз отхожю отсюду, а тебе оставляю Богу, иже не даст преподобному Своему видети истлениа, иже не дасть жезла грешных на жребий праведных, иже не дасть насъ³⁹⁰ в ловитву зубом их. Яко Господь любит праведника и не оставит преподобных Своих, но в векы съхранит а; Господь съхранит въхождение твое и исхождение твое отныне и до века, аминь». И то рек игумен, сътворив молитву и благословив его, отъиде от него, изыде, отнуду же и прииде.

Длъжно же есть и се уведети почитающим: колицех лет пострижеся преподобный. Боле двадесятий убо лет видимою връстою, боле же ста лет разумным остроумиемь; аще бо и млад сый възрастом телесным, но стар сый смыслом духовным исъвръшен Божественою благодатию. По ошествии же игуменове преподобный Сергий в пустыни упражняшеся, един живыи без всякого человека. И кто может сказати труды его, или кто доволенъ изглаголати подвигы его, како претръпе, един живый в пустыни? Несть како мощно нам сказати, с коликым трудом духовным и с многым попечением начинаше начало еже жити наедине, елика доволна времена и лета в лесе оном пустыннемь мужескы пребываше. Твръдейшая убо и святейшаа она душа, несуменно претръпе без приближениа всякого лица человечя, исправляа храняше устав правила иноческаго непорочно, непотъкновенно убо и незазорно.

Кый убо умъ или который язык желаниа, и началныа пръвыа теплоты, и любви того яже к Богу, о тайных добродетели его исправлениа, како доумееть, или может поведати, или писанию явлено предати еже того уединение, и дръезновение, и стенание, прошение и всегдашнее моление, еже присно къ Богу приношаше, сльзы тьплыа, плаканиа душевнаа, въздыханиа сердечнаа, бдениа повсенощнаа, пения трезвеннаа, молитвы непрестанныя, стоаниа неседалнаа, чтениа прилежнаа, коленопокланяниа частаа, алъканиа, жаданиа, на земли леганиа, нищета духовнаа, всего скудота, всего недостаткы: что помяни – того несть. К сим же и всем и бесовськыа рати, видимыа и невидимыа брани, борьбы, сплетениа, демоньскаа страхованиа, диавольскаа мечтаниа, пустыннаа страшилища, неначаемых бед ожидание, зверинаа натечениа и тех сверепаа устрьмлениа. И еще надо всеми сими и по сих еже нестрашьливу быти ему душею и небоязниву сердцем, ни же ужасатися умом къ таковым вражиамь кознем, и лютым прилогом же, и начинанием. Мнози бо тогда зверие чясто нахожаху на нь, не токмо в нощи, но и в дни; бяху жезверие – стада влъков, выюще и ревуще, иногда же и медведи. Преподобный же Сергий, аще и въмале устрашашеся, яко человек, но обаче молитву прилежно к Богу простираше, и тою паче въоружашеся, и тако милостию Божиею пребысть от них неврежен: зверие убо отхожаху от него, а пакости ему не единыа сътворше. Егда бо начинаше испръва състроитися место то, тогда преподобный Сергий многа озлоблениа и скръби претръпе от бесов же, и от зверий, и гад. Но ничто же от них не прикоснуся, ни вреди его: благодать бо Божиа съблюдаше его. И никто же да не дивится о сем, сведый поистине, яко Богу живущу въ человеце, и Духу Святому в нем почивающу, и вся ему покаряются, яко же древле Адаму пръвозданному преже преступлениа заповеди Господня; единаче же егда ему живущу единому в пустыни.

В един убо от дний преподобный Сергий в нощи въниде в церковь, хотя пети заутреенюу. И вънегда наченшу ему пение, внезаапу стена церковнаа разступися, и се диавол очивесть въниде с множеством вой бесовьскых, акы не въходяй дверми, яко тать и разбойник. Яви же ся ему сице: бяху в одежах и в шапках литовьскых островръхих: и устрьмишася на блаженнаго, хотяще разорити церковь и место из основаниа. А на блаженнаго зубы скрегчюще, и грозяще ему и устрашающе его, хотяще убити его, и глаголюще ему: «Избежи, изиди отсюду и к тому не живи зде, на месте сем: не бо мы наидохом на тя, но паче ты нашел еси на нас. Аще ли не избежиши отсюду, то растръгнем тя, и умреши в рукахъ наших, и к тому не жив будеши». Обычай бо есть диаволу и его гръдости: егда начнет на кого похвалятися или грозитися, тогда хощет и землю потребити, и море иссушити, а не имеа власти ни над свиниами. Преподобный же Сергий, въоружився молитвою еже къБогу, и нача глаголати: «Боже! Кто уподобиться Тебе? Не премлъчи, ни укроти, Боже! Яко се врази Твои въшумеша». И пакы рече: «Да въскреснеть Бог, и разыдуться врази Его, и да бежат от лица Его вси ненавидящеи Его. Яко исчезает дым, тако да исчезнут; яко тает въск от лица огню, тако да погибнут грешници от лица Божиа, а праведници възвеселятся». И тако Сергий именем Святыа Троица, имеа помощницу и заступницу Святую Богородицу, и в оружиа место имеа честный крестъ Христов, и порази диавола, акы Давид Голиада. И абие диавол с бесы своими невидими быша, и вси изчезоша, и безвести быша. Преподобный же велико благодарение принесе к Богу, избавльшему его от таковыа бесовьскыа крамолы.

Не по мнозех же днех, егда блаженный в хиже своей всенощную свою единъ беспрестани творяше молитву, вънезаапу бысть шум, и клопот, и мятеж мног, и смущение, и страх, не в сне, но на яве. И се беси мнозипакы наидоша на блаженнаго стадом бесчинно, въпиюще и с прещением глаголюще: «Отъиди, отъиди от места сего! Что ища пришел еси в пустыню сию? Что хощеши обрести на месте семь? Что требуеши, в лесе сем седя? Жити ли зде начинаеши? Въскую зде въдворяешися? Не надейся зде жити: не к тому бо можеши ни часа закоснети. Се бо есть, яко же и сам зриши, место пусто, место безгодно и не проходно, с все страны до людей далече, и никто же от человек не присещает зде. Не боиши ли ся, егда когда от глада умреши зде, или душегубци разбойници обретше, разбьют тя; се и зверие мнози плотоядци обретаються в пустыни сей, и влъци тяжции выюще, стадом происходят сюду. Но и беси мнози пакостять зле, и страшилища многа и вся грознаа проявляются зде, им же несть числа; елма же пусто есть отдавна место, купно же и непотребно. И каа потреба есть тебе, аще зде зверие нашедше снедят тебе, или некакою иною безгодною, безлепотною, напрасною умреши смрътию? Но без всякого пожданиа став, пробежи скорее еже от зде, никако же размышляа, ни сумняся, ни озираася въспять, семо и овамо, да не тебе еже от зде скорее проженемь или умертвим».

Преподобный же крепку веру, любовь, надежу Богу стяжав, и прилежну с сльзами молитву на врагы творяше, еже избавитися ему от таковаго бесовьскаго пронырьства. Благый же человеколюбець Бог, скорый на помощь, готов на милость, не остави раба Своего надлъзе ратоватися и намнозе напаствоватися; но елико, мню, скорее часа посла милость Свою, яко да врази убо, бесове, отсюду посрамятся, и от сего познают Божию помощь, и свою немощь. Преподобный же, тверъдый душею, иже видимо и невидимо присно съ³⁹¹ бесы борыйся, победитель бесовом да явится, абие же въскореБожественнаа тогда некаа внезаапу того осени сила, и лукавыа духы наскоре разгна крепко, и до конца без вести сътвори я, и преподобнаго утеши, и Божественаго некоего исплъни веселиа, и услади сердце его сладостию духовною. Онь же абие упознав скорую помощь, и милость, и благодать Божию уразумев, благодарныа хвалы Богу възъсылаше, глаголя: «Благодарю тя, Господи, и яко не оставил мя еси, но скоро услышав помиловал мя еси. Сътвори с мною знамение в благо, и да видят ненавидящеи мя, и постыдятся, яко Ты, Господи, поможеши ми и утешил мя еси. Десница Твоа, Господи, прославися в крепости, деснаа рука Твоа, Господи, съкруши врагы наша, бесы, и дръжавою крепости Твоеа до конца тех погуби».

Се же да смышляеться и разсужает всяк, кто ум имеай, яко дело се быти лукаваго диавола и начало злобнаго, и зломудреца, и злоначинателя. Хотяше бо диавол прогнати преподобнаго Сергиа от мееста того, завидя спасению нашему, купьно же и бояся, да некако пустое то место въздвигнет Божиею благодатию, и монастырь възградит възмогь своим терпениемь, и еже от себе тщаниемь же и прилежанием, яко некую весь наплънит, или яко некую населит селитву, и яко некый възградит градець, обитель священную и вселение мнихом съделает в славословие и непрестанное пение Богу. Яко же и бысть благодатию Христовою, и еже и видим днесь: не токмо бо сий великый монастырь, яко лавра иже в Радонеже състави, но и прочаа другыа монастыря различныа постави и в них мнихь множьство съвокупи по отечьскому же обычаю и преданию.

По временех же доволных диавол победився с блаженным в различных привидениих, всуе тружався купно с бесы своими: аще и многаа различнаа мечтаниа³⁹² наведе, но обаче ни в ужасть може въврещи твръдаго оного душею и храбраго подвижника. Паче же потом по различных мечтаниих и гръзных привидениих преподобный Сергий храбрей въоружашеся и оплъчяшеся на бесы, дръзаа взираше, уповаа на Божию помощь; и тако, Божиею благодатию съхраняем, без вреда пребысть. Овогда убо демоньскаа кознодейства и страхованиа, иногда же зверинаа устрьмлениа, мнози бо зверие, яко же речеся, в тъй пустыни тогда обретахуся. Овы стадом выюще, ревуще прохождааху, а друзии же не в мнозе, но или два или трие, или един по единому мимо течаху; овии же отдалече, а друзии близъ блаженнаго приближахуся и окружаху его, яко и нюхающе его.

И от них же един зверь, рекомый аркуда, еже сказается медведь, иже повсегда обыче приходити к преподобному. Се же видев преподобный, яко не злобы ради приходит к нему зверь, но паче да возметь от брашна мало нечто в пищу себе, и изношаше ему от хижа своеамал укрух хлеба и полагаше ему или на пень, или на колоду, яко да пришед по обычаю зверь, и яко готову себе обрет пищу; и възем усты своими и отхожаше. Аще ли когда не доставшу хлебу, и пришед по обычаю зверь не обретъ обычнаго своего урочнаго укруха, тогда длъго время не отхожаше. Но стояше възираа семо и овамо, ожидаа, акы некый злый длъжник, хотя въсприати длъгь свой. Аще ли прилучашеся единому обрестися укруху, то нужа бысть преподобному и то пределити на две чясти, да едину убо себе оставит, а другую звереви оному предложит: не имеяше бо тогда в пустыни Сергий у себя различных брашен, разве точию хлебъ един и воду от источника сущаго ту, и то же по оскуду. Многажды же и хлебу дневъному не обрестися; и егда сему бываему, тогда оба абие пребываста алчюща, сам же и зверь. Иногда же блаеженный себе не угажаше и сам алчен бываше: аще и единь кус хлеба обреташе у него, и то пред зверем онем пометаше. И изволи, сам не вкушая³⁹³ в тъй день, алкати паче, нежели зверя оного оскорбити и не ядша отпустити. Не единою же, ни дважды зверь он приходити обыче, но по многа времена на кыйждо день, акы множае году сие творяше.

Блаженный же вся приключившаася искусы с радостию тръпяше, в всех благодаряше Бога, а не стужаше си, ни унываше в скръбех. Елма же стяжаше разум и великую веру к Богу, ею же възможе вся стрелы неприазнены раждеженыа угасити, ею же възможе низложити всяко възвышение высящееся на разум Божий, и яже от демон прилог прилучающихся да не убоится. Писано бо есть: «Праведный яко лев уповаа ходить, и на все дръзает веры ради, не яко искушаа Бога, но паче надеася на нь: «Надеющейся на Господа, яко гора Сион, не подевижется в векы». Надеа же ся въистину яко на Господа тверда, яко же и сьй блаженный, яко некы храбор воин и яко крепкый оружник, въоружен и облъченъ³⁹⁴ в силу Духа, да яко же убо всегдашнее имать попечение к Богу, по толику же и Бог о нем речет: «С ним есмь в скръби; изму и и прославлю и. Длъготу дней исполню его и явлю ему спасение Мое». Слабый же убо и ленивый въ делех своих таковаго упованиа не может имети; но иже с Богом непрестанно пребываа в всех исправлениих своих, и приближаася Ему доброт ради дел своих, и протязаа блюдение своего сердца благости Его, нескудно и неуклонно, яко же Давид пророк рече: «Исчезоста очи мои уповающу ми на Бога моего».

Таковое упование имеа преподобный Сергий, и с таковым дръзновениемь дръзну вънити в пустыню сию, единь единьствовати и безмльствовати, иже и божественыа сладости безмолвиавъкусив, и тоа отступити и оставити не хотяше. И звериных устремлений, и бесовьскых мечтаний не боашеся, яко же есть писано: «Не убоишися от страха нощнаго, от стрелы, летящаа в дне, от вещи, в тме преходящаа, от сряща и беса полуденьнаго и полунощнаго». Противу же пустынному страхованию молитвою въоружашеся, яко же въ Лествице речеся: «В них же, – рече, – местех устрашаешися, не ленися без молитвы проходити, но молитвою въоружися, и руце распростер, Исусовым именем бий ратникы. Аще бо на молитву въскоре въскочив, помолится с нами тогда пришедый благый наш аггелъ³⁹⁵ хранитель».

И тако преподобный възвръзе на Господа печаль свою, и взложи на Бога упование свое, и Вышняго положи в прибежище свое, пребысть от страха бе[с] страха, и бес пакости, и без вреда. Бог бо благый человеколюбець, иже скорое и твердое утешениедаруа рабом Своим, иже всегда щадя и съхраняа угодника Своего, яко же Святое глаголеть Писание: «Яко аггеломь своим заповесть съхранити [тя]». Сице и зде посла Бог милость Свою и благодать Свою в помощь ему, еже съхранити его от всякаго обистоаниа, видимаго же и невидимаго. Преподобный же видя, яко покрывает его Богь Своею благодатию, и денью, и нощию прославляше Бога и благодарныа хвалы възъсылаше Богу, не оставляющему же зла грешных на жръбий праведных, иже не дасть нас чрес силу искушеном быти. Начасте же святую прочиташе книгу, яко да оттуду всяку приплодит добродетель, съкровенными мысльми подвизаа ум свой на въжеление вечных благ и в наслажение обещанных благых съкровищь. И еже пакы дивнее, яко же никто же того жестокое³⁹⁶ добродетелное житиа тайное ведаше, точию то единь Бог, иже тайнаа зря, и таейных испытатель, и неявленаа пред очами имеа тем еже безмлъвнаго и безмятежнаго житиа желаниа лишаемь бывает. Но оно убо възлюблено быти мняшеся ему, еже наедине единому Богу частыа и прилежныа, и тайныа приносити молитвы, и Богу единому събеседовати, и Превышнему вездесущему въжеленми присвоитися, и к Тому единому приближатися, и еже от Него благодатию просвещатися, и сицевыми тому упражняющуся мысльми, яко да благоприатен будет еже о сих подвиг его и без зазора; и сего ради на кыйждо день тепле обнощеваше, частыа к Богу молитвы въсылаа повсегда. Бог же молениа его николи же не презре, яко благосердие имеа множество щедрот, не навыче бо презирати молениа боащихся Его и творящих волю Его. По временех же неколицех, сиречь пребывшу ему в пустыни единому единьствовавшу, или две лете, или боле, или менши, не веде – Богъ весть.

И по сих видя Бог великую веру его и многое тръпение его, умилосердися на нь, хотя облегчити труды его пустынныа; вложи в сердце некоторым от братиа мнихом богобоязнивым, и начаху приходити к нему. Се же бысть строениемь и промышлением всесилнаго милосердаго Господа Бога, яко хощет не единому Сергию жити в пустыни сей, но множайшии братии, яко же рече Павел апостол: «Не ищи своеа пльзы единого, но многых, да ся спасуть». Или рещи, яко хощеть Бог въздвигнути место то, и пустыню ту претворити, и ту монастырь устроити, и множайшим братиамь събратися. Богу тако изволшу, начаша посещати его мниси, испръва единь по единому, потом же овогда два, овогда же трие. И моляху преподобнаго, припадающе и глаголюще: «Отче, приими нас, хощем с тобою на месте сем жити и душа своя спасти».

И преподобный же не токмо не приимаше их, но и възбраняше им, глаголя: «Яко не можете жити на месте сем и не можете тръпети труда пустыннаго: алканиа, жаданиа, скръби, тесноты и скудости, и недостатковъ». Они же реша: «Хощем тръпети труды места сего, да аще Бог подасть, то и можем». Преподобный же пакы въпроси а, глаголя: «Можете ли тръпети труды места сего: глад, и жажду, и всякиа недостаткы?» Они же реша: «Ей, честный отче, хощем и можем, Богу помагающу нам, и молитвамь твоим споспешьствующим намь. Токмо о сем молим твое преподобьство: не отлучи нас от лица твоего и от места сего любезнаго не отжени нас».

Преподобный же Сергий видев веру их и усрьдие, и удивлься им и рече им: «Аз не изьждену вас, поне же Спас наш глаголаше, яко: «Грядущаго ко Мне не [и]жьждену вънъ»; и пакы рече: «Иде же суть два или трие съвокуплениво имя Мое, ту есмь Аз посреде их». И Давид рече: «Се коль добро и коль красно еже жити братии въкупе». Аз бо, братие, хотель есмь единь жити в пустыни сей и тако скончатися на месте сем. Аще ли сице изволшу Богу, и аще угодно Ему будет, еже быти на месте семь монастырю и множайши братии, да будет воля Господня! Аз же вас с радостию приемлю, токмо потъщитеся създати себе комуждо свою келию. Но буди вы сведома: аще в пустыню сию жити приидосте, аще с мною на месте сем пребывати хощете, аще работати Богу пришли есте, приготовайтеся тръпети скръби, беды, печали, всяку тугу, и нужю, и недостатькы, и нестяжание, и неспание. И аще работати Богу изволисте и приидосте, отселе уготовайте сердца ваша не на пищу, ни на питие, ни на покой, не на беспечалие, но на тръпение, еже трьпети всяко искушеение, и всяку тугу и печаль. И приготовайтеся на труды, и на пощениа, и на подвигы духовныа³⁹⁷ и на многы скорби: «Многыми бо скорбьми подобает нам вънити в царство небесное»; «Узок путь и прискорбен есть, въводяй в жизнь вечную, и мало их есть, иже обретают его»; «Нужно бо есть царьство небесное, и нужници въсхыщают е»; «Мнози³⁹⁸ суть звани, мало же изъбранных». Мало бо есть спасающихся, темь и мало есть избранное стадо Христово, о нем же в Еуангелии рече Господь: «Не бойся, малое Мое стадо! О нем же изволил есть Отець Мой дати вам царьство небесное». Сиа блаженному Сергию изглаголавшу к ним, они же с радостию и с усердиемь обещашася, глаголюще: «Вся повеленая тобою творим и ни в чем же не преслушаемся тебе».

И създаша себе кыйждо свою келию и живяху о Бозе, смотряще житиа преподобнаго Сергиа и тому по силе равнообразующеся. Преподобный же Сергий, живый с братиами, многы труды претръпеваеше, и великы подвиги и поты посьтничьскаго житиа творяше. Жестоко же постное житие живяше; бяху же добродетели его сице: алкание, жадание, бдение, сухоядение, на земли легание, чистота телеснаа и душевнаа, устнама млъчание, плотьскаго хотениа извест[н]ое умръщвение, труди телеснии, смирение нелицемерное, молитва непрестающиа, разсужение доброразсудное, любовь съвръшенаа, худость ризънаа, память смрътнаа, кротость с тихостию, страх Божий непрестанный. «Зачало бо премудрости страх Господень»; яко же зачало цвет ягодам и всякому овощу, сице зачало есть всякой добродетели страх Божий. Онь же страх Божий в себе въдружив, и темь ограждься³⁹⁹, и закону Господню поучаася день и нощь, яко древо плодовито, насаждено при исходищих водьных, иже во свое время дасть плод свой.

И поне же младу ему сущу икрепку плотию, – бяше бо силен бывь телом, могый за два человека, – диавол же похотными стрелами хотя уязвити его. Преподобный же, очютивь брань вражию, удръжа си тело и поработи е, обуздавь постом; и тако благодатию Божиею избавлен бысть. Научи бо ся на бесовьскиа брани въоружатися: яко же бесове греховною стрелою устрелити хотяху, противу тех преподобный чистотными стрелами стреляше, стреляющих на мраце правыа сердцемь.

Сице живый с братиами, аще и не поставлен бысть в прозвитеры, но велми с ними пристоаше церькви Божии. И по вся дни пояше с братиями в церкви и полунощницу, и заутренюю, и часове, и третий, и шестый, и девятый, и вечерню, и нефимон, по реченному: «Седмижды днем хвалих Тя о судбах правды Твоея». Промежю сих частыа молбены, на то бо упразднишася, еже безпрестани молити Бога, и в церкви, и в келиах, по Павлу глаголющу: «Не престающе молитеся Богу». А на обедню призываше некоего чюжаго⁴⁰⁰, попа суща саном или игумена сътарца, и того приимаше и повелеваше ему творити святую литургию: сам Сергий испръва не хотяше поставлениа презвитерьска или игуменьства приати многаго ради и конечнаго смирениа. Имеаше бо въ себе кротость многу и велико истинное смирение, о всем всегда подражаа своего владыку Господа нашего Исуса Христа, подавшаго ся на подражание хотящим подражати Его и последовати Ему, рекшему: «Приидете ко Мне, вси тружающеися и обременении, Аз покою вы. Възмете иго Мое на ся, и научитеся от Мене: яко кроток есмь и смирен сердцемь». И таковаго ради смирениа Сергий не хотяше поставлениа поповьства или игуменьства възяти: глаголаше бо присно, яко зачало и корень есть санолюбиа еже хотети игуменьства.

Събравъшимь же ся мнихом незело множайшим, но яко чисменемь до двою на десяте: от них же бе един старець Василий, рекомый Сухи, иже бе в пръвых от страны пришедый от връх Дубны; ин же от них, именем Иаков, рекомый Якута – сий бе в чину образом яко посолник, его же колиждо отсылаху на службу, яко зело на нужную потребу, без нея же не мощно обрестися; другому же Онисим имя, иже бе диакон, диаконов отець Иелисеа глаголемаго. Келиамь же зиждемым и тыном ограженым, не зело пространнейшим, но и вратаря сущих ту у врат пристави⁴⁰¹, от них же сам Сергий трие или четыре келии сам своима рукама създа. Но и прочаа вся монастырьская делеса, яже братиамь на потребу, служаше: ово дрова на раму своею от леса ношаше, и яко же по келиам раздробляа и растесаа, разношаше, на полена разсекаа. Но что въспоминаю яже о дровех? Дивно бо поистине бе тогда у них бываемо видеети: не сущу от них далече лесу, яко же ныне нами зримо, но иде же келиам зиждемым стоати поставленым, ту же над ними и древеса яко осеняющи обретахуся, шумяще стоаху. Окресть же церкви часто колоды и пение повсюду обреташеся, уду же и различнаа сеахуся семена, яко на устроение окладным зелиемь. Но възратимся пакы на предиреченную беседу, яже о подвизе преподобнаго Сергиа, како без лености братиамь яко купленый раб служаше: и дрова на всех, яко же речеся, сечаше; и тлъкущи жито, в жръновех меляше, и хлебы печаше, и вариво варяше, и прочее брашно яже братиамь на потребу устрааше; обувь же и порты краяше и шиаше; и от источника, сущаго ту, воду в двою водоносу почръпаа на своем си раме на гору възношаше и комуждо у келий поставляше.

В нощи же на молитве без сна пребываше; хлебом и водою точию пиеташеся, и того по оскуду приимаше; и николи же ни часа празден пребываше. И сице удручи си тело многим въздръжаниемь и великыми труды. В нем же и плотскаа двизаниа бес пошествиа сътворяше, и пакы большаа подвигы на подвигы прилагаше, и печашеся о пребывании места того, яко дабы токмо благоприатен быль труд его. И елико же деаше, псаломь в устех его всегда беаше, еже рече: «Предзрех Господа предо мною выну, яко одесную мене есть; да ся не подвижу». Сице же ему пребывающу в молитвах и в трудех, плоть истни си и иссуши, желаа быти горняго града гражанин и вышняго Иерусалима жителин.

По лете же единем прежереченный игумен, иже постриже блаженнаго Сергиа, разболеся, и неколико время поболев, от сего житиа преставися и к Господу отъиде. Преподобный же Сергий печяловашеся зело, и моляшеся Богу, и молитву прилежну осем въсылаше, яко дабы Богь даль игумена, месту тому наставника, отца же и правителя, могуща правити корабль душевный всемирныа жизни к пристанищу спасениа от влънь потоплениа, от злых духов. И сице ему молящуся кь Богу и просящу игумена и⁴⁰² истиннаго строителя месту тому, Бог услыша молитву угодника Своего и моление его приат, да не Давида лжуща покажет, рекшаго: «Волю боащихся Его сътворит, и молитву их услышит, и спасет ихъ». Хощет дати самого просителя просивъшаго игумена, праваго правителя; да поскольку же Сергий просиль, по толику же и приа, и обрете, и приобрете в правду праваго правителя, могущаго управити место то. Не себе же самого точию просиль, но иного некоего, его же Бог дасть; Бог же, яко провидець, проведый будущаа и хотя въздвигнути и устроити место то и прославити, иного лучша того не обрете, но тоечию того самого просившаго даруеть, ведый, яко может таковое управление управити в славу имени Его святаго.

Како же и кыим образом случися быти начало Сергиева игуменьства? Въложи Богь в сердце братиам его, како бы въздвигнути его на началное начальство. Въниде же некое размышлние в братию его; и сшедшеся преже сами промежи собою, съвет сътвориша ти; тако верою утвердившеся, вси въкупе приидоша к преподобному Сергию, глаголюще: «Отче! Не можем жити без игумена! Ныне же приидохом к тебе явити мысли наша и хотениа: зело желаем того, дабы был нам ты игумен и наставник душам и телом нашим, да быхом ходили к тебе с покааниемь, исповедающе грехи своа; да быхом от тебе прощение, и благословение, и молитву по вся дни приимали и видели тебе по вся дни съвръшающа святую литургию; да быхом колиждо от честную руку твоею причащаелися пречистых таин. Ей, честный отче, сего желаем от тебе, токмо не отрицайся».

Преподобный же Сергий въздохнув из глубины душа и рече им: «Аз и помышлениа не имех еже хотети игуменьства, но тако желаеть душа моа и⁴⁰³ скончатися и в чрънецех на месте сем. Вы же не принужайте мя, но оставите мя Богу, и тъй, яко же въсхощет, и сътворит о мне». Они же реша: «Мы и, отче, желаем того, дабы нам был ты игумен, ты же отрицаешися. Мы же речем ти: или сам буди игумен, или шед спроси нам игумена у святителя. Аще ли не тако, то таковыа ради нужа разидемся вси от места сего». Преподобный же Сергий пакы⁴⁰⁴ постонав от сердца, рече имь: «Ныне убо разидемся кийждо в свою келию, и вси помолимся Богу прилежно о сем, да явит и открыет нам, что подобает творити». Они же разидошася кождо в свою келию.

По днех же неколицех пакы приидоша братиа к преподобному Сергию, глаголюще: «Поне же мы, отче, снидохомся на место сие, слышавше еже от тебе начаткы добраго подвизаниа твоего и церковнаго основаниа, яже своима рукама съвръшил еси. Имущи благодать Святыа Троица, к той прибегохом, на ню же надежю и упование наше все възложихом твоим руковожением, отселе ты намь буди и отец и игумен. И будеши предстоа престолу Святыа Троица, серафимскую трисвятую песнь въсылаа к Богу, и безкровную съвръшаа служьбу, и своима рукама да подаси нам пречистаго тела и божественыа крове Господа нашего Исуса Христа, и препокоив старость нашу, гробу предаси ны». Сергию же отцу на мнозе отрицающуюся и не хотящу, моля их, утешаа глаголаше: «Простите мя, отци мои и господие мои! Кто есмь аз, смеай таковаа дръзнути, их же с страхом и ужастию аггели не могуть достигнути? Како же недостойный аз дръз явлюся, ни же успев в таковую меру? Аз начатькамнишьскаго устава и житиа никако же достигнух; како смеа сиа святыня приступити или коснутися? А бых могл своих грехов плакатися, и вашею молитвою оного блага достигнути, краа желаннаго, его же въжелех от юности моеа». И сиа, и множайшаа сих к ним извещав, отъиде в келию свою.

Блазии же они старци по днех пакы пришедша, начаша беседовати к нему, глаголюще предреченныа глаголы, и множае тех, и реша: «Мы, отче духовный, пря никоеа же имамы с тобою: Богу наставльшу нас, к тебе снидохомся на место се, и твоему житию и благонравию подобитися въжелахом, и будущих благ наслаждениа сподобитися надеахомся. Аще же ты не хощеши пещися нашими душами и пастух словесным овцам не хощеши нам быти, мы убо отходим от места сего и от храма Святыа Троица и от обета нашего неволею отпадаем. И заблудим, акы овьца не имущи пастуха, в горы преезорьства и распутиа; злым мыслем предавшеся, съкрушени будем мысленым зверем, сиречь диаволом. Ты же ответ въздаси пред необиновенным судиею вседръжителем Богом». Се же глаголаша ему братиа, прещениемь претяще и грозами грозяще: много бо преже, по многы дни молиша его, нудяше ово смирениемь, ово же тихостию и ласканиемь, иногда же прещением и жестокыми словесы претяху, жалующеся. Онь же, крепкый душею, твръдый верою, смиреный умом, ни ласканию повинуся, ни прещениа боашеся, но выше прещениа мужь обретеся.

Егда же много нудиша его братиа на игуменьство, онь же смиреномудр сый, не хотя того приати, ни же еже издетьства съвъзрастъшее ему богоподражанное смирение оставити не хотя. Таковое тех моление отрясе, грешна суща себе глаголя и недостойна, прирек и се: «Яко мои глаголи не согласуют вашимьсловесем, поне же вы убо излише принужаете мя на игуменьство, аз же излише отрицаюся. Елма же аз убо сам хощу учениа требовати паче и учитися, нежели иных поучати: аз убо сам желаю от инех обладаем быти паче, нежели иными обладати и начальствовати. Бою же ся суда Божиа; еда како будет се Богу тако любо, яко же вы повелеваете ми, воля Господня да будет!» Обаче побежен бывь от своего милованнаго братолюбия и от своего усердиа и тщивьства, едва повинуся тех молению. И посули быти прошению их и повинуся воле их быти, паче же рещи, воле Божии быти. И тако по сих всех преподобный Сергий въстенав из глубины сердца, и всю мысль, и упование възложивь к вседръжителю Богу, рече к ним в смирении душа: «Отци и братиа! Аз супротив вам ничто же глаголю, воли Господни предавшися: Тот бо весть сердца и утробы. Идем в град к епископу». Миетрополиту же Алексию всеа Руси тогда бывшу ему в Цариграде, в граде же Переяславли повеле быти в свое место епископу Афонасию Велыньскому. К нему же прииде⁴⁰⁵ преподобный отець нашь Сергий, поим с собою два старца, и вшед сътвори поклонение пред епископомь. Епископ же Афанасий, видев и, благослови его и въпроси имени его. Он же Сергий именем себе поведа. Афанасий же слышав, рад бысть, о Христе целование дасть ему: преже бо бяше слышал яже о нем, начятъкы добраго подвизания его, и церкви възъгражения, и монастырю основаниа, и вся благоугодныа детели, яже к братии любы с прилежаниемь, и многыа добрыя детели⁴⁰⁶. И побеседова с ним духовно; и егда скончаста беседу, и абие сътвори поклонение пред епископом.

Блаженый отець нашь Сергий начат молити святителя, прося игумена, дабы дал наставника душамь их. Преподобный же Афанасий, исплънь сый Святого Духа, рече: «Възлюбленне! Бог СвятымДухом усты Давидовы рече: «Изведу избраннаго от людий Моих»; и пакы: «Ибо рука Моа поможет ему, и мышца Моа укрепит и». Апостоль же Павел рече: «Никто же приемлет ни чти, ни сану, токмо възванный от Бога». Тебе же, сыну и брате, Бог възвавый от утробы матере твоея, яже и от многых слышах о тебе, да будеши отселе ты отець и игумен братии, Богомь събраней в обители Святыа Троица». Преподобному же Сергиу отрицающуся и недостоиньство излагающу, испол[ън]ь же сый благодати Святого Духа, Афанасий рече к нему: «Възлюбленне! Вся стяжаль еси, а послушаниа не имаши». Отець же нашь Сергий поклонься и рече: Яко Господеви годе, тако и буди; благословен Господь в векы!» И всем рекшимь: «Аминь».

Абие же святый епископь Афанасий повеле клириком вънити в святый олтарь; сам же поем блаженнаго Сергиа, потщався въниде в святую церковь. И облечеся въ священныа ризы, и поим блаженнаго Сергиа, повеле изглаголати емуизложение образ святыа веры, еже есть: «Верую в единого Бога». И по скончании того, Сергию главу поклоньшу, святитель же знамена и крестаобразно, и сътворь молитву сановную, и постави его иподьдиаконом, та же и диаконом, и съвръши божественую литургию, и въкупе причастишася божественаго тела и крове Господа нашего Исуса Христа. Наутриа же съвръши его иерейскым саном и пакы повеле ему сътворити святую литургию и своима ему рукама принести безкровную жрътву. Преподобный же отець Сергий вся повеленаа ему с страхом и радостию духовьною съвръши.

Епископ же Афанасий особь поим его, и правила апостольскаа, и отечьскаа учениа, яже суть на строение и исправлению душевному, и беседова к нему: «Длъжно ти есть, възлюбленне, по апостолу, «немощи немощных носити, а не себе угажати. Но на съграждение кождо ближнему да угаждаеть». И пакы к Тимофею посыелает, глаголя: «Сиа предаждь верным человекомь, иже достижни будут и иных научити». Еще же: «Другь другу тяжести носите, и тако скончаете закон Христовъ». Сиа исправив, и сам спасешися, и сущаа с тобою». И сиа рек, духовными даръми учредив его, и о Христе целование дасть ему, и отпусти его въистину игумена, и пастуха, и стража, и врача духовней братии.

Сице не кроме нрава боголюбива бысть се, ни же кроме Божиа промысла се съключися; яко не о себе игуменьство взя, но от Бога поручено бысть ему начальство. Не бо наскакывал на се, ни же превъсхыщаль пред некым, ни посулов сулил от сего, ни мъзды давал, яко же творят неции санолюбци суще, другь пред другом скачюще, врътящеся и прехватающе, не разумеюще Писания, глаголющаго: «Ни хотящему, ни текущему, но милующему Богу, от Него же всяко даание благо, всяк дар совръшен свыше есть, сходя от Бога, Отца светом». Яко да зде Божиа плъка въеводьство вручено будет ему, иде же убо толико множьство инок, акы воиньства духовьныа храбры, общему всех Владыце привести хотяще. И поне же чистоты ради житиа его достоин бысть таковыя благодати, достоин бысть предстательству, пастырь пастве; стаду словесных овець и священному монастырю началникъ явися, Бог бо произведе угодника Своего на игуменьство.

Пришед же преподобный отець нашь игумен Сергий в свой ему манастырь, в обитель Святыа Троица. Братиа же усретше его и поклоньшася ему до земля пред ним, радостию испльнишася. Он же, вшед в церковь, паде лицемь на земли, с сльзами молитву творяше к невидимому царю, възираше на икону Святыа Троица, на помощь призываше Святую Богородицу, служителя же престолу его небесныа сила Предтечюи мудрыа апостолы, сь сими же началныя святителя – Василиа Великого, и Богослова Григориа и Златаустаго Иоанна и вся святыа. Их же молитвами просить от десница Вседръжителя, дабы дал несуменно смение у престола славы стати Живоначалныа Троица и коснутися рукама агньца Божиа, за мир заколенаго Христа, Сына Божиа.

И начат блаженый сице к братии глаголати Господем реченая: «Подвизайтеся, братиа, внити узъкыми враты; «нужно бо есть царьство небесное, и нужници въсхищают е». Павел же к галатом глаголеть: «Плод духовный есть любы, радость, мир, тръпение, благоверие, кротость, въздержание». Давид рече: «Приидете, чада, послушайте мене: страху Господню научю вы». И благослови братию, рек к ним: «Молите, братие, о мне: грубости бо и неразумиа исплънень есмь. Таланът приах Вышняго царя, о нем же и слово отдати ми есть о пастве пещися словесных овец. Боязни устрашаютмя, слово, Господемь реченое: «Иже аще съблазнит единого от малых сих, полезно быти ему дабы жръновъ ослий обязан о выи его и ввръжен в море». Колми паче иже многы душа погрузит в своем неразумии! Или возмогу дръзновенно глаголати: се аз и дети, яже ми дал еси, Господи! И услышу ли сий божественный глас гръним и нижним пасьтыря, великаго Господа, благосръдне вещающа: «Благий рабе, верне! Въниди в радость Господа своего».

И сиа рек, помышляше в уме жития великых светил, иже в плоти живущеи на земли аггельскы пожиша, реку Антониа Великаго, и Великаго Еуфимиа, Саву Освященнаго, Пахомиа аггеловиднаго, Феодосиа общежителя и прочихь. Сих житию и ньравом удивляася блаженный, како, плотяни суще, бесплотныа врагы победиша, аггелом съжители быша, диаволу страшьнии. Им же цари и человеци удивльшеся, к нимь приристаху, болящеи разлиечными недугы исцелеваху, и в бедах теплии избавители, и от смръти скории заступници, на путех и на мори нетруднии шественици, недостатьствующим обилнии предстатели, нищим кръмители, вдовам и сиротам неистощаемое съкровище, по божественому апостолу: «Акы ничто же имуще, все съдръжаще». Сих житиа на сердци [имеа], блаженный моляшеся к Святей Троици, дабы невъзвратно шесътвовати по стопам сих преподобных отець.

Божественую на всяк день служаше литоргию, утреняа же и вечерняа молитвы не трудно славословяше и о смирении всего мира, и о благостоании святых церквий, и о православных царих, и князех⁴⁰⁷, и о всех православных христианех. Глагола к братиамь: «Подвиг немалъ длъжно ны есть подвизатися на невидимаго врага: съй бо акы лев рыкаа ходит, ища когождо хотя поглотити». Мала же некаа словесы глаголаше, наказаа братию, мноежайшаа же паче делесы сам образ бываше братии.

Кто достигнет поистине исповедати добродетелнаго житиа его, благодати цветущи в души его? Болми въоружашеся на спротивныа силы, силою възмогаем Святыя Троица. Многажды же диавол хотя устрашити его, овогда же зверми, овогда же змиами претваряшеся. И очивесть или в келии, или егда в лесе блаженный⁴⁰⁸ дровца збираше на потребу манастырьскую, внезаапу враг многообразною злою покушашеся поне мысль ему съвратити от молитвы и от добродетелных трудовъ его. Богоносный же отець нашъ⁴⁰⁹ Сергие вся неприазненаа его мечтаниа и козни акы дым разганяа и акы паучину претръзаше, силою крестною въоружаем, еуангельское слово на сердце полагаа, Господем реченнаа: «С дах вам⁴¹⁰ власть наступати на змиа и на скорпиа и на всю силу вражию». В начало же игуменьства его, беаше братиа числом два на десяете мних кроме самого игумена, третиаго на десяте. Сь же число – двое на десятное обретъшееся в них, сице живяху тогда и по два лета, и по три, ни же боле сего умножашеся, ни же менше сего умаляхуся. И аще ли когда един от них или умрет, или изыдет от обители, то пакы другый на его место братъ прибудет, да не число истощимо обрящется. Но единаче⁴¹¹ в едином числе двои на десятнем бяху пребывающе, яко некоторым от сего глаголати: «Что убо будет сь? Или повсегда двема на десяте мнихом быти в месте сем, по числу 12 апостол, яко же есть писано: «Призва Господь ученикы Своа, и избра от них 12, яже и апостолы нарече»; или по числу двою на десяте колен Израилев; или будет по числу 12 источник вод, или по числу избранных камений драгых 12, бывших на ризахъ архиерейскых по чину Аароню». И сице имь пребывающем, донде же прииде к ним Симон, архимандрит смоленский, и тъй разрушить число двое на десятное;и оттоле братиа множахуся от того дни боле, и уже числяхуся множайшим числом паче, нежели двое на десятным.

Елма же о реченем Симоне въмале помянухом, и не ленюся пакы поведати о нем пространнее, его же память не утаися, и беседа яже о нем яве его творит, и добродетели его мало пошедше напреди явьствуются.

Сей убо дивный мужь Симон бяше архимандрит старейши, славный, нарочитый, паче же рещи добродетелный, живый в граде Смоленьске. И оттуду слышав яже о житии преподобнаго отца нашего Сергиа и ражьжегъся душею и сердцемь: оставляет архимандритию, оставляет честь и славу, оставляет славный град Смоленеск, вкупе же с ним оставляет отечьство и другы, ужикы, ближникы, и вся знаемыа и сръдоболя; и въсприемлет смирениа образ, и произволяеть странничьствовати. И оттуду въздвижеся,от таковыа от далняа страны земля, от Смоленьска, в Московьскыа пределы, еже есть в Радонежь. Прииде в монастырь к преподобному отцу нашему игумену Сергию, и съ мнозем смирением моляше его, дабы его приал жити у него под крепкою рукою его в повиновании и в послушании. Еще же и имение принесе с собою и предасть то игумену на строение монастырю. Преподобный же Сергий приат его с радостию. Симон же по много лет поживе в покорении и в послушании, паче же в странничьстве и в смирении, и всеми добродетельми исплънен, и в старости добре преставися к Богу. Игумен же Сергий проводи его до гроба и с братиами погребе его чьстно. И тако бысть вечьнаа ему память.

Стефан же, присный⁴¹² брат Сергиев, прииде от граеа от⁴¹³ Москвы, ведый с собою сына своего именем Иоанна меньшаго. И въше в церковь, им за руку десную сынасвоего, предасть его игумену Сергию, веля его пострищи в иночьскый образ. Игумен же Сергий постриже его и нарече имя ему в мнишеском чину Феодор. Старци же видевше, удивишяся вере Стефанове, яко тако не пощаде сына своего, отрочати суща, но из младеньства предасть его Богу, яко же древле Авраам не пощаде сына своего Исаака. Феодор же от млад ноготь въспитан бысть в постничьстве, и в всем благочестии, и в чистоте, яко же научися от своего дяди, всеми доброизволении мнишескыми исплънен и украшен, донде же постиже възрастом в меру мужа съвръшена. Неции же реша яко десяти лет пострижен бысть, и инии же двою на десяте лет; прочаа же его деания инде напишутся, яко убо иного времени подобно требующа слово. Нам же над предлежащее слово возвратитися, да не прекращение нынешней повести внесем.

Мнози же убо от различных градов и от стран приешедше к нему и живяху с ним, их же имена в книгах животных. И тако помалу монастырь распространяшеся, братиамъ умножающимся, келиам зиждемым. Преподобный же Сергий, видя братию умножающуся, умножаше и тъй труды к трудом, образ бываа стаду своему, яко же рече апостол Петр:⁴¹⁴ «Пасете стадо, сущее в вас, не нужею, но волею, не яко обладающе братиею, но образ бываю ще стаду». И пакы писано есть в книгах отечьскых, рекше в Патерице: «Съшедшеся святии отци, пророчьствоваху о последнем роду и реша, яко последний род будеть слабъ». Сергиа сего же Бог укрепи себе в последнем роду, яко единъ от древних святых отец. Бог устрои его трудоделника, инок множеству наставника, множайшей братии игумена и вожа.

И пакы откуду кто начаался сего, еже бо место то было прежде лес, чаща, пустыни, иде же живяху зайци, лисици, волци, иногда же и медведи поседаху, другойциже и беси обретахуся, туда же ныне церковь поставлена бысть, и монастырь велик възгражен бысть, и инокъ множество съвокупися, и славословие и в церкви, и в келиах, и молитва непрестающиа к Богу? Всему же тому начяло и вина – преподобный отець нашъ Сергий. И уведайте, яко удиви Господь преподобнаго Своего. А отнеле же поставлен бысть в игуменьство, по вся дни святаа литоргиа бываше, просфиры же сам печаше: преже бо пшеницу тлъчаше и меляше, и муку сеаше, и тесто месяше и квасяше. Ти тако испекши просфиры, служаше Богу от своих праведных трудов, иному не дааше никому, аще и зело хотяху мнози от братиа пещи просфиры. Но преподобный тщащеся быти учитель и делатель: и кутию сам варяше, и свечи скаше, и каноны творяше.

Преподобъный же отець наш игумен⁴¹⁵ Сергий аще и приял игуменьство старейшиньства, но обаче не измени правила своего чрьнечьскаго, на памяти имея рекшаго:"Иже кто в вас хощет быти старейши, да буди всех менши и всем слуга». На то учение Спасово възираше, смиряше себе, и менши всех творяшеся, и собою образ всем творя, и на дело преже всих исходя, и на церковное пение преже всех обреташеся, и никако же на стену въсклоняася; и оттоле уцветяше место то, и множахуся братиа.

Обычай же в начало игуменьства своего сицев имеаше: еже всякому приходящему к нему и хотящему быти мниху, и желающему острищися, не отреваше убо никого же, ни стара, ни уна, ни богата, ни убога; но всех приимаше с усръдиемь и с радостию. Но не ту абие постризаше его, но преже повелеваше ему облещися в свиту длъгу еже от сукна черна и в ней преходити с братиами время доволно, донде же извыкняше весь устрой монастырьскы. Таче по сих облачяшет и въ мнишескую одежю, акы в всех службах искушена; и остригоблачит и в манатию и клобук. А егда будяше съвръшен чрънець, житием чистым искусен сый, и таковаго сподобляет приати святую схиму.

Елма же убо по еже в начале игуменьства его, внегда преподобному Сергию просиати въ месте своем, в монастыре зовомем «иже в Радонеже», вънегда имени его обносиму быти всюду, по странам же и градом, – весть бо добродетель явьлена сътворити стяжавшаго ю не менши, паче нежели свеща носящаго ю, – тогда мнози от христолюбець любве ради Божиа издалеча прихожаху к нему; и жития суету оставляюще, и под благий ярем Господень своа выа подлагаху. Поне же повсегда тому ученици прилагахуся: призываху бо еже оного благодатей источници добродетельныа душа, яко еленя словесныа, желающе воды духовныа.

Имеаше же обычай блаженный сице испръва: еже по павечернице поздо и долго вечера, акы сущу глубоко нощию, паче же вътемныа и длъгыа нощи, сътворивъ молитву в келии своей, и по молитве исхожаше ис келиа своеа, еже обходити ему вся келиа мниховы. Имея попечение о братии своей, не токмо телесы их промышляше, но и о душах их печашеся, уведати хотя коегождо житие их или желание к Богу. И аще кого услышаше или молитву творяща, или поклоны кладуща, или рукоделие свое с безмолвием и с молитвою творяща, или святыа книгы почитающа, или о гресех своих плачущася и сетующа, о сих убо радовашеся, и Бога благодаряше, и за них Бога моляше, дабы до конца съвръшили доброе свое предложение. «Претръпевый бо, – рече,⁴¹⁶-до конца-той спасеться».

Егда же ли кого слышаше беседующа, два или трие съшедшеся въкупе, или смехы тъкуща, о сем убо негодоваше, и зело не тръпя таковыа⁴¹⁷ вещи, рукою своею ударяше в двери, или в оконце потлъкав, отхожаше. Сим образом назнаменав тем свое к нимприхожение и посещение, и несведомым накиновениемь праздныа беседы их разоряше. Таче наутриа в настоащий день призываше к себе: и не ту абие скоро запрещаше им, и не с яросътию обличаше я и наказаше а, но яко издалеча с тихостию и кротостию, акы притчами наводя, глаголаше им, хотя уведати тщание и усръдие их еже к Богу. И аще будяше брат покрълив, и смирен, и тепл на веру и на любовь Божию, то въскоре, упознав свою вину, съ смирениемь пад поклоняшеся ему, прощениа приати прося от него. Аще ли пакы⁴¹⁸ будяше брат непокорлив, омрачением бесовьскым сердце покровено имея, стоаше мня, яко не о нем глаголеть, сам чист ся творя, донде же преподобный с длъготръпениемь обличаше его, по реченному: «Покажет мя праведник милостию своею, обли[чи]т мя». А непокорливаго брата епитемиею облагаше, акы не познавша на себе своеа вины еже непщевати вины о гресех; и сиеце того, еже к исправлению утвръдивь, отпустяше. И тако всех учаше еже прилежно молити к Богу, и не беседовати ни с кым же по павечерней молитве, и не преходити комуждо от своеа келиа без великиа нужныа потребныа вещи по чюжим келиам, но въ своей келии комуждо в тайне молити Бога наедине и свое рукоделие, яко же рука его может, делати по силе, по вся дни псалмы Давидовы присно в устех своих повсегда имуще.

Поне же убо испръва, егда начинашеся строити место то, тогда многы недостаткы бываху; лишение всех потребных последняго ради нестяжаниа и конечняа деля пустоты, еже не имети им ниоткуду же всякого утешениа, но и прочия всякыя⁴¹⁹ нужныа потребы, откуду бо имети хотяху кое любо потребование. Елма же пусто бяше место то, и не бе тогда окрестъ места того ни сел близ, ни дворов. Помнога же времена и пути пространьнаго не бяше к месту тому, но некоею узкою и прискръбною тесною стезею, акы беспутием, нужахуся приходити к ним. Великый же и широкый путь вселюдскый⁴²⁰ отдалече, не приближаася места того, ведяшеся; окрест же манастыря того все пусто, с вся страны лесове, всюду пустыня: пустыни бо в ресноту нарицашеся. И сице жившим им донде же исплънишяся дние лет, яко, мню, множае пяти на десяти.

Пакы же по днех, непщую яко в днех княжениа князя великого Ивана, сына Иваня, брата же Симионя, тогда начяша приходити христиане, и объходити сквозе вся лесы оны, и възлюбиша жити ту. И множьство людий въсхотевше, начаша с обаполы места того садитися, и начаша сещи лесы оны, яко никому же възбраняющу им. И сътвориша себе различныа многыа починци, преждереченную исказиша пустыню и не пощадеша,и сътвориша пустыню яко поля чиста многа, яко же и ныне нами зрима суть. И съставиша села и дворы многы, и насеаша села, и сътвориша плод житен, и умножишяся зело, и начаша посещати и учащати в монастырь, приносяще многообразнаа и многоразличнаа потребованиа, им же несть числа. Но мы до зде сию речь оставльше, а на предреченную беседу обратимься, еже от начатка слова начах поведовати: о всяцей худости и о недостатцех нужных потреб, без них же не мощно обрестися.

Егда испръва начинашеся създаватися место то, егда немножайшим братиам живущим въ нем, егда немнози бяху приходящеи и приносящеи, тогда начасте скудости бывааху потребных, яко многажды на утриа и хлебу не обрестися. Да кто может и сказати недостаткы, бывшаа преподобному отцу нашему Сергию? Испръва, егда начинашеся строитися место то, овогда убо не достало хлеба, и мукы,и пшеници, и всякого жита; иногда же не достало масла, и соли, и всякого ястиа брашеннаго; овогда же не достало вина, им же обедня служити, и фемиану, им же кадити; иногда же не достало воску, им же свещи скати, и поаху в нощи заутренюю, не имущи свещь, но токмо лучиною березовою или съсновою светяху себе, и тем нужахуся канонархати или по книгам чести, и сице съвръшаху нощныа службы своа. Преподобный же Сергий всяку нужю ону, и тесноту, и всяку скудость, и недостаткы тръпяше с благодарением, ожидаа от Бога богатыа милости.

И случися въ иное время сицево искушение, поне же с искушением бывает и милость Божиа: некогда не достало бысть хлеба и соли у игумена, но и в всем манастыри бысть оскудение всех брашен. Бяше же заповедь преподобнаго игумена к всем братиам сицева: аще когда съключиться таковое искушение, или хлеба не достанет, или будет оскудение всякого брашъена, то не исходити того ради из монастыря в весь некую или в село и не просити у мирян потребных телесных, но седити тръпеливе в монастыре, и просити, и ожидати милости от Бога. Да яко же братиамь веляше и заповедаше, сице паче и сам сиа же творяше и терпяше, и пребысть три дний или четыре не ядущи ничто же.

Минувшим же трем днем, а четвертому наставающу и свитающу, взем секиру прииде к единому от старец, живущему в монастыри его, ему же имя Данил, и рече ему: «Слышах, старче, яко хощеши сени създати пред келиею си. И аз того ради приидох, да руце мои не празъднуета, и съзиждю я тебе». Отвеща Данил и рече ему: «Ей, зело хощу и имам издавна таковаа приготованиа, но ожидаю древодели от села. Тебе чинити боюся, егда како велику мъзду възмеши от Мене». Рече же ему Сергий: «Аз не зело велика възданиа требую от тебе, но имаши ли гнилыа хлебы, зело бо хоетением въсхоте ми ся ясти таковыа хлебы. Иного же боле сего ничто же не требую, ни прошу от тебе мздовъздааниа: у мене николи же обретаються таковии хлеби. А не глаголи, старче, еже ожидати тебе иного древодели мимо мене; и кто есть тебе ин сице древодель, яко же аз?» Старец же Даниль изнесе ему решето хлебов гнилых, скрилев, глаголя: «Аще сицевыа въсхотеся тебе вещи той, и се с тщанием въздаю ти; боле же сего не имам». Отвеща Сергий: «Досыти ми есть и се, и довлеет ми сие преизлише. Но обаче снабди я до девятаго часа, аз бо преже даже руце мои не поработасте и преже труда мъзды не приемлю».

И то рек, препоаса чресла своа крепко и нача делати и тесати от утра до вечера. И дьскы вся истеса, тако же и столъбы издолбе и поставль, Богу помагающу ему, сени съгради до вечера и съвръши я. Позде же сущи, яко в вечернюю годину, Данил старец пакы изнесе ему решето хлеебов уреченных, цена мъзды его, еже руце его поработаста. Сергий же приим сиа, и предложи а пред собою, и сътворь молитву благословися, и начя ясти с водою токмо, а не бе варива, ни соли, ни влагы; и обое съвокупя и обед, и вечерю ядяше. И некоторым от братиа видяшеся от уст его яко дым мал исходящ, егда таковыа ядяше хлебы. И тогда друг другу преклоншеся, глаголаху: «Воле, братие, колико есть тръпение мужа сего и въздръжание его! Яко пребысть четыре дни ничто же не ядый и на четвертый сущу позде гнилым хлебом алкоту свою утешаше и уставляше; и то же не даром хлеб гнилый, но драгою ценою прекупив, ядяше».

Некоторый же от мних поропта един брат тогда на Сергиа: не ядоша бо и по два дни. И оскорбишася, не имуще что въкусити, и приидоша к нему, и пред ним поимы и поносы творяху, глаголюще: «Плесневии хлебии! Еще ли нам в мир не исходити просити хлеба? Се убо на тя смотрихом, яко же учил ны еси; и се тебе слушающе ныне уже ищезаем от глада. Того ради утро рано изыдем от места сего камо кождо потребных ради. Да не пакы възвратимся семо, уже не могуще к тому тръпети бываемых недостатков и скудости зде». Не вси же пороптаху, но некоторый брат един от них.

Его же ради и всю братию съзва; виде бо я ослабевша и оскръбившихся, преподобный Сергий малодушие их своим длъготръпением, и кроткым обычаем, и тихостию исправити хотя. Учаше я от Святых Писаний, от Ветхаго и Новаго Завета, глаголя: «Въскую прискръбни есте, братие? Въскую смущаетеся? Уповайте на Бога; писано бо есть: «Възрите на пръвыя роды и видите: кто упова на Бога – постыдеся когда? Или кто верова Господеви – и посрамлен бысть? Или кто пребыв в страсе Его – оставлен бысть? Или кто призвавый Его – не услышан и презрен бысть от Него?» Глаголеть бо Господь: «Не Аз ли есмь податель пищам,и житныа плоды износя, и житница наплъняа, и кръмитель всему миру, и питатель вселенныа, даай пищу всякой плоти, даай пищу им в благо время, отвръзаа руку Свою, насыщаа всяко животно благоволениа?» И в Еуангелии Господь рече: «Ищете и просите преже царствиа Божиа и правды Его, и сиа вся приложатся вам. Възрите на птица небесныа, яко ни сеють, ни жнут, ни збирают в житница, но Отець небесный кормить а: не паче ли вас, маловерии? Тръпети убо, тръпениа бо потреба есть: в тръпении вашем стяжите душа ваша; претръпевый бо до конца и спасется». И вы ныне глада ради оскръбистеся, еже на мало время на искушение вам съключающеся. Но аще претръпите с верою и со благодарением, то на пльзу вам будет искушение то и на болший прибыток обрящеться: поне же благодать Божиа всем бываеть не без искушениа, яко же в Лествице речеся: «Без искуса злато не съвръшается; по скръби же радости начаемся, поеследует бо скръбным радостная: вечер бо, – рече, – въдвориться плачь, а заутра радость». И вы убо ныне оскудение хлеба имате, и недостаток всякого брашна днесь имате, а заутра умножение брашенъ всех потребных и всякого обилиа ястьа и питиа насладитеся. Тако бо верую, яко не оставит Бог места сего и живущих в нем».

И еще сему глаголющу, и се неции внезаапу⁴²¹ потлъкаша во врата. Вратарь же скоро приникнув скважнею, и виде, яко принесено бысть множьство брашен потребных; и от радости и врат не отвръзе, бе бо приалчен. И обратися с тщанием скоро рища, притече къ преподобному Сергию, поведа ему и глаголя: «Отче! Благослови и принес – шаа хлебы! Яко молитвами твоими обретеся множьство брашен потребных, и се предстоат при вратех». Преподобный же повеле, глаголя: «Скоро отвръзите врата, яко да внидут внутрь». И сему бывшу, видеша привезенное в монастырь брашно на колеснице и в вретищи. И прославиша Бога, давшаго имтаковую пищу и вечерю странну, готову сущу на земли, яко да накръмить а и душа алчющаа насытить препитати а в день глада.

Преподобный же Сергий повеле мнихом си призвати на ядь привезших ядь, прирек им сице: «Вы сами алъчни суще, насытите сытых до сытости, накръмите кормящих вас, напитайте питающих вы, и учредите, и почтите: достойни бо суть учрежениа и почитаниа». И сам не преже въкуси принесенаго ему готоваго брашна, аще и зело алчен сый, но преже повеле бити в било, и вниде с братиами в церковь петь молебен, и велико благодарение и благохваление въсылаше к Богу, не оставляющему надлъзе раб Своих, терпящих Его ради. И исшед из церкви, седе с братиами на трапезе, пред ними же и предложени быша хлеби оны, новопринесеныа и новопеченыа. Преподобный же въставъ сътвори молитву, и благослови, и преломль, и разделив, вдасть чрънцем своим; и ядоша вси, и насытишяся,и прославиша Бога, тако напитавшаго а. Бяху же хлеби оны тепли суще и мякъци, яко обычай есть новопеченым быти. Сладость же вкушениа их странна некако и незнаема являшеся, и яко медвеною некоею сладостию⁴²² испълнены, уподоблены и преудобрены, и яко с маслом семянным устроени суще и преухыщрени, и яко некоторая в них зелиа растворенна благоухана, сладость постную, яко мнети, и от сего имети являюще. И яко же древле израильтяном некогда в пустыни манна от Бога посылаема бяше, о них же рече Давид пророк: «И одожди им манну ясти и хлеб небесный дасть им. Хлеб аггельскый яде человек, брашно посла им до обилиа, и ядоша, и насытишяся зело». И яко не деланнаа в ресноту пища познавашеся засылаема.

И се показа Бог преподобному Сергию плод тръпения и въздръжания его, еже претръпе по четыре дни. Пострада алчя и жажда, поскольку с гладом боряся, тръпяше Бога ради, яко жерече пророк Давид: «Тръпение убогых не погыбнет до конца; труды плод своих снеси; блажен еси добро тебе будет». За хлебы оны гнилыа таковое сладкое Бог засылаше ему брашно: вместо гнилых не гнилыя, но новопеченыа, сладкыа, благоуханныа, въ тленных место нетленныя, земных благ наслажение. И то же точию еще в настоащем веце, а в будущем веце в земныхъ место небеснаа, в временных место вечных благ наслажение, яко же рече апостол: «Их же око не виде, и ухо не слыша, и на сердце человеку не взыде, яже уготова Бог любящим Его и хранящим заповеди Его». Не точию Сергию единому, но и всякому, иже от всеа душа възлюбившему Бога, и творящему волю Его, и хранящим заповеди Его въздание много.

Ядущим же им, рече преподобный: «Где есть онсица брат, иже преже ропща, рече, плесневии хлебии?» Да видит ныне и да разумеет въистину, яко не суть плесневи, но и зело сладци и мякци. А не ли помяну пророка, глаголюща:"Зане пепел яко хлеб ядях и питие мое с плачем растворяхъ». Потом же възысканию бывшу, чии суть хлебы, и где есть принесеныя, и кто есть пославый. И съзирахуся промежи собою, истязающеся и съвъспрошающеся мниси. И никто же удобь можаше извест[н]о уразумети бываемаго, донде же преподобный въпроси я, глаголя: «Не рехь ли вам: призовите а ясти и припровадившаа нам хлебы оны, то где суть ныне? Како не обретошяся в начале ядуща с нами?» Они же реша: «Мы убо по словеси твоему звахом я и о хлебех въпросихом а, глаголюще: «Чии суть хлеби, яже семо послашася с вами?». Послани же реша: «Онъсица христолюбец богат зело, живый в далних странах, посла на имя Сергиево со иже с ним живущими братиами». Пакы же мниси, по повелению Сергиеву, на обед позваша а. Они же не рачиша, но тъщахуся инамо шествие сотворити; и тако изидоша от очию их. Се же бысть дивно, яко тогда мниси не уведаша, ниразумеша, кто есть привезый хлебы оны, кто ли есть пославый я. Токмо пришедше к игумену, дивляхуся, глаголюще: «Отче! Како пшеничнии хлебии с маслом и с зелиемъ утворени суть, тепли, а не от близ привезени суще?» На другий же день такожде множество потребных привезено бысть в монастырь, и ястиа, и питиа. Пакы же на третий день, от иноа страны, по тому же образу привезено бысть, яко же преди сказахом.

Игумен же Сергий сиа видев и слышав, с всеми братиами прослави Бога, глаголя: «Видите ли, братие, како ти промышленик всех Бог не оставит места сего, ни же оставляет раб Своих съиночьствующих, живущих на месте сем, работающих Ему день и нощь и тръпящих с верою и съ благодарениемь?». Поминаше же братиам старець оно слово, еже от Павла апостола реченное: «Имуще пищу и одеждю, сими доволни будем», «а ничем же пещися неполезными, но паче уповати и възирати к Богу, могуещему кръмити нас, и одевати, и о всем промышляти нами, и от Него⁴²³ ожидати потребных добрых и полезных душам и телом нашим. И молим Бога, да Тъй промышляет нами, наипаче надеемся на Нь присно; иже бо древле израильтескыа люди, таковыя жестокыа и непокоривыа, толикыа тысуща в пустыни, та же и последи не мало множество препитавый до сытости: «Одожди имъ манну ясти и хлеб небесный дасть им. Хлеб аггельскый яде человек, просиша, и приидоша крастели, и одожди на ня, яко прах, плоти и, яко песок морьскый, и птица прънатыа; и ядоша и насытишяся зело». Сам ныне Тъй нами будет промышляай: ни же бо силою неморщнейши ныне, ни же о еже промышляти ленивейши бысть, но яко же преже древле, тако и ныне нам всегда мощен есть пищу подаати».

Оттоле же убо мниси навыкоша прочее не стужати си в скръби и в тесноте, елижды аще когда случится каа теснота,или скудость, или недостаткы потребных. Но все тръпяху с усръдиемь и с верою, надеющеися на Господа Бога, залог имуще преподобнаго отца нашего Сергиа.

Глаголаху неции от здешних старець о преподобном Сергии, яко риза нова никогда же възыде на тело его, ни же от сукон немецкыхъ красовидных, цветотворных, или от синеты, или от багрянородных, или от бурявы, или от прочих многообразных различных шаровидных цветов, или белообразно, или гладостно и мягко: «Мягкаа бо, – рече, – носящеи в домех царевых суть». Но токмо от сукна проста, иже от сермяги, от влас и от влъны овчаа спрядено и истъкано, и то же просто, и не цветно, и не светло, и не щапливо, но токмо видну шръстку, иже от сукна ризу ношаше, ветошну же, и многошвену, и неомовену, и уруднену, и многа пота исплънену, иногда же другойци якои заплаты имущу.

Есть же егда и сице слушачеся: единою убо обретеся у них сукьно едино⁴²⁴ злотворно, и неустройно, и некошъно, яко и пелесовато, его же и вся братиа негодующе и гнушахуся его и отвращахуся. Но ово убо един брат вземь сие, и мало подръжав и, пакы възращаше и покидаше; тако же и другий, и третий, даже и до седмаго. Преподобный же не отвратися, но с тщаниемь взем сие, благословив, и крааше, и шияше, и сътвори рясу, в ню же не възгнушася облещися. И не рачи съвлещи еа и пометнути ю, но паче изволи с благодарениемъ на теле своем износити ю, донде же по лете едином, обетщав и издрася и распадеся. Да от сея вещи разумети, колико и каково рачительство имеаше смиреномудриа ради, еже проходити в нищетне образе.

Бяху бо порты на нем обычныя зело худостны, еже по вся дни ношаше, яко аще бы некто не видавый его и отинудь не знаа его, таче аще узрит его негде в таковей суща одеежди, то не мнит его самого того игумена быти Сергиа. Но мнит его, яко единого от чрьнец, яко нища, и убога, и странна, и яко работника, всяку работающа работу. И единою просто рещи: толикы бе худостны порты ношаше, яко хуже и пуще всех черньцев своих, яко некоим от сего омекнутися, не знающим его, и облазнитися; еже и бысть, еже и мнози подъяша и пострадаша, от них же вам единого поселянина явлена сътворити покушуся.

Внегда зело слуху житиа преподобнаго сего⁴²⁵ распространяющуся, тогда мнози от человек, иже от различных град и стран посещающе его прихожаху, желающе поне токмо видети его, и елици видевшии его възвращахуся въсвоаси и другь другу поведающе яже о нем, дивляхуся. Сиа слышав единь от них некто человек, христианин, поселянин, чином орачь, земледелець, живый на селе своем, орый плугом своим и от своего труда питаася, пребываше от далече сущихъ мест, иже от многажелания и слышания въсхоте видети его. Въ един убо от дней упразднився, и прииде в монастырь его, иже преже николи же видав его. В то же время прилучися преподобному на лыскаре тружающуся, в ограде копати землю на устроение некоего ограднаго ради зелиа. Прилежне же пришедшему земледелцу оному еже видети его, ищущу и глаголющу: «Кто есть Сергий, и где есть чюдъный и славный онъ муж, о нем же аз слышу таковаа? И како хощет ми показан быти?». И коегождо от братий опытуя, въпрашаше и моляше, да ему укажут искомаго. Они же поведаша ему: «В ограде есть, и един уединяася, копает землю. Да мало потръпи, донде же изидет». Он же от многа желания не дождав, но приникъ скважнею, виде блаженнаго в худостне портище, зело раздране и многошвене, и в поте лица тружающася. Отинудь не мняше того быти желаемаго, его же ищет, и никако же не верова того быти, о нем же слыеша. Пакы прилежаше братиам, стужая и глаголя: «Да что ради не укажете ми его, к нему же издалеча поклонитися приидох и дело велико имам к нему?» Они же реша: «Се показахом ти его, его же и виделъ еси скважнею. Аще ли не веруеши, то узриши его пакы». Он же единаче не имяше веры, но при дверех пребываше, акы неоткуду ждый его.

Егда же преподобный изыде от дела делания своего и от ограда монастыри обретеся, тогда мниси скоро указаша ему, глаголюще: «Се тот есть, его же вжелел еси видети». Он же земледелец отврати лице свое от блаженнаго, и начят смеятися и гнушатися его, глаголя: «Аз пророка видети приидох, вы же ми сироту указасте. Издалеча пришествовах ползоватися начаахся, и в плъзы место тщету си приях. Аще и в честенъ монастырь приидох, но ни ту плъзы обретох⁴²⁶: вы убо поглумистеся мною, мните мя яко изъумевшася. Аз свята мужа Сергиа, яко же слышах, тако и надеахся видети егов мнозе чти, и славе, и в величьстве. Ныне же сего, иже вами указаннаго ми, ничто же вижю на нем, чти же, и величьства, и славы, ни порт красных, ни многоценных, ни отрок, предстоащих ему, ни слуг скоро рищущих, ни множьства раб, служащих или чьсть въздающих ему; но все худостно, все нищетно, все сиротиньско. И мню, яко не тот есть». Се же глаголаше к мнихом поселянинъ он, глаголемый земледелец, и в правду рещи поселянин, акы невежа сый и не смотряй внутрьнима очима, но внешнима, не ведый книжнаго писаниа, яко же премудрый Сирах рече: «Человекь смотрить в лице, а Бог зрить в сердце». Сий же внешняа обзираше, а не⁴²⁷ внутреняа, но⁴²⁸ и телеснааго устроениа худость ризную блаженаго видев, и страду земную работающа, и добродетель старчю и нищету укаряше, никако же верова того быти, о нем же слыша. В помысле же его бяше некое⁴²⁹ неверьство, помышляшебо в себе глаголя: «Не мощно таковому мужу, честну и славну, в нищете и худости быти, его же в мнозе величьстве, в чти же и в славе слухом преже услышах».

Братиа же игумену реша: «Не смеем рещи и боимся тебе, честный отче, а гостя твоего отслали быхом отсюду акы безделна и бесчьстна, поне же невежда бе и поселянин: ни тебе поклонится, ни чти достойныа въздасть, а нас укаряет и не слушает, акы лжуща мнит нас. Хощеши ли убо да ижьженем его?». Божий же человекь Сергий, възрев на братию, видев их смутившихся, и рече: «Никако же, братие, не сътворите сего, не бо к вам, но на мое имя пришел есть. И что труды деете ему? Дело бо добро съдела о мне, и аз вины не обретаю в нем. Аще ли вы обретаете в нем вину, слышите Павла апостола глаголющеа: «Аще человек впадает в некоторое прегрешение, вы, духовни, съвръшайте таковаго духомь кротькым»; и подобает таковыа смирением и тихостию исправляти». И то рек, недождав от него прежде поклонениа, но сам прежде предварив, приступль на целование земледелче, с тщанием же и спешаше. И с великым смирением поклонися ему до земля, и с многою любовию о Христе целование дасть ему, и благословив, велми похваляше поселянина, яко сице о нем разсудивша. От сеа убо вещи разумети есть, коль велико смирение внутрьуду имеаше в себе Сергий, иже таковаго поселянина невеждю суща, иже негодующа и гнушающася его, излише паче възлюби его: яко же бо гръдии честем и хвалам радуются, тако и смиреномудрии о своем бесчестии и о осужени[и] радуются. И не токмо же се едино, но имь его за руку преподобный и посади одесную себе, ястиа же и питиа насладитися нудяше и, честию же и любовию учрежение сътвори ему. Он же печална быти себе глаголаше: «Сергиа ради, его же ради и потрудихся до зде приити и того видети, не получих желаниа моего». Преподобный же Сергий рече ему: «Не печалуй! Зде есть милость Божиа сицева, да никто же печален исходит от зде. И о нем же печалуеши и его же ищещи, в сий час дасть ти Бог того, его же желаеши».

И еще ему глаголющу, и се князь етер грядяше и в монастырь с многою гръдостию и славою, и плъку велику быти округ его, боляром же и слугам, и отрокомь его. Предъидущии же побиваючи и подвойские княжи поселянина оного яша его за плеща его рукама своима и далече негде отринуша его от лица княжа и Сергиева. И еще отдалече сущи князь поклонися Сергию до земля. И Сергий благослови его; и целовавшася, седоста два токмо, а всем предстоащим. Поселянин же он рискаше, обиходя. И его же преже небрежаше и гнушашеся, и того пакы нудяшеся, уду же бы прикоснутися поглядати не обреташе; амо же хотяше приникнути, не можаше. И въпроси единого от предстоащих ту, глаголя: «Да кый той есть калугерь седяще одесную княезя, повеждь ми?». Он же възрев на нь и рече ему: «Убо пришлец ли еси семо? Неси ли слышал преподобнаго отца Сергиа? Глаголяй с князем той есть». Он же слышав, зазираше в себе вкупе и трепеща.

Егда же князь из монастыря изыде, тогда он поселянин поим с собою некыа от братиа и сиа молитвеникы сподвигну, с ними же и пред ними кланяшеся до земля игумену, глаголя: «Отче! Елико нечьствовах и елико съгреших, просьти мя и помози моему неверьствию. Ныне познах поистине о тебе, отче; яко же слышахом, тако и видехом». Преподобный же Сергий простивъ его и благословив, и побеседова с ним душепитателными, утешительными словесы, и отпусти его в дом свой. И оттоле человек тъй велику веру имеа к Святей Троици и к преподобному Сергию до своего живота. И по летех неколицех прииде от села в монастырь к преподобному, и пострижеся в мнишескый чин, и пребысть неколико лет в покаании, и в исповедании, и в исправлении, преставися къ Богу.

Приидете честное и святое постник съсловие, приидете отцы и братия, приидете празднолюбци, приидете овчята духовная, приидете стадо христоименитое, всяка бремена мирьскых вещей отвръгше и чисти чистому да явимся, се бо свыше наше звание прииде, се убо духовнаа трапеза предлежит и се хлебы неистъщаемыа пища, се масло милованиа, се целомудрьнаа пшеница, се вино душу и тело веселящее, се труба человекы обнавляюща и бесом неисцелную язву дающа, се свеща, иже греховное тръние попаляюща, се убо Русьскиа земля паче жевсеа вселенныа похвал. Тем же приидете, яко да насладимся добраго нынешняго тръжества преподобнии, яко подражателю, ученици, яко учителю⁴³⁰ достоиную⁴³¹ честь въздающи⁴³², зело бо честнеише есть злата и каменья, все же честное земльных вещеи недостоино есть сему праздньству.

Рци убо явленне, яко да навыкнем яснеише, что звание и кто трапезу предложивыи. Аще бо хощеши, рече, слыши разумно и увести истину. Не бо от человек наше звание, но сама Святаа и Живоначалнаа творителнаа и человечьскым умом непостижимаа Троица Святаа ликования въздвиже, аггелы с человекы праздновати устрои и всем обще веселие съдела в памяти святого своего угодника, иже мир своим житием просветивъшаго, иже бесы от Христова стада отгнавшаго, иже равноаггельным си житием земьлю же и самыи въздух радости исплънивъшаго и Духом Святым въверенное сему иночьское стадо на пажити животныянаставившаго.

На предлежащяя же да взыдет слово, яко да навыкнем известно, откуду таковыи и великыи в последняя сия времена светилник въсиа. Еда от Иерусалима или от Синаа, – ни, рече, – но убо Русскаа земля, иже многаа лета живши без просвещениа, не пред многыми же леты святого просвещениа сподобившися, яко тои превзыти, иже от испръва просвещение приемших, глаголю же, очистившеся от идолскаго покланяниа, процветши же в себе православную веру и монастыри честныя, иже и многыи великы стлъпы възсиашя, яко же бы рещи, всю поднебесную просвещающе, от них же и великыи съи преподобныи Сергие, о нем же ныне нам и слово предлежить.

Бе бо некто муж благоверень именем Кирил, бе же и законом съпряженное подружие ему Мариа, поучахуся в заповедех Господних день и нощь, всячьскыми же добродетелми уекрашени беху, и едини къ единому душя с телом преклонше, моляху Бога, яко да дарует им Богъ отроча. Моление же их скорыи в помощех Бог не презре, и от тою прозябе сии святыи великыи Сергие. О честнаго корене святаа отрасль! О прехвалнаа връсто! О добраа супруга! О блаженное съчетание! О святое порождение! Блажени есте и преблажени, сподобльшеся быти таковому отроку родителие.

Хощу же и вашеи любви нечто споведати, вижду бо вас в сладость приемлющих и Божиа величиа послушающих.

Бысть же и таково чюдо прежде рождениа его. Случи бо ся, яко же о Иоанне Предтечи, познавшаго владыку своего и в чреве матерни възыгравшася. Тако же и сего мати пришедши в церковь, бе бо еи обычаи никогда же не лишатися обычнаго своего правила, сиречь божественыа литургиа, пришедши бо по обычаю в церковь, и в время Трисвятого внеезапу възгласи младенець в утробе матерни, яко и гласу слышатися, иже ту сущиимъ стоящим. Самаа же та честнаа мати его страхом и трепетом вкупе и недоумением одръжима бывши и дивляшеся и в себе помышляаше, что будет се. Тако же егда начаху пети Херувимьскую песнь, пакы възгласи выше предреченнаго. И егда възглашаху вънмем святаа святым и пакы възгласи, яко же и прежде. Дивно же ми есть, любимици, умом внимаа, чюдо несказанное, еще бо в утробе матерни младенцу проглаголати, но и слава единому чюдотворящему Богу. Сих же оставивше, на предлежящаа да взыдет слово.

И егда исплънишяся дние рождению, роди младенець. По днех исплънения принесоста и въ церковь и огласивше его крестишя в имя Отца и Сына и Святаго Духа, нарекошя же и имя его Варфоломеи. Родителие же честнаго того отрока възвестишя священникуо проглаголании святого отрока, еще ему в чреве матерни сущу, трикраты възгласи. Священник же рассуждение имеа от божестъвнаго писаниа и рече к родителема его о проглаголании своего отрока: Радостию радуитеся и веселием веселитеся, поне же хощет съсуд избран быти Богу и служитель Святыа Троица, еже и бысть.

И по времени некоем о младенци пакы чудодеиствовашеся странно таково и неудобь сказаемо. В среду бо и в пяток не съсаше от съсцу, ни от млека ядяше. Еда бо, рече, книгы учися или от некоего учителя велика навыкну таковаго въздръжаниа образу, ни, рече, но Святыи Дух действоваше и показуа хотящаго светилника въсиати и будущаго въздръжаниа образ, еже и бысть. Отроча же растяше и крепляшеся духом.⁴³³

Внегда же дъстиже седмаго лета възрастом, тъгда родителие его вдашя учитися Божествъным писанием. Предреченныи же Кирил имеше два сына. Пръваго Стефана, втораго же сегоВарфоломеа, благовествованнаго от чрева матерня; их же въспита в всяком благочестии и чистоте. Стефану же спешно некако изучившу грамоту, сему же некако не скоро и късно. Учител же его с многым прилежанием учаше, отрок же не вльми внимаше. Се же бяше по смотрению Божию, яко да от Бога книжное учение дасться ему, а не от человек. В един убо от днии изыде проходитися, яко же бе ему обычаи, зело бо любяше безмлъвие; и проходя некия дубравы, и обрете некоего старца саном презвитера под древом стоаща и молитву творяща.

Отрок же приближився ста близ его, ожидаа конець молитве. И яко сконча старець молитву и призвав его, рече ему: «Еда, что хощеши, чадо?» Отвещав же отрок, рече: «Отче, зело прискорбна есть душа моа, поне же вдан бых родители моими учитися божествным писанием и никако же могу разумети, о них же ми сказуют. Тем же, отче честныи, помоли Бога о мне, яко да не възбрано ми будет, о нем же вдан бых. Известно, бо знаю, яко твоего молениа Бог не презрит». Старец же зряше внутрьнима очима и глаголы его въсласть приемаше, и разуме хотящеи быти благодати на нем. И сътворив молитву и призвав отрока и благослови его; последи же рече: «Се отныне, чадо, дарова ти Бог грамоту, ею же възможеши иных ползевати». И нечто поучивъ его о ползе. Тъи же святыи отрок, яко же земля плодовита доброплоднаа семена приемши в своем сердци и бе радуася душею и сердцемь, яко сподобися таковаго старца молитвы, и моляше старца⁴³⁴ отрок глаголя: «Гряди, о честныи старче, яко да и родителие мои сподобятся святого ти благословениа». Старец же почюдися: млад суща възрастом, старец же многолетных превъзшедша разумом зря. И идошя оба вкупе. Егда же узревше родителие его, абие изыдошя в сретение старцу и сътворивше емуметание. Старец благословив их. Они же нудяху его да причастится пищи. Старец же отвеща: «Чядца, подобает прежде причаститися духовныа пища, та же телесныа». И вниде в храм молитовныи. Поем же с собою и освященнаго отрока оного. И начят пети час третии. Повеле же и святому отроку псалмопение глаголати. Отрок же отвеща: «Аз, отче честныи, аще бых знаал грамату, радостно бы духу моему славословити Творца своего, но того ради и молих честную ти святыню, яко да помолиши Бога о мне». Старець рече⁴³⁵: «Яко отныне дарова тебе Бог грамоту, ею же възможеши и иных ползевати, тем же ничто же сумняся славослови Бога».

Тъи же, по старчю, паче же по Божию дарованию, начат стихословити зело добре и строине, яко и дивитися святому тому старцу. И бысть, яко же некогда и пророку Исаие от Серафима югльное прикосновение, тако же и сему честному отроку, тамо Серафиемом, зде же старцем. И тако старец причастився и благословив их, конечнее же рече к ним: «Яко сын ваю велик будет пред Богом и многыа его ради добродетели и великаго житиа съсуд избран хощет быти Святыа Троица». И сия рек, хотя изити от них, абие невидим бысть. Они же в недоумении помышляху, аггела Божиа быти и Божие дарование, еже о грамоте. Отец же его и мати въземше благословение от старца и тако благодаряху Бога, паче же и дивляхуся словеси святого того старца.

Блаженный же отрок, иже от самы пелень Богомь избранный, пребывааше в всем повинуася родителем и тщашеся ни в чем же преслушати их. Внимаше же и божествъное повеление глаголющее: «Чти отца своего и матерь, да будеши длъголетень на земли». Начет же и въздръжатися зело, многажды бо единою хлеб ядяше, в нощи же без сна пребываше, яко же и дивитися и тои самои его матери. Мати же его любеезными увещаше, глаголя к нему: «Сладкое мое чадо, почто съкрушаеши си тело? Не веси ли, яко многа въздръжания язу наводят, паче же юну ти сущу и плоти цветущи, нам скръби ходатаи бываеши, тем же, въжделенное чадо мое, не мози преслушати матерь свою». Благоразумныи же отрок тъи отвещаа и тихим гласом глаголя: «Почто глаголы увещаеши мя от въздръжаниа, не бо слышах, ни видих матерь своему чаду злобе ходатаице бывающу, яко же ты мне; или не слышала еси божествнаа писания, глаголющяя: «Яко брашно и питие не представит нас пред Бога». Тем же, мати моа, остави мя, яко же начах и свръшю, Богу хотящу». Мати же его дивляшеся отвещанию его и рече к нему: «Яко же хощеши творити твори». Честныи же тъи отрок на болшиа подвигы поучашеся и николи же ум ему уклонися, яко же обычаи есть детем играти или некая смехотворнаасловеса глаголати. Н в заповедех господних день и нощь поучашеся, обычнаго же правила церковьнаго никогда же оставляше, яко же и дивитися всем, зряще его юностию обложенна и великое въздержание имуща.

Хощем же известно испытати, яко да навыкнем ясно о рождении его. Бе же предреченныи Кирил житие имеа прежде в граде Ростове⁴³⁶, иде же и честнаго того отрока родиста, оттуду же преселися в Радонеж съ всем домом своим. Бе бо, яко един от нарочитых болер и въ богатстве кипя. Пришед же вселися близь Рожества Исус Христова, еже и доныне стоить благодатию Христовою. Сынове же Кирилови, глаголю же, Стефан и Петр оженистася, блаженныи же Варфоломеи тако пребываше, съблюдаа душевную чистоту, желаше бо иноческое житие, но убо от родителеи възбраним бывааше. глаголаху бо к нему родителие его, глаголюще: «Чадо, веси наю старость, яко уже к концу есве, тем же пожди и потръпи, поне же не имаве нашеи старости служащаго, братиа ботвоя оженистася, и пекутся, како угодити женам и детем. Ты же пекися, како угодити родителем, паче же Богу, донде же Бог еже о нас сътворит милость и преведет нас от сего житиа, и тъгда не браним будеши никым же». Пречудныи же тьи отрок, яко услыша умиленныя глаголы родитель своих, зело умилися и обещяся послужити има, дънде же Бог изволит. И от того дне тщашеся в всем угодити родителем, яко да сподобится тех молитвы. Не по мнозе же времени и родителие его сподобишяся иноческаго образа и поидошя кажды в монастырь, и мало лет поживше в великом въздръжании, и тако предашя душя своя Господеви. Честныи же тьи юношя, проводив их с плачем, и надгробныя песне отпев, и тако скутав честная ихъ телеса, погребе честно. Видев же тъи, яко никым же браним есть, пришед в дом отца своего и елика обрете в дому, ова раздасть требующим, иная же остави брату своему Петру. Он же, исшед из домуотча, не взем с собою ничто же от стяжаниа отча, по божествному апостолу рекшу: «Уметы вся вмених, да Христа единого приобрящу». Стефан же, брат его, немного лет поживе с женою, и тако жена его отиде к Господу.

Стефан же, яко же виде жену свою умръшу, яко же некое бремя тяжко отвръг и оставль мир, и остризает власи в монастыри честныа церкви, глаголю же Покрова. К нему же пришед Варфоломеи моляше его, да бы шел с ним на взыскание места пустыннаго, Стефан же понужен быв словесы блаженнаго, и шедшя оба вкупе и обходиста многая места пустыннаа. Последи же придошя, Богу наставляющу их, достигошя место таково пустынное, леси и дубравы, имуща же и воду. Походивша же и зело възлюбиста место то. И сътворше молитву, абие начаста дело. Прежде сътворише себе хызину малу, в неи же нечто мало от труда покои приимаста, и сътвориста же и церкву малу, не бо бе тем сила⁴³⁷великаго зданиа. И егда бысть время освящению церкве, пославше с молением митрополиту. Бе бо тогда митрополит Феогност. Послав же преосвященный митрополит священникы. Пришедше же священницы и принесше елика на потребу освященниа церковнаго, и тако освятишя в имя Святыа и Живоначалныа Троица. Стефан же нечто мало пожив с братом и отиде в монастырь Святого Богоявлениа, иже и добре подвизався и многих ползевав. Последи же священничьством почтен бысть и абие оставляет монастирь, в нем же житие имеаше, и приходит святому Сергеу, яко же прежде рехом, брату ему сущу по плоти. И тако подвизався зело добре и честне, яко ревнитель быти житием святому Сергеу, и, мало пожив, къ Господу отиде.⁴³⁸ И изшед же съи святыи Вартоломеи, о нем же нам слово, моли некоего священноинока, глаголя: «Гряди, о честныи отче, яко да облечеши мя в святыи образ, зело бо от юности своеа желаю, его же да сподобит мя Бог святыхти ради молитов. Молениа же его тъи священноинок не презрев паче же и смерение его видев, по времени же велит ему главу преклонити. Он же с смерением главу преклонив, и абие облачит его в иночьскыи образ, и тако отлагает власи главы своеа, вкупе же и долу влекущяя желаниа. Нареченно же бысть и имя его Сергие. Поучив же его тъи духовныи настоатель о ползи, конечнее же рек: «аз, чадо, отхожду, предаю же тя в руце Божии, Бог же да будет тебе прибежище и сила, еже на врагы, еже противитися кознем его и лаянию». И сия рек, и молитву сътворь, и тако отиде от него. Бе же възрастом тогда святыи Сергее, егда приат святы образъ⁴³⁹ иноческыи, яко 20 лет.

Преподобныи же Сергие упражняшеся от попечениа телеснаго, яко же выше рехом, яко любя безмлъвие, въздръжаниа же его и труды кто сказати можеть, или кыи язык изглаголеть, колика пострада от бесов и от звереи; беси бо преображааехуся овогда в зверя, овогда же в змия. И тако бе видети чюдное борение мужа, ти бо свисканием и зверьскым сверепием устремляющеся бяху, тъи же отражаа молитвою, яко же некым мечем обоудуострым, и пресекаа вся бесовскаа оплъчения, и тако благодатию Христовою пребывааше от них невредим.

В едину же от нощии хоте ити в церковь правило утрънее отпети, и абие зрит явленно множьство плък бесовскых и яростию сверепьство показующе, и зубы скръжещуще устръмляхуся на нь, и от яроста п л а м е н ь изъ уст их исхождааше. И глаголаху к нему: «изыди убо от нашего места, изыди, яко да не от нас злеи умреши». Тъи же святыи никако же убоася, ни же устрашися тех козни, ни же сверепааго лааниа, ведяаше бо некрепькую их силу. И тако молитвою безделных сих показа, бе бо некаково чюдно зрение, молитва бо из уст его изшедши, яко же пламень, и абие техпопали и невидимы тех сътвори.

Не по мнозех же летех хоте Бог въздвигнути святую обитель, о неи же нам слово. Слышавше бо, рече, окрест живуще святого мужа добродетель и абие прихождаху к нему: овии хотяще ползевати, ини же моляху, еже жити с ним. Он же с радостию овех ползеваше, жити же хотящии приимаше и утешаа их, глаголаше: «чядца, да не устрашит вас помысл, яко места пустынная и нужднаа, писано бо есть: «яко многыми скръбми подобает нам внити в царство небесное». Сия святому Сергеу глаголющу, они же отвещавше, решя: «Мы убо вся тобою повеленная нам сътворим, аще Богу хотящу, токмо не отлучаи нас от святого сего места и зрениа честныа ти святыня». И бяху убо по силе тому ревнующе. Създашя же и кыиждо своя келиа и всякыи един безмлъствовавше наедине. Жестокое же житие иже в святых отца нашего Сергеа кто исповесть, глаголю же: бдение, сухоядение, на земли легание, чистота душевнаа и телеснаа, устнама и умом съвръшенное безмлъвие, смерение нелицемерное, молитва непрестаннаа, расуждение доброрасудное, любовь съвръшеннаа, худость ризная, память смертнаа и страхъ Божий и инаа вся, елика прочиташе жития святых отець, тщашеся собою исправити и явится наследник славе их. Братиам же число множаашеся и преспевааше благодатию Христовою.⁴⁴⁰Тем же много молим бывааше от братиа о священьстве. Он же не хотяше зелнаго ради смерениа. Тогда съвещавшеся братиа вся и пакы приидошя к нему и решя: «Отче честныи, видиши братию к Богу прибегших и к святому ти преподобию, тем же о том приидохом и припадохом святым ти ногам, яко да будеши нам игумен, зело бо желает душа нашя от тебе просвещатися. И елико они нудяху его, толико он отерицаашеся. Конечнее же рекошя ему: «или буди игумен, или мы вси отидем, ямо же Бог наставит нас, не можем бо жити без игумена, от иных стран призывающе священника, аще ли не хощеши сам игумена и ты иди с нами, яко да настоащему святителю просим игумена». Се же глаголаху, яко да токмо поидет к святителю, бе бо тогда митрополит Алексие и не сущу ему ту, но в Константине граде, на месте же его беше Афанасие епископъ Волыньскыи в граде Преаславе. К нему же прииде преподобныи отець нашь Сергие, хотя просити игумена. Въпроси же их епископ, како которому их имя есть. Он же отвещаше: «Сергие есть имя мое». Он же възрадовася зело, видев его, поне же слышал бяше мужа добродетель. Он же, въстав, сътвори прежде обычное поклонение, та же начат глаголати: «мы убо, владыко святыи, потщавшеся приидохом всеосвященному ти връху, яко да даси намъ игумена, могущастроити Христову паству, яко да того молитва, паче же поучениа наслаждающеся, пустынное житие проходим. Святому же тому епископу, яко же некым божествным откровением, явленна бе душевнаа его чистота. И рече к нему: «чадо, писано есть апостолом, паче же Дух Святыи того усты глаголя: «никто же приемлет сан или честь, токмо званныи от Бога». Тем же, вълюблене, Бог тебе избра пасти стадо Его, его же кровию своею Христос искупи и тебе избра на священничьство, яко да от тебе ползу приемлюще прославится и от тех имя Божие. Сергею же смерение показующу, паче же сана не хотящу и зело отрицаашеся, показуа себе недостойна таковому дару. Видев же епископ непреклонна еже о священьству, и рече к нему: сладчаишии сыну, вся убо стяжал еси, токмо послушаниа не имаши, иже есть корень всем добродетелем, преслушание же всему злу начало. Тем же, чадо, подобаше тебе корень добродетелем имети и напоитиего водою послушаниа. Слышав же преподобныи отець нашь игумен Сергие святого того епископа поучение, паче же моление, и не смеаше преслушати его и, обещався, рече: «аз, владыко честныи, яко же хощеши сътворю, аще Богу тако изволшу». И тако поставлеется диаконом рукою всеосвященнаго епископа Афанасиа. На заутриа же и священничьства даром почтен бывает. В третии же день велит ему епископ своима рукама съвръшити божествную службу. И тако поучив его освященныи епископ от правил апостолъскых, рече ему: «чадо, подобает ти, по апостолу, немощи немощных носити, а не себе угаждати, но къждо нас искрънему да угаждаеть, яко да будеши образ с тобою живущих братии». И инаа некаа учителная⁴⁴¹ словеса изрек ему и о Христе целования дав ему, и тако отпусти его. Пришед же в свои ему монастырь и тако прилагаше трудом труды и въздръжаниа, яко и дивитиеся и тем самем братиям. Отвръз же и просвещеннаа своя уста, рече к братии: «възлюбленнии, подвизаитеся внити юскыми враты, нужно бо есть царство небесное и нужницы въсхыщают е, Павел же к галатом пишеть сице: «плод духовныи есть: любы, радость, мирь, длъготръпение, благоверие, кротость, въздръжание». И ина многая изрек к ним о ползи, и не токмо словом учаше, но и образ бывааше всем.

Видев же бес прогонима себе оттуду, и не тръпяше своего прогнаниа, и единою преобразився в змия, и бяше келия его плъна змии, и ямо же хождааше старець, толико бяше множьство змии, яко и тая самаа земля не видетися. Он же молитвою сих отражааше и яко дым сих некрепкую силу показа, поминааше же и еуангельское слово, глаголющее: «се дах вам власть наступати на змия и скръпия и на всю силу вражию, и ничто же вас вредить».Дасть же ся ему толико смерение, яко и всем образ быти иже ту живущиим братиям. Бе же тогда братии числом яко 12, и оттоли число братии множаашеся и преспевааше благодатию Христовою.

Приде же некто архимандрит Симон от Смолньска, слышав того мужа добродетель, иже имения принес, дасть святому, яко да болшу тоа церков въздвигнет. И тако пребываше в послушании святого Сергеа. Тъгда же прииде и Иоанн, сын Стефана, брата его по плоти суща, летом яко 12, и тако отлагает власы рукою преподобнаго Сергеа, нареченно же бысть имя его Феодор. И живяше в всяком послушании и повиновении, яко дивитися зрящим его, яко же напред писание скажет о немь, яко же выше рехом. Братиям же число множаашеся, създашя же и монастырь велик и честень, тако же и келия и ина елика потреба братиям. Бе бо ему обычаи, в глубокыи вечер исхождааше по кеелиям уведети всякого их труды, и его же слышаше бдяща или с молчанием рукоделие делающа, зело рад бывааше, и тако отхождаше с молчанием. А его же слышаше с ыним смеющася и празнословяща, о сем убо негодоваше и не тръпя таковыа вещи, рукою своею ударяше в двери или в оконце, сим назнаменуа свое пришествие, и тако отхождаше.⁴⁴²Случи же ся и таково в тои обители, о неи же нам слово, оскудение потребним.⁴⁴³ Бяше бо такова заповедь от духовнаго настоателя, аще бо и недостанет кому потребнаа, никако же исходити в мир в еже просити у миран, но на Бога надежду възлагати и от Того просити потребнаа. Случи бо ся, яко же выше рехом, оскудение хлеба, и пребысть без пища 3 дни, ничто же отнудь вкушаа. В четвертыи же день взем секыру, иде единому от братиа и рече ему: «слышах, яко хощеши сени здаети и того ради приидох, яко да руце мои не празднуют». Брат же: «и зело желаю и имам вся приготованна, токмо древоделя ожидаю». Он же рече: «никого же иного ищи, аз бо тебе сделаю, еже хощеши, мзду же възму от тебе, аще имаши хлебы давных, зело бо желаю ихъ». Он же изнесе ему хлебы гнилых и рече ему: «се имам, аще хощеши». Он же рече: «таковых и желаеть дух мои, но убо преже да делаем, в 9 же час причастимся пища». И сия рек, начат делати. И създа того дне сени, да егда хотяше пища причаститися. Видевши же братия крепкое его въздръжание и зело почюдишяся, бе бо яко же выше рехом, вкушаа пищу тогда четвертыи день, но и тогда гнилыми хлебы свою алкоту утешаше. Некы же брат поропта на святого, не ял бо бяше брат он по два дни, и поношаше старцу, глаголя: «хощеши ли плеснивые хлебы, и еще ли нам възбраняеши ити в мир просити потребная, ужеизнемогаем гладом, но убо тръпети нам неволею сию нощь и заутра идем от места сего, яко да не злеи гладом томими умрем. Призвав же святыи всю братию, ведяше бо ослабльших и утешаа их глаголааше: «въскую прискръбни есте, братие, и въскую смущаетеся, прочитаете святых отець жития, како пострадашя наготу, глад же и жажду и ина многаа, мы же убо единого дне не ядше малодушьствуем и нетръпением обьяти быхом. Пишет бо: «в тръпении вашем стяжите душя вашя», и пакы: «просите прежде царствиа Божиа и правды его и сия вся приложятся вам. Възрите же на птиця небесныя: яко ни жнут, ни сеют, ни в житница сбирают, но Отець небесныи кръмит я. Вас ли не может питати, тръпением потреба есть, вы же ныне нетръпение показасте в мало время приклучившееся на искушенье ваше. Аще убо с благодарением приали бысте находящаа вы, в велику ползувменилося бы вам, безъ искушеньа бо злато не свръшается. Вы убо, аще ныне оскудение хлеба имате, заутра же умножение всех потребных будуть, токмо не малодушьствуите, ни же пренемогаите». В утреи же день, по проречениу святого, привезошя в монастырь хлебы доволны и инаа потребнаа. Въпросишя же братиа привезших потребнаа⁴⁴⁴, глаголюще: «възлюблении, кто присла сиа потребнаа?» Посланнии же отвещяшя, яко некыи христолюбець богат зело присла на имя Сергиево и иже с ним живущим братиям. По повелениу же святого, звавше посланных, яко да причастятся пищи, они же тщахуся далечаише ити, и тако отидошя от очиу их. И се ми есть дивно, како не сказашя, кто присла вы потребнаа, но яко некыи христолюбець богат сыи зело от далних стран присла вам потребнаа, и сами в себе дивляхуся, зряще хлебы топлы, масло же убо и зелия, мню, яко некое посещение от Бога бысть. В другы же день тако же множство потребных привезено бысть в монастырь, тако же и в третии день от иноа страны по тому же образу привезено бысть, яко изъобилствовати в всем. Сергие же, видев с братиями бывшее, прослави Бога, глаголя: «видите ли, братия⁴⁴⁵, яко не забудет Господь нищих Своих до конца, ни же презрети имать места сего и раб Своих молящиихся к Нему день и нощь и тръпящих находящяя с верою и благодарением, тем же подобает нам о всем упование възлагати на Господа, ни же в искушениих пренемогати». И от того дне начяху братия не стужати си, аще и многа искушениа случяхуся или недостаткы потребных, но вся тръпяху крепко с усръдием.⁴⁴⁶Хощем же вашеи любви беседу прострети о[т] преславных чюдес, яже творит Бог своимугодником, и яко же некую царскую утварь или добровонну пищу представити на ползу и утешение прочитающим же и послушяющих в похвалу же и честь преподобнаго отца нашего Сергиа. Рече бо и пророчьское слово: похваляему праведнику възвеселятся людие, да и писание покажется истинствующе, рече бо: «прославляющяя Мя прославлю». Тем же убо нужд но есть от многых и преславных его чюдес едино или две въсповедати, иже всех слышящих услажая чювствиа и мысли ихъ ужасаа, еже бывшим от преподобнаго мужа чюдес, яже и прежде въспомянухом вашеи любви сего святого мужа пришествие, еже в пустыну, яко же рехом, бяше чяща и дубравы, иде же ныне честныи монастырь есть. Тогда убо река течаше, яже есть и донине, иже от Климетина не велми близ монастира течет, другаа же река, яже ныне под монастырь течет, на том же месте от искони реека не бяше, тем же и труд приимаху братия от далека воду приносяще на потребу монастырскую. Неции же от братия поропташя сеа ради вины на Сергеа, глаголюще: «въскую не расужаа сел еси и великы труды приат вътще, воде не близ сущи». И не единою или дваищи, но и многащи досаждяху ему. Тъи же крепкыи душею тръпяше до седми лет, всегда ожидаа помощи от Бога. Некогда же пакы бес въоружааше братию пакы укаряти святого о безводии, решя же ему: «отче честныи, самъ убо веси великаго труда⁴⁴⁷ братскаго, воде далече сущи, но аще хощеши, да пренесемся близь рекы сущи, яко да не неции стуживше сии от братия таковыя нужда не тръпяще и от монастыра разлучятся». К ним же святыи муж отвеща: «аз, братие, не ведях, яко ту хощет святое братство быти, но убо азъ надеахся единому ми ту безмолствовати. Бог же хоте святую обител въздвигнути, еже прославлятися святому имени Его; тем же, аще Богу тако изволшу, не скорбите, ни же пренемогаите, се бо въскоре узриите спасение Божие, аще бо непокоривым людем и жестосердым, глаголю же, роду еуреискому, от суха камени воду источи, вас же, работающих ему день и нощь, презрети ли имат, но и ныне аще хощете, послушаите мене, яко да помолимъся, яко да дарует нам воду на потребу нашу, надеемся на неизреченное милосердие Господа нашего Исус Христа, яко прошение наше исполънит. И сия рек к ним и отпусти я когождо в свою ему келиу. Сам же изыде из монастыра, поем же с собою единого инока в добродетели процветша и сниде с горы в дебрь, иже под монастырем; бяху же ту рови, и егда бяше зима или каково наводнение, и тогда ту на томь месте бываше вода, яко же рехом, от наводнениа, живые же воды, иже от земля истиечет, от искони на том месте не было, яко же и древнии человецы о том ясно известишя. Обрет же святыи Сергие въ едином рову воду, яко же выше рехом, от наводнениа, над ним же став молитву творяще, и воду освящь и преклонь колени, начат молитву сице:⁴⁴⁸ «Боже, Отче Господа нашего Исус Христа, сътворивыи небо и землю и вся видимаа и невидимаа, създавыи человека от небытиа и не хотяи смерти грешником, но яко обратитися им и живым быти, тем же молим Ти ся мы, недостоинии и грешнии и смереннии раби Твои, услыши нас в час съи и яви славу Свою, яко же в пустыни чюдодеиствоваше крепкаа Ти десница и от сухаго камене Твоим повелениемь вода истече, тако же и зде яви славу Свою, Ты бо творець еси небу и земли, и Твоим повелениемь вся бышя, и даждь нам воду на месте семь, да разумеють вси, яко не отступаеши боящихся Тебе и имени Твоему славу въздающих». И сия рекшу святому, абие внезаапу вода явися велиа, яже и доныне нами зрима есть, отнеле же и почръпаем воду на всяку потребу, благодаряще Бога и святого Его угодника Сергиа, иже его ради молитвами даровавшаго нам таковую благодать и чюдотворное удивление. И от того дне, отнели же река молитвами его явися, многая исцелениа бывают от воды тоа, приходящеи бо с верою различными недугы одръжими, исцеление приемлют. Не бо един или два исцеление получишя, но вси верою притекающе радостни възвращаются в дом свои, славяще Бога и угодника Его Сергиа. Прозва же ся река таа Сергиева река, даждь до 10 лет или 20. Тъи же святыи муж, ненавидя славы человеческыя, но хотя от Бога прославитися, възбраняше всем иноком же и белцем, рече: «яко да никогда же не услышу вас отныне глаголю ще моим именем реку сию, не бо азъ проявих реку сию, но Богъ». Се же творяеше многаго его ради смереномудриа.⁴⁴⁹Ни же се потребно есть млъчанию предати от чюдес чюднаго того мужа, иже и слухы всех удивляа. Бе бо, рече, некто христолюбець живыи в пределех иже округ монастыра его, имеа велию веру к святому Сергиу. Имеаше же тъи человек сына мало суща отроча, и тому зело болещу, паче же к смерти приближающеся. Того же отрока родителие принесошя к святому в монастырь, слъзами многыми обливаася, моляше святого, глаголя: «отче святыи, помоли⁴⁵⁰ Бога о мне и о отрочати, поне же уже к концу приближается, знаю бо известно, отче, знаю, яко твоего молениа Бог не презрит». И тако ему молящуся, отроча же от зелныа болезни изнемогши и тако умрет. Се же бяше в келии преподобнаго. Видев же отець отрочате сына своего умръша, и рыдание к рыданиу прилагаше и болезнь, еже о отрочате показуа, не хотяше утешитися, и тако плача, глаголааше: «О человече Божии, аз верою и слъзами в печали сыи к тебе притекох, надеася утешение и радость приати, ныне же [вместо]⁴⁵¹ утешениа себе множаишу болезнь наведох, унее ми бы было, яко да в дому моемь отроча на руках матери своеа святого причащениа сподобившися умръло бы, нежели в чюждеи келии; увы мне, что створю, что сего лютеише или горше, но, отче святыи, аще что можеши, помози моему отроку, яко да поне святого причащениа сподобится. Преподобныи же Сергие отвеща ему: «вижду тя, человече, от печалии неразумием одръжима, кто бо может от человек мертвыя въскрешати, токмо един Бог, владеа живыми и мертвыми. Господь бо мертвит и живит, ты же не косни, но скоро сътвори потребная погрести сына своего, поне же тщуся, аще Богу хотящу, служити святую литургиу». Человек же отвеща: «велиши ли, отче, да ту оставим мертвое ми отроча, донде же приеготовлю древо, в нем же положити его». Он же рече: «еже хощеши творити, твори скорее». Он же шед въскоре обрете древо и сътвори ковчег, в нем же положити его. Святыи же Сергие, став на молитве, моляше Бога о отрочати, и внезапу отроча оживе, и дух его възвратися, начат же и подвизатися и рукы простирати, яко и не болевшее. Иже от служащаго ему брата уведено бысть чюдо сие. Святыи же Сергие покрыти хотя и утаити от человек чюдо сие, яко же выше рехом, не хоте славы⁴⁵² человечьскыа, сице свещавает и таковым образом утаити хотя, но град укрытися не может връху горы стоа. Пришед же отець отрочати, по обычаю и [приготовив]⁴⁵³ ковчежець мал, в нем же бе погребьсти его, яко виде его святыи Сергие и рече к нему: «въскую подвижешися не добре сматряа в печали сыи, отроча же твое не умрет, но живо есть». Он же не имяшет веры, известно бо знааше, яко умрет. Он же рече: «въземотроча свое и иди, ямо же хощеши, поне же аз, яко же Рех ти, иду в церковь». Отец же не ведыи свое отроча, яко оживе молитвами, но надеашеся мертва его быти⁴⁵⁴, яко же и прежде, и взем, хоте его погребьсти. И абие зрит, еже не надеашеся, видить отроча, яко и не болевшее. Радость же его кто может исповедати; тогда рече же к святому: «отче святыи, яко же рече, оживе отрок мои молитвами твоими». Святыи же Сергие: «человече, прелстился еси о своем отроку и не веси, что глаголеши, отроча же твое ни же умрет, ни же оживе, но убо болно суще носимо и озябши, мнится, яко умръше, ныне же в топлеи сем келии⁴⁵⁵ съгревся и, поспав, разбудися, тебе же не добре расматреющу скорбну ти сущу, тем же да не речеши никому же, яко сын мои мертвъ бе и оживе, но умлъкни, прежде даже не промчется в людех». Тъи же человек крепляшеся, знааше бо известно мертво бывше и молитвами его ожившее, благодарениа же ему въздаа, вкупе же и глаголя: «ты мя глаголеши не добре расматряюща, аще бо не бых, видел моима очима, не бых гробнаа приготовал, яко же и свидетельствует малыи гробець, ему же створих. Видев же его святыи Сергие в том крепящася и никако же прекланяющяся и заклят его именем Божиимь, да никому же о том не глаголет, и се рек ему: «аще сие пронесеши, велику тщету приимет дом твои, вкупе же и того отрока отщетишися». Тъи же человек обещяся никому же възвестити, и поклонся, абие отходит в дом свои. Млъчати убо не можаше, възвестити же никому смеаше, но тако в себе чюждашеся и хвалу въздаваше Богу, творящим чюдна и неудобь сказанная своимь угодником Сергием.⁴⁵⁶Иное же хощем сказати от чюдес преподобнаго отца нашего Сергиа. Бе бо, рече, некыи болерин живыи на реце на Влъгы, беше бесом мучим люте, и не престаеаше муча его день и нощь, яко и железныа юзы съкрушати и ничим же могуще его дръжати. Бе же того болярина больше 10 человек, иже ужи железными дръжаху его, и тъи, яко же выше рехом, ужа железнаа ни в что же вменяше: овех рукама биа, инех же зубы ухапаа, иногда же бегаше в пустыну и тамо мучим и люте съкрушаем от беса, донде же пакы обретаху его, и тако связавше его, ведяху его в свои ему дом. Слышавъше же яже о святем Сергии, елика творит Бог чюдеса исцелениа его ради, и тогда племя его съвещавшеся и везошя его в монастырь святому Сергию. И бывшим имъ⁴⁵⁷ на пути, многы труды подъяшя ведущии его. Тъи же⁴⁵⁸ беснуаися велиим гласом въпиаше: «Оле нужда сеа! Камо мя нужею водите, мне не хотящу, ни же слышати, ни же видети Сергиа отнудь не хощу, но пакы възвратите мя в дом мои». И тако тому и не хотящу, нужеею влечаху его. И егда приидошя близ монастыра, предреченныи же болярин от великых юз разрешься, растерзав их, и на всех устръмляшеся, глаголя: «тамо не хощу, пакы хощу отнудь же изыдох». Ти же крепляхуся связати его и никако же можаху утолити его, но и глас испущаше от себе, яко мнетися ему распаднути, бяше же вопль и кричание велие, яко и в монастире гласу слышатися. Тече же един от них в монастырь и възвести преподобному Сергиу бывшаа, яко ни един от них может приити в монастырь, ни могуще того привести. Слышав же преподобныи отець нашь Сергие и повеле скоро [в]⁴⁵⁹ было ударити, и всем братиам съшедшимся, начашя пети молебен о болящем. И тако преподобному Сергиу с братиами помолися, бесныи же начат кротети. Приведен же бысть в монастырь, преподобныи же изыде из церкве, нося крест в руце своеи, и знамена ему чело, уста и пръси. И бысть, егда знамеенаше его, болерин же велием гласом рыкнув и абие отскочи от места того. Бяше же лужа воды в монастыри, и абие въвръжеся в ню и стоаше, глаголя: «оле нужда пламене сего страшнаго». И от того часа исцеле благодатию Христовою, и разум ему възвратися. Начяшя его и въпрошати, глаголюще: «что еси, о человече, и что виде въпиаше». Он⁴⁶⁰ же отвеща: «аз, рече, егда приведошя мя к святому Сергиу и егда нача знаменати мя крестом честным, тогда видех, яко некое второе солнце от креста въсиавше и от того абие изыде пламень велик, иже и окружи мя всего от главы даже и до ногу, и того ради ввергохся в воду, мнях бо, яко сгорети имам от пламене оного». И пребыв неколико днии предреченныи болерин в монастыри том, бысть же благодатию Христовою кроток и смыслен, и тако отиде в дом свои, славя Бога и хвалу въздаваа святому Сергиу, яко того ради молитов дарова ему Бог исцеление. Внегда же зело слуху житиа его распростраеняющуся и мнози от различных град и стран прихождаху, поне токмо видети его.⁴⁶¹Бе бо, рече, некьто человек от иных стран, живыи на селе своем и слышав яже о святомь, и абие оставляет дом и приходит, яко да видить его. Бяше бо, яко же рехом, многа слышав яже о нем. Случи же ся святому въ ограде копающу землю на устроениа зелиа. Предреченныи же человек пришед в монастырь, обрете некую братию и пыташе о святом, яко да видит его. Они же решя: «в ограде копает землю, да аще хощеши – потръпи, донде же изыдет». Тъи же человек не могыи тръпети и шед, зрит святого скважнею и, видев его в худои ризе и зело раздранне и многошвенне, отнудь же не мняше того быти. И пакы братью пытааше, яко да скажут ему искомаго от него. Они же решя: «яко в ограде есть, копаа землю, его же скважнею видел еси, тъи есть». Он же никако же не имяше веры и пребывааше при дверех отнекудь жды его. Егда же изыде блаженныи от дееланиа своего, братия же решя: «человече, тъи есть, его же желаеши». Тъи же человекъ отврати лице свое, глаголя: «аз пророка видети приидох, вы же проста человека, паче же сироту указасте ми, поистине разумех, яко вътще ми труд бысть. Аз бо, яко же слышах, тако и надеахся видети честнаго мужа Сергиа в мнозе славе и величестве, ныне же сего вижду вами сказаемаго в нищете пребывающа: ни чти, ни величьства, ни ризь красных, яко же обычаи есть славным носити, ни же отрок предстоащих ему, ни же служащих или честь въздающих ему, но все худостно и все нищетно». Внешняа же взирааше, а не внутреняа, тем же и добродетель старцю и нищету укаряше, глаголаше бо: «немощно есть таковому мужу славну и чесну в нищете пребывати». Вся бо дни, отнели же бысть инок, страстотрпьчское житие прохождааше, ни же шубы, ни же иное каково платие, могуща от зелние зимы тело съгреати, на себе възлагаеаше, но тръпяше крепко слнечныи вар и зимную студень. Братиа же святому решя: «хощеши ли, отженем сего, иже тебе длъжную честь не въздающа». Разсудительныи же тъи святыи⁴⁶² старець отвеща: «Ни, чядца, поне же тъи един истиньствует, а инии все съблазнишяся». И яко же выше рехом, зря его в нищете суща и не хотяше ся поклонити. Предварив же его святыи, с великым смерением сътвори ему поклонение и о Христе целование дав ему. О сем бо, любимици, разумеем, колику имяше простоту и любовь нелицемерну, иже такова человека, невежду суща и неискусна, с любовию приат и излише паче възлюби его. Яко же бо гръдии честем и хвалам радуются, тако и смереномудрии о своем бесчестии и уничижении радуются. И не токмо се, но поим его и посади одесную себе, ястием же и питием насладитися нудяше, честию же и любовием учреждение сътворяше ему. Тъи же еще неверием одръжим бываше, мня, яко не виде Сергиа. Проразумев же Сергие помысл его и рече ему: «чадо, не скръби, его же ищеши въскоре будет ти». И еще святому глаголющу, и се некыи князь грядяше в монастырь с гръдостиу и славою многою, и полку велику яздящу округ его, боляром же и отроком предидущим. Князю же и еще далече сущу⁴⁶³, пад, поклонися до земля святому Сергиу. Святыи же, благословив его, и о Христе целование дасть ему. И тако седоста два их токмо, а прочим всем предстоящим. Предреченнаго же человека емше за плеща, далече негде отринушя. Человек же тъи Сергиа, его же прежде небрежаше и гнушаашеся, того пакы желанием юду же бы, приник видети его. Въпроси же единого от престоащих его, глаголя: «кто есть онъ инок седяи одесную князя, повеждь ми». Он же рече: «или не веси преподобнаго игумена Сергиа, глаголяи с князем тъи есть». Он же слышав, поеношаше себе, боася вкупе и тръпеща, яко не поклонися ему, ни же достоину честь въздав ему. Егда же князь от монастыра изыде, тогда отдалече прекланяшеся и прося от него прощениа. Святыи же призвав его к себе и поучив его о пользи. Тъи же человек велию притяжав ползу, отиде в дом свои.

Многащи бо беседовахом вашеи любви от житии святого и от чюдес его, тем же⁴⁶⁴ должно есть нам ни се глубине млъчанию предати, но ясно изъяснити, яко да и прочитающии и послушающих обоих опьща полза и веселие будет.

Многащи бо, яко же рехом, в нощи без сна пребываше святыи и молитву творяше и не тъкмо о себе едином, но и оже с ним братиам живущим. Тако же ему по обычаю молящуся в нощи, и абие внезапу глас бысть к нему, глаголя: «Сергие!». Он же удивлься необычному званию в нощи, не хоте изыти от келиа, но сътворь преждемолитву и откры келии оконце, хотя уведети, что глас бывшии. И абие зрит видение чюдно и неудобь сказанно: свет бо велии явися с небесе, яко всеи нощнеи тме отгнане бывши, и толицем светом нощь она просвещенна бысть, яко и дневныи свет превъсходити светлостию. Възгласи же второе, глаголя: «Сергие, молишися о своих чядех и Бог моление твое исплъни, смотри же ясно инок множьства на твое имя съшедшихся». Тъи же святыи, възрев, и видит множьство птиць красных прилетевших и не токмо внутрь монастыра, но округ монастыра, пения же их и гласи различни. И глас слышашеся ему, глаголющь: «им же образом видел еси птицы крилатые, множьство их безчисленое, тако умножиться стадо инок твоих, и по тебе не оскудеют, аще въсхотят стопам твоим последовати». Святы же Сергие дивляшеся оноа неизреченныа светлости страшнаго видениа, съобещника же и свидетеля устроити въсхоете, възглашает предреченнаго Симона двоичи или трикраты. Симон же зело имеа трезвение и абие въскочи и пришед к святому, не бяше бо далече келиа от преподобнаго. Симон же не все виде, но чясть некую видениа оного, иже и подивися. Святы же Сергие исповеда ему видение, и бяху убо радующеся купно душею и телом, славяще Бога, творящаго дивнаа и преславнаа.

Пакы от чюда в чюдо и от силы в силу преводит нас святыи великыи Сергие, толико бо, рече, дасться ему дар, яко по вся дни, егда божествную службу съвръшаше, явльнно видешя и аггели съслужаща ему, не бо тъи един видяше, но случися и ученику его видети Исаакиу.

Некогда бо, рече, в един от днии служащу святому Сергию с Стефаном братом своим и с Феодором, сыном брата его, божественую службу. Исаакие же приник малыми дверьци, виде же с ними некоего священника неезнаема и цветяше образа его красота. Приступи же, глагола отцу своему Макариу: «не трие ли их служят в олтари и откуду четврътыи обретеся». Макарии же отвеща: «И аз, чадо, видев его, недоумеюся, откуду бысть, но яко мню, с князем приехавша. Бе бо тогда пришел князь Володимир в монастырь, и надеахуся, яко с князем приеха⁴⁶⁵. Начаста же и опасно сматрати его, хотяще известно уведети. И яко же бысть пръвы вход, и тъи изыде с ними в след их. И егда бысть близ их, видешя лице их светящеся, яко солнце, яко не могущим зрети на нь. Въпросишя же некоего от боляр княжих, глаголюще: «имат ли попа князь с ним приехавша?». Они же решя: «ни, но в граде остася некоего ради исправлениа». И тако помышляху в себе аггела Божиа быти. Въпросишя же и Сергиа, глаголюще: «скажи нам, отче святыи, Господа ради, кыи есть священник незнаемыи нами, служивыи с тобою?». Святыи же хотя утаити, рече: «Стефан и Феодоер служишя с мною, иного же аз не знаю служаща с нами». Они же и крепляхуся и четврътаго быти, глаголюще ему: «Господа ради, отче честныи, не скрыи от нас, но яви нам, яко да ясно разумеем». Он же рече: «его же видесте – аггел Господень есть, и не токмо днесь, но и по вся дни служит с нами, но благословен Бог, иже тако изволивыи явити вам таину сиу». И тако обще благодарение вздаваху Богу.⁴⁶⁶Въ един же убо от днии придошя грькы от Констандина града и поклонишяся святому, глаголюще: «патриарх Вселенскыи архиепископ Коньстандина града кир Филофеи благословляет тя». Въкупе же и поминкы от патриарха давше ему – крест и парамандь и схыму, давше же ему и грамоту патриаршу. Святыи же Сергие рече к ним: «аз мню, яко съблазнистеся, блюдете, еда к иному послани бысте, аз бо несмь достоин таковых даров от святеишаго патриарха». Они же решя: «отче, мы о том не съблазнихомся, но глаголи нам: ты ли еси Сергие, живыи в Радонеже?» Он же рече: «Аз есмь греешныи и смеренныи Сергие». Они же решя: «И тебе, яко же рехом, Вселеньскии патриархъ благословяет». Сергие же повеле пред⁴⁶⁷ ними поставити трапезу и учреди я. Таже взем поминкы и грамоту патриаршу, и пешь иде к митрополиту в град и дасть ему поминкы и грамоту, поведа же ему глаголаннаа от посланных. Взем же митрополит, нача чести в слух Сергиев, бе же писано сице: «Милостию Божиею архиепископъ Констандина града Вселенскии патриарх кир Филофеи о Святемь Дусе съслужебнику нашего смерениа Сергиу благодать и мир и благословение посилаем. Слышахом же по Бозе житие твое доброе и святое и прославихом Бога по реченному: «тако да просветится⁴⁶⁸ свет вашь пред человекы, яко да узрят добрая вашя дела и прославят Отца вашего, иже на небесехъ». Житие же твое и братиа слышавше похвалихом, но еще ти едина главизна недостаточьствует, яко не опще житие стяжасте, его же и самъпророк богоотець Давыд, иже вся осязавыи разумом и ничто же ино възможе похвалити, токмо се, ныне что добро или что красно, но еже жити братьи вкупе. Ныне же пакы аз съвет благ даю вам: послушаите смерениа нашего, приимите обще житие, а мы вас благословяем и за вас молим, Бог вам на помощь и Пречистаа Его Богомати. И наше благословение и молитва моа да есть с вами». Святыи же Сергие преклонь колене, поклонися святому патриарху, иже о поучении, въпрашает же святыи митрополита: «ты же, владыко святыи, что повелеваеши?» Тъи же отвеща: «яко же патриарх повелевает, тожде и аз благословляю».

Нецыи же дивишяся Радонежу, како абие славен бысть в Цариграде, еже сам патриарх пишет послание Сергиу, живущему в Радонеже. Прежде бо Сергиа Радонеж не славен бе и не нарочит, но Сергиа ради, живущаго в нем, славен бысть. И тако Сергие взем благословение, абие възвратися в монастырь свои и повеле позвонити в было. И браетиам всем събравшимся, и начят им Сергие глаголати: «разумно да будет, отци и братья, се пишет патриарх Констянтина града и повелевает нам обще житие жити, тако же и митрополит Алексие, вы же что съвещаете о том». Они же с радостью приемше слово реченное, глаголюще: «мы убо зело желаем общаго житиа, аще Богу хотящу». Святы же зело рад бысть о единосъгласии братиам и помышляше нечто Божие быти. И тако разделишя⁴⁶⁹ братию по службам: ового келара, ового же повара, иным же хлебы решя пещи, иному же болным служити. Приложишя же и то: никому же ничто⁴⁷⁰ же не дръжати отнудь: ни мало, ни много, ни своим звати, но вся обща имети. Ини же не въсхотешя, паче же недостоини быша званию, отаи изыдошя из монастыра. И оттоле уставися обще житие даже и до сего дне в похвалу Святыа Троица.⁴⁷¹

Не по мнозе же времени пакы встает молва: ненавидяи бо добрая враг не моегыи тръпети яже от преподобнаго⁴⁷² блистающую зару, зря себе уничиждаема и побеждаема от блаженаго, и в помысл вложи, яко не хотети Сергиева стареишинства. В един же убо от днии, дневи сущи суботе и вечерну пояху, игумен же Сергие бе въ олтари облечен в священническую одежду. Стефан же, брат его, на левом стояше клиросе и въпроси канонарха: «[кто ти дасть книгу]⁴⁷³ сию?» Канонарх же отвеща: «игумен дасть ми ю». И рече⁴⁷⁴: «Кто есть игумен на месте сем? Не аз ли преже седох на месте сем?» И ина некая изрек, их же не лепо бе. И то слышав святыи в олтари сыи, не рече ничто же. И егда изыдошя из церкве, святыи не вниде в келию, но абие изшед из монастыра, никому же ведущу, и устремися един путем, ведущим на Кынелу. И тако приспе нощь тому на пустыни, заутра же въстав, иде в путь и приде в монастырь, иже на Махрище, и проси у Стефана, сущу тому игумену того монаестыра, некоего брата, могуща сказати ему места пустыннаа. Иже и многа места обшедше, последи же приидоста⁴⁷⁵ и обретошя место красно зело, имущу и реку близ именем Кержачь, иде же ныне монастырь стоит Честное Благовещенье Пречистыа Владычица нашя Богородица. Сергие же, яко же прежде рехом, изшед от монастыра и не обретен бысть. Тогда ужасошяся зело и распустивше повсюду братию искати его: овех по пустынях, овех же в гради, не бо тръпяху таковаго пастыра разлучитися. Един же от братии шед к Стефану, иже на Махрище, хотя уведети яже о нем, и слышав, яко тамо в далную пустыну отиде, хотя монастырь строити, и зело възрадовася, и от радости не хоте ити к святому, но абие пакы възвращается⁴⁷⁶ в монастырь, яко да братию утешит от скръби еже за святого. Братия же, яко же слышавше о святомь, зело възрадовашяся и начяшя приходити к нему овогда два, овогда три, иногда жеи множае. Предреченныи же отець наш Сергие преже постави келия, в них покои приимати от великаго труда, таже посилает два ученика своя всеосвятеишему митрополиту Алексиу о основании церковнем, прося благословениа. И тако, получив благословение, и абие начат делати церковь, преже молитву рек сице: «Господи, Боже сил, иже древле Израиля многыми уверивыи великыми чюдесы, и законодавца своего Моисеа многыми и различными известив знаменми, иже Гедеону руном образ победы показавыи, сам ныне, Владыко Вседетелю, услыши мене, грешнаго раба Своего, молящагося Тебе. Прими убо молитву мою и благослови место се, его же благоизволи създатися в славу Твою, в похвалу же и честь Пречистыа Ти Матери, честнаго Ее Благовещениа, да и в том всегда славится имя Твое, Отца и Сына и Святого Духа». И кончав молитву, и тако дело преспеваше благодатию Христовою. И бяху убо множьство человек поспешьствуеюще на дело, иноци же и белци, овии келия зиждуще, инии же иная потребная монастыру, овогда же и князи и болере прихождаху к нему, сребро доволно [подааху]⁴⁷⁷ на строение монастыра. И тако благодатию Божиею въскоре цръква поставлена бысть и множество братии. Неции же от монастыра Святыа Троица не тръпяще на мнозе⁴⁷⁸ духовнаго си учителя разлучение и любовию велиею разгоревшеся, идошя в град к митрополиту и решя: «Владыко святыи, ведает святое ти владычество духовнаго ны пастыра разлучение, ныне же живем, яко овця не имуще пастыра. Священноиноци же и старци и святое Богомъ събранное братство не тръпяще отчаго разлучениа отходят от монастыра. И мы убо не тръпим надлъзе не насыщатися святого его зрениа. Тем же, аще велиши, Богом данныи нам строителю, вели ему пакы възвратитися в свои ему монастырь, яко да не до конца болезнуеми за нь». Слышав же сия митрополит от пришедших браетии, и не косно, но абие въскоре посылает два архимандрита Герасима и Паула, нечто предлагаа ему от божественаго писана: «тъи бо, яко отець учаше и яко сына наказааше». Пришедше же архимандрити и сътворше обычное целование и решя: «отець твои Алексие митрополит благословяет тя. Зело, рече, възвеселихся, слышав твое житие, еже в далнеи пустыни яко да и тамо от многых прославится имя Божие, но убо довлеет тобою сътворенаа церковь и Богом събранное братство, да его же веси в добродетели искусна от своих ученик, того постави вместо себе строителя святому монастыру, сам же пакы възвратися в монастыр Святыа Троица, яко да не надлъзе братиа скорбяще о разлучении святого ти преподобиа от монастыра разлучатся, а иже досаду тебе творящих, изведу вон из монастыра, яко да не будет ту никого же пакость⁴⁷⁹ творящаго ти, но токмо не преслушаи нас, милость же Божиа и наше благословение всеегда да есть с тобою». Сия же слышав святыи, отвеща им: «сице рцете господину моему митрополиту: вся от твоих уст, яко от Христовых уст приму с радостию и ни в чем же преслушаю тя». Пришедше же архимандрити, възвестишя митрополиту реченнаа от святого Сергиа. Тъи же слышав, зело възвеселися съвръшенному его послушанию и въскоре посилает священикы и абие освящают церковь в имя Благовещениа Пречистыа Владычица наша Богородица, иже и доныне стоит благодатию Христовою. Избра же Сергие единого от ученик своих именем Роман и сего посилает митрополиту, и тако благословив его на священство и строителя новоначалному монастыру. И оттуда пакы възвращается святыи в монастырь Святыа Троица.

Велми бо желааше святыи Сергие, яко да будеть Исакие Млъчалник игумен у Святого Благовещениа, тъи же никако же хотяше, но яко же рехом, любя безмлъвие и млъчание, но зело моляше святого, яко да конечнее благословит его млъчати и ничто же отнудь не глаголати. Святыи же по прошению его рече ему: «чадо Исакие, аще млъчанию желаеши, заутра, егда съвръшим божестъевную службу, ты же приди на севернаа врата и тако благословлю тя млъчати». Тъи же по словеси святого, яко виде свершившуюся божествную службу, приходит к северным вратом, свытыи же старець прекрестив его рукою, рече: «Господь да исплънит желание твое». И абие, егда благословяше его⁴⁸⁰, видит, яко некыи велик пламень изшедшь от руку его, иже и всего того предреченнаго⁴⁸¹ Исаакиа окруживши. И от того дни пребысть млъча без страсти молитвами святого Сергиа, аще бо некогда хотяше и с тихостию каково слово рещи, но възбраним бываше молитвами святого, и тако пребысть млъча вся дни живота своего по реченному: «аз же бых, яко глух не слыша, и яко нем, не отвръзаа уст своих». И тако подвизався великым въздръжанием, тело свое удручаа ово постом, ово же бдением, ово же млъчанием, конечнее же послушанием до последняго своего издыханиа, и тако в том предасть душу свою Господеви, Его же вжеле от юности своея.⁴⁸²Преже убо беседовахом о Стефане по плоти сущу брату святого Сергиа, како приведе сына своеего Феодора и дасть его в руце святому, иже и сподоблше его иноческому образу, летом суща яко 12. И тако пребываше в всем повинуяся святому Сергиу, и велми тело свое удручаа зелным въздръжанием, яко и дивитися всем, иже в монастыри том, зряще его великое въздръжание и смерение. Имяше же и таковыи обычаи Феодор, яко никакова же помышлениа⁴⁸³ таити от преподобнаго. Приде же ему в помысл нечто таково изъобрести место подобно на създание монастыру, в нем же бы игумен был, яко не токмо себе спасти, но и многых. Пришед же, исповеда помыслъ свои святому. Святыи же, яко виде его на се желание имуща, помышляше нечто Божие быти, отвеща ему, глаголя: «чадо, о Христе възлюбленное мне, аз надеахся, яко кости мои предаси гробу и по мне предстатель в месте сем будешь». Феодор же о том рече: «святыи мои предстателю, благослови мя! Яко да с тобою обрет место, аще Богу хотящу, начну монастырь делати». Видев же его святыи часто о сем молящася и велиеко желание имуща, помышляше нечто Божие быти, еже и бысть. Старец же благословив его, еще же и от братеи, елици въсхотешя с Феодором отити, и тех благослови. Феодор же, получив благословение от святого⁴⁸⁴ старца, и тако исходит из монастыра, поим же и некую братию с собою, их же ведяше в добродетели съвръшенных. Пришед архиепископу кир Алексиу в град, хотя от него благословениа, глаголя: «аще благословиши мне изъбрести место таково подобно строениа монастырска». Митрополит благословив его, рече: «иди, сыну, иде же благоизволит [Бог] прославлятися святому Его имени, место обрет пакы приди, яко да и аз шед, вижду место то, и потом начнеши дело». Обрет же место таково, зовомое от древних Симоново, близ рекы Москвы, недалече от града. Приде же и Сергие на съглядание места и виде, яко добро и подобно монастыру быти место то. И от святителя благословение получивше и тако основашя церкву в имя Пречистыа Владычица нашя Богородица честнаго Еа Рожества. И абие вскоре дело преспеваше, церква же и трапеза и келия, и множьство братии прихождааше, и бысть не в мнозе времени множство инок, съставишя же обще житие зело с крепостью, яко никому же отнудь ничто же дръжати, ни же своим звати, но вся обща имети. Их же преподобныи отець⁴⁸⁵ Сергие, видевь крепкое их житие и велика въздръжания, зело удивися. И толико просиа монастырь тъи, яко и от иных стран желати от того честнаго монастыра овех на епископьство, иных же на игуменство, бяше бо всем, яко зръцало, и вси видящеи и слышящии обои плъзу приимаху. Тъи же Феодор зело добре пожив в посте и в въздръжании, яко и всем братиям образ быти. Видевше же князи великое его житие и зелное въздръжание, и много молим, яко да приимет епископью Ростову. Тъи же не хотяше, последи же принужен, и тако поставишя его архиепископом Ростову. И остави же вместо себе в своем монастыри архимандрита. Сам же Феодор упас добре Богом врученную ему паству, и на пажити животныа наставив, и тако отиде к Господу, к Нему же от младых ногтей прилепися.

Приде же некогда князь Владимир и моли святогоСергиа, яко да идет видети место таково на основание монастыру. Святыи же не обленися, но поиде в Серпохов и обрет место таково, сътворив молитву и начат основати цръкву близ града на Высоком в имя Пречистыа Владичица нашя Богородица честнаго Еа Зачатиа. И тако освятивше и съставишя обще житие зело красно и добре. Моли же князь святого Сергиа, яко да дасть ему единого от ученик своих быти игумену и строителю святому монастыру. Моление же его святыи не презре и дасть ему единого от братья, иже и тъи в добродетели съвръшен, именем Афанасие, иже и многых к истинному пути наставив, и тако отиде к Господу.⁴⁸⁶Видев же себе митрополит Алексие от старости изнемогша, и абие посла единого от боляр своих и призва святого Сергиа. Пришедшу же святому Сергиу, видев же его митрополит и рече ему: «добре прииде, чадо». Сергие же отвеща: «по повелению твоему приидох, не могыи преслушатися твоего званиа, мы бо раби неключими есми, иже длъжни бехомъсътворити, сътворихомъ». Повеле же митрополит изнести крест зело красен, златом и камением украшен и парамандь честен, възем же един от боляр и, въстав, дасть святому Сергиу, рек: «О честныи отче, отець твои Алексие митрополит благословляет тя и дарует ти крест и с парамандом, иже достоить святому ти преподобиу». Онь же сътворь поклонение, глаголя: «прости ми, владыко, ми бо от юности моеа не бых златоносець, ныне же на старость паче хотел бых в нищете пребывати и тако проходити убогое свое житие». Митрополит же отвеща ему: «вем известно, яко сия исправил еси, но створив послушание, възми от моею руку, яко да поминаеши мя в святых твоих молитвахъ». Святы же не могы преслушати его, рече: «владыко, имею на себе крест и параманть». Тъи же повеле сняти с него, сего же своею рукою възложи на нь, повеле же изыти всем. Сед же на едине, начят ему вещати, рек: «веси ли, преподобне, на что призвах тя и что хощу, еже о тебе сътворити». Сергие же отвеща:"не вем, господи мои». Он же к нему: «се аз съдръжах Русьскую митрополию, елико Богу хотящу, мню, яко 24 лет, иже не утаися святого ти преподобиа, ныне же вижду себе к концу приближшяся, тъкмо не вем дне скончаниа моего, желаю же и пекуся о сем, кто будет таковыи, могыи пасти стадо Христово, и о всех недоумевся, тебе единого обретох достоина суща таковыя благодати, могуща исправити слово истины. Изволих же прежде възвестити таже и князу о том явленно сътвору, известно бо, аз знаю, яко и сам князь великыи зело желает тя и вси болере его. Прежде убо епископьства саном почтен будеши, по моеи же смерти и ты в место мое будеши». И некаи от апостола и от божественых писании изрек к нему, хотя его тем к своеи воли повинути. Сергие же зело оскръбися, яко и образу изменитися, и рече ему: «прости мя, владыко, яко выше меры моеа есть дело сие: кто бо есмь аз, грешныи и худыи паче всех человек, такову сану, и выше своеа меры въсходити на степень, его же несмь достоин ни взирати, но молюся тебе, владыко святыи, ни же мене, ни же иному кому о том не глаголи, еже въсприеати ми сана». Много же его молив о въсприатии, тъи же отвеща: «аще велиши ми с нуждею въсприати, его же несмь достоин, никто же может то обрести в мне». Он же видевь его непреклонна, ни же хотяща въсприати сана, паче же убоася, яко да не стужив си отидет в внутрьную пустыну и такова светилника лишится, и не хоте ему много стужати, но учреди его и отпусти в свои ему монастырь.⁴⁸⁷По преставлении же Алексеа митрополита взиде на место его некыи архимандрит именем Михаил и облечеся сам в одежу митрополитову, възложи на ся белыи клобук и мантиу с источникы, и дани, яко же митрополиту, даяху. Бяше бо и преже того хотел князь великыи, но Алексие никако же сего предреченнаго Михаила не въсхоте. Мнев же тъи Михаил, яко Сергие о том глагола митрополиту, да не тъи будет по смерти его, и тако начат въоружатися на святого. Слышав же тои святыи Сергие, абие рече всему множеству братии, яко сего Михаила, хвалящагося разорити святое место сие, никако же сана въсприати ему, его же несть достоин, но и еще и Царскаего града не имат видети, еже и бысть. Поне же егда идяше в Констандин град, тогда разболеся в корабли, и тако не доплув вышереченнаго града, и абие умре по пророчьству святого Сергиа. И оттоле имеаху люди святого яко некоего велика пророка.⁴⁸⁸Некогда же приде князь великии в монастырь к преподобному Сергиу и рече ему: «отче, велиа печаль обдержит мя: слышах бо, яко Мамаи въздвиже всю Орду и идет на Русьскую землю, хотя разорити церквы, их же Христос кровию Своею искупи. Тем же, отче святыи, помоли Бога о том, яко сия печаль обща всем християном есть». Преподобныи же отвеща: «иди противу их и Богу помогающу ти победиши, и здрав с вои своими възвратишися, токмо не малодушьствуи». Князь же отвеща: «аще убо Бог поможет ми молитвами твоими, то пришед поставлю церковь в имя Пречистыа Владычица нашя Богородица честнаго Еа Успениа и монастырь съставлю общаго житиа».

Слышанно же бысть, яко Мамаи идет с татары с великою силою. Князь же, събрав воя, изыде противу их. И бысть по пророчьству святого⁴⁸⁹ Сергиа, и победивь, татары прогна и сам здрав с вои своими възвратися. И такомоливь святого Сергиа обрести место подобно, иде же цръковь сътворити. И тако обретше место подобно, призва же и княза великаго и основаста церковь, иже и вскоре сътворше церковь красну в имя Пречистыа на Дубенке и съставишя обще житие. Постави же единого от ученикъ своих игумена в том монастыри, сам же пакы възвратися в свои ему монастырь.

Прииде⁴⁹⁰ же некыи юношя к святому⁴⁹¹ Сергиу, моля его, да облечеть и в святыи иноческыи образ. Святы же моление его не презре, и тако остризает ему власи и облачит его в святыи иноческыи образ, и нарече имя ему Андроник. И тако бе живыи сам в келии, яко же повеле святыи тъи разсудителныи старець. Зело бо любяше бе безмолъвие и млъчание, въздръжания же его и труды кто исповесть, еже на всяк день ово пощением, ово же послушанием в всем бо тщашеся ревнитель быти святому, и сице пребываа многая времена, работаа Богу день и нощь. Пребысть же Андроник живыи у святого в послушании и в повиновании лета доволна, дивное то и чистое паче человекъ⁴⁹² житие поживша с многым смереномудрием, навык же от свя того всякому иноческому житиу, яко исправлению его и самому святому старцу дивитися, зря в нем множащуся добродетель. И о сем зело моляше Бога святыи, яко да дарует ему крепость, еже съвръшити до конца свое течение; и тако пожив 10 лет в всяком послушании. Прииде же ему сицевыи помысл, еже изити из монастыра и сътворити свои монастырь, еже и бысть; се же творяшеся, еще живу сущу Алексиу митрополиту. Приде же тогда Алексие митрополит⁴⁹³ посещениа ради к святому. Беседующима же има душеполезная некая словеса, Сергие же въпроси его, глаголя: «суть братия некая, егда приходят в святыи иноческыи образ, тогда всего отрицаются, живше же 10⁴⁹⁴ лет, ини же множае, потом санов хотят, ты же како повелеваеши, владыко святыи, благословити или ни». Митрополит же к нему: «имаши от Бога дарованное ти разсуждение, его же видиши могуща пасти стадо Христово – не възбраняи ему, а его же видиши славы ради человеческыя – таковым възбранеи». Седящима же има на долзе, пакы глагола Алексие: «возлюбленне, хощу едино прощение, аще даруеши ми». Святыи же отвеща: «еже хощеши, владыко святыи⁴⁹⁵, вся твоя суть». Он же рече: «хощу, да благословиши мне Андроника». Святыи же рече: «рех ти, его же аще требуеши, волен бо есив мне и в моеи братии». И тако поим Андроника, иде в град, дав доволну милостину монастыру. Рече же Андроник: «владыко святыи, идем, яко да обрящем место подобно, иде же монастырь съставити». Иде же митрополит с Андроником, иже недалече отшедше за Яузою и обретше место таково, и тако сътворше молитву, основаста церковь. Прежде же рече Андроник: «владыко святыи, в кое имя велиши основати церковь в котораго святого?». Он же рече ему: «егда пловяхом от Константина града, хотехом на Русьскую землю, тогда внезапу въздвижеся ветръ велик в мори, яко и погружатися кораблю, тогда обещахся, глаголя, аще Господь поможет ми, вън же день изыду на пристанище и котораго святого прилучится праздник, тому церковь създати. И абие помощию Божиею преста море от влънениа своего, и пристахом в пристанище месяца августа в 16. И завещах поставити церковь Образ Нерукотвореннаго Спасова, но забываю в делех церковных, ныне же хощу упразднитися и исплънити обет свои». И тако въскоре абие създанна бысть церковь зело красна. И егда съвръшися, приде митрополит с всем клиросом и, освятив церковь в имя Пречистаго Образа Нерукотвореннаго, постави же ту игумена Андроника, даа ему и потребная на устроение монастыру. Съставишя же обще житие, иже стоит даже и до сего дне благодатию Христовою. Тъи же предреченныи Андроник зело честне и добре пожив в всяком въздръжании и молитве пребываа, бяше бо кроток и смерен сердцем, кроткаго бо учителя благоразумныи ученик. И ради великаго его житиа от иных стран прихожаху, поне токмо благословениа сподобитися от него, братиям же число множаашеся и преспеваше. Зде же о Андронице да скратим и пакы на предлежащяя да възвратимся.

Число же братии множашеся, пищею же нужно зело и оскудно. Святы же видевъ монастырскую скудость, скръбяше о том и часто взираа на Бога и на Пречистую Его Богоматерь, чаа помощи. Глаголаше бо святыи: «Пречистаа Мати Христа моего, ходатаица и заступнице и крепкаа помощнице роду человеческому, буди и нам ходатаица и молитвеница к Сыну Своему и Богу нашему⁴⁹⁶, яко да призрит на святое место сие, еже и възложенно есть в похвалу и честь святого Его имени. Тебе же, Мати сладкаго ми Христа, ходатаицу предлагаем раби Твои, еси бо всем спасителное упокоение и оцестилище и благоутишное пристанище обуреваемым в гресех». И тако моляшеся, бе бо ему обыечаи по вся дни поаше благодарныи канон Пречистеи⁴⁹⁷, еже есть акафисто.⁴⁹⁸Въ един же от днии поющу ему, яко же преже рехом, благодарныи канон Пречистеи Владычице нашеи Богородици, бяше же тъгда 40ца Рожества Исус Христова, днем же пяток бе при вечере. И яко съвершившу ему обычное правило и сед, мало хоте опочинути. И абие глас слышаашеся: «се Пречистаа грядет». И яко слыша преподобныи, и абие въскоре вста и изшед ис келиа в прусть, еже есть сени. И яко же изыде, абие свет восиа велик зело солнца яснеишии. Видит же и Пречистую и два апостола Иоанна Богослова и Петра връхвнаго, в неизреченнеи светлости зарею блистающеся. И абие видев святыи, паде ниць, страхом же⁴⁹⁹ и радостию обиат. Тако же и ученик его, видевь нестръпимую ону зару, страхом⁵⁰⁰ и тръпетом одръжим и лежаше на земли яко мертв. Пречистаа руку простръши, прикоснуся святого Сергиа и въздвиже его, глаголя: «не ужасаися, избранниче мои, придох бо посетити тебе, о братьях же своих и о монастыру не скръби, ни же пренемогаи, отныне бо в всем изъобилствует святыи монастырь, и не токмо донде же в животе еси изъобилствует, но и по твоем еже к Господу отхождении неотступна буду тех». И тако невидима бысть. Сергие жесвятыи же въстав, виде ученика от страха малодушьствующа и повръгша себе⁵⁰¹ на землю, и рече ему: «встани, чадо, не боися». И тако въздвиже его. Начят же ученик тъи пометати себе на нозе святого, глаголя: «извести ми, отче, известно Господа ради, что бысть се видение и светь неизреченныи, еже видехом, поне же дух мои в мале не разлучися от плотскаго ми соуза ради блистающагося явлениа». Святы же бе радуася душею, яко образу его цьвтущу от радости, и ничто же можаше отвещати, токмо се: «потръпи в мале, чадо, поне же дух мои тръпещет от чюднаго зрениа». Стояше же в себе дивяся, яко полчаса, таже рече ученику своему, бе бо ему Михеа име⁵⁰²: «шед, рече, чадо, призови Исаака и Симиона». И пришедшима има, начат има сказавати⁵⁰³ видение, како приде Пречистаа с апостолы и неизреченное⁵⁰⁴ оно сиание и како обещася неотступна быти святого места сего и по моем еже к Господу отхождении. Тии же яко услышашя, абие радости духовныа исплънишяся. Како бо не бе тем радости⁵⁰⁵ исполънитися, таково обещание слышавше⁵⁰⁶ от Божиа Матере. О сладкаго ти гласа, Мати Христа моего! О чюднеи любви и твоего посещениа, Владычице! О неизреченнаго Тиобещаниа, еже с нами пребываниа!» И тако вкупе отпевше молебен Пречистеи Владычици нашеи Богородици, и отпусти их в келия своя. Сам же всю нощь бяше внимаа умом неизреченному оному явлению, не бо нечто гаданием или привидением, но ясно и явленно, яко же древле и святыи Афанасие Афонскыи.

Не⁵⁰⁷ по мнозе времени пакы служащу святому божественую литургию, бяше бо тогда предреченныи Симион параеклисиарх в добродетели съвръшен сыи, его же и сам святыи свидетельствоваше, имуща свръшенное житие. Служащу же святому Сергиу, съи же Симион зрит чюдно видение: божественыи бо огнь сходя в святом жертвенику, осеняше олтар, окружаа окрест святыа трапезы, последи же святого трищи окруживши, яко мнетися, оному в огни от главу до ногу быти. И егда хотяше святыи причаститися, тъи же огнь свится, яко же некаи плащаница, и вниде в святыи потир, и тако тем причастися. Тъи же Симион⁵⁰⁸ дивляшеся неизреченному оному видению и трепеташе от страха. Егда же святыи изыде от святого жертовника, разумев Духом Святым, и того видениу сподобльшяся и, призвав его, рече ему: «чадо Симионе, что устрашися дух твои?» Он же к нему: «зело бо, рече, устрашихся, видев чюдное видение – божественыи огнь, паче же благодать Святого Духа деиствующиа с тобою». Святыи же рече:⁵⁰⁹

«Никому же, чадо, да не възвестиши, яже виде, донде же Бог сътворит яже о мне смотрение и преведет мя от мира сего». Обще же хвалу въздаша Богу, творящему дивнаа и преславнаа, яже видеста очи наши.

По сем же времени преподобныи отець нашь Сергие болети начать и разуме свое еже к Богу отхождение, и призва всю братию и поучив их о плъзе, постави же игумена в место себе Никона, заповедав ему хранити преданиа и уставы монастырскыа. Причастив же ся пречистых таин, конечное же слово изрек: «Господи, в руце Твои предаю дух мои». И тако почи о Господи месяца септевриа в 25 день, жив лет 78. Положиша же честное его тело в монастыри, иже от него създанем. Многа же исцелениа бывають от ракы его дажде и до сего дне. Приходящии бо с верою различиными недугы одръжими исцеление приемлють, не бо едино чюдо или два или три, но многа и несказанна. Бяше же и чюдно зрение: егда честное его тело на одре положено бысть, и многыми инокы честно объстоимо, святыи же лежааше светлым образом, не яко же обычно есть мрътвым⁵¹⁰, но убо цветяаше образ его, показуа душевную его чистоту. Отнудь же убо честное тело его цело и нетленно пребываеть даже и до сего дне. Тем же, о честныи отче, поминаи нас в святыих своих молитвах, вемы бо известно, яко имаши дръзновение к Святеи Троици, помяни стадо, его же поты своими събра, и не забуди, посещаа чад своих всегда, и не презри иже верою и любовию чтущих тя, но приими, иже от устн наших приносимое ти моление, яко чадолюбный отець, яко да и мы сподобимся небеснаго царьствиа о Христе Исусе, о Господе нашем⁵¹¹. Ему же слава с Отцем и с Святым Духом ныне и присно и в векы веком. Аминь.

Принесемъ убо, иже древле просиавших сравных сему, еже от добродетелии житиа и мудрости. И видим, аще въистинну ничим же от тех скуден бе, иже прежде закона онем божественым мужем, по великому Моисею, иже по немъ Исусу пьроводець бысть и пастырь людем многым, и яко въистинну незлобие Иаковле стяжа, Авраамово страннолюбие, законоположитель новыи, наследникъ небеснаго царьствиа и истинныи исправител пасомых от него. Не пустынно ли исплъни благопопечение многых, аще и разсудителен беаше великыи Сава, общему житию управитель, съи же не стяжа ли по оному доброе разсуждение и много монастыря обще житие проходящем вздвиже. И не имяше ли съи чюдес дарованиа, яко же и прежде того прославлении, и сътвори именита по всеи земли. Мы убо не похваляем того, яко хвалы требующе, но яко да он о нас молится, в всем бо страстоположителя Христа подражав.⁵¹²

Публикуется по списку Российской Национальной библиотеки, шифр: F.I.306 (далее: список Б). Пропуски восполняются (и заключаются в квадратные скобки) и ошибки исправляются по списку Российской государственной библиотеки, собр. Вифанской Духовной семинарии, № 92 (далее: список В). Для корректировки текста привлекается также рукопись Российской государственной библиотеки, собр. П. А. Овчинникова, № 277 (далее: список О); пропуски, восстанавливаемые по этому списку, оговариваются особо.

Приидете преподобное святое постник сословие, приидете отци и братье, приидете празднолюбци, приидете овчята духовная, приидете стадо Христоименитое, всяка бремена мирскых вещеи отвръгъше и чисти непорочному да явимся. Се бо свыше наше звание прииде, се бо духовнаа трапеза нам предлежить, и се хлебы неистощимыя пища и масло милованиа, се целомудрия пшеница и вино, душю и тело веселящу, се труба человекы обнавляющи и бесом неисцелную язву дающи, се божественыи огнь, иже греховное тръние попаляющи, с убо Русскыя земля, паче же и вселенныя похвало. Тем же приидете, яко да насладимся добраго нынешняго тръжества, преподобнии яко подражателю, ученици яко учителю, чяда яко отцю, съставльше праздник, тръжество светло в нарочитом празднице добраго нашего пастыря и учителя, зело бо честнеиши есть камениа многоценнаго, вся бо честна земных вещеи и недостоина суть сему праздньству. Рци убо явленне, яко да навыкнем яснеиши, что се звание и кто трапезу нам предложивыи. Аще бо хощеши, слыши разумно и увеси истинну. Не бо от человек наше звание, но самая Святая творителная же и Живоначялная Троице ликованиа въздвиже, и ангелы с человекы праздноватиустрои, всем общее веселие съдея в памяти своего угодника, иже мир своимъ житьем просветившаго, и бесы от Христова стада далече отгнавшаго, иже равноангелскым житием землю же и самыи въздух възрасти, исполнившаго и Духом Святымь верное ему стадо иноческое на пажити животныя наставившаго.

На предлежащее же да възвратимся, яко да навыкнем известно, откуду⁵¹³ съи таковыи великии светилник в последняа времена сиа въсиа. Егда от Иерусалима или от Сиона – ни, рече, но убо Русская великая земля, иже много лет живши без просвещениа, не многыми же леты святого просвещениа сподобившися, яко тъи превзыти от иже исперва святого просвещениа приимши, глаголю же, очистившеся от идольскаго поклонениа, процветши же в себе православную веру, и манастыря честныя съставишя, в них же многы [велики] светилници въсиавша, яко же бы рещи, всю подсолнечную просвещающи, в них же великии Сергии въсиа, о нем же нам ныне слово предълежить.⁵¹⁴

Бысть убо некто мужь отечьства граду Ростову Кирил именем, благоверен сыи, бояся Бога, всяческими добродетелми украшен, тако и [с] съжителницею своею Мариею именем, поучяющеся в заповедех Господних день и нощь, и един к единому душю с телом преклоншю, моляхуся.⁵¹⁵ Родиста же прьвенець свои и нарекошя имя емуСтефан, последи же по Божию промыслу сего отрока Варфоломея родиста, о нем же нам слово. О честна корене святая отрасль! О прехвалная връсто! О добрая супруго! О божественое съчтание! О святое порожьдение! Блажени есте въистинну и преблажени, сподобльшеся таковому отроку родителие быти. Хощю же вашеи любви⁵¹⁶ исповедати нечто дивно и памяти достоино, вижю бо вас в сласть послушающих.

Бысть таково чюдо прежде рожениа отрока святого. Случи бо ся, яко же о Иоанне Предтечи, познавшаго владыку своего в чреве матерне взыграся, тако же и зде случися. Пришедши бо, рече, матери его по обычяю своему в церковь помолитися в время божественыя литургиа, и бысть егда възглашение Трисвятое, провъзгласи младенець в чреве матерни, яко и гласу слышатися иже ту стоящим. Тако же и матери страхом и недоумением обьяте бывши, в себе помышляющи, что се будет. И егда начяша пети Херувимскую песнь, тако же възгласи. Та же святаа святым⁵¹⁷, и выше предреченнаго абье възгласи. Предстоящим ту слышащим и дивящимся. Кто не дивится преславному чюдеси, еще бо младенцю в утробе матерни провъзгласившю, но слава единому чюдотворящему Богу.

По сих же егда исполньшимся днье рожьдению, родися съи чюдныи отрок. По днех исполнении принесоста родителя его в церковьи огласивше крестишя его во имя Отца и Сына и Святого Духа и нарекошя имя ему Варфоломеи. И о провъзглашении его въ утробе матерни възвестишя священнику. Он же разсужение⁵¹⁸ имея от божественаго откровениа, рече к родителема его: «О провъзглашении младенця своего радуитеся и веселитеся, поне же съсуд будет избран Богу, Троице служитель», еже и бысть. Родителие же сиа в ум внимающе, зело радовахуся.

Пакы же о младенци чюдодеиствовашеся. Отнеле же бо родися, в среду и в пяток от съсцю не съсаше и млека не ядяше, яко же и прочии младенци. Егда убо книгамъ учися или от некоего учителя навыкну таковаго великаго въздръжаниа образ, и Дух Святыи деиствоваше в нем, показуя вконець хотящаго светилника въсиати, будущаго образа въздръжаниа, еже и бысть.

Внегда же достиже седмаго лета възрастом, и вдашя его родителие на учение грамоте. Отроку же учящюся косно неразумьем побеждаему, учителю же прилежащю, ничто же успеваше. Отроку же скорбящю от сверьстник своих, зря себе побеждаема и уничижаема от всех. Се бе по строению Божию, яко да от Бога книжныи разум дасться отроку, а не от человек. В един убо от днии изиде отрок прохладитися, яко же бе обычяи, зело бо любя безмлъвие. И проходящю ему некие дубравы, по строению Божию обрете некоего старца под древом стояща и молитву творяща. Отрок же приближися и ста близ, ожидаа конца молитве. Съвръшившю же старцю молитву и сътвори отрок метание, старець же благослови отрока и рече к нему: «Что требуеши, чядо». Отрок же отвещя: «Молитв твоих, честныи отче, требую, поне же вдан бых родителми моими на учение грамоте, много наказаем есмь от учителя моего и не могу разумети, и сверстьници мои превъсходят мя. Сего ради зело (лакуна в тексте) старцю и благословение получишя от него, и понудиста его внити е в дом свои и причяститися пищи. Старець же вниде, глаголя: «Чадо, подобаеть преже причяститися духовнои пищи». Поим с собою освященаго отрока и вниде в храм молитвеныи и начяша пети чяс третии, и повеле же отроку псалмопениа глаголати. Отроку же отрицающуся и глаголющу: «Отче честныи, аще бы аз разумел грамоту, радостно бы духу моему славословити Творця моего, но того ради молю твою святынютотгж дав по жлиши Бога о моем неразумьи да дасть ми разум на учение сему, еже ми повелеваеши глаголати». Старець же рече ему: «О чядо послушания Хр истова, отвръз уста своя да привлечеши дух, паче еже Бог дарова тебе в сердци твоемъ изрещи усты твоими, уста твоя възглаголють премудрость и поучение сердца твоего⁵¹⁹ разум, въспои Богу внутрь зрящему тя». По словеси же святого старца, паче же по Божию откровению, и отрок же начя стихословити добре и строине, яко дивитися всем. Бысть, яко некогда пророку Исаии⁵²⁰, иже от Серафима угль прикосновением приим, тако же и сему честному отроку, тамо Серафимом, зде же старцем, или паче ангелом Божиим. Старець же благослови отрока с родительми, рече: «О блаженнаа версто, якосынъ ваю велии будет пред Богом и многиа ради добродетели его съсуд избранъ хощет быти Богу и служитель Святыя Троица». И сия рекши, отиде от них. Они же чюдишяся в себе, яко благодать Святого Духа посещением Божиимъ посланнаго старца или ангела Божиа. И тако блгодаришя Бога, даровавшаго отроку разум грамоте.

Блаженныи же отрок, иже от чрева матерня освященныи, пребываше в всем повинуяся родителем своим и тщашеся ни в чем же преслушатися родителеи своих, по Божию повелению, рече: «Чти отца и матерь свою, да будеши долголетен на земли». Начят въздеръжатися зело, постом тело свое изнуряа, в дне единою хлеба токмо причящаася в меру, не до сытости, дебелыи⁵²¹ пищи весма очаашеся, в нощи же мало нечто сна приимаше, яко дивитися и родителем его, не бо⁵²² еще чин таковым бо възрасте младе зелно въздръжание имети. Мати же его любезными глаголы увещевааше и глагола: «Възлюбленное мое чядо, почто тако съкрушаеши си тело, не веси ли, яко многа въздръжаниа язву телеси наводить, паче же уну ти сущю и плоти цветущи, нам скорбь немалу исходатаиствуеши, послушаи матери своея, престани от таковаго въздръжаниа». Благоразумныи же отрок отвещя, глаголя: «Почто, госпоже мати моя, увещеваеши мя, отлучаяа сладкаго мя въздръжаниа, его же и в животе имущи ничто же полезнеиши, ни бо слышах матерь чядом на злои на душевную пагубу съветующю, плоти бо угажати конечнеи смерть наводит и вечную муку, паче же юному. Писано бо есть: яко брашно и питье не поставит нас пред Богом. Но остави мя, мати моя, яко же начях, тако бо Богу помагающю съвръшити ми». Мати же его дивяся премудрому ответу, паче же по Бозе доброму произволению и деиством Святого Духа, и остави его, ркуще: «Яко же хощеши, тако твори, чядо, никто же бо можеть възбранити еже по Бозе чюдному ти деланию».

Отрок же блъшими подвигы подвизаашеся и николи же ум его уклонися, яко же обычяи есть детем, на игры и на смехотворенная словеса, но всегда⁵²³ дряхлость и плачевное хождение, и елико⁵²⁴ попечение о простоте, толико питаа ум свои премудростию, насыщаашеся присно всегдашним въздръжаниемь и вменяа себе наслажьдение алкоту и в зиме наготу, непщевааше теплоты, сице убо плоти своея врагь немилостивь. Егда бо побежаашеся сонным естьства томлением, спротиво томляашеся долгым трьпениа трезвениемь. И аще бо некто от неимущих сретааше, и еже что имея, никако же пощаде. Царски⁵²⁵ убо плоть свою покаряа, а душю же просвещаа. Тем же преже иноческаго житья инок познаваашеся и преже пастырскаго свершениа пастырь являашеся. Елма же добродетелное его житие и кротчяишии нрав, премудрость же и разумчестна и любезна всем творяху, и дивляахуся вси, зряще его юностью обложена и таковую мудрость имуща. Настоящее же да глаголется⁵²⁶.

По сих же предреченныи благоверныи мужь [предиреченыи Кириль], отець освященнаго отрока, преселися от отечества своего сь всем домом своимь от предреченнаго града Ростова на место, именуемое Радонежь, не яко место славно или нарочито, но Богу хотящю прославити на том месте своего угодника.

Благодарованныи же отрок с родители пришед вь оно место, наипаче сьблюдая душевную чистоту и желааше зело иноческаго жития, но убо родители вьзбранимь⁵²⁷ бываше. Глаголааху бо к нему: «Чядо любимое, зриши старость нашю, уже бо кь концю приближаемся и не имаве развее тебе служащаго от ближних рода⁵²⁸ к послужению, пожди до конца родитель своихь, яко да дльжное послужиши и благословениа сподобишися и никим же вьзбранень будеши». Благопослушливыи же отрок, яко слышя сиа от родитель своих, и зело умилися, и тако обещяся, яко не преслушатися их ни в чем же. Не по мнозе же времени родителие его иноческаго житиа сподобятся и добрым покаяниемь и исповеданиемь единь по единому отидоста кь Господу. Отрок же сподобив ихь псалмопениемь и честью надгробною украсив, земли предасть, и благословениа сподобився, свобожается от юзь, яже от мирьскых молвь. Пришедьв дом родителеи и расточи имение убогым и рабы свободи, вся добре управи и изиде, ничто же взем, по божественому апостолу: «Уметы вся вменив, да Христа единаго приобрящет».

И поиде на взыскание брата своего по плоти предреченнаго Стефана, съи бо пребывааше в монастыри тогда в иночьстем образе, добре жительствии подвизаяся и многы плъзуя. И пришед, исповеда ему отшествие к Господу родителии своих, и прослезистася вкупе законом естьства. И посем молит Стефана, помысл свои сказа ему, о нем же прииде, да идеть с ним на взискание места пустыннаго. Стефан же понужен им, паче же позна брата своего доброе произволение, ведыи добродетелное его житие и от утробы матери своеа отрока освященнаго, с многою радостию поиде с ним. И обшедшя пустыня многы и обретоста место угодно и възлюбиста, и сътвориста молитву, и начяста дело. И сътвориста хизину себе малу, в неи же покои от труда приимати, и по мале времени създашя церковь малу. Повеленьем тогда святеишаго архиерея Фегноста освящается во имя Святыя и Живоначялныя Троиця. Таже Стефан пребыв время доволно с братом своим и отиде в свои манастырь.

Благоразумному отроку Варфоломею Богом направляему, на том месте безмлъствующю. Не многу же времени мимошедшю, по Божиюблаговолению прилучися приити к нему старцю чином освящену. Раб же Божии видев сего, радостен быв зело и приат его, яко от Бога послана, и умоли и пребыти с ним. Он же видев его по Бозе добродетелное житие и душевное незлобие и чистоту, и прибысть у него время доволно. Избранник же раб Божии Варфоломеи зрить старца оного в добродетелех сиающа и многу плъзу приимааше от него, и помышляаше – сие быти ему посещение Божие, яко же и прежде о дарованнеи ему [старцемь] грамоте. Таже по времени блаженыи молить старця, да облечет его в иноческыи образ. Старець же онъ ведыи в мнозех добродетелех святого, ни мало помедлив, сътворяет волю святого, и налагает ему святыи иноческии образ и нарече имя ему Сергие. И тако поучив его о плъзе и рече: «Аз, чадо, в свои путь отхожю, ты же пребываи на месте сем, яко же Богу благоволившю и тебе, раба Своего, в волю наставльшю, Тъи да будет тебе прибежище и сила на невидимыя врагы и козни и лаяниа их, и от тех съхранит тя всегда и заступит тя от сетеи вражиих, поне же на сем месте хощет Бог въздвигнути обитель велью и распространити ю зело, бысть же прославитися святому Его имени». И тако молитву сътворь, рек: «Господь да укрепит тя на месте сем и подасть ти тръпение». И благословив его, отиде. Бе же тогда святыи, егда сподобися иноческаго образа, възраестом 23 лет.

Отсюду⁵²⁹ же Бог прославляаше Своего угодника, и проношаашеся повсюду слава о нем. Он же яко студа мерзъска славы гнушаашеся и попечение же имяше много, еже бегати всеи тщия славы и работати Богу истинну в таине. Начят же въздръжатися выше человеческиа силы, алкотою безмерною и наготою в зимнее время, яко и камению разседатися от зелнаго мраза. Он же в единои ризе яко бесплотен подвизаяся, аще бо и яру зиму тръпяаше, но сладко сих въздание ожидааше и тщаашеся всяко зде томление страдати, еже геены⁵³⁰ и будущаго мучениа убежати. Видевше же беси⁵³¹ от святого утесняема и по мале боящеся изгнаниа от жилища своего, и преображахуся овогда в зверя, овогда же въ змиа, покушающеся устрашити святого. И бе видети чюдное борение мужа: овии свистанием зверьскым сверепьством устремляющеся, съи же молитвою отражая их, яко некиим мечем обоюдуострым пресекааше, онех оплъчениа далече негде отгоняаше. И тако Христовою благодатью пребысть от них неврежен.

В едину же от нощи въсхоте святыи поити в церковь на обычное правило и зрит явлено множество плъков бесовскых, яко же некое великое воиньство, яростью на святого подвизающеся и зубы скрегчюще, яко мнети пламени велику изъ уст их исходити, и яростне глаголаху святому: «Изиди от места нашего, изиди, яко да не зле умреши». Святыи же молитвою въоружаашеся, никако же бояся или устрашаяся тех кознеи, ни сверепаго их лаяниа, видяаше бо некрепкую их силу. Бысть же чюдно зрение: молитва святого яко пламень из уст исшедши, абие тех попали и невидимо сътвори.

Сице⁵³² убо святыи подвизаася, мысленыя врагы удобь побежая, хвално всякыми человеческими обношаашеся усты, овому бо спостническое, овому же трудолюбное поведающе, иному же простое и незлобивое, и овому жестокое в пощениих въздеръжание паче меры, иному же над бесы власть възвещающим, и овому же бдение и сухоядение, и на земли легание, и чистоту душевную, и смирение нелицемерное, и разсужение доброразсудное, и любви съвръшение всем просящим и благотворящим, нищии же яко благодетеля похваляюще. И поне же таковеи славе происходящи о нем повсюду, и многы имяще⁵³³ приходяаху к нему плъзы ради, инии же моляаху его, еже съжительствовати с ним. Он же с радостию всех плъзы сподобляа, не некими иными глаголы высокими или испещреными, но Духу Святому деиствующю усты его. Хотящим же жити с ним утешааше их, глаголя: «Чяда, да не устрашит вас помысл, яко места пустыннаа, нужна суть, весте бо, яко многыми скръбьми подобает нам внити в царство небесное». Сиа к ним святому глаголющю, бяху вси повинующеся ему и ревнующи всяческы от душа добродетелем святого. Множащим же ся братьям, и бысть келиамъ строение, бяху по⁵³⁴ единому безмолствующу и предвъсходящи друг друга добродетельми благодатью Христовою. Преподобныи же радоваашеся духом и благодаряше Бога.

Священнику же [не] сущю, о сем зело тяшко вменяющим себе братиям и много моляаху святого, и аще бы приял священьства сан. Оному же никако же повинующеся и глаголющу: «Несть моея меры дело се, подобает бо священьнику быти яко ангелу Божию» . И сему бывающю на много время. Братьям же припадающим и молящимся, святому же всяческы отрицающися. Последи же моленьем Афонасиа епископа, тогда бывша мужа добродетелми свята, едва с нужею повинувся святыи, и сего рукоположеньем священьству сподобися. Бяше бо святыи в духовнем съузе зело възлюбленному епископу, и того ради не може преслушатися его, повинуяся ему святыи. И много поучив и и побеседова с ним о плъзе и прочее, рече: «Веси, възлюбленне, по божественому апостолу, немощи [немощных] носити, а не себе угажати, яко и Христосъ⁵³⁵ не себе угоди⁵³⁶. Тако бо Богу извольшю, и тебе приведену быти на оно место и прославитися твоею паствою, хощет бо Бог въздвигнути обитель велию въ множестве братства, и по воле Его кто упасет, аще не званныи от Него, теебе бо ожидаеть, преподобне, дело сие. Мир тебе, воине Христов, прочее мужаися и крепися на противнаго, мног бо ти велии подвиг предлежит». Тако благословив и целование о Христе дав ему и отпусти его. И отиде в свои манастырь.

Пришедшю же блаженному в манастырь, възрадовашяся ученици его, узревше своего отця и учителя, иже преже молишя его, и сие Богу деиствующю на нем, желаемаго не погрешишя. И тако от преподобьнаго наставляеми, наипаче на предняя [подвиги крепце] подвизающеся, на деланиа духовная поучающеся.

Таже пакы въстаеть враг, не тръпя себе прогонима от святого, претворяется в змии великии, и исполнися келья его полна змии, яко и земли не видети от множества их. Святыи же токмо молитву сътворь и поминааше Господне слово, глаголюще: «Се дах вам власть наступати на змиа и скоропиа и на всю силу вражию, и ничто же вас не вредить», и прочее. Преподобному превыше⁵³⁷ дарова ему Бог власть на духы нечистыя, никако же смеють приближитися ему.

И превосходяще⁵³⁸ слышание о блаженнем в вся страны. Прииде же старець некии честныи архимандрит в то время от Смоленска именем Симон, слышав добродетелное житие святого. И елико принес имениа, вдав преподобному, моля его, да въздвигнет блъшую церковь в обители, еже и послуша разсудная глава. Себе же предасть в послушание свершеное отцю Сергию, и тако преебывааше. Егда же разсуднеиши пастырь премудрыи мужь в добродетелех начят съзидати блъшую обитель четверообразно, в лепоту зело, посреди же церковь блъшую красну, отвсюду видиму, трапезу же и келии и вся, еже подобает на потребу. И на предлежащее възвратимся.

Бе бо обычяи добраго и мудраго пастыря: в глубокы вечер исхожааше и обхожаше болныя и посещая братию по кельям, хотя увидети коегождо деланиа; его же слышя бдяща и молящяся, или божественое писание почитающе, или рукоделие безмлъвием делающе, от сих тихо отхожаше, благодаряше Бога о них, а его же обрящет неполезно творяща, о семь негодоваше, но [с] молитвою ударяа, назнаменуя, прохожааше.

Случи же ся некогда оскудение пищи в обители святого, и тако пребышя на три дни бес пищи. Бе бо устав преподобьнаго и духовнаго настоятеля: никоторыя ради нужа не исходити из манастыря⁵³⁹ братиям к мирскым и просити от них, но на Бога имети надежю и от Того просити их же требуют, не бе бо еще обьщее житие. Неции же от братьа начяша роптати на святого, от глада утесняеми, глаголюще: «Доколе възбраняеши нам итьти в мир да насытимся, от глада исчезающе, но убо и неволею нам тръпети за сию нощь, а заутра изидем от места сего, да не зле умрем».Видев же святыи изнемогших и зело скорбящих, яко мудр врачь начя утешати их, поведуя им писаниа святыхь отець житиа и тръпениа их, колико пострадашя скорбеи Господа ради, глад и наготу и ина зла, даждь и до смерти, царства ради небеснаго. Мы же малаго сего ради лишениа малодушьствуем и не помянем, како обещахомся на постризании нашем тръпети всяку скорбь царства ради небеснаго, и не помянем Господня слова, в еуангелии пишет, глаголя: «Възрите на птица небесныя, яко ни сеють, ни жнут, ни в житница збирають, но Отець небесныи питает ихъ»; нас ли не может, раб Своих, напитати работающих Ему, нам же в мале времени приключьшееся на искушение наше нетръпеливи явихомся. Но благодарим Господа, мало потерпим, но в велику нам плъзу будет, без искушениа бо злато не свершается. Заутра бо посетит нас Господь Бог, и узрите славу Его, прочее же не скорбите и утвержени будите верою.

В утрии же день по проречению святого приидошя неции мужие в обитель с множеством брашен различных, хлебы теплы и брашна вся нова принесошя къ преподобному, поведающа именем некоего незнаема христолюбця приславша на Сергеево имя. И повеле святыи поставити им трапезу, они же невидими бышя. И тако уверишяся вси, яко молитвами раба Божиа святого Сергиа посещение се Божие есть. Чюдиша бо ся зело, видящи вся брашна устроена нова и хлебы теплы, не бе бо ту близ обители таковых мужеи живущих. Блаженныи же Сергии благодарив Бога, рек учеником своим: «Видите, чяда, чюдитеся и веру имете, что се тръпению въздание, научитеся в искушениих не пренемогати, яко не забудет Господь нищих Своих до конца, ни же презрит Господь раб Своих, на месте сем живущих и молящихся Ему с верою». Братиям же пометающим себе на нозе святого, окаанных себе нарицая и не тръпеливых, и молящеся прощение от него получити, иже ропташя на нь. Отець же наказав и много о ползе своя чяда, яко же подобаеть о съгрешении простив, рече: «Прочее, чяда, внимаите себе и научитеся находящая вам напасти тръпети». И тако отпусти я, и вси благодаришя Бога о преславном чюдеси, и на многы дни доволно бысть брашна всем братьям.

Хощю же вам и вашеи⁵⁴⁰ любви беседу прострети от преславных чюдес преподобьнаго, еже сътвори Бог угодником Своим. Еже бо предвъспомянухом доброразсудную главу, пришествие его в пустыню безмолвиа ради на сие место, воде же не сущи близ, изволи труда ради своего. По сем же Богу благоволившю, умножающимся братьям и нужда съдръжаще их, отдалече воду приносяще, и сего ради неции поропташя на святого, глаголюще: «Въскую не разсужая сел еси на месте сем, воде далече сущи от манастыря». И много время быевающю сему, глаголя к ним: «Чяда моя, един зде хотех безмлъствовати и тако устроих полезная мне, ныне же Богу тако благоволившю, множащимся братьям [и] таковеи обители быти, прочее не скорбите о далечеи сущи воде, облегчити может Бог труды вашя, не малодушьствуите, дръзаите в молитвах ваших, скоро услышани будете, вся бо възможна Богу; аще бо непокоривым людем евреискым в пустыни от камени воду источил есть, вас ли работающих Ему раб Своих презрит». И тако утеши их. По мале же времени поим единаго от ученик своих, изиде отаи из манастыря, никому же видящю, в время благополучно сниде в дебрь, яже под манастырем, иде же рвы сухи, в них же николи же воды, развее от наводнениа и нахождениа дождя, яже древнии человеци ясно о том известишя. Обрете же в едином рве мало воды дождевныя и преклонь колени начя молитися: «Боже, Отче Господа нашего Исус Христа, сътворивыи небо и землю, вся видимая и невидимая, създавыи человека от небытиа и не хотяи смерти грешником, но обратитися и живу быти, тем же молим Ти ся мы, грешнии раби Твои, услыши нас в чяс сии и яви славу Свою, яко же в пустыни чюдодеиствовааше крепкая Ти десница, от сухаго камени Твоим повеленьем вода истече, тако же и зде яви славу Свою, Ты бо еси творецьнебу и земли и Твоим повелением вся бышя, даи же нам воду на месте сем, да разумеют вси, яко всегда послушаеши боящихся Тебе и въздающих⁵⁴¹ славу имени Твоему, Отцю и Сыну и Святому Духу, ныне и присно и въ векы веком, аминь».

И сия рекшю святому и место назнамена, внезаапу источник велии явися и потече яко река, еже и доныне есть всем зрящим, от него почерпаема на всяку потребу манастырьскую, благодаряще Господа Бога и Его угодника великаго проявленаго в чюдесех. Многа же исцелениа бывают от воды тоя молитвою святого приходящим с верою различными недугы одръжимы, не токмо в обители, но и в домы своя и в вся страны относяще, болящих покропляют и напаяють, и вси исцеление получяють и донине неизменно. От того времени прозвася источник он именем Сергиев на много время, не ведущю святому. И по сем, яко услышано бысть от него, и зело негодовааше, гнушаяся славы человеческиа, и заповеда ни от кого же зватися источнику Сергиевым именем. И тако умлъчяно бысть от всех по заповеди преподобьнаго.

Се ино чюдо скажем вашеи любви. Беяше некто христолюбець живыи въ пределех обители святого, имея велию веру к нему, и бе ему сын единочядыи, отрочя мало, болезнию съдръжимо, и от дни зело изнемогающи. Отець же его взем с верою влеком, несе его къ прееподобному, помышляа в сердци своем: аще донесу чядо свое до человека Божиа, всяко облегчить ему болезнь. И пришед моляаше святого, да помолится о нем. И бысть яко простерти ему молитву, он же изнемогши от зелныя болезни и умре. Видев же отець чядо свое умръше, всю надежю отложив, рыдание к плачю преложив и не можааше утешитися, увы мне, глаголя, о человече Божии, аз с верою и с слезами в печяли своеи принесох чядо свое к тебе, надеяхся утешениа от тебе получити, нине же конечно⁵⁴² отщетихся любезнаго чяда моего, лишен надежа моея, утешитися ничим же имам, прочее уне ми бысть, яко да бы в дому моем чядо мое скончялося, неже лишену быти прочее любви твоея святыя и веру, еже имех к святыни ти, уже бо⁵⁴³ погыбе память его с шюмом. Святыи же много тешааше его от божественых писании, он же не можааше утешитися, но горко рыдааше и отиде уготовити гроб отрочяти своему [и] погребалная, оного же остави в келии у старца святого. Яко же отиде отець отрочяти умершаго, святыи же начят поминати отець жалостныи плачь по чяде своем, зело умилися, въста на молитву, начят молитися о умръшем отрочяти с слезами. И внезаапу абье начят [отроча] подвизатися и руце простирати, яко же обычяи есть детем. Прииде же отець, нося погрее⁵⁴⁴балная и гроб уготован. Преподобныи же призвав, рече к нему: «Въскую, человече, подвизаешися зелною печялью съдръжим, не разсмотрив добре о детищи своем, не умре бо твое отрочя, но живо есть». Он же не имяше веры, видяаше бо известно, яко умре, и приступив к детищю и зрить его жива сущи, зело ужасен бысть, припаде к ногама с радостию, благодарение въздаяше ему, глаголя: «О человече Божии, твоими молитвами оживе мое отрочя из мертвых, своима очима неизменно видех всяко умръше свое чядо».

Святыи же глагола к нему: «Прелстился еси, человече, не веси, что глаголеши, отрочя бо твое не умре, тебе бо не разсмотрившю от великиа болезни и печяли, на пути ему в болезни бывшю и от студени изнемогшю, мнети ти, яко мертву ему бывшю, ныне же оживе, душа бо его не разлучися соуза⁵⁴⁵ телеснаго, яко же и родися». Отець же детищя креплься, яко мертва бе зрех его, никако же съблазнихся: «И ныне оживе твоими молитвами въистинну, честныи отче». Святыи же запрети ему, глаголя: «Аще не умлъчиши се, отщетишися отрока своего и зле постражеши беду некоторую». Обещася никому же поведати, и приим отрочя свое сдраво, отиде в дом свои радуяся, славя Бога, проповедати бояся, млъчяти же не могыи о преславнем чюдеси святого.

Предлежащее же да глаголется, ино чюдо святого скажем. Бе некто велможа вдалее от лавры святого, жилище имея на реце Влъзе, от рода великых и славных. Случи же ся ему болезнь тяшка зело, в нощи и в дне мучим бе бесом люте, яко путы железныя съкрушати ему, и ничим могуще его удръжати, яко и до десяти крепкых мужеи или множае вяжющим его и дръжащим, бьяше их и зубы хапаше я, исторгашеся от рук их, и бегаа в пустыннаа места, и тамо мучим люте бывааше и съкрушаем от беса, донде же пакы обретааху его. Сердоболи же его слышавше о преподобнем Сергии бываемая от него чюдеса, и повезошя его в обитель к святому. И бывшим им на пути, многы труды подъяша водящии его. Он же беснуяся, велиим гласом въпиаше: «Оле нужа сиа, камо мя ведете, мне не хотящю ни слышати Сергиа, колми же видети, възвратите мя пакы в дом мои». Мужье же нужею влечяахут его. И егда близ манастыря приведошя его, он же растерзав юзы на собе и на всех устремися, глаголя: «Тамо не хощю, но хощю отнюду же изидох». Глас же испущааше зол, яко растерзатися ему от зелнаго вопля. И услышано бысть кричяние от него в обители святого. И възвещено бысть святому, и повеле в било ударити, братиям же събравшимся, начя преподобныи молебен пети за болящаго. Болныи же начятъкротети, и приведен бысть в монастырь к святому. Блаженныи же изиде из церкви, нося крест в руце своеи, и тако знаменаеть болящаго. Он же великым гласом рыкнув, отскочи от святого и въвръжеся в воду, еже беяше на монастыри, глаголя сице:

«Оле нужа пламене сего страшнаго!» И от того чяса исцеле благодатью Христовою и молитвами святого Сергиа, и бысть сдрав, и начят глаголати смыслено. И въпросишя его, что ради въвръжеся в воду. Он же рече: «Егда начят мене знаменати святыи старець честьным крестом, и тогда видех великии пламень исшедши от креста, всего мя опали, и тогда въвръгохся в воду, мнех бо, яко сгорети ми от пламени оного». И тако пребысть в обители святого время доволно, кроток и смыслен, и посем отиде в дом свои сдрав, радуяся и славя Бога и хвалу въздав святому, яко его ради приат исцеление. Сия же до зде.

Всюду убо велик бяше общеи строитель от Вышняго промысла и всемъ⁵⁴⁶ прилагашеся, и много множество стицаахуся к нему от различных стран и градов, паче же весь лик постническии своя жителства оставляющи и к нему прихождааху, слышавше полезнеишее, еже съжительствовати с ним, наставлятися къ добродетели. Не токмо постникы или от великых велможь, но и до простых людии, иже на селе живущих, вси бо имяаху святого, яко единаго от пророк, и прихоеждааху к нему овии видети святого и благословение получити от него. От них же некии земледелець от далечие страны пришед, слышав, яже о святемь, и хоте видети его. Случи же ся тогда старцю в ограде копати. Поселянин⁵⁴⁷ же въпрашааше, где видети его, и показавше ученици его место ему, иде же делааше святыи⁵⁴⁸. Он же желаньем влеком, поиде в оно место видети его, и узре святого копающа землю в ризе худе многошевнеи, и непщевааше того быти, мняше, яко поругахуся ученици ему простоте его, не того показахуть ему. Надеяшеся, яко славно имя ношааше святыи, тако и видети его хотяаше в славе и чести велицеи. И пакы пришед, въпрашааше от ученик его, глаголя: «Оскорбисте мя, [отци] святии, кого ми показасте, яко единаго от нищих, поглумистеся о мне, аще поселянинъ невежа бых, но приидох с верою и с великым желаньем видети святого старца Сергиа от далних стран, его же слышах славна зело и честна, и показасте ми некоего страньна убога, непщюю сего быти». Ученици же святого глаголаста к нему: «Человече, не подобаеть нам глумитися, показахом ти, то тъи есть отець нашь старець Сергии, его же желаеши и требуеши, но не веруеши нам». Он же отвещав: «Не верую сему быти, его же ради приидох семо и зело оскорбех, яко туне труды подъяхъ и не получих желаемаго».И се еще ему глаголющю, святыи изиде от ограда и пакы показашя ему. Оному же сумнящюся земледелцю, паче не верующу ему, и лице свое отвратившю, глаголя: «Аз приидох яко пророка видети, яко слышахом честна мужа и славна, а сего вижю в последнеи нищете и убожестве и вътще бысть труд мои». Божии же раб позна помысл его и таковое неверие о нем и благодаряше Бога, яко гордии⁵⁴⁹ хвалам и честем радующеся, тако смиреномудрыи о бещестии своем и о уничижении⁵⁵⁰. Сергии же поят его с любовию, посади и на трапезе одесную себе и учреди его доволно, и рече ему: «Человече, не скорби, не вътще бо труд твои, его же желаеши и помале того узриши». Оному же единако не разумеюще о святомь. И еще преподобному Сергию глаголющю к нему, и се некто от служащих скоро притече, възвещаа ему некоего князя от великых грядущих к обители святого. И плъком предгрядущим и отроком предидущим, честне прииде в обитель, ему же прииде на сретение блаженныи Сергии. И еще далече сущю старцю, князь поклонися ему до земля. Сергии же благословив его и о Христе целование дав ему, и тако идоста, прочиим же всем предстоящим. Предреченнаго оного селянина далече негде отринушя, его же преже гнушаашеся, последи же сего желааше издалечя видети, но не можааше, и от предстоящих некоего въпрашааше, кто се стаерець с князем седяи. И сказашя ему: «То есть старець святыи Сергии». И тако поселянин объять бысть страхом великым зело и начят укаряти себе, поношая своему неверьствию, глаголя: «Како ослепох и не разумех и не веровах, показающи ми [святого] старца, и како прочее явлюся лицю⁵⁵¹ желаемаго, его же аз преже окаанныи гнушаяся, отвращахся». И помышляа от страха не явитися старцю пред лицем, но бежати от обители. Яко же отиде предреченныи княз, и призываеть преподобныи поселянина. Он же страхом одръжим, пришед, падая на нозе святого, с слезами моляся простити ему неверьствие его и неразумие, поношая и уничижая свою простоту. Смирению же нелицемерну истинныи же делатель утеши его, глаголя: «Ни, чадо, не скорби, поне же ты един преже истинствовал еси о мне, прочии же вси съблазнишяся, яко же и тебе⁵⁵² ныне припадаа к нашему смирению». И тако утеши его всяческы и радостна отпусти в страну свою. Он же отиде, славя Бога и дивяся зелному святого Сергиа смирению, и идяше в путь свои, всем исповедуя. От сея убо вещи разумети есть, какова⁵⁵³ смиренная святая она глава, яко гнушающагося поселянина паче възлюби. Приносимая бо досада искушаеть коегождо внутрь съкровенное произволение. Сиа уботако.

Некогда же святому в обычнем своем правиле бдящю и молящюся о ученицех своих, яко да Господь Бог поспешит им в обхожениих своих. И тако ему молящюся в нощи, слышить глас к нему глаголющь: Сергие! Он же удивися необычному званью и сътвори молитву, отвръзе оконце келии, хотя увидети, откуду глас бысть бывшии. Абье зрить видение чюдно: свет бо велии явися с небеси, яко всеи⁵⁵⁴ нощнеи тме отогнане бывши и дневныи свет предвъсходяще светлостию. Святыи же пристрашен бысть, скоро исшед ис келиа и пакы слышах глас: «Сергии, молишися⁵⁵⁵ о чядех своих, услышана бысть молитва твоя, възри и виждь чяд своих, еже в обители твоеи тобою наставляеми». Святыи же зрить множество птиць седящих в обители, и красота их неисповедима сиающе, и гласи възглашающе ангелское пение, неисповедимо усты человеческими красоты оноя. И пакы глас бысть: «Зри опасно, сии образ чяд твоих, иже⁵⁵⁶ тобою наставляеми и твоему добродетелному житью опасно ревнующе и исправляюще, то суть чяда твоя, а иже по отшествии твоем твоему житию тако последующе, въображенному тобою, тоя же славы сподобятся и въ вечных святыхь обителех вселятся». Святыи же предстоя трепетен въ иступленииума, зря, и мало укреплься, и възглашаше Симона, хотя устроити сведетеля сему чюдному зрению. Он же скоро притече, дивяся необычному старца званию, не бе бо далече келиа его, но убо не всего видениа сподобися, но чясть некую малу света оного сподобися видети. И тако вкупе дивляхуся и духомь радующеся. Исповеда блаженныи вся по ряду, яже видев и слышя, и вси ученици святого сиа слышавше, възрадовашяся о видении своего отца, како виде чяд своих в славе онои и неисповедимеи. И зелным дръзновеньем въздвигошяся братья на многиа подвигы, ревнующе добродетелному житью своего наставника.

По сих временех приидошя греци от Константиня града с посланьем от патриарха киръ Филофея к блаженному отцю Сергию, и тако възвестишя, сказашя старцю благословение и поминькы от патриарха и парамандъ⁵⁵⁷ и скыму, и послание вдашя ему. Святыи же обрадован бысть и удивлен о благословении и побеседова к ним обычьно, и по сем рече к ним: «Простите мя, отци святии, что реку святыни вашеи о прихожении вашем, в удивленьи есмы и о преславных дарованиих святого вселеньскаго⁵⁵⁸ патриарха радуемся. Кто бо есмы недостоинии? Како худость нашя ведома святеишему патриарху? Блюдете, отци, егда ко иному послани будете». Они же решя: «Мы, отче, о семь никако же съблазнихомся, но яко же послани быхом на Сергиево имя, ты ли еси Сергие?» Старець же рече: «Аз есмь грешныи и недостоиныи⁵⁵⁹ Сергии». Греки же решя: «Послушествуеть ти, отче, послание патриарше на твое имя почет, уверишися, поне же не утаено се, еже по Бозе житие твое, в вся конци земли и до Царяграда и до вселеньскаго нашего патриарха». Святыи же, яко услышя сиа, радостен бысть о посещении Божии и оставляет их в обители, и препокоить их, и честь въздасть им. Сам же прииде къ Алексею митрополиту, нося с собою послание патриарше и поминки. Пришед, поведа митрополиту патриарше благословение и поминки являеть ему. Он же послание повеле прочести, бе же послание сицево: «Милостью Божиею архиепископ Константиня града вселеньскии патриарх кир Филофеи о Святем Дусе сыну и съслужебнику нашего смирениа Сергию благодать и мир и благословение да имееть святыни ти. Слышахом еже по Бозе житье твое добродетелное и похвалихом по достоянию, но едина главизна недостаточьствуеть к свершению, яко не убо стяжасте общаго жития, ибо самыи Богоотець пророк Давыд, иже обсязаи разумом и ничто же тако похвали, точию – се ныне что добро или что е красно, еже жити братии вкупе. Ныне же съвет благ аз даю вам: сътворите общее житие, милость Божиа поможет вам и наше благословение да будеть с вами». Блаженныи же въпрашаеть архиерея, глаголя: «Владыко, како ты повелеваеши?» Архиереи же рече: «Зело полезно, тако и аз благословляю». Преподобныи же пришед в обитель свою, слагаеть съвет съ ученики своими, и тако вси единогласно радоваахуся. И тако съставляеть святыи общее житье, яко же есть подобааше вся изрядне и в лепоту, искусных от ученик его поставляеть в службы, ового келаря и прочиих на куюждо службу в магерници⁵⁶⁰, и повары, и магупы⁵⁶¹, еже хлебы пещи, и болным служити, в церкви же первое устрои еклисиарха и иже потом параеклисиарха, рече, пономархи и прочяа. Вся бо сиа прочяа подобающиа чюдная она глава по чину добре устрои и заповеда ничто же своим звати, ни у собя ничто же дръжати, но вся обща имети. И та вся изряднеиши постави благоразумныи он пастырь, яко же подобаеть в славу Божию, по уставу святыхь отець, еже не мощно писанием поведати. Дела [бо] сказание се есть, а не⁵⁶² житиа повесть. Яко же разсудныи он [мужь исправи, прочее]⁵⁶³ число братьи множаашеся, и елико бе множае, толико съкровище благыхъ подавааше потребная, и елико приносимая в обители множаашеся, толмаже страннолюбнаа възрастааху. И никто же в сю обитель приходящь от странных и от неимущих тщама рукама отхожаше, и николи же она боголюбивая душя оставльши благотворение, но рука его к требующим простерта, яко же, рече, река многоводна текущи тиха струями. И всем служащим в обители заповеда странных питати неоскудно и требующим⁵⁶⁴ подавати доволно, сиа глаголя: «Аще съблюдете сию мою заповедь, и по скончянии моем не оскудееть обитель сиа, но умножится в всем благодатью Христовою», яко же и бысть. Ученици же блаженнаго заповедь отчю преданую съблюдающе и доныне и творяще сиа неизменно, наипаче и аще приключяашеся кому в зимняа времена, мразу зелному настоящю, иже самому древию убыхати, или пакы снегу с зелным ветром дыхающю, иже иногда не мощи извне келиа нимало изыти. И елико время таковыя ради нужа кто пребывааше в обители, потребнаа неоскудно приимааху, князи и велможи и воеводы с многым воиньством, поне же от многых стран пути зелному належащу, комуждо подавающиа подаваашеся, и паче умножаашеся. И се тако бывающим [и доныне] по заповеди святого старца, и егда кто от не искусных братьи служаи въсхоте пощадити что, многа тщета познаваашеся в всех потребах. [Мы же на предлежащее возвратимься].

Господу Богу прославляющу Своего угодника преподобнаго Сергиа, и мнози прихождааху к нему чюдес ради бываемых от него. И славе превъсходящи повсюду, ея же боголюбивая она душя гнушаашеся, любяще безмолвие, и еже к нему приходяще и присещахъ⁵⁶⁵ [и о сем велику тщету]⁵⁶⁶ себе вменяа. Тем же и помысли бежати славы человеческиа и един хотя безмлъствовати, еже и сътвори. И исшед отаи от обители своеа, никому же видящю, и устремився путем в место пустынное за 40 поприщь от обители, Богу наставляющи Своего угодника, и обрете место полезно, его же желааше, и под ним течяаше река именем Кержачь. И възлюбивъ ту и безмлъствоваше един. В обители же его учеником скорбящим зело о разлучении, отщетившеся отца и пастыря, плачющи и рыдающи неведомаго отшествиа. И по сем, по словеси Господня гласа, не могущю граду укрытися верху горы стоя, ни же угодника Своего чюднаго светилника, благоволи Господь не скрытися многых ради чюдес и ползы. И времени немалу минувшю, уведанъ бысть святыи, где пребывает, и приидошя ученици его к нему и братья и молят и с слезами, дабы пакы пошел в свою обитель утешити свои плачющих чяд. И не повинуяся им преподобныи. Мнози же от них прихоежааху, и не хотящи отъити, разлучитися от отца, и моляаху его, да не отринеть их. Он же, яко чядолюбовью побежаашеся, и попусти от них которому съжителствовати с ним. И тако умножающимся братьям, и молишя его братья, да въздвигнеть на оном месте церковь, еже по⁵⁶⁷ времени мале послушав великии в добродетелех милостиваа душа, от нас отщетоваашеся⁵⁶⁸, еже желааше безмлъвие, и постави церковь во имя Пречистыя Владычица нашея Богородица приснодевица Мариа, честнаго Ея Благовещениа. И яко же слышано строение святого на месте оном, и тако мнози отвсюду приходящи скоро, не токмо иноци, но и мирстии от вельможь, и тако благодатью Христовою съставлен бысть монастырь, яко же подобааше в лепоту общее житье в славу Божию, еже и доныне. Братьям же блъшиа лавры и учеником не тръпящим надлъзе разлучениа от пастыря и многыя тщеты, и тако непрестанно прихождаху, моляще преподобнаго, дабы не оставил их сиры и възвратился бы въ великую свою лавру. Он же не прикланяашеся. Ученици же видевше непреклонна отца своего възвратитися к ним, приидошя к архиерею Алексею и молишя, дабы увещал преподобьнаго к своеи обители поити. И тако посла митрополит два [архимандрита] старця честна увещати преподобнаго, дабы пошел в болшую обитель к своим учеником⁵⁶⁹, ркуще: «Да некако чяда твоя от скорби стуживъси разидутся, и буедет тщета немала». Блаженныи же имея послушяние свершеное и любовь велику къ святителю, не могии преслушатися его, възвращается в свою блъшюю обитель, на оном же месте в обители остави единаго от ученик своих Романа именем, мужа в добродетелех съвръшена, сему вручив паству яко верну строителю. Моляаше бо предреченаго чюднаго мужа Исаака именем Млъчянника восьприати⁵⁷⁰ он монастырь, но тъи никако же повинуяся, любяаше бо млъчяние и пребываа, по реченному: бых яко глух и не слышах, и яко нем не отвръзаяи уст своих. И подвизаяся подвигом великым и въздръжанием и бденьем и прочими исправленьи, и до последняго издыханиа, о нем же и последи скажем. Настоящее же да глаголется, о нем же нам слово.

Слышано же бысть в обители преподобнаго приход, и тако изидошя вся братья въ сретение ему. Его же видевше, възрадовашяся зело радостию великою, яко второе солнце въсиавше, и бе от всех уст слышати: слава Тебе всех промыслителю, яже не лишил еси нас видети чюднаго светилника, възрадованиа нашего. Бяше зрети чюдно зрение и умилениа достоино: овии убо руце лобызающе, инии же к ногама припадающе касаахуся с слезами, овии же ризами знаменааху очи и лице, инии же предтекуще итолико от желаниа зрети хотяще на нь, и вси убо купно радовахуся и славляху Бога о възвращении своего отца. Что убо отець? Духовне тем радоваашеся, чяда своя зря радостна и усердна, к своему отцю велию веру стяжавшя, расточенная събранна въсприимаа, облобызааше. Сиа же до зде.

Се же на предлежащее възвратимся, о предреченнем ученице святого Исакиа Молъчяннице. Съи убо некогда много молит пастыря святого отца Сергиа, да повелит ему в свершеннем чину молчяниа пребывати. К нему же доброразсуднаа глава отвещя: «Чядо, млъчянию желаеши, в настоящии день придеши и тогда сподобишися». В нареченныи же день преподобному божественую литургию съвръшающю, приходит Исакии к дверем северным, прося от святого благословениа. Святого же Духа делатель знаменает его рукою и рек: «Господь да исполнить желание твое». И виде Исакии пламень от рукы святого, всего окружеша его. И прочее пребысть в молчянии съвръшеном, съхраняем святого отца молитвами, до скончяниа своего.

Елма же [нужа] и другых устроении чюдес и дара⁵⁷¹ прозорливаго въспомянути блаженаго, чюдесное поведание слово обратим, настоящее да глаголем нечто от подобных о епископе Стефане, иже бысть мужь добродетелен и жителством благоговеин, издетска сердечною любовию светяшеся. Съи убо многи в добродетелех въсиавыи, Стефан да глаголется, имеяи любовь велику к блаженному отцю Сергию. И случися ему от своея епископьи, глаголемыя Перми, путь к господьствующему граду Москве, путь же он, им же епископъ идяаше, отстоить от обители преподобнаго яко пять поприщь. И помышляющю ему, егда възвращюся к своеи епископьи, тогда прииду к духовному ми брату. Бывшю же сему епископу Стефану противу обители святого, став на месте благополучне, сътворив молитву и поклонься еже в обители храму Святыя Троица и преподобьному, сиа рек: «Мир тебе, духовныи брате». Случи бо ся в тъи чяс святому быти на трапезе с братьею ясти, и разуме быти ему, еже сътвори епископ, и тако блаженныи Сергии въста и молитву тако же сътворивъ и поклонся, рек: «Радуися [и] ты, пастырю Христова стада, и мир Божии да пребывает с тобою». Братьям же удивльшимся о необычнем въстании на трапезе преже уставльннаго времени, и пакы седше ядошя, и разумевше братьа, яко не туне въста святыи, но нечто видению вменишя быти. И по въстании с трапезы въпросишя блаженнаго необычному въстанию. Он же рече, яко в сии чяс възлюбленныи брат мои духовныи о Христе епископ Стефан идеть путем своим от своеа епископьи Перми къ граду Москве и, противу ставшю моенастыря нашего, поклонися Святеи Троици и нас смиренных благослови. Назнамена же и место, иде же сии бышя. Неции же от братья в нареченное место достигше, известно испыташя, еже тако бысть. И почюдишяся вси отца видению, еже дарова ему Бог прозрение дара Святого Духа. Сиа до зде.

Подобаеть нам ведати о составлении монастыреи от ученик святого от обители преподобнаго.

Преже даж глаголется о обители преподобнаго отца Андроника, поне же Андроник ученикъ бе святого отца нашего Сергиа, от отечьства того же града Ростова. В мале възрасте прииде в обитель к игумену Сергию и сподобленъ бысть от него иноческаго образа, и бысть ему ученик, пребываа в свершеном образе и разуме и в послушании на многа лета. Любяаше бо зело старец⁵⁷² Андроника многиа ради его кротости и благонравиа, преспевааше [во] мнозех добродетелех⁵⁷³, превъсходя в мнозех исправлениих великих, и в всем подобяся своему отцю и наставнику, день от дни приближаяся желаемому. Г осподь же работающих Ему николи же оставляеть, тем же⁵⁷⁴ и отець своих чяд, тако бывающи в добродетелех и в ревности мнозе неослабно, всегда моляше Бога о нем, еже съвръшити ему доброе течение. И по мнозех летех бывшю ему тако в свершеном мужьстве и благоразумии мнозе, прихоеждааше ему помысл, еже бы устроити себе монастырь благословеньем отця и съставити общее житие, и възлагаше на волю Божию, глаголя: «Аще будет сиа възможна Богу на дело произвести по воли Твоеи, токмо да будеть молитвою отца моего, а не моя воля». И тако полагааше всегда в уме своем на Господа. По времени же некогда прииде к преподобному Сергию митрополит Алексеи посещениа ради, зело бо горя любовию по Бозе к старцю и часто с ним беседовати обычьно⁵⁷⁵ о плъзе. И бысть беседующима има, прииде архиереи до сего:⁵⁷⁶ «Прости ми, възлюбленне, еже закоснех обет свои, в нужи завещах к Богу некогда и не съвръших, ныне же повем тебе вещь сицеву. Пловущим нам от Константиня града к своим странам и ветр велии въздвижеся в мори, яко и кораблю съкрушатися от зелнаго оного влънениа и всем смертью ярою претящи. И начяша иже в корабли молити Бога, иже избавитися им от толикиа горкиа смерти, с ними же и аз начяхъ всесилнаго молити Бога, яко да избавит ны от належащиа беды, и обет положих к Богу: в которои день доправить Господь пристанище, в того святого имя създати церковь в своеи митрополии. И от того чяса море преста от волнениа и в великую тишину преложися, и доправи нас Господь Бог в пристанище месяца августа в 16 день, и тако приидохом до своих стран Богомъ съхранени. В мнозех вещехзамедлих исполнити еже обещах, и ныне, аще Бог поможеть ми молитвами твоими, хощю обретъ место угодно поставити церковь во имя Господа нашего Исус Христа, честьнаго Его Образа Нерукотвореннаго, и учинити монастырь общеи. И прошю у тебе, любимиче, да дарует ми духовная ти любовь единаго от ученик твоих искусна на дело сие, его же сам веси». Старець же рече: «Владыко святыи, в руку твоею вси есмы, аще кого благоволит Бог назнаменав его [в святыни сердца твоего]⁵⁷⁷ благодатью Святого Духа, живущаго в святеи твоеи души, и от нас недостоиных кто смеет дръзнути на великое сие дело?» Архиереи же рече: «Хощю да ми даси, его же желаю и прошю, ученика твоего Андроника». [Отець же призываеть Андроника] и дасть его в руце архиерею, глаголеть: «Владыко святыи, весть твоя святыни нашю худость и духовнаа ти любовь, в еже не преслушатися николи же твоея святости, и ныне твоя воля да будет, господи, ты веси в ползу нашю и сему духовному чяду смотритель в всем буди». И тако архиереи приемлеть желаемаго Андроника с великою любовию и вдав милостыню доволну на потребу манастырю, и отиде к господьствующему граду Москве, и тамо обретаеть место угодно на реце именем Яузе и въздвиже церковь во имя Господа Бога Спаса нашего Нерукотвореннаго Образа Исус Христа. И сию украси чюдно и честную его икону украшену златом, образ Спасов, ю же принесохизъ Царяграда, в неи постави, еже и доныне зрится всеми, и вся елико на потребу в строение вдасть преподобному Андронику, вручяеть ему паству⁵⁷⁸.

И тако разсудныи пастырь съставляеть общее житие по чину строине⁵⁷⁹ зело в лепоту. И по мале времени слышав святыи Сергии ученика своего Андроника строение, прииде к нему и похвали дело и благослови его, глаголя: «Господи, призри с небеси и виждь и посети место сие и съвръши его, еже благоволил еси в славу святого Ти имени». И много поучив и о плъзе и сиа прирек: «Чядо, подобает ти по святому апостолу быти, им же научился еси предати верным человеком, и немощи их носити, а не себе угажати, яко же и Христос не себе угоди». И тако научи и и наказа много, и отъиде в свою лавру. И в мале времени происхождааше о блаженном Андронице слава повсюду, яко многым к нему стицатися. Он же вся добре управляаше, и елико множаашеся [стадо, толико подвигом болшим приимашеся], въздръжанию зелному прилежа и всенощному бдению, посту же и молитве. И кто убо исповесть, елико добрыи он мужь⁵⁸⁰ собою исправи⁵⁸¹, когождо⁵⁸² бо яко отець наказуя и общее съглашение творя, запрещааше и моля, наставляа на невидимыя врагы, и тяготы всех нося, всем всяко бываа бяше бо образом кроток, кроткаго учителя благоразумныи ученик. И тако многа лета чюдне и добре пожив и от Бога врученное ему стадо Благочестне упас. И разуме к Господу свое отхоежьдение, вручяет паству своему ученику Саве именем, в добродетелех зело сиающе, и наказав я о ползе души, к Господу отиде, Его же от младеньства възлюби. Тако же и съи преподобныи отець нашь великии въ добродетелех Сава сдръжааше преданную ему паству в благочестии и въ мнозе святости, от всех почитаем великых ради добродетелеи и изряднаго житиа его. И преумножися стадо его добродетелных мужеи честных, от них же многи произведени бышя на игуменьство, овии же на епископьство. И тако многолетне и честне пожив богоугодно к Господу отходить, еже и по смерти чюдеса сътвори. [Некии ученик его священоинокъ именем Ефрем от беса] блуднаго страстью борим бе и притече верою влеком к гробу преподобнаго Савы и призывает отца, да поможеть ему зле стражющу, и получи желаемое. По времени же бывшю игумену Александру, ученику предпомянутаго игумена Савы, и другому ученику, Андрею именем, иконописцю преизрядному, всех превъсходящи мужеи добродетелным житьем, и прочии мнози ученици его, създаста в обители себе церковь каменну красну зело, и подписанием чюдным украсишя ю в память святыхь отець своих, еже и доныне зрится в славу Христу Богу. И тако богоугодно поживше, къ Господу отъидоша. Сиа же до зде о сих повесть.⁵⁸³

По сем же времени поведати нам о съставленииСимоновьского монастыря, еже състави великии чюдныи в добродетелех Феодор, сын Стефанов, предпомянутаго брата святого Сергиа, еже преже 12 летом⁵⁸⁴ приведен бысть отцемь к святому Сергию в обитель и от него сподоблен бывъ иноческому образу. И пребыв у святого в послушании съвръшеном и в всемъ повинуяся тому, повелением наставника своего в всех службах работая многыми леты, и зело бысть искусен и любим всеми, поне же многыми [добродетельми] украшен и многых превъсходя, яко всем чюдитися о нем. Дивно же и се о нем, яко никогда же свои помыслъ утаити хотя наставника своего, в нощи или в дни. Бывшю же ему в чину свершене, и тако священьству сподобившюся. По времени же прихожааше ему помысл, еже съставити общии монастырь, и тако помысл свои исповеда отцю, обычно не единою, но по многу. Святыи же виде его от помысла оного стужаема прилежно и помысли нечто Божие быти. На таково дело производить, повелевая Феодору: «Иди, чядо, Богу наставляющу тя, усмотри место угодно, Тъи да исполнит прошение твое к ползе твоеи». И тако отпусти с ним единаго от ученик своих, глаголя: «Обрет место, възвестите ми.» И шедша на взыскание места, изыскавше многы места и обретошя место угодно, именем Симоново, на реце на Москве, видевше и възвестиешя святому. Преподобныи же видети прииде, тако же възлюби и благословляеть начяти дело. Феодор же освященныи по благословению своего отца Сергия, тако же и от архиерея Алексея благословение получи, въздвиже церковь на том месте во имя Пречистыя Владычиця нашея Богородица Приснодевы Мариа, честнаго Ея Рожества. И в мале времени Божиею благодатию устроен бысть монастырь общее житие, вся по чину благолепне и изрядне и непредк[нове]нне. И събравшимся братьям множеству в мале времени от различных стран, мужи чюдны, прославляаше бо Бог славящаа Его, в вся страны славен бысть манастырь Феодоров Симоновскыи добродетелнаго ради житиа его и изряднаго строениа, еже к исправлению и к плъзе всем приходящим к нему, и повинующимся ему от всея душа. Бе бо видети Феодора в телесном възрасте и в лепоту мужа чюдна, и в духовне разуме и премудрости мнозе преизящне, от великых и господьствующих зело почитаем бе. Не токмо в наших бе странах, но в некое время прилучися ему быти в Цариграде, и от патриарха кир Нила⁵⁸⁵ велми почтен бысть и възвеличен дарми честными, еже честьнеишии манастырь в Руси Феодоров строится в патриарше имя. И в время строениа основанна бысть церковь на другом месте каменна честным анхимандритом Феодором, чюдна и велика зело, во имяПречистыя Владычица нашея Богородица честнаго Ея Успениа, еже есть и доныне великая лавра, и множество братии. И тако просиашя ученици чюднаго мужа Феодора, произведени въ многы страны на игуменьства, овии же на епископьства, и доныне суть всеми ведомо. По времени же възводят честнаго Феодора на архиереиство славному граду Ростову, и не хотящю ему, и тамо⁵⁸⁶ бысть лета доволна честьне зело, яко же светилу на свещнице сиающю. И тако великии в добродетелех благоврученную ему паству на пажити животныя наставив и благочестно упас, радуяся, к Господу отъиде, Его же из младеньства възлюби, в лето 6903, месяца ноября в 28 день.

В время некое, Богу попущающи за грехы нашя, слышано бысть, яко от Ординьскых князя Момая, въздвиже силу велику, всю Орду, и поиде на Рускую землю, и бешя вси людие в страсе велице. Княз же великии Дмитрии, тогда обдержааше скипетр Московьскиа земля, съи убо прииде къ преподобному отцю Сергию в обитель, прося от него благословениа и молитвы, и аще повелить ему поити противу поганых, ведяаше бо мужа добродетелна и свята и даром прозорьства почтена. Святыи же благослови его, рек: «Подобает ти, царю нашь православныи, с дръзновением противу поганых скоро изити, Богупомагающю ти, победиши безбожных и сдрав въ свое отечьство възвратишися». Великии же в бранех отходя, рече к старцю: «Аще, отечь, поможеть ми Бог твоими молитвами, възвратившю ми ся хощю устроити монастырь во имя Пречистеи Богородици и съставлю общее житие». И се рек, отиде. И тако скоро събрав воя своя, и изи де противу агарян. И увидешя силу велику безбожных, устрашишяся. И тако в тъи чяс приспе борзоходець, нося послание от святого Сергиа сице: «Царю великии, да не устрашатся сердца вашя безбожных множества, несть бо крепости в них, всяко побежени будут силою Христовою, поне же с вами есть». И абье великии в победе с всем воиньством сиа слышав, велие дръзновение приашя, зело въскоре поидошя противу поганых, рек сие слово: «Боже великии крепкии, сътворивыи небо и землю, помощник нам буди на съпротивящихся святому Ти имени». И тако въскоре съступишяся, и сражение бысть велие зело, и многа телеса падааху. И время немало бьющимся им, Богу помагающу крепкому на брани достохвалному великому князю Дмитрию, и тако конечне победившю ему поганых и пагубе предавшю. Видевше же супротивнии богопопущенныи гнев на собе и Божие попущение, и абие на бежание устремишяся. Великии же в похвалах много гнашесверепых, убиваа, от них же мнози безчислено избиени бышя, овии же множество язвени отбегошя, иных же живых изимашя. И бяше чюдно зрение и дива исполнено: иже преже блистающия оружиа, тогда же вся окровавлена зряхуся иноплеменных кровми, и вси православнии радовахуся, образъ победе ношааху. И исполнися пророческое слово: един женяше⁵⁸⁷ тысящю, а два двигнета тму. Святыи же, яко прозорливыи имея дар, ведяаше вся тогда бываемая, подвизааше ученики своя непрестанно на молитву о воиньстве православных, аще бо и далече растоянием место и многым днем хожьдение име, но яко пред собою зря, таже и от ученикъ его чюднии мнози мужие, прозорлив имеюще дар, сему преславному видению сподобишяся, яко же и до конца погании побежени бышя. И тако в тъи чяс преподобныи мужь Сергии бывшюю победу и храборство великоименитого⁵⁸⁸ на безбожных все по ряду исповеда всем учеником своим и убьеных христоименитых по имени изрек, всех ублажи и молитву о них сътвори к Господу. Братьям же сиа от святого слышящим и чюдящимся зело о дарованнеи благодати святым Его угодником, и радовашася вси радостию великою о бывшеи победе на⁵⁸⁹ поганых. Храбрыи⁵⁹⁰ же повести достоины победоносныи великии царь Рускии Дмитрии победу светлуювзем на сверепыя варвары, възвращается в свое отечьство с радостию великою, въспевая победителныя прекрасныя песни Господеви, прославлешему пострадавших имени ради Его. И тако прииде победоносныи к чюдному в святыхь отцю Сергию, благодать въздавая ему о добром съвещании, о чюдесех бываемых от него, и тако вкупе прославишя всесилнаго Бога, и милостыню велию вдасть святому.⁵⁹¹

И по семь исполняеть еже вкупе обещяся с блаженным, иде же обрящет место потребно устроити монастырь, и тако обретает место, именем река Дубенка, и ту създана бысть церкви, освящена во имя Пречистыя Богородица честнаго Ея Успениа, и вручи паству святыи единому от ученик своих мужю добродетелному Саве именем, и съставлено бысть общее житие. И тако събрашяся множество братии в мале времени, и бысть обитель въ обителех красна зело, полезна иноческому житью и донине.

В время некое служащю преподобному божественую литургию в обители своеи и с ним служащю предпомянутому Стефану, брату его по плоти, и Феодору, сыну брата его. Стоящю же в церкви тогда предпомянутому присному ученику святого Исакью именем, в чюдесех знаменноносному, зрящю служащю с ним четвертаего, ангела Божиа, поне же образ его светляашеся паче естества красотою несказанною. И приник к олтарю, прилежно зряще его, дивяся чюдному видению, приводить сведетеля родителя своего по плоти Макариа именем, глаголя: «Кто есть, отче, чюдныи он мужь, служаи с отцемь нашим Сергием, его же николи же видехъ». Макарии же рече: «И аз, чядо, зря его, зело удивляюся и не вем, откуду есть». [И] зряста вкупе, он же ничто же виде. Исшедшима же има на исхожьдение, чюдныи зрением изиде с ними, не мощно зрети на лице его светлости ради, ризы его необычно видение некако, превъсходя всякиа светлости, и мечтание златоструино . И тако разумешя ангела Божиа.

По свершении же службы приснопоминаеми святии ти мужие въспросишя блаженнаго наедине, глаголя: «Отче святыи, молим твое преподобье, да не скрыеши от нас, недостоиных раб твоих, еже видехом чюдна мужа, с тобою служащя святую литургию, страшна зреньем, пресветла и красотою неисповедима подобна ангелу». Святыи же крепляашеся не поведати, рече к ним: «Се, чядо, видесте служащих брату моею Стефану и Феодору, сыну его, и мне смиренному с ними, что ся вам мнить». Они же въпрашааху его прилежно, глаголюще: «О, преподобне, что не повеси нам, чядом своим, поне же открыл есть Господь нашему недостоинству четвертаго, служащя с тобою, ангела Божиа виедехом страшна и неизреченное зрение его». Святыи же отвещя к ним: «О, чяда, не могу таити вас, поне же Господь Бог открылъ есть вам истинное се видение, еже видесте, ангел бо Господень служаи мне [не] токмо ныне, но⁵⁹² всегда посылается от Господа служити ми, егда мне недостоиному служащю. Вы же, чяда, млъчянием покрыите сиа, донде же есмь в житии семъ».

Въ прехожьдении времен святеишии митрополит Алексеи, видя себе от старости изнемогающю и к концю приближающуся, призываеть преподобнаго Сергиа. И сему пришедшю, и беседующим има к себе, и повеле архиепископъ изнести крест свои с параамандом, украшен златом и каменьем драгым, и даруеть святому. Он же смирено пад, поклонися, глаголя: «Прости мя, владыко святыи, яко от юности моея не бых златоносець, в старости же пакы несть ми прилично се моеи нищете и до скончяниа моего».⁵⁹³ Архиепископ же рече к нему: «Вем, възлюбленне, смирениа путь възлюбил еси и последнею нищетою красишися, но сътвори к мне послушание духовное, яко же аз люблю твое преподобие, приими от нас се благословение, яко же глаголю конечное». Тако⁵⁹⁴ же възложи своима рукама, яко имея обручение на нь, и не хотящю старцю. И по сих начят глаголати: «Ведыи, преподобне, на что призвах тя и что хощю сътворити о тобе. Веси, люебимиче, се аз дръжах, Богу вручившю ми Рускую митрополию, елико Богу хотящю, ныне же вижу⁵⁹⁵ се к концю приближающю ми ся, токмо не вем дни скончяниа моего. И колико время смотрих аз обрести мужа достоина, могущя по моем исхожении от мира сего пасти стадо Христово, и от всех никто же мил ся обрете сердцю моему на сие дело, токмо ты един, его же исперва възлюбих о Христе и колико в жизни съи и не разлученно пребых с тобою, духовьныи и любовныи брате мои, и всегда съветовах с тобою о⁵⁹⁶ всем. И преже всего времени положих в моем сердци, тебе единаго избрах исправити слово истинны, известно бо вем, яко сынове мои дръжавнеишии велиции князи Русстии, православных людии сънм, по Бозе врученное стадо, вси тебе блажать и желают неизменно. Преже бо епископьства саном почтен будеши, по скончянии же моем место мое приимеши». Преподобныи же слышав сиа, зело оскорбися, яко велику тщету сиа вменив, и не могии тръпети, ни пакы второе слышати от архиерея, рече ему старець: «Прости мя, владыко, веси бо⁵⁹⁷ мою немощь, ничто же утаися от твоея святости, еже в мне недостоинем, что требуеть моя нищета убогая, вся ты веси, се есть дело страшно⁵⁹⁸, не моеа меры, еже глаголеши, господи, моему недостоинству. Кто бо есмь аз, паче всех человекъ грешнее!». Архиереи же глагола к старцюот божественых писании, како бы ему повинути преподобнаго на дело сие. Он же никако же преклонься, глаголя: «Владыко святыи, прочее [не] приложи глаголати⁵⁹⁹ о сем к моеи худости, да не лишиши слышаниа своего⁶⁰⁰ мою нищету, никому же, господи, попустиши глаголати о сем, поне же никто же можеть сиа обрести [от мене]⁶⁰¹ недостоинаго». И яко виде архиепископ тако непреклонна святого на сие дело, и приложи не глаголати о семь к нему, но утешив, отпусти его в свои манастырь.

Не по мнозе же времени Алексеи митрополит от житьа исходить в лето 6885. Пакы начинають великодръжавнии князи молити преподобнаго, да приимет престол архиереискыи. Святыи же Сергии, яко твердыи адамант, никако же сему внят. Взыде же на место архиереиское Михаилъ архимандрит, зовомыи преже Митяи, и облечеся в сан архиереискыи, начят въоружатися на преподобьнаго, мнев, яко тъи [хощетъ] приати престол. Слышав же святыи сиа, пред всеми рече, яко «съи Михаил, хваляися на нашю нищету, не получит желаемаго и Царьскаго града не имать видети». Еже и бысть: пловущю бо ему на море, в недуг впаде, и тако скончяся, по пророчеству святого. Сиа же до зде, настоящее [да глаголется].

В время обычныя молитвы его, вечеру глуебоку сущю, молящюся преподобному пред образом Богоматере и прилежно зря на икону к образу, глаголаше: «Пречистая Мати Христа моего, ходатаице [и] крепкая заступнице, помощнице роду христианьскому, не забуди нас недостоиных раб Своих, молящи Сына Своего и Бога нашего, яко да призрит на место сие святое, еже възложеное в похвалу и в честь честному имени Его. Тебе, Богомати сладкаго нам Христа, ходатаицю предлагаем, яко всем еси спасеное упокоеное оцистилище». И тако ему молящюся с слезами, поющи канон благодарен Богородици, еже есть Окафисто. Съвръшившю же ему правило свое и седшю почити⁶⁰², рече ученику своему именем Михея: «Блюди, чядо, и трезвися, хощет бо нам посещение некое быти чюдно и гости необычны, ведыи буди, да не ослабееши [в] молитве». И се ему глаголющю, и абье гласъ слышаашеся: «се Пречистаа грядет». Святыи же се слышав, зело скоро въспрянув, изиде ис келиа видети глас бывши, и видить свет сиающь паче солнця, еже не мощи зрети на нь, и чюднее и страшнее, последующе свету оному, зрит Пречистую Богородицю с двема апостолома Петром и Иоанном, в неизреченнеи светлости блистающеся. И абье не могии тръпети святыи неизреченнаго света и зрениа, паде ниць, тако же и ученик святого с страхом и трепетом одръжим, лежааше мертв. Пречистая же своима рукама въздвиже святого, глаголя: «Не ужасаися, избранниче мои, услышах молитву твою и приидох посетити тебе, да прочее не скорбиши о обители и о⁶⁰³ братьи твоеи, о них же молишися. Отныне обитель твоя прочье в всем не оскудеет и изъобительствуеть, и по отшествии твоем к Господу неотступна буду от обители твоеа, строити в том и попечение имети о чядех твоих, работающих Сына Моего имени, и несуменно имуще помощницю, яко ходатаицю к Нему и молитвеницю и заступницю в всем к человеколюбцю стязавше непостыдну, и малодушьство всяко отложивше, веру крепку съдръжащю к Мне и надежю, яко же имаши». И сиа рекши, невидима бысть. Святыи же трепетен быв от иступлениа ума, стоя на мнозе, дивяся чюдному видению. И тако обрете ученика своего лежаща на земли, яко мертва, от страха изнемогшю, и сего въздвигше. Он же въстав, начят пометати себе старцю на нозе, глаголя: «Извести ми, отче святыи, истинну Господа ради, что есть видение се чюдное, поне же дух мои в мале не разлучися от плотскаго ми съуза». Святыи же радуяся душею, яко образу его цветущю от радости, бывшиа на нем, ничто же можааше исповедати, токмо се: «Чядо, потръпи мало, поне же трепещет дух мои в мне и не остася крепость моя во мне от⁶⁰⁴ чюднаго и страшнаго видениа». Помале рече ученику своему: «Иди, чядо, и призови ми братью Исакья и Семиона». Они же призваны бывше, преподобьеныи же поведа им вся чюдьнаа видениа, како виде Пречистую Богородицю с двема апостолома, яко же слышя от уст Ея, како обещася неотступна быти от обители его и благопослушлива просящим с верою. И сиа ему едва могущю исповедати от рыданиа слезнаго. Они же слышаще, плачюще, радости неизреченныя исполнишяся, и всем братьям събравшимся, великое благодарение въздашя Богу, славяаше Христа Бога и Пречистую Матерь Его, поне же бо яко обещяся пребывати во обители святого и по отшествии старця. И тако исполняа вся неизменно⁶⁰⁵, пребывааше неотступно и подавааше обилно, покрывающи и заступающи [от всех бед, и помагающи и всегда и везде ходатаиствующи] милостивно к Сыну Своему, Христу Богу нашему, и доныне молитвами святого Сергиа.

Въ время некое се служащю преподобьному Сергию, бяше бо тогда предпомянутыи Семион параеклисиарх, мужь в мнозе добродетели исполнь сыи⁶⁰⁶, его же и сам святыи в мнозе сведетельствоваше. Сеи⁶⁰⁷ приснопоминаемыи ученик святого в время святыя литургиа зрить чюдно видение: егда служааше преподобныи и божественыи огнь осеняющи олтарь, окрест святыя трапезы окружающь, яко же мнети ему святого Сергиа в огни оном стояти всему; и в время причящениа свится⁶⁰⁸, яко некая плащаница и вниде [в святыи потирь, и тако] святыи причястися от оного божественаго огня. Тъи же мужь сиа зря, ужаса и трепета исполнеен быв и в себе дивяся. Святыи же яко изиде от олтаря, зрить ученика своего ужасна стояща и изьменена лицем и разуме, яко видение оно чюдное видети сподобися. И приступль, рече к нему: «Что, чядо, стоиши, зрю тя страхом одръжима». Он же рече: «Зело, господи отче, в велице ужасе бых, поне же видех чюдное зрение, божественыи огнь, паче же благодать Святого Духа деиствующи с тобою». Святыи же запрети ему, рече: «Да никому же повеси, еже виде, донеле же Бог сътворит мне конець от мира сего».

Въ время оно великоименитыи дръжавныи князь Владимер прииде к преподобному Сергию и молит святого, да идет с ним в отечьство его, в град Серпохов, благословить место, иде же хощет устроити монастырь. Еже и послуша преподобныи о Христе възлюбленнаго благороднаго князя, бе бо имея любовь к преподобному ради добродетелнаго и чюднаго его житьа. Вшед в он град и обрете место зело красно, его же благоверныи князь възлюби, на месте⁶⁰⁹, близ великиа рекы Окы, и сътворяет молитву и благословяет место. И скоро основана бысть церкви во имя Пречистыа Богородиця честьнаго Еа Зачятьа. И абье велико моление простирает отцю любимыи сын, да вдасть ему единаго от ученик своих, его же възлюби, именем Афонасиа. Бе бо мужь благоразумен, божественых писании [исполнен и многи книги писания] руки его и доныне зело красны сведетелствуют, обретаются в похваелу чюдному и добродетелному житью его и мнозеи мудрости. Святыи же великиа ради любве боголюбиваго князя и веры, яже имеяше къ святому, и вдасть ему, его же просить, приснаго⁶¹⁰ ученика своего Афонасиа именем. Сам же преподобныи възвратися с великою честию в свою обитель. Обычяи бо имяше пешь ходити всегда, в зимнее время в единои ризе летнеи, просте⁶¹¹, нищьтне, многошвенеи⁶¹². Зело люботрудне жизнь свою прохожаше. О сем⁶¹³ же съкратим зде, не възможно бо исписати трудов его бесчисленых, предлежащее же съвръшим о монастыри, о нем же начяхом. В мале времени Божьею благодатью устроен бысть монастырь зело красен, общее житие изрядно, и прозвася именем Высокое. И бысть множество братии, славных и великих мужии, от них же епископи произведени бышя, и бысть монастырь славен, иже есть и доныне Божиею благодатью.

Тако же и въ ино время приидохом предпомянутыи⁶¹⁴ в похвалах чюдныи⁶¹⁵ великии князь Дмитрии, молит сего чюднаго мужа въ смирении, иже всегда и в всем о⁶¹⁶ начинателных и добродетелных имущи его съветника блага и скораго въ молитвах помощника. Вси бо имущи преподобнаго, яко от древних пророк святых, и велику честь сътворяющи ему. Он же честь ни в что же вменяа, украшаяся нищетою, иже бысть ни мыслью възнестися, тщеславнаго беса⁶¹⁷ всегда ногами попираше, ни ужасаашеся. Настоеящее же да глаголется. И умоли святого великодръжавныи князь, да пришед в отечество его, в град Коломну, благословить место, иде же устроить манастырь. Силныи же в добродетелех с многым трудом прииде, старостью убо побежаем и труды зелными⁶¹⁸, на уреченном месте ста и тако благословляеть молитвою основание церкви, заложи⁶¹⁹ во имя Святыхь Богоявлении на месте, зововом Голутвине, бе бо зело красно и угодно место, на усть рекы Москвы, иде же течет в предреченную великую реку Оку. Великии же князь радостен бысть о сем зело, еже молитвами святого Сергиа съвръшит Господь Бог желание его, и абье молить любимаго духовнаго отца, дабы дал от своих плод настоятеля месту, его же възлюби, еже и сътвори преподобныи. И не презре молениа великодръжавнаго князя, [его] от душя възлюби, и вдасть ему единого от ученик своих, мужа добродетелна именем священноинока Григориа, плодоносию строителя⁶²⁰ верна. И тако к плъзе наказав его и молитвою въоружив, поставляеть настоятеля месту, его же испроси великии [князь]⁶²¹. Сам же святыи исходить к обители своеи, бе бо немало растояние, 100 и 50 и 8 поприщь. Великии же князь едва умоли святого да прииметь покои к обители своеи на коне великиа ради старости и долгаго путишествиа, и не послуша святыи великаго [князя]⁶²² молениа, не⁶²³ хотящи же изиде, и аще егдаизнеможе и в мале причястися покою, и пакы пешь идяаше, елико можаше, преже бо сего не бысть тако. На предлежащее възвратимся. Благодатью Божиею на предреченнем месте устроен бысть монастырь и множество братии чюдным изрядным житием. И посем създана бысть церковь каменна в лепоту зрети всем, обитель славна в обильи мнозе⁶²⁴ всем приходящим в славу Христову и в похвалу угоднику Его.

И что хощемъ⁶²⁵ писати о насаждении монастыреи чюднаго святого Сергиа, но колико монастыреи сынове его и сынове сынов его съставишя в мало время обители чюдны, [в них же] Божиих святых мужеи и множество бесчислено и доныне зримо. Мнози суть приходяще и молитву и плъзу велию от них приемлют. Мы же сиа оставльше до зде, и мало нечто о чюдесех святого събравше, сие от чясти бо написахом, елико обретохом от памяти слышащих, мало оставших. Множество же бесчислено и доныне зрими, преидошя бес памяти, по заповеди зелнаго в смирении⁶²⁶.

Въ время некое прииде епископ некии от Константиня града въ осподствующии⁶²⁷ великии град Москву и слышя многа бываемая о преподобнем Сергии, яже о нем слуху велику повсюду простран[ив] – шюся, даждь и до самаго Царяграда. Предреченныи же епископ о блаженнем Сергии съмнящеся, глаголаше: «Како сеи толико⁶²⁸ славен мужьв сих странах такова житиа, паче же в последняа сиа времена, таков светилник въсиа, великаа чюдеса слышаахуся о нем, всяко хощю видети старца оного». И тако поиде к обители святого. И бывшю ему близ манастыря и начя страхом смущатися, вниде же в обитель и яко узре, о нем же съмняшеся, абье слепота нападе на нь, и начя трепетати. Святыи же емь его за руку, въпрашааше, что ему бысть. Он же исповеда ему свое неверьствие, оканна себе нарицаа, праваго пути погрешешю, вкупе же и прозрениа прося. Боголюбивая же она душа прикоснуся очью его, глаголя: «Что ради пришел еси, честнаа и священная глава, от великаго и славнаго благоразумья и святости, премудраго [ти] величества видети нашю смрадную неразумную нищету, паче же искусити и поносити наше невеждьствие, но не веси, премудре, что подобаеть над смиренными не възноситися, поне же зряи в сердца нашя, Тъи все весть, Его же ничто же может утаитися, и что ныне хощеши от ненаказанных нас». Епископ же пометааше старцю на нозе, глаголя, моля и прозрениа прося, вкупе же и прощениа. Старець же прости его, и абье, яко чешуя⁶²⁹, отпадоша от очию его прикосновением святого. И прозре, славя Бога и Его угодника. Старець же Сергии препокои его в обители своеи и достоину честь подасть ему, и тако отпусти его. Епископ же, преже неверием одръжимыи, правоверною верою и велиим гласом проповедаше всем чюднаго в смирении истинна человека Божьа, глаголя, яко сподоби Богъ видети дньсь небеснаго человека и земнаго ангела, яко же слышахом, тако и видехом.

Человекъ некии живыи близ монастыря преподобнаго, случися ему в болезнь тяжеску впасти, яко в 20 днии ни же пищя, ни же сну причяститися. Сродници его и ближнии скорбью зело одръжими, не могуще тръпети в болезни его суще на длъзе времени тако стражюще, зряще, помыслишя о святомь, глаголюще: Бог творит чюдеса угодником Своим святым Сергием, егда како и о нас умилосердимься. И тако несошя болящаго и повръгошя собе на нозе старцю, во еже помолится о болящем. Старець же взем освященную воду, и молитву сътвори, покропи болящаго. И тако по мале в сон преложися болныи на многы дни. От многа сна въстав, сдрав бысть, яко ни следу болезни его остатися в нем, и пищи причястися, и отиде в дом свои радуяся, благодарение въздая к Богу и Его угоднику многому в чюдесех.

Еже се да не покрыется, яко же прослави Бог угодника Своего даром прозрениа. Некогда бо предпомянутыи князь Владимер, еже имея велию веру к святому старцю, и чясто прихождааше к нему молитвы ради, иногда же и потребная посылашя ему з братьями. По сему жеобразу посла единого от служащих с потребными различных брашен и питья к преподобному с братьями. И тако на пути мужь он посланныи прелщением вражьим съблазнися, вкусив от брашен и от питьа, посланных к святому, яже не⁶³⁰ подобает. Прииде к преподобному в монастырь и поведает ему от князя посланное брашно и питье. Прозорливыи же великии в чюдесех преже весть прегрешениа [его, еже] на пути прелщен бых причящениа брашен, и не хотяаше приати та и случешееся поношаше⁶³¹ ему, глаголя: «Почто, брате, врага послушав, прелстився, вкусил еси, от них же не подобает ти преже благословениа ясти, не требе нам сие приношение». Тогда посланныи слуга позна свое съгрешение, [пад на нозе со слезами святого, согрешение] с срамом исповеда, просяще прощениа, укаряа свою слабость. Святыи же наказав его, отпусти, таковая прочее не приложити. И приат посланная брашна, и тако прости и утешив, отпусти его.

Некии человек живяаше близ святого обители, имеяи нрав лихоимьства⁶³², яко же и доныне есть силным убогих обидети. Съи насилие сътвори сироте от суседьствующих ему, и отъят вепрь, питомыи на пищю себе, и цены не вдасть ему, и тако повеле заклати его. Обидимыи же припаде к святому, скорбя и плачя, моля его, дабы како помоглъ ему. Милостивыи же имея утешениевсегда в скорбех, заступая нищих и помагая убогым, призываеть насилствующаго и потязав, запрети ему, глаголя: «Аще есть Бог судья праведным и грешным, страшно есть впасти в руце Его. И како не убоимся Его, грабим и насилствуем и тмами злаа творим, сия бо творяи обнищают и домы их запустеють и в оном веце сих мучение ждет». И много наказав его, глаголя: убогому цену вдати и прочее, рече, не насилуи сиротам. Он же с страхом обещася вдати цену и к сему исправляти свои нрав на благое житие. И прииде в дом свои и помысли лукавое в сердци своем, не помиловати сироты и не вдати ему цены и не рядити о наказании святого старца. Помрачистеся очи его в еже не видети, и вниде по обычяю в клеть свою, и зрить оного вепря растерзаннаго, червьми всего кипящя, бяше бо тогда зимнее время. Пакы страх велии нападе на ня, и начят плакати и сетовати о преслушании своем к великому старцю, его же ничто же можеть утаитися. Тако и оному сбысться, еже помысли лукавое в сердци своем, и от сего посрамлен бысть зело. И тъи чяс дасть цену убогому, телеса же оного вепря извержены бышя псом и птицам на снедение, ни тема же прикоснувшимся им, на обличение лихоимцю. И прочее не можааше явитися лицю старчю, а его же прежде въжделе излиха, сего и неволею зрети гнуешаашеся и себе укаряаше.

Жив же святыи лета доволна в чюдном въздръжании и трудех безмерных, и в старость добрую пришед, нимало от божественых пении [или служении] отступая, и елико състареишеся възрастом телесе, толико паче крепляашеся и растояше усръдьем, божественых подвиг мужествене и тепле касаашеся, никако же старостию побеждаем, нозе его столпи беяху день от днии ждаем, яко же по степенем приближаяся к Богу. Разумев же преже шестии месяць свое преставление, призываеть святое братьство и вручяеть стареишинство своему преподобному⁶³³ ученику, сущю в добродетелех съвръшену, в всем ревнующе своему отцю, наставнику и учителю, и смирением украшену именем Никону. Сему повеле пасти стадо христоименитое внимателне же и праве, яко слово въздати хотяще, не о себе токмо, но и о многых. Съи бо великии подвижникъ верою благочестив и неусыпаемо хранило, непресыхаемыи источник, желанию имя, безмолствовати начят, месяца септевриа в недуг убо телесныи впаде. И виде конечное к Господу свое отхожьдение, естества отдати долг, дух к желаемому Исусу предати, тако же [призывает]⁶³⁴ священное исполнение и новоизбранное⁶³⁵ стадо и беседу простер, подобающе к ползе поучив непредкновенно в правоеславии пребывати, и единомыслие друг к другу хранити, рек: имеите же чистоту душевную и телесную и любовь нелицемерную, от злых же и от скверных похотеи отлучятися, пищю же и питие имети немятежну, наипаче же смирением украшатися, страннолюбиа не забывати, спротивословиа удалятися, честь и славу житья сего ни в что же вменяти, но вместо сих еже от Бога мздовъзданиа ожидати, вечных и небесных благ наслаждение. Сиа поучив и рече: «Аз убо отхожю от вас, Богу зовущу мя, предаю же вас всемогущему Богу, Его же благодатью хранимы есмы, и Пречистеи Богоматери, поручнице к Своему Сыну Христу, Богу нашему, яко же обещася, и та Царица⁶³⁶ и Г оспожа, да будеть прибежище и стена и всем заступница и помощница от сетеи вражьих [и кознеи и лаяния их. И аще бы в наказаниихъ и добродетелных деланиихъ] пребудите, веру имеите и надежю тверду, и нигде же оставлени будете.⁶³⁷ Сиа и множаишая поучив я, и в самыи убо исход, в он же хотяаше телеснаго съуза отрешитися, и Владычня тела и крови причастися, ученик рукама того немощныа уды подкрепляеми, въздвиже на небо руце и молитву сътвори, чистую свою и священную душю с молитвою в руце Господеви предасть в лето 6000 и 900 ное, месяца септевриа в 25 день. Жив же преподобьныи всех лет 70 и осмь. В⁶³⁸ преставлении же его тогда излияся благоухание велие неизреченноот телеси святого. Братьям же всем [собранным] , плачем и рыданием съкрушаахуся, всечестное и трудолюбное его тело на одре положишя честно, псалмопениемъ⁶³⁹ надгробными провожааху, ученик же слез источники⁶⁴⁰ проливаахуся, кормчии отщетившеся, учителя отъяти бывше, отца разлучениа не тръпяще, плакаахуся, аще бы мощно и умрети им. Тогда лице святого светляашеся яко снег, а не яко обычяи есть мертвым, но яко живу или яко ангелу Божию, показуя душевную чистоту и еже от Бога мздовъздание трудов его. И положишя честьное его тело в обители, иже от него създаннеи. Кая убо иже в исправлении [и по кончине] сего чюднаго мужа бывшая чюдеса: разслабленых стягнути уды, лукавых дух мучениа свободити, слепым прозрение дарова, и слукым исправление [токмо ракы его приближениемъ]. Аще и не хотяаше святыи [яко же] в животе и⁶⁴¹ по смерти славы⁶⁴², но крепкаа сила Божиа прослави я, еи⁶⁴³ же предоидяаху ангили вь преставлении его кь небеси и двери предотверзающе⁶⁴⁴ раискыя и в желаемое блаженьство вьзводяаше, в покои праведных, вь свете ангель, вь⁶⁴⁵ яже присно желааше зряи, Всесвятыа Троица озарение приемля, яко же подобааше постнику, иноком украшение.

Сицевая отца течениа, сицеваа дарованиа, сицевая чюдесь приятия, яже не токмо в животе, но и по смерти, иже не мощно есть писанию предати. Се убо тако же о нем и доныне зриться⁶⁴⁶. Принесем⁶⁴⁷ убо, иже древле просиавших сравнымь⁶⁴⁸ сему, еже о добродетели житиа и мудрости. Видим, аще вьистинну ничим же [от] тех оскудень бе, иже преже закона онемь божественымь мужем, по великому Моисею, иже по нем Исусу, сьборавидець бысть и пастырь людемь многым, и яко воистинну незлобие⁶⁴⁹ Ияковле⁶⁵⁰ стяжавь, Авраамово⁶⁵¹ страннолюбие, и законоположитель бысть и наследникь небеснаго царьствиа, истинныи правитель пасомым от него. Не пустынным ли исполнь благопопечение многым, аще и разсудитель беаше⁶⁵² великии Сава, общем житию строитель, сии же не стяжа ли по оному доброе разсужение и многы монастыря обьще⁶⁵³ житье⁶⁵⁴ проходящим⁶⁵⁵ добродетелное и чюдное вьздвиже. Не⁶⁵⁶ имяше ли сеи⁶⁵⁷ чюдеса бесчисленаа, яко же и прежде⁶⁵⁸ того⁶⁵⁹ бесчислено⁶⁶⁰ прославлени. Колми же Бог сего прослави и сътвори именита⁶⁶¹ по всеи земли. Мы убо похваляем того, не яко похвалы требующи, но яко да о нас помолится он великии светилник, всякиа добродетели делатель, и в всем бо страстоположителя Христа подражав. Сиа же и до зде.

Приложено же и се будет къ⁶⁶² прежереченным о обретении мощем святого, когда и не в кое время, егда въсхоте Бог прославити святого блъшими чюдесы и въздвигнути честнеишюю обитель, яко же в лепоту подобаеть и в память праведнику и в похвалу, строением Вышняго прилучися сице. Прииде некто⁶⁶³ властелин от окрестных стран обители святому, благоговеин, имеа велию веру к преподобному, предреченнаго князя Владимера веси содержаи.⁶⁶⁴ Сему бывшю явлению по преставлении святого тридесятном летом минувшим. И зря всегда от гроба чюднаго мужа бываемаа чюдеса. Бывшю оному благоверному [в та]⁶⁶⁵ времена⁶⁶⁶ у гроба приседящю и молящуся, и абье в сон тонок сведен бысть. И явися ему святыи Сергии, глаголя: «Рци настоятелю обители сея: въскую остависта мя сокровенна под землею на многа лета, и воде утесняющи в гробе тело мое». Възбнув же от видениа дивныи он мужь, страхом и радостию одержим, исповеда чюдное видение настоятелю обители игумену Никону и всему братству в слышание. И възрадовастася радостию великою, глаголюще вси единогласно: слава тебе, Боже, яко открыся нам недостоиным съкровище чюдное, богатьство наше некрадомое, отець нашь великии в чюдесех. И тако услышано бысть повсюду, и стекошяся [с] радостию великою дръжавнии князи, священнии събори, иноци же и простии людие от многых стран. Приспе же⁶⁶⁷ с тщаньем [многим, предварив скорее]⁶⁶⁸ державныи великоименитыи и поехвалам достоиныи князь Г еоргии, съи убо великии благоговеиныи в добродетелех изрядныи многу веру име к святому Сергию, бе бо от преподобнаго просвещению сподоблен бысть. И того ради много попечение и поможение к обители блаженнаго отца своего имея, яко въистинну чюднаго отца духомь пороженное добродетелное чядо, честь достоиную от всея душя подавая и своима рукама неотступно отцю служа. И тако роскопашя землю и открывше чюдотворныи он гроб, вкупе же и благоуханиа арамат духовных исполнишяся. И видяще чюдное тело и умилениа достоино, зело дивляахуся, яко не токмо тело святого цело и нетленно показася, но и одежда его, в неи же погребен бысть, цела бяше вся, к тлению никако же причястися. И вода обоюду стран гроба стояше зрима, телеси же святого, ни ризы его нимало прикоснуся. И видевше его вси, прославишя Бога, толикым летом съблюде тело угодника Своего цело, съкровенно под землею, сиающи и благоухающи, [яко же] съкровище многоценно. Сътворишя же празъдник радостен месяца июля в 5 день и в раку честно с псалмопениемъ тело положишя святого. Предпомянутыи же великоименитыи князь Георгии, иже никогда же отступаяи, но в радости благодарениа милостыню рука его подавааше многу, рекы слезиспущааше и на многа лета учредив братью, странным же и нищим милостыню вдасть. И тако по смотрению Божию преподобьнаго ученикъ святого настоятеля обители и ревнителнаго отцю житью преподобныи Никонъ съвещаеть съвет благ с дръжавным князем и с священным собором, еже въздвигнути над гробом чюднаго отца церковь каменну. И бысть дело въскоре настоятеля подвиги, зелными труды, день и нощь попечение творя, еже бысть молитвами любимаго желанное в животе исполнити, и помаганием простертою⁶⁶⁹ рукою благодарованнаго прореченнаго благовернаго князя Георгиа, горениемь зелным сердца. И тако благодатью Христовою и предстателством поручници Владыци нашея Богородица, споспешеньем събора, създана бысть церковь [каменна] зело красна и подписанием чюдным украси ю, еже и доныне от всех зрится, яко земное небо. И тако в неи положишя в раце честное и многоцелебное тело святого, непрестанно точящи исцелениа приходящим с верою и до сего дни.

Преподобному же настоятелю Никону о семь зело радующеся, его же проси⁶⁷⁰ в конець живота своего болезнью сердца предостателници Матере Господа нашего Исус Христа, и с слезами непрестанно моля, да узрит конець съвръшению церкви, еже и получи наследник отечества в старости глубоце, Господу приложившю лета животу Своему угоднику. Бе бо в всех добродетелных деянии подобен отцю своему бысть по отечеству и чюдному въображенному деланию, высокое исьправление показа и до скончяниа своего в подвизех и в трудех зелных николи же не ослабе. И по мале времени болезни телеснеи постигши, призываеть священное исполнение, все множество братства, и начя к ним глаголати: «Отци и братья, пребывшю ми настоятелем в обители съи святеи благоволеньем [Святыя Троица и Пречистыя Богоматери и повелениемъ] господина отца моего и учителя святого Сергиа, мне недостоиному колико лет бывшю и до глубокиа старости, помощници [нашеи] укрепляющи немощь нашю и в всем предстателствующи, яко же обещяся угоднику, тако⁶⁷¹ исполняющи и до скончяниа, ныне же Господу [все] исполняющи [мое] грубое недостаточьство, яко же и весте, еже просих и не погреших желаемаго недостоиныи. Вы же, отци и братья любимая, простите мя, яко же приасте отеческая преданиа и съдръжасте, тако и до конца съхраните добре и непредкновенно, в православии крепко и непрелестне съблюдаите себе, единомыслие же и любовь нелицемерну имеите межю собою, смирениемъ украшаитеся и страннолюбиа не забываите». И иная многа изглаголав, яже о ползе, и сие прирек: «Отци и братья, простите мя [и отнесете мя отсюду в мою храмину], зде бо не могу тръпеети прочее нимало». Братьям же всем рекшим: «Се, господи отче⁶⁷², твоя келиа, иде же ныне зде пребываеши». Отець же непрестанно глаголаше: «Рек вам, почто не разуместе, вем, что глаголите, [вем, яко зде]⁶⁷³ пребывах, но и о инои обители глаголю, видех бо известно и тамо желаю, в место светло и красно, радости исполнено». [И сия глаголя]⁶⁷⁴, радуяся, предасть святую свою душю в руце Господеви месяца ноября в 17 день. И погребенъ⁶⁷⁵ бысть [честно] своими ученики в обители при⁶⁷⁶ гробе своего учителя святого Сергиа, [иде же подвизася, добре] и упас отчее врученое ему стадо о Христе, тако же и обитель строениа своего оставив, яко же град. Тако бо прославляющу⁶⁷⁷ Богу славящих [Его], святыя Своя угодникы чюдесы украси.

Добро есть въспомянути и се от многых⁶⁷⁸ нечто мало, абье [чюдеснеи коснутися трапезе], еже бысть при настоятеле Никоне⁶⁷⁹ у гроба святого Сергиа, едино убо первие поведание сотворше⁶⁸⁰, ими же чюдесы Бог прослави Своего угодника, неотступно бо пекиися о своеи обители, еже о сем да глаголеться. Некии мужь духовен, въ добродетелех знаменитъ⁶⁸¹, именем Игнатии, в обители его виде известно святого Сергиа на бдении всенощнем в церкви стояще на месте своем и поющя с братьями. И тако исповеда братьям.

В ино же время присныи ученик святого Сергиянастоятель Никон множества⁶⁸² [ради] братьи повеле распространити обитель.

Братъ некии иноческое житие проходя⁶⁸³, пребываа в келии настоятеля предпомянутаго Никона, и сему брату секущи древо на здании келии. Ненавидяи же добру делу врагъ спону⁶⁸⁴ хотя сътворити сему, некако же злобе хитрець весть, секиру обратии в руце его и острием в лице уранитися сътвори ему. Крови же зелне⁶⁸⁵ текущи, того ради изнемогшю ему и седящю в келии настоящаго, вечеру⁶⁸⁶ бывшю, ему и седящю в келии яко въздремавшю. И бысть гласъ при оконци, молитву творяще с кроткым удареньем, именуя себе игуменъ есть, игумена же не⁶⁸⁷ бе тогда в обители. И въсхоте брат отврести келию, [но] не можааше от болезни тоя въстати. И бо сами двери отвръзошяся и виде вшедша светлоносна мужа старца, въслед его в святительстеи одежи и другаго вшедша, и пришествием их светъ велик восиа в келии. Немощному же брату благословившюся от них, светлоносныи архиерею келеиное основание показовааше, он же [та вся и места благословляше и] тако обьхождааше и невидими бышя. Възбнув же брат от видениа и болезни на лици своем никако же [ощюти, осязав же рукою] разумев,⁶⁸⁸ яко вся болезнь его отогнана бысть виденьем их. Бысть же позна⁶⁸⁹ по образу: светлоноснаго мужа быти святого Сергиа, попечение имеюеще о обители, в одежи же архиереистеи Алексеи митрополит, иже в животе пребываа духомь любяаше святого. Вина же явлению оному бысть сиа: яко обители строение благословляеть, брата же болезнующаго исцеляеть. Зрим же и мы: их же зде телеса [неразлучна]⁶⁹⁰, колми паче и по смерти духом съвокуплени суть.

Подобааше ведати и се вашеи любви, еже слышахом от великаго старца, предним бывшя сиа в нашя лета и от нас знаем бысть старець, мужь добродетелен и многиа кротости исполнен, сыи Игнатии имянем, архимандрит Дионисьевы печеры Ноугоротскыя, зело честенъ⁶⁹¹. Сему случися некогда приити в обитель святого, и мимоходящю ему, вечеру сущу, и обита ту. И урани зело ити в путь свои, хотя ускорити, и тем презрев поклонитися гробу святого Сергиа. Исходящю же ему от обители святого и в вратех бывши монастырскых, и внезаапу абие вси уди тела его разслабишася, яко не мощи ему от места оного никако же двигнутися. И тако в тъи чяс разуме вину немощи своея, яко не прииде къ святому гробу поклонитися, сего ради пострада и не може поити. И повеле себе в тъи чяс понести в церковь, принесошя его и положишя у гроба святого. И начят с слезами молитися о согрешении своем, праваго пути погрешешю, и о сем тепле каятися. И абьев тъи чяс здравие приат, яко ничто же пострадав, и отиде в путь свои, радуяся и славя Бога, благодать въздавая великому наказанью чюдесному, иже бо не хотев волею своима ногама приити, и абье неволею всяко привлечен бысть. Тако бо Бог прославляеть угодника Своего, покланяющимся верою мощем его милостивно прощение исполняеть [и небрегущих наказуеть] прочье боятися.

Подобаеть предреченным сим последовати чюдесем, еже сътвори Бог угодником Своим, в настоящее се время непрестанно приходящим с верою и доныне, от них же множество суть зрится очима нашима, настоящее же исповедуется. Бысть некии мужь от дръжавных великых велможь имянем Дмитрии, сему убо нозе на много время болезнью съдрьжимым, яко ходити ему с нужею зело. Съи бо виде многа чюдеса бываемая от святого, и абье верою подвигся, приходить в обитель его. Бывшу же пению, болныи седяаше при гробе святого, в уме своем моляашеся ему о еже избавитися от належащиа болезни. По отпении же изиде на источник, его же молитвою святыи прояви, и ту нозе обе до колену погрузи, и абье от того чяса сдраве быста нозе его, яко николи же что пострадавша. И тако отиде в дом свои сдрав, радуяся, благодаряше Бога и Его угодника святого Сергиа, прославляа великаа чюдеса в вся конца.

Ни же се млъчяти подобаеть, наипаче проповедати с дръзновением Божья чюдеса, бываема угодником Его. Бысть иже в нарочитых от великых и славных велможь Захарья именем, мужь благоговеин и мног в добродетелех, стареишина величеством и честью в всех граду Твери⁶⁹², и доныне во всех странах похвален житием. Сии от обители преподобнаго яко 200 поприщь или мнее, но аще и далече бяше растояниемъ место, но близ верою. Сему бо случися болезнь чревным недугом съдръжиму быти, день от дне утроба его растяаше, смертью претящи. Имяше же велию веру к святому Сергию, помышляаше в себе, глаголя: яко аще токмо хлеба с трапезы святого начну причящатися и надеюся на молитву святого, всяко исцелею. И тако въсприимаше, посылаа къ обители святого Сергиа, хлеб от трапезы, еже ядяаху братьа, и по вся дни на трапезе своеи, от него же преже всего вкушааше за молитву святого с верою. И тако ему творящю на многы дни, и абье по мале дни болезнь от него отогнана бысть. И бысть сдрав, яко же ничто же пострадав, и обещася, глаголя, поити в обитель и поклонитися мощем преподобнаго Сергиа, о исцелении благодарение въздати, еже сътвори на нем милость святы. Се же помыслив, день от дни в забытие прииде, яко же и въ мнозех прилучяется: егда бо в мнозе есмы беде, тогда к Богу прибегаем, по избавлении же тогда неблагодарны бываем. И того ради мы обретаемся непотребны, прогневаем человеколюбца Бога, наказаниа не приемлем и погибаем от пути праведнаго. И тако по сему образу сие бысть: в множестве мирскых попечении великодержавному⁶⁹³ времени же минувшю доволну, не попусти Господь Бог мужю добродетелну в конець в забытие приити, и пакы наказуеть его. Случи бо ся ему в болезнь тяшку впасти зубную, и толика болезнь множаашеся, яко мнети им и челюстем его съкрушитися от многыя болезни. На многы дни ни брашну, ни сну нимало причяститися, и тако многы дни стражющу ему. Бе же подружие его издавна к святому велию веру имея, и благословениа ради скуфью его дръжащи в дому своем, и приимши же благыи⁶⁹⁴ помысл сии и възложе ю на главу мужю своему. Вечеру же сущю, и тако по малу отраду приемши, в сон сведен бысть. В полунощи же, яко сам глаголаше, светилнику горящю и подружию его спящю, он же не свершене⁶⁹⁵ [спяше], ни бдети можаше⁶⁹⁶, [но] яко же обычяи болящим, отягчену лежати, душа же его бдящи, мыслию своею призывааше святого Сергиа, яко да посетит его и подасть здравие ему. Внезаапу видит блаженнаго отца Сергияпредставша⁶⁹⁷ ему. [Немощныи же аще хотяше въстати]⁶⁹⁸ или что проглаголати, но не можааше. Святыи же рече к нему: «Захарьа, что болезнуеши». Он же рече: «Еи, господи, зело стражду зле». Святыи же рече к нему: «Поне же некогда не въсхоте приити ко мне в обитель мою и ныне, аще хощеши цел быти, поиди в мои манастырь». Он же рече: «Господи, хощю, но не могу». Святыи же рече: «Вем, нине же немощен еси, когда же здрав еси не благодарьствуеши [и обещание забываеши]⁶⁹⁹, аз же всяко ныне отнесу тя и поставлю тя в обители своеи. И зрить тако немощныи взята себе из дому своего и отнесена в обитель святого и положена у ракы блаженнаго. Немощныи же видев раку преподобнаго, припаде с плачем, вкупе и радостию облобызааше и болезнеными уды касаашеся, и тако съвръшеное исцеление въсприимааше. И обретеся в дому своем абье здрав. И от видениа възбнув и никако же болезни ощюти и бе, яко николи же болев. И пригласив свое подружие, в радости мнозе вся по ряду исповеда. И чюдишяся зело с всеми ближними своими чюдному посещению святого, како единем чясом взят бысть немощныи⁷⁰⁰ из дому своего святым Сергием и принесен в обитель его, и прикосновением ракы здравье получив, и обретеся в дому своемздрав. И тако възрадовашяся радостию великою зело, въздающе славу Христу Богу и Его угоднику славному в чюдесех. И тако скоро потщався исцелевыи, с многым учрежением иде к обители святого, не закосневая обещаниа исполнити, бояся, да не горше того что постражеть. И прииде в обитель святого и преподобнаго Сергиа, исповедаа чюдеса великаа святого, сбывшаяся на нем, и благодарныя песни въспевааше ему благоподобно⁷⁰¹, и любезне облобызающе многоцелебныя мощи святого. И братью доволно учредив, и милостыню многу вдав, отиде в дом свои, радуася.

В та же времена, в видении нашем, бе некии мужь от великых купець славных господьствующему граду Москве, Семион именем, рода славна и великоименита⁷⁰², сын Антонов и матери Марии, от благоверных мужеи и богатых, и любими премного святым Сергием добродетелнаго ради житиа, иже по пророчеству святого родися. Съи убо предпомянутыи Семион познан бысть въ утробе матере своея, тако же и родителя его велию веру имущи къ святому. Сему же Семиону случися в болезнь тяшку впасти, яко на многы дни ни брашну, ни сну никако же причяститися, и до сего зелною болезнию стисняем, [ни же на одре двигнутися можаше], но подружиемъ своим едва обращаем и ближними носим бывааеше. И сему бывшю на много время. Некогда же в едину от нощии въспомянув чюдеса блаженнаго Сергиа, колика творить Бог чюдеса его ради и подаеть исцелениа просящим с верою, и начат молитися в уме своем, с слезами глаголаше: «Святыи великии чюдотворче Сергие, помилуи мя, егда бе в жизни съи, колику любовь имел еси к родителем моим, и благодетельство, мене же недостоинаго еще в утробе матерне познал еси, и по твоему святому пророчеству родихся, [слышах бо неложно от своих родитель, но отнеле же родихся] и доныне твоими молитвами окръмляемъ⁷⁰³ живот мои, и аще многыми грехы съдръжим есмь, тако же и ныне веру и надежю непреложну имею на тя, умилосердися на мне многогрешнем и недостоинем, не прогневаися до конца на раба своего неключимаго и избави мя от болезни сея. Вем бо, святе, великая твоя чюдеса всем подаеши скоро, уже к концю исхода⁷⁰⁴ приближихся⁷⁰⁵, услыши, святыи, и подаи же руку доле лежащему, да всегда прославлю и аз с всеми великая твоа чюдеса». Сиа же⁷⁰⁶ много молениа немощному [простираше к святому] с плачем, внезаапу явися ему скорыи в помощьх святыи Сергие, с ним же присныи ученик его бываемыи⁷⁰⁷ по нем настоятель обители его Никон. Светилнику горящю, всем же в дому его спящим. Сему же немощному Семиону видяаше [святого] в светлости велице приходящи к нему, страхом одръжим есть и не ведяаше его, кто е⁷⁰⁸ есть, но от последеющаго ему Никона разуме, яко святыи Сергии есть. Сего бо Никона известно знаяше. Хотящу же ему въстати, но не можаше ничто же проглаголати, паче же в страсе мнозе. Святыи же ста близ немощнаго и знамена его крестом, его же ношаше в руце своеи. И по семь повелеваеть последующему ученику своему Никоноу, да знаменуеть его иконою, еже пред одром немощнаго стояше, ю же сам Никон некогда вдасть ему. Тако вземь по повелению святого старца, знаменаеть его иконою немощнаго, и тако зритсяему, иже емше за власы его и содраша с него всю кожу с главы его и до ногу. И тако невидими быша. Сему же в тои час Семиону познавшу в себе облегчание болезни своея, и скоро въста на одре своем, седе никим подкрепляем, еже преже двигнутися не моги. Възбудив подружье свое, исповеда все по ряду чюдо, како прииде святыи Сергии и ученика, его же возлюби, явлена сего сътвори зде знающим в познание всем, яко съпричтен в чюдесех своему учителю, и тако вкупе с ним немощному исцеление дароваста. И толико бысть ему здравье: в явление всем въста с одра своего и сътвори метании 15 до земля пред образы честных икон. И разуме содрание кожное – боелезни своеа скоро отъятье, и возрадовашеся радостью многою с всем домом своим в светлости велице и в славу Христу Богу и в похвалу великому в чюдесехъ святому Сергию и его присному ученику преподобному Никону, свидетельствовану от святого учителя своего неложно в чюдесех предняя простирая. Сия же и доныне от сего самого Семеона в слухи всем исповедающа сия.

Се ино чюдо скажем вашеи любви, иже быша вся нова в нынешняя лета, деиствуема святым дивна и преславна, всеми ведома, еже [не]⁷⁰⁹ мощно писанию проповедати. Мы же нечто от части еже от проповедаемаго случишася ему слышим, предводящее слово скажеть. Яже изначала Богу наказающии нас за грехи наша и еже обратитися намъот злобъ наших, но покаянием от прегрешениих обратить нас и казня овогда гладом, овогда мором, овогда нахождением иноплеменик, яже чюдну повесть хощемъ простерети вашеи любви достоину се свидетельству. Случи бо ся, яко же предрекохом, в нынешняя лета нахожение безбожных агарян [на] наше христоименитое стадо, на Рускую землю, самомоу Ординьскому царю именемь Махметю приитти. Исшедшим же противу князем и воеводам и множьство воиньство християньское бесчисленое, и бысть сраждение страшно, и побеждени быша безбожнии прежде, и мнози от них избьени быша. Царю с воиньством пристрашнымъ быша и зело смиряющимся, и еже токмо жиевы оставити их. Неции же от християньскаго воиньства е⁷¹⁰ смиритися не въсхотешя и от них того ради погибошя, и с ними множество бесчисленое. Еже случися грех ради наших, еже безбожнемь малом воиньством попусти Господь Бог на свое христоименитое стадо множество воиньства агарян, смирениа ради их, не знающих Его, ни призывающим Его, тем победу подасть, [наказуя нас] непокорных⁷¹¹, поне же вторым⁷¹² сражьдением⁷¹³ все воиньство христианьское побежьдено бысть от поганых и от них многа телеса падошя, а инии руками яшя. В них же воин некто, о нем же намъ слово, от полаты великаго князя дръжавнаго любимаго, Иванна именем, сына Михаилова, саном великаго⁷¹⁴ велможи. Сего отлучишя гонящии его от воиньства, яша его, напрасно достигше, и убити претящим. Сему же юну сущю и живота своего отчаявшюся, и вдасть ему Богъ благыи помысл, еже призывати скораго на помощь святого Сергиа ко избавлению его. И толико в мысли своеи помянув святого и абье конь его скоро на бежание⁷¹⁵ простираашеся, яко крила вдасть ему, и еже невидиму быти ему от поганых. И достиже воеводы своего в радости мнозеи, исповедуя всем великаа чюдеса, како избави его Господь от горкиа смерти молитвами святого Сергиа. И тако грядущю ему в путь с воиньствующими ему, веселяхуся и обещеваяся приити в обитель святого и поклонитися мощем его, и благодареение въздати, и братью учредити. И по мале времени пременися мысль его на лукавое, еже сам потом исповеда, глаголя: «Что сътворю, мало имениа дръжю, аще в обители святого учрежю и велику братьям милостыню подам, яко же обещахся, бояся убожества, пол имениа моего не станет ми на потребу». И сиа ему помышляющу, и внезаапу потчеся конь его под ним и паде напрасно, яко из устъ его и браздам исторгнутися, и тако самому с коня спаднутися. И нападе на ня страх велии, яко вси оставишя его страха ради сверепых тотар, сему же в страсе трепещющи, конь свои управляющи от великаго страха. И в тъи чяс безбожнии приспевше [от иныя страны] и сего воина яша, и снемше же с него блистаяся оружиа его и на убииство его устремишяся. Тъи же, увы, и гръко рыдааше, юности своея милуя, и⁷¹⁶ всяческы живота своего отчаався, ничто же надежно имеяи в себе къ избавлению. И укааряше свое лукавство о раскаании обета, еже к святому, и срамляашеся прочее призвати святого Сергиа на помощь, сице глаголя: «Въ правду аз умираю, оканныи, не съхраних обета еже к тебе, святыи Сергие. Аще не⁷¹⁷ прогневаешися на мя вконець, умилосердися, чая мое недостоиньство, сугубо и преславно показааше своа чюдеса, и пакы не могу сългати, уже бо безответен есмь, язык мои пресыхает ми, уста моя глаголюща⁷¹⁸ неправдупреже к тебе,⁷¹⁹ заградишяся, и что потом – се бо есмь студа исполнихся и зле умираю». И тако ему цветущиа своеа юности внутрь рыдающи, и се они зверовиднии в овчюю кротость преложишяся, яко изумлени, оставивше его, отъидошя, ничто же зла сътворишя ему, ни риз многоценных съвлекше с него. Сиа же он видев себе съхранена благодатью Божиею и заступльнием и молитвою святого, отчаянному живот даровавше ему, и абье на бежание себе вдасть. И се аще и некто от⁷²⁰ поганых сретааше его, но молитвами святого покрываем бе и к своему дому доправлен здрав. И тако притече в обитель святого, побояся да не пакы тягчаиши нечто постражеть. И припаде к раце святого, облобызаа съ слезами, изповедуя всем великаа Божия чюдеса и скорое заступление, и милость славнаго в чюдесех святого Сергиа, бывше сугубое на нем милосердие. И в радости мнозе благоподобныя песни отпев и братью учредив и милостыню многу вдав, отъиде в дом свои, радуяся зело и поминаа наказание, еже бысть преславно к нему, и милость яко же присному чаду его.

Посем же и се скажем, еже к убогым святого щедрость и исцелениа подаа им.⁷²¹ Некии бо нищь странен, слепотою одръжим 7 лет, ничто же отинудь⁷²² увиде, водим беяше, милостыни прося. Слышав же о святем бываемаа чюдеса у гроба его, и приведен бысть в обитель милостыня ради. Празднику приспевшюСвятого Духа Сшествию, и множеству⁷²³ народу бывшю, оному же нищему стоящю вне церкви, и водящему же его отшедшю на некую потребу. Он же слышав пениа, бываемаа в церкви, и плакашеся о лишении своем, хотяще еже внити в церковь и поклонитися святому гробу. Милуяи же нищаа, явися ему блаженныи Сергие в образе некоего странна и емь за руку слепаго, приведе и в церковь и постави у гроба своего. Слепыи же сътворив поклонение велико и осязав раку, с слезами прикоснуся очима своима и прозре, виде и възвах предстоящих, и знаемых по образу позна. И тако вельим гласом възопи⁷²⁴, благодарение въздая Богу и Его угоднику, творящему непрестанно дивнаа чюдеса. И видевше вси, прославиша Бога, в вся страны проповедающи чюдо святого Сергиа. Прозревыи же не отступаше, и пребысть в обители святого, работаа всему братьству благочестьне и в мнозе.

Отроковица некаа мала слепотою одръжима, в нищете ходяще водима, милостынею кормящися. От далних стран [преведена бысть] ко⁷²⁵ обители святого, и пребывающе ту с убогими, питающися от трапезы обители святого. Некогда приведена бысть к раце мощеи его, и только приближениемъ⁷²⁶ коснувшися и прозре, и пребысть сдравы очи имущи, яко николи же пострада.

Уношя некыи от духа неечистаго зле мучим, и пребывааше [со служащими]⁷²⁷ в обители святого на многа времяна, стражаи вяжем бывааше⁷²⁸ многими путы железными. Он же растръзаа их и бегаа в пустыню и по стремлинам,⁷²⁹ убиваашеся, и пакы обретше его мноземи привлачим бываеть. И привязаша его крепко к гробу святого, и беяше зле мучиму, яко от гласа его и свистаниа бесчисленаго всем ужасающися, не [могущимъ] тръпети. Падающи ему и убивающися в цръкви о камение, и телу его черну всему являтися, ранами уязвляему от зелнаго мучениа находящаго беса. И тако на много время сему бывшю и мнозем братьям зрящим и умилившимся, слезящим и о нем молящимся преподобному, да помилует зле стражющаго. И тако по мале времени отогнану бесу нечистому духу молитвами святого Сергиа, юноше исцелевшю и смышлену бывшю, яко николи же болевшю, въ благочиньи⁷³⁰ служащим братьям потребнаа в обители, в послушьство всем зрящим и донине. Бе же художество его⁷³¹ швенье⁷³² риз добре и мудре.

И не токмо окрест обители имуща кацем недугом одръжимым исцеление получяющи, но и от далних стран прибегше мучими в пристанище святого, исцелениа получишя, но не отступно работающе в обители его. Мнозеи от земледелець и донынев радости не [стужающе си смыслени]⁷³³, никако же отлучяющеся паствы преподобнаго. И аще от таковых лучиться кому отлучитися предним своим обычяем, и пакы от нечистаго духа гоними бывааху къ обители святого [в] наказание всем волею Божиею святого в чюдесех Сергиа.

Ни же и се да покрыется млъчяньем, се же чюдо сътворися святым в наше видение. Прииде некыи отрок именем Леонтии, имея жилище Вышеграду на реце Поротве,⁷³⁴ сын от стареишин благородных града того, имея суху руку за 8 лет прикорчена к ребромъ⁷³⁵ его, и того ради страньствуя по многым местом и странам Христа ради, тружаася телом своим. Пришедшу же ему преже в весь некую Сергиева монастыря, и тамо явися ему чюдныи и славныи преподобныи Сергии, глаголя: «Чядо, аще хощеши исцеление получити, иди в обитель, еже слышал еси Сергиеву и видел еси некогда, желаемое получиши [и даи же славу Богу]». Идыи же слышав, радостен бе зело, и прииде в обитель святого в память святого апостола Лукы, в время святыя литургиа. Скоро вниде в церковь и ста у ракы чюдоноснаго отца, метание с плачем творя на едину руку, молбу простираа к святому. Всем же братьям [предстоящим] и мне, недостоиному Пахомью, писавшему в то время житие святого, ужасно исповедавше чюдо великаго. Яко третьее метаение сътвори отрок и припаде к гробу, възопи⁷³⁶ гласом великым, глаголя: «Слава тебе, Боже, творящему чюдеса великая⁷³⁷ Своим угодником святым Сергием, се здрава рука моя и сухая». [И се] рек, въздвиже ю горе, глаголя: «Се зрю святого, стоящя у гроба своего и повелевающу⁷³⁸ маньем простерти руку мою сухую, яко же [обещася]⁷³⁹ мне, убогому и недостоиному, и се ныне исполни⁷⁴⁰. И благодарю Господа Бога и святого великаго в чюдесех, должен есмь прославити в вся страны чюдеса его». Видевше же ту предстоящии преславное чюдо, еже сътвори святыи явьствено всем, еже мню и аз, недостоиныи, побежден⁷⁴¹ маловерьем, мою худость уверяа и немощь мою укрепляа, яко же предреченному случися епископу, пришедшему от Царяграда. Ужасным всем нам бывшим и слез очи исполнившим, вси бо знающе отрока преже суху руку имуща. И въздашя хвалу Богу и Его угоднику святому Сергию, богоподобныя песни певше [в] радости. И тако⁷⁴² пребысть и здраву руку [имея], яко же и другую, и тако пребысть дни доволни в обители святого. И посем поиде в вся страны, прославляа святого и дивнаго в чюдеси, яко же обещяся.

О сих же прочее съкратим. Неизследованна бо и несказанна чюдеса святаго, иже даруеть непрестанно приходящим с верою к гробу его, но и повсюду скоро предваряет на помощь призывающим его в скорбех. О них же впреди сказахом вашеи любви, в всяслухы ношаашеся в похвалу великаго в чюдесех.

Случешися [в] наше видение, сиа бо дивнее и преславнее яви себе святыи Сергие благоволением Святого Духа в страны, зело далече сущи, области Латыньскиа, сим образом, иже предоводящее слово скажет.

Внегда⁷⁴³ бо Исидору митрополиту пошедшю от наших стран в Латынскую страну к римскому папе Евгению⁷⁴⁴, и пришед в великое Латыньское събранье и съгласившюся⁷⁴⁵ ему с папою латыньскым и с его единомысленикы съставити осмыи собор, не повеленныи, по преданию святых апостол и святыми отци седми собор, с ними же седмию святых папежеи римскых, учителеи первоначялных вселеньскых, теми святыми заповеданно и проклято и всяческы отвръжено. Сим же преступившим заповедь святыхь отець седми сбор. Исидору же сему злу умышлению велику поспешнику бывши, и съставишя осмыи собор. Марку же епископу Ефесскому⁷⁴⁶ и Иверьскому⁷⁴⁷ епископу Григорью и Тростинскому⁷⁴⁸ епископу⁷⁴⁹ Исакию и Газскому⁷⁵⁰ епискому Съфронию никако же съблагословящися с ними, но всячьскы⁷⁵¹ гнушающимся и отвргъшимся съборовати осмаго собора, и от них избегшим из града [их]. Силному же по Бозе Марку Ефесскому⁷⁵² посреди их стоящю, яко столпу непреклонну или адаманту негиблему, пребывающю и обличяющи суетство их и латынею⁷⁵³ поношающи⁷⁵⁴ им. И колико от нихпретерпе прещение и муку, имения⁷⁵⁵ ласканиа, и никто же можеть одолети его. [И некогда седящу ему]⁷⁵⁶ посреди събора их [множьства] латынскаго, и видев их буиственое кичение и гордость, и рече к ним: «О Латыня, аще кто преступит заповедь святыхъ апостол и святых отець седми събор и святых седми папежеи римскых и вселенскых учителеи, да будет анафема». Папе же и иже с ним вонъ избегшим с мест своих, не стръпевшим сего словеси, яко же от огня попаленым, посрамленым бывшим и ничто же смевшим что к сему рещи ему. Прозвитер некто именем Семион, и пришедшю ему с Сидором митрополитом, пребываа в келии его, съи приходя к великому Марку Ефесскому⁷⁵⁷ и от него укрепляем, не съблаговоляя⁷⁵⁸ митрополиту Исидору, но съпротивная творяаше ему, и обличаа и укаряа, [того ради скорби]⁷⁵⁹ и мукы от него претръпе. Молитву приемля [и] наказаниа от святого епископа Марка, тако же посылаем от него всем крестианом о сеи⁷⁶⁰ прельсти предварив, провъзвестити, да не прельстятся. Исидору же сътворшю волю латыньскую, отшедшю от них и пришедшю въ град Венецию.⁷⁶¹ Сему же прозвитеру свещавшуся с посломъ⁷⁶² Тверскиа земля, ему же имя Фома, с Сидором и в соборе бывши, бегу ся яша⁷⁶³ от Венеции⁷⁶⁴ града к своеи земли, к Русскым странам, хотяще възвестити, что хощет быти от Сидора прелесть крестианом. И тако отбежавшим им немало растояние, Божьею благодатью сьхраняеми. И прилучися купцем страены тоя идущим в путь их, [и приидоша в]⁷⁶⁵ непроходнаа места, в них же горы высокы и стремины⁷⁶⁶ страшны, и межь ими единь путь, над ними же градь утвержень бысть, Наньстраньтрос⁷⁶⁷ именем, за Дунаем, [в нем] же человеци злии разбоиници, паче же крестианстии врази. Граду врата железнаа, ими же путь затворяашеся. Купци же отлучишя их, глаголюще: «Вы крестиане есте, не можете преити сьи град с нами, да не погибнем и мы вас ради». И тако отогнаным имь бывшим, вь скорби велицеи предваривши, отьидошя в путь свои зело в печяли велице, и живота своего отчаявшимся, недоумеюще, како поити вь стране незнаеме, иноязычнеи, кому впаднути в руце, живота надеющися. Призывающи Господа Бога сь слезами, и поидошя кь оному граду. И мало пошед на гору высоку и изнемогшим от труда путнаго шествиа, седошя печялующе, и тако вьздремошя и уснушя. И се зрить священоинокь именем Семионь старца честна, имущи стояща над ними, вь одежи светле, глаголющя: «Про что скорбиши, прозвитере? Се видел еси честна мужа, иже апостолскым ликом последующе, Марка епископа Ефесскаго⁷⁶⁸, от него же благословениа сподобися, прочье [не] усумняся поити». Прозвитер же рече кь святому старцю: «Господи, виде яко же единого от вселеньскых⁷⁶⁹ онех патриархь вь святости и вь дрьзновении мнозе и мужестве, чюдное⁷⁷⁰ на латынское множество победу страшну покаезавши, благословениа сподобися от святого». Старець же рече кь прозвитеру: «Се яко же видель еси и от усть его наказание слышя, блюди, да никто же тя устрашит, сь дрьзновениемь всем проповежьдь православным, поне же имея разум от божественых писании, а не прелстися. А о прехожении вашем не скорбите, аз же непроходимая си места бес печяли вы проведу, нине же поидете в путь. Амо же поидосте, и мало пошед, узрите место, на нем же минувше⁷⁷¹ две полате, и при третьеи полате обрящете жену стоящу, именем Олгину,⁷⁷² и та приимет вы в дом свои и учредит вас любовне. И посем⁷⁷³ непроходимыи он град проидете бес печяли, никым удержимы».⁷⁷⁴ Прозвитер же въпроси светлоносна мужа оного старца, глаголя: «Господи, повежь нам, кто ты еси, мню бо, яко от Бога послан еси извести нас отчаянных от сих стран незнаемых и в конец погибающих». Предвараяи же в помощех отвещя: «Аз есмь Сергие, его же веси Маковьскии⁷⁷⁵, [к нему]⁷⁷⁶ же обещася некогда приити в обитель и не прииде, и ныне пакы ложен обет твои будеть, неволею⁷⁷⁷ приведен будеши». Он же въспрянув от сна, радостне и вся исповеда спутнику своему, еже виде и елико слышя. Възрадовашяся зело вкупе радостью неизреченною, и тако скоро поидошя в путь свои, радуяся. И доидоша места по глаголу старца явльшагося, и минувшим им две полате и приближающимся к третьеи, зрят⁷⁷⁸ при полате жену честну стоящу, и приглаесившю [ихъ], приат я в полату свою, глаголюще: «Аще крестиане есте, упокоитеся в полате моеи доволно⁷⁷⁹, поне же и аз крестианка бех некогда и мала завезена⁷⁸⁰ зде». [Сия] с плачем глаголющи. И поведаше им имя свое – Олгина⁷⁸¹. И тако они радовахуся зело о збывающихся вещех, еже глаголано бысть [от] явльшагося святого старца, и благодаряше Бога о покоих и о учрежении благоразумныа жены⁷⁸², яко же поведашя и вину [пути] шествиа своего без боязни, явльшагося им святого старца Сергиа именем и поведающа, в колико растоянии⁷⁸³ стран ускори на помощь к ним. Она же сиа слышав от них, радовашеся зело, глаголющи: «Велико посещение от Бога послася вам⁷⁸⁴, съи святыи Сергие может⁷⁸⁵ провести вас невидимо, непроходим бо съи град. Дивно бо ми и се, како святыи старець мене заблужешю поведа вам по имени, како ублажу его чужа милости его, вас же ныне сам Бог проведет сим⁷⁸⁶ святым, явльшимся вам, инако никако же не можете проити сего нужнаго града». И тако учредив их доволно, и посла отрока своего показати им путь, самому же никако же смети приближитися к граду страха ради сверепьства злых человек. Сим же укрепльшимся молитвою и верою святого, неложным словесем его, яко же глаголано бысть прозвитеру от него. Приближающимся им к граду оному и зрящим на граде воеводы с воины ликующи, множество беесчислено играюще [в] трубы и свирели и бубны, яко же грому гремящю страшну многыми игранми. Онем же к вратом приближающимся и на⁷⁸⁷ них зряще, [а онем на них зрящи], к сим⁷⁸⁸ же что⁷⁸⁹? О Христе царю, велика сила Твоя и заступльние, еже твориши преславная Твоя чюдеса Своим угодником! Духом убо укрепляющися о надежи, телом же немощни суще трепещюще, страхом зелным одръжимы, толико могущи едва звати в сердцих своих: «Господи, помилуи, покры и съхрани молитвами святого Сергиа». И тако внезаапу они страшнии воини възвертешя железны затворы вратом, ничто же рекши, и яко проидошя в врата, и пакы затворишя в таковеи кротости и млъчаньи⁷⁹⁰, по речению святого, бес печяли проведени бышя, [сохранени быша] всяко молитвами заступника великаго Сергиа. И тако поидошя в путь свои в веселии мнозе, глаголюще: «Слава тебе, Боже, творящему дивнаа чюдеса Своим угодником, избавльшему нас из рук безаконных врагъ». И достигше онех купцев, иже преже отлучивше от себе прозвитера и козмика, и дивишяся зело, како проидошя он град непроходимыи. Они же исповедашя им вся преславнаа чюдеса. Купци же ублажишя их и почесть многу въздашя им, глаголюще своимъ языком: «Велик вашь батко Сергии, такова бо мы не слышахом нигде же». И [та]ко вкупе прославиша [Бога]⁷⁹¹ и разидошяся кождо [сво]им путем. Сии же [поидо]шя своим путем в [своя]страны Рускиа, и многы страны до своих стран проидошя чюжих, съхранени Божьею благодатью и Его угодника великаго в чюдесех.

О прозвитере же глаголеться. Тому бо пришедшю до Русскых стран, предвъзвещающи Исидорово, [иже] хощет быти прехоженье прельсти на съблазн православным крестианом. И закосневшю ему, не прииде в обитель святого первее, по пророчеству его, и тако постиже его суд Божии. Исидору же грядущю к господьствующему граду Москве и достигше, яша его и приведошя его к Сидору. И яко виде прозвитера, не повинующася ему, но противящася ему, и повеле железы обложити его. [И] тако приведенъ бысть в [град] Москву. Он же тако не престая обличяа Исидора, и о муках не радяше, яко же предпомянухом, много претръпевшю ему. Исидору же митрополиту пришедшю в благохранимыи град Москву к великодръжавному царю Русскому Василью Васильевичю, иде же въсхоте, еже умысли, съдеяти⁷⁹² неправду, поне же зачят болезнь и роди безаконие, ров изры и ископа и впадеся в ню, ю же сътвори. Господу Богу Вседръжителю не попустившю сему быти, молитвами Пречистыя Богоматере и великаго в чюдесех Петра митрополита, новаго чюдотворца, Святому Духу просветившю очи сердечнеи самодръжцю Рускому царю Василью Васильевичу православному⁷⁹³, обличившю сего Исидора, яко непраевым путем пришедшю, и не в двери преходяи, но прелазя инуде, по святому еуангелию, отвръжен есть. Събраным епископом русскымь и преподобьным честным отцемь многым, и от святыя съборныя церкви Богоматери отлучен, поне же зачят болезнь и роди безаконие. И болезни его вина бысть сиа. Егда преже поставлениа своего на митрополью, слаганию бывшю с латынею, тогда въоружися на съборную церковь и на все православное крестианьство Русскыя земля и насильем поставльние свое сътворив. И прииде преже лестию в богохранимыи град Москву расмотрити и⁷⁹⁴ искусити, не яко пастырь истинныи своих овець, но яко пастырь наимник враг, или паче суще влък. И виде великых князеи православных дръжавство яко⁷⁹⁵ царьство, велико христианьское множество, и поиде скоро на злое умышление къ своим съветником, и не утаишяся злоплетенныя сети их, но [обличены быша от смиреных новопросвещеныя]⁷⁹⁶ великыя земля Рускыя, ныне же богоразумьем украшену и явльнну в вся конця земли, в познание истинныя веры, еже по великому Давиду рещи: «Благословен Господь Бог, иже не дасть нас в ловитву зубом их, душа нашя яко птица избавися от сети ловящих, сети съкрушишяся и мы избавлени бышя; а онем же поболе злу⁷⁹⁷ умыслив,⁷⁹⁸ обратится болезнь его на главу его, и на връх его неправда сниде».

Не стерпе бообличениа, срамом побежена, но яко влъка отогнана от стада Христова. Ея же ради вины прослави Господь Своего угодника чюдесы: не знающиа [его Латыньскыя] страны да разумеют вси, коль благ [и] дивен в святыхь Своих, в них же святыи Сергие чюдныи; пакы не съкровено будет Исидорово младоумное суетное ухыщрение, но паче обличено. Сие же до зде.

Настоящее да глаголется. Предреченныи же прозвитер Семион свобожаем от юз благоразумным царемь Васильем, и не преста единаче обличяюще злохитрие Исидорово. Святого же Сергиа в преславном чюдеси прослави, еже сътвори о них, всемъ исповеда с слезами, еже сбысться⁷⁹⁹ святымь о нем реченное от⁸⁰⁰ блаженнаго, в явлении к ним глагола: «Еже волею [не прииде] в обитель мою, и неволею придеши». И тако вдан бысть в обитель святого в преупокоение, и симъ образом [обретеся]⁸⁰¹ у гроба явльшагося ему, изведшему непроходимаа места. И тако припадаа къ гробу святого с слезами, моляшеся о прощении съгрешениа, еже сълга и не прииде скоро, и колико пострада того ради. И тако пребысть дни доволны въ обители, славу всылая⁸⁰² Творящему дивная чюдеса Своим угодником. И раны нося на телеси, яже пострада по православнеи вере⁸⁰³, но о сем радоваашеся, и помале молитвами святого исцеле от ран. Не забывааше бо и Марка Ефесскаго⁸⁰⁴, великаго епископа молитвы⁸⁰⁵ призываа. Сия же до зде.

Нееисчерпаемаа⁸⁰⁶ пучина чюдес святого, непрестанно текущиа струя, еже в настоящемь⁸⁰⁷ животе его, или колико по отшествии к Господу множество бесчислено творимо святым чюдеса его. И оставльше та вся бес памяти писания по⁸⁰⁸ заповеди святого смирениа ради⁸⁰⁹, ныне [же] кто может исповедати. Поне же не может град укрытися верху горы стоя, по Господню словеси, тако же и чюднаго смирениа делатель, аще и в настоящеи съи жизни не въсхотев славы мира сего, но мы не благодарны, забыхом имя Господа нашего Исус Христа заповеди о⁸¹⁰ великых чюдес Его. Иногда никому же, рече, не поведати, они же паче всюду проповедашя, иногда же прокаженныа [очистив и]⁸¹¹ взыска, глаголя: «Како не въздаяше славу Богу?» По сему образу явленно⁸¹² к Господню угоднику наше небрежение, но⁸¹³ не прогневася, непрестанно творяи чюдеса преславная. Аще бы не угодно Богу было, како бы подавал святыи⁸¹⁴ бесчисленая исцелениа требующим, поможение и заступление везде всяко. Но Господу «прославляющи Его тако прославлю», по Писанию: Волю боящихся Его сътворить и молениа их услышит, и прошение Своим угодником неоскудно подаваеть. Мы же от многых малая си списахом, яко да и та забвению не предана будут. Но убо, пастырю добрыи, истинныи строителю и наказателю иночьскаго жительства⁸¹⁵, отцемь слава, преподобным единескровне и праведным, наставниче иноком, общему житию съвръшителю, странным питателю, нищимъ скровище⁸¹⁶ и недугующим врачю, пленным свободитель, путником⁸¹⁷ спутник, слепым вождь, старости жезл, заблужьдшим наставник, безумнымъ наказатель, скровным видець, в скорбех утешитель, на море правитель, царемь православным миротворець и поборник на съпротивныя, крепость на поганыя, Троице предстояи о нас моля, неотступно поминаяи стадо, еже събра мудре, съблюдаи⁸¹⁸ богодарованную ти паству, яко чядолюбивыи отець, не презри чтущих тя верою и любовию пречестную⁸¹⁹ память твою, защищаа нас и съблюдая от находящих враг, яко да твоими молитвами съблюдаеми Царства небеснаго сподобимся⁸²⁰ о Христе Исусе, о Господе нашем, Ему же слава и дръжава съ безначялным Его Отцьмь и Пресвятым и Благым и Животворящим ти Духомъ ныне и присно и в векы веком. Аминь.

Текст публикуется по списку Российской государственной библиотеки, собр. П. А. Овчинникова, № 277. Краткая заметка о чудесах, происшедших в 1449 г., воспроизводится по рукописи Государственного Исторического музея, Синодальное собр., № 637 (исправления – по рукописи Российской государственной библиотеки, собр. Е. Е. Егорова, № 637).

Бысть некоторыи инок от древних ученик Никоновых, именем Тимофеи. Сеи, яко же глаголют о нем, пребыв в монастыри до четыредесят лет, искусен же быв во всех службах монастырских, последи же искушен бысть от диавола преслушанием. Во един убо от днии приходит ко игумену Мартиниану в келию и глаголет ему: «Благослови мя, отче, до града Дмитрова, яко некую нуждную потребу имам». Игумен же глаголаше ему: «Не езди, брате, а кую нужу имееши, аз тебе исполню». Он же непреклоним пребысть. И яко виде его игумен непреложна, рече ему с запрещением: «Аз твоея старости щадя, глаголах тебе, что ти было полезнее не ехати, но ныне уже благословляю тебе, яко да едеши тамо и будеши на монастырском подвории, свою потребу исполнив, и скоро возвратишися в монастырь, а по граду шествиа никако же да сотвориши, ни же на княжь двор. Аще ли преслушаеши, воздасть ти чюдотворец Сергии преслушаниа мзду». Бывшу же ему в Дмитрове и свою потребу исполнившу на подвории, во вторыи же день врагу душь наших ослепившу ему душевнии очи, яко же и святии рекоша: пред всяким грехом предшествует ослепение и забвение. Тако и сеи Тимофеи, забыв заповедь, данную ему от отца, иде на княжь двор, и тако взят бысть некими велможи. Понудиша его напитися, бе бо знаем многими, яко изыде и поиде вверх по лествицам на сени княжи верхнии, и яко взыде на верхнии степень, и тако врагу соблазнившу ему ногу, и абие паде от такиа высоты на землю. И тако взяша его и привезоша в монастырь на носилах едва дышуща. И бысть, егда бывшу ему в монастыри, тогда игумен Мартиниан и со всеми старци видевше его в такове сокрушении слежаща, ни единем чим от уд своих двигнутися могуща, съжалиша си зело и единодушьно подвиже всех на молитву ко всесилному Богу со слезами, яко да дасть ему мало время на покаание. И тако милостию Живоначалныа Троица и Пречистыя Богородица и чюдотворца Сергиа молитвами бысть ему здравие от главы и до пояса, да леже ничим же владеаше, но дарова ему Бог смысль целъ и язык чисть. И тако пребыв в велице смирении и исповедании, яко месяць осмь, и в том сокрушении лежащу, не остатисяничему же от телесных его составь, развее кожи и жил и костеи. И тако со извещением великим приставися к Богу молитвами чюдотворца Сергиа.

Некыи от московских великих купець, Дмитрие нарицаем Ермолин Васкина, и жившу на Москве лета доволна и дети воспитавшу в добром наказании, и тако приходит в помышление благочестиваго разуму и желает съвлещися тлеющаго человека по похотех прелестных и облещися в новаго Адама, сиречь Христа, во аггельское великое воображение. Помянув бо своего отца Ермолу, нареченнаго во аггельском чину Ефрема, како преобидев толикое богатство и таковыи лик сынов, паче же благороднем сущим и богатем, и прииде в великую лавру чюдотворца Сергиа ко игумену Никону. Игумен же остриг его и призвав сына его по плоти Германа, бе бо прежде много лет остриглъся в велицеи тои лавре, и предасть ему того Ефрема, по плоти отца, а по духу сына, в послушание. Сиа вся воспомянув, и уязвися сердечною любовию, и тако утаився от всех и братии своеи, и супружницы, и чад своих, и об нощь едину бысть в Сергиеве манастыри, и тако постризается от игумена Досифеа и наречен бысть Дионисии, и в монастыри пребываше во предании общежителнаго устава до некоего времяни. По сих же мало начат ослаблятися и по келиа без времене исходити, и в яже не подобает глаголати, и о уставе монастырском, еже изначала предан бысть чюдотворцем Сергием, иже и доныне держат преемницыего и ученицы, он ни во что же вменяше, и яже от христолюбивых велможь и простых приносимаа милостыня, или на молебны и понахиды и божественыа службы посылаемыа в монастырь кормы съборныа и приношениа – не полезна им та, глаголаше. И ина глаголаше, яже за неудобьство речии молчанием премину. Игумену же Мартиниану внове приемшу предстателство великиа лавры Сергиева монастыря, и обретает его единако недугующа своим неверием. И призывает того Дионисиа в свою келию и глаголет ему с кротостию многою и смирением: «Мы, господине Дионисие, аще есмы и далече были от Сергиева монастыря разстоянием, нарицаемем Белеезере, но всегда слуху нашему досяжущу, яже творит Богъ чюдотворцем Своим Сергием чудеса и знамениа, и колицы суть спасаемые и спасающиися, и колицы от велможь и от вашеи братии, отрекшиися мира, яко же отець твои Ефрем и брат твои Герман, в Христоподражетелнем смирении къ Богу преидоша. Та вся от нас не утаишася, яко же и о твоем пострижении слышано бысть не точию зде и у нас, но во многих и окрестных странах, и мнози слышавшеи поревноваша и почюдишася твоему благому произволению, како оставил еси мир и яже в мире, паче же супружницу и чада. Ныне же мне во обитель сию святую внове пришедшу, и слышу от всего братства, яко болшее еси победил, а ныне ничто же сущим побеждаешися неверствием своим и похулением. И о том зело оскорбихся, зане обретох тяне такова, яко же слышах тя. Но ныне, молю тя, преложи сверепьство свое на кротость и неверие на веру, и роптание на благодарение, и тако враг душь наших, яко же радовася видя тя в сицевых, тако паки восплачется горце, видя тя пременшася и подклоншася Христову ярму, сиречь смирению. И тако тои инок Дионисии сътворяет поклонение отцу своему игумену Мартиниану и обещевается ему все неверие, еже имеяше ко чюдотворцеву гробу и ко всему святому събору, отложити и жити по обетованию, яко же предасть ему тои духовныи отець. И тако всегда игумену посещающу его, овогда к нему приходя в келию, иногда же паки к себе призываа, укрепляше его. Он же, пребыв неколико днии в заповеди отца, паки помалу начат на первое возвращатися и первыя глаголы нелепотныя глаголати, но еще и горше сих. Егда бо ему приношаху братскии хлеб, яже на весь святыи събор братиям сътваряют, тогда изметаше из келиа, глаголя, яко «собаки наши такова хлеба не ели». Се же глаголаше и о рыбе, и о всяком варении, и о питии, о меду и пиве, и всему съпротивне показовашеся. Игумен же о сем зело опечалися, зря его повинующуся врагу, и приходит к нему в келию и глаголет к нему: «Поне же, господине Дионисие, Христос во еуангелиих ко иноязычнику и мытарю повеле единствена имети, иже не послушающих дву или триех свидетелии, паче же будет и о церкви не радяща, церкви же глаголется еже от игумена бывающее запрещение; ты же, яко же обещася, то еси отвергл, а еще и горшее приложил еси». Тогда Дионисие отвещав ко игумену несмирене некако, но яко и с гневом, и глаголет ему: «Что имам сотворити, яко хлеба вашего и варениа не могу ясти? А ведаеш сам, яко возрастохом во своих домех, не таковыми снедми питающеся». И инаа многа изрек, яже не суть ко смирению виновна. Игумен же рече к нему: «Хранися, чадо, да не како приидет на тя апостолское слово, еже рече: предаите таковаго сатане, во измождение плоти, да дух спасется. И ты тако же пожнеши, еже сееши». И се рек, отпусти его.

По мале же времени прииде в монастырь к Живоначалнеи Троици и ко чюдотворцеву гробу жена некаа от благородных, вдовица сущи, бе бо супружница мужу, нарицаемому Иван Сурма, иже преже мала времени в том монастыри пострижеся и положен бысть с преже почившими отци. Она же христолюбиваа жена прииде ко игумену и моляшеся ему, яко да сотворит со всем събором понахиду и божественую литоргию по мужи еа и по всем их роду и да благословит брашно еа и питие представитися на трапезу всему братству. Игумен же благослови тако тому быти. В тои же вечер приспеша грамоты от великого князя и от митрополита ко игумену Мартиниану, веляще ему непреложно в тои час у себе быти на Москве. Игумен же, надвое влеком, ово не хотя отставити веры христолюбивыа жены, ово же поминаше апостолово: всяка душа владыкам преимущим да повинится. Изволи паче сам не преслушатися великого князя и митрополита, и тако поеде к Москве, приказав в свое место священнодеиствовати архимандриту Никандру и всем священником понахиду и божественую литургию. Предреченныи же инок Дионисии, видя изрядную веру жены тоа еже ко Живоначалнеи Троицы и Пречистеи Богородицы и ко чюдотворцеву гробу Сергиеву и к всему святому събору, бе бо и познание немало имыи с мужем еа, тако же и с нею, егда в мире беста, и исполнився духом хулным и прииде к неи, глаголя: «Приидох к тебе первыа ради дружбы мужа твоего. Что прелщаетеся, привозяще или присылающе в Сергиев монастырь милостыню – или хлеб, или рыбу, или мед? Аз тебе глаголю: луче бы та милостыня татаром дати, неже семо». И ина многа изрек, яже нелепо есть, и отиде в келию, ропща. Она же благочестиваа жена от таковых речеи никако же смутися, но тщашеся, елико мощно, молящися келарю и служебником, яко да приношение ея благоугодно будет святому събору. И егда бысть время божественеи литургии, бе бо день суботныи, бывшу клепанию, и абие священныи събор входят в божественую церковь, и понахидиным молитвам исполньшимся, и божественеи литургии начате бывши. Бе же ту в церкви и христолюбиваа та жена Ксениа, се бо еи имя бе. И егда совершися исповедание православныя веры, диакону рекшу: «Станем добре, станем со страхом». И тогда бысть страшно видение: Дионисии бо, яко же бо стояше на своем месте с прочими богоугодными старцы, и яко же от некоего грома страшна поражен бысть и абие падеся на правую страну. Тогда взяша его старцы, не имуща ни гласа, ни очию, ни рук, ни ног, и отнесоша его в притвор – в Похвалу Пречистыа, еже есть у чюдотворцева гроба, и тако пребысть ту и до скончаниа божественыа литургиа, лежа на землияко клада. Жена же она предреченнаа, видящи скорое страшное оно знамение, еже сбысться ему по жесточеству его и непокоривому сердцу, пребысть и до скончаниа святеи литургии, трепещущи и слезы многи изливающи. По скончании же божественыа литургии священници и събор весь поидоша в трапезу, а Дионисиа отнесоша в келию его. И тако старци, щадяще душу его, повелеша възложити на него святыи великии аггелскии образ, аще и нем пребываше. И тако по двою днех начат очима зрети, а по четырех и по пяти начат и подвигатися, и почюватися, и егда что ему на потребу бяше, рукою помаваше, бе бо ему едина рука деснаа простерлася.

Слышавше же преславное то знамение на Москве братия его, Петр и Афонасии, и прочии сродници его и сын его Василие, и приехаша вси единодушно к Живоначалнеи Троици и к чюдотворцеву гробу. И сродника своего Дионисиа видеша, иже преже мала времене многоречиста и пресловуща в беседе, бе бо умея⁸²¹ глаголати русски, гречески, половецки, ныне без юзы всякиа языком связана; и многи слезы излиаша, зряще его в такове сокрушении слежаща. Дионисие же, зря на них, плакашеся и помаванием моляшеся всем, яко да помолятся о нем, и на язык свои показоваше, чтобы ему отверзлъся. Братия же его и чада и сродници молят игумена и весь святыи събор, яко да сотворят о нем молитву, яко да бы ему язык отверзлъся и возмогл бы чисте покаатися, о них же зле неразумием глагола. Тогда игумен со всеми священники и со всеми старци поиде в церковь. Принесоша же егои положиша у чюдотворцева гроба, и пеша молебен и божественую службу совершиша. И тогда бысть чюдо преславно: начат убо яко отроча немотовати, инаа убо речь его познавашеся, инаа же убо не познавашеся; а ея же знати бяше, все покаание глаголаше о преже бывших и хулником себе нарицаше и неверием обдержима, и братству смутителя, и миру соблазнителя. Сыну же его Василию прилежащу ему паче инех и вопрошающу его, что како виде в церкви, отчего паде в разслабление, поне же то множае инех и речь его познавашеся. Он же, видя себе много принужаема от него, сказати же ему совершенне не можаше. Потом же начат ему поведати, яко: «Егда стоях в церкви на божественеи литургии, и диакону возгласившу «станем со страхом», тогда видех старца священнолепна, идуща на мя с гневом и держаща в руце своеи жезл, и рече ми с великим прещением: ты ли еси с неверием живыи, хуля на монастырь мои? И удари мя жезлом по главе, и тогда падох, и оттоле не помню ничто же». Потом же тои Дионисие начат молитися игумену и всему събору, чтобы о нем помолилися, чтобы ему Бог далъ разум по книгам помолитися, поне же бо, аще и держаше книгу, но не ведяше, что в неи писано, зане же уму его не здравствующу. О всем бо здравии телеснем не смеаше помолитися, поне же, рече, недостоин есмь. Человеколюбивыи же Бог, хотяи всем человеком спастися, молитвами чюдотворца Сергиа и его ради сокрушеннаго сердца дасть ему разум и зрение, еже самому по книгам правило свое келеиное совершати, иже и доныне, благодаря Бога, непрестанно есть, приведшаго его в разум истины, ибо, яко же рех, рука его десная прощение прият, потом же и язык, аще и косно глаголет, но разумети лзе глаголемым.

Сия же вся случишася Дионисию иноку, иже, яко же рех, от великих купец бывшу, яко же иногда Елисею авве случися, иже пришел бяше от болших град ко отцу Исаию, иже тако же по времени диаволим неверием обият быв на отца, иже идолослужителя его нарицаше и блудника, донде же и отлучися от него, донде же в богопустную рану впаде, от главы и до ногу поражен бысть проказою и онемев, паки принесен бысть ко отцу Исаии. Отець же умилосердися о нем, помолися и повеле его покропити святою водою учеником своим. И проглагола, и здрав бысть, и потом яко превзыти ему и многих древних отець. Тако же и сему случися, неверие в сердци держащу, а на языце хулу и роптание на монастырь и на весь святыи събор, донде же Живоначалнаа Троица и Пречистаа Богородица, молитвами чюдотворца Сергиа игумена, не остави его в такове рове слежати, но наказа⁸²² его милостивне и уврачева человеколюбне. А на воспоминание остави ему раны тоа часть, яко да паки не воздвизает главы и не глаголет на Бога неправды. Жена же она, о неи же рех, яже слышала бяше от уст его хулу, в тои же час видевши, яже сбышася ему в церкви, в великую веру утвердися, иже и отъиде в дом свои, славящи⁸²³ и хвалящи Бога и проповедающи всем, яже творит Бог чудеса угодником Своим Сергием.

Бывшу же празднику Господьскому, еже есть Воскресение Г оспода нашего Исуса Христа, паче же рещи, всего мира радость и оживление. Игумену же Мартинияну со всемсобором в велицеи лавре Сергиева монастыря вся праздничнаа совершившу, глаголю же, светотворную ту нощ чтеньми и каноны препроводившем, и заутреню по обычаю совершившим и божественую литургию. И повеле игумен чрежение велие сътворити братии, еже бысть, и на утриа, в понеделник, бывшу клепанию утрени по обычаю. Игумену же с братиами собравшимся в церковь, тогда приступи ко игумену келарь Иларион, поведа ему яже о Маркеле иноце болезнь необычну случившуся ему. Бе же тои инок Маркелъ имея в монастыри яко лет пятьнадесять, послужив во всех службах, и тогда случися в хлебници быти. Игумен же, яко слыша, в тои час поиде в хлебницу с келарем, взем с собою чюдотворцеву икону, яже над гробом его стоит. И начат пети молебны Пречистои. Егда же совершиша утреню, и повеле игумен священником и диаконом облещися к молебну. Тогда приидохом вси в хлебопекленицу монастырскую и видехом страшно зрение и ужаса полно: седяше бо на стуле и приступити к себе никому же не дадяше, зьяше бо извнутрь его и глас слышашеся, на воздусе разсходяся, яко же бы рещи. Игумен же Мартиниян со всеми священники и со всем святым събором изыдоша с литиею вне монастыря, изыдоша же мнози и простии людие, обходяще окрест с каноны и тропарми поюще, праздничнаа совершающе, яко же подобает. Возвратившимся им в монастырь и в церковь вшедшим. Маркелу же возбнувшу, и тогда начат поведати мне: «Егда случися лукавому приступити ко мне в нощи сеи святеи и наченшу терзати внутреняамоа, и начах кричати окаанными, яко же глаголете, песиими гласы. И не мните, господине, яко же слышасте, яко столико могох кричати, но видя игумена и святыи събор, от страха возбраняхся, могох бо, яко же мню, отверзшимся акаянне внутреним моим от лукаваго, кричати и скотски, и зверски, и конски, множьству пес ловящих, яко же тогда на ловитве сколят». И иными гласы песиими кричаше, яко же обноситися гласу его не точию в монастыри, но и вне монастыря далече слышатися. Братия же вси зряще, горце плакаху. Игумен же и со священники молебен Пречистои и чюдотворцу Сергию свершившим. И повеле вести его⁸²⁴ в церковь Живоначалныа Троица и к чюдотворцеву гробу, ему же не хотящу поити, и единако злообразующу своими песиими, паче же бесовскими нелепотными гласы. Игумен же повеле его мнозеи братии взяти и вести ко гробу чюдотворцеву, и тако на пути мало начат утишатися, и гласы ты злыа престаша. И яко же ведоша его в церковь, тогда сам поверже себе ко гробу чюдотворца Сергиа, глаголя: «Господине отче святыи Сергие, избави мя от врага сего». И тако у святого раки лежащу ему, в сон тонок сведен бысть.

«Егда же мя поведоша в церковь, тогда начах познавати, яко от Мене убо отхождаху, на воздусе же кличь велик слышах теми гласы кричащих, ими же азъ съдержим бых. Егда же уснух, видех игумена Мартиниана со всеми священники и крылошаны и старцы, поюща молебен среди церкви, яко же обычаи ему есть. И поющим им, мне зрящу, и се от северных дверии явися человек стремовлас, искреглаз, одежду же имяше яко по колену, видение же его бяше чермно. И приходит ко игумену с яростию глаголя: «Что мя обидиши», рече. И емлет игумена, и начат с ним братися. И се явися старец священолепен изо олтаря со жезлом, яко же вижу – Сергиа на иконе написана. И тако приступив, удари жезлом по главе лукаваго стараго злодеа, глаголя: «Почто прикасаешися к рабам Божиим, служащим Ему день и нощь». И абие в тои час окаанныи невидим бысть».

Тои же инок Маркел въстав, из церкви отиде в келию свою, здравствуа, свободився от нечистых бесов. Глаголаше же, яко весь день он понеделника светлаго слышах⁸²⁵ их кричащих тем же гласом, яко же егда⁸²⁶ аз, страстию содержим бех, окаанне восклицах. Пришедши нощи, получих чистаго здравиа, ни гласа оттоле слышах, молитвами Пречистыа Богородица и чюдотворца Сергиа и всех святых, иже по стопам преподобнаго шествовавших. Аминь.

Пришедшу же празднику Господьскому святыа Пятидесятница, во нь же в видении огненых язык сниде Божественыи Дух на святыа апостолы по обетованию Христову. И яко же по вся лета обычаи имут православнии христиане, от различных градов и стран, не точию от московских, но и от окрестных, сиречь от литовских, и рязанских, и тферских, приходят к Живоначалнои Троици и Пречистои Богородици и к чюдотворцеву гробу Сергиеву, и приемляху, еже кто аще что требоваху. Мнози бо от духов нечистых одержими и исцеление получиша, и слепии прозреша; иже по исцелении мнози от них пребыша неисходни из монастыря, в монастырских работах тружающеся и до скончаниа живота, иже и мы видехом.

Бывшу убо пятку вечер понахиду великую и в суботу божественую литоргию игумен Мартиниан и со всеми священники съвершив, и поиде с братиею на трапезу по обычаю. И яко бысть Преполовение, приходит ко игумену из церкви понамарь, поведаа ему, яко инокини две стоят у гроба чюдотворцева, и едина имяше обе руце закорчене, ныне же едину показует, яко простил есть чюдотворец. Игумен же отпусти пономаря, веле пождати мал час, донде же братскаа трапеза отидет. Егда же въсташа от трапезы, повеле игумен позвонити во вся колоколы, и всем в божественую церковь собравшимся, и молебен собором игумен пев, инокиням же стоящим у гроба. И по отпетии молебна приходит к неи игумен и с прочими богоугодными старцы и инии мнози, бяше бо множьство людии, яко и церкви не вмещати. И бяше видети страшно чюдо: прощенаа бо ея рука праваа имеаше ногты отрастъша, яко в долготу перстом равны, но черны бяху, от естественаго зрениа отлучахуся. И тако тою рукою от того часа начат креститися и деиствоваше, еже хотяше, другаа же рука еа бяше прикорчена на възнак прямо в хребет, и не можаше ею никако же двигнути. Игумен же повеле противу руки тоа прикорченыя разрезати ризу, яко да видят вси преславное знамение. И бяше видети рука та прикорчена в хребет, но ногты из тела вышли бяху и отрастъша тако же, яко же и у прощеныяруки видехом. Знамениа же на телеси не изгибша, иде же бяху вросли ногти ты. И тако пребысть у гроба чюдотворцева, и день тои всенощное пение пеша и до заутриа в неделю. Егда же бысть час третии, во нь же сниде Дух Святыи на божественыа апостолы, множьство же народа отреваху еа от гроба чюдотворчева. Она же со слезами предстоящи, и тако же прощена бысть еи и другая рука. И пономарь сказа игумену. Тогда призывает игумен обе инокини и вопрошает их: «Откуду есте, чада, и како семо приидосте, и како послана есть сиа на тя от Бога явленая рана, яже точию попущает сиа на преобидящих божественаа». Она же инокини вся слезами облиявшися, начат сказовати: «Аз, господине, окааннаа, от града есмь Коломны. И в мимошедшее лето, о Петрове дни, егда бысть мор на человеки и скоты, тогда сотвориша христолюбивии человеци Пречистои Богородици обет, обедню и молебен пеша. И священника вземше, снидошася в дом, иде же бяше трапеза уготована и питие. И аз туто же прилучихся. И яко же обычаи имут развращеннии человеци, начаша пети и преже Пречистыа хлеба. Священнику же принесена бысть чаша, он же взем и не испив, отдасть, рече, яко «не подобает вкупе быти трапезе Божии и трапезе бесовстеи», и тако изыде. Нам же седящим и пиющим, и начаша пети и плескати. Христолюбив же мужь некии рече: «Братие, Пречистаа о том не любит, еже плескати и играти». Аз же, окааннаа, к сему рех: «Ничто же в том несть, еже пети и плескати». И егда сиа изрекох, тогда взят мя, яко некии дух силен, и начат мною носити и торгати пред всеми, и тако взем мною, раздрази мя о двери церковныя. И тако закорчи ми правую мою руку прямо назад, яко же и ногтем в тело вразитися, и яко же мало начах почуватися и проглаголах. И паки взят мя и начат мя мучити паче перваго, и удари мя о стену церковную, и тако закорче мне и левая рука, по тому же на възнак назад. И тако лежах, окааннаа, яко мертва. Вси же мняще мя умершу, и тако начаша гробъ чинити. Отець же мои духовныи поп Ауксентии, приступив ко мне и познав, яко духь мои во мне есть, и повеле престати. И тако лежах и до вечера. И по малех днех востах и хожах. И тако, окаяннаа, надеяхся от человек помощи, исках врачев и ходящи бех. Борзо же бяше хождение мое, яко с Коломны днем на Москве обрести ми ся. И оттуду в град Дмитров шедши, и ту обретох старицу честну, иночьствующу в монастыри некоем, иже видевши мя в такове ране и вопрошаше мя, что како случи ми ся. Аз же по ряду все сказах еи. Она же посла по игумена. Старцу же пришедшу в тои час, и видев мою страсть и слышав от тоя, яже аз сказах еи, зело поболе печалию за мя. И рече ми честныи тои мужь: «Чадо, сиа рана посещение есть Божие на тя, яко да и инии накажутся тобою не преобидети Божественое. Но слыхала ли еси в чудесех пресловущаго преподобнаго отца нашего Сергиа, новаго чюдотворца, колицы суть притекающии к мощем его с верою, и вси исцеление получают, иже ныне память его близ есть». Аз же Рех ему: «Господине отче, от многих слышала есмь, но ныне желаю того, чтобы ми на память его быти тамо, еда како святыи милостив ми будет, и помолит за мя и исцелит мя».Тогда игумен рече к неи: «Чадо, аще и млада еси, но подобает ти преже обещатися Богу и отрещитися мира, и тако к Живоначалнеи Троици и чюдотворцевым мощем доидеши». Аз же рех: «Яко же велиши, господине, творю». И тако тои игумен постриже мя. И пребых у честнои тои старици неколико днии, учащися иночьскому житию. И яко прииде память святого, приидох семо, не оглашающи ми ся никому же. И тако сподобихся внити в церковь и святых мощеи прикоснутися. И в тои час выбистася ногти рук моих ис телесе моего, а единако закорчены⁸²⁷ бяху, а резание же от ногтеи, еже страдах, преста телу моему, яко же днесь⁸²⁸ и сами видесте, где были врезалися ногти ты. Аз же, господине, отъидох, благодарящи Бога, получивши малу ослабу, надеющися приити во грядущее лето. И тако оттоле и доныне по вся дни бях молящи Бога и великаго Сергия призывах на помощь. Иже и ныне приидох и получих неизреченнаго здравиа молитвами чюдотворца Сергиа». И тако игумен поучив еа, еже имети страх Божии и целомудрие и воздержание. И тако по триех днех отпусти еа к Москве, а ногтии тех, котории отрасли бяху, не повеле еи ножем отрезовати, но яко же Г осподь восхощет. Она же прииде на Москву, проповедающи всем величиа Божиа, ногты же еа лишнии отрастшии днии в десять, а инии отрастшии днии в девять, а инии по двадесятих, вси отпадоша, а осташася естествении, яко же преже.

В ту же суботу Святого Духа безчисленое множьство уже приидоша, мужи и жены, от различных градов и стран, яко же обычаи, вси, кииждо коимждо недугом одержими, прикасахуся мощем святого Сергиа и исцелевахуся. В них же прииде от Москвы некоторыи человек от церкве съборныя каменыа, еже есть Лазарь святыи, иже бе у нея стражь, водя с собою сына отроча, яко летом двою на десятим. Отрочищу же бе имя Афонасие, смущено от духа нечиста. И прииде в церковь, и едва возможе доити пономоря со отрочатем. И глаголаше понамарю: «Что бы, господине, к мощем святого отрочати моему прикоснутися». Глаголаше бо отець его: «Спящу бо ему, рече, на великомученика Георгиа день весны сеа, и тако устрашився, вниде во нь лукавыи, и въстав смущен и кричаше необычно. Аз же, отець его, приидох, велях ему перекреститися и глаголати: «Господи, помилуи». Он же никако же хотяше прекреститися, ни же глаголати «Господи, помилуи», и ни же в церковь внити, аще не нужею привлечен будет, молитвы же Исусовы отбегаше. И тако ныне приидох к великому Сергию, требуя исцеления». Пономарь же, яко же и прочим требующим, отверзе раку. Отроча же въскрича, глаголя: «О батько, – родителю своему, – не умори мя, напрасно жжет мя». И тако избеже из церкви. И пономарь сказа игумену о нем. Игумен же повеле неотступну быти ему от мощеи святого. И тако всенощному пению совершившуся, и тои весь день в неделю Съшествие Святого Духа отець его дережаше отроча у гроба святого. Игумену же и мнозеи братии нудящим его прекреститися или помолитися, или поклонитися. Он же кричаше, глаголя: «Не хощу, не молюся». И тако в понеделник Святого Духа, на утрени, приступив игумен ко отрочати, повелевает ему прекреститися и поклонитися чюдотворцеву гробу. Отроча же с радостию и прекрестися, и поклонися, глаголя: «О Святаа Троица и святыи Сергие, избави мя от врага сего». И в тои час приступив, и прикоснуся мощем святого.⁸²⁹ И тако от того часа здрав бысть и покланяшеся пред всяким старцем, глаголя, яко «вашими молитвами, отци святии, избави мя Бог от злаго врага, губящаго душу мою». И пребыша в монастыри дни четыре, тако отиде отець его, здраво имея отроча, хваля и славя Бога и святого.

Ин же человек прииде от Ерославля града, еще юн сыи, нем. Иже пришед, приложися к мощем святого и тако проглагола чисто, яко же и преже. Глаголаше же, яко прешедшу третиему лету, случи ми ся в великии страстныи пяток въстати от сна, и се затвористася очи мои и пребых всячьски слеп, и хожах с вожем. И идох в Ростов к чюдотворцу Леонтию и паки возвратихся в дом свои. И пришедшу на второе лето великому пятку, востах от сна, и се отверзостася очи мои и зрях чисто все. Затворижеся язык мои и пребых нем. Иже слышах о чюдесех преподобнагоСергиа, и приидох семо с верою и получих исцеление от святого, яко же видите.

Другии же отрок приведен бысть от рязаньских бояр, Селивестров сын, от града Ярославца, имея духа нечиста, иже мнозе мучаше его, и неподобная глаголаше, и ризы на себе разрезоваше, и никто же можаше его утолити. И тако пребыв у гроба чюдотворцева, исцеле. Не отъиде в дом свои ко отцу и матери, но ту в монастыри и пострижеся, иже и доныне есть в послушании, служа работу монастырскую.

Публикуется по рукописи Син. № 637, л. 54 об.

По сем кто изъчтеть чюдотворца святого Сергиа чюдеса непрестанно бываемая. В лето 6957, месяца маия в 31, на Сшествие Святаго Духа, черноризица именемъ Маремиана прииде от града Коломны к гробу святаго, руце имуще обе сухе, загбеныи составов за хребет и ноготми в ребрех утверженны. И всему народу зрящи и чюдящимся: от ребр отвалишася, здрава бысть. И отрока именем Афанасия беснующася, ни именовати хотяща имени святого Сергия, бесчинно кричяща, исцели, и неотступен бысть святаго ракы. И другаго отрока именем Семеона косноглаголива язык исправи. Ти же вси исцелиша вкупе в едины часы. И пребыша дни доволни в обители святаго, радующеся и славяще Бога, аще бы им и не отъити в своя им домы и ни мало отступити от ракы святаго.

Печатается по рукописи МДА, N° 203. Утраты текста и пропуски восполняются по списку МК РГБ, собр. М. И. Чуванова, инв. № 8386 (далее: Ч) и заключаются в квадратные скобки. По этому же списку даются основные (смысловые) разночтения.

1. О чюдеси святого Сергия, како⁸³⁰ изцели жену слепу.

2. О умножении муки от малого сусечца.

3. О гласе, бывшем ключарю Иванну и о изцелении инока розслаблена и отрока нема.

4. О лодье, како спасена бысть и с людми от потопления на море.

5. О чюдеси чюдотворца, како спасе человека на море от потопления.

6. О изцелении беснаго.

7. О изцелении жены бесные.

8. О боярине Иване Никитиче Романове, како спасен был на пути от озлобления и от юз.

9. О явлении чюдотворца Сергия Козме Минину и о собрании ратных людей на очищение государьству Московскому.

10. О велможи некоем, иже похулив еству монастырьскую.

11. О хожении с образом на спорную землю.

12. О послех, иже от моря спасены⁸³¹ быша⁸³².

13. О полковнике Лисовском, како погибе, хваляся на обитель чюдотворца Сергия⁸³³.

14.⁸³⁴ О жене, изцелевшей молитвами Святого.

15. О неисполнении обещания.

16. О прозрении инокини⁸³⁵.

17. О изхожении из обители, како гнев Божии бывает сего ради.

18. О юноше некоем, иже смятеся умом и изцелев молитвами Святого.

19. О отроке, како спасен бысть от разбойник.

20. О слуге монастырьском, како спасен бысть от разбойник.

21. О падении полат.

22. О падении подвязей.

23. О утопшем, како спасен бысть молитвами Святого.

24. О счете монастырьские казны.

25. О новоявльшемся кладези, его жеГосподь Бог дарова внутрь обители.

26. О изцелении от новоявленные воды дьяку Григорию Одинцову.

27. О дву человеках, како спасены бысть от потопления.

28. О иноке, како спасен есть от разбойник⁸³⁶.

29. О падшем человеке с науголные башни.

30. О изцелении нутреные болезни велможи некоего водою новоявленного кладязя.

31. О изцелении от новоявльшагося⁸³⁷ кладезя⁸³⁸.

32. О тои же святой воде, како изцеление бысть боярской дщери.

33. О князе Семене Шеховском, како спасен бысть от моря.

34. О сложении кондаков⁸³⁹.

35.⁸⁴⁰ О изцелении разслабленные.

36. О тате, иже колокола покраде.

37. О поклепной тяжбе.

38. О инокине разслабленной.

39. О пожаре, како утолися от образа Сергиева.

40. О изсцелении дьякона и дщери его.

41. О изцелении болезни святейшему Иосифу патриарху.

42. О трегубом изцелении боярину князь Алексею Михаиловичю Лвову.

43. О церковнике, иже от болезни изцелен молитвами Святого.

44. О пожаре, иже оугасе молитвами Святого.

45. О изцелении иерею праваго уха.

46. О слуге некоем, на него же каменная стена паде и изцеленъ бысть.

47. О христианех Сергиевых, како преехавше реку Волгу молитвами Святого.

48. О изцелении очной болезни архимариту Андреану.

49. О пожаре, бывшем на Житном дворе.

50. О пожаре, бывшем в Троицкой вотчине.

51. О обидах монастырьским християномъ⁸⁴¹.

52. О слуге Феодоре,⁸⁴² иже молитвами Преподобных от смерти спасен бысть.

53. О отроке некоем, иже виде пред собою образ чюдотворца Сергия.

54. О изцелении жене от болезни.

55. О изцелении⁸⁴³ недужного.⁸⁴⁴

56. О изцелении немому.

57. О изцеление очные болезни жены некоей.

58. О изцеление болезни жены некоей.⁸⁴⁵

59. О изцелении девице изступившей ума.

60. О изцелении болезни Роману Боборыкину молитвами святых Сергия и Савы.

61. О изцелении от трясовицы одержиму⁸⁴⁶ молитвами святаго.

62. О⁸⁴⁷ помощи и одолении преподобнаго чюдотворца Сергия Лву Офонасьевичю Плещееву⁸⁴⁸ на неверных Калмыцких людей⁸⁴⁹.

63. О посещении преподобнаго чюдотворца Сергия по своим обителем, иде же учиницы его начальствоваша.

64. О исцелении болезни сердечныя и гортании слуге обители сея.

65. О исцелении болезни иноку Саватею.

66. О исцелении болезни жене некоей от Святых.

67. О исцелении раслабленнаго и жены его и детей.

68. О исцелении зубныя болезни вдове некоей.

69. О исцелении болезни християнину некоему.

70. О слуге монастырском, иже денги изгубив и молитвою Преподобнаго обрете.

71. О исцелении болезни инокине некоей молитвами Святого.

72. О исцелении болезни страждущему от страхования бесовскаго иконописцу.

73. О напрасном поклепе, иже манастырскую казну взяша поклепом.

74. О обидящих святая местая места⁸⁵⁰, им же гнев Божии приобретают.

75. О слуге, иже от обители Сергиевы отвержеся.

76. О спорной земле в чюдотворецове вотчине и иже гнев Божий изыде на враждующих.

Благоволениемъ Бога Отца Вседержителя, и споспешением единороднаго Сына Его Господа Бога и Спаса нашего Исуса Христа, и содействием Пресвятаго и Животворящаго Духа, написана бысть книга сия преподобнаго и богоноснаго отца нашего Сергия чюдотворца о преподобном житии его учеником его Епифаниемъ Премудрым,⁸⁵¹ по двадесяти и по шти летех преставления его, яко же есть писано в книге его⁸⁵². Потом же иермонах Пахомей по неколицех летех тако же воспомянув о житии его преподобном и о чюдесех бываемых от преподобных мощей его. А после того ноипаче многа и неисчетна содеяшася чюдеса всем притекающим с верою. И не токмо тумногоразличным болезнем своим исцеление приимающе, иде же лежат многочюдесныя мощи его, но и во прочих градех и в весех и в далних странах, иде же аще кто призовет с верою имя его святое. Много же лет преиде, яко близ двою сотъ лет или и вящее, отнеле же житие святаго написано, и никто же не дерзнув в книгу жития его приписати бываемых от него чюдес, или от настоятелей небрежением, или самому тому преподобному не изволяющу сего. Поне же еще и в животе сый таково смиренномудрие стяжавъ⁸⁵³, яко худости ради риз не познаватися ему, и зелным трудом его⁸⁵⁴ и терпению и воздержанию и нестяжанию и скудости потребных⁸⁵⁵ кто не удивится, яко же книга жития его о нем поведает? И елико себе смиряше, паче Богъпрославляше его.

Тако же и учеником своим по себе заповедая смирение любити и славы от человек не искати. И елико о нем ученицы его написати умолчаша, паче от Бога прославляем бысть и от человек удивляем, не токмо во единомъ Росийском государьстве, но и во всех странах земли обносится имя его и прославляется величайшим имянованием. И от далних стран патриархи и митрополиты, архиепископи же и епископи, и архимариты и игумены и честнии старцы, иноки и миряня, от Азии и Африкии и Еуропы и от всея вселенныя, и доныне приходят на поклонение к преподобным мощем его и во святей его обители воздающе молбы и моления ко Святей Троице и Пречистой Богородице и преподобнаго Сергия на помощь призывающе и празноеваша духовно, тако же и пище чюдотворцове сопричастницы бывающе и дары честныя приимающе и потребная на путь пищу и питие доволно, отхождаху во свояси, радующеся, сподобльшеся обитель его видети и преподобным мощем его поклонитися. И аще кто от неведения возглаголет, или неверия мраком помрачен и речет: кто и откуду от вселенныя таковы велицыи святителие и когда прихождаху? а в книге его того не написано. Мы же к нимъ отвещаем: Первое бысть⁸⁵⁶ во святей Росии и в Сергиеве манастыре святейшии Иоакимъ патриарх Великия Антиохии. И потомъ⁸⁵⁷ святейшии вселенскии Иеремия патриарх Царяграда, иже и патриаршества саном украсил престол Росийский, поставил на Москве в патриархипреосвященнаго митрополита Иова. Потом же бысть⁸⁵⁸ святейший Феофан патриарх святаго града Иеросалима и поставил на Москве в патриархи Филарета Никитича; быв же и во обители преподобнаго Сергия и снем с своея святительския главы клобук, возложи на главу архимариту Дионисию, у мощей преподобнаго Сергия стояв, и на возложение клобука молитвы некия изрек и повеле ему носити той властиной клобук и прочим по нем архимаритом Троицкого Сергиева монастыря. В лето же 7157-го году бысть святейший Паисея патриарх святаго града Иеросалима. В нынешнемъ же во 161-м году паки был святейший вселенский патриарх Афанасий Царяграда⁸⁵⁹. Еще же преже Болгарские земли бысть Терновскийсвятитель, и той от тамо живущих патриарх имяновашеся. Сия глаголахом о единыхъ первопрестольницех, иже быша в Московском государьстве и во обители святаго Сергия чудотворца преподобным мощем его поклонницы быша. А митрополитов и архиепископов, и епископов, и архимаритов, и игуменов, и честных мирян ото всея вселенныя, яже и преже рекохом, иже и доныне по вся годы приходят, не бе числа, и покланяются святым его мощем. И в книгу жития его не вместно того исписати. И аще кто восхощет уведати и сия по истинне, и той из монастырских книг келарския и казенныя службы выписав и уверится истинно, како честь и дары приимают и на путь потребная емлют. И яко же бо тогда он преподобный Сергий не взыска видети царствующаго града, ни святыя горы Афонския, ни Синайские горы, ни Иеросалима и прочих святых мест, но седя на месте, иде же обещася простою душею и обнаженнымъ сердцем, у Пресвятые Троицы милости прося, надежу имея на Пресвятую Богородицу, – сице же и Бог, видев благое его изволение и кротость и незлобие, не токмо от далних стран Руския⁸⁶⁰ земли, но и от всея вселенныя благочестных людей всякого чину и пастырей и учителей во обитель его приводя, яко да и в полунощных странах образ благочестия увидят и терпения плода насладятся. Есть же инии, не боящеися Бога, завистию объемшеся и глаголюще безумствующе, яко не смысленнии: аще, рече, не бы Грецы дарове приимали, не бы в Сергиеву обитель на поклонение приходили, яко же и в прочия обители не приеходят. А еже от жития его в писании обретаем, того ни слышати хотяще: еже когда во обители его еще злата и сребра не бе и потребных на пищу пооскуду беяше, и тогда из Царяграда святейший вселенский патриарх Филофей⁸⁶¹ послы своя к преподобному Сергию присла, с ними же и дар честен, крест злат с порамандом и схиму и епистолию о общем житии. Той же дары прием, преосвященному митрополиту Алексею показав и о епистолии возвестив и вопросив: ты, рече, владыко, о сих како повелеваеши? Святый же Алексей рече ему: виждь, колика блага сподобился еси, преподобне, Богу прославляющу тя, и до коих стран достиже имя жителства твоего, яко и вселенский патриарх советует ти на великую ползу; мы же, рече, множае советуем ти и благодарим зело. Се бо и тогда от двух первосвятителей советуем бываше, а не повелеваем. Обитель бо его и тогда честна суть не златом, ни сребром, но множества ради смирения и терпения его, яже по благодати Божии. Яко же некогда епископ Царяграда⁸⁶² дерзости ради своея и неверия наказаем от Бога, иде бо от царствующего града Москвы к преподобному Сергию во обитель видети его, паче же искусити житие его, усумневаяся и глаголя: како, рече, в сих странах, паче же и в последних временех сих, такову светилнику явитися, яко же слышу о нем? Сицевая, мыслящу в неверии своем и сего ради, егда достиже и увидев его, очима слепоту прием, донде же введен бысть в келию его и умолив преподобнаго со слезами, каяся о своемъневерии. Святый же Сергий прикоснуся очем его и прозрение даровав ему и беседовав с ним о еже над смиренными не возноситися и учредивъ отпусти с подобающею честию. Мнозии же Грекове, иже приходяще во обитель его; желающе о чюдесех преподобнаго Сергия слышати, просяще книги жития его и сию любезно прочитающе, Богу благодарение воздавающе и преподобнаго Сергия ублажающе. Едино же непщеваху, яко многа лета преидоша, а чюдес его новых ничего не писано, и ту сущих иноков вопрошающе сице: еще ли от преподобнаго Сергия от целбоносных мощей чюдеса и исцеления бывают?⁸⁶³ Тии же глаголаху им: яко убо река многоводная течет и не умаляет струй своих, тако и чюдеса преподобнаго Сергия от святых мощей его;и аще вся тыя чюдеса и повести бываемая молитвами его святыми писати, недостанет чернил и бумаги и поспеху человеческаго толико не будет. Мы же слышавше сия, в сомнение приидохом и помышляюще, да не како вознепщуют нецыи от них, яко умалитися чюдесем преподобнаго Сергия, и некая от чюдес его, яко от многих малейшая, иже в наша лета содеяшася, ина же от летописных книг избравше и от книги осадного сидения самого того Сергиевы обители, иже во обстоянии ратных от преподобнаго содеяшася чюдеса. А во оно время изволением самодержца государя царя и великого князя Алексея Михайловича всеа Русии преподобнаго Сергия житие повеленно бысть напечатати; сия же, яже от нас быша написана, самодержецту же повеле напечатати. Печатницы же, иже на Печатном дворе, тех новых чюдес яко тридесять и пять главизн напечаташа в Сергиеву книгу, яже от нас принесена быша; прочая же от чюдес святаго в небрежении положиша. И яко же они возгордевшеся и небрегоша о чюдесех святаго, сице нецыи от них и сами в небрежении живот свой препровадиша. Истинну бо глаголаху лож быти и вменяху в случай, а не в чюдеса, яко же о источнице новоявльшагося кладезя, иже у церкви Пречистые Богородицы в стене у паперти, небрегоша по истинне напечатати, и последи уже и напечаташа с понужением, но не по истинне, но некую лож от своего вымыслу приложше. И не во многих книгах о сем источнице напечаташа, в прочих жекнигах Сергиева жития и того не напечаташа, яко совестию своею зазираеми быша; тако же и ины от чюдес святаго изринуша и напеча[та]ти небрегоша. Зрите же боголюбивии: иже некогда гордии небрегоша и по истинне напечатати не восхотеша о новоявленнем кладезе, его же Бог и Пречистая Его Богоматерь дарова молитвами святаго Сергия, и се ныне велия чюдеса и дары целебныя от тоя богодарованныя воды подаются нескудно, и не токмо простии, но и велможи различныя исцеления приимают, паче же государь и самодержец царь и великий князь Алексей Михаиловичь всеа Русии, приходя присно, и от того святаго источника своима царскима рукама почерпаше в честь и похвалу Пресвятей Троице и Пречистей Богородице, и преподобным чюдотворцемъСергию и Никону благодарения воздавая. Тако же и святейший патриарх Иосиф московский и всеа Росии в нынешнем во 160-м году, купно с самодержцем, празновал празник преподобнаго Сергия сентября въ 25 день и о чюдеси святаго Сергия явно всем проповеда, яко молитвами его святыми от болезни утробныя исцеление прием и от тоя воды новоявльшагося кладезя здрав бысть, и повелев нам сие написати в чюдесех святаго, его же и написахом, иже напоследи повесть объявит. Государь же царь и великий князь Алексей Михаиловичь всеа Росии изволил меня, келаря Симона, допросити о чюдесех святаго Сергия: яже в нынешняя лета бываемая чюдеса от мощей святаго, пишете ли памяти ради? Мне же рекшу: Отнеле же, государь, написаноучеником его Епифанием и Пахомием житие его, и оттоле в книге его новых чюдес никто не приписывал. Токмо ныне, когда ты, государь царь, изволил книгу жития его напечатати, и мы случившаяся в нынешняя лета новотворимая чюдеса и от летописных книг и от осадные книги ево же обители случившаяся тогда чюдеса и положиша на Печатной двор. И от тех, государь, чюдес ова напечатана быша в книгу его, ина же, не вемы, коея ради вины небрегома быша и от печатников истеряны быша. И государь, царь и великий князь Алексей Михаиловичь всеа Росии, слышав от нас сия, указал нам впредь чюдеса святаго бываемыя писати, да незабвенна будутъ впредь преподобнаго чюдотворца Сергия чюдеса. Аз же недостойный, слышав царево повеление, помыслив: аще аз не пишу, а прочии тако же не учнут писати, и нашим небрежением и леностию нечто от чюдес его в забвение приидет, и сего ради от самого того преподобнаго гнев на себе наведем, или неисполнением царева приказу от него государя царя опалное слово приимем, бояся притчи лениваго оного раба, аще и зело грешен есть и недостоин сицева дела на послужение, но надеявся на милость и благоутробие самого преподобнаго Сергия и на его молитвы святыя. Зело бо милостив бысть и кроток бяше ко своим присным чадом, яко же в житии сем, тако же равну милость и щедроты и по преставлении подавая: никто же бо тогда от него тщима рукама отхождаше от обители ево, не прием словеси полезна и подаяния блага, тако же и ныне, не прием неисчерпаемых его даров и благодати целебныя, скорбным лицем не отхождаше. Во истину убо не оскудевает и ныне благодать Пресвятаго Духа молитвами его, но растет и множится чюдотворение от преподобных мощей его. И иде же аще призовет кто с верою сердечною, благонадежно приемле и отходит не печален; тако же на домы своя мед его чюдотворцов и хлеб и в путное шествие носят и от того исцеление приемлют. Еще же и по обителем его, в Казани, и в Свияжском, и на Балахне, и в прочих градех, и иде же аще мед его чюдотворцов обреташеся, и до сего дни по молебном пении благодаря Бога и преподобнаго испивают и здравие приемлют. И аще мы умолчимо чюдесехъ его и не проповедуем сотворенных от него чюдес, бездушная глас дадут и безсловесное сотворение проповедают о нем. И не безделно же сия глаголем,⁸⁶⁴ но истинно, еже видим: Сами бо вещи дествием и чюдотворением, яко перстом, указуют: яко же есть сия житница преподобнаго чудотворца Сергия и доныне Богом соблюдаема цела на память и на удивление преподобных трудов его, от нея же христолюбивии от прага или угла трески емлюще зубным болезнем и всяким скорбем на исцеление и относят в домы своя, благодаря Бога и преподобнаго; тако же и ризы его служебныя и посох пастырский в ризнице и до сего дне⁸⁶⁵. Пустыня тогда была непроходная, ныне же всем зримы окрест обители поля широкие, села и деревни многолюдные. Стези не быша тогда и непроходно быстьчеловеческими стопами; ныне же пути дороги велия и проезды всякого чину людем, днем и нощию безпрестанно идущим. Много же тогда гадов и ползущих змиев являхуся ему на устрашение безстрастному его житию; ныне же молитвами его окрест обители его за десять поприщь и вящшее ползущих ужев и змиев не бывает, и доколе колокол его оглашает, ни приближитися могуще. Место тогда было безводно и кроме источника⁸⁶⁶, его же святый Сергии молитвою изведе, не бысть иныя воды под его обителию; ныне же всем зримо многи источницы явишася. Первие по нем ученикъ его преподобный Сава, иже ныне на Сторожех, молитвами святаго отца своего преподобнаго Сергия изведе источник воды чисты выше Конюшенного двора, из него же и доныне почерпают, благодаря Бога. Паки же по 7000-м лете во 151-м году под горою Волкушею, еще же паки и под самым Конюшенным двором, и паки позади Свитошного двора, и во многих местех источницы воды чисты истекоша, от них же вси людие почерпающе пиют, благодаря Бога. И река не мала из них потече от обители его, яко и мельницы мнози поставлени быша, яко же очи всех видят. Ныне же благодатию Божиею, яко же выше написахом, источник целебен внутрь обители изыде, его же все очима своима зрят и пиют на веселие и в просвещение души же и телу, молитвами святаго. И елико людей во обители и около обители в слободах множашеся, толико по премногу и воды и всякая потреба изообиловашеся. Егда же преже под обителью святаго от поганые Литвы разоерения видяху православные християне, глаголаху мнози: не быти уже Сергиеве обители по прежнему. Ныне же всем зримо есть и памятно, яко тогда суще в рощах тех и древес толико не бысть, елико ныне многолюдственное число человек в слободах на тех местех, иде же рощи велицыи были. Сицевыми чюдесы Бог обогати обитель его, яко и безсловесное естество проповедоваше чюдеса его. И паки видевше милосердие Божиих щедрот, изливаемых умолением Богоматери пренепорочныя Владычицы нашея и преподобнаго Сергия, дивных чудес како умолчим? Церковь бо Святыя Троицы, иде же мощи преподобнаго Сергия Богом хранимы в зимнее время от мраза не зело студению холодает, яко в прочих церквах каменных, но некако легкое прохлажениев себе содержит, и людие от студени не зело истомление приемлют. Еще же и внутрь олтаря благодатию Божиею святыня, ею же непорочное приношение небесному Царю принося [т], не померзает, аще когда и зело мрази настоят, но невидимою силою Божиею яко от солнечныя теплоты согреваемо; и руки служащих не озябают, яко же от них уверихомся. Елико же сам преподобный себе смиряше тогда и худостию житие свое пред всеми оказываше, толико Бог паче ныне чюдесы прославляше его: яко солнце сияше пред всеми людми, и яко лучи от солнца ученицы его мнози провозсияша, или яко звезды посреди небеси светяхуся и по всей Рустей земли житием добрым и чюдесы просветишася, яко же обители их и доныне всемъзримы и чюдотворения ведома суть. Еще же и се глаголют нецыи: Яко ученику его Афанасию Высотцкого монастыря игумену неких ради потреб бывшу во Цареграде, патриарху же тамо не сущу в то время, и мятеж велик бысть о избрании на патриаршество: овии хотяще того, овии же инаго, и не согласен бысть святый собор. Емше сего Афонасия Высоцкого игумена, яко странника и ученика преподобному Сергию, его же имя тогда во вселенную обношашеся, и поставиша сего Афонасия патриархом Царюграду, его же Бог весть, колико пребысть на святительском престоле. Последи же, рече, московстии послы и гробницу подписану видевше. Аз же, еже слышав, сия и написав, помыслив, яко невозможная от человек, возможна суть от Бога. Аще ли кто подлиннеесего ведает или гробницу его увесть, да и нас просветит. И что много глаголати и писати: не достанет бо ми разум ниже начати или кончати. Умъ человеч [не] постижет величия Божия, иже удиви Господь преподобнаго своего Сергия чюдесы своими: не от человек бо исперва начало прият, яко же и прочии святии от святых, и преподобнии от преподобных начало приимаху и по стопам отческим последоваху, Богу угожающе. Сей же преподобный Сергий еще во чреве матерни сосуд освящен Святей Троице явися⁸⁶⁷ и трикратным возглашением прославив Святую Троицу во время святые литоргии. Рожение же его и воспитание и детское житие, и возраст, и воздержание, и постничество от самых пелен свыше человеческаго пребывания дорова ему Бог, и от родителейсвоих по 40 днех к церкве в дар Богу принесен. Книжное же учение от ангела Божия прием⁸⁶⁸, а не от человек и иночествовати не к иному х кому прииде под начало, но Богом наставляем, сам себе место уготовав и церковь устроил⁸⁶⁹. Брат же его единоутробный толико пустыню указав ему и мало нечто в трудехъ⁸⁷⁰ поможе ему и отъиде. Той же и преже пострижения своего в пустыне той многи молитвы и труды принес Богови наедине, и видя Богъ изволение его, яже по Бозе ко иночеству, посла ему Богъ⁸⁷¹, от ково и пострижение прияти. И купно с пострижением новоначальный чернец яко совершен инок и святых таин сопричастник бывает, и внегда святый причастився, тогда не токмо церковь, но и окрест церкви благоухание много изыде, показуячистоту его душевную. Той же иночеству начало прием и паки един ко единому Богу бдение и слезы принося присно; зелныя же труды и воздержание кто может изрещи? И з зверми в пустыне многа лета водворяяся⁸⁷² и от бесов искушения колики приемля, донде же изволением Божиимъ снидошася к нему братия и монастырь общий составися, благодатию Божиею, и поспешеством Пречистые Богородицы, молитвами его, яко же ныне очи наши зрят. Смирения же его образ кто может понести? терпению же и нестяжанию⁸⁷³ его кто не подивится? яко и не познаватися ему худости ради риз его⁸⁷⁴, и в церкви скудости ради и канархати по книге с лучиною, и яко многаго ради его⁸⁷⁵ терпения и аггельским хлебом посещаем бысть⁸⁷⁶ от Бога и з братиею. Не требовав бо тогда ни злата, ни сребра, ни риз украшенных, ни коней доброездных; но со многим смирением, иде же аще хотяше, пеш хождаше. Яко же⁸⁷⁷ и пресвященныи Алексей митрополит крест злат с порамандом на него возложи, хотя на митрополию его понудити; он же никако сему повинуся, но вменив себе сия в великую тяготу: не бых, рече, златоносец. И ни возможе его святый Алексей на то увещати, дал ему по ево воли. И такова смирения ради⁸⁷⁸ и посещения Богоматери сподобися. Есть же и доныне зримы суть нашима очима ризы его служебныя и посох пастырский; на праздник его архимарит в службе облачается и посох его в руку его бываше, и тем оказовашеся преподобнаго конечноесмирение. Обитель бо его тогда честна суть чюдесы его, а не златом и сребром; скудость бо потребных и недостатки от жития его слышахом, колико и от братии претерпе поношение и ропот терпеливая она душа. Последи же коликими благими Бог обитель его распространил: елика, рече, во обитель его приносимая умножахуся, толико страннолюбная утешения возрастааху, и никто же, рече, от обители его тщима рукама отхождаше. Заповеда же и по себе не токмо нищих и странных доволно покоити, но и всякому требующему подавати, глаголя: аще сию мою заповедь сохраните без роптания, то мзду от Господа приимете, и по моем отшествии обитель моя зело распространится⁸⁷⁹ и во многа лета не разерушима постоит благодатию Христовою. И сию его заповедь хранят непременно, и доныне сим тако бывающим: не токмо простии и болнии, и нищии, но и князи и боляре и воеводы и воинския люди, мимо грядуще, вси приимаху подобающую доволную честную потребу, яко от источник неисчерпаемых, и в путь свой пищу и питие доволно приимаху, яко же в житии его писано: служащии же, рече, с радостию всем подавающе изообилно, и тако явленне познавающе, иде же потребная пребываютъ во храмех брашна и пития и хлебы, и варения сия вся преумножахуся благодатию Христовою молитвами его, яко же очи всех зрят. Такова бо благодать Божия поспешествова ему тогда, яко и аггели Божии служаху съ ним⁸⁸⁰; и видим бысть от братии, яко и огнем божественным причащатися ему⁸⁸¹. Целебныя же дары и чюдеса, бываемая тогда и ныне, кто может исписати, юже Бог дарова ему? И не едино же то, яже дары целебныя подаются все[мъ]⁸⁸² приходящим к нему и доныне к целбоносным мощем его, но свыше целебных даров от Бога благодать дана ему всю Росийскую землю заступати от находящих врагов християнских, от безбожных Татар, и Немец, и Литвы, и прочих язык, не чтущих по истине Бога Господа нашего Исуса Христа и хотящих разоряти православное християнъство. Яко Богомъ данный помощник всему государьству, и всюду и везде царем и великим князем обреташесяпомощник во бранех: яко же на Дону⁸⁸³ великому князю Дмитрею на безбожнаго царя Мамая благословение дав и во время бою посланьми своими крепко вооружив, и с Резанским и с Нижегородцкими великими князьми великому князю Дмитрею Ивановичю мир вечный устроив посолством своим. Тако же под Казанью и под Свияжском градом царю и великому князю Ивану [Васильевичю] на безбожных Татар чюдесы своими помощ дарова и частыми явлении неверных устрашив, и пленницы православнаго християнского народу невидимо молитвами его от поганых рук свободни бываху, яко же писание поведает. В Себежском же граде помощию его от Литовских людей православнии от осады свободишася. Тако же и во Псковской земли во граде Опочке явлением его от осады свобождени быша и противных разгнаша. А в Латынских и в Немецких странах, во время суетнаго осмаго собору папина собрания и Русскаго митрополита Исидора, и тамо обретеся, и святаго Марка Ефесскаго похвалив и равноапостольна его и многострадална нарече, и Семиона иерея и с прочими оттуду явлением своим на пути от поганых сохранив и благочестие православия проповедати на Росии повелев. Во время же Крымскаго царя и Татарскаго нахождения с Московскими чюдотворцы, и с Леонтиемъ Ростовским, и с Варламом Футынским, купно с ними на умоление Владыки и Пречистые Его Матери обретеся, яко же писание поведает. И где ни быша во бранех цари государи и великие князи, и преподобнаго Сергия имя во устех присно поминаху и церковь полотняную во имя его на путех близ шатров своих поставляху и по вся дни в нее на молитву прихожаху, яко под Казанию и в Свияжском граде, иде же ныне монастыри его, тако же и под Москвою во обозе противу Крымскаго царя, иде же ныне церковь Пречистые Богородицы имянуется Донская. И везде во всяком пути и во всяких напастех имя его призываху и, егда в любовь прихождаху, именем его утверждающеся. Великий же князь Василей Ивановичь на смертном одре лежаше и последнее вслух всем ублажание преподобному Сергию [пропев и] предаде дух свой в руце [Богу. Такову] веру к нему самодержцы имеяху, [иже и] о чадородии цари государи его на молитву къ Богу подвизающе и не погрешающе: елико у Бога прошаху, и молитвами его приимаху и отхождаху с радостию в домы своя. О нынешних же последних дарованиих Божиих, иже молитвою его в разорение Литовское содеяся, что изглаголем? Вси бо помнят, егда Московское государство разорено бысть, и грады и веси и деревни огню и мечю предани быша, и всяка душа от мала и до велика истреблени быша, и Московское государьство и гради обладаеми быша от Поляков и от Литвы и от Немец, прочия же грады от руских воров разоряеми быша, и Московскому государьству не бысть ниоткуду помощи; токмо едина сия обитель Святыя Троицы и чюдотворца Сергия заступлением Пречистые БогородицыБогом снабдима бысть, цветяше всякими благодатми⁸⁸⁴ и кипяше всяким богатеством. Прежние бо государи великие князи и цари благочестивии наполниша обитель Сергиеву всяким богатеством изобилно, не токмо вотчин дающе доволно, но и промыслы торговыя во мнозех градех и по украйнам и за морем беспошлинно, и прилагающе к полности полность; и мноземи леты наполниша обитель его всяким богатеством, яко пророческаго дара сподобишася и яко провидяще Духом Святым в Российском государьстве хотящую быти кроволитную напасть. И тако Божиею благодатию наставляеми живущии во обители сей иноцы и воинстии и всякого чину людие утвердишася душами своими крепко противу безбожных, и не приложишася к прелести Литвы и Поляков, и с крестопреступники с рускими изменниками не сложишася, яко же и в прочих градех; но вси крепкостоятельни быша и истиннии поборатели быша Московскому государьству, и нужу осадную всякую терпяще, ожидающе милости Божия, надежду имуще на Пречистую Богородицу и на преподобных чюдотворцовъ Сергия и Никона, и уповающе и не погрешиша, посещением Богоматери и преподобных. Неотступна бо бысть Пречистая Богородица от обители Сергиевы молитвами его, яко же преже обещася, и от осады обитель его свободи, и люди в них православныя от поганых спасе, и во время недостатков умножением хлеба прекорми, и поганых чюдесы устрашив, и тишину и смирение даровав. И во времяразорения Московскому государьству обитель его не малая подпора и поможение бысть, и проезд от оставших градов к Московскому государьству, и паки от Москвы по градом путь чистый и гладкий, и покой и пристанище князем и боляром и всякаго чину людем. Истинну же аще рещи, нагимъ одежда бысть, странным упокоение, нищим и гладным прекормление, от мраза изгибающих теплое утешение, странным и раненым, и конечно издыхающим отпускъ от сего света с напутием вечного живота, мертвым же⁸⁸⁵ погребение бываше. Сия вся сотворяшеся добрым строителем в чюдотворцове Сергиеве обители, о нем же напреди явленно будет. Не бысть бо иного пути и проезду, окроме сея обители, донде же и о и очистися⁸⁸⁶ государьство Московское. И аще кто восхощет уведати истинну и умирение, и тишину, и престатию кроволитию християнской крови в Московском государьстве и по всей Росии, како явление его о собрании ратных людей на очищение Московскому государьству, и то все молитвами и чюдесы преподобнаго Сергия бысть. Явственно же вси видехом, како под Москвою межъ⁸⁸⁷ бояры и меж дворянским и казачьим войском несогласие бысть в последней гетманской приход Хоткеевичев, хотя освободити из осады Литву и Поляков, Руских же людей хотя побити. И в то время архимарита Дионисия и келаря Аврамия много болезнования было: едва бояр приведоша во смирение и дворянское войско с казаческим в согласие, призывая ихк себе изо обеих полков и по вся дни многи сотницы кормяше и питием всяко утешающе. Дивити же ся сему подобает, како благодать Божия поспешествова тогда: аще не бы умножением Бог одаровал, откуду на такое многолюдъство пища и питие обреташеся? а монастырь от осады конечно оскуде всякими потребами, а вотчины монастырские все в разорении быша. Еще же и в нынешних последнихъ летех в далечайшей стране, на Яицких вершинах, воеводе Льву Афонасьевичю Плещееву с товарыщи на поганых Калмыков помощ и одоление дарова, явлением бо своим крепких на брань вооружив и мужественных сердцем сотворив, а поганых устрашив, такое их многолюдствои храбрость и ратные збруи яко паучиная пряденая вменив, яко же о том писано бысть напред. Прочее же прекратим: доволно бо бысть и преже писано к похвалению чюдес его. Не позазрите же на мя, отцы и братия, яко не в ряд и не по чину главизны изложихом, или год не подле года, но яко же что напред от кого услышахом, или в древних писмах приискахом, сия тогда и написав. Ина же и своима очима видехом, яко же и преже рекохом, но тогда о писании сем и в помысл не вниде, донде же государево царево слово с повелением изыде; и оттоле, призвав Бога и Богородицу и самого преподобного на помощ, дерзаю писати сице:

В лето 7063-го году, сентября в 25 день, на память преподобнаго и богоноснаго отца нашего Сергия чюдотворца, прииде некая жена именем Домникия Васильева раба Машуткина помолитися, очима слепа сущи, два года ей болезнующи и света не видела, и со слезами у чюдотворца Сергия прося милости, да подаст ей исцеление. Дивный же в чюдесех преподобный Сергий подастъ ей исцеление: бысть здрава, яко николи же болев, и очи ея просветишася. Видев же то царь и великий князь, хвалу воздавъПресвятей Троице и Пречистой Богородице и преподобному чюдотворцу Сергию благодарное моление воздав, и учредив братию и милостыню доволну дав, отъиде, радуяся.

Поведа нам соборный ключарь Иван, зовомый Наседкин: Бысть убо, рече, в лета, в ня же благодатию своею Господь Бог наш изволил излияти милость свою ко християнскому народу и многомятежную жития сего бурю в тишину преложити, Троицкий Сергиев монастырь от болшия осадысвободися, и полковники Литовские Петр Сопега и Лисовской изпод монастыря со многим срамом бежаша; служивым же людем еще в Троицком монастыри всякую нужу и скудость вместе со иноки и с миряны терпящим; сему же Ивану ключарю ту сущу, в монастыри живущу; пути же и проезды еще не очистишася, Поляки и Литва и Руские изменники по крепким местом вся пути залегоша, християнский народ секуще и ни с чем к Московскому государству и к Троицкому монастырю не пропущающе и запасов провести не дадуще; в то же время в Троицком монастыри преже бывший Старицкий архимарит Пимин, отец инока Амфилохия Рыбушкина, бысть в смирении, и томиша его хлебными трудамиза сыновне отвержение, поне же сын его той Амфилохий от Троицких властей послан в Троицкой Казанской монастырь в строители и во время разорения того соплемянився з дияком с Никонором Шулгиным, и от паствы Троицких властей и с Казанским монастырем отвержеся, и непослушен явися властем, но и посланных к нему в темницу сажая. И сего ради в Троицком болшом монастыре отец его Пимин сеяше муку. И хлебных запасов в монастыре уже день от дне умаляшеся и оставашеся един мал сусечец, и ис того по вся дни емлюще во все квашни не единожды же днем, но и многажды, на всю братию и на мирян и на ратных людей, и паки той сусечец наполняшеся невидимою силою Божиею. Той же Пимин быв во удивлении, познав Божий промысл, призвав к себе сего ключаря Ивана, и поведа ему бывшее чюдо о муке. И вместе с ним неколико дней зряще промысла Божия дело, удивишася милости Божии и вразумиша себе, яко не туне бысть подвиг архимарита Дионисия и промысл о бедных. В то бо настоящее мятежное время видя архимарит Дионисий люди Божия погибающа по путем и по дорогам, по лесом и по дебрем, побитых и раненых, лежащих без призору, нагих и от зверей и псов разстерзаемых, прочим же еле дышущым, и призвав келаря и казначея и братию и слуг и всяких чинов мирских людей, и плакаше пред ними и вопияше з горкими слезами, захлипаючись глаголаше: да покажут милостьнад бедными, над болными и ранеными, иже от поганых посечени и ранены и повержени наги по лесом и по дебрем, да пошлют и соберут отовсюду во обитель сию, и всякъ промысл об них целебный да покажут, и приюты им построят, и пищею и одеждою попекутся о них, хто что возможет; прочим же о погребении да попекутся. И что у нас есть в монастыри еще муки хлебныя и квасовъ добрых, тая вся болным и раненым соблюдати, а нам самим мочно доволитись овсяным хлебом и водою, и елико Бог даст нам здравие, будем доволни и овсяным хлебом и водою. И слышавше келарь и братия и миряня, вси единодушно обещашась тако быти. И оттоле советом архимарита Дионисия начало изыде промыслу о бедных. Посланнии на возила собирающе болных и раненых и побитых, мужеский пол и женский и девический, привозяще; прочии же сами, кои могуще, прибродяще. И посылающе их овых в братцкую болницу, иных же за монастырем в богаделню; женскому же и девическому полу вне монастыря избы особныя ставяще. И сим всем покой и пища и питие и всяк целебный промысл сотворяюще по приговору архимарита Дионисия; мертвым же погребение сотворяюще. И внегда приговориша о бедных промысл чинити и сами терпению и воздержанию обещашася сице, благодать Божияпреизбыточествова в начале дела их. И пришедша Иванъ и Пимин, возвестиша о сем самому архимариту Дионисию. Той же нелестный промысленик и истинный отец и сирым питатель, слышав сия от них, радостен бысть душею, с ними изыде в пекарню, и иде же малый сусечец муки тоя, и узрев сам промысла Божия дело, слезы многи изливая по ланитома своима, видя благодать Божию, посланную ко уповающим на милость Его. И келарю и старейшим братиям возвестив сия, и слышавше вси, благодарение воздаша Святей Троице и Пречистой Богородице и великим чюдотворцем Сергию и Никону. Той же сусечец малый не оскудеваше и до 40 дней, донде же и пути очистишасяи хлеба из селъ привезоша доволно. Мнози же, иже от ран и от наготы призрением архимарита Дионисия препокоени быша и здравие приемше, и доныне вь его обители тружающеся во многих службах, яко и до пяти сотниц или вящъшее. Прочим же, иже здравие приемше, разыдошася восвояси с радостию, их же число множественно. Погребенных же, яко же инде есть в Повести⁸⁸⁸, вящшее 7000 человек странных, опричь осадных людей.⁸⁸⁹

Той же ключарь Иван поведа нам: Живущимъ⁸⁹⁰, рече, в Троицком монастыре преже, яко же и выше рекох, и архимарит Дионисий поручи ми церковь чюдотворца Сергия священнодействовати для мирских прихожан, поне же около монастыря в то время церквей не бе: вся разорены суть от поганых. А иде же покой телесный приимати, даша ми место мало в стене града каменаго. И тако пребывающу ми ту и часто молящуся Богу и Пречистой Богородице и преподобным чюдотворцем Сергию и Никону о милости Божии и о посещении, о избавлении гнева, належащаго на ны, зря настоящее время, како многаякровь християнская проливаетца. От осады убо Московское государство и Троицкой Сергиев монастырь благодатию Божиею свободистася, прочия же грады еще мятущеся, ово со християны единачествующе, с Поляки превозмогающеся, ово же одолеваеми от поганых; инии же малодушествующе: обращающеся ко християнству и паки отступницы бывающе и прилогающеся к поганым. А пути вся погании и Руския изменники заяша и по всем дорогамъ християнъскую кровь проливающе, яко воду, и беды тоя не мочно изглаголати.

И ото многия горести седе некогда в хизице своей и склячеся нача плакати и рыдати, размышляя в сердцы своем, како в прежьжняя времена Латыни от православия отлучишася, а после и всязападныя стряны в Люторскую ересь уклонишася, от православия тако же быша отступницы. Ово же чая в мысли своей, уже и зде одоленным быти от еретик, к сему же вразумляя речь, иже от Апоколипсиса о жене и о змии притчею глаголемая, и мнев на Руси православию уже не быти, и от многа плача изнемог, бысть въ забыти. Внезапу же слышащу ми глас, глаголющ ко мне оконцем, яко на яве, укоряя и поношая мя: Кто еси ты, рече, иже таковая помышляеши, яко на Руси не быти православию, и хощеши испытать судбы Божия? А того, рече, не веси, яко молит Бога за вас Василий Великий и Димитрий Селунский, да и ваш преподобный Сергий чюдотворивый, и будет православие на Руси по прежнему. И ина многа изрече, поношая мя, отступи от оконца. Аз же яко от сна возбнув, не видев никого, трепетен быв, размышляя в себе ужасное слышание, и востав, иде к архимариту Дионисию, хотя возвестити ему. Егда же приближившу ми ся х келии архимаричье, видев его пред келиею своею на помосте стояща и вопрошающа отрока некоего, юна суща. Отрок же той, всем нам знаем преже, яко нем языком бысть и не могий глаголати ни мало, в то же время глагола к архимариту свободным языком; мы же приложиша уши своя на слышание⁸⁹¹. Отрок же поведаяй сице: бывшу ми, рече, в келии и седящу ми сего часу на печи, в углу⁸⁹² же онсица инок разслабленный лежаше к стене лицем и о себе не можаше превратитись. И внидоеста в келию ту два иноки, им же лица светлообразны, седы брадами, и приступиша к разслабленому тому, сотворше молитву Исусову, глаголаша ему: брате господине! обратися к нам. Он же отрече им: не могу обратитися. Тии же боголепнии иноки паки рекоша ему, повелеша к себе обратитися и глаголаша ему: то ли, брате, твое⁸⁹³ иночество? не буди упрям и обратися к нам. Он же, яко невежда сый, з гневом отвещав им: кто есте вы? рече: отступите от Мене! или не весте, како болезную и како могу обратитися. Тии же святии боголепнии старцы вземше его, яко с нужею, превративше его к себе лицем и поставиша его на нозе его близ постели его, глаголюще ему: лжеши, рече, нарекаяся болен, а се здрав еси. И оставиша его, идуще вон из келии, ко мне же рекуще, седящу ми на печи, назвавше мя имянем: иди, рече, и скажи архимариту Дионисию на сего прекословца и непослушника, како прекословив с нами. Аз же отвещав им: иду и возвещу повеленная вами. Вкупе бо со словом их развязася немота языка моего. – Мы же, слышавше, удивляющися о сем, яко вси знахом отрока того нема языком и инока того разслабленнаго, не могуща о себе обратитися, аще кто не превратит его. Еще же нам глаголющим, прииде и той инок, бывый разслаблен, сам о себе и никим не водим бысть, и вся подробну архимариту и нам возвести о себе бывшее милосердиенад ним благодатию Божиею и молитвами преподобных чюдотворцов Сергия и Никона. Потом же и аз, Иван, свое видение и глас слышавший архимариту Дионисию возвестив, и прославивше Бога и Пречистую Богородицу и преподобных чюдотворцов Сергия и Никона, снабдевающих обитель свою и предивными своими чюдесы проявляющи милосердие Божия человеколюбия православным християном и уже отчаявшихся и безнадежных на несуменное упование приводящи ко Христу Богу Спасителю нашему. Аз же, Симон, слышав сия повести от него, написав и по времени ему показав; он же сия прочет, некия речи своею рукою поисправив и свидетельствовав сие истинну быти.

В лето 7122-го году Троицкого Сергиева монастыря инок Гедеон Коротнев иде изза Студеного моря из волости Варзуга имянуема с монастырскою осеннею рыбою на лодье х Колмогорам. И воста на море волнение велико и монастырскую лодью лдомъ заметало и замерзла; прочии же лодьи Двинянские четыре розбило. На монастырской же лодье люди вси, видевше свою погибель, быша в нечаянии, ту же Двинянин именем Ияков. И от многия горкия печали и от истомы воздремашася и уснуша. Двинянин же той Ияков видит в видении чюдотворца Сергия, и указующе ему перстом ко брегу, иде же им проити, и яко на железные колеса поставив лодью ту, сам чюдотворец в пристанище привез и ввез ее в онбар новый и замкнув ея ту⁸⁹⁴. Возбнув же той от видения, разбудив инока и прочих и сказав свое видение. Они же, слышавше сия, начаша чюдотворца Сергия призывати, да избавит их от потопления и спасет души их от смерти. И в то время начать лед на море разступатися. Они же, подняв парус, доидоша тою щелию до пристанища,⁸⁹⁵ иде же чюдотворец Сергии перстом показуя; а на море позади их лед паки сступися. И видевше сия и получиша ненадежное спасение, иже спасе их Господь молитвами святаго, радостны быша и доидоша обители святаго, ублажающе имя его, и властей и братию возвеселиша пришествием своим, яко нечаянно спасение получиша.

В лета 7122-го году марта вь 17 день человек некий именем Игнатий зовомый Яскин, ходя при брезе морскомь, и взыде на торос, сииречь на лед, и отнесе его в море и нача утопати. Возопив же ко святому Сергию чюдотворцу, да избавит его от потопления, и невидимо обретеся на брезе морскомь, молитвами преподобнаго чюдотворца Сергия спасень бысть.

На Колмогорах же в Куреской волости Троицкого Сергиева монастыря в слободе храмь преподобнаго чюдотворца Сергия, и ту приведень бысть тоя же слободы человек некий именем Якимь Ильин, черным недугомь одержимь и зело беснуяся, и исцелень бысть молитвами святаго Сергия от образа его, и отьиде в дом свой здравь, благодаря Бога. Сие же чюдо бысть 123-го году.

В той же Куреской волости в Сергиеве слободе во храмь преподобнаго чюдотворца Сергия прииде помолитися жена именем Ксения Кехотцкия волости, недугом болезненым одержима и бесомь мучима, яко и рука ея бе прикорчена к сердцу. Скорый же к помощи преподобный Сергий исцеление дару[е]ть ей, и отьиде в домь свой здрава, яко николи же не болевь, благодарение воздая преподобному Сергию, давшаго ей исцеление. Бысть же сие чюдо 124-го году.

Прииде некогда во обитель Святыя Троицы помолитися и чюдотворца Сергия мощемъ поклонитися боярин Иван Никитичь Романов и по молебном пении архимариту Дионисию и нам сказав о чюдеси чюдотворца Сергия сице: Бывшу ми, рече, преже в опале от царя Бориса по зависти вражии, и везоша мя в заточение на колеснице худе покрыта вретищем, многи оковы имущу ми на выи и на руках и на ногах. Не ведущу же ми, иде же везут мя, в то же время начаша в колокол бити, и познавшу ми, яко быти ми близ обители Святыя Троицы. И возмутися сердце мое от горкия печали, и слезы многи излияшася, моляся Святей Троице и Пречистой Богородице и преподобному Сергию, да спасет и ущедрит в беде стражущаго и не имущаго помощи ниоткуду. Сице же плачащу ми ся и преподобнаго Сергия на помощ призывающе и хотящу ми изпод покрытыя позрети ко обители чюдотворцове, и не возможе, зане приставы по обема странама не дадуще приникнути, многу тесноту по приказу царя Бориса сотворяюще ми. И внезапу яко некоею силою Божиею от моея выя и от рук и от ног оковы железныя разрешишася, и узрев скважнею обитель чюдотворцову, и благодаривъ Бога и Пречистую Богородицу и преподобнаго Сергия скораго помощника, и благонадежен быв, почаяв себе милости Божии быти. И проехав монастырь, приставом сия возвестив;они же, сия осмотривше, ужасошася и во удивлении быша и от звериного нрава преложишася во овчюю кротость, и быв у них прочее время во ослабе. Егда же, времени дошедшу, свободи мя Бог от тоя напасти, и бывшу ми в прежнем своем достоянии, и по своему обещанию сице прихожду к чюдотворцу Сергию по вся лета на поклонение ко гробу его. Слышав же сия, архимарит Дионисий и мы вси благодарения воздаша Святей Троицы и Пречистой Богородицы и преподобнаго Сергия скораго помощника ублажаше, яко поспешен предстатель всем уповающим на нь.

Бысть убо во времяна она нахождения на Русииское государство безбожных Поляков и Литвы, Богу попущающу за грехи наша, и многими леты по градом и по весемъ христианъству ото огня и меча погибающу, и уже и Московскому государству до конца от богопротивных разорившуся, всем посеченым бывшим от мала и до велика, от благородных и до простых, мнозем же в пленъ отведеным бывшим, прочим же разбегшимся по всей Рустей земли, яко овцы не имущи пастыря, по градом и по весем и по пустыням скитающеся, преходяще с места на место, иде же бы аще мочно кому горкия смерти гонъзнути. И сея беды не может язык человечь изглаголати, токмо: ох! ох! увы! увы! горе! горе! беды тоя неисказанныя, колико протяжеся напасть та кроволитная. Но мы сия глаголати оставим: сами бо все помнят горкое время то, и поступим на преднее. Московскому убо государству во осаде бывшу, заседоша окаяннии еретицы, Поляки и Литва, Московских боляр князя Федора Ивановича Мстисловского с товарыщи в своих руках имуще и тесноту всякую чиняще им, еле живых содержаще. Християнски же народ от великородных и до простых вси посечени быша, яко же преже глаголахом. Грады же вси в несогласии быша: овии к Полякомъи к Литве приложишася и вместе сь еретики за едино християнъскую кровь проливающе; инии же к вором, к названымъ царевичем приложишася и тии тако же враги быша православным християном, не менши того кровь проливающе; инии гради Росийстии от Немец обладаеми быша; прочии же гради особ стаща, самодержавъствоваше, а Московскому государству ни откуду помощи не бе: одолеша окаяннии еретицы. Во обители же Святыя Троицы и у преподобных чюдотворцов Сергия и Никона паствующу тогда преподобному архимариту Дионисию да келарю Аврамию Палицыну, и слышавше, яко Московское государство в конечном разорении и обладаемо от еретик, советовавше з братиею и с воинескими людми, и обитель утвердивше крепко, и положивше упование на Бога и на Пречистую Богородицу и на преподобных Сергия и Никона, мужественно вооружившеся противу безбожных, и видя православную веру попираему и християн посекаемых от безбожных, зело о том болезнующе и со враги, с Поляки и с Литвою противящеся з Божиею помощию. Дионисий же архимарит ни во что ино упражняшеся, токмо в церковных и в келейных молитвах, моляся ко Христу Богу з горкими слезами и ко Владычице нашей, всего мира заступнице, Пречистой Богородице, скорой помощнице, руце свои выспрь воздевая и призывая на помощ преподобных чюдотворцов Сергия и Никона, и от горкия печали томя себя бдением, и воздержанием, и по многи дни мало хлеба ядый, видя люди Божия конечно погибающа, яко же убо мнозем и во отчаянии впасти. То же ему и опочив бысть от труда многа: писцы скорые и доброумнии у себе имуще, с ними же приседя и обнощеваше, писаше грамоты поучителныя и во вся грады посылая. Иже попраша веру християнскую и стояще заедино с Поляки и с Литвою, разоряюще православных християнь, сихь моляше, да отступят от еретикь и паки да соединятся с православными християны. А иже оставшии християня в неких градех, сихь похвалами ублажаше и моляше их, да станут крепко противу безбожных и мужественно да поборають по християнех, воспомиенающе имь от божественных писаний, и прежнихь государствь в прилучаи прилагающе, колико за православную веру в прежних родехь стояша мужествено и главь своих не щадили и мученически кончашася и ныне мучения ихь церковь Божия прославляеть и песненными хвалами воспевает. И сих ево преподобных трудов грамотам во многи грады дошедшимь, и во умиление приходяще, и приидоша под Москву бояринь князь Дмитрей Тимофеевичь Трубецкой, и Ивань Заруцкой, и прочии от многих градовь со многимь воиньством, и вместе с Прокофьем Ляпуновым оступиша Московское государство и безбожных Поляков осадиша и тесноту имь велику учиниша. Но аще и велицы полцыснидошася и безчисленно войско совокупися, но без Божия промысла множество воинства греха ради нашего непотребно бысть. Людие воиньстии взволновашася и боярину князю Дмитрею Тимофеевичю непослушни учинишася, лутчего же своего промысленика Прокофья Ляпунова своима рукама убиша. Иван же Заруцкой яко возбеснев, бежавь со многим воинствомь и от православия отметникь бысть и многи пакости сотворивь градовом Рускимь пуще Поляков, донде же его суд Божий постиже. Прочии же воинстии людие, видя нестроение в войске, разыдошася врознь. Бодрый же в разуме пастырь нелестный стада словесных овец Христовыхархимарить Дионисий с келарем Аврамиемь пакы неусыпно промышляюще и пишуще грамоты, яко же и преже, во вся грады верховыя и понизовые, моляше их и подвизающе писаниемь, да изыдуть на заступление Московскому государству, и Господь поможет вамь заступлениемь Пречистые Богоматере и за молитвь святых чюдотворьцовь. И паки начаша мнози во умиление приходити, паче же в Нижнем Новегороде за се крепко вземшимся, и начаша всяко мыслити, како и коимь обычаем да подадуть помощь Московскому государству. И когда уже промысль человеколюбца Бога изыде к народу християнскому и благодатию Его обретохом заступника Московскому государству и всейРосиистей земли преподобнаго Сергия чюдотворца, тогда православнии християня яко от люты зимы к праведному солнцу Христу Богу лица своя обращаху и к теплоте спасения желающе приступити, озари бо сердца верных Христось Богь нашь милосердиемь своимь. Не позазрите ми, господия и братия, долготы ради речи сия: аще и грубо есть и несладкоречиво морокование сие, но истина есть, и от самого архимарита Дионисия от уст его слышах, паки же и от прочих достоверных уверився. Оставльше же сия и паки к повести обратим ум свой. Муж бяше благочестив Нижняго Новаграда именем Козма Минин, ремеством же мясник, живый благочестивым житием и в целомудрии и прочихдобродетелех живот свой препровождая. И сего ради на мнозе и от подружия своего отлучашеся, яко безмолвие любя, отходя во особую храмину, Бога присно имея в сердцы своем. Некогда же спящу ему во храмине той, явися ему чюдотворец Сергий, повелевая ему казну собирати и воинских людей наделяти и итти на очищение Московскаго государства. Он же возбнув, бысть во страсе мнозе и помышляя, яко не бе воинское строение ему в обычай, и в небрежении положив. Во ино же время бысть ему то видение вторицею, и паки небреже. По мале же паки является ему преподобный Сергий и глаголя ему с прещением: Не Рех ли ти о сем? поне же изволение праведных судеб Божиих помиловати православныххристиян и от многаго мятежа в тишину привести, сего ради Рех ти казну собрати и ратных людей наделити, да очистят з Божиею помощию Московское государство от безбожных Поляков и прогонят еретиков. И сие ему прирече: яко старейшии в таковое дело не внидут, но и паче юннии начнут творити, и начинания их дело благо будет и в доброе совершение приидет. И яко бы наказав, остави его и невидим бысть. Той же возбнув трепетен и в велицеи ужасти быв, мнев, яко всему чреву его изгнетену быти, и ходя, болезнуя чревом и моляся преподобному Сергию о исцелении чрева его и каяся о своем небрежении и обещеваяся повеленная им сотворити, помышляя же како и откуду начало делусотворити. По смотрению же Божию всем градом избраша его в земския старосты и предаша ему строение всего града, да исправляет и разсуждает земския росправы, яко же обычай есть. Козма же, познав начало Божия промысла, положив упование на Бога и на преподобнаго Сергия, обнадежен бысть, начат ум свой простирати на дело Божие, глаголя пред всеми в земской избе и иде же аще обреташеся, со слезами плача и рыдая: Московское, рече, государство и прочие грады болшия и меншия все разорени быша от безбожных, и людие благороднии от велмож и до простых, вси посечени быша, жены их и дщери пред лицем их опозорени и в плен ведоми быша, и не мочно тоя беды изглаголати. Яко же слышим, и ныне Москва и прочии гради одержими от еретик, и одолеша погании мало не всю землю Росиискую. Толико благодатию Божиею град наш един Богом храним, и пребываемъ яко безбоязнении, а враги наша Поляки и Литва, с ними же и Рустии крестопреступники, яко свирепии волцы, зияюще усты своими, хотяще разхитити нас, яко овца, не имущих пастыря, и град наш разорению предати; мы же о сем ни мало пекущеся и промыслу не чиним. Мнози же, слышавше сия, во умиление приходити начаша⁸⁹⁶; прочии же ругающеся отходяще. И яко же святый Сергий рече: юннии преже имутся за дело, сице и сотворися. Тии бо сладце внимаше и послушанию скоро вдавашеся и отцемсвоим глаголаша: Что, рече, в нашем богатстве? токмо поганым зависть, и аще приидут и град наш возмут, и не таяжде ли сотворят, яко же и прочим градом? и нашему единому граду устояти ль? Но положим все житие свое и богатъство на Божию волю и начнем собирати и ратным людем давати. Тако же и из нас аще кто возможет изыти, то готови есмы за избавление християнские веры глава своя положити. Слышав же сия, вся люди Нижеградстии положиша на Божий промысл и на человеколюбие Его, и яко же о Бозе начаша, тако и сотвориша. Приговор всего града за руками устроиша, иже во всем Козмы слушати, и Козме той приговор на себя даша. Той же первое собою начат: мало себе нечто в домусвоем оставив, а то все житие свое положивъ пред всеми на строение ратных людей. Тако же и прочии гости и торговые люди приносяще казну многу. Инии же аще и не хотяще скупости ради⁸⁹⁷ своея, но и с нужею приносяще: Козма бо уже волю взем над ними по их приговору, з Божиею помощию и страх на ленивых налагая. Тако же и уездные люди не единого Нижняго Новаграда, но и прочих градов, везуща казну, колико кто можаше, за повелением его. И уготовавше многу казну зело. В то же время Смоленска града дворяня и дети боярские и стрелцы, отбыв домов своих, стояху в Арзамаских местех: граду бо их Смоленску от Полскаго краля Жигимонта взяту бывшу, и жены и дети их в плен отведени быша. Они же не похотевше християнския веры отбыти, не приложишася к еретиком и приидоша под Москву. И ту казаческое воинъство к ним дворяном несогласно бысть и самоволно, положиша на них зависть и хотяше их побивати. Они же даша место гневу, не восхотеша межуусобныя брани составити, уклонишася от Москвы в Арзамаския места и преходяще с места на место, не вредяще ничем православных християн, ожидающе милости Божия, донде же ущедрит люди Божия. Слышав же о них Козма, яко людие благочестни суть и воинскому делу искусни, паче же и в бедах сущи и в скудости мнозей ходяще, а християном насилия не чиняше, послав к ним с молением, да приидут в Нижней, обещав им кормъ и казну на подмогу давати. Они же с радостию пришедше, яко до двою тысящ и вящшее число их. И елико множашеся казна, толико воинских людей грядуще, яко бы со всея вселенныя. Избраша же воеводу князя Дмитрея Михайловича Пожарского, яко могущаго ратныя дела строити. И урядивше полки, поидоша на очищение Московскаго государства. Егда же приидоша в Троицкой Сергиев монастырь, войску с ними зело велику сущу, и молебное пение сотвориша. Козма же поведав архимариту Дионисию, како ему явися Сергий, яко же напреди писано. Слышав же сия, архимарит слезы теплы по ланитома изливая, благодаря Святую Троицу и Пречистую Богородицу и преподобнаго Сергия, и до времени сего никому не поведав, донде же исполнися благодать Божия. По молебном же пении архимарит Дионисий со всем освященным собором изыде на провожение воинства из монастыря и взыде на гору, глаголемую Волкушу, и войско все мимо грядыи, осеняя крестом и повелевая водою святою кропити. Ветру же велию дыхающе в лице воинским людем, едва мочи сидети на конех, и бысть о сем воинским людем велия ужасть и сомнение не мало. Егда же напоследи приспе князь Дмитрей и Козма, вземше у архимарита благословение, поидоша в путь свой, архимариту же вслед их еще крестом осеняющу, и внезапу ветръвстрешный переменився и потягая в тыл воинским людем от обители Святыя Троицы, яко от самого чюдотворцова Сергиева гроба. И бысть веселие и радость ратным людем, яко обнадежени быша и почаявше⁸⁹⁸ себе милости Божии быти. Егда же приидоша под Москву, тесноту Поляком и Литве велию учиниша. Искони вечный же враг, присно ненавидя роду человеческаго, паки простирает козни своя греха ради нашего. Бысть межи бояры князя Дмитрея Трубецкого и князя Дмитрея Пожарского и у их советников зависть и вражда велия, тако же и межу воинъствомъ дворянским и казаческим несогласие, яко вмале кроволитию межусобному не быти. Несогласие же их слышавше, погании Поляки и Литва з гетманом своим съ Хоткеевичем от Можайска, яко птицы ловчие налетеше вскоре, хотяще яко ногты своими расхитити стадо Христово, и безпрестанно день и нощь напущаху на православных. Воинство же християнское обоих полков, яко же и преже речеся, несогласно бысть, друг другу не помогаху, но противящесь с погаными, особна кийждо полк прихождаху. Еще же казаки не токмо помогаше дворяном, но и сами похваляющеся разорити дворянские полки. Слышав же сия, архимарит Дионисий и келарь Аврамей оскорбишася о сем зело, и призвав преподобнаго чюдотворца Сергия скораго помощника, подвигошася от обители и приидошапод Москву и вместе с Козмою молиша их, да приидут во смирение и делу ратному нарухи тем не учинять, и многимъ челобитьем приведоша их во смирение. Тако же и воинских людей обоих полковь призывающе к себе и пищею и питиемь утешающе их, и тако и тех многим молением в братолюбие⁸⁹⁹ приведоша. А иже казацкое воиньство негодовавше глаголаша, называюще себя бедны и не пожалованы, симь обещающеся всю Сергиеву казну дати, аще, рече, постоите и поможеть вам Господь; аще ли же, рече, не постоите⁹⁰⁰ и одолеють погании, вся сия в разграбление будут. Они же сия слышавше, с радостию обещавшеся за веру Христову стояти и главы своя полагати. И во времяблагополучно кликнуша ясаком чюдотворцовым: Сергиевь! Сергиевь! и устремившеся обои полки, дворяня и казаки, на поганых единодушно. И поможе им Господь Бог за молитвь преподобнаго Сергия: побивающе и секуще их, и покрыша Московстии поля телесы поганых; прочии же побегоша невозвратно и в свою землю пробегоша. Власти же Троицкия из монастыря из казны и из ризницы привезоша вся драгия вещи: сосуды златыя и сребряные служебныя, шашки архимаричьи златыя же и сребряные, ризы, стихари, поручи, улари, пелены саженыя з драгимь камением, в табары х казакомь и положиша пред ними. Они же аще и желателни быша и сурови на восхищение, с радостию грядуще на восприятие обещаннаго имь, но егда узревше таковая и межи себе зазирающеся глаголаху: вся, рече, сия многими леты собирана и возложенна в дарь Господеви на службу. Устыдешася и челом удариша властем, и избраша от себе первоимянитых людей, послаша во обитель и проводиша честно, возвратиша вся сия в Сергиеву казну нерухому. Не по мнозе же времени явися преподобный Сергий на Москве на подвории своемь у Богоявления Галасунскому архиепископу Арсению, и от гладные болезни исцелив его, и поведа ему о очищении Московскаго государства. И по явлении его заутра Рустии людие Китайград взяша приступом, а потом поскору и Кремльград взяша, окаянныхПоляков посекоша, прочих же в заточение послаша. Сице умолениемь Пречистые Богородицы и святых Московских чюдотворцов и преподобнаго чюдотворца Сергия явлением его преславная победа и одоление на враги содеяся, и государство, от многих лет от нечестивых попираемо, очистися, и христоимянитых людей корабль жития сего бедъствующаго, яко от многоволнуемаго моря, и в тихое пристанище достиже.

Во дни благочестиваго царя государя и великого князя Михаила Феодоровича всеа Росии велможа некий был с царем в походе, чином же рында. И яко же обычай есть в дому Святы[я] Троицы во обители преподобнаго Сергия, на праздники по древнему чину посылашеся ото властей к бояром и к велможам и всякого чину государевым людем от трапезы преподобнаго Сергия чюдотворца пища и питие. И егда до сего таковая пища и питие донесена бысть, не вемы коим вражиим запинанием, вместо благодарения изрече глаголы хулны и зело поносив властей, не в лепоту глагола и келаря королем нарекая, ругаяся в гордости своей. Егда же время изыти из монастыря, пред церковными дверми, внезапу вострепетав, падеся пред всеми и многое время трясыйся и вопия. И по отшествии самодержцеве приложиша⁹⁰¹ его к чюдотворцове Сергиеве раке и молебное пение о нем сотвориша. Той же оздравев, и прииде во умиление, каяся о своем дрзновении, и со властьми простився, отъиде в путь свой здрав, благодаря Бога и преподобных чюдотворцовъ Сергия и Никона. И оттоле по вся годы к чюдотворцу Сергию пеш приходя и веру теплу держав и до умертвия своего. Обретох же аз о сем в писании прежних неких, яко бо той видев двух иноков, боголепных⁹⁰² образом. Первый второму повеле наказати его; той же жезлом наказываше его, и сего ради, рече, вопия и трясыйся, донде же у гробницы святаго исцелев. Аз же видев писание и сие зде приложих написати.

В та же лета, изволением самодержца, Нижняго Новаграда уезд описываше писцы и землю меряше. Егда же приехаша в Троицкую л. 54 вотчину Сергиева монастыряза рекою Кудмою села Ондрейкова в деревню рекомую Бурныковъку, и дияволским наветом учинилася вражда межиусобная боярина Федора Ивановича Шереметева крестьяном с Троицкими крестьяны. И присудиша Троицкому крестьянину образ поднести, а боярскому крестьянину, приняв образ, спорную землю с образомъ⁹⁰³ отвести. И много враждующе межи себе, на правду никоими мерами боярские крестьяня не поступиша. И прием образ явления Пречистые Богородицы, како явися преподобному Сергию чюдотворцу, боярский крестьянин поиде похваляся, хотя чюдотворцову⁹⁰⁴ землю отвести по самые дворы и устремися прямо на средину поля. Монастырския же крестьяня, видевше сия, воздохнувше слезами облияшася, во уме своем призывающе чюдотворца Сергия. И пошел мало, с пути своего сниде и, возвратився⁹⁰⁵ вспять, прииде на то же место, откуду иде: с полъдесятины места кругом объиде, и возопи гласом велиим, да приимут у него образ, поведа себе ослепша. Писцы же, испытавше его и видевше слепа суща, ужасошася и повелеша образ поставити в селе Ондрейкове в церкве чюдотворца Сергия, а землю, покаместа объиде, столбы поставиша и ямы выкопавше на память и на удивление чюдеси чюдотворца Сергия впредь живущимъ людем, да и прочии убоятся и накажутся не творити таковая. По днем же неких християнин той, плакав многодрзновения своего, и от того же Сергиева образа исцелев, прозрев очима и здрав бысть. Бесовскою же завистию оклеветан бысть боярину, яко бы некоею хитростию или затейми по научению слепоту на ся изрек, и многи муки даша ему; инии же после рекоша, и смертию скончася от тех мук. Сие же чудо обретох в писмах прежних властей: писано бысть оттуду от соборного старца Исаи Печерскаго, самовидца ту бывшаго на спорной земле.

В лета благочестиваго царя государя и великого князя Михаила Феодоровича всеа Росии дворянин некий прииде на Москве к архимариту Дионисию и келарю и старцом, поведа бывшее чюдо на море чюдотворца Сергия. Бывшим нам, рече, от самодержца посланым в Персидскую страну посолством к Персидскому шаху и пловущим нам морем, воста волнение велико и на многи дни бури ветреные уставишася, яко во шти седмицах в корабли ношахуся по водам. И от многих волнений морских, паче же от неядения⁹⁰⁶ утрудившимся, лежаще еле живы, отчаявшеся живота своего. И приспевшу, рече, празднику преподобнаго чюдотворца Сергия, и воспомянувшим нам о празднике святаго и о чюдесех его, и потщавшемся, отпеша вечернюю службу, и от скорби мало облегчение приемши, и пище и питию коснувшимся, и мало препочившим, паки воставше и отпевше заутреню и часы и молебен преподобному чюдотворцу Сергию и призывающе его на помощ, да помилует и спасет в беде страждущих. Егда же им молебное пение совершившу, в той час посла Бог милость свою: преста волнение морское и бысть тишина. И поидоша в путь свой со многою радостию и единым днем в пристанище свое достигоша, иде же им годно. И изшедъшим им на землю ис корабля, и мал час преиде, и воста паки ветр, и волнение велико уставися, и корабль той от пристанища отторже и единым мегновением и с кораблениками без вести сотвориша; токмо мы едини спасени быша молитвами святаго чюдотворца Сергия. Сия глагола, слезы многи изливая. Тогда же о сем чюдеси не написано бысть, яко же и преже глаголахом, и о всех чюдесех преподобнаго Сергия не писаша. Ныне же по скаске соборнаго старца Аверкия написахом, поне же той у архимарита Дионисия в келии жил и сему самослышец, как архимариту сказывал. И сего ради имя ему зде не описано, токмо прозвищем дворянин той Погожих.

Бысть убо ратное нахожение на Рускую землю: греха ради нашего изыде Полский и Литовский королевич Владислав, хотя повоевати Рускую землю и Московское государство доступити. И преже себя посылает полковника своего Александра Лисовского со многими воинскими люд ми. Той же прииде на рубеж Рускаго государства и ста на некоем поле, нача всех приводити ко кресту, тако же и сам крестъ целовал, что в Росиийской земле православных християн мечю предавати безо всякие пощады, мужеский пол и до ссущих младенцов: аще бы, рече, и преже секли бес пощады, не бы убоныне нам сопротивны. А на Троицкий Сергиевъ монастырь в безумии своем хваляся до конца разорити и место пусто сотворити. А того не помыслив на сердцы си окаянный, яко Бог благодатию своею, их же хощет, милует, а их же хощет, во гневе своем ожесточит, яко же Ему Содетелю нашему годе есть. День же той бысть, в он же хваляся, праздникъ преподобнаго отца нашего Сергия, иже сентября в 25 день празднуется. И внезапу возбеснев окаянный, начат кричати и терзатися, и нападе на него тоска велика, и на лошедь часто садяся и паки слазя, валяяся по земли, вопия и глаголя пред всеми: О великий Сергие! ты мя не попустил! И во всемъ творя себе винна ко обители его и много тосковав, душу свою зле изверже. Сего же ради окаянный на Сергиеву обитель с похвалою грозяся, яко и преже з гетманом с Петром Сопегою под Троицким Сергиевым монастырем полтора года стояв, промышляя о градоемстве, хотя монастырь разорити, в нем же Троичное имя Божества прославляется и Богородицу песньми величают и преподобных чюдотворцов Сергия и Никона на молитву призывают. И заступлением Пречистые Богородицы и молитвами преподобных Сергия и Никона, не токмо что монастырю его возмогоша зло что сотворити, но и многажды на лицы своем печать от ту сущих Сергиевых воинов прием, и со многим стыдом бежав и с прочими от его обители, оружия своя ратныя и сосуды градоемныя вся тогдапогубив. Ныне же окаянный ум свой и душу погубив, войско же его все разыдеся, видя на него гневъ Божий бывший. И паки нецыи от его войска собрашася на кровопролитие православных християн, и избраша себе вместо Лисовского полковника Чаплинского, и приидоша на Рускую землю, и многи грады проидоша воююще. И паки и того вскоре суд Божий постиже в Троицкой Сергиева монастыря отчине, не далее пятидесят поприщ от монастыря его, глаголемая Вохна: ту убиенъ бысть от Сергиевых воин Рахманина Базлова с товарыщи, и войско его разыдеся. Наместник бысть Лисовскому и един обычай и гордость на православных имяху, сице и едину чашу гнева Божия испиша. Молитвами святого Сергия чюдотворцаот их окаянных рук свободи Бог православных християн. Видевше же сия, нецыи от их полку, Иван Полев, другии с ним некоторыи, свидетели и самовидцы быша чюдеси преподобнаго Сергия и сих окаянных смерти, пришедше в монастырь святаго и возвестиша сия архимариту Дионисию и братии, и поработаша во обители святаго много лет: Иван Полев по цареву указу в губных старостах, а другий возложи на себя иноческий чин и прием диаконский чин, имя ему Васиян. И препроводиста живот свой, прославляюща⁹⁰⁷ Святую Троицу и Пречистую Богородицу, и благодарение воздающе святым угодником Божиим Сергию и Никону.

К сему же неложное свидетелство обретохом, от самодержца грамоту, и сию зде приложихом, да некаконецыи разгордившеся, яко же и преже на Печатном дворе, сия в ложь вмениша и не напечаташа.

От царя и великого князя Михаила Федоровича всеа Русии Живоначалные Троицы в Сергиев монастырь богомолцу нашему архимариту Дионисию да келарю старцу Аврамью Палицыну з братьею. В нынешнем во 125-м году, октября в 5 день, писал к намъ из Стародуба столник нащ и воевода Олександро Нагово да Иван Кологривов, что сентября в 20 день пришел под Стародуб Лисовской с Литовскими людми и стояли под городом полтора дни и отошли от Стародуба десять верст. И сентября же де в 26 день приехали на наше царское имяв Стародуб Литовских людей пять человек, а в роспросе сказали, что Лисовской с воинскими людми пошол из Стародубскаго уезду в Комарицкую волость, и как будет от Стародуба дватцать восмь верст, и Лисовскому учинилася смерть вскоре: спал с коня и издох при них сентября в 25 день, на чюдотворцову Сергиеву память. Да октября же в 14 день писали к нам изо Брянска князь Иван Дашков да Василей Протопопов, что привели к ним в языцех Литвина Лисовского же полку, и тотъ Литвин в роспросе сказал, что Лисовской умер скорою же смертию, поразила ево невидимая сила Божия и богомерзскую свою душу зле изверг. И вы б, слыша такое милосердие Божие и Пречистые Богородицы и великого чюдотворца Сергия к нам и ко всему християнскому родуявное помогание, что пресветлою его памятью и невидимым предстательством таковаго злаго врага и губителя Богъ сокрушил, воздали хвалу всесилному в Троице славимому Богу нашему о Ево премногих на нас щедротах и Пречистой Ево Богоматери, заступнице нашей, и Их великим угодником чюдотворцу Сергию и Никону, и учинили бы естя о томъ предивному нашему и всему християнскому помогателю великому чюдотворцу Сергию празнество нарочно полное со всем торжеством и молили в Троице славимаго Бога и Пречистую Ево Богоматерь и великих чюдотворцов Сергия и Никона, чтоб милостивый в Троицы славимый Бог наш подал нам победу и одоление на вся видимыяи невидимыя враги наша, и царство б наше учинил тихо и мирно и безмятежно, и покорил бы Г осподь Бог под ноги наша вся языки, хотящих бранем, и братью бы есте ве[ле]ли накормить доволно. Писан на Москве, лета 7125-го октября в 16 день.

После Литовского разорения вскоре, егда свободи Господь монастырь святого чюдотворца Сергия от осады, бысть в слободе слуга именем Яков Дементьев з женою своею Наталиею. Живяста во благочестии, игры женикакие и глумления отнюдь ненавидяста, пребывающе во смирении, ходяще в заповедех Господних и к церкви Господни прихожаста выну. По случаю же некоему случися имъ негде беседовати в той своей слободе, и приидоша скомороси, начаша играти во всякие свои игры и глумитися всякими глумы, яко же их диявол научил на прелесть малоумным человеком. И приступиша глумотворцы тии к Наталии, просяще мзды своего глумления. Она же отврати от них лице свое благоумное и отрече им: глумления вашего зрети не хощу и игры бесовския не слушаю и денег не дам. Они же окаяннии, наполнившеся бесовскаго духа и разпыхавшеся на нея, отъидоша, похвалившесяи некиим дияволским ухищрением изпортивше ея, наведоша на нея болезнь люту, яко и лице ея обратися в тыл. Она же, видев на себя таковую злую напасть, не пожелав от них окоянных ползы, яко же есть в мире мнози творят, от кудесников помощи ищут, но возверзе все свое упование на Бога и на самого преподобнаго Сергия чюдотворца, яко могущаго упросити у Спаса и подати ей исцеление. И прииде в монастырь, припаде к преподобным мощем его со слезами, да исцелит ея от напрасныя тоя беды. Скорый же к помощи по молебном пении вскоре исцеление дарует ей: бысть здрава попрежнему, яко б николи же болев, отъиде в дом свой, радуяся, благодаря чюдотворца Сергия, давшаго ей здравие. По умертвии же мужа своего, по неколицех летех, в Пятницком девичье Долнем монастыре восприя на ся иноческий чин, прилежа Божии церкве, в посте и в молитве и в нищелюбии мнозе живот свой препроводив.

В лета 7141-го году велможа некий именем Богдан Михайловичь зовомый от человек Нагой, велию веру стяжав к святому Сергию чюдотворцу, и внегда приспе время отшествия его еже к Богу, приказав душу свою поминати и дом его устроить и имение его и отчины росправити Троицкимъ Сергиева монастыря властем, да брату своему Василью Иванову сыну Нагому, и сродником Семену Головину и прочим, и жене своей. В духовной же своей росписал имянно, что имения его и отчин жене и что вотчин в домъ Святыя Троицы на поминок души его в прок без выкупу. Иныя же отчины свои и двор Московский велел продати и теми денгами в дому Святыя Троицы у чюдотворца Сергия подписати стенным писмом церковь Святыя Троицы, иде же многочюдесныя его мощи лежат, да церковь чюдотворца Никона. Тии же сродницы его и жена его разделишаотчины его и имение его по себе, а о души его, како поминати и церкви подписати, малое радение показаша. Власти же Троицкие, им же в духовной написал душу свою поминати, глаголаша им: да исполнят по духовной приказ ево о церквах, яже стенным писмом написати, и о вотчинах его розправление да учинят. Они же возлюбиша века сего житие, яко порадовашася смерти его, и веселящеся о вотчинах его, яко за себя исправиша мощию своею. О строени[и] же церковном и о помяновении души его никоими мерами попечения не сотвориша и смертнаго часа не воспомянуша себе. Но суд Божий не умытен и век сей не по хотению человеческому течет. Семена Головина вскоре суд Божий постижеи от сего века отдели. Жена же Богданова, позабыв мужа своего приказ, иде за ин муж, на строение же церковнаго стеннаго писма мало от имения своего присла, яко и на един левкас, чем стены подбелить, нечего, и отчины и двор за собою удержав. Видевше же власти, иже от сродников его и от жены его разправляния и строения никакова нету, начаша монастырскою казною строити: злато и краски всякие драгия и всякое строение, яже есть к тому годно, все купиша, и мастером за труды и кормъ мастером монастырскою же казною даваша. И устроиша обе церкви пречюдно, а на стенах подписаша, яко строиша по приказу и по духовной Богдана Нагово. По устроении же, на Москве будучи, келарь Александр глагола брату Богданову Василию, тако же и жене Богданове многажды посылая о томъ говорити, да пришлют за строение деньги, иже вящее 1000 рублев положено на церковное строение монастырские казны. А вотчинами, иже написаны были продати и двор на строение церковнаго стеннаго писма, владеет жена его; а иже кои вотчины его написаны были в прок без выкупу в монастырь, чем душа его поминати, владеет Василей брат его. И се не единожды, но многажды глаголаше, такожде и святейший патриарх возбраняше им, да исправят души свои на правду и не прогневят чюдотворца Сергия. Они же аще и на языцесвоем глаголаше тихо, но сердце их не на то уклоняшеся, еже бы исправитись пред чюдотворцом и приказ Богданов исполнити: не воспомянувше смертного часу, яко им умрети же, положиша то все в небрежении. И по мале времени вскоре и Василья брата его суд Божий постиже. Некогда на Москве учинися пожар; ему же спящу в полуденное время, и послыша колокол вестовой, вскочив от сна, яко изумлен, всед на конь свой, гнаше скоро на пожар той, никим не понуждаем, ни единого человека своего не подождав, яко нуждею влеком на уреченное место суда Божия. И егда приехав к пожару, сверху скатися бревно, удари его в чело, и спаде с коня. И взяша его еле жива сущаи отвезоша его в дом его. Келарю же Александру того же полуденного времени помышляющу ехати с Москвы в монастырь и сетующу о неисполнении приказу по духовной, севшу же ему и воздремавшу, и видит в видении, яко во сне, преподобнаго Сергия и пред ним Богдана, потязающе брата своего Василия о неисправлении приказу его по духовной. И яко б Василей сниде в подгорие, Богдану же стоящу на горе, и пхнув на него з горы тоя храмину велию и падави его храмина та. Возбнув же келарь Александр от видения, трепетен бысть и сказав сия ту сущим у него и послав проведати, что бысть Василию. Посланнии же пришед сказаша, яко убиен бысть бревном на пожаре. Василий жебыв при смерти, видев на себя гнев Божий, того часа посылаетъ по келаря и плакав пред ним несоветия своего, паче же небрежения и неисправления своего по духовной. Келарь же ему сказа, како видение об нем видев. Василий же умре в покаянии блазе, и отчину свою селцо Клобуково отдает в монастырь по Богдане брате своем и по родителех своих. За прочие же отчины, иже за ним быша, приказал в монастырь деньги дати жене своей Парасковии, она же по ево приказу тако и сотворила, долг его весь исправи. За церковьную же подписку и доныне Богданова жена не давывала в монастырскую казну. Да не поставит им Господь Бог во грех, и препровадят свой живот мира сего безмятежно молитвами преподобных отец.

Во время же оно прииде с Москвы во обитель святаго Сергия помолитися чудотворцем Сергию и Никону некая инокиня, и [в] церкве Святыя и Живоначальные Троицы стояше у гроба великаго чюдотворца Сергия, моляшеся с рыданием и со слезами многими и сказываше архимариту Дионисию и прочим братиям, иже ту прилучившимся, о чудеси святагоСергия, како исцели ей очную болезнь. Житие свое сказала на Москве близ церкви чюдотворца Сергия, иже на Неглинне в Пушкарех, и прихождаше, рече, в тое церковь, моляшеся преподобному Сергию о исцелении очныя болезни, и обещаваяся во обители его быти и у честных мощей его молебен пети. По мнозе же времени явися ей преподобный Сергий, веляше обещание исполънити и итти в свою обитель. Она же обещавшися тако сотворити и в той час здравие получи. И пришед во обитель святую и перед честными мощьми чюдотворца Сергия плакаше, и многи слезы изливая, благодаря Бога и преподобнаго Сергия, подавшаго ей исцеление. И отъидездрава радуяся в путь свой.

В лета 7145-го году отрок некий именем Фома пребывая на Москве на Троицком Сергиеве подвории на Богоявленском монастыре, службу же имея крылоскую. Отец же его туто же в монастыри тружаяся на братию в поваренной службе. Завистию же бесовскою не восхоте ту в Сергиеве обителипребывати, но изыде к церкве святого страстотерпца Христова Христофора и тамо стояв на крылосе, пребывая у ерея именем Трофима. И неколико время пребыв, смятеся умом и никого от человек не знаяше. Связавше же его, по многим местом по святым водивше его многое время и нигде исцеления не⁹⁰⁸ получивше ему, донде же отец его взем паки приведе его в Сергиеву обитель в Богоявленский монастырь. И ту исцеление прием и бысть здрав, яко и преже, молитвами святаго чюдотворца Сергия и неотступен бысть от обители святого, каяся о своем согрешении, яко презре святаго обитель невежеством своим.

Зрите, братие, по сему, яко несть полезно, оставя свою обитель и своих чюдотворцов, им же обещахомся работати и милости у Спаса просити о отпущении грехов своих, и идем во иныя обители пользы искати, яко презревше свое обещание и своих чюдотворцев, им же души свои предахом во обещании своем. Не токмо ползуемся, но паче Бога прогневаем и святых его угодников. Яко же и преже зде некогда в Троицком монастыре у преподобнаго Сергия во обители некоему человеку, Емелияну именем, ходящу отсюду в Соловецкой манастырь к Зосиме и Саватию к преподобным чюдотворцем о исцелении чернаго недуга, и оттуду прииде паки недугом тем же одержим бысть много лет. И паки вторицею иде и не получив исцеления. И оттуду путем идучи близ моря на реке Онеге, спаде с судна и во глубине воды воспомянув своего чюдотворца Сергия, у него же родихся и у него же обещахся до смерти тружатись. И от него преподобнаго скоро спасение получив от потопления, вкупе же и от чернаго недуга здрав бысть, яко же и преже напечатано бысть предивное сие чюдо⁹⁰⁹. Не глаголем же сего, яко не возмогоша его Соловецкии чюдотворцы исцелити от болезни; ни, не буди то, но не попусти сего Бог, яко да навыкнут и прочии просити у Спаса милости с верою, иде же обещашася, ту и пребывают. Слышим паки от Писания, аще Иерусалим или Рим и ина святая места постижем, но без веры, ничто же бо есть, токмо труды без ползы и тщета души. С верою же аще и зде попросим, может Богъ верным своим и зде Петра и Павла и прочих своих угодников поставити и [вся] святая места показатии полезная устроити просящим у Него с верою. Яко же и зде Емелияну тому, изплошившуся милости просити на дому своем, в далней же стране заехав, при напасти попросив у святого Сергия и не погрешив, но вскоре получив. Святый бо Сергие и тамо милость над ним показав; тако же и о Фоме збывшеся милосердие святого. Сице и нам достоит ревновати и последовати Божественному Писанию и обещание свое хранити до смерти живота своего, яко же и в житии святаго Сергия преже написано: иже получивши исцеление, во свояси не возвращающеся, но работающе ту. не стужающе си по своему обещанию. Аще ли же кто и отлучится от обители святаго и паки гоним бываше кождо своим недугомъ ко обители святаго и наказуем, паки работаше, благодаря Бога.⁹¹⁰

В лета 7148-го году во обители Святыя Троицы и преподобнаго чюдотворца Сергия бысть слуга именем Богдан зовомый Дементьев. Сей отпустив сына своего именем Петра, юна суща, во град нарицаемый Тверь ко архиепископу ту сущему в службу. И неколико лет пребывшу ему тамо в службе у пресвященнаго архиепископа, и нападе на него болезнь тяжка и ума зелно изступив, яко же и людей в лице не познаваше, и ни отца, ни матере можаше возпомянути. И в таковей болезни пребысть не мало время, и до пяти седмиц молитвы⁹¹¹ изо уст глаголати не возмогоша его принудити. Последи же приведен бысть от града Твери под Троицкий Сергиев монастырь в слободу, иде же родися и воспитан бысть, к отцу своему и матери и к сродником своим, и ни тех можаше познавати, такова болезнь одержаше его. Родителие же его, видевше его, зжалишасяо нем, ведоша его в монастырь в церковь Святыя Троицы к мощем преподобнаго чюдотворца Сергия. Сему же изрывающесь от рук водящих его и не хотящу внити, но едва привлекоша его многою мощию ведомых его и держаша его крепко, донде же молебное пение исполниша о нем, и по молебном пении нача болезнь его тишети. И помале бысть здрав от болезни, отъиде, благодаря Бога и Пречистую Богородицу и преподобнаго чюдотворца Сергия.

Бе некий отрок именем Иван зовомый Махов, отца имея у себе в Рыбномъ ряду торгующа. И понужаем бысть отцем своим законному браку сочтатися, ему же не хотящу сего, но моляше родителей своих, да не понудят его. И просився у родителей своих праздновати празник преподобному чюдотворцу Сергию, иже празднуется июля в 5 день на обретение честных мощей его, и не пождавъ спутников своих, иде един, верою влеком ко святому. И на пути ят бысть от разбойник, и совлекоша с него одеяние и устремишася на убиение его. Даст же ему Господь Бог благий помысл призвати преподобнаго⁹¹² Сергия чюдотворца на избавление напасти тоя, нашедшия на него. И внегда в мысли своей толико помянув Святаго, они же немилосердии яко изумлени сташа и оружия своя изпустиша. Отведоша же его в чащу леса и привязаша его нага к древу, отъидоша. И надолзе пауком и комаром и мшицам ядуще его, и мало смерти не прием, отчаявся живота своего, и паки воспомянув преподобнаго чюдотворца Сергия и нача призывати, да избавит его от горкия тоя смерти. И видит грядущак себе старца, светолепна образом, нося с собою в руках одеяния. И свободив его от связания и дав ему одеяние и рече ему: иди в дом Святыя Живоначалные Троицы в Сергиев монастырь, и желание свое получиши. И се рек, невидим бысть. И разумев отрок той святого старца быти самого преподобнаго чюдотворца Сергия, избавльшаго его от лютыя смерти, и прииде во обитель его и, ни мало помедлив, восприемлет на ся иноческий чин и пребысть до своего живота, благодаря Бога и святаго Сергия.

В лета 7149-го году обители сея святыя слуга некий, имянем Димитрий зовомый Послужилцев, быв на монастырской службе, и на пути близ Нижняго Новагорода ятъ бысть от разбойник и веден бысть и с конем в чащу леса. Обнаживше же его, устремившась на убиение его, оружие свое наго держаше над главою его. Той же отчаявся своего живота, но⁹¹³ положив все свое упование на Всемогущаго десницу и воспомянув скорого помощника преподобнаго Сергия чюдотворца, глаголя всем во услышание: О великий Христов угодниче Сергие! помози и избави мя от горкия сея смерти! вем бо: аще хощеши, можеши мя избавити молитвами своими от напасти сея. И в мысли своей обещався ангельский образ возложити на ся. Они же сташа яко изумлени, и оружия их испустися из рук их. Внезапу же, яко нецыи от Бога посланнии, явишася боголюбивии людие и, видевше я, устремившеся и крикнуша на них. Они же оставиша его и коня его, бежаща в чащу леса и по дебрем пометаша вся, яже взяша. Той же спасен бысть заступлениемъ преподобнаго Сергия чюдотворца, спасъшаго его от лютыя смерти, и пришед во обитель его, поведа настоятелю⁹¹⁴ сия, и восприемлет на ся по своему обещанию аггельскии образ. Наречен бысть Дионисий и пребысть до смерти живота своего, благодаря Святую Троицу и Пречистую Богородицу и преподобных чюдотворцев Сергия и Никона.

В лета 7151-го году в Троицком Сергиеве монастыре созидаемым убо келарские службы каменнымъ⁹¹⁵ гостиным полатам ветхости ради на ново, иде же гостей потчиваху и иде же служебницы тоя службы иноки и миряне живуще, бысть же превозвысивше трои каменныя своды, в отделку уже устрояху близ кровли. В нижних же полатах уже живущим и потребная всякая пища на братию и мирским ту готовашеся. В обеднюю же годину зиждущии и прочии монастырьстии служебницы и стрелцы, множество человек, яко до тысящи или вящее, снидошася в нижние полаты, по обычаю пищу себе на потребу емлюще. Того бо дни братия и мирским людем всякого чину утешение в пищи сотвориша настоятели⁹¹⁶, зане молбу Богу приносяще о дожде плодовь ради земных; бысть ходь со кресты. И внегда вси людие емлюще потребная по обычаю свои участки, внезапу яко громь возгремевь, столпом бо каменым и стенамь двигнувшимся, и тии трекровныя полаты падоша до земли. Людем же всемь бежавшимь от страха троими враты, яко и по подоламь риз их камение и кирпичи падаху; инии же за градцкую стену в нижние окна метающеся. И благодатию Божиею вси спасени, без вреда толик народ бысть, и вси воздаша радостное благодарение ко Пресвятей Троице и Пречистой Богородице и преподобнымь чюдотворцемь Сергию и Никону, яко молитвами их спасени быша. Поверх же полать техь хождаше в то времяинокь некий, Исаия имя ему. И внегда полаты тая⁹¹⁷ возгремеша, он же от страха бежав поверху тех полать, ступаше ногама яко на гору, своды бо полатныя подгибахуся, и возбежавь, ста на едином угле, во усте[хь] призывая Сергия преподобнаго. И по градцкой стене сниде и той без вреда и спасень бысть молитвами святаго Сергия; внегда же сниде, падеся и той угол, иде же инокь той постоявь.

Того же лета у церкви Святыя Троицы на полуденной стране под кровлею наверху, повелением настоятелей, иконописцемь пишущим на церковной стене образ Святыя Живоначалные Троицы, с ними же и прочии мастеры травописцы и подвящики. И во время божественныя литоргии внезапу двигнушася подвязи. Мастером же скочившим на кровлю церкви чюдотворца Никона, прочим же метнувшимся на полатку Серапиона чюдотворца, един же подвящик полете вместе с подвязми, во уме своемь моляся Сергию чюдотворцу о спасении. Проглаголати же в скорости и вси от страха ничто же успеша, токмо спасени быша и благодаривша преподобных Сергия и Никона, яко молитвами их без вреда быша. Подвязи же розослашась по земли к архимаричьим кельям. Подвящик же той, яко неким поставлен, став на нозе свои. Мы же, видевше сия, благодариша Бога и преподобнаго Сергия. И написавь сия с повелением царевымь, положиша на Печатной двор с прочими чюдесы святаго. Они же не брегоша о семь, яко же преже реченно бысть, но в прилучай, а не в чюдеса, вмениша. Мы же сия паки написахом: аще и они не брегоша, но мы иде же аще седим и ходим и иде же аще обретаемся, паче же и во всем житии нашем, его святое имя во устех наших присно. Той наш присный отец нам сирым и руководитель к вечному животу.

В лето 7152-го году, идущу рекою Волгою насаду от Астрахани вверх, гостя Надеи Светешникова, приказщик же бысть на том насаде имянем Одинец. И внегда приидоша противу Казанского устия, внезапу с того насаду свалися человек в реку Волгу и вскоре погрязе, поне же трясовицею одержим бе и зело немощен. Людие же, иже ту бывшии, возопиша, и нецыи от них в малое судно метнувшеся,⁹¹⁸ и поискавше же его, и не обретоша. Мневше его утопша, возвратившеся на болшее судно, иже имянуется насад, его же в то время влекуще конатом, заезжающе завознями, яко же обычай есть. Егда же человеку тому в воде погрязшу, яко некоимпромыслом Божиим воста ветр велий, и на насаде подъяша парус и поидоша в путь свой спешно. Человек же той скорбный, быв на дне реки, в мысли своей призывая Бога на помощь, и внезапу видит инока светлообразна⁹¹⁹, сединами украшена, и взем его за руку, изведе из воды вон и постави его на брезе у реки на суше. Человек же той, мнев его Николу Чюдотворца, тако нарекая его. Святый же рече ему: ни, но Троицкого монастыря есмь, Сергий имя мне. Он же, слышав, припаде к преподобныма ногама его, слезами землю омакая; святый же Сергий к тому невидим бысть. И востав человек той, благодарив Бога и чюдотворца Сергия, спасшаго его от воды, к тому же и от болезни здрав бысть. И от Казани иде пеш, не догнав насаду своего, и прииде в Нижней Новград. Насаду же бывшув пристанищи, и у приказщика ярыжные емлюще наем свой по уговору. Той же явися приказщику и товарыщем своим; они же, видевше его, дивишася, како спасен бысть от воды, а вси его видевше, како утопе. Он же поведа нам явление преподобнаго чюдотворца Сергия, яко той изведе его на брег, к тому же и от болезни исцеление ему дарова. И слышавше вси благодариша Бога и преподобнаго Сергия чюдотворца и советовавше межи себе, даша ему достойнный наем трудов его, глаголюще: Аще, рече, и взят бысть вь его место инъ человек, но сего ради, рекоша, дати ему: уже⁹²⁰ изволил Бог милость свою над ним показати и чюдотворцем Сергием спасенъ бысть от болезни и от воды. А нам, рече, в то время Бог за молитвъ преподобнаго Сергия ветр парусный дарова, и мы, идуще на судне, в покое быша и не утрудишася: и то дело промысла Божия быти, рекша. Поведано же бысть сие чюдо иноком Дионисием, по прозванию Бирягин.

В лето 7150-го году бысть в Троицком Сергиеве монастыре счет и изыскание по наносу некоторых не боящихся Бога ту сущих. Счетчиком же имяна суть: околничей Федор Васильевичь Волынской, да дворянин Никита Панин, да дьяки Иван Федоров да Дмитрей Прокофьев, да подьячих государевых осмь человек. Пребыша же в монастыре у того счетнаго дела и до 152-го году. В начале же счетнаго дела их околничему бысть на властей нелюбие сицевого ради дела: Сестра ево родная дала во обитель святаго чюдотворца Сергия отчину свою селцо Вороново, а той брат ея Федор к духовной ея и руку приложил, и утвердишася клятвою страшнаго суда Божия, что быти вотчине их во обители Сергия чюдотворца вечно, а роду их никому не выкупити. А будет кто чрез сию клятву роду их дерзнет выкупити, и ему дати за тое их вотчину тысящу семьсот рублев в дом Святыя Троицы по них и по их родителех. И околничей Федор, позабыв клятву страшнаго суда Божия, иже сестре своей обещася и духовную рукою своею утвердил, нача властем говорити, да продадут ему отчину сестрину селцо Вороново. Власти же о сем смутишася зело и глаголаша ему: сам веси, како в духовной сестры твоея написано; мы же, рече, клятвы тоя разрушити не можем. Он же разгневася и мочию своею то селцо взял и вместо тысящи семисот рублевтолико дал сто пятдесят рублев, глаголаше бо: яко детям своим в прок устрою, имяше бо дву сынов у себе. И радостен бысть, часто празники творяше, веселяшеся во ядении и в питии, и в сурны, в тимпаны, и в трубы, и по литаврам, яко победныя радостныя игры ликоваху, под стеною монастыря приблиз⁹²¹ Святых ворот. Братия же зело зазираше о сем, но глаголати ему не дерзаше настоящаго ради времени. Но Содетелю же нашему и Спасу неугодно сия вменися: внезапу нападе на него болезнь тяшка зело. Едино око остаме и бысть недвижимо, и веком не закрывашеся, и зрение его страшно бысть, и рот искривися. Познав же свое согрешение, припадая к чюдотворным мощем Сергия чюдотворца, просит прощенияв дерзости своей и вскоре от преподобнаго⁹²² Сергия приемлет исцеление: бысть здрав попрежнему и паки к первому своему счетному делу прилежа и любовь ко всем показуя не малу. А вотчину за собою удержав, сестры своея приказу не восхоте исправити, но и похваляяся, яко бо то делом зделал, что из монастыря вотчину выкупил, и сестру свою не похваляя, на властей же укорныя речи налагаше почасту. И во мнозе возношении позабыв в сердцы си разсудити, яко животом и смертию Бог владеет, и ему же аще хощет, грады и волости дает, яко же Ему годе есть. И по мале времени суд Божий постиже: сын его умре, немедленно же по нем и другаго смерть восхищает. Той же зело оскорбися, по своих детях плача и рыдая, их же чаяв по себе наследников и вотчину им в прок готовая. Ненадежно обезчадися и у властей о вотчине прощения прося, и яко разъярився на свой нрав, вотчину продав, взяв тысящу четыреста рублев, обещания же сестры своея не восхоте исправити. Окамене бо сердце его от скупости, паче же от ярости: вотчины в монастырь не возвратив и денег не дав, яко ея ради детей избыв; таков бо нравъ сердитых. И по мале впаде в ту же болезнь, прежняго еще лютее, яко и глава ему и выя вся извратися на сторону и рот изкривися пуще прежнаго, яко и глаголати не могий. И познав свое неисправление пред Сергием чюдотворцем и еже преступилклятву сестры своея, и положи на сердцы си, яко всякое добро его и всякое дело неугодно чюдотворцем показася, покиня счетное дело, поехал к Москве, и со слезами у чюдотворца Сергия милости просит о исцелении болезни своея. И по мале бысть здрав и вскоре приехав, припадая у многочюдесных мощей преподобнаго Сергия, благодарение воздая и у властей прощение прося, отходит в дом свой. И по мале времени отходит к оному веку и погребен бысть во обители у чюдотворца Сергия.

Невозможно же и сего молчанию предати и ясно не проповедати, иже в наша⁹²³ лета, посещением Богоматери Пречистые Богородицы, за молитвъ преподобнаго отца нашего Сергия, источник воды истече ново, и благодати целебныя от того источника вси притекающии с теплою верою неоскудно почерпают, яко же и ныне очи наши зрят. Не позазрите на мя, господия мои и братия, яко юнейший аз всем вам, и дерзаю писати о чюдесех святаго. Вем бо и аз свою худость и зазираем бываю совестию и худоумием своим; паче же и греха ради моего многа тягостно ми сие великое дело есть. И не мое дело сие есть, но ваше древних и великихъ отец, еже в чюдесех преподобнаго отца нашего Сергия поучатися и насъ грубых просвещати учением и впредь будущим родом писанием возвещати. Но молюся вам, послушайте прилежно: аще аз не буду писати, а вы тако же не изволите, то от ково повеление царево исполнится и о чюдесех святаго кто возвестить, яко же и прежнии не писаша толико леть? Аще бо и грешен есмь и невежда и неискусен на такое дело, но строение ми прилежит и нужда ми есть сицево дело начати, совершитель же всякому благому делу – Отец и Сын и Святый Дух. Не древния же повести хощу поведати, но ныне в лето 7152-го году благодатию Божиею таковаго дара сподобишася и благодати целебныя и всем на потребу бысть, иноком же и мирским. Не просто же и не по прилучаю сия вода истече, яко же преже нецыи вознепщеваша, но послушайте усердно, ибо и сами весте не менши нашего. Прежнии бо власти, тако же и мы, многажды о сем попечение имеюще и посылающе в различныя времена, не единем же летом, но многажды старцов и слуг в далние городы, но Тотму и на Устюг, и с ними и деньги посылающе, да обрящут хитрых мастеров на таковое дело искусных, хотяще такое дело хитростию рукъ человеческих устроити. И приготовившу к таковому строению потребная древия и железныя снасти, надеяхомся во глубине земли такову воду обрести. Послании же наши ничто же успеша и промысл ихи долгота пути на тще бысть. Промыслитель убо Спас наш Господь Исус Христос, умолением пречистыя Своея Богоматери и преподобнаго отца нашего Сергия, иже присно сведый хотения человеком, не попусти таковому делу руками человеческими сотворену быти, но свыше благодать свою излия: таковую воду дарова не токмо на потребу телесную, но и душам нашим на просвещение, и недугом нашим на исцеление, и не на месте просте, но внутрь обители под стеною храма у паперти Пречистые Богородицы честнаго Ея Успения. Обретоша же сице: Ждущим намь от соборного старца Ионы вести от Тотмы или с Устюга, яко же преже речеся, послану быти призвати таковых мастеров х кладезному делу и потребная вся уготоевана быша, и некиим мановением Божиим у церкви Пречистые Богородицы з западныя стены у паперти мало нечто уползе кирпичие, и восхотеша починити. Внегда же мастером начинающим разбирати и кирками очищающимь, внезапу истече источникь воды чисты явно всем, яко зерцало, и всякую гнусость от себе, яко некоею силою Божиею, отделяя; елико копающе и мутяще, толико яко чистое стекло очищашеся. И того часа яко на некое удивление мнозем людемь сшедшимся и прилежно зрящимь, овии Богу и Пречистой Богородице и преподобному Сергию благодарение воздаваху, овии же не тако, но и хулныя речи изглаголаша. И во едином дни благодати Божия уверение явись. Некий инокь, именем Пафнотий, по реклу Озорной, поутру рано пришед от заутрени, болезнуя очима зелно, и возлег на одре своемь, стоня и вопия от щемоты, яко много летъ одержимь тою болезнию: единемь окомь мало видев, вторым же нимало. И мало нечто уснувшу ему, видит Пречистую Богородицу и глаголющу ему яко на яве: чем скорбиши? Он же отвеща: очима, Госпоже моя, скорблю. Святая же Богородица рече ему: иди, умыйся из новаго кладезя, иже вчера Господь вам дарова. Той же яко вне ума рече к Ней: не смею, Госпоже моя, умытися: мнози бо глаголют, яко мутна есть и непотребна. И паки второе явися ему⁹²⁴ Святая Богородица и глагола ему: иди и умыйся, яко вода чиста есть, и исцелееши. Он же возбнувь, иде и умывся тою водою и прозрев: спаде с праваго ока яко жечешуя. И пришед того утра ко архимариту и к намь, возвести о себе бывшее и сказав намь, яко уже много лет пред собою не видев, ныне же, рече, от радости возшедшу ми на градцкую стену и далеко в поле видевшу ми. И паки того же дни, яко двум часомь минувшим, приидоша ко мне, Симону, еще ми тогда казначейску службу имущу, слуги Ивань, зовомый Мешков, да Емельянь Тимофеев и поведающе ми, яко видеша они слугу, именуема Первово Лопухина, болна суща, плачюща и вопиюща м олящуся им: да отвезут его к новоявленному кладезю и покропят тою святою водою; яко вчерашняго дне с прочими пиль аз и похулил ту святую воду, в неверии своем мнев, яко инокь той не от нея исцелев очима, но вся сия во лжу именив, и мнози глаголы неподобны изрече. И едва доведен бысть от друзей, и вниде, рече, яко мраз в сердце мое и весь разслабе. Еще же им глаголющим, пришедше возвестиша, яко испусти дух свой. Мы же, слышавше сия, благодариша Пресвятую Троицу и Пречистую Богородицу и преподобнаго Сергия, и повелеша сия написати, а над водою повелеша кладец обделати, еже и доныне зрим есть, и возвестиша о сем самодержцу царю государю и великому князю Алексею Михаиловичю всеа Русии и святейшему Иосифу, патриарху Московскому и всеа Русии. И с повелением их отдаша сия на Печатной двор, да напечатают в книгу его с прочими чюдесы. Печатники же не вемы коего духа наполнишася, не вмениша сегов чюдеса быти, но прилучай⁹²⁵ быти рекоша. Нужд ею же, повелеваеми быша, напечаташа, но не подлинно и не по истинне, яко же и преже речеся: и то не во многих книгах объявлено бысть, в прочих же во всех не приложиша. И елико они восхотеша утаити от человек о чюдеси сем, толико Бог паче прославляше угодника своего, яко же очи всех зрят, какова благодать и доныне от сея святыя воды изливается.

Поведа нам дияк государев Григорий Одинцов: Во 152-м году болезнующу ми, рече, нутреннею болезнию зело, и протяжеся сия болезнь на много время, яко мнети ми в той болезни и смерть прияти. И в молитвах своих призывающу ми святаго чюдотворца Сергия, скораго помощника, прося помощи о неисцелней своей болезни, внезапу же от некоего знаемаго мне от чюдотворцовы Сергиевы обители прислана ко мне просвира и мед чюдотворцов Сергиев и святая вода. И прием сия с радостию, вкусив просвиры и меду и водою болные места покропив и молитвами святаго Сергия здрав бысть. И сего ради, рече, приидох преподобному Сергию помолитися и о чюдеси святаго Сергия чюдотворца возвестити. Мы же сия сълышавше, благодаривше Святую Троицу и Пречистую Богородицу и преподобнаго чюдотворца Сергия.

Поведа нам инок Дионисий, зовомый Бирягин: Бывшу ми, рече, в прошлом во 153-м году в нижних градех, иже по реке Волге, и в то время идущу насаду государеву вверх рекою Волгою з государевою рыбою, и егда, рече, взыдоша выше града Самары яко до седми поприщ, и в то время Бог дарова ветр поносен. И подъемше парус, идоша в путь свой и от радости седоша на насаде, мнози же седоша на краех паруса. И внезапу дунув ветр силен и удари напрасно в парус, и тем парусом сверже с насаду на воду 17 человекъ и нача в реке утопати. Прочии же людие, с насаду в малых судех елико могуще извлекше их; двум же человеком от очию тех невидимымъ бывшим, мневше утопшим им, оставиша их, взыдоша на насад, скорбяше об них и в мертвых вмениша их. Тема же носящемася по волнам от солнечного всходу мало не до полудне, друг друга видевше на водах, но не близ себе, яко же последи сами сказаша, прочих же никого не видевше, от кого б помочь прияти. И вложи им Бог в сердце призывати чюдотворца Сергия на помощ, яко да избавит их от потопления. И на мнозе утомишася от волнения, быша яко мертвии, и некоею силою Божиею обретошася на брегу реки Волги межу камения велика, лежащим безгласным оба приблиз себе, ниже града Самары яко пять поприщ. Един же от них видитх инока боголепна, седа брадою. И рече ему: благодарите Бога, спасшаго вас от потопления. Он же его вопросив: кто еси, господи? Святый же рече ему: аз есмь Троицкого монастыря смиренный Сергий. И невидим бысть. Той же яко от сна возбнув, востав и седе и виде и подруга своего, лежаща близ себе⁹²⁶ еле жива, и подняв его, поведа ему преподобнаго чюдотворца Сергия явление. И помалу от истомления отраду приемше, начаша ходити. Боголюбивии же людие, видевше их спасеных от воды, емше и отвезоша их во град Самарский. Ту же быв приказщик насаду того и взем их на малый свой струг, отвезе на свой насад, с него же и спадоша. Видевше жевси людие насаду того и слышавше от них, како спасени быша, воскликнуша вси радостными гласы, благодарение Богу воздаша и преподобнаго Сергия чюдотворца ублажиша, спасающаго от бед и напастей уповающих на него. И дивишася милосердию Божию, яко толико далеко на волнах носими вниз реки Волги и спасени быша молитвами святаго Сергия.

В лето 7156-го году инокь некий послан бысть ото властей из Сергиевы обители болшого монастыря, Нифонть именем зовомый Кобылинь, и прочии с нимь служебницы на Вологду, в монастырь глаголемый Авнежский, иже под паствою того же болшого монастыря у властей. И егда град Ярославль минув и отьехавше неколико поприщь, утру еще глубоку сущу, нападоша на них разбойницы и, связавше ихь, пометаша в снегь, а инока того в санях начаша душити треухом его, иже зимняя ради студени на главе своей имяше. И уже духь в немь заимашеся, яко же последи сам сказавь, и воспомянувь скораго помощника преподобнаго великаго чюдотворца Сергия, и во уме своемь моляся преподобному сице: о великий Сергий! виждь, яко погибаю напрасно и ни от кого имею помощи; ты же, преподобне, помози ми и избави мя от горкия сея смерти милосердием своим! И в то время отскочиша от него, яко некоею силою Божиею разгнани, топорки и бердыши в руках имуще; один же от них имея в руках ножь велий, хотя его проколоти; и много стояще и советующе о немь, и молитвами святаго Сергия защищень бысть от них. Седше разбойницы на их санех, побегоша поскору, оставивше его в одной свите, на ногах же чюлки едины оставльше. Той же инок и служебницы, розвязавшеся, идоша вспять, от зимы померзаеми, паки вопиюще, моляхуся преподобному Сергию, да поможет и спасеть безпомощныхь от належащия на них беды. И внезапу наехаша по них мнози люди, празны сани имущи, и умилосердившеся о них, давше им платие и вземше их к себе в сани, и отвезоша в Троицкой Сергиевь монастырь и явиша их пред нами. Они же возвестиша нам случшаяся на них и яже о Бозе спасение прияша молитвами святаго Сергия. Мы же, слышавше сия, благодаривше Святую Троицу и преподобнаго Сергия скораго помощника.

В лета 7158-го году во обители Святые и Живоначальные Троицы и у великих чюдотворцовь Сергия и Никона создана бысть каменная наугольная башня, иже на Житном дворе. И плотником начинающемь тое башню крыти и на кровлю лесть воротом подымающе, единому же от них стоящу на башне поверхь окон, иже нарицаются зубцы, и конать з башни на землю опущающу, рукама своима потягаше. Прочии же ворот поддерживающе, не вдругь конат опущающе, внезапу же ослабеша руки их, опустиша вороть, и вертетися нача. Тому же, иже на зубцах стоящу, изплошившусяполетев з башни стремглавь, конат в руках имуще. Увидевши же его прочии, иже⁹²⁷ на башне и иже на земли, возопиша; тии же скоро паки за ворот емшися, и укрепиша ворот. Падший же, мало до земли не долетев, повис, держася крепко рукама своима за конат, и паки на том же конате подняша к верху тем же воротом и на башне приемше его здрава, рукама оцепеневъша, держася за конат. Слышавше же мы благодариша Бога и Пречистую Богородицу и преподобных чюдотворцов Сергия и Никона, яко с толикия высоты летев, и паки к верху подъемша его невредима. Высоте же бывши 14 саженей.

Того же 158-го году государя царя и великого князя Алексея Михайловича всеа Росии околничей Михайло Алексеевич Ртищев поведа нам сицеву повесть о чюдеси чюдотворца Сергия: Идущу ми, рече, со царем и великим княземъ Алексеем Михайловичем всеа Росии в походе во град, нарицаемый Углечь, и зело изнемогающу ми нутреною болезнию, яко и чрево мое из утробы лоном моим изыде вон; сия же болезнь протяжеся два лета. В таковых же болезнех призывающу ми на помощ дивнаго в чюдесехъ преподобнаго чюдотворца Сергия, просящу ми облегчения, и покропи те скорбныеместа водою новоявленнаго кладеся из Сергиевы обители, что у церкви Пречистые Богородицы в стене. И которые места покропил, и того часа облегчишась. Не доставши же тоя святыя воды и неких скорбных местъ покропити было нечем, и зело те места болезноваша, и стражущу ми люте. Егда же посланнии привезоша ми, и покропившу ми та, и совершенное исцеление прием, молитвами Пречистые Богородицы и преподобнаго чюдотворца Сергия, и чрево мое и лоно оздравеша и быша в старом существе, яко от рожения. И сия пред архимаритом и пред нами со слезами исповедаяся, яко на Углечь мимо монастырь грядый исцеление прием и не известив от радости, чюдяся скорому исцелению, поведати ж боясявскоре, еще бо неверие в сердцы сохраняя, поминая тягость болезни, и в том прощения прося. И сего ради приидох от града Углеча преподобному чюдотворцу Сергию поклонитися у многоцелебных мощей его и вам возвестити сия, яко благодатию Святыя Троица и Пречистыя⁹²⁸ Богородицы и преподобнаго чюдотворца Сергия здрав бысть от тоя болезни.

Во оно жь время прииде во обитель Святыя Троицы болярин Михайло Михайловичь Салтыков помолитися и по молебном пении поведа нам: Яко болезнующу ми, рече, в лете сем зелно главною болезнию, и от многия пухоты, сказав, и очима моима зрак изменися и многи дни света не видев, и во мнозей болезни призывая на помощ скораго помощника великаго в чюдесех Сергия преподобнаго. И слышав, яко во обители его есть кладезь, молитвами его ново истече, иже в стене у церкви Пречистые Богородицы, и тоя воды привезоша ми, и умывся тою водою, и того часу молитвами святаго чюдотворца Сергияздрав бысть, и свет очима моима Богъ дарова, яко же и преже.

В то же время поведа нам болярин Лаврентей Дмитреевичь Салтыков, яко дщи ему бе девица и болезнова телом зелною немощию, яко и живота ей уже отчаявшуся в таковых болезнех. И слышавшу ми, яко у Сергия святаго есть новоявленный кладезь и пославшу ми по нея; и егда привезоша тоя святы воды, и покропившу ея, и того часа нечаемое спасение получи: быстьот болезни здрава, яко же николи не болев. И сего ради, рече, приидох молитись преподобному чюдотворцу Сергию и вам возвестити. Мы же, сия слышавше, благодарение воздаша Святей Троице и Пречистой Богородице и преподобному Сергию чюдотворцу дит очивесть преподобнаго Сергия, по морю ходяща⁹²⁹ и морским волнам запрещающе: не вредите, рече, лодьи сея, поне же людии сии, иже в ней, на моем имени суть. И видев то, сотник сказав нам свое видение: и оттоле море не волнуемои тишина бысть. Мы же, рече, быхомъ благонадежны и воздаша благодарение Богу и Пречистой Богородице и преподобному Сергию, скорому помощнику, и молебное пение воздаша, и радости сердца наша наполнишася, и в пристанище неволнуемое приидоша, о имени святаго спасени быша.

И паки той же князь Семен поведа: егда приидоша, рече, в пристанище, и призвав преподобнаго Сергия чюдотворца на помощ, сотворив тому самому преподобному Сергию кондаки и икосы по подобию неседалных. И егда прииде к нам в Сергиеву обитель, сия с собою принесе и положив пред архимарита и пред нами. Нам же видевшим сия, повелевшим списати на новыя тетрати книгописцу Ивану, зовому Бабику. Той же Иван, написав те кондаки и икосы, принесе ко архимариту и к нам и поведа нам сице: Егда, рече, написавшу ми та, и в вечеру единыя страницы не дописав, и нынешняго утра рано повелевшу ми жене своей огня добыти, яко день настояй праздника Стретения Господа Бога и Спаса нашего Исуса Христа, хотящу же ми и страницу ону дописати. И еще ми на постели своей лежащу и ожидающу огня, и помышляющу во уме своем, будет ли, рече, угодно сие писание преподобному Сергию. И бывшу ми в забытии и видевшу ми видение, сице яко во сне: в келарской келии архимарита Андреана купно с келарем и с казначеем стоящих и глаголющих ко образу Святыя Троицы: о ПресвятаяТроица! угодно ли будет Твоему человеколюбию почитатися писанием сим угоднику твоему преподобному Сергию? Мне же мневшу стояти в заднем угле и слышах глас, от восточныя страны пришедш и глаголющ: достоит, рече, писание сие к чести и похвале преподобнаго Сергия угодника Моего почитати. И возбнув бысть в размышлении и прииде к вам поведати, вкупе же и тетрати написанныя принесе. Мы же, слышавше сия, повелеша речи его написати, и те кондаки и икосы и книгописцовы речи, яже сказа нам, послаша на свидетельство ко святейшему Иосифу, патриарху Московскому и всеа Росии.

В лето 7158-го году града нарицаемаго Кашина, веси же глаголемая Ильинское, приде помолитися в дом Пресвятые Троицы и великих чюдотворцов Сергия и Никона иерей некий с подружием своим и поведа нам о чюдеси святаго чюдотворца Сергия сице: Бысь, рече, подружие моя разслаблена телом много лет, яко ни двигнутися можаше. В такове же неисцелней болезни подружия моя нача призывати преподобнаго Сергия чюдотворца на помощ; вкупе же она и аз обещаховеся итъти ко обители его и гробу его поклонитися, аще исцеление подаст. Вскоре же нечаемое исцеление получив, бысть здрава. О исполнени[и] же обещания замедление⁹³⁰ сотворихом, поне же дние недели Сырныя настоящии и святей Четыредесятнице приближающеся, и не поспешихом ко гробу святаго приити и поклонитися, яко же обещаховеся. И помале паки подружие моя разслабе телом горшее прежняго. Мы же, рече, плакахомся лености своея и паки преподобнаго Сергия на помощ призывающе, да отдастъ нам согрешение, и обещавшеся вскоре обещание свое исполнити. Скорый же в помощи преподобный Сергий паки исцеление дарует, яко николи же не болев. И на первой недели в пяток приидоша во обитель его помолитись Сергию чюдотворцу и чюдотворным мощем его поклонитися, яко же обещаеховеся, и возвестиша сия архимариту Андреану и нам, яко молитвами святаго чюдотворца Сергия от болезни спасена быс[та].

Некогда убо прииде во обитель Святыя Троицы нощию человек завомый Девятой, и возшедшу ему на паперть к церкве к чюдотворцу Сергию, иже на вратех, и дияволским запинанием, забыв страх Божий и чюдеса преподобнаго Сергия, отвязав два колокола малых, помыслив тем себе корыстьприобрести. И един колоколец положив в колпак свой, другий же в руку своею держаще, хотя итти, яко же последи сам сказа, и не попусти ему сего чюдотворец Сергий сотворити: в забыть впаде и погубив ум. Един колокол на паперти на полу испустив, други[й] же понес в руках своих и на половине лестницы в колпаке своем поставив, яко вне ума своего хождаше, и с монастыря сшед, никто сего не очютив. По утру же возшедшу церковницы и колокола взявше и колпакь принесше, и возвестивше случшаяся. Мне же повелевшу той колпакь взяти стрелцом и в монастырских вратех явно положити и входящих вопрошати, аще знають, чий есть той колпакь. Той же тать яко некоею силою Божиеювлеком ко обличению, позабыв промысла своего дело, пришед поимався за колпак, паче же и самого помавше, его приведоша, и испытань бысть. И аще же и не хотяше, но исповеда сам о себе вину свою и каяся со слезами о своем согрешении, глаголя: яко прелестию дияволею дерзнув на таковое беззаконное дело, и не попусти мя на се Бог, внезапу омрачився умом и хождаше, яко сплетен, ни мало памятуя о себе. Повелевше же обычным наказаниемь смирити, да накажется впредь таковая не творити, пустивше его, а чюдотворцу Сергию благодарение воздающе, яко обитель присно храняще и лихоимцев страхомь огражая, яко да навыкнут и прочии не творити таковая.

Не в давных же летех и сие чюдо случися во обители святаго Сергия, яко пятим летом минувшимь или и мнее, сице: ехавшим Сергиевымь слугам Василию Карсакову да Олексею Бужанинову и прочим приблизь монастыря, и учинися у них вражда боярина Никиты Ивановича Романова с крестьяниномь з Богданом Окуловым, да Юрьева Полского соборного протопопа с крестьянином. Тии же приидоша к нам в монастырь, сотвориша жалобу и приложиша поклеп велик не по мере тех слугь живота и не по мере своего живота. Мы же монастырских слуг не по малу смиряше монастырским смирением за вражду ту; о поклепе же не внимаше, поне жене искупимь поклепь той; им же глаголахом, чтоб они смирилися с ними на правде, а поклеп⁹³¹ отложили. Они же паки часто прихождаше к намь и не хотяше иску ни единого пенязи убавити. Слуги же в томь их иску многое время в заточении пребыша. По некоему же времени прииде в домь Святыя Троицы помолитися бояринь Никита Ивановичь Романов; крестьянин же Богдань с товарыщем своим паки ту вопияше нелепым гласомь к боярину и к нам на тех слуг, с клятвою глаголаше, яко ограбиша их и вся взяша, яже сказываху. Боярин же глаголя властем со гневомь, яко сверхь иску их много убытку в частомь хожении учинися имь. Мы же к нему рехом: неискупимь искь затеяв и счет и не против своих животов. Много же и бояринпретяше им з гневом, да скажутъ правду, а поклеп да отвергнут и смирятся на правде. Они же нимало к правде не обратишася, единако кленущеся именем Сергия чюдотворца, яко вся, глаголаша, взята быша, еже глаголахом. Тако же и слуги кленущеся именем Сергиевым, яко ни единому пенезю невинни быша. И тако идущим им мимо церковь Святые Живоначалные Троицы, у обоих Сергиево имя во устех, и как будутъ против северных дверей, внезапу восторже дух того Богдана и ударив о землю, валяяся, и пены течаху от уст его, вопия и трясыйся. Видев же той подруг его протопопов крестьянин, бежав трепетен, возвести боярину всю истинну, яко поклепаша слуг напрасно. Сведен же бысть Богдан той за монастырь, повезоша его во свой дом, и тамо вскоре смертную чашу испив. Слуги же отъидоша, ублажающе преподобнаго Сергия, свободившаго их от напрасныя беды.

В лета 7160-го году инокиня некая, именем Феодосия, ту сущи близ монастыря чюдотворца Сергия, под горою, у Пречистыя Богородицы честнаго Ея Введения и мученицы Христовы Парасковеи пребывая с прочими сестрами. И бысть в раслаблении, яко пол ея главыи рука и нога и вся страна обмертве, яко и огня прикоснувшуся не чюяше, и языком немствоваше. не могии ничего проглаголати. И двигнутися о себе не можаше, но мноземи людми поддержима, аще хотяше ея куды с места на ино место двигнути. Пища же ея чрез два или три дни мало хлеба и воды, и то от чюжих рук питаема бываше. Жалостно же бе видение ея, яко от горести сердца своего покиваше главою и взираше семо и овамо, со слезами воздыхаше, очима своима болезнь неистерпимую показоваше своим, иже у нея беша, и назнаменуя яко бы смерти себе⁹³² желаше. И такова болезнь ей протяжеся на много время. И по времени том нача рукою указывати дщери своей, да отвезут ея в монастырь к мощем чюдотворца Сергия. Они же, разумевше желание ея, мноземи людми едва в сани возмогоша положити ея, и привезше, подъемше на рукахъ своих, в церковь Святыя Троицы введоша ю с нужею, и начаша пети молебен. Ея же хотяше посадити зелныя ради болезни. Она же не хотяше, но крепку надежду положив на Святаго, поддержима бяше на руках брегущих ея и нача укреплятися на свои нозе. И по молебном пении отвезоша ея в Долней девич монастырь, иде же преже бе, и слушав литоргию, помалу нача отступати от поддержащих ея и укрепися, стояв всю литоргию сама о себе. И язык ея отверзеся, нача глаголати, и бысть от немоты язычныяи от раслабления здрава и глаголаше всем явно во услышание. И иде в келию свою сама о себе, радуяся душею. Видеша же все таковое преславное чюдо, благодарение воздаша Святей Троице и Пречистой Богородице и преподобному⁹³³ чюдотворцу Сергию.

Нынешнаго 160-го году по седмотысящном лете, преже праздника Святыя Троицы за едину седмицу, в день суботный, случися пожар под монастырем на Воловом дворе сице: Изволением суда Божия востабуря велия, и дождь, и гром, и молния толико, яко от страха и очию возрети невозможно, вси бо бежаша и укрывающеся во храмех, елико кто иде же возможе убежати. И тою грозою запалися двор Воловый небесным огнем и пламень велий изыде, яко во мгновении ока половину всего двора охватив. Людем же збегшимся множеству, пособити же не возмогоша, но ни⁹³⁴ силный дождь возможе того пламени угасити, ветру же велию дыхающу и потягающу на служни слободы, и головни с огнем ветром ношаше. Егда же доспевше с образом преподобнаго чюдотворца Сергия, его же и всегда в ходу ношаще, и сташа противу ветру, дивно же чюдо бяше зримо во очию нашею. БлагодатиюБожиею яко устыдеся огнь, от образа преподобнаго Сергия отврати и потягнув ветр на горелое место и досталные храмины на томъ дворе на половине целы осташася, покаместа образом Сергиевым засташа. Мы же, сия видевше преславное чюдо, благодарение воздаша Святей Троице и великому чюдотворцу Сергию, творящему предивная чюдеса молитвами своими.

Нынешняго же 160-го году прииде ис Казани диякон некий именем Илия во обители Святыя Троицы и преподобному чюдотворцу Сергию поклонитися, у преподобных мощей его, исповеда нам о чюдеси святаго сице: В прошлом де во 158-м году случися мне болезнь и в той болезни закосне языком, с нужею едва могий проглаголати. Да у него же, сказал, дщерь девица Анна убилася и переломила спину, и гнойныя язвы на спине неисцелныя беяше и ноги скорчены имуще, и в той болезни ей шестому году исполняющуся. Мы же, рече, в таковых болезнех обещашася Пречистые Богородицы образуКазанскому молитись и преподобному чюдотворцу Сергию в Казани певше молебен. И молитвами Пречистые Богородицы и великаго чюдотворца Сергия язык мой исправися и нача глаголати право; тако же и дщери моей девице Анне ноги от корчеты исцелеша и гнойныя язвы очистишася, и быхом здравы. И сего ради, рече, приидох в дом Святыя Троицы по обещанию своему помолитися и у преподобных его многоцелебных мощей поклонитися. И своею рукою написав, даде нам писание. Мы же, слышавше сия, прославиша Святую Троицу и Пречистую Богородицу и предивнаго в чюдесех чюдотворца Сергия.

В лета 7160-го⁹³⁵ году на праздник преподобнаго чюдотворца Сергия, сентября въ 25 день, прииде в дом Святыя Троицы и преподобнаго чюдотворца Сергия помолитися з государем царем и великим князем Алексеем Михайловичемъ всеа Русии святейший Иосиф, патриарх Московский и всеа Русии; купно празднество пресветло учиниша, яко же обычай есть, и братия учрежения прияша по царской милости. Святейший же патриарх Иосиф, призвав архимарита и нас, возвещает о чюдеси преподобнаго чюдотворца Сергия сице: Одержаша мя, рече, нутреныя болезнилюты и щемота неистерпима утробе моей, яко не мощи ми николико сну прикоснутись на мнозе. И молящу ми ся преподобному Сергию, да поможет и упросит у Спаса терпение в немощех моих, паче же от него прося исцеления болезнем моим, и во мнозех изнемоганиихъ бывшу ми, рече, в забытии, мня сон зрети: грядущу ми, рече, яко на яве поклонитися мощем преподобнаго Сергия. И егда, пришед, припаде к преподобнымъ его мощем, нача молитися со слезами, прося помощи, и внезапу увидевшу ми преподобнаго Сергия чюдотворца воставша, и в раке своей седяща, и рукою мя благословляющу, и к себе к вечному покою призываше мя, и болезни моя вся осязав. Аз же, рече, возбнув, ничесо же видев, а болезни моя облегчишася, и здрав бысть, яко бы николи же болев. И востав от одра своего, нача благодарити Бога и преподобнаго чюдотворца Сергия, яко облегчение прием от болезни молитвами его святыми. И помыслив того дня послати во обитель святаго взять просвиру и меду чюдотворцова и воды новоявленново кладезя, и егда помышляющу ми о сем, и хотяще послати того ради нарочно, внезапу в том часе поведаша мне, яко от васъ соборной старец прислан, вся сия нося с собою, и принесе ми. Аз же сия прием, в болшое удивление внидох и чюдотворцу Сергию благодарение воздах, и сего ради молих самодержца и на праздник сей прииде благодарениевоздати. Мы же, слышавше сия, радостни бывше душами, и веселия сердца наша наполнишася, яко таковаго чюдеси сподобишася слышати от первосвятителя в наша лета содеявшася. Святейши[й] же Иосиф патриарх мног вклад, златоглавы и прочия вещи в Сергиеву казну принесе, тако же и хлеба много числом мер обеща дати братии на корм, еже и бысть. После его святителскаго еже к Богу отшествия самодержец царь и великий князь Алексей Михайловичь всеа Рос[и]и обещание ево исполнил, повеле дати по нем десять тысечь четвертей ржи братии на корм и повеле по нем по вся дни в двух церквах литоргию служити, донеле же и обитель Сергиева стоит.

Того же 160-го году июля в <…> день прииде в дом Святыя Троицы помолитися, преподобнаго чюдотворца Сергия мощем поклонитися болярин князь Алексей Михайловичь Лвов, и по молебном пении возвещает архимариту и братии о чюдеси Сергия чюдотворца сице: Болезнующу ми, рече, пред сими деньми не за много утробною немощию, яко и двигнутися ми не могущу, и во мнозе болезни воспомянувшу ми преподобнаго чюдотворца Сергия прежнюю к себе милость: таковым же болезнем двоекратное исцеление прием в прежнихлетех за много лет от сех мест, и властем тоя обители не возвестив. И о сем скорбящу ми и призывающу⁹³⁶ ми святаго Сергия чюдотворца, прося помощи и облехчения болезнем, и егда; рече, от вас привезоша ми чюдотворца Сергия просвиру и меду чюдотворцова и воды новоявленного кладезя, и пев молебен чюдотворцу Сергию, причастился просвире и меду и водою окропился, благодатию Божиею и молитвами святаго болезни моя облехчишась. И сего ради приидох во обитель святаго помолитись чюдотворцу Сергию и чюдотворным его мощем поклонитись и о чюдесех его о прежних и о нынешнем возвестити, яко молитвами его трегубо исцеление болезнем своим приеми благодарю Бога и святаго Сергия, исцелевающаго мя.

В лета 7160-го году бывшу ми ныне в Троицком Киржатцком монастыре, иже под паствою того же болшого Сергиева монастыря, и поведа мне ту сущий строитель инок Нифонт, зовомый Кобылин, о чюдеси чюдотворца Сергия сице: Бысть, рече, у них церковник, именем Иоаким, одержим трясовицею, яко от весны до полулета протяжеся та болезнь в нынешнем лете, и среди монастыря поверзаяся и многое время лежав, едва аще кто помиловав отведет его до келии. И тако болезновавше ему зелне, мне же, рече, в то время желание наиде написати тропари храмом и местным образом для приезжих богомольцов; обычай бо сия глаголати и поклонитися образом. Той же церковник Иоаким такому делу искусен писец, но немощи его ради не глаголах ему о написании тропарей, мнев, яко оскорбится на мя болезни ради своея. И по мале времени идущу ми монастырем, ему же лежащу на земли, еле живу сущу, ах же рече ему от простоты сердечныя: вскую лежиши тако празден? иди, рече, и напиши тропари Богородицеи прочим храмом, иже во обители сей и местным образом. И прирече ему от себе яко на глум, а не истинну: мне, рече, явися инок боголепен и глагола ми: рцы ему, аще напишет тропари ты[и], будет здрав от болезни тоя. Он же, слышав от Мене сия, веру ем и чудотворца Сергия нача призывати во устех своих, и надежду свою на него положив, с радостию начать писати. И молитвами святаго чюдотворца Сергия поможе ему Господь Бог: написав на листы, и принесе в церковь и по чину к местным свечам прилепив, яко да приходящии молитися сия тропари Господеви и Пречистой Богородице и святым Его угодником усты своими глаголют и милости просят. И в том часе молитвами преподобнаго чюдотворца Сергия болезнь ему та облехчись, и бысть здрав. Мы же, сияслышавше, благодарение воздахом Святей Троице и Пречистой Богородице и преподобному Сергию чюдотворцу, и в чюдесех Святаго и сия написахом.

Нынешняго 161-го году по 7000-м лете писал ко мне, келарю Симону, с Москвы князь Семен княжь Иванов сын Шаховской о чюдеси великаго чюдотворца Сергия сице: Случившуся на самый праздник его, сентября в 25 день, в вотчине его пожару быти велику, и нецыи хоромы на его дворе огнем объятым бывшим, и ветр велий потягаше на церковь Божию и на его хоромы. И огненныя пламы уже приближающеся, и во отчаянии всем бывшим и пособити множеством людей не возмогшим, той же князь Семен, воспомянув прежнее чюдо – не в долзе времени пред тем бывший пожар под стеною того самого обители Сергиевы на Воловом дворе, иже от образа его ветр возвратися вспять и угасе огнь, и яко Богом наставляем, взем образ Сергия чюдотворца, иже у него, и став противу огненнаго пламени и нача икосы говорити своего творения. И молитвами преподобнаго Сергия внезапу возвратися ветр на горелое место и угасе огнь, и иже заста Сергиевым образом церковь и хоромы оставшая уцелевша от огня. Мы же, прочетше его рукописание, благодарение воздаша Святей Троице и Пречистой Богородице и преподобному Сергию, и повелехом написати сия, да незабвенна будут чюдеса преподобнаго чюдотворца.

Лета 7161-го году поведа нам иеромонах некий, Аврамий именем, зовомый Лютиковский, о чюдеси святаго Сергия чюдотворца сице: Не в давных летех бывшу ми, рече, во обители преподобнаго Сергия чюдотворца, держащу чреду иерейския службы, и учинися ми во сне правое ухо, яко воды наполнилося, и от того глухота напала, яко не слышав церковнаго пения, ни человеческаго глаголания, и до шти месяцов. И по днех неколицех, приспевшу всенощному пению, и прииде мне преже благовесту церковного в слух звон великий во вся тяжкая колокола. И востав борзо, текох от радости к соборной церкве Живоначалные Троицы, иде же мощи преподобнаго Сергия; двери же церковныязаперты, не убо бе время пению. И постояв мало, снидох в келию свою, дивяся бывшему чюдеси, и нача моление приносити к преподобному Сергию чюдотворцу, помышляя в себе незапное слышание во ушеси своем. И егда по благовесту вшедшу ми в церковь Святыя Троицы, и припадох к мощем преподобнаго Сергия чюдотворца, со слезами моля и прося совершеннаго исцеления от глухоты, и приложився тем правым ухом к мощем святаго, и в то время яко вред некий явися в моем ухе и открыся слух во ушеси моем. И шед во алтарь, во ухо себе влия⁹³⁷ святыя воды, и совершенное исцеление прием молитвами преподобнаго Сергия чюдотворца.

Лета 7159-го году делающим монастырским зодчиям здание каменного града Каличьих ворот, старым бо вратом розобраным бывшим, новой же основе⁹³⁸ бут готовляшеся. И еще на шуей стране старой стене подсечене бывши ветхости ради, хотяще новую стену здати, и внегда уготовавшим конаты и на зубцы наложившим, и подпоры бревна и стрелы выметавшим, протягоша конаты многолюдственным собранием, яко до 500 человекъили и вящее, хотяще старую стену свалити в подгорие скорости ради здания каменного дела новой стене. Ту же и мы прилучившася. И от служащих некоему, имя ему Костянтин Селижаров, стояв близ стены тоя, кирку в руках имый и от мнозех окликан, да отступит, ему же не вем како исплошившуся, не успев отбежати, засыпавше его стеною тою. И жалостно бяше видети, паче же и стонание его слышати: едина глава свободна, а то весь засыпан, яко гора на нем бысть⁹³⁹ камения, прося помощи, паче же меня, келаря Симона, на имя призываше. Нам же всем призывающим преподобнаго Сергия, и приступльше мнози розобраевше от главы и утробы его и до ног, взяша его жива, не задавлена камением, толико от кирки правую ногу повредив. И по малу от болезни молитвами преподобнаго Сергия здрав бысть, яко и прежь. Мы же, видевше сие предивное чюдо, благодарение воздахом Пресвятей Единосущней Троице и Пречистой Богородице и преподобным Сергию и Никону⁹⁴⁰.

Во дни благочестиваго царя государя и великого князя Михаила Феодоровича всеа Русии прииде в дом Святыя Троицы и к преподобным чюдотворцом Сергию и Никону молитися болярин некии⁹⁴¹. И по молебном пении, бывшу ему в трапезе, нам же по чину монастырскому поставляющим ему пищу и питие, яко же есть обычай в Сергиеве обители честных боляр почитати, и в то время случися межи нами речь о чюдесех преподобнаго Сергия. Той же болярин, слышав глаголемая межь нами, поведа нам о чюдеси преподобнаго Сергия сице: Случившу ми ся, рече, ис Костромского уезду из своей вотчины ехати к Москве после Московского разорения вскоре, и егдадоехавшу ми великия реки глаголемыя Волги, ей же ново померзши, и стоявшу ми на брезе со всеми своими от утра и до навечерия, и недоумевающимся, что сотворити. Нужда мя велия к Москве ехати понужаше, но взирая на таковы[й] стропотный путь, помышляющу ми возвратитися вспять. Внезапу же приехаша последи нас Троицкого Сергиева монастыря християня на санях, десеть их или вящшее, из Костромских же сел, иже приблиз моей отчины живущим и почасту с моими християны в соседъстве в межуусобных ссорах бываху, и сего ради мне на них негодование имущу. Тии же вопросиша нас: уже ли кто от человекъ чрез реку Волгу ездиша? Мне же к ним рекшу: поедите, никоего страха в себесодержаще; аз, рече, зжидаюся с своими людми; мнози же при нас сего дне переехаша. И перстом им показуя, иде же ехати. Они же, емше ми веру, седше на сани, призвавше чюдотворца Сергия имя, удариша бичами лошади своя, поехаша друг за другом. Дивно же бысть видети во очию нашею: леду под ними прегибающуся зело и паки после них воставающу, и на брег выехаша. Мы же на них сматряше, восхотеша ехати и начаша по единой лошади с санми з горы спущати тем путем, тако же на десно и на шуе всяко пытающесь. И не токмо лошедь с санми лед подъимаше на реке Волге, но ни пещ человек возмогаше на леду нозе свои утвердити: подо всеми людми лед подламывашеся, и едваот потопления избыхом, а истомления людем и лошадем многа быша. И вразумиша себе, яко Троицким Сергиева монастыря християном путь крепок чрез реку Бог дарова молитвами преподобнаго Сергия чюдотворца. Мы же согрешихом к преподобному Сергию чюдотворцу, ругающеся глаголаху християном его на искус, хотяще им зло сотворити, и еже им уготоваша, сами пострадахом. – И в том у нас прощения прося, яко во младых летех сие сотворихом. Мы же, слышавше сия, благодарение воздахом Святей Троице и преподобному Сергию чюдотворцу.

Поведа нам отец наш архимарит Андреан: Егда, рече, по изволению государя самодержца царя и великого князя Михаила Феодоровича всеа Росии прислан есмь в архимариты в Троицкой Сергиев монастырь от Пречистые Богородицы ис Толского монастыря, и в те поры у меня очи были тяжки и с великою нужею по книгам смотрил, очки наложа. И как в прошлом во 152-м году молитвами преподобнаго Сергия дарова Бог источник воды святыя в стене у паперти Богородичны церкви, и пришед умывся тою святою водою, и оттоле очи моя просветишася и очки отложив. Прочитаю по книгам и доныне без очков, благодаря Бога и Пречистую Богородицуи преподобных чюдотворцов Сергия и Никона.

Не вдалее десяти лет или мнее от сего времени бысть пожар во обители Святаго на Житничном дворе. Загореся в трубе сажа у кельи, иде же житничные старцы живяху, и оттого загореся анбар древяный, иде же приход и росход хлебу писаху, приблиз самые житницы самого преподобнаго Сергия чюдотворца. На стене же градцкой дощаные сусеки, по обе страныанбары хлеба полны насыпаны. Огонь же межи их простираяся и касаяся о самыя стены ближних житниц и дощаных сусеков, паче же и к самой житнице чюдотворца Сергия прикасаяся, но никако же к стенам принимаяся, толико онбар той в средине единъ згоре. Людем же сперва ужаснувшимся, не хотевшим сперва к тому пожару приближитися, поне же среди того Житнишного двора возле самых житничных стен полата камена полна была пороху пищалнаго наставлена. Егда же видевше милосердие Божие, заступлением Пречистые Богородицы и молитвами преподобных Сергия и Никона, огонь к стенам не приимается, помянувше во устех своих имя преподобнаго Сергия, яко жеобыкохом, и огонь той врознь разтащивше и угасиша. Мы же, видевше сия, благодарение воздахом Святей Троице и Пречистой Богородице и преподобным Сергию и Никону.

В лето 7140-го году бывшу ми на Алатаре в строителех, и случися ми тамо на проезде обнощевати в Троицкой Сергиева монастыря отчине в селе Ичиксе. В том же селе християнин именем Иван, ремеством же кузнец, нравом же муж той боголюбив, странноелюбив же и нищелюбец, и сего ради мнозем знаем бяше, яко никому же путем тем минути, не прием от него покою и всякие благоты. Нощи же тоя учинися у того християнина, у Ивана пожар в дому его: загореся кузница, иде же железо и медь коваше. Приблиз же тоя кузницы об едину страну изба, иде же трудники его живяху, яко за едину сажень, а з другую страну онбар запасный, яко и слегам на самую ту кузницу напущеным быти. Среди же двора его наслано соломы во весь двор его скота ради. Еще же и в запасе в копнах сено и солома сметаны быша; страннолюбия бо ради одари его Бог богатъством, тако же и скота имея много. Збежавшим же сялюдем на пожар той, последи же и мне прибегшу, и дивно бяше видети: кузница такова велика горяше, внутри ея яростен огнь пылаше, и к верху высоко подымашеся, и у избы и у онбара до половины слег обгореша, к стенам же и х кровле избы тоя и онъбара никако не касаяся огнь той, яко некоею силою Божиею; искры же многи со огнем на сено и на солому падаху и исчезающе сами о себе. Мне же утешающу того Иванна и глаголющу: благодари Бога и чюдотворца Сергия, яко Бог помогает ти за молитв преподобнаго Сергия. Той же сказав мне: Егда, рече, послышав аз у себя пожар, вышед из ызбы со сна, а уже кузница моя вся обнялася огнем внутрь и внеуду, и у избы и у онбара слеги горят. Мне же воскричавшу ко своим, и призывающу ми чюдотворца Сергия на помощ, и видевшу ми инока прибежавша преже всех, мню, яко ты, строитель, прибежал, и взимая снегъ рукама своима и метавше поскору на анбарныя и на избныя слеги. И от того часа нача огонь тишети и слеги угасоша. Мне же рекшу ему: благодари преподобнаго чюдотворца Сергия, спасающаго тя и избавляющаго тя от напастей; а аз напоследи всех пришел. Кузница же та яко тлениемъ истле, прочих хором ничим не вредив; но ни сено, ни солома не загореся посещением преподобнаго Сергия, нищелюбия его ради и странноприимства.

Не в давных же летех и сие содеяся, яко летом седмим или осмим минувшим. В Нижегородцком уезде Закудемския волости преподобнаго Сергия християня со слезами жалобу творяху властем на боярских князя Бориса Михайловича Лыкова християн, иже, пришед за многие версты от своих деревень, под Троицкими деревнями леса росчищают насильством, и пашню роспахивают, паче же и паханую пашню насилством завладели. Власти же о том посылающе к боярину тому многажды с писанием, моляше его, да запретит своим слугам и християном не обидетиСергиевых християн и землю отнятую да возвратит в монастырь. Он же хотя сам тамо быти и росправу чинити. Ссору же и неправду подлагая и боярину облыгая, слуга его, иже в той вотчине у него приказной бысть, именем Петръ Жуков, и по многи дни з боярскими християны собрався со оружием и дреколми, землю монастырскую насильством розчищаше и роспахиваше и на задор Троицких християн вадяще присно. Сего же тому Петру не ведущу, яко и над ним над самым боярские християня умышляюще, како его убиют жестости его ради, глаголюще: Егда с Троицкими християны бой сотворим, в то время и своего приказщика сами⁹⁴² убьем и возглаголем на Троицких християн убийство его. Троицкия же християняничто же ино помышляюще, токмо Сергиево имя во устех их, на того единого упование имуще, на задор же той не исходяще, поддержими бяше властиным повелением от приказных людей. Случи же ся приездъ боярину того в свою отчину, власти же по его слову прислаша соборново старца именем Иону Дружкова бити челом о росправе. Он же не воспомянув смертнаго часу, объят бысть мира сего любовию, видев, яко власти ему ни в чем не сопротивны учинишася, но во всем на ево боярскую душу полагахуся, чающе от него сущие правды; объехавше сам боярин всю Троицкую землю с соборным старцомъ Ионою и на доброту не уклонився, глаголя: яко многу силу християне его, лес розчищаючи и пашнюл. 119 роспахиваючи, положили; и подержав за собою неколико время ту землю, отдам паки в монастырь. И приказал человеку своему Петру половину земли отдать в монастырь и указав урочище ручей, и поехав к Москве. Человек же его Петр после отъезду собрався паки со мноземи боярскими християны по прежнему обычаю, со оружием, з бердыши, и с рогатинами, и с сомопалы, и с луками, не ведая на себя от боярских християн заводу на убиение его. И приехавше под Троицкую отчину, не по ево боярскому приказу учиниша и отведоша Троицкую землю не по ручей, но и по самые гумна, и з старинною мяхк[о]ю землею, и межи сами учиниша, мняще тем возмутити на задор Троицких християн. Соборный же старец и слуги и християняСергиева монастыря видевше, оскорбишася зело, пособити же не возмогоша тому, яко же всегда обыкохом глаголати: сила закон превозмогает; но возложиша надежду на чюдотворца Сергия. Слуга же боярской Петр Жуков рад бысть, отъехав в веселии и яко бо победный празник сотворив, мня, яко угодие велие боярским християном сотворив, нача с ними пити и веселитися. И во мнозем питии в безумие впадоша християне боярстии, убиша своего приказщика Петра Жукова; яко же преж мыслиша, тако и сотвориша. Сице той насилия своего мзду от Бога восприят. Боярин же той князь Борис Михайловичь Лыков, егда видит себя при смертном часуизнемогающа, его же никому возможно миновати, призвав строителя Троицкого Евфимия и стряпчего Прокофья Мусина, обещаяся землю в дом Святыя Троицы возвратити. Но суд Божий немедленно от сего века ко оному отсылает, вскоре душа от тела разлучается; токмо сродником своим приказав, повелевая им землю отдати; им же аще како Бог благоволит повеленное в совершение привести.

В лето 7160-го году в дому Святыя Живоначалные Троицы и у преподобных во обители слуга именем Феодор Каменев в своем в дому ввечеру поздо возлеже на своем одре спати, иде же обыче; домашнии же его возлегоша кроме его, во иной храмине. И егда вси успоша крепким сном, сему же Феодору воставшу от своего одра, хотящу изыти до ветра, и запинанием вражиимъ впаде в забыть, совратив с пути паде с верху на низ в западную дверь в тесно место, яко невозможно бе ему исправитися; лежаше стремъглав многое время, и аще много кричаше, доколе глас его в нем бысть, но ни от кого же не быстьуслышан, всем бо спящим, иже в дому его. И уже глас его от многа кричания прекратися, и душа его при последнем издыхании бысть, воспомянув смертный час, иже безнадежно умирает, нача тихим гласом призывати имя Святыя Троицы и Пречистую Богородицу и Преподобных, прося живота на покаяние. Щедротами же своими человеколюбец Бог, иже присно печется спасением человеческим, за молитв Пречистые Богородицы и Преподобных ради, на спасение его и прилучай таков уготова. Слуга некий именем Иосиф Голчин удержан бысть в монастыре у властей некия ради монастырския потребы и опоздав, иде с монастыря поздо мимо двора его и слышав глас внутрь ограды его и по гласу позна его. Ста на месте том, слышав глаголюща его на земли умилными глаголы: молит Святую Троицу, и Пречистую Богородицу, и преподобных Сергия и Никона, и Серапиона, и преподобнаго архимарита Дионисия, яко к живу сущу глаголы своя молебныя простирая. Той же Иосиф удивлься, стояв на месте том, начат кликати его именем, и не отозвася глас его, уже бо умолче, вмале не изыде дух его. Он же раскликав своих ему домашних, сказав о нем; они же взявше его еле жива, благодаривше Бога и Пречистую Богородицу, и преподобных ублажающе, яко молитвами их спасение от смерти получив.

Лета 7161-го году поведа ми отрок именем Ондрей Пестриков о чюдеси преподобнаго чюдотворца Сергия сице: Видех, рече, во сне, яко стоящу ми в церкви преподобнаго чюдотворца Никона во время литоргии, и внимающу умом своим о учении книжном, и во уме своем призывающу ми на помощъ преподобнаго Сергия, да подаст ми разум на прочитание книжное. И в забытии быв, вижу на церковной стене образ преподобнаго чюдотворца Сергия, яко написан, и удивление⁹⁴³ и ужасть вниде в сердце мое, и начат молитися и поклонятися образу тому. И той образ виде ми ся, яко отступив от стены и ста противу мене, а на стене место празно остася, яко и прочая стена. Аз же, рече, от ужаснаго сего видения возбнув, и сердце трепетно бысть. Мы же, слышавше сия, повелехом написати памяти ради, да незабвенна будут Преподобнаго чюдеса.

161-го году, марта в 30 день, прииде в дом Святыя Троицы и преподобнаго чюдотворца Сергия Городецкого посаду, что на реке Волге, некая жена именем Ксения, ТерентьяВласова подружия, по своему обещанию, помолитися преподобному Сергию чюдотворцу. И по молебном пении, у чюдотворцовы раки стояв, исполнися слез многих, с плачем и з захлипанием припадая к чюдотворцовым мощем, и поведа ту предстоящим сице: Была де она скорбна сердечною болезнию, и недугом одержима и языком не говорила пять лет. Яви же ся матери еи вдове⁹⁴⁴ Парасковие во сне инок боголепен во священных одеждах, повелевая отпустити мя во обитель к чюдотворцу Сергию, да получит, рече, исцеление. Мне же недостойней не удоволившуся за некими мирскими суетами, но усмотрив время; примешався к сродником, доехав в город, рекомый Балахну. И ту есть монастырь Покрова Пречистые Богородицы и святагоНиколы; ту же есть в пределе церковь прподобнаго чюдотворца Сергия, а в ней образ его чюдотворный, а у тово де образа приблиз стоит кружка с медом. И как де молебное пение совершили и дали мне испити тово меду ис кружки, и в том часе молитвами святаго Сергия нечаемое исцеление получив, бывъ здрава, и во уме нача смысленна быти. Сего же от простоты не поведа никому же, и после того обленчиво нача жити и к церкви Божии мало ходити, и болезнь сердечная паки нача томити мя. Аз же окаянная, позабыв к себе чюдотворца Сергия милость, хотя себя ползовати от некоторого зелия, и найде на мя скорбь зело болезнена. И воспомянув к себе милость преподобнаго Сергия, обещаласябезо всякого сомнения итти во обитель его. И се ныне совершенное исцеление получила от сердечной болезни, и языку исправление от немоты, и молитвами Святаго бысть здрава, яко исперва. Мы же, слышав сия, благодарение воздахом Святей Троице и преподобному Сергию, творящему дивная чюдеса, и повелехом сия написати.

Того же 161-го году февраля в <…> день приведен бысть во обитель преподобнаго Сергия Троицкие вотчины села Выпукова християнин, именем Кирило, и держаше его окована железы, поне же⁹⁴⁵ николико смысла в себе имеяше, и держаше его крепко руками своими, да не вредит себя и прочих человек. И привождаху его к чюдотворцовым мощем преподобнаго Сергия, и по двою седмицах молитвами Святаго здрав бысть и смыслен, яко николи же страдав. И поведав, яко случися ему сия от зелныя и неразсудныя кручины: подружия, рече, у него умерла, а дети в болезни быша; и сего ради пострада изумление. Ныне же умолением Святаго смыслен бысть и отъиде в дом свой, благодаря Бога.

Во 161-м году марта в 7 день прииде во обитель Святыя Троицы и к чюдотворцу Сергию помолитися Нижегородцкого уезду села Лыскова иерей именем Ияков и по молебном пении поведа сице: Обещался де есмь помолитися преподобному чюдотворцу Сергию во обители его и некоим замедлением обету своего не исполнил и во обитель его не поехал. И после де того сын мой Михаил, еще зело детеск возраст имый, изыде на улицу поглумитися, яко же обычай есть детем, и того де сына моего ушибли в голову, и от того де удару сын его бысть болен, и языком нем бысть многое время. Аз же, рече, воспомянул обет свой безо всякого сомненияитти во обитель к преподобному Сергию и с чады своими, да не злее что постражем. И в том часе сын мой здрав бысть, и немота языка его исправися, нача глаголати, яко же и преже. И отъиде в путь свой, благодаря Бога и преподобнаго Сергия.

161-го писал Троицкого Сергиева монастыря из вотчины к нам Владимерскаго уезду села Пирова Городища приказщик Алексей Ефремов о чюдесех преподобнаго чюдотворца Сергия, иже содеяшася от чюдотворнаго образа его:

Прииде в Сергиеву отчину в село Пирово Городище к чюдотворному образу помолитися Вязниковские государевы волости, Зарецкого стану, деревни Тарханова жена именем Христина и по молебном пении поведа о своеи⁹⁴⁶ болезни сице: Была де есмь слепа очима 7 лет и положила де обет в мысли своей итти к чюдотворному образу и молебен отпети. И в то де время за молитв преподобнаго Сергия Бог подаровал, очная болезнь поминовалася, и бысть здрава, и ныне благодаря Бога и преподобнаго Сергия приобрела помолитись преподобному Сергию и чюдотворному образу его поклонитися. Сие чюдо бысть в 7158-м году, октября в 27 день.

Прииде в то же село Городищево во 161-м году помолитися Ерополческие государевы волости, Нагуевские пятины, деревни Колошина, жена именем Агафия и поведа: Болезновала де я зелно, яко и уды моя вся ослабеша, и лежала де я в постеле два года и око де у меня выщемило, и от тое болезни единем оком не видела. И в той де болезни обещалася итти молитися Сергию чюдотворцу и образу его поклонитися, и в то де время от болезни исцелела, и глаз мой просветился. И приидох поклонитися святому его образу чюдотворному.

Того же 161-го году тое же волости, Сельские пятины, деревни Селищ, крестьянинъ Кузма Семенов прииде помолитись, и по молебном пении сказал: В прошлом во 155-м году дочь моя девица Варвара лежала болезнию зело притрудно, и от той де болезни и очима ослепла, николико свету не видела. И я де обещался в селе Пирове Городище чюдотворному Сергиеву образу молебен отпети и образ его выменити. И в то де время молитвами Святаго дочь моя здрава бысть, и очи ея просветишася, яко же и преже. И сего ради ныне приидох обет свой исполнити, яко же преже обещася.

Того же 161-го году Ерополъческие волости, Коншаковския пятины, Матвея Кравкова крестьянин деревни Малагчеганова Павел Леонтьев сказал: В прошлом де во 153-м году дочь моя девица Феодосия лежала в разслаблении и ума де отступила. И я де обещался чюдотворцу Сергию молитися и чюдотворному образу его поклонитися. И молитвами преподобнаго Сергия чюдотворца дочь моя оздравела и умом стала смышлена, и благодарим преподобнаго Сергия, подавшаго исцеление дочери моей.

Лета 7161-го, апреля в 27 день, поведа нам Роман Федоровичь Боборыкин сице: В прошлом, рече, во 159-м году болезнующу ми зелною болезнию, яко ни двигнутися ни превратитися⁹⁴⁷ могуще, яко и друзии приятели и домашнии мои вси в мертвых вменяху мя. И уже отчаявшу ми ся своего живота, токмо упование положив на Всемогущаго десницу и умыслив милости просити о изцелении у преподобнаго Савы Сторожевскаго чюдотворца, повеле себя вести к ево обители в Звенигород. И тамо всенощнаго пения слушав, лежав на одре своем, а стоятии седети не могий, и вклад по силе своей дал 50 рублев. Ту же инокъ некий, именем Тихон Пестриков глаголя ми: Не скорби, рече, но уповай на Бога и на преподобнаго Саву; обычей, рече, есть у преподобнаго Савы чюдотворца: за ково подвигнется к Спасу на молитву, то и сам тому явится. И по молебном пении повеле себя вести в свою отчину в село Воскресенское близ того же монастыря, и ту пребывающу ми, еще тою же болезнию одержиму. И по неколицех днех стоящу на моем дворе человеку моему именем Фаддею Флорову, стрегущу стражу нощную⁹⁴⁸, яко же обычай есть, и на крылце стояв, видит дву человек, мимо себе вверх по лесницам идущих; нозе же их ступающу не яко в сапозех, но яко в сандалиях, скоб железных не имущих. Он же трепетен бысть, нача спрашивати: кто идет? и сие бысть до трижды. Они же рекоша ему: молчи! Сергий Радонежский и Сава Сторожевский есмы, идем здравие от болезни подати господину твоему. Он же умолче, дивяся бывшему и к тому не видев их. Во утрии же поведа человек той в дому всем моим домочадцомъ⁹⁴⁹. И я слышах то от домочадец своих, не поверих им, почаях его лжуща. И по триех днех спящу ми во внутренней своей храмине з женою своею, и от немощи в малом забытии⁹⁵⁰ быв, мнев, яко⁹⁵¹ сон зрети: Слышах в преднюю свою храмину въходящих⁹⁵², потом же и во внутренюю идущих дву иноков, боголепни лица имущих в освященных одеждах; ступание же ихслышах, яко же и преже человекъ мой Фадей Флоров поведа ми. Пришедше же и сташа у одра моего; мне же очи свои на них возведшу, познах по лицу преподобнаго Сергия и преподобнаго Саву. И велий ужас нападе на мя, и более того на боголепные лица их не могох возрети от страха, ни провещати могий, токмо взирая на священныя их ризы и молитву Иисусову тайно в себе глаголя. Преподобнии же рекоша ему: не ужасайся, рече: Сергий Радонежский и Сава Сторожевский есмы. И мняшеся ему речь Сергия чюдотворца к нему: Иди, рече, во обитель паки к Саве преподобному в монастырь и вкладу дай другую пятьдесят рублев, а о болезни своей не скорби; будеши здрав молитвами преподобнаго Савы. – Аз же, рече, начах помышлятина сердцы своем: аще и полтораста рублев, дам. – Той же рече: ни, но то исполни, еже рекох ти. – И поидоша преподобнии вон ис храмины от нас. Аз же, рече, трепенувся виден[ия]⁹⁵³, возбнув, возбудив жену свою; жена же моя видевъ их ис храмины идущим в ризах освященных. И по отшествии их жар от тела моего отступи и болезни моей облегчение бысть, воста со одра своего и хождаше. И потом иде к чудотворцу⁹⁵⁴ Саве во обитель и вклад по явлению чюдес их отвезе, воздая благодарение преподобному Саве. И потом помолився по многим святым местом Новгородские страны и у Пречистые Богородицы в Печерах, и достигох и до обители преподобнаго Сергия, благодарение воздая, яко нечаемоеисцеление от болезни их посещением приях. Ближнии же и знаемии мои и ныне удивляхуся зряху, на мои скорбные места, ими же я болезновал, како от таковы смертоносныя болезни Бог помилова мя молитвами преподобных и великих отец Сергия и Савы.

Того же 161-го году поведа мне о чюдеси преподобнаго Сергия Андрей зовомый Шахов, чином бысть у самодержцаподьячей; строение же бяше вручено ему от самодержца монастырь святаго Савы Сторожевскаго строити. И в прошлом де во 159-м году после Светлого Воскресения Христова впаде в болезнь люту, трасовица имянуема, и толико болев, яко и живота отчаятися ему, и по многим чюдотворным местом сам и жена его о исцелении болезни моляся и милости прошаху. Врученныя же службы минути ему невозможно, аще и немощен. Повеле себя строения ради вести в Савинской монастырь, призывая на помощ преподобнаго Сергия чюдотворца, яко же и преже измлада навык имя его во устех присно поминати. Под стенами обители его и з женою своею вскормлени быша хлебом его чюдотворцовым, и сего ради имя его беспрестанно во устех поминаху, поне же и строения монастыря святаго Савы вменяше за едино, зане же преподобный Сергий учитель бе преподобному Саве. Преже убо у Сергия во обители поработав, ныне же у преподобнаго Савы ученика его, и сего ради неослабну надежду имея на преподобнаго Сергия. И по мале времени от многия болезни уснувшу ему на обычном своем месте, зрит во сне преподобнаго Сергия, при возглавии своем на одре лежаща, светлым лицем сияюща; и начатъ припадывать к нему, со слезами моляся о исцелении болезни своей, мневшу, яко на яве. И внезапу возбнув от видения, трепетен бысть, седя на постели своей, размышляяо видении Преподобнаго, и ощутив себе от того часа здрава, яко же николи же болевша, благодарив Бога и преподобнаго Сергия. И о том к жене своей посла с вестью в дом свой. Последи же приехавшу ми и самому в дом свой, пове мне жена моя сице: Егда, рече, видя болезнь мою, оскорбися и та не мало, и по многим святым местом хождаше молебствовати, и прииде в домъ свой, от многия печали не коснувся пищи, паде на возглавии своем, со слезами молясь о исцелении болезни мужу своему. И найде на ня сон: видитъ пришедша к себе стара мужа, глаголюща ей: не скорби, муж твой здрав есть, изсцелил его Сергий Радонежский чюдотворец. Она же возбнувъот видения, никого же видев, радостна бысть, поведа своим домочадцом видение преподобнаго Сергия. И по времени том Андрей и з своею женою вкупе воздаша благодарение преподобному Сергию и у мощей его молебное пение сотвориша и отъидоша в дом свой, благодаря Бога.

62. В лето 7151-го, июля в 2 день повелением государя царя и великого князя Михаила Федоровича всеа Русии послан был на ево государеву службу в Колмыцкой поход Лев Офонасьевичь Плещеев. И как будет в степи близ реки Сороки за три днища, пришли к нему Уфинские татарове и учали понуждать, чтоб походом поспешили; а ему поспешить было нелзя, потому что были с ним государевы пушки болшие и пушечные многие запасы. И Лев Офонасьевичь собрал государевых дворян лутчих людей и о том стал с ними советовати, как поспешить. И от того впаде в велие сетование. И июля в 3 день прииде нощ, и он, помоляся пред образом Живоначалные Троицы и великого чюдотворца Сергия, преклонися ко сну и спа в тонце сне. И явися ему великий чюдотворец Сергий и рек: не сумневайся, поди, победишъ неверных. И благословил его крестом и невидим бысть. И наутрие встав, Лев Афонасьевичь то видение поведа многим людем, и шед Колмыцких людей побил и станы их повоева и мног полон взем, людей и верблюдовъ множество, и оружие и збрую ратную побрав. И отъидоша к Московскому государству в радости велицей, благодаря Бога и преподобнаго чюдотворца Сергия.

Лета 7161-го, апреля в 24 день писал ко мне из Звенигорода от обители святаго Савы Сторожевскаго чюдотворца той же вышереченный Андрей Шаховъ сице: Сказывал ему каменного дела подмастерье именем Иван Шарутин: В нынешнем де во 161-м году апреля в 20 день оскорбляющу ми ся, рече, зело, поне же мать у меня умерла в то время, а я де у государева дела у такова великого заводу един. И сетоваше зело о матерне смерти, паче же и о единачестве, помышляше себе дело не в силу: ни на мала время переменитися некем, везде надобе доступить, и печаль в велику впаде. И тоя нощи видит во сне, кабы по прежнему в Савине монастыре у каменных дел ходящу ему, а напреди себя видитъ у тово же дела ходит и указует юноша млад, однарядка на нем вишнева. И слышит к себе об нем глас глаголющ: се подмастерье прислан к тебе на помощ изс Троицкого Сергиева монастыря. Он же сему дивися, яко млад зело, яко бо таковии во ученицех бывают. И возбнув от видения, размыслив во уме своем и благодарив Бога и преподобнаго Сергия о посещении, дивяся, яко спомогает ему и во всем строении и во житии купно со учеником своим с преподобным Савою, обители его снабдевает и способствует.

Да ему же де Андрею сказывал ризничей Филарет о преподобнем Сергии, яко посещают обитель ученика своего святаго Савы преподобный Сергий. И купно с ним мнози по монастырю видеша их ходящих и братию к заутрени будящих, и на караулех их тако же видещих. Явно же глаголет: нынешние зимы пришедшим преподобным на караул и глаголющим: идите, рече, к понамарю Ефросиму; доколе спит? время есть утреннему благовесту. Они же тако сотвориша, шедше, рекоша Ефросиму о том. Тако же и сами преподобнии пономарю Ефросиму явишася и рекоша: доколе спиши? время благовесту быти, и архимарит, рече, повелевает благовестити. И невидими быша; понамарь же трепетновскочив, вскоре прииде к архимариту и прося благословения благовесту. Архимарит же глаголя ему со гневом: иди, рече, в келию свою, не у время еще благовесту. Понамарь же ужасеся, дивися сему необычному делу, и сказав архимариту, како возбудиша его стражие с караула, и паки пришедших к нему дву иноков и возбудивших его, яко же уверишася и от стражей; и вразумившим быти преподобных Сергия и Саву посещающим обитель.

Да преже сих дней апреля в 21 день поведал ему Андрею жилец государевъ Иван Кучецкой о чюдесех преподобных Сергия и Савы: В нынешнем же де году ходящу ми пешу помолитися во обитель святаго Савы, и донде же исполнив обещание свое и молебная отпев и мощем преподобнаго Савы поклонитися сподобихся, от виннаго пития удержахся. Последи же паки идох пешю во обитель великого чюдотворца Сергия и тако же молебное пение воздав, и чюдотворным мощем его сподобил Бог поклонитися, и поидох в дом свой благодаря Бога и преподобных. А от виннаго же пития в пути своем, к чюдотворцу Сергию идучи, не сотворих воздержания, положил впросте запинанием вражиим. Егда же от обители его отъиде 10 поприщ, в чюдотворцове Сергиеве отчине в селе Рогачеве случися мне из саней вытти. И людем моим переправливающим в санех, мне же, рече, прислонившусяк санем и в забыть вшедшу, и слышах глас к себе: и аз де хмелного пития не пью же. И от того гласа страх и трепет на сердце мое наиде и ужасть велика нападе на мя, и от страха воскочив на месте том, и быв в себе, сказав своим, иже со мною. И пришед сотворив молебное пение и у чюдотворных мощей его, и прощения со слезами прося в дерзости своей, отъидох в дом свой благодаря Бога и преподобнаго Сергия чюдотворца.

Поведа ми о себе и о съвоей болезни Святыя Живоначалные Троицы обители слуга именем Григорей Ратманов: Болезнующу ми, рече, преже сего, года за два или за три от сех мест, сердечною болезнию, тако же и гортань моя зело болезнена бысть, яко ни ясти, ни пити возможно бяше, и протяжеся болезнь сия на много время. И в той болезни призывающу ми преподобнаго Сергия, о исцелении болезни моляся ему великому чюдотворцу, да исцелит мя. И тоя обители церкви Святыя Троицы понамарь подасть ми артуса; аз же прием от него и в дому своем снедох, и от того часа здрав бысть. И паки будущу ми на Москве в монастырской службе в стряпчих, та же болезнь объят мя и на много время болезновав. Егда же ми приехавшу во обитель Преподобнаго, у того же пономаря взяв артуса и снедох, и паки совершенное исцеление прием, яко бо николи же болев. Аз же, сия слышав, написав, да не в забвение приидет чюдо сие Преподобнаго.

Прошлого 161-го году инок Саватея, зовомый Вятченин, поведа и писмо дав своею рукою о чюдеси Преподобнаго: Было, рече, обещание преже великому чюдотворцу Сергию помолитися мне во обители его и мощем его поклонитися. И едущу ми путем к Москве, поповства ради, позабыв обещание еже ко Святому, положив в небрежении, проехав мимо к Москве. И греха ради своего и нерадения впадох в болезнь тяжку, нутряняя болезнь одержа мя зело и протяжеся на много время. Аз же, рече, познав свое согрешение еже ко Святому, воспомянув обещание, начат ево преподобнаго в молитвах призывати и глаголати к нему, яко к живу и ту сущу, и неотложно хотя исправити обещание. И приближися праздник Бориса и Глеба; мне же в нощи той от многия болезни присно призывающе преподобнаго Сергия о исцелении болезни своея, и бысть в забыти[и], видех во сне преподобнаго Сергия чюдотворца. И рече ми: истинно ли обещался еси во обители моей молитися? и аще сице сотвориши, будеши здрав. И невидим бысть; аз же, рече, от сна возбудихся и здрава себя очютих. – И прииде ко мне, Симону, на Москве, поведая яже о сих, еще ми тогда келарскую службу имущу. Аз же слышав, послав его во обитель к преподобному Сергию, и се ныне зде пребывает, благодарит Бога и преподобнаго Сергия, подавшаго ему исцеление.

Лета 7161-го году жена некая именем Мария, торгового чину, болезнова зелною немощию на Москве и лежа на одре безъязычна много время и бысть уже при смертном часу. Сродницы же, иже знаеми ей, приидоша проститися к ней, и видевше ея, почаяше ей вскоре смерти, разыдошася восвояси, токмо ближнии ея осташася, приседяще у нея, ожидающе исходу душа ея. Она же то все от них слышав, очию же возвести и ответу дати не возможе, на уме своем помышляя и моляся Московским чюдотворцом Петру и Алексею и Ионе и Филиппу о исцелении болезни своея. И внезапу в тонце сне, яко бо на яве, видит близ одра своегоПетра и Алексея и Иону и Филиппа и Николу и преподобнаго Сергия чюдотворцев. Яко на яве советоваша меж собою о моей болезни и нарекающеся имяны меж себя и глаголаша: кто изрече ей умрети ныне? ни, рече, но будет здрава. И преподобнаго Сергия называху они великим чюдотворцем. Аз же, рече, сия вся видев проглаголати же к ним не могии болезни ради, токмо во уме своем моляся к ним, призывая их на спасение свое. И един от них, приступив ко мне, наложи руку свою на главу мою и исцели мя; а который из них исцели мя, того не возможе уразумети. Толико возбнув от видения и никого же ни видев, востав от одра своего здрава и поведа сродником и ближним своим. И оздравев, Московским чюдотворцом молебное благодарение воздав, к преподобному же Сергию обещалася у мощей его быти и молебное пение исполнити и благодарение воздати, яко же и сотвори по своему обещанию. И сего ради и написано бысть на славу и честь и в похвалу чюдотворцем.

Лета 7162-го, сентября в 27 день архимарит Андреан сея обители дал мне писание о чюдеси святаго Сергия, писано же сице: Крестьянин Сергиева монастыря, Суздальскаго уезду, села Олексина, деревни Ерденихи, имя емуИосиф, поведа ему исцеление от болезни молитвами святаго Сергия. Живущу, рече, ему под монастырем в слободе у слуг монастырских, изшед из своего дому, яко же бе обычай есть ремесленым людем, поне же портному мастерству искусен бе, и в прошлом де во 157-м году оттуду бежав, поживе в селе Павлове Перевозе боярина князя Якова Куденетовича Черкаского в вотчине. И ту впаде в разслабление, и нутреная болезнь велми объят его, и глухота ушей нападе на нь, ни же руками или ногами возмогаше протягнути, и сия болезнь протяжеся полтретья года. И в такове болезни Богу моляся о своей неисцелней болезни и преподобнаго Сергия чюдотворца на помощ призывая, да исцелит его молитвами своими от болезни, и обещася в мысли своей, аще исцеление получит. то восприимет иноческий образ. И в третий день молитвами преподобнаго Сергия дарова ему Бог здравие от разслабления, яко николи же болев. И позабыв свой обет, вскоре к преподобному Сергию не возвратився во обитель и учал жити в харчевне, скитаяся в мирском житии, и паки вскоре болезнию объят бысть тяжкою. Тако же и жена его и дети его болезновати начаша, и язычное течение у них отъяся. И видев сия, отец его духовный Спаской священник Василий повеле ему немедленно итти к преподобному Сергию во обитель и обет свой исполнити. Той же Иосиф жену свою и дети своя отвезе во свое отечество в село Олексино, иде же родисяи воспитася, и быша вси здравы от болезни молитвами преподобнаго Сергия. И шед пострижеся в пустыне Хотимской, иже под паствою у властей того же Троицкого Сергиева монастыря; имя ему бысть во иноцех Иона. И прииде в болшой монастырь, благодаря Святую Троицу и Пречистую Богородицу и ублажая преподобнаго Сергия, яко его преподобными молитвами изсцеление от болезни прияша.

Лета 7162-го году, октября в 8 день Подмонастырныя слободы вдова Татьяна служебника Логина Федорова жена поведала о чюдеси преподобнаго⁹⁵⁵ чюдотворца Сергия сице: Болезнующу ми, рече, после мужа своего зубною болезнию зелно 11 недель, и нынешняго месяца октября в 5 день посла яз сына своего к старцу Кариону, иже стоить⁹⁵⁶ у чюдотворнаго гроба его, чтоб прислал к ней от чюдотворных мощей чево нибуть на исцеление зубныя болезни. Той же инок Карион послав к ней с сыном ея малую частку покровца чюдотворцова. Она же прием сия с радостию сердечною, положив себена зубы и от того часа болезнь зубная преста, и бысть здрава, воздая благодарение Святей Троице и Пречистой Богородице и преподобным чюдотворцемъ Сергию и Никону.

Лета 7162-го году, октября в 7 день прииде помолитися преподобному Сергию⁹⁵⁷ человек некий именем Симеон, Романовского уезду, Савинской волости, Ивана Лукьянова сына Талызина християнин. И егда молебное пение исполнив, поведа о себе архимариту и келарюПафнотию и казначею Дионисию, како ему исцеление от болезни молитвами преподобнаго Сергия Бог дарова. В прошлом де во 158-м году случися ему болезнь тяжка зело и протяжеся на шесть недель, яко и ногами своими не возможе николико ступати, ни с места двигнутися. И в той болезни нача обещатися преподобному чюдотворцу Сергию, да исцелит мя от болезни сея, и по вся годы обещався приходити во обитель его и молебен пети и чюдотворным мощем его поклонятися. И с того числа болезнь его начат тишети, и ногами владети и по шти днех оздравев, яко николи же болев. И се ныне пятое лето прихожю молитися, обет свой исполняю, благодаря Святую Троицу и Пречистую Богородицу и преподобнаго Сергия чюдотворца, исцелившаго мя от болезни. Мы же слышавше сия, написахом, да не в забвение приидут чюдеса преподобных.

Лета 7162-го году поведа ми обители преподобнаго Сергия [слуга] именем Ермола Азанчеев о чюдеси преподобнаго чюдотворца Сергия⁹⁵⁸ сице: Бывшу ему преже от нас послану быти на Низ рекою Волгою на монастырскуюрыбную ловлю с старцом Боголепом, и случися ему от того старца послану быти от града Тетюш в монастырской рыбной промысл более 600 верст, на стан глаголемое Черебаево, по конец Златых гор; а с нимъ старец отпустил на промысл денег пятьдесят рублев. Он же, усмотря мимоезжих стрелцов и иноземцов, сед на струг, стану своего рыбного доехав и денги довез. Егда же на стан приехав, уведав от своих ту сущих промышлеников: от воровских казаков стан пограблен, и ту сущии людие жезлием биты, и похвалилися в предыдущую нощ паки быти, и досталное строение в стану пограбити и разорити. Он же, слышав сия, ужасеся и поведав про денги, иже с ним, единому от своих, от протчих же утаив, берегучимонастырския казны, да не сведают про них воровские люди. И согласяся меж себе, утаяся от своих, с тем единем советником своим, именуемым Павлом, седоша в мал стружек и съехавше на остров, близ ту сущий, и денги тыи в кожаную сумочку, еще же паки мошенку з денгами, в лист в бумагу обертев, на ту же сумочку наверху положа, закопали в землю под некоем древом. И место назнаменавше, паки приехавше на стан, никому же об них сведущу, и пребыхом на стану неколико дней, ни в день, ни в ночь друг от друга не отлучающеся, вкупе присно пребыхом, призывающе преподобнаго чюдотворца Сергия на помощ, да избавить от напрасныя беды и в поругание врагом и в конечное разорение промыслу не предаст. Егда же за молитв преподобнаго Сергия от воровских людей избыхом, и слуху про них нет, времени дошедшу, восхотехом деньги на промысл взяти, поехавше купно с ним на остров той, и дошедше обретохом место праздно. Иде же сохранено бяше, земля раскопана, и сумки и мошенки не обрето[хо]м; токмо видехом на том месте повержен листъ бумаги розодран, в нем же обернута была мошенка з денгами. И видевше сия, ужасошася и от многи скорби на мног час ни проглаголати возмомогохом, токмо друг на друга начаша взирати и мыслию в недоумение впадохом. Николи друг от друга не отлучихомся, и никому поведахом, и неверки ни на кого не смышляхом, токмо помышляхом: развее камышники по некоему прилучаюраскопавше взяли, поне же на том месте и окрест того места видехом след зверин или песей. И начаша плакати со многим рыданием, захлипающеся и воздыхающе о такове нашедшей напасти, и межи себе глаголахом не возвратитися в промысл, ни к монастырю своему, отнюду же послани быша, поне же, рече, не поимут намъ веры и поставят нам в воровство. И положихом совет: на страну далече незнаему итти или к воровским людем приложитися и быти с ними заедино. И много время плакавше, в забытие впадохом и начахом ходити по острову, ово впредь, ово вспять обращающеся, и паки по тем же местом обходихом, вне ума, семо и овамо обращающеся. И егда воспомянухом чюдеса преподобнаго Сергия чюдотворца, паки начашапризывати на помощ Святаго, яко к живу сущу глаголахом: То ли тебе, свету нашему, угодно, что от таковы напасти хотим душею и телом погибнути? умилосердися над нами, преподобне отче, помози нам и не сотвори нас отриновенных от своея обители, не даждь душам нашим в вечную пагубу впасти! И сицевая и иная изрекохом от горести сердца своего. И много ходивше, паки приидоша на место, иде же было сокровище наше, и начаша след дозирати и походивше по тому месту не мало, внидохом в лес, от того места яко до 40 сажен и вящее, – и молитвами преподобнаго Сергия обретохом сумочку свою и мошенку, лежащу на едином месте, денги все целы, токмо зубами изъедена сумочка. И егда обретохом воскликнувше радостными гласы и преподобному Сергию велие благодарение воздахом, яко его святыми молитвами от напасти свободихомся. И изтоварившеся рыбными запасами, дошедше обители преподобнаго Сергия, поведа нам и, написав своею рукою, принесе ми сия. Аз же, сия слышав, повеле написати в честь и в похвалу преподобному, да незабвенна будут чюдеса Святаго.

Того же 162-го году, февраля в 15 день поведа ми инок Карион, иже присно стоя у раки преподобнаго чюдотворца Сергия, яко того дни приходила молитися Святей Троице и преподобным мощем чюдотворца Сергия поклонитися с Москвы инокиня, именем Феодосия, прозвищем Давыдовых, и поведала о своей болезни сице: Лежала де она тяжкою болезнию многое время и бысть при самой смерти и безъязычна, яко и в мертвых вмениша келейнии ея старицы, и хотеша ея скутати, яко подобает мертвых. Сродницы же и знаемии ей положиша на персех ея образ преподобнагоСергия чюдотворца, призывающе его на помощ, да покажет милость свою над нею и возвратит от смертнаго недуга. И внезапу воспрянула от того часа, и болезнь ея отъиде от нея, и бысть здрава. Сего ради, рече, прииде благодарение воздати преподобному чюдотворцу Сергию, яко молитвами его бысть здрава.

Поведа ми обители сея иконописец, именем Моисей Савельев. В нынешнем де во 162-м году, февраля в 12 день, в ночи, против воскресно дни, внезапу оступиша около избы моея мнози нечистии дуси, и бысть шум и крик велик и потрясение, яко потолоку избному мнев на мя упасти. И нападе на мя страх велий, яко вмале и духу моему от тела не разлучитися. И едва воспомянув, воскочив, начат молитися перед образом Святыя Троицы и со слезами припадывати, и призывати начат на помощ преподобнаго чюдотворца Сергия, яко да изебавит мя от находящия силы вражия. И помоляся, малу отраду прием, возлег спати на месте своем. И вижу во сне, кабы некто пришел близ моея избы, и укрыв оконца, глагола ми: иди во обитель и молися преподобному Сергию и получиши изцеление. И во утрии приидох во обитель преподобнаго Сергия к церкви Святыя Троицы, к полуденным дверем. И егда церковь Святыя Троицы отперли, и слышах глас глаголющь ми: иди в церковь Святы Троицы и припади к чюдотворнымъ мощем преподобнаго Сергия чюдотворца, и получиши прощение. Аз же, слышав сия, глаголющаго же не видев, внидох в церковь; нечистии же дуси прещаху ми, повелеваху ми вон итти из церкви. Аз же несуменное упование положивна святаго Сергия, припадывая ко гробу его и обедни слушав, бысть здрав; нечистии же дуси от того часа изчезоша и не являхуся мне. И отъиде в дом свой, благодаря Бога и преподобнаго Сергия⁹⁵⁹.

В лето 7140-го году бысть бой Руским людем с Полскими и Литовскими людми под градом Смоленском. И в то время града Алатарского дворяня и дети боярския, воспомянувши некия досады на преже бывших Алатарских строителей Троицкого Алатарского Сергиева монастыря, иже под паствою болшого монастыря у властей, и яко бы время улучивше тогда, воинския ради службы, и заведоша вражду велию. Начаша крик велий творити на властей о обидах своих и клепати многими зело великими поклепы и роспись ложную составиша, и вместо прежних строителей, на них же негодоваша, емше ту прилучившагосястроителя, именем Симона, мочию своею и предаша его судии, зело немилосерду сущу, именем Григорию, зовому от человек Зловидову. И яко же имя его бысть, сице и нрав его подобен имени его: кротость на языце нося, обычаем же зверообразен; лстивым языком глагола, яко помогая на правду, сердце же его не бе к правде; но во всем исцемъ угожая и строителя того безвинного на правеже бьяще без милости. Власти же болшаго монастыря не возмогоша никоея помощи сотворити настоящаго ради времени: лета бо ратнии суть. И видевше такую неискупимую беду напрасную, положиша упование на Всевидящаго ока, послаша из чюдотворцовы Сергиевы казны тысящу рублев и утолиша тую напраснуюбеду. Исцы же, деньги приемше, радости бывше, яко б корысть многу приобретше, а не ведуще суда Божия и часа смертнаго не воспомянувше. По мале же [времени] слышавше, яко старейшины их отцы и братия под градом Смоленским измирающе различными многотомленми болезньми, прочии же изнемогающе, и никто же здравъ обретеся; но вси отчаявшеся живота своего, всяк ожидая себе смерти, прибытки же неправедныя, иже взяша из чюдотворцовы Сергиевы казны, уже не в потребу им быша. И пишуще оттуду к своим сродником на Алатарь, чтоб на чюдотворцову Сергиеву обитель никоими мерами не враждовали, а иже из Сергиевы казны денги взяша и из Сергиевых отчин за себя старинных крестьянвзяша, сия вся обещающеся отдавати. И тако и сотвориша: приехав испод Смоленска, их же от смерти на живот обрати Бог, тии в Сергиеву казну денги обратиша, и крестьян в Сергиеву отчину отпустиша, и со властьми и строителем простишася, яко оболганием некиих, не боящихся Бога, ссоришася. Судия же той Григорей Зловидов, иже угожая исцем и дворян и детей боярских со властьми во вражду изведе, и крестьян исцем из Сергиевых вотчин издая старинных вместо их белых крестьян неправдою. Алаторские монастырские вотчины им невинны ни единым пенязем, тем исцем; строитель той внове бысть, они же грубости своя изложиша давныя. Судия же той человекоугодник бысть, а не по истинне, и бысть им на грех велий, и корысти многи приобретоша не бояся Бога. Восхоте же судия той ту во граде Алаторском и воеводъствовати, и сего ради им угодие сотвори, да воеводствует над ними, и похваляяся Сергиевы отчины и последние пусты учинити. И во время некое, иде же сонмище людское собирается, в день торговый повеле два воза полны и зело вывершены и оборами привязаны из лесу привести батогов, и среди торжища явно всем представити, яко на некое страшное и ужасное удивление. И многих Троицких Сергиева монастыря християн среди торжища того батогами повеле бити и приговаривати, да не называются Сергиевым имянем. И на возы тыя пропоеведники указываху: иже кто Сергиевым имянем учнет зватися, то теми батогами биен будет. И мнози таковое зрение ужасное не похвалиша ему, яко без ума шатаяся, злобою омрачен, человекоугодие творя. Но Всесильный, иже вся видяй и устрояй весь мир мудростию своею, не попусти его на то, но возбраненъ бысть Божиим промыслом. Внезапу повеленно бысть ему малыми денми на Москве стати, и аще и не хотящу ему, послан бысть в Крым на розмену. И тамо, яко же и сам последи сказав, никому таково безчестия не бывало, яко и ус и браду ему побривше, погании ругающеся и мучаще без милости. И иже тогда имяни Сергиева и слышати не хотя, и прочимъзаповедая не глаголати, ныне же зело во устех присно чюдотворца Сергия имя призывая на помощ со слезами, о злобе же своей каяся, иже сотворив и иже корыстовався. И полоненых крестьян Сергиева монастыря тамо своими денгами окупая, ис Крыму присылая их в Троицкий Сергиев монастырь с своим писанием. Помощию же преподобнаго Сергия свобожен бысть от поганых, прииде болен оттуду, и быв в монастыре, у гроба преподобнаго Сергия моляся, и со слезами возвестив сия властем, благодарения воздая преподобному Сергию, и вскоре ко Господу отъиде. Мы же сия написахом памяти ради, смотря времен техъ настоящих, яко мнози человецы во благоденствии живуще, в забытии и в небрежении живот свойпрепровождают, и гордятся и корысть приобретают, и в прибытках своих сытости не чюют, и чести своей и тщеславию меры не полагают. Егда ж озарит Господь Бог благодатию своею в сердце человеку, или бедою некою и напастьми изволит наказати, тогда человекъ от нечювствия, яко от сна, возбуждается, и гордость и честь и тщеславие отлагает, и о богатестве не радит, но един смертный час воспоминает. Терпящим же и напасти носящим в то время кажется горко, но последи полезнее и сладчайше всякие сладости сердце усладитца человеку. Яко ж и тогда случшаяся нам напасти пострадати, тако же и самому тому Григорию беды и напасти ко спасению ходатайственны быша. Сего ради всем нам подобает во благоденьствиине возноситися, а в бедах не низпадати, ко всякому делу радостному и напастем мера пологати и уповати на Вседержителную десницу.

Не мочно же и сего молчанию предати и чюдеси Святаго в забвение положити, яже содеяся не в давных летех. Бысть некий велможа, обычай же его суров бяше, паче же и корысти желатель бяше, мало имый в себе страха Божия; но присно умъ его простираяся, иде же бы откуду корысть приобрести, и отчины за себя присягнути, и крестьянь чюжих за себе посадити; то бяше исправление жития его. На обител же Сергиеву, иже в ней славится имя Пребезначалныя Троицы и Пречистые Богородицы, и преподобнымь чюдотворцемь Сергию и Никону молебное пение приносять, зело нелюбие держа. Нецыи отчины Сергиевы за себя взявь на мену, властемь на его душу полагающимся в крепостях, искусь над ними сотворивь, не ведая злохитрия в немь; той же последи многи убытки монастырю сотворив, яко не бояся Бога. Тако же и к монастырскимь слугам во мнозех искех приставливая напрасно, и во многия неискупимыя беды вверже, яко на глумь себе таковое богатство приобретая, и крестьян из вотчинь Сергиевыхза себе сажая, и во грех себе тово не вменяя; властем же не могуще противу его ничесо же сотворити, поне же мочь его велика беяше. Многажды же и на самую чюдотворцову Сергиеву обитель в высокоумии своем похваляяся и глаголя, пресужая прежних властей, ту бывших, строение и хотя некое новое строение учинити во обители Сергиеве, не по чину прежних уставов, яже устроиша многими леты прежние государи цари и великие князи по своему царскому разсмотрению и по завещанию самого святаго чюдотворца Сергия, како в житии его написано, иже и доселе соблюдается и неизменно то сотворяется. И в таковых его помышлениих неколики времена проидоша. Яко же нецыи боголюбивии сказаша, трикраты подвиг его бысть, еже в Троицкои монастырь ехати, и трикраты и возбранен бысть некоимь промыслом Божиимь: ово очною болезнию удержань бысть, ово же от Сергиева образа свеща свалися и попали ему браду; третицею же на Украйную службу повеление прием от самодержца. И не ускори путем поехати, зане суди ему Богь вскоре на уготованномь месте мзду дела его восприяти. Не едины бо Сергиевы сироты слезы на него излияша, но и весь мир стоняше ко Господу Богу от обид его, и уже зьлобе его исполнися время, и мнози слезы ото всего мира излияшася ко Всевидящему оку. В лета 7156-го году, на праздникь Святыя Троицы, во время божественныя литоргии, ставящу ему преподобнаго Сергия у раки свещу, и елико поставляше, толико падаше из рукь его на землю. Он же срамом обнявся, отдавь свещу иноку, ту стоящему, и отшед, ста на месте, лице на немь изменяшесь. Стоящии же ту иноцы и миряня зряще на него удивишася, како лице на нем пременися, и глаголаше межи себе: что се будеть? и свещи, глаголаше, яко не изволиль чюдотворец Сергий от него прияти. Обычай бо есть мира сего людем: от кого любовь и доброту приимають, или зло от кого и напасти терпят, на того образ паче всех людий взирают и очи свои неуклонно содержат; яко же и зде сия случися. И по десяти днех отшествия его от обители, в Московском государстве чернии людие яко без ума возшаташася, и взволновавшеся, пограбивше домы многих бояр; иных же честных людей и побиша.

Паче же гневом Божиим в то время мятежноепожар велик учинися; мнози от человек згореша. Сему же с Москвы бежавшу Ярославскою дорогою, посланнии же по нем догнавше его под Троицким монастырем, поимавше его и приведоша в Троицкой монастырь. Иже преже не попусти ему Бог гордым образом со злобою судити монастырь Сергиев, ныне же вси узреша его, неволею приведена во смиреннем образе. Той же, воспомянув свой грех, плакав пред всеми, и у преподобнаго Сергия раки припадая, вопияше во услышание всем рыдая и захлипаяся, и виновна себя к его обители нарекая. И отшед от Сергиевых мощей, видев им же некогда злобу и убытки сотворил, пред сими прощаяся со слезами; тако же и перед властьмипрощения прося, паче же прося покаяния, исповедатися о гресех. Вси же священницы отрекающеся на покаяние прияти, страха ради належащаго, иже на Москве, и яже поречения на него поносных слов. Келарь же умоли приставов о нем и от своея келии послав священноинока, именем Аврамия, и повеле его в церкве Святыя Троицы исповедати. И ту получив покаяние, в день воскресный, веден бысть к Москве, и во утрии тамо Сергиеве отчине в селе в Ростокине тем же Аврамием священником причащен бысть телу и крове Христовы, и того же дни на Земском дворе от черных людей убиен бысть, сподобився покаяния и причастия прияти милостию преподобнаго Сергия.

Во оно же время слуга некий бысть в Сергиеве обители, именем Василий, по реклому Корабль. И будучи в Троицкой отчине на приказе, обогатев и вражиимъ наветом возгордевся, изыде из Сергиевы обители вон и предался в службу боярину некоему. И много на монастырь негодовав и на властей боярину тому велию ссору подложив, яко мочию своею и отчину Сергиеву за себе взяв и со християны, ничим ему виновны, токмо полагающимся на ево боярскую душу, чающе праведнаго разсмотрения. Власти же ему глаголюще: посли для сыску кроме сего Василия, иже кому ты вериш, поне же той Василей враждотворец и отметник бысть от Сергиевы обители. Той же болярин не внимая на росправу, токмо радостен бысть о вотчине, иже мочию своею за себя достал, и сего ради того Василия любя и ото вражды, иде же с Сергиевыми крестьяны во соседстве, не отведе. Мнози же слезы на него от Сергиевых крестьян излияшася, и вскоре суд Божий постиже того Василия, ослепоша очи его. И познав согрешение свое, некиим иноком моляшеся, знаемым ему, да отвезут его в монастырь к чюдотворцу Сергию и да сподобят его иночеству, и до конца о[т] милости преподобнаго Сергия не отпадет и не погибнет. Тому же делу сотворитися невозможно без воли господина его. Некиим же мановением Божиим очи его паки просветишася, ото вражды же на кротость обратитися не возможе, уже бо одоле сердцеего злоба, и в неволи будучи, исправитися к чюдотворцу Сергию укосне, еже согруби. Объят бысть лютою скорбию, много же плакався, паче же поскорбев и о своем отвержении, еже от обители Сергиевы, болезновавъ много и прием иноческий образ, испустив душу свою. И аще кто вознепщует и поставит сия в ложь, яко возпоминаем часто о прилучившихся ссорных враждах, иже в соседъстве меж слугами и християны почасту бывают, и тому да не дивуется. Мнози отчины Сергиев монастырь имеет, мнози и ссоры прилучается от соседъствующих. И во всяких прилучившихся напастех иноцы же и мирстии несуменное упование содержат и надежду имеют на Пресвятую Троицу и на своих чюдотворцов, Сергиево жеимя присно во устех их. И уповающе и не погрешают и многое нечаемое поможение приимают от Сергия чюдотворца. И аще кто и ныне восхощет уверитися по истинне, колико в Сергиеве монастыре спорных земель в разных градех и уездех, да протчтет, взем в росправных полатах списки: не мнее сотницы статей обрящется, и увесть, колико обитель его от обид стражет. Нам же, иже от своих преподобных чюдотворцов видя их обитель свою спасающих, и во всяких напастех заступающих, и полезная строящих на ползу человеком, како Богу благодарения не воздавати, и Пречистыя Богородицы и чюдотворцов Сергия и Никона заступлением не хвалитись, и впредь будущим родом не возвещати? То бо есть в нашем житии и долъжное, что милостию Божиеюи государским жалованием похвалятися.

Того же 161-го году поведа нам инок Антоней Яринской и прочии, иже с ним: Бывшим нам, рече, в Нижегородцком уезде в Троицкой Сергиеве отчины на съезде спорныя земли Никиты Ивановича Шереметева с людми и со крестьяны, тако же и прочих окрестных сел и деревень, иже приблиз живущих, мнози людие сьехашася, яко же обычай естьна спорныя земли исходити. И бывшу позору и шуму велию, завистию подьимающеся, хотяще чюдотворцову землю без правды отвести на осми поприщах кругомь всея чюдотворцовы отчины. Еще же Никитинь человек, именемь Стефан, нося роспись и вопияше со многими грозами, владения земнаго вящее 10000 рублев хотяше взяти. И благодатию Божиею [и] молитвами Святаго, царскимь розправданием и его царскою грамотою ненавистницы вси посрамлени быша: во время, в не же начаша неправедный розвод чинити, грамота государева указная доспе, и разсыпася неправедное сонмище, иже восхотеша неправедно землю чюдотворцову взяти, и вси помогающии имь. Протяже бо сясия ссора межиусобная боле десяти леть. На том же сьезде некий иерей именем Ияков, много малодушьствовав и на обитель Сергиеву многу хулу изглагола неподобную, и бысть сердце его злобы наполнено. Мнозем же ему претящим, да престанет, и никако же усумнеся, но множае безумством своим злоречив, яко и отца своего преже бывшаго на том спорномь розводе, сказку и рукописание в ложь глаголаше. И после розъезду в том своем безумии к чюдотворцу Сергию не исправися, и по 19 днех скорою смертию отьиде от сего века к будущему, яко же ему нецыи преже рекоша: не пройдет ти сие безумие даромь. Мы же, сия слышавше, повелехом сия писанию предати, да навыкнут и прочии во всяких скорбныхь напастех уповатина Всемогущаго десницу, и несуменное упование полагати⁹⁶⁰ на своего скораго заступника дивнаго в чюдесех преподобнаго Сергия; прочии же да убоятся злословити, и незбытных речей глаголати да умолкнут; поне же вси аще живемь и аще что приобретаем, не себе и с собою ничево не отнесем, но все в славу Божию да творим, и государскимь царскимь разсуждениемь ото вражды росправдуемся, а не злобою и не оглашением, яко же ненавистницы сотворяють⁹⁶¹.

77.⁹⁶² Боярина князя Юрья Михайловича Одоевского жены ево боярони вдовы⁹⁶³ княгини Настасьи Феодоровны человек Левко Алексеев сынь Гаитиновь со 188-го году болезнова лютою ударною болезнию непрестанно. И в нынешнемь 200-м году октября противь 18-го числа в нощи явися угодникь Божий мне в во сне и рече ко мне, дабы азь читал тропарь ему преподобному отцу Сергию чюдотворцу, иже добродетели подвижникь по вся дни и нощи. Аз же не вем, како читати тропарь, и вопроси. Он же угодник Божий нача глаголати тропарь трижды тихо и невидим бысть. Аз же убудився от сна и возвести о чюдесех угодника Божия въсем дому своего, и от того часа болезнь надо мною преста.

207-го⁹⁶⁴ году декабря в 17 день писал в монастырь ко властем с Москвы стряпчей Семенъ Брехов: Говорил де ему Семену Печатного Приказу дьяк и приказал ему в монастырь ко властем писать: по указу де великого государя и святейшаго государя патриарха велено на Печатном дворе предложить и издать вновь в тиснение книги жития великого чюдатворца Сергия сысправными статьями и с новоявленными чюдесы, и чтоб де к тому тиснению для образца книгу жития великого чюдотворца Сергия прежних печатей, которые справчивее, взять из монастыря ис книгохранителной казны. Да есть ли де явятца и сверх печатныхъ книг жития ево великого чюдотворца Сергия на писме какие новые чюдеса, и тое б де книгу и новыхъчюдес писмо для того вышеписанного предложения в тиснение велели прислать к Москве на Печатной двор без замедления.

И декабря въ 31 день по властину указу книга Житие великого чюдотворца Сергия прежней печати, да список в тетратех с книги сихъ⁹⁶⁵ новоявленных чюдес великого ж чюдотворца Сергия, какова книга новых чюдесъ приискана в монастыре в книгохранителной казне, к нему Семену посланы. Велено ему тое книгу Житие великого чюдотворца Сергия и список с новоявленных чюдес на Печатном дворе началным людемъ объявить. У посланного в тетратех списка по полям написано:

Троицкого Сергиева монастыря книгохранителные полаты иеродиакон Иона, приискав в тетратех в переплете, списали и прочетши руку приложил.

Троицкого Сергиева монастыря книгохранителные полаты иеродиакон Иона, приискав в тетратех в переплете, списали и прочетши руку приложил.