Похвальное слово епископу Ипатию Гангрскому

о святем Ипатии Гангрьсцем епископе и чюдотворцы¹

²Прииде нам днесь, иже добрых виновный и венечник светлый святитель и мученик Ипатие еже бы по достоянию похвалити мужа. Сей не наша грубая словеса точию превъсходит, но и многоученых мудрец могий превзыти словеса. Нам же како будет по достоянию похвалити его, но токмо воспоминанием Ипатиа освятитися. Есть бо освятитися нам³ памятию святаго подвиги его почитающи. Не от прилучающих бо ся подвижников еден Ипатие пришедый к нам днесь, ниже иже древле по еллинох бывающих подвижников, именуемых олимбийскых⁴, ниже в колесницах тичющих управление, ниже иных таковых подвижников. И елиньстии убо подвижницы о⁵ щетных трудовох истленен⁶ венец от смертнаго подвигоположника приемлют. Но чюдимы нами Ипатие подвигом убо подвизася добрым⁷ наставлься от Павла апостола, веру съблюде, течение сконча прочее щадимый тому правде венец восприемля, не от смертнаго подвигоположника руки усвянувших цветец⁸ венец⁹ по еллиньскых отрок борению, но от руки царя царем и господа господем единаго безсмертнаго венец нетленный съприсносущным животом приемля, от добрый своих трудовох честного святительства и божественнаго исповедания дивных потов его с сими же и мученичества почестей наслаждение мученическы бо жызнь Ипатиеви соверьшись. Святительство священно¹⁰ прежде исправив, стадо порученное тому христоименитое, яко истинный пастырь упас. Пастырем начальнику Христови всесоверьшенно представи пагубныя волкы отгнав¹¹, хотящая погубити Христово стадо, и ереси погибелныа обличив, потреби. И той бо посреде триех сот и 18-тих богоносных¹² святых отец съпровозсия, стекшихся уяснити православную веру, в единосущную препетую троицу: отца и сына и святаго духа в первом вселенском соборе и чюжаго Ария прокленших, возмутившаго злым своим учением святую соборную и апостольскую церковь Христову, спроповеда отцем во вселенстем соборе¹³ Ипатие сей господа нашего Исуса Христа, сына божия единородна суща, от бога отца рожденна прежде всех веков, яко света от света, яко тако бога истинна от бога истинна рожденна, а не сотворенна единасущна отцу им же вся Быша, аще вецы, аще небеса, аще земля¹⁴, и яже в них, аще кая видимая, аще кая невидимая, вся тем Быша и без него ничто же бысть, еже бысть. Нас же ради в¹⁵ человекох и нашего ради спасениа съшедшаго с небес и въплошьшась от духа святага и Мария девы въчеловечьшась, и распята за ны, страдавша и погребена, и воскресша тридневно, и въсшедша на небеса и седяща одесную отца, и паки грядуща¹⁶ судити живым и мертвым и царьствующа бес конца. Тако Ипатие проповеда Христа бога, страшнаго его таинства смотрение с преполным того божеством бога отца благоволением¹⁷, безумнаго же Ария, новаго Иуду, на единосущное божество хуляща посреде собора Ипатие всесвятаго духа силою богодухновенным писанием обличаа, посрамляша, предлагая словеса священнаго писания Ветхаго и Новаго, наипаче божиа словеса Евангелиа господня и божественных апостол. Злоименитый¹⁸ Арие, научився еллинскому учению и суемудряа по еллинох богы болшая и богы меншая умышляше, и благочестие ратование¹⁹ бранем со именныи еллинскими баснями, глаголяше бо²⁰ большаго бога отца быти и меньшаго бога сына сътворена на здание²¹ твари, да сыном тварь зиждет²² бог. О безумиа зря предо очима выну орудия, ими же в нас сотворяются вещи, хуждьши суть отвещи, орудия бо соделовающая паволоки и колико хуждьши суть орудия паволок? Такоже и соделовающая златыа сосуды, колико хуждьши суть орудиа сосудов златых, сотворенных ими и многа бо таковая обрящут, колико обезумствовася Арие глаголя величати ему бога отца тем им же сына его сотворенна наречет²³. Елиньскии убо басноглаголники богу величие сътворити глаголяше, да сына его хуждьша здание наречет. Зинув бо богоратничьская уста скверным языком своим изблева Арие бяше глаголя²⁴, некогда время, егда не бяше сына и бысть сын, да сыном бог сотворит мир. Колико убо нечестие есть таковое Ариево и како премудряяся безумием не могий поне сего разумети: ножица швецы имут²⁵ да краят²⁶ царскиа багряница²⁷, и убо ножица и иглу сътворяют да ножицами кроят багряницу, иглу же сотворяют да сшивают царскую багряницу. И кто не весть, колика худость от багряница, ножица и иглы? Арие же уподобляет тварь багряницы, сотворшаго же тварь Христа уподобляет ножицам и иглы. Ипатие²⁸ же чюдный своим исповеданием и светлостию божественных правых велений апостольскых и евангельскых, богохульнику зле зияющая уста на бога загради и обличив того посрами и конечному проклятию врага святей соборней и апостольстей церкви придаде, светло с отцы богоносными всесвятую троицу единосущну православно проповеда, безначальна бога отца, от него же събезначална²⁹ сына единороднаго бога истиннаго от бога истиннаго, господа нашего Исуса Христа и всесвятаго духа господа и бога, от бога отца исходящаго с отцем и сыном покланяема и славима, троицу безначалну и единосущную в трех составех³⁰, единаго бога благаго сътворшаго небо и землю и вся, яже в них видимая и невидимая, по богословию верховнаго богословца и евангелиста, исповеда бо бога отца безначална, бога сына единороднаго собезначална отцу, не бяше времени никогда же, егда не бе сына, но в начале бе слово съ отцем и слово бе у отца присно³¹ искони и вся тем Быша и без сына³² ничтоже³³ бысть, еже бысть. И аще небеса, и земля видимая и невидимая, и аще времена, и аще векы³⁴ всяческая тъй сын божий единородный сътвори. И аще веки и времена и лета Быша сыном божиим, како сотворенная будут прежде творца их, и како будет век, или время³⁵, или лета старее сына божия, сътворшаго веки и время³⁶, и лета без него ничтоже бысть еже бысть³⁷, время и лета, и век бысть. Сын же божий единородный всегда присно есть, а не³⁸ бысть, яко сын бяше всегда и не бяше никогда же, егда не бяше, но всегда бяше сын у отца бога сын единородный и³⁹ святым духом единославен съпрестолен съвладычествуя⁴⁰ равен рождьшему его отцу и единосущен. Подобно бы нам в памяти святаго сего⁴¹ мученика и святителя Ипатия в единых богословных⁴² его учениих, яко в раю напитоватися к утешению и научению нашему и воспоминанием многих его⁴³ чюдес и мученичаскаго окончаниа его возвеселившися тръжествовати, но никто же ми порцы, иже тепле любящих святаго, хотящу ми предложити и от словес бывших во святом и великом вселенском⁴⁴ соборе. Понеже слышах и ныне некых жаб, в тине плъзающих, квоктания, по оному же Арию безумных ересь, рех же убо их⁴⁵ жабы в тине плъзающих от Ария и ище, понеже Арий свою ересь състави опираяся философии и многих философов поборников по себе на прение ко святым отцем приобрете; еще же и житием нерастленным, ниже пияным, живяше Арий: протопоп бо от патриарха Ахыллы Александрейстей церкви поставлен бысть, иже и образ жития показаваше прельщаемым от него к⁴⁶ своей ему ереси. Сии же еретицы, о них же ныне слышах, их же и жабы нарекох по сему, понеже безсловеснейши свиней суть, токмо змииное шептание имуть, не токмо⁴⁷, грамотическых не ведяху словес, неже и поборников мужей философов, но ниже народных грамот ведят или умеют почитати. Токмо в пияньстве и в объядении, и в нечистотах всегда, аки жабы в тине жируют. Таковым гроб отвърст, грътань их клокочют зловоние Ариево же⁴⁸, паче же и злее Ария во лжы и хулы на бога.

Не мню же и сему⁴⁹ сие святому Ипатию несладлстно быти, еже произведохся в память его предложити, яже святии на обличение Арию изложиша, паче же и усладитеся ему о сем болма, непщую елма в нас Христос прославляется ныне единосущен богу отцу. О нем же святому Ипатию весь подвиг бысть с богоносными отцы во святом великом соборе перьвом. О нем же подвизася добре и все время живота своего. О нём же и блаженную коньчину прият побиением. По исповедании единосущныа троицы божественей смерть с страстию притеръпе. Како же ли не усладится и ныне святитель Ипатие? Нам болший подвиг его, еже о православной вере глаголющим и славящим⁵⁰ с ним и нам препетую пресвятую троицу единосущну: триедино и едино три бога единаго в трех съставех⁵¹, отца и сына и святого духа животворящаго. И Арий проклинается от правоверных, с ним же и новыя жабы, нырающие в тине злобесия страстей.

Понеже чюжий Арий скверьными усты своими от священных словес зле на препинания изношаше к отцем перваа богопроповедников богодухновенная уста⁵², яже в плоти смотрения отчим благоволением единороднаго сына божия господа нашего Исуса Христа претыкались Ариеви вознепщевася к своей ему погибели иже и надомяся⁵³ разума помысл своих⁵⁴ разседание Июдино пострада. Таково бо⁵⁵ что богопроповедник Павел писа в послании⁵⁶ Коринфом яко Христу благоухание есмы богови во спасеных и погибелных, овем убо воня от смерти в смерть, овем же воня от живота в живот, еже случися чюжему Арию воня погибели. Понеже писанная добре богопроповедники Арий прият зле, собрав бо словеса честная, яже от Евангелия и от апостола предлагааше к препиранию отцем, в них же и чюдотворивый⁵⁷ сей отец Ипатие. Глаголаше же Арий: “Христос несть рожден от существа отча божия, но создан прежде всех и тем сътвори бог всю тварь”. Писано бо есть⁵⁸, яко глаголет премудрость: Господь созда мя в начаток путий своих, в дела своа. И Пётр в Деяниих глаголет, яко бог сътворил есть и господа и Христа сего Исуса. И Павел к евреом пишет: Верна рече сотворшему его. Сия священныа глаголы Арие зле на хуление единородному сыну божию господу и богу нашему Исусу Христу предложи. Божественный же Ипатие с святым Афонасием добре научиша нас⁵⁹ сия священныя глаголы приемше на смотрение, еже на спасение нам, единороднаго сына божия, яко же истинна во святом писании есть и глаголаше и проповедаше, яко есть премудрость съставная⁶⁰ господь наш Исус Христос, и глаголет о себе воплотився в человечество яко господь созда мя в начаток путий своих, в дела свои. Сия, еже въчеловечитися и распятись, и пострадати, и умрети за всяческая, и съоживити всяческая въскресением своим⁶¹, и призвати вся языки в познание бога⁶² отца, и оправдити вся, яко же самое сие писание показует. Не тварь бо созидати премудрость созда господь, но в начаток путий своих, в дела своя, созда господь премудрость, рекше искупити ны своею кровию богови отцу, а не еже Арий злословит хуля, глаголя, в дела своя созда бог премудрость во творение твари, но в дела своя в она господь созда премудрость. Яже и в Евангелии с небеси свидетельствова, глаголя: Сей есть сын мой возлюбленный, о нем же благоволих. Еже и Павел пишет: Прежде век тайна сокровеннаа от родов явльшижесь ныне писании пророческыми. Понеже созда бог духом святым в утробе девыя плоть премудрости своей единородному сыну своему в начаток путий своих, рекше путий, и ми же да спасет всех, в дела своя, в них же бысть Христос послушлив до смерти отцу своему, смерти же крестней, Яко же Павел пишет, несть бо поведано писанием во творение твари похожениа божия в путех ни единоя твари, но рече бог и бысть тварь. Зде же глаголет: Господь созда мя в начаток путий своих, в дела своя, еже чисто показует благоволение божие. Начаток путей божиих и дел его – спасение человечеству въплощением единороднаго его сына. Понеже внегда создание твари, глаголет тамо⁶³ о себе премудрость, рече бех ему подобна, а не рече, создана бех. Аз бех о ней же радовашесь, рече, собезначалное показует⁶⁴, яко не внегда⁶⁵ создатися плотию начаток бысть премудрости божии, но прежде всех холм ражает мя, рече, и егда готовляше небо и всю тварь бех ему подобна прежде даже создатись плотию в человечестве. Тамо не глаголет господь созда мя, но глаголет⁶⁶ ражает мя и внегда созидати ему тварь и тогда бех ему подобна рече, а не рече, создана бех, но рече тогда бех ему подобна. Тем же самаа словеса показуют сущее в плоти создание въчеловечение сына божия: в начаток путий благоволения божия о нем в дела своя ими же созда церковь: страданьми, крестом и воскресением, еже самый в Евангелии глас съй: Разорите, рече, церковь сию и треми дньми воздвигну ю. Тако же и богопроповедник Петр богословив прежде о Христе показа его бога суща и внегда же въсприяти господне, еже плотию распятие, тогда и сотворение воспомяну глаголет бо помянув⁶⁷ пророчество Давыдово о воскресении Христове, яко не оставися душа его в аде ни плоть его виде истления, и рече: Сего Исуса въскреси бог, ему же мы есми вси свидетели, та же присносущное его божество проповедая рече: Десницею убо божию възнесъся обетование же святаго духа прием от отца. Излия се, еже вы ныне видите и слышите, не бо Давид взыде на небеса глаголет бо сам: Рече господь, господеви моему седи одесную мене, дóндеже положу враги твоя подножие ногама твоима. Таже проповедает паки крест и сущаго уже сотворениа⁶⁸ глаголет, а не от небытиа⁶⁹ сътворение его глаголя твердо убо да разумеет весь дом Израилев, яко и господа и Христа его бог сътворил есть сего Исуса, его же вы распясте. Яко же и царь сына своего сътворит⁷⁰ царя, не несущаго, ниже не роженнаго сына своего царь сотворяет царя, но уже преже роженнаго и всегда с отцем царствующаго и ново прославляа того роженнаго древле сына своего и сущаго сътворяет его царя, яко же Давид Соломана сотвори царя роженнаго уже и сущаго. Соломан же не тогда бытию своему начало принят, внегда Давид сотвори его царя, но⁷¹ прежде сотворениа царем рожен Давидом Соломан от Вирсавиа. Сие и Петр, не начало бытия Христова сказуя, глаголет, яко и господа и Христа его бог сътворил есть⁷² Исуса, но сущаго уже⁷³ того, его же вы распясте, рече. Аще и распясте Исуса, рече, не мнитесь уже⁷⁴, яко и убиете его и смертию истлети ему, но бог сътворил есть от распятия и господа⁷⁵ Христа сего Исуса, его же вы распясте, рече. Такоже и Павел богопроповедник богословив и показа Христа бога истинна несотворена. Внегда же воспоминая Христово, иже во плоти отчаго благоволениа о нем нашего смотрениа⁷⁶ смотрение, тогда сотворение прият, глаголет, бо многочастне и многообразне древле глагола бог отцем, пророки⁷⁷ впоследок дний сих глагола нам сыном, его же положи наследника всем, им же и веки сотвори иже сын сияние славе и образ состава⁷⁸ его нося же всячесная глаголом силы своеа собою очищение сътворив⁷⁹ грехов наших, седе одесную престола величествиа на высоких. Аще сияние славы божия Христос, тем же несть сотворен сын, но рожен. Сияние бо от существа самого славы есть, а не от вну⁸⁰ приближаяся сияние славы, но само существо славы сияет. И посему зело единосущна сына отцу Павел проповеда и съсущна сына отцу суща, а не последи сын отца, ни бысть егда не бе, но присносущен отцу сын. Понеже славы сияние несть послеже, ниже бе слава, егда не бе сияние, несть бо слава никогда же без сияниа, но присносущно сияние славе. Ни может же слава без сияния явитися и в солнцы бо слава никогда же без сияниа, аще когда и заступит землею от сианиа солнечнаго или луна подпад солнцу, но солнечнаа слава единаче сияет, а не без сияния солнце, иже и⁸¹ краеве солнечнаго тела являют, внегда от луннаго круга отступати начинают. По сем глагола Павел, яко плоть прият господь от семени Авраамля и уподобися по всему братии, рекше, человек совръшен бысть. Та же рече и милостив будет и верен перьвосвященник, яже и богу, еже оцыстити⁸² грехы людем. Еже и Давид глаголет: верен господь во всех словесех своих и преподобен во всех делех своих⁸³. И тако глаголет Павел: Братиа святая званию божию причачастницы разумейте посланник⁸⁴ апостола и святителя⁸⁵ исповеданию нашему Исуса Христа верна суща сотворшему его, и прирече, глаголя, яко же Моисей верен во всем дому своем и по мале множаишей бо славе паче Моисея сын⁸⁶ сподобись, яко же елику же множайшю честь имать⁸⁷ сотворивый его, всяк бо храм созидается от некоего, а сотворивый всяческая – бог⁸⁸. И Моисей же убо верен во всем дому своему, яко угодник во сведетельство глаголанным, Христос же, яко сын в дому своем. И Павел не исконное бытие Христово глаголет верна суща сътворшему его, рекша апостола и святителя верна суща сотворшему его, святителем и апостолом, еже в плоти смотрение глаголет сътворен святитель Христос сущий уже сътворен святитель⁸⁹, а⁹⁰ не бытию Христову начало сътворение глаголет Павел, но святительству сотворение и послание сущее во плоти. Им же и Моисеа представи сотворена на избавление Израилю от Египта. И понеже рече Моисей пророка вам воставит⁹¹ господь бог от братиа вашея яко мене того послушайте во всем. И показует им Павел, яко Христос паче есть Моисеа, а не яко и⁹² Моисей. Аще и прирече, яко⁹³ и Моисей верен во всем дому своему, Христос верен сътворшему его и святителем и посланником. Толико⁹⁴ различно Христово от Моисея положи елико сътворивый дом, рекше, якову же честь владыка над рабы имать. Моисей бо яко угодник, Христос же понеже сын в дому своем.

Тако Ипатие с богоносными отцы Ариа низложиша похуливша сына божиа и немы сотвориша уста его глаголющая на бога неправду. Господа же и бога нашего Исуса Христа сына божиа единороднаго единосущна богу отцу проповедаша бога истинна от бога истинна ражена, а не сотворена прежде всех веков им же Быша вся⁹⁵. Сам бо господь и бог и спаситель наш рече Исус Христос: Никто же знает сына, токмо отец, ни отца кто знает, токмо сын и ему же аще волит сын открыти и видевый мене видел есть отца, и аз и отец едино есве. И богопроповедницы⁹⁶ богословцем врьх глаголет: в начале бе слово и слово бе к⁹⁷ богу и бог бе слово, и оно же не восхыщением непщева равен быти богу, но себе излиа зрак раба прием. И множайшими же богодухновенными писаньми троицу единосущну правословно проповедаша ясно. Блаженный же Ипатие силен убо словесы в богодухновенных писаниих и елма же и в чюдесных творениих святитель велик божий апостольскыми даровании светяся. Понеже прослави бога Ипатие делы благими и деяньми богоугодными и гласом грътани прослави зело в троицы единаго бога устнами же и языком възвести правду божию всем, еже крайнаа ради милости к нам сшествие единороднаго сына блжия и преславно нам спасение съделавша вочеловечением своим и крестом и воскресением. Таако же и труды своими священный Ипатие прослави бога. В молитвах непрестанных к богу пождавая и в бдениих всенощных претерьпевая пост с воздерьжанием желанно стяжа, слезныа источники проливая очисти сердце свое и ум на высоту божия любве вознесе, нищая приобрете, вдовыя и сироты не имущих снабдителен взыскав ущедри и снабде, алчныя напита и странным прииматель бывая, и нагух не презрев велми убо подвизаясь на высоту взыде добродетелей, тако бо о нем предасть преподобный Иосиф, иже о нем известно ведяше.

И понеже прослави бога в телеси своем Ипатие и в дусе своем много и бог Ипатия прослави: Славящая мя, рече господь, прославлю. Тем же и дары божественныа подаст бог Ипатию, источити пучину священнообразных чюдес и исцелением потокы излияти. Болным бо мнозем Ипатие здравие подаст молитвами своими, иже молящимся ему⁹⁸ болящим⁹⁹ недуги от них отгна и бесныя приводимыа к нему очищая прогоня лукавыя духы. Сий апостольский муж невкоей веси ходя потребе принудивши людистей¹⁰⁰ и тамо воды текущия из горы гръки суща, и сладкых вод в веси не имуща молим убо тамошьними жители Ипатие и жалящим¹⁰¹ гръкых ради неплодных вод. Ипатие же, яко же и Моисей, преложи на сладость назнаменав текущия воды токмо знамением¹⁰² креста и по Елесею пророку блаженный Ипатие горькия воды целбоносны сотвори. И понеже приближися богови священный Ипатие молитвами священными и¹⁰³ ума чистотою приемница бысть божественнаго просвещения от приближающагося божества приближающимся к божеству осветився пресветлоумными лучами. Тем же и в нощи темней шествующу преподобному сему святителю потреба бе осветити пути близ воды идущу, да не поползшися нога водам ходящаго подаст и пореянием утопити впадшаго в воды. Не имущу же блаженному Ипатию светила умныма очима взимашеся к присносущному свету, иже любя всегда осияватися не заходимым светом тем же абие и свеща многи горящаа от воды възсияша ему многу светлость подающа праведному, внегда по пути ему шествовати. Иногда же такоже творениа ради богоугодных дел ходящу нощию Ипатию и господню заповедь делающу глаголющую: да не увесть шуйца твоя, еже творит десница твоя, обходя посещаше вдовы, и сирыя, и нищаа, и бедныа во еже спомогати им. Постигает же Ипатия и паки владычний глас глаголющий: Не может град укрытися врьху горы стоя и светило на свещнице да светит всем. И тако да¹⁰⁴ просветится свет ваш пред человеки, яко да видят ваша добраа дела и прославят отца вашего небеснаго¹⁰⁵. Сего ради обиявиша Ипатия явльшися и паки от воды свеща горящая озаряюща Ипатия, внегда ему учрежающу убогиа нощию.

Бысть же некогда и в некоей веси своей чудный сей Ипатие под студеным воздухом и влажным сущем месту тому. И жителем веси тоа от недуг воздушныя студени страждущим изнемогати, и к утишению недугов бань не имущим им¹⁰⁶. Видев сиа, иже всем сердцем ко источнику добрым Христу вместивыися от него же богатно чюдес зарями сияя, милосердствовав о них зело милостивому Христу последователь Ипатие. И походив на месте стран угодных к банному устроению на них же молитвами натолико себе простре к богу, дóндеже сухиа боки земныя происпусшивша источникы непрестанно текущиа теплых вод попадающа всяким недугом исцеления¹⁰⁷.

Что же ми убо исчитати содеянная чюдодейственым Ипатием? Како же ли и¹⁰⁸ хощу исчитати, иже превосходит ума достижение его благости¹⁰⁹ и язык изрещи не¹¹⁰ возможет Ипатиевых чюдес безмерную пучину! Едину убо от всех чюдес предложу чюдо святаго, слово съкращу. Призван бысть блаженный сей царем Коньстяньтием, сыном великаго Коньстантина. Змию бо привелику от некуду приползшю и в хранилище царьскаго имения впользшю, идеже все залто и¹¹¹ богатьство лежит. Змиеви убо обьемшу хранилище имения и главу свою к восходу приложшу и не дадущу никому же в двери полатныа внитти. И царю Коньстяньтию о сем в велице печали¹¹² бывшу и многиа священныа мужи о сем молитвовати понуди, да отьженут змия. Последи же и¹¹³ блаженнаго Тпатие приведе, молив убо царь Ипатиа, да молитвою проженет змиа, рече же, да не без соблюдения зверю приближится люту ему сущу, показаша Ипатию змия издалеча. Блаженный же Ипатие пад на земли помолися час доволен. И востав от молитвы, глагола царю: «На месте, идеже есть образ отца твоего, повели посреде подрома¹¹⁴ велицей скраде¹¹⁵ огненей быти, рекше огнищу или груда дров, а не сковрада, но скрада¹¹⁶. И ту¹¹⁷ вжегше да ждут тамо, донележе аз дойду». И царю повелевшу тако сотворити. Блаженный же Ипатие врата хранилищу царских имений отверъз и зверя жезлом своим ударяше и не успеваше же ничтоже. И дню преклоняшуся вси же издалеча позорующе бяху и бояхуся от звери умрети святому. Той же очи¹¹⁸ на небо возведе и господа призвав, жезл свой во уста сверю вложи и рече: «Во имя господа Исуса Христа моего последствуй ми». Змий же зубы своими край железа емся и последоваше святому. Блаженный же извед его от полаты и весь подром¹¹⁹ прошед даже и до тръга жезл по земли влекий, иже и все позорище видевше змия за край жезла дрьжащася и влекома, ужасахуся вси. Бяше бо змий велик зело и страшен взором. И приближися Ипатие к огненей скраде и рече к змию: «Во имя Христово, его же и¹²⁰ аз меньший проповедаю, повелеваю тебе внити посреде огня». Страшный же¹²¹ он змий, нагръбив себе, и¹²² ввержеся среди скрады¹²³ огненыа пред всеми и¹²⁴ изгоре. Тогда Коньстантие царь зело благодарив, аки и своего отца блаженнаго Ипатия и многим имением почте его и¹²⁵ образ лица его на досце въобразити повеле и сему бывшу в царьстей полате над дверьми возлжити повеле. Мню же убо нечистому сему зверю внити в царьския клети прознаменати нечистаго беснованиа Ариева. Коньстаньтие бо царь от Евсевиа¹²⁶, епископа Никомидийскаго, прельщен бысть поплъзесь в Ариеву ересь¹²⁷, тяжек бысть правоверным. Последи же его тяжъчайши и его Уалент¹²⁸, того же злочестиа Ариева православным досади по многу. Блаженный же¹²⁹ Ипатие богатством, обогащенным ему от царя, града своего Гангра¹³⁰ нищая удоволи, и яко душу свою и сердце церковь троицы сотвори Ипатие, рече бо господь: Любяй мя возлюбен будет отцем моим и приидеве¹³¹ к нему и обитель у него сотвориве. И во пророце¹³² рече, яко вселюся в ня и похожду и буду им бог, и тем¹³³ священныа церкви Ипатие многи созда на славу Христа богу. Сице Ипатие пожит¹³⁴, плотьския страсти воздерьжанием умертвив прежде, иже нас ради умершаго на кресте Христа, истинный живот стяжа, тем же и вся шествия Ипатиева в дусе святем к себе направляюща, и яко добре воспитався воздерьжанием в преславную высоту взыде священных добродетелей умом простреся к¹³⁵ видению тайному доброту Христову созерцати. От него же сияния умом и мыслиюю озарився, бысть весь световиден святитель, достоин быв престолу Гангрьскиа церкви, всем, иже с верою приходящим к нему, возсиявше луча¹³⁶ чюдесныа. Святительствова же преподобной праведно, божественными законы ограждаяся слово божие не корчемствова, но истинно съдержа и здраво и цело соврьшение, и учение нескврьно от еллиньскаго и от еретическаго самосмышления соблюде, правая веления апостольская възгласи. И глас бо блаженнаго Ипатия светом смешен бяше понеже осиян божественным светлостьми и тму ересем разори восияв, аки солнце, направи люди к дни¹³⁷ православия имея краснейший язык, яко трость явлься скорописца книжника написа премудро звкон, иже в благодати новый погладив, иже на досках Ветхаго закона образы стеневныа¹³⁸ прочее в глубокую старость достиже во священных трудех не изнемог, подобает же ему к отцем преити.

Ничто же ми возбраняет рещи, яко подобает Ипатию патриарху к патриархом преложитися и истинне проповеднику Ипатию к богопроповедником апостолом и к пророком востещи, и последи их¹³⁹, яко с ними же подвизася и поты многы показа во¹⁴⁰ истиннем словеси исправлении и ко еретиком, кръчемствующим слово божие и к еллином, пагубным волком, хапающим злейшими зубы разногласием и зловерием Христова стада овец, премудрящимся суими¹⁴¹ помышленьми и тщими словесы¹⁴² разливающимися на воздух препиратися, точию ведящими, и ничтоже пользующими, иже мрътвыа богы приводящим в мир, слепыя и глухия и немыя идолы. Ипатием же исповедаемый един бог в троицы, иже на небеси и на земли вся, елика восхоте, и сотвори, и небо самое, и землю и море, и вся же в них. Елма Ипатиеви востещи подобает к богопроповедником апостолом и к пророком, яко причастник потов и трудов их¹⁴³. Подобает же ему еще¹⁴⁴ и болезнем их причаститися, еже крайнему подвигу совершение крови своея за Христа излияти. Христу бо свою пречистую кровь за ны излиявшу на кресте. И Ипатиеви многых потов его и трудов¹⁴⁵ о благочестии многия веньца щадимы¹⁴⁶ суть в сокровищах безсмертия в недрох¹⁴⁷ небеснаго царствия препетыа троица, и иже¹⁴⁸ сего веньца, еже о мученичестве остает Ипатие, да и с мученикы Христовы водворится. Но тогда убо Христос милостию своею мир глубок святей своей церкви подаде потребив гонителей и мучителей от нея поручив земное царство кроткому Коньстаньтину, яко же и Давыду возлюбленному от него. Ипатиеви же от инуду¹⁴⁹ веньца мученичества изготоваются, не подобает бо ему остаяти мученическиа доброты, иже Христа исповеда и Ипатие, яко же и мученики, и трудись и поты пролия, яко же святии апостоли и пророци, и чюдесы землю озари, да мученически и¹⁵⁰ и сконьчався Ипатие, яко¹⁵¹ мучеником приложится и яко исповедник со исповедники вчинен¹⁵² будет и яко истинному словеси правый исправитель к богопроповедником пророком и апостолом вселится. Таковое же на трижнение Ипатиеви случается сице.

Еретицы Наватова мудръствующеи завистию многою распалишася на блаженнаго Ипатия, и¹⁵³ идеже обычай имеяше святый шествовати сквозе теснота и бреговитая места, заседше тамо¹⁵⁴, стрежаху, и блаженному Ипатию идущу напрасно, яко зверие воставше, нань устремившась и низ¹⁵⁵ с высоты брега того¹⁵⁶ свергоша, многи раны на него возложиша и камение же, яко некогда июдее на прьвомученика Стефана посыпаша. Святый же в реку ввержен бысть еле жив, руце мало простер и очи на небо возвед: Господи, не постави им греха сего, глаголяше, и еще ему моляшуся. Жена некая, Ариеви ереси, камень велий вземши в главу святаго удари¹⁵⁷. И тако мученический конец¹⁵⁸ восприа Ипатие венец ему каменная метаниа свыше Быша и¹⁵⁹ к небесной высоте степени и лествица, по ней же восьшед, богови присвоися ближайше. Тело же святаго убийцы в плевницу скрывше отидоша. Делатель же, его же беаше плевница, прииде плевы взяти своему скоту, слыша небесных сил славословие над телесем блаженнаго Ипатиа и вестник быв всем о преподобнем. Не укосневши же благодать на Ипатии чюдеса содевающа. Бесом бо горким¹⁶⁰ предашася грько, иже¹⁶¹ безбожно уморившии Ипатиа. Злокозненая же она жена, убившая святаго, злым духом одерьжима, убийственный камень вземши своя перси непрестанно бияша. Тако же и обещницы таковому убийству нечистыми духы казняхуся вси. Уведавше же жителие Гангрьстии сие, собрашася тамо и много¹⁶² рыдаху, вземше святаго тело его отнесоша во свой град и положиша на место нарочите. Жена же она, последущи по них, биющи себе каменем, им же святаго убила, бяше исповедающися, и по еже полодити святое тело Ипатиево, абие исцеле жена и вси, иже убойству причастившеися и такою мукою истаявша, вси исцелеша. Быша же и ина множайша исцеления в день положения блаженнаго¹⁶³ телеси¹⁶⁴, непрестанно же рака¹⁶⁵ его истекаше исцелениа и благословение же честныя его перьсти приемлющим известно, яко прах истневает всякия страсти.

Приидете удов си любящеи Ипатиа, и о мне ставше, венценосца со мною хвалите божественаго страстотерьпца, пастыря добраго. Церковно¹⁶⁶ утверждение, ереси омрачившаго, безаконных соборища божественою силою потребившаго и чюдесными зарями вся просвещающаго, столпа божественаго¹⁶⁷ к высоте небесней взимаемаго, правоверию стену незыблему, святителем степень, мучеником красную лепоту. И сия убо тебе от нас, о божественая и священнаа главо, аще и скудна и твоея доброты много остающа¹⁶⁸, но нашеа силы не меньши, обаче и богови, еже по силе неотметно.

Ты же нас свыше назирай и жизнь нашу на лучшее изводи, и мучительство укроти, и немощнующим силу, и возвышение християньскому рогу¹⁶⁹, и церькви мир и согласие даруй о самом Христе, истиннем бозе нашем. Ему же слава и дрьжава, честь и покланяние со безначалным его отцем и с пресвятым благим и животворящим его¹⁷⁰ духом ныне и присно и во веки веком. Аминь.

(ГИМ, собр. Уварова, № 349, в 4°, лл. 1–25)