Минея, 2 Января.
Глас 8
Песнь 1
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля жe беглеца́, пешехо́дца спасе́,/ песнь Бо́гови воспева́юща.
Припев: Свята́я пра́ведная Иулиани́е, моли́ Бо́га о на́с.
Бу́рями страсте́й всегда́ погружа́ема мя/ и молво́ю по́мыслов грехо́вных коле́блема,/ к ти́хому приста́нищу Христо́вы во́ли мольба́ми твои́ми, свята́я Иулиани́е, напра́ви,/ я́ко да досто́йно пою́ тя.
Припев: Свята́я пра́ведная Иулиани́е, моли́ Бо́га о на́с.
Вдо́вством чи́стым просвеща́ема, Богоблаже́нная,/ Христо́ви посто́м уневе́стися, и моли́твами, и ми́лостынею/ и после́дова живоно́сным Его́ стопа́м,/ ску́дость мно́гу во́лею претерпе́вши.
Сла́ва Отцу́ и Сы́ну и Свято́му Ду́ху.
Святы́х отец уче́нию после́довала еси́, сла́вная,/ и сих нра́вом и чистоте́ поревнова́ла еси́,/ воздержа́нием, а́ки безпло́тна, су́щи и чистото́ю преподо́бна,/ во и́стиннем смире́нии до́бре пожи́вши.
И ны́не и при́сно и во ве́ки веко́в. Ами́нь.
Богородичен: Пречи́стая Богоро́дице,/ воплоще́нное, присносу́щное и пребоже́ственное Сло́во па́че естества́ ро́ждшая,/ пое́м Тя.
Песнь 3
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Припев: Свята́я пра́ведная Иулиани́е, моли́ Бо́га о на́с.
В Небе́сныя черто́ги все́льшися, светоза́рная,/ Богоуго́днаго ра́ди жития́ исцеле́ния ре́ки источа́еши/ и стра́стная тече́ния изсуша́еши.
Припев: Свята́я пра́ведная Иулиани́е, моли́ Бо́га о на́с.
Распали́вшися жела́нием кра́йним,/ возлюби́ла еси́ Христа́, Богому́драя,/ обнища́вшего пло́тию премно́жеством благосе́рдия,/ и после́довала еси́ живоно́сным Его́ словесе́м,/ жите́йская вся презре́вши.
Сла́ва Отцу́ и Сы́ну и Свято́му Ду́ху.
Позлаще́не криле́ ми́лостынею стяжа́вши,/ к Небе́сней высоте́ возлете́ла еси́, Богоблаже́нная Иулиани́е,/ я́ко голуби́ца нетле́нная.
И ны́не и при́сно и во ве́ки веко́в. Ами́нь.
Богородичен: В ложесна́ Твоя, Всенепоро́чная, всели́ся Зижди́тель,/ воплоща́емь на благодея́ние ве́рно пою́щим Тя.
Седален, глас 4
Посто́м и моли́твами украше́на и ми́лостынею Бо́га одолжи́вши,/ я́ко непоро́чная уго́дница Христо́ва, с Ним в нетле́нный вошла́ еси́ черто́г,/ иде́же красоты́ Его́ наслажда́ешися,/ но моли́ спасти́ся от вся́ких бед и боле́зней нам, любо́вию пою́щим тя.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Свята́я пра́ведная Иулиани́е, моли́ Бо́га о на́с.
Све́тлое торжество́ твое́, све́том Бо́жия Ду́ха сия́ющее,/ озаря́ет ду́ши на́ша,/ ве́рою пою́щих тя, преподо́бная.
Припев: Свята́я пра́ведная Иулиани́е, моли́ Бо́га о на́с.
Чудесы́ Боже́ственными уве́рила еси́ неве́дущих Влады́ку/ и к ве́ре Христо́ве тех возврати́ла еси́,/ пре́лести тьму оста́вльших.
Сла́ва Отцу́ и Сы́ну и Свято́му Ду́ху.
Дар Христо́ви принесла́ еси́ – чи́стое умерщвле́ние удо́в,/ труды́, и воздержа́нием, и ми́лостынею Бо́гу угоди́ла еси́/ и проти́ву прия́ла еси́ Небе́сное Ца́рство и ве́чное наслажде́ние.
И ны́не и при́сно и во ве́ки веко́в. Ами́нь.
Богородичен: Смири́вши, спаси́ мя, высокому́дренно живу́щаго,/ ро́ждшая Спа́са,/ возне́сшаго смири́вшееся естество́ на́ше, Пречи́стая.
Песнь 5
Ирмос: У́тренююще, вопие́м Ти:/ Го́споди, спаси́ ны/ Ты бо еси́ Бог наш,/ ра́зве Тебе́, ино́го не ве́мы.
Припев: Свята́я пра́ведная Иулиани́е, моли́ Бо́га о на́с.
Ру́це твои́ преподо́бныя, воздвиза́еме ко Христу́, ма́ти,/ низложи́ша вра́жия стремле́ния.
Припев: Свята́я пра́ведная Иулиани́е, моли́ Бо́га о на́с.
Удержа́в ру́ку твою́ десну́ю, Вы́шний/ наста́ви тя, ма́ти, к Небе́сному Ца́рствию.
Сла́ва Отцу́ и Сы́ну и Свято́му Ду́ху.
Стезю́ те́сную преше́дши в поще́нии,/ к широте́ ра́йстей приспе́ла еси́, всечестна́я ма́ти.
И ны́не и при́сно и во ве́ки веко́в. Ами́нь.
Богородичен: Богоро́дицу Тя не ве́дущии, Богома́ти,/ Све́та не и́мут ви́дети, ро́ждшагося от Тебе́, Пречи́стая.
Песнь 6
Ирмос: Ри́зу мне пода́ждь све́тлу,/ одея́йся, све́том, я́ко ри́зою,/ Многоми́лостиве Христе́ Бо́же наш.
Припев: Свята́я пра́ведная Иулиани́е, моли́ Бо́га о на́с.
Умертви́вши двиза́ния плотски́я и над страстьми́ воцари́вши ум,/ ны́не, всечестна́я Иулиани́е,/ в бесстра́стных живе́ши све́тлостех.
Припев: Свята́я пра́ведная Иулиани́е, моли́ Бо́га о на́с.
О́бразу Спа́сову покланя́тися навы́кла еси́, сла́вная,/ всено́щными стоя́ньми, сло́вом и де́лы соблю́дши спаси́тельная Его́ уче́ния.
Сла́ва Отцу́ и Сы́ну и Свято́му Ду́ху.
О́блак показа́ тя Христо́с, источа́ющу ми́ро, я́ко дождь,/ на исцеле́ние приходя́щим с ве́рою к моще́м твои́м.
И ны́не и при́сно и во ве́ки веко́в. Ами́нь.
Богородичен: Красе́н па́че всех челове́к/ бысть Сын Твой, Пречи́стая, добро́тою Божества́,/ а́ще и плоть бысть нас ра́ди.
Кондак, глас 8
Скоропослу́шливую помо́щницу вси, су́щии в беда́х и боле́знех,/ воспое́м Иулиани́ю святу́ю,/ та бо в ми́ре богоуго́дно поживе́/ и ми́лостыню к ни́щим безме́рну показа́,/ сего́ ра́ди обре́те благода́ть чуде́с Бо́жиим ве́дением.
Икос
Прииди́те, по́стническое сосло́вие,/ прииди́те, чистоты́ рачи́телие,/ прииди́те, празднолю́бцев вся́ких во́зраст,/ прииди́те, вдови́цы с мужа́тыми,/ пе́сньми духо́вными похва́лим блаже́нную Иулиани́ю,/ по́стницам похвалу́, вдо́вам украше́ние,/ ми́лостивым удобре́ние, печа́льным уте́шительницу,/ боля́щим посети́тельницу/ и су́щим в беда́х ско́рую помо́щницу,/ Богому́друю ми́лостивницу и странноприе́мницу,/ точа́щую всем исце́ления, приходя́щим к ней с ве́рою,/обре́те бо благода́ть чуде́с Бо́жиим веле́нием.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припев: Свята́я пра́ведная Иулиани́е, моли́ Бо́га о на́с.
Красоту́ тле́нную небрегла́ еси́, Иулиани́е блаже́нная,/ смотря́щи та́мо су́щая воздая́ния,/ свет же и сла́ву нестаре́ющуюся,/ и Бо́жию красоту́ и весе́лие, и Боже́ственное наслажде́ние.
Припев: Свята́я пра́ведная Иулиани́е, моли́ Бо́га о на́с.
Мир тле́нный премени́ла еси́ преми́рною жи́знию нестаре́ющеюся/ и вре́менную пи́щу пребыва́ющим существо́м,/ чи́стым же вдовство́м обрела́ еси́ Небе́снаго Жениха́.
Сла́ва Отцу́ и Сы́ну и Свято́му Ду́ху.
Ра́зум боголюби́в стяжа́ла еси́ в души́, пло́тию А́нгелом уподо́бившися,/ бдя́щи те́пле и любо́вию пою́щи:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Виждь скорбь мою́, Де́во Богоро́дице,/ ю́же ми наведе́ мно́жество зол мои́х,/ и от гее́нны о́гненныя исхи́ти мя, пою́ща:/ благослове́н Бог оте́ц на́ших.
Песнь 8
Ирмос: Богоглаго́ливии о́троцы в пещи́/ со огне́м пла́мень попира́юще, поя́ху;/ благослови́те, дела́ Госпо́дня, Го́спода.
Припев: Свята́я пра́ведная Иулиани́е, моли́ Бо́га о на́с.
Украше́на сия́нием чистоты́ и чи́стым житие́м просвеще́на,/ предстои́ши Христу́ Бо́гу нашему́, пою́щи:/ благослови́те, дела́ Госпо́дня, Го́спода.
Припев: Свята́я пра́ведная Иулиани́е, моли́ Бо́га о на́с.
Боле́зни разли́чныя челове́ком врачу́ет/ и бесо́вския нападе́ния прогоня́ет те́ло твое́, пра́ведная,/ во гро́бе пресла́вно сокрыва́емо.
Сла́ва Отцу́ и Сы́ну и Свято́му Ду́ху.
Моле́бную песнь Го́сподеви принеси́ о пою́щих тя, блаже́нная,/ и боле́зни лю́тыя облегчи́,/ да пое́м тя во ве́ки.
И ны́не и при́сно и во ве́ки веко́в. Ами́нь.
Богородичен: Неможе́ние ду́ши моея́ исцели́/ и теле́сныя боле́зни, Де́во,/ я́ко да пое́м Тя во ве́ки.
Песнь 9
Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от девическаго чре́ва быв Челове́к./ Те́мже Пречи́стую Богоро́дицу, ве́рнни, велича́ем.
Припев: Свята́я пра́ведная Иулиани́е, моли́ Бо́га о на́с.
Возжеле́вши добро́ту Христо́ву и от души́ возлюби́вши Его́,/ зове́ши Ему́, те́пле вопию́щи: где пасе́ши, да почи́ю у тебе́?/ В Твои́х све́тлостех наслажда́юся, велича́ющи Твою́ благода́ть.
Припев: Свята́я пра́ведная Иулиани́е, моли́ Бо́га о на́с.
Ра́зум име́ла еси́ в души́ и смире́ние,/ и Боже́ственную кро́тость, и ве́ру несунне́нну, и любо́вь к Бо́гу,/ всено́щными мольба́ми приближа́ющися Ему́/ и та́мо су́щими све́тлостьми ублажа́ема, Иулиани́е, озаря́ема и просвеща́ема.
Сла́ва Отцу́ и Сы́ну и Свято́му Ду́ху.
Нас, ве́рою хва́лящих тя, помяни́, Иулиани́е блаже́нная,/ душе́вных и теле́сных боле́зней изба́ви/ и к Небе́сней стези́ наста́ви ве́рою хва́лящих тя.
И ны́не и при́сно и во ве́ки веко́в. Ами́нь.
Богородичен: Пощади́ мя, Христе́ Бо́же, рожде́йся от Де́вы/ и ро́ждшую Тя нетле́нную сохрани́вый,/ егда́ ся́деши суди́ти дела́ моя́,/ беззако́ния и грехи́ моя́ пре́зри,/ я́ко безгре́шен, и ми́лостив Бог, и Человеколю́бец.
Светилен
Свет Христо́в всели́ся в тя, Иулиани́е,/ и сотвори́ тя жили́ще Свято́му Ду́ху,/ те́мже и нас спаса́й моли́твами твои́ми, блаже́нная.