50. 1422 г. августа 8. Его же грамота тверскому епископу Илие, с разрешением рукополагать ставленников из соседних местностей вдовствующей новгородской епархии

Эта еще неизданная грамота издается по двум спискам, находящимся в августовской книге Макарьевских Миней-Четьих (Успен. сп. – основной – л. 1533–1534 об. Синод. сп. л. 767 об.–769).

Благословенье Фотия, митрополита киевского и всея Руси, о Святом Духе сыну и сослужебнику нашего смирения, епископу тверскому Илие. Веси убо, еже ныне епископа Великого Новгорода без епископа есть, и христианству православному нужно есть без священников быть, а поставлять их тамо несть кому. Ино преже, как есмь пришел на святейшую митрополию русскую с грамотой святого патриарха и всего святого вселенского собора, и послы святого царя и святого патриарха и святого собора, со вселенскими грамотами посланные к ним о церковной старине, и были у них, чтобы старины церковные – суда позывного отпустились церкви Божьей и мне, святителю, по старине митрополии киевские и всея Руси: и они старины не отпустились. И потом был у меня владыка Иван и ял ми ся был ту старину церковную отправить ²¹¹⁰ , да не отправил. А потом прислали ко мне Симеона, а после того Eвфимия, и аз тех обоих поставил им во владыки, и те владыки такоже ми ся были яли старину церковную отправить. А и все те ми послы Новгородские давали таково слово, что им было старины отступиться церкви Божьей и мне. Да как те владыки тое старины церковные не отправили: тако и те новгородцы не отступились тое старины Божьей и до сего времени. А та Божья церковь вдовствует, а христианам пастыря несть. И ныне что еси ко мне приказал с моим боярином с Иваном с Ильичем с Сурмой, чтобы ти поставлять во священство от той архиепископии к тебе приходящих, новгородские, из Бежицкого Верха и с Волока, диаков в диаконы и диаконов во священство свершать: и наше убо смирение, за настоящую о сем нужу времени и за несмотрение о том Великого Новгорода, волю дает твоему боголюбию, яко да литургисаеши церкви своей епископии, и от тех двоих властей приходящих к тебе, по правилам и со истязанием и со испытством всяким духовным, достойных и благоговейных да поставляешь в великое Божье священство. А от иных бо еси властей тое новгородские епископье не принимал, ни поставлял, как есмь тебе и преже сам говорил, а ныне и пишу, блюдучи своего сана по правилам. А приездили бы к тебе тe ставленники из тех двух властей ктоже с своим отцам духовным, который отец того своего сына духовного, от юности его, ведает его житиe и чистоту телесную и все его содеянное от большей вещи и до меньшей; а от шести бы свидетелей от священников от таких же, кто ведает того ²¹¹¹ житие и достоинство к великому Божьему священству, взяв грамоту с их подписями и с их печатями, да приносил к тебе, кто ся поручит: по том ставленники и по всем имет, что он всячески духовно и телесно достоин есть на поставление того великого священства. Занеже должно было всем тем семи священникам приехав испоручаться о того достоинстве; но за нужу нынешнего ради времени и за удаление того места и христианских ради душ, тако есмь поучинил ²¹¹² , чтобы отец духовный которогождо ставленника един приездил, взяв грамоту с подписями их и с печатями: споручали бы ся и имали о нем во всем в том, что ни тать, ни разбойник, ни блудник, ни хищник, ни холоп, ни в иных злых делах повинен, что от всех таковых вещей возбраняют божественные ²¹¹³ и священные правила; но о всем бы добродетелен был и кроток и смирен, и чистоту телесную соблюл от самого родства его и до совокупления от Божьей церкви законом Божьим с венчанной женой. А кто от тех, ведая свое недостоинство, и дерзнет на таковое великое дело, как за плохо себя ставя, или тот отец его духовный и те шесть свидетелей священников, ведая которую возбраняющую тому вещь на поставление священства, да по нем тое покрыют чеси деля, аще и испоручаться, и когда та его вещь изобличится, и он како сам будет лишен своего сана, тако его отец духовный и те священники – свидетели, поручники его, священства же лишены будут. А ты бы того отца духовного которагождо ставленника преже сам истязал о поставляемого достоинстве, да и того самого хотящего в священство, со испытством же всяким духовным, по божественным и священным правилам, истязал его, по вышеписанному, о всякой его чистоте и достоинстве: блюл бы еси о том своей души и своего сана, по сем – и истязания о том будущего в день великого суда. А младых бы еси не поставлял никако, но по правилам в возраст пришедших и благоговейных, со испытством же всяким поставлял, а ни чего ради: занеже Божье священство не продаемо есть, ни купимо. И ты бы о том смотрел, ведая и истязуя крепко, по божественным и священным правилам, каковому достойну подобает души христианские вручить. А грамоты бы еси поручальные тех поставляемых у себя блюл, занеже потом о тех поставляемых на кого какова вещь найдется, и ты стерези своего сана. И сего ради дана бысть грамота сия нашего смирения, на утверждение тому, на Москве, месяца августа в 8 день, в лета 6930, индикта. ²¹¹⁴