Повесть о начале и основании Псковского Печерского первоклассного монастыря, взятая из древних летописцев, обретающихся в книгохранительнице оного монастыря

Человек некий, родом из града Изборска, прозванием Селиша, поведаше нам, глаголя: некогда шедшу ми со отцем моим на лов звериный в пустыню, яже бысть около святого места Печерного, к ней же и лес великий прилежаше, случися нам приити к потоку, сущему при краю горы оныя, идеже ныне Богородичная церковь стоит, и слышахом аки бы гласы церковного пения, и многих поющих благочинно, но гласы убо слышахуся, а поющих не видехом, воздух же весь·исполнен бяше благоухания, якоже от множества фимиама благовонного: мы же мнехом быти сие некое явление Ангельское и благодать святого Духа, освящающую место то, и показующую великую Божию милость. Такового убо дивного видения сподобившеся, немедленно возвестихом неким людем, живущим в окрестных селениях: тии же абие совещания купити ту землю и лес, дабы создати на оном церковь во имя пречистые Богородицы, еже и сотвориша. Сущее убо окрест пещеры место абие дается в жребий некоему человеку, именем Иоанну Дементиеву, иже вскоре и поселися в подгорье на речке Пачковке близ пещеры: и некогда пришедшу ему на холм сея горы Печерские, и наченшу лес сещи, великое некое древо посеченное падеся, и порази другое древо, стоящее па краю горы, ему же падшу с горы, аки с стены, и совлекшу с собою иная древеса с корешем, открыся устие пещеры, над устием же, идеже ныне двери в гробницу, обретоша письмена, начертана на стене горы, имущая разум сицевый: Богом зданная пещера. О сем надписании поведа нам Патермуфий инок Снятогорского монастыря. Бывый же тогда игумен Никон и Мирожский старец Герман поведаны о том же надписании следующее: егда, де, живяхом в Печерском монастыре, тогда бе мних некий, именем Варлаам, иже юродствуя, прихождаше часто к гробнице сей, и стираше писание, еже на стене начертано бяше: но тое паки яко ничим же врежденно являшеся, и пребываше много лет цело и нерушимо. Бяше же в то время священник некий, именем Иоанн, от Московские страны, по прозванию Шесник: сей Иоанн бе священствуя во граде Юрьеве Ливонском со Исидором пресвитером во храме святого Николая чудотворца и великомученика Георгия, его же великий князь Ярослав Владимирович Киевский от имения своего устрой. Егда же Немцы соединити начата Христиан, живущих в тех пределех, и ово ласканием, ово прещением к своей Латинской вере привлекати: тогда той священник Иоанн отъиде из града Юрьева во град Псков, Исидор же оста в Юрьеве Ливонском, и многое прение с Немцы о Христианстей вере показа, за что и в темницу затворен бысть со иными седмьдесят и двема Христианы, и не покорившимся им, ввержени Быша от Латин вси в реку Амовжу, идеже умроша во исповедании Христове, в лето 6980 (1472) Генваря в 8 день: бе же тогда зима, и река льдом покрыта бе. Наставшей же весне, и воде разлившейся, обретоша телеса их в верьху реки оные Амовжи, яко три поприща на берегу, аки некими человеки положены на восток лицем, вся во едином месте, и ничим неврежденна: пресвитер же Исидор посреди их лежаше во всем сану священническом. Нецыи убо Христиане вземше мощи их, погребоша на том месте, а иных привезше во град Юрьев, положиша близ церкви в земле. Иоанн же пребыв мало время во граде Пскове, и слышав о явлении Богом зданные пещеры, восхоте видети место пещеры тоя, о ней же слыша от поведающих, яко бе при потоке некоем, зовомом Каменце, иже бе глубок, аки ров, течение имея прямо к востоку, по обе же стороны оного потока горы высоки, имуща некая места песчаная и крепкая, стояща яко же стены, прямо в верх и до низу, и видев, возлюби место то вельми: шедши же во град Псков, поят жену свою и два сына, и прииде к прежде реченному Иоанну Дементиеву, и у него остави жену свою, сам же пришед в сие место святое, начат копати в горе церковь за Богом зданною пещерою к западу. По мале же времяни разболеся жена его, и пострижена бысть в монашеский образ, и наречено бысть имя ей Васса, и в том образе преставися. Иоанн же ископа землю в той Богом зданней пещере, и со отцем ея духовным отпевше надгробная, положиша ю в ней: в нощи же той изставлена бысть из земли некоею невидимою силою. Иоанн же помыслив со отцем ея духовным, яко нечто погрешиша в надгробном, и отпевше второе, и разрешальную молитву изглаголавшу отцу ея, паки погребоша, и на утрие второе обретеся на верху земли. Иоанн же, недоумеваясь о сем, ископа место на левой стране в пещере, и положиша гроб ея не погребен. Потом же и сам Иоанн постригается во иноческая, и наречен бысть Иона. Во время же благочестиваго и великаго князя Иоанна Васильевича ископа малую церковь в горе, и постави келлии две на столбах прямо церкви Печерные, и шед во град, начат молити священников, бывших при храме святые Троицы, (что ныне собор кафедральный), дабы освятили храм сущий в горе: но не получив прошения, отъиде в Великий Новъград ко Архиепископу Феофилу, и припаде к ногама его, просящи, дабы повелел освятити храм в горе. Архиепископ же благослови, и повеле освятити его прежде реченным священником, и освящена бысть церковь в горе во имя пречистые владычицы нашея Богородицы и приснодевы Марии, честнаго и славнаго ея Успения, Августа в 15 день, в лето 6981 (1473) при великого князя наместнике Псковском Ярославе Васильевиче Оболенском. Прежде реченный же Иоанн Дементиев даде от своего имения удел земли ко храму пречистые Богородицы и на монастырское ограждение по ручей Каменец, с восточные и южные страны на целое поприще, идеже ныне устроена церковь Благовещения пресвятые Богородицы с трапезою, монастырскими келлиями и прочими службами.

Посем священноинок Иона пожив несколько время в молитвах и трудех, преставися к Богу, и погребен бысть в той же пещере. По смерти же его обретоша на нагом теле его панцирь кольчатой, его же снемше, обесиша над гробом его. Некогда же нашедшим Немцем ратию, и в гробнице бывшим, панцирь обешенный над гробом не обретеся. По преставлении же его прииде священноинок Мисаил, и начат служити пречистей Богородице, иже и монастырь ветхий состави на горе, и церковь созда во имя преподобных отец Антония и Феодосия Печерских. По Мисаиле же бысть священноинок Селиван, потом поставлен первый игумен Иона, и по нем ин игумен, иже написа в поминании церковнем перваго старца Печерскаго Марка и прочих преподобных старец. По сем бысть игумен Сергий, таже Симон, по Симоне же Дорофей, а по Дорофее Герасим, иже устава чин церковный и службу вседневную в церкви Успения пресвятые Богородицы, п правила монашеского жития написа.

Минувшим же осьми летом от освящения первые церкви, при державе Государя царя и великого князя Василья Иоанновича всея России, посла Бог других неких благочестивых людей, иже много усердствоваху в деле строения монастырского, в них же бе единый дьяк великого князя, именем Михаил, прозванием Мисюрь, той уведав о месте Печерские обители, многое показа тщание о строении монастыря.

В тоже время нецыи торговые люди Псковичи, а именно, Василий и Феодор, совещавшеся между собою, изволиша от своего праведного имения написати образ пречистые Богородицы честнаго и славнаго ея Успения, еже и сотвориша, поручивше дело иконописцу некоему, именем Алексию, прозванием Малому, мужу благочестиву и благоговейну житием. По написании же святого образа, принесоша его в Печерский монастырь, и поставиша в церкви пречистые Богородицы в лето 7029 (1521), иже творит и до ныне преславная чудеса и исцеления, о них же послежде речем пространнее. Феодор же той, во иноцех Феофил, по умертвии своем положен бысть в гробнице Богом зданные пещеры.

Посем по совету игумена с братиею, и по Мисюреву велению, церковь Пречистые в горе ископаша велику, и в той же церкви приделы устроиша преподобных отец Антония и Феодосия Печерских, тоже и освятиша второе, в лето 6031 (1523) Августа в 15, тогоже месяца и преподобных отец храм освятиша. Потом же и ветхий монастырь пренесоша на сие место: бе бо прежнего монастыря место не равно, и ово горами, ово лесом и рвами окруженно, и воздвигнута церковь с трапезою во имя святых четыредесяти мучеников, иже в Севастии. Посем же и вседневную службу учиниша, и общежитие составлено бысть во славу Христа Бога нашего. И тако день от дне растяше и распространяшеся обитель пречистые Богородицы.

По игумене же Герасиме прият игуменство тояж Печерские обители постриженник, священноинок Корнилий, в лето 7037 (1529). Сей блаженный муж Корнилий начат добре пасти Богом врученное ему Христово стадо, и вящше распространяти и украшати святую обитель не точию внутрь, но и вне. И первее убо созда церковь каменну во граде Пскове, что на Усохе, во имя пречистые Богородицы, нарицаемые Одигитрии, и в ней службу вседневную устави, и дом устрой на прихождение из монастыря неких ради потреб и на препитание служащих, в лето 7046 (1538). Таже в лето 7073 (1565) содела около монастыря ограду каменну велику, и над святыми враты устрой церковь во имя святого Николая чудотворца, Архиепископа Мирликийских, способствовавшу ему в строении храма сего некоему Павлу Заболотскому, во иноцех Пафнутию. Устрои же и иные некие церкви, яко то церковь во имя святые и животворящие Троицы, что на Агиреве, и паки церковь Рождества Христова, что на Топине. Сей приснопамятный и достоблаженный игумен Корнилий поживе на игуменстве 41 лето и месяца два. Он постническим и святым своим житием не точию монахом образ бе ко спасению, но и люди Нового городка Ливонского, Чудь называемая, Христианской вере научи, и святым крещением просвети, и в них пресвитеры и клирики устрой: во время же бывших потом в земли Российского царства мятежей тяжких, многая зла пострада, и наконец от тленного сего жития земным царем предпослан к небесному Царю в вечное жилище, в лето 7078 (1570) Февраля в 20 день, на 69 году от рождения своего: тело же его положено со отцы в стене Богом зданные пещеры. Обретается бо тамо пять улиц долгих, в них же кладут не точию мнихов того монастыря, но и иных от властей и от нарочитых мирян из многих градов и весей Российские земли, дающих милостыню в дом пречистые Богородицы, и овых зарывают в землю во гробех в большие ямы, ископав во глубину и в длину по сажени и по две, овых же полагают в стены, и творят пирамиды с подписанием: смраду же никогда же бе слышати от телес умерших людей.

По игумене Корнилии избран бысть на игуменство в Печерскую обитель Псковского Снятогорского монастыря игумен Савва, при игуменстве которого благоверный Государь царь и великий князь Иоанн Васильевич повеле воеводе своему князю Юрью Токмакову от своея царские казны оную чудотворную икону Успения пресвятые Богородицы обложити златом, и устроити киот от сребра: и по сему повелению тако устроено бысть. Сей благочестивый и великий Государь премного способствование и во всем строении Печерского монастыря: даде бо много сел, и злата и сребра, и икон и книг и риз, и иных потребных вещей. По кончине его, яже бысть в лето 7092 (1584), Марта в 18 день, в первое лето Скипетродержавия сына его царя и великого князя Федора Иоанновича, всея России, егда церкви Божия в его Российском царстве и в Болгарстей стране подобно раю цветяху, и людем велие пространство и от тяготы облегчение бысть, устроиша новую икону Умиления, яже в царствующем граде Москве, обыкоша звати Владимирскою, на извещение Божия помощи и пречистые Богородицы, и на воспоминание того времене, в неже бысть дивная победа и одоление на сопротивных, егда приступаху Угрове и Немцы к стенам монастыря Печерского, и поставиша ту новую икону близ старые иконы Успения пресвятые Богородицы, на воспоминание родом грядущим. Благоверный же Государь царь и великий князь Феодор Иоаннович, Божию дару тезоименитый и истинный по Бозе и по благочестии ревнитель, дарова в дом пречистые Богородицы Печерские многие отчины и села, и от своея царские казны довольное число денег отпускати повеле на церковное строение, и на препитание сущим во обители сту монахом, и служащим в монастырских послушаниях миряном, яко трем стом, еще же и пришельцем и странным, приходящим от всех стран на поклонение пречистому образу Богородицы.

Егда же игумен Савва произведен бысть во Епископа во Тверь, тогда поставиша игуменом в Печерский монастырь прежде реченные обители Снятогорские игумена Сильвестра. А понеже в сии времена Быша мятежи и нестроения в Российстей земли, и царства разделение, и крамолы, и позорные смерти, и пожары великие по градом: еще же за умножение грехов наших приключися и глад и мор в людех, и нашествие иноплеменников, то время и порядок повествования требует и о сем воспомянути, паче же о чудеси явления пресвятые Богородицы, еже бысть сице:

В лето 7089 (1581), Августа в 20 день, прииде Польский король Стефан Баторий, родом Угрянин (Венгерец), веры же Латинские, со множеством вой Польских и Литовских, на Псковскую землю, имея способниками и другие от многих стран воинства, в них же бяху Турки и Агаряне, Волохи и Мултяне, Сербяне и Угрове, Словаки и Немцы и первее взяв град Остров каменный на Великой реке, и бывшие в нем люди плени, таже устремися на Богоспасаемый град Псков, хотя его восхитити: мняше бо в себе, яко безпомощен и безлюден есть, и не вооружен, и прешед реку Череху, ста во ополчении со всем воинством у монастыря святого Спаса, что на Мироже, и святых мученик Флора и Лавра у Песков, и Сентября в 7 день нача стреляти из стенобитных орудий, сиречь, из пушек, во градную стену у великие реки против Мирожского монастыря и против Свинуских враг, и биша чрез весь той день от первого часа до вечера, и на утрие праздника Рождества пресвятые Богородицы такожде биша стену до четвертого часа дни, и пробита с землею равно, и вскоре сотвориша приступ велик ко граду Пскову. Бывшие же во граде воинстии людие бияху со стен, не дающе приступити к пробитому месту. Священный же чин, бывший тогда во граде и весь сигклит, обношаху окрест чудотворную икону Успения пречистые Богородицы, и прочих святых, молебная пения совершающе, Христианский же народ, мужие и жены и всяк возраст, возложше надежду на всемогущего Бога, славимого в Троице, и на пречистую Богородицу, надежду нашу, и стену непобедимую, и на святых небесных воинств, и на Божиих угодников, святых благоверных и великих князей, Владимира, просветившего Русскую землю святым крещением, и Всеволода, нареченного во святом крещении Гавриила, и на храброго князя Тимофея Доманта, и на преподобных отец, Антония и Нифонта Епископа, и Николая юродивого Псковского чудотворца, и на всех святых, бяху молящеся непрестанно, и с воплем руце простираху, глаголюще: не предаждь нас, Владыко человеколюбче, до конца имене твоего ради, и проч., такожде и пречистей иконе Богородицы вопияху: заступнице Христианом не постыдная, ходатаице ко Творцу непреложная, не презри грешных моления гласи, и прочая до конца. Таже и всех святых на помощь призываху.

Промыслом убо всемогущего Бога прииде тогда глас свыше к некоему пятисотнику воеводе Михаилу Косицкому, глаголющь: принесите образ пречистые Богородицы Печерские на сие место, и узрите славу Божию. Принесенней убо бывшей из Печерского монастыря чудотворней иконе пречистые, и поставленней на стене града на пробитом месте, людие убо молитвою вооружишася, молебная совершающе, воини же мечами и оружием крепце на супостатов ополчишася; нецый же от них совещавшеся, принесоша зелие, порох именуемое, и зажгоша Свинускую башню, и абие в той час великий огнь подняся из башни, и бывших в ней Ляхов и Литву попали, и яко прах за град размета: прочии же воини бишася от четвертого часа дне до вечера, и со града согнаша их: они же побежденни бывше, отбегоша от града, и овии убо спяти Быша и падоша, овии же живии поймани Быша во рвех за градом и с ужищи, яже приготовиша пленных во граде вязати: обаче сами связани и избиени Быша. Наказуя убо наказа нас Господь, смерти же не предаде, но милосердием своим преклонься на мольбу Матере своея и всех святых, посла воя своя, невидимо защищающа и помогающа, и нас в беде сущих не предаде в руки врагов беззаконных и мерзских, наипаче же вождю и начальнику их королю Польскому Баторию, Латинские прелести исполнену. Стоявше убо воинство Литовское под градом пять месяц, промышляюще взяти его всякими ухищреньми, и ово подкопы творяще, ово стены подламывающе, ово ядра разженная пущающе во град, дабы дворы запалити на смятение людем: но Господь выну ополчаяйся окрест людей своих, не даде нас в ловитву зубом их, его же чудную помощь, явленную чрез заступление пречистые, сами враги приходяще ко граду, поведаху Псковским людем, бывшим на граде, глаголюще: видехом Жену некую пресветлу, по стене града, подобно некоему стражу ходящу и седящу на пробитом месте, и много стреляхом в ню, но не могохом улучити: помыслиша бо советы, их же не возмогоша составити. Се же бе явление пречистые, якоже мнится мне, снабдевающей свой град, и покрывающей святым своим покровом рабы своя от належащих бед и зол. Многа же и ина преславная и чудная знамения мнози в то время видеша благоговейнии Псковстии мужие, пречистою Богородицею бывшая во граде Пскове: нецыи бо видяху некоего воеводу саном нарочита, по стене града всего на коне ездяща днем и нощию, и строяща людем и граду ополчение, и не знаяху его, кто бысть. Бяху бо в то время во граде Пскове воеводы, князь Василий Феодорович Скопин, да князь Иоанн Петрович Шуйский, граду утверждение строяще и люди вооружающе. Суть же и ина многа, яже в различных повестех различно, но достоверно глаголются о сих. О чем и преждепомянутый игумен Корнилий еще за 14 лет свидетельствование в Книзе Летописаний своих, поведая, яко в лето 7076 (1569) стражие монастыря Печерского, иже бяху поставлени стрещи от мору, видеша в нощи свет сияющ, и людей многое множество вооруженных воинским обычаем, и шедших прямо ко граду Пскову. А инии де видеша днем осенение некое от небеси над храмом пресвятые и живоначальные Троицы, сущим во граде, и три лучи нощию стоящи над Домантовою оградою. Инии паки свет велик протязающийся яко столп до небеси, и шествующий от Печерские обители чрез великую реку по левую страну монастыря Мирожского во град Псков, и под оным светом идущу на воздусе святую Богородицу, и с нею преподобных отец Антония и Феодосия, Киевские пещеры начальников, единого одесную и единого ошуюю, и вшедшу чрез градную стену в церковь Покрова пресвятые Богородицы, и потом изшедшую из церкви, и ставшую на стене града, и ту представших пред Нею Благоверных Великих Князей, Владимира Киевского, Всеволода и Доманта Псковских, созади же блаженного Николая Юродивого Псковского чудотворца.

В то время, егда Король Стефан Баторий стояше у града Пскова, воинстие людие разсеявшеся всюду, добываху себе и конем корм, и ездяще по селам во всей области Псковской, паче же въ Ливонстей земли по лесам и по островам на великом Псковском езере, имаху в плен людей, имения же и скот. Поселяне убо, видяще их таковое насилие творящих, изхождаху из осадных мест, яко то из града Изборска, из Печерского монастыря, из Гдова, из Юрьева Ливонского и из Новогородка, и тех Литовских людей, по селам и по лесам разсеявшихся имаху живых, а иных побиваху, и пограбленная имения у них отнимаху. Егда же отпущенные от Короля Литовстии воини возвращахуся во свою землю со множеством имений и пленников, везуще с собою телег возничих до тридесяти и более, и творяще шествие от Пскова на Печерский монастырь в Ливонскую землю, и егда достигоша Печерского монастыря: тогда людие, бывшие в нем, изыдоша в сретение им, и ополчившеся при речке Пачковке, устремишася на них, и бившеся многих плениша, и имение их все поимаша и в монастырь привезоша: бе же плененных яко до трех сот мужей, в них же бе пленен Рижский немчин Ефим, иже послан бяше из Риги к Королю за порох деньги имати, и некто поспел Солицын с женою и детьми, плененный Литовцами во области великого Новаграда, и инии мнози. Взяша же у них и два колокола, яже плениша в Кобыльской волости у храма святого Николая чудотворца, что в погосте напольном, яже и до ныне обретаются в Печерском монастыре на извещение родом грядущим у церкви святого Николая, что на вратех. Прочии же Литовцы и Немцы побегоша вспять ко граду Пскову, и возвестиша Королю о бывших на них от Печерских людей побеждениях, и иных прежде учиненных ими досадах, наветующе и королю глаголюще: яко достойно бяше таковое место разорити, и людей из него вывести вон, понеже де многая тщета людем Польским от них происходит, а в монастыре заключеон бе в то время пленных Угрян и Поляков и Немцев яко до тридесяти и более.

Слышав же сия вся король Стефан, разъярися на той Псковопечерский монастырь, и абие посла множество Поляков и Немец со стенобитными орудии, сиречь, с пушки, ко обители Печерские пречистые Богородицы, Октября в 29 день. Они же безбожнии Немцы, имуще воеводу Китлера Курляндца и Юрья Кранбека, и пришедше сташа окрест монастыря Печерского, и начата бити в стену из трех пушек. Ноемврия же в 5 день, они безбожнии Немцы вооружившеся крепце, поидоша к пробитому месту стены, и хотяху монастырь себе восприяти. Монастыря же того священницы и иноцы и простии людие принесоша икону старую пречистые Богородицы честнаго Успения ея к пробитому месту, и возложше упование на пречистую, вооружишася, и сташа яко гора Сион неподвижно, и бишася с ними отъ третьяго часа дне до нощи, и прогнаша ихъ посрамлены. Воеводу же Китлера и иных с ним Немец взяша, а Юрья другого воеводу и иных с ним Немец из оружия уязвиша. Слышав же король Баторий, яко побеждени Быша Немцы, абие присылает инаго воеводу, Бурнамиса именем, и иных многих храбрых воинов Угров с нарядом же, запретив им сице: аще не разорите монастыря, и сущих в нем людей не изсецете, не имате возвратитися безопастно ко мне. Оный же воевода со Угры пришед, постави четыре пушки на своем месте, а Немцы на прежнем месте свои три пушки, и биша по ограде в два места чрез два дни, и едва пробиша стену до земли. Тогда вооружившеся Угрове и Немцы, поидоша вкупе на пробитые места, мневше, яко некому противу их стати. Христово же оное стадо, в печали суще велицей, плачуще моляхуся пречистей Богородице и святому Николаю чудотворцу и святым четыредесяти мучеником, иже в Севастии, и преподобным отцем Антонию и Феодосию Печерским, и всем святым о избавлении от толикие беды настощие, и тогда некоему юноше, именем Иулиану, во сне явися пресвятая Богородица, глаголя сице: востани, и поведай сущим ту иноком и всем людем, да идут к проломному месту пети молебная пред образом моим, и не отпадати надежды на Господа, и на того рождшую, людем же неослабно вооруженным быти и стояти крепце: аз же не оставлю места сего, и не предам в руце врагов. Таже даде ему три сребренницы на потребу, понеже юноша той не имеяше обуви ни срачицы. Он же востав, тече ко иконе пречистые, с плачем моляся, и поведа всем явление бывшее ему. Быша же сицевая и сим подобная явления некоторым и иным духовным мужем, иже овогда убо видеша некоего мужа святого, яко же поведа старец Спиридон Иоанникиев о преподобном Варлааме Хутынском, овогда же слышаху глас невидимо глаголющий: не ужасайтеся, но подвизайтеся яко добрии воини Христови за храм пречистые Богородицы. Слышавше же сия священнии иноцы и вси людие, с радостью и трепетом скоро притекоша ко иконе пречистые, яже бе поставлена у пробитой стены, молебная совершающе, и со слезами глаголюще: не остави нас пречистая Владычице Богородице, по приими моление раб своих, и помилуй: скорби бо содержат нас и проч.

Егда же Угрове и Немцы раздельшеся приступиху купно к двум пробитым местам, тогда некто рыболов, именем Сергий, виде над церковью пречистые множество юношей в белых ризах, в руках свещи имущих, и глаголющих друг ко другу: грядем на пособие Христианом, и пожжем иноверные. Сих юношей мню быти святых сорок мученик, иже в Севастии. Сим видением утешени бывше людие, охрабришася и устремишася на врагов, и биша их из пищалей, и камение на них метаху, от четвертого часа дне до девятого, и побита их. Сему же явлению последи свидетельствоваху и сами Угрове и Немцы, глаголюще: егда приступахом ко ограде, тогда видехом над монастырем множество вой в белых ризах, биющих нас, и абие нападе на нас страх велий. К сему же и иное дивное пособие Божие сказаша, рекуще: Егда бихом из наряду по стене, и уже разбихом ю, тогда видехом некоего мужа стара, власы белы имуща, овогда днем ходяща, овогда же нощию на коне ездяща, и являющася на стене в пробитых местах некое ограждение творити, и много по нем стреляхом, и ни единожды улучити возмогохом. Сего мужа стара мню быти святого Николая чудотворца.

Обаче же безбожнии враги онии не отступиша от намерения своего, но в той же день другий приступ сотворити ко вратом у храма святого Николы, и по лествицам взыдоша на башню, сущую пред враты, инии же врата железная сокрушаху, хотяще вкупе с обоих стран влести в монастырь, и всякими образы ухищряющеся. Всеблагий же Господь и промышленник наш Иисус Христос не презре моления матере своея и ходатайства угодника своего Николая: абие бо и жены и младые дети храбры сотвори, иже заряжающе пищали, мужем пособствоваху, овии же воду варяху и лияху за ограду на приступающих по лествицам воинов. Таковым образом и сии побеждена Быша и падоша, а прочии отбегоша посрамлени, им же не бе числа. Сия велия победа и одоления на неверныя Латины бысть Ноября в 14 день, на память святого и всехвального Апостола Филиппа, и на утрие на память святых мученик и исповедник Гуриа, Самона и Авива, иже до конца победита их. При всех же сих лютых приступех обретеся в монастыре язвенных и побиенных людей не более четыредесятих. Обаче от нужды утеснения Быша в то время болезни в людех и мор: сие же обое бысть за умножение грехов наших.

По сих зле бывших на нас последних приступех, минув десять дней, Литовский урядный воевода и канцлер Ян Замоцкий абие присылает от Пскова в Печерский монастырь послание о здаче монастыря, и образ писан на стекле, в простой крабийце, во изъявление ласкательства к людей, и во уверение аки бы к ним своего усердия, льстивно предлагая условия, о них же в послании явлено. Осадный же голова Юрий Нечаев прият послание и образ, и собрав священный чин, монахов и людей нарочитых, показа образ той, а послание прочести повеле всем людем в слух, в нем же бе написано сице: Ян Замоцкий, наивысший Гетман и канцлер коронный, староста Краковский, Бельский, Кнышевский, Крешевский и Гормолинский, в честную обитель Успения пресвятые Богородицы Печерского монастыря господину Тихону еже о Христе с братиею.

„Повелением Государя и великого короля СтеФана, Божиею милостью короля Польского, до вас сию грамоту посылаю, чтоб вы, будучи во храме святом, к Государю нашему никакие прицепки не имели: ибо Государь наш король, по закону Христианские веры не токмо, чтобы сам храмы Божие разоряти имел, но еще и сам созидает, дабы вера Христианская умножалася, також и всему воинству своему запретил, еже бы храмов Божиих не разоряти: но вы, не помня своего чернечества, храм Господень и место святое кровию облили, выходя из монастыря и люди королевские имаючи, побили на смерть, а иных и ныне у себя в монастыре держите, и Государь наш король послал было не многие люди под тот монастырь не для того, чтобы то место святое разорено было, но чтоб тех людей, кои в таком святом месте не христиански живут, вывести оттоле: а повелением нашего Государя короля и аз иду с войском и с нарядом к вам, не хотя святого места разорити, и большие крове пролити, яко аз и сам по вере Христианин церкви Божии не разоряю, но созидаю, дабы Христиане пребывали в своей православной вере. И аз пишу сию грамоту для вас, что бы есте сами по доброй воли монастырь здали, стрельцов из монастыря выслали, и сами со всеми животы своими из монастыря вышли, и аз вас велю и с вашими животы и со всею рухлядию проводити до тех мест, где вы похотите: а которые в монастыре у вас Государские люди, и вы бы тех людей с их животы оставили в монастыре. А буде похотите в том монастыре жити, и молити Бога за Государя короля, и вас Государь король пожалует: а буде не похотите в том монастыре жити, то пойдите вон и с стрельцы своими и со всеми тутошними людьми и с их животы, и то на вашей воли: а буде за сею моею грамотою по доброй воли монастыря не отдадите, то аз буду Богу и Христианской вере невинен, что святое место разорится, и святые церкви осквернятся, и кровь Христианская многая пролиется, и та кровь взыщется на вас. Аз же Христианин веры Божией не разоряю, и храмов Божиих не оскверняю: во уверение чего посылаю к вам образ Благовещения, присланный ко мне из Иерусалима, и образец дому Иосифова и на верху дому пречистая наша царица Богородица со Младенцом, и аз той образ послав к вам в монастырь, и вы бы тот образ поставили в храме честнаго и славного ея Успения, и за нашего Государя и за меня Бога молили, и Государь король и аз вас пожалуем, дабы православная вера Христианская и ваш монашеский чин нерушим был, и святое место не разорилося.

Слышавше же таковое послание иноцы реша: не хотим королева жалованья и не страшимся его угроз, не приемлем канцлерова льстивого ласкания, и его лестного обещания Латинского, по христианству, но умрем в дому пречистые по своему иноческому обещанию, и по крестному целованию, за отчину своего Государя царя и великого князя Иоанна Васильевича всея России и за его чада, царевича князя Феодора и князя Иоанна, а монастыря Богом сданные пещеры не отдадим. Таже осадный голова Юрий Нечаев и весь сигклит советовав, повелеша отказати посланным от короля за ограду старцу Тернуфию тако зовому. Старец же Тернуфий оболкся в весь иноческий чин великого образа, и показав главу из стенного окна, отказа сице: аще и предаст нас Господь за грехи наша, но должны есмы вси по Христе умрети в дому пречистые Богородицы, в нем же прияхом сей великий Ангельский чин, и яко же мя единого сицевого видите, тако вси мы готовы умрети за Государя нашего царя и великого князя, и за святые церкви, и за закон православные нашея Христианские веры: а монастыря королю вашему не отдадим: также и вси людие тоже слово рекше с стены ограды, с воплем дерзостне отказаша, и начата в них с стены стреляти. Они же посрамлени бывше побетоша ничто же обретше: и от того дне стояху Утрове и Немцы около монастыря тоге месяца два и дней пять, стрегуще и никому же дающе изыти из монастыря, ни в монастырь внити, и всячески промышляху, и угрозы творяху, аще монастыря им не отдадут. Таже наконец по мирном положении, от града Пскова и от монастыря Печерского со всем воинством отъидоша.

Слышав таковое побеждение Турский царь Амурат Селимов от своих вой, бывших у Пскова зело посрамися, охуждая голдовника (данника) своего короля Польского, и ко своим глаголя: како сей несмысленный не соодоле безлюдному граду Пскову, и монастырю Печерскому, не имущему вой; Туркове же, иже прежде Христианское писание читаху и разсуждаху, отвещавше реша, яко аще бы и всея вселенные Царие пришли на восхищение града оного и монастыря, не бы могли взяти домъ Божий, и избавителя и защитителя их. Сия же поведа нам некто пленник из царя града, именем Косма Ляпунов: бывшу бо ему тогда в Константине граде, прослы монастырь Пречистые ради и дивного ея поможения и заступления, во все Скифские страны, и в Немецкие острова, по Варяжскому морю, даже и до Рима, паче же и до Царя града. Сами бо они безстуднии Латинове, укоризну себе износяще, чудяхуся и глаголаху: како малый оный градец, меж гор стоящ и воев храбрых не имущ, кроме чернцов и простых людей и поселян, а над ними учинена старейшиною ополчения Юрья Нечаева млада суща и мала возрастом от рук наших избысть, и мы не возмогохом одолети им, но всуе трудихомся противу невидимого небесного Царя воинств.

Сию Божию милость и помощь Пречистые бывшую на всех иноплеменник, неведующих истинного Бога, и его Матере, видевше бывший тогда в Печерском монастыре во осаде сщенницы и братия наша и вси православнии Христиане положиша обет ходити со оною Богоносною иконою и с честными кресты во град Псков, в неделю седьмую по пасце ко святей велицей соборней и апостольской церкви пресвятые и живоначальные и неразделимые Троицы, воспоминовения ради грядущим родом бывшие на сопротивных победы, тою чудотворною иконою, от нея же бывают даже и до днесь дивная и неизреченная чудеса с верою приходящим, яко то: больным исцеление, скорбным утешение, слепым прозрение, хромым хождение, разслабленным исправление, и всякими недугами одержимым скорое поможение.

Свидетели сим не мы едины, но и всего великого Новаграда и Пскова православнии людие, и всея Российские земли Христиане самовидцы: зане видеша вси концы земли спасение Бога нашего. Не точию же правовернии, сиречь, право исповедающии Святую Троицу, Отца, и Сына, и Святого Духа, и пречистую Деву Богородицу верою несомненною разумевающии и почитающии, хульная же умствования еретиков отметающии, но и от иноверных Латин, и от Немецкие земли приходящии с верою в церковь пречистые Богородицы к чудотворным иконам всечестного и славного ея успения и умиления. А иже в нашествие оного безбожного короля Батория и вои его, пленени Быша от обители Печерские слуги и крестьяне, и заведени в морские острова и в Немцы, вси тии снабдением пречистые свобождени Быша, и паки в монастырь возвратишася здравы. Боюся забвению предати и сие, яко и аз окаянный (глаголет списатель) в грубости и ленивстве пребывали, должен есмь тьмою талант пречистей Богородице, ея же милостию и хранением четырекратно от пленения и смерти избавлен бых, кроме внешних нападений от супостат.

Преходящу убо девятому надесять лету от оного завещания бысть в лето 7109 (1601) Маия в 24 день, прииде благодать святого Духа в сердце великому господину священно-епископу Геннадию, правящу тогда престол пресвятые и живоначальные Троицы и Богоспасаемых градов Пскова и Изборска. Завещевает убо совет благ тоя Печерские обители игумену Иоакиму, еже о Христе с братиею, и повелевает сложити чин или устав, како ходити со святыми иконами пречистые Богородицы и с честными кресты из Печерского монастыря во град Псков ко святей и живоначальней Троице по завету осадных лю­дей. Игумен убо Иоаким тогожде лета, Июния в 4 день, по приказу господина священноепископа Геннадиа составив уложение чина, посы­лает к нему на разсмотрение, и пишет сице:

Честнейшему и великому господину священноепископу Геннадию Псковскому и Изборскому, пречистые Богородицы Печерско­го монастыря чернцы, игумен Иоаким с братиею, просим твоего святительского бла­гословения, и челом бьем.

Егда великий господин, по завету братии нашей и всех православных Христиан, быхом у святей и живоначальней Троицы со святыми иконы пречистые Богородицы и с честными кресты, и твоего святительского благословения сподобихомся прияти: тогда ты великий господин, пожаловал велел нам у живоначальные Троицы праздновати Успению пресвятые Богородицы, пришествия ради честнаго ея и чудотворного образа, а в понедельник повелел нам праздновати в храме пречистые Богородицы честнаго ея Одигитрия, воспоминая древния ея и средния, и после бывшия, и настоящия благодеяния, со всенощным соборне, да и написати повелел еси нам во обители той чин, и твой святительский устав, на утверждение святым Божиим церквям, яко да незабвенно будет родом грядущим во веки. И мы, великий господин, елико нам, сущим в чину учимых, возможно бе, подробно написахом, по твоему святительскому указу: и той устав в черне послали есмы к тебе государю, чтобы ты пожаловал велел поисправити то наше писаньице. Покажи милость, великий святитель, и вели государь то наше писаньице поисправити, чтобы государь с твоим святительским уложением во едином согласии было, и к нам своего святительского благословения той чин и устав пожалуй пришли на утверждение Божие церкви, и на память братии нашей, и родом грядущим провославных Христиан, а мы тебе великому господину соборне много челом бьем.

Епископ же Геннадий прочет от игумена Иоакима с братиею послание, и уставный чин о крестохождении, абие то уставное писание исправя, посылает к нему во обитель, и пишет ко игумну Иоакиму с братиею послание сицево:

Благословение священноепископа Геннадиа Псковского и Изборского в пречестную и великую обитель пречистые Богородицы честнаго и славного ея Успения, о Святем Дусе сыну, и сослужителю нашего смирения, игумену Иоакиму, еже о Христе с братиею.

По нашему совету писал еси к нам о приходе и о празднестве пречистые Богородицы Июня в 4 день, да уложение пи­санием прислал еси к нам с Печер­ским старцем Сергием Пестовым, дабы нам то поисправити и прислати к вам: и мы то уложение любезне прияхом, и прочетше посправихом маленько, зане Духом Святым наставляемо все по Бозе писано, а иного тут справливати нечего, и за ва­ши святые труды и подвиги мзду Бог вам воздаст в будущем веце: а с того ва­шего уложения у нас в чиновник списа­но слово в слово: и то ваше уложение по­слали мы к вам в Печерский монастырь запечатано. Прочее милость святые и живо­начальные Троицы и пречистые Богороди­цы, и великого чудотворца, благоверного князя Гавриила Всеволода молитва, и наше­го смирения благословение да будет с то­бою, и со всеми вами во веки аминь.

По сем бывшу игумену у Епископа со всем освященным причтом для приня­тия дальнейших наставлений, словесно завеща, сице рек: егда со образом пречистые Богородицы и с честными кресты по своему обещанию к живоночальней Троице пойдете, и тогда в субботу в вечер, и в неделю на утрии да празднуете воскресе­нию и святей Троице, с величанием и свя­того благоверного великого князя Гавриила Всеволода вкупе, по Господню слову, еже рече: идеже аз, ту и слуга мой будет. Мы же у живоначальные Троицы да празд­нуем воскресению и Успению пресвятые Богородицы, и святым отцем, за настоящую вину, яко той возбранной воеводе преесте­ственно бдевшей и молящей святую едино­сущную и неразделимую Троицу, чудотвор­ная икона ея бе тогда во граде Пскове, в нашествие Литовского короля Стефана, защищающи град от иноплеменник. По проповеди же благовестника, (сиречь по прочтении Евангелия) со всем освященным чином с Божественными и пречистые Бо­городицы иконами и хоругви, с знамением небесного Царя и непобедимою Божествен­ною силою честного и животворящего Кре­ста, и святых небесных сил безплот­ных, Михаила и Гавриила и прочих, и всех святых образы и с кадилы, спо­следствующим града Пскова властодержа­телем, благочестивым боляром и воево­дам, и всему их сигклиту и всем правос­лавным Христианом, всякому возрасту и полу от мала и до велика, воздающе бла­годарственную похвалу и пение, моление же и обеты и песнь победительную, изыдем во сретение пречистые Богородицы честнаго ея Успения, и чудотворные иконы пречис­тые Богородицы Владимирские и Одигитрии, и великого чудотворца Николая, и преподобных отец Антония и Феодосия Печер­ских, и купно вси поклонимся с верою святей и животворящей и неразделимей Троице, Отцу и Сыну и святому Духу, во едином Божестве, и пречистей Владычице на­шей Богородице и приснодеве Марии, и всем святым иконам любезно со страхом прикасающеся и целующе, и честнаго Креста знамением благословение приимем, и друг другу дадим целование о Христе лобзани­ем святым, яко же учитель вселенные ве­ликий Апостол Павел в своих послани­ях творити и последовати завеща нам. Таже совокупльше весь Божественный лик, и священное ополчение паки со псалмы и с кадилы и пении духовными молебно со усердием руце простирающе, помолимся за дер­жавных Государей наших царей и вели­ких князей всея России: и совершив молебная отправим у святые и живоначальные Троицы литургию соборне, вечерню же пети у Одигитрия пречистые Богородицы на Печерском подворье торжественно со антифоны и с паремьями, и молебен Одигитрию святые Богородицы, за настоящую ви­ну, яко сподобил нас Бог видети пречи­стый образ ея, и в честнем храме ея быти на поклонении всем православным Христианом, с верою приходящим отвсю­ду, и прияти освящение и исцеление душам и телесем. Таже поем всенощное на по­недельник Одигитрию святые Богородицы, яко же писано на праздник ея, стихиры, чтения и величания, и преподобным отцем Антонию и Феодосию Печерским общий ка­нон и стихиры и тропари, и на литургии вся служба поряду Богородице, и преподоб­ным, а на трапезе чтется в повести Пе­черской о нахождении Литовского короля ко Пскову, и о чудесех, от иконы пречистые Богородицы бывших. Тогоже дни паки да провожаем святые иконы пре­чистые Богородицы и святого чудотворца Николая, и преподобных отец, такожде, яко же встречаем, со всеми святыми ико­нами, с хоругви и с кадилы, со псалмы же и пении и песньми духовными, со всем освященным чином, с вельможи и со всеми православными людьми из града до тогоже места, идеже встретение творим, сиречь, противу монастыря святого Николая каменные ограды: и тако да творим по вся лета от ныне и до века, памяти ради грядущим родом, благодаряще всемогущую и животворящую святую Троицу, Отца, и Сына, и святого Духа, во едином Божестве, и пречистую Богородицу молебницу о Христианском роде, воспоминающе древнее ея заступление и победы, бывшие в царствующих градех в Константинополе, и на Москве, и в великом Новеграде и во граде Пскове, во время нахождения иноплеменных: и великого чудотворца Николая, скорого помощника и молебника о душах наших, и преподобных отец Антония и Феодосия Печерских, и святого благоверного великого князя Гавриила Всеволода и всех святых, их же тогда виде блаженный он муж Дорофей во осаде.

Слышав же сия от святителя игумен, и весь священный причет и вси людие, благодариша святителю, и просиша, дабы та­ковый чин и устав повелел положити писанием во святей соборней велицей апостольстей церкви пресвятые Троицы и у пречистые Богородицы в Печерском мо­настыре, и в прочих соборных храмех, поминовения ради в род и род. Великий же господин священноепископ Геннадий, слышав от игумена Иоакима и от прочих игуменов, и всего освященного собора цер­ковного, о таковом их преподобном под­виге и тщании, и благодарственном ответе, повелевает завещания сия и устав писани­ем церквам предати, яко да сие Божест­венное, и честное и достохвальное торжест­во незабвенно будет от ныне и во веки. И сия бе первая вина крестохождения из Печерского монастыря во град Псков: вторая же следующая за сим:

В тоже лето 7109, Богу наказующу ны грех ради наших, бысть глад крепок во всей земли Российстей. Первее бо зимою в земли рож под снегом попрела, таже летом от самаго Петрова дни даже до Симеонова безпрестани дождь лияние: на положение же честнаго пояса пречистые Богородицы град поби рож и ярь, и от того начат быти глад велий: ибо четверть ржи куповаху по два, и по три рубли, жито же по два, овес и гречу в полтора рубли и выше. Маломощнии убо человецы и поселяне, приходяще во грады и веси, прошаху хлеба, и от глада и стужи помираху: таже и скоту бысть падение велико, и ядяху человецы, кто что можаше, даже и мертвечину и конину и плоть человеческую.

Людие убо благоспасаемого града Пскова предииемлют благий совет, и пришедше ко Архиерею и боляром и воеводам и все­му освященному собору, предлагают и про­сят, да егда Печерского монастыря игу­мен и священницы и иноки по своему обе­щанию приидут во Псков с чудотворными иконы и с честными кресты молити все­сильного Бога и пречистую Богородицу о все­мирном строении и благосостоянии святых Божиих церквей, и о державе и многолет­ном здравии государей наших царей и ве­ликих князей: тогда бы пречистые Богоро­дицы чудотворную и честную оную икону умиления и Одигитриа срести от града Пскова за пять верст на погосте святого славного страстотерпца и победоносца Георгия, что на Комне, и проповеднику о сем возвестити гра­жданом в народе и на торжищах. Архи­ерей убо и боляре слышавше таковое про­шение возрадовашася, и повелеша проповед­нику возвестити в народе и на торжищах.

Народ же слышав от проповедника та­ковой подвиг возвещаемый, подобне возрадовася духом о таковом богоугодном тщании, и велию веру усердно восприемше, последоваху доброму совету. Вземше убо во уреченное время честные кресты и святые иконы со псалмопением и с кадилы, яко же бе им обычай, такожде и воеводы и граждане и мужи и жены с чады от ма­ла до велика идоша во сретение до Комны, и сретоша оные святые и чудотворные ико­ны со благоговением и со слезами. Святи­тель же со игумены приемше на своя раме­на честную оную чудотворную икону уми­ления пречистые Богородицы, несоша во град Псков честно и боголюбезно во храм пресвятые и живоначальные Троицы, со псалмопением и песньми духовными, мо­лебная совершающе, а сицевым образом и паки проводиша до того же храма святого великомученика Георгия. И от того часа премилосердый Господь Бог, славимый и покланяемый в Троице во едином Боже­стве, пришествия ради многочудесные иконы Богоматере, и святых небесных сил, и святого чудотворца Николая, и благоверно­го князя Гавриила Всеволодовича, и всех святых, такожде и боголюбезного ради тщания и молитв честнаго и освященного собора и всех православных Христиан, и путных ради трудов, и воздыхания и слез, дарова теплоту солнечную и благо­растворенный воздух, и дождь тих, и нача рости рожь и яровый хлеб, и всякие плоды земныя, и жатва и млачение и сея­ние семен даже до поздния осени. И о всем сем благодарихом милосердого Бо­га и пречистую Богородицу, теплую в скорбех помощницу, и небесных предста­телей, и скорого ходатая святого Николая чудотворца, и святого благоверного князя Гавриила, и всех святых молебников о роде человечестем.

Подобне и в последующее за сим 7111 (1603) лето, человеколюбивый Владыка и Господь ускори и потщися на помощь на­шу, и дарова благорастворенный воздух и умножение плодов земных. Паки убо весь град исходит на сретение честным иконам. Паки епископ Геннадий, забыв ста­рость, яко исполин течет в путь с освященным собором, а с ним купно и прочие власти от града Пскова, еще же и мужи и жены и малии и велицыи и с ссущими младенцы. Паки в уреченное крестохождения время при храме великомученика победоносца Георгия усретают чудотворные иконы: паки со благоговением и радостны­ми душами честь и поклонение со псалмо­пением приносят, и яко же первее восприемлют чудотворную икону на рамена, и несут во град, и паки сицевым же образом провождают до тогожде Георгиева храма. При чем толикое бысть стечение народа и из окрестных градов весен и сел, яко не бе видети конца людей, спреди и созади по пути шествующих. Святитель же со всеосвященным собором и вси людие о всех сих благодарив всещедрого и чело­веколюбивого Бога, и пречистую Богородицу и великих чудотворцев, и всех святых, полагают закон, еже и впредь в том же месте сретение и провождение творити па­мяти ради настоящего сего времяни, дабы не забвенна была Божия благодать родом впредь идущим, благодарение же и хвалу воздати благодетелю всех Богу, славимому в Троице, Отцу и Сыну и святому Духу, и пречистей его Матери и святым небес­ным священноначалиям, ныне и всегда и во веки веков, аминь.

Тогоже 7111 года Марта в 22 день, свя­титель Геннадий Псковский и Изборский пи­шет в Печерский монастырь ко игумену Иоакиму с братиею сице: говорили мы с воеводы со Жданом Сабуровым, да с Иваном Полевым, да с дьяком Замятьею Забелиными, и с игумены и с протопо­пом и со всем освященным собором и с гостьми и со всеми посадными людьми, чтобы нам велети тебе Печерскому игумену Иоакиму с братиею и с чудотворными образы пречистые Богородицы итти во Псков к святей живоначальней Троице сего великого поста на третьей неделе: и как к вам сия наша грамота придет, и вы бы сынове подняли святые великие чудотворные образы пречистые Богородицы Одигитриа и умиления, да начальный Николин образ чудотворный великорецкой, с которыми напредь сего ходили в седьмую неделю по пасце, и шли бы во Псков ко святей и живоначальней Троице сего вели­кого поста на третией неделе к четвергу к вечерне, и стояти с чудотворным об­разом во Пскове от четверга до воскресе­ния Христова, а в воскресение Христово ходити нам с чудотворными же образы круг города, и молити всеблагого Бога сла­вимого в Троице, и пречистую Богородицу и святых великих чудотворцев, о все­мирном строении и о благосостоянии свя­тых Божиих церквей, и о многолетном здравии и спасении благоверные государыни царицы и великие княгини инокини Алек­сандры, и о болярех, и о доброхотех, и о Христолюбивом воинстве, и о всем пра­вославном Христианстве, чтобы Господь Бог препитал православное Христианство в сие гладное время, и впредь даровал бы плод земной и теплоту солнечную и бла­горастворенный воздух на умножение пло­дов земных: да молю вас честнии отцы и о святем Дусе чада, Господа ради и для своего спасения, подвизайтеся от усер­дия сердца, и приложите пост к посту, и молитву к молитве соборне, и особь по келлиам, чтобы Господь Бог даровал вашими святыми молитвами вся полезная: и милость святые и живоначальные Троицы, и пречистые Богородицы, и великого чудо­творца благоверного князя Гавриила Всево­лодовича молитва, и нашего смирения бла­гословение да будет со всеми вами.

Игумен же Иоаким со всем освящен­ным собором и всею братиею, слышав таковой богоугодный от святителя совет, скоро за подвиг приемлются, и по соверше­нии всенощного и молебного пения: предприемлют путь с честными хоругви и с чудотворными иконы и со всем освящен­ным собором ко граду Пскову. И егда достигоша града Пскова, тогда боголюби­вый епископ Геннадий, игумены же и про­топопы, и все священное ополчение с боляры и воеводы, с хоругвми и с честны­ми кресты и со святыми иконами идоша за великую реку во храм Успения пречистые Богородицы, и взяша чудотворную икону святого великого Пророка предтечи и кре­стителя Господня Иоанна, таже противу его монастыря на великой реце сретоша их честно и боголюбезно со псалмы и песньми, знаменующеся и целующе святые чудотвор­ные иконы Господа нашего Иисуса Христа, и пречистые Богородицы и святого чудот­ворца Николая и всех святых, и поидоша во град Псков к соборней велицей церкви пресвятые и живоначальные Троицы, и певше молебная, поставиша те святые чудотворные иконы в церкве до уреченно­го дни на моление и поклонение всем пра­вославным Христианом, с верою приходящим: на праздник же благовещения пресвятые Богородицы боголюбивый епис­коп Геннадий со всенощным и молебным пением совершал Божественную литургию в честнем храме, идеже чудотворная икона святого благоверного князя Гавриила Всеволодовича стояше.

Егда Бог по многоразличных бедах и напастех восхоте помиловати страждущие люди, тогда и сию землю Псковскую, да не отчуждена будет Божественные благодати, яко же и прочие многие грады Руские земли, прослави милостию своею и пречудным знамением пречистые Богородицы, ею же Псковская Печерская обитель красится яко светило, сияя во вся концы Российския державы. По освящении бо великие церкви на второе лето начат Богородица чудеса своя являти ежегодно, и не токмо по два и по три чуда творити, но и по пятидесяти и шестидесяти, исцеляя мужей и жен различными недуги одержимых.

В лето убо 7095 (1587) Июня в 1 день, пишет Государя царя и великого князя Феодора Иоанновича всея России болярин и воевода, Псковской князь Никита Романович Трубецкой, в Печерский монастырь о чудесех пречистые Богородицы, яже в та лета от иконы ея содеяшася, вопрошая тоя обители игумена Мелетиа с братиею. Игумен же Мелетий с братиею вопрошения его ради пишут к нему сказание о чудесех пречистые Богородицы сице:

Государя Царя и великого князя Феодора Иоанновича всея России болярину и воеводе князю Никите Романовичу, пречистые Богородицы Печерского монастыря игумен Мелетий со братиею Бога молим и челом бьем.

Велел ты господине нам известити себе о чудесех Пречистые Богородицы, что Бог даровал от ея чудотворного образа в нынешнем 7095 году с верою приходящим: и мы Государь о милости Божией и пречистые Богородицы, и о чудесех ея послали к тебе при сей грамоте роспись. Оная роспись хранится в библиотеке Печерского монастыря, где подробно описаны все чудеса, бывшие от иконы пресвятые Богородицы. Зде же не многая некая сведения ради помещаются.

Егда попущением Божиим за грехи наши прииде безбожный король Польский со множеством вой ко граду Пскову, грозя разорити православную веру, в то время бе во граде единый муж Дорофей именем, благочестив сый и бояйся Бога, о нем же глаголют нецыи, яко вредные имяше очи, но обаче и вредными очами сподобися видети чудное видение Божия матере, юже Бог ему показа, якоже древле святому Андрею со учеником его Епифанием во Влахернстей церкве дарова видети пречистую Матерь, со множеством святых за мир молящуюся, и светозарным своим омофором людей покрывающую. Сему убо мужу некогда седящу в келлии своей и сетующу настоящие ради нужды, абие видит прозрачными очима свет велий, сияющь паче солнца, величеством же яко столп огнен, до небеси досязающь: явися же чудный оный свет от Печерские обители, и миновав Мирожский монастырь, грядяше во Псков, и в нем виде шествующую пресвятую Богородицу, одесную же ея бяше преподобный Антоний, начальник Киевские пещеры, ошуюю же Корнилий игумен преждереченного монастыря Богомзданные пещеры, и взыде с ними пресвятая Богородица чрез стену града, и вниде в церковь честнаго и славного ея Покрова, яже бяше в монастыре, сущем во углу града, в нем же бе келлия оного Дорофея, сподобльшагося видети страшное сие видение. Вшедши же святая Богородица в церковь сию, и освятив ю пришествием своим, изыде из нея с преподобными светом неизреченным блистающися: и посем взыде на стену града, и ста ту. Отверзше же пречистые уста своя вопроси, где есть Мирожский строитель Нифонт, епископ Новгородский. И абие в том часе ста пред нею епископ Нифонт, и пад поклонися ей до земли. По сем паки воззва, глаголя: где суть избрании Божии, в храме святые Троицы лежащии. И абие представше благоверный великий князь Владимир Киевский, и благоверный князь Гавриил Всеволод, и благочестивый князь Тимофей Домант, а по них созади яко на полсажени блаженный Николай Христа ради юродивый, иже пророческим даром украшен бысть от Бога: и сии вси купно со страхом падше, поклонишася Царице и Владычице. Она же возведши очи свои на град, и яко гневаяся, проглагола сице: О злии человицы града сего! прогневали Сына моего Господа и Бога беззаконными и скверными своими делами, и ныне егда прииде на вы туга и беда велия, и вы Сына моего Господа Бога и мене едва познали. Сия же слышав преподобный игумен Корнилий, и блаженный Николай юродивый, абие прослезишася, и отвещаша ей глаголющи: Госпоже пресвятая Владычице Богородице, есть грех и беззаконие людей сих, обаче не прогневайся на них до зела, но помолися Сыну своему и Богу нашему за град сей и за люди согресшыя. Посем преподобный Антоний со святителем Ниифонтом и с ними благовернии велицыи князи такожде восплакашася, и молиша ю умолити Сына своего Христа Бога нашего, да избавит град от належащие оныя беды. Она же паки отверзе пречистые своя уста, и воззва от келлии преждереченного оного мужа, и рече ему: иди вскоре к Боголюбивым воеводам и к Печерскому игумену, и возвести им, дабы молили прилежно Господа Бога за град, и принесли бы образ мой и хоругвь на стену града, идеже аз стою, а людие бы плакалися о гресех своих, моляще милостивого Бога: буду же и аз молити его о вас, и егда Сын Божий, Слово Отчее, славимый со Отцем и Святым Духом, услышит моление и слезы раб своих, тогда оного Короля сотворит недомысленна и умом смятенна, и ничтоже ему успевшу, отъидет посрамлен. Сие Пречистая изрекши, абие невидима бысть купно и со святыми. Старец же Дорофей обретеся в сенех келлии своея седя яко же и прежде: страхом же и трепетом одержим быв от видения, со тщанием тече и исповеда милостивое явление пресвятые Богородицы благочестивым воеводам и всему сигклиту. Сии же таковая слышавше, радости неизреченные исполнишася, и благодарение воздаша Царю веков нетленному и невидимому, единому премудрому Богу, и Пречистей его матери, Владычице нашей и заступнице, на нюже твердую возложивше надежду, и укрепившеся молитвами благоверных князей и преподобных отец, крепце против поганых сташа. Король же Польский много ратовав град, ничтоже успе: понеже Господь наш Иисус Христос, по преждереченному пророчеству матере своея, смяте его умом, и сотвори недомысленна. И тако бедный он недоумения исполнився, отъиде от града посрамлен и разбиен силою возбранные и непобедимые Воеводы пресвятые Владычицы нашея Богородицы, и молитвами, купно же и заступлением святых благоверных великих князей Гавриила и Тимофея Псковских чудотворцов.

Еже бысть во граде Пскове на градней стене во время брани, бывшие в нашествие Польского Короля Стефана Батория.

Егда стрелиша из пушки Литовстии люди из за великие реки с колокольни святого преображения Спасова с Мирожи: тогда ядро прилетев, паде пред иконою пречистые тихо на едином месте, и не вреди ни единого от стоящих ту, и вси людие, видевше сие, прославиша милосердого Бога, и пречистую Богородицу заступницу нашу.

Жена некая вдова, именем Мариа Терентиева дочь с Подкопорья, из за Невы реки, не виде очима два лета и девять месяц: в лето же 7095 Маия в 28 день, егда Печерского монастыря священницы ходиша со образом пречистые богородицы Владимирские (яже и умиления) в град Псков по своему обещанию: тогда оная жена, помоляся во храме живоначальные Троицы, идяше за образом к печерскому двору плачася, и абие прозре, и поведа священником и всем людем преславное то чудо.

На утрие же, егда образ тоя пречистые Богородицы понесоша из Пскова обратно в Печерский монастырь, тогда некоей девице Марии прозрение дарова: она же поведа священником и всем людем, како милостию Пречистые прозре. Бяше же оная девица дщи Власиева, яже из млада живяше во граде Юрьеве Ливонском, и не виде очами девять лет.

Тогоже лета на день рождества святого Иоанна Предтечи у пречистые Богородицы в Печерском монастыре на литургии некоей жене именем Анне Тимофеевой, из града Порхова, яже не видела очима шесть лет, от образа пречистые Богородицы честнаго ея успения, Бог прозрение дарова.

В лето 7097 Апреля в 27 день, на память святого священномученика Симеона сродника Господня, пречистая Богородица после молебна, егда святою водою народ кропили пред обеднею, вдове Марии Андреевой жене Щепетинникова из великих Лук, с посада Пятинного, яже не виде очами пять лет, прозрение дарова.

Многа же и ина чудеса, яже зде множества ради не воспомянухом, во обители пречистые Богородицы содеяшася, (яко же древле во Влахерне образом Одигитрии): овии бо видеша свещи горящие, сами о себе возженныя в церкви Печерской: овии же благоухание исходящее обоняху: нецыи же от наших братий многажды видяху свет в нощи стоящ над монастырем, и не точию иноцы видяху, но и мирстии, от них же некто именем Иоанн, прозванием Долгий, виде некогда в нощи свет стоящ яко облак над монастырем, и мнев, яко от вещественного огня нечто горит в монастыре, и на коне пригнав, хотяше некое пособие сотворити, свет же абие подняся к небеси. Сия он нам поведа: мы же прославихом Бога, показавшего дивная чудеса в дому пречистые Богородицы.

По воскресении Господа нашего Иисуса Христа и по вознесении его на небеса, и по сошествии от Бога Отца святого Духа на святые Апостолы, святым великим Петром научен бысть всехвальный Апостол Марко, он же Александрию и Египет научи, и просвети святым крещением, списавши Христово благовестие, Великий же Феодор Студит похваляет в древних отцех Марка благопокоривого и благопослушного, в пещере же Киевстей прославляется сим тезоименитый и чудотворивый Марко, иже по Христе словом мертвых возстави, и из гробов воздвиже. К сим древним трием Марком да присовокупится четвертый наш Марко, о нем же слышахом от неких в повестех обносимо глаголющих, яко в начале прежде некий старец живяше на потоце Каменце при пещере, от града Пскова разстоянием четыредесять поприщ, а от Ливонской земли за два поприща, его же нецыи ловцы видяху у триех камений, лежащих над церковью пресвятые Богородицы Пещерною: но о сем известно не могохом обрести, каков бяше старец, и коего рода, или како и откуду в сие место прииде, и колико время поживе, и како скончася, но точию обретохом следующее:

По Ионе первом игумене обители Печерские бе некто другий игумен. Сей не вемы, по какой причине, написа в Синодике церковном инока Марка Печерского первого старца. Гроб же его и мощи нецыи поведаша нам, где лежаху, слышавше о сем от первого строителя священноинока Ионы: по многих же летех, егда убо церковь пречистые Богородицы велику в горе ископаша, и тогда игумену Дорофею восхотевшу гробницу большую соделати, обретоша гроб оного старца Марка весь истлевший и распадшийся, кости же его с составами и с ризами и с кукулем и с главою неистлевшие. Вземше убо его, положиша в новом гробе на том же месте, идеже прежде лежал в пещере, иже и до ныне стоит. И по сем многу времени минувшу, вопрошающим нам о сем первом старце Печерском Марке у игумена тоя же обители именем Никона, како имя его известно бысть, яко от прежних старец никомуже ведомо бе, но по прошествии уже многих лет последи первоначальных триех священноиноков Ионы, Мисаила и Селивана, некто другий игумен по первом игумене Ионе написа в Синодике церковном первого старца Печерского Марка: Никон же игумен отвеща: поведаху ми, рече, сея обители старцы, Келестин екклесиарх и Маркелл, сице глаголюще: игумен, де, Корнилий сумняся о сем, праведно ли внесеся в Синодик имя старца Марка, понеже никто от прежних инок точно не известил о том, и сего ради повеле из Синодика имя его изгладити, мня в себе, яко неправедно написано бысть: егда же изгладиша имя его, тогда случися игумену Корнилию болезнь тяжка вельми, и бысть в недоумении и в скорби велицей. Бысть же ему извещение некое, яко сего ради страждет, понеже изгладил имя старца Марка. И абие начат молити братию, дабы привели его в церковь к чудотворней иконе Успения пресвятые Богородицы, и ко гробу старца Марка, иноцы же приведоша его в церковь ко иконе пресвятые Богородицы, и ко гробу Маркову: он же у гроба метание сотворив, со слезами прощения просяще, обещаваяся паки написати имя его в Синодик, и в том часе здрав бысть, и пойде никим же водим. И тоя ради вины поминают именем тем Печерского старца Марка даже и до ныне.

В лето 7108 (1642) месяца Марта в 17 день, вложи Бог духовное рачение в сердце Иоакима игумена обители Печерские, иже советовав с братиею, пишет во град Псков к бывшему тогда священноепископу Геннадию о первом старце Печерском Марце и о начальном строителе священноиноке Ионе, и о его супруге инокине Вассе, возвещая, яко гробы их с мощми обетшали вельми. Епископ же Геннадий прочет послание, скоро повелевает писанием игумену Иоакиму с братиею соделати новые гробы и покрывала, и преложити мощи того первого старца и начального строителя и его супруги. Игумен же Иоаким прием благословение от святителя, повеле ковчеги новые и покровы соделати, и в те новые ковчеги преложи мощи их с старыми гробами, и певше надгробное провождение, поставиша гроб первого старца Марка на том же месте, идеже первее стоял под Спасовым образом прямо дверей, а священноинока Ионы на том же прежнем месте, сиречь, при входе в Богом зданную пещеру на правой стране, супруги же его же инокини Вассы принесоша гроб от левые страны на десную, и поставиша близ священноинока Ионы, яко же повеле священноепископ Геннадий, со псалмопением и кадилы, идеже и ныне почивают под спудом.

Предвечное убо в Троице прославляемого Господа Бога и Спаса нашего Иисуса Христа царство ни начала, ни конца днем имущи, под конец веков на земли открыся, егда прехвального и всепетого ради на земли от Девы воплощения его, православная вера, учительством пребожественных его ученик и Апостол, по вселенней возсия, и достоверна бысть не точию простым и невеждам, но и многим от премудрых, неверна же мняшеся прелести порабощенным точию, иже привременною и суетною славою мира сего содержими бывше, баснь и стень мняху быти смотрения таинство и спасительное проповедание, вочеловечения Христова, и царство его Иудеом убо соблазн, Еллином же безумие вменяшеся. Тем же убо такового ради безумия, рекше неверия, мнози пределы языков тьмою идолобесия покровени бяху, и весьма осквернени, беззаконным прилежаще делом, от них же по неедину в доказательство и в воспоминовение предложим ныне Литовскую страну, к западней части прилежащую, яже чрез множество лет идолобесия прелести поработа, изменяющи славу Божию в подобие скверных человек.

Бысть убо в стране Литовстей некто великий князь именемъ Мендогв, современный благочестивому великому князю Александру Ярославичу Невскому. Той аще и велик бе славою и богатством, и всеми мирскими вскоре увядающими благими, но душевною нищетою до конца бе объят, и зело побеждаем прелестью богомерзских идол. В таковой убо зело лютой прелести присно упражняющуся сему Литовскому князю, родишася два сына, из них же старейшему бе имя Вышелег, а юнейшему Домант, о нем же нам слово предлежит. Сия убо княжеская чада прежде по отеческому преданию погани суще верою, последи же благочестия лучами яко светила возсияша, и первее убо старейший брат Божественное некое озарение свыше сподобися прияти. Разумев бо нечестивую оную идольскую прелесть, и житейский мятеж, и суетной и идолу влекущей славе радоватися рек, остави отечество свое, и в гору Синайскую отъиде, идеже к неблазненней стезе приставь, и Христу крещением чрез святителя присвоився, наречен бысть Давид, и пребывание в непорочней вере, Божественным прилежа писанием. По сем в той же горе облечеся в монашеский образ, и быв пришлец в пустынных местех, пощением же и бдением и Божественных словес прилежным поучением чувства добре очистив, и душу пременив от всяких страстей, безстрастия светом просия. Глаголется же о нем, яко некогда оставль келлию, прииде во отечество свое, и представ отцу своему, Спаса Христа истинного Бога исповеда, всем Творца суща, а идолы попремногу укори, и сих прелесть оставити отца своего моляше, и ко Христу присвоитися крещением, пресвятое и нетленное пребывание будущия жизни яве сказуя пред всеми. От него же сладкое то учение юнейший его брат, преждереченный князь Домант восприим, верова: коснуся бо тогда сердцу его Утешителева благодать, и оттоле искаша подобна времени, да избежит прелести бесовские, еже послежде и бысть: Божий же он муж много молив отца своего, еже отступити идольские мерзости, но не послушан бысть, диаволу ожесточившу сердце его; тем же не точию не послуша, но и поругася и укори его, вмале же и не мучи, обаче Бог не попусти быти сему. Он же таковая за имя Христово подъятъ, возвратися во святую гору, идеже возможе в мертвенном телеси восприяти житие безплотных. По отшествии же его, времени некоему минувшу, абие бысть мятеж велий во стране Литовстей: восташа бо сами на ся Князи Литовстии, убивающе друг друга, убиша же и властелина своего и сродника, преждереченного Князя Мендогва: и абие вскоре изыде весть о убиении его во страны многи, даже и до святые горы.

Преждереченный убо инок Давид, сын убиенного князя Мендогва, иже бяше тамо монашеские подвиги проходя, слышав убиение отчеее, поведа мысль свою игумену, и благословение прием от него, сложи с себя иноческие ризы, но правила иноческого никако же измени, и облечеся в воинский чин, и собра вои многи, и отца своего приятели и боляры, и помолився Христу, прииде ратию на поганую Литву, и Божиею помощью одолев убийцам, многи князи Литовские изби: и тако страшную победу одержав, паки возвратися во святую гору, идеже добре иночествовав, житию конец прият.

Благородный же князь Домант, о нем же глаголется повесть сия, видев бывающий мятеж и убиение отчее, печалью и слезами сокрушашеся зело, и яко трость ветром колеблем бываше размышлением, не доумеваяся, что сотворити, в отечествии ли имети жилище, или в чуждые страны преселитеся; вразумлен же быв промыслом Вышнего, абие возненавиде идольскую лесть, вкупе же и во страны Христианские преселитися восхоте, и ко Христу крещением присвоитися. Сие убо полезно быти разсудив, оставляет отечество свое, и со всем домом своим и с боляры и со отроки в богохранимый град Псков отходит, в лето от создания мира 6774, от рождества же Христова 1266, идеже честне от граждан приемлем бывает. Время же некое пребыв во граде, и уставы правления разсмотрев, уязвися желанием любве Божия, и ничтоже замедлив, крещением просветитися восхоте, весь в бога вперився желанием, и жаждою разгоревся ко источнику безсмертному яко елень к водам, дабы по сих горькие тьмы прелестного идолослужения отступити, и к сладкому свету истины приложитися. Прежнее убо нечестие благочестием измени, и тако просветися Божественным крещением во имя пресвятые Троицы, Отца и Сына и святого Духа: и наречено бысть имя ему во святом крещении Тимофей, сиречь, благочестив. Породивжеся водою и духом, радостью неизреченною радовашеся, яко сын света сподобися быти, иже бе древле омраченный: раздрабося, по рекшему, сердца его греховный покров, и от телесного дебельства належащее души помрачение отъяся, и позна Создателем заповеданная; тем же прежних нечестий отступль, добрым изменением изменися, яко превзыти благочестием многих: тем же радость велия бяше мужем града Пскова ради просвещения его и благонравия. Таже старейшины града совет благ совещавают о нем, и с подобающею честью на престол княжения власти возводят сего, и во всем раболепное повиновение приносят ему. Блаженный же и благородный он князь Домант аще и власть княжения в человецех прият, обаче елико славы века сего: известно бо ведяше, яко аще кто и всего мира имению владыка будет, но обаче не равен есть ни единому от меньших сих, иже души своей обрящет покой от труда грехов. Сего ради тщашеся во всем угодная творити пред Богом, и благочестием яко светило сияше, душу от мглы греховные и от лукавых помышлений удалив, и яко чистое и новосотворенное зерцало сиянием добродетели украсив, и храм святей Троице сию сотворив, к тоя видению всю силу ума своего управляше, любовью теплою и сердцем чистым к Творцу прилеплялся, вещественных же и долу влекущих удалялся, и яко лицем к лицу Богу предстоя, и со страхом моления тому принося, и еже в день исправити не можаше, множицею мирскими делы воспящаем, сие нощь ему неправляше, в нюже дневные недостатки молитвами и слезами дополняше, един ко единому везде сущему беседуя, и оставления от него согрешением прося. Таковый убо в лепоту приближается к Богу, и яко лицем к лицу беседует с ним: приходит бо везде благий Бог наш и Владыка, послушал истинно и чисто молящихся ему, яко же рече Пророк: Очи Господни на праведные, и уши его в молитву их. И понеже таков о Бозе начаток добродетельного здания новопросвещенный сей положи: убо и мир Божий бысть с ним, просвещая его и вразумляя на путь истинный, и всякое похотение лукавое отгоняя от ума его, запечатлевая же душу крестным знамением, да не приближится к ней лукавого соблазн, но да присно озаряема будет светом пребожественные живоначальные Троицы, во Отце и Сыне и святом Дусе славимые. Сию же благодать блаженный приим, коего исправление не сотвори; сиротам и вдовицам кормитель и заступник бысть, нагим одеятель, печальным утешитель, обидимым помощник: монашеский же чин, и весь причет церковный, яко слуги Божие попремногу любляше и почиташе. Такожде и власть княжения своего, богоугодно правяше: николиже обиде убога на суде, не устыдеся лица сильных, но вся сия обычаем благим и глаголы тихими наказоваше, и светом разума просвещаше души их, и от вражия бури в тишину мира провождаше, не толико гордостью властелинскою и величеством сана хотяй честен быти и страшен, елико смирением и кротостью, ею же всех к себе привлече. О таковом убо писание глаголет: князь во стране благ и кроток по образу Божию есть.

По часту же творяше воспоминание плачевно о убиении отца своего, о нем же прежде глаголано бысть, паче же о том, яко не сподобися Божественного крещения, и яко прелести вражией работав, нуждею отъиде века сего в землю темную, ея же вереи заклепы вечные, отонуду же ни един возвратися: и о сем убо множицею моляше Бога со слезами, желая спасти погибшего душею и телом. Таже яростию разжегся на убийц оных, и не могий терпети прочее, мольбу к Вышнему простирает, и на враги победы просит. Укрепивжеся упованием силы его, и знамением честнаго Креста вооружився, абие по мале времени крещения своего, поемлет с собою три девяноста избранных мужей, и Бога в помощь призвав, воздвижеся от славного града Пскова, и без вести во отечество свое пришед, свирепо ополчился на безбожные супостаты, и люте сих оружием карати начат, обладателю их Литовскому князю Герденю во оное время не бывшу ту. Они же нечаемого ради нашествия вой, велиим страхом объяти бывше, возмутишася, и овии бегу яшася, лютым гонением гоними, и немилостиво мечи разсекаеми, инии же в твердая здания затворяхуся, и трепетом колеблющеся, живота прочее отчаявахуся. Мнящийся же искуспи быти во брани, противу ратных сражахуся, друг друга поощряюще, и горце кричаще, но ничтоже успеваху: ибо вси уязвляеми оружием Христиан падаху, источники кровавы по удолиям проливающе. Домы же их и жилища страшный оный ратоборец до основания разрушати, и огнем жещи повелеваше: не точию же имения и сокровища у них отъя, но и княгиню нечестивого их князя Герденя и детей его плени. И тако помощию пресвятые Троицы одоле врагов своих, и отъиде невредим с пленом, яко превысокий победитель. Пришед же к некоей реце, нарицаемой Двине, и преплыв, ста в шатрех на чистом бору, яко за пять поприщ от реки, и сто осмьдесят мужей воинских с пленом ко граду Пскову отпусти, прочиих же девятьдесять с собою остави, из них же двух неких мужей стражами постави у прехода реки, им же заповеда твердо стрещи, и возвестити гонение, поганых, князь же Гердень слышав пленение земли своей, и Княгини и чад, вскоре прииде во владение свое, и узрев плачь и смущение людское, и лютою яростию разжегся, ополчися с братиею своею и с сродники, и собрав вой довольны, яко до осьми сот мужей, и на кони всед, погна в след князя Доманта, с яростию стремяся на погубление его, купно же и на разорение града Пскова, не ведый, яко весть Господь благочестивые от напасти избавляли, неправедные же и грешные в сих место предаяти в напасти. Егда убо приспе к реце нарицаемей Двине, и сию на он пол преходити начат, тогда преждеречении стражие узревше множество ратных приближающихся, абие пристрашни Быша, и воставше бежаша ко блаженному князю Доманту, и возвестиша ему ополчение поганых, гонящих по нем. Блаженный же прием весть, рече: Бог да спасет вас братие, яко добре усретосте супостат наших: тем же убо слезите с коней, яко совершили есте определенную вам работу. Они же реша к нему: не буди нам оставити тебе, о благородный княже наш! но убо хощем с тобою ныне вкупе за дом пресвятые Троицы мужественне пострадати до конца. Он же слышав таковые глаголы от них, радостен бысть, таже воздохнув от глубины сердца, и со слезами преклонь колена на землю, возопи, моляся в Троице славимому Богу нашему и всех Творцу, воистину сущему и присносущному, безначальному и безконечному страшному и всемогущему, благому же и милосердому Владыце Христу глаголя сице: о премилостивая, пресвятая, животворящая, пребожественная и неразделимая Троице, превечный Боже наш, и Творче всякие твари, сотвори с нами по велицей твоей милости: помоги нам грешным в час сей, пособивый иногда кроткому угоднику твоему Давиду победити иноплеменники: покажи милосердие древние твоя милости, и не предаждь нас рабов своих в расхищение врагом нашим, да не рекут нечестивии, где есть Бог их; Ты бо еси наше прибежище, и непостыдная и крепкая надежда. Тебе невидимо укрепляющу, и немощнии возмогают, яко един еси поборник крепок и непобедим, и Бог премилостив всяческим, и щедроты твоя на всех людех твоих, и тя благословит вся тварь препрославленного во веки.

Сице помолился святой, и Божественное утешение ощутив в сердце своем, со дерзновением рече к дружине своей: се ныне нам, сотрудники и братие, предлежит живот и смерть вкупе: но не убоимся, о доблественнии воини! но постраждем за дом святые Троицы и за православную Христианскую веру, и за святые Божие церкви, да не будем в расхищение поганым. И сия рек, еще же и призвав в помощь Христова воина и страстотерпца Леонтиа Трепольского, его же память приспе в той день, такожде и благоверного князя Гавриила, нарицаемого Всеволода Псковского знаменоносца, быстро подвижеся с своими вои, и в малей дружине храбро и мужественно устремися па полки нечестивых. Видевше же погании крепость его и мужество, и сами зверообразным рвением вооружишася на него, и аки зверие дивии рыкающе наскакаху и тьмочисленные стрелы пущаху. Блаженный же князь Тимофей зельне вопияше к своим, укрепляя и понуждая их, и подая им надежду Божию, и не ослабевати в деле моля, но крепце братися со враги. Бысть убо сеча зла и преужасна. Падаху телеса противных яко древие, и кровь сильных аки вода лияшеся по удолиям, бысть же звук и шум страшен зело, аки гром, от вопля и кричания обоих воинств и от трескоты оружия их. Видев же Литовский князь Гердень лютую погибель и падение вой своих, абие плещи даде, и бежати устремися со вставшими с ним: сильнии бо и храбрии ратницы его вси избиени Быша, инии же мнози в воде истопоша, их же последи река изверже яко до 70 числом на остров некий, бывший посреде ея, прочии же быстриною в дальная снесени Быша. И тако достохвальный и доблественный князь Тимофей помощию пресвятые Троицы, и молитвами святых угодников ея, знаменитую победу и преславное одоление над горделивою Литвою одержа, убив яко до шести сот мужей, и трупия их в снедь зверем предав, прочее преста, и со дружиною своею воздаде благодарение Богу, низложившему мышцею своею гордых. Таже иде ко граду Пскову в велицей радости, его же пришествие слышавше граждане, изыдоша во сретение, яко же древле Давыду, победившего прегордого Голиафа, и прияша его с великою честью, о победе веселящеся вси преславно.

В тоже время прииде Ярослав Ярославич в великий Новград со многою силою и гордостию, хотяй итти на богохранимый град Псков, и на блаженного князя Тимофея. Новгородцы же Богом вразумлени бывше, умолиша его не ратовати Пскова: и отосла князь воинство вспять. Благоверный же князь Тимофей постави церковь во имя святого мученика Тимофея Газского, в него же наречено бысть имя его, и сию чудными добротами и стенным писанием украси.

Таже паки пойде с мужи Новгородскими и Псковскими на Литовскую землю, и много воевав, напоследок и Герденя князя преждереченного уби, и возвратися во свояси здрав со всем воинством своим.

Времени же малу минувшу по сих князи Рустии, Святослав Ярославич, и Димитрий сын великого князя Александра Невского, и инии четыре князи, совокупившеся в великом Новеграде, с ними же бе и сей благородный князь Тимофей с воинством своим: (тако бо обыкоша благочестивии Рустии князи друг другу в бранех способствовати на враги, яко да сущие люди во области их в тишине и благоденствии пребудут): поидоша ко граду Немецкие земли, яже глаголется Ракобор. Достигше же Немецкого воинства месяца Генваря в 23 день, и мужественне устремившеся, нападоша на поганые, и помощью Божиею избиша всех острием меча. Толико же бяше множество поганых, яко на седмь поприщ не бяше земли нагие, идеже бы конь ступити могл, трупом Немецким повсюду лежащим: бяху бо совокупльшеся всею землею своею. Пребыша же князи на трупиях три дни, и возвратишася во свояси в великий Новград.

Благородный же князь Домант оста со отроки своими, и пройде горы непроходимые, Вируан завомые, и всех живущих тамо смяте и изби рукою крепкою зело, и вся стяжания и сокровища у них отъя, купно же и жилища демонская, сиречь, кумирницы разори: понеже ревностию Божественною разжигаем, сонмы идольские яко стада овчая разгна и поплени даже и до моря, и поморие все пленив, возвратися ко граду Пскову со множеством плена.

Зиме же прешедшей и лету наставшу, абие приидоша погании Немцы в силе тяжце на богохранимый град Псков в неделю всех святых: но не успеша ничто же, паче же сами окаяннии избиени Быша мужеством блаженного князя Тимофея: оставшии же бежаша, ужасом одержими, понеже в мале времени слава велия о храбрости Домантовой промчеся во языцех.

Двум же летом минувшим от преждереченные победы над Поморяны, паки собрася останок поганых Ладин, иже пришедше тайно, взята неколико сел Псковских, и Хориясы избиша острием меча. Блгородный же князь Тимофей сия слышав, не стерпе обидим быти от поганых Латин. Совокупив убо отроки своя, и иных многих от граждан, и сих всех вооружив, (бе же всех мужей яко шестьдесят), изыде с ними в пяти караблецех, и постиже их на реце глаголемей Мираповии. Бе же в той день память страстотерпца Христова Георгиа Каппадокийского, ему же благочестивый князь со слезами помолися способствовати на враги, еже и бысть помощию его. Мужественне убо ополчившеся на поганые, сурово устремишася на них, и воскричавше, телеса их сокрушаху, и ового убо многочастне оружием раздробиша, иному же главу разсекоша, иного же ранами неисцельне обложиша, и светлая оружия своя кровию их червлены сотвориша, останок же поганых, страхом объяти бывше, бежати устремишася, гоними с места на место гневом Божиим, яко же немощная птица, прелетающая по пустыням и лесам, по горам и пещерам каменным и разселинам гор, нигде же пристанища тверда имуще. Бегающе же погани, узреша остров некий травоносный, и влезше нань, падоша в траву ону, мняше себе спасение получити. Обаче благочестивый князь наш вскоре приспе, гоня по них, и повеле воинству своему огнем запалити траву: погании же ощутивше пламень огня, зело возметошася, и семо и овамо бегати начата, кийждо ища спасения себе: обаче ничто же успеша, но точию конечной пагубе предани быта: овых бо изсекоша, инии же в воде истопоша. Сам же благородный князь наш и воинство его здрави остатася, и велие благодарение воздаша соблюдшему их всесильному Богу, и враги потребившему, и его угоднику великому страстотерпцу Георгию, и по сем возвратишася во град Псков с великою победою. По мале же времени победоносный князь Тимофей созда церковь во имя страстотерпца Христова Георгиа, яже и до ныне стоит молитвами его.

В тые же дни слышав Местер Римский (Гросмейстер Лифляндский) мужество и храбрость благочестивого князя Тимофея, собра воинство много, и ополчися в силе тяжце. Воду бо множеством кораблей покры, землю же коньми, на них же бяху всадники вооруженны: и сия вся урядив, касается пути, с великою гордостию и зельною яростию претя граду и людям, еже погубити их, и дом пресвятые Троицы разорити, и раба ея благоверного и благочестивого князя Тимофея в плен отвести. Но не уведе окаянный хотящего приключитися ему. Слышав бо благочестивый князь Тимофей ополчение его и возношение безумное, хвалящееся во множестве силы своея без помощи Божия, абие вниде в церковь пресвятые Троицы и поверже меч свой пред олтарем, и над на лице помоста церковного, моляшеся со слезами, глаголя: Господи Боже сил! мы людие твои, и овцы пажити твоея, имя твое призываем: призри Владыко, на кроткие и смиренные свыше, и гордых высокие мысли смири и низложи, да не опустеет ограда овец твоих. Сице помолившуся святому Исидор игумен Спасомирожского монастыря и весь священный чин взяша меч его от земли и препоясаша его: посем же певше молебная и осенивше его живоносным крестом и священною водою окропивше, отпустила его, помощь Божию тому прирекше. Блаженный же князь Тимофей не дождав множества вой своих, но елицы обретошася, тех появ с собою, изыде на поганые, вооружився силою животворящего Креста и молитвою святого мученика Феодора Стратилата, (бе бо в той день память страдания его). Посем извлек меч свой, в малой дружине сурово нападе на поганые. Премилосердый же Владыка, Царь царствующих и Господь господствующих яви святую свою помощь, и предаде противных в руце верному своему слузе благочестивому князю нашему, и падоша пред ним острием меча. И тако благочестивый князь Тимофей с малым воинством своим светлую победу одержав, возвратися во град Псков с радостию великою, и бяху выну хваляще и благодаряще Бога о всех, яже сотвори с ними. По сих благочестивый князь созда церковь во имя святого великомученика Феодора Стратилата, его же молитвами победи иноплеменники, и град Псков от разорения поганых избави.

Времени же некоему минувшу, паки попущением Божиим за грехи наши совокупляется множество поганых Немец, и дерзостне приходят на град, яко зверие дивии рыкающе, и стремление лютого гнева своего на Христианы излияти тщащеся. Что же по сих злобесное сих умышление творит; монастыри и ограды иночествующих пожигающе, и сих множество немилостивно избивающе, различными муками телеса постников озлобляют. Тогда убиен бысть преподобный игумен Иоасаф монастыря Снятные горы, потом же Василий игумен Мирожского монастыря, Иосиф пресвитер, иже тесным и прискорбным путем житие проходяще, наконец мученически течение свое скончаша, и получиша безконечное блаженство. Еще же и жен бедных и черноризиц множество и детей избиено бысть от поганых.

Видев же сие благочестивый князь Тимофей, абие на молитву против злодеев устрояется, и к Богу с плачевным рыданием и сокрушением прибегает, победы на поганые прося: еже и бысть. На утpиe бо, егда погании обступиша град, до конца разорити его хотяще, Всеблагий Бог наш, аще и порази ны гневом своим, но милость свою не разори от нас, и не забы душ убогих своих, ниже предаде до конца в расхищение врагом, ратующим нас: но яко благоутробен сый и многомилостив, злобу юже наведе на ны, обрати ю паки по реченному седмерицею в недра поганых врагов, и поразив их до конца рукою раба своего, поношению вечному предаде. Ополчився бо тогда благочестия поборник в малой дружине с некиим мужем Иоанном, нарицаемым Драгомиловым, и со иными мужи Псковичи, иже бяху искусни в воинстве, изыде яко лев на стада овча, и помощью пресвятые Троицы укрепився, изби полки их рукою крепкою и мышцею высокою зело: положи трупия храбрых в брашно зверем земным; и плоти сильных птицам небесным: пролия кровь их яко воду, и овых убо язвами неисцельно обложи, и самого военачальника их, зовомого Кумендера, зельне во главу урани, инии же сами истопоша в воде, нецыи же из них зовомии Вильянцы, в плен взяти Быша, а прочии избывшии сих страхом велиим объяти бывше, и оружие повергше, вскоре устремишася в бег, не могуще противо стати храбрости благочестивого князя Тимофея Доманта. Бысть же сия славная победа в лето 6807, Марта в 4 день. Тогда видев благочестивый князь Тимофей, яко даде ему Бог сицевую победу над погаными, абие радости многие исполнився, многослезное благодарение о таковом благодеянии возсылание Богу выну.

Бе бо день он, в оньже Быша сия, день скорби и веселия: скорби убо, яко попусти Бог таковое искушение на ны за безчисленные грехи наши: веселия же, яко преславно спасени быхом от враг наших. Сего ради исповемыся тебе Боже в век, в род и род и возвестим хвалу твою. Но кто возглаголет силы твоя, Христе, слышаны сотворит вся хвалы твоя, яко во смирении нашем помянул ны еси, и спасл еси нас от стужающих нам; тем же хвалим тя паче слова, покланяемся, поем и превозносим неизглаголанное твое милосердие, пресвятой Царю всех видимых и невидимых! благослови и спаси люди твоя, даруй силу и державу верным рабом твоим, благочестивым князем нашим. Яко же бо древле, братие, блаженным великим князем Александром Ярославичем и сыном его князем Димитрием, тако и зятем его, зде воспоминаемым блаженным князем Домантом, множицею спасени Быша гради наши, великий Новград и Псков, от нашествия поганых и безбожных иноплеменник.

О таковых убо писание глаголет: яко аще князи праведнии бывают в земли, то многая согрешения отдаются земли той яко же и древле бысть во дни пророка Исаии. Не единого ли ради Езекии сохранен бысть Иерусалим от пленения Сеннахирима царя Ассирийска; сице и зде сохрани Господь град Псков от разорения поганых, молитвами раба своего благоверного великого князя Гавриила Псковского чудотворца, и заступлением и храбростью благочестивого князя Тимофея Доманта. Сей бо всегда в молитвах своих призываше на помощь сего благоверного великого князя Гавриила при всех нахождениих безбожных Латин. О таковых паки глаголет Исаия пророк от лица Господня: се дах тя в завет родом и во свет языком, еже быти тебе во спасение даже до последних земли. Тако глаголет Господь, избавивый тя Бог Израилев: во время приятно послушах тебе, и в день спасения помогох ти, и сотворих тя, и дах тя в завет вечный языков, еже устроити землю и наследити наследия людей.

Многие же и иные светлые победы над погаными состави благочестивый князь Тимофей, яже не суть писаны зде. Сия же писана Быша, да незабвенна будут дела Божия преславная, их же сотвори рабом своим.

Прочее же время живота своего благоверный князь Тимофей прохождаше во всяком благочестии и чистоте даже и до смертного дне: чего ради от всех бе почитаем и любим не сана ради великого, но благонравия. Никого бо никогда не укори, ни повреди, ни оклевета, ни позавиде кому, ни разгневася на кого: паче же кийждому возда свое: нищего не презре, странного не остави, в темнице сущие посети, печальные утеши, пленные на свободу пусти, черноризцы почте, сироты и вдовицы прекорми. Тако во всяком благочестии и чистоте по православной вере пожив о Господе лета довольна, и старости достиг, никакоже блаженных дел остави, но елико состаревашеся возрастом, толико паче усердием растяше, и крепляшеся духом. Прочее недугом телесным объят быв, изнемогати нача, и видев конечное свое ко Господу отшествие, располагается естеству отдати долг, дух же желаемому Христу предати. Призывает убо старейшины града и домочадцы своя, и беседу полезну простирает к ним, поучив не преткновенно в православии пребывати, и друг ко другу любовь имети, и всякими делы благими украшатися, в прочем мир и единомыслие хранити заповеда им. Таже в самый час исхода, в оньже хотяше телесного союза отрешитися, Владычнего тела и крови причастися в напутие живота вечного, и тако предаде святую свою душу в руце Богови, в лето 6807 месяца Маия в 20 день. Честное же тело его положено бысть в соборной церкви пресвятые Троицы, от него же подается и до ныне благодать исцеления приходящим с верою. Исходит же от честных мощей сего блаженного князя Доманта вместо мира благовонна, теплота некая, яже видима бывает всеми чрез скважины гроба во образе инеа белого, зимою в храминах на оконницах являющегося, и сие на всякое лето бывает.

Сей благоверный и великий князь Всеволод причтен во святые, и житие его положено в прологе Февраля 11. Где сказано о нем, что он был сын великого князя Мстислава, сына Владимира Мономаха, правнук же великому князю Всеволоду, сыну Ярославлю, внуку равноапостольного великого князя Владимира, просветившего Российскую землю святым крещением. Приял великое княжение в лето 6625, когда князь великий Владимир Мономах посадил сына своего Мстислава в Белеграде переведши из великого Новагорода, а на его место в великом Новеграде посадил внука своего, сына Мстиславова, сего блаженного князя Всеволода. В похвалу добродетелей его там же сказано, что он приняв княжеский престол, нача богоугодно жити и праведно правити власть свою, яко же лепо бе православным князем. Был всеми благими делами исполнен: богобоязлив и правдив, тих и кроток: имел любовь нелицемерную равно ко всем. Когда Новгородцы под предводительством сего князя имея войну с Суждальцами и Ростовцами, были от них побеждены и прогнаны: то приписывая неблагополучный успех оружия в вину сему блаженному князю, возстали на него, и изгнали из града. Он же отъиде во град Киев к дяде своему, князю Ярополку, сыну Владимирову. Ярополк же даде святому князю Всеволоду сроднику своему, Вышеград: и в том граде пребывшу святому мало время, приидоша мужие града Пскова к святому в Вышеград, и молиша его, яко да идет к ним княжити: не бяше бо у них в то время князя во граде Пскове. Святой же пойде княжити во град Псков, и бывшу ему близь града, сретоша его людие, со священным чином, и с честными кресты, и тако прияша его, и бысть радость велика во граде Пскове ради прихода его. И абие начатъ княжити и праведно правити власть свою. Народи же Латинстии вси бояхуся имене святого, и не смеяху приходити на град Псков. Пребысть же святой во граде Пскове едино лето, тако Господу Богу человеколюбцу изволившу, и абие в болезнь телесную впаде, и пречистого тела Христова и крове причастився, и мир дав домочадцем своим и Гражданом, отъиде ко Господу, и приложися ко отцем своим, идеже вси святии почивают. Бысть же преставление святого в четверток сырные недели, в лето 6646 (1138) месяца Февруария в 11 день. И тако проводивше святого честно вси граждане, и игумены и священных множество, положиша в церкви святого великомученика Димитрия Селунского. Бранное же оружие его и щит поставлено бысть на гробе святого, в похвалу и утверждение граду Пскову, даже и до днесь.

По сем слышавше Новгородцы преставление святого благоверного князя Всеволода прислаша Полюда протопопа, и с ним благоговейных мужей по мощи святого. Протопоп же приступль, восхоте взяти честные мощи его, обаче не подвижеся рака с места своего, но токмо спусти ноготь с честные и святые своея руки, и дадеся Полюдови протопопу. Он же взем на благословение великому Новуграду и на исцеление недугов, отъиде во своя.

По прошествии же многих лет от его преставления, восхоте Бог прославити угодника своего чудесы. Вложи убо помысл благ в сердце князю града Пскова, и посадником, и всему священному собору, да принесут мощи святого князя Всеводола в соборную церковь святые и живоначальные Троицы. И егда внидоша в церковь святого великомученика Димитрия, и открыша гроб святого, видеша тело его светло, яко и первее. И возрадовашася радостию великою вси людие, и исполнися церковь от мощей святого многого благоухания. Многим бо летом минувшим по святом его представлении, не изменися святое его тело, ниже ризы его истлеша. Посем же весь священный собор, и вси Христолюбивии людие града Пскова взяша честно святые мощи со псалмопением и фимиамом, и понесоша на рамех своих, и положила в соборней церкви святые Троицы, на правой стране близ амвона: и ту не престаяше святый чудодействуя. Посем же многим летом минувшим, явися святой понамарю в нощи, и рече ему: заутра повеждь собору святые Троицы, и посадником, да изнесут из церкве святые иконы: хощет бо Бог показати чудо над мощьми моими в приидущую ночь, и абие невидим бысть святой: понамарь же сказа сие видение всем. Людие же в той день все из церкве изнесоша. И абие бысть в полунощную стражу чудо преславно: нечаянно бе паде лоб церковный, и отрази часть от главы святого. Христолюбивии же людие видевше преславное то чудо, прославпша Бога и пречистую Богородицу, и вземше часть ону от честные и святые главы святого, вложиша в раку сребряну позлащенну, яже и до ныне видима всеми человеки, и подает исцеления с верою приходящим, знаменующимся и пиющим священную воду с нея. Святого же мощи вземше, положиша в приделе Благовещения пресвятые Богородицы, в том же храме святые Троицы, входя в церковь на правой стране. В 1703 году месяца Апрелия в 8 день освятися придельный храм во имя его, а в той же день и мощи его святые положены в нем при митрополите Иосифе Псковском и Изборском. В 1834 году Апреля 22 дня в день Св. Пасхи, на вечерни, Св. мощи сего угодника Божия пренесены в самый храм живоначальные Троицы, где и ныне почивают в новоустроенной сребряной раке, подавая вся благая с верою притекающим к ним. Близ же гробницы его висит меч с надписью: honorem meum nemini dabo, (т. e. чести моей никому не дам).

Се аз князь великий Всеволод, нареченный во святом крещении Гавриил, Самодержец, сын Мстиславль, внук Владимира Мономаха, влавствующа всею Рускою землею, и властию Новгородскою. Благоволением Божиим поставил есми церковь святой Иоанн великий, на Петрятине дворище, и устроил есми иконами многоценными, и всеми книгами исполнь. И устроил есми попы, и диакона и диака, к соборней церкви. А даю святому великому Иоанну от своего имения великого, на строение церкви во веки: вес вощаной, а в Торжку даю пуд вощаный: половина святому Спасу, а половину святому великому Иоанну па Петрятино дворище. А оброк даю попом, и диакону, и диаку и сторожем: из весу вощаного имати попом по осьми гривен сребра: диакону, по четыре гривны сребра: диаку, три гривны сребра: сторожем, три гривны сребра. А имати им той оброк во веки, по моему даянию князя великого Всеволода. А попом пети у святого великого Иоанна вседневная, а у святого Захарии на полатех по неделям во веки: а диакону пети у святого Иоанна суббота да неделя, из того оброку во веки. Аз князь великий Всеволод поставил есмь святому Иоанну три старосте, от житьих людей, и от черных, тысяцкого: а от купцов два старосты, управливати им всякая дела торговая Иванская, и гостинная. А Мирославу посаднику в то не вступатися, ни иным посадником в Иванское ни вочто же, ни бояром Новгородским. А кто восхощет в купечество вложитися в Иванское, даст купцем пошлым людем вкладу осмь гривен сребра: а тысяцким сукно ипское, ино купцом положити во святой Иоанн, по тридцати гривен сребра. А не вложитися в купчество, и не даст осьми гривен сребра: ино то не пошлой купец. А пошлым купцом ити им пошлиною, и вкладом, и отчиною. А вес весити в притворе святого Иоанна, где дано, ту его и держати, а весити старостам Иванским, двема купцем пошлым, добрым людем. А не пошлым купцем старощенья им не держати, ни весу им не весити Иванского. А у гостя имати у Низовского, от дву берковеск вощаных полгривне сребра да гривенка перцу. А у Полоцкого, да у Смоленского, две гривны кун от берковска вощаного. А у Новоторженина полтары гривны кун, от берковска вощаного. А у Новгородца, шесть мордок от берковска вощаного. А куны класти в дому святого Иоанна великого, что весится по правому слову. А Новоторжцу в бологодеть, не весити ни у которого же гостя. А по моем животе великого князя Всеволода, стояти за дом святого Иоанна великого брату моему, князю великому вся Руси: и владыце Новгородцкому, и за вся церковники святого Иоанна. А взяти князю великому из весу из вощаного, по тридцати гривен сребра чрез год. А в праздник рождества святого великого Иоанна почесть творити, и праздновати старостам Иванским купцом: а пети в праздник обедня владыце: а на завтрее архимандриту святого Георгия: а на третий день игумену святей Богородицы из Антониева монастыря: а взяти владыце дару рубль: а князя великого наместником дару, по сукну ипскому: а дати им двадесять пуд меду на подсыту чистого, пошлины. А дворецкому сукно ипское, да десять пуд меду на подсласту чистого, пошлины по старине. А тиуну дару сукно тумаское: и дати ему пять пуд меду на подсыту чистого, по старине: Архимандриту сукно ипское: а игумену Антоновскому взяти дару полтина: а пошлины на него идет четыредесять колачей, четыредесять хлебов, да капуста, и уксус. А буевище Петрятино дворище, от прежних дверей святого Иоанна до погреба: а от погреба до конца Иванского мосту. А с того буевища имати куны старосте Иванскому, и Побережскому: а тые куны класти в дом святого Иоанна великого. А попов, и диакона, и диака, и сторожей святого Иоанна призирати старостам Иванским, и старостам Побережским, и Побережаном. А в дому святого Иоанна великого не держати никому ничего, разве свечь, и фимиама. А городу, и владыке, и бояром, весу у святого Иоанна великого не отъимати, ни продавати моего даяния князя великого Всеволода. А кто почнет вес отъимати, или продавати, или дом обидети святого великого Иоанна, и святого пророка Захария: ино на того Спас, и пречистая Богородица, и святой великий Иоанн, и святой пророк Захария. И буди им тма, и огнь, и соблазн, и казни от Бога. От них же да избавит ны Господь наш Иисус Христос: ему же слава со Отцем, и со святым Духом, ныне и присно и во веки веков, аминь.

Се аз князь великий Всеволод, нареченный во святом крещении Игафш (Гавриил), правнук Игорев, и блаженные прабабы Ольги, нареченные во святом крещении Елены: и бабы Володимировы, нареченного во святем крещении Василия, и тыя бо прияли святое крещение от Греческих царей, и от Фотия патриарха Цареградского, взяша первого митрополита Михаила Киеву, иже крести всю Рускую землю.

По томъ же летом многим минувшим, моляся Спасу, и пречистей его Матери, святей Богородице, приснодевей Марии, устроиша церковь святые Богородицы десятинную, и даша ей десятину во всей Руской земли, и со всех княжений, в соборную церковь святые Богородицы яже в Киеве: и святей Софии Киевской, и святей Софии Новгородской. И митрополитом Киевским, и архиепископом Новгородским: от всякого княжя суда десятую векшу, а из торгу десятую неделю, а из домов на всякое лето, и от всякого стада и от всякого жита десятое святому Спасу, и пречистей его Матере, и премудрости Божией святей Софии. А се изобретохом в Греческом Номоканоне: что сих судов, и тяж не судити князю, ни его детем, ни его наместником, ни его боляром, ни его тиуном, ни десятника не держати. И созвал есми десять соцких, и старосту Болеслава, и Бирича Мирошку: и старосту Иванского Васяту, и погадал есмь со владыкою, и с своею княгинею, и с своими боляры, и со десятью соцкими, и с старостами, дал есми суд, и мерила иже на торгу: святей Богородицы в Киеве митрополиту: а в Новегороде святей Софии, и епископу, и старосте Иванскому, и всему Новуграду: мерила торговая, скалвы вощаныя, пуды медовыя, и гривенку рублевую, и локоть Иванский, и свой оброк купец, черницам. А попу Иванскому, Руская пись, с Борисоглебским на пол. А сторожу Иванскому, Руской порочицы пятно, да десять конюхов соли. А не вступатися в тыи оброки моим детем, ни моим наместником, ни моим боляром, на дом святей Софии, и святого Иоанна. А дом святей Софии владыкам строити с соцкими. А старостам, и торговцам, докладывая владыки, или кто будет нашего роду князей в Новеграде, строить дом святого Иоанна. А се приказываю своим наместником, и тиуном, суда церковного не обидети, ни судити без владычня наместника. А се дах во олтарь святей Софии, и причету церковному вседенник сенаник, венце что суды церковные то святей Софии. А кто нашего роду пограбит, или отъимет, того повелехом владыце собором в сенанице проклинати. А се суды церковные: роспуски, смилное, заставания, умычка, пошибальное промеж мужем и женою о животе: и о бездетном животе: в племени или в сватовстве ноймутся: потворы, чародеяние, волхование, бедство, зелейничество, зубоежа: упрекание трибляднею, зелии, еретичество: отца или мать бьет сын или дщи, или сноха свекровь: братия или дети тяжутся о заднице: церковная татьба, мертвецы совлачают: крест посекут, или на стенах режут: или два мужа имутся бити, и единого жена имет за лоно другого и роздавит: или кого застанут с четвероногою, или кто молится под овином, или прощении, или уводы, или девка девку повержет, или ино что неподобно церкви подеют.

Тыи суды все церкви даны суть, и епископу: а князю, и боляром, и судиям, в тыя суды не вступатися. А то дал есми по первых царей уряжению, и вселенских святых отец седьми собор великих святитель. А по сем не вступатися детем моим, ни внучатом моим, ни всему роду моему до века, в люди церковные ни во вси суды их. А иже кто преобидит наш устав: таковым не прощенным быти от закона Божия, и горе себе наследуют, и вечная мука ждет их. А о всех что преди писано, держах за своими боляры, аже они обидят гостей: а где живут, тым наровят, а княжу душу топят. И аз всмотрех в Фотия патриарха цареградского грамоты, что принесл на Русь князь великий Владимир, нареченный во святем крещении Василий, сын Светославль, а внук Игорев, и преблаженные княгини и прабабы Ольги. Аже стоит в грамоте: торговые вся весы, мерила, и скалвы вощаные, и пуд медовый, и гривенка рублевая, и всякая известь иже на торгу промеж людьми, от Бога тако искони установлено есть: епископу блюсти без пакости, ни умаливати, ни умноживати: а на всякий год извешивати: а скривится, а кому приказано, и того казнити близко смерти: а живот его на трое: треть живота святей Софии, а другая треть святому Иоанну, а третья треть соцким и Новуграду. А епископу не управив того, за все то дати ему слово в день великого суда. А печаловатися ему о том управлении, яко же и о душах человеческих. Аще же управит епископ сия управления наша, блажен будет, и небесному царствию наследник. А не урядит, и мы то с своей души сводим. А се церковные люди: игумен, игумения, поп, диакон, и дети их: а кто в крилосе; попадья, чернец, черница, псаломник, свещегас, сторожник, слепец, хромец, вдовица, пущеник, задушный человек: а се изгони трои попов сын грамоте не умеет, холоп из холопства выкупится, купец одолжает. А се четвертое изгойства и себе приложим: аще князь осиротеет, монастыреве, больницы, гостинницы и странноприимницы то люди церковный богадельный, или митрополит, или епископ, те ведают между ими суд, или обиду, или кому прикажут, или которого задница, или будет иному человеку с теми людьми речь, или опчий суд, своим тиунам приказываю суда церковного не обидети. А с суда давати: девять частей князю, а десятую святей Софии за княжу душу. А кто приобидит суды церковные, платити ему собою: а пред Богом тому же отвещати на страшнем суде, пред тьмами ангел, идеже когождо дела не скрыются, благая же и злая, идеже не поможет никтоже никомуже: но токмо правда избавит от вторые смерти, и от вечные муки, и от огня негасимого, яко же есми управили по святых отец правилом, и по первых царей и князей уряжению. А кто имет преступити сия правила или дети мои, или внучета, или правнучата: или в коем городе наместник, или тиун, или судия, или кто ин пообидит суды церковный, да будут прокляти в сей век и в будущий, седьмию соборы святых отец вселенских. А та вся дела приказах святей Софии, и всему Новуграду моим мужем десяти соцким: вы соблюдите, а не возблюдете, и вы сами за то ответ дадите в день страшного суда, пред лицем Царя славы, аминь. А се изыскахом у третьей жены, и у четвертой детем прелюбодейная часть в животе: аще будет полн животом, ино даст детем третьей жены, и четвертой по уроку, занеже те и от закона отлучени: а человек ся получает по грехом, занеже прелюбодейнии, а не благословеннии Богом. И аз сам видех тяжу промежу первою женою, и детей с третьего женою и с детьми, и с четвертою женою и с детьми. Из велика живота дати урочная часть без оскуду: а из мала живота: робичичу часть, конь да доспех, и покрут по разсмотрению живота. А тое все приказах епископу управливати, смотря в номоканон. А мы с своей души сводим.

Сего святого и блаженного Николая, Псковского чудотворца, жития в древних Летописцах отъискать мы не могли, а точию на гробнице, обретающейся в Троицком Кафедральном соборе надписано: преставися святой праведный Николай Псковский чудотворец в лето 7084 (1576), Февраля 28 числа. Во Пскове есть изустное предание: будто Николай блаженный, когда царь Иоанн Васильевич ехал во Псков для наказания Псковитян, дал совет гражданам Псковским, чтоб все они вышед за город, встретили государя, и чтоб по обоим сторонам дороги поставили столы с кушаньем. Они быв известны о строгости, какая оказана в Новегороде, послушали сего совета, и вышли все от мала до велика на сретение, повергаясь пред государем ниц. Государь тронутый сим зрелищем, вышед из своей повозки, пошел пешком, но на лице его примечен был великий гнев. Николай блаженный, коего почитали юродивым, сев в то время по обычаю детей на палочку, подъехал к государю, говоря безпрестанно: Иванушко! Иванушко! покушай хлеба и соли, а не Христианские крови. Государь вслушаясь в сии слова, приказал его поймать, но в самое то время стал сей блаженный невидим. Государь сим пораженный, оставил весь свой гнев, на Псковитян, и мало побыв возвратился в Москву. Сие изустное предание подтверждается тем, что на гробнице сего блаженного Николая в Троицком Кафедральном соборе старинным полууставным письмом в тропаре и кондаке изъяснено следующее: в тропаре: Славенска языка, Псковские земли, плотски в родстве быв юродства претворением горнего Иерусалима гражданин явися, Ангелом свеселишися, мироточивого святителя Николы звание восприим, с ним же всегда Христа Бога моли даровати нам велию милость. В кондаке: Чудотворец явися Николае, царску державу, и смысла свирепство на милость обратив: и ныне молим тя святе, пребуди в нас еще, защити от коварств вражиих: ты бо еси граду Пскову, и всем Христолюбивым людям похвала и утверждение.

сказание о житии и чудесех преподобного отца нашего Саввы пустынножителя, Псковского чудотворца, составившего обитель пречестную во имя святого славного и всехвального апостола и евангелиста Иоанна Богослова, глаголемую Крыпецкую. Написася в царство благочестивого и Христолюбивого царя и Великого Князя Иоанна Ввсильевича, всея России Самодержца, при благоверном Сыне Его Царевиче Князе Иоанне Иоанновиче, и при брате его царского Величества Благоверном Князе Георгии Васильевиче, тщанием и трудами некоего благоговейного пресвитера Василия. – О пришествии блаженного отца Саввы во град Псков

Сей преподобный отец наш Савва родися и воспитася в чуждих странах, но от киих родителей произыде, и где пострижен бысть, не обретохом нигде же прехождения ради многих лет. Нецыи глаголют, яко от Сербские земли, инии же, яко от святые горы Афонские прииде в богохранимый град Псков, яко же Аврам от Месопотамии под дуб Мамврийский пришед, и вселився ту, сподобися видети святую и нераздельную Троицу, Отца и Сына и святого Духа, в лице триех Ангелов, и угостити ю. Прииде же первее в пречестную обитель рождества пресвятые Богородицы, яже зовется Снятая Гора, разстояние имущи от града Пскова яко три стадии, и тамо честно прият бысть игуменом и братиею. Идеже пребыв некое время, отъиде в Лавру к великому Евфросину на Толву реку во учительство духовное. Преподобный же отец Евфросин великий, провидя о нем духом, яко хощет быти сосуд святого Духа, (еже послежде и бысть), прият его с духовною радостию яко от Господа посланного во учение к себе, и предаде ему службу монастырскую. Старец же Савва добре прохождаше вся службы монастырские по благословению отца своего великого Евфросина, и правила своего николи же остави, слушая заповеди отца своего духовного святого Евфросина. Иже видев его жестокое житие проходяща, в молитвах всегда непреклонна, и мало сна приемлюща, и день от дне яко по степени на добродетельное житие восходяща, радовашеся духом, и благодарите Бога. От того времени во блаженном Савве возгореся вящшая благодать Святого Духа, и любовь яже к Богу, и желание сердечное, еже ему единому работати Господу Богу, сего ради припадает к ногам учителя своего, святого отца Евфросииа, и глаголет: благослови старче Божий, и моли о мне человеколюбца и всех святых, яко да непоколебим пребуду от всех сетей диавольских молитвами твоими: яко прииде мне некий помысл: издавна бо хощу един работати Господу Богу во отходней пустыни. Великий же отец и чудотворец Евфросин, видя ученика своего блаженного Савву, в добродетелех сияюща, и во многом воздержании ангельское житие препровождающа, благословение преподаде ему, и отпусти с миром идти во внутреннюю пустыню, и тамо Господеви работати, и прорек ему, глаголя: иди чадо Савво, избранниче Христов, с миром. Бог да будет с тобою, и пречистая Богородица от всех сетей диавольских да сохранит тя: Христос бо тя избра от мира сего во иноческое пребывание. Поревнуй убо житию святых великих отец, и последуй стопам владыки Христа, взем крест его на рамо свое, да ученик его наречешися, и имей молитву во устех всегдашнюю, бдению и посту, и нищете самохотней, и прочим таковым поучался, яко же учитель наш Христос. Блаженный же Савва, яко доброплодная земля, со слезами и воздыханием приимаше в сердце свое семена сторичествующа от учителя своего преподобного отца Евфросина, и желаше вся сия исправити, и многие души ко Христу привести во спасение, еже и бысть.

Отшед убо блаженный Савва от Лавры учителя своего святого Ефросина яко стадий 15, или множае, обрете место, человеки непроходимо, но точию зверьми многими обитаемо, имущее холм не велик, прилежащ к востоку летнему, и езеро не великое, имущее в себе рыбы различные. Ту пришед блаженный наш отец Савва, и сотворив молитву, созда на холме том хижину малу, и ту нача жити, и трудолюбию подвизатися в посте и молитве, и воздержании велице. Пища бо святого отца бяше хлеб и вода, но и ту ядяше мало нощию телесного ради изнеможения: в среду же и пяток в посте и молитве пребывание, удручая тело свое воздержанием. Между же тем и землю воздолеваше, яко да от своих трудов, а не от чужих питается. Видевше же беси великое воздержание святого, бояхуся его, да не како по мале изженет их от места того. Тем же во многие и различные виды преображахуся, овогда убо в змия, овогда же в зверя, и различные гады, хотяще святого устрашити, и от места того отгнати. Но крепкая сила Божия помогаше святому, иже разумев их коварство, знамением крестным ограждашеся, и тако без вести тех творяше. Таже на месте оном созда церковь малу во имя святого славного и всехвального, апостола и евангелиста Иоанна Богослова. Такового убо ради жития его прохождаше велия слава о нем во всем граде Пскове, и во окрестных градех и весех, овем трудолюбное житие святого отца похваляющим, иным же высокое смирение поведающим: овем сладкое учение сказующим, иным же нестяжательный нрав его исповедающим, и просто рещи, всем того хвалящим. И тако блаженного отца Саввы пустынножителя имя у всех на языце яко велико обношашеся. Начата убо собиратися отвсюду ко святому иноцы, хотяще сожительствовати ему.

Святой же приимаше их с любовию, яко изрядный ученик своего учителя Христа: таже и князи, и посадники, и боляре, и вси христолюбивии людие богохранимого и славного града Пскова приходити начата к нему пользы ради, ведяще его по Бозе житие и великое смирение и воздержание нелицемерное: святой же всех пользование и учаше без лености, всякие неправды отгребатися, от зависти же и клеветы и от лжи сохраняти себе, и от блуда воздержатися, но в чистоте пребывати, яко же рече писание: Всяк грех кроме тела есть, а блудяй в свое тело согрешает. И вси блудницы, и любодеи, и прелюбы творящий, и многим женидьбам прилепляющийся не узрят Господа, аще не покаются, и осуждена будут мучитися с бесы во тме кромешней, и во огни неугасимом, идеже есть червь не усыпающий, и скрежет зубный, и прочее зло. И инде речеся: Любодеем и прелюбодеем судит Бог. Кротость же и любовь и братолюбие нелицемерное между собою имети, якоже рече апостол: Любы милосердствует, любы не завидит, любы не превозносится, не гордится, не безчинствует, не ищет своих си, не раздражается, не мыслит зла, не радуется о неправде, радуется же о истине: вся любит, всему веру емлет, вся уповает, вся терпит: любы николиже отпадает. К сим же учаше и милостыню творити, яко же речеся в Божественном писании: Милостивых домы не оскудеют, но исполнятся всех благих. Вельможи же и судии учаше, еже праведно судити, и на восхищение не желати, и низшую часть братии своей не обидети, но разумети, яко и они судию имут на небесех: Им же бо судом судите, рече Господь, и вам судит Бог. И паки: В нюже меру мерите, возмерится вам. Сим и иным множайшим поучая блаженный людей, устроеваше спасение душам их. Тем же мнози от них мирская презревше, притецаху ко святому. Он же с любовию тех приимаше, и повелеваше им постризатися во ангельский образ. И отселе начата блаженному милостыню творити боляре, и посадники, и вси христолюбивы людие града Пскова, и села вдавати на сооружение обители. По сем постави святой игумена во обители своей, именем Кассиана, и братию учини по службам: и тако общее житие состави, повелев всем иноком, собравшимся к нему, ничтоже звати свое, но все общее, кто что дал Бога ради от имения своего в дом святого Иоанна Богослова. В келлии же святого отца Саввы ничтоже обреташеся, но токмо образ Владыки Христа, и пречистые Богородицы, и рогозина, на нюже мало себе пометите покоя ради, и мантия едина. Такожде и братию свою учаше, ничтоже имети в келлиях, но токмо святые иконы, и рогозины, и мантии, в них же хождаху отцы. Глаголаше бо, поучая их, яко же и божественный Апостол, труба богословия, во всю вселенную яко гром возгремевый богословным языком своим Иоанн Богослов: Братие, не любите мира сего, ни яже суть в мире. Аще кто любит мир сей, несть любви отчи в нем, яко все, еже есть, в мире сем, похоть плотская, и похоть очес, и гордость житейская, яже не суть отча, но от мира, и мир сей преходит, и похоть его: а творяй волю Божию, пребывает во веки. Учитель же наш Христос сам рече к нелюбящим мира, и добре заповеди его соблюдающим: Приидите ко мне вси труждающиися и обремененнии, и аз покою вы: возьмите иго мое на себе, и научитеся от мене, яко кроток есмь и смирен сердцем, и обрящете покой душам вашим: иго бо мое благо, и бремя мое легко есть. И паки вселенные учитель, уста Господня Павел, такожде возбраняя от мирские любви, глаголет: Аще убо воскреснут мертвии со Христом, (то) вышних ищите, идеже есть Христос, одесную Отца седяй. Вышняя мудрствуйте: умросте бо со Христом, и живот ваш сокровен есть во Христе. Еще же и сие рече преподобный Савва к братии своей, глаголя, яко же великий Исидор Пилусиотский: мы же, братие, что взываем первые черноризцы отцы, а не хощем, яко сынове их, отеческими нравы ходити, и обычаи их краситися, не суть бо отцы наши, их же нравы не творим. О братие! поревнуем отец наших житию, како вскоре любовию Божиею вперившеся, крилы умными возлетеша от видимых сил, и выше меры сущая проникше, вкусиша сладости, сущие тамо. Бездомовни, безъименни, ни в мире сем пожиша, но в пустынях и в вертепах и в разселинах земных: и жилища не имуще, Господа ради плоть свою покориша духови, и показашася добрым и чистым житием своим пред Ангелы и человеки, яко сынове света, и всяк зря их, прославляше Бога. И паки рече преподобный Савва к братии своей поучая их, и глаголя: Возлюбим, чада, благого Господа, и той един да будет часть наша на земли: не усты точию ко устом, и одеждою любовь к нему да имеем, но делами уверимся, и нравы своими, и милостынею ко убогим, и любовию и слезами, и постом и молитвами, и всяким воздержанием телесным, яко же отцы наши пожита, иже вся красная мира сего во уметы вменивше, и вся сущая во свете сем оставльше, в милотех ходиша и в козиих кожах, скорбяще не о сущих в мире, но о страшном и грозном суде Христове, и многа озлобления претерпеша от бесов и неразумных человек Господа ради: обнищания телом, да духом разбогатеют: отвергошася имения и славы мира сего, да небесная сокровища приимут: безчестни зде на земли Быша, да со Ангелы на небеси прославятся: изыдоша от палат, и кущи на холмех поткнуша, да в небесных чертогах возлягут, и просто рещи: всяко и всеми образы тело свое оскорбиша, да душа в пространстве явится. Таковое житие святых Ангелом чудимо пребывает, зане естество плотское превосходит. Кто бо тех болезни уврачует; кто в жаждущая уста воду принесет; кто тем издыхающим очи смежит; кто омыет телеса их святые; кто погребению предаст, или надгробные песни над ними воспоет; кто возопиет со слезами, глаголя: покой господи души их; Несть никтоже. Но Господь един тем бысть утеха, и отрада, и прибежище, и слуга, и сохранитель. Приближишася бо к нему невозвратно, и той приближися к ним: возлюбиша его, и дадеся им: взыскания его, и вселися в них, и прият их яко достойны себе. Таково бяше учение преподобного отца нашего Саввы ко учеником его.

Сим тако бывающим, мнози прихождаху, ко святому отвсюду пользы ради. Всем бо вся бываше, по Апостолу, всех наказуя, и всех яко своя уды милуя: старых яко свою братию, юнейших яко чада, и не бе ту оскорбляема или оскорбляющего, вси бо утешаеми бываху преподобным отцем Саввою.

Пребыв же отец наш Савва в том жестоком житии лета довольна, достиже старости маститы, и в болезнь телесную впаде, и хотяше уже плотского соуза разрешится, и естеству отдати долг. Призывает убо к себе всю братию, и поучив их о пользе душевней, и духовными словесы довольно тех наставив, да в православии пребывают, и обещания иноческая храпят, наипаче же смирением да украшаются, наконец рече им, еже видесте мене творивша сия и вы творите такожде. Многа же и ина изрече, яже к тех пользе и спасению: по сих же монастырь свой приказав игумену Кассиану, и старцу Евфимию, и диакону Герасиму, и иным из братии, иже многи труды показаша со святым на месте том, нача телом изнемогати, душею крепкий, и честных тайн Христовых причастився, душу свою мирно Господеви предаде, в лето седмь тысящ третие, месяца Августа в первый день. Празднуется же память святого отца нашего Саввы пустынножителя того же месяца в 28 день, на память преподобного отца нашего Моисея Мурина.

Ученицы же его, видевше отца своего отшедша, великою скорбию о разлучении наставника своего объяти Быша. Прочее псалмопением надгробным яко отца и промыслителя своего почетше, многострадальное и трудолюбное тело его земле предаша, и положиша в созданном от него монастыре по правую страну церкви Иоанна Богослова, идеже и ныне от честного ковчега его и от святые его персти многая чудодействия бывают с верою приемлющим и пиющим человеком, и мажущимся священною водою в славу Божию.

Минувшим убо шестидесяти летом по преставлении святого отца Саввы, егда восхоте Господь Бог вящше прославити угодника своего, и обитель распространити возлюбленного ученика, возлегшего на персех его, Апостола и Евангелиста Иоанна Богослова, да не будет светильник под спудом сокровен, но да светит всем: тогда по чудному смотрению Божию прииде во ум настоятелю обители преподобного игумену Феоктисту, церковь каменную воздвигнути во имя святого Апостола и Евангелиста Иоанна Богослова, и близ тоя церкви устроити гробницу святому отцу Савве каменную же, над гробницею же создати другую церковь во имя святителя Христова Саввы, Архиепископа Сербского нового чудотворца: понеже и под ветхою церковию святого Апостола и Евангелиста Иоанна Богослова той храм святого Саввы был же. Сие намерение свое настоятель Феоктист объяви братии своей, старцам Мисаилу, Ионе, Даниилу, Варлааму и прочим. Братия же с великим усердием соизволиша быти сему: и тако вскоре делу касаются. Церковь убо древяную Иоанна Богослова, и Саввы Сербского, и гробницу ветхую, яже бе первее над мощьми святого отца Саввы, разобраша, и абие на том месте начата рвы копати на поставление каменные церкви, и множество костей мертвых обретоша: во гробнице же святого отца Саввы мощей не обретоша, и Быша в велицей скорби и печали. Сие же бысть в лето 1547, месяца Априллия в 23 день, на память святого великомученика Георгия, в оньже день священнику некоему, именем Исайи, бывшу постриженнику обители святого Саввы, служащу Божественную литургию, и после оные изшедшу из трапезы в келлию свою, и возлегшу мало почити, бысть явление сицевое: видех, рече, трех братов тоя же обители, Патермуфия, Даниила и Власия, ходящих по монастырю, и держащих в руках своих рыльца, ими же выкопываху гробы мертвых, ищуще мощей святого Саввы, начальника обители тоя, и не обретаху. Таже мало ископавше от того места, идеже бяше гробница святого, обретоша между церковью и гробницею гроб дубовый, его же абие окопавше, вскрыша: но не познаша мощей святого, рекуще к себе, яко не то суть мощи преподобного. Покрывше убо гроб той, мало отъидоша, и абие невидимою силою сам открыся гроб, и глас бысть от гроба, глаголяй: братие, кого ищете; И в том часе нападе на них страх и ужас велий зело, и едва возмогоша отвещати, и реша: ищем мощей святого отца Саввы, строителя обители сея. И абие востав из гроба, седе на нем, и показуя рукою своею на перси себе, рече им: аз есмь многогрешный старец Савва начальник обители сея, иже многи напасти подъях от бесов, и злых человек на сем месте Господа ради, ныне же прииде время, Господу тако изволившу, еже мощем моим явленным быти пред всеми человеки. Образом же бе святой велик, брада же его седа аки снег, кругла и широка, густа и не зело долга. Таже прииде ко святому обители тоя игумен Феоктист, с братиею, благословение прияти от святого: святой же Савва благослови нас, и даде игумену и братии три ягоды, глаголя: возьмите сие от руку моею, труды плодов моих духовных на посещение месту сему. Сия три ягоды аз приях от руки Вседержителя Бога, во имя святые и единосущные Троицы, яко Бог послуша молитвы моея, и даде ми сия. Отселе разумно буди вам, братие, яко не оскудеет обитель ни в чем же отныне и до века, но исполнена будетъ духовными и телесными потребами. Аз бо не престая молю Господа Бога, и пречистую Богородицу со Иоанном Богословом о святей обители сей, и о вас, еже спастися вам и в разум истины приити, и ина многа изрек преподобный к братии, благослови нас всех, и тако паки вниде во гроб свой, и почи. Аз же возбнув от сна, идох ко игумену моему, и поведах ему по ряду все сие объявление преподобного старца Саввы, такожде и братии. Они же прославиша Бога, и пречистую Богородицу, и преподобного старца Савву, начальника святые обители. Таже с великою верою шедше на место оно, идеже явися святой предреченному священнику Исайи, и помолившеся Богу и пречистей Богоматери, и святому Апостолу Иоанну Богослову, и на месте том мало покопавше, обретоша гроб дубов велик, на нем же верхняя дска и нижняя не обретеся, а сторонние доски, и главная и исподняя, яже бе под мощами святого, те все целы, но мало поистлели от множества лет. Окопавше убо песок, иже бе окрест гроба святого, и на верху под мощьми его, лежащ в вышину яко на пядень, обретоша во гробе святолепную главу, и честные многочудесные мощи преподобного отца Саввы, от них же исхождаше благовоние некое велие и чудное. И тако благодаряще Бога, и прославляюще милость Божию, и святого чудотворца Савву, преложиша чудотворные мощи, и честную персть с великою радостию в новую раку: ветхие же гробные дски ряздаваху приходящим с верою комуждо по части на благословение домов и на исцеление вредов душевных и телесных.

Сей благоверный князь Псковский Ярослав Васильевич, нареченный Севастиан, еще при жизни преподобного отца Саввы имяше велию веру ко святому Иоанну Богослову, и к преподобному отцу Савве пустынножителю, и многую даяше милостыню на сооружение монастыря святого, и братию любляше, и по вся недели приезжаше из града в монастырь святого молитися ко всенощному бдению. Святой же честно принимание его и учаше от Божественных писаний о пользе душевной, и о милости к человеком, и о праведном суде еже судити праведно, а не по мзде, и о спасении душевном. Князь же Ярослав в сладость приимаше учение святого, яко от источника сладкого. Единою же Савва посла некоего от ученик своих во сретение князя, яко же древле Елиссей отрока своего к Соманитяныне, глаголя: старец грешный Савва глаголет ти княже, да не внидеши со княгинею во обитель. Зде бо у нас, господине, обычай есть по преданию святых отец: жены да не входят во обители иноческие. Аще убо заповедь преступити отеческую, будеши преступник закону, а княгиня твоя не приимет от Бога болезни своей исцеления, ни благословения сподобится прияти.

Князь же слышав от ученика блаженного Саввы, паде ко святому старцу на нозе, глаголя: отче святой, прости мне грешному согрешение сие, яко не ведех заповеди сея святые, и хотех дерзнути на таковой грех. Посем святой благослови князя, и прости грех той, и поучив его, изыде с братиею за монастырские врата, и тамо благословения сподобиша княгиню: таже молебен певше, животворящим Крестом оградиша, и священною водою окропиша. И абие княгиня она с великим смирением паде на нозе святого старца, прощения прося, и исцеления от болезни своея, да помолится о ней к Богу. И тако святой помолися, и поучив ю прирече: во имя Отца и Сына и святого Духа, и молитвами святого славного Апостола и Евангелиста Иоанна Богослова, буди здрава от болезни твоея, и к тому не согрешай, да не горше ти что будет, яко же древле разслабленному по Христе бысть. И от того времени княгиня она молитвами святого Саввы исцеление прият от болезни своея. И посем князь Ярослав с княгинею исцелевшею отъиде во своя, славя Бога и святого Апостола Иоанна Богослова, и похваляя святого старца Савву, яко его молитвами сотвори Бог таковое чудодействие. В возблагодарение же за оное повеле князь устроити мост по дорозе чрез великое блато даже до обители святого, иже и до днесь зовется мостом князя Ярослава. Посем той же князь Ярослав, и посадник Иаков Афанасьев, и прочии посадники Псковские, боляре, и вси Христолюбные людие, по благословению собора святые Троицы, и всех шести соборов Псковских, и всего великого священства, дали на вечи в обитель святого Апостола Иоанна Богослова, преподобному отцу Савве грамоту крепостную, юже по правилам святых отец и святых Апостол изложив, утвердиша монастырю, в лето 6795.

Некогда приидоша разбойницы нощию ко обители преподобного, еже разграбити монастырь святого Саввы: и прииде от них старейшина разбойников, именем Евсевий, дружина же его сташа подалее от обители святого отца. И ту абие узре предреченный Евсевий множество людей незнаемых, ходящих по монастырю с фонарями. Он же устрашився вельми о необычном видении, и тек поведа дружине своей бывшее. Разбойницы же слышавше сия, и страхом одержима, абие отбегоша от обители преподобного. Бегуще же слышаху за собою аки бы множество человек во след их текущих, и некоего старца посреде оных святолепна, сединами украшена, с жезлом ходяща, грозяща и глаголюща к разбойником онем: почто монастырь мой хощете разбити, и братию мою погубити; отъидите отсюду, и шедше покайтеся, к тому таковая не творити. Аще ли не отъидите, то мольбу сотворю на вас к небесному Царю Христу, и вы зле погибнете. И тако отбегоша разбойницы. Обаче же некая сила Божия устрашайте их молитвами святого отца Саввы: на утрие бо приидоша во обитель святого, и вопросиша единого от живущих там человека, именем Авдия, глаголюще: кто у вас в сию нощь бысть в монастыре, и почто людей множество в полунощи хождаху с фонари и со оружием по монастырю; Авдий же глаголаше к разбойником: ни, братие, никтоже бысть у нас в сию нощь в монастыре. Сие слышавше разбойницы отъидоша: и поведаша игумену и всей братии вся по ряду с покаянием и слезами глаголюще: мы в сию нощь приидохом к вам, и хотехом разбити обитель вашу, и вас погубити: но абие в той час ужас объят ны велик зело, и страх нападе на нас необычен о видении многих человек незнаемых, и сего ради вскоре отбегохом от обители вашея. Сия слышав игумен и братия, прославиша Бога и пречистую Богородицу, и их угодника, блаженного отца Савву, о таковом необычном чудодействии. Разбойницы же онии по времени покаявшеся, спасошася: а старейшина их Евсевий в том монастыре преподобного отца Саввы пострижеся, и в добром жительстве преставися.

Сему Ионе случися зубная болезнь, тяжка вельми, от нея же затекли ему очи, и образ его подобия запухл бе, и продолжися болезнь та на седмь дней, в них же он ни яде, ни пи, ни сна приимаше, но кричание во весь монастырь, елико можаше. Таже от нестерпимые болезни притече на гроб преподобного отца Саввы, и пад со слезами на чудотворном гробе, взя персть от него, и всыпа себе на болящие зубы. Тем же умолкшим вскоре, усну мало, и абие воспрянув от сна, бысть здрав от лютые тоя болезни, яко николиже пострада, даже до конца молитвами преподобного отца и чудотворца Саввы. Сие же чудо бысть до обретения святых мощей его.

Некто сын боярский, именем Василий Инкин, живяше от обители преподобного Саввы яко четыре поприща в веси зовомой Черемиса. Сему Василию, по действу сатанину, от пиянственного недуга случися погубити ум на некое время, и начат нелепая делати и глаголати. Некогда же спящу ему в нощи на одре своем приидоша к нему множество безчисленное бесов, различными образы устрашающе его, и глаголюще: наш еси Василие, и како можеши от рук наших убежати; Василий же устрашися вельми от видения того, и абие воскрича, елико можаше, таже скоро побеже из дому своего в лес, и слыша глас яко трубный, глаголющий: Василие, бежи во обитель святого Апостола и Евангелиста Иоанна Богослова, и приложися ко гробу святого Саввы, начальника обители, и тако исцеление приимеши от тяжкого недуга твоего. Сродницы же и слуги беснующегося во след по нем женуще, не можаху достигнути его ради зельного бежания: не он бо сие творяше, но от нечистых духов гоним бяше. И се внезапу гром бысть, яко и земли колебатися от великого оного треску. Василий же предреченный и свои ему за ним женущии падоша на землю от страшного оного треску, и Быша аки мертви на долг час. И абие паки бысть глас к нему невидимо глаголяй. Василие, не бойся, но востани скоро, и иди во обитель мою, и тамо исцеление приимеши. Он же возстав, прибеже тоя же нощи ко обители святого, и нача лютейше первого бесноватися, и во врата монастырские бити. Страж убо стоящий у врат, слышав нощию вопль людский, и человека стояща и биюща во врата, и шед ко игумену, поведа ему. Игумен же и братия мняше, яко разбойницы приидоша нощию ко обители, устрашишася от такового необычного прихода, и вземше оружие, приидоша ко вратам монастырским. Видевше же предреченного Василия у врат беснующася, взяша его, и с великою нуждою введоша в церковь святого Апостола и Евангелиста Иоанна Богослова, и начаша молебен пети о болящем. Он же бесновашеся люте, и внезапу отторгся от держащих человек, притече к местному образу святого Иоанна Богослова, и отторгнув привес от иконы, поверже его на землю. По сем молебному пению совершившуся, а оному беснующуся безпрестани, повеле игумен предстоящим людем привязати его к колокольне: они же привязаша его. Той же паки нача лютее первого бесноватися, зле возмущаем от демонов. По сем бывшу ему яко часа два или более привязану, нача смирятися, таже призвав к себе игумена и братию, повеле вести себя ко гробнице преподобного Саввы. Они же ведоша его, и приложиша ко гробу святого, и даша ему персти освященные водою, и абие в том часе исцеление получи от обдержавшего его недуга. Игумен же и братия, и он болящий, и вси ту бывшии людие прославиша Бога и пречистую Богородицу, и святого Апостола Иоанна Богослова, и преподобного отца нашего Савву чудотворца.

Некоему человеку именем Никите Стефанову, зовому Крыдину, случися люте от беса мучиму быти, иже ума наступив, неподобная глаголаше, Богу наказующу нас, да быхом престали от грехов, и любовь имели между собою, и братолюбие нелицемерное, яко же рече в соборном послании Иоанн Богослов, глаголя: аще Бога люблю, а брата своего ненавижу, ложь есть. Много убо человеку тому от беса страждущу, сродницы его и соседи окрест его живущий зело скорбяху о нем. Таже железными узами связавше его, под стражу отведоша, идеже обычаи есть бесных во узах содержати: но и тамо не бысть ему отрады от лютого беса: многажды бо одежду раздирание на себе, и людей пометаше на землю. Посем сродницы и знаемии отведоша его в монастырь святого Апостола Иоанна Богослова, идеже Савва чудотворец лежит, и тамо игумен и братия молебная совершивше о болящем, и святою водою покропивше, к чудотворному образу приложиша его, таже даша ему от воды тоя святые с перстию чудотворца смешанные испити. Он же испив, начат мало по малу в чувство приходити, и пребысть во обители святого чрез четыре недели, моляся Господу Богу и святому чудотворцу Савве со усердием многим и со слезами. Таже исцеление до конца получив молитвами святого Саввы, отъиде в дом свой здрав, славя Бога, и пречистую Матерь Божию, и их угодника, дивного в чудесех святого Савву.

Не подобает молчанием прейти и сие чудо, еже бысть в наша времена молитвами и содействием святого Саввы. Некто от нарочитых купцев града Пскова, именем Клементий Иванов, сын Титов, его же отец Иоанн Титов переведен бе от царствующего града Москвы повелением великого князя Василия Иоанновича всея России Самодержца, имяше велию веру ко святому Апостолу Иоанну Богослову и к преподобному чудотворцу Савве, и много милостыни даяше на сооружение обители и на украшение церкви Апостола Христова Иоанна Богослова. Егда же попущением Божиим бысть смертоносное поветрие на град Псков и на великий Новгород, и окрестные их грады и веси, тогда мнози человецы язвою тою смертною вскоре умираху, тако Господу изволившу и наказующу нас, да быхом престали согрешати, и ко спасению обратилися. И сему убо Клементию случися в тоже время болети поветрием, и бысть язва на гортани его, яко не мощи ему ни мало глаголати: затекла бо бяше гортань его от великого того недуга. И бысть сродником его и всем домочадцем скорбь велика и плачь неутешимый в дому его, всем отчаявшымся живота его, и ннчтоже о здравии его промышляющим, но токмо погребательная готовяху. Между же тем сродницы предреченного Клементия послаща единого от слуг своих во обитель святого Апостола Иоанна Богослова ко игумену Иосифу и ко всей братии, дабы молилися о болящем. И абие игумен с братиею вшед в церковь святого Апостола Иоанна Богослова, начата пети молебен о болящем Господу Богу, и Успению пречистые Богородицы, и Наперснику Христову Иоанну Богослову. По молебне же посла игумен к болящему Клементию персти от гроба преподобного чудотворца Саввы, начальника обители, с двумя старцами Мисаилом и Евфимием диаконом. Они же скоро течаху из обители на мсках к болящему Клементию с честною и святою перстию преподобного Саввы чудотворца, и видевше его в велицей болезни суща, и едва дыхание имуща, не надеяхуся живота болящему: обаче со слезами начата молитися Богу и пресвятей Богородице, и святому Апостолу Иоанну Богослову, и преподобному Савве чудотворцу о исцелении его. И по сем дата ему персти святого чудотворца Саввы, и священные воды пити, юже привезоша с собою. Болящий же с великою нуждою испив священную воду, помазася ею, и абие в том часе проглагола, таже и гортань его запухлая по малу до конца исцеле молитвами чудотворца Саввы. И тако сбыстся писание глаголющее: тогда скопит хромый яко елень, и ясен будет язык гугнивых. По сем больный и домашнии его воздаша благодарение Богу, и пречистей Богоматери, и их угодником, великому Апостолу Иоанну Богослову, и святому чудотворцу Савве Псковскому: и бысть радость велия всем прилучившимся в дому болящего о исцелении его.

Старцу некоему, именем Патермуфию, просфиряку обители святого Саввы случися болезнь студеная (лихорадка) тяжка зело, яко и на одре ему лежати, и ни мало отрады имети от лютые болезни тоя. Призвав убо к себе брата своего Даниила, нача его молити, дабы дал ему с мощей святого воды испити на исцеление недуга своего. Даниил же с молитвою и благословением взем от мощей святого часть едину, вложи во святую воду, и персть всыпав от гроба его, даде болящему старцу. Старец же испив от воды, помазася тою, обаче болезнь не престаяше, но горше первого нача мучити его. Он же помысли в себе, глаголя: святче Божий, то ли тебе угодно бысть; не исцелити ли от лютые болезни сея; мощен бо еси исцелити худость мою: дана бо есть тебе власть от Бога отгоняти различные недуги от человек. Помяни святче Божий, яко во обители твоей двадесять пять лет труждуся неисходно, всегда мимо гроба твоего ходя, и твое имя святое поминая. Убо помилуй мя, и исцели от обдержащие сея болезни. Сие ему моление от всего сердца глаголющу со слезами, абие сон в том часе нападе на него, и се зрит теплого заступника и посетителя болящих, святого отца нашего Савву, являющася болящему оному старцу и глаголюща: почто ми брате труды твориши и не даеши почити; Таже приступль ко мне (поведает болящий) и емь мя за главу, рече: во имя святого Отца, и Сына, и святого Духа буди здрав от сего часа, и спаси душу свою. По сем прииде Даниил в келлию, болящего брата посетити, и видев его аки мертва спяща, егда с молитвою возбуди его. Он же возбнув, ощути себе здрава, и воздаде хвалу Богови, и пречистей Богородице, творящым дивная чудеса угодником своим Саввою.

Паки ин человек одержим бяше болезнию чревною люте зело, яко и не помнити себе в живых: и продолжися болезнь та в нем на долгое время, и много себе врачевав, никоея же пользы обрете от зельные тоя болезни. По мале жe слышав от некиих Христолюбивых человеков о преподобном чудотворце Савве, яко Бог подает человеком, с верою ко гробу его притекающим исцеление, посла человека от своих ему в честную обитель святого Апостола Иоанна Богослова, идеже лежаху чудотворные мощи угодника Божия Саввы, и с ним посла на молебен, на свещу и на просфору по силе, и елико довлеет на службу. Человек же той посланный быв во обители святого Саввы, и совершив моление о болящем, возвратися, и даша ему персти от гроба святого чудотворца Саввы, и велеша болящего напоити святою водою, с перстию смешенною. Он же пришед к болящему, даде ему святую персть, и положи в сосуд, повеле испити ю с святою водою. Болящий же прием ю с великою верою, абие исцеле от болезни чревные, и здрав быв, воздаде хвалу всех Богу, и пречистей его Богоматери, и преподобному отцу Савве чудотворцу, яко его святыми молитвами исцеление получи от болезни своея.

Сему Василию попущением Божиим случися болезнь внутреняя тяжка зело: к сей же болезни приспе и вторая сухотная, яже продолжися в нем во все лето, и от многие болезни тоя разслабло все тело его, и много врачевався, ничтоже прият от врачев, но паче в горшая прииде, яко и уму его повредитися, и мнози глаголаху о нем, яко смерть ему будет от тоя болезни. Но изволением Бога, иже прославляше угодника своего блаженного Савву, прилучися некоему старцу монастыря святого Саввы именем Даниилу приити к болящему, иже поряду поведа ему о святем Савве, како Бог молитвами его дарует многим человеком от различных недуг многая исцеления, приходящим во обитель святого Иоанна Богослова, и у гроба святого Саввы знаменующимся, и от персти, яже во гробе святем, емлющим, и пиющим с водою, и мажущимся. Сродницы убо болящего начата молити старца, дабы принес персти святого из обители. Он же принесе им, и всыпа персть оную во священную воду с молитвою и призыванием имени святого отца, таже даде испити болящему человеку Василию от воды тоя святые. Он же испив, нача в чувство приходити, и от того времени брашну причастися, таже совершенно исцеле от болезни тоя молитвами святого Саввы. По сем прииде своими ногами в честную обитель ко святому, благодарение воздая, и поведая братии посещение святого, како Бог молитвами преподобного чудотворца Саввы дарова ему исцеление от лютые тоя болезни: и по сем отъиде во своя, славя Бога, и пречистую Богородицу и угодника их блаженного отца Савву чудотворца.

Бысть некогда при игумене Антонии в Крыпецкой обители служитель некий, именем Иоанн, зовомый Дойня, сему случися болезнь тяжка зело, глаголемая огненная, и страждущу ему в болезни той довольное время, и никим же брегому, се внезапу глас бысть глаголяй: человече, скоро изыди из келлии твоей, и шел пади на гробе преподобного Саввы, начальника честные обители сея, и призови в молитве на помощь святого отца Савву, и тако молитвами его исцеление получити. Аз же вскоре воспрянув со одра моего, (глаголет болящий) на нем же лежах, и пришед ко гробу отца святого, падох со слезами многими на честнем гробе его, и призвах имя святого на помощь, молитвы токмо во уме моем слагая, а языком не глаголя, но сердцем точию веруя, яко Господь Бог исцелит мя молитвами его святыми от обдержащие болезни. И ту абие явися мне больному очевидце старец светел, велик возрастом, широкою брадою седою зело, иже емь мя за главу, и стиснув ю руками, сюду и сюду крестообразно потрясе и рече: Иоанне, отселе здрав буди от болезни, и служи во обители моей верою правою, и к тому не согрешай, да не горше ти что будет: и сие рек, абие невидим бысть. Мне же показася во страсе том, яко от главы и до ногу моею вся кожа содрася с мене, и в том часе исцелех посещением Отца и Сына и святого Духа, яко ничтоже пострадав от болезни оной, и изыдох от гробницы святого с радостью велиею, и поведах игумену и братии о преславном исцелении моем. Они же вси купно со мною прославиша Бога и милость его, и пречистую Богородицу, заступницу рода Христианского, и угодника их блаженного отца и чудотворца Савву.

Бяше некий игумен Спасомирожского монастыря, именем Иоанникий. Сему случися недуг тяжек зело, яко всему телу ею болети вельми, и не можаше нимало двигнутися со одра своего, на нем же лежаше, ниже на ногах своих ходити можаше: и пребысть в болезни той со благодарением терпя, Господа ради время довольно. По семъ слышав от некиих человеков о преподобном отце Савве чудотворце, начальнике обители Крыпецкие, яко многа и различна исцеления Бог творит от святых его мощей, и яко вси с верою приемлющий честную его персть от гробницы, здравие получают от всяких недуг своих. Слышав, глаголю, сие, немедленно с великою верою ко святому и с сердечным воздыханием посла некоего диакона своего именем Игнатия, да принесет ему честные персти от мощей святого. Диакон же с верою и со многим усердием взя честные персти, у некоего благоговейного пресвитера, и принесе ю к игумену. Он же с великою верою и желанием сердечным прием ю, помолися Господу Богу и пречистей Богородице и святому чудотворцу Савве довольно, и всыпа персть оную в священную воду, прирек: за молитв отца нашего Саввы чудотворца Господи Иисусе Христе, Боже наш, помилуй мя грешного, и исцели мя от лютые болезни сея. И по молитве с великою верою испи от тоя честные воды: и абие в том часе облегча ему болезнь его, по мале же и до конца свободися от недуга того тяжкого, и ясно всем исповеда величия Божия, яже творит Бог угодником своим блаженным Саввою чудотворцем.

Человек некто именем Андрей Михнов, поселянин монастыря святого отца Саввы, жилище имеяше близ обители его яко за три поприща. Сему Андрею попущением Божиим язва бысть на нозе, яже прикорчила бяше ногу его, и чрез многое время хождаше на единой нозе. По сем некий старец обители святого Иоанна Богослова, именем Иона, поведа болящему о преподобном Савве чудотворце, како Бог подает многая и различная исцеления от раки святого с верою приходящим, и повеле болящему идти во обитель. Он же пришед, по силе даде милостыню на молебен. Братия же после молебна покропиша его священною водою, и напоиша его от воды тоя, с перстию святого. Он же помолився со слезами довольно у раки преподобного отца Саввы, отъиде в дом свой, славя Бога, и нача нога его простиратися, и бысть цела, яко же и другая.

Бе некий человек, зовомый Ушак, художество имеяй иконное, жительство же во граде Пскове, в урочище глаголемом Полонище. Сему Мартину от многого пиянства случися ум погубити, и начат неподобная глаголати. Сродницы же его ведоша в церковь святого Богоявления, яже зовется в застении: и начаша пресвитеры молебен пети святому Богоявлению. Понамарь же тоя церкви, именем Феодосий, поведа сродником его, како Бог творит многая чудеса и исцеления угодником своим блаженным Саввою, и како его самого исцели от зубные болезни перстию святого отца Саввы. Сродницы же слышавше сие, повелеша на молебне и святому Савве канон прочитати и евангелие над главою болящего. Молебному убо пению совершившуся, окропиша больного святою водою, и напоиша от воды тоя, примесивше и честную персть святого отца Саввы, и абие бысть здрав человек той, яко николиже болев, и отъиде в дом свой, никим же водим, славя Бога, и похваляя угодника его блаженного Савву чудотворца.

Некий человек, именем Леонтий Фомин жилище имяше во граде Пскове, в Петровском конце, в козьей улице. Сему Леонтию случися зубная болезнь, яже продолжися на многие дни, и много врачевавшися, нималыя получи пользы от врачевания, но и горший постиже его недуг. В некое же время прилучися у него быти старцу, именем Даниилу, из монастыря преподобного Саввы, иже вопроси его о болезни той зубной. Он же поведа ему вся по ряду, яко многим зелием врачевашеся, и не бысть ему ни коея пользы от врачевания того. Старец же принесе ему чудотворные персти в дом от раки святого отца Саввы, и повеле ему всыпати на болящие зубы, и призвати на помощь чудотворца Савву. Леонтий же вземь персть ону святую, помолися Богу, и пречистей его Матери довольно, таже возложи на болящие зубы персть оную блаженного Саввы чудотворца, и от того часа здрав бысть от болезни тоя молитвами святого отца Саввы.

Такожде жене некоей от славных града Пскова болярынь, именем Евдокии, яже бе супруга некоего Иоанна Симеонова, сына Препозобова, случися болезнь зубная тяжка вельми, яко и лицу ея и очесем опухнути на многи дни, от неядения же и безсонницы живот ея к концу приближашеся. Мужу же ея Иоанну и всем сродником и домочадцем бысть скорбь велия в дому том, и недоумевающимся им, что сотворити о ней, или чим помощи от болезни той, человек некий именем Феодосий, прежде помянутый понамарь церкви святого Богоявления, поведа о преподобном Савве чудотворце, како Бог творит многая и различная исцеления от честнаго гроба и святые персти преподобного Саввы. Они же с радостию восхитиша слово от него, и начата прилежнее вопрошати его. Он же поведа вся по ряду яже о святем Савве. Имея же при себе часть от честнаго гроба и от персти его, даде им усердно. Они же с великою радостию и верою приемше персть тую, всыпаша во святую воду, и напоиша ею болящую, часть же от гроба возложиша на болящие зубы ея, и абие преста оная болезнь зубная, помале же и до конца исцеле от болезни тоя молитвами чудотворца Саввы.

Жене некоей именем Матроне, благочестивой и богобоязненной, случися болезнь огненная, яже бе толико тяжка, яко всем сущим в дому живота ея отчаятися. Муж же ея, именем Евстафий, художеством иконописец, слышав от выше помянутого понамаря Богоявленские церкви, исцелевшего от зубные болезни молитвами преподобного отца Саввы, яко многа и различна исцеления дает Бог от святые персти блаженного отца: (не токмо бо приходящим человеком к честному его и чудотворному гробу, но и на всяком месте с верою призывающим имя его от различных недугов исцеление подается), оставя вся человеческая врачевания, прииде во обитель преподобного Саввы, и пев молебная над болящею своею женою, взя персти от гроба, и всыпа во святую воду, с великою верою призывая на помощь святого. Таже даде испити болящей: она же испив, абие исцеление получи, и свободися от болезни тоя молитвами преподобного Саввы.

Сим человеком, бывшым от града Пскова, и живущим в посаде близ Хлебные горы, случися болети обоим во едино время огненною болезнию тяжко зело, яко и живота отчаятися. Болезни же той продолжившейся на многое время, домочадцем их бысть скорбь велика и плачь неутешимый. Мнози бо знаемии, и сродницы и соседи приходяще в дом их на посещение болящих, глаголаху, яко в той болезни и смерть им будет. Предреченный же Кирилл, сын Алексиев, от части Божественнае писания ведый, слышав святое житие и чудодействие преподобного Саввы Крыпецкого, начальника и спостника великого Евфросина Псковского чудотворца, како мнози человецы болящии, приемлюще персть святого, и пиюще ю со освященною водою, исцеляются, яцем же недугом одержими бывают. Посылает убо человека во обитель святого Иоанна Богослова, и молит игумена, и весь священный собор, да принесут в дом его святое Евангелие и честный Крест и священную воду, и персть от гроба святого отца Саввы. Игумен же пришед в дом болящих со всем священным собором, начат молебен пети пре святей Богородице, и святому Иоанну Богослову, такожде и Савве чудотворцу. По совершении же молебна игумен покропи болящих оных священною водою, и даде им испити от воды тоя: и абие в том часе начат утолятися болезнь она, помале же и до конца исцеление получиша болящии молитвами чудотворца Саввы. И вси сущии в дому их прославиша Бога и пречистую Богородицу, и великого угодника их Савву чудотворца, глаголюще: слава тебе Господи человеколюбче Царю небесный, единосущная и нераздельная Троице, Отче, Сыне и святый Душе, яко такового чудотворца и врача безмездна даровал еси граду твоему Пскову на исцеление недугов человеческих.

В лето 7170 случися болети огненною тяжкою болезнию благоверному князю Даниилу Иоанновичу, зовомому Бабичеву, иже бысть от великого Новаграда, жилище имый в веси глаголемей Каторская. Сей благоверный князь слышав от многих человек о преподобном чудотворце Савве начальнике Крыпецкие обители, како Бог молитв его ради святых, многа и различна исцеления творит человеком, с верою приходящим к раце его чудотворней, абие предприемлет путь в монастырь Иоанна Богослова, идеже лежат чудотворные мощи святого, аще разстояние и велико бе до обители, но близ сущо верою ко святому. Скоро убо достиже честные обители Крыпецкие, идеже бывшу ему у гроба святого и молебен совершившу, и священные воды с перстию разтворенные испившу, абие облегча болезнь его, и по мале совершенно исцелися молитвами святого. Таже учредив игумена и братию довольно, и милостыню дав многу, отъиде в дом свой, радуяся и славя Бога, и пречистую Богородицу и угодника их святого Савву.

Во дни благочестивого царя и великого князя Иоанна Васильевича всея России, и при чадех его Иоанне Иоанновиче, и Феодоре Иоанновиче, прииде король Литовский с ратию ко граду Пскову. Тогда из всех монастырей игумены и иноки страха ради собрашася во град Псков: в обители же святого Апостола и Евангелиста Иоанна Богослова, и Саввы Крыцецкого чудотворца, остася един от братии некто Иоанн. Сей поведай глаголаше, яко Литовцы многажды прихождаху ратию ко обители преподобного Саввы, и многажды зажигаху келлии и церкви Божия, но Божиею благодатию и молитвами преподобного чудотворца Саввы не возмогоша зажещи. Таже по мале времени приидоша три ротмистра с воинами, разорити хотяще обитель преподобного, и святое место огнем пожещи. Но о преславного чудесе, еже Бог показа за молитв святого угодника его Саввы! Видят тии ротмистры некоего воина идуща от задних врат, яже от востока вооруженна, и грядуща в церковь Иоанна Богослова, из нея же изыде другий воин, подобен тому же, и оба поидоша к гробнице преподобного отца и чудотворца Саввы, и се третий воин изыде со оружием, к ним же прииде множество других храбрых воинов, ово от церкви, ово от гробницы, ово от келлий и от служеб монастырских, вси вооружении. Ратницы же зряще во святые врата, не можаху взыти в монастырь, и от великого того страха побегоша овии путем, овии лесом, овии в непроходимая блата, и едва от страха того собравшеся чрез три дни, приидоша в полки и поведаша королю своему, и иным бывшим при нем военачальником, иже слышавше сие, мняху быти велию рать Московскую, стоящу во обители. По сем бывшу велию взысканию и истязанию от пленных, пойманных во окрестностях того монастыря, мнози поведаша, яко едиными усты глаголюще, что ниединаго человека ратных Московских несть в монастыре том. Король же слышав сие, заповеда ратным людем своим не ходити во обитель ону, и никияже обиды творити месту тому, прирек, яко не просто место сие, но некто велик от святых угодников Божиих пребывает в нем, да не зле вси постраждете. Таже повеле и всех плененных отпустити во своя. Они же отпущени бывше, приидоша во град и возвестиша игумену и братии вся бывшая, како приходиша ратнии людие к монастырю, и не возмогоша разорити его, но страхом объяти бывше, побегоша, Игумен же достигши монастыря с братиею, и видев обитель, церкви, келлии, и вся монастырские службы молитвами чудотворца Саввы Богом сохраненны и невредимы ничим же, возрадовася радостию велиею зело, и вси певше молебен святей Троице, и пречистей Богородице, и святому Апостолу и Евангелисту Иоанну Богослову, и святым Псковским чудотворцем, Всеволоду и Евфросину, и преподобному чудотворцу Савве, прославиша Бога, дивного во святых своих.

В лето 7106, бе некий служебник во обители преподобного Саввы Крыпецкого чудотворца, именем Иоанн, иже много лет работайте во обители той со благодарением многим и послушанием, игумену и братии, повинуяся во всем, яко же и самому Христу. Сей некогда по благословению игумена иде в пустыню на Репище. Бе же в то время зима, и мхи замерзли, яко мощи человека подняти. Ненавидяй же добра диавол соврати его с пути, и заведе в дебри и глухие болота, по ним же человек той блудя, от мраза и от хлада отнюд изнеможе, (зане во многолетней старости бе), и паде на некоем холму главою, и пребысть в воде, (бе бо по мразе оттепель), лежа яко мертв чрез тринадесять дней и нощей. По смотрению же Божию найде на него служитель тоя же обители, и слышав стон человеческого гласа, ужасеся, и пришед едва позна его, зане языка и речи отнюд допытатися не можаше.

Абие убо шел в дом свой, ведя скот, и возложив его на сани, привезе во обитель. Игумен же и братия многое приложиша о нем тщание, и согреша его в теплой келлийце, изменивши ризы его. И тако Божиею милостию отверзеся язык его, и малу часть приим пищи, укрепися. Таже на другий день сподоблен бысть великого Ангельского образа. Между же тем игумен Феодосий беседова с ним, и вопрошаше его, глаголя: како сыне и брате случися тебе таковая великая беда; како от толикие нужды мраза и глада не изыде дух твой, и како тя зверие не снели; Он же отвеща игумену и братии с великими слезами и горьким рыданием: идох, рече, на службу монастырскую, и совратихся с пути, и ходих по мхам и болотам непроходимым, дóндеже изнеможе сила моя, и падох на месте некоем в мох, на нем же вода потопи мя, от нея же точию глава моя свободна бысть, и ничтоже помышлях, токмо смерть и муку вечную, понеже не сподоблен бых исповеди и причастия святых и Божественных тайн: иные же помощи ни от кого же приях, но токмо призывах на помощь Господа Бога и пречистую Богородицу, и святого Апостола Иоанна Богослова, и преподобного чудотворца Савву, начальника Крыпецкие обители: прочее же время лежах вне ума, и како обретохся во обители сей, поведати не могу. Сия рек, моли игумена Феодосия, дабы его сподобил исповеди и причастия святых и Божественных тайн. Игумен же Феодосий сам исповеда его: он же покаяся чистым покаянием с великим благоговением, верою и сокрушением: и по отпуске Божественные литургии сподобися причаститися святых Христовых тайн: по причащении же во вторый день отъиде в вечную жизнь, о Христе Иисусе Господе нашем, ему же слава, честь и держава, ныне и присно, и во веки веков. Аминь.