Кафизма 17

Надписание

А҆ллилꙋ́їа.

Содержание

Данный псалом по трём причинам превосходнее всех других. Во-первых – по пользе: ибо весь наполнен нравоучением, убеждающим человека учреждать жизнь по правилам Божьего закона, и потому ежедневно читается в церкви. Во-вторых – по своему пространству, ибо содержит 176 стихов: и потому, чем пространнее, тем важнее, тем величественнее. Причина столь великого пространства, может быть, была та, чтобы Израильский народ, ходя три раза в год из всех частей Иудеи на поклонение Богу в Иерусалим, имел чем с пользою заниматься на пути. В-третьих – по красоте и искусству стихотворения: ибо первые восемь стихов начинаются от первой буквы алфавита, следующие восемь – от второй, и так далее: так что весь алфавит восемь раз повторяется, и нет ни одного в этих стихах, где бы о законе Божьем упомянуто не было. Впрочем, поскольку этот псалом и в словах, и в мыслях сам по себе весьма ясен, то полагается здесь без толкования, а изволяяй⁴⁷⁹ могут прочесть в первом издании.

Пс.118:1 Блаже́ни непоро́чнїи въ пꙋ́ть (в Евр. въ пꙋтѝ,) ходѧ́щїи въ зако́нѣ гдⷭ҇ни.

Пс.118:2 Блаже́ни и҆спыта́ющїи свидѣ̑нїѧ є҆гѡ̀, всѣ́мъ се́рдцемъ взы́щꙋтъ є҆гѡ̀.

Пс.118:3 Не дѣ́лающїи бо беззако́нїѧ, въ пꙋте́хъ є҆гѡ̀ ходи́ша.

Пс.118:4 Ты̀ заповѣ́далъ є҆сѝ за́пѡвѣди твоѧ̀ сохрани́ти ѕѣлѡ̀.

Пс.118:5 (Ѽ) дабы̀ и҆спра́вилисѧ пꙋтїѐ моѝ, сохрани́ти ѡ҆правда́нїѧ твоѧ̀.

Пс.118:6 Тогда̀ не постыжꙋ́сѧ, внегда̀ призрѣ́ти мѝ (в Евр. внегда̀ призрю̀) на всѧ̀ за́пѡвѣди твоѧ̀.

Пс.118:7 И҆сповѣ́мсѧ тебѣ̀ въ пра́вости се́рдца, внегда̀ наꙋчи́ти ми сѧ (в Евр. внегда̀ наꙋчꙋ́сѧ) сꙋдьба́мъ пра́вды твоеѧ̀.

Пс.118:8 Ѡ҆правда́нїѧ твоѧ̀ сохраню̀, не ѡ҆ста́ви менѐ до ѕѣла̀.

Пс.118:9 Въ чесо́мъ и҆спра́витъ ю҆нѣ́йшїй пꙋ́ть сво́й; внегда̀ сохрани́ти (в Евр. а҆́ще сохрани́тъ) словеса̀ твоѧ̀.

Пс.118:10 Всѣ́мъ се́рдцемъ мои́мъ взыска́хъ тебѐ, не ѿри́ни менѐ ѿ за́повѣдей твои́хъ (в Евр. не попꙋстѝ мнѣ̀ заблꙋжда́ти ѿ за́повѣдей твои́хъ):

Пс.118:11 Въ се́рдцѣ мое́мъ скры́хъ словеса̀ твоѧ̀, ꙗ҆́кѡ да не согрѣшꙋ̀ тебѣ̀.

Пс.118:12 Благослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои́мъ.

Пс.118:13 Оу҆стна́ма мои́ма возвѣсти́хъ всѧ̀ сꙋдьбы̀ ᲂу҆́стъ твои́хъ.

Пс.118:14 На пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ (в Евр. веселю́сѧ па́че, не́же ѡ҆ всѣ́хъ бога́тствахъ):

Пс.118:15 Въ за́повѣдехъ твои́хъ поглмлю́сѧ (в Евр. поꙋмлю́сѧ) и҆ ᲂу҆разꙋмѣ́ю пꙋти̑ твоѧ̀.

Пс.118:16 Во ѡ҆правда́нїихъ твои́хъ поꙋчꙋ́сѧ, не забꙋ́дꙋ слове́съ твои́хъ.

Пс.118:17 Возда́ждь рабꙋ̀ твоемꙋ̀, живи́ мѧ (в Евр. Да́рꙋй рабꙋ̀ твоемꙋ̀, да живꙋ̀), и҆ сохраню̀ словеса̀ твоѧ̀.

Пс.118:18 Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀.

Пс.118:19 Пришле́цъ а҆́зъ є҆́смь на землѝ, не скры́й ѿ менє̀ за́пѡвѣди твоѧ̀.

Пс.118:20 Возлюбѝ дꙋша̀ моѧ̀ возжела́ти сꙋдьбы̀ твоѧ̀ на всѧ́кое вре́мѧ.

Пс.118:21 Запрети́лъ є҆сѝ гѡ́рдымъ (в Евр. Потреби́лъ є҆сѝ го́рдыѧ): про́клѧти ᲂу҆клонѧ́ющїисѧ ѿ за́повѣдей твои́хъ.

Пс.118:22 Ѿимѝ ѿ менѐ поно́съ (поноше́нїе) и҆ ᲂу҆ничиже́нїе, ꙗ҆́кѡ свидѣ́нїй твои́хъ взыска́хъ.

Пс.118:23 И҆́бо сѣдо́ша кнѧ́зи, и҆ на мѧ̀ клевета́хꙋ: ра́бъ же тво́й глꙋмлѧ́шесѧ (в Евр. поꙋча́шесѧ) во ѡ҆правда́нїихъ твои́хъ.

Пс.118:24 Ибо свидѣ̑нїѧ твоѧ̀ поꙋче́нїе моѐ є҆́сть, и҆ совѣ́ти моѝ ѡ҆правда̑нїѧ твоѧ̀ (в Евр. и҆ мꙋ́жїе совѣ́та моегѡ̀ сꙋ́ть).

Пс.118:25 Прильпѐ землѝ дꙋша̀ моѧ̀: живи́ мѧ по словесѝ твоемꙋ̀.

Пс.118:26 Пꙋтѝ моѧ̀ возвѣсти́хъ, и҆ ᲂу҆слы́шалъ мѧ̀ є҆сѝ: наꙋчи́ мѧ ѡ҆правда́нїємъ твои́мъ.

Пс.118:27 Пꙋ́ть ѡ҆правда́нїй твои́хъ вразꙋми́ ми, и҆ поглꙋмлю́сѧ (в Евр. да поꙋмлю́сѧ) въ чꙋдесѣ́хъ твои́хъ.

Пс.118:28 Воздрема̀ дꙋша̀ моѧ̀ ѿ ᲂу҆ны́нїѧ (в Евр. и҆стаѧва́етъ дꙋша̀ моѧ̀ ѿ печа́ли): ᲂу҆тверди́ мѧ въ словесѣ́хъ твои́хъ.

Пс.118:29 Пꙋ́ть непра́вды ѿста́ви (в Евр. ᲂу҆далѝ) ѿ менѐ, и҆ зако́номъ твои́мъ поми́лꙋй мѧ̀.

Пс.118:30 Пꙋ́ть и҆́стины и҆зво́лихъ (в Евр. и҆збра́хъ), и҆ сꙋдьбы̀ твоѧ̀ не забы́хъ (в Евр. предлож́хъ себѣ̀).

Пс.118:31 Прилѣпи́хсѧ свидѣ́нїємъ твои́мъ гдⷭ҇и, не посрамѝ менѐ.

Пс.118:32 Пꙋ́ть за́повѣдїй твои́хъ теко́хъ, є҆гда̀ разшири́лъ є҆сѝ се́рдце моѐ (в Евр. Пꙋте́мъ за́повѣдей твои́хъ потекꙋ̀, є҆гда̀ разшири́ши се́рдце моѐ).

Пс.118:33 Законоположѝ мнѣ̀ гдⷭ҇и, пꙋ́ть ѡ҆правда́нїй твои́хъ, и҆ взыщꙋ̀ и҆̀ вы́нꙋ (в Евр. да сохраню̀ є҆го̀ да́же до конца̀).

Пс.118:34 Вразꙋми́ мѧ, и҆ и҆спыта́ю зако́нъ тво́й, и҆ сохраню̀ и҆̀ всѣ́мъ се́рдцемъ мои́мъ.

Пс.118:35 Наста́ви мѧ̀ на стезю̀ за́повѣдїй твои́хъ, ꙗ҆́кѡ тꙋ́ю восхотѣ́хъ (в Евр. ꙗ҆́кѡ въ то́мъ єсть и҆зволе́нїе моѐ).

Пс.118:36 Приклонѝ се́рдце моѐ во свидѣ̑нїѧ твоѧ̀: а҆ не въ лихои́мство.

Пс.118:37 Ѿвратѝ ѻ҆́чи моѝ, є҆́же не ви́дѣти сꙋеты̀, въ пꙋтѝ твое́мъ живи́ мѧ.

Пс.118:38 Поста́ви рабꙋ̀ твоемꙋ̀ сло́во твоѐ въ стра́хъ тво́й.

Пс.118:39 Ѿимѝ поноше́нїе моѐ, є҆́же непщева́хъ (в Евр. є҆гѡ́же бою́сѧ), ꙗ҆́кѡ сꙋдьбы̀ твоѧ̀ бла́ги.

Пс.118:40 Сѐ возжела́хъ за́пѡвѣди твоѧ̀: въ пра́вдѣ твое́й живи́ мѧ.

Пс.118:41 И҆ да прїи́детъ на мѧ̀ ми́лость твоѧ̀ гдⷭ҇и (в Евр. да прїи́дꙋтъ на мѧ̀ ми́лости твоѧ̀ бж҃е), (и҆) спасе́нїе твоѐ по словесѝ твоемꙋ̀.

Пс.118:42 И ѿвѣща́ю поноша́ющымъ мѝ сло́во, ꙗ҆́кѡ ᲂу҆пова́хъ на словеса̀ твоѧ̀.

Пс.118:43 И҆ не ѿимѝ ѿ ᲂу҆́стъ мои́хъ словесѐ и҆́стинна до ѕѣла̀, ꙗ҆́кѡ на сꙋдьбы̀ твоѧ̀ ᲂу҆пова́хъ (в Евр. ꙗ҆́кѡ сꙋде́бъ твои́хъ ѡ҆жида́ю).

Пс.118:44 И сохраню̀ зако́нъ тво́й вы́нꙋ, въ вѣ́къ и҆ въ вѣ́къ вѣ́ка.

Пс.118:45 И҆ хожда́хъ (в Евр. и҆ пойдꙋ̀) въ широтѣ̀, ꙗ҆́кѡ за́пѡвѣди твоѧ̀ взыска́хъ.

Пс.118:46 И глаго́лахъ (в Евр. и҆ возглаго́лю) ѡ҆ свидѣ́нїихъ твои́хъ пред̾ царѝ, и҆ не стыдѧ́хсѧ (в Евр. и҆ не постыждꙋ́сѧ).

Пс.118:47 И поꙋча́хсѧ (в Евр. И поꙋчꙋ́сѧ) въ за́повѣдехъ твои́хъ, ꙗ҆̀же (ꙗ҆́кѡ) возлюби́хъ ѕѣлѡ̀.

Пс.118:48 И воздвиго́хъ (в Евр. И воздви́гнꙋ) рꙋ́цѣ моѝ къ за́повѣдемъ твои́мъ, ꙗ҆̀же возлюби́хъ, и҆ глꙋмлѧ́хсѧ (в Евр. и҆ поꙋмлю́сѧ) во ѡ҆правда́нїихъ твои́хъ.

Пс.118:49 Помѧнѝ словеса̀ твоѧ̀ рабꙋ̀ твоемꙋ̀ (в Евр. Помѧнѝ сло́во твоѐ, (рече́нное) рабꙋ̀ твоемꙋ̀), и҆́хже ᲂу҆пова́нїе да́лъ мѝ є҆сѝ (в Евр. имже ѡ҆бнаде́жилъ мѧ̀ є҆сѝ).

Пс.118:50 То́ мѧ ᲂу҆тѣ́ши во смире́нїи мое́мъ, ꙗ҆́кѡ сло́во твоѐ живи́ мѧ (в Евр. ѡ҆живи́тъ мѧ̀).

Пс.118:51 Го́рдїи законопрестꙋпова́хꙋ до ѕѣла̀ (в Евр. Го́рдїи посмѣва́ютсѧ мнѣ̀ до ѕѣла̀): (ѻ҆ба́че) ѿ зако́на же твоегѡ̀ не ᲂу҆клони́хсѧ.

Пс.118:52 Помѧнꙋ́хъ сꙋдьбы̀ твоѧ̀ (сꙋ́щыѧ) ѿ вѣ́ка гдⷭ҇и, и҆ ᲂу҆тѣ́шихсѧ.

Пс.118:53 Печа́ль прїѧ́тъ мѧ̀ (в Евр. Стра́хъ нападѐ на мѧ̀) ѿ грѣ̑шникъ, ѡ҆ставлѧ́ющихъ зако́нъ тво́й.

Пс.118:54 Пѣ́та бѧ́хꙋ мнѣ̀ ѡ҆правда̑нїѧ твоѧ̀ на мѣ́стѣ прише́льствїѧ моегѡ̀.

Пс.118:55 Помѧнꙋ́хъ въ нощѝ и҆́мѧ твоѐ гдⷭ҇и, и҆ сохрани́хъ зако́нъ тво́й.

Пс.118:56 Се́й (в Евр. Сїѐ) бы́сть мнѣ̀, ꙗ҆́кѡ ѡ҆правда́нїй твои́хъ взыска́хъ.

Пс.118:57 Ча́сть моѧ̀ є҆сѝ гдⷭ҇и: рѣ́хъ сохрани́ти зако́нъ тво́й.

Пс.118:58 Помоли́хсѧ лицꙋ̀ твоемꙋ̀ всѣ́мъ се́рдцемъ мои́мъ, поми́лꙋй мѧ̀ по словесѝ твоемꙋ̀.

Пс.118:59 Помы́слихъ пꙋтѝ твоѧ̀, и҆ возврати́хъ но́зѣ моѝ во свидѣ̑нїѧ твоѧ̀.

Пс.118:60 Оу҆гото́вихсѧ и҆ не смꙋти́хсѧ (в Евр. Оу҆скори́хъ и҆ не ᲂу҆ме́длихъ), сохрани́ти за́пѡвѣди твоѧ̀.

Пс.118:61 Оу҆́жѧ грѣ̑шникъ ѡ҆бѧза́шасѧ мнѣ̀ (в Евр. Пѡ́лчища грѣ́шнича расхи́тиша мѧ̀): и҆ зако́на твоегѡ̀ не забы́хъ.

Пс.118:62 Полꙋ́нощи воста́хъ (в Евр. Въ пол́нощи востаю̀) и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀.

Пс.118:63 Прича́стникъ а҆́зъ є҆́смь всѣ́мъ боѧ́щымсѧ тебѐ, и҆ хранѧ́щымъ за́пѡвѣди твоѧ̀.

Пс.118:64 Ми́лости твоеѧ̀ гдⷭ҇и и҆спо́лнь землѧ̀: ѡ҆правда́нїємъ твои́мъ наꙋчи́ мѧ.

Пс.118:65 Бла́гость сотвори́лъ є҆сѝ съ рабо́мъ твои́мъ гдⷭ҇и, по словесѝ твоемꙋ̀.

Пс.118:66 Бла́гости и҆ наказа́нїю (в Евр. и҆ зна́нїю) и҆ ра́зꙋмꙋ наꙋчи́ мѧ, ꙗ҆́кѡ за́повѣдемъ твои́мъ вѣ́ровахъ.

Пс.118:67 Пре́жде да́же не смири́ти ми сѧ, а҆́зъ прегрѣши́хъ (в Евр. Пре́жде да́же не смири́хсѧ, а҆́зъ заблꙋжда́хъ): сегѡ̀ ра́ди сло́во твоѐ сохрани́хъ (в Евр. ны́нѣ же сло́во твоѐ сохранѧ́ю).

Пс.118:68 Бла́гъ є҆сѝ ты̀ гдⷭ҇и, и҆ бла́гостїю твое́ю наꙋчи́ мѧ ѡ҆правда́нїємъ твои́мъ.

Пс.118:69 Ѹ҆мно́жисѧ на мѧ̀ непра́вда го́рдыхъ (в Евр. ᲂу҆хи́триша на мѧ̀ ло́жь го́рдїи), а҆́зъ же всѣ́мъ се́рдцемъ и҆спыта́ю (в Евр. соблюда́ю) за́пѡвѣди твоѧ̀.

Пс.118:70 Оу҆сыри́сѧ ꙗ҆́кѡ млеко̀ (в Евр. Оу҆ты̀ ꙗ҆́кѡ тꙋ́къ) се́рдце и҆́хъ, а҆́зъ же зако́нꙋ твоемꙋ̀ поꙋчи́хсѧ.

Пс.118:71 Бла́го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои́мъ.

Пс.118:72 Бла́гъ мнѣ̀ зако́нъ ᲂу҆́стъ твои́хъ па́че ты́сѧщъ зла́та и҆ сребра̀.

Пс.118:73 Рꙋ́цѣ твоѝ сотвори́стѣ мѧ̀, и҆ созда́стѣ мѧ̀: (в Евр. и҆ ᲂу҆гото́вастѣ мѧ̀): вразꙋми́ мѧ, и҆ наꙋчꙋ́сѧ за́повѣдемъ твои́мъ.

Пс.118:74 Боѧ́щїисѧ тебѐ ᲂу҆́зрѧтъ мѧ̀ и҆ возвеселѧ́тсѧ, ꙗ҆́кѡ на словеса̀ твоѧ̀ ᲂу҆пова́хъ.

Пс.118:75 Разꙋмѣ́хъ гдⷭ҇и, ꙗ҆́кѡ пра́вда сꙋдьбы̑ твоѧ̀, и҆ вои́стиннꙋ смири́лъ мѧ̀ є҆сѝ.

Пс.118:76 Бꙋ́ди же ми́лость твоѧ̀, да ᲂу҆тѣ́шитъ мѧ̀ по словесѝ твоемꙋ̀ рабꙋ̀ твоемꙋ̀.

Пс.118:77 Да прїи́дꙋтъ мнѣ̀ щедрѡ́ты твоѧ̀, и҆ жи́въ бꙋ́дꙋ, ꙗ҆́кѡ зако́нъ тво́й поꙋче́нїе моѐ є҆́сть.

Пс.118:78 Да постыдѧ́тсѧ го́рдїи, ꙗ҆́кѡ непра́веднѡ беззако́нноваша на мѧ̀, (в Евр. низпроверго́ша мѧ̀): а҆́зъ же поглꙋмлю́сѧ (поꙋмлю́сѧ) въ за́повѣдехъ твои́хъ.

Пс.118:79 Да ѡ҆братѧ́тъ мѧ̀ (в Евр. да ѡ҆братѧ́тсѧ ко мнѣ̀) боѧ́щїисѧ тебѐ, и҆ вѣ́дѧщїи свидѣ̑нїѧ твоѧ̀.

Пс.118:80 Бꙋ́ди се́рдце моѐ непоро́чно во ѡ҆правда́нїихъ твои́хъ, ꙗ҆́кѡ да не постыжꙋ́сѧ.

Пс.118:81 И҆счеза́етъ во спасе́нїе твоѐ дꙋша̀ моѧ̀, на словеса̀ твоѧ̀ ᲂу҆пова́хъ: (в Евр. И҆стаева́етъ дꙋша̀ моѧ̀ жела́нїемъ спасе́нїѧ твоегѡ̀: словесѐ твоегѡ̀ ѡ҆жида́ю).

Пс.118:82 И҆҆счезо́ша ѻ҆́чи моѝ въ сло́во твоѐ, (в Евр. И҆҆знемаго́ша ѻ҆́чи моѝ, ѡ҆жида́ѧ сло́ва твоегѡ̀), глаго́люще: когда̀ ᲂу҆тѣ́шиши мѧ̀;

Пс.118:83 Занѐ бы́хъ ꙗ҆́кѡ мѣ́хъ на сла́нѣ, (в Евр. ꙗ҆́кѡ мѣ́хъ ко́жанъ въ дымꙋ̀): (ѻ҆ба́че) ѡ҆правда́нїй твои́хъ не забы́хъ.

Пс.118:84 Коли́кѡ є҆́сть дне́й раба̀ твоегѡ̀; когда̀ (ᲂу҆бѡ) сотвори́ши мѝ ѿ гонѧ́щихъ мѧ̀ (в Евр. на гонѧ́щихъ мѧ̀) сꙋ́дъ;

Пс.118:85 Повѣ́даша мнѣ́ законопрест́пницы глмлє́нїѧ, но не ꙗкѡ зако́нъ тво́й гдⷭ҇и: (в Евр. и҆скопа́ша мнѣ̀ го́рдїи ꙗ҆́м, єже нѣ́сть по зако́нꙋ твоемꙋ̀).

Пс.118:86 Всѧ̑ за́пѡвѣди твоѧ̀ и҆́стина: непра́веднѡ погна́ша мѧ̀, помози́ ми.

Пс.118:87 Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдей твои́хъ.

Пс.118:88 По милости твое́й живи́ мѧ, и҆ сохраню̀ свидѣ̑нїѧ ᲂу҆́стъ твои́хъ.

Пс.118:89 Во вѣ́къ гдⷭ҇и сло́во твоѐ пребыва́етъ на небесѝ.

Пс.118:90 Въ ро́дъ и҆ ро́дъ и҆́стина твоѧ̀: ѡ҆снова́лъ є҆сѝ зе́млю, и҆ пребыва́етъ.

Пс.118:91 Оу҆чине́нїемъ твои́мъ пребыва́етъ де́нь (в Евр. по сꙋдьба́мъ твои́мъ всѝ пребыва́ютъ до днѐ сегѡ̀): ꙗ҆́кѡ всѧ́чєскаѧ рабѡ́тна (в Евр. рабо́таютъ) тебѣ̀.

Пс.118:92 Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ.

Пс.118:93 Во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ.

Пс.118:94 Тво́й є҆́смь а҆́зъ, спаси́ мѧ, ꙗ҆́кѡ ѡ҆правда́нїй твои́хъ взыска́хъ.

Пс.118:95 Менѐ жда́ша грѣ́шницы погꙋби́ти мѧ̀, (а҆́зъ же) свидѣ̑нїѧ твоѧ̀ разꙋмѣ́хъ.

Пс.118:96 Всѧ́кїѧ кончи́ны (в Евр. Всѧ́кагѡ соверше́нства) ви́дѣхъ коне́цъ: (но) широка̀ за́повѣдь твоѧ̀ ѕѣлѡ̀.

Пс.118:97 Ко́ль возлюби́хъ зако́нъ тво́й гдⷭ҇и, ве́сь де́нь поꙋче́нїе моѐ є҆́сть.

Пс.118:98 Па́че вра̑гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю, ꙗ҆́кѡ въ вѣ́къ моѧ̀ є҆́сть.

Пс.118:99 Па́че всѣ́хъ ᲂу҆ча́щихъ мѧ̀ разꙋмѣ́хъ, ꙗ҆́кѡ свидѣ̑нїѧ твоѧ̀ поꙋче́нїе моѐ є҆́сть.

Пс.118:100 Па́че ста́рєцъ разꙋмѣ́хъ, ꙗ҆́кѡ за́пѡвѣди твоѧ̀ взыска́хъ.

Пс.118:101 Ѿ всѧ́кагѡ пꙋтѝ лꙋка́ва возбрани́хъ нога́мъ мои́мъ, ꙗ҆́кѡ да сохраню̀ словеса̀ твоѧ̀.

Пс.118:102 Ѿ сꙋде́бъ твои́хъ не ᲂу҆клони́хсѧ, ꙗ҆́кѡ ты̀ законоположи́лъ мѝ є҆сѝ.

Пс.118:103 Ко́ль сладка̀ горта́ни моемꙋ̀ словеса̀ твоѧ̀, па́че ме́да ᲂу҆стѡ́мъ мои́мъ.

Пс.118:104 Ѿ за́повѣдей твои́хъ разꙋмѣ́хъ: (в Евр. ра́зꙋмъ себѣ̀ сниска́хъ): сегѡ̀ ра́ди возненави́дѣхъ всѧ́къ пꙋ́ть непра́вды.

Пс.118:105 Свѣти́льникъ нога́ма мои́ма зако́нъ тво́й, и҆ свѣ́тъ стезѧ́мъ мои́мъ.

Пс.118:106 Клѧ́хсѧ и҆ поста́вихъ сохрани́ти сꙋдьбы̀ пра́вды твоеѧ̀: (в Евр. Клѧ́хсѧ, и҆ и҆спо́лню, єже сохрани́ти сдьбы̀ пра́вды твоеѧ̀).

Пс.118:107 Смири́хсѧ до ѕѣла̀: гдⷭ҇и живи́ мѧ по словесѝ твоемꙋ̀.

Пс.118:108 Вѡ́льнаѧ ᲂу҆́стъ мои́хъ благоволи́ же гдⷭ҇и, (в Евр. Во́льные ѡ҆бѣ́ты ᲂу҆́стъ благоволѝ, молю̀, прїѧ́ти бж҃е): и҆ сꙋдьба́мъ твои́мъ наꙋчи́ мѧ.

Пс.118:109 Дꙋша̀ моѧ̀ въ рꙋкꙋ̀ твоє́ю (єсть) вы́нꙋ: и҆ зако́на твоегѡ̀ не забы́хъ.

Пс.118:110 Положи́ша грѣ́шницы сѣ́ть мнѣ̀: и҆ ѿ за́повѣдїй твои́хъ не заблꙋди́хъ.

Пс.118:111 Наслѣ́довахъ свидѣ̑нїѧ твоѧ̀ во вѣ́къ, ꙗ҆́кѡ ра́дованїе се́рдца моегѡ̀ сꙋ́ть.

Пс.118:112 Приклони́хъ се́рдце моѐ сотвори́ти ѡ҆правда́нїѧ твоѧ̀ въ вѣ́къ за воздаѧ́нїе, (въ вѣ́къ и҆ во вѣ́ки).

Пс.118:113 Законопрестꙋ́пныѧ возненави́дѣхъ, зако́нъ же тво́й возлюби́хъ.

Пс.118:114 Помо́щникъ мо́й и҆ застꙋ́пникъ мо́й є҆сѝ ты̀: на словеса̀ твоѧ̀ ᲂу҆пова́хъ.

Пс.118:115 Оу҆клони́тесѧ ѿ менѐ лꙋка́внꙋющїи, и҆ и҆спыта́ю (в Евр. и҆ сохраню́) за́пѡвѣди бг҃а моегѡ̀.

Пс.118:116 Застꙋпи́ мѧ (в Евр. Оу҆тверди́ мѧ) по словесѝ твоемꙋ̀ и҆ жи́въ бꙋ́дꙋ: и҆ не посрамѝ менѐ ѿ ча́ѧнїѧ моегѡ̀.

Пс.118:117 Помози́ ми, и҆ спасꙋ́сѧ, и҆ поꙋчꙋ́сѧ во ѡ҆правда́нїихъ твои́хъ вы́нꙋ.

Пс.118:118 Оу҆ничижи́лъ є҆сѝ всѧ̀ ѿстꙋпа́ющыѧ ѿ ѡ҆правда́нїй твои́хъ: ꙗ҆́кѡ непра́ведно помышле́нїе и҆́хъ: (в Евр. ꙗ҆́кѡ ло́жь єсть ᲂу҆хищренїе и҆́хъ).

Пс.118:119 Престꙋпа́ющыѧ непщева́хъ всѧ̀ грѣ̑шныѧ землѝ: (в Евр. Ꙗ҆́кѡ жꙋ́пелїе ѿри́нꙋлъ є҆сѝ всѧ̀ грѣ́шныѧ землѝ): сегѡ̀ ра́ди возлюби́хъ свидѣ̑нїѧ твоѧ̀.

Пс.118:120 Пригвоздѝ стра́хꙋ твоемꙋ̀ плѡ́ти моѧ̀: (в Евр. Содрога́етсѧ ѿ стра́ха твоегѡ̀ пло́ть моѧ̀): ѿ сꙋде́бъ бо твои́хъ ᲂу҆боѧ́хсѧ.

Пс.118:121 Сотвори́хъ сꙋ́дъ и҆ пра́вдꙋ: не преда́ждь менѐ ѡ҆би́дѧщымъ мѧ̀.

Пс.118:122 Воспрїимѝ раба̀ твоего̀ во благо̀ (в Евр. Наста́ви раба̀ твоего̀ сло́вомъ пра́вды твоеѧ̀): да не ѡ҆клевета́ютъ менѐ го́рдїи.

Пс.118:123 Ꙍчи моѝ и҆счезо́стѣ во спасе́нїе твоѐ и҆ въ сло́во пра́вды твоеѧ̀ (в Евр. Ꙍчи моѝ и҆знемого́ша, ѡ҆жида́ѧ спасе́нїѧ твоегѡ̀, и҆ сло́ва пра́вды твоеѧ̀).

Пс.118:124 Сотворѝ съ рабо́мъ твои́мъ по ми́лости твое́й, и҆ ѡ҆правда́нїємъ твои́мъ наꙋчи́ мѧ.

Пс.118:125 Ра́бъ тво́й є҆́смь а҆́зъ: вразꙋми́ мѧ, и҆ ᲂу҆вѣ́мъ свидѣ̑нїѧ твоѧ̀.

Пс.118:126 Вре́мѧ сотвори́ти гдⷭ҇еви: разори́ша (бо) зако́нъ тво́й.

Пс.118:127 Сегѡ̀ ра́ди возлюби́хъ за́пѡвѣди твоѧ̀ па́че зла́та и҆ топа́зїѧ.

Пс.118:128 Сегѡ̀ ра́ди ко всѣ́мъ за́повѣдемъ твои́мъ направлѧ́хсѧ: всѧ́къ (же) пꙋ́ть непра́вды возненави́дѣхъ.

Пс.118:129 Ди̑вна свидѣ̑нїѧ твоѧ̀: сегѡ̀ ра́ди и҆спыта̀ ѧ҆̀ (в Евр. сохранѧ́етъ ѧ҆̀) дꙋша̀ моѧ̀.

Пс.118:130 Ꙗ҆вле́нїе слове́съ твои́хъ просвѣща́етъ и҆ вразꙋмлѧ́етъ младе́нцы.

Пс.118:131 Оу҆ста̀ моѧ̀ ѿверзо́хъ, и҆ привлеко́хъ дх҃ъ, ꙗ҆́кѡ за́повѣдїй твои́хъ жела́хъ.

Пс.118:132 При́зри на мѧ̀ и҆ поми́лꙋй мѧ̀, по сꙋдꙋ̀ лю́бѧщихъ и҆́мѧ твоѐ.

Пс.118:133 Стѡпы̀ моѧ̀ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе.

Пс.118:134 И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̀.

Пс.118:135 Лицѐ твоѐ просвѣтѝ на раба̀ твоего̀, и҆ наꙋчи́ мѧ ѡ҆правда́нїємъ твои́мъ.

Пс.118:136 И҆схѡ́дища вѡдна́ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀: (в Евр. Пото́ки вѡ́дъ и҆зведо́стѣ ѻ҆́чи моѝ не сохрани́вшихъ ра́ди зако́на твоегѡ̀).

Пс.118:137 Пра́веденъ є҆сѝ гдⷭ҇и, и҆ пра́ви сꙋдѝ твоѝ.

Пс.118:138 Заповѣ́далъ є҆сѝ пра́вдꙋ свидѣ̑нїѧ твоѧ̀, и҆ и҆́стинꙋ ѕѣлѡ̀.

Пс.118:139 И҆ста́ѧла мѧ̀ є҆́сть ре́вность твоѧ̀ (в Евр. моѧ̀), ꙗ҆́кѡ забы́ша словеса̀ твоѧ̀ вразѝ моѝ.

Пс.118:140 Разжже́но сло́во твоѐ ѕѣлѡ̀: и҆ ра́бъ тво́й возлюбѝ є҆̀.

Пс.118:141 Ю҆нѣ́йшїй (в Евр. Малѣ́йшїй) а҆́зъ є҆́смь и҆ ᲂу҆ничиже́нъ: (ѻ҆ба́че) ѡ҆правда́нїй твои́хъ не забы́хъ.

Пс.118:142 Пра́вда твоѧ̀ пра́вда во вѣ́къ, и҆ зако́нъ тво́й и҆́стина.

Пс.118:143 Скѡ́рби и҆ н̑жди ѡ҆брѣто́ша мѧ̀: (но) за́пѡвѣди твоѧ̀ поꙋче́нїе моѐ.

Пс.118:144 Пра́вда свидѣ̑нїѧ твоѧ̀ въ вѣ́къ: вразꙋми́ мѧ, и҆ жи́въ бꙋ́дꙋ.

Пс.118:145 Воззва́хъ всѣ́мъ се́рдцемъ мои́мъ, ᲂу҆слы́ша мѧ̀ гдⷭ҇и: ѡ҆правда̑нїѧ твоѧ̀ взыщꙋ̀.

Пс.118:146 Воззва́хъ тѝ, спаси́ мѧ, и҆ сохраню̀ свидѣ̑нїѧ твоѧ̀.

Пс.118:147 Предвари́хъ въ безго́дїи (в Евр. на свѣта́нїи) и҆ воззва́хъ: на словеса̀ твоѧ̀ ᲂу҆пова́хъ.

Пс.118:148 Предвари́стѣ ѻ҆́чи моѝ ко ᲂу҆́трꙋ (в Евр. стражбы̀ нощны́ѧ), поꙋчи́тисѧ словесе́мъ твои́мъ.

Пс.118:149 Гла́съ мо́й ᲂу҆слы́ши гдⷭ҇и по ми́лости твое́й: по сꙋдьбѣ̀ твое́й живи́ мѧ.

Пс.118:150 Прибли́жишасѧ гонѧ́щїи мѧ̀ беззако́нїемъ, (в Евр. Прибли́жишасѧ гонѧ́щїи беззако́нїе): ѿ зако́на же твоегѡ̀ ᲂу҆дали́шасѧ.

Пс.118:151 Бли́зъ є҆сѝ ты̀ гдⷭ҇и, и҆ всѝ пꙋтїѐ твоѝ и҆́стина.

Пс.118:152 И҆спе́рва (И҆здре́вле) позна́хъ ѿ свидѣ́нїй твои́хъ, ꙗ҆́кѡ въ вѣ́къ ѡ҆снова́лъ ѧ҆̀ є҆сѝ.

Пс.118:153 Ви́ждь смире́нїе моѐ, и҆ и҆зми́ мѧ: ꙗ҆́кѡ зако́на твоегѡ̀ не забы́хъ.

Пс.118:154 Сꙋдѝ сꙋ́дъ мо́й, (в Евр. Сꙋдѝ прю̀ мою̀), и҆ и҆зба́ви мѧ̀: словесѐ ра́ди твоегѡ̀ живи́ мѧ.

Пс.118:155 Дале́че ѿ грѣ̑шникъ спасе́нїе, ꙗ҆́кѡ ѡ҆правда́нїй твои́хъ не взыска́ша.

Пс.118:156 Щедрѡ́ты твоѧ̀ мнѡ́ги гдⷭ҇и: по сꙋдьбѣ̀ твое́й живи́ мѧ.

Пс.118:157 Мно́зи и҆згонѧ́щїи мѧ̀ и҆ стꙋжа́ющїи мѝ: (в Евр. Мно́зи сꙋ́ть гонѧ́щїи мѧ̀ и҆ вразѝ моѝ): (но) ѿ свидѣ́нїй твои́хъ не ᲂу҆клони́хсѧ.

Пс.118:158 Ви́дѣхъ неразꙋмѣва́ющыѧ и҆ и҆ста́ѧхъ: (в Евр. Ви́дѣхъ развра́тникѡвъ, и҆ ненавидѣ́нїемъ и҆ста́ѧхъ): ꙗ҆́кѡ слове́съ твои́хъ не сохрани́ша.

Пс.118:159 Ви́ждь, ꙗ҆́кѡ за́пѡвѣди твоѧ̀ возлюби́хъ: гдⷭ҇и по ми́лости твое́й живи́ мѧ.

Пс.118:160 Нача́ло слове́съ твои́хъ и҆́стина: и҆ во вѣ́къ всѧ̀ сꙋдьбы̀ пра́вды твоеѧ̀.

Пс.118:161 Кнѧ́зи погна́ша мѧ̀ тꙋ́не: и҆ ѿ слове́съ твои́хъ ᲂу҆боѧ́сѧ се́рдце моѐ.

Пс.118:162 Возра́дꙋюсѧ а҆́зъ (в Евр. Ра́дꙋюсѧ а҆́зъ) ѡ҆ словесѣ́хъ твои́хъ, ꙗ҆́кѡ ѡ҆брѣта́ѧй коры́сть мно́гꙋ.

Пс.118:163 Непра́вдꙋ возненави́дѣхъ и҆ ѡ҆мерзи́хъ: зако́нъ же тво́й возлюби́хъ.

Пс.118:164 Седмери́цею дне́мъ хвали́хъ тѧ̀ ѡ҆ сꙋдьба́хъ пра́вды твоеѧ̀.

Пс.118:165 Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.

Пс.118:166 Ча́ѧхъ спасе́нїѧ твоегѡ̀ гдⷭ҇и, и҆ за́пѡвѣди твоѧ̀ возлюби́хъ.

Пс.118:167 Сохранѝ дꙋша̀ моѧ̀ свидѣ̑нїѧ твоѧ̀, и҆ возлюбѝ ѧ҆̀ ѕѣлѡ̀: (в Евр. и҆ а҆́зъ люблю̀ ѧ҆̀ ѕѣлѡ̀).

Пс.118:168 Сохрани́хъ за́пѡвѣди твоѧ̀ и҆ свидѣ̑нїѧ твоѧ̀, ꙗ҆́кѡ всѝ пꙋтїѐ моѝ пред̾ тобо́ю гдⷭ҇и.

Пс.118:169 Да прибли́житсѧ моле́нїе моѐ пред̾ тѧ̀ гдⷭ҇и: по словесѝ твоемꙋ̀ вразꙋми́ мѧ.

Пс.118:170 Да вни́детъ проше́нїе моѐ пред̾ тѧ̀ гдⷭ҇и: по словесѝ твоемꙋ̀ и҆зба́ви мѧ̀.

Пс.118:171 Ѿры́гнꙋтъ ᲂу҆стнѣ̀ моѝ пѣ́нїе, є҆гда̀ наꙋчи́ши мѧ̀ ѡ҆правда́нїємъ твои́мъ.

Пс.118:172 Провѣща́етъ ѧ҆зы́къ мо́й словеса̀ твоѧ̀, ꙗ҆́кѡ всѧ̀ за́пѡвѣди твоѧ̀ пра́вда.

Пс.118:173 Да бꙋ́детъ рꙋка̀ твоѧ̀ є҆́же спасти́ мѧ (в Евр. въ помощь мнѣ̀), ꙗ҆́кѡ за́пѡвѣди твоѧ̀ и҆зво́лихъ (в Евр. и҆збра́хъ).

Пс.118:174 Возжела́хъ спасе́нїѧ твогѡ̀ гдⷭ҇и, и҆ зако́нъ тво́й поꙋче́нїе (в Евр. ᲂу҆тѣше́нїе) моѐ є҆́сть.

Пс.118:175 Жива̀ бꙋ́детъ дꙋша̀ моѧ̀ и҆ восхва́литъ тѧ̀: и҆ сꙋдьбы̀ твоѧ̀ помо́гꙋтъ мнѣ̀.

Пс.118:176 Заблꙋди́хъ ꙗ҆́кѡ ѻ҆вча̀ поги́бшее: взыщѝ раба̀ твоего̀, ꙗ҆́кѡ за́повѣдей твои́хъ не забы́хъ.