Песнопения на праздника Богородичные и великих Святых

Стихира на Господи воззвах, гл. 6. Мира мятеж преподобие оставив, | и паем крест твой последовал еси Христу | невозратным помыслом, и в пустыню вселился еси преподобне, | душевныя страсти из корене исторгая. | и телесная чувства огорчевая. | и частыми бдении и молитвами, | благодать восприял еси преподобне, | целити различныя недуги, | ангелов собеседниче, и преподобных сожителю: | молися Господу, Сергие преподобне, | помиловатися душам нашим.

Стихира на литии, гл. 6. Приидите празднолюбцы и постников сословие, | верою сошедшеся, | истиннаго постника почтим днесь Сергия, | с веселием шествовавшаго по стопам Владыки своего | узкий путь, и бесстрастную жизнь, | и верою возопиим: | о всеблаженне преподобных сожителю, | и постников похвало! | О нас молися ко Господу, | помиловатися душам нашим.

Стихира на стиховне, гл. 1. Наста богоносе, солнца светлейши твой праздник, | озаряя приходящия к тебе верою, | и бессмертие благоухает: | душам же источает нетление от святаго твоего телесе, | Сергие преподобне, | молитвенниче о душах наших.

Тропарь, гл. 4. Иже добродетелей подвижник, | яко истинный воин Христа Бога, | на страсти вельми подвизался еси в жизни временней, | в пениих, бдениих же и пощениих образ быв твоим учеником. | Тем же и вселися в тя Пресвятый Дух, | Его же действием светло украшен еси. | Но яко имея дерзновение ко Святей Троице, | поминай стадо, еже собрал еси мудре, | и не забуди, яко же обещался еси, | посещая чад твоих, | Сергие преподобне отче наш.

Величание. Ублажаем тя, | преподобне отче Сергие, | и чтем святую память твою, | наставниче монахов | и собеседниче Ангелов.

Кондак, гл. 8. Христовою любовию уязвися преподобне, | и Тому невозвратным желанием последовав, | всякое наслаждение плотское возненавидел еси, | и яко солнце отечеству твоему возсиял еси: тем и Христос даром чудес обогати тя. | Поминай нас чтущих прессветлую память твою, | да зовем ти: | радуйся, Сергие Богомудре.

Стихира на хвалитех. гл. 2. Преподобне отче, | измлада воздержанию прилежав постився, | орган был еси Святаго Духа, | тем и чудес дарования прием: | человеки научил еси преобидети маловременная, | ныне же неизреченным светом светле сиявши; | просвети наша мысли ходатайством твоим, | мудро Сергие.

Стихира на Господи воззвах, гл. 1. Зритель неизреченных откровений, | и сказатель вышних Божиих тайн, | сын Зеведеев, | написав нам Христово Евангелие, | богословити Отца, и Сына, и Духа Святаго, научил есть.

Стихира на литии, гл. 4. Возлег на перси Учителя Христа, | на вечери Господни, возлюбленно учениче, | оттуду познал еси неизреченная, | и небесный всем возгремел еси глас: | в начале бе Слово, и Слово бе к Богу, | и Бог бе Слово, | свет истинный, | просвешаяй всякаго человека в мир грядущаго, | Христос Бог и Спас душ наших.

Стихира на стиховне, гл. 6. Апостоле Христов, Евангелисте Богослове, | неизреченных таинник быв, | премудрости неизглаголанная нам возгремел еси учения, | еже в начале бе, уяснив верным, | и еже не бе отложив, | еретичествующих отревая словеса. | Наперсник явився и друг возлюблен, | яко же Исаия велегласнейший, и Моисей Боговидец, | дерзновение имея к Богу, | прилежно молися о душах наших.

Тропарь, гл. 2. Апостоле, Христу Богу возлюбленне! | ускори избавити люди безответны: | приемлет тя припадающа | Иже падша на перси приемый, | Его же моли Богослове, | и належащую мглу языков разгнати, | прося нам мира и велия милости.

Величание. Величаем тя, | Апостоле Христов и Евангелисте Иоанне Богослове, | и чтем болезни и труды твоя, | ими же трудился еси | во благовестии Христове.

Кондак, гл. 2. Величия твоя, девственниче, кто повесть? | точиши бо чудеса, | и изливаеши исцеления, и молишися о душах наших, | яко Богослов и друг Христов.

Стихира на хвалитех, гл. 8. Благовестниче Иоанне. | равноангельне девственниче, | Богослове Богонаученно православно миру пречистое ребро, кровь | и воду источившее проповедал еси, | им же вечную жизнь обретаем душам, нашим.

Стихира на Господи воззвах, гл. 4. Освящается небо и земля, | церковь же светится, | и людие вси веселятся | се бо Мати Божия, | со ангельскими воинствы, | со Предтечею и Богословом, | с Пророки же и Апостолы, невидимо вшедши, | за христианы молится Христу, | помиловати град и люди, | славящия тоя покрова праздник.

Слава, и ныне, гл. 8. Срадуются с нами умная вся чиноначалия, | духовно совокупльше чувственный лик, видяще Царицу и Владычицу всех, | многоименне верными славиму: | радуются же и дуси праведных, | сущии зрителие видения, | на воздусе молебно простираюшу всечестнеи Свои руце, | просящу умирения миру, | и царем державы и утверждения, | и спасения душ наших.

Стихира на литии, гл. 3. Наста днесь пресветлый праздник, пречистая Дево, | честнаго Твоего покрова, | паче солнца освещаеши люди, | верою от чиста сердца | Тебо истинную Матерь Божию исповедающия, | и Сыну Твоему вопиющия: | Христе Боже, молитвами Приснодевы, | чисто и без нетления рождшия Тя, | не предаждь врагом ратующим Твое достояние, | но яко милостив спаси в мире души наша.

Стихира на стиховне, гл. 2. Яко венцем пресветлым, всечистая Богородице, | покровом Твоим честным | церковь Божия приодеяся: | и светится радуюшися днесь, | и тайно ликовствует Владычице, | вопиющи Тебе: | радуйся одеяние честное, | и венче Божия славы; | радуйся едина славы совершение, | и вечное веселие; | радуйся, к Тебе притекающим пристанище и избавление, | и спасение наше.

Тропарь, гл. 4. Днесь благовернии людие | светло празднуем, | осеняеми Твоим, Богомати, пришествием, | и к Твоему взирающее пречистому образу, умильно глаголем: | покрой нас честным Твоим покровом, | и избави нас от всякаго зла, | молящи Сына Твоего Христа Бога нашего | спасти души наша.

Величание. Величаем Тя, | Пресвятая Дево, | и чтем покров Твой честный: | Тя бо виде святый Андрей на воздусе, | за ны Христу молящуюся.

Ирмосы, гл. 4, песнь 1. Отверзу уста моя, и наполнятся Духа...

Кондак, гл. 3. Дева днесь предстоит в церкви, | и с лики Святых невидимо за ны молится Богу: | Ангелы со архиереи покланяются, | Апостоли же со Пророки ликовствуют: | нас бо ради молит Богородица превечнаго Бога.

Стихира на хвалитех, гл. 6. Яко виде Тя пречудный Андрей на воздухе, | со архангельским множеством, со апостолы и пророки, | и множеством мучеников, | Сыну Твоему и Богу нашему | о граде и людех молящуюся Владычице, | и честным Твоим покровом покрывающую: | не оскудей и ныне Пречистая, | спасти изрядное достояние Твоего Сына, | пречестный праздник Твой празднующее, Многопетая.

Стихира на Господи воззвах, гл. 4. Яко звезды многосветлыя утверждени прехвальнии, | мир украсистс всечестнии, | и сей лучами просвещаете: | догматы благоверия, | и ереси тьму отгоните Святителие. | Молитеся от тли и бед избавитися, | верою творящим | всечестную память вашу.

Слава, гл. 6. Человецы Божии, и вернии раби, | служителие Господни, | мужие желания, сосуди избраннии, | столпи и утверждение Церкве, | царствия наследницы, | не премолчите, еже о нас вопити ко Господу.

Стихира на литии, гл. 2. Приидите верных собори | псаломски восплещем руками; | печальным утешителей, | о грешных ко Господу молитвенники, | иже вси везде теплых предстателей воспевающе, | Святителей, Петра, и Алексия, и Иону, и Филиппа, | похвалу земли Российстей, | и всего священства украшение, | реки милости воистинну | Божественнаго Христова смирения ревнителей, | подающаго миру велию милость.

Стихира на стиховне, гл. 3. Святителие всечестнии, | преблаженнии отцы, и чудотворцы, | угодницы Христовы, | Российстии первопрестольницы, | Петре и Алексие, Ионо и Филиппе: | иже пророческим житием просиявше, | апостольских сподобистеся даров. | Спасу служаще со Ангелы непрестанно, | молите избавитися нам от всякаго прегрешения, | и душам нашим подати мир и велию милость.

Тропарь, гл. 4. Первопрестольницы Российстии, | истиннии хранителие апостольских преданий, | столпи непоколебимии, православия наставницы, | Петре и Алексие, Ионо и Филиппе, | Владыку всех молите, | мир вселенней даровати, | и душам нашим велию милость.

Величание. Величаем вас | Святители Христовы Петре, Алексие, Ионо и Филиппе, | и чтем святую память вашу: | вы бо молите за нас | Христа Бога нашего.

Кондак, гл. 3. Во Святителех благочестно пожисте, | и люди к Богоразумию настависте, | и добре Богу угодисте: | сего ради от Него нетлением и чудесы прославистеся, | яко ученицы Божия благодати.

Стихиры на Господи воззвах, гл. 2. Яко златозарный рай, | и место прекрасное и Богопросвещенное, | и древо святое, Духом Святым осененное, | вместилище света невечерняго, | Тебе ведущим, | ясно немерцающися Божественною лучею, | Младенцем Твоим светиши всей твари; | Его же молящи, Царице Богородице, | спаси ИМПЕРАТОРА и люди, | к Тебе прибегающия от всех бед.

Слава и ныне, гл. 8. Приидите возрадуемся державней Заступнице рода нашего, | Царице Богородице, | приидите к тихому Ея и чудному, | почитаемому Ангелы, | честному поклонимся образу: | дарует бо Богородица верным обильныя дары целебныя, | от неистощимаго источника святыя иконы, | неоскудную благодать источающи; | тьмы избавляет нас искушений и бед, и всякаго греха, | благочестно и Богоприятно прославляющих, и чтущих | светлую и чудную Богоматере святую икону. | Тем воспевающе воззовем Первообразней: | радуйся любезная миру Помоще, | во спасение душ наших.

Стихира на литии, гл. 2. Яко воистинну древняго кивота пречестнее, | егда Давид собрав чины ликовствоваше, | ныне Твоя Богородице икона: | ей же предстоят архиереев собори, | и с чинми Ангел царие же и князи, | и все христоименитых людей множество, | достойно блажат Тя Матерь Божию, | и прославляют раболепно, и чествуют и покланяются. | и молятся Тебе по Бозе: | да мир умириши в православии, | и царския скипетры утвердиши, | и спасеши от всех зол Твоя рабы, | яко едина благословенная.

Стихира на стиховне, гл. 5. Воспоем, людие, светло Давидскую песнь, | Отроковице Невесте Божии, | и Матери Царя Христа; | предста Царица одесную Тебе, Владыко, | рясны златыми одеяна, | и преукрашена Божественными благолепотами. | Сию убо яко избранную и добрую в женах, | паче всего мира удобрив, | благоволил еси родитися из Нея | великия ради милости: | и Сию помощницу людом Твоим даровал еси, | спасати и покрывати от бед, | всемогущею Твоею и Божественною силою, | Ея же молитвами, | Христе Боже помилуй нас.

Тропарь, гл. 4. Заступница усердная, | Мати Господа Вышняго, | за всех молищи Сына Твоего Христа Бога нашего, | и всем твориши спастися, | в державный Твой покров прибегающим, | Всех нас заступи, | о Госпоже Царице и Владычице, | иже в напастех и скорбех, и в болезнех | обремененных грехи многими, | предстоящих и молящихся Тебе умиленною душею, и сокрушенным сердцем, | пред пречистым Твоим образом со слезами, | и невозвратно надежду имущих на Тя | избавления всех зол, | всем полезная даруй, | и вся спаси, Богородице Дево: | Ты бо еси Божественный покров рабом Твоим.

Величание. Достойно есть величати Тя, Богородице, | честнейшую Херувим | и славнейшую | без сравнения Серафим.

Кондак, гл. 8. Притецем людие к тихому сему и доброму пристанищу, | скорой Помощнице, готовому и теплому спасению, покрову Девы. | Ускорим на молитву, и потщимся на покаяние: | источает бо нам неоскудныя милости Пречистая Богородица: | предваряет на помощь, | и избавляет от великих бед и зол, | благонравныя и Богобоящияся рабы Своя.

Стихира на хвалитех, гл. 4. Прославим, вернии, | обрадованную Богородицу, | паче же во устех наших имамы всегда | святое и благословенное имя Ея, | непрестанно прибегающе к пречистей Ея и цельбоносней иконе: | тою бо обретаем яже на земли вся благая и полезная. | и сущих на воздусе от демонов запинаний избавляемся, | яко Мати рождшая всех Творца, | спасает от бед души наша.

Стихира на Господи воззвах, гл. 4. Трисолнечнаго Божества | предстатель светлейший Михаиле: | являлся Архистратиже, | с горними силами зовеши радуяся: | Свят еси Отче, | Свят еси собезначальное Слово, | Свят еси и Святый Душе, | едина слава, едино царство и естество, | едино Божество и сила.

Слава, гл. 6. Срадуйтеся нам вся ангельская чиноначалия, | первостоятель бо ваш и наш предстатель, великий Архистратиг, | в днешний день, в честнем его храме, | преславно являлся освящает. | Тем же по долгу воспевающе, | тому возопиим: | покрый нас кровом крил твоих, | величайший Михаиле Архангеле.

Стихира на литии, гл. 1. Умных сил Архистратизи, | предстояще непрестанно Владычню престолу, | молитеся ко Господу, | мир миру даровати, | и душам нашим велию милость.

Стихира на стиховне, гл. 8. Яко чиноначальник и поборник, | и ангелов началовождь Архистратиже, | всякия нужды и скорби, | недугов и лютых грехов свободу | верно воспевающия, и молящия тя славно, | яве яко невеществен Невещественнаго зря, | и неприступным светом Владычния славы осияем: | Той бо чсловеколюбно плоть нас ради от Девы прият, | спасти восхотев человечество.

Тропарь, гл. 4. Небесных воинств Архистратизи, | молим вас присно мы недостойнии: | да вашими молитвами оградите нас | кровом крил невещественныя вашей славы, | сохраняюще ны припадающия прилежно, и вопиющия: | от бед избавите ны, | яко чиноначальницы вышних сил.

Величание. Величаем вас, | Архангели и Ангели | и вся воинства, | Херувими и Серафими, | славящия Господа.

Кондак, гл. 2. Архистратиги Божии, | служителие Божественныя славы, | Ангелов начальницы, | и человеков наставницы, | полезное нам просите, и велию милость, | яко безплотных Архистратизи.

Стихира на хвалитех, гл. 5. Идеже осеняет благо дать твоя Архангеле, | оттуду диаволя прогонится сила: | не терпит бо света твоего видети спадый денница. | Тем молим тя, | огненосныя его стрелы, | яже нань движимыя, угаси ходатайством твоим, | избавляя нас от соблазнов его, | достохвальный Михаиле Архистратиже.

Стихира на Господи воззвах, гл. 2. В Мирех пожив чувственно, | миро воистину явился еси, | миром помазався умным, | Свято Николае, Святителю Христов: | и благоухаеши лица, | верою и любовию твою всеславную память совершающих присно, | разрешая бед и напастей и скорбей сих, отче, | к Богу твоими молитвами.

Слава, гл. 6. Святителей удобрение, и отцов славу, | источника чудес и верных заступника великаго, | сошедшеся, о празднолюбцы! | песненными похвалами воспоим, глаголюще: | радуйся миряном хранителю, | и первоседателю честный, и столпе неподвижимый, | радуйся светильниче всесветлый, | иже мирския концы просвещая чудесы. | Радуйся скорбящих Божественная радосте, | и обидимых теплый предстателю. | И ныне всеблаженне Николае, | не престай моляся Христу Богу, | о верою и любовию чтущих приснорадостную и всепразднственную память твою.

Стихира на литии, гл. 2. Отче Николае, | аще и Мирская страна молчит, | но мир весь иже тобою просвещенный, | мира же благоухании, и чудес множества, | взывает благохвальными песньми: | и спасшийся тобою осужденнии, | с сущими в Мирех, и мы поюще вопием: | моли спастися душам нашим.

Стихира на стиховне, гл. 6. Человече Божии, и верный рабе, | слуго Господень, | мужу желаний, сосуде избранный, | столпе и утверждение Церкве, Царствия наследниче, | не премолчи вопия за ны ко Господу.

Тропарь, гл. 4. Правило веры и образ кротости.

Величание. Величаем тя, Святителю отче Николае.

Прокимен, гл. 4. Честна пред Господом | смерть преподобных Его.

Стихира по 50-м псалме, гл. 6. Наследниче Божий, сопричастниче Христов, | служителю Господень, Святе Николае, | по имени твоему тако и житие твое: | спросия бо седине разум, | свидетельствование светлость лица твоего | душевное незлобие, | извествоваше кротость слова молчаливое. | Жизнь твоя славна, | и успение со Святыми: | моли о душах наших.

Кондак, гл. 3. В Мирех, Святе, священнодействитель показался еси, | Христово бо, Преподобие, Евангелие исполнив, положил еси душу твою о людех твоих, и спасл еси неповинныя от смерти: | сего ради освятился еси, | яко великий таинник Божия благодати.

Стихира на хвалитех, гл. 1. Воззрев неуклонно на высоту разума, | и узрев неявленно премудрости глубину, | твоими ученьми мир обогатил еси, отче, | о нас присно молися Христу, Святителю Николае.

Стихиры на Господи воззвах, гл. 8. Сходяй Спас к роду человеческому, | прият пеленами повитие, | не возгнушася плотскаго обрезания | осмодневен по Матери, безначальный по Отцу. | Тому вернии возопиим: | Ты еси Бог наш, помилуй нас.

Св. Василию, гл. 4. Иже тезоименитне наречен быв Царствия, | егда царское ты священие, | Христов язык свят | любомудрием и художеством, отче, упасл еси: | тогда венцем тя украси Царствия, Василие, | царствующими царствуяй и всех Господь, | иже рождшему соединенный, | присносущный Сын и собезначальный. | Его же моли, спасти и просветити души наша.

Слава, и ныне. Сходяй Спас к роду...

Стихира на литии, гл. 6. Излияся благодать во устнах твоих, преподобно отче, | и был еси пастырь Христовы Церкве, | уча словесныя овцы, | веровати в Троицу единосущную, | во едином Божестве.

Слава, и ныне. Сходяй Спас к роду...

Стихира на стиховне, гл. 1. О Божественная и священная Христовы Церкве пчело, | Василие всеблаженне! | ты бо Божественнаго желания жалом тебе вооружив, | богомерзких ересей хулы уязвил еси, | и душам верных благочестия сладость сокровиществовал еси: | и ныне Божественнаго рая нетленныя проходя пажити, | поминай и нас предстоя Троице еднносущней.

Слава, и ныне, гл. 8. Не устыдеся Всеблагия Бог | плотским обрезанием обрезатися, | по даде Самаго Себе образ и начертание, | всем ко спасению: | ибо закона Творец законная исполняет, | и пророков проречения яже о Нем. | Иже вся содержав горстию, | и пеленами повивыйся, | Господи, слава Тебе.

Тропарь, гл. 1. Во всю землю изыде вещание твое, | яко приемшую слово твое, | им же Боголепно научил еси, | естество сущих уяснил еси, человеческия обычаи украсил еси, | царское священие отче преподобие: | моли Христа Бога | спастися душам нашим.

– гл. 1. На престоле огнезрачнем | в вышних седяй со Отцем безначальным. | и Божественным Твоим Духом, | благоволил еси родитися на земли, | от Отроковицы неискусомужныя Твоея Матере, Иисусе: | сего ради и обрезан был еси яко человек осмодневный | Слава всеблагому Твоему совету: | слава смотрению Твоему: | слава снизхождению Твоему, едине Человеколюбче.

Прокимен, гл. 4. Уста моя возглаголют.

Стихира по 50-м псалме, гл. 6. Излияся благодать.

Ирмосы канона, гл. 2. Песнь 1. Грядите людие, | поим песнь Христу Богу, | раздельшему море, и наставльшему люди, | яже изведе из работы египетския, | яко прославися.

–      3. Утверди нас в Тебе, Господи, | древом умерщвлен грех | и страх Твой всади | в сердца нас поющих Тя.

Кондак праздника, гл. 3. Всех Господь обрезание терпит, | и человеческая прегрешения яко благ обрезует, | дает спасение днесь миру: | радуется же в вышних | и Создателем иерарх и светоносный, | Божественный таинник Христов Василий.

–      4. Услышах Господи, | слух Твоего смотрения, | и прославих Тя, едине Человеколюбче.

–      5. Света подателю, | и веков Творче, Господи, | во свете Твоих повелений настави нас: | разве бо Тебе иного Бога не знаем.

– 6. Бездна мя многа греховная окружает, | и вопию Ти пророка подражаяй: | от тли мя, Господи, возведи.

Кондак Святаго, гл. 4. Явился еси основание непоколебимое Церкве, | подая всем некрадомое господство человеком, | запечатлей твоими веленьми, | небоявленне Василие преподобне.

–      7. Образу златому на поле Деире служиму, | трие Твои отроцы небрегоша безбожнаго веления: | посреде же огня ввержени орошаеми пояху: | благословен еси Боже отец наших.

–      8. Неизреченною мудростию составльшаго всяческая Бога Слова, | и от не сущих во еже быти приведшаго, | благословите дела яко Господа, | и превозносите во вся веки.

Припевы. Величай, душе моя, | по закону плотию обрезавшагося Господа.

–      Величай, душе моя, | во иерарсех Василия Великаго.

–      Величай, душе моя, | честнейшую небесных воинств, | Деву Пречистую Богородицу.

–      9. Яже прежде солнца | светильника Бога возсиявшаго, | плотски к нам пришедшаго из боку Девичу, | неизреченно воплотившая, | благословенная Всечистая: | Тя, Богородице, величаем.

Стихиры на хвалитех, гл. 5. Терпит обрезание плотию | из Отца кроме сечения же и тления, | неизреченно рождься яко Слово, | и яко Бог от Бога, в непреложнем пребываяй Божестве: | тем по закону, паче закона бывый, | клятвы законныя избавляет вся, | и свыше благословение дарует. | Тем же преблагое Его схождение восхваляюще, | поем и благодарственно прославляем, | Того моляще, | душам нашим даровати велию милость.

Слава, гл. 6. Излияся благодать.

И ныне, гл. 8. Сходяй Спас к роду.

Прокимен на литургии, гл. 6. Спаси, Господи, люди Твоя.

– Василию, гл. 1. Уста моя возглаголют.

Стихира на Господи воззвах, гл. 1. О преславное чудо, | подвижник благочестия в Сарове является | и молитвенник к Богу теплый | Серафим пречудный нам бывает: | веселися, обитель Саровская | имущи в себе мощи преподобнаго: | взыграйте, православных множества, | предивнаго Серафима имуще | в бедах заступника и вопиюще к нему: | радуйся, светильниче Российския земли, | тьмы сопротнвных далече отревай, | и Господеви молися | даровати душам нашим | мир и велию милость.

Стихира на литии, гл. 1. Кими похвальными венцы | венчаим подвижника великаго, | преподобнаго Серафима? | той бо яко наставник добрый | в твердости веры и добродетели явлен, | богодуховными учении и равноангельным житием | приходяшия к нему научая. | Тем же вопием ему: | молися, преподобие, Христу Богу | православную веру утвердити | и душам нашим спастися.

Стихира на стиховне, гл. 5. Радуйся, Ангелом собеседниче, | преподобие Серафиме, | благочестно бо на земли пожив, | многих приходящих к тебе | страху Господню поучал еси. | Благодатию Пресвятаго Духа озаряем, | зрел еси будущая, яко настоящая, | и умиления и радости | многих скорбящих душею исполнял еси: | тем же молим ти ся, | молися Господеви о чтущих тя.

Тропарь, гл. 4. От юности Христа возлюбил еси, блаженне, | и Тому единому работати пламенне вожделев, | непрестанною молитвою и трудом | в пустыни подвизался еси, | умиленным же сердцем любовь Христову стяжав, | избранник возлюблен Божия Матере явился еси. | Сего ради вопием ти: | спасай нас молитвами твоими Серафиме, | преподобие отче наш.

Кондак, гл. 2. Мира красоту и яже в нем тленная оставив, преподобие, | в Саровскую обитель вселился еси: | и тамо ангельски пожив, | многим путь был еси ко спасению: | сего ради и Христос тебе, отче Серафиме, прослави, | и даром исцелений и чудес обогати. | Тем же вопием ти: | радуйся, Серафиме, преподобие отче наш.

Стихира на хвалитех, гл. 8. Приспе всечестный праздник обители Саровския, | память преподобнаго Серафима, | ему же ныне сице везопиим: | радуйся, постником светило и утверждение, | иноком звездо, яко же волхвом, | показуюшая путь в небесныя обители, | свяшенником похвало преславная, | любве и целом дрия источниче приснотекущий, | светильниче пресветлый духовнаго разсуждения: | радуйся, правило добродетелем великое.

Стихира на Господи воззвах, гл. 2. Киими похвальными венцы | увязом Богомудрии учители, | языки словенския во тьме неведения | и сени смертней седящия, | светом Евангелия просветившия, | Троицы единосущныя велегласныя проповедники; | ими же и мы, яко дивия маслина, | к благоплодному корени православия прицепихомся, и прияхом от Христа Бога | мир и велию милость.

Стихира на стиховне, гл. 8. Светлостию жития вашего учителие равноапостольнии, | яко звезды небесныя на тверди церковней просияли есте, | и мрежею учений ваших многия языки Христу уловивше, | ко свету неприступну востекли есте, | идеже со Ангелы ныне водворяюшеся, | мольбу сотворите о нас, | священную память вашу о Господе празднующих.

Тропарь, гл. 4. Яко апостолом единонравнии | и словенских стран учителие, Кирилле и Мефодие Богомудрии, | Владыку всех молите, вся языки словенския утвердити в православии и единомыслии, | умирити мир, | и спасти души наша.

Величание. Величаем вас, | святии равноапостольнии Мефодие и Кирилле, | вся словенския страны ученьми просветившия | и ко Христу приведшия.

Прокимен, гл. 4. Священницы Твои облекутся в правду, | и преподобнии Твои возрадуются.

Кондак, гл. 3. Священную двоицу просветителей наших почтим, | Божественных писаний преложением | источник Богопознания нам источивших, | из него же даже до днесь неоскудно почерпающе, | ублажаем нас Кирилле и Мефодие, | престолу Вышняго предсоящих | и тепле молящихся о душах наших.

Стихира на хвалитех, гл. 4. Кирилле и Мефодие Богомудрии | апостольским стопам последующе, ко взысканию людей заблуждших единомудренно подвигшеся, | яко орли скоропарящия, | страны словенския облетели есте, | яже светом Богопознания озаривше, | приведосте ко Иисусу человеколюбцу | и Спасу душ наших.

Стихира на Господи воззвах, гл. 2. Киими похвальными венцы | увязем Петра и Павла, | разделеные телссы и совокупленье духом, | Богопроповедников первостоятели? | оваго убо, яко апостолов предначальника: | оваго же, яко паче инех трудившася. | Сих бо воистинну достойно бессмертныя славы | венцы венчает Христос Бог наш, | имеяй велию милость.

Стихира на литии, гл. 5. Премудрость Божия, соприсносущное Слово Отчее, | яко же в Евангелиях предрече, | многоплодныя лозы, | вы есте всехвальнии апостоли: | иже грозд зрел и красен во ветвех ваших носящий. | Его же вернии ядуще, | услаждаем вкус к веселию Петре каменю веры, | и Павле похвало вселенныя, | утвердите стадо, еже стяжаете ученьми вашими.

Стихира на стиховне, гл. 6. Праздник радостен возсия концем днесь, | всечестная память премудрых апостол, | и верховных Петра и Павла. | Тем же и Рим срадуется ликовствуя, | в песнех и пениих. | Празднуем и мы братие, | всечестный сий день совершивше. | Радуйся Петре апостоле, | искренний друже твоего Учителя, | Христа Бога нашего; | радуйся Павле вселюбезнейший, | и проповединче веры, и учителю вселенныя: | яко имея дерзновение, | супруже святоизбранный, | Христа Бога нашего молите | спастися душам нашим.

Тропарь, гл. 4. Апостолов первопрестольницы, | и вселенныя учителие, Владыку всех молите, | мир вселенней даровати, | и душам нашим велию милость.

Величание. Величаем вас, | Апостоли Христовы, | весь мир ученьми своими просветившия, | и вся концы | ко Христу приведшия.

Кондак, гл. 2. Твердыя и Боговещанныя проповедатели, | верх Апостолов Твоих, Господи, | приял еси в наслаждение благих Твоих и покой: | болезни бо онех и смерть приял еси, | паче всякаго всеплодия, | Едине сведый сердечная.

Стихира на хвалитех. гл. 4. С небесе благодать прием, | егда вопрошение учеником Спас | дванадесяточисленным рече Апостолом: | кого Мя глаголют человецы быти? | тогда убо лучший Апостолов Петр, | богословствуя отвеща, ясно возопив: | Ты еси Христос Живаго Бога Сын. | Тем же достойно ублажается, | яко свыше прием откровение, | вязати же и решити праведно прием.

Стихира на Господи воззвах, гл. 4. Вторый ты был еси Константин, словом и делом: | он во христианское время родися, | и многа лета во Еллинстве сотворил есть, | ты же от язык родився, | но возлюбил еси возлюбившаго тя Христа, | к Нему же возшел еси радуяся. | Его же моля не престай о чтущих память твою.

Стихира на литии, гл. 2. Днесь возсия благочестиваго князя Владимира память, | яко миро излиянное: | Христа бо возлюбив, идолы преобидев, | церкви Распеншемуся нас ради на земли воздвиже, | и на небесех прият царство и венец.

Стихира на стиховне, гл. 8. О преславнаго чудесе! | величавый разум погубляется днесь, и рыдают вся лукавая воинства, | видяще ветвь сушу вседичну, | силою Божиею Богонасажденну и прославляему, | и светло венчаваему от Бога, | великаго Владимира, | нашего вернаго начальника.

Тропарь, гл. 4. Уподобился еси купцу, ищущему добраго бисера, | славнодержавный Владимире, на высоте стола седя матере градов | Богоспасаемаго Киева: | испытуя же и посылая к царскому граду | уведети православную веру, | обрел еси бесценный бисер, Христа, избравшаго тя яко втораго Павла, | и оттрясшаго слепоту во святей купели | душевную, вкупе и телесную: | тем же празднуем твое успение | людие твои суще. | Моли спастися державы твоея Российския начальником, | Христолюбивому ИМПЕРАТОРУ, | и множеству владомых.

Величание. Величаем тя | святый Равноапостольный княже Владимире, | и чтем святую память твою, | идолы поправшаго | и всю Российскую землю | святым крещением просветившаго.

Кондак, гл. 8. Подобствовав великому Апостолу Павлу, | в сединах всеславне Владимире, | вся яко младенческая мудрования, | яже о идолех тщания оставл, | яко муж совершенный, | украсился еси Божественнаго крещения багряницею: | и ныне Спасу Христу в веселии предстоя, | моли спастися державы Российския начальником, | и множеству владомых.

Стихира на хвалитех, гл. 4. Оружие крепкое князю нашему дал еси, Господи, | крест Твой честный, | им же поживе на земли праведно, | просияв благочестием, | и Царству Небесному сподобися милосердием Твоим. Тем же Твое человеколюбное смотрение славим, | Иисусе всесильне, | Спасе душ наших.

Стихира на Господи воззвах, гл. 1. Иже Фесвитянина Илию, | колесницею огненною, | от земли щедро преложивый, Слове: | сего молитвами спаси нас верно Тя славящих, | и того творящих радостно | Божественную память и спасеную.

Стихира на литии, гл. 4. Светозарен облак Божественный | пророче явился еси, | искапая тучу Богоразумия всем верным, | напаяя богатно вином веселии всех, | верою притичущих к Божественнейшему храму твоему. | Тем же молим тя, | Божественный пророче, и Боговидче Илие, | победы на враги ИМПЕРАТОРУ нашему даруй, | и душам нашим велию милость.

Стихира на стиховне, гл. 6. Пророче, проповедниче Христов, престола величествия никогда же отступаеши, | и коемуждо болящу присно предстоиши, в вышних служа, | вселенную благословляеши. | Всюду прославляем, | проси очищения душам нашим.

Тропарь, гл. 4. Во плоти Ангел, | пророков основание, | вторыя Предтеча пришествия Христова, Илия славный, | свыше пославый Елиссееви благодать, | недуги отгоняти, | и прокаженныя очищати. | Тем же и почитающим его точит исцеления.

Прокимен, гл. 4. Ты иерей во век, | по чину Мелхиседекову.

Кондак, гл. 2. Пророче и провидче великих дел Бога нашего, | Илие великоимените, | вещанием твоим уставивый водоточныя облака, | моли о нас единаго Человеколюбца.

Стихира на хвалитех, гл. 8. Егда ты пророче чудный, | Богу добродетелию и житием чистым, срастворився с Ним, | область прием, тварь по разуму измерил еси, | и двери дождевныя волею затворил еси, | и свыше огнь низвел еси, | и враги погубил еси, | моли спастися душам нашим.

Стихира на Господи воззвах, гл. 6. Рождеству сотворяем у бесстуднаго Ирода, | скверныя плясавицы исполняшеся сложение клятвы: | Предтечева бо глава отсекшися, | яко снедь ношашеся на блюде возлежащим. | О пира мерзка, | непреподобна деяния, и убийства исполнена! | Но мы Крестителя, | яко в рожденных женами больша, | достойно чтуще ублажаем.

– Паки Иродиа бесится, паки смущается. | О плясания льстивна, и пира с лестию! | Креститель усекашеся, и Ирод смущашеся. | Молитвами, Господи, Твоего Предтечи, | мир подаждь душам нашим.

Стихира на литии, гл. 5. Беззаконнаго деяния обличения убежати Ирод умыслив. | главу твою Предтече, | беззаконней жене предаде пакостно: | не разуме бо окаянный обличая себе, | на блюде обнося ю. | Но яко чистоты детельный учитель, | и покаяния наставник спасительный, | полней, Крестителю Христов, | от страстей безчестия избавити нас.

Стихира на стиховне, гл. 2. Покаяния проповедниче Иоаине Крестителю, | отсечене бывшей твоей главе, | землю освятил еси, | зане закон Божий верным уяснил еси, | и беззаконие потребил еси. | Яко предстоя престолу небеснаго Царя Христа, | Того моли, помиловати души наша.

Тропарь, гл. 2. Память праведнаго с похвалами, | тебе же довлеет свидетельство Господне Предтече: | показал бо ся еси воистину и пророков честнейший, | яко и в струях крестити сподобился еси Проповеданнаго. | Тем же за истину пострадав радуяся, | благовестил еси и сущим во аде Бога явльшагося плотию, | вземлющаго грех мира, | и подающаго нам велию милость.

Величание. Величаем тя, Крестителю Спасов Иоанне, | и почитаем вси честныя твоея главы | усекновение.

Кондак, гл. 5. Предтечево славное усекновение, | смотрение бысть некое Божественное: | да и сущим во аде Спасово проповесть пришествие. | Да рыдает убо Иродиа, | беззаконное убийство испросивши: | не закон бо Божий, ни живый век возлюби, | но притворный, привременный.

Стихира на хвалитех, гл. 8. О преславнаго чудесе! | Священную главу, и Ангелом говейную, | нечистая блудница ношаше отроковица, | обличившую деяние беззаконно, прелюбодейце матери принесе. | О неизреченнаго Твоего терпения человеколюбче! | Ниже Христе спаси души наша, | яко Един благоутробен.

Стихира на Господи воззвах, гл. 6. Но имени твоему тако и житие твое, | благоверный княже Александре: | мужеством бо на земли и добрым правлением, | ныне же на небесе молитвами | помоществуеши людем твоим. | Тем же тя и в тебе славимаго | во святых Своих Бога почитаем.

Стихира на литии, гл. 4. Да веселится днесь новый Израиль, | о Сотворшем его, | и сынове Российстии да возрадуются | о князе своем благоверном Александре Невском: | се бо царскою диадимою | венча его Царь царствующим.

Стихира на стиховне, гл. 6. Исповедавшаго имя Иисусово пред человеки, | исповедует тя Иисус пред Отцем Своим на небеси: | и мы на земли воспеваем тя, | благоверне Александре, | яко молящагося о душах наших.

Тропарь, гл. 6. Познай свою братию, Российский Иосифе, | не в Египте, но на небеси царствующий, благоверный княже Александре, | и приими моления их, | умножая жита людем плодоносием земли твоея, | грады владычествия твоего ограждая молением, | наследником твоим благоверным ИМПЕРАТОРАМ нашим на сопротивныя споборствуя.

Величание. Величаем тя, | благоверный княже Александре, | и чтем святую память твою: | ты бо молиши о нас | Христа Бога нашего.

Прокимен. Вознесох избраннаго | от людей Моих.

Кондак. Яко же сродники твои Борис и Глеб | явишася тебе с небесе в помощь, | подвизающемуся на велгера Свейскаго и воев его: | тако и ты ныне, блаженне Александре, прииди в помощь твоим сродником, | и побори борющия ны.

Стихира на хвалитех. гл. 8. Подвигом добрым подвизался еси, | течение скончал, веру соблюл, | благоверный княже Александре. | прочее же соблюдсея тебе венец правды, | ниже венча тя истинный Мздовоздаятель: | Того моли, преблаженне, | врученному тебе стаду, | сыном Российским спастися.