Тропари и кондаки Богородичных, великих Святых и особых праздников

Тропарь, гл. 2. Всея твари Содетелю, | времена и лета во Своей власти положивый, | благослови венец лета благости Твоея, Господи, | сохраняя в мире ИМПЕРАТОРА и град Твой, | молитвами Богородицы, и спаси ны.

Кондак, гл. 2. В вышних живый, Христе Царю, | всех видимых и невидимых Творче и Зиждителю, | иже дни и нощи, времена и лета сотворивый, | благослови ныне венец лета: | соблюди и сохрани в мире православнаго ИМПЕРАТОРА, | и град и люди Твоя, Многомилостиво.

Тропарь, гл. 8. Уст твоих, яко же светлость огня, возсиявши благодать | вселенную просвети; | не сребролюбия мирови сокровища сниска, | высоту нам смиренномудрия показа. | По твоими словесы наказуя, | отче Иоанне Златоусте, | моли Слова Христа Бога, спастися душам нашим.

Кондак, гл. 6. От небес приял еси Божественную благодати, и Твоими устнами учиши покланятися в Троице Единому Богу, | Иоанне Златоусте, всеблаженне преподобие, | достойно хвалим тя: еси бо наставник, | яко Божественная являя.

Тропарь, гл. 4. Яко необоримую стену | и источник чудес | стяжавше Тя раби Твои, Богородице Пречистая, | сопротивных ополчения низлагаем, | тем же молим Тя: | мир граду Твоему даруй, | и душам нашим велию милость.

Кондак, гл. 4. Честнаго образа Твоего | Знамение празднующе людие Твои, Богородительнице, | им же дивную победу на сопротивныя | граду Твоему даровала еси, | тем же Тебе верою взываем: | радуйся, Дево, христиан похвало.

Тропарь, гл. 2. Верою праотцы оправдал еси, | от язык теми предобручивый церковь: | хвалятся во славе святии, | яко от семене их есть плод благословен, | бессеменно рождшая Тя. | Тех молитвами, Христе Боже, помилуй нас.

Кондак, гл. 6. Рукописаннаго образа не почетше, | но неописанным существом защитившеся треблаженнии, | в подвизе огня прославистеся, | среде же пламене нестерпимаго стояще, | Бога призвасте: | ускори, о Щедрый, | и потщися яко милостив в помощь нашу, | яко можеши хотяй.

Тропарь, гл. 4. Ревнителя Илию нравы подражая, | Крестителю правыми стязями последуя, | отче Антоние, | пустыни был еси житель, | и вселенную утвердил еси молитвами твоими. | Тем же моли Христа Бога, спастися душам нашим.

Кондак, гл. 2. Житейския молвы отринув, | безмолвно житие скончал еси, | Крестителя подражаяй всяким образом преподобнейший: | с ним убо тя почитаем, | отцев начальнике Антоние.

Тропарь, гл. 1. Пастырская свирель богословия твоего. | риторов победи трубы: | яко же бо глубины Духа изыскавшу, | и доброты вещания приложишася тебе: | но моли Христа Бога отче Григорие, | спастися душам нашим.

Кондак, гл. 3. Богословным языком твоим сплетения риторская разрушивый славне, | Православия одеждею свыше истканною Церковь украсил еси: | юже и носящи с нами зовет твоими чады: | радуйся отче, | богословия уме крайнейший.

Тропарь, гл. 4. Яко Апостолов единонравнии | и вселенныя учителие, | Владыку всех молите, | мир вселенней даровати, | и душам нашим велию милость.

Кондак, гл. 2. Священныя и Боговещанныя проповедники, | верх учителей, Господи, | приял еси в наслаждение благих Твоих и упокоение: | труды бо онех и смерть приял еси | паче всякаго всеплодия, | едине прославляй Святыя Твоя.

Тропарь, гл. 4. Преудобрен во архиереех, святителю Феодосие, | был еси светило своему стаду, | таже преставился еси в вечныя обители, | умоли у престола Царя славы, | избавится нам от находящих на ны зол, | и спастися душам нашим, | святе, молитвами твоими.

Кондак, гл. 4. Пастырей Начальнику Христу трудился еси, | святителю Феодосие, | на пажити духовней | питая словесныя твоя овцы, | и приял еси от Христа Спаса целебный дар, | целити от немощи душевныя и телесныя, | всякаго с верою приходящаго к целебным твоим мощем. | Моли, святе, о призывающих имя твое, | от наветов вражиих спастися душам нашим.

Тропарь, гл. 4. От святыя иконы Твоея, | Владычице Богородице, | исцеления и цельбы подаются обильно, | с верою и любовию приходящих к ней, | тако и мою немощь посети, | и душу мою помилуй, Благая, | и тело исцели благодатию Твоею, Пречистая.

Кондак, гл. 8. Аще и в море ввержена бысть святая икона Твоя, Богородице, | от вдовицы не могущия спасти ее от врагов: | но явилася хранительница Афона, | и вратарница обители Иверския, | врагов устрашающая, | и в православной Российстей стране, | чтущих Тя от всех бед и напастей избавляющая.

Тропарь, гл. 4. Яко пленных свободитель и нищих защититель, | немотствующих врач, | царей поборниче, | Победоносче Великомучениче Георгие, | моли Христа Бога | спастися душам нашим.

Кондак, гл. 4. Возделан от Бога показался еси благочестия делатель честнейший, | добродетелей рукояти собрав себе; | сеяв бо в слезах, веселием живши, | страдальчествовав же кровию Христа приял еси, | и молитвами, святе, твоими | всем подавши прегрешений прощение.

Тропарь, гл. 3. Днесь восхваляем тя преподобная благоверная великая княгиня инокиня Анно, | яко лоза плодовита процвела еси посреде терния | во всех благочестивых великих княгинях, | во инокинях же, аки крин процвете в винограде во граде Кашине добродетелями своими, | и всех удивила еси чудным своим житием, тем угодила еси Христу Богу: | к Нему же взыде радующеся и веселящися, | и ныне пребываеши с лики преподобных жен, | наслаждаюшися райския красоты и веселия Молим тя, моли о нас Человеколюбца Христа Бога нашего, | даровати нам мир и велию милость.

Кондак, гл. 4. Яко пресветлая звезда | явилася еси в Русстей земли во граде Кашине | преподобная мати Анно, | во всех благочестивых верных женах, чистым своим и непорочным житием | во инокинях же аки крин процвела еси, | совершенными своими труды и подвиги, | и взыде к Вышнему граду радующеся и веселящися, | яко добре соверши свое течение; | и ныне честныя твоя мощи, аки бисерие драгое | явишася на исцеление всем приходящим ти с верою. | Тем вопием ти: | радуйся всекрасная душею, | и моли Христа Бога о спасении душ наших.

Тропарь, гл. 1. Богатство видев добродетелей Иовлих, | украсти кознствоваше праведных враг, | и растерзав столп телесе, | сокровище не украде Духа: | обрете бо вооруженну непорочнаго душу, | мене же и обнажив плени. | Предварив убо мя прежде конца, избави мя льстиваго, Спасе, и спаси мя.

Кондак, гл. 8. Яко истинен и праведен, благочестив и непорочен. | освящен же явлься всеславне, Божий угодниче истинный, | просветил еси мир в терпения твоем, | терпеливейший и доблейший: | тем же вси, Богомудре, память твою воспеваем.

Тропарь, гл. 8. Креста Твоего образ ныне паче солнца возсия, | его же от горы святыя даже до лобнаго места простерл еси, | и в нем Твою, Спасе, крепость уяснил еси, | сим укрепляя и верныя наша цари: | их же и спасай выну в мире, | молитвами Богородицы, Христе Боже, и спаси нас.

Кондак, гл. 4. Отверзый небеса заключенная, | на небеси пресветлыя лучи, | на земли возсия пречистый Крест: | тем же сияние его действа приемше, | к незаходимому наставляемся свету, | и во бранех имамы его оружие мира непобедимую победу.

Тропарь, гл. 4. Приспе день светлаго торжества, | град Барский радуется, | и с ним вселенная вся ликовствует, | песньми и пеньми духовными: | днесь бо священное торжество, | в принесение и многоцелебных мощей Святителя и Чудотворца Николая, | яко же солнце незаходимое возсия, | светозарными лучами, | разгоняя тьму искушений же и бед от вопиющих верно: | спасай нас яко предстатель наш великий Николае.

Кондак, гл. 3. Взыде, яко звезда от востока до запада, | твоя мощи, Святителю Николае, | море же осветися шествием твоим, | и град Барский приемля тобою благодать: | нас бо деля явился еси, чудотворец изящный, предивный и милостивый.

Тропарь, гл, 4. Яко апостолом единонравнии | и словенских стран учителие, | Кирилле и Мефодие Богомудрии, | Владыку всех молите, | вся языки словенския утвердити в православии и единомыслии, | умирити мир, | и спасти души наша.

Кондак, гл. 3. Священную двоицу просветителей наших почтим. | Божественных Писаний преложением | источник Богопознания нам источивших, | из него же даже до днесь неоскудно почерпающе, | ублажаем вас Кирилле и Мефодие, | престолу Вышняго предстоящих | и тепле молящихся о душах наших.

Тропарь, гл. 2. Царскую диадиму обагрил еси кровию твоею | Богомудре мучениче, | за скиптр крест в руку приим, | явился еси победоносец, | и жертву непорочну Владыце принесл еси себе: | яко бо агнец незлобив от раба заколен еси: | и ныне радуяся предстоиши Святей Троице, | молися о державе сродников твоих | Богоугодней быти, | и сыновом Российским спастися.

Кондак, гл. 8. Возсия днесь в славней памяти твоей верным веселие, | яко бо доброрасленный грезн прозябл еси, | и Христу красен плод принесл еси себе, | тем же и по убиении твоем соблюде тело твое нетленно, | страдальчески обагренное кровию. | благородие святе Димитрие, | соблюдай отечество твое, | и град твой невредим: | тому бо еси утверждение.

Тропарь, гл. 8. Креста Твоего образ на небеси видев, | и яко же Павел звание не от человек прием, | во царех апостол Твой, Господи, | царствующий град в руце Твоей положи: | его же спасай всегда в мире молитвами Богородицы, едине Человеколюбче.

Кондак, гл. 3. Константин днесь, с материю Еленою, | крест являют, всечестное древо, | всех убо иудеев посрамление суще, | оружие же на противныя верных царей: | нас бо ради явися знамение велие | и во бранех грозное.

Тропарь, гл. 4. Пророче и Предтече пришествия Христова, | достойно восхвалит тя недоумеем мы, | любовию чтущий тя: | неплодство бо рождшия и отчее безгласие разрешися | славным и честным твоим рождеством, | и воплощение Сына Божия | мирови проповидуется.

Кондак, гл. 3. Прежде неплоды, | днесь Христова Предтечу раждает, | и той есть исполнение всякаго пророчества: | Его же бо пророцы проповедаша | на Сего во Иордане руку положив, | явися Божия Слова пророк, | проповедник, вкупе и Предтеча.

Тропарь, гл. 4. Днесь яко солнце пресветлое возсия нам на воздусе | всечестная икона Твоя, Владычице, | лучами милости мир просвещаюши, | юже великая Россия | яко некий дар Божественный | свыше благоговейне восприимши, | прославляет Тя, Богомати, всех Владычицу, | и от Тебе рождшагося Христа Бога нашего величает радостно. | Ему же молися, о Госпоже Царице Богородице! | да сохранит вся грады и страны христианския невредимы | от всех навет вражиих и спасет верою покланяющихся Его Божественному | и Твоему пречистому образу, | Дево неискусобрачная.

Кондак, гл. 8. Притецем, людие, к Деве Богородице Царице, | благодаряще Христа Бога, | и к Тоя чудотворней иконе умильно взирающе припадем и возопиим Ей: | О Владычице Марие! | присетивши страну сию Твоего честнаго образа явлением чудесно, | спасай в мире и благовременстве вернаго ИМПЕРАТОРА нашего и вся Христианы, | наследники показующи небесныя жизни: | Тебе бо верно зовем: | радуйся, Дево, мира спасение.

Тропарь, гл. 8. От юности восприял еси Христа в души твоей, преподобне, и паче всего возжелал еси мирскаго мятежа уклонитися: | мужески в пустыню вселился еси, | и чада послушания в ней плоды смирения возрастил еси. | Тем быв Троице вселение, | чудесы твоими всех просветил еси приходящих к тебе верою: | и исцеления всем подая обильно, | отче наш Сергие, моли Христа Бога, | да спасет души наша.

Кондак, гл. 8. Днесь яко солнце пресветло | возсиявше от земли честныя моши твоя, | нетленны обретошася, | яко благоуханный цвет множеством чудес сияюще, | и всем верным источающе различная исцеления, | и веселяще избранное твое стадо, | еже мудре собрав, и добре наствил еси, | о них же и ныне троице предстоиши моляся, | и ИМПЕРАТОРУ победительная на враги даровати, | да вси вопием ти: | радуйся, Сергие Богомудре.

Тропарь, гл. 1. Крилами Богоразумия вперивши твой ум, | возлетела еси превыше видимыя твари: | взыскавши Бога и Творца всяческих, | и Того обретши, | паки рождение крещением прияла еси: | древа животнаго наслаждающися, | нетленна бо веки пребывавши, | Ольго приснославная.

Кондак, гл. 4. Воспоем днесь благоднтеля всех Бога, | прославльшаго в России Ольгу богомудрую: | да молитвами ея | подаст душам нашим грехов оставление.

Тропарь, гл. 1. Христу нас ради от Девы рождшемуся, | честная Магдалино Марие, последовала еси, | Того оправдания и законы хранящий | тем же днесь всесвятую твою память празднующе, | грехов разрешение | молитвами твоими приемлем.

Кондак, гл. 3. Предстоящи преславная у креста Спасова | со иными многими и Матери Господни состраждущи, | и слезы точащи, | сие в похвалу приношаше, глаголющи: | что сие есть странное чудо? | Содержай Всю тварь, пострадати изволи; | слава державе Твоей.

Тропарь, гл. 2. Пречистому образу Твоему покланяемся, Благий, | просяще прощения прегрешений наших, Христе Боже: | волею бо благоволил еси плотию взыти на крест, | да избавиши, яже создал еси, от работы вражия. | Тем благодарственно вопием Ти: | радости исполнил еси вся, Спасе наш, | пришедый спасти мир.

Кондак, гл. 2. Неизреченнаго и Божественнаго Твоего к человеком смотрения, | неописанное Слово Отчее, | и образ неписанный, и Богописанный победителен, | ведуще неложнаго Твоего воплощения, | почитаем того лобызающе.

Тропарь, гл. 4. Днесь светло красуется славнейший град Москва, | яко зарю солнечную восприимши, Владычице, чудотворную Твою икону, | к ней же ныне мы притекающе и молящеся Тебе, взываем сице: | о Пречудная Владычице Богородице! | молися из Тебе воплощенному Христу Богу нашему, | да избавит град сей, | и вся грады и страны христианския невредимы | от всех навет вражиих, | и спасет души наша, яко милосерд.

Кондак, гл. 8. Взбранной Воеводе победительная, | яко избавльшеся от злых, | пришествием Твоего честнаго образа, Владычице Богородице, | светло сотворяем празднество сретения Твоего, | и обычно зовем Ти: | радуйся, Невесто неневестная.