Источник

II. Четыре литургии

Копты служат четыре литургии: две св. Василия великого (одну по Коптски, другую по Гречески) почти во все дни года; св. Григория Богослова в господские праздники, именно, в Благовещение, в неделю Ваий, в Пасху, Вознесение, Пятидесятницу, Рождество Христово и Богоявдеше; св. Кирилла Александрийского в Великую Субботу.

Все эти литургии переведены на Славянский язык с Латинского и Греческого по издания Ренодота. (Lilurgiarum orieotalium collectio opert et sludio Euseb. Renaudol. Parisiis. 1847). Первые две составлены Коптами по подражанию литургии св. Василия с разными дополнениями, а остальные, вероятно, приняты от тех, св. отцов, которых имена надписаны на них.

Существенные части всех их суть: – молитвеннее приготовление всего нужного к священнодействию и возношение фимиама; чтение апостола и Евангелия; моленье о мире с взаимным лобзанием, прославление совершенств Божиих; воспоминание о создании и грехопадении человека, о сообщении ему закона и пророчеств, о воплощении сына Божия и установлении Тайной Вечери; призывание св. Духа не только на Дары, но и на верующих; прошение у Бога разных благ телесных и духовных; молитвенное общение со всеми святыми; моление об усопших; приготовление к Причащению молитвою, Отче наш; моление о разрешении грехов; причащение тела и крови Христовой; благодарение по причащении, и отпуст.

В совершение литургии участвует весь народ с помощию диаконов, которые часто сказуют ему, что надобно делать, и о чем молиться в известные минуты. Такое участие показывает, что таинство причащения, по понятию Коптов, бывает действенно только при сочетании сердечной веры народа и священника, или епископа, совершающего оное.

В первые христианские века епископы, служа литургию, произносили свои собственные молитвы над предложенными Дарами, как кто умел, сохраняя впрочем, одинаковый состав и порядок священнодействия, указанный апостолами. Те из епископов, которые не имели дара извитийствования сих молитв, заимствовали их, у мудрословесных святителей и вносили в свои служебники, означая или не означая имена этих святителей. Таких заимствованных молитв довольно много в Коптских литургиях, и они служат драгоценнейшим свидетельством той свободы облагодатстваванного духа, какая была в первобытной церкви. Кто внимательно сличит эти молитвы, тот заметит в них единство мысли и разнообразие выражения оной.

Литургия святого Василия

Молитва приуготовления

Господи, ведый сердца всех, святе и во святых почиваяй, единый безгрешный, могий оставление грехов даровати. Ты Господи веси мое недостоинство, малое мое приготовление и недовольное расположение, во еже приступити к сему святому Твоему служению. Чесо ради и не имам такового дерзновения, да приступлю, и отверзу уста мои пред славою Твоею святою: но по множеству милости Твоея прости мне грешному и даждь ми обрести в сей час благодать и милость, и посли мне силу свыше начати и уготовати и совершати, якоже Тебе угодно есть, служение Твое святое, по благоволению хотения Твоего, с вонями фимиама. Ей Господи буди с нами. Буди сообщник в деле нашем, и благослови нас Ты бо еси оставление грехов наших, свет душ наших, живот, крепость и упование наше. Ты еси, Ему же возсылаем хвалу, честь и поклонение, Отче, Сыне, и Душе Святый, ныне и присно, и во веки веков. Аминь.

Молитва по уготовлении олтаря

Иерей. Ты Господи научил еси нас великому сему таинству спасения. Ты призвал еси нас отверженных и недостойных рабов Твоих, во еже быти нам служителем олтаря Твоего святого. Ты убо Господи сотвори ны достойны силою духа Твоего святого совершати сие служение, да не впадем в суд пред славою Твоею великою, но принесем ти сию жертву благословения и с нею славу и величание во святилище Твоем. Боже, ущедряяй милостию и подаваяй спасение, иже всяческая во всех совершаяй, даждь нам, да приятна будет, пред Тобою жертва наша за грехи мои и невежествия людей Твоих, за неже чиста есть, яко дар духа Твоего святого, во Христе Иисусе Господе нашем, о нем же Тебе подобает слава и честь, с ним и животворящим, единосущным ти Духом Святым, ныне и присно, и во веки веков. Аминь.

Молитва благодарственная

Иерей. Благодарим милосердого содетеля благих, Бога Отца Господа Бога и Спаса нашего Иисуса Христа, яко сам он покрыл, есть нас, помогл и соблюл, ны, и восприял ны к себе, помиловал, и привел ны даже до сего часа. И ныне молим его, да сохранит нас в сей святый день и во вся дни живота нашего во всяком мире, Вседержитель Господь Бог наш.

Диакон. Станите на молитву.

Иерей. Господи Боже Вседержителю, Отче Господа Бога и Спаса Нашего Иисуса Христа, благодарим Тя о всех и за вся и во всех, яко покрыл еси ны, и помогл, и сохранил и восприял еси ны к себе, и помиловал, и дал еси нам помощь, и привел ны даже до сего часа.

Диакон. Помолитеся, да Господь помилует нас.

Иерей. Сего ради просим, и молим благость Твою человеколюбче, сподоби ны сей святый день и все дни живота нашего скончати в мире со страхом Твоим. Всяку зависть, всяко искушение, всяко действо сатанино и навет людей нечестивых и козни врагов видимых отжен от нас, от всех людей Твоих, и от сего места святого, и яже суть блага и яже угодна, заповеждь нам. Ты бо сам дал еси нам власть наступати на змию и скорпию и на всяку силу вражию. И не введи нас во искушение, но избави нас от зла благодатию, милосердием и человеколюбием Сына Твоего Единородного, Господа Бога и Спаса Нашего Иисуса Христа, о Нем же Тебе подобает честь, слава и держава с Ним и Святым и Животворящим и Единосущным ти Духом, ныне и присно, и во веки веков. Аминь.

Молитва приношения пли предложения хлеба и чаши

Господи Иисусе Христе, Сыне Единородный, Слове Бога Отца, единосущне Ему и совечие и Духу Святому: Ты еси хлеб жывый, сшедый с небесе: Ты предварил ны, и душу Твою совершенную и непорочную положил еси на живот мира: просим и молим благость Твою человеколюбче яви лице Твое на семь хлебов и на сей чаше, яже положихом на сей жертвенный трапезе Твоей: благослови я , очисти я , и освяти я , и преложи я, да будет хлеб сей тело Твое Святое, а еже в чаши сей смешение кровь твоя честная, да будут всем нам охранение и врачевство и спасение душам, телесем и духовом: яко ты еси Бог наш, и Тебе подобает слава и держава со благим Твоим Отцем и животворящим и единосущным Духом. Ныне и присно и во веки веков. Аминь.

По сем иерей покрывает дискос и чашу коеждо покровом его, и обоя большим покровом: потом лобызает престол и, обращся к восточной стороне его, творит поклонение Богу и лобызает престол. И обошед оный, нисходит пред престол и провозглашает разрешение служителям, седящим пред ним. Аще же прилучится ин иерей сослужай, сей провозглашает разрешение.

Молитва разрешительная к Сыну

Господи Иисусе Христе Сыне единородный и Слове Бога Отца, расторгий вся узы грех наших страстию Твоею спасительною и животворящею, и дуновый в лице учеников Твоих, апостолов святых, глаголяй им: приимите Дух Свят. Им же отпустите грехи, отпустятся им, и им же держите, держатся: Ты убо Господи чрез апостолов твоих святых избрал еси тех, иже в церкви Твоей святой священствуют, во еже прощати грехи на земли, и вязати, и решати вся узы – неправды. Просим и молим благость Твою, человеколюбие, о рабех Твоих, отцех моих и братиях моих, и о немощи моей, иже главы своя пред славою Твоею святою преклоняют: яви нам милосердие Твое и разреши вся узы грехов наших. Аще согрешихом пред тобою ведением или неведением, словом или делом, по жестокосердию или малодушию, Ты Господи, иже веси слабость человеческую, яко благ и человеколюбец Бог даруй нам оставление прегрешений наших, благослови ны и очисти ны, и разреши ны и вся люди Твоя, исполни страха Твоего и направи нас к воде Твоей святой и блазей, яко Ты еси Бог наш, и Тебе подобает слава, честь и держава со Отцем Твоим благим и Духом Твоим Святым, ныне и присно и проч. Раби Твои днесь служащии, иерей, диакон и причт, вси людие и моя немощь, да будут разрешени устами Святой Троицы, Отца и Сына и Святого Духа, и устами единой, святой, соборной и апостольской церкве, и устами дванадесяти апостол, и устами видящего евангелиста Марка апостола и мученика, еще же святого патриарха Севера, и учителя нашего святого Диоскора, святого Иоанна златоустого, святого Кирилла, святого Василия и святого Григория, еще же и устами трех сот осмнадесяти, иже в Никеи собрашася, и ста пятидесяти, иже в Константине граде, и ста иже во Ефесе: такожде и устами всечестного отца нашего архиепископа аввы (имярек), и сообщника его в служении апостольском всечестного отца епископа аввы, (имярек), и устами моего смирения, иже грешник есмь: яко благословенно и препрославленно имя Твое, Отче, Сыне и Душе Святый, ныне и присно, и во веки веков. Аминь.

Молитва фимиама

Иерей лобызает главу служащего иерея, аще прилучится сослужай ему: целует ступени престола, и взойдя, целует самый престол, и вземлет сосуд с фимиамом и кадит, по чину предписанному о вечернем каждении. Пять крат покадив и сия сотворив, иерей глаголет сию молитву:

Боже вечный, безначальный и безконечный, великий в повелениях Твоих и могущий в делех Твоих, иже везде сый и вся исполняяй: буди Господи с нами грешными в сей час: пребуди посреде всих нас. Очисти сердца наша, и освяти души наша: очисти ны от всех грехов, содеянных нами волею и неволею. Даждь нам принести Teбе жертвы разумные, жертвы благословения: и возжение духовное да внидет за завесу, и вместо, святая святых. Молим Тя Боже наш: помяни Господи мир единой Твоея святой, соборной и апостольской церкви. Помяни Господи блаженного отца нашего епископа авву (имрк). Помяни Господи собрания наша и благослови я: сотвори, да будут без препятия и смущения, да по святей и блаженней воли Твоей имамы и преславны домы молитвы, домы чистоты, домы священия, домы благословения. Даждь Господи стяжати и нам и рабом Твоим, да до века во нас будут. Воскресни Господи Боже, и расточатся врази Твои, и да бежат от лица Твоего вси ненавидящии имя Твое святое. И люди Твоя да насладятся тысящию тысящь и тьмами тем благословении, и сотворят волю Твою благодатию, милостию и человеколюбием единородного Твоего Сына Господа Бога и Спаса Нашего Иисуса Христа, о нем же…и проч.

Единожды обходит престол с кадильницею, целует его, и сходит левою ногою: становится вскрай престола к востоку и трижды кадит, глаголя еже и прежде: посем кадит, особо от других, патриарха, аще присутствует: аще же ни, кадит иерей, а не ины. По сем творит поклонение. По прочтении же послания Павлова на Коптском языке глаголет тайно сию молитву. Аще же будет ин священник сослужай, сей прочтет ю. А диакон читает послание коптски, и потом арабски, еще же и кафоликон, си есть чтение инь посланий соборных. Тогда священник служащих кадит трижды окрест престола.

Молитва после чтения апостола, или Павлова послания

Господи ведения в мудрости подателю, открываяй, язвы непроницаемым мраком покровена суть, мощию Твоею великою давый разум человекам, благостию Твоею призвавый Павла, иже некогда бысть гонитель, во еже быти ему сосуду избранну, и благоизволивый его, да будет апостол, провозвестник и проповедник Евангелия царствия Твоего, Иисусе Христе Боже наш: Тя убо, блаже и человеколюбче, молим: даждь нам и всем людем Твоим ум неблазненный и смысл чистый, во еже познати и уразумети, коль полезно есть учение Твое святое, еже достиже нас служение его. И якоже он, подражатель Тебе бысть, творче жизни, тако и наст равно сподоби, делом и верою быти подражатели ему, и прославляти имя Твое, и хвалитися крестом Твоим на всякое время. Ты бо еси, ему же честь, славу, державу и поклонение возсылаем со Отцем Твоим благим и святым Духом, ныне и присно и проч.

Посем един от диаконов читает соборное послание коптски и арабски, и егда прочтется коптски, служащий священник глаголет сию молитву; и аще бы сам патриарх священнодействовал, оную глаголет священник.

Молитва по соборном послании

Священник. Господи Боже чрез святые апостолы Твоя открывый нам таинство Евангелия славы Христа Твоего, и давый им по величию безконечного дара благодати твоея проповедовати всему миру преизбыточество неизследного милосердия Твоего, молим Тя Господи: сотвори ны достойны части и жребия их. Даждь нам, присно ходити по стезям их, и подражати подвигом их, и быти сообщники им в трудех и потех, яже за благочестие подъяша. Сохрани церковь Твою святую, юже чрез них основал еси, благослови агнцев стада Твоего, и умножи виноград сей, его же насади десница Твоя, во Христе Иисусе Господи нашем, о нем же…

По скончании чтения соборного послания по-арабски священник восходит к престолу и кадит единожды: посем же чтет сию молитву:

Молитва деяний апостольских

Священник. Боже, приявый жертвоприношение Авраама и на место Исаака уготовивый ему агнца, приими и от нас Господи приношение сего фимиама, и посли нам богатое Твое милосердие. Очисти ны от всякие скверны греховные, и сподоби нас пред благостию Твоею, человеколюбче, чисто и совершенно служити во вся дни живота нашего. Помяни Господи мир и проч. И оканчивает ее молитвою фимиама, ничесоже отъемля, ниже прилагая, и по прочтении ее един с кадилом обходит хор. По скончани же чтения деяний коптски и арабски трижды глаголет, Свят: посем священник глаголет сию молитву.

Молитва святого Евангелия

Господи и Учителю Иисусе Христе Боже наш, иже рекл еси Божественным апостолом Твоим и учеником Твоим святым: мнози пророцы и праведницы восхотеша видити, яже видите, и не видеша, и слышати, яже слышите, и не слышаша: блажени очи ваша, иже видят, и уши ваша, иже слышат: даждь, да будем достойны слышати и исподняти Святое Твое Евангелие, молитвами святых Твоих.

Диакон. Помолимся о Святем Евангелии.

Священник. Помяни Господи всех, заповедавших нам поминать их в наших к Тебе молитвах и молениях. О Господи, покой даруй прежде усопшими, немощныя уврачуй: яко ты еси живот всех нас, и ты еси, ему же возсылаем славу, честь и поклонение, со Отцем Твоим благим и святым и животворящим и единосущным Духом, ныне и присно и проч.

По сем священник глаголет 50-й псалом, и по третьем стихе кадит Евангелие. Восходит к престолу и паки приносит кадило, знаменуя оное единожды крестным знамением; посем обходит с кадилом Евангелие и престол единожды: нисходит, приемлет от диакона Евангелие и обращается к западу. Вси иереи приступают и лобызают оное: един же он последний, облобызав е, вручит е служащему диакону, его же такожде кадит. И егда диакон возгласит: «Востаните», священник обращен к востоку глаголет: «во имя Бога». Aбиe трижды кадит олтарь. Егда же диакон возгласит: «благослови владыко», священник речет: «начало св. Евангелия от Матфея, Марка, Луки, Иоанна». Егда же истолкователь Евангелия речет: «станите со страхом Божиим», священник обращается к западу, и трижды кадит Евангелие. По сем обращся ко алтарю, кадит оный паки трижды, и иерей единожды, и станет на своем месте, повторяя что либо из молитвы Евангелия. По семь единожды кадит диаконы, и не престает кадить пред Евангелием даже до конца чтения его коптски, и на последней запятой кадит трижды, дает же Евангелие чести диакону, аще сей правильно уметь чести е, аще же ни, чтет е сам священник. Аще диакон чтет Евангелие с амвона, каждение в первый и последний раз бывает вскрай хора. Егда же истолкователь речет: «Господа и Бога нашего», священник возвращается в олтарь, и трижды кадит, и глаголет сию молитву тайно, во время чтения Евангелия арабски, обращся лицем к востоку. Аще же прилучится священник сослужай, ему же подобает чтение молитвы сея, ему дает кадильницу, и он чтет ее.

Молитва после Евангелия, глаголемая тайно

Долготерпеливе, многомилостиве и истинне, приими молитвы, моления и прошения наша, покаяние же и исповедание наше, во святый, чистый и небесный Твой жертвенник, да будем достойнии слышатели Евангелий Твоих Святых, и сохраним заповеди и повеления Твоя, и принесем плод сторичный, шестидесятный в тридесятный во Христе Иисусе Господе нашем. Помяни Господи немощные в людех Твоих, призри на них милосердием и милостию, и исцели я. Помяни Господи отцы и братия наша, во отшествии сущие, и возврати я в домы их здравы и невредимы.

Во время разлития Нила и дождя, глаголет

Помяни Господи воды речные, и благослови, умножая я по мере их.

Во время сеяния с первого дня Папе до первого же дня Павне глаголет:

Помяни Господи семена и насаждения, да растут и множатся.

С Богоявления до первого дня тогожде месяца.

Помяни Господи воздух неба и плоды земли, и благослови я. Помяни Господи благостояние святого Твоего места сего и всех церквей, и обителей святых отец наших православных. Помяни Господи здравие людей и животных. Помяни Господи раба Твоего царя земли нашей, и сохрани его в мире и достоинстве. Помяни Господи отцы и братия наша, усопшия и упокоившиеся в вере православной. Помяни Господи жертвы и приношения, и мзду воздаждь оным, иже сия приношения предложиша, и приими я. Помяни Господи плененныя и в рабство отведенныя, и возврати плен их. Помяни Господи угнетенныя бедами и скорбями. Помяни Господи оглашенныя в людех Твоих, помилуй их, утверди их в вере Твоей, и вся останки почитания идолов отыми от сердец их: закон Твой, страх Твой, заповеди Твоя, истины Твоя и повеления Твоя насади в сердцах их: даруй им твердое познание слова, ему же оглашением наставляются, да в узаконенное время изыдут достойны купели возрождения во оставление грехов их: уготови их в жилище Духу Святому благодатию Твоею.

По прочтении Евангелия, диакон относит е священнику. Он лобызает ё, равно же и клир и народ, и абие священник тайно чтет молитву покрова, стоя вскрай его с преклоненною главою.

Молитва покрова

Боже по неизреченному человеколюбию Твоему пославый в мир единородного сына Твоего, да приведет к Тебе овцу заблудшую, молим Тя Господи: не отвержи нас от Себе во веки, егда приносим Тебе страшную сию и безкровную жертву, не бо на праведность нашу уповаем, но на Твое милосердие, им же оживотворил еси род наш. Просим, молим благость Твою, человеколюбче: да не будет сие таинство, еже уставил еси нашего ради спасения, во осуждение нам и людем Твоим, но во очищение грехов наших и оставление прегрешений наших. Слава и честь имени Твоему святому, Отца и Сына и святого Духа, ныне и присно и проч.

Оканчивая молитву, священник целует ступень престола, восходит на оную, лобызает престол, и обращся к западу начинает чести три главные молитвы. Егда священник возглашает «мир всем», – обращся к священникам, братиям своим, приветствует их наклонением главы, и обращен к западу знаменует народ крестом.

Молитва о мире

Священник. Паки помолимся вседержителю Богу, Отцу Господа Бога и Спаса нашего Иисуса Христа

Просим и молим благость Твою человеколюбие: помяни Господи мир единыя Твоей, святыя, соборныя и апостольския церкви, яже простирается от конец до конец земли, и вся люди страны сия благослови. Мир оный небесный ниспосли в сердца наша, но и мир жизни сея милостивно нам даруй. Православные цари, воинство, вожди, советники, вся люди, и соседи наша, вхождение и исхождение наше, всяким миром украси. О Царю мира, даждь нам мир Твой, яко вся нам даровал еси. Притяжи ны, Боже спасителю наш, разве бо Тебе иного не вемы, и имя Твое святое призываем. Да живут убо души наша духом Твоим святым, и смерть греха да не обладает нами рабы Твоими, ниже всеми людьми Твоими. Господи помилуй.

О патриархе и епископах

Паки молимтися, вседержителю Господи, Отче Господа Бога и Спаса нашего Иисуса Христа. Просим и молим благость Твою, человеколюбче:

Аще патриарх священнодействует, сослужай священнику глаголет:

Помяни Господи блаженного отца нашего и честного архиепископа авву (имрк), и блаженного отца нашего авву епископа (имрк): соблюди и сохрани их нам на многая лета и времена мирна, да делом оправдают святость епископства, еже им от Тебе вверено есть во святой и блаженной воли Твоей, да право правят слово истины, и люди Твоя свято и правосудно устрояют, внуке со всеми православными епископы, игумены, пресвитеры и диаконы, и со всем исполнением единственной Твоей и единой, святой, соборной и апостольской церкве. Даждь нам и им мир и спасение на всяком месте, и вся молитвы, яже изливают за ны и за вся люди Твоя, приими такожде, якоже и наша о них,

Посем, священник кадит единожды, глаголя вышереченное: аще же будет ин священник сослужай, он вместо его творит сие.

(Приими) на олтарь Твоя святый, духовный и небесный, в воню благоухания. Вся враги их видимые и невидимые сотри и скоро низложи под нози их; и их же самих в мире и правде соблюди в церкви Твоей святой. Господи помилуй.

О собрании

Паки молимся Тебе Боже Вседержителю, Отче Господа Бога и Спаса нашего Иисуса Христа. Просим и молим благость Твою, человеколюбче: помяни Господи собрание наше и благослови я. Даждь нам, да будут без смущения и препятия, и да имамы я преславны домы молитвы, домы благословения, домы священия: сподоби нас быти а них Господи и рабов Твоих, иже по нас даже до века будут.

Молитва о церкви, юже зде глаголет священник во дни поста

Почитание идолов от всея вселенной далече отжени: сатану и всю скверную силу его сотри и скоро низложи под ноги наша: ереси и виновники их обуздай, да разделится и разрушится всяко еретическое заблуждение, враждебное церкви Твоей святой. Господи и ныне, яко же древле, уничижи я отжени мрак от сердец ересеначальников, и нищету их яве покажи им: обуздай их ненависть. Советы, ухищрения, козни и наветы, и руце, яже сопротиву нам зле подъемлют, ослаблены сотвори. Соборища их расточи, совещания их раздели. О Боже, разрушивый совет ахитофелев.

И кадит трижды к востоку

Воскресни Господи Боже, да расточатся вси врази Твои, и да бежат от лица Твоего вси ненавидящии имя Твое, святое.

Обращся к западу, священник кадит диаконы и народ.

Люди же Твоя, тысящею тысящ и тьмами тем благословении ущедри, да вси исполнят волю Твою.

По сем обращся к востоку, речет:

Благодатию, милостию и человеколюбием Сына Твоего единородного, Господа Бога и Спаса нашего Иисуса Христа и проч.

Народ глаголет Символ Веры православной. Священник трижды кадит к востоку и отдаде кадильницу прислужнику, и абие глаголет символ. Но сем священник трижды омывает свои руки и, не стирая их, обращается к народу, и вземлет пред ним из воды свои руки и со тщанием отирает их.

По прочтении Символа глаголет: мир всем.

Народ отвещает: и Духови Твоему.

И абие обращся, единожды осеняет народ знамением креста, и глаголет сию молитву

Молитва лобызания мира ко Отцу

Священник. Боже великий и вечный, создавый человека права, и смерть, яже завистию сатаны в мир вниде, разрушивый животворным пришествием единородного сына Твоего Иисуса Христа Господа Бога и Спаса нашего, и исполнивый землю небесного мира: Ты, его же славословят вои ангельстии глаголюще, слава в вышних Богу и на земли мир, в человецех благоволение, исполни по благоволению Твоему, Господи, сердца наша миром Твоим, и очисти ны от всякие скверны, лицемеры, всякие лжи, всякого зла и всякого смертоносного памятозлобия. Сотвори Господи, да будем достойны взаимно целоватися лобызанием святым, и тако быти причастники мира, да не судом отженеши нас от безсмертнаго и небеснаго дара Твоего, о Христе Иисусе Господи нашем.

Иная молитва целования мира

Священник. Всяк дар слова и всяку силу ума превосходят богатства шедрот Твоих Господи, яже утаил еси от премудрых и разумных и открыл еси нам младенцем, яже вожделеша пророцы и царие видети, и не видеша. Сия нам грешным милостиво даровал еси, да совершаем я и освящаемся ими. Егда сына Твоего смотрением такожде и священный чин сия безкровныя жертвы явил еси нам: несть бо чин крове законной, или правды плотской, но агнец есть духовный и меч умный и безтелесный в сей жертве, юже приносим Тебе. Просим и молим благость Твою, человеколюбие; очисти уста наша, и свободи умы наша от всякого прилога плотского: посли нам благодать Духа Твоего Святого, и сподоби ны взаимно целоватися лобзанием святым, да не впадше в суд приимем дар Твой безсмертный и небесный, о Иисусе Христе Господе нашем.

Молитва о мире апостола Иакова

Священник. Боже Господи всех, сподоби спасения сего нас недостойных грешников, да от всякия нечистоты и лицемерия очистившеся обымем друг друга в целовании святем и соделаемся едино тело и един дух в союзе любви и мира Господа нашего Иисуса Христа, с ним же благословен еси со животворящим и единосущным Твоим Духом, ныне и присно, и во веки веков. Аминь.

Возношение святого Василия

Диакон. Приступите, станите мужи со страхом, и к востоку зрите. Вонмем.

Народ. Милость, мир и жертва хваления.

Священник трижды осиняет крестным знамением первее себе, посем диаконы служащии и наконец народ.

Священник. Господь с вами.

Народ. И со духом Твоим.

Священник. Горе вознесите сердца ваша.

Народ. Имамы ко Господу.

Священник. Благодарим Господа.

Народ. Достойно и праведно есть.

Священник. Достойно и праведно, достойно и праведно есть, воистину достойно, преподобно, потребно, достойно и праведно есть. Господи, Господи, ты еси Бог истинный, сый прежде век, царствуяй во веки, на высоких обитаяй, и дольняя призираяй, сотворивый небо и землю, море, и вся яже в них, Отец Господа Бога и Спаса нашего Иисуса Христа, сотворивый о нем вся видимая и невидимая, седяй на престоле славы Своей, ему же покланяются вся власти святые.

Диакон. Сидящии востаните.

Священник. Ему же предстоят ангели и архангели, начала, власти, престоли, господствия, силы.

Диакон. Зрите к востоку.

Священник. Окрест Тебе стоят многоочитии херувимы и шестокрылатии серафимы и воспевают песнь славы, непрестанно глаголюще:

Народ. Свят, свят, свят Господь.

Священник трижды знаменует крестом себе, служащим и народ, и абие глаголет:

Воистину Свят, Свят, Свят еси Господи Боже наш, сотворивый ны, и создавый ны и положивый ны в рай сладости: да и егда заповедь Твою о древе преступихом прелестию змия, и от жизни вечной отпадохом, и из рая сладости изгнана быхом, не до конца оставил еси нас, но непрестанно чрез святых Твоих пророков обетования подавал еси: в последние же дни послал еси Бога и Спаса Иисуса Христа, иже воплотился от Духа Свята и от Святыя Девы Марии, и человек быв, путь спасения показа нам, и оное рождение свыше водою и духом дарова нам, и сотворил ны народ избран, и очистил ны Духом Твоим Святым, возлюбив же сущия Своя в мире, предаде Себе Самого спасения нашего ради на смерть, яже царствова над нами, и еюже грех наших ради связани бехом: сниде в преисподняя со креста, воскресе из мертвых в третий день, взыде на небеса, и седе одесную Тебе Отче, и предустави день впадаяния, в онь же имать судити вселенной в правде и воздати комуждо по делом его.

Народ. По милосердию Твоему Господи, а не по грехом нашим.

Священник. Устави нам сие великое таинство благочестия и веры, егда восхоте предати себе смерти за живот мира:

Народ. Веруем воистинну тако быти.

Священник. Прия хлеб в руце свои святыя, чистыя, пренепорочныя, блаженная и животворящия, и возре на небо к Тебе, Боже, Отцу Своему и всех Господу.

Абие вземлет на руце своя Возношение (т. е. просфору) и отъемлет покров от дискоса.

Народ. Аминь.

Священник возвед очи глаголет: «Возблагодари».

Народ. Аминь.

Священник. и благослови его.

Народ. Аминь.

Священник перстом трижды знаменует Возношение во образ креста. И освяти его

Народ. Аминь

Священник преломляет Возношение на три части, и соединяет их вкупе так, якобы не суть разделени. И сотворив сие, отирает персты над дискосом, да ничтоже от Возношения останет на них, и глаголет:

И преломи его и даде святым Своим учеником и апостолом, рек приимите, ядите от сего вси: сие бо есть Тело Мое, еже за вы ломимое и за многия даемое во оставление грехов: сие творите в Мое воспоминание.

Народ. Аминь.

Священник, держа в руке своей чашу, глаголет: «Такожде и чашу по вечери, воду с вином соедини».

Священник трижды знаменует чашу крестом и речет: «возблагодари».

Народ. Аминь.

Священник. Благослови ю.

Народ. Аминь.

Священник: Освяти ю

Народ. Аминь.

Священник: Вкуси, и даде учеником своим и апостолом, святым рек: приимите. пийте от нея вси: сия бо есть Кровь Моя Нового Завета, яже за вы и за многия изливаемая во оставление грехов: сие творите в Мое воспоминание.

Священник держит чашу крестообразно, обаче не колеблет её.

Народ глаголет: Аминь. Тако есть сие.

Священник: Елиждыбо аще ясте хлеб сей и чашу сию пиете, смерть Мою возвышаете, и воскресение Мое исповедуете, и мене воспоминаете, дóндеже приду.

Народ. Смерть Твою возвышаем Господи, и воскресение Твое исповедуем.

Священник: Поминающе убо страдание Его Святое, Воскресение Его из мертвых, вознесение на небо и седение Его одесную Тебе Отца, еще же и второе его с небесе пришествие страшное и преславное, приносим Тебе дары сие от благ Твоих, о всех, за вся и во всех.

Диакон. Помолитеся Богу со страхом и трепетом.

Священник глаголет призывание.

Просим Тя Христе Боже Наш, мы грешнии и недостойнии раби Твои, и молим Тя: по благоволению благости Твоея да внидет Дух Твой Святый на ны и на предложенные дары сие, и освятит я, и содеет я святая святым Твоим!..

Священник, моляся о наитии Духа Святого, имать руце распростерты и подъяты горе.

Народ глаголет: Аминь.

Священник велегласно: и хлеб сей (трижды знаменуете хлеб крестом) да сотворит Святое Тело, (преклоняет главу свою и рукою указует Тело) Самого Господа Бога и Спаса Нашего Иисуса Христа, еже дается во оставление грехов и в жизнь вечную приемлющим оное.

Народ. Аминь.

Священник трижды знаменует чашу крестит и глаголет: чашу же сию – честную Кровь Нового Завета Твоего (абие знаменует крестом Тело и Кровь) Самого Господа Бога и Спаса Нашего Иисуса Христа, яже дается во оставление грехов и в жизнь вечную приемлющим ю.

Народ. Аминь.

Священник. Сотвори Господи, да будем достойны причащения святынь Твоих, во освящение телес, душ и духов наших, да будем едино Тело и един Дух, и улучим жребий и часть со всеми святыми Твоими, от века Тебе угодившими. Помяни Господи мир единыя и единственныя Твоея соборныя и апостольския Церкве.

Диакон17. Помолитеся о…

Священник. Юже стяжа честною кровию Христа Твоего: соблюди ю в мире и вся православныя епископы, иже в ней суть. Во первых же помяни Господи блаженного отца нашего всечестнаго архиепископа папу авву (имрк),

Диакон. Помолитеся о....

Священник. И иже с ним право правят слово истины: даруй их церкви Твоей святей, да пасут стадо Твое в мире. Помяни Господи игумены, пресвитеры православные, и диаконы.

Диакон. Помолитеся о....

Священник. И вся служащия и вся девство и чистоту соблюдавшия, и вся верныя люди Твоя. Помяни Господи и помилуй всех нас.

Диакон. Помилуй нас Боже, Отче Вседержителю.

Народ трижды: Кирие елейсон, т. е. Господи помилуй.

Священник. Помяни Господи благостояние сего места Твоего Святого и всякого места, и обители православных отец наших.

Диакон. Помолитеся о....

Священник: И живущих в них с верою в Бога. Благоволи Господи благословити воздух неба, и плоды земли.

Во время разлития Нила от 12-го Павне по 9-го Папе присовокупляет:

Благоволи Господи наполнити воды речныя в сие лето, и благослови я.

По время сеяния сиречь от 10-го дне до 20-го Тиба:

Помяни Господи семена травные и злак полей в сие лето, и сотвори да растут, елико могут, по благости Твоей. Возвесели лице земли, да явится плодородие ея, и плоды ея да умножатся: уготови ей сеющего и жатву: житие наше к полезному управи: благослови венец лета благостынею Твоею нищих ради в людех Твоих, вдовиц ради и сирых, пришельцев ради и терпящих нужду и ради всех нас, уповающих на Тя и имя Твое святое тепле призывающих: понеже очи всех на Тя уповают, и ты даеши им блага во время свое. Сотвори с нами по благости Твоей, даяй пищу всякой плоти: исполни сердца наша веселия и радости, да присно довлеют нам вся потребная, и да преизбыточествуем во всяком деле блазе.

Диакон: Помолитеся О....

Священник, указуя руками своима на хлеб и вило, глаголит:

Помяни Господи принесших Тебе дары сия и тех, за них же принесоша. И иже принесоша за себе и за имя свое, и даждь им всем мзду с небесе.

Священник сослужай обходит престол с кадилом, умывает руки своя и отирает их бумажным полотенцем.

По сем, священник сослужай глаголет:

Ныне Господи, по заповеди сына Твоего единородного, приобщаемся памяти святых Твоих от начала Тебе угодивших и отцев наших святых, патриархов, пророков, апостолов, мучеников, проповедников и евангелистов, и всех праведных, в вере скончавшихся. Изрядно же Святыя и Преславныя Приснодевы, Богородицы, Божественныя Святыя Марии, святого Стефана архидиакона и первомученика, и Боговидца святого апостола и мученика евангелиста Марка, патриарха святого Севера, и учителя нашего Диоскора, святого Иоанна Златоустого, святого Афанасия апостольского, святого Кирилла, святого Василия, святого Григория, и отца нашего святого аввы Антония мужа всесвятейшего, и преподобного отца Павла, и святых трех Макариев, и святого отца нашего Иоанна игумена, отца нашего Пшоя (Псоя) мужа совершенного, и святых отец греческих Максима и Диомида, сорока девяти мучеников, и святого чудотворца отца Моисея, и отца нашего Исидора, и Арсения, и отца нашего Иоанна нигра пресвитера, и отца нашего Даниила игумена, и отца нашего праведного Иуния, и отца нашего Ефрема, и отца нашего Пахомия начальника общежития, и ученика его Феодора, и отца нашего архимандрита Санутия, и аввы Веизы ученика его, еще же отца нашего Онуфрия отшельника, отца нашего Симеона столпника, отца нашего Самуила исповедника, и учеников его Иуста и Аполлона, и отца нашего Варсомы мудрого, отца нашего Бепифия пресвитера, и ученика его аввы Иоанна, и отца нашего аввы Варсомы обнаженного, и отца нашего аввы Фегия обнаженного, и святого (имрк), его же память днесь празднуем, и всего лика святых Твоих их же молитвами и моленьями помилуй всех нас, и свободи ны ради имени Твоего святого, еже призвася на ны.

Священник. Еще помяни Господи вся почившие и упокоившиеся во священстве и во всяком звании мира сего. Сподоби Господи души всех их покоя в лоне святых Авраама, Исаака и Иакова, всели их на месте злачне, на водах упокоения, в раи сладости, в месте, отонудуже отбеже болезнь сердца, печаль и воздыхание, во свете святых Твоих.

Диаконы читают диптихи (т. е. помянники) и сказуют усопших

Священник по скончании диптихов глаголет:

Тем убо Господи, их же души приял еси, повели покоитися в сем месте, нас же странных сущих в вере Твоей соблюди, и мир Твой милостивно подаждь нам даже доконца.

Народ. Такобе. И проч.

Священник. И управи ны в Царствие Твое, да яко о семь, тако и о всем прославится, благословится и превознесется имя Твое великое, всесвятое, превознесенное, достопокланяемое и благословенное, вкупе же и имя Иисуса Христа, Сына Твоего Возлюбленного и Духа Святого.

Священник. Мир всем,

Народ. И духови Твоему.

Предначинательная молитва Преломления.

Священник. Благодарим Тя, Вседержителю Боже Отче Господа Бога и Спаса Нашего Иисуса Христа, яко сподобил еси нас предстояти в сем месте святем, воздеяти руце наша, и имени Твоему Святому служити. И паки молим Его, да сподобит ны общения и причащения Божественных и безсмертных Его Таинств Тела Святого и Честной Крови Христа Его, Вседержитель Господь Бог Наш.

Народ. Аминь.

Егда священник изречет сие благословение, вземлет десницею шелковый покров, о обращся к западу, сим покровом знаменует народ, держа шуйцу над дискосом: егда же чтется сие благословение, диаконы молятся; священник же обратив лице и взоры на Тело, возлежащее на дискосе, речет:

-Бог да помилует ны, и благословит ны, и просветит лице Свое на ны, и помилует ны.

И абие священник вземлет десницею Святое Тело и возлагает е на шуйцу, и полагает перст на Тело вскрай господния или большия частицы, в том месте идеже оно преломлено, и речет.

Тело Святое.

И отъемлет перст свой от верха тела, и опускает его в чашу и касается честной крови концем большого перста: и абие изымает перст от крови и знаменует кровь кровию во образ честного преста, и речет:

И честная кровь самого Христа всемогущего Господа Бога нашего

По семь изымает из чаши перст свой, честною кровью обагривый, и знаменует им тело единожды, во образе креста, вверху над переломом вскрай большей частицы и внизу по окружию тела, един крест, образуя над кровию и два над телом

Диакон: Помолитеся о…

Священник. Мир, всем,

Народ. И духови Твоему.

Молитва преломления ко Отцу

Священник. Господи Боже наш, великий, вечный, дивный во славе, сохраняяй завет Твой и обетования Твоя любящим Тя от всего сердца своего, давый нам спасение от грех наших Сыном Твоим Единородным Иисусом Христом Господем нашим, животе всех, помощи прибегающим к Тебе, и упование вопиющих к Тебе: Емуже предстоят тысящами тысящ и тьмами темь ангели, архангели, херувимы и серафимы, и все неисчетное множество сил небесных: иже освятил еси предложенные Дары сия наитием на них Святого Твоего Духа: очисти ны Господи от грех наших, тайных и явных, и от всякого помышления, еже благости Твоей противно есть. Господи человеколюбче отжени е от нас: очисти телеса и души наша, сердца наша и совести наша, да с чистым сердцем и душею светлою и лицем непомраченным и с любовию совершенною и надеждою твердою дерзаем во уповании и без страха молитися Тебе, Боже Отче Святый и Небесный, и глаголати: Отче наш.

Иная молитва преломления святого Василия.

Боже Отче Света, источниче жизни, подателю ведения, творче дарования, благодати зиждителю, душ наших благодетелю, сокровище мудрости, наставниче святых, создателю веков, приятелище чистых молитв, и уповающим на Тя всем сердцем подателю благ, в ня же ангели желают примкнути, из тьмы изведеши нас на свет, и от смерти в живот, даровавый нам свободу и премену от рабства, и тьму заблуждения в нас бывшую просветивый воплощением единородного Сына Твоего, ты убо Господи, просвети очи сердца нашего и совершенны соделай души, телеса и дуси наша, да сердцем святым и устами чистыми дерзаем призывати Тя, Боже Отче Святе, иже еси на небесех, и глаголати.

Иная молитва преломления, Иоанна Златоустого

Ты даровал нам благодать усыновления банею паки бытия и обновления Духа Святого: и ныне сподоби нас без лицемерныя, с сердцем чистым, совестию исполненною упования, и устами нескверными молитися Тебе, Отче, да отринувше суетствие многословия языческого и высокомерия иудейского, вознесем Ти мольбы и моления, по спасительному наставлению Сына Твоего Единородного, гласом чистым, иже подобает христианам, и во святости души, тела и духа да дерзнем без страха взывати к Тебе, несозданному, безначальному, нерожденному, нас и всих Господу Богу Отцу Святому, иже еси на небесех и проч.

Молитва по Отче наш

Тако молим Тя, Отче Святый, Благий и любяй благостыню: не введи наст, во искушение, ниже попусти никоейже неправде обладати нами, паче же свободи нас от суетных деяний, и помыслов о них, от влечения к ним, воззрения на них и прельщения ими, и всяко искушение потреби и отжени от нас. Укроти такожде вся внутренняя похотения наша, и отврати от нас вины, яже ко греху нас подвизают. Спаси ны силою Твоею Святою о Иисусе Христе Господе нашем.

Диакон глаголет: Главы ваша Господеви приклоните.

Народ. Тебе Господи.

Священник глаголет молитву главопреклонения ко Отцу:

Преизбыточествова благодать зиждителя благих Сына Твоего Единородного, Господа Бога и Спаса Нашего Иисуса Христа. Исповедуем спасительную страсть Его, возвещаем смерть Его, и веруем воскресению Его, еже есть таинства исполнение. Благодарим Тя Господи Боже Вседержителю, яко милосердие Твое велие бысть к нам, егда уготовал еси нам, яже ангели видети желают. Просим и молим Тя Человеколюбче: очисти всех нас и соедини с собою приобщением тайнам Твоим божественным, да исполнимся Духа Твоего Святого, и утвердимся в вере правой, желанием возжелен, и любве Твоея истинный, и возвестим Славу Твою во всякое время, и Иисусе Христе Господе нашем.

Диакон. Вонмем Богу со страхом.

Молитва разрешения, ко Отцу

Священник. Господи Боже Вседержителю, врачуяй души, телеса и дуси наша, Ты рекл еси Петру, отцу нашему, устами единородного Сына Твоего, Господа Бога и Спаса Нашего Иисуса Христа: ты еси Петр, и на сем камени созижду церковь Мою и врата адовы не одолеют ей, и дам ти ключи Царствия Небесного: елика аще свяжеши на земли, будут связани на небеси, и елика аще разрешиши на земли, будут разрешени на небесах. Да будут убо, Господи, разрешени отцы и братия мои от Духа Святого Твоего усты моими, блаже и человеколюбче. Боже вземляй грехи мира, предвари ны, приемля покаяние рабов, Твоих, еже есть свет ведения и отпущение грехов наших, яко ты еси Бог, щедр и милостив, долготерпелив и многомилостив и праведен. Елика аще согрешихом Тебе словом или делом, пощади и прости нам блаже и человеколюбче. О Господи, разреши ны, и люди Твоя да будут разрешени.

Зде священник поминает живых и умерших:

Помяни, Господи, мир единыя, святыя, соборныя и апостольския церкви: утверди во благе даже до последнего издыхания жизни и соблюди в мире вся православныя отцы наша, епископы, игумены, пресвитеры, диаконы, иподиаконы, чтецы, певцы, заклинатели, монахи, девы, вдовицы, сирыя, воздержники в мире живущая, рабы же и свободные, во отшествии сущии и зде пребывающие, якоже мужи такожде и жены, старцы и юные, малые и великие, пришедшие и непришедшие, заповедавшие нам помянути их и не заповедавшие, знаемые и незнаемые, ненавидящих нас, и любящих. Живых сохрани помощию ангела мирна, души же умерших упокой Господи в лоне отец наших: Авраама, Исаака и Иакова, в рай сладости. И всех православных христиан, от востока солнца даже до запада и от десныя страны до шуия, коегождо в мире сохрани Господи: и мою немощь разреши от всякого греха, от всякия клятвы, отречения и клятвопреступления, и от всякого безумия еретического же и языческого. Подаждь нам Господи разум, силу и смысл, даже до конца уклонятися от всякия вещи злыя ко блазей, и даждь нам творити во всякое время угодная Тебе. Впиши имена наша со всеми ликами святых Твоих во Царствии небесном, о Иисусе Христе Господе Нашем.

Диакон. Со страхом Божиим вонмем.

Народ глаголет: Един Отец Свят.

Егда диакон речет: Со страхом и проч.

Народ. Кирие елейсон. (Господи помилуй.) Священник возвышает деспотикон. (агнец), преклоняется и велегласно глаголет: Святая святым. Весь народ падает ниц на землю: священник влагает деспотикон в кровь нижнею частию его, и творит им в крови единожды крест: посем изъемлет, и знаменует им Святое Тело на дискосе единым крестом: абие знаменует его единожды честною кровию во образе креста, и тако совершит три назнаменования телом над кровию, и три кровию над Телом. Совершив же сие влагает деспотикон во кровь, глаголя внутрь чаши:

Благословен Господь Иисус Христос Сын Божий и Дух Святый. Аминь.

Абие вземлет иерей третию часть, в ней же бе деспотикон, и разделяет на три части: и аще будут велики, раздробляет и на дискосе, и три части влагает в десную руку, юже имать воздеянну, шуюю же держит внутрь дискоса18 и глаголет: Тело святое и Кровь честная, истинная, Иисуса Христа Сына Бога Нашего. Аминь. Верую, верую, верую и исповедую даже до последняго издыхания, яко же есть живое Тело Единородного Сына Твоего Господа Бога и Спаса Нашего Иисуса Христа, еже прия от владычицы нашея Богородицы, Божественной и святой Марии, и содела е едино с Божеством Своим, без слияния, смешении, или изменение, исповеда исповедание благое пред Пилатом, и Себе Самого предаде за ны на древо Креста Святого, единою волею Своею за вся ны. Истинно верую, яко Божество Его не отлучися от человечества его ниже на един час, или мгновение ока: предаде сие за ны во спасение, оставление грехов и в жизнь вечную приемлющему оное. Верую, яко сие есть воистину.

По сем священник покрывает Святое Тело шелковым покровом, другим же облекает свои руки. Такожде диакон покрывает чашу бумажным покровом, священник же преклонь главу глаголет:

Всяка честь, слава и поклонение подобает Троице Святей, Отцу, Сыну и Святому Духу.

По сем священник лобызает престол, и поклонившись братиям своим, священникам и народу на десно и шуе, открывает дискос, и егда поется псалом, глаголет тайно:

Сподоби всех нас Господи достойно причаститися Тела Твоего Святого и Крови Твоея Честныя, во очищение телес, душ и духов наших, и в прощение грехов наших.

Тогда священник приобщается сам и раздает Тело и Чествую Кровь сослужащему священнику, диаконам, мужам и женам, сошед от престола с дискосом.

Диакон глаголет: Помолитеся за вся христианы.

Молитва благодарственная по причащении

Священник. Уста наша исполнишася радости, и язык, наш веселия, яко сотворихомся причастницы безсмертных Таинств Твоих Господи: яко яже око не виде и ухо не слыша и на сердце человеку не взыдоша, та утотовал еси Боже любящим имя Твое Святое, и открыл еси та младенцам Церкве Твоей святыя. Ей Отче, тако бысть благоволение пред Тобою: яко милостиво еси, и Тебе славу возсылаем, честь и поклонение Отцу, Сыну и Святому Духу, ныне и присно и проч.

Молитва поклонения по приобщении

Священник. Раби Твои Господа, служащии Тебе, молят имя Твое Святое, и вкупе преклоняются пред Тобою. Буди в них Господи, помози им, во всяком деле блазе, исправи сердца их от всякого злаго и земнаго помышления. Даждь им жити и помышляти, яже к. животу довлеют, и разумети, яже Твоя суть, чрез Сына Твоего Единородного Иисуса Христа Господа нашего, емуже мы со всеми людьми Твоими вопием, глаголюще: Господи Спасителю помилуй ны.

Священник, глаголет благословение:

Боже, ущедри ны, благослови ны, и помилуй ны. Господи спаси люди Твоя, и благослови достояние Твое, исправи я, и вознеси их во веке. Сохрани я в правой вере, славе и чести во вся дни живота их, и укорени их в любви, вся превосходящей, и в мире всяк ум превышающем, молитвами и моленьями, яже творит за ны Владычица всех, нас Мати Божия, Божественная и Святая Мария, и четыре светлые святые, Михаил, Гавриил, Рафаил и Суриил, и четыре животныя безтелесные, еще же двадесять и четыре старца, херувимы, серафимы, и все небесные лики, молитвами патриархов и пророков, Иоанна Крестителя, и ста сорока четырех тысяч, и святых апостолов, трех святых отроков, святого Стефана, святого Георгия, святых двоих Феодоров, и святого странноприимца Меркурия, святого отца Мины, и всех мучеников, и отца нашего Антония мужа святейшего, и святых отец трех Макариев, и всех праведных, благочестивых, мудрых дев, и ангела дне сего благословенного. Да снидет на нас благословение их, святая Благодать их, и сила их, дар их, любовь их, терпение их, помощь их: и благословение воскресного дне Спасителя нашего благого да будет со всеми нами до века. Аминь. Сотворив, омовение сосудов, потребляет оставшуюся в них воду, и отпускает народ, реченным благословением.

Литургия святого Василия

Молитва о покрове

Священник глаголет тайно:

Славим Тя Творче и Царю всяческих, и покланяемся неизреченному и всечестному имени Твоему. Призри на ны и помилуй ны, и избави ны от всех искушений, яко от Тебе помощь и заступление. Спаси люди Твоя, их же стяжал еси честною кровию Христа Твоего, о нем же и с ним Тебе честь.

Иная молитва Божественной литургии апостола и брата Божия Иакова

Боже по великому и неизреченному человеколюбию Твоему пославый единородного Твоего Сына в мир, да заблудшее обратить овча, не отвратися от нас, грешных, приносящих Тебе страшную сию я безкровную жертву. Не бо на праведность нашу уповаем, но на милость Твою благую, ею же род на наш стяжал еси. Молим Твою благость и припадаем Ти: да не будет, во осуждение людем Твоим уставленное нам сие во спасение Таинство, но во оставление грехов, во обновление душ и телес, во благоугождение Тебе Богу Отцу, и единородному Твоему Сыну, и Благому и Животворящему и Единосущному Тебе Духу, ныне и присно, и во веки веков. Аминь.

Молитва о мире

Мир всем.

И паки молим Вседержителя и милосердого Бога Отца Господа же и Бога и Спаса нашего Иисуса Христа, о нем же просим, и молим Тя человеколюбче, Блаже Господи. Помяни Господи мир святыя, единыя, соборныя и апостольския церкве Твоей.

Помолитеся о мире святыя, единыя, и проч. сущия от конец вселенныя до конец ея, о вся люди и вся паствы. Мир небесный ниспосли в сердца всех нас, обаче и сея жизни мир нам даруй. Царя, воинство, князи, советы, народ, соседи наша, вхождения и исхождения наша украси всяким, миром. Царю мира, мир Твой даждь нам, вся бо нам даровал еси: и стяжи нас Боже: разве бо Тебе иного не вемы: имя Твое призываем. Оживотвори душе всех нас, святым Твоим Духом, и да не преможет смерть греха над нами рабами Твоими, ниже над всеми людьми Твоими.

Молитва о папе. (Александрийском)

И паки молим Вседержителя о милосердого Бога Отца Господа же и Бога и Спаса нашего Иисуса Христа, о нем же просим и молим Тя человеколюбче, Блаже Господи. Помяни Господи святейшего и блаженнейшего архиерея нашего авву (имрк). Сохраняя сохрани его нам на многая лета и времена мирна, совершающа от Тебе вверенное ему архиерейство святое, по святой и блаженной воле Твоей, право правяща слово истины, и пасуща люди Твоя в преподобии и правде, со всеми православными епископы, пресвитеры, диаконы, со всем исполнением святыя и единыя, соборныя и апостольския церкви Твоея, мир и здравие им же и нам даруя во вся дни. Молитвы же их, яже творить за ны и за вся люди Твоя, и наша моления о всих приими в небесный и благословенный Твой жертвенник в воню благоухания. Всякого же врага его видимаго и невидимаго сокруши и покори под нози его скоро: самого же его во святой Твоей церкви в мире и правде соблюди.

Народ глаголит: Верую во единого Бога и проч.

Молитва целования св. Василия

Мир всем.

Господи Боже, сотворивый нас и введый в жизнь сию, показавый нам пути спасения, даровавый нам небесных Таинств откровение: Ты еси поставивый нас во служение сие, в силе Духа Твоего святого. Благоволи убо Господи быти нам, служителем, нового завета Твоего, и совершителем святых Твоих Таинств, да сподобимся принести Тебе дары же и жертвы о наших грехах и о людских невежествах. И даждь нам со всяким страхом и чистою совестию принести Тебе духовную сию и безкровную жертву, юже приими во святый жертвенник в воню благоухания, и возниспосли нам благодать Святаго Твоего Духа. Ей Боже, призри на ны и виждь сие словесное служение наше, и приими е: яко же приял еси от святых Твоих апостол истинную сию службу, тако и от рук нас грешных приими предлежащие дары сия, во благости Твоей Господи, с виждь им быти благоприятным, освященным в Дусе Святе, во очищении прегрешений наших и людских невежествий, и во упокоении прежде усопших душ, да и мы смирении и грешнии и недостойнии раби Твои, сподобльшеся безпорочно служити святому Твоему жертвеннику, приимем мзду верных и мудрых домостроителей и обрящем благодать и милость в страшный день воздаяния Твоего праведного и благого. И ныне даждь нам мир на всякое время всяким, образом, и любовь Твою даруй нам Господи Боже наш в братолюбие не лицемерно, но еже от чистого сердца любити друг друга непрестанно. Благоволи очистяти ны от всякия скверны, всякого коварства, и всякие злобы и вселукавствия, и смертоносного памятозлобия, и сподоби всех нас Владыко лобзати друг друга лобзанием святым, во еже неосужденно причаститися божественного и пренебесного Твоего дара, щедротами единородного Твоего Сына, с ним же благословен еси и препрославен со всеми святыми.

Иная молитва целования

Боже великий и вечный, создавый в нетлении человека, и вшедшую завистию диавола смерть в мир животворящим явлением единородного Твоего Сына поправый, и небесным миром исполнивый землю, о нем же прославиша Тя воинства ангельская глаголюще: слава в вышних Богу и на земли мир, в человецех благоволение: благоволением Твоего мира исполни сердца наша, благоволи, очисти ны от всякие скверны, всякого коварства и всякой злобы и смертоносного памятозлобия, и сподоби нас лобызати друг друга лобзанием святым, во еже не осужденно причаститися безсмертнаго и пренебеснаго Твоего Дара, во Христе Господе нашем, о Нем же и с Ним Тебе слава и честь и проч.

Иная молитва целования мира

Всяку силу разума и воображение ума превышает величие Твоих, Владыко. Яже бо от премудрых и разумных утаил еси, та младенцем нам открыл еси, и яже пророки и царие восхотеша видети и не видеша, та совершати и теми освящатися сподобил еси нас грешных, единородного Твоего Сына явивый нам домостроительство и, сея жертвы тайнодействие, в ней же несть подзаконныя крове, ниже плоти оправдания, но духовное овча есть, и меч словесный и безтелесный. Сию убо приносят Тебе жертву, молим, Тя человеколюбче: очисти уста наша, и свободи умы наша от всякого вещественного прилога. Возниспосли нам, благодать святого Твоего Духа, и сподоби нас лобызати друг друга святым лобзанием, во еже неосужденно причаститися безсмертного и пренебесного Твоего Дара, во Христе Иисусе Господе нашем, о нем же и проч.

И бывает целование.

Диакон глаголет: Станем добре.

Иерей велегласно: Господь со всеми вами.

Народ. И со духом Твоим.

Священник. Горе имеем, сердца.

Народ. Имамы ко Господу.

Священник. Благодарим Господа.

Народ. Достойно и праведно.

Священник. Достойно и праведно воистину достойно и праведно есть.

Начало Возношения.

Владыко Господи, Боже истины, сый прежде век и царствуяй во веки, в вышних живый во веки и на смиренныя призираяй, сотворивый небо и землю, и море, и вся яже в них, Отче Господа и Бога и Спаса нашего Иисуса Христа, им же вся сотворил, еси видимая же и невидимая, седяй на престоле святыя славы царствия Твоего, от всея святыя силы поклоняемый.

Диакон глаголет: Седящии востаните.

Ему же предстоят ангели, архангели, начала и власти, престоли, господствии и силы.

Диакон глаголет: К востоку зрите.

Предстоят окрест Тебе многоочитии херувимы и шестокрылатии серафими, непрестанно поюще, вопиюще и глаголюще.

Диакон глаголит: Вонмем.

Народ. Свят, свят, свят Господь Саваоф.

Свят, свят, свят еси воистину, Господи Боже наш, иже сотворил еси нас и поставил еси в рай сладости, преступивших же заповедь Твою прелестию змия и отпадших нас от вечной жизни и изгнанных из рая сладости не отвергл еси до конца, но выну посещал еси нас чрез святых Твоих пророков, и в последок дний сих явился еси нам, седящим во тьме и сени смертной, чрез единородного Твоего Сына Господа и Бога и Спаса нашего Иисуса Христа, иже от Духа Свята и от Святыя нашея Богородицы и Приснодевы Марии воплотився и вочеловечився показа нам пути спасения, дарова нам сущее свыше возрождение водою и духом, и сотвори нас себе люди избранны, освятил есть нас Духом Твоим Святым. Иже возлюби сущия своя в мире, дарова Себе Самого во искупление царствующей над нами смерти, в ней же содержими бехом, продани под грех, и сошед со креста во ад, воскресе из мертвых в третий день, и возшед на небеса седе одесную Тебе Отца, уставив день воздаяния, в онь же явлься судити имать вселенной в правде и воздати комуждо по делом его.

Народ глаголет: По милости Твоей Господи, а не по грехом нашим.

Священник. Оставил же есть нам сие великое благочестие таинство. Хотя бо предати Себе Самого на смерть за жизнь мира.

Народ глаголет: Веруем.

Прием хлеб во святые и пренепорочные и блаженные руце своя: воззрев на высоту небес к Тебе Отцу Своему и Богу нашему, и Богу всех: возблагодарив.

Народ. Аминь.

Благословив.

Народ. Аминь.

Освятив.

Народ. Аминь.

Преломив, даде святым своим учеником и апостолом, рек: приимите, ядите: сие есть Тело Мое еже за вы и за многия ломимое и даемое во оставление грехов. Сие творите в мое воспоминание.

Такожде и чашу по вечери, слияв вино с водою, возблагодарив.

Народ. Аминь.

Благословив.

Народ. Аминь.

Освятив.

Народ. Аминь.

Вкусив, паки даде святым своим учеником и апостолом, рек: приимите, и пийте от нея вси: сия есть Кровь Моя нового завета, яже за вы и за многая изливаемая во оставление грехов. Сие творите в мое воспоминание. Елижды бо аще ясте хлеб сий, и чашу сию пиете, смерть Мою возвещаете и Воскресение Мое и Вознесение исповедуете доньдеже прииду.

Народ. Аминь, аминь, аминь.

Смерть твою Господи …

Священник. Поминающе убо и мы святыя Твоя Страсти, и еже из мертвых воскресение, и на небеса восходе и седение одесную Тебе Бога и Отца, в славное и страшное пришествие, Твое от Твоих даров Тебе приносим о всей и за вся и во всех.

Народ. Тебе поем, Тебе благословим.

Диакон. Главы ваша Богови приклоните со страхом.

Священник глаголет такие: И просим и молим Ти человеколюбче, Блаже Господи, мы грешнии и недостойнии раби Твои, покланяющиеся Тебе: благоволением Твоея благости да снидет Дух Твой святый на нас, рабов Твоих и на предлежащие Твои дары сия, и освятит и покажет Святая Святым:

Диакон. Вонмем.

Народ. Аминь.

Священник велегласно. И да сотворит убо хлеб сей Святое Тело самого Господа и Бога и Спаса нашего Иисуса Христа, во оставление грехов и в жизнь вечную причащающимся его.

Народ. Аминь.

Священник. Чашу же сию – честную Кровь нового завета самого Господа и Бога и Спаса Нашего Иисуса Христа, во оставление грехов и в жизнь вечную причащающимся от нея.

Народ. Аминь. Господи помилуй, (трижды)

И сподоби нас Владыко причаститися святых Твоих Таинств во освящение души и тела и духа, да будем едино тело и един дух, и обрящем часть в наследие со всеми святыми, от века благоугодившими Тебе.

Помяни Господи святую, единую, соборную Твою церковь и умири ю, юже стяжал еси честною кровию Христа Твоего.

В первых помяни Господи святого отца нашего архиепископа авву (имрк) папу и патриарха великого града Александрии, его же даруй святым Твоим церквам, в мире цела, честна, здрава, долгоденствующа, право правящи слово Твоей истины, и пасуща стадо Твое в мире.

Помяни Господи православные, и все диаконства и служение, и всех иже в девстве, и вся вернейшия люди Твоя.

Помяни нас Господи, во еже помиловал и вся ны вкупе присно.

Народ. Помилуй нас Боже, отче, вседержителю.

Священник. Помилуй нас, Боже вседержителю, (трижды.)

Народ. Господи помилуй. (трижды.)

Священник. Помяни Господи и спасение града нашего сего и в вере Божией живущих в нем.

Помяни Господи воздух и плоды земли.

Помяни Господи дожди и семена земли.

Помяни Господи мерное восхождение вод речных.

Возвесели такожде и обнови лице земли. Бразды ея напои и умножи порождения ся. Уготови ю нам в сеяние и в жатву и ныне благословляя благослови. Жизнь нашу управи. Благослови венец лета благостию Твоею, ради бедных в людех Твоих, ради сира и вдовицы, ради странна и пришельцы, и ради всех нас, уповающих на Тя и призывающих имя Твое святое: очи бо всех на Тя уповают, и ты даеши им пищу в благовремении. Сотвори с нами по благости Твоей, давый пищу всякой плоти. Исполни радостию и веселием сердца наша, да во всем всегда всяко имуще довольство, преуспеем во всяком деле блазе, во еже творити волю Твою святую.

Народ. Кирие елейсон: (т.е. Господи помилуй).

Священник. Помяни Господи приносящих Тебе честныя дары сия, и за них же и чрез них же и от них же сия принесошася, и мзду небесную подаждь всем им. Понеже, Владыко, есть заповедь единородного Твоего Сына, – приобщатися нам памяти святых Твоих. Еще же помянути сподоби Господи и от века благоугодившие Тебе святыя отцы, патриархи, апостолы, пророки, проповедники, благовестники, мученики, исповедники, и всяку душу праведную во Христианской вере скончавшуюся.

Изрядно же Всесвятую, Преславную, Пренепорочиую, Преблагословенную Владычицу Нашу Богородицу и Приснодеву Марию.

Святого славного пророка, предтечу, крестителя и мученика Иоанна,

Святого Стефана, архидиакона и первомученика,

И святого, блаженного отца нашего Марка апостола и евангелиста, и иже во святых отца нашего чудотворца Василия,

Святого имрк, его же и память днесь совершаем, и весь лик святых Твоих, их же молитвами и молениями и нас помилуй, и спаси ради имени Твоего святого, еже призвася на ны.

Диакон. Чтет диптихи (помянники).

Священник тайно.

Такожде помяни Господи и всех во священстве прежде усопших и в мирских званиях: души всех упокоения сподоби в лоне святых отец наших Авраама и Исаака, и Иакова. Собери и постави я на месте злачне, на воде упокоения, в раи сладости, отонудуже отбеже болезнь, и печаль и воздыхание, в светлости святых Твоих.

И после чтения диптихов священник глаголет:

Оныя убо души Господи тамо приим, упокой я, и царствия небесного сподоби. Нас же зде пребывающих соблюди в вере Твоей и управи нас в царствие Твое, даруя нам мир Твой на всякое время, да и о сем, якоже и во всем прославится и возвеличится, и благословится, и святится всесвятое и честное и благословенное имя Твое, со Христом Иисусом и Святым Духом.

Народ. Якоже бе и проч.

Диакон. Диаконы станите ниже

Священник. Мир всем.

Предуготовление к преломлению

И паки возблагодарим Вседержителя Бога, Отца Господа и Спаса Нашего Иисуса Христа, яко ныне сподобил есть нас стояти во святем месте и воздевати руцы и служити святому Его имени. Его убо просим, да сподобит нас общения и причащения Святых Своих Таин, Пречистого Тела, и Честныя Крове Христа Своего, Вседержитель Господь и Бог наш.

Диакон. Помолитеся.

Священник. Мир всем.

Молитва преломления св. Василия

Боже наш, Боже спасения, ты научи нас благодарити достойно за благодения Твоя, яже сотворил, еси и твориши присно с нами. Ты еси Бог наш, приемый дары сия. Очисти мы от всякие скверны плоти и духа, и научи совершати святыню во страсе Твоем, да в чистом свидетельстве совести нашей приемши часть святынь Твоих соединимся святому телу и крови Христа Твоего, приявше сия достойно, да имамы Христа, живуща в сердцах наших, и будем храм Святого Твоего Духа. Тако, Боже наш! И ни единого же от нас повинна сотвори страшным Твоим Тайнам сим, ниже немощна душею и телом быти, за еже недостойни причаститися их. Но даждь нам даже и до последнего издыхания нашего достойно приимати упование святынь Твоих, в напутие живота вечного, в ответ благоприятен на страшнем судищи Христа Твоего, яко да и мы со всеми святыми от века благоугодившими Тебе будем участники вечных Твоих благ, яже уготовал еси любящим Тя Господи: и сподоби нас Владыко со дерзновением неосужденно смети призывати Тебе небесного Бога Отца и глаголати.

Иная молитва преломления

Владыко Господи, Вседержителю Боже, великий, вечный и дивный во славе, сохраняяй завет Твой и милость Твою любящим Тя, давый нам оставление грехов ради единородного Твоего Сына Господа и Бога и Спаса Нашего Иисуса Христа. Животе всех, и помощи к Тебе прибегающих и упование призывающих Тя: ему же предстоят тысящи тысящ и тьмы тем святых ангел и архангел, херувимы и серафимы и все множество небесных сил. Освятивый предлежащие Дары сия наитием всесвятаго Твоего Духа: очисти нас от тайных и явных прегрешений наших, и всяк помысл неугодный благости Твоей далече отстави от нас. Освяти души наша, телеса, дух, и совести, да с чистым сердцем и душею просвещенною смеем со дерзновением без страха призывати Тя небесного Бога Отца Святого и глаголати.

Иная молитва преломления

Сыноположения благодать нам даровавый банею пакибытия и обновление Духа Святого: и ныне сподоби нас нелицемерно, чистым сердцем, с совестию небоязненною, и устами нетрепетными призывати Тя, авва отче, да тщету языческого многоглаголания и иудейского неразумия отложше, смиренно и яко же подобает христианам, во гласе молитвенном, возможем вознести Тебе моление по спасительному Единородного Сына Твоего законоположению, и во освящение души, тела же и духа дерзнем, без страха призывати несозданного, безначального и безконечного всех Владыку, Небесного Бога Отца Святого и глаголати.

Народ глаголит: Отче Наш: и по Отче Наш глаголит священник:

Ей Отче блаже и человеколюбче, не введи нас во искушение, но избави нас от злых дел и помышлений, стремлений же и зрений, и осязаний, и искусителя безуспешна отжени: укроти же в нас и врожденные телесные движения, и яже ко греху поползновения губительные всецело отжени от нас о Господе и Боге и Спасе Нашем Иисусе Христе, о нем же и с ним и проч.

Диакон. Главы ваша…

Молитва главопреклонения

Боже, тако возлюбивый нас и даровавый нам достоинство усыновлении, да чада Божии назовемся и есмы, наследницы же Тебе Отца, сонаследницы же Христа Твоего. Приклони Господи ухо Твое и услыши нас, преклонших Тебе главы своя, и очисти внутреннего в нас человека, якоже чист есть единородный Сын Твой, его же имамы прияти. И да бежит от нас блуд и помысл нечист, Бога ради рожденного от Девы: кичение же и древнее зло гордость, смирившегося ради за ны: страх, пострадавшего ради плотию и воздвигшего победное знамение креста: тщеславие, приимшего ради заушения и бичевания и не отвратившего Лица Своего от стыденные оплевания: зависть и убийство, и раздор и ненависть, Агнца Божия ради, вземшего грех мира: гнев и памятозлобие, пригвоздшего ради ко кресту долгов, рукописание, бесы и диавол (да бежат от нас) победившего ради лукавые начала, и темные власти потребившего: всяко земное мудрование, восшедшего ради на небеса: да тако чисто чистейшего Таинства причастимся, и всецело освятимся душею, телом и духом, сотлесни и сопричастни, и сообразни соделавшеся Христу Твоему: и да исполнятся уста наша хваления и устне наша веселия, яко да воспоем славу Тебе Отца, и единородного Твоего Сына Предвечного, о нем же и с ним же и проч.

Яко Твое есть Царство и Сила Отца и Сына и Святого Духа, ныне и проч.

Диакон. Главы ваша Богови приклоните.

Молитва главопреклонения

Владыко Господи, Отче щедрот и Боже всякие утехи, преклоньших Тебе главы своя благослови, освяти, соблюди, огради, укрепи, от всякого дела лукавого отврати, всякому же делу благому сочетай, и сподоби неосужденно причаститися пречистых сих животворящих Таин, во оставление грехов, во общение Духа Святого, благодатью и щедротами и человеколюбием и проч.

Иная молитва у Египтян из литургии преждеосвященных апостола Марка, пред причащением Святых Таин

Совершенны суть дары благостыни, яже суть страшная и преблагословенная Таинства единородного Сына Твоего, Господа же и Бога и Спаса нашего Иисуса Христа. Спасительные страсти его исповедахом, животворящую смерть его возвестихом, святому, тридневному из мертвых воскресению его уверовахом. Таинство совершися. Благодарим Тя Господи, Боже Отче, Вседержителю, яко милость Твоя велия на нас, и совершил еси нам, в няже ангелы желают приникнути. Просим и молим Твою Благость, человеколюбче, да очистиши всех нас припадающих к Тебе, и соединиши с Собою причащением Божественных Твоих Таинств, да будем преисполнены Святого Духа и утверждени в правой вере Твоей. Да исполнимся желания истинной любви Твоей, славяще Тя присно, во Христе Иисусе, Господе нашем, о нем же и с ним и проч.

Диакон. Вонмем Богу со страхом

Священник. Мир всем.

Владыко Господи Боже Отче Вседержителю, исцеляяй наши души и телеса, и дуси: ты еси заповедавый Петру, верховному из святых Твоих учеников я и апостолов, устами Единородного Твоего Сына, Господа же и Бога и Спаса нашего Иисуса Христа, глаголавшему ему: ты еси Петр и на сем камне созижду Церковь Мою, и врата адовы не одолеют её: и дам ти ключи Царствия Небесного, и елика аще свяжеши на земли, будут сказана на небесех, и елика аще разрешиши на земли, будут разрешена на небесех. Да будем убо и мы рабы Твои, отцы мои и братия священницы и левиты, и вси люди Твои верние, припадающие пред святою Славою Твоею во святый час ceй, и носящии честный крест Твой, да будем вси разрешени и свободни устами мене грешного, чрез всесвятого Твоего Духа, благого и человеколюбца. Боже, ради Сына Твоего, вземшаго грех мира, приими покаяние рабов Твоих от них самих в свет ведения, во очищение грехов: яко не хощеши смерти грешника, но еже обратитеся и живу быти ему Ты бо еси, Господи, Господь Бог щедрый и милостивый, долготерпеливый и многомилостивый и истинный, отъемляй беззакония и неправды, и грехи. И елика ти согрешихом, аще словом или делом, ослаби, остави, прости нам, яко благ и человеколюбец Бог. Аще бо беззакония назриши Господи. Господи, кто постоит; яко у тебе очищение есть, яко ты еси очищение грехов наших, просвещение и спаситель душ наших. Боже всех нас свободи, и вся люди Твоя избави от всякого греха, всякого отречения и злохуления, от всякие клятвы и проклятия, волшебства и отравы, идолослужения и клятвопреступления, от анафемы и прещения, от разделения действуемаго, от стрелы летящие, от стенания правых же в неправых, от всякого прения еретиков и язычников. Даруй нам Владыко ум и смысл в силу бегати, даже до конца, всякого дела лукавого, противного, и даждь нам творити сие во благоугождение Твое. Напиши имена наша со всем ликом снятых Твоих во царствие небеснем, о Христе Иисусе Господе нашем, о нем, же и с ним же и проч.

Священник возвышает Агнец (Σπουδικόν) и возглашает:

Святая святым.

Народ. Господи помилуй, (трижды.)

Един Отец свят, един Сын свят, един Дух свят. Аминь.

Священник. Господь со всеми вами.

Народ. И со духом Твоим.

Священник. Благословен Господь во веки. Аминь.

Народ. Аминь.

Священник. Мир всем.

Народ. И духови твоему.

Священник глаголет исповедание.

Тело Святое и Кровь Честная, истинная, Иисуса Христа Сына Божия. Аминь.

Народ. Аминь.

Святое, честное Тело и Кровь истинная Иисуса Христа Сына Божия. Аминь.

Народ. Аминь.

Тело и Кровь Емануила Бога нашего. Сие есть воистину. Аминь.

Народ. Аминь.

Верую, верую, верую и исповедую даже до последнего издыхания, яко сия есть самая плоть животворящая единородного Твоего Сына, Господа же и Бога и Спаса нашего Иисуса Христа, юже прия от Святыя Владычицы нашея Богородицы и Приснодевы Марии, и сотвори едино с Божеством своим не смешением, ниже слиянием, ниже преминением, и засвидетельствова при Понтийстем Пилате благое исповедание, и предаде ю за вся ны на древо Святого Креста по Своему хотению. Истинно верую, яко Божество Его николи же отделися от человечества Его, ниже на мгновение ока. Предаде ю во искупление и во оставление грехов и в жизнь вечную от нея причащающимся. Верую, яко сие есть воистину. Аминь.

Народ. Аминь.

Диакон. В мире и любви.

Священник возглашает: О нем и с ним подобает всякая слава, честь и поклонение Отцу и Сыну и Святому Духу, ныне и присно и проч.

Народ глаголет псалом 50-й и причастен дне.

Диакон. Соберитеся и внидите диаконы со благоговением.

Молитва благодарения по причащении Святых Таин

Диакон глаголет: На молитву станите.

Священник. Мир всем.

Народ. И духови твоему.

Диакон. Помолитеся о....

Народ. Кирие елейсон (Господи помилуй).

Священник глаголет сию молитву:

Исполнишася радости уста наша, и язык наш веселия, о причащении Святых Твоих Таинств, Господи. Яже око не виде и ухо не слыша, и на сердце человеку не взыдеша, та уготовал еси Боже любящим имя Твое святое, и открыл еси та младенцем святой церкве Твоея. Ей отче, яже тако бысть благоволение пред Тобою. Благословен еси Боже, Отче Господа и Бога и Спаса нашего Иисуса Христа, о нем же и проч.

Диакон. Главы ваша…

Молитва главопреклонения

Владыко, Господи Боже, Отче Вседержителю, творяй милость в тысящах призывающим Тя во истине. Призри с небесе благоуветливым лицем и тихим взором на рабы Твоя: Тебе бо преклоните выи сердец своих, чая от Тебе великие и богатые милости, еже от Тебе прияти милость и благословение. Благослови их всяцем благословением духовным. Освяти их Духом Твоим Святым. Ангела мирна к коемуждо из нас пристави стрегуща, соблюдающа, сохраняюща, просвещающа и наставляюща нас на всякое дело благое. Милуя помилуй, и ущедряя спаси и ущедри, и да будет с нами во веки милость Твоя. Святый же день сей и вся дне живота нашего даждь нам Господи Боже без греха прейти, во всякой радости, здравии, мире, спасении, благотворении, всяком освящении и страси Твоем, благодатию и щедротами, и человеколюбием Христа Иисуса, с ним же благословен еси и препрославлен со Святым Духом.

Молитва сорока дней святых постов

Владыко Господи вседержителю, всю тварь мудростию создавый, иже неизреченным промыслом Твоим и по великой благости введый нас во пречестныя дни сия, ко очищению душ и телес, к воздержанию страстей, к надежде воскресения. Иже четыредесятьми деньми скрижали вручивый, Богоначертанные письмена рабу Твоему Моисеови, подаждь и нам Блаже подвигом добрым подвизатися, течение поста совершити, веру нераздельну соблюсти, главы не видимых змиев сокрушити. Победителем же греха явитися, и не осуждение достигнути и поклонитися Святому Воскресению. Яко свято есть имя Твое, Отца и Сына и Святого Духа, ныне и проч.

Отпуст.

Господи, буди с рабами Твоими, поющими Тя и призывающими Тя, и руководи их, помоществуя им во всяком деле блазе. Уклони сердца их от земных неуместных помышлений. Даруй им жити и мудрствовати, яже подобает живым и разумети Твоя. Благословляяй благословящие Тя Господи, и освящаяй на Тя уповающие, спаси люди Твоя и благослови достояние Твое, исполнение Церкве Твоея сохрани, освяти любящие благолепие дому Твоего: ты тех воспрослави Божественною Твоею силою, и не остави нас, Боже, уповающих на Тя.

Болящие уврачуй.

Странствующие умири.

Ветры укроти.

И плоды земли благослови. Мир мирови Твоему даруй, церквам Твоим, священником, царем нашим, воинству и всем людем Твоим.

Прежде усопшия упокой. Принесших дары и за них же принесоша помяни.

Во всяцей печали и нужде сущих спаси. И нам благодать Твою низпосли. В вере во Святую Троицу даже до последнего нашего издыхания соблюди. Яко всякое даяние благо, и всяк дар совершена свыше есть сходяй от Тебе Отца Светов. И Тебе славу и благодарение, и поклонение возсылаем, Отцу, и единородному Твоему Сыну и Святому Твоему Духу, ныне и присно и проч.

Диакон глаголет. Благодать Господа и Бога и Спаса нашего Иисуса Христа со всеми вами. Идите в мире.

Народ глаголет. Господи помилуй (дважды). Господи благослови. Аминь.

Священник глаголет благословение отпуста.

Диакон. И паки идите в мире.

Диаконы глаголют: И паки спасенный… Господи благослови. Аминь.

Священник глаголет отпустную молитву диаконам.

Совершивше священное служение, якоже научени есьмы, Господи, и причащении святых, пречистых, пренебесных и страшных Таинств сподобльшеся, от силы в силу восходим. Мы грешнии и недостойнии раби Твои, сподобльшися служити святому Твоему жертвеннику, и принесшии Тебе безкровную жертву, пречистое Тело и Честную Кровь великого Бога и Спаса нашего Иисуса Христа, во славу Тебе безначального Отца, и самого единородного Твоего Сына, и Духа Святого и Благого и животворящего и единосущного Тебе, молим Тя: сподоби ны и деснаго предстояния Тебе в страшный и праведный день Твой, молитвами и ходатайством прославим я Владычицы нашея Богородицы и Приснодевы Марии и всех святых Твоих. Яко благословен еси ныне и проч.

Совершишися в мире Божественная литургия иже во святых отца нашего чудотворца Василия.

Ведати подобает, яко молитвы: исполнишася радости уста наша: не глаголет иерей в пятый день великой седмицы, не речет сию молитву:

Благодарим Тя Владыко Человеколюбче благодетелю душ наших, яко и в настоящий день сей сподобил еси нас небесных Твоих и безсмертных таинств, их же око не виде… (до конца).

Божественная Литургия иже во святых отца нашего Григория

Посетивый нас милостию и щедротами, владыко Господи Иисусе Христе, и даровавый нам дерзновение смиренным и грешным и недостойным рабом Твоим, предстати святому Твоему жертвеннику, и приносити Тебе страшную и безкровную жертву о наших гресех и людских невежествиих в ослабу и упокоение прежде почивших отец и братии наших, и во утверждение всех людей Твоих, призри на мя непотребного раба Твоего и изглади грехопадения моя, благоутробия Твоего ради, и очисти уста моя и сердце от всякие скверны плоти и духа: и отстави от мене всяк помысл скверный же и неразумный; и освяти мя силою Святого Духа в служение сие, и приими ми приступающа к святому Твоему жертвеннику: и благоволи Господи приятым быти даром, яже Ти принесутся руками нашима, снисходя немощем нашим и не отвержи мене от лица Твоего, ниже возгнушайся моего недостоинства, но помилуй мя Боже по велицей милости Твоей, и по множеству щедрот Твоих очисти беззаконие мое, да не осужденно став пред лицем славы Твоея, сподоблюся покрова Твоего и просвещения всесвятого Духа Твоего, и не яко раб греха отвержен буду, по яко раб, иже обрящет благодать и милость и оставление грехов в нынешнем и грядущем веке. Ей Владыко вседержителю, всеславне Господи услыши молитву мою. Ты бо еси действуяй вся во всех, и от Тебе еси чаем помощи и заступления во всем, яко человеколюбец еси, и препрославлен пребываеши Иисусе Христе Боже наш, со безначальным Твоим Отцем и Святым Твоим Духом, ныне и присно.

Молитва по уготовании святого жертвенника

Владыко Господи Иисусе Христе Боже наш, иже спасительным пришествием Твоим и осиянием всесвятого Духа Твоего сподобивый нас смиренных и грешных и недостойных раб Твоих предстати святому Твоему жертвеннику, и приносити, и служити пречистым Таинствам Нового Завета Твоего, сам, животворче и благих подателю, сотвори с нами знамение во благо, и сподоби ны в чистой совести служити тебе во вся дни живота нашего, и во святости сие Божественное приносити Тебе служение во оставление грехов и в приятие грядущего блаженства. Помяни Блаже, Благодетелю, Царю веков и всея твари содетелю, принесших и за них же принесоша, и нас неосужденных соблюди во священнодействии Божественных Твоих Таинств: яко благословися и освятися и прославися всечестное и великолепое святое имя Твое, со Отцем и Святым Духом, ныне и присно.

Молитва Святого Евангелия

Мир всем!

Владыко Господи Иисусе Христе Боже наш, иже Святым Твоим учеником и священным апостолом Твоим рекл еси, яко мнози пророцы и праведницы вожделеша видети, яже видите, и не видеша, и слышати, яже слышите, и не слышаша: ваши же блажени суть очи, яко видят, и уши яко слышат. Да сподобимся о мы ныне слышати и исполнити Святые Твоя Евангелия молитвами святых Твоих.

Помяни убо Владыко и ныне всех заповедавших нам недостойным помянути их в молитвах наших и прошениях, яже приносим Тебе, Господи Боже, наш. Преждепочившия упокой. Труждающиеся укрепи. Ты бо еси живот всех нас, и спасение всех нас, и упование всех нас, и врачевание всех нас, и воскресение всех нас. И Тебе славу, честь и поклонение возсылаем со вседержительным и всевидящим Отцем Твоим, и со всесвятым и живоносным и единосущным Ти духом, ныне и присно.

Молитва о завесе

Никтоже достоин от связавшихся плотскими похотьми и сластьми приходити и приближатися и служити Тебе, Царю славы. Еже бо служити Тебе велико и страшно, и самем небесным силами неприступно. Обаче неизреченного и безмерного человеколюбия Твоего ради непреложно и неизменно был еси человек, и архиерей был еси нам, и служебныя сея и безкровныя жертвы священнодействие предал еси нам, яко Владыка всех. Ты бо владычествуеши небесными и земными, и преисподними, иже на престоле херувимстем седяй, иже серафимов Господь и Царь Израилев, един святый и во святых почиваяй. Тя убо молю единого благого и благопослушливаго Бога; призри на мя грешного и непотребного раба Твоего, и силою святого Духа Твоего удовли мя, облеченна благодатию священства, предстояти святей Твоей трапезе и свяшеннодействовати пречистое тело Твое и честную Кровь Твою. К Тебе бо прихожду, преклонь мою выю, и молютися: не отврати лица Твоего от мене, ниже отрине мене от отрок Твоих, но сподоби принесенным быти даром сим мною грешным и недостойным рабом Твоим. Ты бо еси освящаяй и освящаемый, приносяй и приносимый, приемляй и приемлемый, даяй и раздаваемый, и Тебе славу возсылаем со Отцем и Святым Духом.

Иная молитва о завесе у египтян

Господи Боже наш Вседержителю, ведый помышления человеков, испытуяй сердца и утробы, мене недостойного призвавый к сему служению Твоему: не отвержи мене, ниже отврати лица Твоего от мене, но остави вся прегрешения моя и омый скверну тела моего и нечистоту души, и всего мя освяти, да не како умоляя Тебя, другим даровати оставление грехов, сам неискуплен явлюся. Ей Господи, да не отвратишися от мене уничиженнаго и постыженнаго, но посли мне благодать святого Твоего Духа, и сподоби мя предстати святому Твоему жертвеннику неосужденно, и приносити Тебе словесное и безкровное приношение сие с чистою совестию во отпущение моих грехов и преступлении, и во оставление невежествия людей Твоих, в покой и прохлаждение прежде почивших отец и братий наших, и во утверждение всех людей Твоих, во славу Отца и Сына и Святого Духа, ныне ...

Молитва лобзания

Мир всем!

О сый и прежде сый и пребываяй во веки, Отцу совечивый и единосущный, и сопрестольный, и созиждительный, иже по единей благости из небытия в бытие приведый человека и поставивый его в раи сладости, лестию же врага и преслушательствием Твоея заповеди падша возобновить хотяй и к древнему возвести достоинству, не ангелу и не архангелу, ниже патриарху, или пророку вручил еси спасение наше: но сам без изменения плоть быв и вочеловечшася, во всем уподобился еси нам кроме греха: ходатай нам быв пред Богом, и средостение ограды и исконную вражду разрушив, земная с небесными соединил еси и обоя во едино совокупил еси, и во плоти исполнил еси домостроительство. И внегда в телеси возноситися Тебе на небеса, исполняющему вся божественна, святым Твоим учеником и апостолом рекл еси: мир оставляю вам, мир мой даю вам. Сей мир ныне и нам даруй Владыко. Благоволи очистити ны от всякия скверны, всакаго лукавства, и всякой злобы и вселукавствия и смертоноснаго памятозлобия, и сподоби ны целовати друг друга во святем лобзании, во еже неосужденно причаститися безсмертнаго и небеснаго дара Твоего, благодатию благоволения Отча и действом Святого Духа. Ты бо еси податель всех благ, и Тебе славу и вечное славословие воссылаем, со безначальным Твоим Отцем и святым Твоим Духом, ныне и присно…

Иная молитва лобзания

Христе Боже наш, страшная и непостижимая сило Бога и Отца, на пламеннем престоле херувимстем возседяй и силами огненными дориносимый, и огнь поядаяй сый, яко Бог, и по неизреченному снисхождению и человеколюбию Твоему не пожелай приступльша к Тебе лукавого предателя, облобызавый же его яко друга, ведя его к покаянию и уразумению дерзновения его: сподоби нас Владыко в страшный сей час, во единомыслии и без всякого двоедушия и остатка злобы, объяти друг друга во святом лобзании. И да не осудиши нас, за еже не всецело и яко угодно Твоей благости чисти есьмы от всякого кваса греховного и лукавства и смертоносного памятозлобия, но сам по неизреченному и неисповедимому благоутробию Твоему ведый наше естество немощное, и долу преклоншееся, отыми всяку скверну преступление наших, да не в суд или во осуждение нам будет Божественное сие таинство. Ты бо еси могий оставляти всяк грех и превосходити неправды и беззакония окаянных человеков – очищение сый всего мира, и Тебе подобает от всех согласное славословие, честь и поклонение, со безначальным Твоим Отцем и животворящим Твоим Духом, ныне и проч.

И бывает лобзание.

Диакон глаголет: Станем добре.

Народ. Милость мира.

Священник возглашает:

Любы Бога Отца и благодать единородного Сына Господа и Бога и Спаса нашего Иисуса Христа, и причастие и дар Святого Духа да будет со всеми вами.

Народ. И со духом твоим.

Священник. Горе; имеим сердца.

Народ. Имамы ко Господу.

Священник. Благодарим Господа.

Народ. Достойно и праведно.

Священник. Достойно и праведно, достойно и праведно.

Начало Возношения

Воистину бо достойно есть и праведно Тя хвалити, Тя благословити, Тебе кланятися, Тя славити единаго истиннаго Бога человеколюбца, неизглаголаннаго, невидимаго, невместимаго, безначальнаго, вечнаго, безвременнаго, неизмеримаго, непостижимаго, Творца всяческих, искупителя всех, очищающего вся беззакония наша, изцеляющего вся недуги наша, избавляющего от истления живот наш, вмещающего нас милостию и щедротами. Тя хвалят ангели, Тебе покланяются архангели, Тебе воспевают начала, Тя превозносят господства, Твою славу власти проповедуют, Тебе престоли хвалу возсылают, тысящи тысящ предстоят Тебе и тьмы темь служение приносят, Тя хвалят невидимая, Тебе покланяются вся видимая, творящая Слово Твое, Владыко.

Диакон. Седящии востаните.

Священник. О Сын Боже Господи истинный от Бога истинна, показавый нам сияние Отца, даровавый нам истинное познание Святаго Духа, показавый нам великое сие Таинство жизни, вчинивый посреди человек ликостояние сил безплотных, установивый на земли песнопение серафимов, приими с невидимыми и наш глас, совокупи нас с небесными силами, да глаголем и мы с ними, всяк неуместен помысл отвергши, да вопием, якоже они, да взываем немолчными гласы, и непрестанными усты воспеваем величие Твое.

Диакон. К востоку зрите.

Священник глаголет: Тебе бо предстоят окрест серафимы шесть крыл единому: двема убо крылами покрывают лица своя, двема же нози своя, и двема летают и вопиют друг ко другу велегласно, победную песнь спасений наших гласом славным, гласом чистым песнословяще, поюще, вопиюще, славословяще, взывающе и глаголюще.

Диакон. Вонмем.

Народ. Свят, свят, свят Господь Саваоф, исполнь небо и проч.

Священник. Свят, свят еси Господи и всесвят. Изрядно существа Твоего сияние, неизреченна мудрости Твоея сила. Ни един ум не измерит пучины человеколюбия Твоего. Сотворил еси мене человека, яко человеколюбец, не сам нуждаяйся в служении моем, но паче аз Твоего взыскуяй владычества. Не суща мя, благоутробия ради, создал еси: небо поставил мя еси в покровь, землю положа ми еси во основание, мене ради обуздал еси море, мене ради произвел еси естество животных, вся покорил еси под нозе мои, ниже единаго от дел Твоего человеколюбия ко мне преминул еси.

Народ глаголет: Господи помилуй.

Священник. Ты создал еси мене и положил еси на мне руку Твою, Твоея власти образ во мне написал еси, дар слова вложил еси, в сладость мне рай отверзл еси. Твоего ведения учение предал еси, древо жизни явил ми еси, смерти жало разумети дал еси, единаго древа вкушати запретил ми еси, от сего единаго рекл ми еси не ясти: аз же ядох, закон поправ умыслом, заповедь презрех: аз же осуждение смерти восхитих.

Народ глаголет: Господи помилуй.

Священник. Ты мне, о Владыко, наказание отъял еси, яко Пастырь благий к заблудшему притекл еси, яко Отец истинный о мне падшем соболезновал еси, всеми яже к животу врачевствами обложил мя еси. Сам ко мне пророки послал еси. Ради мене немощна закон в помощь дал еси. Сам мне вся потребная ко здравию подал еси. Свет заблудшим возсиял еси: к неведущим присносущий пришел еси. В девственную вселился еси утробу. Невместимый Бог сый, не восхищением непщевал еси быти равен Богу, но себе умалил зрак раба приим. Мое в себе естество благословил еси. Мене ради закон исполнил еси. Падения моего восстание совершил еси. От ада обдержимым отпущение дал еси. Закона клятву отъял еси. Во плоти грех упразднил еси. Твоея власти могущество явил ми еси: слепым зрение подал еси, мертвыя из гробов воскресил, еси, словом Твоим естество обновил еси. Твоего благоутробия домостроительство явил мя еси: лукавых насилие потерпел еси, хребет Твой дал еси в бичевание, ланиты же Твоя простерл еси на заушения, не отвратил еси ради мене лица Твоего от постыдных оплеваний.

Народ глаголет: Господи помилуй.

Священник. Яко овча на заколение шел еси: даже до креста попечение о мне показал, еси. Во гробе Твоем грех мой умертвил еси. На небо начаток мой возвел еси. Пришествия Твоего явление извествовал еси, в нем же имаши приити судити живым и мертвым и воздати комуждо по делом его.

Народ. По милости Твоей Господи.

Священник. Сего спасения моего приношу ти образы: словесем Твоим, восписую пресуществления. Ты мне таинственное сие предал еси плоти Твоея в хлебе и вине причащение

Народ. Веруем.

Священник. В нощь бо, в нюже предаяшеся волею Твоею.

Народ. Веруем.

Священник. Прием хлеб во святые и пречитые, и нескверные руцы Твои, воззрев горе ко Отцу Твоему, Богу нашему и Богу всяческих, возблагодарив, 🕂 благословив, 🕂 освятив 🕂 преломив дал еси святым Твоим учеником и апостолом рек: приимите, ядите: сие есть Тело Мое, еже за вы и за многие ломимое и даемое во оставление грехов. Сие творите в Мое воспоминание.

Такожде и по вечери прием чашу и влив в ню лозное с водою, возблагодарив 🕂 благословив 🕂, освятив 🕂 дал еси святым Твоим учеником и апостолам, рек: пийте от нея вси: сия есть кровь Моя Новаго завета, яже за вы и за многие изливаемая во оставление грехов. Сие творите в Мое воспоминание. Елижды бо аще ясте хлеб сей и чашу сию пиете, смерть Мою возвышаете и воскресение Мое исповедуете, дóндеже прииду.

Народ. Аминь, (трижды). Смерть твою...

Священник. Воспоминающе убо Владыко Твое на землю пришествие, и смерть животворящую, и тридневное погребение Твое, и из мертвых воскресение, и на небеса восхождение, и одесную Отца сидение, и будущее с небес второе и страшное и славное Твое пришествие, (громогласно) Твоя от Твоих даров Тебе приносяще о всех и за вся и во всех.

Народ. Тебе поем, тебе благословим.

Диакон. Главы ваша Богови приклоните со страхом.

Священник преклонь, главу глаголет тайно:

Сам убо Владыко Твоим словом предлежащая сия преложи: сам зде пребываяй, таинственную сию службу соверши, Сам сего служения Твоего памятование нам соблюди. Сам Духа Твоего всесвятаго ниспосли, да сошед святым, и благим, и славным в присутствием Своим освятить и преложить предлежащие, честные и святыя Дары сия в самое Тело и Кровь нашего искупителя.

Диакон. Вонмем.

Народ. Аминь.

Священник велим гласом. И сотворить убо хлеб сей Святое Тело Господа и Бога и Спаса и Всецаря нашего Иисуса Христа, во оставление грехов, и в жизнь вечную причащающимся от него.

Народ. Аминь.

Священник. Чашу же сию, – честную Кровь Новаго Завета Господа же, и Бога, и Спаса, и Всецаря нашего Иисуса Христа во оставление грехов, и в жизнь вечную причащающимся от нея.

Народ. Аминь.

Егда священник глаголет следующее, народ отвещавает

Господи помилуй.

Молим Тя Христе Боже наш: церкви Твоей, Господи, основание утверди.

Любви единомыслие в нас вкорени.

Веры истину возвыси.

Твоего благочестия путь нам благоуправи.

Пастыри огради.

Пасомыя защити.

Подаждь клиру благонравие.

Монахом воздержание.

Сущим в девстве чистоту.

Сущими в честнем браце благое житие.

Кающимся милость.

Богатыми сердоболие.

Бедным помощи.

Нищими пропитание.

Старшие препояши.

Юные уцеломудри.

Неверующие обрати.

Церковные раздоры умири.

Ересей возстания разори.

Всех нас во единомыслие благочестия Твоего соедини.

Народ. Господи помилуй (кирие элейсон).

Священник. Помяни Господи мир, единой, святой, соборной и апостольской Церкве Твоей, от конец вселенной, и сущие в ней православные епископы, право правящим слово истины.

Громогласно: Изрядно святейшего и блаженнейшего архиерея нашего авву. имя рек, папу и патриарха великаго града Александрии, присущие зде епископы, диаконы, чтецы, певцы, заклинатели, иноки, приснодействующие, воздержники, вдовицы, сирыя, вся люди и все исполнение Святой Божией Церкве, вся верующие.

Народ глаголет: Кирие элейсон.

Священник. Помяни Господи благочестивые цари.

Помяни Господи сущих в палате братий наших верных и православных и все воинство.

Помяни Господи приносящих Святыя Дары сия, и за них же принесоша, и мзду небесную подаждь всем им.

Помяни Господи и сущих в горах и вертепах и пропастех земных,

И в пленении сущих братий наших, и мирное возвращение во своя даруй им.

Диакон. Помолитеся о плененных.

Народ. Господи помилуй.

Тогда священник преклоняет свою главу, глаголя тайно:

Помяни Господи и мою душу убогую и окаянную, смирение мое, и прости ми вся прегрешения моя, и идеже умножися грех, преизбыточество благодать Твою, и ради грехов моих и скверны сердца моего не лиши люди Твоя благодати Святаго Духа Твоего.

И восклонься возглашает:

Люди бо Твоя и церковь Твоя молятся. И чрез Тебя и с Тобою, Отца, глаголюще:

Народ. Помилуй нас Боже спасителю наш, (трижды).

Священник. Помилуй нас Боже спасителю наш, (трижды).

Народ глаголет: Господи помилуй, (трижды).

Священник. Помяни Господи воздух и плоды земли.

Помяни Господи соразмернее восхождение вод речных.

Помяни Господи дожди, и семена земные.

Возвесели паки и обнови лице земли.

Бразды ея напои, произрастания ея умножи, уготови и нам в сеяние и в жатву, и ныне благословляя благослови. Живот наш управи. Благослови венец лета благостию Твоею ради бедных, сущих среди людей Твоих, ради вдовицы и сироты, ради странна и пришельца, и ради всех нас, уповающих на Тя и призывающих имя Твое святое. Очи бо всех на Тя уповают, и ты даеши им пищу во благовремении. Сотвори с нами по благости Твоей, даяй пишу всякой плоти. Исполни радостию и веселием сердца наша, да во всем всегда всяко довольство имуще преизбыточествуем во всяком деле блазе, воеже творити волю Твою святую.

Народ: Господи помилуй.

Священник глаголет, народ же отвещавает: Господи помилуй.

Подаждь людем Твоим единомыслие.

Миру благостояние.

Воздухом благорастворение.

Недугующим исцеление.

Нуждающимся утешение.

Сущим во изгнании ослабу.

Сирым помощь.

Вдовицам заступление.

Скорбящие удовли во благое.

Стоящие укрепи.

Падшие возстави.

Возставшие утверди.

Усопшие помяни.

Сущих во исповедании19 молитвы приими.

Согрешившие и покаяшиеся сопричти с верными Твоими.

Верные сопричти с мучениками Твоими.

Присущие в месте сем подражатели ангелом соделай.

И нас Твоею благодатию призванных к сему служению Твоему, недостойных сущих, приими.

Народ. Господи помилуй.

Священник. Помяни Господи и град сей и в православной вере живущих в нем, и всякий град и страну со всеми людьми их. И избави нас от глада и язвы, труса, потопа и огня, и от пленения варвар, и от меча иноплеменника, и восстания врагов же и еретиков.

Народ. Господи помилуй.

Священник. Помяни Господи преждеотшедшие преподобные отцы наша, православные епископы, и вся от века благоугодившие Тебе святые отцы, патриархи, апостолы, пророки, проповедницы, благовестницы, мученики, исповедники, и всяк дух праведный в вере Христовой скончавшиеся,

Громогласно: Изрядно пресвятую, преславную, пречистую, преблагословенную владычицу нашу Богородицу и Приснодеву Марию,

Святаго славнаго пророка предтечу, крестителя и мученика Иоанна,

Святаго Стефана перводиакона и первомученика. Святаго и блаженнаго отца нашего Марка, апостола и евангелиста,

Иже во святых отца Григория,

И их же в настоящий день память совершаем, и весь лик святых Твоих, их же молитвами и молениями и нас помилуй и спаси ради имени Твоего святаго, еже призвася на ны.

Диакон чтет диптихи (т. е. помянники)

Священник глаголет тайно:

Помяни Господи преждепочившие в православной вере отцы наша и братие, и упокой души их с преподобными и праведными, всели и совокупи их в месте злачне, на воде упокоения, в раи сладости, и с ними – их же рекохом имена их.

Абие поминает живых и умерших и по сем глаголет.

Помяни Господи, их же помянухом, и их же не помянухом, верных и православных, с ними же и нас яко благ и человеколюбец Бог.

Народ. Ослаби, остави, прости.

Священник. Ты бо еси Бог наш милостивый, не хотяй смерти грешника, но еже обратитеся и живу быти ему. Боже посети нас спасением Твоим. Сотвори с нами по благости Твоей, творяй более тех, яже просим и о них же помышляем да и в сем яко же и во всем прославится и вознесется и восхвалится и благословится и святится всесвятое и честное и благословенное имя Твое вкупе со пречистым Твоим Отцем и Святым Духом.

Народ. Якоже бе и есть и будет.

Диакон. Диаконы приступите.

Священник. Мир всем.

Народ. И духови твоему.

Начало преломления

Священник глаголет: Иисусе Христе, спасительное имя, иже божественные и пречистые и небесные Таинства сия установивый, иже священники в чине служителей поставивый, исповедимою же Твоею силою сия преложивый, иже чистым сердцам являйся, и искренне приступающим сам подаваяй сия.

Иже тогда благословивый, и ныне благослови.

Иже тогда освятивый и ныне освяти.

Иже тогда преломимый и ныне преломи.

Иже тогда преподавый учеником и апостолом своим и ныне Владыко даждь нам и всем людем Твоим человеколюбче, вседержителю, Господи Боже наш.

Диакон. Помолимся.

Народ. Господи помилуй.

Священник. Мир всем.

Молитва преломления

О сый, иже бе пришедый и паки грядый, одесную Отца седяй, хлеб сшедый с небесе и живот даяй миру, архиерее великий, начальниче спасения нашего, свете истинный, иже прежде всех век. Иже сый сияние славы и образ ипостаси самаго Отца Твоего, иже благоволивый снити с высот небесных из лона неприступнаго света и истиннаго и невидимаго единаго Отца, воплотивыйся же от Духа Свята и от всеславной, пречистой, святой владычицы нашей Богородицы и Приснодевы Марии

Православно

И совершенно вочеловечивыйся, не преложением человечество изменивый, соединивый же оное Себе Самому во ипостаси неизреченно и недомыслимо, неизменно, неслитно, душу имущее словесную же и разумную, и тако произошел еси из нея Богочеловек, единосущный Отцу по Божеству и единосущный нам по человечеству, не во двою лицу, ниже во двою зраку,

Не православно отражено

Ниже по двое естеству познаваемый, но един Бог, един Господь, едино существо, едино царство, едино Господство, едино действо, едина ипостась, едино хотение, едино естество Бога слова воплощенное, и покланяемое.

Распятый же при Понтийстем Пилате, и исповедавый благое исповедание, пострадавый и погребенный и воскресый в третий день, и возшедый на небеса, и седяй одесную величества Отца, поправый смерть, и ад упразднивый, сокрушивый врата медные и вереи железные расторгий, и пленнаго Адама воззвавый от тления, и нас свободивый от работы диавольской:

Сего ради просим и молим Тя человеколюбче, ближе: сподоби ны в чистом сердце смети без страха призывати всех Владыку небеснаго Бога Отца Святаго, и глаголати.

Иная молитва преломления

Ты бо еси Слово отчее, предвечный Бог, великий архиерей, за спасение рода человеческаго воплотивыйся и вочеловечивыйся, и призвавый Себе от всех язык род избран, царское священие, язык свят, народ и стяжание. Сего ради просим и молим Тя человеколюбче, Блаже Господи: не во обличение и студ, не в суд ниже во осуждение наших грехов да будет жертва сия: за немощи бо наша принесохом: но якоже всесвятые Твоя честные дары сии всякой святыни исполнити сподобил еси наитием на них всесвятаго Твоего Духа, тако и нас грешных рабов Твоих освятитися сподоби душею, телом, духом, совестию, да с просвещенною душею, лицем непостыжденным, сердцем чистым, совестию нелицемерною, освященными усты, с любовию совершенною, надеждою твердою, смеем со дерзновением без страха глаголати святую молитву, юже предал еси святым Твоим учеником и священным апостолом (глаголя): егда молитеся, сице молитеся: отче наш.

Народ. Да святится имя Твое и проч.

Иная молитва подобная

Коими Господи Иисусе Христе Боже наш от святаго жилища Твоего и от престола царствия Твоего, и прииди во еже освятити нас призывающих Тя, в вышних со Отцем седяй и зде с нами невидимо пребываяй, и сподоби державною Твоею рукою преподати нам пречистое Тело Твое, и нами всем людем Твоим. Ты бо еси ломяй и преломляемый и неломимый, и Тебе славу возсылаем со Отцем и Святым Духом, ныне и проч.

Диакон. Вонмем Богу со страхом.

Молитва разрешительная

Мир всем.

Агнче Божий, вземляй грех мира, пречестную Кровь Твою пролиявый за живот мира, и во искупление и замену всех предавый Себе Самаго, искупивый от смерти, к нейже содержими бехом продани под грех, боящихся его творяй волю, и молению их внемляй и спасаяй их, праведнаго Иова услышавый, егда востав заутра за чада своя жертвы приносяще, глаголя: посли помыслиша сынове мои лукавая в сердцах их противу Бога; услыши и мене окаяннаго и грешнаго и непотребнаго раба Твоего, молящегося о Твоих рабех, отцех моих и братиях, и о моем окаянстве. Благоуветливым лицем и кротким оком призри на ны в сей час, и остави нам всяку неправду и всяко преступление и преслушание закона и заповодей Твоих, еще же и всяко помышление, и вся деяния, и вся движения, бывающие в нас во дни и в нощи, во еже вязати и обдержати душу: оных же свободи от всякие лукавые совести и от всякаго безплоднаго деяния и от всякаго помысла разженнаго. Даруй им грехов познание, да в конец воздержатся от них. Подаждь им покаяния чистоту и к Тебе обращение. Ты бо Владыко Господи волею обнищал еси, егда воплотился еси ради спасения нашего рода, и раздрал еси еже на ны рукописание, распрострый на кресте Божественные длани Твоя. Пощади всех Владыко душелюбче, яко всяческая Тебе работа суть, и от Тебе нам вся начинания, и ничто же дается рукама нашима: сего ради Царствие Твое славим и воспеваем Тя, Христе Боже наш

Священник. Тело и Кровь.

Диакон. Со страхом Божиим вонмем.

Священник возвышает деспотикон. (т. е. агнца) и возглашает: Святая святым.

Народ. Господи помилуй.

Един Отец свят, един Сын свят, един Дух свят. Аминь.

Священник. Господь со всеми вами.

Народ. И со духом Твоим.

Священник. Благословен Господь во веки. Аминь.

Народ. Аминь.

Священник. Мир всем

Народ. И духови твоему.

Священник. Тело святое и Кровь честная, истинная, Иисуса Христа Сына Божия. Аминь.

Народ. Аминь.

Священник. Тело святое и Кровь честная, истинная, Иисуса Христа Сына Божия. Аминь.

Народ. Аминь.

Священник. Тело и Кровь честная. Еммануила Бога нашего. Сие есть во истиниу. Аминь.

Народ. Аминь.

Верую, верую, верую и исповедую даже до последнего издыхания, яко сия есть плоть животворящая, юже приял еси Христе Боже наш от святой Владычицы нашей Богородицы и Приснодевы Марии и сотворил еси Ю едино с Божеством Твоим, не в смешении, ниже в слиянии, ниже в пременении: (и засвидетельствовал еси при Понтийстем Пилате благое исповедание) и предал еси Ю за ны… вземляй на древо Креста Твоего Святаго волею Твоею.

Истинно верую, яко Божество Твое николиже разлучися от человечества Твоего ниже на едино мгновение ока. Предал еси е во искупление и во оставление грехов и в жизнь вечную причащающимся от него.

Верую, яко сие есть воистину. Аминь Народ. Аминь.

Диакон. В мире и любви.

Священник возглашает: Непостижиме Боже, Слове невместиме и вечне приими от нас грешных из недостойных устен песнь с вышними силами: Тебе бо подобает всякая слава, честь и поклонение, со безначальным Твоим Отцем, и животворящим Твоим Духом во вся веки веков. Аминь.

Народ чтет псалом 50-й.

Диакон глаголет: Соединитеся и приступите, диаконы со благоговением.

Молитва благодарственная по причащении Святых Таин.

Диакон. На молитву станите.

Священник. Мир всем.

Народ. И духови твоему.

Диакон. Помолитеся о достойном причащении.

Народ. Господи помилуй

Священник глаголет сию молитву:

Благодарим Тя, Слове Бога истине, Сын от существа безначальнаго Отца, яко тако возлюбил еси нас, и предал еси Себе Самаго за ны на заклание, даровал еси нам пречистым Твоим Телом и честною Твоею Кровию искупление, яко сподобил еси нас ныне человеколюбче, причаститися от них. Сего ради исповедуемтися ныне человеколюбче, Блаже, и Тебе славу, честь и поклонение, непрестанно возсылаем со безначальным Твоим Отцем, со Святым Твоим Духом, ныне ...

Диакон. Главы ваша Господеви приклоните.

Молитва главопреклонения

О сый, иже бе, и пришедый в мир, просветити его. Воплотивыйся, вочеловечивыйся, и распныйся за ны, и волею пострадавый плотию, и пребывый безстрастен яко Бог, и погребенный, и воскресый в третий день, и нисшедый на небеса, и седяй одесную величия славы Отца, и Божественнаго и Святаго, и единосущнаго, и единосильнаго, и единославнаго, и совечнаго Духа низпославый на святых Твоих учеников и апостолов, и им просветивый их, ими же всю вселенную, Христос истинный, Бог наш… молитвами… и Гавриила и Рафаила.

И ангелов четверозрачных, животных, безтелесных, и ангелов двадесяти четырех старцев, святаго славнаго пророка предтечи, крестителя и мученика Иоанна, святаго Стефана перводиакона и первомученика, Божественных, священных, славных апостолов, страстотерпцев, пророков, и добропобедных мучеников. И святаго и блаженнаго отца нашего Марка, апостола и евангелиста, и всех святых Твоих.

Спаси, и помилуй, и благослови всякаго христианина. И Тебе славу, и честь, и поклонение возсылаем со безначальным Твоим Отцем и Святым Духом, ныне и присно.

В мире Божием совершается Божественная литургия, учрежденная иже во святых отцем нашим Григорием Богословом.

Литургия святаго Кирилла Александрийскаго

Священник, молится тайно.

Творче видимым же всем и невидимым, вся управляя Твоим, промыслом: Твоя бо суть вся, Господи душелюбче: молю Тя, Господи вседержителю, аз немощный, худый и непотребный паче всех служителей Твоих, приступая к совершению сего таинства святаго, еже есть Твоя святая святым: подаждь ми Господи Духа Твоего Святаго, огнь невещественный, разумением непостижимый, иже поядает всякое ожестение, пожигает злая помышления, умерщвляет уды земные и телесные, и воспящает поползновения души, преклоняющая к мечтаниям страстным и пагубным те и якоже лет есть священником, постави мя превыше всякаго помышления земнаго, и даруй ми словеса чиста, да совершу сие возношение предложенное, еже есть Таинство паче всех таинства», во общении и причастии Христа Твоего, ем уже с Тобою подобает слава, в Духу Святому животворящему, и Тебе Единосущному ныне и проч.

Молитва о мире св. Кирилла

Священник. Подателю жизни и Царю веков, Боже, пред Ним же преклоняется всяко колено небесных, земных и преисподних, Ему же вся повинуются и служат, и преклоняются под державу царства Его, Его же хвалят вои ангельстии, лики небесные и естества умные. Непрестанными гласи славяще Божество Его: иже восхотел еси, да мы, немощни в земии суще, служим Тебе, не чистоты ради рук наших, или коего дела нашего благаго на земли, но понеже угодно той: бысть даровати нам, рабом Твоим наименьшим и недостойным, некую часть от чистоты Твоей: восприими убо нас, к Тебе Блаже и Человеколюбче, да приступим ко олтарю Твоему святому, по велицей милости Твоей, и сотвори ны достойны онаго мира небеснаго, иже подобает Божеству Твоему, и иже есть спасение нам, да дадим его друг другу в любви совершенней и да лобжем друг друга лобзание святым, ниже помышлении нечистыми, или умом коварным и злобою предателя отмщение страх Твой, ниже совесть имущее беззаконну, но в радости душ наших и в веселие сердец наших, егда мир оный есть нам знамение велико и совершенно любве единороднаго Сына Твоего. Не отвержи нас рабов Твоих скверны ради грех наших: Ты бо создал еси персть нашу и веси яко никтоже есть рожденный женою, иже не согрешит пред Тобою. Сподоби всех нас, Господи, да с сердцем чистым и душею, исполненною благодати Твоея, стоим пред Тобою, и принесем Тебе сию жертву святую, разумную, духовную и нетленную во оставленье прегрешений наших и прощение невежествий людей Твоих: яко Ты еси Бог благий и милостивый, и Тебе возсылаем славу, честь и поколение, Отче, Сыне и Душе Святе, ныне и присно и проч.

Иная молитва лобзания мира ко Отцу

Боже любви и подателю согласия, иже совет един к пользе нашей дал еси нам и заповедь нову Единородным Сыном Твоим, да любим друг друга, якоже ты возлюбил еси нас недостойных и заблудших, и дал еси Сына Твоего возлюбленнаго за живот и спасение наше: молим Тя, Господи: подаждь нам рабам Твоим во всякое время жизни нашей на земли, паче же ныне, дух правый, совесть чисту, помышления искренние, и сердце любящее братий, да дадим лобзанье духовно, не якоже Иуда предатель, но якоже ученицы Твои и апостолы святии приветствуем друг друга, и да освятимся и очистимся, присущу Духу Твоему Святому, благодатию единороднаго Сына Твоего, и проч.

Возношение св. Кирилла.

Священник. Господь с вами.

Народ. И со духом Твоим.

Священник. Горе имеем сердца.

Народ. Имамы ко Господу.

Священник. Благодарим Господа.

Народ. Достойно и праведно есть.

Священник. Достойно и праведно есть, яко Ты воистину достоин еси: праведно и свято, достолепно и потребно душам, телесем и духовом нашим вечный Господи, Господи Боже Отче всемогущий, да всегда и на всяком месте владычествия Твоего хвалю Тя, пою Тя, благословлю Тя, служу Ти, поклоняюся Тебе, благодарю Тя, славлю Тя, и исповедую Тя во дни и в нощи усты немолчными, сердцем николиже умолкающим, и хвалою непрестающею. Ты бо сотворил еси небеса и вся, еже в небесех, землю и вся, яже в ней суть, моря, реки, источники и озера, и вся яже в них. Ты создал еси человека по образу и по подобно Твоему и вся премудростию Твоею сотворил еси во свете Твоем истинном – в единородном Сыне Твоем, Господи Боже, Спасе и Царе нашем Иисусе Христе: за еже благодарим Тя и приносим Тебе, такожде Ему и Духу Святому, Троице Святей, единосущней и нераздельней, сию жертву разумную и служение безкровное, еже приносят Тебе вси людие от восток солнца даже до запада и от севера даже и юга, понеже имя Твое, Господи, велие есть во всех языцех, и на всяком месте приносят фимиам имени Твоему святому, и жертву чисту вкупе с сею жертвою и сим возношением. Священник приемлет кадило и возжигает фимиам.

Господи помилуй. Просим и молим благость Твою человеколюбче. Помяни, Господи, мир единой, святой, соборной и апостольской Церкве,

Диакон. Помолитеся о мири единой, святой, соборной и апостольской Церкве, о спасении людей и благостоянии коегождо места, и да отпустятся нам грехи наша.

Священник. Яжо есть от конец до конец земли. И проч. (Смотри литургию св. Василия).

Господи помилуй. Немощные в людях Твоих уврачуй.

Диакон. Помолитеся о отцех и братиях наших.

Священник. Посети их благостию (зде чтет молитву утреннего возношения фимиама) отцев и братий наших странствующих.

Диакон. Помолитеся о отцах и братиях наших странствующих.

Священник. И тех, иже готови суть в путь шествовати и проч. (чтет молитву). Благорастворенный и здравый подай Господи воздух неба, и люди земли благослови.

Диакон. Помолитеся о воздусе неба и о плодах.

Священник. Сотвори, да растут по силе своей. (Как в литургии Василия).

Господи помилуй царя земли раба Твоего.

Диакон. Помолитеся. Да Христос Бог наш и проч.

Священник. Соблюди его в мире и правосудии и силе, да покорят вся языки, брани хотящии, нам же даруй изобилие благ: возглаголи в сердце его о мире единые Твоея, соборной и апостольской Церкве: сотвори, да помышляет о мире нас ради и имени Твоего святаго, да тихое и мирное житие, пожинем, и во всяком благочестии и чистоте обретемся пред Тобою.

Господи помилуй. Отцам и братиям нашим усопшим, ихже души восприял еси, покой даруй. Помяни такожде вси святия, от века Тебе благоугодившия. отцы наша святые, патриархи, пророцы, апостолы, евангелисты, мученики, исповедники, проповедники, и вся духи праведные, в вере совершенные, изрядно же, святую, преблагословенную Богородицу, присно Деву, чистую и непорочную Святую Марию и проч. (как в литургии Василия), и весь лик святых Твоих.

Священник гласом Иова20. Мы же, Господи недостойны есьмы молитися о блаженных отцев: понеже предстоят они у престола Сына Твоего единороднаго, сего ради сами да ходатайствуют вместо нас о убожестве и немощи нашей. Отпусти нечестия наша молитв их ради, и имени Твоего ради благословеннаго, еже призвася на ны.

Диакон. Помолитеся о отцех и проч.

Священник. Помяни Господи отцы наша православные архиепископы, преждепочившие, иже право правиша слово истины, и даруй нам часть и наследие с ними. Такожде помяни, и ихже память творим днесь.

Священник после диптихов: и онех, и всех, Господи, их же имена сказуем, и их же не сказуем, их же кийждо от нас в уме имать, и их же не памятуем, иже успоша и упокоишася в вере Христовой. Сподоби, Господи, да покоятся души их в лоне отец наших, святых Авраама, Исаака и Иакова и проч.

Господи помилуй.

Священник. И иже жертвы о возношения во благодарение и хвалу и славу приносят имени Твоему святому.

Диакон. Помолитеся о иже от себе жертвы и возношения принесоша.

Священник. Приими я в пренебесный и мысленный Твой жертвенник, в воню благоухания, к величеству Твоему небесному, служением ангел и архангел Твоих святых, якоже приял еси дары праведнаго Авеля и жертву отца нашего Авраама, и

две лепты вдовицы. Такожде в обеты рабов Твоих восприми, великие и малые, тайные и явные, но и тем, иже хотяща принести Тебе жертвы, недостаточестые же ради невозмогоша, такожде и сим, иже днесь сия Тебе дары принесоша, воздаждь нетленные вместо тленных, небесные вместо земных, вечные вместо временных, домы их и работные храмины исполни всех благ. Огради их, Господи, властию ангел и архангел, Твоих святых, и яко же воспомянуша имя Твое святое на земли, помяни их во Царствии Твоем, но и в сем веце да не оставиши их.

Господи помилуй.

Диакон. Помолитеся о здравии и благостоянии патриарха и отца нашего благоговейнаго, архиепископа отца имрек, да Христос Бог наш сохранит житие его на многа лета и времена мирна.

Священник. Патриарха нашего благоговейнаго отца авву имрек, сохраняя сохрани на многие лета и времена мирна, да совершенно исполняет служение святаго архиерейства, еже от Тебе ему вручено есть, по воле Твоей святей и блаженней, право правя слово истины, и паси люди Твоя во святости и правосудии. Даруй ему и нам мир и спасение отовсюду, и молитвы его, яже о нас и о всех, людех, Твоих деет, якоже и наша о нем, приими в жертвенник Твой мысленный и небесный, в воню благоухания. Такожде вся враги его видимые и невидимые сотри и покори под нози его скоро, его же соблюди в мире и правосудии в Церкви Твоей святей.

Господи помилуй.

Диакон. Помолитеся о отцех наших епископах, идеже суть, да Христос Бон наш сохранит житие их на многая лета и времена мирна, и пощадит нас.

Священник. Помяни, Господи, епископы православные на всяком месте, священники, диаконы, иподиаконы, чтецы, певцы, заклинатели, иноки, девы, вдовицы, сирыя, воздержания искус имущие, и в мире пребывающие, всех иже супружеством соединени суть и воспитывают чада своя, иже сказаша нам: помяните нас: и иже не сказаша сего, их же вемы и их же не вемы, ненавидящие и любящие ны: Господи помилуй их.

Господи помилуй. Помяни, Господи, вся православные христианы, иже суть на всей земли.

Диакон. Помолитеся о всех православных, идеже суть на земли, да Христос Бог наш будет им милостив, и помилует их, и нас пощадит.

Священник. Господи помилуй. Помяни Господи место сие, храм сей и вся жилища отец наших, православных.

Диакон. Помолитеся о благостоянии места сего и всех мест отец наших, православных, пустынников и отшельников, и о иже обитают тамо, и о благостоянии всего мира, да Христос Бог наш сохранит я от всякаго зла, и нас пощадит.

Священник. Вся грады, страны и области, и вся домы верных сохрани и всех нас в вере православной даже до последнего издыхания: сия бо есть едина надежда наша.

Господи помилуй. Помяни Господи предстоящих, иже нам в молитве причастни суть.

Диакон. Помолитеся о предстоящих, иже зде причастни суть нам в молитве, да Христос Бог наш сохранит и помилует их, и нас пощадит.

Священник. Отцев и братий наших и всех иде же суть на земли. Сохрани с нами помощию воинства сил святых, и избави нас от разженных стрел диавола, и от всех сетей диавольских, и от всякой прелести суетной славы.

Господи помилуй.

Священник. Помяни Господи всех, иже заповедаша нам воспоминати их молитвах и молениях наших, –

Диакон. Помолитеся о всех, иже заповедаша нам воспоминати их в молитвах и молениях наших, да Христос Бог наш избавит их от всякаго зла.

Священник продолжает. Яже приносим Тебе, Христе Боже наш, паче в сие время сего возношения святаго. Воспоминание же днесь совершаемое, о них же память всегда творим, и их же кийждо от нас во уме иметь, да будет им якоже стена нерушима, одолевающа вся приражения бесов и советы людей нечестивых.

Диакон. Поклонитеся Богу со страхом.

Священник. Помяни Господи убожество мое и нищету души моей, и просвети мя, да разумею, сколь велико есть достоинство, еже предстояти ми у олтаря Твоего святаго. Отъими от мене вся пожелания неразумия и юности, да и та не отягчат мя, егда имать ответ дати в день он страшный. Избави мя такожде от всех действий власти противных, ниже погубиши мя за нечестия моя, ниже разгневаешися на мя во век, ниже соблюдеши злая мне, но яви мне благость Твою ко мне, и спаси мя недостойнаго по множеству милосердия Твоего ко мне, (Гласом бытия21) да выну благословлю Тя во вся дни живота моего.

Господи помилуй. Помяни Господи лик сего священства Твоего святаго и всякий чин священный православный.

Диакон. Помолитеся о сем святом соборе священников, и о всяком, чине священников православных, да Христос Бог наш утвердит их в вере православней даже до последнего издыхания.

Священник. Всякий чин священников православных и вся люди предстоящие Тебе помяни Господи, Господи, в милосердии и долготерпении, и изглади нечестия наша, Блаже и человеколюбче Боже. Буди общник с нами, да послужим имени Твоему Святому.

Господи помилуй. Благослови собрания наша.

Диакон. Помолитеся о сем собрании нашем и о всяком собрании людей православных, да Христос Бог наш благословит и усовершит их в мире, и отпустит нам грехи наша.

Священник. Поклонение идолам изжени из мира сатану и вся власти его скверные сотри и сокруши под нози наша скоро: соблазны и виновники оных укроти, да пагубныя разделения ересей престанут: гордыню сердца врагов церкви Твоей Святой, Господи, якоже всегда, тако и ныне сокруши: яви им скоро безсилие их: пожени их ненависть, ложь, ухищрения и клеветы, имиже на нас воюют. И возврати им оныя тщетны: расточи советы их, Боже, якоже расточил еси совет ахитофелев. Воскресни Господи Боже, и да расточатся вси врази Твои, и да бежат от лица Твоего вси ненавидящии имя Твое святое, люди же Твои во благословених тысящных и тьмочисленных да волю Твою.

Диакон. Сидящие востаните.

Священник. Плененные свободи, нуждающихся спаси, алчущих насыти, малодушных укрепи, падших возстави, стоящих утверди, заблудших обрати, приведи всех их па путь спасения Твоего, сопричти их к людем Твоим, избави нас от грех наших. Буди Господи нам хранение и покров во всем.

Диакон. К востоку зрите.

Священник. Ты еси Бог превознесенный превыше всех начал и властей, Господств и престолов, и всякаго имене именуемаго не точию в веце сем, но и в будущем: пред Тобою предстоят тысящи тысящ и тьмы тем ангел и архангел святых, служащих Тебе, и два преславная животная шестокрылатая, многоочитая, серафим и херувим:22 двумя крылами покрывают лица своя ради Божества Твоего невидимаго и умом непостижимаго, двумя покрывают нози своя, и двумя летают.

Священник велегласно. Кийждо их всегда святить Тя: но и со всеми, святящими Тя, приими такожде освящение и от нас, Господи, да вкупе с ними хвалим Тя, глаголюще.

Народ. Свят, свят, свят.

Священник. Воистину полны суть небеса и земля славы Твоея святой о Сыне Твоем Единородном Господе Боге Спасе и Царе всех нас Иисусе Христе. Исполни сию жертву Твою Господи благословения, еже от Тебе есть, наитием на ню Духа Твоего Святаго: а) аминь: и благословением благослови: б)23 аминь: и очищением очисти, аминь,

сие дары Твои достопоклоняемые предложенные пред Тобою, хлеб сей и чашу сию. Понеже Сын Твой Единородный Господь Бог Спас и Царь наш Иисус Христос в нощь, в нюже предаяшеся, да по страждет за грехи наша, прежде смерти, юже волею Своею восприя за вся ны,

Народ. Веруем.

Священник. Взем хлеб в pyци Свои Святые, нескверные, чистые, блаженные и животворящие, воззре на небо к Тебе Богу Отцу Своему и всех Господу и возблагодари,

Народ. Аминь.

Священник. И благослови его,

Народ. Аминь.

Священник. И освяти его,

Народ. Аминь.

Священник. И преломи его и даде святым своим ученикам и апостолам, чистым, рек: приимите, ядите от него вси: сие есть Тело мое, еже за вы ломимое за многие даемо во оставление грехов. Сие творите в Мое воспоминание.

Народ. Аминь.

Священник. Подобен, и чашу по вечери, слия воду с вином и возблагодари.

Народ. Аминь.

Священник. И благослови ю.

Народ. Аминь.

Священник. И освяти ю.

Народ. Аминь.

Священник. И вкусив даде ю преславным святым своим учеником и апостолом, рек: приимите, пийте от нея вси: сия есть Кровь Моя Новаго Завета, иже за вы изливаемая и за многие даемая во оставление грехов. Сие творите в Мое воспоминание.

Народ. Аминь.

Священник. Елижды бо аще ясте хлеб сей и пиете от чаши сея, смерть Мою возвещаете, и Воскресение Мое исповедуете, и память Мою творите, дóндеже прииду.

Народ. Смерть Твою возвещаем Господи.

Священник. Ныне. Боже Отче всемогущий, возвещаем смерть единороднаго Сына Твоего Господи Бога Спаса и Царя всех нас Иисуса Христа, и исповедуем Воскресение Его святое, и восшествие его горе на небеси, и седение его одесную Тебе, Отче, и чаем пришествия Его с Небесе втораго, страшнаго и славнаго, в конце сего века, егда приидет судити вселенную в правде, и воздаст, комуждо по делом его благо или аде.

Народ. По милости Твоей, Господи, а не по грехам нашим.

Священник. Ты еси, и пред славою Твоею предлагаем сие Дары Святые от тех, яже Твоя суть, Отче Святе.

Диакон. Поклонитеся Богу со страхом.

Священник. Просим и молим благость Твою, человеколюбче: не постыди нас стыждением вечным и не отвержи нас, рабов Твоих, ниже отрини нас, от лица Твоего, и да не речеши нам: не вем вас: но даждь воды главам нашим и источник слез очам нашим, да днем и нощию плачем пред Тобою о гресех наших: понеже мы есьмы люди; Твои и овцы пажити Твоея: изглади нечестия наша и отпусти прегрешения наша, яже содеяхом волею и неволею, ведением и неведением, тайная и явная, яже давно невемы, или забыхом, и яже весть имя Твое святое. Услыши Господи моление людей Твоих: призри на воздыхание рабов Твоих: ниже грех моих ради, или нечистоты сердца моего лишиши людей Твоих наития Духа Твоего Святаго.

Народ. Помилуй нас Боже Отче вседержителю.

Священник. Облекает руки свои покровом, и знамение креста творит обращся к народу, и абие глаголет велегласно

Людие бо Твои и церковь Твоя молит Тя, глаголюще: и абие зрит к востоку.

Народ. Помилуй нас Боже, Отче вседержителю.

Диакон. Поклонитеся Богу Отцу вседержителю.

Священник глаголет призывание тайно. И ниспосли с высоты Твоей Святой и от жилища Твоего украшена, и из неописаннаго лона Твоего и от предела Царствия славы Твоея, утешителя Духа Твоего Святаго, лицу Твоему присуща, неизменяема, непреложна, Господа животворящего, глаголавшего законом, пророки и апостолы: иже везде есть и вся исполняет, ниже местом описуется: иже волею и властию Своею, по воле Твоей, содевает чистоту в тех, их же любит, а не якоже слуга: иже прост есть в существе своем, в действии же многообразен, сый источник даров Божественных, единосущен Тебе, от Тебе исходит, общник есть престола Царствия Славы Твоей с Сыном Твоим единородным, Господом Богом Спасом и Царем всех нас Иисусом Христом: (ниспосли) на нас рабов Твоих и на сие достопоклоняемые дары предложенные пред Тобою, на хлеб сей и чашу сию, да освятятся и преложатся.

Диакон. Вонмем.

Народ. Аминь.

Священник, знаменуя трижды Тело, велегласно глаголет. – И сотворит убо хлеб сей Тело Христово.

Народ. Аминь.

Священник знаменует трижды Кровь. И чашу сию сотворит такожде честную Кровь Новаго Завета,

Народ. Аминь.

Священник. Его Господа Бога спаса и Царя всех нас Иисуса Христа.

Народ. Аминь.

Священник. Да будут всем нам, причащающимся от них, полезна к получению веры непрепретельныя, любви нелицемерной, терпения совершеннаго, надежды твердой, упования, здравия, радости и обновления души, тела и духа, во славу имене Твоего святаго, в блаженное причастие жизни вечной и нетленной, и во оставление грехов.

Народ. Якоже же бе и проч.

Священник. Да и в сем якоже и во всем прославится, благословится и превознесется имя Твое великое, святое, достопокланяемое и благословенное, со Иисусом Христом, Сыном Твоим возлюбленным и Духом Святым.

Священник. Мир всем.

Народ. И духови Твоему.

Священник. Паки возблагодарим Бога всемогущего и проч. (Смотри литургию Василия).

Молитва преломления ко Отцу

Боже предъизбравый ны ко усыновлению о Иисусе Христе Господе нашем, по благоволению воли Твоей, во славу и похвалу благодати Твоея, юже даровал, еси нам чрез возлюбленнаго Твоего, Им же совершися спасение наше, и егоже Кровию честною даровася нам отпущение грехов: благодарим Тя Господи, Боже Отче всемогущий, яко сподобил, еси нас грешных стояти пред Тобою в сем месте святом, и совершити сие Таинство Святое и Небесное: да якоже сподобил еси нас освятити оная, такожде да сподобимся и приобщения и вкушения оных. Отверзый очи слепых, отверзи очеса сердец наших, да отженем от себе всякий мрак злобы и нечестия, еже иматъ подобие пятна, да возможем возвести очи наша к свету славы Твоей святой. И якоже очистил еси уста раба Твоего Исаи пророка, егда един Серафим взя клещами уголь с олтаря, и приступи к, нему и рече ему: се, прикоснуся сие устом Твоим и отымутся беззакония твоя и очистятся вся грехи твоя: тако сотвори и нам немощным грешником, убогим рабам Твоим. Сподоби освятити души наша, телеса наша, естне и сердца наша, и даруй нам оный угль истинный, подающий живот душам, телесем, и духовом нашим, иже есть Тело Святое и Кровь Честная Христа Твоего, не в суд, или во осуждение, ниже в стыдение или смятение грех ради наших, да ненедостойно причастимся их, и да не будем повинны оным, ни да множество щедрот Твоих, Господи, послужит к вящему и большему осуждению нас, аще не благодарни явимся Тебе, подателю благих. Но даруй нам Духа Твоего Святаго, да с чистым сердцем и совестию нескверною, и с лицем непостыдным, с верою невоображаемою токмо, с любовию совершенною и надеждою твердою, смеем со дерзновением молитися, глаголя молитву святую, юже возлюбленный Сын Твой даде присным своим, святым ученикам и апостолам, рек: егда молитеся, молитесь сице и глаголите: Отче Наш, иже еси на Небесех и проч.

Молитва по отче наш

Священник. Молим Тя, Боже Отче Вседержителю, не введи нас во искушение, но избави нас от лукаваго. Действия диавольскаго отжени от нас. Ухищрения и советы нечестивых людей вся тщетны сотвори. Покры нас присно десницею Твоею животворящею: Ты бо еси заступник наш и помощник наш о Христе Иисусе Господе Нашем, ему же и проч.

Молитва преклонения ко Отцу

Священник. Боже, тако возлюбивый нас, и даровавый нам усыновление, да чада Божии зовемся и есмы и наследницы Твои, Боже Отче, сонаследницы же Христа Твоего, приклони ушеса Твоя и услыши нас преклоншихся пред Тобою, и очисти внутреннего в нас человека, святости ради Сына Твоего Единороднаго, егоже прияти духом хощем: и да бежат от нас блуд и всяк помысл нечист Бога ради рожденнаго от Девы: кичение и зло древнее, еже есть гордость, – смирившегося ради за ны: страх – пострадавшего ради плотию за ны и воздвигшего победное знамение Креста: суетная слава – заушеннаго ради за ны и не отвратившего лица Своего от стыденых оплеваний: зависть, человекоубийство, раздор и ненависть – агнца Божия ради, вземшего грехи мира: гнев и памятозлобие – пригвоздившего ради ко Кресту рукописание грех наших. Да бежат бесы и диавол, истребившего ради козни злобы, и темные власти победившего. Вся помышления злая и земная да отвержем далече от нас, восшедшего ради на Небеса, да тако очистимся и приимем сия Тайны чистыя, и совершенно чисти будем душею, телом и духом нашим, во еже быти причастники Тела, под видом его, и части Христа, ему же и проч.

Иная молитва благодарения

Кое благословение, или кую хвалу, или кое благодарение можем принести Тебе, Боже человеколюбче, яко иногда отверженным нам быти судом смерти и погруженным в пучину греха, свободил еси мы и даровал еси нам сие брашно нетленное и небесное, и явил еси нам сие Таинство, сокровенное от век и родов, да скажется ныне началам и властем небесным церковию многоразличные премудрости Твоя. Боже, управляяй дела наша премудростию Твоею, сподоби ны разумети сию милость Твою и величие Отеческаго попечения Твоего о нас и благоволения Твоего. Тебе бо воистину подобает всякая слава, величие, честь и держава прежде всех век, Отче, Сыне и Душе Святе, ныне и проч.

Иная молитва благодарения

Призри, Господи, на сия рабы Твоя, преклонившие главы своя пред славою Твоею святою: даруй им прощение грехов их, благослови их всяцем благословением духовным, и покры их десницей Твоею всесильною. Утверди их в любви Твоей, всади страх Твой в сердца их, отверзи очи душ их, да сияет им свет Божества Твоего, ущедри их дарами духа Твоего святаго, остени их всеоружием Твоим, сохрани их под сению благости Твоея, избави их от лукавых дел диавола, и сотри вся дела его, и покори его под нози их скоро. Даждь им, да соблюдают заповеди Твои святые, внуши им вожделение благ Твоих вечных, веди их от мира в мир, укрепи их воинствами ангел Твоих святых, дела рук их благослови, направи все стези их, и управи живот их, сотвори им вся, яже суть блага и прилична, и яже им уверена суть, да преумножатся людие. Мы же вкупе с ними да сподобимся благодати Твоея, и возниспослем Тебе горе хвалы царственные, яже подобают величеству Твоему, и даждь нам обрести дерзновение пред Тобою ходатайством и проч.

Конец литургии св. Кирилла.

* * *

17

Диакон приглашает народ молиться о том же, о чем молится свяшенник; напр.: помолитеся о мире, о патриархе и так далее.

18

у Коптов дискос имет вид глубоковатого блюда.

19

Разумей исповедников веры христианской, содержимых в темницах.

20

т. е. таким голасом, каким читали книгу Иова.

21

Таким голосом, каким читается книга Бытия.

22

Знаменует дары крестом.

23

а), б) Знаменует дары крестом


Источник: Еп. Порфирий. Вероучение, богослужение и правила церковного благочиния египетских христиан (коптов). СПб.: В Тип. Имп. Акад. Наук, 1856. - 311 с.

Комментарии для сайта Cackle