Акафист Пресвятой Богородице в честь иконы Ее Минской

Празднование 13/26 августа

Кондак 1

Избра́нная от всех родо́в Владычице Дево Богородице, ныне, припа́дающе к чудотворному образу Твоему, хвалебное пение и благодарение приносим Ти: Радуйся, Пренепорочная Отрокови́це, града нашего Небесная Заступнице.

Икос 1

Ангельския силы, прилежно моля́щияся и благоговейно служа́щия Ти, Пресвятая Дево, от лет древних на ге́рбе богоспасаемаго града Минска изображе́ны бы́ша во свидетельство чу́днаго Твоего о нас попечения. Мы же земнороднии, дерзающе подражати песнь ангельскую, благодарственно Тебе пое́м: Радуйся, о зачатии Сына от Духа Святаго архангелом предвозвещенная; радуйся, благовестия архангелова Восприемнице смиренная. Радуйся, херувимов и серафимов Честнейшая; радуйся, архангелов и ангелов Сла́внейшая. Радуйся, превыше сил небесных вознесе́нная; радуйся, от горних во́инств почитаемая. Радуйся, лики ангельскими песносло́вимая; радуйся, от всех родо́в при́сно ублажаемая. Радуйся, прибежище наше и заступление; радуйся, в ско́рбех и напастех вспоможе́ние. Радуйся, за христиан усердная Молитвеннице; радуйся, за ны пред Богом милостивая Предстательнице. Радуйся, Пренепорочная Отрокови́це, града нашего Небесная Заступнице.

Кондак 2

Видевши святы́й образ Твой, Пречистая, святым Лукою первопи́санный, рекла́ еси: «С сим образом благодать Моя и сила да пребудет». И во Минстем образе зря́ще сбы́тие словес Твоих, прославим Господа, пою́ще Ему: Аллилуиа.

Икос 2

Разуме́ти не можно дивнаго Промысла Божия, ка́ко чудная икона Твоя, Богородице, насади́телю веры православныя благоверному князю Владимиру на помощь даде́ся во апостольстве его от Царьграда и Корсу́ни даже до Киева. Мы же, преискренне умиля́ющеся Твоему о роде нашем предста́тельству верно вопием: Радуйся, истиннаго благочестия Наставнице; радуйся, языческаго нечестия Искоренительнице. Радуйся, чудотворною иконою, аки драгоценным даром, князя Владимира обогатившая; радуйся, в равноапостольных труде́х его укрепившая. Радуйся, власть демонскую сокрушившая; радуйся, веру православную в земли́ нашей утвердившая. Радуйся, Тобою бо от прелести диа́воли свобожда́емся; радуйся, Тобою бо познания Творца сподобля́емся. Радуйся, козней вра́жиих посече́ние; радуйся, верных чад Отцу Небесному усыновление. Радуйся, зловерия и́дольскаго попра́ние; радуйся, учения Христова насажде́ние. Радуйся, Пренепорочная Отрокови́це, града нашего Небесная Заступнице.

Кондак 3

Силу благодати, явле́нныя в честне́й иконе Твоей, Владычице, ви́де святы́й равноапостольный князь Владимир и со благогове́нием ве́лиим поста́ви ю в Десяти́нней Церкви града Киева, вопия Богу: Аллилуиа.

Икос 3

Иму́щи попечение Ма́тернее о просвеще́нных людех земли́ Русския, соделала еси сию́ дом Свой и то́ки чудес от иконы Твоея́ преизобильно источила еси, Богородице, сего ра́ди взываем Ти си́це: Радуйся, притекающих к иконе Твоей лучами чудес озаряющая; радуйся, обращающимся к ней безчисленныя милости подающая. Радуйся, всем прося́щим море щедрот изливающая; радуйся, духовную радость всем соделывающая. Радуйся, о людех православных при́сное попечение, радуйся, образ Твой дарова́вшая нам, яко залог спасения. Радуйся, источниче благодати неистощимый; радуйся, кла́дезю сокровищ многоценный. Радуйся, крепосте твердая веры православныя; радуйся, всем чтущим Сына Твоего помоще преславная. Радуйся, путь истины указу́ющая заблуждшим; радуйся, скоро поспе́шствующая на помощь Тя призывающим. Радуйся, Пренепорочная Отрокови́це, града нашего Небесная Заступнице.

Кондак 4

Бури бед и напастей за грехи наша многажды на Русь воздвиза́еми бы́ша, та́кожде и град Киев огню и мечу предаваемь бе от нечести́вых ага́рян, неве́дущих пети Исинному Богу: Аллилуиа.

Икос 4

Слышав богатство Киева, хан ага́рянский во едино лето устреми́ся расхи́тити е и град той пожже́. Воин же некий злочести́вый взят ризу многоценную, Всеблага́я Мати, икону же Твою вве́рже в Днепр, оба́че сия́ неврежде́нна в водах сохрани́ся, подвизаю́щи нас восхваля́ти Тя си́це: Радуйся, образ Твой, яко купину́ неопа́льну, яви́вшая; радуйся, икону Твою от пламене сохра́ншая. Радуйся, по вода́м, аки по су́ху, от Киева даже до Минска икону Твою прене́сшая; радуйся, во́ды Немиги и Свислочи явле́нием Своим освятившая. Радуйся, Царице небесе́ и земли́, Ейже вся стихии покоряются; радуйся, Тобою бо на спасительныя стези́ лю́дие наставляются. Радуйся, потопа греховнаго усмирение; радуйся, страстей свирепых укрощение. Радуйся, моря житейскаго благонадежное прохождение; радуйся, от земли́ на небо верных возведе́ние. Радуйся, дивное благодати зна́мение; радуйся, силы чудотворныя явле́ние. Радуйся, Пренепорочная Отрокови́це, града нашего Небесная Заступнице.

Кондак 5

Боготечней звезде уподо́бися пречестна́я икона Твоя, Богороди́тельнице, чудными лучами осиявшая насельники града Минска. Ти́и же, таинственное явле́ние ея́ на водах Свислочи зря́ще, со умилением воспеша Сыну Твоему: Аллилуиа.

Икос 5

Видевше чудную икону сию́, о Всемилостивая, и приемлюще, яко дар Божий, лю́дие христианстии взя́ша ю от воды и поставиша в церкви за́мковой в честь преславнаго Рождества Твоего, и а́бие благодарне воззваша: Радуйся, от иконы Твоея́ да́ры многоразличныя источающая; радуйся, яко Самой Ти су́ще, во иконе Твоей благодать нам изливающая. Радуйся, грешники не отметающая; радуйся, кающихся те́пле приемлющая. Радуйся, града нашего неусы́пная Хранительнице; радуйся, за нас пред Богом любвеобильная Хода́таице. Радуйся, веры и благочестия исправление; радуйся, в молитвах ко Господу всемо́щное дерзновение. Радуйся, боля́щих и немощству́ющих исцеление; радуйся, заблуждших на путь правый наставление. Радуйся, благодати обильное дарова́ние; радуйся, людей христоимени́тых непостыдное упование. Радуйся, Пренепорочная Отрокови́це, града нашего Небесная Заступнице.

Кондак 6

Проповедницы чудес ве́лиих, от иконы Минския истекающих, яви́шася мнозии лю́дие, ихже Ты, Премилосердная Владычице, поклоня́тися святыне сей научила еси, да нело́жно воспоют Богу: Аллилуиа.

Икос 6

Возсия́ и возвеличися вера наша по мнозех ле́тех пленения лестнаго и неправаго, и паки возвратися икона Минская людем православным, и́же с радостию воспеша Богородице: Радуйся, православия щи́те и ограждение; радуйся, отеческих уставов незыблемое утверждение. Радуйся, маловерных вразумление; радуйся, в сомнении сущим снисхождение. Радуйся, верных чад Це́ркве Православныя духовное услаждение; радуйся, отступников правыя веры посрамле́ние. Радуйся, православных немо́лчная похвало́; радуйся, гони́мым за веру несокрушимое забрало. Радуйся, утесняемым скорое вспоможе́ние; радуйся, мучеников и исповедников неизглаго́ланная отра́до. Радуйся, искушаемым помоще; радуйся, обуреваемым пристанище. Радуйся, Пренепорочная Отрокови́це, града нашего Небесная Заступнице.

Кондак 7

Хотя Владыка наш и Судия́ Пра́веднейший вразуми́ти зе́млю Русскую за беззакония тмочисленная, попусти́ мучителем гнати Церковь Православную, да вси, в покая́ние прише́дше, возопии́м Ему: Аллилуиа.

Икос 7

Новое наста́ испытание от Господа, егда соборный храм во граде Минске разруше́н бысть от неистовых гони́телей. Икона же Твоя, о Богомати, отья́та и сокрыта бе от верных. Лю́дие же православнии в сокрушении се́рдца возопи́ша к Богородице: Радуйся, во дни правосуднаго Божия посещения гнев Его отводя́щая; радуйся, в тяжких злостраданиих нас не оставляющая. Радуйся, лютыя крамолы́ обличающая; радуйся, душегубительная учения низлага́юща. Радуйся, благосе́рдая наша Вразумительнице; радуйся, непамятозлобная наша Настави́тельнице. Радуйся, в злых обстоя́ниих неистощимое терпение; радуйся, с правосудием Божиим смиренное примирение. Радуйся, малодушных и падших возстание; радуйся, духа уныния и боя́зни отгна́ние. Радуйся, грехов наших отпуще́ние; радуйся, Божие к нам благоволе́ние. Радуйся, Пренепорочная Отрокови́це, града нашего Небесная Заступнице.

Кондак 8

Странное и ужасное нашествие иноплеме́нных пости́же нас, милосердием же Божиим одоле́ша врагов лю́дие предста́тельством Богоматере, отверзо́ша храмы православныя и воздаша благодарение Го́сподеви, воспева́юще Ему: Аллилуиа.

Икос 8

Вся испо́лнися радости неизрече́нныя раба Божия Варвара, егда обре́те чудный образ Твой, Мати Дево, сокрытый посреде́ праха и тления. Мы же, дивя́щеся таковому неча́емому обрете́нию, восхваляем Тя: Радуйся, веру Христову от поруга́ния защищающая; радуйся, праведный гнев Божий на милость претворяющая. Радуйся, отступников веры постыжа́ющая; радуйся, нечестие грешников обличающая. Радуйся, броне́ неуязвимая; радуйся, Воеводо непобедимая. Радуйся, от нашествия иноплеме́нных избавление; радуйся, от работы вра́жия свобожде́ние. Радуйся, видимых и невидимых супостат одоление; радуйся, враждующих скорое вразумление. Радуйся, упокоение за дру́ги своя души положивших; радуйся, прославление за веру и Отечество на поле брани убие́нных. Радуйся, Пренепорочная Отрокови́це, града нашего Небесная Заступнице.

Кондак 9

Всякое разумение человеческое не возможет исчести́ страдания, я́же претерпе́ша граждане оте́чествия нашего в годину войн, лихолетий и в последнее время от беды́ чернобыльския. Взирающе же на икону Твою, Богомати, яко на цельбоно́сное утешение, непрестанно пое́м: Аллилуиа.

Икос 9

Вити́и суему́дрении соблазняются о древности иконы Минския и недоуме́ют постигнути та́инственный Про́мысл Божий; сохрани́вый ю в огне и вода́х, от рук иноплеме́нных и злоумышле́ний супротивных. Мы же, прославляюще Богородицу, пред чудотворным образом Ея вопием таковая: Радуйся, почитания святых икон увенча́ние; радуйся, иконоборнаго злоче́стия обличение. Радуйся, душеполезных знаний преизобильное излияние; радуйся, душевреднаго мрака светлое озарение. Радуйся, неверных смыслов милостивое просвещение; радуйся, неправо мудрствующих внезапное низверже́ние. Радуйся, верных незыблемое увере́ние; радуйся, отъемлющая духовное помраче́ние. Радуйся, Промысла Божия прославле́ние; радуйся, прегордых хули́телей устрашение. Радуйся, суему́дренныя премудро смиряющая; радуйся, заблу́ждшия кротко вразумляющая. Радуйся, Пренепорочная Отрокови́це, града нашего Небесная Заступнице.

Кондак 10

Спасительное пристанище от житейских треволнений и́мамы во храме Духа Святаго богоспасаемаго града нашего, иде́же светозарная икона Твоя, Владычице, неотступно доныне пребывает, всех нас путеводя́щи к жизни ве́чней. Сего ра́ди о Тебе возглашаем Богу: Аллилуиа.

Икос 10

Стена и заступление не токмо граду нашему, но и всем с верою притекающим к Тебе, Преблагословенная, даде́ся икона Твоя, е́юже мно́гажды благоде́яла еси нам и отце́м нашим, да вознесем Ти пение таковое: Радуйся, и́щущим спасения правый путь указу́ющая; радуйся, снисше́дшия даже до дна а́дова молитвами Своими спасающая. Радуйся, супроти́в нашествия иноплеме́нных нас воздвиза́юща; радуйся, от врагов Отечество наше избавляющая. Радуйся, отчаянных скорое слы́шание; радуйся, неду́гов душевных и телесных безме́здное врачевание. Радуйся, печалей житейских утоление; радуйся, греховных язв очищение. Радуйся, во обстоя́ниих сущим всегдашняя Помощнице; радуйся, людем благоверным усердная Споспе́шнице. Радуйся, нечаянная радосте; радуйся, непостыдная надеждо. Радуйся, Пренепорочная Отрокови́це, града нашего Небесная Заступнице.

Кондак 11

Пение и моление о богохрани́мей стране нашей, власте́х, во́инстве и народе ея приими́ пред чудотворным образом Твоим, Владычице, и спаси нас, яко держа́щая скипетр в руце́ Своей. Богомладенец же Иисус, име́яй в десни́це державу да да́рует нам тихое и безмолвное житие, слыша от нас: Аллилуиа.

Икос 11

Светлый праздник явле́ния иконы Твоея́, Присноде́во, во граде Минске исполня́ет ликованием сердца́ наша. Сего ра́ди с верою припа́дающе и с любовию лобыза́юще чудный образ Твой, вопием Ти: Радуйся, богоспасаемому граду нашему милость показавшая; радуйся, нас грешных сиянием Своим просветившая. Радуйся, при́сно силу Свою явля́ющая; радуйся, предста́тельством Своим нас спасающая. Радуйся, молитвы наша приемлющая; радуйся, хваления наша не отвергающая. Радуйся, небожительми при́сно прославляемая; радуйся, собором белорусских святы́х и новомучеников сугубо воспеваемая. Радуйся, людьми́ благочестивыми в позлаще́нную ризу облече́нная; радуйся, многими би́серы и адама́нты преукраше́нная. Радуйся, сердец наших тихое умиление; радуйся, жития нашего доброе устрое́ние. Радуйся, Пренепорочная Отрокови́це, града нашего Небесная Заступнице.

Кондак 12

Благодати Твоея́, о Всемилостивая Мати, не лиши нас грешных, претерпеваем бо днесь новыя скорби и нестроения, ника́коже иму́ще надежды оправди́тися, но помози́ нам возстати от погибельных смут, да, о Тебе радующеся, воспоем Богу: Аллилуиа.

Икос 12

Пою́ще небесную Заступницу нашу, веруем и исповедуем, яко и в последняя времена́ яви́ши благодатную помощь и имиже ве́си судьба́ми сохрани́ши нас от соблазнов мира сего, да благодарне восхва́лим Тя: Радуйся, избавление наше от навет вражиих; радуйся, спасение от коварств лукаваго. Радуйся, от сна греховнаго пробуждение; радуйся, беззаконий наших прощение. Радуйся, пред Всевышним благоговейное предстоя́ние; радуйся, полчищ сатанинских благомо́щное разсе́яние. Радуйся, погибших Взыскание; радуйся, прельще́нных вразумление. Радуйся, внезапную смерть от нас отводя́щая; радуйся, кончину христианскую нам хода́тайствующая. Радуйся, врата небесная нам отверза́ющая; радуйся, к жизни ве́чней нас приводя́щая. Радуйся, Пренепорочная Отрокови́це, града нашего Небесная Заступнице.

Кондак 13

О Всепетая Мати, Заступнице града нашего, приими́ сию́ ма́лую молитву и умоли Сына Твоего, Судию́ Праведнаго, да сподо́бит десна́го стоя́ния нас, вопиющих Ему: Аллилуиа.

Этот кондак читается трижды, затем 1-й икос «Ангельския силы...» и 1-й кондак «Избранная от всех родов...».

Молитва

О Всепетая и Всеблага́я Дево Богородице, Небесная наша Заступнице! К Тебе по Бозе, яко Премилосердней Госпоже́, собо́рне прибегаем и вопием: Приими́ сие́ ма́лое хвалебное пение, сохрани богоспасаемый град сей, емуже чудотворная икона Твоя во отраду и утешение даде́ся. Молим Тя, Владычице Всемилостивая: Изба́ви нас от враг видимых и невидимых, от нашествия иноплеме́нных и междоусобныя брани, от злаго обстоя́ния и скорби, от искушений, бед и болезней. Спаси и помилуй рабы́ Твоя: великаго господина и отца нашего Алекси́я, Святе́йшаго Патриарха Московскаго и всея́ Руси, преосвященныя митрополиты, архиепископы, епископы, весь священнический и монашеский чин и весь при́чет церковный. Приими́ под кров Твой власти и во́инство богохранимыя страны́ нашея, вразуми́ и наста́ви их право пра́вити, за́поведи Божия соблюдающе, да тихое и безмолвное житие поживе́м во всяком благочестии и чистоте. О Пресвятая Владычице! Не забу́ди нас во вся дни жизни нашея и да пребывает с нами неотступно образ Твой честны́й. Во время же исхода нашего пролей теплую молитву ко Праведному Судии́, да презре́в безчисленная согрешения наша, помилует и спасет нас, яко Благ и Человеколюбец. Аминь.