Акафист Пресвятой Богородице в честь иконы Ее «Нерушимая Стена»

Празднование в Неделю Всех святых

Кондак 1

Избра́нней от всех родо́в Божией Матери и Царице, пред пречистым Твоим образом, Неруши́мая Стена именуемым, благодарственное хвалебное пение приносим Тебе, Благодатная. Ты же, яко иму́щая силу непостижимую и любовь несказанную, от всяких нас бед и скорбе́й сохрани, да зовем Ти: Радуйся, Богородице, Стено́ Неруши́мая, Заступнице наша и утешение.

Икос 1

Ангел предста́тель по́слан бысть от Бога к Тебе, Пречистая, благовести́ти Тебе радость всемирную, яко зачнеши от Духа Свят́а во утробе Твоей Бога Слова, Спасителя мира. Мы же, ве́дуще исполнение сего Благове́щения, веруем, яко Господь Тебе, Преблагословенная, яви́ Стеною Неруши́мою во ограждение нас от всякаго греха, бед и напастей. Сего ра́ди ублажаем Тя, Богородице, и радостно вопием: Радуйся, яко Господь с Тобою и Тобою с нами; радуйся, яко в Кане Галиле́йстей Предста́тельницею к Сыну Твоему о людех яви́лася еси. Радуйся, яко омофо́ром Твоим ширше о́блака покрываеши верных; радуйся, яко ле́нтием Твоим сле́зы страждущих отираеши. Радуйся, яко воздеваеши ру́це Твои во ограждение нас от греха и всякия скверны; радуйся, яко от всех родо́в по глаголу Твоему ныне и при́сно ублажаешися. Радуйся, Богородице, Стено́ Неруши́мая, Заступнице наша и утешение.

Кондак 2

Провидяще пророцы умными очесы́ своими Твое явле́ние среди сыно́в Изра́илевых, Рождество во плоти́ от Тебе Сына Божия провозвести́ша, да вси, сбы́тие пророческих вещаний познавше, благоговейно взывают к Богу: Аллилуиа.

Икос 2

Разум богопросвеще́н имеюще, Иаков, Моисей, Давид и других пророков множество в словесе́х, виде́ниих и со́ниих чудное Рождество Твое и тайну Присноде́вства Твоего изобразиша. Мы же, всю силу пророческих вещаний разуме́ти не могу́ще, из глубины верующих сердец наших с любовию воспеваем Тебе: Радуйся, ле́ствице высокая, землю с небесе́м совоку́пльшая; радуйся, Бога, на земли́ я́вльшагося, во чреве Твоем понесшая и яко Неопали́мая Купина́ нетленною пребывающая. Радуйся, светоносный облаче, из негоже всех Владыка, яко дождь на руно́, с небеси́ сниде́, радуйся, Живоносный Источниче, алчбу́ и жажду вечныя правды в людех возгревающая. Радуйся, Христа, манну жизни, во чрево Свое вместившая и ду́ши наша хлебом безсмертия насыщающая; радуйся, чудный же́зле, цветами добродетелей верных украшающая. Радуйся, Богородице, Стено́ Неруши́мая, Заступнице наша и утешение.

Кондак 3

Сила Вышняго осени́ Тя, Пречистая, соделавши Тя Ма́терию Господа, и по Рождестве Твоем обильно пребывает в Тебе, Богомати. Радующеся таковому Божию благоизволе́нию, на Тебе бывшему, вси мы, восхваля́юще Спасителя мира, вопием Ему радостно: Аллилуиа.

Икос 3

Иму́щи в себе обильно благодать Божию, Ты, Пренепорочная, все житие Твое отдала еси благи́м попечением о Сыне Твоем и Господе, вся глаголы Его соблюдо́ша, слагающи их в сердце Своем. Мы же, грешнии, скорбное житие Твое на земли́ воспоминающе, глаголем Тебе похвалы́ таковыя: Радуйся, Владыку вселе́нныя во убо́зем вертепе родившая; радуйся, во Египет от беззако́нновавшаго Ирода с Сыном Своим бежавшая. Радуйся, о́трока Сына Своего с великою ско́рбию во Иерусалиме во дни Пасхи искавшая; радуйся, ненависть и зависть к Сыну Твоему от врагов Его скорбным сердцем созерцавшая. Радуйся, Ма́терним сердцем сраспина́вшаяся Ему, егда Крестныя страдания и смерть Его на Кресте созерцала еси; радуйся, во Иоанне Богослове сына Себе, по глаголу Иисусову, обретшая. Радуйся, Богородице, Стено́ Неруши́мая, Заступнице наша и утешение.

Кондак 4

Бурею нашествия иноплеме́нников многократно испытуема была страна наша Российская, и в тяжких испытаниих отцы́ наши взыва́ху о помощи ко Пресвятой Деве Богородице. Та бо яко Неруши́мая Стена, Своим предста́тельством у Престола Сына Своего и Бога, благодатно ниспосылает силу Сюю, и с надеждею на помощь Богоматере люди русстии изгоняют полчища вражеская от пределов Российских. Сего ра́ди восхваля́юще Богоматерь, радостно воспеваем Господу: Аллилуиа.

Икос 4

Слышит и знает весь мир, яко Пресвятая Богородица возжигает в сердцах русских лю́дей мужество, и силу на подвиги в защиту отечества, бори́маго от иноплеме́нных, подае́т, и помощь Свою благодатную посылает всему во́инству русскому. Испове́дующе таковую веру нашу в чудное заступление Царицы Небесныя во дни бранных нашествий на землю нашу, та́ко воспеваем Благодатней: Радуйся, народу русскому на врагов всесильное поможе́ние; радуйся, земли́ нашея на изгнание иноплеме́нников благодатное подкрепление. Радуйся, вождей во́инства русскаго тайное вразумление и умудрение, радуйся, ненавистников рода человеческаго посрамле́ние. Радуйся, пламень вражды разжигающих грозная Наказательнице; радуйся, всех пекущихся о мире всего мира необори́мая Помощнице. Радуйся, Богородице, Стено́ Неруши́мая, Заступнице наша и утешение.

Кондак 5

Боготе́чною звездою явля́ешися, Присноблаженная, всем блуждающим во тьме страстей и пороков, Твоим бо вразумлением множество и тяжких грешников от злых дел Своих отвращаются и к Богу с покая́нием прибегают, вопиюще Ему: Аллилуиа.

Икос 5

Видящи Премилосердая Владычица гибель душ многих, во власть греха и скверны сатаною исхище́нных, по Своей неизрече́нней любви к роду человеческому предваряет на помощь, от пути гибельнаго отвращает и на путь спасения наставляет. Радующеся дивному милосердию Царицы Небесныя, вси ве́рнии та́ко глаголют: Радуйся, путь спасения всем нам показу́ющая; радуйся, гордости и гневу сердцами нашими владети возбраняющая. Радуйся, чревоугодником и пиа́ницам строгое вразумление. Радуйся, ленивым и безвольным крепкое побуждение. Радуйся, живущих блудно к покая́нию приводя́щая; радуйся, грешников, к Тебе с верою прибегающих, скорое исправление. Радуйся, Богородице, Стено́ Неруши́мая, Заступнице наша и утешение.

Кондак 6

Проповедницы бы́ша чудес, от Твоих икон явле́нных, благочести́вии отцы́ наши, Тобою, Богородице, спасеннии и от бед и напастей изба́вленнии. Темже благодаря́ще Бога, таковую благу́ю Заступницу роду человеческому дарова́вшаго, вси Тобою спасеннии немо́лчными усты́ воспевают Ему: Аллилуиа.

Икос 6

Возсия́ свет неизрече́нныя Твоея́ благости, Благословенная, всем скорбя́щим, плачущим и всем нам, во искушении сущим, ибо чрез наша слезныя молитвы да́руется нам Тобою, Богородице, чудесное от бед избавление. Оба́че не имеюще словес, достойных восхваля́ти Тя за милости Твоя ко всем нам, своими грешными усты́ восклицаем Ти во умилении та́ко: Радуйся, скорби и сле́зы наша в радость претворяющая; радуйся, изнемогающим во искуше́ниих Милосердная Помощнице. Радуйся, до́мы наша от огня и иных разрушений спасающая; радуйся, от та́тей и злых лю́дей верныя ограждающая; радуйся, клеветы и козни врагов наших разрушающая; радуйся, страх смерти и внезапныя кончины в душа́х наших побеждающая. Радуйся, Богородице, Стено́ Неруши́мая, Заступнице наша и утешение.

Кондак 7

Хотя Всемилостивый Господь яви́ти Свою Божественную любовь к нам, недостойным, дарова́ нам Твою, Богомати, икону, Стена Неруши́мая именуемую, да ви́дящии чудеса, от сея́ святы́я иконы бывшая, вси лю́дие с верою и надеждою на чудодейственную Твою помощь со умилением взывают источнику чудес Господу: Аллилуиа.

Икос 7

Новое свидетельство присущия всегда Тебе, Пречистая, благодати и чудесныя силы показа́ нам Создатель, егда дивный образ Твой, на алтарней стене дре́вняго Софийскаго собора во граде Киеве изображенный, девять столетий неврежде́н сохрани́. Полчища бо поганых врагов веры православныя не дерзнувше повредити образ сей благодатный, силою Твое́ю охраняемый. Воистинну и нам, грешным и скорбным, Стено́ю Неруши́мою является святая икона сия́, всем верным внушающая возглашати Тебе таковая: Радуйся, облече́нная в хито́н, сияющий светом небесным; радуйся, воздея́нием руку́ Твое́ю пречистую Твою непрестанную молитву о всем мире явля́ющая. Радуйся, яко честна́го образа Твоего и долгота веков не повреди; радуйся, яко образ сей и по нашествии силы вражия во всей своей ле́поте пребывает. Радуйся, яко благодатная сила, сему́ образу Твоему присущая, бе́сы устрашает; радуйся, яко образом сим сердца́ моля́щихся благоговейно умиляются. Радуйся, Богородице, Стено́ Неруши́мая, Заступнице наша и утешение.

Кондак 8

Странно есть неверующим слышати, яко Ты, Богомати, о младенцех особое попечение и́маши. Мы же, воспоминающе словеса́ Господа нашего, ре́кшаго: «Оста́вите детей приходи́ти ко Мне, таковых бо есть Царствие Божие», с твердою верою исповедуем, яко Ты, Пресвятая Дево, Своею любовию охраняеши незло́бивых младенцев и их ма́терей, и вопием Сыну Твоему: Аллилуиа.

Икос 8

Всем сердцем Твоим, Царице мира, всякое Божие создание любя́щи и о всех к Сыну Твоему молитвы возно́сиши, яко Мати по пло́ти Сына Божия, Ты нетесно вмещаеши в душе́ Твоей скорби и труды ма́терей. Сего ра́ди, яко Матери Богомладенца Иисуса, воспеваем Ти восхваления таковая: Радуйся, верная Помощнице и прибежище ма́терей деторожда́ющих; радуйся, покро́ве и крепосте младенцев незло́бивых. Радуйся, ма́терния скорби утоляющая; радуйся, всяк возраст младенческий сохраняющая. Радуйся, благочестивых ма́терей в воспитании детей блага́я Наставнице; радуйся, младенцев безпомощных в болезнех Целительнице. Радуйся, Богородице, Стено́ Неруши́мая, Заступнице наша и утешение.

Кондак 9

Всякое естество́ ангельское и человеческое воспевает присноде́вственную чистоту Твою, Пренепорочная, сего ради почитаем Тя, яко неусыпную Попечительницу непорочности дев, чистоты вдови́ц, целомудрия юнош; и всяк возраст лю́дей вверяем Тебе, да сохрани́ши их в святости, воспевающих безгрешному Сыну Твоему: Аллилуиа.

Икос 9

Вити́и суему́дреннии не могут в сердце своем вместити истину Твоего, Богородице, Присноде́вства. Мы же, верующе в сию́ непостижимую тайну, с благогове́нием восхваляем Тя си́це: Радуйся, яко красныя и светлыя добро́ты Твоея́ возжела Жених, паче всех дщере́й человеческих; радуйся, яко Сей Жених Девство и Рождество в Тебе сочета. Радуйся, премудрая Наставнице непорочнаго девства; радуйся, христианских дев призывающая обеты девства изрека́ти и единаго Небеснаго Жениха люби́ти. Радуйся, чистых вдови́ц в безбрачии соблюдающая; радуйся, чистых дев и вдови́ц работати во славу Христа на благо ближних наставляющая. Радуйся, Богородице, Стено́ Неруши́мая, Заступнице наша и утешение.

Кондак 10

Спасти хотя́щи люди Своя от падений греховных, Ты, Владычице, неусыпно святость честна́го брака охраняеши и пребывающим в браце указу еши хранити заповеди Господни, дети своя в любви к Богу воспитывати и к дело́м милосердия приуча́ти. Благодаря́ще Бога, дарова́вшаго нам таковую мудрую Наставницу, мы от всего сердца пое́м Ему ангельскую песнь: Аллилуиа.

Икос 10

Стена еси и Хранительница христианских семейств благочести́вых, Пресвятая Дево, верующих мудро наставля́еши брачную жизнь яко иго благо́е приима́ти и верность друг ко другу до кончины хранити. Сего ра́ди и мы, радующеся Твоему благостному попечению о добрем христианстем супружестве, та́ко со умилением Тебе глаголем: Радуйся, честны́й брак благословляющая; радуйся, живущим в супружестве любовь и единомыслие в сердце влагающая. Радуйся, по учению Христа и апостолов жити супругов наставляющая; радуйся, семейныя узы охраняющая. Радуйся, блага́я Попечительнице домашния це́ркве; радуйся, грозная Обличительнице нарушителей супружеския верности. Радуйся, Богородице, Стено́ Неруши́мая, Заступнице наша и утешение.

Кондак 11

Пение всеумиле́нное приносят Ти, Преблагословенная, вси ро́ди христианстии, видяще Тя, яко всесильную Молитвенницу за весь мир. Ты же, Богородице, и юных молитвы приемлеши, и моление немощны́х старцев и ста́риц не презираеши, юных на добрая дела́ ко спасению наставля́еши, старцем же о скором их преселе́нии в жизнь загробную напоминаеши. Сего ра́ди, моляще Господа о дарова́нии всем нам памяти смертныя, взываем Ему: Аллилуиа.

Икос 11

Светилом назидательным и светозарным в нашей греховной жизни учение Христа Спасителя о жизни будущаго ве́ка явля́ется. Ты же, Всемилостивая, возгрева́еши в сердцах наших благодатное желание от грехов покая́нием очи́ститися и добрыми делами жизнь свою украси́ти. Радующеся Твоему о нас полному любве́ попечению, о е́же получи́ти нам вечное спасение, со слеза́ми великаго умиления взываем Ти та́ко: Радуйся, изрядную любовь ко старцем немощны́м явля́ющая; радуйся, верным людем, хотя́щим житие свое во благочестии сконча́ти, Всеблага́я Помощнице. Радуйся, престарелых родителей, детьми своими оставленных, под Свой честны́й покров приемлющая; радуйся, таковых жестоких чад, небрегу́щих о старцех своих, грозная Вразумительнице. Радуйся, о страшнем втором Христовом пришествии всем нам напоминающая; радуйся, и о душа́х преставльшихся верных рабов Божиих Молитвеннице теплая. Радуйся, Богородице, Стено́ Неруши́мая, Заступнице наша и утешение.

Кондак 12

Благодать Божественная явно пребывает в Твоей чудотворней иконе, достойно и праведно во утешение наше Стеною Неруши́мою именуемой. Изливающе пред се́ю иконою своя радости и печали, молим Тя, Мати Господа нашего Иисуса Христа, никогда не оставляти нас Своим заступлением, да благодарно о Тебе взываем Господу: Аллилуиа.

Икос 12

Пою́ще Твое всемо́щное предста́тельство за весь мир, воспоминающе чудеса, я́вленная Тобою чрез святую икону Твою Стена Неруши́мая, молим Тя, Заступнице усердная: Бу́ди стране нашей непрестанная Помощница, умоли Сына Твоего, исполняющаго моления Твоя, водворити во всем мире желанный народами мир, да вси благодарно восхваляем Тя си́це: Радуйся, явле́нием Сына Своего и Его Воскресением обрадованная; радуйся, в безсмертнем Успении Твоем душу Твою радостно в ру́це Сына Твоего предавшая. Радуйся, пастырей добрых на их крестнем пути укрепляющая; радуйся, проводя́щих и́ноческую жизнь незримое поможе́ние. Радуйся, храм сей и моля́щихся в нем благодатию Своею охраняющая; радуйся, отечеству нашему неизменный покро́ве и Стено́ Неруши́мая. Радуйся, Богородице, Стено́ Неруши́мая, Заступнице наша и утешение.

Кондак 13

О Всепетая Мати Господа нашего Иисуса Христа, Стено́ Неруши́мая, приими́ ныне сие́ ма́лое моление наше, огради нас от грехов и всякия скверны, изба́ви от находя́щих на нас бед и нужд, сохрани от уныния и отчаяния, клевет человеческих и болезней нестерпимых, да молитвами Твоими ставше на путь спасения вечнаго, благодарно воспоем Сыну Твоему и Богу нашему: Аллилуиа.

Этот кондак читается трижды, затем 1-й икос «Ангел предстатель...» и 1-й кондак «Избранней от всех родов...».

Молитва

О Благодатная Владычице наша, Богородице Присноде́во, приими́ от нас сие́ благодарственное хвале́бное пение и вознеси ко Творцу и Зижди́телю нашему теплыя молитвы Твоя за ны недостойныя, да простит Он, Милосердый, нам вся грехи наша, помыслы лукавыя и нечистыя, дела́ скверныя. О Госпоже́ Пресвятая, умилосердися и ниспосли́ дар по коегождо потребе: боля́щия исцели, скорбя́щия уте́ши, и заблу́ждшия вразуми, охрани младенцы, воспитай и научи юныя, ободри́ и наста́ви мужи́ и же́ны, поддержи и согрей старыя, бу́ди нам и зде, и в жизни ве́чней Стена Неруши́мая, изба́ви от всяких бед и напастей и от вечнаго мучения, да всегда воспева́юще Твою Ма́тернюю любовь, восхваляем всем сердцем Сына Твоего, со Отце́м Его и Святым Духом, во веки веков. Аминь.