Акафист преподобному Тихону Медынскому, Калужскому
Празднование 16/29 июня
Кондак 1
Возбра́нный чудотворче и предивный по́стниче, великий угодниче Христов, преподобне отче Тихоне, граду и стране нашей источа́яй многочудесныя цельбы́ и милости, восхваляем тя любовию, достохвальне; ты же, яко име́я дерзновение ко Господу, от всяких нас бед свободи́, да зовем ти: Радуйся, преподобне отче наш Тихоне чудотворче.
Икос 1
Ангелов Творец, в Троице Бог славимый, предуве́девый чистаго сердца твоего изволе́ние, показа́ тя ми́рови истиннаго ревнителя благочестия и добродетелей подвижника, вся земная вмени́вшаго в уме́ты. Того ра́ди мы, любовию побеждаеми, вопием ти си́це: Радуйся, богоносне, небесный человече; радуйся, земный ангеле. Радуйся, обиталище Пресвятаго Духа; радуйся, яко Бога ра́ди отечества страну оставил еси. Радуйся, яко в пустыню вселился еси; радуйся, яко слеза́ми оную напои́л еси. Радуйся, яко теми оную многоплодну сотворил еси; радуйся, яко божественными песнопении сию́ просветил еси. Радуйся, яко в той ученик стадо собрал еси; радуйся, яко страху Божию тех научил еси. Радуйся, яко и ныне непрестанно мо́лишися ко Господу о совершающих благоче́стно память твою; радуйся, яко и нас соблюдаеши от врагов видимых и невидимых. Радуйся, преподобне отче наш Тихоне чудотворче.
Кондак 2
Видяще, яко дана́ тебе бысть от Господа, преподобне отче наш Тихоне, благодать подавати скорое вспоможе́ние всем, с верою к святым твоим моще́м приходя́щим, и содева́ти преславная чудеса, мы, веселя́щеся, яко имамы таковаго милостиваго помощника, прославляем всесильнаго Бога и вопием Ему: Аллилуиа.
Икос 2
Разум богомудрый стяжа́в и усмотрев суету́ мира сего, преподобне отче Тихоне, помышля́я о небесном, вселился еси в пустыню, и в ней преславный храм боголе́пнаго Преображения Господня и обитель устроив, собрал еси ту множество ученик. Сего ра́ди вернии научи́шася воспевати тебе си́це: Радуйся, яко стаду твоему отец и наставник был еси; радуйся, яко смиренномудрием тех исправлял еси. Радуйся, яко обычай кроток имел еси; радуйся, яко незло́биво сердце стяжа́л еси. Радуйся, яко земная отри́нув, умом твоим к небесным возшел еси; радуйся, яко к вышнему течение твое вы́ну исправлял еси. Радуйся, яко в добродетелех пресла́вен обре́лся еси; радуйся, яко кроткому Пастырю Христу последовал еси. Радуйся, яко алчущих питал еси; радуйся, яко жаждущия напоя́л еси. Радуйся, яко всегда едино пред очи́ма имел еси, е́же со Христом быти; радуйся, яко Той тя пресели́ в вечныя обители блаженства. Радуйся, преподобне отче наш Тихоне чудотворче.
Кондак 3
Силою, данною ти свыше, блаженне Тихоне, долготу́ летнюю, пустынное озлобле́ние и в потребных ску́дость пред очи́ма име́я, терпел еси благодарно, и тем Христа обре́т в души́ твоей, Тому вы́ну воспевал еси: Аллилуиа.
Икос 3
Иму́ще тя воистину, отче Тихоне, подвижника крепкаго и молитвенника бодраго, и мысленно взирающе на досточудныя твоя подвиги и труды, мы, любовию твое́ю побеждаеми, умильно вопием ти си́це: Радуйся, яко ангельски на земли́ пожи́л еси; радуйся, яко жития чистотою страну нашу просветил еси. Радуйся, яко тяготу́ ва́ра дневна́го понесл еси; радуйся, яко сле́зными потоки землю се́рдца твоего напои́л еси. Радуйся, яко теми лукавых духов ополче́ния попра́л еси; радуйся, яко молчанием язык обузда́л еси. Радуйся, яко благо́ю жизнию твое́ю образ терпения и смиренномудрия нам яви́л еси; радуйся, яко высоту добродетелей достигл еси. Радуйся, яко восприя́л еси Святаго Духа озарение; радуйся, яко воистину честна́ смерть твоя, преподобне. Радуйся, яко и по смерти с нами пребываеши; радуйся, яко верно почитающим тя во всяких ну́ждах помогаеши. Радуйся, преподобне отче наш Тихоне чудотворче.
Кондак 4
Буря недоуме́ния смущает ум наш, ка́ко бо возмо́жем исчи́слити подвиги твоя, блаженне Тихоне: бдение и сухояде́ние, непрестанныя молитвы и прочия добродетели; но мы дивно Богу, в тебе прославляющемуся, дерза́ем воспевати: Аллилуиа.
Икос 4
Слышавше ближнии и дальнии, преподобне отче наш Тихоне, ангелоподобное твое житие, и яко молитвою твое́ю мно́зи, с верою притекающии к ра́це моще́й твоих, исцеление прие́млют от разнообра́зных неду́гов, благодарне воспоминающе о толи́ких твоих благодея́ниих, радостно взывают к тебе таковая: Радуйся, неду́гующих врачу́; радуйся, скорбным сострадателю. Радуйся, в душевных и телесных не́мощех скорый целителю; радуйся, еле́е, милости подающий. Радуйся, светильниче, благочестием сияющий; радуйся, древо благора́сленное при вода́х. Радуйся, яко многи ветви добродетелей израстил еси; радуйся, яко под сень пустыни твоея́ хотя́щих спасения приима́л еси. Радуйся, яко о тех молитвенник тепл в жизни твоей был еси; радуйся, яко благими де́лы душу твою украси́л еси. Радуйся, яко вели́ку благодать и силу от Бога прия́л еси; радуйся, прося́щим милости пода́телю. Радуйся, преподобне отче наш Тихоне чудотворче.
Кондак 5
Боготечная звезда яви́лся еси во стране нашей, наставляя всех на путь спасения; призывающих бо тя вскоре предваря́еши и от всяких бед и напастей избавляеши, верныя же научаеши спасающему тобою Богу взывати: Аллилуиа.
Икос 5
Видевше российстии наро́ди богоспасаемыя страны́ сея́ пречудное по Бозе житие твое, Тихоне преподобне, яко аще и последи́ толи́ких лет нам возсия́л еси, но древних отец чести сподо́бился еси, дарова́ния чудес достойно прии́м от Бога, того ра́ди научи́шася пети тебе: Радуйся, великий Богу угодниче; радуйся, яко во вре́менней жизни, любве́ ра́ди ко Господу, вы́ну во спасение души́ твоея́ трудился еси. Радуйся, яко егоже помощию оставль тленная, стяжа́л еси блага неистленная; радуйся, яко благодатию Божиею сподо́бился еси стоя́ти у Престола Владычня. Радуйся, яко та́ко сподо́бился еси быти прича́стником славы вечныя; радуйся, тамо получи́вый благодать хода́тайствовати о нас. Радуйся, скорый помощниче призывающим тя; радуйся, готовый пособи́телю христианом. Радуйся, православных защитителю; радуйся, многая чудеса благодатию Святаго Духа соде́явый. Радуйся, слепым прозрение подаваяй; радуйся, хромым хождение исправля́яй. Радуйся, преподобне отче наш Тихоне чудотворче.
Кондак 6
Проповедует Калужская наша страна труды твоя и подвиги, богомудре Тихоне, подъятыя тобою душевнаго ра́ди твоего спасения, егоже ра́ди прослави тя Господь славою благоле́пною. Темже в пустыни яко древо благоплодови́тое яви́лся еси, от негоже духовно питаемся, благодаря́ще Бога и вопиюще к Нему: Аллилуиа.
Икос 6
Возсия́ православней Российстей земли́ нашей просвещение от соверше́нных твоих добродетелей и чудес, преподобне отче Тихоне, о нихже благодаря́ще Бога, давшаго тебе таковую благодать, к тебе, яко к теплому о нас молитвеннику, радостная воспеваем, глаго́люще: Радуйся, живы́й ангельски на земли́; радуйся, от страсте́й греховных себе удали́вый. Радуйся, образ истиннаго терпения бы́вый; радуйся, совершенное смирение нам в себе яви́вый. Радуйся, наставниче спасения; радуйся, грешных приводя́й ко исправлению. Радуйся, Христовых заповедей исполнителю; радуйся, душ немощны́х целителю. Радуйся, лукавых духов прогонителю; радуйся, благочестия ревнителю. Радуйся, неоску́дный милости пода́телю; радуйся, благих желаний исполнителю. Радуйся, преподобне отче наш Тихоне чудотворче.
Кондак 7
Хотя избра́н дом Духу Святому себе сотвори́ти, потща́лся еси тесным и прискорбным путе́м, веду́щим в жизнь вечную, ити́, е́же благодатию Божиею от юности твоея́ совершив непорочно, тем достигл еси в небесном всерадостном пребывании воздая́ния, и тамо благодарственно пое́ши Богу: Аллилуиа.
Икос 7
Новую благодать показа́ всех Владыка тебе, богомудре Тихоне: многая бо и преславная чудеса в мире живущим людем де́еши и скорым твоим хода́тайством пособствуеши. Темже вопием тебе таковая: Радуйся, иноком добрый наставниче; радуйся, пустыню име́вый яко тихое пристанище. Радуйся, яко в той аки безпло́тен пожи́л еси; радуйся, яко многомятежие мира презре́л еси. Радуйся, непостоянную суету́ яко прах вмени́вый; радуйся, яко к премирным ум твой возвел еси. Радуйся, яко безмолвием воздержа́л еси телесная чувства; радуйся, яко тем Богу угодил еси. Радуйся, ангельскую жизнь стяжа́вый; радуйся, яко ко отшествию от мира сего всегда себе готовил еси. Радуйся, яко благи́ми де́лы душу твою украшал еси; радуйся, о людех нело́жный молитвенниче. Радуйся, преподобне отче наш Тихоне чудотворче.
Кондак 8
Странное чудо и выше ума: ты бо преславную от Бога прие́м благодать, с верою прибегающим к тебе источа́еши дарова́ния исцелений, преподобне отче Тихоне; сего ра́ди славит тя священная твоя обитель, иде́же положе́но святое твое тело, и мы, усердное моление зде принося́ще, благодарим просла́вльшаго тя Господа и вы́ну вопием Ему: Аллилуиа.
Икос 8
Весь еси и всем воистину, преподобне отче Тихоне, ди́вен яви́лся еси: аще бо и плоть в мире носил еси, но вся плотска́я мудрова́ния презре́в, ангельски на земли́ пожи́л еси. Мы же, видевше толи́кия твоя подвиги, благодарными устна́ми вопием ти: Радуйся, собеседниче ангелов; радуйся, украшение праведных. Радуйся, ла́стовице сладкопесненная; радуйся, орга́не Духа Святаго. Радуйся, цевни́це духовная; радуйся, отче чадолюбивый. Радуйся, ста́да твоего пастырю добрый; радуйся, благи́й и верный ра́бе. Радуйся, делателю винограда Христова; радуйся, данный тебе талант от Бога усугуби́вый. Радуйся, неподви́жимый благочестия сто́лпе; радуйся, непоколебимое ограждение веры. Радуйся, преподобне отче наш Тихоне чудотворче.
Кондак 9
Всякия болезни наша и печали утоли, великий наш заступниче, преподобне отче Тихоне, и пода́ждь нам последовати твоему житию, славу земную ни во чтоже вменя́ти и честь вре́менную презира́ти; тоя́ бо ра́ди добродетели прослави тя Бог на небеси́, иде́же ныне. Ему ты предстои́ши и непрестанно воспеваеши: Аллилуиа.
Икос 9
Вити́и многовеща́ннии недоуме́ют достойно славити тя, преподобне отче Тихоне, ибо многая и преславная чудодействия источа́еши благодатию Божиею. Мы же, любовию побеждаеми, дерза́ем пети тебе си́це: Радуйся, слепых просветителю; радуйся, хромых исправителю. Радуйся, разсла́бленных целителю; радуйся, злых помыслов прогонителю. Радуйся, скорбя́щих утешение; радуйся, яко ху́льныя уста́ вражия загради́л еси. Радуйся, яко осла́бленная сердца́ к вере и упованию наставил еси; радуйся, яко твоими молитвами тех спасл еси. Радуйся, яко тьму суеверия прогнал еси; радуйся, яко к небесному свету многих направил еси. Радуйся, светильниче, сияющий добродетельми; радуйся, Единаго Бога истинный исповедниче. Радуйся, преподобне отче наш Тихоне чудотворче.
Кондак 10
Спасти хотя душу твою, преподобне отче Тихоне, в юности возраста своего оставив отечество твое и страну, достигл еси царствующаго града Москвы, и конечнаго ра́ди смирения своего восприя́в и́ноческий образ, вселился еси в пустыни, иде́же устро́ив храм боголепнаго Преображения и собрав ученик множество, богоугодно подвиза́лся еси в посте и воздержа́нии, терпя́ различная искушения благодарно и работая Го́сподеви, Емуже на небесе́х предстоя́, ныне вопиеши: Аллилуиа.
Икос 10
Стена твердая яви́лся еси всем человеком, к заступлению твоему прибегающим, преподобне отче Тихоне, темже и нас, к тебе притекающих и твоея́ святы́я помощи прося́щих, от всяких бед и напастей заступай и ограждай, за е́же мы вопием к тебе таковая: Радуйся, богатства мира сего возненавидевый; радуйся, нетленная сокровища на небесе́х возлюбивый. Радуйся, единаго безценнаго бисера Христа Бога приобреты́й; радуйся, и́ноческую нищету возлюбивый. Радуйся, яко с тою во вся дни и́ноческия жизни твоея́ пребы́л еси неразлучно; радуйся, яко тою стяжа́л еси богатая сокровища на небеси́. Радуйся, яко ангельския достигл еси чи́ны, имже непорочно поревновал еси; радуйся, яко уневе́стил еси душу твою Жениху Христу. Радуйся, яко от Него на небесе́х обрел еси мзду трудов твоих; радуйся, яко вшел еси в радость Господа твоего. Радуйся, яко тамо наслаждаешися вечныя славы Его; радуйся, преподобне отче наш Тихоне чудотворче.
Кондак 11
Пение благодарственное Христу Богу, тя, преподобне отче Тихоне, прославля́ющему, вси православнии возсылают, яко Господь дарова́л есть ти многих чудес силу всякия неду́ги исцеля́ти, Емуже ты предстои́ши у Престола Его на небесе́х, нас же земных всех научаеши в Троице Единому Богу воспевати: Аллилуиа.
Икос 11
Светозарным светом блистает преславный храм твой, преподобне отче Тихоне чудотворче, име́я цельбоносный твой гроб, яко светильник пресветлый, да входя́ще видим, и благоговейно чествующе тя, дерза́ем глаго́лати тебе: Радуйся, светильниче света небеснаго; радуйся, яко лучами святыни твоея́ нас озаряеши. Радуйся, яко блистанием чудес твоих нашу страну просвещаеши; радуйся, яко притекающих к тебе утешаеши. Радуйся, врачу́ душ наших благоприятнейший; радуйся, скорбя́щих всерадостное утешение. Радуйся, отчаянных надеждо спасения; радуйся, обидимых скорый заступниче. Радуйся, правды истинный хранителю; радуйся, крепкий наш сто́лпе и забра́ло. Радуйся, пла́мене, пожига́яй злочестие; радуйся, росоносный о́блаче благодати, возращаяй благочестие. Радуйся, преподобне отче наш Тихоне чудотворче.
Кондак 12
Благодать, данную тебе от Бога, преподобне отче Тихоне, све́дуще, тебе нашего милостиваго отца прилежно просим: Пролей ныне теплую твою молитву о нас грешных ко Господу, да утвердит и укрепи́т нашу страну Российскую, Церковь же Святую и веру православную да сохранит и вся православныя христианы помилует, всегда вопиющия Ему: Аллилуиа.
Икос 12
Пою́ще дивнаго во святых Своих Бога нашего, преподобне отче наш Тихоне, и почитающе всечестно́е твое успение, яко и по преставле́нии твоем не оставляеши нас благодатными чудес дарова́нии, скорое твое нам во всяких ну́ждах и печалех поможе́ние прославляем, и вопием к тебе си́це: Радуйся, великий наш молитвенниче; радуйся, известный Бога умилостивителю. Радуйся, всех православных скорый помощниче; радуйся, в беда́х всем скорый заступниче. Радуйся, сильный в напастех защитниче; радуйся, алчущим кормителю. Радуйся, скорый врачу́ всем к тебе прибегающим; радуйся, всяких исцелений источниче. Радуйся, лю́те стра́ждущим помощниче; радуйся, везде и всем скорый предста́телю. Радуйся, страны́ нашея похвало́ и утверждение; радуйся, православному вои́нству нашему сило и укрепление. Радуйся, преподобне отче наш Тихоне чудотворче.
Кондак 13
О великий и преславный чудотворче и заступниче наш, Тихоне блаженне! Приими́ сие́ приноси́мое тебе моление и благоприятным твоим хода́тайством умоли Господа сил всем нам избавитися от всяких скорбе́й, бед и напастей, и грядущая в небесных благая улучи́ти вопиющим Ему: Аллилуиа.
Этот кондак читается трижды, затем 1-й икос «Ангелов Творец» и 1-й кондак «Возбранный чудотворче...».
Молитва
О священная главо́! Великий чудотворче, преподобне отче наш Тихоне преблаже́нне и преславне, Духа Святаго исполнение! По́стников похвало́, монашествующих славо, пустыни украси́телю, теплый о нас грешных молитвенниче, ныне со ангельскими во́инствы предстоя́й у Престола всех Царя Славы Господа, и наслаждаяся света Единосущныя Троицы, и с горними силами воспевая Трисвятую песнь, яко дерзновение име́я, моли́ся Всемилостивому Владыце спасти вся верующия во имя Его: испроси мир и тишину Святым Це́рквам ниспосла́ти, вере православней укрепление, видимыя и невидимыя враги низложи́ти, гра́ды наша утвердити, мир весь умири́ти. Моли милостиваго Бога, да твоим благоприятным хода́тайством вся православныя христианы избавит от глада, губительства, труса, потопа, огня, меча, от нашествия иноплеме́нник и междоусобныя брани, старыя да подкрепи́т, юныя да наставит, немудрыя умудри́т, боля́щия исцелит, плене́нныя и узники свободи́т, сироты́ заступи́т, младенцы воспитает, и вся люди сохранит от всех бед и напастей и от нападения вражия, и смертоносныя язвы, и тлетворных ветр, и от всякаго зла. Днесь же с верою приходя́щих рабов твоих (имя), со страхом и любовию припа́дающих ко святому гробу многоцелебных моще́й твоих и образ подобия твоего любезно целующих, яко теплый наш заступниче, сохрани и в скорбных обстоя́ниих наших предста́ни, душевных и телесных страсте́й свободи́; в день Страшнаго Суда шу́ияго стоя́ния изба́ви, и с десны́ми овца́ми молитвами твоими стати сподо́би и слышати блаженный оный глас Владыки Христа Бога нашего: «Прииди́те, благословеннии Отца Моего, наследуйте угото́ванное вам Царство от сложе́ния мира», – Емуже подобает всякая слава, честь и поклонение со Безначальным Его Отце́м и со Пресвятым и Благим и Животворящим Его Духом, ныне и при́сно и во веки веков. Аминь.