Акафист святой благоверной великой княгине Анне Кашинской

Празднование 12/25 июня и 2/15 октября

Кондак 1

Избра́нней и предивней угоднице Христовой, скорой помощнице и молитвеннице нашей, похвальная воспеваем ти, о нас пред Христом Богом предста́тельнице. Ты же, яко иму́щая ве́лие дерзновение ко Господу, молися, да избавит от бед и скорбе́й ны, зовущия: Радуйся, святая благоверная княгине, преподобная мати Анно.

Икос 1

Ангелов Творец честну́ю отрасль благочести́ваго корене благоверных российских князей избра́ тя во образ всем, сияющую верою, любовию, чистотою, да вси, зря́ще твое благоугодное житие, со благословением и радостию глаголют ти си́це: Радуйся, яко от младенчества благодати Божия исполнилася еси; радуйся, яко в житии твоем добродетельми многими просветилася еси. Радуйся, правило веры и благочестия; радуйся, образе кротости и смирения; радуйся, светило любве́ и воздержа́ния. Радуйся, даров Святаго Духа честно́е вместилище; радуйся, скорбных утешение; радуйся, княгинь и и́нокинь российских похваление. Радуйся, живущих в мире тихое пристанище; радуйся, благочести́вых родителей утешение. Радуйся, градов Твери и Ка́шина и всея́ земли́ нашея украшение; радуйся, ныне с лики ангельскими на небесе́х Владыще всех предстоя́щая. Радуйся, святая благоверная княгине, преподобная мати Анно.

Кондак 2

Прови́дев Господь ангелоподобное житие твое, яко святое имя Его прославиши и, якоже запове́да святы́й апостол, бдительна, святолепна, целомудренна, здрава верою, любовию и терпением пребудеши, от юности твоея́ призва́ тя пети Ему: Аллилуиа.

Икос 2

Разум небесный тебе дарова́ся, богоизбра́нная отрокови́це, непрестанно помышля́ти о небесных в боголюбивем крове благоверных родителей твоих. Сего ра́ди приими́ от нас похвалы сия́: Радуйся, родителей благочести́вых плод благословенный бывшая; радуйся, добродетели и благочестие их унаследовавшая. Радуйся, благоче́стию и молитве от них науче́нная; радуйся, чтению Божественных Писаний навыкшая. Радуйся, жития святых и поучения их возлюбившая; радуйся, от святителей ростовских научения прии́мшая. Радуйся, с родители твоими благословению и наставлению иереев Господних при́сно внима́вшая; радуйся, аки крин благовонный, во отечествии твоем процветшая. Радуйся, от младых ногтей твоих страх Божий име́вшая; радуйся, от юности твоея́ горняя му́дрствовавшая. Радуйся, сим путь спасения нам показавшая; радуйся, непоколебимое на Господа Иисуса упование неизменно сохраншая. Радуйся, святая благоверная княгине, преподобная мати Анно.

Кондак 3

Сила Вышняго от юности твоея́ воистину осеня́ше тя, и храня́ше, и возбужда́ше на молитвы, поще́ние и милосердие, во е́же благочести́вым предком твоим подражати и Го́сподеви воспевати: Аллилуиа.

Икос 3

Иму́щи благочести́выя родители, прилежа́ла еси богоугодному житию, благодатию Божиею во всяком деле бла́зе всегда подкрепля́ема су́щи. Темже, дивя́щеся таковому от юности твоея́ раче́нию, со умилением зовем ти: Радуйся, яко Господь Бог благоизво́ли от юности освятити тя; радуйся, яко богатый милостию обогати тя благодатию Свое́ю. Радуйся, яко Господь испо́лни тя страха Божия, премудрости и разума; радуйся, яко от младенчества Го́сподеви прилепи́лася еси. Радуйся, яко со страхом Божиим и усердием храму Божию и слу́жбам церковным при́сно прилежа́ла еси; радуйся, яко в доме неусыпно правило молитвенное исправля́ла еси. Радуйся, яко всякое дело твое с молитвою сопряга́шеся; радуйся, яко труд твой благодарением Богу скончава́шеся. Радуйся, чистоты душевныя и телесныя хранительнице; радуйся, неустанным благотворением и ми́лостынями верным скорая помощнице. Радуйся, девам чистым премудрая устрои́тельнице; радуйся, чадом нашим добрая учительнице. Радуйся, святая благоверная княгине, преподобная мати Анно.

Кондак 4

Буря бед и напастей утесня́ше тогда Отечество наше и веру православную, и вси бе́дствоваху от нашествия иноплеме́нников и междоусобныя брани. Ты же, ю́нице, сердцем чистая, во уединении су́щи, излива́ла еси в молитве пред Господем душу, твою, ангельскую песнь вопиющи: Аллилуиа.

Икос 4

Слышавши боголюбивая княгиня Ксения, мати святаго Тверскаго Михаила, о благочестии твоем, княгине Анно, рече́ послом своим: «Слышах, яко есть у Ростовскаго князя дщи зело́ добродетельна, премудра же и прекрасна: сию́ убо, Божиим изволе́нием, видети желаю в супружестве за сыном моим». И а́бие по благодати Божией испо́лнися желание сердца ея, да тобою Бог прославится и да вси воспевают тебе: Радуйся, неве́сто, Промыслом Божиим предука́занная; радуйся, голуби́це, чистая и непорочная сердцем. Радуйся, мудрая евангельская дево, во свете веры и дел благих ходи́вшая; радуйся, яко невозвратным путе́м по заповедем Владыки твоего шествовала еси. Радуйся, яко за преславныя добродетели твоя вни́ти в чертог Царя Небеснаго сподо́билася еси; радуйся, всем жена́м российским похвало́ и утверждение. Радуйся, чистотою твое́ю всем родом твердое научение; радуйся, яко согласие супругом по молитвам к тебе подавала еси. Радуйся, неисповеди́мыми судьба́ми Божиими от Него просла́вленная; радуйся, новая чудеса и зна́мения многа чтущим тя яви́вшая. Радуйся, яко царя боговенча́ннаго и о́трасли дома его на поклонение моще́м твоим подвигла еси; радуйся, яко и сердца́ верных к почитанию и воспрославле́нию твоему привлекла еси. Радуйся, святая благоверная княгине, преподобная мати Анно.

Кондак 5

Яко светлая звезда, богомудрая неве́сто, при́сными твоими сопровождаема, с великою славою во град Тверь, во храм Спаса нашего, прибыла́ еси. Кня́зи же и наро́ди, велеле́пно срета́юще тя, радовахуся о тебе, вопиюще Богу: Аллилуиа.

Икос 5

Видевше тя вельможи, кли́рицы и мирсти́и лю́дие богоспасаемаго града Твери, на брак честный с возлюбленным князем их Михаилом притекшую, изыдо́ша в сре́тение твое и вопия́ху ти, глаголюще: Радуйся, от Лива́на неве́сто, во образ единения Христа и Це́ркве сочета́тися браком со князем нашим грядущая; радуйся, чистая голуби́це, пришествием твоим мир с Богом и в человецех благоволе́ние зна́менующая. Радуйся, от Бога князю нашему в де́лех управления помощнице угото́ванная; радуйся, за невинныя и лю́те стра́ждущия хода́таице, Промыслом Божиим предука́занная. Радуйся, о ну́ждах и потребах наших пещи́ся от Бога поста́вленная; радуйся, сокровище ма́терняго попечения, от Господа нам данное. Радуйся, светило милосердия, над градом нашим восходя́щее; радуйся, звездо́ утренняя, при́сно радость нам возвещающая. Радуйся, о́блаче всесветлый, дождь любве́ и помощи всем достойным твоего заступления иска́пати обещаяй; радуйся, во образ жена́м христианским свыше пронарече́нная. Радуйся, вдови́цам и си́рым покрове, провиде́нием по́сланный; радуйся, юным девам и жена́м прибежище и укрепление. Радуйся, святая благоверная княгине, преподобная мати Анно.

Кондак 6

Проповедуют о богоугоднем житии твоем, блаженная мати, в супружестве и княже́нии, добродетели твоя: ве́лие благочестие, смиренномудрие, милосердие, истинныя ма́терняя любы́ ко всем, пою́щим о тебе Богу: Аллилуиа.

Икос 6

Возсия́ богоугодное житие твое, яко красная заря, призыва́ющая всех на богоугождение и на делание свое со усердием, да вси, после́дующе ти, зовут: Радуйся, со князем, супругом твоим, во всяком благочестии и чистоте пожившая; радуйся, и чада твоя во стра́се Божии воспитавшая. Радуйся, Церкви Божией благоде́явшая и благолепие храмов Божиих любившая; радуйся, и по кончине твоей любовь многу ко храмом Божиим в душа́х граждан боголюбивых возжигавшая. Радуйся, яко от всякаго неду́га прибегающия с верою к тебе исцеляеши; радуйся, яко от лютаго насилия диа́вольскаго моля́щияся к тебе изыма́еши. Радуйся, при́сно всякое попечение о бла́зе владо́мых имевшая; радуйся, в ско́рбех и страданиих несчастным, си́рым и бедным помощнице теплая. Радуйся, больных целительнице скорая и чудная; радуйся, и́щущим пути ко спасению наставнице благодарная. Радуйся, яко по преставле́нии твоем сподо́билася еси от Бога дара чудотворений; радуйся, полки иноплеме́нных молением твоим от града Ка́шина отгнавшая. Радуйся, святая благоверная княгине, преподобная мати Анно.

Кондак 7

Хотя Господь истинное благочестие твое яви́ти и в терпении тя укрепи́ти, скорби многи попусти́ на тя́, да просвети́шися, якоже злато в горни́ле, и да пое́ши Богу: Аллилуиа.

Икос 7

Новаго страстотерпца яви́ Господь супруга твоего, благовернаго князя Михаила, емуже сострадающи, венце́м от Бога венча́лася еси, благоверная княгине, да прославля́юще прославльшаго тя Господа, пое́м си́це: Радуйся, праведная Анно, нося́щая дух сокруше́н к Сильному и Богу разумов; радуйся, многия скорби и беды претерпевшая. Радуйся, молитвою вся побеждавшая; радуйся, терпением и упованием супруга твоего утеша́вшая. Радуйся, от Единаго Бога помощи ожидавшая; радуйся, к Нему, Милостивому, с горькими слеза́ми припа́давшая. Радуйся, от Господа, якоже злато, в горни́ле скорбе́й очище́нная; радуйся, якоже камень драги́й, чистотою сияющая. Радуйся, винограде, из точи́ла принося́й вино благовонное; радуйся, ма́нно, питающая и услаждающая всех требующих. Радуйся, источниче разума, от Бога разумов вся напая́яй; радуйся, росо́, орошающая и оживляющая страну твою, от нашествия иноплеме́нных пострадавшую. Радуйся, святая благоверная княгине, преподобная мати Анно.

Кондак 8

Странник в неверней стране яви́ся благоверный супруг твой, всеблаже́нная Анно, егда за́вистию и клеветою сро́дников своих к безбожному царю орды́нскому приведе́н бысть. Ты же, скорбь сердца твоего покрывающи, и́злиха вопия́ла еси Богу: Аллилуиа.

Икос 8

Весь еси желание мое, весь сладость, Сладчайший Иисусе! Си́це моля́шеся Михаил, князь христолюбивый, и та́ко глаго́лаше: «Аще Бог соизво́лит, хощу́ ити́ сам в орду ко беззаконному царю, хощу́ сам дати ответ и душу мою положити за о́вцы стада Христова, по слову Его». Ты же, супружнице князя благочестиваго, вдохновле́нная благодатию свыше, рекла́ еси ему: «Поистине блажен будеши во вся ро́ды». Сего ра́ди вси приглаша́ху ти си́це: Радуйся, блаженная мати, в же́нстем естестве́ мужескую крепость име́вшая; радуйся, долготерпеливо упованием на Господа укрепля́вшаяся. Радуйся, глаго́лавшая князю: «Господь будет твой Помо́щник»; радуйся, ре́кшая ему: «За Господа пострадав, пои́стине блажен будеши». Радуйся, яко и сама уготовля́лася еси пострадати за Спаса Христа; радуйся, спострадавшая супругу твоему в скорби мно́зе. Радуйся, аще и не плотию, оба́че сердцем за Христа страдавшая; радуйся, то́кмо постом, молитвою и благодатию Божиею подкреплявшаяся. Радуйся, воплем крепким ко Господу взывавшая; радуйся, глаго́лавшая: «Изми́ нас, Господи, от человек лукавых, и от муже́й неправедных, ополча́вших брани, изба́ви нас». Радуйся, супруга твоего презре́ти славу и всю сладость мира сего тленнаго увеща́вшая; радуйся, и нам крепкое упование подающая. Радуйся, святая благоверная княгине, преподобная мати Анно.

Кондак 9

Все сердце твое содрогну́ся, богомудрая, егда вестник печальную весть принесе́, яко благоверный супруг твой Михаил во мно́зех страданиих смерть мученическую претерпе́; и а́бие в скорби ве́лией, прекло́ньши колена, ко Отцу Небесному возстена́ла еси: «Буди воля Твоя». Ангели же, вознося́ще душу блаженнаго на небо, поя́ху: Аллилуиа.

Икос 9

Вити́и многовеща́нии не возмо́гут изрещи́ скорби твоя и крепость любве́ твоея́, егда со чады твоими текла еси во срете́ние моще́й блаженнаго князя, супруга твоего. Темже и мы, ублажающе болезни сердца твоего, глаго́лем си́це: Радуйся, огненное искушение Господа ра́ди претерпевшая; радуйся, приобщитися Страсте́м Христовым удостоившаяся. Радуйся, с верою и любовию поне́сшая крест твой и Христу последовавшая; радуйся, прелести мира сего спасения ра́ди презре́вшая. Радуйся, яко и во явле́ние славы Его возрадуешися и восторжествуеши; радуйся, в беда́х и скорбных обстоя́ниих помощнице нам скорая. Радуйся, яко и сама в житии твоем Христа ра́ди многоскорбна была еси; радуйся, душ смяте́нных умиротвори́тельнице тихая. Радуйся, унывающим утешительнице дивная; радуйся, недоумева́ющим советнице мудрая. Радуйся, призывающим тя молитвеннице теплая; радуйся, с верою и упованием умирающим пору́чнице крепкая. Радуйся, святая благоверная княгине, преподобная мати Анно.

Кондак 10

Спасительнаго подвига и́щущи, блаженная многоскорбная княгиня Анна теплыми молитвами непрестанно Бога моля́ше, да не лишит ю достоя́ния святых и наследия Небеснаго Своего Царствия, пою́щую Богу: Аллилуиа.

Икос 10

Стена нерушимая, пристанище и предста́тельство к тебе прибегающих была еси, блаженная, утешение же и веселие. Сего ра́ди зовем ти: Радуйся, и во вдовстве́ бывшая прави́тельница мудрая, Ользе святе́й подобная и милосердная; радуйся, чада твоя во страсе Божии содержавшая. Радуйся, ходи́ти в заповедех Господних и явля́ти ко всем милость поучавшая; радуйся, блаженная, нищия питавшая и убогия призиравшая. Радуйся, странныя в дом твой вводи́ти повелева́вшая, пищу и одежду им подававшая; радуйся, си́рыя и вдови́цы заступавшая и всем прося́щим помощи помогавшая. Радуйся, много душе́ю за чада своя поболе́вшая; радуйся, супружнице до́бляя. Радуйся, и́ноческое строгое житие во вдовстве́ проводи́вшая; радуйся, печальми земными угнете́нным мир вечный раскрывающая. Радуйся, у Распятаго на Кресте за ны, грешныя, мира и тишины непрестанно просившая; радуйся, в нынешнем житии всем помощнице теплая. Радуйся, святая благоверная княгине, преподобная мати Анно.

Кондак 11

Пение и молитвы непрестанныя возноси́ти Богу хотя́щи, блаженная, пришла еси во обитель деви́чу, и тамо, с великим смирением моля́щися, повелела еси себе постри́щи во ангельский чин, и та́ко, помощию Всевышняго Бога, в ма́ле времени превозшла еси добродетельми вся бывшия тамо по́стницы, пою́щи Го́сподеви: Аллилуиа.

Икос 11

Светопода́тельный светильник была еси, богоблаже́нная: князи бо, княгини, чада твоя и вся благочестно живущия во градех Твери и Ка́шине, обитель твою посеща́вшия, непрестанно поучала еси Бога боятися, Тому всегда угодная творити и жити в любви друг ко другу. Сего ра́ди вси прославля́ху тя си́це: Радуйся, мирски́я суеты́ отрешившаяся; радуйся, Небеснаго Отечествия возжеле́вшая. Радуйся, Христа всем сердцем возлюбившая; радуйся, к подножию ног Его при́сно припа́давшая. Радуйся, великим ангельским образом украси́вшаяся; радуйся, на и́ноческия подвиги и боре́ния устремившаяся. Радуйся, и́ноческому послуша́нию всецело преда́вшаяся; радуйся, всю себе в жертву непорочную принесшая. Радуйся, ум и сердце твое молитве посвятившая; радуйся, яко Христос по успении твоем в чертог Свой тя всели́. Радуйся, яко и мощи твоя нетленны сохрани, и многими чудесы́ и исцеле́ньми к тебе приходя́щих обогати; радуйся, наставнице и́нокиням и собеседнице ангелом. Радуйся, святая благоверная княгине, преподобная мати Анно.

Кондак 12

Благодать и ве́лие дерзновение твое пред Богом ве́дуще, тебе, преподобная мати, молимся: Молися о нас ко Господу, да избавит ны от всех бед и напастей и сохранит и утверди́т ны во святе́й вере, во всяком благочестии и чистоте, да тихое и безмолвное житие поживем и пое́м благоде́ющему тобою Богу: Аллилуиа.

Икос 12

Пою́ще твое прославление, ублажаем тя, преподобная, яко многомощную о нас молитвенницу пред Господем, уте́шительницу и покровительницу, и возглашаем ти си́це: Радуйся, подвигом добрым подвиза́вшаяся; радуйся, течение скорбное постом, бдением и молитвою непрестанно совершавшая. Радуйся, носившая на земли́ венец терно́вный; радуйся, унаследовавшая на небеси́ венец нетленный. Радуйся, супружнице страстотерпца Христова; радуйся, с ним спострадавшая и венчавшаяся. Радуйся, молитвами твоими град наш Ка́шин от смертоносныя язвы избавившая; радуйся, яко веру к тебе несумненную и надежду известную в любящих тя возгрела еси. Радуйся, от Господа всех благих нам пода́тельнице; радуйся, во всех скорбех и обстоя́ниих уте́шительнице. Радуйся, от враг видимых и невидимых защитнице; радуйся, о нас пред Господем в день праведнаго воздая́ния предста́тельнице. Радуйся, святая благоверная княгине, преподобная мати Анно.

Кондак 13

О преподобная и преблаже́нная мати Анно! Молися при́сно Христу Богу, дарова́ти на враги победы и одоле́ние, и миру умире́ние, и всей Российстей земли́ великое утверждение, нам же грехов оставле́ние и жития исправление, да та́ко Небеснаго Царствия наследницы будем, в радости пою́ще со ангелы Богу: Аллилуиа.

Этот кондак читается трижды, затем 1-й икос «Ангелов Творец…» и 1-й кондак «Избранней и предивней угоднице...».

Молитвы

О преподобная и преблаже́нная мати Анно! Смиренно припа́дающе к ра́це честны́х моще́й твоих, молимся со слеза́ми прилежно: Не забу́ди убогих твоих до конца, но поминай нас всегда во святых твоих и благоприятных молитвах к Богу. О преблаже́нная великая княгине Анно! Не забу́ди посещати чад твоих: аще телом и преста́вилася еси от нас, но и по смерти жива́ пребываеши. Не отступай от нас духом, сохраня́ющи нас от стрел вражиих и всякия прелести бесо́вския и козней диа́вольских. Молитвеннице наша усердная! Не преста́й моля́щися за ны ко Христу Богу нашему: аще бо моще́й твоих ра́ка пред очи́ма нашима видима есть всегда, но святая душа твоя, со ангельскими во́инствы у Престола Вседержи́теля предстоя́щи, достойно веселится. К тебе убо припа́даем и тебе молимся: Молися, преблаже́нная Анно, Всемилостивому Богу нашему о спасении душ наших и испроси нам время на покаяние, да невозбра́нно прейдем от земли́ на небо, от мыта́рств же горьких и от вечныя муки да избавимся и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже слава, со Безначальным Его Отце́м, и с Пресвятым и Благим и Животворящим Его Духом, ныне и при́сно и во веки веков. Аминь.

Восхваляюще Господа Бога и Творца своего, прии́мшаго труды и подвиги угодницы Своея́, благоверныя великия княгини Анны, немо́лчными усты́ воспоем и восхвалим: Радуйся, преподобная богоблаже́нная княгине Анно, я́же от юности своея́ начала́ еси Богу работати и Того святы́я заповеди усердно в сердцы своем прия́ла еси. Радуйся, пречестно́е селение, яко честь и господство века сего оставила еси и до конца оплева́ла еси, и ни во чтоже, яко уме́ты, положила еси вся сущая в мире, и Христу Единому последовала еси, Его пресвятое иго на ра́ме понесши, и многими добродетельными делы Тому угодила еси. Радуйся, преподобная мати Анно, я́же невозвратным путе́м шествовала еси по заповедем Владыки своего Христа, ничтоже паче любве́ Его предпоче́тши. Сего ра́ди и Христос возлюби тя, яко невесту прекрасную, и с мудрыми девами в чертозе Своем сочета́ тя, и по успении твоем соблюде́ пресвятое тело твое нетленно, душу же твою святую в премирная селения всели и многими чудесы́ обогати тя. Радуйся и веселися, угоднице Христова, ты бо врач показалася еси всем приходя́щим с верою к цельбоносным моще́м твоим и исцеляеши страсти наша неисце́льныя. Молися, святая, Христу Богу нашему: Стра́ждущую страну Российскую от лютых безбожников и власти их да свободи́т и да возста́вит престол православных царей; верных рабов Его, в скорби и печали день и нощь вопиющих к Нему, многоболезный вопль да услышит и да изведе́т от погибели живот наш; миру смирение и всей Российстей земли́ великое утверждение да подаст. Яко да и мы молитвами твоими получим оставле́ние грехов, житию исправление и Небеснаго Царствия наследницы будем, благодатию и человеколюбием Господа Бога и Спаса нашего Иисуса Христа, с Нимже ку́пно Отцу и Пресвятому и Животворящему Духу подобает всякая слава, честь и поклонение, ныне и при́сно и во веки веков. Аминь.