Акафист святым семи отрокам Ефесским
Празднование 4/17 августа и 22 октября/4 ноября
Кондак 1
Избра́ннии от воскресшаго плотию из мертвых Христа Бога, во увере́ние общаго всех воскресения миру явле́ннии, предивнии о́троцы, и́же во Ефе́се, прославляюще прославльшагося в вас Господа, похвальная пения возносим вам, глаго́люще: Радуйтеся, страстотерпцы Христовы, всемирнаго воскресения мертвых пречуднии проповедницы.
Икос 1
Ангелов Творец, ве́дый из начала несуме́нную крепость испове́дания вашего, сотвори вас в лютых обстоя́ниих провозве́стники быти общаго всех воскресения, яко ангелоподобныя свидетели евангельскаго обетования. Сицево́му о нас смотре́нию Божию дивя́щеся, во благогове́нии зовем си́це: Радуйтеся, светлыя зве́зды грядущаго воскресения; радуйтеся, преславнии лучи Христа Спаса воскресшаго. Радуйтеся, денни́це великаго дне Господня; радуйтеся, из домов неверных верная Христу чада яви́вшиися. Радуйтеся, в чудный свет и свободу сыно́в воскресения призва́ннии; радуйтеся, Духом Святым в проповедники глаго́лов живота вечнаго избра́ннии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 2
Видяще вас родителие разум добр иму́ща, потща́шася в чин во́инский дружины царе́вы вас устроити; вы же, вся тленная мира презре́вше, в Сион горний к Царю Небесному сердцы своими востеко́сте, да яко дру́зи Божии и служителие тайны общаго воскресения вмене́ни будете, пою́ще Христу: Аллилуиа.
Икос 2
Разум Христов чистыми ду́шами восприя́ти сподо́бившеся, дивнии о́троцы, посреде́ греховныя жизни сверстник ваших благодатию Христовою соблюдаеми, друг ко другу любовию и единением духа братия яви́стеся и во едино сверше́ни бы́сте. Сего ра́ди приими́те от нас похвалы сия́: Радуйтеся, единою банею пакибытия́ возрожде́ннии; радуйтеся, любовию Христовою аки братия соединеннии. Радуйтеся, Це́ркве Божия чада возлюбленная; радуйтеся, ангелов Божиих собеседницы. Радуйтеся, паче бра́шен естественных истинным хлебом жизни себе питавшии; радуйтеся, се́ю пищею чрез благодать Святаго Духа от смерти в жизнь процветшии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 3
Сила Вышняго, таи́нники благодати в злостраданиих укрепляющи, сих венце́м добропобедным испове́дания увенча́тися пред человеки и ангелы сподо́би, нас же научи пети Богу: Аллилуиа.
Икос 3
Иму́ще тща́ние в дом Господень на молитву по вся дни приходи́ти, ника́коже сего обычая отверго́стеся, святи́и, гонению Де́киеву бывшу; е́же уве́девше, врази́ веры Христовы царя о сем извести́ти потщашася, оба́че мучителева преще́ния на прославле́ние вам силою Божиею премени́шася. Таковому убо о вас Божию промышле́нию радующеся, со умилением глаго́лем вам си́це: Радуйтеся, темныя силы князя мира сего благодатию Христовою сокрушившии; радуйтеся, злобу и коварство слуг его всепобедно посрами́вшии. Радуйтеся, козней и преще́ний их не убоявшиися, ниже́ смутившиися; радуйтеся, помощию Божиею видимо укрепи́вшиися. Радуйтеся, яко дре́вле Даниил в пещере льво́ве, посреде́ мучителей сохраненнии; радуйтеся, силою Владычнею из среды их неврежде́нно изведе́ннии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 4
Бурею ярости дви́жим, злочести́вый Де́кий царь во гневе святы́я вопрошает: «Почто́ не бы́сте с нами в праздник бого́в, всю вселенную призвавших к поклонению?» Емуже Максимилиа́н, един от седми́, отвещает: «И́мамы Единаго Бога и Царя, И́же на небеси́, Емуже приносим на всяк час жертву хваления, испове́дания и моления, пою́ще Ему: Аллилуиа».
Икос 4
Слышав нечести́вый царь, ка́ко веру вашу со дерзновением испове́дасте, чести во́инския лишити вас повеле́, и та́ко испытания ваша Христа ра́ди нача́шася, Христом скоропослушно в пречудное успение преображенная. Темже и ныне крепость в испытаниих от Бога умолите пою́щим: Радуйтеся, во́еве царя земнаго, к во́инству Царя Небеснаго сопричте́ннии; радуйтеся, честь земную оставльшии, да славу небесную восприи́мете. Радуйтеся, земныя чести за Христа лише́ннии; радуйтеся, сего ра́ди венцы́ нетленными от Него увенча́ннии. Радуйтеся, победы Его проповедницы явле́ннии; радуйтеся, славы Его вечныя седмочи́сленное блистание. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 5
Божественныя любве́ теплотою гре́еми, благодатию Христовою от мучителей покрове́ни яви́лися есте́, святи́и о́троцы, Максимилиа́не, Иамвли́ше, Мартиниа́не, Иоанне, Диони́сие, Ексакустодиа́не же и Антони́не, в ле́тех юных красоту внутренняго человека с ле́потою внешнею сочетава́юще и, яко ангели, в пламени испове́дания вашего воспевающе Богу: Аллилуиа.
Икос 5
Видев злохитрый царь Де́кий зело́ благолепную юность вашу, на не́колико дний ослабу от уз вам да́рует, прельсти́ти вас ко отрече́нию от Христа наде́яся. Вы же, во своя́си отшедше, сребро и злато нищим раздати потща́стеся, ко исходу себе уготовля́юще. Сего ра́ди воспису́ем вам похвальная сия́: Радуйтеся, закосне́вшаго во зле мучителя на некое милосердие подвигшии; радуйтеся, младенческою кротостию вашею коварную зло́бу его на время угаси́вшии. Радуйтеся, красотою сыно́в света злообра́зныя служители греха плени́вшии; радуйтеся, Духа Святаго благодатию коварство их победно посрами́вшии. Радуйтеся, чрез раздая́ние земных богатств сокровищем небесным обогатившиися; радуйтеся, и нас взаи́м давати Богу научающии, да богатство неоскудева́емое на небесе́х обря́щем. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 6
Проповедует пещера горы́ Охло́н чудную славу вашу, святи́и о́троцы, дебри бо и вертепы ея молитвою вашею облагоухали есте́, отоню́дуже на тверди церковней, якоже зве́зды славы небесныя, из мрака гробов чудно возсия́вшии, яви́стеся и нас Первоначальнику общаго воскресения Христу Богу пети научи́сте: Аллилуиа.
Икос 6
Возсия́ти хотя людем свет истины, мглу же заблуждения разгнати, Христос Бог сни́ти вам во мрак могильный соизво́ли, яко да по́слежде в дивнем востании вашем общее воскресение уве́рит. Пред таковым Божиим о вас благоволе́нием преклоняющеся, возсылаем вам хваления сия́: Радуйтеся, твердости ра́ди испове́дания от мук промыслительно изба́вленнии; радуйтеся, и нас кре́пце за правду пра́тися научающии. Радуйтеся, безболезненно подвиг ваш скончавшии; радуйтеся, чудным сном почившии, во е́же воста́нием от сего сна смерти мглу заблуждения разсе́яти. Радуйтеся, в нетлении телес ваших Господем соблюде́ннии; радуйтеся, прежде общаго воскресения изволе́нием Бо́жиим воставшии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 7
Хотя безбожный царь ну́ждею к идолослужению святы́я привлещи, паки праздник и́дольский устроя́ет и ты́я нань привести повелевает; не обре́тшим же тех во граде Ефе́се слугом его, родители их казнию устраши́ти тщится, но от сих извеще́н бывает, яко святи́и в пещере сокры́шася, воспевающе Богу: Аллилуиа.
Икос 7
Новое устремление злобы мир яви́л есть, егда родителие место покоища чад своих царе́ви открыша и та́ко любве́ отчия к ним отреко́шася. Сего ра́ди ко избра́нником Божиим глаго́лем си́це: Радуйтеся, миром отве́рженнии и небо восприя́вшии; радуйтеся, Отца ра́ди Небеснаго отцы земными пре́даннии. Радуйтеся, Отчею любовию Его в та́инственнем сне чудно сохраненнии; радуйтеся, нетление улучи́вшии и мир светом воскресения осиявшии. Радуйтеся, путь к сему дивному свету нам указу́ющии; радуйтеся, час кончины сбы́тием обетования Божия нам услаждающии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 8
Странное и преславное чудо всемогущества Божия на вас, святи́и о́троцы, показа́ся, камением бо по повеле́нию Де́киеву в пещере загражде́ннии и печатию запечатле́ннии, сто и о́смьдесят лет даже до дний царя Феодосия тамо спя́ще пребы́ли есте́, воставше же аки живы́я, саддуке́йское мудрова́ние посрами́ли есте́, пою́ще Христу, вас воскресившему: Аллилуиа.
Икос 8
Весь седмочи́сленный исповедников лик, во гробе каменнем заключе́н быв, жизни вечныя ника́коже отлучи́ся, но истекшим стом и осмидесяти́м ле́том сон от оче́с их произволе́нием Божиим отрясе́ся, и та́ко святи́и о́троцы живии воста́ша, весь мир о воскресении всех уверя́юще и нас пети научающе си́це: Радуйтеся, упование общаго воскресения обетованием Божиим утверждающии; радуйтеся, краеугольнаго ради камене Христа Бога ка́мением во гробе загражде́ннии. Радуйтеся, Его ра́ди, во гробе запечатле́ннаго, печатию запечатле́ннии; радуйтеся, Агнцем, взе́мшим на Себе грех мира, от уз смерти свобожде́ннии. Радуйтеся, во увере́ние общаго воскресения, якоже Ла́зарь четверодневен, из гроба изведе́ннии; радуйтеся, числу седми́ херувим, Престолу славы Божия предстоя́щих, сообра́знии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 9
Всякое естество́ ангельское возрадовася о чу́днем по мно́зех ле́тех воста́нии вашем и ужасашеся, ка́ко вы, преславнаго убо чудесе́, о вас бы́вшаго, не ве́дуще, обычное целование друг другу подаете и утреннее пение Господу, аки вчера ко сну отшедшии, принесе́те, пою́ще: Аллилуиа.
Икос 9
Вити́йствующий язык не возмо́жет изрещи́ чудес Твоих, Господи, ве́мы бо, ка́ко блаженный о́трок Иамвли́х, многолетняго успения своего не разумея и во град за пищею изшедый, удивися, егда Ефе́с, Христовою верою изда́вна просвеще́нный, уви́де, и Господа прослави, нас же глаго́лати сотвори таковая: Радуйтеся, делателие на ни́ве Господни, молитвенныя сле́зы обильно пролившии; радуйтеся, в ску́дости и гонении почившии, во славе и богатстве воставшии. Радуйтеся, зрением торжества веры Христовы, во дни ваша гонимыя, по востании обрадованнии; радуйтеся, победу Христа над миром я́ве узре́вшии. Радуйтеся, и нас на сию́ уповати научающии; радуйтеся, от уныния нас ограждающии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 10
Спасти хотя Бог и в вере утверди́ти люди, сия́ о многолетнем успении Иамвли́ха чрез древний пе́нязь, на то́ржище им принесе́нный, научает, епископу града сия́ уразуме́вшу и Бога прославившу с песней: Алиллуия.
Икос 10
Стена и утверждение веры яви́стеся, святи́и, человеком, в пещеру вашу пришедшим и ковче́жец с ха́ртиею тамо обре́тшим, на нейже имена ваша и кончины образ напи́сана бы́ша, во е́же пети всем: Радуйтеся, седмь избра́нных сосудов Божиих; радуйтеся, вку́пе со святыми мученики еле́ем радования пома́заннии. Радуйтеся, седмь светильников пред Престолом Бога; радуйтеся, седмь труб благове́стия втораго пришествия Сына Человеческаго. Радуйтеся, седмь ангел, благовествующих нам славу до конца претерпевших; радуйтеся, яко седмисве́щник златы́й, Церковь Божию украшающии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 11
Пение благодарственное Пресвяте́й Троице вознося́, благочести́вый царь Феодосий со тща́нием во Ефе́с устремися, во е́же святы́я о́троки ви́дети, и седмь дний тамо пребываше, до́ндеже сии́, главы прекло́нше, дух свой Господу преда́ша, ку́пно с ними победную возсылая песнь Христу Богу: Аллилуиа.
Икос 11
Светильницы, тьму е́реси разгоняющии, яви́лися есте́, святи́и о́троцы, светом нетления вашего сияющии и блаженным по востании паки успением истину грядущаго живота утверждающии, саддуке́йское бо мудрова́ние посрами́вше, вся раздоры церковныя утиши́ли есте́, общее воскресение вку́пе с древним Ла́зарем уверя́юще. Темже, благодаряще о сем Господа, со умилением зовем вам: Радуйтеся, скорбное житие наше добрым упованием осиява́ющии; радуйтеся, посреде́ волн жития сего к пристанищу небесному нас направляющии. Радуйтеся, яко зве́зды, во оти́шие блаженнаго покоя в чертозе Христове нас путеводя́щии; радуйтеся, блаженство вечное, скорбя́щим угото́ванное, благовеству́ющии. Радуйтеся, яко недостойны суть страсти нынешняго вре́мене к будущей славе, уверя́ющии; радуйтеся, до́блии вестницы Царства Небеснаго бывшии. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 12
Благодать даде́ся вам от Бога, во е́же вся любящия и чтущия вы в чудный свет Его руково́дствовати. Темже и нашея жизни скорбный путь крепкою надеждею воскресения озарите, от греховныя погибели нас соблюдите и в час смертный нам предста́ните, да вашим заступлением невечерняго света величествия Божия и мы грешнии дости́жем, идеже с лики праведных воспои́м о вас Богу: Аллилуиа.
Икос 12
Пою́ще дивное просла́вление силы Божия в вас, святи́и о́троцы, ублажаем вы, яко заступники и молитвенники наша пред Господем, и с любовию, святей иконе вашей предстоя́ще, возглашаем вам хваления сия́: Радуйтеся, в Российстей земли́ града Ста́рицы похвало́ и утверждение; радуйтеся, вся окре́стныя ве́си славою благодатныя помощи вашея испо́лнившии. Радуйтеся, боля́щих младенцев прибежище и исцеление; радуйтеся, скорбе́й родителей их нело́жное врачева́ние. Радуйтеся, всем любящим и чтущим вы покрове и ограждение; радуйтеся, всего мира христианскаго помоще и заступление. Радуйтеся, страстотерпцы Христовы, всемирнаго воскресения мертвых пречуднии проповедницы.
Кондак 13
О чуднии о́троцы, светом небесныя славы вашея и увере́нием нескончаемаго живота скорбный путь жития нашего озаряющии! Приими́те ма́лое сие́ моление наше и не отри́ните нас, притекающих к вам, молите при́сно всех Владыку, да и мы райскаго чертога не лише́ни будем, но вку́пе со святыми воспои́м тамо Христу Богу: Аллилуиа.
Этот кондак читается трижды, затем 1-й икос «Ангелов Творец…» и 1-й кондак «Избраннии от воскресшаго плотию...».
Молитва
О пречуднии святи́и седмочи́сленнии о́троцы, Ефе́са града похвало́ и всея́ вселенныя упование! Воззри́те с высоты небесныя славы на ны, любовию память вашу чтущия, наипаче же на младенцы христианския, вашему заступлению от родителей своих препоруче́нныя. Низведи́те на ня благословение Христа Бога, ре́кшаго: «Оставите детей приходи́ти ко Мне». Боля́щия убо от них исцелите, скорбя́щия утешите; сердца их в чистоте соблюдите, кротостию испо́лните я, и в земли́ сердец их зерно́ испове́дания Божия насади́те и укрепи́те, во е́же от силы в силу им возраста́ти. И всех нас, святе́й иконе вашей предстоя́щих, мощи же ваша с верою лобза́ющих и те́пле вам моля́щихся, сподо́бите Царствие Небесное улучи́ти и немо́лчными гла́сы радования тамо прославля́ти Великоле́пое Имя Пресвятыя Троицы, Отца и Сына и Святаго Духа, во веки веков. Аминь.