Чи́нъ ѹ҆мове́нїѧ но́гъ в вели́кїй четверто́къ

Бывает литурги́а Великаго Василиа, во свое время по чину.

По заамвонной же молитве архиерей омывает но́зе по чину си́це.

Исходит царскими две́рьми из олтаря́ на архиерейское, иде́же облача́ется, место, ники́м поддержи́мь, без посоха, а пред ним несет диакон Святое Евангелие да два диакона несут лаха́нь и рукомо́йник сре́бряныя: и диакон полагает Святое Евангелие на анало́гии, между́ пре́дних столпо́в поста́вленном. А в то время глаголют протопо́п со священники псалом 50: Поми́луй мя, Боже, по стихо́м, ко́сно: а на месте поставляют иподиакони кресла, а не кафе́дру.

Архиерей же возше́д на место, сядет в кре́слах, и поставляют пред ним скаме́йку, покрыту червча́тым сукно́м, а на скамейку ставят лахань с рукомойником, по́лным воды, на котором положе́н за́пон кисе́йный да ле́нтион. А власти, ко́им быти в чину́ омовения, сидя́т во олтаре́ по своим места́м по-степе́нно.

И ко архиерею приходят протодиакон да диакон и прие́млют благословение, и из олтаря́ выводят по два архимандрйта, или́ по два иере́а (архимандриты же покланя́ются архиерею по чину) и посажда́ют на угото́ванном месте по степе́нем. А в то время певцы поют пятую песнь канона Великаго Четвертка́.

Песнь 5, ирмос: Сою́зом любве́ связу́еми апо́столи, Влады́чествующему все́ми, себе́ Христу́ возло́жше, кра́сны но́ги очища́ху, благовеству́юще всем мир.

Неодержи́мую держа́щая и превы́спреннюю на возду́се во́ду, бе́здны обуздава́ющая и моря́ востязу́ющая Бо́жия Прему́дрость во́ду во умыва́льницу влива́ет, но́ги же омыва́ет рабо́в Влады́ка.

Ученико́м показу́ет смире́ния о́браз Влады́ка, о́блаки облага́яй не́бо, препоясу́ется ле́нтием и приклоня́ет коле́но, рабо́в омыва́ти но́ги, в Его́же руце́ дыха́ние все́х су́щих.

Та́же стихиры самогла́сны, умове́ния.

Глас 1: Ле́нтием препоя́савыйся и омы́вый но́ги ученико́в, Христе́ Бо́же, омы́й души́ на́шея по́мысл и опоя́ши нас сою́зом духо́вным, е́же твори́ти за́поведи Твоея́ бла́гости.

Глас 2: Вели́кое благоде́тельство прия́ти хотя́ще, ве́рнии, благогове́йно честно́му умове́нию притеце́м, не плотску́ю скве́рну омыва́юще, но ду́шы же та́йно освяща́юще. Христо́с бо Спас наш, призира́яй на зе́млю и творя́й ю́ трясти́ся, приклоня́ет Самаго́ Себе́ и следам каса́ется бре́нным, на вся́кую сопроти́вную силу тве́рдое да́руя нахожде́ние. Тому́ благода́рно возопие́м: изря́дный возвыше́ния путь показа́вый нам – смире́ние, спаси́ нас, Бла́же, я́ко Человеколю́бец.

Глас 3: Петр благогове́яше омы́тися нога́м от ІІречи́стых рук, и́миже со́здан быстъ Ада́м: услы́ша же: Аще не умы́ю тебе́, не и́маши ча́сти со Мно́ю. Тре́петом мно́гим содержи́мь, вопия́ше Тебе, Господи: не то́кмо но́зе мои́ умы́еши, но и ру́це и главу́. О великих Влады́чных даро́в! Общники твори́т благода́ти Своя́ ученики́ и часть име́ти с ними обещава́ет в неизрече́нней сла́ве, я́коже и в Та́йной Ча́ши рече́, но́вую си́ю пи́ти с ни́ми в Царствии Небе́снем, еяжс и на́с сподо́би, я́ко ми́лостив и Человеколю́бец.

Глас 8: Дне́сь Непристу́пный существо́м де́ло раба́ восприя́т, ле́нтием препоя́сася, одева́яй не́бо о́блаки. Во́ду влива́ет во умыва́льницу, мо́ре Чермно́е пресеки́й. И прикло́нь коле́на, нача́т омыва́ти но́ги ученико́в и отира́ти ле́нтием, и́мже бе препоя́сан. Егда́ у́бо умы́ но́ги ученико́в, рече́ им: вы чи́сти есте́, но не вси, зна́менуя предаю́щаго Его.

Уне тебе бя́ше, Иу́до, а́ще не бы зача́лся еси́ во утро́бе ма́терни: у́не тебе бя́ше, преда́телю, аще не бы роди́лся еси́, отчужде́ние Сы́на Бо́жия: тебе ра́ди растерза́ся собра́ние учени́к Христо́вых и и́стинный виногра́д объе́млет разбо́йник распина́емь: тобо́ю пресече́ся граде́ж, и храм нерукотворе́нный разоря́ют беззако́нницы. Да а́ще ми́ро гре́шныя почита́л еси́, я́ко многоце́нное, ка́ко Пра́веднаго кровь рука́ма беззако́нных преда́ти не ужасну́лся еси? Уне ти бя́ше, преда́телю, а́ще не бы роди́лся еси́, отчужде́нне Сы́на Бо́жия.

Слава, и ныне: Дрема́нием диа́вольским содержи́мь Иу́да, усну́ в смерть. Вре́мя бо́дрствовати, вре́мя трезви́тися: да стене́т се́рдце, да слезя́т ве́жди: псало́м да пое́тся. Ве́лия бо кре́пость Креста́. Христо́с при две́рех, жре́мая Па́сха прии́де. Сла́ва Тебе́, Го́споди, сла́ва Тебе́.

И егда исполнится число дванадесяти учеников, архиерей повелевает единому диакону близ себе на месте стоя́ на правой стране глаголати ектению:

Ми́ром Го́споду помо́лимся.

О свы́шнем ми́ре: О ми́ре всего́ ми́ра:

О святе́м хра́ме сем: О Вели́ком Господи́не:

О Богохрани́мей стране́: О гра́де сем:

О благорастворе́нии возду́хов: О пла́вающих:

О е́же благослови́тися и освяти́тися умове́нию сему́ си́лою и де́йством и наи́тием Свята́го Ду́ха Го́споду помо́лимся.

О е́же бы́ти е́му на омове́ние скве́рны согреше́ний на́ших Го́споду помо́лимся.

О изба́вится нам:

Заступи́, спаси́:

Пресвяту́ю, Пречи́стую:

Возглашает архиерей:

Ꙗкѡ ты̀ є҆сѝ ѡ҆чище́нїе дꙋ́шъ на́шихъ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.

Клирицы же: Ами́нь.

Во время чтения вышеписанныя ектении архиерей и власти седят на своих местех.

Потом востав един токмо архиерей велегласно глаголет молитву сию:

Бж҃е пребл҃гі́й, непристꙋ́пный бж҃ество́мъ, иже во зра́цѣ ра́бїи слꙋжи́телѧ ѡбразъ воспрїе́мый и҆, во и҆з̾ѡбраже́нїе сп҃си́тельнагѡ смире́нїѧ, ѹ҆чн҃кѡ́въ твои́хъ но́ги пречи́стыма рꙋка́ма твои́ма ѡ҆мы́вый и҆ ле́нтїемъ ѡ҆тры́й! При́зри и҆ ны́нѣ на на́съ недосто́йныхъ ра̑бъ твои́хъ, толи́кагѡ твоегѡ̀ снизхожде́нїѧ подража́ющихъ пресла̑внаѧ, и҆ сподо́би плотски́хъ скве́рн̾ и҆змы́тисѧ на́мъ и҆ дꙋше́вныѧ нечистоты̀, воды̀ сеѧ̀ прикоснове́нїемъ. Да́рꙋй на́мъ прест҃а́гѡ дх҃а неви́димое наи́тїе, ѹ҆твердѝ на́съ ѿ блюдꙋ́щагѡ на́шꙋ пѧ́тꙋ ѕмі́ѧ льсти́вагѡ, да чи́сти бы́вше, послꙋ́жимъ бл҃гопрїѧ́тнѡ тебѣ̀, верхꙋ̀ ѕмїє́въ и҆ скорпі́й и҆ всеѧ̀ си́лы вра́жїѧ преходѧ́ще.

Ꙗкѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ и҆ во вѣ́ки вѣкѡ́въ.

Клирицы: Ами́нь.

Архиерей глаголет: Ми́ръ всѣ̑мъ.

Протодиакон же: Главы́ вашя Го́сподеви приклони́те.

Архиерей глаголет тайно молитву сию:

Гдⷵи бж҃е на́шъ, показа́вый на́мъ мѣ̑ры смире́нїѧ въ твое́мъ превысо́комъ снизхожде́нїи, и҆ послѣ́днѧго и҆зволе́нїемъ пе́рваго наре́къ, ѡ҆бл҃годатѝ на́съ въ слꙋже́нїи дрꙋ́гъ дрꙋ́гꙋ, вознесѝ на́съ бж҃е́ственнымъ смире́нїемъ, соблюди́ ны несквє́рны, ѡ҆мыва́ємыѧ при́снѡ слеза́ми, ѡ҆чища́ємы просвѣще́нїемъ чисти́тельныѧ твоеѧ̀ бл҃года́ти: да истиною къ тебѣ̀ всегда̀ припа́дающе, ѡ҆брѧ́щемъ млⷵть и҆ щедрѡ́ты на стра́шнѣмъ твое́мъ сꙋди́щи.

Возглас:

Ꙗкѡ млⷵтивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ всест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Клирицы же: Ами́нь.

Посем архиерей сядет в кресла своя, протодиакон же, приняв благословение у архиереа, сходит с места и, став проти́во архиереа, возглашает тако:

И о сподо́битися нам слы́шания Свята́го Ева́нгелиа Го́спода Бо́га мо́лим.

Клирицы: Го́споди, поми́луй. [Трижды.]

Паки возглашает протодиакон: Прему́дрость, про́сти, услы́шим Свята́го Ева́нгелиа.

Архиерей глаголет: Мі́ръ всѣ̑мъ.

Клирицы: И ду́хови твоему́.

Протодиакон начинает чести́ Святое Евангелие тако:

От Иоа́нна Свята́го Ева́нгелиа чте́ние.

Клирицы: Сла́ва Тебе́, Го́споди, слава Тебе́. Протодиакон: Во́нмем. Архиерей же и власти вси седят. Протодиакон чтет:

Во вре́мя оно, ве́дый Иису́с, я́ко вся даст Ему́ Оте́ц в ру́це, и я́ко от Бога изы́де, и к Бо́гу гряде́т, воста́в с ве́чери [сию речь трижды глаголет] и архиерей востает. Протодиакон глаголет: И положи́ ри́зы Своя́.

Архиерей же сам сиимает с себе шапку и отдает диакону, потом снимает панагию и крест, и кладет на кресла, таже омофорий и саккос или ри́зу и поли́цу, и кладет на кресла, и никто ему не помогает. Протодиакон же чтет все сднну речь: И положи́ ри́зы Своя́, многажды, до́ндеже разоблачится: а диакони стоят у места на нижнем степе́ни. По́яса же, по́ручей и епитрахилиа и подризника не снимает. И взем у диакона шапку, возлагаст на главу сам. И прием за́пон, утверждает сопреди́ един конец за по́яс, а други́й опускает до ног. Та́же приемлет ле́нтион: а протодиакон в то время чтет: И прие́м ле́нтион, препоя́сася. И архиерей препоясу́ется, от левыя руки един конец мало опускает, а другий конец прекидывает от левыя же руки чрез спину на правое рамо, и конец лентиа полагает на левую ру́ку. Протодиакон же чтет все едину речь: И прие́м ле́нтион, препоясася, дóндеже архиерей препояшется. Та́же протодиакон чтет: Пото́мже влия́ во́ду во умыва́льницу. Архиерей же, взяв рукомойник с водою теплою, вливает в лаха́нь крестообразно, малую часть, глаголя втай:

Во имѧ ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.

Протодиакон чтет вторично ту́южде речь: Пото́мже влия́ во́ду во умыва́льницу. Архиерей же паки лие́т крестообразно. Та́же протодиакон чтет трети́чно ту́южде речь: Пото́мже влия́ во́ду во умыва́льницу. Архиерей же лиет третие крестообразно.

Протодиакон чтет: И нача́т умыва́ти но́ги ученико́м и отира́ти ле́нтием, и́мже бе препоя́сан.

Архиерей и́дет с места своего ники́м поддержи́мь, а лаха́нь вземлют два диакона и несут пред ним: и начинает умывати ноги с начала от своего места сущих по левую страну́ до царских двере́й, и от царских дверей рядом по правую страну́ до Симона Петра, преклоня́яся на землю на одно правое колено, возливая воду из лахани своею рукою на но́гу трижды, омывает и отирает лентием. И у котораго умы́ет ногу, тот целует архиереа в шапку и в ру́ку. А архиерей того в ру́ку же. Архимандриты же седят в шапках. В то время протодиакон чтет все сдину речь: И нача́т умыва́ти но́ги ученико́м и отира́ти ле́нтием, и́мже бе препоя́сан.

И егда́ архиерей умы́ет трие́м но́ги, протодиакон чтет: Пото́м влия́ во́ду во умыва́льницу. Архиерей паки вземлет рукомойник и лиет воду в лахань по прежнему трижды крестообразно. Протодиакон чтет, якоже и прежде: И нача́т умыва́ти но́ги ученико́м и отира́ти ле́нтием, и́мже бе препоя́сан. Архиерей же паки умывает ноги еще трие́м. Сие бывает на четыри статии́.

Егда́ умыет ноги единона́десяти, тогда приходит к первому архимандриту: и протодиакон чтет: Прии́де же к Си́мону Петру́, и глагола́ ему той: Архимандрит, воста́в, глаго́лет: Го́споди, Ты ли мои́ умы́еши но́зе? Протодиакон чтет: Отвеща́ Иису́с и рече́ ему́: Архиерей глаголет:

Еже азъ творю̀ ты̀ не вѣ́си ны́нѣ, разꙋмѣ́еши же по си́хъ.

Протодиакон чтет: Глаго́ла Ему́ Петр: Архимандрит глаголет: Не умы́еши но́гу мое́ю во ве́ки. Протодиакон чтет: Отвеща́ ему́ Иису́с:

Архиерей отвещает:

Аще не ѹ҆мы́ю тебѐ, не имаши ча́сти со мно́ю.

Протодиакон чтет: Глаго́ла Ему́ Си́мон Петр: Архимандрит глаголет: Господи, не но́зе мои́ то́кмо, показуя свои руки: но и ру́це, паки показуя рукою своею на главу: и главу́, и сядет архимандрит.

Протодиакон чтет: Глаго́ла ему́ Иису́с:

Архиерей отвещает:

И҆змове́ный не требꙋетъ то́кмѡ но́зѣ ѹ҆мы́ти: єсть бо ве́сь чи́стъ, и҆ вы̀ чи́сти є҆стѐ, но не всѝ.

И омывает ноги архимандриту.

По умовении же ног восходит архиерей на прежнее место, где разоблачашеся, ники́м поддержи́мь, а диакони пред ним несут лахань с водою и поставляют на прежнем месте, на угото́ванной скамии. Возшед же на место, снимает с себе лентион и за́пон, а протодиакон дочитает Святое Евангелие си́це: Ве́дяше бо предаю́щаго Его́, сего́ ра́ди рече́: я́ко не вси чи́сти есте́. Клирицы: Сла́ва Тебе́, Го́споди, сла́ва Тебе́.

Паки начинает протодиакон: Прему́дрость, про́сти, услы́шим Свята́го Ева́нгелиа, и: От Иоа́нна Свята́го Ева́нгелиа чте́ние, и: Во́нмем, и чтет: Во вре́мя о́но, егда́ умы́ Иису́с но́зе ученико́м, прия́т ри́зы Своя́: Архиерей же облачается сам во все облачение прежнее, и никто ему не подает, а протодиакон чтет едину речь, прия́т ри́зы Своя́, многажды, дóндеже облачится. Таже протодиакон чтет: Возле́г па́ки. Архиерей сядет в креслах. Протодиакон чтет: Рече им: и подносит ко архиерею Святое Евангелие. Архиерей же, седя́ в креслах, дочитает Евангелие, власте́м всем в то время стоящым:

Вѣ́сте ли что̀ сотвори́хъ ва́мъ; вы глаша́ете мѧ̀ ѹ҆чи́телѧ и҆ гдⷵа: и҆ до́брѣ гл҃ете, єсмь бо. Аще ѹбѡ азъ ѹ҆мы́хъ ва́шшы но́зѣ, гдⷵъ и҆ ѹ҆чи́тель: и҆ вы̀ до́лжни є҆стѐ дрꙋ́гъ дрꙋ́гꙋ ѹ҆мыва́ти но́зѣ. Ѻбразъ бо да́хъ ва́мъ, да ꙗкоже азъ сотвори́хъ ва́мъ, и҆ вы̀ твори́тѣ. А҆ми́нь, а҆ми́нь, гл҃ю ва́мъ: нѣ́сть ра́бъ бо́лїй гдⷵа своего̀, ни посла́нникъ бо́лїй посла́вшаго є҆го̀. Аще сїѧ̑ вѣ́сте, бл҃же́ни є҆стѐ, аще твори́те ѧ.

И, прочет, востает и глаголет во услышание всем молитву сию:

Гдⷵи бж҃е на́шъ, иже по мно́зѣй млⷵти твое́й и҆стощи́вый себѐ и҆ зра́къ раба̀ прїе́мый, иже во вре́мѧ сп҃си́тельныѧ и҆ животворѧ́щїѧ и҆ во́льныѧ твоеѧ̀ стрⷵти вечерѧ́ти и҆зво́ливый со ст҃ы́ми твои́ми ѹ҆чн҃ки̑ и҆ а҆пⷵлы, и҆ посе́мъ ле́нтїемъ препоѧ́савый себѐ и҆ ѡ҆мы́вый но́ги ѹ҆чн҃кѡ́въ, ѡбразъ да́въ имъ смиреномꙋ́дрїѧ и҆ любвѐ єже дрꙋ́гъ ко дрꙋ́гꙋ, и҆ рекі́й: ꙗкоже сотвори́хъ ва́мъ, та́кожде и҆ вы̀ твори́те дрꙋ́гъ дрꙋ́гꙋ! Са́мъ и҆ ны́нѣ, влⷣко, посредѣ̀ недосто́йныхъ рабѡ́въ твои́хъ, иже твоемꙋ̀ ѡбразꙋ послѣ́дꙋющихъ, прише́дъ ѡ҆мы́й всѧ́кꙋю скве́рнꙋ и҆ нечистотꙋ̀ дꙋ́шъ на́шихъ, да ѿмы́вше прилѣпи́вшїйсѧ на́мъ ѿ согрѣше́нїй пра́хъ и҆ ле́нтїемъ любвѐ дрꙋ́гъ дрꙋ́га ѡ҆те́рше, возмо́жемъ бл҃гоꙋгоди́ти тебѣ̀ всѧ̑ дни̑ живота̀ на́шегѡ и҆ ѡ҆брѣстѝ бл҃года́ть пред̾ тобо́ю.

Ꙗкѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷵтѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ всест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Та́же архиерей входит во святый олтарь, и совершается служба по чину.