Иже во ст҃ы́хъ ѻ҆ц҃а̀ на́шегѡ і҆ѡа́нна, а҆рхїепі́скопа кѡнстантїнопо́льскагѡ, златꙋ́стагѡ, сло́во ѡ҆гласи́тельное во ст҃ꙋю и҆ вели́кꙋю недѣ́лю па́схи

Аще кто̀ благочести́въ, и҆ бг҃олюби́въ, да наслади́тса сегѡ̀ до́брагѡ и҆ свѣ́тлагѡ торжества̀. аще кто̀ ра́бъ благоразꙋ́мный, да вни́детъ ра́дꙋѧсѧ въ радость гдⷵа своегѡ̀. аще кто̀ потрꙋди́сѧ постѧ́сѧ, да воспрїи́метъ ны́нѣ дїнарїй. аще кто̀ ѿ пе́рвагѡ часа̀ дѣ́лалъ єсть, да прїи́метъ дне́сь пра́ведный до́лгъ. аще кто̀ по тре́тїемъ часѣ̀ прїи́де, благодарѧ̀ да пра́зднꙋетъ. аще кто̀ по шесто́мъ часѣ̀ дости́же, ничто́же да сꙋмни́тсѧ, ибо ничи́мже ѿтщетѣва́етсѧ. аще кто̀ лиши́сѧ и҆ девѧ́тагѡ часа̀, да пристꙋ́питъ ничто́же сꙋмнѧ́сѧ, ничто́же боѧ́сѧ. аще кто̀ то́чїю дости́же и҆ во є҆динонадесѧ́тый ча́съ, да не ѹ҆страши́тсѧ замедлѣ́ніѧ: любочести́въ бо сы́й влⷣка, прїе́млетъ послѣ́днѧго, ꙗкоже и҆ пе́рваго: ѹ҆покоева́етъ во є҆динондаесѧ́тый ча́съ прише́дшаго, ꙗкоже дѣ́лавшаго ѿ пе́рвагѡ часа̀: и҆ послѣ́днѧго ми́лꙋетъ, и҆ пе́рвомꙋ ѹ҆гожда́етъ: и҆ ѻномꙋ дае́тъ, и҆ семꙋ̀ да́рствꙋетъ: и҆ дѣла̀ прїе́млетъ, и҆ намѣ́ренїе цѣлꙋ́етъ: и҆ дѣѧ́нїе почита́етъ, и҆ предложе́нїе хва́литъ. Тѣ́мже ѹбѡ вни́дите всѝ въ ра́дость гдⷵа своегѡ̀. и҆ пе́рвїи и҆ вторі́и мздꙋ̀ прїимаи́те. бога́тїи и҆ ѹ҆бо́зїи дрꙋ́гъ со дрꙋ́гомъ ликꙋ́йте. возде́ржницы и҆ лѣни́вїи де́нь почти́те. пости́вшїисѧ и҆ непости́вшїисѧ возвесели́тесѧ дне́сь. Трапе́за и҆спо́лнена, наслади́тесѧ всѝ: теле́цъ ѹ҆пита́нный, никто́же да и҆зы́детъ алчай, всѝ наслади́теса пи́ра вѣ́ры: всѝ воспрїими́те бога́тство бла́гости: никто́же да рыда́етъ ѹ҆бо́жества, ꙗ҆ви́ бо сѧ ѻбщее црⷵтво. никто́же да пла́четъ прегрѣше́нїй, проще́нїе бо ѿ гро́ба возсїѧ̀. никто́же да ѹ҆бои́тсѧ сме́рти, свободи́ бо на́съ сп҃сова сме́рть: ѹ҆га̀си ю, иже ѿ неѧ̀ держи́мый: плѣнѝ ада, сше́дый во адъ: ѡ҆горчѝ є҆го̀, вкꙋси́вша пло́ти є҆гѡ̀. и҆ сїѐ предпрїе́мый и҆са́їа возопѝ: адъ, глаго́летъ, ѡ҆горчи́сѧ, срѣ́тъ тѧ̀ до́лѣ. ѡ҆горчи́сѧ, ибо ѹ҆праздни́сѧ. ѡ҆горчи́сѧ, ибо порꙋ́ганъ бы́сть. ѡ҆горчи́сѧ, ибо ѹ҆мертви́сѧ. ѡ҆горчи́сѧ, ибо низложи́сѧ. ѡ҆горчи́сѧ, ибо свѧза́сѧ. прїѧтъ тѣ́ло, и҆ бг҃ꙋ ^I5 приразисѧ. прїѧ́тъ зе́млю, и҆ срѣ́те нб҃о. прїѧ́тъ єже ви́дѧше, и҆ впадѐ во єже не ви́дѧше. гдѣ̀ твоѐ, сме́рте, жа́ло, гдѣ̀ твоѧ̀, аде, побѣ́да; воскре́се хрⷵто́съ, и҆ ты̀ низве́рглсz є҆сѝ. воскре́се хрⷵто́съ, и҆ падо́ша де́мѡни. воскре́се хрⷵто́съ, и҆ ра́дꙋютсѧ агг҃ли. воскре́се хрⷵто́съ, и҆ жи́знь жи́тельствꙋетъ. воскре́се хрⷵто́съ, и҆ ме́ртвый ни є́ди́нъ во гро́бѣ: хрⷵто́съ бо воста́въ ѿ ме́ртвыхъ, нача́токъ ѹ҆со́пшихъ бы́сть. томꙋ̀ сла́ва и҆ держа́ва, во вѣ́ки вѣ́кѡ́въ. а҆ми́нь.