Источник

В 22-й день

Предпра́зднство Рождества́ Христо́ва, и святы́я великому́ченицы Анаста́сии Фармаколи́трии, е́же есть Узореши́тельницы

На Го́споди, воззва́х: стихи́ры предпра́зднства 3 и святы́я 3.

Стихи́ры предпра́зднства, глас 1.

Подо́бен: Всехва́льнии му́ченицы

Земля вся, зря́щи/ Бо́жие снизхожде́ние, весели́тся:/ волсви́ да́ры Мне прино́сят,/ Не́бо свы́ше веща́ет звездо́ю,/ А́нгели сла́вят,/ па́стырие, свиря́юще, дивя́тся,/ я́сли подъе́млют,/ я́коже престо́л Мя огнезра́чный./ Ра́дуйся, Ма́ти, сия́ ви́дящи.

Свет во открове́ние язы́ков/ прише́л еси́, обложи́мь Моего́ зра́ка подо́бием,/ Сы́не Мой Безнача́льне,/ Отца́ Пребезнача́льнаго/ несказа́нное рожде́ние,/ обогати́ти бо гряде́ши/ обнища́вшее челове́чество нището́ю,/ е́юже обложи́мь еси́,/ воспева́ю, Го́споди, Твое́ благоутро́бие.

Я́ко Младе́нца Мя зря́щи,/ на Твои́х почива́юща, Ма́ти, дла́нех, возвесели́ся:/ приидо́х бо боле́знь всю отъя́ти Ада́мову,/ ю́же пострада́ зле́йшим сове́том зми́я,/ дре́вле вкуси́в, и сла́дости вне быв ра́йския,/ и растли́вся.

И́ны стихи́ры святы́я му́ченицы, глас 8.

Подо́бен: Что вы нарече́м:

Ми́ра кра́сных пренебре́гши/ и к сим пло́ти твоея́ не пощади́вши, честна́я,/ всю вдала́ еси́ себе́ саму́ю служи́ти боголе́пно святы́м,/ во страда́ниях терпели́вейше,/ гной о́ных отира́ющи/ и к му́жеству му́дрейше/ словесы́ му́дрыми укрепля́ющи,/ моли́ е́же спасти́ся душа́м на́шим.

Бога́тство тре́бующим расточи́ла еси́ привре́менное, честна́я,/ ве́чнующая те́пле взыску́ющи/ и Христо́вым стопа́м Боже́ственным/ неукло́нною ве́рою после́дующи, и вопия́ше:/ уязви́хся Твои́м жела́нием, Безсме́ртне,/ Твои́х страда́ний сообра́зну мя/ и сла́вы Боже́ственныя соприча́стницу покажи́,/ я́ко Щедр и Человеколю́бец.

Страсть претерпе́вши блаже́нную,/ стра́сти на́ша, Анастаси́е, и́стинно омыва́еши/ струя́ми врачева́ний твои́х при́сно./ Тем тя по до́лгу блажи́м,/ и любо́вию пра́зднуем па́мять твою́,/ и покланя́емся моще́м, свяще́ние почерпа́юще./ Моли́ спасти́ся душа́м на́шим.

Сла́ва, святы́я, глас 2:

Воскресе́ния дар прия́ла еси́,/ Анастаси́е всехва́льная,/ пострада́вши на суди́щи:/ де́монов бо мно́жество погуби́вши,/ мо́рю преда́ла еси́, страстоно́сице,/ му́ченице досточу́дная.

И ны́не, предпра́зднства, глас 4:

Вифлее́ме, украша́йся,/ воспо́й, гра́де Сио́не, ра́дуйся, пусты́не, предобруча́ющи ра́дость:/ звезда́ бо предъи́дет в Вифлее́м,/ возвеща́ющи хотя́щаго роди́тися Христа́,/ и верте́п прие́млет Невмести́маго все́ми,/ и я́сли гото́вятся восприя́ти Жи́знь ве́чную./ Тому́ вси воспои́м и возопии́м:/ спаси́ ду́ши на́ша, Иису́се Бо́же,/ воплоти́выйся нас ра́ди.

На стихо́вне стихи́ры, глас 2.

Подобен: До́ме Евфра́фов:

Гряде́т Христо́с/ лука́ваго сокруши́ти,/ су́щия во тьме просвети́ти/ и разреши́ти свя́занныя,/ предусря́щим Того́.

Стих: Бог от ю́га прии́дет/ и Святы́й из горы́ приосене́нныя ча́щи.

Лику́й, Сио́не,/ верте́пе, благоукраси́ся,/ Вифлее́ме, гото́вися:/ се бо Де́ва/ роди́ти Христа́ грядет.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Воспо́йте, оте́чествия язы́ков,/ хвалу́ и сла́ву,/ волсви́ с да́ры,/ па́стырие, свиря́юще,/ усе́рдно потщи́теся.

Сла́ва, свя́тей, глас 4. Студи́тово:

Живоно́снаго воста́ния Христо́ва тезоимени́тна бы́вши,/ честны́м жи́тельством зва́нию преизя́щно после́довала еси́/ и, естество́ укре́пльши,/ вмужи́вшися же мудрова́нием,/ червлени́цу истка́ла еси́ обагре́нием крове́й твои́х/ и, ца́рски, я́коже скиптр, крест держа́щи,/ Бо́гу и Спа́су сца́рствуеши, Анастаси́е всеблаже́нная./ Того́ моли́ и нас облиста́ти Боже́ственною сла́вою Его́.

И ны́не, глас то́йже:

Иса́ие, лику́й, Сло́во Бо́жие восприе́м,/ прорцы́ Отрокови́це Мари́и:/ купине́ горе́ти и огне́м не сгара́ти заре́ю Божества́./ Вифлее́ме, благоукраси́ся,/ отве́рзи врата́, Еде́ме,/ и волсви́, иди́те ви́дети спасе́ние, в я́слех повива́емое:/ Его́же звезда́ показа́ верху́ верте́па, Жизнода́вца Го́спода,/ спаса́ющаго род наш.

Тропа́рь, глас 4:

Побе́доноснаго Воскресе́ния/ истинноимени́тая нарече́на еси́, му́ченице Христо́ва,/ побе́ды на враги́ поста́вила еси́ мук терпе́нием,/ Христа́ ра́ди, Жениха́ твоего́,/ Его́же возлюби́ла еси́./ Того́ моли́/ спасти́ ду́ши на́ша.

Сла́ва, и ны́не, предпра́зднства, глас то́йже:

Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Ада́м у́мрем./ Христо́с ражда́ется пре́жде па́дший возста́вити о́браз.

НА ПОВЕ́ЧЕРИИ

Кано́н, глас 6. Его́же краегранесие: Вели́каго четвертка́ до́лгую песнь пою́.

И́рмо́с по два́жды, тропари на 6 и па́ки ирмо́с на сходе.

Песнь 1

Ирмо́с: Сече́ное, сече́тся/ мо́ре Чермно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же Богокра́сная воспева́шеся:/ сла́вно просла́вися Христо́с, Бог наш.

Всевино́вная и вседержи́тельная Жи́знь, безме́рная Му́дрость Бо́жия,/ созда́ дом Себе́ от Чи́стыя Неискусому́жныя Ма́тере:/ хра́мом бо теле́сным обложи́вся,/ сла́вно просла́вися Христо́с, Бог наш.

Тайноводя́щи волхвы́, созыва́ет нача́ток Бо́жия Му́дрость от язы́ков,/ безслове́сныя пре́жде напита́ти та́инственно,/ в безслове́сных я́слех трапе́за лежи́т тайная:/ к не́йже тща́тся,с дарми́ путеше́ствующе, звезде́ предсия́ющей.

Да услы́шим ны́не проро́ческия, исполня́емыя Ду́хом, гла́сы:/ Де́ва бо, прие́мши во чре́ве, прихо́дит Пресу́щественнаго роди́ти;/ Его́же волхво́м у́бо не́бо показа́, па́стырем же А́нгели,/ я́ко Младе́нца носи́ма.

Песнь 3

Ирмо́с: Госпо́дь, Сый, всех и Зижди́тель Бог,/ созда́нное, Безстра́стный, обнищав, Себе́ соедини́/ и я́ко Младе́нец, носи́мь пло́тию,/ в я́слех убо́гих покланя́емь быва́ет,/ яди́те, – вопия́, – Те́ло Мое́/ и ве́рою утверди́теся.

Избавле́ние за ми́р истощи́ти ны́не Свою́ Кровь Христа́ гряду́ща,/ И́род свире́пствует уби́ти пре́жде вре́мене,/ неи́стовствуя пре́жде неи́стовства Пила́това:/ те́мже уби́йственным суровство́м младе́нец мно́жество закла́.

Безу́мен муж рече́:/ несть Бо́га./ И́же неи́стовства испо́лнився коне́чнаго, христоуби́йством неду́гует,/ ра́зума же де́рзостию отпа́д,/ ко убие́нию младе́нец неискусозло́бных всего́ себе́ вооружи́/ и зе́млю оскверни́ кровьми́.

Песнь 4

Ирмо́с: Прови́дев проро́к/ та́йну Твою́ неизрече́нную, Христе́, провозгласи́:/ положи́л еси́ тве́рдую любо́вь кре́пости, О́тче Ще́дрый,/ Единоро́днаго бо Сы́на, Благи́й,/ очище́ние, в ми́р посла́л еси́.

На руно́, я́ко дождь, низше́д,/ и, я́коже ка́пля, на зе́млю, на Ро́ждшую Тя, Го́споди,/ гряде́ши ми́лостивно роди́тися и с челове́ки пожи́ти:/ Единоро́днаго бо Тя, очище́ние, Оте́ц в ми́р посла́.

Прио́бща́ешися челове́ческия, Христе́, пло́ти от се́мене Авраа́мля,/ и благода́ть вме́сто благода́ти гряде́ши пода́ти,/ и спасти́ о́браз, и обезтли́ти;/ Единоро́днаго бо Тя, очище́ние, Оте́ц в ми́р посла́.

Питие но́вое, е́же дре́вле пи́ти Дави́д, жа́ждав, возжеле́,/ в верте́пе происхо́дит источи́тися Вифлее́мли/ и уста́вити прибы́вшую душе́вную жа́жду, Ада́мову же и Дави́дову,/ из ни́хже по пло́ти ражда́ется Христо́с.

Песнь 5

Ирмо́с: Сою́зом любве́ связу́еми я́ко братолю́бцы,/ Владущему все́ми, ми́р зело́ Возлюби́вшему,/ и Да́вшему избавле́ние Сы́на Возлю́бленнаго,/ дади́м сла́ву Даю́щему всем мир.

Неодержи́мую держа́щая и превы́спреннюю на возду́се во́ду,/ бе́здны обуздава́ющая и мо́ря востязу́ющая Бо́жия Прему́дрость,/ я́ко дождь, на руно́ низше́дши, всели́ся во утро́бу Де́вы.

Ученики́ волхва́ Валаа́ма волхвы́ зове́т к ра́зуму звездо́ю Христо́с,/ о́блаки же не́бо одева́яй, пелена́ми повива́ется/ и в я́слех возлежи́т, Его́же трепе́щут Херуви́ми,/ в верте́пе же вмеща́ется исполня́яй вся.

Песнь 6

Ирмо́с: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́.

Го́спода ве́дяще Тя, Небеса́ пове́дают твою́ сла́ву, Спа́се,/ звездо́ю волхвы́ ны́не с да́ры призыва́юще к позна́нию Твоему́/ и Боже́ственному поклоне́нию.

Скве́рну кто отте́р, да отве́ржет/ и та́ко Христу́ чист Чи́стому да прико́снется Младе́нцу,/ в я́слех лежа́щу и глубину́ серде́ц очища́ющу.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.

Зы́бля главо́ю, И́род, зла́я прови́дя, подви́жеся, благовре́мения ища́,/ умертви́ти жи́зни и сме́рти Бо́га,/ и́же всех есть Госпо́дь и Влады́ка тва́ри.

Ели́цы вас, Христо́вы друзи, бе́гайте с бе́гающим в Еги́пет/ и, Сему́ до́бре покланя́ющеся, боголе́пно воззови́те/ и согла́сно просла́вите.

И́же кто со Мно́ю несть, на Мя де́ет, Христо́с глаго́лет,/ не собира́яй же со Мно́ю расточа́ющему уподо́бися./ Те́мже Сего́ убои́мся плотска́го низше́ствия.

Песнь 8

Ирмо́с: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Пито́мцы Богому́дрии, в Вифлее́м Сло́ву предше́дшии,/ со А́нгелы у́зрим и па́стырьми чу́до,/ су́щему в Вы́шних сла́ву возсыла́юще Бо́гу,/ благоволе́ние даю́щему челове́ком и мир:/ Го́спода по́йте, дела́, и превозноси́те во вся ве́ки.

Зако́на любве́ держа́щеся, братолю́бия изволе́ние да восприи́мем,/ с друг дру́ги ми́рствующе и еди́но сму́дрствующе:/ ми́ра бо Пода́тель прихо́дит Христо́с,/ умиря́яй вся́ческая и спаса́я зову́щия:/ Го́спода по́йте, дела́, и превозноси́те во вся ве́ки.

Вме́сто Сла́вы

припе́в:

Благослови́м Отца́ и Сы́на и Свята́го Ду́ха, Го́спода.

Почита́ет ле́стными словесы́ ражда́ющагося Христа́ И́род беззако́нный/ и к волхво́м приклоня́шеся, я́ко и сам бо поклони́тся;/ но не стыдя́шеся, гоня́ тая́щагося Христа́,/ ни младе́нцев уще́дри и вопи́ти не разуме́:/ Го́спода по́йте, дела́, и превозноси́те во вся ве́ки.

Та́же пое́м оба ли́ка вку́пе:

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

И пое́м ирмо́с:

За зако́ны оте́ческия:

Песнь 9

Ирмо́с: Стра́нствия Влады́чня/ и Безсме́ртныя Трапе́зы/ во убо́зем верте́пе высо́кими умы́,/ ве́рнии, прииди́те, наслади́мся,/ воплоти́вшееся Сло́во неизрече́нно уве́девше,/ Его́же велича́ем.

Иди́те, – нача́льником И́род рече́ волхво́в,–/ поищи́те Отроча́те;/ егда́ же обря́щете Сего́, ми ско́ро возвести́те,/ лесть в се́рдцы ко́знствуя;/ но обличе́н бысть преле́стник, вотще́ беззако́ннуя.

Соде́тель, рожде́йся от Отца́ пре́жде веков, ражда́ется от Де́вы,/ му́дрость Сый Сло́во Бо́жие и си́ла./ Те́мже еди́наго Сы́на ве́дяще, Богочелове́ка Го́спода велича́ем.

Я́ко челове́к яви́лся еси́ существо́м, не мечта́нием,/ та́ко Бог нра́вом воздая́ния, естество́м, Спа́се, е́же прия́л еси́./ Те́мже, от Де́вы Боже́ственное прише́ствие Твое́ чту́ще, велича́ем.

Посе́м ирмо́с и поклон.

НА У́ТРЕНИ

По 1-й стихологии седа́лен, глас 1.

Подо́бен: Ка́мени запечатану:

Просвети́ся тварь,/ Зижди́тель бо предгряде́т роди́тися в верте́пе за неизрече́нную ми́лость./ Па́стырие, сря́щите со тща́нием, зря́ще чу́до стра́шно./ Прииди́те, волсви́, да́ры рука́ми держа́ще и глаго́люще:/ сла́ва рожде́нному Царю́,/ сла́ва путево́дствовавшему ны./ Сему́, я́ко Царю́ всех, поклони́мся пло́тию.

Сла́ва, и ны́не, глас 4.

Подо́бен: Ско́ро предвари́:

Боже́ственне весели́тся тварь вся днесь:/ Христо́с бо Госпо́дь, Бо́жий Сын, из Де́вы ражда́ется Чи́стыя,/ весь род челове́чь обезсме́ртствуя,/ разреша́я же кля́тву прама́тере Е́вы./ Тем я́ко Бла́годе́телю на́шему пе́ние принесе́м.

По 2-й стихологии седа́лен, глас 6.

Подо́бен: Упова́ние ми́ра:

Из Перси́ды ца́рие зла́то, сми́рну и лива́н рожде́нному Царю́ и Бо́гу принесо́ша дре́вле,/ мы же ны́не, предпра́зднующе Рождество́ Его́,/ благочестному́дренне от души́ наде́жду, ве́ру и любо́вь принесе́м Ему́,/ Де́ву пою́ще.

Сла́ва, и ны́не, глас 3.

Подо́бен: Де́ва днесь:

Де́ву, ражда́ющую Преве́чное Сло́во,/ Ио́сиф пра́ведный песносло́вя, вопия́ше:/ ви́жду Тя, бы́вшую храм Госпо́день,/ нося́щую вся челове́ки спасти́ прише́дшаго,/ и воспева́ющия Того́ за милосе́рдие, Боже́ственныя хра́мы показу́ющаго.

Кано́на два: предпра́зднства на 8, и святы́я на 6. Кано́н предпра́зднства, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Из де́вственнаго о́блака вели́кое нам возсия́ со́лнце, Иису́с Просвеще́ние,/ су́щии во тьме пое́м Ему́,/ озаря́еми све́тло Сего́ сия́ньми.

Язы́ков ча́яние, Царь ми́ра гряде́т ра́тника уби́ти./ Сре́сти потщи́мся Того́,/ ражда́ема в Вифлее́ме на спасе́ние на́ше.

Проро́честии соверша́ются Боже́ственнии гла́си,/ стра́шное явле́ние прознаменова́вше Христо́во:/ А́гница бо приближа́ется роди́ти А́гнца/ и Изба́вителя и всех Го́спода.

Богоро́дичен: Тя, Чи́стую Влады́чнюю голуби́цу,/ честну́ю, и непоро́чную, и до́брую в жена́х,/ я́ко всех ро́ждшую Бо́га, ублажа́ем ве́рно, Богоблаже́нная.

Кано́н святы́я, глас 8, его́же краегране́сие: Пою́ тя, му́ченице Анастаси́е, любо́вию. Ио́сиф.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це.

Пе́ние возсле́м Бо́гу,/ роди́тися хотя́щему пло́тию из Де́вы в Вифлее́ме гра́де/ и в я́слех положи́тися Отроча́ти, я́ко младе́нцу,/ да спасе́т челове́ческий род.

Еди́ныя вожделе́нныя Христо́вы, Анастаси́е сла́вная, добро́ты и́щущи,/ претекла́ еси́ добро́ты мирски́я тве́рдостию нра́ва/ и безсме́ртнаго насле́дия, му́ченице, сподо́билася еси́.

Нощь ле́стнаго омраче́ния, просвеще́нием ду́ха озаря́ема, честна́я,/ претекла́ еси́ смы́сленне/ и ны́не всели́лася еси́, иде́же есть Боже́ственное сия́ние Несозда́нныя Тро́ицы.

Богоро́дичен: Яви́ся неви́димый Бог, преесте́ственно ражда́емь,/ за благоутро́бие мно́гое из Тебе́, Де́во Ма́ти, обнища́в, бога́тый,/ я́ко да безсме́ртием челове́ческий род обогати́т.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Сло́вом простры́й небеса́, вхо́дит в верте́п/ и в безслове́сных восклони́тися я́слех Христо́с,/ безслове́сия нас за милосе́рдие хотя́ изба́вити.

Вопие́т проро́к я́вственно:/ Бог наш Сей, не вмени́тся у́бо ин кто к Нему́./ Изобре́те всяк путь худо́жества, челове́ком соедини́вся.

Не терпи́т зре́ти Херуви́м,/ и ка́ко стерпя́т Тя я́сли, невмести́маго естество́м,/ за милосе́рдие мно́гое ражда́ема нас ра́ди от Де́вы,/ Го́споди Человеколю́бче?

Богоро́дичен: Прови́дя Тя го́ру иногда́ Дании́л проро́к,/ из нея́же ка́мень отсече́ся, Богоро́дице,/ тре́бища и́дольския истни́в и разори́в, Всечи́стая Богоневе́сто.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Пелена́ми повива́емый Младе́нец, неосяза́емый Госпо́дь,/ хо́щет ви́ден бы́ти, в я́слех возлежа́й;/ го́ры, взыгра́йте, и ра́достию Боже́ственною, хо́лми, облецы́теся,/ све́та исполня́еми.

Благоче́стным дерзнове́нием гони́телей притупи́ла еси́ разжже́нных глаго́л стре́лы,/ спаси́тельным Сло́вом обогати́вшися, Анастаси́е,/ и Боже́ственною любо́вию двиза́ния душе́вная упра́вивши.

То́чию, му́ченице, вопия́ла еси́:/ ищу́ Го́спода, к еди́ной того́ любви́ ду́шу привяза́х,/ сего́ осия́тися чисте́йшими бога́тно блиста́ньми иду,/ обы́чая простото́ю.

Богоро́дичен: Неискусобра́чная Отрокови́це,/ руко́ю Нося́щаго всю тварь во утро́бе но́сиши, воплоща́ема,/ Его́же и ражда́ема восклоня́еши в я́слех,/ младе́нца зри́ма Преве́чнаго.

Конда́к предпра́зднства, глас 3.

Подобен: Де́ва днесь:

Де́ва днесь Преве́чное Сло́во/ в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со А́нгелы и па́стырьми хотя́щаго яви́тися/ Отроча́ мла́до, Преве́чнаго Бо́га.

И́кос:

О, ужа́снаго вои́стинну и па́че сло́ва чудесе́!/ Е́же бы́ти дая́й всем ра́ди бла́гости/ во чре́во Святы́я Де́вы вни́де,/ и в верте́пе роди́тися гряде́т, и в я́слех положи́тися./ Звезда́ же Сего́ пропове́дует свы́ше волхво́м,/ иду́щим на поклоне́ние Его́ с да́ры, издале́ча привлача́щи,/ со тща́нием после́дующия Валаа́ма прорече́нию, ре́кшаго:/ звезда́ хо́щет провозвести́ти Отроча́ мла́до, Преве́чнаго Бо́га.

Седа́лен, глас 1.

Подо́бен: Гроб Твой, Спа́се:

Я́ко неве́сту тя Христо́ву восхваля́ем, де́во,/ я́ко Фе́клу честну́ю досто́йно почита́ем./ Те́мже и в па́мяти твое́й пролива́ются ре́ки исцеле́ний:/ ты бо прия́ла еси́ благода́ть,/ я́ко храня́щи за́поведи Госпо́дни си́лою Ду́ха.

Сла́ва, и ны́не, предпра́зднства, глас 8.

Подо́бен: Повеле́нное та́йно:

Рождества́ Христо́ва предпра́зднственная соверша́юще,/ ве́рнии, торжеству́им и досто́йне вси предусря́щим,/ я́ко волсви́, даронося́ще доброде́тели, воспе́ти а́нгельскую песнь но́вую/ от Де́вы Богоотрокови́цы в Вифлее́ме без се́мене ро́ждшемуся Бо́гу на́шему,/ Его́же славосло́вят вся́ческая.

Песнь 4

Ирмо́с: Христо́с моя́ си́ла, Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Се возсия́ звезда́ издале́ча,/ я́же предвозвести́ся дре́вле из Иа́кова;/ Челове́к быв необъе́млемый Бог,/ и зри́тся, пелена́ми повива́емь.

Всех Госпо́дь избавле́ние зри́тся Младе́нец, в де́вственных не́дрех седя́й,/ И́же в не́дрех О́тчих, я́ко Сын, почива́яй.

Еде́ме, заключи́вшийся мне окраде́нием сне́ди иногда́, отве́рзися:/ ны́не бо в Вифлее́ме ражда́ется Облеки́йся в мя,/ отлучи́вый мя твоего́ безболе́зненнаго наслажде́ния.

Богоро́дичен: Проро́к Авваку́м Ду́хом прови́дя Тя, Де́во,/ го́ру Бо́жию, доброде́тельми приосене́нную,/ из Нея́же яви́ся нам Просвеща́яй ду́ши на́ша.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Рече́ния уже́ исполня́ются проре́кших Боже́ственным Ду́хом:/ Де́ва бо и́дет в верте́пе роди́ти Всесоверше́ннаго.

Му́ченическое благосла́вие любо́вию взыска́вши,/ сего́ получи́ла еси́, тве́рдо пострада́вши/ несомне́нною во́лею, терпеливоду́шная.

Истка́нною от свы́ше благода́ти ри́зою и́стинно оде́ялася еси́ совлече́нием те́ла,/ страстоте́рпице му́ченице всехва́льная.

Богоро́дичен: Плотоно́сец происхо́дит от Твоего́ светоно́снаго ложесна́, Пречи́стая,/ Царь Небе́сный,/ я́ко на престо́ле, в я́слех возлеги́й.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Евфра́фов доме, Вифлее́ме,/ Нача́льник изы́дет из тебе́ во Изра́или,/ призыва́я язы́ки отринове́нныя,/ я́коже предрече́,/ Ду́хом Михе́я озаря́емь.

Па́ствити па́ству Свою́ еди́ный кре́постию Иису́с из Де́вы роди́тся,/ до коне́ц же земли́ возвели́чится,/ проро́к Богоглаго́ливый дре́вле провозвести́.

Дух прему́дрости, Дух Бо́жий,/ Дух кре́пости и сове́та, зна́ния же и ра́зума,/ Дух Боже́ственнаго стра́ха/ из ложе́сн Твои́х Сы́на вопло́щшагося, Де́во, испо́лни.

Богоро́дичен: Ору́жия вся вра́жия, Пречи́стая Всенепоро́чная, Чи́стая,/ и́стинно в коне́ц оскуди́ла еси́:/ Ты бо всех Бо́га родила́ еси́,/ копие́м низложи́вшаго сего́ свире́пство.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Возсия́ звезда́ Иу́дова от земли́ Халде́йския,/ дви́жущи на поклоне́ние звездосло́вцы, я́ко писа́ся.

Зако́нно подвиза́лася еси́, беззако́нныя победи́вши,/ му́ченице всесла́вная, си́лою ду́ха.

Воскресе́ние Бо́жие образу́еши тезоимени́тством,/ враги́ проклина́ющи неви́димыя, всехва́льная.

Богоро́дичен: В верте́пе подзе́мнем роди́тися от Де́вы Христо́с гряде́т,/ да веселя́тся вся́ческая.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Се во Своя́ прихо́дит Христо́с,/ присво́имся Ему́ благода́тию, доброде́тельми Боже́ственными, ве́рнии,/ и Сего́ прии́мем, душа́ми и сердцы́ просвеща́емы.

Ко́рень прозябе́ Иессе́ев,/ и из него́ проше́д Бог наш,/ наде́жда язы́ков, упокое́ние и честь,/ я́коже дре́вле прорече́ Иса́ия, Боже́ственно просвеща́емь.

Плени́цы моя́ разреша́я мно́гих грехо́в пеле́нным пови́тием,/ обогаща́я же мя, лю́те зло́бою обнища́вшаго,/ Иису́се мой, обнищава́еши воплоща́емь.

Богоро́дичен: Обурева́ет зима сопроти́вных помышле́ний смире́нное се́рдце мое́/ лука́вых духо́в наве́тами, благолюби́вая Влады́чице:/ укроти́ сию́ хода́тайством Твои́м.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Естество́, е́же от нас Благоутро́бный прие́м,/ ви́димь есть я́ко Младе́нец, зи́ждай во чре́ве младе́нцы,/ и повива́ется, и в я́слех возлега́ет,/ и разреша́ет мои́х страсте́й многоплете́нныя плени́цы бла́гостию.

Святы́х му́ченик следя́щи терпели́вно Христа́ ра́ди по́двиги,/ и тех потре́бам служа́щи,/ и гное́ния, преподо́бная, отира́ющи, обогати́лася еси́ пресве́тло,/ тех сия́ющи благосла́вием.

Ка́пли врачева́ний излива́еши ту́чами Боже́ственных дарова́ний,/ и страсте́й ре́ки воспря́туеши,/ и по́моществу́еши лю́те бе́дствующим, всесла́вная му́ченице Христо́ва,/ Боже́ственнаго Воскресе́ния тезоимени́тая.

Богоро́дичен: Исцеля́я челове́ческое естество́, дре́вним преступле́нием истле́вшее,/ без тли нов ражда́ется Младе́нец/ и в Твои́х не́дрех, я́ко на престо́ле, седи́т, Безневе́стная,/ Оте́ческаго не оста́вль соседе́ния Божество́м.

Конда́к, глас 2.

Подо́бен: Вы́шних ища:

Во искуше́ниих и ско́рбех су́щии,/ к твоему́ хра́му притека́юще,/ прие́млют честна́я дарова́ния от живу́щия в тебе́ Боже́ственныя благода́ти, Анастаси́е:/ ты бо при́сно ми́ру то́чиши исцеле́ния.

И́кос:

Воскресе́ния Христо́ва тезоимени́та су́щи,/ па́дша мя ны́не воскреси́ моли́твами твои́ми,/ от чуде́с твои́х ка́плю иска́павши, му́ченице, души́ мое́й/ и запале́ния лю́таго греха́ угаша́ющи./ Ми́р бо спа́саеши от страсте́й многообра́зных всегда́,/ и́миже и аз искушаемь есмь:/ ты бо, всем вся подаю́щи, ми́ру то́чиши исцеле́ния.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Всесоверше́нный ражда́ется, я́ко Младе́нец пелена́ми повива́емь,/ и Безнача́льный от Де́вы прие́млет нача́ло, обожи́ти прия́тие иски́й:/ да ра́дуется Не́бо, и да весели́тся земля́.

Я́ко ца́рскою багряни́цею, обло́жся пло́тию,/ ны́не предгряде́т от ложе́сн Твои́х ми́ра, Отрокови́це, Царь,/ сокруши́в враги́, я́ко си́лен,/ и умири́в на́шу бори́му бы́вшую жи́знь.

С на́ми Бог яви́тся, воплоща́емь,/ разуме́йте, язы́цы проти́внии,/ и покори́теся, на́шея удали́вшиися жи́зни:/ се воззва́ние на́ше,/ Младе́нец в я́слех Вифлее́мских возлещи́ хо́щет.

Богоро́дичен: От всех Тя родо́в избра́, пала́ту нескве́рну,/ всели́выйся Царь во утро́бу Твою́, Отрокови́це,/ Ему́же песнопое́м ны́не благоче́стно:/ благослове́н еси́, Бо́же оте́ц на́ших.

Ин

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Го́рнии ли́цы славосло́вят безпло́тных,/ на земли́ же покланя́емся, зря́ще, земни́и, нам уподо́бльшагося/ и в я́слех возлежа́ща Тя, Христе́, Бо́же вся́ческих.

Огнь испепели́ла еси́ ле́стный, я́коже де́ти, пла́мени приобщи́вшися,/ пока́зоваше тепло́ раче́ние, Богому́драя,/ его́же к твоему́ стяжа́ла еси́ Влады́це и Жени́ху́.

Ту́чи пролива́еши врачева́ний,/ уставля́ющи пале́ние неду́гов, и лю́ди при́сно устроя́еши песнопе́ти:/ благослове́н еси́, Го́споди Бо́же, во ве́ки.

Богоро́дичен: Чу́до, мысль удивля́ющее, соверша́емое в Тебе́, Де́во Ма́ти:/ роди́ти и́маши Бо́га и в я́слех восклони́ти,/ Херуви́мом непристу́пнаго и невмести́маго естество́м.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Проро́к Богоглаго́ливых рече́ния ны́не испо́лнишася:/ Де́ва приближа́ется роди́ти Го́спода./ Вся земля́ да весели́тся, лику́ющи,/ и да ра́дуется во вся веки.

Заря́ми светя́ся Боже́ственныя благода́ти,/ зако́на сень уставля́я, Светода́вец Иису́с возсия́;/ омраче́ннии, у́зрите свет вели́к.

Бы́вша мя верте́п разбо́йников,/ Го́споди, рожде́йся в верте́пе, храм покажи́ Твой,/ и Отца́, и Боже́ственнаго Твоего́ Ду́хa,/ да сла́влю Тя во вся ве́ки.

Богоро́дичен: Небе́сная из чре́ва Твоего́ звезда́ возсия́,/ звездосло́вцы подвиго́шася сию́ ви́дети,/ ра́зумом тоя́ просве́щшеся Ду́хом, Пречи́стая Де́во,/ при́сно Благослове́нная.

Ин

Ирмо́с: Богоглаго́ливии о́троцы, в пещи́/ со огне́м пла́мень попирающе, поя́ху:/ благослови́те, дела́ Госпо́дня, Го́спода.

Ему́же предстоя́т горе́ ты́сящи и тьмы А́нгелов,/ верте́п но́сит ражда́емаго;/ Его́же пое́м дела́ непреста́нно, я́ко Го́спода.

Храм Тро́ицы показа́лася еси́ в Боже́ственных хра́мех,/ моли́твами и поще́нии, Анастаси́е, упражня́ющися,/ благослови́те, взыва́ющи, дела́ Госпо́дня, Го́спода.

Крепча́йшими словесы́ Хрисого́на, страстоте́рпице, укре́пльшися,/ и́долов немощно́е попра́ла еси́ суровство́,/ до́блественне пострада́вши.

Богоро́дичен: О Боговмести́мая Отрокови́це!/ Роди́ши Младе́нца, Творца́ веков и неизме́ннаго Го́спода, в Вифлее́ме гра́де/ за неизрече́нную ми́лость.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Се всех прии́де воззва́ние, очище́ние, Христо́с, спасе́ние и си́ла,/ сокро́вище многоце́нное кры́ется внутрь верте́па,/ и́мже обогати́вшеся, волсви́ зла́то я́ко Царю́ прино́сят.

Христо́вы па́стырие, побди́те,/ и умно во град Вифлее́м прииди́те,/ и Бо́гу в вы́шних возопи́йте:/ сла́ва и вели́чие благоволи́вшему Младе́нцу яви́тися нас ра́ди за благосты́ню.

Пло́тию пелена́ми повива́емь,/ повива́яй мгло́ю зе́млю, песко́м же мо́ре,/ соу́з зол мои́х расто́ргл еси́ и пра́вдою вся связа́л еси́,/ разсла́бленныя прило́гми борца́.

Богоро́дичен: Черто́же и престо́ле Ца́рствующаго,/ Горо́ Бо́жия, и гра́де избра́нный,/ и раю́, со́лнца о́блаче всесве́тлый,/ просвети́ ду́шу мою́,/ о́блак отгоня́щи беззако́ний мои́х мно́гих, Богора́дованная.

Ин

Ирмо́с: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Игра́йте, горы, в весе́лии,/ и ра́достию, хо́лми, препоя́шитеся;/ ны́не Де́ва приближа́ется роди́ти Господа.

День весе́лия приноша́ет ти тварь, Анастаси́е, па́мять прославля́ющи,/ Его́же просла́вила еси́, Сло́ва, твои́ми кровьми́.

Све́том чисте́йшим ны́не осия́ема,/ моли́твами твои́ми просвеща́тися свы́ше всем нам проси́,/ му́ченице благода́рная.

Богоро́дичен: Све́тло вся тварь ны́не да ра́дуется:/ Богоро́дица роди́ти гряде́т от Бо́га Бо́га Сло́ва, Челове́ка бы́вшаго.

Свети́лен.

Подо́бен: Ду́хом во святи́лищи:

Хрисого́ну чу́дному, в темни́це заключе́ну, Анастаси́е сла́вная, служи́ла еси́/ и, сего́ словесе́м повину́вшися, в Бо́зе сконча́ла еси́ муче́ния тече́ние,/ от Него́же благода́ть исцеле́ний прие́мши, исцеля́еши неду́ги.

Сла́ва, и ны́не, предпра́зднства. Подо́бен то́йже:

Да ра́дуется Не́бо, и земля́ да весели́тся./ Верте́пе, просвети́ся,/ я́сли же, подъими́те Созда́вшаго челове́ка руко́ю я́ко Младе́нца, ражда́ющася от Де́вы./ А́нгелов мно́жество, возопи́йте ясно:/ сла́ва Бо́гу в Вы́шних.

На хвали́тех стихи́ры на 4, глас 6.

Подо́бен: А́нгельския предъиди́те:

Ны́не дре́вняя разреша́ются явле́ния,/ прия́т бо во утро́бе Де́ва,/ и́бо ка́мень из горы́ отсече́ся,/ и жезл прозябе́ Иессе́ев,/ и роса́ ны́не Гедео́нова на земли́ пролия́ся./ Лю́дие, возопие́м:/ Царь Изра́илев, Христо́с прихо́дит.

Стра́ннаго Рождества́ стра́нны вещи ви́дятся:/ ка́ко в Вы́шних Отцу́ соседя́й/ в я́слех безслове́сных, восхоте́в, восклоня́ется?/ ка́ко Неосяза́емый в пелена́х?/ ка́ко везде́ Сый в верте́пе?/ Лю́дие, возопие́м:/ Царь Изра́илев, Христо́с прихо́дит.

И́же чудеса́ Творя́й,/ и Еги́пта уязвля́я,/ одождя́я лю́дем неразу́мным ма́нну,/ воплоща́ется и млеко́м пита́ется,/ и Отроча́ зри́мо бе́гает гони́теля И́рода,/ я́ко на о́блаце, Де́вою Ма́терию носи́мь,/ я́ко Иса́ия прозре́ Богови́днейший.

Отроча́, пре́жде Сый Царь веко́в,/ ражда́ется во́льно,/ и Сын нам даде́ся,/ услы́шите, язы́цы, Изра́илю, внуши́./ Разуме́йте и покаря́йтеся:/ с на́ми бо, И́же истни́т и разори́т от земли́/ вся́кое и ца́рство, и нача́льство, и́же его́ не послуша́ша.

Сла́ва, подо́бен то́йже:

Жезло́м желе́зным упасе́н бу́деши, иуде́е,/ я́ко не покори́выйся и проро́ком не ве́руяй:/ Сы́ну бо ро́ждшуся Оте́ц насле́дие дае́т язы́ки/ и одержа́ние земли́ всея́,/ тебе́ же отри́нет скверноуби́й ственне,/ вопи́ти бо не повину́ешися:/ Царь Изра́илев, Христо́с прихо́дит.

И ны́не, подо́бен то́йже:

Взыгра́й, Дави́де,/ из чресл бо твои́х Христо́с;/ ра́дуйся, Иессе́е,/ процвете́ бо ко́рень твой;/ от бедра́ твоего́, Иу́до, прихо́дит Госпо́дь,/ по прорече́нию Валаа́мову./ Ви́дите, язы́цы, по вели́кому Иса́ии:/ се роди́т Отроча́ Емману́ила/ Де́ва Всечи́стая.

На стихо́вне стихи́ры, глас 2.

Подобен: До́ме Евфра́фов:

Приближа́ется Христо́с,/ звезда́ предозаря́ет/ Небе́сное мно́жество,/ во́инства приница́ет/ у́мных сил.

Стих: Бог от ю́га прии́дет/ и Святы́й из горы́ приосене́нныя ча́щи.

Ра́дуйся, Вифлее́ме,/ па́ствуяй наста́,/ Изра́иля спаса́яй,/ не ктому́ мний бу́деши,/ во Иу́довых влады́ках.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Прииди́те, земноро́днии,/ со А́нгелы и мы/ соста́вим лик:/ сла́ва в Вы́шних/ Бо́гу возопии́м.

Сла́ва, святы́я, глас 5. Византи́ево:

Предпра́зднственный день днесь вочелове́чения Христа́ Бо́га/ и всехва́льныя му́ченицы пра́здник совозсия́ Анастаси́и:/ се Де́ва в Вифлее́м приближа́ется/ Младе́нца, пелена́ми пови́та, восклони́ти в я́слех безслове́сных,/ свободи́вшаго ны от дре́вния кля́твы/ и спаса́ющаго ду́ши на́ша.

И ны́не, предпра́зднства, глас то́йже:

Не дря́хлуй, Ио́сифе, зря мою́ утро́бу:/ узри́ши бо ражда́емаго от Мене́, и возра́дуешися,/ и я́ко Бо́гу поклони́шися,/ Богоро́дица глаго́лаше ко Своему́ обру́чнику,/ хотя́щи роди́ти Христа́./ Сию́ воспои́м, глаго́люще:/ ра́дуйся, Обра́дованная, с Тобо́ю Госпо́дь/ и Тебе́ ра́ди с на́ми.

НА ЛИТУРГИ́И:

Блаже́нны предпра́зднства песнь 3-я и святы́я песнь 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Аллилу́ия, глас 1: Терпя́, потерпе́х Го́спода, и внят ми. Ева́нгелие от Луки́, зача́ло 33. Прича́стен: В па́мять ве́чную:

Святая великомученица Анастасия Узорешительница († ок. 304) пострадала во время правления римского императора Диоклетиана (284–305). Родилась в Риме, в семье сенатора Претекстата. Отец – язычник, мать Фавста – тайная христианка, которая поручила воспитание маленькой девочки известному своей ученостью святому Хрисогону († ок. 304; память 22 декабря). Хрисогон учил Анастасию Священному Писанию и исполнению закона Божия. По окончании учения об Анастасии говорили как о мудрой и прекрасной деве. После смерти матери, не считаясь с желанием дочери, отец выдал ее замуж за язычника Помплия. Чтобы не нарушить обет девства и избежать супружеского ложа, Анастасия постоянно ссылалась на неизлечимую болезнь и сохраняла чистоту.

В темницах Рима в то время находилось много заключенных христиан. В нищенской одежде святая тайно посещала узников, – умывала и кормила больных, неспособных двигаться, перевязывала раны, утешала всех, кто нуждался в этом. Ее учитель и наставник два года томился в заключении. Встречаясь с ним, она назидалась его долготерпением и преданностью Спасителю. Муж святой Анастасии, Помплий, узнав об этом, жестоко избил ее, поместил в отдельной комнате и у дверей поставил стражу. Святая скорбела, что лишилась возможности помогать христианам. После смерти отца Анастасии Помплий, чтобы завладеть богатым наследством, постоянно истязал жену. Святая писала своему учителю: «Муж мой... томит меня как противницу его языческой веры в столь тяжком заключении, что мне ничего не остается, как только, предав дух Господу, упасть мертвою». В ответном письме святой Хрисогон утешал мученицу: «Свету всегда предшествует тьма, и после болезни часто возвращается здоровье, и после смерти обещана нам жизнь». И предсказал скорую смерть ее мужа. Через некоторое время Помплия назначили послом к персидскому царю. По дороге в Персию он утонул во время внезапно начавшейся бури.

Теперь святая вновь могла посещать томившихся в темницах христиан, полученное наследство она употребляла на одежду, пищу и лекарства для больных. Святого Хрисогона отправили в Аквилею (город в верхней Италии) на суд к императору Диоклетиану, – Анастасия последовала за своим учителем. Тело святого Хрисогона после его мученической кончины, по Божественному откровению, было сокрыто пресвитером Зоилом. Через 30 дней после смерти святой Хрисогон явился Зоилу и предсказал о близкой кончине трех юных христианок, живших недалеко,– Агапии, Хионии и Ирины (1304; память 16 апреля). И повелел послать к ним святую Анастасию. Такое видение было и святой Анастасии. Она пошла к пресвитеру, помолилась у мощей святого Хрисогона, затем в духовной беседе укрепила мужество трех дев перед предстоящими им пытками. После кончины мучениц, сама похоронила их тела.

Святая Анастасия стала странствовать, чтобы везде, где только можно, служить христианам, заключенным в темницах. Так она получила дар врачевания. Трудами и словами утешения святая Анастасия облегчала заключение многих людей, попечением о телах и душах страждущих разрешала их от уз отчаяния, страха и беспомощности, поэтому и названа Узорешительницей. В Македонии святая познакомилась с молодой вдовой-христианкой Феодотией, которая помогала ей в благочестивых трудах.

Стало известно, что Анастасия – христианка, ее взяли под стражу и отвели к императору Диоклетиану. Расспросив Анастасию, Диоклетиан узнал, что она все свои средства истратила на помощь нуждающимся, а золотые, серебряные и медные статуэтки перелила на деньги и кормила многих голодных, одевала нагих, помогала немощным. Император приказал отвести святую к верховному жрецу Ульпиану, чтобы тот склонил ее к жертве языческим Богам или предал жестокой казни. Жрец предложил святой Анастасии сделать выбор между богатыми дарами и орудиями пытки, положенными с двух сторон около нее. Святая, не колеблясь, указала на орудия пытки: «Окруженная этими предметами, я стану прекраснее и угоднее вожделенному Жениху моему – Христу...» Прежде, чем подвергнуть святую Анастасию пыткам, Ульпиан решил осквернить ее. Но, как только прикоснулся к ней, ослеп, страшная боль сжала ему голову, и через некоторое время он скончался. Святая Анастасия оказалась на свободе и вместе с Феодотией продолжала служить узникам. Вскоре святая Феодотия и три ее сына были преданы мученической смерти анфипатом (начальником области) Никитием в их родном Городе Никее († ок. 304; память 29 июля и 22 декабря).

Святую Анастасию вторично заключили в темницу и 60 дней истязали голодом. Каждую ночь мученице являлась святая Феодотия, ободряла и укрепляла в терпении. Видя, что голод не причинил святой вреда, игемон Иллирии приказал утопить ее вместе с осужденными преступниками, среди которых был и гонимый за веру христианин Евтихиан († ок. 304; память 22 декабря). Воины посадили узников на корабль и вышли в открытое море. Далеко от берега они пересели в лодку, а в корабле сделали несколько пробоин, чтобы он затонул. Судно стало погружаться в воду, но узники увидели мученицу Феодотию, управлявшую парусами и направлявшую корабль к берегу. 120 человек, пораженные чудом, уверовали во Христа – святые Анастасия и Евтихиан крестили их. Узнав о случившемся, игемон приказал казнить всех новокрещеных. Святую Анастасию растянули над костром между четырьмя столбами. Так окончила свой мученический подвиг святая Анастасия Узорешительница.

Тело святой осталось невредимым, – похоронила его благочестивая христианка Аполлинария. По окончании гонений она построила над гробом святой великомученицы Анастасии церковь.


Источник: Минея - М. : Издат. совет Русской Православной Церкви, 2002-. 12 том. / Минея декабрь. - 2002. / Ч. 1. – 600; Ч. 2. - 560 с.

Комментарии для сайта Cackle