Сентябрь

Ме́сяца сентября́ в 1-й день

Новоле́тие церко́вное и пра́зднование Пресвяте́й Богоро́дице,

ра́ди ико́ны Ея́, имену́емыя Черни́говская Гефсима́нская

На вели́цей вече́рни

На Го́споди, воззва́х: стихи́ры Богоро́дице, глас 2.

Подо́бен: Егда́ от Дре́ва:

Всех скорбя́щих Ра́досте,/ и оби́димых Предста́тельнице,/ и убо́гих Пита́тельнице,/ стра́нных же Утеше́ние, и Же́зле слепы́х,/ немощны́х Посеще́ние,/ тружда́ющихся Покро́ве и Засту́пнице,/ и си́рых Помо́щнице,/ Ма́ти Бо́га Вы́шняго, Ты еси́ Пречи́стая:/ потщи́ся, мо́лимся, спасти́ся рабо́м Твои́м. Два́жды.

Всем Предста́тельницу Тя челове́ком,/ всем Прибе́жище вели́кое,/ все́м Засту́пницу Тя показа́, Влады́чице, христиа́ном,/ И́же из Тебе́ в на́ше смеше́ние облече́ся/ и распя́тие и смерть нас ра́ди подъя́т./ Того́ у́бо моли́ непреста́нно/ всем очище́ние низпосла́ти прегреше́ний, Богоневе́стная. Два́жды.

Ина́го прибе́жища, Чи́стая,/ ко Творцу́ и Влады́це не и́мамы,/ ра́зве Тебе́, Богоневе́сто,/ да не оста́виши нас те́плым Твои́м предста́тельством,/ ниже́ отри́неши любо́вию притека́ющия честно́му о́бразу Твоему́ поклони́тися,/ от него́же исто́чники ми́лости Твоея́ нам источи́,/ потре́бное нам во вся дни жития́ на́шего подаю́щи.

Сла́ва, глас 6:

И́же со Ду́хом Святы́м соедине́н,/ Безнача́льне Сло́ве и Сы́не,/ всех ви́димых и неви́димых Соде́телю и Зижди́телю,/ и вене́ц ле́та благослови́,/ сохраня́я в ми́ре правосла́вных мно́жества,/ моли́твами Богоро́дицы, и всех святы́х Твои́х.

И ны́не, глас 2:

О, вели́каго та́инства!/ Ви́дя чудеса́, пропове́даю Божество́,/ Емману́ил у́бо естества́ две́ри отве́рзе, я́ко Человеколю́бец,/ де́вства же затво́ры не разве́рзе, я́ко Бог,/ но та́ко из ложе́сн про́йде, я́коже слу́хом вни́де,/ та́ко роди́ся, я́коже и зача́тся,/ безстра́стно вни́де и неизрече́нно изы́де,/ по глаго́лющему проро́ку:/ та дверь затворе́на бу́дет, и никто́же про́йдет сквозе́ ея́,/ то́кмо Еди́н Госпо́дь Бог Изра́илев,/ име́яй ве́лию ми́лость.

Та́же вход. Проки́мен дне. И чте́ния Богоро́дичная.

На стихо́вне стихи́ры и сла́вник новоле́тия.

И ны́не, глас 6:

Преложе́ние скорбя́щих,/ Премене́ние боля́щих еси́, Богоро́дице Всепе́тая,/ спаси́ град и лю́ди,/ бори́мых умире́ние, обурева́емых тишина́,/ Еди́на Предста́тельнице ве́рных.

Тропа́рь инди́кта и Богоро́дице, глас 5:

Похвала́ми венча́ем, Влады́чице Богоро́дице,/ венцено́сный Черни́говский о́браз Твой,/ от него́же явле́нием чу́да/ в Гефсима́нии земли́ Ра́донежския/ благослови́ Госпо́дь вене́ц ле́та бла́гости Своея́./ И ны́не приле́жно мо́лимся Ти, Всецари́це:/ венча́й благослове́ньми пою́щия Тя.

На у́трени

По 1-м стихосло́вии седа́лен, глас 2:

Притеце́м к ти́хому приста́нищу/ и Засту́пнице ро́да на́шего, Де́ве Мари́и,/ поклони́мся честно́му Ея́ о́бразу, уми́льно зову́ще:/ при́зри, Благосе́рдая Ма́ти, на лю́тыя ско́рби, нас обдержа́щия,/ и исцели́ боле́зни душ на́ших.

По 2-м стихосло́вии седа́лен, глас 3:

Притека́юще к многоцеле́бному о́бразу Твоему́, Де́во Богоро́дице,/ ве́мы Тя христиа́н Предста́тельницу,/ к Сы́ну бо Твоему́ и Бо́гу на́шему при́сно моле́бнеи ру́це Твои́ о нас простира́еши, Всенепоро́чная,/ и спаса́еши от бед ве́рою и любо́вию Богоро́дицу Тя почита́ющих.

По полиеле́и седа́лен, глас 5:

Стра́ждущая жена́, тя́жким неду́гом обдержи́ма,/ к Твоему́ пречи́стому о́бразу прите́кши, Богома́ти,/ сле́зную моли́тву смире́нно сотвори́,/ врачевство́ цельбоно́сное прося́щи пода́ти,/ и во упова́нии свое́м не посра́мленна оты́де,/ ве́рных Исто́чник исцеле́ний созыва́ющи просла́вити:/ прииди́те и ви́дите, я́же сотвори́ ми Госпо́дь,/ предста́тельством Пречи́стыя Своея́ Ма́тере.

По 50-м псалме́ стихи́ра, глас 6: Не и́мамы ины́я по́мощи:

Кано́н Богоро́дице, глас 2.

Песнь 1.

Ирмо́с: Гряди́те лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Покрови́тельница оби́тели Гефсима́нския Ты еси́, Богороди́тельнице,/ помози́ нам просла́вити Тя/ и разреше́ние прегреше́ний пода́ждь благоче́стно поклоня́ющимся о́бразу Твоему́.

Я́коже на одре́ боле́зни лежа́щия жены́ моле́ния послу́шала еси́, Влады́чице,/ та́ко и на́ше смире́нное воздыха́ние не отри́ни,/ но, Сама́ заступи́вши, зла́го обстоя́ния изба́ви рабы́ Твоя́.

Пове́дает оби́тель Гефсима́нская, я́же от о́браза Твоего́ бы́вшая чудеса́,/ той бо исто́чник соде́лася, исцеле́ния струи́ оби́льно излива́ющий,/ ве́рою призыва́ющим и́мя Твое́, Богома́ти.

О, Всепе́тая Ма́ти, стра́ждущая жена́ рече́,/ да́руй ми исцеле́ние, да, восста́вши, поклоню́ся о́бразу Твоему́ свято́му./ Ты же, прикло́ньшися к ея́ моле́нию,/ проси́мая подала́ еси́, Пречи́стая.

Катава́сия: Кре́ст начерта́в, Моисе́й:

Песнь 3.

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Тя похвалу́, ве́рнии, стяжа́хом,/ прибе́жище и утвержде́ние и ра́дование, и душа́м спасе́ние,/ наде́жду же и сте́ну, покро́в и заступле́ние, Богоблагода́тная Влады́чице.

Не усыпа́ет о нас в моли́твах Пречи́стая Ма́терь Спа́сова/ и явля́ет чу́дное Свое́ милосе́рдие всем, ве́рою притека́ющим/ и любо́вию свято́му Ея́ о́бразу покланя́ющимся.

Приклони́ся к мольба́м рабо́в Твои́х, Влады́чице,/ и не закосни́ изба́вити нас от бед и скорбе́й, я́же обдержа́т нас,/ ви́димых и неви́димых враго́в отжени́,/ да не зле поги́бнем, окая́ннии.

Ми́лостивым и кро́тким Твои́м о́ком, Богороди́тельнице,/ при́зри на нас, недосто́йных,/ и от напа́сти обстоя́щия свободи́,/ призыва́ющих Тя на по́мощь, Всепречи́стая.

Седа́лен, глас 4:

Твоего́ милосе́рдия дарова́ния воспомина́юще, Влады́чице,/ и Твой чудотво́рный о́браз благогове́йно лобыза́юще,/ я́ко посреде́ нас пребыва́ющую Тя помышля́ем и ве́рою Тебе́ вопие́м:/ Твоего́ Сы́на и Го́спода моли́,/ да научи́т нас за́поведи Его́ всегда́ твори́ти,/ злы́я же искуше́ния побежда́ти,/ и Тебе́, Предста́тельницу на́шу, досто́йно пе́ти и сла́вити во ве́ки.

Песнь 4.

Ирмо́с: Услы́шах, Го́споди, глас Твой, его́же рекл еси́,/ глас вопию́щаго в пусты́ни,/ я́ко возгреме́л еси́ над вода́ми мно́гими,/ Твоему́ свиде́тельствуяй Сы́ну,/ весь быв соше́дшаго Ду́ха, возопи́:/ Ты еси́ Христо́с, Бо́жия Му́дрость и Си́ла.

Влады́чице Пречи́стая, ели́ка про́сим днесь от Тебе́ прия́ти,/ сия́ от чудотво́рныя Твоея́ ико́ны нам пода́ждь,/ немощно́е на́ше произволе́ние утверди́/ и Небе́сных благ жела́ние в сердца́ на́ша всели́.

Спасе́ния Тя наде́жду, моли́тву неусы́пну, заступле́ние тве́рдо и́мамы:/ умилосе́рдися и виждь на́шу нестерпи́мую печа́ль, боле́зни и ско́рби/ и ми́лостивно посети́, Ма́ти Бо́жия,/ осла́бу ско́рую подаю́щи.

В ско́рбех Тя Засту́пницу стяжа́хом, Влады́чице,/ те́мже и ны́не помози́ нам, лю́те обурева́емым,/ ру́ку по́мощи простира́ющи, Чи́стая:/ бу́ди ми́лостива боле́знем на́шим, Ма́ти Бо́жия,/ исцеле́ние ско́рое подаю́щи.

Смири́, Влады́чице, вы́ю враго́в вознесе́нную,/ сове́ты тех и сердца́ злонра́вная укроти́,/ кре́пость же пода́ждь призыва́ющим Тя, Ма́ти Бо́жия,/ побе́ду ско́рую подаю́щи.

Песнь 5.

Ирмо́с: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику Отцу́ Твоему́/ от но́щи неве́дения/ приведе́ние и́мамы.

Мно́зи ле́ты тя́жким неду́гом свя́занная жена́, здра́вие Тобо́ю улучи́вши,/ созыва́ет ве́рныя просла́вити чу́дная дела́ Твоя́, Богоро́дице, зову́щи:/ ра́дуйся, Исто́чниче дарова́ний, Богоблагода́тная Де́во.

Неизсле́димую бе́здну Твоея́ ми́лости рассла́бленная жена́ позна́вши,/ пред свято́ю Твое́ю ико́ною усе́рдную моли́тву Тебе́ принесе́/ и, а́бие исцеле́ние от неду́га своего́ прие́мши,/ здра́ва в дом свой возврати́ся, Тя воспева́ющи.

Свяще́нная ико́на Твоя́/ друга́я Силоа́мская купе́ль показа́ся, Влады́чице,/ очища́ющая и исцеля́ющая боле́зни душ и теле́с,/ ве́рою приходя́щих к ней/ и Тя любо́вию велича́ющих.

Присту́пим, ве́рнии, с любо́вию к чудотво́рному о́бразу Присноде́вы/ и благогове́йне ему́ поклони́мся,/ се бо в нем чуде́с си́лу Всеблага́я Влады́чица явля́ет и вся спаса́ет,/ с ве́рою несумне́нною почита́ющих пречи́стаго ли́ка Ея́ подо́бие.

Песнь 6.

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Изба́ви нас от напа́стей и бед, Богоневе́сто,/ Тя бо Хода́таицу устро́и Бог во спасе́ние на́ше и заступле́ние./ Сего́ ра́ди исхода́тайствуй нам, недосто́йным,/ от печа́ли грехо́вныя избавле́ние.

Пое́м Тя и покланя́емся Ти, Богома́ти Де́во,/ ве́рою и любо́вию пропове́дающе мно́гая и пресла́вная чудеса́,/ от ико́ны Твоея́ чудотво́рныя явле́нныя./ Те́мже от вся́ких нас бед изба́ви.

О, благоутро́бия Твоего́, Де́во Чи́стая!/ Свобожда́еши бо безме́рныя печа́ли и напа́сти в ну́ждех и обстоя́ниих Тя призыва́ющих./ Те́мже и ны́не, Благослове́нная, Засту́пница нам бу́ди.

Ве́дущи не́мощи на́ша, Богороди́тельнице,/ уврачу́й духо́вныя неду́ги на́ша,/ да славосло́вим Сы́на Твоего́ и Бо́га на́шего,/ я́ко Врача́ вся́ческих.

Конда́к, глас 8:

Притеце́м, ве́рнии, к многоцеле́бному о́бразу Засту́пницы на́шея, Богоро́дицы Мари́и,/ и, припа́дающе к нему́ с любо́вию, си́це рцем:/ о, Всепе́тая Ма́ти, при́зри Твои́м благосе́рдием на ны, недосто́йныя,/ и яви́ нам Твоя́ ми́лости и щедро́ты:/ в боле́знех исцеле́ние, в ско́рбех утеше́ние, в беда́х заступле́ние/ и вся ны спаси́, на Тя упова́ющия, да зове́м Ти:/ ра́дуйся, Де́во, христиа́н заступле́ние.

И́кос:

Я́ко дар прия́ла еси́, Ма́ти Бо́жия, всех христиа́н неду́ги исцеля́ти,/ от бед избавля́ти, от плене́ния спаса́ти и от враго́в заступа́ти;/ не пре́зри и нас, Всеми́лостивая Госпоже́, Богоро́дице, Тебе́ вопию́щих:/ Ра́дуйся, А́нгелов удивле́ние; ра́дуйся, ми́ра утеше́ние. Ра́дуйся, христиа́н ра́дование; ра́дуйся, мона́хов утвержде́ние. Ра́дуйся, подвиза́ющихся укрепле́ние; ра́дуйся, Ра́досте скорбя́щих. Ра́дуйся, боля́щих исцеле́ние; ра́дуйся, заблу́ждших вразумле́ние. Ра́дуйся, Утоли́тельнице печа́лей; Ра́дуйся, Де́во, христиа́н засту́пнице.

Песнь 7.

Ирмо́с: Да пресла́вное Рождество́ Твое́, Христе́, е́же от Де́вы,/ прообрази́ши я́ве,/ неопали́мы в пещи́ о́троки сохрани́л еси́,/ пе́сньми пою́щия Тебе́:/ отце́в Бо́же, благослове́н еси́.

Яви́ ско́рое Твое́ заступле́ние, Влады́чице,/ мо́жеши бо, я́ко Ма́ти Бо́жия./ Те́мже призыва́ем Тя серде́чне, со слеза́ми припа́дающе/ и наде́жду на Тя несумне́нную возлага́юще.

Наде́жда блага́я и Засту́пница ве́рных Ты еси́, Влады́чице:/ сего́ ра́ди мо́лимся Тебе́ дарова́ти ми́лости бога́тыя всем,/ упова́ющим на Тя и зову́щим:/ благослове́на, Я́же Бо́га пло́тию ро́ждшая.

Я́же еди́но упова́ние и по́мощь ве́рных, Богороди́тельнице,/ потщи́ся помощи́ рабо́м Твои́м, обурева́емым скорбьми́ и во гресе́х су́щим,/ любо́вию же к Тебе́ прибега́ющим.

О, ди́вное чу́до!/ Разсла́бленная бо жена́,/ лобыза́ющи цельбоно́сную ико́ну Твою́, Ма́ти Бо́жия,/ ско́ро кре́пость теле́сную ощути́ и благода́рно возопи́:/ благослове́на Ты еси́, Пречи́стая.

Песнь 8.

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́, я́ко Го́спода,/ и превозноси́те во вся ве́ки.

Прибе́жище на́ше и ми́ру ра́дование, Богороди́тельнице,/ умилосе́рдися и ско́ро благода́ть Твою́ пода́ждь нам, ско́рбным,/ и заступи́, Блага́я, рабы́ Твоя́.

Тя от всея́ души́ нело́жно призыва́ющих, Богоро́дице,/ во вся́кой ско́рби и в боле́знех разли́чных,/ беда́х и обстоя́ниих лю́тых спе́шно услы́ши,/ сих избавля́ющи при́сно моли́твами Твои́ми.

Безсме́ртия зарю́ и исто́чник спасе́ния ве́мы Тя, Богоро́дице,/ я́ко ро́ждшую Отца́ Безсме́ртнаго Сло́во,/ от сме́рти избавля́ющее вся,/ превознося́щия Его́ во ве́ки.

Спаси́ от зол и скорбе́й рабы́ Твоя́, Богоро́дице,/ и мир Бо́жий, превы́шший вся́каго ми́ра земна́го,/ пода́ждь рабо́м Твои́м, Тя воспева́ющим.

Песнь 9.

Ирмо́с: Недоуме́ет всяк язы́к благохвали́ти по достоя́нию,/ изумева́ет же ум и преми́рный пе́ти Тя, Богоро́дице:/ оба́че, Блага́я су́щи, ве́ру приими́,/ и́бо любо́вь ве́си боже́ственную на́шу,/ Ты бо христиа́н еси́ Предста́тельница, Тя велича́ем.

В моли́твах неусыпа́ющую Богоро́дицу Чи́стую призове́м вси, взыва́юще:/ изба́ви от лю́тыя сме́рти и огня́ гее́нскаго рабы́ Твоя́,/ Ты бо христиа́н еси́ Предста́тельница, Тя велича́ем.

Отча́явшихся кре́пкое прибе́жище,/ обурева́емых ти́хое приста́нище Ты еси́, Богоро́дице./ Те́мже и мы притека́ем к Тебе́, взыва́юще:/ спаси́ нас, усе́рдно Тя велича́ющих.

Не преста́й, Чи́стая, моля́щи от Тебе́ ро́ждшагося Бо́га/ о всех, с ве́рою притека́ющих к Тебе́/ и прося́щих избавле́ния,/ Ты бо христиа́н еси́ Предста́тельница, Тя велича́ем.

Дар от Бо́га прия́ла еси́, я́ко Ма́ти Бо́жия,/ неду́ги исцеля́ти и от бед избавля́ти,/ о гресе́х умоля́ти и от плене́ния спаса́ти./ Не пре́зри и нас, Госпоже́ Преми́лостивая,/ Ты бо христиа́н еси́ Предста́тельница, Тя велича́ем.

Свети́лен инди́кта.

Сла́ва, и ны́не, Богоро́дицы:

Днесь ве́рнии, соше́дшеся,/ поклоне́ние досто́йное Твоему́, Пречи́стая, о́бразу прино́сят,/ покро́ва и заступле́ния Твоего́ прося́ще и зову́ще:/ принеси́ о нас Сы́ну Твоему́ и Бо́гу на́шему те́плое Твое́ моле́ние.

На хвали́тех стихи́ры самогла́сны инди́кта.

Та́же стихи́ры Богоро́дицы, глас 1.

Подо́бен: О, ди́вное чу́до:

О, ди́вное чу́до!/ Исто́чник исцеле́ний,/ честны́й о́браз Твой ве́рным показа́ся, Влады́чице,/ неду́гующим телесе́м врачевство́ источа́я,/ и боле́зни душе́вныя утоля́я,/ сего́ ра́ди вси земноро́днии,/ благогове́йне лобыза́юще ли́ка Твоего́ изображе́ние,/ из глубины́ души́ прино́сят Ти похва́льное пе́ние, взыва́юще:/ ра́дуйся, Благода́тная,/ Тобо́ю бо Госпо́дь/ подае́т с ве́рою притека́ющим ми́лость и исцеле́ние.

О, ди́вное чу́до!/ Ве́рным показа́лася еси́, Пречи́стая, украше́ние:/ проро́ком исполне́ние,/ апо́столом сла́ва,/ му́чеником удобре́ние,/ де́вствующим похвала́/ и всему́ ми́ру преди́вный Покро́в./ Покры́й, Влады́чице, ми́лостию Твое́ю/ ве́рою покланя́ющихся о́бразу Твоему́ честно́му/ и с любо́вию пред ним Тебе́ вопию́щих:/ Обра́дованная, ра́дуйся, с Тобо́ю Госпо́дь,/ подая́й ми́ру Тобо́ю ве́лию ми́лость.

О, Премилосе́рдная Влады́чице!/ Ди́вно Твое́ о нас ко Го́споду предста́тельство,/ день бо и нощь Престо́лу Сы́на Твоего́ предстои́ши,/ моле́бне ру́це за ны к Нему́ простира́ющи/ и ми́лости исто́чник отве́рзти прося́щи,/ похва́льное пе́ние из глубины́ души́ Ти принося́щим:/ ра́дуйся, Благода́тная,/ Тебе́ бо ра́ди Госпо́дь/ пра́ведный гнев на ми́лость прелага́ет.

Сла́ва, инди́кта. И ны́не, глас 8:

Влады́чице, приими́ моли́твы раб Твои́х/ и изба́ви нас от вся́кия ну́жды и печа́ли.

Та́же славосло́вие вели́кое и отпу́ст

На Литурги́и

Проки́мен инди́кта, глас 3: Ве́лий Госпо́дь наш, и ве́лия кре́пость Его́,/ и ра́зума Его́ несть числа́. Стих: Хвали́те Го́спода, я́ко благ псало́м. И Богоро́дицы проки́мен, глас 3: Вели́чит душа́ моя́ Го́спода и возра́довася дух Мой о Бо́зе, Спа́се Мое́м:

Апо́стол к Тимофе́ю, зача́ло 282. И Богоро́дицы, к Филипписи́ем, зача́ло 240.

Аллилу́иа, глас 4: Тебе́ подоба́ет песнь, Бо́же, в Сио́не. Стих: Благослови́ши вене́ц ле́та бла́гости Твоея́, Го́споди. И Богоро́дицы: Слы́ши, Дщи, и ви́ждь и приклони́ у́хо Твое́.

Ева́нгелие от Луки́, зача́ло 13. И Богоро́дицы: Луки́, зача́ло 54.

Прича́стен инди́кта: Благослови́ши вене́ц ле́та бла́гости Твоея́, Го́споди. И Богоро́дицы: Ча́шу спасе́ния прииму́ и И́мя Госпо́дне призову́.

Источник: Текст утвержден Священным Синодом Русской Православной Церкви 16 апреля 2016 года (журнал № 15)

Ме́сяца сентября́ в 7-й день

Священному́ченика Михаи́ла, пресви́тера Орло́вскаго

На вели́цей вече́рни

На Го́споди, воззва́х: стихи́ры на 8, глас 5:

Прииди́те, ве́рнии,/ но́ваго первому́ченика земли́ Вя́тския/ пе́сньми боголе́пными просла́вим,/ Михаи́ла чу́днаго,/ па́стыря до́браго,/ благоче́стия побо́рника,/ ве́ры правосла́вныя защи́тника и раско́ла обличи́теля,/ пра́вды Бо́жия и́стиннаго пропове́дника,/ сме́ртию Го́спода просла́вившаго,/ и вене́ц сла́вы от Него́ прии́мшаго,// и моля́щагося о спасе́нии душ на́ших.

Свяще́нства дар прие́м/ и крест свой на ра́мо взем,/ до́брый па́стырю Михаи́ле,/ до́бле во благоче́стии потруди́лся еси́,/ мно́гия лю́ди во огра́ду церко́вную возврати́л еси́/ и, о гони́телех моля́ся, смерть за Христа́ смире́нно прия́л еси́./ Ны́не же, во oби́телех Небе́сных пребыва́я,// моли́ спасти́ся душа́м на́шим.

Терпе́ние безро́потное в тебе́, о́тче, показа́ся,/ егда́ погребе́нию предаде́ трие́х чад и супру́жницу до́брую./ Вся сия́ ско́рби тя́жкия,/ я́же со смире́нием прия́л еси́,/ кре́пости ду́ха твоего́ сокруши́ти не возмого́ша,/ поне́же си́ла Бо́жия в не́мощи соверша́ется./ Те́мже во страда́ниих твои́х ве́рою укрепля́лся еси́// и в сме́рти Бо́га просла́вил еси́.

Да ра́дуется земля́ Вя́тская,/ прославля́ющи па́стыря до́браго Михаи́ла,/ и́же, во дни нестрое́ний дух мяте́жный ве́ка сего́ облича́я,/ к ми́ру и моли́тве всех ве́рных призыва́ше/ и о гони́телех свои́х моля́шеся./ И ны́не Престо́лу Бо́жию предстои́т/ со все́ми новому́ченики и испове́дники Це́ркве Ру́сския// и прославля́ет Тро́ицу Живонача́льную.

Сла́ва, глас 2:

Прииди́те, ве́рнии, лик соста́вльше,/ благода́рственную песнь Бо́гу принесе́м,/ дарова́вшему нам му́ченика но́ваго,/ пропове́дника и́стиннаго Боже́ственных слове́с,/ па́стыря до́браго ста́да Христо́ва,/ му́ченика добропобе́днаго,/ те́плаго моли́твенника и усе́рднаго хода́тая,/ и с любо́вию вси возопии́м:/ Го́споди, моли́твами уго́дника Твоего́, священному́ченика Михаи́ла,// поми́луй и спаси́ ду́ши на́ша.

И ны́не, предпра́зднства.

Вход. Проки́мен дне. И чте́ния 3 му́ченическая.

На лити́и стихи́ры, глас 8:

Процвето́ша доброде́тели твоя́, священному́чениче Михаи́ле,/ и плод мног принесо́ша се́мена уче́ния Христо́ва,/ тобо́ю все́янная в ду́ши благоче́стию прилежа́щим/ и скве́рное житие́ отложи́вшим./ Моли́ Христа́, Преблага́го Бо́га,/ проще́ние грехо́в нам дарова́ти// и душа́м на́шим спасе́ние.

Раско́льники му́дрым и кро́тким сло́вом/ в и́стинней ве́ре наставля́я,/ Правосла́вней Це́ркви послу́шная ча́да сотвори́л еси́,/ да не поги́бнут, но восприи́мут спасе́ние,// е́же Христо́с дарова́ ста́ду Своему́.

Сла́ва, глас 1.

Подо́бен: Подо́бен: О, ди́вное чу́до:

О, ди́вное чу́до!/ Исто́чник ра́дости во гра́де Орло́ве яви́ся,/ обрето́ша бо ся честны́я мо́щи твоя́,/ священному́чениче Михаи́ле,/ те́мже архиере́и, свяще́нницы и лю́дие правосла́внии благода́рственно восклица́ют:/ сла́ва Бо́гу в Тро́ице Еди́ному,// подаю́щему ми́рови ве́лию ми́лость.

И ны́не, предпра́зднства.

На стихо́вне стихи́ры, глас 1:

Пострада́вый Тебе́ ра́ди, Христе́,/ священному́ченик Михаи́л/ мно́гия му́ки претерпе́/ и, побе́дный вене́ц на Небесе́х прие́м,// днесь мо́лится о спасе́нии душ на́ших.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Мно́ги ско́рби пра́ведным,/ и от всех их изба́вит я́ Госпо́дь./ Ты же, священному́чениче Михаи́ле,/ в лише́нии чад и супру́жницы,/ ско́рби тя́жкия претерпе́л еси́,/ оба́че не оскуде́ ве́ра твоя́,/ и ста́до, Бо́гом ти да́нное, до́бре упа́сл еси́,// те́мже помина́й любо́вию тя восхваля́ющия.

Стих: Блаже́н муж, боя́йся Го́спода,// в за́поведех Его́ восхо́щет зело́.

Учи́тельство с непреста́нною моли́твою сочета́в,/ пропове́дничество же со смире́нием показа́в,/ всем житие́м твои́м преподо́бным отце́м уподо́бился еси́./ Ны́не же мо́лим тя,/ помози́ нам, священному́чениче прехва́льне,/ по́двигом до́брым подвиза́тися// и спасе́ние душа́м улучи́ти.

Сла́ва, глас 2:

Просла́вим ны́не, ве́рнии,/ па́стыря до́браго Михаи́ла,/ смире́нием укра́шеннаго,/ усе́рдне лю́дем послужи́вшаго/ и жизнь свою́ за Христа́ положи́вшаго,// ны́не же моля́щагося о спасе́нии душ на́ших.

И ны́не, предпра́зднства.

Тропа́рь, глас 4:

Богоуго́дному житию́ поревнова́в,/ му́ченическою кро́вию ве́рность Христу́ запечатле́л еси́,/ священному́чениче Михаи́ле,/ моли́ Всеблага́го Бо́га на́шего,/ да сохрани́т Це́рковь и зе́млю Ру́сскую/ от ересе́й, раско́лов, мяте́жа и бра́ни,/ укрепи́т нас в Правосла́вии и единомы́слии,/ возниспо́слет нам ми́лости Своя́// и спасе́т ду́ши на́ша.

На у́трени

По 1-м стихосло́вии седа́лен, глас 4:

Наставле́ния твоя́, Михаи́ле богому́дре, всех, послу́шающих тебе́, духо́вне напита́ша и словеса́ ева́нгельская, усты́ твои́ми прорече́нная, окамене́ние серде́ц людски́х сокруши́ша. Мы же мо́лим тя: помози́ нам крест свой неле́ностно носи́ти и ра́йскаго селе́ния дости́гнути.

Сла́ва, и ны́не, предпра́зднства.

По 2-м стихосло́вии седа́лен, глас 1:

Благода́тию Ду́ха Свята́го просвеща́емь, апо́стольским стопа́м после́довал еси́, Михаи́ле сла́вне, и мно́гия лю́ди во огра́ду Святы́я Це́ркве приве́л еси́, о́вцы ста́да Христо́ва соде́ловая.

Сла́ва, и ны́не, предпра́зднства.

Велича́ние:

Велича́ем тя,/ священному́чениче Михаи́ле,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный: Бог нам прибе́жище и си́ла:

По полиеле́и седа́лен, глас 2:

Любо́вь Христо́ву в се́рдце свое́м стяжа́в, ча́да твоя́ к Пастыренача́льнику приве́л еси́, о́тче наш Михаи́ле. Мы же, му́жеству твоему́ во страда́ниих дивя́щеся, усе́рдно взыва́ем: помози́ нам правосла́вную ве́ру свя́то храни́ти и, взе́мше крест свой, во след Христа́ ше́ствовати.

Сла́ва, и ны́не, предпра́зднства.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Священному́чениче о́тче Михаи́ле,/ пра́ведно яви́ся житие́ твое́ пред лице́м Бо́га Вы́шняго,/ па́стырския бо труды́ усе́рдно соверша́я/ и вся ско́рби тя́жкия му́жески терпя́,/ смерть от рук богобо́рных смире́нно прия́л еси́./ И ны́не у Престо́ла Влады́чня/ вку́пе с новому́ченики Це́ркве Ру́сския// мо́лишися о спасе́нии душ на́ших.

Кано́н священному́ченика, глас 3.

Песнь 1.

Ирмо́с: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,// Тому́ еди́ному пои́м, я́ко просла́вися.

Припе́в: Священному́чениче Михаи́ле, моли́ Бо́га о нас.

Боголюби́вою душе́ю твое́ю, свя́те Михаи́ле, ко Го́споду изде́тска прилепи́лся еси́, всем се́рдцем жела́я Тому́ послужи́ти и пе́ти Спа́су Христу́, я́ко просла́вися во ве́ки.

Зна́ния разли́чная улучи́ти жела́я, неле́ностне труди́лся еси́ и сла́ву Еди́ному Бо́гу воспева́л еси́: сла́вно бо просла́вися.

Храм души́ твоея́ в чистоте́ сохрани́в и мно́гия доброде́тели стяжа́в, священному́чениче Михаи́ле, апо́стольски ше́ствовал еси́ и ста́до Христо́во умно́жил еси́.

Богоро́дичен: Пресвята́я Де́во Чи́стая, ру́ку Свою́ ко гре́шным простри́, взыва́ющим Ти: спаси́ ны, Госпоже́ Ми́лостивая.

Песнь 3.

Ирмо́с: И́же от не су́щих вся Приведы́й,/ Сло́вом созида́емая,/ соверша́емая Ду́хом,/ Вседержи́телю Вы́шний,// в любви́ Твое́й утверди́ мене́.

Учи́тельство с по́двигом сочета́вый, па́стырь до́брый лю́дем земли́ Вя́тския яви́лся еси́, свя́те Михаи́ле, сло́вом и житие́м твои́м пасо́мыя наставля́яй.

Служе́ние в Це́ркви Бо́жией усе́рдно соверша́я, о еди́нем на потре́бу попече́ние ве́лие прилага́л еси́, благи́я ча́сти приобща́я ве́рных.

Храм Бо́жий созида́я, труды́ мно́гия ко благоустрое́нию того́ приложи́л еси́, и́же и по ны́не зри́ми суть.

Богоро́дичен: Ско́рбных утеше́ние и отча́янных спасе́ние, Ма́ти Христа́ Бо́га, к Тебе́ прибега́ем и мо́лим: исцели́ ду́ши на́ша, грехо́м омраче́нныя.

Седа́лен, глас 1:

Припаде́м к моли́твеннику на́шему, Михаи́лу сла́вному, и испро́сим по́мощи духо́вныя, да возмо́жем воспита́ти ча́да на́ша в ве́ре и благоче́стии, во е́же па́губныя ле́сти им избега́ти и всем се́рдцем ко Христу́ прилепля́тися.

Сла́ва, и ны́не, предпра́зднства.

Песнь 4.

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.

Попусти́ Госпо́дь испыта́ти тве́рдость ве́ры твоея́, егда́ супру́ги и чад твои́х ма́лых лиши́лся еси́. Оба́че, печа́ль твою́ на Бо́га возложи́в, в моли́тве Тому́ взыва́л еси́: сла́ва си́ле Твое́й, Го́споди.

Не то́кмо отце́м, но и ма́терию ча́дом твои́м по пло́ти был еси́, и́хже и возрасти́л еси́ во благоче́стии и чистоте́; сы́нове бо твои́ во архиере́йстве Бо́гу послужи́ша, дще́ри же лю́дем наста́вницы до́брыя яви́шася.

Пе́ние похва́льное благогове́йно прино́сим ти, свя́те Михаи́ле, Бо́га же, да́вшаго ти кре́пость, прославля́ем, взыва́юще: сла́ва си́ле Твое́й, Го́споди.

Богоро́дичен: Нескве́рная Отрокови́це, чистото́ю удиви́вшая А́нгелы и вся Небе́сныя Си́лы; о Тебе́, Богоизбра́нная, ра́дуются вси земноро́днии, я́ко сподо́бльшейся бы́ти Ма́ти Бо́жия.

Песнь 5.

Ирмо́с: На земли́ Неви́димый яви́лся еси́/ и челове́ком во́лею сожи́л еси́, Непостижи́мый,/ и к Тебе́ у́тренююще,// воспева́ем Тя, Человеколю́бче.

Очи́стив ум твой и боже́ственными по́мыслы озари́вся, священному́чениче Михаи́ле, я́ко па́стырь до́брый ду́шу твою́ за о́вцы полага́л еси́.

Милосе́рдный нрав име́я, стра́ждущим оте́ц до́брый был еси́, Михаи́ле сла́вне, ве́дый, я́ко ми́лостивии поми́ловани бу́дут.

Во вся́ком челове́це о́браз Бо́жий ви́дя, в темни́цах заключе́нныя посеща́л еси́, скорбя́щих утеша́я и к позна́нию во́ли Бо́жия наставля́я.

Богоро́дичен: Всяк неду́г врачу́еши и отча́янных от поги́бели спаса́еши, благодаре́ние на́ше приими́ и ско́ро на дела́ блага́я возста́ви, Цели́тельнице душ и теле́с на́ших.

Песнь 6.

Ирмо́с: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,// я́ко Петра́, мя, Упра́вителю, спаси́.

Па́ству, я́же во Орло́ве, вода́ми жи́зни ве́чныя напои́л еси́, богоно́се Михаи́ле, и, я́ко де́латель до́брый, в вертогра́де Христо́ве усе́рдно потруди́лся еси́.

Весть о Христе́ Воскре́сшем па́стве твое́й непреста́нно возвеща́л еси́, да вси печа́ль жите́йскую превозмо́гут и ра́дости Небе́сныя испо́лнятся.

О сла́ве Бо́жией усе́рдно ревну́я, досточу́дне Михаи́ле, в годи́ну гоне́ний любо́вию ко Го́споду пламене́л еси́, злове́рие нечести́вых му́жески посека́я.

Богоро́дичен: Уны́нием мя отягче́ннаго и по́мощи не иму́щаго от сро́дник свои́х, Де́во Влады́чице, не оста́ви, но возведи́ от тли живо́т мой.

Конда́к, глас 1:

Гра́ду Орло́ву па́стырь до́брый/ и Вя́тстей земли́ пе́рвый новому́ченик яви́лся еси́,/ священному́чениче Михаи́ле,/ Христу́ подража́я, за убива́ющих тя, моли́лся еси́,/ о проще́нии их хода́тайствуя./ И ны́не, Престо́лу Бо́жию предстоя́,/ моли́ о нас непреста́нно,// те́плый засту́пниче и ско́рый помо́щниче.

И́кос:

Кто возмо́жет исчи́слити мно́гия труды́ и боле́зни твоя́, я́же ра́ди любве́ к Бо́гу подъя́л еси́, священному́чениче Михаи́ле? Сего́ ра́ди восхваля́ем тя: Ра́дуйся, чад свои́х по пло́ти в за́поведех Бо́жиих ходи́ти научи́вый; ра́дуйся, сугу́бое попече́ние о ча́дех церко́вных приложи́вый. Ра́дуйся, кро́ткий и ми́лостивый нрав име́вый; ра́дуйся, в пра́веднем житии́ ста́рческих седи́н дости́гнувый. Ра́дуйся, по́двигом твои́м гони́тели удиви́вый; ра́дуйся, смире́нием высоту́ доброде́телей яви́вый. Ра́дуйся, о́тче Михаи́ле, те́плый наш хода́таю и ско́рый помо́щниче.

Песнь 7.

Ирмо́с: Я́коже дре́вле благочести́выя три о́троки/ ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших.

Скорбь и стена́ние о́крест ви́дя, се́рдцем твои́м уязви́лся еси́, о́тче Михаи́ле, те́мже и му́жественне преще́ние святи́теля Ти́хона на богоху́льники па́стве твое́й возвести́л еси́.

Богоотсту́пницы, я́рости испо́лненнии, заключе́нию тя преда́ша, ненави́дяху бо свет и́стиннаго богове́дения и не терпя́ху богоуго́днаго твоего́ жития́.

На суди́щи незако́ннем вси тя оправда́ша, о́тче Михаи́ле, оба́че судии́ гла́са людска́го послу́шати не восхоте́ша и преще́ние на тя возложи́ша.

Богоро́дичен: Скве́рных игра́лищем явля́юся и из ро́ва поги́бели вопию́ к Тебе́, Пресвята́я Влады́чице: воздви́гни мя из пучи́ны грехо́вныя.

Песнь 8.

Ирмо́с: Нестерпи́мому огню́ соедини́вшеся,/ богоче́стия предстоя́ще, ю́ноши,/ пла́менем же неврежде́ни, боже́ственную песнь поя́ху:/ благослови́те, вся дела́ Госпо́дня, Го́спода// и превозноси́те во вся ве́ки.

Безу́мнии богобо́рцы, лжесвиде́тельства обрести́ жела́юще, труды́ мно́гия прилага́ху, да погубя́т тя и сме́рти предаду́т. Ты же во смире́нии воспева́л еси́: благослови́те, вся дела́ Госпо́дня, Го́спода.

Пе́сни пасха́льныя воспева́я, я́ко а́гнец на заколе́ние ше́ствовал еси́ и, скорбя́щих о тебе́ утеша́я, взыва́л еси́: благослови́те, вся дела́ Госпо́дня, Го́спода.

Жене́, иду́щей по тебе́ и пла́чущей, рекл еси́: возьми́ ри́зу мою́ и ча́дом возвести́, да ева́нгельския за́поведи соблюда́ют и путе́м Христо́вым сле́дуют, Бо́га превознося́ще во вся ве́ки.

Богоро́дичен: По́мощь всех еси́, Всенепоро́чная, и́же ве́рою и любо́вию песносло́вят Боже́ственное Твое́ Рождество́, И́мже возсия́ с Небесе́ свет Боже́ственнаго ра́зума.

Песнь 9.

Ирмо́с: Но́вое чу́до и боголе́пное:/ Деви́ческую бо дверь затворе́нную/ я́ве прохо́дит Госпо́дь,/ наг во вхо́де,/ и плотоно́сец яви́ся во исхо́де Бог,/ и пребыва́ет Дверь затворе́на;/ Сию́ неизрече́нно// я́ко Богома́терь велича́ем.

На убие́ние влеко́мый, после́днее наставле́ние ча́дом твои́м посла́л еси́, да неле́ностно за́поведи ева́нгельския исполня́ют.

Доше́дшу ти до ме́ста сме́рти твоея́, Михаи́ле священному́чениче, благослови́л еси́ хра́мину, иде́же немощны́я и боля́щия твои́ми труды́ благоустро́ил еси́, о проще́нии мучи́телей Го́споду моля́ся.

Егда́ Собо́р церко́вный, и́же во гра́де Москве́, о убие́нии твое́м извеще́н бысть, тогда́ Ти́хон, Первосвяти́тель Це́ркве Ру́сския, сы́на твоего́, епи́скопа Влади́мира, рыда́юща сле́зне, ми́лостивно утеша́ше.

Богоро́дичен: Ра́дуйся, Хода́таице спасе́ния челове́ком и заступле́ние; ра́дуйся, красото́ Це́ркве и благоле́пие; ра́дуйся, держа́во и сла́во ве́рных. Те́мже Тя неизрече́нно, я́ко Богома́терь, велича́ем.

Свети́лен:

Оте́ц сиро́т и вдов защи́тник, бога́тство ни́щих и боля́щих утеше́ние, ю́ных просвеще́ние и жезл ста́рости еси́, о́тче Михаи́ле, те́плый наш моли́твенниче и неуста́нный пред Бо́гом хода́таю. Моли́ Ми́лостиваго Бо́га, да просвети́т ду́ши на́ша све́том Своея́ благода́ти.

Сла́ва, и ны́не, предпра́зднства.

На хвали́тех стихи́ры, глас 6:

Ди́вно и пречу́дно бысть твое́ служе́ние,/ священному́чениче Михаи́ле,/ непреста́нно бо слу́жбы соверша́я,/ ми́лость Бо́жию на лю́ди привлека́л еси́/ и, сло́вом и житие́м па́ству свою́ наставля́я,/ де́ло Бо́жие во смире́нии соверши́л еси́,/ те́мже и вене́ц му́ченический улучи́л еси́,// Подвигополо́жника спасе́ния на́шего прославля́я.

Се́рдце твое́ в ми́ре сем ско́рбно бысть,/ ты бо, источа́я сле́зы и Бо́гу моля́ся,/ жития́ ми́рнаго непреста́нно проси́л еси́,/ его́же страда́нии твои́ми во oби́телех Небе́сных улучи́л еси́,/ иде́же Госпо́дь вся́ку слезу́ от оче́й твои́х отъя́т// и ра́дость Небе́сную тебе́ дарова́.

Не можа́ху безу́мнии богобо́рцы/ зре́ти твоего́ смире́ния, о́тче Михаи́ле,/ и, ру́ки своя́ просте́рше,/ лю́тей сме́рти тя преда́ша,/ оба́че любо́вь Небе́сную уби́ти не возмого́ша,/ я́ко пребыва́ет во ве́ки,// е́юже ве́рнии спаса́ются.

Сла́ва, глас 8:

По страда́льчестей кончи́не твое́й/ мно́зи, ско́рбию объя́ти, о сиротстве́ свое́м,/ воспла́каша и возрыда́ша,/ утеше́ния ча́юще,/ его́же и обрето́ша в прославле́нии твое́м,// священному́чениче прехва́льне Михаи́ле.

И ны́не, предпра́зднства.

На Литурги́и

Блаже́нны от кано́на предпра́зднства, Песнь 3-я, и свята́го, Песнь 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Свяще́нницы Твои́ облеку́тся в пра́вду, и преподо́бнии Твои́ возра́дуются. Апо́стол ко Евре́ем, зача́ло 334. Аллилу́ия, глас 4: Мно́ги ско́рби пра́ведным, и от всех их изба́вит я́ Госпо́дь. Стих: Воззва́ша пра́веднии, и Госпо́дь услы́ша их. Ева́нгелие от Луки́, зача́ло 67. Прича́стен: В па́мять ве́чную бу́дет пра́ведник:

Моли́тва

О, избра́нниче и уго́дниче Христо́в, священному́чениче Михаи́ле, Це́ркве Ру́сския сто́лпе непоколеби́мый, земли́ Вя́тския благо́е прозябе́ние, сро́дников твои́х предста́телю и наста́вниче! Ты, от ю́ности во благоче́стии подвиза́яся, добр плод в терпе́нии прине́сл еси́. Егда́ же призва́ тя Госпо́дь на служе́ние па́стырское, тогда́ до́брый де́латель вертогра́да Бо́жия яви́лся еси́ и, ча́да своя́ в ве́ре и доброде́лании наставля́я, мно́гия же ду́ши во огра́ду церко́вную возвраща́я, о всех лю́дех те́плыя моли́твы возноси́л еси́. Во вре́мя же гоне́ния безбо́жнаго во смире́нии смерть кро́тко прия́л еси́, за уби́йц твои́х моля́ся, и в пе́рвых новому́ченицех земли́ Вя́тския просия́л еси́. Ны́не у́бо при́зри на на́с, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Бу́ди па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник. О, свя́тче Бо́жий! Умоли́ Го́спода Бо́га, да соблюда́ется в ве́ре правосла́вней Оте́чество на́ше и в нем досто́йно и пра́ведно прославля́ется и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 14 мая 2018 года (журнал № 37)

Месяца сентября в 7-й день

Святых преподобномученик Александра Пересвета и Андрея Осляби Радонежских

На вечерни

На Господи, воззвах: стихиры, глас 6:

Дивная чада послушания,/ преподобномученицы Александре и Андрее,/ по заповеди Христовой взясте кресты своя/ и, ужаса смертнаго не убоявшеся,/ души своя за други положисте./ Темже помозите и нам кресты своя безропотне носити,/ да, претерпевше до конца скорби временныя,/ обрящем милость у Христа Спаса нашего.

О, святии сродницы наши,/ преподобномученицы Александре и Андрее,/ с верою и любовию к вам прибегаем,/ немощны бо молитвы наша/ и дел благих не имамы./ Темже будите о нас ходатаи пред Богом,/ да, претерпевше до конца скорби временныя,/ обрящем милость у Христа Спаса нашего.

Како достойно возможем восхвалити подвиги ваша,/ воини Царя Небеснаго, Александре и Андрее Радонежстии?/ Вы бо, вознерадивше о временнем/ и помышляюще о хотящей открытися славе Божией,/ Бога в кончине своей прослависте/ и мученическия венцы от Него восприясте./ Темже будите о нас ходатаи пред Богом,/ да, претерпевше до конца скорби временныя,/ обрящем милость у Христа Спаса нашего.

Образ ангельский от преподобнаго Сергия восприемше,/ волю свою отвергли есте,/ преподобномученицы Александре и Андрее./ Добродетелию же смирения, яко бронею, облекшеся,/ враги невидимыя и видимыя победили есте/ и верныя непоколебимо стояти за веру Православную научили есте./ Темже будите о нас ходатаи пред Богом,/ да, претерпевше до конца скорби временныя,/ обрящем милость у Христа Спаса нашего.

Слава, глас 8:

Двоице священная,/ Александре и Андрее преславнии,/ вы, в невидимей брани победителие явльшеся,/ брань противу нечестивых агарян сотворили есте,/ благословением бо аввы Сергия,/ благодать Божия, на вас почившая,/ образ всем воином православным вас показа/ и яви заступники христолюбиваго воинства./ Темже молите Святую Троицу/ умирити мир и спасти души наша.

И ныне, Предпразднства или Богородичен.

Вход. Прокимен дне. И чтения 3 мученическая.

На литии стихиры, глас 4:

Преподобнаго Сергия кротцыи послушницы/ и благовернаго князя Димитрия ратнии сподвижницы,/ преподобномученицы Александре и Андрее,/ вы, на брань противу агарян устремившеся,/ на поли Куликове венцы мученическия прияли есте./ Молитеся о душах наших.

Идольския прелести победители/ и веры Православныя поборники,/ церковныя столпы крепкия/ и воистину адаманты твердыя,/ Христовы верныя оружники/ в духовных песнех верою да почтим,/ схимонахов воинов/ Александра Пересвета и Андрея Ослябю.

Подвиги вашими ратными/ Христа истиннаго Бога исповедасте,/ пред тмочисленными агарянскими и варварскими полчищи,/ преподобномученицы Александре и Андрее,/ и тем славу вечную на Небесех наследовасте.

Слава, глас тойже:

Щитом Православныя веры оболкшеся/ и знамением Крестным укрепльшеся,/ мукам со упованием на Господа Бога вдашася/ и диаволю гордыню упраздниша/ святии Твои преподобномученицы Александр и Андрей./ Тех молитвами, Всесильный Боже,/ мир Отечеству нашему низпосли/ и душам нашим велию и богатую милость.

И ныне, Богородичен:

Богородице, всех Царице,/ православных похвало,/ еретичествующих шатания разори/ и лица их посрами,/ не славящих, ниже чтущих, Пречистая,/ честный Твой образ.

На стиховне стихиры, глас 6:

Преподобнаго аввы Сергия ученицы славнии,/ Александре Пересвете дивный и Андрее Ослябе прехвальный,/ вы в земнем житии велию любовь к Богу показасте/ и души на поли брани за други своя положисте./ Молите Владыку Всеблагаго/ Отечеству нашему в мире пребывати/ и вере Православней в нем утверждатися.

Стих: Честна пред Господем/ смерть преподобных Его.

Суетное житие отринувше/ и в покаянии пребывати возжелавше,/ во обитель Сергия преподобнаго водворилися есте,/ воини Христови и преподобномученицы храбрии,/ воли же наставника повинующеся/ и молитвою того укрепляеми,/ в руце ваша оружие ратное взясте/ и русским воином образ мужества бысте./ Помозите убо и нам послушанием в смирение облещися/ и враги невидимыя сокрушити.

Стих: Блажен муж, бояйся Господа,/ в заповедех Его восхощет зело.

Преподобномученицы Александре и Андрее,/ святии схимницы и ратницы непобедимии,/ воинов православных похвало/ и всех верных укрепление,/ Отечества нашего славо/ и Церкве Русския украшение,/ столпи крепцыи благочестия/ и веры Христовы адаманти твердии./ Молитеся ко Святей Троице/ стране нашей в мире пребывати/ и душам нашим спастися.

Слава, глас тойже:

Благословенни есте, преподобномученицы Александре и Андрее,/ аще бо и земнородни бысте,/ но ангельскаго достоинства потщастеся достигнути/ и, о телесех нерадевше,/ страдании своими безплотных чести сподобистеся./ Тех молитвами, Христе Боже,/ низпосли нам велию милость.

И ныне, Предпразднства или Богородичен.

Тропарь, глас 1:

Воини христолюбивии/ и страдальцы прехвальнии,/ дивный Александре Пересвете/ и Андрее Ослябя именуемый,/ Сергия преподобнаго усерднии послушницы/ и брани Куликовския ратницы духовнии,/ силу вражию посрамившии/ и души своя за други положившии./ Молите Христа Бога/ мир Отечеству нашему даровати/ и душам нашим велию милость.

На утрени

На Бог Господь: тропарь предпразднства дважды.

Слава, святых. И ныне, предпразднства.

По 1-м стихословии седален, глас 4:

Подобен: Вознесыйся:

Приидите днесь, вернии, память преподобномученик Александра и Андрея песньми почтим, тии бо подвиги своими собор преподобных отцев земли Радонежския дивно украшают и молятся Пресвятей Троице о спасении душ наших.

Слава, и ныне, Предпразднства или Богородичен:

Суровство лукавых враг и коварства, яже приносимая на нас, низложи, Всенепорочная, и облецы ны крепостию Твоею, невредимы, целы и непоколебимы нас присно соблюдающи, светло Тя воспевающих.

По 2-м стихословии седален, глас 8.

Подобен: Премудрости:

Крестом и молитвою крепкою преподобномученицы Александр и Андрей вооружившеся, в подвизе ратнем нечестивых врагов на поли Куликовом победиша и, яко светила пресветлая, во Отечестве нашем возсияша. ихже мольбами, Христе Боже, спаси души наша.

Слава, и ныне, Предпразднства или Богородичен:

Пречистая Всенепорочная и Неискусомужная Мати Дево, Яже Едина Безлетнаго Сына и Слова Божия в лето рождшая. Того со святыми преподобномученики Александром и Андреем моли, даровати нам очищение грехов и велию милость.

Величание:

Ублажаем вас,/ святии преподобномученицы Александре и Андрее,/ и чтим святую память вашу,/ воинов христолюбивых наставницы/ и ангелов собеседницы.

Ино величание:

Ублажаем вас,/ преподобномученицы Александре и Андрее,/ и чтим святую память вашу,/ наставницы монахов/ и собеседницы ангелов.

Псалом избранный: Терпя, потерпех Господа:

По полиелеи седален, глас 8.

Подобен: Премудрости:

Кто не подивится подвигу доброму преподобномученик Александра и Андрея? Тии бо, во плоти суще, врага безплотнаго победиша и, Крестом вооружившеся, Троицу Святую исповедаша и врагов нечестивых победителие достойни явишася. Ныне же, Престолу Божию предстояще, молятся о спасении душ наших.

Слава, и ныне, Богородичен:

Образы рождества Твоего, Всенепорочная, пророцы проповедаша, друзии же инако Тебе преславная нарицания слагаху: Живот бо во аде сущым родила еси, державу смерти разрушивый.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 36.

По 50-м псалме стихира, глас 6:

Яко оружие крепкое,/ Крест Христов восприимше,/ святии преподобномученицы Александре и Андрее,/ ко ополчению врагов видимых и невидимых изыдосте/ и, тех мужественне победивше,/ нетленными венцы увенчастеся/ и славу вышнюю получисте./ Темже верою вас ублажаем.

Канон, глас 4.

Песнь 1.

Ирмос: Моря чермную пучину,/ невлажными стопами,/ древний пешешествовав Израиль,/ крестообразныма Моисеовыма рукама,/ Амаликову силу в пустыни победил есть.

Припев: Святии преподобномученицы Александре и Андрее, молите Бога о нас.

Крепцыи столпи и забрала благочестия явистеся, славнии преподобномученицы Александре и Андрее. Тех молитвами, Христе Боже, ущедри всех нас.

О, всехвальнии Господни преподобномученицы Александре и Андрее, ни беда, ни меч, ниже самая смерть возмогоша разлучити вас от Христа, егоже всем сердцем возлюбили есте.

Честна пред Господем смерть ваша бысть, святии преподобномученицы Александре и Андрее, юже за други своя прияли есте и безчестнаго врага посрамили есте.

Богородичен: Имущи, Мати Чистая, дерзновение ко Христу Богу, моли присно от врагов видимых и невидимых и всякаго вреда избавитися нам и благодарно славити Его, Пренепорочная, утверди.

Песнь 3.

Ирмос: Не мудростию и силою, и богатством хвалимся,/ но Тобою, Отчею ипостасною мудростию, Христе,/ несть бо свят, паче Тебе, Человеколюбче.

Смертию временною жизнь вечную приобретше, преподобномученицы Александре и Андрее славнии, Царствия Небеснаго сподобистеся. Сего ради прославляем вас и ублажаем.

Православия защитницы, неверных посрамителие, благочестия столпи, Господни преподобномученицы Александре и Андрее, мыслию чистою песненно вас ублажаем.

Христови воини, схимницы Александре и Андрее, безплотных сожителие, вы Крестом, яко бронею, оболкшеся, на сопротивоборца ополчистеся и того мужески попрасте.

Богородичен: Покрове и Избавление наше, Стено и Державо благохвалящих Тя, Многопетая, изми нас скорбей всяческих и обстояний житейских, выну соблюдающи, яко да славим Тя.

Седален, глас 4:

В Небесныя обители всельшеся, преподобномученицы Александре и Андрее, славу присносущную прияли есте, и ныне поминайте нас, чтущих верою священную и честную вашу память, схимонаси воини приснославнии.

Слава, и ныне, Предпразднства или Богородичен:

Всесвятая Дево, Владычице, туне ущедри ны, не имамы бо иныя надежды на спасение, аще не Твое заступление и покров Твой.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине Своем,/ достойно взывающи:/ слава силе Твоей, Господи.

О, святии преподобномученицы Александре и Андрее, вы, души своя за други положити восхотевше, кровь пролияли есте и радость Небесную восприяли есте.

Воистину добра ваша купля, святии преподобномученицы Александре и Андрее, тленная бо презревше, нетленная восприясте, ныне же, со ангелы ликовствующе, воспеваете Троицу Единосущную.

Яко доблии воини единомудренно веровавше, смерти не убоялися есте, святии, и, скончавше течение, с Небесе победу прияли есте.

Богородичен: Души тайная прегрешения лечбою милосердия исцели, Пресвятая Богородице, и утиши плотское стремление, врагов ухищрения посрамляющи.

Песнь 5.

Ирмос: Ты, Господи мой, Свет/ в мир пришел еси,/ Свет Святый, обращаяй из мрачна неведения,/ верою воспевающия Тя.

Щитом веры и благочестия вооружившеся, божественнии преподобномученицы, устремистеся ко брани и суетную силу врага погубисте, песнь победную Христу поюще.

Повержен бысть льстец при ногах нельстивых преподобномученик, воинов Христовых, тии же ныне со ангелы ликовствуют, радости неизреченныя исполняющеся.

Оружие крепчайшее, святый Крест, вземше, преподобномученицы Александре и Андрее, всю силу губителя врага до конца победили есте.

Богородичен: Многия щедроты Твоя спасают нас, Пречистая Дево, от грехов и напастей различных. Ты бо, рождшая Бога, спасаеши мир весь.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися,/ ради милости от ребр Твоих/ истекшею Кровию.

Благословением и молитвою аввы Сергия ограждени, непобедимии оружницы, схимонаси воини, доблественно на супостаты вооружистеся, лестная и лукавая тех разоривше.

Силою божественною немощное ваше укрепльше, доблии преподобномученицы Александре и Андрее, крепость борца всеконечней пагубе предасте.

Яко смиреннии послушницы, добротворному и красному подвигу сочетавшеся, дерзновение пред Богом улучисте о воинстве православнем присно ходатайствовати.

Богородичен: Ты, Пречистая Дево Богородице, силою Креста Сына Твоего и молитвами Твоими вооружаеши рабы Твоя. Темже воспеваем славу Твою.

Кондак, глас 7:

На поли Куликове враги нечестивыя победисте/ и венцы славы увенчастеся,/ преподобномученицы Александре и Андрее,/ молите Христа Бога/ и нам врага рода человеческаго побеждати,/ Православие хранити,/ душам же нашим улучити велию милость.

Икос:

Преподобномученик Христовых Александра и Андрея, приидите, людие вси, почтим пеньми и песньми духовными, светильники мира и веры проповедники, источники исцелений приснотекущия, из нихже вернии благодатныя дары почерпают. Тех молитвами, Христе Боже, мир даруй Отечеству нашему и душам нашим велию милость.

Песнь 7.

Ирмос: В пещи Авраамстии отроцы Персидстей,/ любовию благочестия паче,/ нежели пламенем опаляеми, взываху:/ благословен еси в храме славы Твоея, Господи.

Молитвами преподобнаго Сергия крепцыи воини на враги явльшеся, некрепостную их низложисте силу, преподобномученицы Христови достохвальнии.

Сласти мира сего отринувше, послушанием на страдание доблественне устремилися есте и, кровь свою за други пролиявше, Христу усвоилися есте.

Твердыми вашими воинскими подвиги, яко жилами крепкими, свирепство неверных агарян удависте, хотящих Отечество наше злоковарно погубити. Темже и райския жизни явистеся наследницы.

Богородичен: Умири мир, Христе, мольбами Богоотроковицы Чистыя, бурю греховную низлагая, и тишину неизглаголанную в сердца наша низпосли.

Песнь 8.

Ирмос: Руце распростер Даниил,/ львов зияния в рове затче,/ огненную же силу угасиша,/ добродетелию препоясавшеся,/ благочестия рачители отроцы, взывающе:/ благословите, вся дела Господня, Господа.

Друзи Христови, игумена Сергия послушницы, теплии человеком заступницы и воином православным помощницы, преподобномученицы Александр и Андрей достойно ныне ублажаются.

От кровей своих преподобномученицы Александр и Андрей пресветлую очервлениша схиму и, тою украсившеся, с Господем присно царствуют.

Ополчившеся на сопротивных, святии преподобномученицы божественными оружии сих победиша и венцы победныя от Бога прияша.

Богородичен: Богородительнице Пречистая, Заступнице Усердная, святым образом Твоим укрепила еси православныя в смертней брани на поли Куликове, землю нашу от врагов спасающи.

Песнь 9.

Ирмос: Камень Нерукосечный,/ от Несекомыя Горы Тебе, Дево,/ Краеугольный отсечеся, Христос,/ совокупивый разстоящаяся естества./ Тем, веселящеся, Тя, Богородице, величаем.

В мире православнем почитаема имена ваша, страдальцы доблии, за други бо своя смерть прияли есте. Темже священницы вам поклоняются, воини восхваляют и вси людие, радующеся, согласно вопиют: честна пред Господем смерть преподобных Его.

Крепцы на страсти, сильни на враги явистеся, преподобномученицы, схимонаси воини прехвальнии, законно бо пострадавше, венцами нетленными от Бога венчастеся.

Крест Христов, яко Оружие непобедимое, вземше, силу диаволю упразднили есте и, венцы Небесныя приемше, предстателие крепцыи нам явилися есте.

Богородичен: Погуби наветы вражия, яже на ны воздвизаемыя, и радости исполни уповающих на Тя, Мати Бога Вышняго, да вси усердно заступление Твое славим.

Светилен.

Подобен: Духом во святилищи:

Вооружившеся во всеоружие добродетелей Христовых, светильницы миру явистеся и, ополчения вражия низложивше, венцы нетленныя приясте, преподобномученицы Христови Александре и Андрее, терпеливодушнии.

Слава, и ныне, Богородичен:

Низложи Владычице, врагов наших шатания, Тя бо едину имамы Предстательницу, и Надежду и Помощь крепкую. Ты нас соблюди, Пречистая, всякаго навета вражия нас избавляющи.

На хвалитех стихиры, глас 4.

Подобен: Яко добля:

Честна смерть святых Твоих, Господи,/ преподобномученик Александра и Андрея,/ упование бо твердо имуще,/ по заповеди Твоей кровь за други своя пролияша/ и полки сопротивных на поли Куликове вспять обратиша./ Сего ради венцы нетленныя прияша/ и молятся о душах наших.

Приидите, православнии людие,/ святых преподобномученик Александра и Андрея/ всечестную память днесь почтим,/ иже, брони воинския схимою покрывше,/ на поли брани силу Божию явиша./ Темже, венцы победныя от Христа Бога приемше,/ молятся присно о душах наших.

Яко неугасимая светила во Отечестве нашем,/ по смерти славней сияете,/ преподобномученицы Александре и Андрее,/ подвигом бо добрым подвигшеся,/ послушание аввы Сергия исполнисте/ и воинство православное мужественне на брань укреписте./ Темже, дерзновение ко Христу Богу имуще,/ молите помиловатися душам нашим.

Слава, глас 2:

О, преславнии мученицы,/ досточуднии Пересвете и Ослябе!/ Вы врага непобедимаго,/ силою своею гордо хвалящася,/ в день Рождества Пресвятыя Богородицы/ яко немощна сотвористе/ и кровь по заповеди Господней/ за други своя пролиясте./ Темже молите о любовию вас прославляющих.

И ныне, предпразднства: Пронареченная всех Царица:

На Литургии

Блаженны от канона, песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99. Евангелие от Матфеа, зачало 36. Причастен: В память вечную будет праведник:

Молитва

О, святии славнии воини Христови, истинныя веры поборницы Александре и Андрее! Услышите ныне и на всякий час моление нас, почитающих святую память вашу, и к вашим честным гробом припадающих. Вы, истиннии воини Христови, под кровом Троицы Живоначальныя аввою Сергием водимии, полки лукавых духов в монашеских подвизех победили есте и до конца заповедь Христову, яко несть большия любве, да кто душу свою положит за други своя, исполнили есте и, благословению преподобнаго Сергия последующе, иноческия шлемы спасения венцы мученическими украсили есте. Храбри во брани со враги Отечества и веры Православныя явльшеся, образ мужества воином благовернаго князя Димитрия подали есте и ныне ополчающихся на нас молитвами вашими низлагаете.

О, преславнии страстотерпцы Христови! Не презрите моления нашего и явите нам, смиренным и грешным, святое и многомощное ваше заступление, помозите нам, в бедах, скорбех и печалех сущим, и от всякия напасти сохраните. Воззрите на первопрестольный град, в немже телесы вашими почиваете, и на люди верныя, ко гробом вашим припадающия, прострите своя десницы, защищающе нас от враг видимых и невидимых, избавите Отечество наше от всякаго губительства, огня и междоусобныя брани. Укрепите данною вам благодатию воинство наше, разрушите силы врагов, возстающих на ны, и да уведят, яко присно Божественною помощию сохраняеми есмы, сице глаголющии: Господи, Иисусе Христе, молитвами святых воинов-иноков, изряднее же предстательством Пречистыя Твоея Матере, рождшия Тя, Владычицы нашея Богородицы, спаси ны, грешныя рабы Твоя, да всегда прославляем Тя со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков. Аминь.

Источник: Текст службы утвержден решением Священного Синода от 28 декабря 2018 г. (журнал № 126)

На велицей вечерни

На Господи воззвах: стихиры воскресны – на 4 и святым – на 6. Гл. 3.

Аще беззакония назриши, Господи, Господи, кто постоит, // яко у тебе очищение есть.

Да радуется днесь Церковь Православная Казахстанския страны, / Пустынная Невеста Агнца Божия, / и да красуется светло собор святых Ея / Духа Святаго нетленною красотою. / Стецемся, вернии, узрим землю иже бе неплодна иногда, / како ныне цветы райския прозябла есть, // новомученицы и исповедницы преславныя.

Имене ради Твоего потерпех Тя, Господи, потерпе душа моя в слово Твое, // упова душа моя на Господа.

Во иерарсех светила три великая / от словес учительных веру составиша древле. / Вы же, святителие, градовом Российским Ангели, / в пределы Казахстанския апостольски притекше, веру проповедали есте, / алчуще, труждающеся, яко немощнии вменилися и безчестнии, / да крепко и славно явится стадо новособранное. / И ныне слышим глас ваш тепле взывающий: / О чада, стойте и держите предания, // печать бо апостольства нашего вы есте о Господе.

От стражи утренния до нощи, от стражи утренния // да уповает Израиль на Господа.

Дивны подвизи ваши, отцы преподобнии, / ихже ради исполнилися есте Духа, якоже древнии. / Тии бо безмолвным житием яко гласом проповедания / собраша инок множества во грады обительныя. / Вы же всякому злостраданию навыкше послушания ради, / в землю сию страдания вселилися / и яко звезды возсияли есте в нощи неведения блуждающим, / Христовы ученики я сотворяюще силою Христовою. // С ними же ныне вас ублажаем.

Ины стихиры, гл. 8:

Яко у Господа милость и многое у Него избавление // и Той избавит Израиля от всех беззаконий его.

Отца сирых и Заступника вдовиц служители / за любовь яже ко Христу многия скорби прияша: / овии от престола яты быша и заклани яко агнцы, / овии в заточениих и горьких работах изнемогоша. / Сего ради глас Господень услышаша призывающий: / Приидите, благословеннии, / внидите в Небесное Мое Царство: / взалках бо и дасте Ми ясти, / странен бых и введосте Мя, болен бых и посетисте Мене, / еще же и души за овцы Моя положисте, / любве Моей подражающе, // темже приимите правды венец неувядаемый.

Хвалите Господа вси язы́цы, // похвалите Его вси людие.

О, жены святыя, богоизбранныя, / мироносицам вы уподобилися есте воистинну, / овевающа землю нашу миром веры и чистоты. / В терпении вашем не токмо души ваша стяжали, / но и страждущих укрепили есте убо надеждею, / призывающа я с собою молитвы творити на всяк день. / Мучителем же претящим рекли есте: / Судите, аще достоит вас послушати паче нежели Бога, / сотворшаго вселенную и украсившаго небо звездами, / и смерть поправшего и спасшаго люди, // молитвою непрестанною тепле Того взыскующия.

Яко утвердися милость Его на нас, // и истина Господня пребывает во век.

Радуйтеся, страстотерпцы безчисленнии, / святи бо грады и веси, имущии мощи святыя ваша, / изочтена же суть на небесех вся страдания ваша. / Аще и гладом истаеваеми бысте, / но яко пшеницу собра вас в житницу Свою Господь, / аще не имели есте чим жажду утолити, / ныне пустынную страну нашу благодатию напояете, / аще и мраз лютый претерпели, ныне хладныя души согреваете, / аще на всяк день зрели есте страшное таинство смертное, / ныне со Ангелы славите Троицу Единосущную, // Животворящую и Освящающую концы.

Слава, гл. 1:

Что ти есть имя, дивная страно Российская: / сад ли, прозябший от Божественнаго корене, / даров ли Божественных приятелище, / правдолюбцев ли сонм живый, присно побеждающий? / Да постыдятся врази твои, хотящии до конца погубити тя, / востанеши бо паки, лик духовный являя мирови, / и совозставиши с собою грады и страны, / в нихже почитаются священнии твои страдальцы. / Сего ради да ликует ныне земля Казахстанская // и собор святых своих да празднует согласно.

И ныне: Догматик

И чтения три:

Пророчества Исаиина чтение (гл. 43)

Премудрости Соломоновы чтение (гл. 3)

К Римляном послания святого апостола Павла чтение (8, 28–39)

На литии

Глас 4, подобен “Дал еси знамение”

Кое благодарение Тебе, Христе, принесем, / землю Казахстанскую святу соделавшему, / сердца же верных Твоих страдальцев / любви Твоей тайнонаучившему? / Сего ради ныне градовом и весем страны нашея / зело честни предстатели явишася друзи Твои, / ихже память ныне прославляюще, / молим Тя, Человеколюбче, / не лиши нас в будущем веце зрения лица их, // но направи пути наша в покаяния пристанище.

На стиховне:

Стихиры воскресны

Слава, глас 3:

Днесь светом воскресения страна наша озаряется, / мощи бо ваша, о мученицы, проповедуют сие. / Вы бо во гробех лежаще злобный мрак прогоняете, / и благодатию Христовою болезни душ и телес наших врачуете. / Молим вас, земли Казахстанския покровителие, / в молитвах чад своих не забудите, // но воскресите душ наших божественное подобие.

И ныне: Богородичен воскресный по гласу Славы.

Тропарь, глас 7:

Небо церковное ныне отверзается, / веселия исполняется Церковь Православная земли Казахстанския, / и яко ангельский лик собору верных предходит / пресветлое воинство мучеников и исповедников ея. / ихже ради страдания, Христе Боже, / крепость благоутробнаго милосердия яви земли нашей. / Церковь же в пустыни Тобою насажденную / молитвами Богородицы и всех святых // избави от бед и утверди вовеки.

На утрени

По 1-м стихословии седален, глас 2:

Како воспоем песнь Господню на земли чуждей? / взываху изгнаннии правды ради Христовы страдальцы. / Ныне же к лику святых земли сея причтеннии // песнь радования и веселия Богови воспевают.

Слава и ныне:

Божественнаго естества общницы быхом / Тобою, Богородице Приснодево: / Бога бо нам воплотившагося родила еси. // Темже по долгу Тя вси благочестно величаем.

По 2-м стихословии седален, глас 8:

Даждь нам слово во отверзение уст наших, Преблагий Иисусе, / ибо угодники Твоя воспети дерзаем, / земли Казахстанския покровители и заступники наша. / Вемы яко подобное точию подобным познавается, / но вемы и сие, яко приемый праведника во имя праведниче и мзду того приемлет. / Темже, Всещедрый Боже, смирение нам подаждь, // да общницы будем благодати святых Твоих.

Слава и ныне:

Небесную дверь и кивот, / пресвятую гору, светлый облак воспоим, / неопалимую купину, словесный рай, Евы воззвание, / вселенныя всея великое сокровище: / яко спасение в Ней соделася мира, и оставление древних согрешений. / Сего ради вопием Ей: молися Сыну Твоему, прегрешений оставление даровати, // благочестно покланяющимся Всесвятому Рождеству Твоему.

Величание:

Величаем вас, / святии новомученицы и исповедницы в земли Казахстанстей просиявшии, / и чтим святую память вашу, / вы бо молите за нас // Христа Бога нашего.

Седален по полиелеи, глас 5, подобен: Радуйся:

Приидите, святии сродницы наши, к нам / и услышите молитву чад ваших духовных, / с верою и любовию к вам притекающих / и вашея помощи и заступления просящих. / Вы бо в годину гонения лютаго / от безбожных за веру Христову пострадали есте, / яко злато в горниле искушени бывше, / темже и возмогли есте искушаемым отчаянием лютым помощи. / И ныне испросите нам любодружное благое единство, // да уведят людие, яко ученицы есмы Господни.

Слава и ныне:

Теплая Предстательнице и непобедимая, / Упование известное и непостыдное, / Стено и Покрове и Пристанище прибегающим к Тебе, / Приснодево чистая, / Сына Твоего и Бога моли со ангелы // мир дати миру, и спасение, и велию милость.

Прокимен воскресный по гласу.

Канон, глас 2:

Песнь 1.

Ирмос: Грядите, людие, / поим песнь Христу Богу, / раздельшему море и наставльшему люди, / яже изведе из работы египетския, // яко прославися.

Святии новомученицы и исповедницы земли Казахстанския, молите Бога о нас.

Грядите, вернии, / бездну страдания именем Христовым прошедшия ныне ублажим, / святителей дивный лик, священников сонм пресветлый, иноков славное воинство, / праведных мужей и жен, старцев же и младенцев тьмочисленное множество, // имиже Троица Святая в земли нашей славно прославися.

Святии новомученицы и исповедницы земли Казахстанския, молите Бога о нас.

Твоя слезныя молитвы, о святителю Пимене, / угасиша иногда огнь брани братоубийственныя, / но яко первостоятель святых наших молися Господеви / с Верненскими первомученики, со Евдокиею же, чистою голубицею, // да не возстанет брат на брата никогдаже в земли нашей.

Святии новомученицы и исповедницы земли Казахстанския, молите Бога о нас.

Радуйся, священномучениче Владимире, Лепсинская похвало, / ты бо мужески на подвиг укрепил еси иже в Семиречии за веру пострадавшия, / с нимиже прежде лета многа Богу и народу Божию благочестно послужил еси. / И ныне купно со иереи Виссарионом, Георгием и Михаилом Христу во славе предстоя, // молися благая и полезная прошения исполнити всем к раце мощей твоих притекающим.

Святии новомученицы и исповедницы земли Казахстанския, молите Бога о нас.

Иоанна, пресвитера Талгарскаго глас ныне да услышится: / Не отрекайтеся от Бога! / С нимже диакона Константина подвиг любве да воспоется, / положшаго душу свою за пастыря своего, // мы же на кончину их взирающе вере славных мученик подражати да научимся.

Святии новомученицы и исповедницы земли Казахстанския, молите Бога о нас.

Делы изрядными во спасение чад духовных удивили ангелов, / и милость Божию чудотворную пламенною молитвою испросили есте, / Евстафие, града Иссыка похвало, и Василие, Джаркентское украшение, // ныне любовию отеческою нас от вечныя смерти спасайте.

Слава и ныне:

Не лиши нас благодатнаго Твоего заступления, / Дево Мати, Богородице Пречистая, / имамы бо на сие молитвенники неусыпныя, / иже любве ради Сына Твоего // мучения за Имя Того сподобишася прияти.

Песнь 3.

Ирмос: Процвела есть пустыня яко крин, Господи, / языческая неплодящая церковь / пришествием Твоим, // в нейже утвердися мое сердце.

Святии новомученицы и исповедницы земли Казахстанския, молите Бога о нас.

Смирения Христова и ревности о славе Дому Божия исполнен сый, / никоейже от овец заблуждших возгнушался еси, архипастырю Мефодие, / никогоже от волков, Церковь терзающих, устрашился еси. / Мира ради церковнаго душу свою положил еси. // Не престай и ныне град Петропавловск и страну нашу истинным миром ограждати.

Святии новомученицы и исповедницы земли Казахстанския, молите Бога о нас.

Град Усть-Каменогорск утешителя тя весть, отче Александре: / ты бо в житии под Покровом Божия Матери паству твою соблюдая, / сердцем о всяком человеке болезновал еси, яко мати о чаде своем, / сего ради и о убивающих тя слезно молился, братия и чада тех именуя. // Пролей, молим тя, хладным сердцам нашим благодать любве твоея, приснопамятне.

Святии новомученицы и исповедницы земли Казахстанския, молите Бога о нас.

Святому Пантелеимону последуя, отче Зиновие, / врач душ и телес людей Согрских явился еси, / нуждающимся же помощь подавал еси, имея споспешника тебе Чудотворца Николая. / Не престай и ныне милости и исцеления источати неоскудно / всем с благоговением входящим в дивный храм Божий, // во граде твоем созданный и во имя твое освященный.

Святии новомученицы и исповедницы земли Казахстанския, молите Бога о нас.

Град Караганда о первомученицех своих ныне хвалится, / ублажая Леонида пресвитера и Исидора чтеца за веру Христову даже до крове пострадавших, / и вси людие во храм, идеже сии послужиша, ныне сошедшиися, // благодарственное пение в Троице славимому Богу воспевают.

Святии новомученицы и исповедницы земли Казахстанския, молите Бога о нас.

Вси гради и веси страны нашея / безмерному страданию первых мученик своих да поклонятся: / да почтут удолия Иртышская Сергия пресвитера, христолюбиваго воинства окормителя, / Джамбульстии пределы о священномученице Владимире да возвеселятся, // Яика воды да восплещут радостно о защитницех веры и славы отеческия.

Слава и ныне:

У Креста предстоящи Сына Твоего, / претерпела еси страдание, Дево Мати, любви Твоей равночестное. / Сего ради мученик Христовых Взбранная Воевода явилася еси, // путеводящи их к небесному блаженству.

Седален, глас 4:

Кое слово воздадим о гресех наших на Судищи Страшнем, / толик облак свидетелей имуще правды Христовы, / образ спасения нам показующих, руку помощи подающих и изымающих от бед? / Но молим вас, святии, дадите нам дух вашея ревности, // да исправим дóндеже есть день житие наше.

Слава и ныне:

Обновила еси, Чистая, Божественным Рождеством Твоим, / истлевшее страстьми земнородных мертвенное существо: / и воздвигла еси вся от смерти к жизни нетления. / Темже Тя по долгу блажим вси, Дево Препрославленная, // якоже прорекла еси.

Песнь 4.

Ирмос: Пришел еси от Девы ни ходатай, ни Ангел, / но Сам, Господи, воплощься / и спасл еси всего мя человека. / Тем зову Ти: // Слава силе Твоей, Господи.

Святии новомученицы и исповедницы земли Казахстанския, молите Бога о нас.

Тебе, святителю отче Кирилле, вручи Святый Патриарх жребий Первохранителя Церкве Русския, / но вместо того чашу скорбей за Христа Отец Небесный тебе подаде. / Темже молим тя и собратьев твоих архипастырей, / во удолиях Чимкентских с тобою убиенных: // святителие многострадальнии, научите и нас воле Божией до конца последовати, якоже вы возмогли есте.

Святии новомученицы и исповедницы земли Казахстанския, молите Бога о нас.

Семипалатинска красото, преосвященный Александре, / проповедниче неустрашимый, молитвенниче неусыпный, / исповедниче твердый, страдальче кроткий и терпеливый: / ты все житие твое от юности в жертву Богу принесл еси, / ты монашеское житие всем сердцем возлюбил еси, // помози и нам небесное паче земнаго возлюбити.

Святии новомученицы и исповедницы земли Казахстанския, молите Бога о нас.

Пастве новой карагандинстей, посреде лютых страданий собранной, / паства градов российских ныне спразднует: / вы бо святителие славнии, Евгение и Сергие, / еще же Захарие, Уаре и Дамаскине, // за обоя души своя положившии, слово ныне за них воздаете радующеся.

Святии новомученицы и исповедницы земли Казахстанския, молите Бога о нас.

Добре Церкве послуживше, истину соблюдше, / в конце же в весь дальнюю Талды-Курганскую достигше, / и отсюду землю обетования вечную духом узревше, / благое уготовление душам своим постом и молитвою сотворили, // и венец мучения прияли есте, архиереи Божии Макарие и Порфирие.

Святии новомученицы и исповедницы земли Казахстанския, молите Бога о нас.

Святыни разоренныя безкрайняго удела твоего зрети не терпя, отче отцев Николае, / еще же и люди расточенныя, яко овцы пастыря неимущия, / слезами на всяк день землю орошал еси, / труды же архипастырския ко трудом бодренно прилагал еси, / темже паства твоя возлюби тя зело, яко отца чадолюбива, / яко наставника прозорлива, ведуща коегождо имя, возраст и потребу, // яко службы Божия рачителя изрядна и молитвы светильника пламенеюща.

Слава и ныне:

Священноначальнику и Чудотворцу Николаю омофор подала еси / пречистыма рукама Твоима, Дево Мати Пречистая. / Темже и доныне святителем Твое заступление милостивно являеши / и весело спасаеши, // зане служители суть Пастыря овцам Великаго.

Песнь 5.

Ирмос: Ходатай Богу и человеком был еси, Христе Боже: / Тобою бо, Владыко, к Светоначальнику Отцу Твоему / от нощи неведения // приведение имамы.

Святии новомученицы и исповедницы земли Казахстанския, молите Бога о нас.

Возлюбленная чада Божия – на земли ангельский образ восприявшии, / отцы святии Иссык-Кульстии, матери же преподобныя Иверския и Свято-Ключенския / молят на Небесех прекраснаго Жениха Христа, // да приведутся от удел земли нашея во обители святыя души Тому уневестившияся.

Святии новомученицы и исповедницы земли Казахстанския, молите Бога о нас.

Преподобнии Серафиме и Феогносте, града Алма-Аты заступницы, / в немже и монашество насадили есте и ко страданию за Христа уготовали верных множество, / вкупе со отцы святыми Анатолием, Пахомием, Ираклием и блаженным Виктором Господа молите / прегрешений оставление даровати всем во обитель вашу с любовию притекающим // и имена ваша призывающим с верою.

Святии новомученицы и исповедницы земли Казахстанския, молите Бога о нас.

Кому уподобим тя, Севастиане, отче наш? / Сергию ли, землю Русскую якоже кокош под криле собравшему? / Серафиму ли, всякий подвиг подъявшему и любовию сердца огорченная воспламенившему? / Амвросию ли, словесы медоточными напитавшему души? // С ними ныне помяни град Караганду и страну, юже зело возлюбил еси.

Святии новомученицы и исповедницы земли Казахстанския, молите Бога о нас.

Попецытеся ныне о душах наших, отцы преблажении, / старчества благодать приемшии чистоты ради, / Павле Одесский, Георгие Московский и инии, в земли нашей страдальчески пожившии. / И вы, жены святыя, сим послужившия, страдание вольное предпочетши благам века сего, // научите нас в любви и радости служение ближним совершати.

Святии новомученицы и исповедницы земли Казахстанския, молите Бога о нас.

Егда гонят вы во граде сем, во другий тецыте: / глаголаша вам, преподобнии Иоанне и Иларионе, друзи ваша словеса Господня, ко немощным реченная. / Вы же, яко сильнии, отвещавасте: Не буди тако, мученик бо венцы желаем улучити: / Сего ради не токмо благодати горы Афонския сподобилися есте, славнии, // но и Небеснаго Сиона достигли есте, яко Чимкентстии страдальцы.

Слава и ныне:

Егда лик мученик, яко плод Церкве первородный, взыде на Небеса, / рекоша уста Ея пречистая: / даждь ми, Боже, криле, да полещу и почию в пустыни / и тамо соберу от человек лик ангельский, // Пречистую Твою Матерь имущ Наставницу.

Песнь 6.

Ирмос: Прообразуяй Твое погребение, Крест и страсть Иона, / во чреве китове, Спасе, тридневновав, / от внутрь взываше: / да взыдет живот мой, / и приидет молитва моя в храм Твой Божественный, // о Господи милости.

Святии новомученицы и исповедницы земли Казахстанския, молите Бога о нас.

Сердце Казахстанския страны кровоточащее / ты еси, Караганда благословенная. / Многа бо места скорби князь тьмы в земли твоей устрои. / Имена же златосиянная, в тех за Христа умученных, / во всяком роде и роде да помянутся, // написаны бо суть на небесех.

Святии новомученицы и исповедницы земли Казахстанския, молите Бога о нас.

Оле страшнаго испытания, имже искусися вера ваша, / страстотерпцы Христовы! / Нуждно бо от домов своих отгнани бысте в степи Сары-арки безводныя, / гладом и мразом изнуряеми не обрели есте от человек помогающаго, / обаче Бог бысть помощник ваш, // вселяяй оправданныя верою и благодатию в вечныя кровы.

Святии новомученицы и исповедницы земли Казахстанския, молите Бога о нас.

Ужас бе видети младенцев неискусозлобное множество, / в местех пустынных и мрачных узилищех смертию лютою пожинаемое, / матерей же сонм безутешный, власы терзающих и слезы точащих. / Мерзко есть безвинных губительство, но чиста детей жертва, / мученик бо лик суть, вопиющий: // Осанна Сыну Давидову, Спасе наш, слава Тебе.

Святии новомученицы и исповедницы земли Казахстанския, молите Бога о нас.

Вы, о юзницы святыя Акмолинския, / во броня веры оболкшася и женскую немощь отвергше, / глад и болезни, мраз и зной претерпели есте, / труды тяжкия и злобу мучителей. / Темже за имя Христово убиенныя, Тому предстали есте, радующася, // яко мученицы добропобедныя и молитвенницы о душах наших.

Святии новомученицы и исповедницы земли Казахстанския, молите Бога о нас.

В дому Божием ходяще иногда, священницы, якоже в раи светлости, / послежде в недрех земли Павлодарския яко в преддевериях адовых на всяк день трудилися есте, / ко Агнцу Божию очи возводяще, ада Победителю, / глаголюще: еда во веки удержиши во гневе щедроты Твоя, Христе Спасе? // Ныне же во Царствии Небеснем веселитеся, престолу Господню служаще.

Слава и ныне:

Дево Святая, во Святая Святых воспитанная, / Духа Святаго пречистый сосуде, / егда тварь содрогашеся, зряще Сына Твоего пригвождена ко Кресту, / Ты во глубину скорби яко во ад сердцем снизшла еси, / ныне же от рова погибели безнадежных исхищаеши, // бездну милости и щедрот источающи мирови.

Кондак, глас 5:

О, мученицы и исповедницы преславнии, / Казахстанския земли предстателие теплейшии, / во всяком чине и возрасте Христу послужившии! / Кто исповесть болезни и подвиги ваша, / кто доволен изрещи чудеса вашея веры, / или хвалу достойную красоте исповедания вашего воздати? / Обаче приимите любовию вас почитающия // и молитву вознесите о спасении душ наших.

Икос:

Ныне наста день радостен, / милости исполнен и щедрот Божественных, / яже излияшася изобильно чадам Церкве Православныя в стране Казахстанстей, / память бо ныне празднует собора новых мученик и исповедник своих. / И всяк град и селение, идеже святии пострадаша, / и всяко место, идеже мощи угодников Божиих чудесы прославляются, / и вси горы и холми, и степи, молитвою преподобных облагоуханнии, и кровию мученик обагреннии, и слезами страдальцев напоеннии, немолчным гласом сице вопиют: / Радуйся, первомучениче святителю Пимене, на тебе бо яко на твердем камени Церковь в земли нашей устроишася. / Радуйтеся, преподобномученицы Серафиме и Феогносте, гора бо на нейже подвизастеся, ныне яко святыня велия в земли нашей явишася. / Радуйся, отче преподобне Севастиане, твоею бо любовию сердца всех с верою под кров твой притекающих воистинну преображаются. / Радуйся, святителю Николае, твоими бо молитвами град Алма-Ата и вся страна наша в мире и благоденствии сохраняется. / Радуйтеся священницы Господни, вашими бо ходатайствы на всяк день в церквах земли нашея святое возношение в мире приносится. / Радуйтеся, преподобныя жены и страстотерпицы Христовы, вашими бо подвиги вера и любовь друг ко другу в чадех Божиих укрепляется. / Сего ради, святии угодницы Божии, явленнии и неявленнии, в день светлаго сего торжества приимите любовию вас почитающих // и молитву вознесите о спасении душ наших.

Песнь 7.

Ирмос: Телу златому премудрыя дети не послужиша, / и в пламень сами поидоша, / и боги их обругаша, / среди пламене возопиша и ороси я Ангел: // услышася уже уст ваших молитва.

Святии новомученицы и исповедницы земли Казахстанския, молите Бога о нас.

Суетное лжеименных пастырей мудрование, / апостолов учением и святых отцев богословием низложили есте, архипастырие славнии Церкве нашея: / града Алма-Аты святителие и иже в Чимкентских пределех пострадавшии, / священнии Александре, Семипалатинска украшение, и Иакове, Уральска святое рождение, // и ныне помозите нам истины глаголы разумети и сим последовати.

Святии новомученицы и исповедницы земли Казахстанския, молите Бога о нас

Священницы Господни, Александре, Стефане и Филиппе, / Кучугурская славо, Алма-Аты окормителие, истиннии и добрии пастырие, / изгнанных правды ради крепции заступницы и усерднии врачеве, / веры истинныя поборницы, еяже ради от безбожных умучени бысте, // от волков во овчиих кожах приходящих, соблюдайте паству вашу ныне и во веки.

Святии новомученицы и исповедницы земли Казахстанския, молите Бога о нас.

Да поем вси песнь Христу Воскресшему, / храм Воскресения Своего в залог вечный граду Семипалатинску Давшему, / служителей же храма сего Феодора, Нестора, Константина и Виктора молитвенники за ны Сотворшему, // крестнаго ради жития их и кончины преславныя.

Святии новомученицы и исповедницы земли Казахстанския, молите Бога о нас.

Ваше безмолвное во храме Господни предстояние, / воистинну проповедь учения Христова явися, / верным спасительная, лукавнующим же и безбожным нестерпимая, / от нихже умученныя, жены преподобныя Агафие и Марие Павлодарския, вкупе с Мариею и Александрою, // Христу молитеся в правой вере страну нашу утвердити.

Святии новомученицы и исповедницы земли Казахстанския, молите Бога о нас.

Слова Божия ради и таинств церковных, / верности ради преданиям отеческим и Святому Патриарху / изгнани бысте в землю сию, / иже Агнца за мир закланнаго служителие, // но смертию своею степи бездыханныя оживотворили есте.

Слава и ныне:

Вознесоша главу лжеименитое сонмище, / Церковь Божию непщуя низложити, / но сего советы разори Господь, / Ты же, Дево Мати, Слова Палато, // хитрословесныя яко безсловесныя обличила еси.

Песнь 8.

Ирмос: Глагол мучителев понеже превозможе, / седмерицею пещь разжжена бысть иногда, / в нейже отроцы не опалишася, царево поправше веление, / но вопияху: вся дела Господня, Господа пойте // и превозносите во вся веки.

Святии новомученицы и исповедницы земли Казахстанския, молите Бога о нас.

Древним мучеником подражающе святии страны нашея / в горниле страдания искушаеми друг ко другу глаголаху: / Аще со Христом умрем, с Ним и оживем, / аще терпим, с Ним и воцаримся, // аще отвержемся, и Той отвержется нас.

Святии новомученицы и исповедницы земли Казахстанския, молите Бога о нас.

Осуждения ради перваго человека / терние изнесе земля по глаголу Зиждителеву, / Воплощшееся же Слово на суд человечь изыде, нося венец терновен, / имже последи кийждо от вас увенчася, о мученицы, // якоже царскою диадимою.

Святии новомученицы и исповедницы земли Казахстанския, молите Бога о нас.

На вечери Христос ноги умы учеником Своим, / да во свете заповедей Его пойдут благовестити миру всему, / вы же, о угодницы Божии, / страдальчески землю сию стопами вашими прошли есте, // слезами чад ваших духовных омываемыми.

Святии новомученицы и исповедницы земли Казахстанския, молите Бога о нас.

Излияся обилие дарований духовных / чадом Церкве младенствующия древле, / высоту подвигов и житие непорочное показаша пустыни светильницы, / но вы, новии мученицы и исповедницы, иже от великия скорби пришедшия, // якоже оныя убелили есте ризы своя.

Святии новомученицы и исповедницы земли Казахстанския, молите Бога о нас.

Возрадуйтеся ныне, святии мученицы, / носящии яко утварь благолепну скорби и раны за веру истинную, / юже Слово Отчее вам возвестило есть, / тихообразно совершая сердца ваша, // обаче во всю землю ныне вещание победы вашея изыде.

Благословим Отца и Сына и Святаго Духа Господа: и ныне и присно и во веки веков. Аминь.

Страшно есть зрети Тебе Творца на Древе воздвижена, / страждуща волею за рабы и во гробе бездыханна лежаща, / но востани и возвеличи верою и любовию Тебе спострадавшия, // Дева и Мати вещаше.

Песнь 9.

Ирмос: Безначальна Родителя Сын Бог и Господь, / воплощься от Девы нам явися, / омраченная просветити, собрати расточенная. // Тем Всепетую Богородицу величаем.

Святии новомученицы и исповедницы земли Казахстанския, молите Бога о нас.

Воскресе Христос жизни Податель, / приити хотяй воскресити вся и судити вселенней. / О, коея славы и благодати тогда исполнитеся! // Но молим вас, не забудите в молениих ваших тепле вас ныне призывающих.

Святии новомученицы и исповедницы земли Казахстанския, молите Бога о нас.

Класы зрелии на нивах Российских утучненнии, / в рукояти собраннии, принесени бысте в землю сию / и вознесени во всесожжение Господеви за страну сию, / мученицы Христовы славнии, // да почиет и в ней благодать Земли Русския.

Святии новомученицы и исповедницы земли Казахстанския, молите Бога о нас.

Новосаждения масличная окрест трапезы Божественныя, / вами красуется ныне доброцветный сад Церковь Православная земли Казахстанския, / вами и укрепляется, побеждает же всякое искушение, // вы бо есте наши ко Спасу теплии предстатели.

Святии новомученицы и исповедницы земли Казахстанския, молите Бога о нас.

Рцыте нам, святии сродницы наши, / како вы, сосуды суще скудельничи, Духа Святаго вселения сподобилися есте? / В воню благоухания Христова текохом истощанием вольным, святым Его заповедем себе поработивше, / сего ради ко злодеем якоже Подвигоположник причтени быхом, / ныне же в невестнице Его водворихомся со свещами светлыми: // такожде и вы тецыте, да постигнете.

Пресвятая Троице, Боже наш, слава Тебе:

Приидите чада Церкве Православныя, / благодарение усердное принесем Пресвятей Троице, / утвердившей на седми столпах Церковь Православную на лице всея земли, / яже всякаго приходящаго, яко добрая мати утешает присно // словесы духовными и Божественною благодатию.

Слава и ныне:

Возвеличил еси, Христе, рождшую Тя Матерь Пречистую, / чудо в Кане Галилейстей сотворив первее, / ныне ли не сотвориши в земли нашей чудес множество молитвами Ея, // сомолитвенники прием новых мучеников ликостояние!

Светилен:

Камени многоценнии вы есте воистинну, о мученицы и исповедницы славнии, / имиже украсися Дом Божий Церковь Православная земли Казахстанския. / Сего ради Церкве Зиждителя Христа молите / да не попустит людем земли сея блуждати на распутиих греха, / ниже обольститися ученьми злочестивых, // но да дарует ей свет незаходимый веры Православныя.

Слава и ныне:

Радость Неизреченную рождши Господа, / радости нас небесныя причастники сотвори, всех Тебе почитающих, Пречистая, / и благодарение от души приносящих Тебе: // не забуди рабов Твоих, Благословенная Марие.

На хвалитех:

стихиры воскресны – на 4 и святым – на 4

Глас 8, подобен: О преславнаго чудесе.

Хвалите Его в тимпане и лице, // хвалите Его во струнах и органе.

Иже в лице мученик и страстотерпцев Казахстанския земли / во свете невечернем Богу предстоящия / воспомянем ныне, вернии, всех по имени, / сердцем и усты пение приносяще / и ко Спасу тепле вопиюще: / О, Творче и Создателю всяческих, Боже! / звездам небесным имена нарицаяй, / имена страдальцев, ихже не вемы, Сам помяни // и во время подобно житие их явленно сотвори.

Хвалите Его в кимвалех доброгласных, хвалите Его в кимвалех восклицания // всякое дыхание да хвалит Господа.

Идеже Аз есмь, ту и слуга Мой будет, – / рекоша честная и пречистая Господня уста. / О, кто таковии слуги Христовы, / якоже вы, святии земли нашея? / Вся бо красная мира сего яко уметы вменили есте, / веры ради, и кротости, и правды. / Темже и управи вас десница Божественная, // даже до врат чертога Спасова украшеннаго.

Бог нам прибежище и сила, // Помощник в скорбех обретших ны зело.

Взыграйте горы Заилийския, / пустыня Бетпак-Дала веселися, / ничимже меньшия есте вы градов и весей Российских, / имущих в себе честныя мощи угодников святых. / Ликовствуйте, обители Земли Русския, / преподобнии наставницы и священницы ея, / возрастившия воинов Христовых, // иже суть страны Казахстанския похвало и радование.

Господь сил с нами, // Заступник наш Бог Иаковль.

О, преславнии мученицы и исповедницы, / о, сыны и дщери вечныя победы Божия: / сеющии слезами во дни жития земнаго, / приидите, пожените радость духовную: / землю бо светом солнечным щедро осиянную, / ныне Свет вечный Христос озари. / егоже молите, святии сродницы наши, / да утвердит Церковь неколебиму в земли сей во веки // и спасет души наша, яко милосерд.

Слава, глас 6:

Реки в кровь преложишася, / и завеса церковная раздрася, / алтари Господни пожжены огнем и раскопаны быша, / священницы и раби Господни горькое изгнание и смерть прияша. / Обаче победа ваша, мученицы Казахстанския земли, / плач преложи в радость праздника настоящаго. / Поклоняемся страданию вашему, святии. / Торжествуем же и прославление ваше. // Покажите на нас милосердое ваше заступление.

И ныне, глас 2:

Преблагословенна еси, Богородице Дево…

На Литургии

h6C Блаженны гласа – на 6 и святых – Песнь 8.-я на 4

h6C Прокимен, гл. 4:

Святым иже суть на земли Его удиви Господь вся хотения своя в них. Стих: Предзрех Господа предо мною выну яко одесную мене есть да не подвижуся.

Апостол – Евр.11:33–40.

Аллилуарий воскресный и святым, гл. 4: Воззваша праведнии и Господь услыша их и от всех скорбей их избави их.

Стих: Многи скорби праведным и от всех их избавит я Господь

Евангелие – Лк.21:12–19.

Причастен: Радуйтеся, праведнии, о Господе, правым подобает похвала.

Молитва

О, преславнии воины Отца Небеснаго! О, Божественнии храборницы! В годину гонения лютаго в земли Казахстанстей за веру Христову пострадавшии и сея земли предстатели теплейшии явившиися! Вам ныне мы, смиреннии и недостойнии, усердное моление приносити дерзаем в день благознаменитый праздника вашего. Обаче недоумеюще, како нарещи вас подобает или како по достоянию воспети подвиги ваша, сице вопием:

О, святителие Христовы, Евангелия Божественнаго и предания церковнаго носителие, о народе Божием печальницы! Помозите нам закону Господню прилежно поучатися и ближним своим милости творити, да будем достойни вашея любви и заступления.

О, священницы Господни, Жертвы Безкровныя совершителие и о прощении грехов людей христоименитых ходатаи! Испросите нам прилежание к службе Божией и попечение об исправлении грехов наших.

О, преподобнии отцы и матери, во ангельстем чине Богу послужившии, страстей победителие и даров Духа Святаго честнии сосуди! Излейте на нас благодать даров ваших, да возревнуем страсти вся победити.

О, страстотерпцы Божественнии, терпения адаманти твердии, кротости Христовы цвети благоуханнии! Далече отжените от нас малодушие и ропот, научите нас надежду на единаго Бога спасающаго возлагати и ближних немощи терпеливно носити.

О, святии сродницы наши, Земли Казахския украшение, юдоль печальную в славы Божия селение претворившии, равноагельнии хранителие градов и весей наших, о людех православных приснии молитвенницы! Якоже во время земнаго жития вашего во всяких нуждах страждущим помогали есте, тако и ныне будите нам помощницы и заступницы, яко велие дерзновение пред Богом стяжали есте, в тяжких страданиях верны Христу явившеся. Помозите нам поприще земное без порока прейти и Царствия Небеснаго достигнути и тамо купно с вами прославляти в Троице певаемаго Бога, Отца и Сына и Святаго Духа, ныне и присно и во веки веков. Аминь.

Источник: Митрополия.кз

Месяца сентября в 10-й день

Святыя новомученицы Татианы Гримблит

На велицей вечерни

На Господи, воззвах: стихиры, глас 2.

Подобен: Егда от Древа:

Восхвалим, вернии, песньми духовными,/ мученицу добропобедную Татиану,/ яже, страха мучений не убоявшися,/ к страданием мужественне устремися/ и душу свою, яко жертву непорочную,/ в руце Подвигоположника Христа предаде./ Ныне же с лики святых жен Ему предстоит/ и молится прилежно/ мир душам нашим даровати и велию милость.

Христу Жениху рачением твоего сердца/ от младенства поработати возжелела еси,/ во дни же гонений лютых,/ любовию к Нему распалаема,/ страдания и муки небоязненно претерпела еси,/ невесто благославная Татиано./ Ныне же, в нетленнем чертозе пребывающи,/ прилежно молися Спасу и Владыце всех,/ мир душам нашим даровати и велию милость.

Яко жены мироносицы древле,/ добродетельми многими преукрашена/ и делами милосердия исполнена,/ прехвальная страдалице Татиано,/ Христа всем сердцем возлюбила еси/ и вместо мира благовоннаго/ душу твою в жертву Ему принесла еси./ Ныне же, Богу предстоящи,/ испроси душам нашим мир и велию милость.

Слава, глас 6:

Инии язы́цы мудростию хвалятся,/ инии богатством и силою,/ мы же славными новомученики и исповедники,/ подвиги своими процветшими,/ кровию землю нашу обагрившими/ и верныя прославляти научившими/ Отца и Сына и Святаго Духа,/ Троицу Единосущную и Нераздельную.

И ныне, праздника.

Вход. Прокимен дне. И чтения 3 мученическая.

На литии стихиры, глас 1:

Яко некогда восточнии царие/ Богомладенцу Христу дары принесоша,/ такожде и ты, Татиано богомудрая,/ принесла еси от сокровища сердца твоего/ вместо злата – веру чистую,/ вместо фимиама – молитву теплую,/ вместо смирны – страстей умерщвление,/ и явилася еси воистинну жертва благоприятная.

Яко агница нескверная,/ посреде мучителей предстала еси/ и, сих зверонравие кротостию победивши,/ дерзость же тех терпением посрамивши,/ Горняго Иерусалима достигла еси,/ мученице Татиано добропобедная,/ идеже, Христу предстоящи,/ молишися о душах наших.

Слава, глас 8:

Руце твои на рало заповедей Божиих возложивши,/ вспять не обратилася еси/ и, Христу усердно работающи,/ плод сторичный добродетелей принесла еси:/ веру несумненную, надежду известную/ и любовь нелицемерную,/ наипаче же милосердию прилежала еси,/ святая мученице Татиано./ Темже молися от бед и скорбей избавитися/ благочестно совершающим святую память твою.

И ныне, праздника.

На стиховне стихиры, глас 6.

Подобен: Все отложше:

Мученице преславная Татиано,/ ты, жена естеством сущи,/ мужественне смерть прияла еси/ и, Крестом Христовым вооружившися,/ страсти душетленныя отсекла еси/ и гордаго змия смирением попрала еси./ Ныне же, в радости вечней пребывающи,/ Христу Богу молися,/ грехов прощение нам даровати,/ благочестно совершающим святую память твою.

Стих: Зане Тебе ради умерщвляемся весь день,/ вменихомся, яко овцы заколения.

Огнем любве распалаема/ и делами милосердия украшена,/ страждущим и в заточении сущим/ усердно послужила еси/ и в радость Господа твоего вошла еси,/ Татиано, мученице преславная./ Темже и нас, добродетельми убогих/ и многими страстьми исполненных,/ от язв душетленных избави/ и на путь благочестия направи.

Стих: Дивен Бог во святых Своих,/ Бог Израилев.

Яко маслина плодовита/ в стране нашей явилася еси,/ мученице Христова Татиано,/ исцеляющи елеем милосердия/ души и телеса недугующих/ и твоея помощи просящих./ Ныне же, Богу предстоящи,/ данною тебе свыше благодатию/ испроси болящим исцеление/ и душам нашим велию милость.

Слава, глас 8:

Радуйся, святая мученице Татиано,/ премудрая ученице Христова,/ временная бо искушения прешедши,/ ныне в радости вечней пребываеши/ и гласа ангелов наслаждаешися,/ непрестанно воспевающих:/ Свят, Свят, Свят еси, Господи.

И ныне, праздника.

Тропарь, глас 3:

Мироносицам женам в добродетелех подражающи,/ в темницах и юзах сущим усердно послужила еси,/ и, образ евангельскаго милосердия нам показавши,/ за Христа мученическую смерть прияла еси,/ Татиано преславная./ Ныне, Богу предстоящи,/ моли спастися душам нашим.

На утрени

На Бог Господь: тропарь праздника, дважды.

Слава, святыя. И ныне, праздника.

По 1-м стихословии седален, глас 4:

Житием праведным ныне обнищах/ и грехи многими ураних душу мою,/ но ты, мученице честная,/ богатством милосердия и лечбою молитв твоих/ исцели мене, немощнаго,/ яко да воспою славныя твоя подвиги.

Слава, и ныне, праздника.

По 2-м стихословии седален, глас 4:

Яко разбойницы, обыдоша мя страсти моя,/ световидную одежду души моея совлекоша/ и ту ранами греховными уязвиша,/ но ведый тя милостивую помощницу,/ из глубины сердца моего взываю:/ пролей елей милосердия на мя/ и еле жива суща, возстави,/ Татиано, мученице честная.

Слава и ныне, праздника.

Величание:

Величаем тя,/ святая мученице Татиано,/ и чтим честная страдания твоя,/ яже за Христа/ претерпела еси.

Псалом избранный: Бог нам Прибежище и Сила:

По полиелеи седален, глас 8:

В багряницу от кровей твоих одеявшися/ и порфирою славы украсившися,/ вошла еси в чертог Христов, Татиано богомудрая,/ идеже святии новомученицы и исповедницы Церкве Русския/ Престолу Божественныя славы предстоят./ Сего ради молим тя:/ вознеси с ними молитвы о нас,/ любовию память твою празднующих.

Слава, и ныне, праздника.

Таже степенна, 1-й антифон 4-го гласа. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфеа, зачало 104.

По 50-м псалме стихира, глас 6:

Днесь восхвалим, вернии,/ дивнаго во святых Своих Бога/ и воспоим Ему благодарственно,/ яко яви нам Татиану пречудную,/ чистотою и милосердием украшенную/ и благодать Святаго Духа стяжавшую,/ и тако возопиим:/ Господи, молитвами Твоея мученицы,/ не помяни беззаконий наших,/ но спаси души наша.

Канон, глас 8.

Песнь 1.

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Днесь память мученицы преславныя Татианы нас созва, да восхвалим, вернии, добродетели и труды ея и, торжеством духовне напитавшеся, прославим Избавителя и Бога нашего.

Благочестиваго корене отрасль всечестная сущи, мученице славная, всяцей добродетели от юности навыкла еси и, закона Божия николиже оставляющи, яко древо плодоносное при исходищах вод явилася еси.

Глагол Христов, яко блажени милостивии, от младенства в сердце твоем восприемши, доброю стезею шествовала еси, всечестная Татиано, заключенных за имя Христово утешающи и от глада избавляющи.

Богородичен: Тя, благословенную в женах, архангельским гласом величаем: радуйся, Благодатная, Господь с Тобою.

Песнь 3.

Ирмос: Небеснаго круга/ Верхотворче Господи/ и Церкве Зиждителю,/ Ты мене утверди в любви Твоей,/ желаний краю, верных утверждение,/ едине Человеколюбче.

Старца Саровскаго почитающи, во обитель Дивеевскую вселитися возжелала еси, святая, обаче, волю Господню о себе познавши, к смерти и страданию уготовилася еси, поющи: утверди мене в любви Твоей, едине Человеколюбче.

Преподобнаго Гавриила, добродетельми украшена, наставника ко спасению обрела еси, блаженная Татиано, иже поучаше тя в подвизе духовнем пребывати и в любви Господней утверждатися.

Святей Анастасии Узорешительнице в милосердии подражающи, во узах и заточении сущим усердно послужила еси, богозванная невесто Татиано, поющи: утверди мене в любви Твоей, едине Человеколюбче.

Богородичен: Рождеством Твоим, Дево Пречистая, род человеческий избавила еси служения вражия и женское естество Тобою почтено бысть.

Седален, глас 8:

Кая темница не име тя юзницу,/ кий град не имать тя заступницу,/ не токмо земля Московская о тебе хвалится,/ но и Зырянская с нами ликовствует,/ и Казахстанская о тебе радуется,/ и мнози инии грады и веси свеселятся с нами в торжестве твоем,/ поминающе изгнания и прославляюще страдания твоя,/ Татиано, мученице христоименитая.

Слава, и ныне, Богородичен:

Боголюбивая Владычице, ангелов украшение и мучеников славо,/ с ними молися обрести нам милость и разрешение от беззаконий наших,/ помози течение жизни нашея добре совершити/ и Царствия Небеснаго наследники явитися.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Нрав благ праведных жен Марфы и Марии стяжавши, единое на потребу обрела еси и веру благими делы украсила еси, алчущих питающи, странных утешающи и больных посещающи, мученице славная.

Добродетелем безсребренников и чудотворцев подражающи, на служение страждущим устремилася еси, Татиано терпеливодушная. Темже и наша телесныя и душевныя недуги исцели благоприятными твоими молитвами.

Милосердие творити в житии твоем возлюбивши, вся имения твоя в руце нищих влагала еси и тако Богу угодила еси. Темже молим тя: части человека богата, обаче немилосерда, избави нас и со всеми святыми в недрех Авраамовых вселитися Господа умоли.

Богородичен: Родила еси Сына Божия плотию, девство сохраньши, темже притекают к Тебе, Пречистая Владычице, отроковицы, девство возлюбившия, и яве побеждают невидимыя враги.

Песнь 5.

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Девственных лик о тебе, невесто Христова, ныне радуется, собор мучеников веселится и множества благочестивых в храме взывают: Твой мир подаждь нам, Человеколюбче.

От тесноты темничныя и смраднаго заточения, мученице честная, к пространней широте рая сладости прешла еси и святых светлость узрела еси. Ныне прилежно с ними молися, даровати нам мир и веры утверждение.

О, мученице добропобедная, ластовице красная, голубице кроткая, горлице миролюбивая! Душу мою плодоносну покажи и нрав жестокосердый премени, и мир душевный низпосли молитвами твоими.

Богородичен: Ныне род человеческий возрадовася, печаль преста и радость процвете, яко Бог вселися во утробу Твою, Пречистая, и виден бысть Тобою.

Песнь 6.

Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.

Истинною любовию, милосердием и кротостию, терпением и целомудрием украсившися, обитель Духа Святаго себе соделала еси, святая, нас же, грехами отягченныя, посети и надеждою на милость Божию ободри, молитвами твоими.

Страдания и гонения от безбожных претерпевши и силою Креста Христова диавола победивши, Небеснаго пристанища достигла еси, избраннице Христова, идеже неотъемлемый мир обрела еси.

Исповедников Христовых в темницах утешающи, нищетою вольною себе украсила еси, святая Татиано, и, страдания нивочтоже вменивши, от смерти к Жизни прешла еси.

Богородичен: Тя, Дево, яко Матерь Божию, лицы мученичестии велегласно прославляют, темже и святая Татиана, Сыну Твоему последовавши, купно с ними ублажает Тя, Пречистая.

Кондак, глас 2:

Слово Божие сердцем твоим восприемши,/ миру распялася еси,/ святая мученице Татиано,/ и, в служении страждущим Богу угодивши,/ плод добродетелей обилен пожала еси./ Сего ради буди нам ходатаица/ и умоли Создателя всех,/ безплодие сердец наших исцелити,/ да принесем Ему плоды покаяния,/ любовь, милосердие и смирение.

Икос:

Приидите, вернии, духовне возвеселимся в памяти святыя мученицы Татианы,/ и, прославляюще подвиги ея, воспоим тако:/ радуйся, града Томска благое прозябение;/ радуйся всея земли Русския украшение./ Радуйся, Церкве Божия плод благоприятный;/ радуйся, лика новомучеников наших цвет благоуханный./ Радуйся, женам мироносицам в ревности подражавшая;/ радуйся, многия добродетели стяжавшая./ Радуйся, Татиано, мученице преславная, образ милосердия нам показавшая.

Песнь 7.

Ирмос: От Иудеи дошедше отроцы/ в Вавилоне иногда/ верою Троическою пламень пещный попраша, поюще:/ отцев Боже, благословен еси.

Кая темница не име тя юзницу, страдалице терпеливодушная? Ты бо, лютое неистовство мучителей безбожных мужественне претерпевающи, смирением Христовым сих победила еси. Ныне же в радости поеши: отцев Боже, благословен еси.

Евангельскими глаголы святых юзников утешала еси, достохвальная Татиано, имже божественне поревновавши, вседушно пострадати за Христа возжелела еси. Ныне же с лики мучеников в радости поеши: отцев Боже, благословен еси.

Мироносицы вземши чин, всечестная страдалице, Христу, нас ради волею обнищавшему, усердно послужила еси, егда, вместо мира, елеем милосердия страждущих и недужных умастила еси. Ныне же, Господа зрящи, поеши: Боже, благословен еси.

Богородичен: Вся жены богомудрыя с веселием прославляют Деву Пречистую, истинную Матерь Божию, и, благоговейно предстояще, Христа восхваляют во веки.

Песнь 8.

Ирмос: Царя Небеснаго,/ егоже поют вои ангельстии,/ хвалите и превозносите во вся веки.

Сластьми мира сего не прельстившися, яко цвет красный, в девстве процвела еси и мученическаго венца сподобилася еси, Татиано богомудрая, и тако, сугубый подвиг на земли совершивши, ныне с лики ангельскими Христа прославляеши.

Христа всем сердцем возлюбивши, Тому усердно последовала еси, честная, и, скверны греховныя избегши, яко голубица, крилома добродетелей в Небесный чертог возлетела еси, идеже, веселящися, песнь победную воспеваеши.

Добродетельми и подвиги твоими Богу угодила еси, Татиано достохвальная, сего ради Той в лице мучениц прослави тя и дерзновение велие дарова молитися присно о верою и любовию чтущих тя.

Богородичен: Ты Бога едина родила еси, Дево, преславно; Ты естество обновила еси Рождеством Твоим, Богородительнице Чистая.

Песнь 9.

Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с безплотными лики Тя величающе.

Светильник добродетели во мраце беззакония возжегши, мудрым девам сопричислилася еси, всечестная, и, в чертог брачный возшедши, Небесному Жениху Христу обручилася еси. егоже моли спастися душам нашим.

От земных к небесным ум вперивши, сетей вражиих избегла еси, мученице Татиано, и крилами чистоты Царствия Божия достигла еси, идеже с безплотными силами Христа величаеши.

Приими, Триипостасный Боже, малую песнь сию, в память святыя Татианы, добропобедныя мученицы Твоея, сложенную. Еяже молитвами умягчи наша окамененная сердца и научи любви и милосердию.

Богородичен: Приими, о, Богомати, яко миро, от любве приносимую песнь сию, и принеси Сыну Твоему, яко дар, во оставление грехов наших.

Светилен:

Яко мудрая дева, светильник души твоея елеем украсивши,/ во след Христа устремилася еси, Татиано достоблаженная,/ и, Чертога Небеснаго достигши,/ Свет Невечерний лицезрети сподобилася еси./ Укрепи и нас, мати всехвальная,/ во свете заповедей Господних ходити/ и делы своими Бога прославляти.

Слава и ныне, праздника.

На хвалитех стихиры, глас 8.

Подобен: О, преславнаго чудесе:

О, преславнаго чудесе!/ Голубица нескверная, Татиана всеблаженная,/ девство и милосердие возлюбивши,/ сими, яко крилы духовными,/ возлете превыше видимыя твари,/ в Царство благодати и нескончаемыя радости,/ идеже, со всеми святыми пребывающи,/ молится Богу грехов оставление даровати,/ светло празднующим святую память ея.

О, преславнаго чудесе!/ Девства благое процветение,/ Татиана мученица Христова/ во дни гонений на Церковь Русскую,/ страдания мужественне претерпевающи,/ в законе Господни непорочно хождаше,/ темже, нетленным венцем увенчавшися/ и обретши дерзновение у Бога,/ подает верным велию милость.

О, преславнаго чудесе!/ О, Божественнаго произволения!/ Христова мученица Татиана,/ жена немощная сущи,/ победи коварствия демонов/ и, лютыя смерти не убоявшися,/ истину пред беззаконники исповеда./ Ныне же с безплотными силами/ Триипостаснаго Бога прославляет.

Слава, глас 6:

Мира соблазны презревши/ и любовию Божественною возгоревшися,/ в темницах сущим прилежно послужила еси,/ мученице славная Татиано,/ раны же юзников слезами омывающи,/ во исповедании веры словесы твоими сих укрепляла еси./ Ныне, во славе вечной пребывающи,/ благодать духовную нам низпосли,/ благоприятными твоими молитвами.

И ныне, праздника.

Славословие великое и отпуст.

На Литургии

Блаженны от канона, песни 3-я и 6-я. Прокимен, глас 6: Тебе ради умерщвляемся весь день,/ вменихомся яко овцы заколения. Стих: О Бозе похвалимся весь день и о имени Твоем исповемыся во век. Апостол Коринфяном, зачало 181. Аллилуиа, глас 1: Терпя потерпех Господа, и внят ми. Стих: И услыша молитву мою. Евангелие от Матфеа, зачало 39. Причастен: Веселитеся, праведнии, о Господе, и исповедайте память святыни Его.

Молитва

О, доблественная страстотерпице Христова Татиано, земли нашея доброе прозябение, Церкве Русския благое украшение и Вышняго Иерусалима избранная дщи!

Ты, на земли благочестно поживши, Христа всем сердцем возлюбила еси и, в темницах сущих посещающи, алчущих питала еси, нагих одевала еси и словом Евангельския любве утешала еси. Таже, вземши крест свой, страдания и смерть за веру Православную прияла еси и Царствия Небеснаго достигла еси. Темже тя, яко благую и верную рабу Господню достойно почитающе, усердно просим: моли о нас Всещедраго Бога, да дарует Церкви Русской благостояние, Отечеству нашему мир, людем во благочестии преспеяние, в скорбех утешение, во обстояниих помощь и заступление, да благодатию Божиею и твоим теплым предстательством земное жительство пройдем и Горняго Иерусалима достигнем, идеже вкупе с тобою сподобимся прославляти дивнаго во святых Своих Бога нашего, Отца и Сына и Святаго Духа во веки веков. Аминь.

Источник: Текст службы утвержден решением Священного Синода от 9 июля 2019 г. (журнал № 82).

Ме́сяца сентября́ в 10-й день

Всех святы́х, в земли́ Ли́пецкой просия́вших

На ма́лей вече́рни

На Го́споди, воззва́х: стихи́ры святы́х, глас 1.

Подо́бен: Небе́сных чино́в:

Небеса́ ны́не ра́дуются/ и земля́ с челове́ки весели́тся,/ днесь бо земля́ Ли́пецкая/ соверша́ет торжество́ святы́х свои́х,/ и́хже моли́твами и предста́тельством Богоро́дицы// Це́рковь и страну́ на́шу в ми́ре соблюди́, Многоми́лостиве.

Небе́снии на́ши предста́телие,/ от дре́вних лет да́же и до ны́не просия́вшии,/ прииди́те, ста́ните посреде́ нас неви́димо,/ предначина́юще торжество́ и пе́ние,/ и ра́дости духо́вныя испо́лните// ваш пра́здник любо́вию соверша́ющих.

Небе́снаго Ца́рствия зве́зды пресве́тлыя,/ земна́го Оте́чества кре́пцыи засту́пницы,/ святи́и вси, в земли́ Ли́пецкой просия́вшии,/ и ны́не ча́да ва́ша собери́те к торжеству́,/ вас бо моли́твенники те́плы// ко Го́споду и Богоро́дице стяжа́хом.

Небе́сным чино́м подо́бницы/ и земноро́дным ко спасе́нию наста́вницы,/ собо́ре святы́х Ли́пецких,/ моли́те за ны, ве́рою к вам прибега́ющия,/ я́ко на вас упова́ние// по Бо́зе и Богоро́дице возложи́хом.

Сла́ва, и ны́не, пра́здника, глас то́йже:

Кто дово́льно по досто́инству пе́ти возмо́жет,/ от А́нны неизре́ченно младе́нствующую Де́ву?/ го́ры у́бо и хо́лми, сла́дость иска́пайте днесь,/ всех бо Жи́знь и Очище́ние млеко́м пита́ется,// Богоро́дица Чи́стая.

На стихо́вне стихи́ры священному́ченика Уа́ра, глас 7:

Презре́в вре́менная,/ святы́й священному́чениче Уа́ре,/ и на суди́щи му́жески испове́дав Христа́,/ вене́ц му́ченический от Него́ прия́л еси́/ и ны́не, име́я дерзнове́ние,/ Того́ моли́, я́ко Бо́га Всеси́льна,/ па́ству Ли́пецкую утверди́ти// и мир умири́ти.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Всехва́льне священному́чениче Уа́ре,/ ничто́же тя разлучи́ от любве́ Христо́вы:/ ни сро́дство, ни дру́жество, ни благ земны́х обеща́ние,/ ни заточе́ния и сме́рти преще́ние,/ я́ко бо сокро́вища му́ки вмени́в,/ Христу́ сораспя́лся еси́,// Того́ моли́ спасти́ ду́ши на́ша.

Стих: Честна́ пред Го́сподем// смерть преподо́бных Его́.

Священному́чениче Уа́ре богому́дре,/ а́нгеле Це́ркве Ли́пецкия,/ тя ни земля́ потаи́ла есть,/ ни зло́ба люде́й богопроти́вных сокры́ла есть,/ но отверзо́шася тебе́ ра́йския две́ри,/ и в со́нме новому́ченик Христу́ предсто́иши,/ моли́ за па́ству твою́,// ве́рою твоя́ страда́ния почита́ющую.

Сла́ва, новому́чеников, глас 2.

Подо́бен: Ки́ими похва́льными венцы́:

Ки́ими похва́льными венцы́/ увязе́м новому́ченики Христо́вы?/ разделе́нныя телесы́ и совоку́пленныя ду́хом,/ новозакла́нныя а́гнцы от земли́ Ру́сския:/ о́ви у́бо без ми́лости убие́ни бы́ша,/ о́ви же во изгна́ниих и темни́цах безве́стно умро́ша:/ сих бо вои́стину досто́йно безсме́ртныя сла́вы венцы́ венча́ет Христо́с Бог наш,// име́яй ве́лию ми́лость.

И ны́не, пра́здника, глас то́йже:

Днесь Всенепоро́чная Чи́стая произы́де от непло́дове,/ днесь вся́ческая ра́дуются в Тоя́ рождестве́./ Ада́м уз разреша́ется,/ и Е́ва кля́твы свободи́ся,/ Небе́сная вся веселя́тся,/ и мир челове́ком да́руется./ Мы же, славосло́вяще, вопие́м:/ сла́ва в Вы́шних Бо́гу, и на земли́ мир,// в челове́цех благоволе́ние.

Тропа́рь святы́х, пи́сан на вели́цей вече́рни.

Сла́ва, и ны́не, пра́здника.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8: пра́здника 3, и святы́х 5.

Стихи́ры святы́х, глас 1.

Подо́бен: О, ди́вное чу́до:

О, ди́вное чу́до!/ Собо́р святы́х в земли́ Ли́пецкой явля́ется днесь/ и моли́твенницы к Бо́гу те́плии святи́и сро́дницы нам быва́ют,/ весели́теся, гра́ди и ве́си земли́ на́шея,/ гра́жданы возрасти́вшия Небе́снаго Ца́рствия;/ возопии́м, ве́рнии, таковы́я иму́ще в беда́х засту́пники:/ собо́ре святы́х, ра́дуйся,/ предста́тельством бо ва́шим Госпо́дь подае́т лю́дем Свои́м// спасе́ние и ве́лию ми́лость.

О, ди́вное чу́до!/ В земли́, я́же дре́вле пуста́ и окра́инна бысть,/ иде́же неве́рных и разбо́йник шата́ния,/ иде́же непоко́рство и нра́вы же́стоки,/ та́мо ра́йская жизнь процвете́ от преподо́бных и святы́х Твои́х, Го́споди,/ ти́и бо ожесте́вшая людска́я сердца́ теплото́ю ве́ры оживи́ша,/ плодоно́сны сия́ соде́лаша/ и при́сно мо́лят Тя, Христе́,// пода́ти нам ве́лию ми́лость.

И́ны стихи́ры, глас 3:

Святи́телей Христо́вых Ти́хона и Уа́ра,/ Ли́пецкия земли́ украше́ния, днесь воспои́м:/ пе́рваго, я́ко основа́ние,/ ду́хом любве́ Христо́вы ча́да Це́ркве породи́вшаго,/ втора́го же, я́ко увенча́ние,/ во дни гоне́ний па́ству от раско́ла и собла́знов сохра́ньшаго,/ ти́и бо в со́нме святи́телей земли́ Ли́пецкия,/ мо́лят Христа́ Бо́га// Оте́честву своему́ в ми́ре спасти́ся.

А́нгельскаго жития́ возжеле́вше,/ преподо́бнии отцы́ и ма́тери на́ша,/ Иларио́не затво́рниче, Иоа́нне блаже́нне,/ ста́рицы Да́рие и Серафи́мо,/ и вси, в земли́ на́шей преподо́бно пожи́вшии,/ вы уте́шителие и наста́вницы лю́дем яви́стеся,/ неду́гов цели́телие, бесо́в прогони́телие// и моли́твенницы о душа́х на́ших.

Святы́х новому́чеников и испове́дников па́мять пра́зднующе,/ прииди́те, вси лю́дие, почти́м:/ архипа́стыри и па́стыри,/ мона́хи и мирски́я,/ му́жы и жены́ немощны́я,/ ти́и бо, руга́ния и ра́ны ни во что́же вмени́вше/ и по́двигом до́брым подвиза́вшеся,/ подо́бницы страсте́м Спа́са Христа́ яви́шася,// ны́не же мо́лятся о душа́х на́ших.

Сла́ва, глас 5.

Подо́бен: Ра́дуйся, Живоно́сный Кре́сте:

Ра́дуется днесь оби́тель Задо́нская,/ благослове́нием Богома́тере осене́нная,/ и свети́льником вели́ким Ти́хоном просла́вленная,/ с не́юже ликовству́ют и про́чия оби́тели земли́ Ли́пецкия,/ подви́жников и ста́рцев мно́жество возрасти́вшия./ Мы же, днесь слу́жбу соверша́юще/ и гробо́м святы́х оте́ц и ма́терей на́ших/ любе́зно покланя́ющеся, мо́лимся:/ упоко́й, Го́споди, послужи́вшия Тебе́ ве́рно/ и моли́твами их це́рквам благостоя́ние да́руй// и душа́м на́шим мир и ве́лию ми́лость.

И ны́не, пра́здника, глас 2:

Что шум пра́зднующих быва́ет?/ Иоаки́м и А́нна торжеству́ют та́йно,/ ра́дуйтеся с на́ми, глаго́люще, Ада́ме и Е́во, днесь:/ я́ко и́мже дре́вле преступле́нием затвори́ша рай,/ плод благосла́вен нам даде́ся,/ Богоотрокови́ца Мари́я,// отверза́ющи его́ всем вход.

Вход. Проки́мен дне. Чте́ния 3.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х./ Да позна́ете и ве́руете Ми/ и разуме́ете, я́ко Аз есмь,/ пре́жде Мене́ не бысть ин Бог, и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Иису́са, сы́на Сира́хова, чте́ние (глава́ 44, 1–14):

Восхва́лим у́бо му́жи сла́вны и отцы́ на́ша в бытии́./ Мно́гу сла́ву созда́ Госпо́дь в них вели́чием Свои́м от ве́ка./ Госпо́дствующе во ца́рствиих свои́х/ и му́жие, имени́ти си́лою, сове́тующе ра́зумом свои́м,/ провеща́вшии во проро́чествах,/ старе́йшины люди́й в сове́тех/ и в ра́зуме писа́ния люди́й./ Прему́драя словеса́ в наказа́нии их,/ и́щуще гла́са мусики́йска и пове́дающе по́вести во писа́ниих:/ му́жие бога́тии, обдарова́ни кре́постию,/ ми́рно живу́ще в жили́щих свои́х./ Вси си́и в ро́дех просла́влени бы́ша/ и во днех их похвала́./ Суть от них, и́же оста́виша и́мя, е́же пове́дати хвалы́:/ и суть, и́хже несть па́мяти, и погибо́ша, я́ко не су́щии,/ и бы́ша, я́ко не бы́вше, и ча́да их по них./ Но си́и му́жие ми́лостивии,/ и́хже пра́вды не забве́ны бы́ша:/ с се́менем их пребу́дет до́брое насле́дие,/ исча́дия их в заве́тех:/ оста́ся се́мя их, и ча́да их по них:/ до ве́ка пребу́дет се́мя их,/ и сла́ва их не потреби́тся:/ телеса́ их в ми́ре погребе́на бы́ша,/ а имена́ их живу́т в ро́ды./ Прему́дрость их пове́дят лю́дие,/ и похвалу́ их испове́сть Це́рковь.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки. / Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ра хра́ма, и новому́чеников, глас 6:

А́ще и разоре́ни бы́ша хра́ми/ и оби́тели и́ноческия от рук беззако́нных,/ и вси, хотя́щии благоче́стно жи́ти, гони́ми бы́ша,/ оба́че не оскуде́ земля́ Ру́сская испове́дники но́выми,/ и́же от всех преде́л ея́/ благоуха́ние по́двигов свои́х/ и кровь страда́ния Бо́гу принесо́ша./ И ны́не, просла́вльшему их Христу́ предстоя́ще,/ мо́лятся приле́жно о нас,// любо́вию соверша́ющих све́тлое их торжество́.

Сла́ва, глас то́йже:

Благослове́н еси́, Го́споди Бо́же оте́ц на́ших,/ спаса́яй упова́ющия на Тя,/ И ны́не не отста́ви ми́лости Твоея́ от нас,/ возлю́бленных Твои́х ра́ди,/ даждь сла́ву и́мени Твоему́, Го́споди,/ и да разуме́ют вси,/ я́ко Ты еси́ Госпо́дь Бог еди́н// и сла́вен по всей вселе́нней.

И ны́не, пра́здника, или́ Богоро́дичен, глас то́йже:

Благослове́нна еси́, Влады́чице,/ Держа́вная Засту́пнице ро́да на́шего,/ страда́льцев утвержде́ние и ве́рных похвало́./ И ны́не не отста́ви ми́лости Твоея́ от нас,/ спаса́ющи рабы́ Твоя́ от вся́ких лю́тых,/ да сла́вится свято́е и благослове́нное и́мя Твое́// по всей Ру́сстей земли́.

На стихо́вне стихи́ры святы́х, глас 2.

Подо́бен: До́ме Евфра́фов:

Земле́ Придонска́я,/ гра́де дре́вний Е́льче,/ не ктому́ нарече́шися непло́ды,/ се бо ве́лий сонм святы́х твои́х,// я́коже плод кра́сный, Спа́су прино́сится.

Стих: Го́споди Го́сподь наш,// я́ко чу́дно и́мя Твое́ по всей земли́.

Ди́вен Бог во святы́х Свои́х,/ в ко́емждо обновля́яй дарова́ния,/ и́миже Це́рковь украша́ется,/ и во всех Еди́н Сый,// прославля́емый во ве́ки.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Прииди́те, ве́рнии,/ просла́вим любо́вию/ избра́нныя от ро́да на́шего,/ предстоя́щия за ны Христу́// и Оте́чество от бед избавля́ющия.

Сла́ва, глас и подо́бен то́йже:

Свят еси́,/ О́тче, Сы́не и Ду́ше,/ во святы́х почива́яй/ и те́ми прославля́емый// челове́ком во спасе́ние.

И ны́не, пра́здника, глас и подо́бен то́йже:

Храм Бо́жий,/ Еди́на Богоро́дица,/ от непло́дове/ и неражда́ющия происхо́дит,// и ра́дуется Ада́м взыва́я.

Или́ и́на стихи́ра пра́здника, глас то́йже. Самогла́сен:

Пронарече́нная всех Цари́ца,/ Бо́жие оби́телище,/ от непло́дныя днесь утро́бы про́йде, А́нны сла́вныя,/ Присносу́щнаго Существа́ Боже́ственное пребыва́лище,/ Е́юже безсту́дный ад попра́ся,/ и всеро́дная Е́ва в тве́рдую жизнь вво́дится./ Той досто́йно возопии́м:// блаже́нна Ты в жена́х, и Плод чре́ва Твоего́ благослове́н.

Тропа́рь собо́ра святы́х, глас 4:

Днесь ра́дуется све́тло Ли́пецкая земля́,/ прославля́ющи святы́я своя́,/ ве́рно Го́сподеви послужи́вшия/ и Це́рковь Ру́сскую украси́вшия./ О преди́внии сро́дницы на́ши,/ святи́телие, преподо́бнии, новому́ченицы и испове́дницы,/ в по́двизех и страда́ниих Бо́гу угоди́вшии/ и о́браз благоче́стия в житии́ нам показа́вшии,/ Оте́чество на́ше соблюди́те в ми́ре и благоде́нствии/ и на пути́ земна́го стра́нствия на́шего/ те́плии засту́пницы и споспе́шницы бу́дите,/ посреде́ искуше́ний же и бед// к ве́чному Оте́честву нас приводя́щии.

А́ще изво́лит настоя́тель твори́ти бде́ние, на благослове́нии хле́бов тропа́рь собо́ра святы́х, два́жды, и тропа́рь пра́здника, еди́ножды. А́ще полиеле́й, тропа́рь святы́х, еди́ножды. Сла́ва, тропа́рь священному́ченика Уа́ра. И ны́не, пра́здника.

Тропа́рь священному́ченика Уа́ра, глас 4:

Правосла́вныя ве́ры ревни́телю,/ раско́лов искорени́телю и безбо́жия обличи́телю,/ моли́твою и трудо́м Творцу́ твоему́ да́же до кро́ве послужи́л еси́,/ пе́рвый святи́телю Ли́пецкий Уа́ре,// о нас Христу́ Бо́гу моли́ся.

На у́трени

На Бог Госпо́дь: тропа́рь пра́здника, еди́ножды, и собо́ра святы́х, еди́ножды. Сла́ва, священному́ченика Уа́ра. И ны́не, пра́зника.

По 1-м стихосло́вии седа́лен новому́чеников, глас 4:

Чу́до ве́лие яви́ся нам в после́дния дни, я́ко моли́твами но́вых му́чеников призре́ Госпо́дь на смире́ние на́ше и возвели́чи Це́рковь Ру́сскую, воспева́ющую Бо́га, ди́внаго во святы́х Свои́х.

Сла́ва, и ны́не, пра́здника, глас то́йже:

Иу́до, велича́йся, и да весели́тся Дави́д: Ада́ме, обнови́ся, и да крепи́тся Леви́й, от ни́хже мне роди́ся Христо́с. Дви́гни цевни́цу, песнопи́сче, и глаго́ли: кто есть роди́вшаяся, Ю́же нарица́еши Дщерь? Пита́тельница есть Жи́зни на́шея, Ма́ти Христа́ Бо́га.

По 2-м стихосло́вии седа́лен святы́х, глас 8:

Апо́столов пропове́данием и отце́в догма́ты, преподо́бных терпе́нием и кро́вию новому́ченик утверди́вшеся, ве́рнии, мо́лим Ти ся, Всеще́дрый Бо́же: Це́рковь Ру́сскую необори́му сохрани́ до сконча́ния ве́ка.

Сла́ва, и ны́не, пра́здника (зри ни́же пи́сан),

или́ Богоро́дичен Страстны́я ико́ны, глас 8:

Днесь велича́ет ра́достно Спаси́теля Ли́пецк град, я́ко свет со́лнечный восприе́м чудотво́рную Твою́ ико́ну, Влады́чице Богоро́дице, и с любо́вию сла́вит Тя, Ма́терь Бо́жию,/ и ми́лости и цельбы́ Твоя́, на нас излия́нныя, я́ко повеле́ла еси́ обнести́ о́браз Твой чудотво́рный о́крест гра́да Ли́пецка, да очи́стится святы́нею Твое́ю возду́х от я́зи смертоно́сныя, и да возблагодаря́т вси лю́дие неизрече́нную любо́вь Святы́я и Неразде́льныя и Живонача́льныя Тро́ицы.

Или́ пра́здника, глас то́йже:

Обнови́ся, Ада́ме, ра́дуйся, Е́во, весели́ся, Дави́де, благоду́шствуй, А́нно, и́бо Ма́ти Зижди́теля твоего́ ражда́ется пресла́вно; лику́ет, обно́вльшися, вся земля́ и ра́дуется, оде́яна во оде́жду; всяк язы́к, лику́я, да вопие́т ны́не Мари́и: блаже́н дом Дави́дов, я́ко пита́ет Пита́тельницу Жи́зни на́шея.

Велича́ние:

Велича́ем вас,/ вси святи́и, в земли́ Ли́пецкой просия́вшии,/ гра́ды и ве́си на́ша доброде́тельми ва́шими озари́вшии// и о́браз спасе́ния нам светоявле́нно показа́вшии.

И́но велича́ние:

Велича́ем вас,/ вси святи́и, в земли́ Ли́пецкой просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние.

Возвеселя́тся вси упова́ющии на Тя, во век возра́дуются, и всели́шися в них.

И похва́лятся о Тебе́ лю́бящии и́мя Твое́.

Сей род и́щущих Го́спода, и́щущих лице́ Бо́га Иа́ковля.

Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их.

Изочту́ их, и па́че песка́ умно́жатся.

По полиеле́и седа́лен новому́чеников, глас 4:

Ева́нгельскаго се́яния плод стори́чный яви́шася му́ченицы, от преде́л земли́ на́шея в жи́тницу Небе́сную со́браннии, тех моли́твами в ми́ре глубо́це Це́рковь и страну́ на́шу Богоро́дицею соблюди́, Многоми́лостиве.

Сла́ва, и ны́не, пра́здника,

или́ Богоро́дичен Еле́цкия ико́ны, глас 4:

Днесь све́тло красу́ется дре́вний град Еле́ц, помина́я сла́вное чу́до Пресвяты́я Богоро́дицы: егда́ бо на сто́гнах первопресто́льныя Москвы́ ико́ну Ея́ чу́дную лю́дие моско́встии срета́ху, тогда́ Сама́ Влады́чица, на горе́ Аргама́чстей во гра́де Ельце́, на сре́тение нечести́вому Тамерла́ну изше́дши, гро́зное его́ наше́ствие вспять обрати́. Сего́ ди́внаго явле́ния изображе́ние на новопи́санней ико́не зря́ще и Засту́пницу на́шу за вся благодея́ния благодаря́ще, уми́льно Ей взыва́ем: не оста́ви нас, Ма́ти Бо́жия.

Степе́нна, 1-й антифо́н 4-го гла́са. Проки́мен, глас 4: Ра́дуйтеся, пра́веднии, о Го́споде,// пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя. Вся́кое дыха́ние: Ева́нгелие от Матфе́я, зача́ло 10.

По 50-м псалме́ стихи́ра, глас 6:

(Творе́ние святи́теля Афана́сия Ковро́вскаго)

Ежеле́тнюю па́мять днесь/ святы́х сро́дников на́ших соверша́юще,/ досто́йно сия́ да ублажи́м./ Ти́и вои́стину вся блаже́нства Госпо́дня проидо́ша:/ обнища́вше бо ду́хом, обогати́шася/ и, кро́тцы бы́вше, зе́млю кро́тких насле́доваша;/ пла́кавше, уте́шишася;/ алка́вше пра́вды, насы́тишася;/ ми́ловавше, поми́ловани бы́ша;/ чи́сти бы́вше се́рдцем, Бо́га я́коже мо́щно узре́ша;/ миротвори́вше, Боже́ственнаго сподо́бишася сыноположе́ния;/ гони́ми же и му́чими пра́вды ра́ди и благоче́стия бы́вше,/ на Небесе́х ны́не веселя́тся и ра́дуются,/ и приле́жно мо́лятся Го́сподеви// поми́ловатися Оте́честву на́шему.

Кано́н пра́здника на 6, и святы́х на 8, глас 8.

Песнь 1.

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́, я́ко Изба́вителю на́шему Бо́гу,// я́ко просла́вися.

Припе́в: Вси святи́и земли́ Ли́пецкия, моли́те Бо́га о нас.

Прииди́те, ве́рнии, согла́сно возвели́чим собо́р святы́х, от дре́вних родо́в и доны́не в земли́ на́шей Бо́гу послужи́вших и при́сно со А́нгелы Того́ воспева́ющих: я́ко просла́вися.

Васи́лия, пе́рваго архипа́стыря Ряза́нскаго, по вода́м ди́вно прише́дшаго, Ио́ну, Феодори́та и Мисаи́ла, от язы́к убие́ннаго, Филаре́та же, Гаврии́ла и Меле́тия, по́слежде в Ряза́ни епи́скопствовавшия, я́ко святи́тели земли́ на́шея днесь ублажи́м.

Святи́телю о́тче Алекси́е, Моско́вский чудотво́рче, Руси́ Правосла́вныя свети́льниче, град Еле́ц благослове́нием твои́м утверди́вый, ны́не и нас от бед, скорбе́й и боле́зней сохрани́.

Митрофа́не, архипа́стырю гра́да Воро́нежа, па́стве твое́й, царю́ и Оте́честву трудолю́бно служа́, преще́ния госуда́рева не убоя́лся еси́ и и́долы упраздни́л еси́, Еди́ному Бо́гу поя́: я́ко просла́вися.

Питири́ме, а́нгеле Це́ркве Тамбо́вския и ди́вный святи́телю, ни́вы Христо́вы де́лателю, язы́ческих обы́чаев и раско́ла искорени́телю, ны́не тя почита́ющим благослове́ние и мир подава́й.

Богоро́дичен: Прииди́те, собери́теся, правосла́внии лю́дие, в пречестны́й храм Всенепоро́чныя Влады́чицы и возопи́йте, уми́льно моля́щеся, к честно́му Ея́ о́бразу взира́юще: Богоро́дице Безневе́стная, восхваля́ющия Тя спаса́й.

Песнь 3.

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.

Ти́хоне, свети́льниче Воро́нежский, Еле́цкий и Задо́нский, па́стырем наста́вник, си́рым и убо́гим оте́ц яви́лся еси́, кро́тостию а́нгельскою и моли́твою чистоту́ стяжа́в, уте́шитель и моли́твенник был еси́ к тебе́ притека́ющим.

Святи́телю Анто́ние, любому́дрия и смире́ния о́бразе, в пеще́ры Ки́евския, я́ко во учи́лище духо́вное, от ми́ра прите́к, та́мо небе́сныя жи́зни навы́кл еси́, на ка́федру же земли́ Воро́нежския возведе́н, мо́щи святи́теля Митрофа́на обрести́ сподо́бился еси́. С ни́мже вку́пе тя прославля́ем.

Святи́тели прему́дрыя Инноке́нтия Херсо́нскаго, златоу́ста Це́ркве Ру́сския, и Феофа́на, затво́рника Вы́шинскаго, благоче́стия учи́тели и чистоты́, я́ко цве́ты благоуха́нныя земли́ на́шея Бо́гу в моли́тву прино́сим.

Прииди́те, лю́дие, преподо́бныя отцы́ и ма́тери на́ша восхва́лим, и́же, а́нгельски во пло́ти пожи́вше и моли́твами свои́ми Небеса́ к земли́ приклони́вше, ны́не предста́тельствуют пред Бо́гом о спасе́нии душ на́ших.

Иларио́на преподо́бнаго воспои́м, стра́нника на земли́ и прише́льца, в де́брех и верте́пех скита́вшагося, последи́ же в затво́ре, в поще́нии и слеза́х по вся дни Бо́гу предстоя́вшаго и ны́не све́том дарова́ний духо́вных нас озаря́ющаго.

Богоро́дичен: Всечестну́ю и чудотво́рную ико́ну Влади́мирскую, я́ко заступле́ние кре́пко и сте́ну неруши́му, ру́сстии лю́дие стяжа́хом, те́мже и мо́лим Ти ся, Присноде́во, побе́ду на враги́ Оте́честву на́шему дарова́ти.

Конда́к и и́кос пра́здника.

Седа́лен святы́х, глас 4:

И́же доброде́телей подви́жницы, от Ли́пецкия земли́ возсия́вше, я́ко и́стиннии во́ини Христа́ Бо́га, во вся́ком чи́не и вся́ким по́двигом Тому́ угоди́вше, Ду́ха Свята́го сосу́ди честни́и яви́стеся, Его́же де́йствием све́тло укра́шени, ве́рныя ко спасе́нию наставля́ете, но, я́ко иму́ще дерзнове́ние ко Святе́й Тро́ице, помина́йте земно́е Оте́чество ва́ше и не забу́дите посеща́ти ча́да своя́, ве́рою и любо́вию вас почита́ющая.

Сла́ва, и ны́не, пра́здника:

От ко́рене Иессе́ева, и от чресл Дави́довых, Богоотрокови́ца Мариа́м, ражда́ется днесь нам: ра́достию бо ра́дуются вся́ческая и обновля́ются. Сра́дуйтеся ку́пно, не́бо и земля́; восхвали́те Ю́, оте́чествия язы́к. Иоаки́м весели́тся, и А́нна торжеству́ет, зову́щи: непло́ды ражда́ет Богоро́дицу, и пита́тельницу Жи́зни на́шея.

Песнь 4.

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог.// Сла́ва си́ле Твое́й, сла́ва снизхожде́нию Твоему.

Ли́пецкия земли́ украше́ние, ста́рче Амвро́сие, Иларио́ном затво́рником благослове́нный, и преподо́бне Некта́рие, от гра́да Ельца́ во оби́тель О́птину благода́тию при́званный, Оте́чества ва́шего не забу́дите.

Иоа́нна Сезе́новскаго блаже́ннаго, нра́вом младе́нствовавша, умо́м же му́жа соверше́нна ве́дуще, Христо́ви де́вство свое́ сохра́ньша и Тому́ сораспя́вшася во́лею, со Иларио́ном Троеку́ровским и подви́жники Задо́нскими и Еле́цкими, ве́рнии, вси похва́лим.

Да возра́дуется ны́не Шо́вская весь, моли́твами Иоа́нна блаже́ннаго добропло́дна я́вльшися, из тоя́ бо изы́де Силуа́н, ди́вный подви́жник горы́ Афо́нския, и́же, плач Ада́мов в се́рдце свое́ восприе́м, о спасе́нии ми́ра при́сно моля́шеся.

Послуша́ния та́йну позна́вши, Да́рие преподо́бная, от у́тра жития́ твоего́ да́же до ве́чера де́лания сего́ не оста́вила еси́, те́мже с наста́вником твои́м Иоа́нном тя ублажа́ем.

Пе́рвую игу́мению Сезе́новскую Серафи́му почти́м, и́нокиням му́друю наста́вницу, к лю́дем Бо́жиим в любви́ не оскудева́ющую.

Богоро́дичен: Дави́д пред киво́том ликовству́ет, леви́ти же благогове́йно слу́жат, мы же Тя, Богороди́тельнице Чи́стая, усе́рдно мо́лим, гла́сы моле́бными приле́жно вопию́ще: ра́дуйся, Засту́пнице гра́да на́шего.

Песнь 5.

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// И́мя Твое́ имену́ем.

Егда́ пре́дал еси́ нас, Влады́ко, в ру́ки враго́в беззако́нных и ме́рзких отсту́пников, смире́ни бы́хом по всей земли́ грех ра́ди на́ших, тогда́ ве́рнии сы́ны и дще́ри Ру́сстии всех Соде́теля и Спа́са Тя испове́даху и кровь свою́ непоро́чно Тебе́ принесо́ша во всесожже́ние и же́ртву прия́тну.

Иоа́нна Царскосе́льскаго, я́ко нача́ток новому́чеников Це́ркве Ру́сския, земля́ Данко́вская прино́сит Ти, Го́споди, свое́ порожде́ние. Того́ моли́твами злове́рие и собла́зны от нас отжени́.

Воро́нежския и Задо́нския земли́ первому́ченик яви́лся еси́, Ти́хоне свяще́нне, по соверше́нии бо Безкро́вныя Же́ртвы сам, я́ко а́гнец, пожре́н был еси́ и, от слуг сатани́нских на Ца́рских врате́х хра́ма обе́шен, во врата́ Ца́рствия Небе́снаго невозбра́нно вшел еси́.

Петра́ священному́ченика, ка́меня ве́ры и чистоты́ сокро́вище, уста́вов же церко́вных блюсти́теля до́бляго днесь воспои́м, во у́зах Солове́цких па́ствы своея́ любо́вию не оста́вивша и ны́не во святы́х моще́х па́ки к нам возврати́вшася.

Заха́рие сла́вный, по святи́тели Петре́ епи́скопский жезл и терно́вый вене́ц прие́мый, от мо́ря Бе́лаго до пусты́нь Казахста́нских му́ченическими стопа́ми проше́л еси́, та́мо и смерть вкуси́л еси́. Ны́не па́ки нас собира́еши, глаго́ля: да бу́дем вси еди́ни о Го́споде, в сем бо спасе́ние на́ше.

Богоро́дичен: Ны́не у́бо приступи́те с весе́лием, богоизбра́нное ста́до, ру́сстии собо́ри, ко Пречи́стей Бо́жией Ма́тери и честны́й Ея́ о́браз любе́зно приими́те, се бо Исто́чник Неисчерпа́емый, боже́ственныя во́ды неоску́дно точа́щий, Ю́же, ве́рнии, пое́м и велича́ем.

Песнь 6.

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:// возведи́ от тли живо́т мой, Благоутро́бне Го́споди.

Пе́рвый святи́телю Ли́пецкий Уа́ре, па́ствы своея́ утвержде́ние, столпа́ души́ твоея́ ничто́же поколеба́ти возмо́же, в любви́ бо Спа́са Христа́ утвержде́н быв, Того́ да́же до сме́рти не отре́клся еси́.

Святи́телю Се́ргие, гра́ду Ельцу́ украше́ние, у́зы Караганди́нския любве́ твоея́ не связа́ша, та́мо бо па́ству твою́ и убие́нныя за Христа́ моли́твенно помина́ше, за сие́ и на смерть осужде́н был еси́.

Священному́чениче Кири́лле, Це́ркве Ру́сския сла́во, Патриа́рха Ти́хона ве́рный сподви́жниче, ты, в стране́ Тамбо́встей Христу́ послужи́в, святи́теля ея́ Питири́ма чу́днаго в ли́це святы́х просла́вил еси́. С ни́мже тя ны́не благогове́йно почита́ем.

Святи́теля Дими́трия, па́ству Тамбо́вскую от лжеуче́ний но́вых сохра́ньшаго и за Христа́ смерть претерпе́вшаго, со Амвро́сием преподобному́чеником и ины́ми страда́льцы днесь ублажи́м.

Мака́рие священному́чениче, убива́ющих тя благослови́вый, Серафи́ме, лжепа́стырей обличи́телю, Нико́лае, кро́ткий испове́дниче и чудотво́рче, Еле́цкую зе́млю окормля́вшии, омофо́ром моли́тв ва́ших нас покрыва́йте.

Богоро́дичен: Се ны́не весе́лие приближа́ется и скорбь потребля́ется, ве́рнии же спаса́ются и, я́ко от исто́чника, ра́дость почерпа́юще, уми́льно воспева́ют: ра́дуйся, Чи́стая Влады́чице, спасе́ния на́шего Глави́зно.

Конда́к, глас 3:

Ны́не Це́рковь Ру́сская/ прославля́ет собо́р святы́х земли́ Ли́пецкия,/ Престо́лу Пресвяты́я Тро́ицы предстоя́щих/ и о спасе́нии на́шем при́сно хода́тайствующих,/ и́мже и мы благода́рственная пе́ния прино́сим и согла́сно вопие́м:/ ра́дуйтеся, преди́внии чудотво́рцы// и те́плии о нас пред Бо́гом моли́твенницы.

И́кос:

Егда́ разделя́ше Вы́шний язы́ки и разсе́я сы́ны Ада́мовы, тогда́ поста́ви преде́лы язы́ков и вся́кому ме́сту, гра́ду и стране́ А́нгелы Храни́тели дарова́. Той же, я́ко Промысли́тель и Всеблаги́й Бог, Ду́хом любве́ Своея́ созида́яй Це́рковь Ру́сскую, моли́тву святы́х сро́дников на́ших о земне́м Оте́честве ны́не прие́млет и нас со А́нгельскими си́лами собира́ет в торжестве́ их согла́сно пе́ти: ра́дуйтеся, преди́внии чудотво́рцы и те́плии о нас пред Бо́гом моли́твенницы.

Песнь 7.

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:// благослове́н еси́, Бо́же оте́ц на́ших.

О любе́зная чето́, еди́н дух во двою́ телесу́ иму́щая, священному́чениче Ти́хоне и Хиони́е испове́днице, за Христа́ пострада́вшии, о́браз честна́го супру́жества нам яви́ли есте́.

Се́ргие правдолюби́ве, испове́дниче Христо́в, во у́зах Солове́цких мно́гая страда́ния претерпе́вый, по́слежде град Лебедя́нь служе́нием твои́м освяти́вый, помина́й любо́вию чту́щия тя.

О, мно́гаго долготерпе́ния твоего́, священному́чениче Михаи́ле! Егда́ бо су́щий с тобо́ю в заточе́нии разбо́йник му́чаше тя и власы́ главы́ твоея́ исто́рже, ты сего́, кро́тостию твое́ю к покая́нию обрати́в, ева́нгельски прости́л еси́ и от ка́зни изба́вил еси́.

Алекса́ндре, па́стырю ве́рный, со диа́коном Михаи́лом, Ли́пецкия земли́ прозябе́ние! Вы, во у́зах Караганди́нских та́йно моли́твы твори́вше, за сие́ и убие́ние прия́сте. Ны́не же, я́ко а́гнцы новозакла́ннии, Христу́ принесо́стеся.

Уче́нии и де́лы Христа́ пропове́давше, па́стырие свяще́ннии Алекса́ндре, Се́ргие, Михаи́ле, Алекса́ндре, Васи́лие, Исма́иле, Михаи́ле, Иоа́нне, Нико́лае и ини́и, и́хже имена́ Бо́гу ве́дома, да́же до сме́рти Спа́су после́довасте и зе́млю на́шу кро́вию свое́ю обагри́сте.

Богоро́дичен: Приими́ мольбы́ раб Твои́х, Пречи́стая Де́во Богоро́дице, и бу́рю лю́тых страсте́й моли́твами Твои́ми утиши́ и сове́ты враго́в проти́вных разжени́, напа́дающих на ста́до Твое́, Всенепоро́чная Влады́чице.

Песнь 8.

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки.

Преподо́бне Гео́ргие испове́дниче, от земли́ Еле́цкия я́ко оре́л возлете́вый, под кро́вом ста́рцев О́птинских воспита́нный, и благода́ть ста́рчества от них восприе́мый, нас, чад твои́х, крила́ми любве́ и моли́тв покры́й.

Преподобному́чениче Васи́лие, Покро́вскаго монастыря́, и́же в Данко́ве, священноархимандри́те, моли́твами твои́ми укрепи́ благоче́стно подвиза́ющихся во оби́телех святы́х.

Преподобному́чениче Пантелеи́моне, дре́внему цели́телю и врачу́ тезоимени́те, со ста́рцы О́птинскими моли́ Многоми́лостиваго Бо́га от страсте́й и неду́гов нам исцели́тися.

Под кро́вом святы́я оби́тели Задо́нския обе́ты мона́шеския прине́с, Фео́доре любоче́стне, сия́ до конца́ соблю́л еси́, изгна́ние же, заточе́ние и смерть претерпе́в, ны́не у Престо́ла Бо́жия моли́твы о нас непреста́нно возно́сиши.

Му́ченицы святы́я А́нну и Евфроси́нию, в земли́ Лебедя́нстей до́мы и ча́да ма́лая Христа́ ра́ди оста́вльшия, вку́пе с му́ченицами Ната́лиею, Алекса́ндрою и Ната́лиею, на страда́ния и смерть себе́ угото́вльшия, с ни́ми же и Ната́лию преподобному́ченицу от гра́да Ельца́, я́ко неве́сты Христо́вы сла́вныя днесь ублажи́м.

Богоро́дичен: Ка́ко Тя, Де́во, по достоя́нию воспои́м, По́мощь тве́рдую, Храни́тельницу жи́зни на́шея и Хода́таицу непрело́жну к Сы́ну Твоему́ и Бо́гу на́шему. Его́же воспева́ем и превозно́сим во ве́ки.

Песнь 9.

Ирмо́с: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я,// непреста́нно велича́ем.

Любо́вию Христо́вою па́ству свою́ объе́млюще, святи́телие богому́дрии, Ду́ха еле́й в сосу́дех се́рдца стяжа́ли есте́, оби́тельми же и хра́мы зе́млю на́шу украси́вше, плод духо́вный в ней возрасти́ли есте́. Те́мже любо́вию вас велича́ем.

Пло́ти, ми́ру и диа́волу не порабо́тавше, преподо́бнии, любо́вию к Бо́гу распя́ли есте́ плоть со страстьми́ и похотьми́ и, чи́сте Чи́стому предстоя́ще, при́сно мо́лите о спасе́нии на́шем.

Ми́ру, горды́нею одержи́мому, посмея́вшеся, блаже́ннии Христа́ ра́ди юро́дивии, и му́дрость ве́ка сего́ презре́вше, та́йны ве́ка гряду́щаго от Бо́га позна́сте и на неви́димыя враги́ си́лу прия́сте. Огражда́йте нас при́сно моли́твами ва́шими.

Зло́бы богопроти́вныя не убоя́вшеся, новому́ченицы и испове́дницы сла́внии, страда́нием и сме́ртию воскре́сшаго Христа́ пропове́дасте, любо́вию побе́ду прие́мше, и нас люби́ти враги́ своя́ научи́те.

Песнь благода́рную от нас приими́те, Сио́на Го́рняго гра́ждане, зе́млю на́шу имены́ и по́двиги ва́шими, я́ко Не́бо соде́лавшии, любо́вию к Бо́гу и бли́жним согре́йте хла́дная сердца́ на́ша и ко спасе́нию напра́вите моли́твами ва́шими.

Богоро́дичен: Ра́дости Хода́таице, да́руй нам ра́зум, е́же вопи́ти Тебе́, Богоро́дице Чи́стая: ра́дуйся, Храни́тельнице на́ша, держа́во и огражде́ние, и спаси́тельное прибе́жище.

Свети́лен святы́х:

Я́ко благоуха́нныя цве́ты ра́йския,/ вся святы́я, в земли́ Ли́пецкой ди́вно прозя́бшия/ и Це́рковь Ру́сскую изря́дно украси́вшия, днесь почти́м/ и Бо́га, просла́вльшаго их, велегла́сно просла́вим.

Сла́ва, свети́лен священному́ченику Уа́ру.

Подо́бен: Черто́г Твой:

Черто́г Твой ви́дев, Спа́се, украше́нный,/ священному́ченик Уа́р му́жественне подвиза́ся/ и, ри́зою святи́тельства облече́н,/ кро́вию муче́ния украси́ся./ Того́ моли́твами, Христе́, просвети́ и спаси́ ны.

Сла́ва, и ны́не, пра́здника: От непло́дныя днесь А́нны цвет произы́де Богоро́дица:

На хвали́тех стихи́ры на 6: пра́здника 3 и святых 3.

Стихи́ры святы́х, глас 4.

Подо́бен: Дал еси́ зна́мение:

Избра́ннии от Бо́га святи́и сро́дницы на́ши,/ в ми́ре пожи́вшии,/ оба́че не от ми́ра су́щии,/ вы есте́ соль земли́ на́шея,/ ва́ми бо гра́ди и ве́си на́ша освяща́ются,/ пути́ стро́потныя исправля́ются,/ заблу́ждшия к покая́нию обраща́ются/ и вси́ прославля́ют ди́внаго во святы́х Свои́х Иису́са Всеси́льна,// Спа́са душ на́ших. Два́жды.

И́же ча́да похваля́ет,/ весели́т отца́ их,/ та́ко и святы́я прославля́яй/ Бо́га сла́вит в них почива́юща/ и Це́рковь те́ми украша́юща./ Те́мже, бра́тие, любо́вию просла́вим святы́я земли́ на́шея,/ я́ко сы́ны и дще́ри Отца́ Небе́снаго,// ко Оте́честву ве́чному нас возводя́щия.

Сла́ва, глас то́йже:

Святи́телие, преподо́бнии и пра́веднии,/ блаже́ннии, испове́дницы и му́ченицы,/ имено́ваннии и безыме́ннии,/ явле́ннии и неявле́ннии,/ я́коже отре́би ми́ру бы́сте/ и попра́ние сыно́м ве́ка сего́,/ оба́че, сла́ву мно́гу от Бо́га прие́мше,/ любо́вию вас пою́щия не пре́зрите,/ расточе́нныя собери́те, па́дшия возста́вите,// вы бо есте́ Святы́я Руси́ утвержде́ние.

И ны́не, пра́здника, глас то́йже:

Всеми́рная ра́дость от пра́ведных возсия́ нам,/ от Иоаки́ма и А́нны Всепе́тая Де́ва,/ я́же премно́гия ра́ди чистоты́ храм Бо́жий одушевле́нный быва́ет,/ и еди́на вои́стину Богоро́дица познава́ется./ Тоя́ моли́твами, Христе́ Бо́же,/ мир ми́ру низпосли́,// и душа́м на́шим ве́лию ми́лость.

Славосло́вие вели́кое. И отпу́ст.

На Литурги́и

Блаже́нны от кано́на пра́здника, песнь рядова́я на 4, и святы́х, Песнь 6.-я на 4. Проки́мен святы́х, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Сохрани́ мя, Го́споди, я́ко на Тя упова́х. Апо́стол ко Евре́ем, зача́ло 329 (гл. 11, ст. 23 – гл. 12, ст. 2). Да́же до: Взира́юще на Нача́льника ве́ры и Соверши́теля Иису́са. Аллилу́ия, глас 4: Бо́же, уши́ма на́шима услы́шахом и отцы́ на́ши возвести́ша нам. Стих: Спасл еси́ нас от стужа́ющих нам и ненави́дящих нас посрами́л еси́. Ева́нгелие от Матфе́я, зача́ло 11. Прича́стен: Благоволи́т Госпо́дь в лю́дех Свои́х, и вознесе́т кро́ткия во спасе́ние.

Моли́тва

О, святи́и сро́дницы на́ши, трудолю́бне подвиза́вшиися, се́мя сло́ва Бо́жия в земли́ на́шей возрасти́вшии, и плод кра́сный доброде́телей Бо́гу прине́сшии! Ны́не призыва́ем вас, уго́дницы Бо́жии, и́же пусты́ни Казахста́нския, брега́ Беломо́рския, о́стровы Солове́цкия и ины́я преде́лы по́двиги и страда́нии свои́ми освяти́вшии, ны́не же в Го́рнем Иерусали́ме Тро́ице Святе́й предстоя́щии. Ве́мы бо, ве́мы, я́ко любы́ ва́ша николи́же преста́нет. Сего́ ра́ди, дерза́юще, мо́лим вас: бу́дите нам наста́вницы ко спасе́нию, испроси́те у Всеще́драго Бо́га на́шего всяк дар, коему́ждо благопотре́бен, наипа́че же дар смире́ния и любве́, да тем Христо́ви и друг дру́гу служа́ще, в братолю́бии соедини́мся и ку́пно с ва́ми просла́вим Отца́, и Сы́на, и Ду́ха Свята́го. Ами́нь.

Источник: Текст утвержден Священным Синодом Русской Православной Церкви 29 июля 2017 года (журнал № 65)

Месяца сентября в 12-й день

На велицей вечерни

На Господи, воззвах: стихиры на 8, глас 8.

Подобен: О, преславнаго чудесе:

О, преславнаго чудесе!/ Во дни гонений лютых на Церковь Русскую/ явися земли нашей теплый заступник,/ блаженный и богомудрый Алексий,/ иже земнаго пристанища отвержеся,/ во еже водворитися в чертозех Небесных./ Темже к нему притекающии исцеления многоразличная приемлют/ и разрешение нуждных обстояний,/ творяще летнюю память его.

О, блаженне Алексие!/ Яко доблий воин Христов,/ отложив мира пристрастие/ и суетныя обычаи того презрев,/ брачныя узы небрегл еси,/ во еже душу свою уневестити Господеви/ и чисту ю представити,/ яко пресветлую свещу, на свещнице церковнем сияющу./ Поминай нас, творящих память твою.

О, подвигов твоих, блаженне!/ О, мужества твоего и светлости!/ Како изшел еси на брань с князем мира сего?/ Како не убоялся еси служителей свирепейших?/ Како обличил еси люди беззаконныя?/ Како глад и хлад и наготу терпя,/ и в скорбех, о Алексие, благодушествуя,/ вся возмогл еси о укрепившем тя Господе?/ Того моли спастися душам нашим.

Глас 5:

Премудре и богоблаженне Алексие!/ Искус послушания монашескаго прошед,/ на сугубое служение в мир изшел еси,/ идеже власть и славу от руки лукаваго миродержителя тьмы века сего отвергл еси,/ во еже не пременитися нраву твоему тленных ради/ и сохранитися в чистоте души твоей./ Ныне же, в чертозех Небесных пребывая,/ моли спастися душам нашим.

Богомудре Алексие,/ многомятежный мир оставив,/ во дни жития твоего вельми потрудился еси/ и Небеснаго Царствия достигл еси,/ идеже ныне пребываеши,/ Христа непрестанно славословя./ егоже моли усердно, премудре,/ даровати душам нашим велию милость.

Адаманте твердый, непреклонный столпе,/ миру чужд быв, сущих в нем не отчуждался еси/ и, к покаянию люди призывая,/ жалостию сердца о них болезновал еси,/ безумие же богоборцев мудростию Христовою обличая,/ страждущих и крова лишенных утешал еси./ Темже и нас не остави, блаженне,/ но к любви Небесней сердца наша управи.

Слава, глас тойже:

Приидите, православнии людие,/ припадем к раце мощей блаженнаго Алексия,/ заступника страждущих и обидимых,/ подает бо помощь скорую и всемощную,/ недужных врачуя, болящих исцеляя,/ в скорбех сущих утешая,/ всех же верных назидая и глаголя:/ О, чада возлюбленная!/ Вскую любите суету и ищете лжи?/ Что всуе мятетеся?/ Последуйте мне, якоже аз Христу,/ да водворитеся в Чертозех радости нескончаемыя/ и лица ваша во век не постыдятся.

И ныне, праздника.

Вход. Прокимен дне. И чтения три преподобническая.

На литии стихиры, глас 1:

Днесь радуются верных собори,/ во псалмех и песнех Господеви поюще,/ и, обстояще раку угодника Христова,/ блаженнаго Алексия, глаголют:/ сей и по смерти, яко жив сый,/ прият от Бога дар недуги телесныя исцеляти/ и ко спасению верныя наставляти,/ град же свой от всякия напасти избавляти/ и молитися, во еже спастися душам нашим.

Днесь ликует обитель Введенская,/ приемлющи, яко бисер многоценный,/ мощи богоблаженнаго Алексия./ Той бо, яко светильник возженный,/ показует нам путь во обители Небесныя,/ имже ко спасению наставляеми,/ славим Бога, дивнаго во святых Своих.

Веру твердую имея, преблаженне Алексие,/ благодатию Божиею добродетель к добродетели прилагал еси:/ терпению незлобие, послушанию смирение,/ безстрастием же и любовию, яко златом, венчався,/ храм духовен себе самаго наздал еси,/ в немже выну принося Богу жертву хваления,/ яко Ангел на земли пожил еси./ Ныне же, с Небесными чинми совокупляяся,/ поеши Богу песнь победную.

Слава, глас 6:

Даром пророчества украшен,/ досточудне Алексие,/ Церкви Русстей гонимей быти предрекл еси/ и давидским гласом вопиял еси:/ Вскую шаташася язы́цы/ и людие поучишася тщетным?/ Олтари Твоя, Господи, раскопаша/ и священники Твоя избиша./ Но не постави им греха сего,/ не ведят бо, беззаконнии,/ яко неправедная содевают.

И ныне, праздника.

На стиховне стихиры, глас 2.

Подобен: Егда от Древа:

Егда найде на тя Божественный Дух,/ Алексие чудне,/ тогда мира мятеж и суетныя обычаи того отринул еси/ и, будущия жизни вожделевая,/ духом же к Богу пламенея,/ о плоти всеконечне небрегл еси./ Темже, в вечныя обители водворився/ и дивным небожителем совокупився,/ поминай нас, любовию чтущих тя,/ в теплых молитвах ко Господу.

Стих: Пришлец аз есмь на земли,/ не скрый от Мене заповеди Твоя.

Егда найде на землю Русскую безбожная злоба,/ тогда мира вся красная отвергл еси, блаженне Алексие,/ и, одежды тленныя обнажився,/ подвиг юродства приял еси,/ безумна же себе творя,/ безумие неверных всеконечне обличал еси, глаголя:/ почто, людие, веру отеческую забыша?/ Почто заповеди Божия попраша?/ Почто скверным богоборцем выю подклониша?/ Темже, святе, молися/ улучити нам время на покаяние.

Стих: Прилепихся свидением Твоим, Господи,/ не посрами мене.

Егда, преблаженне Алексие, проречений твоих ради и твердости/ на раскаленныя плинфы поставлен был еси,/ тогда, древним мучеником подобяся,/ тленным огнем не опалился еси,/ но небоязненно Христа пред мучители проповедал еси,/ тепле о них моляся./ Кончину же свою дивно предуведев,/ от многомятежия сего, радуяся, преселился еси,/ правды Божия показуя торжество.

Слава, глас 8:

Новый Алексий и человек Божий явился еси,/ твердый в скорбных, непреклонен в болезненных,/ Симону в терпении и Василию в безстрашии подражая,/ любве Божия силу являя,/ очи, суетою омраченныя, отверзая,/ сильныя мира сего, яко расточенныя, вменяя,/ и грядущая, яко настоящая, прозревая./ Темже моли, всеблаженне,/ улучити нам Небесныя кровы.

И ныне, праздника.

Тропарь, глас 1:

Рачением божественным уязвився от юности,/ юродством вольным мудрость века сего посрамил еси,/ премудрости Божией в тайных поучаяся,/ предзрел еси, яко настоящая, грядущая,/ не словом, но житием образ быв добродетели,/ страдальчески течение скончал еси,/ темже Христос сугуба венца сподоби тя, блаженне Алексие,/ егоже моли спастися душам нашим.

На утрени

По 1-м стихословии седален, глас 7:

Яко бездомок странствуя и не имый где главы подклонити,/ озлобления и скорби земныя претерпел еси, блаженне,/ ныне же, во отечествии Небеснем водворяяся,/ нас, в молитве тебе призывающих,/ от бед и напастей многообразных избави.

Слава, и ныне, праздника.

По 2-м стихословии седален, глас 2:

Умом и душею украшен,/ многострадальным житием просиял еси, преблаженне,/ темже и мы, в памяти твоей благодатными лучами просвещшеся, молимся ти прилежно:/ воздохни о нас ко Господу/ и покрый теплым твоим предстательством.

Слава, и ныне, праздника.

Величание:

Величаем тя,/ блаженный мучениче Алексие,/ и чтим святую память твою,/ ты бо молиши за нас/ Христа Бога нашего.

Псалом избранный: Терпя потерпех Господа:

По полиелеи седален, глас 1:

Твое, блаженне, предстательство стяжахом,/ людие скорбнии и отчаяннии,/ наипаче же гонимии от миродержителей тьмы века сего,/ ты бо и заблуждшия не оставляеши/ и отчаянныя надеждею воспламеняеши./ Темже, ныне память твою совершающе, припадаем и вопием:/ расточи греховныя соблазны,/ изсуши мутныя потоки безбожия/ и умоли Господа славы,/ да не постыдимся, егда приидет судити всяческая.

Слава, и ныне, праздника.

Степенна, 1-й антифон 4-го гласа. Прокимен, глас 4: Возвеселится праведник о Господе/ и уповает на Него. Стих: Услыши, Боже, глас мой, внегда молити ми ся к Тебе. Евангелие от Матфеа, зачало 43.

По 50-м псалме стихира, глас 6:

Мира сего красная возненавидел еси,/ плоть духу поработив,/ и, телесныя любве удалився,/ юродства подвиг тяжкий подъял еси/ и, яко златыми крилами,/ на Небеса возлетел еси,/ яже есть молитва теплая и смирение нелицемерное,/ темже, блаженне Алексие,/ не забуди нас, припадающих мощем твоим,/ и совершающих святую память твою.

Канон, глас 8.

Песнь 1.

Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Припев: Святый мучениче Алексие, моли Бога о нас.

Слове Божий и Агнче Непорочный, даруй ми слово, во еже восхвалити угодника Твоего, иже предлежит зде телом, духом же Ангелом сликовствует присно.

О Господе помощник нам буди, блаженне, изымая нас скорбей и болезней, соблазнов же, нестроений и бед, желания сердец наших во благих исполняя.

Египетския котлы благоденствия презрев и миру кичливому посмеявся, Алексие мудре, реки мутных вод житейских неврежденно прешел еси, Богу победную песнь воспевая.

Богородичен: Тлитель убо древле и братоубийца явися Каин, прежде от Бога прокляся. Что же сотворю аз, вседе́рзый, душу свою люте погубивый! Но даждь ми, Владычице, прежде конца покаяние.

Песнь 3.

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желaний крaю, верных утверждение,/ Едине Человеколюбче.

Наготу и хлад терпя, и страх мучителей любовию превозмогая, судьбы Божия людем предвозвестил еси, блаженне, и путь правый показал еси.

От младенства смиренномудрие стяжав, любовию Божиею обогатился еси, умом же горе возносяся, лице Господне чисте зрел еси.

Чада твоя есмы, святче Божий, не остави нас сирых, обаче на помощь к нам притецы и научи добродетельми Господа славити.

Богородичен: Крепость ведый матерния Твоея молитвы к Сыну и Того многое благоутробие, к Тебе приступаю, Пречистая, страхом одержимь и любовию понуждаемь.

Седален, глас 6:

Молитеся Богу, непрестанно призывал еси, святе, молитеся,/ и убойтеся гнева Его./ Темже не обленимся, православнии,/ да не искусим паки долготерпения Божия,/ но воззовем теплою верою и неленостною молитвою:/ согрешихом, беззаконновахом, неправдовахом, Господи,/ не остави нас, во унынии сущих,/ но спаси нас Алексия праведнаго мольбами.

Слава, и ныне, праздника.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Точию изыде слава подвиг твоих, блаженне, врази Господни возсташа погубити тя, духа бо Христова в тебе не терпяху и злобою зело распаляхуся.

Иоанна, возлюбленнаго ученика Спасова, слышав, глаголюща, аще кто любит мир, несть любве Отчи в нем: мир и лесть его возненавидел еси, ярем Христов возложь на ся, радуяся.

Сродство и имение Христа ради оставил еси, святе Алексие, и телесная одеяния презрел еси. Даждь и нам сицевое небрежение о преходящих и суетных.

Богородичен: Адам убо преступи едину заповедь и изгнанию подпаде: како же восплачу аз прегрешений моих бездну? Обаче к Тебе, о Мати Божия, молитвы простираю: моли, Всечистая, Сына Твоего и Бога, помиловатися души моей.

Песнь 5.

Ирмос: Утренююще, вопием Ти:/ Господи, спаси ны,/ Ты бо еси Бог наш,/ разве Тебе, иного не вемы.

Земленый и перстный имею ум, блаженне, просвети мя к Небесным и вечным, тебе бо стяжах тепла молитвенника.

Осмеяние и ругание пища тебе бысть, блаженне, питие же сладкое богомыслие и смиренномудрие, глагол же пророческий, яко одежда, вменися.

Власть беззаконную и богоборную обличая, люди поучал еси имения тленная и непостоянная презирати, Небесная же сокровища добродетелей стяжати.

Богородичен: Исаву поревновав лютому во чревобесии, душу и тело осквернив невоздержанием и нечистотою, к Тебе, о Дево, прибегаю, заступи мя и избави вечных мук.

Песнь 6.

Ирмос: Ризу мне подаждь светлу,/ одеяйся светом, яко ризою,/ Многомилостиве Христе Боже наш.

Чуден в терпении и во уповании непосрамлен, Единаго Царя Христа воин был еси, блаженне, малодушныя утверждая во исповедании дерзновеннем.

Риз совлеклся еси, святе Алексие, взывая: довлеет ми риза крещения, и наготу и хлад превозмогл еси, побеждая естества чин.

Уста непрестанно движа в молитве, без неяже никакоже возможет человек понести ни единыя тяготы Христа ради, венцем на Небесех увязлся еси, блаженне.

Богородичен: Сокрушаема множеством прегрешений и во отчаянии суща, не остави мя, Владычице, но возведи крепкою рукою Твоею.

Кондак, глас 6:

Христовою любовию распалаемь,/ не убоялся еси вещественнаго огня,/ терпением твоим врага посрамив,/ сердце мучителево уязвил еси кроткими твоими глаголы,/ провещая гнев Божий, праведно грядущий нань,/ и о прощении всех, блаженне, моляся./ Темже тебе припадаем и тепле вопием:/ не премолчи за ны ко Господу.

Икос:

Проповедует весь Елнатская труды и подвиги твоя, богомудре Алексие,/ еже ко Господу рачение теплое,/ о людех болезнование сердечное,/ моление непрестанное, слез источницы,/ риз совлечение, и пищи лишение,/ и всякаго мирскаго пристрастия отложение,/ еще же ругания и безчестия от злых человек,/ в темнице заключение и нуждную смерть./ Но вся сия претерпел еси, радуяся,/ Симона блаженнаго стопам последуя,/ с нимже ныне в дому Отчем водворяешися, Алексие, угодниче Христов./ Темже тебе припадаем и тепле вопием:/ не премолчи за ны ко Господу.

Песнь 7.

Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен еси, Господи Боже, во веки.

Суету, яко прах, от ногу твоею отрясл еси, никакоже той поработився, власть суетную и невесту земную отринув, чисте душу твою Христови представил еси.

Разумение писаний и книжныя мудрости делом показуя, дара пророчествия сподобился еси и, сие гадательно людем извествуя, до конца в подвизе неколебимь пребыл еси.

Прежде юродства подвигом затвора крепко подвизаяся и правило веры непостыдное являя, Богу твоему рабство не пременил еси на свободу суетную сынов века сего.

Богородичен: Омрачихся окаянный множеством безмерных зол, изменихся душевным оком и умом, погубих первую доброту и чужд бых сыновства Владычня. Ты же, Пречистая Дево, света Твоего зарями просвети мя.

Песнь 8.

Ирмос: Богоглаголивии отроцы в пещи,/ со огнем пламень попирающе, пояху:/ благословите, дела Господня, Господа.

Воззови о нас ко Господу гласом крепким, блаженне Алексие, якоже Моисей о людех своих в пустыни, да избавимся от власти лютаго миродержца.

Имже образом желает елень на источники водныя, сице и ты, всегда подвизаяся, желал еси единаго на потребу, вся заповеди в мире соблюдая и сердце молитвою присно согревая.

Аще и отшел еси во обители Небесныя, обаче земная обиталища, чтущая тя, не оставил еси, темже благодарне ублажаешися верных гласы.

Любве стяжания, смиренномудрия взыскания и веры велия сподоби нас, подвиги жития твоего чтущих, Алексие блаженне.

Богородичен: Егда дух мой имать с плотию разлучитися, Владычице, тогда не презри мене, обеты поправшаго, но избави дивно козней лютаго миродержца и губителя.

Песнь 9.

Ирмос: Устрашися всяк слух/ неизреченна Божия снизхождения,/ яко Вышний волею сниде даже и до плоти,/ от Девическаго чрева быв Человек./ Темже Пречистую Богородицу, вернии, величаем.

Кто не удивится терпению твоему, блаженне? Ты бо, греховнаго рабства отрицаяся и разрешитися плоти желая, раскаленныя плинфы небрегл еси.

Славою божественною облистаемь, предстательствуеши к Богу за чтущия тя, Алексие блаженне, темже молим тя: молитвою твоею напасти отжени и коварство духов злобы разори.

И раны врачуеши, и молитвы слышиши, и на помощь к нам, призывающим тя, скоро прибегаеши, блаже, заступниче верный.

Богородичен: Езеро огненное уготовах себе житием блудным и скверным, Владычице, совестное жжение прежде геены нестерпимо ми есть, темже молюся: не остави раба Твоего, праведнаго Алексия мольбами.

Светилен:

Свет Христов осия тя, Алексие чудне, совлеклся бо еси ветхаго человека и явился еси нов, духом горя. И ныне в лице новомученик предстоиши Святей Троице и землю нашу просвещаеши чудесы.

Слава, и ныне, праздника.

На хвалитех стихиры, глас 5.

Подобен: Радуйся:

Радуйся, богомудре Алексие,/ яко Духа Святаго жилище себе соделав,/ земных вещей всеконечне совлеклся еси/ и, юрод быв о Христе,/ подвигом и терпением Царствия Небеснаго достигл еси,/ хранение же устом своим положив,/ чист помысл стяжал еси./ Ныне же со Ангелы ликуеши,/ человече Божий и небошественный.

Радуйся, преблаженне Алексие,/ яко измлада чистаго жития возжелав,/ пламень похотный погасил еси,/ ризою юродства премудрость сокрыв/ и непрестанною молитвою тайнолепно Богу послужив,/ благодать Духа Святаго стяжал еси./ Темже, яко имея дерзновение ко Господу,/ Тому непрестанно молися/ о поющих и славящих тя.

Радуйся, богоблаженне Алексие,/ ты бо, мудрость века сего презрев,/ любовию Господнею разжеглся еси/ и, яко хврастие, помыслы гнусныя попалил еси/ и, вся узы временнаго жития расторг,/ Богу теплыя молитвы возносил еси,/ во еже стяжати Того Единаго в сердце твоем,/ егоже благодать приим,/ не остави молитвенник твоих во странствии сущих.

Слава, глас 8:

Что тя наречем, о Алексие чудне?/ Приим бо крест, последовал еси Христу/ и, мудрейшим юродством врага победив,/ потоки слез того потопил еси/ и, богатство некрадомо в души нося,/ Христово учение делом исполнил еси./ И ныне, на Небесех ликуя,/ моли Милостиваго Бога/ спастися душам нашим.

И ныне, праздника.

На Литургии

Блаженны от канона песни 3-я и 6-я. Прокимен, глас 7: Возвеселится праведник о Господе/ и уповает на Него. Стих: Услыши, Боже, глас мой, внегда молити ми ся к Тебе. Апостол к Галатом, зачало 113. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник, от слуха зла не убоится.

Молитва

О, угодниче и заступниче наш, преблаженне Алексие, достойный наследниче Небеснаго Царствия! Припадающе раце мощей твоих, усердно просим тя: помолися, отче, да исправятся стопы наша по словеси Господню к деланию заповедей Его и да не возобладает родом нашим от безбожник всеянное беззаконие душетленное, но да узрим на Святей Руси утверждение веры Православныя!

О, святче Божий, утаивый истинную премудрость и обличивый мудрость сынов века сего! Испроси нам у Господа дух смирения, кротости и любве залог, в молитвах несумненную веру, в покаянии твердую надежду, в служении ближним крепость, в болезнех скорое исцеление, всего же жития нашего обновление, яко да, ублажающе тя, достигнем христианския кончины непостыдны и мирны, и наследим Царствие Небесное, идеже ты, в вечней славе пребывая со всеми святыми, прославляеши Отца и Сына и Святаго Духа. Аминь.

Источник: Текст службы утвержден решением Священного Синода от 14 июля 2018 года (журнал № 61)

На велицей вечерни

На Господи, воззвах: стихиры, глас 1.

Подобен: Небесных чинов:

Приидите, православных собори, / воспоим ныне преподобнаго Кукшу, / чудотворца дивнаго и теплаго о нас молитвенника, / и усердно возопиим ему: / вознеси, преподобне отче, молитву, / да помилует нас Господь, // яко Един Благ и Человеколюбец.

Приидите, монашествующих лицы, / восхвалим днесь дивнаго подвижника, / и, подражающе того подвигам и смирению, / любовию величаем преподобнаго, / и усердно возопиим к нему: // моли о нас Единаго Человеколюбца.

Приидите, боголюбцев множество, / с радостию воспоим преподобнаго, / величающе подвиги и труды его, / лобызаем святыя мощи, вопиюще: / моли, отче преподобне, Христа Бога, / да спасет люди Своя, // яко Един Благ и Человеколюбец.

Приидите, людие православнии, / поклонимся дивному чудотворцу и новому исповеднику, / преподобному и богоносному отцу нашему Кукше, / светильнику Отечества нашего / и украшению земли Одесския, / и сему пение принесем, зовуще: / моли о нас, старче предивный, // Единаго Человеколюбца.

Иныя стихиры, глас 2.

Подобен: Киими похвальными:

Киими духовными песньми / воспоим преподобнаго Кукшу, / терпения проповедника, новомученика и исповедника. / Той бо всех нас научает скорбей безропотному терпению / и добровольному крестоношению, // и молится о нас ко Спасу душ наших.

Киими доброславными словесы / похвалим подвиги преподобнаго: / в скорбех – терпение, во искушении – крепость, / в труде – послушание, / в молитве – Богу предстояние; / и того величающе, / в Православии утвердимся, / прославляюще Господа Человеколюбца, // дивнаго во святых Своих.

Киими похвальными венцы венчаем преподобнаго, / от юности мира лукаваго отвергшагося, / древним отцем подражателя / и подвигов их ревнителя, / старца дивнаго и богопросвещеннаго, / неленостнаго проповедника и духовника нелестнаго; / и сего ублажающе, Господу поклонимся, // дивному во святых Своих.

Киими песненными добротами / воспоим преподобнаго Кукшу, / Одесския земли украшение / и Успенския обители честную похвалу, / той бо демонския козни попра, / божественною благодатию укрепляем, / новый исповедник и дивный молитвенник явися, / и ныне молит о нас Господа, // дивнаго во святых Своих.

Слава, глас 6.

Подобен: Тридневен:

Днесь радуются концы вселенныя, / днесь веселится Русь Святая, / днесь ликует земля Одесская, / днесь великое торжество и радость велия всем православным: / новый бо исповедник и чудотворец изрядный, / слава и украшение Церкве Христовыя, / преподобный Кукша, Престолу Божию предстоя, / молится ко Творцу всех, / да помилует Отечество наше, / простит нам грехи наша // и дарует нам прежде конца покаяние.

И ныне, праздника, глас тойже: Четвероконечный мир днесь освящается:

Или Богородичен: Кто Тебе не ублажит, Пресвятая Дево:

Вход. Свете тихий. Прокимен дне. Чтения три.

Притчей чтение:

Память праведнаго с похвалами:

Притчей чтение:

Уста праведнаго:

Премудрости Соломоновы чтение:

Праведных души в руце Божией:

На литии стихиры, глас 1:

О дивное чудо, / зрим на тебе, преподобне, / како во плоти сый, ангелом ревнуя, / страсти попрал еси / и демонския козни смирением твоим отгнал еси. / Сего ради тя ублажающе, вопием: / моли о нас Господа Христа, // подающаго нам велию милость.

Отче преподобне, / кто возможет поведати подвиги твоя, / в темницах и узах мучение мужественно претерпел еси, / мраз и глад ни во что же вменил еси, / со апостолом вопия: вся могу о укрепляющем мя Иисусе. // егоже моли спастися душам нашим.

Небесныя Силы удивишася, / зряще труды и подвиги твоя: / сый бо един от земнородных, / яко бесплотный ангел являешися, / узы греха постом разрешая / и нмощь естества молитвою превозмогая. / Сего ради и мы, яко свидетелие чудес твоих, / с любовию вопием ти: / моли о нас Христа Бога, // Кукшо, преподобне отче наш.

Слава, глас 2.

Подобен: Доме Евфрафов:

Дивнаго тя обретше в бедах заступника / и в скорбех скораго помощника, / люди православнии к тебе притекают / и, припадающе ко святей раце мощей твоих, / со слезами молят тя: / вознеси, отче, молитвы твоя пред Престолом Божиим, / выну предстательствуя о нас, // да помилует Господь люди Своя согрешившия.

И ныне, праздника, глас тойже:

Ты мой покров державен еси:

Или Богородичен:

Единосущное Слово Отчее, / бытие всей твари подающее, / содела Тя, Богоблаженная, / Чистую Свою Матерь, // Живот мирови источившую.

На стиховне стихиры, глас 5.

Подобен: Радуйся, Живоносный Кресте:

Ныне торжествует земля Русская, / ныне благодать на верныя обильно изливается, / ныне Церковь Небесная спразднует земной; / не оскуде бо преподобный в Руси Православней, / и ангельстии лицы купно с земнородными / прославляют старца дивнаго, // той бо выну молит о нас Христа Жизнодавца.

Стих: Честна пред Господем / смерть преподобных Его.

Ныне притекают люди православнии, / со слезами припадающе / к цельбоносным мощем богоноснаго отца нашего Кукши, / и тому со усердием молящеся, / приемлют неоскудеваемую благодать, / юже по молитвам преподобнаго // обильно низпосылает нам Господь.

Стих: Блажен муж бояйся Господа, / в заповедех Его восхощет зело.

Преподобне отче наш Кукшо, / вознеси многомощную молитву твою / и, выну предстоя престолу Божию, / испроси нам у Христа Господа оставление грехов, // прощение многих прегрешений наших // и велию милость.

Слава, глас 8:

Подобен: О, преславнаго чудесе:

Страна Российская проповедует терпение твое, / сего ради и мы, яко твердаго исповедника ублажаем тя, / восхваляюще подвиги твоя / и к раце святых мощей твоих припадающе, / просим и молим тя: / моли спастися людем православным, / да не погибнем во гресех, / но присно прославляем Господа, // дивнаго во святых Своих.

И ныне, праздника, глас тойже:

Егоже древле Моисей прообразовав собою:

Или Богородичен, глас тойже:

Безневестная Дево, яже Бога неизреченно заченши плотию:

Тропарь, глас 4:

От юности мир суемудренный и лукавый оставил еси, / Божественною свыше просветився благодатию, преподобне, / многим терпением во временней жизни подвиг совершил еси, / темже источаеши чудес благодать / всем с верою приходящим к раце мощей твоих, // Кукшо преблаженне отче наш.

На утрени

По 1-м стихословии седален, глас 8:

Душу твою от страстей очистил еси, преподобне отче Кукшо, и старец предивный миру явился еси, сего ради тя ублажаем.

Слава, и ныне, праздника, глас 3:

Крест и смерть пострадати изволил еси:

Или Богородичен, глас 8:

Пресвятая Богородице, преподобных радование, Владычице Державная земли Русския явилася еси, темже Тя, ублажающе, вопием: моли спастися людем Твоим, непрестанно Тя славящим.

По 2-м стихословии седален, глас 6:

Свещу в молитвах пламенеющую зрим тя ныне, преподобне отче, не оставил бо еси нас сирых, но присно молишися спастися нам.

Слава, и ныне, праздника, глас тойже:

На древе, Спасе, крестнем:

Или Богородичен, глас тойже:

Всесвятая Богородице, Всемилостивая наша Владычице, помози нам недостойным, Тя бо Едину надежду имамы.

По полиелеи седален, глас 2:

Преподобне отче наш Кукшо, земли нашея украшение и Церкви Русския похвало, горы Афонския плод краснейший и града Одессы священное сокровище, моли о нас Спаса душ наших.

Слава, и ныне, праздника, глас 8:

В Раи мя прежде древо обнажи:

Или Богородичен, глас тойже:

Всемилостивая Госпоже, Дево Богородице, огради нас честным Твоим Покровом и избави нас от всякаго зла.

Степенна, 1-й антифон 4-го гласа.

Прокимен, глас 4: Честна пред Господем / смерть преподобных Его.

Стих: Что воздам Господеви о всех, / яже воздаде ми.

Всякое дыхание: Евангелие от Матфея, зачало 43.

По 50-м псалме стихира, глас 6:

Ангела земнаго и небеснаго человека, / твердаго исповедника и старца духоноснаго, / учителя покаяния и проповедника чистоты, / преподобнаго Кукшу днесь радостно прославляем: / радуйся, Кукшо блаженне; / радуйся, многих на путь спасения наставивый; / радуйся, верным похвало и земли Российстей утверждение, // молися о душах наших.

Канон праздника или Богородицы со ирмосом на 6 и святаго на 8,

егоже краегранесие: Преподобнаго Кукшу радостно величаю. Глас 6.

Канон святаго.

Песнь 1.

Ирмос: Яко по суху пешешествовав Израиль:

Преподобне отче наш Кукшо, помози нам немощным величати тя достойно и воспевати подвиги твоя.

Родителей благочестивых плод достославный явился еси, отче преподобне, сего ради тя ублажаем.

Елеем молитвы от юности душу твою умастил еси и учитель изрядный покаяния явился еси, отче достославне, моли спастися душам нашим.

Богородичен: Покровом Твоим, Дево Богородице, от всякаго зла огради души наша.

Песнь 3.

Ирмос: Несть Свят, якоже Ты:

Отцев афонских последователь усердный явился еси и подвигов их подражатель изрядный, сего ради прослави Тя Господь.

Демонския немощныя дерзости невозмогоша победити тя, отче святый, молитвою бо умною вооружаяся, вся сия мужественно преоборол еси.

Огнем молитвы Иисусовы разжегл еси сердце твое и явился еси людем православным, яко свеща во тьме неверия пламенеющая и путь ко Христу показующая.

Богородичен: Богородице Владычице, не остави ны во грехи впадшия, но молитвами Твоими спаси души наша.

Седален, глас 4:

Старца дивнаго выну прославляй, душе моя, теплыя тому принеси яже от сердца молитвы, в радости поюще того, присно бо молится ко Спасу душ наших.

Слава, и ныне, праздника, глас 8:

Посреде Едема древо прозябе смерть:

Или Богородичен, глас тойже:

Пресвятая Дево, Мати Христа Бога нашего, высши всея твари явилася еси и ангельских чинов Честнейшая, молися Сыну Твоему спастися душам нашим.

Песнь 4.

Ирмос: Христос моя сила:

Не терпя враг спасения нашего в Горняя умнаго восхождения твоего, отче преподобне, гонения на тя воздвиже, ты же, яко воин Христов, вся сия мужественно претерпел еси.

Афонских пределов твое оставление и еже в Печеры Киевския вселение всеблагим Промыслом Господним свершися, да явишися проповедник покаяния и молитвы учитель изрядный.

Горнему миру причастник явился еси и в телеси сомолитвенник безплотным чином, сего ради тя ублажаем.

Богородичен: Отчаго лона не Оставльшаго и во утробу Твою, Пречистая, Всельшагося, моли спасти от смерти души наша.

Песнь 5.

Ирмос: Божиим светом твоим, Блаже:

Кто возможет изчести страдания твоя и терпение твое поведати, яко всех наветов диавольских победитель достославный явился еси, отче наш Кукшо.

Узилища скорбныя и дебри лесныя молитвою твоею освятишася, отче, и сею враг посрамлен бысть, тою же и мы от грехов очищаемся.

Кукшу преподобнаго прославляюще, подражаем того терпению, да молитвами его от грехов очистимся.

Богородичен: Шуия части избави нас, Богородице Дево, и части деснаго сопричтения сподоби на Страшнем Судище Христовем, да со всеми святыми прославляем Сына Твоего.

Песнь 6.

Ирмос: Житейское море:

Убийцы и разбойницы, яко льви явишася, ты же, отче святый, Даниил новый показался еси, благодатию Божиею злобы посрамитель явился еси и о душах наших молитвенник изрядный.

Радости вечныя причастник явился еси, отче наш Кукшо, и вся скорби во уметы вменяя, Христа Бога воин добрый показался еси.

Авво досточудне, не остави ны, чада твоя, но молитвою твоею укрепи вся, да тою спасемся.

Богородичен: Древом Крестным язву древнюю исцели Сын Твой, Дево Чистая, тем Тя молим, Владычице, вечных нас избави мучений предстательством Твоим.

Кондак, глас 8:

Подвижника благочестия искусна, / новаго исповедника веры отеческия / преподобнаго Кукшу верно вси ублажим, / яко пастыря истиннаго, старца благостнаго, / иноков наставника, утешителя малодушных, целителя недужных, / и по кончине показующаго светлость жития своего. / И днесь в память его притекше, радостно возопием: / яко имея дерзновение к Богу, / многообразных нас избави обстояний, да зовем ти: // радуйся, утверждение людем православным.

Икос:

Досточудне отче Кукшо, ублажаем тя, Небесных Чинов сожителя и сонма преподобническаго украшение; прославляем тя пророков всеславных сотаинника; величаем тя, мучеников и исповедников равностоятеля; поем тя, Пастыреначальника Христа добраго последователя; зрим тя, лика чудотворцев и целителей благосердаго сопричастника; песнословим тя, дерзновеннаго молитвенника о Отечестве нашем и неусыпнаго ходатая о людех православных.

Песнь 7.

Ирмос: Росодательную убо пещь:

Отец чадолюбивый и старец благостный явился еси, отче, яко чадом твоим путь спасения показуеши и к Царству Небесному приводиши.

Старец духоносный, благодатию освящаемый, был еси и, к Небеси всех приводяй, сего ради не остави нас, чад твоих.

Таин Божиих провозвестник был еси, отче преподобне, вся ко спасению потребная верным открывая и к Царству Небесному путевождь являяся.

Богородичен: Игумение Всечестная земли нашея, Всесвятая Госпоже Богородице, Ты Сама нас от всякаго зла огради.

Песнь 8.

Ирмос: Из пламене преподобным росу источил еси:

Юродство мудрецам века сего есть жизнь евангельская, ты же, отче богомудре, обращая их, истинней мудрости научал еси.

Веселия вечнаго сладость еще сый в телеси предвкусил еси, отче преподобне, сея наслаждения молитвами твоими достигнути и нас сподоби.

Естеством человек сый, житием ангел являешися, и нас сподоби молитвами твоими ликом небесным сопричастники быти.

Богородичен: Лицы ангельстии Тя, Чистая, зряще, удивляхуся, како Дево и Богородица являешися Херувим Честнейшая.

Песнь 9.

Ирмос: Бога человеком невозможно видети:

Иноков наставник и ангелом сомолитвенник явился еси, отче преподобне, предстательством твоим спаси нас от бед и скорбей.

Чудотворец изрядный и бесов отгонитель, отче преподобне, явился еси, не остави нас, помощи твоея требующих, но заступи от сих молитвами твоими.

Агнца Христа проповедник всем житием твоим явился еси, отче наш Кукшо, егоже умоли спасти души наша.

Богородичен: Юже ангели непрестанно славословят, Небесе и земли Царицу, Сию о нас моли, отче преблаженне, да спасет удел Свой земной – Русь Православную и помилует люди Своя.

Светилен:

Ангела земнаго и небеснаго человека, исповедника преславнаго и новаго чудотворца, преподобнаго Кукшу ныне ублажаем и сего усердно просим: моли о нас Спаса душ наших.

Слава, и ныне, праздника:

Светозарными сиянии, Крест Господень на воздвижение Его:

Или Богородичен:

Пресвятая Госпоже Богородице, всем сирым Помощниче и обидимым Надеждо, не остави ны, Твоея помощи требующия, но спаси от бед души наша.

На хвалитех стихиры, глас 2.

Подобен: Доме Евфрафов:

Веселися граде Одессо, / воспевая псалмы и песни духовныя, / радуйся, обитель Успенская, / имуще в себе мощи преподобнаго, / и выну прославляй дивнаго подвижника // и молитвенника усерднаго, той бо молится спастися нам.

Ныне притекающе к раце мощей твоих, / отче преподобне, просим и молим тя: / исцели язвы душ наших / и умасти я елеем молитв твоих, // да теми выну сохраняеми от всякаго зла, тя ублажаем.

Ныне торжествуют людие православнии, / дивнаго обретше тя чудотворца / и в скорбех скораго помощника, отче преблаженне, / и к тебе припадающе, просят тя: / вознеси о нас святыя твоя молитвы, // да теми от свякаго зла сохраняеми, тя ублажаем.

Ныне светло красуется земля Русская, / ныне радостно вернии просвещаются / и веселием прославляют преподобнаго Кукшу; / той бо молитвенник изрядный о нас является / и дивный чудотворец, / сего ради ублажаем преподобнаго, // той бо молит о нас Господа Вседержителя.

Слава, глас 6.

Подобен: Тридневен:

Ликуй ныне, богоспасаемый граде Одессо, / яко лучами солнечными просвещаемый чудотворным образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил-храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему // и всем верою живущим в нем.

И ныне, праздника, глас тойже:

Днесь происходит Крест Господень:

Или Богородичен, глас и подобен тойже:

В непреступнем Свете Живущаго / явила еси миру Творца Жизнодавца, / Богородице Чистая, / Того моли, Владычице, / с богоносным отцем нашим Кукшею, / да приимет похвальныя песни сия во славу Имени Своего Святаго / и низпослет нам благодать неоскудную / усердно работати и молитися Ему, // Дивному во святых Своих.

На Литургии

Блаженны от канона, песни 3-я и 6-я.

Прокимен, глас 7: Честна пред Господем / смерть преподобных Его.

Стих: Что воздам Господеви о всех, яже воздаде ми.

Апостол к Галатом, зачало 213.

Аллилуия, глас 6: Блажен муж, бояйся Господа, в заповедех Его восхощет зело.

Стих: Сильно на земли будет семя Его.

Евангелие от Луки, зачало 24.

Причастен: В память вечную будет праведник, от слуха зла не убоится.

Источник: сайт храма новомучеников и исповедников Российских в Строгино

По изданию: «Службы Одесским святым» (под общей редакцией митр. Одесского и Измаильского Агафангела; сост.: архим. Тихон (Василиу), прот. Илия Тетерько, прот. Андрей Николаиди. – Одесса: Издание Одесской духовной семинарии, Астропринт, 2009)

Ме́сяца септе́мврия в 18-й день

Попра́зднство Воздви́жения Креста́ Госпо́дня. И преподо́бнаго Иларио́на О́птинскаго

На ма́лей вече́рни

На Го́споди, воззва́х: преподо́бнаго стихи́ры, глас 1:

Прииди́те, празднолю́бцы,/ дне́сь восхва́лим лик честны́й,/ преподо́бных ста́рцев О́птинских,/ в земли́ Калу́жской просия́вших,/ я́ко многоце́ннии би́сери;/ и вку́пе с ни́ми просла́вим богому́драго Иларио́на,// ублажа́юще того́ досто́йно.

Красу́йся ны́не и лику́й/ благослове́нная пу́стыне О́птинская,/ возрасти́вшая, я́ко кри́ны благоуха́нныя,/ преподо́бныя отцы́ на́ша,/ от ни́хже ста́рец Иларио́н всехва́льный есть,/ его́же ны́не ублажа́ем,/ доброде́телей ди́внаго наста́вника// и пра́вило мона́шествующих.

Боже́ственная веле́ния исполня́я,/ в по́двизех послуша́ния кре́пок показа́лся еси́/ и, я́ко но́вый Елисе́й,/ благода́ть ста́рчества от преподо́бнаго Мака́рия досто́йно восприя́л еси́,/ о́тче Иларио́не блаже́нне,/ те́мже и почита́ющих па́мять твою́// духо́вныя ра́дости испо́лни.

Сла́ва, глас 6:

Ликовству́ет ны́не Це́рковь Ру́сская,/ наипа́че же О́птина пу́стынь велича́ет тя,/ о́тче Иларио́не прехва́льне,/ мы же, немощна́я ча́да твоя́,/ любо́вию тя почита́юще,// мо́лим испроси́ти нам у Го́спода мир и ве́лию ми́лость.

И ны́не, пра́здника.

На стихо́вне стихи́ры преподо́бнаго, глас 2:

Блага́я и спаси́тельная/ слеза́ми покая́нными се́явый,/ стори́чный пло́д доброде́телей возрасти́л еси́/ и Бо́гу Благоутро́бному во смире́нии глубо́це прине́сл еси́,/ преподо́бне о́тче Иларио́не,// сего́ ра́ди ве́рно тя похваля́ем.

Стих: Честна́ пред Го́сподем// смерть преподо́бных Его́.

Благоче́стнаго жития́ по Бо́зе взыску́я,/ в по́двизех по́стнических утверди́лся еси́/ и, я́ко ма́слина многопло́дная,/ в О́птине пу́стыни процве́л еси́;/ те́мже па́мять твою́ све́тло пра́зднуем// и мо́лимся спасти́ся душа́м на́шим.

Стих: Блаже́н муж боя́йся Го́спода,// в за́поведех Его́ восхо́щет зело́.

Благонра́вным житие́м ше́ствуя,/ дости́гл еси́ в му́жа соверше́нна/ и в по́двизех доброде́телей иску́сна;/ те́мже и мно́гия ученики́ наста́вил еси́,/ блаже́нне о́тче Иларио́не,/ и, я́коже сотвори́вый и научи́вый,// мзду́ от Бо́га мно́гую прия́л еси́.

Сла́ва, глас то́йже:

Я́коже о́трасль до́брая роди́телей благонра́вных,/ жи́знь твою́ в день пра́здника Па́схи от Го́спода восприя́л еси́, преподо́бне,/ ны́не же в невече́рнем све́те Христо́ве,/ причаща́яся несконча́емыя Па́схи,// моли́ и на́м тоя́ сподо́битися.

И ны́не, пра́здника.

Тропа́рь преподо́бнаго пи́сан на вели́цей вече́рни.

Сла́ва, и ны́не, пра́здника.

На вели́цей вече́рни

На Го́споди, воззва́х: стихи́ры на 8, глас 5:

Ра́дуйся, Иларио́не, свети́ло благоче́стия,/ мы́сленный мрак нече́стия просвети́вый/ и озари́вый сло́вом и́стины сосло́вия вся́ческая,/ подви́гнув к похвале́нию Бо́га,/ во Еди́ней Тро́ице сла́вимаго,/ ты бо, я́коже луча́ми со́лнечными, ра́зумы заблу́ждшия просвети́л еси́/ и Це́рковь оде́ждею златосла́вною украси́л еси́./ Те́мже, богопропове́дниче Иларио́не,/ моли́ Христа́, Со́лнце Пра́вды,/ све́том И́стины нам озари́тися// и улучи́ти мир и ве́лию ми́лость.

Ра́дуйся, преподо́бне Иларио́не,/ по́стников удобре́ние,/ пра́во мы́слящих утвержде́ние,/ на враги́ церко́вныя побе́до,/ О́птины пу́стыни похвале́ние всекра́сное,/ догма́тов чи́стое зерца́ло,/ раско́льнических умо́в низложе́ние,/ му́дрости ста́рческия вмести́лище!/ Моли́, богопросвеще́нный о́тче, Христа́ Бо́га,/ дарова́ти Правосла́вию утвержде́ние,/ Це́рквам единомы́слие,/ и́ноком ве́ру и́стинную,/ лю́дем во благоче́стии укрепле́ние,// мир и ве́лию ми́лость.

Ра́дуйся, врачу́ безме́здный,/ врачева́телю душ богому́дрый,/ свети́льниче моли́твы неугаси́мый,/ еле́ем прему́дрости Небе́сныя умягча́ющий стру́пы на́ша грехо́вныя,/ и, я́же от нападе́ний де́монских ра́ны исцеля́ющий./ Те́мже, о́тче Иларио́не,/ моли́ Христа́ Бо́га дарова́ти нам// мир и ве́лию ми́лость.

Ра́дуйся, богому́дре Иларио́не,/ блаже́нство ра́йское улучи́вый,/ я́ко и́стинный учени́к Христо́в:/ соверше́нне Бо́жия за́поведи усво́ив/ и живота́ ве́чнаго глаго́лы уясни́в,/ дея́нием вся сия́ испо́лнил еси́./ Мы же мо́лим тя, о́тче:/ не оста́ви нас, си́рых,/ заблужда́тися на путе́х земны́х,/ взыщи́ моли́твою твое́ю/ и на стезю́ и́стинную наста́ви,/ да сподо́бимся от Христа́ улучи́ти// мир и ве́лию ми́лость.

Слава, глас 6:

Свети́льника ве́ры тя позна́хом,/ Иларио́не, Христо́в уго́дниче,/ и́же оте́ческих преда́ний не оста́вил еси́,/ ерети́ческая же мудрова́ния возненави́дев,/ учи́тели ло́жныя сокруши́л еси́/ и раско́льники победи́тельно посрами́л еси́,/ Отца́ и Сы́на и Свята́го Ду́ха испове́дав,/ па́стырь до́брый ста́да Христо́ва яви́лся еси́./ О нас, преподо́бне, моли́ся ко Благоде́телю всех,// е́же уще́дрити и спасти́ ду́ши на́ша.

И ны́не, пра́здника.

Вход. Проки́мен дне. И чте́ния три преподо́бническая.

На лити́и стихи́ра пра́здника, и преподо́бнаго, глас 1:

А́нгельски пожи́в на земли́,/ к Све́ту Невече́рнему, сла́вне, взя́лся еси́,/ оста́вль нам боже́ственнаго смире́ния о́браз,/ трудолю́бия твоего́ вожделе́нное пра́вило/ и доброде́телей немерца́ющую зарю́./ Ны́не же со а́нгельскими чи́нми Бо́гу предстои́ши,/ и о всем ми́ре дерзнове́нно мо́лишися./ Помина́й нас, любо́вию соверша́ющих па́мять твою́,/ преподо́бне Иларионе,/ и оте́ческим твои́м заступле́нием/ ерети́чествующих воста́ния разори́/ и испроси́ Це́ркви Ру́сской// мир и ве́лию ми́лость.

Победи́л еси́ страсте́й воста́ние умерщвле́нием пло́ти/ и, в бытие́ ве́чное роди́вся,/ я́ко но́вая тварь во Христе́,/ Ду́хом Святы́м просвети́лся еси́,/ в ри́зу же нетле́ния оде́явся,/ зва́нныя ве́чери Ца́рския сподо́бился еси́./ Те́мже мо́лим тя, о́тче Иларио́не,/ помози́ и нам покая́нием очи́ститися// и в черто́г Госпо́день вни́ти.

Глас 2:

Ки́ими словесы́ восхва́лим тя, о́тче Иларио́не?/ Ка́ко изочте́м доброде́тели твоя́,/ в се́ни сме́ртней грехо́внаго жития́ пребыва́юще?/ Ка́ко досто́йно воспое́м труды́ твоя́?/ Ки́й язы́к возмо́жет изрещи́ бла́га, и́хже сподо́бился еси́?/ Ты бо, у́зким путе́м ше́ствуя,/ во дво́рех Бо́га на́шего ра́достно всели́лся еси́,// и нас сподо́би того́ дости́гнути.

Смире́нием Христу́ подража́я,/ клеветы́ и поноше́ния благоду́шно терпя́/ и за оби́дящих те́пле моля́ся,/ мно́гия бе́ды и ско́рби поне́сл еси́./ Ны́не же, преподо́бне, моли́ о нас гре́шных и злонра́вных,/ да истреби́тся вся́кая нечистота́// из серде́ц на́ших.

Слава, глас то́йже:

Красу́йся, Це́рковь Ру́сская,/ днесь воспева́ющи сы́на твоего́,/ преподо́бнаго Иларио́на О́птинскаго,/ му́жа соверше́нна,/ тя, я́ко ма́терь многоча́дную, возлю́бльшаго,/ и да́же до после́дняго издыха́ния/ усе́рдие к тебе́ сохра́ньшаго// и ча́дом свои́м тя люби́ти завеща́вшаго.

И ны́не, пра́здника.

На стихо́вне стихи́ры преподо́бнаго, глас 1.

Подо́бен: Небе́сных чино́в:

Преподо́бне о́тче Иларио́не,/ ра́дуется о тебе́ Калу́жская земля́,/ наипа́че же сла́вится пу́стынь О́птина,/ в со́нме бо преподо́бных ста́рцев,/ я́ко звезда́ пресве́тлая сия́еши/ и Христа́ Бо́га вку́пе с ни́ми те́пле мо́лиши// о спасе́нии душ на́ших.

Стих: Честна́ пред Го́сподем/ смерть преподо́бных Его́.

Преподо́бне о́тче Иларио́не,/ вся кова́рства злоко́зненнаго мучи́теля/ си́лою Бо́жиею разруши́л еси́,/ вы́ну о́чи мы́сленныя горе́ вперя́я,/ се́рдцем же к Бо́гу устремля́яся,/ я́ко фи́никс, насажде́нный руко́ю Госпо́дней,// ны́не в вертогра́де Небе́снем процве́л еси́

Стих: Блаже́н муж боя́йся Го́спода,/ в за́поведех Его́ восхо́щет зело́.

Преподо́бне о́тче Иларио́не,/ ты я́ко до́брый строи́тель,/ на кре́пцем ка́мени Христо́ве/ хра́мину души́ твоея́ воздви́гл еси́/ и, я́ко земледе́лец трудолюби́вый,/ зе́млю се́рдца твоего́ со тща́нием возде́лав,/ мно́гими доброде́тельми украси́л еси́,// и́миже пита́еши духо́вная ча́да твоя́.

Сла́ва, глас 8:

Днесь наста́ день торжества́ твоего́,/ ве́рный ра́бе Христо́в Иларио́не,/ ты бо, я́ко во́ин добропобе́дный,/ лю́таго зми́я си́лою Бо́жиею низложи́в,/ венце́м нетле́нным от Христа́ увенча́лся еси́// и в Це́рковь Небе́сную с ликова́нием вшел еси́.

И ны́не, пра́здника.

На благослове́нии хле́бов, тропа́рь свята́го, два́жды, и пра́здника, еди́ножды.

Тропа́рь, глас 4:

Боже́ственный врачева́телю страсте́й,/ ве́ры иску́сный ко́рмчий вои́стину,/ прия́л еси́ от Го́спода благода́ть исцеле́ний,/ и на де́монов сла́вныя побе́ды,/ Иларио́не, о́тче преди́вне,/ вся бо та́йная обличи́л еси́,/ ерети́ческия у́мыслы разори́в./ Те́мже моли́ся Христу́ Бо́гу,/ от пре́лести диа́вольския изба́вити// и спасти́ ду́ши на́ша.

Ин тропа́рь, глас 7:

Ми́ра кра́сная возненави́дев,/ мир душе́вный в души́ стяжа́л еси́,/ земна́я же наслажде́ния презре́в,/ Небе́сными дарова́нии обогати́лся еси́./ Те́мже, и тьму раско́ла отгна́в,/ ста́до Христо́во до́бре упа́сл еси́,/ спаса́й и нас моли́твами твои́ми,// Иларио́не ста́рче богопросвеще́нный.

На у́трени

На Бог Госпо́дь: тропа́рь пра́здника, два́жды. Сла́ва, тропа́рь свята́го. И ны́не, пра́здника.

По 1-м стихосло́вии седа́лен, глас 3:

Све́тлостию подвиго́в богоприя́тных просия́л еси́, о́тче,/ ерети́ческую тьму разгоня́я/ и доброде́тельми вся́ческими украша́яся,/ оби́тель Ду́ха Пресвята́го яви́лся еси́./ Те́мже ны́не, Иларио́не, источа́еши ве́рным исцеле́ния,/ я́ко сосу́д испо́лнь благода́ти Бо́жия.

Сла́ва, и ны́не, пра́здника.

По 2-м стихосло́вии седа́лен, глас 2:

В собо́ре богоизбра́ннем ны́не предстои́ши, Иларио́не пра́ведне,/ ста́рчества О́птинскаго утвержде́ние незы́блемое,/ догма́ты бо огради́в ста́до твое́,/ к ве́ре Правосла́вней па́ству путеводи́л еси́,/ те́мже всегда́ огражда́й от бед оби́тель твою́.

Сла́ва, и ны́не, пра́здника.

По полиеле́и седа́лен, глас 6:

Я́ко звезду́ пресве́тлую, зрит тя ны́не О́птина пу́стынь,/ Иларио́не богому́дре о́тче,/ луча́ми бо ве́ры прогоня́еши неве́дения мглу/ и ра́зумы просвеща́еши заре́ю Тро́ическою./ Те́мже у́бо моли́ Светода́вца Христа́,/ да просвети́т нас Све́том Своего́ богоразу́мия,/ любо́вию почита́ющих свяще́нную па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Наста́вник богому́дрый,/ Це́ркве Ру́сския благоглаго́ливая уста́,/ Ду́ха орга́н доброгла́сный,/ лжу раско́лов посрамля́яй,/ до́лу влеку́щия стра́сти отсека́яй/ и к высоте́ богопозна́ния возвыша́яй,/ Иларио́н преподо́бный ны́не да почти́тся,/ ве́ры пра́выя побо́рник// и моли́твенник о душа́х на́ших.

Кано́н пра́здника со ирмосо́м на 6, и свята́го на 8.

Кано́н свята́го, глас 8.

Песнь 1.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре:/ Изра́иля же беглеца́, пешехо́дца спасе́,// песнь Бо́гови воспева́юща.

Роди́телю изде́тска в послуша́нии навы́к, с млеко́м ма́тере ве́ру Христо́ву впита́л еси́, зна́менався в рождестве́ твое́м све́том Воскресе́ния Христо́ва.

Ратобо́рец иску́сен показа́лся еси́, егда́ неви́димая по́лчища бесо́вская посто́м, бде́нием и моли́твою победи́л еси́, те́мже мо́лим тя, преподо́бне, помози́ и нам в духо́вных бра́нех устоя́ти.

Еги́птян мы́сленных зело́ усмири́л еси́, непреста́нно и́мя Христо́во призыва́я, и, я́ко фараони́тское во́инство, водо́ю слез твои́х потопи́л еси́, песнь Бо́гови воспева́я.

Богоро́дичен: Пала́то Небе́снаго Царя́, во чре́ве вмести́вшая Невмести́маго, Всепречи́стая Де́во Богоро́дице, услы́ши нас гре́шных, моля́щихся Тебе́, и побори́ враго́в, борю́щих нас.

Песнь 3.

Ирмо́с: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́:/ я́ко несть свят па́че Тебе́,// Еди́не Человеколю́бче.

Све́том Христо́вым просвеща́я зе́млю Ру́сскую и расколоучи́телей облича́я нече́стие, спасл еси́ о́вцы Христо́вы от ги́бели ве́чныя.

Наста́вников твои́х, Льва и Мака́рия, досто́йный учениче́ и послу́шниче преизря́дный сый, в нижа́йшем смире́нии серде́чнем высо́к пред Го́сподем яви́лся еси́.

Любо́вию дви́жимый, е́же Бо́гу Еди́ному рабо́тати, вся кра́сная ми́ра презре́л еси́ и, по Бо́зе житие́ ре́вностно облобыза́в, ве́рный после́дователь Христа́ яви́лся еси́, с Ни́мже и ца́рствуеши ны́не.

Богоро́дичен: Богоро́дице Де́во, простри́ в моли́тве ру́це к воздвиза́емому на Кресте́ Сы́ну Твоему́, Пречи́стая, за ны гре́шныя во́лею распе́ншемуся, да изба́вит нас от рабо́ты вра́жия.

Конда́к и и́кос пра́здника.

Седа́лен, глас 5:

Небе́сных лико́в подо́бниче, о́тче пра́ведне, ны́не в вели́цей сла́ве незаходи́мей лику́еши и любо́вию на ны, гре́шныя и немощны́я, взира́еши, оба́че приими́ похвалы́, бре́нными устна́ми тебе́ воспева́емыя, е́же умоли́ти Милосе́рднаго Бо́га дарова́ти нам потре́бная ко спасе́нию.

Сла́ва, и ны́не, пра́здника.

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Цевни́ца духо́вная был еси́, о́тче, возвеща́я от Бо́жиих слове́с, отту́ду бо поче́рпл еси́ ра́зум боже́ственный, и всем к тебе́ притека́ющим, препо́дал еси́ благоче́стно.

Апо́стольски поревнова́в, преподо́бне, заблу́ждшия и прельще́нныя из ро́ва поги́бельнаго изве́л еси́ и, ерети́ческая собра́ния пресе́к, лжеучи́тели пра́ведному суду́ пре́дал еси́. Ве́ру Правосла́вную сохраня́я, я́коже учи́л, та́кожде и твори́л еси́: мирско́му предпоче́л еси́ мона́шеское, тем и житие́ твое́ просла́вися.

Богоро́дичен: Еди́на Чи́стая в жена́х, Ма́ти сподо́бившися бы́ти Го́спода, на руку́ носи́ла еси́ Безнача́льнаго и от сосцу́ пита́ла еси́ Безле́тнаго. Того́ у́бо моли́ спасти́ пою́щия Тя.

Песнь 5.

Ирмо́с: Вску́ю мя отри́нул еси́/ от Лица́ Твоего́, Све́те Незаходи́мый,/ и покры́ла мя есть чужда́я тьма окая́ннаго./ Но обрати́ мя, и к све́ту за́поведей Твои́х// пути́ моя́ напра́ви, молю́ся.

К по́двигу и́ноческому приступи́в неосла́бным умо́м, и́стины разуме́ние прия́л еси́, а́нгельским же чино́м поревнова́в, во́лю боже́ственную испо́лнити потща́лся еси́.

Восхожде́ние в се́рдце свое́м положи́л еси́, в моли́тве непреста́нно поуча́яся, и всено́щными твои́ми бде́нии но́щи я́ко дни светоза́рны показа́л еси́.

Илиину́ ре́вность к Богоугожде́нию име́я, и я́ко Ио́сиф, целому́дрие храня́, вельми́ Бо́гу угоди́л еси́ и со избра́нными сопричте́н был еси́. Испроси́ и нам невеще́ственная бла́га восприя́ти.

Богоро́дичен: Распина́емаго на Кресте́ зря́щи Сы́на Твоего́, сле́зно вопия́ла еси́, Ма́ти Бо́жия, ору́жие бо нестерпи́мыя ско́рби ду́шу Твою́ про́йде, оба́че ны́не дарова́ Тебе́ Христо́с Бог неизрече́нную ра́дость.

Песнь 6.

Ирмо́с: Очи́сти мя, Спас́е,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х и услы́ши мя,// Бо́же спасе́ния моего́.

Всему́дрый ум стяжа́в и во́ли своея́ отложе́ние усво́ив, послуша́нием ко исто́чником му́дрости прит́екл еси́ и чи́стыя воды́ разсужде́ния испи́л еси́.

О́ко духо́вное во бде́ниих изощри́в, зрел еси́ зако́ны бытия́ ве́чнаго и, гряду́щая я́ко настоя́щая прови́дя, от бе́д и скорбе́й чад свои́х охраня́л еси́. Та́ко и нас, преподо́бне, от бед изба́ви.

Ди́вное чу́до сотвори́ тобо́ю Госпо́дь, егда́ ты, о́тче, благослови́в жену́ непло́дную, на бу́дущее ле́то со ча́дом приити́ повеле́л еси́. Та́ко и нас, доброде́телей не иму́щих, благослови́ и сотвори́ благопло́дны.

Богоро́дичен: Егда́ кни́ги со́вестныя разгну́тся и ста́нет Нелицеприя́тный Судия́ на Суди́щи Свое́м, тогда́ воздежи́ богоприе́мнеи ру́це Твои́, Пречи́стая Богоро́дице, и сподо́би нас одесну́ю Сы́на Твоего́ ста́ти.

Конда́к, глас 5:

Сотаи́нниче ста́рцев О́птинских/ и сонасле́дниче преде́ла Влады́чицы,/ я́ко дре́во плодови́тое, в пу́стыннем вертогра́де процве́л еси́/ и, я́ко па́стырь до́брый, ста́до Христо́во утверди́л еси́./ Ны́не же моли́ Христа́ Бо́га/ в Правосла́вии сохрани́тися и в благоче́стии утверди́тися// любо́вию тя почита́ющим.

И́кос:

Лю́тою боле́знию изнуря́емь, И́ову Многострада́льному подража́я, непреста́нно Бо́га благодари́л еси́, и за сие́ возда́ тебе́ Госпо́дь и в Ца́рстве смире́нных и кро́тких упоко́и. Мы же, дивя́щеся по́двигу жития́ твоего́, уми́льно вопие́м ти: ра́дуйся, мона́шествующим о́бразе терпе́ния; ра́дуйся, подвиза́ющимся о Го́споде кре́пкий помо́щниче. Ра́дуйся, Руси́ Святы́я при́сный моли́твенниче; ра́дуйся, похвало́ и ра́дование любо́вию тя почита́ющим.

Песнь 7.

Ирмо́с: Бо́жия снизхожде́ния/ о́гнь устыде́ся в Вавило́не иногда́:/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.

Недрема́нно о́ко се́рдца твоего́ соблю́л еси́/ и та́йная кова́рства де́монская изобличи́л еси́,/ тьму преле́стную разгоня́я непреста́нным псалмопе́нием:/ благослове́н еси́, Го́споди, взыва́я.

Престо́лу Бо́жию предсто́я, предста́тельствуеши моли́твою твое́ю за пу́стынь О́птину, науча́я всех ве́рных пе́ти: благослове́н еси́, Бо́же оте́ц на́ших.

Веще́ственная бла́га отри́нув, невеще́ственнаго пакибытия́ прича́стник соде́лался еси́ и, я́ко до́брый де́латель виногра́да Христо́ва, мзду Небе́сную со все́ми святы́ми прия́л еси́, воспева́я: благослове́н еси́, Бо́же оте́ц на́ших.

Убе́жище благооти́шное в О́птиной пу́стыни обре́т, мяту́щияся ду́ши людски́я ми́ром и любо́вию исполня́л еси́, науча́я всех вы́ну воспева́ти: благослове́н еси́, Бо́же оте́ц на́ших.

Богоро́дичен: Тебе́ и Сте́ну и Приста́нище и́мамы, и Моли́твенницу благоприя́тну к Бо́гу, помяни́ нас во Ца́рствии Сы́на Твоего́, Де́во Пречи́стая.

Песнь 8.

Ирмо́с: Седмери́цею пещь/ халде́йский мучи́тель/ благочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

В моли́тве к тебе́ прибега́ем и защище́ния у тебе́ про́сим: изба́ви ста́до Христо́во от волко́в, губя́щих е, и ерети́чествующих нападе́ния вконе́ц разори́. Егда́ богоно́сный ста́рец Мака́рий, а́вва твой, преста́вися ко Го́споду, тогда́ ты сиро́т его́ духо́вных не оста́вил еси́, сло́вом Бо́жиим тех неле́ностно пита́яй.

Ели́цы под зако́ном хо́дят, раби́ суть Госпо́дни, ты же, любо́вию объя́тый и се́рдце Бо́гу в дар принесы́й, я́ко ча́до Христу́ усво́ился еси́: сподо́би и нас Того́ всем се́рдцем возлюби́ти и насле́дники благ Небе́сных соде́латися.

Богоро́дичен: Све́тлое а́нгелов ликова́ние, кади́льнице моли́тв святы́х благово́нная, Нача́льника жи́зни на́шея во чре́ве Свое́м носи́вшая, Того́ моли́, Ма́ти Бо́жия, да прии́мет нас в Небе́сныя черто́ги.

Песнь 9.

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,// а́нгелов и челове́к чинонача́лия велича́ют.

Иде́же умно́жил еси́ тала́нт духо́вный, зде ны́не пребыва́ют честны́я мо́щи твоя́, ту посеща́й, и твоя́ певцы́ любо́вию назира́й, тя непреста́нно велича́ющия.

И́стинный учени́к Христо́в быв, потща́лся еси́ оде́жды души́ твоея́ слеза́ми покая́нными омы́ти и воня́ми доброде́телей ума́стити. Те́мже на бра́чную ве́черю невозбра́нно вшел еси́, и нас тоя́ сподо́би.

О при́сный де́лателю моли́твы, о́тче преподо́бне! Ты, ум на стра́жи се́рдца своего́ утверди́в, вся́кий лука́вый по́мысл и́менем Христо́вым иску́сно посе́кл еси́ и чистото́ю серде́чною Бо́га узре́л еси́. Сподо́би и нас чи́стым се́рдцем Того́ сла́вити.

Богоро́дичен: Тя, Богоро́дице Де́во, Хода́таицу те́плую и сте́ну необори́му иму́ще, я́ко Моли́твенницу за ны неотсту́пную пе́сненно восхваля́ем.

Свети́лен:

Мно́гими страстьми́ обурева́еми, мо́лим тя, о́тче Иларио́не: исхити́ нас из че́люстей а́дскаго зми́я и сподо́би све́том Христо́вым просвети́тися, и на Кре́ст Честны́й с весе́лием взира́ти, я́ко тем иску́плени есмы́ от рабо́ты вра́жия.

Сла́ва, и ны́не, пра́здника.

На хвали́тех стихи́ры, глас 4:

Мона́шествующих сто́лпе кре́пкий,/ богому́дрый прее́мниче ста́рчества О́птинскаго,/ трудолю́бия ди́вное пра́вило,/ бесо́в смире́нный прогони́телю,/ де́лателю у́мныя моли́твы,/ ста́рче наш Иларио́не,/ в твое́й па́мяти све́тло со́бранных// огради́ покро́вом моли́тв твои́х.

О́бразе послуша́ния,/ мона́шествующих похвало́,/ и́ноков украше́ние,/ преподо́бне о́тче Иларио́не,/ ве́мы тя доброде́телей наста́вника,/ возводя́щаго ду́ши к Небеси́,// те́мже тя ны́не любо́вию ублажа́ем.

Благоче́стия учи́телю,/ раско́ла искорени́телю му́дрый,/ па́стырю до́брый, Иларио́не,/ соблюди́ ста́до твое́ моли́твами твои́ми/ и нерасхище́но Христу́ Пастыренача́льнику приведи́,// да пра́зднуем торжество́ твое́ светоно́сное.

Сла́ва, глас 1:

Днесь собо́р О́птинских отце́в,/ собра́вшихся в пу́стыни Христа́ ра́ди,/ срета́ет побо́рника Правосла́вныя ве́ры,/ его́же прие́мши, лику́ет Небе́сная Це́рковь./ Те́мже и мы, лик соста́вльше,/ твое́ преставле́ние честву́ем, вопию́ще благоче́стно:/ ра́дуйся, преподо́бне Илари́оне,/ от ми́ра прише́дый в мона́шеское ополче́ние;/ ра́дуйся, ста́рче всехва́льный,/ Правосла́вную ве́ру неврежде́нну храни́вый;// ра́дуйся, моли́твенниче о душа́х на́ших.

И ны́не, пра́здника.

На Литурги́и

Слу́жба пра́здника, и преподо́бнаго.

Моли́тва

О, богому́дре о́тче на́ш Иларио́не! Ве́ры Правосла́вныя и́стинный побо́рниче и кре́пкий моли́твенниче о душа́х на́ших пред Престо́лом Святы́я Тро́ицы! Ты, ре́вностию зе́льною о ве́ре и́стинней еще́ от ю́ности твоея́ распали́вся, от расколоучи́телей па́ству церко́вную храни́л еси́. Ты мно́гия ду́ши от поги́бельнаго заблужде́ния спасл еси́ и прельще́нныя к разуме́нию И́стины приве́л еси́, те́мже за правоту́ се́рдца твоего́ дарова́ся ти от Бо́га благода́ть исцеле́ний. И ны́не, о́тче, при́зри на па́ству твою́ и посети́ ю́ и наве́ты лука́вых духо́в твои́м предста́тельством разори́; ра́зум наш просвети́, е́же не внима́ти нам духово́м обольсти́тельным, вы́ну всева́ющим в нас вражду́ и нестрое́ние, и́миже разоря́ется мир церко́вный и бра́тии единомы́слие. Ей, о́тче, испроси́ у Го́спода мир и благоде́нствие стране́ на́шей и лю́дем ея́, ве́ры пра́выя утвержде́ние и ерети́чествующих низложе́ние, нам же пода́ждь здра́вие душе́вное и теле́сное, со́весть чи́стую и жи́тельство незазо́рное, да сподо́бимся вку́пе с тобо́ю, сла́вити великоле́пое И́мя Единосу́щныя и Неразде́льныя Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 9 марта 2017 года (журнал № 15)

Месяца сентября в 19-й день

Священномученика Константина, пресвитера Богородскаго

На велицей вечерни

На Господи, воззвах: стихиры на 8, глас 5.

Подобен: Радуйся, Живоносный Кресте:

Отче священномучениче Константине,/ от юности усердно Истину взыскуя,/ мудрость духовную добре стяжал еси./ Темже и Бог людем заблуждшим тя яви,/ пастыря добраго, благочестия поборника,/ веры Православныя защитника и расколов обличителя,/ правды Божия неустрашимаго проповедника./ Укрепи и нас, святе, во истине право ходити,/ еже спастися душам нашим.

Священства дар прием/ и крест твой на рамо взем,/ добрый пастырю Константине,/ добле во благочестии потрудился еси/ и, мужественне даже до смерти пострадав,/ от Христа мученический венец приял еси./ Ныне, в Небеснем Царствии Пасхи вечныя наслаждаяся,/ со всеми святыми Бога прославляеши,/ егоже моли даровати нам велию милость.

Отче священномучениче Константине,/ Церкве Русския благое украшение,/ вельми тя Христос прослави/ и слово истины тебе дарова,/ имже, плевелы раскола исторгая,/ многия люди во ограду церковную возвратил еси/ и единение духа в союзе мира хранити призывал еси./ Темже в единомыслии и нас утверди,/ во еже спастися душам нашим.

Отче священномучениче Константине,/ светом Христовы истины сияя,/ землю Московскую просветил еси/ и, тьму зловерия отгоняя,/ заблуждшыя к Богу обратил еси,/ семена же благочестия насаждая,/ душы верных, яко плод духовный, Христу принесл еси./ Ныне же, в Небесных селениих пребывая,/ моли спастися душам нашим.

Слава, глас 8:

Приидите, вернии, лик составльше,/ благодарственную песнь принесем Триипостасному Богу,/ даровавшему нам добропобеднаго мученика Константина,/ истиннаго проповедника Божественнаго Евангелия,/ добраго пастыря словесных овец,/ теплаго молитвенника и усерднаго ходатая,/ и с любовию вси возопиим:/ Господи, молитвами и предстательством угодника Твоего/ помилуй и спаси души наша.

И ныне, праздника.

Вход. Прокимен дне. И чтения 3 мученическая.

На литии стихира, глас 6:

Яко дар священный,/ страдания восприял еси Христа ради,/ Иже тя, яко вернаго раба Своего,/ священномучениче Константине,/ победным венцем украси/ и лику святых мучеников сочета./ Емуже молися, теплый наш предстателю,/ отечеству нашему в мире пребывати/ и людем ея во истинней вере ходити.

Слава, глас 8:

Како беззаконнии людие на праведнаго руки своя простроша?/ Како кроткаго гласа не услышаша?/ Како иереа Божия убити не устрашишася/ и, люте злобствующе, в земли живаго погребоша?/ О, безбожных тщетнаго ликования!/ ихже безумную злобу Христос упраздни./ Темже Церковь Небесная светло торжествует/ и победоноснаго Константина с радостию сретает,/ егоже Христос Бог, светлым венцем венчая,/ в ризы белыя облекает/ и мученическому лику совокупляет./ Мы же со умилением зовем:/ Господи, молитвами Твоего угодника/ в вере истинней укрепи и помилуй нас.

И ныне, праздника.

На стиховне стихиры, глас 2.

Подобен: Егда от Древа:

Егда законопреступнии людие,/ злобою неверия ослепленнии,/ в темницу мрачную тя всадиша/ и неправедно на смерть осудиша,/ тогда, блаженне Константине,/ любовию ко Христу распалаемь,/ сице глаголал еси:/ Боже, в помощь мою вонми,/ Господи, помощи ми потщися.

Стих: Священницы Твои облекутся в правду/ и преподобнии Твои возрадуются.

Егда безбожнии мучителие,/ беззаконное веление исполняюще,/ руки своя на тя возложиша/ и, яко злодея, на смерть ведоша,/ тогда, святе исповедниче,/ верою в Сына Божия укрепляемь/ и умныма очима на подвиг Его взирая,/ страданий лютых не убоялся еси/ и, яко жертва священная, Богу принеслся еси.

Стих: Блажен муж, бояйся Господа,/ в заповедех Его восхощет зело.

Егда нечестивии убийцы,/ жестокою раною тя уязвивше,/ в ров жива суща ввергаху/ и немилостивно землею погребаху,/ тогда, страстотерпче славный,/ страдания лютая претерпевая,/ образ мужества показал еси/ и, телом в земли посеявся,/ душею в Царствии Небеснем процвел еси.

Слава, глас 8:

О, людие, веру отеческую презревшии!/ Камо ведете мя, яко разбойника?/ Почто руки своя на мя простираете/ и раною жестокою уязвляете?/ Почто мя, жива суща, в рове полагаете/ и землею немилостивно покрываете?/ Не ведаете убо, что творите,/ сице священномученик Константин кротко глаголаше,/ душу свою Господеви предавая.

И ныне, праздника.

Тропарь, глас 4:

Священником украшение и мучеником похвала/ явился еси, отче Константине,/ ты бо, многия люди во ограду Церкви возвратил еси/ и небоязненно страдания и смерть за Христа приял еси./ Ныне же моли Человеколюбца Бога/ Церковь Русскую от ересей и расколов сохранити/ и спастися душам нашим.

На утрени

По 1-м стихословии седален, глас 3:

Веселися днесь, земле Московская, имеющи теплыя молитвенники, новыя страдальцы за веру Христову, подвиги своими пределы твоя освятившия. В нихже и священномученик Константин, града Богородска благое украшение, богомудрыми словесы плевелы раскола искоренив, образ благочестия и православнаго исповедания в сердцах верных насади. Темже, память его совершающе, Бога, дивнаго во святых Своих, достодолжно прославим.

Слава, и ныне, праздника.

По 2-м стихословии седален, глас 4:

Наставления твоя, Константине богомудре, всех послушающих тебе духовне напиташа, ты бо, горняя, а не земная всегда мудрствовати поучая, ралом словес твоих окаменевшая сердца людей возделал еси и, евангельское семя в них насадив, многоплодны сотворил еси. Помози и нам, святче Божий, тесным и узким путем Царства Небеснаго достигнути.

Слава, и ныне, праздника.

Величание:

Величаем тя,/ священномучениче Константине,/ и чтим честная страдания твоя,/ яже за Христа/ претерпел еси.

Псалом избранный: Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиелеи седален, глас 8:

Светом Христовым просвещаемь, расколы и ереси искоренял еси, святе Константине. Мы же, пастырския твоя труды почитающе и мужеству в страданиих дивящеся, усердно просим: помози нам Православную веру свято хранити и, вземше крест свой, во след Христа шествовати.

Слава, и ныне, праздника.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Града Богородска украшение,/ Церкве Русския светлую похвалу,/ Православия твердаго поборника,/ благочестия истиннаго ревнителя,/ расколов и ересей искоренителя,/ днесь восхвалим, вернии,/ Константина, священномученика добропобеднаго/ и теплаго о нас пред Богом молитвенника.

Канон священномученика, глас 4, егоже краегранесие: Похваляю победоноснаго Константина.

Песнь 1.

Ирмос: Моря чермную пучину/ невлажными стопами/ древний пешешествовав, Израиль/ крестообразныма Моисеовыма рукама/ Амаликову силу в пустыни победил есть.

Просвети сердце мое, Владыко Господи, и подаждь свыше светозарную благодать, воспети похвальная пения Твоему угоднику, злобу безбожных гонителей победившему.

От юности Христа всем сердцем возлюбив, Константине блаженне, во дни гонений пастырь добрый и мученик непобедимый явился еси.

Храм души твоея в чистоте соблюл еси и многия добродетели стяжал еси, священномучениче Константине, темже и Господь дарова ти силу пребыти непоколебиму и Царствия Небеснаго достигнути.

Богородичен: Волнами страстей душу мою боримую чистотою помыслов умири, Пресвятая Дево, Ты бо еси Заступница усердная рода христианскаго.

Песнь 3.

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Апостольским стопам последуя и благодатию Духа Святаго просвещаемь, отче Константине, множество суемудренных во ограду святыя Церкве привел еси и овцы стада Христова соделал еси.

Лик светлый составльше, воспоим память святаго Константина, той бо, славою небесною облистаемь, вкупе с новомученики Церкве Русския молится о спасении душ наших.

Яко крин сельный и цвет благоуханный, процвел еси подвиги твоими, блаженне Константине, и кровей твоих излияньми плоды многия Богови принесл еси.

Богородичен: Юже ангели светоносно воспевают и земнороднии достойно ублажают, Божию Матерь вси почтим и чистое житие Той принесем.

Седален, глас 3:

Возсиял еси, яко звезда лучезарная, достохвальне, тьму неверия разгоняя и ересей лукавое мудрование посрамляя, мучимыя страстию пианства на путь спасительный возвращая и заблуждшия люди к покаянию призывая. Темже, прославляюще добродетели и подвиги твоя, умильно вопием: досточудне отче Константине, укрепи нас во истинней вере и на путь благочестия настави молитвами твоими.

Слава, и ныне, праздника.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Пение похвальное благоговейно приносим ти, святе Константине, Бога же, давшаго ти крепость во страдании, прославляем, взывающе: слава силе Твоей, Господи.

Очистив ум твой и божественными помыслы озарився, святе, яко пастырь добрый, душу твою за овцы полагал еси, молитвенно Богу взывая: слава силе Твоей, Господи.

Богородскую паству водами жизни вечныя напоил еси, богоносче Константине, и, яко делатель добрый, в вертограде Христове усердно потрудился еси, присно воспевая: слава силе Твоей, Господи.

Богородичен: Евангельских учений росою божественною окропи изсохшая сердца наша, Пречистая Дево, да воспоем Тя, яко Источника Жизни нам рождшую.

Песнь 5.

Ирмос: Ты, Господи, мой Свет,/ в мир пришел еси,/ Свет Святый, обращаяй из мрачна неведения/ верою воспевающия Тя.

Духа Пресвятаго обитель чудная быв, преблаженне Константине, люди, зломудрием омраченныя и гордостию ослепленныя, к свету истиннаго боговедения привел еси.

Озари и наша души, помраченныя грехом, и к свету богоразумия настави, пастырю добрый, да путем заповедей Господних непорочно ходити будем.

На камени веры утверждаяся, досточудне Константине, столп непоколебимь в годину гонений явился еси, зловерие нечестивых мужески посекая.

Богородичен: Одигитрие Благая, на путь спасения направи нас молитвами Твоими и от скорбей, находящих на ны, избави.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися/ ради милости от ребр Твоих/ истекшею Кровию.

Светлый праздник памяти твоея, блаженне Константине, верныя люди воедино собра, еже прославити твоя доблественныя подвиги и за Христа страдания, имиже мрак безбожия разгоняется.

Неистовою злобою гонителей, еще жив сый, немилостивно в земли погребен был еси, страстотерпче, обаче, яко клас зрелый, в раи сладости богатно процвел еси.

Апостолом, мучеником и пророком в ревности о славе Божией подобяся, отверзл еси уста во обличение беззаконных, священне Константине, и, муки за Христа прием, лику святых сочетался еси.

Богородичен: Гору Тя, благодатию Божиею приосененную, пророк прозорливо разуме, Пречистая Дево, от Тебе бо отсечеся Камень Жизни, Христос Бог наш во спасение наше и обновление.

Кондак, глас 5:

Ревностию о вере Христове от юности возгоревся,/ богомудре отче Константине,/ заповедем евангельским последовал еси/ и светильник веры заблуждшим явился еси./ Темже, страданием за Христа жизнь твою увенчав,/ Бога в подвизе прославил еси,/ егоже моли спастися душам нашим.

Икос:

Гласу Божественнаго Учителя повинуяся, яко премудр ловец явился еси, святе Константине, и, мрежею словес душы заблуждшыя из глубины греховныя извлачая, на путь спасения наставил еси. Сего ради похвальная восписуем ти сице:

Радуйся, истиннаго пастырства светлое сияние;

радуйся, честнаго мученичества добрая похвало.

Радуйся, мед словес евангельских вкусивый;

радуйся, сими глад духовный утоливый.

Радуйся, заповедей Божиих ревностный исполнителю;

радуйся, неверия и раскола мудрый обличителю.

Радуйся, Константине досточудный, теплый о нас пред Богом молитвенниче.

Песнь 7.

Ирмос: В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Огнем Божественныя любве, мучениче Христов Константине, лед неверия растопил еси и чистотою исповедания твоего возгрел еси верных сердца воспевати Богу: благословен еси в храме славы Твоея, Господи.

Кротце страдания терпя, святе Константине, незлобием единаго от мучителей ко Христу обратил еси, еще же и самовидца кончины твоея мученичеству сочетал еси. Ныне же купно с ними взываеши: благословен еси в храме славы Твоея, Господи.

О, неизглаголаннаго долготерпения! Константин блаженный люте умерщвляется и землею покрывается. Обаче ангели душу его святую к Престолу Божию возносят, идеже небожители вопиют: благословен еси в храме славы Твоея, Господи.

Богородичен: Надежда и Покров еси на Тя уповающим, Богородице Дево. Молитвами Твоими на враги видимыя и невидимыя укрепи ны и Сыну Твоему пети достойно сподоби: благословен еси в храме славы Твоея, Господи.

Песнь 8.

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители, отроцы, взывающе:/ благословите, вся дела Господня, Господа.

Страж веры Православныя непоколебимь явился еси, священномучениче, первее убо многая лжемудрования изобличая, второе же верность Христу пред мучители показуя, темже Владыце взываеши: благословите, вся дела Господня, Господа.

Темничное заключение и истязания беззаконных мучителей не возмогоша поколебати твердость веры твоея, святе Константине, ты бо, мужески вся претерпев, райския обители достигл еси, идеже ныне светло воспеваеши: благословите, вся дела Господня, Господа.

Аще и убиен был еси, мучениче славне, обаче ныне во обителех Царя Небеснаго жизни вечныя наслаждаешися и с лики святых новомучеников и исповедников победне взываеши: благословите, вся дела Господня, Господа.

Богородичен: Наследия Небеснаго не даждь нам лишитися, Пресвятая Дево, но молитвами Твоими сподоби нас со святым Константином воспевати: благословите, вся дела Господня, Господа.

Песнь 9.

Ирмос: Камень нерукосечный/ от несекомыя горы, Тебе, Дево,/ краеугольный отсечеся,/ Христос, совокупивый разстоящаяся естества./ Тем, веселящеся, Тя, Богородице, величаем.

Тело твое, святе Константине, Бог нетлением прослави и, яко многоценное сокровище нам явив, благоволи положити во утверждение олтарей храмов земли Московския. Мы же, Источника безсмертия вкушающе, причастники жизни вечныя бываем.

Исповедника тверда, мученика славна и пастыря добра именуем тя, Константине блаженне, и, подвиги твоими назидаеми, усердно просим: не лиши нас и ныне твоего отеческаго попечения.

Не может язык человеческий воспети по достоянию подвиги ваша, мученицы Христовы, мы же, любовию движими, приносим похвалы сия и молим: присно ходатайствуйте о спасении душ наших.

Богородичен: Агница нескверная, Агнца Божия верным рождши, Пречистая Дево, спаси любовию поющыя Тя и заступления Твоего усердно просящыя.

Светилен:

Днесь, вернии, вкупе собравшеся, светлость настоящаго праздника возвестим и священномученика Константина песньми прославим, егоже Христос сына Света показа и даров Духа Святаго исполни.

Слава, и ныне, праздника.

На хвалитех стихиры, глас 8.

Подобен: О, преславнаго чудесе:

О, преславнаго чудесе!/ Константин, пресвитер Богородский,/ лютыми страданьми и мучением/ проповедник всеобщаго Воскресения является/ и в земли, еще жив сый, погребается,/ обаче нетлением телесе от Бога прославляется,/ и в Небеснем Царствии со всеми святыми/ истее Пасхи Христовы причащается/ и молится о душах наших.

О, преславнаго чудесе!/ Путь тесный в широту райскую приводит/ и мучение Христа ради/ несказаннаго блаженства сподобляет./ На тебе же, добропобедне Константине,/ сия преславно исполнишася./ Помози и нам, страстотерпче,/ верность Богу даже до смерти сохранити/ и Царствия Небеснаго достигнути.

О, преславнаго чудесе!/ Константин, добропобедный мученик,/ священную одежду обагрив своею кровию,/ страданьми Небесных селений достигл есть,/ идеже ныне престолу Агнца Божия предстоит/ и со Ангелы победно взывает:/ благословение, и слава, и премудрость,/ и хвала, и честь, и сила, и крепость Богу нашему/ во веки веков. Аминь.

Слава, глас 6:

Мужественне крест твой на рамо взем/ и добродетельми вооружився,/ безбожныя наветы гонителей силою Божиею победил еси/ и мученическими страданьми божественнаго пристанища достигл еси,/ идеже от Владыки Христа услышал еси:/ благий рабе и верный,/ вниди в радость Господа твоего./ Того моли, Константине блаженне,/ грехов оставление и исправление жития нам подати,/ чтущим любовию святую память твою.

И ныне, праздника.

На Литургии

Блаженна от канона праздника Песнь 3.-я и святаго Песнь 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28–39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила,/ Помощник в скорбех, обретших ны зело. Евангелие от Луки, зачало 106, (21, 12–19). Причастен праздника и святаго: В память вечную будет праведник:

Молитва

О, избранный угодниче Христов, отче богомудре Константине, Церкве Русския столпе непоколебимый, земли Богородския похвало, паствы твоея предстателю и наставниче!

Ты, от юности в благовестии слова Божия подвизаяся, многия души от заблуждения и раскола во ограду Церкве возвратил еси. Егда же призва тя Господь на служение пастырское, добрый делатель вертограда Божия явился еси: сопастыри в благочестии укрепляя, юныя в вере и доброделании наставляя, мучимыя страстию пианства от пути погибельнаго отвращая и о всех людех пред Престолом Божиим теплыя молитвы вознося.

Во время же гонения безбожнаго образ мужественнаго и кроткаго стояния за веру явил еси и, еще жив сый, в землю погребен был еси и, лютую смерть прием, в первых новомученицех просиял еси.

Ныне же, мы, недостойнии, к честней и многоцелебней раце святых мощей твоих благоговейно припадающе, с любовию вопием ти: помози пастырем правило веры благочестне содержати, болящия и немощныя уврачуй, печальныя утеши, гонимыя защити, юныя настави, всем же благосердый отец и теплый молитвенник явися.

О, святче Божий! Умоли Господа Бога, да соблюдается в вере Православней отечество наше и в нем достойно и праведно прославляется имя Пресвятыя Троицы, Отца и Сына и Святаго Духа во веки веков. Аминь.

Источник: Текст утвержден Священным Синодом Русской Православной Церкви 17 июля 2020 года (журнал № 34)

Месяца септемврия в 20-й день

На велицей вечерни

На Господи, воззвах: стихиры на 8, глас 2:

Приидите, православных собори,/ восхвалим теплаго заступника Брянския земли,/ преподобнаго благовернаго князя Олега,/ измлада Христа Бога возлюбившаго,/ делами веры заповеди Его исполнившаго,/ монашеское жительство в пределех Брянских устроившаго/ и нам образ добродетели явившаго,/ празднственно почитающим святую память его.

Род правых благословится,/ рече праведный Давид./ Темже величаем днесь благовернаго князя Олега,/ прозябение благочестиваго корене князей Черниговских:/ Николы Святоши и Игоря страстотерпца,/ мученика Михаила и благовернаго Романа,/ сродника преподобныя Евфросинии Суждальския./ С нимиже ныне молися, преподобне,/ о спасении душ наших.

Егда бедство постиже землю Русскую/ и полчища агарянская разоряху ю,/ тогда, паче видимых, на невидимыя враги изшел еси/ и на молитвенней страже Отечества твоего стал еси,/ благоверне княже Олеже,/ воздевая преподобнеи руце к Богу,/ Единому спасти могущему/ и Спасу душ наших.

Первее в смиреннем сердцы обитель Богу сотворивый, преподобне,/ последи обитель первоверховных апостол во граде Брянске основал еси,/ идеже, добре во иноческих подвизех потрудився,/ нам мощи твоя честныя оставил еси,/ душею же во обителех Отца Небеснаго ныне ликовствуя,/ поминай верою и любовию воспевающих тя.

Богомудрый Петропавловския обители первоздателю,/ багряницу княжескую на власяницу иноческую вольне пременив,/ меч духовный мудре носил еси,/ Православие утверждая и вся душевредная посекая,/ ближним же и братии по образу Христову послужил еси,/ темже не престай присно покрывати/ град Брянск и обитель твою.

Слава, глас 8.

Подобен: О, преславнаго чудесе:

Преподобне княже Олеже,/ веры Православныя поборниче,/ благочестия истиннаго проповедниче/ и монахов известное правило,/ како славу мира сего презрел еси/ и узким путем Христу последовал еси?/ Темже и Господь нам тя дарова/ в скорбех скораго помощника/ и молитвенника тепла о душах наших.

И ныне, праздника.

Вход. Прокимен дне. Чтения три преподобническая.

На литии стихиры, глас 2:

Приидите, вернии людие,/ во обитель преподобнаго князя Олега/ и, духовный лик составльше, сице возопиим:/ радуйся, похвало наша и упование,/ и земли Брянския жертва Богу благоуханная,/ моли в мире пребывати всем,/ православно чтущим святую память твою.

Благоверия образ,/ в княжении милосердаго правителя,/ вдов и сирот предстателя,/ нищих питателя и скорбных утешителя,/ иноков правило и целомудрия забрало,/ богомудраго Олега воспоим./ Той бо, таланты богоданныя добре умножив,/ в радость Господа своего вниде/ и дерзновенно молится о душах наших.

Слава, глас 8:

На земли благочестно живя,/ в Горняя выну взирал еси,/ Олеже богоблаженне,/ ныне же с высоты Небесныя призри на нас,/ любовию тя призывающих,/ и споборствуй молитвами твоими,/ воинству же нашему победы на супостаты испроси,/ град твой и обитель, тобою созданную, от скорбей и бед лютых огради,/ молитвенниче наш усердный и скорый помощниче.

И ныне, праздника.

На стиховне стихиры, глас 4:

Мирския суеты Христа ради отрекся,/ первую в земли Брянстей обитель/ во имя первоверховных апостол основал еси,/ благоверный княже Олеже,/ та бо, яко камень краеугольный веры Православныя явися,/ на немже доныне утверждающеся,/ козни вражия заступлением твоим побеждаем.

Стих: Честна пред Господем/ смерть преподобных Его.

Мощи твоя честныя, преподобне княже Олеже,/ в годину безбожных гонений/ под спудом от поругания сохранишася,/ ныне же паки на свещнице обители твоея,/ яко богатое сокровище, нам явишася,/ освящающе и озаряюще благодатною помощию/ верою к ним притекающих.

Стих: Блажен муж, бояйся Господа,/ в заповедех Его восхощет зело.

От юности разум богопросвещенный стяжав/ чтением Божественных словес и писаний отеческих,/ подвигом святых подражати навыкл еси,/ учение правды, яко питие,/ делание же заповедей, яко пищу духовную имея,/ темже Безсмертныя трапезы ныне наслаждаешися.

Слава, глас 6:

Славу мира сего тленнаго/ непреложно отвергнув,/ о спасении людей, Богом ти врученных,/ сердцем отечески болезновал еси,/ молитвою же теплою/ милость Божию призывая/ и не себе угождая,/ апостольски ближних тяготы носил еси./ Темже достойно прославляешися,/ Олеже приснопамятне.

И ныне, праздника.

Тропарь, глас 8:

От юности возлюбив Христа всем сердцем, преподобне,/ славу земную, яко преходящу, оставил еси,/ и царство земное в ничтоже вменив,/ лику инок радостно причелся еси,/ и труды многими град Брянск, аки солнце, пресветло озарил еси:/ тем, быв Троицы украшение,/ моли, княже Олеже, Христа Бога,/ спастися душам нашим.

Ин тропарь, глас тойже:

От юности Христа возлюбив всем сердцем, преподобне,/ славу земную, яко преходящу, оставил еси/ и, царство земное нивочтоже вменив,/ лику иноческому радостно приобщился еси/ и, многими подвиги благодать Святаго Духа стяжав,/ град Брянск, аки солнце, пресветло озарил еси./ Темже моли, княже Олеже, Христа Бога,/ спастися душам нашим.

На утрени

По 1-м стихословии седален, глас 7:

Подвигом добрым подвизався,/ сосуд, благодати Божия исполненный, явился еси, преподобне княже Олеже./ Темже и уготовася тебе венец правды от Подвигоположника Христа Бога нашего./ Мы же, чада твоя, любовию чтуще святую память твою, со умилением зовем:/ молися о нас, святче Божий,/ да слезами покаяния очистим души наша/ и дерзновение улучим в день страшнаго испытания.

Слава, и ныне, праздника.

По 2-м стихословии седален святаго, глас 8:

Течение земное добре скончав,/ веру соблюл еси непорочну, святе Олеже,/ темже прослави тя Бог в чудесех,/ егоже моли даровати нам грехов прощение,/ воинству нашему на враги победу,/ плененным свобождение, миру умирение/ и христианом в Православии единение.

Слава, и ныне, праздника.

Величание:

Ублажаем тя,/ преподобне благоверне княже Олеже,/ и чтим святую память твою,/ наставниче монахов/ и собеседниче ангелов.

Псалом избранный:

Блажен муж, бояйся Господа, в заповедех Его восхощет зело.

Сильно на земли будет семя его.

Закон Бога его в сердцы его и не запнутся стопы его.

Постави его господина дому своему и князя всему стяжанию своему.

Божии державнии земли зело вознесошася.

По полиелеи седален, глас 4:

Красуйся и ликуй, земле Брянская,/ и да играют чада твоя в тебе,/ светло торжествующе в памяти преподобнаго князя Олега,/ общаго отца нашего и молебника,/ всех бо, притекающих к нему, утешает/ и во благочестии утверждает.

Слава, и ныне, праздника.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Яко добраго древа князей Русских благий плод,/ преподобне княже Олеже,/ стопам святых сродник твоих последовал еси,/ в княжении благоверие соблюдая,/ во иночестве добродетельми чистоту души являя,/ сего ради, яко имаши дерзновение ко Христу Богу,/ моли даровати Отечеству нашему мир/ и душам нашим велию милость.

Канон святаго, глас 4, егоже краегранесие: Заступника земли Брянския верою чтим.

Песнь 1.

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама,/ Амаликову силу в пустыни победил есть.

Припев: Святый благоверный княже Олеже, моли Бога о нас.

Заступника теплаго Брянския земли, князей похвалу и монахов удобрение, преподобнаго Олега воспоим, той бо силою Креста страсти и безплотныя враги победил есть.

Ангельски на земли пожил еси, княже Олеже, благаго корене князей Черниговских доброплодная отрасль быв, и яко воевода Небеснаго Царя, Отечество наше ныне ограждаеши.

Смирению Царя царствующих подражая, власть и честь, славу и богатство Христа ради во уметы вменил еси, и слезами постническими велиарову гордыню потопил еси.

Богородичен: Твоего Печерскаго образа в пределы Брянския пренесение ведая и родителя своего от слепоты исцеление зря, князь Олег воспеваше благодать Твою, Пречистая.

Песнь 3.

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Утвердил еси землю и люди твоя в вере Православней, преподобне, княжением благозаконным и подвиги монашескими.

Первую в земли Брянстей обитель основал еси, святе Олеже, яко камень краеугольный веры, во имя апостол первоверховных.

Нивы новонасажденныя делатель усердный явился еси, блаженне, темже доныне плодами трудов твоих освящаемся.

Богородичен: Источник исцелений близ Свены реки открыся чудотворная икона Богоматере. Еяже благодатию укрепляемь, князь Олег мир конечне оставил есть.

Кондак и икос праздника, глас 4.

Седален святаго, глас 8:

Смиренномудренно царства земнаго удаливыйся, во иноцех тезоименством царским наречен был еси, княже Олеже, во знамение уготованнаго ти Небеснаго Царствия, идеже ныне, яко царское священие, добродетели возвещаеши Христа Бога, Призвавшаго тя в чудный Свой свет.

Слава, и ныне, праздника.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Крест свой взем, себе и мира отверглся еси, преподобне, и вся козни вражия силою возлюбившаго тя Христа победил еси.

Агарян древле и зловерных нахождение паче меча молитвою отражал еси, и ныне Отечество наше от злых заступлением твоим избави.

Земля Брянская красуется древом, тобою насажденным при исходищих вод Православия, питающим нас и покрывающим.

Богородичен: Егда иноцы созданныя тобою, княже, святыя обители принесоша от Киева икону Пречистыя, тогда сила Ея в чудесех явися.

Песнь 5.

Ирмос: Ты, Господи, мой Свет,/ в мир пришел еси,/ Свет Святый,/ обращаяй из мрачна неведения/ верою воспевающия Тя.

Меч Божий обоюдуострый именуем тя, святе, душевредная бо посекаеши: в княжении благоверием, во иночестве же преподобием.

Лице твое в час кончины просветися, богоблаженне Олеже, и яко благий раб и верный в радость Господа твоего вшел еси.

Избавляеши от бед в нощи греховней блуждающих, святче, неба церковнаго кроткая звездо и к Свету Невечернему путеводителю.

Богородичен: Благословенная Владычице, просвети нас светом Сына Твоего, якоже древле очи благовернаго князя Романа.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися,/ ради милости из ребр Твоих/ истекшею Кровию.

Русская Церковь днесь всех созывает к похвале угодника Христова, преподобнаго князя Олега, от земли Брянския Отечеству нашему возсиявшаго.

Явился еси, преподобне Олеже, Православныя веры правило, монахом образ, людем предстатель теплый, граду и обители твоей ограждение.

Наследие Небесное и чудес благодать, воздаяние от Бога приял еси, святе Олеже, темже не престай милостивно посещати тя почитающия.

Богородичен: Свенския иконы Богоматере явление чудное видев, блаже, купно со отцем твоим, освященным собором и людьми многими благодарение Богу возсылаше.

Кондак, глас 2:

Заступниче теплый Брянския земли,/ преподобне княже Олеже,/ купно со святыми сродники твоими/ Престолу Божию ныне предстоя,/ молитвами твоими Православие утверди,/ ереси и расколы разори,/ Отечеству нашему мир/ и душам нашим полезная испроси.

Икос:

Отверзи честная уста твоя, Олеже благородне, и тайно глаголи во ушеса сердец наших: како, трудом равноапостольнаго Владимира ревнуя, обитель первоверховных апостол во граде Брянске основал еси? Како, Николе Святоше и Игорю страстотерпцу подобяся, мира отверглся еси? Како, последуя прадеду Михаилу, безкровное мученичество в подвизех монашеских восприял еси и благочестие родителя твоего наследовал еси? О, цвете красный древа великаго князей Русских! Молитвами твоими Православие в земли нашей утверди, ереси и расколы разори, Отечеству нашему мир и душам нашим полезная испроси.

Песнь 7.

Ирмос: В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Княжение и род оставил еси, огнем любве Божия распалаяся и крепко подвизаяся в чине монашестем, блаже. Темже и ныне с преподобных лики радуешися.

Избавитися езера огненнаго Человеколюбца Бога моли, преподобне, почитающим любовию святую память твою и добродетелем твоим подражающим.

Якоже злато огнем, душу и тело искусив воздержанием и молитвою, преподобне, в порфире чистоты над страстьми водворился еси.

Богородичен: Вся окрестныя земли, елика виде исцеленныма очима князь Роман, обители Твоей, Владычице, дарова, сын же его себе самаго в жертву Сыну Твоему принесе.

Песнь 8.

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители,/ отроцы, взывающе:/ благословите, вся дела Господня, Господа.

Елико велик в православном княжении был еси, толико в монашестем делании смирил еси себе, преподобне Олеже, темже и Бог тя превознесе и дарова ти чудес благодать.

Ревность велию показал еси ко благочестию, преизряден быв образ людем и учеником твоим, от младенства бо воспитався в законе Господни, чрез все житие волю Божию исполнити тщался еси.

Одеяния худость не омрачи девственныя красоты души твоея, блаженне, бдение же душевнеи твои очи просвети и труды тяжкия плоть твою духу покориша.

Богородичен: Юже древле избрала еси гору в пределех Брянских во обитель иноком и образом Твоим Свенским освятила еси, Пренепорочная, невредиму сохрани, да воспевается в ней Имя Сына Твоего во веки.

Песнь 9.

Ирмос: Камень нерукосечный/ от несекомыя горы, Тебе, Дево,/ краеугольный отсечеся, Христос,/ совокупивый разстоящаяся естества./ Тем, веселящеся, Тя, Богородице, величаем.

Чаянием будущих благ веселяся, тесным и прискорбным путем шествовал еси, воздержанию же, кротости, смирению и послушанию навыкнув, лику святых совокупился еси.

Трудолюбное по Бозе житие от юности возлюбив, преподобне княже, в меру возраста Христова достигл еси и, яко клас зрелый, в Небесныя житницы пожался еси.

Имамы святыя мощи твоя, богоносне княже, яко сокровище неистощимое и утешение велие душам и телесем нашим, темже тя величаем.

Богородичен: Мати Божия Пречистая, молитвами преподобнаго князя Олега и святых сродник его спаси землю Русскую и верныя люди Твоя утеши, иже Тя достойно величают.

Светилен:

Утреневав к Богу выну, тьмы вечныя избегл еси, преподобне княже Олеже, сего ради в час кончины лице твое просветися, и мощи твоя честныя доныне сияют нетлением и чудесы.

Слава, и ныне, праздника.

На хвалитех стихиры, глас 5:

Преподобне княже Олеже,/ Церкве Русския похвало преславная,/ града Брянска стено необоримая,/ Отечества нашего крепкое ограждение,/ ты, богоугодными и добрыми делы/ на свещнице княжения возсиял еси/ и, совершен быти хотяй,/ себе и мира отверглся еси/ и Царствия Небеснаго достигл еси.

Хвала Богу благодействующу,/ глаголал еси, святе Олеже,/ на смертнем одре возлежа,/ зрю уже брег моря житейскаго,/ имже доселе ношашеся моя утлая ладия./ Тем и лице твое радостию Небесною просветися/ и скорбь учеников утешением сим растворися./ Мы же, очима веры зряще нетленную красоту души твоея,/ похвальная ти воспеваем.

Богоносне отче Олеже,/ блажен град твой и обитель, созданная тобою,/ идеже подвизатися изволил еси/ и по смерти мощи твоя святыя оставил еси,/ к нимже припадающе, усердно молим тя:/ не отступай от нас духом,/ побори борющия ны видимыя и невидимыя враги,/ да присно о тебе Бога хвалим.

Слава, глас 6:

Яко заря утренняя/ в земли Брянстей возсиял еси,/ преподобне Олеже,/ князей Русских украшение,/ евангельски два поприща скончал еси,/ в княжении благоверием,/ во иночестве же преподобием,/ тем и сугубый венец от Господа восприял еси,/ Емуже тепле молися о душах наших.

И ныне, праздника.

На Литургии

Блаженны от канона праздника Песнь 3.-я и святаго Песнь 6-я. Прокимен, глас 5: Блажен муж, бояйся Господа,/ в заповедех Его восхощет зело. Стих: Сильно на земли будет семя его, род правых благословится. Апостол к Галатом, зачало 213. Аллилуиа, глас 8: Терпя потерпех Господа, и внят ми, и услыша молитву мою. Стих: Божии державнии земли зело вознесошася. Евангелие от Матфеа, зачало 81. Причастен: В память вечную будет праведник:

Молитва

О, преподобне отче, благоверне княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неустанный! Воззри, преблаженне, милостиво на град твой и виждь чада твоя, смиренно ти припадающая и служити тебе хотящая. Не отвержи требующих твоея помощи, но, яко благодетель и ходатай, моли присно Господа и Бога и Спаса нашего Иисуса Христа, да благословит землю Русскую, в мире и благоденствии сохраняя ю, грады умножая, достояние Свое соблюдая. Вознеси, богоносне отче наш, сие малое моление ко Владыце Христу, да утвердит во Святей Православней Церкви живый дух правыя веры и любве, благочестие непоколебимое, любомудрие, кротостию растворенное; да дарует пастырем ревность попечения о спасении людей, во еже неверующия просветити, заблуждшия наставити, отпадшия обратити и привлещи; изряднее же вся чада Церкве Православныя чисты да сохранит от мирских искушений, похотей плотских, суемудрия, суеверий и наваждений вражеских.

Ей, угодниче Божий, не презри нас, молящихся тебе, но помози нам скорым предстательством твоим, да, всяких бед, напастей и скорбей в сей жизни временней избежавше, кончину непостыдну обрящем и, тако на земли богоугодно поживше, жизни райския на Небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.

Источник: Текст службы утвержден решением Священного Синода от 14 июля 2018 года (журнал № 61)

Месяца сентября в 20-й день

Всех святых, в земли Брянской просиявших

На велицей вечерни

На Господи, воззвах: поставим стихов 8 и поем стихиры праздника 3 и святых стихиры, глас 3:

Приидите, православных собори,/ святыя, просиявшия в пределех Брянских, восхвалим:/ святители и священномученики,/ преподобныя и князи благоверныя,/ мученики и исповедники,/ вкупе именуемыя и неименуемыя,/ сии бо воистинну делы и словесы и многовидным житием/ и от Бога даровании/ соделашася святии,/ ихже и гробы Бог чудесы прослави./ Ныне же прославльшему их Христу предстоят/ и молятся прилежно о нас,/ любовию совершающих светлое их торжество.

Приидите, Православия ревнителие,/ песньми восхвалим богомудрыя святители,/ в земли Брянской слово Христовы истины право правившия,/ строители таин Божиих,/ священства венцы, благочестия образы,/ Церкве Христовы столпи непоколебимии,/ благоверным людем теплыя пособники/ и молитвенники о душах наших.

Кто от земнородных изречет/ чудная ваша жития, преподобнии отцы?/ Кий же язык изглаголет/ священныя о Дусе подвиги и поты ваша?/ Вы бо в мире явистеся воистину, якоже ангели,/ вся начала тьмы и власти лютыя/ Божиим вспоможением победисте,/ плоть умертвисте и дух оживисте/ и землю Брянскую небо другое сотвористе.

Ины стихиры, глас 8:

Блаженнии богомудрии князие,/ в пределех Брянских благоверно правившии,/ евангельскою мудростию украшеннии,/ светлостию добродетелей блиставшии,/ вы ныне, на Небесех предстояще,/ верных сословие озаряете/ и тьму бесовскую отгоняете./ Темже вас, яко причастники невечерния благодати/ и земли Брянския хранители непостыдныя,/ почитаем, досточуднии.

Мученицы Христовы преблаженнии,/ земли Брянския красное воспитание,/ страдания нивочтоже вменисте/ и срамоту поношения презресте,/ смерть же, яко приобретение/ жизни вечныя со Христом,/ радостно облобызасте/ и землю кровьми вашими напоисте,/ воздух же преставлением освятисте,/ и ныне на Небесех о нас молитеся непрестанно,/ боговидцы.

Слава, глас 1:

Веселися о Господе, земле Брянская,/ радуйся и ликуй, верою Православною обогатившися,/ телеса подвижников и свидетелей истины/ в недрех своих имущи, яко сокровище,/ насладися чудес, от них истекающих,/ и, видящи полк сей святый,/ от видимых и невидимых врагов тя ограждающий,/ благодарне Богу возопий:/ Господи, слава Тебе.

И ныне, праздника.

Вход. Прокимен дне. Чтения три.

Пророчества Исаина чтение (глава 49, 8–15):

Премудрости Иисуса, сына Сирахова, чтение (глава 44, 1–14):

Премудрости Соломоновы чтение (глава 3, 1–9):

На литии стихира праздника и святых стихиры, глас 8:

Срадуйтеся с нами, вси лицы святых/ и вся ангельская чиноначалия,/ духовне совокупльшеся,/ приидем и воспоим благодарную песнь Христу Богу:/ се бо безчисленный сонм сродников наших/ предстоит Царю Славы/ и молебне ходатайствует о нас./ Сии суть столпи и красота веры Православныя;/ сии учении, и делы, и кровей излиянии/ Церковь Божию прославиша;/ сии от всех предел земли нашея возсияша,/ и веру Православную в ней/ чудесы и знамении утвердиша,/ и во иныя страны пронесоша,/ апостольски ревнующе;/ инии же пустыни и грады земли Брянския обительми святыми украсиша,/ ангельское житие показующе;/ мнози ругании, и ранами, и лютою смертию/ от сынов века сего искусишася,/ мнози же и инеми виды,/ во всяцем чине подвизавшеся,/ нам терпения и злострадания образ подаша,/ и вси вкупе молят ныне Господа/ от бед избавитися Отечеству нашему/ и всем нам спастися.

Глас 1.

Подобен: О, дивное чудо:

О, дивное чудо!/ Источницы благочестия/ в пределех Брянских являются/ и путеводителие к Небеси святии сродницы нам бывают./ Веселися, земле Брянская,/ сих отечество земное./ Возопиим, вернии,/ таковыя имуще в бедах заступники:/ блаженнии и святии,/ Бога не престайте о нас молити,/ подающаго вами земли нашей велию милость.

Слава, святых, глас 6.

Подобен: Все отложше:

О, коль красно собрание ваше,/ личе святоизбранный,/ друзи Христови,/ Бога рачительнии угодницы,/ святии вси, в земли Брянской просиявшии,/ знаемии купно и безыменнии,/ приидите и станите посреде нас невидимо,/ предначинающе торжество и пение/ и сподобляюще даров невещественных/ ваш праздник совершающих светолепно.

И ныне, праздника.

На стиховне стихиры святых, глас 5.

Подобен: Радуйся:

Радуйся, земле Брянская,/ яже древле бе неверна,/ ныне же верою Православною сияющая,/ проповедию святаго Кукши со учеником его Никоном просвещенная,/ тех память усердно сохраняй,/ чада твоя подвизающи/ подражати вере их,/ в мудрования же странна и ложна не уклонятися,/ но благодатию утверждати сердца.

Стих: Господи, Господь наш,/ яко чудно имя Твое по всей земли.

Радуйся, земле Брянская,/ гражданы Небеснаго Царства воспитавшая/ и совершенныя мужи Господеви показавшая,/ иже светила душам нашим явишася,/ яко учении, делы и чудес зарею просияша./ Сих доблести с любовию прославляюще,/ поревнуим добродетелем их,/ молящеся прилежно ко Господу/ даровати нам велию милость.

Стих: Святым, иже суть на земли Его,/ удиви Господь вся хотения Своя в них.

Приидите, Небеснии предстателие наши к нам,/ вашего требующим милостиваго посещения/ и сердца наша радости исполните/ вашими к Богу молитвами,/ чудес источницы,/ любве органи благозвучнии,/ добродетельми украшеннии./ О, соборе святый/ и полче Божественный,/ земли Брянския утверждение/ вы есте воистинну.

Слава, святых, глас 2.

Подобен: Киими похвальными:

Киими похвальными венцы увенчаем заступники наша?/ Престолу Божию ныне предстоящия/ и чисте тех любящих духовно посещающия,/ всех скорбных утешители/ и сущих в бедах прибежище,/ земли Брянския хранители,/ веры истинныя в ней утверждение,/ Православия поборники,/ ихже ради возношение врагов наших Христос низложи,/ имеяй велию милость.

И ныне, праздника.

На благословении хлебов тропарь святых дважды и праздника единожды.

Тропарь святых, глас 4:

Днесь радостно ликует земля Брянская,/ прославляющи чада своя, Богу угодившия,/ святители и иереи,/ преподобныя отцы и матери,/ благоверныя князи и княгини,/ мученики и исповедники,/ к нимже с любовию возопиим:/ о, соборе святый и полче Божественный,/ земли нашея утверждение вы есте воистинну.

На утрени

На Бог Господь: тропарь праздника дважды. Слава, святых. И ныне, праздника.

По 1-м стихословии седален святых, глас 2:

К милости Источнику, Господу Иисусу, моление теплое принесите, прехвальнии,/ о земли Брянской молящеся,/ и от бед избавите нас,/ скорое поможение подающе.

Слава, и ныне, праздника.

По 2-м стихословии седален святых, глас 6:

Днесь Небеса радуются и земля Брянская веселится,/ память святых Твоих, Господи, празднующе,/ тех молитвами помилуй нас.

Слава, и ныне, праздника.

Величание:

Величаем вас,/ вси святии, в земли Брянския просиявшии,/ и чтим святую память вашу,/ вы бо молите за нас/ Христа Бога нашего.

Ино величание:

Ублажаем вас,/ чудотворцы наши славнии,/ землю Брянскую добродетельми вашими озарившии/ и нам образ спасения/ светоявленно показавшии.

Псалом избранный:

1 лик: Воскликните Господеви, вся земля, пойте же имени Его, дадите славу хвале Его.

2 лик: Род и род восхвалят дела Твоя и силу Твою возвестят.

1 лик: Яко благоволит Господь в людех Своих и вознесет кроткия во спасение.

2 лик: Сей род ищущих Господа, ищущих Лице Бога Иаковля.

1 лик: Мне же зело честни быша друзи Твои, Боже, зело утвердишася владычествия их.

2 лик: Изочту их, и паче песка умножатся.

1 лик: Пойте Богу нашему, яко Царь всея земли Бог, пойте разумно.

2 лик: И исполнится славы Его вся земля, буди, буди.

По полиелеи седален, глас 3:

Радостию совершающе днесь светлое торжество,/ восхвалим угодники Божия, землю Брянскую евангельским благовестием огласившия,/ тии бо, якоже древле праотцем нашим, тако и нам взывают ныне:/ приидите, обретохом Спаса душ наших.

Слава, и ныне, праздника.

Степенна, 1-й антифон 4-го гласа. Прокимен, глас 4: Радуйтеся, праведнии, о Господе,/ правым подобает похвала. Стих: Буди, Господи, милость Твоя на нас, якоже уповахом на Тя. Всякое дыхание: Евангелие от Матфеа, зачало 10.

По 50-м псалме стихира, глас 6.

Подобен: Отчаянная:

Творение святителя Афанасия, епископа Ковровскаго

Отчаянни есмы/ жития ради/ и не имамы нрава добродетельна,/ яко миро, приносим Ти, Господи,/ молитвы святых сродников наших./ Не отвержи Русь издревле Святую,/ ныне же грехов наших ради люте страждующую./ Не презри слезы верных сынов,/ колен своих пред Ваалом не преклонявших/ и ихже не поразил еси, согрешающих./ Приими нас, кающихся, Боже,/ святых Твоих мольбами.

Канон праздника, глас 8.

И святых канон, егоже краегранесие: Заступники земли Брянския верою чтим. Глас 4.

Песнь 1.

Ирмос: Моря чермную пучину/ невлажными стопами,/ древний пешешествовав Израиль,/ крестообразныма Моисеовыма рукама,/ Амаликову силу в пустыни победил есть.

Земли Брянския прозябения, Церковию Православною воспитанныя,/ во благочестии просиявшия Божественныя отцы и матери наша/ в песнех духовных согласно воспоим.

Священномученика Кукшу со учеником его Никоном восхвалим,/ землю Брянскую проповедию Евангелия просветившия/ и ныне купно Святей Троице предстоящия.

Славу княжения и отечество Христа ради оставив,/ преподобне отче наш Николо, Святоша именуемый,/ вечное Царство и славу на Небеси приял еси,/ идеже, ликуя, поминай верою чтущих тя.

Богородичен: Ты еси, Богородице, оружие наше и стена, и Святей Руси Заступница,/ к Тебе ныне прибегаем, Тя на молитву призываем,/ да избавиши нас от врагов наших.

Песнь 3.

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Убийц жестосердых, незлобиво муки претерпев,/ победитель явился еси, княже Игорю,/ темже благодать стяжал еси от междоусобныя брани избавляти.

Приидите, воспоим мученика Михаила, князя Черниговскаго,/ с болярином верным Феодором,/ исповедания венцы украсившихся.

Небесное Царство восприим трудами и молитвами,/ Феодоре, княже Смоленский,/ оружием молитв твоих и ныне Отечество наше охраняй.

Богородичен: Имамы образ Твой, Благая Одигитрие, в Чубковичах сияющий,/ знамение милости Твоея и в скорбех утешение,/ и чудес источник, Пречистая.

Кондак и икос праздника.

Седален святых, глас 7:

Нощней тьме огустевающей, умножается звездное блистание,/ и к тому очи заблуждших радостно возводятся./ Тако и умножившейся на земли тьме греховней,/ возведем горе очи наши, братие,/ и, сияние духовных звезд, землю нашу озаряющих, узревше,/ к Небесному отечеству потщимся,/ егоже да не лишит Господь нас, грешных, молитвами святых Своих.

Слава, и ныне, праздника.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине Своем,/ достойно взывающи:/ слава силе Твоей, Господи.

Киими словесы прославим князи благоверныя, иже, благочестием и верою просиявше, землю Брянскую добре управиша и обительми иноческими украсиша.

Изшел еси, яко воин Христов, на враги невидимыя, преподобне княже Олеже,/ и во обители, тобою созданней, добре подвизався,/ нам мощи твоя святыя оставил еси.

Звезду Суждальскую, от Чернигова возсиявшую,/ невесту Христову, инокинем наставницу,/ Евфросинию преподобную любовию да ублажим.

Богородичен: Егда обыдоша град Брянск супостаты,/ тогда благодатию Свенскаго Твоего образа, Пречистая, тех вспять обратила еси/ и многия ины чудеса от иконы Своея явила еси.

Песнь 5.

Ирмос: Ты, Господи, мой Свет,/ в мир пришел еси,/ Свет Святый, обращаяй из мрачна неведения/ верою воспевающия Тя.

Моли Бога о нас, святителю Феогносте, Московский чудотворче,/ мудрость со благочестием в житии сочетавый и благословение свое земли Брянской даровавый.

Любве и смирения сокровище,/ подвигов иноческих зерцало,/ правило веры и благочестия явился еси, святителю Феодосие Черниговский,/ темже Бог тя дивным нетлением и чудесы мощей твоих прослави.

Иоанна, святителя Тобольскаго, усердно воспоим,/ той бо, от Свенския обители изшед,/ Сибирския страны светильник явися/ и апостольскою ревностию и милосердием к страждущим прославися.

Богородичен: Балыкинскою и Молченскою, и Чолнскою иконами Твоими пределы Брянския освящаеши, Пречистая,/ и помощь неоскудную притекающим к ним присно источаеши.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися,/ ради милости из ребр Твоих/ истекшею Кровию.

Ратниче дерзновенный брани Куликовския,/ игумена Земли Русския послушниче смиренный,/ Александре Пересвете, страдальче мужественный,/ Брянскую землю, отечество твое, заступай.

Яко светильник дивный в дебри Брянской явился еси, преподобне Поликарпе,/ мудрование бо и славу мирскую презрев,/ Божественным заповедем неленостне последовал еси.

Несумненно вся красная мира сего оставил еси, преподобне Поликарпе,/ пощением и слезами, молитвами и песньми устремляяся к Богу,/ и обитель иноческую во имя Спаса нашего во граде Брянске создал еси.

Богородичен: Споручнице грешных, Всепетая Владычице,/ икону Твою в Одриной обители чудесы прославившая,/ яко Матерь Божия, умоли Твоими молитвами Избавителя всех,/ да спасет души наша.

Кондак, глас 2:

Заступницы теплии Брянския земли,/ святии сродницы наши,/ купно с Пресвятою Богородицею и всеми святыми/ Престолу Божию ныне предстояще,/ молитвами вашими Православие утвердите,/ ереси и расколы разорите,/ Отечеству нашему мир/ и душам нашим полезная испросите.

Икос:

Едемскаго рая древеса доброплодная и красная явишася, святии,/ цветы благовонныя учений и плоды дел творящии,/ от нихже души наша питаются и глад наш духовный утоляется,/ приидите убо, притецем под сень их и ублажим,/ яко земли Брянския отраду и украшение, образ жития и начертание,/ и к ним с любовию возопиим:/ о, блаженнии сродницы наши,/ молитвами вашими Православие утвердите,/ ереси и расколы разорите,/ Отечеству нашему мир/ и душам нашим полезная испросите.

Песнь 7.

Ирмос: В пещи Авраамстии отроцы персидстей,/ любовию благочестия паче,/ нежели пламенем опаляеми взываху:/ благословен еси в храме славы Твоея, Господи.

Крестителю Иоанну ревностию уподобился еси, Феодоре преподобне,/ от юности Богу угодив и скорби Его ради претерпев,/ обители Площанския воспитание и Санаксарскаго вертограда иноческаго похвало,/ моли спастися нам.

Имамы преподобных Василиска Сибирскаго и ученика его Зосиму Верховскаго,/ в Брянских дебрех начало подвигов положивших,/ яко образ послушания и пустыннолюбия,/ и о спасении ближних попечения.

Явишася народа Божия печальницы доблии,/ преподобнии старцы Оптинстии Льве, Макарие и Моисее,/ в обителех Брянских подвизавшиися,/ и нас на путь покаяния, смирения и терпения наставите.

Богородичен: Владычице Богородице,/ цельбоносною Твоею иконою, Троеручицею именуемою,/ Пустынь Белобережскую украсившая,/ простри всемощную Твою руку на помощь православно Тя величающим.

Песнь 8.

Ирмос: Руце распростер Даниил,/ львов зияния в рове затче:/ огненную же силу угасиша,/ добродетелию препоясавшеся,/ благочестия рачители отроцы, взывающе:/ благословите, вся дела Господня, Господа.

Егоже носил еси в сердце твоем, Слова Христа Бога,/ моли за ны, святителю Игнатие богомудре,/ Православия поборниче, покаяния и молитвы наставниче,/ архиереев украшение и монашествующих похвало.

Радуйтеся, священномученицы славнии Александре, Иоанне, Митрофане, Алексие и Корнилие, во дни гонений безбожных веру соблюдшии и даже до крове Христа ради пострадавшии.

Архипастыри земли орловския, мученическою кровию украшенныя, согласно воспоим:/ Серафима митрополита, прославлению Саровскаго чудотворца послужившаго,/ и другаго Серафима добропобеднаго,/ и добляго Макария.

Богородичен: Юже воспевают ангели, прославим ныне Заступницу Усердную,/ икону Свою обители Площанской и всей земли Брянской в покров и ограждение даровавшую.

Песнь 9.

Ирмос: Камень нерукосечный/ от несекомыя горы, Тебе, Дево,/ краеугольный отсечеся, Христос,/ совокупивый разстоящаяся естества,/ тем, веселящеся, Тя, Богородице, величаем.

Честныя иерархи, Стародуба славу,/ Дамаскина ревностнаго, за Христа смерть приемшаго,/ и кроткаго Николая, в Казахской земли исповеднический путь скончавшаго,/ молитвенники о нас ко Спасу приводим.

Твердо Православную веру, яко щит держаще, святии страстотерпцы земли Брянския,/ злобу лютых отступников и безбожных наглое неистовство препобедили есте/ и нам образ терпения и злострадания явили есте.

Именованнии и безыменнии, явленнии и неявленнии, святии сродницы наши,/ славу многу от Бога приимшии,/ утверждение в Православии и мир Отечеству нашему испросите/ и спасение душам нашим.

Богородичен: Мати Божия Пречистая,/ грады и веси земли Брянския честнаго лика Твоего изображении милостивно обогатившая,/ благодарение наше приими/ и от всякаго зла покрый Отечество наше.

Светилен святых:

В песнех восхвалим светила незаходимая Брянския земли,/ таинники Божественнаго Слова,/ Христа славяще, сих просветившаго и возлюбившаго,/ и помощники нам в скорбех даровавшаго.

Слава, и ныне, праздника.

На хвалитех стихиры праздника и святых стихиры, глас 4.

Подобен: Дал еси знамение:

Дал еси знамение/ святым, боящимся Тебе, Господи,/ Крест Твой Честный,/ имже тии, посрамивше начала и власти тьмы,/ на Брянской земли Православие утвердиша./ Темже Твое человеколюбное смотрение славим,/ Иисусе Всесильне,/ Спасе душ наших.

Дал еси нам, яко образ мужества и терпения,/ святыя вся земли нашея,/ благоугодившия Тебе, Господи,/ благия и верныя рабы Твоя,/ ихже слезами, подвиги и поты,/ кровьми и учении/ Отечество наше утвердися./ Тех молитвами,/ Иисусе Всесильне,/ спаси души наша.

От Божественныя благодати подвигшеся,/ честныя отцы наша/ сынолепно да восхвалим,/ тии бо безстрастием души и ума чистотою,/ нравом кротким и благочестием/ даже до крове и смерти мучителем противосташа/ и Христу присвоишася,/ Спасу душ наших.

Слава, святых, глас 8.

Подобен: О, преславнаго чудесе:

Благодарным сердцем и усты/ хвалим Тя, Многомилостиве Господи,/ дивен бо явился еси во святых Твоих,/ в земли Брянской богоугодне подвизавшихся,/ ихже предстатели нам даровал еси/ и в нуждах заступники./ Тем, ныне совершающе память их,/ покланяемся державе Твоей, поюще:/ Троице Святая, слава Тебе!

И ныне, праздника.

Славословие великое. И отпуст.

На Литургии

Блаженны от праздника, Песнь 8-я, на 4, и святых на 4. Прокимен, глас 4: Святым, иже суть на земли Его,/ удиви Господь вся хотения Своя в них. Стих: Сохрани мя, Господи, яко на Тя уповах. Апостол ко Евреем, зачало 330. Аллилуиа, глас 4: Боже, ушима нашима услышахом, и отцы наши возвестиша нам. Стих: Спасл бо еси нас от стужающих нам и ненавидящих нас посрамил еси. Евангелие от Матфеа, зачало 11. Причастен: Благоволит Господь в людех Своих и вознесет кроткия во спасение.

Молитва

О, всеблаженнии и богомудрии угодницы Божии, подвиги своими землю Брянскую освятившии и телеса своя, яко семена веры, в ней оставльшии, душами же своими Престолу Божию предстоящии и непрестанно о ней молящиися!

Се ныне, в день общаго вашего торжества, мы, грешнии, земнии сродницы ваши, дерзаем приносити вам сие хвалебное пение. Величаем ваша великия подвиги, духовнии воини Христови, терпением и мужеством до конца врага низложившии и нас от прелести и козней его избавляющии. Ублажаем ваше святое житие, светильницы божественнии, светом веры и добродетелей светящиися и наша умы и сердца богомудренно озаряющии. Прославляем ваша великая чудеса, цвети райстии, в стране нашей прекрасне процветшии и ароматы дарований и чудес повсюду благоухающии. Восхваляем вашу богоподражательную любовь, предстателие наши и покровителие, и, уповающе на помощь вашу, припадаем к вам и вопием: просветителие наши! Споспешествуйте людем Брянския земли завещанную вами веру Православную твердо содержати, да спасительное семя, вами всеянное, не изсушено будет зноем неверия, но, дождем благодати Божия напоенное, плод изобильный да принесет.

Святителие Христови! Молитвами вашими утвердите Церковь Русскую, ереси, расколы и нестроения в ней потребите, расточенныя овцы во едино соберите и от всяких волков, во одежди овчей в стадо Христово входящих, оградите.

Преподобнии отцы! Сохраните нас от прелестей мира сего лукаваго, да, отвергшеся себе и вземше крест свой, последуем Христу, распинающе плоть свою со страстьми и похотьми, носяще тяготы друг друга.

Благовернии князие! Воззрите милостивно на земное Отечество ваше и вся нечестия и соблазны, в нем ныне сущия, оружием молитв ваших потребите, да, якоже древле, тако и ныне и в грядущее время, прославляется на святей земли нашей Имя Господне.

Страстотерпцы преславнии! Укрепите нас в мужественнем стоянии даже до крове за веру Православную и обычаи отеческия, да ни скорбь, ни теснота, ни гонения, ни глад, ни нагота, ни беда, ни меч возмогут нас разлучити от любве Божия, яже о Христе Иисусе, Господе нашем.

Богомудрыя жены, в немощнем естестве подвиги велия явившия! Молитеся, да дух вашея любве ко Господу и ревность о угождении Ему и о своем и ближняго спасении не оскудеет в нас.

Вси святии сродницы наши, от лет древних просиявшии и в последния дни подвизавшиися, явленнии и неявленнии, ведомии и неведомии! Посетите нашу немощь и уничижение и молитвами вашими испросите у Христа Бога нашего, да и мы, безбедно преплывше пучину житейскую и невредимо соблюдше сокровище Православныя веры, пристанища вечнаго спасения достигнем и в блаженных обителех Горняго Отечества вкупе с вами и со всеми угодившими Ему от века святыми водворимся благодатию и человеколюбием Спасителя нашего Господа Иисуса Христа, Емуже со Превечным Отцем и Пресвятым Духом подобает непрестанное славословие и поклонение от всех верных во веки веков. Аминь.

Истончик: Текст службы утвержден решением Священного Синода от 9 июля 2019 года (журнал № 82).

Ме́сяца септе́мврия в 24-й день

Свята́го благове́рнаго кня́зя Владисла́ва Се́рбскаго

На вече́рни

На Го́споди, воззва́х: стихи́ры, глас 6:

По и́мени твоему́ та́ко и житие́ твое́: прозябы́й бо от сла́внаго ко́рене, досто́йно подража́л еси́ роди́телю первовенча́нному, и венча́н быв от Са́ввы вели́каго, оте́честву яви́лся еси́ сла́ва и похвала́, Владисла́ве приснопа́мятне.

По и́мени твоему́ та́ко и житие́ твое́: взыска́л бо еси́ сла́вы небе́сныя, и сла́вою оте́чество твое́ обогати́вый, воздви́гл еси́ в нем хра́мы и оби́тели, взыва́я: не нам, Го́споди, не нам, но и́мени Твоему́ даждь сла́ву о ми́лости и и́стине Твое́й.

По и́мени твоему́ та́ко и житие́ твое́: несла́вныя бо ми́ра сего́ возлюби́л еси́, убо́гия, ни́щыя и уве́чныя. И тем оби́льно благотвори́вый, сла́вне, досто́йно венча́н был от Царя́ Небе́снаго сла́вою и че́стию нетле́нною.

Сла́ва, глас 8:

Христолюби́вый Владисла́в самоде́ржец, я́ко дре́вле Дави́д пред киво́том, предходя́ пред святы́м те́лом Са́ввы, всея́ Се́рбии вели́каго и чу́днаго па́стыря, воспева́ше в весе́лии и ра́довании: вели́чит душа́ моя́ Го́спода, я́ко святы́ню сию́ вношу́ во оби́тель мою́.

И ны́не, Богоро́дичен, или́ Крестобогоро́дичен:

Пресвята́я Де́ва Влады́чица, предстоя́щи Кресту́ Сы́на Своего́ и Бо́га, уми́льно глаго́лаше слезя́щи: о Сы́не, ка́ко умира́еши сме́ртию безче́стною, че́стию венча́вый челове́ческое естество́? Утро́бою уязвля́юся и ра́зумом трепе́щу, Пречи́стая пла́кашеся го́рько.

На стихо́вне Окто́иха.

Та́же глаго́лем:

Стих: Го́споди, си́лою Твое́ю возвесели́тся царь, и о спасе́нии Твое́м возра́дуется зело́.

И пое́м стихи́ру, глас 4:

Весели́тся и лику́ет страна́ Се́рбская, с не́ю же вси язы́цы слове́нстии благоче́стно пра́зднуют. Предста́ бо царь Престо́лу Твоему́, Христе́ Бо́же, и мо́лит Тя о правосла́внем во́инстве. Те́мже и мы взыва́ем ему́ в весе́лии: ра́дуйся, Владисла́ве многоимени́те.

Сла́ва, глас 2:

Егда́ страну́ твою́ сокро́вищами земны́ми обогати́л еси́, тогда́ к Небе́сному Царю́ воззва́л еси́: возлюби́х словеса́ Твоя́ па́че зла́та и топа́зия. Те́мже благода́ть от Христа́ Бо́га получи́вый и я́ко тала́нт сию́ умно́живый, не преста́й Того́ о чту́щих тя моли́ти, да уще́дрит и спасе́т ду́ши на́ша.

И ны́не, Богоро́дичен, или́ Крестобогоро́дичен:

Сокрыва́ше лучи́ своя́ со́лнце, и земля́ в тре́пете содрога́шеся, и безду́шнии ка́мени распада́хуся, вся же тварь окаменева́ше у́жасом, и заве́са церко́вная раздира́шеся, А́нгели ли́ца своя́ закрыва́ху: но кий язы́к испове́сть Твоя́ страда́ния у Креста́ Сы́на Твоего́, Пречи́стая?

Тропа́рь, глас 4:

И́же ко́рене честна́го о́трасль сла́вная, благове́рный кня́же Владисла́ве, в оте́честве твое́м до́бре ца́рствовал еси́, и Ца́рствие Небе́сное получи́вый, владе́еши сла́вою и че́стию вели́кою. Те́мже не забу́ди язы́ков слове́нских и правосла́вным лю́дем на сопроти́вныя спобо́рствуй.

На у́трени

Кано́н, его́же краегране́сие: Владисла́ва воспе́ти, Го́споди, сподо́би мя. Глас 2

Песнь 1.

Ирмо́с: Гряди́те, лю́дие, пои́м песнь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Владисла́ву царю́ песнь воспе́ти, Го́споди, сподо́би мя, оскверне́ннаго мно́гими и безме́стными согреше́ньми, па́дшаго во глубину́ зол и уя́звленнаго тщесла́вием и го́рдостию лю́тою.

Лоза́ благоуха́нная виногра́да Христо́ва яви́лся еси́, Владисла́ве, процве́л бо еси́ на сла́внем дре́ве царе́й благочести́вых, его́же сла́достию напита́выйся, кра́сныя плоды́ произрасти́л еси́.

А́ще и мно́ги ско́рби от бра́та своего́ претерпе́л еси́, оба́че послуша́ния роди́телем отню́д не уклони́ся, те́мже и венча́ тя сро́дник твой святы́й Са́вва богому́дрый ца́рским венце́м, достохва́льне.

Богоро́дичен: Де́во Пресвята́я, христиа́н похвало́, лица́ Твоего́ не отврати́ от нас, но я́ко милосе́рдая Ма́ти, защити́ чад Твои́х от враг ви́димых и неви́димых.

Песнь 3.

Ирмо́с: На ка́мени мя ве́ры утверди́в, разшири́л еси́ уста́ моя́ на враги́ моя́. Возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.

И́стинный насле́дник отцу́ своему́ первовенча́нному в забо́те о стране́ Се́рбстей был еси́, Владисла́ве, огражда́я ю́ от наше́ствия иноплеме́нных и от вся́кия междоусо́бныя бра́ни.

Суд Твой, Бо́же, царе́ви даждь, и пра́вду Твою́ сы́ну царе́ву, та́ко взыва́л еси́, блаже́нный царю́ Владисла́ве. Те́мже стяжа́л еси́ от Царя́ царе́й ра́зум, во е́же твори́ти суд пра́ведный и ми́лостивый.

Ли́хвы и мзды отбежа́л еси́ я́ко огня́, Владисла́ве, при́сно ходя́й пред лице́м Госпо́дним. Сего́ ра́ди и благослови́ Бог тя и страну́ Се́рбскую Свое́ю бога́тою ми́лостию.

Богоро́дичен: А́нгели удиви́шася, Чи́стая, рождеству́ Твоему́, мы же ужаса́емся всегда́шнему Твоему́ предста́тельству о нас, его́же не лиши́ нас, Влады́чице, за мно́жество на́ших прегреше́ний.

Седа́лен, глас 4:

Вои́стину до́брый во́ин Христо́в яви́лся еси́, пресла́вный царю́ Владисла́ве, ору́жием зе́млю свою́ защити́вый и благоче́стием правосла́вную ве́ру огради́вый, но я́ко име́яй дерзнове́ние ко Святе́й Тро́ице, мир стране́ Се́рбстей испроси́ и душа́м на́шим ве́лию ми́лость.

Сла́ва, и ны́не, Богоро́дичен:

Прия́телище Божества́ непристу́пнаго яви́лася еси́, Пресвята́я Де́во Чи́стая, но простри́ ру́це Твои́ ко Всеми́лостивому Спа́су, да изба́вит ны от вся́кия напа́сти и сподо́бит покланя́тися Ему́ неосужде́нно.

Крестобогоро́дичен:

Предстоя́щи Кресту́ Сы́на Твоего́ и Бо́га, грехо́в мои́х ра́ди уя́звлена и распя́таго, не прогне́вайся до конца́, Влады́чице, но Твои́ми всемо́щными моли́твами изба́ви мя от ве́чнаго осужде́ния.

Песнь 4.

Ирмо́с: Прише́л еси́ от Де́вы, не хода́тай, ни А́нгел, но Сам, Го́споди, вопло́щься, и спасл еси́ всего́ мя челове́ка. Тем зову́ Ти: сла́ва си́ле Твое́й, Го́споди.

Ве́ру пра́вую па́че зе́ницы о́ка храни́л еси́ во оте́честве свое́м, огражда́я ю́ от лати́нян и ага́рян, сего́ ра́ди сохрани́ тя Госпо́дь от вся́каго лю́таго обстоя́ния.

А́нгели сла́ву Бо́жию воспе́ша на Небеси́, егда́ ты, Владисла́ве, в земли́ Се́рбстей мно́гия хра́мы и оби́тели и́ноческия воздви́гл еси́, иде́же не умолка́ет моли́тва ко Го́споду.

Вои́стину всей вселе́нней яви́лся еси́ удобре́ние, христолюби́вый царю́ Владисла́ве, благотворя́ше бо и правосла́вным Це́рквам восто́ка, да́ры бога́тыя сим посыла́я чрез Са́вву блаже́ннаго.

Богоро́дичен: Одушевле́нная пала́то Царя́ ца́рствующих и колесни́це свята́я Го́спода сла́вы, не оста́ви нас, в доброде́тели убо́гих, помози́ нам гре́шным, и вку́пе со святы́м царе́м Владисла́вом заступи́ нас и изба́ви от ве́чнаго безче́стия.

Песнь 5.

Ирмо́с: Све́та Пода́телю, и веко́в Тво́рче, Го́споди, во све́те Твои́х повеле́ний наста́ви нас: ра́зве бо Тебе́ ино́го Бо́га не зна́ем.

Си́лою Госпо́днею возвесели́лся еси́, царю́ Владисла́ве, и в ра́дости воспева́ше Ему́ пе́сни хвале́бныя: ра́зве бо Тебе́ ино́го Бо́га не зна́ю.

Положи́ святы́й Са́вва на главе́ твое́й вене́ц от ка́мене че́стна. Живота́ ве́чнаго проси́л еси́ у Влады́ки живота́, и Той ти даде́ долготу́ дний и спасе́ние во век ве́ка.

Е́же от враго́в наше́ствие укроти́л еси́, Владисла́ве, побора́ше бо Госпо́дь на ня́ и гне́вом Свои́м смяте́ я́. Я́ко упова́ше на Бо́га, те́мже кре́постию Его́ не подви́глся еси́, му́дре.

Богоро́дичен: Тя, па́че ума́ и словесе́ Ма́терь Бо́жию, ве́рнии сла́вим единому́дренно и воспева́ем Ти пе́сни хвале́бныя, роди́ла бо еси́ нам ве́чное Ра́дование.

Песнь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Излия́ се́рдце мое́ сло́во бла́го: славословле́ния святокра́сному Владисла́ву, и́же ми́лостию и му́дростию стяжа́ небе́сное ра́дование, те́мже глаго́лю аз похвалы́ царе́ви.

Глас Христо́в во Ева́нгелии услы́шавый, о некра́домем сокро́вищи попече́ся, и расточи́в име́ния своя́ ни́щим и убо́гим, стяжа́л еси́ Небе́сное Ца́рствие.

От ю́ности возлюби́л еси́ отве́рженныя ми́ра сего́ и сотвори́л я́ еси́ дру́ги себе́ от бога́тства мимотеку́щаго, сего́ ра́ди оскуде́вшу ти в животе́ вре́меннем, ти́и прия́ша тя в ве́чная селе́ния.

Богоро́дичен: Стена́ еси́ и огражде́ние нам, Пресвята́я Де́во Чи́стая, на рабы́ Твоя́ неключи́мыя умилосе́рдися, немощна́я уврачу́й и оскудева́ющая воспо́лни.

Конда́к, глас 6:

Царю́ Небе́сному подража́я, Уте́шителю и Пода́телю жи́зни, бога́тства твоя́ убо́гим расточа́ше, и был еси́ прибе́жище вся́кому стра́ждущему, утеше́ние и заступле́ние оби́димому, кре́пость и огражде́ние стране́ твое́й, Владисла́ве богоблаже́нне.

И́кос

Вои́стину яви́л еси́, Владисла́ве, в себе́ само́м ца́рский о́браз смире́нием, милосе́рдием и кро́тостию, послуша́нием Царю́ Небе́сному и любо́вию к лю́дем твои́м. Те́мже нас сподо́би взыва́ти тебе́ и уми́льно глаго́лати: ра́дуйся, мно́ги ско́рби претерпе́вый, ра́дуйся, сла́бости людски́я отту́ду позна́вый, ра́дуйся, сла́дость жите́йскую ни во что́же вмени́вый, ра́дуйся, печа́ль люде́й на ра́дость претвори́вый, ра́дуйся се́рбская похвало́ и удобре́ние, ра́дуйся, царе́й сла́во и ни́щих весе́лие, Владисла́ве богоблаже́нне.

Песнь 7.

Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги их обруга́ша, среди́ пла́мене возопи́ша, и ороси́ я́ А́нгел: услы́шася уже́ уст ва́ших моли́тва.

Пома́за Дави́да Саму́ил проро́к иногда́, показу́я на сем Бо́жие благоволе́ние, та́ко и Са́вва святы́й тя, Владисла́ве, пома́за, прозира́я о тебе́ Боже́ственное промышле́ние.

Отбеже́ вся́кая зло́ба от души́ твоея́, я́ко в се́рдцы твое́м Христо́с воцари́ся и за́поведьми Свои́ми Боже́ственными низложи́ вся́кое беззако́ние и горды́ню.

Духо́вный ра́зум от Бо́га стяжа́л еси́ и, егда́ восста́ша на тя лю́дие неблагода́рнии, кро́тко ца́рствие твое́ бра́ту уступи́л еси́, спаса́я страну́ от междоусо́бныя бра́ни.

Богоро́дичен: Изумева́ет всяк ум пе́ти Тя, Богоро́дице, недоумева́ет всяк язы́к испове́дати Твоя́ чудеса́, оба́че вме́сто слове́с ве́ру приими́. Ты бо христиа́н еси́ Засту́пница, Тя велича́ем.

Песнь 8.

Ирмо́с: В пещь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Се́рбии яви́стася вы, дво́ица честна́я, Са́вво богому́дре и Владисла́ве доброхва́льне, пе́рвый Се́рбский архиере́ю и венча́нный им пресла́вный госуда́рю, но моли́та вку́пе о стра́ждущем оте́честве ва́шем.

Пти́ца обре́те себе́ хра́мину, и го́рлица гнездо́ себе́, та́кожде Владисла́в оби́тель святу́ю созда́, иде́же положи́ мо́щи Са́ввы святи́теля, по́слежде и сам упоко́ися та́мо.

Оби́тель Миле́шевская процвете́ я́ко крин се́льный, иму́щи в себе́ мо́щи двою́ уго́днику Бо́жию: Са́ввы святи́теля и Владисла́ва царя́, и́хже моли́твами, Го́споди, поми́луй нас.

Богоро́дичен: Де́во Влады́чице, Ма́ти всех нас, не пре́зри люде́й согреши́вших, на ча́да Твоя́ умилосе́рдися и покры́й нас честны́м Твои́м омофо́ром.

Песнь 9.

Ирмо́с: Безнача́льна Роди́теля Сын, Бог и Госпо́дь, вопло́щься от Де́вы нам яви́ся, омраче́нная просвети́ти, собра́ти расточе́нная. Тем Всепе́тую Богоро́дицу велича́ем.

Обре́л еси́ ве́чную сла́ву, блаже́нне, со святы́ми упокоева́яся, те́мже и чту́щих тя помина́й у Престо́ла Го́спода Вседержи́теля.

Блаже́н разумева́яй на ни́ща и убо́га, в день лют изба́вит его́ Госпо́дь, те́мже и ты, царю́ Владисла́ве, обре́л еси́ мзду пра́ведных.

Изукра́шенный сонм царе́й благочести́вых в стране́ Се́рбстей пресла́вно просия́: Симео́н, Стефа́н, Ла́зарь и и́ни мно́зи. С ни́миже, Владисла́ве досточу́дне, моли́ся о нас.

Многогре́шный и суему́дренный аз, не возмого́х принести́ ти пе́ния досто́йнаго, Владисла́ве, оба́че ве́дуще тя ми́лостива и нищелю́бна, не пре́зри моего́ убо́жества, молю́ся.

Богоро́дичен: Я́ко одушевле́нному Бо́жию киво́ту сла́ва Ти подоба́ет, Влады́чице, превознесе́нна бо па́че Го́рних чино́в, роди́вши Сы́на, Преве́чнаго Бо́га.

Свети́лен, глас 1:

Вои́стину яви́лся еси́ ни́щим сокро́вище, стра́нным прибе́жище, утеше́ние пла́чущим, оби́димым заступле́ние, стране́ Се́рбстей сла́ва и огражде́ние. Те́мже и нам, свя́те Владисла́ве, бу́ди предста́тель до́брый и моли́твенник всеусе́рдный.

Сла́ва, и ны́не, Богоро́дичен:

О всепе́тая Ма́ти, ро́ждшая всех Влады́ку и Го́спода, на рабы́ Твоя́ умилосе́рдися и ку́пно со святы́м Владисла́вом моли́ спасти́ся душа́м на́шим.

На стихо́вне Окто́иха.

Та́же глаго́лем:

Стих: Го́споди, спаси́ царя́ и услы́ши ны, во́ньже а́ще день призове́м Тя.

И пое́м стихи́ру, глас 4:

Досто́йный насле́дник яви́лся еси́ святы́м сро́дником твои́м держа́вным: Симео́ну мироточи́вому и Стефа́ну первовенча́нному, ца́рский о́браз утвержда́я свя́тостию жития́. Те́мже Ца́рствие Небе́сное насле́довал еси́, Владисла́ве присноблаже́нне.

Сла́ва, глас 8:

Весели́тся днесь оби́тель Миле́шевская, иму́щи в себе́ всеизя́щное сокро́вище, честны́я мо́щи царя́ Владисла́ва, изря́днаго моли́твенника и ми́лостиваго засту́пника, ему́же вси уми́льно глаго́лем: о пресла́вный царю́ Владисла́ве, не оста́ви нас моли́твами твои́ми.

И ны́не, Богоро́дичен, или́ Крестобогоро́дичен:

Егда́ ко Кресту́ пригвозди́ша Го́спода сла́вы неблагода́рнии и злонра́внии лю́дие, на смерть осуди́вше Жизнода́вца, тогда́ ору́жие про́йде Твою́ святу́ю ду́шу и греси́ на́ши пронзи́ша Твое́ се́рдце, но не отри́ни нас до конца́ погиба́ющих и изба́ви ве́чнаго муче́ния.

Источник: Текст утвержден Священным Синодом Русской Православной Церкви 25 декабря 2013 года (журнал № 147)

На велицей вечерни

На Господи, воззвах: стихиры, глас 5

Подобен: Радуйся, Живоносный Кресте:

На Брак Агнчий Владыкою Христом призвани, / во одежду светлу добродетелей одеялися есте / и угодны явистеся Христу Богу со всеми святыми, / наслаждающеся нетленною пищею // во Царствии Небеснем.

В багряныя ризы / кровию твоею облачился еси / и явился еси истиннейший священник Бога Вышняго, / во Царствии Небеснем ныне пребываеши, / священномучениче Александре, / молися даровати нам грехов прощение // и веры утверждение.

Воистину дар Божий / явишася нам мощи твоя, / святый священномучениче Феодоре, / болезни телесныя исцеляюще, / и душевныя страсти искореняюще, / и в нуждах помогающе, // всем любовию тя почитающим.

Плодоносное прозябение веры Христовы / явистеся мученицы, Александре и Феодоре. / Темже кровию вашею / землю нашу освящающе / и Церковь Русскую украшающе, / молите Христа Бога, // да соблюдет нас от всякаго навета вражия.

Слава, глас 6:

Днесь благодать Святаго Духа нас cобра / в прославление святых священномучеников Александра и Феодора, / тии бо предстоят Престолу Всецаря // и молятся о спасении душ наших.

И ныне: Богородичен

“Кто Тебе не ублажит…”

Вход.

Прокимен дне.

И чтения новомучеником:

Деян. 4,6–31; 2Тим.4,1–8; Евр.11,33–40.

На литии стихира новомучеником, глас 6:

Подобен: Отчаянная:

Творение святителя Афанасия Ковровскаго.

Отчаяни есмы / жития ради / и не имамы/ нрава добродетельна, / но, яко миро, приносим Ти, Господи, / молитвы святых сродников наших./ Не отвержи Русь, издревле Святую, / ныне же грехов наших ради люте страждующую. / Не презри слезы верных сынов, / колен своих пред Ваалом не преклонявших, / и ихже не поразил еси, согрешающих. / Приими нас, кающихся, Боже, / святых Твоих мольбами.

Стихиры на стиховне, глас 2:

Подобне древним мучеником, святии Александре и Феодоре, / во страданиих страшных пребысте непоколебими / и мучителем вашим вопиясте: / страха вашего не убоимся, ниже смутимся, // яко с нами Бог.

Стих: Проидохом сквозе огнь и воду, / и извел еси ны в покой.

Небрегше о сосудех телес ваших, / в различных изтязаниих / мученически течение жития скончасте, / темже, память вашу празднующе, / цветы песненными венчаем вас, / ходатаев наших пред Христом Богом, // егоже молите спасти и просветити души наша.

Стих: Блажени живущии в дому Твоем,/ в веки веков восхвалят Тя.

Егда, яко мученики, имеюще дерзновение / ко Христу Богу нашему, / востаните судити мирови / во Второе Пришествие Его: // тогда помяните и нас, память вашу любовию празднующих.

Слава, глас 2:

Яко плод зрелый благочестный / сподобистеся принести Христу телеса ваша, / священномученицы Александре и Феодоре, / и собрани бысте в житницу Его, // молите спасти и просветити души наша.

И ныне, глас 6:

Егда приидет времен исполнение, / труба же Архангелова вострубит, / престоли судищныя поставятся и река огненная возшумит, / мертвии возстанут и живии восхищени будут, / и явится знамение Сына Человеческаго на Небесех,/ вси земнороднии восплачутся, / и вся силы небесныя поколеблются, / тогда Дева Богородица, / грешных Спасение и ненадежных Надежда, / одесную Судии предстоящи, явится, / Пречистеи Свои руце к Сыну простирающи, / и слезами ланиты Своя милостивно орошающи, / и вечнаго мучения избавляющи, / имя Ея препетое призывающих. / Темже убо, братие, / ныне потщимся и к Богородице прибегати не обленимся, / да и нас заступит в оный страшный час, / все упование на Ню возлагающих.

По Ныне отпущаеши:

тропарь священномучеником дважды

и Богородице Дево: единожды.

Тропарь, глас 1:

Бескровную Жертву Богу приносяще, / предстояли есте престолу земнаго храма. / Излиявше же кровь свою за Христа, / днесь предстоите Небесному Престолу Царя Славы, / святии священномученицы Александре и Феодоре, // молитеся непрестанно спастися душам нашим.

На утрени

По 1-м стихословии седален:

Вы, святии Александре и Феодоре, яко священницы Бога Вседержителя, приясте власть прощати и решити грехи, разрешите зол моих множество и направите жизнь мою на путь заповедей Божиих.

Слава, и ныне:

Яко юродивыя девы не имам светильника покаяния, не обретох бо елея милости, слез и воздыханий сердечных, тщетно толку в двери, затворенныя ми грехом: Мати Божия, отверзи ми двери милости Твоея.

По 2-м стихословии седален:

Законно пострадасте, венцами нетленными от Господа венчалися есте, и нас утвердите подвигом добрым подвизатися, течение жизни достойно совершити, вас бо теплыя ходатаив ко Спасу стяжахом.

Слава, и ныне:

Буди нам Заступница и Покров от враг видимых и невидимых, Пресвятая Богородице, и Предстательница пред Богом, молящи Его вкупе со священномучениками Александром и Феодором о спасении нашем.

На полиелее величание:

Величаем вас, / святии священномученицы Александре и Феодоре, / и чтим честная страдания ваша, / яже за Христа // претерпели есте.

Псалом избранный: Бог нам прибежище и сила:

Седален по полиелеи:

Днесь двоицу святых страдальцев прославим, крепкаго духом Александра и мужественнаго Феодора, сии бо службу святым братиям Косме и Дамиану совершивше, спострадати им сподобишася, яко братия духовнии суще, ныне же молятся Христу Богу в вере, надежди и любви сохранитися нам.

Слава, и ныне:

Богородице, Упование наше, буди нам Помощница и Предстательница пред Сыном Твоим, Христом Богом нашим, во вся дни живота нашего.

Прокимен, глас 4: Проидохом сквозе огнь и воду, / и извел еси ны в покой.

Стих: Разжегл ны еси, якоже разжизается сребро.

Евангелие от Матфея, зачало 36 (10, 16–22): Рече Господь Своим учеником, се Аз посылаю вас: конец: Претерпевый же до конца, той спасен будет.

Стихира по 50-м псалме, глас 6:

Како возможем прославити вас по достоянию / или что принесем вам в дар, / святии священномученицы Александре и Феодоре, / от Самаго Христа Бога прославлении? / Но приимите усердныя мольбы наша, // вас бо теплыя предстатели ко Спасу стяжахом.

Канон

Песнь 1.

Ирмос: Яко по суху:

Како дерзну, недостойный, прославити священную двоицу мучеников, кровь свою Христа ради пролиявших и пред лицем безбожных Имя Его исповедовавших? Но даждь ми, Господи, слово прославити сих, Тебе в житии своем прославивших.

Во страдании Христа исповедавше, вы явистеся воистину камение на истиннем Камени Христе утвержденнии.

В любви ко Господу возрастающе, вы исполнили есте заповедь любве вышшия, темже о нас Христа Бога молите, да утвердит в любви души наша.

Слава, и ныне:

Что принесет Тебе, Владычице Богородице, наше неможение? Кую песнь воспоем Тебе, рождшей Бога плотию? Токмо ту, коею Гавриил Архангел нас научи: радуйся, Благодатная, Господь с Тобою.

Песнь 3.

Ирмос: Несть свят:

Заповедем Господним поучающеся и от соблазнов мира сего удаляющеся, явистеся избраннии сосуди Духа Святаго, святии Александре и Феодоре, и, от Него укрепляеми, шествовали есте во след распеншагося Христа и от Того венчалися есте венцами небесными.

Юдоль земную благочестно прошедше и кровию своею веру запечатлевше, ныне со всеми святыми прославляетеся в Царствии Небеснем, помяните и нас, священномученицы доблии, память вашу празднующих.

Образ верным показастеся в деле, слове, житии и смерти за Христа. Темже молитеся за нас, чад ваших, яко да достойни явимся вашего за нас предстательства.

Слава, и ныне:

Како возмогла еси вместити Невместимаго? Како родила еси, из Негоже вся быша? Что возглаголю Тебе, окаянный аз, или что воспою? Токмо: радуйся, Благодатная, Господь с Тобою.

По 3-ей песни седален:

Украшение пастырей явистеся, святии священномученицы Александре и Феодоре, Бескровную Жертву усердно Богу приносяще и в добродетелех возрастающе, сподобилися есте венцы мученическия от Христа прияти. Темже молите, да подаст Он пастырем Церкве ревность и попечение о спасении душ наших.

Слава, и ныне:

Витии словеснии умолкают, Дево, в Рождестве Твоем, зряще како раждаеши всю тварь Содержащаго дланию? Мы же в благоговении и трепете предстоим Тебе, взывающе: радуйся, Благодатная, Господь с Тобою.

Песнь 4.

Ирмос: Христос моя сила:

От рук безбожных заклатися изволили есте, пастырие Божии, Агнцу и Пастырю Христу последовавше и Того заколение вообразивше.

Пастыреначальнику Христу подражающе, пастырие Божии суще, страстотерпцы, молистеся за убийц своих: Боже, прости им, не ведают бо, что творят.

Духа Святаго вместилище, явившеся, святыя мощи ваша нам оставили есте, достохвальнии, ихже мы обретше дивно, с преподобным аввою Сергием вас ныне ублажаем.

Слава, и ныне:

О, Владычице Богородице, буди нам Щит и Заступление во дни испытаний, находящих на ны: разве бо Тебе инаго предстательства не вемы.

Песнь 5.

Ирмос: Божиим светом:

Яко свеща, возженная пред Богом, житие твое бысть, святый мучениче Александре, просвещающая тьму неверия и безбожия, землю Русскую объявшую. Ты бо был еси воистину отец духовный верным чадом твоим.

Воли Божией себе вручивше, святии священномученицы, не обязастеся куплями житейскими, оставивше же вся яже в мире сем и за Христом на смерть последовавше, получисте от Него обетованное Царство.

Новомученицы Российстии, простотою, милосердием, незлобием и любовию подражателие бысте древним мучеником Косме и Дамиану. Темже и празднество им совершивше, пострадати сподобистеся и с ними достойно ныне веселитеся в Царствии Небеснем.

Слава, и ныне:

Аще не была бы Ты, Владычице, Предстательница наша пред Господем, како могли быхом приступити к Нему, обремененнии многими грехми? Но в Тебе имуще дерзновение, вопием Христу о спасении нашем.

Песнь 6.

Ирмос: Житейское море:

Мужески страдания претерпесте, человеческое естество превозмогающе, пастырие Христови, и яко хлеб сладкий Святей Троице принесостеся. Молите Христа Бога, да помилует всех нас.

Жертву Безкровную усердно Богу приносяще, священномученицы, вменистеся, яко овцы заколения, и пожрени бысте за Христа, егоже всем сердцем возлюбили есте.

В смерти вашей явистеся семенем веры, святии Александре и Феодоре, кровию же вашею Церковь утверждающе, бысте достойнии делателие винограда Христова. Темже от Бога получисте венцы нетленныя.

Слава, и ныне:

В скорбех Помощницу, в болезнех Целительницу, от уз Свободительницу обретохом Тя, Владычице Богородице, темже молим Тя: не удали от нас милости Твоея.

Кондак, глас 2:

Пастырие Христовы, Александре и Феодоре, священномученик чудная двоице, мужественне веру православную пред мучители исповедовавшии и кровию своею землю Русскую обагрившии, страдания ваша днесь благочестно восхваляем и мощи ваша умильно лобызаем, молите непрестанно о всех нас.

Ин кондак:

священномученику Александру, глас 3:

Душу свою милосердием удобрил еси,/ предался еси в руце Божии,/ безбожных мучителей удивил еси,/ предвозвестив им смерть грядущую, яко бывшую;/ и душею твоею, яко нетленною звездою,/ сонм святых украсил еси;/ сего ради и мы восхваляем тя,/ святый священномучениче Александре/, пастырей добрых крепосте и утверждение.

Икос:

Руками вашими Безкровную Жертву Богу принесосте и от рук Его венцы мученическия и нетление приясте. Мы же, чудеса ваша зряще, верно вопием: Радуйтеся, исповедницы Христа Бога нашего; радуйтеся, яко за Него пострадати изволисте. Радуйтеся, Царства Небеснаго наследницы; радуйтеся, яко дар мощи своя нам остависте. Радуйтеся, земли Московския столпи непоколебимии; радуйтеся, граду нашему освящение и утверждение. Радуйтеся, прибегающим к вам скории помощницы; радуйтеся, яко исцеляете душевныя недуги. Радуйтеся, Александре и Феодоре, пастырей добрых крепосте и утверждение.

Песнь 7.

Ирмос: Россодательну убо пещь:

Господь, древле росу с Небесе трием отроком пославый, и вам терпение и крепость во страданиих подаде, вы же, страстотерпцы, любвию к Нему распалающеся, пети научисте всех: благословен еси, Боже отец наших.

Яко отроцы посреде огня неопально стояху, тако и вы, святии мученицы Александре и Феодоре, посреде огненнаго испытания веры неопалими бысте и Христу вопияли есте: благословен еси, Боже отец наших.

Яко злато в горниле очищено явистеся, святии мученицы Александре и Феодоре, во страдании крепчайше адаманта бывше, Христу вопияли есте: благословен еси, Боже отец наших.

Слава, и ныне:

На Тя, Богородице, упование возлагаем, вернии людие, да не постыдимся никогдаже, но имуще Тя Покров и Стену Нерушимую, вопием Ти: радуйся, Благодатная, Господь с Тобою.

Песнь 8.

Ирмос: Из пламене:

Облика пастырскаго не отреклся еси, священномучениче Александре, пред лицем безбожных исповедовав Истину, и даже до смерти верным пребыл еси Пастыреначальнику Христу, от Негоже венец победный приял еси во Царствии Небеснем.

Во страдании своем мучителей удивив, блаженне Феодоре, Христа не отверглся еси и, силою Его укрепляемь, всех научал еси вопити: благословен еси Боже отец наших.

Ревнителие убо отеческих преданий и блюстителие уставов церковных пребысте, святии священномученицы Александре и Феодоре, наставляюще верных твердо шествовати путем заповедей Христовых. Молите Христа Бога, да соблюдет Церковь Свою от наветов вражиих.

Слава, и ныне: троичен:

В Триех Лицех Бога исповедую, Отца, и Сына, и Духа Святаго, Троицу Единосущную и Нераздельную.

Песнь 9.

Ирмос: Бога человеком:

Словеса Давидова приемлюще: “Се что добро или что красно, но еже жити братии вкупе”, вы, святии, яко братия единокровнии явистеся и, пребывше единомыслени во страданиих, в Царствии Христовом ныне веселитеся.

Смертию вашею веру в воскресение исповедасте, священномученицы предивнии, и бесстрашно страданьми ко Господу приидосте, верующе, яко кто погубит душу свою Христа ради, восприимет ю во Царствии Небеснем.

Терпением многим муки претерпевше, святии мученицы Александре и Феодоре, Христа смертию вашею прослависте. О нас Того прилежно молите, да спасет души наша.

Слава, и ныне:

Богородице Дево, моли Сына Твоего и Бога нашего со всеми святыми в земли Российстей просиявшими, да избавит Отечество наше от неверия и сохранит нерушиму Церковь Православную.

Светилен:

Мучения за Христа яко истинный дар Божий восприясте, мученицы славнии, и кровию вашею потописте бесовския полки, ныне же сцарствуете Ему во веки.

Слава, и ныне:

Под Твою милость прибегаем, Богородице Дево, молитв наших не презри в скорбех, но от бед избави нас Едина Чистая и Благословенная.

На хвалитех, глас 8:

Подобен: Что вас наречем:

Что вас наречем, святии мученицы, / Ангели, яко презресте своя телеса; / Херувими, яко на вас почи благодать Божия; // Силы, яко творите чудеса молитвами вашими?

Что вас наречем, святии мученицы, / солнце, яко изливаете Свет Христов по всей земли, / столпи, яко укреписте небосвод церковный // страданиями вашими за Христа?

Придите, мучениколюбцев собори, / восхвалим заступников наших святых Александра и Феодора,/ тии бо предстоят Престолу Всецаря // и молятся о душах наших.

Слава, глас 6:

Подобен: Все отложше:

Восхваляюще заступников наших, / святых мучеников Александра и Феодора, / воспоим Христу победную песнь: / слава Тебе, мучеников крепосте, / слава Тебе, явившему дивных святых в последняя времена; // тех предстательством помилуй нас.

И ныне, Богородичен, глас 6:

Богородице, Ты еси лоза истинная,/ возрастившая нам Плод Живота,/ Тебе молимся, молися, Владычице,/ со святыми священномучениками Александром и Феодором,// помиловатися душам нашим.

На Литургии

Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми;

Апостол к Римляном, зач. 99 (8,28–39): Братие, вемы, яко любящим Бога вся поспешествуют во благое;

Аллилуиа, глас 2: Священницы Твои облекутся в правду, и преподобнии Твои возрадуются. Стих: Бог нам прибежище и сила, Помощник в скорбех, обретших ны зело.

Евангелие от Луки, зач. 106 (21,12–19): Возложат на вы руки своя:

Причастен: Радуйтеся, праведнии о Господе, правым подобает похвала.

Источник: Гимнограф.ру

Месяца сентября в 27-й день

Священномученика Петра, митрополита Крутицкаго

На велицей вечерни

На Господи, воззвах: стихиры на 8, глас 4.

Подобен: Яко добля:

Храм Божий себе соделав,/ священномучениче Петре,/ столп Церкве непоколебимый показался еси,/ яви бо тя Христос утверждение/ всем, в раздорех мятущимся,/ светильника верным во тьме безверия,/ ограждение пастве от волков злохищных/ и хранителя верна дома Божия./ Темже моли спастися душам нашим.

Слову Божию последовав,/ священномучениче Петре,/ яко агнец непорочный заклался еси/ и, живоносным зерном в земли нашей сокрывся,/ плод мног Богу принесл еси,/ верныя же люди от разделения сохранив,/ яко раб благий и верный,/ в радость Господа твоего вшел еси./ егоже моли спастися душам нашим.

Древним пророком в скитаниих подобяся,/ ничтоже имеяй и вся содержай,/ в болезнех и трудех неустанных/ апостольски пожил еси,/ священномучениче Петре./ Святителем же Московским в трудех и ревности последовав,/ новым мучеником кончиною соединился еси,/ всем житием твоим Богу послуживый./ егоже моли спастися душам нашим.

Ины стихиры, глас 6.

Подобен: Все отложше:

Все возложив на Бога упование,/ глаголом патриарха Тихона внял еси/ и, архиерейство из рук того приемь,/ первосвятителю гонимому во всем последовал еси,/ небоязненный же исповедник Христов явився,/ в гонениих мужески взывал еси:/ веру Православную в любви и смирении/ потщимся, братие, сохранити./ Мы же, священномучениче Петре,/ прославляюще крепость твою, вопием:/ моли Милостиваго Бога/ спастися душам нашим.

Все отложив плотское мудрование,/ глаголал еси, Петре смиренномудре:/ житие мое, егоже дни преходят,/ страдание и скорбь есть,/ обаче точию единаго страшуся,/ разделения и смуты церковныя,/ сего ради престол патриарший блюсти не отрекаюся./ Мы же, прославляюще крепость твою, вопием:/ моли спастися душам нашим.

Вся стрелы лукаваго отразив:/ новых раскольников лживая ухищрения,/ братии неповиновение,/ безбожников клевету,/ соблазны, устрашения и мучения,/ единство Церкве Русския сохранил еси./ Мы же, прославляюще терпение твое, вопием:/ моли Милостиваго Бога/ спастися душам нашим.

Вся страдания темничная мужественне претерпевая,/ священномучениче Петре,/ мир Христов в сердце приумножил еси/ и, архипастыри смиренно увещавая,/ раскольники же кротко к покаянию призывая,/ Бога о мире молил еси:/ да будут вси едино./ Мы же, прославляюще смирение твое, вопием:/ моли спастися душам нашим.

Слава, глас тойже:

Како прославим тя, священномучениче Петре,/ всем бо вся был еси:/ архипастырем твердое прибежище,/ верным известное упование,/ мучеником похвала,/ монашествующим радование,/ сомнящимся правило веры,/ гонимым образ терпения,/ гонителем небоязненный обличитель/ и всем свидетель Христов./ Темже и ныне не остави нас,/ на Небесех моляся,/ помиловатися душам нашим.

И ныне, Богородичен: Кто Тебе не ублажит:

Вход. Прокимен дне. И чтения.

1. Деяний святых апостол чтение (глава 4): Во дни оны, глаголющым апостолом к людем, наидоша на них священницы:

2. Деяний святых апостол чтение (глава 4): Во дни оны, видяще иудеи Петрово дерзновение и Иоанново:

3. Деяний святых апостол чтение (глава 4): Во дни оны, отпущена бывша апостола:

На литии стихира, глас 4.

Подобен: Дал еси знамение:

Моисеева знамения приял еси:/ жезл, имже народ упасл еси/ и лжепастыри обличил еси,/ проказу, яко многия болезни претерпел еси,/ такожде и скрижали закона,/ егоже мужественне исполнил еси,/ всею крепостию Бога возлюбивый/ и душу свою за ближних положивый.

На стиховне стихиры, глас 5.

Подобен: Радуйся:

Радуйся, священномучениче Петре,/ Церковь Русская ти взывает,/ храмы возсозидающи и веру утверждающи,/ ейже, на тя взирающе, научаемся,/ твоему смирению подражаем,/ подвиги твоя чтуще, соуз любве обретаем,/ молитвами твоими укрепляемся,/ тя прославляюще, Бога благодарим,/ подающаго нам мир и велию милость.

Стих: Честна пред Господем/ смерть преподобных Его.

Радуйся, священномучениче Петре,/ в вере наше утверждение/ и воине Христов изрядный,/ вся терпети со смирением нас научаяй,/ да явимся вернии сыны Церкве/ и новомучеников наших чада,/ за вся благодаряще Бога,/ скорбь и радость нам посылающаго/ и подающаго мир и велию милость.

Стих: Что воздам Господеви о всех,/ яже воздаде ми.

Радуйся, священномучениче Петре,/ об Отечестве нашем Христу теплый молитвенниче,/ еже Церковь Русскую от раздоров оградити/ и светом Евангелия Русь просветити,/ пастыри и учители премудрыя даровати,/ верныя во благочестии укрепити,/ младенцы в вере возрастити,/ да едиными усты вси Тому воспоют:/ Господи, мир Твой подаждь нам.

Слава, глас тойже, самогласен:

Ликуй священный граде Москво,/ прославляя новаго митрополита Петра,/ не в тебе, но в безвестней стране погребеннаго,/ подобне же древнему святителю просиявшаго./ Той единению земли Русския послужи,/ сей разорителей ея обличи,/ той власть святительскую возвеличи,/ сей, в темницах сый, власть любве показа,/ но, якоже и той, единое упование всея Руси быв,/ Отечество и град наш прослави./ Ныне со святители Московскими за ны молится Богу.

И ныне, Богородичен: Храм и Дверь еси:

Тропарь, глас 2:

Бо́жиим смотре́нием к святи́тельскому служе́нию/ святы́м Патриа́рхом Ти́хоном призва́нный,/ ста́ду Христо́ву яви́лся еси́ стра́ж неусы́пный/ и защи́тник небоя́зненный,/ священному́чениче Пе́тре./ Жесто́кая заточе́ния и да́льная изгна́ния,/ страда́ния и сме́рть от богобо́рцев претерпе́л еси́./ Вене́ц му́ченический прием,/ на Небеси́ ны́не ра́дуешися./ Моли́ Ми́лостиваго Бо́га,/ да сохрани́т Це́рковь на́шу от нестрое́ний,/ единомы́слие и мир лю́дем Свои́м да́рует/ и спасе́т ду́ши на́ша.

На утрени

По 1-м стихословии седален, глас 2:

В лютая времена, егда любы оскуде, промыслом Божиим призван был еси соблюсти паству Русскую, святителю отче Петре, прииди и ныне невидимо и стани с нами, моляся, во еже в любви утвердитися нам.

Слава, и ныне, Богородичен:

Великия милости Твоя поминающе, Пресвятая Владычице, отвращаемся лютых страстей, врагом всеваемых, с любовию Тя, Чистая, призывающе.

По 2-м стихословии седален, глас 6:

Всего себе отверг, Христу последовал еси, священномучениче Петре, и, егда прельстишася мнози, неуловлен лестию сатанинскою явился еси. Темже и нас соблазнов льстиваго избави, наставник премудрый буди и в вере истинней утверди.

Слава, и ныне, Богородичен:

О, Всемилостивая Госпоже, Заступнице Усердная рода христианскаго! Покрый нас от всякаго зла, бесовских обстояний и тьмы страстей избави и моли спастися душам нашим.

Величание:

Величаем тя,/ священномучениче Петре,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиелеи седален, глас 5:

Ликует Церковь Христова, прославляющи тя, святителю Петре, яко подвижника веры Православныя, святым сотаинника и сомученика, верным пастыря добраго и всем нам предстателя изряднаго, молящагося о спасении душ наших.

Слава, и ныне, Богородичен:

Тебе, Пречистая Дево Богоневесто, Архангел возопи: благословен Плод чрева Твоего. Темже и мы, раби Твои, яко истинную Богоматерь, Тя православно величаем.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Иоанна, зачало 36.

По 50-м псалме стихира, глас 6:

О, двоице святая,/ святителие Тихоне и Петре,/ вы, даже до смерти за Христа подвизавшеся,/ овцы Его словесныя добре упасли есте,/ страждуще с ними и за них молящеся,/ всех бо любовию вместили есте./ Темже и нам ныне глаголете:/ друг друга тяготы носите/ и тако исполните закон Христов.

Канон Богородицы на 6, глас 6, подобен: Волною морскою:

Песнь 1.

Ирмос: Казнями во Египте/ Моисей фараона обличи/ и, тому невразумлену,/ морскую пучину разверзе жезлом своим/ властию, Богом данною./ Израиль же, гонителя видев погибель,/ песнь Избавителю вопияше:/ славно бо прославися.

Праведный гнев Господень порази иногда землю Русскую, Церковь же, пучину гонений прешедши, Богородице вопиет: буди и ныне нам Путеводительница благая и теплая Молитвенница к Сыну Твоему, Иже славно прославися.

Мучительства фараона мысленнаго избегше, благодарственная пения воспеваем Тебе, Предстательнице Всемощная, и земли обетованныя достигнути чаем молитвами Твоими, Богородице.

Канон священномученика Петра на 8, глас тойже.

Песнь 1., ирмос тойже

Вождь преславный людем верным быв, святителю Петре, якоже Моисей, шатания и мятежи претерпел еси и пустынная скитания с народом разделил еси. Ныне славу Божию яве зриши и за ны Господу молишися.

Имя Илиино бысть едино упование седми тысящ во Израили, такожде и людие земли нашея, тя жива ведуще, отче Петре, правыя веры не отступаху. Мы же вемы тя на Небесех живуща и о нас молящася.

Первоверховному апостолу тезоименит быв, святителю Петре, того веру стяжал еси и Иоанну в любви подражал еси, Иаковлеву же ревность имея, яко Павел к пастве взывал еси: подражайте мне, якоже аз Христу.

Богородичен: Пророчески предвозвещенная, Дево, апостолом Божия Матерь явилася еси, святителем же Божественная Помощница и всем христианом непостыдная Предстательница.

Песнь 3.

Ирмос: Лук сильных изнеможе,/ мучеников же не престаше песнь:/ несть свят яко Господь,/ Той судит концем земли.

Песнь и крепость новомучеников была еси, Владычице, сопротивных оружие низлагающи, издревле бо владычествуеши, яко Царица удела Своего, в земли Русской.

Архангелу рекшая: буди Ми по глаголу твоему, христианом, в гонениих сущим, образ подала еси, Пречистая Дево, еже волю Божию творити со смирением.

Ин, ирмос тойже

Все упование на Бога возложив, во искушениих смертных не унывал еси, священномучениче Петре, глаголя: аще и страдания претерпеваю, но вем, яко Господь мя не оставит, даруя души моей мир. Темже ныне и нас в молитвах твоих не остави.

Верный сын Церкве Русския явился еси, святителю Петре, темже, во узах сый, верныя люди научал еси: послушная чада преданий церковных будите и противляйтеся предателем и раскольником, нововведения льстивая умыслившим.

Во всяцем деле Бога пред собою зря, паче первосвятительскаго долга величие разумевая, Церкви страж неусыпный и защитник твердый стаду Христову явился еси, священномучениче Петре добропобедный.

Богородичен: Рождество Твое, Богородице, чудно явися, отрочество во Святая Святых сокрыто есть, чистота же и Божественное избрание непостижимы, Едина Троическаго совета Таиннице.

Седален, глас 6:

Чиста есть совесть моя и смерти никакоже страшуся, рекл еси, отче Петре, темже служения, мне ввереннаго, не оставляю, отступники же, предания церковная отвергающия и нововведения льстивая умыслившия, осуждаю, грех бо расколоучительства благочестием не покрывается, ниже мученическою кровию омывается. Вы же, братие, бегайте творящих разделения и соблазны, и Бог мира сокрушит сатану под ногами вашими.

Слава, и ныне, Богородичен:

Едина плотию Бога рождшая, молимся Ти, Чистая: избави сетей вражиих души наша и утверди на камени Божественных заповедей, яко на Тя упование возложихом.

Песнь 4.

Ирмос: О, таинство смотрения Божия/ и лето посещения Господня,/ освящение кровьми нашея земли,/ утверждение Церкве!/ Во гладе, огни, проказе и брани/ изшел еси на спасение людей Твоих,/ слава силе Твоей, Господи.

О, таинства смотрения Божия! Страдания бо спасительная Руси низпосылая, Господь ей и Предстательницу Всемощную дарова. К нейже, с верою притекающе, вопием: подаждь нам крепкое терпение и истинное покаяние.

Всех скорбящих Радосте, Блаженное Чрево, Цвете благоуханный, Живоносный Источниче, Избавление от зол страждущих, Путеводительнице, Умягчение злых сердец, како исчислим имена Твоя, Богородице, и милости неисчислимыя роду христианскому?

Ин, ирмос тойже

Божий глас, призываяй тя к святительскому служению, чрез патриарха Тихона уразумел еси, темже, мужеством вооружився и смерти не убоявся, верный служитель Господень явился еси и мученическую кончину за Христа приял еси.

Глаголы первосвятителя Тихона на тебе яве исполнишася, священномучениче Петре, ты бо святительство во изгнаниих и в безлюдных пустынех провождал еси, темница тебе иноческая келлия явися, храм же твой небеса быша и сослужителие твои ангели Божии.

Верный помощник первосвятителя Тихона быв, Промыслом Божиим тому преемник явился еси и призывал еси люди твердо веровати во Едину, Святую, Соборную и Апостольскую Церковь.

Богородичен: От века избранная и от младенства призванная, в храм, яко Невеста, введена была еси, Приснодево Мати, и, Неневестная пребывши, Бога плотию родила еси.

Песнь 5.

Ирмос: Ныне видим свет утренния зари,/ светлее солнца просиявших святых,/ имиже нощь брани пришедше, со Исаией возопиим:/ правде научитеся, вси земнии,/ Господи, Боже наш, мир даждь нам.

Во дни предстательствуеши, Владычице, в нощи на верныя призираеши и утренний свет милостию предваряеши, сего ради всечасно под Твой покров прибегаем и неотступнаго Твоего предстательства чаем.

Яко в солнце облеклася еси, Солнце Правды рождшая, светом разума власть тмы побеждаеши, Пречистая Дева Богородице, и верным людем мир Сына Твоего даруеши, темже Тя славим.

Ин, ирмос тойже

Како обновити Церковь Христову восхотели есте, иного бо основания положити никтоже может, рекл еси, священномучениче Петре, предателем первосвятителя Тихона и хулителем преданий. Темже многия верныя от сетей льстивых спасл еси.

Самочинцем, общения льстивно просящим, отвещал еси, местоблюстителю отче Петре: не наши есте, отшли бо от нас, посему покайтеся и будем единодушни, тщетно есть ваше мудрование.

Яко горькую чашу, местоблюстительство приял еси, святителю Петре, и на Голгофу возшел еси, волю Божию на земли хотя совершити.

Богородичен: Благовестия архангельскаго сподобившися и Небесная земным совокупльши, Дево, выну Благовестница христианом являешися во утешение и обетование Царствия грядущаго.

Песнь 6.

Ирмос: Ионово чудесное избрание/ очищению во чреве китове/ нас трепетно молити научает:/ сущым званным нам избранным явитися/ тлению временному и промыслительному/ и спасительному совоскресению.

Колена сердца преклоньше, со умилением взываем Ти, Мати Пресвятая: обрати страдания земли Русския во спасение людей ея, да познают имя Сына Твоего, Имже единым дано есть человеком спастися.

О, Дево Пречистая, послушанием низведшая в мир Воскресение и Жизнь! Умоли Сына Твоего, да Русь Святая не токмо в последний день воскреснет, но и ныне, яко Лазарь ходатайством Марфы и Марии, Твоим предстательством оживет.

Ин, ирмос тойже

Святителем Московским в любви последуя, первее со Христом и народом Божиим быти потщался еси, святе Петре, темже и гонители победил еси.

Расколы творяху безбожницы, лестию злобу покрывающе, ты же, отче Петре, сие разумев, никакоже тем уступил еси, кротостию вражду препобеждая.

Клеветы многомудренныя воздвигоша на тя разорители Церкве Христовы, ты же местоблюстительства до смерти не отреклся еси и козни их сокрушил еси, страдальче неустрашимый.

Богородичен: Зряще Тя, Дево, рождшую Царя, и Владыку и Творца мира, молим: спаси нас, во гресех погибающих.

Кондак, глас 7:

Скорби, труды и болезни,/ суд безбожный и немилостивый/ претерпел еси, первосвятителю Петре,/ обаче сих не устрашился еси,/ Единому Судии верен пребывая,/ Тому ныне предстояй, о нас молися,/ прославляющих любовию память твою.

Икос:

Множае в трудех, преболе в ранах, в темницех же излиха и в смертех многащи, был еси, священномучениче Петре, глад, зиму и наготу претерпевая, укоряемь, благословляше, хулимый не отвещаваше. Темже и, озлобляемь, не умираше и, умерший почитаемь, жив был еси, в нищете многия обогащая и слуга Божий всем являяся. Христу о нас, святе, молися, прославляющих любовию память твою.

Песнь 7.

Ирмос: Како огненная пещь/ Богови приобщение бысть,/ попаление кумиротворения,/ отцем верности исповедание,/ Божия правды прозрение,/ яко близится падение вавилонское,/ отроков же во веки воспоется песнь:/ отцев и наш Боже, благословен еси.

На Тя, Богородице, уповающе, новомученицы веления богомерзская презреша и, чающе востания Русския земли, в пещи гонений воспеваху: Боже отец наших, благословен еси.

Вавилону безбожных падшу, Тя, Владычицу нашу Державную, немолчно воспеваем и, отцев веру исповедующе, с ними вопием: Боже, благословен еси.

Ин, ирмос тойже

Кии ангели орошаху тя в пещи страданий, егда алчбу, жажду, наготу, тесноту и раны многия на всяк день претерпевал еси, святителю, благодарне Господу Сил взывая: Боже, благословен еси.

Житие твое, священномучениче Петре, яко умирание на кресте бысть, всеми бо уды страдал еси, солнце многая лета не видя, смрадом дыша, пищи и сна лишение терпя, непрестанно же моляся: Боже, благословен еси.

С разбойники заточен и с паствою разлучен быв, ничимже мучителем уступил еси, святе Петре, врагом Божиим работати отвергаяся, отцем же святым подобяся, вопиял еси: Боже, благословен еси.

Стражею ненавидимь, паствою же любимь, к той взывал еси: не отступите преданий отеческих, в подвизех и мучениих молящеся: Боже отец наших, благословен еси.

Богородичен: Сына Божия плотию родила еси и како Той умираше, при Кресте стоящи, видела еси, Дево, мучеников Похвало. Моли о всех, Честному Древу покланяющихся и Тя почитающих.

Песнь 8.

Ирмос: Вострепеташа халдеи,/ Единаго Бога не познавшии,/ убивающе бо, утвердиша живот/ и, пламенем низведше живоносный ток,/ песнь из огня яве слышаша:/ благословите, сынове человечестии, Господа,/ пойте и превозносите во вся веки.

Свидетелие силы Христовы явишася новомученицы людем земли нашея, ихже просвети, Богородице, и в вере утверди, да воспевают Бога во вся веки.

Прославление Твое, Пречистая Богородице, от верных видяще, отвергшиися веры истинныя к Богу обращаются, слышаще о древних и новых чудесех Твоих, имиже и впредь землю нашу не остави, Чудоточная Владычице.

Ин, ирмос тойже

Безбожнии гонителие, смерти твоея ищуще, прежде о сей лживо поведаша, святе Петре, послежде же грех убийства твоего совершиша. Темже мученическим венцем украси тя Господь, егоже ныне превозносиши во веки.

Гонителем, страданьми и темничным заточением тя устрашающим, отвещал еси, отче: не могу преступити клятвы Церкви и патриарху; не мните, яко един есмь аз, ибо со мною в молитвах вся паства пребывает, еяже ради живу и умираю.

Изнемогше в мучительстве беззаконнии, любоблаженне Петре, немилостивно тя убивают, живота вечнаго тя сподобляюще и Церковь украшающе, верныя же научающе вопити: Господа пойте и превозносите во вся веки.

Глаголаша беззаконнии тебе, святе Петре, яко туне страдаеши и ничтоже можеши и уне ти есть, да местоблюстительства отречешися. Ты же, крепкодушне мучениче, отвещал еси: не аз избрах его, претерпевый же до конца той спасен будет.

Всем житием Церкви послужив, святителю Петре, мученическою смертию новый дар той приносиши, гонители обличая и Христа являя. Мы же, по словеси твоему, о земных не пекущеся, ти последуем, превозносяще Христа во веки.

Богородичен: Воспеваем Успение Твое, Мати Христа Бога нашего, из мертвых воскресшаго, и со апостолы молим: с нами до скончания века пребуди.

Песнь 9.

Ирмос: Твоих, Богородице, глаголов/ видим исполнение:/ низложение сильных и вознесение смиренных,/ темже в храмех и темницех,/ в печалех и радостех, в гонениих и мире/ Тя, Матерь Света, величаем.

Многая благодеяния чрез иконы Твоя верным людем явила еси, мучеников Нерушимая Стено, страны нашея Державная Владычице, Взыскание во гресех погибающих, милости Неупиваемая Чаше. И ныне утоли печали наша, Богородице.

Ведущи глас Богородицы, яко отныне ублажат Мя вси роди, Святая Русь вопиет: радуйся, Благодатная Мати Божия, миру Благая Помощнице и всем нам любящая Мати.

Ин, ирмос тойже

Днесь торжествуем радостно, тя имуще пастыря и отца о чадех молящагося, и величаем непрестанно, священномучениче Петре, Церкве Русския похвало.

Возлюбим друг друга, братие, вси бо есмы сродницы святых новомученик и Христос есть посреде нас, егоже не престай, святителю Петре, о нас умоляти.

Пасхальныя радости да исполнимся, память священномученика Петра торжествующе, и друг друга обымем, и вся простим, того моляще радости Небесныя и нам сподобитися.

Богородичен: Светися, светися, Церковь Русская, дивный бо святитель в тебе возсия. Ты же, Чистая, красуйся, Богородице, о прославлении предстательства Твоего.

Светилен:

Егда в темнице бе, священномучениче Петре, имя твое, во святых храмех поминаемое, Церковь Русскую в единении храняше, ныне же, тебе на Небеси пребывающу, иже с верою и любовию тя призывают, великия милости сподобляются. Моли спастися душам нашим.

Слава, и ныне, Богородичен:

О мнозе моляще Тя, Пречистая Дево, вящших даров сподобляемся, славословити же Тя хотяще, преизобилен мир и радость Божественную обретаем. Темже поем, величаем, славим, почитаем, ублажаем и превозносим Тя, Богородице.

На хвалитех стихиры, глас 8.

Подобен: О, преславнаго чудесе:

О, преславныя веры твоея, отче Петре,/ яже явися в тебе извещение уповаемых,/ невидимых же вещей обличение,/ еюже заградил еси уста неправедных гонителей/ и угасил еси силу огненную,/ сия бо есть победа, победившая мир./ Темже восхвалим сице веровавшаго,/ прославим Бога, тако благоволившаго,/ и воспоим Заступницу Усердную рода христианскаго.

О, преславнаго упования твоего, отче Петре,/ ты бо, приемь шлем спасения,/ на камени веры утвердился еси/ и ревности начало положил еси/ проповеди дерзновенныя/ и исповедания неуклоннаго./ Темже восхвалим сице уповавшаго,/ прославим спасение Обетовавшаго/ и воспоим в скорбех Утешающую.

О, пламенныя любве твоея, отче Петре,/ яже долготерпит и милосердствует,/ не ищет своих си и не мыслит зла,/ всему веру емлет/ вся уповает, вся терпит/ и николиже отпадает./ Темже восхвалим сице возлюбившаго,/ прославим Спасителя, нас искупившаго/ и воспоим Богоматерь, Того родившую.

О, дивнаго подвига твоего, отче Петре,/ поем бо твою крепость, воспеваем терпение,/ славим смирение, славословим кротость,/ превозносим мудрость, благословим упование,/ почитаем любовь, величаем веру,/ покланяемся страданием, ублажаем кончину,/ почитаем труды, прославляем предстательство,/ хваляще Господа Бога/ и воспевающе Пречистую Богородицу.

Слава, глас 6.

Подобен: Тридневен:

Преславное днесь созерцайте чудо,/ ума превышшее и словесы неизъяснимое,/ дивный бо святитель, доблий мученик,/ милостивый отец, добрый пастырь,/ благословенный проповедник, богоизбранный архиерей,/ богоглаголивый учитель, богодухновенный наставник,/ доблественный страдалец, воин Христов непобедимый,/ святый священномученик Петр днесь в храме своем нам является.

И ныне, глас и подобен тойже:

Тридневно предпразднуем Ти,/ Богородице Марие,/ ведуще, яко на всякий день/ помогаеши призывающим Тя./ Темже покланяемся Рождеству Твоему,/ не лиши нас и Небеснаго Твоего покрова.

На Литургии

Блаженна от канона песни 3-я и 6-я. Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28–39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106, (21, 12–19). Конец: В терпении вашем стяжите души ваша. Причастен: В память вечную будет праведник:

Молитва

О, святый священномучениче Петре, святителю славный земли Русския, архиерейство, яко чашу смертную, приемый и престол патриарший добре соблюдый, верою вся претерпевый и смирением благодать велию стяжавый!

Кую похвалу воздадим ти языком худым? Во гресех и немощех суще, како дерзнем призывати тя? Обаче вемы, яко со всеми святыми земли нашея, наипаче же со святым Патриархом Тихоном, не престая, молишися у Престола Пресвятыя Троицы о Церкви Русской, да сохранит ю Господь от всякаго зла и искушения, да право правят слово истины архипастыри и пастыри ея, да не изсякает вера в сердцах людских, да в совете мнозе разрешается всякое нестроение и вся любовию всем да бывает!

О, преславный страдальче! Ты, яко отец чадолюбивый, веси вся потребная нам, сего ради единаго взыскуем: тебе подражатели быти, якоже и ты Христу, да крест свой приимше, яко бремя благое и легкое, путем узким шествуем и тако обителей Небесных достигнем, идеже вкупе с тобою и всеми святыми сподобимся прославляти пречестное и великолепое имя Отца и Сына и Святаго Духа в безконечныя веки. Аминь.

Источник: Текст службы утвержден на заседании Священного Синода 25 августа 2022 года (журнал № 78).

На велицей вечерни

На Господи воззвах: стихиры, глас 4.

Подобен: Яко добля:

Яко чистый благодати источник, / Бога Слова река боготечная, / струи источил еси боговедения, / имиже и до ныне напаяемся: / лучами же поучений твоих / священно озаряемся, / верою зовуще ти: / буди нам до конца предстатель, / Иоанне священномучениче.

Яко Богом явленное светило, / в граде Рижстем светло возженное, / и Латвийстим людем / духоносне возсиял еси, / сердца верных на путь истины направляя, / Православно славити научая / Пребожественную Троицу, / Юже до конца возлюбил еси, / Иоанне богомудре.

Яко присноцветный луг, / добродетелей лучами преиспещренный, / благоуханием небесным / чувства наши услаждаеши, / яко хлеб сладкий на огни испекаемь, / души наша питаеши, / чтущих тя любовию / несказанною радостию веселиши, / Иоанне богоносне.

Яко доблий воин Христов, / страстей терния в юности попалил еси, / чистотою жития украсился еси: / темже и пастырь добрый / в земли Латвийстей явися, / сего ради и мученический венец / огнем скончаваемь приял еси, / да покажеши верным путь спасения, / Иоанне богославне.

Слава, глас 5:

Свеща возжженная от Бога, / и Латвийское пресветлое светило, / вселенную всю озарившее, / явился еси, отче достославне Иоанне, / учений твоих зарями / просвещаяй верою чтущих тя: / темже и зовем ти: / радуйся, всесожжение богоприятное, / иерарше премудрейший, / новомучеников пресветлое украшение, / и молитвенниче теплый о душах наших.

И ныне, Богородичен: В Чермнем мори:

Вход, прокимен, и чтения 3.

Пророчества Исаиина чтение (глава 43):

Тако глаголет Господь: вси язы́цы собрашася вкупе, и соберутся князи от них. Кто возвестит сия в них или яже от начала, кто слышана сотворит вам; да приведут свидетели своя, и оправдятся и да услышат, и да рекут истину. Будите Ми свидетели, и Аз свидетель, глаголет Господь Бог, и Отрок егоже избрах, да познаете и веруете Ми, и разумеете, яко Аз есмь: прежде Мене не бысть ин Бог, и по Мне не будет. Аз есмь Бог, и несть разве Мене спасаяй. Аз возвестих, и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй. Сотворю и кто отвратит то; сице глаголет Господь Бог, избавляяй вас Святый Израилев.

Премудрости Соломони чтение (глава 3):

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенно прият я. И во время посещения их возсияют: и яко искры по стеблию потекут: судят языком, и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: Яко благодать и милость в преподобных Его, и посещение во избранных Его.

Премудрости Соломони чтение (глава 3):

Правeдницы во веки живут, и в Господе мзда их, и попечение их у Вышняго: сего ради приимут царствие благолепия, и венец доброты от руки Господни, яко десницею покрыет я, и мыщцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины, и яко от благокругла лука облаков на намерение полетят. И от каменометныя ярости исполнь падут грады, вознегодует на них вода морская: реки же потопят я нагло. Сопротив станет им дух силы, и яко вихор развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте: и навыкните, судии концев земли. Внушите держащии множества, и гордящиися о народех языков: яко дана есть от Господа держава вам, и сила от Вышняго.

На литии стихира, глас 6:

Огнем воспаляемь Господни любве, огня презрел еси, / и яко Божественное углие возжигаемь, / честный священномучениче Иоанне, / попалил еси хврастное лести шатание: / нечестивых же уста заградил еси, / и кровей проливаяй потоки терпеливно, / Церковь напоил еси верно просвещаему.

Слава, глас 4.

Подобен: Яко добля:

И огню смесився, и мукам, святе, / непреклонен мудрствованием пребыл еси, / и яко свеща вжегшеся благодатию Духа, / просветил еси верных сердца благодатию. / Тем всяк возраст и род празднует святую память твою, / песнословяще Господа.

И ныне, Богородичен: Призри на моления:

На стиховне стихиры, глас 4.

Подобен: Дал еси знамение:

В подвизе мнозе быв, / отче священномучениче Иоанне, / егда мучители безбожнии на тя вооружишася / и предаша тя горьким мукам, / ты же разжегся любовию Христовою, / терпеливно вражия козни победил еси, / и венцем страдания увязлся еси, / вечно со Христом царствуеши.

Стих: Разжегл ны еси, / якоже разжизается сребро.

Богомудрым смыслом / Евангельскаго проповедания сеяв словеса, / Иоанне блаженне, / возрастил еси плоды в земли Латвийстей, / пребывати в плодоприношении добродетелей / и содержати крепко / Православную веру истинную, / за нюже и пострадал еси, / возрасти и в нас плоды в любовь Божию.

Стих: Проидохом сквозе огнь и воду / и извел ны еси в покой.

Неизреченное Божие смотрение / бысть в тебе, иерарше всечестный, / яко бо сосуд всезлатый, / благодати Божественныя, / от него же всем подаваяй обильно, / милосердовал еси многия, / священномучениче Христов, отче Иоанне, / и ныне, Престолу Господню предстоя, / моли о всех, память твою совершающих.

Слава, глас 1.

Подобен: О, дивнаго чудесе:

О, дивное чудо! / источник благодати на огни испекается, / и лествица на Небо дверь бывает, / на нейже, Христу подобяся, распят бысть. / Веселися, Иоанне святителю, / мучеников украшение, / сосуде честный Святаго Духа. / Царствию наследниче, / не премолчи, вопия за ны ко Господу.

И ныне, Богородичен: Cе исполнися Исаиино проречение:

Тропарь, глас 4:

Божественную благодать восприим и безбожную лесть низложив, / земли Латвийския пастырь добрый явился еси, / священномучениче Иоанне, / Божественною же любовию ум распалив, на огненную смерть доблественно дерзнул еси. / Темже тезоименитно просящим тя даеши благодатныя дары. / Сего ради вопием ти: / моли Христа Бога прегрешений оставление даровати / празднующим любовию святую память твою.

На утрени

По 1-м стихословии седален, глас 1:

Огнедохновенно показался еси благовоние, страданием обоневаеши наша сердца, мучеников украшение и святителей удобрение. Темже, днесь всесвятую твою память празднующе, Иоанне, освящаемся вси любовию, чтущии тя.

Слава и ныне, Богородичен:

Матерь Тя Божию вси свемы вси Деву воистинну, и по рождестве явльшуюся, иже любовию прибегабщии к Твоей благости: Тебе бо имамы грешнии предстательство, Тебе стяжахом в напастех спасение, Пресвятая Мати Дево.

По 2-м стихословии, седален, глас 3:

Точа веры исповедание, прелесть угасил еси злославия, обличив безбожник нечестие, и всесожжение божественное быв, благодатьми орошаеши концы: священномучениче Иоанне, Христа Бога моли, даровати нам велию милость.

Слава и ныне, Богородичен:

Красоте девства Твоего, и пресветлей чистоте Твоей, Гавриил удивився, вопияше Ти, Богородице: кую Ти похвалу принесу достойную? Что же возыменую Тя? Недоумеваю и ужасаюся. Темже яко повелен бых, вопию Ти: Радуйся, Обрадованная.

Величание: Величаем тя, священномучениче Христов Иоанне, и чтим честная страдания твоя, яже за Христа претерпел еси.

Псалом избранный: Бог нам прибежище и сила, Помощник в скорбех, обретших ны зело.

По полиелеи седален, глас 1:

Пройде сквозе огнь мучения и воду слез, изведе тя Господь в покой святых, священномучениче преславне Иоанне, ходатаю воззвания к Богу разумеющим и лобызающим подвиг твой. Слава Предуведевшему произволение твое, слава Предуставившему тя к славе Небесней, слава Подающему нам тобою велию милость.

Слава и ныне, Богородичен:

Под кров Твой прибегаем, Пречистая Дево: мольбу убо принеси о нас к Человеколюбцу Богу, спастися рабом Твоим.

Степенна, 1-й антифон 4-го гласа.

Прокимен, глас 4: Честна пред Господем / смерть преподобных Его.

Стих: Что воздам Господеви о всех, яже воздаде ми?

Всякое дыхание: Евангелие от Луки, зачало 67.

По 50-м псалме стихира, глас 6:

Благочестия истиннаго проповедник, / сожженный во пламени огненнем, / водрузися на тверди церковней, / яко звезда светосиятельная, / и освещаеши темную нощь неверия, / и озаряеши сердца верных учении божественными, / священномучениче Иоанне, молитвенниче о душах наших.

Канон, глас 2.

Песнь 1.

Ирмос: Грядите, людие:

Запев: Священномучениче Иоанне, моли Бога о нас.

Во обителех райских достойно наслаждаяся и всем новомучеником Российским сликовствуяй, благодать ми даровати моли, воспевающу тя, блаженне Иоанне.

Был еси, блаженне, отрасль корене благочестива, прадед бо твой прелести люторския отвержеся, и веру истинную восприяв, исповедник святаго Православия явися.

Пасл еси первее стадо отца своего, пастырь же истинный стада овец Христовых последи явися, пасый души твоея в мудрости помышления, души же заблуждающия обращая и к Богу приводя, славне.

Богородичен: Бога из Тебе воплощенна, ведуще, без хотения плотскаго, суща прежде твари и прежде всех век, воистинну Богородицу Тя исповедуем.

Песнь 3.

Ирмос: Утверди нас в Тебе, Господи:

Палат украшенных отметаяся, имел еси житие твое в подклете церковнем, восхотел бо еси приметатися в дому Господнем паче, неже жити в селениих грешничих.

Иисуса Бога во плоти явльшагося и в доме Иосифа древодела труждавшагося, поминая, и сам, отче Иоанне, труды велии понесл еси, глаголя, яко труд лучшее средство есть от зла удаления.

Яко пси лаяху на тя нечестивии, не терпяще обличений твоих, и скорби мнози тебе деяху, послежде огнем тя сожгоша, ты же огня мучений не устрашився, ныне огнь напастей к тебе притекающим, угашаеши, Иоанне.

Богородичен: Неискусобрачно Слово Божие, о, Богородице, породила еси из Тебе воплощенна, егоже священномученик Иоанн, Бога, мужески исповедав, яко воин Сего и венечник явися.

Седален, глас 1:

Укоризны и оклеветания от безбожник прием и огненное мучение претерпев, чашу страданий испил еси, за правду и верность Церкви Христовой подвизався, на двери распят и огнем опаляемь, священномученик явился еси. Сего ради зовем: спасай нас, святителю Иоанне, молитвами твоими.

Слава, и ныне, Богородичен:

Пречистыя руки Твои, Дево Мати простерши, покрый уповающия на Тя, и Сыну Твоему зовущия: всем подаждь, Христе, милости Твоя.

Песнь 4.

Ирмос: Услышах, Господи:

Не поколеба столпа сердца твоего безбожных противление, страстотерпче, темже разжегся ревностию веры, явился еси огня сильнейши.

Храмы мнози, еретики разореннии, паки воздвигл еси, Иоанне, сам же Духа Святаго явился еси храм одушевлен.

Не нам, не нам, но имене Твоему слава, сице глаголал еси, Иоанне, вся дни живота твоего, ни огнь бо, ни раны, ниже смерть любве Христовы отлучиша тебе.

Богородичен: Просвети, Чистая, омраченную душу мою светом Твоим, Яже Свет Рождшая присносущный.

Песнь 5.

Ирмос: Света подателю:

Грады Чернигов и Вологда учение твое слышаху, Минск же, Тамбов, и Пенза имеяху тя пастыря, Рига же мощи твоя святыя прият, Иоанне, тамо бо тело огню на снедь предав, вся концы просветил еси.

Трезвения и воздержания поборник быв, монах истинный явился еси, яко пастырь же добрый, мужественный защитник Церкве от безбожник показася, Иоанне святителю.

Душевныя крепости твоея не преможе сила вражия, святителю Христов Иоанне, клеветы бо диавольския, девицею некою на тя возводимыя, в ничтоже вменил еси, тя бо праведна и непорочна показа Господь.

Богородичен: Ветхий деньми, якоже на руно дождь, Пречистая, в Твое чрево сниде освященное, и нов явися Адам, Человеколюбец.

Песнь 6.

Ирмос: В бездне греховней валяяся:

Злобу слуг сатанинских, сожженную совесть имущих, обличи, святителю Иоанне, сими сожигаемь, всесожжение же совершенно и чиста жертва Спасу всех принеслся еси.

Тя славят святители со иереи, и весь собор благочестивых, в животе бо твоем явися пастырь Церкве Латвийския, во Христе вся собирая верныя.

Евангельскою простотою и святостию крепко оградився, Иоанне, и на нечестие ополчився, крепость ересей низверг, твердый проповедник явися.

Богородичен: Грех мира вземлющаго, Чистаго Агнца заченши, Всенепорочная, согрешений прощение моли даровати рабом Твоим.

Кондак, глас 2:

Богодухновеннаго исповедника Иоанна, / претерпевшаго муки лютыя, / и жива сожженнаго, приял еси Господи, / яко жертву непорочну, / Един Сый прославляяй святыя Своя.

Икос:

Озари омрачение ума моего Христе, яко да дерзновенно отверзу уста воспети труды и страдания священномученика Твоего Иоанна, егоже подвигом и терпению удивишася видимая же с невидимыми, защищаше бo обидимых от руки обидящих, не бояся лица сильных, и искореняше нечестие, обличаше безбожие и утверждаше Православие, и претерпев узы, гонения, оклеветания, лишения, и смерть во пламени огненнем, и прославил еси его по всей земли, Един Сый прославляяй святыя Своя.

Песнь 7.

Ирмос: Образу златому:

Огнем, богоблаженне, болезней твоих запаление безбожное угасил еси, кровными же потоки погрузил еси враги безплотныя, Иоанне, вопия: благословен еси, Боже отец наших.

Яко фимиам благовонен, принеслся еси, мудре, Подвигоположнику твоему, Божественною благодатию злосмрадную лесть низлагая. Тем поеши радостно: благословен еси, Боже отец наших.

Юныя три отроки изобразуя, Иоанне блаженне, якоже посреде пещи, среди пламене разженнаго взывал еси: благословен еси, Боже отец наших.

Богородичен: Ты едина Богу Мати явилася еси, Неискусобрачная Девомати Всечистая, темже благочестно Тебе, Всенепорочная, взывающе, поем: благословенная, Яже Бога плотию рождшая.

Песнь 8.

Ирмос: В пещь огненную:

Пастырский жезл прием, святителю, людем учитель был еси, преславне Иоанне, и многия к вере Православней привел еси, да вси с тобою зовут: пойте дела Господа, и превозносите во вся веки.

Помыслом доблим на всеядца огня дерзнул еси, якоже отроцы еврейстии, святителю, с теми взывая: пойте дела Господа, и превозносите во вся веки.

Твердым умом был еси нестерпимаго пламене крепчайши, яко в чуждем телеси сожигаемь, блаженне, верою поя Господа и превознося Его во веки.

Богородичен: Световиден столп огнен и облак светел преводящ к Небесному наследию, Богородице Чистая, буди ми, Дево Всенепорочная, в пустыни жития заблужденному.

Песнь 9.

Ирмос: От Бога Бога Слова:

Срам безбожия и нечестия гнетет ныне чад Новаго Израиля, Руси святыя, обаче Господь во веки Тойже есть, и се благодатная нива уготовляется, иже произрастит избавление Божие, сице глаголал еси, Иоанне, чад твоих на подвиг укрепляя.

Днесь Рига град, хранителя тя изрядна стяжавши, празднует, божественное совершающе твое страдание, со всеми грады и весьми, ихже соблюди твоими молитвами.

Якоже солнце, блаженне, от запада возсиял еси, Иоанне, поборник единения во Христе людей Божиих быв, Церковь всю просвещая твоими блистаньми, досточудне, и согревая веры и страданий пламенем, тем тя вси ублажаем.

Богородичен: Явльшися Дево дверь Божественнаго Света, души моея мглу Твоими невещественными блистаньми озари, и от вечнаго огня избавитися ми со священномучеником Иоанном молися, да верою и любовию Тя песньми величаем.

Светилен:

Искусився, якоже злато, огнем и муками, благодать Небесную приял еси от Бога Вышняго, Иоанне священномучениче, о нас ныне молися.

Слава и ныне, Богородичен:

Державным Твоим покровом, от врагов навета нас, Чистая, Твоя рабы сохрани вся невредимы, Тя бо стяжахом, Едину прибежище в нуждах.

На хвалитех стихиры, глас 8:

Подобен: О, преславнаго чудесе:

О, преславнаго чудесе! / Латвийския земли славный цвет / днесь в Церкви Торжествующей благоухает / и веселит поющия: / радуйся, пречудный святителю! / радуйся, божественный наш заступниче! / приими, отче, от уст недостойных / прославление и песнословия, / яко Богом прославленный.

О, преславнаго чудесе! / град Рига радуется днесь: / се новый угодник Божий является / и от верных сице прославляется: / радуйся, земнородный ангеле! / радуйся, теплый наш молитвенниче! / приими от нас прославление, / и мир душам нашим даруй, / яко Богу мира угодивый.

О, преславнаго чудесе! / днесь Иоанн на земли огнем сожигается / и на Небеси со славою венчается, / приемля от верных сия прославления: / радуйся, небесным радование! / радуйся, земных хваление! / испроси и нам в покаянии житие скончати, / и с тобою наследие на Небеси имети, / яко Отцу щедрот любезный.

Слава, глас 1

Подобен: Небесных чинов:

Послужив Слову непорочно, святителю, / огнем вещественным благовонна жертва Господеви принеслся еси, / и радости Небесныя сподобился еси, / о нас моля всегда, / чтущих тя, Иоанне.

И ныне, Богородичен:

Владычице, приими молитвы раб Твоих и избави нас от всякия нужды и печали.

Славословие великое.

На Литургии

Блаженны от канона, Песнь 3.-я и 6-я.

Прокимен, глас 4: Разжегл ны еси, / якоже разжизается сребро.

Стих: Проидохом сквозе огнь и воду / и извел ны еси в покой.

Апостол ко Евреом, зачало 334.

Аллилуиа, глас 2: Священницы Твои облекутся в правду и преподобнии Твои возрадуются.

Стих: Терпя потерпех Господа, и внят ми, и услыша молитву мою.

Евангелие от Луки, зачало 67.

Причастен: В память вечную будет праведник, от слуха зла не убоится.

Источник: Живой Журнал. Уставщик