Декабрь

Стихиры, глас 1-й.

Ангелы житием своим удивила еси,/ в немже девство и непорочность от юности сохранивши,/ чиста пред Богом обрелася еси,/ и кончины мученическия от Всевышнего удостоилася еси,/ поминай нас, святая мученица Киро,/ ныне совершающих честную память твою.

Рода древняго и именитаго/ пречестная отрасль явилася еси,/ обаче гордость земную отринувши,/ людем простым и незнатным послужила еси,/ во смирении подвиг свой совершающи,/ путем тесным в земнем житии терпеливо шествовала еси,/ и достигла еси врат Царства Небеснаго.

Мужество твое во исповедании имени Христова,/ прославляет ныне Церковь Господня,/ вся скорби временныя добре претерпела еси,/ Божиею крепостию врага низлагая,/ яко адамант пребыла еси в испытаниях горьких,/ в нихже обрела еси вечный покой и радование нескончаемое.

Слава и ныне, богородичен.

Тропарь, глас 4-й:

Отрасль пречестная рода древняго и именитаго,/ благоверная княжна Киро,/ в жизни временней потрудившаяся на ниве учительства,/ гонения и узы за веру истинную претерпела еси,/ и мученица за имя Христово явилася еси,/ молися о нас ко Господу,/ украситися и нам верою, любовию и благочестием.

Канон, глас 8-й.

Песнь 1.

Колесницегонителя фараоня погрузи, чудотворяй иногда моисейский жезл крестообразно поразив, и разделив море: Израиля же беглеца пешеходца спасе, песнь Богови воспевающа.

Христовою любовию уязвившись, мученице Киро преславная, поревновала еси в житии твоем праведным женам, имиже красуется Церковь Русская, сего ради и сопричисли тя Иже во святых почивающий благолепному сонму их.

Христу единому сочеталася в жизни временней, егоже возлюбила еси паче сынов человеческих, и девством душу свою просвещая, яко невеста Божия целомудрием и чистотою украсилася еси.

Мудрым девам подобяся, сосуд свой елеем добрых дел наполнила еси, Киро благонравная, и с горящим светильником Небеснаго Жениха сретила еси.

Богородичен. Вразуми, Дево, верных лики, на враги видимыя и невидимыя укрепльши, и спаси от всякия скорби.

Песнь 3.

Утверждей в начале небеса разумом и змелю на водах основавый, на камени мя, Христе, заповедей Твоих утверди, яко несть свят, паче Тебе, едине Человеколюбче.

Гонения тяжкия и прещения властей безбожных не возмогоша угасити силу любви твоея ко Христу, Богу нашему, Киро прехвальная, посрамила еси всю злобу их и с венцем добропобедным в чертог небесный взошла еси.

Тведость души твоея ангельская ликостояния воспели есте, Киро достоблаженная, зряще неустрашимость сердца твоего, юже в мучениях и гонениях обрела еси.

Украси тя Христос Господь венцем мученическим, провидя тайную красоту души твоея, Киро досточудная, и дарова ти велию крепость в мучениях, еюже вся вражия страхования преодолела еси.

Богородичен. Освяти мой ум, и просвети сердце мое, святая Мати Божия, и одержащих мя зол измени: да Тя славлю твердую заступницу мою.

Седален

Сетей вражиих избегла еси, воспаривши, яко птица небесная, к Иерусалиму горнему, святая мученице Киро, житие свое скончав богоугодне. Поминай нас, совершающих честную память твою, яко избегнути и нам в жизни временней всех навет вражиих и улучити молитвами твоими Царство Небесное.

Слава и ныне, богородичен.

Предстательнице верных, Богородительнице, скорбящих радосте и плачущих великое утешение, из чрева Твоего, Дево, Рождшагося непрестанно о нас с новомученики моли, избавити нас в час испытания лютаго осуждения.

Песнь 4.

Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.

Светом велиим просвети Господь Русь святую, егда полк безбожных наведе на землю нашу. Тогда и ты, святая мученице Киро, смертию своею Христа прославила еси, озарив души наша светом любви Божией.

Егда убиваху тя гонители безбожныя, Киро, мученице добропобедная, тогда мняху искоренити имя Христово в отчизне нашей, обаче погибе память их с шумом, твоя же ныне память ублажаема на земли.

Красотою души твоея покоряла еси не токмо верных, но и безбожных и неверных, Киро преславная, молися Господеви, да исцелит безобразие душ наших и убожество наше пощадит милостию Своею.

Богородичен. Пречистая Богородице, утиши болезни сердца моего, Яже Христа неболезненно паче ума и слова рождшая.

Песнь 5.

Вскую мя отринул еси от лица Твоего, свете незаходимый, и покрыла мя есть чуждая тьма, окаяннаго; но обрати мя и к свету заповедей Твоих пути моя направи, молюся.

Ложь и неправду гонителей отвергши, даже и во узилище не изменила благородству своему, мученице Киро, научи и нас, грешных, не посрамляти отпаденьми различными звания христианскаго.

Яко княжескаго рода отрасли, вся красная мира сего доступна тебе бысть, и не прилепилася еси сердцем стяжанию земному, но и в нищете, якоже и в богатстве, верна Господеви обрелася еси.

Пребыти бесстрашным пред лицем смерти удел есть душ высоких и избранных. Сему жребию сопричисли тя, святая Киро, сердцеведец Господь, егоже моли утвердитися и нашим колеблемым стопам на пути спасения.

Богородичен. Радуйся, спасение притекающих к Тебе, Дево, Мати Христова: радуйся всех мучеников похвало.

Песнь 6.

Очисти мя, Спасе, многа бо беззакония моя, и из глубины зол возведи, молюся: к Тебе бо возопих и услыши мя, Боже спасения моего.

Во смирение и кротость, яко в броню, облеклася еси, Киро именитая, и победила еси вся козни диавольския, научи убо и ны, неразумныя, отражати злобу исконнаго противника добродетельми сими.

Со оружием терпения и беззлобия на брань с мучителем изшла еси, мученица святая, и обрела еси победу от Господа. Вразуми убо и нас, грехом потемненных, злу противитися мудростию Креста Христова.

Не ожесточися, ниже озлобися благоуханная душа твоя посреди гонений суровых и преследований коварных. Сего ради молим тя: сохрани и наша сердца в любви Божией посреди рода развращеннаго и прелюбодейнаго.

Богородичен. Пресвятая Богоневесто, Владычице мира, Ты мя спаси, бед пременяющи и страстей молву отгоняющи.

Кондак общий, новомученический, глас 4-й:

Страстотерпцы, мученицы и и споведницы Церкве Российския,/ кровию своею грады и вся веси освятившии,/ Богови принесостеся яко жертва непорочная,/ заклани бысте за имя Спасово,/ во утверждение на Руси православия,/ во еже сохранитися отечеству нашему,/ яко оплоту веры истинныя.

Песнь 7.

Божия снизхождения огнь устыдеся в Вавилоне иногда: сего ради отроцы в пещи радованною ногою, яко во цветнице ликующе пояху: благословен еси, Боже отец наших.

Глас евангельский, рекший жене хананейской, огласи вселенную всю: «вера твоя спасе тя, иди в мире». Такожде и твоя вера изведе тя к покою вечному, мученице Киро, и исполни тя божественнаго веселия.

Аще не бы кончина мученическая, потаена бысть чистая и правдивая жизнь твоя, света евангельскаго исполненная. Сего ради восхваляем Бога нашего, даровавшаго нам чудную ходатаицу и молитвенницу спасения нашего.

Не отпаде душа твоя заветов Христовых, но во страданиих земных очистися и утвердися в Бозе сердце твое. Ныне на небесех вечно радуешися, мученице, госпожею нареченная, воспевая хвалебную песнь Живущему во веки веков.

Богородичен. Пламень страстей сердца моего погаси росою Твоею, Дево, и огня страшнаго исхити, Отроковице, и вечнаго судаи бесовскаго томления.

Песнь 8.

Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы воспойте, людие, превозносите во вся веки.

Рече Господь-Вседержитель верным рабом Своим: «Побеждающему дам вкушати сокровенную манну», еюже ты обильно насыщаешися, мученице Киро, претерпев все скорби настоящаго времени.

«Дам звезду утреннюю соблюдающему дела Мои до конца». Сие обетование Спаса нашего на тебе исполнися, святая Киро, сохранила еси неврежденно до исхода своего мученическаго заповеди Господни.

Пред престолом ныне предстоиши, мученице Киро, в ризах белых, с ветви пальмовы, восклицая: «Спасение Богу нашему и Агнцу». Седяй на престоле херувимстем вселися в тя, от скорби великия к Нему пришедшую.

Богородичен. Воспеваем Тя по рождестве паки Деву, и прославляем Тя, Пречистая, яко Матерь Бога нашего.

Песнь 9.

Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу ангелов и человек чиноначалия величают.

Тщашеся исконный враг рода человеча веру православную в отчизне нашей искоренити, обаче ничтоже успе, яко злоба его сонмы мученики изведе и светом истины люди церковны просвети.

Едина ты еси от новомученик Российских, Киро благонравная, молящаяся на небесех о роде нашем, да помилует Бог землю Русскую, яко поработати ей Христови, якоже и в прежняя лета.

О святая мученице Киро! С прочими новомученицы Церкве нашея моли Господа сил о Доме Пресвятыя Богородицы, егоже святии русстии трудами и потами своими создаша, яко утвердитися ему православием и Богови служити до скончания века.

Богородичен. Яже Слово плотию рождши паче слова, Начальника жизни, Христа, Бога нашего, моли спастися нам.

Составитель: игумен Нестор (Кумыш)

На малой вечерне

На «Господи воззвах», глас 1:

Днесь, вернии, ликовствуем, во псалмех и пecнex Господеви поюще и чтуще память страстотерпцев земли крымския, поправших буесловия безбожная и истинную веру утвердивших, и воззовем к ним: молите Христа Бога, спастися душам нашим.

Жития невещественнаго восхотевше, мученицы, гонителей не убоялися есте, и веру пред ними исповедавше, гонения и муки претерпели есте. И ныне, со ангелы ликовствующе, предстоите Престолу Христа Бога нашего.

Пищи райския насладитися возжелевше, угодницы Господни, гладом и жаждею, мучими были есте, и славою от Бога, венчани быти восхотевше, земную славу отвергли есте. От Него же и прославилися есте на земли пред человеки.

В небесныя обители вселившеся и со ангелы предстояще Престолу Христову, яко истинии исповедницы и страстотерпцы, молите прегрешений нам оставление даровати, и мир и велию милость.

Слава, глас 6:

Яко жертвы непорочныя на Божии трапезе положилися есте, мучений бо ваших ради благослови вас Господь, и зряще благая горняго Сиона, наслаждаетеся Божественнаго радования.

И ныне:

Слава на небесех и на земли веселие, се бо Царица со святыми страстотерпцы, за вся ны в церкви молится Богу

На стиховне стихиры, глас 8:

Стих: Дивен Бог во святых Своих, Бог Израилев.

Нов сад священномученик Таврических, песньми восхвалим, яко зарями вся просвещающия, иже в нощи неведения пребывающим, к Свету богоразумия путь осиявающия.

Стих: В церквах благословите Бога Господа от источник Израилевых.

Дом Духа Святаго были есте,/ благодатию исполнени божественных учений:/ ими же напояете мир, страстотерпцы премудрии.

Слава, И ныне, глас 3:

Радуйся, Марие Богородице, храме нерушимый, паче же и святый, о немже вопиет пророк: свят храм Твой, дивен в правде.

Тропарь, глас 8 или 1:

Избраннии православия ревнителие/, пастырей Христовых похвало/, страдания и узы за Церковь Святую претерпели есте/, светильницы веры православныя показалися есте, /от властей беззаконных убиении быша/, молитвами вашими спасайте души наша.

На велицей вечерни

На Господи воззвах, глас 2:

Днесь светло красуется земля Таврическая, торжествующи честную память новомученик своих, тии бо светильницы веры православныя показавшеся, неистовство безбожных славно препобедили, тем же вопием к вам: молите Христа Бога о спасении душ наших.

Добродетелей верх и верных основание, святителей слава и мучеников похвало досточудне Порфирие; вся верныя призываеши светло праздновати святую память твою.

В вере Христове, Димитрие, Божественною славою облеклся еси и града Ялты благоукрашение явился еси. Церкви святителя Христова Иоанна Златоуста настоятелю, и страстотерпче всечестне, и мучениче верне.

Церкви Христовой верен быв, отче наш Николае, не дал еси осквернити сосудов церковных соборныя церкви богохульником, и ныне в сонме мученик явленный, молися о почитающих тя.

Священную одежду омочив в крови твоей, преподобномучениче Варфоломее, сугуб венец от Христа приял еси всеблаженне, пострадав во граде древнем Феодосии, мученик Господень явился еси.

Буесловие обновления лжеумнаго низлагая, священным словом твоим утвердил еси маловерных сердца, и к жизни вечней путеводил еси, мучениче Владимире, моли спастися нам, словесы и делы тебе последовати произволяющим.

Священне отче Тимофее, града Алушты украшение, ты бо наветы претерпев неправедныя Христа прославил еси пред мучители, моли спастися нам в буре житейстей потопляемым.

Отче Иоанне всечестне, града Судака верное ограждение, проповедуя слово истины, добрый конец жития яко мученик приял еси. И ныне молися, да вечнаго живота причастницы будем с пострадавшими Христа ради.

Отче Антоние преподобне, на Горе Афонстей противу невидимых враг добре подвизался еси, послежде же врагом невидимым во всеоружии кротости противустал еси, в земли Тавричестей веру правую защищая, и яко кадило благовонное исповедание и мучение твое Господеви принося, егоже моли даровати душам нашим мир и велию милость.

Слава, глас 4:

Богомудрый Порфирий со Николаем, Димитрием, Варфоломеем, Владимиром, Иоанном и Антонием добльствоваша за веру, враги победивше, и яве возсияша яко звезды пресветлы, уяснише верных сердца, безбожия и раскола тьму отгнавше светозарением Духа.

И ныне, Богородичен воскресный по гласу «Славы»:

(из 1-го Приложения Минеи).

Паремии мученикам общие:

1-я: Тако глаголет Господь: вси язы́цы:

2-я: Праведньrx души в руце Божией:

3-я: Праведницы во веки живут:

На литии стихира храма и святым настоящия, глас 3:

Днесь ликовствует радостно Крымская земля, и хвалится богоугодными деянии исповедник и мученик своих, к нимже яко добрым защитником и поборником ныне вопием: молитеся блажении да сподобит и нас Царствия Небеснаго Христос Бог наш.

Столпи Православия непоколебимии, меди крепчайшии и железа твердейшии, новомученицы Крымстии непобедимии, молите ныне Подвигоположника вашего крепость духовную малому стаду даровати, во еже твердо стояти за догматы Церкве Вселенския.

Слава, глас 3:

Приидите празднолюбцы, Христовых страдалец в песнех почтим: священномученика Порфирия непобедимаго, Димитрия и Николая, Владимира и Варфоломея, Тимофея и Антония со Иоанном, Николая, Андрея и Елеазара со Димитрием и Стефаном, доблестныx новомученик лик, добре подвизавшихся и венцы победными увенчании, молятся Христу за всю землю Крымскую и о иже верою и любовию совершающих память их.

И ныне, глас 4:

О Пресвятая Дева, Заступнице усердная рода христианского, правды вышния чающе, к Тебе прибегаем, стена нам буди и помощь непобедимая противу нашествия лжеучителей ересей и расколов. Умоли убо Сына Твоего и Бога нашего да сохранит Отечество наше в правоверии и единомыслии.

На стиховне стихиры, глас 2:

Яко звезды многосветлыя в земли Крымстей возсиявше, осветили есте сердца верных в прославлении вашем, страстотерпцы святии. Ныне же предстояще Престолу Царя Славы, молите всякое шатание душевредное от земли нашея истребити.

Стих: Тебе ради умервщляеми есмы весь день, вменихомся, яко овцы заколения (Пс.43:23).

Властители богомерзкия тщашася ласканьми запяти вас и отвратити от спасительная вашея веры, вы же суще на земли, яко ангели неуклонни пребыли есте. И ныне на небесех с лики мученик веселящеся, просите нам оставление грехов и велию милость.

Стих: (Вменихомся яко овцы заколения). Бог нам прибежище и сила, Помощник в скорбех обретших ны зело (Пс.45:2).

Камение твердо явистеся, святии, противу прещений безбожных мучителей, сего ради хвалится вами земля Российская и верно вопиет: слава Прославляющему святыя Своя.

Слава, глас 8:

Приидите верных собори, в память святых Крымския земли, песни победныя принесем и тако возопиим: умилостивите о нас Христа, Страстоположника вашего, да возможем достойно подвиги ваша похвалити.

И ныне, глас 8:

Огнезрачный жезл силы Твоея, яко пламень чист, и сим ведеши, Путеводительнице, люди Твоя, да соблюдаются от бед христианы.

На благословение хлебов

Ин тропарь святым (дважды), глас 4:

Днесь притецем, вернии, к лику новомyченик Крымских, яко добрым делателем сада Иисусова, во дни гонений и озлоблений веру непоколебиму соблюдшим, и со умилением воззовем к ним: молитеся отечеству вашему в православии и единомыслии сохранитися и сыновом Российским в мире спастися.

И Богородице Дево (единожды).

На утрени

На Бог Господь: Тропарь святым (дважды),

Слава И ныне, Богородичен: Еже от века утаенное.

По 1-ой кафизме седален святым, глас 1:

Благочестно пожил еси во святителех, смиренно крест свой взем, Христу последовал еси, гонение и мучения претерпевая, священномучениче Порфирие, и ныне со святыми Крымския земли и мученик лики предстоя, моли спастися нам.

Слава:

Божественною свыше просветившеся благодатию, святителю Порфирие с богомудрыми сподвижники и многими муками жертву благоприятну Богу принесосте, и ныне молите даровати согрешений очищение, верою творящим память вашу.

И ныне:

Едина крепкая и теплая Предстательнице роду человеческому, Богородице Дево, непрестанно моли со святыми священномученики, Его же родила еси паче естества Бога Слова, спасти всяческая.

По 2-ой кафизме:

Терпением и мужеством вашим всю страсть подъясте мученицы Крымския, любовию взирая на Милостиваго и Человеколюбиваго Бога, подающего мирови велию милость.

Слава:

Земля освятися кровию всечестною Вашею, святии мученицы Крымския, и вся люди православныя обогатишася Вами, Богомудрии угодницы Христовы, молитеся Господеви, спасти верою поющия Вас.

И ныне, глас 6:

Настави ны на пугь покаяния, уклоняющияся безпрестанно в безпутия злыя и Преблагаго прогневающия Господа, Неискусобрачная Благословенная Марие, прибежище отчаянных человек, Божие обиталище.

Полиелей

Величание:

Величаем Вас, священномученицы Крымския, и чтим честная страдания Ваша, яже за Христа претерпели есте.

Псалом избранный

Услышите сия вси язы́цы (общии святительские).

По полиелеи седален, глас 2:

Званию Господа своего последовавше, крест аки знамение воскресения, в руци восприемше, не убоялися есте мучений за веру православную, но упованием приидосте к безбедному пристанищу, и страданий своих обретше воздаяние, веселитеся во Свете неприступнем. Темже Вас почитаем, страстотерпцы всеблаженнии.

Слава, глас 6:

Память твою святителю Порфирие празднующе со страстотерпцами Николаем, Димитрием, Варфоломеем, Владимиром, Тимофеем, Иоанном, Антонием, Николаем, Андреем, Елеазаром со Димитрием, Стефаном вопием вам: со Ангелы предстояще в дерзновении мнозе, о всех нас, молитеся ко Владыце Христу.

И ныне:

Всепетая Богородице Дева, всех скорбящих присная Радосте, на образ Твой умильно взирающе, вкупе со священномученики крымскими вопием Ти: спасай нас, Ты бо еси Едина Заступница наша усердная, разве Тебе иныя не вемы.

Степенна, 1-й антифон, глас 4.

Прокимен: (см. общ. Минею, службу сщмчч.)

Евангелие: Лк., 24 зач.

По 50-м псалме стихира, глас 6:

Веселися, Крымская земле, и вся грады и веси, горы и холми восплещите руками, се бо ныне прославляется лик священномученический, мы же бренными усты вопием: избавите землю нашу от нашествия агарянскаго и даруйте мир душам нашим.

Каноны

Канона два, первый молебный ко Пресвятей Богородице изрядный, творение благочестивейшего царя господина Феодора Дуки Ласкаря, глас 8

Песнь 1.

Ирмос: Колесницегонителя фараона погрузи, чудотворяй иногда Моисейский жезл, крестообразно поразив и разделив море, Израиля же беглеца пешеходца спасе, песнь Богови воспевающа.

Скорбных наведения обуревают смиренную мою душу, и напастей облацы мое покрывают сердце, Богоневестная: но Свет рождшая Божественный и Превечный, возсияй мне свет радостный.

От безмерных нуждей и скорбей, и от врагов лютых, и напастей житейских, избавлься Всечистая, крепкою силою Твоею, воспеваю, величаю безмерную Твою милость и еже ко мне Твое утешение.

Слава:

Ныне надеяся, к Твоему прибегох заступлению крепкому, и к Твоему покрову вседушно притекох, и колени преклоняю Владычице, и плачу и стеню, не презри мене окаяннаго, христианом прибежище.

И ныне:

Не умолчу вопити яснейше величия Твоя: аще бо не Ты, Отроковице, всегда предстояла еси, о мне молящи Сына Твоего, кто бы от толикия бури и лютых бед избавил мя.

Канон священномученикам на 8, ирмос тойже.

Новый светильниче, возсиявый в земле Крымстей во дни гонений в тягчайшем часе для Церкве Православныя, священномучениче Порфирие, молися за отечество наше и вся люди во обстоянии сущия.

Отец духовный быв людем Крымския земли во дни шатания и нестроения, во едино стадо люди расточенная собирая и омофором святительским покрывая, молися о чтущих тя, блаженне.

Слава:

Вседержителю духом предстоя, Порфирие блаженне, ежечасно наставлял еси люди во страсе Божием, лживыя наветы и клеветы претерпевая, непоколебим пребыл еси.

И ныне:

Из глубины зол моих вопию Ти: Виждь, Владычице Дево, скорбь мою, и не отвержи мене во обстоянии сущаго. Услыши убо вопль сердца моего, и покрый мя ризою Твоею, да воспою Ти песнь победную.

Катавасия: Отверзу уста моя.

Песнь 3.

Ирмос: Небеснаго круга верхотворче Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Недоумевый от всех, болезненно зову Ти: предвари теплое предстательство, и Твою помощь даждь ми рабу Твоему смиренному и окаянному, Твоего заступления ищущему тепле.

Удивила еси воистину ныне на мне Владычице, благодеяния Твоя Отроковице, и милости Твоя. Темже славлю Тя, и воспеваю, и почитаю многое и безмерное смотрение Твое.

Слава:

Буря мя обуревает напастей, Владычице, и скорбных треволнения погружают: но предваривши руку ми даждь помощи, теплое заступление и предстательство Твое.

И ныне:

Истинную Богородицу исповедую Владычицу Тя, смерти державу потребившую: яко бо оживляющая, от уз адовых к животу возвела еси мя в землю текшаго.

Ин. ирмос тойже.

Мучения и гонения претерпевая, священномучениче Димитрие, из града Ялты в Казахстан изгнан бысть, обаче и по возвращении верен пребываеши, в руци Божии спасение пасомых вверяя.

Святый священномучениче Николае, святителю Порфирию сподвижниче добрый на ниве Христовой, тому и соузник и сострадалец явился еси.

Слава:

Человече Божий, Димитрие славне, в заточении сущим священником и чадом их сирым любовию послужив, не остави и нас, обнищавших в узах греховных.

И ныне:

Егда предстанеши, Владычице, в помощь нашу, никтоже сокрушит ны, яко велие дерзновение обрела еси у Христа Бога, Сына Твоего, и сие ведуще вопием Ти: спаси ны под покровом Твоим.

Седален, глас 4:

Со святителем Порфирием Димитрия мудраго, Николая с Варфоломеем и Владимиром верою почтим и досточудных Тимофея, Иоанна, Антония, Николая, Андрея и Елеазара с мученики Димитрием и Стефаном служители бо, сии Бога Вседержителя бывше, верою тому благоугодиша: и мучения от безбожных прияша: молитеся убо раздирания церквей искоренити и ересей востания скоро разорити, веру же добре сохранити.

Слава:

Пострадавше от беззаконных, мученицы всехвальнии венчаетеся претерпевшие бо горькия клеветы, заушения и биения, и раны, на не6есех наслаждатися нетленныя жизни сподобистеся.

И ныне, Богородичен:

Разумейте непокорнии еретицы: не подобает вкупе с вами и вам подо6ящимся, нам молитвы совершати и о единении совещеватися лжецерковном. Святии бо Апостоли глаголют: Аще кто со отступники помолится, аще бы и в дому то было: таковый да будет отлучен. Не сотворим же братие сего и ко Владычице воззовем: Защити нас под державою Твоею Всепречистая.

Песнь 4.

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.

И где прочее иное обрящу заступление; камо прибегну; где же и спасуся; кую теплую возимам помощницу, скорбьми житейскими и бурями, увы, мне колеблему; на Тя Едину уповаю, и дерзаю, и хвалюся, и притекаю к покрову Твоему, спаси мя.

Реку сладкую милости Твоея, богатыми дарми оросившую, всеокаянную и смиренную душу мою, Всечистая, напастей и скорбей пещию сожженную, величаю, проповедую и притекаю к покрову Твоему, спаси мя.

Слава:

Тя Чистую, Тя Деву и Нескверную, Едину имам стену необоримую, прибежище, покров крепкий, оружие спасения, не презри мене блуднаго, надеждо ненадеемых, немощствующих помоще, оскорбляемых радосте и заступление.

И ныне:

Како изрещи Твоя по достоинству возмогy безмерныя щедроты, о Владычице, яже мою всегда душу люте оскорбляемую, яко воды обышедшия; но о Твоего промысла и благодеяния, егоже безумно окаянный погубих!

Ин.

Николае чудный, исповедниче непоколебимый, многия изгнания претерпел еси, пастырю наш добрый, града Симферополя украшение и твердый поборниче веры православныя.

Истину вещав, в заключении пребывая многажды, и молитвы творя со святители Никодимом и Порфирием и многими иереи соборная церкве взывал еси: Слава Богу тако устроившему.

Слава:

Кроток и смирен быв иерею Божий Елеазаре, кротко отвещал еси вопрошающим и клевещущим на тя. Сего ради гонения и заточения подъял еси со святителем Порфирием богомудрым.

И ныне:

Отроковице Всечистая, Мати Бога Вышняго, молися и ныне за вся во обстоянии и скорбех сущия отцы и братию нашу, и вся христианы предстательством Твоим защити.

Песнь 5.

Ирмос: Вскую мя отринул еси от Лица Твоего Свете незаходимый, и покрыла мя есть чуждая тьма окаяннаго: но обрати мя, и к свету заповедей Твоих пути моя направи, молюся.

Благодарно вопию Ти: Радуйся, Мати Дево; Радуйся Богоневесто, Радуйся, божественный покрове. Радуйся, оружие и стено нерушимая. Радуйся, предстательство и помоще и спасение, иже к Тебе притекающим верою. (Дважды)

Слава:

Ненавидящии мя всуе стрелы и мечи и ров уготовиша, и ищут всеокаяннаго моего тела исторгнути, и низвести в землю желают: но от сих Чистая предваривши, спаси мя.

И ныне:

Кий Тебе дар принесу благодарения, за яже насладихся Твоих дарований, и Твоея безмерныя благостыни; темже убо славлю, песнословлю, и величаю Твою неизреченную ко мне милость.

Ин.

Мученик добр был еси, Владимире, глаголя без преткновения пред гонители в защиту веры православныя.

О гонящих тя, блаженне Владимире, во дни и в нощи молитвы Богу творя, веру непорочно соблюл еси, лжеучителей раскола и обновления богомерзкаго обличая.

Слава:

В молитве и богомыслии непрестанном пребыл еси, отче, благоговейно, прение со безбожными иереи творя, и главы тех заушая словесно.

И ныне:

Светоподателю ныне предстоя и с мученики ликовствуя, помолися, святче Божий Димитрие, ко Пресвятей Богородице о воспевающих подвиги твоя.

Песнь 6.

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

Облацы скорбных покрыша окаянную мою душу и сердце, и помрачение вводят мне, Отроковице: но рождшая Свет неприступный, изжени сия далече, дохновением божественныя молитвы Твоея.

Утешение в скорбех вем, и недугов врача Тя знаю, и всесовершенное сокрушение смерти, и реку живота неизчерпаемую, и всех сущих в напастех скорое и быстрое заступление.

Слава:

Не скрываю глубины Твоея милости, и ток безмерных чудес, и источник приснотекущий воистинну, яже ко мне милости Твоя Владычице: но всем исповедую, и вопию, и проповедую, и вещаю.

И ныне:

Обыдоша мя житейския бури, яко пчелы сот, Дево, и мое содержащыя сердце, уязвляют стрелы скорбей: но да обрящу Тя помощницу, и гонительницу, и избавительницу, Всепречистая.

Ин.

Таков подобаше проповедник быти, отче Варфоломее преподобне, крест железный на ся возложив, иже есть терпение и упование на Бога Живаго.

Отложив привременная, всечестный мучениче Димитрие, прещения, истязания, уничижения судей беззаконных презрел еси, Христа Единаго возжадав, с Нимже и ликовствуеши в бесконечныя веки.

Слава:

Неправедно от безбожных ят быв, священномучениче Андрее, наветы лживыя отвергл еси, глаголемыя яко противу властей предержащих поучал еси люди, обаче и смерти осужден быв, воспевал еси Единому Безгрешному и Всеправедному Судии всех Богу: Аллилуя.

И ныне:

Слава на небесех и на земли веселие, се бо Царица со святыми страстотерпцы Крымскими за вся ны в церкви молится Богу.

Кондак, глас 4:

Избранныя новомученицы, о нихже ликовствуют вернии, прославляя звезды незаходимыя неба православнаго, Церкве Христовы исповедницы, венцем мученическим увенчаныя. Святый священномучениче Порфирие со сподвижники твоими, предстоя у Престола Царя Славы, молите Христа Бога, Отечеству нашему в православии утвердитися и ниспослати нам велию милость, вопиющим вам: Радуйтеся, светильницы земли Таврическия.

Икос

Воспоим ныне светильницы Таврическия земли, возсиявшии на небе Православнем, и воззовем:

Радуйтеся, святии земли нашея, во благочестии Христу подражавшии; Радуйтеся, искушения врага добре претерпевшии в гонении.

Радуйтеся, бедствующим многомощныя помощницы.

Радуйтеся, во православии стоящих незыблемое утверждение. Радуйтеся, подвиг свой кровию запечатлевшии.

Радуйтеся, от Небеснаго Пастыреначальника венцы мученическия прияли есте.

Радуйтеся, добропобеднии воини Царя Небеснаго. Радуйтеся, светильницы земли Таврическия.

Песнь 7.

Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси Господи Боже во веки.

Свет рождшая Богородице, помрачена мя нощию грехов просвети Ты, Света сущи приятелище чистое и непорочное: да любовию Тя славлю.

Покров буди и предстательство, и заступление, и похвала, Дево, обнажену мне ныне всякия помощи, беспомощных сило, и надеждо ненадеемых.

Слава:

Всею душею и мыслию, и сердцем, и устнами Тя славлю, насладився Твоих великих дарований: но, о Твоея благостыни, и безмерных Твоих чудес!

И ныне:

Виждь милостивым оком Твоим, и посети озлобление еже имам, и лютых напастей, и вреда, и бед, и от искушений мя избави безмерною милостию Твоею.

Ин.

Причастник быв Божественныя славы, отче Тимофее, не убоявся гонений и мучений от власти антихристовой. Темже молим тя, даруй нам веру дерзновенную.

Единому Богу служа, отче Елеазаре, поучал еси чада духовныя боятися Суда Божия паче суда человек грешных.

Слава:

Смерть приемше Тимофее и Гаврииле ныне ликуете на небесех в сонме святых предстояще. Молитеся убо за землю Крымскую в нейже подвизалися есте.

И ныне:

О Царице Всепетая, православных Похвало, буди стране нашей держава и заступление от находящих на ны ересей и расколов, и всяких богохульных учений насадителей, низводящих в бездну адскую многия души искупленных Кровию Сына Твоего

Песнь 8.

Ирмос: На горе Святей прославльшася, и в купине огнем Приснодевы Моисеовы тайну явльшаго, Господа пойте, и превозносите во вся веки.

Благоутробия ради милости Твоея, Дево, не презри Чистая, потопляемаго мене бурею житейских волн: но даждь ми руку помощи, утесняему озлобленьми житейскими.

Обстояния и скорби и нужды обретоша мя, Чистая, и напасти житейския, и искушения отвсюду мя обыдоша: но предстани ми, и заступи мя крепким Твоим покровом.

Слава:

В бурях да обрящу Тя пристанище, в печалех радость и веселие, и в недузех скорую помощь, и в бедах Избавительницу и Предстательницу во искушениях.

И ныне:

Радуйся, Престоле огнеобразный Господень. Радуйся, божественная и манноприемная ручко. Радуйся, златый светильниче, свеще неугасимая. Радуйся, девам славо и матерем украшение и похвало

Ин.

Избави стадо Твое от належащия ныне бури нестроений и бед, отче Иоанне блаженне, приводя ны в пристанище тихое послушания воле Христовой, да возможем с тобою взывати: Господа пойте и превозносите во вся веки.

Подобен быв Златоустому, Истины слово вещая, на ниве Христове труждаяся, спящыя пробуждая, утешая озлобленныя, ихже и научил еси пети: Господа пойте и превозносите во вся веки.

Слава:

Во узах горьких пребывая, мучениче Димитрие, веру тверду, и надежду светлу, и любовь нелицемерну явил еси, присно глаголя: Господа пойте и превозносите во вся веки.

И ныне:

Едино Предстательство имамы, да не постыдимся, вопия к Тебе Пречистей избави от бед рабы Твоя. Стефан же узрев милости Твоя в песнех воспел еси: Благословен Бог отец наших.

Хвалим Благословим: Катавасия.

Песнь 9.

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу ангелов и человек чиноначалия величают.

К кому прибегну иному, Чистая; где притеку прочее и спасуся; камо иду; кое же обрящу прибежище; кое теплое заступление; кую в скорбех помощницу; на Тя Едину уповаю, и о Тебе Единей хвалюся, и на Тя дерзая, прибегох.

Несть исчислити возможно величия Твоя Богоневесто, и глубину неиспытательну изрещи, паче ума чудес Твоих, совершенных выну, любовию Тя чтущим, и верою поклоняющимся, яко воистину Бога рождшей.

Слава:

В песнех благодарных славословлю, и почитаю безмерную милость, и многую силу Твою всем исповедую, и благодеяния Твоя, яже истощила еси на мя, проповедую, величаю душею же и сердцем, и мыслию, и языком всегда.

И ныне:

Моление мое приими убогое, и плача моего не презри, и слез, и стенания: но заступи мя яко Благая, и прошения исполни: можеши бо вся, яко всемощнаго Владыки Бога Мати, аще возмагаеши токмо моему окаянному смирению.

Ин.

Добре подвизався на Святей горе Афонстей, отче Антоние, в послушании и молитве благодать Св. Духа стяжав, землю же Крымскую подвигом мученическим украсил еси.

Ревностию Божественною распалаем, Антоние досточудне, образ терпения и мужества явился еси. Темже и нам, немощным, последовати Христу произволение доброе даруй.

Слава:

Прост, благолепен, безстрастен быв, человече Божий Антоние, просто отвещевая о монашестем житии твоем, сети хитросплетенныя наветник твоих расторгая незлобием, кончину мученическую, преподобне, приял еси.

И ныне:

Егда взираем на образ Твоего изображения, Чистая, именуемый Скорбящая, вопием во отчаянии сущии, огради нас под покровом Твоим и спаси вся ны.

Светилен.

Возсия нам заря невечерняго дне в памяти святых страстотерпец; тии бо тьму безбожныя злобы, ересей и расколов отгнаша, и в залог чистоты православныя веры апостольския, кровь свою пролияша.

Слава:

Терпя во страданиих, священномученицы Порфирие, Димитрие, Николае, Варфоломее, Владимире, Тимофее, Иоанне, Антоние, Николае, Стефане, Андрее, Елеазаре со Димитрием, телеса своя предали есте за Христа Бога. Темже мучеников святых равностоятелие, не оскудевайте молящеся спастися душам нашим, от всякаго вреда чуждаго.

И ныне:

Избави ны, Пречистая, бесовския прелести, озлобления же и вреда, и искушения, да верою Тя славим, сущую по Бозе Заступницу и покров наш.

На хвалитех стихиры на 4, глас 4:

Дал еси, Христе Боже, Крымстей земли мученики преславныя Порфирия и Димитрия, Николая и Владимира премудрыя, Тимофея со Иоанном, Стефана, Антония, Николая, Андрея, Елеазара со Димитрием, крепкии камения веры, их же молитвами даруй земли нашей утверждение, и велию милость.

Святии страстотерпцы Твои, Христе, явистася Церкве непоколебимыя столпы, благочестия ревнители, нечестия и вражды прогонители, веры православныя утверждение и всякия ереси, раскола и богохульства от земли нашея искоренители.

Градом Крымским крепкии защитники, врагов преславнии победителие, христианом соратники непреоборимыи, мученицы Тавричестии показашася, иже ныне Престолу Твоему, Господи, во славе предстоят радующеся.

Дал еси дерзновение святым Твоим, Христе Боже, молитися о убивающих и гонящих я, ихже молитвами расточенное стадо Твое воедино собери, отпадшия и ожесточенныя к покаянию привлецы, и ко святей Соборней и Апостольстей Церкви сопричти, ересей и расколов шатания разори, и людем Твоим даруй велию милость.

Слава, глас 8:

Божественным огнем разжизаеми, и светом просвещаеми Пресвятыя Троицы отцы блаженнии, вражия победили есте советы и коварства, и на ревность божественную подвизая с собою верныя, мучения претерпели есте. Молитеся убо Единому Сердцеведцу Христу Богу, да помилует Отечество наше, архиереи и вся люди, и да подаст нам милость в день Судный.

И ныне:

Яко звезда светлая сияет днесь образ Твой, Владычице мира, пред нимже ныне молящеся вопием Ти: обрати на путь покаяния заблудшия и спаси вся ны.

Славословие великое.

Тропарь святым, Слава и ныне: Богородичен.

На Литургии

Блаженны от канона, Песнь 3.-я и 6-я на 8:

Прокимен, глас 7: общий священномучеником.

Ин прокимен, глас 7: Тебе ради умервщляемся есьмы весь день.

Стих: Вменихомся яко овцы заколения.

Апостол: Рим.99 зач. 8:28–39.

Аллилуиа, глас 4: Воззваша праведнии и Господь услыша их и от всех скорбей избави их.

Стих: Господь пасет мя и ничтоже мя лишит на месте злачне.

Евангелие: Лк.52 зач.

Причастен: Тебе ради, Господи, умерщвляемся есьмы весь день.

Ме́сяца деке́мврия в 15-й день

Священному́ченика Иларио́на, архиепи́скопа Вере́йскаго

На ма́лой вече́рни

На Го́споди, воззва́х: стихи́ры на 4, глас 6:

Егда́ Бо́жиим попуще́нием прии́де на Це́рковь гоне́ние лю́тое, воздви́же тя Госпо́дь, Иларио́не сла́вне, Це́ркве непоколеби́маго столпа́, му́чеников украше́ние, сосу́д честны́й Святáго Ду́ха.

Егда́ любы́ и ве́ра оскуде́ша и преда́ния оте́ческая забве́на бы́ша, Иларио́не богому́дре, писа́нии твои́ми тьму лжеуче́ний обличи́л еси́, святы́х отце́в насле́дниче.

Егда́ во́лны ересе́й Це́рковь Бо́жию обурева́ху, ты, Иларио́не, богому́дрыми словесы́ тех свире́пство утиши́л еси́.

Егда́ неи́стовии богоотсту́пницы смуща́ху Це́рковь Бо́жию, ты, священному́чениче Иларио́не, ве́рность первосвяти́телю Ти́хону неколе́блемо сохрани́л еси́, благи́й о́браз всем подава́я.

Сла́ва, глас то́йже:

Кто возмо́жет восхвали́ти тя, избра́нниче Бо́жий и Це́ркве Христо́вы служи́телю, ересе́й обличи́телю и раско́лов искорени́телю, ты бо, коле́блющияся вразумля́яй, и заблу́ждшия на путь и́стинный наставля́яй, враго́м Христо́вым противоста́в, зло́бу диа́волю посрами́л еси́ и Христа́ му́жески испове́дал еси́, Того́ моли́ спасти́ся душа́м на́шим.

И ны́не, Богоро́дичен, глас то́йже:

Богоро́дице, Де́во Чи́стая, Це́ркве Христо́вы покро́ве, покры́й нас от вся́каго зла и обстоя́ния, сохраня́ющи чту́щия Тя.

На стихо́вне стихи́ры, глас 4:

До́блестный святи́телю, святáго патриáрха Ти́хона сподви́жниче, ты лесть безбо́жных возненави́дел еси́, и собла́зны их обличи́л еси́, и, суди́ще непра́ведное претерпевáя, вене́ц побе́дный стяжа́л еси́.

Стих: Мно́ги ско́рби пра́ведным, и от всех их изба́вит я́ Госпо́дь.

Егда́ святы́ня солове́цкая пору́гана бысть, ты, архиере́ю Бо́жий, ме́рзость запусте́ния в свя́то ме́сто претворя́я, во у́зах в нощи́ Святы́я Па́схи возгласи́л еси́: да воскре́снет Бог и расточа́тся врази́ Его́.

Стих: Уста́ пра́веднаго поуча́тся прему́дрости, и язы́к его́ возглаго́лет суд.

Прему́дрый наста́вниче па́стырей, во ото́цех солове́цких заточе́ние претерпева́я, разбо́йники на стезю́ покая́ния напра́вил еси́, отсту́пники святы́я ве́ры обличи́л еси́, малоду́шныя уте́шил еси́, изнемога́ющия укрепи́л еси́. Те́мже и испове́дник Христо́в и́стинный яви́лся еси́.

Сла́ва, и ны́не, Богоро́дичен, глас то́йже:

Мари́е, Ма́ти Пастыренача́льника, бу́ди па́стырем правосла́вным Помо́щница, Це́ркве Христо́вы несокруши́мая Стена́, сохраня́ющи от раздо́ров и нестрое́ний, наипа́че же от зло́бы безбо́жия и лю́тых ересе́й.

Та́же Ны́не отпуща́еши: Трисвято́е, по О́тче наш:

Тропа́рь, глас 4:

Святи́телю Христо́в Иларио́не,/ сла́во и похвало́ Це́ркве Ру́сския,/ ра́зум боже́ственный стяжа́в,/ пред безбо́жники Христа́ дерзнове́нно испове́дал еси́,/ Его́же ра́ди страда́ния претерпева́я,/ лю́дем ве́рным возглаша́л еси́:/ без Це́ркве несть спасе́ния.

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 8, глас 1:

О, священному́чениче Иларио́не, ревни́телю патриа́ршества и́стинный, первосвяти́телю Ти́хону помо́щник ве́рен был еси́, Це́рковь Бо́жию соблюдáя во дни искуше́ний и гоне́ний. Те́мже вопие́м ти: ра́дуйся, святи́телю Христо́в, Це́ркве Правосла́вныя ре́вностный побо́рниче.

Днесь ра́дуется оби́тель Сре́тенская, иму́щи святы́я мо́щи Иларио́на чу́днаго, его́же па́мять све́тло пра́зднующи, хвале́бно воспева́ет: ра́дуйся, святи́телю Христо́в, Це́ркве Правосла́вныя ре́вностный побо́рниче.

О, богому́дре Иларио́не, благода́тию Свята́го Ду́ха просвеще́нный, и́стину Правосла́вия утвержда́я, лука́выя изобличи́л еси́ и сло́вом кре́стным безу́мие ми́ра сего́ посрами́л еси́. Сего́ ра́ди взыва́ем ти: ра́дуйся, святи́телю Христо́в, Це́ркве Правосла́вныя ре́вностный побо́рниче.

А́гнцу Бо́жию в терпе́нии подража́я, беззло́бно темни́чная страда́ния, преще́ния и поноше́ния, глад, мраз и боле́зни претерпе́л еси́ и, за враги́ моля́ся, Иларио́не свя́те, кро́тко ду́шу Христу́ преда́л еси́. Сего́ ра́ди ублажа́ем тя: ра́дуйся, святи́телю Христо́в, Це́ркве Правосла́вныя ре́вностный побо́рниче.

И́ны стихи́ры, глас 4:

От Бо́га обогаще́н чистото́ю душе́вною, по́стническими по́двиги благода́ть Свята́го Ду́ха стяжа́л еси́, доброде́тели люби́телю и греха́ победи́телю, земны́й А́нгеле и Небе́сный челове́че.

От ю́ности Христа́ возлюби́в, вся кра́cная ми́ра сего́ оста́вил еси́, Иларио́не сла́вне, и, вы́сшаго любому́дрия взыску́я, в лик и́ночествующих всели́лся еси́, земны́й А́нгеле и Небе́сный челове́че.

О́чи серде́чнеи писа́нии Боже́ственными просвети́л еси́, блаже́нне Иларио́не, те́мже, в богосло́вии Правосла́вия высоту́ показу́я, свиде́тель ве́рен яви́лся еси́, и, кано́ны церко́вныя утвержда́я, вся ко спасе́нию наста́вил еси́, земны́й А́нгеле и Небе́сный челове́че.

Ви́дя я́ко безбо́жных мно́жество на ве́ру Христо́ву ополчи́ся, це́ркви святы́я сокруша́я и лю́ди правосла́вныя истребля́я, тогда́ со слеза́ми к уго́дником земли́ на́шея о спасе́нии наро́да Бо́жия взыва́л еси́, святи́телю Иларио́не, земны́й А́нгеле и Небе́сный челове́че.

Сла́ва, глас 8:

Прииди́те, лю́дие вси, священному́ченику Иларио́ну ве́рно поклони́мся, и, тому́ подража́юще, все упова́ние на Христа́ возложи́м, и нече́стия мирскáго отве́ргнемся, в ве́ре же и чистоте́ пребу́дем, порабо́таем Го́сподеви и Его́ Це́ркви Святе́й, ско́рби и боле́зни до конца́ претерпи́м. Ты же, святы́й Иларио́не, моли́ Христа́ Бо́га, да прости́т нам грехи́ на́ша и Ца́рствия Небе́снаго сподо́бит.

И ны́не, Богоро́дичен догма́тик, глас то́йже: Царь Небе́сный:

Вход. Проки́мен дне.

И чте́ния в Дея́ниих, глава́ 4:

Во дни о́ны, глаго́лющим апо́столом к лю́дем:

Во дни о́ны, ви́дяще иуде́и петро́во дерзнове́ние и иоа́нново:

Во дни о́ны, отпуще́на бы́вша апо́стола:

(Зри в Мине́и о́бщей новому́чеником и испове́дником)

На лити́и стихи́ры священному́ченика, глас 5:

Днесь лику́ет Собо́р новому́чеников Це́ркве Ру́сския, име́я в себе́ священному́ченика всесла́внаго, испове́дника непоколеби́маго, Иларио́на архиере́я богому́драго и моли́твенника те́плаго о душа́х на́ших.

О, святи́телю Иларио́не, ты, во всем боже́ственным отце́м после́дуя, о Це́ркви нело́жно богосло́вствовал еси́, се́рдце до́брым по́двигом очи́стив, о лю́дех боле́зновал еси́ и, враго́м Це́ркве противоста́в, коле́блемыя утверди́л еси́. Те́мже ны́не Святе́й Трóице предстоя́, моли́ся о душа́х на́ших.

Сла́ва, глас 1:

По и́мени твоему́, Иларио́не блаже́нне, и житие́ твое́ бысть: посреде́ бо мяте́жа мирска́го, тишину́ Христо́ву стяжа́л еси́, всегда́ ра́дуяся и о всем благодаря́, чи́стым се́рдцем Бо́га позна́л еси́ и ны́не мо́лишися о душа́х на́ших.

И ны́не, Богоро́дичен, глас то́йже:

Ра́дуйся, Богоро́дице Чи́стая, церко́вная Похвало́, Сто́лпе де́вства, прему́дрости Прия́телище, Две́ре спасе́ния. Не оста́ви нас во тьме неве́дения пребыва́ющих, просвети́ на́ша очеса́ серде́чная и сподо́би ны узре́ти свет Ца́рствия Бо́жия.

На стихо́вне стихи́ры, глас 6:

Дар благодáти Боже́ственныя прия́л еси́, Иларио́не, избра́нниче Бо́жий, крест бо взем, Христу́ после́довал еси́ и, жи́зни ве́чныя взыску́я, вся су́етная ми́ра отве́ргл еси́. Ны́не же со все́ми святы́ми на небесе́х лику́я, моли́ся о душа́х на́ших.

Стих: На Тя, Го́споди, упова́х, да не постыжу́ся во век.

Во́ле Бо́жией после́дуя, жезл архипа́стырский, я́ко крест, в годи́ну гоне́ний прия́л еси́ и, к му́ченичеству за Христа́ уготовля́яся, Того́ пред безбо́жными дерзнове́нно испове́дал еси́. Ны́не же со все́ми святы́ми на небесе́х лику́я, моли́ся о душа́х на́ших.

Стих: Весели́теся о Го́споде и ра́дуйтеся, пра́веднии, и хвали́теся, вси пра́вии се́рдцем.

Ду́ха Свята́го испо́лненный, Иларио́не ди́вный, посреде́ страда́ний и мра́ка неве́рия, пасха́льныя ра́дости прича́стник яви́лся еси́ и све́т невече́рний зре́ти от Бо́га сподо́бился еси́. Ны́не же со все́ми святы́ми на небесе́х лику́я, моли́ся о душа́х на́ших.

Сла́ва, глас 8:

Ка́ко нарече́м тя, священному́чениче пресла́вне? Ве́ры ли Правосла́вныя ревни́теля? Богосло́ва ли преизя́щнаго? Устрое́ния ли церко́внаго рачи́теля? Му́дрости ли оте́ческия храни́теля? Пропове́дника ли дерзнове́ннаго? А́нгелов ли небе́сных собесе́дника? Недоумевáет ум именовáти тя, ты бо еси́ Це́ркве Ру́сския утвержде́ние, страны́ на́шея сла́ва и му́чеников похвала́.

И ны́не, Богоро́дичен, глас тойже:

Ра́дуйся, Преблагослове́нная Влады́чице, Сын бо Твой из ме́ртвых восста́ и нам дарова́ живо́т ве́чный.

Тропа́рь пи́сан на ма́лой вече́рни.

На у́трени

На Бог Госпо́дь: тропа́рь два́жды. Сла́ва, и ны́не, Богоро́дичен, глас то́йже.

По 1-м стихосло́вии седа́лен, глас 6:

Му́дрость че́стну не мно́гими ле́ты, но скорбьми́ и страда́ньми стяжа́л еси́, Иларио́не свя́те, и Бо́га чи́стым ра́зумом позна́л еси́, помози́ и нам прича́стники Боже́ственныя прему́дрости соде́латися.

Сла́ва, и ны́не, Богоро́дичен, глас то́йже:

О, Пресвятáя Де́во, Цари́це Небе́сная, из Тебе́ воплоти́ся Боже́ственное Сло́во, и Челове́к бысть, да мы обожи́мся.

По 2-м стихосло́вии седа́лен, глас 4:

Днесь оби́тель Сре́тенская све́тло торжеству́ет, кре́пкаго моли́твенника и пред Бо́гом те́плаго хода́тая тя иму́щи, святи́телю Иларио́не, ты бо в годи́ну гоне́ний и ерети́ческих нападе́ний оби́тель сию́ до́бре упа́сл еси́.

Сла́ва, и ны́не, Богоро́дичен, глас то́йже:

Пресвята́я Богоро́дице, Заре́ све́тлая Трисия́тельнаго Све́та, Тобо́ю гра́ды и оби́тели утвержда́ются, сове́ты вра́жия посрамля́ются, сердца́ ве́рных чистото́ю и любо́вию просвеща́ются, супоста́ты низлага́ются. Пода́ждь и нам побе́ды на враги́ и спаси́ ду́ши на́ша.

Велича́ние:

Велича́ем тя, священному́чениче Иларио́не, и чтим честна́я страда́ния твоя́, я́же за Христа́ претерпе́л еси́.

По полиеле́и седа́лен, глас 5:

Воспои́м, ве́рнии, священному́ченика архиепи́скопа Иларио́на, за Це́рковь ду́шу свою́ положи́вшаго, Христо́ва во́ина сла́внаго, его́же днесь Русь свята́я достохва́льно велича́ет.

Сла́ва, и ны́не, Богоро́дичен, глас 1:

Ма́ти Бо́жия и Де́во, в рождестве́ де́вство сохра́ньшая, не оста́ви нас немощству́ющих, от бед и боле́зней сохрани́ и моли́твами Твои́ми изба́ви от сме́рти ду́ши на́ша.

Степе́нна 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду/ и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Бу́ря напа́стей смуща́ет мя, я́ко умно́жишася беззако́ния и оскуде́ любы́, сего́ ра́ди взыва́ю к тебе́, святи́телю Иларио́не: бу́ди ми помо́щник и засту́пник, исцели́ и вразуми́ мя и на путь спасе́ния напра́ви, и научи́ во́лю Бо́жию твори́ти.

Кано́н Богоро́дицы со ирмосо́м на 6

и свята́го священному́ченика Иларио́на на 8, его́же краегране́сие:

Иларио́на сла́внаго Христо́ва ра́тника воспева́ем. Глас 6.

Песнь 1.

Ирмо́с: Волно́ю морско́ю скры́вшаго дре́вле гони́теля мучи́теля, под земле́ю скры́ша спасе́нных о́троцы: но мы я́ко отрокови́цы, Го́сподеви пои́м, сла́вно бо просла́вися.

Иларио́не, всечестны́й святи́телю, по и́мени твоему́ и житие́ твое́ бысть, тишину́ бо моли́твенную внутрь себе́ име́я, ра́дость пасха́льную всем яви́л еси́.

Лесть гони́телей твои́х отве́ргнув, муче́ния лю́таго не убоя́лся еси́, свя́те, Христа́ же пред судия́ми непра́ведными му́жески испове́дав, сла́вою небе́сною просла́вился еси́.

А́нгелов собесе́дниче, Иларио́не преподо́бне, во огра́де до́ма Живонача́льныя Трóицы, пожи́л еси́, иде́же посто́м и моли́твою ду́шу очи́стив, богове́дение стяжа́л еси́.

Ре́вность по Бо́зе име́я, святи́телю, богобо́рцев сло́вом облича́л еси́, та́кожде и ерети́ческих мудрова́ний не терпя́, нечести́выя из оби́телей и хра́мов изгоня́л еси́, ка́ющияся же ко спасе́нию приводи́л еси́.

Богоро́дичен: Ины́я по́мощи не и́мамы, ра́зве Тебе́, Влады́чице, Ты нам помози́ мо́ря жития́ сего́ пучи́ну я́ко по су́ху проити́ неискуше́нно от злых.

Катава́сия: Отве́рзу уста́ моя́:

Песнь 3.

Ирмо́с: Тебе́ на вода́х пове́сившаго всю зе́млю неодержи́мо, тварь ви́девши на ло́бнем ви́сима, у́жасом мно́гим содрага́шеся, несть свят, ра́зве Тебе́, Го́споди, взыва́ющи.

От ю́ности чистоту́ возлюби́в, Иларио́не ди́вный, де́вственник душе́ю и те́лом пребы́л еси́ и, не пожела́в порабо́тати тва́ри па́че Творца́, на земли́ невеще́ственное житие́ показа́л еси́.

Небе́сный челове́че, земны́й А́нгеле, Иларио́не прему́дре, святы́м отце́м житие́м после́дуя, за Христа́ ду́шу твою́ положи́л еси́ и земли́ Ру́сския украше́ние яви́лся еси́.

Архиере́ю Бо́жий, Иларио́не свя́те, кро́тостию, смире́нием и терпе́нием, па́че же любо́вию преукра́шен был еси́, сего́ ра́ди за мучи́телей твои́х моли́лся еси́, Христу́ Бо́гу подража́я.

Свята́го Ду́ха дар стяжа́в, Сы́ну Бо́жию, крест взем, после́довал еси́, и во́лю Отца́ Небе́снаго испо́лнил еси́, Иларио́не блаже́нне, Трóицы Святы́я и́стинный почита́телю.

Богоро́дичен: Ле́ствице Небе́сная, Е́юже сни́де Бог, до́лу лежа́щее естество́ на́ше к небеси́ возво́диши, те́мже Тя, Пресвята́я Богоро́дице, любо́вию непреста́нно велича́ем.

Седа́лен, глас 7:

Священному́чениче сла́вне Иларио́не, архиере́ю и дру́же Христо́в, ты, в темни́це заключе́н быв, не восхоте́л еси́ слуга́м анти́христовым поклони́тися, я́коже и му́ченицы дре́вле не возжела́ша же́ртву и́дольскую принести́. Сего́ ра́ди помози́ нам моли́твами твои́ми стре́лы вра́жия отрази́ти и ко́зни диа́вольския разори́ти, еди́наго же Христа́ распя́таго вы́ну очесы́ у́мными зре́ти и Тому́ из глубины́ серде́чныя взыва́ти: Го́споди, Иису́се Христе́, поми́луй нас.

Сла́ва, и ны́не, Богоро́дичен, глас то́йже:

Предста́тельнице и Моли́твеннице на́ша, Пресвята́я Влады́чице, умоли́ Сы́на Твоего́ и Бо́га, егда́ ся́дет суди́ти живы́м и ме́ртвым, да прости́т грехи́ и беззако́ния на́ша, и сподо́бит ны Ца́рствия Небе́снаго.

Песнь 4.

Ирмо́с: На Кресте́ Твое́ Боже́ственное истоща́ние прови́дя Авваку́м, ужа́сся вопия́ше: Ты си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Апо́стольское сло́во исполня́я, в безбо́жнем ми́ре Христа́ пропове́дал еси́, Иларио́не богому́дре, и Це́рковь Его́ от волко́в, расхища́ющих ю́, неусы́пно охраня́л еси́.

Вели́ка та́йна есть Це́ркве, я́ко неве́сты Христо́вы, ю́же ты, Иларио́не, чи́стым се́рдцем узре́л еси́ и я́сно провозгласи́л еси́.

Небе́сныя любве́ да́ра удосто́ен быв, Иларио́не, Бо́га Трóицу во Еди́нице, И́же есть Любы́, испове́дал еси́ и о Це́ркви Святе́й, я́же есть любве́ едине́ние, богосло́вствовал еси́.

Адама́нт ве́ры быв и оте́ческих заве́тов храни́тель, святи́телю Иларио́не, лука́выми уче́нии не смуща́емь, Богоро́дицу Чи́стую, я́ко Де́ву и Ма́терь, просла́вил еси́.

Богоро́дичен: Голго́фе предстоя́щи, Ма́ти Бо́жия ско́рбно взыва́ше: увы́ Мне, Сы́не Мой! Ка́ко на Кресте́ ви́сиши, зе́млю на вода́х пове́сивый? Ка́ко стра́сти терпи́ши, прише́дый спасти́ мир?

Песнь 5.

Ирмо́с: Богоявле́ния Твоего́, Христе́, к нам ми́лостивно бы́вшаго, Иса́ия свет ви́дев невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси земноро́днии возра́дуются.

О, святи́телю Христо́в Иларио́не, помози́ нам нощь жития́ сего́ ско́рбнаго в терпе́нии и покая́нии без поро́ка прейти́, и ра́дости све́та невече́рняго сподо́битися.

Христо́вым па́стырем пра́вило был еси́, Иларио́не, и наста́вник терпели́вый, не то́кмо сло́вом, но и де́лом о́браз им показу́я, и благода́тию, тебе́ от Бо́га да́нною, укрепля́я.

Ра́дости духо́вныя испо́лнен, Иларио́не, ше́ствовал еси́ путе́м те́сным и приско́рбным, всех уча́ Христу́ сраспина́тися, дабы́ с Ним воскре́снути.

И́ноцы оби́тели Сре́тенския днесь прославля́ют архипа́стыря Иларио́на, служи́теля благогове́йнаго Де́вы Пренепоро́чныя, сла́ву Влади́мирскому о́бразу Ея́ досто́йно возда́вшаго и тем преще́ния безбо́жных презре́вшаго.

Богоро́дичен: Сла́вим Тя немо́лчно, Влады́чице, и ко ико́не Твое́й Влади́мирстей припа́даем, взыва́юще: покры́й град Москву́ от тьмы грехо́вныя и безбо́жныя и спаси́ ду́ши на́ша.

Песнь 6.

Ирмо́с: Ят бысть, но не удержа́н в пе́рсех ки́товых Ио́на: Твой бо о́браз нося́, Страда́вшаго, и погребе́нию Да́вшагося, я́ко от черто́га от зве́ря изы́де, приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Ты, иера́рше честны́й, о устрое́нии Це́ркве Ру́сския ревну́я, из глубины́ душе́вныя Христу́ Бо́гу взыва́л еси́: Го́споди, чин патриа́рший возста́ви и единомы́слие в Це́ркви соблюди́.

О, Иларио́не блаже́нне, ты, Собо́ру муже́й церко́вных предстоя́, му́дрым сло́вом, благода́тию растворе́нным, призва́л еси́ их патриа́ршеством Це́рковь Ру́сскую па́ки украси́ти и по достоя́нию возвели́чити.

Всечестны́й Иларио́не святи́телю, ве́рный сподви́жник Ти́хона патриа́рха яви́лся еси́, Це́рковь от безбо́жных власте́й и раздира́ющих хито́н Христо́в до́блественне охраня́я.

Архиере́я достосла́внаго Иларио́на Вере́йскаго днесь, ве́рнии лю́дие, благоче́стно восхва́лим, той бо град Москву́ от поновля́ющих и изменя́ющих чин церко́вный огради́ и ве́рных в благоче́стии утверди́.

Богоро́дичен: Ра́дуйся, Цари́це Небе́сная, Патриа́рхов правосла́вных Похвало́, оби́телей святы́х неруши́мая Стено́, гра́да же первопресто́льнаго и страны́ на́шея Утвержде́ние.

Конда́к, глас 2:

Сла́ву ми́ра сего́ оста́вив, Христу́ до́блественне после́довал еси́ и, святи́тельское служе́ние восприи́м, венце́м му́ченичества украси́лся еси́, и ны́не, Престо́лу Бо́жию предстоя́, моли́ся, Иларио́не, иера́рше прему́дре, спасти́ся душа́м на́шим.

И́кос:

Све́том боже́ственныя му́дрости, Иларио́не святы́й, испо́лни ум мой помраче́нный, да восхвалю́ житие́ твое́, взыва́я си́це: Ра́дуйся, Христа́ Бо́га ве́рный служи́телю; ра́дуйся, Це́ркве Его́ и́стинный испове́дниче. Ра́дуйся, ю́ных до́брый наста́вниче; ра́дуйся, Сло́ва Бо́жия изря́дный пропове́дниче. Ра́дуйся, ве́рным путь спасе́ния возвести́вый; ра́дуйся, хитросплете́ния су́етная посрами́вый. Ра́дуйся, патриа́ршества ревни́телю; ра́дуйся, оте́ческих заве́тов ди́вный храни́телю. Ра́дуйся, Иларио́не, Це́ркве на́шея сла́во и украше́ние.

Песнь 7.

Ирмо́с: Неизрече́нное чу́до, в пе́щи изба́вивый преподо́бныя о́троки из пла́мене, во гро́бе мертв бездыха́нен полага́ется, во спасе́ние нас пою́щих: Изба́вителю Бо́же, благослове́н еси́.

А́ще не яви́лася бы ве́лия ре́вность новому́чеников Це́ркве Ру́сския, поги́бла бы ве́ра Правосла́вная во оте́честве на́шем. Ты же, святи́телю Иларио́не, с ни́ми страда́ния претерпева́я, взыва́л еси́: Изба́вителю Бо́же, благослове́н еси́.

Труды́ и по́двиги, священному́чениче Иларио́не, богоуго́дне поне́сл еси́, и́миже разори́тели Це́ркве Христо́вы посра́млены бы́ша, ве́рнии же восклица́ху: Изба́вителю Бо́же, благослове́н еси́.

Наста́вник мона́хом быв, Иларио́не свя́те, ты во вре́мя лихоле́тия оби́тель Сре́тенскую от нечести́вых защища́л еси́. И ны́не та́мо моща́ми почива́еши, и́ноков ея́ науча́я взыва́ти: Изба́вителю Бо́же, благослове́н еси́.

Иларио́не свя́те, Це́ркве Ру́сския похвало́, сподо́би нас, немощны́х и гре́шных, моли́твами твои́ми от пла́мене страсте́й изба́витися и от искуше́ний невреди́мы сохрани́тися, Го́сподеви взыва́юще: Изба́вителю Бо́же, благослове́н еси́.

Богоро́дичен: Кто Тебе́ не просла́вит, Пресвята́я Де́во, Ты бо еси́ Роса́ небе́сная, грехо́вный пла́мень угаша́ющая и ве́рныя благода́тию исполня́ющая. Те́мже Тебе́ вопие́м: изба́ви нас ве́чнаго осужде́ния и спаси́ ду́ши на́ша.

Песнь 8.

Ирмо́с: Ужасни́ся боя́йся, не́бо, и да подви́жатся основа́ния земли́: се бо, в мертвеце́х вменя́ется в вы́шних Живы́й, и во гроб мал странноприе́млется: Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

А́гнца Бо́жия возлюби́в и ду́ха ми́ра сего́ отве́ргнув, еди́наго и́стиннаго Бо́га служи́тель пребы́л еси́, Иларио́не сла́вне, ны́не же на Небеси́ Влады́це всех предстои́ши. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Внегда́ вся власть тьмы на Це́рковь Ру́сскую ополчи́ся, тогда́ ты, Иларио́не, ду́хом кре́пкий, Христа́ испове́дати не убоя́лся еси́. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

О, свяще́нная и спаси́тельная нощь Па́схи, егда́ ты, святи́телю Христо́в, во у́зах солове́цких возгласи́: да воскре́снет Бог! Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Солове́цкая земле́ многострада́льная, возра́дуйся и возвесели́ся: Иларио́н бо преди́вный с со́нмом новому́чеников на небесе́х за Русь Святу́ю мо́лит ны́не Царя́ Сла́вы. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Богоро́дичен: Пресвята́я Де́во, на Небеса́ к Сы́ну Твоему́ возшла́ еси́ и нас, си́рых, на земли́ не оста́вила еси́; покры́й честны́м Твои́м омофо́ром оби́тели и гра́ды на́ша, жизнь ве́чную подаю́щи всем воспева́ющим Тя.

Песнь 9.

Ирмо́с: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бог, ве́рою и любо́вию Тя велича́ющия.

Егда́ во враче́бнице темни́чней Петро́ва гра́да огне́вицею те́ло твое́ пали́мо бя́ше, душа́ твоя́, я́ко на вода́х упокое́ния ра́достию испо́лнися, и, сете́й кня́зя ми́ра сего́ избе́гнув, ко Христу́ оты́де.

Во́ине Христо́в, Иларио́не сла́вне, ты Го́спода в житии́ твое́м небоя́зненно испове́дав, кончи́ны блаже́нныя сподо́бился еси́. Те́мже взыва́ем: моли́ ми́лостиваго Бо́га, да пода́ст нам во и́стинней ве́ре живо́т свой сконча́ти.

А́нгельское пе́ние и звон пасха́льный дру́зи твои́ и сро́дницы услы́шавше, возра́довашася, Иларио́не, уразуме́ша бо, я́ко душа́ твоя́ чи́стая на Не́бо восхо́д соверша́ше.

Егда́ те́ло твое́ многоболе́зненное во гро́бе положе́но бысть, ча́да твоя́ духо́вная со слеза́ми к тебе́ взыва́ху: моли́ся о нас, пра́ведниче, у престо́ла Госпо́дня.

Богоро́дичен: Ма́ти Безневе́стная, не лиши́ нас Твоего́ заступле́ния, умоли́ Милосе́рдаго Судию́ оправда́ти ны, ве́рою и любо́вию Тя велича́ющих.

Свети́лен:

Вси святи́и Це́ркве Ру́сския ны́не торжеству́ют све́тло, священному́ченика и архиере́я Иларио́на зря́ще, с ни́ми Трóице Боже́ственней моли́твенно предстоя́щаго.

Сла́ва, и ны́не, Богоро́дичен:

Пресвята́я Богоро́дице, ди́вное селе́ние Бо́га и Сло́ва, помози́ нам, Ми́лостивая, моли́твами Твои́ми терпе́ние и упова́ние стяжа́ти, и спасе́ние улучи́ти.

На хвали́тех стихи́ры на 4, глас 8:

О, пресла́вне святи́телю Иларио́не, учи́телю и́стиннаго богосло́вия, тебе́ от Бо́га дарова́на бысть му́дрость благода́тная, во след отце́м ше́ствовати и и́стину Це́ркве возвеща́ти. Сего́ ра́ди просвети́ ду́ши на́ша помраче́нныя, в ра́зуме церко́внем утвержда́я.

О, преди́вне священному́чениче Иларио́не, на суди́щи безбо́жнем стоя́, ты Христа́ му́жески испове́дал еси́ и ве́рныя в по́двизе укрепи́л еси́, те́мже помози́ и нам в житии́ Христу́ после́довати, да не посра́млени бу́дем на суди́щи Бо́жием.

О, достохва́льне архиере́ю Христо́в Иларио́не, благода́тныя си́лы испо́лнен, о́браз и́стиннаго па́стыря яви́л еси́, и о еди́нстве церко́внем неусы́пно ревнова́л еси́, те́мже бу́ди и нам па́стырь до́брый и к любви́ и́стинней наста́ви.

О, Иларио́не, священному́чениче до́бле, ты, на Крест Христо́в взира́я, ми́ру сему́ распя́лся еси́, оскорбле́ния и боле́зни смире́нно претерпева́я. Те́мже моли́ Христа́ Бо́га укрепи́ти ны на пути́ кре́стнем и сердца́ на́ша све́том непристу́пным просвети́ти.

Сла́ва, глас 6:

Се́рдце до́брым по́двигом предочи́стив, бла́га ми́ра сего́ презре́л еси́, Иларио́не священному́чениче, и Христа́ пред безбо́жники небоя́зненно испове́дав, благода́ть Свята́го Ду́ха стяжа́л еси́. Те́мже имы́й дерзнове́ние ко Христу́ Бо́гу, моли́ Того́ спасти́ся душа́м на́шим.

И ны́не, Богоро́дичен, глас то́йже:

Богоро́дице, Ты еси́ Лоза́ и́стинная, возрасти́вшая нам Плод Живота́, Тебе́ мо́лимся, моли́ся, Влады́чице, со святы́ми апо́столы и священному́чеником Иларио́ном, поми́ловати ду́ши на́ша.

На литурги́и

Блаже́нна от кано́на свята́го, Песнь 3.-я и 6-я.

Проки́мен, глас 1: Уста́ моя́ возглаго́лют прему́дрость, и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней.

Апо́стол ко Евре́ем, зача́ло 318.

Аллилу́иа, глас 1: Терпя́ потерпе́х Го́спода, и внят ми, и услы́ша моли́тву мою́. Стих: Мужа́йтеся, и да крепи́тся се́рдце ва́ше, вси упова́ющии на Го́спода.

Ева́нгелие от Иоа́нна, зача́ло 36.

Прича́стен: В па́мять ве́чную:

Источник: Текст утвержден Священным Синодом Русской Православной Церкви 16 июля 2013 года (журнал № 83)

Месяца декабря в 16-й день

священномученика Аркадия (Остальскаго), епископа Бежецкаго

На велицей вечерни

На Господи, воззвах: стихиры на 8, глас 6:

Апостольския благодати преемниче/ и славы мучеников сопричастниче,/ Аркадие богопрославленне,/ ты, во узах темничных пребывая,/ за истину Христову добле подвизался еси,/ и душу свою за ню положил еси./ Темже усердно к тебе взываем:/ молися ко Господу,/ веру святую сохранити и спастися душам нашим. (Дважды)

Придите, вернии,/ в песнех восхвалим Аркадия богоизбраннаго,/ сей бо, слово Истины проповедуя,/ житием своим его утверди,/ Христовою же любовию влекомь,/ с мученики венчася./ Сего ради тепле к нему взываем:/ молися, священномучениче,/ Отечеству твоему в мире пребывати/ и спастися душам нашим. (Дважды)

Ины стихиры, глас тойже.

Подобен: Все отложивше:

Все отложив житейское попечение,/ трудам архипастырским ревностне предался еси,/ Аркадие священнейше,/ сего ради грады и веси апостольски обходил еси,/ ничтоже земная себе стяжевая,/ но Небесная взыскуя,/ да последуеши во всем Пастыреначальнику Христу/ и молитвенник явишися о спасении душ наших. (Дважды)

Все отринув привременных мечтание,/ мучителей суровство презрел еси,/ священномучениче Аркадие,/ темже Христов свидетель истинный показался еси/ гонителем и верным,/ отпадшим и соузником,/ ближним и дальним,/ да вси в познание приидут Сына Божия,/ егоже со дерзновением моли/ о спасении душ наших. (Дважды)

Слава, глас 8:

Аркадие небомудренне,/ славы Божия ревнителю,/ и паствы твоея ангеле добрый,/ ты, первее Безкровную Жертву с любовию принося,/ последи кровию своею священнодействие слова истины запечатлел еси./ Темже, Христу сораспенся/ и во славу Его возшед,/ молися, страдальче блаженне,/ спастися душам нашим.

И ныне, Богородичен: Царь Небесный:

Вход. Прокимен дне. И чтения три.

Деяний святых апостол чтение, глава 4:

Во дни оны, глаголющим апостолом к людем:

Деяний святых апостол чтение, глава 4:

Во дни оны, видяще иудеи Петрово дерзновение и Иоанново, и разумевше:

Деяний святых апостол чтение, глава 4:

Во дни оны, отпущена бывша апостола, приидоста к своим:

На литии стихира, глас 1:

Аркадие богопросвещенне,/ Отечеству полезная разумевая,/ и разорение Руси Святыя прозревая,/ священномученика Патриарха Ермогена шествием молебным почтил еси/ и сеятелей смуты новыя обличил еси,/ темже, в житии многотруднем Христа исповедуя,/ верен Ему даже до смерти пребыл еси./ Моли о чтущих память твою.

Слава, глас 2:

Христова воина добропобеднаго,/ Небесным воинством соратника земнаго,/ земному воинству пастыря многомолитвеннаго,/ священномученика Аркадия песненно почтим,/ усердно к нему взывающе:/ святче Божий,/ Отечество твое от междоусобныя брани сохрани,/ от всякия ереси и раскола избави/ и во истине Христовой паству твою соблюди.

И ныне, Богородичен, глас тойже:

Смирения нашего не презри,/ Благословенная Богородице,/ и молитвы новомучеников и исповедников Церкве нашея приими,/ нечестие от земли Русския отвращающи/ и обстояния греховнаго избавляющи,/ да славим Тя во веки, Державная Помощнице.

На стиховне стихиры, глас 2.

Подобен: Доме Евфрафов:

Светильниче Церкве Русския,/ священномучениче Аркадие,/ жезл епископский, якоже крест,/ благословением святителя Тихона восприял еси,/ с нимже моли Христа Бога спастися нам.

Стих: Священницы Твои облекутся в правду,/ и преподобнии Твои возрадуются.

Святых твоих наставников,/ священномучеников Амвросия, Фаддея и Прокопия,/ глаголы в сердце восприим,/ житию их небоязненно последовал еси,/ Аркадие блаженне.

Стих: Честна пред Господем/ смерть преподобных Его.

Священники, во узах содержимыя,/ хлебом насущным препитал еси,/ обуреваемыя укреплял еси/ и страждущия утешал еси,/ Аркадие чудне.

Слава, глас тойже:

Святыя Троицы проповедниче,/ Аркадие небомудренне,/ во благоденствии земная расточивый,/ во страдании Небесная стяжавый,/ Трисолнечным светом уныния тьму просвети,/ во еже спастися нам.

И ныне, Богородичен:

Пречистыя Девы/ служителю чистый,/ Аркадие священне,/ моли Владычицу державную,/ веру правую во Отечестве твоем утвердити/ и спастися душам нашим.

Тропарь, глас 4:

От юности Церковь себе яко невесту предобручив,/ за нюже и страдати за Христа возжелел еси/ и крепостию твоею не изнемогл еси,/ вседневно душу за паству полагая./ Темже последи и смерть от мучителей приял еси,/ священномучениче Аркадие славне,/ и теплый о нас пред Богом молитвенниче.

На утрени

По 1-м стихословии седален, глас 4:

Слова Божия служителю, священномучениче Аркадие достохвальне! Ты, землю волынскую апостольски обходя, заблуждшия овцы взыскал еси и во ограду церковную ввел еси, темже, и страдание Христа ради восприем, дерзновение пред Богом обрел еси. Моли спастися душам нашим.

Слава, и ныне, Богородичен:

О, Всепетая Владычице Богородице, мучеников исповедание и венче, ангелы славимая, человеки воспеваемая, и всего мира вожделенная Помощнице! Избави Церковь Русскую всякаго обстояния, Едина Благословенная.

По 2-м стихословии седален, глас 5:

Пастырю добрый, Аркадие славне, егда на суд неправедный призван был еси, тогда любящии тя чада в темницу с тобою внидоша, песньми священными ту оглашающе. С нимиже и нашу любовь приими, святче Божий.

Слава, и ныне, Богородичен:

Теплая Предстательнице и непобедимая, упование известное и непостыдное, стено, и покрове, и пристанище прибегающим к Тебе, Приснодево Чистая, Сына Твоего и Бога моли со ангелы, умирение дати мирови, и спасение, и велию милость.

По полиелеи седален, глас 4:

Святителю Аркадие милостиве! Ты, к нищим и гладным сострадания исполнився, все достояние твое истощил еси и верныя подражати ти подвигл еси, да просветятся вси любовию Христовою.

Слава, и ныне, Богородичен:

В покаянии припадаем к Тебе, Владычице, прощения беззаконий наших испрошающе, и в радости славим Тя, спасения нашего Начальница, со Архангелом воспевающе: радуйся, Невесто Неневестная.

Степенна, 1-й антифон 4-го гласа. Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Евангелие от Матфеа, зачало 36.

По 50-м псалме стихира, глас 6:

Благовестника Богомудраго,/ люди волынския во Православии утвердившаго,/ во узах соловецких содержимаго,/ и с мученики бутовскими смерть приимшаго,/ святителя Аркадия восхвалим песньми,/ той бо ныне, Престолу Божию предстоя,/ со дерзновением молится о спасении душ наших.

Канон, глас 7.

Песнь 1.

Ирмос: Изменшему Богу Израиля/ от моря Чермнаго/ победную песнь поим,/ яко прославися.

Аркадия небомудраго, на земли за Христа пострадавша, воспоим со ангелы, яко во святых прославися.

Ревностию Божественною от юности палима и священства призвание восприимша, поим Аркадия, яко во святых прославися.

Ко проповеданию слова Божия благодатию влекомь, грады и веси обходил еси, отче Аркадие, отпадшия взыскуя и Христу воспевая, яко славно прославися.

Богородичен: Ангелов удивление, и человеков прибежище, Богородительнице Пречистая, немолчное хваление Тебе приносим, яко в Сыне Твоем славно прославилася еси.

Песнь 3.

Ирмос: Утвердися верою Христова Церковь,/ ибо непрестанно песньми вопиет, поющи:/ Свят еси, Господи,/ и Тя поет дух мой.

Делы слово извествуя, нищим вся раздал еси и житием твоим Христа прославил еси, егоже выну в духе твоем воспевал еси.

Истины свидетелю, Аркадие светозарне! Скорби времене многотруднаго не смутиша тя, но к вящшей ревности поустиша Христа прославити, егоже выну в духе твоем воспевал еси.

Апостолом подобяся, верныя призывал еси, отче Аркадие, нищим послужити, гладныя напитати Христа ради, егоже выну в духе твоем воспевал еси.

Богородичен: Неискусобрачная Дево Богородице, Ты священномученика Аркадия чиста от соблазнов мира сего многострастнаго соблюла еси, и с ним поет Тя дух мой.

Седален, глас 5:

Страха несть в любви, рече Апостол, темже и ты, святителю Аркадие, любовь совершенну стяжав, за други душу положил еси и, дерзновение ко Христу имея, молиши присно о нас, страдания твоя почитающих.

Слава, и ныне, Богородичен:

Утоли болезни многовоздыхающия души моея, утолившая всяку слезу от лица земли: Ты бо человеков болезни отгоняеши, и грешных скорби разрушаеши, Тебе бо вси стяжахом надежду и утверждение, Пресвятая Мати Дево.

Песнь 4.

Ирмос: Услышах слух Твой, Господи,/ яко явился еси на земли,/ за еже спасти ны;/ тем вопием:/ слава силе Твоей, Господи.

Евангельскаго благовестия дар с даром священства восприял еси, отче, темже и слово истины небоязненно возвещал еси, поя: слава силе Твоей, Господи.

Боговещанными твоими глаголы вожди и воины русския укрепил еси, отче, и люди заблуждшия научил еси православно Христа исповедати и воспевати: слава силе Твоей, Господи.

Отче Аркадие, ты святителю Христову Тихону в великом и малом верен пребыл еси, темже, со многими христианы в темницу всажден быв, купно с ними Христа воспевал еси: слава силе Твоей, Господи.

Богородичен: Предстательством Божия Матере утверждаемь, Аркадие чудне, в гонениих и темницех немощь плоти духом препобеждал еси и Сыну Пречистыя немолчно воспевал еси: слава силе Твоей, Господи.

Песнь 5.

Ирмос: К Тебе утренюю/ и Тебе вопию, Благоутробне Господи:/ омраченную грехми душу мою,/ светом озарив заповедей Твоих, настави.

Ужасошася людие, егда на смерть обрекоша тя безбожнии, ты же, отче Аркадие, всего себе Богу предал еси, светом заповедей Его просвещен и наставлен.

Данным ти благословением патриаршим, блаженне Аркадие, крест служения архиерейскаго, с нимже скорби и узы восприял еси, во след Христа стопы своя направляя.

Ревнуя о славе Господни, яко архиерей Божий, служение Пасхальное возглавити тайно дерзнул еси, Аркадие славне, паству лубенскую светом заповедей Христовых просвещая.

Богородичен: Покров и Прибежище, Богородице, страдальцем Христовым явльшися, и ны, страстьми стужаемыя, ко спасению настави.

Песнь 6.

Ирмос: Иона из чрева адова вопияше:/ возведи от тли живот мой./ Мы же Тебе вопием:/ Всесильне Спасе, помилуй нас.

Горних, отче, взыскал еси, в дольних, яко странник и пришлец, скитаяся и присно взывая: Всесильне Спасе, помилуй нас.

Отче многострадальне Аркадие, ты болезни и скорби многия в житии твоем претерпел еси, слово Божие проповедуя и моляся: Всесильне Спасе, помилуй нас.

Воскресение Твое, Христе Спасе, Аркадий доблемудрый дерзновенно воспел есть, со страждущей паствой своей взывая: Всесильне Спасе, помилуй нас.

Богородичен: Все упование на Сына Твоего, Богородительнице, возлагая, Аркадий терпеливодушный с верными воспеваше: Всесильне Спасе, помилуй нас.

Кондак, глас 2:

Нравом кроток и сердцем милостив быв,/ во образ Спасов, священномучениче Аркадие,/ убогим достояние твое расточил еси,/ любовию же Христовою обогащен,/ на Голгофу Русскую возшел еси,/ темже с новомученики Церкве нашея,/ престолу Святыя Троицы предстоя,/ славу Воскресения улучил еси.

Икос:

Ангела земнаго и человека Небеснаго зрим тя, отче Аркадие небомудренне,/ не своих си взыскавый, но яже к пользе и спасению братий твоих. Темже Житомир град проповеданием твоим украшается, Галиция православная воспевает, горы Кавказския странствии твоими освящаются, Лавра Невская пасхальным пением оглашается, острови Соловецтии долготерпение твое почитают, Москва тя узника и исповедника Христова приемлет и вся земля Русская с новомученики Церкве нашея воспевает, ты бо, престолу Святыя Троицы предстоя, славу Воскресения улучил еси.

Песнь 7.

Ирмос: В пещь огненную ввержени, преподобнии отроцы/ огнь в росу преложиша,/ воспеванием сице вопиюще:/ благословен еси, Господи/ Боже отец наших.

Силою Христа Воскресшаго дерзновение приял еси, Аркадие доблестне, за други своя душу положити, воспевая: благословен еси, Господи Боже отец наших.

Пещи огненныя гонений лютых не убоялся еси, отче Аркадие, в руце мучителей себе предая, сердцем же воспевая: благословен еси, Господи Боже отец наших.

Основание твердое каноны церковныя поставляя, прельщенныя увещевал еси, Аркадие, без епископа ничтоже творити, да вси единым сердцем воспоют: благословен еси, Господи Боже отец наших.

Богородичен: Милостивая Заступница, юности твоея Хранительница, Богородица, святе Аркадие, во узах тебе явися, да не изнеможеши, воспевая: благословен еси, Господи Боже отец наших.

Песнь 8.

Ирмос: Единаго Безначальнаго Царя Славы,/ егоже благословят Небесныя Силы/ и трепещут Чини Ангельстии,/ пойте, священницы,/ людие, превозносите Его во веки.

С новомученики соловецкими, отче Аркадие, гладом, мразом, и работами горькими томимый, взывати не престал еси: людие, превозносите Христа во веки.

Отца Небеснаго слуго верный, всещедре отче Аркадие, собратиям во узах служити потщался еси, милосердие паче силы являя, да превозносят с тобою Бога во веки.

Аркадие христоподражательне, ты судиям неправедным рекл еси: аще мене ищете убити, собратий моих оставите. Темже превозносим во святых дивнаго Бога во веки.

Богородичен: Небеснаго человека и земнаго ангела, священномученика Аркадия, служением во узах Тя, Богомати, прославивша, величаем, и с нимже превозносим Тя во вся веки.

Песнь 9.

Ирмос: Всепетая, Небес превышшая,/ Безначальное Слово безсеменно заченшая/ и Воплощеннаго Бога рождшая человеком,/ тем Тя вси величаем.

Глаголы жизни в сердце нося, сия проповедал еси немолчно, отче Аркадие, и верен даже до смерти Христу пребыл еси; тем тя вси величаем.

Плотию тленную смерть приял еси, архиерею Христов Аркадие, во рву бутовстем погребен быв, обаче со святыми Престолу Божию предстоиши во славе; тем тя вси величаем.

Лику новомученик сочетався, святителю отче Аркадие, дерзновенно молиши ныне о утверждении Церкве Русския; тем тя вси величаем.

Богородичен: Иныя надежды разве Тебе не стяжахом, Владычице: дом Твой, землю нашу, от враг заступи, Тя бо с новомученики Церкве Русския присно величаем.

Светилен:

Светильниче Церкве Русския, область тмы разсеявый, Аркадие богопрославленне, моли за ны, да светом Христовым озаримся.

Слава, и ныне, Богородичен:

Светлостию чистоты Твоея Херувимы и Серафимы превозшедшая,/ Богородительнице Браконеискусная,/ светом Сына Твоего поющия Тя просвети.

На хвалитех стихиры, глас 5.

Подобен: Радуйся:

Радуйся, святителю Аркадие,/ Евангелиа проповедниче,/ нестяжания и милости сокровище,/ сосуде чистый Духа Святаго,/ славы Божия ревнителю,/ небоязненно за веру подвизавыйся/ в годину гонений лютых,/ и кровь твою за Христа пролиявый,/ егоже моли даровати душам нашим велию милость. (Дважды)

Радуйся, святителю Аркадие,/ от юности Богом предызбранный,/ целомудрия рачителю,/ благочестия светильниче,/ в нощи безбожия горяй и светяй,/ заблуждшия ко спасению наставляяй,/ темже и ны, грехи многими отягченныя,/ из глубины уныния возведи,/ Христа моля даровати нам велию милость.

Радуйся, святителю Аркадие,/ милости богатство неистощимое,/ любве Евангельския образе,/ братолюбия правило,/ вдовицам и сиротам прибежище,/ скорбящим утешение,/ во узах сущим помощниче,/ изнемогающим в подвизе укрепление,/ ты бо молитвами твоими даруеши нам велию милость.

Слава, глас 8.

Подобен: О, преславнаго чудесе:

О, преславнаго чудесе!/ Смирение силу препобеждает,/ изгнание возводит в дом Отчий,/ и узы в царское благолепие претворяются:/ се бо за Христа пострадавый,/ священномученик доблемудрый Аркадий/ с новомученики Церкве Русския/ прославляет Святую Троицу/ и молит присно спастися нам.

И ныне, Богородичен, глас и подобен тойже:

О, преславнаго чудесе!/ Небесе и земли Царица,/ от святых сродников наших умоляемая,/ до днесь землю Русскую покрывает/ и лик Свой во образех многоименных/ во утешение наше являет./ О, Владычице Державная!/ Не престани и впредь во утверждение Православия/ милости на ны изливати до века. Аминь.

На Литургии

Блаженны от канона, Песнь 3.-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99. Аллилуиа, глас 2: Священницы Твои облекутся в правду, и преподобнии Твои возрадуются. Стих: Бог нам прибежище и сила, Помощник в скорбех, обретших ны зело. Евангелие от Луки, зачало 106. Причастен: В память вечную будет праведник, от слуха зла не убоится.

Источник: Текст службы утвержден к общецерковному богослужебному употреблению на заседании Священного Синода 24 августа 2023 года (журнал № 68).

Месяца декабря в 20-й день

святителя Антония, архиепископа Воронежскаго и Задонскаго

На велицей вечерни

Блажен муж: 1-й антифон. На Господи, воззвах: стихиры на 8: предпразднства Рождества Христова 3 и святителя 5, глас 2.

Подобен: Киими похвальными:

Киими похвальными венцы/ увязем святителя Антония,/ от юности всею душею Бога взыскавшаго/ и паче всего службу церковную возлюбившаго,/ тихостию нрава и смирением украшеннаго,/ града Воронежа похвалу/ и Русския земли светильника,/ егоже избра Христос Бог наш,/ имеяй велию милость. (Дважды)

Киими достойными песньми/ прославим святителя Антония,/ мира тленнаго отрекшагося,/ постника, не токмо телом, но и душею,/ узким путем заповедей Господних шествовавшаго,/ града Воронежа похвалу/ и Русския земли светильника,/ емуже благодать дарова Христос Бог наш,/ имеяй велию милость.

Киими церковными хвалами/ воспоим святителя Антония,/ словом Божиим ум питавшаго/ и подвиги святых отец волю свою укрепльшаго,/ молитвою сердечною чувства освятившаго,/ града Воронежа похвалу/ и Руссския земли светильника,/ егоже просвети Христос Бог наш,/ имеяй велию милость.

Киими песненными гласы/ воспоим святителя Антония,/ пастыря монашествующих изряднаго,/ во игуменстве своем/ всем всяко послужившаго,/ града Воронежа похвалу/ и Русския земли светильника,/ егоже умудри Христос Бог наш,/ имеяй велию милость.

Слава, глас 8:

Что тя наречем, святителю Антоние;/ монахов ли украшение,/ яко целомудрием, нищетою и послушанием себе украсил еси;/ архиереев ли похвалу,/ яко свет твой пред человеки просиял еси;/ святителей Митрофана и Тихона достойнаго преемника,/ яко светильник земли Воронежския явился еси./ Сего ради со дерзновением молися Христу Богу/ о спасении душ наших.

И ныне, предпразднства, глас тойже: Восприими, Вифлееме:

Вход. Прокимен дне. И чтения три святительская.

На литии стихира храма.

Слава, святителя Антония, глас 3:

Отче, святителю Антоние,/ ты во дни смертоносныя язвы и глада губительнаго/ Господа прилежно умолял еси,/ о еже отступити прещению сему лютому./ И ныне моли всемилостиваго Бога,/ еже избавитися нам от губительнаго поветрия, на ны движимаго,/ таже огненнаго запаления/ и неистовства водныя стихии,/ глада и иных бед, по грехом нашим находящих на ны;/ да дарует Господь молитвами твоими/ людем православным и всей земли Русской/ мир и велию милость.

И ныне, предпразднства от стиховны, глас 2: Се, время приближися:

На стиховне стихиры предпразднства со стихи их, глас 2.

Аще кроме праздника, стихиры святителя, глас тойже.

Подобен: Доме Евфрафов:

Дом добродетелей/ и обитель Святаго Духа/ явился еси, святе Антоние,/ Воронежская похвало/ и Церкве Русския украшение.

Стих: Священницы Твои облекутся в правду/ и преподобнии Твои возрадуются.

Пастырю добрый/ и молитвенниче присный,/ святе Антоние,/ огради стадо твое/ от волков, губящих е.

Стих: Восхвалятся преподобнии во славе/ и возрадуются на ложах своих.

Бедствующих помощниче,/ во узах томящихся укрепление,/ святче Божий Антоние,/ не престай молитися/ о призывающих тя.

Слава, глас 1:

Приидите, вернии, прославим Господа,/ даровавшаго нам угодника Своего,/ святителя Антония,/ иже по преставлении от земных к Небесным/ чудесы паче луч солнечных сияет/ и всем всяко ко благу способствует:/ болящия исцеляет,/ бедствующия спасает,/ скорбящия утешает,/ путешествующия сохраняет,/ немощныя в вере укрепляет,/ неверующия вразумляет,/ злонамеренныя наказует,/ небрегущия о законе и правде обличает/ и молится о спасении душ наших.

И ныне, предпразднства, глас тойже: Предпразднуим, людие, Христово Рождество:

Тропарь, глас 4:

Предивнаго селения Божия Матере житель сый,/ кротостию и смирением изрядно украшаемь,/ граду Воронежу третие светило благодати явился еси,/ святых Митрофана и Тихона сонаследниче,/ святителю отче наш Антоние,/ моли Милостиваго Бога,/ граду твоему мир даровати,/ Отечеству нашему утверждение/ и душам верных спасение.

Слава, и ныне, предпразднства, глас тойже: Готовися, Вифлееме:

На утрени

На Бог Господь: тропарь предпразднства, дважды. Слава, святителя. И ныне, предпразднства.

По 1-м стихословии седален, глас 1:

Аще и сокровени быша подвиги твоя, святе Антоние, обаче подвижницы Христови яко угодника Божия тя почитаху, свет бо доброты души твоея преславно просиял есть.

Слава, и ныне, предпразднства глас тойже: Приклонивый Небеса:

По 2-м стихословии седален, глас 4:

Ангелов собеседник и святых подражатель был еси, святе Антоние, темже мудрость и благочестие твое в мире просияша, аще и добродетели своя от людей евангельски сокрывал еси.

Слава, и ныне, предпразднства глас тойже: Радуйся, Сионе:

Величание:

Величаем тя,/ святителю отче Антоние,/ и чтим святую память твою,/ ты бо молиши о нас/ Христа Бога нашего.

Псалом избранный: Услышите сия, вси язы́цы:

По полиелеи седален, глас 3:

Днесь святитель Антоний у престола Божия вкупе с Митрофаном и Тихоном и всеми святыми земли Воронежския за ны предстоит Святей Троице; днесь во храмех архиереи и священницы ликовствуют и вси вернии радости исполняются, тии бо молят усердно о нас Превечнаго Бога.

Слава, и ныне, предпразднства.

Таже, степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Иоанна, зачало 35 (от полу).

По 50-м псалме стихира, глас 6:

Святителю отче Антоние,/ пастырю добрый и мудрый,/ града Воронежа похвало,/ и Церкве Русския украшение,/ скорый пред Богом ходатаю о пастве твоей,/ моли спастися душам нашим.

Канон предпразднства со ирмосом на 6 и святаго на 8, глас 1.

Песнь 1.

Ирмос: Песнь победную поим вси Богу,/ сотворшему дивная чудеса мышцею высокою/ и спасшему Израиля,/ яко прославися.

Даждь ми слово, Христе Боже, воспети достойно святителя Воронежскаго Антония, иже днесь купно с нами Рождество Твое песньми предпраздственными славословит.

От земнаго священства род свой ведя, святе Антоние, измлада душею к Небесным обителем устремился еси. Сего ради Бог сохрани тя во всех путех твоих.

Еще отрок сый, святе Антоние, мудрость книжную возлюбил еси, темже и в словесех Господних со тщанием поучался еси.

Богородичен: Едеме, украсися, Евфрафа бо Создателю уготовася, родитися хотящу от Девы Матере в вертепе Вифлеемстем за благоутробие многое.

Песнь 3.

Ирмос: Камень, егоже небрегоша зиждущии,/ сей бысть во главу угла:/ той есть Камень,/ на Немже утверди Церковь Христос,/ юже от язык искупи.

Тихостию нрава и смирением украшен, святе Антоние, Смирницким во училищи духовнем наречен был еси, да по житию прозвание твое будет.

От юности Богу всем сердцем служити восхотев, святе Антоние, в обитель первоначальников жития монашеского на Руси притекл еси и, мира отрекся, преподобнаго Антония имя восприял еси.

Жития и творения святых отец, яко путь к Солнцу Правды Христу, возлюбил еси, писания же мирская, яко тьму и суесловие, отвергл еси, святе Антоние.

Богородичен: Гряди, Исаие, возопий: се Дева имать во чреве Избавителя мира и родит в вертепе, и нарекут Раждаемаго Еммануил, еже есть сказаемо: с нами Бог.

Кондак и икос предпразднства.

Седален святаго, глас 8:

Стопам преподобнаго Антония последовал еси, блаженне, той бо в пещере Киевстей начало русскому монашеству положи; ты же, от силы в силу восходя, блюститель Ближних пещер и игумен Лавры Печерския нареклся еси.

Слава, и ныне, предпразднства, глас тойже: Из чрева прежде век:

Песнь 4.

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом – познаешися,/ внегда приити времени – покажешися./ Слава силе Твоей, Господи.

Преподобным отцем Печерским наследуя, подвигами воздержания, поста и молитвы просиял еси, святе Антоние, разумом же богопросвещен, братию ко спасению наставлял еси.

Предстательством Пресвятыя Богородицы укрепляемь, блаженне Антоние, яко искусный кормчий Лаврою Печерскою право правил еси, темже и благоволение Александра Благословеннаго стяжал еси.

Хранитель паствы Воронежския Божиим изволением поставлен был еси, святе Антоние, да ветхая обновиши, немощная укрепиши, благая удобриши, омертвелая отсечеши.

Богородичен: В вертепе убозем родитися нас ради, Бог Сый, изволил еси, обнищав, Блаже, нашею нищетою за милосердие и, из Девы прошед, воплощен, пребыв един Сын из Отца Предвечен.

Песнь 5.

Ирмос: Твой мир даждь нам,/ Сыне Божий:/ иного бо, разве Тебе бога не знаем,/ Имя Твое именуем,/ яко Бог живых и мертвых еси.

Труды велия на земли Воронежстей уготованы быша тебе, святителю Антоние, якоже в видении чуднем показа ти Господь, темже, со упованием руку на рало возложил еси.

Службу Божию неотступно совершал еси, святителю Антоние, паству Воронежскую словом благодатным ко спасению назидая.

Милостынею никогдаже оскудевая, богомудре Антоние, имущих стяжание многое праведно расточати то поучал еси, наипаче же сущим в темницах питатель и утешитель был еси.

Богородичен: Бог человеком подобен быв из Тебе, Младенец нас ради раждается, Богоневесто, и пребывает весь неизменен, и во плоти видится Бог вочеловечивыйся.

Песнь 6.

Ирмос: Пророка Иону подражая, вопию:/ живот мой, Блаже, свободи из тли/ и спаси мя, Спасе мира, зовуща: слава Тебе.

Во дни смертоносныя язвы и глада губительнаго паству твою призывал еси, отче Антоние, усердно Богу молитися и Святых Таин приобщатися, да помиловани будут.

Преподобный старец Серафим яко великаго архиерея Божия почиташе тя, святителю Антоние, ты же, в любви Христовой с ним пребывая, преставление его к Богу духом провидел еси.

Яко наставника искусна почитаху тя, святителю Антоние, Георгий Затворник, старец Муромский Антоний, служка Серафимов Николай и мнози инии, на нихже явлены быша чрез тебе чудеса и знамения Божия.

Богородичен: Украсися, Вифлееме, уготовися Евфрафо: без матере бо от Отца и без отца Материю Сын чревоносится и раждается, спасая ны.

Кондак, глас 3:

Днесь земля Воронежская веселия исполняется,/ во иерарсех великаго Антония память чествующи:/ той бо любовию Христовою воспламенився,/ молитвами, бдением и пощением обитель Духа Святаго себе сотвори,/ от Негоже вразумляемь,/ паству церковную премудре упасл еси;/ мы же, таковаго ходатая ко Христу Богу имуще,/ с верою и любовию вопием:/ радуйся, святителю Антоние,/ теплый о нас пред Богом предстателю.

Икос:

Ангелом подражателя и паствы Воронежския любвеобильнаго архипастыря, святителя Антония, песньми прославим, вернии, иже, от юности Христа всем сердцем возлюбив, добронравное житие явил еси и многия люди на путь истины наставил еси. Емуже днесь по достоянию приносим похвалы сия:

Радуйся, яко от младенства храму Господню прилежал еси;

радуйся, яко мудрость Божию паче суемудрия мира возлюбил еси.

Радуйся, от юности обеты монашеския избравый;

радуйся, иноков обители Печерския добре управивый.

Радуйся, пастыри премудре наставляяй;

радуйся, яко и паству твою словом истины питаяй.

Радуйся, яко святителя Митрофана на земли прославил еси;

радуйся, яко святителя Тихона мощи нетленныя обрел еси.

Радуйся, яко во дни язвы и глада Бога умолил еси;

радуйся, яко всем призывающим тя скорый помощник явился еси.

Радуйся, верныя чудесы твоими укрепляяй;

радуйся, неверныя к Богу обращаяй.

Радуйся, святителю Антоние, теплый о нас пред Богом предстателю.

Песнь 7.

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты, пояху/ и благословляху, глаголюще:/ благословен Бог отец наших.

Воистину Ангел паствы Воронежския был еси, святителю Антоние, крилами молитвы твоея ю ограждая и неотступно к Богу взывая: призри с небесе, Боже, и виждь и посети виноград сей, егоже насади десница Твоя.

В милосердии, молитве и терпении пастыри утверждал еси, святителю Антоние, да, яко ревностнии служителие и строителие Тайн Божиих, добрый ответ дадут на Страшном Судище Христове.

Сугубое попечение о младости неразумней имея, отче Антоние, поучением кротким и любовию в юных сердцах страх Господень насаждал еси.

Богородичен: Пророком древле прореченный, приближается мне Младенец, из Девы рождейся, радуется Адам и прамати Ева болезней разрешися и сликовствует Давид, раждающия отец.

Песнь 8.

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

Святителя Митрофана, архипастыря Воронежскаго, всем сердцем почитая, нетленныя мощи его обрести потщался еси, отче Антоние, и яко новаго заступника земли Русския того прославил еси.

О монашестем жительстве ревнуя, святителю Антоние, обитель Благовещения Пресвятыя Богородицы во граде Воронеже основал еси, идеже и честныя мощи святителя Митрофана, яко драгоценное сокровище, положил еси.

Телом болезнуя, святителю Антоние, возжелел еси ради спасения души в Лавру Печерскую удалитися, обаче, святителя Митрофана явлением вразумляемь, даже до смерти паству Воронежскую не оставил еси.

Богородичен: Звезда возсия, Христос от Иакова, и волсви стекаются во град Вифлеем пети, чествовати и поклонитися Ему, рожденному из ложесн Чистыя Богородицы.

Песнь 9.

Ирмос: Живоприемный Источник приснотекущий,/ светоносный светильник благодати,/ храм одушевленный, сень пречистую,/ Небесе и земли пространнейшую,/ Богородицу, вернии, величаем.

На конец дний твоих, святе Антоние, дарова ти Господь обрести мощи святителя Тихона, да явлен будет на свещнице Воронежстей пред очию всех, яко светильник веры и добрых дел.

Подвигом добрым подвизался еси, течение жития твоего непостыдно скончав, веру соблюл еси, святителю Антоние, сего ради уготова ти Господь венец правды.

Се ныне время благоприятно, се ныне день спасения! Паства Воронежская и вся Церковь Русская радуется, святителя Антония молитвенным предстательством и чудесы Богом прославленнаго, достойно величающи.

Богородичен: Радуйся, Чистая, Божий граде одушевленный, в Немже Бог вместитися благоволи, не оставль бо горних, к Тебе сниде, яко дождь на землю, Богородительнице, и во граде Вифлееме Младенец раждается.

Светилен:

Светлостию добродетелей просияв, в месте светле, идеже празднующих глас непрестанный и безконечная сладость зрящих лика Христова доброту неизреченную, вселился еси, святче Антоние, ходатаю наш пред Богом непостыдный.

Слава, и ныне, предпразднства: Украсися, Вифлееме:

На хвалитех стихиры на 8: предпразднства 4 и святителя 4, глас 5.

Подобен: Радуйся, Живоносный Кресте:

Радуйся, святителю Антоние,/ архипастырю предивный Церкве Русския,/ яко по вся дни жития твоего,/ трудом, молитвою и неленостным попечением/ ревностно паству твою охранял еси/ и повеленная ти от Господа со усердием исполнял еси,/ благая терпеливне возращаяй,/ негодная же искореняяй./ И ныне не престай молитися Христу Богу нашему/ даровати нам велию милость. (Дважды)

Радуйся, святителю Антоние,/ архипастырю добрый земли Воронежския,/ ты бо, болезнуя о пастве твоей, Бога умолял еси,/ да дарует ти помощники верныя,/ служители Христовы и строители Таин Божиих,/ с радостию бдящия о душах христианских,/ путеводствующия люди в Царство Небесное./ И ныне не престай молитися Христу Богу нашему/ даровати нам велию милость.

Радуйтеся, святителие тричисленнии,/ Митрофане, Тихоне и Антоние,/ столпи благочестия и закона Божия проповедницы,/ пастырие и учителие богодухновеннии,/ путеводителие в Царствие Небесное,/ земнаго Отечества нашего заступницы,/ земли Воронежския утверждение,/ всея Руси чудотворнии молитвенницы./ Молитеся Христу Богу нашему,/ даровати нам велию милость.

Слава, глас 5:

Вострубим трубою песней,/ прославим святителя Антония:/ архипастыри и священницы, монаси и простии,/ старцы и юнии, мужие и жены,/ нищии и богатии,/ властителие и иже под властию сущии,/ скорбящии и радующиися,/ всех бо созывает наш архипастырь добрый,/ даровати коемуждо по сердечному прошению,/ мир и велию милость.

И ныне, предпразднства, глас 6: Зависть же и огнь:

На Литургии

Блаженны от канона предпразднства, Песнь 3. и святителя Песнь 6. Прокимен, глас 1: Уста моя возглаголют премудрость/ и поучение сердца моего разум. Стих: Услышите сия, вси язы́цы, внушите вси, живущии по вселенней. Апостол ко Евреем, зачало 318. Аллилуиа, глас 2: Уста праведнаго поучатся премудрости/ и язык его возглаголет суд. Стих: Закон Бога его в сердце его и не запнутся стопы его. Евангелие от Иоанна, зачало 36. Причастен: В память вечную будет праведник:

Молитва

О, святителю отче наш Антоние, пастырю добрый, чудотворче изрядный и молитвенниче предивный! Ты во дни земнаго жития твоего нищетою духовною, кротостию и чистотою сердца себе украсив, жаждою правды, милостынею и плачем покаянным заповеди Евангельския исполнил еси. Дух мирен стяжав и даже до конца дней твоих ближним послужив, Богу угодил еси и Царствия Небеснаго достигл еси.

Ныне же, со святителями Воронежскими Митрофаном и Тихоном Престолу Божию предстоя, моли Пресвятую Троицу паству твою добре управити и всем вся, яже ко спасению полезная, подати. Испроси у Отца Небеснаго, Врача душ и телес, болящим исцеление, скорбящим и озлобленным утешение, грешным покаяние, неведующим вразумление. Моли Сына Божия, Господа нашего Иисуса Христа, отроки в страсе Божии наставити и в целомудрии возрастити, юныя во благочестии утвердити, старыя без попечения не оставити. Умоли и Духа Святаго Утешителя Животворящаго Церкви Православней в единстве сохранятися, пастырем ревность о спасении пасомых даровати, да людие в вере, надежди и любви Божией утвердятся и славится от всех пречестное и великолепое Имя Пресвятыя Троицы, Отца и Сына и Святаго Духа, ныне и присно и во веки веков. Аминь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

На Господи воззвах стихиры гл. 6

Преславно совершив крестоношения путь / постнически подвизався / еже по образу прежде бывших отцев, / вся плотская мудрования духу повинул еси, / душу молитвою просветил, / образ был твоему стаду / юже не дал еси в снедь безбожным врагом, / и душу свою за овцы положил, / темже венчался еси победы венцем, / живоначальною Дланию, / преподобномучениче Исаакие.

Днесь тобою хвалится собор Оптинский, / имуща тебя добля страдальца и исповедника, / Крестом бо гордыню диаволю посрамил / и щитом веры безбожных шатания низложил, / светолития Ангельского достигл еси, / отцем оптинским преславно сочетался / венченосче Исаакие, / новомученников Российских славо.

Якоже звезда воссиял еси в нощи, / тьму безбожия прогоняя, / иноком облистал еси путь светозарнейший, / риз очервлением своея крови, / дерзновенно вшел еси во святая святых, / и Пресущественному поклонился, / дариносяще раны краснаго исповедания, / темже молися Христу / даровати вселенней мир и велию милость.

Слава гл. 8

Велий день нынешнего торжества, / Оптина Пустынь в виссон святых одеяся, / и багряницею мученической крови украшается, / прославляя своего последняго архимандрита, / преподобномученика Исаакия, / законно подвизавшегося, / и власть безбожную мужественно обличившаго, / дары прнесши Христу всебогатыя, раны на теле огнепальныя, яко жертва всесожигаемая; / темже Тому молися отче прилежно / еже избавитися стаду твоему муки вечныя, / и мир глубоцый Церкви Русския испроси / и Отечеству на враги победы.

И ныне: праздника

На стиховне стихиры праздника

Слава святому, гл. 5

Краснейшее прозябение Оптиной Пустыни, / новомученников благовонный цвете / страстотерпче Исаакий, / добропобедный мучениче, / днесь приемлет венец нетленный от Богородицы, / и источает исцеления струи, / всем верно поющим его страдания, / яко дароцарственное приношение, / в яслех Лежащему и пеленами Повитому / нас ради Младенца зрак восприимша, / Единому Многомилостивому.

И ныне: праздника

Тропарь преподобному гл. 1

Венечник явился еси преподобномучениче Исаакие / яко враги Креста Господа твоего низложил еси, / старцем оптинским поревновал еси / и с новомученики Российскими прославился еси / темже мы тебе с любовию вопием: / слава Давшему ти крепость, / слава Венчавшему тя, / слава Действующему тобою всем исцеления.

Ин тропарь гл. 4

Страданьми твоими, отче Исаакие / возсия стране Российстей свет разума / в ней бо звездам служащие, / Кресту ныне кланяются / удобрившеся кровьми новомученник / земля Русская плод православнаго исповедания принесе; / Господеви поющее, Слава Тебе.

На утрени

По 1-м стихословии седален гл. 2

Верно сошедшеся днесь мучениколюбцы, видите подвиг преславный и паче ума, како любовию распаляемь, всехвальный, ко Христу, силою Того __________ и твердо укрепляем, на смерть дерзнул и врага безбожнаго посрамил еси, людей священных предпослал еси в радости на небеса, Отроча Младо прославляя отче отцев Исаакие, молися прилежно спастися душам нашим.

Слава и ныне: праздника

По 2-м стихословии седален

Блажен еси мучениче преподобне Исаакие; преподобен убо яко правду возлюбил и благодать приял еси; мученик, яко ничесоже тебе от любви Христовы отлучи, глагол твой: от креста своего не побегу, исполнил еси, и сего ради радуешися отче блаженне, яко мзда твоя многа на небесех, и молитва со дерзновением.

Слава и ныне: праздника

Ин канон преподобномученику, гл. 1

Песнь 1.

Ирмос: Христос раждается – славите! / Христос с Небес – срящите! / Христос на земли – возноситеся! / Пойте Господеви, вся земля, / и веселием воспойте, людие, / яко прославися.

Всесовершенну жертву, и благовонну принесл еси Тебе Христе, Исаакий славный новомученик оптинский; уст исповедание и страдальческое житие и от безбожных заклание, темже с небес его славу срящем и от земных возносимся, и песенными увязаем венцы, яко прославися.

Слава: Благочестие воспитанием приял еси преподобне млад был и порока удаляяся Богомладенца Христа чистым умом славословил еси, и сыновство твое тем чисте Богу явил.

И ныне: Лоно Церкви ти бысть возрождение, отче Исаакие, якоже Лоно Девыя Чистыя, Христу; воплощение и славное рождение; темже жертвою одушевленною почитаеши Тоя Собор, яко прославися.

Песнь 3.

Ирмос: Прежде век от Отца рожденному нетленно Сыну / и в последняя от Девы воплощенному безсеменно, / Христу Богу возопиим: / вознесый рог наш, / Свят еси, Господи.

Прежде век от Отца Рожденному Господу Иисусу, возжелал еси всем сердцем послужити, мирския пристрастия превременныя отвергл еси, и во Христа облеклся, житием монашеским возвысился еси, и свят еси, отче, явися.

Слава: Божий дом ти бысть, Оптина вторый, преподобне наказания дивных старцев мудрым сердцем приял и воплощение Христово яве познал, ум в горняя верою вперил, и слава в вышних со безплотными славословил еси.

И ныне: Яко в последняя от Девы Свет нетленный Отчий возсиявший, миру яве проповедал еси, и велегласно воплощение Христово безбожным исповедал еси, и плод устен твоих бысть ти во спасение, Исаакие досточудне.

Седален гл. 4

Самого себе принесл еси от Девы Рождшемуся Божию Слову: жертва исповедания и жертва страданий твоих паче ладана бысть и злата, Исаакие преподобномучениче крепкий; безбожных дерзость посрамил еси и венец победных почестей во страданиях приял еси; темже молися прилежно Христу, спастися душам нашим.

Слава и ныне: праздника.

Песнь 4.

Ирмос: Жезл от корене Иессеова / и цвет от него, Христе, / от Девы прозябл еси, / из горы, Хвальный, приосененныя чащи / пришел еси, воплощся от Неискусомужныя, / Невещественный и Боже. / Слава силе Твоей, Господи.

Жезл игуменский тебе прияти, блаженнаго уста, прорекают и цвет от него венца мученическаго прозябение, уверяет, егда первее пришел еси во обитель, отче Исаакие, преподобномучениче.

Слава: Невещественным чинам поревновал еси, егда в лик иноческий вченился еси; смирение яко злато, послушание яко смирну, и молитву яко ладан, Рожденному от Неискусомужныя, Господу принесл еси, якоже иногда волсви.

И ныне: Старца Иосифа ты присный был учениче, и от него любити Матерь Божию научився; той бо любимиче от Нея наименован был, и тайнозритель явился, блаженный.

Песнь 5.

Ирмос: Бог Сый мира, Отец щедрот, / Великаго Совета Твоего Ангела, / мир подавающа, послал еси нам; / тем, Богоразумия к свету наставльшеся, / от нощи утренююще, / славословим Тя, Человеколюбче.

Богомудрыми старцами просвещен, отче преподобне Исаакие, от нощи страстей исшел еси, светел словом, светел и умом явился еси, темже и священства честь приемлеши, и славословиши присно, Господа Человеколюбца.

Слава: Сотаинник старца Нектария был еси отче, и Анатолия–утешителя друже, и всему собору Оптинскому сопричастник и венценосец блаженный явился еси, и небеснаго Иерусалима славный гражданине.

И ныне: Чин Богослужебный право правя, священнословию смиренному братию научал еси: едиными усты и единым сердцем воспоем, Богородице, о братие, якоже Ангели на небеси тако и мы: Радуйся Благодатная Господь с Тобою.

Песнь 6.

Ирмос: Из утробы Иону младенца изблева морский зверь, / якова прият; / в Деву же всельшееся Слово / и плоть приемшее пройде, сохраншее нетленну: / егоже бо не пострада истления, / Рождшую сохрани неврежденну.

Зверообразную пасть безбожной власти, крестом препнул еси, поглатити хотящую Церковь Русскую, Исаакие ратоборче славный; на судище стал еси мужественне и Христа исповедал, и верныя утвердил и полки монашествующих воодушевил еси, последний архимандрите Оптинский.

Слава: Бурю злобы и волны гонений мужеством души усмирил еси, премудре Исаакие, еще пять лет кораблекрушение обитель твоя не терпит, Кормчему бо вселенныя вручил еси тоя водительство, но и до ныне Церковь Русскую хранит, новомученик молитвами.

И ныне: От Девы родшемуся Христу принесл еси дары пребогатыя Исаакие: житие чистое, добродетельми паче злата блищащее, и исповедание благовонно и сладко, и страдания благоприятныя, не якоже смирна тленная.

Кондак гл. 3

Новомученников предивная доброто / Венценосче Исаакие / страданьми твоими собор Оптинский украсился; / Крест бо Христов и уничижения в похвалу себе вменил / о земном пренебрегл еси / душу твою за други положил еси / и в место небеснаго упокоения отшел еси / и оттуда точиши исцеления / верно чтущим память твою.

Икос:

Приидите вси мучениколюбцы и Креста чтители, подивитесь подвигу мудрому: се бо изначала предреченный крест, Исаакий в сердце любовию приим, и им распял еси страсти и похоти, и на конец поприща, вожделенный достиг: не побегу от креста своего, мудрый глаголет старец Оптинский; им бо вселюся в рай, и токи исцелений источу, верно чтущим память мою.

Песнь 7.

Ирмос: Отроцы, благочестию совоспитани, / злочестиваго веления небрегше, / огненнаго прещения не убояшася, / но, посреде пламени стояще, пояху: / отцев Боже, благословен еси.

Благочестию совоспитался еси, со богомудрыми старцами Оптинскими; Дух Премудрости, Дух страха Божия в сердце стяжав, темже и на судище ужасаеши ответами богомудрыми, и дерзость нечестивых посрамил еси: отцев Боже благословен, во страданиях пел еси веселящеся.

Слава: На камени твердем исповедания Христа, поставил еси нози твои красныя, мучениче Исаакие, и щит веры Крест приим, и лаяния и клеветы заградил еси безбожных псов, едину истину отвещевал: отцев Боже благословен еси.

И ныне: Тебе ради от Девы Рожшемуся и пеленами в яслех повитому, Исаакий преподобномученик связуется, и в темнице темней затворяется: благословен еси вопия, Боже отец наших.

Песнь 8.

Ирмос: Чуда преестественнаго / росодательная изобрази пещь образ: / не бо, яже прият, палит юныя, / яко ниже огнь Божества Девы, / в Нюже вниде утробу. / Тем, воспевающе, воспоем: / да благословит тварь вся Господа / и превозносит во вся веки.

В пещи скорбей и яростных гонений вернии изнемогаша и колебашася, но ты громогласным исповеданием яко роса неботочная явился еси Исаакие, и верою несумненною исполнил еси сердца: да благословит Церковь Русская, Господа и превозносит во вся веки.

Слава: Оружием веры победил еси супротивных полки Исаакие мудре, и токи кровей угасил еси огнь нечестия, темже с небесе подаеши благодать всеобильно, верою благословящих Господа и превозносящих во вся веки.

И ныне: Страстотерпца Исаакия память верно совершаем Мати Бога Вышняго, страданьми бо своими Твой праздник почтил есть, капли кровей, Ти, яко рубины дарует, якоже древле камения драгия, Сыну Твоему волхвы.

Песнь 9.

Ирмос: Таинство странное вижу и преславное: / Небо – вертеп, Престол Херувимский – Деву, / ясли – вместилище, / в нихже возлеже Невместимый – Христос Бог, / егоже, воспевающе, величаем.

В Пренебесный Райский Чертог вшел еси отче Исаакие и Пресущественному и Невместимому поклонился еси досточудне, дариносяще житие скорбми очищенное и яко златый сосуд, сердце любви и фимиама молитв исполнено; темже облаговонствуй твоим посещением, тя величающих.

Слава: С ликом отцев Оптинских сочетался еси славне, и радости святых и светлости Ангельской сподобился еси, той и нас причастниками соделай богоблаженне отче, скудныя дары тебе принесшыя.

И ныне: Нову мелодию днесь песнотворит Исаакий новомученик оптинский, Собор Твой Дево чтит страданьми и красным исповеданием, и яко фимиам возносит Ти умную сердца песнь, Тя величающи.

Канон преподобномученику, гл. 4

Песнь 1.

Ирмос: Моря Чермную пучину / невлажными стопами / древний пешешествовав, Израиль / крестообразныма Моисеовыма рукама / Амаликову силу в пустыни победил есть.

Монашествующих недвижимое основание, запинателя же сопротивных крепка, тя любовию почитаем, отче Исаакие, и в молитвах призываем верно.

Инок истинен был еси, пространнаго пути удаляяся, тесный же предпочитая, достигл еси широты мученическия и высоты исповедания, но и нас чтущих тя поминай.

Слава: Бога узрел еси действо, имея житие отцев твоих образно, отче, и Сего исповедал еси твердо, на судище законопреступных.

И ныне: Пламеноносная клеще, Юже Исаия виде иногда, вещественные сердца моего страсти, Богородительнице попали, и до конца потреби.

Песнь 3.

Ирмос: Лук сильных изнеможе, / и немощствующии препоясашася силою, / сего ради утвердися в Господе сердце мое.

Простотой сияя истинной, и всякия добродетели образом и разумом, начальник славнаго собора был еси достоин, благодатию водим и молитвами отцев твоих.

Тридесят лет в подвизе совершил еси, пастырь обители поставляешися, желая всех привести ко спасению, мучения светлостию сам украсился еси.

Слава: Уязвился еси любовию Владыки всех, мучениче досточудне Исаакие, и умрети Его ради преусердствовал.

И ныне: Доиши матеролепно Питетеля всех, о Дево, и носиши Сего на объятиях Чистая. Всяческая рукою Носящаго всегда.

Седален:

Препрославлен и предивен во святых Твоих, Господи Боже наш, яко уверил еси свидетельство Свое, когда отец наш Исаакий блаженный и преславное воинство его, от креста своего не побежаша, но с крепостию поразиша безбожных дерзкую немощь и лжу.

Слава и ныне, праздника.

Песнь 4.

Ирмос: Вознесена Тя видевши Церковь на Кресте.

Сердце твое скрижаль чисту нашедши, благодать Святаго Духа, отче Исаакие, дарова тебе исповедания и мучения заповедь, веру тверду и святую любовь.

Небесное уготовася жилище, яко страдальцу тебе, славне, от земныя бо преложился еси тесноты, вопия Владыце твоему, слава силе Твоей Господи.

Стена нерушима и столп крепок был еси гонимым людям твоим, и настоятель премудр Оптиной пустыни, егда наста година лютая и недоумений время.

Слава: Аще и взят был еси нуждею от обители твоея, преподобне, обители многи ичудны наследовал еси в селениях праведных, от земныя прелести нам избавитися помоги.

И ныне: Научився Духом пророческий преславный лик, еже паче ума Твоей тайне, Богородице, и различнообразно сию предначертает священными образы, ихже конец зрим светло.

Песнь 5.

Ирмос: Ты Господи мой, свет в мире пришел еси:

Усердно последовал еси Звавшему тя, преподобне, когда тя пастыря Своим овцам устрояет, егда и исповедания столп тя показа, и мучения светлостию украси.

Весь распялся еси мирови, отче Исаакие, Крест Христов на рамо взем блаженне, и того страстем подобяся, причастник был еси воскресения и славы лучшия, в нейже и нас поминай.

Велику крепость подаде ти Бог, егда посреде великих, начальника тя постави, отче.

Слава: Плоды прозяб духовными, рай явился еси украшен добродетельми, и объемлем огнем мучения, в снедь Богу познаваешися.

И ныне: Даниил Тя гору великую, Духом зряще, Богородице, от неяже Камень отсекся, сокрушает демонов истуканныя.

Песнь 6.

Ирмос: Пожру Ти со гласом хваления Господи:

Руку ми простри яко Петрови, и возведи из глубины, Боже, молят бо Тя присно старцы блаженнии, ихже Исаакий добрый венечник, и якоже онаго мя спаси.

Мира добродетели твоея, не терпя собор законопреступных, в темницу тя затвори, идеже облаговонил еси сердца верных.

Слава: Благочестия проповедник житием своим быв прехвальне, и нечестия обличил еси немощь, Исаакие и верных утвердил еси непоколебимо, собрание.

И ныне: Божественная Лествице, Юже виде Иаков, по нейже сниде Бог, вознося нас, прилежно моли со святыми ущедрити нас.

Кондак и Икос общие преподобномученику.

Песнь 7.

Ирмос: Спасый во огни авраамския Твоя отроки:

Отче, предстателю и молитвенниче, непоколебимый Исаакие, вознеси моления чад твоих милостивому Богу, и испроси нам велию милость.

Уд Христовы Церкви благопотребен и честен был еси, и причастник Собора священнаго, поставляя патриарха Тихона страдальца, и сему последуя усердно к нетленной славе.

Якоже мученик подвизался еси отче, и украсил еси ликостояния преподобных, яко венценосец всех осиял еси, Божие достояние, защитниче всем буди, о Исаакие.

Слава: Очервленишася воистину кровию ваши ноги, и быстрейше к небесем потекоша, со грехом землю оставльше, новомученицы, собеседницы Божественным силам.

И ныне: Помилуй нас, Чистая, помилуй, ибо от дел спасения отнюд несть нам, темже верою теплою к Тебе вопием, помилуй рабы Твоя.

Песнь 8.

Ирмос: Избавителю всех Всесильне:

Закон Божий сохраняя невредимо преподобне, столп непоколебим обители твоей и людем был еси, и нас малодушных укрепляеши.

В подвизе послушания учинен быв на лета многа, дóндеже навык Исаакие славне, всякия добродетели образ.

Ныне приспе память славных твоих страданий отче Святый, веселящее благочестивыя души, верно чтущие тя, Исаакие.

Слава: Простерт имуще ум ко Единому Владыце, на мучения устремишася зельне, всехвальнии иже со Исаакием, и уязвляеми вопияху, благословите вся дела Господня Господа.

И ныне: Егда хощет душа моя, разлучитися от окаяннаго моего телесе, невидимых враг томительства, избави мя, Богоневестная.

Песнь 9.

Ирмос: Ева убо недугом преслушания клятву вселила есть:

Закон божественный преподобно соблюдающе добропобеднии, прилогам чуждаго мужеским нравом противостасте, и уезвляеми телесы, победу вечную мученицы взясте.

Людие беззаконнии и жестокии сердцем, не послушаше словес любви твоея, и на убиение осудиша тя, не терпит бо законнопреступный, обличающих его, Исаакие.

Слава: Веселится отечество твое, и обитель тебе воспитавшая, таковаго молитвенника тя имея, и друга Божия тя нарицая, заступления усердно просит.

И ныне: Пети Тя должны есмы, но воистину по достоянию не можем, темже поем Тя, молчанием чтуще несказаное, еже на Тебе Дево, содеянное таинство.

Светилен. гл. 6.

Светлыя лозы, был еси, честная розга Христова, мгногострадальне Исаакие всехвальне явлься, со страждущими взывал еси: Ты мучеников, Христе, светлое радование.

Слава и ныне, Богородичен: Праздника.

На хвалитех, стихиры, глас 6-й:

Поругания и изгнания венец достойно обнося, / благозвания возжелал еси, нареченнаго мучеником, / в темничном вертепе от безбожных заключаемь, / Духа благодатию помышление просветил еси, / болезни претерпел еси дерзостным разумом / и кровию своею прославил Едину Богородицу, // родшую Христа Царя.

Приидите поклонитеся последнему архимандриту, / слышано бысть от человека Божия иногда, / ныне же егда от Девы родися Господь, / во святыню одеялся еси Исаакие блаженне, / небесножителю славне и мучениче, / Христов угодниче прехвальный, / темже достодолжное поклонение тебе приносим отцу нашему и просим, // молитву сотвори о душах наших.

Крепость твоя и пение твое Господь / и исповедание Его бысть ти во спасение, / сердцем правостию и верою возвысился, / егда на вольную смерть за Христа дерзнул еси, / глаголя, от креста своего не побегу, / темже и Никон блаженный ти простирает ваийя глаголя; / благословен грядый страданьми почтити Рождество Христово.

Слава гл. 8

Днесь собор старцев оптинских / благочестно почитает собор Богородицы: / яко цари персидстии ладон благохвалений и славословий приносят / паче же злата аравийска житие преподобномученика Исаакия / в горниле скорбей и огнем гонений очищенное / и смерть того и страдания паче смирны тленныя / и молят воплощеннаго Человеколюбца Христа / еже спастися сыновом Российстем / во обновлении духа.

И ныне: праздника.

Славословие великое.

На малей вечерни

На Господи, воззвах: стихиры, глас 1.

Подобен: Небесных чинов:

Возсия Небесный свет Христов в души твоей, отче блаженне Никодиме, и возродися, яко крин сельный, отрасль благочестия в сердцы твоем, и процвете и даде плод красен спасительнаго сеяния.

Возлюбил еси доброту Небесную паче благ земных, в юношеских летех ко Христу сердцем прилепился еси и жаждущую Бога душу богомыслием питал еси, тако и по заповедем Божиим поживе, яко добрый сын, к Отцу Небесному с радостию возшел еси, святителю Никодиме.

Возжада душа твоя Бога Крепкаго Живаго, и притекл еси волею в благословенныя объятия Отча, яко блудный сын, со Адамом вкупе рыдая и стеня о потерянном блаженстве райстем, егоже сладости ныне непрестанно наслаждаешися.

Добрым подвигом подвизался еси, саном священства облеченный, благодарение Богу за вся приносил еси, очи сердечныя горе возводя, труды к трудам прилагал еси, Владыку умилостивляя, и чистым сердцем Духа Святаго прияти сподобился еси, священномучениче Никодиме.

Слава, глас 8

Многими подвиги и труды плоть свою измождил еси, ветхаго человека в себе умерщвляя, сердце сокршенное в себе явил еси, и за сие слезы благодатнаго умиления стяжал еси, богомудре Никодиме, и яко сеявый слезами, радость непрестанную пожал еси. Темже молим тя, испроси нам у Господа тоя радости выну причащатися.

И ныне, Богородичен, глас 8

Имамы Тя молитвеницу неотступную к Богу, Мати Божия, молим Тя, Благая, град наш и веси сохрани и всю землю Русскую покровом Твоим милостивно осени, сердца наша во благочестии утверди и спаси души наша.

На стиховне стихиры, глас 4

Дарова ти Господь таланты мнози, яже ты весьма преумножил еси, о подвижницех благочестия жития составляя, и сам духом тех утверждался еси, добронравное житие свое являя, с нимиже и спрославился еси. Темже молим тя, святителю Никодиме, моли Бога о нас грешных.

Стих: Насаждени в дому Господни, во дворех Бога нашего процветут.

Землю сердца твоего непрестанно возделывал еси, самоуничижением и укорением добре ю взрыхляя, плевелы высокоумия смиренномудрием исторгл еси, и чистыми источницы слез твоих обильно оросил еси и, яко добрый делатель Христов, плод вечнаго жития стяжал еси, смиренномудре Никодиме.

Стих: Праведник, яко финикс процветет, яко кедр, иже в Ливане, умножится.

Дарова ти Господь в терпении Евангельстем стяжати душу твою, егда богоборческая година лютая нападе на Землю Русскую, ты вся находящая на тя злая мужественне претерпел еси и кровьми своими ризы святительстии обагрив, яко пастырь и мученик добропобедный в Небеснем Царствии венчался еси. Темже молим Тя, священномучениче Никодиме, победи вся, воюющия на ны.

Слава, глас 2.

Подобен: Егда от древа:

Жертву безкровную на земли приносил еси, яко истинный служитель Христа Бога, Тому же со страхом и трепетом предстоял еси, ныне же Престолу Небесному предстояще, моли Бога о нас грешных, празднующих святую память твою.

И ныне, Богородичен

Велия тайна Божия содеяшеся на Тебе, Дево Богородице Пречистая, вси бо мы земнороднии пред сею тайною благоговеим, и молим из Тебе воплотившагося Бога и Господа нашего Иисуса Христа о спасении душ наших.

Тропарь, глас 4

Апостолом сопрестольне и святителем единонравне,/ образом благочестия просиял еси,/ неленостный сеятелю слова Божия,/ достойный приемниче святителя Иоасафа,/ Белгородскую паству верно упасл еси/ и кровию мученическою любовь к Церкви Христовой показал еси,/ темже молим тя, священномучениче Никодиме, моли Бога о спасении душ наших. (Дважды)

Тропарь Рождества Христова:

Слава, и ныне, Богородичен

Твоим Рождеством, Пречистая Дево, род человеческий спасеся от тления, сего ради молим Тя, испроси нам у Господа Иисуса Христа нетленныя ризы спасения и приснаго с Ним пребывания.

На велицей вечерни

Блажен муж: 1-й антифон.

На Господи, воззвах: стихиры, глас 8.

Подобен: О преславнаго чудесе:

Дивное Промышление Божие явися о тебе, святче Никодиме, яко устрои в житии твоем встречу с Иоанном Российским чудотворцем, им же ты в благочестии и вере утвежденный, благодатными беседы сердце насладил еси, любовию к Богу пламенея, Ему же ныне с Иоанном пастырем Кронштадтским предстояще, молися о нас, славящих пречестное имя твое.

Возлюби душа твоя святителя Белгородскаго Иоасафа, его же писании твоими дивно прославил еси, умоляя о спасении души твоея, и не оставит я молитвеник крепкий тщетна, испросише у Господа ти кончину чудну, мучеником сопричастну. Темже молим тя, священномучениче Никодиме, вкупе со святителем Иоасафом, моли Христа Бога даровати душам нашим велию милость.

Нощная тма безбожия объяла землю Русскую, и угасоша светильницы благочестия в сердцах хритианских. Ты же, отче святителю Никодиме, Свет Христов выну приявый, озарил еси всю вселенную. Темже молим тя просвети помраченныя страстьми души наша, да вселится в нас Свет Невещественный Божия благодати

Слава, глас 5.

Подобен: Радуйся, Живоносный Кресте:

Милостивому архипастырю Иоасафу подражая, и сам милостив сотворился еси, на страдания и нищету вдов и сирот призревая, братство любви и помощи во имя святителя Белгородскаго учредил еси, егоже молитвами на оную кафедру достойно возшел еси. Темже молим тя, досточудне святителю Никодиме, не остави нас сирых и безпомощгых молитвенным твоим предстательством.

И ныне, Богородичен догматик из 1 прилож.

Вход. Прокимен дне. И чтения три. Притчей чтение: Память праведнего: Премудрости Соломоновы чтение: Уста праведнего каплют премудрость: Премудрости соломоновы чтение: Праведник аще постигнет: или Похваляемому праведнику возвеселятся людие:

На литии стихиры, глас 2.

Подобен: Егда от древа:

Возлюбил еси, яко мудрый муж, безсмертие и потщался еси душу и тело твое в благочестии соблюдати, благоуханием девственаго целомудрия Богу приятное сотворил еси и со ангельскими лики в Небеснем Царствии вселился еси, священномучениче Никодиме, моли Бога в чистоте сохранитися нам.

Возгореся на Земли Белгородстей новый светильник Божия блгодати и озари нас светом Небесныя радости. Темже молим тя, угодниче Христов святителю Никодиме, просвети нас Светом Христовым, да очистимся от всякия нечистоты.

Блажен ты еси, отче Никодиме, яко обрел еси спасительную премудрость Божию, та бо и приведе тя к Премудрому, научающему верных истине и исподняющему сердца Духа Святаго.

Слава, глас 6

Дивны дела сотворише Господь, егда явил есть милость Свою на граде сем, дарова нам два молитвеника чудна, святителя Иоасафа милостиваго и о нас попечителя священномученика Никодима, сирых и убогих питателя.

И ныне, Богородисен, глас 6

Тучи злых помышлений сердец наших разгони, Богородице, и возсияй в них лучи благодатных устремлений, Ты бо Солнце Умное Христа родила еси, Пренепорочная Дево.

На стиховне стихиры, глас 5.

Подобен: Радуйся:

Приидите, празднолюбцы боголюбивии, ублажим песненными похвалы мученика добропобеднаго, иерарха именитаго, достоблаженнаго Никодима, той бо апостолом Христовым соревнуя, проповедник слова Божия неутомимый явился еси, нечестие ереси обновленческия честне обличил еси, с нечестивыми богоборцы на совет не ходил еси. Темже блаженным мужем давидски нареклся еси.

Стих: Насаждении в дому Господни, во дворех Бога нашего процветут.

Приидите, мучениколюбцы честнии, соплетем похвальный венец священномученику Никодиму, достойному архиерею Божию, яко подвиг добре совершил еси, веру соблюл еси и себе, яко овча словесное, в благоуханную жертву Богу принесл еси.

Стих: Праведник яко финикс процветет, яко кедр, иже в Ливане, умножится.

Киими похвалы возвеличим имя твое, славный друже Христов святителю отче Никодиме, кто возможет выразить словом велию любовь твою к Богу, тая же приведе тя на твою Голгофу, ты же со креста страданий духом к Богу вознеслся еси, смиренно убийц своих благословил еси и в Царство Любви вечныя с кротцыми вселился еси.

Слава, глас 2.

Подобен: Егда от древа:

Кое слово достойно изрещи славу твою, юже улучил еси от руки Божия? Кое слово выразит радость сердца твоего, еюже исполнился еси в Царстве блаженных? Кой ум выразит награду твою, еюже наградил тя за верность Отец Небесный? С Нимже присно царствующе, святителю Никодиме, воздохни о нас ко Господу, да и мы блаженство райское наследуем.

И ныне, Богородичен

Дева днесь Пресущественнаго раждает, тако сладкогласно воспевает ныне Святая Церковь Христова, и мы, яко Вифлиемстии пастырие, чудеси сему дивящеся, величаем рождшагося Бога.

На утрени

На Бог Господь: тропарь святаго дважды, глас 4

Тропарь, глас 4

Апостолом сопрестольне и святителем единонравне,/ образом благочестия просиял еси,/ неленостный сеятелю слова Божия,/ достойный приемниче святителя Иоасафа,/ Белгородскую паству верно упасл еси/ и кровию мученическою любовь к Церкви Христовой показал еси,/ темже молим тя, священномучениче Никодиме, моли Бога о спасении душ наших.

Тропарь Рождества

Слава, и ныне, Богородичен

По 1-м стихословии седален, глас 4

Нищетою духовною премного обогатился еси, святителю Никодиме, и правды Божия ненасытно алкал еси, темже и насыти тя Господь пищи нетленныя и неизреченно обогати тя, дарова в наследие Царство Свое.

Слава, и ныне, Богородичен

Рождеству Твоему, Пречистая Дево, умиляемся и рожденному от Тебе Христу Богу верно поклоняемся, и в молитвеники за ны приводим вси святии и священномученика Никодима достославнаго.

По 2-м стихословии седален, глас 2

Венчался еси славою нетленною, возлюбивый Бога паче живота своего и от смерти к Животу Вечному в невечерии прешел еси. Темже на Свет незаходимый взирающе, моли о нас, святителю Никодиме, чтущих память твою.

Слава, и ныне, Богородичен

Источницы воднии изведе из очес наших, Мати Божия, да умягчатся и умилятся сердца наша, камени подобнии, и истают, яко воск, от любви к рожденному от Тебе Христу.

По полиелеи седален, глас 4

Егда лихие богоборцы истязаша тя, крепкодушне святителю Никодиме, ты в сердцы своем злобу коварных князей воздушных победил еси, и яко истинный друг Христов, о прощении убийц Бога молил еси. Сего ради молим тя, даруй и нам таковое незлобие.

Слава, и ныне, Богородичен

Просияла еси светом Рождества Твоего и прославилася еси в родех родов, Богоблаженная Отроковице, Жениха Церковнаго миру даровавшая.

Евангелие. По Евангелии стихира, глас 6.

Подобен: Все отложше:

Духа Святаго жилище преславное и благодати вместилище предивное ты еси, отче блаженне Никодиме, велегласный проповедник слова Божия и истинный наставник благочестия. Темже молим тя даруй нам спасительная разумети, от душетленных же сердцем отвращатися, да сопричтет нас Великий Работодатель с делателями единонадесятаго часа с верою потрудившихся.

Канон. Глас 2

Егоже краегранесие: Ищите прежде Царствия Небеснаго, и все спасетеся.

Песнь 1.

Ирмос: Грядите, людие, поим песнь Христу Богу, раздельшему море, и наставльшему люди, яже изведе из работы египетския, яко прославися.

Священномучениче Никодиме, моли Бога о нас.

Иерусалима Вышняго взыска душа твоя, к немуже неуклонно в житии твоем шествуя, соделался еси гражданином Небеснаго Отечества, богомудре Никодиме.

Щедролюбивая душа твоя весьма любезна бе Богу. Тойже виде страннолюбие твое, святителю Никодиме, ущедри тя паче всякаго смысла. Темже молим тя: даруй нам сердце милостивое.

Имамы тя молитвеника крепкаго к Богу. Темже, отче прславне, воздежи чистии руце твоя и испроси нам у Господа выну в сердцах Бога имати и в заповедех Его неуклонно ходити

Тебе, святителю Христов, усердно молимся и в сокрушении сердец наших слезно вопием: умоли Щедродавца Бога грехов и беззаконий наших не помянути и на Страшнем Суде оправдание даровати.

Богородичен: Еже паче всякаго разумения единаго от Троицы нетленно рождшая Господа и Бога нашего Иисуса Христа, Он же спасение нам дарует, и яко кокош птенцев Своих, благодатию сердца верных питает.

Песнь 3.

Ирмос: Утверди нас в Тебе, Господи, древом умерщвлей грех, и страх Твой всади в сердца нас поющих Тя.

Покоя не дал еси скраниама твоима и веждома твоима дремания дóндеже возсия в сердцы твоем Христос. егоже светом просвещаем, познал еси законы бытия вечнаго.

Разум божественный имея, устроял еси добре храмину души твоея. Егда же волны диавольских козней восхотеша поколебати ю, твердо стояше, основана бо бе на незыблемом камени веры Христовой.

Егда богоборцы лютыя восхотеша уничтожити Церковь Христову, ты яко дорый воин Царя Небеснаго на защиту ея устремился еси, нещадно словом святительским безбожных обличая, пред очи тех Суд Божий возвещая, и претя им вечными муками.

Богородичен: Живота вечнаго Благоутробная Мати, Пресвятая Дево Богородице, живот мой соблюди во страсе Божием и даруй души моей мир и велию милость.

Седален

Духом Божественным просвещаем, немощную дерзость мучителей посрамил еси, благословением пастырским сердца агарянских слуг умягчил еси и отказашася убивати тя, Божия служителя.

Слава, и ныне, Богородичен

Египетскаго рабства злобнаго мучителя избегнув, яко новыя Израильтяне, умиленно прославляем имя Твое, всехвальная Богородице, рождшая победителя фараона мысленаго.

Песнь 4.

Ирмос: Услышах, Господи, славное Твое смотрение, и прославих, Человеколюбче, непостижимую Твою силу.

Царюющих безбожников злобу презрел еси, добрыми помышлении сердце свое питая, паству свою усердно в слове Божии поучая, добрым пастырем от Небеснаго Пастыреначальника нареклся еси.

Агарянское нашествие богоборцев во всеоружии сретил еси, духа любви не угашая, многия сердца любовию к Богу воспламенил еси и мученическим подвигом в стоянии за Истину утвердил еси, богомудре отче Никодиме.

Ревнуя о чистоте Православия, с нечестивыми обновленцы в сговор не вступил еси, ересь тех пред паствой обличая. Темже молим тя, святителю Никодиме, даруй нам крепость духовную в исповедании имени Христова.

Струями кровей обагришеся тело твое честное, многострадальне отче Никодиме, люте бо уязвлен был еси многими раны, дух же твой непреклонен явися в Горняя воспаривый и в Господе упокоивыйся.

Богородичен: Твои певцы, Богородице, ущедри, Ты бо еси независтная подательнице всякия благости. Темже вопием Ти: испроси нам у Господа вящшего разумения, како достойно славити Тя, превышшую всякия славы.

Песнь 5.

Ирмос: Света Подателю и веков Творче, Господи, во свете Твоих повелений настави нас, разве бо Тебе инаго Бога не знаем.

Вся возмогл еси о укрепляющем тя Господе, святителю Божий Никодиме, жезлом веры ереси уязвляя и лукавство бесовское именем Иисусовым далече отгоняя. Темже молися о нас, да не впадем в злокозненыя сети вражия.

Источнику света непрестанно моливыйся, да осияет сердце твое светом Христовым, с Нимже в невечернем свете пакибытия водворивыйся вкупе с новомученики Российскими моли о нас, грешных сродницех твоих земных, достоблаженне Никодиме.

Ярче солнца видимаго свет твой возсия в Церкви Христовой, о подвизе твоем во имя Христа свидетельствуя. Темже мужество твое прославляюще, святителю Никодиме, светло празднуем святую память твою.

Богородичен: Непобедимая Победо и Стена нерушимая, Взбранная Воеводо, Богородице Дево, страшная бесовом язва. Темже во умилении взываем Ти: защити нас от коварства змия древняго, злобно воюющаго на ны.

Песнь 6.

Ирмос: В бездне греховней валяяся, неизследную милосердия Твоего призываю бездну. От тли, Боже, мя возведи.

Емляся за ризу Христову в помышлениих сердца твоего верою спаслся еси, огненное искушение страданий мужествене претерпе, яко злато очистился еси. Темже моли, отче святителю Никодиме, о прощении грехов и прегрешений наших, да не впадем в ров нечувствия и нерадения.

Божиим глаголам сердцем внимая, в терпении твоем стяжал еси душу свою, не убоялся еси убивающих тело, души же не могущих убити, и яко вся заповеданная исполнивый и паству свою научивый, велий в Царствии Небеснем нареклся еси.

Елеем милости наполнил еси лампаду души твоея и Жениха Небеснаго со светильником горящим, богомудре Никодиме, сретил еси, с Ним же и вошел еси на брачную вечерю.

Богородичен: Сын Божий ублажи девственную утробу Твою, восхоте от чистых кровей Твоих человеческое естество восприяти. Темже вси ублажаем Тя, яко Богородительницу.

Кондак, глас 1

Наследниче Божественных дарований/ и собеседниче ангельских ликов Небесных,/ добрый делателю винограда Христова,/ священномучениче Никодиме,/ Белгородския земли неусыпный молитвениче/ и всея России велия похвало,/ ты яко жертва благоприятная,/ Богу выну предстоиши/ и молиши о спасении душ наших.

Икос

Аще и пожил еси на земли, яко человек, обаче нравом своим и чистотою души твоея ангелом Небесным уподобился еси, егда же возсия в тебе сила Христова, и властно Дух Святый позва тя на подвиг, ты ничтоже сумняся, на зов Божий скоро потекл еси и добре подвиг скончал еси и в Царстве Славы от Подвигоположника Христа нетленною славою увенчался еси. Темже вопием ти: святителю Никодиме: радуйся, архиерее достоблаженне; радуйся, мучениче непобедимый; радуйся, вечныя славы наследниче неизменный.

Песнь 7.

Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, пояху: благословен еси, Боже отец наших.

Горе умом непрестанно возносивыйся, страстныя помыслы и двизания души твоея огненно находящия на тя, именем Иисусовым прохладительно орошал еси, и яко отроцы вавилонския неврежденно пел еси: благословен еси, Боже отец наших.

Огненное страдание росою упования на милость Божию претерпел еси, сердцем поя: благословен еси, Боже отец наших.

Именем Божиим и делами благочестия сердца паствы пробуждал еси, к Богу истинному их взоры обращая, научал еси пети: благословен еси, Боже отец наших.

В Небесных селениих достойно веселяся, отче блаженне Никодиме, призри на ны немощныя и грешныя чада твоя духовныя, исцели нас от недугов душевных и телесных, да благодарно возопием Богу: благословен еси, Боже отец наших.

Богородичен: Света Небеснаго истинное жилище, Солнце Невещественное миру даровавшая, отверзи умныя очи сердечныя, Мати Божия, да узрим Свет Христов, с любовию поюще: благословен еси, Боже отец наших.

Песнь 8.

Ирмос: В пещь огненную ко отроком еврейским снизшедшаго, и пламень в росу преложшаго Бога пойте, дела, яко Господа, и превозносите во вся веки.

Естество падшаго Адама безжалостно отвергнув, во Христа облеклся еси, с Ним и умер еси, с Ним и воскресл еси, с Ним и воцарился еси во вся веки.

Со Христом соцарствуеши ныне, боголюбиве отче, и песнь победную со святители воспеваеши, яко от великия скорби пришел еси и себя в жертву мученически принесл еси возлюбившему тя Господу.

Постом и молитвою Богу послужил еси, воздержанием тело умерщвляя, дух свой оживил еси и на земли духовно, яко ангел поживе, ангелом сопричтен, святе Никодиме.

Богородичен: Агнице Неискусомужняя, Агнца Незлобиваго, за грехи всего мира закланнаго, нестудно родила еси. Темже мы, избавлении от смерти вечныя, достодолжно тя величаем.

Песнь 9.

Ирмос: От Бога Бога Слова, неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии, единомудрено песньми величаем.

Светоносную память радостотворнаго жития твоего со святыми празднуем душами просвещаемся и причастницы Света Небеснаго являемся, посему песнеными похвалами тя достойно ублажаем.

Егоже поют Ангели Небесныя и славословят Херувими, Страшнаго во Святыни Своей Вседержителя Бога выну созерцаеши в Небесней Славе, священномучениче Никодиме. егоже моли, да не попалит нас огнем гнева Своего за премногия грехи наша.

Твоим ходатайством грешники от греховныя жизни отвращаются, сластолюбцы к воздержанию прилепляются, ленивии трудолюбцами становятся и всякая язя скоро врачуется.

Богородичен: Егда совестная деяния обличатися будут, егда вси людие пред Грозным Судиею в страхе и трепете предстанут, тогда не премолчи, Богородице, воздежи богоноснии руце Твои и вкупе со священномучеником Никодимом и со всеми святыми моли Бога о спасении душ наших.

Светилен

Светоносный отче, ангелом Небесным сотаинниче, светом Христовым озари наша темныя души и, яко в сени смертней грехов и страстей седящия, узрим Свет Неприступный, славяще Бога дивнаго во святых Своих.

Богородичен: Яко Светоносная Сене Небесная, духовную благодать в нас направи и вечнаго геенскаго огня исхити, да безконечно славим имя Твое, со избранными вопиюще: радуйся, Благодатная Богородице Дево, даровавшая нам спасение.

На хвалитех стихиры, глас 1.

Подобен: Небесных чинов:

Водворился еси в дому Господни и яко финикс благодатию процвел еси и яко кедр добродетельми умножился еси, и яко маслина плодовитая, в саду райстем рукою Божиею насадился еси, достоблаженне отче Никодиме.

Червлеными мученическими ризы, яко виссоном многоценным украсился еси и на брачную вечерю Господню со избранными вшел еси, идеже выну веселяся, не забуди нас, во юдоли плачевней пребывающих, добропобедне Никодиме.

Не довлеет похвала наша к славе твоей, священномучениче Никодиме, слава бо твоя паче солнца вещественнаго сияет и радость неизреченная боголюбивое сердце твое исполняет, торжествуеши бо в Церкви святых, преславне отче.

Слава, глас 8.

Подобен: О преславнаго чудесе:

Яко адамант твердейший верою просиял еси, учение Христово в сердце приемый, и яко мудрый купец, бисер безценный – Христа стяжал еси, егоже лик пресветлый зряще, моли о всех, чтущих память твою, священномучениче Никодиме, Христу Богу возлюблене.

И ныне, Богородичен

Пресвятая Богородице Дево, не возгнушайся наших песненных похвал, обаче благоутробно приими и Сыну Твоему и Богу нашему милостиво вознеси, да поставит нас одесную Себе в Страшный День Судный.

Источник: сайт храма новомучеников и исповедников Российских в Строгино

Служба святому священномученику Никодиму (Кононову) составлена насельницей Толгского монастыря (Ярославская епархия) инокиней Смарагдой (Зыковой)

Месяца декабря в 29-й день

На велицей вечерни

На Господи, воззвах: стихиры на 8, глас 1:

Яко заря пресветлая,/ землю Сибирскую житием твоим озарил еси,/ единаго безмолвия взыскуя,/ сердечныя молитвы делатель преизрядный явился еси,/ отче Василисче преблаженне,/ моли спастися душам нашим.

Издетска к Богу мыслию восперяяся,/ Тому Единому прилепился еси,/ в трудех пустынных смиренно подвизаяся,/ любовь совершенную стяжал еси,/ боголюбиве отче Василисче,/ темже и дух твой возрадовася о Господе,/ егоже моли о чтущих память твою.

Смирением себе украсивый/ и воздержанию навыкнувый,/ страстей возстание, блаженне, погребл еси,/ молитвою же сердечною душу твою очистив,/ храм Духа Святаго явился еси./ Темже и радость неизреченную от Господа достойно приял еси,/ егоже моли и нам благая улучити.

Слава, глас 6:

Приидите, вернии людие,/ хвалебными песньми память почтим/ богоноснаго старца Василиска,/ земли Сибирския украшение,/ иже, в ней усердне подвизався/ и на лествицу духовную возшед,/ яко светильник светозарный просия,/ ныне предстоит Престолу Святыя Троицы/ и молится о душах наших.

И ныне, праздника.

Вход. Прокимен дне. И чтения три преподобническая.

На литии стихира, глас 2:

Светильник пустыни Господом возженный,/ монашествующим правило/ и людем верным наставник явился еси./ Темже, угодниче Христов Василисче,/ и нас в добродетелех укрепи,/ святую память твою празднующих.

В пустыни, яко во гробе затворився,/ плотская двизания духовными стремленьми угасил еси,/ во еже со Христом в живот вечный воскреснути./ егоже усердно моли о нас, преподобне,/ душ наших греховную мертвость оживотворити,/ любовию тя почитающих.

Тайныя твоя подвиги кто изочтет, святе Василисче,/ яже Единому Богу ведомыя?/ Ты бо сна очима твоима не дал еси,/ во дни и нощи духом к Богу пламенея,/ плотския страсти постом далече от себе отгнал еси./ Темже и нам, в лености греховней сущим,/ буди усердный помощник.

Слава, глас 6:

Остров Коневский осветися пришествием твоим, преподобне,/ и братия, Бога благодаряще, зело возрадовашася./ Сотаинник же твой Зосима,/ умнаго твоего делания благодати свидетель быв,/ деяния праведнаго жития твоего списа./ Мы же прославляем Святую Троицу,/ даровавшую таковаго подвижника земли Русстей/ и молитвенника о душах наших.

И ныне, праздника.

На стиховне стихиры, глас 5:

Приидите, монашествующих чини,/ Василиска преподобнаго житию поревнуим/ и песньми духовными того почтим,/ со умилением к нему взывающе:/ радуйся, в подвизех иноческих вспоможение/ и в душегубительнем унынии ободрение,/ радуйся, послушания высото богосветлая/ и смирения глубино благоотишная/ всем, с верою к тебе притекающим.

Стих: Честна пред Господем/ смерть преподобных Его.

Приидите, мирских сословия,/ Василиска блаженнаго честныя мощи облобызаим/ и словесы достойными того ублажим,/ в молитве теплей к нему воздыхающе:/ радуйся, в скорбех и напастех заступниче/ и в трудех праведных помощниче,/ радуйся, братолюбия дивный образе/ и любве Христовы зерцало/ всем, с надеждою к тебе прибегающим.

Стих: Блажен муж, бояйся Господа,/ в заповедех Его восхощет зело.

Приидите, всех верных собори,/ Василиска преподобнаго днесь память прославим/ и духовному доброделанию того научимся,/ пение хвалебное тому приносяще:/ радуйся, страны Сибирския велие украшение/ и земли пустынныя благовонное процветение,/ радуйся, деяний молитвенных сокровище пребогатое/ и божественныя благодати источниче/ всем, любовию тя почитающим.

Слава, глас 8:

Суетная и ложная мира сего оставив,/ в пустыню безлюдную притекл еси, преподобне,/ идеже во плоти, яко безплотный, пожил еси/ и, Духа Святаго светлостьми просвещаемь,/ плоды духовныя сторицею преумножил еси./ Мы же, таковому житию твоему дивящеся,/ прославляем Отца и Сына и Святаго Духа,/ Троицу Единосущную и Нераздельную.

И ныне, праздника.

Тропарь, глас 4:

Христа издетска возлюбив, преподобне,/ Тому Единому поработати вожделел еси/ и, в пустыню Сибирскую вселився,/ дар непрестанныя молитвы стяжал еси./ Мы же, чтуще славныя подвиги твоя,/ с любовию вопием ти:/ моли спастися душам нашим.

Ин тропарь, глас 8:

Земли Сибирския процветение,/ сердечныя молитвы искусный делателю,/ иноком известнейшее правило,/ всем притекающим добрый наставниче,/ преподобне отче Василисче,/ моли Христа Бога спастися душам нашим.

На утрени

По 1-м стихословии седален, глас 4:

Послушание Авраамово познав и терпению Иовлеву поревновав, отче Василисче,/ велий подвижник безмолвия явился еси,/ верою и благочестием сияя./ Темже вси наставника умнаго делания тя почитаем/ и молитвенника о спасении душ наших.

Слава, и ныне, праздника.

По 2-м стихословии седален, глас 1:

К пустынножительству Богом предъизбран быв/ и ангельский чин достойно восприем,/ безмолвия путь до конца прешел еси, блаженне,/ и в подвизе веры молитву чистую стяжал еси./ Ныне же, в Царствии Небеснем радости неизреченныя наслаждаяся,/ моли спасти и просветити души наша.

Слава, и ныне, праздника.

Величание:

Ублажаем тя,/ преподобне отче Василисче,/ и чтим святую память твою,/ наставниче монахов/ и собеседниче ангелов.

Псалом избранный: Терпя потерпех Господа:

По полиелеи седален, глас 8:

В безмолвии сердечнем пребывая,/ ум твой в памяти о Господе хранил еси, преподобне,/ нищету же духовную стяжав,/ благодать обильную Духа Святаго привлекл еси/ и жилище чистое Того соделался еси./ Молися о нас, святе Василисче, любовию творящих память твою.

Слава, и ныне, праздника.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Приидите днесь, празднолюбцы,/ пении и песньми духовными/ память почтим святаго Василиска,/ той бо яко подвижник пустыннолюбный/ велия труды ко трудом прилагая,/ Духа Святаго благодать стяжа./ Темже, духовне торжествующе,/ купно тому возопиим:/ преподобне и богоносне отче,/ моли спастися душам нашим.

Канон преподобнаго, глас 8.

Песнь 1.

Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Припев: Преподобне отче Василисче, моли Бога о нас.

Василиска блаженнаго ныне память совершающе, радуемся, Бога благодаряще, споспешника во спасение нам явившаго и в молитве непрестанней наставника преизряднаго.

Даром смирения от Бога щедро обогатився и многия скорби благодушно терпя, преподобне, пустыннаго делания велий подвижник показался еси. Темже и нас, малодушных, молитвами твоими укрепи.

К Богу любовию паче огня распалаемь, отче, радости жития безмолвнаго достигл еси, Христу Единому сочетаваяся, егоже воистинну узрел еси.

Богородичен: Упование мое Ты еси, Богородице, и на Тя всю надежду мою возлагаю, страстей море помози неврежденно прейти, любовию Тя воспевающему.

Песнь 3.

Ирмос: Утверждей в начале Небеса разумом/ и землю на водах основавый,/ на камени мя, Христе, заповедей Твоих утверди,/ яко несть свят паче Тебе,/ Едине Человеколюбче.

Яко елень желает на источники водныя, тако душа твоя возжада безмолвия, отче, во еже Единому Господу служити. Темже убо и нас к высоте любве Божественныя подвизаеши.

Велию ревность к пустынножительству имеяй, о плоти своей небрегл еси, блаженне, вящшия же подвиги к подвигом прилагая, воздержания сладость познал еси.

Самочиннаго жительства устрашився, в леса Брянския пришел еси, идеже, воли своея отметаяся, в послушание старцу духовному себе вдал еси и в чине иночестем достойно Богу послужил еси.

Богородичен: Словом вся Сотворшаго неизреченно во чреве Твоем носила еси, Пречистая Дево, егоже неустанно моли помиловати нас в День страшнаго испытания.

Седален, глас 4:

Пустыню неплодную во спасение избрал еси, Василисче,/ и, миру воистинну умертвився,/ труды постническими ангелов безплотных удивил еси,/ бесов же наветы смирением сокрушая, плод духовный терпением велиим возрастил еси.

Слава, и ныне, праздника.

Песнь 4.

Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

В трудолюбии и богомыслии подвизаяся, блаженне, един со Единым в безмолвии присно пребывал еси и, славы земныя удаляяся, тишины божественныя исполнился еси.

Просто и смиренно житие твое бысть, богоблаженне, о себе бо ничесоже когда возомнил еси, но, яко звезда многосветлая, подвиги твоими пустыню озарил еси.

Послушания образ и кротости зерцало, любве сосуд и благодати источник обрете в тебе святый Зосима. Буди и нам наставник духовный и молитвенник усердный.

Богородичен: Ты моя Надежда, Богородице, Ты мое Заступление, Ты Матерь Господа моего и Творца, Ты мой Покров, не остави предстательством Твоим на Тя уповающаго и спаси, Пречистая, молитвами Твоими.

Песнь 5.

Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих,/ пути моя направи, молюся.

Братскою любовию распалаемь, преподобный Зосима списатель богоугодных деяний твоих, блаженне Василисче, явися, да житие твое осветит степени лествицы духовныя, от дольняго к горнему нас возводящия.

Сердечныя молитвы делатель усердный был еси, отче Василисче, темже, светом божественнаго ведения просвещаемь, Царствия Божия тайновидец явился еси. Ныне же на Небеси Владыку тепле молиши о нас.

Радостию велиею исполняшеся душа твоя, блаженне, яко умом трезвяся на всякое время, со Христом Сладчайшим всегда пребывал еси.

Богородичен: Огнь Божества, яко Купина Неопалимая, во чреве Твоем носила еси, Пресвятая Дево. Темже моего окаянства тьму просвети и к свету заповедей Сына Твоего вся помышления направи.

Песнь 6.

Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже спасения моего.

Вся привременная оставив, яко добрый купец бисер многоценный обрел еси, молитву сердечную, от любве велия радостно к Богу изливаемую.

Молитвы непрестанныя действо благодатное познал еси, богоблаженне, темже внутрь сердца твоего явися источник, изливаяй токи сладости несказанныя.

В молитве к Богу простираяся и Того зря в сердце своем, преподобне отче Василисче, слез благодатных потоки пролиял еси.

Богородичен: О, Мати Дево, неправда обдержит мя и в пропасть погибели влечет. Помози, Пречистая, и умоли Сына Твоего, да помилует мя, грешнаго.

Кондак, глас 4:

В пустыню безлюдную от славы мирския удалився,/ умнаго делания высоты смирением достигл еси,/ теплою любовию ко Христу простираяся,/ сладость непрестанныя молитвы сердцем познал еси./ Темже сосуд Духа Святаго явився,/ вся концы земли Сибирския освятил еси,/ богоносне отче Василисче,/ моли Всещедраго Бога,/ да спасет души наша.

Икос:

Безмолвия поприще неблазненно претек, воздержания труды и болезни телесныя понесл еси, отче, всенощная стояния и поста подвиг отай совершая, смирения истиннаго достигл еси, имже на высоту духовную возшед и молитвы сердечныя сладость небесную вкусив, богатством благости украсился еси. Темже вопием ти: богоносне отче Василисче, моли Всещедраго Бога, да спасет души наша.

Песнь 7.

Ирмос: Божия снизхождения/ огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.

Заступницу Усердную на помощь призывая и путем узким неуклонно шествуя, благодать помогати зле страждущим стяжал еси, Василисче, богоприятными твоими молитвами.

Пустыня Сибирская освятися, таковаго подвижника приемлющи, иже, и мраз лютый и скудость телесную помощию Божиею претерпев, Господа неустанно славословил есть.

В молитве непрестанней пребывая, от силы в силу восходил еси, блаженне, и сице преспеяния духовнаго достигнув, путь истинный верным уяснил еси.

Богородичен: Обнажен есмь благих деяний и стыждуся, но Ты, Пречистая, миру обновление рождшая, просвети мя светом благодати Сына Твоего, Преблагословенная.

Песнь 8.

Ирмос: Седмерицею пещь/ халдейский мучитель/ богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Яко птица небесная, святе Василисче, никакоже попечения о телеси своем имея, душу твою добротою украсил еси и нестяжания учитель явился еси. Темже и нас на гору добродетели возведи, да превозносим Господа во веки.

В любви совершенней пребывая, яко свеща пресветлая, в пустыни хладней возсиял еси, блаженне, и наставник искусный явился еси, вся призывавый воспевати Господа во веки.

Мирскую мудрость отвергнув, премудрость от Господа стяжал еси, святче, и себе нивочтоже вменяя, высок пред Богом явился еси. Помози и нам в смиренномудрии превозносити Господа во веки.

Богородичен: Множицею моих прегрешений пещь геенскую сам себе разжегох, окаянный, но множеством милости и щедрот Сына Твоего, Всепетая, осуждения огненнаго избави мя, да, спасаемь присно молитвами Твоими, превознесу Тя во веки.

Песнь 9.

Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

О, велия любве твоея, отче! Како по смерти сотаиннику твоему Зосиме молитвы непрестанныя действо благословил еси огласити и на полезная ко спасению мирови открыти.

О, чудо дивное! Храм молитвы непрестанныя сердце твое созижде Господь, благодати Духа Святаго пламенем объятое и по успении твоем о нас всегда молящееся.

О, дивная дела Господня! Мощей твоих десныя руки треперстное сложение зряще, Василисче блаженне, жития твоего деянии наставляемся и, благодать богатную от сих приемлюще, пение умиленное тебе приносим.

Богородичен: Страшно бысть сие таинство и недомыслимо, како Невместимый Бог во утробу Твою вместися и яко Человек нам явися. Тем Тя, Богородительнице, ангелов и человек чиноначалия величают.

Светилен, глас 2:

Богосветлыми лучами деяний молитвенных сияя,/ леность душ наших к деланию духовному подвигни,/ помышления же наша ко Христу направи/ и в молитвеннем трезвении соблюди,/ да тя, Василисче пресветле, любовию воспеваем.

Слава, и ныне, праздника.

На хвалитех стихиры, глас 8:

О, пустыннолюбче Василисче,/ обет безмолвия волею прием/ и лествицы восхождения верх достигнув,/ дар молитвы непрестанныя стяжал еси/ и, любовию ко Христу распалаемь,/ Духа Святаго жилище себе соделал еси,/ егоже благодать стяжати и нам помози/ святыми твоими молитвами.

О, подвижниче безмолвия предивный,/ человеческия славы хотя утаитися,/ в пустыню Сибирскую удалился еси,/ идеже, ветры безгодными обуреваемь,/ труды тяжкия подъял еси/ и, во брани духовней победу над враги одержав,/ в радость Господа твоего вшел еси,/ егоже моли спастися душам нашим.

О, честный боголюбче Василисче,/ отцем пустынным подобяся,/ благодатнаго безмолвия достигл еси/ и, любовь сыновнюю стяжав,/ верное чадо Отца Небеснаго явился еси/ и всем, от века Богу угодившим, сонаследник./ Мы же, мощей твоих благодать приемлюще,/ благодарственная Господу приносим,/ егоже моли о спасении душ наших.

Слава, глас 5:

Радуйся, звездо пустынная,/ отче Василисче преблаженне,/ ты бо, от юности усердно Господу послужив,/ добродетельми душу твою обновил еси/ и молитвою непрестанною ум твой просветил еси,/ ныне же к тщанию духовному нас наставляеши/ и молишися о душах наших.

И ныне, праздника.

На Литургии

Служба вся преподобническая.

Молитва

О, преподобне и богоблаженне отче наш Василисче, безмолвия доблий рачителю и пустынножителю ревностный, умнаго делания смиренный наставниче и послушания предивный образе! Ты, мира сладости бегая, пустыни непроходныя достигл еси, в нейже многая лета, богомыслием озаряемь, в трудех пустынных подвизался еси, смиренномудрия глубину стяжав. Сего ради, яко сокровище пребогатое, сердечныя молитвы сладость утешительную Господь тебе дарова, еяже действием великих дарований исполнился еси. Темже молим тя, отче Василисче, призри на ны, унылыя и немощныя, и возгрей в сердцах наших истинную ревность о Христе Иисусе Господе нашем, Иже есть Единый Источник спасения нашего. Буди нам споспешник в духовнем восхождении: ум наш в трезвении бодреннем укрепи и дух сокрушен в сердца наша вкорени, наипаче вразуми, научи и усердие неослабное в молитве непрестанней подаждь нам, во еже освятити уста и сердца и вся помышления Христу Богу нашему, егоже Именем отбежит от нас всякая неправда и уныние, иже от диавола нам пребывающия, и да просветятся души наша светом любве Божественныя ко исправлению жития нашего, да не погибнем во огни, аки плевелы, но, яко пшеницу чистую, да соберет ны Господь в житницу Свою Небесную, идеже вси любящии Его в радости неизреченней пребывают, славяще Отца и Сына и Святаго Духа, во веки веков. Аминь.

Источник: Текст службы утвержден решением Священного Синода от 14 июля 2018 года (журнал № 61).

Месяца июня в 7-й день

Священномучеников Павла и Григория Мокинских

На велицей вечерни

На Господи, воззвах: стихиры 8, глас 4.

Подобен: Яко добля:

Приидите, хвалу воздадим Господу Богу нашему,/ память новомучеников прославляюще,/ служителей верных,/ исповедников и мучеников Христовых твердых,/ Пермския земли утверждение!/ Тии бо слово Господне соблюдоша,/ вся до конца притерпеша/ и Церкви Русстей похвала и слава явишася./ ихже мощи святыя лобызающе,/ молитву к ним простираем:/ оградите нас от бед, священномученицы Павле и Григорие, заступлением вашим/ и испросите нам у Господа велию милость.

Плач умиленный Павел сотвори,/ со сверстники юными сый на месте святем,/ идеже стоясте нозе Твои, Господи,/ темже, сострадания и благодарения исполнився/ и духовне Животворящий Твой Крест облобызав,/ светом Воскресения адамант соделася/ и, посреде нощи безбожия благодатию возсияв,/ твердость древних мученик яви/ и смерть от безбожных мужественне прият.

Не на земли сокровище себе скрыл еси,/ Григорие досточудне,/ но в сердце, к Богу глаголющем/ псалмы и пеньми и песньми духовными./ Сия от юности паче злата возлюбив,/ себе самаго духовно усовершил еси,/ и люди общники сего богатства сотворил еси,/ еже в любовь Божию скоро возводит,/ даже до мученическия славы.

И к конем привязуеми,/ и мразом ночным истязаеми,/ и сечении мечными люте ураняеми,/ храми явистеся Духа Святаго,/ страстотерпцы Христови,/ младости своея не пощадившии./ Темже, яко мужи совершеннии,/ к Богу возшедше,/ Того молите, даровати людем земли Русския/ мир и велию милость.

Ины стихиры, глас 1.

Подобен: Всехвальнии мученицы:

Любовию Христовою связуеми,/ Павле и Григорие доблии,/ ко спасению многия люди настависте,/ образ братолюбия святых показующе,/ еже жити братии вкупе, вкупе же и умрети./ И ныне молитеся ко Господу,/ да ничтоже разлучит ны от любве Божия.

Всяк град земли Пермския празднует,/ известие приемь об обретении святых мощей ваших,/ заступницы наши и молитвенницы,/ священномученицы Павле и Григорие,/ не под спудом, но на свещнице днесь возсиясте,/ Христа проповедающе,/ Распятием и Воскресением мир спасшаго/ и даровавшаго нам велию милость.

Слава, глас 3:

Коль добро или коль красно,/ во еже жити братии вкупе,/ сице мысляху священномученицы Твои, Господи,/ ихже бо служение у Престола Божия/ братию по духу сотвори,/ любовь же ко Христу страдати даже до крове укрепи./ Тех молитвами, Боже, утверди и нас в братолюбии.

И ныне, Богородичен: Како не дивимся:

Вход. Прокимен дне. И чтения 3 мученическая.

На литии стихиры, глас 1:

Первострадалец Христов, Стефан боговенчанный,/ виде небеса отверста/ и Сына Божия одесную Отца стояща,/ вы же, страдальцы честнии,/ Павле иерею и диаконе Григорие,/ небесными венцы украшеннии,/ с сонмом мученик одесную Господа предстоите,/ молитеся убо и нам шуия части избавитися.

Слава, глас 4:

Павле, доброе Кунгура воспитание,/ и Григорие, сыне Вятския земли,/ в пределех Пермских Христу добре послужившии,/ от оружных устрелени бысте/ и яко ангели просветистеся./ Славу же Распеншагося нас ради зряще/ и, яко победители, велие дерзновение имуще,/ с мученики новыми молите Господа/ спастися душам нашим».

И ныне, Богородичен: Призри на моления:

На стиховне стихиры, глас 6.

Подобен: Тридневен:

Усердия Андроникова в вере наследницы,/ Павле и Григорие славнии,/ пострадасте до крове, подвигу архипастыря последствующе./ Темже Христа Бога молите,/ сердце верное даровати/ всем почитающим страдания ваша.

Стих: Священницы Твои облекутся в правду/ и преподобнии Твои возрадуются.

Не дасте братоубийству благословения,/ сего ради со братией предел Мокинских/ убиени бысте без милости,/ милость проповедавшии/ и убийцы своя благословившии,/ да познают, омраченнии, свет покаяния.

Стих: Честна пред Господем/ смерть преподобных Его.

Красуйся и радуйся, Пермская земле,/ память новомучеников празднующи,/ тии бо предстоят Христу во славе,/ о людех твоих молящеся,/ подвиги их воспевающих/ и к святым мощем их с любовию припадающих.

Слава, глас 5:

Правнуцы бывше изгнанных из рая/ за безсловесное стремление,/ ови Каиново братоубийство умножиша,/ ови лихоиманию Иудину подражаша./ Вы же, мученицы доблии,/ словесы Евангельскими просвещеннии/ и молитвою церковною освященнии,/ ратование неправое и лютое отринусте,/ брани междоусобней не приобщистеся,/ сего ради во единем часе/ мученичеством восхитисте Царствие Небесное.

И ныне, Богородичен: Храм и Дверь еси:

Тропарь, глас 5:

Честное страдание ваше/ за веру святую Православную/ к веселию духовному вся люди созывает,/ священномученицы, Павле и Григорие,/ вы бо, землю Пермскую кровьми своими освятивше,/ любви совершенней научаете,/ душу полагати за Христа, Бога нашего,/ Светом Воскресения мир обновившаго.

На утрени

По 1-м стихословии седален, глас 5:

Мраз претерпевше и биение, и коньми влачение, и ребр прободение, святии мученицы Павел и Григорий радовахуся, от оружных бо устрелени бывше, душею во Обители Небесныя вознесошася. Тех молитвами, Христе Боже, спаси души наша.

Слава, и ныне, Богородичен:

Споручнице грешных и Утешительнице скорбящих, Пречистая Мати Божия Обрадованная, Пермскую землю иконами Твоими украсившая и святых множество в ней воспитавшая, Твоими ко Христу молитвами спаси души наша.

По 2-м стихословии седален, глас 2:

Сосуди честнии, благодати Божия исполненнии, священномученицы Павле и Григорие! Вы, молитвою усердною души ко страданию уготовавше, житие временное сохранити не искасте, но потщастеся Небеснаго Царствия достигнути, темже и жители его святыя други себе стяжасте.

Слава, и ныне, Богородичен:

Благоутробия сущи источник, милости сподоби нас, Богородице, призри на люди согрешившия, яви яко присно силу Твою, на Тя бо уповающе, радуйся, вопием Ти, якоже иногда Гавриил, безплотных архистратиг.

Величание:

Величаем вас,/ священномученицы Павле и Григорие,/ и чтим честная страдания ваша,/ яже за Христа/ претерпели есте.

Псалом избранный: Бог нам Прибежище и Сила:

По полиелеи седален, глас 8:

Повеленное во Евангелии приемше в разуме, в церкви Божией единомышлением ходисте, святии, глаголом жизни вечныя люди Божии учаще и красоту веры Православныя им показующе, юже да сохранит Господь непоколеблему от всех навет вражиих в земли Русстей, непрестанно взывающей: Пресвятая Троице, Боже наш, слава Тебе.

Слава и ныне, Богородичен:

Повеленное тайно приемь в разуме, в крове Иосифове тщанием предста безплотный, глаголя Неискусобрачней: Приклонивый схождением Небеса, вмещается неизменно весь в Тя. егоже и видя в ложеснах Твоих, приемша рабий зрак, ужасаюся звати Тебе: радуйся, Невесто Неневестная.

Степенна, 1-й антифон 4-го гласа. Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Священномученицы славнии Павле и Григорие,/ подвига мученичества сподобльшеся,/ вся грады и веси земли Пермския воздвизаете/ почитати мощи ваша, нам дивно явленныя,/ зане христианы добрыми, память вашу хранящими,/ многа лета от поругания соблюдаеми быша,/ ныне же в храме лучи благодати нам простирают/ и вся верныя научают,/ како подобает жити и за Христа страдати.

Канон, глас 8.

Песнь 1.

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Мужеством и крепостию души ваша украсивше и верность Христу в житии сохранивше, вечнаго покоя достигли есте, священномученицы Павле и Григорие.

Павла почтим, страдальца добропобеднаго, священную ризу кровьми белу соделавшаго, есть бо Пермския земли красота и Мокинския веси слава.

Песненно возвеличим диакона Григория, иже смерть, яко ходатаицу к лучшей жизни, приим, днесь непрестанно возсылает хвалу Избавителю и Богу нашему.

Страданием святых Севастийских мучеников подобницы явистеся, страстотерпцы славнии, мразом бо искусившеся, воини добропобеднии Царя Христа показастеся.

Богородичен: Оружие пройде Твою Пресвятую душу, егда распинаема видела еси волею Сына и Бога Твоего, егоже, Благословенная, молящи не престай, прощение прегрешений нам даровати.

Песнь 3.

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний Краю, верных Утверждение,/ Едине Человеколюбче.

Мучению лютому без милости предани бысте, святии страстотерпцы, обаче плоды любве Христовы принесосте нас ради пострадавшему Господу Человеколюбцу.

Дом Божий зело возлюбил еси, священномучениче Павле, идеже молитву благоговейне совершал еси, темже и нам помози в храме усердно Господеви молитву возносити.

Церковными гласы, еще отрок сый, Бога прославлял еси, святе Григорие, темже и призва тя Господь, яко вернаго слугу Своего, в диаконстем чине Тому усердно послужити.

Всем верным паствы церкве Никольския наставницы мудрии явистеся, священномученицы, озаряюще души, помраченныя грехом, и к свету богоразумия наставляюще.

Богородичен: Пречистая Дево, Русь зело возлюбившая, и землю нашу чудным светом честных икон Твоих озарившая, страдальцев Пермских сонм собравши, в вере Православней нас утверди до скончания века.

Седален, глас 3:

Проповедницы Православныя веры явльшеся и ревности о храме Божии исполньшеся, служение усердно совершили есте и страдание достойно восприяли есте, святии Павле и Григорие. И ныне молитеся ко Господу, даровати нам мир и велию милость.

Слава, и ныне, Богородичен:

Божественная скиния была еси Слова, едина Пречистая Мати Дево. Утешительница в скорбех сущи, гонимым за Христа всегда помогаеши и водами Божественных молитв Твоих духовную жажду утоляеши, подающи всем велию милость.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Прослави вас Господь, преподобномученицы добропобеднии, воини бо есте духовнии и свет благодати чистый, священномученика Андроника Пермскаго наследницы.

Врач недугов душевных и мудрый наставник отроком был еси, отче Павле, темже тя славит Пермская земля.

Познав любовь Христову и духом пламенея, в храм Божий притекл еси, священномучениче Григорие диаконе, да послужиши тамо усердно.

Благочестно поживше и страдания путь терпеливно восприимше, священномученицы славнии, сугубую мзду на Небесех восприяли есте.

Богородичен: Всегда припадаем, Марие Дево, к Твоей милости, Ты бо верным щит еси и новых мучеников крепость.

Песнь 5.

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Благочестия рачителие явилися есте, Павле и Григорие премудрии, зане избрасте часть благую.

От юности святость града Иерусалима возлюбив, Павле священне, Голгофу место слезами омыл еси, идеже и тайну Креста Господня познал еси.

Григория, диакона славнаго, днесь, вернии, почтим, иже смиренный сослужитель благоговейному иерею Павлу явися и вкупе с ним за Христа пострада.

Ничтоже возможе разлучити вас, священномученицы, от любве Христовы: ни скорбь, ни гонение, ни смерть, вся бо сия мужественне претерпели есте.

Богородичен: При Кресте Сына Твоего всыновися мир Тебе, о Дево Пресвятая, пречестных мучеников Крепосте и Утешение.

Песнь 6.

Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона,/ от тли, Боже, возведи мя.

Новомученики Пермския днесь прославим, тии бо смерти не убояшася и кровьми своими землю нашу освятиша. Тех молитвами, Христе Боже, спаси души наша.

Христа всем сердцем возлюбив, смерть за Него доблестно претерпел еси и наветы безбожных посрамил еси, отче Павле. Темже молим тя: помози и нам в любви тебе подражати и Господеви благоугождати.

Молитвами боголюбиваго Григория благодать нам подаждь, Христе Боже наш, твердую веру, пламенную любовь и Давидову кротость стяжати и заповеди Евангельския усердно исполняти.

Коль многое терпение священномучеников Павла и Григория! В лютый мраз коньми по земли влачими, мучими зле и мечем побиени бывше, обаче безбожное неистовство смирением победиша и за Христа пострадаша.

Богородичен: Егда ученицы вси, кроме Иоанна юна, от Креста бежаша и, страхом одержими, Христа оставиша, Ты, Дево Пречистая, с Ним пребыла еси. Темже молим Тя: в верности Богови пребывати нам помози.

Кондак, глас 3:

Пастырю добрый Павле/ и святолепнаго служения рачителю Григорие,/ паству вашу словом просветившии,/ святыни Церкве Христовы зело возлюбившии/ и веры ради смерть мученическую приемшии,/ ныне землю Пермскую благодатию просвещаете/ и святыня ея бываете,/ мощми своими безсмертие проповедающе/ и исцеления точаще всем, с верою к вам притекающим.

Икос:

Восхвалим, людие, двоицу святых страстотерпцев,/ духом мужественнаго иерея Павла/ и благоговейнейшаго диакона Григория,/ иже, союзом братския любве связуеми,/ за Христа пострадати сподобишася,/ в наша же дни святыя мощи своя во утешение и укрепление всем явиша,/ безсмертие проповедающе и чудеса источающе./ Темже к ним с любовию возопиим:/ радуйтеся, священномученицы Павле и Григорие, земли Пермския похвало и украшение.

Песнь 7.

Ирмос: От Иудеи дошедше, отроцы/ в Вавилоне иногда/ верою Троическою пламень пещный попраша, поюще:/ отцев Боже, благословен еси.

Кто не ужаснется огненнаго искушения, на Отечество наше пришедшего, верных людей убиение, святых храмов разрушение, детей сиротство и веры Православныя попрание! Но, Господи, Иисусе Христе Боже, помилуй землю Русскую и спаси души наша.

Мучителей лукавое безбожие не возможе поколебати твердости души твоея, священномучениче Павле, темже, яко имеяй дерзновение ко Господу, моли, да люди греховнаго плена избегнут и достойныя плоды покаяния принесут.

Святе Григорие, образ верности Христу и терпеливаго страдания показавый, молися о нас, чтущих твой крестный подвиг, да верная чада Церкве Русския пребудем даже до смерти.

Слагающе в сердце своем глагол Христов, еже не боятися убивающих тело, души же не могущих убити, мужественне на подвиг страдания потекли есте, священномученицы Павле и Григорие.

Богородичен: Сына Воскресшаго зрети чающи, яко мироносицы жены, Мати Дево, ко Гробу притекла еси зело заутра, учащи нас утреневати к Богу.

Песнь 8.

Ирмос: Царя Небеснаго,/ егоже поют вои Ангельстии,/ хвалите и превозносите во вся веки.

С пределы Пермскими ликуют людие веси Мокинския, радующеся обретению в ней святых мощей священномучеников Павла и Григория, и молятся им, яко своим помощником и заступником.

Тебе молящеся, священномучениче Павле, согласно взываем: да пробавит Господь милость Свою на нас и приимем любовь Христову в душах наших.

Святе Григорие, диаконе досточудне, молися Господу за люди веси Мокинския и всея Пермския земли теплый предстатель буди.

Отца и Сына и Духа Святаго, Троицу Единосущную и Нераздельную, в житии вашем прославили есте, священномученицы добропобеднии, темже и Бог вас прослави и Царствия Небеснаго наследники сотвори.

Богородичен: Днесь людие Пермстии обстоят раку святых новомучеников иерея Павла и диакона Григория, взывающе: о, теплии наши предстателие, молите Христа Бога и Пречистую Его Матерь, спастися душам нашим.

Песнь 9.

Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с Безплотными лики Тя величающе.

Земля издаде безценное сокровище, мощи священныя Григория и Павла, воинов Христовых добропобедных, от всякаго вреда пределы Пермския защищающих.

О, Павле, честный иерею, священства красото и верных предстателю! Помози нам молитвами твоими мир Христов стяжати и подвигом добрым неленостно подвизатися.

О, славне Григорие, добрый воине Христов и доблий страдальче! Помози нам сердце чистое соделати и спасение душ улучити.

О, светоноснии мученицы, Пермских предел похвало и украшение! Испросите у Господа Бога и Пречистыя Его Матере оставления всех наших грехов, да избавимся вечнаго осуждения и причастницы Небеснаго Царствия явимся.

Богородичен: Сохрани от бед рабы Твоя, Пречистая Дево, Тя бо теплую Предстательницу к Сыну Твоему имамы и Тобою спасение улучити надеемся.

Светилен:

Светлый венец от Солнца Правды, Христа, стяжавше, страстотерпцы святии, светозарно всех просвещаете и чтущия святую память вашу благодатно озаряете.

Слава, и ныне, Богородичен:

Пречистая Мати Дево! Светом незаходимым нас просвети, да в радости ликующе, прославим свет нам Показавшаго.

На хвалитех стихиры, глас 8.

Подобен: О, преславнаго чудесе:

О, всехвальнии новомученицы,/ Пермския земли похвало,/ в годину брани лютейшия/ от безбожных невинно пострадавшии,/ иерею Павле, смирением украшенный,/ и диаконе Григорие, духом пламенеяй,/ в молитвах теплых испросите/ раку мощей ваших обстоящим/ мир и велию милость.

Не токмо мучеников раны телесныя,/ но и власи священнии/ изочтени суть у Бога,/ Хранящаго вся кости их,/ и души их в руце Своей Содержащаго,/ и молитву их скоро Приемлющаго./ Темже, святии Павле и Григорие,/ помозите нам Господеви благоугодити/ и труды покаянными сердце очистити.

Яко благоговейнии служителие Христови,/ Павле и Григорие блаженнии,/ вы, Безкровную Жертву приносяще,/ о людех усердно молилися есте,/ да тихое и безмолвное житие поживут,/ христианския кончины живота сподобятся./ Помозите и нам богоугодне житие скончати,/ добрый ответ на Страшнем Судищи Христу Богу воздати/ и милость в День страшнаго воздаяния улучити.

Чадом кротость и послушание,/ мужем и женам благочестие,/ иноком ревность о Бозе,/ святителем укрепление,/ богохранимей стране нашей благоверие,/ и Церкви Русстей во истине стояние/ испросите у Господа,/ священномученицы Павле и Григорие,/ Пермския земли украшение.

Слава, глас тойже:

Пророчески Давид во псалмех вопияше:/ проидохом сквозе огнь и воду,/ и извел еси ны в покой./ И вы, священномученицы Павле и Григорие,/ огнь злобы мучительския безбедно проидосте/ и воду слез о супружницах и чадех,/ о роде, и друзех, и о пастве своей в душах удержасте,/ да в вино любве Божия претворится/ и с чашею страдания вашего срастворится./ Темже ныне от всех прославляетеся.

И ныне, глас тойже:

Владычице, приими молитвы раб Твоих,/ и избави нас/ от всякия нужды и печали.

Славословие великое. И отпуст.

На Литургии

Блаженна от канона, песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99. Аллилуиа, глас 2: Священницы Твои облекутся в правду, и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106. Причастен: В память вечную будет праведник:

Молитва

О, новомученицы славнии, иерею Павле и диаконе Григорие! Днесь, верно сошедшеся, восхваляем честная страдания ваша, яже в годину тяжкую гонений на Церковь Русскую претерпесте. Почитаем и братскую любовь вашу, веры бо нравом связуеми, яко единодушнии сослужителие, согласно и муки за Христа приясте. Ублажаем любовь вашу, псалмопевца бо глаголы в час испытания воспомянусте, яко добро и красно жити братии вкупе, благо же есть и в Царствии Небеснем вкупе радоватися. Дивимся долготерпению вашему, ни мраз бо, ни раны, ни коньми истязание от Бога вас разлучиша. Покланяемся честным мощем вашим, до времене под спудом земным сокровенным, напоследок же, яко некий дар светоносный, всей земли Пермстей возсиявшим. Ныне молите Великодаровитаго Бога, явлением мощей ваших нас, недостойных, Почтившаго, да пробавит молитвами вашими милость Свою ведущим веру Православную, да обратит к ней отпадшия, да укрепит верныя в стоянии за правду Божию, да сподобит нас от мощей ваших почерпнути исцелений Божественное действо, благодать и милость, и да дарует нам единеми усты и единем сердцем славити и воспевати Пречестное и Великолепое Имя, Отца и Сына и Святаго Духа, ныне и присно и во веки веков. Аминь.

Источник: Текст службы утвержден на заседании Священного Синода 23–24 сентября 2021 года (журнал № 67).