Январь

На велицей вечерне

Блажен муж: 1-й антифон.

На Господи, воззвах: стихиры на 8, глас 4-й:

Истинную веру соблюл еси, и за Церковь Христову от безбожников смерть вкусил еси, ярости и злобе их предан был еси, зверонравие их утолил еси, но не отступил еси от Господа своего, священномучениче Платоне, молися за ны Христу Богу нашему, во еже и нам веру православную соблюсти неврежденно.

Горькия желчи страданий вкусил еси, ныне на небесех вечно радуешися, показал еси нам путь ко спасению, яко не блуждати нам широкими стезями плотоугодия, но шествовати скорбным путем к Царству Небесному.

Крест Христов житием своим прославил еси, святителю славный Платоне, не убоялся еси хулителей и гонителей истины Божия, паству свою не оставил еси, не устрашившись велений безбожных, на смерть свою яко на пасху Господню шествовал еси, и нас утверди в любви Божией твоими к Богу молитвами.

Слава, глас 8:

О священномучениче Платоне! Промыслом Божиим во град Юрьев приведенный, и в темнице заключенный, посреде узников чистотою жития и веры сиявший, в подземелии убиенный, ныне на небесех царствующий, поминай стадо твое в терпении и лишениих сущее, во еже и нам Троицу Святую житием и верою прославити.

И ныне, Богородичен догматик.

Прокимен дне и чтения мученическая 3.

Пророчества Исаиина чтение.

Тако глаголет Господь: вси язы́цы собрашася вкупе, и соберутся князи от них, кто возвестит сия в них? Или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину. Будите Ми свидетели, и Аз Свидетель, глаголет Господь Бог, и отрок, егоже избрах, да познаете, и веруете Ми, и разумеете, яко Аз есмь; прежде Мене не бысть ин бог и по Мне не будет. Аз есмь Бог, и несть разве Мене, спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог. И еще от начала Аз есмь, и несть отъ рук Моих избавляяй; сотворю, и кто отвратит то? Сице глаголет Господь Бог, избавляяй вас святый Израилев.

Премудрости Соломоновы чтение.

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение; они же суть в мире. Ибо пред лицем человеческим аще и муку приимут, упование их бессмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле искуси их и яко всеплодие жертвенное, прият я. И во время посещения их воссияют и, яко искры по стеблию, потекут: судят языком и обладают людьми, и воцарится Господь в них во веки. Надеющиися Нань разумеютъ истину и вернии в любви пребудут Ему, яко благодать и милость в преподобных Его и посещение во избранных Его.

Премудрости Соломоновы чтение.

Праведницы во веки живут, и в Господе мзда их, и попечение их у Вышняго. Сего ради приимут царствие благолепия и венец доброты от руки Господни, зане десницею покрыетъ я и мышцею защититъ ихъ. Прииметъ всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Приимет щит непобедимый преподобие, поострит же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им Дух силы и, яко вихор, развеет их. И опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех язык, яко дана есть от Господа держава вам и сила от Вышняго.

На литии стихиры, глас 5-й:

Святителей похвало и слава мучеников показался еси Платоне досточудне, крест бо Христов подвижнически восприявше, поприще мучения претекл еси, и со славою очищение самаго себе мученически совершивше, яко чист сый Чистому предстоиши Христу, венценосче всеславный, со всеми новомученики Российскими веселящеся, молися за нас ко Господу.

Глас 6-й:

Дом отчий оставил еси, святителю Платоне, во град Петров вселился еси, пастырь добрый показался еси, о спасении чад своих выну подвизаяся. Напоследок жития твоего паки в землю свою возвратился еси, и освятил еси ю кровию твоею честною, и ныне со всеми мученики во Царствии Небеснем прославляешися.

Столп церковный явился еси, в любви Божией до конца пребыл еси, принуждаху тя невернии от проповеди евангельской отказатися, обаче неустрашимо рекл еси им: дóндеже язык мой свободен есть, непрестанно хвалу Богови воссылаю, ни во что же вменяя страх ваш.

Слава, глас 8-й:

Святитею Христов Платоне! Егда в темницу посажен был еси, искаше диавол погубити вся труды твоя, насылаше на тя трепет и ужас, ты же в борении суще низлагал еси того молитвою твоею, страсти Господни выну поминая, и непреткновенно достигл еси священных чертогов вечныя славы Божия.

И ныне, Богородичен.

На стиховне стихиры, глас 6-й:

Озарися град Юрьев светом подвига твоего, и возгреме отсюду проповедь христианская во убиении твоем, страстотерпче Христов святителю Платоне, новомученик Церкве Российския, от Господа прославленный, удостой и нас созерцания света невечерняго твоими ходатайствы.

Стих: Священницы Твои облекутся в правду и преподобнии Твои возрадуются.

Во граде Юрьеве, отонудуже воссия иногда эстам свет Православия, напоследок времен обновися проповедь Евангелия во убиении твоем, страстотерпче Господень, и паки прозвуча увещание Спасителя: не убойтеся убивающих телеса ваша и не могущих душе повредити, но убойтеся малодушнаго отступления от камене Жизни.

Стих: Блажен муж бояйся Господа, в заповедех Его восхощет зело.

Прииде на землю чудскую весна благодати Божия во дни правления Ярослава Мудраго, во времена же хулителей нечестивых наста зима лютых гонений, но во мраце безбожия и злохуления светил еси народу Божию светом веры твоея, новая звездо на тверди небесней.

Слава, глас 2-й:

Поучал еси паству твою, священномучениче Платоне, пребывати выну в молитве, непрестанно имети память Божию, всегда поучатися в страданиих Господних, претерпевати безропотно досаждения, и яко учитель на заколение веден был еси, показав пример стаду твоему, иерарше досточудне.

И ныне, Богородичен.

Тропарь священномученику Платону, глас 4-й:

Отечество твое оставил еси, и народу своему в рассеянии сущему послужити восхотел еси, храм в столице эстам православным воздвигл еси, последи же первым епископом земли твоея поставлен бысть, мученичеством ризы твоя архиерейския украсил еси, явив твердую и непоколебимую любовь ко Христу Богу нашему, егоже моли спасти души наша.

И ныне, Богородичен.

На утрени

На Бог Господь: тропарь священномученику дважды. Слава и ныне, Богородичен.

По 1-м стихословии седален, глас 4-й:

О новый угодниче Петроградский! Церковию Русскою воспитан был еси, укрепися духом древляго благочестия, напоен был еси водами богоугождения истиннаго, возгорелся еси огнем любви евангельстей, и сей пламень веры в земли Лифляндстей добре сохранил еси, научи и ны крепко блюсти Православие во вся дни живота нашего.

Слава и ныне, Богородичен:

Яко молитву неусыпающую, мольбу пребывающу имущи, Пречистая, ко Господу, напасти успи, и волны укроти окаянныя моея души, и в скорби сущее сердце мое утеши, Отроковице, молю Тя, и облагодати ум мой, яко да достойно Тя прославлю.

По 2-м стихословии седален, глас 4-й:

О новый угодниче Церкве нашея! Прославляюще подвиг твой, приносим ти песни похвальныя, почитаем страдания твоя, избранник Господень явился еси, десницею Божиею венцем мученика украшен еси, яко агнец непорочен кровьми своими Церковь Христову украсил еси во спасение душ наших.

Слава и ныне, Богородичен:

Богородице Дево, моли Сына Твоего, волею пригвожденнаго на Кресте и воскресшаго из мертвых, Христа Бога нашего, спастися душам нашим.

По полиелее седален, глас 4-й:

О новый угодниче града Петрова! Во узилище суще, борением внутренним томим был еси, гефсиманстей чаше приобщился еси, грехи своя голгофской желчию очистил еси, и страданием мученическим в Бозе сердце свое утвердил еси, ныне Пасху вечную торжествуеши на небесех, соделай и ны общники веселия твоего.

Слава и ныне, Богородичен:

Настави нас на путь покаяния, уклоняющихся всегда беспутием к заблуждению и преблагаго Бога прогневляющих, неискусобрачная Дево, Марие Чистая, Слову двере, Божие вселение, прибежище бо еси отчаянным и спасение душам человеческим.

Степенна 1-й антифон 4-го гласа. Прокимен, глас 4-й: Честна пред Господем смерть преподобных Его. Всякое дыхание: Евангелие от Луки, зачало 67.

По 50-м псалме стихира, глас 6-й:

Храмоздатель славный явился еси, святителю Платоне, попечение велие о пастве эстонстей имея, не пренебрегл еси малым стадом сим, но яко матерь о чадех, тако о нем болезновал еси, и Братство свято-Исидоровское со училищем устроил еси, споспешником и сомолитвенником великаго пастыря Кронштадтскаго имел еси, и ныне молися о малом стаде любовию почитающем тя.

Канон Богородицы и священномученику.

Канон священномученику, глас 2-й:

Песнь 1.

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.

Настави мя, Господи Боже мой, да возмогу воспети благочестно угодника Твоего, Юрьевского мученика, и совершити память того неленостно, и благоговейно.

Нарекоша тя отъ купели именем апостола первоверховнаго. По имени твоему бысть и житие твое: повсюду бо среди эстов изыде проповедь от дел твоих, о первый иерарше Ревельский!

Храм священномученику Исидору в стольнем граде воздвигл еси, умножая труды твоя, в них же навыкл еси выну молитися небесному покровителю паствы твоея, той же приведе тя ко жребию своему, да постраждеши, якоже и он, даже до крове за имя Христово. Ныне молитеся ко Господу о стаде вашем, о священномученицы единомысленнии.

Богородичен: Воду слез очищающую, Пречистая, подаждь ми и, очистивши мя от беззаконий, чиста представи, Богородительнице, Сыну Твоему и Богу.

Песнь 3.

Ирмос: Процвела есть пустыня, яко крин, Господи, языческая неплодящая, Церковь пришествием Твоим, в нейже утвердися мое сердце.

Во братстве, тобою созданном, обретаху помощь велию не токмо православныя, но и вси в нуждах и скорбех сущии. Явился еси новый заступник обидимых, Платоне боголюбиве, подражателю жития святителя Николая Мир Ликийских чудотворца.

Теплотою молитв твоих и веры твоея, отче Платоне, многия при жизни согрел еси, унылыя ободряя и расслабленныя укрепляя. Умягчи любовию и наша сердца, мразом века сего томимыя, твоими к Богу молитвами.

Ясен взор твой, мягкость сердечная и чистота нрава твоего привлекали к тебе чада церковная. Во убиении же твоем дивно прославися имя твое, отче Платоне, и ныне собрася окрест тебе паства новая твоя, ожидающи от Тебе благословения святительского.

Богородичен: Избавляющаго человеки от насилия вражия, родила еси сильнаго Бога, Пречистая Дево Всенепорочная.

Седален, глас 4-й:

Яко агнец чистый пожершеся, принесеся Слову Пастыреначальнику, мучениче всехвальный, темже торжествуем вси любовию божественную память твою.

И ныне, Богородичен:

Прибежище и сила наша Богородице, державная помощь мира, молитвами твоими покрый рабы Твоя от всякия нужды, едина благословенная.

Песнь 4.

Ирмос: Пришел еси от Девы не ходатай, ни Ангел, но Сам, Господи, воплощься, и спасл еси всего мя, человека. Тем зову Ти: слава силе Твоей, Господи.

Во епископы Ревельския бысть наречение твое, но расширися вскоре паства твоя, отче Платоне. Добре носил еси бремя архиерейское тяжкое, возложенное на тя Предстоятелем Церкве Российския.

Непрестанно помышляя о пастве твоей, панагию святительскую не втуне носил еси, с неюже не расстался еси даже во убиении твоем, Платоне священномучениче.

Жезл архиерейский вручен бысть тебе не во дни мира, но мятежа кроваваго: посылаше тя святитель и исповедник Тихон во тьму кромешнюю на подвиг крестный. Но не убоялся еси тех злодейств и к пастве твоей поспешно притекл еси.

Богородичен: Исцели души моея, Дево, язвы, осенением Твоим божественным, и ум мой просвети, омраченный леностию и злобою врага борца.

Песнь 5.

Ирмос: Ходатай к Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.

Презревши удобства мирския и прещения властей безбожных, единой совести святительской повинуяся, к пастве твоей в телезе скоро течаше и неленостно пешешествовал еси, Платоне, архиерею истинный, взыскуя чада твоя в годину лютых испытаний.

Разорители церквей Божиих, хулители веры православныя не устрашиша тя, Платоне священномучениче, но оплевал еси тех угрозы.

Тщетна бысть ярость зверя, не приведе тя оная в трепет и страх. Посрамил еси суетную силу сопротивника в мучении твоем, архипастырь доблестный, и предстал еси Христу в веселии и радовании.

Богородичен: Едину отъ всех родов избра Тя Господь, Богородице, из Тебе воплотися, обожив человечество.

Песнь 6.

Ирмос: Во глубине греховней содержимь есмь, Спасе, и в пучие. житейской обуреваемь, но якоже Иону от зверя, и мене от страстей возведи и спаси мя.

В темнице быв, подвергся еси позору и уничижению, принуждаху тя невернии отказатися от проповеди евангельстей. Но пребыл еси до конца верен Христу Богу, мучениче Платоне, укрепляя твердым стоянием твоим прочих узников Юрьевских.

Креста силу уразумел еси, сего ради легкаго жития никогдаже искал еси, святителю Платоне, с прочими новомученики российскими молися о нас, да познаем и мы спасительную силу Креста Господня, возлюбив долготерпение Христа Бога нашего.

Откры тебе Господь тайну вольнаго распятия Своего и вкусил еси благодати Креста, сего ради не любил еси покоя в жизни твоей, отче Платоне, неустанно труждаяся ради Церкве Христовой, ожидая упокоения в Царствии Небеснем.

Богородичен: Тя, Предстательницу, вернии, и стену вси стяжахом, во глубине злых и молве скорбей присно бедствующих, Богородице, едина земных прибежище.

Кондак, глас 3-й:

Ведый твое измлада благое изволение Всеведец Бог, приведе тя во град стольный святыя Руси, воспита в тебе велию и чистую любовь к Церкви Христовой, в годину лютых гонений вручи тебе всю паству земли Прибалтийския, ейже до пролития крове служил еси, священномучениче Платоне, поминай насъ верою чтущих тя.

Икос:

Ангелов Творец и всея вселенныя Создатель постави тя Ангелом Церкви Эстонския во времена гонений лютых, святителю Платоне, первенствуеши посреде иерархов эстляндских. Сего ради вопием ти таковая: Радуйся, просветителю эстов, апостолом единонравный; радуйся, святителю, Богом и народом твоим избранный; радуйся, добрый пастырю словесных овец; радуйся, душу свою положивый за чада твоя; радуйся, от безбожных убиенный; радуйся, телесем в Ревеле почивающий и душею на небесех царствующий; радуйся, дерзновенный о нас к Богу молитвенниче; радуйся, священномучеником рукоположенный; радуйся, и сам в чине мученическом прославленный; радуйся, твердый воителю за паству твою; радуйся, ступанием архиерейским безбоязненно шествовавый; радуйся святителю Платоне, Церкве нашея похвало и украшение.

Песнь 7.

Ирмос: Богопротивное веление беззаконнующаго мучителя высок пламень вознесло есть. Христос же простре богочестивым отроком росу духовную, Сый благословен и препрославлен.

Апостольской жизни поревновавый, апостольский конец жития твоего приял еси, отче Платоне, и ныне наслаждаешися жизни бесконечныя, молися Христу Богу о чтущих память твою.

Приобщи и нас, грешных, вере твоей, священномучениче Платоне, укрепи стопы наша на пути жизни христианской, соделай нас неколеблемы от ветр нечестия, и научи нас Троицу Святую любити паче живота своего.

Взираем на подвиг твой, Платоне мучениче, прославляем Бога нашего, давшего нам новаго ходатая, наставника и руководителя душ наших.

Богородичен: Милостива мне буди, Дево, и уязвлена мя оружием греха врачеством Твоея молитвы излечи, благословен, зовущи, Плод чрева Твоего.

Песнь 8.

Ирмос: Пещь иногда огненная в Вавилоне. действа разделяше Божиим велением, халдеи опаляющая, верныя же орошающая, поющия: благословите вся дела Господня, Господа.

Бысть вера твоя, святителю Платоне, оплот крепок. Пребыл еси во устроении евангельстем вся дни живота твоего, и во времена смуты велия апостольски учил еси хранити чистоту сердечную, блюсти незлобие душевное, Богу молитися на всякий час и сущим в бедах сострадание имети.

Дивна проповедь твоя, незыблемо упование твое, твердо веровал еси, святителю Платоне, яко благочестие на земли никогдаже исчезнет.

Созерцал еси последняя яко настоящая, дадеся тебе зоркость орляя во святительской хиротонии, и прозревал еси, яко Истина распространятися имать на земли до скончания века.

Богородичен: Избави мя страстей нашествия, Владычице, и борющия мя враги ныне преобори, утверди мя на камени Божия воли, душу мою просвети, двере божественнаго Света.

Песнь 9.

Ирмос: Безначальна Родителя Сын, Бог и Господь, воплощься от Девы нам явися, омраченная просветити, собрати расточенная. Тем Всепетую Богородицу величаем.

Ангелом Церкве Эстонския поставлен бысть, явился еси новый мученик Церкве Российския, святителю Платоне, молися непрестанно Христу Богу нашему, во еже преодолевати нам соблазны разделения и братолюбие выну сохраняти.

Яко пастырь стада Христова, пример нам показал еси, о страстотерпче чудный! Смертию твоею прославил еси Троицу Нераздельную. С собором святых совокупленный, и нас нераздельны соблюди во еже пребывати нам стадом единым, во еже купно приносити нам Богу жертву хваления.

Ты в житии своем Богу угодил еси, Платоне приснопамятне, сего ради приведе тя Господь к убиению за веру православную, сего ради сопричисли тя к сонму новомученик российских, сего ради сотвори тя ходатая за новособранную паству Свою.

Богородичен: Землю убо мглою, небо же облаки одеваяй Господь, в плоть мертвенную из кровей Твоих, Дево, одеяся, во одежду славы бессмертия одевая человеки.

Светилен:

Во святителех и мученицех прешедше преподобне, верен явился еси пастырь, Христову испивше чашу. Тем во обоих благоугодивше Христу, Тому молися о всех нас с горними силами, во свете ныне водворяющеся.

Слава и ныне, Богородичен:

Архангела Гавриила глас восприимше рцем: радуйся, Мати Божия, яже Жизнодавца Христа миру рождшая.

На хвалитех стихиры, глас 8-й:

Аще и в столице служил еси, Платоне трудолюбиве, но не утаися от сродник твоих вера чудная твоя: достигоша бо свет добрых дел твоих до отчизны твоея, и тамо избран бысть во архиерея, новым служением Богу угодил еси, следуя стопам Христа Подвигоположника.

О священномучениче Платоне! Усердный насадителю Православия среди эстов явился еси, неутомимо трудился еси ради Церкве Христовой, не покладая рук своих, епископ народа Божия став, ожиданий его не посрамил еси, укрепляя в вере новых чад твоих, покоя не давал еси плоти твоея, просвещая, утешая и укрепляя паству свою во времена мятежа страшнаго.

Крест Господа своего на рамо взем и ангельскому житию поревновал еси, своего Владыки странствованию подражая, егоже заповедем хранитель был еси истинный, священне архиерею Платоне преблаженне.

Приидите, боголюбивии вси, Православием одеяннии, чистыми сердцы и светлыми душами память почтим священномученика Платона, иже молится присно о нас ко Господу.

Слава, глас 6-й:

Крепчае адаманта вера твоя оказася, священномучениче Платоне, сего ради и поставлен бысть на высоту церковную в годину тяжких испытаний, из темницы Юрьевския на мученичество веден был еси, утверждая кровию своею новорожденную паству свою.

И ныне, Богородичен:

Никтоже притекаяй к Тебе посрамлен от Тебе исходит, Пречистая Богородице Дево, но просит благодати и приемлет дарование к полезному прошению.

На Литургии

служба священномученику.

Конец, и Богу слава!

Источник: Бденную службу священномученику Платону составил игумен Нестор (Кумыш)

Великая вечерня

Блажен муж:

На Господи воззвах: стихиры на 8, глас 4.

Подобен: Дал еси знамение:

Гонения претерпел еси и беды подъял еси, Богоглаголивый святителю Александре, дóндеже лесть обличал еси безбожную, и стадо твое от нечестия спасл еси, яко пастырь истинный Церкви Христовой. Сего ради светло сошедшеся тя почитаем. Дважды.

Добродетельми светло процвел еси, яко маслина плодовита, в дому Божиим, тучами твоих пречистых молитв. Нашествие раскола, страстотерпче Александре, разрушил еси, нечестивых верою посрамил еси, православных победою укрепил еси и венец от Бога приял еси, Его же моли от тмы и бед избавити нас. Дважды.

Глас 2.

Подобен: Приидите вернии:

Приидите, видите печаль, сердце растерзающую! Се бо разлучает враг Александра святителя и паству его. И вси обливаются слезами и горько к нему вопиют: кому ны оставляеши сиротствующих, святый владыко? Не оставлю никогоже, глаголет, николиже. Вездесущей Троице, Богу нашему, слава и ныне и во веки. Дважды.

Приидите, видите любовь велию паствы к пастырю. Се бо провождают Александра в невозвратное заточение. И вси плачут и рыдают, руце же его и нозе целуют, и землю, стопы его священными попранную, в благословение себе востерзают. О, Новая Голгофа страстей людских и претерпевшим спасительное в Бозе упокоение. Дважды.

Слава, глас 6:

Веселися днесь, граде Самаро, се бо честная наста память архипастыря твоего, пострадавшаго верою, радуйся и земле волжская, таковаго святителя имущая, ко всем благосострадательна, преподобна, незлобива, предстоящаго пред Престолом Пресвятей Троицы, и молящагося за град Божий и всех живущих в нем православных христиан.

И ныне, догматик, глас 6: Кто Тебе не ублажит:

Вход, прокимен дне, и паримии 3.

На литии стихиры, глас 1:

Веселися о Господе, граде Самаро! Радуйся, вся волжская земле, и похвалами воспойте новаго страдальца Александра, в последняя дни пострадавшаго и равное древним терпение показавшаго. Прославим Христа, его укрепившаго и победы на безбожныя даровавшаго и венцем светлым венчавшаго, нам же молитвами его подающаго велию милость.

Веселися граде Самаро, яко в тебе страдании возсия добропобедный Александр, мученически венец победы достойно приял есть, поправ мужески коварство врага, и всем людем проповеда держатися веры Православныя, Троице певаемому Богу, Емуже со дерзновением мы вопием: спаси души наша.

Слава, глас 3:

Александра, святителя земли нашея во дни нестроения, вернии сошедшеся восхвалим, яко нам путь православнаго строительства проповедавша и бoгoпpотивныя власти обличивша дерзновение, и в темнице замучен еси и ныне с сонмом мучеников живый предстояй Христу, молится спастися нам.

И ныне, глас тойже:

Ныне Святитель Александр предстоя Божией Матери и молящийся за град Самару, и мы с тобою припадаем ко Пречистой: Пресвятая Богородице, помогай нам.

На стиховне стихиры, глас 5.

Подобен: Радуйся:

Радуйся, священная главо, чистый сосуде Духа Святаго святителю Александре, церковное украшение, града Самары великое удобрение, ересей обличение и Православия утверждение, мужественно положил еси душу твою за паству свою, Христу подражая. егоже моли даровати душам нашим мир и велию милость.

Стих: Честна пред Господем:

Радуйся, святителю Самарский отче Александре, судом Божиим попустися тебе видети страшная и ужасная, стадо твое расколами и ересьми разрываемо и порабощенное лютым безбожием, храмов Божиих разорение, монастырей разрушение, Святых Олтарей ископание и священных сосудов ниспровержение. Но со слезами яко новый Иеремия, вопия ко Господу, моли и ныне о нас, даровати душам нашим мир и велию милость.

Стих: Священницы Твои облекутся в правду:

Радуйся, страстотерпче Христов Александре, в темнице заточенный, обаче Божественным учением укрепляемый, мучителем никакоже повинулся еси, темже искусом огненным ко Христу пришел еси радуяся, егоже моли от тмы и бед избавитися верою совершающим всечестную память твою.

Слава, глас 4.

Подобен: Зван свыше:

Всехвальный отче Александре, архипастырю града Самары чудный, Троицу несозданную исповедавше, безбожную лесть множеством ран и мук победил еси и победы венцем венчавшися, молися ко Господу, даровати нам мир и велию милость.

И ныне, Богородичен, по гласу Славы.

Тропарь, глас 6:

Священномучениче Александре, безбожную крепость твердым борением низложил еси и вознесл еси веру Православную, злочестивое служение уничижил еси и дерзновенно Христа Бога проповедал еси и ныне неустанно молися за град Самару и вся волжския страны, даровати нам мир и велию милость.

Утреня

На Бог Господь: тропарь дважды.

Слава и ныне, Богородичен воскресный по гласу тропаря.

Седален по 1 стихословии, глас 1:

Яко благословенный новый воине Христов, священномучениче Самарский вседоблий, законно пострадавши и венчавшися от Христа, молися о нас, совершающих память твою, всякаго избавитися лютаго обстояния.

Слава и ныне:

В кров Твой, Пречистая Дево, прибегающих, мольбу приемлеши от нас, не престай молящи Человеколюбца спасти рабы Твоя.

Седален по 2 стихословии, глас 2:

Яко солнце пресветлое во тьме безбожия показася, священный страстотерпче, просвещаяй верныя, согреваеши тех к Божественней любви и яко якорь крепкий во время треволнения утверждаеши колеблющияся в вере сердца.

Слава и ныне:

Общея беды Адамова греха нас избавляеши предстательством Твоим, Пречистая, и венцев славы сподобляеши.

По полиелее седален, глас 3:

Благодати и силы Божественныя исполнен быв, благочестия непреклонно держался еси, святителю отче Александре, мученическую показал еси твердость, за Христа пострадав радуяся, безбожную ересь посрамил еси, испроси и нам велия милости.

Слава и ныне:

Пречистие руци Твои, Дево Мати, простерши, покрый уповающия на Тя и Сыну Твоему зовущия: всем подаждь Христе, милости Твоя.

Степенна, глас 4.

Прокимен священномученика.

Евангелие от Иоанна, зачало 35 от полу.

Стихира по 50-м псалме, глас 6:

Веселися, граде Самаро, радуйся, соборе святых, светло торжествующих память священномученика Александра, Православия наставника и утишителя ересей, расколов искоренителя и безбожия обличителя, молящагося о спасении душ наших.

Канон Богородице молебный, глас 8, и канон святому, глас 6.

Песнь 1.

Ирмос: Волною морскою:

Божественнаго страдальца мудраго святителя, чудес источника, пастыря добраго, Церкви Православной утверждение, песньми велегласно яко светильника града Самары, Александра священномученика, вси восхвалим, радующеся.

Священствовав преподобно и законно пострадав, святителю Александре, священство показал еси светльшее, кровьми излиянными за любовь Христа Бога, Источившаго Кровь Свою за человеческий род.

Глас твой свету срастворився, и Божественными осиян светлостьми, тьму ересей и расколов, всемудре Александре, отметая, и к Истине Православия приводя заблудших.

Богородичен: Избави мя всякаго прилога сопротивнаго змиина, Мати Дево Чистая, и сердце мое просвети, Тя Всенепорочную славящаго верою.

Песнь 3.

Ирмос: Тебе на водах:

Явился еси священномученнче Александре, первее преподобне Бескровную жертву принося Избавителю: последи же яко жертву себе самаго священнодействовал еси.

Был еси не наемник, но вернейший пастырь, преподобне Александре, твою кровь проливая Боголюбезне за стадо твое.

Изрядне упасл еси Владыки Твоего стадо, святителю Александре, тем на месте злачне вселился еси.

Богододичен: Даждь нам помощь мольбами Твоими, Пречистая, прилоги отгоняеши любых обстояний.

Седален, глас 1:

Кровь твоя, отче Александре, вопияше от земли яко Авелева: яве бо проповедал еси Троицу Несозданную, сохраняя стадо Владыки от безбожных врагов. Темже пастырски просияв, отгнал еси ересей звери, яко хранитель веры Православныя.

Слава и ныне:

Пречистыя руки Твоя, Дево Мати, простерши, покрый уповающия на Тя, и Сыну Твоему зовущия: всем подаждь, Христе, милости Твоя.

Песнь 4.

Ирмос: На Кресте Твое:

Светлейшую тя звезду на высоте церковной положи, святителю Александре, Господь, страданий священнейше, и благодати сиянием всех сердца просвещающа.

Исповедав Веру Православную пред судищем мучителей, страстотерпче Александре, яве посрамил еси гордых расколоучителей и суемудренное безбожие.

Возвышаему морю прелести безбожия бурею, Божественным окормлением прешел еси, славне Александре, пристанище тишайшее всем быв плавающим.

Богородичен: Неискусобрачная Дево Благословенная, иерархов похвало, и страстотерпцев всех венче, бед и скорбей поющия Тя избави.

Песнь 5.

Ирмос: Богоявления Твоего, Христе:

Исаия виде пророческима очима на Престоле превознесенна Бога, ты же, отче Александре, в новей благодати священнодействуя, агнца Божия, за всех закланнаго, жрел еси, воскресшаго и одесную Отца седящаго.

Безбожником нечестивым, чада твоя, Александре, убивающим, болезновал еси утробою, но паки радуяся душею, благочестию процветающу, на земли скорбей, слезами орошаемой.

Раздирая душу свою скорбию крепкою, народ твой Троице предал еси навеки, Александре, и убо взят бысть нечестивый от среды мышцею высокою, и благочестие паки процвете на земли Самарстей молитвами твоими.

Богородичен: Древле тя провиде Исаия, Богородительнице, – яко Дева – вопияше, – во чреве приимет и Дева родит, и по рождестве паки Дева пребудет, Мати Еммануилева.

Песнь 6.

Ирмос: Ят бысть:

Житейское море прелестное зря волнуемо бурею страстей, Александре, преславный страдалец вопияше: возведи от тли нас, днесь молящихся Тебе.

Христу подобяся, за паству душу твою предал еси, о славный мучениче и страдальче Александре блаженне, и безбожныя стены разрушил еси.

От колебаний и расколов утверди своими страданьми, Александре, приснопамятный страдальче, к жизни небесней от земли преводяй всех, молящиеся тебе.

Богородичен: Пречистая Владычице, рождшая земным Кормчего Господа, страстей моих непостоянное и лютое укроти смущение, и тишину подаждь сердцу моему.

Кондак, глас 2:

Яко просияв, Александре, житием святительским, и в мире облистал еси течением страдальчества, разгнал еси мрачную прелесть безбожников воинствующих и раскольников злобствующих, показав истинную славу православных, сего ради моли Христа Бога спастися душам нашим.

Икос:

Яко волнами вод многих обуревается Церковь Православная, колеблема ложными ученьми и безбожным поруганием враг Ея. Веруем и уповаем купно с тобою, святителю Александре, яко врата адова не одолеют Ея, и молим тя, испроси у Господа великия милости, да ниспослет нам в дни испытаний наших крепость духа и твердое стояние во истине Православия, да не явится кто из братии нашей сыном погибели, но моли Христа Бога спастися душам нашим.

Песнь 7.

Ирмос: Неизреченное чудо:

Благодать во уста твоя, Александре, излияся, тем обратил еси от безбожныя лести светом Евангелия и привел еси ко Христу стадо твое, яко пастырь истинен, зовуще: благословен еси, Боже отец наших.

Неусыпна имать тя, мудре Александре, верных собор молитвенника, утоляюща безбожия волны свирепыя, напастей еретиков укрощающа и нас научающа вопити: благословен еси, Боже отец наших.

Твою честную память, Александре, торжествующе, преблагаго Господа сил умоли от гонителей злочестивых нас избавити и спасение даровати вопиющим: благословен еси, Боже отец наших.

Богородичен: Согнивший души моея дом, Пречистая Отроковице, покаяния образы яко благая обнови, яже все человечество Рождеством Твоим обновившая.

Песнь 8.

Ирмос: Ужаснися бояйся небо:

Стал еси на судищи, крепко подвизаяся, отче Александре, совершеннейшему бо пределу любве поучился еси, яко изволил еси умрети за други твоя, вопиющия: благословите, вся дела Господня, Господа.

Светел и словом и умом, светлу стяжал еси душу, светло лице и ныне же подвизался даже до крове, отче Александре, правителем богохульным противлься и вопия: благословите, вся дела Господня, Господа.

Нападоша, блаженне Александре, на тя крепции земли, умертвити тя беззаконнейшая делающии: но ты простираяся к Рождшемуся Избавителю от Девы Чистыя, взывал еси: благословите, вся дела Господня, Господа.

Богородичен: Ты бо, Всенепорочная, родила еси, яже Тому первее уготована, чаяние языков Христа, Ему же поем: благословите, вся дела Господня, Господа.

Песнь 9.

Ирмос: Не рыдай Мене, Мати:

Евангелие едино сокровище имел еси, отче Александре, нищенствуя плотию на земли, но якоже великий апостол, ничесоже содержа, многих обогатил еси сокровищи Духа, и одесную грядущаго Судии предстояния люди предуготовляя.

Возносяй смиренныя Господь вознесе тя, отче Александре, из глубины иноческаго смирения на престол святительства, оттуду же на Небо Небесе, и венча тя венцы преподобия и новаго мученичества.

Иерарше Христов и учителю Православия Александре всехвальне, егоже вещания сладце послушаше вся христоименитая Самара, утверди ны в благочестии молитвами твоими.

Богородичен: И мы Тебе вопием, якоже древле Предтечева мати, Дево Всечестная: откуду нам сие, яко к многогрешным приходиши и всем помогаеши неистощимою милостию Твоею.

Светилен, глас 3:

Приими, о Троице покланяемая, новаго мученика Александра, его же приводит к Тебе род безбожный, яко жертву совершенную, яко благоуханный цвет, яко благовонный фимиам, яко миро многоценное и даруй нам и граду Самаре избавитися от всех напастей и просветитися светом истины.

Слава и ныне:

Марие Богоневестная, христианом Предстательнице, Ангелом же Царице и всем святым Первостоятельнице, не престай молящи Господа о православно воспевающих Тя.

На хвалитех стихиры, глас 4:

Терпел еси гонение от неверных, радовался еси воздаянием, яже уготова Бог любящим Его. Сего ради, священномучениче, ветхаго совлеклся еси человека, ветхаго же искоренив идола безбожия, благодатию мучений своих освятил еси град Самару, и в нем яко солнце незаходимое возсиял еси. Сего ради молим тя, отче Александре: моли Христа Бога спастися душам нашим.

Терпел еси от безбожных гонения, и радовался еси от Владыки Христа воздаянием, и к злобствующим вопиял еси: нужно страдание, но радостно возмездие, многи скорби, но сладок рай и сего ради многи оставльша раскол, к тебе притекаху, глаголюще: моли Христа Бога, отче Александре, да твоими молитвами спасет души наша.

Терпя мучения кровавыя, одежду священства своего, святителю Александре, светло украсил еси, и в Небесную Церковь введен бысть, и со Ангелы всегда Богу предстоя, мудре, и ныне моли даровати мир душам нашим.

Слава, глас 8:

Самарскому граду вся волжская страна спразднует днесь, в память честнаго сего архиерея, ибо концы земнии восплещуще веселятся нынешним торжеством священномученика. Тем же и мы песньми, яко цветы, венцы сплетше, возопиим: радуйся пастырю добрый, иже душу положи за овцы своя, молимся тебе, богоносне отче Александре, молися стадо свое от безбожных волков избавити и небесныя ограды с тобою сподобитися.

И ныне:

Владычице, приими молитвы раб Твоих, и избави нас от всякия нужды и печали.

Великое славословие и отпуст.

Источник: сайт храма новомучеников и исповедников Российских в Строгино

18.01 Служба преподобному Симеону Псково-Печерскому

Ме́сяца ианнуа́риа в 5-й день

Преподо́бнаго Симео́на Пско́во-Пече́рскаго

На вели́цей вече́рни

Блаже́н муж: 1-й антифо́н.

На Го́споди, воззва́х: пое́м стихи́ры, глас 1.

Подо́бен: Небе́сных чино́в:

Я́ко дре́во многопло́дное, во оби́тели Пече́рстей преподо́бием процве́л еси́, о́тче Симео́не преблаже́нне, еле́ем трудо́в житие́ твое́ ума́стив, ра́дуяся, в селе́ния ра́йская преста́вился еси́, и досто́йная по́тов твои́х прие́млеши воздая́ния.

Измла́да боже́ственную мысль прие́мь, стра́хом Бо́жиим огради́л еси́ себе́, о́тче Симео́не богодухнове́нне. Те́мже, и́ночества у́зкий путь избра́в, чи́стаго жития́ твоего́ добро́ту показа́л еси́ и послуша́ния яви́л еси́ о́браз.

Незло́бием и кро́тостию украша́емь, любо́вь Христо́ву стяжа́л еси́, о́тче Симео́не богоприя́тне, е́юже первозда́нный в челове́цех о́браз зря, ду́ши мно́гия ко спасе́нию приве́л еси́, от дре́вняго зми́я лука́вства тех огражда́яй.

Сла́ва, глас 6:

От до́льняго к го́рнему про́мыслом Боже́ственным свы́ше направля́емь, те́лом к пеще́рам богозда́нным прите́кл еси́, душе́ю же на го́ру небе́сную возне́слся еси́: и нас ускори́ к восхожде́нию на высоту́ духо́вную, Симео́не преподо́бне о́тче наш.

И ны́не, Богоро́дичен, глас то́йже.

Вход. Проки́мен дне. И чте́ния 3 преподо́бническая.

На лити́и стихи́ры самогла́сны, глас 4:

Тле́нныя ми́ра сего́ красоты́ убежа́л еси́, бу́дущих восприя́тия возжеле́в сокро́вищ, и в ти́хое приста́нище прите́кл еси́, Симео́не, иде́же, по́стническое тече́ние сконча́в, дарова́ний Боже́ственных сокро́вище яви́лся еси́, и нам благода́ть от моще́й твои́х источи́, честно́е успе́ние твое́ сла́вящим.

Саро́вскому чудотво́рцу от ю́ности подража́я, того́ ра́дость о Го́споде стяжа́л еси́ и к лю́дем ве́лию любо́вь яви́л еси́, Симео́не, све́том благоче́стия вся просвеща́я и подава́я ве́рным исцеле́ния, те́мже ра́дость духо́вную моли́твами твои́ми испроси́ всем, па́мять твою́ святу́ю соверша́ющим.

Ве́лию по́двига и́ноческаго ре́вность показу́я, в ке́ллию пеще́рную затвори́лся еси́ и та́мо, я́ко безпло́тен, пожи́л еси́, Симео́не, от духо́в нечи́стых стуже́ния прие́мый, ны́не же а́нгельскаго сподо́бився ликостоя́ния, к милосе́рдию Бо́жию с ни́ми воззови́ о всех, любо́вию тя почита́ющих.

Сла́ва, глас 8:

Земли́ Пече́рския процвете́ние, стори́цею плод умно́живый, дар моли́твы к Бо́гу стяжа́л еси́, и́мже оби́лие плодо́в земны́х от земли́ непло́дныя испроси́л еси́, напита́в зело́ оби́тель твою́, о, Симео́не пресла́вне, непло́дствие душ на́ших претвори́, да сподо́бимся принести́ Го́споду досто́йныя плоды́ покая́ния.

И ны́не, Богоро́дичен, глас то́йже.

На стихо́вне стихи́ры, глас 5.

Подо́бен: Ра́дуйся, живоно́сный Кре́сте:

Ра́дуйся, преподо́бне Симео́не, исто́чниче чуде́с неисчерпа́емый, всем, с ве́рою к тебе́ взыва́ющим, был еси́ безме́здный врач и ско́рый помо́щник, неду́ги душе́вныя разреша́я и боле́зни теле́сныя утоля́я, те́мже и ны́не честны́я мо́щи твоя́ струи́ исцеле́ний источа́ют неоску́дно: моли́ Христа́ ниспосла́ти нам ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, преподо́бне Симео́не, воздержа́нием плотски́я стра́сти в себе́ умертви́в, власть на ду́хи нечи́стыя от Бо́га прия́л еси́ и человекогуби́теля посрами́л еси́, егда́ посто́м, моли́твою и смире́нием ко́зни вра́жия разоря́яй, ду́ши стра́ждущия свобожда́л еси́, те́мже моли́ Человеколю́бца дарова́ти душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, преподо́бне Симео́не, ми́рен дух и се́рдце чи́сто стяжа́в, проро́ческаго сподо́бился еси́ да́ра и тайнови́дец преди́вный яви́лся еси́, прему́дростию Бо́жиею озаря́емь, мно́гия от бед изба́вил еси́ и неврежде́нны от па́губы сохрани́л еси́, и ны́не моли́ Христа́ Бо́га дарова́ти душа́м на́шим мир и ве́лию ми́лость. Сла́ва, глас 6:

Бре́нныя сла́вы бе́гая, венце́м нетле́нным увенча́лся еси́ и, смире́нием украси́вся, ве́лие дерзнове́ние пред Бо́гом стяжа́л еси́, Того́ непреста́нно моли́, Симео́не, дарова́ти нам прегреше́ний оставле́ние, во е́же спасти́ся нам.

И ны́не, Богоро́дичен, глас то́йже.

На благослове́нии хле́бов, тропа́рь свята́го два́жды, и Богоро́дице Де́во: еди́ножды.

Тропа́рь, глас 1:

Любо́вию Христо́вою се́рдце твое́ уязви́вый, ева́нгельски Тому́ после́довал еси́: я́ко дре́вний подви́жник преподо́бием украси́выйся, сла́вный насе́льник оби́тели Богома́тери у пеще́р Бо́гом зда́нных яви́лся еси́, и, благода́ть духо́вную свы́ше прие́мь, подае́ши ве́рным исцеле́ния, Симео́не богоблаже́нне, не преста́й моли́тися о чту́щих тя.

На у́трени

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен гла́са.

По 1-м стихосло́вии седа́лен, глас 8.

Подо́бен: Повеле́нное та́йно:

Благода́тию свы́ше осия́нный, па́стырь до́брый яви́лся еси́, преподо́бне Симео́не, и, ве́лие попече́ние о ча́дех твои́х прилага́яй, огра́ду па́жити духо́вныя твоея́ неврежде́нну соблю́л еси́, те́мже и нас предста́тельством твои́м сохрани́ и овца́м избра́нным Христо́ва ста́да моли́твами твои́ми сопричти́.

Сла́ва, и ны́не, Богоро́дичен:

Пресвята́я и пренепоро́чная Де́во, у Креста́ возлю́бленнаго Сы́на Твоего́ яви́лася еси́ всем христиа́ном Ма́ти Преблага́я, те́мже к Тебе́, упова́ние на́ше, в ско́рби душе́вней припа́даем, вопию́ще: простри́ ма́терски ру́це Твои́ ко Престо́лу Влады́чню и моли́ся, Пречи́стая, о душа́х на́ших.

По 2-м стихосло́вии седа́лен, глас 3.

Подо́бен: Де́ва днесь:

Во оби́тели Пречи́стыя труды́ мона́шеския смире́нно поне́сл еси́, Богоро́дицу любо́вию немо́лчно песносло́вя, сего́ ра́ди, о́тче Симео́не, еще́ на земли́ сый, собесе́дник избра́нный Бо́жия Ма́тере яви́лся еси́, ны́не же, у Престо́ла Царя́ сла́вы предстоя́, со Влады́чицею Небе́сною не преста́й моли́тися о спасе́нии душ на́ших.

Сла́ва, и ны́не, Богоро́дичен:

Яви́лася еси́ в ско́рбех утеше́ние и в беда́х Предста́тельница, Засту́пница еси́ оби́димым и ненаде́янным наде́жда, те́мже Тя, я́ко упова́ние спасе́ния на́шего по Бо́зе стяжа́вше, в моле́нии серде́чнем к Тебе́ припа́даем и усе́рдно мо́лимся: всенепоро́чная Де́во, со уго́дником Твои́м Симео́ном помози́ спасти́ся душа́м на́шим.

Велича́ние:

Ублажа́ем тя, преподо́бне о́тче Симео́не, и чтим святу́ю па́мять твою́, наста́вниче мона́хов и собесе́дниче А́нгелов.

По полиеле́и седа́лен, глас 4.

Подо́бен: Удиви́ся Ио́сиф:

Прииди́те, ве́рнии, ублажи́м свята́го Симео́на, и́же, высото́ю дел в боже́ственную добро́ту оде́яся и сосу́д небе́сных дарова́ний яви́ся, от него́же бога́тныя ми́лости неоску́дно прие́млюще, ве́рою и любо́вию взыва́ем: ра́дуйся, Симео́не, преподо́бне о́тче наш.

Сла́ва, и ны́не, Богоро́дичен:

Ра́дуйся, Пречи́стая, арха́нгельский глас слы́шавшая, Сло́ва бо неизрече́ннаго вмести́лище и Рождества́ несказа́ннаго Ма́ти, безслове́сие душ на́ших разреши́, да устна́ма ра́дости по достоя́нию восхва́лим Тя: ра́дуйся, Цари́це небеси́ и земли́, Тобо́ю бо вся́каго зла избавля́емся.

Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Днесь све́тлаго торжества́ ра́дование и душа́м на́шим весе́лие быва́ет: но́ваго бо моли́твенника тя пред Бо́гом обрета́ем, преподо́бне о́тче Симео́не, пеще́ра у́бо отве́рзеся, и гроб не удержа́ чудото́чных моще́й твои́х сия́ние, и́мже озари́шася вси ве́рнии, в светоно́сный день прославле́ния твоего́ соше́дшиися, те́мже вку́пе небе́сная и земна́я весе́лия вся́каго исполня́ются, и Госпо́дь во святы́х Свои́х прославля́ется.

Кано́н преподо́бнаго, глас 8.

Песнь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский жезл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, песнь Бо́гови воспева́юща.

Днесь в до́ме Пречи́стыя соше́дшеся, ве́рнии, Ду́хом Боже́ственным веселя́щеся, преподо́бнаго Симео́на восхва́лим, той бо всем житие́м свои́м непреста́нно песнь Бо́гови воспева́л еси́.

Я́ко се́мя на ни́ве ве́ры и́стинныя, в вертогра́де Пренепоро́чныя Жизнода́вцем насажде́н быв, плод до́брый стори́цею прине́сл еси́ и мно́жества ве́рных напита́л еси́, песнь Бо́гови воспева́яй.

Благи́ми нра́вы измла́да укра́шен, за́поведей Бо́жиих иску́сный де́латель был еси́ и, о́ко серде́чное, взира́ющее к Бо́гу, име́я, о́тче Симео́не, Боже́ственных даро́в и чуде́с испо́лнился еси́, песнь Бо́гови воспева́яй.

Богоро́дичен: Богороди́тельнице всенепоро́чная, всем ве́рою испове́дающим Тя на вся́ком ме́сте и покланя́ющимся Твоему́ свято́му о́бразу, моли́ Сы́на Твоего́, Христа́ Бо́га на́шего, избавле́ние дарова́ти от страсте́й и бед, песнь Ему́ воспева́ющим.

Песнь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Твои́х утверди́, я́ко несть свят па́че Тебе́, еди́не Человеколю́бче.

Весь прилежа́ Вседержи́телю, преподо́бне о́тче Симео́не, Тому́ прилепи́лся еси́ от ю́ности, и нас, ве́рных чад твои́х, научи́ похваля́ти Святу́ю Тро́ицу: несть свят па́че Тебе́, еди́не Человеколю́бче.

Любо́вию Боже́ственною укрепля́емь, о́тче наш Симео́не, чудотво́рцу Саро́вскому после́довал еси́, и ны́не вку́пе с ним и все́ми святы́ми воспева́еши: несть свят па́че Тебе́, еди́не Человеколю́бче.

Стра́сти плотски́я умерщвля́я, о́тче Симео́не, ду́шу обогати́л еси́ Боже́ственными дарова́ньми, и си́ми мно́жество к тебе́ притека́ющих уврачева́л еси́, науча́я тех пе́ти: несть свят па́че Тебе́, еди́не Человеколю́бче.

Богоро́дичен: К Тебе́, Богоро́дице всепе́тая, приле́жно притеце́м, недосто́йная ча́да Твоя́, гре́шнии и смире́ннии, и припаде́м, в покая́нии зову́ще из глубины́ души́: Влады́чице, моли́твами уго́дника Твоего́ преподо́бнаго Симео́на сотвори́ спасти́ся нам, вопию́щим: несть свят па́че Тебе́, еди́не Человеколю́бче.

Седа́лен, глас 4:

Страсте́й умерщвля́я волчцы́, о́тче Симео́не пресла́вне, ду́шу твою́, я́ко зе́млю добропло́дную, возде́лал еси́ и, по́том мно́гих боле́зней и трудо́в оби́льно ю́ ороша́я, дави́дски процве́л еси́, я́ко крин ра́йский, сего́ ра́ди тя велича́ем.

Сла́ва, и ны́не, Богоро́дичен:

Молю́ Тя, Пречи́стая Ма́ти Бо́га вы́шняго, еди́но души́ моея́ утеше́ние, упова́ние, сла́досте, Боже́ственный покро́ве, све́те, заступле́ние и спасе́ние! Сподо́би мя Твои́ми моли́твами услы́шати глас, внутрь черто́га Влады́ки ве́рных призыва́ющий.

Песнь 4.

Ирмо́с: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра О́тча и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколю́бче.

Ду́шу твою́ очи́стив, преподо́бне о́тче Симео́не, храм Свята́го Ду́ха соде́лался еси́ и, в по́двизех до́бре подвиза́яся, го́рнее Ца́рство насле́довал еси́. Сего́ ра́ди Просла́вльшему тя вопие́м: си́ле Твое́й сла́ва, Человеколю́бче.

Бу́дущее твое́ прозре́в, о́тче Симео́не, блаже́нный Корни́лий Кры́пецкий ма́нной Боже́ственных слове́с тя напита́ и на па́жить духо́вную поста́ви. Ты же, позна́в сию́ сла́дость, ра́достно вопия́л еси́: си́ле Твое́й сла́ва, Человеколю́бче.

Многоболе́зненными страстьми́ одержи́мым, о́тче пречу́дне Симео́не, дарова́л еси́ исцеле́ния си́лою благода́ти Христо́выя, ю́же стяжа́л еси́ изря́дными дела́ми твои́ми. Те́мже с тобо́ю вопие́м: си́ле Твое́й сла́ва, Человеколю́бче.

Богоро́дичен: О, Пресвята́я Влады́чице, всех пра́ведных удобре́ние и дво́ре слове́сных ове́ц, во уде́ле Пече́рстем боголюби́ваго Симео́на под честны́м Твои́м омофо́ром взрасти́вшая и воспита́вшая, не оста́ви нас, рабо́в Твои́х, и моли́ Сы́на Твоего́ и Бо́га на́шего, да спасе́т ду́ши на́ша.

Песнь 5.

Ирмо́с: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чужда́я тьма, окая́ннаго: но обрати́ мя и к све́ту за́поведей Твои́х пути́ моя́ напра́ви, молю́ся.

Све́том незаходи́мым осиява́емь, о́тче пресве́тле Симео́не, возсия́л еси́ на земли́, я́ко со́лнце, ча́да твоя́ к позна́нию и́стины провожда́я и к све́ту за́поведей Христо́вых пути́ тех направля́я.

В ста́до ове́ц духо́вных преподобному́ченика Корни́лия прише́л еси́, о́тче наш Симео́не, и вся земна́я отве́ргнув, возше́л еси́ на не́бо, взыва́я к Бо́гу: к све́ту за́поведей Твои́х пути́ моя́ напра́ви.

Ны́не в вы́шних селе́ниих обита́я, чад твои́х назира́еши, преподо́бне о́тче Симео́не. Те́мже научи́ и нас богоприя́тными твои́ми моли́твами взыва́ти Го́споду: к све́ту за́поведей Твои́х пути́ на́ша напра́ви.

Богоро́дичен: Ра́дуйся, Де́во Всечестна́я, мо́сте, к небесе́м преводя́й, и ле́ствице высо́кая, ко Христу́ нас возводя́щая. Те́мже, Всепе́тая, я́ко Ма́тернее дерзнове́ние к Нему́ иму́щи, исцели́ ума́ моего́ омраче́ние и пути́ моя́ испра́ви, молю́ся.

Песнь 6.

Ирмо́с: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся, к Тебе́ бо возопи́х, и услы́ши мя, Бо́же спасе́ния моего́.

Умо́м очище́нным от помышле́ний лука́вых, блаже́нне о́тче Симео́не, в моли́тве непреста́нней пребыва́я и, я́ко свети́льник горя́, взыва́л еси́ ко Го́споду: из глубины́ зол возведи́ мя, Бо́же спасе́ния моего́.

Обнови́в послуша́нием Христу́ ду́шу твою́, о́тче свяще́нне Симео́не, в вели́кий о́браз обле́клся еси́ и, в пеще́ру Ла́заря прозорли́вца всели́вся, тому́ подража́л еси́, взыва́я: услы́ши мя, Бо́же спасе́ния моего́.

Кре́постию ду́ха, о́тче Симео́не, превозмога́я держа́ву вра́жию, подвиза́лся еси́ вни́ти сквозе́ те́сная врата́. Те́мже в оби́тели Отца́ Небе́снаго всели́лся еси́, со умиле́нием взыва́я: сла́ва Тебе́, Бо́же спасе́ния моего́.

Богоро́дичен: Не преста́й хода́тайствовати о нас, рабе́х Твои́х, Пречи́стая, я́коже Госпо́дь с Тобо́ю бы́ти изво́ли и от бед и скорбе́й изба́ви ны, моля́щихся Сы́ну Твоему́ и воспева́ющих Бо́га спасе́ния на́шего.

Конда́к, глас 6:

Я́ко Бо́жия любве́ зерца́ло, во оби́тели Пече́рстей благода́тно просвети́лся еси́, о́браз и́ноческаго жития́ показу́я, трудолю́бием и послуша́нием на высоту́ доброде́телей восте́кл еси́. Те́мже, да́ры Ду́ха Свята́го от Го́спода почте́нный, чудеса́ мно́га ще́дро источа́еши, преподо́бне о́тче наш Симео́не, моли́ спасти́ся душа́м на́шим.

И́кос:

Ду́ха Свята́го сия́нием просве́щся, вся, я́же в ми́ре, необину́яся оста́вил еси́, блаже́нне, мно́гими труды́ плоть покори́вый ду́ху, к высоте́ дости́гл еси́ безстра́стия, си́це, благопло́дие души́ твоея́ доброде́телей дея́нием явля́яй, и́стинную любо́вь к лю́дем стяжа́л еси́ и благода́ть целе́ний от Бо́га прия́л еси́. Те́мже, и по преставле́нии твое́м да́ры чуде́с обогаще́нный, по́мощию твое́ю нас не оставля́еши, преподо́бне о́тче наш Симео́не, моли́ спасти́ся душа́м на́шим.

Песнь 7.

Ирмо́с: Бо́жия снисхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших.

Водо́ю живо́ю, ю́же почерпа́л еси́ у Жизнода́вца Христа́, жа́ждущих напая́л еси́, о́тче наш Симео́не, и, я́ко и́стинный па́стырь слове́сных ове́ц, благода́рне взыва́л еси́: благослове́н Бог оте́ц на́ших.

Красне́йшее прозябе́ние, преподо́бне о́тче Симео́не, в дому́ Бо́жием прозя́бл еси́, и, в моли́твах боле́знуя о ча́дех твои́х, и́хже Пречи́стая тебе́ вручи́, с ве́рою Бо́гу вопия́л еси́: благослове́н еси́, Бо́же оте́ц на́ших.

С небе́сными ли́ки предстои́ши, богоблаже́нне о́тче Симео́не, Престо́лу Пресвяты́я Тро́ицы, с ни́ми ку́пно и со все́ми святы́ми непреста́нно воспева́я: благослове́н еси́, Бо́же оте́ц на́ших.

Богоро́дичен: К кому́ возопию́, Влады́чице, а́ще не к Тебе́, Засту́пнице усе́рдней ро́да христиа́нскаго? Ты бо Отроча́ ро́ждши, пребезнача́льное Сло́во, обветша́вшия грехо́м обнови́ла еси́ и пе́ти научи́ла еси́: оте́ц на́ших Бо́же, благослове́н еси́.

Песнь 8.

Ирмо́с: Седмери́цею пещь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Облецы́теся ны́не, лю́дие, чту́щии па́мять Симео́на достохва́льнаго, в милосе́рдие, бла́гость, смиренному́дрие, кро́тость, долготерпе́ние, снисхожде́ние, подража́юще Христу́, Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Нището́ю духо́вною обогати́лся еси́, преподо́бне о́тче Симео́не, и́ноком и всем, приходя́щим к тебе́, о́браз любве́ Христо́вы быв, Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Тро́ичен: Тро́ицу Единосу́щную, Неразде́льную, Неслия́нную и Пребезнача́льную днесь, ве́рнии, почти́м, Ю́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Богоро́дичен: Исто́чник неисчерпа́емый воды́ живо́тныя, от пото́па грехо́внаго мир спа́сшая, Де́во Пренепоро́чная, стра́сти души́ моея́ потопи́ и прохлади́ се́рдце мое́, острупле́нное грехми́, да воспою́ Сы́на Твоего́, Его́же о́троцы благословля́ют, свяще́нницы воспева́ют, лю́ди превозно́сят во вся ве́ки.

Песнь 9.

Ирмо́с: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу, А́нгелов и челове́к чинонача́лия велича́ют.

Преподо́бне о́тче Симео́не, я́ко и́стинный па́стырь ове́ц Христо́вых, ны́не дерзнове́ние име́я ко Го́споду, назира́еши ста́до твое́ с го́рних высо́т, помози́ и нам вни́ти во огра́ду небе́сную.

Пресели́лся еси́, о́тче наш Симео́не, от привре́менныя жи́зни во оби́тели Небе́сныя, иде́же со отцы́ святы́ми песнь побе́дную воспева́еши, ра́дуяся, те́мже и нас, с ве́рою и любо́вию тебе́ пою́щих, от вели́ких бед и скорбе́й изба́вити Христа́ умоли́.

О, богоблаже́нне о́тче наш Симео́не, в жи́зни вре́менней на земли́ не покори́вся страсте́м пло́ти, безстра́стием, я́ко ри́зою, обле́клся еси́ и сослужи́тель А́нгелов яви́лся еси́, те́мже умоли́ Христа́ Бо́га изба́вити нас от искуше́ний.

Богоро́дичен: Христа́, Сы́на Твоего́, умоли́, Ма́ти Де́во, согреше́ний проще́ние дарова́ти рабо́м Твои́м, Тебе́ Богоро́дицу вои́стину пропове́дающим, и све́тлости святы́х и весе́лия сподо́би нас во Ца́рствии Небе́снем.

Свети́лен:

Днесь све́тло пра́зднует свята́я оби́тель твоя́, ю́же честны́м житие́м и по́двиги, я́ко звезда́ многосве́тлая, озари́л еси́, о́тче Симео́не, указу́я нам путь ко Христу́, И́же есть Свет ми́ра.

Сла́ва, и ны́не, Богоро́дичен:

Пе́ти Тебе́ сподо́би, Де́во Всесвята́я, Свет бо невече́рний от чре́ва Твоего́ возсия́, и прогони́ мглу страсте́й мои́х, еди́на Всепе́тая.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, богому́дре Симео́не, от ю́ности святы́м отце́м подо́бяся, во бде́ниих, моли́твах и посте́х труды́ с боле́зньми подъя́л еси́, а́нгельским житие́м украси́выйся и де́монския полки́ устраши́вый, муж соверше́н вои́стину яви́лся еси́ и ко святы́м Пско́во-Пече́рским причте́н был еси́, с ни́миже за ны Христа́ Бо́га мо́лиши.

О, преди́вне Симео́не, ве́ры несумне́нныя стяжа́телю, исцеле́ний Боже́ственных сосу́д тя зна́ем неиждива́емый, чудесы́ от Бо́га прославля́емь и от ве́рных пе́сньми восхваля́емь, моли́твенник те́плый днесь возсия́л еси́, те́мже, Престо́лу Христо́ву предстоя́, моли́ дарова́ти нам бога́тыя ми́лости.

О, преблаже́нне Симео́не, виногра́да Христо́ва приле́жный де́лателю, я́ко оте́ц чадолюби́вый, тяготу́ дневну́ю поне́сл еси́, моли́твою чад твои́х огражда́я и любо́вию ду́ши тех возгрева́я, был еси́ всем ко Го́споду путево́ждь, те́мже мона́хов и мирски́х мно́жество наста́вника тя непрело́жна почита́ет.

Сла́ва, глас то́йже:

Чуде́с заре́ю облиста́емь, ны́не яви́лся еси́, преподо́бне, Це́ркве Ру́сския украше́ние, оби́тели Пско́во-Пече́рския торжество́, мона́хов ликовству́ющее пе́ние и ве́рных весе́лия глас. О, Симео́не, усе́рдный наш хода́таю пред Бо́гом, моле́ния на́ша ско́ро Ему́ принеси́.

И ны́не, Богоро́дичен, глас то́йже.

Славосло́вие вели́кое. И отпу́ст.

На Литурги́и

Блаже́нна от кано́на пра́здника, Песнь 6.-я на 4 и свята́го Песнь 6.-я на 4.

Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми?

Апо́стол к Кори́нфяном, зача́ло 176. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́.

Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Источник: Текст утвержден Священным Синодом Русской Православной Церкви 16 июля 2013 года (журнал № 84)

На велицей вечерни

Блажен муж 1-й антифон.

На Господи, воззвах: стихиры праздника 3

и священномученика 5, глас 4.

Приидите, христоименитии людие, / песньми духовными похвалим Анатолия чуднаго, / апостольских престолов сонаследника / и ликов мученических сопричастника твердаго, / и глас услышим дивнаго священномученика, / от небесныя славы нам вещающий: / чадца моя духовная и возлюбленная, / храните твердо веру апостольскую, / яже во благочестии всю вселенную утверди, / храните, чадца, веру отеческую, / еяже ради и аз страдания претерпех, / храните даже до сканчания века // веру святую Православную.

Приидите, православных собори, / пение боголепное принесем днесь Анатолию, / святителю преславному и богомудрому, / во мучениих твердому исповеднику / и, того похваляюще, усердно возопием: / о треблаженне отче и досточудне, / града и страны нашея заступление, / Церкве Православныя воистину дивное украшение, / моли о нас Господа Человеколюбца, // Анатолие отче наш.

Всекраснейшее Церкве Христовы украшение / и ангельских ликов купножителя, / святителя же и мученика преславнаго / приидите вси радостию воспоим, / Крест Христов на рамена своя подъемльшаго / и даже до Голгофы за Господом последовавшаго, / сего ради, страстем его поклоняющеся, / верою и любовию взываем: / моли о нас Господа Человеколюбца, // Анатолие отче наш.

Великаго во иерарсех Анатолия, / и твердаго во страданиих исповедника / ныне вся вселенная проповедует / и ангели купно с лики земнородных / славу днесь возвещают единаго от новомученик, / не убоявшагося злобы богоборцев / и ярости безбожных не устрашившагося, / егоже воспевающе, вопием: / моли о нас Господа Человеколюбца, // Анатолие отче наш.

Ангела досточуднаго Церкве Одесския / небесная воинства радостию днесь величают / и мученичестии лицы песньми прославляют / единаго от новомученик и исповедник, / вселенная же вся веселия исполняется, / память совершающе священномученика Анатолия / и люди православнии сему усердно вопиют: / заступи молитвою твоею град и люди, // память твою светолепно совершающия.

Слава, глас 4:

Грядите людие, / священномученику дивному поклонимся, / Анатолию всепетому и богомудрому / и сему усердно возопиим: / о златословесная богословия трубо и сосуде всекраснейший Пресвятаго Духа, / мучениче всекрепкий и препрославленный, / страданьми вшедый в радость Господа своего, / егоже непрестанно моли от всякаго зла сохранити град и люди, // память твою светолепно совершающих.

И ныне, праздника, глас тойже: Трепеташе рука Крестителева:

Вход. Свете тихий. Прокимен дне. Чтения три.

Притчей чтение:

Память праведнаго с похвалами:

Притчей чтение:

Праведник аще постигнет скончатися:

Премудрости Соломоновы чтение:

Уста праведнаго каплют премудрость:

На литии стихиры, глас 8:

Подобен: О преславнаго чудесе:

Глас Господень услышал еси, глаголющ: / возьми крест свой и по Мне гряди, / с радостию за Христом последовал еси, / и ко страстем с веселием течение совершающе, / яко знамение спасения Крест Христов прием, / ярость вселютейшую победил есть / и новомученик преславный явился еси, отче Анатолие, / темже и мы, любовию тя днесь воспевающия, // радости вечныя причастники явитися сподоби.

Слава, глас тойже:

Потщашеся вселукавии служители беззакония / отторгнути землю нашу / от веры отеческия / и воздвигнуша жестокая гонения на Церковь Православную, / ты же, отче треблаженне Анатолие, / яко свеща светолепная явился еси, / во тьме безбожия верою пламенеющая, / юже не поколебаша шатания еретическая / и погасити не возмогоша преисподнейшая злоба нечестивых. / Сего ради яко столпа веры Православныя / и единаго от лика новомученик / вселенная вся тя днесь похваляет / и лицы песнословцев славу твою проповедуют, // досточудне и преславне Анатолие.

И ныне, праздника, глас той же:

Днесь тварь просвещается:

На стиховне стихиры, глас 5.

Подобен: Радуйся, Живоносный Кресте:

Радуйся, преславне отче Анатолие, / архипастырю истеннейший людем православным, / не убоял бо ся еси волков злобы душетленныя, / стадо твое расхитити тщащихся, / но душу свою за чада твоя предал еси, / Пастыреначальника Великаго сый верный учениче, / темже и ныне не забуди стадо твое, // но молитвами твоими во Православии нас утверди.

Стих: Честна пред Господем / смерть преподобных Его.

Радуйся, священномучениче Анатолие, / Евангелия вечнаго воистину проповедниче неленостный, / житием бо твоим Истины свидетель был еси / и, страданьми житие непорочно запечатлевши, / новомученик и исповедник явился еси всепетый, // темже ти похвалы днесь радостию приносим.

Стих: Что воздам Господеви о всех, / яже воздаде ми.

Радуйся, Анатолие отче наш, / ревностный служителю Церкве Православныя, / смуты бо богомерзкия / расколов безбоязненный обличитель явился еси, / темже ныне ти припадая вопием: / вознеси, треблаженне отче, молитвы, / да утишит Господь бури искушений и соблазнов, / да умирит ересей и расколов вселестнейшая шатания, // да ниспослет Церкви Своей мир и велию милость.

Слава, глас 1.

Подобен: Небесных чинов:

Священномученика Анатолия днесь величающе воспоим, / той бо молитвою душу очистив, / ко мучением радостно шествовал со апостолом вопияше: / вся могу о укрепляющем мя Иисусе; / темже Всесильне Господи, молитвами треблаженнаго Анатолия // ниспосли Церкви Твоей мир и велию милость.

И ныне, праздника, глас 4:

Тебе в дусе и огни очищающа грех мира:

Тропарь, глас 5:

Во святителех благочестно пожил еси, / и мучения путь скончав, / богоборцев ярость посрамил еси, / поборник быв Христову стаду, богомудре. / Темже тя почитаем ныне, вопиюще: / священномучениче Анатолие, / моли Христа Бога, // спастися душам нашим.

На утрени

На Бог Господь: тропарь праздника, дважды.

Слава, святаго. И ныне, праздника.

По 1-м стихословии седален, глас 3:

Крестоношения вольнаго радости вечныя причастник воистину показался еси, отче Анатолие, и вся научаеши за Христом радостно шествовати даже до страстей и Голгофы, темже молитвою твоею чада твоя утверди, да благое иго Христово на рамена подъемлюще, сподобимся радости Пасхи вечныя причаститися.

Слава, и ныне, праздника:

Владыка днесь на Иордан прииде:

По 2-м стихословии седален, глас 4:

Страстьми твоими уязвил еси богомерзкую гордыню вселукаваго человекоубийцы древняго и безбожных посрамил дерзновение нечестивейшее, темже тя радостию прославляем, яко всеславнаго ярости демонския победителя.

Слава, и ныне, праздника:

Богоявления время, Христос явися нам во Иордане реце:

По полиелеи седален, глас 1.

Недостойных устен немощное пение / от любве ти восписуемое, отче Анатолие, / приими и призри от пренебесныя великия славы твоея / на люди, память твою верно совершающия / и усердно вопиющия: / радуйся, благоуханное молитвы кадило, / радуйся, столпе недвижимый веры православныя, / радуйся, молние еретическое злочестие попаляющая, / радуйся, Церкви нашея чудное украшение / и града нашего всепетое заступление, // радуйся, Анатолие отче наш.

Слава, и ныне, праздника, глас тойже:

Струи освятил еси Иорданския:

Степенна, 1-й антифон 4-го гласа.

Прокимен, глас 4-й: Уста моя возглаголют премудрость, / и поучение сердца моего разум.

Стих: Уста праведнаго поучатся премудрости, / и язык его возглаголет суд.

Всякое дыхание:

Евангелие от Луки, зачало 106.

По 50-м псалме стихира, глас 6:

О, дивнаго и преславнаго чудесе! О явления силы Божией! Кровь мученика семенем веры является / и сокрушаются демонския дерзости. / Церковь необорима враты адовы пребывает / и люди православнии память совершают Анатолия, / священномученика новаго // и молитвенника о душах наших.

Канон праздника со ирмосом на 6 и святаго на 8.

Канон святаго, глас 2. егоже краегранесие: Пение немощное приими, отче Анатолие.

Песнь 1.

Ирмос: Непроходимое волнящееся море:

Песнь победную воспевающе, приидите составим лицы и похвалу принесем дивному Анатолию, священномученику славному и всепетому.

Едиными усты и единым сердцем ликовствующе, воспеваем песнь, любовию величающе Анатолия, и сему молитвы приносим, священномученику славному и всепетому.

Ныне ангели и человецы неизглаголанныя радости исполняются, ныне вся вселенная ликовствует и православнии люди похвалу воспевают Анатолию, священномученику славному и всепетому.

Богородичен: Исаино проречение исполнишася и поколебашеся мрачная основания адовы и ангельстии чини удивишася и земнородных лицы ликующе воспеша Рождество Твое, Богородице Дево Чистая и Всепетая.

Катавасия праздника.

Песнь 3.

Ирмос: Иже в начале премудростию Твоею, Христе:

Единый Истинный и Всепетый Господь избра тя от рождения, Анатолие отче наш, и ко служению многотрудному призва, да явишися исповедник веры отеческия.

Небеснаго Царя от юности твоея возлюбил еси, отче Анатолие, Тому послужити возжелел еси всем сердцем, сего ради яви тя Господь людем православным пастыря добраго и новаго исповедника веры отеческия.

Евангельскии глаголы от юности распалиша сердце твое огнем пренебесныя божественныя любве, еяже и нас причаститися сподоби, новый исповедниче веры отеческия.

Богородичен: Мати Божия Всепетая, Госпоже Дево Богородице, милостию Твоею заступи люди, Тя воспевающия, и недвижимо утверди до скончания века Православную Святую веру отеческую.

Кондак и икос праздника.

Седален священномученика, глас 1:

Анатолие всеславне отче наш, от чад твоих возносимое днесь пение яко фимиам благоуханен приими и молитвою твоею во Православии утверди страну нашу, священномучениче досточудне и всеблаженне.

Слава, и ныне, праздника, глас тойже:

Иисусу родшуся от Девы Марии:

Песнь 4.

Ирмос: Пою Тя, слухом бо, Господи:

Огнем разжегшеся любве яже ко Христу, отче Анатолие, отбежал еси лукавства мира сего и, ангельскому ревноваше житию, облеклся еси во иноческий чин, да Господу послужиши неленостно.

Шествовати возжелел еси путем тесным жития монашескаго, и отверглся суетнаго лукавства и соблазнов многомятежнаго мира сего, и явился еси наставник монахов, и служитель Господень неленостный.

Не возмогша красная и лукавая прельстити тя, отче, всем сердцем доброту Небесную возлюбившаго и ангельскому житию прилепившагося, ангелом воистину сомолитвенника и Господня служителя неленостнаго.

Богородичен: От Небесных ликов пение возсылается присно Ти, Владычице Всенепорочная, вселенней всей милости истощающей, и людие православнии песни Ти возносят неленостно.

Песнь 5.

Ирмос: Просвещением заповедей Твоих, Едине Щедре:

Епископскаго служения бремя многотрудное возложи на рамена твоя Господь, Анатолие предивне, да во время бед и искушений явишися людем укрепление и Церкве Православныя дивный архипастырь.

Предивный и Божественный свет осия лице твое, отче Анатолие, егда совершашеся архиерейское поставление твое, сим являя тя новаго чудотворца и Церкве Православныя дивнаго архипастыря.

Руце в преподобии и чистоте воздевающе, в молитве ко Господу за мир весь ходатайствовал еси, яко кадило благовонное благоухающе, сего ради прославляем тя, молитвенника великаго и Церкве Православныя дивнаго архипастыря.

Богородичен: Иесеова корня благочестиваго Отрасле Пречестная, Преблагословенная Мати Божия, прозябшая Цвет нетления Христа Бога нашего, егоже моли помиловати люди православныя, присно Ти моления приносящия.

Песнь 6.

Ирмос: Прообразуяй Твое погребение, Крест и страсть Иона:

Ирода древняго и Нерона безбожнаго наследницы новии лютейшее гонение потщашася на Церковь воздвигнути и на тя дерзнуша руцы возложити, Анатолие отче наш, но ты злобы демонския посрамитель явился еси.

Многомятежную лютейшую бурю гонений мира сего князь воздвиже и адовых врат служители всебезбожнии Церковь Христову сокрушити потщашася безумием своим, ты же, отче, Православия столпе несокрушимый, в крепости своей злобы вражия посрамитель явился еси.

Истину попрати восхотеша демонския лести поборницы, на Церковь Христову восташа змия древняго вселукаваго служители безумнии, но крепостию твоею, Анатолие отче наш, злобы вражия посрамитель явился еси.

Богородичен: Огнем купина неопалимая, Тя, Богородице Всечистая, прообрази древле, темже молим Тя, Всемилостивая Владычице, огня геенскаго избави рабы твоя.

Кондак, глас 5:

Апостолов сопрестольниче / и святителей украшение, / православным щит и утверждение был еси, / просвещая безбожия нощь глубокую; / сего ради явился еси священнострадалец за Христа, / от бед избави нас твоими молитвами, // священномучениче Анатолие.

Икос:

Ничтоже возмогло есть отлучити тя от любве Божия: ни скорбь, ни теснота, ни гонения, но вся сия превозмогл еси силою возлюбленнаго тобою Господа Иисуса, за Ним же последовал еси, отвергше ветхаго человека и вземше крест свой, имже посрамил еси злобу и ярость богоборцев. Сице пришедше от скорби велией и убелиша ризы своя кровию за Христа излиянною, в радости предстоиши ныне пред престолом Божиим и ходатайствуеши о мире всем, отче священномучениче Анатолие.

Песнь 7.

Ирмос: Херувимы подражающе, отроцы в пещи ликовствоваху:

Терпение твое кто изрещи возможет, и крепость твою кия уста дерзнут воспети, отче Анатолие, исповедниче преславный и священномучениче досточудный, во страдании своем явивыйся столп непоколебимый Православия.

Чудо всеславное зряще, удивляхуся чини небеснии, како естеством сый един от земнородных, мучения яко безплотен терпиши и страданьми твоими в селения ангельския восходиши и являешися столп непоколебимый Православия.

Естество человеческое превозмогающе крепостию яже ко Господу любве, мраз и глад, раны и поношения терпел еси, и в темнице, яко во храме красном молитвою пламенеюще, столп непоколебим явился еси Православия.

Богородичен: Ааронов жезл прозябл иногда, таинство Твое прообразуя, Дево Всепетая Богородице, ангельских чинов радование и утверждение людем православным.

Песнь 8.

Ирмос: Глагол мучителев понеже превозможе:

Не возмогоша тя, отче треблаженне, ни скорбь, ни теснота, ни гонения от любве Божия отлучити, но на Голгофу за Христом шествовал еси радостно, священномучениче преславный Анатолие.

Ангели воспеша страдания твоя и демонския полки вострепеташа, егда ко Господу шествовал еси, яко знамение победы крест носяще, священномучениче преславный Анатолие.

Тесная узилища и мрачная светом пренебесным озарени быша, егда душа страдальца безвиннаго ко престолу Божию возношашеся, идеже и ныне о мире всем молитвы своя возносит священномученик преславный Анатолий.

Богородичен: Огнезрачнии серафими недоумеют тайну Твою, Богородице, разумети, мы же како по достоянию возможем Тя воспети, обаче, любовию побеждаеми, песни Ти дерзаем возносити, Владычице.

Песнь 9.

Ирмос: Чудо преславное и таинство странное:

Лукавая и нечестивейшая шатания безбожных невозмогоша веру твою сокрушити, Православия адаманте всетвердый, и тщание немощное сокрушися подвигом твоим, темже вся вселенная ти пение приносит.

Исповедниче всепетый веры Православныя, отче досточудне и всехвальне Анатолие, не устрашился еси иногда злобы адския, темже ныне полки демонскии молитвы твоея трепещут и вселенная вся ти пение приносит.

Егоже ради страдания и смерть претерпети сподобился еси, отче Анатолие, Господа Иисуса моли непрестанно со всеми новомученики и исповедники Русскими страну нашу недвижиму во Православии утвердити до скончания века.

Богородичен: Всепречистая Дево Мати Божия, Всемилостивая Владычице и Всепетая, к Твоему притекаем заступлению и Тя усердно молим: страну нашу недвижиму во Православии утвердити до скончания века.

Светилен:

Церкве поборниче всесвятый, Анатолие преславне и богомудре, дерзновенною молитвою твоею умири вся ереси и расколы и на камени веры православныя недвижимы чада твоя утверди, священномучениче отче Анатолие.

Слава, и ныне, праздника:

Явися Спас, благодать и истина:

На хвалитех стихиры праздника 3 и священномученика 3, глас 2.

О вселукавое и безбожное собрание, / о служителие злобы поднебесныя, / нечестивии люди и безбожнейшии, / како дерзнули есте на святителя руце возложити, / или кто настави вас на мучения старца богопросвещеннаго предати, / или коея ярости исполнени бысте, / егда убили есте дивнаго архипастыря, / но сей злобы демонския явился еси посрамитель преславный // и молитвенник всепетый о душах наших.

О безчестие злобы окаянныя, / на благочестие дерзнувшее вооружитися; / о яростное намерение людей безбожных, / возставших на Церковь Православную. / Ныне сии посрамлены суть / и погублени всечестным Крестом Христовым, / егоже, яко меч восприем священномученик Анатолий, / страдании во пренебесныя селения восходит / и является людем православным заступление необоримое // и молитвенник преславный о душах наших.

О всеоружие злобы поднебесныя, / брань воздвигнувшее противу Церкве Божия, / дерзнувшее святыя храмы разорити / и нечестиво убити служителей веры Христовыя. / Ныне разорени быша вся лукавая твоя советования / и Церковь необорима враты адовы красуется, / светло прославляющи единаго от новомученик, / пречуднаго и вседивнаго Анатолия, / той бо явился еси чудотворец изрядный // и молитвенник усердный о душах наших.

Слава, глас 6.

Подобен: Тридневен:

Ликуй ныне, богоспасаемый граде Одессо, / яко лучами солнечными просвещаемый чудотворным образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил-храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему // и всем верою живущим в нем.

И ныне, праздника, глас 8:

Господи, исполнити хотя:

Славословие великое. И отпуст.

На Литургии

Блаженны праздника, Песнь 5.-я и священномученика, Песнь 6-я.

Прокимен, глас 7: Честна пред Господем / смерть преподобных Его.

Стих: Что воздам Господеви о всех, яже воздаде ми.

Апостол ко Евреем, зачало 335.

Евангелие от Иоанна, зачало 36.

Причастен: В память вечную будет праведник, от слуха зла не убоится.

Источник: Текст бденной службы приводится по изданию: Службы Одесским святым. / Под общей редакцией митр. Одесского и Измаильского Агафангела; сост.: архим. Тихон (Василиу), прот. Илия Тетерько, прот. Андрей Николаиди. – Одесса: Издание Одесской духовной семинарии, Астропринт, 2009.

Ме́сяца иануа́рия в 10-й день

преподо́бнаго Анти́пы Валаа́мскаго (Афо́нскаго)

Слу́жба соверша́ется в соедине́нии с попра́зднством Богоявле́ния

На велицей вечерни

Блаже́н муж: 1-й антифо́н. На Го́споди воззва́х: стихи́ры пра́здника 3 и свята́го 5.

Стихи́ры свята́го, глас 4.

Подо́бен: Дал еси́ зна́мение:

Дне́шний пра́здник я́ве/ сугу́бую благода́ть светлоно́сит,/ Креще́ния Спа́сова облиста́емь заря́ми/ и успе́нием преподо́бнаго Анти́пы осиява́емь./ Стеце́мся у́бо, христолюби́вое мно́жество,/ наро́читое торжество́ досто́йно почти́м,/ в не́мже ра́дость нетле́нная подава́ется/ и неоску́дное душ и теле́с врачество́/ песнопою́щим весе́лия вино́вных.

Рожде́нием Крести́теля Иоа́нна/ свяще́нный Заха́рия со Елисаве́тою хва́лится;/ и тобо́ю, преподо́бне Анти́по,/ оте́ц и ма́ти че́сти сподобля́ются,/ я́ко сы́на моли́твы породи́ша/ и плод благоче́стия возрасти́ша./ Ны́не же, прославля́ема тя зря́ще,/ с собо́ром Небе́сных и земны́х/ песнопою́т тебе́, я́ко весе́лия вино́вному.

Я́коже со́лнце тече́ние свое́ соверша́ет,/ и несть и́же укры́ется теплоты́ его́,/ та́ко и ты, преподо́бне Анти́по,/ стезе́ю жи́зни шел еси́,/ све́том любве́ Христо́вой ду́ши просвеща́я,/ моли́твою и сло́вом благода́ти животворя́./ Те́мже, па́мять твою́ благогове́йне чту́ще,/ Молда́вия и Афо́н, и Ру́сская земля́/ ныне песнопою́т тебе́, я́ко весе́лия вино́вному.

Глас то́йже.

Подо́бен: Я́ко до́бля:

Скажи́ мне, Го́споди, путь!/ из глубины́ воззва́л еси́, о́тче Анти́по,/ и, глас боже́ственный восприи́м,/ мир и вся, я́же в нем, оста́вил еси́/ и в пусты́ню Афо́нскую всели́лся еси́,/ Крести́телеву житию́ ревну́я,/ иде́же, от Исто́чника приснотеку́щаго пив,/ благода́ти Свята́го Ду́ха испо́лнился еси́/ и во пло́ти равноа́нгелен показа́лся еси́.

Я́ко благослове́ние Афо́нския горы́/ ты, преподо́бне о́тче Анти́по,/ ко оби́тели Валаа́мстей прише́л еси́,/ я́же не вотще́ Се́верный Афо́н имену́ется,/ и бога́тством неистлева́ющим души́ твоея́/ мона́хом и просты́м послужи́л еси́,/ о́браз Ве́чнаго Бо́га ми́ру явля́я/ и к соверше́нству Его́ устремля́тися призыва́я,/ да не разлучи́мся Блага́го Влады́ки на́шего во ве́ки.

Сла́ва, глас 6:

Све́та Незаходи́маго Ма́ти/ и Пречи́стая Де́ва,/ возлюби́ тя, о́тче Анти́по,/ измла́да чистоту́ возлюби́вша/ и Сы́ну Ея́ ве́рно после́довавша./ Те́мже, зна́менуя благоволе́ние Свое́/ и промышле́ния обеща́ние,/ изображе́ние ли́ка Своего́ тебе́ дарова́;/ его́же благогове́йне храни́л еси́,/ на вся́кий день пе́ние ака́фистное Влады́чице принося́./ Егда́ же успе́ния твоего́ вре́мя наста́,/ ра́дуйся! обы́чно Ей глаго́ля,/ от земны́х к Небе́сным преста́вился еси./ Неве́ста же Неневе́стная/ Свои́м песносло́вцем тя причте́,/ хва́лящим благослове́нное и́мя Ея́ во ве́ки.

И ны́не, пра́здника.

Вход. Прокимен дне. И чтения 3 преподо́бническая.

На лити́и стихи́ры пра́здника и свята́го, глас 8:

Прииди́те, бра́тие,/ просла́вим богоно́снаго отца́ на́шего Анти́пу/ ве́ры истинныя испове́дание чисте́йшее,/ за́поведей Христо́вых хране́ние непоро́чное,/ Боже́ственных восхожде́ний неудобозри́мую высоту́,/ кро́тости и смире́ния тиша́йшую глубину́,/ и́же любо́вию Творцу́ уподо́бися/ и мо́лит Его́ непреста́нно о всех нас.

Сла́ва, глас 1:

О, до́браго твоего́ произволе́ния, блаже́нне Анти́по,/ и́мже путь оте́ческий неукло́нно ше́ствовал еси́,/ послуша́ние нача́льствующим всепоко́рно явля́я,/ посто́м и бде́нием страстны́я вхо́ды загражда́я,/ нището́ю, я́ко по́ясом честны́м, опоясу́яся,/ чистоту́ душе́вную и теле́сную невреди́мо храня́./ Те́мже мона́шествующим о́браз показа́лся еси́/ и всем святы́м соприча́стник.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Ду́ха Свята́го/ оби́тель честна́я/ от младе́нства был еси́,/ преподо́бне Анти́по,/ и чуде́с Его́ мо́ре.

Стих: Честна́ пред Го́сподем/ смерть преподо́бных Его́.

Ве́трилу души́ твоея́/ дыха́нием благода́ти дви́жиму/ вся су́етная преплы́л еси́/ и го́ру Афо́нскую дости́гл еси́,/ сосло́вию и́ноков сочета́вся.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Земля́ Ру́сская,/ я́ко дар Вы́шний тя прия́т,/ ты же сию́ возлюби́л еси́,/ я́ко оте́чество друго́е,/ и на о́строве Валаа́ме всели́лся еси.

Сла́ва, глас 6.

Подо́бен: Все отло́жше:

Смире́ние с по́стническими труды́ соедини́в,/ основа́ние незы́блемое доброде́телем положи́л еси́;/ и, просвети́вся, о́тче Анти́по,/ от самого́ Боже́ственнаго Светозаре́ния,/ Небеса́ отве́рстыя зрел еси́/ и глас Преве́чнаго Сло́ва слы́шал еси́,/ возлю́бленным чадом тя имену́ющь./ Отону́дуже вседе́тельным благоволе́нием Бо́жиим/ наста́вник неле́стный ко спасе́нию яви́лся еси́/ и ча́да мно́га духо́вне породи́л еси́./ И ны́не попече́ния оте́ческаго сподобля́еши/ вся ве́рою и любо́вию к тебе́ притека́ющия.

И ны́не, пра́здника.

Тропа́рь, глас 2:

Боже́ственную благода́ть восприи́м,/ ду́шу твою́ по о́бразу Христо́ву назда́л еси́, о́тче Анти́по;/ десни́цею же Вы́шняго путеводи́мь,/ от горы́ Афо́нския ко оби́тели Валаа́мстей прите́кл еси́/ и мно́гим наста́вник ко спасе́нию яви́лся еси́,/ де́латель изя́щный моли́твы быв/ и слове́с ева́нгельских храни́тель непоро́чный./ Те́мже, Тро́ице Святе́й предстоя́,/ моли́ спасти́ся душа́м на́шим.

Ин тропа́рь, глас 8:

Я́ко свети́льника пресве́тла и моли́твенника те́пла/ яви́ тя оби́тели Валаа́мстей и всем лю́дем Влады́ка Христо́с,/ преподо́бне о́тче наш Анти́по,/ благода́тию бо ста́рчества сия́я,/ в Небе́сныя оби́тели путь нам озаря́еши/ и науча́еши непреста́нно пе́ти Бо́гу: Аллилу́иа.

И ны́не, пра́здника.

На утрени

На Бог Госпо́дь: тропа́рь пра́здника, еди́ножды, и свята́го тропа́рь, глас 2. Сла́ва, ин тропа́рь свята́го. И ны́не, пра́здника.

По 1-м стихосло́вии седа́лен, глас 8:

На святе́й Афо́нстей горе́ и на благослове́нных Валаа́мских острове́х, в пусты́ни, и во о́бщем житии́, и среди́ ми́ра мяте́жнаго непоро́чне пожи́л еси́, о́тче Анти́по. Сего́ ра́ди Бог тя во све́тлости Го́рния прия́т, на земли́ же мо́щи твоя́ нетле́нием и чудесы́ просла́ви, к ни́мже притека́юще, моли́твами твои́ми мно́гая блага́я прие́млем.

Слава, и ныне, праздника.

По 2-м стихосло́вии седа́лен, глас 5:

Ка́плям ро́сным, в ни́хже со́лнце сия́ет, святи́и подо́бни суть, зане́ вся́кой души́ жа́ждущей питие́ живи́тельное предлага́ют, и, Све́том Непристу́пным блиста́ющеся, ко умиле́нию сердца́ приклоня́ют. Те́мже в по́мощь тя, о́тче Анти́по, призыва́ем, да не изсо́хнем зно́ем страсте́й, но просвети́мся, омы́вшеся чи́сте покая́нием.

Слава, и ныне, праздника.

По полиеле́и седа́лен, глас 6:

За́поведи Бо́жия испо́лнил еси́, я́ко Творца́ премно́го возлюби́вый, и, о́ко души́ просвети́в, вои́стину богообра́зен соде́лался еси́, о́тче Анти́по. Те́мже ре́ки Ду́ха Свята́го истеко́ша из чре́ва твоего́, сла́ныя во́ды мо́ря жите́йскаго услажда́ющия и ве́рныя напоя́ющия. Сего́ пития́ боже́ственнаго причаща́тися и нас ми́лостивно сподо́би, да не вжа́ждемся во ве́ки.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Евангелие от Матфе́а, зача́ло 43.

По 50-м псалме́ стихи́ра, глас 6:

Днесь, духо́вно ликовству́юще,/ па́мять твою́, о́тче Анти́по, све́тло пра́зднуем,/ ты бо, земна́го оте́чества стра́нен быв,/ многоразли́чными по́двиги и́ноческими Бо́гу угоди́л еси́./ И, на высоту́ доброде́телей возше́д,/ Оте́чества Небе́снаго дости́гл еси́,/ иде́же, в Тро́йчестем Незаходи́мом Све́те водворя́яся,/ мо́лишися со все́ми святы́ми,/ о е́же ми́ру в ми́ре сохрани́тися/ и спасти́ся душа́м на́шим.

Во оби́тели же Валаа́мстей пое́м си́це:

Днесь, духо́вно ликовству́юще,/ па́мять твою́, о́тче Анти́по, све́тло пра́зднуем,/ ты бо, земна́го оте́чества стра́нен быв,/ многоразли́чными по́двиги и́ноческими Бо́гу угоди́л еси́./ И, на высоту́ доброде́телей возше́д,/ Оте́чества Небе́снаго дости́гл еси́,/ иде́же, в Тро́йчестем Незаходи́мом Све́те водворя́яся,/ мо́лишися с преподо́бными Се́ргием и Ге́рманом,/ о е́же в ми́ре и любви́ сохрани́тися оби́тели на́шей/ и всем лю́дем спасти́ся.

Кано́н пра́здника пе́рвый со ирмосо́м на 8, и свята́го на 6.

Кано́н свята́го, глас 8.

Песнь 1.

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мно́гими содержи́мь напа́стьми, к тебе́ прибега́ю, по́мощи иски́й: о, преподо́бне Анти́по, на путь спасе́ния наста́ви мя.

Моли́твы плод и благоче́стия ты был еси́, о́тче, и Ду́ха Свята́го сосу́д предызбра́нный. Те́мже от младе́нства житие́ свято́е показа́л еси́.

Сла́ва: Спа́сова обетова́ния сбытие́ зрим на тебе́, о́тче, я́ко смертоно́сных змий рука́ми взе́млеши и нас от лю́тых обстоя́ний избавля́еши.

И ны́не: Ма́ти твоя́, преподо́бне Анти́по, без боле́зней тя породи́. Сие́ же в зна́мение бысть, я́ко Христу́ после́дуеши ве́рно, из Де́вы па́че естества́ Возсия́вшему.

Песнь 3.

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Оте́чество твое́, ма́лая весь Калаподе́шти, позна́ тя ю́наго моли́твы рачи́теля и чудесе́м твои́м зело́ удиви́ся.

В ти́хой души́ твое́й, я́ко в поко́йных вода́х, Небеса́ изобрази́шася. Сего́ ра́ди возлюби́ тя Ро́ждшая Нача́льника Тишины́.

Сла́ва: Свет Преми́рный я́ко узре́л еси́, о́тче, всего́ себе́ возложи́ти Бо́гу потща́лся еси́ и соверше́нным житие́м Тому́ угоди́ти.

И ны́не: Е́же ко Христу́ жела́ние твое́ ми́лостивно прии́мши, преподобне, Богоро́дица о́браз Свой Ня́мецкий чу́дно тебе́ яви́, на путь и́ноческий благословля́ющи.

Седа́лен, глас 5:

Я́ко свет от Све́та Пе́рваго, и я́ко ра́дость от Ра́дости Вино́внаго возсия́ нам звезда́ я́сная, Анти́па преподо́бный, и́же во страна́х Молда́вских у́треневав, на горе́ Афо́нстей путь дневны́й соверши́л еси, ве́черу же предвари́вшу, к земли́ Ру́сстей прии́де и во оби́тели Валаа́мстей тече́ние сконча́, в не́йже и опочи́ святоле́пно. И ны́не, в незаходи́мей сла́ве блиста́я, со дерзнове́нием мо́лится о душа́х на́ших.

Сла́ва, и ны́не, пра́здника.

А́ще моле́бное пе́ние, Богоро́дичен, глас то́йже:

О Тебе́, ра́дуются, Благода́тная, святы́х собо́ри;/ и челове́цы гре́шнии, на Тя упова́юще, никогда́же отчаява́ются,/ си́льнаго бо в кре́пости Христа́ ро́ждши,/ ма́терски ми́лость Его́ к нам приклоня́еши.

Песнь 4.

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Страсте́й смуще́ние посто́м и бде́нием уставля́я, па́че же смире́нию и послуша́нию прилежа́, я́коже отцы́ издре́вле запове́даша, и́стинно во́ин Христо́в яви́лся еси́.

Наважде́ния бесо́вская нивочто́же вменя́л еси́, преподо́бне, Кре́стным зна́мением тех побеждая. И нас му́жески стоя́ти проти́ву враг неви́димых укрепи́.

Ни скорбь, ни теснота́, ни озлобле́ния челове́ческая, и́хже терпели́вно поне́сл еси́, не разлучи́ша тя от Сла́дкаго Иису́са, но крепча́е Сему́ совокупи́ша.

Сла́ва: Го́споди Иису́се Христе́, Сы́не Бо́жий, поми́луй мя! Немо́лчно взыва́л еси́, о́тче Анти́по, сна не дава́я твои́м очесе́м, до́ндеже обре́л еси́ Жела́емаго.

И ны́не: На ре́вность твою́ ве́лию по Бо́зе призира́ющи, святе Антипо, Цари́ца Небе́сная во уде́л Свой земны́й, го́ру Афо́нскую, стопы́ твоя́ напра́вити благоизво́ли.

Песнь 5.

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Во о́бщем житии́ тружда́яся, моли́тву непреста́нную я́ко ра́дость се́рдца име́л еси́, о́тче; но, Бо́гом испыту́емь, сея́ до вре́мени лиши́вся, в терпе́нии непоколеби́мь пребы́л еси́.

Безмо́лвнаго жития́ усе́рдно взыска́в, я́ко ратобо́рник иску́сный в пусты́ню Афо́нскую удали́лся еси́, преподо́бне, оте́ческим благослове́нием укрепля́емь.

Сла́ва: Пост вме́сто пи́щи сла́дкия, труды́ и бде́ние вме́сто плотска́го упокое́ния, сле́зы же, я́ко питие́, име́л еси́, о́тче, Христа́ сподви́жника му́жеству твоему́ стяжа́в.

И ны́не: Богома́тери святу́ю ико́ну в пусты́нней ке́лии обре́т, возра́довася зело́, преподо́бне Анти́по, я́коже Саме́й Влады́чице тя сре́тившей и по́мощию не оставля́ти обеща́вшей.

Песнь 6.

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Христо́ви сораспя́вся во́лею, мрак тле́ния и сме́рти си́лою Бо́жиею препобеди́л еси́, о́тче, я́коже души́ твое́й до конца́ просвети́тися и те́лу благода́ти испо́лнитися.

Непоро́чному Бо́гу непоро́чно служа́, Пречи́стых Та́ин священноде́йствитель бы́ти сподо́бился еси́, о́тче, и Хле́бом Жи́зни ста́до Христо́во пита́ти, ми́ру же всему́ спасе́ние хода́тайствовати.

Сла́ва: Ку́плю духо́вную со тща́нием соверши́в, обре́лся еси́, о́тче Анти́по, я́коже кора́бль, нетле́ннаго бога́тства испо́лнь и Вы́шнею Прему́дростию окормля́емь.

И ны́не: Гла́су Бо́жию и отце́в повину́яся, от са́да Богоро́дицы, горы́ Афо́нския, восте́кл еси́, преподо́бне о́тче, в Зе́млю Ру́сскую, в дом Пречи́стыя.

Конда́к, глас 3:

Днесь преподо́бный Анти́па,/ я́коже с на́ми сый, взыва́ет:/ прииди́те, вси, обремене́ннии грехми́,/ очи́стите покая́нием сердца́ ва́ша/ и испо́лнитеся весе́лия неизрече́ннаго,/ во све́те за́поведей Христо́вых ходя́ще/ и пою́ще Бо́га во ве́ки.

И́кос:

Я́ко Бо́жия дуга́ из о́блака восходя́щая от кра́я небесе́ и до кра́я све́тится, заве́т дре́вний утвержда́я, та́ко и ты, преподо́бне Анти́по, доброде́телей многосве́тлыми луча́ми сия́еши, Вы́шнее благоволе́ние ми́ру возвеща́я, я́ко, крести́выйся Христо́с во Иорда́не, пото́п грехо́вный уста́ви, и ны́не вси челове́цы покая́нием спаса́ются, пою́ще Бо́га во ве́ки.

Песнь 7.

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Бо́гу ти поспешеству́ющу, о́тче, оби́тели Валаа́мския дости́гл еси́, я́же честны́м житие́м и́ноческим цветя́ше и до́брый чин во всем имя́ше, игу́меном Дамаскины́м управля́ема.

Се́вернаго Афо́на суро́вую красоту́ возлюби́л еси́, о́тче, и пусты́нную тишину́, моли́твы помо́щницу, и, под кров Скита́ Всесвя́тскаго всели́вся, от дел жите́йских упраздни́лся еси́.

Сла́ва: Свет Непристу́пный Божества́ созерца́я, о вре́менных небре́гл еси́, о́тче, и в нищете́ кра́йней пребыва́л еси́, пи́щу же и питие́ на мно́ги дни не вкуша́л еси́, а́ки безпло́тен.

И ны́не: Еди́но сокро́вище име́л еси́ на земли́, преподо́бне, ико́ну Богоро́дицы, ю́же в пусты́ни Афо́нстей обре́л еси́ иногда́, и сия́ обнови́ся чу́дно и мно́гая пресла́вная чудеса соде́ла.

Песнь 8.

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Соверше́нным, я́ко соверше́н сый, сподви́жник и собесе́дник чу́дный был еси́, о́тче, ученико́м же твои́м наста́вник прему́дрый, и всем ко спасе́нию поспе́шник.

Ле́гкий наш ум в серде́чную клеть потщи́мся улови́ти, о, бра́тие, – глаго́ла преподо́бный, – де́ло сие́ многотру́дно есть и терпе́нием стяжава́ется.

Благослови́м Отца́ и Сы́на и Свята́го Ду́ха Го́спода: Суете́ мирсте́й да не порабо́тимся, о, по́стницы, – блаже́нный ста́рец рече́, – жи́тельство бо и́нока во святе́м хра́ме есть, и де́лание его́ моли́тва у́мная, Боже́ственным раче́нием воскриля́емая.

И ны́не: Богоро́дице, я́ко Ма́тери, прилепи́мся, возлю́бленнии, – па́ки рече́ святы́й, – день от дне хвалу́ ака́фистную Ей принося́ще. Она́ же путь наш земны́й упра́вит и от сме́рти внеза́пныя сохрани́т.

Песнь 9.

Ирмо́с: Вои́стину Богоро́дицу/ Тя́ испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя́ велича́юще.

От духо́внаго стяжа́ния твоего́, я́ко от трудо́в пчелы́, и́ноцы и мирсти́и сла́дость цели́тельную душа́м почерпа́ху и тя, отца́ и па́стыря до́браго, сла́вляху.

Све́тло житие́ твое́ бысть, преподо́бне, и успе́ние пресве́тло, в ра́дость бо несконча́емую и поко́й досто́йно вшел еси́, Ма́терь Све́та воспева́я боголе́пно.

А́ще и в Небе́сных кро́вех живе́ши ны́не, но ве́мы, я́ко любо́вию твое́ю весь мир объе́млеши и пред Бо́гом заступа́еши. Сего́ ра́ди со упова́нием тя призыва́ем.

Сла́ва: Па́мять твою́ ны́не соверша́ющих нас, о́тче, благослови́ и свя́то жи́ти укрепи́, в час же сме́ртный помо́щник нам бу́ди.

И ны́не: К Де́ве Богоро́дице, Ея́же избра́нник и таи́нник яви́лся еси́, преподо́бне, ру́це о нас воздежи́, да с тобо́ю, яко ча́да со отце́м, Жизнь Ве́чную насле́дити сподо́бимся.

Свети́лен, глас 3:

Плотски́я стра́сти и мудрова́ние отложи́в, я́ко зерца́ло чи́стое о́браз Созда́теля твоего́ запечатле́л еси́ и, весь светоза́рен быв, нача́льника тьмы низложи́л еси́, о́тче Анти́по, ми́ру свети́льниче и пред Бо́гом наш теплый засту́пниче.

Слава, и ныне, праздника.

На хвали́тех стихи́ры, глас 1.

Подо́бен: Прехва́льнии му́ченицы:

Ми́лостив и кро́ток, и се́рдцем чист/ был еси́, преподо́бне Анти́по,/ сего́ ра́ди зми́и лю́тыя тя слу́шаху/ и челове́цы зли́и на покая́ние обраща́хуся,/ о́браз Созда́теля в тебе́ познава́юще,/ де́мони же лица́ твоего́ бе́гаху,/ огне́м благода́ти боже́ственныя опаляемии.

Не́бо у́мное душа́ твоя́ показа́ся,/ в не́йже Христо́с, я́ко со́лнце полу́денное,/ вся́кую тьму дале́че отгна́/ и свет Богове́дения возсия́./ Те́мже благоле́пию твоему́, о́тче Анти́по,/ А́нгели удиви́шася и Творца́ просла́виша,/ та́ко возвели́чившаго естество́ челове́ческое.

Кри́ны се́льныя одева́ет Бог,/ я́коже ни Соломо́ну пред ни́ми хвали́тися,/ кольми́ па́че украша́ет преподо́бных Свои́х,/ облека́я ри́зами нетле́ния./ Сего́ ра́ди успе́ние твое́, о́тче Анти́по,/ све́тлостию воскресе́ния блиста́ет/ и ра́дости исполня́ет ду́ши на́ша.

Сла́ва, глас 6.

Подо́бен: А́нгельския:

А́нгельски/ во пло́ти пожи́л еси́/ и ко А́нгельским лико́м/ ны́не возше́л еси́,/ о́тче Анти́по,/ до́брый наш па́стырю./ Не оста́ви, и́хже возлюби́л еси́,/ но при́сно хода́тайствуй/ к Царю́ Небе́сному/ мир пода́ти/ душа́м на́шим.

И ны́не, пра́здника.

Славосло́вие вели́кое. Ектении́ и отпу́ст.

На Литургии

Блаже́нны пра́здника Песнь 5.-я на 4, и свята́го Песнь 6.-я на 4. Проки́мен, Апо́стол, Аллилуа́рий, Ева́нгелие пра́здника. И свята́го проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́иа, глас 6: Блаже́н муж, боя́йся Го́спода,/ в за́поведех Его́ восхо́щет зело́. Ева́нгелие от Луки́, зача́ло 24. Прича́стен: пра́здника и святаго: В па́мять ве́чную бу́дет пра́ведник.

Моли́тва

О, честна́я и свяще́нная главо́, преподо́бне о́тче наш Анти́по, Ду́ха Свята́го кра́сное жили́ще, Це́ркве Правосла́вныя многопе́сненная похвало́! К тебе́ ны́не притека́ем и тебе́ мо́лимся, я́ко ве́лие дерзнове́ние пред Бо́гом стяжа́вшу: умоли́ Его́ благосты́ню, да не погуби́т нас со беззако́ньми на́шими, но вре́мя на покая́ние да́рует и благода́ть, ко спасе́нию поспешеству́ющую. А́ще бо и ве́мы пра́выя пути́, оба́че не́мощни зело́ те́ми ходи́ти и мно́гаго милосе́рдия Бо́жия и по́мощи тре́буем. Ты же, о́тче святы́й, прелюбе́зен Творцу́ яви́лся еси́, от ю́ности неукло́нно к Нему́ ше́ствуя. Не послужи́л бо еси́ пре́лести ми́ра сего́, но всю си́лу души́ твоея́ к Ве́чному устреми́л еси́, ско́рби и тесноты́ вре́меннаго жития́ му́жественне претерпева́я, наипа́че же во́льныя по́двиги к тем прилага́я.

О, вели́кия твоея́ любве́, ю́же я́ко дар Христу́ прине́сл еси́, и тоя́ ра́ди соверше́нныя да́ры духо́вныя от Него́ прия́л еси́! О, вели́какого смире́ния твоего́, и́мже вся блага́я души́ твоея́ невреди́мо сохрани́л еси́ и смири́вшемуся нас ра́ди Го́споду уподо́бился еси́! Те́мже, не я́ко раб, но я́ко сын возлю́блен, вшел еси́ в ра́дость Небе́снаго Отца́. И ны́не ра́дуются о тебе́ А́нгели и вси святи́и, купножи́теля тя иму́ще; весели́тся страна́ Молда́вская, тя произрасти́вшая; хва́лится гора́ Афо́нская, в му́жа соверше́на тя воспита́вшая; Земля́ Ру́сская, я́ко ма́терь втора́я, любо́вию тя прославля́ет; изря́дно же торжеству́ет оби́тель Валаа́мская, верх доброде́тельнаго жития́ твоего́ узре́вшая и ны́не мо́щи твоя́ нетле́нныя благогове́йне храня́щая. Оба́че и вси лю́дие в па́мяти твое́й ликовству́ют, такова́го засту́пника пред Бо́гом стяжа́вше. Ты же, о́тче святы́й, не преста́й посеща́ти чад твои́х, но к Ца́рствию Небе́сному путево́дствуй, да, моли́твами твои́ми, ча́сти шу́ия изба́вльшеся, Невече́рний Свет Триипоста́снаго Божества́ сподо́бимся зре́ти и во ве́ки прославля́ти Отца́ и Сы́на и Свята́го Ду́ха. Ами́нь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

Господи, воззвах, глас 8-й:

Радуйся, пастырю Христов Иоанне,/ ты бо горния силы мучением своим возвеселил еси,/ нам же на земли праздник добропобеднаго твоего преставления даровал еси,/ в немже страдания твоя прославляюще,/ яже за Церковь Божию претерпел еси,/ славословим Христа, Бога нашего,/ даровавшаго нам ходатая и молитвенника о душах наших.

Радуйся, страстотерпче Христов Иоанне!/ Ты бо кровию твоею честною землю нашу освятил еси,/ и венец нетленный от руки Господней приял еси,/ не от камений честных украшен,/ но твоею кровию прозябен./ Темже молися Христу Богу/ даровати душам нашим мир и велию милость.

Радуйся, священномучениче Иоанне,/ иже во времена гонений лютых/ от безбожников неповинно убиенный,/ за распятаго и воскресшаго Христа,/ и ныне росы небесныя наслаждающийся,/ и благоухания рая исполняющийся,/ и лицезрения божественныя доброты насыщающийся;/ темже моли Спаса нашего умирити мир и спасти души наша.

Слава, глас 6-й:

Страстотерпче новый,/ священномучениче Иоанне,/ во граде Валга смерть за Христа претерпевый,/ тя бо яви Господь предстателя о пастве земли Эстонския,/ поминай нас, чтущих святую память твою,/ да избавимся бед и скорбей молитвами твоими.

И ныне, богородичен.

Тропарь сщмч. Иоанну, пресвитеру, в Валге пострадавшему.

Глас 4-й:

Благодать иерейства от руки священномученика восприял еси/ и по триех месяцех служения кровь свою за Христа пролиял еси,/ страстотерпче отче Иоанне,/ во граде Валга неповинно убиенный,/ якоже и архипастырь твой жертвою непорочною оказался еси,/ молися Христу Богу нашему,/ да спасет души наша, яко милосерд.

Слава и ныне, богородичен.

Канон, глас 6-й.

Песнь 1.

На степень священства в годину лютую возшел еси, священномучениче Иоанне, отложивши боязливость и маловерие, и прият сердцеведец Господь дерзновение твое, вселив тя во обители радости нескончаемыя.

Скончал еси житие твое мученически, пастырю Иоанне, жребия высокаго от Господа удостоившись, и пребываеши ныне тамо, отонудуже отбеже всякая болезнь, печаль и воздыхание.

Пострадал еси на земли вмале, узы неправедные и убиение от безбожников претерпев, и наследовал еси за горечь кратковременную блаженство неизреченное и веселие вечное.

Богородичен: Украшена добротою чистоты, Дево Мати, добротворнаго благолепия жилище бывши: темже Тя поем и превозносим, Чистую, во вся веки.

Песнь 3.

Служитель престола Божия славный, ризы кровию своею украсивый и благодать священства мученичеством умноживый, страстотерпче Иоанне, молися Господеви о почитающих святую память твою.

Лику мученическому сопричисленный, жертвою непорочною явился еси, святе Иоанне, буди молитвенник теплый и предстатель непостыдный о душах наших.

За веру Православную и Церковь Божию от безбожников убиенный, чаше Гефсиманстей приобщивыйся, един от великаго сонма страдальцев Господних явивыйся, не забуди паствы твоея, священномучениче преславный.

Богородичен: Яко врата, вводящая к божественному входу, яко добровосходную лествицу Божию, яко спасающимся незаблудную Наставницу, обрадованную воспоим Деву Марию.

Седален.

Скончал еси житие твое мученически, убиен быв Истины ради, Еяже служителем яви тя Господь. Ни единыя вины обретше противу тя гонители твои, токмо риз пастырских ради злобу свою излиявши на тя, не терпяще самаго имене Христова. Ты же, яко агнец незлобив, кротко вся претерпел еси и достоинства иерейскаго ничимже посрамил еси.

Песнь 4.

Аще не сан твой иерейский, священномученниче Иоанне, не бы убиен был еси от руки гонителей Церкве Христовы. Темже поминай нас у престола Божия пастырскою твоею молитвою.

Хиротонию от священномученика Платона восприял еси, отче Иоанне, и ныне вкупе с ним и прочими новомученики ходатайствуеши о роде нашем. Сего ради ублажаем тя и почитаем священную память твою.

По триех месяцех служения твоего восхищен был еси от многомятежнаго мира сего, пастырю наш Иоанне, испроси и нам, грешным, у великодаровитаго Бога безбедно преплыти житейскаго моря пучину и достигнути тихаго пристанища спасения.

Богородичен: Закона сени преидоша рождеством Твоим, истина возсия, благодать даровася, Богородице: темже Тя величаем.

Песнь 5.

Освятися град Валга мученическою кровию твоею, священномучениче Иоанне, сего ради наполнишася души наша радостию и веселием, яко дарова нам Господь молитвенника во утешение и спасение душ наших.

Ни единыя вины обрете в тебе истязатели твои, отче наш Иоанне, обаче убиен бысть от них креста ради Христова, егоже на персех своих носил еси. Сего ради почитаем святую память твою.

Ныне возвеселися град Валга и вся земля Эстонская в памяти твоей, Иоанне страстотерпче: приял еси жребий высокий, убиен быв за веру Христову, сего ради во веки ублажаешися.

Богородичен: С мученики, Чистая, с божественнымии пророки и со всеми ангелы, Зиждителя всех моли спасти верою Тя славящих и величающих.

Песнь 6.

Се простер тебе Христос победы венец, страстотерпче отче Иоанне, егда убиваху тя гонители Церкве Христовой. Промыслом бо Его, избежавши многих скорбей земнаго пути, удостоился еси вселения со всеми святымми.

Звезда малая явился еси, лучами мученичества сердца верных просвещая, темже ныне со ангелы водворяяся, спасай нас молитвами твоими, совершающих честную память твою.

В спасительную одежду, прехвальне Иоанне, божественнаго веселия одеявся, мученичества венец от Бога приял еси, честная града Валга и земли Эстонския похвало.

Богородичен: Леностию жизнь мою иждив, Пречистая, к Твоему притекаю заступленнию, ущедривши, спаси мя.

Кондак, глас 3-й.

Страстотерпче отче Иоанне,/ служителю Церкве Христовой,/ кровию своею землю нашу освятивый,/ Богови принесеся, яко жертва непорочная,/ заклан был еси за имя Спасово,/ во утверждение веры православныя,/ во еже выну просвещатися нам светом евангельским.

Песнь 7.

Ныне град Валга хвалится, яко дарова Господь утешение малому стаду Своему, молитвенника, на небесех живущаго и на земли во останках честных почивающаго.

Единому Владыце Христу на земли работати возжелел еси, блаженне Иоанне, в годину лютую пастырский крест восприим , сего ради возмездие от Бога восприял еси, еже на небесех жительствовати со ангелы вкупе и со святыми.

Утешение в скорбех своих вем тя, Иоанне священномучениче, сего ради в памяти твоей к предстательству твоему прибегох, да не презриши мя окаяннаго, требующа твоея помощи.

Богородичен: Небесная врата воспоем Богородицу, имиже входят вси грешнии ко входом прощения.

Песнь 8.

Христову престолу предстоя, священномучениче, не престай молитися о стаде твоем и о всех, с верою притекающих к тебе, да молитвами твоими получим спасение и от всяких бед и скорбей избавление.

Кто изочтет премудрость Божию или кто уразумеет непостижимыя пути Его? Недоумением объяти, зрим бо днесь пастыря Иоанна, по триех месяцех служения гонителями убиеннаго и ныне в лике святых водворившагося.

Во благоговении и умилении сердец взирающе на кончину твою, отче Иоанне, в молчании помыслов совершаем священную память твою.

Богородичен: Святая Мати Божия, оскверненное сердце мое деяянии нечистыми молитвами Твоими очисти.

Песнь 9.

Шествия и стези твоя направишася ко Христу, всех Богу и Господу, Емуже в руце дух твой предал еси, мучениче страстоносче Иоанне блаженне.

Яви тя Господь, пастырю Иоанне, единаго от новомученик, иже в последняя лета ко Христу кровьми своими пришедших и ныне на небесех молящихся о спасении душ наших.

И ты, земле Эстонская, ничимже меньше еси прочих стран православных, в тебе бо просия сонм угодников Божиих, из нихже священномученик Иоанн, во граде Валга пострадавший, ныне нами достойно ублажается.

Богородичен: Просвети мя омраченнаго грехи, безстрастия Свет рождшая: яко да пою Тя, чистая Приснодево.

Источник: сайт храма новомучеников и исповедников Российских в Строгино

Составитель: игумен Нестор (Кумыш)

Стихиры на Господи воззвах, глас 4-й:

Отрасль пречестная земли Владимирския,/ пастырь столицы брегов Невских,/ учитель трудолюбный закона Божия,/ молитвенниче усердный Царицы Небесныя,/ священномучениче Петре,/ кровь свою за Христа во граде нашем пролиял еси,/ сего ради почитаем и ублажаем память твою.

Хулителей веры не убоялся еси,/ голос свой пастрыский в защиту народных святынь возвысил еси,/ и гонителей Церкве бесстрашно обличил еси,/ люди церковныя от насилия тех избавити хотя,/ и абие, яко спелый клас, пожат был еси,/ яко жертва непорочная,/ принесеся Господеви чистая и пламенная душа твоя,/ освятившая светом любве Божия сердца нас, поющих тя.

«Всех скорбящих Радосте и обидимых Заступнице»/ сице взывал еси Пресвятей Деве, Богоматере,/ пред пречистою и чудотворною Ея иконою./ И ныне, молим тя, отче наш Петре,/ не забуди нас, с любовию творящих честную память твою,/ но вознеси о нас молитвы твоя Владычице мира,/ да помилует и спасет люди Своя,/ мирови мир ниспошлет и душам нашим велию милость.

Слава и ныне, богородичен.

Тропарь, глас 5-й:

Пастырю добрый града нашего,/ апостолу верховному тезоименитый,/ Господеви ревностно и благоговейно служивый,/ свыше от Бога бесстрашие духа приим,/ кровию своею лавру Невскую освятивый,/ священномучениче Петре,/ моли Христа Бога/ спастися душам нашим.

Канон

Песнь 1.

Колесницегонителя фараоня погрузи, чудотворяй иногда, Моисейский жезл, крестообразно поразив, и разделив море: Израиля же беглеца пешеходца спасе, песнь Богови воспевающа.

Един из первых приявый жребий новомученический, святе Петре, един из первых сердца верных дерзновением своим утвердивый, молися Христу Богу нашему, да укрепит и нас в вере православной, к славословию твоему тщащихся.

Образ бесстрашнаго исповедания имени Господня явил еси нам, отче наш Петре, образ истиннаго ревнования о правде Христовой, буди ходатай и предстатель о душах наших, яко и нам утвердитися неколебимо в любви Божией.

Лавра Невская освятися кровию твоею честною, мучениче Петре. Взирающе на кончину твою, прославляем Христа Бога нашего и веселия духовнаго исполняемся, творяще память твою, пастырю дивный града нашего.

Богородичен: Преславная о Тебе глаголашеся в роде родов, яже Бога Слова во чреве вместивши, чиста же пребываеши, Богородице Мария. Тем Тя вси чествуем, по Бозе предстательство наше.

Песнь 3.

Небеснаго круга Верхотворче, Господи, и Церкве зиждителю, Ты мене утверди в любви Твоей, желаний краю, верных утверждение, Едине Человеколюбче.

В годину лютую и посреде гонений беспримерных ревности Илииной подражая, отче Петре, обличил еси безумие хулителей дерзких, нивочтоже вменяя страх человеческий, сего ради во веки ублажаешися.

Поборниче веры православныя, людей церковных защитителю, подражал еси в житии твоем святителю Христову Николаю, сего ради улучил еси кончину мученическую, еюже наследовал еси Царство Небесное.

Долг христианский исполняя, сына своего, преграждавшаго ти путь к пролитию крове, отстранил еси, исполнив заповедь Христову: «иже любит чадо свое паче Мене, несть Мене достоин».

Богородичен: Яко небо и престол Тя Божий, воспеваем вси, Богородительнице Чистая, яко из Тебе явися Иисус Христос Истина.

Седален

Яко проповедь последняя стаду твоему, яко прощальное назидание в вере, яко завещание пребывати даже до крове во Истине отзвучала есть во стенах обители Невския честная кончина твоя, Петре священномучениче, молися о нас Христу Богу, да пребудем до самаго исхода нашего в поучении твоем.

Слава и ныне, богородичен.

Божественная скиния была еси Слова, Едина Пречистая Мати Дево, чистотою ангелы превозшедшая, паче всех мене персть бывша, осквернена плотскими прегрешеньми, очисти молитва Твоих божественными водами, подающи, Чистая, велию милость.

Песнь 4.

Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе твоей слава, Человеколюбче.

Радуйся, земле Петербургская, имущи честныя останки священномученика Петра, веселися и ты, лавра Александро-Невская, яко ты еси место подвига новаго угодника Божия, освятившаго люди правоверныя сиянием любви Христовой.

От святителя Вениамина на смертном одре благословение приим, преселился еси от жизни временней в живот вечный, идеже едина правда Божия живет, поминай нас, совершающих святую память твою, яко и нам вышния славы улучити.

«За веру и Церковь Православную убиенный» – тако молися о тебе святитель и исповедник патриарх Тихон. Имея душу светлую и непорочную, священномучениче Петре, удостоился еси от Господа великия чести быти убиенным за Христа.

Богородичен: Безневестная Дево, и Чистая и нескверная Мати Христа Бога, Того непрестанно моли, спасти души поющих Тя.

Песнь 5.

Вскую мя отринул еси, от Лица Твоего, Свете незаходимый; и покрыла мя есть чуждая тьма окаяннаго. Но обрати мя и к свету заповедей Твоих, пути моя направи, молюся.

Со всеми новомученики Российскими предстоиши ныне пред престолом Божиим, святе Петре, молися Господеви утвердитися стране и граду нашему исповеданием веры истинныя.

Чудотворней иконе Богоматере служение прилежно в житии твоем совершая, чистотою и благоговением исполнился еси, пастырю Петре, моли избравшую тя Царицу Небесную, удостоитися милостей от Нея и нам, неключимым рабом Ея.

Провидя благолепие души твоея, отче наш Петре, изнесе тя Господь, яко свещу возженную, на средину храмины и постави тя на свещнице церковнаго почитания, в просвещение людем христоименитым.

Богородичен: Яко Царицу вси и Царя всех рождшую, приидите со ангелом Благословенную почтим.

Песнь 6.

Очисти мя, Спасе, многа бо беззакония моя, и из глубины зол возведи, молюся: к тебе бо возопих, и услыши мя, Боже спсения моего.

Не оскуде никогда же земля наша верою и благочестием, се и в последняя времена, якоже и в первыя, украсилася есть святыми, живот свой за Христа и ближних положившими, ихже яви премудрость Божия во дни смуты великия.

«Любы никогдаже отпадет», – тако помышлял еси на всяк день в сердце твоем, священномучениче Петре. Сею любовию вдохновленный, в последний день жития твоего к месту своего убиения безбоязненно шествовал еси.

Утешал еси в жизни временней души страждущих и грехми обремененных, ихже Владычица мира чудотворною иконою к Себе привлекаша. Уврачуй убо, пастырю добрый, скорби и недуги наша, елеем святых молитв твоих.

Богородичен: Быхом общницы Божественному естеству, Пречистая, божественным рождеством Твоим: и покой небесный со ангельскими чинми Тя восхваляющими, во Христе наследовахом.

Кондак, глас 8-й:

Яко избранника Владычицы нашея Богородицы/ и прилежнаго служителя чудотворнаго Ея образа, просиявшаго во граде на Неве,/ яко дерзновеннаго предстателя о людех православных,/ живот свой за ближних положившаго,/ почитаем тя, священномучениче Петре,/ ты бо еси Церкве нашея преславное украшение.

Песнь 7.

Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси Боже отец наших.

Во дни пришедшаго на ны гнева Божия не пощаде Господь многия святыни Своя, обаче не до конца прогневася Бог на люди Своя, но яви нам новых угодников Своих и изведе из-под спуда, яко некое сокровище, честныя мощи их, ради верных раб Своих.

Неугасимая лампада бысть возжжена на месте упокоения твоего, святе Петре, светящая во мраке нощи неверия и отступления, и тьма безбожия не объят ю, яко да светит всем хотящим ходити в законе Господнем.

Почитающи святую память твою, отче наш Петре, прославляем Бога нашего, даровавшаго нам утешение велие прибегати к тебе несумненною душею во всех обстояниих и печалех жизни нашея.

Богородичен: Се ныне исполнися богоглаголиваго проречение: во утробе бо, Дево, Бога Слова имела еси, и родила еси Жизнодавца, Емуже вси зовем: блгаословен Бог отец наших.

Песнь 8.

Седмерицею пещь халдейский мучитель, богочестивым неистовно разжже, силою же лучшею, спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.

Сонм новомученик Российских сияет в небесах светом велиим, в немже и ты, мучениче Петре, живот свой за други и Христа положивый, блистаешь, яко камень драгий, лучами благодати Божией.

Благодать Господня осия тя, егда вшел еси в лавру Невскую, в нейже хулители веры бесчинства творяху, и незримо руководяше послушную душу твою к подвигу мученическому.

Почи на главе твоей Дух Свят, отче Петре, и дерзновенна и небоязненна сотвори тя пред лицем гонителей и осквернителей Церкве Христовой, и введе тя в живот вечный, идеже ныне со всеми святыми веселишися.

Богородичен: Одожди ми, Пречистая, грехов оставление, посети мя немощствующа и влаема напастьми житейскими и страстьми телесными.

Песнь 9.

Ужасеся о сем небо и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу ангелов и человек чиноначалия величают.

Не со оружием и дрекольми изшел еси на супостаты, но с пламенною верою и упованием на Бога Жива, Иже тя сотвори мученика и новаго ходатая о душах наших.

Красен путь твой, новомучениче Петре, имже шествовал еси к венцу небесному, светла победа, юже дарова ти Господь на убивавших тя, в бегство обратившихся с места убиения твоего.

Егда порази тя рука безбожных, высшим спокойствием просия лик твой, во уверение людей церковных, яко в пролитии крове своея предначертание Божие добре исполнил еси.

Богородичен: Радуйся, присноживотный источниче нетления, радуйся, всесветлый Облаче Солнца мысленнаго; радуйся, носило Божества всего: радуйся, Ковчеже священия.

Источник: Живой Журнал. Уставщик

Составитель: игумен Нестор (Кумыш)

Месяца января в 25-й день

Преподобнаго Анатолия Оптинскаго, Старшаго

На ма́лой вече́рни

На Го́споди, воззвáх: стихи́ры, глaс 4:

От ю́ности во стра́се Бо́жием воспита́нный,/ о́тче Анато́лие преподо́бне,/ все́ю душе́ю го́рняго возжеле́л еси́/ и, роди́тели твои́ми на по́двиг и́ноческий благослове́нный,/ во оби́тель О́птинскую всели́лся еси́,/ в не́йже, ре́вностно подвиза́яся,/ ве́лия дарова́ния от Го́спода прия́л еси́/ и вои́стину зерца́ло благоче́стия яви́лся еси́./ Те́мже в доброде́тели и нас укрепи́// и моли́ спасти́ся душа́м на́шим.

Преподо́бным Мака́рием му́дре наставля́емь,/ богоизбра́нне о́тче Анато́лие,/ ду́шу твою́, я́ко зла́то в горни́ле, от страсте́й очи́стил еси́/ и, доброде́телей и́ноческих высоту́ показу́я,/ послуша́нием и смире́нием украси́лся еси́/ и, я́ко крин кра́сный, в О́птинстей пу́стыни процве́л еси́./ Те́мже со дерзнове́нием к тебе́ вопие́м:/ дух покая́ния нам испроси́// и не преста́й моли́тися о душа́х на́ших.

Послуша́ние от ста́рца Амвро́сия прие́мый,/ Ша́мординския оби́тели насе́льницы духо́вно окормля́ти,/ блаже́нне о́тче Анато́лие,/ му́дрый наста́вник тем яви́лся еси́/ и, я́ко лю́бящий оте́ц, сло́вом и житие́м назида́я,/ неразу́мныя же де́вы от сна грехо́внаго пробужда́я,/ кро́тце вся во Ца́рствие Небе́сное упра́вил еси́./ Те́мже и нас на путь спасе́ния наста́ви// и не преста́й моли́тися о душа́х на́ших.

Сла́ва, глaс 5:

Святи́телю Григо́рию Богосло́ву подо́бяся,/ преподо́бне о́тче Анато́лие,/ изде́тска доброде́тельное житие́ возлюби́л еси́/ и, словесы́ того́ па́че, не́жели бра́шном, насыща́яся,/ благоче́стие и чистоту́ восприя́л еси́/ и, ве́ру пра́вую трубо́ю покая́ния возпропове́дав,/ в любви́ ко Пресвяте́й Тро́ице возра́сл еси́,/ те́мже и преставле́ния с ним во еди́н день сподо́бися./ Ны́не же, вку́пе Престо́лу Божества́ Трисия́ннаго предстоя́ще,/ моли́теся о нас, достоблаже́ннии отцы́,/ па́мять ва́шу любо́вию почита́ющих,// е́же спасти́ся душа́м на́шим.

И ны́не, Богоро́дичен: В Чермне́м мори́:

На стихо́вне стихи́ры, глас 1.

Подо́бен: Небе́сных чино́в:

Небе́снаго гра́да ра́дование/ и оби́тели Введе́нския ликова́ние,/ преподо́бне о́тче Анато́лие,/ ны́не к тебе́ в ско́рби прибега́ющих/ ра́дости духо́вныя испо́лни,// я́ко те́плый и ди́вный пред Бо́гом предста́тель.

Стих: Честна́ пред Го́сподем// смерть преподо́бных Его́.

Любо́вию оте́ческою украша́емый,/ свет Христо́в вои́стину стяжа́л еси́,/ о́тче Анато́лие преблаже́нне,/ и́мже путь духо́вный освеща́я,/ ду́ши мно́гия и́стинно просвети́л еси́.// Те́мже моли́ о спасе́нии тя почита́ющих.

Стих: Блаже́н муж, боя́йся Го́спода,// в за́поведех Его́ восхо́щет зело́.

Трудолю́бие и послуша́ние явля́я,/ высоты́ мона́шескаго жития́ дости́гл еси́,/ о́тче богоприя́тне Анато́лие,/ те́мже чу́дный дар от Го́спода прия́л еси́,/ словесы́ твои́ми скорбя́щих утеша́ти// и моли́тися о душа́х на́ших.

Сла́ва, глaс 6:

Днесь пу́стынь О́птинская/ цвет духо́вный нам прино́сит,/ и́же в раи́ Бо́гом насажде́нный,/ чи́стаго житие́м и по́двигом высо́каго,/ преподо́бнаго ста́рца на́шего Анато́лия,// глубину́ смире́ния и му́дрости сокро́вище.

И ны́не, Богоро́дичен: Творе́ц и Изба́витель мой, Пречи́стая:

Тропа́рь зри на вели́цей вече́рни.

На вели́цей вече́рни

Блаже́н муж: 1-й антифо́н. На Го́споди, воззвáх: стихи́ры, глас 4:

Трисо́лнечный свет в ду́шу твою́ восприе́м/ и Боже́ственными светлостьми́ озари́вся,/ я́ко пресве́тлая звезда́ в Це́ркви Ру́сской возсия́л еси́/ и, высоча́йший путь у́мнаго де́лания указу́я,/ мона́шествующим свети́льник яви́лся еси́,/ о́тче наш Анато́лие,/ те́мже све́тло па́мять твою́ пра́зднующих// изведи́ из темни́цы прегреше́ний.

Пла́менное и чи́стое е́же к Бо́гу жела́ние име́в/ и о́чи мы́сленныя моли́твою непреста́нною твое́ю просвети́в,/ богоно́се о́тче Анато́лие,/ по́лчища де́монская вспять обрати́л еси́/ и а́нгельское житие́ на земли́ яви́л еси́./ Ны́не же, Престо́лу Бо́жию с ли́ки преподо́бных предстоя́,/ помина́й нас, чту́щих святу́ю па́мять твою́,// да обря́щем ми́лость в день пра́веднаго воздая́ния.

А́нгельскаго жития́ взыску́я,/ а́нгельски на земли́ пожи́л еси́,/ те́мже и вели́кий па́стырь Кроншта́дтский,/ у престо́ла сослужа́ща посреде́ А́нгел тя узре́,/ ны́не же Престо́лу Влады́чню со А́нгелы предстоя́,/ моли́ся о нас, о́тче Анато́лие,/ па́мять твою́ святоле́пно соверша́ющих,// да моли́твами твои́ми ра́йския жи́зни сподо́бимся.

О́бразе и́стиннаго послуша́ния/ и ста́рчества све́тлое зерца́ло,/ моли́твенниче Анато́лие преподо́бне,/ в се́рдце Всесвято́е и́мя Иису́сово прии́м,/ вся стра́сти тернообра́зныя искорени́л еси́/ и, сла́дости моли́твы наслади́вся,/ всего́ себе́ в жили́ще Бо́гу угото́вал еси́./ Его́же моли́ от тли и бед изба́витися// соверша́ющим всечестну́ю па́мять твою́.

Сла́ва, глaс 8:

Послуша́ния ревни́телю/ и смире́ния пропове́дниче,/ путь земны́й всече́стно соверши́в,/ цветни́к О́птинский досто́йно украси́л еси́/ и, оби́льно благода́ть всем источа́яй,/ сосу́д Свята́го Ду́ха яви́лся еси́./ О блаже́нне Анато́лие,/ ны́не на Небеси́ со святы́ми пребыва́я,/ не оста́ви и́же на земли́ к тебе́ прибега́ющих// и святу́ю па́мять све́тло соверша́ющих.

И ны́не, Богоро́дичен, глас то́йже.

Вход. Проки́мен дне. И чте́ния три преподо́бническая.

На лити́и стихи́ра хра́ма.

И преподо́бнаго стихи́ры, глас 6:

У́мною моли́твою/ Триипоста́снаго Бо́га воспе́л еси́:/ Го́спода, я́ко Отца́ Безнача́льна,/ Иису́са, Собезнача́льное Сло́во Его́,/ и Ду́ха Свята́го, жи́зни Пода́теля Ми́лостива,/ Собезнача́льна и Сопресто́льна Отцу́ и Сы́ну,/ всем подаю́ща грехо́в проще́ние,/ в покая́нии зову́щим:// Тро́ице Свята́я, поми́луй нас.

Трисо́лнечным Све́том озаре́н,/ треми́ вели́кими луча́ми доброде́телей возсия́л еси́:/ смире́нием, послуша́нием и моли́твою непреста́нною,/ и, те́ми светово́дствуя,/ и́ночествующих сосло́вия на стези́ покая́ния наставля́л еси́,/ те́мже тя, я́ко подви́жника всеизря́дна,/ воспева́ем, Анато́лие преподо́бне,// ста́рцев О́птинских превели́кая сла́во.

Глaс 4:

Вся ми́ра кра́сная отве́ргл еси́/ блага́го и́га Христо́ва ра́ди/ и, верх доброде́телей показу́я,/ яви́лся еси́ о́браз целому́дрия и послуша́ния,/ терпе́ния, смире́ния и кро́тости,/ те́мже труды́ мно́гия и боле́зни,/ я́ко бре́мя ле́гкое, нося́,/ преподо́бне в оби́тели О́птинстей пожи́л еси́,/ иде́же и поко́й души́ твоея́ в селе́ниих ве́чных обре́л еси́./ Ны́не же слы́шиши всех к тебе́ взыва́ющих:/ преподо́бне о́тче наш Анато́лие,// не преста́й моли́тися о душа́х на́ших.

Глaс 5:

Всесве́тел ум и се́рдце чи́сто/ по́двиги мно́гими стяжа́л еси́,/ преподо́бне о́тче Анато́лие,/ те́мже мона́шествующим помо́щник изря́дный,/ па́дшим во грехи́ воздви́жение ско́рое/ и су́щим в не́мощи врач изря́ден яви́лся еси́./ Мы же к тебе́ со умиле́нием зове́м:/ моли́ся Христу́ Бо́гу,/ грехо́в оставле́ние дарова́ти// и душа́м на́шим ве́лию ми́лость.

Сла́ва, глaс 6:

Труды́ и боле́зни жития́ мона́шескаго/ мужему́дренно поне́сл еси́,/ терпе́нием и смире́нием/ стра́сти борю́щия умертви́л еси́/ и душе́ю твое́ю чи́стою, Анато́лие преподо́бне,/ непоро́чне Христу́ предста́л еси́,// Его́же моли́ о спасе́нии душ на́ших.

И ны́не, Богоро́дичен, глас то́йже:

Цвет неувяда́емый зрим Тя, Богоро́дице,/ и ми́лости Ча́шу неисчерпа́емую,/ нас бо ра́ди от Тебе́ роди́ся Исто́чник спасе́ния/ и, яви́в Свое́ человеколю́бие,// Тя Засту́пницу Усе́рдную дарова́ ро́ду христиа́нскому.

На стихо́вне стихи́ры, глас 5.

Подо́бен: Ра́дуйся:

Ра́дуйся, преподо́бне Анато́лие,/ любве́ исто́чниче неисчерпа́емый,/ Ду́ха Свята́го благода́ть из се́рдца твоего́ источа́я,/ живи́тельными словесы́ твои́ми ду́шы мно́гия ороси́л еси́/ и вертогра́д духо́вный Бо́гу неврежде́н соблю́л еси́,/ те́мже, ра́йских садо́в дости́гнув,/ назира́й с любо́вию ча́да твоя́// и Христа́ моли́ дарова́ти нам мир и ве́лию ми́лость.

Стих: Честна́ пред Го́сподем// смерть преподо́бных Его́.

Ра́дуйся, блаже́нне Анато́лие,/ нищеты́ духо́вныя рачи́телю,/ во вся дни живота́ твоего́ Го́сподеви усе́рдно рабо́тая,/ ду́шу твою́ святу́ю Христу́ у́мно сочета́л еси́/ и, я́ко пти́ца све́тла, во оби́тели ра́йския возне́слся еси́,/ те́мже, па́мять твою́ соверша́юще,/ во умиле́нии серде́ц на́ших со дерзнове́нием зове́м:// испроси́ нам у Христа́ Бо́га мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, богому́дре Анато́лие,/ преспе́яния духо́внаго помо́щниче,/ к Бо́гу горе́ние в сердца́х ю́ных любо́вию возжига́я,/ оте́ц чадолюби́вый яви́лся еси́/ и мона́шествующим ве́рный наста́вник,/ те́мже, целому́дрия венце́м от Го́спода досто́йно увенча́нный,/ вшел еси́ в черто́г Небе́сный,/ иде́же за ны Христу́ Бо́гу моли́ся// дарова́ти нам мир и ве́лию ми́лость.

Сла́ва, глaс 6:

Досто́йный подража́телю ста́рцев О́птинских,/ о́тче преподо́бне Анато́лие,/ многоразли́чныя ко́зни бесо́вския отрази́в/ и горды́ни ненави́стную тьму смире́нием одоле́в,/ и́стинный путево́ждь безмо́лвствующим/ и моли́твы у́мныя наста́вник яви́лся еси́,/ те́мже и нас на стези́ спаси́тельныя наста́ви,// днесь в па́мяти твое́й соше́дшихся.

И ны́не, Богоро́дичен: Творе́ц и Изба́витель мой, Пречи́стая:

Тропа́рь, глaс 3:

У́мныя моли́твы пресве́тлый свети́льниче,/ О́птины пу́стыни ди́вная похвало́,/ Це́ркве Ру́сския украше́ние,/ Небе́снаго Иерусали́ма граждани́не,/ о́тче Анато́лие преподо́бне,/ моли́ Христа́ Бо́га// спасти́ся душа́м на́шим.

На у́трени

По 1-м стихосло́вии седа́лен, глас 8:

Еди́ному Бо́гу послужи́ти восхоте́в, ду́шу твою́ богомы́слием пита́л еси́ и, в моли́тве уедине́нней, я́ко свеща́ горя́щая, пред Го́сподем предстоя́, о́браз чи́стаго и ангелоподо́бнаго жития́ мона́шествующим яви́л еси́. Помози́ и нам, преподо́бне о́тче Анато́лие, па́мять твою́ творя́щим, чистоту́ по́мыслов стяжа́ти и в ду́се моли́твеннем благогове́йно пребыва́ти.

Сла́ва, и ны́не, Богоро́дичен:

Пресве́тлая пала́то Сло́ва, Мари́е Де́во Богоневе́стная, уга́сший свети́льник ума́ моего́ просвети́ Твои́ми моли́твами, я́ко во мра́це страсте́й заблужде́н есмь и в стране́ греха́ творю́ дела́ неподо́бная. Но всеси́льным Твои́м предста́тельством о́блаки печа́ли разве́й, да ви́жду я́сно путь покая́ния всесве́тел и ра́достию воспою́ Тя, Всенепоро́чная.

По 2-м стихосло́вии седа́лен, глас 3:

Па́стырю от Бо́га благослове́нный, душ скорбя́щих врачева́телю и заблу́ждших води́телю, ста́до твое́ богому́дре упа́сл еси́, словесы́ благоиску́сными уныва́ющия ободря́я, де́лы же, я́ко свети́льник, сия́я. Помози́ и нам, преподо́бне о́тче Анато́лие, те́сным ева́нгельским путе́м тве́рдо ше́ствовати и Ца́рствия Небе́снаго дости́гнути.

Сла́ва, и ны́не, Богоро́дичен:

О, Де́во Пречи́стая Богоро́дице! Та́инство воплоще́ния от Тебе́ Сы́на Бо́жия несказа́нно и Рождество́ Твое́ нетле́нно, те́мже к Тебе́, я́ко Ма́тери Бо́жией, притека́ем и усе́рдно мо́лим: огради́ нас от бед и покры́й честны́м Твои́м омофо́ром, моля́щи Сы́на Твоего́, Христа́ Бо́га на́шего, да спасе́т ду́ши на́ша.

По полиеле́и седа́лен, глас 4:

Днесь пу́стынь О́птинская на торжество́ ве́рныя созыва́ет досто́йно просла́вити честна́го ста́рца, его́же па́мять с любо́вию прославля́юще, си́це вопие́м: ра́дуйся, ди́вный пред Бо́гом предста́телю, преподо́бне о́тче наш Анато́лие.

Сла́ва, и ны́не, Богоро́дичен:

Ра́дуйся, Ра́досте на́ша, Всепе́тая Богоро́дице, Тобо́ю вся́кия ско́рби избавля́емся и ра́дость спасе́ния обрета́ем: родила́ бо еси́ Еди́наго Христа́ Бо́га, и нас земны́х не оставля́еши. Того́ со уго́дником Твои́м преподо́бным Анато́лием моли́ спасти́ся душа́м на́шим.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Смире́нный се́рдцем,/ любо́вию ева́нгельскою возвы́шенный,/ ду́хом кре́пок, я́ко адама́нт,/ нра́вом же кро́ткий,/ богому́дрия кла́дязь живи́тельный,/ душ скорбя́щих врачева́тель иску́сный/ и жи́зни духо́вныя наста́вник му́дрый,/ преподо́бне о́тче наш Анато́лие,// моли́ Христа́ Бо́га спасти́ ду́ши на́ша.

Кано́н преподо́бнаго, его́же краегране́сие: Анато́лия пою́, моли́твы у́мныя свети́льника. Глас 3.

Песнь 1.

Ирмо́с: Ди́вно, сла́вно творя́й чудеса́/ Ты еси́, Бо́же,/ бе́здну оземлени́вый, и колесни́цы потопи́вый,/ и лю́ди спасы́й, пою́щия Тебе́,// я́ко Царю́ на́шему и Бо́гу.

Припе́в: Преподо́бне о́тче наш Анато́лие, моли́ Бо́га о нас.

Анато́лие, о́тче преди́вне, па́мять твоя́ светоно́сная не́бо церко́вное озари́, всех лю́бящих тя привлека́ющи, те́мже во стра́се свяще́ннем дерза́ю воспе́ти житие́ твое́.

Наста́ви ны, заблу́ждшия умо́м, на стези́ спаси́тельныя и возгре́й в сердца́х на́ших любо́вь к Сладча́йшему Иису́су, е́юже снеда́емь сла́дце, се́рдцем та́ял еси́, я́ко воск, во огни́ Божества́.

А́нгелов све́тлости подража́я, невеще́ственный огнь в се́рдце носи́л еси́ и, весь просве́щся, стра́сти плотски́я испепели́л еси́, быстрокры́лым хоте́нием во́лю о́тчую испо́лнив.

Богоро́дичен: Тя Честне́йшую Херуви́м и Сла́внейшую без сравне́ния Серафи́м, воспева́ем, Всепе́тая Де́во, Бо́га бо пло́тию родила́ еси́, Всенепоро́чная, Еди́наго от Тро́ицы, Христа́ Жизнода́вца.

Ин кано́н преподо́бнаго, глас 4.

Песнь 1.

Ирмо́с: Мо́ря чермну́ю пучи́ну/ невла́жными стопа́ми,/ дре́вний пешеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.

Го́споди, благослови́ ны, досто́йно песнь воспе́ти и хвалу́ возда́ти па́че всего́ земна́го Тя возлюби́вшему и Тя еди́наго всем се́рдцем возжела́вшему, преподо́бному отцу́ на́шему Анато́лию.

Изде́тска в ве́ре воспита́нный, любо́вь к мона́шескому житию́ име́л еси́, Анато́лие, и, Бо́жиим про́мыслом води́мый, пу́стыни О́птинския дости́гл еси́, иде́же свя́то подвиза́яся, во град Небе́сный прише́л еси́.

Тя́готы и ско́рби жития́ пусты́ннаго смире́нно поне́сл еси́, терпе́нием ду́шу твою́ укрепля́я, Анато́лие, и послуша́ния яви́л еси́ о́браз, зми́я дре́вняго кова́рство вои́стину посрами́в.

Богоро́дичен: Мо́ря жите́йскаго пучи́ну Тобо́ю храни́мому ро́ду христиа́нскому неврежде́нно преплы́ти помози́, Богоро́дице, от си́лы вра́жия рука́ма Твои́ма нас огражда́ющи, и́маже Сы́на Твоего́ и Бо́га носи́ла еси́.

Песнь 3.

Ирмо́с: Лук сокруши́л еси́ вра́жий,/ и щиты́ стерл еси́ кре́постию, Влады́ко Христе́,/ утвержде́ние на́ше,// Свят еси́, Го́споди.

О́птинская похвала́ еси́, Анато́лие, и мона́шествующих до́брый во́ин Христо́в, восприи́м бо щит послуша́ния, по́стничества шлем и моли́твы обоюдоо́стрый меч, на путь спасе́ния мно́гия и́ноки наста́вил еси́.

Лук вра́жий сокруши́л еси́, о́тче прему́дре, и, крыле́ моли́твы посре́брене име́я, в го́рняя у́мно воспари́л еси́, се́рдце же чи́сто, я́ко зла́том бле́щуще, стяжа́в, лице́м к лицу́ Бо́га узре́л еси́, вопия́: Свят еси́, Го́споди.

Иису́са, Царя́ Сла́вы и Го́спода, возлюби́в, полки́ бесо́вския и́менем Того́ вспя́ть обрати́л еси́, о́тче, не Голиа́фа бо меч прие́м, но ка́мень слове́сный, и исполи́ны страсте́й тем сокруши́л еси́.

Богоро́дичен: Я́ко злата́я Кади́льница су́щи, Пречи́стая Де́во, Боже́ственный фимиа́м источа́ющая, смра́да грехо́внаго ве́рныя рабы́ Твоя́ изба́ви, Ты бо еси́ Засту́пница ро́да христиа́нскаго.

Ин

Ирмо́с: Весе́лится о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Теле́сныя неду́ги безро́потно терпя́, благодаре́ние Бо́гу за вся приноси́л еси́, блаже́нне Анато́лие, ча́да твоя́ сему́ науча́я.

На вся́ком ме́сте хвалу́ Го́споду воздава́я, се́рдце твое́ храм Свято́му Ду́ху соде́ял еси́, преподо́бне блаже́нне о́тче.

Моли́тву непреста́нно соверша́я и и́мя Боже́ственное Сладча́йшаго Иису́са призыва́я, се́рдце твое́ чи́сто соде́лал еси́, богому́дре о́тче.

Богоро́дичен: О Тебе́ вси правосла́внии лю́дие ра́дуются, Пречи́стая Богоро́дице, вопию́ще: благослове́нна Ты в жена́х, Всенепоро́чная Влады́чице.

Ин конда́к, глас 4:

Поле́зная души́ твое́й взыску́я,/ во оде́жду и́ночества обле́клся еси́,/ кро́тости же и смире́нию Госпо́дню подража́я,/ Небе́сным жи́телем уподо́бился еси́/ и, до́брый наста́вник и́ноком быв,/ благоче́стия ве́лий побо́рник яви́лся еси́,/ преподо́бне о́тче наш Анато́лие,/ моли́ Христа́ Бо́га// спасти́ся душа́м на́шим.

Седа́лен, глас 4:

До́брый па́стырю ста́да слове́снаго, свя́те Анато́лие, ду́ши немощны́я словесы́ твои́ми и де́лы исцеля́л еси́ и, и́нокини мно́гия оте́ческою любо́вию назида́я, неврежде́нны от собла́знов ми́ра сохрани́л еси́, и досто́йны Жениху́ Христу́ приве́л еси́. Его́же моли́ и нам Ца́рствия Небе́снаго сподо́битися.

Сла́ва, и ны́не, Богоро́дичен:

К Тебе́, Богоро́дице Пречи́стая, в ско́рбех и ну́ждах су́ще, прибега́ем недосто́йнии, Ты бо еди́на ско́рая Моли́твенница у Престо́ла Сы́на Твоего́ и тве́рдое на́ше Упова́ние. О Всепе́тая Ма́ти, Твои́м хода́тайством заступи́ и спаси́ нас, да не постыди́мся во ве́ки.

Песнь 4.

Ирмо́с: Что ужа́слся еси́, Авваку́ме?/ Кому́ зове́ши и вопие́ши:/ от ю́га прии́дет Бог?/ Сло́во Пло́ть бы́сть, и всели́ся в ны, и ви́дехом,/ во хвале́нии пою́ще ди́вному Бо́гу на́шему,// я́ко просла́вися.

Пое́м и сла́вим Твое́ спаси́тельное смотре́ние, Го́споди, я́ко яви́л еси́ Це́ркви Ру́сской избра́нника Твоего́, преподо́бнаго Анато́лия, О́птины пу́стыни преди́вное украше́ние, благода́ти испо́лнена и моли́твенника те́плаго о душа́х на́ших.

О, ди́внаго Бо́жия смотре́ния! Дарова́ бо Госпо́дь тебе́, преподо́бне Анато́лие, дар у́мныя серде́чныя моли́твы, е́юже о́чи мы́сленныя просвети́в, духо́внаго соверше́нства дости́гл еси́. Не оста́ви и нас твои́м моли́твенным заступле́нием.

Ю́ношеския нра́вы отри́нув, вседу́шно Бо́гови порабо́тал еси́, о́тче Анато́лие, те́мже Той просла́ви тя и, в Небе́сныя оби́тели всели́в, ли́ку преподо́бных сочета́.

Богоро́дичен: Мари́е, Богора́дованная Отрокови́це, Го́ру Тя зрит проро́к Приосене́нную, и ужаса́ется: Всевы́шний бо, все́лься в Тя, сни́де к нам, я́ко пото́ки ю́гом, и испо́лни зе́млю Богове́дения.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Прее́мник ста́рцев ве́лиих и учени́к досто́йный богому́дрых и сла́вных Мака́рия и Амвро́сия показа́лся еси́, преподо́бне Анато́лие досточу́дне.

Ду́хом пламене́я, да́ры духо́вными ду́шу бога́тно возрасти́л еси́, богому́дре Анато́лие, и ве́рный учени́к Го́спода твоего́ яви́лся еси́.

Ни́вы духо́вныя се́ятель приле́жный был еси́, о́тче Анато́лие, и, пле́велы грехо́вныя прему́дре исторга́я, де́латель иску́сный показа́лся еси́.

Богоро́дичен: Пресвята́я Богоро́дице Де́во, превознесе́нну и преукра́шенну зрит тя Це́рковь Бо́жия, досто́йно взыва́ющи: Ты еси́ Ма́ти Го́спода и Спа́са на́шего.

Песнь 5.

Ирмо́с: Све́том Твои́м Невече́рним, Христе́,/ озари́, Бо́же, смире́нную мою́ ду́шу,/ и наста́ви на страх Твой,// зане́ свет повеле́ния Твоя́.

Оте́ческия заве́ты храня́ и послуша́ние доброразсу́дное име́я, ключа́рь та́инственный яви́лся еси́, преподо́бне, и, ключе́м моли́твы у́мныя две́ри страсте́й затвори́в, Небеса́ отве́рзл еси́. Те́мже и нас в го́рняя тайново́дствуй, досточу́дне.

Ла́стовице богогла́сная и Предте́чев рачи́телю, о́тче Анато́лие ста́рче наш, ты, в се́рдце и́мя Го́спода Иису́са име́я, ве́сну у́мную в скит прине́сл еси́ и мно́гия ду́ши, мра́зом греха́ окова́нныя, теплото́ю любве́ согре́л еси́.

И́стинный послу́шник ста́рца Амвро́сия быв, окормле́ние сестр Ша́мординския оби́тели прия́л еси́, богому́дре, и, духо́вне тех назида́я и стра́ху Бо́жию науча́я, в го́рния оби́тели му́дре упра́вил еси́.

Богоро́дичен: Тя, Пресвята́я Де́во, Богоро́дицу вои́стину испове́дуем, зане́ Тобо́ю Свет яви́ся в мир, и су́щия во тьме грехо́вней просвети́.

Ин

Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Богомы́слием просвеще́нный и в послуша́нии отцу́ духо́вному прилежа́вый, от Го́спода на враги́ неви́димыя си́лою моли́твы одоле́ние прия́л еси́, о́тче преподо́бне.

За́поведи Христо́вы усе́рдно исполня́я и любо́вию твое́ю всех благоче́стно согрева́я, попече́ния о себе́ ника́коже име́л еси́, свя́те Анато́лие.

Боже́ственным Све́том лице́ твое́ озаря́шеся, преподо́бне о́тче Анато́лие, егда́ та́инство Святы́я Евхари́стии благоле́пно соверша́л еси́.

Богоро́дичен: Ты, Пречи́стая Де́во, Свет Невече́рний ми́ру яви́ла еси́, из тьмы грехо́вныя изводя́щий ве́рою Тя воспева́ющих.

Песнь 6.

Ирмо́с: Воззва́х воздыха́нии немо́лчными к Ще́дрому Бо́гу,/ и услы́ша мя от а́да преиспо́дняго,// и возведе́ от тли живо́т мой.

Воздыха́ньми немо́лчными и слеза́ми, всено́щными стоя́ньми и моли́твенными бде́нии неви́димыя враги́ от ста́да твоего́ отгна́л еси́, преподо́бне.

И́мя сладча́йшее Иису́сово по вся дни непреста́нно в се́рдце твое́м носи́л еси́, Анато́лие сла́вне, сего́ ра́ди и мно́жество и́ноков и и́нокинь научи́л еси́, ка́ко моли́тве сей подоба́ет прилежа́ти.

Украси́лся еси́ боже́ственными добро́тами и венце́м побе́дным увя́злся еси́, Анато́лие о́тче, те́мже и ца́рствуеши над враги́ и Царю́ ми́ра и Спа́су душ на́ших предстои́ши.

Богоро́дичен: Мари́е Де́во Влады́чице, Невмести́маго Бо́га во чре́ве Твое́м вмести́вшая, сердца́ на́ша разшири́, е́же и́скренне люби́ти Бо́га и бли́жняго по за́поведи Сы́на Твоего́.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

И́стинный де́лателю моли́твы Иису́совы сый, о́тче преподо́бне, е́й и чад твои́х му́дре науча́л еси́, о чистоте́ серде́чней тех раде́я, да сла́дость духо́вную обря́щут.

По́мыслов открове́нию пред отце́м духо́вным чад твои́х поуча́л еси́, свя́те Анато́лие, во е́же сете́й бесо́вских избежа́ти и Сама́го Го́спода в себе́ прия́ти сподо́битися.

Во́ина Христо́ва вои́стину яви́ тя Госпо́дь ве́рным, Анато́лие, о спасе́нии вся́кия души́ при́сно ра́тующаго, те́мже и нас от наве́тов вра́жиих защити́.

Богоро́дичен: Песнь Ти сле́зную прино́сим, Де́во, и си́це вопие́м: изба́ви ны вся́кия беды́ и ми́лость Боже́ственнаго Сы́на Твоего́ нам испроси́.

Конда́к, глас 2.

Подо́бен: Вы́шних ища́:

Богодарова́нною ти моли́твою/ возсия́л еси́, я́ко боже́ственное свети́ло,/ посреде́ собо́ра О́птинских отце́в,/ просвети́в мона́шествующих ли́ки и наста́вив,/ е́же вопи́ти непреста́нно се́рдцем и усты́:// Го́споди, Иису́се Христе́, Сы́не Бо́жий, поми́луй нас.

И́кос:

Прииди́те, вси ве́рнии, ратобо́рцы у́мныя бра́ни, побе́дника ди́внаго Анато́лия воспои́м, и́же зло́бу возду́шных князе́й, я́ко прах, возмета́ и к Небесе́м взы́де ле́ствицею моли́твы непреста́нныя, к вы́шнему Иерусали́му вы́ну устремля́яся и смире́нием стра́сти посека́я. Те́мже от Венцеда́вца Христа́ я́ко ца́рским венце́м обложе́н, возгла́ви мона́шествующих ли́ки и наста́ви, е́же вопи́ти непреста́нно се́рдцем и усты́: Го́споди, Иису́се Христе́, Сы́не Бо́жий, поми́луй нас.

Песнь 7.

Ирмо́с: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших.

Небе́сная возлюби́л еси́, о́тче, вся земна́я презре́в, и, от а́ввы Мака́рия криле́ моли́твы восприи́м, на высоту́ доброде́телей, я́ко оре́л высокопа́рный, возлете́л еси́, благослове́н еси́, вопия́, Бо́же оте́ц на́ших.

И́стинным Све́том просвеще́н, мона́шествующим пра́вило ве́рнейшее и о́браз моли́твы был еси́, преподо́бне о́тче, те́мже и бесе́да твоя́ услади́ святи́теля Игна́тия богому́драго, о непреста́нней моли́тве вопроси́вшаго.

Я́коже дре́внии отцы́, всепослушли́в духо́вным наста́вником твои́м яви́лся еси́, блаже́нне Анато́лие, те́мже и смиренному́дрие нело́жное стяжа́л еси́, нача́льниче му́дрый и учениче́ смире́нный а́ввы Амвро́сия.

Богоро́дичен: Сове́т преве́чный Тобо́ю, Де́во, испо́лнися, глас бо Арха́нгелов услы́шавши, Сло́во О́тчее во утро́бу прия́ла еси́ и Безле́тнаго Сы́на, Всенепоро́чная, родила́ еси́ на спасе́ние нас пою́щих: благослове́н Плод чре́ва Твоего́, Богоро́дице.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми взыва́ху:// благослове́н еси́ в хра́ме сла́вы Твоея́, Го́споди.

Житие́ твое́, труды́ духо́вными преиспо́лненное, почита́юще, о́тче, и писа́нии твои́ми на поле́зное наставля́еми, благода́рне Бо́гу взыва́ем: благослове́н еси́ в хра́ме сла́вы Твоея́, Го́споди.

А́нгел во пло́ти на земли́ показа́лся еси́, о́тче, наставле́нии твои́ми, я́ко крыла́ми, от ко́зней вра́жиих огражда́я и огне́м любве́ твоея́ душевре́дная те́рния попаля́я.

Те́ло твое́, я́ко хра́мину души́, целому́дрием украша́я, к чистоте́ душе́вней и теле́сней чад твои́х подвиза́л еси́, Анато́лие преподо́бне, те́мже моли́ Бо́га и нам от вся́кия скве́рны очи́ститися.

Богоро́дичен: Тебе́, Де́во Чи́стая, Ку́пино Неопали́мая, Огнь Божества́ во чре́ве Твое́м носи́вшая и неопа́льна пребы́вшая, вопие́м: благослове́нна Ты в жена́х, Всенепоро́чная Влады́чице.

Песнь 8.

Ирмо́с: Обра́зно во а́нгельстем я́вльшася зра́це,/ и де́ти прохла́ждша посреде́ горя́щия пе́щи,// благослови́те, дела́ Госпо́дня, Го́спода.

Вели́чие дел твои́х испове́дует Ру́сская земля́, и А́нгельский собо́р воспева́ет твое́ им сопряже́ние, те́мже и на́ше хвале́ние приими́, Анато́лие досточе́стне, вопию́щих: благослови́те, дела́ Госпо́дня, Го́спода.

Егда́ с Кроншта́дтским па́стырем безкро́вную же́ртву приноси́л еси́, о́тче Анато́лие, тогда́ А́нгели сослужи́ша вам со стра́хом и тре́петом, воспева́юще и глаго́люще: благослови́те, дела́ Госпо́дня, Го́спода.

Тро́ичным соста́вом благоугожда́я Пресвяте́й Тро́ице, ум и се́рдце во еди́но сочета́л еси́ и те́ло де́ланием за́поведей предочи́стил еси́, блаже́нне, непреста́нно взыва́я: благослови́те, дела́ Госпо́дня, Го́спода.

Богоро́дичен: Из сете́й вра́жиих ду́шу мою́ исто́ргни, Всенепоро́чная Влады́чице, прило́ги бо сла́стными лю́те оплете́н, не могу́ чист предста́ти Престо́лу Влады́чню, то́кмо вопию́: благослови́те, дела́ Госпо́дня, Го́спода, и Ма́терь Его́ в пе́снех велича́йте.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Наставле́ния твоя́, преподо́бне, му́дрости испо́лнена суть, и́миже малоду́шнии укрепля́ются, неради́вии исправля́ются и скорбя́щии утеша́ются, благода́рне взыва́юще: благослови́те, вся дела́ Госпо́дня, Го́спода.

Сокро́вище богому́дрыя души́ твоея́ источа́я, се́рдцем о ча́дех твои́х боле́зновал еси́, о́тче Анато́лие, и, в терпе́нии скорбе́й тех наставля́я, та́ко увещава́л еси́: благослови́те, вся дела́ Госпо́дня, Го́спода.

Словеса́ уте́шительная от лю́бящаго се́рдца твоего́, о́тче Анато́лие, я́ко ми́ро благово́нное, нам изли́шася, мы же, о тебе́ Го́спода сла́вяще, вопие́м: благослови́те, вся дела́ Госпо́дня, Го́спода.

Богоро́дичен: Ру́це Твои́, Пречи́стая Богоро́дице, к Сы́ну Твоему́ простира́ющи, моли́твы за ны Бо́гу возно́сиши, те́мже, Тобо́ю спаса́еми, си́це вопие́м: благослови́те, вся дела́ Госпо́дня, Го́спода.

Песнь 9.

Ирмо́с: Сла́дкою Пречи́стаго Твоего́ Рождества́/ стрело́ю уязвле́ни, Чи́стая,/ Твое́й достожела́нней добро́те дивя́щеся,// пе́сньми а́нгельскими досто́йно Тя я́ко Ма́терь Бо́жию велича́ем.

Па́мять твоя́, о́тче Анато́лие, плоды́ сла́дкия прино́сит доброде́лания твоего́, моли́твою бо и терпе́нием ду́шу твою́ очи́стил еси́ и прия́т ю́ Христо́с во оби́тели Своя́. Те́мже пе́сньми велича́ющих твое́ преставле́ние, сподо́би улучи́ти ми́лость в День су́дный.

Насажде́н в дому́ Бо́жием, преподо́бне Анато́лие, возра́сл еси́ в скиту́ О́птинстем, я́ко кедр лива́нский, благово́ние милосе́рдия и любве́ приходя́щим к тебе́ источа́я. Не забу́ди и нас, убо́гих чад твои́х, ве́рою и любо́вию тя велича́ющих.

Иису́совы моли́твы де́латель рачи́тельный быв, блаже́нне Анато́лие, ум твой, я́ко влады́ку, на стра́сти плотски́я му́жески поста́вил еси́ и се́рдце твое́ вселе́ние Ду́ху Свято́му соде́лал еси́. Помози́ и нам стра́сти грехо́вныя искорени́ти и непреста́нною моли́твою при́сно Бо́гу угожда́ти.

Кра́сный и медото́чный рай О́птину пу́стынь соде́лал еси́, о́тче Анато́лие, в не́йже ду́ши всех приходя́щих к тебе́ духо́вными глаго́лы, я́ко ме́дом, услажда́л еси́. Те́мже и нас, с любо́вию почита́ющих святу́ю па́мять твою́, прича́стниками сла́дости ра́йския бы́ти сподо́би.

Богоро́дичен: А́нгелов сла́дость и апо́столов утеше́ние, мона́шествующих утвержде́ние и правосла́вных Спобо́рнице, не преста́й моли́тися к Сы́ну Твоему́ о испове́дающих Тя, я́ко Ма́терь Бо́жию и Де́ву Чи́стую.

Ин

Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́.// Тем веселя́щеся, Тя, Богоро́дице, велича́ем.

Де́вства красоту́ на земли́ яви́в и ду́шу твою́ посто́м и моли́твою очи́стив, богоблаже́нне, во оби́тели ве́чныя Го́споду себе́ угото́вал еси́.

Глаго́лы твоя́ спаси́тельныя, я́ко би́сер многоце́нный, в ду́ши ве́рных влага́л еси́, преподо́бне о́тче Анато́лие, те́мже и нас не оста́ви, я́коже обеща́лся еси́.

От моще́й твои́х благода́ть почерпа́юще, труды́ твоя́ и по́двиги мно́гия ублажа́ем, преподо́бне Анато́лие, и за вся Бо́га на́шего сла́вим.

Богоро́дичен: Из Тебе́, Богоро́дице, Исто́чниче чи́стый, истече́ Вода́ Жива́я, Я́же есть Христо́с Бог наш, глаго́лом жи́зни ве́чныя жа́ждущия напая́яй.

Свети́лен:

Житие́ твое́, све́том ве́ры и́стинныя озаре́нное, пра́ведно сконча́л еси́, свя́те Анато́лие, ны́не, в со́нме О́птинских ста́рцев пребыва́я, я́ко звезда́ путево́дная, к ми́ру го́рнему ве́рным путь освеща́еши.

Сла́ва, ин свети́лен, глас 1:

Свети́льник све́та сый и у́мныя моли́твы лампа́да негаси́мая, Анато́лие ста́рче О́птинский, еле́й ду́ха доброде́ланием души́ стяжа́в, те́мже вся просвеща́еши в па́мяти твое́й и стезю́ спаси́тельную мона́шествующим и мирски́м указу́еши.

И ны́не, Богоро́дичен:

Песнь Тебе́ досто́йно воспева́ем, Де́во Всепе́тая, Богоро́дице, Ты бо, от всех родо́в Бо́гом избра́нная, яви́лася еси́ я́ко Заря́ Пресве́тлая, от Нея́же Со́лнце Пра́вды ми́ру возсия́ и гре́шныя просвети́.

На хвали́тех стихи́ры, глас 8.

Подо́бен: О, пресла́внаго чудесе́:

Богому́дре о́тче Анато́лие,/ А́нгелов Небе́сных ра́дование/ и преподо́бных отце́в похвало́,/ огнь моли́твы непреста́нныя стяжа́в,/ духо́вную сла́дость вкуси́л еси́/ и чистоту́ серде́чную соблю́л еси́./ Те́мже ны́не тя сосу́д избра́нный зрим/ и моли́твенника те́пла Бо́гу предлага́ем,// е́же дарова́ти нам ве́лию ми́лость.

Блаже́нне о́тче Анато́лие,/ смире́нный и кро́ткий подви́жниче,/ зерца́ло послуша́ния,/ заве́ты ста́рцев свя́то соблюда́я,/ неви́димаго врага́ победи́л еси́/ и а́нгельския высоты́ дости́гл еси́./ Те́мже, боже́ственною благода́тию облиста́емь,/ при́сно моли́ Христа́ Бо́га на́шего,// дарова́ти душа́м на́шим ве́лию ми́лость.

Преподо́бне о́тче Анато́лие,/ чад духо́вных му́дрый наста́вниче,/ и́хже оте́ческою любо́вию согрева́я,/ грехо́вныя стра́сти искореня́л еси́/ и, доброде́тельми сердца́ их укрепля́я,/ вои́стину па́стырь до́брый яви́лся еси́./ Те́мже ны́не, во Ца́рствии Небе́снем ликовству́я,/ моли́ся ко Христу́ Бо́гу на́шему,// дарова́ти нам мир и ве́лию ми́лость.

Сла́ва, глас то́йже:

Вертогра́д скита́ Предте́чева/ прозябе́ цвет красне́йший,/ доброде́тельми благоуха́ющий,/ преподо́бнаго ста́рца Анато́лия,/ его́же ве́рнии благоче́стно почита́ем,/ Го́спода на́шего сла́вяще и ра́достно взыва́юще:/ о му́дрый наста́вниче и те́плый моли́твенниче,/ Це́ркве Ру́сския благо́е украше́ние,/ моли́ся Пресвяте́й Тро́ице вку́пе со все́ми ста́рцы О́птинскими// спасти́ся душа́м на́шим.

И ны́не, Богоро́дичен: Влады́чице, приими́ моли́твы раб Твои́х:

Славосло́вие вели́кое, и отпу́ст.

На Литурги́и слу́жба вся преподо́бническая.

Моли́тва

О преподо́бне о́тче Анато́лие, ди́вный ста́рче О́птинский! Предстоя́ще ра́це моще́й твои́х (или́: пред о́бразом твои́м святы́м) , воспомина́ем ди́вное твое́ житие́ и по́двиги, во сла́ву Го́спода на́шего Иису́са Христа́ подъя́тыя. Ты, от ю́ности красоту́ ми́ра сего́ презре́в, возжела́л еси́ Бо́гу усе́рдно послужи́ти и, от роди́телей теле́сную добро́ту унасле́довав, па́че украша́лся еси́ души́ благоле́пием, е́же в терпе́нии стяжа́ти подоба́ет. Ты, от двои́х ста́рцев, блаже́ннаго Мака́рия и пречу́днаго Амвро́сия, воспита́нный, ста́рец духоно́сный соде́лался еси́, я́ко и богому́дрый святи́тель Игна́тий о тебе́ удивля́шеся. О ста́рче ди́вный! Ты, моли́твою непреста́нною вы́ну со Христо́м пребыва́я, вели́кую благода́ть стяжа́л еси́, те́мже и мно́гая ча́да, путь у́зкий и приско́рбный избра́вше, ра́достно вслед тебе́ теча́ху, к Восто́ку восто́ков приближа́ющеся. Мы же, словесы́ твои́ми наставля́еми и моли́твами твои́ми огражда́еми, со умиле́нием зове́м ти: не оста́ви нас, скорбьми́ обурева́емых, грехи́ мно́гими обремене́нных, от лука́ваго врага́ смуща́емых, но помози́ по́двигом до́брым подвиза́тися, ве́ру соблюсти́ и Све́та Небе́снаго дости́гнути, да досто́йно восприи́мем вся от Го́спода угото́ванная и, зерца́лом разре́шшимся, вку́пе с тобо́ю чи́сте у́зрим Бо́га на́шего в Тро́ице сла́вимаго, Отца́, и Сы́на, и Свята́го Ду́ха, во Ца́рствии Его́. Ами́нь.

Источник: Утверждено Священным Синодом Русской Православной Церкви 16–17 июля 2020 года (журнал № 34)

Творим бдение, идеже храм Василия, или аще изволит настоятель.

На малей вечерни:

На Господи, воззвах: стихиры, глас 3. Подобен: велия мученик твоих.

Велия мученика Твоего, Христе, сила:/ в нечисто бо место ввержен быв,/ испрашивает всем очищения,/ верно совершающим память его.

Велия крепость твоего, Василие, дерзновения:/ пред судом представ безбожных,/ низложил еси тех хуления,/ верою Троическою подвигся о благочестии.

Велия вера твоя, и славно благочестие;/ темже святому житию твоему страдание срастворив, священнейше,/ предстал еси Святей Троице,/ моляся за еже спасти град твой и вся люди.

Велий еси ты, Василие, мученик,/ и благочестив иерарх,/ и ходатай непостыден/ всем верою поющим тя.

Слава, глас 6. Самогласен:

Чудна во иерарсех,/ и светла в мученицех,/ воспеваем тя, Василие,/ любовию зовуще:/ радуйся, града нашего украшение,/ радуйся, веры укрепление,/ радуйся, любве Христовы сосуде,/ радуйся, пастырю добрый,/ радуйся, отче треблаженнейший,/ не престай моляся о всех нас.

На стиховне: Стихиры, глас 8. Самогласны:

Христовы словеса/ благоразумно уяснив,/ и тыя исполняя прилежно,/ положил еси, Василие,/ душу твою за други твоя.

Стих: Праведник яко финикс процветет, яко кедр, иже в Ливане, умножится.

Безчисленных чудес/ и изцелений чающе,/ собираемся вси ныне/ у иконы святаго,/ и приемлем токи благодати.

Стих: Насаждени в дому Господни, во дворех Бога нашего процветут.

Вся, яже на земли,/ во уметы вменив,/ возжелал еси, отче, небеснаго,/ еже улучив,/ молишися непрестанно о нас.

Слава, глас тойже.

Приидите, восприимем свет,/ истекающь от иконы священномученика Василия,/ и, просветившеся сиянием Божественным,/ узрим величествие Господа,/ во святых Своих дивнаго.

Тропарь, глас 1

Святое житие твое/ украсив венцем мучения,/ возшел еси, радуяся,/ к небесным обителем./ И ныне, предстоя Святей Троице,/ священномучениче Василие,/ моли за град Твой,/ и вся люди, совершающия память Твою.

На велицей вечерни:

На Господи, воззвах: Стихиры, глас 6. Подобен: Ангельския предыдите

Ангельския приидите силы,/ уготовайте венец:/ Василий бо мученик приходит/ от земли к небесным,/ приемлет от святых целование/ на радость всем нам./ Людие, рцем:/ благословен дивный во святых/ Боже наш, слава Тебе.

Умныя грядите воинства,/ сретайте вам подобнаго/ святаго Василия,/ иже на земли ангелоподобно поживе,/ ныне же прият мзду трудов своих/ на небеси,/ и оттуду призывает/ паству свою/ пети непрестанно:/ Боже наш, слава Тебе.

Безплотных полки, тецыте,/ украсите кринами/ святую икону/ дивнаго страстотерпца./ Паче же изыщите с трепетом/ безвестное место погребения его,/ и, лобзающе, умастите ароматами тело многострадальное,/ и пойте непрестанно:/ Боже наш, слава Тебе.

Небесныя силы, идите,/ возвестите во всей вселенней/ славу священномученика,/ иже паству свою добре упасе,/ еще же и мучения прияв,/ разруши безбожных шатания,/ верных же всех/ верно научил пети:/ Боже наш, слава Тебе.

Ангельския предыдите силы,/ принесите моления наша/ ко Престолу Владычню;/ Той бо, ради благости Своея,/ и молитв ради Василия,/ дарует нам грехов прощение/ и жизнь вечную,/ подвизая благодарственно вопити:/ Боже наш, слава Тебе.

Слава, глас 4. Самогласен:

Иже от не сущих/ во еже быти приведый вся,/ и сотворивый человека по образу Твоему и подобию,/ не оставил еси создания Своего умерша грехом,/ Сам Себе жертву предложив,/ и Своим воскресением живот вечный дарова,/ укрепил еси, Боже, полки страдальцев,/ свидетельствующих о Тебе,/ от нихже Василия ныне поем,/ восхваляюще Дивнаго во святых Своих Господа.

Чтения три:

Пророчества Исаиина чтение

Тако глаголет Господь: вся язы́цы собрашася вкупе, и соберутся князи от них. Кто возвестит сия в них? или яже от начала, кто слышана сотворит вам? да приведут свидетели своя, и оправдятся, и да услышат, и да рекут истину. Будите Ми свидетели, и Аз Свидетель, глаголет Господь Бог, и Отрок, егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих, и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй. Сотворю, и кто отвратит то? Сице глаголет Господь Бог, избавляяй вас Святый Израилев.

Премудрости Соломоновы чтение

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси их, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися нань, разумеют истину, и вернии в любви пребудут Ему: яко благодать и милость в преподобных Его, и посещение во избранных Его.

Премудрости Соломоновы чтение

Праведницы во веки живут, и в Господе мзда их: и попечение их у Вышняго. Сего ради приимут царствие благолепия, и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихор развеет их, и опустошит всю землю беззаконие, и злодейство превратит престолы сильных. Слышите убо царие, и разумейте, навыкните судии концев земли. Внушите держащии множества, и гордящиися о народех языков, яко дана есть от Господа держава вам, и сила от Вышняго.

На литии:

Стихиры, глас 2. Подобен: Доме Евфрафов.

Радости духовныя/ днесь исполняемся:/ се бо, память/ священномученика Василия/ нам светло возсия.

Торжествуй,/ земле Полтавская,/ прославляющи память/ дивнаго Твоего пастыря/ и велия мученика.

Претерпев мучения/ во святый и великий день,/ ныне безсмертныя трапезы/ наслаждаешися,/ Василие божественный.

Яко победоносец,/ яко воевода/ Царя Небеснаго,/ является нам днесь/ Василий царственноименитый.

Слава, глас 1. Самогласен:

Василием наречен быв,/ и царственнаго священия дело совершив,/ ныне в чертозех Царствия Горняго водворяешися,/ отче священнейший./ Не презри молений наших,/ вознеси их ко Господу,/ испроси нам неколеблемый мир,/ Церкви единение,/ и душам нашим велию милость.

На стиховне: стихиры, глас 8. Самогласны.

Гонение неправедное и заточение,/ и нуждную смерть/ претерпел еси, отче,/ памятуя непрестанно/ слова Господни,/ яко мзда твоя многа на небесех.

Стих: Праведник яко финикс процветет, яко кедр, иже в Ливане, умножится.

Яко вторый Илиа,/ предстал еси правителем беззаконным,/ и посрамил еси тех ложная мудрования,/ памятуя присно,/ яко мзда твоя многа на небесех.

Стих: Насаждени в дому Господни, во дворех Бога нашего процветут.

Духовное торжество совершающе/ в пениих и песнех духовных,/ ублажаем святаго Василия,/ тому поюще:/ радуйся, священномучениче терпеливодушный,/ яко мзда твоя многа на небесех.

Слава, глас 5. Самогласен.

Радуйся, Василие,/ пастырю наш добрый/ и молитвенниче теплый о граде нашем,/ радуйся, веры правило,/ радуйся, мужества образе,/ радуйся, терпения мерило;/ не забуди в молитвах паству твою.

Тропарь, глас 1

Святое житие твое/ украсив венцем мучения,/ возшел еси, радуяся,/ к небесным обителем./ И ныне, предстоя Святей Троице,/ священномучениче Василие,/ моли за град Твой,/ и вся люди, совершающия память Твою.

На утрени:

По кафисмах: седален, глас 4. Подобен: Вознесыйся.

Вознесшемуся на Крест волею/ и стяжавшему на достояние Себе/ честною Своею кровию,/ Христу Господу,/ подобитися желая, Василие,/ и мучения претерпев,/ Небеснаго Отечествия достигл еси.

Ин седален, глас 1. Подобен: Спаси, Господи, люди Твоя.

Спаси, Господи, Люди Твоя,/ и благослови достояние Твое,/ молитвами святаго мученика/ и богомудраго архипастыря Василия.

Богородичен, глас тойже.

Всесильными молитвами Твоими, о Пречистая Богородице,/ защити нас во обстояниих,/ и испроси нам у Сына Твоего/ спасение и жизнь вечную.

Полиелей.

Величание: Величаем тя,/ святый священномучениче Василие,/ и чтем святую память твою,/ ты бо молиши о нас Христа Бога нашего.

По полиелеи: седален, глас 6. Подобен: Ангельския силы.

Ангелов воинства снидошася/ к месту преставления твоего,/ и, трепетом обдержими,/ друг ко другу глаголаху:/ како сей, человек сый,/ пачечеловеческия мучения терпит,/ како силы изыскует глаголати:/ Господи, слава Тебе. (Дважды)

Слава, и ныне: Богородичен, глас тойже

Радуйся, Ходатаице спасения нашего,/ породившая нам Христа Господа;/ радуйся, Мосте,/ преводяй к райским обителем; радуйся, святителей радование;/ радуйся, мучеников укрепление./ Молися со святым Василием к Сыну Твоему/ о спасении нашем.

Степенна: 1-й антифон 4-го гласа, От юности моея:

Прокимен: Честна пред Господем/ смерть преподобных его.

Стих: Что воздам Господеви о всех, яже воздаде ми.

Евангелие: Лк.64

По Евангелии: Стихира, глас 6. Самогласен.

Днесь пророческое слово исполняется,/ днесь восхваляется преподобный в житии,/ и процветает яко финикс/ во дворех Бога нашего/ страстотерпец предивный/ и пастырь добрый,/ Василий богомудренный,/ смиреннейший на земли,/ и со Христом в Царствии горнем пребывающий,/ и молящийся о всех нас.

Канон, глас 6

егоже краегранесие (без ирмосов): Богомудраго священномученика Василия пою.

Песнь 1.

Ирмос: Сеченое сечется море Чермное,/ волнопитаемая изсушается глубина:/ таяжде купно безоружным бывши проходима,/ и всеоружным гроб./ Песнь же богокрасная воспевашеся:/ славно прославися Христос Бог наш.

Богомудра хощу восхвалити Василия, егоже Господь яви венценосна страдальца и велика пастыря. Темже прошу тя, священномучениче, испроси у Бога ми слово твердо, и ум чист, да пою, яко в тебе славно прославися Христос Бог наш.

Очервлены ризы твоя святительския, Василие, токами кровей твоих, и убелены благодатию Божественною, и сам еси светел и чист предстоиши ныне у престола Господня, вопия: славно прославися Христос Бог наш.

Горя желанием послужити Христу, весь себе Богу от юности возложь, пострадал еси, Василие, законно при кончине жития твоего, воспевая: славно прославися Христос Бог наш.

Богородичен: Обитель Бога была еси, Дево, и паче слова Материю Слова, и паче естества питала еси Творца Твоего и Питателя; темже Тя молю: исходатайствуй и мне, Марие Чистая, очищения моих пачеестественных грехов и страстей.

Песнь 3.

Ирмос: Господь сый всех и Зиждитель Бог,/ созданное Безстрастный обнищав Себе соедини,/ и Пасха за яже хотяше умрети,/ Сам сый Себе предпожре:/ ядите, вопия, Тело Мое,/ и верою утвердитеся.

Моисейскую ревность и тогожде кротость прият святый Василий, и во вся оружия правды оболкся, низложи злочестивых хуления, вопия: покайтеся, и верою утвердитеся.

Ужасом содержима паства твоя молитву деяше, егда виде тя на судище неправедно влекома; егда же паки пришел еси во еже пасти люди твоя, тыя в радости глаголаху: зрите чудо Божие, и верою утвердитеся.

Дары Святыя принося о всех и за вся, очистил еси себе, Василие, Кровию Христовою, и всяко терние греха попалив углем Тела Божественнаго, восклицал еси к пастве твоей: со страхом Божиим, верою и любовию к святым Тайнам приступите, и верою утвердитеся.

Богородичен: Радование Ангеловым целованием прияла еси, Преобрадованная, и во чреве заченши Агнца Непорочна, Материю Того нареклася, Иже Тебе сотвори. Умоли же Сына Твоего радости причастника и мя сотворити, и изъяти от греховных скорбей.

Седален, глас 6:

Ангельское житие на земли совершив,/ и мучение претерпев,/ восприял еси, Василие,/ в Царствии Небеснем мзду трудов твоих./ Не забуди и нас, паству твою,/ и испроси нам у Господа/ спасения велию милость.

Богородичен, глас тойже:

Госпоже Дево Богородице,/ щедрот неизследимая пучино,/ и милости бездно!/ Умоляем Тя ныне мы, недостойнии,/ молися ко Господу/ со священномучеником Василием,/ улучити нам спасения велию милость.

Песнь 4.

Ирмос: Провидев пророк тайну Твою неизреченную Христе, провозгласи:/ положил еси твердую любовь крепости, Отче Щедрый:/ Единороднаго бо Сына, Благий,/ очищение в мир послал еси.

Отцу Сына Собезначальна и Духа Равночестна и Сопрестольна, Троицу едину существом и раздельну Лицы проповедал еси, отче Василие. Наставляемь же Духом Святым, ко Отцу непрестанно взывал еси: Единороднаго бо Сына, Благий, очищение в мир послал еси.

Сердце чисто созда Господь во святем Василии; того бо ради и богословствова архипастырь Божественне, уясняя неизреченныя тайны Божества, и яко пророк древле, взываше: Единороднаго бо Сына, Благий, очищение в мир послал еси.

Вознесе ум ко Пребожественным царственный священник Василий, и досточудно поучаше в Дусе ко Отцу глаголати: Единороднаго бо Сына, Благий, очищение в мир послал еси.

Богородичен: Явися Тобою Господь в мир в рабии зраце, да нас от работы горькия измет, и Тя яви Свою Матерь, аки бы кладезь некий, от негоже всяк пиющий восприемлет токи благодати, аще токмо с верою притекает.

Песнь 5.

Ирмос: Союзом любве связуеми апостоли,/ Владычествующему всеми себе Христу возложше,/ красны ноги очищаху,/ благовествующе всем мир.

Щедрому и Милостивому Господу твоему подражая, коегождо возлюбил еси, отче священнейший, и о спасении душ попечение имея, радостно текл еси со апостолы стезею Евангельскою, благовествующе всем мир.

Еже о нас закланному себе принесл еси, о Василие царственноимените, и в Царствии Небеснем вселился еси, вся глаголы Господни исполняя, яко сущий друг Божий; ныне же яко жив зде предстоиши, укрепляя данною ти благодатию души наша, благовествующе всем мир.

Никакоже отступая пути праваго, богоборческое шатание низложил еси, Василие, сиянием святости твоея мглу греховную просвещая, и вкупе с мученики благовествующе всем мир.

Богородичен: Никтоже возможет изрещи и капли от моря чудес Твоих, Чистая, никтоже и песни сложити Тебе достойныя дерзнет; обаче приими наше убогое пение, и излей на вся люди милости Твоя обильно.

Песнь 6.

Ирмос: Бездна последняя грехов обыде мя,/ и волнения не ктому терпя,/ яко Иона Владыце вопию Ти:/ от тли мя возведи.

Огнь возжег в сердце своем ревности яже по Бозе, и не убоявся страданий купно же и клеветы, уготова Василий себе обитель Духа Святаго, ничтоже отвещавая на поношения, обаче, якоже Павел древле, себе мня первым от грешник, смиренно ко Господу глаголаше: от тли мя возведи.

Мужески ополчаяся противу козней диавольских, покаянием себе предуготовав к мучениям, взывал еси, отче Василие, ко Владыце: от тли мя возведи.

Ужасаюся изрещи, каковыя страдания телесныя претерпе священномученик, егда ввержен бысть в бездну смрадну и зловонну. Взираю же на бездну грехов моих, токмо и молюся, глаголя: Василия молитвами, Господи, от тли мя возведи.

Богородичен: Чистая Голубице Непорочная, Дево Неискусобрачная, молися к Сыну Твоему и Господу, очистити мя от всякия скверны.

Кондак, глас 4.

Елеем милости Христовы всяку душу уврачевав,/ и растерзав яко паучину козни велиаровы,/ копием Слова Божия диавола умертвил еси, святе,/ и прославился еси в Царствии Небеснем,/ отче священнейший.

Икос:

Нем ко лживым словесем,/ и глух являяся ко оглаголанию,/ не таяся отверзал еси уста твоя в защищение истины,/ и во утешение печальных,/ и в проповедании Евангелия;/ и тако вторый Василий Великий явился еси,/ отче священнейший.

Песнь 7.

Ирмос: Отроцы в Вавилоне пещнаго пламене не убояшася, но посреде пламене ввержени, орошаеми пояху: благословен еси, Господи Боже отец наших.

Имже образом желает елень на источники водныя, возжелел еси, отче, Горнейшаго Царствия, егоже ради вся дольняя презрев, смерти вкушением жизнь вечную обрел еси, взывая: благословен еси, Господи, Боже отец наших.

Камень неколеблемый Христа в сердце Твоем положив, возвел еси на Том храм души твоея, Василие, от ветров сопротивных невредимый и водами нечестия нерушимый; егда же бури злобныя на тя налегаху, точию взывал еси: благословен еси, Господи, Боже отец наших.

Апостольскою стезею шел еси, отче, просвещая сердца верных Духом Божественным, егоже дарований обильных сам сподобился еси; и научая коегождо взывати: благословен еси, Господи, Боже отец наших.

Богородичен: Велия слава Твоя, славно и величествие Твое, о Мати Безмужная, и неизреченно море чудес Твоих, от негоже ми каплю улучити молюся.

Песнь 8.

Ирмос: За законы отеческия блаженнии в Вавилоне юноши предбедствующе, царюющаго оплеваша повеление безумное, и совокуплени имже не сваришася огнем, державствующему достойную воспеваху песнь: Господа пойте, дела и превозносите во вся веки.

Агнца себе уготовал еси, Василие, в жертву Богови, восклицая: Господа пойте, дела, и превозносите во вся веки.

Страха не имея ниже трепета, повергся в блато смрадное священный мученик, и вниде в светлыя чертоги Небесныя, взывая: Господа пойте, дела, и превозносите во вся веки.

Ина слава солнцу и ина луне; такожде и оваго святаго мощи всяк возмогает лобзати, твое же, Василие, честнейшее и многострадальнейшее тело точию Бог весть, где лежит. Обаче кланяемся пред иконою твоею святою, яко самому тебе сущу с нами, и величающе дивнаго во святых Своих Бога, зовем: Господа пойте, дела, и превозносите во вся веки.

Богородичен: Леностию греховною омрачен, и недугами страстными обложен, камо бежу или к кому возопию? токмо, по Бозе, к Тебе, Дево Богородице. Тя прошу: помози ми, недостойному, избави мя от мук молитвами Твоими.

Песнь 9.

Ирмос: Странствия Владычня, и безсмертныя трапезы на Горнем Месте, высокими умы, вернии приидите насладимся, возшедша Слова, от Слова научившеся, егоже величаем.

Иоанна восприемь Предтечу яко соратника, и Илию споборника, устремился еси, Василие, на тьмы безбожных врагов с мечем веры, плевелы посекая и всех научая веровати в Бога Истиннаго, егоже величаем.

Язык умолкает восхвалити по достоянию все терпение твое и мужество, святе, имиже всяк язык просветил еси, ведуще, яко несть скиф ниже иудей, ниже еллин для Господа, егоже величаем.

Преподобен в житии, злат в словесех, велик в мужестве явился еси, Василие, смиренно служа Богу Единому, егоже величаем.

Богородичен: Образ Твой древле видев патриарх яко лествицу, на нейже Господь утверждашеся; ныне же, ликующе, купно со всеми пророки, рцы, Иакове: радуйся, Дево, пророческое сбытие; радуйся, Еюже Господь на землю сниде; радуйся, Ковчеже Завета Вечнаго; радуйся, Истинная Богородице и Приснодево.

Светилен:

Юже древле Давид прорече, приял еси, Василие, смерть честну пред Господем, яко преподобный и праведный, потщався же Богови воздати и житие твое, обрел еси мзду болезней твоих в Светлом Царствии Небеснем.

На хвалитех: стихиры, глас 1. Подобен: Небесных чинов.

Невещественных житию поревновав,/ яко Михаил Архистратиг/ устремился еси на диавола,/ и того под ногу поправ,/ торжествуя, Василие, взывал еси:/ кто, яко Бог наш!

Окружаемь Силами небесными,/ совершал еси, отче, Святыя Тайны,/ серафимским желанием/ к Богу пламенея,/ и мужески ко своей кончине потекл еси,/ и со святыми водворяешися.

Пред Престолом Господним/ со святыми Ангелы/ ныне предстоит Василий,/ и возносит молитвы о всех нас,/ совершающих память его/ благочестно.

Трисвятому пению/ еще на земли научився,/ устремился еси, Василие,/ во еже лицезрети Бога,/ от ангелов немолчно/ и благолепно славословимаго.

Слава, глас 8. Самогласен.

Богови от юности поработав,/ и священствовав непорочно,/ и венец святительский/ от руку блаженнаго Григория приим,/ сподобился и венца мученическаго, славне Василие,/ и ликуеши со всеми святыми,/ моляся непрестанно и спасении нашем.

На стиховне:

Слава, глас 1. Самогласен.

Святому житию твоему/ како не дивимся, Василие,/ како достойную ти хвалу принесем?/ Припадаем ти ныне, ведуще,/ яко ничтоже творим достойно/ святости и мужеству твоему;/ Обаче зовем ти:/ помяни нас в молитвах твоих/ к Богу в Троице славимому,/ Емуже на земли служил еси,/ и ныне Его светом просвещаешися.

На Литургии

Прокимен, глас 7:

Восхвалятся преподобнии во славе,/ и возрадуются на ложах своих.

Стих: Воспойте Господеви песнь нову, хваление Его в Церкви преподобных.

Апостол: Евреем, зачало 334.

Аллилуиа, глас 2.

Стих: Священницы Твои облекутся в правду, и преподобнии Твои возрадуются.

Стих: Надеющиися на Господа яко гора Сион: на подвижится в век Живый во Иерусалиме.

Евангелие: От Луки, зачало 67.

Причастен: В память вечную будет праведник, от слуха зла не убоится.

Ме́сяца января́ в 25-й день

Священному́ченика Петра́, архиепи́скопа Воро́нежскаго

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 4:

Прииди́те, хвалу́ воздади́м Го́сподеви Бо́гу на́шему,/ па́мять святи́теля Его́ прославля́юще,/ служи́теля ве́рна, па́стыря непоро́чна,/ испове́дника и му́ченика Христо́ва тве́рда:/ той бо, сло́во Госпо́дне соблю́д,/ вся до конца́ претерпе́/ и Це́ркви Ру́сстей похвала́ и сла́ва яви́ся./ Его́же мо́щи святы́я лобыза́юще,/ моли́тву к нему́ простира́ем:/ огради́ нас, священному́чениче Пе́тре, заступле́нием твои́м// и испроси́ нам у Го́спода ве́лию ми́лость.

От младе́нства позна́в Христа́, богоблаже́нне,/ во́лю свою́ Тому́ предаде́,/ на ка́мени за́поведей Его́ вся созида́я:/ те́мже ка́мень ве́ры Христо́вы во дни гоне́ний яви́лся еси́,/ первоверхо́вному апо́столу Госпо́дню подобообра́зен быв./ Моли́ся, архиере́ю Бо́жий, не оскуде́ти ве́ре на́шей// и Правосла́вию сохрани́тися в земли́ на́шей.

Защи́тителю Це́ркве Правосла́вныя,/ наро́да ру́сскаго, скорбьми́ обурева́емаго, уте́шителю,/ в час лю́тых испыта́ний тве́рдо Христа́ испове́дал еси́,/ священному́чениче сла́вне Пе́тре,/ заступи́ и ны́не сро́дники твоя́/ те́плою твое́ю к Бо́гу моли́твою,/ уте́ши стра́ждущия ду́ши на́ша// и от ра́спрей и раско́лов Це́рковь Ру́сскую благонаде́жно огради́.

И́ны стихи́ры, глас 5:

Боже́ственней слу́жбе зело́ прилежа́, священноде́йствителю,/ со благогове́нием ве́лиим Престо́лу Госпо́дню предстоя́л еси́,/ о всем ми́ре же́ртву благоприя́тну Бо́гу принося́,/ и моли́твою твое́ю благомо́щною укроти́ти преще́ние Бо́жие умоля́л еси́,// на ми́лость к па́дшим созда́нием Го́спода приклоня́я.

Па́стырь до́брый яви́лся еси́, о́тче Пе́тре,/ на па́жити доброде́телей ева́нгельских воспитова́я па́ству свою́/ и глаго́лом Боже́ственным ра́достно внима́я,/ о ко́емждо овча́ти душе́ю боле́зновал еси́./ Испроси́ у Го́спода, моли́твенниче боголюбе́зне,/ Оте́честву на́шему мир и благоде́нствие,/ ве́рным лю́дем на враги́ ви́димыя и неви́димыя одоле́ние,// и душа́м на́шим спасе́ние.

В ми́ре ско́рбни бу́дете, рече́ Госпо́дь,/ предвозвеща́я ра́дость Небе́сную./ Сие́ вои́стину на тебе́ испо́лнися, священному́чениче,/ я́ко ско́рби мно́гия о Го́споде,/ я́же претерпе́л еси́ в житии́ твое́м,/ в ра́дость ве́чную души́ твое́й преложи́шася./ Испроси́, страстоте́рпче, и нам/ си́лу вся за Христа́ претерпе́ти,// и спасе́ние душа́м стяжа́ти.

Моли́тва пла́менная се́рдцу твоему́ усво́ися, досточу́дне,/ си́лу и кре́пость ти содева́ющи,/ му́дрость ду́ху твоему́ и любо́вь Боже́ственную да́рующи,/ те́мже трудо́в изря́дных де́латель показа́лся еси́,/ и ны́не на Небесе́х моле́нием твои́м// вся ко спасе́нию благопотре́бная нам испроси́.

Сла́ва, глас 2:

Па́ству Воро́нежскую/ от поруга́ния и разделе́ния ре́вностно храни́л еси́, святи́телю,/ и Оте́честву твоему́ в годи́ну лю́тую ве́рен до конца́ яви́лся еси́./ На вся́ком же ме́сте служе́ния твоего́, достоблаже́нне,/ вся укрепля́л еси́ словесы́ ве́чными пропове́дания Христо́ва,/ се́рдце испо́лнено любве́ лю́дем простира́я:/ мно́зем бо градо́м и ве́сем/ святи́тельство твое́ ко утвержде́нию во и́стине послужи́ло есть./ Те́мже и ото́ком Солове́цким, кро́вию му́чеников но́вых напое́нным,/ иде́же вене́ц му́ченический чу́дному житию́ твоему́ сплете́н бысть,// архипа́стырь нарече́ся.

И ны́не, Богоро́дичен: Пре́йде сень зако́нная:

Вход. Проки́мен дне. И чте́ния 3 му́ченическая.

На лити́и стихи́ра хра́ма, и священному́ченика, глас 7:

Пропове́дника изя́щнаго/ и священнотаи́нника Христо́ва пе́сньми восхва́лим:/ той бо, песнь воспева́я своему́ Влады́це,/ пла́мень се́рдца в поуче́ниих о́гненных излива́л есть,/ возжига́я ду́ши ве́рою/ и собира́я ста́до Бо́жие, от неве́рных расхища́емое./ Те́мже моли́твою твое́ю укрепи́, святи́телю,/ ве́рныя, собла́знами ве́ка сего́ смуща́емыя,/ и враги́ ви́димыя и неви́димыя прожени́// си́лою Боже́ственнаго Ду́ха.

Осужде́ние прие́м судо́м непра́ведным и беззако́нным,/ в вы́шних оправда́ние обре́л еси́, блаже́нне./ Дерзнове́ние ве́лие име́я ко Влады́це,/ оправда́нием Госпо́дним научи́ ны, избра́нниче Христо́в,/ да, во и́стинных путе́х ходи́ти тща́щеся,// Того́ благоутро́бием всеми́лостивно оправди́мся.

Сла́ва, глас 1:

Исполне́ние любве́ Христо́вы стяжа́л еси́, боголюбе́зне,/ устна́ма пра́ведныма и се́рдцем непоро́чным Го́спода испове́дуя,/ пра́во пра́вил еси́ сло́во и́стины,/ си́лу вра́жию безстра́шно сокруша́я./ Те́мже на спасе́ния стези́ наста́ви нас, святи́телю,// и в Ца́рствие Бо́жие прему́дре упра́ви.

И ны́не, Богоро́дичен, глас то́йже:

Небе́сных чино́в ра́дование,/ на земли́ челове́ков кре́пкое предста́тельство,/ Пречи́стая Де́во,/ спаси́ ны, и́же к Тебе́ прибега́ющия:/ я́ко на Тя упова́ние по Бо́зе,// Богоро́дице, возложи́хом.

На стихо́вне стихи́ры, глас 1:

Ве́ру Христо́ву пропове́дуя, апо́столом подобообра́зен был еси́,/ и ча́шу страда́ний, по словеси́ Госпо́дню,/ я́коже ти́и, да́же до конца́ испи́вый,/ венце́м нетле́нным со о́ными увенча́лся еси́, архипа́стырю,/ и, досто́йно прие́м Небе́сную сла́ву,// украше́ние Це́ркве Ру́сския яви́лся еси́.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

К высоте́ святи́тельстей му́ченичества добро́ту приложи́л еси́/ и испове́дничества красото́ю посреде́ тьмы неве́рия в земли́ на́шей возсия́л еси́,/ победи́вый си́лу вра́жию И́менем Христа́, сме́рти Победи́теля,/ и себе́ не пощади́л еси́ ра́ди Живу́щаго во ве́ки,/ те́мже блаже́нства ве́чнаго от Того́ сподо́бился еси́,// Пе́тре достоблаже́нне.

Стих: Честна́ пред Го́сподем// смерть преподо́бных Его́.

О сла́ве фаво́рстей незаходи́мей ду́хом пламене́я,/ Голго́фы Госпо́дни о́браз в се́рдце при́сно носи́л еси́, страстоте́рпче,/ в Голго́фе А́нзерстей кончи́ну му́ченическую прия́ти сподо́бился еси́,/ е́юже, спаси́тельную же́ртву Христо́ву пропове́дав,// Кро́вию А́гнчею убели́л еси́ ри́зы своя́.

Сла́ва, глас 8:

О́браз Христа́ воскре́сшаго/ пред очи́ма души́ твоея́/ при́сно име́л еси́, святи́телю,/ и глаго́лы испыту́ющия Госпо́дни: лю́биши ли Мя,/ к первоверхо́вному апо́столу рече́нныя,/ в се́рдце твое́м благогове́йно храни́л еси́./ Си́ми словесы́ к подвиго́м ве́ры воздвиза́емь,/ ре́вностию ве́лиею по Бо́зе распаля́лся еси́,/ те́мже упаси́ ду́ши на́ша, па́стырю святы́й, о́тче Пе́тре,/ да не погубя́т нас хи́щныя стра́сти,// и от Го́спода да не отлуча́т во ве́ки.

И ны́не, Богоро́дичен: Безневе́стная Де́во:

Тропа́рь, глас 4:

Ве́рою пла́менною апо́столу Петру́ подо́бяся,/ ра́достию страда́ния за Христа́ претерпе́ти изво́лил еси́,/ святи́телю о́тче Пе́тре,/ ка́меню тве́рдый Це́ркве Правосла́вныя,/ со испове́дники и страстоте́рпцы ру́сскими во мра́це беззако́ний доброде́тельми сия́яй,/ моли́ся с ни́ми о нас,// архиере́ю Бо́жий, священному́чениче пресла́вне.

На у́трени

По 1-м стихосло́вии седа́лен, глас 3:

Егда́ Ца́рствие Бо́жие возвеща́л еси́ велегла́сно,/ проника́я вну́тренняя челове́ков о́гненными словесы́,/ в пла́мене души́ твоея́ ражда́ющимися,/ в Ду́се Свя́те и́стину Христо́ву лю́дем пропове́дал еси́, о́тче Пе́тре,/ се бо дар апо́стольскаго благове́стия чу́дно в тебе́ яви́ся.

Сла́ва, и ны́не, Богоро́дичен, глас то́йже:

Немо́лчная уста́ апо́столом,/ си́ла духо́вная святи́телем,/ Мари́е, Ма́ти Бо́жия,/ вся́цей души́, тружда́ющейся Бо́гу, Предста́тельница Благода́тная,/ немоту́ нечу́вственных душ на́ших разреши́,/ благоуха́нием Боже́ственнаго Ду́ха исполня́ющи,/ да от се́рдца избыва́юще моли́твенными воздыха́нии,/ устна́ма ра́дости хвалу́ Госпо́дню возвеща́ем неуста́нно.

По 2-м стихосло́вии седа́лен, глас 8:

Ду́шу свою́ не прия́л еси́ всу́е, святи́телю,/ николи́же в беззако́ния ру́це свои́ простира́я,/ свят житие́м твои́м яви́лся еси́, преподо́бне,/ тем и же́ртва твоя́ свя́та Бо́гу бысть,/ И́же от горы́ кра́ниевы прие́м ю́ непоро́чну,/ в го́ру Боже́ственную Свою́ возведе́ тя,/ в приосене́нныя ча́щи Небе́сныя сла́вы.

Сла́ва, и ны́не, Богоро́дичен, глас то́йже:

Печа́лей утоле́ние,/ скорбе́й отгна́ние яви́лася еси́, Влады́чице Пречи́стая,/ ра́дости Небе́сныя нело́жное обетова́ние,/ печа́ль и скорбь земну́ю святи́теля Петра́ наве́ки утоли́вшая/ и во о́бласть ра́дости приснотеку́щия того́ прие́мшая./ Печа́ли души́ моея́ всеще́дрою добро́тою Твое́ю утоли́, молю́ Тя,/ наше́ствия творя́щих ей боле́знь изба́ви/ и от огня́ ве́чнаго неврежде́нну сохрани́.

Велича́ние:

Велича́ем тя,/ священному́чениче Пе́тре,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный:

Бог нам прибе́жище и си́ла.

Го́споди, воздви́гни си́лу Твою́ и прииди́, во е́же спасти́ нас.

Глаго́лах о свиде́ниих Твои́х пред цари́ и не стыдя́хся.

Вси язы́цы обыдо́ша мя и и́менем Госпо́дним противля́хся им.

Тебе́ ра́ди умерщвля́емся весь день, вмени́хомся, я́ко о́вцы заколе́ния.

Кре́пость моя́ и пе́ние мое́ Госпо́дь и бысть мне во спасе́ние.

По полиеле́и седа́лен, глас 8:

Христа́ распя́таго еди́ным Го́сподем и Бо́гом испове́дуя,/ во вну́тренних души́ твоея́ о́браз Его́ свя́то соблюда́л еси́, священному́чениче Пе́тре,/ до часа́ сме́ртнаго креста́ твоего́ не оставля́я, страстоте́рпче,/ и я́ко а́гнец заколе́ния вмени́лся еси́,/ вся побежда́я си́лою Возлю́бльшаго тя./ Сего́ ра́ди ото́ка А́нзерскаго освяще́ние и Це́ркве Ру́сския похвала́ высо́кая яви́лся еси́.

Сла́ва, и ны́не, Богоро́дичен, глас то́йже:

Предста́тельнице те́плая и Засту́пнице усе́рдная,/ в годи́ну безбо́жия от коне́чныя поги́бели зе́млю Ру́сскую/ всемо́щным хода́тайством к Сы́ну Твоему́ изба́вльшая,/ и ны́не не оста́ви нас моли́твами Твои́ми,/ Влады́чице Богоро́дице.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Из глубины́ взыва́л еси́ ко Го́споду, священному́чениче:/ гото́во се́рдце мое́, Бо́же, гото́во се́рдце мое́,/ по во́ли Твое́й сотвори́ со мно́ю./ Сего́ ра́ди благода́тию в тебе́ животворя́щею/ не себе́ живя́ше, о́тче, но Влады́це и Творцу́ твоему́,/ вся ко спасе́нию ста́да Христо́ва му́дрствуя и де́я./ Престо́лу сла́вы Бо́жия ны́не предстоя́, преподо́бне,/ моли́ Боже́ственною ми́лостию избра́нных ча́сти нам сподо́битися// и мзду ве́рных восприя́ти в день пра́веднаго воздая́ния.

Кано́н священному́ченика, глас 4.

Песнь 1.

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Сло́во прему́дрости Госпо́дни испроси́вше,/ просла́вим по достоя́нию ди́внаго в ли́це святы́х Петра́ достоблаже́ннаго,/ святи́теля, му́ченика же и испове́дника,/ во дни гоне́ния по́двигом до́брым просия́вшаго/ и зало́г Христо́в до после́дняго издыха́ния неврежде́нно сохра́ньшаго.

От ю́ности благонра́вными роди́тели твои́ми благоче́стию науча́емь,/ о́браз Христо́в любо́вию в се́рдце твое́м носи́л еси́, свя́те Пе́тре,/ та́же и, доброде́телем ева́нгельским подража́ти тща́ся,/ в стра́се Бо́жии возраста́л еси́.

Чи́стым се́рдцем да́ры благода́ти во мно́жестве прие́м,/ предызбра́ние твое́ от Бо́га оправда́л еси́, святи́телю,/ пра́востию же ду́ха и дея́ний угоди́в Избра́вшему тя,/ вои́стину ца́рское свяще́ние яви́лся еси́.

Богоро́дичен: Спа́са и Изба́вителя во утро́бе де́вственней вмести́вшая, Животода́вца Ма́ти Чи́стая;/ к Тебе́ у́бо в моли́твах прибега́ем, Богоизбра́нная Мари́е,/ Твои́м предста́тельством к животу́ ве́чному упра́ви нас,/ во е́же спасти́ся нам.

Песнь 3.

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Ре́вность Петро́ву по Бо́зе стяжа́в, святи́телю,/ соиме́нник тому́ достосла́вен яви́лся еси́/ и, я́коже той, в лови́тву спасе́ния Бо́жия челове́ки управля́л еси́,/ воспреща́я си́лам вра́жиим, хотя́щим ду́ши людски́я погуби́ти.

Учи́тель духо́вный и нача́льник оби́телем и́ноческим был еси́, достоблаже́нне,/ благоче́стию и́стинному неле́ностне науча́я,/ и, во́ины росси́йския во бране́х ми́лостивно утеша́я,/ пропове́дник ре́вностный Сло́ва Бо́жия яви́лся еси́,/ пита́я ду́ши от жи́тницы Христо́вы.

Жезл святи́тельский от десни́цы Ти́хона Святе́йшаго,/ Первопресто́льника Росси́йскаго и испове́дника сла́внаго,/ досто́йно восприя́л еси́, блаже́нне Пе́тре,/ и, си́лою свы́ше оболки́йся, ни́вы Христо́вы де́латель му́дрый яви́лся еси́,/ плод творя́ в терпе́нии и Творца́, Господи́на жа́твы, воспева́я немо́лчно.

Богоро́дичен: Приклони́ благоутро́бие Царя́ Небе́снаго к нам, гре́шным, Пресвята́я Де́во,/ и душ на́ших ху́дость обнови́ всеси́льною держа́вою Твое́ю,/ тех стро́потная покая́нием исправля́ющи и доброде́тельми исполня́ющи,/ да Ца́рству Бо́жию, прише́дшу в си́ле,/ угото́виши их неврежде́нны.

Седа́лен, глас 2:

Ве́руяй в Мя, рече́ Госпо́дь, дела́, я́же Аз творю́, и той сотвори́т./ Те́мже ве́ра твоя́ ве́лия, святи́телю Пе́тре, и сло́во, е́же со вла́стию/ мно́ги заблу́ждшия, преда́ния церко́вная отве́ргшия и ло́жными нововвожде́ньми прельсти́вшияся/ в Це́рковь Правосла́вную па́ки приведо́ша./ Сего́ ра́ди вопие́м ти:/ моли́ся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен, глас то́йже:

Блаже́нство и́стинныя ве́ры явля́еши нам, Богоро́дице,/ Твое́ю благода́тию ве́ру нам приложи́, Пренепоро́чная,/ терпе́нием снабдева́ющи,/ я́ко да вся возмо́гше ве́рою/ и то́ю упова́ние спасе́ния иму́ще,/ услы́шим глас Небе́снаго Влады́ки глаго́люща:/ ве́ра ва́ша спасе́ вы.

Песнь 4.

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Во дни богоборе́ний лю́тых яви́ Госпо́дь земли́ Ру́сстей ве́рныя служи́тели Своя́,/ и́же, стра́ха вра́жия не устраши́вшеся,/ ду́ши своя́ за о́вцы слове́сныя полага́ху,/ я́коже и Петр, священнострада́лец Солове́цкий,/ Небе́сному Архиере́ю подо́бяся.

Священному́чениче досточе́стне, святи́телю Моско́вскому Петру́ тезоимени́те,/ ты, жезл архипа́стырский прие́м,/ в вертогра́де Госпо́днем, я́коже о́ный, усе́рдно потруди́лся еси́, сло́во и́стины испpавля́я,/ се бо и́стинен Зва́вый тя, Пребыва́яй во ве́ки.

Слу́жбу Боже́ственную все́ю душе́ю возлюби́в, досточу́дне,/ со ве́лиим тща́нием сию́ благогове́йне соверша́л еси́/ и, ни еди́ному словеси́ слух се́рдца своего́ затворя́я,/ псалмопе́нию любо́вию навы́кл еси́.

Лю́дем ве́рным ра́дость приноси́л еси́,/ и́же, с тобо́ю вку́пе Бо́га славосло́вяще, утеше́ние в ско́рбех обрета́ху./ Ты же, и в заточе́нии сый, с соу́зники твои́ми же́ртву благодаре́ния Бо́гу приноси́л еси́,/ престо́л живы́й Трапе́зы Госпо́дни собо́ю явля́я.

Богоро́дичен: Я́ко боговмести́мое Жили́ще, Та́йне Сове́та Преве́чнаго послужи́ла еси́, Пречи́стая Де́во,/ Тобо́ю бо даде́ся нам Заве́та Но́ваго Пода́тель благ и кро́ток,/ любо́вию спаси́тельною зако́на сме́рти у́зы разруши́вый.

Песнь 5.

Ирмо́с: Ты, Го́споди мой,/ Свет в мир прише́л еси́,/ Свет святы́й, обраща́яй из мра́чна неве́дения,// ве́рою воспева́ющия Тя.

Духо́вным о́ком созерца́яй Го́спода воскре́сшаго/ и серде́чным слу́хом вне́мляй Боже́ственным глаго́лом,/ сла́достию любве́ Христо́вы исполня́лся еси́, о́тче Пе́тре,/ и па́ству твою́ му́дре упра́вил еси́.

К тебе́, стяжа́вшему Христа́ в се́рдцы свое́м,/ мно́жество взыску́ющих Его́, я́ко ко вмести́лищу благода́ти Бо́жия, прихожда́ху/ и утеше́ние в ско́рбех во святы́ни любве́ твоея́ обрета́ху.

По́двиг и́ноческий всем се́рдцем возлюби́в,/ посту́ и моли́тве, терпе́нию и нестяжа́нию усе́рдно прилежа́л еси́, священному́чениче Пе́тре,/ Вы́шним же изволе́нием по́двиг ве́лий испове́дничества подъе́м,/ му́ченически житие́ твое́ на ото́це А́нзерстем сконча́л еси́.

Богоро́дичен: Богора́дованною душе́ю гла́су Арха́нгельскому вне́мшая/ и ра́дость ми́ру Христа́ несказа́нно ро́ждшая, Богоро́дице Мари́е,/ всех родо́в весе́лие яви́лася еси́, Влады́чице./ Простри́ над все́ми земноро́дными Покро́в Твой держа́вный/ и мене́ утеше́ния и ра́дования о Тебе́ сподо́би, Ма́ти Бо́жия,/ я́ко да ублажа́ю Тя.

Песнь 6.

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Мно́гим уго́дником Бо́жиим собесе́дник бы́ти сподо́бился еси́, Пе́тре:/ ста́рцем оби́тели О́птинския и Диве́евским ста́рицам,/ та́же и вели́кому па́стырю Кроншта́дтскому Иоа́нну,/ и́хже наставле́ния и моли́твы/ в по́двизе кре́стнем тя укрепля́ху.

Тьма, в ню́же погрузи́ся земля́ Ру́сская отступле́нием от Бо́га и ве́ры ослабле́нием,/ не возмо́же объя́ти све́та Бо́жия, во и́стинных Его́ свети́льницех горя́щаго./ Ты же, священному́чениче Пе́тре, еди́н от сих избра́нных,/ учине́нных во мра́це беззако́ния пропове́дати Христа́ на спасе́ние мно́гим.

Благода́тию Бо́жиею и вели́чием ду́ха твоего́/ люде́й, во узи́лищах с тобо́ю су́щих, утеша́л еси́, присноблаже́нне,/ и, немо́лчныма устна́ма Христа́ пропове́дуя,/ из глубины́ неве́дения их возводи́л еси́/ и све́том И́стины просвеща́л еси́.

Богоро́дичен: Пресвята́я Влады́чице, Ма́ти Бо́га на́шего,/ Свет живота́ нам всесве́тло возсия́вшая,/ сподо́би нас по сло́ву Сы́на Твоего́/ мир и любо́вь между́ собо́ю име́ти/ и научи́ печа́ли на́ша на Го́спода возлага́ти,/ во е́же спасти́ся нам.

Конда́к, глас 8:

Во святи́тельстве твое́м до́бре подвиза́лся еси́, богому́дре,/ и му́ченичества венце́м све́тло украси́лся еси́,/ преще́ния враго́в Христо́вых не устраши́вся,/ страда́ньми твои́ми ото́ки Солове́цкия освяти́л еси́,/ сего́ ра́ди Си́лы Небе́сныя удиви́шася терпе́нию твоему́,/ мы же с ве́рою и любо́вию притека́ем ко святы́м моще́м твои́м, досточу́дне./ Ны́не со все́ми новому́ченики Це́ркве Ру́сския/ моли́ о нас Христа́ Бо́га, всеблаже́нне Пе́тре, да зове́м ти:/ Ра́дуйся, о́тче приснопа́мятне,// земли́ Воро́нежския в ве́ре утвержде́ние.

И́кос:

Соверше́н быв в ре́вности по Бо́зе и любви́ Боже́ственней, святи́телю,/ благода́тию ди́вная дела́ в простоте́ и кро́тости серде́чней соверша́л еси́,/ служи́телю Госпо́день и́стинен,/ и, по́двиг архипа́стырский со усе́рдием исполня́я,/ па́ству Христо́ву в Ду́се Бо́жии возраща́л еси́,/ си́лою же и чистото́ю ду́ха твоего́ вра́жиим си́лам противоста́в,/ свеща́ горя́щая во тьме безбо́жия яви́лся еси́, богоизбра́нне о́тче,/ и за Христа́ и ве́ру пра́вую гоне́ния и му́ки претерпе́л еси́./ Ники́ими же скорбьми́ от любве́ Бо́жия отлучи́вся,/ смерть Его́ ра́ди в приобре́тение себе́ вмени́л еси́/ и, вене́ц нетле́нен от Христа́ Бо́га в Ца́рствии Небе́снем восприе́м,/ священному́ченик и страстоте́рпец до́блий яви́лся еси́,/ Це́ркве Ру́сския ди́вная похвало́ и неувяда́емая сла́во./ Моли́ся о нас ко Го́споду, всеблаже́нне Пе́тре, да зове́м ти:/ Ра́дуйся, о́тче приснопа́мятне,/ земли́ Воро́нежския в ве́ре утвержде́ние.

Песнь 7.

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:// благослове́н еси́ в хра́ме сла́вы Твоея́, Го́споди.

Ве́лию любо́вь ко святи́телем Воро́нежским Митрофа́ну, Ти́хону и Анто́нию име́я,/ в ме́сте по́двигов святи́тельства их труд подъя́л еси́, достоблаже́нне Пе́тре,/ и гра́ду Воро́нежу ра́дость ве́лию яви́л еси́,/ утвержде́ние и благода́тную по́мощь подава́я.

В стеня́щем мо́ри безбо́жия земли́ Ру́сския,/ тве́рдый ото́к благода́ти яви́лся еси́, святи́телю Пе́тре,/ иде́же бо мно́жится грех, та́мо и благода́ть изоби́лует,/ излива́ющися ще́дро на спасе́ния ча́ющих.

Ре́вностию о до́ме Госпо́дни снеда́емь,/ отсту́пником, преда́ния церко́вная отверга́ющим/ и нововведе́ния льсти́вая вводя́щим, противоста́л еси́, о́тче Пе́тре,/ и, Предте́чевым гла́сом к покая́нию заблу́ждшия приводя́,/ мно́гия о́вцы во огра́ду церко́вную возврати́л еси́.

Богоро́дичен: Исто́чник любве́ Бо́жия/ испо́лни во оскудева́ющих сердца́х на́ших, Благода́тная Мари́е,/ теплото́ю Ма́терних Твои́х моли́тв согре́й хла́дность моле́ний на́ших/ и до конца́ не оста́ви нас,/ в ми́ре житие́ на́ше соблюда́ющи,/ и к Ца́рству Сы́на Твоего́ прему́дре нас уготовля́ющи.

Песнь 8.

Ирмо́с: Ру́це распросте́р Дании́л,/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы взыва́юще:// благослови́те, вся дела́ Госпо́дня, Го́спода.

Мно́гажды искуше́ние темни́цею и у́зами прия́л еси́,/ от беззако́нник му́чимь бе боле́зньми и гла́дом, скорбьми́ и непра́вдами лю́тыми./ Оба́че стра́ха их не устраши́лся еси́, страстоте́рпче,/ и любо́вь твоя́ к Бо́гу николи́же преста́,/ страда́ния же твоя́ ве́ре твое́й утвержде́ние де́яху/ и му́ки безви́нныя дая́ху души́ возвыше́ние.

Во святы́х ото́цех Солове́цких верх подвиго́м твои́м обре́теся, священному́чениче,/ ты бо, зва́ние архиере́йское благогове́йно храня́ и заточе́нных в Бо́зе утвержда́я,/ архиепи́скоп Солове́цкий нарече́н бысть ве́рными соу́зники твои́ми, Пе́тре,/ я́коже и брат твой во Христе́, священному́ченик Иларио́н богоблаже́нный.

Во удале́нии от па́ствы твоея́ в заточе́нии ти бы́вшу,/ востаю́щия на тя наве́ты вра́жия сокруша́л еси́ моле́нием приле́жным, любе́зная же ча́да твоя́, я́же отлуче́на от Тебе́ теле́сне, во еди́нем ду́се совоку́плена с тобо́ю бя́ху/ и во и́стинных путе́х Госпо́дних хожде́ние при́сно творя́ху.

Тро́ичен: Благослови́м Тя, Всеси́льне Го́споди, Бо́же Вседержи́телю,/ Присносу́щне О́тче,/ Сло́ве Бо́жий, нас ра́ди плоть прие́мый,/ и Ду́ше Всесвяты́й Животворя́щий,/ Тро́ице Единосу́щная и Неразде́льная,/ воспева́ем Тя со стра́хом и вопие́м:/ благослови́те, вся дела́ Госпо́дня, Го́спода.

Богоро́дичен: Сло́во от нача́ла бы́вшее,/ ко спасе́нию ми́ра плоть прия́ло есть от Тебе́, Богоневе́сто,/ и дарова́ Ду́ха ра́зума в сердца́ на́ша,/ я́ко да, оправда́ние прие́мше от слове́с любве́,/ во избы́тце се́рдца излива́ющихся,/ глаго́лов неизрече́нных слы́шателие при́снии яви́мся,/ с небе́сными ли́ки воспева́юще:/ благослови́те, вся дела́ Госпо́дня, Го́спода.

Песнь 9.

Ирмо́с: Ка́мень нерукосе́чный/ от Несеко́мыя Горы́, Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́,/ тем, веселя́щеся,// Тя, Богоро́дице, велича́ем.

Всем житие́м Твои́м ве́рность Христу́ показа́в,/ се́рдце, любве́ испо́лнено, со благодаре́нием ко Го́споду простира́л еси́, священному́чениче Пе́тре,/ те́мже с Вы́шними чи́ны ны́не пред лице́м Госпо́дним предстои́ши/ и со все́ми святы́ми Бо́га хвале́бными пе́сньми прославля́еши.

Боже́ственныя слу́жбы отлуче́н быв/ и скорбьми́ мно́гими истязу́емь,/ моли́твою и богомы́слием жа́жду души́ твоея́ утоля́л еси́, о́тче Пе́тре,/ те́мже открове́ние Ду́ха дарова́ ти словеса́ богому́драя/ ко прославле́нию первонача́льника Солове́цкаго, Ге́рмана преподо́бнаго.

Лю́тою боле́знию уязви́вся/ и страда́ния тя́жкая претерпе́в, присноблаже́нне,/ сме́ртию всехва́льною просла́вил еси́ Го́спода./ Те́мже и Той ублажи́ тя в Це́ркви святы́х,/ явле́нии чу́дными назна́меновав души́ твоея́ свя́тость,/ и мо́щи честны́я твоя́ в поклоне́ние и почита́ние свяще́нное нам ми́лостивно оста́ви.

Богоро́дичен: Па́че всех земноро́дных страда́ние в любви́ ко Го́споду позна́вшая,/ се́рдце любве́ испо́лнено простри́ нам, Ма́ти Де́во,/ в печа́лех на́ших немощству́ющим и в боре́ниих изнемога́ющим,/ уте́ши ду́ши на́ша в та́йне промышле́ния О́тча,/ я́ко да путе́м страда́ний о Христе́ в любо́вь Его́ Боже́ственную вни́дем/ и ра́дости Небе́сныя хода́тайством Твои́м неотлуче́ни яви́мся.

Свети́лен:

Я́ко свеща́ всесве́тлая, благода́ть Бо́жия извну́трь просвеща́ше тя, святи́телю Пе́тре,/ сего́ ра́ди избра́н бысть от Бо́га свиде́тельствовати о Све́те/ и просвеща́ти тьму неве́рия в лю́дех обраще́нием к ве́ре Христо́вой./ Просвети́ у́бо и на́шу те́мность духо́вную/ и ду́ши, сном ле́ности отягче́нныя, пробуди́,/ и ко Го́споду сердца́ на́ша обрати́.

Сла́ва, и ны́не, Богоро́дичен:

Свет открове́ния язы́ком ро́ждшая, Всесве́тлая Богоневе́сто,/ во све́те повеле́ний Бо́жиих ходи́ти нас наста́ви,/ я́ко да, до́брая творя́ще в нем,/ сла́ву Отца́ Небе́снаго умно́жим в челове́цех,/ да и Той испо́лнит ны/ Боже́ственнаго сия́ния всепобежда́ющия Своея́ любве́.

На хвали́тех стихи́ры, глас 8:

Небе́снаго Ца́рствия жи́телю,/ Боже́ственных благ соприча́стниче,/ Престо́лу Вы́шняго предстои́ши, священному́чениче Пе́тре,/ о до́льнем Оте́чествии твое́м моли́, блаже́нне,/ безчи́сленными по́двиги святы́х Его́ просла́вленнем./ Твои́ми бо и тех моли́твами/ ча́ем лю́тыя сме́рти избе́гнути// и ча́сти избра́нных Госпо́дних сподо́битися.

Ми́ру распя́ся и вся, я́же в ми́ре, презре́,/ я́звы Госпо́дни на те́ле и в се́рдце при́сно носи́л еси́, о́тче:/ о Христе́ страда́ния в ра́дость души́ твое́й вменя́хуся,/ и смерть Его́ ра́ди безсме́ртие тебе́ сотвори́./ Гра́ду Воро́нежу сла́ва и утвержде́ние быв, архипа́стырю,/ Голго́фы Ру́сския же́ртва богоуго́дна яви́лся еси́,// отсю́ду же и во оби́тели ве́чныя душе́ю возлете́л еси́.

Егда́ гоне́ния от безбо́жных зе́млю Ру́сскую постиго́ша/ и чрез о́ная испыта́ние ве́ры твоея́, священному́чениче, прии́де,/ тогда́ с ка́федры архиере́йския изгна́ние/ и с па́ствою твое́ю разлуче́ние му́жественне претерпе́л еси́/ и письмены́ свои́ми лю́ди воро́нежския/ неуста́нно в любви́ Бо́жией наставля́л еси́,/ от нея́же ни скорбь, ни теснота́, ни гоне́ния, ни глад// ника́коже возмо́же тебе́ разлучи́ти.

Пра́ведность души́ твоея́ возлюби́ Госпо́дь,/ сего́ ра́ди ра́зум свят и по́двиг кре́пок дарова́ ти,/ благода́тию и ми́лостию Свое́ю вы́ну посеща́я./ Ты же, и во у́зах сый,/ ве́рою и тве́рдым упова́нием жив был еси́, священному́чениче,/ благове́стием и же́ртвою хвале́ния непреста́нно Бо́га прославля́я,/ И́же, соверша́яй тя во вся́цем де́ле бла́зе,/ к ли́ку избра́нных Свои́х причте́// и сла́вою нетле́нною тебе́ просла́ви.

Сла́ва, глас 5:

Излия́ся благода́ть во устна́х твои́х, о́тче Пе́тре,/ е́юже пра́вде Бо́жией побе́ду соде́ловал еси́,/ глаго́лы бо жи́зни ве́чныя дарова́ни тебе́ бы́ша открове́нием Христо́вым/ к разуме́нию слы́шавших/ и ко спасе́нию по словеси́ твоему́ ве́ровавших,/ к низложе́нию сопроти́вных,/ не могу́щих глаго́лом сим противоста́ти./ Се бо Сло́во Бо́жие суди́ти и́мать вселе́нней в пра́вду:/ зло́бе гре́шных запрети́ти наве́ки,// сыново́м же ми́ра обетова́нное Ца́рство дарова́ти.

И ны́не, Богоро́дичен, глас то́йже:

Утоли́ боле́зни/ многовоздыха́ющия души́ моея́,/ утоли́вшая вся́ку слезу́ от лица́ земли́./ Ты бо челове́ком боле́зни отго́ниши,/ и гре́шных ско́рби разруша́еши:/ Тебе́ бо вси стяжа́хом наде́жду и утвержде́ние,// Пресвята́я Ма́ти Де́во.

На литурги́и

Блаже́нны от кано́на Песнь 3.-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Луки́, зача́ло 106 (гл. 21, ст. 12–19). Прича́стен: В па́мять ве́чную бу́дет пра́ведник:

Моли́тва

О досточу́дне Пе́тре, священному́чениче сла́вный, еди́н от со́нма новому́чеников Солове́цких и всея́ земли́ Ру́сския, гра́ду Воро́нежу похвало́, па́стырю ди́вный ста́да Христо́ва, ве́рный служи́телю Бо́жий, защи́тителю ре́вностный Це́ркве Правосла́вныя! Все житие́ твое́ любве́ ко Го́споду и страда́ний о Христе́ испо́лнено бысть, ты бо, мно́гая муче́ния, боле́зни и ско́рби, изгна́ния и заточе́ния Его́ ра́ди претерпе́в, испове́дник безстра́шен яви́лся еси́ и венце́м нетле́нныя твоея́ сла́вы Це́рковь Ру́сскую украси́л еси́. Вся преда́в в ру́це Бо́жии, до́блественне служе́ние твое́ на земли́ соверши́л еси́ и на Голго́фе А́нзерстей кончи́ну му́ченическую прия́ти сподо́бился еси́, богоблаже́нне. Ны́не к Небе́сному ли́ку причте́нный, и вене́ц му́ченический за Христа́ прие́мый, со мно́гими жи́тели Го́рняго Иерусали́ма в Ца́рстве Боже́ственныя любве́ пребыва́еши. О блаже́нне о́тче наш Пе́тре, помози́ нам хра́мину се́рдца своего́ незапусте́вшу храни́ти, научи́ нас ра́дость во страда́ниих о Христе́ обрета́ти, озари́ путь наш кре́стный сия́нием твоея́ святы́ни. Бу́ди и ны́не нам утвержде́ние в ве́ре, да, прише́д, обря́щет ю́ Госпо́дь не уга́снувшу в сердца́х на́ших. Умоли́ Творца́ вся́ческих дарова́ти нам си́лу и кре́пость, да, не устраши́вшеся стра́ха лука́ваго, испове́даем тве́рдо Христа́ Спа́са на́шего и Его́ милосе́рдием ча́сти злых да изба́вимся в день стра́шный воздая́ния, и в ра́дость ве́чную всели́мся, сла́вяще о всем Вседержи́теля Бо́га, и твое́ благода́тное к Нему́ о нас предста́тельство во ве́ки веко́в. Ами́нь.

И́на моли́тва

О свяще́нная и многострада́льная главо́, земны́й а́нгеле и Небе́сный челове́че, священному́чениче и чудотво́рче Пе́тре, архиере́ю Бо́жий! Ты в годи́ну лю́тых гоне́ний яви́лся еси́ я́ко церко́вное свети́ло и и́стинныя ве́ры утвержде́ние, зане́ пред богобо́рцы дерзнове́нно Христа́ испове́дал еси́, и я́ко кади́ло благово́нное, в же́ртву Бо́гу себе́ прине́сл еси́. Яви́ нам, смире́нным и гре́шным, ко святы́м моще́м твои́м притека́ющим, многомо́щное твое́ заступле́ние, и вку́пе со все́ми святы́ми, во ото́цех Солове́цких просия́вшими, испроси́ у Го́спода вся́кий дар, коему́ждо благопотре́бен ко спасе́нию. Се бо грех на́ших ра́ди не и́мамы дерзнове́ния ко Го́споду и Влады́це на́шему, и пра́ведный гнев Его́ на ны наведо́хом, и вся́кия ми́лости Его́ недосто́йны сотвори́хомся. Те́мже, не сме́юще возвести́ очеса́ на́ша к высоте́ Небе́сней, ниже́ моле́бный глас ко Го́споду, се́рдцем сокруше́нным и смире́нным ду́хом тебе́ моли́твенника благоприя́тнаго к Нему́ предлага́ем, и про́сим тя со усе́рдием ве́лиим: бу́ди засту́пник и хода́тай наш пред Бо́гом, Судие́ю Пра́веднейшим, се бо вы́ну прогневля́ем Его́ согреше́нии мно́гими. Ны́не у́бо, во сла́ве Небе́сней пребыва́я и с ли́ки святы́х непреста́нно славосло́вя Пресвято́е И́мя Го́спода, при́зри на нас, гре́шных, и изба́ви всех, ве́рою несумне́нною к Бо́гу приходя́щих, от вся́ких бед, наве́тов и прило́гов диа́вольских. Укроти́ во́лны страсте́й и искуше́ний, востаю́щих на ны, да ра́ди святы́х твои́х моли́тв не обы́мет нас напа́сть, и не поги́бнем в пучи́не грехо́вней и в ти́не страсте́й на́ших. Вознеси́, богоно́сне о́тче наш, сие́ ма́лое моле́ние недосто́йных раб твои́х Влады́це Христу́, да утверди́т зе́млю на́шу в пра́вой ве́ре и благоче́стии, Це́рковь Святу́ю да сохрани́т непреобори́му от ересе́й и раско́лов, и соблюде́т невреди́му от вся́каго зла. Испроси́ у великодарови́таго Христа́ Бо́га на́шего скорбя́щим утеше́ние, неду́гующим исцеле́ние, оби́димым заступле́ние, па́дшим во грехи́ покая́ние и возста́ние, стра́ждущим от бесо́в ско́рое свобожде́ние, от Це́ркве Христо́вы отпа́дшим вразумле́ние и на путь спасе́ния обраще́ние. Ты му́ченически ду́шу твою́ за ве́ру положи́л еси́, да́руй и нам му́жество подража́ти тебе́, да ничто́же в жи́зни сей вре́менней возмо́жет отлучи́ти ны от любве́ Бо́жия. О святи́телю Христо́в, огради́ и укрепи́ моли́твами твои́ми град сей, да процвете́т в нем ре́вность ко спасе́нию и благоче́стие. Ты, непреста́нно о часе́ сме́ртнем па́мять име́вый и благу́ю часть избра́нных Бо́жиих от Го́спода получи́вый, сподо́би и нас в ми́ре и покая́нии живо́т свой сконча́ти, и Ца́рствия Бо́жия насле́дники бы́ти, иде́же ты водворя́ешися со А́нгелы и все́ми святы́ми, хваля́ Бо́га в Тро́ице сла́вимаго, Отца́, и Сы́на, и Свята́го Ду́ха, во ве́ки веко́в. Ами́нь.

Источник. Текст утвержден Священным Синодом Русской Православной Церкви 28 декабря 2017 года (журнал № 131)

На велицей вечерне

Блажен муж: 1-й антифон

На Господи, воззвах: стихиры на 6, глас 4:

Отче святителю Владимире, / измлада Христу поработати пламенне вожделел еси / и сего ради во градех Тамбове и Киеве богомудрию неленостно поучался еси, / идеже слово Евангелия сердцем чистым восприим, / и на нем все житие твое утверждая, Христу верен явился еси даже до смерти. (Дважды)

Божественное смотрение о тебе исполнися, святителю, / егда к пастырскому деланию призва тя Бог, / таже и святительством увенча / и души словесных овец твоему попечению предаде, / да соблюдеши я во единем стаде // Единаго Пастыря Христа Бога нашего.

Чистоту душевную вкупе и телесную / призывал еси хранити, / блудником и винопийцем был еси обличитель нелицеприятный, / тии бо, якоже рече апостол, / Царствия Божия не наследуют. / Сего ради смиренно молим тя, досточудне, / людем, страждущим грехи сими, // помощник буди непостыдный.

Пастырь добрый, милосердия исполнен, / явился еси пастве твоей, святителю Христов: / егда мор жесток и глад велий землю самарскую постиже, / о людех страждущих и алчущих / попечение непрестанное полагая, / многая от смерти избавил еси. // Темже моли от бед и глада душевнаго нас избавити.

Да радуется земля Московская, / прославляющи богомудраго святителя Владимира, / той бо во дни распрей и нестроений / дух мятежный века сего обличи, / к благоустроению и миру призывая, / о согрешивших братоубийством ходатай быв, / и ныне престолу Божию предстоит, / моляся о всех выну Господу, // спасти и просветити души наша.

Слава, глас 8:

Боголюбивому отцу твоему, иерею Никифору, / яко истинный сын, святе Владимире, / в служении Богу уподобился еси. / Ныне же вкупе с лики исповедников Российских // престолу Отца Небеснаго предстоиши, выну моляся о душах наших.

И ныне, Богородичен, глас тойже:

Царь Небесный за человеколюбие на земли явися, / и с человеки поживе, / от Девы бо Чистыя плоть приемый / из Нея прошедый с восприятием, / Един есть Сын, сугуб естеством, / но не Ипостасию, / Темже, совершенна Того Бога и совершенна Человека / воистину проповедающе, / исповедуем Христа Бога нашего: / егоже моли, Мати Безневестная, // помиловатися душам нашим.

Вход, прокимен дне и чтения священномученику единому.

На литии стихиры, глас 6:

Ныне к тебе прибегаем, / святителю Владимире, / не престай молитися о нас ко Господу, / да веру нашу чисту соблюдем, / истинную же любовь и единомыслие / кийждо друг ко другу в делех свидетельствуим. / Зане идеже бывают являема сия, / тамо пребывает Бог, // спасаяй и освящаяй души наша.

Собор святых русских / восполнил еси в подвизе твоем, святителю, / веру бо Христову соблюд, течение сконча, / темже дадеся тебе венец правды, / егоже дарует Господь любящим Его, // спасаяй и освящаяй души наша.

Призри с небесе, Боже, и виждь, / и посети виноград сей, / и утверди его, – / усердно взывал еси ко Господу / о пастве твоей, святителю./ Такожде и о нас молися, делателю добрый, / да вси едини во Христе, / якоже ветви с лозою пребываем, // во еже спастися нам.

На стиховне стихиры, глас 8.

Подобен: О, преславного чудесе:

Приидите, вернии, / видим иерарха всечестна, / право правивша слово Божественныя истины, / и жестокия муки / даже до смерти небоязненно претерпевша, / сими же страдании и смертию Господа прославивша / и венец славы от Него приимшаго, / и молящагося выну // о спасении душ наших.

Стих: Честна пред Господем / смерть преподобных Его.

Трезвение ума сохранив, / и воли твоей не попустив поколебатися, / таже сердце чисто / и чужде показав духу озлобления, / сице твою душу / целу и невредиму соблюд, / мужественно и небоязненно / Христа ради смерть приял еси, // егоже возлюбил еси, святителю.

Стих: Священницы Твои облекутся в правду, / и преподобнии Твои возрадуются.

Имея ревность о славе Божией, / святителю Владимире, / вся труды твоя подъял еси / во благо Церкве, / яже есть невеста Христова, / тоя ради и Бог прослави тя / и дарова ти / дерзновение велие // молитися о чтущих святую память твою.

Слава, глас тойже:

Буди имя Господне / благословенно отныне и до века, / се бо от сродник наших российских / ныне светильник веры возсия, / и православие крепце хранити присно нас научает, // во еже спастися нам.

И ныне, Безневестная Дево: или сей Богородичен:

Приидите, людие, ублажим Заступницу усердную рода христианскаго, / се бо предстоит Престолу Царя Славы / и со слезами молит о земнем уделе Своем. / С Неюже вкупе и собори святых новомучеников вопиют немолчно: // Владыко Христе, спаси землю Русскую.

По Ныне отпущаеши: тропарь новомученика единожды.

Тропарь, глас 2:

Веры православныя непорочный блюстителю / и заповедей Христовых усердный исполнителю, / священномучениче Владимире, / Христа всем сердцем возлюбив, / паству твою добре упасл еси, / незлобиво мученическую смерть приял еси. / Сего ради в вечной славе пребывая, // моли спастися душам нашим.

Ин тропарь, глас 4:

Подвигом добрым яко святитель Христов подвизался еси, / веру Православную непорочно соблюд, / во дни гонения лютаго мучителей прошения не убоявся, / священномучениче Владимире, / яко первомученик Стефан, убивающим тя рекл еси: / Господь да простит вас. / Сего ради уготовася ти венец правды, / егоже да воздаст Господь молитвами твоими // всем почитающим тя.

Слава и ныне, Богородичен.

На утрени

На Бог Господь: тропарь святителя дважды. Слава и ныне, Богородичен.

По 1-ом стихословии седален, глас 4:

Верен был еси Христу даже до смерти, святителю Владимире, / и якоже Стефан апостол молился еси о убивающих тя: / Господь да простит вас. / Сего ради к тебе усердно взываем: дар всепрощения и незлобия нам испроси, / многими грехи обремененным.

Слава и ныне, Богородичен:

Ублажим Владычицу мира, радующуюся о славе новомученика, / имать бо дерзновение многое в молитвах о отечестве нашем. / Еяже предстательством и мольбами святителя / да сподобит Господь и нас милости Своея.

По 2-ом стихословии седален, глас 4:

Мужественно с терпением и благодарением Богу восприял еси / промышление Божие о тебе, святителю. / И по смерти супружницы и чада твоего подвиг иноческаго жития избрав, / Богови со тщанием и всяким смирением поработати возжелел еси, богомудре. / Сего ради и нас в подвизех благочестия утверди, молимтися.

Слава и ныне, Богородичен:

Достойно есть величати Тя, Богородице Дево, / яко родившую Христа, Бога нашего, / и матернее дерзновение к Нему имущую, руце молебне присно простирающи, / да спасет и помилует отечество наше, яко Благий и Человеколюбец.

По полиелее седален, глас 4:

Вонмем, о христолюбивии людие, / днесь бо святитель Владимир в сонме святых земли нашея предстоит / и молитвы о нас к Богу выну возносит. / Таковое милосердие Божие о нас ведяще, согласно воспоим: / Боже, дивный во святых Своих, / молитвами и предстательством угодника Твоего Владимира / помилуй и спаси всех нас.

Слава и ныне, Богородичен:

Кто возможет разлучити нас от богатства милосердия Твоего, о Богомати, / аще не грехи наши, имиже отлучаем себе от любве Божия? / Ты же, Благая, не остави нас, / но благодатию, данною Ти от Бога, / возведи от тли греховныя и призови к покаянию, / да сподобимся со святыми сродники нашими жизни вечныя.

Степенна, 1-й антифон 4-го гласа.

Прокимен, глас 4: Честна пред Господем / смерть преподобных Его.

Стих: Что воздам Господеви о всех, яже воздаде ми?

Евангелие от Луки, зачало 67.

По 50-м псалме стихира, глас 6:

Приидите, вернии, / новаго первомученика святителя Владимира / песньми боголепными восхвалим, / той бо, смерти от беззаконных предан быв, / жизни вечныя на Небеси сподобися / и ныне предстоит пред Богом, // выну моляся о душах наших.

Канон Богородицы со ирмосом на 6,

ирмосы по дважды, глас 8: Воду прошед:

и святителя канон на 8, глас 6:

Песнь 1.

Ирмос: Яко по суху:

Приидите, вернии, песньми благолепными Владимира, перваго новомученика, восхвалим, / той бо в сонме Российских святых вселился есть.

Кротостию и смирением, добротою и чистотою сердечною украшен, / николиже иский своих си, / добре служение твое совершил еси, святителю.

Смерть не разлучи тя от любве Божия, святителю, / мужественне бо претерпел еси сию ради возлюбившаго тя Христа.

Богородичен: О Мати Дево, / неизреченно Сына Твоего и Бога нашего рождшая, / молися прилежно спастися нам.

Песнь 3.

Ирмос: Несть свят:

Помяни нас, святче Божий, / имя твое в скорбех и печалех призывающих / и чающих от Тебе помощи во обстояниих тяжких, находящих на ны.

Образ неусыпнаго стража Церкве Христовы явил еси себе, святителю, / и небоязненно предстал еси пред беззаконными, / смерти твоея искавшими.

Жестокосердие, неразумие и греховное ослепление мучителей твоих / препобедил еси, святителю, кротостию и смирением, / таже и к Богу молитвенным призыванием о прощении их.

Богородичен: Крепкое утверждение на Тя надеющихся, Богородице Дево, / крепость и силу подавай нам ради Рождшагося от Тебе, Владычице.

Седален, глас 8:

Кая польза человеку, аще мир весь приобрящет, душу же свою погубит, / или что даст человек в измену за душу свою, – рече Господь. / Сими словесы от юности наставляемь, тело твое на смерть уготовал еси, святителю, / да душу живу сохранив, со Христом пребываеши.

Слава и ныне, Богородичен:

Велия радость бывает на Небеси, Владычице, / егда обращаем сердца своя сокрушенная к Сыну Твоему и Богу нашему. / Той бо дарует нам прегрешений прощение молитвами Твоими / и прелагает Свой праведный гнев на милосердие. / Сего ради вопием Ти: / радуйся, Радосте наша, грешников кающихся упование.

Песнь 4.

Ирмос: Христос моя сила:

Воистинну апостольский преемник был еси, святителю, / егда в годину тяжких испытаний, мужество и твердую веру явив, / безбоязненно за Господа душу свою предал еси.

Егда лютии убийцы, смерти предати тя хотяще, / вне святых врат ведоша тя, / воспевал еси, святителю: / Господь мне прибежище и сила.

Первенствующим иерархом Церкве Российския поставлен быв, / первым и нравом и деянием в подвизе иераршего служения явился еси, / первым же в годину лихолетий мученически пострадал еси, святителю.

Богородичен: Ты еси помощь и заступление молящимся Тебе, Владычице Державная, / буди и нам предстательство и покров / егда предстанем Сыну Твоему, нелицеприятному Судии.

Песнь 5.

Ирмос: Божиим светом Твоим, Блаже:

Скорби и разлучение с паствою первопрестольнаго града мужественно восприял еси, святителю. / Обаче и новей пастве твоей Богоспасаемаго града Киева / сокровище и приобретение безценное явился еси.

Тезоименитому ти равноапостолу в ревности по Бозе уподобляяся, / паству твою в православной вере утверждал еси, святителю, / и яко новое красное солнце на горах киевских возсиял еси.

Русь святая, водами Крещения омытая, / светом Христова учения равноапостольным князем Владимиром просвещенная / и кровию страстотерпец и новомученика святителя Владимира орошенная, / храни веру Православную, в нейже тебе утверждение.

Богородичен: Кому возопиим, Владычице, в напастех наших и лютых обстояниих, / аще не к Тебе, Царице Неба и земли, / помощь твою присно нам подавай, тепле Тебе молящимся.

Песнь 6.

Ирмос: Житейское море:

Жестокая глумления, поругания и смерть / не возмогоша отлучити тя от любве Христовы, / новый исповедниче киевский и всероссийский за Христа мучениче. / Сего ради молим тя: в твердей вере и нас укрепи, / празднующих любовию святую память твою.

Многими ранами уязвленное честное тело твое, кровию истекшее, / яко свидетельство любве жертвенныя ко Христу явил еси, святителю, / и, быв верен Ему даже до смерти, / венец жизни от Него приял еси.

Согрешения моя прости, Господи, / и в мире дух мой приими, / таже не вмени греха смерти предающим мя, / – слезно молился еси, священномучениче достохвальне.

Богородичен: Что Тя наречем, о Благодатная? / Заступницу ли нашу, яко руце Твои выну к Сыну Твоему простерты о нас имаши?/ Крепость ли и силу, яко роди христианстии в вере и любви к Сыну Твоему утверждаются. / Вся бо можеши, яко Мати Творца и Владыки Неба и земли.

Кондак, глас 2:

Образ Христова милосердия являя, / покров и защищение пастве твоей был еси, / святителю отче Владимире, / в кротости и незлобии страдания приемля, / безбожных мучителей, благословляя, простил еси. / Темже и нам испроси у Христа Бога / дух мирен и велию милость.

Икос:

Имеяй выну попечение о чадех Божиих, / сия отечески к богоугодней жизни направлял еси, святителю Владимире, / глаголы мудрыми и праведными делы, / постом, молитвою и смертию честною / предивный подвиг в подражание святым Христовым показавый. / Мы же твоя пастырския добродетели хваляще, / тя ублажаем, боголюбче, и взываем сице: испроси нам у Христа Бога дух мирен и велию милость.

Песнь 7.

Ирмос: Росодательну убо пещь:

Многая беды и напасти беззаконнии отступницы воздвигоша на тя, исповедниче, / обаче в кротости и смирении чистоту веры храните /и в лоне единыя Православный Российския Церкве пребывати / верныя призывал еси.

Глумления и поругания, имже подвергоша тя гонителие твои, / не возмогоша понудити тя в жестокий дни оставити возлюбленную паству, / сего ради и явился еси пастырь добрый, полагаяй душу за овцы Христовы.

Верныя непрестанно научал еси пребывати в союзе любве, / имже связуеми быша во Христе апостоли, пастырю добрый. / Сего ради ныне ти взываем: / и нас соблюди молитвами твоими в любви Христове.

Богородичен: В любви крепцей к Сыну Твоему и Богу нашему соблюди нас, Дево Богородице, / и прощение грехов и беззаконий наших испроси, / присно Тя блажащим.

Песнь 8.

Ирмос: Из пламене преподобным:

Страха не иму, / готово сердце мое, готово смерть прията на всякое время Церкве ради Христовы, / да утвердится вера православная во отечестве нашем, – рекл еси во дни испытаний твоих, пастырю мужественнейший.

Добрый делатель быв в вертограде Господни, святителю Христов, / душу твою положил еси, во еже цело и неврежденно соблюсти достояние Его. / Сего ради и достоин явился еси услышати глас, зовущий ти: / благий и верный рабе, вниди в радость Господа твоего.

Право правил еси слово Божественныя истины, / темже и Царствия Божия сподобился еси, святителю, / в немже пребывая во славе со всеми святыми, / не престай молитися Владыце, / да и мы наследники сего будем.

Богородичен: Радуйся, Благодатная Богородице Дево, / – прилежно вопием Ти, Владычице, / – избави нас от плена греховнаго и всякаго прилога вражия, / сохрани от злых человек, востающих на ны; / на Тебе крепце надеемся и пред враги нашими хвалимся, / Ты бо еси Заступница рода христианскаго.

Песнь 9.

Ирмос: Бога человеком невозможно видети:

Правило веры и благочестия явился еси, святителю. / Сию бо веру, любовию ко Христу и людем споспешествуему, / добре свидетельствовал еси пред враги твоими, / таже и благочестие, во еже умрети тоя ради любве, изрядно показал еси.

Ум наш просвети, святителю, молитвами твоими к Богу, / да, правый путь избравше, Христа обрящем и в чертозех Его водворимся.

Страстию озлобления обуреваемии, / злочестивии людие смерти лютей предали тя, таже телеси твоему глумляхуся, / и честному погребению его претяху. / Обаче, не имеяху власти над душею твоею, непобедимый страдальче, / оставлени быша тщи во злобе своей.

Богородичен: Преукрашенна еси Божественною славою, Мати Безневестная, / Бог бо Слово из Твоих ложесн изыде, во еже уготовати нам спасение. / Емуже не престай молитися, Владычице, / да свободит нас от работы вражия, яко Милосерд.

Светилен:

Во тьме беззаконий сущий светом Христовым просвещаются / и любы Христова в сердцах грешных возжигается, / егда пастырие попечение изрядное о людех имут, / – тако поучал еси, святителю, жребий пастырскаго служения приемлющих.

Слава и ныне, Богородичен:

Преблагословенна еси, Богородице Дево, мати Неизреченнаго Света, / Тя величаем и предстательства о нас пред Сыном Твоим всеусердно просим, / Тя бо едину надежду имамы.

На хвалитех стихиры, глас 8.

Подобен: О, преславнаго чудесе:

О, преславнаго чудесе: / храм во славу Христа Спасителя воздвигнутый, / руками нечестивых в лета же беззакония разрушенный, / ныне во благолепии предивно воссоздася. / В немже святителем Владимиром / смиренный Тихон Всероссийский Патриарх наречен бысть. / Тех молитвами, Христе Боже, / прости людем грехи и беззакония / и спаси души наша.

О, преславнаго чудесе: / яко во дни безбожнаго лютаго гонения, / восхоте Господь веру в людех укрепити / подвигом Патриаршаго служения. / Темже, святителю Владимире, / смиреннаго архипастыря Тихона свыше избраннаго, / ты первый удостоился еси / Святейшаго отца возгласити. / С нимже ныне молися о душах наших.

О, дивнаго чудесе: / Святейший Тихон, первосвятитель Российский, / кончину твою услышав, святе Владимире, / скорбию велиею объят бысть, обаче свидетельствова: / смерть твоя яко жертва благовонная, / во очищение грехов народа нашего явися. / Сего ради прилежно вопием та: / моли милостиваго Бога о земном отечестве твоем / и спасении душ наших.

Слава, глас тойже:

Святителие Церкве Российския, / добре в подвизех ваших той послужившии, / грядите днесь во сретение сослужителя вашего, / любовь ко Христу мученически свидетельствующаго, / да вкупе с вами вящщия славы еже на Небеси сподобится // и присный ходатай пред Богом о людех верных явится.

И ныне, Богородичен:

Владычице, приими молитвы раб Твоих, / и избави нас от всякий нужды и печали.

Славословие великое.

По Трисвятом тропарь священномученика, Слава и ныне: Богородичен:

Ектении и отпуст.

На часех тропарь и кондак святителя.

На Литургии

Блаженны, Песнь 3. на 4 и Песнь 6. на 4.

По входе тропарь храма Христова, или Богородицы, или храма святаго, и священномученика, Кондак храма святаго. Слава: священномученика, И ныне: Предстательство христиан: А в храме Христа и Богородицы на И ныне: глаголем кондак храма.

Прокимен, глас 7: Честна пред Господем / смерть преподобных Его.

Стих: Что воздам Господеви о всех, яже воздаде ми?

Апостол дне и святаго, ко Евреем, зачало 334.

Аллилуиа, глас 2: Священницы Твои облекутся в правду и преподобнии Твои возрадуются.

Стих: Блажен муж, бояйся Господа, в заповедех Его восхощет зело.

Евангелие дне и святаго, от Иоанна, зачало 36.

Причастен: В память вечную будет праведник, от слуха зла не убоится. Аллилуиа, трижды.

Зри: Аще случится память святителя в субботу. На Господи, воззвах: на И ныне: Богородичен воскресен настоящаго гласа. Богородичны по тропарех на вечерни, на Бог Господь: и в конец утрени воскресны настоящаго гласа. Апостол и Евангелие святаго и дне. Прокимен, аллилуарий и причастен точию святаго.

Зри: Аще случится память святителя в неделю прежде мытаря, творим якоже указася в главе 4-й Типикона.

Зри: Аще случится память святителя в неделю мытаря, или блуднаго, или мясопустную, совершаем службу его якоже трием святителем в сии недели, точию на благословении хлебов тропарь Богородице Дево: поем трижды.

Зри: Аще случится память святителя в субботу мясопустную, поем ему службу в пяток.

Зри: Егда творим бдение святителю, держим устав во всем якоже бденным святым.

Зри: Аще случится храм святителя, творим бдение, якоже пишется в главах о храмех.

Источник: Храм.инфо