Источник

В 5-й день

Свята́го священному́ченика Дорофе́я, епи́скопа Ти́рскаго

Священномученик Дорофей

Свята́го благове́рного кня́зя Фео́дора Яросла́вича, бра́та свята́го благове́рнаго вели́кого кня́зя Алекса́ндра Не́вскаго

Благоверный князь Феодор Новгородский

Преподо́бных отце́в Вассиа́на и Ио́ны, Пертоми́нских чудотво́рцев

Преподобные Вассиан и Иона

Преподо́бного отца́ на́шего Петра́ Кори́шскаго

Преподобный Петр Коришский

Перенесе́ние моще́й свята́го благове́рнаго кня́зя И́горя

Перенесение мощей блаженного Игоря

Святой Константин I, митрополит Киевский

 

 

Свята́го священному́ченика Дорофе́я, епи́скопа Ти́рскаго

Стихи́ры, глас 8.

Подо́бен: Му́ченицы Твои́, Го́споди:

Скрижа́ли Бо́жия Ду́ха, Богоблаже́нне, показа́лся еси́, о́тче,/ Боже́ственная уче́ния пи́сана нося́ в ра́зуме боже́ственне,/ тех разгну́тием просвети́л еси́ неразу́мием бе́дствующия./ Тем твои́ми моли́твами/ проси́ нам всем, о́тче, ве́лию ми́лость.

Крове́й Боже́ственными тече́нии/ обагри́в твою́ свяще́нную оде́жду, Дорофе́е,/ вшел еси́, ра́дуяся, в Небе́сный храм,/ ны́не яви́тися Бо́гу на́шему,/ подаю́щему венцы́ страда́вшим./ Того́ приле́жно моли́/ всем низпосла́ти ве́лию ми́лость.

Житие́ твое́ равноа́нгельно,/ муче́ние же просвеще́нно,/ и́мже сподо́бился еси́ со А́нгелы ликова́ти в ра́дости,/ чудесы́ зе́млю, о́тче Дорофе́е, Боже́ственными озаря́я и уче́ньми./ Тем твои́ми моли́твами проси́/ дарова́ти всем ве́лию ми́лость.

И́ны стихи́ры Богоро́дицы, глас и подо́бен то́йже:

Исхити́ мя, Влады́чице, из руки́ зми́я человекоуби́йцы,/ борю́щаго мя ле́стию пожре́ти до конца́,/ сокруши́ че́люсти сего́, молю́ся,/ и кова́рствия разори́,/ я́ко да, изба́влься сего́ ногте́й,/ велича́ю си́лу Твою́.

Аз есмь дре́во непло́дное, Всенепоро́чная,/ неплодя́щее плода́ спаси́тельнаго,/ те́мже и трепе́щу посече́ния,/ да не ка́ко вве́ржен буду во огнь негаси́мый, окая́нный./ Те́мже Ти припа́даю:/ сего́ изба́ви мя/ и плодоно́сна покажи́, Чи́стая, Сы́ну Твоему́ хода́тайством Твои́м.

Уязви́ се́рдце мое́/ стрела́ жела́ния смертоно́сная,/ и уязви́хся от неразумия, и неисце́льно болю́:/ Ма́ти Бо́жия, не пре́зри мене́, отча́яннаго,/ но исцеле́ние даждь ми,/ я́ко ро́ждши Го́спода и Спа́са, еди́наго Милосе́рдаго.

Сла́ва, и ны́не, Богоро́дичен:

Помышле́ния нечи́ста, и устны́ льстивы́,/ дела́ же моя́ вся оскверне́на,/ и что́ сотворю́?/ Ка́ко усря́щу Судию́?/ Влады́чице Де́во, моли́ Сы́на Твоего́, и Зижди́теля, и Го́спода,/ я́ко да в покая́нии прии́мет дух мой,/ я́ко еди́н Благоутро́бен.

Крестобогоро́дичен:

Ю́ница нескве́рная,/ Юнца́ ви́дящи, на Дре́ве пригвожда́ема во́лею,/ рыда́ющи жа́лостне: –/ увы́ Мне, – вопия́ше, – люби́мейшее Ча́до,/ что́ Ти сонм воздаде́ безблагода́тный евре́йский,/ хотя́ Мя обезча́дствовати от Тебе́, Вселюбе́зне?

Тропа́рь, глас 4:

И нра́вом прича́стник,/ и престо́лом наме́стник, апо́столом быв,/ дея́ние обре́л еси́, Богодохнове́нне,/ в виде́ния восхо́д;/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Дорофе́е,/ моли́ Христа́ Бо́га/ спасти́ся душа́м на́шим.

Ин тропа́рь, глас 5:

Нищелю́бием обогати́вся/ и ми́лость воздержа́ния источи́в,/ наслажде́ния Ца́рствия Небе́снаго сподо́бися,/ страда́льчески бе́ды прии́м по ста́де свое́м,/ и апо́столом обре́теся ссе́льник,/ о́тче священному́чениче Дорофе́е,/ моли́ Христа́ Бо́га/ спасти́ся душа́м на́шим.

Кано́н, егоже краегране́сие: Да́ра Бо́жия тя, всеблаже́нне о́тче, честву́ю. Творе́ние Ио́сифово, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Дар Бо́гу, всеблаже́нне, тебе́ сама́го прине́сл еси́ чисте́йший,/ житие́м соверше́нным и честны́м муче́нием, Дорофе́е.

Я́коже зрел грозд, о́тче, изгне́т мысль,/ весе́лия ча́шу – ве́рным уче́ния предложи́л еси́.

То́ки ле́стныя уста́вил еси́, Дорофе́е, тече́ньми прему́драго твоего́ язы́ка/ и ве́рных мы́сли напои́л еси́.

Богоро́дичен: Одожди́ ми, Де́во, молю́ся, ка́пли умиле́ния,/ прибы́вшую ми скве́рну отмыва́ющия,/ я́ко да сла́влю Тя.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Нощь отгна́л еси́ су́етства вся́ку/ блиста́нии, о́тче святи́телю, прему́драго пропове́дания.

Чудесы́ утверди́л еси́ и свяще́нными, му́дре, уче́нии/ ве́рных всех мы́сли, я́ко па́стырь свяще́нен.

Пома́за тя Госпо́дь свяще́нным, о́тче, пома́занием/ и Своея́ Боже́ственныя Це́ркве пастыренача́льника поста́ви.

Богоро́дичен: Все се́рдце мое́ Боже́ственным све́том просвети́, две́ре Све́та,/ грехо́вное омраче́ние отгоня́щи.

Седа́лен, глас 3.

Подо́бен: Боже́ственныя ве́ры:

Боже́ственными догма́ты при́сно сия́ющ дар святы́й,/ тебе́ сама́го прине́сл еси́ Безсме́ртному Царю́, пострада́в, Дорофе́е,/ и обита́еши ны́не, при́сно веселя́ся,/ перворо́дных в Го́рней митропо́лии./ О́тче преподо́бне, Христа́ Бо́га моли́/ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлучи́ся, плоть быв во чре́ве Твое́м,/ но Бог вочелове́чся и пребы́сть,/ И́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Возноси́мую оплева́л еси́, преподо́бне, зи́му безбо́жия/ и теплото́ю Боже́ственнаго Ду́ха невреди́мо се́рдце соблю́л еси́.

Сокруши́шася, Дорофе́е блаже́нне, пред лице́м твои́м го́ры ну́ждныя де́монския/ и иста́яша злочести́вых челове́к шата́ния.

Терпе́л еси́, оскорбля́емь, от гра́да во град изгони́м,/ те́мже блаже́нную улучи́л еси́ му́ченик сла́ву и све́тлость.

Богоро́дичен: Искуше́ний мя спаси́ и душетле́нныя страсте́й бу́ри,/ я́ко да ве́рою ублажа́ю Тя, Пресвята́я Отрокови́це, Ма́ти Де́во.

Песнь 5

Ирмо́с: От но́щи неве́дения,/ Богове́дением просвети́вши концы́,/ просвети́ мя у́тром человеколю́бия Твоего́, Го́споди.

Смотря́я разу́мно воздая́ния Боже́ственная, Дорофе́е,/ вели́кия беды́ и напа́сти претерпе́л еси́.

Еди́нством Божества́ пропове́дая Тро́ицу, Дорофе́е,/ многобо́жнаго неи́стовства су́етное погуби́л еси́ шата́ние.

Не поклони́вся, му́чениче, дело́м рук беззако́нных,/ терпе́л еси́ искуше́ния, и беды́, и ра́ны, и боле́зни, Дорофе́е.

Богоро́дичен: Восто́к Со́лнца, пре́жде денни́цы возсия́вшаго, была́ еси́,/ И́мже свет су́щии во тьме лю́тых, Чи́стая, ви́деша.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Се́рдце, разжже́но дыха́нии Ду́ха, стяжа́л еси́,/ духо́в, Дорофе́е, сопроти́вных стремле́ние разруша́ющо.

Святы́х жития́ свяще́нными списа́ньми яви́л еси́, о́тче Богодохнове́нне,/ Боже́ственным ра́зумом ду́шу просвеща́я.

Глаго́л твои́х веща́ние и кра́сных уче́ний си́ла/ всю обтече́, преблаже́нне, зе́млю Боже́ственною благода́тию.

Богоро́дичен: Де́во, Его́же родила́ еси́, Бо́га, Челове́ка бы́вша,/ Того́ моли́ изба́вити мя огня́ и му́ки.

Конда́к, глас 5:

Доброде́тельми сия́я, и Боже́ственными уче́нии па́че со́лнца,/ и страда́нии, блаже́нне, облиста́л еси́,/ просвети́л еси́ зе́млю, Дорофе́е, отгна́в мглу многобо́жия и лю́тыя е́реси./ Сего́ ра́ди па́мять твою́ све́тло пра́зднуем.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Звезда́ многосве́тлая яви́лся еси́, светлостьми́ страда́ний твои́х просвеща́я ду́ши/ ве́рно, Дорофее, вопию́щих:/ благослове́н еси́, Го́споди Бо́же, во ве́ки.

Стезя́ми пра́выми ходя́, низве́ргл еси́ де́бри льсти́ваго,/ к путе́м живо́тным наставля́я вопию́щия:/ благослове́н еси́, Го́споди Бо́же, во ве́ки.

Угаси́л еси́ ту́чами крове́й твои́х, всесла́вне, пещь преле́стную/ и на воде́ жи́зни всели́лся еси́, взыва́я:/ благослове́н еси́, Го́споди Бо́же, во ве́ки.

Богоро́дичен: Изба́ви соу́з греха́ окая́нную мою́ ду́шу, Богороди́тельнице,/ и любви́ Бо́жией припрязи́ соверше́ние,/ да ве́рно сла́влю Тя, Богоро́дице, во ве́ки.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Хва́лящагося зми́я в зло́бе, смири́вся о Го́споде, о́тче, смири́л еси́, вопия́:/ благослови́те, вся дела́ Госпо́дня, Го́спода.

Во глубо́цей тя ста́рости в нестаре́ющихся поко́йных ме́стех Зижди́тель всели́,/ свяще́нный о́тче, му́чеников украше́ние.

Житие́ равноа́нгельно име́я,/ со А́нгелы Влады́ки твоего́ престо́лу ны́не предстои́ши, вопия́:/ благослови́те, вся дела́ Госпо́дня, Го́спода.

Богоро́дичен: Кра́сная, Де́во, яви́лася еси́,/ прекра́сное Сло́во поро́ждши, Ему́же пое́м:/ благослови́те, вся дела́ Госпо́дня, Го́спода.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Испра́вил еси́ ста́до Христо́во к Боже́ственным приста́нищем,/ невре́дно соблю́д е от бу́ри сопроти́вныя, я́ко преизря́ден святи́тель/ и Боже́ственных, о́тче, испо́лнитель, му́дре, повеле́ний.

Я́ко священноде́йственник чист, я́ко му́ченик добль,/ я́ко чудоде́йственник чу́ден, я́ко Боже́ственных словопи́сец,/ я́ко ве́ры непоколеби́м столп, сла́ву ве́чную, о́тче, улучи́л еси́.

На суди́щи подъе́м мно́ги труды́ и боле́зни,/ к неболе́зненней и Боже́ственней жи́зни, ра́дуяся, преше́л еси́,/ обоже́нию ны́не чи́сто прича́щся, му́чениче досточу́дне Дорофе́е.

Богоза́рная па́мять твоя́ возсия́ ми́ру,/ озаря́ющи ве́рныя луча́ми дарова́ний,/ ю́же сла́вящия о́бщники ны покажи́, о́тче, в тебе́ Боже́ственныя све́тлости.

Богоро́дичен: Нося́щи Христа́ на рука́х, нося́щаго вся ма́нием Боже́ственным, Чи́стая,/ Того́ при́сно моли́ рук на́ших воздея́ния испра́вити,/ я́ко фимиа́м, пред лице́м Его́.

Священномученик Дорофей

Священномученик Дорофей в период гонений на христиан при императоре Диоклитиане (284–305) был епископом города Тира Финикийского. По слову Евангелия (Мф. 10:21), святитель удалился из Тира и скрылся от мучителей. В царствование святого Константина Великого (306–337; память 21 мая) он вернулся в Тир, вновь занял епископский престол и управлял паствой более 50 лет, обратив в христианство множество язычников. Когда Юлиан Отступник (361–363) начал открыто преследовать христиан, святителю Дорофею было уже более 100 лет. Он удалился из Тира в Мизийский город Уд (ныне Варна). Там его схватили придворные императора. За отказ принести жертву идолам святого старца стали жестоко истязать, и под пыткой он предал душу свою Господу († около 362 года в возрасте 107 лет). Священномученику Дорофею некоторые приписывают составление «Синопсиса» – собрания исторических сказаний, а также житий святых пророков и апостолов.

Свята́го благове́рного кня́зя Фео́дора Яросла́вича, бра́та свята́го благове́рнаго вели́кого кня́зя Алекса́ндра Не́вскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Род пра́вых благословля́яй Вы́шний,/ благослови́ и тебе́ благослове́нием Свои́м благосты́нным,/ благове́рный кня́же Фео́доре,/ и я́коже на земли́ пред челове́ки,/ си́це на Небеси́ пред А́нгелы и ду́хи пра́ведных/ прославля́ет тя Свое́ю благода́тию.

Был еси́ красе́н те́лом и ду́хом,/ егда́ жил еси́ в ми́ре сем,/ я́ко крин посреде́ те́рния,/ ны́не же и па́че красе́н еси́,/ егда́ те́ло твое́ зде облече́ся в нетле́ние,/ ду́хом же пребыва́еши на Небеси́/ со ду́хи пра́ведных.

Веселя́хуся о тебе́, кня́же Фео́доре,/ сро́дницы твои́, боля́ре и сы́нове росси́йстии,/ приспе́вшу вре́мени прия́ти тебе́ бра́чный вене́ц,/ но мы ны́не весели́мся сугу́бо,/ я́ко увенча́н еси́ венце́м сла́вы безсме́ртныя/ и мо́лишися о нас ко Го́споду.

Пра́вым подоба́ет похва́ла,/ я́коже ца́рствующий пое́т проро́к./ Тем и мы, Дави́ду внима́я,/ тебе́, ве́рный ра́бе Госпо́день,/ мзду пра́ведничу прии́мшаго,/ похва́льными пе́сньми ублажа́ем.

Сла́ва, глас то́йже:

Сла́ва Тебе́, Го́споди Бо́же наш,/ прия́вшему ду́шу благове́рнаго кня́зя Фео́дора в кро́вы Небе́сныя/ и прославля́ющему те́ло его́ на земли́ нетле́нием,/ по вели́цей Твое́й ми́лости.

И ны́не, Богоро́дичен:

Услы́шавши Елисаве́т целова́ние Твое́, Мари́е,/ возопи́ от ра́дости гла́сом ве́лиим:/ отку́ду мне сие́,/ да прии́де Ма́ти Го́спода моего́ ко мне?/ Мы же, слы́шаще глаго́лы Твоего́ Сы́на,/ я́же суть глаго́лы живота́ ве́чнаго,/ с ра́достию та́кожде вопие́м:/ отку́ду нам сие́,/ я́ко Тобо́ю роди́ся нам Спас.

На стихо́вне стихи́ры, глас 2.

Подо́бен: До́ме Евфра́фов:

Честна́ пред Го́сподем смерть твоя́,/ блаже́нне Фео́доре,/ а́ще бо от те́ла/ душе́ю и разлучи́лся еси́,/ но душа́ твоя́ в руце́ Его́.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Горе́ли бы́ша к тебе́ любо́вию/ росси́йстии сы́нове,/ ви́дяще благочести́ва ко́рене/ о́трасль благочести́вую,/ но вя́щше возлюби́ тя Царь ца́рствующих.

Стих: Возвесели́тся пра́ведник о Го́споде/ и упова́ет на Него́.

Тече́ние жития́ твоего́/ в кра́ткое вре́мя соверши́л еси́,/ но Бо́гу дово́льно угоди́л еси́,/ сего́ ра́ди вшел еси́/ в ра́дость жи́зни ве́чныя.

Сла́ва, глас 2:

Всеще́дрый пра́ведных/ Мздовоздая́телю Го́споди,/ пое́м и сла́вим Твою́ неизрече́нную бла́гость,/ ея́же уго́дника Твоего́ Фео́дора/ сподо́бил еси́.

И ны́не, Богоро́дичен:

Недове́домая воплоще́ния Бо́жия та́йна/ Тобо́ю, Де́во,/ я́сно ми́ру откры́ся,/ сего́ ра́ди, благодаря́ще, пое́м Ти:/ ра́дуйся, недове́домыя та́йны Бо́жия открове́ние.

По Ны́не отпуща́еши: тропа́рь, глас 8, пи́сан на вели́цей вече́рни. Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

Почита́я ли́ки пра́ведных,/ правове́рно и благоче́стно в ми́ре сем сконча́вшихся,/ велича́ем в Тро́ице сла́вимаго Бо́га,/ те́мже и тебе́, кня́же Фео́доре,/ ве́ру и благоче́стие це́ло соблю́дшаго,/ и целому́дрием твои́м Бо́гу угоди́вшаго,/ и во оби́телех Небе́сных/ с пра́ведными торжеству́ющаго,/ единогла́сно почита́ем.

Подража́я твои́м роди́телем,/ и́мже бысть зако́н Бо́жий благ/ па́че ты́сящ зла́та и сребра́,/ прилепи́лся еси́ усе́рдно тому́жде/ и поуча́лся еси́ в нем со тща́нием,/ соблюда́я же его́ в твое́м се́рдцы,/ пра́вою стезе́ю ходи́л еси́,/ и сию́ благода́ть обре́л еси́,/ да ны́не тя во святы́х почита́ем.

И в ю́ношеских ле́тех сый, кня́же Фео́доре,/ соверше́нно разуме́л еси́,/ ка́ко му́дрыя де́вы внидо́ша на брак:/ украси́л еси́ свети́льник твой/ неугаса́ющим доброде́телей еле́ем,/ его́же в кра́ткой жи́зни стяжа́л еси́,/ и та́ко вшел еси́ невозбра́нно/ на брак Жениха́ Небе́снаго/ и наслажда́ешися гла́са веселя́щихся.

Великоле́пный брак тебе́ на земли́ готовля́ху/ сро́дницы и дру́зи твои́,/ неве́дуще Бо́жия Про́мысла,/ я́ко Бог благоволи́ избра́ти тя,/ во е́же тебе́ безбра́чну/ служи́ти на бра́ке Сы́на Его́ Единоро́днаго,/ а́може и Небе́сныя си́лы/ со благогове́нием тща́тся прини́кнути,/ трисвяту́ю песнь воспева́юще.

Сла́ва, глас 2:

Хвали́ Бо́га твоего́, Росси́е,/ я́ко призира́я на тя о́ком Своего́ благоутро́бия/ и прославля́я тя уго́дники Свои́ми,/ нетле́нием телесе́ удивля́ющими,/ причте́ к их ли́ку и благове́рнаго кня́зя Фео́дора,/ и́же ку́пно с ни́ми о свои́х единове́рных/ Ему непреста́нно мо́лится.

И ныне, Богоро́дичен.

Вход, проки́мен дне и чте́ния.

При́тчей чте́ние (гла́вы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же е́сть ка́мений многоце́нных,/ все же честно́е недосто́йно ея́ есть./ Долгота́ бо дни́й и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя сохрани́т:/ исхо́ди бо мои́, исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящии люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́,/ Послу́шайте мене́ и па́ки, честна́я бо реку́,/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (гла́вы 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая – ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет доса́ждение, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их, безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раекопа́ется./ Руга́ется гра́жданам лише́нный ра́зума,/ муж же му́дрый безмо́лвие во́дит.

Прему́дрости Соломо́новы чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет изчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 4:

Стецы́теся, росси́йстии наро́ди,/ ублажи́м досто́йными похвалы́ благове́рнаго Фео́дора,/ нетле́нием телесе́ на земли́ процвета́ющаго/ и душе́ю предстоя́щаго Престо́лу Бо́жию.

Пра́ведный Госпо́дь во всех словесе́х Свои́х/ утверди́ я и на рабе́ Свое́м, кня́зе Фео́доре:/ горя́щаго к Нему́ любо́вию возлюби́/ и и́щущему Его́ даде́ благода́ть.

Храня́й пра́ведныя Своя́, а́ки зе́ницу о́ка,/ храня́ше и пра́ведника Своего́, Фео́дора,/ е́же не преткну́ти ему́ ноги́ своея́ о ка́мень беззако́ния/ во всех путе́х его́.

Предви́дев Всеве́дущий Влады́ка/ тве́рдое его́ усе́рдие,/ е́же пребы́ти ему́ во вся дни живота́ своего́ в целому́дрии,/ прия́т его́ от земли́ пре́жде бра́чнаго сочета́ния/ в ра́достная селе́ния де́вственников.

Приспе́вшу вре́мени блаже́нныя кончи́ны его́,/ бысть плач, и рыда́ние, и во́пль мног,/ но мы ны́не, ви́дяще его́ во святы́х Бо́гом просла́вленнаго,/ преложи́м плач на ра́дость,/ рыда́ние на весе́лие,/ вопль на пра́зднственное восклица́ние.

Сла́ва, глас то́йже:

Да облеку́тся в студ и срамоту́/ и́же не ве́руют бы́ти чудесе́м Бо́жиим./ Се, в пе́рвых чу́до:/ я́ко тле́нию естество́м подлежа́щее кня́зя Фео́дора те́ло/ чу́ждо есть истле́ния.

И ны́не, Богоро́дичен:

Ра́дуйся, Богоро́дице Де́во,/ я́ко Симео́ном Прорече́ннаго/ на паде́ние и на воста́ние мно́гим/ Тобо́ю получи́ти сподо́бихомся.

На стихо́вне стихи́ры, глас 2:

Украси́вый не́бо звезда́ми,/ украси́ Росси́ю нетле́нными телесы́ Свои́х уго́дников,/ в ни́хже просла́ви/ и благове́рнаго кня́зя Фео́дора.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Я́ко фи́никс, процве́л еси́, кня́же Фео́доре,/ на земли́ нетле́нием,/ на Небеси́ же безсме́ртною сла́вою,/ ю́же от сложе́ния ми́ра угото́ва Бог лю́бящим Его́.

Стих: Возвесели́тся пра́ведник о Го́споде/ и упова́ет на Него́.

Доброде́тельми, я́ко крыла́ми,/ на Не́бо возлете́л еси́/ и ду́шу твою́ я́ко же́ртву чи́сту/ Бо́гу предста́вил еси́,/ оста́вив нам утеше́нием нетле́нное твое́ те́ло,/ е́же благогове́йно лобыза́ем.

Сла́ва, глас то́йже:

Вели́ких даро́в сподо́бил еси́, Влады́ко, кня́зя Фео́дора,/ я́ко пра́во ходи́ пред Тобо́ю;/ сподо́би тех и нас, моля́щихся Тебе́ приле́жно,/ и наста́ви нас, да хо́дим пред Тобо́ю/ вы́ну путе́м пра́вым.

И ны́не, Богоро́дичен:

Соврати́ся род челове́ческий от пути́ и́стины,/ и скита́шеся, я́ко овча́ поги́бшее,/ но Ты, Де́во, показа́ла еси́ Сы́ном Твои́м/ путь, и́стину и живо́т.

На благослове́нии хле́бов, по Ны́не отпуща́еши: тропа́рь свята́го, два́жды. Та́же Богоро́дице Де́во: еди́ножды.

Тропа́рь свята́го, глас 8:

От благочести́ваго ко́рене о́трасль благочести́вая прозя́бл еси́/ и, сконча́вся в ю́ности, ле́та до́лга твои́ми доброде́тельми испо́лнил еси́,/ благове́рный кня́же Фео́доре,/ сего́ ра́ди Владе́ющему времена́ми мо́лимся,/ да моли́твами твои́ми пода́ст нам долготу́ лет/ и низпосле́т стране́ на́шей ве́лию и бога́тую ми́лость.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Блаже́н и треблаже́н еси́, кня́же Фео́доре,/ в млады́х бо ле́тех твои́х си́це в доброде́телех преуспе́л еси́,/ я́ко и ве́тхим де́ньми диви́тися довле́ет:/ между́ земноро́дными жи́тельствуя,/ чисте́йшим А́нгелом подража́тель яви́лся еси́,/ сего́ ра́ди по успе́нии твое́м и торжеству́еши ны́не с ли́ки А́нгельскими.

Сла́ва, и ны́не, Богоро́дичен:

Вели́чие вои́стинну сотвори́ Тебе́ Си́льный, Де́во Всечи́стая,/ сокрове́нное от ве́ка та́инство Тебе́ откры́/ и, я́же хотя́ше, Тобо́ю соде́я./ Сего́ ра́ди Тя усе́рдно в си ублажа́ем.

По 2-м стихосло́вии седа́лен, глас 2:

На земли́ живя́, земна́я му́дрствовати презира́л еси́,/ но, слу́шая сло́ва спаси́тельнаго,/ весь ум твой вперя́л еси́ в Го́рняя,/ сего́ ра́ди и сам ны́не в Го́рних водворя́ешися.

Сла́ва, и ны́не, Богоро́дичен:

Недоуме́ет всяк язык досто́йными Тя ублажи́ти похвала́ми, Всесвята́я Влады́чице,/ из Твои́х бо ложе́сн про́йде Спас и Изба́витель ми́ра.

По полиеле́и седа́лен, глас 7:

Насажде́нному дре́ву при исто́чницех вод,/ е́же дае́т плод во вре́мя свое́/ и его́же лист не отпа́дает,/ подо́бен еси́, свя́те Фео́доре,/ водвори́лся бо еси́ в ме́сте све́тле, в ме́сте зла́чне, в ме́сте поко́йне,/ иде́же гла́сы пра́зднующих шумя́т, я́ко ре́чная устремле́ния,/ сие́ весе́лие твое́ не оты́мется от Тебе́ во ве́ки безконе́чныя.

Сла́ва, и ны́не, Богоро́дичен:

Ма́терь Тя Бо́жию бы́ти ве́руя/ и благода́ти неизрече́нныя испо́лнену испове́дуя, Преблагослове́нная Де́во Мари́е,/ с Гаврии́лом вопие́м Ти:/ ра́дуйся, Благода́тная, Госпо́дь с Тобо́ю.

Степе́нна 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Ве́лию красоту́ творя́ше Ааро́ну ми́ро,/ сходя́щее на браду́ его́/ и на оме́ты оде́жды его́,/ но мно́го па́че вя́щшую красоту́ твори́т благода́ть Бо́жия,/ на кня́зя Фео́дора излия́нная,/ подаю́щая те́лу его́ нетле́ние,/ душе́ же его́ сла́ву безсме́ртную.

Кано́н свято́му на 8, глас 8.

Песнь 1

Ирмо́с: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

Я́ко еле́нь жела́ет на исто́чники водны́я,/ си́це жела́ше душа́ твоя́, кня́же Фео́доре, к Бо́гу,/ И́же и прия́ тя с любо́вию и сотвори́ насле́дника Ца́рствия Своего́.

Кра́ткое жи́зни твоея́ име́л еси́ тече́ние,/ но по́двигом до́брым в зако́не Бо́жии подвиза́лся еси́/ и ве́ру соблю́л еси́,/ сего́ ра́ди отложи́ся тебе́ вене́ц сла́вы безсме́ртныя.

Ди́вный, Го́споди, во святы́х Твои́х,/ ди́вен еси́ вои́стинну и во святе́м Твое́м кня́зе Фео́доре,/ и́бо в не́мощнем естестве́ челове́честем/ вышеесте́ственную си́лу Твою́ соверша́я,/ дал еси́ те́лу его́ нетле́ние.

Богоро́дичен: Чу́дно бысть, е́же огне́м опаля́тися купине́ и не сгара́ти;/ чу́дно же и сие́ вои́стинну,/ я́ко Де́вою безсе́менно зачала́ и родила́ еси́ Сы́на Бо́жия/ и по рожде́нии Его́ па́ки Де́ва пребыла́ еси́./ Те́мже Тя, я́ко Ма́терь Бо́жию и Де́ву, благоче́стно велича́ем.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

И́стинная лоза́ виногра́да Христо́ва был еси́, кня́же Фео́доре,/ сего́ ра́ди и в кра́ткое вре́мя мног плод доброде́телей израсти́л еси́.

Дозре́вшим твои́х доброде́телей гро́здием,/ еще́ тебе́ мла́ду су́щу,/ да не ка́ко же́стокия страсте́й бу́ри повредя́т я,/ преселе́н еси́ в вертогра́д Небе́сный.

Коль пра́веден и щедр еси́, Благоутро́бный Влады́ко,/ в мздовоздая́нии Твои́м пра́ведником!/ Довле́ет и еди́н о́браз:/ ка́ко пра́ведника Твоего́ Фео́дора уще́дрил еси́.

Богоро́дичен: От утро́бы ма́тере Себе́ Бо́гу посвяти́ла еси́, Отрокови́це,/ и усе́рдием Ему́ служи́ла еси́,/ тем Тебе́ и Бог воздаде́ по правоте́,/ я́ко Тя вси ро́ди Богоро́дицею ублажа́ют.

Седа́лен, глас 8:

Исхо́д твой, кня́же Фео́доре, от сея́ вре́менныя жи́зни,/ мно́гия источи́ сле́зы от о́чию сыно́в росси́йских,/ но Оте́ц щедро́т и Бог вся́кия уте́хи награди́ их изоби́льно весе́лием,/ возложи́в на свято́е твое́ те́ло оде́жду нетле́ния, во вя́щшее увере́ние,/ я́ко ты по исхо́де твое́м в ра́дости пребыва́еши.

Сла́ва, и ны́не, Богоро́дичен:

Усумне́ся обру́чник Твой Ио́сиф, ви́дев Тя непра́здну,/ но а́бие разреши́ся сумне́ние,/ егда́ извеще́н бысть от А́нгела,/ я́ко заче́ншееся в Тебе́ от Ду́ха есть Свя́та.

Песнь 4

Ирмо́с: Услы́шах слух си́лы Твоея́,/ и возвесели́ся се́рдце мое́ о Го́споде.

Хваля́шеся иногда́ ева́нгельский ю́ноша пред Го́сподем,/ я́ко вся за́поведи соблюде́ от ю́ности своея́,/ но не послу́ша Го́спода, ма́лое сотвори́ти ему повелева́ющаго,/ и не и́де вслед Его́,/ ты же, блаже́нне Фео́доре, и, не хваля́ся, повеле́ний Госпо́дних слу́шал еси́/ и Ему́ с весе́лием после́довал еси́.

Даны́ бы́ша тебе́ от Го́спода тала́нты душе́вныя и теле́сныя,/ и́хже во бла́го употребля́я,/ в кра́ткое вре́мя мно́гое приобре́тение Ему́ сотвори́л еси́,/ сего́ ра́ди и введе́ тя, я́ко раба́ блага́го и ве́рнаго, в ра́дость Свою́.

Слу́шаяй моли́твы пра́ведных Твои́х, Го́споди,/ услы́ши моли́тву и пра́ведника Твоего́ Фео́дора,/ ю́же прино́сит Тебе́ о ро́де свое́м.

Богоро́дичен: С ра́достию гото́ва су́щи к званию,/ на не́же избра́ Тя Вы́шний, Де́во Мари́е,/ со смире́нием Гаврии́лу рекла́ еси́:/ се раба́ Госпо́дня./ Мы же, Тя си́це смири́вшуюся, Влады́чицею ны́не почита́ем.

Песнь 5

Ирмо́с: Я́ко Бо́га ино́го, Бла́же,/ па́че Тебе́, не зна́ем,/ к Тебе́, Све́ту Незаходи́мому, от но́щи у́тренююще,/ воспева́ем Тя, Человеколю́бче.

В ма́лых днех жития́ твоего́, блаже́нне Фео́доре,/ вели́ких свети́ло яви́лся еси́ доброде́телей,/ и́миже Бог благоугожда́ется.

Све́тлу ду́шу твою́ хотя́ предста́вити Бо́гу,/ чистоту́ в житии́ твое́м соблю́л еси́,/ сего́ ра́ди по твое́м успе́нии вшел еси́,/ а́може ничто́же нечи́сто вхо́дит.

Ра́ди пра́ведных Твои́х, Го́споди,/ простира́еши лучи́ Твоея́ ми́лости на гре́шныя:/ озари́ у́бо и нас, недосто́йных рабо́в Твои́х, луча́ми Твоего́ благоутро́бия/ ра́ди пра́ведника Твоего́ Фео́дора.

Богоро́дичен: Егда́ Гаврии́л благовести́ Тебе́, Неискусому́жная Де́во,/ я́ко во чре́ве Твое́м зачне́ши и роди́ши Сы́на Бо́жия,/ с ве́рою отвеща́ла еси́:/ бу́ди Мне по глаго́лу твоему́./ Сего́ ра́ди по ве́ре Твое́й и бысть Тебе́ благослове́ние Вы́шняго,/ Тобо́ю же и вси лю́дие,/ и́же сиде́ша во тьме и се́ни сме́ртней,/ узре́ша свет ве́лий.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

И мя́гкия нося́й оде́жды, кня́же Фео́доре,/ си́це житие́м твои́м в кра́ткое вре́мя Бо́гу угоди́л еси́, я́ко мно́гим диви́тися,/ и́же угоди́ша Ему́, долговре́менно облача́ющеся во вре́тище.

Уве́рен быв, я́ко и златотка́нныя ри́зы о́бщему подлежа́т тле́нию,/ потща́лся еси́ в животе́ твое́м из доброде́телей истка́ти себе́ ри́зу нетле́ния,/ в не́йже ны́не красу́ешися.

Коле́на се́рдца на́шего преклоня́я,/ благодаре́ние Тебе́ возсыла́ем, Человеколю́бче,/ я́ко те́ло кня́зя Фео́дора, тле́нию по естеству́ подлежа́щее,/ обле́кл еси́ в ри́зу нетле́ния,/ и́мже умножа́ется сла́ва всея́ Росси́и.

Богоро́дичен: Позлаще́нными доброде́телей ри́зами/ оде́янна и преиспещре́нна была́ еси́ на земли́, Пренепоро́чная,/ сего́ ра́ди и Бог Сло́во во утро́бе Твое́й/ благоволи́ облещи́ся в плоть челове́ческую.

Конда́к, глас 4:

В благоче́стии рожде́нна,/ в стра́се Бо́жии воспита́на,/ в житии́ целому́дрие стяжа́вшаго,/ по успе́нии же нетле́нием телесе́ просия́вшаго,/ благове́рнаго кня́зя Фео́дора во святы́х почита́я,/ смире́нно мо́лимся Тебе́, Всеси́льный Влады́ко,/ да и во ве́ки прославля́еши святы́ми Твои́ми/ страны́ на́ша росси́йския.

И́кос:

Досто́йно и пра́ведно есть ра́доватися тебе́, свя́те Фео́доре, на Небеси́,/ я́ко неизрече́нную благода́ть от Бо́га получи́л еси́,/ мы же ра́дуемся на земли́,/ я́ко тя и́мамы те́плаго к Бо́гу моли́твенника,/ и от ра́дости си́це зове́м:/ ра́дуйся, похвало́ росси́йская.

Песнь 7

Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Я́ко чи́стое доброде́телей зерца́ло был еси́ на земли́, кня́же Фео́доре,/ сего́ ра́ди Вы́шний, восприя́в ду́шу твою́ в черто́г Свой Небе́сный,/ оста́ви нам о́браз, нетле́нное твое́ те́ло,/ да после́дуем стопа́м твои́м.

Не стыди́мся хвали́тися, пра́ведниче Бо́жий,/ я́ко моли́тва твоя́ к Бо́гу мно́го мо́жет поспешествова́ти нам во благо́е:/ ве́мы бо, я́ко моли́твы пра́ведных прия́тны Ему́.

Хва́лим, пое́м и благослови́м Тебе́, Го́споди,/ я́ко призира́еши на Росси́ю с высоты́ свята́го жили́ща Твоего́/ и посеща́еши ю, я́ко виногра́д Твой,/ его́же насади́ десни́ца Твоя́.

Богоро́дичен: Блажи́м Тя, Богоро́дице Де́во,/ и блажи́ти никогда́ не престае́м:/ благослове́нна бо Ты еси́ в жена́х/ и благослове́н Плод чре́ва Твоего́.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Блаже́н еси́, кня́же Фео́доре,/ я́ко сый посреде́ волну́ющагося душетле́нных страсте́й мо́ря,/ к ти́хому приста́нищу в кра́ткое вре́мя безбе́дно дости́гл еси́.

А́ще и устремля́хуся ми́ра сего́ во́лны, е́же потопи́ти ю́ность твою́,/ но ничто́же успе́ша:/ ковче́г бо тебе́ бысть чистота́,/ корми́ло – Правосла́вная ве́ра,/ ко́тва 14 – тве́рдая на Бо́га наде́жда,/ ве́трило – любо́вь к Бо́гу и бли́жним.

Прославля́ем Тя, Го́споди Бо́же,/ я́ко, удивля́я хоте́ния Твоя́ во святы́х Твои́х,/ удиви́л еси́ хоте́ние Твое́ и в благове́рнем кня́зе Фео́доре.

Богоро́дичен: Удивля́хуся волсви́ еги́петстии си́ле чудотво́рнаго жезла́ Моисе́ова,/ мы же удивля́емся Тебе́, Мари́е:/ ка́ко Невмести́маго все́ми во утро́бе Твое́й вмести́ла еси́?

Песнь 9

Ирмо́с: Благослове́н Госпо́дь, Бог Изра́илев,/ воздви́гнувши рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Ви́дяще тя росси́йстии сопоста́ты,/ лета́ми доспева́ющаго ко изощре́нию меча́ на вы́и их,/ не можа́ху не смуща́тися:/ ты бо, душе́внаго сопоста́та, еще́ млад сый, победи́ти в си́лах был еси́;/ сего́ ра́ди кре́пкий во бране́х Госпо́дь/ и причте́ тя, я́ко до́браго во́ина,/ к Безпло́тному Своему́ во́инству.

Несумне́нная наде́жда был сыново́м росси́йским к защище́нию оте́чества,/ но Прему́дрый о всех Промысли́тель/ благоволи́ тя прия́ти безмяте́жна в поко́й Свой,/ Росси́ю же защити́ти руко́ю бра́та твоего́, свята́го Алекса́ндра.

Благослове́н еси́, Го́споди Бо́же наш,/ я́ко ве́си пути́ непоро́чных,/ и достоя́ние их во ве́ки пребыва́ет,/ его́же прича́стником бы́ти сподо́бил еси́/ и непоро́чнаго кня́зя Фео́дора.

Богоро́дичен: Призира́яй на смире́нныя рабы́ Своя́ Вы́шний/ призре́ и на Твое́ смире́ние, Пречи́стая Де́во,/ и превознесе́ Тя па́че всех дще́рей сыно́в челове́ческих.

Свети́лен, глас 8:

Прекра́сный доброде́телей храм на земли́ быв, благове́рный князь Фео́дор/ оста́ви нам по свое́м успе́нии те́ло свое́, украше́нное нетле́нием,/ душе́ю же вни́де в храм нерукотворе́нный.

Сла́ва, и ны́не, Богоро́дичен:

Вели́ким благодаре́нием до́лжни мы Тебе́, Влады́чице:/ еди́на бо Ты от земноро́дных яви́лася еси́/ досто́йна прия́ти во утро́бу Твою́ Сы́на Бо́жия,/ Его́же Оте́ц посла́ на зе́млю разруши́ти зако́нную кля́тву/ и пода́ти ве́чное всем благослове́ние.

На хвали́тех стихи́ры, глас 6:

Приника́я в бе́здну суде́б Бо́жиих,/ удивля́емся чу́дному Его́ о пра́ведных Свои́х смотре́нию:/ о́чи бо Его́ вы́ну на них/ и у́ши Его́ вы́ну в моли́тву их,/ и прославля́ет их вре́менно и ве́чно,/ я́коже ви́дим смотре́ние Его́ и о тебе́,/ благове́рный кня́же Фео́доре,/ те́мже тя ублажа́ем.

Я́же кра́сная суть ми́ра сего́,/ вся сия́ бы́ша в руку́ твое́ю,/ егда́ на земли́ сей обита́л еси́;/ егда́ же и от ми́ра сего́ изше́л еси́,/ вся па́ки восприя́л еси́ блага́я, пра́ведным угото́ванная,/ вшел бо еси́ в зе́млю обетова́нную,/ я́же не ме́дом и млеко́м тече́т,/ но есть Ца́рство Небе́сное;/ сего́ ра́ди тя ублажа́ем.

От кня́жеския кро́ве произше́д в мир сей,/ кня́жескую сла́ву име́л еси́ насле́дие:/ вене́ц гото́вяшеся главе́ твое́й,/ порфи́ра рамена́м твои́м,/ ски́петр рука́м твои́м,/ по успе́нии же те́лу твоему́ даде́ся нетле́ние/ и душе́ твое́й ве́чное блаже́нство,/ сего́ ра́ди тя ублажа́ем.

А́ще и в млады́х ле́тех сконча́лся еси́,/ но испо́лнил еси́ ле́та до́лга:/ ста́рость бо честна́ немноголе́тна,/ ниже́ в числе́ лет изчита́ется,/ и во́зраст ста́рости есть житие́ нескве́рное,/ в не́мже до кончи́ны пребы́л еси́;/ ны́не же на Небеси́, и па́ки живе́ши,/ и молишися о нас ко Го́споду,/ сего́ ра́ди тя ублажа́ем.

Сла́ва, глас то́йже:

Ра́ди кро́ткаго раба́ Твоего́ Дави́да,/ по за́поведей Твои́м пред Тобо́ю ходи́вшаго,/ мно́гия ро́ду изра́ильскому явля́л еси́ благодея́ния, Бо́же наш,/ благоде́телен у́бо бу́ди и нам,/ ра́ди незло́биваго раба́ Твоего́ Фео́дора,/ тече́ние жи́зни своея́/ по за́поведем Твои́м соверши́вшаго.

И ныне, Богоро́дичен:

Взыгра́ся се́рдце Твое́, Де́во,/ весе́лием на земли́,/ егда́ в рождестве́ Сы́на Твоего́/ велегла́сно А́нгели воспе́ша:/ сла́ва в Вы́шних Бо́гу, и на земли́ мир,/ в челове́цех благоволе́ние./ Весели́ся и ны́не на Небеси́,/ я́ко и мы ту́южде песнь о Тебе́ Бо́гу воспева́ем.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на песни 3-я и 6-я на 8. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Ева́нгелие от Матфе́я, зача́ло 105. Прича́стен: В па́мять ве́чную:

Моли́тва

Святы́й благове́рный вели́кий кня́же Фео́доре! Ты от кня́жеския кро́ве происше́д в мир сей, кня́жескую сла́ву навсегда́ име́л еси́ насле́довати, и вся кра́сная ми́ра сего́ бы́ша в руку́ твоею́, егда́ на земли́ сей обита́л еси́. Но ты, а́ще и в млады́х ле́тех сконча́лся еси́, но испо́лнил еси́ ле́та до́лга и душе́внаго сопоста́та, еще́ млад сый, победи́ти в си́лах был еси́. И чистоту́ в житии́ твое́м соблю́л еси́, чесо́ ра́ди Кре́пкий во бра́нех Госпо́дь и причте́ тя, я́ко до́браго во́ина, к Безпло́тному Своему́ во́инству в Небе́сных оби́телех, Росси́ю же защити́ руко́ю бра́та твоего́, свята́го благове́рнаго вели́каго кня́зя Алекса́ндра Не́вскаго. Сего́ ра́ди мо́лим тя, Небе́сный во́ине Христо́в: даждь и нам позна́ти, сколь ничто́жно и преходя́ще все жите́йское и сколь бли́зок всегда́ до́лжен бы́ти се́рдцу на́шему Бог наш, да вы́ну помышля́ем о Го́рнем, не о земно́м, да неусы́пно и́щем ве́чнаго Небе́снаго оте́чества, да прославля́ем Бо́га жи́знию и дела́ми на́шими и с му́жеством отража́ем стре́лы по́хоти, греха́ и собла́знов. Ты из среды́ волну́ющагося душе́вных страсте́й мо́ря к ти́хому приста́нищу в кра́ткое вре́мя безбе́дно дости́гл еси́, и, а́ще устремля́хуся ми́ра сего́ во́лны, е́же потопи́ти неви́нную ю́ность твою́, но ничто́же успе́ша, ковче́г бо тебе́ бысть чистота́, корми́ло – Правосла́вная ве́ра, ко́тва – тве́рдая на Бо́га наде́жда, ве́трило – любо́вь к Бо́гу и бли́жнему. Мо́лим тя, уго́дниче Бо́жий, усво́й и нам эти сво́йства своя́ и доброде́тели, охлажда́й по́хоти се́рдца на́шего, помога́й нам в борьбе́ со страстьми́ на́шими, исхода́тайствуй нам у Го́спода реши́тельное отвраще́ние от поро́ков, постоя́нство в доброде́тели, терпе́ние в бе́дствиих, великоду́шие в го́рестех, тве́рдую на Бо́га наде́жду во всех обстоя́тельствех настоя́щая жи́зни, любо́вь к враго́м, жела́ние добра́ всем, любя́щим и ненави́дящим нас. Ты, увере́н быв, я́ко златотка́нныя ри́зы о́бщему подлежа́т тле́нию, потща́лся еси́ в животе́ твое́м из доброде́телей истка́ти себе́ ри́зу нетле́ния, в не́йже ны́не красу́ешися, внуши́ и нам, да отвраща́емся от всех мирски́х удово́льствий, от вся́кия плотски́я похо́ти, от всея́ земны́я сла́вы и от вся́каго тле́ннаго сокро́вища, да презира́ем обольще́ние ро́скоши, и гнуша́емся обая́ния ле́сти и поро́ка, и да ра́дуемся, егда́ те́рпим за Христа́ лише́ния, уничиже́ния, гоне́ния, презре́ния, клевету́ и озлобле́ние. Горя́ху к тебе́, святый́ кня́же, любо́вию росси́йския сы́нове, ви́дяще тя, от благочести́ваго ко́рене отра́сль благочести́вую, и великоле́пный брак тебе́ на земли́ гото́вляху сро́дницы и дру́зи твои́, не ве́дуще Бо́жия Про́мысла, я́ко Бог благоволи́л избра́ти, во е́же тебе́ безбра́чну служи́ти на бра́це Сы́на Его́ Единоро́днаго, и ты, святы́й благове́рный кня́же, предвари́в нас в Ца́рстве благода́ти, привлецы́ и нас свое́ю любо́вию в Ца́рство Небе́сное, бу́ди для нас ору́дием человеколю́бия и бла́гости Бо́жией, отклоня́й от нас и́стинная бе́дствия, утеша́й нас в го́рестех и печа́лех, укрепля́й свои́м предста́тельством у Го́спода си́лы ве́рныя на доброде́лание во сла́ву И́́мене Бо́жия и в преспе́яние Ца́рства Христо́ва, да процвета́ют здра́вием к благоде́нствию и возраста́ют от си́лы в си́лу и от сла́вы в сла́ву вси наро́ди земли́ Росси́йския, да бу́дут всегда́ одушевле́ни благоче́стием, пра́вдою, му́жеством, пре́данностию оте́честву и всеми доброде́тельми, да и мы вме́сте с тобо́ю удосто́имся превозноси́ти бла́гость, любо́вь и милосе́рдие Еди́наго, в Тро́ице Святе́й сла́вимаго Бо́га, Отца́ и Сы́на и Ду́ха Свята́го, ны́не, и при́сно, и во ве́ки веко́в. Ами́нь.

Благоверный князь Феодор Новгородский

Благоверный князь Феодор Новгородский, старший брат святого Александра Невского, родился в 1218 году. Княжеское служение его родной земле началось в очень раннем возрасте; уже в 1229 году оба брата были оставлены в Новгороде их отцом Ярославом Всеволодовичем как представители его власти. Не прошло и года, как юным княжичам пришлось покинуть Новгород: буйные новгородцы постановили на вече призвать другого князя. В 1230 году во время голода и мора новгородцы снова пригласили Ярослава. 30 декабря 1230 года он в четвертый раз сел на княжение в Новгороде, но сам пробыл в городе лишь две недели, вновь посадил там своих сыновей и ушел в Переяславль-Залесский. В 1232 году четырнадцатилетний Феодор уже был призван послужить Богу не только молитвой, но и мечом: он участвовал в походе русских дружин против языческих мордовских князей.

В 1233 году по желанию отца он должен был вступить в брак с дочерью святого Михаила Черниговского – Феодулией. Когда гости уже собрались на свадебный пир, жених внезапно скончался. После неожиданной смерти жениха обрученная с ним княжна оставила мир, постриглась в одном из суздальских монастырей и прославилась в иноческом подвиге как преподобная Евфросииия Суздальская († 1250, память 25 сентября).

Святой Феодор был погребен в Юрьевском монастыре в Новгороде. В 1614 году шведы, разорив монастырь, разбили гробницу князя и, обретя его целым и неразрушенным, ругаясь над святыми мощами, поставили тело, «яко живо», у церковной стены. Новгородский митрополит Исидор перенес его мощи в Софийский собор, где их положили в приделе святого пророка Иоанна, Предтечи и Крестителя Господня.

Служба святому благоверному князю Феодору составлена в 1787 году митрополитом Петербургским и Новгородским Гавриилом (Петровым) († 1801).

Преподо́бных отце́в Вассиа́на и Ио́ны, Пертоми́нских чудотво́рцев

На Го́споди, воззва́х: стихи́ры на 8, глас 8:

Преподо́бнии отцы́ Богому́дрии,/ слепы́м дае́те свет,/ боля́щим исцеле́ние и хромы́м здра́вие,/ ми́лостивно преклня́ющеся к приходя́щим ве́рою к моще́м ва́шим/ и прося́щим по́мощи ва́шея,/ засту́пники бо и предста́тели ве́рнии вси обрето́хом,/ восхваля́юще вас.

Преподо́бнии отцы́ всечестни́и,/ доброде́тельми возше́дше на колесни́цу,/ к Бо́гу востеко́сте,/ побе́дныя по́чести прие́млюще,/ и я́ко ми́лоть нам телеса́ ва́ша,/ положе́на во гробе́х, оста́вили есте́,/ источа́ти исцеле́ния и прогоня́ти д́ухи лука́выя,/ те́мже блажи́м вас, прехва́льнии.

Лико́м по́стническим сочта́стеся,/ и укра́сшеся, блаже́ннии, по́стническим житие́м,/ и ны́не в Небе́сных оби́телех лику́юще со А́нгелы,/ помина́йте любо́вию блажа́щих вас на земли́/ и свято́е ва́ше творя́щих пра́зднество.

Сла́ва, глас то́йже:

Преподо́бнии отцы́,/ мира красоты́ и пи́щи вре́менныя отню́д возненави́девше,/ и́ноческое житие́ па́че возлюби́вше,/ и А́нгелом собесе́дницы бы́сте,/ и свети́льницы многосве́тлии,/ вселе́нней чудеса́ми сия́юще,/ но о всех нас помина́йте,/ соверша́ющих святу́ю па́мять ва́шу:/ мы бо чада ва́ша и о́вцы слове́сных ва́ших уче́ний,/ и вас на по́мощь призыва́ем,/ прося́ще вами прия́ти мир и ве́лию ми́лость.

И ны́не, Богоро́дичен: Царь Небе́сный:

Вход. Проки́мен дне, и чте́ния три преподо́бническая (зри 1 июня)

На лити́и стихи́ры, глас 5:

И́же на земли́ А́нгели/ и на Небесе́х челове́цы Бо́жии,/ ми́ра благо́е украше́ние,/ и́ноков и преподо́бных похвалу́,/ вели́ких отце́в почти́м вы, Ио́но и Вассиа́не,/ насажде́ни бо в дому́ Госпо́дни,/ процвели́ есте́ пра́вдою/ и, я́ко ке́дри в пусты́ни,/ умно́жили есте́ ста́до Христо́во слове́сных ове́ц/ в преподо́бии и пра́вде.

Я́коже А́нгели земни́и, пожи́ли есте́,/ воздержа́нием те́ло свое́ удручи́вше, всесла́внии,/ бде́нием и па́мятью сме́ртною,/ и вели́кими восхожде́нии/ вои́стинну прибли́жилися есте́/ к Самому́ Ка́меню, Христу́, краеуго́льному.

Глас 4: Жития́, до́лу влеку́щая,/ и пи́щи наслажде́ния,/ и цвету́щую сла́ву, прехва́льнии, оста́вльше, я́ко вре́менну,/ Христо́ви прилепи́стеся,/ Того́ добро́тою кра́сною распала́еми,/ и венце́м нетле́ннаго Ца́рствия благоле́пно венча́стеся.

Сла́ва, глас 5:

Возсия́ днесь пресве́тлая и всепра́зднственная ва́ша па́мять,/ преподо́бнии отцы́ Вассиа́не и Ио́но,/ созыва́ющи многочи́сленное по́стников сосло́вие/ и преподо́бных ликостоя́ния,/ А́нгелы же с челове́ки,/ к похвале́нию И́же в Тро́ице покланя́ема Бо́га на́шего,/ те́мже, притека́юще к моще́м ва́шим/ исцеле́ния да́ры оби́льно прие́млем/ и вас венча́вшего Христа́ прославля́ем,/ Спа́са душ на́ших.

И ны́не, Богоро́дичен:

Храм и дверь еси́, пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце сый Пра́вды,/ просвети́ти хотя́, я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко ма́терне дерзнове́ние к Нему́ стяжа́вшая,/ непреста́нно моли́, спасти́ся душа́м на́шим.

На стихо́вне стихи́ры, глас 4.

Подо́бен: Я́ко до́бля:

Во Христа́ обо́лкшеся,/ тле́емаго челове́ка богому́дренно совле́кшеся/ и духо́вною благода́тию при́сно просвеща́еми,/ я́ко зве́зды све́тлыя, ми́рови просия́ли есте́,/ моля́щеся от тли и бед изба́витися/ и́же ве́рою соверша́ющим при́сно честну́ю па́мять ва́шу.

Стих: Честна́ пред Го́сподем/ смерть преподо́бных Его́.

Ны́не пи́щу ра́йску восприе́млюще,/ и све́том огражда́еми,/ и жизнь ве́чную насле́дствующе,/ к вам прибега́ющия от бед изба́вите,/ и искуше́ний разли́чных, и вся́каго озлобле́ния,/ к Бо́гу дерзнове́ние стяжа́вше/ и любо́вь показу́юще к нам вои́стинну христоподо́бную.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоно́сцы вседи́внии,/ Тро́ицы побо́рницы,/ к боре́нию проти́ву миродержи́теля тьмы му́жескою му́дростию ополчи́вшеся,/ и, того́ низложи́вше,/ побе́дными увязо́стеся венцы́,/ сего́ ра́ди Боже́ственную и светоно́сную соверша́ем ва́шу па́мять,/ освяща́еми благода́тию.

Слава, глас 6:

Преподо́бнии отцы́,/ дале́че изы́де веща́ние исправле́ний ва́ших,/ тем на Небесе́х обрето́сте мзду трудо́в свои́х,/ и́миже бесо́вския разруши́ли есте́ полки́/ и А́нгельския дости́гли есте́ чи́ны,/ и́хже житию́ непоро́чно поревнова́сте;/ дерзнове́ние у́бо иму́ще ко Го́споду,/ мир испроси́те душа́м на́шим.

И ны́не, Богоро́дичен: Творе́ц и Изба́витель:

Тропа́рь, глас 8:

Пре́жде отверже́нием ми́ра,/ я́ко морска́го треволне́ния, избего́сте, отцы́ преподо́бнии,/ по́слежде же, изволе́нием Бо́жиим,/ в вода́х морски́х кончи́ну блаже́нную прия́сте/ и к неболе́зненному поко́ю преста́вистеся от земли́, ра́дующеся./ Тем и по кончи́не от Христа́ Бо́га просла́вистеся чудесы́ оби́льно,/ те́плии в беда́х ве́рным помо́щницы показа́стеся,/ и ны́не на Небесе́х предстоя́ще Престо́лу Христо́ву,/ Вассиа́не преблаже́нне и Ио́но пресла́вне,/ моли́теся при́сно о душа́х на́ших.

НА У́ТРЕНИ

На Бог Госпо́дь: тропа́рь преподо́бным, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Подо́бен: Вознесы́йся:

Землены́х и тле́ющих наслажде́ния небрегли́ есте́,/ и мона́шеское житие́ возлюби́ли есте́,/ ми́ра красоты́ и пи́щи вре́менныя возненави́девше,/ и отсю́ду сподо́бистеся по́стническому сочта́стися ли́ку,/ с ни́ми же моли́те спасти́ ча́да своя́.

Сла́ва, и ны́не, Богоро́дичен:

И́же на Престо́ле Херуви́мсте седя́й и в не́дрех О́тчих пребыва́яй,/ я́ко на Престо́ле седи́т святе́м Свое́м, Влады́чице,/ на ло́не Твое́м Плотоно́сец:/ Бог у́бо вои́стинну воцари́ся над язы́ки,/ и разу́мно ны́не пое́м Ему́,/ Его́же моли́ спасти́ся рабо́м Твои́м.

По 2-м стихосло́вии седа́лен, глас 8:

Отреко́стеся пло́ти Христа́ ра́ди/ и духо́внии яви́стеся лю́дем води́телие:/ услы́шали есте́ словеса́ та́йных уче́ний,/ и́ноком же яви́стеся пра́вило пра́вости,/ и стра́сти вся кре́постию попра́ли есте́,/ и кова́рства бесо́м до конца́ попали́ли есте́,/ те́мже Христу́ изря́дно всегда́, Богоно́снии отцы́, моли́теся/ грехо́в оставле́ние пода́ти чту́щим святу́ю па́мять ва́шу.

Сла́ва, и ны́не, Богоро́дичен:

Се Тебе́ ро́ди родо́в сла́вят, я́коже прорекла́ еси́, Отрокови́це,/ Созда́теля бо всех была́ еси́ пала́та и Боже́ственный храм,/ в не́мже всели́ся Вы́шний и пло́тию обложи́ся, да спасе́т нас.

По полиеле́и седа́лен, глас 8.

Подо́бен: Прему́дрости:

Егда́, блаже́ннии, к Боже́ственному жела́нию ум свой впери́ли есте́,/ тогда́ оста́висте вся до́лу влеку́щая мудрова́ния/ и, в пусты́ню все́льшеся, я́ко крин, процвели́ есте́ добродете́льми, прекра́снии,/ страсте́й искорени́вше те́рние/ и в ней насади́вше плоды́ трудо́в свои́х,/ те́мже и пожа́вше рукоя́ти бога́тство неотъе́млемое на Небесе́х,/ отцы́ преподо́бнии Вассиа́не и Ио́но,/ моли́те Христа́ Бо́га согреше́ний оставле́ние дарова́ти/ чту́щим ве́рою святу́ю па́мять ва́шу.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся и Младе́нец бысть,/ пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бнии отцы́,/ в да́льняя изы́де веща́ние исправле́ний ва́ших,/ те́мнее на Небесе́х обрето́сте мзду трудо́в ва́ших,/ и́миже бесо́вския разруши́ли есте́ полки́/ и А́нгельския дости́гли есте́ чи́ны,/ и́хже житию́ непоро́чно поревнова́сте,/ дерзнове́ние у́бо иму́ще ко Го́споду,/ мир испроси́те душа́м на́шим.

Кано́н Пресвяте́й Богоро́дице со ирмосо́м на 6 и преподо́бным на 8, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́нием Трисо́лнечнаго Божества́ озари́вшеся, прему́дрии,/ свети́ла яви́лися есте́/ и просвеща́ете ве́рно светоно́сную ва́шу па́мять чту́щих.

Вы во всем Творцу́ возложи́вше себе́/ и вседухо́вное жела́ние излия́вше к Нему́,/ духо́вную благода́ть восприя́ли есте́.

Све́том благода́ти озаря́еми, преподо́бнии,/ ве́рою па́мять ва́шу торжеству́ющих просвети́те/ и от тьмы грехо́вныя моли́твами свои́ми изба́вите.

Богоро́дичен: Пло́тию Безпло́тнаго поро́ждши, Богороди́тельнице Пречи́стая,/ теле́сных нас и душе́вных скверн омы́й/ окропле́нием Боже́ственныя Твоея́ моли́твы.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Напои́вше ду́ши сле́зными пото́ки,/ соде́ясте их, преподо́бнии, плодоно́сны/ и доброде́тели вся́кия износя́щи, пресла́внии.

Исцеле́ние содева́ют Боже́ственною благода́тию мо́щи ва́ша/ и отгоня́ют боле́зни челове́ческия,/ и укрепля́ют мудрова́ния их восхвали́ти труды́ ва́ша, всечестни́и.

Со враго́м дре́вле бо́ршеся воздержа́нием/ и ны́не кре́постию поста́вивше на него́ побе́ду, преподо́бнии,/ венцы́ сла́вы прия́ли есте́ от Го́спода.

Богоро́дичен: Из ложе́сн Твои́х, Де́во,/ вели́кое Со́лнце возсия́ пресла́вно, просвети́в земна́я,/ Его́же осия́ния преподо́бных лик прия́л есть.

Седа́лен, глас 4

Подо́бен: Яви́лся еси́:

Жите́йское мо́ре воздержа́нием без труда́ преплы́вше,/ ко приста́нищу мы́сленному безстра́стия приста́ли есте́,/ преподо́бнии отцы́ и Богому́дрии.

Сла́ва, и ны́не, Богоро́дичен:

Де́вство и рождество́ вы́ше естества́ и сло́ва в Тебе́, Богоро́дице, стеко́стася,/ я́ко Бо́га вопло́щшася породила́ еси́,/ Спа́са душ на́ших.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Я́ко Христо́во смире́ние возлюби́вше,/ вознесо́стеся безстра́стием/ и смири́ли есте́ вся бесо́вския горды́ни.

Возсия́вше, я́ко со́лнце,/ чуде́с луча́ми просвеща́ете, преподо́бнии, всю подсо́лнечную.

Кади́ло благоуха́ния Всеви́дцу, преподо́бнии,/ своя́ моли́твы принесо́сте, я́ко овня́ духо́вно.

Богоро́дичен: Блажи́т Тя, Пречи́стая,/ преподо́бных лик и вся́ка душа́ ве́рных:/ Бо́жие бо Сло́во па́че ума́ и сло́ва родила́ еси́.

Песнь 5

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Еди́ной любви́ Христо́вой вы прило́жшеся душа́ми/ и потща́вшеся исполни́тели бы́ти Бо́жиим за́поведем,/ мно́гих чуде́с прия́сте благода́ть, пресла́внии.

Незло́биви и кро́тцы, вся зло́бы вра́жия погуби́сте,/ ми́лостиви до конца́ я́вльшеся:/ от Еди́наго же Ми́лостиваго прия́сте благода́ть и́стинную и спаси́тельную.

Зако́ном, и моли́твою, и посто́м всегда́ претерпева́сте,/ в безстра́стие оде́ястеся,/ плотски́й ра́зум смири́вше кре́постию Свята́го Ду́ха.

Богоро́дичен: Воспо́йте Го́сподеви песнь но́ву,/ возсия́вшему боголе́пно из чре́ва Неискусобра́чныя/ и Сию́ ве́рным показа́вшу тве́рдую наде́жду и похвалу́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Кропле́нием вели́ких по́двиг ва́ших, отцы́,/ победи́ли есте́ бесо́в ли́ца,/ распе́ншемуея нас ра́ди Го́споду угожда́юще, преподо́бнии.

Благи́я нра́вы, отцы́, стяжа́ли есте́/ и от Благода́теля Бо́га дар прия́сте бога́тно,/ и сего́ подае́те тре́бующим, преподо́бнии.

Дарова́ний напо́лнистеся духо́вных, отцы́,/ и неприя́зненныя ду́хи повину́ли есте́,/ Вассиа́не и Ио́но Богому́дрии.

Богоро́дичен: Душе́вныя моя́ стра́сти исцели́,/ Я́же безстра́стия бы́вши исто́чник,/ просвети́вшая ли́ки преподо́бных оте́ц рождество́м Твои́м.

Кондак, глас 2.

Подо́бен: Вы́шних ища́:

Я́ко сокро́вище бога́тно,/ ве́рным Боже́ственная благода́ть/ из морски́х недр издаде́ мо́щи ва́ша, отцы́ преблаже́ннии,/ и в ме́сте пу́сте це́лы и невреди́мы обрето́шася пресла́вно,/ и та́ко вас ра́ди ны́не сла́вится Бог,/ Ему́же со дерзнове́нием предстоя́ще ны́не на Небесе́х,/ Вассиа́не и Ио́но досточу́днии,/ моли́теся непреста́нно о всех нас.

И́кос:

Премно́жеством доброде́телей ва́ших, преподо́бнии,/ я́ко сад кра́сный, испо́лнь су́ще/ и, я́ко от рая́, процве́тше поще́нием и моли́твами,/ всех благоуха́ете от вони́ мно́гих ва́ших трудо́в, и по́двигов, и по́тов преподо́бнических,/ в ни́хже проидо́сте благоиску́сно к безско́рбному животу́/ и венце́м побе́дным увязо́стеся от руки́ Венцеда́теля, всех Бо́га,/ Его́же моли́те непреста́нно о всех нас.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Ору́жием ва́ших моли́тв, преподо́бнии, победи́вше бе́сы лука́выя,/ с Небесе́ благода́ть прия́ли есте́ исцеля́ти неду́ги/ и прогоня́ти ду́хи лука́выя от взыва́ющих:/ благослове́н Бог оте́ц на́ших.

Пло́ти ва́ша повину́ли есте́, отцы́ му́дрии, ду́хови/ и воздержа́нием вся́цем пожи́сте в добродея́нии, прехва́льнии,/ иму́ще чи́сту со́весть и житие́ Небе́сное, воспева́юще:/ благослове́н Бог оте́ц на́ших.

Путе́м и́стинным входя́ще в Боже́ственное поко́ище,/ уклони́стеся напа́стей бесо́вских, блаже́ннии,/ Боже́ственною покрыва́еми благода́тию, и вопию́ще:/ благослове́н Бог оте́ц на́ших.

Богоро́дичен: Ору́жие, Чи́стая Деви́це, храня́щее пре́жде врата́ Еде́мская,/ плещи́ всем дае́т, низложи́вшим по́стнически бори́теля врага́ и при́сно взыва́ющим:/ благослове́н Бог оте́ц на́ших.

Песнь 8

Ирмо́с: В купине́ Моисе́ю Де́вы чу́до/ на Сина́йстей горе́ Прообрази́вшаго иногда́/ по́йте, благослови́те/ и превозноси́те во вся ве́ки.

Слез ва́ших ка́пли угаси́ша огнь грехо́вный,/ ре́ку же чуде́с показа́ша всем нам,/ вся́кия стра́сти потопля́ющу притека́ющих к вам, пресла́внии отцы́.

Ве́ру и наде́жду неразори́му,/ и любо́вь и́стинну име́ли есте́, отцы́, и ми́лостивное прилежа́ние,/ терпе́ние бла́го и поуче́ние слове́с духо́вных,/ смиренному́дрство и соверше́нное беззло́бие.

Подвиза́стеся до́бре, и, победи́вше вся вра́жия де́йства,/ венча́стеся, му́дрии, и ко всем преподо́бным причто́стеся,/ с ни́ми же вас чтим и превозно́сим Христа́ во ве́ки.

Богоро́дичен: Спаси́ мя, Ма́ти Бо́жия, спасе́нию нача́ло ми́рови я́вльшися,/ избавля́ющи мя молвы́ нечи́стых страсте́й и вся́кия проти́вныя ско́рби,/ да Тя сла́влю во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Се отве́рзеся вам, Богоно́снии отцы́, Ца́рство Небе́сное,/ сконча́вшим до́брое тече́ние,/ ви́дите бо, я́же ви́дят А́нгели, и воздая́ние трудо́в подае́т вам по́чести Бог,/ те́мже ублажа́ем вас.

Сокруше́нным се́рдцем Бо́гу угоди́вше и сокруши́вше бесо́в ко́зни,/ сокруше́нныя от них испра́висте, Богоно́сцы,/ те́мже ублажа́ем вас ве́рно, кла́няющеся моще́м ва́шим, Богоблаже́ннии.

Выспрь к Бо́гу име́сте мысль, Богоно́снии отцы́ преподо́бнии,/ и земна́я оста́вили есте́, и Небе́сная восприя́сте/ трудо́в ра́ди ва́ших и воздержа́ния неосла́бнаго,/ сего́ ра́ди почита́ем вас.

Богоро́дичен: Пощади́ мя, Го́споди, пощади́, егда́ хо́щеши суди́ти ми,/ и не осуди́ мене́ во огнь, ни я́ростию Твое́ю обличи́ мя, –/ мо́лит Тя, Христе́, ро́ждшая Тя Де́ва, и А́нгельстии собо́ри, и преподо́бных соста́вы.

Свети́лен.

Подо́бен: Посети́л еси́:

Процвели́ есте́, я́ко фи́никс дави́дски, отцы́,/ оби́тели яви́стеся Ду́ху Пресвято́му,/ и сла́вни вселе́нней показа́стеся,/ о нас непреста́нно моли́те,/ почита́ющих ве́рою пречестну́ю па́мять ва́шу, преподо́бнии.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богороди́це,/ и но́сиши на Боже́ственную руку́ Пребога́тое Сло́во,/ непреме́нно и неизме́нно.

На хвали́тех стихи́ры, глас 4.

Подо́бен: Дал еси́ зна́мение:

Светле́йше просия́ше, я́коже со́лнце, преподо́бнии,/ всепра́зднственная па́мять ва́ша,/ луча́ми облиста́ющи/ ва́ших доброде́тельных дея́ний, блаже́ннии,/ и озаря́ющи ве́рных чу́вства све́том чуде́с ва́ших,/ сию́ у́бо пра́зднующе, ра́достно вас восхваля́ем/ и ве́рно ублажа́ем.

Я́коже А́нгели земни́и, пожи́ли есте́,/ воздержа́нием те́ло свое́ удручи́вше, всесла́внии,/ бде́нием, и па́мятию сме́ртною,/ и вели́кими восхожде́нии/ прибли́жилися есте́ к Самому́ Ка́меню, Христу́, краеуго́льному.

Стра́сти теле́сныя воздержа́нием утоми́ли есте́/ и, приле́жным моле́нием/ зми́я льсти́ваго сле́зными пото́ки от себе́ отгна́вше,/ отцы́ преподо́бнии,/ угоди́ли есте́ Бо́гу па́че ине́х, досточу́днии,/ те́мже вас укра́си Небе́сными дарова́нии/ Иису́с Человеколю́бец и Спас душ на́ших.

Сла́ва, глас 8:

Преподо́бнии отцы́,/ поуча́вшеся день и нощь в зако́не Госпо́дни,/ досто́йны бы́ли есте́ дре́ва живо́тнаго са́дове бы́ти,/ и плод ваш страда́ньми и венцы́ процвете́,/ дерзнове́ние у́бо иму́ще к Подвигополо́жнику Христу́ Бо́гу,/ проси́те нам очище́ние и ве́лию ми́лость.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое. Тропа́рь и отпу́ст.

НА ЛИТУРГИ́И

Блаже́нны от кано́на преподо́бных, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О преподо́бнии и всечестни́и отцы́ Вассиа́не и Ио́но, уго́дницы Христо́вы блаже́ннии и чудотво́рцы пресла́внии! По́стничеством Бо́гу пе́рвее угоди́вше и де́лы благоче́стно на земли́ подвиза́вшеся, я́ко свети́ла све́тлая, по сме́рти в ми́ре возсия́вше, просвеща́юще ве́рных чуде́с све́тлостию, вы засту́пницы те́плии показа́стеся. Мно́гих, в ско́рбех и беда́х стра́ждущих и поги́бнути иму́щих, здра́вы сохрани́сте, непослу́шавших же завеща́ния ва́шего и малове́рующих отмсти́тельне наказа́сте, и пре́жде заблу́ждшей жене́ путевожди́ бы́сте, и осле́пшему па́ки прозре́ние дарова́сте. Де́рзостне же косну́вшагося целе́бных моще́й ва́ших напра́сно отри́нусте и, разслабле́нием наказа́вше, поми́ловасте. К сим же и ина́я пресла́вная соде́ласте, и бы́вшее оскуде́ние во оби́тели ва́шей сугу́бо испо́лнисте, соблюда́юще ю. Мо́лимся у́бо ны́не вам, о преблаже́ннии отцы́, услы́шите моле́ние на́ше, не пре́зрите нас в бе́дах и ско́рбех, призыва́ющих вас ве́рою, бу́дите помо́щницы нам ско́рии и покрови́тели, сохрани́те же во благоде́нствии, ми́ре и тишине́ оте́чество на́ше. К сим же и духо́внаго о вас собра́ния не оста́вите до конца́, посеща́юще я всегда́, о преподо́бнии, изоби́лованием вся́цем, и́ моли́теся при́сно о нас ко Го́споду, да моли́твами ва́шими грехо́в проще́ние полу́чим, и Ца́рствия Небе́снаго сподо́бимся благода́тию Его́, я́ко Тому́ подоба́ет вся́кая сла́ва, честь и поклоне́ние, ны́не, и при́сно, и во ве́ки веко́в. Ами́нь.

Преподобные Вассиан и Иона

Преподобные Вассиан и Иона иноки Соловецкого Преображенского монастыря, ученики святого игумена Филиппа, впоследствии Митрополита Московского (†1569; память 9 января). Святых иноков Господь прославил после кончины (1561). Рыбаки и моряки приезжали помолиться в часовню, воздвигнутую в 1599 году над местом их погребения старцем Троице-Сергиева монастыря Мамантом. В 1623 году иеромонах Иаков основал там обитель, получившую название Пертоминской.

Преподо́бного отца́ на́шего Петра́ Кори́шскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 8:

Зако́ном Христо́вым научи́вся,/ небре́гл еси́ о пи́щи и о оде́жди,/ но небе́сных птиц де́ло испо́лнив, о́тче,/ и в пеще́ру всели́вся,/ без пи́щи и без покро́ва на мно́га ле́та пребы́л еси́, преподо́бне,/ те́мже во све́те изы́де пра́вда твоя́,/ и, я́коже полу́дне, о́тче, возсия́л еси́.

На ра́ло возложи́л еси́ ру́ки своя́, всече́стне,/ де́лая всегда́ Боже́ственная,/ и не возврати́лся еси́, зря вспять,/ но был еси́ упра́влен во Ца́рствие Христа́,/ вопло́щшагося Бо́га,/ во спасе́ние душ на́ших.

В лодии́ теле́сней вози́м,/ кро́ткими дыха́нии кро́ткаго ду́ха/ легко́ преше́л еси́ жите́йскую пучи́ну, му́дре,/ и на Би́сере многоце́ннем твоя́ име́ния прода́в/ и обре́т Его́, в себе́ удержа́л еси́,/ блаже́н быв Боже́ственными добро́тами Его́.

Преподо́бен и че́стен,/ свети́льник Боже́ственный и светоно́сный/ под спу́дом жите́йския толстоты́ никогда́же скрыва́ется,/ но на версе́ полага́ет его́ высо́ких чуде́с Человеколю́бец./ Того́ моли́твами, Христе́,/ да́руй лю́дем Твои́м ве́лию ми́лость.

Сла́ва, глас 1:

Наста́, Богоно́се,/ со́лнца светле́йший твой пра́здник,/ озаря́ет приходя́щия к тебе́ ве́рою,/ и безсме́ртием облагоуха́ет,/ и душа́м источа́ет исцеле́ния,/ Пе́тре преподо́бне, моли́твенниче о душа́х на́ших.

И ны́не, Богоро́дичен, глас то́йже:

Святе́йшая святы́х всех сил,/ Честне́йшая всея́ тва́ри,/ Богоро́дице, Влады́чице ми́ра,/ спаси́ ны, Спа́са ро́ждшая,/ от прегреше́ний тмори́чных 15 и бед,/ я́ко Блага́я, моли́твами Твои́ми.

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́/ от ма́терних пеле́н/ сосу́д свяще́н Бо́гу,/ Богоно́се о́тче наш Пе́тре,/ и дом Пресвята́го Ду́ха.

Стих: Честна́ пред Го́сподем/ смерть преподо́бных Его́.

Нося́ на ра́ме свое́м, Пе́тре,/ Крест Госпо́день,/ бесо́вская мечта́ния до конца́,/ о́тче наш,/ потреби́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ле́сти лука́вых бесо́в/ обличи́л еси́ кре́стнаго си́лою,/ му́дростию же ве́ры/ уясни́л еси́ сла́ву Христо́ву,/ Пе́тре, о́тче наш.

Сла́ва, глас 8, самогла́сен:

Прииди́те днесь, благове́рнии лю́дие,/ и притеце́м преподо́бному Петру́, отцу́ на́шему,/ я́ко да свои́ми моли́твами/ изба́вит всех нас от тлетво́рных страсте́й/ и искуше́ний лука́вых/ и испро́сит ро́ду на́шему на враги́ побе́ды,/ плене́нным свобожде́ние,/ бра́тиям любо́вь, ми́ру устрое́ние,/ Це́рквам соедине́ние/ и душа́м на́шим ве́лию ми́лость.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 8:

Преподо́бне о́тче Богому́дре,/ благи́ми нра́вы украси́вся,/ Христу́ прилепи́лся еси́ от ю́ности,/ плотски́я стра́сти умертви́в воздержа́нием,/ глаго́лов и зако́нов Бо́жиих испо́лнитель быв,/ испо́лнился еси́ Боже́ственных даро́в и чуде́с,/ и всем лучи́ бога́тно испусти́л еси́,/ и ны́не моли́ спасти́ся душа́м на́шим.

Преподо́бне о́тче пресла́вне,/ со́весть име́л еси́ бла́гу/ и о́ко серде́чное, взира́ющее к Бо́гу./ Кре́постию Христа́ возмо́г,/ держа́ву вра́жию и си́лу низложи́л еси́/ и, весь прилежа́ Вседержи́телю,/ свергл еси́ на зе́млю велехва́льнаго/ изря́дными де́лы твои́ми,/ и ны́не моли́ спасти́ся душа́м на́шим.

Преподо́бне о́тче досточу́дне,/ ду́шу твою́ храм Свято́му Ду́ху соде́ял еси́,/ и был еси́ насле́дник Го́рняго Ца́рствия с Вы́шними си́лами:/ многоболе́зненныя стра́сти всегда́ врачу́еши приступа́ющих к тебе́,/ благода́ть бо прии́м от Го́спода/ содева́ти зна́мения и чудеса́,/ и ны́не моли́ спасти́ся душа́м на́шим.

И́ны стихи́ры, глас то́йже:

Собра́вшеся я́ко ве́рное Христо́во ста́до/ к ковче́гу преблаже́ннаго отца́ на́шего Петра́,/ благогове́йно поклони́мся,/ хвалу́ досто́йную в пе́снех воздая́ ему́/ и моля́ся усе́рдие,/ да пода́ст всем ве́рным исцеле́ние благода́тию Го́спода,/ Ему́же благоче́стно покланя́емся.

Прииди́те, новосвяще́ннии лю́дие,/ избра́нное ста́до Христо́во,/ да просла́вим па́мять преблаже́ннаго отца́ на́шего Петра́,/ в верте́пе возсия́вшаго и к нам прише́дшаго,/ и́же и по сме́рти дае́т слепы́м зрак,/ хромы́м – хожде́ние, глухи́м – слух,/ согбе́нным – исправле́ние,/ бе́сы же изгони́т/ и, ду́хом предстоя́ Влады́це,/ мо́лится о спасе́нии душ на́ших.

И́хже о́ко не ви́де и у́хо не слы́ша,/ ниже́ на се́рдце челове́ка взы́де,/ я́же угото́ва Бог возлю́бльшим Его́,/ сих ты возжеле́л еси́,/ о́тче Пе́тре Богодухнове́нне,/ возненави́дел еси́ мирско́е пристра́стие,/ к Бо́гу еди́ному прите́кл еси́,/ и, Того́ бла́гости при́сно насыща́яся,/ моли́ся Ему́ приле́жно,/ спасти́ся душа́м на́шим.

Сла́ва, глас 2:

Преподо́бне о́тче Пе́тре,/ а́ще и в после́дних вре́менех яви́лся еси́,/ оба́че житие́ твое́ и исправле́ния/ ра́вно дре́вним отце́м показа́ся./ Те́мже Христо́с, ве́дый твоя́ по́двиги/ и души́ твоея́ чистоту́,/ воспросла́ви тя на земли́,/ да и мы к подо́бной подвиго́в твои́х ре́вности воспря́нем/ и сподо́бимся на Небесе́х с тобо́ю/ дости́гнути ве́чнаго блаже́нства.

И ны́не, Богоро́дичен.

Вход. Проки́мен дне и чте́ния три преподо́бническая. (зри 1 июня)

На лити́и стихи́ры, самогла́сны, глас 1:

Прииди́те, лю́дие, восторжеству́им днесь,/ сла́вяще преподо́бнаго отца́ на́шего Петра́,/ в Кори́ше возсия́вшаго,/ и, вопию́ще ему́, си́це рцем:/ ра́дуйся, кори́шское свети́ло,/ осиява́ющее всю Се́рбскую страну́,/ источа́я благода́тныя струи́/ и подава́я всем исцеле́ние.

От ю́ности своея́ Бо́га возлюби́л еси́,/ жела́л еси́ служи́ти Ему́ ве́рою и любо́вию,/ воздержа́нием, посто́м и моли́твою,/ сего́ ра́ди, укроти́в стра́сти,/ труди́лся еси́ днем и но́щию,/ терпя́ вся́кия ско́рби/ и преодолева́я вра́жеския наве́ты,/ ны́не же в Небе́сных селе́ниих водворя́яся,/ моли́ся о душа́х на́ших.

Слава, глас 5:

Ра́дуйся, пресве́тлое свети́ло,/ Богозра́чное церко́вное украше́ние,/ и́же процве́л еси́ благоуха́нием, я́ко крин,/ Влады́це Христу́ подража́я/ и благода́ти Его́ вруча́яся./ Те́мже чи́стое А́нгельское житие́ стяжа́в,/ го́ры, верте́пы и гра́ды све́тло украси́,/ сего́ ра́ди Богоуго́дный вене́ц восприя́л еси́,/ ре́ки Богодухнове́ннаго уче́ния источи́л еси́,/ преподо́бне о́тче Пе́тре,/ Христу́ же моли́ся о нас, ча́дех твои́х,/ дарова́ти душа́м на́шим мир и ве́лию ми́лость.

И ны́не, Богоро́дичен:

Тве́рдое и непрело́жное упова́ние ве́мы Тя, Богоро́дице,/ Его́же держи́мся и, упова́я, мо́лимся:/ сохрани́ нас, и град сей, и вся гра́ды и страны́ христиа́нския/ от всех бед, находя́щих челове́ком согреша́ющим,/ но моли́твами Твои́ми прие́млющим/ а́бие согреше́ний оставле́ние.

На стихо́вне стихи́ры самогла́сны, глас 2:

Избе́гл еси́ жите́йскую красоту́, Богому́дре Пе́тре,/ после́довав Христу́,/ те́мже прия́л еси́ жизнь ве́чную,/ красоты́ неувяда́емыя и неизменя́емыя.

Стих: Честна́ пред Го́сподем/ смерть преподо́бных Его́.

Млад проводя́ во́зраст,/ ста́рческий име́л еси́ ра́зум,/ те́мже жизнь до́брую упражня́я/ в воздержа́нии, и труда́х, и моли́твах, вы́ну взыва́л еси́:/ сла́ва, Христе́, благоутро́бию Твоему́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Свети́льник яви́лся еси́ вели́кий,/ Богому́дре о́тче наш Пе́тре,/ просвеща́я подсо́лнечную/ чуде́с сия́ньми/ и Боже́ственными дея́ньми,/ те́мже по успе́нии Незаходи́мый Свет прия́л еси́,/ сего́ ра́ди моли́ся спасти́ся душа́м на́шим.

Сла́ва, глас 6, самогла́сен:

Преподо́бне о́тче Пе́тре,/ твой ум от страсте́й свобо́ден соблю́д,/ Ду́ху Пресвято́му сосу́д свяще́н был еси́/ и, Христа́ прии́м в се́рдце свое́м,/ чудотво́рец яви́лся еси́, прогоня́я де́моны,/ сего́ ра́ди мо́лим тя:/ моли́ся непреста́нно о всех нас.

И ны́не, Богоро́дичен: Творе́ц и Изба́витель мой:

На благослове́нии хле́бов тропа́рь свята́го, два́жды и Богоро́дице Де́во: еди́ножды.

Тропа́рь, глас 4:

Любо́вию Христо́вою просвеще́н,/ измла́да возлюби́л еси́ мона́шеское житие́/ и, возненави́дев вся́кое плотско́е наслажде́ние,/ житие́ твое́ испо́лнил еси́ терпе́нием, посто́м и моли́твами,/ просия́л бо еси́ доброде́тельми, я́ко све́тлое свети́ло,/ и ны́не, усе́рдно мо́лим тя:/ моли́ Христа́ Бо́га/ сохрани́ти оте́чество на́ше и весь крестоно́сный наро́д се́рбский/ и всем дарова́ти ве́лию ми́лость.

НА У́ТРЕНИ

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

Воздержа́ния огне́м, я́ко зла́то в пещи́, му́дре, искуси́вся,/ возсия́л еси́ светле́йше со́лнца, растерза́в у́зы естества́ преесте́ственным чи́стым житие́м,/ вышеесте́ственных прия́л еси́ де́йство, всеблаже́нне./ Сего́ ра́ди ве́рою тя восхваля́юще, вопие́м:/ благода́ть, и ми́лость, и очище́ние согреше́ний на́ших, о́тче, испроси́.

Сла́ва, и ны́не, Богоро́дичен, глас то́йже:

Моли́твы Твои́х раб приими́, Богоро́дице, Засту́пнице на́ша и прибе́жище/ к кому́ бо прибе́гнем, ра́зве Тебе́, Влады́чице?/ Ты покро́в наш и заступле́ние еси́,/ и ны́не не оста́ви нас до конца́ поги́бнути,/ да Твои́ми моли́твами от бед сохраня́емся:/ на Тя бо упова́ние возложи́хом, Богоро́дице.

По 2-м стихосло́вии седа́лен, глас 5:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием и тве́рдым терпе́нием вои́стинну,/ и посрами́вша зело́ противобо́рца врага́ и всю его́ горды́ню,/ и ны́не моля́щася Го́споду поми́ловатися душа́м на́шим.

Сла́ва, и ны́не, Богоро́дичен, глас то́йже:

Ужа́сно чу́до зача́тия и несказа́нен о́браз рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние,/ сла́ва Твоя́, Богоро́дице, во всех простре́ся, ко спасе́нию душ на́ших.

По полиеле́и седа́лен, глас 4:

Преподо́бных добро́то, страда́льцев сострада́льче,/ без кро́ве венча́лся еси́, яко му́ченик, Христово́ нося́ и́мя Боже́ственное/ и дерзнове́нно всегда́ пропове́дуя та́инство Святы́я Тро́ицы,/ Е́йже и моли́тися, Пе́тре, не преста́й о восхваля́ющих тя.

Сла́ва, и ны́не, Богоро́дичен, глас то́йже:

Удиви́ся Иосиф, е́же па́че естества́ зря, и внима́ше мы́слию,/ и́же на руно́ дождь, в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет, и по рождестве́ па́ки Де́вою пребыва́ет.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне отче Пе́тре,/ во всю зе́млю изы́де веща́ние исправле́ний твоих,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чины,/ и́хже житию́ без поро́ка поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Богоро́дицы со ирмосо́м на 6 и преподо́бнаго на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Благи́ми нра́вы украси́вся,/ Христу́ прилепи́лся еси́ от ю́ности,/ плотски́я стра́сти умертви́в воздержа́нием,/ и к животу́, преподо́бне, преста́вился еси́.

Глаго́лов и зако́нов Бо́жиих испо́лнитель быв,/ испо́лнился еси́, о́тче прему́дре, Боже́ственных даро́в и чуде́с/ и всем лучи́ бога́тно испусти́л еси́.

Со́весть име́л еси́ бла́гу и о́ко серде́чное, взира́ющее к Бо́гу,/ те́мже внят моли́тве твое́й, прему́дре,/ с преподо́бными сочта́ тя.

Богоро́дичен: Стра́сти пло́ти моея́ и ума́ моего́ двиза́ния неподо́бная/ утоли́, молю́ Тя, Пречи́стая Де́во,/ и испра́ви мя, заблу́ждшаго умо́м.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Весь прилежа́ Вседержи́телю,/ преподо́бне о́тче прему́дре,/ всея́ бесо́вския зло́бы избе́гл еси́.

Высото́ю смире́ния украша́емь,/ на зе́млю свергл еси́ велехва́льнаго изря́дными де́лы твои́ми.

Пло́тию обложе́н, о́тче прему́дре,/ смири́л еси́ превзя́тую 16 вы́ю нечести́ваго смире́нием слове́с твои́х.

Богоро́дичен: В ложесна́ Твоя́ воплоща́емь, Всенепоро́чная, всели́ся Зижди́тель,/ на благодея́ние ве́рно пою́щим Тя.

Седа́лен, глас 4:

Страстно́е покори́л еси́ плотско́е мудрова́ние,/ и, го́ршая 17 порабо́тив лу́чшему, о́тче Пе́тре пресла́вне,/ сокруши́л еси́ бесо́вския ко́зни посто́м/ и возси́ял еси́ в ми́ре, я́ко луча́ со́лнечная, сия́нии твои́х доброде́телей,/ сего́ ра́ди тя воспева́ем.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Соде́яв, пресла́вне, ду́шу твою́ храм Свято́му Ду́ху,/ был еси́ насле́дник Го́рняго Ца́рствия с Вы́шними си́лами.

Многоболе́зненныя стра́сти всегда́ врачу́еши приступа́ющих к тебе́:/ благода́ть бо, преподо́бне, прии́м от Го́спода/ содева́ти зна́мения и чудеса́.

Красне́йшим прозябе́нием, о́тче, в дому́ Бо́жии прозя́бл еси́,/ доброде́тельми укра́шен и плоды́ чуде́сными облагоуха́емь.

Богоро́дичен: Ни́ва духо́вная, я́коже из бразды́ клас,/ изнесла́ еси́ всю тварь Пита́ющаго,/ вся́ческих Бо́га, Присноде́во.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Умо́м очище́нным, пресла́вне,/ зри́ши добро́ту неизрече́нную Христа́, вся́ческих Бо́га на́шего.

Я́коже Илия́ на колесни́це, о́тче,/ доброде́тельми твои́ми возше́л еси́ на Не́бо, Ду́хом облегчава́емь.

Стягну́в 18 те́ло твое́ воздержа́нием и чистото́ю,/ в Вы́шняя селе́ния к широте́, о́тче, дости́гл еси́.

Богоро́дичен: Исцели́ неду́гующего у́ма моего́ омраче́ние,/ Врача́ ро́ждшая, Христа́, Всенепоро́чная Влады́чице.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Лука́вый умертви́ся змий святы́ми твои́ми моли́твами, Богоблаже́нне Пе́тре,/ и от того́ разреша́ются зло́бы и́же зна́мения от Тебе́ испроси́вшии:/ еси́ бо уго́дник Бо́жий всесве́тел, позна́н был еси́ ве́рен.

Обнови́в приле́жным ра́лом ду́шу твою́, свяще́нный о́тче Пе́тре,/ доброде́тельная в ню ввергл еси́ прему́дренно многопло́дная се́мена/ и пожа́л еси́ многоразли́чных исцеле́ний бога́тыя кла́сы.

Кре́постию ду́ха, о́тче, возмо́г,/ держа́ву вра́жию и си́лу низложи́л еси́/ и похвалу́ побе́дную по́чести прия́л еси́, преподо́бне Пе́тре, чуде́сными сия́нии.

Богоро́дичен: Госпо́дь с Тобо́ю, Пречи́стая, я́коже изво́лил есть, быв, Отрокови́це,/ всех нас от о́бласти льсти́ваго хода́тайством Твои́м изба́вил есть,/ темже Тя ны́не по до́лгу, ро́дове родо́в, ублажа́ем.

Конда́к, глас 2:

Вели́чием по́двиг твои́х возсия́л еси́/ и озари́л еси́, Богому́дре, вся концы́ земны́я./ Те́мже, и у́мер, преше́л еси́/ от све́та к Све́ту возсия́вшему./ Мы же ны́не вопие́м ти:/ просвети́ на́ша помышле́ния, Пе́тре, о́тче наш,/ и моли́ непреста́нно о всех нас.

Икос:

Возлюби́в Бо́га па́че всех,/ кро́ток же и смире́н се́рдцем, вся в ми́ре оста́вил еси́/ и, отреши́вся мирска́го жития́, возжеле́л еси́ всеце́ло послужи́ти Бо́гу./ Сего́ ра́ди удали́лся еси́, вку́пе со единоро́дною сестро́ю Еле́ною,/ во е́же подвиза́тися по́двигом до́брым и спаси́тельным./ Восхоте́в же па́ки крепча́йшаго по́двига,/ оста́вил еси́ да́же и единоро́дную сестру́ свою́ Еле́ну/ и, отбе́г ея́, подвиза́лся еси́ кре́пко и до́лго./ Те́мже и победи́тель яви́лся еси́ мно́гих искуше́ний и всея́ вра́жия си́лы./ Наста́вник быв мно́жеству мона́хов,/ отону́дуже дарова́ние чуде́с от Христа приял еси́,/ те́мже мно́гих жи́телей удиви́л еси́./ Жития́ же ра́ди свята́го и Богоуго́дных дел твои́х/ тебе́ чтут да́же и ага́ряне 19 и притека́ют к ра́це моще́й твои́х, прося́ще твоея́ по́мощи./ Мы же днесь, ве́рою и любо́вию восхваля́юще тя, вопие́м:/ ра́дуйся, преподо́бне Пе́тре Богоблаже́нне,/ преди́вная кори́шская похвало́.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Проше́д по́двиги по́стныя, о́тче,/ умо́м кре́пким ум прего́рдый Боже́ственным смире́нием смири́л еси́, поя́:/ благослове́н Бог оте́ц на́ших.

Красне́йшее прозябе́ние, о́тче,/ в дому́ Бо́жии прозя́бл еси́, доброде́тельми укра́шен,/ и плоды́ чуде́сными облагоуха́л еси́.

Просвети́в твое́ се́рдце,/ нача́льник был еси́ свяще́ннаго Собо́ра о́тча,/ наказу́я, и уча́, и вся приводя́ к Бо́жией во́ли, поя́:/ оте́ц на́ших Бо́же, благослове́н еси́.

Богоро́дичен: Но́во Отроча́ ро́ждши, Пребезнача́льнаго Сло́ва,/ обветша́вшая ны грехо́м обнови́ла еси́, Де́во, и пе́ти укрепи́ла еси́:/ оте́ц на́ших Бо́же, благослове́н еси́.

Песнь 8

Ирмо́с: Богоглаго́ливии отро́цы, в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Насле́днице Боже́ственных селе́ний,/ а́нгельски, о́тче, пожи́л еси́,/ тем со А́нгелы лику́ет дух твой.

Невозвра́тно ше́ствовав, о́тче прему́дре и досточу́дне,/ веду́щими к Небеси́ Боже́ственными стезя́ми,/ от зле веду́щих до конца́ уклони́лся еси́.

Все́льшеюся благода́тию в ду́шу твою́, о́тче,/ лука́вно живу́щии в челове́цех нечи́стии ду́хи отгони́ми быва́ют.

Богоро́дичен: Вода́ еси́ неисчерпа́емая, Де́во,/ от нея́же вси пию́ще, благода́ти исполня́емся,/ душе́ю и те́лом освяща́еми.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Исцеле́ние источа́ет бога́тно честна́я твоя́ ра́ка Бо́жиим Ду́хом/ и стра́сти многовре́менныя исцеля́ет, о́тче, приходя́щих к тебе́,/ и прогоня́ет лука́выя ду́хи лю́тыя,/ и воздвиза́ет ве́рныя восхвали́те твоя́ све́тлыя по́двиги.

Те́ло твое́, блаже́нне, терпели́вое, связа́вшееся вери́гами,/ стра́сти неисце́льныя прикоснове́нием исцеля́ет,/ Бо́гу и Спа́су тя вельми́ просла́вльшу,/ о́тче прему́дре и досточу́дне Пе́тре,/ я́ко де́лы твои́ми до́брыми просла́вльшуся, преподо́бне.

Процве́л еси́ в по́стнических удо́лиих, прехва́льне Пе́тре, о́тче наш,/ я́ко шипо́к благоуха́нен,/ и, я́коже крин, облагоуха́л еси́ со́вести ве́рных доброде́тельми и чудесы́./ Те́мже, преподо́бне, отжени́ от нас стра́сти смердя́щия.

Богоро́дичен: Просвети́, Чи́стая Де́во, се́тующее се́рдце мое́ при́сно/ преступле́ньми и жите́йскими мно́гими молва́ми,/ не оста́ви мене́ враго́м бы́ти в ра́дость,/ я́ко да сла́влю Тя и любо́вию пою́, Препе́тая.

Свети́лен:

Све́том невеще́ственным озаря́емь,/ светови́ден вои́стинну показа́лся еси́, преподо́бне о́тче Пе́тре,/ му́жески оттря́с вся земна́я попече́ния,/ ду́шу свою́ к Небесе́м впери́л еси́,/ сего́ ра́ди ны́не на Небеси́ лику́еши/ я́ко вои́стинну насле́дник Боже́ственных наслажде́ний.

Сла́ва, и ны́не, Богоро́дичен:

Пресвята́я Богоро́дице, Влады́чице всея́ тва́ри,/ просвети́ и нас све́том невеще́ственным,/ и да́руй нам вре́менное и ве́чное благополу́чие,/ и изба́ви нас от вся́кия ну́жды и печа́ли.

На хвали́тех стихи́ры на 4, глас 4:

Да ра́дуется днесь вся земля́ Се́рбская,/ да весели́тся, торжеству́я, и град При́зрен,/ я́ко име́я в преде́лех о́бласти своея́ неистощи́мое сокро́вище –/ преподо́бнаго отца́ на́шего Петра́ Кори́шскаго,/ кре́пкаго предста́теля и моли́твенника ко Го́споду,/ Его́же непреста́нно моли́/ о душа́х на́ших.

Прииди́те, вси благове́рнии лю́дие,/ псалмы́ и пе́сньми воспое́м/ преподо́бнаго отца́ на́шего Петра́ Кори́шскаго,/ и́же возсия́ на тве́рди ве́ры па́че со́лнца./ Сей бо, жела́ние Боже́ственное восприи́м,/ мирску́ю оста́ви пре́лесть,/ взем же яре́м Христо́в на ра́мо,/ полки́ бесо́в му́жески победи́/ и ны́не на Небесе́х мо́лится непреста́нно/ о душа́х на́ших.

Име́я всегда́ бодр ум,/ Богому́дре о́тче Пе́тре,/ зако́ном Боже́ственным после́довал еси́,/ повеле́нием Сотво́ршаго повину́яся,/ показа́лся еси́ мона́хов законополо́жник/ и пра́вило изве́стнейшее,/ наказа́тель безу́мных и наста́вник заблу́ждших,/ свети́льник во тьме неве́дения,/ освяща́ющ всю зе́млю Се́рбскую,/ и ны́не моли́, во е́же спасти́ся нам.

Име́я си́лу наставля́ющаго тя Ду́ха Бо́жия,/ Богому́дре о́тче Пе́тре,/ ника́коже восхоте́л еси́ внутрь ми́ра пребы́ти,/ но, избе́г ми́ра, в непроходи́мых пу́стынях жил еси́/ и, я́ко земны́й А́нгел и Небе́сный челове́к,/ со зверьми́ без боя́зни ходи́л еси́,/ сего́ ра́ди и нетле́нныя жи́зни причасти́лся еси́,/ и ны́не лику́я со А́нгелы,/ моли́ о душа́х на́ших.

Сла́ва, глас 5:

Стецы́теся днесь, вся мно́жества мона́хов,/ воструби́те трубо́ю пе́сней,/ благода́ть бо Ду́ха, вся́кия трубы́ боголе́пнейши,/ всех созыва́ет к пе́нию преподо́бнаго отца́ на́шего Петра́:/ лю́дие, я́ко раби́ Госпо́дни,/ да покло́нятся и́скреннему рабу́ всех Царя́,/ мона́си да просла́вят и́стиннаго наста́вника своего́,/ и́же показа́ де́тельно изря́дный путь любве́ Бо́жественныя,/ па́стыри и учи́тели да восхва́лят/ вои́стинну изря́дно пра́вило же и о́браз па́стве,/ и́же пости́же Свет и́стинный Вседе́тельныя Тро́ицы/ и мо́лится непреста́нно о душа́х на́ших.

И ны́не, Богоро́дичен:

Тебе́ мо́лимся,/ я́ко Бо́жией Ма́тери, Благослове́нная:/ моли́ о спасе́нии душ на́ших.

Славосло́вие вели́кое, тропа́рь преподо́бнаго, ектении́ и отпу́ст.

НА ЛИТУРГИ́И

Блаже́нны от кано́на преподо́бнаго, пе́сни 3-я и 6-я. Проки́мен, глас 7: Честна́ пред Го́сподам/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Кори́нфяном, зача́ло 176. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 77. Прича́стен: В па́мять ве́чную:

Преподобный Петр Коришский

Преподобный Петр Коришский родился в селении Унымире Печской области в начале XIII века, между 1211 и 1215 годами. Его родители были благочестивыми христианами. Они научили сына чтению святых книг, кротости, смирению и незлобию. Святой Петр уже в детстве полюбил пост и молитву. Он избегал детских игр со сверстниками, но любил посещать храм Божий и читать Священное Писание. Ему глубоко в душу запали слова Писания, что ради любви Божией нужно оставить все земное и посвятить себя служению Богу. Когда умер отец, святой Петр хотел уйти из родительского дома, чтобы жить отшельником. Но мать просила юношу не оставлять ее и младшую сестру. Ради послушания матери святой Петр исполнил ее просьбу, но удвоил свой подвиг поста и молитвы. На теле преподобный носил власяницу.

После смерти матери святой Петр постригся в монашество в храме во имя святых апостолов Петра и Павла, расположенном недалеко от его села. Недалеко от храма преподобный построил хижину для себя и сестры. Однако уединение святого нарушали родственники и знакомые. Тогда, взяв сестру, он отправился на высокую гору около села Корише (ныне Кабаш) близ Призрена. Через некоторое время преподобный Петр, стремясь к большему уединению, оставил сестру и поселился в пещере в расселине высокой горы. Сестра святого стала жить в селе, подвизаясь в целомудрии и молитве.

Преподобный Петр питался травами и желудями, терпеливо переносил зной и холод. Дикие звери не причиняли ему вреда, но бесы непрестанно искушали святого. Более всего они стремились изгнать подвижника из пещеры, являясь ему в образах различных чудовищ и говоря, что здесь их жилище. Однажды бесы напали на святого в образе множества черных воронов, которые старались выклевать преподобному глаза, но святой подвижник отогнал их молитвой и чтением символа веры.

Особенно досаждал святому змей, поселившийся в его пещере. Когда подвижника, наконец, стало смущать постоянное шипение змея, он стал усердно молиться Богу и призывать на помощь Ангела. Сорок дней преподобный постился, а затем ему явился Архистратиг Божий Михаил и изгнал из его пещеры змея. После этого преподобный Петр стал еще усерднее подвизаться в посте и молитве. Он достиг такой чистоты ума, что провидел устраиваемые против него диавольские козни и разрушал их молитвой.

За любовь к Богу и великое терпение преподобный Петр удостоился видения несказанного Света, который много дней и ночей освещал его пещеру.

Преподобный Петр подвизался в уединении до глубокой старости. Незадолго до кончины его жилище было обнаружено боголюбивыми иноками, которые просили святого позволить жить с ним. Преподобный Петр благословил их построить келлии недалеко от его пещеры. В пещере, где жил святой,была устроена часовня, стены которой были расписаны изображениями святых. Преподобный просил учеников высечь себе в скале гроб. Перед кончиной он поведал ученикам свое житие.

Преподобный Петр Коришский мирно скончался 5 июня 1270 (или 1275) года. В ночь, когда святой скончался, ученики видели в его пещере чудесный Свет, множество свечей и слышали ангельское пение. Господь прославил мощи Своего угодника благоуханием и чудесами.

В 1343 году на месте подвигов преподобного Петра был сооружен храм. Житие преподобного и служба ему написаны иноком Феодосием Хиландарским в XIII веке. В конце XVI века иноки Коришского монастыря, скрывая от турецких захватчиков святые мощи, перенесли их в пещерный храм монастыря у Черной реки близ Калашина, где они почивают и ныне.

Литература:

Иустин (Попович), архимандрит. Жития святых (на сербском языке). Июнь. Белград, 1975.

Перенесе́ние моще́й свята́го благове́рнаго кня́зя И́горя

(Слу́жбу зри 19 сентября́)

Тропа́рь, глас 4:

Наста́ днесь всечестна́я па́мять страстоте́рпца благове́рнаго кня́зя И́горя,/ созыва́ющая лю́ди в пречестны́й храм Спа́сов,/ иде́же ра́достно соше́дшеся благочести́вых мно́жество/ моли́твенно пра́зднуют святу́ю па́мять твою́,/ и с ве́рою взыва́ют ти:/ моли́ся, свя́те, стране́ Росси́йстей, гра́ду Черни́гову и всем правосла́вным христиа́ном/ в ми́ре и благоде́нствии спасти́ся.

Конда́к, глас 6:

Измени́л еси́ земна́го княже́ния сла́ву/ во и́ночества о́браз смире́нный/ и страда́льчески земно́е житие́ сконча́в,/ ны́не на Небесе́х ра́дуешися,/ усе́рдие моля́ся/ о чту́щих тя, И́горе, страда́льцев похвало́.

Перенесение мощей блаженного Игоря

Перенесение мощей блаженного Игоря, великого князя Киевского. Великий князь Киевский Игорь Ольгович, в святом крещении Георгий (память его 19 сентября), в 1146 году был разгромлен и взят в плен князем Изяславом и заточен в одном из монастырей Переяславля Русского или Южного (ныне Переяслав-Хмельницкий). Вдали от суеты мира сего, тяжело больной, он стал раскаиваться в своих грехах и просил разрешить ему постричься в монахи. 5 января 1147 года епископ Переяславский Евфимий постриг его в иночество с именем Гавриил. Вскоре он выздоровел и был переведен в Киевский Феодоровский монастырь, где принял схиму с именем Игнатий и предался иноческим подвигам.

Но дух братоубийственной ненависти бушевал над Киевом. Черниговские князья, двоюродные братья Игоря, замыслили заманить Изяслава Киевского в совместный поход с тем, чтобы захватить его или убить. Заговор открылся, когда князь был уже на пути к Чернигову. Возмущенные киевляне, узнав о коварстве черниговцев, обрушили месть на ни в чем неповинного князя-схимника. 19 сентября 1147 года святой Игорь был зверски убит.

Господь прославил страдальца чудесами. По благословению митрополита Климента Смолятича, игумен Феодоровского монастыря Анания совершил погребение страстотерпца в храме Киевского Симоновского монастыря. 5 июня 1150 года, когда киевский стол был занят Юрием Долгоруким, его союзник, князь Черниговский Святослав Ольгович, родной брат убиенного Игоря, торжественно перенес святые мощи князя Игоря на родину, в Чернигов, где они были положены в раку «с теремом» в кафедральном Спасском соборе. Тогда же было установлено празднование памяти святого.

Святи́теля Константи́на, митрополи́та Ки́евскаго

Тропа́рь, глас 4:

Апо́столов прее́мниче,/ архиере́ев сопресто́льниче,/ Ро́ссии всея́ па́стырю и учи́телю,/ всеблаже́нне о́тче Константи́не,/ Влады́це всех моли́ся/ мир па́стве твое́й дарова́ти/ и спасе́ние душа́м на́шим и ве́лию ми́лость.

Конда́к, глас 8:

Звезду́ росси́йскую,/ от Ки́ева возсия́вшую/ и Черни́гов блаже́нною кончи́ною свое́ю озари́вшую,/ всеблаже́ннаго святи́теля Константи́на почти́м,/ прося́ще его́ моли́тися Христу́,/ да пода́ст мир стране́ на́шей/ и душа́м на́шим ве́лию ми́лость.

Святой Константин I, митрополит Киевский

Святой Константин I, митрополит Киевский. В 1155 году Ростово-Суздальский князь Юрий Долгорукий вступил в первопрестольный град Киев и стал великим князем. Объединив почти всю Русскую землю, Юрий Долгорукий приступил к разрешению церковных дел, требовавших устроения с 1145 года, когда митрополит Киевский Михаил оставил кафедру и удалился в Константинополь (в 1147 году великий князь Изяслав Мстиславич и Собор русских епископов поставили митрополитом Киевским Климента Смолятича без участия Константинопольского Патриарха, но не все епископы согласились с этим, и в Русской Церкви началась смута).

По инициативе князя Юрия Долгорукого были проведены успешные переговоры с Константинополем. В январе 1156 года в Константинополе получил посвящение на Киевскую кафедру митрополит Константин, который в том же году приехал в Киев. Перед отправлением в свою северную Митрополию он в январе того же года участвовал в Константинопольском Соборе, обсуждавшем вопрос о Евхаристической Жертве. Церковный Собор Русской Церкви в составе митрополита Константина и епископов –  Косьмы Полоцкого и Мануила Смоленского приступил к восстановлению канонических норм церковной жизни: «Священнодействия митрополита Климента были «испровергнуты», а князь Изяслав Мстиславич подвергнут строгому соборному осуждению.

Митрополит Константин замещал архиерейские кафедры епископамигреками, стремясь тем самым сделать невозможным повторение Собора 1147 года. В Суздаль на место лишенного кафедры Нестора был назначен грек Леон, в Чернигов – грек Антоний. По всей вероятности греком был и Косьма, поставленный епископом на вновь учрежденную кафедру в Галиче. В Переяславль-Залесский был поставлен епископ Василий. В Новгороде Великом на вече был избран епископом Аркадий.

У князя Юрия Долгорукого с митрополитом Константином установились, по всей вероятности, добрые отношения, и князь прислушивался к его мнению в государственных вопросах. Так, например, митрополит Константин и киевские игумены просили Юрия не выдавать князя Ивана Берладника в руки князя Галицкого Ярослава.

15 мая 1158 года Юрий Долгорукий скончался. Нелюбившие его киевляне начали грабить княжеское имущество и «избивать» суздальцев по городам и селам. Смерть Юрия Долгорукого позволила захватить великокняжеский стол Изяславу Давидовичу, но в конце 1158 года он был изгнан из Киева Ярославом Галицким и Мстиславом Изяславичем, решившими передать столицу князю Смоленскому Ростиславу.

Митрополит Константин, стремясь избежать мести Мстислава, сына преданного при нем анафеме Изяслава, удалился в Чернигов, где княжил Святослав Ольгович, друг и союзник Юрия Долгорукого, а епископом был грек Антоний. Здесь митрополит Константин внезапно заболел. Можно предполагать, что тогда он стал сожалеть и раскаиваться в излишне строгом наказании участников поставления на Киевскую митрополию Климента. Митрополит Константин призвал епископа Антония и вручил ему свое завещание, взяв обязательство исполнить все, что в нем написано. Когда, после кончины митрополита Константина епископ Антоний распечатал перед князем Святославом завещание и прочел его, все присутствовавшие были поражены: «По умертвии моем не погребите тела моего, но повергше его на землю и поцеплеше ужем за нози и извлекше из града, поверзите на оном месте, имя нарек ему, псом на расхищение». Епископ Антоний постарался исполнить последнюю волю митрополита. Тело Константина лежало непогребенным в течение одного или трех дней, а затем было положено в черниговском Спасо-Преображенском соборе. Подобно тому, как Господь не оставил раскаявшегося разбойника, так милосердный Владыка принял и плоды покаяния, принесенные Константином – у его мощей стали совершаться многочисленные чудесные исцеления.

Литература:

1. Барсуков Н. Источники русской агиографии. СПб., 1882, с. 310–311.

2. Голубинский Е.Е. История Русской Церкви. Т. 1. М, 1901, с. 288.

3. Леонид (Кавелин), архимандрит. Святая Русь. СПб., 1891, с. 34–35.

4. Макарий (Булгаков), митрополит. История Русской Церкви. Т. 1. СПб., 1868, с. 249.

5. Приселков М. Д. Очерки по церковно-политической истории Киевской Руси. СПб., 1913, с. 387–392.

6. Соколов П. Русский архиерей из Византии. Киев, 1913, с. 88–92.

7. Стефан, митрополит. Блаженный Константин, митрополит Киевский. «Журнал Московской Патриархии», 1959, № 6, с. 68–71.

* * *

14

Ко́тва – якорь.

15

Тмори́чных – весьма многих, бесчисленных

16

Превзя́тую – превознесенную, высокомерную.

17

Го́ршая – худшее.

18

Стягну́в – укрепив.

19

Ага́ряне – турки, магометане.


Источник: Минея - М. : Издательский Совет Русской Православной Церкви, 2002-. 12 том. / Минея июнь. - 2002. / Ч. 1. – 664 с.; Ч. 2. – 616 с.

Комментарии для сайта Cackle