Мѣ́сѧца тогѡ́же въ з҃ї-й де́нь. Ст҃а́гѡ мꙋ́ченика мѵ́рѡна.

На Гдⷭ҇и, воззва́хъ, стїхи̑ры пра́здника, гла́съ д҃. Подо́бенъ: Зва́нный свы́ше:

Ю҆́же жи́знь, бцⷣе, заче́ншаѧ, ꙳ ᲂу҆мира́еши зако́номъ є҆стества̀, ꙳ и҆ прехо́диши ѿ землѝ къ нбⷭ҇нымъ, ꙳ ма́нїемъ вопло́щшагѡсѧ ꙳ ѿ пречⷭ҇тыхъ и҆ бжⷭ҇твенныхъ крове́й твои́хъ. ꙳ тѣ́мже ѿ конє́цъ тебѣ̀ всѝ предста́ша, ꙳ бг҃огла́снїи а҆пⷭ҇ли тѧ̀ погребстѝ, ꙳ пѣ́сненнѡ тебѣ̀ вѣща́юще: ꙳ ѡ҆дꙋшевле́нный прⷭ҇то́ле всѣ́хъ цр҃ѧ̀, ꙳ и҆ чⷭ҇тны́ѧ ст҃ы́ни ковче́же, ꙳ ра́дꙋйсѧ, є҆ди́на ро́ждшаѧ ꙳ сп҃са дꙋ́шъ на́шихъ.

Свѣ́та чистѣ́йшагѡ прїѧ́тєлища, ꙳ свѣти̑льницы, разо́ршїи но́щь многобо́жнꙋю, ꙳ сп҃совы а҆пⷭ҇ли, ꙳ ѻ҆́блакъ бжⷭ҇твенный, ꙳ и҆зъ негѡ́же незаходи́мый свѣ́тъ возсїѧ̀, ꙳ є҆гда̀ дꙋ́хомъ преста́вленꙋ тѧ̀ ѿ мїрски́хъ ꙳ ᲂу҆вѣ́дѣша, бл҃гослове́ннаѧ, ꙳ къ премі́рнѣй ра́дости ꙳ ѻ҆́блакомъ преидо́ша, ꙳ и҆схо́дными пѣ́сньми тѧ̀ проводи́вше ꙳ ко гро́бꙋ живоно́сномꙋ, ꙳ бцⷣе, ᲂу҆пова́нїе на́ше.

Да пра́зднꙋетъ тва́рь моле́бнѡ, ꙳ всѣ́хъ цр҃и́ца ꙳ къ ца́рствꙋ мы́сленномꙋ пре́йде ꙳ сцⷭ҇ртвовати црⷭ҇твꙋющемꙋ ꙳ все́ю тва́рїю. ꙳ є҆ѧ́же ра́ди разрꙋши́сѧ а҆́дово ца́рство, ꙳ и҆ мы̀ ѿ землѝ вознесо́хомсѧ, ꙳ и҆ со а҆́гг҃лы жи́ти сподо́бихомсѧ. ꙳ є҆ѧ́же ᲂу҆спе́нїемъ собра́сѧ ꙳ мы́сленное є҆стество̀ всѐ, ꙳ патрїа́рси, прⷪ҇ро́цы ꙳ и҆ съ мꙋ́чєники а҆пⷭ҇ли.

Стїхи̑ры ст҃а́гѡ, гла́съ в҃. Подо́бенъ: Є҆гда̀ ѿ дре́ва:

Є҆гда̀ безбо́жное разжже́нїе всѧ́кꙋ попалѧ́ше странꙋ̀, пребл҃же́нне, тогда̀ разжже́сѧ теплото́ю дх҃а, ѿ дв҃ы бг҃оѻтрокови́цы проповѣ́далъ є҆сѝ сло́ва въ пло́ть ѡ҆бле́кшасѧ за бла́гость. тѣ́мъ и҆ ѻ҆гнѧ̀ и҆ мꙋ́къ претерпѣ́лъ є҆сѝ лю̑таѧ томлє́нїѧ, си́лою ᲂу҆крѣплѧ́емь благода́ти.

Є҆гда̀ ѕлоимени́тый вра́гъ тща́шесѧ ласка́ньми ᲂу҆кра́сти твою̀ мы́сль, тогда̀ мꙋ́жествомъ ᲂу҆добрѧ́емь, сопроти́вилсѧ є҆сѝ тве́рдѣ, и҆ претерпѣ́лъ є҆сѝ бѡлѣ́зни, къ неболѣ́зненномꙋ поко́ю приводѧ́щыѧ тѧ̀, мꙋ́чениче достохва́льне мѵ́рѡне, небе́сномꙋ црⷭ҇твїю и҆ вѣ́чномꙋ наслажде́нїю.

Є҆гда̀ волꙋ́ѧми жи́лами тѧ̀ вра́гъ бїѧ́ше, строга̑нїи непреста́нными и҆знꙋрѧ́ѧ, мꙋ́чениче, пло́ть твою̀ свѧще́ннꙋю, ко хрⷭ҇тꙋ̀ взира́лъ є҆сѝ подвигополо́жникꙋ, рꙋ́кꙋ тебѣ̀ простира́ющꙋ бжⷭ҇твенныѧ си́лы. тѣ́мже, сконча́въ тече́нїе, ᲂу҆лꙋчи́лъ є҆сѝ по́чєсти вели́ки, мѵ́рѡне страда́льче предо́блїй.

Сла́ва, и҆ ны́нѣ, гла́съ то́йже. Самогла́сенъ:

Ꙗ҆́же нб҃съ вы́шшаѧ сꙋ́щи, и҆ херꙋві̑мъ сла́внѣйшаѧ, и҆ всеѧ̀ тва́ри чⷭ҇тнѣ́йша, ꙗ҆́же премно́гїѧ ра́ди чистоты̀, прⷭ҇носꙋ́щнагѡ сꙋщества̀ прїѧ́телище бы́вши, въ сн҃о́внѣ рꙋ́цѣ дне́сь всест҃ꙋ́ю предае́тъ дꙋ́шꙋ, и҆ съ не́ю и҆сполнѧ́ютсѧ всѧ́чєскаѧ ра́дости, и҆ на́мъ да́рꙋетъ ве́лїю ми́лость.

На стїхо́внѣ стїхи̑ры самогла́сны, гла́съ в҃. Поⷣ: До́ме є҆ѵфра́ѳовъ:

Пѣ́сньми твоѐ честно́е, ꙳ и҆ бг҃опрїѧ́тное тѣ́ло, ꙳ провожда́юще бжⷭ҇твеннїи ꙳ а҆пⷭ҇ли, вопїѧ́хꙋ: ꙳ гдѣ̀ ны́нѣ ѿхо́диши, влⷣчце;

Сті́хъ: Воскрⷭ҇нѝ, гдⷭ҇и, въ поко́й тво́й, ты̀ и҆ кївѡ́тъ свѧты́ни твоеѧ̀.

Прїиди́те, земноро́днїи, ꙳ соста́вимъ ли́къ, ꙳ и҆схо́дное вопїю́ще ꙳ на преставле́нїе бцⷣы дне́сь.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Землѧ̀ ᲂу҆́бѡ твои́мъ погребе́нїемъ ꙳ благослови́сѧ, дв҃о: ꙳ воздꙋ́хъ же восхожде́нїемъ ꙳ ѡ҆свѧти́сѧ стра́ннымъ, ꙳ зако́номъ ᲂу҆ме́рши є҆стества̀.

Сла́ва, и҆ ны́нѣ, гла́съ то́йже. Самогла́сенъ:

Всенепоро́чнаѧ невѣ́ста, и҆ мт҃и бл҃говоле́нїѧ ѻ҆́ч҃а, ꙗ҆́же бг҃ꙋ пронарече́ннаѧ во своѐ є҆мꙋ̀ жили́ще, несли́тнагѡ соедине́нїѧ, дне́сь пречⷭ҇тꙋю дꙋ́шꙋ творцꙋ̀ и҆ бг҃ꙋ предае́тъ: ю҆́же безпло́тныхъ си̑лы бг҃олѣ́пнѡ под̾е́млютъ, и҆ къ животꙋ̀ преставлѧ́етсѧ, сꙋ́щаѧ мт҃и живота̀, свѣща̀ непристꙋ́пнагѡ свѣ́та, спасе́нїе вѣ́рныхъ, и҆ ᲂу҆пова́нїе дꙋ́шъ на́шихъ.

Тропа́рь пра́здника, гла́съ а҃:

Въ ржⷭ҇твѣ̀ дѣ́вство сохрани́ла є҆сѝ, во ᲂу҆спе́нїи мі́ра не ѡ҆ста́вила є҆сѝ, бцⷣе. преста́виласѧ є҆сѝ къ животꙋ̀, мт҃и сꙋ́щи живота̀, и҆ моли́твами твои́ми и҆збавлѧ́еши ѿ сме́рти дꙋ́шы на́шѧ.

На ᲂу҆́трени, по а҃-й стїхоло́гїи сѣда́ленъ, гла́съ г҃.

Подо́бенъ: Красотѣ̀ дѣ́вства:

Въ нбⷭ҇наѧ мы́слєннаѧ твоѧ̀ дꙋша̀, въ ра́й чⷭ҇тое твоѐ тѣ́ло преста́висѧ, ѿ тлѝ, пренепоро́чнаѧ, въ мѣ́сто свѣ́тло: сегѡ̀ ра́ди возда́стъ беззакѡ́ннымъ гдⷭ҇и, ле́сть бо содѣ́лаша честно́мꙋ твоемꙋ̀ тѣ́лꙋ. тѣ́мже со а҆пⷭ҇лы вопїе́мъ: ра́дꙋйсѧ, бл҃года́тнаѧ.

Сла́ва, и҆ ны́нѣ, то́йже:

По в҃-й стїхоло́гїи сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:

Въ рꙋ́цѣ на́съ ра́ди вочл҃вѣ́чшагѡсѧ и҆зъ тебє̀, преда́вши дꙋ́шꙋ, ꙗ҆́кѡ зижди́телю твоемꙋ̀ и҆ бг҃ꙋ, къ жи́зни нетлѣ́ннѣй преста́виласѧ є҆сѝ. тѣ́мже тѧ̀ че́стнѡ ᲂу҆блажа́емъ, є҆ди́нꙋ чи́стꙋю и҆ нескве́рнꙋю, бцⷣꙋ всѝ и҆́стиннѡ и҆сповѣ́дающе, взыва́емъ: хрⷭ҇та̀ молѝ къ немꙋ́же преста́виласѧ є҆сѝ, спастѝ дꙋ́шы на́шѧ.

Сла́ва, и҆ ны́нѣ, то́йже.

Канѡ́нъ пра́здника, со і҆рмосо́мъ на и҃. Кѵ́ръ і҆ѡа́нна дамаскина̀.

Гла́съ а҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ ᲂу҆спе́нїе.

Дѣ̑вы ѻ҆трокови̑цы съ марїамі́ею прⷪ҇ро́чицею пѣ́снь и҆схо́днꙋю ны́нѣ воскли́кните: дв҃а бо и҆ є҆ди́на бг҃ома́ти ко прїѧ́тїю нбⷭ҇номꙋ преставлѧ́етсѧ.

Досто́йно ꙗ҆́кѡ ѡ҆дꙋшевле́нное тѧ̀ не́бо, прїѧ́ша нбⷭ҇наѧ, пречⷭ҇таѧ, бжⷭ҇твєннаѧ селє́нїѧ: и҆ предста̀ свѣ́тлѡ ᲂу҆кра́шена, ꙗ҆́кѡ невѣ́ста всенепоро́чнаѧ, цр҃ю̀ и҆ бг҃ꙋ.

Канѡ́нъ ст҃а́гѡ, на д҃, є҆гѡ́же краегране́сїе:

Пою̀, мѵ́рѡне, твою̀ мѷродохнове́ннꙋю бл҃года́ть. І҆ѡ́сифъ.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Хвалꙋ̀ бг҃ꙋ, въ па́мѧти ликꙋ́юще страда́льца мѵ́рѡна, дне́сь воспое́мъ, ᲂу҆крѣ́пльшемꙋ сего̀, держа́вꙋ погꙋби́ти борца̀.

Да́ръ са́мъ себѐ благодѣ́телю прине́слъ є҆сѝ, и҆ свѧще́нно возложе́нїе, и҆ добро̀ заколе́нїе, и҆ благово́ннꙋ же́ртвꙋ, зако́ннѡ пострада́въ, мꙋ́чениче многострада́льне.

Ꙗ҆́кѡ мꙋ́дръ, ꙗ҆́кѡ чи́стъ хра́мъ, сла́вне, ѿ дв҃ы возсїѧ́вшагѡ, ᲂу҆стреми́вшагосѧ возмꙋти́ти бжⷭ҇твенное ста́до, дꙋшетлѣ́ннаго во́лка ѿгна́лъ є҆сѝ.

Бг҃оро́диченъ:

Є҆ди́на бг҃а неискꙋсобра́чнѡ родила̀ є҆сѝ, є҆го́же страстоте́рпцы мꙋ́чєницы и҆сповѣ́давше на́мъ ᲂу҆подо́бльшасѧ, ᲂу҆праздни́ша пре́лесть, чⷭ҇таѧ влⷣчце.

Пѣ́снь г҃. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй па́мѧти твое́й вѣнцє́въ сла́вы сподо́би.

Ѿ ме́ртвыхъ чре́слъ произве́дшисѧ, є҆стество́мъ подо́бна, чⷭ҇таѧ, и҆схожде́нїе разрѣшѝ: ро́ждши же сꙋ́щꙋю жи́знь, къ жи́зни преста́висѧ бжⷭ҇твеннѣй и҆ ѵ҆поста́снѣй.

Ли́къ бг҃осло́вѡвъ ѿ конє́цъ, свы́ше же а҆́гг҃лъ мно́жєства къ сїѡ́нꙋ и҆дѧ́хꙋ, всеси́льнымъ манове́нїемъ, достодо́лжнѡ, влⷣчце, твоемꙋ̀ погребе́нїю слꙋжа́ще.

И҆́нъ. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Возвы́сивъ твоѐ жела́нїе серде́чное ко гдⷭ҇ꙋ, на крⷭ҇тъ возне́сшемꙋсѧ, вознесе́нъ бы́лъ є҆сѝ, пресла́вне, на дре́вѣ стрꙋ́жемь, ᲂу҆се́рднѡ же вопїѧ̀: ꙗ҆́кѡ нѣ́сть пра́веденъ па́че тебє̀, гдⷭ҇и.

Глагѡ́лъ твои́хъ стрѣла́ми ѻ҆́стрыми пронзи́лъ є҆сѝ мꙋчи́телѧ въ се́рдце, до́блїй во́ине цр҃ѧ̀ хрⷭ҇та̀, всехва́льне, и҆ поѧ̀ глаго́лалъ є҆сѝ: нѣ́сть пра́веденъ па́че тебє̀, гдⷭ҇и.

Ꙗ҆́кѡ ᲂу҆́тро, ꙗ҆́кѡ де́нь возсїѧ́въ, разори́лъ є҆сѝ мра́къ невѣ́дѣнїѧ, просвѣти́лъ є҆сѝ пою́щыѧ всегда̀, мѵ́рѡне многострада́льне: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.

Бг҃оро́диченъ:

Недꙋ́гꙋющꙋю безбо́жїемъ тва́рь всю̀, бг҃а ро́ждши и҆сцѣли́телѧ, дв҃о, и҆сцѣли́ла є҆сѝ пресла́внѡ. тѣ́мже благодарѧ́ще взыва́емъ тѝ: нѣ́сть пречⷭ҇ты па́че тебє̀, влⷣчце.

Конда́къ ст҃а́гѡ, гла́съ д҃. Подо́бенъ: Вознесы́йсѧ:

И҆змла́да хрⷭ҇та̀ возлюби́въ, пресла́вне, и҆ тогѡ̀ соблюда́ѧ бжⷭ҇твєнныѧ за́пѡвѣди, къ томꙋ̀ прите́клъ є҆сѝ ве́сь цѣ́лъ, мѵ́рѡне всече́стне, и҆ со а҆́гг҃лы мо́лишисѧ прилѣ́жнѡ. просѝ всѣ̑мъ почита́ющымъ па́мѧть твою̀ ѡ҆ставле́нїѧ грѣхѡ́въ.

Сѣда́ленъ, гла́съ а҃. Подо́бенъ: Гро́бъ тво́й, сп҃се:

Ѻ҆гнедохнове́нно показа́лсѧ є҆сѝ благово́нїе, страда́нїемъ ѡ҆бонева́еши на̑ша тезоиме́ннѡ сердца̀, мꙋ́ченикѡвъ ᲂу҆краше́нїе, и҆ вѣ́рныхъ ᲂу҆добре́нїе. тѣ́мже дне́сь всесвѧтꙋ́ю твою̀ па́мѧть пра́зднꙋюще, ѡ҆свѧща́емсѧ всѝ любо́вїю чтꙋ́щїи тѧ̀.

Сла́ва, и҆ ны́нѣ, гла́съ и҆ подо́бенъ то́йже:

Всечестны́й ли́къ премꙋ́дрыхъ а҆пⷭ҇лъ, собра́сѧ чꙋ́днѡ, погребстѝ сла́внѡ тѣ́ло твоѐ пречⷭ҇тое, бцⷣе всепѣ́таѧ: съ ни́миже воспѣ́ша и҆ а҆́гг҃лъ мно́жество, преставле́нїе твоѐ че́стнѡ хва́лѧще, є҆́же вѣ́рою пра́зднꙋемъ.

Пѣ́снь д҃. І҆рмо́съ:

Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Чꙋ́до бѧ́ше зрѣ́ти, нб҃о всѣ́хъ цр҃ѧ̀ ѡ҆дꙋшевле́нное, и҆спражднє́нїѧ преходѧ́щее земна̑ѧ, ꙗ҆́кѡ чꙋ́дна дѣла̀ твоѧ̑. сла́ва си́лѣ твое́й, гдⷭ҇и.

А҆́ще и҆ непости́жный сеѧ̀ пло́дъ, и҆́мже нб҃са̀ бы́ша, погребе́нїе прїѧ́тъ во́лею, ꙗ҆́кѡ ме́ртвъ: ка́кѡ погребе́нїѧ ѿве́ржетсѧ, неискꙋсобра́чнѡ ро́ждшаѧ;

Въ преставле́нїи твое́мъ, мт҃и бж҃їѧ, простра́ннѣйшее тѣ́ло твоѐ и҆ бг҃опрїѧ́тное, а҆́гг҃льскаѧ вѡ́инства свѧще́нными кри́лы, тре́петомъ и҆ ра́достїю покрыва́хꙋ.

И҆́нъ. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Сп҃са и҆ бг҃а и҆ гдⷭ҇а возсїѧ́вшаго ѿ дв҃ы, и҆сповѣ́дꙋѧ, сла́вне, посредѝ сꙋди́ща, мꙋчи́телей шата́нїе терпѣ́нїемъ смири́лъ є҆сѝ, и҆ многобо́жїе потреби́лъ є҆сѝ.

Ника́коже ᲂу҆страши́всѧ стрꙋ́жемь и҆ бїе́мь, доблемꙋ́дренне, а҆́гг҃лы ᲂу҆диви́лъ є҆сѝ зрѧ́щыѧ твоѐ терпѣ́нїе: и҆́мже врагѝ безплѡ́тныѧ погꙋби́въ, побѣдоно́сенъ мч҃никъ бы́лъ є҆сѝ.

Сы́й бжⷭ҇твенныѧ росы̀ и҆спо́лненъ, проше́лъ є҆сѝ доблемꙋ́дреннѡ ѻ҆́гненнꙋю пе́щь, зри́мь въ не́й, мѵ́рѡне мꙋ́дре, со а҆́гг҃лы ра́дꙋющсѧ, и҆ ника́коже, бл҃же́нне, ѡ҆палѧ́емь.

Бг҃оро́диченъ:

Ве́лїе и҆ стра́шное та́инство ржⷭ҇тва̀ твоегѡ̀ ᲂу҆дивлѧ́етъ всѧ́къ, чⷭ҇таѧ, ᲂу҆́мъ: ꙗ҆́кѡ бг҃ъ вочл҃вѣ́читисѧ и҆зъ тебє̀ бл҃гостїю и҆зво́ли, во спасе́нїе мі́ра и҆ назда́нїе.

Пѣ́снь є҃. І҆рмо́съ:

Оу҆жасо́шасѧ всѧ́чєскаѧ ѡ҆ честнѣ́мъ ᲂу҆спе́нїи твое́мъ: ты́ бо, неискꙋсобра́чнаѧ дв҃о, ѿ землѝ, преста́виласѧ є҆сѝ къ вѣ̑чнымъ ѻ҆би́телемъ, и҆ къ безконе́чнѣй жи́зни, всѣ̑мъ воспѣва́ющымъ тѧ̀ спасе́нїе подава́ющаѧ.

Да возгласѧ́тъ трꙋбы̑ бг҃осло́вѡвъ дне́сь: ѧ҆зы́къ же многовѣща́нный человѣ́ческїй ны́нѣ да восхва́литъ: да ѡ҆гласи́тъ же воздꙋ́хъ, безмѣ́рнымъ сїѧ́ѧ свѣ́томъ: а҆́гг҃ли да пою́тъ пречⷭ҇тыѧ дв҃ы ᲂу҆спе́нїе.

Сосꙋ́дъ подоба́ше и҆збра́нный, пѣ́нїемъ тѝ ве́сь ᲂу҆дивлѧ́емь, дв҃и́це, и҆схо́денъ, ве́сь ѡ҆сщ҃е́нъ бг҃ꙋ, всѣ̑мъ бг҃опрїѧ́тенъ, и҆ се́й и҆́стиннѡ ꙗ҆влѧ́емый, бцⷣе всепѣ́таѧ.

И҆́нъ. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Бг҃оза́рнаѧ и҆ свѣтоно́снаѧ твоѧ̀ па́мѧть, ст҃а́гѡ дх҃а си́лою въ ве́сь мі́ръ простира́ема, просвѣще́нїемъ благоче́стїѧ ѡ҆зарѧ́етъ сїю̀ чтꙋ́щыѧ, и҆ до́блєсти твоѧ̑ возвѣща́ющыѧ.

Ю҆́ношски гѡ́рькаѧ томлє́нїѧ претерпѣ́лъ є҆сѝ, ꙗ҆́кѡ безпло́тенъ, до́блїй мꙋ́чениче: ѡ҆дира́емѣ бо ко́жѣ терпѣ́лъ є҆сѝ, ꙗ҆́коже и҆но́мꙋ стра́ждꙋщꙋ, сла́вне, си́лою неви́димою ꙗ҆́вѣ ᲂу҆крѣплѧ́емь.

Мѵ́ро твоѧ̑ и҆ска́паше бѡлѣ́зни, мꙋ́чениче, благово́нно, всѧ́къ смра́дъ ѿгонѧ̀ безбо́жїѧ, хрⷭ҇то́вꙋ же ст҃ꙋ́ю цр҃ковь благово́нствꙋѧ при́снѡ, вѣ́рнѡ тѧ̀ и҃ любо́вїю ꙗ҆́вѣ бл҃жа́щꙋю.

Бг҃оро́диченъ:

Ѡ҆ на́съ и҆зъ тебє̀ воплоще́ннагѡ неизглаго́ланнымъ сло́вомъ, пречи́стаѧ, молѝ, бл҃гослове́ннаѧ, ꙗ҆́кѡ да и҆зба́вимсѧ ви́димыхъ всѣ́хъ и҆ неви́димыхъ вра̑гъ, всенепоро́чнаѧ, тѧ̀ бцⷣꙋ при́снѡ и҆сповѣ́дающїи.

Пѣ́снь ѕ҃. І҆рмо́съ:

Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

И҆зъ тебє̀ жи́знь возсїѧ̀, ключѝ дѣ́вства не рꙋши́вши: ка́кѡ ᲂу҆́бѡ пречи́стое и҆ живонача́льное твоѐ тѣ́ло и҆скꙋше́нїѧ сме́рти бы́сть прича́стно;

Жи́зни бы́вши хра́мъ, жи́знь присносꙋ́щнꙋю ᲂу҆лꙋчи́ла є҆сѝ: сме́ртїю бо къ животꙋ̀ преминꙋ́ла є҆сѝ, ꙗ҆́же жи́знь ро́ждши воѷпоста́снꙋю.

И҆́нъ. І҆рмо́съ:

Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.

Кропле́нїемъ твои́хъ крове́й свѧще́нныхъ, потопи́лъ є҆сѝ де́мѡнскїѧ полкѝ, во́ине до́блїй: и҆ вѣне́цъ носѧ̀, къ бг҃ꙋ восте́клъ є҆сѝ, побѣдоно́сецъ бы́въ и҆зрѧ́денъ.

Ви́дѣвше твоѐ лицѐ просвѣти́вшеесѧ мꙋчи́тели, бж҃е́ственными свѣтлостьмѝ, страстоте́рпче, ᲂу҆диви́шасѧ, не позна́вше же бг҃а, тмꙋ̀ прїѧ́ша, въ вѣ́чнꙋю мꙋ́кꙋ ѿсыла́еми.

Повелѣ́нїемъ сꙋро́вагѡ мꙋчи́телѧ, терпѣ́лъ є҆сѝ ко́жи ѿѧ́тїе, па́че є҆стества̀, достохва́льне, показа́въ є҆́же къ бг҃ꙋ чи́стое твоѐ жела́нїе, и҆ при́сное, всеблаже́нне, воззрѣ́нїе.

Бг҃оро́диченъ:

Зако́ны въ тебѣ̀ ѡ҆бновлѧ́ютсѧ, дв҃о, є҆стества̀: па́че бо є҆стества̀, є҆стество́мъ непостижи́маго, бг҃а є҆мманꙋ́ила пресла́внѡ родила̀ є҆сѝ, въ на́ше вѣ́рныхъ порожде́нїе.

Конда́къ пра́здника гла́съ, в҃:

Въ моли́твахъ неꙋсыпа́ющꙋю бцⷣꙋ, и҆ въ предста́тельствахъ непрело́жное ᲂу҆пова́нїе, гро́бъ и҆ ᲂу҆мерщвле́нїе не ᲂу҆держа́ста: ꙗ҆́коже бо живота̀ мт҃рь, къ животꙋ̀ преста́ви, во ᲂу҆тро́бꙋ всели́выйсѧ приснодѣ́вственнꙋю.

І҆́косъ:

Ѡ҆градѝ моѧ̑ помышлє́нїѧ хрⷭ҇тѐ мо́й, и҆́бо стѣ́нꙋ мі́ра воспѣ́ти дерза́ю, чи́стꙋю мт҃рь твою̀, на столпѣ̀ глагѡ́лъ ᲂу҆крѣпи́ мѧ, и҆ въ тѧ́жкихъ мы́слехъ застꙋпи́ мѧ: ты́ бо взыва́ющымъ, и҆ просѧ́щымъ вѣ́рою, молє́нїѧ и҆сполнѧ́еши. ты̀ мнѣ̀ ᲂу҆́бѡ да́рꙋй ѧ҆зы́къ доброрѣ́чивъ, и҆ по́мыслъ непосты́денъ: всѧ́кое бо даѧ́нїе сїѧ́нїѧ ѿ тебє̀ низпосыла́етсѧ, свѣтопода́телю, во ᲂу҆тро́бꙋ всели́выйсѧ приснодѣ́вственнꙋю.

Пѣ́снь з҃. І҆рмо́съ:

Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Ю҆́ношы и҆ дѣ́вы, дв҃ыѧ же и҆ бг҃ома́тере па́мѧть чтꙋ́ще, ста́рцы и҆ мона́си, ца́рїе и҆ сꙋдїи̑ по́йте: ѻ҆тє́цъ на́шихъ гдⷭ҇и и҆ бж҃е, бл҃гослове́нъ є҆сѝ.

Да вострꙋ́бѧтъ трꙋбо́ю дх҃о́вною го́ры нбⷭ҇ныѧ. да ра́дꙋютсѧ хо́лми, и҆ да и҆гра́ютъ бжⷭ҇твеннїи а҆пⷭ҇ли: цр҃и́ца къ сн҃ꙋ преставлѧ́етсѧ, съ ни́мъ ца́рствꙋющи.

Всесвѧще́нное преставле́нїе, бжⷭ҇твенныѧ твоеѧ̀ и҆ нетлѣ́нныѧ мт҃ре, премі́рныѧ вы́шнихъ си́лъ совокꙋпѝ чи́ны, весели́тисѧ съ сꙋ́щими на землѝ тебѣ̀ пою́щими: бж҃е, бл҃гослове́нъ є҆сѝ.

И҆́нъ. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.

Оу҆́мъ тво́й свѣ́тлѡ распалѧ́емь, мꙋ́дре, бжⷭ҇твеннымъ жела́нїемъ ра́довашесѧ и҆ веселѧ́шесѧ посредѝ пла́мене стоѧ́щꙋ тебѣ̀, ꙗ҆́коже трїе́мъ ю҆́ношамъ, съ ни́миже вѣ́рнѡ взыва́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.

Зрѧ́ще въ пла́мени стоѧ́ща тѧ̀, мꙋ́дре, посредѝ а҆́гг҃лъ, зра́комъ неизглаго́ланнымъ блиста́юща, зри́тели ᲂу҆диви́шасѧ, и҆ къ пѣ́нїю прело́жшесѧ, влⷣцѣ взыва́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆мо́мъ чи́стымъ стоѧ̀ со ᲂу҆́мными пое́ши а҆́гг҃лы, посредѝ пе́щи ра́дꙋѧсѧ, преблага́го гдⷭ҇а, ꙗ҆́коже ѡ҆бꙋзда́юща пла́мень, и҆ пою́ща тѧ̀ спаса́юща: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Вмѣсти́лище бж҃їе, и҆ пала́та красна̀, и҆ бжⷭ҇твенный престо́лъ, на не́мже сѣ́де, ᲂу҆гото́ва всѣ̑мъ сѣдѣ́нїе нбⷭ҇ное, ꙗ҆ви́ласѧ є҆сѝ, пречⷭ҇таѧ дв҃о. сегѡ̀ ра́ди взыва́емъ: бл҃гослове́ннаѧ, ꙗ҆́же бг҃а пло́тїю ро́ждшаѧ.

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Па́мѧть твою̀, чⷭ҇таѧ дв҃о, нача̑ла же и҆ вла̑сти и҆ си̑лы, а҆́гг҃ли, а҆рха́гг҃ли, прⷭ҇то́ли, гдⷭ҇ьства, херꙋві́ми сла́вѧтъ, и҆ стра́шнїи серафі́ми: человѣ́ческїй же ро́дъ пое́мъ и҆ превозно́симъ во всѧ̑ вѣ́ки.

И҆́же стра́ннѡ всели́выйсѧ, бцⷣе, въ чи́стое чре́во твоѐ воплоща́емь, се́й всесщ҃е́нный дх҃ъ тво́й прїе́мъ, ᲂу҆ себє̀ ᲂу҆поко́и: ꙗ҆́кѡ должни́къ сн҃ъ. тѣ́мже тѧ̀ пое́мъ, дв҃о, и҆ превозно́симъ во всѧ̑ вѣ́ки.

Ѽ вы́ше ᲂу҆ма̀ чꙋде́съ приснодв҃ы же и҆ бг҃ома́тере! во гро́бъ бо все́льшисѧ, показа̀ ра́й, є҆мꙋ́же предстоѧ́ще дне́сь, ра́дꙋющесѧ пое́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

И҆́нъ. І҆рмо́съ:

Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.

Непобѣди́ма зрѧ̀ безꙋ́мный мꙋчи́тель, тѧ̀ доблемꙋ́дренне, є҆гда̀ реме́нїе кроѧ́ще да́же до са́мыхъ косте́й, приложѝ ногтьмѝ терза́ти тѧ̀, ꙗ҆́звами нестерпи́мыми ᲂу҆ѧзви́всѧ неисцѣ́льнѡ.

Глаго́лъ бж҃їй съ нб҃сѐ, во ᲂу҆слы́шанїе всегѡ̀ наро́да, мꙋ́чениче, принесе́сѧ тебѣ̀, мѵ́рѡне, ко ѻ҆́нѣмъ тѧ̀ призыва́ющь неизречє́ннымъ поко́ищємъ, сла́вне, и҆ а҆́гг҃льскимъ кра̑снымъ ликостоѧ́нїємъ.

Стоѧ́лъ є҆сѝ ꙗ҆́коже данїи́лъ посредѝ ѕвѣре́й, стыдѧ́щихсѧ блаже́нныѧ стра́сти, и҆ подвигѡ́въ твои́хъ, преблаже́нне, неизче́тнагѡ вели́чества, живы́мъ же гла́сомъ твои́мъ застꙋпа́емыхъ.

Бг҃оро́диченъ:

Оу҆стрѣле́нъ стрѣло́ю врага̀, дꙋ́шꙋ до конца̀ ᲂу҆ѧзви́хъ, и҆ неисцѣ́льнѡ страждꙋ̀: ꙗ҆́же сп҃са хрⷭ҇та̀ неизрече́ннѡ ро́ждши, пренепоро́чнаѧ, и҆сцѣли́ мѧ и҆ спасѝ, ᲂу҆пова́нїе ненаде́ждныхъ.

Пѣ́снь ѳ҃. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное преставле́нїе бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.

Прїиди́те въ сїѡ́нъ, на бжⷭ҇твеннꙋю и҆ тꙋ́чнꙋю го́рꙋ жива́гѡ бг҃а, возра́дꙋемсѧ, бцⷣꙋ зрѧ́ще: къ ѕѣлѡ́ бо лꙋ́чшей и҆ бжⷭ҇твеннѣй сѣ́ни, ꙗ҆́кѡ мт҃рь, сїю̀ во ст҃а̑ѧ ст҃ы́хъ хрⷭ҇то́съ преста́ви.

Прїиди́те, вѣ́рнїи, ко гро́бꙋ пристꙋ́пимъ бж҃їѧ мт҃ре, и҆ ѡ҆б̾и́мемъ сердцы̀ и҆ ᲂу҆стна́ми, ѻ҆чесы̀ и҆ лице́мъ чи́стѡ прикаса́ющесѧ, и҆ почерпа́юще и҆сцѣле́нїй незави̑стныѧ да́ры ѿ и҆сто́чника приснотекꙋ́щагѡ.

Прїимѝ ѿ на́съ пѣ́снь и҆схо́днꙋю, мт҃и жива́гѡ бг҃а, и҆ свѣтоно́сною твое́ю и҆ бжⷭ҇твенною ѡ҆сѣнѝ бл҃года́тїю, во́инствꙋ побѣди́тєльнаѧ, хрⷭ҇толю̑бнымъ лю́демъ ми́ръ, ѡ҆ставле́нїе пою́щымъ, и҆ дꙋша́мъ спасе́нїе подаю́щи.

И҆́нъ. І҆рмо́съ:

Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

Да бꙋ́дꙋщꙋю сла́вꙋ и҆ несказа́ннꙋю добро́тꙋ, хрⷭ҇та̀ подвигополо́жника ви́дѣти сподо́бишисѧ до́блественнѣ, прекланѧ́еши вы́ю, и҆ прїе́млеши ме́чное ᲂу҆сѣче́нїе, и҆ ра́дости мꙋ́чєникъ и҆сполнѧ́еши бжⷭ҇твєнныѧ полкѝ.

Ꙗ҆́коже сладкодохнове́нное мѵ́ро, достохва́льне мѵ́рѡне, благово́нствꙋющее сердца̀ вѣ́рныхъ, достохва́льнаѧ па́мѧть твоѧ̀ жела́ющымъ наста̀, въ не́йже торжествꙋ́ющихъ на́съ благово́нїѧ бжⷭ҇твеннагѡ твои́ми моли́твами и҆спо́лни.

Твои́ми а҆ха́їа хва́литсѧ пелена́ми и҆ страда́нїи, до́блїй гдⷭ҇нь страда́льче: мно́жае же кра́ситсѧ кѵ́зїкъ, многострада́льное тѣ́ло держа̀, ꙗ҆́кѡ бога́тство и҆́стинное, и҆ и҆сто́чникъ и҆сцѣле́нїй, и҆ недꙋ́гѡвъ ѡ҆чисти́лище.

Ст҃ы́хъ всѣ́хъ, и҆збра́нный въ вы́шнихъ, ма́ти градѡ́въ сїѡ́нъ мы́сленный, пе́рвенецъ, ꙗ҆́коже пи́шетъ, кра́снаѧ цр҃ковь, ꙗ҆́кѡ мꙋ́ченика ѡ҆ на́съ молѧ́щасѧ, тѧ̀ и҆́мать мꙋ́ченикѡвъ ве́рхъ.

Бг҃оро́диченъ:

Гла́съ вопїе́мъ тѝ всѝ а҆́гг҃ловъ, дв҃о, пала́то, и҆ престо́ле бж҃їй, ра́дꙋйсѧ, є҆́юже сподо́бихомсѧ нбⷭ҇нагѡ ца́рствїѧ, дре́вле ѿринове́ннїи тлѣ́нїемъ, и҆ добро́тꙋ пе́рвꙋю несмы́сленнѡ погꙋби́вшїи.

Свѣти́ленъ пра́здника. Подо́бенъ: Оу҆ченикѡ́мъ зрѧ́щымъ:

Ѿ землѝ на нб҃са̀ преста́вльшисѧ, твоегѡ̀ наслѣ́дїѧ, чⷭ҇таѧ, не ѡ҆ста́ви: ро́ди хрⷭ҇тїа́нстїи ᲂу҆твердѝ, ꙗ҆зы́ки ᲂу҆кротѝ, и҆ проле́й ми́ръ въ концы̀ мі́ра.

Сла́ва, и҆ ны́нѣ, то́йже.

На стїхо́внѣ стїхи́ра, гла́съ ѕ҃. Подо́бенъ: Тридне́венъ:

Глаго́лѡмъ бжⷭ҇твеннагѡ гаврїи́ла послѣ́дꙋюще, ꙳ ра́дꙋйсѧ, тебѣ̀ зове́мъ, чⷭ҇таѧ. ꙳ ты̀ ᲂу҆́бѡ прест҃а́ѧ и҆ мт҃и гдⷭ҇нѧ, ꙳ къ семꙋ̀ преста́вльшисѧ, ꙳ помина́й ѡ҆ воспѣва́ющихъ тѧ̀.

Сті́хъ: Воскрⷭ҇нѝ, гдⷭ҇и, въ поко́й тво́й, ты̀, и҆ кївѡ́тъ ст҃ы́ни твоеѧ̀.

Неизмѣ́рнаѧ премꙋ́дрость бж҃їѧ, ꙳ хра́мъ себѣ̀ па́че ᲂу҆ма̀, бцⷣе, созда̀ ꙳ и҆зъ тебє̀ дх҃омъ ст҃ы́мъ: ꙳ и҆ ны́нѣ тѧ̀ къ невеще́ствєннымъ селе́нїємъ ꙳ преста́ви, всепѣ́таѧ.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Ра́бъ ны́нѣ прихождꙋ̀ къ тебѣ̀ мт҃ри всѣ́хъ бг҃а, ѿ всѧ́ческихъ и҆зба́витисѧ напа́стей молѧ́сѧ. но, ѽ бг҃ороди́тельнице, црⷭ҇твꙋющи съ сн҃омъ твои́мъ, хрⷭ҇тїа́нскїй ро́дъ сохранѧ́й.

Сла́ва, и҆ ны́нѣ, гла́съ г҃:

Прїиди́те, всѝ концы̀ земні́и, честно́е преставле́нїе бг҃ома́тере восхва́лимъ: въ рꙋ́цѣ бо сн҃а дꙋ́шꙋ непоро́чнꙋю положѝ. тѣ́мже ст҃ы́мъ ᲂу҆спе́нїемъ є҆ѧ̀ мі́ръ ѡ҆животвори́сѧ: во ѱалмѣ́хъ и҆ пѣ́нїихъ и҆ пѣ́снехъ дꙋхо́вныхъ, со безпло́тными и҆ а҆пⷭ҇лы пра́зднꙋетъ свѣ́тлѡ.

На лїтꙋргі́и блажє́нна пра́здника, пѣ́снь г҃, ѻ҆бою̀ канѡ́нѡвъ, со і҆рмосо́мъ на ѕ҃.

Чи́нъ погребе́нїѧ прест҃ы́ѧ бцⷣы. ПОХВАЛЫ̀,

и҆лѝ сщ҃е́нное послѣ́дованїе на ст҃о́е преставле́нїе

ПРЕСТ҃Ы́Ѧ ВЛⷣЧЦЫ НА́ШЕѦ БЦⷣЫ И҆ ПРИСНОДВ҃Ы МР҃І́И,

пое́мое въ седьмы́й на́десѧть де́нь мѣ́сѧца а҆́ѵгꙋста, каждого́днѡ въ ски́тѣ геѳсима́нїи, а҆ въ ла́ѵрѣ ѿправлѧ́емое пѧтна́дцатагѡ а҆́ѵгꙋста.

На вели́цѣй вече́рни стїхосло́вимъ, Бл҃же́нъ мꙋ́жъ, а҃ а҆нтїфѡ́нъ.

На Гдⷭ҇и воззва́хъ, ста́вимъ стїхѡ́въ и҃: и҆ пое́мъ стїхи̑ры и҆з̾ мине́и, гла́съ а҃.

Ѽ ди́вное чꙋ́до! и҆сто́чникъ жи́зни во гро́бѣ полага́етсѧ, и҆ лѣ́ствица къ нб҃сѝ гро́бъ быва́етъ: весели́сѧ геѳсима́нїе, бг҃оро́диченъ ст҃ы́й до́ме. возопїе́мъ вѣ́рнїи, гаврїи́ла и҆мꙋ́ще чинонача́льника: бл҃года́тнаѧ ра́дꙋйсѧ, съ тобо́ю гдⷭ҇ь, подаѧ́й мі́рови тобо́ю ве́лїю млⷭ҇ть.

Ди̑вны твоѧ̑ та̑йны бцⷣе, вы́шнѧгѡ прⷭ҇то́лъ ꙗ҆ви́ласѧ є҆сѝ влⷣчце, и҆ ѿ землѝ къ нб҃сѝ преста́виласѧ є҆сѝ дне́сь: сла́ва твоѧ̀ бг҃олѣ́пнаѧ, бг҃оподо́бными сїѧ́ющи чꙋдесы̀, дѣ́вы съ мт҃рїю цр҃е́вою на высотꙋ̀ вознеси́тесѧ. Бл҃года́тнаѧ ра́дꙋйсѧ, съ тобо́ю гдⷭ҇ь, подаѧ́й мі́рови тобо́ю ве́лїю млⷭ҇ть.

Твоѐ сла́вѧтъ ᲂу҆спе́нїе, вла́сти и҆ прⷭ҇то́ли, нача́ла и҆ гдⷭ҇ства, си́лы и҆ херꙋві́мы, и҆ стра́шнїи серафі́мы: ра́дꙋютсѧ земноро́днїи, ѡ҆ бж҃е́ственнѣй твое́й сла́вѣ красѧ́щесѧ. припа́даютъ ца́рїе, со а҆рха́гг҃лы и҆ а҆́гг҃лы, и҆ воспѣва́ютъ: бл҃года́тнаѧ ра́дꙋйсѧ, съ тобо́ю гдⷭ҇ь, подаѧ́й мі́рови тобо́ю ве́лїю млⷭ҇ть.

И҆́ны стїхи̑ры и҆з̾ і҆ерꙋсали́мскагѡ послѣ́дованїѧ, гла́съ ѕ҃:

Дне́шнїй де́нь та́йнѡ вели́кїй ѱалмопѣ́вецъ проѡбразова́ше, глаго́лѧ: воскрⷭ҇нѝ гдⷭ҇и въ поко́й тво́й, ты̀ и҆ кївѡ́тъ ст҃ы́ни твоеѧ̀. и҆ па́ки: предста̀, глаго́лѧ, цр҃и́ца ѡ҆деснꙋ́ю тебѐ, рѧ́сны златы́ми ѡ҆дѣ́ѧна преиспещре́нна. Сїѧ́ бо є҆́сть блгⷭ҇ве́ннаѧ сꙋббѡ́та, се́й є҆́сть ᲂу҆покое́нїѧ бж҃е́ственный де́нь, въ ѻ҆́ньже почѝ ѿ живота̀ мт҃рь сꙋ́щи живота̀, смотрѣ́нїемъ є҆́же на сме́рть, пло́тїю сꙋббѡ́тствовавшаѧ и҆ преста́вльшаѧсѧ, и҆ на нб҃са̀ возше́дшаѧ, си́лою и҆́же и҆з̾ неѧ̀ вопло́щшагѡсѧ хрⷭ҇та̀ бг҃а, и҆ съ ни́мъ во вѣ́ки вѣкѡ́въ вѣ́чнꙋющаѧ, и҆ да́рꙋющаѧ на́мъ живо́тъ вѣ́чный, съ любо́вїю чтꙋ́щымъ ст҃о́е є҆ѧ̀ ᲂу҆спе́нїе.

Гла́съ в҃:

Подо́бенъ: Є҆гда̀ ѿ дре́ва тѧ̀ ме́ртва:

Є҆гда̀ ѿ мі́ра, жи́знь сꙋ́щи, ро́ждшаѧ жи́знь всѧ́ческихъ, сн҃а бж҃їѧ во пло́ти, взе́млема была̀ є҆сѝ восходѧ́щи во вхо́ды бж҃е́ственныѧ, нбⷭ҇ныѧ, чтⷭ҇аѧ, тогда̀ чꙋ́днѡ сбы́стсѧ ¹³, є҆́же возгласѝ дх҃ъ ст҃ы́й: кто̀ сїѧ̀ ны́нѣ восходѧ́щаѧ ѿ пꙋсты́ни; всѧ́ же со стра́хомъ вопїѧ́хꙋ: сла́ва восхожде́нїю твоемꙋ̀, любобл҃га́ѧ.

Є҆гда̀ во гро́бѣ, марїа́мъ, въ геѳсима́нїи положи́ласѧ є҆сѝ пло́тїю, є҆стества̀ ѡ҆животвори́тельнице, тогда̀ всѧ̀ тва́рь, зрѧ́щи тѧ̀, ᲂу҆жасе́сѧ: творе́цъ же дх҃ъ тво́й, рꙋ́цѣ распросте́ръ, бл҃года́тнѣ прїѧ́тъ, ꙗ҆́кѡ должни́къ сн҃ъ. є҆́же безпло́тныхъ чи́ни зрѧ́ще, со стра́хомъ вопїѧ́хꙋ: сла́ва восхожде́нїю твоемꙋ̀, любобл҃га́ѧ.

Є҆гда̀ трїѐ сщ҃е́нницы, а҆реопагі́тъ ѻ҆́ный и҆ і҆ероѳе́й съ дїонѵ́сїемъ, твоѐ бж҃е́ственное ᲂу҆ви́дѣша всенетлѣ́ннаѧ ᲂу҆спе́нїе, тогда̀ сле́зы точа́ще глаго́лютъ си́це: ка́кѡ стерпи́мъ страда́нїе въ мі́рѣ; въ тебѣ́ бо, ѽ дв҃аѧ, сн҃а твоего̀ мнѣ́хомъ зрѣ́ти, и҆ ᲂу҆тѣша́хомсѧ.

Гла́съ є҃:

Тебѐ ѡ҆дѣ́ющагосѧ свѣ́томъ ꙗ҆́кѡ ри́зою, сн҃а бж҃їѧ ро́ждшꙋю, ли́къ ᲂу҆ч҃ни̑къ є҆гѡ̀ ви́дѣвъ ме́ртвꙋ, во гро́бѣ мра́ка и҆спо́лненномъ просте́ртꙋ, бл҃госе́рдный пла́чь воспрїи́мъ, рыда́ѧ глаго́лаше: ᲂу҆вы̀ мнѣ̀, сладча́йшаѧ марїа́мъ, ю҆́же въ ма́лѣ и҆мѣ́хъ ᲂу҆тѣше́нїе, и҆ ви́дѧ тебѐ, мнѣ́хъ ᲂу҆чи́телѧ моего̀ зрѣ́ти: но сѐ, ны́нѣ ви́ждꙋ тѧ̀ по зако́нꙋ є҆стества̀ под̾е́мшꙋ сме́рть. Ѽ, ка́кѡ тѧ̀ погребꙋ̀ дв҃о, и҆лѝ ка́кѡ плащани́цами ѡ҆бвїю̀; кі́има же рꙋка́ма прикоснꙋ́сѧ нетлѣ́нномꙋ твоемꙋ̀ тѣ́лꙋ; и҆лѝ кі́ѧ пѣ̑сни воспою̀, твоемꙋ̀ и҆схо́дꙋ достѡ́йныѧ; ка́кѡ же стерплю̀, гпⷭ҇жѐ, твоѐ ско́рбное мѝ ѿше́ствїе; и҆лѝ ка́кѡ безтрꙋ́днѡ понесꙋ̀ всетѧ́жкое сиротство̀; недоꙋмѣва́ю, бл҃же́ннаѧ бцⷣе марі́е, и҆ болѣ́зненнымъ се́рдцемъ соплета́ю пѣснопѣ́нїѧ, и҆ велича́ю тѧ̀ влⷣчце: пѣсносло́влю зача́тїе твоѐ, почита́ю твоѐ бжⷭ҇твенное ржⷭ҇тво̀, чтꙋ̀ вхожде́нїе твоѐ дв҃о. ᲂу҆блажа́ю же ᲂу҆спе́нїе твоѐ, и҆ всест҃о́е погребе́нїе твоѐ со преставле́нїемъ, зовы́й: гдⷭ҇и, сла́ва тебѣ̀.

Сла́ва, и҆ ны́нѣ, гла́съ а҃:

Бг҃онача́льнымъ манове́нїемъ, ѿвсю́дꙋ бг҃оно́снїи а҆пⷭ҇ли ѻ҆́блаки высо́цѣ взима́еми, доше́дше пречⷭ҇тагѡ и҆ живонача́льнагѡ твоегѡ̀ тѣ́ла, любе́знѡ лобыза́хꙋ. Превы́шнїѧ же нбⷭ҇ныѧ си́лы, съ свои́мъ влⷣкою прише́дше, бг҃опрїѧ́тное и҆ пречⷭ҇тое тѣ́ло предсыла́юще, ᲂу҆́жасомъ ѡ҆держи́ми, прекра́снѡ же пред̾идѧ́хꙋ, и҆ неви́димѡ вопїѧ́хꙋ превы́шнимъ чинонача́лїємъ: сѐ всецр҃и́ца бг҃оѻтрокови́ца прїи́де, возми́те врата̀, и҆ сїю̀ премі́рнѡ под̾ими́те, прⷭ҇носꙋ́щагѡ мт҃рь свѣ́та. Тоѧ́ бо ра́ди всеро́дное чл҃вѣ́кѡмъ спасе́нїе бы́сть: на ню́же взира́ти не мо́жемъ, и҆ то́й досто́йнꙋю че́сть возда́ти не мо́щно: тоѧ́ бо преизѧ́щно прихо́дитъ всѧ́къ ᲂу҆́мъ. тѣ́мже пречⷭ҇таѧ бцⷣе, при́снѡ съ живоно́снымъ цр҃е́мъ, и҆ ржⷭ҇тво́мъ живꙋ́щи, моли́сѧ вы́нꙋ сохрани́ти, и҆ спастѝ ѿ всѧ́кагѡ прило́га проти́внагѡ, но́выѧ лю́ди твоѧ̑: твое́ бо предста́тельство стѧжа́хомъ, во вѣ́ки свѣтоѧвле́ннѡ блажа́ще.

Вхо́дъ. Прокі́менъ, гла́съ в҃: Воскрⷭ҇нѝ гдⷭ҇и въ поко́й тво́й, ты̀ и҆ кївѡ́тъ ст҃ы́ни твоеѧ̀. Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Чтє́нїѧ трѝ. Бытїѧ̀ чте́нїе.

И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо сл҃нце. И҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й, гдⷭ҇ь же ᲂу҆твержда́шесѧ на не́й. И҆ речѐ: а҆́зъ бг҃ъ а҆враа́мовъ ѻ҆ц҃а̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀ и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ́на земна́ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̀ врата̀ нбⷭ҇наѧ.

Прⷪ҇ро́чества і҆езекі́илева чте́нїе.

Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ: и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворе́на. И҆ речѐ гдⷭ҇ь ко мнѣ̀: врата̀ сїѧ̀ затворе́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворе́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇нь.

При́тчей чте́нїе.

Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвеннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̀, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете. И҆ взыщи́те ра́зꙋма, да поживетѐ: и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇нь, и҆ совѣ́тъ ст҃ы́хъ, ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѡ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ́та живота̀.

На лїті́и стїхи̑ры самогла́сны, гла́съ а҃.

Подоба́ше самови́дцємъ сло́ва и҆ слꙋга́мъ, и҆ є҆́же по пло́ти мт҃ре є҆гѡ̀ ᲂу҆спе́нїе ви́дѣти, коне́чное є҆ли́ко на не́й та́инство: ꙗ҆́кѡ да не то́кмѡ є҆́же ѿ землѝ сп҃сово восхожде́нїе ᲂу҆́зрѧтъ: но и҆ ро́ждшїѧ є҆гѡ̀ преставле́нїю свидѣ́тельствꙋютъ. тѣ́мже ѿвсю́дꙋ бж҃е́ственною си́лою собра́вшесѧ, сїѡ́на достиго́ша, и҆ на не́бо и҆дꙋ́щꙋю предсыла́хꙋ, вы́шшꙋю херꙋві̑мъ: є҆́йже и҆ мы̀ съ ни́ми покланѧ́емсѧ, ꙗ҆́кѡ молѧ́щейсѧ ѡ҆ дꙋша́хъ на́шихъ.

Гла́съ в҃. А҆нато́лїево.

Ꙗ҆́же нб҃е́съ вы́шшаѧ сꙋ́щи, и҆ херꙋві̑мъ славнѣ́йшаѧ, и҆ всеѧ̀ тва́ри чⷭ҇тнѣ́йша, ꙗ҆́же премно́гїѧ ра́ди чистоты̀, присносꙋ́щагѡ сꙋщества̀ прїѧ́телище бы́вши, въ сн҃о́внѣ рꙋ́цѣ дне́сь всест҃ꙋ́ю предае́тъ дꙋ́шꙋ: и҆ съ не́ю и҆сполнѧ́ютсѧ всѧ́чєскаѧ ра́дости, и҆ на́мъ да́рꙋетъ ве́лїю млⷭ҇ть.

І҆ѡа́нново.

Всенепоро́чнаѧ невѣ́ста, и҆ мт҃и бл҃говоле́нїѧ ѻ҆́ч҃а, ꙗ҆́же бг҃ꙋ пронарече́ннаѧ во своѐ є҆мꙋ̀ жили́ще, несли́тнагѡ соедине́нїѧ, дне́сь пречⷭ҇тꙋю дꙋ́шꙋ творцꙋ̀ и҆ бг҃ꙋ предае́тъ: ю҆́же безпло́тныхъ си́лы бг҃олѣ́пнѡ под̾е́млютъ, и҆ къ животꙋ̀ преставлѧ́етсѧ, сꙋ́щаѧ мт҃и живота̀: свѣща̀ непристꙋ́пнагѡ свѣ́та, спасе́нїе вѣ́рныхъ, и҆ ᲂу҆пова́нїе дꙋ́шъ на́шихъ.

Гла́съ г҃. Ге́рманово.

Прїиди́те всѝ концы̀ земні́и, чтⷭ҇но́е преставле́нїе бг҃ома́тере восхва́лимъ: въ рꙋ́цѣ бо сн҃а дꙋ́шꙋ непоро́чнꙋю положѝ. тѣ́мже ст҃ы́мъ ᲂу҆спе́нїемъ є҆ѧ̀ мі́ръ ѡ҆животвори́сѧ: и҆ ны́нѣ во ѱалмѣ́хъ и҆ пѣ́нїихъ и҆ пѣ́снехъ дх҃о́вныхъ, со безпло́тными и҆ а҆пⷭ҇лы пра́зднꙋетъ свѣ́тлѡ.

Сла́ва, гла́съ є҃. Ѳеофа́ново.

Прїиди́те празднолю́бныхъ собо́ръ, прїиди́те, и҆ ли́къ соста́вимъ: прїиди́те вѣнча́емъ пѣ́снми цр҃ковь, ᲂу҆покое́нїемъ ковче́га бж҃їѧ. Дне́сь бо нб҃о простира́етъ нѣ́дра, прїе́млѧ ро́ждшꙋю всѣ́ми невмѣсти́маго: и҆ землѧ̀ и҆сто́чникъ жи́зни, ѿдаю́щи бл҃гослове́нїе, ᲂу҆краша́етсѧ бл҃голѣ́пїемъ. А҆́гг҃ли ли́къ со а҆пⷭ҇лы составлѧ́ютъ, ᲂу҆жа́снѡ взира́юще, ѿ живота̀ въ живо́тъ преставлѧ́емꙋ, ро́ждшꙋю нача́льника жи́зни. Всѝ поклони́мсѧ є҆́й, молѧ́щесѧ: сро́дна присвое́нїѧ не забꙋ́ди, влⷣчце, вѣ́рнѡ пра́зднꙋющихъ всест҃о́е твоѐ ᲂу҆спе́нїе.

И҆ ны́нѣ, гла́съ то́йже.

Воспо́йте лю́дїе, мт҃ри бг҃а на́шегѡ, воспо́йте: дне́сь бо всесвѣ́тлꙋю дꙋ́шꙋ свою̀ въ пречⷭ҇тыѧ дла́ни, и҆́же и҆з̾ неѧ̀ вопло́щшагѡсѧ без̾ сѣ́мене предае́тъ: є҆го́же и҆ мо́литъ непреста́ннѡ, дарова́ти вселе́ннѣй ми́ръ, и҆ ве́лїю млⷭ҇ть.

На стїхо́внѣ стїхи̑ры самогла́сны, гла́съ д҃.

Прїиди́те воспое́мъ лю́дїе, прест҃ꙋ́ю дв҃ꙋ чи́стꙋю, и҆з̾ неѧ́же неизрече́ннѡ про́йде, вопло́щсѧ сло́во ѻ҆́ч҃ее, зовꙋ́ще и҆ глаго́люще, бл҃гослове́нна ты̀ въ жена́хъ, бл҃же́ннѡ чре́во вмѣсти́вшее хрⷭ҇та̀. тогѡ̀ ст҃ы̑мъ рꙋка́мъ дꙋ́шꙋ преда́вши, моли́сѧ пречⷭ҇таѧ, спасти́сѧ дꙋша́мъ на́шымъ.

Сті́хъ: Воскрⷭ҇нѝ гдⷭ҇и въ поко́й тво́й, ты̀ и҆ кївѡ́тъ ст҃ы́ни твоеѧ̀.

Дв҃дскꙋю пѣ́снь дне́сь лю́дїе воспое́мъ хрⷭ҇тꙋ̀ бг҃ꙋ: приведꙋ́тсѧ, речѐ, цр҃ю̀ дѣ́вы въ слѣ́дъ є҆ѧ̀, и҆ и҆́скрєннѧѧ є҆ѧ̀ приведꙋ́тсѧ въ весе́лїи и҆ ра́дованїи. и҆́бо ѿ сѣ́мене дв҃дова, є҆ѧ́же ра́ди мы̀ ѡ҆божи́хомсѧ, въ рꙋ́цѣ своегѡ̀ сн҃а и҆ влⷣки, сла́внѡ и҆ па́че сло́ва прелага́етсѧ. ю҆́же ꙗ҆́кѡ мт҃рь бж҃їю воспѣва́юще, вопїе́мъ и҆ глаго́лемъ: спасѝ на́съ, и҆сповѣ́дающихъ тѧ̀ бцⷣꙋ, ѿ всѧ́кагѡ ѡ҆бстоѧ́нїѧ, и҆ и҆зба́ви ѿ бѣ́дъ дꙋ́шы на́шѧ.

Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.

Всечⷭ҇тно́е твоѐ ᲂу҆спе́нїе, прест҃а́ѧ дв҃о чтⷭ҇аѧ, а҆́гг҃лъ мно́жество на нб҃сѝ, и҆ чл҃вѣ́ческїй ро́дъ на землѝ ᲂу҆блажа́етъ, ꙗ҆́кѡ мт҃и была̀ є҆сѝ творца̀ всѣ́хъ хрⷭ҇та̀ бг҃а: того̀ молѧ́щи не преста́й ѡ҆ на́съ, мо́лимсѧ, и҆̀же на тѧ̀ съ бг҃омъ ᲂу҆пова́нїе поло́жшихъ, бцⷣе всепѣ́таѧ и҆ неискꙋсобра́чнаѧ.

Сла́ва, и҆ ны́нѣ, гла́съ то́йже.

Є҆гда̀ и҆зшла̀ є҆сѝ бцⷣе дв҃о, ко и҆з̾ тебѐ ро́ждшемꙋсѧ неизрече́ннѡ, бѧ́ше і҆а́кѡвъ бра́тъ бж҃їй, и҆ пе́рвый сщ҃еннонача́льникъ, пе́тръ же чтⷭ҇нѣ́йшїй верхо́вникъ, бг҃осло́вѡвъ нача́льникъ, и҆ ве́сь бж҃е́ственный а҆пⷭ҇льскїй ли́къ, ꙗ҆вле́ннымъ бг҃осло́вїемъ пѣсносло́вѧще бж҃е́ственное и҆ стра́шное хрⷭ҇та̀ бг҃а смотре́нїѧ та́инство, и҆ живонача́льное и҆ бг҃опрїѧ́тное твоѐ тѣ́ло погре́бше, ра́довахꙋсѧ всепѣ́таѧ. Превы́ше же прест҃ы́ѧ и҆ старѣ́йшыѧ а҆́гг҃льскїѧ си́лы, чꙋдесѝ дивѧ́щесѧ, прини́кше дрꙋ́гъ ко дрꙋ́гꙋ глаго́лахꙋ: возми́те ва́ша врата̀, и҆ воспрїими́те ро́ждшꙋю нб҃сѐ и҆ землѝ творца̀: славословле́нми же воспое́мъ чтⷭ҇но́е и҆ ст҃о́е тѣ́ло, вмѣсти́вшее на́ми неви́димаго и҆ гдⷭ҇а. тѣ́мже и҆ мы̀, па́мѧть твою̀ пра́зднꙋюще, вопїе́мъ тѝ препѣ́таѧ: хрⷭ҇тїа́нскїй ро́гъ вознесѝ, и҆ спасѝ дꙋ́ши на́шѧ.

На бл҃гослове́нїи хлѣ́бѡвъ, тропа́рь, гла́съ д҃:

Въ ржⷭ҇твѣ̀ дѣ́вство сохрани́ла є҆сѝ, во ᲂу҆спе́нїи мі́ра не ѡ҆ста́вила є҆сѝ бцⷣе: преста́виласѧ є҆сѝ къ животꙋ̀, мт҃и сꙋ́щи живота̀, и҆ мл҃твами твои́ми и҆збавлѧ́еши ѿ сме́рти дꙋ́шы на́шѧ. [Три́жды.]

И҆ быва́етъ бл҃гослове́нїе хлѣ́бѡвъ, и҆ раздробле́нїе, и҆ а҆́ще и҆зво́литъ настоѧ́тель, чрез̾ дїа́конѡвъ дае́тъ все́й цр҃кви.

По возгла́сѣ: Бл҃гослове́нїе гдⷭ҇не на ва́съ, быва́етъ чте́нїе ѡ҆ ᲂу҆спе́нїи прест҃ы́ѧ влⷣчцы на́шеѧ бцⷣы, и҆ а҆́ще и҆зво́литъ настоѧ́тель, съ нѣ́кїимъ сокраще́нїемъ, да въ мѣ́рꙋ бꙋ́детъ слꙋ́жба.

По шестоѱа́лмїи, и҆ по вели́цѣй є҆ктенїѝ, поставлѧ́етсѧ посредѣ̀ цр҃кве ᲂу҆краше́нный а҆нало́гїй, и҆ пѣва́емꙋ: бг҃ъ гдⷭ҇ь, и҆ ꙗ҆ви́сѧ на́мъ: и҆схо́дитъ ѿ ѻ҆лтарѧ̀ предстоѧ́тель, несѧ̀ ѡ҆́бразъ ᲂу҆спе́нїѧ прест҃ы́ѧ бцⷣы: послѣ́дꙋютъ же є҆мꙋ̀ сщ҃е́нницы въ ѡ҆блаче́нїи, и҆ полага́етсѧ ѡ҆́бразъ на а҆нало́гїй, и҆ раздае́тъ предстоѧ́тель свѣщы̀ бра́тїи, и҆ бл҃гословлѧ́етъ дїа́конѡмъ и҆ пономарє́мъ раздаѧ́ти свѣщы̀ та́кожде и҆ наро́дꙋ. И҆ пою́тсѧ сі́и тропарѝ и҆з̾ і҆ерꙋсали́мскагѡ послѣ́дованїѧ, кадѧ́щꙋ предстоѧ́телю ст҃ы̑мъ, и҆ ѡ҆́бразꙋ.

Гла́съ в҃. Подо́бенъ: Бл҃гоѡбра́зный і҆ѡ́сифъ.

Бл҃гоѡбра́зныхъ ᲂу҆чени̑къ ли́къ ны́нѣ бж҃е́ственный, ѽ чтⷭ҇на́ѧ, нескве́рное тѣ́ло твоѐ слеза́ми чи́стыми ѡ҆мочи́въ, ꙗ҆́кѡ а҆рѡма́ты, во гро́бѣ че́стнѣ погреба́ѧ положѝ: но тридне́внѡ преста́виласѧ є҆сѝ, влⷣчце, подаю́щи мі́рови бж҃е́ственнꙋю млⷭ҇ть.

Сла́ва:

Є҆гда̀ снизшла̀ є҆сѝ къ сме́рти, живота̀ мт҃и безсме́ртнаѧ, тогда̀ а҆́дъ ᲂу҆диви́сѧ и҆ ᲂу҆жасе́сѧ стра́шнѡ: є҆гда́ же ᲂу҆зрѣ́ласѧ є҆сѝ преста́вльшисѧ на нб҃са̀, марїа́мъ, ѿ гро́ба, всѧ̑ си́лы нбⷭ҇ныѧ взыва́хꙋ: живоно́снаѧ мт҃и живота̀ на́шегѡ, сла́ва тебѣ̀.

И҆ ны́нѣ:

Сщ҃є́ннымъ ᲂу҆ч҃никѡ́мъ, въ геѳсима́нїю тѣ́ло мт҃ре бж҃їѧ носѧ́щымъ, пѣ́снь, ю҆́же возглаша́ю, прили́чна є҆́сть. сегѡ̀ ра́ди хрⷭ҇та̀ мт҃ри вои́стиннꙋ, є҆ди́нѣй бг҃оѻтрокови́цѣ возопі́йте: воста́ни, ѽ влⷣчце, подаю́щи всѣ̑мъ ве́лїю млⷭ҇ть.

Возглаша́етъ канѡна́рхъ, на гла́съ є҃:

Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ.

И҆ чте́тъ а҃ сті́хъ з҃ї-ѧ каѳі́смы: Бл҃же́ни непоро́чнїи:

Статїѧ̀ пе́рваѧ.

Бл҃же́ни непоро́чнїи въ пꙋ́ть, ходѧ́щїи въ зако́нѣ гдⷭ҇ни.

Жи́знь во гро́бѣ положи́лсѧ є҆сѝ хрⷭ҇тѐ, мт҃рь живота̀ полага́етсѧ: стра́нное видѣ́нїе а҆́гг҃лѡмъ и҆ человѣ́кѡмъ.

Бл҃же́ни и҆спыта́ющїи свидѣ̑нїѧ є҆гѡ̀, всѣ́мъ се́рдцемъ взы́щꙋтъ є҆го̀.

Велича́емъ тѧ̀, бцⷣе чтⷭ҇аѧ, и҆ чти́мъ ст҃о́е твоѐ ᲂу҆спе́нїе, и҆ покланѧ́емсѧ честно́мꙋ гро́бꙋ твоемꙋ̀.

Не дѣ́лающїи бо беззако́нїѧ, въ пꙋте́хъ є҆гѡ̀ ходи́ша.

Марїа́мъ, ка́кѡ ᲂу҆мира́еши, жи́знь вѣ́рныхъ; ка́кѡ же гро́бъ вмѣстѝ твоѐ тѣ́ло, вмѣсти́вшее невмѣсти́маго всѣ́ми;

Ты̀ заповѣ́далъ є҆сѝ за́пѡвѣди твоѧ̑ сохрани́ти ѕѣлѡ̀.

Нб҃съ цр҃ѧ̀ бг҃а ро́ждшаѧ, въ нбⷭ҇ное црⷭ҇тво прелага́ешисѧ чтⷭ҇аѧ, ца́рски.

Дабы̀ и҆спра́вилисѧ пꙋтїѐ моѝ, сохрани́ти ѡ҆правда̑нїѧ твоѧ̑.

Ѿ землѝ преста́виласѧ є҆сѝ, и҆ ѿ землѝ ника́коже ѿлꙋчи́ласѧ є҆сѝ, всест҃а́ѧ бцⷣе, и҆збавлѧ́ѧ ве́сь мі́ръ ѿ бѣ́дъ.

Тогда̀ не постыжꙋ́сѧ, внегда̀ призрѣ́ти мѝ на всѧ̑ за́пѡвѣди твоѧ̑.

Всѧ̀ землѧ̀ сла́витъ погребе́нїе твоѐ, хрⷭ҇тѐ, и҆ пое́тъ, влⷣко, погреба̑льнаѧ пречⷭ҇тыѧ твоеѧ̀ мт҃ри всебл҃гоговѣ́йнѡ.

И҆сповѣ́мсѧ тебѣ̀ въ пра́вости се́рдца, внегда̀ наꙋчи́тимисѧ сꙋдьба́мъ пра́вды твоеѧ̀.

А҆́гг҃ли, зрѧ́ще тѧ̀ чтⷭ҇аѧ, просте́ртꙋ ме́ртвꙋ, живо́тъ мі́рꙋ возсїѧ́вшꙋю, соꙋжаса́ющесѧ дивлѧ́хꙋсѧ. (с. 726)

Ѡ҆правда̑нїѧ твоѧ̑ сохраню̀, не ѡ҆ста́ви менѐ до ѕѣла̀.

Па́ки по́сланъ бы́сть гаврїи́лъ ѿ бг҃а, и҆ твоѐ бл҃говѣствꙋ́етъ и҆зше́ствїе, пренб҃е́снаѧ, нетлѣ́ннаѧ, чтⷭ҇аѧ.

Въ чесо́мъ и҆спра́витъ ю҆нѣ́йшїй пꙋ́ть сво́й; внегда̀ сохрани́ти словеса̀ твоѧ̑.

Въ черто́гъ бж҃е́ственный, тебѐ невѣ́стꙋ бж҃їю жени́хъ призыва́етъ, бг҃оневѣ́сто, весели́тисѧ при́снѡ бг҃олѣ́пнѡ.

Всѣ́мъ се́рдцемъ мои́мъ взыска́хъ тебѐ, не ѿри́ни менѐ ѿ за́повѣдей твои́хъ.

До прⷭ҇то́ла бж҃їѧ, и҆дѣ́же свѣ́тъ трⷪ҇цы стра́шный и҆ непристꙋ́пный, дости́гла є҆сѝ, и҆ почи́ла є҆сѝ, дв҃о, и҆́стиннѡ.

Въ се́рдцѣ мое́мъ скры́хъ словеса̀ твоѧ̑, ꙗ҆́кѡ да не согрѣшꙋ̀ тебѣ̀.

Преста́вльшисѧ ѿ землѝ, бг҃ꙋ предста́ла є҆сѝ, бцⷣе, ѿ бг҃а ника́коже ѿлꙋче́на бы́вши, николи́же ѿ ᲂу҆тро́бы мт҃ре.

Бл҃гослове́нъ є҆сѝ, гдⷭ҇и, наꙋчи́ мѧ ѡ҆правда́нїємъ твои̑мъ.

Чтⷭ҇но́е твоѐ тѣ́ло, дв҃о, тлѣ́нїѧ и҆ во гро́бѣ не ᲂу҆вѣ́дѣ: но съ тѣ́ломъ прешла̀ є҆сѝ ѿ землѝ къ нб҃сѝ.

Оу҆стна́ма мои́ма возвѣсти́хъ всѧ̑ сꙋдьбы̀ ᲂу҆́стъ твои́хъ.

Всест҃о́е твоѐ лицѐ, пречⷭ҇таѧ, и҆ ме́ртвое, ꙗ҆́кѡ ра́й ꙗ҆влѧ́шесѧ, бл҃года́тїю и҆ жи́знїю ды́шꙋщее взира́ющымъ.

На пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ.

Ѿ на́съ ча́дъ твои́хъ, мт҃и, любо́вь на́шꙋ и҆ пѣ́снь и҆схо́днꙋю прїимѝ, приноси́мꙋю и҆з̾ глꙋбины̀ дꙋшѝ.

Въ за́повѣдехъ твои́хъ поглꙋмлю́сѧ, и҆ ᲂу҆разꙋмѣ́ю пꙋтѝ твоѧ̑.

Ѿве́рзи, мт҃и, чтⷭ҇ны̑ѧ твоѝ ѻ҆́чи, и҆ на ча́дъ со́бранныхъ при́зри, твоѐ ᲂу҆спе́нїе сла́вѧщихъ че́стнѡ.

Во ѡ҆правда́нїихъ твои́хъ поꙋчꙋ́сѧ, не забꙋ́дꙋ слове́съ твои́хъ.

Ѿве́рзи ᲂу҆ста̀, и҆ да́ждь на́мъ бл҃гослове́нїе, прест҃а́ѧ бцⷣе, преста́вльшаѧсѧ ѿ на́съ коне́чнѣ. (с. 728)

Возда́ждь рабꙋ̀ твоемꙋ̀, живи́ мѧ, и҆ сохраню̀ словеса̀ твоѧ̑.

Не ѡ҆ста́ви на́съ ны́нѣ си́рыхъ, мт҃и, ѿ землѝ на нб҃о ны́нѣ взе́млема, сопребыва́ти и҆мꙋ́щаѧ сн҃ꙋ и҆ бг҃ꙋ.

Ѿкры́й ѻ҆́чи моѝ, и҆ ᲂу҆разꙋмѣ́ю чꙋдеса̀ ѿ зако́на твоегѡ̀.

Ѻ҆́крестъ ѻ҆дра̀ твоегѡ̀ предстоѧ́ще, те́плѣ взыва́емъ тебѣ̀, дв҃о: поми́лꙋй, всест҃а́ѧ, спасѝ всѣ́хъ вѣ́рныхъ.

Пришле́цъ а҆́зъ є҆́смь на землѝ, не скры́й ѿ менѐ за́пѡвѣди твоѧ̑.

Прїидѝ ны́нѣ а҆́нна, ста́ни съ на́ми, нача́льствꙋющи во пра́зднествѣ твоеѧ̀ ст҃ы́ѧ дще́ре, бг҃ома́тере.

Возлюбѝ дꙋша̀ моѧ̀ возжела́ти сꙋдьбы̑ твоѧ̑ на всѧ́кое вре́мѧ.

Прїиди́те, дади́мъ сла́вꙋ и҆ хвалꙋ̀ бг҃ꙋ, призва́вшемꙋ сїю̀ во ст҃а̑ѧ, ꙗ҆́кѡ ст҃ꙋ́ю ст҃ы́хъ бо́льшꙋю.

Запрети́лъ є҆сѝ гѡ́рдымъ, про́клѧти ᲂу҆клонѧ́ющїисѧ ѿ за́повѣдей твои́хъ.

Ны́нѣ прїѧ́тъ нб҃о пресла́внѡ цр҃и́цꙋ вселе́нныѧ, и҆ весели́тсѧ, ца́рствꙋющꙋю зрѧ̀ съ бг҃омъ.

Ѿимѝ ѿ менѐ поно́съ и҆ ᲂу҆ничиже́нїе, ꙗ҆́кѡ свидѣ́нїй твои́хъ взыска́хъ.

Бг҃ъ сла́вы, сн҃ъ тво́й чтⷭ҇аѧ, со сла́вою ꙗ҆́кѡ мт҃рь прїѧ́тъ тѧ̀, и҆ посадѝ ѡ҆деснꙋ́ю себѐ.

И҆́бо сѣдо́ша кнѧ́зи, и҆ на мѧ̀ клевета́хꙋ: ра́бъ же тво́й глꙋмлѧ́шесѧ во ѡ҆правда́нїихъ твои́хъ.

Ѡ҆блече́нна и҆ преꙋкраше́нна бл҃года́тїю, ны́нѣ предста́ла є҆сѝ бг҃ꙋ, ꙗ҆́кѡ цр҃и́ца и҆ мт҃и бж҃їѧ.

И҆́бо свидѣ́нїѧ твоѧ̑ поꙋче́нїе моѐ є҆́сть, и҆ совѣ́ти моѝ ѡ҆правда̑нїѧ твоѧ̑.

А҆́гг҃ли дв҃о, слꙋжа́хꙋ на землѝ, а҆́гг҃ли и҆ ны́нѣ на нб҃сѣ́хъ предстоѧ́тъ тебѣ̀ раболѣ́пнѡ.

Прильпѐ землѝ дꙋша̀ моѧ̀, живѝ мѧ̀ по словесѝ твоемꙋ̀.

А҆́гг҃льскаѧ вѡ́инства слетѣ́вше, со стра́хомъ ѡ҆бстоѧ́хꙋ, твоѐ, чтⷭ҇на́ѧ влⷣчце, преставле́нїе зрѧ́ще.

Пꙋти̑ моѧ̑ возвѣсти́хъ, и҆ ᲂу҆слы́шалъ мѧ̀ є҆сѝ, наꙋчи́ мѧ ѡ҆правда́нїємъ твои̑мъ.

И҆ ны́нѣ ᲂу҆́мныѧ си́лы, мы́сленнѡ съ на́ми предстоѧ́ще пою́тъ, преставле́нїе сла́вѧще твоѐ.

Пꙋ́ть ѡ҆правда́нїй твои́хъ вразꙋми́ ми, и҆ поглꙋмлю́сѧ въ чꙋдесѣ́хъ твои́хъ.

Ѿ конє́цъ прїидо́ша ᲂу҆ч҃нцы̀ хрⷭ҇тѡ́вы, послꙋжи́ти погребе́нїю твоемꙋ̀ влⷣчце, и҆ воспѣ́ти твоѐ ᲂу҆спе́нїе, чтⷭ҇аѧ.

Воздрема̀ дꙋша̀ моѧ̀ ѿ ᲂу҆ны́нїѧ, ᲂу҆тверди́ мѧ въ словесѣ́хъ твои́хъ.

Хрⷭ҇то́съ бг҃ъ, дв҃о, а҆́гг҃лы своѧ̑ и҆ бж҃е́ствєнныѧ а҆пⷭ҇лы посла̀ на погребе́нїе мт҃ре сынолѣ́пнѡ.

Пꙋ́ть непра́вды ѿста́ви ѿ менѐ, и҆ зако́номъ твои́мъ поми́лꙋй мѧ̀.

Всѣ̀ дꙋ́шы ст҃ы́хъ пра̑ѻц҃ъ и҆ прⷪ҇рѡ́къ и҆ првⷣникъ снидо́шасѧ, и҆схо́днꙋю приносѧ́ще пѣ́снь.

Пꙋ́ть и҆́стины и҆зво́лихъ, и҆ сꙋдьбы̑ твоѧ̑ не забы́хъ.

Тебѐ, бцⷣе чтⷭ҇аѧ, живꙋ́щꙋю и҆ ны́нѣ по сме́рти, сла́витъ всѐ мно́жество нбⷭ҇ныхъ и҆ земны́хъ.

Прилѣпи́хсѧ свидѣ́нїємъ твои̑мъ, гдⷭ҇и, не посрамѝ менѐ.

Живе́ши и҆ по сме́рти, живопрїе́мный и҆сто́чниче: ѿ живота́ бо къ животꙋ̀ прешла̀ є҆сѝ, ꙗ҆́кѡ ро́ждшаѧ присноживо́тный живо́тъ.

Пꙋ́ть за́повѣдей твои́хъ теко́хъ, є҆гда̀ разшири́лъ є҆сѝ се́рдце моѐ.

А҆́ще и҆ ᲂу҆мира́еши, дв҃о, ны́нѣ по подо́бїю на́шемꙋ, но всѣ́хъ цр҃и́ца ꙗ҆влѧ́ешисѧ, ꙗ҆́кѡ заче́ншаѧ творца̀ всѧ́ческихъ.

Законоположѝ мнѣ̀, гдⷭ҇и, пꙋ́ть ѡ҆правда́нїй твои́хъ, и҆ взыщꙋ̀ и҆ вы́нꙋ.

А҆́ще и҆ сокрыва́ешисѧ во гро́бѣ ма́лѣмъ, дв҃о, но са́мое нб҃о тебѣ̀ ѿве́рзесѧ, и҆ на прⷭ҇то́лъ прїѧ́тъ тебѐ бг҃ъ.

Вразꙋми́ мѧ, и҆ и҆спыта́ю зако́нъ тво́й, и҆ сохраню̀ и҆ всѣ́мъ се́рдцемъ мои́мъ.

И҆з̾ нѣ́дръ ѻ҆́ч҃ихъ роди́выйсѧ бг҃ъ, и҆ въ нѣ́дра твоѧ̑, непоро́чнаѧ, вше́дый, прїѧ́тъ во ѡ҆б̾ѧ̑тїѧ тебѐ, чтⷭ҇аѧ.

Наста́ви мѧ̀ на стезю̀ за́повѣдей твои́хъ, ꙗ҆́кѡ тꙋ́ю восхотѣ́хъ.

Бг҃ъ погребе́сѧ, и҆ мт҃и бж҃їѧ: бг҃ъ въ тє́мнаѧ сни́де, и҆ мт҃и бж҃їѧ.

Приклонѝ се́рдце моѐ во свидѣ́нїѧ твоѧ̑, а҆ не въ лихои́мство.

Сн҃а, дв҃о, и҆ на крⷭ҇тѣ̀ не ѡ҆ста́вила є҆сѝ: сегѡ̀ ра́ди и҆ то́й не ѡ҆ста́ви тѧ̀, тебѣ̀ ны́нѣ предстоѧ̀ тѣле́снѣ.

Ѿвратѝ ѻ҆́чи моѝ, є҆́же не ви́дѣти сꙋеты̀, въ пꙋтѝ твое́мъ живи́ мѧ.

Гро́бъ сн҃а прославлѧ́еши мт҃рски и҆ то́й, дв҃о, твоѐ ст҃о́е ᲂу҆спе́нїе воспрославлѧ́етъ бж҃е́ственнѣ.

Поста́ви рабꙋ̀ твоемꙋ̀ сло́во твоѐ въ стра́хъ тво́й.

Восхвали́ша тебѐ всѝ а҆́гг҃ли бж҃їи, є҆гда̀ вы́ше нб҃съ возшла̀ є҆сѝ, и҆ па́дше поклони́шасѧ чтⷭ҇нѡ.

Ѿимѝ поноше́нїе моѐ, є҆́же непщева́хъ, ꙗ҆́кѡ сꙋдьбы̀ твоѧ̑ бла́ги.

Къ прⷭ҇то́лꙋ прише́дши всевы́шнѧгѡ бг҃а, па́дши, ра́бски поклони́ласѧ є҆сѝ, и҆ предста́ла є҆сѝ зрѧ́щи бг҃а.

Сѐ возжела́хъ за́пѡвѣди твоѧ̑, въ пра́вдѣ твое́й живи́ мѧ.

Ѽ ра́дости неизрече́нныѧ! ѽ че́сти безмѣ́рныѧ! марїа́мъ со і҆и҃сомъ сн҃омъ свои́мъ ца́рствꙋетъ на нб҃сѝ и҆ на землѝ.

И҆ да прїи́детъ на мѧ̀ млⷭ҇ть твоѧ̀, гдⷭ҇и, спасе́нїе твоѐ по словесѝ твоемꙋ̀.

Бцⷣе дв҃о, преста́вльшисѧ ѿ землѝ, сꙋ́щихъ на землѝ не ѡ҆ста́ви, сохранѧ́ющи покланѧ́ющихсѧ преставле́нїю твоемꙋ̀.

И҆ ѿвѣща́ю поноша́ющымъ мѝ сло́во, ꙗ҆́кѡ ᲂу҆пова́хъ на словеса̀ твоѧ̑.

Ѿ нб҃сѐ мт҃и, и҆дѣ́же ны́нѣ ѡ҆бита́еши, призрѣ́вши на зе́млю, бꙋ́ди бл҃гоꙋтро́бна, и҆ поми́лꙋй мі́ръ, бл҃га́ѧ.

И҆ не ѿимѝ ѿ ᲂу҆́стъ мои́хъ словесѐ и҆́стинна до ѕѣла̀, ꙗ҆́кѡ на сꙋдьбы̑ твоѧ̑ ᲂу҆пова́хъ.

А҆пⷭ҇ли, бцⷣе чтⷭ҇аѧ, є҆гда̀ прест҃о́е тѣ́ло твоѐ ви́дѣша, припа́дше поклони́шасѧ че́стнѡ.

И҆ сохраню̀ зако́нъ тво́й вы́нꙋ, въ вѣ́къ и҆ вѣ́къ вѣ́ка.

И҆схо́дныѧ ѱалмы̀ и҆ пѣ̑нїѧ и҆ пѣ́сни, ли́къ соста́вльше, поѧ́хꙋ тебѣ̀, чꙋдѧ́щесѧ сла́вѣ твое́й, чтⷭ҇аѧ.

И҆ хожда́хъ въ широтѣ̀, ꙗ҆́кѡ за́пѡвѣди твоѧ̑ взыска́хъ.

Бг҃олѣ́пнымъ, дв҃о, твои́мъ та́мѡ сїѧ́нїемъ ѡ҆зарѧ́еми, ра́довахꙋсѧ, и҆ мнѧ́хꙋ сн҃а твоегѡ̀ зрѣ́ти.

И҆ глаго́лахъ ѡ҆ свидѣ́нїихъ твои́хъ пред̾ цр҃ѝ, и҆ не стыдѧ́хсѧ.

Живонача́льномꙋ твоемꙋ̀ тѣ́лꙋ кі́ими рꙋка́ми ны́нѣ прикосне́мсѧ, всенепоро́чнаѧ, глаго́лахꙋ, сло́ва пита́тельнице чтⷭ҇аѧ.

И҆ поꙋча́хсѧ въ за́повѣдехъ твои́хъ, ꙗ҆́же возлюби́хъ ѕѣлѡ̀.

Кі̑ѧ словеса̀, дв҃о, тебѣ̀ и҆зрече́мъ ны́нѣ: кі̑ѧ пѣ́сни, препѣ́таѧ влⷣчце, принесе́мъ ᲂу҆спе́нїю твоемꙋ̀;

И҆ воздвиго́хъ рꙋ́цѣ моѝ къ за́повѣдемъ твои̑мъ, ꙗ҆̀же возлюби́хъ, и҆ глꙋмлѧ́хсѧ во ѡ҆правда́нїихъ твои́хъ.

Марїа́мъ дв҃о, прїѧ́тное бг҃ꙋ и҆́мѧ и҆ сꙋщество̀, ка́кѡ ᲂу҆мерла̀ є҆сѝ ѡ҆божи́вшаѧ є҆стество̀ сме́ртныхъ;

Помѧнѝ словеса̀ твоѧ̑ рабꙋ̀ твоемꙋ̀, и҆́хже ᲂу҆пова́нїе да́лъ мѝ є҆сѝ.

Ка́кѡ ви́дѣна была̀ є҆сѝ бездыха́нна, всѧ́кое дыха́нїе даю́щаго неизрече́ннѡ ро́ждшаѧ; ѽ сбытїѧ̀, дв҃о, но́вагѡ!

То̀ мѧ̀ ᲂу҆тѣ́ши во смире́нїи мое́мъ, ꙗ҆́кѡ сло́во твоѐ живи́ мѧ.

Преше́дшаѧ є҆стества̀ ᲂу҆ста́вы, ка́кѡ подклонѧ́ешисѧ ᲂу҆ста́вамъ є҆стества̀, влⷣчце, и҆ сме́рти, ꙗ҆́коже мы̀, и҆скꙋ́съ прїѧ́ла є҆сѝ;

Го́рдїи законопрестꙋпова́хꙋ до ѕѣла̀, ѿ зако́на же твоегѡ̀ не ᲂу҆клони́хсѧ.

Ржⷭ҇тво́мъ твои́мъ, дв҃о, гро́зное сме́рти ᲂу҆стремле́нїе ѡ҆станови́вшаѧ, ка́кѡ ны́нѣ наше́ствїю сме́рти ᲂу҆стꙋпа́еши;

Помѧнꙋ́хъ сꙋдьбы̀ твоѧ̑ ѿ вѣ́ка, гдⷭ҇и, и҆ ᲂу҆тѣ́шихсѧ.

Ѻ҆гнено́снаѧ кꙋпина̀, ка́кѡ клеща́ми сме́рти ѡ҆б̾ѧ́та была̀ є҆сѝ, бг҃оневѣ́сто, носи́вшаѧ ѻ҆́гнь бж҃ества̀.

Печа́ль прїѧ́тъ мѧ̀ ѿ грѣ̑шникъ, ѡ҆ставлѧ́ющихъ зако́нъ тво́й.

Почи́ла є҆сѝ, дв҃о, а҆ не ᲂу҆мерла̀ ны́нѣ, и҆ въ лꙋ́чшемъ животѣ̀ и҆ безсме́ртнѣмъ пробꙋ́ждшисѧ, ѡ҆брѣла́сѧ є҆сѝ во пло́ти.

Пѣ́та бѧ́хꙋ мнѣ̀ ѡ҆правда́нїѧ твоѧ̑, на мѣ́стѣ прише́льствїѧ моегѡ̀.

Бж҃е́ственный кївѡ́тъ завѣ́та съ на́ми бж҃їѧ, въ ски́нїи ди́внѣй, въ до́мѣ бж҃їи всели́сѧ.

Помѧнꙋ́хъ въ нощѝ и҆́мѧ твоѐ, гдⷭ҇и, и҆ сохрани́хъ зако́нъ тво́й.

Злата́ѧ ста́мна, въ не́й же ма́нна нбⷭ҇наѧ соблюде́сѧ, преложи́сѧ ѿ землѝ бг҃оѻтрокови́ца марїа́мъ къ бг҃ꙋ.

Се́й бы́сть мнѣ̀, ꙗ҆́кѡ ѡ҆правда́нїй твои́хъ взыска́хъ.

Бг҃а и҆ сло́ва крило̀, на крило̀ нбⷭ҇ное восхо́дитъ па́че сло́ва, бг҃оневѣ́ста чтⷭ҇аѧ.

Ча́сть моѧ̀ є҆сѝ, гдⷭ҇и, рѣ́хъ сохрани́ти зако́нъ тво́й.

Є҆ѵⷢ҇льскїй многоцѣ́нный би́серъ ᲂу҆сокро́виществовасѧ ны́нѣ въ та̑йнаѧ сокрѡ́вища бж҃їѧ.

Помоли́хсѧ лицꙋ̀ твоемꙋ̀ всѣ́мъ се́рдцемъ мои́мъ, поми́лꙋй мѧ̀ по словесѝ твоемꙋ̀.

Смотре́нїѧ бг҃а вопло́щшагѡсѧ, сокраще́нный є҆́сть ѡ҆́бразъ сїѐ са́мое та́инство, преставле́нїе твоѐ къ бг҃ꙋ.

Помы́слихъ пꙋтѝ твоѧ̑, и҆ возврати́хъ но́зѣ моѝ во свидѣ́нїѧ твоѧ̑.

Ви́дѧще тѧ̀, дв҃о, мт҃рь бж҃їю, мнѣ́хомъ ви́дѣти бг҃а при́снѡ: ка́кѡ же ны́нѣ стерпи́мъ ѿлꙋче́нїе;

Оу҆гото́вихсѧ и҆ не смꙋти́хсѧ, сохрани́ти за́пѡвѣди твоѧ̑.

Тебѐ стѧжа́вшꙋю дх҃а бж҃їѧ, въ тебѣ̀ бг҃оневѣ́сто все́льшагосѧ, бездыха́ннꙋ ви́дѧ, и҆ на́шъ дꙋ́хъ ѡ҆скꙋдѣва́етъ.

Оу҆́жѧ грѣ̑шникъ ѡ҆бѧза́шасѧ мнѣ̀, и҆ зако́на твоегѡ̀ не забы́хъ.

Бцⷣе дв҃о, ра́досте на́ша, бцⷣе проповѣ́данїе на́ше, бцⷣе, ка́кѡ ѿхо́диши ѿ на́съ;

Полꙋ́нощи воста́хъ, и҆сповѣ́датисѧ тебѣ̀ ѡ҆ сꙋдьба́хъ пра́вды твоеѧ̀.

Ка́мѡ ѿхо́диши, дв҃о; ка́мѡ преставлѧ́ешисѧ ны́нѣ; превы́ше нб҃съ возлетѣ́ла є҆сѝ, ѡ҆ста́вльши на землѝ птенцы̀.

Прича́стникъ а҆́зъ є҆́смь всѣ̑мъ боѧ́щымсѧ тебѐ, и҆ хранѧ́щымъ за́пѡвѣди твоѧ̑.

Дв҃де бг҃оѻ́ч҃е, бꙋ́ди съ на́ми ны́нѣ, во и҆схо́дѣ мт҃ри бг҃а на́шегѡ, и҆ въ бл҃гознамени́тый де́нь пра́здника.

Млⷭ҇ти твоеѧ̀ гдⷭ҇и и҆спо́лнь землѧ̀, ѡ҆правда́нїємъ твои̑мъ наꙋчи́ мѧ.

Возопі́й и҆ ны́нѣ ко а҆́гг҃лѡмъ бж҃їимъ: возми́те врата̀, прїѧ́ти мт҃рь бж҃їю бг҃олѣ́пнѡ.

Бла́гость сотвори́лъ є҆сѝ съ рабо́мъ твои́мъ, гдⷭ҇и, по словесѝ твоемꙋ̀.

Кра́сный добро́тою, цр҃ь нбⷭ҇ный, ны́нѣ добро́ты мт҃ре вожделѣ̀ и҆ призва̀ ю҆̀ въ нб҃са̀.

Бл҃гости, и҆ наказа́нїю, и҆ ра́зꙋмꙋ наꙋчи́ мѧ, ꙗ҆́кѡ за́повѣдемъ твои̑мъ вѣ́ровахъ.

А҆́ще и҆ прїе́млеши погребе́нїе, дв҃о, ꙗ҆́кѡ сме́ртнаѧ, но ꙗ҆́кѡ мт҃и бж҃їѧ востае́ши дх҃омъ бж҃їимъ, вседѣ́тельнымъ.

Пре́жде да́же не смири́тимисѧ, а҆́зъ прегрѣши́хъ, сегѡ̀ ра́ди сло́во твоѐ сохрани́хъ.

Бг҃опрїе́мное тѣ́ло, а҆́ще и҆ во гро́бъ вселѧ́етсѧ, но во гро́бѣ пребы́ти не навы́че, востае́тъ же си́лою бж҃е́ственною.

Бл҃гъ є҆сѝ ты̀, гдⷭ҇и, и҆ бл҃гостїю твое́ю наꙋчи́ мѧ ѡ҆правда́нїємъ твои̑мъ.

Погребе́нїе твоѐ, бцⷣе, лѣ́ствице нбⷭ҇наѧ, тебѣ̀ лѣ́ствица бы́сть, є҆́юже возшла̀ є҆сѝ къ бг҃ꙋ, сꙋ́щемꙋ верхꙋ̀ є҆ѧ̀.

Оу҆мно́жисѧ на мѧ̀ непра́вда го́рдыхъ, а҆́зъ же всѣ́мъ се́рдцемъ мои́мъ и҆спыта́ю за́пѡвѣди твоѧ̑.

Свѣтоно́сный свѣ́щникъ незаходи́магѡ свѣ́та под̾ земле́ю вма́лѣ сокрыва́етсѧ, но полага́етсѧ свѣ́тлѡ на высотѣ̀.

Оу҆сыри́сѧ ꙗ҆́кѡ млеко̀ се́рдце и҆́хъ, а҆́зъ же зако́нꙋ твоемꙋ̀ поꙋчи́хсѧ.

Бы́вши є҆ди́ножды ѿ бг҃а проклѧта̀ землѧ̀, ѡ҆ст҃и́сѧ погребе́нїемъ бг҃а на́шегѡ, и҆ ны́нѣ па́ки погребе́нїемъ твои́мъ мт҃и.

Бла́го мнѣ̀, ꙗ҆́кѡ смири́лъ мѧ̀ є҆сѝ, ꙗ҆́кѡ да наꙋчꙋ́сѧ ѡ҆правда́нїємъ твои̑мъ.

Съ нб҃сѐ падѐ бѣ́днѣ безпло́тный дре́вле: превы́ше нб҃съ чꙋ́днѡ быва́етъ ны́нѣ плотоно́снаѧ дв҃а марїа́мъ.

Бл҃гъ мнѣ̀ зако́нъ ᲂу҆́стъ твои́хъ, па́че ты́сѧщъ зла́та и҆ сребра̀.

Твоѐ, чтⷭ҇аѧ, вели́чїе и҆ сла́ва вни́де пред̾ лицѐ сла́вы гдⷭ҇а, преста́вльшейсѧ тебѣ̀ ѿ землѝ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ:

Воспѣва́емъ, сло́ве, тебѐ всѣ́хъ бг҃а, со ѻ҆ц҃е́мъ и҆ ст҃ы́мъ твои́мъ дх҃омъ, и҆ сла́вимъ бж҃е́ственный зра́къ тво́й.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Бл҃жи́мъ тѧ̀ всѝ ро́ди, бцⷣе приснодв҃о влⷣчце, и҆ сла́вимъ ᲂу҆спе́нїе твоѐ.

И҆ па́ки пе́рвый ли́къ пе́рвый сті́хъ.

Жи́знь во гро́бѣ положи́лсѧ є҆сѝ, хрⷭ҇тѐ, и҆ мт҃рь живота̀ полага́етсѧ: стра́нное видѣ́нїе а҆́гг҃лѡмъ и҆ чл҃вѣ́кѡмъ!

Та́же є҆ктенїа̀ ма́лаѧ, и҆ возгла́съ:

Ꙗ҆́кѡ бл҃гослови́сѧ твоѐ и҆́мѧ, и҆ просла́висѧ твоѐ црⷭ҇тво ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.

И҆ покади́вшꙋ і҆ере́ю, лѣ́вый ли́къ начина́етъ вторꙋ́ю статїю̀.

Статїѧ̀ втора́ѧ.

Досто́йно є҆́сть велича́ти тѧ̀ жизнода́вца, возвели́чившаго живоно́сное преставле́нїе мт҃ре твоеѧ̀ чтⷭ҇ыѧ.

Рꙋ́цѣ твоѝ сотвори́стѣ мѧ̀, и҆ созда́стѣ мѧ̀: вразꙋми́ мѧ, и҆ наꙋчꙋ́сѧ за́повѣдемъ твои̑мъ.

Досто́йно є҆́сть велича́ти тѧ̀, бцⷣе, дꙋ́шꙋ бж҃е́ственнꙋю и҆ непоро́чнꙋю въ рꙋ́цѣ бг҃а положи́вшꙋю.

Боѧ́щїисѧ тебѐ ᲂу҆́зрѧтъ мѧ̀, и҆ возвеселѧ́тсѧ, ꙗ҆́кѡ на словеса̀ твоѧ̑ ᲂу҆пова́хъ.

Ѽ чꙋдесѐ но́вагѡ! две́рь въ двє́ри, нб҃о въ нб҃о ны́нѣ и҆́детъ, и҆ прⷭ҇то́лъ бж҃їй на прⷭ҇то́лъ бж҃їй.

Разꙋмѣ́хъ, гдⷭ҇и, ꙗ҆́кѡ пра́вда сꙋдьбы̑ твоѧ̑, и҆ вои́стиннꙋ смири́лъ мѧ̀ є҆сѝ.

Ста̀ и҆ ᲂу҆диви́сѧ всѐ мно́жество а҆́гг҃лѡвъ, зрѧ́щи хрⷭ҇та̀ бг҃а непристꙋ́пнаго, пристꙋпа́юща къ мт҃ри, че́сть є҆́й воздаю́ща.

Бꙋ́ди же млⷭ҇ть твоѧ̀, да ᲂу҆тѣ́шитъ мѧ̀ по словесѝ твоемꙋ̀, рабꙋ̀ твоемꙋ̀.

Оу҆жасе́сѧ, бг҃а тре́петнѡ зрѧ́щи, низходѧ́щаго па́ки, и҆ дꙋ́шꙋ на рꙋ́цѣ прїе́млющаго, и҆ возше́дшаго во сла́вѣ бж҃е́ственнѣй.

Да прїи́дꙋтъ мнѣ̀ щедрѡ́ты твоѧ̑, и҆ жи́въ бꙋ́дꙋ, ꙗ҆́кѡ зако́нъ тво́й поꙋче́нїе моѐ є҆́сть.

Оу҆жасни́сѧ нб҃о, и҆ ты̀, землѐ, внꙋшѝ глаго́лы: бг҃ъ, и҆́же над̾ всѣ́ми, пе́рвѣе сни́де, и҆ ны́нѣ второ́е на зе́млю ра́ди мт҃ре.

Да постыдѧ́тсѧ го́рдїи, ꙗ҆́кѡ непра́веднѡ беззако́нноваша на мѧ̀: а҆́зъ же поглꙋмлю́сѧ въ за́повѣдехъ твои́хъ.

Премꙋ́дрость до́мъ сво́й ѿ землѝ преста́вивши въ до́мъ сво́й пренбⷭ҇ный, и҆спо́лни ны́нѣ сла́вы бж҃е́ственныѧ.

Да ѡ҆братѧ́тъ мѧ̀ боѧ́щїисѧ тебѐ, и҆ вѣ́дѧщїи свидѣ̑нїѧ твоѧ̑.

Не ѿ нб҃а сни́де бг҃оневѣ́стнаѧ дв҃а, но на нб҃са̀ взы́де, ꙗ҆́кѡ ро́ждшаѧ нбⷭ҇наго цр҃ѧ̀.

Бꙋ́ди се́рдце моѐ непоро́чно во ѡ҆правда́нїихъ твои́хъ, ꙗ҆́кѡ да не постыжꙋ́сѧ.

Ны́нѣ прохо́дно бы́сть нб҃о и҆ чл҃вѣ́кѡмъ: прїиди́те ᲂу҆̀бо всѝ хрⷭ҇тоно́снїи, взы́демъ съ мт҃рїю бж҃їею.

И҆счеза́етъ во спасе́нїе твоѐ дꙋша̀ моѧ̀: на словеса̀ твоѧ̑ ᲂу҆пова́хъ.

Въ зе́млю пони́кла є҆сѝ, неѡра́ннаѧ землѐ гдⷭ҇нѧ, кла́съ живота̀ и҆зрасти́вшаѧ, и҆ во странѣ̀ произни́кла є҆сѝ нбⷭ҇нѣй.

И҆счезо́ша ѻ҆́чи моѝ въ сло́во твоѐ, глаго́люще: когда̀ ᲂу҆тѣ́шиши мѧ̀.

Со́лнце, ви́дѣвшее пре́жде заше́дшее сл҃нце пра́вды, ви́дитъ ны́нѣ и҆ лꙋнꙋ̀ заше́дшꙋю, дв҃ꙋ и҆ мт҃рь свѣ́та.

Занѐ бы́хъ ꙗ҆́кѡ мѣ́хъ на сла́нѣ, ѡ҆правда́нїй твои́хъ не забы́хъ.

Гро́бъ несвѣ́тлый покры̀ прїѡсѣне́ннꙋю и҆ свѣтоно́снꙋю го́рꙋ гдⷭ҇ню, покры́вшꙋю нб҃са̀ добродѣ́телїю.

Коли́кѡ є҆́сть дне́й раба̀ твоегѡ̀; когда̀ сотвори́ши мѝ ѿ гонѧ́щихъ мѧ̀ сꙋ́дъ.

А҆́ще и҆ преста́виласѧ є҆сѝ ѿ землѝ къ нбⷭ҇нымъ дв҃о, ѻ҆ба́че всѧ̑ землѧ̀ сора́дꙋетсѧ, и҆ сла́витъ преставле́нїе твоѐ.

Повѣ́даша мнѣ̀ законопрестꙋ́пницы глꙋмлє́нїѧ, но не ꙗ҆́кѡ зако́нъ тво́й гдⷭ҇и.

А҆́ще и҆ въ нб҃сѝ заключи́сѧ нетлѣ́нное тѣ́ло твоѐ, дв҃о, ѻ҆ба́че бл҃года́ть твоѧ̀ и҆злїѧ́сѧ, и҆ и҆сполнѧ́етъ всѐ лицѐ землѝ.

Всѧ̑ за́повѣди твоѧ̑ и҆́стина: непра́веднѡ погна́ша мѧ̀: помози́ ми.

Въ пѣ́снехъ къ бг҃ꙋ, мл҃твахъ и҆ поще́нїихъ, дв҃о, въ сі́и дни̑ ᲂу҆пражнѧ́ющисѧ, ѡ҆жида́ла є҆сѝ преставле́нїѧ твоегѡ̀.

Вма́лѣ не сконча́ша менѐ на землѝ: а҆́зъ же не ѡ҆ста́вихъ за́повѣдей твои́хъ.

Ра́дꙋетсѧ дꙋша̀, и҆ лицѐ свѣ́томъ блиста́етъ, ѿходѧ́щей тебѣ̀ ко гдⷭ҇ꙋ всест҃а́ѧ гпⷭ҇жѐ вѣ́рныхъ.

По млⷭ҇ти твое́й живи́ мѧ, и҆ сохраню̀ свидѣ̑нїѧ ᲂу҆́стъ твои́хъ.

Сѐ вѣ́рнїи надгро́бнꙋю пѣ́снь соверша́емъ тебѣ̀, нача́ткꙋ жи́зни на́шеѧ, предстоѧ́ще гро́бꙋ твоемꙋ̀ бл҃гоче́стнѡ.

Во вѣ́къ, гдⷭ҇и, сло́во твоѐ пребыва́етъ на нб҃сѝ.

Любо́вїю вѣ́рнїи ны́нѣ ᲂу҆́треннююще славосло́вимъ тѧ̀ влⷣчце, дв҃о непоро́чнаѧ, и҆ сла́вимъ ᲂу҆спе́нїе твоѐ.

Въ ро́дъ и҆ ро́дъ и҆́стина твоѧ̀: ѡ҆снова́лъ є҆сѝ зе́млю, и҆ пребыва́етъ.

Помѧнѝ на́съ во црⷭ҇твїи нбⷭ҇нѣмъ, преставле́нїе твоѐ вѣ́рнѡ пою́щихъ, дв҃о бг҃оневѣ́сто.

Оу҆чине́нїемъ твои́мъ пребыва́етъ де́нь: ꙗ҆́кѡ всѧ́ческаѧ рабѡ́тна тебѣ̀.

Ны́нѣ си́льный, ꙗ҆́коже предрекла̀ є҆сѝ, вели́чїе тебѣ̀, пречтⷭ҇аѧ дв҃о, сотворѝ, нб҃а и҆ землѝ созда́тель.

Ꙗ҆́кѡ а҆́ще бы не зако́нъ тво́й поꙋче́нїе моѐ бы́лъ, тогда̀ ᲂу҆́бѡ поги́блъ бы́хъ во смире́нїи мое́мъ.

Предстои́ши ны́нѣ бж҃ествꙋ̀ трїѷпоста́сномꙋ, лице́мъ къ лицꙋ̀ зрѧ́щи, и҆дѣ́же ли́ца покрыва́ютъ серафі́ми.

Во вѣ́къ не забꙋ́дꙋ ѡ҆правда́нїй твои́хъ, ꙗ҆́кѡ въ ни́хъ ѡ҆живи́лъ мѧ̀ є҆сѝ.

Нб҃о ны́нѣ сра́дꙋетсѧ землѣ̀ и҆ сликовствꙋ́етъ, чл҃вѣ́цы со а҆́гг҃лы соедини́шасѧ, преста́вльшейсѧ чтⷭ҇ѣй на нб҃о.

Тво́й є҆́смь а҆́зъ, спаси́ мѧ, ꙗ҆́кѡ ѡ҆правда́нїй твои́хъ взыска́хъ.

І҆ѡакі́мъ ны́нѣ сра́дꙋетсѧ сла́вѣ дще́ри своеѧ̀ и҆ бг҃оѻтрокови́цы, неизрече́ннѣй и҆ бж҃е́ственнѣй и҆́стиннѡ.

Менѐ жда́ша грѣ́шницы погꙋби́ти мѧ̀: свидѣ̑нїѧ твоѧ̑ разꙋмѣ́хъ.

Геѳсима́нїѧ, бл҃же́нный и҆ дѣ́вственный гро́бъ прїе́мшаѧ, ᲂу҆бл҃жа́етсѧ, чествꙋ́ема, ꙗ҆́кѡ черто́гъ ца́рскїй.

Всѧ́кїѧ кончи́ны ви́дѣхъ коне́цъ: широка̀ за́повѣдь твоѧ̀ ѕѣлѡ̀.

Прїиди́те вѣ́рнїи, ст҃о́мꙋ гро́бꙋ гдⷭ҇а и҆ всест҃ы́ѧ є҆гѡ̀ мт҃ре, поклони́мсѧ со стра́хомъ и҆ ра́достїю.

Ко́ль возлюби́хъ зако́нъ тво́й, гдⷭ҇и, ве́сь де́нь поꙋче́нїе моѐ є҆́сть.

І҆ерⷭ҇ли́мъ ѡ҆б̾и́мемъ всѝ ᲂу҆се́рднѡ, и҆ ᲂу҆́зримъ та̑инства бж҃їѧ, на́съ ра́ди соверши́вшїѧсѧ.

Па́че вра̑гъ мои́хъ ᲂу҆мꙋдри́лъ мѧ̀ є҆сѝ за́повѣдїю твое́ю, ꙗ҆́кѡ въ вѣ́къ моѧ̀ є҆́сть. (с. 747)

А҆́гг҃ли че́стнѡ сопровожда́ютъ чтⷭ҇ны́й гро́бъ тво́й, чтⷭ҇аѧ, свѣ́томъ сщ҃е́ннымъ молнїено́снѡ сїѧ́ющїй, просвѣща́емый свѣ́томъ бж҃їимъ.

Па́че всѣ́хъ ᲂу҆ча́щихъ мѧ̀ разꙋмѣ́хъ, ꙗ҆́кѡ свидѣ́нїѧ твоѧ̑ поꙋче́нїе моѐ є҆́сть.

Оу҆жасо́шасѧ всѝ дꙋ́си воздꙋ́шнїи, ѡ҆ є҆́же на нб҃са̀ восхожде́нїи твое́мъ, и҆ вострепета́ша держа́вы твоеѧ̀, чтⷭ҇аѧ.

Па́че ста́рєцъ разꙋмѣ́хъ, ꙗ҆́кѡ за́пѡвѣди твоѧ̑ взыска́хъ.

Вострепета̀ сатана̀, ᲂу҆зрѣ́въ свѣ́тъ сла́вы мт҃ре бж҃їѧ, ѿ высоты̀ молнїеви́днѡ проше́дшїй да́же до а҆́да, и҆ пла́ча и҆ стенѧ̀ взыва́ше: что̀ мнѣ̀ и҆ тебѣ̀ мт҃и бж҃їѧ;

Ѿ всѧ́кагѡ пꙋтѝ лꙋка́ва возбрани́хъ нога́мъ мои̑мъ, ꙗ҆́кѡ да сохраню̀ словеса̀ твоѧ̑.

Ѽ бога́тства хрⷭ҇та̀ бг҃а! ѽ безмѣ́рнаѧ глꙋбина̀ любвѐ! и҆ до́льнѣйшыѧ страны̑ землѝ и҆спо́лни пресла́внагѡ ꙗ҆вле́нїѧ мт҃ре.

Ѿ сꙋде́бъ твои́хъ не ᲂу҆клони́хсѧ, ꙗ҆́кѡ ты̀ законоположи́лъ мѝ є҆сѝ.

Пре́жде на́съ ра́ди во а҆́дъ хрⷭ҇то́съ сни́де, ны́нѣ же дв҃а марїа́мъ взы́де на нб҃о, въ ра́дость и҆ по́мощь на́мъ.

Ко́ль сладка̀ горта́ни моемꙋ̀ словеса̀ твоѧ̑, па́че ме́да ᲂу҆стѡ́мъ мои̑мъ.

Схожде́нїю бж҃їю, и҆ восхожде́нїю твоемꙋ̀ дв҃о, покланѧ́юсѧ, сла́влю ѧ҆̀ и҆ чтꙋ̀, ꙗ҆́кѡ вины̀ вхо́да моегѡ̀ въ живо́тъ.

Ѿ за́повѣдей твои́хъ разꙋмѣ́хъ: сегѡ̀ ра́ди возненави́дѣхъ всѧ́къ пꙋ́ть непра́вды.

По́ѧсъ чтⷭ҇ны́й, во свидѣ́нїе твоегѡ̀ съ пло́тїю ны́нѣ къ бг҃ꙋ преставле́нїѧ, врꙋча́еши дв҃о ѳѡмѣ̀.

Свѣти́льникъ нога́ма мои́ма зако́нъ тво́й, и҆ свѣ́тъ стезѧ́мъ мои̑мъ.

А҆́ще и҆ ны́нѣ па́ки не приспѣ̀ ѳѡма̀ близне́цъ, но та̑инъ сподо́бисѧ, пресла́внымъ воскресе́нїемъ хрⷭ҇та̀.

Клѧ́хсѧ, и҆ поста́вихъ сохрани́ти сꙋдьбы̑ пра́вды твоеѧ̀.

Ѡ҆бори́тельный и҆ стропти́вый ро́дъ є҆вре́йскїй, сн҃а крⷭ҇тꙋ̀ пре́далъ є҆сѝ: и҆ ны́нѣ рꙋ́цѣ воздвиза́еши на мт҃рь.

Смири́хсѧ до ѕѣла̀: гдⷭ҇и, живи́ мѧ по словесѝ твоемꙋ̀.

Ка́кѡ кївѡ́тꙋ кївѡ́та бг҃а жи́ва прикоснꙋ́тисѧ, лꙋка́ве, дерзнꙋ́лъ є҆сѝ; но пости́же сꙋ́дъ ѿсѣче́нїемъ.

Вѡ́льнаѧ ᲂу҆́стъ мои́хъ бл҃говоли́ же, гдⷭ҇и, и҆ сꙋдьба́мъ твои̑мъ наꙋчи́ мѧ.

До́лѣ тѧ̀, чтⷭ҇аѧ, а҆пⷭ҇ли ѡ҆бстоѧ́хꙋ, горѣ́ же си́лы срѣта́хꙋ тебѐ, ꙗ҆́кѡ а҆́гг҃лѡвъ є҆сѝ влⷣчца и҆ сме́ртныхъ.

Дꙋша̀ моѧ̀ въ рꙋкꙋ̀ твое́ю вы́нꙋ, и҆ зако́на твоегѡ̀ не забы́хъ.

Пла́чь сщ҃е́нный соверша́юще тебѣ̀, дв҃о, взыва́хꙋ: ка́кѡ тѧ̀ бж҃їю пала́тꙋ покры́емъ земле́ю мертволѣ́пнѡ;

Положи́ша грѣ́шницы сѣ́ть мнѣ̀, и҆ ѿ за́повѣдей твои́хъ не заблꙋди́хъ.

Ка́кѡ тѧ̀ гро́бꙋ предади́мъ, чтⷭ҇аѧ, сн҃а и҆ сло́ва ра́й слове́сный, па́че ᲂу҆ма̀ и҆ сло́ва.

Наслѣ́довахъ свидѣ̑нїѧ твоѧ̑ во вѣ̑къ, ꙗ҆́кѡ ра́дованїе се́рдца моегѡ̀ сꙋ́ть.

Словесы̀ бж҃е́ственными бг҃опроповѣ́дники ᲂу҆тѣша́ѧ, мно́жество ско́рби разрѣши́ла є҆сѝ, возглаго́лавши ма́тернимъ ѡ҆́бразомъ къ ни̑мъ, бг҃ома́ти.

Приклони́хъ се́рдце моѐ сотвори́ти ѡ҆правда̑нїѧ твоѧ̑ въ вѣ́къ за воздаѧ́нїе.

Ча́да гдⷭ҇а и҆ сн҃а моегѡ̀! ра́дости ѿше́ствїѧ моегѡ̀ къ бг҃ꙋ не претворѧ́йте въ пла́чь слеза́ми ва́шими.

Законопрестꙋ̑пныѧ возненави́дѣхъ зако́нъ же тво́й возлюби́хъ.

Хода́таица къ бг҃ꙋ сѐ ѿхождꙋ̀ превы́ше мі́ра, съ ва́ми же є҆́смь въ мі́рѣ при́снѡ, со гдⷭ҇емъ, ꙗ҆́коже ѡ҆бѣща́лсѧ є҆́сть.

Помо́щникъ мо́й, и҆ застꙋ́пникъ мо́й є҆сѝ ты̀: на словеса̀ твоѧ̑ ᲂу҆пова́хъ.

Оу҆жаса́емсѧ прикоснꙋ́тисѧ всест҃о́мꙋ и҆ бг҃опрїе́мномꙋ тѣ́лꙋ твоемꙋ̀, чтⷭ҇аѧ, рабѝ твоѝ, и҆ погребстѝ мт҃рь живота̀.

Оу҆клони́тесѧ ѿ менѐ лꙋка́внꙋющїи, и҆ и҆спыта́ю за́пѡвѣди бг҃а моегѡ̀.

Кі̑ѧ ѻ҆дє́жды, кі̑ѧ пелєны̀, дв҃о, и҆ мѵ́ры, кі̑ѧ же надгрѡ́бныѧ пѣ́сни погребе́нїю твоемꙋ̀ принесе́мъ, чтⷭ҇аѧ;

Застꙋпи́ мѧ по словесѝ твоемꙋ̀, и҆ жи́въ бꙋ́дꙋ: и҆ не посрамѝ менѐ ѿ ча́ѧнїѧ моегѡ̀.

Ца́рїе зе́мстїи и҆ бога́тїи лю́дстїи мо́лѧтсѧ лицꙋ̀ твоемꙋ̀, дв҃о, ꙗ҆́кѡ дще́ри цр҃ѧ̀ нбⷭ҇нагѡ.

Помози́ ми, и҆ спасꙋ́сѧ, и҆ поꙋчꙋ́сѧ во ѡ҆правда́нїихъ твои́хъ вы́нꙋ.

Бг҃ъ въ мт҃ри почѝ на землѝ ꙗ҆́кѡ млⷣнцъ, ны́нѣ же на нб҃ѣ почі́етъ, и҆ всели́тсѧ мт҃и въ бз҃ѣ.

Оу҆ничижи́лъ є҆сѝ всѧ̑ ѿстꙋпа́ющыѧ ѿ ѡ҆правда́нїй твои́хъ, ꙗ҆́кѡ непра́ведно помышле́нїе и҆́хъ.

Ны́нѣ марїа́мъ весели́тсѧ, всенепоро́чное тѣ́ло гдⷭ҇а, ѡ҆боже́нное зрѧ́щи прⷭ҇то́лѣ бж҃їи.

Престꙋпа́ющыѧ непщева́хъ всѧ̑ грѣ̑шныѧ землѝ: сегѡ̀ ра́ди возлюби́хъ свидѣ̑нїѧ твоѧ̑.

Ны́нѣ ᲂу҆слы́шала є҆сѝ та́мѡ неизрече́нныѧ глаго́лы, дв҃о, и҆ безвѣ́стнаѧ и҆ та̑йнаѧ премꙋ́дрости ꙗ҆вѝ тебѣ̀ бг҃ъ.

Пригвоздѝ стра́хꙋ твоемꙋ̀ плѡ́ти моѧ̑: ѿ сꙋде́бъ бо твои́хъ ᲂу҆боѧ́хсѧ.

Взѧ́тсѧ ѿ землѝ пресла́вный гра́дъ гдⷭ҇нь, ѡ҆ не́мже пресла̑внаѧ глаго́лашасѧ, и҆ введе́сѧ въ до́мъ бж҃їй.

Сотвори́хъ сꙋ́дъ и҆ пра́вдꙋ, не преда́ждь менѐ ѡ҆би́дѧщымъ мѧ̀.

Взѧ́тсѧ ѿ землѝ землѧ̀ неѡскверне́ннаѧ и҆ дѣ́вственнаѧ, и҆з̾ неѧ́же созда́сѧ но́вый а҆да́мъ, пра́ѻц҃а а҆да́ма созда́тель.

Воспрїимѝ раба̀ твоего̀ во бла́го, да не ѡ҆клевета́ютъ менѐ го́рдїи.

Нб҃о ны́нѣ колесни́цꙋ бж҃їю, тмочи́сленнѡ ст҃ꙋ́ю, прїе́млетъ, со тма́ми а҆́гг҃лѡвъ пресла́внѡ.

Ѻ҆́чи моѝ и҆зчезо́стѣ во спасе́нїе твоѐ, и҆ въ сло́во пра́вды твоеѧ̀.

Дне́сь ѿ землѝ чи́стый и҆ всест҃ѣ́йшїй ѻ҆́бразъ, новолѣ́пнѡ возно́ситсѧ та́мѡ, и҆дѣ́же первоѻбра́зное быва́етъ.

Сотворѝ съ рабо́мъ твои́мъ по млⷭ҇ти твое́й, и҆ ѡ҆правда́нїємъ твои̑мъ наꙋчи́ мѧ.

Бл҃госодѣ́ланный ѡ҆́бразъ, красотꙋ̀ землѝ преиз̾ѻби́льнꙋю, ны́нѣ бг҃олѣ́пнѡ прелага́етъ бг҃ъ на нб҃о.

Ра́бъ тво́й є҆́смь, а҆́зъ вразꙋми́ мѧ, и҆ ᲂу҆вѣ́мъ свидѣ̑нїѧ твоѧ̑.

Кни́га та́инственнаѧ, въ не́йже написа́сѧ бж҃їе сло́во, въ рꙋ́цѣ бг҃а полага́етсѧ, въ написа́нїе нбⷭ҇ныхъ та̑инъ.

Вре́мѧ сотвори́ти гдⷭ҇ви, разори́ша зако́нъ тво́й.

Ꙗ҆́кѡ голꙋби́ца, ᲂу҆ѧ́звленнаѧ любо́вїю, дв҃о, прⷭ҇то́лъ бж҃їй ѡ҆блета́еши ѿлетѣ́вши ѿ гнѣзда̀, є҆́же на землѝ.

Сегѡ̀ ра́ди возлюби́хъ за́пѡвѣди твоѧ̑ па́че зла́та и҆ топа́зїѧ.

Землѝ и҆ нб҃а всецр҃це, ди́внаѧ мр҃і́е, въ црⷭ҇тво введѝ сла́вѧщихъ ᲂу҆спе́нїе твоѐ.

Сегѡ̀ ра́ди ко всѣ̑мъ за́повѣдемъ твои̑мъ направлѧ́хсѧ, всѧ́къ пꙋ́ть непра́вды возненави́дѣхъ.

Оу҆спѝ, чтⷭ҇аѧ, ᲂу҆спе́нїемъ твои́мъ живоно́снымъ, ᲂу҆тишѝ цр҃кве собла́зны, и҆ ᲂу҆твердѝ ю҆̀ ꙗ҆́кѡ бл҃га́ѧ.

Ди̑вна свидѣ̑нїѧ твоѧ̑: сегѡ̀ ра́ди и҆спыта̀ ѧ҆̀ дꙋша̀ моѧ̀.

Воспѣва́емъ ны́нѣ ᲂу҆спе́нїе и҆ погребе́нїе твоѐ, чтⷭ҇аѧ, и҆ всѝ вѣ́рнѡ ᲂу҆блажа́емъ тѧ̀, и҆скꙋ́плени ѿ сме́рти твои́мъ рожде́нїемъ.

Ꙗ҆вле́нїе слове́съ твои́хъ просвѣща́етъ и҆ вразꙋмлѧ́етъ младе́нцы.

Тѧ̀, ѻ҆́дръ чтⷭ҇ны́й ст҃ы́й и҆ бг҃опрїе́мный, на ѻ҆дрѣ̀ чтⷭ҇нѡ зрѧ́щи вопїѧ́хꙋ со пла́чемъ.

Оу҆ста̀ моѧ̑ ѿверзо́хъ и҆ привлеко́хъ дх҃ъ, ꙗ҆́кѡ за́повѣдей твои́хъ жела́хъ.

Налѧцы̀ чтⷭ҇на́ѧ, приснодѣ́ваѧ дв҃о мр҃і́е, и҆ ᲂу҆спѣва́й, и҆ црⷭ҇твꙋй во вѣ́ки вѣкѡ́въ съ бг҃омъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Безнача́льне бж҃е, соприсносꙋ́щне сло́ве и҆ дꙋ́ше ст҃ы́й, вознесѝ ро́гъ хрⷭ҇тїа́нъ, ꙗ҆́кѡ всеми́лостивый и҆ бл҃гі́й.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Жи́знь ро́ждшаѧ, всенепоро́чнаѧ чтⷭ҇аѧ дв҃о, и҆ къ жи́зни преста́вльшаѧсѧ ны́нѣ, и҆́стинныѧ жи́зни сподо́би и҆ всѧ̑ вѣ̑рныѧ.

И҆ па́ки вторы́й ли́къ сті́хъ пе́рвый.

Досто́йно є҆́сть велича́ти тѧ̀ жизнода́вца, возвели́чившаго живоно́сное преставле́нїе мт҃ре твоеѧ̀ чтⷭ҇ыѧ.

Та́же є҆ктенїа̀, и҆ возгла́съ:

Ꙗ҆́кѡ ст҃и́сѧ и҆ просла́висѧ всечⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

Статїѧ̀ тре́тїѧ.

Гла́съ г҃.

При́зри на мѧ̀, и҆ поми́лꙋй мѧ̀, по сꙋдꙋ̀ лю́бѧщихъ и҆́мѧ твоѐ.

Ро́ди всѝ пѣ́снь погребе́нїю твоемꙋ̀ прино́сѧтъ, дв҃о;

Стѡпы̀ моѧ̑ напра́ви по словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе.

Грѧдѝ сѣ́мѡ всѧ̀ тва́рь, пѣ́сни и҆схѡ́дныѧ принесе́мъ дв҃ѣ.

И҆зба́ви мѧ̀ ѿ клеветы̀ чл҃вѣ́ческїѧ, и҆ сохраню̀ за́пѡвѣди твоѧ̑.

Оу҆ч҃нцы̀ хрⷭ҇та̀ моегѡ̀, погреба́ютъ тѣ́ло мт҃ре бг҃а моегѡ̀.

Лицѐ твоѐ просвѣтѝ на раба̀ твоего̀, и҆ наꙋчи́ мѧ ѡ҆правда́нїємъ твои̑мъ.

А҆́гг҃лѡвъ и҆ а҆рха́гг҃лѡвъ чи́ни предстоѧ́ще воспѣва́ютъ неви́димѡ.

И҆схѡ́дища водна́ѧ и҆зведо́стѣ ѻ҆́чи моѝ, поне́же не сохрани́хъ зако́на твоегѡ̀.

Жєны̀ чє́стныѧ со а҆пⷭ҇лы вопїѧ́хꙋ пла́чꙋще.

Пра́веденъ є҆сѝ гдⷭ҇и, и҆ пра́ви сꙋдѝ твоѝ.

Неискꙋсомꙋ́жнаѧ дв҃о, мт҃и бг҃а вы́шнѧгѡ, ка́кѡ стерпи́мъ болѣ́знь;

Заповѣ́далъ є҆сѝ пра́вдꙋ свидѣ̑нїѧ твоѧ̑, и҆ и҆́стинꙋ ѕѣлѡ̀.

Твоѐ ны́нѣ ѿше́ствїе, ра́дость всемꙋ̀ мі́рꙋ, на́мъ же пла́чь ско́рбный.

И҆ста́ѧла мѧ̀ є҆́сть ре́вность твоѧ̀, ꙗ҆́кѡ забы́ша словеса̀ твоѧ̑ вразѝ моѝ.

Ѿ мт҃рнїѧ любвѐ твоеѧ̀ и҆ попече́нїѧ твоегѡ̀ да не ѡ҆ста́немъ си̑ры.

Разжже́но сло́во твоѐ ѕѣлѡ̀, и҆ ра́бъ тво́й возлюбѝ є҆̀.

Свѣ́те на́шъ дв҃о, ка́кѡ стерпи́мъ не зрѣ́ти твоегѡ̀ сла́дкагѡ ѻ҆́ка;

Ю҆нѣ́йшїй а҆́зъ є҆́смь и҆ ᲂу҆ничиже́нъ, ѡ҆правда́нїй твои́хъ не забы́хъ.

Ка́кѡ бг҃олю́бнаѧ твоѧ̀ и҆ бг҃осло́внаѧ ᲂу҆ста̀ молча́нїемъ, ᲂу҆вы̀, свѧза́шасѧ!

Пра́вда твоѧ̀ пра́вда во вѣ́къ, и҆ зако́нъ тво́й и҆́стина.

Ѿ мт҃ре ᲂу҆чи́телѧ на́шегѡ не ѿстꙋ́пимъ, а҆пⷭ҇ли вопїѧ́хꙋ.

Скѡ́рби и҆ нꙋ́жди ѡ҆брѣто́ша мѧ̀, за́пѡвѣди твоѧ̑ поꙋче́нїе моѐ.

На ѻ҆́блацѣхъ па́ки предпо́слемъ тѧ̀, дв҃о, до нбⷭ҇ныхъ.

Пра́вда свидѣ́нїѧ твоѧ̑ въ вѣ́къ, вразꙋми́ мѧ и҆ жи́въ бꙋ́дꙋ.

Же́злъ ст҃ы́й, положе́нный во гро́бѣ, жи́знь и҆зраща́етъ.

Воззва́хъ всѣ́мъ се́рдцемъ мои́мъ, ᲂу҆слы́ши мѧ̀ гдⷭ҇и, ѡ҆правда̑нїѧ твоѧ̑ взыщꙋ̀.

Во гро́бѣ положи́сѧ, мє́ртвыѧ ѿ гробѡ́въ воздви́гшаѧ ржⷭ҇тво́мъ свои́мъ.

Воззва́хъ тѝ, спаси́ мѧ, и҆ сохраню̀ свидѣ̑нїѧ твоѧ̑.

Ка́мѡ ѿхо́диши мт҃и; дрꙋ́гъ и҆ дѣ́вственникъ сынолѣ́пнѡ вопїѧ́ше.

Предвари́хъ въ безго́дїи, и҆ воззва́хъ, на словеса̀ твоѧ̑ ᲂу҆пова́хъ.

Въ ра́дость сн҃а твоегѡ̀ ѿхо́диши бг҃ома́ти, и҆ весели́шисѧ и҆ ра́дꙋешисѧ.

Предвари́стѣ ѻ҆́чи моѝ ко ᲂу҆́трꙋ, поꙋчи́тисѧ словесє́мъ твои̑мъ.

Є҆да̀ па́ки въ ка́нꙋ на бра́къ ны́нѣ позвана̀ є҆сѝ со а҆пⷭ҇лы;

Гла́съ мо́й ᲂу҆слы́ши гдⷭ҇и, по млⷭ҇ти твое́й, по сꙋдьбѣ̀ твое́й живи́ мѧ.

Поимѝ дв҃о, къ бжⷭ҇твенномꙋ твоемꙋ̀ сн҃ꙋ и҆ менѐ ны́нѣ, твоѐ ча́до.

Прибли́жишасѧ гонѧ́щїи мѧ̀ беззако́нїемъ, ѿ зако́на же твоегѡ̀ ᲂу҆дали́шасѧ.

Преста́ви мѧ̀ мт҃и, ны́нѣ твои́мъ преставле́нїемъ къ ро́ждшемꙋсѧ и҆з̾ тебѐ.

Бли́зъ є҆сѝ ты̀ гдⷭ҇и, и҆ всѝ пꙋтїѐ твоѝ и҆́стина.

Да сопредстои́мъ на нб҃сѝ сла́вѣ, ꙗ҆́коже при крⷭ҇тѣ̀ страда́нїю.

И҆спе́рва позна́хъ ѿ свидѣ́нїй твои́хъ, ꙗ҆́кѡ въ вѣ́къ ѡ҆снова́лъ ѧ҆̀ є҆сѝ.

Со тма́ми ᲂу҆мѡ́въ сни́де влⷣка: геѳсима́нїе, весели́сѧ.

Ви́ждь смире́нїе моѐ, и҆ и҆зми́ мѧ, ꙗ҆́кѡ зако́на твоегѡ̀ не забы́хъ.

Оу҆ч҃нкѡ́въ ли́къ весели́сѧ, зрѧ̀ гдⷭ҇а во сла́вѣ.

Сꙋдѝ сꙋ́дъ мо́й, и҆ и҆зба́ви мѧ̀, словесѐ ра́ди твоегѡ̀ живи́ мѧ.

Всѧ̀ землѧ̀ да взыгра́етъ, бг҃а па́ки сходѧ́ща дне́сь зрѧ́щи.

Дале́че ѿ грѣ̑шникъ спасе́нїе, ꙗ҆́кѡ ѡ҆правда́нїй твои́хъ не взыска́ша.

И҆зы́демъ ско́рѡ во срѣ́тенїе гдⷭ҇а, па́ки снизше́дшагѡ.

Щедрѡ́ты твоѧ̑ мнѡ́ги гдⷭ҇и, по сꙋдьбѣ̀ твое́й живи́ мѧ.

Да ᲂу҆слы́шимъ всѝ бг҃а, собесѣ́дꙋюща ны́нѣ мт҃ри всенепоро́чнѣй.

Мно́зи и҆згонѧ́щїи мѧ̀, и҆ стꙋжа́щїи мѝ, ѿ свидѣ́нїй твои́хъ не ᲂу҆клони́хсѧ.

Ѽ сладча́йшаѧ мт҃и, къ сладча́йшемꙋ сн҃ꙋ прїидѝ ра́дꙋѧсѧ.

Ви́дѣхъ неразꙋмѣва́ющыѧ, и҆ и҆ста́ѧхъ, ꙗ҆́кѡ слове́съ твои́хъ не сохрани́ша.

Ви́ждь, сѐ ны́нѣ сн҃ъ тво́й прїи́де, во своѧ̑ тебѐ прїѧ́ти.

Ви́ждь, ꙗ҆́кѡ за́пѡвѣди твоѧ̑ возлюби́хъ, гдⷭ҇и, по млⷭ҇ти твое́й живи́ мѧ.

Прїидо́хъ, гл҃етъ, да пред̾ лице́мъ сла́вы ѻ҆ц҃а̀ ꙗ҆ви́тсѧ сла́ва мт҃ре моеѧ̀.

Нача́ло слове́съ твои́хъ и҆́стина, и҆ во вѣ́къ всѧ̑ сꙋдьбы̀ пра́вды твоеѧ̀.

Сла́влю твоѐ бж҃е мо́й, къ сн҃ꙋ мт҃рь глаго́летъ, кра́йнее благоꙋтро́бїе.

Кнѧ́зи погна́ша мѧ̀ тꙋ́не, и҆ ѿ слове́съ твои́хъ ᲂу҆боѧ́сѧ се́рдце моѐ.

Сла́влю тѧ̀ сн҃ъ мо́й, и҆ покланѧ́юсѧ сла́вѣ твоегѡ̀ вели́чествїѧ.

Возра́дꙋюсѧ а҆́зъ ѡ҆ словесѣ́хъ твои́хъ, ꙗ҆́кѡ ѡ҆брѣта́ѧй коры́сть мно́гꙋ.

Бли́зъ ѻ҆ц҃а̀ моегѡ̀ прїидѝ, бли́жнѧѧ моѧ̀, ѿ землѝ воста́вши.

Непра́вдꙋ возненави́дѣхъ и҆ ѡ҆мерзи́хъ, зако́нъ же тво́й возлюби́хъ.

Ты̀ са́дъ заключе́нный, и҆дѣ́же дре́во жи́зни и҆ безсме́ртїѧ.

Седмери́цею дне́мъ хвали́хъ тѧ̀ ѡ҆ сꙋдьба́хъ пра́вды твоеѧ̀.

Ты̀ є҆сѝ и҆сто́чникъ запечатлѣ́нный, въ не́мже пото́къ сла́дости всенеизрече́нныѧ.

Ми́ръ мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна.

Пѣсносло́влю, сн҃е мо́й, бжⷭ҇тва̀ твоегѡ̀ пребж҃е́ственнагѡ держа́вꙋ.

Ча́ѧхъ спасе́нїѧ твоегѡ̀ гдⷭ҇и, и҆ за́пѡвѣди твоѧ̑ возлюби́хъ.

Пѣсносло́влю, бж҃е мо́й, снизхожде́нїе твоѐ и҆ чл҃вѣколю́бїе.

Сохранѝ дꙋша̀ моѧ̀ свидѣ̑нїѧ твоѧ̑ и҆ возлюбѝ ѧ҆̀ ѕѣлѡ̀.

Прїидѝ кра́снаѧ моѧ̀, да наслажда́ешисѧ красоты̀ сн҃а твоегѡ̀ и҆ созда́телѧ.

Сохрани́хъ за́пѡвѣди твоѧ̑ и҆ свидѣ̑нїѧ твоѧ̑, ꙗ҆́кѡ всѝ пꙋтїѐ моѝ пред̾ тобо́ю, гдⷭ҇и.

Прїидѝ, мт҃и моѧ̀, въ ра́дость бж҃е́ственнꙋю и҆ въ црⷭ҇тво.

Да прибли́житсѧ моле́нїе моѐ пред̾ тѧ̀ гдⷭ҇и, по словесѝ твоемꙋ̀ вразꙋми́ мѧ.

Прїидѝ марі́е, и҆дѣ́же спокланѧ́емь є҆́сть ѻ҆ц҃ъ, сн҃ъ, и҆ дх҃ъ.

Да вни́детъ проше́нїе моѐ пред̾ тѧ̀ гдⷭ҇и, по словесѝ твоемꙋ̀ и҆зба́ви мѧ̀.

Что́ ти возда́мъ бг҃очеловѣ́че сн҃е мо́й, раба̀ влⷣцѣ;

Ѿры́гнꙋтъ ᲂу҆стнѣ̀ моѝ пѣ́нїе, є҆гда̀ наꙋчи́ши мѧ̀ ѡ҆правда́нїємъ твои̑мъ.

Что̀ ны́нѣ тѝ принесꙋ̀ на нб҃сѝ, бж҃е мо́й, а҆́ще не дꙋ́шꙋ и҆ тѣ́ло;

Провѣща́етъ ѧ҆зы́къ мо́й словеса̀ твоѧ̑.

Сла́влю ѻ҆ц҃а̀, воспѣва́ю тѧ̀ сн҃а моего̀, и҆ покланѧ́юсѧ дх҃ꙋ.

Ꙗ҆́кѡ всѧ̑ за́пѡвѣди твоѧ̑ пра́вда.

Сла́ва тебѣ̀, бцⷣе, сла́ва твоемꙋ̀ ржⷭ҇твꙋ̀, сла́ва и҆ ᲂу҆спе́нїю.

Да бꙋ́детъ рꙋка̀ твоѧ̀ є҆́же спасти́ мѧ, ꙗ҆́кѡ за́пѡвѣди твоѧ̑ и҆зво́лихъ.

А҆да́мъ и҆ є҆́ѵа чꙋдѧ́хꙋсѧ, зрѧ́ще сла́вꙋ дв҃ы.

Возжела́хъ спасе́нїе твоѐ, гдⷭ҇и, и҆ зако́нъ тво́й поꙋче́нїе моѐ є҆́сть.

І҆ѡакі́мъ и҆ а҆́нна, блаже́ни є҆стѐ, ро́ждше мі́рови дще́рь.

Жива̀ бꙋ́детъ дꙋша̀ моѧ̀, и҆ восхва́литъ тѧ̀ и҆ сꙋдьбы̀ твоѧ̑ помо́гꙋтъ мнѣ̀.

Препросла́вленнꙋю, въ превы́спрєннѧѧ всели́вшꙋюсѧ, ꙗ҆́кѡ мт҃рь бж҃їю.

Заблꙋди́хъ ꙗ҆́кѡ ѻ҆вча̀ поги́бшее, взыщѝ раба̀ твоего̀, ꙗ҆́кѡ за́повѣдей твои́хъ не забы́хъ.

Ми́ръ цр҃кви, лю́демъ твои̑мъ спасе́нїе да́рꙋй, твои́мъ ᲂу҆спе́нїемъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Ѽ трⷪ҇це бж҃е мо́й, ѻ҆́ч҃е, сн҃е и҆ дш҃е, поми́лꙋй мі́ръ!

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Ви́дѣти сн҃а твоегѡ̀ црⷭ҇тво, сподо́би дв҃о твоѧ̑ рабы̑.

Та́же ѻ҆́ба ли́ка сті́хъ пе́рвый:

Ро́ди всѝ пѣ́снь погребе́нїю твоемꙋ̀ прино́сѧтъ, дв҃о.

И҆ пото́мъ бл҃гослове́нны, на гла́съ є҃.

Бл҃гослове́ннаѧ влⷣчце, просвѣти́ мѧ свѣ́томъ сн҃а твоегѡ̀.

А҆́гг҃льскїй собо́ръ ᲂу҆диви́сѧ, зрѧ̀ тебѐ въ ме́ртвыхъ вмѣни́вшꙋюсѧ, дꙋ́шꙋ же въ рꙋ́цѣ бг҃а преда́вшꙋю, и҆ съ бг҃омъ возше́дшꙋю, пренепоро́чнаѧ, со сла́вою бж҃е́ственною въ нбⷭ҇наѧ.

Бл҃гослове́ннаѧ влⷣчце, просвѣти́ мѧ свѣ́томъ сн҃а твоегѡ̀.

Почто̀ ра́дость со слеза́ми, бг҃опроповѣ́дницы, растворѧ́ете; прише́дъ близне́цъ, свы́ше вразꙋмлѧ́емь, приглаша́ше а҆по́столѡмъ: ви́дите вы̀ по́ѧсъ, и҆ ᲂу҆разꙋмѣ́йте, дв҃а воскре́се ѿ гро́ба.

Бл҃гослове́ннаѧ влⷣчце, просвѣти́ мѧ свѣ́томъ сн҃а твоегѡ̀.

Оу҆чени́къ, невѣ́ривый, влⷣчце, воскресе́нїю сн҃а твоегѡ̀, ны́нѣ ᲂу҆вѣрѧ́етъ про́чихъ ѡ҆ воста́нїи твое́мъ, глаго́лѧ: рыда́нїѧ вре́мѧ преста̀, не пла́чите, воскресе́нїе же дв҃ы рцы́те.

Бл҃гослове́ннаѧ влⷣчце, просвѣти́ мѧ свѣ́томъ сн҃а твоегѡ̀.

Бг҃онѡ́снымъ, дв҃о, ᲂу҆ч҃нкѡ́мъ собра́вшымсѧ ко гро́бꙋ твоемꙋ̀, и҆ рыда́ющымъ, ꙗ҆ви́выйсѧ ѳѡма̀ речѐ, глаго́лѧ: что̀ съ ме́ртвыми живꙋ́ю помышлѧ́ете; воскре́се бо, ꙗ҆́кѡ бг҃а роди́тельница.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Поклони́мсѧ ѻ҆ц҃ꙋ̀, и҆ є҆гѡ̀ сн҃ови, и҆ ст҃о́мꙋ дꙋ́хꙋ, ст҃ѣ́й трⷪ҇цѣ, во є҆ди́номъ сꙋществѣ̀, съ серафі́мы зовꙋ́ще, ст҃ъ, ст҃ъ, ст҃ъ є҆сѝ гдⷭ҇и.

И҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Жизнода́вца ро́ждши, къ жи́зни нестарѣ́емѣй прешла̀ є҆сѝ: ра́дость же дв҃о въ печа́ли мѣ́сто подала̀ є҆сѝ ᲂу҆ч҃никѡ́мъ, и҆з̾ гро́ба тридне́внѡ воста́вшаѧ дв҃о, ꙗ҆́коже и҆ гдⷭ҇ь.

А҆ллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]

Є҆гда̀ же пою́тсѧ бл҃гослове́нны, кадѧ́тъ два̀ дїа́кона. По бл҃гослове́нныхъ є҆ктенїа̀ ма́лаѧ.

Возгла́съ: Ꙗ҆́кѡ тѧ̀ хва́лѧтъ всѧ̑ си́лы нбⷭ҇ныѧ, ѻ҆ц҃а̀ и҆ сн҃а и҆ ст҃а́го дх҃а, и҆ тебѣ̀ сла́вꙋ возсыла́ютъ, ны́нѣ и҆ при́снѡ, и҆ во вѣ́ки вѣкѡ́въ. (с. 766)

Степе́нна, а҃ а҆нтїфѡ́нъ д҃ гла́са: Ѿ ю҆́ности. Та́же прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Всѧ́кое дыха́нїе:

Ѿ лꙋкѝ ст҃а́гѡ є҆ѵⷢ҇лїа чте́нїе.

Во днѝ ѻ҆́ны, воста́вши марїа́мъ, и҆́де въ гѡ́рнѧѧ со тща́нїемъ во гра́дъ і҆ꙋ́довъ. И҆ вни́де въ до́мъ заха́рїинъ, и҆ цѣлова̀ є҆лїсаве́тъ. И҆ бы́сть, ꙗ҆́кѡ ᲂу҆слы́ша є҆лїсаве́тъ цѣлова́нїе мр҃і́ино, взыгра́сѧ млⷣнецъ во чре́вѣ є҆ѧ̀: и҆ и҆спо́лнисѧ дх҃а ст҃а є҆лїсаве́тъ. И҆ возопѝ гла́сомъ ве́лїимъ, и҆ речѐ: бл҃гослове́нна ты̀ въ жена́хъ, и҆ бл҃гослове́нъ пло́дъ чре́ва твоегѡ̀. И҆ ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; се́ бо ꙗ҆́кѡ бы́сть гла́съ цѣлова́нїѧ твоегѡ̀ во ᲂу҆́шїю мое́ю, взыгра́сѧ млⷣнецъ ра́дощами во чре́вѣ мое́мъ. И҆ бл҃же́нна вѣ́ровавшаѧ, ꙗ҆́кѡ бꙋ́детъ соверше́нїе глагѡ́ланнымъ є҆́й ѿ гдⷭ҇а. И҆ речѐ мр҃їа́мъ: вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆блажа́тъ мѧ̀ всѝ ро́ди. Ꙗ҆́кѡ сотворѝ мнѣ̀ вели́чїе си́льный, и҆ свѧ́то и҆́мѧ є҆гѡ̀. Пребы́сть же марїа́мъ съ не́ю ꙗ҆́кѡ трѝ мѣ́сѧцы, и҆ возврати́сѧ въ до́мъ сво́й.

Сла́ва: Моли́твами бцⷣы: И҆ ны́нѣ, то́йже.

Стїхи́ра, гла́съ ѕ҃. Вѷзанті́ево.

Є҆гда̀ преставле́нїе пречⷭ҇тагѡ твоегѡ̀ тѣ́ла ᲂу҆готовлѧ́шесѧ, тогда̀ а҆пⷭ҇ли ѡ҆бстоѧ́ще ѻ҆́дръ, съ тре́петомъ зрѧ́хꙋ тѧ̀: и҆ ѻ҆́ви ᲂу҆́бѡ взира́юще на тѣ́ло, ᲂу҆́жасомъ ѡ҆держи́ми бѧ́хꙋ, пе́тръ же со слеза́ми вопїѧ́ше тѝ: ѽ дв҃о, ви́ждꙋ тѧ̀ ꙗ҆́снѡ просте́ртꙋ про́стꙋ, живота̀ всѣ́хъ и҆ ᲂу҆дивлѧ́юсѧ: въ не́й же всели́сѧ бꙋ́дꙋщїѧ жи́зни наслажде́нїе. но ѽ пречⷭ҇таѧ, моли́сѧ прилѣ́жнѡ сн҃ꙋ и҆ бг҃ꙋ твоемꙋ̀, спасти́сѧ ста́дꙋ твоемꙋ̀ невреди́мꙋ.

По се́мъ: Спасѝ бж҃е лю́ди твоѧ̑:

И҆ по возгла́сѣ канѡ́нъ мине́и.

Въ сїѐ вре́мѧ цѣлꙋ́емъ ст҃ꙋ́ю і҆кѡ́нꙋ, и҆ помазꙋ́етъ настоѧ́тель ѡ҆сщ҃е́ннымъ є҆ле́емъ.

І҆рмо́съ по два́жды. Канѡ́нъ чте́мъ ѻ҆бои́хъ творцє́въ, не повторѧ́юще стїхѡ́въ: катава́сїа пое́тсѧ ѻ҆бои́ми ли́ки втора́гѡ творца̀: Ѿве́рзꙋ ᲂу҆ста̀ моѧ̑.

Пѣ́снь а҃.

І҆рмо́съ: Преꙋкраше́ннаѧ бж҃е́ственною сла́вою, сщ҃е́ннаѧ и҆ сла́внаѧ дв҃о па́мѧть твоѧ̀, всѧ̑ собра̀ къ весе́лїю вѣ̑рныѧ, начина́ющей марїа́мѣ, съ ли́ки и҆ тѷмпа́ны, твоемꙋ̀ пою́щыѧ є҆диноро́дномꙋ: сла́внѡ ꙗ҆́кѡ просла́висѧ.

Да провожда́ютъ невеще́ственный чи́нове нб҃оше́ственное въ сїѡ́нъ бж҃е́ственное тѣ́ло твоѐ: внеза́пꙋ же сте́кшесѧ а҆пⷭ҇лъ мно́жество, ѿ конє́цъ, бцⷣе, тебѣ̀ предста́ша а҆́бїе: съ ни́миже чтⷭ҇аѧ, твою̀ честнꙋ́ю, дв҃о, па́мѧть сла́вимъ.

Побѣ́дныѧ по́чєсти взѧла̀ є҆сѝ на є҆стество̀, чтⷭ҇аѧ, бг҃а ро́ждши: ѻ҆ба́че же, подо́бѧщисѧ творцꙋ̀ твоемꙋ̀ и҆ сн҃ꙋ, па́че є҆стества̀ повинꙋ́ешисѧ є҆сте́ствєннымъ зако́нѡмъ. тѣ́мже ᲂу҆ме́рши, съ сн҃омъ востае́ши вѣ́чнꙋющи.

Дѣ́вы ѻ҆трокѡви́цы, съ марїамі́ею прⷪ҇ро́чицею пѣ́снь и҆схо́днꙋю ны́нѣ воскли́кните, дв҃а бо и҆ є҆ди́на бг҃омт҃и, ко прїѧ́тїю нбⷭ҇номꙋ преставлѧ́етсѧ.

Досто́йнѡ, ꙗ҆́кѡ ѡ҆дꙋшевле́нное тѧ̀ нб҃о, прїѧ́ша нбⷭ҇наѧ, пречⷭ҇таѧ, бж҃е́ственнаѧ селє́нїѧ: и҆ предста̀ свѣ́тлѡ ᲂу҆кра́шена, ꙗ҆́кѡ невѣ́ста всенепоро́чнаѧ цр҃ю̀ и҆ бг҃ꙋ.

Катава́сїа: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ ᲂу҆спе́нїе.

Пѣ́снь г҃.

І҆рмо́съ: Содѣ́тельнаѧ и҆ содержи́тельнаѧ всѣ́хъ, бж҃їѧ мꙋ́дросте и҆ си́ло, непрекло́ннꙋ, недви́жимꙋ цр҃ковь ᲂу҆твердѝ хрⷭ҇тѐ: є҆ди́нъ бо є҆сѝ ст҃ъ, во ст҃ы́хъ почива́ѧй.

Женꙋ́ тѧ ме́ртвенꙋ, но па́че є҆стества̀ и҆ мт҃рь бж҃їю, ви́дѣвше всенепоро́чнаѧ сла́внїи а҆пⷭ҇толи, ᲂу҆жа́снѡ прикаса́хꙋсѧ рꙋка́ми сла́вою ѡ҆блиста́ющей, ꙗ҆́кѡ бг҃опрїѧ́тное селе́нїе ви́дѧще.

Пости́же рꙋ́цѣ досади́тєльныѧ де́рзагѡ, ᲂу҆сѣче́нїемъ сꙋ́дъ нане́съ: бг҃ꙋ сохра́ншꙋ че́сть ѡ҆дꙋшевле́нномꙋ кївѡ́тꙋ, сла́вою бж҃ества̀, въ не́мже сло́во пло́ть бы́сть.

Ѿ ме́ртвыхъ чре́слъ произве́дшисѧ, є҆стество́мъ подо́бна чтⷭ҇аѧ, и҆схожде́нїе разрѣшѝ: ро́ждши же сꙋ́щꙋю жи́знь, къ жи́зни преста́висѧ бж҃е́ственнѣй и҆ ѵ҆поста́снѣй.

Ли́къ бг҃осло́вѡвъ ѿ конє́цъ, свы́ше же а҆́гг҃лъ мнѡ́жества, къ сїѡ́нꙋ и҆дѧ́хꙋ, всеси́льнымъ манове́нїемъ, достодо́лжнѡ влⷣчце, твоемꙋ̀ погребе́нїю слꙋжа́ще.

Катава́сїа: Твоѧ̑ пѣсносло́вцы бцⷣе, живы́й и҆ незави́стный и҆сто́чниче: ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бж҃е́ственнѣй па́мѧти твое́й, вѣнцє́въ сла́вы сподо́би.

Ѵ҆пакоѝ, гла́съ и҃:

Бл҃жи́мъ тѧ̀ всѝ ро́ди бцⷣе дв҃о, въ тѧ́ бо невмѣсти́мый хрⷭ҇то́съ бг҃ъ на́шъ вмѣсти́тисѧ бл҃говолѝ. блаже́ни є҆смы̀ и҆ мы̀, предста́тельство тѧ̀ и҆мꙋ́ще: де́нь бо и҆ но́щь мо́лишисѧ ѡ҆ на́съ, и҆ ски́птры црⷭ҇твїѧ твои́ми мл҃твами ᲂу҆твержда́ютсѧ. тѣ́мъ воспѣва́юще вопїе́мъ тѝ: ра́дꙋйсѧ бл҃года́тнаѧ, гдⷭ҇ь съ тобо́ю.

Пѣ́снь д҃.

І҆рмо́съ: Рѣ́чи прⷪ҇ро́кѡвъ и҆ гада́нїѧ воплоще́нїе проѧви́ша ѿ дв҃ы твоѐ, хрⷭ҇тѐ: сїѧ́нїе блиста́нїѧ твоегѡ̀, во свѣ́тъ ꙗ҆зы́кѡвъ и҆зы́детъ, и҆ возгласи́тъ тебѣ̀ бе́здна съ весе́лїемъ, си́лѣ твое́й сла́ва чл҃вѣколю́бче.

Ви́дите лю́дїе, и҆ чꙋди́тесѧ: гора́ бо ст҃а́ѧ, и҆ ꙗ҆́вственнаѧ бг҃ꙋ, въ нбⷭ҇ныѧ ѻ҆би́тєли превы́шше взе́млетсѧ: нб҃о земно́е въ нбⷭ҇ное и҆ нетлѣ́нное селе́нїе вселѧ́емо.

Жи́зни прⷭ҇носꙋ́щныѧ и҆ лꙋ́чшїѧ, сме́рть твоѧ̀ бы́сть прехожде́нїе чтⷭ҇аѧ, ѿ привре́менныѧ къ бж҃е́ственнѣй вои́стиннꙋ и҆ непроходи́мѣй, преставлѧ́ѧ тѧ̀ чтⷭ҇аѧ, въ весе́лїи сн҃а зрѣ́ти твоего̀ и҆ гдⷭ҇а.

Взѧ́шасѧ двє́ри нбⷭ҇ныѧ, и҆ а҆́гг҃ли воспѣ́ша: и҆ прїѧ́тъ хрⷭ҇то́съ дѣ́вства своеѧ̀ мт҃ре сосꙋ́дъ: херꙋві́ми под̾ѧ́ша тѧ̀ съ весе́лїемъ, серафі́ми же сла́вѧтъ ра́дꙋющесѧ.

Чꙋ́до бѧ́ше зрѣ́ти, нб҃о всѣ́хъ цр҃ѧ̀ ѡ҆дꙋшевле́нное, и҆спражнє́нїѧ преходѧ́щее земна̑ѧ, ꙗ҆́кѡ чꙋ́дна дѣла̀ твоѧ̑: сла́ва си́лѣ твое́й гдⷭ҇и.

А҆́ще и҆ непости́жный сеѧ̀ пло́дъ, и҆́мже нб҃са̀ бы́ша, погребе́нїѧ прїѧ́тъ во́лею ꙗ҆́кѡ ме́ртвъ: ка́кѡ погребе́нїѧ ѿве́ржетсѧ, неискꙋсобра́чнѡ ро́ждшаѧ;

Въ преставле́нїи твое́мъ мт҃и бж҃їѧ, простра́ннѣйшее тѣ́ло твоѐ и҆ бг҃опрїѧ́тное, а҆́гг҃льскаѧ вѡ́инства, сщ҃е́нными кри́лы, тре́петомъ и҆ ра́достїю покрыва́хꙋ.

Катава́сїа: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й гдⷭ҇и.

Пѣ́снь є҃.

І҆рмо́съ: Бж҃їю и҆ неизрече́ннꙋю добро́тꙋ, добродѣ́телей твои́хъ хрⷭ҇тѐ и҆сповѣ́мъ: ѿ присносꙋ́щныѧ бо сла́вы, соприсносꙋ́щное и҆ ѵ҆поста́сное возсїѧ́вый сїѧ́нїе, и҆з̾ дѣ́вственныѧ ᲂу҆тро́бы, сꙋ́щымъ во тмѣ̀ и҆ сѣ́ни, вопло́щсѧ, возсїѧ́лъ є҆сѝ сл҃нце.

Ꙗ҆́кѡ на ѻ҆́блацѣ дв҃о, а҆пⷭ҇льскїй ли́къ носи́мь, къ сїѡ́нꙋ ѿ конє́цъ, слꙋжи́ти тебѣ̀, ѻ҆́блакꙋ ле́гкомꙋ собира́шесѧ: ѿ неѧ́ же вы́шнїй бг҃ъ, сꙋ́щымъ во тмѣ̀ и҆ сѣ́ни, пра́ведное возсїѧ̀ сл҃нце.

Трꙋ́бъ бг҃опрїѧ́тнѣйшїи ѧ҆зы́цы бг҃осло́вныхъ мꙋже́й, благогла́снѣйше бцⷣѣ вопїѧ́хꙋ, и҆схо́днꙋю возглаша́юще пѣ́снь дх҃омъ: ра́дꙋйсѧ нетлѣ́нный и҆сто́чниче, бж҃їѧ живонача́льнагѡ и҆ спаси́тельнагѡ всѣ̑мъ воплоще́нїѧ.

Да возгласѧ́тъ трꙋбы̀ бг҃осло́вѡвъ дне́сь: ѧ҆зы́къ же многовѣща́нный чл҃вѣ́ческїй, ны́нѣ да восхва́литъ: да ѡ҆гласи́тъ же воздꙋ́хъ, безмѣ́рнымъ сїѧ́ѧ свѣ́томъ: а҆́гг҃ли да пою́тъ пречⷭ҇тыѧ дв҃ы ᲂу҆спе́нїе.

Сосꙋ́дъ подоба́ше и҆збра́нный, пѣ́нїемъ тѝ ве́сь ᲂу҆дивлѧ́емь дв҃и́це и҆схо́денъ, ве́сь ѡ҆свѧще́нъ бг҃ови, всѣ̑мъ бг҃опрїѧ́тенъ, и҆ се́й и҆́стиннѡ ꙗ҆влѧ́емый бцⷣе всепѣ́таѧ.

Катава́сїа: Оу҆жасо́шасѧ всѧ́чєскаѧ, ѡ҆ чтⷭ҇нѣ́мъ ᲂу҆спе́нїи твое́мъ: ты́ бо неискꙋсобра́чнаѧ дв҃о ѿ землѝ преста́виласѧ є҆сѝ къ вѣ́чнымъ ѻ҆би́телемъ, и҆ къ безконе́чнѣй жи́зни, всѣ̑мъ воспѣва́ющымъ тѧ̀ спасе́нїе подава́ющаѧ.

Пѣ́снь ѕ҃.

І҆рмо́съ: Морскі́й пꙋчиноро́дный ки́товъ внꙋ́треннїй ѻ҆́гнь, тридне́внагѡ твоегѡ̀ погребе́нїѧ проѡбраже́нїе, є҆гѡ́же і҆ѡ́на прⷪ҇ро́къ показа́сѧ: спасе́нъ бо ꙗ҆́кѡ и҆ предпосла́сѧ, неврежде́нъ вопїѧ́ше: пожрꙋ́ ти со гла́сомъ хвале́нїѧ гдⷭ҇и.

Дае́тъ тебѣ̀ ꙗ҆̀же превы́ше є҆стества̀, цр҃ь всѣ́хъ бг҃ъ: въ ржⷭ҇твѣ́ бо дв҃ꙋ ꙗ҆́коже сохранѝ, (с. 774) та́кѡ во гро́бѣ тѣ́ло соблюдѐ нетлѣ́нно: и҆ спросла́ви бж҃е́ственнымъ преставле́нїемъ, че́сть тебѣ̀ ꙗ҆́кѡ сн҃ъ ма́тери да́рꙋѧ.

Вои́стиннꙋ тѧ̀ ꙗ҆́кѡ свѣ́телъ свѣ́щникъ невеще́ственнагѡ свѣ́та, кади́льницꙋ златꙋ́ю бж҃е́ственнагѡ ᲂу҆́глѧ, во ст҃а̑ѧ ст҃ы́хъ вселѝ: рꙋ́чкꙋ и҆ же́злъ, скрижа́ль бг҃опи́саннꙋю, ковче́гъ ст҃ы́й, трапе́зꙋ сло́ва жи́зни, дв҃о ржⷭ҇тво̀ твоѐ.

И҆з̾ тебѐ жи́знь возсїѧ̀, ключѝ дѣ́вства не рꙋши́вши: ка́кѡ ᲂу҆́бѡ пречⷭ҇тое и҆ живонача́льное твоѐ тѣ́ло, и҆скꙋше́нїѧ сме́рти бы́сть прича́стно;

Жи́зни бы́вши хра́мъ, жи́знь присносꙋ́щнꙋю ᲂу҆лꙋчи́ла є҆сѝ: сме́ртїю бо къ животꙋ̀ преминꙋ́ла є҆сѝ, ꙗ҆́же жи́знь ро́ждши воѷпоста́снꙋю.

Катава́сїа: Бж҃е́ственное сїѐ и҆ всечⷭ҇тно́е соверша́юще пра́зднество, бг҃омꙋ́дрїи бг҃омт҃ре, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Конда́къ, гла́съ в҃:

Въ мл҃твахъ неꙋсыпа́ющꙋю бцⷣꙋ, и҆ въ предста́тельствахъ непрело́жное ᲂу҆пова́нїе, гро́бъ и҆ ᲂу҆мерщвле́нїе не ᲂу҆держа́ста: ꙗ҆́коже бо живота̀ (с. 775) мт҃рь, къ животꙋ̀ преста́ви, во ᲂу҆тро́бꙋ всели́выйсѧ приснодѣ́вственнꙋю.

І҆́косъ: Ѡ҆градѝ моѧ̑ помышлє́нїѧ хрⷭ҇тѐ мо́й, и҆́бо стѣ́нꙋ мі́ра воспѣ́ти дерза́ю, чтⷭ҇ꙋю мт҃рь твою̀: на столпѣ̀ глагѡ́лъ ᲂу҆крѣпи́ мѧ, и҆ въ тѧ́жкихъ мы́слехъ застꙋпи́ мѧ: ты́ бо взыва́ющымъ и҆ просѧ́щымъ вѣ́рою, молє́нїѧ и҆сполнѧ́еши. ты̀ мнѣ̀ ᲂу҆̀бо да́рꙋй ѧ҆зы́къ прино́сенъ, и҆ по́мыслъ непосты́денъ: всѧ́кое бо даѧ́нїе сїѧ́нїѧ ѿ тебѐ низпосыла́етсѧ свѣтопода́телю, во ᲂу҆тро́бꙋ всели́выйсѧ приснодѣ́вственнꙋю.

Пѣ́снь з҃.

І҆рмо́съ: Безстꙋ́днѣй ꙗ҆́рости же и҆ ѻ҆гню̀, бж҃е́ственное жела́нїе сопротивлѧ́ѧсѧ, ѻ҆́гнь ᲂу҆́бѡ ѡ҆роша́ше, ꙗ҆́рости же смѣѧ́шесѧ, бг҃одохнове́нною преподо́бныхъ тривѣща́нною цѣвни́цею, противовѣща́ѧ мꙋсїкі́йскимъ ѻ҆рга́нѡмъ посредѝ пла́мене: препросла́вленный ѻ҆ц҃є́въ и҆ на́шъ бж҃е бл҃гослове́нъ є҆сѝ.

Бг҃одѣ́ланныѧ скрижа̑ли мѡѷсе́й, пи́санныѧ бж҃е́ственнымъ дх҃омъ, ꙗ҆́ростїю сокрꙋшѝ: но сегѡ̀ влⷣка, ро́ждшꙋю неврежде́ннꙋ въ нбⷭ҇ныѧ сохра́нь до́мы, ны́нѣ внꙋ́трь вселѝ. съ не́ю и҆гра́юще вопїе́мъ хрⷭ҇тꙋ̀: препросла́вленный ѻ҆ц҃є́въ и҆ на́шъ бж҃е бл҃гослове́нъ є҆сѝ.

Въ кѷмва́лѣхъ ᲂу҆сты̀ чи́стыми, мꙋсїкі́йски же се́рдцемъ свѣ́тлымъ, доброгла́сною трꙋбо́ю, высо́кою мы́слїю, дв҃ы и҆ чтⷭ҇ыѧ въ наро́читый и҆збра́нный де́нь преставле́нїѧ, дѣ́тельными пле́щꙋще рꙋка́ми вопїе́мъ: препросла́вленный ѻ҆ц҃є́въ и҆ на́шъ бж҃е бл҃гослове́нъ є҆сѝ.

Бг҃омꙋ́дрїи собери́тесѧ лю́дїе: бж҃їѧ бо сла́вы селе́нїе, ѿ сїѡ́на преставлѧ́етсѧ къ нбⷭ҇номꙋ жили́щꙋ, и҆дѣ́же гла́съ чи́стъ пра́зднꙋющихъ, гла́съ несказа́ннагѡ ра́дованїѧ, и҆ въ весе́лїи вопїю́щихъ хрⷭ҇тꙋ̀: препросла́вленный ѻ҆ц҃є́въ и҆ на́шъ бж҃е бл҃гослове́нъ є҆сѝ.

Ю҆́нѡши и҆ дѣ̑вы, дв҃ыѧ же и҆ бг҃омт҃ре па́мѧть чтꙋ́ще, ста́рцы и҆ кнѧ́зи, ца́рїе и҆ сꙋдїѝ по́йте: ѻ҆ц҃ъ на́шихъ гдⷭ҇и и҆ бж҃е бл҃гослове́нъ є҆сѝ.

Да вострꙋ́бѧтъ трꙋбо́ю дх҃о́вною го́ры нбⷭ҇ныѧ, да ра́дꙋютсѧ хо́лми, и҆ да и҆гра́ютъ бж҃е́ственнїи а҆пⷭ҇толи: цр҃и́ца къ сн҃ꙋ преставлѧ́етсѧ, съ ни́мъ ца́рствꙋющи. (с. 777)

Всесщ҃е́нное преставле́нїе, бж҃е́ственныѧ твоеѧ̀ и҆ нетлѣ́нныѧ мт҃ре, премі́рныѧ вы́шнихъ си́лъ совокꙋпѝ чи́ны, весели́тисѧ съ сꙋ́щими на землѝ, тебѣ̀ пою́щими: бж҃е бл҃гослове́нъ є҆сѝ.

Катава́сїа: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ бл҃гослове́нъ є҆сѝ.

Пѣ́снь и҃.

І҆рмо́съ: Пла́мень ѡ҆роша́ющь прпⷣбныѧ, ѕлочести̑выѧ же попалѧ́ющь, а҆́гг҃лъ бж҃їй всемо́щный показа̀ ѻ҆трокѡ́мъ: живонача́льный же и҆сто́чникъ содѣ́ла бцⷣꙋ, тлю̀ сме́рти и҆ живо́тъ точа́щꙋ, пою́щымъ: содѣ́телѧ є҆ди́наго пои́мъ и҆зба́вленнїи, и҆ превозно́симъ во всѧ̑ вѣ́ки.

Глаго́лы послѣ́довахꙋ бж҃е́ственномꙋ ковче́гꙋ сщ҃е́нномꙋ, всѐ мно́жество бг҃осло́вѡвъ въ сїѡ́нѣ: ка́мѡ и҆́деши ны́нѣ ски́нїе, зовꙋ́ще, бг҃а жива́гѡ; не преста́й призира́ющи вѣ́рою пою́щыѧ: содѣ́телѧ є҆ди́наго пое́мъ и҆зба́вленнїи, и҆ превозно́симъ во всѧ̑ вѣ́ки.

Ꙗ҆́коже воздѣ́вши рꙋ́цѣ, и҆схо́диши всенепоро́чнаѧ, рꙋ́цѣ и҆́миже бг҃а носи́ла є҆сѝ пло́тїю, со дерзнове́нїемъ ꙗ҆́кѡ мт҃и рекла́ є҆си къ рожде́нномꙋ: ꙗ҆̀же мѝ да́лъ є҆сѝ, во вѣ́ки сохранѝ, вопїю́щыѧ тебѣ̀: содѣ́телѧ є҆ди́наго пое́мъ и҆зба́вленнїи, и҆ превозно́симъ во всѧ̑ вѣ́ки.

Па́мѧть твою̀ чтⷭ҇аѧ дв҃о, нача́ла же и҆ вла̑сти и҆ си̑лы, а҆́гг҃ли, а҆рха́гг҃ли, прⷭ҇то́ли, госпо́дства, херꙋві́ми сла́вѧтъ, и҆ стра́шнїи серафі́ми, чл҃вѣ́ческїй же ро́дъ пое́мъ, и҆ превозно́симъ во всѧ̑ вѣ́ки.

И҆́же стра́ннѡ всели́выйсѧ бцⷣе, въ чи́стое чре́во твоѐ воплоща́емь, се́й всесвѧще́нный дх҃ъ тво́й прїе́мь, ᲂу҆ себѐ ᲂу҆поко́и, ꙗ҆́кѡ должни́къ сн҃ъ. тѣ́мже тѧ̀ пое́мъ дв҃о, и҆ превозно́симъ во всѧ̑ вѣ́ки.

Ѽ вы́ше ᲂу҆ма̀ чꙋде́съ приснодѣ́вы же и҆ бг҃омт҃ре! во гро́бъ бо все́льшисѧ, показа̀ ра́й. є҆мꙋ́же предстоѧ́ще дне́сь, ра́дꙋющесѧ пое́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Катава́сїа: Ѻ҆́троки бл҃гочести́выѧ въ пещѝ, ржⷭ҇тво̀ бг҃оро́дичо спасло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

На ѳ҃ пѣ́сни Чтⷭ҇нѣ́йшꙋю не пое́мъ, но пое́мъ припѣ́вы пра́здника: Ро́ди всѝ бл҃жи́мъ тѧ̀ є҆ди́нꙋ бцⷣꙋ: и҆лѝ, А҆́гг҃ли ᲂу҆спе́нїе пречⷭ҇тыѧ ви́дѣвше ᲂу҆диви́шасѧ, ка́кѡ дв҃аѧ восхо́дитъ ѿ землѝ на нб҃о.

Та́же і҆рмо́съ: Побѣжда́ютсѧ є҆стества̀ ᲂу҆ста́вы: И҆ вторы́й ли́къ пое́тъ то́йже припѣ́въ и҆ і҆рмо́съ. И҆ на кі́йждо тропа́рь пою́тъ то́йже припѣ́въ по є҆ди́ножды.

Пѣ́снь ѳ҃.

І҆рмо́съ: Побѣжда́ютсѧ є҆стества̀ ᲂу҆ста́вы, въ тебѣ̀ дв҃о чи́стаѧ: дѣ́вствꙋетъ бо ржⷭ҇тво̀, и҆ живо́тъ пред̾ѡбрꙋча́етъ сме́рть: по рождествѣ̀ дв҃а, и҆ по сме́рти жива̀, спаса́еши при́снѡ бцⷣе наслѣ́дїе твоѐ.

Дивлѧ́хꙋсѧ а҆́гг҃льскїѧ си́лы, въ сїѡ́нѣ смотрѧ́юще своего̀ влⷣкꙋ, же́нскꙋю дꙋ́шꙋ рꙋка́ми носѧ́щаго: пречи́стѡ бо ро́ждшей, сынолѣ́пнѡ провозглаша́ше: грѧдѝ чтⷭ҇аѧ, съ сн҃омъ и҆ бг҃омъ просла́влена бꙋ́ди.

Ѡ҆прѧ́та ли́къ а҆пⷭ҇льскїй бг҃опрїѧ́тное тѣ́ло твоѐ, со стра́хомъ зрѧ́ще, и҆ гла́сомъ ве́лїимъ вѣща́юще: въ нбⷭ҇ныѧ до́мы къ сн҃ꙋ восходѧ́щи, спаса́еши при́снѡ бцⷣе наслѣ́дїе твоѐ.

Посе́мъ втора́гѡ канѡ́на припѣ́въ пою́тъ на кі́йждо тропа́рь, по є҆ди́ножды. Прїиди́те въ сїѡ́нъ, на бж҃е́ственнꙋю и҆ тꙋ́чнꙋю го́рꙋ жива́гѡ бг҃а, возра́дꙋемсѧ, бцⷣꙋ зрѧ́ще: къ ѕѣлѡ́ бо лꙋ́чшей и҆ бж҃е́ственнѣй сѣ́ни, ꙗ҆́кѡ мт҃рь, сїю̀ во ст҃а̑ѧ ст҃ы́хъ хрⷭ҇то́съ преста́ви.

Прїиди́те вѣ́рнїи, ко гро́бꙋ пристꙋ́пимъ бж҃їѧ мт҃ре, и҆ ѡ҆б̾и́мемъ сердцы̀ и҆ ᲂу҆стна́ми ѻ҆чесы̀ и҆ лице́мъ чи́стѡ прикаса́ющесѧ, и҆ почерпа́юще и҆сцѣле́нїй незави́стныѧ да́ры ѿ и҆сто́чника приснотекꙋ́щагѡ.

Прїимѝ ѿ на́съ пѣ́снь и҆схо́днꙋю мт҃и жива́гѡ бг҃а, и҆ свѣтоно́сною твое́ю и҆ бж҃е́ственною ѡ҆сѣнѝ бл҃года́тїю: хрⷭ҇толю́бнымъ лю́демъ ми́ръ, грѣхѡ́въ ѡ҆ставле́нїе пою́щымъ и҆ дꙋша́мъ спасе́нїе подаю́щи.

Та́же ѻ҆́ба ли́ка сше́дшесѧ вкꙋ́пѣ, пою́тъ втора́гѡ канѡ́на припѣ́въ и҆ катава́сїю.

Катава́сїа: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное преставле́нїе бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о.

И҆ покло́нъ.

Свѣти́ленъ. Подо́бенъ: Нб҃о ѕвѣзда́ми.

А҆пⷭ҇ли ѿ конє́цъ совокꙋ́пльшесѧ здѣ̀, въ геѳсима́нстѣй ве́си, погреби́те тѣ́ло моѐ: и҆ ты̀ сн҃е и҆ бж҃е мо́й, прїимѝ дх҃ъ мо́й. [Три́жды.]

На хвали́техъ стїхи̑ры на д҃, гла́съ д҃.

Подо́бенъ: Ꙗ҆́кѡ до́блѧ:

Въ сла́вномъ ᲂу҆спе́нїи твое́мъ нб҃са̀ ра́дꙋютсѧ, и҆ а҆́гг҃льскаѧ возра́довашасѧ вѡ́инства: всѧ́ же землѧ̀ весели́тсѧ, пѣ́снь тебѣ̀ и҆схо́днꙋю провозглаша́ющи, мт҃ри всѣ́ми влⷣчествꙋющагѡ, неискꙋсобра́чнаѧ прест҃а́ѧ дв҃о, ꙗ҆́же ро́дъ чл҃вѣ́ческїй и҆зба́вльшаѧ прароди́тельнагѡ ѡ҆сꙋжде́нїѧ. [Два́жды].

Ѿ конє́цъ стеко́шасѧ а҆пⷭ҇лѡвъ лꙋ́чшїи, бг҃онача́льнымъ манове́нїемъ, погребстѝ тѧ̀, и҆ ѿ землѝ взе́млемꙋ тѧ̀ къ высотѣ̀ зрѧ́ще, гла́съ гаврїи́ловъ ра́достїю вопїѧ́хꙋ тебѣ̀: ра́дꙋйсѧ носи́ло бж҃ества̀ всегѡ̀: ра́дꙋйсѧ є҆ди́на, земна̑ѧ съ вы́шними ржⷭ҇тво́мъ твои́мъ совокꙋ́пльшаѧ.

Ꙗ҆́же живо́тъ ро́ждшаѧ, къ жи́зни преминꙋ́ла є҆сѝ, чтⷭ҇ны́мъ ᲂу҆спе́нїемъ твои́мъ, безсме́ртнѣй, дорѷносѧ́щымъ тѧ̀ а҆́гг҃лѡмъ, нача́лѡмъ и҆ си́ламъ, а҆пⷭ҇лѡмъ и҆ прⷪ҇ро́кѡмъ, и҆ все́й тва́ри: прїе́мшꙋ же нетлѣ́нными дла́нми сн҃ꙋ твоемꙋ̀, непоро́чнꙋю дꙋ́шꙋ твою̀, дв҃о мт҃и бг҃оневѣ́сто.

Сла́ва, и҆ ны́нѣ, гла́съ ѕ҃:

На безсме́ртное твоѐ ᲂу҆спе́нїе, бцⷣе мт҃и живота̀, ѻ҆́блацы а҆пⷭ҇лы по воздꙋ́хꙋ восхища́хꙋ, и҆ по мі́рꙋ разсѣ́ѧнныѧ, во є҆ди́номъ ли́цѣ предста́ша прест҃о́мꙋ твоемꙋ̀ тѣ́лꙋ: є҆́же и҆ погре́бше чтⷭ҇нѡ, гла́съ тебѣ̀ гаврїи́ловъ пою́ще вопїѧ́хꙋ: ра́дꙋйсѧ бл҃года́тнаѧ дв҃о, мт҃и безневѣ́стнаѧ, гдⷭ҇ь съ тобо́ю. съ ни́ми же ꙗ҆́кѡ сн҃а твоего̀ и҆ бг҃а на́шего молѝ, спасти́сѧ дꙋша́мъ на́шымъ.

Славосло́вїе вели́кое. По славосло́вїи тропа́рь: Въ ржⷭ҇твѣ̀ двⷭ҇тво сохрани́ла є҆сѝ. Въ концѣ̀ а҃ часа̀, вмѣ́стѡ Взбра́нной воево́дѣ, пое́тсѧ конда́къ: Въ мл҃твахъ неꙋсыпа́ющꙋю.

Наꙋ́трїе пред̾ водоѡсщ҃е́нїемъ, чте́тсѧ а҆ка́ѳїстъ на ᲂу҆спе́нїе прест҃ы́ѧ бцⷣы, и҆ по водоѡсщ҃е́нїи ѡ҆кроплѧ́ютсѧ крⷭ҇ты̀ и҆ ма́лыѧ хлѣ́бы длѧ раздаѧ́нїѧ наро́дꙋ.

По лїтꙋргі́и крⷭ҇тный хо́дъ со ст҃ы́ми і҆кѡ́ны ѻ҆́крꙋгъ цр҃кви, и҆ посе́мъ быва́етъ раздаѧ́нїе ст҃ы́хъ крⷭ҇тѡ́въ и҆ бл҃гослове́нныхъ хлѣ́бѡвъ наро́дꙋ.