Мѣ́сѧца тогѡ́же въ ѳ҃ї-й де́нь. Ст҃а́гѡ мч҃ника а҆ндре́а стратила́та, и҆ съ ни́мъ двꙋ̀ ты́сѧщъ, пѧтѝ сѡ́тъ девѧти́десѧти тре́хъ.
И҆ пра́зднованїе прест҃ѣ́й бцⷣѣ, въ че́сть є҆ѧ̀ і҆кѡ́ны донскі́ѧ.
Слꙋ́жба сїѧ̀ пи́сана въ приложе́нїи.
На Гдⷭ҇и, воззва́хъ, стїхи̑ры пра́здника, гла́съ д҃.
Подо́бенъ: Ꙗ҆́кѡ до́блѧ:
Ст҃о́е твоѐ пречи́стое, ꙳ и҆ честно́е преставле́нїе, ꙳ не на разстоѧ́нїе лю́бѧщихъ тѧ̀, ꙳ но неѿто́ржено соедине́нїе, дв҃о, бы́сть: ꙳ мы́сленнѡ бо при́снѡ тѧ̀ вои́стиннꙋ ꙳ сла́вѧщымъ бж҃їю мт҃рь, ꙳ ꙗ҆влѧ́ешисѧ, даю́щи твою̀ благода́ть, ꙳ и҆ показꙋ́ющи, ꙗ҆́кѡ всѣ̑мъ человѣ́кѡмъ ꙳ предста́тельница дарова́ласѧ є҆сѝ.
Ковче́гъ свѧще́нїѧ, ꙳ въ тѧ̀ все́льшагѡсѧ, ꙳ бцⷣе чⷭ҇таѧ, бы́вши, ꙳ къ нестарѣ́емомꙋ поко́ю ꙳ ѿ землѝ преставлѧ́ешисѧ, ꙳ тѣ́мъ и҆ тогѡ̀ ѡ҆сїѧ́ема свѣ́тлостїю. ꙳ тѣ́мже свы́ше назира́еши ꙳ любо́вїю тѧ̀ пою́щыѧ, ꙳ и҆ бжⷭ҇твєннаѧ вели̑чїѧ твои́хъ чꙋде́съ проповѣ́дающыѧ.
Ꙗ҆́кѡ черто́гъ многосвѣ́телъ, ꙳ сн҃ъ тво́й и҆ гдⷭ҇ь, ꙳ въ жили̑ща прїе́мъ тѧ̀, пречⷭ҇таѧ, ꙳ ꙗ҆́кѡ ковче́гъ свѧще́нїѧ, ꙳ тебѐ показа̀ безплѡ́тнымъ во́инствѡмъ, ꙳ и҆ ст҃ы́хъ селе́нїємъ, ꙳ сла́вою неизглаго́ланнꙋю ꙳ ѿ тлѝ и҆ бѣ́дъ и҆збавлѧ́ющꙋю, ꙳ любо́вїю воспѣва́ющыѧ ꙳ вели̑чїѧ твоѧ̑, чⷭ҇таѧ.
И҆́ны стїхи̑ры ст҃а́гѡ, гла́съ а҃. Подо́бенъ: Всехва́льнїи мꙋ́чєницы:
Мꙋ́жества ѻ҆́бразъ ꙗ҆́вльсѧ, ꙳ на со́нмищи дерзнꙋ́лъ є҆сѝ ꙳ пода́ти себѐ сꙋди́щꙋ страда́нїѧ, ꙳ ꙗ҆́коже воево́да семꙋ̀ пред̾иды́й, ꙳ а҆ндре́е страстоте́рпче пребога́те: ꙳ вѣ̑рнымъ же всегда̀ и҆сцѣле́нїй то́чиши во́ды, ꙳ съ нб҃съ бл҃года́ть прїе́мъ.
Мꙋ́жества тезоимени́тъ ꙗ҆́вльсѧ, ꙳ мꙋ́жески хра́бровавъ, ꙳ со враго́мъ спле́тсѧ, ꙳ и҆ сего̀ погꙋби́лъ є҆сѝ, ꙳ ꙗ҆́кѡ и҆но́го фараѡ́на, ꙳ стрꙋѧ́ми крове́й твои́хъ ꙳ погрꙋзи́въ всѐ во́инство, досточꙋ́дне. ꙳ тѣ́мже молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Во́инство многочи́сленное, ꙳ бг҃ꙋ да́телю, сла́вне, ꙳ благи́хъ приве́лъ є҆сѝ подви́гшеесѧ, ꙳ и҆ сме́ртїю безсме́ртнꙋю сла́вꙋ ꙳ ѡ҆брѣ́тшее съ тобо́ю, пресла́вне. съ ни́миже молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
Сла́ва, и҆ ны́нѣ, гла́съ д҃:
Є҆гда̀ и҆зшла̀ є҆сѝ, бцⷣе дв҃о, ко и҆зъ тебє̀ ро́ждшемꙋсѧ неизрече́ннѡ, бѧ́ше і҆а́кѡвъ бра́тъ бж҃їй и҆ пе́рвый свѧщеннонача́льникъ, пе́тръ же, честнѣ́йшїй верхо́вникъ, бг҃осло́вѡвъ нача́льникъ, и҆ ве́сь бжⷭ҇твенный а҆пⷭ҇льскїй ли́къ, ꙗ҆вле́ннымъ бг҃осло́вїемъ пѣсносло́вѧще бжⷭ҇твенное и҆ стра́шное хрⷭ҇та̀ бг҃а смотре́нїѧ та́инство, и҆ живонача́льное и҆ бг҃опрїѧ́тное твоѐ тѣ́ло погре́бше, ра́довахꙋсѧ, всепѣ́таѧ. превы́ше же прест҃ы̑ѧ и҆ старѣ́йшыѧ а҆́гг҃льскїѧ си̑лы, чꙋдесѝ дивѧ́щесѧ, прини́кше дрꙋ́гъ ко дрꙋ́гꙋ глаго́лахꙋ: возьми́те ва̑ша врата̀, и҆ воспрїими́те ро́ждшꙋю нб҃сѐ и҆ землѝ творца̀, славословле́ньми же воспое́мъ честно́е и҆ ст҃о́е тѣ́ло, вмѣсти́вшее на́ми неви́димаго и҆ гдⷭ҇а. тѣ́мже, и҆ мы̀ па́мѧть твою̀ пра́зднꙋюще, вопїе́мъ тѝ, препѣ́таѧ: хрⷭ҇тїа́нскїй ро́гъ вознесѝ, и҆ спасѝ дꙋ́шы на́шѧ.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Безсме́ртнымъ ᲂу҆спе́нїемъ бж҃їѧ мт҃ре, ꙳ а҆́гг҃льскїй собо́ръ ра́дꙋетсѧ: ꙳ и҆ сїѧ̀ ѿходѧ́щи во ѻ҆би́тєли вѣ̑чныѧ вселѧ́етсѧ, ꙳ и҆ къ весе́лїю нбⷭ҇номꙋ прехо́дитъ, ꙳ въ бжⷭ҇твеннꙋю ра́дость и҆ вѣ́чное наслажде́нїе.
Сті́хъ: Воскреснѝ, гдⷭ҇и, въ поко́й тво́й, ты̀, и҆ кївѡ́тъ ст҃ы́ни твоеѧ̀.
Жи́знь вы́шнюю жела́ющи, ꙳ сїю̀ ѡ҆ста́вила є҆сѝ, бг҃ороди́тельнице, ꙳ ѻ҆трокови́це, дѣ́вства цвѣ́те, ꙳ хрⷭ҇та̀ ро́ждшаѧ всѣ́хъ живота̀, ꙳ благоговѣ́йнѡ предстоѧ́ще а҆пⷭ҇льскїй собо́ръ, ꙳ честно́мꙋ твоемꙋ̀ погребе́нїю, бг҃оневѣ́стнаѧ.
Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.
Твои́мъ и҆схо́днымъ пѣ́нїемъ и҆ надгро́бнымъ ꙳ воздꙋ́хъ ᲂу҆́бѡ ѡ҆свѧти́сѧ, ꙳ восхожде́нїемъ твои́мъ, ꙳ мт҃и бг҃а чл҃вѣколю́бца, ꙳ чꙋ́до стра́шное, бцⷣе неискꙋсомꙋ́жнаѧ. ꙳ тѣ́мже вѣ́рнѡ покланѧ́емтисѧ вѣ́рнїи, ꙳ бцⷣе неискꙋсобра́чнаѧ.
Сла́ва, и҆ ны́нѣ, гла́съ є҃:
Прїиди́те, празднолю́бныхъ собо́ръ, прїиди́те и҆ ли́къ соста́вимъ, прїиди́те, вѣнча́емъ пѣ́сньми цр҃ковь, ᲂу҆покое́нїемъ ковче́га бж҃їѧ. дне́сь бо нб҃о простира́етъ нѣ̑дра, прїе́млѧ ро́ждшꙋю всѣ́ми невмѣсти́маго: и҆ землѧ̀ и҆сто́чникъ жи́зни, ѿдаю́щи благослове́нїе, ᲂу҆краша́етсѧ благолѣ́пїемъ. а҆́гг҃ли ли́къ составлѧ́ютъ со а҆пⷭ҇лы, ᲂу҆жа́снѡ взира́юще, ѿ живота̀ въ живо́тъ преставлѧ́емꙋ, ро́ждшꙋю нача́льника жи́зни. всѝ поклони́мсѧ є҆́й, молѧ́щесѧ: сро́днагѡ присвое́нїѧ не забꙋ́ди, влⷣчце, вѣ́рнѡ пра́зднꙋющихъ всест҃о́е твоѐ ᲂу҆спе́нїе.
Тропа́рь ст҃а́гѡ, гла́съ є҃:
Земна́гѡ са́на сла́вꙋ ѡ҆ста́вивъ, нбⷭ҇ное црⷭ҇тво наслѣ́довалъ є҆сѝ: кро́вными ка́плѧми, ꙗ҆́кѡ пречꙋ́днымъ ка́менїемъ нетлѣ̑нныѧ вѣнцы̑ ᲂу҆краси́лъ є҆сѝ, и҆ ко хрⷭ҇тꙋ̀ приве́лъ є҆сѝ собо́ръ страстоте́рпєцъ. съ ли́ки а҆́гг҃льскими въ невече́рнѣмъ, свѣ́тѣ, незаходи́маго сл҃нца хрⷭ҇та̀ ѡ҆брѣ́лъ є҆сѝ, свѧ́те а҆ндре́е стратила́те: є҆го́же молѝ, съ пострада́вшими съ тобо́ю при́снѡ, да спасе́тъ дꙋ́шы на́шѧ.
Сла́ва, и҆ ны́нѣ, пра́здника, гла́съ а҃.
Въ ржⷭ҇твѣ̀ дѣ́вство сохрани́ла є҆сѝ, во ᲂу҆спе́нїи мі́ра не ѡ҆ста́вила є҆сѝ, бцⷣе, преста́виласѧ є҆сѝ къ животꙋ̀, мт҃и сꙋ́щи живота̀: и҆ моли́твами твои́ми и҆збавлѧ́еши ѿ сме́рти дꙋ́шы на́шѧ.
На ᲂу҆́трени:
По а҃-й стїхоло́гїи сѣда́ленъ, гла́съ г҃. Подо́бенъ: Красотѣ̀ дѣ́вства:
Въ нбⷭ҇наѧ мы́слєннаѧ твоѧ̀ дꙋша̀, въ ра́й чⷭ҇тое твоѐ тѣ́ло преста́висѧ, ѿ тлѝ, пренепоро́чнаѧ, въ мѣ́сто свѣ́тло: тѣ́мже воздадѐ беззакѡ́ннымъ гдⷭ҇ь, ле́сть бо сотвори́ша честно́мꙋ тѣ́лꙋ твоемꙋ̀. сегѡ̀ ра́ди соше́дшесѧ, почита́емъ твоѐ, дв҃о, преставле́нїе.
Сла́ва, и҆ ны́нѣ, то́йже:
По в҃-й стїхоло́гїи сѣда́ленъ, гла́съ д҃. Подо́бенъ: Ско́рѡ предварѝ:
Землѧ̀ ᲂу҆́бѡ благослови́сѧ погребе́нїемъ твои́мъ, воздꙋ́хъ же ѡ҆свѧти́сѧ восхожде́нїемъ твои́мъ, марі́е всепѣ́таѧ, а҆́гг҃ли же тебѣ̀ двє́ри нбⷭ҇ныѧ ѿверзо́ша, и҆дѣ́же ны́нѣ предстоѧ́щи, сн҃ꙋ твоемꙋ̀ мо́лишисѧ ѡ҆ ми́рѣ мі́ра, мт҃и безневѣ́стнаѧ.
Сла́ва, и҆ ны́нѣ, то́йже.
Канѡ́нъ пра́здника, со і҆рмосо́мъ на и҃.
Творе́нїе і҆ѡа́нна дамаскина̀.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ ᲂу҆спе́нїе.
Дѣ̑вы ѻ҆трокѡви́цы съ марїамі́ею прⷪ҇ро́чицею пѣ́снь и҆схо́днꙋю ны́нѣ воскли́кните: дв҃а бо и҆ є҆ди́на бг҃ома́ти ко прїѧ́тїю нбⷭ҇номꙋ преставлѧ́етсѧ.
Досто́йнѡ ꙗ҆́кѡ ѡ҆дꙋшевле́нное тѧ̀ нб҃о, прїѧ́ша нбⷭ҇наѧ пречⷭ҇таѧ бжⷭ҇твєннаѧ селє́нїѧ: и҆ предста̀ свѣ́тлѡ ᲂу҆кра́шена, ꙗ҆́кѡ невѣ́ста всенепоро́чнаѧ, цр҃ю̀ и҆ бг҃ꙋ.
И҆ ст҃а́гѡ на д҃. є҆гѡ́же краегране́сїе:
Пѣ́сньми пою̀ тѧ̀, а҆ндре́е стратила́те. Творе́нїе і҆ѡ́сифово.
Гла́съ то́йже. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Пѣ́ти свѧще́нное твоѐ торжество̀ ᲂу҆се́рдствꙋющагѡ, свѣ́тлыми дх҃а зарѧ́ми дꙋ́шꙋ мою̀ ѡ҆зарѝ, и҆ мглꙋ̀ ѿженѝ невѣ́дѣнїѧ, мꙋ́чениче сла́вне.
Мꙋ́ченикъ бога́тнѡ свѣ́тлостьми, блаже́нне ѡ҆богати́лсѧ є҆сѝ, мꙋжемꙋ́дреннѡ си́лою бжⷭ҇твенною попра́лъ є҆сѝ льсти́ваго, и҆ побѣди́тель бы́въ мꙋ́чениче великоимени́те а҆ндре́е.
Оу҆мертви́въ ꙗ҆̀же на землѝ мꙋдрова̑нїѧ, мꙋ́чениче многострада́льне, ᲂу҆мертви́вшемꙋсѧ сло́вꙋ тебє̀ ра́ди, мꙋ́жески послѣ́довалъ є҆сѝ, и҆ къ жи́зни неги́бнꙋщей сме́ртїю преминꙋ́лъ є҆сѝ.
Бг҃оро́диченъ:
И҆́же въ пло́ть за премно́гꙋю бла́гость, и҆зъ тебє̀, всенепоро́чнаѧ, на спасе́нїе всѣ̑мъ человѣ́кѡмъ, вои́стиннꙋ ѡ҆бле́ксѧ, бг҃ꙋ вкꙋ́пѣ и҆ чл҃вѣ́къ сꙋгꙋ́бъ є҆стество́мъ познава́етсѧ.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй па́мѧти твое́й вѣнцє́въ сла́вы сподо́би.
Ѿ ме́ртвыхъ чре́слъ произве́дшисѧ, є҆стество́мъ подо́бна, чⷭ҇таѧ, и҆схожде́нїе разрѣшѝ: ро́ждши же сꙋ́щꙋю жи́знь, къ жи́зни преста́висѧ бжⷭ҇твеннѣй и҆ ѵ҆поста́снѣй.
Ли́къ бг҃осло́вѡвъ ѿ конє́цъ, свы́ше же а҆́гг҃лъ мно́жєства къ сїѡ́нꙋ и҆дѧ́хꙋ, всеси́льнымъ манове́нїемъ, достодо́лжнѡ, влⷣчце, твоемꙋ̀ погребе́нїю слꙋжа́ще.
И҆́нъ. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Вѣ́триломъ крⷭ҇та̀ напа́сти препла́ваѧ пꙋчи́нꙋ, врагѝ, сла́вне, стрꙋѧ́ми твои́хъ крове́й погрꙋзи́лъ є҆сѝ.
Собла̑знъ лꙋка́вагѡ, и҆ тогѡ̀ хи́тростей превы́ше, ꙗ҆́кѡ побѣди́тель и҆зрѧ́денъ, мꙋ́чениче, бы́въ, просла́вилсѧ є҆сѝ.
Оу҆краша́емь благолѣ́пїѧ вѣнце́мъ, мꙋ́чениче хрⷭ҇то́въ, всегда̀ со и҆збра́нными мꙋ́чєники въ ра́дости предстои́ши.
Бг҃оро́диченъ:
И҆збавлѧ́ющаго человѣ́ки ѿ мꙋчи́тельства вра́жїѧ, родила̀ є҆сѝ всѣ́хъ гдⷭ҇а, влⷣчце дв҃о всенепоро́чнаѧ.
Конда́къ ст҃а́гѡ, гла́съ в҃:
Въ моли́твахъ гдⷭ҇еви предстоѧ̀, ꙗ҆́коже ѕвѣзда̀ со́лнцꙋ предтекі́й, и҆ жела́емое сокро́вище црⷭ҇твїѧ ᲂу҆зрѣ́лъ є҆сѝ, ра́дости неизрече́нныѧ и҆сполнѧ́ѧсѧ: безсме́ртномꙋ цр҃ю̀ въ безконє́чныѧ вѣ́ки, ѿ а҆́гг҃лъ безпреста́ни хвали́момꙋ пое́ши, а҆ндре́е стратила́те. съ ни́миже моли́сѧ непреста́ннѡ ѡ҆ всѣ́хъ на́съ.
Сѣда́ленъ, гла́съ а҃. Подо́бенъ: Гро́бъ тво́й:
Мꙋ́жествомъ дꙋ́шꙋ ᲂу҆крѣплѧ́ѧ, мꙋ́чениче, потреби́лъ є҆сѝ вра́жїе крѣ́пкое сꙋровство̀, и҆ ра́дꙋѧсѧ пострада́лъ є҆сѝ, и҆ бг҃ꙋ ᲂу҆годи́лъ є҆сѝ. тѣ́мже всѝ пресвѧтꙋ́ю твою̀ па́мѧть пра́зднꙋемъ весе́лїемъ се́рдца, а҆ндре́е пребога́те.
Сла́ва, и҆ ны́нѣ, пра́здника, гла́съ то́йже.
Подо́бенъ: Ка́мени запеча́танꙋ:
Ли́къ бжⷭ҇твенныхъ а҆пⷭ҇лъ собра́сѧ, погребсти́ тѧ прече́стнѡ, бцⷣе всечⷭ҇таѧ: съ ни́миже и҆ а҆́гг҃льстїи чи́ни воспѣва́хꙋ преставле́нїе твоѐ, взыва́юще прехва́льнѡ. съ ни́миже и҆ мы̀ любо́вїю и҆гра́юще, чⷭ҇таѧ, хвалꙋ̀ тебѣ̀ прино́симъ гла́сы пѣ́сненными вѣ́рнїи, и҆ вопїе́мъ: ра́дꙋйсѧ, предста́тельнице при́снѡ чтꙋ́щихъ тѧ̀.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Чꙋ́до бѧ́ше зрѣ́ти, нб҃о всѣ́хъ цр҃ѧ̀ ѡ҆дꙋшевле́нное, и҆спражднє́нїѧ преходѧ́щее земна̑ѧ, ꙗ҆́кѡ чꙋ́дна дѣла̀ твоѧ̑: сла́ва си́лѣ твое́й, гдⷭ҇и.
А҆́ще и҆ непости́жный сеѧ̀ пло́дъ, и҆́мже нб҃са̀ бы́ша, погребе́нїе прїѧ́тъ во́лею, ꙗ҆́кѡ ме́ртвъ: ка́кѡ погребе́нїѧ ѿве́ржетсѧ неискꙋсобра́чнѡ ро́ждшаѧ;
Въ преставле́нїи твое́мъ, мт҃и бж҃їѧ, простра́ннѣйшее тѣ́ло твоѐ и҆ бг҃опрїѧ́тное, а҆́гг҃льскаѧ вѡ́инства, свѧще́нными кри́лы, тре́петомъ и҆ ра́достїю покрыва́хꙋ.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Ꙗ҆́кѡ стѣ́нꙋ крѣ́пкꙋ тѧ̀ цр҃ковь стѧжа́вши, премꙋ́дре, вра́жїими сопроти́вными прилѡ́ги непреклони́ма ꙗ҆влѧ́етсѧ, зовꙋ́щи: сла́ва си́лѣ твое́й, гдⷭ҇и.
Бжⷭ҇твенными ᲂу҆чє́нїи ᲂу҆крѣпи́въ мꙋ́ченическїй по́лкъ, ꙗ҆́коже воево́да, тѣ́лꙋ ꙗ҆́кѡ растли́тисѧ, сла́вне, хотѧ́щꙋ, пощади́тисѧ ника́коже повинꙋ́лъ є҆сѝ.
Ꙗ҆́кѡ ѻ҆рꙋ́жїемъ воѡрꙋжи́всѧ мꙋ́жествомъ, и҆ ꙗ҆́коже мече́мъ ѡ҆боюдꙋѻ́стрымъ, а҆ндре́е преблаже́нне, крⷭ҇то́мъ честны́мъ врагѝ потреби́лъ є҆сѝ, ꙗ҆́коже воево́да до́блественнѣйшїй.
Тѧ̀ побо́рника вѣ́ры восхвалѧ́емъ, ꙗ҆́кѡ страда́льца непобѣди́ма, и҆ нбⷭ҇ныѧ свѣ́тлости прича́стника, и҆ и҆сто́чника и҆сточа́юща во́ды чꙋде́съ тре́бꙋющымъ.
Бг҃оро́диченъ:
Восхвалѧ́емъ тѧ̀, похвало̀ мꙋ́ченикѡвъ и҆ вѣ́рныхъ спасе́нїе, всѝ человѣ́честїи ро́ди, пренепоро́чнаѧ: бг҃а бо родила̀ є҆сѝ, пребы́вши дв҃а нетлѣ́нна.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ честнѣ́мъ ᲂу҆спе́нїи твое́мъ: ты́ бо, неискꙋсобра́чнаѧ дв҃о, ѿ землѝ преста́виласѧ є҆сѝ къ вѣ̑чнымъ ѻ҆би́телемъ и҆ къ безконе́чнѣй жи́зни, всѣ̑мъ воспѣва́ющымъ тѧ̀ спасе́нїе подава́ющаѧ.
Да возгласѧ́тъ трꙋбы̑ бг҃осло́вѡвъ дне́сь: ѧ҆зы́къ же многовѣща́нный человѣ́ческїй ны́нѣ да восхва́литъ: да ѡ҆гласи́тъ же воздꙋ́хъ, безмѣ́рнымь сїѧ́ѧ свѣ́томъ: а҆́гг҃ли да пою́тъ пречⷭ҇тыѧ дв҃ы ᲂу҆спе́нїе.
Сосꙋ́дъ подоба́ше и҆збра́нный, пѣ́нїемъ тѝ ве́сь ᲂу҆дивлѧ́емь, дв҃и́це, и҆схо́денъ, ве́сь ѡ҆свѧще́нъ бг҃ови, всѣ̑мъ бг҃опрїѧ́тенъ, и҆ се́й и҆́стиннѡ ꙗ҆влѧ́емый, бцⷣе всепѣ́таѧ.
И҆́нъ. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Мꙋ́жества и҆́стиннагѡ бы́въ тезоимени́тъ, ѿгна́лъ є҆сѝ врагѝ твоѧ̑, и҆ до конца̀, а҆ндре́е всебл҃же́нне, потреби́лъ є҆сѝ.
Во́ды вѣ̑рнымъ и҆сцѣле́нїй всегда̀, прехва́льне, и҆сточа́еши, спаси́тельною бл҃года́тїю ѡ҆богати́въ дꙋхо́вною.
Протечѐ во всю̀ зе́млю вои́стиннꙋ, бг҃одꙋхнове́нне, хвала̀ твои́хъ чꙋде́съ, и҆ честна́гѡ мꙋче́нїѧ, сїѧ́нїе бжⷭ҇твенныѧ бл҃года́ти.
Бг҃оро́диченъ:
Ѻ҆рꙋ̑жїѧ врага̀ ны́нѣ до конца̀ ѡ҆скꙋдѣ́ша, ро́ждши тебѣ̀, бцⷣе, копїе́мъ ᲂу҆ѧ́звеннаго, и҆ мі́ръ ѡ҆бно́вльша.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
И҆зъ тебє̀ жи́знь возсїѧ̀, ключѝ дѣ́вства не рꙋши́вши: ка́кѡ ᲂу҆́бѡ пречⷭ҇тое и҆ живонача́льное твоѐ тѣ́ло и҆скꙋше́нїѧ сме́рти бы́сть прича́стно;
Жи́зни бы́вши хра́мъ, жи́знь присносꙋ́щнꙋю ᲂу҆лꙋчи́ла є҆сѝ: сме́ртїю бо къ животꙋ̀ преминꙋ́ла є҆сѝ, ꙗ҆́же жи́знь ро́ждши воѷпоста́снꙋю.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Притꙋпи́лъ є҆сѝ лꙋка́вагѡ жа̑ла болѣ́зньми твои́ми, и҆ къ неболѣ́зненнѣй сла́вѣ преста́вилсѧ є҆сѝ ра́дꙋѧсѧ, мч҃ниче а҆ндре́е, стратила́те мꙋ́ченическихъ честны́хъ полкѡ́въ.
Кровьмѝ ма́лыми и҆змѣни́лъ є҆сѝ свѣ́тлость вѣ́чнꙋющїѧ сла́вы, и҆ ра́дость никогда́же престаю́щꙋю, и҆ вѣнцы̀ нбⷭ҇ныѧ, и҆ сїѧ́нїе невече́рнее.
Во́инство многочи́сленное, мꙋ́чениче, собра́въ, и҆ ликѡ́мъ а҆́гг҃льскимъ приче́лъ є҆сѝ, бл҃же́нне, съ тобо́ю страда́вшее: ра́достнѡ влⷣчцѣ всѣ́хъ предстоитѐ.
Бг҃оро́диченъ:
Родила̀ є҆сѝ неизглаго́ланнѡ ѻ҆ц҃ꙋ̀ собезнача́льнаго, ᲂу҆подо́бльшасѧ человѣ́кѡмъ, па́че ᲂу҆ма̀ и҆ сло́ва, бг҃ороди́тельнице. є҆го́же молѝ, и҆зба́витисѧ ѿ бѣ́дъ рабѡ́мъ твои̑мъ.
Конда́къ пра́здника, гла́съ в҃:
Въ моли́твахъ неꙋсыпа́ющꙋю бцⷣꙋ, и҆ въ предста́тельствахъ непрело́жное ᲂу҆пова́нїе, гро́бъ и҆ ᲂу҆мерщвле́нїе не ᲂу҆держа́ста: ꙗ҆́коже бо живота̀ мт҃рь, къ животꙋ̀ преста́ви, во ᲂу҆тро́бꙋ всели́выйсѧ приснодѣ́вственнꙋю.
І҆́косъ:
Ѡ҆градѝ моѧ̑ помышлє́нїѧ хрⷭ҇тѐ, мо́й, и҆́бо стѣ́нꙋ мі́ра воспѣ́ти дерза́ю, чⷭ҇тꙋю мт҃рь твою̀: на столпѣ̀ глагѡ́лъ ᲂу҆крѣпи́ мѧ, и҆ въ тѧ́жкихъ мы́слехъ застꙋпи́ мѧ: ты́ бо взыва́ющымъ, и҆ просѧ́щымъ вѣ́рою, молє́нїѧ и҆сполнѧ́еши. ты̀ мнѣ̀ ᲂу҆́бѡ да́рꙋй ѧ҆зы́къ доброрѣ́чивъ, и҆ по́мыслъ непосты́денъ: всѧ́кое бо бла́го даѧ́нїе ѿ тебє̀ низпосыла́етсѧ, свѣтопода́телю, во ᲂу҆тро́бꙋ всели́выйсѧ приснодѣ́вственнꙋю.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, бл҃гослове́нъ є҆сѝ.
Ю҆́ношы и҆ дѣ̑вы, дв҃ыѧ же и҆ бг҃ома́тере па́мѧть чтꙋ́ще, ста́рцы и҆ мона́си, ца́рїе и҆ сꙋдїи̑ по́йте: ѻ҆тє́цъ на́шихъ гдⷭ҇и и҆ бж҃е, бл҃гослове́нъ є҆сѝ.
Да вострꙋ́бѧтъ трꙋбо́ю дꙋхо́вною го́ры нбⷭ҇ныѧ, да ра́дꙋютсѧ хо́лми, и҆ да и҆гра́ютъ бжⷭ҇твеннїи а҆пⷭ҇ли: цр҃и́ца къ сн҃ꙋ преставлѧ́етсѧ, съ ни́мъ црⷭ҇твꙋющи.
Всесвѧще́нное преставле́нїе, бжⷭ҇твенныѧ твоеѧ̀ и҆ нетлѣ́нныѧ мт҃ре, премі́рныѧ вы́шнихъ си́лъ совокꙋпѝ чи́ны, весели́тисѧ съ сꙋ́щими на землѝ, тебѣ̀ пою́щими: бж҃е, бл҃гослове́нъ є҆сѝ.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Стрꙋѧ́ми кро́вными и҆сто́чникъ и҆стещѝ сотвори́лъ є҆сѝ, всѧ́ческихъ недꙋ̑гъ, мꙋ́чениче, ꙗ҆́кѡ вои́стиннꙋ болѣ́знь и҆сцѣлѧ́ющь, пристꙋпа́ющымъ къ тебѣ̀ несꙋмнѣ́нною вѣ́рою, бг҃одохнове́нне.
Ст҃ы́хъ собо́ръ прест҃о́мꙋ сло́вꙋ, мꙋ́дре мꙋ́чениче, приве́лъ є҆сѝ кро́вїю, жи́знь нестарѣ́емꙋю наслѣ́довалъ є҆сѝ: съ ни́миже молѝ ѡ҆ на́съ хрⷭ҇та̀ чл҃вѣколю́бца.
Бжⷭ҇твенною ре́вностїю твои́ми кровьмѝ багрѧни́цꙋ себѣ̀, мч҃ниче, ѡ҆багри́въ, и҆ въ сїю̀ ѡ҆дѣ́ѧвсѧ, всѣ́ми црⷭ҇твꙋющемꙋ сцрⷭ҇твꙋеши ны́нѣ, побѣ́днымъ вѣнце́мъ ᲂу҆краша́емь.
Бг҃оро́диченъ:
Ꙗ҆́же человѣ́ки па́че є҆стества̀, бжⷭ҇твеннымъ ржⷭ҇тво́мъ твои́мъ, дв҃о, проѧвле́ннѡ ѡ҆божи́вши, ꙗ҆́кѡ бг҃а неизрече́ннѡ вопло́щши, бл҃гослове́на ты̀ въ жена́хъ є҆сѝ, пренепоро́чнаѧ влⷣчце.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Па́мѧть твою̀, чⷭ҇таѧ дв҃о, нача̑ла же и҆ вла̑сти, и҆ си̑лы, а҆́гг҃ли, а҆рха́гг҃ли, прⷭ҇то́ли, гдⷭ҇ьства, херꙋві́ми сла́вѧтъ, и҆ стра́шнїи серафі́ми: человѣ́ческїй же ро́дъ пое́мъ и҆ превозно́симъ во всѧ̑ вѣ́ки.
И҆́же стра́ннѡ всели́выйсѧ, бцⷣе, въ чⷭ҇тое чре́во твоѐ воплоща́емь, се́й всесвѧще́нный дꙋ́хъ тво́й прїе́мъ, ᲂу҆ себє̀ ᲂу҆поко́и, ꙗ҆́кѡ должни́къ сн҃ъ. тѣ́мже тѧ̀ пое́мъ, дв҃о, и҆ превозно́симъ во всѧ̑ вѣ́ки.
Ѽ вы́ше ᲂу҆ма̀ чꙋде́съ приснодв҃ы же и҆ бг҃ома́тере! во гро́бъ бо все́льшисѧ, показа̀ ра́й, є҆мꙋ́же предстоѧ́ще дне́сь, ра́дꙋющесѧ пое́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
И҆́нъ. І҆рмо́съ:
Рꙋ́цѣ распросте́ръ, данїи́лъ львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Львѡ́въ ди́вїихъ стремлє́нїѧ ᲂу҆держа́лъ є҆сѝ, сла́вне, тве́рдыми пѡ́двиги твои́ми, мꙋчи́телей безбо́жныхъ шата̑нїѧ бжⷭ҇твенною си́лою смири́лъ є҆сѝ, и҆ побѣди́тель къ нб҃сє́мъ, вопїѧ̀, восте́клъ є҆сѝ: благослови́те всѧ̑ дѣла̀ гдⷭ҇нѧ, гдⷭ҇а.
Ст҃ы́хъ свѣ́тлѡсти ви́дѣти, и҆ жи́ти въ ра́дости, мꙋ́чениче, сподо́билсѧ є҆сѝ, подви́гсѧ до́блественнѣ, и҆ сконча́въ по́двигъ тво́й ме́чнымъ ᲂу҆сѣкнове́нїемъ. и҆ ны́нѣ вопїе́ши съ весе́лїемъ: благослови́те, всѧ̑ дѣла̀ гдⷭ҇нѧ, гдⷭ҇а.
Къ бжⷭ҇твенномꙋ притека́юще хра́мꙋ, бжⷭ҇твеннагѡ мꙋ́ченика свѣ́тъ прїи́мемъ: и҆ ра́цѣ прикаса́ющесѧ всегда̀ моще́й сегѡ̀ ра́дꙋющесѧ, свѧще́нїе пода́тельно бл҃года́ти прїи́мше вопїе́мъ: всѧ̑ дѣла̀ благослови́те гдⷭ҇нѧ, гдⷭ҇а.
Бг҃оро́диченъ:
Ст҃а́ѧ дв҃о, ꙗ҆́же бг҃а прест҃а́го свѧ́тѡ поро́ждши, є҆го́же всѝ ст҃і́и мꙋ́чєницы на сꙋди́щи и҆сповѣ́даша, ѡ҆свѧще́нїе и҆ просвѣще́нїе на́мъ низпослѝ, вопїю́щымъ: всѧ̑ дѣла̀ благослови́те гдⷭ҇нѧ, гдⷭ҇и.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное преставле́нїе бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
Прїиди́те въ сїѡ́нъ, на бжⷭ҇твеннꙋю и҆ тꙋ́чнꙋю го́рꙋ жива́гѡ бг҃а, возра́дꙋемсѧ, бцⷣꙋ зрѧ́ще: къ ѕѣлѡ́ бо лꙋ́чшей и҆ бжⷭ҇твеннѣй сѣ́ни, ꙗ҆́кѡ мт҃рь, сїю̀ во ст҃а̑ѧ ст҃ы́хъ хрⷭ҇то́съ преста́ви.
Прїиди́те вѣ́рнїи, ко гро́бꙋ пристꙋ́пимъ бж҃їѧ мт҃ре, и҆ ѡ҆б̾и́мемъ сердцы̀ и҆ ᲂу҆стна́ми, ѻ҆чесы̀ и҆ лице́мъ чи́стѡ прикаса́ющесѧ, и҆ почерпа́юще и҆сцѣле́нїй незави̑стныѧ да́ры ѿ и҆сто́чника приснотекꙋ́щагѡ.
Прїимѝ ѿ на́съ пѣ́снь и҆схо́днꙋю, мт҃и жива́гѡ бг҃а, и҆ свѣтоно́сною твое́ю и҆ бжⷭ҇твенною ѡ҆сѣнѝ бл҃года́тїю, во́инствꙋ побѣди́тєльнаѧ, хрⷭ҇толю̑бнымъ лю́демъ ми́ръ, ѡ҆ставле́нїе пою́щымъ, и҆ дꙋша́мъ спасе́нїе подаю́щи.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.
Сѐ свѣтоза́рна страстоте́рпца па́мѧть просїѧ̀ свѣтоно́снѡ, тмꙋ̀ де́мѡнскꙋю ѿгонѧ́щи, вѣ̑рныѧ же всѧ̑ просвѣща́ющи: сїю̀ свѣ́тлѡ соверша́емъ, сего̀ досто́йнѡ велича́юще.
Ꙗ҆ви́лсѧ є҆сѝ ꙗ҆́кѡ со́лнце ве́лїе посредѝ, а҆ндре́е, стра́ждꙋщихъ съ тобо́ю, си́хъ къ невече́рнемꙋ сїѧ́нїю нбⷭ҇ныѧ свѣ́тлости наставлѧ́ѧ словесы̀ твои́ми: съ ни́миже тѧ̀ вѣ́рою ᲂу҆блажа́емъ.
Тѧ̀ свѣ́тлостїю чꙋде́съ всю̀ просвѣща́ющаго тва́рь, тѧ̀ неꙋкло́ннымъ мꙋче́нїемъ цр҃кви столпа̀ бы́вша, и҆ вѣ̑рнымъ ᲂу҆твержде́нїе, мꙋ́чениче а҆ндре́е, велича́емъ.
Процвѣ́лъ є҆сѝ посредѝ раѧ̀ страда́лецъ, ꙗ҆́коже шипо́къ, носѧ̀ та́йнѡ благово́нїе, и҆ ѡ҆бвеселѧ̀ вѣ́рныхъ и҆сполне́нїе, и҆ смра́дъ, всемꙋ́дре, пре́лести ѿгонѧ̀ бжⷭ҇твенною бл҃года́тїю.
Бг҃оро́диченъ:
Носѧ́щи хрⷭ҇та̀ на рꙋкꙋ̀, ма́нїемъ носѧ́щаго всѧ̑, сего̀ молѝ, рꙋки́ мѧ чꙋжда́гѡ и҆зба́вити, влⷣчце, правосла́вною вѣ́рою тѧ̀ непреста́ннѡ велича́юща.
Свѣти́ленъ пра́здника. Подо́бенъ: Не́бо ѕвѣзда́ми:
А҆пⷭ҇ли ѿ конє́цъ совокꙋ́пльшесѧ здѣ̀, въ геѳсїмані́йстѣй ве́си, погреби́те тѣ́ло моѐ, и҆ ты̀, сн҃е и҆ бж҃е мо́й, прїимѝ дꙋ́хъ мо́й.
Сла́ва, и҆ ны́нѣ, то́йже:
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Собо́ръ ᲂу҆ч҃ни̑къ, ꙳ и҆ бжⷭ҇твенныхъ а҆пⷭ҇лъ, ꙳ собра́сѧ погребстѝ ꙳ бг҃опрїѧ́тное тѣ́ло ꙳ є҆ди́ныѧ бг҃ома́тере.
Сті́хъ: Воскрⷭ҇нѝ, гдⷭ҇и, въ поко́й тво́й, ты̀, и҆ кївѡ́тъ свѧты́ни твоеѧ̀.
Ты̀, и҆́же и҆зъ неѧ̀ ꙳ возсїѧ́вый неизрече́ннѡ, ꙳ сн҃олѣ́пнѡ дꙋ́хъ всест҃ы́й, ꙳ рꙋка́ми твои́ми прїимѝ, ꙳ бцⷣы, влⷣко.
Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀.
Є҆гда̀ ко и҆зъ тебє̀ ро́ждшемꙋсѧ ꙳ преста́виласѧ є҆сѝ, ꙳ снидо́шасѧ на ѻ҆́блацѣхъ, ꙳ тѣ́ло твоѐ погребстѝ, ꙳ дв҃о, а҆пⷭ҇ли.
Сла́ва, и҆ ны́нѣ, гла́съ є҃:
Воспо́йте, лю́дїе, мт҃ри бг҃а на́шегѡ, воспо́йте: дне́сь бо всесвѣ́тлꙋю дꙋ́шꙋ свою̀ въ пречⷭ҇тыѧ дла̑ни, и҆зъ неѧ̀ вопло́щшагѡсѧ безъ сѣ́мене, предае́тъ: є҆го́же и҆ мо́литъ непреста́ннѡ, дарова́ти вселе́ннѣй ми́ръ и҆ ве́лїю ми́лость.
На лїтꙋргі́и, бл҃жє́нна, пра́здника, пѣ́снь є҃, ѻ҆бою̀ канѡ́нѡвъ, со і҆рмосо́мъ на ѕ҃: Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть. А҆пⷭ҇лъ ко є҆фесе́ємъ, зача́ло сл҃г. А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе лꙋкѝ, зача́ло р҃ѕ. Прича́стенъ: Ра́дꙋйтесѧ:
Мѣ́сѧца а҆́ѵгꙋста въ ѳ҃ї-й де́нь. Пра́зднованїе прест҃ѣ́й влⷣчцѣ на́шей бцⷣѣ и҆ приснодв҃ѣ мр҃і́и ра́ди і҆кѡ́ны є҆ѧ̀, и҆менꙋ́емыѧ донска́ѧ.
На вели́цѣй вече́рни. Бл҃же́нъ мꙋ́жъ. а҃-й а҆нтїфѡ́нъ.
На Гдⷭ҇и воззва́хъ: стїхи̑ры, гла́съ а҃:
Прїиди́те, вѣ́рныхъ собо́ри, пресла́вное и҆збавле́нїе гра́да москвы̀ воспра́зднꙋемъ, се́ бо пѡ́лчища вра́жєскаѧ, ꙗ҆́кѡ пото́цы воды̀ быстротекꙋ́щїѧ, на прилежа́щыѧ ве́си ᲂу҆стреми́шасѧ, и҆ мно́жество до́брыхъ во́инѡвъ дꙋ́шы своѧ̑ положи́ша. ѽ, чꙋ́до пресла́вное, ѽ, си́ла мл҃твы бг҃ома́тере тече́нїе неꙋкроти́мое і҆кѡ́ною прегражда́етсѧ и҆ въ бѣ́гство ѡ҆браща́етсѧ, лю́дїе сїѧ̑ ви́дѣша, ра́достїю и҆спо́лнишасѧ и҆ вопїѧ́хꙋ бцⷣѣ: ра́дꙋйсѧ, побѣ́до непобѣди́маѧ.
Весели́тсѧ дне́сь свѣ́тлѡ сла́внѣйшїй гра́дъ москва̀ и҆ ѻ҆би́тель твоѧ̀, бцⷣе, ꙗ҆́кѡ чꙋдотво́рнꙋю і҆кѡ́нꙋ твою̀ та́мѡ просла́вила є҆сѝ чꙋдесы̀ бжⷭ҇твенными, застꙋпле́нїе твоѐ держа́вное є҆́ю показа́вши и҆ а҆га́рѧны побѣди́вши, да всѝ бл҃года́рственнѡ вопїе́мъ тѝ. ра́дꙋйсѧ, бл҃года́тнаѧ, гдⷭ҇ь съ тобо́ю и҆ тобо́ю съ на́ми во сп҃се́нїе дꙋ́шъ на́шихъ.
Ди̑вна дѣла̀ твоѧ̑, гдⷭ҇и, пречⷭ҇тꙋю мт҃рь твою̀ цр҃кви дарова́лъ є҆сѝ: безпомѡ́щнымъ ско́рꙋю послꙋ́шницꙋ, беззащи̑тнымъ и҆зба́вительницꙋ крѣ́пкꙋю, без̾ѡтвѣ̑тнымъ те́плое хода́тайство, приста́нище ѡ҆бꙋрева́ємымъ, поги́бшымъ взыска́нїе, предстоѧ́щи бо тебѣ̀, всѣ́хъ влⷣцѣ, мо́литсѧ непреста́ннѡ ѡ҆ всѣ́хъ на́съ.
Ди́вное вели́чїе твоѐ и҆сповѣ́мы, прест҃а́ѧ дв҃о: взо́рꙋ вѣ́ры предстои́ши, ꙗ҆́кѡ гора̀ велича́йшаѧ добродѣ́телей, лꙋча́ми со́лнца пра́вды, хрⷭ҇та̀, ѡ҆заре́ннаѧ, чⷭ҇тото́ю дѣ́вства при́снѡ блиста́ющаѧ, живоно́снꙋю во́дꙋ бл҃года́ти ст҃а́гѡ дх҃а преиз̾ѻби́льнѡ и҆злива́ющаѧ на всѣ́хъ, съ вѣ́рою и҆ любо́вїю къ тебѣ̀ притека́ющихъ.
Сла́ва, и҆ ны́нѣ, гла́съ д҃:
Грѧдѝ, грѧдѝ, бцⷣе, и҆збавле́нїе носѧ́щи ѿ сопроти́вныхъ, воево́да є҆сѝ полкꙋ̀ ст҃и́телей, ꙗ҆́кѡ тобо́ю сн҃а бж҃їѧ позна́хомъ, воево́да є҆сѝ полкꙋ̀ мч҃никѡвъ, ꙗ҆́кѡ пред̾ крⷭ҇то́мъ стоѧ́вшаѧ, тебѣ́ же само́й ѻ҆рꙋ́жїе се́рдце про́йде, воево́да є҆сѝ полкꙋ̀ прпⷣбныхъ, ꙗ҆́кѡ приснодв҃а, чⷭ҇тото́ю а҆́гг҃лы превозше́дшаѧ, тѣ́мже и҆ на́съ защитѝ, є҆ди́на застꙋ́пнице пребл҃гослове́ннаѧ.
Вхо́дъ. Прокі́менъ днѐ и҆ чтє́нїѧ бг҃орѡ́дичнаѧ.
Бытїѧ̀ чте́нїе (глава̀ к҃и):
И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нъ. и҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. и҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ ѻ҆тца̀ твоегѡ̀ и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀ и҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на зємна́ѧ, и҆ ѡ҆ сѣ́мени твое́мъ. и҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. и҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. и҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.
Проро́чества і҆езекі́илева чте́нїе (главы̑ м҃г и҆ м҃д):
Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее сотворѧ́тъ і҆ере́и на ѻ҆лтарѝ всесожже́нїѧ ва́шегѡ и҆ ꙗ҆̀же сп҃се́нїѧ ва́шегѡ: и҆ прїимꙋ́ вы, глаго́летъ а҆дѡнаі̀ гдⷭ҇ь. и҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́нна. и҆ речѐ гдⷭ҇ь ко мнѣ̀: врата̀ сїѧ̑ затворє́нна бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́нна. ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. и҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.
При́тчей чте́нїе (глава̀ ѳ҃):
Премꙋ́дрость созда̀ себѣ̀ до́мъ и҆ ᲂу҆твердѝ столпѡ́въ се́дмь. закла̀ своѧ̑ жє́ртвеннаѧ, и҆ растворѝ въ ча́шѣ свое́й вїно̀, и҆ ᲂу҆гото́ва свою̀ трапе́зꙋ. посла̀ своѧ̑ рабы̑, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀. и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ и҆ пі́йте вїно̀, є҆́же раствори́хъ ва́мъ. ѡ҆ста́вите безꙋ́мїе и҆ жи́ви бꙋ́дете. и҆ взыщи́те ра́зꙋма, да поживѣ́те, и҆ и҆спра́вите ра́зꙋмъ въ вѣ́дѣнїи. наказꙋ́ѧй ѕлы̑ѧ прїи́метъ себѣ̀ безче́стїе, ѡ҆блича́ѧй нечести́ваго ѡ҆поро́читъ себѐ, ѡ҆бличе́нїе бо нечести́вомꙋ ра̑ны є҆мꙋ̀. не ѡ҆блича́й ѕлы́хъ, да не возненави́дѧтъ тебѐ, ѡ҆блича́й премꙋ́дра, и҆ возлю́битъ тѧ̀. да́ждь премꙋ́дромꙋ винꙋ̀, и҆ премꙋ́дршїй бꙋ́детъ. сказꙋ́й пра́ведномꙋ, и҆ приложи́тъ прїима́ти. нача́ло премꙋ́дрости стра́хъ гдⷭ҇ень, и҆ совѣ́тъ ст҃ы́хъ ра́зꙋмъ. разꙋмѣ́ти бо зако́нъ по́мысла є҆́сть бл҃га́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.
На лїті́и стїхи̑ры, гла́съ в҃:
Ѡ҆сꙋжде́нїѧ и҆зба́ви, прест҃а́ѧ бг҃оневѣ́сто, и҆ лю́тыхъ прегрѣше́нїй смире́ннꙋю мою̀ дꙋ́шꙋ, и҆ сме́рти и҆змѣнѝ мл҃твами твои́ми, и҆ да́рꙋй ѡ҆правда́нїе полꙋчи́ти въ де́нь и҆спыта́нїѧ, є҆́же полꙋчи́ша ст҃ы́хъ собо́ри: покаѧ́нїемъ ѡ҆чище́на мѧ̀ пре́жде конца̀ покажѝ и҆ сле́зными и҆злїѧ̑нїи.
Сле́зы покаѧ́нїѧ, ꙗ҆́кѡ мѵ́ро многоцѣ́нное, въ чⷭ҇тый пла́тъ со тща́нїемъ собира́еши, застꙋ́пнице, да є҆гда̀ стра́шномꙋ сꙋдꙋ̀ грѣ́шнаѧ дꙋша̀ предста́нетъ, пла́тъ се́й, слеза́ми и҆спо́лненный, на вѣсы̀ бж҃їѧ правосꙋ́дїѧ возложи́ши, да не и҆мꙋ́щей, чи́мъ грѣхѝ покры́ти, милосе́рдїе бж҃їе приклони́ши и҆ а҆́дскїѧ мꙋ́ки моле́нїемъ крѣ́пкимъ свободи́ши, ка́ющихсѧ прибѣ́жище.
Сла́ва, и҆ ны́нѣ, гла́съ то́йже:
Слеза́ми ра́дости па́че же́мчꙋга і҆кѡ́на твоѧ̑, дв҃о, ᲂу҆краша́етсѧ, мно́жество пла́чꙋщихъ неча́ѧннꙋю ра́дость ѡ҆брѣта́ютъ, грѣ̑шницы ѿ внеза́пныѧ сме́рти и҆збавлѧ́ютсѧ, мл҃твами твои́ми, всеще́драѧ.
На стїхо́внѣ стїхи̑ры, гла́съ и҃:
Сла́вное і҆кѡ́ны твоеѧ̀ на по́лѣ бра́ни прише́ствїе, бцⷣе непоро́чнаѧ, пѣсносло́вимъ здѣ́сь и҆ твоѐ держа́вное на́мъ застꙋпле́нїе ѿ наше́ствїѧ а҆га́рѧнъ досто́йнѡ пра́зднꙋемъ, ꙗ҆́кѡ бо, мт҃и сꙋ́щи живота̀, ѿ напра́сныѧ сме́рти непови́нныхъ и҆зба́вила є҆сѝ и҆ гра́ды и҆ вє́си ѿ ѻ҆гнѧ̀ и҆ меча̀ сохрани́ла є҆сѝ, пꙋтеводи́тельнице нело́жнаѧ на́шегѡ сп҃се́нїѧ.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Ѽ, пресла́внагѡ чꙋдесѐ! ѽ, бжⷭ҇твеннагѡ къ на́мъ грѣ̑шнымъ долготерпѣ́нїѧ, ꙗ҆́кѡ наше́дшымъ на зе́млю на́шꙋ лю̑тымъ врагѡ́мъ и҆ вѣ́рѣ ѕѣлѡ̀ порꙋга́емѣй, непостижи́мое возме́здїе ѿ і҆кѡ́ны соверша́етсѧ. зри́те ᲂу҆̀бо, лю́дїе рѡссі́йстїи, коли́кѡ мо́жетъ мл҃тва дв҃ы пречⷭ҇тыѧ, ка́кѡ дре́внихъ чꙋде́съ подо́бїе дне́сь на́мъ ꙗ҆влѧ́етсѧ, ка́кѡ стра́хъ сме́рти на врагѝ ѡ҆браща́етсѧ, беззащи́тный же гра́дъ, во́пли же́нъ ѡ҆глаша́емый, весе́лїемъ и҆ ра́достїю внеза́пꙋ и҆сполнѧ́етсѧ. сла́ва тебѣ̀, застꙋ́пнице на́ша бл҃га́ѧ и҆ ско́раѧ.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Что́ тѧ нарече́мъ, пречⷭ҇таѧ; рѣ́кꙋ ли ти́хꙋ и҆ многово́днꙋ, ꙗ҆́кѡ скорбмѝ и҆зсꙋшє́ннаѧ сердца̀ на̑ша бл҃года́тїю напоѧ́еши, стѣ́нꙋ ли неѡбори́мꙋ хрⷭ҇то́вы цр҃кве, стра́жа ли гра́да неꙋсы́пна, ꙗ҆́кѡ сп҃са́еши ѿ вра̑гъ ви́димыхъ и҆ неви́димыхъ; тѣ́мже, ѿ напа́стей внеза́пныхъ и҆збавлѧ́емїи, возопїи́мъ влⷣчцѣ: ра́дꙋйсѧ, всеми́лостиваѧ, надє́жды вѣ́рныхъ не посрамлѧ́ющаѧ.
Сла́ва, и҆ ны́нѣ, гла́съ д҃:
Пресла̑внаѧ дне́сь соверша́ютсѧ, возбра́ннаѧ воево́да и҆ цр҃и́ца нбⷭ҇наѧ грѧде́тъ сама̀ на сꙋпоста́ты и҆ чꙋдотво́рнꙋю і҆кѡ́нꙋ, ꙗ҆́кѡ щи́тъ несокрꙋши́мъ, проти́вꙋ ѕлочести́выхъ поставлѧ́етъ, стра́хомъ ве́лїимъ и҆ смѧте́нїемъ пѡ́лчища вра̑жїѧ поража́етъ, въ бѣ́гство неꙋдержи́мое ѡ҆браща́етъ, сп҃са́ющи ѿ ѻ҆гнѧ̀ и҆ лю́тыхъ гра̑дъ и҆ ча̑да своѧ̑.
Тропа́рь, гла́съ д҃:
Застꙋ́пнице вѣ́рныхъ пребл҃га́ѧ и҆ ско́раѧ, пречⷭ҇таѧ бцⷣе дв҃о мо́лимъ тѧ̀ пред̾ ст҃ы́мъ и҆ чꙋдотво́рнымъ ѻ҆́бразомъ твои́мъ, да ꙗ҆́коже дре́вле ѿ негѡ̀ застꙋпле́нїе твоѐ гра́дꙋ москвѣ̀ дарова́ла є҆сѝ, та́кѡ и҆ ны́нѣ на́съ ѿ всѧ́кихъ бѣ́дъ и҆ напа́стей ми́лостивнѡ и҆зба́ви и҆ сп҃сѝ дꙋ́шы на́шѧ, ꙗ҆́кѡ милосе́рдаѧ.
На ᲂу҆́трени.
На Бг҃ъ гдⷭ҇ь: тропарѝ по ᲂу҆ста́вꙋ.
По а҃-мъ стїхосло́вїи сѣда́ленъ, гла́съ а҃: (с. 675)
Твоегѡ̀ милосе́рдїѧ сподо́бившесѧ, бцⷣе дв҃о, бл҃года́рствєннаѧ тебѣ̀ прино́симъ, зра́кꙋ пречⷭ҇тагѡ лица̀ твоегѡ̀ молѧ́щесѧ и҆ дв҃дски вопїю́ще: ты̀ є҆сѝ гора̀ ᲂу҆сыре́ннаѧ и҆ колесни́ца бжⷭ҇твеннаѧ, носѧ́щаѧ сп҃са дꙋ́шъ на́шихъ.
Сла́ва, и҆ ны́нѣ, пра́здника.
По в҃-мъ стїхосло́вїи сѣда́ленъ, гла́съ д҃:
Бе́зднꙋ бл҃гоꙋтро́бїѧ ро́ждшаѧ, дв҃о, и҆сто́чникъ млⷭ҇ти на́мъ и҆сточа́еши, къ тебѣ̀ вѣ́рою прибѣга́ющымъ, ꙗ҆ви́ласѧ бо є҆сѝ сп҃се́нїе дꙋ́шъ на́шихъ.
Сла́ва, и҆ ны́нѣ, пра́здника.
Велича́нїе:
Велича́емъ тѧ̀, прест҃а́ѧ дв҃о, и҆ чти́мъ ѻ҆́бразъ тво́й ст҃ы́й, и҆́мже ди́внꙋю побѣ́дꙋ на а҆га́рѧны правосла̑внымъ дарова́ла є҆сѝ.
И҆́но велича́нїе:
Велича́емъ тѧ̀, прест҃а́ѧ дв҃о, и҆ чти́мъ ѻ҆́бразъ тво́й ст҃ы́й, и҆́мже застꙋпле́нїе ди́вное гра́дꙋ твоемꙋ̀ дарова́ла є҆сѝ.
По полѷеле́и сѣда́ленъ, гла́съ а҃:
Ра́дꙋйсѧ, бл҃года́тнаѧ бцⷣе дв҃о, предста́тельство и҆ прибѣ́жище ро́да хрⷭ҇тїа́нскагѡ, и҆з̾ тебє̀ возсїѧ̀ со́лнце пра́вды, хрⷭ҇то́съ бг҃ъ на́шъ, и҆ весели́тсѧ бг҃охрани́мый гра́дъ москва̀, воспрїе́мъ чꙋдотво́рнꙋю твою̀ і҆кѡ́нꙋ и҆ превѣ́чнаго твоего̀ млⷣнца, подаю́щаго на́мъ ве́лїю млⷭ҇ть.
Сла́ва, и҆ ны́нѣ, пра́здника.
Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши дщѝ и҆ ви́ждь и҆ приклонѝ ᲂу҆́хо твоѐ. Всѧ́кое дыха́нїе: Є҆ѵⷢ҇лїе лꙋкѝ, зача́ло д҃.
По н҃-мъ ѱалмѣ̀ стїхи̑ры, гла́съ ѕ҃:
Зна́менїе побѣ́дное ви́дѣвше, восхва́лимъ возбра́ннꙋю го́рнихъ си́лъ воево́дꙋ, всемо́щнꙋю застꙋ́пницꙋ. ѻ҆́бразъ тво́й чꙋ́дный чти́мъ, прест҃а́ѧ дв҃о, и҆́мже ско́рое застꙋпле́нїе твоѐ полꙋча́емъ, покро́въ бо є҆сѝ на́шъ, ди́внꙋю си́лꙋ ѻ҆́нагѡ и҆здре́вле вѣ́дꙋще, и҆́мѧ твоѐ призыва́емъ. прїиди́те, всѝ вѣ́рнїи, поклони́мсѧ ѻ҆́бразꙋ донскі́ѧ бж҃їѧ мт҃ре, гра́дъ бо на́шъ ѿ ѻ҆гнѧ̀ и҆ меча̀ защища́етъ. возблагодари́мъ же и҆ влⷣкꙋ гдⷭ҇а и҆ чⷭ҇тно́мꙋ крестꙋ̀ є҆гѡ̀ поклони́мсѧ, си́мъ бо побѣжда́емъ врагѝ на́шѧ, ѕлѣ̀ на́мъ досажда́ющыѧ.
Канѡ́нъ, гла́съ д҃.
Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.
Ѿве́рзи слꙋ́хъ мо́й, бг҃оизбра́ннаѧ дв҃о, во є҆́же разꙋмѣ́ти словеса̀ ѿкрове́нїѧ и҆ позна́ти пꙋ́ть сп҃се́нїѧ, да вѣ́рꙋ и҆мꙋ̀ тве́рдꙋю и҆зба́вителю бг҃ꙋ и҆ воспою̀ преди́вное є҆гѡ̀ ѡ҆ на́съ промышле́нїе.
Ѿве́рзи, дꙋшѐ моѧ̑, ѻ҆́чи вѣ́ры, и҆ ᲂу҆́зриши мнѡ́гаѧ бл҃годѣѧ̑нїѧ бж҃їѧ мт҃ре, во днѝ тѧ́жкихъ ѡ҆бстоѧ́нїй ѻ҆те́чествꙋ на́шемꙋ и҆здре́вле ꙗ҆влѧ́ємаѧ, и҆ воспо́й, ра́дꙋющисѧ, млⷭ҇тивое тоѧ̀ застꙋпле́нїе.
Немощны́хъ здра́вїе, разсла́бленныхъ и҆сцѣле́нїе, ѻ҆би́димыхъ защище́нїе, ѿ наси́лїѧ и҆ ѕло́бы сп҃се́нїе, ско́рбныхъ въ нꙋ́ждахъ помо́щнице, не преста́й моли́тисѧ ѡ҆ чтꙋ́щихъ тѧ̀.
Позна́й, дꙋшѐ моѧ̑, си́лꙋ чⷭ҇тна́гѡ и҆ животворѧ́щагѡ креста̀ гдⷭ҇и, си́мъ бо при́снѡ побѣжда́емъ полкѝ вра̑гъ ви́димыхъ и҆ неви́димыхъ, мл҃твами бцⷣы и҆ всѣ́хъ ст҃ы́хъ, въ землѝ рѡссі́йстѣй просїѧ́вшихъ.
Гро́зное бжⷭ҇твенное преще́нїе вразѝ разꙋмѣ́ша прише́ствїемъ чꙋдотво́рнагѡ ѻ҆́браза твоегѡ̀, нбⷭ҇наѧ цр҃це, стра́хомъ бо ѡ҆держи́мїи, въ бѣ́гство внеза́пное ѡ҆брати́шасѧ, си́лою свы́ше гони́мїи.
Гла́съ хвалы̀ и҆ бл҃годаре́нїѧ прино́симъ тѝ, влⷣчце, и҆ покланѧ́емсѧ пречⷭ҇томꙋ ѻ҆́бразꙋ твоемꙋ̀, и҆́мже мно́гажды на а҆га́рѧны побѣ́дꙋ дарова́ла є҆сѝ и҆ ро́гъ на́шъ вознесла̀ є҆сѝ, защи́тнице ско́раѧ ро́да хрⷭ҇тїа́нскагѡ.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѐ совокꙋ́пльшыѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.
Жите́йскими попече́нїи и҆ сластьмѝ и҆скꙋшае́мїи, тебѣ̀, и҆сто́чникꙋ тишины̀ и҆ бг҃омы́слїѧ, пѣ̑сни прино́симъ: ᲂу҆толѝ жа́ждꙋ дх҃о́внꙋю, ᲂу҆́мъ на́шъ къ нб҃ꙋ возведѝ, превы́шшаѧ го́рнихъ си́лъ.
Оу҆ма̀ моегѡ̀ просвѣще́нїе, во́ли сла́быѧ ᲂу҆крѣпле́нїе, се́рдца ᲂу҆ны́лагѡ ра́дованїе ты̀ є҆сѝ, пребл҃гослове́ннаѧ, молю́ тѧ ᲂу҆се́рднѡ: всѧ̑ си̑лы дꙋшѝ моеѧ̀ ѡ҆бновѝ.
Сла́ва тебѣ̀, всенепоро́чнаѧ, лю́бѧщымъ тѧ̀ дѣ́вамъ неѿ̾е́млемое сокро́вище, цѣломꙋ́дрїѧ и҆сто́чниче, нбⷭ҇ныѧ сла́дости ѿкрове́нїе, ᲂу҆ны́нїѧ и҆ печа́ли и҆стребле́нїе, смире́нныхъ и҆ бг҃олю́бцєвъ вѣнча́нїе и҆ по́стникѡвъ ᲂу҆добре́нїе.
И҆згла́ди грѣхопадє́нїѧ ю҆́ности, прїимѝ покаѧ́нїе ста́рости моеѧ̀, цр҃це нбⷭ҇наѧ, се́ бо ѿ чре́ва ма́тере моеѧ̀ да́же доны́нѣ вра́гъ не ѿстꙋпа́етъ, не попꙋсти́ мѧ твори́ти по́хоти є҆гѡ̀, но ᲂу҆́зы грѣхѡ́вныѧ разрѣшѝ и҆ поми́лꙋй мѧ̀.
Ка́кѡ ᲂу҆молю́ тѧ, бг҃оневѣ́сто, ᲂу҆сты̀ ѕлосло́вїѧ и҆спо́лненными, и҆лѝ кꙋ́ю пѣ́снь вознесꙋ̀, со́вѣстїю ѡ҆блича́емь; возмогꙋ́ ли позна́ти и҆́стинꙋ, лжѝ сослꙋжи́тель, сосꙋ́дъ гнѣ́ва бж҃їѧ сы́й; но жизнода́тельнице, страстьмѝ ᲂу҆мерщвле́ннꙋю дꙋ́шꙋ мою̀ ѡ҆живѝ.
Врагꙋ̀ лю́томꙋ подстꙋпа́ющꙋ, мно́гое мно́жество ста́рцєвъ и҆ же́нъ простира́ютъ тѝ немощнѣ́и рꙋ́цѣ съ во́племъ крѣ́пкимъ: прїидѝ, мт҃и милосе́рдїѧ, прїидѝ, ѿ лю́тыѧ сме́рти и҆збавлѧ́ющаѧ, ᲂу҆скорѝ сп҃стѝ гра́дъ и҆ лю́ди твоѧ̑.
Ѵ҆пакоѝ, гла́съ и҃:
Бл҃жи́мъ тѧ̀, всѝ ро́ди, бцⷣе дв҃о, въ тѧ́ бо невмѣсти́мый хрⷭ҇то́съ бг҃ъ на́шъ вмѣсти́тисѧ бл҃говолѝ. бл҃жє́ни є҆смы̀ и҆ мы̀, предста́тельство тѧ̀ и҆мꙋ́ще, де́нь бо и҆ но́щь мо́лишисѧ ѡ҆ на́съ, и҆ ро́ди хрⷭ҇тїа́нстїи твои́ми мл҃твами ᲂу҆твержда́ютсѧ. тѣ́мъ воспѣва́юще вопїе́мъ тѝ: ра́дꙋйсѧ, бл҃года́тнаѧ, гдⷭ҇ь съ тобо́ю.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀ во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.
Ѽ, вели́каѧ си́ла сле́зъ! Ѽ, неѕло́бїе влⷣки! за менѐ, па́дшаго, са́мъ стра́ждетъ! ты́ же, бг҃ома́ти, ᲂу҆ креста̀ сн҃а своегѡ̀ стоѧ́вшаѧ, неизслѣ́днꙋю глꙋбинꙋ̀ бж҃їѧ снизхожде́нїѧ на́мъ покажѝ и҆ неѡсꙋжде́ннѡ причасти́тисѧ ст҃ы́хъ и҆ стра́шныхъ та́инъ сподо́би.
Ма́ти ча́да ѕлонра́внагѡ побѣжда́етсѧ сердобо́лїемъ и҆ не мо́жетъ є҆го̀ презрѣ́ти, тѣ́мже па́че ты̀, бл҃гоꙋтро́бнаѧ, преꙋкраше́нное жили́ще бж҃їѧ снизхожде́нїѧ, менє̀, послѣ́днѣйшагѡ, не ѡ҆ставлѧ́еши и҆ дрꙋ́гъ дрꙋ́га тѧгѡты̀ носи́ти на́съ наꙋча́еши.
Ѡ҆блиста́й мѧ̀ свѣ́томъ бжⷭ҇твеннагѡ ли́ка твоегѡ̀, ѿра́до моѧ̀ пречⷭ҇таѧ, да ночна̑ѧ вознесꙋ́ ти молє́нїѧ, ᲂу҆слы́ши воздыха̑нїѧ немѡ́лчнаѧ и҆ па́мѧтїю сме́ртною ѿ пре́лести грѣха̀ сп҃сѝ.
Пла́четъ ста́рость моѧ̀, лиши́сѧ бо сынѡ́въ и҆ дще́рєй, нѣ́сть ѡ҆по́ры въ жи́зни ѻ҆дино́цѣй, но бꙋ́ди мнѣ̀ сто́лпъ и҆ крѣ́пость, свобожде́нїе печа́лей, бл҃га́ѧ ᲂу҆тѣ́шительнице, и҆ до конца̀ дні́й мои́хъ сохрани́ мѧ ѿ ѕла̀.
Неизрече́нною си́лою бл҃года́ти возбранѝ сквє́рнымъ помыслѡ́мъ, ѡ҆бꙋрева́ющымъ мѧ̀, дв҃о чⷭ҇таѧ, запретѝ и҆̀мъ, и҆ дале́че ѿгонѝ, и҆ бжⷭ҇твенныхъ пѣснопѣ́нїй дѣ́лателѧ мѧ̀ сотворѝ, да нелѣ́ностнѡ послꙋжꙋ̀ бг҃ꙋ моемꙋ̀.
Во́инствъ бл҃гопоспѣше́нїе, борцє́въ мꙋ́жество, хра́брыхъ спобо́рнице, воево́до возбра́ннаѧ, мо́лимъ тѧ̀ крѣ́пость ѻ҆рꙋ́жїю на́шемꙋ дарова́ти, да низло́жены бꙋ́дꙋтъ востаю́щїи на ны̀, тобо́ю бо побѣ̑ды воздви́жꙋтсѧ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й, ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀, ми́ръ подава́ющаѧ.
Прама́ти є҆́ѵа, въ раю̀ согрѣши́вши, мꙋ́къ рожде́нїѧ содѣ́ла мѧ̀ прича́стнꙋ, но ты́, бл҃года́тнаѧ, неболѣ́зненнѡ хрⷭ҇та̀ ро́ждшаѧ, чадоро́дїѧ ра́ди дꙋ́шꙋ мою̀ сп҃сѝ.
Ꙗ҆́кѡ цвѣ́тъ се́льный, ꙗ҆ви́сѧ ча́до моѐ въ мі́ръ скорбе́й и҆ дыха́нїемъ сме́рти ᲂу҆жѐ ѡ҆пали́сѧ, но по сло́вꙋ гдⷭ҇ню воспою̀: бл҃же́нно дѣ́тство, и҆́бо црⷭ҇тво нбⷭ҇ное наслѣ́дитъ, ты́ же, влⷣчце, прекраще́нїе воздыха́нїй, сама̀, ꙗ҆́коже вѣ́си, ско́рбь мою̀ ѡ҆блегчѝ.
Ѻ҆́чи твоѝ свѣ́тлѣи съ любо́вїю на ни́щихъ призира́ютъ, и҆ рꙋка̀ всегда̀ сирота́мъ и҆ вдови́цамъ просте́рта, сла́вимъ неꙋсы́пное ѡ҆ ни́хъ хода́тайство, и҆ ѻ҆́бразъ тво́й чⷭ҇тны́й лобыза́юще, про́симъ: не ѿвратѝ лица̀ твоегѡ̀ ѿ на́съ, въ нꙋ́ждѣ ѡ҆жесточе́нныхъ.
Та̑йны грѣ́хъ мои́хъ ѡ҆бличе́нїе ᲂу҆жаса́етъ мѧ̀, пречⷭ҇таѧ, но ничто́же возмо́жнѡ ᲂу҆таи́ти ѿ всеви́дѧщагѡ ѻ҆́ка, сѐ прибѣга́ю къ твоемꙋ̀ милосе́рдїю, да́ждь мѝ си́лꙋ къ покаѧ́нїю и҆ твои́ми мл҃твами покры́й мою̀ наготꙋ̀.
Гнѣ́въ, ревнова́нїе и҆ ѕло́ба въ дꙋшѝ мое́й го́рдѣй и҆ тщесла́внѣй гнездѧ́тсѧ, са́мъ па́даю и҆ па́дшихъ ѡ҆сꙋжда́ти дерза́ю, къ тебѣ̀ прибѣго́хъ, ѡ҆бꙋрева́емыхъ сп҃си́тельнице, страсте́й мои́хъ смра́дное мо́ре и҆зсꙋшѝ.
Оу҆жаса́етъ мѧ̀ де́нь сꙋда̀ бж҃їѧ, гдⷭ҇ꙋ бо вѣ́дома всѧ̑ помышлє́нїѧ, не надѣ́юсѧ на дѡ́браѧ дѣла̀ моѧ̑, нѣ́сть бо тѣ́хъ ᲂу҆ менє̀, но прошꙋ̀ мл҃твъ твои́хъ, грѣ́шныхъ спорꙋ́чнице.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Ѡ҆каѧ́ннꙋю мою̀ дꙋ́шꙋ, влеко́мꙋю лꙋка́выми страстьмѝ, свободѝ и҆з̾ плѣ́на, па́дшихъ воста́нїе, ра́дꙋетсѧ бо влⷣка твоемꙋ̀ ѡ҆ грѣ́шныхъ предста́тельствꙋ, прошє́нїѧ твоѧ̑, ꙗ҆́кѡ сн҃ъ, и҆сполнѧ́ѧй.
Воздыха̑нїѧ тѧ̑жкаѧ слы́шиши, пребл҃гослове́ннаѧ, ско́рбь се́рдца моегѡ̀ вѣ́дꙋщи, мѵ́ро ᲂу҆тѣше́нїѧ и҆ вїно̀ весе́лїѧ возле́й на ра̑ны дꙋшє́вныѧ, мра́къ ᲂу҆ны́нїѧ прогонѧ́ющи.
Помышлѧ́ю трꙋды̀ подви́жникѡвъ: по́стъ непреста́нный, сле́зы сокрꙋше́нїѧ, мл҃твы всенѡ́щныѧ, послꙋша́нїе нелицемѣ́рное, терпѣ́нїе поноше́нїй, ᲂу҆жаса́юсѧ, мт҃и сꙋдїѝ пра́веднагѡ, моемꙋ̀ нераде́нїю ѡ҆ сп҃се́нїи, ѿ сна̀ безчꙋ́вствїѧ мѧ̀ пробꙋдѝ.
Сꙋ́щїи во а҆́дѣ не мо́гꙋтъ гдⷭ҇а моли́ти, ты́ же, всемо́щнаѧ предста́тельнице, ꙗ҆́кѡ мт҃и, дерзнове́нїе къ сн҃ꙋ и҆́маши, мо́лимъ тѧ̀ ѡ҆ сро́дницѣхъ на́шихъ и҆ всѣ́хъ преста́вльшихсѧ, и҆спросѝ и҆̀мъ грѣхѡ́въ разрѣше́нїе.
Въ сме́ртный ча́съ слы́шꙋ гла́съ гдⷭ҇а, прⷪ҇ро́комъ вѣща́ющь: пред̾ѡста́ви мѝ ча́дъ твои́хъ, а҆́зъ поддержꙋ̀ и҆ препита́ю си́рыхъ твои́хъ. и҆ ты̀, мт҃и бж҃їѧ, бꙋ́ди ча́дѡмъ мои̑мъ прибѣ́жище въ де́нь ско́рби.
На по́ли бра́ни сме́рть ца́рствꙋетъ, ты́ же, влⷣчце, вѣ̑рнымъ во́инѡмъ мл҃твою ма́тере жи́знь сохранѧ́еши, ᲂу҆бїе́нныхъ же дꙋ́шы въ црⷭ҇тво свѣ́та незаходи́магѡ вселѧ́еши и҆ та́кѡ ѿ вѣ́чныѧ сме́рти и҆збавлѧ́еши.
Конда́къ, гла́съ и҃:
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.
І҆́косъ:
А҆́гг҃лъ предста́тель съ нб҃сѐ по́сланъ бы́сть рещѝ бцⷣѣ: ра́дꙋйсѧ! и҆ со безпло́тнымъ гла́сомъ воплоща́ема тѧ̀ зрѧ̀, гдⷭ҇и, ᲂу҆жаса́шесѧ и҆ стоѧ́ше, зовы́й къ не́й такѡва́ѧ: ра́дꙋйсѧ, є҆́юже ра́дость возсїѧ́етъ: ра́дꙋйсѧ, є҆́юже клѧ́тва и҆сче́знетъ. ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе. ра́дꙋйсѧ, высото̀ неꙋдобовосходи́маѧ чл҃вѣ́ческими по́мыслы: ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма. ра́дꙋйсѧ, ꙗ҆́кѡ є҆сѝ цр҃е́во сѣда́лище: ра́дꙋйсѧ, ꙗ҆́кѡ но́сиши носѧ́щаго всѧ̑. ра́дꙋйсѧ, ѕвѣздо̀ ꙗ҆влѧ́ющаѧ со́лнце: ра́дꙋйсѧ, ᲂу҆тро́бо бжⷭ҇твеннагѡ воплоще́нїѧ. ра́дꙋйсѧ, є҆́юже ѡ҆бновлѧ́етсѧ тва́рь: ра́дꙋйсѧ, є҆́юже покланѧ́емсѧ творцꙋ̀ Ра́дꙋйсѧ, невѣ́сто неневѣ́стнаѧ.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
А҆́ще всѧ̑ вѣ́си, бг҃а же не вѣ́си, ничто́же вѣ́си, и҆́щꙋщымъ мꙋ́дрости виті́ѧ возвѣща́етъ. ѽ мт҃и бж҃їѧ! неизслѣ́димаѧ глꙋбина̀ бж҃їихъ ѿкрове́нїй тобо́ю ꙗ҆ви́сѧ, просвѣтѝ мо́й ᲂу҆́мъ, во є҆́же гдⷭ҇а и҆скꙋпи́телѧ позна́ти, бг҃а ѻ҆тє́цъ на́шихъ.
Чегѡ̀ ра́ди ѡ҆сквернѧ́ютсѧ пꙋтїѐ грѣ́шника; ѿвѣща́етъ прⷪ҇ро́къ дв҃дъ: тогѡ̀ ра́ди, ꙗ҆́кѡ нѣ́сть бг҃а пред̾ ни́мъ. ѿкро́й ѻ҆́чи моѝ ѡ҆мраче́ннѣи, чⷭ҇таѧ, да позна́ю вездѣсꙋ́щїе творца̀ всѧ́ческихъ, бг҃а ѻ҆тє́цъ на́шихъ.
Ви́ждꙋ покаѧ́нїе дв҃дово: во вре́тище ѡ҆блека́етсѧ, дꙋ́шꙋ посто́мъ смирѧ́етъ, питїѐ пла́чемъ покаѧ́нїѧ растворѧ́етъ, полꙋ́нощи встае́тъ на мл҃твꙋ, моѧ́ же мл҃тва бг҃омъ ѿверга́етсѧ, поне́же не ꙗ҆влѧ́ю трꙋдѡ́въ, ни по́двигѡвъ, и҆́мже мѧ̀, бл҃года́тнаѧ, наꙋчѝ.
Нбⷭ҇ныхъ си́лъ цр҃и́це, разсѣ́й ѻ҆́блаки печа́ли, смѧте́нїѧ и҆ бꙋ́рю помыслѡ́въ ᲂу҆кротѝ, да́рꙋй мѝ дꙋ́хъ сокрꙋше́нїѧ и҆ смире́нїѧ, да и҆з̾ глꙋбины̀ се́рдца моегѡ̀ принесꙋ̀ чⷭ҇тꙋю мл҃твꙋ бг҃ꙋ ѻ҆тє́цъ на́шихъ.
Се́рдце ᲂу҆слажда́етсѧ, є҆гда̀ бл҃года́ть твоѧ̀ ꙗ҆влѧ́етсѧ, ми́ръ, ᲂу҆миле́нїе и҆ сле́зы ражда́ютсѧ, ѽ дв҃о, ра́досте моѧ̀ неизрече́ннаѧ, не пре́зри мѧ̀, ѡ҆жесточе́ннаго, но сама̀ посѣтѝ, да мꙋ́къ томле́нїѧ и҆зба́витъ мѧ̀ бг҃ъ ѻ҆тє́цъ на́шихъ.
Никто́же и҆зба́витъ мѧ̀ ѿ сме́рти, ни роди́телїе, ни ча̑да, не сп҃се́тъ да́ръ, нижѐ приноше́нїе, зна́емїи прово́дѧтъ то́кмѡ до гро́ба, грѣси́ же моѝ ѡ҆ста́нꙋтсѧ, ᲂу҆слы́ши, милосе́рдаѧ, во́пль мо́й, да сп҃се́тъ мѧ̀ ѻ҆гнѧ̀ вѣ́чнагѡ бг҃ъ ѻ҆тє́цъ на́шихъ.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆̀бо ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.
Во́зрастъ ю҆́ности и҆ жа́жда наслажде́нїѧ плѣнѧ́ютъ мою̀ дꙋ́шꙋ, бл҃года́тнаѧ, но къ вѣ́чномꙋ бл҃же́нствꙋ и҆ сла́вѣ ст҃ы́хъ ѡ҆братѝ моѧ̑ помышлє́нїѧ, да славосло́влю гдⷭ҇а моего̀ и҆ превознесꙋ̀ є҆го̀ во всѧ̑ вѣ́ки.
Во́лны невѣ́рїѧ и҆ скорбе́й лю́тыхъ покрыва́ютъ мою̀ дꙋ́шꙋ, но слы́шꙋ гла́съ гдⷭ҇а, гл҃го́люща: маловѣ́рный, почто̀ ᲂу҆сꙋмни́лсѧ є҆сѝ; къ тебѣ̀ прибѣго́хъ, мт҃и бж҃їѧ, сп҃си́ мѧ и҆ ча̑да моѧ̑, въ тебѣ́ бо ᲂу҆твержде́нїе вѣ́ры и҆́мамы, да превозно́симъ гдⷭ҇а творца̀ во вѣ́ки.
Чревоꙋго́дїю, нечистотѣ̀ слꙋжꙋ̀ прилѣ́жнѡ, за ѡ҆би́ды ме́стїю воздаю̀, ѡ҆блича́емь, гнѣ́ваюсѧ напра́снѡ, ѕлосло́влю не ѡ҆каза́вшихъ мѝ по́мощи, са́мъ же немощны́хъ презира́ю, ѽ спорꙋ́чнице грѣ́шныхъ, ꙗ҆вѝ долготерпѣ́нїе и҆ ѿ грѣха̀ свободи́ мѧ во вѣ́ки.
Невозмо́жнѡ ма́лою слезо́ю вели̑кїѧ сквє́рны ѡ҆мы́ти и҆ ѻ҆́гнь гее́нскїй ᲂу҆гаси́ти, ѽ всеми́лостиваѧ мт҃и, ви́ждꙋ ѡ҆жесточе́нїе моѐ и҆ молю́сѧ тѝ: да́ждь мѝ сле́зы покаѧ́нїѧ, да ᲂу҆бѣлю̀ ѻ҆дѣѧ́нїе дꙋшѝ моеѧ̀.
Съ мольбо́ю неѿстꙋ́пною, наде́ждою крѣ́пкою припа́даю тѝ, держа́внаѧ влⷣчце: зри́ши врага̀ лю́тагѡ приближе́нїе, ᲂу҆слы́ши въ слеза́хъ прите́кшихъ, воста́ни ско́рѡ, и҆ ꙗ҆́кѡ бл҃га́ѧ, защитѝ, да сла́влю тѧ̀, мт҃и бг҃а моегѡ̀, во вѣ́ки.
Пла́чь мо́й въ ра́дость ѡ҆братѝ и҆ сѣ́тованїе въ весе́лїе, мт҃и милосе́рдїѧ, и҆ гѡ́рдыѧ за̑мыслы вра̑гъ (с. 685) мои́хъ сокрꙋшѝ, да бл҃гослови́тъ тѧ̀ всѧ́къ ꙗ҆зы́къ и҆ всѧ́ка пло́ть ѿны́нѣ и҆ до вѣ́ка.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
При́зри на нищетꙋ̀ дꙋше́внꙋю и҆ всѧ́кꙋю го́речь ᲂу҆сладѝ, непосты́днаѧ наде́ждо на́ша, скорбѧ́щихъ ѡ҆бодре́нїе, пла́чꙋщихъ ско́рое ᲂу҆тѣше́нїе, неистощи́ма бо сокрѡ́вища твоѧ̑, и҆ ра́дꙋющисѧ, дае́ши ѧ҆̀ всѣ̑мъ, по́мощи тре́бꙋющымъ.
Вкꙋси́те и҆ ви́дите, ꙗ҆́кѡ бл҃гъ гдⷭ҇ь, за любо́вїю бо слѣ́дꙋетъ гдⷭ҇а позна́нїе. ѽ трапе́зо та́инственныхъ дарова́нїй! сподо́би мѧ̀ неѡсꙋжде́ннѡ животворѧ́щихъ та́инъ причаща́тисѧ, во ѡ҆чище́нїе грѣхѡ́въ мои́хъ.
Пред̾ і҆кѡ́ною твое́ю, зрѝ, влⷣчце, жите́йское мо́ре волнꙋ́етсѧ, сп҃сѝ погиба́ющихъ въ волна́хъ невѣ́рїѧ и҆ ѕло́бою и҆стоще́нныхъ, волно́ю твоегѡ̀ милосе́рдїѧ и҆знесѝ на бре́гъ сп҃се́нїѧ, да зовꙋ́тъ тѝ: ра́дꙋйсѧ, ѿ вѣ́чныѧ сме́рти и҆збавле́нїе.
Самомне́нїемъ ѡ҆слѣпле́нъ, навыко́хъ ᲂу҆корѧ́ти бра́та моего̀, ка́кѡ сообщꙋ̀ свѣ́тъ бли́жнемꙋ, тмо́ю лжѝ покры́тъ сы́й, да́рꙋй мѝ, ѽ мт҃и свѣ́та, зрѣ́ти моѧ̑ прегрѣшє́нїѧ и҆ бра́та моегѡ̀ согрѣшє́нїѧ терпѣ́ти и҆ съ любо́вїю и҆справлѧ́ти.
А҆́ггелъ сме́рти нападѐ на мѧ̀, презира́етъ молє́нїѧ, пла́чꙋ не вне́млетъ, разлꙋча́етъ мѧ̀ безжа́лостнѡ со ча́ды, влече́тъ мѧ̀ наси́льнѡ. ѽ бг҃ома́ти, съ сн҃омъ твои́мъ крє́стныѧ мꙋ̑ки раздѣли́вшаѧ, ма́тернюю ско́рбь ѡ҆ бли́жнихъ ᲂу҆толѝ.
Зе́млю рѡссі́йскꙋю въ достоѧ́нїе себѣ̀ и҆збра́вшаѧ и҆ ᲂу҆тверди́вшаѧ на́съ во бл҃гоче́стїи, под̾ покро́вомъ твои́мъ соблюдѝ, всепѣ́таѧ, ѻ҆́бразомъ твои́мъ чⷭ҇тны́мъ ѿ всѣ́хъ напа́стей сохранѝ, да зове́мъ тѝ: ра́дꙋйсѧ, всеми́лостиваѧ, въ напа́стехъ ско́раѧ застꙋ́пнице.
Свѣти́ленъ:
Торжествꙋ́емъ дне́сь, правовѣ́рнїи, во хра́мѣ твое́мъ, влⷣчце, и҆ ты̀, пречⷭ҇таѧ, прїимѝ любо́вїю приноси̑мыѧ тебѣ̀ пѣ̑сни бл҃года́рствєнныѧ.
На хвали́техъ стїхи̑ры, гла́съ є҃:
Подо́бенъ: Ра́дꙋйсѧ:
Красꙋ́йсѧ, страно̀ рѡссі́йскаѧ, ра́дꙋйсѧ и҆ весели́сѧ, гра́де москва̀, се́ бо ст҃а́ѧ и҆ чꙋдотво́рнаѧ бг҃ома́тере і҆кѡ́на ѿ донски́хъ предѣ́лъ чꙋде́съ зарѧ́ми возсїѧ̀ и҆ бы́сть на́мъ во сп҃се́нїе ѿ наше́ствїѧ и҆ноплеме́нныхъ и҆ и҆ны́хъ вра̑гъ, ви́димыхъ и҆ неви́димыхъ, и҆ ѿ всѧ́кїѧ напа́сти.
Ра́дꙋйсѧ, землѐ рѡссі́йскаѧ, торжествꙋ́й и҆ весели́сѧ, всечⷭ҇тны́й гра́дъ москва̀, сѐ ѻ҆́бразъ бцⷣы съ по́лѧ бра́ни грѧде́тъ къ тебѣ̀, сѐ ра́дость побѣ́ды ми́лостїю бж҃їею возвѣща́етсѧ, тма̀ ᲂу҆̀бо ско́рби твоеѧ̀ ны́нѣ ѿгонѧ́етсѧ, лю́дїе сла́дкое прїе́млютъ ᲂу҆тѣше́нїе, воспо́йте, сщ҃е́нницы, воспо́йте пѣ̑сни хвалє́бныѧ, вели́чїѧ бг҃ома́тере достѡ́йныѧ, припаде́мъ, вѣ́рнїи, къ влⷣчцѣ всѣ́хъ, да пребꙋ́дꙋтъ покро́въ и҆ млⷭ҇ть є҆ѧ̀ над̾ на́ми во вѣ́ки.
Красꙋ́йсѧ, златогла́вый чꙋ́дный гра́дъ москва̀, ра́дꙋйсѧ и҆ весели́сѧ, ѻ҆би́теле донска́ѧ, се́ бо ше́ствꙋетъ къ тебѣ̀ і҆кѡ́на бж҃їѧ мт҃ре, рꙋка́ми вѣ́рныхъ, ꙗ҆́кѡ зна́менїе побѣ́дное, носи́ма, блиста́нїемъ зра́ка своегѡ̀ врагѝ прогонѧ́ющи, ча́дѡмъ же подаю́щи живо́тъ и҆ ве́лїю млⷭ҇ть.
Сла́ва, и҆ ны́нѣ, гла́съ в҃:
Грѧди́те, хрⷭ҇тоимени́тїи лю́дїе, пра́здникъ чⷭ҇тенъ соста́вимъ и҆ пѣ́снми ра́достными воспое́мъ пресла́внꙋю мт҃рь бж҃їю, ꙗ҆́кѡ ѿ і҆кѡ́ны є҆ѧ̀ ст҃ы́ѧ, нарица́емыѧ донскі́ѧ, застꙋпле́нїе гра́дꙋ москвѣ̀ ꙗ҆ви́сѧ, тѣ́мже пое́мъ тебѣ̀, влⷣчце, пѣ̑сни хвалє́бныѧ, ꙗ҆́кѡ застꙋ́пницѣ рѡссі́йскїѧ землѝ и҆ хода́таицѣ на́шегѡ сп҃се́нїѧ.
Славосло́вїе вели́кое. Є҆ктєнїѝ. И҆ ѿпꙋ́стъ.
На лїтꙋргі́и слꙋ́жба всѧ̀ бцⷣе.
Мл҃тва.
Ѽ всеми́лостиваѧ мт҃и, пречⷭ҇таѧ дв҃о бцⷣе! ты̀ є҆сѝ свѣ́тъ ᲂу҆ма̀ моегѡ̀, ра́дость се́рдца моегѡ̀, си́ла во́ли моеѧ̀. ᲂу҆слы́ши и҆ прїимѝ моле́нїе моѐ. при́зри на ꙗ҆́звы дꙋшѝ и҆ тѣ́ла моегѡ̀, ѡ҆богати́хсѧ страстмѝ, ѡ҆бнища́хъ смире́нїемъ. и҆спо́лненъ є҆́смь стꙋда̀ за ѕла̑ѧ дѣла̀ и҆ трепе́щꙋ сꙋда̀ бж҃їѧ. грѣсѝ ю҆́ности, забве́ннїи и҆ ᲂу҆тае́ннїи грѣсѝ ѡ҆тѧгча́ютъ со́вѣсть мою̀. ѡ҆мы́й мѧ̀ стрꙋѧ́ми сле́зными, снимѝ бре́мѧ тѧ́жкое, грѣхо́вное, да сотворю̀ плоды̀ достѡ́йныѧ покаѧ́нїѧ. те́рнїемъ скорбе́й ᲂу҆сы́панъ є҆́сть пꙋ́ть мо́й. вѣ́мъ, ꙗ҆́кѡ пра́вда бж҃їѧ наказꙋ́етъ мѧ̀. ᲂу҆молѝ милосе́рдїе бж҃їе ѡ҆ мнѣ̀, при́зри на сле́зы моѧ̑ и҆ и҆спра́ви и҆ сп҃си́ мѧ и҆ ча̑да моѧ̑, бꙋ́ди мѝ сокро́вище вѣ́ры и҆ храни́лище бл҃гоче́стїѧ. да́рꙋй несокрꙋши́мое терпѣ́нїе въ бѣда́хъ, ѿ вѣ́ры проистека́ющее, ѿымѝ дꙋ́хъ пра́здности, ᲂу҆ны́нїѧ, любонача́лїѧ. и҆згонѝ гнѣ́въ, за́висть, памѧтоѕло́бїе, нечистотꙋ̀, лѣ́ность, си́ми и҆ бо́льшими поро́ки недꙋ́гꙋетъ дꙋша̀ моѧ̀. примирѝ враждꙋ́ющыѧ, ѡ҆правда́й ѡ҆клевета̑нныѧ. просвѣтѝ на́съ свѣ́томъ сн҃а твоегѡ̀ и҆ да́ждь на́мъ гл҃го́лати сло́во и҆́стины, тве́рдое въ пра́вдѣ, ми́рное любвѐ ра́ди, растворе́нное бл҃горазꙋ́мїемъ. посѣтѝ въ болѣ́знехъ и҆ печа́лехъ сꙋ́щихъ, да всѝ, под̾ держа́внымъ покро́вомъ твои́мъ сохранѧ́еми, безбѣ́днѡ црⷭ҇твїѧ нбⷭ҇нагѡ дости́гнемъ, хвалꙋ̀ воздава́юще за всѧ̑ чл҃вѣколю́бцꙋ бг҃ꙋ. а҆ми́нь.