В 20-й день

Предпра́зднство Введе́ния (Вхо́да) во храм Пресвяты́я Богоро́дицы, и преподо́бнаго отца́ на́шего Григо́рия Декаполи́та, и и́же во святы́х отца́ на́шего Про́кла, архиепи́скопа Константи́награ́да

На Го́споди, воззва́х: стихи́ры предпра́зднства, глас 1.

Подо́бен: Небе́сных чино́в:

Свещено́сицы де́вы,/ Присноде́ву све́тло провожда́юще,/ проро́чествуют и́стинно Ду́хом бу́дущее:/ храм бо Бо́жий Богоро́дица су́щи,/ в храм со сла́вою де́вственною,/ младе́нствующи, вво́дится.

Обеща́ния свята́го и плод благосла́вный,/ Богоро́дица вои́стинну яви́ся ми́ру,/ я́ко всех превы́шшая,/ я́же благоче́стно приводи́ма в храм Бо́жий,/ моли́тву ро́ждших исполня́ет,/ соблюда́ема Боже́ственным Ду́хом.

Небе́сным воспи́тана, Де́во, хле́бом/ ве́рно в хра́ме Госпо́дни,/ родила́ еси́ ми́ру жи́зни Хлеб, Сло́во./ Ему́же, я́ко храм избра́нный и всенепоро́чный,/ предобручи́лася еси́ Ду́хом та́инственно,/ обруче́на Бо́гу и Отцу́.

Стихи́ры преподо́бнаго, глас и подо́бен то́йже:

В Небе́сныя оби́тели с весе́лием вселя́яся/ и со А́нгелы, о́тче, предстоя́ дерзнове́нно Престо́лу Госпо́дню,/ на земли́ соверша́ющим па́мять твою́/ грехо́в оставле́ние и страсте́й дарова́ти моли́ся.

Моли́твенным серпо́м, о́тче Григо́рие,/ страсте́й те́рния изсе́к/ и возде́лав ра́лом воздержа́ния зе́млю душе́вную,/ вверг семена́ благоче́стия в ню:/ и́миже нам возраща́еши исцеле́ния плоды́.

Доброде́телей тя прия́телище нарица́ем, преподо́бне,/ я́ко молча́ния дру́га, бде́ния де́лателя, и о́браз целому́дрия,/ и моли́твы жили́ще некра́домое, и чуде́с сокро́вище,/ и моли́твенника чту́щих тя, Григо́рие.

Сла́ва, и ны́не, глас 4:

Днесь Боговмести́мый храм, Богоро́дица,/ в храм Госпо́день приво́дится,/ и Заха́рия Сию́ прие́млет,/ днесь святы́х свята́я ра́дуются,/ и лик А́нгельский та́инственно торжеству́ет,/ с ни́миже и мы, пра́зднующе днесь, с Гаврии́лом возопии́м:/ ра́дуйся, Благода́тная, Госпо́дь с Тобо́ю,/ име́яй ве́лию ми́лость.

А́ще в пято́к ве́чера: Сла́ва, предпра́зднства. И ны́не, догма́тик гла́са.

На стихо́вне стихи́ры свята́го Про́кла, глас 4.

Подо́бен: Дал еси́ зна́мение:

Догма́тов све́тлостию и жития́ красото́ю/ благоче́стно удобри́л еси́, Про́кле приснопа́мятне, священнонача́лие,/ и Це́ркве столп яви́лся еси́ и́стинно,/ просвеща́я вся словесы́ твои́ми./ Тем тя ублажа́ем и во псалме́х же и пе́снех/ святу́ю и всечестну́ю пра́зднуем па́мять твою́.

Стих: Честна́ пред Го́сподем/ смерть преподо́бных Его́.

Све́тло научи́л еси́ и Богому́дренно пропове́дал еси́/ Богоро́дицу, пречи́стую Отрокови́цу,/ ро́ждшую Су́щаго пре́жде век Созда́теля и Влады́ку,/ Сы́на и Сло́во О́тчее,/ и в после́дняя за ны Челове́ка бы́вша хоте́нием и невра́щна168 естество́м,/ и Несто́рия посрами́в, я́ко нечести́ва и пребезу́мна.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Во́ды поче́рпл еси́ златоза́рныя, приснопа́мятне,/ му́драго Богопропове́дника,/ Его́же и прее́мник и благоче́стия яви́лся еси́, и седа́лища,/ утвержда́я уче́нми и́стины Христо́ву па́ству,/ и того́ честне́йшия и всечестны́я мо́щи,/ я́коже у́тварь ца́рскую, Це́ркви отда́л еси́.

Сла́ва, и ны́не, глас 4.

Самогла́сен:

Прииди́те, вси ве́рнии,/ еди́ну Непоро́чную восхва́лим,/ от проро́к пропове́данную и в храм приведе́нную,/ пре́жде век пронарече́нную Ма́терь/ и в после́дняя ле́та169 я́вльшуюся Богоро́дицу./ Го́споди, моли́твами Ея́/ мир Твой пода́ждь нам и ве́лию ми́лость.

Тропа́рь о́бщий, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Тропа́рь Григо́рия, глас 3:

О́браз был еси́ воздержа́ния,/ Боже́ственным Ду́хом вся просвети́в:/ правове́рия тече́ние соверши́л еси́,/ уче́нием мир просвети́л еси́/ и злове́рных обличи́л еси́ смы́слы,/ о́тче преподо́бне Григо́рие,/ Христа́ Бо́га моли́ дарова́ти нам ве́лию ми́лость.

Тропа́рь Про́кла, глас 4:

И́же Боже́ственным нача́лом прему́дрости,/ стра́хом Госпо́дним утве́рждся,/ отту́ду свяще́нными восхожде́нии возше́л еси́/ во учени́чество Златоу́ста,/ и архиере́йскаго того́ престо́ла досто́ин быв чистоты́ добро́тами,/ апо́стольским пра́вилом себе́ вообрази́в,/ не себе́ живы́й, но Христу́ и ста́ду твоему́./ Тем в нетле́нный живо́т апо́стольски всели́лся еси́,/ иера́рше Про́кле,/ моли́ Христа́ Бо́га/ спасти́ся душа́м на́шим.

Сл́ава, и ны́не, предпра́зднства, глас то́йже:

Ра́дость предобруча́ет всем А́нна ны́не,/ печа́ли сопроти́вный плод прозя́бши, еди́ну Присноде́ву,/ Ю́же и приво́дит, моли́твы исполня́ющи,/ днесь веселя́щися, в храм Госпо́день,/ я́ко су́щий храм Бо́га Сло́ва и Ма́терь чи́стую.

На у́трени

НаБог Госпо́дь: тропа́рь предпра́зднства, два́жды. Сла́ва, святы́х, и ны́не, предпра́зднства.

По 1-й кафи́зме, седа́лен, глас 4.

Подо́бен: Удиви́ся Ио́сиф:

Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние,/ в Боже́ственнем же хра́ме, я́ко су́що Боже́ственный храм,/ от младе́нства чи́сте, со свеща́ми све́тлыми отдана́ бы́вши,/ яви́лася еси́ прия́телище непристу́пнаго и Боже́ственнаго Све́та,/ вели́ко вои́стинну предше́ствие Твое́, еди́на Богоневе́сто и Присноде́во.

Сла́ва и ны́не, то́йже.

По 2-й кафи́зме седа́лен, глас и подо́бен то́йже:

Храм Бо́жий, многоче́стный черто́г,/ в храм Бо́жий со свеща́ми све́тлыми, с весе́лием всели́тися происхо́дит;/ и ра́дуется о Ней Заха́рия, зря явле́ние я́сно, свяще́нных проро́ков исполня́емо,/ и весели́тся, и предпра́зднственный пое́т глас:/ ра́дость провозвеща́ет происхожде́ние Твое́, Отрокови́це Девома́ти.

Сла́ва и ны́не, то́йже.

Кано́н предпра́зднства со ирмосо́м на 6 и святы́х о́ба кано́на на 8. Кано́н предпра́зднства, его́же краегране́сие по алфави́ту до седмы́я пе́сни. Подо́бно же и осма́я своя́ стихи́. Девя́тая же Ио́сифово, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся,/ Тоя́ чудеса́.

Святы́х во свята́я Всесвята́я и Непоро́чная всели́тися происхо́дит,/ Пресвята́го Бо́га я́ко да бу́дет храм освяще́н,/ и Той предтеку́т де́вы отрокови́цы.

Сове́т преве́чный Преве́чнаго Бо́га на́шего во исполне́ние гряде́т/ предгряду́щей Ти воспита́тися во свята́я святы́х,/ Сло́ва в жили́ще, Отрокови́це Всенепоро́чная.

Роди́телие Боже́ственнии Тя, Бо́жию Роди́тельницу хотя́щу бы́ти,/ вво́дят воспита́тися во свята́я святы́х:/ моли́тву, е́юже моля́хуся, обеща́ние исполня́ют, Пречи́стая.

Укрепи́, Влады́чице, не́мощь се́рдца моего́/ и утверди́, страстьми́ коле́блемое,/ я́ко да ве́рою Тя и любо́вию ублажа́ю, Присноблаже́нную и Всенепоро́чную.

Ин кано́н преподо́бнаго Григо́рия, глас 8.

Творе́ние Ио́сифа.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Умерщвле́нную сластьми́ телесе́, смире́нную мою́ ду́шу/ твои́ми моли́твами оживи́, блаже́нне Григо́рие:/ жизнь бо ны́не прия́л еси́ нестаре́ющуюся,/ умертви́в я́же на земли́ у́ды, преподо́бне, по́стническими по́двиги.

Удержа́в сла́сти теле́сныя ума́ чистото́ю,/ из млада́го, о́тче, во́зраста орга́н Ду́ха был еси́,/ Того́ де́йства све́тло прие́мля и Богови́ден познава́яся.

Жела́нием Боже́ственным пло́ти жела́ния увяди́л еси́,/ и тебе́ самому́, блаже́нне, обручи́л еси́ супру́жницу чистоту́,/ из нея́же ча́да тебе́ роди́шася вся доброде́тели, присносла́вне,/ ча́до тя Бо́жие соде́ловающия.

Богоро́дичен: От земли́ до Небе́с дося́жущи ле́ствица Небе́сная,/ е́юже Бог Сло́во земны́м сни́де,/ Благослове́нная Пречи́стая, несказа́нное чу́до, недомы́сленное виде́ние,/ спаси́ к Тебе́ прибега́ющия.

Ин кано́н свята́го Про́кла, глас 1.

Творе́ние Феофа́ново.

Песнь 1

Ирмо́с: Твоя́ победи́тельная десни́ца/ Боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Дея́нием же и сло́вом и́стинным/ разу́мных Арха́нгелов быв сообра́зен, Богоприя́тне,/ и с ни́ми Престо́лу предстоя́ Честны́я Тро́ицы,/ ю́же, Про́кле, моли́ спасти́ нас.

Стопа́м после́дуя я́ве Златоу́стаго, всеблаже́ные и приснопа́мятые,/ того́же Боже́ственное свяще́нства, о́тче, одея́ние/ я́ко насле́дие взял еси́ оте́ческое, достосла́вне.

Дре́вле Бо́га на зе́млю Иса́ии вопию́щу Ду́хом приити́,/ Несто́рий, умовре́дно оболгу́яй воплоще́ние,/ от Тебе́, треблаже́нне, собо́рне низверга́ется.

Богоро́дичен: Словесы́ Богодохнове́нными/ стра́шное от Де́вы уясни́л еси́ Воплоще́ние Сло́ва Бо́га на́шего/ и Богоро́дицу Сию́ пропове́дав,/ догма́том всему́дрым апо́столов после́дуя.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный 170 исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Начина́ющия отрокови́цы де́вы,/ свещи́ нося́щия све́тло, бу́дущее подпису́ют:/ из Нея́ бо роди́тся просвеще́ние зна́ния,/ реша́щее пре́лести омраче́ние.

Ревну́ющи дре́вле Богому́дренно, А́нна моли́тву исполня́ет/ и Тебе́ привозлага́ет святи́лищу, Всенепоро́чная,/ свяще́ннейшее зача́тие име́ти хотя́щу и рождество́.

Со́лнце простре́ лучи́, зря о́блак све́тлый, простира́емь/ ма́нием Боже́ственным внутрь во свята́я,/ из Нея́же одожди́т оставле́ние олядене́вшим171 страстьми́.

Обожа́ет мя Бог, всели́вся в Тя за милосе́рдие, Всенепоро́чная, Чи́стая,/ укра́дена сне́дию пре́жде ле́стию змии́ною,/ и тли нетле́ния па́ки пи́щу воздае́т.

Ин

Ирмо́с: Небе́снаго кру́га верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твоей,/ жела́ний кра́ю,/ ве́рных утвержде́ние,/ еди́не Человеколю́бче.

Доброде́телей на го́ру восте́к, преподо́бне,/ во мрак виде́ния вшел еси́/ и, разуме́в, ели́ко вмести́л еси́ Непости́жнаго естество́м,/ просвеще́ния испо́лнен, о́тче, быв.

Рожде́нный в верте́пе172 за земны́х избавле́ние,/ дре́вле тя, в верте́пе, всеблаже́нне, живу́ща,/ све́том озари́ Небе́сным, я́ко Па́вла,/ светоза́рна показу́я тя, о́тче Григо́рие.

Небе́сная дверь, Христо́ва Пречи́стая Ма́ти,/ прило́ги тя де́монскими окружа́ема, о́тче, впери́/ и мо́щна кре́постию на них соде́ла Ду́ха благода́тию.

Богоро́дичен: Ра́дуйся, еди́на, ро́ждшая вся́ческих Го́спода,/ ра́дуйся, жизнь челове́ком исхода́таившая,/ ра́дуйся, осене́нная и несеко́мая горо́, ве́рных утвержде́ние,/ ра́дуйся, Всенепоро́чная.

Ин

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме неизрече́нныя сла́вы Твоея́, Человеколю́бче.

Свет из Све́та Богови́дно, всеблаже́нне, прие́м,/ Це́ркве свет был еси́./ Те́мже и Свет тебе́ Боже́ственный возсия́ разу́мно, я́коже есть пи́сано,/ и́мже просвеща́емь, пою́щия озаря́еши па́мять твою́.

Воструби́в догма́тов гро́мом,/ я́ко сте́ны низложи́л еси́ Иерихо́нския ересе́й де́рзости вся и во́инства/ и одоле́ния побе́ду возста́вил еси́,/ Воплоще́ние Бо́жие е́же от Де́вы пропове́дав я́сно.

Исто́чнику му́дрости приложи́в уста́ твоя́, Богоприя́тне,/ и духо́вныя поче́рпл еси́ му́дрости, Про́кле, Боже́ственныя во́ды,/ му́тныя потопи́в ре́ки, всеблаже́нне, Несто́риева безбо́жная мне́ния.

Богоро́дичен: И́же горе́173 Отцу́ Единоро́дный Сын неизрече́нно сразумева́емь,/ единоро́дный из Тебе́ до́ле174 , Пречи́стая, па́че вины́ и ра́зума роди́ся/ и обожа́ет челове́ка, Пречи́стая Влады́чице Богороди́це:/ те́мже Тя сла́вим.

Ин и́кос предпра́зднства:

В прама́тери на́шей о́браз прообразова́шеся,/ егда́ вообрази́ся есте́ственный зра́к от Де́вы све́тло,/ я́коже бо о́на от ре́бр без се́мене произы́де пра́отца,/ та́ко и Сия́ без се́мене Го́спода роди́/ па́че сло́ва и помышле́ния челове́ческа и ра́зума все́х Безпло́тных,/ те́мже тя́ та́йно А́нна науча́я, пропове́да я́вственно я́же от Де́вы,/ да с ра́достию приведе́ши Ю Го́сподеви,/ Та есть сень Небе́сная.

Конда́к Григо́рия, глас 3:

Све́тлое тя со́лнце Це́рковь познава́ет,/ доброде́телей красота́ми и исцеле́ний луча́ми/ всех просвеща́я, Христо́в уго́дниче:/ те́мже пра́зднуем честну́ю па́мять твою́/ и почита́ем по́двиги твоя́,/ всеблаже́нне о́тче прему́дре Григо́рие.

Конда́к Про́кла, глас 4.

Подо́бен: Яви́лся еси́:

Досто́йно днесь торжеству́ет/ всех градо́в честне́йший вои́стинну в честно́м преставле́нии твое́м,/ о́тче отце́в, Про́кле му́дре.

Ин конда́к свята́го Про́кла, глас 8.

Подо́бен: Взбра́нной:

Всечестна́го святи́теля, Ца́рскаго гра́да престо́л украси́вшаго/ и сокро́вищем безце́нным того́ обога́щшаго, пречестны́ми мощми́ Златоу́стовыми,/ и́мже сло́во живо́тно стяжа́, просвеща́я ве́рно чту́щия его́,/ пе́сньми похвале́ния того́ ра́достно ублажи́м, зову́ще:/ ра́дуйся, архиере́ю, о́тче свяще́нный.

Седа́лен Григо́рия, глас 4.

Подо́бен: Ско́ро предвари́:

Боже́ственною све́тлостию озаря́емь,/ мрак изгна́л еси́ душетле́нных страсте́й, Григо́рие прему́дре,/ взя́тся к безстра́стия чисте́йшей высоте́,/ возсия́л еси́ пресла́вно врачева́ний зари́,/ всели́вся в незаходи́мый свет Ца́рствия Христо́ва.

Сла́ва, Про́кла, глас 3.

Подо́бен: Боже́ственныя ве́ры:

Боже́ственный быв свяще́ннопропове́дник,/ Боже́ственным уче́нием Це́рковь обогаща́я, тайноучи́телю всехва́льне,/ и Богоро́дицу Де́ву Пречи́стую пропове́дал еси́/ и Несто́рия посрами́л еси́./ Те́мже вси чтим ве́рно па́мять твою́,/ прося́ще прия́ти ве́лию ми́лость.

И ны́не, предпра́зднства, глас 1.

Подо́бен: Ка́мени запеча́тану:

Восхвали́те, де́вы, ма́тери, предпра́зднуйте,/ лю́дие, славосло́вите, свяще́нницы, благослови́те Пречи́стую Ма́терь Бо́жию:/ пло́тию бо младе́нствующи пре́жде,/ во храм принесе́ся, я́ко храм Бо́жий святе́йший./ Те́мже пра́здник соверша́юще духо́вный, воспое́м Ю,/ я́ко Предста́тельницу ро́да челове́ческаго.

Песнь 4

Ирмо́с: Неизсле́дный Бо́жий сове́т175/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.

Свяще́ннии провозвести́ша язы́цы Тебе́, Чи́стая,/ бы́ти село́176 невмести́маго Естества́,/ сего́ ра́ди Тя ли́цы де́вственнии провожда́ют, свещи́ нося́ще во свята́я.

Сла́ву взят Иоаки́м со А́нною,/ ходя́ще и нося́ще Тя с весе́лием во святы́й храм, хра́ме Бо́жий пресвяты́й,/ Чи́стая и Всенепоро́чная Влады́чице.

Разреша́ется изрече́ние прароди́тельное:/ се бо процвете́ Лоза́, я́же Грозд нетле́нный нам плодоно́сит,/ вино́ нося́щий весе́лия конце́м.

Еди́ну Тя Всенепоро́чную Соде́тель Сло́во обре́т,/ всели́ся во Твое́ чре́во, содева́я на́ше спасе́ние благода́тию, Пречи́стая,/ за неизглаго́ланную ми́лость.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча, и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Нас ра́ди стра́нным соше́ствием быв, Григо́рие, стра́нен благосты́нею,/ тебе́ Его́ ра́ди стра́нна ви́дев, от оте́чества бы́вша прия́т/ и Боже́ственна насле́дника Своего́ Ца́рства, доброде́тельми укра́шена, соде́ла.

За Христа́, нас ра́ди младе́нствовавшаго, и О́трока, преподо́бне, бы́вша,/ отроко́в учи́лищу вдал еси́ тебе́ сама́го, младе́нец зло́бою, Богому́дре о́тче, быв,/ и Боже́ственным смире́нием вра́жию зло́бу смири́л еси́, блаже́нне Григо́рие.

Ту́чами твои́х слез, о́тче Григо́рие, я́коже росо́ю Боже́ственною, напая́емь,/ вся́ку возрасти́л еси́ доброде́тель, вся́кое благопло́дие пра́вды процве́л еси́,/ я́ко дре́во плодоно́сное, при исхо́дищах вод насажде́н соверше́ннаго по́стничества.

Богоро́дичен: Ма́ти Бо́жия, Благослове́нная, Всенепоро́чная,/ души́ моея́ я́звы исцели́, сла́сти утоли́ плотски́я,/ омраче́нное се́рдце мое́ просвети́, умири́ ум мой/ и вся́каго вре́да, и вра́жиих мя напа́стей изба́ви.

Ин

Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му 177 / во спасе́ние на́ше и обновле́ние.

Глаго́л веща́ния и догма́тов благогла́сный уче́ний твои́х гром/ Це́рковь Бо́жию му́дро веселя́т,/ ерети́ческое отго́нят свире́пство, священноявле́нне Про́кле всесла́вне.

Я́коже зла́то огне́м, свяще́ннейше, воздержа́нием/ честно́е те́ло твое́ очи́стив, му́дре, красно́ показа́л еси́ Творцу́./ Сего́ ра́ди тебе́ одея́ние свяще́нства ве́чно дарова́.

Зна́ние Боже́ственное навы́к, быв я́ко иера́рх свяще́нный,/ благопода́тно про́чее всем препо́дал еси́ просвеще́ние/ и Боже́ственныя све́тлости во спасе́ние душ, достосла́вне.

Богоро́дичен: Угль Боже́ственный во утро́бе, Всенепоро́чная, прие́мши па́че ума́,/ не опали́лася еси́ и́стинно:/ купина́ бо издале́ча обра́зно Твое́ Рождество́ прообразова́/ во спасе́ние на́ше и обновле́ние.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

О́блацы да воска́плют пра́вду днесь,/ я́ко на Небеси́ бо простира́ется Боже́ственный о́блак во хра́ме Бо́жии,/ и́же ка́плет сла́дость, всю го́ресть душ на́ших изъе́млющу.

Стра́нно Твое́ зача́тие, стра́нно Твое́ и рождество́, стра́нно твое́ происхожде́ние, Де́во,/ е́же внутрь святи́лища введе́ние,/ стра́нна и пресла́вна Твоя́, сло́во превосходя́ща и помышле́ние, Пречи́стая.

Всю Тебе́ освяти́ Дух Всесвяты́й, внутрь хра́ма пребыва́ющу/ и пита́ему пи́щею небе́сною, Неве́сто О́тча прекра́сная,/ сего́ ра́ди была́ еси́ и Сло́ва Роди́тельница.

К Тебе́ мою́ всю наде́жду, Отрокови́це, полага́я,/ к щедро́там твои́м прибега́ю:/ вре́да де́монскаго яви́ неприча́стну па́дшую ду́шу мою́/ и изнемо́гшую сласте́й потопле́нми.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Де́ланием словесе́ лоза́ показа́лся еси́ плодоно́сна, преподо́бне,/ доброде́телей зре́лыя и велича́йшия принося́щая гро́зды,/ спасе́ния вино́ духо́вное точа́щия, о́тче,/ и ве́рных сердца́ веселя́щее.

Сла́вный Рим, о́тче, от восто́ка тя свети́льника незаходи́ма прие́м ве́рою,/ просвети́ся честны́ми твои́ми дарова́нии:/ Христа́ бо име́л еси́ в души́ я́ко свет,/ ви́дящия тя, о́тче, озаря́юща.

Ползя́щаго зми́я и наблюда́ющаго твою́ пя́ту, Григо́рие,/ бо́дростию Боже́ственною в путе́х жи́зни ходи́ я́ко Бо́жий уго́дник,/ я́ко за́поведей Христо́вых де́латель, умертви́л еси́ си́лою Ду́ха.

Богоро́дичен: Предста́тельнице ми́ра, Ма́ти Присноде́во, Ты мя окорми́,/ и путево́дстви мя на пра́вый путь,/ и напра́ви к пра́вды стезя́м пра́вым помышле́ние мое́,/ души́ ше́ствия исправля́ющи.

Ин

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Светоно́сен, я́ко свети́льник, всеблаже́нне, быв,/ Боже́ственныя Це́ркве яви́лся еси́ побо́рник,/ и Бо́жие уясни́л еси́ е́же из Де́вы Всесвяты́я Рождество́ невра́щное, сла́вне.

Воплоще́ние Бо́жие из Де́вы сла́вное/ догма́тов в пра́щу178 вложи́в,/ яко́ иноплеме́нника Голиа́фа, низложи́л еси́ Несто́риев свире́пый нрав,/ я́ко дре́вле Боже́ственный Дави́д.

Па́вловыми уче́нии сый испо́лнен/ и того́ виде́ния узре́в, всеизбра́нне,/ Елиссе́й вторы́й показа́вся,/ ма́стию Боже́ственною, свяще́нством, пома́зан та́инственно.

Богоро́дичен: Ни смуще́ния, ни смеше́ния во утро́бе прия́т Де́вы/ Бог, пло́тию происходи́,/ но е́же бе, пребы́сть Бог и Челове́к,/ невра́щно де́йствы явля́емь.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Укре́пльшеся Боже́ственно благода́тию, Боже́ственныя Де́вы родите́лие/ Сию́ я́ко непоро́чную голуби́цу во свята́я воспита́тися любо́вию возлага́ют.

Тебе́, хотя́щей приима́ти Свет, из Све́та происходя́щий,/ свещи́ вжига́юще, отрокови́цы, Чи́стая,/ предхло́дят светови́дно к Боже́ственному хра́му, ликовству́юще.

Полна́ сла́вы Пала́та,/ вели́кое проро́ков оглаше́ние, Престо́л Святы́й внутрь свята́я вво́дится,/ Царю́ всех гото́вящися.

Пою́ Твое́, Отрокови́це, зача́тие, пою́ Твое́ и неизрече́нное рождество́,/ пою́ и покро́в Твой, и́мже вре́да вся́каго избавля́емся,/ к Твоему́ оти́шию прибега́ющии.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

Ма́нием179 е́же к Бо́гу обожа́емь, свяще́ннейше,/ виде́нии та́инственными и Боже́ственными осия́нии/ я́ко проро́к Боже́ственный, я́ко Бо́жий уго́дник сподо́бился еси́ Бо́жия благода́ти.

Молчали́во твою́ жизнь соверши́л еси́, Богодухновенне,/ мяте́жей жите́йских яви́лся еси́ бо́льший, и страсте́й вы́шший,/ и земли́ всея́ стра́нен же и пришле́ц.

Я́ко зерца́ло чи́стое, Боже́ственною заре́ю обогати́лся еси́,/ я́ко сосу́д свяще́нный, храм украси́л еси́, го́рнюю, Григо́рие,/ и перворо́дных Це́рковь просвети́л еси́.

Богоро́дичен: Мари́е, чи́стая пала́та Царе́ва,/ бы́вша мя разбо́йником нечи́стый верте́п моли́твами Твои́ми очи́стивши,/ из Тебе́ ро́ждшемуся храм свят покажи́.

Ин

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние.

Обыше́дшия, я́ко зве́ри, отгна́л еси́ ересе́й от ста́да Христо́ва побо́рники/ жезло́м разу́мным твои́х уче́ний, Про́кле блаже́нне,/ к па́стве же правосла́вия па́ству испра́вил еси́.

Я́ко ин ковче́г, Це́ркви Христо́ве те́ло всеблаже́ннаго Златоу́ста/ вдал еси́ твои́ми, Про́кле, поуче́ньми/ и возвесели́л еси́ правосла́вных ли́ки прису́тствием его́.

На вели́кое возше́д седа́лище, преподо́бне,/ велича́йшими исправле́нии украси́л еси́ то́е Боголе́пно./ Те́мже, соше́дшеся, благохва́лим тя, архиере́е, великому́дренне Про́кле сла́вне.

Богоро́дичен: Яви́лася еси́ Херуви́мов, Богоблагода́тная Де́во, преиму́щи:/ на ра́мех бо носи́ма те́ми, Чи́стая,/ объя́тии Твои́ми носи́ла еси́./ Те́мже Тя при́сно, Богоро́дице, вси́ сла́вим.

Кондак предпра́зднства, глас 4.

Подо́бен: Яви́лся еси́ днесь:

Весе́лия днесь вселе́нная испо́лнися вся/ в благознамени́том пра́зднице Богоро́дицы,/ зову́щи:/ Та есть сень Небе́сная.

И́кос:

И́же всех Творе́ц, Созда́тель и Влады́ка,/ неизрече́нным благоутро́бием приклони́выйся, еди́нем человеколю́бием Свои́м,/ его́же Свои́ма устро́и рука́ма, ви́дев па́дша, уще́дри/ и возста́вити сего́ благоволи́, зда́ние Боже́ственнейшее,/ и истоще́нием Свои́м, я́ко благ естество́м и ми́лостив./ Тем Мари́ю Хода́таицу прие́млет и я́ко Де́ву и чи́стую та́инства,/ из Нея́ на́ше естество́ носи́ти восхоте́:/ Та есть сень Небе́сная.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Светоно́сное Тя я́ко со́лнце, прие́млет храм святы́й,/ внутрь сия́ющу зарю́ конце́м спасе́ния, Чи́стая,/ храм бы́ти иму́щую Сы́на Бо́жия, Де́во.

Рука́ми вси воспле́щем,/ избавле́ния нося́щую о́бразы Неискусобра́чную ви́дяще:/ руко́ю бо А́нгеловою пита́ется,/ Небе́сный Хлеб нам я́ко хотя́щу неизрече́нно породи́ти.

Ду́ши вся пра́ведных подзе́мныя благовести́ша Тя, голуби́це злата́я,/ поко́й нося́щу пото́па разу́мнаго проявля́ют,/ и во святы́х свята́я благоче́стно ликовству́ющу.

Я́ко красна́, Кра́снаго родила́ еси́,/ неле́поту на́шу возвраща́ющаго в пе́рвый о́браз, Отрокови́це Всенепоро́чная,/ Ему́же и пое́м:/ отце́в Госпо́дь и Бог, благослове́н еси́.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́;/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Слез пролия́ньми греха́ огнь погаси́л еси́,/ безстра́стия же во́ду и врачева́ний чи́стое пи́во песнопою́щим то́чиши, Григо́рие:/ благослове́н Бог оте́ц на́ших.

Пла́менною колесни́цею, честны́я любве́ соверше́нием носи́мь,/ к высоте́ возше́л еси́,/ в не́йже стяжа́л еси́ твое́, Богому́дре, житие́, зовы́й:/ благослове́н Бог оте́ц на́ших.

Страсте́й успи́л еси́ треволне́ния бо́дренными стоя́нми:/ усну́в же сном, пра́ведным подо́бно,/ к све́ту преше́л еси́ невече́рнему, зовы́й:/ благослове́н Бог оте́ц на́ших.

Богоро́дичен: Ме́ртва бы́вша грехо́м и погиба́юща,/ Жизнь ро́ждшая, Чи́стая Де́во,/ оживи́ и спаси́ мя и гее́нны исхити́, пою́щаго:/ благослове́н Бог оте́ц на́ших.

Ин

Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Те́ло, и ум, и ду́шу очи́стив отъя́тием страсте́й, иера́рше Про́кле му́дре,/ отту́ду догма́тствовал еси́,/ те́ло, и ду́шу, и ум от Де́вы ро́ждшагося Бо́га кроме́ премене́ния,/ за е́же спасти́ ны, прие́мшаго.

Ты, ко Христу́ стяжа́в, свя́те, дерзнове́ние,/ на земли́ хва́лящим песнопе́сненно па́мять твою́ сла́вную/ вся́ких напа́стей изба́витися моли́,/ хва́льнаго пою́щим Бо́га пресла́внаго.

Огнь разу́мный, в помышле́ниих вжег твои́х,/ хвра́стную180 и гнилу́ю злочести́ваго Несто́рия е́ресь попали́л еси́./ Те́мже ти мо́лимся:/ хвра́стныя на́ша сла́сти, е́же к Бо́гу мольба́ми твои́ми, поже́г, очи́сти, сла́вне.

Богоро́дичен: Но́сиши Бо́га, пло́тию обложе́на, на объя́тиих Твои́х, Чи́стая,/ я́коже Престо́л Херуви́мский, Нося́щаго вся глаго́лом си́лы Своея́,/ Ему́же песнопое́м, веселя́щеся:/ препе́тый отце́в Бо́же и препросла́вленный, благослове́н еси́.

Песнь 8

Ирмо́с: Слы́ши, Отрокови́це, Де́во Чи́стая,/ да рече́т у́бо Гаврии́л/ сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:/ благослови́те, вся дела́ Госпо́дня, Го́спода.

Слы́ши и разуме́й, ста́рче му́дрый,–/ Заха́рии А́нна глаго́лет,–/ сове́том Боже́ственным, Ю́же и́мам Отрокови́цу Чи́стую до́блественною душе́ю приими́,/ Тоя́ бо ра́ди бу́дет избавле́ние,/ и в храм святы́й введи́ Сию́, вопия́:/ благослови́те, вся дела́ Госпо́дня, Го́спода.

Благослове́н еди́н Госпо́дь, возопи́ свяще́нник:/ жи́зни вхо́ды ны́не указу́ют я́ве, нам объяви́вше,/ в ню́же хо́щет всели́тися, Боговмести́мую пала́ту, Христо́с, Царь вся́ческих,/ Ему́же вопие́т вся земля́:/ благослови́те, вся дела́ Госпо́дня, Го́спода.

Се, ста́рче мудре́йше,–/ А́нна рече́ благогове́йно,–/ до́брейшую Отрокови́цу, Ю́же даде́ мне Бог,/ све́тло приими́ и проро́чествуй еди́ну, хотя́щую в ве́щи произнести́ пропове́дания,/ с ни́миже вопие́ши проро́чески:/ благослови́те, вся дела́ Госпо́дня, Го́спода.

Ны́не позна́х, же́но, я́вственнейше,–/ разу́мно рече́ ста́рец,–/ дре́во возраста́ет посреде́ хра́ма,/ е́же процвете́т су́що Боже́ственный плод, в рай вводя́щий/ сне́дию изгна́нныя тле́ния, вопию́щия ра́достию:/ благослови́те, вся дела́ Госпо́дня, Го́спода.

Глаго́л неизрече́нных уче́ний/ Твоя́ душа́, Отрокови́це Чи́стая, я́ве бу́дет,–/ ста́рец рече́ я́сно,–/ в Боже́ственный сей, Де́во, всели́шися храм:/ А́нгелом бо пита́ема, Сове́та Вели́каго А́нгела роди́ши. Ему́же пое́м:/ благослови́те, вся дела́ Госпо́дня, Го́спода.

Глас Ти поем, Отрокови́це Чи́стая, ра́достно Гаврии́лов:/ ра́дуйся, всех вина́ еди́на ра́дости,/ ра́дуйся, душ очище́ние, яко ро́ждшая избавле́ние на́ше и воздание, песнопою́щих Тому́:/ благослови́те, вся дела́ Госпо́дня, Го́спода.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Твои́ми к Бо́гу мольба́ми терпели́вно де́я,/ прия́л еси́, всеблаже́нне, ве́рою проси́мое:/ но́щию бо спя́щу, яви́вся тебе́, А́нгел/ меч пла́менный вдаде́, стра́сти се́рдца отсека́ющ,/ и огне́м тя невеще́ственным очища́ющ, и сла́вою просвеща́ющ неизрече́нно.

Всесве́тлое я́ко со́лнце,/ разу́мно возсия́л еси́ све́том доброде́телей светоза́рно, Григо́рие,/ чуде́с же сия́ньми озаря́я всю зе́млю и просвеща́я благоче́стно песнопою́щия:/ де́ти, благослови́те,/ свяще́нницы, воспо́йте,/ лю́дие, превозноси́те Христа́ во ве́ки.

А́нгельскаго песнопе́ния слы́шав, Григо́рие,/ еще́ ходя́ в ме́ртвеннем твое́м телеси́,/ от него́же чу́вствия твоя́ душе́вная я́ве наслади́в,/ и Богови́ден, и светоза́рен позна́лся еси́, зовя́ Влады́це:/ де́ти, благослови́те,/ свяще́нницы, воспо́йте,/ лю́дие, превозноси́те Его́ во ве́ки.

Богоро́дичен: Судию́ и Го́спода па́че сло́ва ро́ждшая,/ Того́ я́ко Сы́на Твоего́, Всесвята́я, умоли́ в час суда́,/ осужде́ния, и огня́, и тьмы несве́тлыя,/ и скре́жета зубо́в изба́вити ве́рою благоче́стно песнопою́щия:/ свяще́нницы, воспо́йте,/ лю́дие, превозноси́те Его́ во ве́ки.

Ин

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Я́ко в горни́ле светоза́рнем, всесла́вне, чистото́ю стра́сти плотски́я очи́стив,/ я́ко зла́то, всем возсия́л еси́, воспева́я:/ вся дела́ Го́спода по́йте и превозноси́те Его́ во ве́ки.

Орга́ном, блаже́нне, честна́го твоего́ язы́ка, украша́ема веща́нием, Це́рковь Бо́жия/ на земли́ спаси́тельное низше́ствие воспева́ет, всем глася́щи я́сно и вопию́щи:/ Тя превозно́сим, Христе́, во вся ве́ки.

Гусль Боже́ственная яви́лся еси́ и́стинно,/ веща́ние возглаша́ющая ве́рою прие́млющим Бо́жие, е́же к нам, спаси́тельное Воплоще́ние,/ Про́кле, о́тче блаже́нне, ве́рою зовы́й:/ Го́спода по́йте дела́ и превозноси́те Его́ во ве́ки.

Богоро́дичен: Сохрани́в зна́мения Твоего́, Де́во, де́вства невре́дна Влады́ка,/ про́йде Бог из Тебе́ па́че смы́сла, во е́же спасти́ вопию́щия:/ Го́спода по́йте и превозноси́те Его́ во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Се Бо́жия гора́ свята́я со свеща́ми све́тлыми внутрь во свята́я ше́ствует,/ от Нея́же Ка́мень отсече́тся и тре́бища181 и куми́ры182 демонския истни́т183 ,/ челове́ки же са́мыя соде́лает хра́мы и честна́я оби́телища.

Кля́тся Бог и ны́не испо́лни,/ от коле́на Иу́дова нам дав Присноде́ву,/ Ея́же чре́во дре́во возрасти́т Жи́зни,/ смертоно́сныя сне́ди избавля́ющее, паде́нию пи́щею подни́кшия/ и укра́деныя пре́лестию змии́ною.

Усты́ све́тлыми А́нна возопи́ в хра́ме Бо́жии:/ Тебе́ привозлага́ю, Ю́же мне дал еси́, Отрокови́цу, о Влады́ко!/ Из Нея́же за милосе́рдие неизглаго́ланное, Плотоно́сец яви́вся, спасе́ши мир,/ его́же созда́л еси́, возвели́чив Ю я́ко Ма́терь Твою́.

Се озари́ся день спасе́ния су́щим в нощи́ лю́тых:/ дверь Небе́сная, хра́ма две́ри отве́рзши, со свеща́ми вхо́дит внутрь во свята́я/ от святы́я пита́тися си́лы, свято́е Бо́га вселе́ние.

Просвети́, Чи́стая, души́ моея́ о́чи, Свет ро́ждшая,/ да не пости́гнет мя грехо́вная тьма́ глубоча́йшая,/ ниже́ глубина́ да покры́ет мя отча́яния,/ но Сама́ мя спаси́ и окорми́ ко приста́нищу Боже́ственнаго хоте́ния.

Ин

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

По́ты по́стническими греха́ угаси́л еси́ у́глие/ и с Небесе́ я́ве огня́ в ви́де благода́ть прия́л еси́,/ не попаля́ющую, му́дре, но па́че ороша́ющую/ и кре́постию тя си́льна на стра́сти показу́ющую.

Я́ко ши́пок, в по́стнических, о́тче, процве́л еси́ удо́лиих184 , Григо́рие,/ и я́ко крин185 благово́нный./ Сего́ ра́ди то́чиши ми́ро благово́нное, твоя́ ко́сти оби́льно уха́ют186 жизнь:/ по́лны бо лани́ты187 твоя́, я́ко ча́ши, арома́т показа́шася.

Днесь с на́ми собо́р по́стников и преподо́бных весели́тся, патриа́рхов и проро́ков/ в па́мяти твое́й, блаже́нне, спра́зднуют нам апо́столи и му́ченицы,/ с ни́миже помина́й чту́щих тя ве́рно, досточу́дне.

Ра́ка, иде́же честно́е и многострада́льное те́ло твое́ лежи́т,/ чуде́с благода́ть нам источа́ет, о́тче Григо́рие,/ освяща́ющи на́ша ду́ши и телеса́,/ обогати́вшихся тобо́ю и предста́теля и те́пла тя засту́пника иму́щих.

Богоро́дичен: Глас Тебе́ Гаврии́лов, ве́рнии, ра́достно привещава́ем:/ ра́дуйся, раю́, Жи́зни дре́во прозя́бший,/ ра́дуйся, реше́ние кля́твы,/ му́чеников венча́ние, преподо́бных похвало́ и челове́ков благочести́вых утвержде́ние.

Ин

Ирмо́с: О́браз чи́стаго Рождества́ Твоего́,/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь/ да Тя, Богоро́дице,/ непреста́нно велича́ем.

О́бразы и се́ни мимоте́к и и́стинно Христа́ разуме́в,/ породи́вся ба́нею Креще́ния, свяще́нник же пома́зан свяще́ннейший./ Те́мже и Богоро́дицу, Того́ ро́ждшую, пропове́дал еси́.

Нра́вы свяще́нныя и догма́ты Златоу́стаго, блаже́нне, впе́рсил188 еси́,/ ре́вность же его́ свяще́нную ве́ры,/ изры́гнул еси́ догма́тов твои́х пучи́ну,/ ересе́й пото́ки изсуша́ющую благода́тию.

Уста́ви свяще́нными твои́ми моли́твами воздвиза́емое на ны смуще́ние/ и отжени́189 напа́стей омраче́ние и челове́к всех озлобле́ние,/ я́ко име́я дерзнове́ние ко Влады́це и Бо́гу на́шему.

Богоро́дичен: О, па́че ума́ чуде́с Твои́х!/ Бо́жие бо Сло́во, плоть бы́вшее, еди́на родила́ еси́ преесте́ственно, Ма́ти Де́во,/ вся́ческая Боже́ственным хоте́нием му́дре Содержа́щаго, и окормля́юща190 , и соблюда́юща.

Свети́лен, Григо́рия.

Подо́бен: Ученико́в зря́щим:

Святы́ни храм был еси́, иера́рше,/ по Боже́ственному же прича́стию ны́не благ быва́еши и рая́ граждани́н,/ в не́мже напитава́ешися невозбра́нно дре́ва зна́ния и нетле́нныя сла́вы,/ па́мять творя́, Григо́рие му́дре, о и́же от любве́ ве́рою хва́лящих тя, свяще́нный о́тче.

Сла́ва, и ны́не, предпра́зднства.

Подо́бен: Жены́, услы́шите:

День предпра́зднственный/ храм приво́дит ны́не пречи́стым введе́нием Богоро́дицы Мари́и,/ Ю́же пою́т А́нгели, и челове́цы ублажа́ют,/ де́вы же провожда́ют, свещи́ нося́ще и игра́юще, в храм Госпо́день.

На стихо́вне стихи́ры, глас 1.

Подо́бен: Небе́сных чино́в:

Прииди́те, ве́рнии, соше́дшеся, пе́сньми почти́м/ от ма́тере непло́дныя пресла́вно ро́ждшуюся/ Богоневе́стную Ма́терь Творца́,/ и с де́вами же и свеща́ми предъусря́щем191 Ю,/ в храм входя́щу во свята́я.

Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.

Я́коже цве́ты разли́чныя собра́вше/ от разу́мных цветнико́в Ду́ха слове́с,/ похва́льныя венцы́ ра́достно Де́ве исплете́м/ и предпра́зднственный дар Ей/ досто́йно принесе́м.

Стих: Приведу́тся в весе́лии и ра́довании,/ введу́тся в храм Царе́в.

Да угото́вятся две́ри хра́ма Госпо́дня и да отве́рзутся:/ и дом сла́вы, и еди́ну, Превы́шшую Небе́с,/ па́че ума́ бы́вшую,/ да прие́млют, ра́дующеся,/ и Христа́ Спа́са да воспою́т.

Сла́ва, и ны́не, глас то́йже,

Гео́ргия Никомиди́йскаго:

Да ра́дуется днесь Не́бо свы́ше,/ и о́блацы весе́лие да кропя́т/ о зело́ пресла́вных вели́чиих Бо́га на́шего:/ се бо дверь, на восто́ки зря́щая,/ ро́ждшися от непло́дове безпло́дныя по обетова́нию/ и Бо́гу освяще́на бы́вши в жили́ще,/ днесь в храм я́ко непоро́чное приноше́ние приво́дится./ Да ра́дуется Дави́д, бряца́я в гу́сли:/ приведу́тся (рече) Царю́ де́вы в след Ея́,/ бли́жния Ея́ приведу́тся внутрь ски́нии Бо́жия,/ внутрь очисти́лища Его́,/ воспита́тися в жили́ще пре́жде век от Отца́ нетле́нно Ро́ждшагося/ во спасе́ние душ на́ших.

На Литурги́и

Блаже́нны предпра́зднства, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость: Стих: Услы́шите сия́, вси язы́цы: Апо́стол дне и у́трешний под зача́ло. Та́же свята́го, ко Евре́ем, зача́ло 351. Аллилу́ия, глас 2: Уста́ пра́веднаго поуча́тся прему́дрости: Стих: Зако́н Бо́га его́ в се́рдце его́: Ева́нгелие дне и у́трешнее под зача́ло. И свята́го Ева́нгелие от Иоа́нна, зача́ло 36. Прича́стен: В па́мять ве́чную:

Подоба́ет ве́дати, я́ко а́ще случи́тся предпра́зднство Вхо́да Пресвяты́я Богоро́дицы в неде́лю:

В суббо́ту на ма́лой вече́рни

Стихи́ры воскре́сны и Богоро́дицы, по обы́чаю.

На Вели́цей Вече́рни

По обы́чной кафи́зме, на Го́споди, воззва́х: стихи́ры воскре́сны 3, и восто́чен 1, Анато́лиев, и предпра́зднства 3, и преподо́бнаго Григо́рия 3. Сла́ва, предпра́зднства. И ны́не, Богоро́дичен 1-й гласа. На литии́ обы́чное. На стихо́вне стихи́ры воскре́сны. Сла́ва и ны́не, предпра́зднства. На благослове́нии хле́бов тропа́рь: Богоро́дице Де́во, ра́дуйся: три́жды.

А́ще ли несть бде́ния, глаго́лем тропа́рь воскре́сен. Сла́ва, Григо́рия, глас 3 ( зри день сей вы́ше ). И ны́не, предпра́зднства.

На Бог Госпо́дь: тропа́рь воскре́сен два́жды. Сла́ва, Григо́рия. И ны́не, предпра́зднства. По кафи́змах седа́льны воскре́сны и Богоро́дичны их. Та́же полиеле́й и тропари́: А́гельский собо́р: ектения́, ипакои ́ гла́са, степе́нна, проки́мен, и Ева́нгелие воскре́сно, и про́чее до кано́на. Кано́н воскре́сен со ирмосо́м на 4, и Богоро́дицы на 2, и предпра́зднства на 4, и преподо́бнаго Григо́рия на 4. Катава́сия: Отве́рзу уста́ моя́. По 3-й пе́сни конда́к предпра́зднства и и́кос; и конда́к Григо́рия. Слава, седа́лен его́. И ны́не, предпра́зднства. По 6-й пе́сни конда́к воскре́сен и и́кос. На 9-й пе́сни пое́м Честне́йшую: Свети́лен воскре́сен. Сла́ва, Григо́рия. И ны́не, предпра́зднства. На хвали́тех стихи́ры воскре́сны 4 и предпра́зднства подо́бны 3, пи́саны на стихо́вне, и самогла́сен их, с припе́вы. Сла́ва, стихи́ра Ева́нгельская. И ны́не, Преблагослове́нна еси́: Славосло́вие вели́кое. По Трисвято́м Тропа́рь воскре́сен то́чию, ектении́, и отпу́ст, и час 1. На 1-м часе́ Тропа́рь воскре́сен. Сла́ва, предпра́зднства. И ны́не, Богоро́дичен часо́в. По О́тче наш: конда́к предпра́зднства. На 3-м часе́ Тропа́рь воскре́сен. Сла́ва, Григо́рия. И ны́не, Богоро́дичен часо́в. По О́тче наш: конда́к воскре́сен. Та́кожде и на про́чих часе́х глаго́лем конда́к воскре́сен и предпра́зднства, пременя́юще.

На Литурги́и

Блаже́нны гла́са на 6 и предпра́зднства песнь 3-я на 4. По вхо́де Тропа́рь воскре́сен, и предпра́зднства, и хра́ма свята́го. Та́же Тропа́рь Григо́рия. Конда́к воскре́сен и хра́ма. Сла́ва, Григо́рия. И ны́не, предпра́зднства. Проки́ мен, Апо́стол, аллилу́ия, и Ева́нгелие, и прича́стен, пре́жде воскре́сен, и пото́м свята́го, слу́жба преподо́бническая.

Свята́го же Про́кла слу́жба пое́тся, егда́ разсу́дит екклисиа́рх.

Святитель Прокл , архиепископ Константинопольский († ок. 446–447), с юных лет всё свое время отдавал молитве и Богомыслию. Господь удостоил его великого счастья быть учеником святителя Иоанна Златоуста (†407, память 13 ноября), который рукоположил его сначала в сан диакона, а затем в сан пресвитера. Святой Прокл был свидетелем чудесного явления святого апостола Павла святителю Иоанну Златоусту. От своего учителя святой Прокл получил глубокие духовные познания, любовь к постоянному чтению Священного Писания, умение в совершенной форме излагать мысли.

После изгнания и смерти святителя Иоанна Златоуста святой Прокл был рукоположен святым Патриархом Константинопольским Сисинием (426―427) в сан епископа города Кизика, но под влиянием еретиков-несториан паства изгнала своего святителя. Тогда святой Прокл вернулся в столицу и проповедовал Слово Божие в храмах Константинополя, укрепляя слушателей в Православной вере, обличая заблуждения еретиков, в частности Феодора Мопсуэтского. По смерти Патриарха Сисиния святитель Прокл стал его преемником и возглавлял Константинопольскую Церковь в течение двенадцати лет (434―447). Стараниями архиепископа Константинопольского Прокла в 439 г. из Коман в Константинополь были перенесены мощи святителя Иоанна Златоуста.

В период патриаршества святителя Прокла Византию постигло сильное землетрясение, продолжавшееся несколько месяцев. В Вифинии, Геллеспонте, Фригии рушились города, исчезали с лица земли реки, в безводных прежде местах возникали губительные наводнения. Константинопольцы во главе с Патриархом и императором выходили из города и совершали молебны о прекращении невиданного по силе бедствия. Во время одного молебна из толпы был невидимой силой поднят в воздух мальчик и унесен на такую высоту, где человеческий взгляд уже не мог его видеть. Затем, целым и невредимым, отрок был опущен на землю и рассказал, что там, в вышине, он слышал и видел, как ангелы, славя Бога, поют: «Святый Боже, Святый Крепкий, Святый Безсмертный». Весь народ запел трисвятую молитву, присоединив к ней: «помилуй нас» – и землетрясение прекратилось. Эту молитву Православная Церковь поет за Богослужением и до сего дня.

Константинопольская паства любила своего Патриарха за его подвижническую жизнь, за его заботу об обездоленных и за его проповеди. До наших дней дошли многие творения святителя. Известны направленные против несториан два слова святителя в похвалу Божией Матери, четыре слова на Рождество Христово, пасхальные проповеди, а также слова, излагающие Православное учение о Боговоплощении.

Рождество и Воскресение Христово – два величайших христианских праздника, которые, как подчеркивает святитель Прокл в своей пасхальной проповеди, составляют глубокое духовное единство, являют чудо Богооткровения и любви: «Своим рождением Он (Богочеловек) утвердил нашу веру в то, что Он есть человек, а во втором случае Своею властию над смертию доказал, что Он есть Бог. А Агнец, вземляй грехи мира ( Ин. 1:29 ), никогда не был бы заклан, если бы Бог не восприял образа раба и Создатель непостижимым для нас образом не облекся в естество Своего создания так, чтобы плоть Его служила источником жизни, кровь – ценою искупления, дух – печатию даров Духа Святаго». Важно также свидетельство святителя Прокла о древней Литургии апостола Иакова, брата Господня, сохранившееся в виде отрывка из недошедшего до нас полностью сочинения. Всеобщее уважение снискала деятельность святаго патриарха по устройству благочиния во всех церковных делах.

В то́йже день Преподо́бнаго Диодо́ра Юрьего́рскаго, Каргопо́льскаго

Тропа́рь, глас 2:

Жела́нием ду́ха распали́вся,/ мяте́ж мирски́й отри́нув,/ ко Еди́ному Бо́гу любо́вию прилепи́ся/ и Того́ вседу́шне взыску́я,/ во вну́треннюю пусты́ню оты́де,/ при во́дах всели́ся,/ и́деже в слеза́х и труде́х пребыва́я многоле́тное вре́мя,/ в терпе́нии мно́зе житие́ А́нгельское проходи́л еси́/ в наставле́нии Боже́ственнаго ра́зума,/ ста́до и́нок собра́ му́дре,/ и́хже посеща́я, не оста́ви, Диодо́ре преподо́бне, о́тче наш,/ Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

Конда́к, глас 2:

От ю́ности, преподо́бне,/ плотску́ю во́лю в посте́х и моли́твах источи́л еси́,/ крест свой взем, Христо́ви после́довал еси́,/ те́мже и к Вы́шним тече́нием ра́достно устреми́в себе́,/ и́деже со все́ми святы́ми Святе́й Тро́ице предстои́ши,/ но и ны́не ста́до свое́ посеща́я,/ помина́й чту́щих пресвяту́ю па́мять твою́,/ да вси благода́рно вопие́м ти:/ ра́дуйся, Богому́дре Диодо́ре, наста́вниче наш пусты́нный.

Моли́тва

О преподо́бне и достоблаже́нне Диодо́ре, о́тче наш, по́стниче терпеливоду́шный, безмо́лвия рачи́телю предо́блий, учи́телю духо́вный спасти́ся хотя́щим, разреши́телю тлетво́рных страсте́й незло́бивый, моли́твенниче о бию́щих тя безви́нно, Христоподо́бный, прозорли́вства проро́ческаго испо́лненный, предвозгла́сная о бу́дущих благи́х цевни́це, адама́нте ве́ры во Христа́ несеко́мый, сто́лпе терпе́ния незы́блемый, за́поведей Творца́ своего́ благопослу́шливый соверши́телю, плотоно́сный А́нгеле и Ду́ха Свята́го вмести́лище благоуха́нное, жи́телю пусты́нный несумни́тельный, смиренному́дрый Небе́сный челове́че и сожи́телю Го́рним чинонача́лием! Ты кро́тостию духа́ кро́тких зе́млю насле́довал еси́, друг же и уго́дник в Тро́ице сла́вимому Бо́гу на́шему яви́лся еси́, И́же и просла́вити тя благоизво́ли. Ве́мы бо, преподо́бне, ка́ко Бог изоби́льно от Тебе́ чуде́сному дождю́ ве́рным кропи́ти повеле́. К тебе́ у́бо припа́дающе, любе́зно мо́лим тя, уго́дниче досточу́дный: не преста́й моля́ся Пресвяте́й и Живонача́льней Тро́ице, да низпосле́т стране́ на́шей тишину́ и мир, на вра́ги побе́ду и одоле́ние, це́рквам же согла́сие и всем лю́дем смиренному́дрие и изоби́лие благи́х. Угаси́, блаже́нне, моли́твами твои́ми паря́щия на ны разжже́нныя бесо́вския стре́лы, да не прико́снется нам зло́ба грехо́вная, и всем всегда́ ми́лостивное да́руй. При́зри и на мя, недосто́йнаго: свя́зан бо есмь лю́те плени́цами прегреше́ний мои́х и в пучи́ну стра́стнаго мо́ря влеко́м, у́вы мне! неодержа́нно. Сего́ ра́ди приле́жно молю́ святы́ню твою́, пребога́те, и припа́даю к тебе́ со слеза́ми, глаго́ля: предста́ни ми на пути́ напа́сти моея́, расто́ргни у́зы, отжени́ стра́сти, осла́би от грехо́вных вери́г, изба́ви мя от належа́щия ско́рби и от вся́каго зла, да не сведе́н бу́ду по дело́м моим в снедь лю́тому мироде́ржцу врагу́. Разреши́ мя от боле́зненных соу́з и спасе́ние да́руй ми, я́ко да спаса́емь моли́твами твои́ми, воспою́ и просла́влю от всея́ ви́димыя и неви́димыя тва́ри в Тро́ице сла́вимаго Бо́га – Отца́, и Сы́на, и Свята́го Ду́ха, ны́не и в безконе́чныя ве́ки веко́в. Ами́нь.

Ина́я моли́тва

О пресла́вный, Богоукраше́нный, пресве́тлый свети́льниче, Небе́снаго Ца́рствия насле́дниче, безмо́лвия рачи́телю всеизря́дный, трудополо́жниче терпеливоду́шный! Ты дре́вле непло́дную, ны́не же тобо́ю новопросвеще́нную Ю́рьеву го́ру све́том Христо́вым озари́л еси́, на не́йже и святу́ю оби́тель воздви́гл еси́, и Богоуго́дными твои́ми труды́ и по́двиги, разли́чными добро́тами и благоле́пием сию́ украси́л еси́, и честны́м твои́м и чудотво́рным и цельбоно́сным моще́м просла́витися изво́лил еси́, и те́ми страну́ сию́ освяти́л еси́, и бесо́вския полки́ из нея́ изгна́л еси́. Помози́ мне гре́шному, о всеблаже́нне, Ду́ха Свята́го благода́тию путь жития́ спаси́тельно ше́ствовати; просвети́ омраче́нную ду́шу мою́ заре́ю Богодарова́нныя ти благода́ти; да́руй ми бога́тно неболе́зненным жи́тельством пожи́ти; покажи́ вход невозбра́нен во огра́ду ве́чнаго пребыва́ния; сохрани́ блужда́ющаго в пусты́ни жите́йстей; отжени́ от се́рдца моего́ душетли́тельную по́хоть; очи́сти скве́рну грехо́вную моли́твами твои́ми, я́звы исцели́ и спасе́ние да́руй, да ве́село зову́ ти, спаса́емь: ра́дуйся, преподо́бне Диодо́ре, о́тче наш, свети́ло незаходи́маго све́та, све́тло сия́ющая зве́здо пресве́тлая, в сия́ после́дняя времена́ в се́верных стра́нах возсия́вшая; ра́дуйся, стране́ Росси́йской вели́кое на супоста́ты поможе́ние и заступле́ние, во бра́нех кре́пкое одоле́ние; ра́дуйся, непоколеби́мый благоче́стия сто́лпе, и́ноческих преда́ний тве́рдый храни́телю и и́ноком наста́вниче духо́вный; ра́дуйся, кре́пкий адама́нте и стра́шный бесо́м прогони́телю и победи́телю; ра́дуйся, гра́ду на́шему и Богозда́нней твое́й оби́тели све́тлая добро́то и оте́честву твоему́ похвало́ ве́чная и непреста́нная. Сподо́би у́бо и мене́ вся́кия ра́дости и Небе́снаго Царствия бы́ти прича́стника ны́не, и при́сно, и во ве́ки веко́в. Ами́нь.

* * *

168

невра́щна – необращаемая, неизменяемая

169

в последняя ле́та – в последние времена

170

независтный – обильный

171

олядене́вшим – иссохшим

172

вертеп – пещера

173

горе́ – вверху

174

до́ле – внизу, на земле

175

сове́т – воля; замысел; совещание

176

село́ – селение, вселение

177

Изра́илеву...Святому – Господу нашему Иисусу Христу

178

пра́ща – орудие для метания камней в неприятеля; здесь – образное выражение

179

ма́нием – склонностью, обращением

180

хвра́стный – хворостинный

181

тре́бище – место принесения идольских жертв

182

куми́р – идол

183

истни́т – сокрушит

184

в ... удо́лиих – в долинах

185

кри́н – цветок лилии

186

уха́ют – благоухают

187

лани́ты – щеки

188

впе́рсил – принял (вложил) в себя

189

отжени́ – отгони

190

окормля́юща – направляющего

191

предъусря́щем – благовременно встретим


Комментарии для сайта Cackle