[Глава 18] Слу́жба о́бща преподо́бному́ченику еди́ному
Ве́чер,
на Го́споди воззва́х, стихи́ры, гла́с 6.
Подо́бен: Тридне́вен:
По́двиги му́драго по́стника, ꙳ и боле́зни во́ина Христо́ва ꙳ восхваля́юще по до́лгу ве́рнии, ꙳ возопие́м Го́сподеви: ꙳ того́ моли́твами Христе́ Бо́же, ꙳ от вся́кия бе́ды изба́ви на́с.
Да́стся ти́ от Бо́га мно́г ми́р предо́блий, ꙳ бу́рю преше́дшу ти́ лю́тых, ꙳ преподо́бне о́тче, и́мярек, ꙳ непобеди́мый во́ине, ꙳ и моли́твенниче о хва́лящих тя́.
Пострада́л еси́ му́дре зако́нно, ꙳ и бы́л еси́ прему́др к Бо́гу, ꙳ я́ко други́й до́м ты́ му́чениче, ꙳ вся́ческих соде́телю, и яви́лся еси́ Богоно́се, ꙳ свети́ло церко́вное, ꙳ преподо́бных удобре́ние.
Сла́ва, и ны́не, Богоро́дичен:
Богоро́дице Де́во чи́стая, моли́ся Го́сподеви, ꙳ я́ко да моли́твами Твои́ми ꙳ пода́ст душа́м на́шым грехо́в оставле́ние, ми́р и ве́лию ми́лость.
Крестобогоро́дичен: На дре́ве живо́т на́ш зря́щи, всенепоро́чная Богоро́дице ви́сящ, ма́терски рыда́ющи вопия́ла еси́: Сы́не Мо́й, и Бо́же Мо́й, спаси́ любо́вию пою́щыя Тя́.
А́ще и́мать, самогла́сен. Сла́ва, гла́с 5:
Преподо́бне о́тче, не да́л еси́ сна́ очи́ма твои́ма, ни ве́ждома твои́ма дрема́ния, до́ндеже ду́шу и те́ло от страсте́й свободи́л еси́, и себе́ угото́вал еси́ Ду́ха жили́ще: прише́д бо Христо́с со Отце́м, оби́тель в тебе́ сотвори́, единосу́щныя Тро́ицы благода́ть прии́м, великопропове́дниче преподо́бне, моли́ся о душа́х на́ших.
И ны́не, Богоро́дичен:
Блажи́м Тя́ Богоро́дице Де́во, и сла́вим Тя́ ве́рнии по до́лгу, гра́д непоколеби́мый, сте́ну необори́мую, тве́рдую предста́тельницу, и прибе́жище ду́ш на́ших.
Крестобогоро́дичен.
Подо́бен: Блажи́м Тя́:
Зря́щи дре́вле А́гнца своего́, Де́во Ма́ти всеблаже́нная отрокови́ца, на Кре́ст воздви́жена, вопия́ше слезя́щи: увы́ Мне́, Сы́не Мо́й, ка́ко умира́еши, Бо́г естество́м сы́й безсме́ртен?
А́ще пра́зднуеши с полиеле́ем, глаго́ли Богоро́дичен воскре́сный: В Чермне́м мо́ри:
Вхо́д. Проки́мен дне́.
Чте́ния 3 му́ченическая, [пи́сана в конце́ кни́ги сея́].
На стихо́вне стихи́ры, гла́с 1.
Подо́бен: Всехва́льнии му́ченицы:
Прехва́льне, и́мярек, ꙳ твое́ житие́ возложи́л еси́, ꙳ доброде́телей попече́ние, ꙳ песносло́вием бо ве́рнии, ꙳ ве́рою Христа́ похваля́ют, ꙳ твои́ми покаря́ющеся уче́нии: ꙳ и́мже утверди́тися в ми́ре, ꙳ предстоя́ умоли́ Боже́ственнаго Ду́ха.
Сти́х: Честна́ пред Го́сподем сме́рть преподо́бных Его́.
Богодухнове́нне му́чениче, и́мярек, ꙳ твое́ житие́ у́бо ра́вно а́нгелом, ꙳ земны́м объяви́ся: ꙳ небе́сным же я́ко благово́нная же́ртва, ꙳ и до́брое кади́ло, ꙳ твое́ испове́дание принесе́ся. ꙳ И ны́не моли́ся, ꙳ дарова́ти душа́м на́шым ꙳ ми́р и ве́лию ми́лость.
Сти́х: Блаже́н му́ж боя́йся Го́спода, в за́поведех Его́ восхо́щет зело́.
Пребога́тый, и́мярек, страсте́й победи́тель бы́в, ꙳ мучи́теля победи́л еси́: ꙳ венцено́сцем сликовству́я блаже́нне, ꙳ о все́х помина́й соверша́ющих твою́ па́мять, ꙳ и ны́не Христу́ моли́ся, ꙳ дарова́ти душа́м на́шым ꙳ ми́р и ве́лию ми́лость.
Сла́ва, гла́с 4:
Посо́бием духо́вным преподо́бному́чениче, и́мярек, победи́в врага́ проти́внаго, я́ко во́ин непобеди́мь, ору́жием ве́ры, тьмы́ мы́сленныя ефио́пы ссе́кл еси́, и соверши́в зако́н по́двиг твои́х, со все́ми страстоте́рпче венча́лся еси́ ли́ки, преподо́бне и пребога́те.
И ны́не, Богоро́дичен:
Изба́ви на́с от ну́жд на́ших Ма́ти Христа́ Бо́га, ро́ждшая все́х Творца́, да вси́ зове́м Ти́: ра́дуйся, Еди́но предста́тельство ду́ш на́ших.
Крестобогоро́дичен.
Подо́бен: Я́ко до́бля:
Распина́ема ви́дящи, ꙳ и в ре́бра пробода́ема копие́м, ꙳ Пречи́стая, Христа́ Человеколю́бца, ꙳ пла́чущи вопия́ше: ꙳ что́ сие́ Сы́не Мо́й? ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м, ꙳ и тщи́шися безча́дствовати Мя́ вселюбе́знейше? ꙳ Дивлю́ся Благоутро́бне ꙳ Твоему́ во́льному распя́тию.
Тропа́рь во уста́ве.
А́ще ли не́сть уста́ва, глаго́ли се́й тропа́рь, гла́с 8:
В тебе́ о́тче изве́стно спасе́ся е́же по о́бразу: прии́м бо кре́ст, после́довал еси́ Христу́ и де́я учи́л еси́ презира́ти у́бо пло́ть, прехо́дит бо: прилежа́ти же о души́, ве́щи безсме́ртней. Те́мже и со а́нгелы сра́дуется, преподо́бне и́мярек, ду́х тво́й.
Сла́ва, и ны́не, Богоро́дичен, или́ Крестобогоро́дичен.
На у́трени,
на Бо́г Госпо́дь, тропа́рь то́йже.
По 1-й кафи́сме, седа́лен, гла́с 4.
Подо́бен: Вознесы́йся:
Земны́х и тле́ющих наслажде́ния небре́гл еси́, и в пусты́ни житие́ возлюби́л еси́, ми́ра красоты́ и пи́щи вре́менныя возненави́дел еси́, и отсю́ду сподо́бился еси́ му́ченическому и по́стническому сочта́тися ли́ку: с ни́миже моли́ спасти́ рабы́ твоя́. [Два́жды.]
Сла́ва, и ны́не, Богоро́дичен:
На Престо́ле херуви́мстем седя́й, и в не́дрех О́тчих водворя́яйся, я́ко на Престо́ле святе́м седи́т Свое́м, Влады́чице, в не́дрех Твои́х, вопло́щься бо Бо́г, и́стинно воцари́ся над все́ми язы́ки, и разу́мно ны́не пое́м Ему́: Его́же умоли́ спасти́ся рабо́м Твои́м.
По 2-й кафи́сме седа́лен, гла́с 8.
Подо́бен: Прему́дрости:
Иоа́нновы нра́вы Крести́теля и Илии́ Фесви́тянина доброде́тели посто́м подража́я, безпло́тно пожи́л еси́, со а́нгелы сла́вя святу́ю Тро́ицу Боже́ственную, и бесо́вская нахожде́ния побежда́я му́жеством. Те́м и страда́нием кре́пко подвиза́вся, Христо́ву Боже́ственному воплоще́нию кла́няяся с Божество́м, и́мярек, блаже́нне, Его́же моли́, грехо́в оставле́ние дарова́ти, пра́зднующым любо́вию святу́ю па́мять твою́. [Два́жды.]
Сла́ва, и ны́не, Богоро́дичен:
Я́ко Де́ву и еди́ну в же́нах, Тя́ безсе́менно ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тебе́ Божества́, и я́ко Младе́нца дои́ши Зижди́теля и Го́спода. Те́м а́нгельский собо́р, и челове́ческий ро́д досто́йно сла́вим всесвято́е рождество́ Твое́, и согла́сно вопие́м Ти́: моли́ Христа́ Бо́га, прегреше́ний оставле́ние дарова́ти, досто́йно пою́щым сла́ву Твою́.
По Хвали́те и́мя Госпо́дне:
Припе́в:
Ублажа́ем тя́ преподо́бному́чениче, и́мярек, и чте́м святу́ю па́мять твою́, наста́вниче мона́хов, и собесе́дниче а́нгелов.
Псало́м избра́нный: Терпя́ потерпе́х Го́спода:
По полиеле́и седа́лен, гла́с 4.
Подо́бен: Яви́лся еси́:
В поще́нии иску́сен бы́в, во страда́нии просия́л еси́, и просвети́л еси́ ве́рныя твои́ми по́двиги блаже́нне, и́мярек: те́мже тя́ вси́ согла́сно велича́ем. [Два́жды.]
Сла́ва, и ны́не, Богоро́дичен.
Наде́ждо непосты́дная наде́ющихся на Тя́, еди́на ро́ждшая па́че естества́ пло́тию Христа́ Бо́га на́шего: Того́ со святы́ми преподо́бному́ченики моли́, пода́ти вселе́нней очище́ние прегреше́ний, и все́м на́м пре́жде конца́ жития́ исправле́ние.
Степе́нна, 1-й антифо́н 4-го гла́са.
Проки́мен: Честна́ пред Го́сподем сме́рть преподо́бных Его́.
Сти́х: Что́ возда́м Го́сподеви о все́х, я́же воздаде́ ми?
Вся́кое дыха́ние:
Ева́нгелие преподо́бному́ченику, [пи́сано в конце́ кни́ги сея́.]
По 50-м псалме́ стихи́ра, гла́с 8:
И́же по о́бразу соблюды́й невреди́мо преподо́бне о́тче, и́мярек е́же по Христо́ве ве́ре, сопроти́вился еси́ терпели́во, не устраши́вся мучи́тельскаго преще́ния, но духо́вным мече́м того́ уби́л еси́: те́м дерзнове́ние стяжа́в к Бо́гу, спаса́й чту́щыя тя́ от вся́ких бе́д, преподо́бный страда́льче.
Кано́н, гла́с 6.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м вопия́ше.
От собла́зн жите́йских и от страсте́й оскорбля́ющих мя́, умири́ у́м мо́й страда́льче преподо́бне, и в твою́ похвалу́ ти́хо па́мять твори́ти сподо́би мя́.
Страда́льческия венцы́ я́ко страда́лец прие́м преподо́бне, и́мярек, прело́жен бы́л еси́ от земли́ к ми́ру нера́тному, и к све́ту и животу́ и́стинному преблаже́нне.
Струя́ми крове́й пла́мень мучи́тельский погаси́в, благоче́стне му́чениче, напои́л еси́ ду́шы ве́рных, сотвори́в прозяба́ти жела́ние живота́ ве́чнаго преподо́бне.
Богоро́дичен: И́же невмести́мое Сло́во во чре́ве Твое́м вмеще́но поро́ждши, Боговмести́мая се́нь, утесня́ющия мя́ лю́тыя бу́ри злы́х свободи́, Чи́стая.
Пе́снь 3.
Ирмо́с: Не́сть свя́т, я́коже Ты́ Го́споди Бо́же мо́й, вознесы́й ро́г ве́рных Твои́х Бла́же, и утверди́вый на́с на ка́мени испове́дания Твоего́.
Укрепле́н бы́л еси́ си́лою Бо́жиею, отлучи́вся к подвиго́м дерзнове́нием преблаже́нне, терпя́ боле́зни и му́ки гони́тельския страстоте́рпче преподо́бне о́тче на́ш.
Кре́пость даде́ ти Христо́с подвигода́вец вели́кий, сокруши́ти пре́лесть, и посрами́ти врага́, хва́лящагося безсту́дно, и тще́тно всу́е шата́ющагося.
Твои́ кра́снеи но́зе я́ве преподо́бне, ко стези́ муче́ния входя́щыя све́тло, и главы́ злочести́вых сламля́ющыя, и́мярек, многострада́льне.
Богоро́дичен: Ю́же дре́вле ви́де Иа́ков от земли́ просте́рту к небе́сней высоте́, Боже́ственную ле́ствицу я́ве, Мари́ю Чи́стую Влады́ки воспое́м пала́ту.
Седа́лен, гла́с 4.
Подо́бен: Удиви́ся Ио́сиф:
Креще́н бы́сть трегу́бо, треми́ креще́нии ве́рно, водо́ю и огне́м, и Бо́жиим Ду́хом, пе́рвее слеза́ми, второ́е воздержа́нии мно́гими подвиза́вся кре́пко, пожи́в равноа́нгельским житие́м на земли́ блаже́нне, и́мярек: тре́тие, я́ко а́гнец изря́ден закла́н бы́л еси́ Христу́ Бо́гу на́шему. Того́ моли́ непреста́нно, спасти́ся душа́м на́шым.
Сла́ва, и ны́не, Богоро́дичен:
Удиви́ся Ио́сиф е́же па́че естества́ зря́, и внима́ше мы́слию и́же на руно́ до́ждь, в безсе́менном зача́тии Твое́м Богоро́дице, купину́ огне́м неопали́мую, же́зл Ааро́нов прозя́бший. И свиде́тельствуя обру́чник Тво́й и храни́тель, свяще́нником взыва́ше: Де́ва ражда́ет, и по рождестве́ па́ки Де́вою пребыва́ет.
Крестобогоро́дичен: Помышле́ния от серде́ц мно́гих открыва́ются: копие́м страсте́й Твои́х уязвля́ющи мо́й у́м, в распя́тии Твое́м во́льном: Ча́до, кто́ у́зрит пла́ча Моего́, и пло́ти терза́ния, разуме́ет вельми́ Бо́га Тя́ су́ща всеи́стинна? воспева́ю Сло́ве, милосе́рдие Твое́, его́же ра́ди терпи́ши распя́тие.
Пе́снь 4.
Ирмо́с: Христо́с моя́ си́ла, Бо́г и Госпо́дь, честна́я це́рковь Боголе́пно пое́т взыва́ющи, от смы́сла чи́ста, о Го́споде пра́зднующи.
Зако́нно пости́лся еси́, зако́нно пострада́л еси́, и зако́нно венча́н бы́л еси́, Бо́жиим сло́вом укрепля́емь, и невре́дна себе́ соблюда́я преблаже́нне.
Не терпя́ преподо́бне ле́сти возсле́довати, к Богоразу́мию я́ко разу́мен ра́дуяся приступи́л еси́: све́т мы́сленный восприи́м, свети́льник показа́лся еси́.
Священноде́йствуемь, я́коже заколе́ние во́льное свято́е приведе́н бы́л еси́, и́мярек, тебе́ ра́ди пожре́нному, и в хра́ме пе́рвенец почи́л еси́ веселя́ся.
Богоро́дичен: Де́вою пребыла́ еси́ по рождестве́, я́коже бе́ и пре́жде рождества́: я́ко Бо́га Сло́ва родила́ еси́ изба́вльшаго на́с от тли́ хода́тайством Твои́м, Пренепоро́чная.
Пе́снь 5.
Ирмо́с: Бо́жиим све́том твои́м бла́же, у́треннюющих ти́ ду́шы любо́вию озари́, молю́ся, тя́ ве́дети сло́ве Бо́жий, и́стиннаго Бо́га, от мра́ка грехо́внаго взыва́юща.
Ору́жием уязви́ся вра́г, мно́гаго терпе́ния доблему́драго му́ченика: и сего́ нога́ми попра́н бы́сть, и сме́х яви́ся, посра́млен бы́в.
Ты́ зло́бу мучи́тельскую отри́нув, незло́бив и кро́ток я́влься му́чениче всече́стне, сконча́нием твои́м кро́вным венце́м нетле́нным увя́злся еси́.
Му́ченическими венча́ тя честьми́ вои́стинну, и по́стническими труды́, преподо́бне, и́мярек, трудополо́жник еди́н Бо́г на́ш, на уби́йцу укрепи́вый тя́.
Богоро́дичен: Разуме́в издале́ча та́йно проро́ческий Богозра́чный ли́к, Де́во Богоневе́стная, Бо́жия рождества́ Твоего́ глубину́ неизрече́нную, о́бразы свяще́нными Тя́ прозна́мена.
Пе́снь 6.
Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ ти: возведи́ от тли́ живо́т мо́й Многоми́лостиве.
Все́л еси́ на вода́х, окормля́емь руко́ю живонача́льною о́тче на́ш, и сохране́н бы́л еси́, в ни́хже погрузи́шася гони́тельская веле́ния, моли́твою приле́жною свяще́нне.
Ма́лыми изменя́я вели́кая, себе́ му́кам пре́дал еси́ преподо́бне: прельсти́теля зми́я Е́вина, ду́хом умертви́л еси́ Богоявле́нне.
Глаго́л твои́х си́лы, зло́бы обрета́тель претерпе́ти не возмо́же: те́м у́зам тя́, и́мярек, и ра́нам, сме́рти же лю́тей, суро́во льсте́ц пре́дал е́сть.
Богоро́дичен: Се́ ны́не из крове́й Твои́х чи́стых Де́во Ма́ти, воплоти́ся Госпо́дь, и челове́ком приединя́ется кроме́ обы́чая, за неизрече́нную ми́лость, на́ше спасе́ние содева́я.
Конда́к во уста́ве.
А́ще ли не́сть уста́ва, глаго́ли се́й конда́к, гла́с 2.
Подо́бен: Тве́рдыя:
Я́ко по́стника благоче́стна, и иску́сна, и страда́льца произволе́нием че́стна, и пусты́ни жи́теля сообра́зна, в пе́снех досто́йно восхва́лим, и́мярек, приснохва́льнаго: то́й во зми́я попра́л е́сть.
И́кос: Страсте́м Госпо́дним поревнова́в преблаже́нне, за того́ умре́ти возжеле́л еси́, ле́сть и́дольскаго су́етства разори́л еси́, му́жески подви́гся проти́ву враго́в, те́х злохи́трственная ловле́ния и ко́зни низложи́л еси́, и вене́ц по́чести прия́л еси́, и́мярек, преподо́бне страда́льче. Те́м ве́рою прибега́ем в тво́й кро́в, и зове́м ти́: от вра́г ви́димых и неви́димых изба́ви на́с, ты́ бо зми́я попра́л еси́.
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.
Ми́лования е́же к пло́ти отлучи́в у́м тво́й блаже́нне, опаля́емь огне́м и сожига́емь му́дре, о́троческую воспева́я пе́снь: благослове́н Бо́г оте́ц на́ших.
Отгони́ми быва́ют еди́ным призыва́нием твои́м, лука́вии ду́си, позна́вшии тя́ по́стника и му́ченика Христо́ва, преподо́бне, пою́ща те́пле: благослове́н Бо́г оте́ц на́ших.
Возвеще́н ти́ бы́сть коне́ц преблаже́нне, и́мярек, вседе́тельною во́лею: те́м вда́лся еси́ бо́льшему поще́нию, и от сла́вы в сла́ву прехо́диши, убие́н бы́л еси́ Христа́ ра́ди над все́ми Бо́га.
Богоро́дичен: Уны́нием мя́ одержи́ма, воздви́гни Пречи́стая, к де́ланию Бо́жиих де́л, укрепля́ющи мя́ на враги́, при́сно борю́щыя мя́ лю́те, и проти́вными по́мыслы прельща́ема.
Пе́снь 8.
Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши Христе́, то́кмо е́же хоте́ти, Тя́ превозно́сим во вся́ ве́ки.
По́стническими добро́тами украша́емь, и ра́нными боле́зньми утомля́емь, победотво́рцу показа́лся еси́ пресла́вне, побе́дныя по́чести от него́ прии́м.
Воспали́вся любо́вию Вседержи́телевою, и́мярек, пресла́вне, вра́жию возвы́шенную вы́ю низложи́л еси́: и к Бо́гу жела́нием твои́м, прия́л еси́ Того́ в тебе́ живу́ща во ве́ки.
Ми́лости Бо́жия му́чениче Богоблаже́нне, сподо́би мя́, и искуше́ний и бе́д изба́ви, чту́щаго тя́, и́мярек, преподо́бне, и под кро́в тво́й прибега́ющаго.
Богоро́дичен: Ра́дуйся, Свята́я горо́, и Богопрохо́дная, ра́дуйся, свяще́нных та́ин явле́ние, и слы́шание стра́шное, и неудо́бь ви́димое зре́ние: ра́дуйся Де́во, па́дших возведе́ние.
Пе́снь 9.
Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя́ ублажа́ем.
Ты́ к после́дней красоте́ и сла́дости приспе́л еси́, Богому́дре о́тче на́ш, и́мярек, и бли́з Бо́га бы́л еси́, поя́ со безпло́тными: Свя́т, Свя́т, Свя́т еси́ Тро́ице вседе́тельная, и всеси́льная.
Избы́в от сете́й ловя́щих тя́, в добро́те небе́сней почи́л еси́ преподо́бне, и́мярек, и с му́ченическими совокупи́лся еси́ во́и: со безпло́тными ны́не моли́ся о все́х на́с, я́ко да тя́ ублажа́ем.
Кре́пость и держа́ву Христа́ положи́в, злу́ю бесо́в прогони́л еси́ молву́, и в вы́шняя приста́нища приста́л еси́, укра́шен ве́сь, Боже́ственными светоли́тии бога́тно облиста́емь.
Богоро́дичен: Разуме́ти чу́до непостижи́мое рождества́ Твоего́ Ма́ти Де́во, не могу́ще, молча́нием сие́ па́че сла́вяще, Тебе́ славосло́вим преблаже́нную, и еди́ну до́брую в жена́х, и пренепоро́чную.
Свети́лен.
Подо́бен: Жены́ услы́шите:
Страда́нием пе́рвое до́бре искуси́вся, второ́е же посто́м тече́ние Боже́ственное соверши́в, на небеса́ возше́л еси́, Христу́ предстои́ши, и́мярек, о́тче преподо́бне, за на́с моли́ся те́пле пою́щих тя́.
Богоро́дичен: Ра́дость неизрече́нную ро́ждши Го́спода, ра́дости на́с небе́сныя прича́стники сотвори́, все́х Тебе́ почита́ющих Пречи́стая, благода́ть и́стинну, от души́ вопию́щих Ти́: не забу́ди Твоя́ рабы́ Благослове́нная Мари́е.
На хвали́тех стихи́ры, гла́с 6.
Му́ченическими кровьми́ свяще́нную ри́зу очервлени́в преподо́бне, вше́л еси́ во свята́я святы́х досто́йно сла́вне, иде́же све́т неизрече́нный, иде́же Боже́ственная Сла́ва, иде́же гла́с пра́зднующих: от Него́же трудо́в твои́х му́ченическия восприя́л еси́ побе́ды, и вене́ц неувяда́ющий, и ве́чнующую до́брую сла́ву, и ра́йское житие́, и́мярек, прему́дре. Со дерзнове́нием моли́ся о душа́х на́ших. [Два́жды.]
Муче́ний треволне́ния не поколеба́ша твоея́ души́, ни затворе́ние долготы́ во мра́чней темни́це, тя́ сокрыва́ющее страда́льче сла́вне: но я́ко све́т возсия́л еси́ во тьме́ бе́дствующым су́етия, и́хже сы́ны дне́ показа́л еси́ ба́нею креще́ния, порожде́нием бо́льшим и спаси́тельным, и Боже́ственным пребыва́нием, я́ко страда́лец Богоприя́тен прему́дре, и́мярек.
Кто́ досто́йно доброде́телей твои́х испове́сть побе́ды? ка́я уста́ муче́ния и терпе́ния изреку́т? во обои́х бо благоугоди́л еси́ Христу́, и́мярек: и ны́не не преста́й моля́ся уго́дниче, спасти́ ду́шы на́ша, я́ко име́я преподо́бному́чениче, дерзнове́ние мно́гое.
Сла́ва, гла́с 2.
Прииди́те пе́сньми венча́ем страда́льца Христо́ва, я́ко кри́н се́льный, и рая́ Боже́ственнаго благора́сленный цве́т: правосла́вных овча́, чистоты́ добро́та, ве́ры утвержде́ние, сла́ва воздержа́ния, яви́ся я́вственно ми́рови: те́мже вене́ц прия́т Ца́рствия непреме́нен.
И ны́не, Богоро́дичен:
Все́ упова́ние мое́ на Тя́ возлага́ю, Ма́ти Бо́жия, сохрани́ мя под кро́вом Твои́м.
Крестобогоро́дичен: Гро́зд всезре́лый Чи́стая, Его́же невозде́ланно во утро́бе младоноси́ла еси́, на дре́ве я́ко узре́ла еси́ Сего́ ви́сяща, рыда́ющи восклица́ла еси́, взыва́ющи: Ча́до, сла́дость иска́пай, е́юже пия́нство вся́кое страсте́й оте́млется, благоде́телю, Мене́ ра́ди Тебе́ ро́ждшия, Боже́ственными утеше́ньми, я́ко благоутро́бен.
А́ще и́мать Сла́ву на стихо́вне, глаго́ли,
И ны́не, Богоро́дичен, или́ Крестобогоро́дичен.