[Глава 20] Слу́жба о́бща му́ченице еди́ной

Ве́чера,

на Го́споди воззва́х, стихи́ры, гла́с 4.

Подо́бен: Я́ко до́бля:

Де́вства добро́тами / и муче́ний кровьми́, / ду́шу твою́ украси́вши му́ченице сла́вная, и́мярек, / вручи́лася еси́ Созда́вшему, / сохраня́ющему тя́ нетле́нну во ве́к и́стинно, / о се́м ликовству́ющи с во́инствы арха́нгел и а́нгел, / апо́стол же и проро́к, / и му́ченик ликостоя́нии всехва́льная.

И к коле́сам привяза́ема,/ и зверьми́ растерза́ема,/ и огне́м и водо́ю обостри́вши / тво́й по́мысл Боже́ственным ду́хом, / тьмы́ нача́льника, / тече́нии кро́вными му́жески удави́ла еси́, / и востекла́ еси́ к разу́мным черто́гом, / ве́но Жениху́ твоему́ де́во прине́сши страда́ние.

Жениха́ Христа́ кро́вию / освяти́вшися прехва́льная, / твое́ю кро́вию украси́ла еси́ плотску́ю оде́жду. / Те́мже обою́ду просве́щшися прехва́льная, и́мярек, / све́тлаго сподо́билася еси́ черто́га Его́: / Его́же моли́, / от тли́ и бе́д изба́витися, / ве́рою творя́щым всечестну́ю па́мять твою́.

Сла́ва, и ны́не, Богоро́дичен:

Я́ко моли́тву неусыпа́ющую, и мольбу́ пребыва́ющую, иму́щи Пречи́стая ко Го́споду, напа́сти успи́, и во́лны укроти́ окая́нныя моея́ души́, и в ско́рби су́щее се́рдце мое́ уте́ши Отрокови́це, молю́ Тя, и облагодати́ у́м мо́й, я́ко да досто́йно Тя́ просла́влю.

Крестобогоро́дичен: А́гнца и Па́стыря Тя́ на дре́ве я́ко ви́де А́гница, ро́ждшая рыда́ше, и ма́терски Тебе́ веща́ше: Сы́не возжеле́нне, ка́ко на дре́ве кре́стнем пове́шен еси́ Долготерпели́ве? ка́ко ру́це и но́зе Твои́, Сло́ве, пригвозди́шася от беззако́нных, и Кро́вь Твою́ излия́л еси́ Влады́ко?

А́ще и́мать самогла́сен, Сла́ва, гла́с 6.

Одесну́ю Спа́са предста́ де́ва, и страстоте́рпица и му́ченица, и́мярек, оде́яна доброде́тельми, непобежде́на, и преукра́шена еле́ем чистоты́, и кро́вию страда́ния, и вопию́щи к Нему́ ра́достно, свещу́ держа́щи: в воню́ ми́ра Твоего́ теко́х, Христе́ Бо́же, я́ко уязви́хся Твое́ю любо́вию а́з, не отлучи́ мене́, Женише́ небе́сный. Тоя́ моли́твами низпосли́ на́м, Всеси́льне Спа́се, ми́лости Твоя́.

И ны́не, Богоро́дичен:

Никто́же притека́яй к Тебе́, посра́млен от Тебе́ исхо́дит Пречи́стая Богоро́дице Де́во: но про́сит благода́ти, и прие́млет дарова́ние к поле́зному проше́нию.

Крестобогоро́дичен: Пречи́стая, я́ко ви́де Тя́ на Кресте́ ви́сяща, рыда́ющи вопия́ше ма́терски: Сы́не Мо́й и Бо́же Мо́й, сла́дкое Мое́ Ча́до, ка́ко терпи́ши стра́сть поно́сную?

[зри́] А́ще пра́зднуеши с полиеле́ем, глаго́ли Богоро́дичен воскре́сный: Кто́ тебе́ не ублажи́т:

Вхо́д. Проки́мен дне́.

Чте́ния му́ченическая. [Пи́сана в конце́ кни́ги сея́].

На стихо́вне стихи́ры, гла́с 4:

Подо́бен: Я́ко до́бля:

Мучи́тельскому шата́нию / и на́глому суровству́, / по́мыслом супроти́вльшися мужему́дренно, / бу́дущих предви́дящи наслажде́ние Богому́дренная, / пребыва́ющее при́сно во ве́ки неподви́жимо: / е́же и получи́ла еси́, / от земли́ преста́вльшися к черто́гом небе́сным, / и ли́ку неразори́мому, сла́вная.

Сти́х: Ди́вен Бо́г бо святы́х свои́х, Бо́г Изра́илев.

Ца́рствия благоле́пие, / и добро́ту кра́сную ви́дети сподо́билася еси́ / Жениха́ твоего́ Христа́ / укра́шена ра́нами тве́рдаго твоего́ страда́ния, / и исто́чнику благи́х, / досто́йно прибли́жилася еси́. / Отону́ду же Боже́ственнаго весе́лия пло́д / бога́тно прия́ла еси́ блаже́нная, / и безсме́ртную сла́ву.

Сти́х: В це́рквах благослови́те Бо́га, Го́спода от исто́чник Изра́илевых.

Ни и́го рабо́тное, / ни сла́бость же́нская, / ни гла́д, ни ра́ны запя́ша ти́ / му́ченичестей тве́рдости уподо́битися всесла́вная, / усе́рдием души́ му́ки претерпе́ла еси́. / Отону́ду же получи́ла еси́ небе́сный черто́г, / и венце́м благода́ти украси́лася еси́, / предстоя́щи Зижди́телю Твоему́.

Сла́ва, гла́с 5:

Де́вства твоего́ красоты́ восхоте́ Ца́рь сла́вы Христо́с, я́ко непоро́чну тя́ неве́сту Себе́ обручи́, совокупле́нием нетле́нным: и́бо во́лею Свое́ю пода́в добро́те твое́й си́лу, на враги́ же и стра́сти непобеди́му показа́, претерпе́вшую ра́ны го́рькия, и му́ки свире́пыя, сугу́бым венце́м увязе́ тя, и поста́ви одесну́ю Себе́ я́ко Цари́цу испещре́ну. Того́ моли́ му́ченице честна́я и многострада́льная, и́мярек, певце́м твои́м спасе́ние и жи́знь пода́ти, и ве́лию ми́лость.

И ны́не, Богоро́дичен:

Блажи́м Тя́, Богоро́дице Де́во, и сла́вим Тя́ ве́рнии по до́лгу, гра́д непоколеби́мый, сте́ну необори́мую, тве́рдую предста́тельницу, и прибе́жище ду́ш на́ших.

Крестобогоро́дичен: Зря́щи дре́вле А́гнца своего́, Де́ва и Всеблаже́нная Отрокови́ца на Кре́ст воздви́жена, вопия́ше слезя́щи: увы́ Мне́, Сы́не Мо́й, ка́ко умира́еши, Бо́г сы́й естество́м безсме́ртен?

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 4:

А́гница твоя́ Иису́се, и́мярек, зове́т ве́лиим гла́сом: Тебе́ Женише́ мо́й люблю́, и Тебе́ и́щущи страда́льчествую и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да Ца́рствую в Тебе́, и умира́ю за Тя́, да и живу́ с Тобо́ю: но я́ко же́ртву непоро́чную приими́ мя с любо́вию поже́ршуюся Тебе́, тоя́ моли́твами, я́ко ми́лостив, спаси́ ду́шы на́ша.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 5.

Подо́бен: Собезнача́льное:

Благоче́стно порабо́тившися Вседержи́телю, злочести́вому же мучи́телю не порабо́тилася еси́ честна́я, но претерпе́ла еси́ тве́рдо те́мное заключе́ние, и ра́н разжже́ние, и преста́вилася еси́ к Бо́гу, Богому́драя му́ченице, и́мярек, моли́ся о на́с соверша́ющих па́мять твою́. [Два́жды.]

Сла́ва, и ны́не, Богоро́дичен:

Те́плая предста́тельнице и непобеди́мая, упова́ние изве́стное и непосты́дное, стено́ и покро́ве и приста́нище прибега́ющих к тебе́ Присноде́во чи́стая, Сы́на Твоего́ и Бо́га моли́ со а́нгелы умире́ние да́ти ми́ру, и спасе́ние, и ве́лию ми́лость.

По 2-й кафи́сме седа́лен, гла́с 1.

Подо́бен: Гро́б тво́й:

Муче́ний о́гнь, ду́ха росо́ю погаси́ла еси́ честна́я, и к све́ту преста́вилася еси́ Боже́ственному и невеще́ственному, и по кончи́не блаже́нней источа́еши исцеле́ний ка́пли, и́мярек, уставля́ющи разжже́ние страсте́й, си́лою духо́вною. [Два́жды.]

Сла́ва, и ны́не, Богоро́дичен:

Моли́твы Твои́х ра́б приими́ Богоро́дице, и изба́ви на́с от вся́кия беды́, я́ко ро́ждшая Христа́ Спа́са, изба́вителя ду́ш на́ших.

По Хвали́те и́мя Госпо́дне:

Припе́в:

Велича́ем тя́ страстоте́рпице Христо́ва, и́мярек, и чте́м честно́е страда́ние твое́, е́же за Христа́ претерпе́ла еси́.

Псало́м избра́нный: Бо́г на́м прибе́жище и си́ла:

По полиеле́и, седа́лен, гла́с 4:

Подо́бен: Вознесы́йся на кре́ст:

Прише́дшую Христу́ во́лею, и украси́вшую доброде́тельми се́рдце, благоле́пно воспои́м, и́мярек, ве́рных мно́жество: та́ бо посрами́ мучи́тельскую де́рзость, и просия́вши я́ко со́лнце посреде́ беззако́нник, по кончи́не яви́ся земны́м подтвержде́ние Боже́ственное, вку́пе и держа́ва. [Два́жды.]

Сла́ва, и ны́не, Богоро́дичен:

От а́нгела сло́во прии́мши во утро́бе Твое́й, и ро́ждши воплоще́нна Бо́га Емману́ила, Богоро́дице, моли́ о душа́х на́ших.

Степе́нна, 1-й антифо́н, 4-го гла́са.

Проки́мен: Ди́вен Бо́г во святы́х Свои́х, Бо́г Изра́илев.

Сти́х: В це́рквах благослови́те Бо́га, Го́спода от исто́чник Изра́илевых.

Вся́кое дыха́ние:

Ева́нглие му́ченице, [пи́сано в конце́ кни́ги сея́.]

По 50-м псалме́ стихи́ра, гла́с 6, на Го́споди воззва́х, Сла́вник.

Кано́н, гла́с 8.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вне просла́вися.

Влече́т к песнопе́нию преми́рных во́инства, и земны́х ли́ки, всехва́льная отрокови́ца, чудесы́.

Добро́ты возжела́в Влады́ка все́х, красне́йшаго твоего́ се́рдца всехва́льная, небе́сных черто́гов сподо́би тя́.

На ка́зни и боле́зни, и на ра́ны многообра́зныя, не устрашена́, му́ченице, вмести́лася еси́: поспеша́ющую бо и́маши благода́ть Спа́сову, возмога́ющую тя́.

Богоро́дичен: Пречи́стая Богоро́дице, воплоще́нно Присносу́щное и Пребоже́ственное Сло́во па́че естества́ ро́ждшую, пое́м Тя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных и пое́т Тя́ ду́х мо́й.

Яви́лася еси́ на суди́щи му́жественну ду́шу нося́щи, и врага́ я́коже нему́жественна победи́ла еси́ всехва́льная.

Поро́к в добро́те твое́й, ниже́ вра́ска души́ бы́сть: и тя́ Христо́с неве́сту в нетле́нныя черто́ги прия́т.

Исцели́ всехва́льная души́ моея́ стру́пы, му́ченице Христо́ва, и́мярек, и ути́ши твои́ми моли́твами жи́зни моея́ бу́рю.

Богоро́дичен: Тя́ вси́ стяжа́хом прибе́жище, и сте́ну на́шу христиа́не, и Тя́ славосло́вим немо́лчно Безневе́стная.

Седа́лен, гла́с 8.

Подо́бен: Прему́дрости:

Крове́й твои́х струя́ми му́ченице Христо́ва, пото́п нечести́вым при́сно де́йствуеши, всехва́льная: ту́чами же благода́ти слове́сныя ни́вы напая́ющи всегда́, в ни́хже возраща́еши кла́с ве́ры, те́м пресла́вно и по сме́рти яви́лася еси́ о́блак, источа́ющи жи́зни свиде́тельство, страстоте́рпице всехва́льная, и́мярек, моли́ся Христу́ Бо́гу согреше́ний оставле́ние дарова́ти, чту́щым любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя́ безсе́менно ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м а́нгельский собо́р, и челове́ческий ро́д, досто́йно сла́вим пресвято́е рождество́ Твое́, и согла́сно вопие́м ти́: моли́ Христа́ Бо́га, прегреше́ний оставле́ние дарова́ти, досто́йно пою́щым сла́ву Твою́.

Крестобогоро́дичен: А́гнца и Па́стыря и изба́вителя, А́гница зря́щи на Кресте́, восклица́ше пла́чущи, и го́рько рыда́ющи вопия́ше: ми́р у́бо ра́дуется, прие́мляй Тобо́ю избавле́ние: утро́ба же моя́ гори́т, зря́щи Твое́ распя́тие, е́же те́рпиши за милосе́рдие ми́лости, долготерпели́ве Го́споди, ми́лости бе́здно, и исто́чниче неисчерпа́емый, умилосе́рдися, и да́руй прегреше́ний оставле́ние, ве́рою пою́щым Боже́ственныя стра́сти Твоя́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Нескве́рное зерца́ло Боже́ственных разуме́ний тебе́ саму́ю устро́ивши, я́ко свети́льник златоле́потнейший страда́лиц посреде́, му́ченице, возсия́ла еси́.

Мра́чному не принесла́ еси́ де́мону же́ртвы, непобеди́мая му́ченице, и́мярек: жизноно́сную бо возлюби́ла еси́ за благоче́стие сме́рть прия́ти.

Я́ко неболе́зненно нося́щи со страстоно́сцы те́ло непоро́чная, ра́нами нечу́вственна пребыла́ еси́, Боже́ственныя любве́ раче́нием.

Богоро́дичен: Очище́ние на́м да́руй неве́дений я́ко безгре́шен, и умири́ ми́р Тво́й, Бо́же, моли́твам ро́ждшия Тя́.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве Тебе́ ино́го не ве́мы.

Дне́ и ми́ра противополо́жное уве́девши ратолю́бнаго де́мона люби́ти не восхоте́ла еси́.

Мне́в твою́ осла́бити Боже́ственную му́ченице, и́мярек любо́вь, сме́х яви́ся, козньми́ вселука́вый.

Пода́ждь ми́ просвеще́ние и ми́р всехва́льная, реша́щи моли́твами твои́ми многомяте́жное смуще́ние.

Богоро́дичен: Де́ву по рождестве́ пое́м Тя́, Богоро́дице, Ты́ бо Бо́га Сло́ва пло́тию ми́ру породила́ еси́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том я́ко ри́зою, многоми́лостиве, Христе́ Бо́же на́ш.

Му́жественное в же́нстей пло́ти души́ мудрова́ние нося́щи сла́вная, о зве́рех су́щих в вода́х неради́ла еси́.

Победи́ла еси́ мучи́телей горды́ню, неврежде́на пребыла́ еси́ му́ченице непобеди́мая, и вене́ц побе́ды прия́ла еси́.

Я́ко добру́, и я́ко красну́, я́ко че́стну, и я́ко де́вства заря́ми сия́ющую, тебе́ Жени́х Госпо́дь себе́ приво́дит пресла́вная.

Богоро́дичен: Еди́на сло́вом пло́тию Сло́во поро́ждшая, изба́ви мо́лимся, се́тей вра́жиих ду́шы на́ша.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2:

Подо́бен: Вы́шних ищя́:

Хра́м тво́й всечестны́й, я́ко цельбу́ душе́вную обре́тше вси́ ве́рнии, велегла́сно вопие́м ти́ де́во му́ченице, и́мярек, великоимени́тая: Христа́ Бо́га моли́ непреста́нно о все́х на́с.

И́кос: Уневе́стившуюся Христу́ муче́нием, и́мярек, соше́дшеся почти́м досто́йно: я́ко да тоя́ моли́твами, душетле́нныя па́губы изба́вльшеся, губи́тельства, тру́са и паде́жа, житие́ во смире́ние препрово́дим, сподо́бльшеся со все́ми святы́ми, от ве́ка Бо́гу благоугоди́вшими, ходи́ти во све́те, и пе́ти с си́ми: удиви́л еси́, Спа́се, Твоя́ ми́лости все́м челове́ком, ве́рою хва́лящим ю́. Те́мже зове́м е́й: моли́ непреста́нно о все́х на́с.

Пе́снь 7.

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же благослове́н еси́.

Па́че ума́ яви́шася Боже́ственных му́чеников благому́жества: зижди́тель бо все́х, тва́рь покаря́ет во страда́нии зову́щым: отце́в на́ших Бо́же, благослове́н еси́.

Ху́лящая загради́ преслову́щая отрокови́ца уста́ мучи́телей, и горды́ню пребеззако́нных ду́хом святы́м Боже́ственно воспева́ющи: отце́в на́ших Бо́же, благослове́н еси́.

Тро́ица о́трок преподо́бных, разже́гшыя пе́щь дре́вле попали́: ны́не же Богому́драя Тро́ицу пою́щи слуги́ улови́, отце́в Бо́га пою́щыя: Бо́же, благослове́н еси́.

Богоро́дичен: На́ше спасе́ние я́коже восхоте́л еси́, Спа́се, устро́ити, во утро́бу Де́вы всели́лся еси́, ю́же ми́ру предста́тельницу показа́л еси́: отце́в на́ших Бо́же, благослове́н еси́.

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Блаже́ннейшая в жена́х, вы́шняго возме́здную иму́щи благода́ть, поя́ше хва́лящи Христа́ во ве́ки вся́.

Укрепле́на по́мыслом неве́стника, невеще́ственным раче́нием, те́ло предала́ еси́ на сме́рть, и живе́ши во ве́ки вся́.

Та́йно Жени́х ко пречи́стей неве́сте в пе́щь прише́д духо́вною росо́ю О́тчим благоволе́нием спа́сл е́сть, пою́щу Христа́ во ве́ки.

Богоро́дичен: По́мощи я́же от Тебе́ тре́бующыя не пре́зри Де́во, пою́щыя и превознося́щыя Тя́ во ве́ки.

Пе́снь 9.

Ирмо́с: Тя́ неискусобра́чную Ма́терь Бо́га вы́шняго, Тя́ па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.

Тече́ние живы́я кро́ве зна́мение нетле́нныя свы́ше дарова́нныя тебе́ жи́зни, му́ченице всехва́льная: целе́ний бо сокро́вище непреста́нное че́рплющым яви́лася еси́.

Косне́ся тебе́ сме́рть естества́ зако́ном Богому́драя: в живоно́сную же ме́ртвость нестра́стно облекла́ся еси́, е́юже я́ко одушевле́нное твое́ те́ло поло́жши всечестно́е, живе́ши нетле́нно, и свиде́тельствуют твоя́ кровотече́ния.

Я́ко со́лнечную лучу́ озаря́ющую вся́, и я́ко неве́сту Христо́ву предо́бру, я́ко го́рлицу чистолюби́вую, и я́ко ма́слину, я́ко ке́др, я́ко су́щую избра́нную голуби́цу, хва́лим тя́ вси́, и́мярек, Богоимени́тая.

Богоро́дичен: Неве́сто неискусобра́чная, сосу́де благово́ния, Тя́ я́ко и́стинную и непоро́чную, и Боже́ственнаго о́блак све́та, прие́мшую небе́сный до́ждь во утро́бе, Де́во Ма́ти, велича́ем.

Свети́лен.

Я́ко неве́ста украси́лася еси́ добро́тою, обручи́вшися Жени́х страстьми́ добротво́рными: вну́трь же черто́га светови́дна, я́ко избра́нная всели́лася еси́, нося́щи свещу́ Де́вческую, и ны́не ца́рствуеши с живу́щим во ве́ки, и́мярек, сия́ющи.

Богоро́дичен: Тя́ заступле́ние вси́ и́мамы гре́шнии, о пречи́стая Де́во! Ты́ благоуве́тлива на́м сотвори́ Сы́на Твоего́ ма́терними Твои́ми моли́твами.

На хвали́тех стихи́ры самогла́сны, гла́с 3:

Страда́льческое торжество́ ве́рнии, Богому́дренне соверша́емо ви́дяще, чу́дному в сове́тех Бо́гу на́шему, благода́рственное песнопе́ние воспои́м: неви́димую бо держа́ву проти́вныя си́лы в же́нстем естестве́ победи́, и Боже́ственную свою́ си́лу в не́мощи соверши́в доброму́ченицы: тоя́ моли́твами спаса́ет ду́шы на́ша. [Два́жды.]

И́стины ча́шу от свои́х крове́й страда́льческих, всехва́льная му́ченица Христо́ва, и́мярек, раствори́вши, и сию́ всегда́ предлага́ющи це́ркви, в не́йже церко́вныя пито́мцы му́дрости гла́сом созыва́ет, глаго́лющи: почерпи́те пи́во, воскресе́ния свиде́тельное, неве́рных прогони́тельное и страсте́й чисти́тельное, благочести́вым же душа́м храни́тельно, Спа́су зову́ще: напои́вый на́с пото́ком сла́дости Ду́ха, спаси́ ду́шы на́ша.

И́же кро́вию Христо́вою ду́шы запеча́тавше в де́нь избавле́ния, кро́вь святу́ю от му́ченическаго исто́чника востека́ющую на́м, с весе́лием духо́вным проро́чески почерпе́м, живото́чных страсте́й Спа́совых, и присносу́щныя сла́вы образова́тельну. Те́мже Ему́ возопии́м: прославля́яйся во святы́х Твои́х, Го́споди, пресла́вныя Твоея́ страстоте́рпицы моли́твами спаси́ ду́шы на́ша.

Сла́ва, гла́с 6:

Страда́льческим ше́ствовавши путе́м, мучи́тельскаго избежа́ла еси́ сове́та, и́мярек, всечестна́я: я́ко де́ва, у́бо мудра́, свещу́ нося́щи вошла́ еси́ во дворы́ Го́спода твоего́: я́ко му́ченица му́жеством, благода́ть прия́ла еси́ исцели́ти плотски́я стра́сти, но и на́с воспева́ющих тя́, душе́вных боле́зней изба́ви, я́же к Бо́гу мольба́ми твои́ми.

И ны́не, Богоро́дичен:

Бо́га из Тебе́ воплоти́вшагося разуме́хом Богоро́дице Де́во: Того́ моли́ о спасе́нии ду́ш на́ших.

Крестобогоро́дичен: Всечи́стая, я́ко ви́де Тебе́ на Кресте́ пове́шена, пла́чущи вопия́ше ма́терски: Сы́не Мо́й и Бо́же Мо́й, Сладча́йшее Мое́ Ча́до, ка́ко терпи́ши стра́сть поно́сную?

А́ще и́мать Сла́ву на стихо́вне, глаго́ли вече́рний:

И ны́не, Богоро́дичен, или́ Крестобогоро́дичен.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle