[Глава 27] Слу́жба о́бща Христа́ ра́ди юро́дивым, Андре́ю Царегра́дскому, Иси́дору Росто́вскому, Макси́му и Васи́лию Моско́вским, и про́чым.

Ве́чера,

на Го́споди воззва́х, стихи́ры, гла́с 8.

Подо́бен: О пресла́внаго чудесе́!

Блаже́нне, и́мярек, Богому́дре, ꙳ чи́стая твоя́ душа́, ꙳ правове́рным смы́слом сия́ющи, ꙳ облиста́ющи доброде́телей светлостьми́, ꙳ озаря́ет ве́рных исполне́ние, ꙳ бесо́вскую тьму́ отгоня́ющи: ꙳ те́мже я́ко прича́стника тя́ невече́рней благода́ти, ꙳ ублажа́ем благоче́стно вси́, досточу́дне.

Име́я ду́шу ми́лостивну, ꙳ и чи́ст по́мысл, и се́рдце бо́дро, ꙳ ве́ру небла́зненну, ꙳ и любо́вь вои́стинну нелицеме́рну, ꙳ от земли́ преста́вился еси́ к небе́сным, ꙳ и с ли́ки пра́ведных водворя́ешися: ꙳ те́мже тя́ почита́ем свяще́нными пе́сньми, ꙳ и благоче́стно вси́ сла́вим, ꙳ досточу́дне, и́мярек.

Боже́ственными уче́нии укрепля́яся, ꙳ стра́сти плотски́я от души́ отгна́л еси́, ꙳ и Святе́й Тро́ице селе́ние преочище́нное бы́л еси́: ꙳ те́м к Боже́ственней жи́зни преста́вился еси́, ꙳ Бо́гу соблюда́ющу и ны́не ꙳ невреди́мо твое́ блаже́нное те́ло, ꙳ Боже́ственным судо́м, ꙳ и́мже са́м ве́сть, ꙳ прославля́яй тя́ я́ве, и́мярек.

Сла́ва, гла́с 1:

Ка́ко не диви́мся житию́ твоему́; или́ не похва́лим преподо́бне, и́мярек, житие́ твое́ равноа́нгельное, по́мысла целому́дренное, и кро́тости твоея́ смире́нное и молчали́вое, ми́лостыни неоску́дное, все́ми доброде́тельми украси́лся еси́ блаже́нне: те́мже ожида́ет тебе́ неизглаго́ланная ра́дость, и небе́сное Ца́рствие.

И ны́не, Богоро́дичен:

Гре́шных моли́твы прие́млющи, и скорбя́щих воздыха́ния не презира́ющи, моли́ от пречи́стаго чре́ва Твоего́ Сы́на Твоего́, спасти́ся на́м, Пресвята́я Де́во.

Крестобогоро́дичен: Твоего́ Сы́на и Влады́ку дре́вле, я́ко ви́дела еси́ на Кресте́ ру́це распросте́рша, и копие́м ре́бра ископова́ема, Ма́ти чи́стая рыда́ющи взыва́ла еси́: увы́ Мне́, ка́ко стра́ждеши, стра́сти челове́к оте́мляй Человеколю́бче?

А́ще пра́зднуеши с полиеле́ем, глаго́ли Богоро́дичен воскре́сный: Всеми́рную сла́ву:

Вхо́д Проки́мен дне́.

Паремии́ преподо́бническия, [пи́саны в конце́ кни́ги сея́].

На стихо́вне стихи́ры, гла́с 2:

Подо́бен: До́ме Евфра́фов:

До́м и жили́ще ꙳ Ду́ха Пресвята́го, ꙳ прему́дре, и́мярек, бы́л еси́: ꙳ те́мже и на́с до́мы Того́ соде́лай, ꙳ святу́ю твою́ па́мять почита́ющих.

Сти́х: Возвесели́тся пра́ведник о Го́споде, и упова́ет на него́.

Житие́ твое́ я́ко со́лнце ꙳ в сердца́ ве́рных возсия́, ꙳ чудеса́ испуща́я: ꙳ те́мже и на́с све́том невече́рним озари́, ꙳ всечестну́ю твою́ па́мять почита́ющих.

Сти́х: Пра́ведник я́ко фи́никс процвете́т, я́ко ке́др и́же в Лива́не умно́жится.

Не преста́й моля́ся, и́мярек, ꙳ о при́сных твои́х рабе́х, ꙳ и́хже духо́вным твои́м житие́м просвети́л еси́, ꙳ да вси́ честно́е твое́ пра́зднество, ꙳ веселя́щеся почита́ем.

Сла́ва, гла́с 4:

Земны́й а́нгел, и небе́сный челове́к яви́лся еси́ преблаже́нне, исто́чник умиле́ния, ми́лости тече́ние, пучи́на чуде́с, струя́ исцеле́ний, и́мярек, досточу́дне, ма́слина Бо́жия вои́стинну плодови́та, еле́ем трудо́в твои́х просвеща́я ве́рно хва́лящих тя́, и моля́ Человеколю́бца, от бе́д изба́вити любо́вию чту́щыя всечестну́ю па́мять твою́.

И ны́не, Богоро́дичен:

Изба́ви на́с от ну́жд на́ших, Ма́ти Христа́ Бо́га, ро́ждшая все́х Творца́, да вси́ зове́м Ти́: ра́дуйся, еди́но предста́тельство ду́ш на́ших.

Крестобогоро́дичен:

Подо́бен: Я́ко до́бля:

Распина́ема ви́дящи Христа́, ꙳ Пречи́стая Влады́чице, ꙳ умерщвля́юща льсти́ваго, ꙳ я́ко Влады́ку пла́чущи поя́ше благоутро́бнаго, ꙳ из нея́ проше́дша, ꙳ и долготерпе́нию Его́ дивя́щися взыва́ше: ꙳ Ча́до Мое́ любе́знейшее, ꙳ не забу́ди рабы́ Твоея́, не закосни́ Человеколю́бче, Мое́ утеше́ние.

А́ще пра́зднуеши, глаго́ли догма́тик: При́зри на моле́ния:

Тропа́рь, гла́с 1.

Гла́с апо́стола Твоего́ Па́вла услы́шав глаго́лющ: мы́ юро́ди Христа́ ра́ди, ра́б Тво́й Христе́ Бо́же, и́мярек, юро́д бы́сть на земли́ Тебе́ ра́ди: те́мже па́мять его́ почита́юще, Тебе́ мо́лим: Го́споди, спаси́ ду́шы на́ша.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме, седа́лен, гла́с 5.

Подо́бен: Собезнача́льное Сло́во:

Тве́рдаго адама́нта, и столпа́ непоколеби́ма вра́жиими прило́ги, Богоно́снаго, и́мярек, пе́сньми почти́м: терпе́нием бо вои́стинну посрами́вша сопроти́внаго врага́, и без ве́сти его́ сотвори́вша, и ны́не моля́щася о спасе́нии ду́ш на́ших. [Два́жды.]

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз рождества́, в Тебе́ позна́ся чи́стая Присноде́во: ужаса́ет мо́й у́м и удивля́ет по́мысл: сла́ва Твоя́ Богоро́дице, все́м простре́ся, во спасе́ние ду́ш на́ших.

По 2-й кафи́сме седа́лен, гла́с 4.

Подо́бен: Ско́ро предвари́:

Посто́м и воздержа́нием, и на земли́ лега́нием, увяди́л еси́ плотски́я стра́сти: ду́шу же просвети́л еси́, и на небесе́х от Христа́ вели́кое возме́здие восприя́л еси́. Те́м благоугоди́л еси́ Бо́гу, досто́ин сосу́д чуде́с и по кончи́не яви́лся еси́ притека́ющым к ра́це моще́й твои́х, и́мярек, преблаже́нне, моли́ Христа́ Бо́га, грехо́в оставле́ние дарова́ти чту́щым любо́вию святу́ю па́мять твою́. [Два́жды.]

Сла́ва, и ны́не, Богоро́дичен:

Обнови́ла еси́ Чи́стая Боже́ственным рождество́м Твои́м, истле́вшее страстьми́ земноро́дных ме́ртвенное существо́: и воздви́гла еси́ вся́ от сме́рти к жи́зни нетле́ния. Те́мже Тя́ по до́лгу блажи́м вси́ Де́во препросла́вленная, я́коже прорекла́ еси́.

По Хвали́те и́мя Госпо́дне:

Припе́в:

Ублажа́ем тя́ святы́й пра́ведный, и́мярек, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.

Псало́м избра́нный: Блаже́н му́ж боя́йся Го́спода:

По полиеле́и седа́лен, гла́с 4.

Подо́бен: Ско́ро предвари́:

Яви́лся еси́ чу́ден в терпе́нии твое́м, вся́чески Христу́ угоди́л еси́, преблаже́нне, и́мярек, му́дрою мы́слию утверди́л еси́ ду́шу твою́, порабо́тив плотска́я мудрова́ния Ду́ху, и избра́в до́брая, е́же Бо́га ра́ди тружда́тися, му́жески глаго́лал еси́: а́ще и я́ра зима́, но сла́док ра́й: боле́зненно е́же тружда́тися, но блаже́нно восприя́тие. Те́мже преблаже́нне, моли́ Христа́ Бо́га, спасти́ ду́шы на́ша. [Два́жды.]

Сла́ва, и ны́не, Богоро́дичен:

Тебе́ велича́ем Богоро́дице, вопию́ще: Ты́ еди́на благослове́нная, из Тебе́ бо неизрече́нно роди́ся Христо́с Бо́г на́ш.

Степе́нна, 1-й антифо́н 4-го гла́са.

Проки́мен: Возвесели́тся пра́ведник о Го́споде, и упова́ет на него́.

Сти́х: Услы́ши Бо́же гла́с мо́й, внегда́ моли́ти ми ся к Тебе́.

Вся́кое дыха́ние:

Ева́нглие, [пи́сано в конце́ кни́ги сея́.]

По 50-м псалме́ стихи́ра, гла́с 8.

Челове́че Бо́жий, и́мярек, чу́дный, ты́ у́бо возше́д на ле́ствицу доброде́телей, по не́йже возше́л еси́ к го́рнему Иерусали́му и та́мо узре́л еси́ жела́емаго Христа́: Его́же ра́ди пло́ть твою́ изнури́л еси́, и те́ло ме́ртвенное на безсме́ртную жи́знь измени́л еси́. И о на́с непреста́нно моли́ся, дарова́ти душа́м на́шым ми́р и ве́лию ми́лость.

Кано́н, гла́с 4.

Пе́снь 1.

Ирмо́с: Мо́ря Чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Прича́стием е́же к Бо́гу преподо́бне, све́т бы́л еси́, и к нему́ отлучи́вся, и́мярек, блаже́нне, жела́нием кра́йним, благи́м наде́ждам свои́м о́тче, исполне́ние прия́л еси́.

Жела́нием е́же к Бо́гу распала́емь, ми́р оста́вил еси́, спу́тника обре́т Христа́, о́тче и́мярек, сла́вне: с Ни́мже стезю́ проше́л еси́ спаси́тельную ра́дуяся.

Обогати́тися ника́коже истоща́емыми возжеле́в, бога́тство и сла́ву вре́менную му́дре, и пи́щу мимотеку́щую, и мирско́е достоя́ние доблему́дренно отри́нул еси́.

Богоро́дичен: Кра́сную и избра́нную и всечестну́ю разуме́в Тя́ Сы́н Бо́жий, Пренепоро́чная, Сы́н Тво́й бы́сть: сы́ны сотвори́ благода́тию Богоро́дице, чту́щыя Тя́.

Пе́снь 3.

Ирмо́с: Весели́тся о Тебе́ це́рковь Твоя́ Христе́, зову́щи: Ты́ моя́ кре́пость Го́споди, и прибе́жище и утвержде́ние.

Усе́рдно к мы́сленным совле́клся еси́ дея́нием побежда́я вра́жия полки́, посо́бием Боже́ственнаго Ду́ха.

Ра́нами и моли́твенным воздержа́нием, и бие́нии преподо́бне, стра́сти мирски́я о́тче, и́мярек, уязви́л еси́.

Умори́ врага́ блаже́нный тво́й Иису́се, и́мярек, умерщвле́ния твоего́ Влады́ко, живоно́снаго ра́достно возжеле́в.

Богоро́дичен: Избавля́ющаго челове́ки преслуша́ния лю́таго паде́ния, всему́ вино́внаго Чи́стая и Всенепоро́чная, родила́ еси́.

Седа́лен, гла́с 5.

Подо́бен: Собезнача́льное:

Согла́сием Боже́ственным озаря́емь, в пути́ веду́щыя к Боже́ственным сия́нием ходи́л еси́ ве́рно, о́тче преподо́бне, и враго́в отбе́г прило́гов, сы́н све́та и дне́ яви́лся еси́, и́мярек, Богоблаже́нне.

Сла́ва, и ны́не, Богоро́дичен:

Ма́ти Бо́жия Пречи́стая, гра́де Христиа́нский, изба́ви лю́ди твоя́ от бе́д приле́жно зову́щыя, и проти́вися враго́м го́рдым мы́сленным, да вопие́м ти́: ра́дуйся Благослове́нная.

Крестобогоро́дичен: Кресто́м Сы́на Твоего́ Богоблагода́тная, и́дольская пре́лесть вся́ упраздни́ся, и де́монская кре́пость попра́ся: сего́ ра́ди ве́рнии по до́лгу Тя́ при́сно пое́м и благослови́м, и Богоро́дицу вои́стинну испове́дающе Тя́ велича́ем.

Пе́снь 4.

Ирмо́с: Вознесе́на Тя́ ви́девши це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й Го́споди.

Соедини́вся стезе́ пра́вды, в Богоспаса́емый Боже́ственный гра́д вше́л еси́ преподо́бне. и́мярек, спаси́тельным сия́нием обогати́вся.

Единообра́зный преподо́бне, и́мярек, смы́сл Богоно́сный ви́дев, Боже́ственными повестьми́, и Боже́ственною оде́ждею оде́ялся еси́.

Се́рдце твое́ скрижа́ль очище́ну, Свята́го Ду́ха благода́ть обре́тши о́тче, и́мярек, написа́ соверше́нно безстра́стие, ве́ру и любо́вь нелицеме́рную.

Богоро́дичен: Седя́й на Престо́ле превознесе́нне херуви́мстем, я́ко Престо́л Тя́ име́я Мари́е Богоневе́сто, на рука́х Твои́х почи́, препросла́вленный Бо́г на́ш.

Пе́снь 5.

Ирмо́с: Ты́ Го́споди мо́й, све́т в ми́р прише́л еси́, све́т святы́й, обраща́яй из мра́чна неве́дения ве́рою воспева́ющыя тя́.

Пресве́тлую зарю́, и́мярек, прии́м, я́ко со́лнце яви́лся еси́, и де́монскую тьму́ отгна́л еси́ достосла́вне.

Твои́м жела́нием Христе́, окрили́вся всепреподо́бный и́мярек, жела́ние теле́сное, я́коже изгре́бие мирско́е оттрясе́.

Си́лою Боже́ственною ду́шу укрепи́в, в ми́р всели́лся еси́, опустева́я стра́сти о́тче Богому́дре, и́мярек.

Богоро́дичен: Рече́ние преста́ тле́нное, Де́ва бо нетле́нно роди́ Бо́га Сло́ва, па́че естества́ и сло́ва Де́ва пребыва́ет.

Пе́снь 6.

Ирмо́с: Пожру́ Ти со гла́сом хвале́ния Го́споди, це́рковь вопие́т Ти́ от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Ум тво́й ве́сь к Бо́гу простира́я, непреста́нными поуче́нии, плотски́я любве́ не пощаде́л еси́, благи́х тебе́ хода́тайству, и́мярек, присвое́ние.

Ни скве́рны, ни вра́ски прия́л еси́ блаже́нне, посреде́ тебе́ ми́ра живу́щу, ча́стыми же па́че мольба́ми твои́ми очища́еши от душе́вныя скве́рны, притека́ющыя к тебе́.

Ты́ плотски́х мудрова́ний вы́шше име́я по́мысл, не уязви́лся еси́ посреде́ же́н обнажа́емь: безстра́стия бо оде́ждею, и́мярек, оде́ялся еси́.

Богоро́дичен: Усты́ и по́мыслы и се́рдцем, Пресвята́я Богоро́дице, Тя́ пропове́дуем: Тобо́ю Бо́гу примири́хомся, отринове́ннии преступле́нием пе́рвее пра́отца.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 8.

Вы́шния красоты́ жела́я, ни́жния сла́сти теле́сныя то́щно оста́вил еси́, нестяжа́нием су́етнаго ми́ра, а́нгельское житие́ проходя́, сконча́вся, и́мярек, блаже́нне: с ни́миже Христа́ Бо́га моли́ непреста́нно о все́х на́с.

И́кос: Ка́ко возмогу́ гре́шный а́з, и скве́рный душе́ю вку́пе и те́лом, исписа́ти е́же во пло́ти сы́й, равноа́нгельное житие́ твое́, и пресла́вная чудеса́? а́ще у́бо мно́зи прему́дрии не дости́гнут испове́дати мно́гаго твоего́ терпе́ния и смире́ния, и те́плыя ко Христу́ любве́, но оба́че наде́яся на твое́ беззло́бие, о блаже́нне, си́це вопию́ ти: ра́дуйся, пресве́тлая звездо́, от восто́ка доброде́телей возсия́вшая и вселе́нную чудесы́ озари́вшая. Ра́дуйся, возненави́девый роди́тельскую любо́вь, Христа́ же еди́наго, над все́ми су́щаго Бо́га, все́м се́рдцем возлюби́вый, и Тому́ невозвра́тным жела́нием после́довал еси́. Ра́дуйся, я́ко бу́йственное и юро́дственное по апо́столу жи́тельство избра́вый. Ра́дуйся, премени́вый тле́нная и нестоя́щая, наде́ждею бу́дущих благи́х. Ра́дуйся, и́же дре́внему И́ову уподо́бивыйся терпе́нием. Ра́дуйся, страстоте́рпче Христо́в непобеди́мый, но при́сно побежда́яй диа́вола твои́м смире́нием. Ра́дуйся, и́же я́ко дре́вний о́н Ла́зарь ни́щий, ны́не почива́еши в ло́не Авраа́мли. Ра́дуйся, и́же по отше́ствии от ми́ра сего́, су́щым в беда́х и искуше́ниих гото́в обрета́ешися предста́тель и засту́пник. Ра́дуйся, везде́ призыва́ющих тя́ бы́стро предваря́еши. Ра́дуйся Богому́дре, и́мярек.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Содержи́мь Христоподо́бною, о́тче, и́мярек, Боже́ственною любо́вию други́х спасти́, ра́достно ве́сь са́м вопия́ изда́лся еси́: благослове́н еси́ в хра́ме сла́вы Твоея́ Го́споди.

С небесе́ тебе́ пода́нную о́тче и́мярек, прие́м пи́щу, се́ю препита́л еси́ благопоко́рно прие́млющыя твоя́ повеле́ния, и до́лу влеку́щий гре́х оставля́ющыя, блаже́нне.

После́довав оте́ческим преда́нием о́тче, и́мярек, му́дре, па́губы Ориге́новы бе́гати злочести́выя, запове́дал еси́ зову́щым: благослове́н еси́ в хра́ме сла́вы Твоея́ Го́споди.

Богоро́дичен: Вы́шняго освяще́нное Боже́ственное селе́ние. Ра́дуйся: Тобо́ю бо даде́ся ра́дость, Богоро́дице зову́щым: благослове́на Ты́ в жена́х еси́ всенепоро́чная Влады́чице.

Пе́снь 8.

Ирмо́с: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.

Всесве́тлая ты́ бы́л еси́ звезда́, су́щыя в ти́не страсте́й приводя́ к животу́: твори́ши бо жены́ нечи́стыя целому́дренно жи́ти, и отго́ниши лю́тыя неду́ги, вопия́: благослови́те вся́ дела́ Госпо́дня Го́спода.

Сы́й це́л умо́м в скро́ве му́дрых чуде́с преподо́бне, мно́гия улови́л еси́ юро́дствовати Го́спода ра́ди, ве́дый наруга́емь бы́ти, вопия́ чисте́йшею душе́ю и́мярек: благослови́те вся́ дела́ Госпо́дня Го́спода.

Соверше́н еди́н Госпо́дь, и́же Свои́х сла́вяй по достоя́нию, износи́ма тя́ и гро́бу посыла́ема блаже́нне, а́нгельскими светлослове́ньми почита́ет зову́щаго: благослови́те вся́ дела́ Госпо́дня Го́спода.

Богоро́дичен: Избавля́яй на́с возсия́ из Тебе́ Госпо́дь, Де́во чи́стая, Его́же моли́ Влады́чице, просвети́ти пою́щыя Тя́, и обстоя́ния на́с изба́вити вопию́щих: благослови́те вся́ дела́ Госпо́дня Го́спода.

Пе́снь 9.

Ирмо́с: Ка́мень нерукосе́чный, от несеко́мыя горы́, Тебе́ Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́ Богоро́дице велича́ем.

Все́м се́рдцем и́мярек, Тро́ице усе́рдно предложи́вся, и от нея́ лучи́ благоде́тельно прие́м, светови́ден бы́л еси́, и со а́нгелы лику́еши.

Жела́нием Боже́ственным приедини́вся, и воздержа́нием просвеща́емь, бу́дущих бла́г в прича́стии уже́ бы́в, и́мярек, Богоблаже́нне, и в наслажде́нии.

Твои́ми боле́зньми и по́ты прия́л еси́ весе́лие, ника́коже конца́ иму́щее: в не́мже пита́яйся и́мярек, преблаже́нне, и на́с непреста́нно помина́й.

Богоро́дичен: Спаси́ мя ро́ждшая все́х Изба́вителя и Благоде́теля, разори́ души́ моея́ о́блаки, све́та о́блаче свята́я Влады́чице, и си́льна соде́лай на стра́сти борю́щыя мя́.

Свети́лен.

Удали́вся бе́гая мирски́х сожи́тельства, Христу́ над все́ми Бо́гу на́шему непоро́чным житие́м благоугоди́л еси́: Его́же ны́не моли́ о на́с рабе́х твои́х, ве́рою пра́зднующих всечестну́ю па́мять твою́, Богому́дре, и́мярек.

Богоро́дичен: Му́дрость ипоста́сную и Сло́во пресу́щное, и Врача́ все́х поро́ждшая Де́во, стру́пы и я́звы души́ моея́ исцели́ лю́тыя и многовре́менныя: и страстна́я утоли́ се́рдца моего́ помышле́ния.

На хвали́тех стихи́ры, гла́с 4.

Подо́бен: Да́л еси́ зна́мение:

Да́л еси́ при́тчу ꙳ терпе́ния и му́жества, ꙳ преблаги́й Го́споди, ꙳ пра́веднаго, и́мярек, и многочуде́снаго, ꙳ доброде́тельми и словесы́ ꙳ и де́лы сия́юща, ꙳ целому́дрием украша́ема и кро́тостию. ꙳ Те́м твое́ неизрече́нное строе́ние сла́вим, ꙳ Иису́се всеси́льне, и Спа́се ду́ш на́ших. [Два́жды.]

Пра́веден и незло́бив, ꙳ и́стинен же и непоро́чен и ве́рен, ꙳ уклоня́яся от вся́кия зло́бныя ве́щи, ꙳ показа́лся еси́ и́мярек, блаже́нне, ꙳ просвеще́н доброде́тельми, ꙳ и благоче́стием сия́я. ꙳ Те́м тя́ ублажа́ем, ꙳ и свято́е твое́ и честно́е дне́сь пра́зднуем успе́ние, ꙳ ра́дующеся, Богому́дре.

Целому́дрием и благове́рием, ꙳ я́ко багряни́цею многоце́нною оде́явся и́мярек, ꙳ пра́вдою же и кро́тостию, ꙳ я́ко Боже́ственным венце́м увя́злся еси́, ꙳ со стра́ждущими Христа́ ра́ди, ꙳ Ца́рствовати возжеле́л еси́. ꙳ И ны́не Царю́ си́л предстои́ши, ꙳ Иису́су всеми́лостивому, ꙳ и Спа́су ду́ш на́ших.

Сла́ва, гла́с 8:

Доброде́телей твои́х Богому́дре, и́мярек, исправле́ния уясни́ша ве́рных сердца́: кто́ бо слы́ша безме́рное твое́ смире́ние и терпе́ние, не удиви́тся? е́же ко все́м кро́тость и беззло́бие, к скорбя́щым ми́лование, и су́щым в бе́дах ско́рое поможе́ние, пла́вающым немяте́жное приста́нище, и путеше́ствующым благо́е поспеше́ние, вся́ Боголе́пно предвари́ досточу́дне. И ны́не неувяда́емым венце́м венча́лся еси́ от руки́ Вседержи́теля Бо́га: Его́же моли́ спасти́ся душа́м на́шым.

И ны́не, Богоро́дичен:

Влады́чице, приими́ моли́твы рабо́в Твои́х, и изба́ви на́с от вся́кия ну́жды и печа́ли.

Или́ Крестобогоро́дичен.

На литурги́и слу́жба преподо́бническая.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle