[Глава 30] Богоро́дичны воскре́сны на о́смь гласо́в, пое́мии ве́чер на Го́споди воззва́х, и на стихо́внах, и́же от алфави́т.

Гла́с 1.

На Го́споди воззва́х, Богоро́дичен:

Всеми́рную сла́ву от челове́к прозя́бшую, и Влады́ку ро́ждшую, небе́сную две́рь воспои́м Мари́ю Де́ву, безпло́тных пе́снь, и ве́рных удобре́ние. Сия́ бо яви́ся не́бо, и хра́м Божества́. Сия́ прегражде́ние вражды́ разруши́вши, ми́р введе́, и Ца́рствие отве́рзе. Сию́ у́бо иму́ще ве́ры утвержде́ние, побо́рника и́мамы из Нея́ ро́ждшагося Го́спода. Дерза́йте у́бо, дерза́йте лю́дие Бо́жии: и́бо То́й победи́т враги́, я́ко всеси́лен.

На стихо́вне Богоро́дичен:

Се́ испо́лнися Иса́иино прорече́ние: Де́ва бо родила́ еси́, и по рождестве́ я́ко пре́жде рождества́ пребыла́ еси́. Бо́г бо бе́ рожде́йся, те́мже и естества́ новопресече́. Но, о Богома́ти! моле́ния Твои́х рабо́в, в Твое́м хра́ме приноси́мая Тебе́, не пре́зри: но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́м на́шым.

Гла́с 2.

На Го́споди воззва́х, Богоро́дичен:

Пре́йде се́нь зако́нная благода́ти прише́дши: я́коже бо купина́ не сгара́ше опаля́ема, та́ко Де́ва родила́ еси́, и Де́ва пребыла́ еси́. Вме́сто столпа́ о́гненнаго, пра́ведное возсия́ Со́лнце: вме́сто Моисе́а, Христо́с спасе́ние ду́ш на́ших.

На стихо́вне Богоро́дичен:

О чудесе́ но́ваго все́х дре́вних чуде́с! кто́ бо позна́ Ма́терь без му́жа ро́ждшую, и на руку́ нося́щую, всю́ тва́рь содержа́щаго, Бо́жие е́сть изволе́ние ро́ждшееся: Его́же я́ко Младе́нца Пречи́стая, Твои́ма рука́ма носи́вшая, и ма́терне дерзнове́ние к Нему́ иму́щая, не преста́й моля́щи о чту́щих Тя́, уще́дрити и спасти́ ду́шы на́ша.

Гла́с 3.

На Го́споди воззва́х, Богоро́дичен:

Ка́ко не диви́мся Богому́жному рождеству́ Твоему́ Пречестна́я, искуше́ния бо му́жескаго не прие́мши Всенепоро́чная, родила́ еси́ без отца́ Сы́на пло́тию, пре́жде ве́к от Отца́ рожде́ннаго без ма́тере, ника́коже претерпе́вшаго измене́ния, или́ смеше́ния, или́ разделе́ния: но обою́ существу́ сво́йство це́ло сохра́ншаго. Те́мже, Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

На стихо́вне Богоро́дичен:

Без се́мене от Боже́ственнаго Ду́ха, во́лею же О́тчею зачала́ еси́ Сы́на Бо́жия, от Отца́ без ма́тере пре́жде ве́к су́ща: на́с же ра́ди, из Тебе́ без отца́ бы́вша, пло́тию родила́ еси́ и Младе́нца млеко́м пита́ла еси́. Те́мже не преста́й моли́ти, изба́витися от бе́д душа́м на́шым.

Гла́с 4.

На Го́споди воззва́х, Богоро́дичен:

И́же Тебе́ ра́ди Богооте́ц проро́к Дави́д, пе́сненно от Тебе́ провозгласи́, вели́чия Тебе́ сотво́ршему: предста́ Цари́ца о десну́ю Тебе́. Тя́ бо Ма́терь, хода́таицу живота́ показа́, без отца́ из тебе́ вочелове́читися благоволи́вый Бо́г, да сво́й па́ки обнови́т о́браз, истле́вший страстьми́ и заблу́ждшее горохи́щное обре́т овча́, на ра́мо восприи́м, ко Отцу́ принесе́т и своему́ хоте́нию, с небе́сными совокупи́т си́лами, и спасе́т, Богоро́дице, ми́р, Христо́с име́яй ве́лию и бога́тую ми́лость.

На стихо́вне Богоро́дичен:

При́зри на моле́ния Твои́х ра́б, Всенепоро́чная, утоля́ющи лю́тая на ны́ воста́ния, вся́кия ско́рби на́с изменя́ющи: Тя́ бо еди́ну, тве́рдое и изве́стное утвержде́ние и́мамы, и Твое́ предста́тельство стяжа́хом, да не постыди́мся, Влады́чице, Тя́ призыва́ющии, потщи́ся на умоле́ние Тебе́ ве́рно вопию́щих: ра́дуйся, Влады́чице, все́х по́моще, ра́досте и покро́ве, и спасе́ние ду́ш на́ших.

Гла́с 5.

На Го́споди воззва́х, Богоро́дичен:

В Чермне́м мо́ри, Неискусобра́чныя Неве́сты о́браз написа́ся иногда́. Та́мо Моисе́й раздели́тель воды́: зде́ же Гаврии́л, служи́тель чудесе́. Тогда́ глубину́ ше́ствова немо́кренно Изра́иль: ны́не же Христа́ роди́ безсе́менно Де́ва. Мо́ре по проше́ствии Изра́илеве пребы́сть непрохо́дно: Непоро́чная по рождестве́ Емману́илеве пребы́сть нетле́нна. Сы́й и пре́жде сы́й, явле́йся я́ко челове́к, Бо́же, поми́луй на́с.

На стихо́вне Богоро́дичен:

Хра́м и две́рь еси́, пала́та и Престо́л Царе́в, Де́во Всечестна́я, е́юже изба́витель мо́й, Христо́с Госпо́дь, во тьме́ спя́щым яви́ся, Со́лнце сы́й пра́вды, просвети́ти хотя́ я́же созда́ по о́бразу Своему́, руко́ю Свое́ю. Те́мже, Всепе́тая, я́ко ма́терне дерзнове́ние к Нему́ стяжа́вшая, непреста́нно моли́ спасти́ся душа́м на́шым.

Гла́с 6.

На Го́споди воззва́х, Богоро́дичен:

Кто́ Тебе́ не ублажи́т, Пресвята́я Де́во? кто́ ли не воспое́т Твоего́ пречи́стаго рождества́? безле́тно бо от Отца́ возсия́вый Сы́н Единоро́дный, То́йже от Тебе́ Чи́стыя про́йде, неизрече́нно вопло́щься, естество́м Бо́г сы́й, и естество́м бы́в челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый. Того́ моли́ Чи́стая всеблаже́нная, поми́ловатися душа́м на́шым.

На стихо́вне Богоро́дичен:

Творе́ц и изба́витель мо́й Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́ Всечи́стая, я́ко Бо́жии Ма́тери же и Де́ве вои́стинну, вопие́м немо́лчно: ра́дуйся а́нгельски, ра́дуйся Влады́чице, предста́тельство и покро́ве, и спасе́ние ду́ш на́ших.

Гла́с 7.

На Го́споди воззва́х, Богоро́дичен:

Ма́ти у́бо позна́лася еси́, па́че естества́ Богоро́дице, пребыла́ же еси́ Де́ва, па́че сло́ва и ра́зума: и чудесе́ рождества́ твоего́, сказа́ти язы́к не мо́жет, пресла́вну бо су́щу зача́тию Чи́стая, непости́жен е́сть о́браз рожде́ния: иде́же бо хо́щет Бо́г, побежда́ется естества́ чи́н. Те́мже Тя́ вси́ Ма́терь Бо́жию ве́дуще, мо́лим Ти ся приле́жно: моли́ спасти́ся душа́м на́шым.

На стихо́вне Богоро́дичен:

Под кро́в Тво́й Влады́чице, вси́ земноро́днии прибега́юще, вопие́м Ти́: Богоро́дице, упова́ние на́ше, изба́ви ны́ от безме́рных прегреше́ний, и спаси́ ду́шы на́ша.

Гла́с 8.

На Го́споди воззва́х, Богоро́дичен:

Ца́рь небе́сный за человеколю́бие на земли́ яви́ся, и с челове́ки поживе́: от Де́вы во чи́стыя пло́ть прие́мый, и из Нея́ проше́дый с восприя́тием, еди́н е́сть Сы́н, сугу́б естество́м, но не ипоста́сию. Те́мже соверше́нна того́ Бо́га, и соверше́нна челове́ка вои́стинну пропове́дающе, испове́дуем Христа́ Бо́га на́шего. Его́же моли́, Ма́ти безневе́стная, поми́ловатися душа́м на́шым.

На стихо́вне Богоро́дичен:

Безневе́стная Де́во, я́же Бо́га неизрече́нно заче́нши пло́тию, Ма́ти Бо́га вы́шняго, Твои́х рабо́в мольбы́ приими́ Всенепоро́чная, все́м подаю́щи очище́ние прегреше́ний: ны́не на́ша моле́ния прие́млющи, моли́ спасти́ся все́м на́м.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle