В 10-й день
Святых мученик Евла́мпия и Евлампи́и
В той же день. Святителя Васи́лия (Вассиа́на), чудотворца
В той же день. Собор всех святых Волы́нских
В той же день. Святителя Амфило́хия, епископа Влади́мира Волы́нскаго
Преподо́бнаго Амвро́сия, ста́рца О́птинскаго (Минея дополнительная)
Святых мученик Евла́мпия и Евлампи́и
НА ВЕЧЕ́РНИ
На Го́споди, воззва́х: стихиры, глас 4
Подо́бен: Я́ко до́бля:
Просве́щшеся Духом Святым, прехвальнии му́ченицы,/ к ко́знем миродержи́теля ополчи́стеся/ и, сего мужески побеждше,/ Божественным пособием на него до́блествовасте./ Тем днесь светлую вашу память совершающе,/ по долгу хвала́ми ваша почитаем страдания, пресловущии.
И огню́ смесившеся, и мукам, святии,/ непрекло́нни мудрова́нием пребы́сте,/ и, я́ко свещи́, вже́гшеся теплотою Духа,/ просветили есте́ верных сердца́ благодатию./ Тем всяк возраст и род/ празднует святую вашу память,/ песнословяще Господа.
Богомудрый Евла́мпий и Евлампи́я всечестна́я,/ дво́ица Божественная,/ возсиявше, я́ко звезды многосветлы, тварь просвещают/ подвиг сия́ньми и чудес све́тлостьми,/ сих днесь всесвященную память совершающе,/ с веселием покланяемся ра́це мощей ваших.
Сла́ва, глас 4. Иоанна монаха:
Братолюбию единоимение срастворшееся/ и чистота, безстрастию сочетавшися,/ без вреда́ сохрани́сте нра́вное благосе́рдие,/ идеже бо Бог желаем, мир весь небреже́тся./ О чудесе! змий умертвися,/ и на высоту неправду глаголавый подземный,/ самобратных мучением низпаде́,/ Евла́мпия мудраго и Евлампи́и./ К ни́мже духовными песньми возопии́м:/ иже добре течение о Христе совершившии,/ проси́те мира миру и душам нашим ве́лия милости.
И ны́не, Богоро́дичен или́ Крестобогоро́дичен.
Подо́бен: Я́ко до́бля:
А́гнца и Пастыря, Тя на Древе я́ко виде,/ А́гница рождшая рыда́ше и матерски Ти веща́ше:/ Сы́не Возжеле́нне,/ ка́ко на Древе Крестнем пове́шен еси, Долготерпеливе?/ ка́ко ру́це и но́зе Твои, Слове,/ пригвоздишася от беззаконных,/ и Кровь Твою́ излиял еси, Владыко?
На стиховне Окто́иха.
Сла́ва, мучеников, глас 4. Самогласен:
Троичным светом самобра́тний сопру́г просве́щся,/ мучителей суровство́ низложи́./ Тем и пламень поправше, ликовствова́ху, поюще:/ се ны́не что добро́ или что красно́,/ но еже жи́ти братии вку́пе,/ и, к Божественней славе зря́ще,/ Небесныя славы сподобишася,/ Христа Бога о нас всегда моля́ще/ спастися душам нашим.
И ны́не, Богоро́дичен или́ Крестобогоро́дичен.
Подо́бен: Я́ко до́бля:
На Кресте Тя я́ко узре́/ пригвожде́на, Го́споди,/ А́гница и Мати Твоя дивляшеся/ и, что виде́ние сие, взываше,/ Сы́не Возжеле́нне,/ сия Ти неверный собор воздаде́ беззаконный,/ иже многих Твоих чудес насладивыйся;/ но сла́ва неизглаго́ланному соше́ствию Твое́му, Владыко.
Тропа́рь, глас 4:
Мученицы Твои, Го́споди,/ во страда́ниих своих венцы прия́ша нетленныя от Тебе́, Бога нашего:/ имуще бо крепость Твою́,/ мучителей низложиша,/ сокрушиша и демонов немощныя де́рзости./ Тех моли́твами/ спаси́ души на́ша.
НА У́ТРЕНИ
Оба канона Окто́иха и святых канон на 4, егoже краегране́сие: Самобратное пою сопряжение. Феофа́ново. Глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову силу в пусты́ни победи́л есть.
Любовию Христовою распаля́емь, му́чениче Евла́мпие,/ мирское отвергл еси омрачение;/ Небесному же, премудре, приближился еси те́пле Свету невещественному, всеблаженне.
Раче́ние еже к Бо́гу твое́, премудре му́чениче Евла́мпие,/ муче́ний преврати стремление,/ воздержанием же и стоянием де́монская попали́ ополчения истинно, многохвальне.
Укрепив Богоглаголивым твоим язы́ком воинство му́ченическое,/ привел еси ко Христу совокупление Боже́ственное, многобогатное уловление/ и приемля с ними венцы нетленныя, пребогате.
Богоро́дичен:
С высоты во чрево Твое́, Пречистая, пришед Бог,/ плоть быв, произы́де явственно, падшия возвышая к Себе,/ сынополагая благодатию земныя, Всепетая Дево Чистая.
Песнь 3
Ирмо́с: Веселится о Тебе́ Церковь Твоя, Христе, зовущи:/ Ты моя крепость, Го́споди,/ и прибежище, и утверждение.
Возвысити враг прелести лука́вное писание душетленно хотя́ще,/ но того в пропасть низвергл еси.
Любовию братнею распала́ема,/ ко Христове добро́те, отрокови́це, притекла́ еси яве,/ мученице Евлампи́е приснословущая.
Богоро́дичен:
Безсеменно Божие Слово, Отрокови́це,/ во чреве Твое́м приемши неслиянно,/ па́че ума, Пречистая, нам родила еси.
Седален, глас 8.
Подо́бен: Премудрости:
Мучений о́блаки те́мныя, страдальцы, прешедше терпеливно,/ я́ко солнце, благодатию Спа́совою возсия́сте;/ братскою же любовию Божественне связа́еми,/ подобными болезньми све́тло украси́стеся./ Тем по кончине безконечную благодать от высоты прия́сте/ исцели́ти неду́ги, Господни угодницы;/ моли́те Христа Бога грехов оставление пода́ти/ чтущим любовию святую память вашу.
Сла́ва, и ны́не, Богоро́дичен:
В напа́сти многоплете́нныя впад от враг видимых и невидимых,/ бурею одержим безчисленных согрешений моих,/ и, я́ко к теплому заступлению и покрову моему, Чистая,/ ко пристанищу притекаю Твоея́ благости./ Темже, Пречистая, из Тебе́ воплощенному безсе́менно/ молися прилежно о всех рабех Твоих,/ непрестанно моля́щих Ти ся, Богородице Пречистая,/ молящи Его присно согрешений оставление даровати/ воспева́ющим достойно славу Твою́.
Крестобогоро́дичен:
А́гнца и Пастыря, и Изба́вителя/ А́гница зря́щи на Кресте, восклица́ше, пла́чущи,/ и, горько рыдающи, вопияше:/ мир убо радуется, приемля Тобою избавление,/ утроба же Моя горит, зря́щи Твое́ распятие,/ еже терпи́ши за милосердие милости./ Долготерпели́ве Го́споди, милости бездно и источниче неисчерпаемый,/ умилосердися и даруй согрешений оставление/ верою поющим Божественныя Страсти Твоя.
Песнь 4
Ирмо́с: Вознесе́на Тя ви́девши Церковь на Кресте,/ Солнце праведное,/ ста в чи́не своем,/ досто́йно взывающи:/ сла́ва силе Твое́й, Го́споди.
Любве ради Зижди́теля, о страстоте́рпцы,/ всю мирску́ю лесть истинно презре́вше,/ Единаго возжеле́сте Христа, взывающе:/ сла́ва силе Твое́й, Го́споди.
Наступивше на пе́щный пламень и поправше сего, мученицы,/ росо́ю с Небес Божественно обогати́стеся, Христу взывающе:/ сла́ва силе Твое́й, Го́споди.
Просвещшеся Троичным сиянием, мучеников до́бляя верста́/ идольское разруши́ омрачение, Христу взывающе:/ сла́ва силе Твое́й, Го́споди.
Богоро́дичен:
Носи́мое смертное стремление, Дево,/ Ты, Христа рождши нетленно, Марие, уста́вила еси,/ сочетавши Безплотным чино́м ро́ды земных, Пренепорочная.
Песнь 5
Ирмо́с: Ты, Го́споди, мой свет/ в мир пришел еси,/ Свет Святый, обращаяй из мрачна неведения/ верою воспева́ющия Тя.
Не превратиша вас приложения мучений, тве́рдии,/ на камени бо Спа́сове/ душевныя ваша ноги яве утверди́сте.
Побе́ждше крепко лести первоначальнаго,/ упраздняете и́дольския кровныя жертвы/ кровей ваших лиянием, славнии.
Богоро́дичен:
Отъяла еси клятву,/ я́ко Радость рождши, обожившую земныя,/ Бога Твоима рукама носивши, Мати Богоневесто.
Песнь 6
Ирмо́с: Пожру́ Ти со гла́сом хвале́ния, Го́споди,/ Церковь вопиет Ти,/ от бесо́вския кро́ве очи́щшися,/ ради́ милости от ребр Твоих/ исте́кшею Кровию.
Целение душетленных страстей/ яви́шася ваша кро́ви всем, страстотерпцы,/ верою притекающим к Божественней и всесветлей ра́це, преблаженнии.
Законно за Христа пострадавше, славнии,/ обогатистеся венцем нетленным истинно, преблаженнии,/ и Царство Небесное, и Боже́ственное наслаждение прия́сте.
Богоро́дичен:
Обре́т Тя посреде́ те́рния, Пренепорочная,/ я́ко пречистый крин и юдо́льный цвет, о Богомати,/ Жених во чреве Твое́м плоть бысть.
Конда́к, глас 3.
Подо́бен: Дева днесь:
До́блия мученики и братию по плоти,/ мудраго Евла́мпия и Евлампи́ю, почтим:/ ти́и бо пребеззаконных козноде́йства посрами́ша силою Распе́ншагося:/ сего ради яви́шася мучеников сла́ва, купно и похвала.
Икос:
Дво́ицу, ве́рнии, страстотерпцев днесь в песнех священных и пениих похва́лим,/ я́ко лесть идольскую низложиша, многобожия огнь испепели́ша и демоны посрами́ша;/ мучителей же ярости не устраши́шася,/ меча убо и огня не убояшася, ниже́ звере́й стремления,/ до́блественно подвизавшеся до́бре, Евла́мпий славный с честно́ю Евлампи́ею и со страдальцы,/ явльшеся мучеников сла́ва, купно и похвала.
Песнь 7
Ирмо́с: В пещи́ Авраа́мстии о́троцы перси́дстей,/ любо́вию благочестия па́че,/ нежели пламенем, опаля́еми, взыва́ху:/ благословен еси в храме славы Твоея́, Го́споди.
Разумом Божественным обогаще́н, му́чениче приснопамятне,/ все томление укори́л еси истинно злочестивых, Евла́мпие, поя́:/ благословен еси в храме славы Твоея́, Го́споди.
Я́ко поте́кше к любви истинно Создавшаго,/ Божественно сочета́стеся, о страдальцы, я́коже плотию и духом, поюще:/ благословен еси в храме славы Твоея́, Го́споди.
Богоро́дичен:
Странноле́пно Ты Отчее, Дево, зачала́ еси Слово во чреве Твое́м, Пречистая,/ и плотию родила еси зовущим:/ благословена Ты в женах еси, Всенепорочная Владычице.
Песнь 8
Ирмо́с: Ру́це распросте́р Дании́л,/ львов зия́ния в ро́ве затче́;/ о́гненную же силу угаси́ша, доброде́телию препоя́савшеся,/ благоче́стия рачи́тели,/ о́троцы, взывающе:/ благословите вся дела Госпо́дня Господа.
Вас, страдальцы славнии, не возмого́ша разлучи́ти от любве́ Христовы мук умноже́ния:/ ни огнь, ни раны, премудрии, ни коно́бная вре́ния, ни острота меча,/ но победи́сте, вопиюще:/ благословите вся дела Господня Господа.
Ны́не вместо болезней благовременно вы Царством Божиим обогатистеся, славнии страдальцы,/ приснословущий Евла́мпие с Евлампи́ею, честно́ю девою мученицею, вопиюще:/ благословите вся дела Господня Господа.
Богоро́дичен:
Я́ко Едина рождши Бога, Мати Безневестная, безсе́менным рождеством, Чистая,/ Сего милостива сотвори, Владычице,/ сохранитися стаду Твое́му от искушения врагов, вопиющу Христу:/ благословите вся дела Господня Господа.
Песнь 9
Ирмо́с: Камень нерукосе́чный/ от несеко́мыя горы, Тебе́, Дево,/ краеуго́льный отсече́ся,/ Христос, совокупивый разстоя́щаяся естества./ Тем, веселящеся, Тя, Богородице, величаем.
Течением крове́й прелесть и́дольскую, страстоте́рпцы мученицы, разруши́сте,/ мучения вашего восприе́мше мзду,/ Небесное жилище и пребывающий покой.
Се вместо тьмы, юз же, и огня, и ран, страстотерпцы,/ Свет присносиянный вам, пространство и восхлаждение радостное,/ полезныя благодати удобно подаде́ся, мученицы славнии пребога́тии.
Течение совершивше Боже́ственное вашего честнаго страдания,/ в све́тлостех Божиих водворя́етеся, идеже лицы Ангельских чино́в,/ и множества праведных, и мученик собори, о приснопамятнии.
Богоро́дичен:
Пророческая ны́не проречения конец прияша, Дево, Отрокови́це,/ Плотоноснаго Бога нам рождши Ты, Всечистая./ Тем еже радуйся, Владычице, со А́нгелом зовем Ти.
Светилен.
Подо́бен: Жены́, услы́шите:
В ле́поту самобра́тное страстотерпцев сдохнове́ние,/ Евла́мпий Богомудрый и честна́я Евлампи́я,/ званием обога́щшеся от Божественнаго предзна́ния:/ тварь бо просвещают мученическими зарями и исцелений сияньми.
Богоро́дичен:
Из Тебе́ Пресущественный Бог, Чистая,/ в смешение человеческаго существа многим милосердием оде́яся,/ не смеси́в уве́дения обои́х, Отроковице, естеств,/ но Един Сын быв по обоему́ и по Рождестве.
В той же день. Святителя Васи́лия (Вассиа́на), чудотворца
На Го́споди, воззва́х: стихиры, глас 5.
Подо́бен: Радуйся:
Подвигни с собою, свя́те,/ Безплотныя вся силы, пророки и апостолы,/ мученики и святители с постники,/ моли́те за ны прегреше́нием отпуст даровати,/ егда́ сядет на Престоле Бог,/ воздая́ комуждо проти́ву дело́м его./ Тем ти вопием немолчно, прехвальне, молящеся Христу,/ мольбами своими даровати нам мир и велию милость.
Верою соше́дшеся вси,/ славим Христа Бога псалмы и песньми духовными,/ пою́ще и препою́ще в сердцах наших Господеви,/ дарующему повсюду дар исцеления святителем Своим Василием,/ егoже даст нам на помощь и избавление./ Тем припадаем державе твое́й, Владыко, просяще избавления зол,/ имиже одержими, к тебе́ вопием:/ даруй душам нашим мир и велию милость.
Троице Пресвятей прилежно за ны молися, преподобне,/ болезней страсти вся прогнати творящих верою и любовию память Твою́, святе,/ да избавлени бывше твоими моли́твами от зол,/ Христа славим, Изба́вителя нашего, давшаго нам на помощь избавление./ Тем ти радость вопием, прехвальне,/ победу нам свыше испроси на противныя враги твоими моли́твами/ и мирови даровати велию милость.
Канон, глас 6.
Песнь 1
Ирмо́с: Волно́ю морско́ю/ скрывшаго дре́вле гони́теля мучителя,/ под землею скры́ша спасе́нных о́троцы;/ но мы, я́ко отрокови́цы,/ Го́сподеви поим,/ славно бо прославися.
Отче святе Василие, не домышляюся, како исплести слово похвале твое́й,/ но молю ти ся, святе,/ подаждь ми ум умилению воспевати святыни твоея́ Божий дар.
Хвалы достойны возслем вси Дающему нам обильно исцеление/ святителем Своим славным Василием,/ воистину бо славящая Его просвещает Господь.
Престолу предстоя, святе, со Безплотными силами,/ Владыце, помоли́ся за люди своя, избавитися от всех зол и наход,/ противных супостат покори нам.
Богоро́дичен:
Волны греховныя мя потопляют бурею,/ но в пристанище тихо щедрот Твоих, Владычице, настави мене ны́не моли́твами святителя Твоего Василия,/ радуйся, вопия неизреченное Твое́ житие.
Песнь 3
Ирмо́с: Тебе́, на водах/ Повесившаго всю землю неодержи́мо,/ тварь ви́девши на ло́бнем ви́сима,/ у́жасом многим содрога́шеся:/ несть свят,/ разве Тебе́, Го́споди, взывающи.
Тебе́, отче Василие, Христос Бог дарова на помощь земным,/ ви́девшим ны́не дарование исцеле́нием чудесно дивимся, вопиюще:/ несть бо свята, разве Давшаго ти силу.
Тебе́ припа́даем, святе, немолчно вопиюще непрестанно,/ угаси́ страсти на́ша исцеле́нием:/ несть бо свята разве Иисуса Христа, давшаго ти силу.
Чудотворче Василие, Владыце помоли́ся непрестанно/ невидимыя враги на́ша и видимыя прогнати от нас/ и победу свыше испроси у Христа Бога верным людем Его.
Богоро́дичен:
Тебе́, Пречистая Владычице, имуще град непобедим,/ в немже избавляема от всех напастей, к Сыну Твое́му вопиюще:/ несть свята, разве Тебе́ Бога, рождшагося от Тебе́.
Седален, глас 1.
Подо́бен: Гроб Твой, Спа́се:
Гроб твой, святе, источник явися,/ источая исцелений благодати/ всегда верою приходящим к мощем твоим, блаженне./ Тем вопием и мы:/ моли́твами твоими/ сподоби ны исцеление прияти от страсте́й наших.
Песнь 4
Ирмо́с: На Кресте́ Твое́ Боже́ственное истоща́ние прови́дя,/ Аввакум ужа́сся, вопия́ше:/ Ты сильных пресе́кл еси державу, Бла́же,/ приобщаяся су́щим во аде/ я́ко Всеси́лен.
На Небеси со Ангелы ликовствуя, светом озаряя Неизреченнаго Божества,/ имы́й дерзновение, за ны помолися/ даровати нам исцеление и грехов отдание.
Имуще че́стно гроб твой, в немже, прири́щуще, исцеле́ния дары приемлем,/ тем твою́ память чтим, святе Василие,/ Христа Спаса славяще я́ко Всемогуща.
Ко Христу воздев пречистеи руце, презря соблазны на́ша,/ Владыце помолися избавитися нам от всех напастей,/ мир свыше испроси всей вселенней.
Богоро́дичен:
Надежда яви́ся роду земному, порождали сугу́ба Бога и Человека,/ вы́ну моли́ся Ему страсти избавитися нам,/ творящим празднество слуги Твоего Василия.
Песнь 5
Ирмо́с: Богоявле́ния Твоего, Христе,/ к нам милостивно бывшаго,/ Иса́ия свет ви́дев невечерний,/ из но́щи у́треневав, взыва́ше:/ воскре́снут ме́ртвии,/ и востанут су́щии во гробе́х,/ и вси земноро́днии возра́дуются.
Богомудраго Твоего, Христе, святителя день славяще, державу Твою́,/ из нощи вопиюще Ти, Го́споди,/ грехов оставление просим и недугом целение, да и мы, земни́и, обрадуемся.
Имея дерзновение к Бо́гу,/ за нас Владыце помолися мрак грехов отгнати от нас и свет вселенней даровати, верою притекающим Ти,/ да радостию Христу вопием:/ дивен еси, Боже, во святых.
Верою вооружься, демонския полки попрал еси/ и страсти плотския победи/ да, свобо́ждься от них, прославляю твою́ память славою Бога непрестанно,/ давшаго Ти причастие славы Своея.
Богоро́дичен:
Бо́гу явитися за милосердие хотящу,/ к нам Исаия пророк Духом вопияше Твоим:/ се Дева прии́мет во чреве и родит Сына Божия,/ Иже возстави падшаго Адама и вси, иже с Ним, возра́довашася.
Песнь 6
Ирмо́с: Ят бысть,/ но не удержа́н в пе́рсех ки́товых Ио́на,/ Твой образ нося,/ Страдавшаго и погребе́нию да́вшагося,/ я́ко от черто́га, от зверя изы́де,/ приглаша́ше же кустоди́и,/ храня́щии су́етная и ло́жная,/ милость сию оставили есте́.
Ангельски на земли́ пожив, в Небесныя обители, святителю, преселися,/ в свете Неизреченнаго Божества предстоя,/ я́ко имея дерзновение к Нему, помолися, святителю,/ испроси моли́твами твоими нам мир свыше и велию милость душам нашим.
Во всю землю изы́де глас твой, возбуждая сидящая во мра́це,/ одержимыя лестию греховною, призывая на Свет невечерний,/ наньже молю ти ся, настави мя моли́твами своими,/ тебе́ бо нам Христос дарова на помощь и избавление.
Чудесы сияя, я́ко солнце в мире, Васи́лие,/ просвещая омраченныя и бесы отгоняя моли́твами твоими, тем ти вопием:/ прожени́ от нас видимыя враги и невидимыя, Милостивому Бо́гу моляся за ны.
Богоро́дичен:
Пречистая Владычице, проро́ком сбытие, апо́столом радость,/ челове́ком утверждение, святи́телем сла́ва,/ славы вечныя общник быти сотворив,/ Тя бо и́мам Молитвенницу Чисту к Сыну Твое́му, Госпоже, и Бо́гу нашему.
Песнь 7
Ирмо́с: Неизрече́нное чу́до,/ в пещи́ Изба́вивый преподобныя о́троки из пла́мене,/ во гробе мертв бездыха́нен полагается/ во спасе́ние нас, поющих:/ Изба́вителю Боже, благословен еси.
Прожени́ от нас, преподобне, страсти вся и болезни твоими моли́твами,/ за ны молися Христу прославльшаго тя на спасение нам, поющим,/ Изба́вителю Боже, благословен еси.
Имея дерзновения к Бо́гу за ны молитися, святе Василие,/ непрестанно вопия к Бо́гу Владыце, прославльшаго тя на спасение нам, поющим:/ Изба́вителю Боже, благословен еси.
Приими от нас, святе, молебную песнь, юже ти приносим,/ Христа, прославльшаго тя на спасение нам, поющим:/ Избавителю Боже, благословен еси.
Богоро́дичен:
Припа́даем Ти, Пречистая Владычице, грехми одержими/ и молим Ти ся, моли Рожденнаго из Тебе́ на спасение нам, поющим:/ Избавителю Боже, благословен еси.
Песнь 8
Ирмо́с: Ужасни́ся, боя́йся Небо,/ и да подви́жатся основания земли́:/ се бо в мертвеце́х вменя́ется в Вы́шних Живы́й/ и во гроб мал странноприе́млется./ Егoже, о́троцы, благословите,/ священницы, воспойте,/ людие, превозноси́те во вся веки.
Отче Василие, помяни ко Господу творящих ти память,/ се убо твоими моли́твами бед всех избавимся, да радостию Христу вопием:/ дети, благословите, священницы, воспойте, людие, превозносите во вся веки.
Вари́ к Бо́гу твоими моли́твами избавити ны от настоящаго гнева и вся страсти и недуги прожени от нас,/ чтущих Твою́ святыню и вопиющих:/ дети, благословите, священницы, воспойте, людие, превозносите во вся веки.
Богоро́дичен:
Безстрастнаго рождши Христа,/ обложе́на мя страстьми́, свободи Твоими моли́твами, Пречи́стая,/ прогоня́ющи недуги моя и дающи крепость вопити:/ дети, благословите, священницы, воспойте, людие, превозноси́те во вся веки.
Песнь 9
Ирмо́с: Не рыда́й Мене, Ма́ти,/ зря́щи во гробе,/ Егoже во чреве без се́мене зачала́ еси, Сына:/ воста́ну бо, и просла́влюся,/ и вознесу́ со славою непрестанно я́ко Бог/ верою и любовию Тя величающия.
Приими от нас, Христе Боже, молебную песнь,/ юже Ти приносим, чтуще память святителя Твоего,/ и подаждь оставление грехом, да Тя непрестанно, Христе, песньми возпевающе, возвеличим.
Возведем очи свои на Небо, умы своя духом вперивше, Вышняго мудрствующе/ и Вышних желающе вечных благ насладитися/ моли́твами Твоего, Владыко Христе, преславнаго святителя Василия.
Троице Пресвятей, святе, за ны помоли́ся,/ десна́го стояния сподоби нас и пищи вечныя,/ наслаждение улучити ны сподоби, да верою и любовию тебе́ величаем.
Богоро́дичен:
Свободи́теля, Дево, порождши пра́дедом,/ греховною ны лестию порабоще́ны, Чистая, Твоими моли́твами свободи,/ Сына Твоего молящи, да непрестанно Тебе́, Богородице, величаем.
В той же день. Святых преподобномученик двадесяте и шести, во священной обители Зографския скончавшихся
Тропа́рь, глас 1:
Тревелича́йшия светильники,/ всех преподобномученик Богоизбра́нный полк,/ двадесять и шесть Божественныя обители Зогра́фския отец, почтим,/ прелесть лати́нскую обличившим/ и насильственно во огни сконча́вшияся;/ Фому́ пастыреначальника, священнаго Варсоно́фия,/ достославнаго Парфе́ния и прочия, подвизавшияся,/ сошедшеся, песньми почтим,/ сии бо Тро́ицу Святу́ю/ присно о нас умоляют.
Сла́ва, глас 3:
Столп истинный великия похвалы,/ обители Зогра́фския защита и заступление,/ мученицы отцы да восхва́лятся,/ лесть папи́стов низложившия/ и во огни венцев сподо́бившияся,/ ихже песньми по долгу почтим,/ молящихся о спасении душ наших.
И ны́не, Богоро́дичен, глас тойже.
Конда́к, глас 8.
Подо́бен: Взбранной:
Иже обители нашея засту́пницы и храни́телие,/ преподобнии отцы да похва́лятся,/ лесть лати́нян отвергшия/ и, огнем сожженныя, сконча́вшияся и венча́вшияся,/ ихже достойно воспоим, зовуще:/ радуйтеся, преподобнии мученицы.
Икос:
Ангелу с Небесе безбожную гордыню латинян поразившу и показавшу,/ како преподобнии во огни сожегахуся благочестия ради,/ иже и скончатися благочестно избра́вшия,/ мучителеву дерзость посрамившия, да услышат от нас таковая:/ радуйтеся, сонме преподобномученик;/ радуйтеся, по́лче преславный;/ радуйтеся, твердая дружино многохвальная;/ радуйтеся, двадесяте и шестерице преподобных;/ радуйтеся, Фомо́ с прочими мученики;/ радуйтеся, Боже́ственный Варсоно́фие со Михе́ем твердым;/ радуйтеся, Дометиа́не, Ми́но с Па́влом светлейшим;/ радуйтеся, Анто́ние, Евфи́мие и Иларио́не;/ радуйтеся, со Парфе́нием Иоаса́фе и Си́моне;/ радуйтеся, два Иа́кова купно со Иоанни́кием;/ радуйтеся, Мартиниа́не купно со Космою и Се́ргием;/ радуйтеся, Киприа́не, Кири́лле, И́ове и Са́вво светлейший;/ радуйтеся и четверице прехвальная подвижник светлых;/ радуйтеся, преподобнии мученицы.
В той же день. Собор всех святых Волы́нских
Тропа́рь, глас 4:
Приспе́ день светлаго торжества,/ лю́дии Волы́нстии радуются,/ и с ними вся Российская Церковь ликовству́ет/ во псалме́х и пе́ниих, и пе́снех духовных,/ днесь бо, я́коже солнце незаходимое,/ всем возсия́ память/ святых и Богому́жных угодников и чудотворцев Волынских/ святителя Стефа́на чуднаго,/ иера́рхом Волынским первопресто́льника,/ и свята́го благовернаго Яропо́лка,/ блаженнаго страдальца Богому́жнаго,/ и с ними Амфило́хия, святителя Волынскаго,/ и победоно́снаго Фео́дора, Остро́жскаго князя Богодарованнаго,/ и преподобнаго Иова Поча́евскаго присноблаже́ннаго,/ ихже моли́твами, Го́споди,/ зе́млю отеческую нашу в Православии и мире утверди,/ и спаси́ всех имуще ку́пно о нас Молитвенницу усердную,/ Пресвятую Матерь Свою Богородицу,/ благода́тне сияющую в цельбоно́сней стопе́ Своей/ и чудотворней иконе на горе Поча́евстей/ и заступленьми прочих угодников Волынския паствы,/ Иулиа́нии, блаженныя девы Ольша́нския,/ и свята́го преподобномученика Мака́рия, архимандрита О́вручскаго.
ин тропа́рь, глас 4:
Приспе́ день светлаго торжества,/ обитель Пече́рская радуется/ и с нею благословенная Поча́евская Лавра ликовству́ет/ во псалме́х и пе́ниих, и пе́снех духовных,/ днесь бо, я́коже солнце незаходимое,/ всем возсия память/ преподобных и Богоносных отец Печерских,/ от нихже волею Божиею изыдо́ша/ первонача́льницы иноческаго жития́ на горе Поча́евстей,/ ихже моли́твами, Го́споди,/ землю отечественную нашу в Православии и мире утверди/ и помилуй всех, иму́ще купно о нас Молитвенницу и Заступницу усердную,/ Пречистую Матерь Свою Богородицу,/ от лет древних благода́тне сияющую в цельбоно́сней стопе́ Своей/ и чудотворней Своей иконе во обители Поча́евстей/ в просвещение и спасение душ наших.
Конда́к 8
Избра́нным чудотворцам и изря́дным угодником Волынския земли,/ похвальная воспису́ем вам, святии:/ Яропо́лче святый, Стефа́не, Амфило́хие, Фео́доре,/ Иулиа́ние, Иове и Мака́рие, присноблаженнии!/ Тем я́ко имущии благодать и милость у Христа Бога нашего,/ от всяких нас бед свободите/ да вы́ну вашею помощию избавляемии, вопием вам благодарне:/ радуйтеся, преславнии угодницы Божии и земли Волы́нския украшение.
Ин конда́к, глас 8:
Избраннии от родо́в угодницы Божии,/ преподобнии Пече́рстии:/ Мерку́рие и Симео́не, Акинди́не же, Лукиа́не, Па́мво и Полика́рпе,/ Авраа́мие, Алекси́е, Евста́фие, Елла́дие, Ефре́ме, Иерони́ме,/ Луко́, Мела́дие, Они́симе, Пе́рсие, Па́вле, Се́ргие,/ Сисо́е и Фео́филе, Анато́лие же, Афана́сие, Иси́доре, Кассиа́не,/ Лавре́нтие, Пафну́тие, Пио́ре, Сисо́е вторы́й и Софро́ние,/ от нихже изыдо́ша первонача́льницы/ и́ноческаго жития на горе Поча́евстей,/ вас не потаи́ла есть земля,/ Небо же и райския селе́ния отверзо́шася вам./ Темже мы, похва́льная песни Бо́гу,/ прославльшему вас в памяти вашей, принося́ще/ и честный Собор ваш вселюбезно почита́юще,/ из глубины́ душевныя вопие́м вам:/ от всех бед вашими моли́твами заступа́йте нас, зовущих,/ радуйтеся, Пече́рстии чудотворцы/ и обители Поча́евския сла́ва и утверждение.
В той же день. Святителя Амфило́хия, епископа Влади́мира Волы́нскаго
Тропа́рь, глас 4:
От мирска́го мяте́жа изше́д,/ в пещерах Киевских Феодосия блаженнаго Богому́дренно всели́лся еси,/ святителю Христов, отче Амфило́хие,/ и отсю́ду во епископа Богоспаса́емей па́стве Влади́миро-Волы́нстей поста́вленный,/ в труде́х, бде́ниих и поще́ниих свято подвиза́лся еси./ И та́ко достиг добродетелей совершенства,/ па́ки в пещеры святыя возвратился еси,/ иде́же и дух свой благоче́стно предал еси Го́сподеви, всечестне,/ к ли́ку преподобных Печерских причте́н,/ с ними же моли́ся Христу, всече́стне,/ спастися душам нашим.
Конда́к, глас 8:
Звезду́ Волы́нскую, из пещернаго мрака от Киева возсия́вшую,/ и от Волыни второ́е пещеры заве́тныя житие́м своим/ и блаженною кончиною, и прославлением своим озари́вшаго,/ всеблаженнаго Амфилохия, архипастыря Влади́миро-Волы́нскаго почти́м,/ прося́ще его, да в ли́ке преподобных Печерских водворя́яся,/ мо́лится ку́пно с ними о душа́х наших.
Блаженнаго Андре́я То́темскаго, Христа́ ради юродиваго
Тропа́рь, глас 4:
Терпением и му́жеством Христа ра́ди юро́дство восприял еси, блаженне Андрее,/ в посте и бдении пребывая,/ тягость зноя ле́тняго понесл еси,/ и мразы зи́мния терпя,/ темже и ны́не приходящим с верою к тебе́,/ исцеление неоску́дно подае́ши,/ моли Христа Бога спастися душам нашим.
Конда́к, глас 8:
Вы́шния красоты желая,/ и нижния сласти телесныя то́щно9 оставил еси нестяжа́нием су́етнаго мира,/ Ангельское житие преходя, сконча́вся, Андрее блаженне,/ с ними же Христа Бога моли́ непрестанно о всех нас.
* * *
то́щно – усердно.