10.10 Преподо́бнаго Амвро́сия, ста́рца о́птинскаго

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

Днесь све́тло торжеству́ет / Введе́нская пу́стынь, / прославля́ющи своего́ вели́каго моли́твенника, / преподо́бнаго ста́рца о́птинскаго, / Амвро́сия чудотво́рца, / и́же зде подвиза́ся ре́вностно / и, возше́д на ле́ствицу духо́вную, / просия́л есть, я́ко свети́льник огнезра́чный, // по всей земли́ Росси́йстей.

Прииди́те, ве́рнии лю́дие, / воздади́м досто́йное поклоне́ние / ны́не просла́вленному ста́рцу Бо́жию / и согла́сно воспои́м ему́: / преподо́бне о́тче наш Амвро́сие, / моли́твенниче наш пред Престо́лом Царя́ Небе́снаго, / не забу́ди нас, убо́гих чад твои́х, / ча́ющих твоея́ по́мощи, / и изба́ви нас от вся́кия ну́жды и печа́ли.

Что тя нарече́м, преподо́бне Амвро́сие? / В по́двизех бо возше́л еси́ / на го́ру свя́тости и соверше́нства, / я́ко земны́й А́нгел и челове́к Небе́сный / ны́не же ра́дуешися и весели́шися в черто́зех Царя́ ца́рствующих, / и та́мо зри́ши сла́ву и добро́ту неизрече́нную, / и с го́рними Си́лами непреста́нно / воспева́еши Трисвяту́ю песнь // Бо́гу, в Тро́ице сла́вимому.

Пра́зднующе па́мять богоно́снаго Амвро́сия, / вели́каго ста́рца Оптинскаго, / всеросси́йскаго наста́вника благоче́стия, / воспо́йте, лю́дие, песнь но́вую: / блаже́н еси́, преподо́бне о́тче наш, / сотвори́вый вся, запове́данная Христо́м, / ны́не бо ты, прославля́емь в сове́те святы́х, / созерца́еши сла́ву Вседержи́теля Бо́га, // прославля́ющаго просла́вльших Его́.

И́ны стихи́ры, глас 2.

Подо́бен: Егда́ от Дре́ва:

Преподо́бне о́тче Амвро́сие, / кто испове́сть труды́ и боле́зни твоя́, / я́же поне́сл еси́ ра́ди Ца́рствия Небе́снаго? / И был еси́ о́браз терпе́ния и смире́ния, / кро́тости и воздержа́ния, / целому́дрия и послуша́ния, / те́миже обогати́л еси́ ду́шу твою́ / и стяжа́л еси́ да́ры Ду́ха Всесвята́го, // И́мже вся́ка душа́ живи́тся.

Благословля́л еси́ Го́спода / на вся́кое вре́мя, / в ра́дости и печа́ли земна́го жития́, / всегда́ хвала́ Его́ бысть во усте́х твои́х, / да услы́шат кро́тцыи и немощству́ющии глас твой и возвеселя́тся, / взыска́л бо еси́ Го́спода, и услы́ша тя, / и от всех скорбе́й твои́х изба́ви тя. / Присту́пим и мы, бра́тие, к Бо́гу и просвети́мся, // и ли́ца на́ша не постыдя́тся.

Святы́й уго́дниче Бо́жий, / ве́ры правосла́вныя ревни́телю, / сосу́де благода́ти избра́нный, / ди́вным житие́м твои́м пу́стынь Оптина просла́вися, / и вси концы́ земли́ на́шея возра́довашася, / тебе́ бо вси стяжа́хом сте́ну и утвержде́ние, / моли́ся при́сно ко Го́споду, / всеми́лостивому Бо́гу на́шему, // да спасе́т ду́ши на́ша.

Богоблаже́нне о́тче Амвро́сие, / су́етная и ло́жная ми́ра сего́ / отве́ргл еси́ непоколеби́мо, / облеки́йся в ри́зы мона́шеския, / препобеди́л еси́ в себе́ ве́тхаго челове́ка, / угаси́в разжже́нныя стре́лы вра́жия, / ду́шу свою́, я́ко зе́ницу о́ка, / соблю́л еси́ невреди́му, // те́мже тя вси ублажа́ем.

Сла́ва, глас 1:

Прииди́те, мона́хов мно́жество, / хвале́бными пе́сньми / па́мять почти́м богоно́снаго ста́рца Амвро́сия, / о́птины пу́стыни украше́ния, / се бо, я́ко фи́никс, насажде́нный в дому́ Бо́жием, / процве́л и возблагоуха́л есть цвет неувяда́емый, / и ны́не предстои́т пред Царе́м Небе́сным, / моля́ся о душа́х на́ших.

И ны́не, Богоро́дичен, глас то́йже: Всеми́рную сла́ву: Вход. Проки́мен дне. И чте́ния.

При́тчей чте́ние (главы́ 10, 3 и 8):

Па́мять пра́веднаго с похвала́ми, / и благослове́ние Госпо́дне на главе́ его́. / Блаже́н челове́к, и́же обре́те прему́дрость, / и сме́ртен, и́же уве́де ра́зум. / Лу́чше бо сию́ купова́ти, / не́жели зла́та и сребра́ сокро́вища. / Честне́йшая же есть ка́мений многоце́нных, / все же честно́е недосто́йно ея́ есть. / Долгота́ бо дней и ле́та живота́ в десни́це ея́, / в шу́йце же ея́ бога́тство и сла́ва. / От уст ея́ исхо́дит пра́вда, / зако́н же и ми́лость на язы́це но́сит. / Послу́шайте у́бо мене́, о ча́да, / честна́я бо реку́, / и блаже́н челове́к, и́же пути́ моя́ сохрани́т. / Исхо́ди бо мой – исхо́ди живота́, / и уготовля́ется хоте́ние от Го́спода. / Сего́ ра́ди молю́ вас / и предлага́ю мой глас сыново́м челове́ческим: / я́ко аз, прему́дрость, устро́их сове́т, / и ра́зум и смысл аз призва́х. / Мой сове́т и утвержде́ние, / мой ра́зум, моя́ же кре́пость. / Аз мене́ лю́бящия люблю́, / и́щущии же мене́ обря́щут благода́ть. / Разуме́йте у́бо, незло́бивии, кова́рство, / ненака́заннии же, прилага́йте сердца́. / Послу́шайте мене́ и па́ки, / честна́я бо реку́, / и отве́рзу от усте́н пра́вая, / я́ко и́стине поучи́тся горта́нь моя́, / ме́рзки же предо мно́ю устны́ лжи́выя. / С пра́вдою вси глаго́лы уст мои́х, / ничто́же в них стро́потно, ниже́ развраще́нно. / Вся пра́ва суть разумева́ющим / и про́ста обрета́ющим ра́зум. / Научу́ бо вас и́стине, / да бу́дет о Го́споде наде́жда ва́ша, / и испо́лнитеся Ду́ха.

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость: устне́ же муже́й му́дрых ве́дят благода́ть. / Уста́ му́дрых поуча́тся прему́дрости, пра́вда же избавля́ет их от сме́рти. / Сконча́вшуся му́жу пра́ведну, не поги́бнет наде́жда. / Сын бо пра́веден ражда́ется в живо́т и во благи́х свои́х плод пра́вды обы́мет. / Свет пра́ведным всегда́, и от Го́спода обря́щут благода́ть и сла́ву. / Язы́к му́дрых до́брая свесть, и в се́рдце их почи́ет му́дрость. / Лю́бит Госпо́дь преподо́бная сердца́, прия́тни же Ему́ вси непоро́чнии в пути́. / Му́дрость Госпо́дня просвеща́ет лице́ разу́мнаго. / Постига́ет бо жела́ющия ю, пре́жде да́же разуме́ти ю, и удо́бь у́зрится от лю́бящих ю. / Утреневавый к ней не утруди́тся, и бдяй ея́ ра́ди вско́ре без печа́ли бу́дет. / Я́ко досто́йных ея́ сама́ обхо́дит, и́щущи, и во стезя́х ея́ явля́ется им благоприе́мне. / Му́дрости никогда́же одоле́ет зло́ба. / Сих ра́ди и рачи́тель бых добро́ты ея́, и возлюби́х ю, и поиска́х от ю́ности моея́. / И взыска́х неве́сту привести́ себе́, я́ко всех Влады́ка возлюби́ ю. / Тайбница бо есть Бо́жия хи́трости, и обрета́тельница дел Его́. / Труды́ ея́ суть доброде́тели: целому́дрию же и ра́зуму та учи́т, пра́вде и му́жеству, / и́хже потре́бнее ничто́же есть в житии́ челове́ком. / А́ще же и мно́гаго иску́сства жела́ет кто, весть дре́вняя и бы́ти хотя́щая разсмо́трит. / Свесть изви́тия слове́с и разреше́ния гада́ний, зна́мения и чудеса́ проразуме́ет и сбытия́ време́н и лет, / и всем сове́тник есть благ, я́ко безсме́ртие есть в ней и благосла́вие во обще́нии слове́с ея́. / Сего́ ра́ди бесе́довах ко Го́споду, и помоли́хся Ему́, и рех от всего́ се́рдца моего́: / Бо́же отце́в и Го́споди ми́лости, сотвори́вый вся сло́вом Твои́м / и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде. / Даждь ми Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́. / Посли́ ю с Небе́с от свята́го жили́ща Твоего́, и от Престо́ла сла́вы Твоея́, / да, су́щи со мно́ю, научи́т мя, что благоуго́дно есть пред Тобо́ю, / и наста́вит мя в ра́зум, и сохрани́т мя в сла́ве свое́й. / Помышле́ния бо сме́ртных вся боязли́ва, и погреши́тельна умышле́ния их.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка. / Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. / И е́же от нас ше́ствие сокруше́ние, они́ же суть в ми́ре. / И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. / И вма́ле нака́зани бы́ше, вели́кими благоде́тельствовани бу́дут, / я́ко Бог искуси́ я и обре́те их досто́йны Себе́. / Я́ко зла́то в горни́ле искуси́ их и я́ко всепло́дие же́ртвенное прия́т я. / И во вре́мя посеще́ния их возсия́ют и, я́ко и́скры по сте́блию, потеку́т. / Су́дят язы́ком и облада́ют людьми́, и воцари́тся Госпо́дь в них во ве́ки. / Наде́ющиися Нань разуме́ют и́стину и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ра хра́ма и свята́го, глас 6:

Преподо́бне о́тче наш Амвро́сие, / всея́ Росси́и наста́вниче богому́дрый, / же́зле немощны́х и стра́ждущих, / о́бразе ве́ры и благоче́стия, / пропове́дниче смире́ния и терпе́ния, / моли́твенниче за Оте́чество на́ше правосла́вное, / днесь ублажа́ем честну́ю твою́ па́мять, / с ве́рою и любо́вию притека́юще, / взыва́ем ти дерзнове́нно: // моли́ Христа́ Бо́га спасти́ся душа́м на́шим.

Сла́ва, глас 8: Прииди́те, ве́рнии лю́дие:

И ны́не, Богоро́дичен, глас то́йже: Безневе́стная Де́во:

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Песнь воспои́м, лю́дие, / учи́телю душеспаси́тельнаго жи́тельства, / исто́чнику любве́ Христо́вы, вели́кому ста́рцу Амвро́сию, / мона́хов путеводи́телю, / а́лчущих пита́телю, бе́дствующим помо́щнику, / всем христиа́ном прибе́жищу: / приими́, уго́дниче Бо́жий, на́ша моле́ния, / ве́рных чад твои́х, // чту́щих святу́ю па́мять твою́.

Стих: Честна́ пред Го́сподем // смерть преподо́бных Его́.

Пра́зднующе, преподо́бне о́тче, / святу́ю па́мять твою́, / благода́рную песнь воспева́ем ти, / ты бо ве́си ну́жды нас, чад твои́х, / обремене́нных скорбьми́ мно́гими, / помога́еши нам си́лою свы́ше / и огражда́еши, я́ко щит, / от вся́ких де́монских нахожде́ний, // низпосыла́я ве́лию ми́лость.

Стих: Блаже́н муж, боя́йся Го́спода, // в за́поведех Его́ восхо́щет зело́.

Притеце́м, бра́тие, / к исто́чнику све́та и́стины, / богоблаже́нному Амвро́сию, / просвети́мся его́ уче́ньми духо́вными / и с ве́рою возопии́м ку́пно: / приими́ на́ша моли́твы // и изба́ви нас от вся́ких зол и скорбе́й.

Сла́ва, глас 8:

Наста́вниче всех приходя́щих к тебе́, / о́тче наш Амвро́сие, / любве́ насади́телю, / ни́щих корми́телю, / жа́ждущих напои́телю, / гре́шников до́брый испра́вителю, / неве́рных вразуми́телю, / при́зри на нас, чад твои́х, // чту́щих святу́ю па́мять твою́.

И ны́не, Богоро́дичен, глас то́йже: Безневе́стная Де́во:

Тропа́рь, глас 5:

Я́ко к целе́бному исто́чнику, / притека́ем к тебе́, Амвро́сие, о́тче наш, / ты бо на путь спасе́ния нас ве́рно наставля́еши, / моли́твами от бед и напа́стей охраня́еши, / в теле́сных и душе́вных ско́рбех утеша́еши, / па́че же смире́нию, терпе́нию и любви́ науча́еши; / моли́ человеколю́бца Христа́ / и Засту́пницу усе́рдную // спасти́ся душа́м на́шим.

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Це́рковь свята́я ны́не пра́зднует / твою́ честну́ю па́мять, о́тче наш Амвро́сие, / почита́ющи по́двиги твоего́ земна́го жития́, / ты бо яви́лся еси́ вои́стину я́ко река́ благода́ти Ду́ха Свята́го, / врачу́я не́мощи теле́сныя и душе́вныя / всех прибега́ющих к тебе́ с ве́рою и наде́ждею. / Тем взыва́ем тебе́ непреста́нно: / моли́ся Христу́ Бо́гу о спасе́нии душ на́ших.

Сла́ва, и ны́не, Богоро́дичен:

Упова́ние и прибе́жище христиа́ном, / Богоро́дице Присноде́во Мари́е, / не пре́зри упова́ющих на Тя рабо́в Твои́х, / тре́буем бо всегда́ Твоей по́мощи и заступле́ния, / я́ко Ма́ти еси́ Зижди́теля всех, Христа́ Бо́га на́шего: / тем и велича́ем Рождество́ Твое́, Пречи́стая, и вопие́м: / ра́дуйся, Богора́дованная Влады́чице, / ра́дуйся, спасе́ние душа́м на́шим и ве́лия ми́лость.

По 2-м стихосло́вии седа́лен, глас 1:

Любо́вию Христо́вою привле́кл еси́ вся концы́ земли́ на́шея / и учи́л еси́ до́брому христиа́нскому жи́тельству, / терпе́ние и смире́ние насажда́я в душа́х а́лчущих спасе́ния, / наипа́че помога́еши нам, / предстоя́ ны́не у Царя ца́рствующих и Влады́ки жи́зни ве́чныя / и моли́ Его́, / да поми́лует недосто́йных раб Свои́х / и спасе́т ду́ши на́ша.

Сла́ва, и ны́не, Богоро́дичен:

Тя, Пресвята́я Богоро́дице, / А́нгели пою́т непреста́нно, / я́ко Соде́теля тех и Бо́га на́шего несказа́нно во чре́ве Твое́м заче́нши, / родила́ еси́ неискусому́жно во спасе́ние на́ше и избавле́ние, / Его́же и мо́лиши при́сно, / су́щим на земли́ здра́вие дарова́ти / и ми́ру всему́ умире́ние. / Те́мже и зове́м Ти: / ра́дуйся, всех родо́в весе́лие, / ра́дуйся, Де́во, христиа́н похвало́.

По полиеле́и седа́лен, глас 8:

Досто́йно восхва́лим, бра́тие, / по́двиги всея́ Росси́и чудотво́рца, / преподо́бнаго отца́ на́шего Амвро́сия, / возше́дшаго на высоту́ ле́ствицы духо́вныя / и просла́вльшаго Бо́га соверше́нством доброде́телей душеспаси́тельных, / и па́ки воспои́м, со умиле́нием серде́ц на́ших зову́ще: / ра́дуйся, Амвро́сие, о́тче святы́й, / до́брый наста́вниче благоче́стия.

Сла́ва, и ны́не, Богоро́дичен:

Де́во пренепоро́чная и неискусобра́чная Мари́е, / при́зри и посети́ рабо́в Твои́х, / ве́рно пою́щих и хва́лящих Тя во хра́ме Твое́м, Препе́тая: / ра́дуйся, Богоблагода́тная Богоро́дице Всепе́тая, / ра́дуйся, спасе́ние на́ше и утвержде́ние, / ра́дуйся, просвети́вшая род наш светоно́сным Рождество́м Сы́на Твоего́ и Бо́га на́шего, / И́мже искорени́ся лесть бесо́вская, / ра́дуйся, совокупи́вшая до́льняя Небе́сным: / ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Честна пред Го́сподем // смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Богоно́сный о́тче наш Амвро́сие, / в христоподража́тельнем житии́ свое́м / стяжа́л еси́ плоды́ духо́вныя: / любо́вь, мир, ра́дость, / долготерпе́ние, бла́гость, милосе́рдие, / ве́ру, кро́тость, воздержа́ние, / плоть распя́в со страстьми́ и похотьми́, / тяготы́ други́х поне́сл еси́ / и та́ко испо́лнил еси́ зако́н Христо́в, // достоблаже́нне о́тче, моли́ся о спасе́нии душ на́ших.

Кано́н Богоро́дицы со ирмосо́м на 6 и свята́го на 8.

Кано́н свята́го, глас 8.

Песнь 1

Ирмо́с: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре: / Изра́иля же беглеца́, пешехо́дца спасе́, // песнь Бо́гови воспева́юща.

Це́рковь ны́не торжеству́ет, / све́тло пра́зднующи твою́ святу́ю па́мять, / и с ра́достию воспева́ет ти хвале́бную песнь, / сла́вящи Го́спода, ди́внаго во святы́х Свои́х.

Позна́л еси́ сла́дость жи́зни во Христе́ / и не обину́яся оста́вил еси́ пре́лесть земны́х благ и суету́ ми́ра, / всего́ себе́ покори́в Бо́гу.

Кто изочте́т по́двиги твоя́, / я́же поне́сл еси́ ра́ди Ца́рствия Небе́снаго, / в пе́нии, бде́нии и поще́нии утвержда́я дух свой?

Восходи́л еси́ от си́лы в си́лу в доброде́лании за́поведей Христо́вых / и стяжа́л еси́ дар Ду́ха Свята́го, / Его́же де́йствием спасл еси́ мно́гия ду́ши христиа́нския.

Богоро́дичен: Богоро́дице Присноде́во Мари́е, / простри́ ми ми́лостивне десни́цу на по́мощь, / умоля́ющи Сы́на Твоего́ и Бо́га, / я́ко уя́звен есмь лю́те / и на Тя то́чию наде́жду мою́ положи́х, / Ты мя уще́дри.

Катава́сия: Отве́рзу уста́ моя́:

Песнь 3

Ирмо́с: Утвержде́й в нача́ле небеса́ ра́зумом / и зе́млю на вода́х основа́вый, / на ка́мени мя, Христе́, за́поведей твои́х утверди́: // я́ко несть свят, па́че Тебе́, Еди́не Человеколю́бче.

Послуша́нием соверше́нным отве́рглся еси́ во́ли своея́ / и тем стра́сти существа́ па́дшаго Ада́ма отри́нул еси́, / всего́ себе́ преда́в води́тельству богому́дрых ста́рцев и отце́в пу́стыни, / и́же и возрасти́ша тя в ме́ру во́зраста духо́внаго.

Целому́дрия красоту́ стяжа́ла есть твоя́ чи́стая душа́, / си́лою покая́ния совле́кшися ве́тхаго челове́ка / и в духо́внем преуспе́янии обле́кшися во Христа́.

Бога́тства тле́ннаго ми́ра возненави́дел еси́ / и был еси́ я́ко стра́нник и пришле́ц на земли́, / взыску́я Гра́да Небе́снаго, / те́мже Домовлады́ка введе́ тя в черто́г сла́вы Своея́.

Христо́с Бог обогати́ тя да́ром чуде́с, / и мно́гия боле́зни стра́ждущих исцели́л еси́, / не оста́ви нас, ча́ющих от Тебе́ благода́тныя по́мощи.

Богоро́дичен: Наде́ждо и упова́ние на́ше, / Влады́чице ми́ра, блага́я Помо́щнице, / спаси́, и в кре́пости рог вознеси́ правосла́вных, / и лю́ди на́ша от вся́ких бед и от разли́чных обстоя́ний свободи́.

Седа́лен, глас 4:

Лик мона́хов ны́не славосло́вит тя, / преподо́бне о́тче наш Амвро́сие, / ублажа́я честну́ю па́мять твою́, / и вся оби́тель в ра́дости торжеству́ет, / почита́ющи твое́ чи́стое в доброде́телех житие́ / и мно́жество чудотворе́ний, тобо́ю преизлива́емых. / Те́мже мы вси вку́пе вопие́м: / спаса́й нас моли́твами твои́ми, Амвро́сие, о́тче наш.

Сла́ва, и ны́не, Богоро́дичен:

Под твое́ благоутро́бие притека́юще, / мо́лим, Богоро́дице Де́во, / не пре́зри пла́ча на́шего и моли́твы, / но ускори́ изба́вити от бед и скорбе́й лю́ди безотве́тныя: / Ты бо еди́на еси́ изве́стнейшее христиа́ном упова́ние, / и к Тебе́ прибега́юще, вси спаса́емся.

Песнь 4

Ирмо́с: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: // си́ле Твое́й сла́ва, Человеколю́бче.

Избра́нный сосу́д Ду́ха Свята́го был еси́ / и то́ки чуде́с изли́л еси́. / Приими́ на́ша моли́твы / и исцели́ нас от ран грехо́вных и страсте́й.

Позна́вый си́лу моли́твы во спасе́ние души́, / научи́ нас душеполе́зно моли́тися / ко Изба́вителю всех ми́лостивому Иису́су.

Ве́ру и́стинную правосла́вную утверди́ в лю́дех твои́х, / чту́щих тя я́ко ревни́теля уче́ния Христо́ва.

Что воздади́м ти, преблаже́нне о́тче наш, / за вся, я́же возда́л еси́ нам, ча́дом твои́м, / чту́щим твою́ честну́ю па́мять?

Богоро́дичен: Из твоего́ пречи́стаго чре́ва, Богороди́тельнице, / Сло́во Бо́жие произы́де несказа́нно, / Его́же объе́мши, от зол изба́вити умоли́ зову́щих: / сла́ва си́ле Твое́й, Го́споди.

Песнь 5

Ирмо́с: Вску́ю мя отри́нул еси́ / от лица́ Твоего́, Све́те незаходи́мый? / И покры́ша мя есть чужда́я тьма, окая́ннаго. / Но обрати́ мя и к све́ту за́поведей Твои́х // пути́ моя́ напра́ви, молю́ся.

Све́том уче́ния Христо́ва просвеще́нный, / мрак заблужде́ния грехо́внаго отме́л еси́, / наста́ви во све́те повеле́ний Бо́жиих и нас, омраче́нных страстьми́.

Но́вая свеща́ возсия́л еси́, о́тче, на земли́ Росси́йстей, / озаря́я све́том любве́ Боже́ственныя вся до́льняя, / просвети́, богоно́се, нас, недосто́йных чад твои́х, / све́том за́поведей Христо́вых.

Возлюби́л еси́ бли́жняго и подъя́л еси́ его́ бре́мя грехо́в и скорбе́й, / да у́зрит свет и́стины и испра́вит стопы́ своя́ к де́ланию за́поведей Христо́вых.

Унасле́довал еси́ Ца́рство Небе́сное, / иде́же пра́зднующих глас непреста́нный / и безконе́чная сла́дость зря́щих лица́ добро́ту Бо́га неизрече́нную.

Богоро́дичен: Нескве́рная А́гнице и Богоотрокови́це Мари́е, / Твои́ми моли́твами укрепи́вшеся, / святи́и победи́ша бесо́вския си́лы. / Те́мже и нам, упова́ющим на Тя, / ско́ро предста́ни в по́мощь, / да посра́мятся и паду́т вси, явля́ющии рабо́м Твои́м зла́я.

Песнь 6

Ирмо́с: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ши мя, // Бо́же спасе́ния моего́.

Кре́пкое заступле́ние бу́ди всем, / притека́ющим к твое́й по́мощи в неду́зех и печа́лех, о́тче наш Амвро́сие, / О́птинския оби́тели вели́кий ста́рче.

Изба́ви нас от кова́рства лука́вых духо́в / и изведи́ из глубины́ грехо́вныя, / да очи́стит нас Христо́с Бог от беззако́ний на́ших и спасе́т ду́ши на́ша.

Ка́ко рцем твои́ благодея́ния лю́дем, стра́ждущим и уничиже́нным? / Ка́ко воспои́м ти благода́рственную песнь? / Приими́ ны́не песнь хвале́бную недосто́йных чад твои́х.

Посети́ на́ша не́мощи по ми́лости твое́й, / исцели́ я́звы духо́вныя си́лою да́нною ти свы́ше благода́ти, / да воста́нем от ме́ртвеннаго сна грехо́внаго.

Богоро́дичен: Песносло́вяще, Чи́стая, из утро́бы Твоей Вопло́щшагося, / Тя славосло́вим, я́ко Бо́жию Ма́терь.

Конда́к, глас 2:

Заве́т Пастыренача́льника испо́лнив, / ста́рчества благода́ть насле́довал еси́, / боле́знуя се́рдцем о всех, с ве́рою притека́ющих к тебе́. / Те́мже и мы, ча́да твои́, с любо́вию вопие́м ти: / о́тче святы́й Амвро́сие, // моли́ Христа́ Бо́га спасти́ся душа́м на́шим.

И́кос:

Доброзра́чное житие́ показа́л еси́ / и свои́ми доброде́тельми озари́л еси́ всю зе́млю Ру́сскую, / привле́кл еси́ к себе́ вся концы́ Оте́чества на́шего, / окормля́я неисче́тную па́ству ве́рных чад твои́х, / и́хже с любо́вию призре́л еси́, я́ко оте́ц чадолюби́вый и ми́лостивый. / Те́мже сте́кшеся в день преставле́ния твоего́, / во умиле́нии зове́м: / ра́дуйся, подви́жниче благоче́стия, восприе́мый бога́тыя да́ры Ду́ха Всесвята́го; / ра́дуйся, высото́ смире́ния и терпе́ния, и́миже науча́еши ве́рная ча́да своя́; / ра́дуйся, дре́во плодоно́сное, и́мже напита́л еси́ мно́жество а́лчущих жи́зни ве́чныя; / ра́дуйся, цве́те благоуха́нный любве́ Боже́ственныя, е́юже утеша́ются скорбя́щии и боле́знующии; / ра́дуйся, исто́чниче приснотеки́й чуде́с и благотворе́ний, от ни́хже боля́щии исцелева́ют и ги́бнущии спаса́ются; / ра́дуйся, дерзнове́нный хода́таю наш пред пра́ведным Судие́ю; / ра́дуйся, помо́щниче нам пресла́вный во всех обстоя́ниих. / Ра́дуйся, богому́дре Амвро́сие, вели́кий ста́рче всеросси́йский.

Песнь 7

Ирмо́с: Бо́жия снизхожде́ния / огнь устыде́ся в Вавило́не иногда́: / сего́ ра́ди о́троцы в пещи́ ра́дованною ного́ю, / я́ко во цве́тнице, лику́юще, поя́ху: // благослове́н еси́, Бо́же оте́ц на́ших.

Пресели́лся еси́ в Го́рния черто́ги / и та́мо зри́ши сла́ву неизрече́нную преве́чнаго Бо́га, зовя́: / благослове́н еси́, Бо́же оте́ц на́ших.

В со́нме святы́х уго́дников ны́не / прославля́еши прему́драго Творца́ и Го́спода Сил, воспева́я: / благослове́н еси́, Бо́же оте́ц на́ших.

С ли́ки А́нгелов и Арха́нгелов предстои́ши пред лице́м Вседержи́теля / и та́мо немо́лчно пое́ши: / благослове́н еси́, Бо́же оте́ц на́ших.

Вни́де в ра́дость Го́спода, я́ко до́брый и ве́рный раб его́ был еси́ на земли́, / и ны́не на Небесе́х взыва́еши: / благослове́н еси́, Бо́же оте́ц на́ших.

Богоро́дичен: Виждь, Влады́чице, души́ моея́ злосмра́дныя ра́ны, / и́хже самохо́тне подъя́х, окая́нный, и не могу́ приложи́ти пла́стыря, но е́ле жив сый, вопию́: / ми́лостива мне Врача́ всех и Бо́га ма́терними твои́ми моли́твами сотвори́, / я́ко да воспою́ ти: / благослове́н, Пречи́стая, Плод Твоего́ чре́ва.

Песнь 8

Ирмо́с: Седмери́цею пещь / халде́йский мучи́тель / богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, // лю́дие, превозноси́те во вся ве́ки.

Це́рковь ны́не ликовству́ет, / пра́зднующи блаже́нную па́мять твою́, достохва́льне о́тче, / и обре́тение честны́х моще́й твои́х прославли́ет ра́достно, пою́щи: / да благослови́т вся тварь Го́спода и превозно́сит Его́ во ве́ки.

Собра́шася ны́не в оби́тели святе́й мона́хов мно́жество, / ублажа́ющих твою́ честну́ю па́мять и пою́щих с ра́достию: / да благослови́т вся тварь Го́спода и превозно́сит Его́ во ве́ки.

Па́стырие и учи́телие стеко́шася в сей град оби́тельный, / иде́же в доброде́телех ты процве́л еси́, пой: / да благослови́т вся тварь Го́спода и превозно́сит Его́ во ве́ки.

Ста́рии и млади́и, си́льнии и немощни́и приидо́ша ны́не в дом Госпо́день / просла́вити преподо́бнаго ста́рца и отца́ на́шего Амвро́сия, вопию́ще: / да благослови́т вся тварь Го́спода и превозно́сит Его́ во ве́ки.

Богоро́дичен: от Тебе́, Пресвята́я Богоро́дице, / излия́ся вода́ живо́тная на омове́ние скве́рны всеми́рныя, / е́юже благоволи́ и мое́ се́рдце прохлади́ти / и окропи́ти росо́ю моли́тв в кро́ве крил Твои́х во ве́ки вся.

Песнь 9

Ирмо́с: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, // А́нгелов и челове́к чинонача́лия велича́ют.

Пропове́дует ны́не Правосла́вная Це́рковь по́двиги твои́, / я́ко всеросси́йскаго уго́дника Бо́жия, / и чтит твою́ па́мять, / восхвали́ющи твое́ ангелоподо́бное житие́.

При́зри с Небесе́, о́тче наш Амвро́сие, на ве́рныя лю́ди твоя́ / и низпосли́ свы́ше ру́ку по́мощи / всем покланя́ющимся честно́му о́бразу твоему́.

Услы́ши глас моле́ния на́шего, / посети́ ми́лостию твое́ю боле́зни и не́мощи чад твои́х, / с ве́рою к тебе́ прибега́ющих, досточу́дне о́тче наш.

Припа́даем во умиле́нии серде́ц на́ших к стопа́м твои́м, / вели́кий ста́рче земли́ на́шея, про́сим и мо́лим: / не забу́ди посеща́ти чту́щия пречестну́ю па́мять твою́.

Богоро́дичен: Ко́е Тебе́ дарова́ние принесе́м, Богоро́дице? / Или́ что веща́ти и́мамы, гре́шнии? / То́чию уми́льно вопие́м, моля́щеся: / спаси́ рабы́ Твоя́, Богоблагода́тная Отрокови́це, / я́ко да Тя при́сно велича́ем.

Свети́лен:

Мона́шескаго о́браза житие́ избра́в непрело́жно / и отри́нув ми́ра сего́ суету́ и сла́ву, / всели́лся еси́ в оби́тель Богоро́дицы, / преподо́бне о́тче наш Амвро́сие, / и процве́л еси́, я́ко крин се́льный. / Мы же, чту́ще святу́ю па́мять твою́, зове́м ти: / бу́ди нам помо́щник и засту́пник в беда́х и ско́рбех обстоя́щих.

Сла́ва, и ны́не, Богоро́дичен:

Ра́дуйся, Тебе́ зове́м, благослове́нная Богоро́дице Де́во, / я́ко Тобо́ю присносу́щныя ра́дости прича́стницы бы́хом. / Живо́т бо наш и спасе́ние недомы́слимо и превы́ше естества́ родила́ еси́, / сего́ ра́ди непреста́нно ублажа́ют Тя ро́дове родо́в, / я́коже пре́жде прорекла́ еси́.

На хвали́тех стихи́ры на 4, глас 6:

Восхва́лим, ве́рнии лю́дие, / достоблаже́нную па́мять преподо́бнаго Амвро́сия, / вели́каго ста́рца О́птинскаго, / всея́ Росси́и чудотво́рца, / той бо, сконча́в земно́е стра́нствие, / вни́де в оби́тель Царя́ Небе́снаго / и зрит та́мо красоту́ неизрече́нную, / вчини́вся с ли́ки безпло́тных, / пое́т с ни́ми песнь Трисвяту́ю // в Тро́ице сла́вимому Бо́гу.

Возра́дуемся, бра́тие, / пра́зднующе све́тлую па́мять / богоно́снаго ста́рца Амвро́сия, / учи́теля благоче́стия, / пропове́дника любве́ Христо́вы, / его́же Бог сотвори́ сосу́д избра́нный благода́ти своея́ живоно́сныя, / воспои́м, зову́ще: / моли́, о́тче, всеще́драго Бо́га // спасти́ся душа́м на́шим.

Преблаже́нне о́тче Амвро́сие, / вонми́ гла́су душ на́ших, / ча́ющих твоея́ ми́лости, / се бо ско́рби и ну́жды / превзыдо́ша главу́ на́шу, / и несть исцеле́ния пло́ти на́шей; / прииди́ и помози́ всем // чту́щим твою́ святу́ю па́мять.

Це́рковь Ру́сская ны́не пра́зднует / твою́ прехва́льную па́мять, / богому́дре о́тче Амвро́сие, / прославля́ющи твое́ земно́е житие́, / е́же укра́сил еси́ доброде́тельми Христо́выми. / Не премолчи́ за ны ко Го́споду / в твои́х те́плых моли́твах, // да спасе́т ду́ши на́ша.

Сла́ва, глас 8:

Бу́ди помо́щник и засту́пник нам, / обурева́емым в пучи́не жите́йскаго мо́ря, / богоблаже́нне о́тче Амвро́сие, / до́брый па́стырю и де́лателю жа́твы мно́гия, / тебе́ бо вси ве́мы / я́ко ми́лостиваго чудотво́рца, / ско́раго врача́ душ и теле́с на́ших, / кре́пкаго моли́твенника пред Бо́гом // о спасе́нии душ на́ших.

И ны́не, Богоро́дичен, глас то́йже: Влады́чице, приими́:

Славосло́вие вели́кое и отпу́ст.

На Литурги́и слу́жба преподо́бническая.

Моли́тва

О вели́кий ста́рче и уго́дниче Бо́жий, преподо́бне о́тче наш Амвро́сие, о́птинская похвало́ и всея́ Руси́ учи́телю благоче́стия! Сла́вим твое́ во Христе́ смире́нное житие́, и́мже Бог превознесе́ и́мя твое́, еще́ на земли́ тебе́ су́щу, наипа́че же увенча́ тя Небе́сною че́стию по отше́ствии твое́м в черто́г сла́вы ве́чныя. Приими́ ны́не моле́ние нас, недосто́йных чад твои́х, чту́щих тя и призыва́ющих и́мя твое́ свято́е, изба́ви нас твои́м предста́тельством пред Престо́лом Бо́жиим от всех ско́рбных обстоя́ний, душе́вных и теле́сных неду́гов, злых напа́стей, тлетво́рных и лука́вых искуше́ний, низпосли́ Оте́честву на́шему от великодарови́таго Бо́га мир, тишину́ и благоде́нствие, бу́ди непрело́жный покрови́тель святы́я оби́тели, в не́йже в преуспе́янии сам подвиза́лся еси́ и угоди́л еси́ все́ми в Тро́ице сла́вимому Бо́гу на́шему, Ему́же подоба́ет вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Преподобный Амвросий Оптинский

В миру Александр, родился 23 ноября 1812 года в селе Большая Липовица Тамбовской губернии в многодетной семье пономаря Михаила Федоровича (отец которого был священником и благочинным) и Марфы Николаевны Гренковых. В 12 лет Александра определили в Тамбовское духовное училище, после которого он поступил в Тамбовскую духовную семинарию. Тяжело заболев в последнем классе семинарии, Александр дал Богу обет в случае выздоровления пойти в монастырь, но, поправившись, несколько лет откладывал исполнение обета. Успешно окончив семинарию, Александр Михайлович был сначала домашним учителем, а затем преподавателем Липецкого духовного училища. Наконец в 1839 году Александр поступил во Введенскую Оптину пустынь Калужской губернии к преподобному старцу иеросхимонаху Льву (память 11 октября). Александр Гренков был определен в скит монастыря, где нес послушание помощника повара. Черная и трудная кухонная работа не смутила бывшего преподавателя духовного училища. Он не стал рассуждать, что послушание не по нем, не по его силам, а принял назначение со смирением, как из уст Самого Господа. Поварская работа занимала у молодого послушника большую часть дня, ему мало приходилось бывать на богослужениях, и это приучило его к внутренней молитве.

Через три года, когда ему исполнилось тридцать лет, Александр был пострижен в монашество с именем в честь святителя Медиоланского Амвросия (память 7 декабря) и рукоположен в иеродиакона, а через два года – в иеромонаха. Тяжело заболев, отец Амвросий был пострижен в схиму, после чего стал выздоравливать, но полностью поправиться уже никогда не мог. Он не скорбел о своих болезнях, считал их необходимым средством воспитания души и говорил в утешение недужным: «Бог не требует от больного подвигов телесных, а только терпения со смирением и благодарения».

Иеромонах Амвросий стал помогать своему духовному отцу, преподобному старцу иеросхимонаху Макарию, в его трудах как духовник, принимал посетителей, участвовал в переводах и издании творений святых отцов и книг духовного содержания. После кончины преподобного Макария (†7 сентября 1860) преподобный Амвросий становится духовным наставником братии. За наставлением к нему шли тысячи верующих и неверующих людей со всей России. К нему приезжали за советом и для беседы великий князь Константин Константинович Романов, Ф. М. Достоевский, В. С. Соловьев, К. Н. Леонтьев (монах Климент), А. К. Толстой, Л. Н. Толстой, М. П. Погодин и многие другие. Преподобный Амвросий никогда не позволял себе пустого слова и говорил лишь с целью исправления и назидания. На насущный вопрос: «Как жить?» – он давал шутливые ответы: «Нужно жить нелицемерно и вести себя примерно, тогда дело наше будет верно, а иначе будет скверно». Или: «Жить – не тужить, никого не осуждать, никому не досаждать, и всем мое почтение». Или: «Жить можно и в миру, только не на юру, а жить тихо». «Мы должны, – говорил старец, – жить на земле так, как колесо вертится: чуть только одной точкой касается земли, а остальными непременно стремится вверх; а мы как заляжем на землю, так и встать не можем». Преподобный Амвросий имел дар прозорливости, он исцелял больных, помогал нуждавшимся и бедным. Для оказания помощи старец являлся людям на расстоянии, наяву или во сне. Преподобным Амвросием была устроена Казанская Шамординская женская обитель, куда он посылал жить или нуждавшихся больных, или бедных благочестивых женщин, девушек и сирот. Преподобный Амвросий был великим молитвенником за всю Россию. Во время молитвы его лицо видели преображенным.

Скончался преподобный Амвросий 10 октября 1891 года в Шамординской обители и был похоронен в Оптиной пустыни рядом с могилой преподобного старца Макария. После кончины старец Амвросий являлся многим людям в разных концах России, исцеляя больных, помогая страждущим. Святость жизни старца Амвросия явлена в его деятельной любви к ближним, и православный народ всегда отвечал ему глубоким почитанием. В 1988 году на Поместном Соборе Русской Православной Церкви преподобный Амвросий был причислен к лику святых угодников Божиих. Обретенные его честны́е мощи почивают во Введенском соборе Оптиной пустыни. Память празднуется 10 октября, а также 27 июня (обретение мощей) и 11 октября – в Соборе Оптинских старцев.


Источник: Минея дополнительная. Вып. 1. - Москва : Издательский совет Русской православной церкви, 2005. - 416 с. ISBN 5-94625-058-2

Комментарии для сайта Cackle