Приглашаем Вас пройти Православный интернет-курс — проект дистанционного введения в веру и жизнь Церкви.

В 11-й день

Преподо́бныя ма́тере на́шея Феодо́ры, я́же во Александри́и.

Зде же пое́тся слу́жба и священному́ченика Автоно́ма

Вече́р

На Го́споди, воззва́х: стихи́ры преподо́бныя 3. Глас 4.

Подо́бен: Я́ко до́бля:

В же́нстем телеси́/ и в му́жестем о́бразе/ му́жеския прошла́ еси́ по́двиги,/ посреде́ муже́й все́льшися,/ и стра́сти оху́ждши,/ и стремле́ния похоте́й всеконе́чно обузда́вши/ поще́нии, и непреста́нными мольба́ми, Феодо́ро,/ и боже́ственными к Бо́гу/ и неукло́нными твои́ми воззре́нии.

Под зе́млю тя со́лнце, заше́д,/ не ви́дяше погреша́ющу;/ позна́ же тя Незаходи́мое,/ Сердцеве́дец и Госпо́дь,/ ви́дяй сокрове́нная,/ и озари́ све́том покая́ния/ о́чи се́рдца твоего́./ Те́мже потща́лася еси́ Сему́ угоди́ти/ боле́зненным воздержа́нием/ и доброде́телей соверше́нием.

Вра́жиих мудрова́ний/ ника́коже разуме́вши,/ его́же не родила́ еси́,/ лю́биши отроча́/ и оте́ческим милосе́рдием,/ сла́вная, пита́еши,/ терпя́щи благочести́вым по́мыслом/ челове́ческое поноше́ние,/ непови́нное запреще́ние вои́стину, Феодо́ро;/ сего́ ра́ди честно́е твое́ соверша́ем торжество́.

И́ны стихи́ры священному́ченика,глас и подо́бен то́йже:

Доброде́тельми просвеща́лся,/ благоче́стием украша́емь,/ иера́рх боже́ственный был еси́/ и, я́ко многосве́тлое со́лнце,/ мир проте́кл еси́,/ насева́я всю́ду ве́ры пропове́дание,/ пре́лесть же искореня́я серпо́м твоего́ язы́ка,/ иера́рше богому́дре,// великопропове́дателю Автоно́ме.

К боле́зненным страда́нием,/ к му́жественным боре́нием,/ к я́звам и ра́нам устреми́лся еси́:/ мно́жеством бо ка́мения/ посыпа́емь, Автоно́ме,/ сотвори́в е я́ко степе́ни и ле́ствицу,/ возше́л еси́ к Бо́гу вене́чник/ и совокупи́лся еси́ во́инством безпло́тных,// о ми́ре моля́ся.

Одея́ние твое́ю кро́вию/ муче́ния соверши́л еси́ светле́йше/ благода́тию Боже́ственнаго Ду́ха/ и свяще́нно во Свята́я/ вы́шняя восте́кл еси́,/ а́може Предте́ча наш Иису́с вни́де,/ побе́ды вене́ц от Бо́га прие́м,/ со все́ми честно́ю кро́вию// сконча́вшимися, Автоно́ме.

Сла́ва, и ны́не, пра́здника, глас то́йже. Самогла́сен:

А́нгеловым прорече́нием/ плод пречи́ст от Иоаки́ма и А́нны, пра́ведников,/ днесь произы́де, Де́во,/ не́бо и престо́л Бо́жий,/ и прия́телище Чистоты́,/ ра́дость провозвеща́ющи всему́ ми́ру,/ жи́зни на́шея Хода́таице,/ кля́твы отъя́тие, благослове́ния пода́ние./ Тем в рождестве́ Твое́м, Де́во Богозва́нная,/ ми́ру мир испроси́// и душа́м на́шим ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Пла́кала еси́ от души́,/ я́ко безча́дна рыда́ющи,/ отроча́те жела́ющи:/ но родила́ еси́ Отроча́,// ро́да всего́ похвалу́.

Стих: Слы́ши, Дщи, и виждь,// и приклони́ у́хо Твое́.

Рожде́ние че́стно/ Де́вы Всесвяты́я,/ Ея́же ра́ди/ обнови́ся мир,// пе́сненными гла́сы почти́м.

Стих: Лицу́ Твоему́ помо́лятся// бога́тии лю́дстии.

Ра́дуйтеся, му́дрии,/ проро́цы богоглаго́ливии:/ ражда́ется бо Де́ва,/ из Нея́же Спасе́ние ми́ра// хо́щет роди́тися.

Сла́ва, и ны́не, глас 4:

Непло́ды безча́дная А́нна/ днесь рука́ми да воспле́щет све́тло,/ да светлоно́сят земна́я, ца́рие да игра́ют,/ святи́телие во благослове́нии да веселя́тся,/ да пра́зднует весь мир:/ се бо Цари́ца и непоро́чная Неве́ста о́тча/ от ко́рене Иессе́ева прозябе́./ Ктому́ жены́ в печа́лех не родя́т чад:/ Ра́дость бо процвете́, и Живо́т всем челове́ком в ми́ре жи́тельствует./ И ктому́ да́ры Иоаки́мовы не возвраща́ются,/ рыда́ние бо А́нны в ра́дость преложи́ся:/ сра́дуйтеся мне, глаго́лющи, весь избра́нный Изра́иль,/ се бо даде́ ми Госпо́дь одушевле́нную пала́ту/ Боже́ственныя сла́вы Его́,/ во о́бщее весе́лие и ра́дость// и спасе́ние душ на́ших.

Тропа́рь преподобныя, глас 8:

В тебе́, ма́ти, изве́стно спасе́ся е́же по о́бразу:/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней;// те́мже и со А́нгелы сра́дуется, преподо́бная Феодо́ро, дух твой.

Сла́ва, и ны́не, пра́здника.

На у́трени

На Бог Го́сподь: тропа́рь пра́здника два́жды. Сла́ва, святы́я. И ны́не, пра́здника.

По 1-м стихосло́вии седа́лен, глас 1.

Подо́бен: Ка́мени запеча́тану:

Ро́ждшися пресла́вно от непло́дных ложе́сн,/ от де́вственных чресл родила́ еси́ па́че естества́:/ красе́н бо я́вльшися стебль, израсти́ла еси́ ми́ру Жизнь./ Сего́ ра́ди Си́лы Небе́сныя вопию́т Тебе́, Богоро́дице:/ сла́ва происхожде́нию Твоему́, Чи́стая,/ сла́ва рождеству́ Твоему́,/ сла́ва де́вству Твоему́, Ма́ти Безневе́стная.

Сла́ва, и ны́не, то́йже.

По 2-м стихосло́вии седа́лен, глас 4.

Подо́бен: Яви́лся еси́:

Лучи́ возсия́ша всеми́рныя ра́дости/ рождества́ Твоего́, Де́во Ма́ти Мари́е, на земли́/ и озари́ша мы́сли любо́вию пою́щих Тя.

Сла́ва, и ны́не, то́йже.

Кано́н пра́здника, со ирмосо́м на 6, и преподо́бныя на 4, и священному́ченика на 4.

Кано́н пра́здника, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ и́же изведе́ из рабо́ты еги́петския,// я́ко просла́вися.

Гряди́те, ве́рнии, Ду́хом Боже́ственным ра́дующеся,/ Юже от непло́дове днесь прише́дшую челове́ков на спасе́ние/ Присноде́ву Отрокови́цу пе́сньми почти́м.

Ра́дуйся, Чи́стая, Ма́ти и Рабо́ Христа́ Бо́га,/ я́же пе́рвому Хода́таица блаже́нству,/ челове́ческий род, Тя вси досто́йно пе́сньми сла́вим.

Жи́зни ражда́ется днесь мост,/ и́мже челове́цы, воззва́ние паде́ния, е́же от а́да, обре́тший,/ Христа́ Жизнода́вца пе́сньми прославля́ют.

Ин кано́н преподо́бныя, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́, ра́дуяся, Тоя́ чудеса́.

Уста́ моя́ испо́лни Твоего́ хвале́ния, Го́споди,/ пою́щу сла́ву Твою́ многопе́тую/ и честву́ющу боле́зни Феодо́ры,/ уго́ждшия Тебе́ жития́ све́тлостию.

Возсия́ днесь свяще́нное твое́ торжество́, со́лнца светле́йше,/ су́щия во тьме ду́ши озаря́ющее,/ мрак де́монский всегда́ отгоня́ющее, досточу́дная.

Не позна́, заходя́, тя погреша́ющу со́лнце,/ Незаходя́щее же позна́ Еди́н, я́ко Всеве́дый/ и озари́ луча́ми покая́ния души́ твоея́ о́чи, богоблаже́нная.

Напи́сан бысть грех твой, всечестна́я, Я́ве, я́ко сказа́ша Ева́нгелия;/ но, потща́вшися, по́ты воздержа́ния,/ сле́зными же то́ки сей изгла́дила еси́.

Богоро́дичен: я́ко одушевле́н черто́г, я́ко нетле́нную ски́нию,/ я́ко дверь Небе́сную, я́ко Боже́ственную трапе́зу,/ я́ко пала́ту и престо́л Влады́чень,/ Мари́ю Чи́стую пе́сньми почти́м.

Ин кано́н священному́ченика, его́же краегране́сие:

Зако́нное, богому́дре, соверши́л еси́ тече́ние. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Зако́ны измла́да Творца́ своспита́вся,/ возра́сл еси́ в зако́не доброде́телей и благоче́стия версте́;/ тем зако́нно, о́тче, пострада́л еси́.

Вооружи́л еси́ по́мысл терпе́ния и му́жества ору́жием, му́дре,/ на пре́лести рать ополчи́вся,/ невозвра́тно победи́в ту.

Зако́нов благоче́стия наста́вник и догма́тов, о́тче,/ и́стины пропове́дник я́влься,/ во всей тва́ри огласи́лся еси́, я́ко апо́столи, Автоно́ме.

Богоро́дичен: Позна́вше я́вльшагося на земли́ Бо́га воплоще́нна/ и обожи́вшеся от Него́ благода́тию,/ пое́м Тя, Де́во, дарова́ний наслади́вшеся.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.

Непоро́чно Бо́гу пожи́вшии,/ всех роди́сте Спасе́ние,/ богому́дрии роди́теле/ Зижди́теля Ро́ждшия и Бо́га на́шего.

Всем жизнь источа́яй Госпо́дь/ от непло́дове произведе́ Де́ву,/ в Ню́же всели́тися изво́ли,/ и по Рождестве́ сохрани́в нетле́нну.

А́ннин плод, Мари́ю, днесь,/ Грозд ро́ждшую живоно́сный,/ я́ко Богоро́дицу воспои́м,/ Предста́тельницу же всех и Помо́щницу.

Ин

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве венце́в сла́вы сподо́би.

В му́жескую оде́жду обле́кшися,/ му́дре потекла́ еси́ со тща́нием/ и мона́шескому собо́ру, честна́я, себе́ примеси́ла еси́,/ к нача́лом бо́рбствующи лука́ваго мироде́ржца.

Сла́бость же́нскую му́жески измени́ла еси́/ зва́нием и́стинно и но́вым о́бразом,/ де́лы дар че́стен и Бо́гу возжеле́нен/ тебе́ саму́ю, преподо́бная, показу́ющи.

Безплотно житие́ показа́ла еси́ в телеси́, сла́вная, ме́ртвенне,/ не сосу́дное воздержа́ние, и бде́ние непреста́нное,/ и моли́тву вы́ну, о Феодо́ро, держа́вши.

Богоро́дичен: Волну́ет мя бу́ря грехо́вная/ и возмуще́ние безме́стных помышле́ний;/ умилосе́рдися, Всенепоро́чная, и ру́ку ми по́мощи, я́ко ми́лостива, простри́,/ я́ко да спа́сся, велича́ю Тя.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.

Ту́чами слове́с твои́х/ безбо́жия потопи́л еси́ стра́стную ти́ну, иера́рше,/ и ве́рныя напои́л еси́.

Учи́тель был еси́/ и служи́тель Христо́в, преподо́бне,/ и Того́ Боже́ственных Страсте́й соо́бщник и прича́стник.

Ору́жием утверди́л еси́ пропове́дания, преподо́бне, благопослушли́выя,/ и проти́вящияся безпа́губны сохрани́л еси́.

Богоро́дичен: Яви́ся пречу́дное на Небеси́ и на земли́ слы́шание,/ Творца́ бо всех су́щих, Богоро́дице,/ неизрече́нно родила́ еси́.

Конда́к святы́я, глас 2.

Подо́бен: Вы́шних ища́:

Те́ло твое́ поста́ми изнури́вши,/ бде́нными моли́твами Творца́ умоли́ла еси́ о гресе́ твое́м,/ я́ко да прии́меши соверше́нное проще́ние,/ и прия́ла еси́ оставле́ние,// путь покая́ния показа́вши.

И свята́го конда́к, глас 2.

Подо́бен: Вы́шних ища́:

Боже́ственная, прему́дре, непоро́чне тайноводи́л еси́,/ же́ртва прия́тная был еси́, богоблаже́нне:/ Христо́ву бо пил еси́ Ча́шу, пресла́вне,/ свети́льниче всеми́рный,// моля́ непреста́нно о всех нас.

Седа́лен, глас 5.

Подо́бен: Собезнача́льное Сло́во:

Му́жески по́двиги воздержа́ния претерпе́вши,/ низложила еси́ многоко́зненнаго,/ с му́жи жизнь пожи́вши, Феодо́ро, благоче́стно./ И ны́не прешла́ еси́ к Бо́гу, моля́щи о всех/ свяще́нно свято́е соверша́ющих твое́ успе́ние.

Сла́ва, священному́ченика, глас 4.

Подо́бен: Ско́ро предвари́:

Сугу́б тебе́ вене́ц нетле́ния Христо́с, всеблаже́нне, дарова́,/ я́ко страда́льцу и че́стну иера́рху, Автоно́ме:/ Тому́ бо Безкро́вныя прине́сл еси́ Же́ртвы,/ Того́ Боже́ственную Страсть неле́стно подража́я,/ Того́ и нестаре́ющияся сла́дости, блаже́нне, наслади́лся еси́.

И ны́не, пра́здника, глас 5.

Подо́бен: Собезнача́льное Сло́во:

Иоаки́м и А́нна торжеству́ют,/ по Бо́зе бо досто́йно благода́ть обрето́ша/ и роди́ша плод, богоприя́тен храм,/ Де́ву и Чи́стую Ма́терь Бо́жию,/ еди́ну Благослове́нную, моля́щуюся непреста́нно/ спасти́ся душа́м на́шим.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче.

Воспева́ем Тя, Го́споди,/ ве́рным спаси́тельное приста́нище пода́вшаго всем,/ Тебе́ Ро́ждшую.

Тя, Богоневе́сто,/ похвалу́ всем Христо́с яви́ и держа́ву/ пою́щим ве́рно Твое́ та́инство.

Неискусобра́чная Влады́чице,/ Твои́ми моли́твами избавля́еми прегреше́ний,/ благоразу́мно вси Тя ублажа́ем.

Ин

Ирмо́с: Неизсле́дный Бо́жий Сове́т,/ е́же от Де́вы воплоще́ния,/ Тебе́, Вы́шняго,/ проро́к Авваку́м усмотря́я, зовя́ше:// сла́ва си́ле Твое́й, Го́споди.

Терпи́ши на мно́ги дни до́блественно, сла́вная, поще́ние, я́ко безпло́тна,/ не́мощь твою́ укрепля́ющу Христу́ всеси́льною во́лею/ и Боже́ственною пита́ющу тя благода́тию.

Виждь смире́ние и плач, виждь мою́ скорбь/ и облегчи́ греха́ тяжча́йшее бре́мя,/ Феодо́ра вопия́ше к Еди́ному спасти́ Могу́щему.

Ловле́нием запе́ншаго тя ле́стно ту́чами твои́х слез потопи́вши,/ ловле́нием победи́ла еси́ ловя́щаго ду́ши,/ в приста́нищи благода́тию Боже́ственною покрыва́ема, сла́вная.

Богоро́дичен: Всепречу́дная Ма́ти Бо́жия, возсия́й ми покая́ния лучу́,/ разори́ мрак безме́рных мои́х зол,/ лука́выя отжени́, Де́во, по́мыслы се́рдца моего́.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Споспеша́юща име́я Побо́рника/ в боже́ственней ра́ти Го́спода,/ врага́ ста́раго земны́х победи́л еси́, о́тче, по́двиги твои́ми.

Виде́нием прекло́нься, о́тче,/ во глубины́ сокрове́ний Бо́жиих,/ отту́ду та́йны навы́кл еси́ Того́ неизрече́нныя.

Возглаше́нием слове́с твои́х тре́бища и́дольская па́даху, му́дре,/ и попали́шася чти́лища пре́лести/ огне́м веле́ний твои́х.

Пла́мень уче́ний твои́х/ на высо́кое взя́тся житие́, му́дре,/ тебе́ конце́м явля́я наста́вника к Бо́гу непреле́стна.

Богоро́дичен: Оскве́рншияся страстьми́, омы́й Богоро́дице, моли́твами Твои́ми/ и сподо́би ны чи́стыми помышле́нии/ пе́ти Твое́ рождество́.

Песнь 5

Ирмо́с: Сеннопи́санный мрак гада́ний разори́в/ и ве́рных прибы́тием и́стины,/ Богоотрокови́цею, озари́в сердца́,// и нас све́том Твои́м, Христе́, наста́ви.

Воспои́м, лю́дие, всех вину́/ су́щаго по нам бы́ти Вино́внаго:/ Ея́же о́бразу ра́довахуся сподобля́еми проро́цы,/ явле́нное спасе́ние от Тоя́ плодя́ще.

От су́ха прозябе́ние же́зла иере́ева/ Изра́илю показа́ проразсужде́ние,/ и ны́не све́тлость прозя́бших пресла́вно све́тит,/ от непло́дове всесла́вное рожде́ние.

Ин

Ирмо́с: Ужасо́шася вся́ческая/ о боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Удиви́ша́ся чи́ни безтеле́сных,/ зря́ще тя в телеси́ бре́ннем/ подо́бящуся тех житию́/ и честно́му пребыва́нию/ и пребори́вшую врага́,/ дре́вле подпе́ншаго тя, Феодо́ро, ле́стию.

Звере́й стремле́ния Бог тебе́ покори́,/ благода́ть исцеле́ний дав тебе́,/ сие́ пропове́дает/ руко́ю твое́ю изба́вивыйся снеде́ния ди́вияго зве́ря,/ его́же сокруше́на исцели́ла еси́, сла́вная.

Пита́вши младе́нца соверше́нным смы́слом,/ терпя́щи лю́тое оклевета́ние,/ благодаря́щи Вседержи́телю, да́вшему тебе́ кре́пость/ и тя уди́вльшему,/ Феодо́ро всехва́льная.

Богоро́дичен: Кре́пость и утвержде́ние немощна́го моего́ се́рдца Ты еси́, Неискусобра́чная Де́во,/ необори́мая стена́ от лица́ вра́жия,/ спаса́ющи мя от всех лю́тых,/ побежда́ющи полки́ лю́таго борца́.

Ин

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Свет тя у́мный озари́, Автоно́ме,/ и жи́зни сло́во иму́щаго/ свети́льника всем конце́м яви́ тя.

Глаго́л Бо́жий, я́ко меч, извле́к,/ ополче́ние ссекл еси́ лжеиме́нныя му́дрости,/ о́тче Автоно́ме.

Весь вра́жий тул стрел истощи́л еси́/ и всу́е сих показа́л еси́, вооружи́вшихся на тя,/ блаже́нне Автоно́ме.

Богоро́дичен: Бы́ша но́вая и пресла́вная, Всечестна́я,/ Тобо́ю бо на земли́ Бог Пло́тию яви́ся,/ и земни́и обожи́хомся.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю, во гла́се хвале́ния,// и́стины же ду́хом пожру́ Тебе́.

Ко Го́споду в ско́рби непло́дства возопи́ша/ Богома́тере богому́дрии роди́тели/ и Сию́ в ро́ды родо́в роди́ша,/ на о́бщее спасе́ние и похвалу́.

Прия́ша Небе́сный дар от Бо́га досто́ин/ Богома́тере богому́дрии роди́тели,/ саме́х Херуви́мов превы́шшее носи́ло,/ Сло́ва и Зижди́теля Роди́тельницу.

Ин

Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,// от Нея́ Ро́ждшагося Бо́га сла́вим.

Исто́чник слез принося́щи непреста́нно,/ друча́щися и стеня́щи,/ запреще́ние мона́хов и отлуче́ние,/ благодаря́щи, терпи́ши, богоблаже́нная.

Питие́ от мо́ря иму́щи,/ ди́виим же бы́лием пита́ющися,/ со зверьми́ же в пусты́ни водворя́ющися,/ я́ко на Небеси́ обита́ла еси́, досточу́дная.

Опале́ние со́лнца понесла́ еси́,/ нощну́ю сту́день терпе́ла еси́,/ Ду́ха Боже́ственнаго согрева́ема благода́тию:/ тем наслажда́ешися го́рняго блаже́нства.

Богоро́дичен: Боже́ственную ста́мну и трапе́зу,/ Хлеб Жи́зни поне́сшую,/ неде́ланнуто ни́ву, го́ру святу́ю,/ Богоро́дицу Де́ву пе́сньми сла́вим.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Си́ла тя му́дре Уте́шителева укрепи́, я́коже пре́жде ученики́,/ и язы́ком вооружи́ о́гненным, Автоно́ме,/ земны́я просвеща́ти, огнепопаля́ти же нече́стие.

Младе́нствующу душе́вным ти мудрова́нием, о́тче преподо́бне,/ по́двиги па́че естества́ за пропове́дание/ и труд неосла́бный благомо́щно прия́л еси́/ не́мощию естества́ телесе́.

Положи́л еси́ под но́ги благочести́вых главу́ вра́жию,/ на Созда́теля вознесе́нную,/ ве́рою слове́с вооружи́в на ню сия́ благода́тию.

Богоро́дичен: Исцели́ти Тобо́ю естества́ сокруше́ния/ Созда́тель и Творе́ц восхоте́в, Богоро́дице,/ подаде́ Тя врачевство́ Боже́ственное/ в не́мощех прибега́ющим Тебе́.

Конда́к пра́здника, глас 4:

Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.

И́кос:

Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное/ и во у́ши Госпо́дни вни́де, и прозябе́ плод живоно́сен ми́ру./ Ов бо моли́тву на горе́ творя́ше, о́ва же в саде́ поноше́ние ноша́ше,/ но с ра́достию непло́ды ражда́ет Богоро́дицу и Пита́тельницу Жи́зни на́шея.

Песнь 7

Ирмо́с: Купина́ в горе́ огненеопа́льная и росоно́сная пещь халде́йская/ Я́ве предписа́ Тя, Богоневе́сто,/ Боже́ственный бо невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:// благослове́н еси́, Бо́же оте́ц на́ших.

Твоо́ в веще́ственных явле́ниих/ законополо́жник возбрани́ся разуме́ти/ и вели́кое, Пречи́стая, та́инство,/ не му́дрствовати земноре́вностная обра́зно наказу́ем иногда́./ Те́мже, уди́влься чудеси́, глаголаше:/ благослове́н Бог оте́ц на́ших.

Го́ру и дверь Небе́сную и мы́сленную Тя ле́ствицу/ боголе́пно лик боже́ственный пронарече́,/ от Тебе́ бо Ка́мень отсече́ся не рука́ми му́жескими,/ и дверь, е́юже про́йде Госпо́дь, Иже чуде́с Бог оте́ц на́ших.

Ин

Ирмо́с: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся пою́ще:// препе́тый отце́в Госпо́дь и Бог, благослове́н еси́.

Нестерпи́мыми тя ра́нами многоко́зненный враг удручи́,/ в привиде́ниих мечта́яся;/ но того́ низложи́ла еси́ су́етное свере́пство, воспева́ющи:/ отце́в на́ших Бо́же, благослове́н еси́.

Сухи́я ро́вы напо́лнила еси́ вод моли́твами твои́ми, сла́вная,/ чудоде́йствующи Я́ве,/ Бо́га велича́ющи, тя просла́вльшаго, Ему́же взыва́ем:/ отце́в на́ших Бо́же, благослове́н еси́.

Соверша́ющих твою́ па́мять, сла́вная,/ при́сно помина́й со дерзнове́нием мно́гим,/ Бо́га моля́щи Всеще́драго, Ему́же зове́м:/ отце́в на́ших Бо́же, благослове́н еси́.

Богоро́дичен: Цари́це Де́во, ро́ждшая Царя́ Христа́,/ уще́дривши, спаси́ мя, коле́блема страстьми́,/ ве́рою утверди́ и наста́ви мя ко спасе́нней стези́,/ ве́рных Спасе́ние.

Ин

Ирмо́с: От Иуде́и доше́дше о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Сочлени́в во еди́но благоче́стия ликова́ния, о́тче Автоно́ме,/ ве́рою просвеще́нныя словесы́ твои́ми/ непреста́нно взыва́ти учи́л еси́:/ отце́в на́ших Бо́же, благослове́н еси́.

Неосла́бным му́жеством стрясл еси́, му́чениче, безбо́жных веле́ния,/ в душа́х утвержде́нная неве́рных,/ и от основа́ний сия́ му́дре исто́ргл еси́,/ в сердца́х ве́рных благода́ть утвержда́я.

Твоего́ свяще́нства сме́шено пома́зание, о́тче Автоно́ме,/ страда́ние боже́ственно,/ кровь бо тя све́тла иера́рха показа́ вопию́щим ве́рно:/ Христе́, благослове́н еси́.

Богоро́дичен: И́же от земли́ созда́в челове́ческое естество́,/ я́ко Творе́ц и Бог, истле́вшее поновля́ет,/ от Тебе́, Богома́ти, сие́ прие́м,/ и та́инственнаго сподобля́ет, Чи́стая, Сынотворе́ния.

Песнь 8

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше неопа́льно входя́щия,/ ю́же пое́м, я́вльшуюся Тобо́ю конце́м днесь,// и превозно́сим во вся ве́ки.

Я́же к Бо́гу на́шего примире́ния предопределе́нная ски́ния/ е́же бы́ти ны́не начина́ет,/ иму́щи роди́ти Сло́ва, нам дебельство́м Пло́ти я́вльшася,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки.

Непло́дства преложе́ние мирско́е благи́х разреши́ непло́дство/ и я́сно чу́до Христа́ показа́, к земны́м прише́дша,/ Его́же пое́м, из не су́щих во е́же бы́ти Тем прие́мшии,/ и превозно́сим во вся ве́ки.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Умо́м чи́стым просвеще́н, твой началово́ждь, восхище́н быв,/ ви́де, я́же угото́ва блага́я тебе́ Госпо́дь,/ светови́дный рай и неизрече́нный черто́г, Феодо́ро,/ в не́мже тя Подвигополо́жник всели́ Жени́х.

А́нгелов, му́чеников и преподо́бных ли́цы,/ души́ твое́й предначина́юще, сию́ к Небе́сным несо́ша оби́телем,/ к та́мошнему поко́ю веселя́щихся,/ в не́мже есть жили́ще вопию́щих и превознося́щих Христа́ во ве́ки.

Мно́жество мона́шествующих, собра́вшеся,/ блаже́нное погреба́ют ве́рою те́ло твое́,/ ви́девше бо пресла́вная, позна́ша изря́дная:/ я́ко жена́ те́лом посреде́ муже́й жи́ти благоволи́ла еси́,/ руко́ю покрыва́ема Всеси́льнаго, богому́драя Феодо́ро.

Моли́твами всено́щными терпя́щи, страсте́й успи́ла еси́ двиза́ния,/ усну́ла же еси́ пра́ведным сном подо́бным/ и к зари́ невече́рней прешла́ еси́, пою́щи:/ Го́спода воспева́йте, дела́, и превозноси́те Его́ во ве́ки.

Богоро́дичен: В след Тебе́ теко́ша жены́, ми́ра сладково́нная чу́вствующе,/ Пречи́стая Богоневе́сто, Отрокови́це Неискусобра́чная;/ из утро́бы Твоей Возсия́вшаго Единоро́днаго Сы́на,/ и Тебе́ сца́рствуют и́стинно,/ воспева́юще Христа́ во ве́ки.

Ин

Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Укрепля́ющуся тебе́ во Христе́,/ мучи́телей кре́пость па́даше, богому́дре:/ стра́шен бо ей ду́хом был еси́.

До́блестию ра́зума пре́лести гнило́е обличи́л есй, всеблаже́нне,/ кре́пость в де́лех яви́в благоче́стия.

Чуде́с твои́х ре́ки излия́вшеся,/ исцеле́ний бе́здну тя, о́тче, яви́ша в ми́ре,/ источа́ющую благода́ть.

Богоро́дичен: Препросла́вися и́стинно в зна́мениих на земли́/ благода́ть Твоя́, Де́во:/ стра́нно бо чу́до Твоего́ рожде́ния.

Песнь 9

Ирмо́с: я́же пре́жде Со́лнца Свети́льника Бо́га возсия́вшаго,/ пло́тски к нам прише́дшаго, / из боку́ Деви́чу неизрече́нно воплоти́вшая,/ Благослове́нная Всечи́стая,// Тя, Богоро́дице, велича́ем.

И́же непокори́вым лю́дем из ка́мене источи́в во́ду,/ благопокори́вым же язы́ком да́рует от чресл непло́дных плод на весе́лие нам,/ Тя, Богома́ти Пречи́стая,/ ю́же досто́йно велича́ем.

Напра́снаго дре́вняго Отъя́тельницу осужде́ния и прама́тере исправле́ние,/ ю́же ро́да к Бо́гу вину́ присвое́ния, к Зижди́телю мост,/ Тя, Богоро́дице, велича́ем.

Ин

Ирмо́с: Всяк земноро́дный/ да взыгра́ется, ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ я да вопие́т:/ ра́дуйся, Всеблаже́нная, Богоро́дице,// Чи́стая Присноде́во.

Зашла́ еси́, я́ко звезда́, от ми́ра, прехва́льная,/ и возсия́ла еси́ в преми́рней жи́зни,/ оста́вльши, я́ко зари́, нам доброде́тели жития́ твоего́ и исправле́ния,/ сердца́ всех озаря́ющи/ ве́рно соверша́ющих па́мять твою́.

Две́ри Небе́сныя све́тло отверзо́шася, подъе́млюще тя,/ и перворо́дных ны́не Це́рковь име́ет/ ликовству́ющу со избра́нными, приснопа́мятная, свяще́нную твою́ ду́шу,/ иде́же есть шум пра́зднующих, Феодо́ро, и свет невече́рний.

Обрела́ еси́ возме́здие боле́зней,/ я́ко наде́ялася еси́, Небе́сныя че́сти:/ уста́вила еси́ жела́ние, обре́тши исто́чник,/ благи́х наслажда́ешися, ясне́йши и чисте́йши Жениха́ зря́щи, Феодо́ро,/ я́коже Ангели зре́ти сподо́бишася.

Разреше́ние неудо́бных, избавле́ние страсте́й и жития́ исправле́ние/ испроси́, приснопа́мятная, низпосла́ти хва́лящим тя/ и честну́ю па́мять соверша́ющим твою́,/ дерзнове́ние иму́щи ко Го́споду,/ Феодо́ро честна́я и достосла́вная.

Богоро́дичен: Спаси́ мя, Чи́стая, Спа́са ро́ждшая и Всеще́драго,/ уще́дри раба́ Твоего́, к покая́ния пути́ напра́ви,/ лука́ваго собла́зны от среды́ отжени́, того́ же изба́ви мя ловле́ния,/ Богоро́дице, ве́рных Помо́щнице.

Ин

Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безплотными ли́ки Тя велича́юще.

Лета́я на высоту́ благоче́стия,/ доброде́тельми возноша́емь, Автоно́ме,/ и Христу́ страда́нием, о́тче, восте́кл еси́.

Боле́зни твоя́ со слеза́ми се́явшеся, богому́дре,/ неотъе́млемыя плоды́ расплоди́ша ра́дости и сла́вы,/ сла́дости, я́же во Христе́ Иису́се.

Зако́нно венце́в и Боже́ственных дарова́ний сподо́бився, иера́рше Автоно́ме,/ зако́ны Боже́ственными утвержда́вши ны/ моли́твами твои́ми.

Богоро́дичен: Жизнь и Нетле́ние родила́ еси́, Де́во,/ победи́тели сме́рти сотво́ршаго/ Богоро́дицу вои́стину Тя велича́ющия.

Свети́лен пра́здника.

Подо́бен: Ду́хом во святи́лищи:

От непло́дныя и ста́рицы, престаре́лыя А́нны/ жизнь и свет возсия́, Веенепоро́чная Отрокови́ца,/ дверь восто́ка, свет возсия́вшая конце́м неизреченно;/ лик соста́вльше, ублажи́м Ю, я́ко земны́х превы́шшую.

Сла́ва, и ны́не, то́йже.

На стихо́вне стихи́ры, глас 1.

Подо́бен: Небе́сных чино́в:

От А́нны днесь цвет,/ сад богода́нный,/ Богоро́дица прозябе́,/ спасе́ние челове́ков,/ из Нея́же всех Зижди́тель ро́ждься па́че ума́,// Ада́мову очища́ет, я́ко Благ, всю скве́рну бла́гостию.

Стих: Слы́ши, Дщи, и виждь,,/ и приклони́ у́хо Твое́.

Кто дово́льно по досто́инству пе́ти возмо́жет/ от А́нны неизрече́нно младе́нствующую Де́ву?/ Го́ры у́бо и хо́лми, сла́дость иска́пайте днесь:/ всех бо жизнь и очище́ние/ млеко́м пита́ется,// Богоро́дица Чи́стая.

Стих: Лицу́ Твоему́ помо́лятся,// бога́тии лю́дстии.

Пре́жде безча́дная непло́ды/ ражда́ет всех жизнь, еди́ну Богоро́дицу;/ весе́лия исполня́ется/ и ра́дуется земно́е естество́ ны́не челове́ческое,/ сла́вяще и́стинную Роди́тельницу// Изба́вителя Иису́са, Еди́наго Го́спода.

Сла́ва, и ны́не, глас 8:

В благознамени́тый день пра́здника на́шего/ востру́бим духо́вною цевни́цею:/ я́же бо от Се́мене Дави́дова, днесь ражда́ется Ма́ти Живота́,/ тьму разреша́ющи,/ Ада́мово обновле́ние, и Е́вино воззва́ние,/ и нетле́ния исто́чник, тли премене́ние,/ Ея́же ра́ди мы обожи́хомся/ и от сме́рти изба́влени бы́хом,/ и возопии́м Той с Гаврии́лом, ве́рнии:/ ра́дуйся, Благода́тная, Госпо́дь с Тобо́ю,// Тебе́ ра́ди да́руя нам ве́лию ми́лость.

На литурги́и

Блаже́нны пра́здника, пе́сни 7-я и 8-я, на 8. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208: Пре́жде прише́ствия ве́ры: Аллилу́йя, глас 1: Терпя́, потерпе́х Го́спода, и внят ми: Ева́нгелие от Иоа́нна, зача́ло 28: Приведо́ша кни́жницы: Прича́стен: В па́мять ве́чную бу́дет пра́ведник:

Преподобная Феодора Александрийская († ок. 474–491) жила с мужем в Александрии. Побуждаемый диаволом, один богатый человек прельстился ее красотой и стал склонять к прелюбодеянию. Женщина-сводница обманула доверчивую Феодору, сказав, что грех, совершаемый ночью, Бог не видит. Когда Феодора осознала гнусность падения, она рассказала знакомой игумении о совершенном грехе. Игумения, видя отчаяние молодой женщины, возбудила в ней веру в Божественное милосердие и напомнила притчу о грешнице, омывшей слезами ноги Христа и получившей от Него прощение. Святая тайно покинула семью и, переодевшись, постриглась в мужском монастыре, ибо боялась, что в женской обители муж найдет ее. Даже опытные иноки удивлялись смирению и терпению инока Феодора. Святая подвизалась в монастыре восемь лет. Ее тело, некогда оскверненное прелюбодеянием, стало храмом Святого Духа.

Однажды святая была послана в Александрию для покупки хлеба. В гостинице Енатского монастыря проживала тогда дочь игумена. Прельщенная красотой молодого инока, она стала склонять святую ко греху, не зная, что перед ней женщина. Услышав отказ, она совершила грех с другим гостем и зачала. Бесстыдная девица сказала отцу, что ее обольстил Феодор-монах. Отец немедленно сообщил об этом настоятелю монастыря, в котором подвизалась преподобная. Игумен не поверил клевете. Но, когда любодейца родила, енатские монахи принесли младенца в монастырь, где жила подвижница, и стали укорять иноков в нечистой жизни. Младенца вручили преподобной и с бесчестьем выгнали ее из монастыря. Святая смиренно покорилась новому испытанию, усматривая в нем искупление прежнего греха.

В течение семи лет, перенося невзгоды, она жила в шалаше близ монастыря. Наконец по просьбе иноков игумен позволил ей возвратиться вместе с младенцем в монастырь, где она два года провела в затворе. Игумен обители получил от Бога откровение, что грех инока Феодора прощен. Однажды в той местности во время засухи пересохли все источники. По благословению игумена преподобная Феодора принесла воду из высохшего колодца, и после этого она там уже не пересыхала.

Перед смертью преподобная затворилась в келлии с отроком и, завещав ему любить Бога и повиноваться игумену, мирно скончалась.

Господь открыл игумену ее тайну. В присутствии братии Енатской обители он рассказал о видении и для удостоверения открыл перси преподобной. Енатский игумен и братия со слезами просили прощения у преподобной Феодоры. Известие о кончине подвижницы дошло до ее супруга. Он принял постриг в монастыре, где спасалась жена. Отрок, воспитанный преподобной, также принял иночество и впоследствии стал игуменом этого монастыря.

Священномученик Автоном (†313) был епископом в Италии и пострадал от язычников в городе Сорее неда¬леко от Никомидии.

Во время гонения на христиан при императоре Диоклитиане святой Автоном оставил Италию и поселился в Вифинии, где был принят христианином Корнилием. Святой Автоном и здесь ревностно продолжал свое апостольское служение, обращая язычников в христианство. Он создал также церковь во имя Архистратига Михаила. В этой церкви он поставил Корнилия сперва диаконом, а затем пресвитером. С проповедью о Христе святой Автоном посетил также Ликаонию и Исаврию. Когда император Диоклитиан стал преследовать святого Автонома, как известного проповедника, тот удалился в Клавдиополь на Черном море и таким образом избежал опасности. Возвратившись снова в Сорею, святой Автоном посвятил пресвитера Корнилия во епископа, и сам направился в Асию, а вернувшись оттуда, начал проповедовать Евангелие и обращать язычников в местечке Лимны близ города Сореи. Многие язычники обратились в истинную веру, другие же упорствовали и ожесточались.

Однажды, когда святитель Автоном служил Божественную литургию в храме Архистратига Михаила, язычники напали на христиан. Ворвавшись в храм, они разогнали молящихся, а святого Автонома после истязаний убили, обагрив алтарь церкви его мученической кровью. Его тело они забросали камнями. Диакониса Мария извлекла тело святого мученика из-под камней и предала его погребению. Мощи святого Автонома прославились чудесами и исцелениями. На месте его погребения впоследствии была воздвигнута церковь.

В той же день

Преподо́бнаго отца́ на́шего Силуа́на Афо́нскаго

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры пра́здника на 3 и свята́го на 5, глас 5:

Прииди́те, лю́дие Бо́жии,/ с ли́ки святы́х и А́нгел соста́вим духо́вное торжество́,/ в нем бо Це́рковь земна́я боже́ственне с Небе́сней ликовству́ет:/ ны́не ве́рный де́латель вертогра́да Присноде́вы Богоро́дицы/ во Иерусали́м го́рний прие́млется/ и, я́ко муж жела́нный,/ у Престо́ла Бо́жия сла́вою и че́стию венча́ется,/ ра́дость спасе́ния нам предвозвеща́ет,// егда́ горе́нием любве́ его́ ко Го́споду воспламени́мся.

Прииди́те, Ма́тере Бо́жия сподви́жницы/ и по́стническаго жития́ ревни́телие,/ со пустыннолю́бцы Горы́ Афо́нския/ трапе́зы боже́ственныя соприча́стницы бу́дем./ Ны́не Пречи́стая Ма́ти Бо́жия/ Силуа́на, подви́жника но́ва и преди́вна,/ его́же диа́вол иска́ше поглоти́ти, спасла́ есть,/ и Це́ркви Небе́сней на ра́дость приведе́,/ и, я́ко фимиа́м благово́нный,/ моли́твенника те́пла за нас у Престо́ла Бо́жия поста́ви,// венце́м ле́поты неувяда́емыя увенча́на.

Прииди́те, мона́шескаго по́двига щедролю́бцы,/ воста́ните, уневе́стившиися Христу́,/ да Силуа́на богому́дреннаго,/ по́двигом равноа́нгельским укра́шена, у́зрим,/ и сему́, ко́зни вра́жия победи́вшему, ра́дующеся, возопии́м:/ ра́дуйся, роди́телей благочести́вых плод целому́дренныя чистоты́;/ ра́дуйся, облагода́тствованный щедро́тами боже́ственныя добро́ты;/ ра́дуйся, ве́ры чи́стыя и незло́бия ди́вное воплоще́ние;// ра́дуйся, посто́м и моли́твою стяжа́вый Христо́во всепроще́ние.

О преблаже́нне о́тче Силуа́не,/ Небе́снаго Уте́шителя дориноси́телю преди́вный/ и пла́мене любве́ Бо́жия сосу́де неистощи́мый,/ тебе́, припа́дающе, вопие́м:/ Его́же всем се́рдцем возлюби́л еси́,/ Его́же ра́ди в Горе́ Афо́нстей моли́твою сле́зною за мир сраспина́лся еси́,/ не преста́й и ны́не умоля́ти/ Це́ркви Святе́й от зол избавле́ние дарова́ти,/ лю́дем же, грехо́вными собла́зны обурева́емым,// мир и ве́лию ми́лость.

Сла́ва, глас 6:

Весели́ся и ра́дуйся, Горо́ Свята́я,/ Врата́рницы Небе́сныя омофо́ром при́сно украша́емая,/ Це́рковь Росси́йская, взыгра́й, ликовству́ющи./ Ны́не христолюби́вии лю́дие,/ от восто́к со́лнца до за́пад,/ ве́чери А́гнца Бо́жия приуготовля́ются,/ Силуа́на богому́дреннаго добро́ты порфи́рою украша́ются./ С ни́миже и мы, сему́ братолю́бия учи́телю,/ па́мять пра́зднующе, сла́дце вопие́м:/ ра́дуйся, се́вера благода́тное сия́ние,/ в вертогра́де Афо́нстем Святы́я Руси́ све́тлое отраже́ние;/ ра́дуйся, Ангеле моли́твы сле́зныя,/ Бо́гу приноси́мыя о всей вселе́нней;// моли́ о нас Го́спода, братолю́бием оскудева́ющих.

И ны́не, пра́здника.

Та́же вход. Проки́мен дне.

Чте́ния три преподо́бническая.

Прему́дрости Соломо́новы чте́ние: Пра́ведницы во ве́ки живу́т: Прему́дрости Соломо́новы чте́ние: Пра́ведных ду́ши в руце́ Бо́жией: Прему́дрости Соломо́новы чте́ние: Пра́ведник, а́ще пости́гнет сконча́тися: (зри страницы 272–273).

На стихо́вне стихи́ры, глас 2.

Подо́бен: Егда́ от Дре́ва:

Све́том невече́рним Святы́я Тро́ицы просвеще́н,/ нощь жите́йскую без претыка́ния преше́л еси́,/ богому́дре Силуа́не,/ виде́нии боже́ственными возвыша́яся,/ во дво́рех Бо́га Вы́шняго всели́лся еси́./ Те́мже и нас насле́дники Того́ соде́лай,// святу́ю твою́ па́мять почита́ющих.

Стих: Честна́ пред Го́сподем/ смерть преподо́бных Его́.

Земна́я вся оста́вив,/ бога́тство и сла́ву я́ко прах вменя́в,/ Го́ру Святу́ю слеза́ми твои́ми ороси́л еси́/ и, невозвра́тным жела́нием Еди́ному Бо́гу приближа́яся,/ Сему́ а́нгельски послужи́л еси́./ Его́же моли́, преподо́бне,// в кни́зе жи́зни написа́тися почита́ющим тя.

Стих: Блаже́н муж, боя́йся Го́спода,// в за́поведех Его́ восхо́щет зело́.

Не преста́й моля́ся, о́тче Силуа́не,/ о неключи́мых рабе́х твои́х,/ и́хже богому́дренным твои́м житие́м просвети́вый,/ Бо́гу прирази́л еси́,/ да вси честно́е преставле́ние твое́ све́тло почита́ем.

Сла́ва, глас то́йже:

О всеблаже́нне о́тче Силуа́не,/ бога́тства некра́домаго стяжа́телю прему́дрый,/ моли́тву я́ко хлеб, сле́зы я́ко еле́й вменя́я/ и, я́коже Па́вел богому́дрый,/ о Кресте́ Госпо́днем ра́дуяся,/ Со́лнцу Пра́вды горе́нием любве́ у́треневал еси́;/ стяжа́нию Ду́ха Свята́го нас науча́еши приле́жно.

И ны́не, пра́здника.

Тропа́рь, глас 2:

Серафи́мския любве́ ко Го́споду пла́менный ревни́телю/ и Иереми́и, о наро́де пла́чущему,/ усе́рдный подража́телю,/ всеблаже́нне о́тче Силуа́не,/ ты бо, зо́ву Ма́тере Го́спода Сил вне́мляй,/ зми́я грехо́внаго мужему́дренно изрыгну́л еси́/ и в Го́ру Афо́нскую от суеты́ ми́ра удали́лся еси́,/ иде́же в труда́х и моли́твах со слеза́ми/ благода́ть Свята́го Ду́ха оби́льно стяжа́в,/ е́юже сердца́ на́ша воспламени́/ и с тобо́ю уми́льно взыва́ти укрепи́:/ Го́споди мой, Жи́зне моя́ и Ра́досте Свята́я,/ спаси́ мир и нас от вся́ких лю́тых.

И ны́не, пра́здника.

На у́трени

На Бог Госпо́дь: тропа́рь пра́здника, два́жды.

Сла́ва, свята́го. И ны́не, пра́здника.

По 1-м стихосло́вии седа́лен, глас 5:

Го́ры и хо́лми, взыгра́йте, пусты́ня Афо́нская, возвесели́ся,/ днесь бо оби́тель цели́теля безсре́бреннаго, у́тренюющи, песнь прино́сит Влады́це:/ воспо́йте Го́сподеви песнь но́ву, я́ко ди́вна сотвори́ Госпо́дь,/ возведе́ от нас к Еде́му го́рнему моли́твенника за мир неусы́пна,/ Силуа́на богому́драго.

Сла́ва, и ны́не, пра́здника, или́ Богоро́дичен, глас то́йже:

Потреби́ся вся́ка печа́ль Рождество́м Твои́м,/ и отъя́т Госпо́дь рыда́ние и плач и вся́ку слезу́ от лица́ земноро́дных, Чи́стая Богоро́дице:/ о Тебе́, Неискусобра́чная, и мы ра́дости исполня́емся.

По 2-м стихосло́вии седа́лен, глас то́йже:

Погре́бл еси́ страсте́й воста́ние умерщвле́нием пло́ти, преподо́бне о́тче,/ ра́дость жи́зни безконе́чныя по сме́рти прия́л еси́,/ те́мже днесь Христо́ва Це́рковь пра́зднует твою́ досточу́дную па́мять,/ отце́в Афо́нских украше́ние.

Сла́ва, и ны́не, пра́здника, или́ Богоро́дичен:

Ору́жием нас сла́дости грехо́вныя уязвле́нных и лежа́щих в ра́нах неисце́льных,/ Пречи́стая Богоро́дице, не пре́зри, но исцели́/ копие́м и Кро́вию распе́ншагося за ны Сы́на Твоего́ и Бо́га на́шего.

По полиеле́и седа́лен, глас 1.

Подо́бен: Гроб Твой, Спа́се:

От ю́ности на го́ру безстра́стия возше́л еси́,/ и, я́ко ветвь ма́сличная ко́рене земли́ Росси́йския,/ в пусты́ни Афо́нстей житие́м непоро́чным процве́л еси́, преди́вне о́тче Силуа́не,/ и, я́ко но́вый тайнови́дец, благода́ть богове́дения стяжа́л еси́,/ и дерзнове́нием Илиины́м ко Го́споду взыва́л еси́:/ Го́споди, спаси́ мир, во зле обурева́емый.

Сла́ва, и ны́не, пра́здника, или́ Богоро́дичен, глас то́йже:

Наста́ви нас на путь покая́ния,/ укло́ньшихся к безпу́тием зол и Преблаго́го прогне́вавших Го́спода,/ Неискусобра́чная Преблагослове́нная Ма́ти,/ ми́ра всего́ и Горы́ Афо́нския наде́ждо непререка́емая.

То́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Силуа́не,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́;/ дерзнове́ние име́я ко Христу́ Бо́гу,// мир испроси́ душа́м на́шим и ве́лию ми́лость.

Кано́н пра́здника, глас 2, на 8 и свята́го на 6.

Кано́н свята́го, глас 5.

Песнь 1

Ирмо́с: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,// Тому́ Еди́ному пои́м, я́ко просла́вися.

Ума́ чистото́ю зо́ву Ма́тере Го́спода Сил вне́мляй,/ зми́я, грех поражда́ющаго, изрыгну́л еси́,/ и взыгра́ся дух твой о Бо́зе Спа́се твое́м, боголюби́ве о́тче Силуа́не,/ Его́же моли́ о чту́щих па́мять твою́.

К тебе́, крест твой взе́мшему и на го́ру безстра́стия возше́дшему,/ припа́дающе, мо́лимся, всеблаже́нне:/ воспламени́ сердца́ на́ша ко всех лю́бящему Бо́гу,/ пла́менем любве́ твоея́, в горе́нии неугаса́ющем.

Его́же возлюби́ душа́ твоя́, Сему́ уве́рился еси́,/ и к Нему́ Еди́ному прилепи́лся еси́, боголю́бче,/ и си́це искуси́теля злолука́ваго души́ твоея́ покори́л еси́,/ трудо́м, бде́нием, смире́нием и сле́зною моли́твою сего́ посрамля́я.

Го́споди Сил, освяща́яй вся́каго челове́ка, гряду́щаго в мир,/ даждь сло́во хвале́ния усто́м мои́м,/ да превознесу́ Трисвято́е и́мя Твое́, ди́вно во святы́х Твои́х почива́ющее,/ с ни́миже и Силуа́н, возлю́бленный Твой, мо́лит Тя о душа́х на́ших.

Богоро́дичен: Ско́рбных наведе́ния обурева́ют убо́гую мою́ ду́шу,/ и напа́стей о́блацы мое́ покрыва́ют се́рдце, Богоневе́сто,/ но, Свет ро́ждшая Боже́ственный и преве́чный,/ возсия́й мне свет ра́дости, моли́твами Силуа́на, уго́дника Твоего́.

Песнь 3

Ирмо́с: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити// спаси́тельное Твое́ Воскресе́ние.

Кто испове́сть страда́ния души́ твоея́, преподо́бне Силуа́не,/ егда́ дух зло́бы поднебе́сныя претя́ше ти,/ от Го́спода удали́ти ду́шу твою́ зложела́я?/ Сете́й сего́ лука́ваго изба́ви и нас, моли́твенниче о всей вселе́нней.

Си́лою терпе́ния и красото́ю смире́ния душа́ твоя́, всеблаже́нне,/ хра́мина Ду́ху Свято́му устро́ися, сего́ ра́ди взыва́л еси́:/ о лю́дие, творе́ние Бо́жие, позна́йте Творца́/ и любо́вию к Нему́ прилепи́теся.

Исто́чник ра́достей твои́х и средото́чие мы́слей твои́х/ и́мя Бо́га Вы́шняго бысть, о́тче Силуа́не,/ к Нему́ прилепи́тися и в Нем утверди́тися/ моли́твами твои́ми помози́ нам, к тебе́ прибега́ющим.

Го́споди, Го́споди, да́руй си́лу Твоея́ благода́ти,/ да позна́ют Тебе́ вси лю́дие Ду́хом Святы́м,/ взыва́ем к Тебе́ уми́льно, я́коже возлю́бленный Твой,/ любо́вию к Тебе́ распаля́емый, Силуа́н преди́вный.

Богоро́дичен: Не умолчу́ вопи́ти ясне́йше вели́чия Твоя́:/ а́ще бо не Ты, Отрокови́це,/ всегда́ предстоя́ла, моля́щи о мне Сы́на Твоего́,/ кто бы толи́кия бу́ри и лю́тых бед изба́вил мя?

Конда́к и и́кос пра́здника.

Седа́лен, глас 4:

Жа́ждею по Бо́зе возревнова́в, о́тче наш Силуа́не, зе́млю оте́ческую оста́вил еси́,/ и со пустыннолю́бцы Горы́ Афо́нския/ дла́ни твоя́ порабо́тати Го́сподеви всеусе́рднейше распросте́рл еси́,/ иде́же равноа́нгельскими труды́ твои́ми вертогра́д Влады́чицы ми́ра преукра́сил еси́/ и, я́ко благово́ние, Це́ркви Вселе́нстей возблагоуха́л еси́,/ лозо́ виногра́да но́ваго, Ду́хом Святы́м облагода́тствованная.

Сла́ва, и ны́не, пра́здника, или́ Богоро́дичен, глас то́йже:

Несть возмо́жно исчи́слити вели́чия Твоя́, Богоро́дице,/ ниже́ изрещи́ неизсле́димую па́че ума́ си́лу чуде́с Твои́х, соверша́емых вы́ну,/ любо́вию Тя чту́щим и ве́рою покланя́ющимся,/ я́ко вои́стину Бо́га ро́ждшей.

Песнь 4

Ирмо́с: Услы́шах слух си́лы Креста́,/ я́ко рай отве́рзеся им,/ и возопи́х:// сла́ва си́ле Твое́й, Го́споди.

Я́ко пчела́ трудолю́бная, посто́м и моли́твою к Бо́гу прилежа́л еси́/ и Богоро́дицу Пречи́стую мир не оставля́ти сле́зно умоля́л еси́,/ о́тче преподо́бне, не преста́й и ны́не о нас моли́тися,/ я́ко и́маши дерзнове́ние ве́лие.

Кла́дязь но́вый благода́ти неисчерпа́емыя в Горе́ Афо́нстей яви́лся еси́, всеблаже́нне,/ из него́же, па́че ме́да и со́та,/ сла́дость любве́ Христо́вы Ду́хом Святы́м источа́ется,/ е́юже в го́рести грехо́вней услади́ сердца́ на́ша.

Го́споду, ре́кшу: иде́же есть сокро́вище ва́ше, ту бу́дет и се́рдце ва́ше,-/ благоволи́ у́бо, о всеблаже́нне, с тобо́ю Тому́ взыва́ти:/ Го́споди, Ду́хом Твои́м Святы́м даждь се́рдцу моему́ жа́жду,/ да никогда́же Тобо́ю насы́щуся.

Я́ко же́ртву благово́нную и непоро́чную,/ принеси́ моли́твы твоя́ за ны ко Пресвято́й Тро́ице, преподо́бне о́тче наш,/ и ми́лости испроси́ ненави́дящим и вражду́ющим на нас,/ и их и нас изба́ви от вся́кия ско́рби и печа́ли.

Богоро́дичен: Тя, Чи́стую, Тя, Де́ву Нескве́рную, еди́ну и́мам сте́ну необори́мую,/ прибе́жище, покро́в кре́пок, ору́жие спасе́ния,/ не пре́зри мене́, блу́днаго, наде́ждо ненаде́емых,/ немощству́ющих по́моще, ра́досте оскорбля́емых и заступле́ние.

Песнь 5

Ирмо́с: Утренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве бо Тебе́, ино́го не зна́ем.

Ты, Го́споди, созда́л мя еси́ и святы́м Креще́нием просвети́л мя еси́,/ Ты проща́еши грехи́ моя́ и да́руеши причаща́тися Те́ла Твоего́ и Кро́ве,/ да́руй ми си́лу всегда́ пребыва́ти в Тебе́,/ Силуа́ново рыда́ние приношу́ Ти, Бо́же наш.

Ума́ моего́ омраче́ние и страсте́й теле́сных обурева́ние/ твои́ми моли́твами, всеблаже́нне, просвети́ и ути́ши,/ я́коже дерзну́л еси́ укроти́ти во́лны морски́я,/ не терпя́ ви́дети ры́бари ги́бельными ве́тры обурева́емы.

Недосто́йными усты́ приноси́мое тебе́ убо́гое хвале́ние на́ше, преподо́бне, не пре́зри,/ но приими́ и воспева́ющих па́мять твою́ моли́твою посети́,/ бед и напа́стей и ве́чнаго муче́ния изба́ви,/ да не постыди́мся, на тя упова́юще.

Я́коже го́рлица пустыннолю́бная, от стра́жи у́тренния до но́щи/ воспева́ти Тро́ицу Единосу́щную и Неразде́льную/ со пустыннолю́бцы Горы́ Святы́я прилежа́л еси́, о́тче Силуа́не,/ умилостивле́ния ме́ртвым, живы́м и гряду́щим хода́тайствуя.

Богоро́дичен: Кий дар благодаре́ния принесу́ Ти, Богоро́дице,/ я́ко наслади́хся Твои́х дарова́ний и Твоея́ безме́рныя бла́гости?/ Те́мже у́бо песносло́влю и велича́ю/ Твою́ неизрече́нную ко мне ми́лость.

Песнь 6

Ирмо́с: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,// и спасе́ мя десни́ца Твоя́, Го́споди.

Святи́телие и свяще́нницы, и́ноцы и вси лю́дие,/ ра́дующеся, вку́пе просла́вите Бо́га и Пречи́стую Ма́терь Его́,/ кади́ло но́вое, моли́тву чи́стую Силуа́на, пла́менем Ду́ха Свята́го горя́ща,/ у Престо́ла Небе́снаго за нас прия́вших.

Возвесели́ся, Горо́ Афо́нская, со пустыннолю́бцы твои́ми/ и во псалме́х и пе́ниих и песнех духо́вных воскли́кни Бо́гу:/ да уго́ден бу́дет пред Лицо́м Твои́м ве́рный слуга́ Твой,/ его́же моли́твами благода́ть но́вая Це́ркви Святе́й дарова́ся.

Прииди́те, вси ве́рнии, со пустыннолю́бцы Горы́ Святы́я,/ па́мять пра́веднаго с похвала́ми почти́м, взыва́юще:/ возноси́те Го́спода Бо́га на́шего и покланя́йтеся в горе́ святе́й Его́/ ди́вно во святы́х Свои́х Почива́ющему.

Бо́же, кто уподо́бится Тебе́?/ Ты Еди́н Вы́шний по всей земли́./ Мы же, равноа́нгельному смире́нию раба́ Твоего́ вне́млюще,/ о́бразу и подо́бию Твоему́ Ду́хом Святы́м ча́ем обнови́тися.

Богоро́дичен: Не скры́ю глубины́ Твои́х щедро́т, и то́ка безме́рных чуде́с,/ и исто́чника приснотеку́щаго вои́стину е́же ко мне ми́лости Твоея́, Богоро́дице:/ но всем испове́дую, и вопию́, и веща́ю.

Конда́к, глас 2:

Смиренному́дрия испове́дниче преди́вный/ и человеколю́бия Ду́хом Святы́м согрева́емая добро́то,/ Бо́гу возлю́бленне Силуа́не,/ о по́двизе твое́м Це́рковь Росси́йская ра́дуется,/ и́ноцы же Горы́ Афо́нския и вси христиа́нстии лю́дие,/ веселя́щеся, сыно́внею любо́вию к Бо́гу устремля́ются./ Его́же моли́ о нас, равноа́нгельне богове́дче,// во е́же спасти́ся нам, в горе́нии любве́ тебе́ подража́ющим.

И́кос:

Име́я бога́тство благода́ти, во е́же ду́хом на Небеса́ возведе́ну бы́ти,/ вои́стину ра́дости неизрече́нныя сподо́бился еси́, о́тче преблаже́нне Силуа́не./ Егда́ бо, вне образо́в ми́ра, в созерца́нии безме́рно лю́бящаго Христа́ Бо́га Лице́ ви́дети сподо́бился еси́,/ тогда́, Ду́хом Святы́м укрепля́емь,/ в вертогра́де Преблагослове́нныя Богома́тере Тому́ всеусе́рднейше послужи́л еси́./ Его́же моли́, равноа́нгельне богове́дче,/ во е́же спасти́ся нам, в горе́нии любве́ тебе́ подража́ющим.

Песнь 7

Ирмо́с: В пещи́ о́гненней/ песносло́вцы спасы́й о́троки,// благослове́н Бог оте́ц на́ших.

И́го благо́е, бре́мя ле́гкое Христа́ Спа́са взем,/ и ветри́лом Ду́ха Свята́го, в стра́се боже́ственнем,/ к приста́нищу благооти́шному кора́бль душе́вный твой упра́вил еси́, о́тче Силуа́не,/ мона́хом, в по́двизе изнемога́ющим, о́бразе преди́вный.

Ка́ко не диви́мся смире́нию и человеколю́бию твоему́, Силуа́не предо́бре,/ ви́дяще тя сле́зы источа́юща/ и о су́щих во а́де и нераска́янных гре́шницех рыда́ньми сраспина́ющася,/ враго́м же свои́м проще́ния прося́ща, всепроще́нию Христо́ву подража́юща?

Псало́мски восклица́я: ви́дена бы́ша ше́ствия Твоя́, Бо́же,/ ше́ствия Бо́га моего́ и Царя́, Иже во свято́м,/ Сего́ вои́стину в лице́ отца́ духо́внаго Авраа́мия зре́ти сподо́бился еси́,/ чти́ти наста́вники на́ша благода́тне нас наставля́я, Силуа́не богове́дче.

О́браз начерта́ний доброде́тельных дея́ний сый,/ смире́н же, и кро́ток, и наста́вник до́брый мона́шествующим в Горе́ Афо́нстей показа́лся еси́, Силуа́не,/ сего́ ра́ди мона́си и мирсти́и/ предста́тельству твоему́ пред Бо́гом вверя́ются.

Богоро́дичен: Покро́в бу́ди, и предста́тельство, и заступле́ние, и похвала́, Де́во,/ обнаже́ну мне ны́не вся́кия по́мощи,/ безпо́мощных си́ло и наде́ждо ненаде́емых,/ Силуа́на моли́твами, со́лнца тепле́йшими.

Песнь 8

Ирмо́с: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере, / свяще́нницы, по́йте,// лю́дие, превозноси́те во вся ве́ки.

Воздея́ние рук на́ших приими́, преподо́бне,/ Влады́чней бла́гости подо́бяся, прегреше́ния на́ша презира́я,/ ты бо ду́шу твою́ уязви́л еси́ Христо́вою любо́вию и Пречи́стыя Его́ Ма́тере,/ Е́юже умоли́ спасти́ ду́ши на́ша.

Я́ко крин преди́вный и сапфи́р пречу́дный,/ в вертогра́де Пречи́стыя процве́л еси́, преподо́бне Силуа́не,/ Влады́це твоему́ Христу́ смире́нно ревну́я, вы́ше бо челове́ка восприе́м житие́,/ и́мже мно́гих ду́ши Го́споду приво́диши.

Вои́стину носи́тель даро́в Свята́го Ду́ха был еси́/ и, разли́чными доброде́тельми укра́шен, Силуа́не,/ смире́нием го́рнюю высоту́ насле́див, нището́ю Небе́сное бога́тство изря́дно прия́л еси́./ Насле́дники сего́ покажи́ ны, моли́твами твои́ми.

Сия́ния Боже́ственнаго и Ду́ха Свята́го сла́дости прича́стника показа́ тя Госпо́дь, о́тче Силуа́не,/ егда́ в неизрече́ннем Фаво́рстем сия́нии тя посети́л есть./ Зре́ти сла́ву Сего́ в све́те блиста́ния Божества́ Его́/ сподо́би и нас, мо́лимтися.

Богоро́дичен: Пречи́стая Влады́чице, Небе́сных Сил превы́шшая,/ ро́ждшая Спа́са, всех Соде́теля, Единосу́щна Отцу́ и Ду́ху,/ даждь нам сло́во, Препе́тая, я́ко да возмо́жем пе́ти Тя,/ су́щую Засту́пницу ро́да на́шего.

Песнь 9

Ирмо́с: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,// ве́рни и, единому́дренно велича́ем.

В житии́ подви́жника преди́вна, по сме́рти же моли́твенника/ и сострада́теля за ны пред Бо́гом изря́дна позна́хом тя, преподо́бне,/ егда́ иеродиа́кона Дави́да, смерте́льне отра́влена, посеще́нием твои́м внеза́пу исцели́л еси́,/ покая́ния вре́мя сему́ исхода́тайствовав усе́рдно.

Земли́ Росси́йския сосу́де избра́нный и Горы́ Афо́нския подви́жниче но́вый,/ уто́дниче Бо́жий Силуа́не, простри́ дла́ни твоя́ за ны ко Го́споду/ и, я́ко ми́ро благово́нное, моли́твы вознеси́,/ да спасе́т от сме́рти ду́ши на́ша.

А́нгелом единонра́вна и святы́м соприча́стна/ к го́рнему Сио́ну призва́ тя Госпо́дь, преподо́бне,/ иде́же вознеси́ моли́твы твоя́ за ны ко всех Влады́це,/ хода́тайствуя о Святе́й Це́ркви и о нас, чту́щих па́мять твою́ сладкопе́сненно.

Огне́м купину́ не опали́вшаго и пла́менными язы́ки Це́рковь Христо́ву освяти́вшаго,/ смире́ния твоего́ ра́ди, Ду́хом Святы́м возжже́н был еси́, о́тче преди́вне,/ да житие́м нескве́рным научи́ши ны покланя́тися Тро́ице, всех Бо́гу,/ пла́менем любве́ твоея́ к Нему́ приближа́ющихся.

Богоро́дичен: я́ко всех Цари́цу и Влады́чицу на́шу,/ Тя любо́вию сла́вим, Пречи́стая Де́во,/ просве́щшиися Страстьми́ Сы́на Твоего́ и позна́вшии Сего́ всем Благоде́теля./ Сла́ва благода́ти Его́ во вся ве́ки.

Свети́лен, глас 4:

Све́та неме́ркнущаго блиста́нием украси́лся еси́, преподо́бне о́тче наш Силуа́не,/ и предстои́ши ве́чно престо́лу сла́вы Триеди́наго Божества́, о Ду́се Свято́м ликовству́яй./ Благода́ти сея́ испроси́ и нам,/ да моли́твами твои́ми прича́стницы жи́зни ве́чныя бу́дем.

Сла́ва, и ны́не, пра́здника, или́ Богоро́дичен, глас то́йже:

Осия́нием Твои́м просвети́ на́ша помышле́ния, и сердца́, и ра́зум, Ма́ти Безневе́стная,/ я́ко да стезя́ми жи́зни пра́во ходя́ще, ми́лость приобря́щем,/ возвеща́юще при́сно хвалы́ Твоя́.

На хвали́тех стихи́ры свята́го на 4, глас 4:

Подо́бен: Дал еси́ зна́мение:

Любве́ Бо́жия пла́менный рачи́телю/ и Ду́ха Свята́го усе́рднейший стяжа́телю,/ преподо́бне о́тче Силуа́не,/ Его́же ветри́лы/ стра́сти душе́вныя в се́рдцы твое́м,/ я́ко на ме́льнице, исте́рл еси́,/ и си́це хлеб а́нгельский вкуси́в,/ те́мже, иконо́ме добре́йший, пита́еши и нас,// да прича́стницы жи́зни ве́чныя бу́дем.

Кла́дязь но́вый,/ воды́ живы́я преиспо́лненный,/ в Горе́ Афо́нстей источи́ся,/ сле́зы моли́твы твоей, преподо́бне Силуа́не,/ и́хже, я́ко ми́ро на́рда чи́ста многоце́нна,/ у ног Го́спода на́шего источа́л еси́,/ ме́ртвым, живы́м и гряду́щим умилостивле́ния прося́./ Сея́ моли́твы не лиши́ и нас, преподо́бне,// в мо́ри жите́йстем грехми́ обурева́емых.

О́браз смире́ния Христо́ва и любве́ Его́/ житие́м твои́м показа́л еси́, преподо́бне,/ сле́зно взыва́я:/ бра́тие, люби́те враги́ ва́ша,/ си́и бо суть бра́тия ва́ша,/ враг же наш диа́вол есть,/ си́це бо средосте́ние греха́ разруша́ется, и злоухищре́ния диа́вола побежда́ются,/ и мир Бо́жий в челове́цех водворя́ется,// творя́щия же сия́ не подви́жатся в пра́вде Бо́жией во ве́ки.

Свещу́, мрак грехо́вный просвеща́ющую,/ показа́ тя Госпо́дь, боголюби́ве Силуа́не,/ да к тебе́, человеколю́бием изоби́лующу,/ за томя́щихся во а́де страда́ти жела́ющу,/ в наде́жди спасе́ния припа́дающе, вопие́м:/ слез твое́х тече́ньми очи́сти прегреше́ния на́ша/ и исцели́ ду́ши на́ша,/ да не лише́ни бу́дем любве́ Христо́вы,// егда́ яви́тся в День Су́дный.

Сла́ва, глас 6:

Прииди́те, вси Христу́ любо́вию у́тренююще,/ да ра́дости подви́жника преди́внаго прича́стницы бу́дем:/ ны́не А́нгели на Небесе́х/ и челове́цы на земли́ ра́дуются,/ се бо Пречи́стая Ма́ти/ от юдо́ли грехо́вныя,/ я́ко овча́ обрете́нное,/ Силуа́на, смире́нием укра́шена,/ во двор ове́ц Христо́вых приведе́,/ вели́чие его́ по́двига ве́ры,/ я́ко же́ртву непоро́чную,/ во Свята́я Святы́х вознесе́,/ да ви́дяще, ка́ко лю́бит Госпо́дь ве́рных Свои́х,/ и мы Ца́рствию Христо́ву приобщи́мся.

И ны́не, пра́здника.

Славосло́вие вели́кое. И отпу́ст.

На литурги́и

Блаже́нны пра́здника, песнь 7-я и 8-я, на 4, и свята́го, песнь 6-я, на 4. Проки́мен, апо́стол, аллилу́йя и прича́стен преподо́бнаго. Ева́нгелие от Луки́, зача́ло 24.

Моли́тва

О преди́вный уго́дниче Бо́жий, о́тче Силуа́не! По благода́ти, тебе́ от Бо́га да́нней, сле́зно моли́тися о всей вселе́нней, ме́ртвых, живы́х и гряду́щих, не премолчи́ за нас ко Го́споду, к тебе́ усе́рдно припа́дающих и твоего́ предста́тельства уми́льно прося́щих. Подви́гни, о всеблаже́нне, на моли́тву усе́рдную Засту́пницу ро́да христиа́нскаго, Преблагослове́нную Богоро́дицу и Присноде́ву Мари́ю, чу́дно призва́вшую тя бы́ти ве́рна де́лателя в Ея́ земне́м вертогра́де, иде́же избра́нницы Бо́жии о гресе́х на́ших ми́лостива и долготерпели́ва бы́ти Бо́га умоля́ют, во е́же не помяну́ти непра́вд и беззако́ний на́ших, но, по неизрече́нней бла́гости Го́спода на́шего Иису́са Христа́, уще́дрити и спасти́ нас по вели́цей Его́ ми́лости. Ей, уго́дниче Бо́жий, с Преблагослове́нною Влады́чицею ми́ра, Святе́йшею Игу́мениею, и святы́ми подви́жники Ея́ земна́го жре́бия, испроси́ у святы́х Святе́йшаго Сло́ва Святе́й Горе́ Афо́нстей и боголюби́вым пустынножи́телем ея́ от всех бед и наве́тов вра́жиих в ми́ре сохрани́тися, да А́нгелы святы́ми от зол избавля́еми и Ду́хом Святы́м в ве́ре и братолю́бии укрепля́еми, до сконча́ния ве́ка о Еди́ней, Святе́й, Собо́рней и Апо́стольстей Це́ркви моли́твы творя́т и всем спаси́тельный путь указу́ют, да Це́рковь земна́я и Небе́сная непреста́нно славосло́вит Творца́ и Отца́ Све́тов, просвеща́ющи и освяща́ющи мир в ве́чней пра́вде и бла́гости Бо́жией. Наро́дом всего́ ми́ра испроси́ благоде́нственнаго и ми́рнаго жития́, ду́ха смиренному́дрия и братолю́бия, добронра́вия и спасе́ния, ду́ха стра́ха Бо́жия, да не зло́ба и беззако́ние ожесточа́ют сердца́ людска́я, жела́юще истреби́ти любо́вь Бо́жию в челове́цех и низве́ргнути их в богопроти́вныя вражду́ и братоуби́йства, но в си́ле Боже́ственныя любве́ и пра́вды, я́коже на Небеси́, и на земли́ да святи́тся и́мя Бо́жие, да бу́дет во́ля Его́ свята́я в челове́цех и да воцари́тся мир и Ца́рствие Бо́жие на земли́. Та́кожде и земно́му оте́честву твоему́, земли́ Росси́йстей, испроси́, уго́дниче Бо́жий, вожделе́ннаго ми́ра и Небе́снаго благослове́ния, во е́же, всемо́щным омофо́ром Ма́тере Бо́жия покрыва́ему, изба́витися ему́ от гла́да, губи́тельства, тру́са, огня́, меча́, наше́ствия иноплеме́нников и междоусо́бныя бра́ни и от всех враг ви́димых и неви́димых, и та́ко же бы́ти ему́ до сконча́ния ве́ка святе́йшему до́му Преблагослове́нныя Богоро́дицы, Креста́ Животворя́щаго си́лою, и в любви́ Бо́жией неоскудева́ему утверди́тися. Нам же всем, во тьму грехо́в погружа́емым, и покая́ния те́пла, ниже́ стра́ха Бо́жия не иму́щим, и си́це безме́рно лю́бящаго нас Го́спода непреста́нно оскорбля́ющим, испроси́, о всеблаже́нне, у Всеще́драго Бо́га на́шего, да Свое́ю всеси́льною благода́тию Боже́ственне посети́т и оживотвори́т ду́ши на́ша и вся́ку зло́бу и го́рдость жите́йскую, уны́ние и нераде́ние в сердца́х на́ших да упраздни́т. Еще́ мо́лимся, о е́же и нам, благода́тию Всесвята́го Ду́ха укрепля́емым и любо́вию Бо́жиею согрева́емым, в человеколю́бии и братолю́бии, смиренному́дрии и моли́твеннем сраспина́нии друг за дру́га и за всех, в пра́вде Бо́жией утверди́тися, и в благода́тней любви́ Бо́жией благонра́вно укрепи́тися, и сынолю́бне Тому́ прибли́житися. Да та́ко, творя́ще Его́ всесвяту́ю во́лю, во вся́ком благоче́стии и чистоте́, вре́меннаго жития́ путь непосты́дно пре́йдем и со все́ми святы́ми Небе́снаго Ца́рствия и Его́ А́гнчаго бра́ка сподо́бимся. Ему́же от всех земны́х и Небе́сных да бу́дет сла́ва, честь и поклоне́ние, со Безнача́льным Его́ Отце́м, Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Преподобный Силуан Афонский († 1938) (в миру – Симеон) родился в 1866 году в Тамбовской губернии в благочестивой семье крестьянина Иоанна Антонова. С юности Симеон пожелал принять постриг. Однако отец настоял, чтобы сын сначала поступил на воинскую службу. В армии с особой силой проявился дар его мудрого совета.

Незадолго до окончания воинской службы, которую Симеон проходил в Санкт-Петербурге, он решил испросить благословения у отца Иоанна Кронштадтского. Не застав его, оставил записку со словами: «Батюшка, хочу пойти в монахи; помолитесь, чтобы мир меня не задержал».

Осенью 1892 года Симеон прибыл на Святую Гору и был принят послушником в Русский Пантелеймонов монастырь. Он воспитывался в атмосфере афонской духовной традиции: дни проводил в непрестанной молитве Иисусовой, длительных богослужениях, в посте, частой исповеди и причащении Святых Христовых Таин, в чтении духовных книг и труде. Послушанием его была тяжелая работа на мельнице, затем хлопотливый труд эконома, заведование мастерскими, продовольственным складом, а на склоне лет – торговой лавкой. В 1896 году он был пострижен в мантию с именем Силуан, а в 1911 году – в схиму с оставлением прежнего имени.

Прожив сорок шесть лет в обители с общежительным уставом, преподобный никогда не стремился к уходу в затвор или удалению в пустынь. Постоянно находясь среди людей, старец хранил ум и сердце от мирских помыслов, для молитвенного предстояния Богу, зная, что это самый краткий путь ко спасению. Вся жизнь его была сердечной молитвой «до великих слез». В этой молитвенной устремленности он достиг такого духовного состояния, при котором провидел происходящее и прозревал будущее человека, открывая тайны душ и призывая всех вступить на путь спасительного покаяния. 11 сентября 1938 года старец Силуан мирно скончался.

В 1988 году Константинопольской Православной Церковью преподобный Силуан причислен к лику святых; Русская Православная Церковь канонизовала преподобного в 1991 году. Однако задолго до его канонизации прибывавшие в Пантелеймонов монастырь паломники совершали поклонение честно́й главе старца, покоящейся в Покровском храме обители, с верой в его молитвенное предстательство пред Господом. Духовно врачуют души верующих и писания преподобного Силуана о сущности христианской жизни и монашеского делания, переведенные на многие языки и получившие большую известность.

Перенесение моще́й преподо́бных оте́ц на́ших Се́ргия и Ге́рмана, Валаа́мских чудотво́рцев

Слу́жбу зри 28 ию́ня.

Тропа́рь, глас 4:

Ева́нгелия Христо́ва и́стиннии послу́шницы/ яви́стеся, преподо́бнии,/ мир и вся, я́же в нем, я́ко не су́щая/ преоби́девше любве́ ра́ди Христо́вы,/ и в морско́й о́стров всели́стеся,/ и трудолю́бно в нем проти́ву ко́зней неви́димых враго́в подвиза́стеся,/ посто́м, бде́нием же и всено́щным стоя́нием/ пло́ти своя́ ду́ху му́дре повину́ли есте́./ Сего́ ра́ди от Вседержи́тельныя десни́цы достойныя венцы́ прия́ли есте́./ И ны́не, Пресвяте́й Тро́ице предстоя́ще,/ моли́теся, всеблаже́ннии отцы́ Се́ргие и Ге́рмане,/ сохрани́тися в мо́ре оте́честву на́шему// и спасти́ся душа́м на́шим.

Ин тропа́рь, глас 1:

От мирски́я молвы́ бе́гающе,/ безмо́лвия и благоче́стия рачи́тели,/ в ти́хое приста́нище Валаа́ма/ от восто́ка приидо́сте/ и, в нем ева́нгельски Христу́ доброде́тельми после́довавше,/ на верх соверше́нства востекли́ есте́./ И ны́не, в торжестве́ преми́рнем богозре́нием наслажда́ющеся,/ всеблаже́ннии отцы́ Се́ргие и Ге́рмане,/ Человеколю́бца Бо́га моли́те,// е́же спасти́ всех нас, благоче́стно вас почита́ющих.

Конда́к, глас 4:

От мирска́го жития́ изше́дше,/ отверже́нием ми́ра Христу́ после́довасте,/ и достиго́сте вели́каго Не́ва е́зера,/ и в нем, на о́строве Валаа́ме, все́льшеся,/ равноа́нгельное житие́ пожи́ли есте́,/ отону́дуже веселя́щеся, прешли́ есте́ к Небе́сным черто́гом./ И ны́не со А́нгелы Влады́чню Престо́лу предстоя́ще,/ помина́йте нас, чад свои́х,/ я́же собра́ли есте́, богому́дрии,/ да ра́достно от души́ вопие́м:// ра́дуйтеся, Се́ргие и Ге́рмане, отцы́ преблаже́ннии.

Преподобные Сергий и Герман Валаамские, по преданию, пришли на остров Валаам и основали здесь монастырь еще до крещения Руси святым князем Владимиром, в X веке. Другие источники указывают более позднюю дату. В рукописи конца XVI века читаем: «В лето 6837 [1329] старец Сергий пришел на Валаамов остров» (Востоков А. Описание рукописей Румянцевского музеума. СПб., 1842. № 35). При этом предполагается, что кончина преподобных последовала около 1353 года.

Спасо-Преображенский монастырь был общежительным. «Исстари, как только стал монастырь,– писали валаамские иноки,– начальники Валаамского монастыря Сергий и Герман установили общину, полотняную одежду и обувь давали каждому...»

Монастырь не раз переживал периоды и расцвета, и полного упадка. Инокам приходилось покидать остров; они уходили в Новгород, унося с собой главную святыню – мощи преподобных Сергия и Германа. Некоторые источники свидетельствуют, что мощи преподобных были обретены в 1163 году. По другим источникам, обретение мощей преподобных и написание их иконы произошло около 1401 года. После шведского разорения мощи были перенесены в Никольский Староладожский монастырь, и только в начале XVIII века они были возвращены на остров и почивают под спудом в храме Преображения Господня. Днем перенесения мощей считается 11 сентября.

Не только войны, пожары и моровые поветрия разоряли монастырь. Нестроения, переживаемые Русью и ее Церковью, отражались и на жизни монастыря, и не раз приходил пречудный остров в запустение.

В XVIII веке митрополит Санкт-петербургский Гавриил (Петров) по благословению Святейшего Синода назначил игуменом Валаамского монастыря старца Назария († 1809). Появились уединенные скиты на небольших островках, разбросанных вокруг Преображенского монастыря; был введен строгий устав Саровской пустыни, возрождено старчество.

Другой наиболее известный вала-амский игумен, Дамаскин († 1809), управлял обителью 42 года; за время его игуменства построено множество церквей, часовен и других монастыр¬ских зданий, воздвигнуты поклонные кресты.

Среди всех разорений, случавшихся на Валааме, самым страшным кажется разорение, бывшее в XX веке. В 1940 году монахи вынуждены были уйти в Финляндию.

13 декабря 1989 года, на праздник апостола Андрея Первозванного (который, по преданию, побывал на острове еще в I веке), вновь вступили на валаамскую землю иноки. Возрожденный монастырь остается верным валаамским традициям и уставу и в духовной, и в хозяйственной, и в мессионерской деятельности.

Память преподобных Сергия и Германа Валаамских совершается дважды в году: 11 сентября и 28 июня.

Комментарии для сайта Cackle