20/2 Преподобного Евфимия Великого (473). Преподобного Евфимия Архангелогородского (ок. 1523). Преподобного Евфимия, схимника Печерского, в Дальних пещерах почивающего (XIV). Преподобного Лаврентия, затворника Печерского, в Дальних пещерах почивающего (XIII-XIV). Святителя Евфимия, патриарха Терновского (Тырновского), Болгарского (XIV).

Тропарь преподобному Евфимию Великому, глас 4

Весели́ся, пусты́ня неражда́ющая,/ благоду́шствуй, неболя́щая,/ я́ко умно́жи тебе́ ча́да муж жела́ний духо́вных,/ благоче́стием насади́в,/ воздержа́нием воспита́в доброде́телей в соверше́нство./ Того́ моли́твами, Христе́ Бо́же,/ умири́ живо́т наш.

Кондак, глас 8

В честно́м рождестве́ твое́м ра́дость тварь обре́те/ и в Боже́ственней па́мяти твое́й, преподо́бне ,/ благоду́шие прия́т мно́гих твои́х чуде́с,/ от ни́хже пода́ждь бога́тно* в ду́ши на́ша, и очи́сти грехо́в скве́рны,/ я́ко да пое́м: Аллилу́иа.

Величание

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Евфимию Архангелогородскому, глас 4

Я́ко сокро́вище многоце́нно/ и исто́чник, излива́ющ то́ки исцеле́ний,/ подаде́ нам Христо́с честны́я мо́щи твоя́,/ преподо́бне Евфи́мие,/ боле́зней у́бо отье́млющия страсте́й разли́чных,/ благода́ть же душа́м точа́щия непреста́нно,/ Его́же моли́ дарова́ти нам ве́лию ми́лость.

Кондак, глас 3

Пра́зднует днесь Арха́нгелов град пра́здник пресве́тлый светоно́сныя твоея́ па́мяти,/ вся созыва́я окре́стныя его́,/ ра́дуется бо, я́ко стяжа́в сокро́вище ве́лие, честны́я мо́щи твоя́, преподо́бне Евфи́мие,/ его́же сохраня́й всегда́ моли́твами твои́ми от всех зол, да зове́м ти:/ ра́дуйся, о́тче, благоду́шию тезоимени́те.

Величание

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Евфимию, схимнику Печерскому, в Дальних пещерах почивающему, глас 4

Евфи́мие всече́стне,/ преподо́бным единоревни́телю и а́нгелом собесе́дниче,/ получи́вый с ни́ми житие́м свои́м чи́стым и безмо́лвным ве́чная блага́я,/ моли́ся Го́сподеви при́сно о всех нас,/ да и мы тех же благ сподо́бимся.

Кондак, глас тойже

Я́ко прия́л еси́ схи́му,/ бысть вы́ну тих и молчали́в, преподо́бне,/ никогда́же бо ни с ким, ра́зве моли́тв ко Го́споду,/ ничесо́же глаго́лал еси́,/ и пи́щи, ра́зве зе́лия суро́ва, нико́ея же вкуша́л еси́./ Тем обре́т днесь пи́щу неижди́вшую* на Небеси́, Евфи́мие,/ моли́ и нам то́яжде причасти́тися.

Величание

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Лаврентию, затворнику Печерскому, в Дальних пещерах почивающему, глас 3

Затвори́вый себе́ Го́спода ра́ди в те́мней пеще́ре,/ преподо́бне о́тче Лавре́нтие, многоле́тне,/ и О́ному до́бре в ней угоди́вый,/ пода́ждь и нам от вся́каго зла чу́вствия затвори́ти,/ и тьмы страсте́й отврати́тися,/ и све́тлость получи́ти Ца́рствия Небе́снаго.

Кондак, глас 4

Бог, реки́й из тьмы све́ту возсия́ти,/ просия́ тебе́ из те́мна ме́ста, я́ко свет,/ и зна́ема всем показа́, Лавре́нтие,/ яви́ же и Све́ту невече́рнему тя прича́стника, преподо́бне ,/ в не́мже лику́я, поми́луй нас, хва́лящих тя.

Величание

Ублажа́ем тя,/ преподо́бне о́тче Лавре́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Евфимию, патриарху Терновскому (Тырновскому), Болгарскому, глас 4

По́двигом пусты́нным просия́л еси́/ и на престо́л первосвяти́тельства по достоя́нию возше́л еси́,/ отону́дуже луча́ми Богове́дения и доброде́тели всех озари́л еси́/ и ча́шу му́ченичества безкро́вно отпи́л еси́./ Ны́не же предстоя́ престо́лу Го́рняго Иерусали́ма, Евфи́мие,/ моли́ сидя́щаго на нем Христа́ Бо́га на́шего/ о почита́ющих честну́ю па́мять твою́.

Кондак, глас 8

Во бра́ни неви́димой быв победи́тель,/ от Вы́шния десни́цы вене́ц прия́л еси́,/ Евфи́мие, преподо́бне о́тче наш,/ во бра́ни же с злочести́выми неодоле́нный,/ усугу́бил еси́ мзду твою́ в кро́вех Небе́сных./ Темже воспева́ем ти такова́я:/ ра́дуйся, страда́льче безкро́вный земли́ Болга́рския.

Величание

Велича́ем тя,/ святи́телю о́тче Евфи́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.