Четверг

Последование утрени

Тро́ичны

По 1-м стихосло́вии глаго́лем седа́льны апо́стольския осмогла́сника.

По 2-м же стихосло́вии глаго́лем настоя́щий седа́лен, господи́на ио́сифа. Гла́с 6.

Подо́бен: Наде́жде ми́ра:

Свети́ла ми́ра непреле́стная, ученицы́ спа́совы, просвети́те мою́ ду́шу грехо́м осле́пшую, и покажи́те боже́ственнаго дне́ о́бщника, храня́ща спаси́тельныя за́поведи, и тьмы́ мя́ изба́вите о́ныя несвети́мыя, я́ко да ва́с прославля́ю.

Сла́ва, то́йже.

И ны́не, Богоро́дичен: Свята́я Влады́чице Богоро́дице, Христа́ Бо́га на́шего Ма́ти, я́ко все́х Творца́ неизрече́нно ро́ждшая, моли́ся со апо́столы свяще́нными всегда́ бла́гости Его́, страсте́й на́с изба́вити, и оставле́ние на́м да́ти грехо́в.

По 3-м же стихосло́вии други́й седа́лен господи́на Фео́дора.

Гла́с 6.

Подо́бен: А́нгельския:

Миросве́тлая свети́ла боже́ственнии апо́столи, просвети́те певцы́ ва́шя, возме́здие творя́ще вре́мени поста́, досто́йно моля́щеся, все́м ви́дети дре́во живоно́снаго Креста́, и лобыза́ти нескве́рныма устна́ма и очи́ма, вопию́щым псало́мски: Го́споди сла́ва Тебе́.

Сла́ва, то́йже.

И ны́не, Богоро́дичен: Наде́жде ми́ра блага́я Богоро́дице Де́во, Твое́ и еди́но стра́шное предста́тельство дви́жем, умилосе́рдися на безпомо́щныя лю́ди, умоли́ ми́лостивнаго Бо́га, изба́витися душа́м на́шым от вся́каго преще́ния, еди́на Благослове́нная.

Кано́н Мине́и, и настоя́щий трипе́снец господи́на Ио́сифа.

И стихосло́вится пе́снь. Гла́с 6.

Пе́снь 4.

Ирмо́с: Христо́с моя́ си́ла:

По́ст, сле́зы, моли́твы, ми́лостыню, благоумиле́нный нра́в, мы́сль пра́вую, жития́ чистоту́, пока́жем ве́рнии, я́ко да сла́вы наслади́мся.

Свети́льницы светя́щии на тве́рди честны́я Це́ркве, пресве́тло яви́стеся апо́столи: те́мже просвети́те на́ша сердца́ Боже́ственным Ду́хом.

Я́ко Боже́ственное у́глие вже́гшеся огне́м невеще́ственным, страстна́я вещества́ попали́те серде́ц на́ших, му́дрии Бо́га на́шего апо́столи.

Богоро́дичен: Све́щниче негаси́мый, черто́же всесве́тлый, серафи́м превы́шшая, херуви́мская колесни́це Всенепоро́чная, грехо́в мя́ лю́тых и бе́д свободи́.

И́ный господи́на Фео́дора. Гла́с то́йже.

Ирмо́с: Услы́ша проро́к:

Свети́льницы богоявле́ния, апо́столи Спа́совы яви́вшеся, неве́дения но́щь разруши́сте, и Це́рковь уясни́вше, просвеща́ете вселе́нную огневеща́нными уче́ньми ва́шими.

Ми́р проте́кше, и́ный у́бо во и́ную страну́, во еди́ну ве́ру вся́ собра́сте апо́столи, и улучи́вше небе́сная, лику́ете, Христа́ непреста́нно моля́ще, спасти́ся все́м на́м.

Тро́ичен: Сы́на от Отца́, и Ду́ха сла́влю, я́ко от со́лнца све́т и лучу́: о́ваго у́бо рожде́ственне, зане́ и рожде́ние: о́ваго же происхо́дне, зане́ и происхожде́ние, собезнача́льную Боже́ственную Тро́ицу, покланя́емую от вся́кия тва́ри.

Богоро́дичен: Де́ва Младе́нца роди́вшая, и чистоту́ соблю́дшая Чи́стая, ты́ яви́лася еси́, Бо́га ро́ждши и Челове́ка, еди́наго Того́ во обою́ зра́ку, чу́до Твое́ Де́во Ма́ти, ужаса́ет вся́кий слу́х и по́мысл.

Сла́ва Тебе́ Бо́же на́ш, сла́ва Тебе́.

Моли́твами ва́шими святы́ми, апо́столи Госпо́дни, да сподо́бимся животворя́щий Кре́ст облобыза́ти чи́стыми устна́ми и очи́ма, предлежа́щий су́щым в ми́ре, и покланя́емый.

Ирмо́с: услы́ша проро́к прише́ствие Твое́ Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й, и убоя́хся, сла́ва си́ле Твое́й Го́споди.

Пе́снь 8.

Ирмо́с: Из пла́мене преподо́бным:

Моисе́а по́ст Богови́дца показа́, и Илию́ о́гненною колесни́цею взя́т: потщи́ся, помышле́ний вре́дных удержи́ся, я́ко да долувлеку́щия, душе́, изба́вишися пре́лести.

Поползну́вся в го́ршая впадо́х, и я́зве стру́п прилага́ю: исцели́ Христе́, окамене́нное моего́ се́рдца ожесточе́ние, апо́стольскими Ще́дре моли́твами.

Ми́ра свети́ла богоза́рная, страсте́й на́ших о́блаки разори́те, и покло́нники све́тлаго Воскре́сния покажи́те, пою́щыя Со́лнца сла́вы.

Богоро́дичен: Ро́дове родо́в Тя́ Богоблаже́нная ублажа́ют, я́коже дре́вле прорекла́ еси́: еди́на бо челове́ком блаже́нное родила́ еси́ Сло́во несказа́нно, из Тебе́ воплоще́нное.

И́ный. Ирмо́с: Преподо́бнии Твои́ о́троцы:

Во глубине́ пре́лести пла́вающыя улови́вше тро́стию ве́ры апо́столи, Го́сподеви приведо́сте сия́, благословя́щыя, пою́щыя и превознося́щыя Го́спода во ве́ки.

Ве́лия кре́пость Твоя́ во апо́столех я́ко се́ни и суда́рия и́х исцелева́ют боля́щыя, благословя́щыя, пою́щыя и превознося́щыя Го́спода во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Безнача́льным и рождество́м же и происхожде́нием Отцу́ покланя́юся ро́ждшему, Сы́на прославля́ю ро́ждшася, и воспева́ю совозсия́вша Отцу́ же и Сы́ну Ду́ха Свята́го.

Богоро́дичен: Его́же родила́ еси́ Де́во несказа́нно, всегда́ я́ко Человеколю́бца не преста́й моля́щи, да бе́д спасе́т к Тебе́ прибега́ющыя.

Сла́ва Тебе́ Бо́же на́ш, сла́ва Тебе́.

Двоенадеся́тице святы́х апо́стол, честно́му Кресту́ сподо́би неосужде́нно поклони́тися мя́, благословя́ща, пою́ща и превознося́ща во вся́ ве́ки.

Хва́лим, благослови́м, покланя́емся Го́сподеви:

Ирмо́с: Преподо́бнии Твои́ о́троцы, в пещи́ херуви́мы подража́ху, трисвяту́ю пе́снь воспева́юще: благослови́те, по́йте и превозноси́те во вся́ ве́ки.

Пе́снь 9.

Ирмо́с: Бо́га челове́ком:

Бо́же и Го́споди Многоми́лостиве, моего́ се́рдца очи́сти я́звы, покая́ния мне́ прилага́я лечбы́: согреши́х, согреши́х Тебе́, уще́дри, спаси́ мя́ апо́стол Твои́х моли́твами, я́ко Многоми́лостив.

Стремле́нием безме́стным после́довах умовре́дно, и вне́ себе́ ве́сь бы́х, сластьми́ жесто́кими пита́емь, и спаси́тельныя лиша́емь сне́ди блу́дный: Христе́ уще́дри, и спаси́ мя́.

Душе́ зло́бы не очи́стившаяся, и сласте́й тлетво́рных себе́ не удали́вшая, что́ безвре́менно ра́дуешися постя́щися: сего́ бо поста́ не избра́ Госпо́дь, еди́н на́шего хотя́й исправле́ния.

Богоро́дичен: Све́том Боже́ственным мене́ просвети́, Де́во Богоро́дице, Све́та роди́тельнице, и души́ моея́ мглу́ отжени́, я́ко да блажу́ Тя́, Ю́же блажа́т вси́ челове́честии ро́ди, я́коже предрекла́ еси́.

И́ный. Ирмо́с: Безсе́меннаго зача́тия:

Сло́вом неве́жи, прему́дри яви́стеся ра́зумом, плете́ния слове́с мудрецо́в разруши́вше, вети́ям сугу́бствия, и число́ звездоче́тцов. Те́м апо́столи Христо́вы еди́ни, всея́ вселе́нныя показа́стеся учи́телие.

Пе́тр вети́йствует, и Плато́н умолче́: учи́т Па́вел, Пифаго́р постыде́ся: про́чий апо́стольский богосло́вяй собо́р, е́ллинское ме́ртвое веща́ние погреба́ет, и ми́р совозставля́ет к слу́жбе Христо́ве.

Сла́ва, тро́ичен: Еди́наго Единороди́телю, Единоро́днаго Сы́на О́тче: и еди́не еди́наго, све́те све́та сия́ние: и еди́ный еди́не, еди́наго Бо́га Святы́й Ду́ше, Го́спода, Госпо́дь вои́стинну сы́й. О Тро́ице Еди́нице Свята́я, спаси́ мя́ богосло́вяща Тя́.

Богоро́дичен: Чу́до Рождества́ Твоего́ удивля́ет мя́ Всенепоро́чная, ка́ко зачина́еши безсе́менно необыме́ннаго? рцы́, ка́ко де́вствуеши, ро́ждши я́ко Ма́ти; е́же па́че естества́ ве́рою прие́м, Рожде́нному поклони́ся: ели́ка хо́щет бо, и мо́жет.

Сла́ва Тебе́ Бо́же на́ш, сла́ва Тебе́.

Кре́ст честны́й дре́во всесвято́е, е́же ми́ру спасе́ние процвете́, ви́дети и поклони́тися вси́ да сподо́бимся, чи́стыми устна́ми и душе́ю, моли́твами все́х ва́с святы́х апо́стол Христо́вых.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди, я́ко Богоневе́стную Ма́терь правосла́вно велича́ем.

Свети́лен гла́са.

На стихо́вне, самогла́сен, два́жды. Гла́с 6:

Сыноположе́ния отпа́д блу́дный а́з, раболе́пно с свиния́ми пита́яся, и ниже́ те́х пи́щи насыща́яся, прихожду́ к Тебе́ Отцу́ благоутро́бному, отону́дуже изыдо́х зле́, возвраща́юся до́бре в покая́нии зовы́й: согреши́х на не́бо и пред Тобо́ю, О́тче пода́ждь ми́ во обраще́нии вели́кую ми́лость.

Му́ченичен: Избра́нныя удиви́ и святы́я Бо́г на́ш, ра́дуйтеся и весели́теся вси́ раби́ Его́, ва́м бо угото́ва венцы́, и Ца́рствие Свое́: но мо́лим, и на́с не забу́дите

Сла́ва, и ны́не, Богоро́дичен: Богоро́дице, ты́ еси́ лоза́ и́стинная, возрасти́вшая на́м Пло́д живота́: Тебе́ мо́лимся, моли́ся Влады́чице, со святы́ми апо́столы [и все́ми святы́ми,] поми́ловати ду́шы на́ша.

На 6-м часе́ тропа́рь проро́чества. Гла́с 3:

А́ще беззако́ния на́зриши Человеколю́бче, ка́я спасе́ния наде́жда на́м? Но твою́ свы́ше по́мощь, я́ко Ще́др, лю́дем Твои́м низпосли́ Го́споди.

Проки́мен, псало́м 53, гла́с 4: Бо́же, во и́мя Твое́ спаси́ мя, и в си́ле Твое́й суди́ ми. Сти́х: Бо́же, услы́ши моли́тву мою́, внуши́ глаго́лы у́ст мои́х.

Проро́чества Иса́иина чте́ние. [Ис. 11:10–16, 12:1–2.]

Та́ко глаго́лет Госпо́дь: бу́дет в де́нь о́ный ко́рень Иессе́ов, и востая́й владе́ти язы́ки, на того́ язы́цы упова́ти бу́дут: и бу́дет поко́й его́, че́сть. И бу́дет в де́нь о́ный, приложи́т Госпо́дь показа́ти ру́ку Свою́, е́же возревнова́ти по оста́нку про́чему люде́й, и́же а́ще оста́нет от Ассири́ов, и от Еги́пта, и Вавило́на, и от Ефио́пии, и от Елами́тов, и от восто́ков со́лнца, и от Арави́и, и от острово́в морски́х. И воздви́гнет зна́мение в язы́ки, и собере́т поги́бшыя Изра́илевы, и расточе́нныя Иу́дины собере́т от четы́рех кри́л земли́. И оти́мется ре́вность Ефре́мова, и врази́ Иу́дины поги́бнут: Ефре́м не возревну́ет Иу́де, и Иу́да не оскорби́т Ефре́ма. И полетя́т в корабля́х иноплеме́нничих, мо́ре ку́пно пленя́т, и су́щих от восто́к со́лнца, и Идуме́ю: и на Моа́ва пе́рвее ру́ки возложа́т, сы́нове же Аммо́ни пе́рвии покоря́тся. И опустоши́т Госпо́дь мо́ре Еги́петское, и возложи́т ру́ку Свою́ на реку́ ду́хом преси́льным: и порази́т на се́дмь де́брий, я́коже преходи́ти ю́ во обуве́нии: И бу́дет проше́ствие лю́дем Мои́м оста́вльшым во Еги́пте, и бу́дет Изра́илю, я́коже в де́нь, егда́ изы́де от земли́ Еги́петския. И рече́ши в де́нь о́ный: благословлю́ Тя́, Го́споди, я́ко разгне́вался еси́ на мя́, и отврати́л еси́ я́рость Твою́ [от мене́,] и поми́ловал мя́ еси́. Се́ Бо́г мо́й, Спа́с мо́й, упова́я бу́ду на Него́, и не убою́ся: зане́ сла́ва моя́ и похвала́ моя́ Госпо́дь, и бы́сть ми́ во спасе́ние.

Проки́мен, псало́м 54. Гла́с 7: Внуши́ Бо́же, моли́тву мою́, и не пре́зри моле́ния моего́. Сти́х: Вонми́ ми, и услы́ши мя́.

Последование вечерни

На Го́споди воззва́х, поста́вим стихо́в 6, и пое́м настоя́щыя подо́бны 3, трипе́снца, и Мине́и 3. Стихи́ры господи́на Ио́сифа, гла́с 5.

Подо́бен: Ра́дуйся по́стников:

Спа́се и́стинная сла́досте, го́рькия Ме́рры дре́вле во́ды услади́вый о́бразом тогда́ дре́ва, Боже́ственнаго Креста́, просте́рся на не́м, я́коже благоволи́л еси́: же́лчи же вкуси́л еси́, в ре́бра прободе́н, из ни́хже ми́ру вода́ излия́ся оставле́ния, на обновле́ние земна́го смеше́ния. Те́мже славосло́вим твою́ неизрече́нную си́лу, и мо́лимся: пода́ждь на́м стра́х Тво́й Го́споди, во вре́мя поще́ния, и проще́ние согреше́ний, и ве́лию ми́лость.

Сло́ве простры́йся на Кресте́, собира́я дале́че отстоя́щыя от Тебе́, возне́с помышле́ние мое́ от гно́я страсте́й, доброде́тельми вся́ческими обогати́, подава́я се́рдцу моему́ чисте́йший стра́х Тво́й и души́ мое́й соверше́нную любо́вь, плотски́я мя́ любве́ отсеца́ющую: я́ко да воздержа́нием Тебе́, моли́твою и моле́нием, в настоя́щыя дни́ угожду́, и узрю́ Тво́й све́тлый де́нь Воскре́сния, прие́мля ве́лию ми́лость.

И́на стихи́ра господи́на Фео́дора, гла́с 1.

Подо́бен: О́блак Тя́ све́тлый:

Тре́тию честны́х посто́в седми́цу Христе́ Сло́ве, преше́дших, дре́во живоно́снаго Креста́ Твоего́ ви́дети сподо́би на́с, и че́стне поклони́тися, и пе́ти по достоя́нию и сла́вити держа́ву Твою́, воспе́ти стра́сти Твоя́, предвари́ти сла́вное чи́сте и свято́е Воскре́сние, Па́сху та́йную, е́юже Ада́м па́ки вни́де в ра́й.

И в Мине́и 3. Сла́ва, и ны́не, Богоро́дичен.

Проки́мен, псало́м 55, гла́с 6: Поми́луй мя́ Бо́же, я́ко попра́ мя челове́к. Сти́х: Попра́ша мя́ врази́ мои́ ве́сь де́нь.

Бытия́ чте́ние. [Быт. 7:11–24, 8:1–3.]

Бы́сть в шестьсо́тное ле́то в житии́ Но́еве, втора́го ме́сяца, в два́десять седмы́й де́нь ме́сяца, в де́нь то́й разверзо́шася вси́ исто́чницы бе́здны, и хля́би небе́сныя отверзо́шася. И бы́сть до́ждь на зе́млю четы́редесять дне́й, и четы́редесять ноще́й. В де́нь то́й вни́де Но́е, Си́м, Ха́м, Иа́феф, сы́нове Но́евы, и жена́ Но́ева, и три́ жены́ сыно́в его́ с ни́м в ковче́г. И вси́ зве́рие земни́и по ро́ду, и вси́ ско́ти по ро́ду, и вся́кий га́д дви́жущийся на земли́ по ро́ду, и вся́кая пти́ца перна́тая по ро́ду своему́: Внидо́ша к Но́ю в ковче́г два́ два́, му́жеский по́л и же́нский, от вся́кия пло́ти, в не́йже е́сть ду́х живо́тный. И входя́щая му́жеский по́л и же́нский от вся́кия пло́ти внидо́ша к но́ю в ковче́г, я́коже запове́да Госпо́дь Бо́г Но́ю: и затвори́ Госпо́дь Бо́г ковче́г отвне́ его́. И бы́сть пото́п четы́редесять дне́й, и четы́редесять ноще́й на земли́, и умно́жися вода́, и взя́ ковче́г, и возвы́сися от земли́: И возмога́ше вода́, и умножа́шеся зело́ на земли́, и ноша́шеся ковче́г верху́ воды́. Вода́ же возмога́ше зело́ зело́ на земли́: и покры́ вся́ го́ры высо́кия, я́же бя́ху под небесе́м: Пятьна́десять лакте́й горе́ возвы́сися вода́, и покры́ вся́ го́ры высо́кия. И у́мре вся́кая пло́ть дви́жущаяся по земли́, пти́ц и ското́в и звере́й, и вся́кий га́д дви́жущийся на земли́, и вся́кий челове́к. И вся́ ели́ка и́мут дыха́ние жи́зни, и все́ е́же бе́ на су́ши, у́мре. И потреби́ся вся́кое воста́ние, е́же бя́ше на лице́ всея́ земли́, от челове́ка да́же до скота́, и гадо́в, и пти́ц небе́сных, и потреби́шася от земли́: и оста́ Но́е еди́н, и и́же с ни́м в ковче́зе. И возвы́сися вода́ над земле́ю дне́й сто́ пятьдеся́т. И помяну́ Бо́г Но́а, и вся́ зве́ри, и вся́ скоты́, и вся́ пти́цы, и вся́ га́ды пресмыка́ющыяся, ели́ка бе́ху с ни́м в ковче́зе: и наведе́ Бо́г ду́х на зе́млю, и преста́ вода́. И заключи́шася исто́чницы бе́здны, и хля́би небе́сныя: и удержа́ся до́ждь от небесе́. И вспя́ть по́йде вода́, иду́щая от земли́: и умаля́шеся вода́, по сте́ пяти́десятих дне́х.

Проки́мен псало́м 56, гла́с 7: Поми́луй мя́ Бо́же, поми́луй мя́, я́ко на Тя́ упова́ душа́ моя́. Сти́х: И на се́нь крилу́ Твое́ю наде́юся.

При́тчей чте́ние. [Притч. 10:1–22.]

Сы́н прему́др весели́т отца́: сы́н же безу́мен печа́ль ма́тери. Не по́льзуют сокро́вища беззако́нных, пра́вда же изба́вит от сме́рти. Не убие́т гла́дом Госпо́дь ду́шу пра́ведную, живо́т же нечести́вых низврати́т. Нищета́ му́жа смиря́ет: ру́це же му́жественных обогаща́ются. Сы́н нака́зан прему́др бу́дет, безу́мный же слуго́ю употреби́тся: спасе́тся от зно́я сы́н разу́мный, ветротле́нен же быва́ет на жа́тве сы́н беззако́нный. Благослове́ние Госпо́дне на главе́ пра́веднаго: уста́ же нечести́вых покры́ет пла́чь безвре́менный. Па́мять пра́ведных с похвала́ми: и́мя же нечести́вых угаса́ет. Прему́др се́рдцем прии́мет за́поведи: непокрове́нный же устна́ма остроптева́я запне́тся. И́же хо́дит про́сто, хо́дит наде́яся: развраща́я же пути́ своя́, позна́н бу́дет. Намиза́яй о́ком с ле́стию, собира́ет муже́м печа́ли: облича́яй же со дерзнове́нием, миротвори́т. Исто́чник жи́зни в руце́ пра́веднаго: уста́ же нечести́ваго покры́ет па́губа. Не́нависть воздвиза́ет ра́спрю: все́х же нелюбопри́тельных покрыва́ет любо́вь. И́же от усте́н произно́сит прему́дрость, жезло́м бие́т му́жа безсерде́чна. Прему́дрии скры́ют чу́вство, уста́ же проде́рзаго приближа́ются сокруше́нию. Стяжа́ние бога́тых гра́д тве́рд: сокруше́ние же нечести́вых нищета́. Дела́ пра́ведных живо́т творя́т, пло́дове же нечести́вых грехи́. Пути́ жи́зни храни́т наказа́ние: наказа́нием же не обличе́нный заблужда́ет. Покрыва́ют вражду́ устне́ пра́выя: износя́щии же укори́зну безу́мнейшии су́ть. От многосло́вия не избежи́ши греха́: щадя́й же устне́, разу́мен бу́деши. Сребро́ разжже́нное язы́к пра́веднаго: се́рдце же нечести́ваго исче́знет. устне́ пра́ведных ве́дят высо́кая: безу́мнии же в ску́дости скончава́ются. Благослове́ние Госпо́дне на главе́ пра́веднаго: сие́ обогаща́ет, и не и́мать приложи́тися ему́ печа́ль в се́рдцы.

На стихо́вне самогла́сен дне́, два́жды. Гла́с 6:

На дре́ве Кре́стнем обе́шена жи́знь все́х Христе́ Бо́же, оживи́ мою́ ду́шу умерщвле́нную прегреше́ньми: и да не всеконе́чно поги́бнути оста́виши Твое́ овча́, Па́стырю до́брый. Отступи́х от Твои́х за́поведей, и безгре́шия бога́тство, е́же дарова́л ми́ еси́, расточи́х грехолю́бным произволе́нием, растле́х же и омерзи́хся в блу́дных начина́ниих: но обнови́ мя́ к покая́нию привле́к, еди́не Многоми́лостиве.

Му́ченичен: Му́ченицы Твои́ Го́споди, не отверго́шася Тебе́, ни отступи́ша от за́поведей Твои́х: те́х моли́твами поми́луй на́с.

Сла́ва, и ны́не, крестобогоро́дичен.

Подо́бен: Тридне́вный:

Ви́дящи тя́ распина́ема Христе́ Тебе́ Ро́ждшая, вопия́ше: что́ стра́нное е́же ви́жду та́инство, сы́не мо́й? ка́ко на дре́ве умира́еши пло́тию пове́шен, жи́зни пода́телю?

Комментарии для сайта Cackle