Чи́нъ ма́лыѧ вече́рии по ᲂу҆ста́вꙋ.
Пре́жде со́лнечнагѡ захожде́нїѧ днѐ сꙋббѡ́тнагѡ, прихо́дитъ параекклисїа́рхъ, си́рѣчь кандиловжига́тель къ предстоѧ́телю, и҆ твори́тъ поклоне́нїе е҆мꙋ̀, зна́менꙋѧ прише́ствїемъ свои́мъ вре́мѧ клепа́нїѧ. И̑ взе́мъ бл҃гослове́нїе, и҆зше́дъ кле́плетъ въ ма́лый кампа́нъ.
И̑ собра́вшымсѧ бра́тїѧмъ въ притво́ръ, твори́тъ сщ҃е́нникъ нача́ло:
Бл҃гослове́нъ бг҃ъ на́шъ: и̑ ᲂу̑чине́нный чте́цъ глаго́летъ: Сла́ва тебѣ̀ бж҃е на́шъ, сла́ва тебѣ̀. Та́же, Цр҃ю̀ нбⷭ҇ный: Трист҃о́е, и̑ по Ѻ҆́ч҃е на́шъ: возгла́съ ѿ сщ҃е́нника. и҆ чте́тъ чте́цъ ѳ-й ча́съ по ѻ҆бы́чаю. Та́же, по концѣ̀ тогѡ̀ и҆ по ѿпꙋ́стѣ вхо́димъ въ хра́мъ, и҆ ста́нетъ кі́йждо на свое́мъ мѣ́стѣ. А҆́ще же ѳ҃-й ча́съ глаго́летсѧ въ хра́мѣ, тогда̀ ѿпꙋ́стъ ѳ҃-гѡ часа̀ не быва́етъ, но а҆́бїе і҆ере́й начина́етъ глаго́лѧ: Бл҃гослове́нъ бг҃ъ на́шъ: и҆ чте́цъ глаго́летъ: Прїиди́те поклони́мсѧ: три́жды. И҆ вече́рнїй ѱало́мъ: Бл҃гословѝ дꙋшѐ моѧ̀ гдⷭ҇а: ти́хѡ и҆ кро́ткимъ гла́сомъ. По ѱалмѣ́ же. Сла́ва, и҆ ны́нѣ: А҆ллилꙋ́їа, три́жды. І҆ере́й же є҆ктенїѝ не глаго́летъ, но чте́цъ глаго́летъ: Гдⷭ҇и поми́лꙋй, три́жды. Сла́ва, и҆ ны́нѣ: и҆ а҆́бїе, Гдⷭ҇и воззва́хъ: и҆ ста́вимъ стихѝ д҃. И̑ пое́мъ стїхи҆ры воскрⷭ҇ны гла́са, трѝ, повторѧ́юще а҃-ю: Сла́ва и҆ ны́нѣ, бг҃оро́диченъ. Та́же, Свѣ́те ти́хїй: прокі́менъ, Гдⷭ҇ь воцр҃и́сѧ: сті́хъ: Ѡ҆блече́сѧ гдⷭ҇ь въ си́лꙋ и҆ препоѧ́сасѧ, и҆ па́ки: Гдⷭ҇ь воцр҃и́сѧ: та́же, Сподо́би гдⷭ҇и, въ ве́черъ се́й. И҆ а҆́бїе пое́мъ стїхо́вны стїхи́рꙋ є҆ди́нꙋ воскрⷭ҇нꙋ: и҆ дрꙋгі҆ѧ стїхи҆ры бцⷣы, подо́бны г҃, съ припѣ́вы и҆́хъ. Сла́ва, и҆ ны́нѣ, бг҃оро́диченъ и҆́хъ. Та́же, Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ: тропа́рь воскрⷭ҇нъ. Сла́ва, и҆ ны́нѣ. бг҃оро́диченъ є҆гѡ̀.
Посе́мъ глаго́летъ і҆ере́й є҆ктенїю̀ ма́лꙋю:
Поми́лꙋй на́съ, бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и, поми́лꙋй, три́жды.
Е҆щѐ мо́лимсѧ ѡ҆ вели́комъ господи́нѣ и҆ ѻ҆тцѣ̀ на́шемъ ст҃ѣ́йшемъ патрїа́рсѣ а҆леѯі́и и҆ ѡ҆ господи́нѣ на́шемъ прешсщ҃е́ниѣйшемъ є҆пⷭ҇кпѣ [и҆́мⷬ҇къ, є҆гѡ́же є҆́стъ ѡ҆́бласть] и҆ ѡ҆ все́й во хрⷭ҇тѣ̀ бра́тїи на́шей.
Ли́къ: Гдⷭ҇и, поми́лꙋй, три́жды.
Е҆щѐ мо́лимсѧ ѡ҆ бг҃охрани́мѣй странѣ̀ на́шей, власте́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.
Ли́къ: Гдⷭ҇и, поми́лꙋй, три́жды.
Е҆щѐ мо́лимсѧ за всю̀ бра́тїю и҆ за всѧ҆ хрⷭ҇тїа́ны.
Ли́къ: Гдⷭ҇и, поми́лꙋй, три́жды.
Возгла́съ: Ꙗ҆́кѡ млⷭ҇тивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ. Ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ́, ны́нѣ и҆ при́снѡ и҆ во вѣ́ки вѣкѡ́въ.
Та́же, Сла́ва тебѣ̀, хрⷭ҇тѐ бж҃е. И҆ ѿпꙋ́стѣ ма́лый. И҆ многолѣ́тїе.