Пра́вило гото́вѧщымсѧ слꙋжи́ти и҆ хотѧ́щымъ причасти́тисѧ ст҃ы́хъ бж҃е́ственныхъ та́инствъ тѣ́ла и҆ кро́ве гдⷭ҇а і҆и҃са хрⷭ҇та̀, и҆мѣ́ти подоба́етъ си́це:

По цр҃ко́внѣмъ повече́рїи глаго́лати канѡ́нъ і҆и҃сꙋ хрⷭ҇тꙋ̀ и҆ бцⷣѣ а҆ка́ѳїстъ, канѡ́нъ а҆́гг҃лꙋ храни́телю и҆ канѡ́нъ днѐ, и҆́же прилꙋчи́тсѧ [и҆ні́и же и҆ моли̑твы на со́нъ грѧдꙋ́щихъ], пото́мъ. Досто́йно є҆́сть: Ст҃ы́й бж҃е: и҆ по Ѻ҆́ч҃е на́шъ, тропарѝ: Поми́лꙋй на́съ гдⷭ҇и: и҆ногда́ же конда́къ пра́здника глаго́лютъ, и҆ моли́твꙋ: Нескве́рнаѧ, небла́знаѧ: и҆ ѿпꙋ́стъ, и҆ Ненави́дѧщихъ и҆ ѡ҆би́дѧщихъ на́съ:

Воꙋ́трїе же лїтꙋргисꙋ́ющымъ до́лжно є҆́сть глаго́лати часы̀ г҃-й и҆ ѕ҃-й: и҆ по моли́твѣ, Бж҃е и҆ гдⷭ҇и си́лъ: ко ст҃о́мꙋ причаще́нїю канѡ́нъ и҆ моли̑твы. По прочте́нїи же моли́твъ сотвори́ти ѿпꙋ́стъ часѡ́въ.

Хотѧ́щїи же причасти́тисѧ часы̀ слꙋ́шаютъ и҆ въ цр҃кви пред̾ лїтꙋргі́ею.

И҆ є҆гда̀ кто̀ причасти́тсѧ животворѧ́щихъ ст҃ы́хъ та́инствъ, моли̑твы по причаще́нїи и҆ ѿпꙋ́стъ сотвори́тъ.

Въ про́чыѧ же дни̑, въ ве́черъ недѣ́ли, канѡ́нъ і҆и҃сꙋ, бцⷣѣ пара́клисїсъ, є҆мꙋ́же і҆рмо́съ: Во́дꙋ проше́дъ: тропа́рь же: Мно́гими содержи́мь напа́стьми: канѡ́нъ а҆рха́гг҃лѡмъ, и҆ а҆́ще хо́щетъ кто̀, а҆́гг҃лꙋ храни́телю. Воꙋ́трїе по вышепи́санномꙋ да сотворѧ́етъ [и҆ні́и же и҆ моли̑твы ᲂу҆́трєннїѧ глаго́лютъ].

Въ ве́черъ понедѣ́льника, канѡ́нъ гдⷭ҇ꙋ і҆и҃сꙋ и҆ пара́клисїсъ бцⷣѣ, ст҃о́мꙋ і҆ѡа́ннꙋ прⷣте́чи и҆ а҆́гг҃лꙋ храни́телю.

Во вто́рникъ ве́чера канѡ́нъ і҆и҃сꙋ, бцⷣѣ канѡ́нъ ѻ҆диги́трїи, и҆лѝ и҆́нъ нѣ́кїй, и҆ а҆́гг҃лꙋ храни́телю.

Въ сре́дꙋ ве́чера, канѡ́нъ гдⷭ҇ꙋ і҆и҃сꙋ, пара́клисїсъ бцⷣѣ, а҆́гг҃лꙋ храни́телю, ст҃ы̑мъ а҆пⷭ҇лѡмъ [и҆ а҆́ще кто̀ и҆зво́литъ, и҆ ст҃о́мꙋ нїкола́ю].

Въ четверто́къ ве́чера, канѡ́нъ животворѧ́щемꙋ крⷭ҇тꙋ̀, пара́клисїсъ бцⷣѣ, а҆́гг҃лꙋ храни́телю.

Въ пѧто́къ ве́чера, канѡ́нъ і҆и҃сꙋ сладча́йшемꙋ, а҆ка́ѳїстъ бцⷣѣ неѿло́жнѡ, а҆́гг҃лꙋ храни́телю, и҆ всѣ̑мъ ст҃ы̑мъ.

Въ сꙋббѡ́тꙋ ве́чера, канѡ́нъ гдⷭ҇ꙋ і҆и҃сꙋ, пара́клисїсъ бцⷣѣ, а҆́гг҃лꙋ храни́телю.

И҆ні́и же а҆ка́ѳїстъ бцⷣѣ [съ размышле́нїемъ та̑инъ бж҃е́ственныхъ, ка́кѡ содѣ́ѧсѧ] и҆ по всѧ̑ дни̑ чита́ютъ, но и҆ тогда̀, а҆́ще восхо́щетъ кто̀, да глаго́летъ пара́клисїсъ бцⷣѣ: а҆́ще ли нѝ, да ѡ҆ста́витъ.

Бг҃обоѧ́знивїи же лю́ди, и҆ къ семꙋ̀ не вдава́ющесѧ въ сꙋ́етнаѧ помышлє́нїѧ, и҆ ᲂу҆́мъ сво́й воздержава́юще, ᲂу҆пражнѧ́ютсѧ въ чита́нїи ѱалти́ри, съ мл҃твами, по ѡ҆предѣле́нїю и҆ кни́гъ зако́на гдⷭ҇нѧ, и҆ ᲂу҆чи́телей ст҃ы́хъ.

Сицево́е же пра́вило и҆ мона́шествꙋющїи во ѻ҆би́телехъ ст҃ы́хъ, та́кожде сщ҃е́нницы, дїа́кони, и҆ приче́тницы цр҃ко́внїи, и҆ гра́мматѣ ᲂу҆мѣ́ющїи всѧ́кагѡ чи́на и҆ по́ла, твори́ти повседне́внѡ до́лжни сꙋ́ть, кромѣ̀ прїꙋготовле́нїѧ ко причаще́нїю часѡ́въ, канѡ́на и҆ мл҃твъ.

И҆ начина́ти си́це [а҆́ще повече́рїе слꙋ́ша кто̀ въ це́ркви]: наединѣ̀ въ ве́черъ и҆лѝ пора́нꙋ, ꙗ҆́кѡ и҆ні́и раздѣлѧ́юще канѡ́ны глаго́лютъ по нача́лѣ: Бл҃гослове́нъ бг҃ъ на́шъ: и҆лѝ Мл҃твами ст҃ы́хъ ѻ҆тє́цъ на́шихъ: Цр҃ю̀ нбⷭ҇ный: по Прїиди́те поклони́мсѧ: ѱало́мъ н҃, и҆ Вѣ́рꙋю во є҆ди́наго бг҃а: и҆ канѡ́ны, пото́мъ, Досто́йно є҆́сть: Сла́ва, и҆ ны́нѣ: ѿпꙋ́стъ, и҆ мл҃тва: Ненави́дѧщихъ, и҆ ѡ҆би́дѧщихъ на́съ: и҆ покло́нѡвъ є҃і, съ мл҃твами. И҆ні́и же в҃і ѱалмѡ́въ, по ѡ҆предѣле́нномꙋ чи́нꙋ въ пра́вило себѣ̀ чита́ютъ.

Не ѡ҆ставлѧ́ти бо цр҃ко́внагѡ собра́нїѧ а҆пⷭ҇лъ завѣща̀: ᲂу҆̀бо и҆ мл҃твъ цр҃ко́вныхъ, и҆ ѡ҆предѣле́ннагѡ себѣ̀ пра́вила ѻ҆со́бь ѡ҆ставлѧ́ти не подоба́етъ комꙋ́ждо: поне́же въ любо́вь бж҃їю простира́тисѧ всѧ́комꙋ человѣ́кꙋ потре́бно, ꙗ҆́коже пи́сано є҆́сть: Возлю́биши гдⷭ҇а бг҃а твоего̀ всѣ́мъ се́рдцемъ твои́мъ, все́ю дꙋше́ю твое́ю, все́ю крѣ́постїю твое́ю, и҆ всѣ́мъ помышле́нїемъ твои́мъ. Любо́вь же и҆мѣ́ти, сотворѧ́ти мл҃твы прилѣ̑жныѧ подоба́етъ къ бг҃ꙋ трїѷпоста́сномꙋ, и҆ къ пречⷭ҇тѣй дв҃ѣ бцⷣѣ мр҃і́и, и҆ ко всѣ̑мъ ст҃ы̑мъ: и҆ ᲂу҆готѡ́ваннаѧ бл҃га̑ѧ въ нб҃сѣ́хъ полꙋчи́ши со всѣ́ми ст҃ы́ми, бл҃гоꙋгоди́вшими въ неконча́ємыѧ вѣ́ки, а҆ми́нь.

Нача́ти же комꙋ́ждо пра́вило кла́нѧѧсѧ, и҆ по предѣ́лꙋ покло́ны твори́ти, си́це глаго́лати до́лжно є҆́сть:

Бж҃е, млⷭ҇тивъ бꙋ́ди мнѣ̀ грѣ́шномꙋ, и҆лѝ грѣ́шнѣй.

Бж҃е, ѡ҆чи́сти грѣхѝ моѧ̑, и҆ поми́лꙋй мѧ̀.

Созда́вый мѧ̀ гдⷭ҇и, поми́лꙋй.

Без̾ числа̀ согрѣши́хъ, гдⷭ҇и, прости́ мѧ. и҆

Бцⷣе влⷣчце дв҃о, сп҃си́ мѧ.

Сїѐ и҆ за канѡ́ны є҆ѧ̀ коли́кимъ число́мъ глаго́лати, и҆лѝ ѻ҆со́бнѡ ра́ди ᲂу҆се́рдїѧ къ не́й по р҃ кра́тъ не ᲂу҆мѣ́ющїи да вѣща́ютъ.

Та́кожде и҆ а҆́гг҃лꙋ храни́телю, и҆ ст҃ы̑мъ глаго́лати:

А҆́гг҃ле храни́телю мо́й ст҃ы́й, ѿ всѧ́кагѡ ѕла̀ сохрани́ мѧ.

Ст҃ы́й а҆пⷭ҇ле, и҆лѝ мч҃нче, и҆́мⷬ҇къ: и҆лѝ ѻ҆́тче васі́лїе, и҆лѝ прпⷣбне ѻ҆́тче, молѝ бг҃а ѡ҆ мнѣ̀.


Источник: Служебник. - М.: Издательский Совет Русской Православной Церкви, 2003. - 464 с. ISBN 5-94625-063-9

Комментарии для сайта Cackle