Е. Кустовский

Неделя, в нюже чтется священное и святое Евангелие притчи о мытаре и фарисее2

В субботу вечера, о предначинательном псалме, стихословим Блаже́н му́ж: 1ю кафисму всю.

На Го́споди воззва́х: поставим стихов 10, и поем Осмогласника стихиры воскресны 3 и анатолиевы 4 и Триоди самогласны две, повторяюще первую.

Глас 1:

Стих: Яко у Го́спода ми́лость и мно́гое у Него́ избавле́ние / и Той изба́вит Изра́иля от всех беззако́ний его́.

Не помо́лимся фарисе́йски, бра́тие: / и́бо вознося́й себе́ смири́тся. / Смири́м себе́ пред Бо́гом, / мыта́рски поще́нием зову́ще: // очи́сти ны, Бо́же, гре́шныя.

Стих: Хвали́те Го́спода вси язы́цы / похвали́те Его́ вси лю́дие.

Паки таяжде стихира.

Стих: Яко утверди́ся ми́лость Его́ на нас / и и́стина Госпо́дня пребыва́ет во век.

Фарисе́й тщесла́вием побежда́емь, / и мыта́рь покая́нием приклоня́емь, / приступи́ста к Тебе́ Еди́ному Влады́це; / но ов у́бо похвали́вся, лиши́ся благи́х, / ов же ничто́же веща́в, сподо́бися дарова́ний. / В сих воздыха́ниих утверди́ мя, Христе́ Бо́же, / я́ко Человеколю́бец.

Слава, глас 8:

Вседержителю Господи, / вем, колико могут слезы: / Езекию́ бо от вра́т сме́ртных возведо́ша, / гре́шную от многоле́тных согреше́ний изба́виша, / мытаря́ же па́че фарисе́а оправда́ша: // и молю́ся, с ни́ми причта́в, поми́луй мя.

И ныне, Богородичен догматик гласа.

На литии стихира святаго обители, по обычаю.

Слава, глас 3:

Мытаря́ и фарисе́а разли́чие разуме́вши душе́ моя́, / о́наго у́бо возненави́ждь горды́нный гла́с, / о́ваго же ревну́й благоумиле́нной моли́тве, и возопи́й: // Бо́же, очи́сти мя гре́шнаго, и поми́луй мя.

И ныне, глас тойже:

Без се́мене от Боже́ственнаго Ду́ха, / во́лею же Отчею зачала́ Сы́на Бо́жия, / от Отца́ без Ма́тере пре́жде век су́ща; / нас же ра́ди, из Тебе́ без Отца́ бы́вша, / пло́тию родила́ еси́, / и Младе́нца млеко́м пита́ла еси́. / Те́мже не преста́й моли́ти, // изба́витися от бед душа́м на́шим.

На стиховне стихиры Октоиха.

Слава, глас 5:

Отягче́нныма очи́ма мои́ма от беззако́ний мои́х, / не могу́ воззре́ти и ви́дети высоту́ небе́сную: / но приими́ мя, я́ко мытаря́ ка́ющася, Спа́се, // и поми́луй мя.

И ныне, глас тойже:

Храм и дверь еси́, / пала́та и престо́л Царе́в, / Де́во Всечестна́я, / Еюже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже Всепетая, / я́ко Ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.

Тропарь: Бого́родице Де́во: трижды.

На утрени,

по шести псалмех, Бог Госпо́дь: на глас осмогласника. И глаголем тропарь воскресен дважды, Слава, и ныне: Богородичен его, и обычныя кафисмы. Седальны Октоиха. По непорочных тропари: Ангельский собо́р: Ипакои гласа. Степенны и прокимен гласа; Вся́кое дыха́ние: Евангелие воскресно ряду. Воскресе́ние Христо́во:

Слава, глас 8:

Покая́ния отве́рзи ми две́ри, Жизнода́вче, / у́тренюет бо дух мой ко хра́му свято́му Твоему́, / храм нося́й теле́сный весь оскверне́н: / но я́ко Щедр, очи́сти // благоутро́бною Твоею́ ми́лостию.

И ныне, Богородичен:

На спасе́ния стези́ наста́ви мя, Богоро́дице, / сту́дными бо окаля́х ду́шу грехми́, / и в ле́ности все житие́ мое́ ижди́х: // но Твои́ми моли́твами изба́ви мя от вся́кия нечистоты́.

Таже, глас 6:

Поми́луй мя, Бо́же / по вели́цей ми́лости Твое́й / и по мно́жеству щедро́т Твои́х, / очи́сти беззако́ние мое́.

Мно́жества соде́янных мно́ю лю́тых, / помышля́я окая́нный, / трепещу страшнаго дне суднаго; / но надеяся на милость благоутро́бия Твоего́, / я́ко Дави́д вопию́ Ти: // поми́луй мя, Боже, по велицей Твоей милости.

Канон воскресен Осмогласника, со ирмосом на 4, и Крестовоскресный на 2, и Богородицы на 2; и в Триоди на 6.

Катавасия Триоди, глас 4: Песнь 1:

Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, // и воспою́, ра́дуяся, Тоя́ чудеса́.

Песнь 3:

Твоя́ песносло́вцы, Богоро́дице, / Живы́й и Незави́стный Исто́чниче, / лик себе совоку́пльшия / духо́вно утверди́ в Боже́ственней Твое́й сла́ве // венце́в сла́вы сподо́би.

Песнь 4:

Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: // сла́ва Христе́, си́ле Твое́й.

Песнь 5:

Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над всеми Бога / и родила́ еси́ Безлетнаго Сына, / всем воспевающим Тя / мир подава́ющая.

Песнь 6:

Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми восплещим, // от Нея рождшагося Бога славим.

Кондак, глас 4:

Фарисе́ева убежи́м высокоглаго́лания, / и мытаре́ве научи́мся высоте глагол́ смиренных,/́ покаянием́ взыва́юще: / Спа́се ми́ра, // очи́сти рабы́ Твоя́.

Ин кондак, глас 3:

Воздыха́ния принесе́м мыта́рская Го́сподеви, / и к Нему́ присту́пим гре́шнии, я́ко Влады́це: / хо́щет бо спасе́ния всех челове́ков, / оставле́ние подае́т все́м ка́ющимся, / нас бо ра́ди воплоти́ся, Бог сый, // Отцу́ Собезнача́льный.

Песнь 7:

Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: // препе́тый отце́в Госпо́дь и Бо́г, благослове́н еси́.

Песнь 8:

Отроки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, // и превозноси́те Его́ во вся ве́ки.

Таже, Честне́йшую:

Песнь 9:

Всяк земнородный / да взыграется, Духом просвещаемь, / да торжествует же Безплотных умов естество, / почитающее свяще́нное торжество́ Богома́тере, / и да вопие́т: / ра́дуйся, Всеблаже́нная Богоро́дице, // Чи́стая Присноде́во.

На хвалитех стихиры воскресны Осмогласника, 4.

И Триоди самголасны 4:

Стих: Хвали́те Его́ в тимпа́не и ли́це, / хвали́те Его́ во стру́нах и орга́не.

Не помо́лимся фарисе́йски, бра́тие: Писана на вечерне.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния, / вся́кое дыха́ние да хва́лит Го́спода.

Фарисе́й тщесла́вием:

Глас 3:

Стих: Воскресни́ Го́споди, Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Мытаря́ и фарисе́а разли́чие разуме́вши, душе́ моя́, / о́наго у́бо возненави́ждь горды́нный глас; / о́ваго же ревну́й благоумиле́нной моли́тве, и возопи́й: // Бо́же, очи́сти мя гре́шнаго и поми́луй мя.

Стих: Испове́мся Тебе́, Го́споди, всем се́рдцем мои́м, / пове́м вся чудеса́ Твоя́.

Фарисе́а велехва́льный глас ве́рнии возненави́девше, / мытаре́вой же благоумиле́нной моли́тве поревнова́вше, / не высо́кая му́дрствуем, / но себе́ смиря́юще, со умиле́нием воззове́м: // Бо́же, очи́сти грехи́ на́ша.

Слава, глас 8:

От дел похвале́ньми, / фарисе́а оправда́юща себе́ осуди́л еси́ Господи, / и мытаря́ смирившася, и воздыханьми очищения прося́ща оправда́л еси́: / не внима́еши бо велему́дренным помысло́м, / и сокруше́нная сердца́ не уничижа́еши. / Те́мже и мы Тебе́ припа́даем во смире́нии, / пострада́вшему нас ра́ди: // пода́ждь оставле́ние и ве́лию ми́лость.

И ныне: Преблагослове́нна еси́ Богоро́дице Де́во:

Славословие великое, и отпуст. И обычно лития в притворе, в нейже поем: Слава, и ныне: Стихиру утреннюю Евангельскую. И час первый.

Подобает ведати, яко стихиры вся 11 утренния Евангельския, от сея настоящия недели, и даже до всех святых, на литиях поются в притворе, на Сла́ва, и ны́не. Аще убо не служим литии в притворе, поем Евангельскую стихиру без Сла́ва, и ны́не: по отпусте утрени.

На Литургии,

блаженны Осмогласника, и от канона Триоди песнь 6я. Прокимен прилучившегося гласа. Апостол к Тимофею, зачало 296. Аллилуия гласа. Евангелие от Луки, зачало 89. Причастен: Хвали́те Го́спода с небе́с:

* * *

2

В это и все последующие воскресения Триоди постной Минея оставляется, служба только по Октоиху и Триоди. Исключением являются такие службы из Минеи, как Сретение Господне с предпразднством и попразднством, великие святые, храмовые святые. О порядке соединения см. Марковы главы, стр. 70.


Источник: Воскресные службы постной Триоди / Е. Кустовский - Москва, Паломникъ, 2000. - 68 с.

Комментарии для сайта Cackle