епископ Арсений (Жадановский)

Служба и акафисты

Служба с акафистом Пресвятой Владычице нашей Богородице в честь и память св. иконы Ея «Покрывающая»134

На великой вечерне, на Господи воззвах поем:

Стихиры на 8, глас 2-й.

Киими песнями восхвалим Тя, Пресвятая Дево! Ты от злых обстояний нас изъимаешь, от скорбей и печалей освобождаешь, советы лукавые и коварства врагов наших разоряеши, страх от злых духов и человеков прогоняеши и всесильною Твоею помощию от всякаго зла спасаешь. (Дважды).

Киими похвалами ублажим Тя, Пречистая, Ты бо прошения наша скоро во благо исполняешь, скорби, нужды и печали утоляешь, вражду, злобу и ненависть искореняешь, смертоносную язву прекращаешь и знамение милости Твоея неоскудно нам являешь. (Дважды).

Киими благодареньями воздадим Ти, Премилосердая Мати! Ты еси воистину Заступница усердная рода христианскаго, похвала Российской земли, всего мiра утешение, Православной Церкви слава, святых храмов украшение, иноческих обителей покров и снабдение и всех верных рабов Твоих надежда, прибежище и вечное спасение. (Дважды).

Киими достохвальными словесы превознесем Тя, Богоблагодатная! Ты бо еси взыскание погибших и милосердая о грешных споручница. Ты от всякаго лица всяку слезу отьемлющая, не отвратися и моих покаянных слез, яко самых отчаянных грешников моления не отвергаешь, и о них к Сыну Твоему предстательствуешь.

Слава, и ныне, глас 2-й.

Прейде сень законная, благодати пришедши якоже бо купина несгораше опаляема, тако Дева родила еси и Дева пребыла еси; вместо столпа огненнаго, праведное возсия солнце; вместо Моисея, Христос спасение душ наших.

На литии стихиры, глас 5-й.

Радуйся, пленных свобождение; радуйся, бедствующим в пути, на суше и на водах внезапное вспоможение; радуйся, утесняемым ослабу дарующая; радуйся, в бедах и напастях смирением и терпением снабдевающая; радуйся, невинных страдальцев дарами благодатными ущедряющая; радуйся, Радосте наша, покрой нас от всякаго зла честным Твоим омофором.

Радуйся, окаменение сердечное умягчающая; радуйся, хладность души благодатно согревающая; радуйся, веру и любовь в нас укрепляющая; радуйся, миром и покоем верные рабы награждающая; радуйся, отрадо и утешение наше.

Слава, и ныне, глас тойже.

Радуйся, яко память смертную благочестивым людем посылаешь; радуйся, яко мирной кончины их сподобляеши; радуйся, в день судный наше защищение; радуйся, вечныя муки избавление; радуйся, благая вратарнице, двери райския нам отверзающая.

На стиховне стихиры.

О Богородице, Дево, Ты еси Свеща в молитве за нас пред Богом присно горящая; Ты еси Лампада, елей милости Божией на ны изливающая; Ты еси Светильник, путь спасения верным освещающий, и Луч, мрак греховный в душах разгоняющий.

Стих: Слыши, Дщи, и виждь и приклони ухо Твое.

О Всеблагая Мати, Ты еси теплота солнечная, всех оживотворяющая; Ты еси дождь благовременный, сердца, пораженныя духовным нечувствием, любовию напояющий; Ты еси ветер мерный, суету житейскую отметающий, и роса плодоносная, сердца наша благодатно орошающая.

Стих: Приведутся Царю девы в след Ея, искренния Ея приведутся Тебе.

О Владычице мiра, Ты еси весна животворная, озимевших нас грехами пробуждающая; Ты еси лето благоуханное, здравием дух и тело укрепляющее; Ты еси осени житница, плодами духовными христиан снабдевающая, и зима бодрящая, хладом огнь страстей наших истывающая.

Слава, и ныне.

О Царице Небесная, Ты еси тихое утро, мир всему мiру приносящая; Ты еси день благословенный, к благоденствию житие наше управляющий; Ты еси заря невечерняя, облак находящих на ны зол и болезней надеждою озяряющая, и ночь безмятежная, отягченным скорбями и печалями отдохновение дающая.

Тропарь, глас 3-й.

К Богородице притецем сущии в бедах и святей иконе Ея тако возопием: О Владычице мiра, приими непрестанное и усердное благодарение наше, яко во дни лютых обстояний Ты, Всеблагая Мати, дивно верных рабов Твоих сохраняешь и от наветов злых духов и человек незримо покрываешь.

На утрени.

Канон, глас 4-й, его же краестрочие:

Радуйся, Владычице мiра, покрывающая мя.

Песнь 1.

Ирмос: Отверзу уста моя и наполнятся духа и слово отрыгну Царице Матери и явлюся светло торжествуя и воспою, радуяся, Тоя чудеса.

Пресвятая Богородице, спаси нас.

Радостно воспети и восхвалити Тя, Богородице, подаждь ми, недостойному рабу Твоему, да познают вси, сколь великое заступление Ты являешь всем усердно молящимся пред чудотворным Твоим образом, Покрывающей.

Пресвятая Богородице, спаси нас.

«Адама воззвание» поет Тебе Св. Церковь, и мы с нею глаголем Ти: «Ты еси избранная от всех родов Отроковице, тайну воплощения Сына Божия от веков в Бозе сокровенную, нам открывшая».

Слава.

Духов нечистых и враждебных отжени от Мене, Пренепорочная, да возмогу трезвенным умом и чистым сердцем славить Тя, Богоблагодатная.

И ныне.

Уйми и собери разсеянныя по мiру мои помыслы, Пречистая, и чувства греховныя утиши и весь сосуд мой душевный и телесный дом Духа Святаго сотвори.

Песнь 3.

Ирмос: Твоя песнословцы, Богородице, живый и независтный источниче, лик себе совокупльшия духовно утверди в Божественной Твоей славе венцев славы сподоби.

Суди обидящие и побори борющие мя и от напраснаго оскорбления избави раба Твоего, яко Ты Судию Праведнаго родила еси, Милосердая Мати, Иже хощет судити комуждо по делом его.

Якоже луна светозарная явися Твоя, Владычице, икона, приводя чудесами своими, к свету истиннаго боговедения меня, духовным нечувствием одержимаго и в тину сластей греховных погруженнаго.

Виждь, Пресвятая Дева, воздвизаемые на мя клеветы, досаждения, укорения и изми от них да избавльшеся, славлю Тя, твердую Заступницу мою в злых обстояниях погибающую.

Любовь сей жизни страстную и плотскаго покоя рачение отложи от меня, молю Тя, Дева чистая, да суетных попечений избег, Тобою получу нетленное богатство на небеси, едина души моея Покровительнице.

Песнь 4.

Ирмос: Седяй во славе на престоле Божества во облаце легце, прииде Иисус Пребожественный нетленною дланию и спасе зовущие: слава, Христе, силе Твоей.

Ангельские силы Боголепно Тебе на небеси служат и весь лик святых с ними честне поклоняется, сподоби и нас, на земле сущих, непрестанно пети Твоя чудеса, явленные от иконы Твоея нам во вся дни многотруднаго и многомятежнаго жития нашего.

Души наши сохрани под кровом Твоим, Преблагословенная Богородице, и от различных находящих на ны бед и скорбей избави, да не порадуются враги о погибели нашей, но да присно славим Тя, всеблагую Божию Матерь.

Исхити мя, Всесвятая, от мрака душевнаго, туги, уныния и в час недоумения благую мысль на сердце положи, яко Ты еси Просветительнице душ наших.

Чистая Голубице, нескверная Агнице, о Девице Марие, всего мя освяти, люто омраченнаго житейскими сластьми.

Песнь 5.

Ирмос: Ужасошася всяческая о Божественной славе Твоей, Ты бо неискусобрачная Дево имела еси во утробе над всеми Бога и родила еси безлетнаго Сына, всем воспевающим Тя, мир подавающая.

Избави ны, Пренепорочная, от пагубных начинаний, несмысленных пожеланий и пламень страстей наших угаси.

Царице моя Преблагая, обидимых и всех гонимых Заступнице, зриши обдержащие мя злые обстояния, помози ми немощну, яко не имам иныя помощи, разве Тебе, Богомати, да сохраниши мя во веки под кровом Твоим.

Едину надежду на Тя имуще, Всепетая, к Тебе прибегаю спасения иский, о Мати Слова и Дево, от искушений и греховных падений мя спаси.

Молю, Дево, мир, отраду, радость в душе моей водвори, Ты бо Богоневестная, Начальника тишины Христа родила еси, Едина Пречистая.

Песнь 6.

Ирмос: Божественное сие и всечестное совершающе празднество, богомудрые, Богоматери, приидите руками восплещим, от Нея рождшагося Бога славим.

Икону Твою всечестную, Владычице, в залог благоволения Твоего даровала еси нам, покрывающую и сохраняющую на всех путях жизни нашей; сие со слезами умиления исповедающе, непрестанное благодарение приносим Ти, Преблагословенная Дево.

Раба Твоего, малодушием болезнующаго, оживи и, пораженнаго мя страхом злых духов и человеков, укрепи, яко Ты еси свет омраченных и Тя поет выну дух мой.

Апостолов похвала и Православия слава, Ты еси, Богородице Дево, буди же превознесенною славою всех, рабов Христовых, под Твой покров всечестный прибегающих.

Помози нам, Богоблагодатная, с терпением, благодушием и благодарением переносить вся испытания жизни сея, проразумевающе в них бдящий над нами Всеблагий Промысел Божий и Твое дивное о нас попечение.

Акафист Божией Матери

Кондак 1.

Взбранней Воеводе, Царице Небесе и земли, даровавшей нам пречудную икону «Покрывающую», благодарственное приносим пение, Ты же, яко благосердая Мати, не отрини нашего сего моления, но благоволи прияти е, сподобив вопити Тебе тако:

Радуйся, Владычице мiра, от наветов злых духов и человеков нас покрывающая.

Икос 1.

Ангельский глас услыша святая Анна, извествующ: «Ты зачнешь и родишь Дщерь преблагословенную Марию, о Ней же благословятся вся племена земная и приидет спасение всему мiру». Сие ведуще, возопием Богородице:

Радуйся, Мати Сына Божия; радуйся, пренепорочная Дево.

Радуйся, Спаса душ наших рождшая; радуйся, грешных с Богом примирившая.

Радуйся Невместимаго вместилище; радуйся носило всего Божества.

Радуйся, Божие к смертным благоволение; радуйся, смертных к Богу дерзновение.

Радуйся, честнейшая херувим; радуйся, славнейшая без сравнения серафим.

Радуйся, ада и смерти попрание; радуйся, вечной жизни дарование.

Радуйся, Владычице мiра, от наветов злых духов и человеков нас покрывающая.

Кондак 2.

Видяще святые Твои родители Иоаким и Анна, яко Ты еси Пречистая, плод Благословенный, возблагодариша Бога и пред дверьми храма положиша обет посвятить Тя Господу, поя Ему: Аллилуиа.

Икос 2.

Разум совершенный Ты Сама стяжала еси, Богородице, воспитавшись во Святая Святых, тако не перестаешь умудрять и просвещать светом благоразумия и всех христиан, вопиющих Тебе таковая:

Радуйся, к Богопознанию приводящая; радуйся, к Свету истины прельщенныя обращающая.

Радуйся, страх Божий в сердца вселяющая; радуйся, благоговеть пред святыней научающая.

Радуйся, ревностию ко спасению воодушевляющая; радуйся, духовное нечувствие в нас подавляющая.

Радуйся, храмы Божии почитать внушающая; радуйся, в них отраду находить вдохновляющая.

Радуйся, жажду Святаго Причащения возбуждающая; радуйся, веру и любовь к Богу воспламеняющая.

Радуйся, чистоты и целомудрия поборнице; радуйся, доброй христианской жизни споспешнице.

Радуйся, Владычице мiра, от наветов злых духов и человеков нас покрывающая.

Кондак 3.

Сила Вышняго осени Тя, Благодатная, егда архангел Гавриил благовествоваше о безсеменном зачатии из Тебя Сына Божия, Спасителя мiру. Прияв сию благую весть со смирением, яко раба Господня, возопила еси Богу: Аллилуиа.

Икос 3.

Имуще во утробе Христа Жизнодавца, востекла еси, Благословенная к южике Своей, праведной Елисавете и целовастася обе матери, радуяся о Боге Спасе нашем. Сего ради, яко источнику святой радости, вопием Ти сице:

Радуйся, лютые беды и напасти отгоняющая; радуйся, тяжкое житие наше облегчающая.

Радуйся, от душевныя туги и уныния спасающая; радуйся, безпомощным на помощь ускоряющая.

Радуйся, испытания Божия за благо принимать указующая; радуйся, в самых страданиях утешение подающая.

Радуйся, яко Тобою добрыя желания наша исполняются; радуйся, яко Тобою злыя начинания пресекаются.

Радуйся, огнем Матерней Твоей любви души согревающая; радуйся, благодатию Святаго Духа нас озаряющая.

Радуйся, всех скорбящих и угнетенных Мати благосердая; радуйся, всего рода христианскаго Заступнице усердная.

Радуйся, Владычице мiра, от наветов злых духов и человеков нас покрывающая.

Кондак 4.

Буря недоумения смущает мне ум, како возмогу недостойными усты восхвалить Тебя, Пресвятая Дево, за Твое великое нам вспоможение. Тем же величая неисчетныя Твоя милости, смиренномудренно пою Вседержителю: Аллилуиа.

Икос 4.

Слышаша Вифлиемстии пастырие ангелов, поющих Христово рождество, текше в пещеру, обретоша тамо Богородительницу, на руках держащую Превечнаго Младенца. С ними в веселии духовном и мы Тебе, яко общей Матери, глаголем тако:

Радуйся, младенцев воспитание; радуйся, отроков смысла подательнице.

Радуйся, юношей руководительнице; радуйся, добрых дев величание.

Радуйся, возрастных и мужей премудростию обогащающая; радуйся, жен стыдением и кротостию наделяющая.

Радуйся, старцев благоговейных сладкое успокоение; радуйся, стариц боголюбивых тихое прибежище.

Радуйся, честных браков устроение; радуйся, вражды, ссоры между единокровных разрушение.

Радуйся, благочестивых семейств благословение; радуйся, девства похвало и возвышение.

Радуйся, Владычице мiра, от наветов злых духов и человеков нас покрывающая.

Кондак 5.

Боготечною звездою являешися, Царице Небесная, всем под кров Твой всемощный прибегающим и непрестанно во умилении сердечнем вопиющим Богу: Аллилуиа.

Икос 5.

Видя праведный Симеон Тя, пришедшую с Младенцем Иисусом во храм преставитися Господеви, рече: «Тебе Самой душу пройдет оружие», проразумевая Матерния Твоя страдания о Сыне Твоем Божественнем и о всех гонимых за имя Его святое, сего ради зовем Ти:

Радуйся, пастырей Церкви от мiра поносимых прославление; радуйся, рабов Божиих осмеиваемых ободрение.

Радуйся, стоящих за правду защищение; радуйся, томимых горькими работами облегчение.

Радуйся, яко невинно осужденных свобождаешь; радуйся, из изгнания скоро возвращаешь.

Радуйся, во узах сидящих благодатно посещающая; радуйся, терпеливых страдальцев предвкушением блаженства услаждающая.

Радуйся, сердца злых людей, враждующих против нас, смягчающая; радуйся, советы лукавые и коварства их разоряющая.

Радуйся, от разбойников на пути ны охраняющая; радуйся, татей и тайных убийц от домов наших отводящая.

Радуйся, Владычице мiра, от наветов злых духов и человеков нас покрывающая.

Кондак 6.

Проповедницы Твоея благодатныя помощи суть все множество Тобою спасенных: страждущих, болящих, скорбящих и грехми обремененных благодарственно о Тебе поющих: Аллилуиа.

Икос 6.

Возсия Божественный свет во Египте и падоша тамо идоли, егда бежала еси Пречистая с Богомладенцем Иисусом, спасаяся от убийства Иродова. Ты убо озаряешь светом Боговидения умы всех удаляющихся прелестей суетнаго мiра, исторгая из душ их кумиры, гнездящихся тамо губительных страстей. Тем же превозносим Тя словесы сими:

Радуйся, сумнящихся в вере вразумление; радуйся, гордым умам своим смирение.

Радуйся, озлобленных и гневом палимых укрощение; радуйся, ропщущих на Промысл Божий с тяготами жизни примирение.

Радуйся, яко дерзких ругателей Бога и Святыни Его незримо караешь; радуйся, яко заблудших на путь спасения наставляешь.

Радуйся, суеверных и гадателей посрамление; радуйся, развращенных и нечестивых обличение.

Радуйся, яко душевредныя учения низлагаешь; радуйся, яко истину познавать помогаешь.

Радуйся, мрак хулы и срамословия и всякой лжи рассеиваешь; радуйся, светом Святаго Евангелия люди просвещаешь.

Радуйся, Владычице мiра, от наветов злых духов и человеков нас покрывающая.

Кондак 7.

Хотяще николи же отлучатися от рожденнаго Тобою Спасителя мiра, Ты, Богоблаженная, пребыла еси с Ним неотлучно во граде Назарете, детоводя и питая Его, яко человека, и поя в сердце Своем, яко Богу: Аллилуиа.

Икос 7.

Новую показуя матернюю любовь к Сыну Твоему, со скорбию искала Его, двоюнадесятилетня Отрока, во граде Иерусалиме в праздник Пасхи, «мнеша Его в дружине суща». Ведуще таковое Твое сердоболие, со умилением вопием Ти:

Радуйся, обидимых и огорченных возвышающая; радуйся, ненавидимых и всеми отверженных честью венчающая.

Радуйся, убогих и нагих одеяние; радуйся, нищих и разоренных питание.

Радуйся, бездомных, странных, вдов и сирот призрение; радуйся, неимущих работы вспоможение.

Радуйся, путешествующим благополучное к дому возвращение; радуйся, заблудших в пути к жилищу приведение.

Радуйся, детям неудобоучащимся разум обновляющая; радуйся, умом и нравом простых Своею помощию не оставляющая.

Радуйся, ненадежных надеяние; радуйся, уповающих на волю Божию наслаждение.

Радуйся, Владычице мiра, от наветов злых духов и человеков нас покрывающая.

Кондак 8.

Странное и предивное Твое попечение бысть о христианах на всех путях их жизни многомятежной и многотрудной. Имея в Тебе столь милосердую и независтную Помощницу, вси облагодетельствованныя Тобою велегласно поют Богу: Аллилуиа.

Икос 8.

Вся была еси со Христом при служении Его роду человеческому, како и божественный евангелист Лука повествует о Тебе, глаголя: «Мати Твоя и братия вне стоят видеть Тя хотяще»135. Мним, яко Ты, Всеблагая Мати, неотступно пребываеши и со всеми труждающимися, восхваляющими Тя тако:

Радуйся, правителей, яко слуг Божиих, поставляющая; радуйся, сущих во власти к торжеству добра направляющая.

Радуйся, святителей Правилом веры и образом благочестия украшающая; радуйся, пастырей ревностию о спасении чад духовных снабдевающая.

Радуйся, наставников совершенный разум; радуйся, учащихся в науках преуспеяние.

Радуйся, вождей и воинов к защите веры и родины побуждающая; радуйся, инокам и инокиням в борьбе с прилогами мiра и плоти пособляющая.

Радуйся, судей святое зерцало правды; радуйся, врачей искусное больных врачевание.

Радуйся, земледельцев соработнице и благая помощнице; радуйся, всех честно трудящихся покой и надежное пристанище.

Радуйся, Владычице мiра, от наветов злых духов и человеков нас покрывающая.

Кондак 9.

Вся возраст верных благопользуется Твоим попечением, Всемилостивая Мати, яко всегда к Тебе прибегающим душеполезное даруеши, потребная в житии доставляешь и усердно ходатайствуешь за ны немощные и грешные у Престола Господа славы, Ему же поем: Аллилуиа.

Икос 9.

Ветии многовещанныя не могут изглаголати Твоея матерния печали при Кресте Сына Твоего бывшей, егда видела еси Его страждуща за вся человеки мукою неизглаголанной. Тем же, яко искушенней по всяческому, и спострадати в самых тяжких скорбех и лишениях нам могущей, взываем Ти:

Радуйся, слепых прозрение; радуйся, глухих слышание.

Радуйся, хромых хождение; радуйся, расслабленных телом исцеление.

Радуйся, недужных здравие; радуйся, в злоключение впадших земныя суеты познание.

Радуйся, стужаемых от бесов избавление; радуйся, поврежденных умом просветление.

Радуйся, неисцельно больных на Свои всемощныя руцы приемлющая; радуйся, от злых навыков, опивства, брани, игралищ изъемлющая.

Радуйся, отчаянных грешников моления не отвергающая; радуйся, от пагубнаго безволия их исхищающая.

Радуйся, Владычице мiра, от наветов злых духов и человеков нас покрывающая.

Кондак 10.

Спасти хотя мiр, Иже всех Господь, сый на Кресте, даровал всему мiру Пресвятую Премилосердную Матерь, егда изрек Пренепорочней и возлюбленному ученику: «Се сын Твой» и «се Мати твоя». Благодаряще за сие Бога, глаголем Ему: Аллилуиа.

Икос 10.

Стена крепка явилася еси по завету Господа, Преблагословенная, даруя всем благоденствие, мир, отраду, радость, яко Сама все сие первая получила еси от воскресшаго Христа Спасителя, услышав от Него приветственный глас: «Радуйтеся!» Сего ради ублажаем Тя тако:

Радуйся, всяку ненависть, злобу, вражду в нас укрощающая; радуйся, мир о Дусе Святе в сердце вселяющая.

Радуйся, зависть, клевету, ревность и злопамятство истребляющая; радуйся, братолюбием нас ущедряющая.

Радуйся, глада, хлада и труса, потопа, огня, меча ограждающая; радуйся, хлебом насущным нас питающая.

Радуйся, смертоносную язву прекращающая; радуйся, гнев Божий, праведно на ны движимый, утоляющая.

Радуйся, праведных дел наших поспешение; радуйся, на всех путях жизни нашей промышление.

Радуйся, родителей благонравием детей утешающая; радуйся, рабов Божиих тихим и безмолвным житием награждающая.

Радуйся, Владычице мiра, от наветов злых духов и человеков нас покрывающая.

Кондак 11.

Пение наше смиренное, от полноты любви и усердия Тебе приносимое, не презри, Богоневесто, и не отвратись от нас грешных и недостойных, но помоги нам очиститься от всякой скверны плоти и духа, да возможем достойно и праведно пети Богу: Аллилуиа.

Икос 11.

Светом руководствующим являлась еси апостолам, Богородительнице, по вознесению Сына Твоего на небо. Таковою остаешься даже до сегодня всем хотящим спастися и в разум истины приити. Не лиши, о Всеблагая, Твоего святаго водительства и нас в житейском море треволнений обуреваемых, обаче от сердца приносящих Тебе благохваления таковая:

Радуйся, нечистые помыслы пожигающая; радуйся, от греховных чувств отрезвляющая.

Радуйся, искушения и соблазны от нас прогоняющая; радуйся, к покаянию и исправлению подвизающая.

Радуйся, слезами сокрушения бездну беззаконий наших омывающая; радуйся, духовно бодрствовать нам помогающая.

Радуйся, ум и сердце к горнему возносящая; радуйся, [...]136.

Радуйся, все земное презирати понуждающая; радуйся, блаженство духа тем уготовляющая.

Радуйся, подвижников благочестия явное подкрепление; радуйся, всех верных дивное спасение.

Радуйся, Владычице мiра, от наветов злых духов и человеков нас покрывающая.

Кондак 12.

Благодать Божественную испроси нам у Сына Твоего и Бога, простри руку помощи, да не погибнем во гресех и лютых обстояниях находящих на нас от враг видимых и невидимых, умиротвори наши сердца, злобою и враждою исполненные, да, утешенные Тобою, радостно зовем Богу: Аллилуиа.

Икос 12.

Поюще честное Твое успение, прославляем и покров Твой святой, распростертый над всем мiром, наипаче же над родом христианским, прославляющим Ти тако:

Радуйся, покаянием к исходу от сея жизни нас приуготовляющая; радуйся, болезнями от грехов очищающая.

Радуйся, яко последнего напутствия достойных сподобляешь; радуйся, смертный страх удаляющая.

Радуйся, скорое разрешение души от тела в предсмертных муках посылающая; радуйся, мирную кончину дарующая.

Радуйся, горьких мытарств избавляющая; радуйся, христианскаго погребения не лишающая.

Радуйся, ко Господу выну о нас предстательствующая; радуйся, [...]137.

Радуйся, в жизни по смерти с нами пребывающая; радуйся, Радосте наша, двери райския нам отверзающая.

Радуйся, Владычице мiра, от наветов злых духов и человеков нас покрывающая.

Кондак 13.

О Владычице мiра, приими сие малое благодарение наше, от всего сердца Тебе приносимое, и не попусти нам николиже охладевати в сем благодарном чувстве, но вразуми нас всегда помнить Твоя неисчетныя милости и со слезами умиления вопити о Тебе Богу: Аллилуиа, аллилуиа, аллилуиа.

(Сей кондак глаголи трижды и паки первый икос и паки первый кондак).

Песнь 7.

Ирмос: Непослужиша твари богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородице, о благосердное Твое о нас промышление, Владычице! В годину бед и испытаний чудную Твою икону Ты посылаешь нам в помощь и защищение и ею укрощаешь свирепство врагов наших. Тем же велегласно поем: отцев Боже, благословен еси.

Кротким Твоим оком виждь смятение души моей, Пренепорочная, и приклони ухо Твое к молитве сердца моего, кротостию и незлобием благоукраси мя, да в тишине духа принимая вся находящия на ны злыя обстояния, радостно возглашаю: отцев Боже, благословен еси.

Радости суетныя и довольства, к преогорчению ближняго приводящия, чужда мя соделай, пречудная Царице, и даждь ми сочувствовать всегда искреннему моему в бедах и напастех, поя непрестанно: отцев Боже, благословен еси.

Исполнихся многих злых начинаний, тяготою слякохся безчисленных немощей душевных и телесных. О, Владычице, сними с меня тяжкое бремя греховное, еще на мне потерпи, обрадуй и спаси, да в веселии духовном пою: отцев Боже, благословен еси.

Песнь 8.

Ирмос: Отроки благочестивыя в пещи рождество Богородицы спасло есть, тогда убо образуемое, ныне же действуемое, вселенную всю воздвизаете пети Тебе: Господа пойте дела и превозносите Его во вся веки.

Возмущение души моея утоли, Всенепорочная, от клеветы наветуемых избави мя, вражду, злобу и всяку ненависть в нас укроти, да в братолюбии поживши, прославим Тя, Чистая, во веки.

Аще и зело грешен есмь, Богоблагодатная, аще всегда неисправлен пребываю, обаче спастися желаю и тихое житие получить чаю. Тем же вопию Ти: матерински помилуй мя, да величаю Тя во веки.

Южика Твоя Елисавета возопи Тебе, Всеблаженная, велиим гласом: «Откуду мне сие да прииде Мати Господа моего ко мне». И аз, поне и недостоин, но преиспещрен Твоими богатыми милостями, взываю Ти: Кто есмь, яко Ты николиже оставляешь мене?» Сего ради славлю Тя во веки.

Щит и стена крепкая явилась нам Твоя дивная икона «Покрывающая», ею охраняемые здравы бываем, благоденствие получаем, наветы вражии отражаем и поем Тебе хвалу и благодарение во веки.

Песнь 9.

Ирмос: Всяк земнородный да взыграется, Духом просвещаем, да торжествует же безплотных умов естество, почитающее священное торжество Богоматери, и да вопиет: радуйся, Богородице, чистая Приснодева.

Аще бы не Ты, Всеблагая, предстояла моляще, кто бы избавил от находящих на ны бед, кто же даровал нам свободу духа и веры? Не отступим, Владычице, от Тебя, Твои бо рабы присно спасаешь от всяких зол.

Яко необоримую стену и источник неистощимой благостыни имея в Тебе, Богородице Дево, все мы удобно побеждаем наветы злых духов и человек, тем же молим Тя: помози нам преодолети греховныя навыки, в нас живущие, да не затворишь двери милосердия Твоего за беззакония наша.

Мати Всеблагая, о Владычице мiра, не престай покрывати и заступати рабы Твоя, дóндеже приведеши ны в небесныя чертоги Божественнаго Сына Твоего.

Явлены будут на последнем судище Господнем сокровенныя мысли, намерения и дела коегоже, тогда Ты, Всемилостивая, оправдай, спаси и вечнаго неугасимаго огня мя исхити.

Светилен.

Добрые обеты приемлющая и благая намерения наша исполняющая, приими, Преблагословенная Богородице, и мое земное служение и помози мне непреткновенно пройти е, выну храня мою совесть в Истине, Правде, да и мною, недостойным, на земле святится имя Сына Твоего, Христа Бога нашего.

На хвалитех стихиры, глас 2-й.

Что Тя возименуем, о Богородице Дево, Ты еси храм невместимаго Божества, прекрасная и светоносная палато Святых Святейшаго Слова, приятелище Святаго Духа, благодати Божией реко, неистощимый источниче святыни, пресветлое украшение небеси и земли, дверь Царствия Небеснаго, Ты еси нетленная и неискусобрачная Мати Христа Бога нашего.

Кии восписуем Ти похвалы, о Богоневесто, Ты еси крине белоснежный, девства и чистоты маргарит, его же духовной красоты и светлости никакая тьма греховная обступить не может. Ты еси голубице тихая и кротчайшая, величием благолепия Своего превосходящая весь мiр, неувядаемый цвете райский и прекрасный и драгий, мvро благовонное, всему мiру благодать изливающее.

Кое принесем Ти благохваление, о Владычице мiра! Ты еси златой ковчег, от потопа греховнаго весь род человеческий спасший; баня, слезами покаяния совесть нашу очищающая; немерцающий свет, блуждающим во тьме духовнаго неведения разумные очи просвещающий; тихое пристанище обуреваемым волнами моря житейскаго; неисчерпаемый кладезь милостей и щедрот. Ты еси сострадательная Мати всех скорбящих и грехами обремененных.

Кто Тебе не ублажит, о Пресвятая Дево, Тебе все силы небесныя смиренно служат; Тебе преславный апостольский собор, своего Творца и Спасителя Матерь, восхваляют; Тебе мучеников множество, Богородицу, величают; Тебе боголепный исповедников лик Святой Троицы храм нарицают; Тебе девственнии полцы своего девства образ проповедуют; Тебе вси святии, яко Владычицу мiра славят; Тебе по всей вселенней Святая Церковь от всего рода человеча, Богоизбранную Отроковицу, почитает.

Слава и ныне, глас тойже.

О Преславная и Преблагословенная Богородице! Паче меда и сота сладчайшая, паче солнца прекраснейшая, паче луны светлейшая, паче кипариса и всех аромат благовоннейшая, даждь ми: да ради памяти пречудной иконы Твоей «Покрывающей» вся суеты и утехи мiра презрю и всем сердцем к небесным воскрилю.

Великое славословие.

Молитва

О Пресвятая Дево Богородице, Премилостивая Мати всех христиан, наипаче же скорбящих, гонимых и многоразличными недуги одержимых. Аз, яко нищ и убог душею и телом, предстою пред святым Твоим образом со слезами и умильно прошу Твоего благодатнаго подаяния. Ничто бо доброе и благое во мне есть, весь обложен немощами, нищетою и убожеством, нози мои не обувени, дабы поспешати мне на дела святыя и благоугодныя, руки мои загрязнены от множества содеянных мною беззаконий, очи мои потуплены от нечистой совести, зане возмогут взирать на благолепие красоты Твоея, явленной нам в чудотворном Твоем образе «Покрывающей», все лице мое потемнело и испещрено печатию безчисленных моих пороков и грехопадений. Нет во мне ни спасительной веры, ни утешительной надежды, ни благостной любви, аз есмь гнилостный сосуд, преисполненный всякой скверны, гордости, себялюбия, высокоумия, тщеславия, гнева, раздражительности, злобы, памятозлобия, недоброжелательности, зависти, ревности, осуждения, ропота, злословия, празднословия, лукавства, лести, обмана, лицемерия, уныния, нетерпения, малодушия, невоздержания душевных и телесных чувств, пристрастия, плотоугодия, всякаго сладострастия и иных тмочисленных страстей. И каково мое убожество духовное, таково же и телесное. Болезни и напасти обдержали меня и все житие мое как трость, ветром колеблемая, полна непостоянства, страха и всякой опасности. По глаголу святаго апостола: «беды наидоша отовсюду на мя: беды от духов злобы поднебесных, беды от ненавидящих, обидящих и враждующих против меня человек, беды от зверей, скотов и гад земных, беды от стихий мiра – молнии, огня, воды, тлетворнаго воздуха, хлада, глада; беды от многих немощей и болезней моего тела, беды на пути и в дому, беды во дни и нощи. Кто же меня поддержит, кто сохранит, кто меня от врагов избавит, кто к добродетели направит, кто болезни мои исцелит, кто утешит, упокоит, вразумит, наставит, спасет и помилует, если не Ты, Пресвятая Мати, Заступнице и Покровительнице моя Всеблагая. Ты рассеянный по мiру ум мой собери, помыслы от всякия скверны очисти, чувства, отравленныя всяким злом, освежи; волю мою дряблую на все доброе укрепи и от пагубнаго безволия меня избави, сердце от страстей свободи и святою любовию к Богу и ближним наполни, всю внутреннюю храмину мою переустрой и удобным жилищем Духа Святаго соделай. Не остави мене, Премилосердная Владычице, в телесном моем многоскорбном житии, болезни потреби, враги видимыя и невидимый отжени, злыя обстояния разруши, страх приходящий от духов злобы и человек, хотящих меня погубить, отжени, вся потребное и нужное мне даруй, бодрость духа пошли, да обновленный, да очищенный, да утешенный Тобою, Царице моя Пресвятая, прославлю Святую Троицу, Отца и Сына и Святаго Духа и Твое дивное о мне попечение ныне и присно и во веки веков. Аминь

Тропарь св. иконе Божией Матери «Умягчение злых сердец»

Умягчи наши злыя сердца, Богородице, и напасти ненавидящих нас угаси и всякую тесноту души нашей разреши. На Твой бо святой образ взирающе, Твоим страданием и милосердием о нас умиляемся и раны Твои лобызаем, стрел же наших, Тя терзающих, ужасаемся. Не даждь нам, Мати Благосердия, в жестокосердии нашем и от жестокосердия ближних погибнути. Ты бо еси воистину злых сердец умягчение.

Акафист Иконе Божией Матери «Знамение»138

Кондак 1.

Взбранной Воеводе, Царице Небесе и земли, даровавшей нам пречудную икону «Знамения», благодарственное приносим пение. Ты же яко Благосердая Мати не отрини нашего сего моления, но благоволи прияти е, сподобив вопити Тебе тако: Радуйся, Владычице, знамение милости Твоея нам являющая.

Икос 1.

Ангельский глас услыша св. Анна, извествующ: ты зачнеши и родиши Дщерь Преблагословенную Марию; о Ней благословятся вся племена земная и приидет спасение всему мiру. Сие ведуще, возопием Богородице:

Радуйся, освященное селение Бога Слова; радуйся, благодатию Божиею и нас освящающая.

Радуйся, спасению падшаго рода человеческаго послужившая; радуйся, Матерним Твоим попечением всех нас объемлющая.

Радуйся, в бедах и напастях скорая нам Помощнице; радуйся, злыя страсти наша невидимо укрощающая.

Радуйся, в христианских добродетелях преуспевати нам помогающая; радуйся, недуги наша безмездно врачующая.

Радуйся, Владычице, знамение милости Твоея нам являющая.

Кондак 2.

Видяще святыя Твоя родители Иоаким и Анна, яко Ты еси, Пречистая, плод благословенный, возблагодариша Бога и пред дверьми храма положиша и обет даша посвятити Тя Господу, поя Ему: Аллилуиа.

Икос 2.

Разум совершенный Ты Сама стяжала еси, Богородице, воспитавшися во Святая святых, тако не престаеши умудряти и просвещати светом богоразумия и вся христианы, вопиющия Ти таковая:

Радуйся, Дево, христиан похвало; радуйся, яко блажат Тя вси роди.

Радуйся, на стези покаяния нас премудро наставляющая; радуйся, Надеждо христиан ненадежных.

Радуйся, скорбящих радосте и заступление; радуйся, безпомощным скорую помощь Твою являющая.

Радуйся, обидящих всегрозная устрашительнице; радуйся, обидимых Всеблагая Заступнице.

Радуйся, Владычице, знамение милости Твоея нам являющая.

Кондак 3.

Сила Вышняго осени Тя, Благодатная, егда архангел Гавриил благовествоваше о безсеменном зачатии из Тебе Сына Божия, Спасителя мiру. Прияв сию благую весть со смирением, яко раба Господня, возопила еси Богу: Аллилуиа.

Икос 3.

Имущи во утробе Христа Жизнодавца, востекла еси Благословенная к южике Своей, праведней Елисавете и «целовастася обе матери», радуяся о Бозе Спасе нашем. Сего ради, яко источнику святыя радости, вопием Ти сице:

Радуйся, умирение мiру Святым рождеством Твоим принесшая; радуйся, знаменьми и чудесы Твоими христолюбивыя люди утешающая.

Радуйся, неправедно враждующия наказующая; радуйся, утесняемым ослабу и свободу дарующая.

Радуйся, от стрелы вражия язву на лице иконы Твоея приемшая; радуйся, слезы благодатныя от нея дивно источившая.

Радуйся, во бранех крепкая помощнице; радуйся, врагов посрамление.

Радуйся, Владычице, знамение милости Твоея нам являющая.

Кондак 4.

Буря недоумения смущает ми ум, како возмогу недостойными усты восхвалити Тя, Пресвятая Дево, за Твое великое нам вспоможение. Тем же величая неисчетныя Твоя милости, смиренномудренно пою Вседержителю Богу: Аллилуиа.

Икос 4.

Слышаша Вифлеемстии пастырие ангелов поющих Христово Рождество, текше в пещеру, обретоша тамо Богородительницу, на руках держащую Превечнаго Младенца. С ними в веселии духовнем и мы Тебе, яко общей Матери, глаголем тако:

Радуйся, яко из Тебе в плоть облечеся, одеваяй небо облаки; радуйся, яко млеком питала еси Питателя вселенныя.

Радуйся, Живоначальныя и Единосущныя Троицы благодатию осененная; радуйся, ангельския соборы чистотою превозшедшая.

Радуйся, человеческаго рода возвышение; радуйся, непобедимая Воеводо вождей и воинств христианских.

Радуйся, Заступнице наша от Бога нам дарованная; радуйся, Радосте наша и спасение душ наших.

Радуйся, Владычице, знамение милости Твоея нам являющая.

Кондак 5.

Боготечною звездою являешися, Царице Небесная, всем под кров Твой всемощный прибегающим и непрестанно во умилении сердечнем вопиющим: Аллилуиа.

Икос 5.

Видя праведный Симеон Тя, пришедшую с Младенцем Иисусом во храм преставитися Господеви, рече: «Тебе же Самой душу пройдет оружие», – проразумевая матерния Твоя страдания о Сыне Твоем Божественнем и о всех гонимых за Имя Его Святое. Сего ради зовем Ти:

Радуйся, скорбящих Радосте и обидимых Заступнице; радуйся, печальных Утешение и бедствующих Помощнице.

Радуйся, болящих немздоприимная Целительнице; радуйся, нищих и убогих некрадомое богатство.

Радуйся, терпеливых страдальцев дарами благодатными ущедряющая; радуйся, отчаянных и безнадежных от рова погибели избавляющая.

Радуйся, вдовиц и сирых благосердая Попечительнице; радуйся, целомудрия и воздержания юных Наставнице.

Радуйся, Владычице, знамение милости Твоея нам являющая.

Кондак 6.

Проповедницы Твоея благодатныя помощи суть все множество Тобою спасенных: страждущих, болящих, скорбящих и грехми обремененных, благодарственно о Тебе поющих Богу: Аллилуиа.

Икос 6.

Возсия Божественный Свет во Египте и падоша тамо идоли, егда бежала еси Пречистая с Богомладенцем Иисусом, спасаяся от убийства Иродова. Ты убо озаряеши светом боговидения умы всех удаляющихся прелестей суетнаго мiра, исторгая из душ их кумиры гнездящихся тамо губительных страстей. Тем же превозносим Тя словесы сими:

Радуйся, Молитвеннице благоприятная за нас к Богу; радуйся, Предстательнице всемощная, гнев Божий на милость прелагающая.

Радуйся, руце Твои богоносне на умоление ко Творцу выну простирающая; радуйся, яко Мати Сына, Судию Праведнаго о всем мiре умоляющая.

Радуйся, покровом Матерняго Твоего заступления всех нас покрывающая; радуйся, сущих в бедах и скорбях благодатию смирения и терпения снабдевающая.

Радуйся, старцев благоговейных сладкое успокоение; радуйся, стариц боголюбивых тихое прибежище.

Радуйся, Владычице, знамение милости Твоея нам являющая.

Кондак 7.

Хотящи николиже отлучатися от Рожденнаго Тобою Спасителя мiра, Ты, Богоблаженная, пребывала еси с Ним неотлучно во граде Назарете, детоводя и питая Его, яко человека и поя в сердце Своем, яко Богу: Аллилуиа.

Икос 7.

Новую показуя матернюю любовь к Сыну Твоему, со скорбию искала Его, двоюнадесятилетня Отрока во граде Иерусалиме в праздник Пасхи «мнеша Его в дружине суща». Ведуще таковое Твое сердоболие, со умилением вопием Ти:

Радуйся, страждущия и безпомощныя невидимо укрепляющая; радуйся, болящия и безнадежныя от одра болезни возставляющая.

Радуйся, кающихся грешников верная Споручнице; радуйся, даров духовных щедрая Подательнице.

Радуйся, верою молящимся Тебе великия милости являющая; радуйся, во благих прошения наша дивно исполняющая.

Радуйся, струи благодатных исцелений обильно нам источающая; радуйся, всем вся полезная дарующая.

Радуйся, Владычице, знамение милости Твоея нам являющая.

Кондак 8.

Странное и предивное Твое попечение бысть о христианех на всех путех их жизни многомятежней и многотрудней. Имея в Тебе столь милосердую и независтную Помощницу, вси облагодетельствованные Тобою велегласно поют Богу: Аллилуиа.

Икос 8.

Вся была еси со Христом при служении Его роду человеческому, како и божественный евангелист Лука повествует о Тебе, глаголя: «Мати Твоя, и братия вне стоят, видети Тя хотяще»139. Мним, яко Ты, Всеблагая Мати, неотступно пребываеши и со всеми труждающимися во славу Божию, восхваляющими Тя тако:

Радуйся, скоропредстательная Помощнице усердно к Тебе притекающим; радуйся, благосердая Услышительнице молений наших.

Радуйся, великий Новгород благословением Твоим осенившая; радуйся, многих мест и обителей сокровище неоскудное.

Радуйся, иноков и инокинь благоподвизающихся всемощная Покровительнице; радуйся, в мiре благочестно живущих усердная Заступнице.

Радуйся, ведущим брань противу мiра, плоти и диавола добрая Споспешнице; радуйся, за всех нас милостивая к Сыну Твоему и Богу Ходатаице.

Радуйся, Владычице, знамение милости Твоея нам являющая.

Кондак 9.

Всяк возраст верных благопользуется Твоим попечением, Всемилостивая Мати, яко всегда, к Тебе прибегающим душеполезная даруеши, потребная в житии доставляеши и усердно ходатайствуеши за ны, немощныя и грешныя, у Престола Господа Славы, Емуже поем: Аллилуиа.

Икос 9.

Ветии многовещанныя не могут изглаголати Твоея матерния печали, при Кресте Сына Твоего бывшей, егда видела еси Его страждуща за вся человеки мукою неизглаголанною. Тем же, яко искушенней по всяческим и спострадати в самых тяжких скорбях и лишениях нам могущей, взываем Ти:

Радуйся, Славо небесных и упование земных; радуйся Надеждо наша и Заступнице христиан.

Радуйся, любящия и чтущия Тя от всяких бед избавляеши; радуйся, подвижников благочестия к Горнему Сиону путеводствующая.

Радуйся, омраченныя сердца светом истиннаго Боговедения просвещающая; радуйся, освятившая землю Всесвятым Твоим Рождеством.

Радуйся, девство и рождество в Себе дивно сочетавшая; радуйся, велие вселенный Чудо.

Радуйся, Владычице, знамение милости Твоея нам являющая.

Кондак 10.

Спасти хотя мiр, иже всех Господь, Сый на Кресте, дарова всему мiру Пресвятую, Премилосердую Матерь, егда изрек Пренепорочней и возлюбленному ученику: «Се сын Твой» и «Се Мати твоя». Благодаряще за сие Всеблагаго Бога, глаголем Ему: Аллилуиа.

Икос 10.

Стена крепка явилася еси, по завету Господа, Преблагословенная, даруя всем благоденствие, мир, отраду, радость, яко и Сама все сие Первая получила еси от Воскресшаго Христа Спасителя, услышав от Него приветственный глас: «радуйтеся». Сего ради ублажаем Тя тако:

Радуйся, ангельских ликов удивление; радуйся, святых Божиих угодников радование.

Радуйся, мiра горняго первейшее украшение; радуйся, мiра дольняго благонадежное заступление.

Радуйся, демонов низложение; радуйся, ада попрание.

Радуйся, крепкое наше упование; радуйся, несумненная наша Надеждо.

Радуйся, Владычице, знамение милости Твоея нам являющая.

Кондак 11.

Пение наше смиренное, от полноты любве и усердия Тебе приносимое, не презри, Богоневесто, и не отвратися от нас грешных и недостойных, но помози нам очиститися от всякия скверны плоти и духа, да возможем достойно и праведно пети: Аллилуиа.

Икос 11.

Светом руководствующим являлася еси апостолом, Богородительнице, по Вознесении Сына Твоего на небо. Таковою остаешися даже до сего дне всем хотящим спастися и в разум истины приити. Не лиши, о Всеблагая, Твоего святаго водительства и нас в житейском море обуреваемых, обаче от сердца приносящих Тебе благохваления таковая:

Радуйся, иноческих обителей покров и снабдение; радуйся, благочестивых домов и семейств благословение.

Радуйся, девства и чистоты поборнице; радуйся, обидимых и гонимых предстательнице.

Радуйся, нагих одеяние; радуйся, больных исцеление.

Радуйся, уповающия на Тя непосрамляющая; радуйся, просящия Твоея святыя помощи от бед избавляющая.

Радуйся, Владычице, знамение милости Твоея нам являющая.

Кондак 12.

Благодать Божественную испроси нам у Сына Твоего и Бога, простри руку помощи, да не погибнем во гресех и лютых обстояниях, находящих на ны от враг видимых и невидимых, умиротвори наша сердца, злобою и враждою исполненных, да утешеннии Тобою, с радостью зовем Богу: Аллилуиа.

Икос 12.

Поюще честное Твое Успение, прославляем и Покров Твой святый, распростертый над всем мiром, наипаче же родом христианским, прославляющим Тя тако:

Радуйся, Царице и Владычице Небесе и земли; радуйся, порфиро Царя царей.

Радуйся, столпе и утверждение девства; радуйся, щите и ограждение веры Православныя.

Радуйся, боголепное украшение святыя Христовы Церкве; радуйся, покрывающая всех нас матерним Своим покровом.

Радуйся, телес наших врачевание; радуйся, душ наших спасение.

Радуйся, страждущих от бед избавление; радуйся, взыскание погибших.

Радуйся, Владычице, знамение милости Твоея нам являющая.

Кондак 13.

О Всепетая Мати Сладчайшаго Спасителя нашего Иисуса Христа! нынешнее наше приемши приношение, от всякия избави нас напасти и скорби, и вечныя изми муки всех пред святою иконою Твоею с верою и любовию поклоняющихся и о Тебе благодарно зовущих Богу: Аллилуиа.

(Сей кондак глаголи трижды и паки первый икос и паки первый кондак).

Молитва

К кому возопию, Владычице, к кому прибегну в горести моей, аще не к Тебе, Царице Небесная? Кто плач мой услышит и воздыхание приимет, аще не Ты, Пренепорочная, Надежда христиан и прибежище нам грешным? Кто паче Тебе в несчастиях защитит? Услыши стенание мое и приклони ухо Твое ко мне, Владычице и Мати Бога моего! Не презри ищущаго Твоея помощи и не отрини мене, грешнаго, Царице Небесная! Научи меня исполнять волю Сына Твоего и даруй желание всегда следовать Его святым заповедям. За мой ропот в болезнях, трудах и несчастиях не отступи от Мене, но пребуди Материю и Покровительницей мене малодушнаго. Царице моя Преблагая, Заступнице усердная! Твоим ходатайством прегрешения моя покрый, от видимых и невидимых врагов защити; сердца враждующих против меня смягчи и Христовою любовию согрей. Мне, немощному, даруй Твою всесильную помощь победить мои греховныя привычки, дабы очищенный покаянием и последующею добродетельною жизнию, в общении со Св. Церковию, провел остальные дни земнаго странствия. Предстани мне, Надеждо всех христиан, в час кончины моея и подкрепи мою веру в смертный тяжкий час. Вознеси за меня, многогрешащаго в жизни сей, Твои всесильныя молитвы по отшествии моем, да оправдает меня Господь и соделает причастником Его безконечных радостей. Аминь.

Акафист Преподобному Арсению Великому140

Кондак 1.

Изрядный подвижниче Христов, пустыни пресветлое украшение и монахов пречудное удобрение, преподобие отче наш Арсение! Со Ангелы предстоя ныне Триипостасному Богу, молися о спасении душ наших, да с любовию зовем ти: радуйся, Арсение, великий угодниче Божий.

Икос 1.

Ангела во плоти и человека небеснаго вемы тя, преподобие отче Арсение. Ты бо, от знатнаго рода происходя, отринул еси мiрское знание, богатство и честь и смиренным клириком восхотел быти, сего ради вопием ти:

Радуйся, благочестивых родителей отрасль пречестная; радуйся, приявый от них доброе воспитание.

Радуйся, наукам греческим и римским изрядно обученный; радуйся, премудростию небесной свыше одаренный.

Радуйся, во диакона церкви Римския поставленный; радуйся, иерейскаго сана недостойным себе считавый.

Радуйся, Арсение, великий угодниче Божий.

Кондак 2.

Видя твое святое тщание ко спасению, призва тя Господь исперва общему благу послужити, ради отечества и славы Божией, сынов царевых воспитати и обучити. Послушный велению Божию, ты, отче Арсение, Рим древний оставил еси, в немже в простоте и неизвестности определил себе жити и ко дворцу Феодосия Великаго предстал, воспевая Богу: Аллилуиа.

Икос 2.

Разума Божественнаго исполненный, добре наставлял еси, отче Арсение, детей царя земнаго, сподобляем от него чести и величия, но душа твоя, воспаряя к небесному, помышляла токмо о жизни вечной. Темже и вопием ти:

Радуйся, яко сенаторским званием почтен был еси; радуйся, яко к славе сердца не прилагал еси.

Радуйся, вся красная мiра презревый; радуйся, от соблазнов и искушений ангелом своим огражденный.

Радуйся, во дворце молитвы не оставлявый; радуйся, и тамо единое на потребу искавый.

Радуйся, Арсение, великий угодниче Божий.

Кондак 3.

Силою Божиею водимый, свыше чаял еси вещания, отче преподобне, на кий спасительный путь вступити и был тебе глас во сне от Господа: «Арсение, бегай людей и спасешися». Сему Божественному зову последуя, ты царский двор оставил еси и в обиталище иноков стопы своя направил, воспевая Богу: Аллилуиа.

Икос 3.

Имея неопальное желание Господу служити, в пустыню Скитскую, блаженне отче, вселился еси и скоро в подвизех иноческих преуспел, от великаго Иоанна Колова наставляем; темже глаголем ти:

Радуйся, от царской чести и людей бежавый; радуйся, честнаго монашества просивый.

Радуйся, старцу и иноческому послушанию себе предавый; радуйся, на подвиги себе посвятивый.

Радуйся, до зела смиривыйся; радуйся, странником и человеком убогим объявивыйся.

Радуйся, Арсение, великий угодниче Божий.

Кондак 4.

Бурю страстей миновал еси, богомудре Арсение, оградив себе постом, бдением, молитвою и в пристань благодатнаго покоя души достиг, воспевая Богу: Аллилуиа.

Икос 4.

Слышав паки глас небесный: «Арсение, бежи от человек и в молчании буди: ибо сие есть корень безгрешия», – в глубочайшую пустыню удалился еси и тамо святому безмолвию совершенно предался, яко и приходити к себе возбранял и лица своего никому же показывал еси. Сего ради вопием ти:

Радуйся, спасительнаго безмолвия учителю; радуйся, иноческих обетов верный исполнителю.

Радуйся, о сказанных словесех каявыйся; радуйся, о молчании николиже жалевый.

Радуйся, пением птиц не хотевый развлекатися; радуйся, яко беседою с Богом любил еси присно наслаждатися.

Радуйся, Арсение, великий угодниче Божий.

Кондак 5.

Богоприятный источник радостотворнаго плача имел еси, преподобие, нося при поясе плат, да им отираеши молитвенныя слезы обильно истекавшия из твоих пресветлых очес, соделывая душу твою плодоносну ко всякому делу благому, подвизая пети тя Богу: Аллилуиа.

Икос 5.

Виден был некиим братом на молитве, яко во огни стоящим, ибо воистину пламенел еси любовию к Богу Живому, пришедшему грешныя спасти. Дивящеся убо сей твоей огнепальней любви ко Господу, ублажаем тя благохвалениями сими:

Радуйся, дар умиления стяжавый; радуйся, выну себе укорявый.

Радуйся, от захода до восхода солнца трезвивыйся; радуйся, с воздетыми руцеми в нощи моливыйся.

Радуйся, яко Бог в тебе и ты в Бозе пребывавый; радуйся, непрестанным богомыслием всего себе освящавый.

Радуйся, Арсение, великий угодниче Божий.

Кондак 6.

Проповедник монашескаго делания был еси, преподобне, не словесы и речами, а великими подвиги твоими. Сего ради не оставил ни письменных книг, ни посланий, разве малыя изречения, в нихже отобразися твой лучезарный ум, яко в зерцале. Темже и вопием просвещему тя Богу: Аллилуиа.

Икос 6.

Возсиял еси великими добродетельми не токмо в пустыни Скитстей, но и далече за пределы ея и подражаху твоему богоугодному житию мнози отцы, якоже и Евфимий Великий в Палестине подвизавыйся. Прославляя болезни и труды твоя, вопием ти:

Радуйся, нищету духовную и телесную стяжавый; радуйся, от наследия и дани отказавыйся.

Радуйся, худою одеждою своею всех иноков превосшедый; радуйся, нужду и в срачице имевый.

Радуйся, вместо одра рогозину постилавый; радуйся, гнилую воду, яко ароматы обонявый.

Радуйся, Арсение, великий угодниче Божий.

Кондак 7.

Хотя Господь явити отцам пустынным, отче Арсение, твоего безмолвнаго жития совершенство, показа единому от них в видении, како корабль твой в велицем безмолвии не человеки и не ангелы, а Самим Господом управляется: и тако всем ведомо сотворися, яко бегая от человек с Богом соединился еси, зовый Ему: Аллилуиа.

Икос 7.

Ново и дивно бысть житие твое, преподобие отче Арсение, яко никто же от иноческаго сословия восходил на столь дивную степень безстрастия, на кую восшел еси ты, достигнув ангельския чистоты. Зряща тя во плоти, небеснаго человека, глаголим ти:

Радуйся, целомудрие души и тела невредимо сохранивый; радуйся, огнь похоти плотския погасивый.

Радуйся, взора жен избегавый; радуйся, образы их в ум николиже державый.

Радуйся, кроткое и незлобивое сердце имевый; радуйся, пустынное озлобление сладце претерпевый.

Радуйся, Арсение, великий угодниче Божий.

Кондак 8.

Странником и пришельцем на земли, по слову святаго апостола, рекшаго: «не имамы зде пребывающаго града, но грядущаго взыскуем», – ты, преподобие, почитал еси себе, преходя от места на место, да ближае станеши ко Господу, взывая Ему: Аллилуиа.

Икос 8.

Весь ум свой к Богу возвысив, ты, отче святый, дремания веждом своим не дал еси, присно бодрствуя, моляся и трезвяся. Сего ради вопием ти:

Радуйся, со сном, яко со злым демоном боровыйся; радуйся, один час сна для себе довольным считавый.

Радуйся, да не впадеши в разслабление, – учеников своих назирати просивый; радуйся, над плетением корзин добре трудивыйся.

Радуйся, скудную пищу вкушавый; радуйся, овощи единожды в год принимавый.

Радуйся, Арсение, великий угодниче Божий.

Кондак 9.

Вся заповеди верно исполнил еси, преподобне, и тако угодил Господеви, яко сословие монашеское нарекоша тя «Великим», воспевая Богу: Аллилуиа.

Икос 9.

Вития многовещанныя не могут сравнитися с тобою, отче Арсение, в познании души человеческия, яко не токмо иноцы искаху твоего наставления, но и святители к тебе прихождаху. Ты же, чужд быв человекоугодия, от всех двери келлии своея затворял еси, почитая у простецов учитися науке из наук – спасению души, неже самому учителем быти. Того ради вопием ти:

Радуйся, благодатными дары преукрашенный; радуйся, духом разсуждения обогащенный.

Радуйся, богомудренно учеников своих назидавый; радуйся, спящую совесть их искусно пробуждавый.

Радуйся, страхом Божиим яко щитом от злых приражений защищенный; радуйся, старче Божий, свыше просвещенный.

Радуйся, Арсение, великий угодниче Божий.

Кондак 10.

Спасения душевное стяжал еси, святче Божий, многими труды и поты, и образ преподобия и благочестия оставил всем иночествующим, да последуя стопам твоим, велегласно вопиют Богу: Аллилуиа.

Икос 10.

Стена крепка бысть произволение твое, отче наш Арсение, в делании духовнем, ибо николиже забывал еси речений Господа: «никтоже возлож руку свою на рало, и зря вспять, управлен есть в Царствии Божии»141. Сего ради бодренно нес иго Христово, дóндеже достиг Небеснаго Царствия, идеже и пребываеши со всеми святыми, подвизая нас пети тебе тако:

Радуйся, несокрушимую твердость в подвизех явивый; радуйся, всецело воле Божией себе предавый.

Радуйся, на всех путех жизни Промыслом водимый; радуйся, от варвар и злых обстояний многажды хранимый.

Радуйся, великим терпением от Господа наделенный; радуйся, мужеством, яко каменем укрепленный.

Радуйся, Арсение, великий угодниче Божий.

Кондак 11

Пение со безплотными чины горе ныне принося ко Пресвятей Троице, Арсение богомудре, ты уже зде на земли яко ангел пожил еси, любве Христовой быв исполнен, ибо вещал учеником своим: «всех любите и от всех ради любве ко Господу бегите». Тою же любовию распаляем ко ближнему своему, ты инока, одержимаго немощью крадения, на исправление в келлию принял еси, поя Богу: Аллилуиа.

Икос 11.

Светоподательный светильник явился еси, отче Арсение, всему иноческому роду, сияя добродетельми, наипаче же спасительным смирением, имже стяжал еси в сердце своем Духа Святаго. Темже и величаем тя тако:

Радуйся, образ смиренномудрия показавый; радуйся, ниже всея твари себе считавый.

Радуйся, простоте иноков вельми подражавый; радуйся, яко не от себе, а от лица старцев ответы вопрошавшим тя дававый.

Радуйся, со смирением строгий нрав соединивый; радуйся, яко всего себе ни во что же вменивый.

Радуйся, Арсение, великий угодниче Божий.

Кондак 12.

Благодать Христову приобрел еси, преподобне, помогати всем с любовию творящим память твою. Сего ради молимся ти: вразуми ны не мiру, а Богови благоугождати, Ему Единому служити и Его святому водительству себе вручати, яко же и ты сие в житии своем исполнил еси, глаголя: «аще не Господь сохранит мя, то ми низачимже жити на земли». Поминая твоя сия святыя словеса, взываем Промыслителю Богу: Аллилуиа.

Икос 12.

Поюще твое безмолвное житие, отче наш Арсение, дивимся и всем подвигом твоим, адаманта веры, надежды и любве к Богу тя имуща. Темже и глаголем ти:

Радуйся, всех заповедей Христовых рачителю; радуйся, ведений Божественных тайнозрителю.

Радуйся, яко час смертный присно поминал еси; радуйся, яко не погребати, а низвергнути тело свое завещал еси.

Радуйся, в маститей старости умерый; радуйся, Безкровную жертву за себе совершати повелевый.

Радуйся, Арсение, великий угодниче Божий.

Кондак 13.

О, великий угодниче Божий, преподобие отче наш Арсение! Приими малое сие моление в похвалу тебе приносимое и умоли возлюбленнаго тобою и возлюбившаго тя Господа, да сподобит ны прочее время живота нашего в покаянии, без порока прейти и мирно о Бозе почити, воспевая Ему: Аллилуиа.

(Сей кондак глаголи трижды и паки первый икос и паки первый кондак).

Молитва преподобному и богоносному отцу нашему Арсению Великому

Кую похвалу принесем ти, преподобие и богоносне отче наш Арсение! Ты еси воистину ангел хранитель всем христианам, наипаче же иночествующим, кои имя твое святое на себе носят! Во время земнаго жития твоего, ты, преподобне, бегал еси людей, показуя сим не неприязнь к ближним, а наивящую к ним любовь, дабы в безмолвии, стяжав в сердце своем Единаго Бога, получити сугубое дерзновение ходатайствовати у престола Божия о духовнех чадех твоих! И, о, дивно сие твое предстательство!

Ты от искушений и падений спасаеши, от наветов злых духов и человеков сохраняеши, от уз и темниц свобождаеши, из изгнания возвращавеши, всякия беды и напасти от нас прогоняеши.

Чим же возблагодарим ти за твое велие нам вспоможение, святче Божий?!

Мним, яко лучшим тебе приношением будет исправление нашея греховныя жизни и подражание твоей богоугодней, святей.

Ты был еси украшен духовным разсуждением, твердой волею в отражении всякаго зла, процвел еси трудами и подвигами. Да поможет Господь и нам молитвами твоими все сие по силе нашей имети.

Ты, пресвятый отче, стяжал еси дар смирения, дар молитвы, дар умиления и благодатных слез: да даст Отец Небесный и нам хотя малую толику причаститися твоим великим сим дарованиям.

Ты, пречудный авво, возлюбив простоту и нищету телесную даже до убожества, приобрел еси Господа даже до богатства духа благодати; да с тобою и мы терпеливо понесем скудость, лишения, все невзгоды земныя и, уповая на небесное жительство, возлюбим нашего Сладчайшаго Спасителя, выну прославляя Отца, и Сына, и Святаго Духа. Аминь

* * *

134

Печатается впервые по списку, переписанному в школьной тетради, принадлежавшей духовным чадам владыки Арсения (архив Кориных), с исправлением некоторых неточностей. Икона Божией Матери «Покрывающая» принадлежала схиигумении Фамари. Божия Матерь на ней правой рукой поддерживает и как бы покрывает мафорием сидящего на бархатной подушечке Богомладенца. В левой руке у Пресвятой Богородицы гроздь винограда. Праздник иконы приходится на 6/19 марта – день рождения владыки Арсения. После смерти духовных чад владыки Арсения и м. Фамари икона была передана в Ново-Спасский монастырь в Москве.

136

В списке слова пропущены. – Сост.

137

В списке слова пропущены. – Сост.

138

Печатается впервые по списку, переписанному в школьной тетради, принадлежавшей духовным чадам владыки Арсения (архив Кориных), с исправлением некоторых неточностей.

140

Печатается впервые по списку, переписанному в школьной тетради, принадлежавшей духовным чадам владыки Арсения (архив Кориных), с исправлением некоторых неточностей.


Источник: «Свете тихий» : Жизнеописание и труды епископа Серпуховского Арсения (Жадановского) / [Сост. Сергей Фомин] - Москва : Паломник, 1996-. / Т. 2. - 2002. - 622, [1] с. : ил. (Русское православие XX века).

Комментарии для сайта Cackle