святитель Димитрий Ростовский

Псалмы или духовные канты

Псалом I II III IV V VI VII VIII

 

Псалом 1

Иисусе мой Прелюбезный,

сердцу Сладосте.

Едина в скорбех утеха,

моя Радосте.

Рцы души моей: «Твое есмь

Аз спасение,

Очищение грехов

и в рай вселение».

Мне же Тебе, Богу, благо

прилеплятися,

От Тебе милосердия

надеятися.

Никто же мне в моих бедах

грешному поможет,

Аще не Ты, о Всеблагий

Иисусе Боже!

Хотение мне едино

с Тобою быти:

Даждь ми Тебе, Христа, в сердце

всегда имети.

Изволь во мне обитати,

благ мне являйся,

Мною грешным, недостойным,

не возгнушайся.

Изчезе в болезни живот

без Тебе, Бога:

Ты мне крепость и здравие,

Ты слава многа.

Радуюся аз о Тебе

и веселюся,

И Тобою во вся веки,

Боже, хвалюся.

Псалом 2

Надежду мою

В Бозе полагаю,

Промыслу Его

Весь себе отдаю.

Я ко Он хощет,

Так о мне устроит,

А Его воли

Никто не перестроит.

Судьбы Господни –

Есть то бездна многа,

В тайных советех

Кто постигнет Бога?

Аще что кому

Он восхощет дати,

Людская зависть

Не может препяти.

Кому у Него

Что предоставлено,

То непременно

Будет исполнено.

Убо надежда

Моя буди к Богу –

Удивит на мне

Милость Свою многу.

Не надеюся

На князи и люди,

В тех уповая,

Постыжен есть всюду.

Часть моя еси –

Ты, единый Боже.

Твоя десница

Во всем мне поможет.

Десница Твоя –

Та сотворит силу,

Исцелит душу,

Даст здравие телу.

Та и вся блага,

Аще их есть требе,

Вскоре дать может

И потом жить в небе.

Псалом 3

Ты мой Бог, Иисусе,

Ты моя Радосте,

Ты ми Веселие,

Ты моя Сладосте!

Аще бы вся моя

Погубил во мире,

Тя паче, Боже мой,

Всегда имам в вере.

Богатства земная

Ни во что вменяю,

Егда, зря на небо,

Тя, Бога всех, знаю.

Аще мя скорбиши –

Должен есмь хранити,

Аще мя биеши –

Буду Тя хвалити.

Люблю Тя, Боже мой,

Над всех Святейшаго,

Хвалю Тя, Царю мой,

Всех Достойнешаго.

Дверь сердца моего

Сокруши каменну,

Положи в нас любовь

К Тебе пламенну.

Аще бы людие

Тя, Христе, познали,

Никогда бы Тебе

Грехми прогневляли.

Аще Тя познаем

В мольбе Херувимской,

Тогда Тя прославим

В хвале Серафимской.

Хощем всеусердно

Тя, Христе, познати.

Ты нас лицем к лицу

Сподоби взирати.

Псалом 4

Похвалу принесу

Сладкому Иисусу:

Той бо моя слава

И всем есть похвала,

Иисусе Прекрасный!

В Троице славимый,

Всем Непостижимый,

Архангелов Творче,

От бесов Поборче,

Иисусе Прекрасный!

Монахом Радосте,

Иереом Сладосте,

Дай же и мне радость,

Спасения сладость,

Иисусе Прекрасный!

Не отрини мене,

Святе, взыщи мене,

В грехах лежащаго,

Не восстающаго,

Иисусе Прекрасный!

Вышних Создателю,

Земных Искупителю,

Не забуди мене,

Не погуби мене,

Иисусе Прекрасный!

О! Царю Преславный,

Агнче Непорочный,

Надеждо во смерти,

Живот всем по смерти,

Иисусе Прекрасный!

Одеждо краснаго,

Отца Небеснаго,

Одей мя тоею

Ласкою Твоею,

Иисусе Прекрасный!

Скорбящим Радосте

И Жезле старости;

Дай же мне утеху

В подвигах успеху,

Иисусе Прекрасный!

Не остави мене,

Творче, взыщи мене,

Пастырю Всещедрый

И Премилосердый,

Иисусе Прекрасный!

Не по делом моим,

По щедротам Твоим

Суди мене, Пане,

Вышних сил Гетмане,

Иисусе Прекрасный!

Прийми се малое

Моление мое

И скоро потщися,

На мя умилися,

Иисусе Прекрасный!

Останную мольбу

К Тебе приношаю

И смиренным сердцем

До Тебе взываю:

Иисусе Прекрасный!

Псалом 5

Христе мой Боже,

Иисусе Сладчайший,

Спасителю мой

Зело Величайший!

Подаждь ми присно

В воли Твоей жити,

И страсти Твоя

В сердцы ми носити.

Да образ Твой зря,

Свята Бога знаю,

И в руце Твои

Дух мой предаваю.

Яко хощеши,

Твори, Боже, мною,

Да не скрыет тма

Греховная мглою.

Господи Боже!

Дела Твоя дивна;

Прими раб Твоих

Словеса умильна,

Иже молитвы

Тебе приношают;

А Матерь Твою

Песнми почитают.

Псалом 6

Превзыдох меру,

О мой Вечный Боже,

Во дневных злобах;

Кто ми в том поможет?

Преступих закон,

О, мой Крепкий Боже,

И кто мне ныне

Грешному поможет?

Разве Ты, Отче,

Высокий в милости,

Подаси руку

Мне в моей бедности.

Яко вся моя

Лета иждих блудне,

В мирских суетах,

Грешный, пребых гнусне.

Восприйму на ся

Зрак сына блуднаго,

Пойду умолю

Отца Небесного:

Согреших, Отче,

И моя есть вина,

Несмь достоин быть

У Тебе за сына.

Согреших к Тебе,

Отче Милосердый.

Будь мне милостив,

Молю аз, злосердый.

А грехи, их же

Творих от юности,

Остави, прости

По Твоей благости.

И научи мя

Безпорочно жити,

Впредь сохрани мя

От греховной сети.

Днесь же да буду

Твоим наемником,

Верным Ти рабом,

Верным послушником.

Даждь ми по Твоей

Воли всегда жити,

По здешней жизни

Небо улучити.

Псалом 7

Воплю к Богу в беде моей –

Да мя Он услышит,

И в велицей скорби моей

Весело утешит.

Обратит мой плач в веселие

И в радость преложит,

Тяжкое ми злолучество

Во благо приводит.

Не вем, откуду ветр возвеет

В сладостной охладе,

Уже падаю отвсюду

Сущи на свободе.

Надежда мя утверждает,

Мысль ми направляет,

Указует тещи к Богу

Кий все устрояет.

Аще бы под землю скрылся –

И там мя обрящет,

Аще в камень заключился –

И там мя досяжет.

Но аз стоя издалеча

По примеру грешнаго,

Реку: «О! Боже, почто мя

Оставил, страстнаго!»

Приспе время исправленья

Живота моего,

Из младых бо лет в жизни сей

Делал много злаго.

Помилуй мя Ты, грешнаго,

О, мой Вечный Боже!

И в уши святыя Твоя

Прийми вопль мой уже.

И подаждь ми терпение

Всех страданий моих,

Управи мя, яко же веси,

Духом Святым Твоим.

Аще волишь наказати,

Буди воля Твоя,

Токмо да спасется душа

Милостивно моя.

Весь день, всю нощь восклицаю,

Господи мой, к Тебе:

«Услыши молитву мою

И прийми ю к Себе».

Подаждь же мне милость Твою,

Избави от муки,

Понеже аз вельми впадох

Чрез грех в Твои руки.

Псалом 8

Мати Милосерда!

Ты еси Ограда,

От лютаго врага злаго

Храниши мя всегда.

Он, лютый, рыкает,

Бедна мя хищает;

Скоро, скоро Твоя помощь

От того избавляет.

На всякий час зову,

В немощи воззову,

Воплем крепким, Мати, Тебе,

Чиста Дево, молю.

Не вем аз кончину,

Дне того годину,

К Тебе, к Тебе – всех Царице

Очи мои выну.

Прошу Тя Всещедру,

Матерь Милосерду,

Глас услыши мой, плачь внуши,

Моля Тя Всещедру.

Руце да воздену

Ко Твоему Сыну, Мати,

Мати Преблагая

Ходатайствуй к Нему.

Тебе, Дево, молю,

Воплем крепким зову,

Душу, сердце, в воздыханий

Преклоняя главу.

Приглашаем на цикл бесед по основам православного вероучения и духовной жизни. По средам в 19 часов, м. Чернышевская.